പ്രതീകാത്മക ചിത്രം
കാസര്ഗോഡ്: വൃക്കയ്ക്കുള്ളില് പടര്ന്നുപിടിക്കുന്ന അപൂര്വവും ഗുരുതരവുമായ കിഡ്നി സ്റ്റോണ് ബാധിച്ച് അപകടത്തിലായ യുവാവിന് നൂതന ശസ്ത്രക്രിയയിലൂടെ പുതുജീവന്. കാസര്ഗോഡ് ആസ്റ്റര് മിംസിലെ യൂറോളജി വിഭാഗത്തിലെ വിദഗ്ധ മെഡിക്കല് സംഘമാണ് അതീവ സങ്കീര്ണമായ ഓപ്പണ് നെഫ്രോലിത്തോട്ടമി ശസ്ത്രക്രിയയിലൂടെ 44 കാരന്റെ വൃക്ക പൂര്ണമായും തകരാറിലാകാതെ സംരക്ഷിച്ചത്.
വൈദ്യശാസ്ത്രത്തില് സ്റ്റാഗ്ഹോണ് കാല്ക്കുലസ് എന്നറിയപ്പെടുന്ന അതീവ ഗുരുതരാവസ്ഥയിലായിരുന്നു രോഗി.
സാധാരണയായി കാണപ്പെടുന്ന കിഡ്നി സ്റ്റോണുകളില് നിന്ന് വ്യത്യസ്തമായി ധാതുക്കള് കൊമ്പുകള് പോലെ ശാഖകളായി വളര്ന്ന് വൃക്കയുടെ ഉള്ഭാഗം പൂര്ണമായും നിറയുന്ന അവസ്ഥയാണിത്. പ്രാരംഭഘട്ടത്തില് രൂക്ഷമായ മൂത്രതടസത്തിനും മാരകമായ അണുബാധയ്ക്കും വഴിവയ്ക്കും. ശേഷം കല്ലുകള് അതിവേഗം വളരുന്നതിനാല് കൃത്യമായ ചികിത്സ ലഭിച്ചില്ലെങ്കില് വൃക്കയുടെ പ്രവര്ത്തനം പൂര്ണമായും നിലയ്ക്കും. അത്തരത്തില് വൃക്ക പൂര്ണമായും തകരാറിലായി മുറിച്ചുമാറ്റേണ്ടി വരുമെന്ന ഘട്ടത്തിലാണ് രോഗി ആശുപത്രിയില് എത്തിയത്. എന്നാല് ഈ വെല്ലുവിളി ഏറ്റെടുത്ത ആശുപത്രിയിലെ യൂറോളജി വിഭാഗം സമയോചിതമായ ഇടപെടലിലൂടെയും നൂതന ശസ്ത്രക്രിയയിലൂടെയും ആരോഗ്യം വീണ്ടെടുത്തു.
അത്യന്തം വെല്ലുവിളികളും സങ്കീര്ണതകളും നിറഞ്ഞ രോഗാവസ്ഥ ആയതിനാലാണ് യൂറോളജി വിഭാഗം വിദഗ്ധരായ ഡോ. രാകേഷ് ഷെട്ടിയുടെയും, ഡോ. ശിവപ്രസാദിന്റെയും നേതൃത്വത്തിലുള്ള മെഡിക്കല് സംഘം അഡ്വാന്സ്ഡ് ഓപ്പണ് നെഫ്രോലിത്തോട്ടമി ശസ്ത്രക്രിയ അവലംബിച്ചത്. വൃക്കയുടെ ഒരു ഭാഗം മാത്രം തുറന്ന് അതിലെ സൂക്ഷ്മമായ രക്തക്കുഴലുകള്ക്കും പേശികള്ക്കും യാതൊരു കേടുപാടും വരുത്താതെ അതിവിദഗ്ധമായാണ് കല്ലുകള് പൂര്ണമായും നീക്കം ചെയ്തത്.
Tags : Nattuvishesham DistrictNews DeepikaNews kidney disease