പിറ്റ് എൻഡിപിഎസ് ആക്ട് പ്രകാരം കുറ്റ്യാടിയിൽ ആദ്യ അറസ്റ്റ്

കുറ്റ്യാടി: മയക്കുമരുന്ന് കേസിൽപെട്ട പ്രതിയെ പിറ്റ് എൻഡിപിഎസ് ആക്ട് പ്രകാരം അറസ്റ്റ് ചെയ്തു.

വടയം ഇടത്തിൽപൊയിൽ ഫാസിലിനെയാണ് കുറ്റ്യാടി സർക്കിൾ ഇൻസ്പെക്ടർകൈലാസനാഥ് അറസ്റ്റ് ചെയ്തത്.

ഫാസിലിനെ തിരുവനന്തപുരത്തെ ജയിലിൽ പാർപ്പക്കും. പിറ്റ് എൻഡിപിഎസ് നിയമം ഉപയോഗിച്ചുകൊണ്ടുള്ള റൂറൽ ജില്ലയിലെ ആദ്യ അറസ്റ്റാണ് ഇന്നലെ കുറ്റ്യാടിയിൽ നടന്നത്.

ADVERTISEMENT

പമ്പ് സെറ്റ് നന്നാക്കാൻ നടപടിയില്ല;പമ്പ് ഹൗസിന് മുന്നിൽ ജനപ്രതിനിധികൾ പ്രതിഷേധിച്ചു

മണിക്കൂറുകൾക്കുള്ളിൽ പരിഹാരം മുക്കം: കൊടിയത്തൂർ പഞ്ചായത്തിലെ നിരവധി കുടുംബങ്ങൾ ആശ്രയിക്കുന്ന കോട്ടമുഴി പമ്പ് ഹൗസിലെ രണ്ടാഴ്ച മുമ്പ് തകരാറിലായ പമ്പ് സെറ്റ് നന്നാക്കാൻ നടപടി‍ ആശ്യപ്പെട്ട് ജനപ്രതിനിധികളുടെ നേതൃത്വത്തിൽ പ്രതിഷേധ ധർണ സംഘടിപ്പിച്ചു. കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബുവിന്‍റെ നേതൃത്വത്തിലാണ് സമരം നടന്നത്. പ്രശ്നത്തിന് ഉടൻ പരിഹാരം കണ്ടില്ലങ്കിൽ വലിയ രീതിയിലുള്ള മറ്റ് സമരമുറകളിലേക്ക് കടക്കുമെന്നും ജനപ്രതിനിധികൾ പറഞ്ഞു. മാസങ്ങൾക്ക് മുമ്പ് തകരാറിലായ മറ്റൊരു പമ്പ് സെറ്റ് നന്നാക്കി വെച്ചിരുന്നെങ്കിൽ ഇത്തരമൊരു പ്രതിസന്ധി ഉണ്ടാവുമായിരുന്നില്ലെന്ന് പ്രസിഡന്‍റ് ദിവ്യ ഷിബു പറഞ്ഞു. സമരത്തിന് പിന്തുണയുമായി യുഡിഎഫ്, വെൽഫെയർ പാർട്ടി നേതാക്കളും എത്തിയിരുന്നു. തുടർന്ന് കൊടുവള്ളി ജല അഥോറിറ്റി അസിസ്റ്റന്‍റ് എൻജിനീയർ പി.പി യാസറിന് മുന്നിലും ജനപ്രതിനിധികൾ പ്രതിഷേധവുമായെത്തി. പ്രശ്നത്തിന് പരിഹാരം കാണാതെ തിരിച്ച് പോവില്ലെന്ന് നിലപാടെടുത്തതോടെ ശനിയാഴ്ചക്കകം പ്രശ്നത്തിന് പരിഹാരം കാണുമെന്നും വെള്ളം പമ്പിംഗ് തുടങ്ങുമെന്നും ഉറപ്പ് നൽകി. കോട്ടമുഴി പമ്പ് ഹൗസിന് മുന്നിൽ നടന്ന ചടങ്ങിൽ പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർപേഴ്സൺമാരായ ബാബു പൊലുകുന്നത്ത്, ആയിഷ ചേലപ്പുറത്ത്, മുൻ പ്രസിഡന്‍റ് വി. ഷംലൂലത്ത്, പഞ്ചായത്തംഗങ്ങളായ ടി.കെ. അബൂബക്കർ, യു.പി. മമ്മദ്, എം.ടി. റിയാസ്, കെ.ജി. സീനത്ത്, ഫാത്തിമ നാസർ, യുഡിഎഫ് നേതാക്കളായ കെ.ടി. മൻസൂർ, മജീദ് പുതുക്കുടി, കെ.പി. അബ്ദു റഹിമാൻ, റഫീഖ് കുറ്റിയോട്ട് തുടങ്ങിയവർ പ്രസംഗിച്ചു.

വടകരയിൽ ബസ് ഇടിച്ച് ബൈക്ക് യാത്രക്കാരിക്ക് പരിക്കേറ്റു

വടകര: ദേശീയപാതയില്‍ ചോറോട് കൈനാട്ടിയില്‍ ബസ് ഇടിച്ച് ബൈക്ക് യാത്രക്കാരിക്ക് സാരമായി പരിക്കേറ്റു. ബൈക്കില്‍ നിന്ന് തെറിച്ചു വീണ സ്ത്രീയുടെ കൈക്കുമുകളിലൂടെ ബസ് കയറിയിറങ്ങി. കുറ്റ്യാടി കുമ്പളച്ചോലയിലെ കുന്നത്തുണ്ടയില്‍ നളിനിക്കാണ് (48) പരിക്കേറ്റത്. വടകര ബേബി മെമ്മോറിയില്‍ ആശുപത്രിയില്‍ എത്തിച്ച ഇവരെ സ്ഥിതി ഗുരുതരമായതിനാല്‍ കോഴിക്കോടേക്ക് കൊണ്ടുപോയി. ബൈക്കില്‍ ഒപ്പമുണ്ടായിരുന്ന ഭര്‍ത്താവ് പരിക്കേല്‍ക്കാതെ രക്ഷപ്പെട്ടു. വെള്ളിയാഴ്ച വൈകുന്നേരം നാലരയോടെ രമ്യഹോട്ടലിനു സമീപമാണ് അപകടം. തലശേരിയില്‍ നിന്ന് വടകരക്കു വരുന്ന സ്വകാര്യ ബസാണ് ബൈക്കില്‍ ഇടിച്ചത്. ബൈക്ക് യാത്രക്കാരായ ഇരുവരും ബസിനടിയില്‍പെടുകയായിരുന്നു. ഓടിക്കൂടിയ നാട്ടുകാര്‍ രക്ഷാപ്രവര്‍ത്തനം നടത്തി. വടകര പോലീസും ഫയര്‍ഫോഴ്‌സും സ്ഥലത്തെത്തി. അപകടത്തെ തുടര്‍ന്ന് ദേശീയപാതയില്‍ ഗതാഗതം താറുമാറായി.

യുവാവിനെ മാരകായുധങ്ങളുമായി ആക്രമിച്ച പ്രതി പിടിയിൽ

വടകര: അഴിയൂര്‍ കോറോത്ത് റോഡില്‍ യുവാവിനെ മാരകായുധങ്ങളുമായി ആക്രമിച്ച് ഗുരുതരമായി പരിക്കേല്‍പ്പിച്ചവരില്‍ ഒരാള്‍ പിടിയില്‍. കോറോത്ത് റോഡ് ആശാരിത്താഴക്കുനി അന്‍ജിത്തിനെയാണ് (25) ചേമ്പാല എസ്‌ഐ ബി. മഹേന്ദ്രനും സംഘവും അറസ്റ്റ് ചെയ്തത്. ഇക്കഴിഞ്ഞ ജൂലൈയിലാണ് സംഭവം. മാഹിയില്‍ പോയി മദ്യപിക്കുന്നതിനായി ബൈക്ക് കൊടുക്കാതിരുന്ന പരാതിക്കാരനെ ഇരുമ്പു കട്ടയും ഇരുമ്പു പൈപ്പും അടക്കമുള്ള മാരകായുധങ്ങളുമായി പ്രതികളായ അന്‍ജിത്തും മുഹമ്മദ് അലി റിഹാനും വഴിയില്‍ ഒളിച്ചിരുന്ന് ആക്രമിക്കുകയായിരുന്നു. തലയ്ക്കും കാലിനും ഗുരുതരമായി പരിക്ക് പറ്റിയ പരാതിക്കാരന്‍ കണ്ണൂര്‍ മിംസ് ആശുപത്രിയില്‍ ചികിത്സ തേടി. കാലിലെ എല്ല് പൊട്ടിയതിനാല്‍ ശസ്ത്രക്രിയ നടത്തി ചികിത്സ ചെയ്തു വരികയാണ്. സംഭവ ശേഷം ആന്ധ്രപ്രദേശിലേക്ക് കടന്ന പ്രതികളില്‍ അന്‍ജിത്ത് വീട്ടില്‍ തിരിച്ചെത്തിയതായി രഹസ്യ വിവരം കിട്ടിയ ചോമ്പാല പോലീസ് ഇന്‍സ്പക്ടര്‍ എസ്.ആര്‍. സേതുനാഥിന്‍റെ നിര്‍ദ്ദേശ പ്രകാരം പോലീസ് സംഘം പുലര്‍ച്ചെ വീടുവളഞ്ഞ് പ്രതിയെ കീഴ്‌പ്പെടുത്തുകയായിരുന്നു. രണ്ടാം പ്രതി ഒളിവിലാണ്.

മലയോര ഹൈവേ നിർമാണ കേസ്: ഒക്ടോബർ എട്ടിലേക്ക് മാറ്റി

ചക്കിട്ടപാറ: ചെമ്പ്ര മുതൽ പെരുവണ്ണാമൂഴി വരെയുള്ള മലയോര ഹൈവേ നിർമാണത്തിനു വേണ്ടി റോഡിന്‍റെ വീതി നിർണയിച്ചത് ശരിയായ രീതിയിലല്ലെന്ന് കാണിച്ച് ചില കെട്ടിട ഉടമകളും വ്യാപാരി വ്യവസായി ഏകോപന സമിതി ചക്കിട്ടപാറ യൂണിറ്റ് പ്രസിഡന്‍റും, ബിജെപിയും ഹൈക്കോടതിയിൽ നൽകിയ കേസ് പരിഗണിക്കാനായി ഒക്ടോബർ എട്ടിലേക്ക് മാറ്റി. റോഡ് വികസനത്തിനു് 1971 ൽ ഭൂവുടമകളിൽ നിന്നും സ്ഥലം സർക്കാർ വില കൊടുത്ത് വാങ്ങിയിരുന്നു. 1975 ലെ സർവേ സ്കെച്ച് പ്രകാരം ചെമ്പ്ര മുതൽ പെരുവണ്ണാമൂഴി വരെയുള്ള റോഡിന് 12 മീറ്റർ മുതൽ 16 മീറ്റർ വരെ വീതിയുണ്ട്. എന്നാൽ നിലവിലെ റോഡ് കഴിച്ച് ബാക്കിയുള്ളതെല്ലാം പലരും കയ്യേറുകയും ബിൽഡിംഗ് പണിയുകയും സ്വന്തമാക്കുകയും ചെയ്തു. മലയോര ഹൈവേ പ്രവർത്തനങ്ങൾക്കായി നിലവിലെ റോഡിന്‍റെ നടുവിൽ നിന്നും ഇരു സൈഡിലേക്കും ആറ് മീറ്റർ വീതം വീതി കണക്കാക്കി പണി തുടങ്ങാൻ മലയോര ഹൈവെ അഥോറിറ്റിക്ക് ആരാണ് അധികാരം നൽകിയത് എന്നാണ് ഹർജിക്കാരുടെ പ്രധാന ചോദ്യം. 1975 ലെ റോഡ് സ്കെച്ചും പ്ലാനും നില നിൽക്കെ കയ്യേറ്റക്കാരെ സംരക്ഷിച്ചു കൊണ്ടുള്ള നിർമാണങ്ങൾ ആർക്കു വേണ്ടിയാണെന്നും ഇവർ ചോദിക്കുന്നു. താലൂക്ക് സർവേയറുടെ നേതൃത്വത്തിൽ കൃത്യമായ അളവ് നടക്കുകയാണെങ്കിൽ നിലവിൽ ധൃതിപ്പെട്ട് നടത്തിയ റോഡ് നിർമാണത്തിലെ പല ഭാഗങ്ങളും പൊളിച്ച് മാറ്റേണ്ടി വരുന്ന സ്ഥിതിയാണ്. തലയാട് - 27 മൈൽ റോഡിൽ വർഷങ്ങൾക്ക് മുമ്പ് അക്വയർ ചെയ്ത പോലെ തന്നെയാണ് ചെമ്പ്ര - പെരുവണ്ണാമൂഴി റോഡ് വികസനത്തിന് സ്ഥലങ്ങൾ സർക്കാർ വില നൽകി ഏറ്റെടുത്തത്. ഇപ്പോൾ ഇവിടെ നടക്കുന്ന മലയോര ഹൈവേ നിർമാണം നിയമ ലംഘനത്തിലൂടെയാണെന്നു രേഖകളുടെ അടിസ്ഥാനത്തിൽ കേസ് നൽകിയവർ വാദിക്കുന്നു. കോടതിയെ സമീപിച്ചവരുടെ ഭൂമിയിൽ മലയോര ഹൈവെ പ്രവൃത്തികൾ പാടില്ലായെന്ന ഹൈക്കോടതിയുടെ താത്കാലിക ഉത്തരവാണ് ഒക്ടോബർ എട്ട് വരെ വീണ്ടും നീട്ടിയിരിക്കുന്നത്. അഡ്വ. സുമിൻ എസ്. നെടുങ്ങാടനാണ് കേസിൽ ഹൈ കോടതിയിൽ ഹാജരായത്.

കാട്ടുപന്നി ഇടിച്ചുണ്ടായ അപകടത്തിൽ മരണപ്പെട്ടയാളുടെ വീട് മന്ത്രി സന്ദർശിച്ചു

തിരുവമ്പാടി: മടൂരിൽ കാട്ടുപന്നിയിടിച്ചുണ്ടായ അപകടത്തിൽ മരണപ്പെട്ട ഓടത്തെരുവ് കോയസന്‍റെ മകൻ ജബ്ബാറിന്‍റെ വീട് മന്ത്രി എ.കെ. ശശീന്ദ്രൻ സന്ദർശിച്ചു. കൂടത്തായി മണിമുണ്ടയിലെ വീട്ടിലെത്തിയാണ് മന്ത്രി വീട്ടുകാരെ ആശ്വസിപ്പിച്ചത്. തിരുവമ്പാടി എംഎൽഎ ലിന്‍റോ ജോസഫും ഒപ്പമുണ്ടായിരുന്നു. സംസ്ഥാന സർക്കാരിന്‍റെ സഹായത്തിന്‍റെ ആദ്യ ഗഡു അഞ്ച് ലക്ഷം രൂപയുടെ ചെക്ക് ഇവർ കുടുംബാംഗങ്ങളെ ഏൽപ്പിച്ചു. തിങ്കളാഴ്ച രാത്രി 11 ഓടെയാണ് ഓമശേരി മുടൂരിൽ വച്ച് ജബ്ബാർ അപകടത്തിൽപ്പെട്ടത്. ബൈക്കിൽ യാത്ര ചെയ്യുകയായിരുന്ന ജബ്ബാറിന്‍റെ മുന്നിലേക്ക് കാട്ടുപന്നി ചാടിയതോടെ ബൈക്ക് നിയന്ത്രണം വിട്ട് മറിയുകയായിരുന്നു. ഗുരുതരമായി പരിക്കേറ്റ് ചികിത്സയിലായിരുന്ന ജബ്ബാർ ചൊവ്വാഴ്ച ഉച്ചയോടെയാണ് മരണത്തിന് കീഴടങ്ങിയത്.

ആഫ്രിക്കൻ ഒച്ച് ദുരീകരണം: ചക്കിട്ടപാറയിൽ പരിശീലന പരിപാടി സംഘടിപ്പിച്ചു

ചക്കിട്ടപാറ: ചക്കിട്ടപാറ പഞ്ചായത്തിലെ 10,11,12 വാർഡുകളിൽ രൂക്ഷമായ ആഫ്രിക്കൻ ഒച്ചിന്‍റെ ശല്യത്തിനെതിരേ കൃഷിഭവൻ ചക്കിട്ടപാറയുടെയും കൃഷി വകുപ്പ് ആത്മ കോഴിക്കോടിന്‍റെയും നേതൃത്വത്തിൽ നിർമാജന പരിശീലന പരിപാടി സംഘടിപ്പിച്ചു. പഞ്ചായത്ത്‌ പ്രസിഡന്‍റ് കെ. സുനിൽ ഉദ്ഘാടനം ചെയ്തു. ഒച്ച് നിർമാജനത്തിന് ഗ്രാമ പഞ്ചായത്തിന്‍റെ സഹായത്തോടെയും കർഷകരുടെ സഹകരണത്തോടെയും ത്വരിത പ്രവൃർത്തനങ്ങൾ സംഘടിപ്പിക്കുമെന്ന് അദ്ദേഹം പറഞ്ഞു. വൈസ് പ്രസിഡന്‍റ് ചിപ്പി മനോജ് അധ്യക്ഷത വഹിച്ചു. ബ്ലോക്ക് പഞ്ചായത്ത് മെമ്പർ ഗിരിജ ശശി, ഗ്രാമപഞ്ചായത്ത് ഭരണ സമിതി അംഗങ്ങളായ കെ.എ. ജോസ്‌ കുട്ടി, എം.എം. പ്രദീപൻ, ബിന്ദു സജി, സി.കെ. ശശി, വി.കെ. ബിന്ദു, ഇ.എം. ശ്രീജിത്ത്, കൃഷി ഓഫീസർ രശ്മനായർ, കർഷകരായ ബേബി കാപ്പുകാട്ടിൽ, ബാബു കൂനന്തടം, ജെയിംസ് തോട്ടുപുറം എന്നിവർ പ്രസംഗിച്ചു. ബ്ലോക്ക് ലെവൽ അഗ്രികൾച്ചർ നോഡൽ ഓഫീസർ ഡോ. വി. ശ്രീറാം ബോധവത്കരണ ക്ലാസ് നടത്തി. തുടർന്ന് ഒച്ചിന്‍റെ നിർമാർജനം സംബന്ധിച്ച് കാപ്പുകാട്ടിൽ കൃഷിയിടത്തിൽ ഫീൽഡ് ഡെമോൺസ്ട്രേഷൻ നടത്തി. കൃഷി ഉദ്യോഗസ്ഥരായ കെ. ഗിരീഷ് കുമാർ, ഇ. ലിനൂപ്, എം.സി. ബീന, ആൽമ ബിടിഎം എം .നീതു എന്നിവർ നേതൃത്വം നൽകി.

എഎപി നിൽപ്പ് സമരം നടത്തി

കോടഞ്ചേരി: ആന്‍റി ടോർച്ചർ ലോ നടപ്പാക്കണമെന്ന ആവശ്യവുമായി ആം ആദ്മി പ്രവർത്തകർ കോടഞ്ചേരി പോലീസ് സ്റ്റേഷനുമുൻപിൽ നിൽപ്പ് സമരം നടത്തി. പോലീസുകാർ നിയമം ലംഘിച്ച് പ്രവർത്തിക്കുന്പോൾ അതിനെതിരേ പ്രതികരിക്കാൻ നിയമമില്ലാത്തതുമൂലം ജനങ്ങൾ ബുദ്ധിമുട്ടുകയാണ്. ഇതിനു മാറ്റം വരണമെങ്കിൽ രാജ്യത്ത് ആന്‍റി ടോർച്ചർ ലോ ഉണ്ടാകണമെന്നും അതിന് വേണ്ടി എംപിമാരും എംഎൽഎമാരും ശ്രമിക്കണമെന്നും പാർട്ടി ആവശ്യപ്പെട്ടു. ഏബ്രഹാം വാമറ്റത്തിൽ, ഏലിയാസ് പാടത്തുകാട്ടിൽ, ലിൻസ് ജോർജ്, സിബി തോമസ് തുടങ്ങിയവർ നേതൃത്വം നൽകി.

സഹജീവി സ്നേഹത്തിന് കുഞ്ഞുമക്കളുടെ ഹൃദയത്തിൽ തൊട്ട വാക്കുകൾ

മുക്കം: ഷോക്കേറ്റ് വീണ പൊന്മാന്‍റെ ജീവന് പോലും പൊന്നും വിലയുണ്ടെന്നറിഞ്ഞ് സഹജീവി സ്നേഹത്തിന്‍റെ ഉദാത്ത മാതൃകയായി സിപിആർ നൽകി രക്ഷപ്പെടുത്തിയ അഗ്നിരക്ഷാ ഉദ്യോഗസ്ഥന് അഭിനന്ദനമറിയിച്ചു സ്കൂൾ കുട്ടികൾ തയാറാക്കിയ വീഡിയോ സമൂഹമാധ്യമങ്ങളിൽ വൈറലാവുന്നു. മുക്കം അഗ്നിരക്ഷാ നിലയത്തിലെ ഉദ്യോഗസ്ഥനായ എൻ. ജയ്കിഷിന് തൊണ്ടിമ്മൽ ഗവ. എൽപി സ്കൂളിലെ നാലാം ക്ലാസിലെ കുരുന്നുകൾ അഭിനന്ദനമറിയിച്ചു തയാറാക്കിയ വീഡിയോ ആണ് എല്ലാവരുടെയും മനം കവരുന്നത്. നാലാം ക്ലാസിലെ മലയാള പുസ്തകത്തിലെ സഹജീവി സ്നേഹത്തെനപ്പറ്റി പഠിപ്പിക്കുന്നതിനിടെ അധ്യാപികയായ സ്മിന മൊബൈലിൽ കാണിച്ചു നൽകിയ വീഡിയോയുടെ പശ്ചാത്തലത്തിലാണ് ഈ അഭിനന്ദനമറിയിക്കുന്നതെന്നു കുട്ടികൾ വീഡിയോയിലൂടെ പറയുന്നുണ്ട്. പരസ്പരം കൊല ചെയ്യപ്പെടുന്ന യുദ്ധങ്ങളുള്ള ഈ കാലഘട്ടത്തിലാണ് നിസാരമെന്ന് തോന്നുന്ന ഒരു പൊന്മാന്‍റെ ജീവന് പോലും പ്രാധാന്യം കല്പിച്ച് രക്ഷപ്പെടുത്തുന്നത്. ഇത് കുട്ടികളായ ഞങ്ങളുടെ മനസിനെ വല്ലാതെ ആകർഷിച്ചു എന്നും ആ രക്ഷാ പ്രവർത്തനത്തിന് അഭിനന്ദനമറിയിക്കുന്നു എന്നുമാണ് നിഷ്കളങ്കരായ കുരുന്നുകൾ വീഡിയോയിൽ വ്യക്തമാക്കുന്നത്. മാത്രമല്ല സമയം കിട്ടുമ്പോൾ സ്‌കൂളിലെത്തി അവരെ കാണണമെന്ന ആവശ്യം കൂടി അറിയിച്ചാണ് വീഡിയോ അവസാനിപ്പിക്കുന്നത്.

കല്ലുത്താൻകടവിൽ പച്ചക്കറി മാർക്കറ്റ്‌ ഉദ്ഘാട‌നത്തിന് ഒരുങ്ങുന്നു

മാർക്കറ്റ്‌ നിർമാണം മൂന്നാഴ്‌ചക്കുള്ളിൽ പൂർത്തിയാവും കോഴിക്കോട്: കല്ലുത്താൻകടവിൽ ആധുനിക സംവിധാനങ്ങളും സൗകര്യങ്ങളുമായി നിർമിച്ച വിൽപന കേന്ദ്രം ഉദ്‌ഘാടനത്തിനൊരുങ്ങുന്നു. പാളയത്ത് ഇപ്പോള്‍ പ്രവര്‍ത്തിച്ചുകൊണ്ടിരിക്കുന്ന മാര്‍ക്കറ്റാണ് ഒരു വിഭാഗം വ്യാപാരികളുടെ പ്രതിഷേധങ്ങള്‍ക്കിടയിലും ഇങ്ങോട്ട് മാറ്റാന്‍ ഒരുങ്ങുന്നത്.പച്ചക്കറി മാർക്കറ്റ്‌ നിർമാണം മൂന്നാഴ്‌ചക്കുള്ളിൽ പൂർത്തിയാവും. വയറിംഗ് പ്രവൃത്തി അവസാന ഘട്ടത്തിലാണ്. നിലമൊരുക്കൽ, സാനിറ്ററി സജ്ജീകരിക്കൽ എന്നിവ അടുത്ത ദിവസങ്ങളിൽ പൂർത്തിയാക്കും. കല്ലുത്താൻ കടവ്‌ കോളനി നിവാസികൾക്കായി ഫ്ലാറ്റും സ്ഥലപരിമിതിയിൽ പ്രവർത്തിക്കുന്ന പാളയം പച്ചക്കറി മാർക്കറ്റ്‌ കല്ലുത്താൻ കടവിലേക്ക്‌ മാറ്റി നിർമിക്കാനുമുള്ള പദ്ധതി 2005ലാണ്‌ കോർപറേഷൻ ആവിഷ്‌കരിച്ചത്‌. കാഡ്‌കോ (കല്ലുത്താൻ കടവ്‌ ഏരിയ ഡെവലപ്പ്‌മെന്‍റ് കന്പനി)യുമായി സഹകരിച്ചുള്ള പദ്ധതിയ്‌ക്ക്‌ 2009 ൽ കല്ലിട്ടുവെങ്കിലും സ്ഥലം ഏറ്റെടുക്കുന്നതിലെ പ്രശ്‌നങ്ങൾ കാലതാമസമുണ്ടാക്കി. 100 കോടി രൂപയുടെ പദ്ധതിയിൽ കാഡ്‌കോയാണ്‌ ഫ്ലാറ്റ്‌ നിർമിച്ചത്‌. ഇത് 2019 ൽ തുറന്നുനൽകി. മുപ്പത്തഞ്ചര വർഷത്തേക്ക്‌ പഴം–പച്ചക്കറി മാർക്കറ്റിന്‍റെയും അനുബന്ധ കെട്ടിടങ്ങളുടെയും നടത്തിപ്പ്‌ ചുമതലയും കാഡ്‌കോയ്‌ക്കാണ്‌. വർഷം നിശ്ചിത ഫീസ്‌ കോർപറേഷന്‌ നൽകണം. അഞ്ചര ഏക്കറിൽ ആറ്‌ കെട്ടിടങ്ങളിലായാണ് മാർക്കറ്റും അനുബന്ധസംവിധാനങ്ങളും വരുന്നത്‌. 3.29 ഏക്കർ സ്ഥലമാണ് കോർപറേഷന്‍റെ ഉടമസ്ഥതയിലുള്ളത്‌. 25 കോടിയോളം മുടക്കി ഏറ്റെടുത്ത 1.78 ഏക്കർ സ്ഥലം കഴിഞ്ഞ വർഷം കോർപറേഷൻ കൈമാറി. കെട്ടിടങ്ങളിൽ താഴെ നിലയിലാണ് പച്ചക്കറി മാർക്കറ്റ്‌. ശീതീകരണ സംവിധാനം, വിശ്രമ കേന്ദ്രം തുടങ്ങിയ എല്ലാ സൗകര്യങ്ങളുമുണ്ട്‌. അതേസമയം പാളയത്തെ പച്ചക്കറിമാര്‍ക്കറ്റ് ഇവിടേക്ക് മാറ്റുന്നതിനെതിരേ വ്യാപാരികള്‍ പ്രതിഷേധത്തിലാണ്. വില്‍പന കുത്തനെ കുറയുമെന്നും ആളുകള്‍ക്ക് കല്ലുത്താന്‍ കടവിലേക്ക് എത്തുന്നതിന് ബുദ്ധിമുട്ടേറെയുമാണെന്ന് ഇവര്‍ പരാതിപ്പെടുന്നു. പുതിയ മാർക്കറ്റിൽ 300 ലധികം കടമുറികളാണുള്ളത്‌. പാളയത്ത്‌ കോർപറേഷൻ വാടക കെട്ടിടങ്ങളിലെ 153 കച്ചവടക്കാരെയാണ് ഇങ്ങോട്ട്‌ മാറ്റുക. ഇതിന്‍റെ വാടക കോർപറേഷനാണ്നിശ്ചയിക്കുക. ഇതിന്‌ പുറമെ 40 ഉന്തുവണ്ടിക്കാരും 80 തട്ടുകച്ചവടം ചെയ്യുന്നവരുമുണ്ട്‌. ഓപ്പൺ മാർക്കറ്റിൽ ഈ വിഭാഗത്തിനെല്ലാം സൗകര്യമുണ്ട്‌. മറ്റ്‌ കെട്ടിടങ്ങളിലുള്ളവർക്കും ഇവിടെ കച്ചവട മുറികൾ കിട്ടും. 162 സെന്‍റിലാണ്പാളയം മാർക്കറ്റ്‌ പ്രവർത്തിക്കുന്നത്‌. 50 ഉം 60ഉം ചതുരശ്രഅടി വീസ്‌തീർണത്തിലുള്ള കടമുറികളുണ്ട്‌. കല്ലുത്താൻ കടവിൽ അഞ്ചര ഏക്കറിൽ ഒരു കടമുറിക്ക്‌ കുറഞ്ഞത്‌ 100 ചതുരശ്രഅടി വിസ്‌തീർണമുണ്ട്‌. താഴെ നിലയിലാണ് പഴം– പച്ചക്കറി മാർക്കറ്റ്‌. മുകളിൽ മറ്റ്‌ ബിസിനസ്‌ ആവശ്യങ്ങൾക്ക്‌ മുറി നൽകും. 500 വാഹനങ്ങൾക്ക്‌ പാർക്ക്‌ ചെയ്യാം.

വിലങ്ങാട് പുനരധിവാസത്തിന് എറണാകുളം അങ്കമാലി അതിരൂപതയുടെ കൈത്താങ്ങ്

വിലങ്ങാട്: വിലങ്ങാട് പുനരധിവാസ പ്രവര്‍ത്തനങ്ങളുടെ ഭാഗമായി എറണാകുളം അങ്കമാലി അതിരൂപതയുടെ നേതൃത്വത്തില്‍ നിര്‍മിച്ചു നല്‍കുന്ന ഏഴ് ഭവനങ്ങളില്‍ നാലെണ്ണത്തിന്‍റെ തറക്കല്ലിടല്‍ എറണാകുളം സോഷ്യല്‍ സര്‍വീസ് സൊസൈറ്റി ഡയറക്ടര്‍ ഫാ. ജോസ് കുളത്തുവള്ളിലിന്‍റെ നേതൃത്വത്തില്‍ നടത്തി. ഇതിനുമുമ്പ് രണ്ട് വീടുകളുടെ തറക്കല്ലിടല്‍ കഴിഞ്ഞ മാസം നടത്തിയിരുന്നു. ശേഷിക്കുന്ന ഒരു വീടിന്‍റെ തറക്കല്ലിടല്‍ അടുത്ത ആഴ്ച നടക്കും. വിലങ്ങാട്, കണ്ണൂര്‍, ചക്കിട്ടപ്പാറ എന്നീ പ്രദേശങ്ങളിലാണ് ഭവന നിര്‍മാണം പുരോഗമിക്കുന്നത്. ഫാ. വില്‍സണ്‍ മുട്ടത്തുകുന്നേല്‍, ഫാ. പ്രിയേഷ് തേവടിയില്‍, ഫാ. സായി പാറന്‍കുളങ്ങര, സിദ്ധാര്‍ഥ് എസ്. നാഥ്, ആല്‍ബിന്‍ സക്കറിയാസ് എന്നിവര്‍ നേതൃത്വം നല്‍കി.

കുട്ടികൾ ഡ്രൈവർമാരായി : രക്ഷിതാക്കൾക്ക് കാൽ ലക്ഷത്തിലേറെ പിഴ ചുമത്തി

നാദാപുരം: ലൈസൻസില്ലാതെ ഇരുചക്ര വാഹനങ്ങളുമായി റോഡിലിറങ്ങിയ വിദ്യാർഥികളുടെ രക്ഷിതാക്കൾക്ക് കോടതി വൻ പിഴ വിധിച്ചു. നാദാപുരം പോലീസ് രജിസ്റ്റർ ചെയ്ത കേസുകളിലാണ് ഒന്നാം ക്ലാസ് മജിസ്ട്രേറ്റ് അമൃത അരവിന്ദ് ശിക്ഷ വിധിച്ചത്. അഞ്ച് കേസുകളിലായി ഓരോ രക്ഷിതാക്കൾക്കും 25,500 രൂപയാണ് പിഴ ചുമത്തിയത്. നാദാപുരം സ്റ്റേഷൻ പരിധിയിൽ 2025 മാർച്ച് 20നു പുളിക്കൂൽ റോഡിലും, ഏപ്രിൽ ഒന്പതിനു കസ്‌തുരിക്കുളത്തും മേയ് 18നു തെരുവൻപറമ്പിലും ജൂൺ എട്ടിനു കുമ്മങ്കോടും ജൂൺ 16നു കല്ലാച്ചി പൈപ്പ് ലൈൻ റോഡിലുമാണ് കുട്ടി ഡ്രൈവർമാരെ എസ്ഐ എം.പി. വിഷ്‌ണുവിന്‍റെ നേതൃത്വത്തിൽ പിടികൂടി കേസെടുത്തത്. 16, 17 വയസ് പ്രായമുള്ളവരായിരുന്നു ഡ്രൈവർമാർ. കസ്റ്റഡിയിലെടുത്ത ഇരു ചക്ര വാഹനങ്ങളുടെ ഉടമസ്ഥരെ കണ്ടെത്തുകയും കുട്ടികൾക്ക് വാഹനം നൽകിവർക്ക് എതിരേ കേസെടുത്ത് കുറ്റപത്രം കോടതിയിൽ സമർപ്പിക്കുകയായിരുന്നു. ഇത്തരം ഒട്ടേറെ കേസുകൾ ഇനിയും വിചാരണയ്ക്ക് എടുക്കാൻ ബാക്കിയുണ്ട്. ലൈസൻസില്ലാത്ത കുട്ടികൾ ഹെൽമെറ്റ് പോലുമില്ലാതെ വണ്ടികളുമായി ഇറങ്ങി അപകടങ്ങൾ സൃഷ്ടിക്കുന്നത് ഒഴിവാക്കാനാണ് പോലീസ് കുട്ടി ഡ്രൈവർമാരെ കണ്ടെത്തി കേസെടുത്തു തുടങ്ങിയത്.

കുരിശുപള്ളി തിരുനാളിന് കൊടിയേറി

കോഴിക്കോട്: കോഴിക്കോട് രൂപത സാന്താക്രൂസ് കുരിശുപള്ളിയില്‍ തിരുനാള്‍ ആരംഭിച്ചു. 14നു സമാപിക്കും. കോഴിക്കോട് നഗരമധ്യത്തിലെ അതിപുരാതന തീര്‍ഥാടനകേന്ദ്രമാണിത്. ദേവമാതാ കത്തീഡ്രല്‍ വികാരി ഫാ. ജെറോം ചിങ്ങന്തറ കൊടിയേറ്റ് നിര്‍വഹിച്ചു. ഇന്ന് വൈകുന്നേരം അഞ്ചിന് കരുണകൊന്തയും തുടര്‍ന്ന് 5.30ന് ആഘോഷമായ പൊന്തിഫിക്കല്‍ കുര്‍ബാനയും നൊവേനയും ഉണ്ടാകും. കോഴിക്കോട് ആര്‍ച്ച് ബിഷപ് ഡോ. വര്‍ഗീസ് ചക്കാലയ്ക്കല്‍ മുഖ്യകാര്‍മ്മീകതം വഹിക്കും. തുടര്‍ന്ന് പ്രദക്ഷിണം, പരിശുദ്ധ കുര്‍ബാനയുടെ ആശീര്‍വാദം. നാളെ വൈകുന്നേരം അഞ്ചിന് കരുണകൊന്ത. 5.30ന് ആഘോഷമായ ദിവ്യബലി, നൊവേന. അതിരൂപത വികാരി ജനറാള്‍ മോണ്‍ ജെന്‍സണ്‍ പുത്തന്‍വീട്ടില്‍ മുഖ്യകാര്‍മീകത്വം വഹിക്കുമെന്ന് ഫാ. ജെറോം ചിങ്ങന്തറ, സഹവികാരി ഫാ. ഷിന്‍റോ ആന്‍റണി എന്നിവര്‍ അറിയിച്ചു.

കായികവിനോദം ലഹരിയാക്കി പഠനസമ്മര്‍ദം കുറയ്ക്കാം: സ്നേഹില്‍ കുമാര്‍ സിംഗ്

പാറോപ്പടി: വിദ്യാഥികളില്‍ പഠനസമ്മര്‍ദം കുറയ്ക്കാന്‍ കായികവിനോദങ്ങള്‍ ലഹരിയാക്കണമെന്ന് ജില്ലാ കളക്ടര്‍ സ്നേഹില്‍ കുമാര്‍ സിംഗ് ഐഎഎസ് അഭിപ്രായപ്പെട്ടു. സില്‍വര്‍ ഹില്‍സ് ഹയര്‍ സെക്കൻഡറി വിദ്യാലയത്തിലെ 17-ാമത് സില്‍വര്‍ ഹില്‍സ് ട്രോഫി സൗത്ത് ഇന്ത്യാ ഇന്‍റര്‍ സ്‌കൂള്‍ ബാസ്‌കറ്റ്‌ബോള്‍ ടൂര്‍ണമെന്‍റ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കായികരംഗത്തെ ആരോഗ്യകരമായ മത്സരം വിദ്യാര്‍ത്ഥികളെ മികച്ച പൗരന്മാരാക്കി വളര്‍ത്തിയെടുക്കാനും ലഹരിയുടെ നീരാളിപിടുത്തത്തില്‍ നിന്നും അകറ്റി നിര്‍ത്താനും സഹായിക്കുമെന്നും അദ്ദേഹം കൂട്ടിച്ചേര്‍ത്തു.ഒളിമ്പ്യന്‍ വി. മുഹമ്മദ് അജ്മല്‍ ചടങ്ങില്‍ വിശിഷ്ടാതിഥിയായി മുഖ്യപ്രഭാഷണം നടത്തി. സില്‍വര്‍ ഹില്‍സ് സ്ഥാപനങ്ങളുടെ മാനേജര്‍ ഫാ. അഗസ്റ്റിന്‍ കെ. മാത്യു സിഎംഐ അധ്യക്ഷത വഹിച്ചു. കേരള ബാസ്‌കറ്റ്ബോള്‍ അസോസിയേഷന്‍ ജനറല്‍ സെക്രട്ടറി പി.സി. ആന്‍റണി അനുമോദന പ്രഭാഷണം നടത്തി. സില്‍വര്‍ ഹില്‍സ് പബ്ലിക് സ്‌കൂള്‍ പ്രിന്‍സിപ്പല്‍ ഫാ. മാത്യു കളപ്പുരയില്‍ സിഎംഐ, കെബിഎ ജോയിന്‍റ് സെക്രട്ടറി ജോസ് സെബാസ്റ്റ്യന്‍ എന്നിവര്‍ മുഖ്യാതിഥികള്‍ക്ക് ഉപഹാരങ്ങള്‍ സമര്‍പ്പിച്ചു. സ്‌കൂള്‍ ജനറല്‍ ക്യാപ്റ്റന്‍ വിഘ്‌നേഷ് ശിവ പ്രതിജ്ഞ ചൊല്ലിക്കൊടുത്തു. കാഞ്ഞങ്ങാട് ക്രൈസ്റ്റ് സിഎംഐ പബ്ലിക് സ്‌കൂള്‍ പ്രിന്‍സിപ്പല്‍ ഫാ. ജോര്‍ജ് പുഞ്ചയില്‍ സിഎംഐ, സ്‌കൂള്‍ കോര്‍ഡിനേറ്റര്‍ പി.കെ. ശശിലാല്‍, ബാസ്‌കറ്റ്‌ബോള്‍ തീം സോംഗ് രചിച്ച ചെല്ലേത്ത് റോഷന്‍ ജോണ്‍ എന്നിവര്‍ സന്നിഹിതരായി. പ്രിന്‍സിപ്പല്‍ ഫാ. ജോണ്‍ മണ്ണാറത്തറ സിഎംഐ, പിടിഎ ജോയിന്‍റ് സെക്രട്ടറി ടി. ശ്രീലക്ഷ്മി, സ്‌കൂള്‍ സ്പീക്കര്‍ പി. ശ്രാവണ എന്നിവർ പ്രസംഗിച്ചു. ഇന്ത്യയിലെ മികച്ച 27 ടീമുകള്‍ പങ്കെടുക്കുന്ന ബാസ്‌ക്കറ്റ്‌ബോള്‍ ടൂര്‍ണമെന്‍റിന്‍റെ ഉദ്ഘാടന മത്സരത്തില്‍ ആണ്‍കുട്ടികളുടെ വിഭാഗത്തില്‍ സില്‍വര്‍ ഹില്‍സ് എച്ച്എസ്എസ് കോഴിക്കോട്, ഡോണ്‍ ബോസ്‌കോ എച്ച്എസ്എസ് ഇരിങ്ങാലക്കുടയെ (72-20) പരാജയപ്പെടുത്തി. മിനി ബോയ്‌സ് വിഭാഗത്തില്‍ സില്‍വര്‍ ഹില്‍സ് എച്ച്എസ്എസ്, മോണിംഗ് സ്റ്റാര്‍ ഗൂഡല്ലൂരിനെ പരാജയപ്പെടുത്തി ( 34-27). മറ്റൊരു മത്സരത്തില്‍ ആണ്‍കുട്ടികളുടെ വിഭാഗത്തില്‍ ലിയോ 13 എച്ച്എസ്എസ് ആലപ്പുഴ ആതിഥേയരായ സില്‍വര്‍ ഹില്‍സ് എച്ച്എസ്എസ് ബി ടീമിനെ പരാജയപ്പെടുത്തി (52-43).

അരിപ്പാറ വെള്ളച്ചാട്ടത്തിൽ യുവാവ് മുങ്ങി മരിച്ചു

തിരുവമ്പാടി: അരിപ്പാറ വെള്ളച്ചാട്ടത്തിൽ യുവാവ് മുങ്ങി മരിച്ചു. കൂരാച്ചുണ്ട് പാത്തിപ്പാറ സ്വദേശി കൊച്ചുവീട്ടിൽ ജസ്റ്റിൻ (26) ആണ് മരിച്ചത്. ഇന്നലെ വൈകുന്നേരം 5.30 ഓടെയാണ് അപകടം. സുഹൃത്തുമായാണ് ജസ്റ്റിൻ ഇവിടെ എത്തിച്ചേർന്നത്. നീന്തുന്നതിനിടെ കയത്തിൽ മുങ്ങി പോവുകയായിരുന്നു. ഉടനെ കൂടെയുണ്ടായിരുന്ന സുഹൃത്ത് ബഹളം വച്ച് ആളുകളെ അറിയിക്കുകയും സമീപത്തുണ്ടായിരുന്ന ലൈഫ് ഗാർഡ് അവിടെയെത്തി യുവാവിനെ മുങ്ങിയെടുക്കുകയായിരുന്നു. മൃതദേഹം മെഡിക്കൽ കോളജിലേക്ക് മാറ്റി. കൊച്ചു വീട്ടിൽ വിൽസൺ- സിനി ദമ്പതികളുടെ മകനാണ്. സഹേദരങ്ങൾ: ജോബിൻ, ജെയിസ്.

ഗതാഗതം നിരോധിച്ചു

കോഴിക്കോട്: ഓമശേരി-കോടഞ്ചേരി റോഡില്‍ ടാറിംഗ് നടക്കുന്നതിനാല്‍ ഇന്ന് മുതല്‍ പ്രവൃത്തി പൂര്‍ത്തിയാകും വരെ ഓമശേരി-പെരിവില്ലി-വേനപ്പാറ-അമ്പലത്തിങ്ങല്‍-മണിപ്പാല്‍ ഭാഗത്ത് ഗതാഗതം പൂര്‍ണമായും നിരോധിച്ചതായി പൊതുമരാമത്ത് വകുപ്പ് എക്‌സിക്യൂട്ടീവ് എൻജിനീയര്‍ അറിയിച്ചു. കോടഞ്ചേരി ഭാഗത്തേക്കുള്ള വാഹനങ്ങള്‍ മൈക്കാവ് വഴിയും ശാന്തിനഗര്‍ തോട്ടത്തിന്‍ കടവ് വഴിയും പോകണം.

കൈത്താങ്ങായി പെൻഷനേഴ്സ് കൂട്ടായ്മ

കൊയിലാണ്ടി: ഭിന്നശേഷിക്കാർക്ക് കൈത്താങ്ങായി പെൻഷനേഴ്സ് കൂട്ടായ്മ. അഭയം ചേമഞ്ചേരിയിലെ ഒരു മാസത്തെ ഭക്ഷണച്ചെലവ് കെഎസ്എസ്പിയു പന്തലായനി ബ്ലോക്ക് കമ്മിറ്റി ഏറ്റെടുത്തു. പ്രതിദിനം 5000 രൂപ നിരക്കിൽ ഒരു ലക്ഷം രൂപ ഇതിനായി പ്രവർത്തകർ അഭയം സ്കൂളിലേക്ക് കൈമാറി. പരിപാടിയുടെ ഔപചാരിക ഉദ്ഘാടനം അഭയം ഓഡിറ്റോറിയത്തിൽ നടന്നു. പന്തലായി ബ്ലോക്ക് കമ്മിറ്റി പ്രസിഡന്‍റ് എൻ.കെ.കെ. മാരാർ ഉദ്ഘാടനകർമ്മം നിർവഹിച്ചു. മുസ്തഫ ഒലീവ് അധ്യക്ഷത വഹിച്ചു. സംസ്ഥാന സമിതി അംഗം ടി.വി. ഗിരിജ മുഖ്യ പ്രഭാഷണം നടത്തി.

എഎപി നിൽപ്പ് സമരം നടത്തി

തിരുവമ്പാടി: ആന്‍റി ടോർച്ചർ നിയമം കേരളത്തിൽ നടപ്പാക്കണമെന്നാവശ്യപ്പെട്ടു ആം ആദ്മി പാർട്ടി പ്രവർത്തകർ തിരുവമ്പാടി പോലീസ് സ്റ്റേഷനു മുമ്പിൽ നിൽപ്പ് സമരം നടത്തി. ഗുണ്ടകളും ക്രിമിനലുകളും നാട്ടിൽ സ്വൈര്യവിഹാരം നടത്തുമ്പോൾ നിരപരാധികളെ തടങ്കലിൽ വച്ച് പീഡിപ്പിക്കുന്നത് ഒരു തുടർക്കഥയാവുകയാണ്. ഇതിന് പരിഹാരമായി ആന്‍റി ടോർച്ചർ നിയമം നടപ്പാക്കുക മാത്രമേ വഴിയുള്ളുവെന്ന് ആം ആദ്മി പാർട്ടി അഭിപ്രായപ്പെട്ടു. തോമസ് പുത്തൻപുരക്കൽ, ബേബി തരണിയിൽ, ജോർജ് പുതിയടത്ത്, ജിമ്മി അലക്സ്‌ ഉഴുന്നാലിൽ, ജോസ് മുള്ളനാനിയിൽ എന്നിവർ നേതൃത്വം നൽകി.

ലഹരി വിൽപനയ്‌ക്കെതിരേ ശക്തമായ നടപടി വേണമെന്ന്

കൂരാച്ചുണ്ട്: മലയോര മേഖലകളിലെ വിവിധ പ്രദേശങ്ങളിൽ വ്യാപകമായി നടക്കുന്ന അനധികൃത മദ്യം, മറ്റ് ലഹരി വസ്തുക്കളുടെ വിൽപനയ്ക്കെതിരേ ശക്തമായ നടപടികൾ സ്വീകരിക്കണമെന്ന് കെസിബിസി മദ്യ വിരുദ്ധ സമിതി രൂപതാ കമ്മിറ്റി യോഗം ആവശ്യപ്പെട്ടു. ലഹരി വിൽപന തടയാൻ പോലീസ്, എക്സൈസ് വകുപ്പ് ഉദ്യോഗസ്ഥർ രാത്രികാല പെട്രോളിംഗ് നടത്തണം. കഴിഞ്ഞ മൂന്ന് വർഷങ്ങളായി മലപ്പുറം കളക്ടറേറ്റിന് മുന്നിൽ കേരളാ മദ്യനിരോധന സമിതി നടത്തുന്ന സത്യഗ്രഹസമരം അവസാനിപ്പിക്കുന്നതിനായി സർക്കാർ തയാറകണമെന്നും അല്ലാത്തപക്ഷം കേരള മദ്യനിരോധന സമിതിയോടൊപ്പം ചേർന്ന് കെസിബിസി മദ്യ വിരുദ്ധ സമിതി പ്രത്യക്ഷ സമരപരിപാടികൾ സംഘടിപ്പിക്കുവാനും യോഗം തീരുമാനിച്ചു. രൂപതാ ഡയറക്ടർ ഫാ. ജിസോ മച്ചുകുഴിയിൽ ഉദ്ഘാടനം ചെയ്തു. രൂപതാ പ്രസിഡന്‍റ് കുര്യൻ ചെമ്പനാനി അധ്യക്ഷത വഹിച്ചു. സെക്രട്ടറി ജോളി ഉണ്ണ്യാപ്പള്ളി, റോയ് മുരിക്കോലിൽ, ടി.ടി. തോമസ്, ഏബ്രഹാം മണലോടി, എൻ.വി. ഏബ്രഹാം, വി.ജെ. മത്തായി, കെ.സി. ജോസഫ്, ജോർജ് വാഴയിൽ തുടങ്ങിയവർ പ്രസംഗിച്ചു.

എലത്തൂരിലെ റോഡ് പ്രവൃത്തികള്‍ ഉടന്‍ പൂര്‍ത്തിയാക്കാന്‍ നിര്‍ദേശം

കോഴിക്കോട്: എലത്തൂര്‍ മണ്ഡലത്തിലെ റോഡ് പ്രവൃത്തികള്‍ ഉടന്‍ പൂര്‍ത്തിയാക്കാന്‍ മന്ത്രി എ.കെ. ശശീന്ദ്രന്‍ തദ്ദേശ സ്വയംഭരണ വകുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കി. മന്ത്രിയുടെ അധ്യക്ഷതയില്‍ കോഴിക്കോട് ഗവ. ഗസ്റ്റ് ഹൗസില്‍ ചേര്‍ന്ന എലത്തൂര്‍ മണ്ഡലത്തിലെ റോഡ് പ്രവൃത്തികളുടെ അവലോകന യോഗത്തിലാണ് നിര്‍ദേശം. ഗ്രാമീണ റോഡ് പുനരുദ്ധാരണ പദ്ധതി, എംഎല്‍എയുടെ ആസ്തി വികസന ഫണ്ടുപയോഗിച്ച് പൂര്‍ത്തിയാക്കുന്ന പദ്ധതികള്‍, എംഎല്‍എയുടെ പ്രദേശിക വികസന ഫണ്ടുപയോഗിച്ചുള്ള പദ്ധതികള്‍, മറ്റ് വകുപ്പുകളുടെ നേതൃത്വത്തിലുള്ള റോഡ് പദ്ധതികള്‍ എന്നിവയുടെ പുരോഗതികളാണ് യോഗം വിലിരുത്തിയത്. പുതിയ പദ്ധതികളുടെ ടെന്‍ഡര്‍ നടപടികള്‍ ഉടന്‍ പൂര്‍ത്തിയാക്കണമെന്നും 30നകം പ്രവൃത്തി ആരംഭിക്കാന്‍ ആവശ്യമായ നടപടികള്‍ സ്വീകരിക്കണമെന്നും മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി. യോഗത്തില്‍ എലത്തൂര്‍ മണ്ഡലത്തിലെ ഗ്രാമപഞ്ചായത്ത് പ്രസിഡന്‍റുമാര്‍, കോര്‍പറേഷന്‍ കൗണ്‍സിലര്‍മാര്‍, സ്ഥിരം സമിതി അംഗങ്ങള്‍, മെമ്പര്‍മാര്‍, എക്‌സി. എൻജിനീയര്‍മാര്‍, വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

വേസ്റ്റ് ബിൻ വിതരണം ചെയ്തു

പുല്ലൂരാംപാറ: പൊന്നാങ്കയം എസ്എൻഎംഎ എൽപി സ്കൂളിൽ ചങ്ക്സ് പുല്ലൂരാംപാറ എന്ന സൗഹൃദ കൂട്ടായ്മ വേസ്റ്റ് ബിൻ വിതരണം ചെയ്തു. പിടിഎ പ്രസിഡന്‍റ് സോണി മണ്ഡപത്തിൽ, സ്കൂൾ ഹെഡ്മിസ്ട്രസ് പി. റാണി എന്നിവർ ഏറ്റുവാങ്ങി. ചടങ്ങിൽ ലിജോ കുന്നേൽ, ലാലിച്ചൻ പുല്ലംപ്ലാവിൽ, ഷിജു ചെമ്പനാനിയിൽ, അനിൽ തേക്കുംകാട്ടിൽ, ജോസ് ഒലക്കേങ്കിൽ, ബൈജു എമ്മാനുവേൽ, ഷാജി വാഴേപ്പറമ്പിൽ, സോണി ഇടവാക്കൽ, ശില്പ സുരേഷ് ബാബു, പി.എസ്. അജയ്, ദിൽഷ രവീന്ദ്രൻ എന്നിവർ പങ്കെടുത്തു.

പ്രതിഷേധ പ്രകടനം നടത്തി

കോഴിക്കോട്: പോസ്റ്റ് ഓഫീസുകൾ അടച്ചുപൂട്ടുന്നതിനെതിരേ എഫ്എൻപിഒ കോഴിക്കോട് ഡിവിഷൻ പ്രതിഷേധ പ്രകടനം നടത്തി. കോഴിക്കോട് സീനിയർ പോസ്റ്റൽ സൂപ്രണ്ട് ഓഫീസിലേക്കാണ് പ്രതിഷേധ പ്രകടനം നടത്തിയത്. നോൺ ഡെലിവറി ബ്രാഞ്ച് ഓഫീസുകളും, നോൺ ഡെലിവറി സബ് പോസ്റ്റ് ഓഫീസുകളും വ്യാപകമായി പൂട്ടിക്കൊണ്ടിരിക്കുകയാണ്. ഇതിന്‍റെ ഭാഗമായി ദേവഗിരി കോളജിലെ ബ്രാഞ്ച് ഓഫീസ്, തളി സബ് പോസ്റ്റ്ഓഫീസ് എന്നിവ പൂട്ടിക്കഴിഞ്ഞു. നോൺ ഡെലിവറി ഓഫീസായ സിറ്റി പോസ്റ്റ് ഓഫീസ്, പരപ്പിൽ പോസ്റ്റ് ഓഫീസ്, പേട്ട പോസ്റ്റ് ഓഫീസ്, എസ്ആർകെ മിഷൻ ബ്രാഞ്ച് ഓഫീസ്, വൃന്ദാവൻ കോളനി ബ്രാഞ്ച് ഓഫീസ് എന്നിവ അടച്ചു പൂട്ടൽ ഭീഷണിയിലാണ്. അശാസ്ത്രീയമായി നടപ്പാക്കുന്ന ഇത്തരം നടപടികൾ നിർത്തിവക്കണമെന്ന് ഐഎൻടിയുസി സംസ്ഥാന വൈസ് പ്രസിഡന്‍റ് അഡ്വ. എം. രാജൻ ഉദ്ഘാടന പ്രസംഗത്തിൽ ആവശ്യപ്പെട്ടു. ഹൈദരലി അധ്യക്ഷത വഹിച്ചു.

ജേണലിസ്റ്റ് ക്രിക്കറ്റ് ലീഗ്: കാലിക്കട്ട് പ്രസ് ക്ലബ് ടീം ജഴ്‌സി പ്രകാശനം ചെയ്തു

കോഴിക്കോട്: വയനാട് കൃഷ്ണഗിരി സ്‌റ്റേഡിയത്തില്‍ നടക്കുന്ന ജേണലിസ്റ്റ് ക്രിക്കറ്റ് ലീഗില്‍ പങ്കെടുക്കുന്ന കാലിക്കട്ട് പ്രസ് ക്ലബ് ടീം പ്രഖ്യാപനവും ജഴ്‌സി പ്രകാശനവും ഷാഫി പറമ്പില്‍ എംപി നിര്‍വഹിച്ചു. വൈജാത്യങ്ങള്‍ക്കിടയിലും എല്ലാവരെയും ഒന്നിപ്പിക്കാന്‍ കായികവിനോദങ്ങള്‍ക്ക് കഴിയുമെന്ന് അദ്ദേഹം പറഞ്ഞു. വാര്‍ത്തകളുടെ കാര്യത്തില്‍ വലിയ മത്സരങ്ങള്‍ നടക്കുന്ന കാലത്ത് സ്‌പോര്‍ട്‌സ്മാന്‍ സ്പിരിറ്റ് നഷ്ടപ്പെടാതിരിക്കാന്‍ ഇത്തരം മത്സരങ്ങള്‍ക്ക് കഴിയുമെന്നും അദ്ദേഹം കൂട്ടിച്ചേര്‍ത്തു. പ്രസ് ക്ലബ് പ്രസിഡന്‍റ് ഇ.പി മുഹമ്മദ് അധ്യക്ഷത വഹിച്ചു. ഇന്ത്യ ഫസ്റ്റ് സാറ്റലൈറ്റ് കമ്യൂണിക്കേഷന്‍സ് എഡിറ്റോറിയല്‍ ഡയറക്ടര്‍ അഭിലാഷ് നായര്‍, കണ്ടന്‍റ് മാനേജര്‍ കെ. ഉണ്ണികൃഷ്ണന്‍, ലെയ്‌സണ്‍ ഓഫീസര്‍ ഇ. വിനോദ്കുമാര്‍, ടീം ക്യാപ്റ്റന്‍ സി.വി. മുഹമ്മദ് നൗഫല്‍ പ്രസംഗിച്ചു.

മൈജി "മാസ് ഓഫറുകൾ മാസ് വിലക്കുറവ്' സെയിൽ 14 വരെ

കോഴിക്കോട്: മൈജി ഓണം മാസ് ഓണത്തിന്‍റെ ഭാഗമായി മൈജി, മൈജി ഫ്യൂച്ചർ ഷോറൂമുകളിൽ നാല് ദിവസം നീണ്ടുനിൽക്കുന്ന "മാസ് ഓഫറുകൾ മാസ് വിലക്കുറവ് ' സെയിൽ 14 വരെ. സെയിലിന്‍റെ ഭാഗമായി ഓരോ 10,000 രൂപയുടെ മൊബൈൽ ഫോൺ ടാബ്‌ലറ്റ് പർച്ചേസിനൊപ്പം വൻ ക്യാഷ്ബാക്ക് ഓഫറുകൾ ലഭ്യമാണ്. 10,000 രൂപ മുതൽ 29,900 രൂപ വരെ വിലയുള്ളവ വാങ്ങുമ്പോൾ 1,250 രൂപ മുതൽ 2,500 രൂപ വരെ ക്യാഷ്ബാക്ക് വൗച്ചർ, 30,000 രൂപ മുതൽ 59,999 രൂപ വരെ വിലയുള്ളവ വാങ്ങുമ്പോൾ 3,750 രൂപ മുതൽ 6,250 രൂപ വരെ ക്യാഷ്ബാക്ക് വൗച്ചർ, 60,000 രൂപ മുതൽ 99,999 രൂപ വരെ വിലയുള്ളവ വാങ്ങുമ്പോൾ 7,500 രൂപ മുതൽ 11,250 രൂപ വരെ ക്യാഷ്ബാക്ക് വൗച്ചർ, ഒരു ലക്ഷം രൂപക്ക് മുകളിൽ വിലയുള്ളതിന് 12, 500 രൂപ മുതൽ 25,000 രൂപ വരെ ക്യാഷ്ബാക്ക് വൗച്ചർ എന്നിങ്ങനെയാണ് ഓഫറുകൾ. ഐഫോൺ 16, ഐഫോൺ 15 എന്നിവ മറ്റെവിടത്തെക്കാളും കുറഞ്ഞ വിലയിൽ കില്ലർ പ്രൈസിൽ വാങ്ങാം. എംഐ പാഡും വൻവിലക്കുറവിൽ ലഭ്യമാണ്. 32 ആൻഡ് 43 ഇഞ്ച് സ്മാർട്ട് എൽഇഡി ടിവി, 43 ഇഞ്ച് 4 കെ ക്യുഎൽഇഡി ടിവി, 43 ഇഞ്ച് 4കെ എഫ്എച്ച്ഡി സ്മാർട്ട് ടിവി, 43 ഇഞ്ച് ഗൂഗിൾ യുഎച്ച്ഡി, 55 ഇഞ്ച് 4കെ യുഎച്ച്ഡി ടിവി എന്നിവ ഏറ്റവും കുറഞ്ഞ വിലയിൽ വാങ്ങാം. 75 ഇഞ്ച് 4കെ ക്യുഎൽഇഡി ടിവിക്കൊപ്പം 7,000 രൂപ എക്‌സ്‌ചേഞ്ച് ഓഫറും ലഭിക്കും. എൽജി, വോൾട്ടാസ് എന്നീ ബ്രാൻഡുകളുടെ എല്ലാ മോഡൽ എസി കളും 50 ശതമാനം വരെ വിലക്കുറവിൽ വാങ്ങാം. ലാപ്‌ടോപ്പുകൾ ഏറ്റവും കുറഞ്ഞ മൈജി സ്‌പെഷ്യൽ പ്രൈസിൽ വാങ്ങാം. കൂടാതെ ലാപ്‌ടോപ്പ് കിറ്റും സൗജന്യമായി ലഭിക്കും. ഹൈടെക് റിപ്പയർ ആൻഡ് സർവീസ് ലഭിക്കുന്ന മൈജി കെയറിലും സർവീസിന് വലിയ ഓഫറുകളുണ്ട്. 7994 111 666 എന്നീ നമ്പറിൽ വിളിച്ചാൽ നിങ്ങളുടെ വീട്ടിലെത്തി സർവീസ് ചെയ്തുനൽകുന്നതാണ്. കൂടുതൽ വിവരങ്ങൾക്ക് ഫോൺ: 9249 001 001.

യുവജാഗരണ്‍ യാത്രക്ക് സ്വീകരണം

കോഴിക്കോട്: ലഹരിവസ്തുക്കളുടെ ഉപയോഗത്തിനും എയ്ഡ്‌സിനുമെതിരായ ബോധവത്കരണം ലക്ഷ്യമിട്ട് സംസ്ഥാന എന്‍എസ്എസ് കാര്യാലയവും എയ്ഡ്സ് കണ്‍ട്രോള്‍ സൊസൈറ്റിയും ചേര്‍ന്ന് നടത്തുന്ന യുവജാഗരണ്‍ യാത്രക്ക് താമരശേരി ഐഎച്ച്ആര്‍ഡി കോളജില്‍ സ്വീകരണം നല്‍കി. പ്രിന്‍സിപ്പല്‍ ഡോ. കെ.എം. രാധിക ഉദ്ഘാടനം നിര്‍വഹിച്ചു. എന്‍എസ്എസ് പ്രോഗ്രാം ഓഫീസര്‍മാരായ എസ്. രേഷ്മ, ടി.സി. അര്‍ച്ചന, ഐക്യുഎസി കോഓഡിനേറ്റര്‍ എം. ആതിര, എന്‍എസ്എസ് സെക്രട്ടറി അശ്വിക അശോക് പ്രസംഗിച്ചു. തുടര്‍ന്ന് ടീം മനോരഞ്ജന്‍ ആര്‍ട്സിന്‍റെയും എന്‍എസ്എസ് വളണ്ടിയര്‍മാരുടെയും കലാപരിപാടികള്‍ അരങ്ങേറി.

എംഡിഎംഎയുമായി യുവാവ് പിടിയിൽ

മേപ്പയ്യൂർ: മേപ്പയ്യൂരിൽ എംഡിഎംഎയുമായി യുവാവ് പോലീസ് പിടിയിലായി. നടുവണ്ണൂർ കാവിൽ സ്വദേശി അമ്മിചെത്ത് എ. നിസാമിനെയാണ് ഒന്നര ഗ്രാം എംഡിഎംഎയുമായി പിടികൂടിയത്. മേപ്പയ്യൂർ വിശ്വഭാരതി കോളജ് ജംഗ്ഷനു സമീപത്തു വച്ച് വാഹന പരിശോധനയ്ക്കിടെ മേപ്പയൂർ സബ് ഇൻസ്പെക്ടർ ഗിരീഷ് കുമാറും കോഴിക്കോട് റൂറൽ ജില്ല പോലീസ് മേധാവിയുടെ സ്പെഷ്യൽ ടീമും ചേർന്ന് കെഎൽ 11 ബിഎച്ച് 8396 രജിസ്ട്രേഷൻ നമ്പർ കാറിൽ നിന്നാണ് ഇയാളെ കസ്റ്റഡിയിലെടുത്തത്.

അധ്യാപകരായ കന്യാസ്ത്രീകളെ ആദരിച്ചു

പുഷ്പഗിരി: ദേശീയ അധ്യാപക ദിനത്തില്‍ പുഷപഗിരി യൂദിത്ത് ഫോറത്തിന്‍റെ നേതൃത്വത്തില്‍ അധ്യാപകരായ പുഷ്പഗിരി സിഎംസി കോണ്‍വെന്‍റിലെ കന്യാസ്ത്രീകളെ ആദരിച്ചു. യൂദിത്ത് ഫോറം പ്രസിഡന്‍റ് ആനി തേക്കുംകാട്ടില്‍, സെക്രട്ടറി ലിസി വെട്ടുകാട്ടില്‍, ഖജാന്‍ജി ഏലിക്കുട്ടി ഫിലിപ്പ്, അംഗങ്ങളായ റോസമ്മ, ചിന്നമ്മ, ഏലിയാമ്മ തുടങ്ങിയവര്‍ പങ്കെടുത്തു.

പോളിംഗ് സ്റ്റേഷൻ നിർണയത്തിൽ അപാകതയെന്ന് യുഡിഎഫ്

ചക്കിട്ടപാറ: ചക്കിട്ടപാറ ഗ്രാമ പഞ്ചായത്തിലെ പോളിങ്ങ് സ്റ്റേഷനുകൾ പുനർക്രമീകരിക്കുന്നതിനായി പഞ്ചായത്ത് സെക്രട്ടറി വിളിച്ച യോഗം ബഹിഷ്ക്കരിച്ച് യൂഡിഎഫ് പ്രതിനിധികൾ ഇറങ്ങിപ്പോയി. 16-ാം വാർഡിലെ പോളിംഗ് സ്റ്റേഷൻ നിർണയിക്കുന്നത് സംബന്ധിച്ച തർക്കമാണ് ഇറങ്ങിപ്പോക്കിൽ കലാശിച്ചത്. 1350 ഓളം വോട്ടർമാരുള്ള വാർഡിൽ അനുവദിക്കുന്ന രണ്ടാമത്തെ പോളിംഗ് സ്റ്റേഷൻ പെരുവണ്ണാമൂഴി ഫാത്തിമ യുപി സ്കൂളിൽ വേണമെന്ന ആവശ്യം നിരാകരിച്ചതിനെ തുടർന്ന് യുഡി എഫ് പ്രതിനിധികളായ റെജി കോച്ചേരി, ജെയിംസ് മാത്യു, പെരിഞ്ചേരി കുഞ്ഞമ്മദ് തുടങ്ങിയവരാണ് യോഗത്തിൽ നിന്നും ഇറങ്ങി പോയത്. രാഷ്ട്രീയ പാർട്ടികളുടെ താൽപര്യങ്ങൾ മാത്രമല്ല വോട്ടർമാരുടെ സൗകര്യം പരിഗണിച്ചാവണം പോളിംഗ് സ്റ്റേഷനുകൾ നിർണയിക്കേണ്ടതെന്ന് ഈ നേതാക്കൾ പറഞ്ഞു. 16-ാം വാർഡിലെ പെരുവണ്ണാമൂഴി ഭാഗത്തുള്ളവർക്ക് ഏകദേശം നാല് കിലോമീറ്ററിലധികം സഞ്ചരിച്ചു വേണം ഇപ്പോൾ നിശ്ചയിച്ച പോളിംഗ് സ്റ്റേഷനിൽ എത്താനെന്ന് അവർ ചൂണ്ടിക്കാട്ടി. ഇത് വോട്ടർമാർക്ക് പ്രയാസം സൃഷ്ടിക്കും. ഈ സാഹചര്യത്തിൽ 16-ാം വാർഡിലെ രണ്ടാം പോളിംഗ് സ്റ്റേഷൻ ഫാത്തിമ യുപി. സ്കൂളിൽ തന്നെ സ്ഥാപിക്കണമെന്ന് മണ്ഡലം കോൺഗ്രസ് പ്രസിഡന്‍റ് റെജി കോച്ചേരി ആവശ്യപ്പെട്ടു.

സിബിഎസ്ഇ ജില്ലാ ഹാൻഡ്ബോൾ ടൂർണമെന്‍റ് ; കിരീടം കരസ്ഥമാക്കി അൽഫോൻസാ സ്കൂൾ

താമരശേരി: കോഴിക്കോട് ജില്ല സിബിഎസ്ഇ സ്കൂളുകളുടെ ഹാൻഡ് ബോൾ ടൂർണമെന്‍റിൽ നാലു വിഭാഗത്തിൽ അൽഫോൻസാ സ്കൂൾ കിരീടം സ്വന്തമാക്കി. താമരശേരി അൽഫോൻസാ ഇംഗ്ലീഷ് മീഡിയം സ്കൂളിൽ നടന്ന ടൂർണമെന്‍റിൽ ജില്ലയിലെ 14 സിബിഎസ്ഇ സ്കൂളുകളിൽ നിന്നുള്ള ടീമുകൾ പങ്കെടുത്തു. 14 വയസിൽ താഴെയുള്ള ആൺകുട്ടികളുടെ വിഭാഗത്തിൽ താമരശേരി അൽഫോൻസാ ഇംഗ്ലീഷ് മീഡിയം സ്കൂൾ കുറ്റിക്കാട്ടൂർ ബി ലൈൻ പബ്ലിക് സ്കൂളിനെ ഫൈനലിൽ ഏകപക്ഷീയമായ 12 ഗോളുകൾക്ക് പരാജയപ്പെടുത്തി ഒന്നാം സ്ഥാനം കരസ്ഥമാക്കി. 14 വയസിൽ താഴെയുള്ള പെൺകുട്ടികളുടെ വിഭാഗത്തിൽ താമരശേരി അൽഫോൻസ ഇംഗ്ലീഷ് മീഡിയം സ്കൂൾ മൂന്നിനെതിരേ നാലു ഗോളുകൾക്ക് ബി ലൈൻ സ്കൂളിനെ പരാജയപ്പെടുത്തി ഒന്നാം സ്ഥാനം കരസ്ഥമാക്കി. 17 വയസിൽ താഴെയുള്ള പെൺകുട്ടികളുടെ വിഭാഗത്തിൽ താമരശേരി അൽഫോൻസാ ഇംഗ്ലീഷ് മീഡിയം സ്കൂൾ ദയാപുരം റസിഡൻഷ്യൽ സ്കൂളിനെ നാലിനെതിരേ ആറ് ഗോളുകൾക്ക് പരാജയപ്പെടുത്തി കിരീടം കരസ്ഥമാക്കി. ഈ വിഭാഗത്തിൽ ബി ലൈൻ പബ്ലിക് സ്കൂളിനാണ് മൂന്നാം സ്ഥാനം. 17 വയസിൽ താഴെയുള്ള ആൺകുട്ടികളുടെ മത്സരത്തിൽ താമരശേരി അൽഫോൻസ ഇംഗ്ലീഷ് മീഡിയം സ്കൂൾ ദയാപുരം റസിഡൻഷ്യൽ സ്കൂളിനെ ആറിനെതിരെ 11 ഗോളുകൾക്ക് പരാജയപ്പെടുത്തി കിരീടം നേടി. അൽഫോൻസാ സ്കൂളിലെ ഹരി മാധവ്, ഹന്ന റോസ്, ക്രിസ്റ്റീന ജോസഫ്, ദയാപുരം സ്കൂളിലെ മുസയിദ് ആദി ഖാദിർ എന്നിവർ വിവിധ വിഭാഗങ്ങളിലെ മികച്ച കളിക്കാർക്കുള്ള ട്രോഫികൾ കരസ്ഥമാക്കി. ബീ ലൈൻ സ്കൂളിലെ റിഷാൻ മുഹമ്മദ്, ഹയാ ഇസ്ബിൻ, അൽഫോൻസാ സ്കൂളിലെ മുഹമ്മദ് നഹാൻ ദയാപുരം സ്കൂളിലെ ഇസാ കദീജ എന്നിവർ മികച്ച ഗോൾകീപ്പർമാർക്കുള്ള സമ്മാനങ്ങൾ കരസ്ഥമാക്കി. അൽഫോൻസാ സ്കൂളിലെ മുഹമ്മദ് ഇസാൻ, ഗൗരി എന്നിവർക്കാണ് മികച്ച ഭാവി വാഗ്ദാനങ്ങൾക്കുള്ള ട്രോഫികൾ ലഭിച്ചത്. വിജയികൾക്കുള്ള ട്രോഫികൾ താമരശേരി രൂപത ബിഷപ് മാർ റെമീജിയോസ് ഇഞ്ചനാനിയിൽ വിതരണം ചെയ്തു. മലബാർ സഹോദയ പ്രസിഡന്‍റ് മോനി യോഹന്നാൻ ചടങ്ങിൽ അധ്യക്ഷത വഹിച്ചു.മലബാർ സഹോദയയാണ് മത്സരങ്ങൾക്ക് നേതൃത്വം നൽകിയത്.

ചെറൂപ്പ സിഎച്ച്‌സി വികസനത്തിന് ഹെല്‍ത്ത് ഗ്രാൻഡ് ഉപയോഗിക്കാം

27.57 ലക്ഷം രൂപ ഉപയോഗപ്പെടുത്തും കോഴിക്കോട്: ചെറൂപ്പ സിഎച്ച്‌സിയുടെ വികസന പ്രവൃത്തികള്‍ക്ക് ഹെല്‍ത്ത് ഗ്രാൻഡ് ഉപയോഗിക്കുന്നതിനുള്ള തടസം നീക്കി സര്‍ക്കാര്‍ ഉത്തരവായതായി പി.ടി.എ. റഹീം എംഎല്‍എ അറിയിച്ചു. പതിനഞ്ചാം ധനകാര്യ കമ്മീഷന്‍ അവാര്‍ഡ് പ്രകാരം ഹെല്‍ത്ത് ഗ്രാൻഡ് ഇനത്തില്‍ കുന്നമംഗലം ബ്ലോക്ക് പഞ്ചായത്തിന് അനുവദിച്ച 27.57 ലക്ഷം രൂപയാണ് പൊതുജനാരോഗ്യ യൂണിറ്റ് സ്ഥാപിക്കുന്നതിന് ഉപയോഗിക്കാന്‍ പ്രത്യേകാനുമതി നല്‍കിയത്. ചെറൂപ്പ സിഎച്ച്‌സി അഭിമുഖീകരിക്കുന്ന വിവിധ പ്രശ്‌നങ്ങള്‍ ചര്‍ച്ചചെയ്ത് പരിഹരിക്കാന്‍ ആരോഗ്യവകുപ്പ് മന്ത്രിയുടെ സാന്നിധ്യത്തില്‍ ചേര്‍ന്ന യോഗത്തിലെ തീരുമാനത്തിന്‍റെ അടിസ്ഥാനത്തില്‍, ആശുപത്രിയുടെ ഭരണ നിയന്ത്രണം കുന്നമംഗലം ബ്ലോക്ക് പഞ്ചായത്തിന് കൈമാറി സര്‍ക്കാര്‍ ഉത്തരവായിരുന്നു. പദ്ധതി നിര്‍വഹണത്തിന് കുന്നമംഗലം ബ്ലോക്ക് പഞ്ചായത്തിനെയും മാവൂര്‍ ഗ്രാമപഞ്ചായത്തിനെയും നിര്‍വഹണ ഉദ്യോഗസ്ഥരായി ചെറൂപ്പ സിഎച്ച്‌സിയിലെ സിവില്‍ സര്‍ജനെയും അസി. സര്‍ജനെയും നിയോഗിച്ചുള്ള സര്‍ക്കാര്‍ തീരുമാനവും വന്നതോടെ വര്‍ഷങ്ങളായി നിലനിന്ന ഫണ്ട് വിനിയോഗത്തിലുള്ള പ്രതിസന്ധിക്കും പരിഹാരമായി. ആശുപത്രി പ്രവര്‍ത്തന സമയം ദീര്‍ഘിപ്പിക്കുന്നത് ഉള്‍പ്പെടെയുള്ള വിഷയങ്ങളില്‍ നടപടി സ്വീകരിക്കാന്‍ മെഡിക്കല്‍ കോളജ് പ്രിന്‍സിപ്പലും ജില്ലാ മെഡിക്കല്‍ ഓഫീസറും അംഗങ്ങളായ സബ് കമ്മിറ്റിക്ക് കഴിഞ്ഞ ദിവസം ചേര്‍ന്ന യോഗത്തില്‍ രൂപം നല്‍കിയിട്ടുണ്ടെന്നും ആശുപത്രി പ്രവര്‍ത്തനം പരാതിക്കിടയാകാത്തവിധം മെച്ചപ്പെടുത്താനുള്ള ശ്രമങ്ങളാണ് ബ്ലോക്ക് പഞ്ചായത്തുമായി സഹകരിച്ച് നടത്തിവരുന്നതെന്നും പി.ടി.എ. റഹീം എംഎല്‍എ പറഞ്ഞു.

കാറിടിച്ചു പരിക്കേറ്റ് ചികിത്സയിലായിരുന്ന കാല്‍നട യാത്രക്കാരന്‍ മരണമടഞ്ഞു

കോഴിക്കോട്: റോഡ് മുറിച്ചുകടക്കുന്നതിനിടെ കാറിടിച്ച് ഗുരുതര പരിക്കേറ്റ് ചികിത്സയിലായിരുന്ന കാല്‍നടയാത്രക്കാരന്‍ മരിച്ചു. ഫറോക്ക് ചുങ്കം എട്ടേനാല്‍ കുന്നത്തുമോട്ടയില്‍ താമസിക്കുന്ന പരേതനായ ചെറുവണ്ണൂര്‍ പുതുക്കടി അലവിയുടെ മകന്‍ മുഹമ്മദ് കോയ എന്ന ബിച്ചാപ്പു (70) ആണ് കോഴിക്കോട് മെഡിക്കല്‍ കോളജ് ആശുപത്രിയില്‍ മരിച്ചത്. ഇക്കഴിഞ്ഞ ശനിയാഴ്ച രാത്രി 7.20ന് ചുങ്കം എട്ടേനാലില്‍ സീബ്രാ ലൈനില്‍ റോഡ് മുറിച്ചുകടക്കുന്നതിനിടെ കാറിടിച്ച് തെറിപ്പിക്കുകയായിരുന്നു. ഭാര്യ: ഖദീജ. മക്കള്‍: സിദ്ദിഖ്, മുഹമ്മദ് ഫൈസല്‍, അബ്ദുല്‍ സലീം. മരുമക്കള്‍: ഹസ്‌ന, ആയിഷ ഫസീന, ആയിഷ സിനു, സഹോദരങ്ങള്‍: അബ്ദുല്‍ അസീസ് (റിയാദ്), ഖദീജ, നബീസ, പരേതനായ ഹസന്‍ കോയ.

ടൂറിസ്റ്റ് ബസിലെ ക്ലീനറെ മർദ്ദിച്ചു

കൊയിലാണ്ടി: ടൂറിസ്റ്റ് ബസ് ക്ലീനറെ മർദ്ദിച്ചതായി പരാതി. കാസർകോഡ് നിന്നും എറണാകുളത്തേക്ക് പോവുകയായിരുന്ന അമയ ബസിലെ ക്ലീനർ കാസർകോഡ് വെള്ളരിക്കുണ്ട് പുന്നക്കുന്ന് മേനാം തുണ്ടത്തിൽ അരവിന്ദി (27) നാണ് മർദ്ദനമേറ്റത്. ഇന്നലെ പുലർച്ചെ 1.30ന് ബസ് നന്തിയിൽ എത്തിയപ്പോഴായിരുന്നു സംഭവം. തളിപ്പറമ്പിൽ നിന്നും കയറിയ രണ്ട് പേരാണ് എസിയുടെ തണുപ്പ് പോരായെന്ന് പറഞ്ഞ് മർദ്ദിക്കുകയും അസഭ്യം പറയുകയും ചെയ്തത്. മുഖത്ത് തുടരെ മർദ്ദിക്കുകയായിരുന്നു. പരിക്കേറ്റ അരവിന്ദിനെ താലൂക്ക് ആശുപത്രിയിൽ പ്രവേശിപ്പിച്ചു. കൊയിലാണ്ടി പോലീസിൽ പരാതി നൽകിയിട്ടുണ്ട്.

എംഎൽഎയുടെ ഭാര്യയ്ക്ക് ഇരട്ട വോട്ട്: ആരോപണ പ്രത്യാരോപണങ്ങൾ നിർബാധം തുടർന്ന് പാർട്ടികൾ

മുക്കം: തിരുവമ്പാടി എംഎൽഎ ലിന്‍റോ ജോസഫിന്‍റെ ഭാര്യക്ക് ഇരട്ട വോട്ട്. മുക്കം നഗരസഭയിലെ 17-ാം വാർഡ് കച്ചേരിയിലും കൂടരഞ്ഞി പഞ്ചായത്തിലെ ഒന്പതാം വാർഡ് ആനയോടുമാണ് കെ. അനുഷക്ക് വോട്ടർ പട്ടികയിൽ പേരുള്ളത്. മുക്കം നഗരസഭയിലെ കച്ചേരി വാർഡിലെ വോട്ടർ പട്ടികയിലെ ക്രമ നമ്പർ 1002 ഉം, കൂടരഞ്ഞി പഞ്ചായത്തിലെ ആനയോട് വാർഡിലെ ക്രമനമ്പർ 881മായാണ് വോട്ട്. ‌ ഇതോടെ വോട്ടർ പട്ടികയിൽ വൻ ക്രമക്കേടാരോപിച്ച് യൂത്ത് കോൺഗ്രസ് ഉൾപ്പെടെ രംഗത്തെത്തി. തിരുവമ്പാടി മണ്ഡലത്തിൽ വോട്ടർ പട്ടികയിൽ വൻ ക്രമക്കേട് നടന്നതായി നിയോജക മണ്ഡലം യൂത്ത് കോൺഗ്രസ് പ്രസിഡന്‍റ് മുഹമ്മദ് ദിഷാൽ പറഞ്ഞു. ഇത് സ്വാഭാവികമായി വന്നതാണന്ന് പറഞ്ഞ് ഒഴിയാൻ സാധിക്കില്ലെന്നും രണ്ട് വോട്ടുകളുമുള്ളത് പുതുതായി ചേർക്കപ്പെട്ട ലിസ്റ്റിലാണെന്നും ദിഷാൽ പറഞ്ഞു. സംഭവത്തിൽ എംഎൽഎ മറുപടി പറയണമെന്നും അദ്ദേഹം ആവശ്യപ്പെട്ടു. ജനാധിപത്യ സംവിധാനത്തെ അട്ടിമറിക്കാനുള്ള ശ്രമമാണ് സിപിഎം നടത്തുന്നതെന്നും ഇത് അനുവദിക്കില്ലന്നും യൂത്ത് കോൺഗ്രസ് വ്യക്തമാക്കി. അതേ സമയം സംഭവത്തിൽ ചെറിയ ശ്രദ്ധക്കുറവുണ്ടായതായി ലിന്‍റോ ജോസഫ് എംഎൽഎ പറഞ്ഞു. ജനപ്രതിനിധികൾ കാണിക്കേണ്ട ജാഗ്രത കാണിച്ചില്ലെന്നും തിരുത്താനാവശ്യമായ നടപടികൾ സ്വീകരിക്കുമെന്നും എംഎൽഎ വ്യക്തമാക്കി. എന്നാൽ എംഎൽഎയുടെ ഈ വാദവും യൂത്ത് കോൺഗ്രസ് ഖണ്ഡിക്കുകയാണ്. പഞ്ചായത്ത്‌ തെരഞ്ഞെടുപ്പിൽ വോട്ട് ചേർക്കൽ പ്രക്രിയ ആരംഭിക്കുന്നതിന്‍റെ ഭാഗമായി പ്രസിദ്ധീകരിച്ച വോട്ടർ പട്ടികയിൽ എംഎൽഎയുടെ ഭാര്യയുടെ വോട്ട് കച്ചേരി വാർഡിൽ അല്ലായിരുന്നുവെന്നും മുക്കം നഗരസഭയിലെ വാർഡ് 18-കണക്കുപറമ്പിൽ ക്രമ നമ്പർ 457 ആയാണ് കെ. അനുഷയുടെ വോട്ട് ഉണ്ടായിരുന്നതെന്നും ഇവർ പറയുന്നു. ആ വാർഡിലെ സിപിഎം പ്രവർത്തകർ മുക്കം നഗരസഭയിലെ വാർഡ് -17 കച്ചേരിയിലേക്ക് ആ വോട്ട് മാറ്റാൻ ശ്രമിച്ചപ്പോൾ കോൺഗ്രസ്‌ പ്രതിനിധികൾ എതിർപ്പ് പ്രകടിപ്പിക്കുകയും ആ വോട്ട് കൂടരഞ്ഞിയിലേക്കാണ് മാറേണ്ടതെന്ന് പറയുകയും ഇതിന്‍റെ അടിസ്ഥാനത്തിൽ അത് ഉദ്യോഗസ്ഥർ മാറ്റി വച്ചിരുന്നതായും യൂത്ത് കോൺഗ്രസ് ആരോപിക്കുന്നു. പക്ഷേ പുതിയ വോട്ടർ പട്ടിക പ്രസിദ്ധീകരിച്ചപ്പോൾ വാർഡ് 17 കച്ചേരിയിൽ ചേർക്കപെട്ടവരുടെ ലിസ്റ്റിൽ ക്രമ നമ്പർ 1002ലായി കെ. അനുഷയുടെ വോട്ട് വന്നു. ഏറ്റവും ഒടുവിൽ വന്ന ലിസ്റ്റിൽ മുക്കം നഗരസഭ ഭരിക്കുന്ന സിപിഎം സമ്മർദത്തിന് വഴങ്ങിയാണ് വാർഡ് 18ൽ നിന്ന് ഒഴിവാക്കിയ വോട്ട് വാർഡ് 17ലേക്ക് മാറിയതെന്നും അവർ പറഞ്ഞു.നിർബാധം തുടർന്ന് പാർട്ടികൾ

ജില്ലയിലെ പോലീസ് സ്റ്റേഷനുകൾക്ക് മുന്നിൽ കോൺഗ്രസ് പ്രതിഷേധം

കൊയിലാണ്ടി: കുന്നംകുളം പോലീസ് സ്റ്റേഷനിൽ ചൊവ്വന്നൂർ മണ്ഡലം യൂത്ത് കോൺഗ്രസ്‌ പ്രസിഡന്‍റ് സുജിത്തിനെ അകാരണമായി ക്രൂരമായി മർദിച്ച പോലീസ് ഉദ്യോഗസ്ഥരെ സർവീസിൽ നിന്നും പിരിച്ചു വിടണമെന്ന് ഡിസിസി പ്രസിഡന്‍റ് അഡ്വ. കെ. പ്രവീൺ കുമാർ ആവശ്യപ്പെട്ടു. കുന്നംകുളം പോലീസ് സ്റ്റേഷൻ മർദ്ദനത്തിൽ പങ്കാളികളാ‍യ പോലീസുകാരെ പിരിച്ചുവിടണമെന്ന് ആവശ്യപ്പെട്ട് കോൺഗ്രസിന്‍റെ നേതൃത്വത്തിൽ കൊയിലാണ്ടി പോലീസ് സ്റ്റേഷന് മുന്നിൽ സംഘടിപ്പിച്ച പ്രതിഷേധ സദസ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സുജിത്തിനെ മർദിച്ച പോലീസ് ഉദ്യോഗസ്ഥരെ സർവീസിൽ നിന്നും പിരിച്ചു വിടുന്നത് വരെ കോൺഗ്രസ്‌ പ്രതിഷേധം തുടരും. ഇത്തരം സമാന സ്വഭാവമുള്ള പോലീസുകാർ ജില്ലയിലെ പല പോലീസ് സ്റ്റേഷനുകളിലും ഉണ്ട്. അവർ നിയമപരിധി വിട്ട് പ്രവർത്തിക്കുകയാണെങ്കിൽ നിയമപരമായും അല്ലാതെയും കോൺഗ്രസ്‌ കൈകാര്യം ചെയ്യുമെന്നും പ്രവീൺ കുമാർ കൂട്ടിച്ചേർത്തു. കൊയിലാണ്ടി ബ്ലോക്ക്‌ കോൺഗ്രസ്‌ പ്രസിഡന്‍റ് എൻ. മുരളീധരൻ തൊറോത്ത് അധ്യക്ഷത വഹിച്ചു.ഡിസിസി ജനറൽ സെക്രട്ടറി രാജേഷ് കീഴരിയൂർ, വി.വി. സുധാകരൻ, വി.ടി. സുരേന്ദ്രൻ, പപ്പൻ മൂടാടി, രജീഷ് വെങ്ങളത്തുക്കണ്ടി, കിഴക്കയിൽ രാമകൃഷ്ണൻ, ഇടത്തിൽ ശിവൻ, ശശി ഊട്ടേരി, അരുൺ മണമൽ തുടങ്ങിയവർ പ്രസംഗിച്ചു മുക്കം: കുന്നംകുളത്ത് യൂത്ത് കോൺഗ്രസ് പ്രവർത്തകന് പോലീസ് കസ്റ്റഡിയിൽ ക്രൂരമായ മർദ്ദനമേറ്റ സംഭവത്തിൽ ക്രിമിനലുകളെ സർവീസിൽ നിന്ന് പുറത്താക്കുക എന്ന മുദ്രാവാക്യമുയർത്തി കോൺഗ്രസ് പ്രവർത്തകർ മുക്കം പോലീസ് സ്റ്റേഷന് മുന്നിൽ ജനകീയ പ്രതിഷേധ സദസ് സംഘടിപ്പിച്ചു. മുക്കം, കാരശേരി, കൊടിയത്തൂർ മണ്ഡലം കമ്മിറ്റികളുടെ നേതൃത്വത്തിലായിരുന്നു പ്രതിഷേധം. കോൺഗ്രസ് പ്രവർത്തകരെ മർദ്ദിച്ച പോലീസുകാരുടെ ഫോട്ടോ പതിച്ച ഫ്ലക്സ് ഉൾപ്പെടെ സ്ഥാപിച്ചായിരുന്നു സമരം. ഡിസിസി സെക്രട്ടറി നിജേഷ് അരവിന്ദ് പ്രതിഷേധ സദസ് ഉദ്ഘാടനം ചെയ്തു. മുക്കം മണ്ഡലം കോൺഗ്രസ് പ്രസിഡന്‍റ് എം. മധു അധ്യക്ഷത വഹിച്ചു. ഡിസിസി അംഗം എം.ടി അഷ്റഫ്, ബ്ലോക്ക് കോൺഗ്രസ് പ്രസിഡന്‍റ് എം. സിറാജുദ്ധീൻ, പി. പ്രേമ ദാസൻ, കെ.ടി മൻസൂർ, അബ്ദു കൊയങ്ങോറൻ, എം.കെ മമ്മദ്, വേണു കല്ലുരുട്ടി, ഒ.കെ ബൈജു, സമാൻ ചാലൂളി, ചന്ദ്രൻ കപ്പിയേടത്ത്, ജംഷിദ് ഒളകര, നിഷാദ് വീച്ചി, രാജു കുന്നത്ത്, എ.എം നൗഷാദ്, മാധവൻ കുളങ്ങര തുടങ്ങിയവർ പ്രസംഗിച്ചു. പേരാമ്പ്ര: കുന്നംകുളം പോലീസ് സ്റ്റേഷനിൽ യൂത്ത് കോൺഗ്രസ് നേതാവ് വി.എസ്. സുജിത്തിന് നേരെ നടന്ന ക്രൂര മർദനത്തിൽ പ്രതിഷേധിച്ച് പേരാമ്പ്ര, നൊച്ചാട്, കൂത്താളി മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ പേരാമ്പ്ര പോലീസ് സ്‌റ്റേഷനു മുന്നിൽ പ്രതിഷേധ സദസ് സംഘടിപ്പിച്ചു.യുഡിഎഫ് ജില്ലാ ചെയർമാൻ കെ. ബാലനാരായണൻ ഉദ്ഘാടനം ചെയ്തു. ബ്ലോക്ക് കോൺഗ്രസ് പ്രസിഡന്‍റ് കെ. മധുകൃഷ്ണൻ അധ്യക്ഷനായി. രാജൻ മരുതേരി, പി.കെ രാഗേഷ്, വി.വി. ദിനേശൻ, രാജൻ കെ. പുതിയേടത്ത്, പി.എസ്. സുനിൽകുമാർ, പി.എം. പ്രകാശൻ, ഇ.പി. മുഹമ്മദ്, മനോജ് എടാണി, തണ്ടോറ ഉമ്മർ, കെ.സി. രവീന്ദ്രൻ, അശോകൻ മുതുകാട്, റഷീദ് പുറ്റംപൊയിൽ, വി.പി സുരേഷ്, പി.സി കുഞ്ഞമ്മദ്, വി. ആലീസ് മാത്യൂ, മിനി വട്ടക്കണ്ടി എന്നിവർ പ്രസംഗിച്ചു. തിരുവമ്പാടി: തിരുവമ്പാടി കൂടരഞ്ഞി കോൺഗ്രസ് മണ്ഡലം കമ്മിറ്റികളുടെ ആഭിമുഖ്യത്തിൽ തിരുവമ്പാടി പോലീസ് സ്റ്റേഷന് മുമ്പിൽ ജനകീയ പ്രതിഷേധ സദസ് സംഘടിപ്പിച്ചു. പ്രതിഷേധ സദസ് ഡിസിസി ജനറൽ സെക്രട്ടറി സി.ജെ. ആന്‍റണി ഉദ്ഘാടനം ചെയ്തു. തിരുവമ്പാടി മണ്ഡലം കോൺഗ്രസ് കമ്മിറ്റി പ്രസിഡന്‍റ് മനോജ് സെബാസ്റ്റ്യൻ വാഴപ്പറമ്പിൽ അധ്യക്ഷത വഹിച്ചു. ജനകീയ പ്രതിഷേധ സദസിൽ കർഷക കോൺഗ്രസ് സംസ്ഥാന ജനറൽ സെക്രട്ടറി ബോസ് ജേക്കബ് മുഖ്യപ്രഭാഷണം നടത്തി. കൂടരഞ്ഞി മണ്ഡലം പ്രസിഡന്‍റ് സണ്ണി പെരികലം തറപ്പിൽ, തിരുവമ്പാടി പഞ്ചായത്ത് യുഡിഎഫ് ചെയർമാൻ ടി.ജെ. കുര്യാച്ചൻ, തിരുവമ്പാടി ബ്ലോക്ക് കോൺഗ്രസ് കമ്മിറ്റി വൈസ് പ്രസിഡന്‍റ് മുഹമ്മദ് പാതിപ്പറമ്പിൽ പ്രസംഗിച്ചു. പെരുവണ്ണാമൂഴി: പെരുവണ്ണാമൂഴി പോലീസ് സ്റ്റേഷനു മുൻപിൽ ചക്കിട്ടപാറ, ചങ്ങരോത്ത് മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ നടത്തിയ ജനകീയ പ്രതിഷേധ സദസ് ഡിസിസി ജനറൽ സെക്രട്ടറി ഇ. വി. രാമചന്ദ്രൻ ഉദ്ഘാടനം ചെയ്തു. ചക്കിട്ടപാറ മണ്ഡലം പ്രസിഡന്‍റ് റെജി കോച്ചേരി അധ്യക്ഷത വഹിച്ചു. വി.പി. ഇബ്രാഹിം, കെ.കെ. വിനോദൻ, കെ.എ. ജോസുകുട്ടി, ജെയിംസ് മാത്യു, ജിതേഷ് മുതുകാട്, രവീന്ദ്രൻ പുതുക്കോട്ട്, ബാബു കൂനംതടം, ഗിരിജ ശശി, സത്യൻ കല്ലൂർ, ജോസ് കാരിവേലി എന്നിവർ പ്രസംഗിച്ചു. താമരശേരി: ജനങ്ങളുടെ സുരക്ഷയ്ക്കും നീതിക്കും വേണ്ടി നിലകൊള്ളേണ്ട പോലീസ് ഇന്ന് ജനങ്ങളെ തന്നെ ഭീതിയിലാഴ്‌ത്തുകയാണെന്ന് കെപിസിസി മെമ്പർ പി.സി ഹബീബ് തമ്പി അഭിപ്രായപ്പെട്ടു. പോലീസ് സ്റ്റേഷനുകൾ നീതി ലഭിക്കുന്ന ക്ഷേത്രങ്ങളാകേണ്ടിടത്ത് ഭീകരതയുടെ കേന്ദ്രങ്ങളായി മാറുകയാണെന്നും അദ്ദേഹം പറഞ്ഞു. കുന്നംകുളം പോലീസ് സ്റ്റേഷനിൽ യൂത്ത് കോൺഗ്രസ് മണ്ഡലം പ്രസിഡന്‍റ് പി. സുജിത്തിനെ അകാരണമായി മർദ്ദിച്ച പോലീസ് ഉദ്യോഗസ്ഥരെ പിരിച്ചുവിടണമെന്ന് ആവശ്യപ്പെട്ട് താമരശേരി മണ്ഡലം കോൺഗ്രസ് കമ്മിറ്റി സംഘടിപ്പിച്ച ജനകീയ പ്രതിഷേധ സദസ് ഉദ്ഘാടനം ചെയ്യുകയായിരുന്നു അദ്ദേഹം. മണ്ഡലം കോൺഗ്രസ് പ്രസിഡന്‍റ് എം.സി. നാസിമുദ്ദീൻ അധ്യക്ഷത വഹിച്ചു. കോടഞ്ചേരി: കോടഞ്ചേരി, പുതുപ്പാടി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ കോടഞ്ചേരി പോലീസ് സ്റ്റേഷനു മുന്നിൽ ജനകീയ പ്രതിഷേധ സദസ് സംഘടിപ്പിച്ചു. ഡിസിസി ജനറൽ സെക്രട്ടറി ബാബു പൈക്കാട്ട് ഉദ്ഘാടനം ചെയ്തു. കോടഞ്ചേരി മണ്ഡലം കോൺഗ്രസ് പ്രസിഡന്‍റ് വിൻസെന്‍റ് വടക്കേമുറിയിൽ അധ്യക്ഷത വഹിച്ചു. ബ്ലോക്ക് പ്രസിഡന്‍റ് ജോബി ഇലന്തൂർ, പുതുപ്പാടി മണ്ഡലം പ്രസിഡന്‍റ് രാജേഷ് ജോസ്, പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, കെ.എം. പൗലോസ്, സണ്ണി കാപ്പാട്ട് മല, വി.ഡി.ജോസഫ്, ബിജു താന്നിക്കക്കുഴി, സഹീർ എരഞ്ഞോണ, ഷിജു ഐസക്ക്, അന്ന‌കുട്ടി ദേവസ്യ, ബിജു ഓത്തിക്കൽ എന്നിവർ പ്രസംഗിച്ചു.

കാണാതായ വിജിലിന്‍റേതെന്ന് കരുതുന്ന ഷൂ കണ്ടെത്തി

കോഴിക്കോട്: സരോവരത്തെ ചതുപ്പില്‍ സുഹൃത്തുക്കള്‍ കുഴിച്ചിടുമ്പോള്‍ എലത്തൂര്‍ സ്വദേശി കെ.ടി.വിജില്‍ ധരിച്ചതെന്ന് കരുതുന്ന ഷൂ കണ്ടെത്തി. ആറു വര്‍ഷം മുമ്പ് വിജിലിനെ കുഴിച്ചിടുമ്പോള്‍ ധരിച്ച ഷൂവാണ് കണ്ടെത്തിയത്. രണ്ടു പ്രതികളും ഇത് വിജിലിന്‍റേതാണെന്ന് തിരിച്ചറിഞ്ഞിട്ടുണ്ട്. വിജിലിന്‍റെ തിരോധാനവുമായി ബന്ധപ്പെട്ട് സരോവരം തണ്ണീര്‍ത്തടത്തില്‍ അന്വേഷണ സംഘം ചതുപ്പു നീക്കി തെരച്ചില്‍ നടത്തിയപ്പോഴാണ് ചെളിയില്‍ മൂടിയ നിലയില്‍ ഷൂ കിട്ടിയത്. വുഡ്‌ലാന്‍ഡ് കമ്പനിയുടേതാണ് ലെതര്‍ ഷൂ. പന്തീരാങ്കാവ് സ്വദേശി മഠത്തില്‍ അബ്ദുൾ അസീസിനെയും സംഘത്തിനെയും ഉപയോഗിച്ച് പോലീസ് നടത്തിയ തെരച്ചിലിലാണ് ഷൂ കണ്ടെത്തിയത്. കഴിഞ്ഞ തിങ്കളാഴ്ച രണ്ടാംഘട്ട തെരച്ചിലിനായി പ്രതികളെ പോലീസ് കസ്റ്റഡിയില്‍ വാങ്ങുകയായിരുന്നു. ഏഴടിയോളം താഴ്ചയുള്ള ചതുപ്പില്‍ നിന്ന് വെള്ളം പമ്പ് ചെയ്തു വറ്റിച്ചാണ് തെരച്ചില്‍ നടത്തുന്നത്. പ്രതികളായ വാഴാത്തിരുത്തി കുളങ്ങരക്കണ്ടി മീത്തല്‍ കെ.കെ നിഖില്‍, വേങ്ങേരി തടമ്പാട്ടുതാഴം ചെന്നിയാംപൊയില്‍ ദീപേഷ് എന്നിവരാണ് ഷൂ തിരിച്ചറിഞ്ഞത്. അസി. കമ്മീഷണര്‍ ടി.കെ. അഷ്‌റഫിന്‍റെയും എലത്തൂര്‍ ഇന്‍സ്‌പെക്ടര്‍ കെ.ആര്‍. രഞ്ജിത്തിന്‍റെയും നേതൃത്വത്തിലായിരുന്നു പരിശോധന. റവന്യൂ ഉദ്യോഗസ്ഥരും ഫോറന്‍സിക് വിദഗ്ധരും പരിശോധനയുടെ ഭാഗമായി. മൃതദേഹം കണ്ടെത്താന്‍ മായ, മര്‍ഫി എന്നീ പോലീസ് നായ്ക്കളെയും പരിശോധനയ്ക്കായി കൊണ്ടുവന്നിരുന്നു. മൃതദേഹത്തിന്‍റെ അവശിഷ്ടങ്ങള്‍ക്കായുള്ള തെരച്ചില്‍ ഇന്നും തുടരും.

ഡിജിറ്റല്‍ തട്ടിപ്പിലൂടെ 36 ലക്ഷം കവര്‍ന്നു; ആലപ്പുഴ സ്വദേശി അറസ്റ്റില്‍

കോഴിക്കോട്: ഡിജിറ്റല്‍ കറന്‍സി ഇന്‍വെസ്റ്റ്‌മെന്‍റിലൂടെയും ട്രേഡിംഗിലൂടെയും ലാഭം നേടിത്തരാമെന്ന് പറഞ്ഞ് വിശ്വസിപ്പിച്ച് കോഴിക്കോട് സ്വദേശിയായ ബിസിനസുകാരനില്‍ നിന്ന് 36 ലക്ഷത്തോളം രൂപ തട്ടിയെടുത്ത കേസില്‍ ആദ്യ അറസ്റ്റ്. പരാതിക്കാരന്‍റെ അക്കൗണ്ടില്‍ നിന്ന് നേരിട്ട് പണം എത്തിയ ബാങ്ക് അക്കൗണ്ടിന്‍റെ ഉടമയായ ആലപ്പുഴ പഴവീട് ജിതേഷ് ബാബു (50)വിനെയാണ് കോഴിക്കോട് സിറ്റി സൈബര്‍ പോലീസ് അറസ്റ്റ് ചെയ്തത്. കൂടുതല്‍ ലാഭം നേടിത്തരാമെന്ന് പറഞ്ഞ് വിശ്വസിപ്പിച്ചും പരാതിക്കാരനെ തെറ്റിധരിപ്പിച്ചും ഡെപ്പോസിറ്റ് ചെയ്യിപ്പിച്ച പണം എത്തിയത് ഇയാളുടെ അക്കൗണ്ടിലേക്കാണ്. ഓണ്‍ലൈന്‍ സാമ്പത്തിക തട്ടിപ്പുകളിലൂടെ ബാങ്ക് അക്കൗണ്ടുകളില്‍ എത്തിച്ചേരുന്ന വലിയ തുകകള്‍ പണമായി മാറ്റുന്ന സംഘത്തില്‍പെട്ട ആളാണോ ഇയാള്‍ എന്നത് കൂടുതല്‍ പരിശോധനകളിലൂടെ മാത്രമേ വ്യക്തമാക്കാന്‍ സാധിക്കൂവെന്ന് പോലീസ് അറിയിച്ചു. കംബോഡിയ ബന്ധങ്ങള്‍ ഉള്ളതായി മനസിലാക്കിയ ഈ ഓണ്‍ലൈന്‍ ഇന്‍വെസ്റ്റ്‌മെന്‍റ് തട്ടിപ്പു കേസിന്‍റെ ആദ്യത്തെ ലെയറിലാണ് ഒരു കേരള അക്കൗണ്ട് വന്നത്. പണം വാഗ്ദാനം ചെയ്ത് ബാങ്ക് അക്കൗണ്ടുകള്‍ ശേഖരിച്ച് ഓണ്‍ലൈന്‍ തട്ടിപ്പുകാര്‍ക്ക് നല്‍കുന്ന സംഘങ്ങള്‍ ഇതിന്‍റെ പിറകില്‍ ഉണ്ടോയെന്ന് പരിശോധിച്ചു കൊണ്ടിരിക്കുകയാണ്.സോഷ്യല്‍ മീഡിയ പ്ലാറ്റ്ഫോമുകള്‍ ആയ വാട്സാപ്പ് വഴിയും ടെലിഗ്രാം വഴിയും ബന്ധപ്പെട്ട് ഡിജിറ്റല്‍ കറന്‍സി പ്ലാറ്റ് ഫോമിന്‍റേതെന്ന് തെറ്റിധരിപ്പിക്കുന്ന വ്യാജ വെബ്‌സൈറ്റ് വഴി നിക്ഷേപം നടത്തി വന്‍തോതില്‍ ലാഭം നേടാമെന്ന് പറഞ്ഞാണ് കോഴിക്കോട് സ്വദേശിയായ ബിസിനസുകാരനില്‍ നിന്നും 36 ലക്ഷത്തോളം രൂപ തട്ടിപ്പെടുത്തത്. സോഷ്യല്‍ മീഡിയ പ്ലാറ്റുഫോമുകളില്‍ കാണുന്ന അമിത ലാഭം വാഗ്ദാനം ചെയ്യുന്ന പരസ്യങ്ങളിലും വ്യാജനിക്ഷേപ പ്ലാറ്റുഫോമുകളിലും ആകൃഷ്ടരായി പണം നിക്ഷേപിച്ചു വഞ്ചിതരാകുന്ന കേസുകള്‍ അനുദിനം കൂടിക്കൊണ്ടിരിക്കുകയാണ്. കഴിഞ്ഞമാസം കോഴിക്കോട് സൈബര്‍ ക്രൈം പോലീസ് സ്റ്റേഷനില്‍ മാത്രം രജിസ്റ്റര്‍ ചെയ്ത കേസുകളില്‍ രണ്ട് കോടിയോളം രൂപയാണ് പരാതിക്കാര്‍ക്ക് നഷ്ടമായത്. ഓണ്‍ലൈന്‍ സാമ്പത്തിക തട്ടിപ്പിന്‍റെ ഇരയാകുകയാണെങ്കില്‍ 1930 എന്ന ടോള്‍ ഫ്രീ നമ്പറില്‍ ബന്ധപ്പെടണമെന്ന് പോലീസ് അറിയിച്ചു.

മലബാര്‍ ഗോള്‍ഡ് ആൻഡ് ഡയമണ്ട്‌സ് യുകെയിൽ രണ്ട് ഷോറൂമുകള്‍ തുറന്നു

കോഴിക്കോട്: മലബാര്‍ ഗോള്‍ഡ് ആൻഡ് ഡയമണ്ട്‌സ് യുകെയിലെ ബ്രാന്‍ഡിന്‍റെ സാന്നിധ്യം വ്യാപിപ്പിച്ചുകൊണ്ട് ബര്‍മിംഗ്ഹാമിലും സൗത്താളിലും പുതിയ രണ്ട് ഷോറൂമുകള്‍ കൂടി ആരംഭിച്ചു. അന്താരാഷ്ട്ര ജ്വല്ലറി വിപണിയില്‍ ബ്രാന്‍ഡിന്‍റെ സ്വാധീനം കൂടുതല്‍ ശക്തിപ്പെടുത്തുന്ന പുതിയ ഷോറൂമുകള്‍ പ്രശസ്ത ബോളിവുഡ് താരവും മലബാര്‍ ഗോള്‍ഡ് ആൻഡ് ഡയമണ്ട്‌സിന്‍റെ ബ്രാന്‍ഡ് അംബാസഡറുമായ കരീന കപൂര്‍ഖാന്‍ ഉദ്ഘാടനം ചെയ്തു. ആയിരക്കണക്കിനാളുകളാണ് ഉദ്ഘാടന ചടങ്ങില്‍ പങ്കെടുത്തത്. 5,700ലേറെ ചതുരശ്ര അടി വിസ്തീര്‍ണമുള്ള ബര്‍മിംഗ്ഹാം ഷോറൂം മലബാര്‍ ഗോള്‍ഡ് ആൻഡ് ഡയമണ്ട്‌സിന്‍റെ യുകെയിലെ ഏറ്റവും വലിയ ഔട്ട്‌ലെറ്റാണ്. ബര്‍മിംഗ്ഹാം ഷോറൂമിന്‍റെ ഉദ്ഘാടന ചടങ്ങില്‍ ബര്‍മിംഗ്ഹാം ലോര്‍ഡ് മേയര്‍ കൗണ്‍സിലര്‍ സഫര്‍ ഇഖ്ബാല്‍ എംബിഇ, ബര്‍മിംഗ്ഹാമിലെ ഇന്ത്യന്‍ കോണ്‍സല്‍ ജനറല്‍ ഡോ. വെങ്കിടാചലം മുരുകന്‍, മലബാര്‍ ഗോള്‍ഡ് ആൻഡ് ഡയമണ്ട്‌സ് സീനിയര്‍ ഡയറക്ടര്‍മാര്‍, മാനേജ്‌മെന്‍റ് ടീം അംഗങ്ങള്‍, സമൂഹ നേതാക്കള്‍, ഉപഭോക്താക്കള്‍ എന്നിവര്‍ പങ്കെടുത്തു. സൗത്താള്‍ ഷോറൂമിന്‍റെ ഉദ്ഘാടന ചടങ്ങില്‍ ഈലിംഗ് മേയര്‍ കൗണ്‍സിലര്‍ ആന്‍റണി കെല്ലി, ഈലിംഗ് സൗത്താള്‍ എംപി ഡീഡ്രെ കോസ്റ്റിഗന്‍, മലബാര്‍ ഗോള്‍ഡ് ആൻഡ് ഡയമണ്ട്‌സ് സീനിയര്‍ ഡയറക്ടര്‍മാര്‍, മാനേജ്‌മെന്‍റ് ടീം അംഗങ്ങള്‍, സമൂഹ നേതാക്കള്‍, ഉപഭോക്താക്കള്‍ എന്നിവര്‍ പങ്കെടുത്തു.

മൈജിയിൽ ടെക്നോ പോവ സ്ലിം 5ജിയുടെ ഒഫിഷ്യൽ ലോഞ്ച് നടത്തി

കോഴിക്കോട്: ടെക്നോ പുറത്തിറക്കുന്ന ലോകത്തിലെ ഏറ്റവും സ്ലിംമെസ്റ്റ് 3ഡി കർവ്ഡ് അമോലെഡ് ഡിസ്പ്ലേയുള്ള പോവ സ്ലിം 5ജിയുടെ ഒഫീഷൽ ലോഞ്ച് നടന്നു. കോട്ടയം മൈജി ഫ്യൂച്ചർ ഷോറൂമിൽവച്ച് പ്രശസ്ത സിനിമാതാരം ഹണി റോസാണ് ലോഞ്ച് ചെയ്തത്. വളരെ കനം കുറഞ്ഞ രൂപകൽപ്പനയ്ക്കൊപ്പം പ്രവർത്തനക്ഷമതയും സ്റ്റൈലും ഒരുമിക്കുന്ന രീതിയിലാണ് ഇത് പുറത്തിറക്കിയിരിക്കുന്നത്. വെറും 5.95എംഎമ്മാണ് ടെക്നോ പോവ സ്ലിം 5ജിയുടെ തിക്നെസ് വരുന്നത്. ലോഞ്ചിനോടനുബന്ധിച്ച് ഒട്ടനവധി ഓഫറുകളാണ് മൈജിയും ടെക്നോയും കൂടി ഒരുക്കിയിരിക്കുന്നത്. പത്ത് മാസത്തെ തവണ വ്യവസ്ഥയിൽ ടെക്നോ പോവ സ്ലിം 5ജി സ്വന്തമാക്കാവുന്നതാണ്. 30നുള്ളിൽ പർച്ചേസ് ചെയ്യുന്ന കസ്റ്റമേഴ്സിന് രണ്ട് വർഷ വാറന്‍റി ലഭിക്കുന്നു. ഴയ ഫോണുകൾ ഏറ്റവും മികച്ച വിലയിൽ എക്സ്ചേഞ്ച് ചെയ്ത് മികച്ച ഓണം ഓഫറിൽ പുതിയ ടെക്നോ പോവ സ്ലിം 5ജി വാങ്ങാനുള്ള സ്പെഷൽ അവസരവും മൈജിയിലുണ്ട്. ഫോൺ പർച്ചേസ് ചെയ്യുന്ന കസ്റ്റമേഴ്സിന് മൈജിയുടെ ലോയൽറ്റി പോയന്‍റ് ലഭിക്കുന്നതാണ്. ഈ ലോയൽറ്റി പോയന്‍റ്സ് ഉപയോഗിച്ച് അഡീഷണൽ പർച്ചേസ് നടത്താം.

വോട്ടർ പട്ടിക; കാരശേരിയിൽ വ്യാജ വോട്ട് ഇരട്ട വോട്ട് ആരോപണങ്ങളുമായി മുന്നണികൾ

മുക്കം: കാരശേരി പഞ്ചായത്തിൽ വോട്ടർ പട്ടിക സംബന്ധിച്ച് ക്രമക്കേട് ആരോപണവുമായി എൽഡിഎഫും യുഡിഎഫും. പഞ്ചായത്തിലെ നിരവധി വാർഡുകളിൽ വയസാകാത്ത ആളുകളെ പോലും വ്യാജ രേഖ നൽകി വോട്ട് ചേർത്തതായി എൽഡിഎഫ് മെമ്പർമാർ ആരോപിച്ചു. പതിനൊന്നാം വാർഡിലെ കോൺഗ്രസ് നേതാവായ സമാൻ ചാലോളിയുടെ പ്രായ പൂർത്തിയാകാത്ത മകന്‍റെ വോട്ട് വ്യാജ രേഖ നൽകി ചേർത്തിരിക്കുകയാണന്നും കോൺഗ്രസ് നേതാക്കളുടെ മക്കളുടെ വോട്ട് പോലും പഞ്ചായത്തിന്‍റെ ഭരണം ഉപയോഗിച്ച് ഉദ്യോഗസ്ഥർക്ക് വ്യാജ രേഖ നൽകിയാണ് ചേർത്തതെന്ന് എൽഡിഎഫ് മെമ്പർമാർ ആരോപിച്ചു.കാരശേരി പഞ്ചായത്തിലെ ഭരണം എങ്ങനെയും പിടിച്ചു നിർത്തുക എന്ന ലക്ഷ്യത്തോടെ യുഡിഎഫ് ഭരണസമിതി ഇത്തരത്തിൽ വ്യാപകമായി കള്ളവോട്ട് ചേർത്തതായും ഇവർ ആരോപിക്കുന്നു. അതേ സമയം കൃത്യമായ രേഖകൾ നൽകിയാണ് വോട്ട് ചേർത്തതെന്ന് സമാൻ ചാലൂള പറഞ്ഞു.അതിനിടെ ജില്ല പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർപേഴ്സൺ വി.പി ജമീലയുടെ മകൾക്ക് ഇരട്ട വോട്ടെന്ന ആരോപണവുമായി മുസ്ലീം ലീഗും രംഗത്തെത്തി. വി.പി. ജമീലയുടെ മകൾ ഫാത്തിമ മാഷിദക്ക് ഭർത്താവിന്‍റെ പഞ്ചായത്തായ കൊടിയത്തൂർ പതിമൂന്നാം വാർഡ് പൊറ്റമ്മലിൽ 941 ക്രമനമ്പറായും സ്വന്തം പഞ്ചായത്തായ കാരശേരിയിലെ എട്ടാം വാർഡ് അള്ളിയിൽ 750ക്രമ നമ്പറായും വോട്ട് ഉണ്ടെന്ന്‌ മുസ്ലീം ലീഗ് കാരശേരി പഞ്ചായത്ത് ജനറൽ സെക്രട്ടറി സലാം തേക്കുംകുറ്റി പറഞ്ഞു. കാരശേരി പഞ്ചായത്ത് ഡിലിമിറ്റേഷനുമായി ബന്ധപ്പെട്ടും വോട്ടർ ലിസ്റ്റ് ക്രമീകരണവുമായി ബന്ധപ്പെട്ടും അനധികൃതമായ നിരവധി വോട്ടുകളാണ് ലിസ്റ്റിൽ കടന്നുകൂടിയിരിക്കുന്നത്. ഗ്രാമപഞ്ചായത്ത് വാർഡുകളിൽ 1200ൽ കൂടുതൽ വോട്ടർമാർ ഉണ്ടാവാൻ പാടില്ലെന്ന് ഇലക്ഷൻ കമ്മീഷന്‍റെ നിയമമാണ് എന്നിരിക്കെ രണ്ടായിരത്തിനടുത്ത വോട്ടുകളാണ് പുതുതായി രൂപീകരിച്ച 19 മുരിങ്ങം പുറായി വാർഡിലും 15 വലിയപറമ്പ് വാർഡിലും കുത്തിനിറച്ചിരിക്കുന്നതെന്നും മുസ്ലീം ലീഗ് ആരോപിക്കുന്നു. എന്നാൽ തന്‍റെ മകൾ കാരശേരി പഞ്ചായത്തിലാണ് വോട്ട് ചെയ്യുകയെന്നും കൊടിയത്തൂരിലെ വോട്ട് ഒഴിവാക്കാൻ അപേക്ഷ നൽകിയിരുന്നതായും വി.പി. ജമീലയും പറഞ്ഞു.

കേരളത്തിന്‍റെ ഭരണരംഗങ്ങൾ പൂർണ തകർച്ചയിൽ: മാജൂഷ് മാത്യു

കൂരാച്ചുണ്ട്: കഴിഞ്ഞ ഒമ്പത് വർഷക്കാലമായി കേരളത്തിന്‍റെ ഭരണരംഗങ്ങൾ പൂർണ തകർച്ചയിലാണെന്ന് കർഷക കോൺഗ്രസ് സംസ്ഥാന പ്രസിഡന്‍റ് മാജൂഷ് മാത്യു പറഞ്ഞു. ക്രിമിനലുകളെ സർവീസിൽ നിന്നും പുറത്താക്കുകയെന്ന മുദ്രാവാക്യവുമായി നടുവണ്ണൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ കൂരാച്ചുണ്ട് പോലീസ് സ്റ്റേഷന് മുമ്പിൽ നടത്തിയ ജനകീയ പ്രതിഷേധ സദസ് ഉദ്ഘാടനം ചെയ്തു സംസാരിക്കുകയായിരുന്നു മാജൂഷ് മാത്യു. കേരളത്തിന്‍റെ ആഭ്യന്തരവകുപ്പ് കെടുകാര്യസ്ഥതയുടെ അങ്ങേയറ്റത്ത് എത്തിയിരിക്കുകയാണ്. മാത്രമല്ല എല്ലാ ഭരണ വകുപ്പുകളും പൂർണമായി തകർത്തുകൊണ്ട് കേരളത്തെ വികസനത്തിന്‍റെ പടികളിൽ നിന്നും ചവിട്ടിവീഴിച്ച സർക്കാരാണ് കേരളം ഭരിക്കുന്നതെന്നും അദ്ദേഹം പറഞ്ഞു. നടുവണ്ണൂർ ബ്ലോക്ക് കോൺഗ്രസ് പ്രസിഡന്‍റ് കെ. രാജീവൻ അധ്യക്ഷത വഹിച്ചു. കെഎസ്‌യു ജില്ലാ പ്രസിഡന്‍റ് വി.ടി സൂരജ്, കോൺഗ്രസ് മണ്ഡലം പ്രസിഡന്‍റുമാരായ ജോസ് വെളിയത്ത്, എ.പി ഷാജി, വിജയൻ പൊയിൽ, ടി.കെ ചന്ദ്രൻ, ഡികെടിഎഫ് നിയോജക മണ്ഡലം പ്രസിഡന്‍റ് ശശി മങ്ങര, കൂരാച്ചുണ്ട് പഞ്ചായത്ത് വൈസ് പ്രസിഡന്‍റ് വിൻസി തോമസ്, കോൺഗ്രസ് മണ്ഡലം വൈസ് പ്രസിഡന്‍റ് ഷാജു കാരക്കട എന്നിവർ പ്രസംഗിച്ചു. പി.പി ശ്രീധരൻ, മനോജ് അഴകത്ത്, കെ.കെ അബൂബക്കർ, ബിജു മാണി, നുസ്രത്ത് ബഷീർ, ബി.പി ഗോവിന്ദൻകുട്ടി, കെ.പി ഗിരീഷ്, വി.പീതാംബരൻ, ഗീത ചന്ദ്രൻ തുടങ്ങിയവർ നേതൃത്വം നൽകി.

കാർ നിയന്ത്രണം വിട്ട് വൈദ്യുതപോസ്റ്റിൽ ഇടിച്ചു

പുല്ലൂരാംപാറ: പള്ളിപ്പാലം - ഇലന്തുകടവ് റോഡിൽ കാർ നിയന്ത്രണം വിട്ട് വൈദ്യുതപോസ്റ്റിൽ ഇടിച്ചു. വൈദ്യുതപോസ്റ്റ് തകർത്ത് കാർ സമീപത്തെ മരത്തിൽ ഇടിച്ചു കയറി. ഇന്നലെ ഉച്ചയ്ക്ക് രണ്ടോടെയായിരുന്നു അപകടം. കാറിന്‍റെ മുൻഭാഗം ഭാഗികമായി തകർന്നു. അപകടത്തിൽ ആർക്കും പരിക്കില്ല. പുല്ലൂരാംപാറ സ്വദേശിയുടെ കാറാണ് അപകടത്തിൽപ്പെട്ടത്.

ജെന്‍ സി പ്രക്ഷോഭം: കോഴിക്കോട് നിന്നുള്ള സംഘത്തിന്‍റെ മടക്കയാത്ര അനിശ്ചിതത്വത്തില്‍

മുക്കം: ജെന്‍ സി പ്രക്ഷോഭം കാരണം നേപ്പാളില്‍ കുടുങ്ങിയ കോഴിക്കോടു നിന്നുള്ള നാല്പതംഗ മലയാളി വിനോദയാത്രാ സംഘം സുരക്ഷിതരെങ്കിലും മടക്കയാത്ര അനിശ്ചിതത്വത്തില്‍. രാജ്യം സൈന്യത്തിന്‍റെ വറുതിയിലായതോടെ കലാപത്തിന്‍റെ ആളിക്കത്തല്‍ പുറത്തെല്ലാം അടങ്ങിയിട്ടുണ്ട്. പട്ടാളത്തിന്‍റെ വാഹനങ്ങള്‍ ചുറ്റിക്കറങ്ങിക്കൊണ്ടിരിക്കുകയാണെന്നു യാത്രാസംഘാംഗമായ ബക്കര്‍ കളര്‍ ബലൂണ്‍ പറഞ്ഞു. നാല്പതംഗ മലയാളി യാത്രാ സംഘം ഹോട്ടല്‍ മുറിയില്‍ സുരക്ഷിതരായി കഴിഞ്ഞുകൂടുകയാണ്. ഭക്ഷണത്തിനും മറ്റും പ്രയാസമില്ല. അതേ സമയം റോഡുകള്‍ വിജനമാണ്. വീടുകളില്‍നിന്ന് ആരും മുറ്റത്തേക്കുപോലും ഇറങ്ങുന്നതായി കാണുന്നില്ല. മടക്കയാത്രയെക്കുറിച്ചാണിപ്പോള്‍ ആശങ്ക. അടച്ചിട്ട വിമാനത്താവളങ്ങള്‍ എപ്പോഴാണ് തുറക്കുകയെന്നറിയില്ലെന്നും ബക്കര്‍ പറഞ്ഞു. കോഴിക്കോട് ജില്ലയിലെ കാരശേരി പെന്‍ഷനേഴ്‌സ് ടൂര്‍ പ്രകാരം ഞായറാഴ്ച നാട്ടില്‍നിന്ന് പുറപ്പെട്ട സംഘമാണ് നേപ്പാളില്‍ കുടുങ്ങിയത്. മുക്കം, കൊടിയത്തൂര്‍, കാരശേരി, കൊടുവള്ളി അരീക്കോട് പ്രദേശവാസികളായ നാല്പത് പേരാണ് ഈ സംഘത്തിലുള്ളത്. അധികവും പെന്‍ഷന്‍കാരായ ഭാര്യാ -ഭര്‍ത്താക്കന്മാരാണ്. തിങ്കളാഴ്ച രാവിലെ എട്ടുമണിക്കാണ് ഇവര്‍ കാഠ്മണ്ഡു വിമാനത്താവളത്തില്‍ ഇറങ്ങിയത്. ചൊവ്വാഴ്ച രാവിലെ കാഠ്മണ്ഡുവിലേക്കുള്ള യാത്രക്കിടെയാണ് ഇവര്‍ കുടുങ്ങിയത്.

കേരളോത്സവം സ്വാഗതസംഘം രൂപീകരിച്ചു

കൂരാച്ചുണ്ട്: യുവജനക്ഷേമ വകുപ്പും കുരാച്ചുണ്ട് പഞ്ചായത്തും സംയുക്തമായി സംഘടിപ്പിക്കുന്ന കേരളോത്സവം 2025 ഭാഗമായി സ്വാഗതസംഘ രൂപീകരണ യോഗം പഞ്ചായത്ത് ഹാളിൽ ചേർന്നു. 27-ന് അത്‌ലറ്റിക് മത്സരങ്ങളും, 28ന് ക്രിക്കറ്റ് മത്സരം, ഒക്ടോബർ ഒന്നിന്‌ കലാ വിഭാഗം മത്സരങ്ങളും, രണ്ടിന് കായിക മത്സരങ്ങൾ എന്നിവ നടത്താൻ പഞ്ചായത്ത് പ്രസിഡന്‍റ് ഒ.കെ. അമ്മദിന്‍റെ അധ്യക്ഷതയിൽ ചേർന്ന യോഗത്തിൽ തീരുമാനമായി. ഇതിന്‍റെ നടത്തിപ്പിനായി വിവിധ വിഭാഗങ്ങളിലായി സബ് കമ്മിറ്റികളും രൂപീകരിച്ചു. യോഗത്തിൽ പഞ്ചായത്ത് സ്ഥിരം സമിതി അംഗങ്ങളായ സണ്ണി പുതിയകുന്നേൽ, സിമിലി ബിജു, ഡാർളി എബ്രഹാം, പഞ്ചായത്ത് അംഗങ്ങളായ സിനി ഷിജോ, ജെസി ജോസഫ്, സിഡിഎസ് ചെയർപേഴ്സൺ കാർത്തിക വിജയൻ, പഞ്ചായത്ത് ജൂനിയർ സൂപ്രണ്ടന്‍റ് അഷറഫ്, വിവിധ പാർട്ടി പ്രതിനിധികളായ നിസാം കക്കയം, എ.സി ഗോപി, ടി.കെ ശിവദാസൻ, എം.വി രാഘവൻ, പ്രധാനാധ്യാപകൻ കെ.സി ബിജു, യുവജന സംഘടന ഭാരവാഹികൾ, വിവിധ ക്ലബ് ഭാരവാഹികൾ തുടങ്ങിയവർ പങ്കെടുത്തു.

ദേശീയ ഭക്ഷ്യഭദ്രതാ നിയമം: അവലോകന യോഗം ചേര്‍ന്നു

കോഴിക്കോട്: ‌ദേശീയ ഭക്ഷ്യഭദ്രതാ നിയമം 2013 പ്രകാരം ജില്ലയില്‍ നടപ്പാക്കിവരുന്ന വിവിധ പദ്ധതികളുടെ നിര്‍വഹണ പുരോഗതി വിലയിരുത്താന്‍ ഭക്ഷ്യ കമ്മീഷന്‍ ചെയര്‍പേഴ്സണ്‍ ഡോ. ജിനു സഖറിയ ഉമ്മന്‍റെ നേതൃത്വത്തില്‍ അവലോകന യോഗം ചേര്‍ന്നു. അതിഥി തൊഴിലാളികള്‍ക്ക് റേഷന്‍ നല്‍കാന്‍ നടപടിയെടുക്കണമെന്ന് നിര്‍ദേശിച്ച ചെയര്‍പേഴ്സണ്‍, പദ്ധതികളുടെ ഫലപ്രദമായ നടത്തിപ്പിനാവശ്യമായ മാര്‍ഗനിര്‍ദേശങ്ങളും നല്‍കി. എന്‍എഫ്എസ്എ പ്രകാരം വിവിധ വകുപ്പുകള്‍ മുഖേന നടപ്പാക്കിവരുന്ന പദ്ധതികള്‍ സംബന്ധിച്ച റിപ്പോര്‍ട്ട് യോഗത്തില്‍ അവതരിപ്പിച്ചു. പദ്ധതി നിര്‍വഹണം സംബന്ധിച്ച പരാതികളൊന്നും നിലവിലില്ലെന്ന് വിവിധ വകുപ്പ് ഉദ്യോഗസ്ഥര്‍ അറിയിച്ചു. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ അഡീഷണല്‍ ജില്ലാ മജിസ്ട്രേറ്റ് പി. സുരേഷ് അധ്യക്ഷത വഹിച്ചു. പൊതുവിതരണം, പൊതു വിദ്യാഭ്യാസം, വനിതാ ശിശു വികസനം, പട്ടികവര്‍ഗ വികസനം, കുടുംബശ്രീ മിഷന്‍ തുടങ്ങിയ വകുപ്പ് ഉദ്യോഗസ്ഥര്‍ പങ്കെടുത്തു.

യുവ ജാഗരണ്‍ യാത്രയ്ക്ക് സ്വീകരണം നല്‍കി

മുക്കം: എയ്ഡ്‌സ്, ലഹരി ഉപയോഗം എന്നിവയ്ക്കെതിരേയുള്ള ബോധവത്കരണം ലക്ഷ്യമിട്ട് സംസ്ഥാനതല എന്‍എസ്എസ് കാര്യാലയവും കേരള എയ്ഡ്‌സ് കണ്‍ട്രോള്‍ സൊസൈറ്റിയും സംയുക്തമായി സംഘടിപ്പിച്ച യുവ ജാഗരണ്‍ യാത്രയുടെ കോഴിക്കോട് ജില്ലാതല സ്വീകരണ ഉദ്ഘാടനം ആനയാംകുന്ന് ഹയര്‍ സെക്കന്‍ഡറി സ്‌കൂളില്‍ നടന്നു. സ്വീകരണ ചടങ്ങ് കുന്നമംഗലം ബ്ലോക്ക് പഞ്ചായത്ത് പ്രസിഡന്‍റ് അരിയില്‍ അലവി ഉദ്ഘാടനം ചെയ്തു. സ്‌കൂള്‍ പ്രിന്‍സിപ്പല്‍ പി.പി. ലജ്‌ന അധ്യക്ഷത വഹിച്ചു. ജില്ലാ കോ ഓര്‍ഡിനേറ്റര്‍ സംഗീത കൈമള്‍, നോഡല്‍ ഓഫീസര്‍ ലിജോ ജോസഫ്, എന്‍എസ്എസ് പ്രോഗ്രാം ഓഫീസര്‍ കെ.വി.നസീറ, സ്റ്റാഫ് സെക്രട്ടറി എം.ടി. ഫരിദ, എന്‍എസ്എസ് മാവൂര്‍ ക്ലസ്റ്റര്‍ കോ ഓര്‍ഡിനേറ്റര്‍ സില്ലി ബി. കൃഷ്ണന്‍, എന്‍എസ്എസ് വോളണ്ടിയര്‍ ഇ.പി. ആദിത്യ എന്നിവര്‍ സംസാരിച്ചു.

മലബാര്‍ ആര്‍ട്‌സ് ആൻഡ് കള്‍ച്ചറല്‍ സെന്‍റര്‍ രൂപികരിച്ചു

കോഴിക്കോട്: മലബാറിലെ നാടന്‍ കലാകാരന്‍മാരുടെ സംരക്ഷണം ഉറപ്പുവരുത്തണമെന്ന് പുതുതായി രൂപികരിച്ച മലബാര്‍ ആര്‍ട്‌സ് ആൻഡ് കള്‍ച്ചറല്‍ സെന്‍റര്‍ (മാക്) ആവശ്യപ്പെട്ടു. നാടന്‍ കലകളുടെ പഠന ഗവേഷണത്തിനായി ഫെലോഷിപ്പ് എര്‍പ്പെടുത്തണമെന്നും യോഗം ആവശ്യപ്പെട്ടു. അഡ്വ. എം. രാജന്‍ അധ്യക്ഷത വഹിച്ചു. ഭാരവാഹികളായി അഡ്വ.എം. രാജന്‍ (പ്രസിഡന്‍റ്), സി.രമേശ് (ജനറല്‍ സെക്രട്ടറി), അഡ്വ. സുനീഷ് മാമിയില്‍, പി.ഐ. അജയന്‍ ( വൈസ് പ്രസിഡന്‍റുമാര്‍), എം.ടി. സേതുമാധവന്‍, സി.പി. ശ്രീകല (സെക്രട്ടറിമാര്‍) , എം. അരവിന്ദാക്ഷന്‍ (ട്രഷറര്‍) എന്നിവരെ തെരഞ്ഞെടുത്തു.

പി.എം. സജിത്കുമാറിന് സംസ്ഥാന അധ്യാപക അവാര്‍ഡ്

പേരാമ്പ്ര: പേരാമ്പ്ര കിഴിഞ്ഞാണ്യം സ്വദേശിയും കണ്ണൂര്‍ ആയിത്തറ മമ്പറം ഗവ. ഹയര്‍ സെക്കന്‍ഡറി സ്‌കൂള്‍ മലയാളം അധ്യാപകനുമായ പി.എം. സജിത്കുമാറിന് സംസ്ഥാന അധ്യാപക അവാര്‍ഡ് ലഭിച്ചു. കഴിഞ്ഞ 18 വര്‍ഷമായി ആയിത്തറ മമ്പറത്ത് മലയാളം അധ്യാപകനായി സേവനമനുഷ്ഠിച്ചു വരുന്ന സജിത്കുമാര്‍ എഴുത്തുകാരന്‍, പ്രഭാഷകന്‍, സാംസ്‌കാരിക പ്രവര്‍ത്തകന്‍ എന്നീ നിലകളില്‍ സജീവ സാന്നിധ്യമാണ്. തരംഗം സമഗ്ര വിദ്യാഭ്യാസ പദ്ധതിയുടെ മാങ്ങാട്ടിടം പഞ്ചായത്ത് കോ ഓര്‍ഡിനേറ്ററായും പ്രവര്‍ത്തിച്ചു വരുന്നു. പാഠ പുസ്തക രചനാ സമിതി അംഗം, കൈറ്റ് വിക്ടേഴ്‌സ് ഫസ്റ്റ് ബെല്‍ അധ്യാപകന്‍, മലയാളം സ്റ്റേറ്റ് റിസോഴ്‌സ് ഗ്രൂപ്പ് അംഗം എന്നീ നിലകളിലും അദ്ദേഹം അറിയപ്പെടുന്നു. പൊതു വിദ്യാഭ്യാസ വകുപ്പിന്‍റെ സംസ്ഥാന അധ്യാപക സാഹിത്യ അവാര്‍ഡ് നാല് തവണ ലഭിച്ചതുള്‍പ്പെടെ കവിത, നാടകം, ലേഖനം, തിരക്കഥ തുടങ്ങി വിവിധ മേഖലകളില്‍ നിരവധി സാഹിത്യ പുരസ്‌കാരങ്ങള്‍ നേടിയിട്ടുണ്ട്. ഭാര്യ: പി.ടി. സജിത. മക്കള്‍: ശ്രാവണ ജ്യോത്സന, സ്‌നിഗ്ധ് കല്‍ഹാര്‍.

വി.എന്‍. രാധാമണിയെ ആദരിച്ചു

പന്തിരിക്കര: ദീര്‍ഘകാലം ആവടുക്ക എല്‍പി സ്‌കൂളിലെ അധ്യാപികയായിരുന്ന മണിമന്ദിരത്തില്‍ വി.എന്‍. രാധാമണിയെ പട്ടാണിപ്പാറ നവീന ഗ്രന്ഥശാല ആന്‍ഡ് തീയേറ്റേഴ്‌സിന്‍റെ ആഭിമുഖ്യത്തില്‍ ആദരിച്ചു. പ്രസിഡന്‍റ് സി.എം. ദിനേശ് കുമാര്‍ അധ്യക്ഷത വഹിച്ചു. രാധാമണിയെ ചങ്ങരോത്ത് മുന്‍ പഞ്ചായത്ത് പ്രസിഡന്‍റ് കെ.കെ. ലീല പൊന്നാട അണിയിച്ചു. താലൂക്ക് ലൈബ്രറി കൗണ്‍സില്‍ മെമ്പര്‍ കെ. ജി. രാമനാരായണന്‍, ഇ. വിജയരാഘവന്‍, ഷാജന്‍ മാത്യു, ടി. ഇ. പ്രഭാകരന്‍, വി.പി. ഇബ്രാഹിം, വി.എന്‍. വിജയന്‍ എന്നിവര്‍ പ്രസംഗിച്ചു.

കിണറ്റില്‍ വീണ പശുവിനെ അഗ്‌നിരക്ഷാ സേന രക്ഷപ്പെടുത്തി

പേരാമ്പ്ര: പാലേരി വടക്കുമ്പാട് കിണറ്റില്‍ വീണ പശുവിനെ അഗ്‌നിരക്ഷാ സേന രക്ഷപ്പെടുത്തി. പറമ്പില്‍ മേയുന്നതിനിടെ 20 അടിയോളം താഴ്ചയുള്ള ആള്‍മാറയില്ലാത്ത കിണറ്റിലാണ് പശു വീണത്. പേരാമ്പ്ര അഗ്‌നിരക്ഷാ നിലയത്തില്‍ നിന്നും സ്റ്റേഷന്‍ ഓഫീസര്‍ പി.കെ. ഭരതന്‍റെയും സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ വിനോദിന്‍റെയും നേതൃത്വത്തിലെത്തിയ സംഘം പശുവിനെ സുരക്ഷിതമായി കരയയ്ക്ക് എത്തിച്ചു. സേനാംഗങ്ങളായ കെ. ശ്രീകാന്ത്, അഭിലജ്പത് ലാല്‍, അശ്വിന്‍ ഗോവിന്ദ്, പി.പി. രജീഷ്, ഹോം ഗാര്‍ഡ് അനീഷ് കുമാര്‍ എന്നിവരും രക്ഷാ പ്രവര്‍ത്തനത്തില്‍ പങ്കാളികളായി.

"ബ്രിട്ടീഷ് ഭരണം മാറിയിട്ടും ലോക്കപ്പ് മര്‍ദനം മാറിയില്ല'

കോഴിക്കോട്: നമ്മുടെ നാട്ടിലെ ജയിലുകളിലെയും ലോക്കപ്പുകളിലെയും ക്രൂരതയും മര്‍ദനരീതികളും ബ്രിട്ടീഷ് ഭരണകാലത്തില്‍നിന്ന് കാര്യമായി മാറിയിട്ടില്ലെന്നതാണ് യാഥാര്‍ഥ്യമെന്ന് എഴുത്തുകാരന്‍ ചന്ദ്രശേഖരന്‍ തിക്കോടി പറഞ്ഞു. ലോക സാക്ഷരത ദിനത്തോട് അനുബന്ധിച്ച് എ. സുജനപാല്‍ ലൈബ്രറി ആൻഡ് കള്‍ച്ചറല്‍ സെന്‍ററിന്‍റെ നേതൃത്വത്തിൽ വി.എ. കേശവന്‍ നായര്‍ എഴുതിയ "ഇരുമ്പഴിക്കുള്ളില്‍' എന്ന പുസ്തകത്തെ കുറിച്ചുള്ള ചര്‍ച്ചയില്‍ പുസ്തകാവതരണം നടത്തുകയായിരുന്നു അദ്ദേഹം. ജില്ലാ കോണ്‍ഗ്രസ് കമ്മിറ്റി ഓഫീസില്‍ നടന്ന പരിപാടിയില്‍ ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അധ്യക്ഷത വഹിച്ചു. ഉണ്ണികൃഷ്ണന്‍ പൂല്‍ക്കന്‍, ബീന പൂവ്വത്തില്‍, മോഹനന്‍ പുതിയോട്ടില്‍, കാവില്‍ പി. മാധവന്‍, സാബു കീഴരിയൂര്‍, പി.ടി. ധര്‍മ്മരാജ് തുടങ്ങിയവര്‍ സംസാരിച്ചു.

ഓണാഘോഷം സംഘടിപ്പിച്ചു

താമരശേരി: കല്ലുള്ളതോട് നാട്ടൊരുമ സാംസ്‌കാരിക വേദിയുടെ നേതൃത്വത്തില്‍ ഓണാഘോഷം സംഘടിപ്പിച്ചു. ഗൃഹാങ്കണ പൂക്കളമത്സരവും സാംസ്‌കാരിക ഘോഷയാത്രയും സാംസ്‌കാരിക സമ്മേളനവും നടത്തി. പ്രശസ്ത സിനിമാ ഗാനരചയിതാവ് ബാപ്പു വാവാട് ഉദ്ഘാടനം ചെയ്തു. കൊടുവള്ളി ബ്ലോക്ക് പഞ്ചായത്ത് അംഗം നിധീഷ് കല്ലുള്ളതോട് അധ്യക്ഷത വഹിച്ചു. വിവിധ മേഖലകളില്‍ കഴിവു തെളിയിച്ച ഡോ. കെ. ഇന്ദു, സംവിധായകന്‍ ശ്രുതില്‍ മാത്യു എന്നിവരെ ആദരിച്ചു. കട്ടിപ്പാറ ഗ്രാമപഞ്ചായത്ത് അംഗം വി.പി.സുരജ, സി.പി നിസാര്‍, ജോര്‍ജ് ഇലവുങ്കല്‍, മജീദ് മൗലവി, എം. ദിപീഷ്, പി.പി. ബിനു, അഖില്‍ മലയില്‍, കെ.എം.ബാലകൃഷ്ണന്‍ എന്നിവര്‍ പ്രസംഗിച്ചു. കൂടരഞ്ഞി: ഓണാഘോഷത്തിന്‍റെ ഭാഗമായി വ്യാപാരി വ്യവസായി ഏകോപന സമിതി കൂടരഞ്ഞി യൂണിറ്റ് കമ്മിറ്റിയുടെ നേതൃത്വത്തില്‍ ഘോഷയാത്രയും വിവിധ മത്സരങ്ങളും നടത്തി. പ്രസിഡന്‍റ് മുഹമ്മദ് പാതിപ്പറമ്പില്‍, സെക്രട്ടറി സ്റ്റാലിന്‍ എന്നിവര്‍ നേതൃത്വം നല്‍കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]