കൊല്ലപ്പെട്ട ഷുക്കൂറും സിപിഎം നേതാക്കളും
കണ്ണൂർ: കേരള രാഷ്ട്രീയത്തിൽ വൻ കോളിളക്കങ്ങൾ സൃഷ്ടിച്ച അരിയിൽ ഷുക്കൂർ വധക്കേസിൽ 14 വർഷങ്ങൾക്കുശേഷം നിർണായക വിധി. സിപിഎം നേതാക്കളായ പി. ജയരാജൻ, ടി.വി.രാജേഷ്, എം.വി. ഗോവിന്ദന്റെ മകൻ ശ്യാംജിത്ത് തുടങ്ങിയവരെ കുറ്റവിമുക്തരാക്കിയാണ് എറണാകുളം പ്രത്യേക സിബിഐ കോടതി വിധിപറഞ്ഞത്. ഒന്നാം പ്രതി സുമേഷ് ഉൾപ്പെടെ 13 പേർ കുറ്റക്കാരാണെന്നും കോടതി കണ്ടെത്തി. വിചാരണ നേരിട്ട 31 പ്രതികളിൽ 18 പേരെയാണ് കോടതി വെറുതെവിട്ടത്.
സിപിഎം-മുസ്ലിം ലീഗ് സംഘർഷം
2012 ഫെബ്രുവരി 20നാണ് കണ്ണൂർ തളിപ്പറമ്പ് പട്ടുവം അരിയിൽ സ്വദേശിയും എംഎസ്എഫ് പ്രാദേശിക നേതാവുമായ അരിയിൽ അബ്ദുൽ ഷുക്കൂർ കൊല്ലപ്പെട്ടത്. അന്ന് ഉച്ചയ്ക്ക് പ്രദേശത്ത് സിപിഎം-മുസ്ലിം ലീഗ് സംഘർഷമുണ്ടായിരുന്നു. ഇതിനിടെ സിപിഎം കണ്ണൂർ ജില്ലാ സെക്രട്ടറിയായിരുന്ന പി.ജയരാജനും കല്ല്യാശേരി എംഎൽഎയായിരുന്ന ടി.വി.രാജേഷും സഞ്ചരിച്ച വാഹനത്തിനുനേരെ അരിയിൽവെച്ച് ആക്രമണമുണ്ടായത്. ഈ സംഭവം ഉണ്ടായി മണിക്കൂറുകൾക്കുള്ളിൽ തന്നെ പ്രദേശത്ത് വ്യാപകമായ അക്രമങ്ങൾ അരങ്ങേറി.
പട്ടുവത്തെ ആക്രമണത്തിൽ പങ്കുണ്ടെന്ന് ആരോപിച്ച് അരിയിൽ സ്വദേശിയായ അബ്ദുൾ ഷുക്കൂറിനെയും സുഹൃത്ത് സക്കരിയായെയും സിപിഎം പ്രവർത്തകർ പിടികൂടി. കീഴറയിലെ ഒരു വയലിൽ വെച്ച് മണിക്കൂറുകളോളം ചോദ്യം ചെയ്ത ശേഷം ഷുക്കൂറിനെ ക്രൂരമായി കുത്തിക്കൊലപ്പെടുത്തുകയായിരുന്നു എന്നാണ് അന്വേഷണ സംഘത്തിന്റെ കണ്ടെത്തൽ. ആക്രമണത്തിൽ പരിക്കേറ്റ ജയരാജനും രാജേഷും തളിപ്പറമ്പ് സഹകരണ ആശുപത്രിയിലെ 315-ാം നമ്പർ മുറിയിൽ ചികിത്സയിലിരിക്കെ പ്രതികാരം ചെയ്യാൻ ഗൂഢാലോചന നടത്തിയെന്നായിരുന്നു പ്രോസിക്യൂഷൻ ആരോപണം.
ജയരാജന്റെ അറസ്റ്റും രാഷ്ട്രീയ വിവാദവും
ആദ്യഘട്ടത്തിൽ പ്രാദേശിക സിപിഎം പ്രവർത്തകരെ മാത്രം കേന്ദ്രീകരിച്ചായിരുന്നു പൊലിസിന്റെ അന്വേഷണം. എന്നാൽ കേസിൽ പിന്നീട് നിർണായകമായത് പി.ജയരാജനും ടി.വി. രാജേഷിനുമെതിരായ ഗൂഢാലോചന ആരോപണമായിരുന്നു. അരിയിൽവെച്ച് ഇരുവരും സഞ്ചരിച്ച വാഹനത്തിനുനേരെയുണ്ടായ ആക്രമണത്തിന് പ്രതികാരമായാണ് ഷുക്കൂറിനെ കൊലപ്പെടുത്തിയതെന്നായിരുന്നു അന്വേഷണ സംഘത്തിന്റെ കണ്ടെത്തലും പ്രോസിക്യൂഷന്റെ ആരോപണവും. ഇരുവരും ചികിത്സയിൽ കഴിഞ്ഞിരുന്ന 315-ാം നമ്പർ മുറിയിൽവെച്ചാണ് കൊലപാതകത്തിനുള്ള ഗൂഢാലോചന നടന്നതെന്ന ആരോപണവും ഉയർന്നു.
അന്നത്തെ കണ്ണൂർ എസ്പിയായിരുന്ന രാഹുൽ ആർ. നായരുടെ നേതൃത്വത്തിലുള്ള പ്രത്യേക അന്വേഷണസംഘം ആശുപത്രിയിലെ ഗൂഢാലോചനാ ആരോപണം ഉൾപ്പെടെ വിശദമായി അന്വേഷിച്ചു. കൊലപാതക ഗൂഢാലോചന അറിഞ്ഞിട്ടും അത് തടയാൻ ശ്രമിച്ചില്ലെന്ന കുറ്റം ചുമത്തിയാണ് 2012 ഓഗസ്റ്റ് ഒന്നിന് അന്നത്തെ സിപിഎം കണ്ണൂർ ജില്ലാ സെക്രട്ടറിയായിരുന്ന പി. ജയരാജനെ പൊലിസ് അറസ്റ്റ് ചെയ്തത്. അറസ്റ്റ് കണ്ണൂരിൽ വലിയ രാഷ്ട്രീയ പ്രതിഷേധങ്ങൾക്കും സംഘർഷങ്ങൾക്കും വഴിവെച്ചു. ഇതിന് പിന്നാലെ ഓഗസ്റ്റ് ഏഴിന് ടി.വി. രാജേഷും കീഴടങ്ങി.
ഇരുവരുടെയും അറസ്റ്റ് കേസിന് വലിയ രാഷ്ട്രീയമാനം നൽകി. സിപിഎം നേതാക്കൾക്കെതിരായ നടപടി രാഷ്ട്രീയപ്രേരിതമാണെന്ന് പാർട്ടി ആരോപിച്ചപ്പോൾ കൊലപാതകത്തിന് പിന്നിലെ ഗൂഢാലോചന പുറത്തുകൊണ്ടുവരണമെന്ന നിലപാടിലായിരുന്നു ഷുക്കൂറിന്റെ കുടുംബം. പിന്നീട് അന്വേഷണത്തിൽ അതൃപ്തി പ്രകടിപ്പിച്ച് കുടുംബം കോടതിയെ സമീപിച്ചതോടെയാണ് കേസ് സിബിഐയുടെ കൈകളിലെത്തിയത്.
കേസ് സിബിഐയിലേക്ക്
കേസിൽ ആദ്യം ലോക്കൽ പൊലിസ് അന്വേഷണം നടത്തി 2012 മാർച്ച് 22ന് 18 പേരെ പ്രതികളാക്കി കുറ്റപത്രം സമർപ്പിച്ചു. ജൂൺ 22ന് പ്രതികളുടെ എണ്ണം 34 ആയി ഉയർത്തി. കൊലപാതക ഗൂഢാലോചന അറിഞ്ഞിട്ടും തടയാൻ ശ്രമിച്ചില്ലെന്ന കുറ്റം ചുമത്തി 2012 ഓഗസ്റ്റ് ഒന്നിനാണ് പി. ജയരാജനെ പൊലിസ് അറസ്റ്റ് ചെയ്തത്. അന്വേഷണത്തിനിടെ 2012 ഒക്ടോബർ ഏഴിന് കേസിലെ ഇരുപതാം പ്രതി അച്ചാലി സുരേഷ് ജീവനൊടുക്കി. ലോക്കൽ പൊലിസിന്റെ അന്വേഷണത്തിൽ തൃപ്തരല്ലാതിരുന്ന ഷുക്കൂറിന്റെ മാതാവ് ആത്തിക്ക നൽകിയ ഹർജിയെ തുടർന്ന് 2016 ഫെബ്രുവരി എട്ടിന് ഹൈക്കോടതി കേസ് അന്വേഷണം സിബിഐക്ക് വിട്ടു.
17 മാസം നീണ്ട വിചാരണ
തുടരന്വേഷണം നടത്തിയ സിബിഐ 2019 ഫെബ്രുവരി 11ന് തലശേരി കോടതിയിൽ കുറ്റപത്രം സമർപ്പിച്ചു. പി. ജയരാജനെയും 32-ാം പ്രതിയായും ടി.വി. രാജേഷിനെ 33-ാം പ്രതിയായും ഉൾപ്പെടുത്തി കൊലപാതക ഗൂഢാലോചനക്കുറ്റം ചുമത്തി. കുറ്റകൃത്യം നടക്കാൻ സാധ്യതയുണ്ടെന്ന് അറിഞ്ഞിട്ടും അത് തടയാനുള്ള നടപടികൾ സ്വീകരിക്കാതെ ഒത്താശ ചെയ്തുകൊടുത്തു എന്ന കുറ്റമായിരുന്നു ജയരാജനും രാജേഷിനുമെതിരെ ചുമത്തിയത്.
ജയരാജന്റെ വാഹനത്തിന് നേർക്ക് കല്ലെറിഞ്ഞതിന് എംഎസ്എഫ് പ്രവർത്തകരായ ഷുക്കൂറിനേയും സക്കരിയയേയും പരസ്യമായി വയലിൽ വച്ച് പാർട്ടിക്കാർ പരസ്യമായി വിചാരണ ചെയ്ത് ക്രൂരമായി ആക്രമിക്കുകയും കുത്തേറ്റ ഷുക്കൂർ കൊല്ലപ്പെടുകയുമായിരുന്നുവെന്നാണ് ലീഗ് പ്രധാനമായും ഉന്നയിച്ചത്. കേസിൽനിന്ന് ഒഴിവാക്കണമെന്നാവശ്യപ്പെട്ട് ജയരാജനും രാജേഷും നൽകിയ വിടുതൽ ഹർജികൾ 2024 ഒക്ടോബറിൽ കോടതി തള്ളിയിരുന്നു.
2025 മേയ് അഞ്ചിന് എറണാകുളം പ്രത്യേക സിബിഐ കോടതിയിൽ ആരംഭിച്ച വിചാരണ 17 മാസം നീണ്ടുനിന്നു. ഒടുവിൽ ഉന്നത നേതാക്കൾക്കെതിരായ ഗൂഢാലോചന തെളിയിക്കാൻ പ്രോസിക്യൂഷന് കഴിഞ്ഞില്ലെന്ന് നിരീക്ഷിച്ചാണ് കോടതി പി. ജയരാജനെയും ടി.വി. രാജേഷിനെയും കുറ്റവിമുക്തരാക്കിയത്. വിധിക്കെതിരെ മേൽക്കോടതിയെ സമീപിക്കാനൊരുങ്ങുകയാണ് ഷുക്കൂറിന്റെ കുടുംബവും സിബിഐയും.
Tags : AriyilShukoor ShukoorMurderCase KeralaPolitics MurderCase CourtVerdict Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash