വോട്ടവകാശം ജാഗ്രതയോടെ
വിനിയോഗിക്കണം: ആന്‍റോ ആന്‍റണി
റാന്നി: ജനങ്ങൾ വോട്ടവകാശം ജാഗ്രതയോടെ വിനിയോഗിക്കേണ്ട നിർണായക തെരഞ്ഞെടുപ്പാണിതെന്ന് യുഡിഎഫ് സ്ഥാനാർഥി ആന്‍റോ ആന്‍റണി. എഴുമറ്റൂർ ബ്ലോക്കുതല സ്വീകരണ പര്യടന പരിപാടികളിൽ പ്രസംഗിക്കുകയായിരുന്നു അദ്ദേഹം.
രാജ്യത്തിന്‍റെ നിലനില്പു തന്നെ അപകടത്തിലായ ഘട്ടത്തിലാണ് തെരഞ്ഞെടുപ്പ് നടക്കുന്നത്. മതേതര ജനാധിപത്യ സങ്കല്പങ്ങൾ പുലരാൻ വോട്ടവകാശം വിനിയോഗിക്കപ്പെടേണ്ടതുണ്ട്. കാവിവത്കരണവും ചുവപ്പുവത്കരണവും ഫാസിസം ആണെന്ന് ജനങ്ങൾ തിരിച്ചറിയണം. രാജ്യത്തെ കർഷകർക്കും സാധാരണക്കാർക്കും ചേർത്ത് പിടിക്കുന്ന ജനാധിപത്യ മതേതര മൂല്യങ്ങൾ ഉയർത്തിപ്പിടിക്കുന്ന മുന്നണിയുടെ പേരാണ് ഇന്ത്യ. നമ്മുടെ ഇന്ത്യ നിലനിൽക്കാനായി ഉണർന്ന് പ്രവർത്തിക്കണമെന്നും അദ്ദേഹം ആവശ്യപ്പെട്ടു.
പത്തനംതിട്ട: യുഡിഎഫ് സ്ഥാനാർഥി ആന്‍റോ ആന്‍റണി ഇന്ന് പന്തളം ബ്ലോക്കിൽ പര്യടനം നടത്തും. രാവിലെ ചന്ദനപ്പള്ളി ജംഗ്ഷനിൽനിന്നാരംഭിക്കുന്ന പര്യടനം കെപിസിസി പ്രചാരണ വിഭാഗം കൺവീനർ പന്തളം സുധാകരൻ ഉദ്ഘാടനം ചെയ്യും. വൈകുന്നേരം പന്തളത്താണ് സമാപനം.
ജനകീയ വിഷയങ്ങൾ ഏറ്റെടുക്കും: തോമസ് ഐസക്
റാന്നി: മണ്ഡലത്തിലെ ജനങ്ങളുടെ വിഷയങ്ങൾക്കു ശാശ്വത പരിഹാരം നല്കുന്ന വിവിധ പദ്ധതികൾ എൽഡിഎഫ് ആസൂത്രണം ചെയ്യുമെന്ന് സ്ഥാനാർഥി തോമസ് ഐസക്. റാന്നി മണ്ഡലത്തിലെ വിവിധ സ്വീകരണയോഗങ്ങളിൽ പ്രസംഗിക്കുകയായിരുന്നു അദ്ദേഹം.
തൊഴിലില്ലായ്മ, സംരംഭകത്വ വികസനം, ടൂറിസം, മെച്ചപ്പെട്ട വിദ്യാഭ്യാസം എന്നീ മേഖലകളിൽ ശ്രദ്ധ കേന്ദ്രീകരിക്കേണ്ടതുണ്ടെന്നും ഐസക് പറഞ്ഞു.
കാഞ്ഞിരപ്പള്ളി: എൽഡിഎഫ് സ്ഥാനാർഥി ഡോ. തോമസ് ഐസക് ഇന്നലെ കാഞ്ഞിരപ്പള്ളി മണ്ഡലത്തിൽ സ്വീകരണപര്യടനം നടത്തി.
രാവിലെ കങ്ങഴ പഞ്ചായത്തിലെ കാനം ചന്തക്കവലയിൽ നിന്നും ആരംഭിച്ച പര്യടനം സിപിഐ ജില്ലാ സെക്രട്ടറി വി.ബി. ബിനു ഉദ്ഘാടനം ചെയ്തു. സുരേഷ് കെ. ഗോപാൽ അധ്യക്ഷത വഹിച്ചു.
നെടുംകുന്നം, കറുകച്ചാൽ പഞ്ചായത്തുകളിലെ വിവിധ കേന്ദ്രങ്ങളിൽ പര്യടനം നടത്തി വൈകുന്നേരം ശാന്തിപുരത്ത് സമാപിച്ചു.
തുറന്ന വാഹനത്തിൽ എത്തിയ സ്ഥാനാർഥിയെ പൂക്കളും പുസ്തകങ്ങളും പഴവർഗങ്ങളും നല്കിയാണ് ഓരോ സ്വീകരണ കേന്ദ്രങ്ങളിലും വരവേറ്റത്. വിവിധ സ്വീകരണ കേന്ദ്രങ്ങളിൽ ചീഫ് വിപ്പ് ഡോ. എൻ. ജയരാജ്. എൽഡിഎഫ് നേതാക്കളായ കെ. ജെ. തോമസ്, എ.വി. റസൽ, കെ.എം. രാധാകൃഷ്ണൻ, ഗിരീഷ് എസ്. നായർ, ഷെമീം അഹമ്മദ്. വി.ജി. ലാൽ, എ.എം. മാത്യു, എം.എ. ഷാജി, പി.എ. താഹ തുടങ്ങിയവർ പ്രസംഗിച്ചു.
പ്രമുഖ ഫുട്ബോൾ ക്ലബ്ബായ മാഞ്ചസ്റ്റർ സിറ്റി അബുദാബിയിൽ സംഘടിപ്പിച്ച അബുദാബി കപ്പിൽ മത്സരിച്ച കാനം സ്വദേശി ദയാൽ ഡേവഡ് സാമുവലിനെയും പാറമടക്കുളത്തിൽ വീണ ആളെ സാഹസികമായി രക്ഷപ്പെടുത്തിയ എം.ഡി. മോനിഷയേയും സ്വീകരണ പര്യടനത്തിടെ തോമസ് ഐസക് ആദരിച്ചു.
അനിൽ ആന്‍റണി റാന്നി മണ്ഡലത്തിൽ പര്യടനം നടത്തി
റാന്നി: എൻഡിഎ സ്ഥാനാർഥി അനിൽ കെ. ആന്‍റണി റാന്നി മണ്ഡലത്തിൽ പര്യടനം നടത്തി. രാവിലെ അട്ടത്തോട് ഗിരിജൻ കോളനിയിൽനിന്നാരംഭിച്ച പര്യടനം കർഷക മോർച്ച സംസ്ഥാന പ്രസിഡന്‍റ് ഷാജി ആർ. നായർ ഉദ്ഘാടനം ചെയ്തു. നാറാണംതോട്, തുലാപ്പള്ളി, കൊല്ലമുള, ചാത്തൻതറ, വെച്ചൂച്ചിറ, കുന്നം, മണ്ണടിശാല, പരുവ തുടങ്ങിയ മലയോര മേഖലകളിലൂടെയായിരുന്നു പര്യടനം. ഉച്ചകഴിഞ്ഞ് റാന്നി പെരുന്പുഴ ടൗണിൽനിന്നു പര്യടനം തുടങ്ങി. റാന്നി, വടശേരിക്കര, അത്തിക്കയം, പെരുനാട് പഴവങ്ങാടി പഞ്ചായത്തുകളിലൂടെ ഇട്ടിയപ്പാറയിൽ സമാപിച്ചു.
അടൂർ: എൻഡിഎ സ്ഥാനാർഥി അനിൽ കെ. ആന്‍റണിയുടെ മണ്ഡല പര്യടനം ഇന്ന് കൊടുമൺ ഐക്കാട് ജംഗ്ഷനിൽ നിന്നാരംഭിക്കും. ഇടത്തിട്ട, ചന്ദനപ്പള്ളി, ഒറ്റത്തേക്ക്, പെരുംപുളിക്കൽ, പറപ്പെട്ടി, തോലൂഴം, വഴി കുരന്പാലയിലെത്തും. വൈകുന്നേരം തെങ്ങമ‌ത്താണ് സമാപനം.