പ്രതീകാത്മക ചിത്രം
വടശേരിക്കര: ജനവാസ മേഖലയിൽ കാട്ടാനകൾ കൂട്ടത്തോടെ ഇറങ്ങിയതിന്റെ ഭീതി വടശേരിക്കരയിൽ തുടരുന്നു. വ്യാഴാഴ്ച പകൽ നാടിനെ വിറപ്പിച്ച കാട്ടാനകൾ രാത്രിയിൽ പിന്നെ എത്തിയില്ലെന്ന് പറയുന്നു. എന്നാൽ ആനക്കൂട്ടം തീറ്റ തേടി വീണ്ടും ജനവാസ മേഖലയിലേക്ക് വരുമെന്നു തന്നെയാണ് പ്രദേശവാസികൾ പറയുന്നത്. പ്രദേശത്ത് വനപാലകരുടെ കാവൽ തുടരുകയാണ്. ആർആർടി സംഘത്തെയും നിയോഗിച്ചിട്ടുണ്ട്.
ഇതിനിടെ ഇന്ന് വടശേരിക്കരയിലെത്തുന്ന മന്ത്രി ഷിബു ബേബി ജോണിന്റെ സാന്നിധ്യത്തിൽ കാട്ടാന ശല്യം ഒഴിവാക്കാനുള്ള മാർഗങ്ങളെക്കുറിച്ച് ചർച്ച ചെയ്യും. ഉച്ചയ്ക്ക് ഒന്നിന് വടശേരിക്കര ഐബിയിൽ മന്ത്രി ബന്ധപ്പെട്ടവരുടെ യോഗം വിളിച്ചിട്ടുമുണ്ട്. വനംവകുപ്പിന്റെ ചുമതലയിലായശേഷം വടശേരിക്കരയിൽ മന്ത്രി ഷിബു ബേബി ജോൺ എത്തുന്നതു രണ്ടാം തവണയാണ്. അധികാരമേറ്റ് അധികം കഴിയുന്നതിനു മുന്പ് വടശേരിക്കരയിൽ വന്യമൃഗശല്യം നേരിടുന്നതുമായി ബന്ധപ്പെട്ട യോഗം വിളിച്ചിരുന്നു. അന്നു കൈക്കൊണ്ട തീരുമാനങ്ങൾ പലതും ഇപ്പോഴും നടപ്പാക്കാത്തതാണ് ആനകൾ വീണ്ടും കൂട്ടത്തോടെ എത്താൻ കാരണമെന്നാണ് പ്രദേശവാസികൾ പറയുന്നത്.
അഞ്ച് കിലോമീറ്റർ അകലെയുള്ള വനത്തിൽ നിന്നാണ് കാട്ടാനകൾ വടശേരിക്കര ടൗണിനു സമീപംവരെ എത്തുന്നത്. ശബരിമല പ്രധാന പാതയോടു ചേർന്നും ചിറ്റാർ റോഡരികിലുമൊക്കെ ആനയുടെ സാന്നിധ്യമുണ്ടായി. ഒളികല്ല്, കുന്പളത്താമൺ മേഖലകൾ രാപകൽ ഭേദമെന്യേ ആനകളെത്തുന്ന സ്ഥലങ്ങളായി മാറി. വടശേരിക്കര-കുന്പളത്താമൺ റോഡിൽ സന്ധ്യ കഴിഞ്ഞാൽ യാത്ര നടത്താനാകാത്ത സ്ഥിതിയായി. വടശേരിക്കര സെന്റ് ആൻഡ്രൂസ് മാർത്തോമ്മാ പള്ളിയോടു ചേർന്ന പുരയിടത്തിലൂടെ കല്ലാറിലേക്ക് പുതിയ ഒരു ആനത്താരയും രൂപപ്പെട്ടിട്ടുണ്ട്. കഴിഞ്ഞദിവസം കാടിറങ്ങി ജനവാസമേഖലയിൽ തന്പടിച്ച നാല് ആനകളും മടങ്ങിയത് ഇതേവഴിയിലൂടെയാണ്.
കാടിനോടുചേർന്നുള്ള തേക്ക് പ്ലാന്റേഷനുകളിൽ തലങ്ങും വിലങ്ങും സ്ഥാപിച്ചിട്ടുള്ള വൈദ്യുതി ഫെൻസിംഗാണ് കാട്ടാനക്കൂട്ടം ജനവാസ മേഖലയിലേക്ക് എത്താനുള്ള പ്രധാന കാരണങ്ങളിലൊന്നായി പറയുന്നത്.
വനാതിർത്തിയോട് ചേർന്നുള്ള പ്ലാന്റേഷൻ മേഖലകളിൽ ആനകളുടെ സ്വാഭാവിക സഞ്ചാരപാതകൾ തടസപ്പെടുത്തിയാണ് വനം വകുപ്പ് ഫെൻസിംഗ് സ്ഥാപിച്ചിട്ടുള്ളത്. സ്വാഭാവിക ആനത്താരകൾക്ക് സോളാർ വൈദ്യുതി വേലികൾ തടയിട്ടതിനാൽ കല്ലാറ്റിൽ നിന്നും വെള്ളം കുടിക്കാനായി എത്തുന്ന ആനകൾ വഴി തെറ്റി ജനവാസ മേഖലകളിലേക്ക് എത്തുകയാണെന്നാണ് കരുതുന്നത്.
ആർആർടി സംഘത്തെയും കൂടുതൽ വനംവകുപ്പ് ജീവനക്കാരെയും പൊലിസിനെയും വിന്യസിച്ച് ആനയിറങ്ങുന്നത് തടയാനാണ് അധികൃതർ ശ്രമിക്കുന്നത്. അടക്കുഴിയിലെ ഫെൻസിംഗിന്റെ ചില ഭാഗങ്ങൾ നീക്കം ചെയ്യാനും കൈതച്ചക്ക കൃഷി നിയന്ത്രിക്കാനും വനംവകുപ്പും ജില്ലാ ഭരണകൂടവും നടപടികൾ സ്വീകരിച്ചിട്ടുണ്ട്.
ആക്കേമൺ ഭാഗത്തുനിന്ന് മുള്ളൻപാറ ഭാഗത്തേക്ക് നീങ്ങിയ ആനകൾ നേരത്തേ കുരിശുംമൂട് ജംഗ്ഷന് സമീപം ഒരു വീടിന്റെ മതിൽ തകർക്കുകയും പന്പ - മണ്ണാറക്കുളഞ്ഞി റോഡിന് സമീപത്തെ കൃഷിയിടത്തിലെ സോളാർ വേലിയും വിളകളും നശിപ്പിക്കുകയും ചെയ്തിരുന്നു.
ജനവാസ മേഖലയിലെ ആനത്താര
റാന്നി ഫോറസ്റ്റ് ഡിവിഷൻ പരിധിയിലെ ഒളികല്ല് വനമേഖല വഴിയാണ് ആനക്കൂട്ടം ജനവാസ മേഖലകളിലേക്ക് എത്തുന്നത്. വനത്തിൽനിന്നും ഇറങ്ങുന്ന ആനകൾ ഒളികല്ല് ജനവാസ മേഖലയിലൂടെ സഞ്ചരിച്ച് കല്ലാർ നദി കടന്ന് കടമാൻകുന്ന്, ആക്കേമൺ, മുള്ളൻപാറ, ഇടത്തറമുക്ക് വഴിയാണ് വടശേരിക്കര ടൗണിന് സമീപത്തേക്ക് എത്തുന്നത്. അടക്കുഴിയിലെ തോട്ടങ്ങളിൽ സ്ഥാപിച്ച ഫെൻസിംഗ് പ്രധാന കാരണമാണ്. ഒപ്പം സമീപത്തെ കൈതച്ചക്ക കൃഷിയാണ് മറ്റൊരു ആകർഷകം.
പ്ലാന്റേഷനുകളിലെ ഫെൻസിംഗ് കാരണം വഴിമാറി വടശേരിക്കര ടൗൺ ഉൾപ്പടെയുള്ള ജനവാസ മേഖലകളിലേക്ക് എത്തുന്ന ആനകൾക്ക് തിരികെ വനത്തിലേക്ക് പ്രവേശിക്കാനും കഴിയുന്നില്ല.
ആക്കേമൺ ഭാഗത്ത് നിന്ന് മുള്ളൻപാറ ഭാഗത്തേക്ക് നീങ്ങിയ ആനകൾ നേരത്തേ കുരിശുംമൂട് ജംഗ്ഷന് സമീപം ഒരു വീടിന്റെ മതിൽ തകർക്കുകയും ശബരിമല-മണ്ണാരക്കുളഞ്ഞി റോഡിന് സമീപത്തെ കൃഷിയിടത്തിലെ സോളാർ വേലിയും വിളകളും നശിപ്പിക്കുകയും ചെയ്തിരുന്നു.
കടുവയും പുള്ളിപ്പുലിയും
കുമ്പളത്താമൺ, ആക്കേമൺ, മുള്ളൻപാറ, ഒലിക്കല്ല്, ചെമ്പരത്തിമൂട് തുടങ്ങിയ ജനവാസ മേഖലകളിൽ ഏറ്റവും കൂടുതൽ നാശനഷ്ടങ്ങൾ ഉണ്ടാക്കുന്നത് കാട്ടാനക്കൂട്ടമാണെങ്കിലും മറ്റ് വന്യമൃഗങ്ങളുടെ സാന്നിധ്യവും പതിവായിരിക്കുകയാണ്. ആനകൾ സ്ഥിരമായി ജനവാസ മേഖലകളിൽ ഇറങ്ങി കൃഷികൾ നശിപ്പിക്കുകയും വീടുകളുടെ മതിൽ തകർക്കുകയും ചെയ്യാറുണ്ട്.
അടുത്തയിടെ മുക്കൂഴി-കുമ്പളത്താമൺ-വടശേരിക്കര റോഡിൽ പതിനേഴോളം കാട്ടുപോത്തുകളെ കണ്ടിരുന്നു. ഇത് രാത്രികാല യാത്രക്കാർക്കും ഇരുചക്ര വാഹന യാത്രക്കാർക്കും വലിയ ഭീഷണിയാണ്.
കുമ്പളത്താമൺ ഒളിക്കല്ല് മേഖലയിൽ രണ്ടു മാസത്തോളം ഭീതി പരത്തുകയും വളർത്തുമൃഗങ്ങളെ ആക്രമിക്കുകയും ചെയ്ത കടുവ വനംവകുപ്പ് സ്ഥാപിച്ച കൂട്ടിൽ മുന്പ് കുടുങ്ങിയിരുന്നു.
പ്രദേശത്തെ ഫാമുകളിലെയും വീടുകളിലെയും ആട്, പോത്ത്, വളർത്തുനായ്ക്കൾ തുടങ്ങിയവയെ കടുവ തുടർച്ചയായി ആക്രമിച്ചു കൊന്നിട്ടും അധികൃതർ കാര്യമാക്കിയിരുന്നില്ല. പകൽ സമയത്ത് ജനവാസ മേഖലയിലിറങ്ങിയ കടുവ ആടിനെ പിടികൂടിയതോടെയാണ് വനംവകുപ്പ് കാവൽ ശക്തമാക്കിയത്.
തുടർന്ന് പിടികൂടിയ കടുവയെ വെറ്ററിനറി ഡോക്ടർമാരുടെ പരിശോധനകൾക്ക് ശേഷം ഗവി വനമേഖലയിലേക്ക് തുറന്നുവിടുകയാണ് ചെയ്തത്. വടശേരിക്കരയോട് ചേർന്നുകിടക്കുന്ന വനമേഖലകളിൽ നിന്നും പുള്ളിപ്പുലി ഇറങ്ങുന്നതായും പരാതിയുണ്ട്.
ജനങ്ങളുടെ സുരക്ഷ ഉറപ്പാക്കണം: സഫ്രഗൻ മെത്രാപ്പോലീത്ത
റാന്നി: വടശേരിക്കരയിലും പരിസര പ്രദേശങ്ങളിലും പകൽസമയത്ത് പോലും കാട്ടാനകൾ കൂട്ടമായി ഇറങ്ങി ജനങ്ങളിൽ ഭീതിയും ആശങ്കയും സൃഷ്ടിച്ച സംഭവത്തിൽ മാർത്തോമ്മാ സഭയ്ക്ക് കടുത്ത ആശങ്കയുണ്ടെന്ന് റാന്നി-നിലയ്ക്കൽ ഭദ്രാസനാധ്യക്ഷൻ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത.
വനാതിർത്തിയിൽ താമസിക്കുന്ന ജനങ്ങളുടെ ജീവനും സ്വത്തിനും സുരക്ഷ ഉറപ്പാക്കേണ്ട സർക്കാർ സംവിധാനങ്ങൾ അതിൽ നിസംഗത കാട്ടുന്നതായി സംശയിക്കപ്പെടേണ്ടതുണ്ട്. തേക്ക് പ്ലാന്റേഷനുകൾ സംരക്ഷിക്കാൻ സ്ഥാപിച്ച സോളാർ വേലികൾ കാട്ടാനകൾക്ക് തിരികെ വനത്തിലേക്ക് പോകുന്നതിന് തടസമാകുന്നുവെന്ന നാട്ടുകാരുടെ പരാതി ഗൗരവമായി കാണണം. മനുഷ്യജീവനേക്കാൾ തേക്ക് പ്ലാന്റേഷനുകൾക്ക് പ്രാധാന്യം നൽകുന്ന സമീപനം അംഗീകരിക്കാനാവില്ലെന്നും അദ്ദേഹം പറഞ്ഞു.
ഭീതിയിൽ കഴിയുന്ന പ്രദേശവാസികൾക്ക് സ്വസ്ഥമായി ജീവിക്കാനുള്ള സംവിധാനം സൃഷ്ടിക്കാൻ സർക്കാർ തയാറാകണം. വനാതിർത്തി പ്രദേശങ്ങളിൽ ആനകൾക്ക് സുരക്ഷിതമായി വനത്തിലേക്ക് മടങ്ങാനുള്ള വഴികൾ ഒരുക്കുക,സ്ഥിരമായ വനപാലക സാന്നിധ്യവും മുന്നറിയിപ്പ് സംവിധാനവും ദ്രുതകർമ സേനയുടെ സേവനവും ഉറപ്പാക്കുക, വന്യമൃഗ ആക്രമണത്തിൽ നാശനഷ്ടം സംഭവിക്കുന്നവർക്ക് കാലതാമസമില്ലാതെ നഷ്ടപരിഹാരം നൽകുക തുടങ്ങിയ നടപടികൾ സർക്കാർ അടിയന്തരമായി സ്വീകരിക്കണമെന്നും അദ്ദേഹം ആവശ്യപ്പെട്ടു.
ശബരിമലയിലേക്ക് പോകുന്ന തീർഥാടകരുടെ സുരക്ഷയും ഗൗരവത്തോടെ കൈകാര്യം ചെയ്യേണ്ട വിഷയമാണെന്നും സഫ്രഗൻ മെത്രാപ്പോലീത്ത അഭിപ്രായപ്പെട്ടു.
കാടും വന്യമൃഗങ്ങളും സംരക്ഷിക്കപ്പെടുന്നതിനൊപ്പം വനാതിർത്തിയിൽ ജീവിക്കുന്ന മനുഷ്യരുടെ സുരക്ഷയും ഉറപ്പാക്കണം. ഭീതിയിൽ കഴിയുന്ന വടശേരിക്കരയിലെ ജനങ്ങളോടൊപ്പം സഭ നിലകൊള്ളുമെന്നും അവരുടെ സുരക്ഷയ്ക്കായി ആവശ്യമായ ഇടപെടലുകൾ നടത്തുമെന്നും മാർ ബർണബാസ് അറിയിച്ചു.
Tags : Vadasherikkara Nattuvishesham DistrictNews wild elephants