കൊല്ലം: ജസ്റ്റിസ് ജെ ബി കോശി കമ്മീഷൻ റിപ്പോർട്ട് ചർച്ച ചെയ്തു നടപ്പിലാക്കണമെന്ന് കൊല്ലം ബിഷപ് ഡോ. പോൾ ആന്‍റണി മുല്ലശേരി ആവശ്യപ്പെട്ടു.
ജസ്റ്റിസ് ജെ.ബി കോശി കമ്മീഷൻ റിപ്പോർട്ട് നടപ്പിലാക്കണമെന്ന് ആവശ്യപ്പെട്ടു കെഎൽസിഎ സംസ്ഥാന സമിതി കേരളത്തിലെ 12 രൂപതകളിലായി സംഘടിപ്പിക്കുന്ന ആയിരം പ്രചരണ യോഗങ്ങളുടെ കൊല്ലം രൂപതതല ഉദ്ഘാടനവും കൊല്ലം രൂപതയിലെ ആദ്യയോഗവും ക്ലാപ്പന സെന്‍റ് ജോർജ് ദേവാലയ അങ്കണത്തിൽ ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്.
ലത്തീൻ സമുദായത്തിന്‍റെ ഉന്നമനത്തിനുള്ള ഒട്ടനവധി നിർദേശങ്ങളാണ് റിപ്പോർട്ടിൽ ഉള്ളത്. ന്യൂനപക്ഷ സമുദായം എന്ന നിലയിലും പിന്നാക്ക സമുദായം എന്ന നിലയിലും ഭരണഘടന പ്രകാരമുള്ള അവകാശങ്ങളും അർഹതപ്പെട്ട ആനുകൂല്യങ്ങളും ലത്തീൻ സമുദായത്തിന് ലഭിക്കണം. ഭാരതത്തിൽ ലത്തീൻ കത്തോലിക്കാ സമുദായത്തിന് ആരംഭം കുറിച്ചത് കൊല്ലം രൂപതയാണ്.
കൊല്ലം രൂപതയിലെ മുഴുവൻ വിശ്വാസികളും അവകാശങ്ങളെപ്പറ്റി ബോധവാന്മാരാവുകയും അവകാശ പോരാട്ടങ്ങളിൽ പങ്കാളികളാവുകയും ചെയ്യണം. സമ്മേളനത്തിൽ കെഎൽസിഎ ക്ലാപ്പന യൂണിറ്റ് പ്രസിഡന്‍റ് ഡെറിക്‌ കാർഡോസ് അധ്യക്ഷത വഹിച്ചു.
കെഎൽസിഎ സംസ്ഥാന പ്രസിഡന്‍റ് അഡ്വ. ഷെറി. ജെ. തോമസ് മുഖ്യപ്രഭാഷണം നടത്തി. ബിജു ജോസി കരുമാഞ്ചേരി, ലെസ്റ്റർ കാർഡോസ്, ഫാ. ജോർജ് സെബാസ്റ്റ്യൻ, ഫാ. സേവ്യർ ലാസർ, ജാക്സൺ നീണ്ടകര, വിൻസി ബൈജു, ജോസഫ് കുട്ടി കടവിൽ, അനിൽ ജോൺ ഫ്രാൻസിസ്, വിൻസ് പെരിഞ്ചേരി, രമണി പോൾ, ജോസ് കല്ലശേരിൽ, ഷിജോ ജോസഫ്, സിസ്റ്റർ ക്ലയർ മേരി, ഫ്രഡി കാർഡോസ്, രജിനാൾഡ് ഡേവിഡ്, സാലി സിഇസഡ്, എഡിസൺ അലക്സ്, അജിത ഷാജി, തോമസ് ആന്‍റണി എന്നിവർ പ്രസംഗിച്ചു.