AI Image for representation
കൊച്ചി: ചൊവ്വാഴ്ച ഒരുലക്ഷത്തിനു താഴെ വീണതിനു പിന്നാലെ ഈ വര്ഷത്തെ ഏറ്റവും താഴ്ന്ന നിലയിലേക്ക് കൂപ്പുകുത്തി സ്വര്ണ വില. 22 കാരറ്റ് സ്വർണം ഗ്രാമിന് 255 രൂപയും പവന് ഒറ്റയടിക്ക് 2,040 രൂപയുമാണ് കുറഞ്ഞത്. ഇതോടെ, ഒരു ഗ്രാം സ്വർണത്തിന് 12,215 രൂപയിലും പവന് 97,720 രൂപയിലുമാണ് വ്യാപാരം പുരോഗമിക്കുന്നത്.
അതേസമയം, 18 കാരറ്റ് സ്വർണവില ഗ്രാമിന് 205 രൂപ താഴ്ന്ന് 10,000 രൂപയായി. 14 കാരറ്റ് സ്വർണവില ഗ്രാമിന് 7,825 രൂപയിലും ഒമ്പത് കാരറ്റ് സ്വർണവില 5,045 രൂപയിലും ഒമ്പത് കാരറ്റ് സ്വർണവില 40,360 രൂപയിലുമെത്തി.
ഒരാഴ്ചയ്ക്കിടെ വിലയില് ഏകദേശം ഏഴായിരം രൂപയിലേറെ കുറഞ്ഞതോടെയാണ് സ്വർണവില ഒരുലക്ഷത്തിനു താഴെപ്പോയത്. ശനിയാഴ്ച സ്വര്ണവിലയില് നേരിയ വര്ധനയുണ്ടായിരുന്നു. ഗ്രാമിന് 25 രൂപയും പവന് 200 രൂപയുമാണ് വര്ധിച്ചത്. ഇതിനു പിന്നാലെയാണ് തിങ്കളാഴ്ചയും ചൊവ്വാഴ്ചയും വീണ്ടും താഴേക്കുപോയത്. തിങ്കളാഴ്ച മുതൽ ഇന്നുവരെ കേരളത്തിൽ പവന് കുറഞ്ഞത് 3200 രൂപയാണ്. ഗ്രാമിന് 400 രൂപയും കുറഞ്ഞു.
ചൊവ്വാഴ്ച ഗ്രാമിന് 70 രൂപയും പവന് 560 രൂപയുമാണ് കുറഞ്ഞത്. ഈ വർഷം രണ്ടാംതവണയാണ് പവൻ വില ഒരു ലക്ഷം രൂപയിൽ താഴെയെത്തുന്നത്. നേരത്തെ, മാർച്ച് 23ന് സ്വർണവില പവന് 99,480 രൂപയെന്ന നിലയിലേക്ക് ഇടിഞ്ഞിരുന്നു.
നേരത്തെ, പവന് ഒരു ലക്ഷം രൂപയുടെ താഴേക്ക് ഇടിയുമെന്ന സൂചന നൽകി സ്വർണവില ഒക്ടോബർ 31ന് കേരളത്തിൽ 1,01,840 രൂപയിലേക്ക് കൂപ്പുകുത്തിയിരുന്നു. പിന്നീട് സ്വർണവില തിരിച്ചുകയറുകയാണുണ്ടായത്.
ഈ വർഷം ജനുവരി 29ന് കുറിച്ച ഗ്രാമിന് 16,395 രൂപയും പവന് 1.31 ലക്ഷം രൂപയുമാണ് സംസ്ഥാനത്തിന്റെ ചരിത്രത്തിലെ എക്കാലത്തെയും ഉയർന്ന സ്വർണവില.
ജനുവരി 29ന് പവൻവില സർവകാല ഉയരം തൊട്ടിരുന്നു. അന്നു ഗ്രാമിന് ഒറ്റയടിക്ക് 1,080 രൂപയും പവന് 8,640 രൂപയും വര്ധിച്ച സ്വർണവില സര്വകാല റിക്കാര്ഡ് ഭേദിച്ച് ഗ്രാമിന് 16,395 രൂപയും പവന് 1,31,160 രൂപയിലുമെത്തുകയായിരുന്നു.
പുതുവർഷത്തിൽ കുതിപ്പോടെ തുടങ്ങിയ സ്വർണവില ജനുവരി അഞ്ചിന് പവന് ഒറ്റയടിക്ക് 1,160 രൂപയും ഗ്രാമിന് 145 രൂപയും വർധിച്ച് വീണ്ടും ഒരു ലക്ഷം പിന്നിട്ടിരുന്നു. ഇതിനു പിന്നാലെയാണ് വൻ കുതിപ്പുമായി മുന്നോട്ടുപോയത്. 2025 ജനുവരിയിൽ 57,000 രൂപ മാത്രമായിരുന്ന വിലയാണ് വർഷാവസാനം ലക്ഷം ഭേദിച്ചത്.
മാർച്ച് മാസം അവസാനം നാലു ദിവസത്തിനിടെ ഗ്രാമിന് 435 രൂപയും പവന് 3,480 രൂപയും വർധിച്ചിരുന്നു. മാർച്ച് 23ന് നാലുതവണ മാറിമറിഞ്ഞ സ്വർണവില ഒരു ലക്ഷത്തിന് താഴേക്ക് പോയിരുന്നെങ്കിലും വൈകിട്ടോടെ വീണ്ടും ഒരു ലക്ഷത്തിനു മുകളിലെത്തിയിരുന്നു. പിന്നീട് ഇതുവരെ ലക്ഷത്തിൽ താഴെപ്പോകാതെ വൻ കയറ്റിറക്കങ്ങൾക്കാണ് സാക്ഷ്യം വഹിച്ചത്.
രാജ്യാന്തര വിലയിലെ ചലനങ്ങളാണ് ആഭ്യന്തര സ്വർണവിപണിയിലും പ്രതിഫലിക്കുന്നത്. ഔൺസിന് 61.32 ഡോളർ ഇടിഞ്ഞ് 3787.44 ഡോളറിലാണ് രാജ്യാന്തരവില. 2025 സെപ്റ്റംബറിനുശേഷമുള്ള ഏറ്റവും താഴ്ന്ന വിലയാണിത്.
അതേസമയം, വെള്ളി വിലയും ഇന്നു താഴേക്കാണ്. ഒരു ഗ്രാം സാധാരണ വെള്ളിക്ക് അഞ്ചുരൂപ താഴ്ന്ന് 185 രൂപയിലാണ് വ്യാപാരം പുരോഗമിക്കുന്നത്.
100 വര്ഷത്തെ സ്വര്ണക്കുതിപ്പ്
കഴിഞ്ഞ 100 വര്ഷത്തിനിടയില് സ്വര്ണ വില പവന് 13.75 രൂപയില് നിന്ന് 1,13,520 രൂപയിലേക്കാണ് എത്തി നില്ക്കുന്നത്. 1925 മാര്ച്ച് 31 ന് ഒരു പവന് സ്വര്ണത്തിന് 13.75 രൂപയായിരുന്നു വിപണി വില. 1930 മാര്ച്ച് 31 ആയപ്പോഴേക്കും പവന് 13. 57 രൂപയായി അത് കുറഞ്ഞു.
1935 മാര്ച്ച് 31 ന് സ്വര്ണ വിലയില് വര്ധന രേഖപ്പെടുത്തി. ഇക്കാലയളവില് ഒരു പവന് സ്വര്ണത്തിന്റെ വില 22.65 രൂപയായി ഉയര്ന്നു. പിന്നീടങ്ങോട്ട് സ്വര്ണവിലയില് വര്ധനയാണ് ഉണ്ടായത്.
1940 മാര്ച്ച് 31 ന് ഒരു പവന് സ്വര്ണത്തിന് 26.77 രൂപയും 1945 മാര്ച്ച് 31 ന് 45.49 രൂപയും 1950 മാര്ച്ച് 31 ന് 72.75 രൂപയുമായി സ്വര്ണ വില ഉയര്ന്നു. എന്നാല് 1955 മാര്ച്ച് 31 ന് പവന് 58.11 രൂപയായി സ്വര്ണ വില കുറഞ്ഞു.
1960 മാര്ച്ച് 31 ന് പവന് 82.05 രൂപയായിരുന്നു സ്വര്ണവില. 1965 മാര്ച്ച് 31 ന് പവന് 90.20 രൂപയും 1970 ല് 135.30 രൂപയും 1975 മാര്ച്ച് 31 ന് 396 രൂപയുമായി സ്വര്ണ വില ഉയര്ന്നു. 1980 മാര്ച്ച് 31 ന് പവന് 975 രൂപയായി. 1985 ല് പവന് 1,573 രൂപയും 1990 ല് പവന് 2,493 രൂപയും 1995 ല് 3,432 രൂപയുമായി സ്വര്ണവിലയില് മുന്നേറ്റം തുടര്ന്നു.
1996 മാര്ച്ചില് പവന് 3,784 രൂപയായി. 1997 മാര്ച്ച് 31 ന് പവന് 3,432 രൂപയും 1998 മാര്ച്ച് 31 ന് 2,966 രൂപയുമായി സ്വര്ണ വില കുറഞ്ഞു. 1999 ല് പവന് 3,106 രൂപയായി വീണ്ടും ഉയര്ന്നു. തുടര്ന്നുള്ള വര്ഷങ്ങളില് സ്വര്ണ വിലയില് ഏറ്റക്കുറച്ചിലുകളാണ് രേഖപ്പെടുത്തിയത്.
2000 മാര്ച്ച് 31 ന് ഒരു പവന് 3, 2 1 2 രൂപയും 2001 ല് 3,073 രൂപയുമായി. 2002 മാര്ച്ച് 31 ന് പവന് 3,670 രൂപ, 2003 ല് 3,857 രൂപ, 2004 ല് 4,448 രൂപ, 2005 ല് 4,550 രൂപ, 2006 ല് 6,255 രൂപ എന്നിങ്ങനെ സ്വര്ണക്കുതിപ്പ് തുടര്ന്നു.
2007 ല് പവന് 6,890 രൂപയും 2008 ല് 8,892 രൂപയുമായി. പവന് 10,000 കടന്നത് 2009 ലാണ് . അന്ന് ഒരു പവന് സ്വര്ണത്തിന് 11,077 രൂപയായിരുന്നു. 2010 മാര്ച്ച് 31 ന് പവന് 12,280 രൂപയും 2011 ല് 15,560 രൂപയും എത്തി. പവന് 20,000 രൂപ കടന്നത് 2012 ലായിരുന്നു.
2012 മാര്ച്ചില് ഒരു പവന് സ്വര്ണം വാങ്ങാന് 20,880 രൂപ നല്കണമായിരുന്നു. 2013 ല് പവന് 22,240 ആയെങ്കിലും 2014 എത്തിയപ്പോള് പവന് 21,480 രൂപയായും 2015 ല് 19,760 രൂപയായും 2016 ല് 21,360 രൂപയായും 2017 ല് 21,800 രൂപയായും സ്വര്ണ വിലയില് ചാഞ്ചാട്ടം തുടര്ന്നു.
2018 ല് പവന് 22,600 രൂപയായിരുന്ന സ്വര്ണ വില 2019 ആയപ്പോഴേക്കും 23,720 രൂപയായി. എന്നാല് 2020 മാര്ച്ചില് സ്വര്ണവിലയില് വന് കുതിപ്പാണ് ഉണ്ടായത്. പവന് 32,000 രൂപയായി സ്വര്ണ വില ഉയര്ന്നു. പിന്നീടങ്ങോട്ട് പൊന്ന് പിടി തരാതെ പാഞ്ഞു.
2021 ല് പവന് 32,880 രൂപയിലും 2022 ല് 38,120 രൂപയും 2023 ല് 44,000 രൂപയുമായി. 2024 മാര്ച്ച് 31 ന് ഒരു പവന് സ്വര്ണത്തിന്റെ വില 50,200 രൂപയായി വര്ധിക്കുകയായിരുന്നു. 2025 ഡിസംബര് 29 ന് 1,03,560 രൂപയായിരുന്നു സ്വര്ണവില. 2026 ജനുവരി 21 ആയപ്പോഴേക്കും ഒരു പവന് സ്വര്ണത്തിന് 1,13,520 രൂപയായി.
Tags : GoldRateToday Business Market Money Commodity Economy MarketWatch Finance Deepika DeepikaNewspaper BreakingNews NewsUpdate Headlines CurrentAffairs