വാഗമൺ കൈതപ്പതാലിൽ റിസോർട്ട് ഉടമയും നാട്ടുകാരും തമ്മിൽ ഭൂമിയെച്ചൊല്ലിയുണ്ടായ തർക്ക സ്ഥലത്ത് റവന്യു സംഘം എത്തിയപ്പോൾ.
ഉപ്പുതറ: വാഗമൺ കൈതപ്പതാലിൽ സർവേ നമ്പർ 751ൽ ഉൾപ്പെട്ട സ്ഥലത്തെച്ചൊല്ലി നാട്ടുകാരും റിസോർട്ട് ഉടമയും തമ്മിലുള്ള തർക്കം രൂക്ഷമായി. ഇതേത്തുടർന്ന് റവന്യു അധികൃതർ സ്ഥലം സന്ദർശിച്ചു. വ്യൂ പോയിന്റ് ഉൾപ്പടെയുള്ള ഭൂമി തങ്ങളുടേതെന്നാണ് റിസോർട്ട് ഉടമ അവകാശപ്പെടുന്നത്. ഇത് റവന്യു ഭൂമിയാണെന്ന വിവരവകാശ രേഖയുമായാണ് നാട്ടുകാർ ഈ വാദത്തിനെതിരേ നിൽക്കുന്നത്. വി.എസ്. അച്യുതാനന്ദൻ സർക്കാരിന്റെ കാലത്ത് ദൗത്യസേന കൈയേറ്റക്കാരിൽനിന്നു തിരിച്ചുപിടിച്ച് ബോർഡ് സ്ഥാപിച്ച ഭൂമിയാണിതെന്നാണ് നാട്ടുകാരുടെ വാദം.
നാട്ടുകാർ പറയുന്നത്
വില്ലേജിൽനിന്നെടുത്ത പ്ലാൻ, സ്കെച്ച്, വിവരാവകാശ രേഖകൾ എന്നിവ കൈവശമുണ്ടെന്ന് നാട്ടുകാർ അവകാശപ്പെടുന്നു. മാലിന്യം നിക്ഷേപിക്കുന്നതു തടയാൻ പഞ്ചായത്ത് ഇവിടെ കാമറ സ്ഥാപിച്ചിരുന്നുവെന്നും സ്വകാര്യ ഭൂമിയെങ്കിൽ എങ്ങനെ പഞ്ചായത്ത് കാമറ സ്ഥാപിക്കുമെന്നുമാണ് ഇവരുടെ ചോദ്യം. ഏതാനും മാസങ്ങളായി ഈ കാമറ കാണാനില്ല.
പരിശോധനയും ധാരണയും
രേഖകൾ കൈവശമുണ്ടെന്നും കരമടയ്ക്കുന്നുണ്ടെന്നുമാണ് റിസോർട്ട് ഉടമയുടെ വാദം. എന്നാൽ റവന്യു ഭൂമി ഏതെന്നു വ്യക്തമാക്കാൻ കഴിയാതെ അധികാരികൾ നോക്കുകുത്തിയായെന്നു നാട്ടുകാർ ആരോപിക്കുന്നു.
വാഗമണ്ണിൽ നിരവധി ഭൂമി കൈയേറ്റങ്ങൾ നടക്കുന്ന സാഹചര്യത്തിൽ വിഷയത്തിൽ അടിയന്തര നടപടി വേണമെന്നാണു നാട്ടുകാരുടെ ആവശ്യം.
Tags : Vagamon Nattuvishesham DistrictNews Land dispute