ADVERTISEMENT

ADVERTISEMENT

നാലര പതിറ്റാണ്ടിനുശേഷം സഹപാഠികൾ ഒത്തുചേർന്നു

പയ്യാവൂർ: ഇരൂഡ് സേക്രഡ് ഹാർട്ട് ഹൈസ്കൂളിലെ 1978 എസ്എസ്എൽസി ബാച്ച് സഹപാഠികളുടെ പ്രഥമ സംഗമം "റോയൽ-78' പയ്യാവൂർ സെന്‍റ് ആൻസ് ഓഡിറ്റോറിയത്തിൽ നടന്നു. പൂർവ വിദ്യാർഥിയും ഉഴവൂർ സെന്‍റ് തോമസ് ഇടവക വികാരിയുമായ ഫാ. തോമസ് ആനിമൂട്ടിൽ സംഗമം ഉദ്ഘാടനം ചെയ്തു. പൂർവ വിദ്യാർഥിയും വൈദികനുമായ ഫാ. ഫിലിപ്പ് ആനിമൂട്ടിൽ അധ്യക്ഷത വഹിച്ചു.

പ്രോഗ്രാം കോ-ഓർഡിനേറ്റർ കെ. ബാലകൃഷ്ണൻ, കെ.വി. സുധാകരൻ, ജോയി തോമസ്, കെ. ബാലൻ, സിസ്റ്റർ സിബി എന്നിവർ പ്രസംഗിച്ചു. മുൻകാല അധ്യാപകരായ കുരുവിള, അന്നക്കുട്ടി പുതുപ്പള്ളി, ഏലിക്കുട്ടി മൂലക്കാട്ട്, അന്നക്കുട്ടി തേർമറ്റം എന്നിവരെ ആദരിച്ചു. തുടർന്ന് പൂർവ വിദ്യാർഥികൾ പങ്കെടുത്ത വിവിധ കലാപരിപാടികളും കായിക മൽസരങ്ങളും നടന്നു. സംഗമത്തിന്‍റെ ഭാഗമായി രണ്ട് രോഗികൾക്ക് സാമ്പത്തിക സഹായവും നൽകി.

ADVERTISEMENT

ആയിക്കരയിൽ ഐസ് പ്ലാന്‍റിൽ അമോണിയം ചോർച്ച

കണ്ണൂർ: ഐസ് പ്ലാന്‍റിൽ അമോണിയം ചോർന്നത് പരിഭ്രാന്തി പരത്തി. ആയിക്കരയിലെ മോഡേൺ ഐസ് പ്ലാന്‍റിലാണ് ഇന്നലെ പുലർച്ചെ അമോണിയം ചോർച്ച ഉണ്ടായത്. കണ്ണൂർ അഗ്നിശമന രക്ഷാ സേന സ്റ്റേഷൻ ഓഫീസർ ടി. അജയന്‍റെ നേതൃത്വത്തിൽ മണിക്കൂറുകൾക്കകം ചോർച്ച പരിഹരിക്കാനായത് ആശ്വാസമായി. ഇന്നലെ പുലർച്ചെ അഞ്ചോടെ വാൽവിലെ ലീക്കിനെ തുടർന്നുണ്ടായ അമോണിയം ചോർച്ച ശ്രദ്ധയിൽപെട്ട ഉടൻ പ്ലാന്‍റ് ഉടമ പള്ളിക്കുന്ന് സ്വദേശി സിറാജുദ്ദീൻ ഫയർ സർവീസിൽ വിവരമറിയിക്കുകയായിരുന്നു. സ്ഥലത്തെത്തിയ സേന പ്ലാന്‍റിലുള്ളവരുടെ സഹായത്തോടെ ഏഴോടെ ചോർച്ചയടച്ച് പ്രശ്നത്തിന് പരിഹാരം കാണുകയായിരുന്നു. ഇതിനകം തന്നെ ഫയർ സർവീസ് സമീപവാസികളായ മൂന്നോളം കുടുംബങ്ങളെ അവിടെനിന്ന് ബന്ധുവീടുകളിലേക്ക് മാറ്റി പാർപ്പിച്ചിരുന്നു. 24 മണിക്കൂറും പ്രവർത്തിക്കുന്ന ഐസ് പ്ലാന്‍റിൽ ഉടമ ഉൾപ്പെടെ തൊഴിലാളികൾ സംഭവസമയം സ്ഥലത്തുണ്ടായിരുന്നു. യഥാസമയം വേണ്ട മുൻകരുതലുകൾ സ്വീകരിച്ചത് സ്ഥിതി പെട്ടെന്ന് നിയന്ത്രണ വിധേയമാക്കാനായി . അസി. സ്റ്റേഷൻ ഓഫീസർ സി.ഡി. റോയ്, സീനിയർ ഫയർ ഓഫീസർ വി.കെ. അഫ്സൽ, കെ. രഞ്ജു, രഗിൻകുമാർ, സച്ചിൻ, ഷിജു, സുകേഷ്, ശില്പ, നസീർ എന്നിവരുൾപ്പെട്ട സംഘമാണ് ചോർച്ച പരിഹരിച്ചത്.

ആറു വീടുകളില്‍ നിന്നായി ബിന്ദു കവര്‍ന്നത് 25 പവന്‍

ചെറുവത്തൂര്‍: പട്ടാപ്പകല്‍ വീട്ടില്‍നിന്നു മൂന്നരപവന്‍ സ്വര്‍ണം കവര്‍ന്ന കേസില്‍ അറസ്റ്റിലായ യുവതിയെ ചോദ്യം ചെയ്തപ്പോള്‍ അഞ്ചു കവര്‍ച്ചാ കേസുകള്‍ കൂടി തെളിഞ്ഞു. പിലിക്കോട് കാര്‍ഷിക കോളജ് തോട്ടം തൊഴിലാളിയും ചെറുവത്തൂര്‍ കാടങ്കോട് അസൈനാര്‍മുക്കിലെ വാടക ക്വാര്‍ട്ടേഴ്‌സിലെ താമസക്കാരിയുമായ കെ. ബിന്ദുവാണ് (44) പ്രതി. റിമാന്‍ഡിലായ പ്രതിയെ ചന്തേര എസ്‌ഐ കെ.പി.സതീഷും സംഘവും വിശദമായി ചോദ്യം ചെയ്തപ്പോഴാണ് മറ്റു കവര്‍ച്ചകളുടെ വിവരങ്ങള്‍ പുറത്തറിയുന്നത്. 2024 ജൂണ്‍ രണ്ടിന് കാടങ്കോട്ടെ ജനാര്‍ദ്ദനന്‍റെ വീട്ടില്‍ കയറി 1,22,500 രൂപ വിലമതിക്കുന്ന 12 ഗ്രാം സ്വര്‍ണമാലയും രണ്ടു ഗ്രാം ലോക്കറ്റും 1890 രൂപയും മോഷ്ടിച്ചു. ചെറുവത്തൂര്‍ തുരുത്തി നെല്ലിക്കാലിലെ ഷാജിയുടെ വീട്ടില്‍നിന്നും 10 പവനും ലസിത മുട്ടത്തിന്‍റെ വീട്ടില്‍നിന്നു മൂന്നേമുക്കാല്‍ പവനും ചെറുവത്തൂര്‍ പയ്യങ്കിയിലെ വിജിനയുടെ വീട്ടില്‍നിന്നു രണ്ടുപവനും പിലിക്കോട്ടം തോട്ടം തൊഴിലാളി കോതോളിയിലെ പുഷ്പയുടെ വീട്ടില്‍നിന്നു മൂന്നു പവനും കാടങ്കോട്ടെ ജാനകിയുടെ വീട്ടില്‍നിന്നു പവനും കവര്‍ച്ച നടത്തിയത് പ്രതി സമ്മതിച്ചു. ഈ വര്‍ഷം ഏപ്രില്‍ 27ന് പയ്യങ്കിയിലെ പ്രവാസിയായ പി.വത്സലന്‍റെ വീട്ടില്‍നിന്നു മൂന്നരപവന്‍ തൂക്കം വരുന്ന സ്വര്‍ണമാല, ബ്രേയ്‌സ്‌ലെറ്റ്, മോതിരം എന്നിവ കവര്‍ന്ന കേസിലാണ് ബിന്ദു അസ്റ്റിലാകുന്നത്. പരിസരവാസികള്‍ ഉള്‍പ്പെടെയുള്ളവരെ ചോദ്യം ചെയ്യുകയും സിസിടിവി ദൃശ്യങ്ങള്‍ പരിശോധിക്കുകയും ചെയ്തപ്പോഴാണ് ബിന്ദു ഇവിടെ വന്ന വിവരമറിയുന്നത്. തുടര്‍ന്ന് ഇവരെ ചോദ്യം ചെയ്യുകയും കുറ്റം സമ്മതിക്കുകയായിരുന്നു. കവര്‍ച്ച നടത്തിയ വീടുകളെല്ലാം ബിന്ദുവിന്‍റെ ബന്ധുക്കളുടെയോ അടുത്ത പരിചയക്കാരുടെയോ ആയിരുന്നു. ഇവര്‍ വീട് പൂട്ടി പുറത്തുപോകുമ്പോള്‍ താക്കോല്‍ സൂക്ഷിച്ചുവയ്ക്കുന്ന സ്ഥലം കൃത്യമായി മനസിലാക്കിയാണ് ബിന്ദു കവര്‍ച്ച നടത്തിയിരുന്നത്. കൃത്യം നടത്തിയശേഷം താക്കോല്‍ അതേ സ്ഥലത്തു തന്നെ തിരിച്ചുവയ്ക്കുകയും ചെയ്യും. വത്സലന്‍റെ വീട്ടില്‍നിന്നും കവര്‍ന്ന മാല നീലേശ്വരത്തെ ജ്വല്ലറിയില്‍ വില്ക്കുകയും പുതുതായി വാങ്ങിയ ഒരു മാലയും രണ്ടു മോതിരവും വാങ്ങി. ബാക്കി സ്വര്‍ണാഭരണങ്ങള്‍ തിമിരി സര്‍വീസ് സഹകരണ ബാങ്കില്‍ മകളെക്കൊണ്ട് പണയം വയ്പ്പിച്ചു. ആഭരണങ്ങള്‍ വിറ്റുകിട്ടുന്ന പണം കൊണ്ട് ആര്‍ഭാടജീവിതം നയിക്കുന്ന ബിന്ദുവിന്‍റെ കൈവശം കാര്യമായി ഒന്നും അവശേഷിക്കുന്നില്ലെന്നാണ് പോലീസിന്‍റെ കണ്ടെത്തല്‍.

സണ്ണി ജോസഫ്; കർഷക മനസ്, മലയോരത്തിന്‍റെ ശബ്ദം

ബിജു പാരിക്കാപള്ളിൽ ഇരിട്ടി: പേരാവൂർ മണ്ഡലത്തിൽ 2011 ലെ തെരഞ്ഞെടുപ്പ് ഒരു വഴിത്തിരിവായിരുന്നു. ഇടതും വലതും ചാഞ്ചാടി കളിച്ചിരുന്ന മണ്ഡലത്തിലേക്ക് സിറ്റിംഗ് എംഎൽഎ കരുത്തയായ കെ.കെ. ശൈലജയെ മത്സരിപ്പിക്കാനായിരുന്നു പാർട്ടിയുടെ നിർദേശം. എന്നാൽ ചാഞ്ചാടി നിന്ന പേരാവൂരിന് സ്ഥിരത നല്കിയായിരുന്നു ശൈജലയെ പരാജയപ്പെടുത്തിയുള്ള പേരാവൂരിലെ അഡ്വ. സണ്ണി ജോസഫിന്‍റെ വിജയം. സ്വദേശത്തു നിന്നുതന്നെ വിജയിക്കുന്ന ആദ്യത്തെ മത്സരാർഥി എന്ന പ്രത്യേകതയും സണ്ണിക്ക് സ്വന്തം. പേരാവൂർ ജനതയ്ക്ക് കൂടുതൽ സമയം എംഎൽഎയുടെ സേവനം നേരിട്ട് ലഭിച്ചതും 2011 ന് ശേഷമായിരുന്നു. കഴിഞ്ഞ 14 വർഷത്തെ മണ്ഡലത്തിലെ പ്രവർത്തനങ്ങൾ അദ്ദേഹത്തെ കൂടുതൽ ജനകീയനാക്കി. മലയോരത്തെ കർഷക പുത്രനായി ജനിച്ച് വിദ്യാർഥി രാഷ്‌‌ട്രീയത്തിലൂടെ വളർന്ന് ജനപ്രതിനിധി യായപ്പോഴും എന്നും കർഷകർക്കൊപ്പം. എതിരാളികളെപോലും പുഞ്ചിരിയോടെ നേരിടുന്ന നേതാവ് കൂടിയാണ് സണ്ണി വക്കീൽ. കർഷകർക്കൊപ്പം രാവും പകലും സഞ്ചരിക്കാൻ മടികാണിക്കാത്ത നേതാവ്. ഇരിട്ടി താലൂക്ക് എന്ന മലയോരത്തിന്‍റെ സ്വപ്നം യാഥാർഥ്യമാക്കാൻ നിരന്തരം ശ്രമിച്ച വ്യക്തി. മലയോരത്തെ കർഷകരുടെ പ്രശ്ങ്ങൾ നിയമസഭയിൽ ഉയർത്തിക്കാട്ടിയ കർഷകന്‍റെ യഥാർഥ ശബ്ദമായിരുന്നു അദ്ദേഹം. കസ്തൂരി രംഗൻ, ബഫർ സോൺ, വന്യമൃഗ ആക്രമണം, പട്ടയം, ഏറ്റവും ഒടുവിൽ വയനാട് കരിന്തളം 400 കെവി ലൈൻ വിഷയത്തിലും കർഷകന്‍റെ ശബ്ദമായി അദ്ദേഹം തിളങ്ങി. കുറിച്ചിട്ട വാക്കുകൾ കുറിക്കുകൊള്ളുന്ന വക്കീലിന്‍റെ കൂർമ ബുദ്ധി പലപ്പോഴും പലരും അറിഞ്ഞു. തലശേരി കൂട്ടുപുഴ റോഡ് യാഥാർഥ്യമാക്കിയതു മുതൽ മണ്ഡലത്തിലെ റോഡുകളും പാലങ്ങളും തുടങ്ങി വികസന മേഖലയിൽ അധികം കോലാഹലങ്ങൾ ഒന്നും സൃഷ്ടിക്കാതെ തന്‍റേതായ ശൈലിയാണ് വക്കീലിന്. ചിരിച്ച മുഖത്തോടെ പ്രശ്നങ്ങളെ നേരിടുന്ന നേതാവ്. ആറളം ഫാമിലെ പുനരധിവാസ മേഖലയിൽ കാട്ടാനയുടെ ആക്രമണത്തിൽ വെള്ളി - ലീല ദമ്പതികൾ കൊല്ലപ്പെട്ടപ്പോൾ അർധരാത്രിയിലും പ്രതിഷേധിക്കുന്ന ജനത്തിന് നടുവിൽ ശാന്തനായി നിന്ന് ഓരോരുത്തരോടും സംസാരിക്കാൻ കഴിഞ്ഞ നേതാവ്. മലയോരം കണ്ട 2018,19 പ്രളയകാലത്തും ഊണും ഉറക്കവും ഇല്ലാതെ എംഎൽഎ യുടെ വാഹനം എല്ലാ സ്ഥലത്തും എത്തി. 400 കെവി ലൈൻ നിർമാണവുമായി ബന്ധപ്പെട്ട് സ്ഥലം നഷ്ടപ്പെടുന്ന കർഷകർക്കുവേണ്ടി ശക്തമായ ഇടപെടലുകൾ അദ്ദേഹം നടത്തി. കർഷകന് വേണ്ടി ശബ്ദിച്ച കർഷക പുത്രനെ കൂടുതൽ പദവികൾ തേടിയെത്തുമ്പോഴും സണ്ണിക്കൊപ്പം ഈ നാടും അഭിമാനിക്കുകയാണ്.

നിരവത്ത് ജൂബിലി ചിറ്റ്‌സ് വാർഷികാഘോഷവും കുടുംബ സംഗമവും നടത്തി

ഇരിട്ടി: പ്രമുഖ രജിസ്റ്റേർഡ് ചിട്ടി സ്ഥാപനമായ ഇരിട്ടി നിരവത്ത് ജൂബിലി ചിറ്റ്‌സ് പതിനഞ്ചാം വാർഷികാഘോഷത്തിന്‍റെ ഭാഗമായി കുടുംബസംഗമം നടന്നു. കോളിക്കടവ് ഗ്രാൻഡ് റിവർ വ്യൂ സൈഡ് കൺവൻഷൻ സെന്‍ററിൽ നടന്ന സംഗമം സണ്ണി ജോസഫ് എംഎൽഎ ഉദ്ഘാടനം ചെയ്തു. ജൂബിലി ചിറ്റ്‌സ് മാനേജിംഗ് ഡയറക്ടർ ഡോ. ബിനീസ് ജോസഫ് അധ്യക്ഷത വഹിച്ചു. ഗായകൻ ജി. വേണുഗോപാൽ വിശിഷ്ടാതിഥിയായിരുന്നു. സജീവ് ജോസഫ് എംഎൽഎ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ, ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ, നഗരസഭാ ചെയർപേഴ്‌സൺ കെ. ശ്രീലത, പായം ഗ്രാമ പഞ്ചായത്ത് പ്രസിഡന്‍റ് പി. രജനി, ആറളം ഗ്രാമപഞ്ചായത്ത് പ്രസിഡന്‍റ് കെ.പി. രാജേഷ്, ജൂബിലി ചിറ്റ്സ് ജനറൽ മാനേജർ ക്യാപ്റ്റൻ സി. ദാമോദരൻ, പ്ലാനിംഗ് ആൻഡ് ഡെവലപ്‌മെന്‍റ് ജനറൽ മാനേജർ ജോളി പി. മാണി, ഡിജിഎം എം. രാജൻ തുടങ്ങിയവർ പ്രസംഗിച്ചു. ജൂബിലി ചിറ്റ്സിൽ വർഷങ്ങളായി സേവനമനുഷ്ഠിക്കുന്ന ജീവനക്കാർ, ഇടപാടുകാർ തുടങ്ങി സ്ഥാപനവുമായി ബന്ധമുള്ള വിവിധ മേഖലയിലുള്ളവർ എന്നിവരെ ജി. വേണുഗോപാൽ അനുമോദിച്ചു. തുടർന്ന് വിവിധ കലാപരിപാടികളും നടന്നു.

മാർ ജോസഫ് പാംപ്ലാനിക്കെതിരെയുള്ള നീക്കം അപലപനീയം

തലശേരി: എറണാകുളം-അങ്കമാലി അതിരൂപതയുടെ വികാരി സ്ഥാനം ഏറ്റെടുത്ത മാർ ജോസഫ് പാംപ്ലാനിയെ അവഹേളിക്കാനും അസ്ഥിരപ്പെടുത്താനുമുള്ള നീക്കം തികച്ചും അപലപനീയവും പ്രതിഷേധാർഹവുമാണെന്ന് കത്തോലിക്ക കോൺഗ്രസ് തലശേരി അതിരൂപത കമ്മിറ്റി. പ്രശ്നങ്ങൾ പരിഹരിക്കപ്പെടരുതെന്ന് ആഗ്രഹിക്കുന്ന ഒരു കൂട്ടം ആളുകളാണ് ഇതിനു പിന്നിലെന്ന് വ്യക്തമാണ്. ഇവർക്കെതിരേ സഭാ നിയമമനുസരിച്ച് കടുത്ത നടപടിയും രാജ്യത്തിന്‍റെ പൊതുനിയമം അനുസരിച്ചുള്ള നടപടികളും ആവശ്യമാണെന്ന് യോഗം വിലയിരുത്തി. ആർച്ച്ബിഷപ്പിനെ മാനസികമായി തകർക്കാനാണ് അന്യായമായ ഈ ശ്രമങ്ങളെന്നും യോഗം അഭിപ്രായപ്പെട്ടു. കത്തോലിക്ക കോൺഗ്രസ് ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ യോഗം ഉദ്ഘാടനം ചെയ്തു. തലശേരി അതിരൂപത പ്രസിഡന്‍റ് ഫിലിപ്പ് വെളിയത്ത് അധ്യക്ഷത വഹിച്ചു. ഗ്ലോബൽ ട്രഷറർ ടോണി ജോസഫ് പുഞ്ചക്കുന്നേൽ, ജനറൽ സെക്രട്ടറി ജിമ്മി ആയിത്തമറ്റം, ട്രഷറർ സുരേഷ് ജോർജ്, വൈസ് പ്രസിഡന്‍റുമാരായ ബെന്നിച്ചൻ മഠത്തിനകം, ഐ.സി. മേരി, ടോമി കണയാങ്കൽ, ഷിനോ പാറയ്ക്കൽ, സെക്രട്ടറിമാരായ ജയിംസ് മാനുവൽ, ജോണി തോമസ് വടക്കേക്കര, സിജോ കണ്ണേഴത്ത്, ജോർജ് കാനാട്ട്, വർഗീസ് പള്ളിച്ചിറ, ഫൊറോന പ്രസിഡന്‍റുമാരായ ബെന്നി തുളുമ്പൻമാക്കൽ, സാജു പടിഞ്ഞാറേട്ട്, സ്റ്റീഫൻ കീച്ചരിക്കുന്നൽ, ജോണി തോലമ്പുഴ, ജയ്സൺ അട്ടാറമാക്കൽ, ജോസഫ് മാത്യു കൈതമറ്റം, ജോളി എരിഞ്ഞേരിയിൽ, ബെന്നി ജോൺ, മാത്യു വള്ളോംകോട്ട് എന്നിവർ പ്രസംഗിച്ചു.

വിദ്യാർഥികൾക്ക് ചോദ്യപേപ്പറുമില്ല; അധ്യാപകർക്ക് ഉത്തരപേപ്പറുമില്ല

സ്വന്തം ലേഖകൻ കണ്ണൂർ: പരീക്ഷയെഴുതാൻ വന്ന വിദ്യാർഥികൾക്ക് കണ്ണൂർ സർവകലാശാല ചോദ്യപേപ്പർ നല്കാത്ത സംഭവത്തിനു പിന്നാലെ മൂല്യനിർണയ ക്യാന്പിനെത്തിയ അധ്യാപകർക്ക് ഉത്തരപേപ്പറും ലഭിച്ചില്ല. നാലുവർഷ ബിരുദ കോഴ്സിന്‍റെ രണ്ടാം സെമസ്റ്റർ മൂല്യനിർണയ ക്യാന്പിനെത്തിയ അധ്യാപകർക്കാണ് ഇന്നലെ ഉത്തര പേപ്പർ ലഭിക്കാതിരുന്നത്. കണ്ണൂർ സർവകലാശാലയുടെ കീഴിൽ ഒൻപത് മൂല്യനിർണയ ക്യാന്പുകളാണുള്ളത്. കാസർഗോഡ് മുതൽ തിരുവനന്തപുരം വരെയുള്ള അധ്യാപകർ മൂല്യ നിർണയ ക്യാന്പുകളിൽ പങ്കെടുക്കുന്നുണ്ട്. ഉത്തരപേപ്പർ കിട്ടാത്തിനാൽ ഇവരിൽ പലർക്കും തിരികെ പോകേണ്ടി വന്നു. നാലുവർഷ ബിരുദ കോഴ്സിന്‍റെ ആദ്യ മൂല്യനിർണയ ക്യാന്പിലാണ് സർവകലാശാലക്ക് പാകപ്പിഴ സംഭവിച്ചിരിക്കുന്നത്. ബിരുദ കോഴ്സിന്‍റെ ഒന്നാം വർഷ മൂല്യനിർണയും കോളജിൽ തന്നെയാണ് നടത്തുന്നത്. രണ്ടാം വർഷ മൂല്യ നിർണയമാണ് ക്യാന്പുകളിൽ നടത്തുന്നത്. എന്നാൽ, ഉത്തരപേപ്പറുമായി ബന്ധപ്പെട്ട് മൂല്യനിർണയ ക്യാന്പ് ഡയറക്‌ടർ‌മാർ മതിയായ രീതിയിൽ വിശദീകരണം നല്കാത്തതും അധ്യാപകരിൽ പ്രതിഷേധം ഉയർത്തി. മൂല്യനിർണയം അവതാളത്തിലെന്ന് കെപിസിടിഎ കണ്ണൂർ യൂണിവേഴ്സിറ്റി പരീക്ഷാ നടത്തിപ്പിലും മൂല്യനിർണയത്തിലും കനത്ത പരാജയമായി തുടരുന്നതായി കെപിസിടിഎ കണ്ണൂർ മേഖലാ കമ്മിറ്റി. രണ്ടാം സെമസ്റ്റർ മൂല്യനിർണയം ആരംഭിച്ചിട്ട് പല ക്യാമ്പുകളിലും മൂല്യനിർണയനത്തിന് പേപ്പറുകൾ എത്തിയിട്ടില്ല. മറ്റ് വാലുവേഷൻ ക്യാമ്പുകളിൽ ഉത്തര സൂചിക നൽകാതെയും സമയത്തിന് പ്രതിഫലം നൽകാതെയും അധ്യാപകരെ വട്ടം കറക്കുന്നതിനിടക്കാണ് ഇത്തരം നിരുത്തരവാദപരമായ സമീപനങ്ങൾ യൂണിവേഴ്സിറ്റി തുടരുന്നത്. അവധിക്കാലത്തു ജോലി ചെയ്യാൻ സന്നദ്ധരായ അധ്യാപകരുടെ സമയനഷ്ടമൊന്നും യൂണിവേഴ്സിറ്റിയുടെ പരിഗണനയിൽ പോലുമില്ല. യൂണിവേഴ്സിറ്റിയുടെ കെടുകാര്യസ്ഥതയിൽ സമയബന്ധിതമായി പേപ്പർ എത്തിക്കാൻ സാധിക്കാത്ത ക്യാമ്പ് ഡയറക്ടർമാർക്കെതിരെ നടപടി എടുക്കണമെന്നും കെപിസിടിഎ കണ്ണൂർ മേഖല കമ്മിറ്റി ആവശ്യപ്പെട്ടു. കെപിസിടിഎ കണ്ണൂർ മേഖലാ പ്രസിഡന്‍റ് ജോൺസൺ ജോർജ്, മേഖലാ സെക്രട്ടറി ഡോ.വി. പ്രകാശ്, ലെയ്സൺ ഓഫീസർ ഡോ. ആർ. ബിജുമോൻ എന്നിവർ പ്രസംഗിച്ചു.

പുകപ്പുരയ്ക്ക് തീപിടിച്ച് റബർ ഷീറ്റ് കത്തിനശിച്ചു

ചെറുപുഴ: പുകപ്പുരയ്ക്ക് തീപിടിച്ച് റബർഷീറ്റ് കത്തിനശിച്ചു. തട്ടുമ്മൽ സിഎച്ച് സെന്‍ററിന് സമീപത്തെ വാഴവളപ്പിൽ അബ്ദുൾ സത്താറിന്‍റെ വീടിനു സമീപത്തെ പുകപ്പുരയാണ് കത്തിനശിച്ചത്. ഇന്നലെ രാവിലെ 11 ഓടെയായിരുന്നു സംഭവം. ശക്തമായ പുക ഉയരുന്നത് ശ്രദ്ധയിൽപ്പെട്ടപ്പോഴാണ് തീപിടുത്തം ഉണ്ടായത് അറിയുന്നത്. പുകപ്പുരയിൽ ഉണ്ടായിരുന്ന രണ്ട് കിന്‍റലോളം റബർഷീറ്റ് കത്തിനശിച്ചു. പുകപ്പുരയുടെ അകവും ആസ്ബസ്റ്റോസ് ഷീറ്റും പൂർണമായും നശിച്ചു. സമീപത്ത് കൂട്ടിയിട്ടിരുന്ന അടയ്ക്കാത്തൊണ്ടിന് തീപിടിക്കാതിരുന്നതിനാൽ കൂടുതൽ അപകടം ഒഴിവായി. നാട്ടുകാരും തൊഴിലാളികളും വീട്ടുകാരും ചേർന്ന് തീയണയ്ക്കുകയായിരുന്നു. വീടിന്‍റെ നിർമാണ പ്രവൃത്തി നടക്കുന്നതിനാൽ തൊഴിലാളികൾ സമീപത്തു തന്നെ ഉണ്ടായിരുന്നതിനാൽ വേഗത്തിൽ രക്ഷാപ്രവർത്തനം നടത്താൻ കഴിഞ്ഞു.

മണക്കടവ്-മൂരിക്കടവ്-കാപ്പിമല റോഡ് മെക്കാഡം ടാർ ചെയ്യണം

ആലക്കോട്: ടൂറിസ്റ്റ് കേന്ദ്രമായ പൈതൽമലയെയും മഞ്ഞപ്പുല്ലിനെയും ബന്ധിപ്പിക്കുന്ന മണക്കടവ്മൂരിക്കടവ്-കാപ്പിമല റോഡ് വീതി കൂട്ടി മെക്കാഡം ടാർ ചെയ്യണമെന്നും മൂരിക്കടവ് പുഴക്ക് പാലം നിർമിക്കാൻ നടപടി സ്വീകരിക്കണമെന്നും മൂരിക്കടവ് വാർഡ് കോൺഗ്രസ് കമ്മിറ്റി ആവശ്യപ്പെട്ടു. വനാതിർത്തിയിൽ രണ്ടു വർഷം മുമ്പ് അനുവദിച്ച ഫെൻസിംഗ് വേലി നിർമാണം അപാകത കൂടാതെ പൂർത്തീകരിക്കണമെന്നും യോഗം ആവശ്യപ്പെട്ടു. വാർഡ് കുടുംബ സംഗമം ജില്ലാ പഞ്ചായത്ത് അംഗം തോമസ് വെക്കത്താനം ഉദ്ഘാടനം ചെയ്തു. സാബു വെള്ളമറ്റം അധ്യക്ഷത വഹിച്ചു. ജോസ് പറയൻകുഴി, ബേബി കോയിക്കൽ, സി.ബി. കൃഷ്ണൻകുട്ടി, അജിത്ത് മാത്യു, സിന്ധു തോമസ്, ഷൈല സുനിൽ, ടോമി കാടൻകാവിൽ, ടെസി ബെന്നി എന്നിവർ പ്രസംഗിച്ചു.

മലപ്പട്ടത്ത് ഇനിയൊരു ആക്രമണമുണ്ടായാൽ തിരിച്ചടിക്കും: കെ. സുധാകരൻ

മലപ്പട്ടം: മലപ്പട്ടത്ത് ഇനിയൊരു ആക്രമണമുണ്ടായാൽ മണിക്കൂറുകൾക്കകം തിരിച്ചടിക്കുമെന്ന് കെപിസിസി പ്രസിഡന്‍റ് കെ. സുധാകരൻ. തിരിച്ചടിക്കാൻ കഴിയാതെ വന്നാൽ കണ്ണൂർ ജില്ലയിലെ കോൺഗ്രസിനെ പിരിച്ചു വിടുമെന്നും അദ്ദേഹം പറഞ്ഞു. അടുവാപ്പുറത്തെ തകർത്ത സ്തൂപവും പി.ആർ. സനീഷിന്‍റെ വീടും സന്ദർശിച്ച ശേഷം മാധ്യമപ്രവർത്തകരോട് സംസാരിക്കുകയായിരുന്നു സുധാകരൻ. മനക്കരുത്തുള്ളവരാണ് കോൺഗ്രസുകാർ. അതിനാൽ യാതൊരു ആശങ്കയും ഇല്ല. തിരിച്ചടിക്കാൻ 10 പേരുണ്ടെങ്കിൽ മുന്നിൽ സുരക്ഷയ്ക്കായി ഞങ്ങളും കാണും. മലപ്പട്ടത്ത് സിപിഎം വളർന്നോ എന്ന് ആത്മപരിശോധന നടത്തണം. ജനങ്ങൾ വിഡ്ഡികളല്ല. നല്ല ബോധ്യമുള്ളവരാണ്. തകർത്ത സ്തൂപം പുനർനിർമിക്കാൻ സുധാകരൻ നിർദേശം നൽകി. തുടർന്ന് തറക്കല്ലിട്ടു. ഡിസിസി പ്രസിഡന്‍റ് മാർട്ടിൻ ജോർജ്, നേതാക്കളായ മുഹമ്മദ് ബ്ലാത്തൂർ, വിജിൽ മോഹനൻ, കെ.പി. ശശിധരൻ, കെ.എം. ശിവദാസൻ എന്നിവരും ഒപ്പമുണ്ടായിരുന്നു. സ്തൂപം തകർത്ത സംഭവത്തിൽ കണ്ടാലറിയാവുന്നവരടക്കം 28 പേർക്കെതിരേ മയ്യിൽ പോലീസ് കേസെടുത്തു.

മാലിന്യ സംസ്കരണ കേന്ദ്രത്തിൽ തീപിടിത്തം

നടുവിൽ: നടുവിലിൽ വൻ തീപിടിത്തം. നടുവിൽ പഞ്ചായത്തിന്‍റെ സ്റ്റേഡിയത്തിന് സമീപത്തുള്ള പ്ലാസ്റ്റിക് മാലിന്യ കേന്ദ്രത്തിലാണ് തീപിടിച്ചത്. ഇന്നലെ രാത്രി 9.30 ഓടെയാണ് സംഭവം. മാസങ്ങളായി മാലിന്യ സംസ്കരണ കേന്ദ്രത്തിലെ പ്ലാസ്റ്റിക്കുകൾ ഉൾപ്പെടെയുള്ള മാലിന്യങ്ങൾ നീക്കം ചെയ്തിട്ടില്ലെന്നാണ് പ്രദേശവാസികൾ പറയുന്നത്. സംഭവമറിഞ്ഞ് കണ്ണൂർ, തളിപ്പറന്പ്, പയ്യന്നൂർ എന്നിവിടങ്ങളിൽ നിന്നെത്തിയ അഗ്നി രക്ഷാ സേന തീ അണയ്ക്കാനുള്ള തീവ്രശ്രമം രാത്രിയും തുടരുകയാണ്. ഇവിടെ പ്ലാസ്റ്റിക്കിന് തീപിടിച്ചതിൽ ദുരൂഹതയും നിലനില്ക്കുന്നു. യാഥാർഥ്യമറിയാൻ ചുറ്റുപാടുള്ള സിസിടിവി കാമറകൾ പരിശോധിക്കും. വലിയ സ്ഫോടനത്തോടെയാണ് തീപിടിച്ച് കത്തിയതെന്ന് പ്രദേശവാസികൾ പറയുന്നു.

ഡെങ്കിപ്പനി: ചെറുപുഴയിൽ യോഗം ചേർന്നു

ചെറുപുഴ: ചെറുപുഴ പഞ്ചായത്തിന്‍റെയും പുളിങ്ങോം കുടുംബാരോഗ്യ കേന്ദ്രത്തിന്‍റെയും നേതൃത്വത്തിൽ പകർച്ചവ്യാധി പ്രതിരോധ പ്രവർത്തനങ്ങളുമായി ബന്ധപ്പെട്ട് ജനപ്രതിനിധികൾ, ആരോഗ്യ പ്രവർത്തകർ, സന്നദ്ധ പ്രവർത്തകർ എന്നിവരുടെ യോഗം പഞ്ചായത്ത് ഹാളിൽ ചേർന്നു. പഞ്ചായത്തിലെ തിരുമേനി, ചുണ്ട പുഴയോരം ഭാഗങ്ങളിൽ ഡെങ്കിപ്പനി റിപ്പോർട്ട്‌ ചെയ്ത സാഹചര്യത്തിലാണ് യോഗം ചേർന്നത്. തുടർച്ചയായ നിർദേശങ്ങൾ കൊടുത്തിട്ടും വീട്ടിലും പരിസരങ്ങളിലും പൊതു സ്ഥലങ്ങളിലും കൊതുക് വളരുന്ന സാഹചര്യങ്ങൾ ഉണ്ടാക്കുന്നവർക്കെതിരേ പിഴ ഉൾപ്പെടെയുള്ള നിയമ നടപടി സ്വീകരിക്കാനും യോഗം തീരുമാനിച്ചു. പഞ്ചായത്ത്‌ പ്രസിഡന്‍റ് കെ.എഫ്. അലക്സാണ്ടർ ഉദ്ഘാടനം ചെയ്തു. വൈസ് പ്രസിഡന്‍റ് റെജി പുളിക്കൽ അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗങ്ങളായ കെ. ദാമോദരൻ, എ.സി. പൗലോസ്, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ജോയി, ആരോഗ്യ വിദ്യഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. ബാലകൃഷ്ണൻ, ധനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഷാന്‍റി കലാധരൻ, ഹെൽത്ത് ഇൻസ്‌പെക്ടർ വി. മുഹമ്മദ്‌ ശരീഫ് എന്നിവർ പ്രസംഗിച്ചു. ഡെങ്കിപ്പനി പ്രതിരോധ പ്രവർത്തനങ്ങൾ സംബന്ധിച്ച് പെരിങ്ങോം ബ്ലോക്ക് എപ്പിഡമോളജിസ്റ്റ് ഡോ. ആതിര മുങ്ങത്ത് വിഷയാവതരണം നടത്തി. ഡെങ്കി ഹോട്ട് സ്പോട്ടുകളിൽ മേയ് 14,15,16 തീയതികളിൽ പ്രത്യേക ജനകീയ സ്‌ക്വാഡ് പ്രവർത്തനം നടത്താനും റബർ തോട്ടം തൊഴിലാളികളുടെ യോഗം വിളിക്കാനും തീരുമാനിച്ചു.

തളിപ്പറന്പിലെ ആംബുലൻസിന് വേണം അടിയന്തര ചികിത്സ

തളിപ്പറമ്പ്: തളിപ്പറന്പ് താലൂക്ക് ആശുപത്രിയിൽ കൊട്ടിഘോഷിച്ച് കൊണ്ടുവന്ന ആംബുലൻസ് ഇരുമ്പ് വിലയ്ക്ക് പോലും വിൽക്കാനാകാതെ ആശുപത്രി വളപ്പിൽ ഉപേക്ഷിച്ച നിലയിൽ. 2003ൽ തളിപ്പറമ്പ് താലൂക്ക് ആശുപത്രിക്ക് ആരോഗ്യവകുപ്പ് അനുവദിച്ച ഈ ആംബുലൻസ് ആദ്യത്തെ ഓട്ടത്തിൽ തന്നെ കരിവെള്ളൂരിൽ അപകടത്തിൽപ്പെട്ടിരുന്നു. കേടുപാടുകൾ മാറ്റി ആശുപത്രിയിൽ എത്തിച്ചുവെങ്കിലും അപകടം നടന്നതിന്‍റെ പേരിൽ ഡ്രൈവറെ ജോലിയിൽ നിന്ന് ഒഴിവാക്കിയതിനാൽ തുടർന്ന് ഉപയോഗിക്കാനായില്ല. പുതിയ ഡ്രൈവർ എത്താൻ വൈകിയതോടെ ഇത് കട്ടപ്പുറത്തായി. ഇപ്പോൾ ഉപയോഗശൂന്യമായി പ്രസവ വാർഡിന് സമീപം തള്ളിയ നിലയിലാണ്. ഇഴജന്തുക്കളുടെ വിഹാരകേന്ദ്രമായി ഇത് മാറിയിരിക്കുന്നത് ആശുപത്രിയിൽ എത്തിചേരുന്നവർക്കും രോഗികൾക്കും ആശുപത്രി ജീവനക്കാർക്കും ഒരുപോലെ ഭീഷണി സൃഷ്ടിക്കുകയാണ്. ഇത് ലേലം ചെയ്ത് ഇരുമ്പ് വിലയ്ക്ക് വില്പന നടത്തിയാൽ ചെറിയ തുകയെങ്കിലും സർക്കാർ ഖജനാവിന് ലഭിക്കും. മൂന്നു വർഷം മുന്പ് ഇത് ആരോഗ്യ വകുപ്പിന് തിരിച്ചേൽപ്പിച്ചിരുന്നുവെന്നും ഇത് ഇവിടെ നിന്നും കൊണ്ടുപോകേണ്ടത് അവരാണ് എന്നുമാണ് ആശുപത്രി അധികൃതർ പറയുന്നത്.

തീരക്കടലിൽ മണൽ ഖനനത്തിന് അനുമതി നൽകരുത്: കേരള കോൺഗ്രസ്-എം

ചെമ്പന്തൊട്ടി: കേരളത്തിന്‍റെ തീരക്കടലില്‍ നിന്ന് നിര്‍മാണ ആവശ്യങ്ങൾക്കായി മണല്‍ ഖനനം ചെയ്യാനുള്ള കേന്ദ്ര സര്‍ക്കാര്‍ നീക്കം ഉപേക്ഷിക്കണമെന്ന് കേരള കോൺഗ്രസ്-എം ഇരിക്കൂർ നിയോജക മണ്ഡലം കമ്മിറ്റി ആവശ്യപ്പെട്ടു. കേരളത്തിലെ മത്സ്യത്തൊഴിലാളികളുടെ പരമ്പരാഗത മത്സ്യബന്ധന മേഖലകൾ കടല്‍മണല്‍ ഖനനം മൂലം തകരുമെന്ന് മത്സ്യത്തൊഴിലാളികള്‍ക്ക് ആശങ്കയുണ്ട്. തീരക്കടലിൽ മണൽ ഖനനം നടത്താതെ പുഴകളിലും ഡാമുകളിലും പ്രളയകാലത്ത് അടിഞ്ഞുകൂടിയിട്ടുള്ള മണൽ ഖനനം നടത്താൻ അനുമതി നൽകുകയാണ് വേണ്ടത്. മണൽ നിറഞ്ഞ് ഡാമുകളുടെയും പുഴകളുടെയും ആഴം കുറഞ്ഞതിനാൽ മഴക്കാലത്ത് പുഴകൾ കരകവിഞ്ഞും ഗതി മാറിയും ഒഴുകുകയാണ്. നദികളില്‍ നിന്നുള്ള മണല്‍ വാരല്‍ ഈ വര്‍ഷം തന്നെ പുനരാരംഭിക്കാൻ ബന്ധപ്പെട്ട വകുപ്പുകൾ ഉടൻ നടപടികൾ സ്വീകരിക്കണമെന്നും സംസ്ഥാനത്ത് നിലവിലുള്ള മണല്‍ വാരല്‍ നിയന്ത്രണ നിയമം വ്യവസ്ഥ ചെയ്യുന്ന രീതിയില്‍ തദ്ദേശസ്വയംഭരണ സ്ഥാപന മേധാവികളുടെ നേതൃത്വത്തിൽ കടവ് കമ്മിറ്റികൾ പുനഃസംഘടിപ്പിച്ച് കേരളത്തിലെ പുഴകളെ സംരക്ഷിക്കുന്നതോടൊപ്പം സംസ്ഥാനത്തെ മണലിന്‍റെ ദൗര്‍ലഭ്യം പരിഹരിക്കാനാവുമെന്നും ഏറ്റവും സുതാര്യമായ രീതിയിൽ മണല്‍ വിതരണം നടത്തണമെന്നും കേരളാ കോൺഗ്രസ്-എം ഇരിക്കൂർ നിയോജക മണ്ഡലം കമ്മിറ്റി ആവശ്യപ്പെട്ടു. കണ്ണൂർ ജില്ലാ പ്രസിഡന്‍റ് ജോയി കൊന്നയ്ക്കൽ യോഗം ഉദ്ഘാടനം ചെയ്തു. ബിജു പുതുക്കള്ളി അധ്യക്ഷത വഹിച്ചു. സജി കുറ്റ്യാനിമറ്റം മുഖ്യപ്രഭാഷണം നടത്തി. സുരേഷ് കുമാർ, വി.വി. സേവി, ബിനു ഇലവുങ്കൽ, സിബി പന്തപ്പാട്ട്, സണ്ണി മുക്കുഴി, സോണി അറയ്ക്കൽ, ഏലമ്മ ജോസഫ്, നോബിൻസ് ചെരിയൻപുറം, എബിൻ കുര്യാക്കോസ്, ജോളി പുതുശേരി, ജോണി കരിമ്പന, ഷാജി കുര്യൻ, പി.പി. രാഘവൻ, അപ്പച്ചൻ കുമ്പുക്കൽ, ജോസ് മണ്ഡപം, ജയിംസ് ചിറമാട്ടേൽ, ജയ്സൺ പല്ലാട്ട്, അലക്സാണ്ടർ ഇല്ലിക്കുന്നുംപുറം, ഷാജി കുറ്റിയാത്ത്, റോബിൻ തേരാംകുടി, സി.കെ. നാരായണൻ, തുളസീധരൻ നായർ, യാക്കോബ് ആലയ്ക്കൽ, കെ.ജെ. ജോയി എന്നിവർ പ്രസംഗിച്ചു.

രാപ്പകൽ സമരയാത്രയ്ക്ക് സ്വീകരണം

കണ്ണൂർ: ആശാ സമരത്തിനെതിരേയുള്ള സർക്കാർ ന്യായികരണങ്ങൾ ന്യായീകരണങ്ങളല്ല, അബദ്ധ വാദങ്ങൾ മാത്രമാണെന്ന് സാഹിത്യകാരൻ ശിഹാബുദ്ദീൻ പൊയ്തുംകടവ്. ആശമാരുടെ രാപ്പകൽ സമരയാത്രയ്ക്ക് കാൾടെക്സിൽ നൽകിയ സ്വീകരണത്തിൽ പ്രസംഗിക്കുകയായിരുന്നു അദ്ദേഹം. സ്റ്റേഡിയം കോർണറിൽ സംഘടിപ്പിച്ച സ്വീകരണ സമ്മേളനം കോർപറേഷൻ മേയർ മുസ്‌ലിഹ് മഠത്തിൽ ഉദ്ഘാടനം ചെയ്തു. കോർപറേഷനു കീഴിലുള്ള ആശമാർക്ക് 2000 രൂപ അധിക വേതനം പ്രഖ്യാപിച്ചിരുന്നു. അതിന്‍റെ നടപടികളുമായി ശക്തമായി തന്നെ മുന്നോട്ടു പോകുമെന്നും അദ്ദേഹം കുട്ടിച്ചേർത്തു. നേതാക്കളായ സുരേഷ് ബാബു എളയാവൂർ, സി.എ. അജീർ, റോസിലി ജോൺ, കെ.പി. റോസമ്മ, എസ്. ശാലിനി തുടങ്ങിയവർ പ്രസംഗിച്ചു. ജില്ലയിൽ രണ്ടാ ദിവസം കമ്പിൽ നൽകിയ ആദ്യ സ്വീകരണം കൊളശേരി പഞ്ചായത്ത് പ്രസിഡന്‍റ് കെ.പി. അബ്ദുൽ മജീദ്, ഇരിട്ടി പഴയ സ്റ്റാൻഡിൽ ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധന്‍, മട്ടന്നൂരിൽ മുൻ നഗരസഭാ കൗൺസിലർ കെ.വി. ജയചന്ദ്രൻ എന്നിവർ ഉദ്ഘാടനം ചെയ്തു. ജില്ലയിലെ മൂന്നാം ദിനം സമരയാത്ര രാവിലെ ഒന്പതിന് കൂത്തുപറമ്പിൽ നിന്നാരംഭിക്കും. വി.എസ്. അനിൽകുമാർ സമ്മേളനം ഉദ്ഘാടനം ചെയ്യും. തുടർന്ന് പേരാവൂരിൽ 11.30 നും പാനൂരിൽ ഉച്ചകഴിഞ്ഞ് മൂന്നിനും സ്വീകരണം നൽകും. തലശേരിയിൽ വൈകുന്നേരം 5.30ന് സണ്ണി ജോസഫ് എംഎൽഎ സമാപന സമ്മേളം ഉദ്ഘാടനം ചെയ്യുന്നതോടെ ജില്ലയിലെ സമരയാത്രയുടെ പര്യടനം അവസാനിക്കും. തുടർന്ന് ആശമാർ തലശേരി പഴയ ബസ് സ്റ്റാൻഡിൽ അന്തിയുറങ്ങും.

കേരളത്തെ വികസന മികവിന്‍റെ ഉന്നതങ്ങളില്‍ എത്തിച്ചു: മന്ത്രി കടന്നപ്പള്ളി രാമചന്ദ്രന്‍

കണ്ണൂർ: സംസ്ഥാന സര്‍ക്കാര്‍ കേരളത്തെ വികസന മികവിന്‍റെ ഉന്നതങ്ങളില്‍ എത്തിച്ചെന്ന് മന്ത്രി കടന്നപ്പള്ളി രാമചന്ദ്രന്‍. രണ്ടാം പിണറായി വിജയന്‍ സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ ഭാഗമായി 14 വരെ കണ്ണൂര്‍ പോലീസ് മൈതാനിയില്‍ സംഘടിപ്പിക്കുന്ന എന്‍റെ കേരളം പ്രദര്‍ശന വിപണന മേള ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ജില്ലാ ഇന്‍ഫര്‍മേഷന്‍ ഓഫീസ് തയാറാക്കിയ "സ്മൃതിയുണര്‍ത്തി മ്യൂസിയങ്ങള്‍' ഡോക്യുമെന്‍ററി മന്ത്രി പ്രകാശനം ചെയ്തു. കെ.കെ. ശൈലജ എംഎല്‍എ അധ്യക്ഷത വഹിച്ചു. എംഎല്‍എമാരായ കെ.പി. മോഹനന്‍, കെ.വി. സുമേഷ്, എം. വിജിന്‍, ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടര്‍ അരുണ്‍ കെ. വിജയന്‍, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍, പഞ്ചായത്ത് പ്രസിഡന്‍റ് അസോസിയേഷന്‍ ജില്ലാ പ്രസിഡന്‍റ് എം. ശ്രീധരന്‍, ജില്ലാ പോലീസ് മേധാവി സി. നിതിന്‍ രാജ്, റൂറല്‍ എസ്പി അനൂജ് പലിവാൾ, എഡിഎം സി. പദ്മചന്ദ്രകുറുപ്പ്, ജില്ലാ ഇന്‍ഫര്‍മേഷന്‍ ഓഫീസര്‍ പി.പി. വിനീഷ്, ജനതാദൾ-എസ് സംസ്ഥാന ജനറല്‍ സെക്രട്ടറി പി.പി. ദിവാകരന്‍, വിവിധ രാഷ്‌ട്രീയ പാർട്ടി നേതാക്കളായ വെള്ളോറ രാജന്‍, വി.കെ. ഗിരിജന്‍, പ്രഫ. ജോസഫ് തോമസ്, ഹമീദ് ചെങ്ങളായി, രതീഷ് ചിറക്കല്‍ എന്നിവര്‍ പ്രസംഗിച്ചു. പ്രദര്‍ശന വിപണന മേള മന്ത്രി തുറന്നുകൊടുത്തു വൈവിധ്യങ്ങളുടെ 250 ലധികം സ്റ്റാളുകള്‍ മന്ത്രി രാമചന്ദ്രന്‍ കടന്നപ്പള്ളി തുറന്നുകൊടുത്തു. വിവിധ വകുപ്പുകളുടെ 151 തീം സ്റ്റാളുകളും 100 വാണിജ്യ സ്റ്റാളുകളുമടക്കം 251 സ്റ്റാളുകളാണ് മേളയിലെ പ്രധാന ആകര്‍ഷണം. ഏഴ് ദിവസങ്ങളിലായി നടക്കുന്ന പ്രദര്‍ശന മേളയ്ക്കായി 52000 ചതുരശ്ര അടിയില്‍ പവലിയന്‍ ക്രമീകരിച്ചിട്ടുണ്ട്. ഐപിആര്‍ഡിയുടെ 2500 ചതുരശ്ര അടിയിലുള്ള തീം പവലിയനും ഒരുക്കിയിട്ടുണ്ട്. 14ന് മേള സമാപിക്കും. മുഖ്യമന്ത്രിയുടെ മുഖാമുഖം ഇന്ന് സംസ്ഥാന സര്‍ക്കാരിന്‍റെ നാലാം വാര്‍ഷികാഘോഷങ്ങളുടെ ഭാഗമായി 14 വരെ കണ്ണൂര്‍ പോലീസ് മൈതാനിയില്‍ നടക്കുന്ന എന്‍റെ കേരളം പ്രദര്‍ശന വിപണനമേളയുടെ ഭാഗമായി നാടിന്‍റെ മുന്നേറ്റവും വികസനങ്ങളും ചര്‍ച്ച ചെയ്യാന്‍ മുഖ്യമന്ത്രി പിണറായി വിജയന്‍ സമൂഹത്തിലെ വിവിധ മേഖലകളിലെ വ്യക്തിത്വങ്ങളുമായി നടത്തുന്ന മുഖാമുഖം പരിപാടി ഇന്ന് നടക്കും. രാവിലെ 10.30 മുതല്‍ 12.30 വരെ കണ്ണൂര്‍ ദിനേശ് ഓഡിറ്റോറിയത്തിലാണ് മുഖാമുഖം. മന്ത്രി കടന്നപ്പള്ളി രാമചന്ദ്രന്‍ അധ്യക്ഷത വഹിക്കും. ഇന്നത്തെ വിവിധ പരിപാടികള്‍ എന്‍റെ കേരളം പ്രദര്‍ശന വിപണനമേളയുടെ രണ്ടാം ദിനമായ ഇന്ന് ഉച്ചകഴിഞ്ഞ് രണ്ടു മുതല്‍ വൈകുന്നേരം നാലു വരെ സാമൂഹ്യനീതി വകുപ്പിന്‍റെ എന്‍റെ കേരളം വയോജന സൗഹൃദ കേരളം എന്ന വിഷയത്തില്‍ മൂന്ന് സെഷനുകളായി സെമിനാര്‍ നടക്കും. "വയോജന നയം, വയോജന കൗണ്‍സില്‍, വയോജന കമ്മീഷന്‍' എന്ന വിഷയത്തില്‍ സംസ്ഥാന വയോജന കൗണ്‍സില്‍ ഉപദേശക സമിതി അംഗം പ്രഫ. കെ. സരള, "വയോജന സംരക്ഷണ നിയമങ്ങളും ചട്ടങ്ങളും എംഡബ്ല്യുപിഎസ്‌സി ആക്ട് 2007 ആൻഡ് റൂള്‍സ്' വിഷയത്തില്‍ ഡിഐഎസ്എ പാനല്‍ അംഗം അഡ്വ. കെ.എ. പ്രദീപ് എന്നിവര്‍ സെഷനുകള്‍ കൈകാര്യം ചെയ്യും. തുടര്‍ന്ന് വയോജന സൗഹൃദ കേരളം വെല്ലുവിളികളും സാധ്യതകളും എന്ന വിഷയത്തില്‍ ഓപ്പണ്‍ ഫോറം നടക്കും. വൈകുന്നേരം 4.30ന് ട്രാന്‍സ്ജെന്‍ഡേഴ്സിന്‍റെ നൃത്ത പരിപാടിയും രാത്രി ഏഴിന് കൊച്ചിന്‍ കോക്ക് ബാന്‍ഡിന്‍റെ തത്സമയ പരിപാടിയും അരങ്ങേറും. 14 വരെയുള്ള ദിവസങ്ങളില്‍ രാവിലെ 10 മുതല്‍ സ്റ്റാളുകള്‍ സന്ദര്‍ശിക്കാം. പ്രവേശനം സൗജന്യമാണ്. ഉദ്ഘാടന വേദിയില്‍ ആംഗ്യഭാഷ തര്‍ജമ രണ്ടാം പിണറായി വിജയന്‍ സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് കണ്ണൂര്‍ പോലീസ് മൈതാനിയില്‍ നടക്കുന്ന എന്‍റെ കേരളം പ്രദര്‍ശന വിപണന മേളയുടെ ഉദ്ഘാടന ചടങ്ങില്‍ ആംഗ്യഭാഷ തര്‍ജമ ശ്രദ്ധേയമായി. മന്ത്രി കടന്നപ്പള്ളി രാമചന്ദ്രന്‍, കെ.കെ. ശൈലജ എംഎല്‍എ എന്നിവരുടെ പ്രസംഗം എല്ലാവരും ഉള്‍ക്കൊള്ളുന്നതിന് തലശേരി സ്വദേശിയായ ഒ.എം. ദീപ്തിയാണ് ആംഗ്യഭാഷ തര്‍ജമ അവതരിപ്പിച്ചത്. നാഷണല്‍ ഇന്‍സ്റ്റിറ്റ്യൂട്ട് ഓഫ് സ്പീച്ച് ആന്‍ഡ് ഹിയറിങ് കോളജില്‍ നിന്നും സൈന്‍ ലാംഗ്വേജ് എന്‍റര്‍പ്രറ്റര്‍ കോഴ്‌സ് പൂര്‍ത്തീകരിച്ച ദീപ്തി രണ്ടു വര്‍ഷമായി ഈ രംഗത്ത് സജീവമാണ്.

ഓടകൾക്ക് സ്ലാബിടാൻ താമസമുണ്ടെങ്കിൽ താത്കാലിക സംവിധാനം ഒരുക്കണം: മനുഷ്യാവകാശ കമ്മീഷൻ

കണ്ണൂർ: പൊതുമരാമത്ത്, തദ്ദേശ സ്വയംഭരണ വകുപ്പുകൾക്ക് കീഴിലുള്ള റോഡുകൾ നവീകരിക്കുമ്പോൾ ഓവുചാലുകൾക്ക് മേൽ സ്ലാബുകൾ സ്ഥാപിക്കുന്നതിന് കാലതാമസമുണ്ടാകുകയാണെങ്കിൽ താത്കാലിക ഇരുമ്പുവേലിയോ മറ്റേതെങ്കിലും സജ്ജീകരണമോ ഏർപ്പെടുത്തണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് ഉത്തരവിട്ടു. പൊതുമരാമത്ത്, തദ്ദേശ സ്വയംഭരണ വകുപ്പ് സെക്രട്ടറിമാർക്കാണ് കമ്മീഷൻ ഉത്തരവ് നൽകിയത്. ഉത്തരവിന്‍റെ അടിസ്ഥാനത്തിൽ സ്വീകരിച്ച നടപടികൾ മൂന്നുമാസത്തിനകം അറിയിക്കണമെന്നും നിർദേശിച്ചു. തലശേരിയിൽ ബസ് കാത്തുനിൽക്കുമ്പോൾ മൂടാത്ത ഓവുചാലിൽ വീണ് രഞ്ജിത്ത് എന്നയാൾ മരിച്ച സംഭവത്തിൽ പത്രവാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് ഉത്തരവ്. 2024 ജൂൺ 24 നായിരുന്നു സംഭവം. അപകടമുണ്ടായ റോഡ് പൊതുമരാമത്ത് വകുപ്പിന് കീഴിലുള്ളതാണെന്ന് മുനിസിപ്പൽ സെക്രട്ടറി കമ്മീഷനെ അറിയിച്ചു. തലശേരി-കോടിയേരി റോഡിൽ കണ്ണിച്ചിറയിലാണ് അപകടം നടന്നത്. ഫണ്ടിന്‍റെ അഭാവമാണ് ഓവുചാലുകൾക്ക് മൂടി സ്ഥാപിക്കാനുള്ള പ്രധാന തടസമെന്നായിരുന്നു പൊതുമരാമത്ത് വകുപ്പ് കമ്മീഷനെ അറിയിച്ചത്. അത്യാഹിതമുണ്ടാകുമ്പോൾ മാത്രമാണ് ഫണ്ട് കണ്ടെത്തി തുറന്നു കിടക്കുന്ന ഓവുചാലുകൾ മൂടുന്നതെന്ന് കമ്മീഷൻ വിമർശിച്ചു. സംസ്ഥാനത്തുടനീളം ഇതാണ് അവസ്ഥ. റോഡ് വികസനത്തിന് മതിയായ ഫണ്ട് ലഭിക്കാതെ വരുമ്പോൾ ഓവുചാലുകൾ മൂടാതെ മാറ്റിവയ്ക്കുന്നതാണ് രീതി. മതിയായ ഫണ്ടിന്‍റെ അഭാവത്തിൽ പദ്ധതിയിൽ വിഭാവനം ചെയ്തിരിക്കുന്ന മുഴുവൻ കാര്യങ്ങളും നടപ്പാക്കാൻ ബുദ്ധിമുട്ടുണ്ട്. പദ്ധതിയേതര ശീർഷകങ്ങളിൽ ലഭ്യമായ ഫണ്ട് ഉപയോഗിച്ച് ഓവുചാലുകൾക്കുള്ള മൂടി പോലുള്ള കാര്യങ്ങളിൽ ഭരണാനുമതി നൽകിയ പ്രവൃത്തികൾ നടപ്പിലാക്കാമെന്നാണ് ചീഫ് എൻജിനിയർ വിശദീകരിച്ചത്. ഈ സംവിധാനം എല്ലായിടത്തും നടപ്പിലാക്കികൂടെയെന്ന് കമ്മീഷൻ ചോദിച്ചു. ഇതിന് സാങ്കേതിക തടസമുണ്ടെങ്കിൽ മൂടി സ്ഥാപിക്കുന്നത് വരെ താത്കാലിക സംവിധാനം ഏർപ്പെടുത്തണമെന്ന് കമ്മീഷൻ ആവശ്യപ്പെട്ടു.

വനിത കർഷക സംഗമം ന‌ടത്തി

കണ്ണൂര്‍: അഖിലേന്ത്യ കിസാൻ സഭ കണ്ണൂർ ജില്ലാ കൗൺസിലിന്‍റെ ആഭിമുഖ്യത്തിൽ വനിത കർഷക സംഗമം നടത്തി. സംസ്ഥാന എക്സിക്യുട്ടീവ് അംഗവും തൃശൂർ ജില്ലാ പഞ്ചായത്ത് സ്റ്റാൻഡിംഗ് കമ്മറ്റി ചെയർപേഴ്സനുമായ എസ്. ദീപ ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് പയ്യരട്ട ശാന്ത അധ്യക്ഷത വഹിച്ചു. കൃഷി അസി. ഡയറക്ടർ ബിന്ദു കെ. മാത്യു, ഡെയറി എക്സ്റ്റൻഷൻ ഓഫീസർ കെ.കെ.ബീന എന്നിവർ വിവിധ വിഷയങ്ങളിൽ ക്ലാസെടുത്തു. കിസാൻസഭ സംസ്ഥാന വൈസ് പ്രസിഡന്‍റ് എ. പ്രദീപൻ, ജില്ലാ പ്രസിഡന്‍റ് പി.കെ. മധുസൂദനൻ, സെക്രട്ടറി സി.പി. ഷൈജൻ മഹിളാ സംഘം സംസ്ഥാന ജോയിന്‍റ് സെക്രട്ടറി എന്‍. ഉഷ, ജില്ലാ സെക്രട്ടറി കെ.എം. സപ്ന, കെ.വി. ഗോപിനാഥ്, സംസ്ഥാന വനിതാ കര്‍ഷക അവാര്‍ഡ് ജേതാവ് കെ. ബിന്ദു, ഒ.വി. രത്നകുമരി എന്നിവർ പ്രസംഗിച്ചു. കിസാൻസഭ വനിത കർഷക സമിത രൂപീകരിച്ചു. സെക്രട്ടറിയായി പയ്യരട്ട ശാന്തയെയും പ്രസിഡന്‍റായി ഒ.വി. രത്നകുമാരിയെയും തെരഞ്ഞെ‌ടുത്തു.

ആറളത്ത് കുളിവെള്ളത്തിനായി നെട്ടോട്ടം

ഇരിട്ടി: വേനൽ മഴ കനിഞ്ഞിട്ടും കുടിവെള്ളമില്ലാതെ വലഞ്ഞ് ആറളം പുനരധിവാസ മേഖല ബ്ലോക്ക് 13 ലെ കുടുംബങ്ങൾ. കുടിവെള്ള വിതരണം ആരംഭിച്ചെങ്കിലും കാര്യക്ഷമമെല്ലെന്നാണ് പ്രദേശവാസികൾ പറയുന്നത്. പ്രദേശത്തെ പുഴയും വറ്റിവരണ്ട നിലയിലാണ്. പുഴയുടെ നടുക്ക് കുഴികുത്തിയും മറ്റുമാണ് പല കുടുംബങ്ങളും കുടിവെള്ളം ശേഖരിക്കുന്നത്. പുനരധിവാസ മേഖലയിലെ എല്ലാ ബ്ലോക്കുകളിലും ജലനിധി പദ്ധതി ഉണ്ടെങ്കിലും ഇവയൊന്നും പ്രവർത്തനക്ഷമമെല്ല. കോടികളുടെ കുടിവെള്ള പദ്ധതിയാണ് പുനരധിവാസ മേഖലയിൽ അധികൃതർ ശ്രദ്ധിക്കാതെ കാടുകയറി നശിക്കുന്നത്. മുൻവർഷങ്ങളിലെല്ലാം പഞ്ചായത്തും ടിആർഡിഎമ്മും വാഹനങ്ങളിൽ കുടിവെള്ളം എത്തിച്ചിരുന്നു. ഈ വർഷം ഒരറിയിപ്പുമില്ലാതെ ഒരു ദിവസം മാത്രം കുടിവെള്ളം എത്തിച്ചതായി പതിമൂന്നാം ബ്ലോക്കിലെ താമസക്കാർ പറയുന്നു. മെയിൻ റോഡിലൂടെ മാത്രമാണ് അന്ന് കുടിവെള്ള വിതരണം വാഹനം കടന്നു പോയതെന്നും പലർക്കും ആവശ്യത്തിനുള്ള വെള്ളം നല്കുന്നില്ലെന്നും പരാതിയുണ്ട്. അറിയിപ്പ് ലഭിച്ചാൽ ലീവ് എടുത്തിട്ടാണെങ്കിലും വെള്ളം വരുന്നത് ശേഖരിക്കാൻ കഴിയുമെന്നാണ് സ്ത്രീജനങ്ങൾ പറയുന്നത്. ആനയുടെ ഭീഷണി നിലനിൽക്കുന്ന ഇവിടെ കിലോമീറ്ററുകൾ നടന്ന് പുഴയിലെ കുഴിയിൽ നിന്നാണ് ഇവർ കുടിവെള്ളം ശേഖരിക്കുന്നത്. മേഖലയിലെ കുടിവെള്ളക്ഷാമം പരിഹരിക്കാൻ ആവശ്യമായ അടിയന്തര നടപടി ഉണ്ടാവണമെന്നാണ് ഇവരുടെ ആവശ്യം.

പരിഹാരമില്ലാതെ ഉരുപ്പുംകുറ്റി ഈന്തുംകരി മേഖലയിലെ യാത്രാക്ലേശം

ഇരിട്ടി: ജില്ലയിലെ പ്രധാന കുടിയേറ്റ മേഖലയായ ഉരുപ്പുംകുറ്റി ഈന്തുംകരി പ്രദേശവാസികളുടെ യാത്രാ ക്ലേശത്തിന് പരിഹാരം കാണാൻ നടപടി വേണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ടെങ്കിലും നടപടികൾ ഒന്നുമായില്ല. 300 ൽ അധികം കുടുംബങ്ങൾ താമസിക്കുന്ന വനാതിർത്തിയോട് ചേർന്ന പ്രദേശത്തുകാർ ഇവിടെ നിന്ന് പുറത്തേക്ക് പോകാനും തിരിച്ചു വരാനും കടുത്ത ദുരിതമാണ് അനുഭവിക്കേണ്ടി വരുന്നത്. സാധാരണ കർഷകരും കൂലിപണിക്കാരുമടങ്ങുന്ന സമൂഹമാണ് ഈ മേഖലയിലെ ഭൂരിഭാഗം ജനങ്ങളും. നേരത്തെ 15ൽ അധികം ബസുകൾ സർവീസ് നടത്തിയിരുന്ന ഇവിടേക്ക് ഇപ്പോൾ രണ്ടു ബസുകൾ മാത്രമാണുള്ളത്. കരിക്കോട്ടകരിയിലെയും അങ്ങാടികടവിലെയും സ്കൂളുകളിൽ പഠിക്കുന്ന 60 ഓളം വരുന്ന വിദ്യാർഥികൾ ഉൾപ്പെടെയുള്ളവർ യാത്രയക്ക് ടാക്സി വാഹനങ്ങളെയാണ് ആശ്രയിക്കുന്നത്. ഇത് വലിയ സാന്പത്തിക ബാധ്യതയക്ക് ഇടയാക്കുന്നുണ്ട്. പരിമിതമായ പൊതു വാഹന സംവിധാനങ്ങളെ ആശ്രയിക്കുന്ന മുതിർന്നവർ തുടങ്ങി വിദ്യാർഥികൾ വരെ ഏറ്റവും അടുത്ത ടൗണായ കരിക്കോട്ടകരിയിലെത്തണമെങ്കിൽ 120 രൂപ മുടക്കി ഓട്ടോറിക്ഷ വിളിച്ചാണ് യാത്ര ചെയ്യുന്നത്. അടുത്ത അധ്യയനവർഷം ആരംഭിക്കാനിരിക്കെ വിദ്യാർഥികളെ എങ്ങിനെ സ്കൂളുകളിലേക്കയക്കുമെന്ന ആശങ്കയിലാണ് രക്ഷിതാക്കൾ. ബസ് ഉടമകളുടെ തർക്കത്തിൽ ബലിയാടായി നാട്ടുകാർ 15 ഓളം ബസുകൾ സർവീസ് നടത്തിയിരുന്നിടത്ത് ബസ് സർവീസുകൾ രണ്ടായി ചുരുങ്ങാൻ കാരണം സർവീസ് ലാഭകരമല്ലാത്തതല്ല. മറിച്ച് ബസ് ഉടമകളുടെ തൊഴുത്തിൽകുത്തും പിടിവാശിയുമാണെന്ന് നാട്ടുകാർ ആരോപിക്കുന്നു. ദീർഘദൂര ബസ് സർവീസ് പെർമിറ്റിനായി ചിലർ ഈന്തുംകരിയെ ഉൾപ്പെടുത്തിയുള്ള പെർമിറ്റ് സംഘടിപ്പിച്ച ശേഷം ക്രമേണ ഗ്രാമീണ സർവീസ് നടത്താതെ ടൗൺ കേന്ദ്രീകരിച്ച് സർവീസ് നടത്തുകയായിരുന്നു. ഇതിനിടെ ഉരുപ്പുംകുറ്റി ഈന്തുംകരി ഭാഗത്ത് നിന്ന് താത്കാലിക പെർമിറ്റിൽ സർവീസ് നടത്തിയിരുന്ന ബസുകൾക്കെതിരെ ഈ റൂട്ടിൽ സർവീസ് നടത്താത്ത മറ്റ് മൂന്ന് ബസുടമകൾ കോടതിയെ സമീപിച്ചു. ഈന്തുംകരിയിൽ നിന്നും പുറത്തേക്ക് സർവീസ് നടത്തിയിരുന്ന ബസുകൾ ഇവരുടെ ബസ് സർവീസിന് തൊട്ടുമുന്നിലായി ഓടുന്നതായിരുന്നു ഇവരെ പ്രകോപിപ്പിച്ചത്. ഇതേ തുടർന്ന് കോടതി താത്കാലിക പെർമിറ്റുമകൾ മരവിച്ചു. മറ്റുചിലരാകട്ടെ സർവീസ് മറ്റിടങ്ങളിലേക്ക് മാറ്റുകയും ചെയ്തു. ഇതോടെ നാട്ടുകാരാണ് ദുരിതത്തിലായത്. നിലവിൽ രാവിലെ 6.30ന് സർവീസ് ആരംഭിക്കുന്ന ഒരു ബസും എട്ടിന് പുറപ്പെടുന്ന ഒരു കെഎസ്ആർടിസിയും മാത്രമാണ് സർവീസ് നടത്തുന്നത്. പരിഹാരം കെഎസ്ആർടിസി സർവീസ് ഈ മേഖലയിലെ ജനങ്ങളു‌ടെ യാത്രാക്ലേശത്തിന് പരിഹാരം കെഎസ്ആർടിസിയുടെ ഷട്ടിൽ സർവീസുകൾ മാത്രമാണെന്ന് നാട്ടുകാർ പറയുന്നു. ഇരിട്ടിയിൽ നിന്നും കെഎസ്ആർടിസി രണ്ടോ മൂന്നോ ഷട്ടിൽ സർവീസ് നടത്തിയാൽ യാത്രാദുരിതത്തിന് ഒരു പരിധിവരെ പരിഹാരമാകും. കരിക്കോട്ടക്കരി വരെ ബസിൽ പോയി തിരിച്ചുവരാൻ 30 രൂപ ചെലവ് വരുന്നിടത്ത് ഇന്ന് 240 രൂപയാണ് യാത്രക്കാർക്ക് മുടക്കേണ്ടി വരുന്നത്. രണ്ട് ആദിവാസി സങ്കേതങ്ങൾ സ്ഥിതി ചെയ്യുന്ന പ്രദേശം കൂടിയാണിത്. കോടതിയെ സമീപിച്ചവരുടെ ബസുകൾ തടയും "യാത്രാ സൗകര്യം ഒരുക്കിത്തരണമെന്നാവശ്യപ്പെട്ട് മന്ത്രി, ജില്ലാ പഞ്ചായത്ത്, ആർടിഒ തുടങ്ങി എല്ലായിടത്തും പരാതികൾ നൽകി. ഇതുവരെ ഒരു നടപടിയും ഉണ്ടായിട്ടില്ല. ബസ് ഉടമകളുടെ കിടമത്സരത്തിൽ പാവം ജനങ്ങളാണ് ബുദ്ധിമുട്ടുന്നത്, അനുകൂലമായ തീരുമാനം ഉണ്ടായില്ലെങ്കിൽ താത്കാലിക പെർമിറ്റിൽ ഓടിയ ബസുകൾക്കെതിരേ കോടതിയെ സമീപിച്ചവരുടെ ബസുകൾ വഴിയിൽ തടയുന്നതുൾപ്പെടെയുള്ള സമരപരിപാടികളിലേക്ക് ജനങ്ങൾ നീങ്ങേണ്ടി വരും. സർവീസ് നടത്താൻ രണ്ടു ബസുകൾ തയാറായിരിക്കുന്പോഴാണ് കോടതി ഉത്തരവിലൂടെ താത്കാലിക പെർമിറ്റുകൾ മരവിപ്പിച്ച് ബസുടമകൾ 300 ഓളം കുടുംബങ്ങളെ ദുരിതത്തിലാക്കിയത്. -ഫാ. സുനിൽ കടുന്പൻന്താനത്ത്, ഉരുപ്പുംകുറ്റി സെന്‍റ് മേരീസ് പള്ളി വികാരി

സിപിഎം ക്രിമിനലുകളുടെ നടപടി അപലപനീയമെന്ന് മാർട്ടിൻ ജോർജ്

മലപ്പട്ടം: മലപ്പട്ടം അടുവാപ്പുറത്ത് രണ്ടുമാസങ്ങൾക്ക് മുമ്പ് യൂത്ത് കോൺഗ്രസ് പ്രവർത്തകർ സ്ഥാപിച്ച മഹാത്മജിയുടെയും ദേശീയ നേതാക്കളുടെയും ചിത്രങ്ങൾ ആലേഖനം ചെയ്ത സ്തൂപം തകർത്ത സിപിഎം ക്രിമിനലുകളുടെ നടപടി അപലപനീയമെന്ന് ഡിസിസി പ്രസിഡന്‍റ് മാർട്ടിൻ ജോർജ്. മുമ്പ് പയ്യന്നൂരിലും ഗാന്ധി പ്രതിമ സിപിഎമ്മുകാർ തകർത്തിരുന്നു. രാഷ്‌ട്രപിതാവിനു നേർക്ക് നിറയൊഴിച്ച ഗോഡ്സെയുടെ പിന്മുറക്കാരായി സിപിഎം മാറുകയാണ്. ഗാന്ധിസ്തൂപം സ്വന്തം സ്ഥലത്ത് സ്ഥാപിക്കാൻ മുൻകൈയെടുക്കുകയും പ്രവർത്തനങ്ങൾക്ക് നേതൃത്വം നൽകുകയും ചെയ്ത യൂത്ത് കോൺഗ്രസ് തളിപ്പറമ്പ് നിയോജക മണ്ഡലം സെക്രട്ടറി സനീഷിന്‍റെ വീടും സിപിഎം ആക്രമിച്ചു. വീട്ടിലുണ്ടായിരുന്ന ചെറിയ കുട്ടിയടക്കം ഭാഗ്യവശാലാണ് പരിക്കേൽക്കാതെ രക്ഷപ്പെട്ടത്. സ്തൂപം തകർത്തും കോൺഗ്രസ് പ്രവർത്തകരെ ഭയപ്പെടുത്തിയും കോൺഗ്രസ് ആശയങ്ങൾ പ്രചരിപ്പിക്കുന്നതിൽ നിന്ന് പിന്തിരിപ്പിക്കാമെന്ന വ്യാമോഹം വേണ്ട. ആ കാലമൊക്കെ കഴിഞ്ഞു. സിപിഎം ജനാധിപത്യ ധ്വംസനങ്ങളുടെ കോട്ട കെട്ടിയ മലപ്പട്ടം പോലുള്ള പ്രദേശങ്ങളിലെ യഥാർഥ കമ്മ്യൂണിസ്റ്റ് പാർട്ടി പ്രവർത്തകർ ഇതിനെതിരെ പ്രതികരിക്കും. ഗാന്ധി സ്തൂപം തകർക്കുകയും യൂത്ത് കോൺഗ്രസ് പ്രവർത്തകൻ സനീഷിന്‍റെ വീട് ആക്രമിക്കുകയും ചെയ്ത ക്രിമിനലുകളെ അറസ്റ്റ് ചെയ്യാൻ പോലീസ് തയാറാകണമെന്ന് മാർട്ടിൻ ജോർജ് ആവശ്യപ്പെട്ടു. ഡിസിസി പ്രസിഡന്‍റിനോടൊപ്പം റിജിൽ മാക്കുറ്റി, കെ.സി. ഗണേശൻ, കെ.പി. ശശിധരൻ, ശ്രീജേഷ് കൊയിലേരിയൻ തുടങ്ങിയവർ അക്രമം നടന്ന സ്ഥലം സന്ദർശിച്ചു.

ഇന്ത്യൻ സൈന്യത്തിനായി ക്ഷേത്രത്തിൽ വഴിപാട്

പയ്യാവൂർ: കാഷ്മീരിൽ ഭീകരാക്രമണം നടത്തിയ പാക് ഭീകരവാദികൾക്കെതിരെ ഇന്ത്യൻ സൈന്യം തിരിച്ചടി തുടങ്ങിയ സാഹചര്യത്തിൽ സൈനികർക്ക് വേണ്ടി പയ്യാവൂർ ശിവക്ഷേത്രത്തിൽ വിശേഷാൽ പൂജയും പ്രാർഥനകളും. പയ്യാവൂർ ദേവസ്വം മുൻ ചെയർമാൻ ടി.പി. രാജീവന്‍റെ നേതൃത്വത്തിലാണ് മൃത്യുഞ്ജയ ഹോമം ഉൾപ്പെടെയുള്ള വഴിപാടുകളും പ്രാർഥനകളും നടത്തിയത്. വില്ലാളിവീരനായ അർജുനന് പരമശിവൻ പാശുപതാസ്ത്രം നൽകി അനുഗ്രഹിച്ച സ്ഥലമായാണ് പയ്യാവൂർ ശിവക്ഷത്രം കരുതപ്പെടുന്നത്.

നിവേദനം നല്കി

തളിപ്പറമ്പ്: തളിപ്പറമ്പ് നഗരസഭ പുഷ്പഗിരിയിൽ നഗരസഭ നിർമിക്കുന്ന സ്പോർട്ട്സ് കോംപ്ലക്സിന് സിഎംഐ വൈദികൻ വിശുദ്ധ ചാവറയച്ചന്‍റെ പേരിടണമെന്നാവശ്യപ്പെട്ട് തളിപ്പറമ്പ് സെന്‍റ് മേരീസ് ഫൊറോന പള്ളി അധികൃതർ നിവേദനം നൽകി. ഫൊറോന വികാരി ഫാ. മാത്യു ആശാരിപറമ്പിലിന്‍റെ നേതൃത്വത്തിൽ നഗരസഭ സ്ഥിരം സമിതി അധ്യക്ഷൻ പി.പി. മുഹമ്മദ് നിസാറിനാണ് നിവേദനം നൽകിയത്. ടി.എസ്. ജയിംസ് മരുതാനിക്കാട്ട്, സിബി പരിയാനിക്കൽ, ഒ.സി. തോമസ് എന്നിവരും നിവേദക സംഘത്തിൽ ഉണ്ടായിരുന്നു. 40 വർഷം മുമ്പ് സിഎംഐ സഭ തളിപ്പറമ്പ് പഞ്ചായത്തിന് സൗജന്യമായി നൽകിയ ഒരേക്കർ സ്ഥലത്താണ് സ്പോർട്സ് കോംപ്ലക്സ് നിർമിക്കുന്നത്.

റെഡ് ക്രോസ് അവാർഡുമായി വായാട്ടുപറമ്പ് സെന്‍റ് ജോസഫ്സ്

വായാട്ടുപറമ്പ്: ഇന്ത്യൻ റെഡ് ക്രോസ് സൊസൈറ്റി ഏർപ്പെടുത്തിയ കണ്ണൂർ ജില്ലയിലെ ജെആർസി ബെസ്റ്റ് സ്കൂൾ അവാർഡിന് വായാട്ടുപറന്പ് സെന്‍റ് ജോസഫ്സ് എച്ച്എസ്എസ് അർഹമായി. വിദ്യാല യത്തിലെ ജെആർസി യൂണിറ്റിന്‍റെ മികവാർന്ന ജീവകാരുണ്യ പ്രവർത്തനങ്ങൾ, ലഹരി വിരുദ്ധ ബോധവത്കരണ പ്രവർത്തനങ്ങൾ, പ്രഥമ ശുശ്രൂഷാ രംഗത്തെ പ്രവർത്തനങ്ങൾ, പരിസ്ഥിതി സംരക്ഷണ പ്രവർത്തനങ്ങൾ തുടങ്ങിയവ ഫലപ്രദമാമായി വിദ്യാലയത്തിൽ നടപ്പിലാക്കിയതും, സംസ്ഥാന തലത്തിൽ കേഡറ്റുകൾ നേടിയ വിജയങ്ങളും പരിഗണിച്ചാണ് അവാർഡ്. വിദ്യാലയത്തിലെ ഗായികയും, പ്രാസംഗികയുമായ റോസ്‌ലിന ആൻ ഡെന്നീസാണ് ജില്ലയിലെ മികച്ച ജെആർസി കേഡറ്റ്.

ഡെങ്കിപ്പനി: ഫോഗിംഗ് നടത്തി

ചെറുപുഴ: ഡെങ്കിപ്പനി റിപ്പോർട്ട്‌ ചെയ്ത ചെറുപുഴ പഞ്ചായത്ത് അഞ്ചാം വാർഡിലെ ചുണ്ട പുഴയോരത്തും, തിരുമേനിയിലും ആരോഗ്യ വകുപ്പ് പ്രതിരോധ പ്രവർത്തനങ്ങൾ ശക്തമാക്കി. ഒരാഴ്ചയ്ക്കിടെ ചുണ്ടയിലും തിരുമേനിയിലും രണ്ടാൾക്ക് വീതമാണ് ഡെങ്കിപ്പനി ബാധിച്ചത്. പുളിങ്ങോം കുടുംബാരോഗ്യ കേന്ദ്രത്തിന്‍റെയും ചെറുപുഴ പഞ്ചായത്തിന്‍റെയും നേതൃത്വതിൽ തളിപ്പറമ്പ് ഡിവിസി യൂണിറ്റിന്‍റെ സഹകരണത്തോടെ രോഗബാധിത മേഖലകളിൽ കൊതുക് നശീകരണത്തിനായി ഫോഗിംഗ് നടത്തി. കൊതുക് കൂത്താടി പരിശോധന, ഹെൽത്ത് സ്‌ക്വാഡ് നേതൃത്വതിൽ ഗൃഹ സന്ദർശനം, കൊതുക് ഉറവിട നശീകരണം എന്നിവ നടത്തി. പ്രതിരോധ പ്രവർത്തനങ്ങൾക്ക് പഞ്ചായത്ത് അംഗം കെ.ഡി. പ്രവീൺ, ഹെൽത്ത് ഇൻസ്പെക്ടർ വി. മുഹമ്മദ് ഷെരീഫ്, എൽ.എസ്. അശ്വതി, ആര്യ രാജപ്പൻ, തളിപ്പറമ്പ് ഡിവിസി യൂണിറ്റിലെ പി. രാജീവൻ, രാജേഷ്കുമാർ, ഇ. പ്രസന്ന, വി. സിന്ധു, ആശ വർക്കർ എം. രജിത എന്നിവർ നേതൃത്വം നൽകി. പ്രവർത്തനങ്ങൾ വിലയിരുത്താനും ആസൂത്രണം ചെയ്യാനുമായി ആരോഗ്യ പ്രവർത്തകർ, ജനപ്രതിനിധികൾ, സന്നദ്ധ പ്രവർത്തകരുടെ യോഗം ഇന്ന് ഉച്ചകഴിഞ്ഞു മൂന്നിന് പഞ്ചായത്ത് ഹാളിൽ ചേരുമെന്ന് പ്രസിഡന്‍റ് കെ.എഫ്. അലക്സാണ്ടർ അറിയിച്ചു.

മട്ടന്നൂർ നഗരസഭ ബഡ്സ് സ്കൂളിന് സംസ്ഥാന പുരസ്കാരം

മട്ടന്നൂർ: മട്ടന്നൂർ നഗരസഭയ്ക്കു കീഴിലുള്ള പഴശിരാജ മെമ്മോറിയൽ ബഡ്സ് സ്പെഷൽ സ്കൂളിന് കുടുംബശ്രീ മിഷന്‍റെ സംസ്ഥാന പുരസ്കാരം. പഴശി സ്മൃതി മന്ദിരത്തിന് സമീപത്തുള്ള പഴയ സാംസ്കാരിക നിലയത്തിലാണ് 2014 മുതൽ ബഡ്സ് സ്കൂൾ പ്രവർത്തിച്ചു വന്നിരുന്നത്. നേരത്തെ ഒയിസ്ക ചാരിറ്റബിൾ ട്രസ്റ്റിന്‍റെ നേതൃത്വത്തിൽ ആരംഭിച്ച ഭിന്നശേഷി കുട്ടികളുടെ പരിപാലന കേന്ദ്രം അവർക്ക് നടത്തി കൊണ്ടുപോകാൻ പ്രയാസമറിയിച്ചതിനെ തുടർന്നാണ് 2014 ൽ നഗരസഭ ഏറ്റെടു ക്കുന്നത്. ഭിന്നശേഷിക്കാരായ നിരവധി കുട്ടികൾക്ക് മികച്ച പരിശീലനം നല്കുന്ന കേന്ദ്രമായി ഈ സ്കൂൾ മാറുകയുണ്ടായി. തുടർന്നാണ് സംസ്ഥാന സർക്കാർ മോഡൽ ചൈൽഡ് റിഹാബിലിറ്റേഷൻ സെന്‍ററായി ഈ സ്ഥാപനത്തെ മാറ്റാൻ തീരുമാനിച്ചത്. എംസിആർസിക്കായി നഗരസഭ സ്ഥലം ഏറ്റെടുക്കുകയും കേരള സാമൂഹ്യ സുരക്ഷാ മിഷൻ ആറു കോടി രൂപ ചെലവിൽ പുതിയ കെട്ടിടം നിർമിക്കുകയും ചെയ്തിട്ടുണ്ട്. 2025 ജനുവരി മുതൽ പുതിയ കെട്ടിടത്തിലാണ് ബഡ്സ് സ്കൂൾ പ്രവർത്തിച്ചു വരുന്നത്. 65 വിദ്യാർഥി കളും 10 ജീവനക്കാരും ആണ് ഇവിടെ ഉള്ളത്. നഗരസഭയുടെ വാർഷിക പദ്ധതിയിൽ ഉൾപ്പെടുത്തുന്ന ഫണ്ടും ബഡ്സ് സ്കൂൾ മാനേജ്മെന്‍റ് കമ്മിറ്റി മുഖാന്തരം ലഭിക്കുന്ന സഹായങ്ങളും സർക്കാരിന്‍റെ ഗ്രാന്‍റും ഉപയോഗപ്പെടുത്തിയാണ് സ്ഥാപനത്തിന്‍റെ പ്രവർത്തനം. രക്ഷിതാക്കൾക്കായി തൊഴിൽ പരിശീലനം ഉൾപ്പെടെ കേന്ദ്രത്തിന്‍റെ ഭാഗമായി പ്രവർത്തിച്ചു വരുന്നു. അഞ്ചുലക്ഷം രൂപ വിലവരുന്ന പുതിയ തെറാപ്പി ഉപകരണങ്ങൾ പുതുതായി സ്ഥാപിച്ചു കഴിഞ്ഞു. നാട്ടുകാരുടെയും അഭ്യുദയകാംക്ഷികളുടെയും സഹകരണമാണ് സ്ഥാപനത്തിന്‍റെ പുരോഗതിക്ക് അടിസ്ഥാനമെന്ന് നഗരസഭാ ചെയർമാൻ എൻ. ഷാജിത്തും പ്രിൻസിപ്പൽ സി. രജനിയും പറഞ്ഞു. സമീപ പഞ്ചായത്തുകളിൽ നിന്നുമുളള വിദ്യാർഥികൾക്കായി പ്രത്യേക വാഹന സൗകര്യവും നഗരസഭ ഏർപ്പെടുത്തിയിട്ടുണ്ട്.

ജില്ലാതല സമ്മര്‍ ക്യാമ്പ് ലിയോറ ഫെസ്റ്റിന് തുടക്കമായി

കണ്ണൂർ: കുടുംബശ്രീ ജില്ലാമിഷന്‍ ബാലസഭാ അംഗങ്ങള്‍ക്കായി നടത്തുന്ന ജില്ലാതല സമ്മര്‍ ക്യാമ്പ് മൈന്‍ഡ് ബ്ലോവേഴ്‌സ് ലിയോറ ഫെസ്റ്റ് കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ എം.വി. ജയന്‍ ഉദ്ഘാടനം ചെയ്തു. കൂടാളി ക്ഷേമകാര്യ സ്ഥിരം സമിതി അധ്യക്ഷന്‍ കെ. ദിവാകരന്‍ അധ്യക്ഷത വഹിച്ചു. കുടുംബശ്രീ ജില്ലാ പ്രോഗ്രാം മാനേജര്‍ പി. വിനേഷ് പദ്ധതി വിശദീകരണം നടത്തി. പള്ളിക്കുന്ന് കൃഷ്ണ മേനോന്‍ സ്മാരക ഗവ. വനിതാ കോളജില്‍ ഇന്നും നാളെയുമായി നടക്കുന്ന ക്യാമ്പില്‍ സിനിമാ താരം ഇന്ദ്രന്‍സ്, കണ്ണൂര്‍ ജില്ലാ കളക്ടര്‍ അരുണ്‍ കെ. വിജയന്‍ എന്നിവര്‍ പങ്കെടുക്കും. 11 ബ്ലോക്കുകളില്‍ നിന്ന് തെരഞ്ഞെടുത്ത ബാലസഭയുടെ 55 കുട്ടികളാണ് ക്യാമ്പില്‍ പങ്കെടുക്കുന്നത്. മികച്ച പ്രകടനം കാഴ്ചവയ്ക്കുന്ന ജില്ലയിലെ ഏഴ് കുട്ടികള്‍ക്ക് അടുത്ത വര്‍ഷം തിരുവനന്തപുരത്ത് നടക്കുന്ന ഇന്‍റര്‍നാഷണല്‍ ഇന്നോവേഷന്‍ കോണ്‍ക്ലേവില്‍ ആശയാവതരണം നടത്താനുള്ള അവസരമുണ്ടാകും. അറിവിനും സര്‍ഗാത്മകതയ്ക്കുമൊപ്പം സംരംഭകത്വത്തിന്‍റെ നൂതന പാഠങ്ങള്‍ പരിശീലിപ്പിക്കുക എന്ന ലക്ഷ്യത്തോടെ ആരംഭിച്ച "മൈന്‍ഡ് ബ്ലോവേഴ്‌സ്' ക്യാമ്പിന്‍റെ തുടര്‍ച്ചയാണ് ലിയോറ ഫെസ്റ്റ് സമ്മര്‍ ക്യാമ്പ്. ഗ്രൂപ്പ് ആക്ടിവിറ്റി, ഗെയിംസ്, കളക്ടറുമായി സംവദിക്കല്‍ എന്നിങ്ങനെയുള്ള നിരവധി പരിപാടികള്‍ ക്യാമ്പിന്‍റെ ഭാഗമായി നടക്കും. കുടുംബശ്രീ ജില്ലാമിഷന്‍ എഡിഎംസിമാരായ കെ. വിജിത്ത്, കെ. രാഹുല്‍, പി.ഒ. ദീപ, പാപ്പിനിശേരി സിഡിഎസ് ചെയര്‍പേഴ്സണ്‍ മിനി ഷേര്‍ളി, തില്ലങ്കേരി സിഡിഎസ് ചെയര്‍പേഴ്സണ്‍ എം. ഷിംന തുടങ്ങിയവര്‍ പരിപാടിയില്‍ പങ്കെടുത്തു.

മോക്ക് ഡ്രില്ലില്‍ പങ്കുചേര്‍ന്ന് ജനം: ജില്ലയില്‍ 'ഓപ്പറേഷന്‍ അഭ്യാസ്' വിജയകരം

കണ്ണൂർ: ആക്രമണങ്ങളില്‍ നിന്ന് സ്വയം രക്ഷയ്ക്കുള്ള മുന്നൊരുക്കം ലക്ഷ്യമിട്ട് വിവിധ വകുപ്പുകളുടെ നേതൃത്വത്തില്‍ നടത്തിയ സിവില്‍ ഡിഫെന്‍സ് മോക്ക് ഡ്രില്‍, "ഓപ്പറേഷന്‍ അഭ്യാസ്' ജില്ലയിലെ അഞ്ചിടങ്ങളില്‍ വിജയകരമായി സംഘടിപ്പിച്ചു. വൈകുന്നേരം നാലോടെ തളിപ്പറമ്പ് എല്‍ഐസി കോംപ്ലക്സ്, പരിശോധന, രക്ഷപ്പെടുത്തല്‍ എന്നിവ സംബന്ധിച്ച് സെന്‍റ് തെരേസാസ് സ്‌കൂളിലും, ആളുകളെ ഒഴിപ്പിക്കല്‍ ഇരിട്ടി താലൂക്ക് സിവില്‍ സ്റ്റേഷനിലും നടന്നു. മോക്ക് ഡ്രില്ലിന്‍റെ ഭാഗമായി താത്കാലിക ആശുപത്രി പയ്യന്നൂര്‍ റവന്യു ടവറില്‍ സജ്ജമാക്കി. വൈകുന്നേരം നാലോടെ നഗരസഭാ അപകട സൈറണ്‍ മുഴക്കിയതോടെ തലശേരി കണ്ണിച്ചിറ ഗാര്‍ഡന്‍സ് അപ്പാര്‍ട്ട്‌മെന്‍റിലെ ജാസ്മിന്‍ ബ്ലോക്കിലാണ് ഷെല്‍ ആക്രമണവും തുടര്‍ന്ന് തീപിടുത്തവുമുണ്ടായാല്‍ നടത്തുന്ന രക്ഷാപ്രവര്‍ത്തനങ്ങളുടെ മോക്ക്ഡ്രില്‍ നടന്നത്.

തൊരപ്പൻ സന്തോഷ് കാക്കയങ്ങാട്ടുണ്ട്; ജാഗ്രത വേണമെന്ന് പോലീസ്

ഇരിട്ടി: കുപ്രസിദ്ധ മോഷ്ടാവ് തൊരപ്പൻ സന്തോഷ് കാക്കയങ്ങാട് മേഖലയിൽ എത്തിയതായി സൂചന ലഭിച്ചതോടെ ജനങ്ങളൊട് ജാഗ്രത പാലിക്കാൻ പോലീസ് നിർദേശം. ബുധനാഴ്ച ഉച്ചയോടെ തൊരപ്പൻ സന്തോഷ് മുഴക്കുന്ന് ഭാഗത്ത് എത്തിയതായാണ് പോലീസിന് ലഭിച്ച വിവരം. പകൽ സ്ഥലം കണ്ടെത്തി രാത്രിയിൽ മോഷണം നടത്തുന്നതാണ് തൊരപ്പന്‍റെ രീതി. ഭിത്തി തുരന്ന് അകത്തു കയറി മോഷണം നടത്തുന്നതുകൊണ്ടാണ് ഇയാൾ തൊരപ്പൻ എന്ന പേരിൽ അറിയപ്പെടുന്നത്. വെള്ളർവള്ളി നരസിംഹ മൂർത്തി ക്ഷേത്രത്തിലടക്കം നിരവധി സ്ഥലങ്ങളിൽ മോഷണം നടത്തിയിട്ടുള്ള സന്തോഷ് ജാമ്യത്തിൽ ഇറങ്ങിയതാണ്. ഇയാളെ തിരിച്ചറിയുന്നവർ അടിയന്തരമായി മുഴക്കുന്ന് പോലീസ് സ്റ്റേഷനിൽ വിവരം അറിയിക്കുക. ഫോൺ: 0490 2458200.

കൃഷിഭവനുകളിലേക്ക് 12ന് കർഷക കോൺഗ്രസ് മാർച്ച്

കണ്ണൂർ: കർഷക കോൺഗ്രസ് മണ്ഡലം കമ്മിറ്റികളുടെ ആഭിമുഖ്യത്തിൽ ജില്ലയിലെ മുഴുവൻ കൃഷിഭവനുകൾക്ക് മുന്നിലും 12ന് രാവിലെ 11ന് കർഷക കോൺഗ്രസ് മാർച്ചും ധർണയും നടത്തുമെന്ന് കർഷക കോൺഗ്രസ് ജില്ലാ നേതൃയോഗം. കേര സംരക്ഷണത്തിനായി ലോകബാങ്ക് ആദ്യ ഗഡുവായി നൽകിയ 139 കോടി രൂപയാണ് സർക്കാർ വകമാറ്റി ചെലവഴിച്ചത്. നെല്ല് സംഭരണത്തിലെ പാളിച്ചകളും മില്ലുകാരുമായി ഒത്തു കളിച്ച് കിഴിവിലൂടെ കർഷകന് അധിക നഷ്ടം വരുത്തിയും സംഭരിച്ച നെല്ലിന്‍റെ പണം നൽകാതെയും കർഷകരെ വഞ്ചിച്ചു. നാലാം വാർഷികം ആഘോഷിക്കുന്ന സർക്കാരിന്‍റെ കർഷക വഞ്ചനയ്ക്കെതിരെയും റബറിന് 250 രൂപ തറവില നിശ്ചയിക്കാമെന്ന് സർക്കാർ വാഗ്ദാനം പാലിക്കാത്തതിനെതിരെയും പ്രതിഷേധിച്ചുകൊണ്ടാണ് കൃഷിഭവനിലേക്ക് മാർച്ചം ധർണയും നടത്തുന്നത്. കർഷക കോൺഗ്രസ് ജില്ലാ നേതൃയോഗത്തിൽ ജില്ലാ പ്രസിഡന്‍റ് ജോസ് പൂമല അധ്യക്ഷത വഹിച്ചു. സംസ്ഥാന ഭാരവാഹികളായ പി.ഒ. ചന്ദ്രമോഹനൻ, സി.പി. സലീം, അബൂബക്കർ പൂക്കോത്ത്, എ.ജെ. തോമസ്, ജോണി മുണ്ടക്കൽ, കെ.പി. കുമാരൻ, റോയി ഈറ്റക്കൽ, ജോസ് പന്ന്യാമാക്കൽ തുടങ്ങിയവർ പ്രസംഗിച്ചു.

സിപിഎം ക്രിമിനലുകളുടെ നടപടി അപലപനീയമെന്ന് മാർട്ടിൻ ജോർജ്

മലപ്പട്ടം: മലപ്പട്ടം അടുവാപ്പുറത്ത് രണ്ടുമാസങ്ങൾക്ക് മുമ്പ് യൂത്ത് കോൺഗ്രസ് പ്രവർത്തകർ സ്ഥാപിച്ച മഹാത്മജിയുടെയും ദേശീയ നേതാക്കളുടെയും ചിത്രങ്ങൾ ആലേഖനം ചെയ്ത സ്തൂപം തകർത്ത സിപിഎം ക്രിമിനലുകളുടെ നടപടി അപലപനീയമെന്ന് ഡിസിസി പ്രസിഡന്‍റ് മാർട്ടിൻ ജോർജ്. മുമ്പ് പയ്യന്നൂരിലും ഗാന്ധി പ്രതിമ സിപിഎമ്മുകാർ തകർത്തിരുന്നു. രാഷ്‌ട്രപിതാവിനു നേർക്ക് നിറയൊഴിച്ച ഗോഡ്സെയുടെ പിന്മുറക്കാരായി സിപിഎം മാറുകയാണ്. ഗാന്ധിസ്തൂപം സ്വന്തം സ്ഥലത്ത് സ്ഥാപിക്കാൻ മുൻകൈയെടുക്കുകയും പ്രവർത്തനങ്ങൾക്ക് നേതൃത്വം നൽകുകയും ചെയ്ത യൂത്ത് കോൺഗ്രസ് തളിപ്പറമ്പ് നിയോജക മണ്ഡലം സെക്രട്ടറി സനീഷിന്‍റെ വീടും സിപിഎം ആക്രമിച്ചു. വീട്ടിലുണ്ടായിരുന്ന ചെറിയ കുട്ടിയടക്കം ഭാഗ്യവശാലാണ് പരിക്കേൽക്കാതെ രക്ഷപ്പെട്ടത്. സ്തൂപം തകർത്തും കോൺഗ്രസ് പ്രവർത്തകരെ ഭയപ്പെടുത്തിയും കോൺഗ്രസ് ആശയങ്ങൾ പ്രചരിപ്പിക്കുന്നതിൽ നിന്ന് പിന്തിരിപ്പിക്കാമെന്ന വ്യാമോഹം വേണ്ട. ആ കാലമൊക്കെ കഴിഞ്ഞു. സിപിഎം ജനാധിപത്യ ധ്വംസനങ്ങളുടെ കോട്ട കെട്ടിയ മലപ്പട്ടം പോലുള്ള പ്രദേശങ്ങളിലെ യഥാർഥ കമ്മ്യൂണിസ്റ്റ് പാർട്ടി പ്രവർത്തകർ ഇതിനെതിരെ പ്രതികരിക്കും. ഗാന്ധി സ്തൂപം തകർക്കുകയും യൂത്ത് കോൺഗ്രസ് പ്രവർത്തകൻ സനീഷിന്‍റെ വീട് ആക്രമിക്കുകയും ചെയ്ത ക്രിമിനലുകളെ അറസ്റ്റ് ചെയ്യാൻ പോലീസ് തയാറാകണമെന്ന് മാർട്ടിൻ ജോർജ് ആവശ്യപ്പെട്ടു. ഡിസിസി പ്രസിഡന്‍റിനോടൊപ്പം റിജിൽ മാക്കുറ്റി, കെ.സി. ഗണേശൻ, കെ.പി. ശശിധരൻ, ശ്രീജേഷ് കൊയിലേരിയൻ തുടങ്ങിയവർ അക്രമം നടന്ന സ്ഥലം സന്ദർശിച്ചു.

നവവധുവിന്‍റെ മോഷണം പോയ 30 പവൻ ആഭരണങ്ങൾ തിരിച്ചുകിട്ടി

പയ്യന്നൂർ: ആദ്യ രാത്രിയിൽ വരന്‍റെ വീട്ടിൽ നിന്നും മോഷണം പോയ നവവധു വിവാഹത്തിന്നണിഞ്ഞ 30 പവൻ ആഭരണങ്ങൾ തിരിച്ചു കിട്ടി. സംഭവത്തിൽ പോലീസ് അന്വേഷണം ഊർജിതമാക്കിയതിനിടയിലാണ് ആഭരണങ്ങൾ വീടിന് സമീപം കൊണ്ടു വച്ച നിലയിൽ കണ്ടെത്തിയത്. മേയ് ഒന്നിനാണ് കരിവെള്ളൂർ പലിയേരിയിലെ എ.കെ. അർജുന്‍റെ ഭാര്യ കൊല്ലം തെക്കേവിള സ്വദേശിനി ആർച്ച എസ്. സുധിയുടെ 30 പവന്‍റെ ആഭരണങ്ങൾ മോഷ്ടിക്കപ്പെട്ടത്. വിവാഹ ദിവസം വീടിന് മുകൾ നിലയിലെ കിടപ്പുമുറിയുടെ അലമാരയിൽ നവവധു അഴിച്ചു വച്ചിരുന്ന ആഭരണങ്ങളാണ് പിറ്റേ ദിവസം മോഷ്ടിക്കപ്പെട്ടതായി കണ്ടെത്തിയത്. നവവധുവിന്‍റെ പരാതിയിൽ കേസെടുത്ത പയ്യന്നൂർ പോലീസ് അന്വേഷണം ഊർജിതമാക്കിയിരുന്നു. ഡോഗ് സ്ക്വാഡും ഫോറൻ സിക് വിദഗ്ധരും പരിശോധന നടത്തിയെങ്കിലും പുരോഗതിയുണ്ടായില്ല. അന്ന് വിവാഹ ചടങ്ങിനെത്തിയ യുവതിയുടെ ബന്ധുക്കളെയും ജോലി ചെയ്യുന്ന തിരുവനന്തപുരത്തെ സ്ഥാപനത്തിലെ സുഹൃത്തുക്കളെയും കണ്ടെത്തി പോലീസ് ചോദ്യം ചെയ്തിരുന്നു. തുടരന്വേഷണത്തിന്‍റെ ഭാഗമായി ഇന്നലെ പോലീസ് വീണ്ടും സംഭവസ്ഥലത്തെത്തിയപ്പോഴാണ് സ്വർണാഭരണങ്ങൾ അടങ്ങിയ ബാഗ് കണ്ടെത്തിയത്. പയ്യന്നൂർ ഡിവൈഎസ്പി കെ. വിനോദ്കുമാറിന്‍റെ നിർദേശപ്രകാരം എസ്ഐ പി. യദുകൃഷ്ണനും സംഘവും നടത്തിയ പഴുതടച്ച അന്വേഷണത്തിൽ മോഷ്ടാവ് പിടിക്കപ്പെടുമെന്ന ഘട്ടത്തിലാണ് സ്വർണാഭരണങ്ങൾ വീടിനു സമീപം ഉപേക്ഷിച്ചതെന്നാണ് നിഗമനം. സ്വർണാഭരണങ്ങൾ തിരിച്ചു കിട്ടിയെങ്കിലും മോഷ്ടാവിനെ എത്രയും വേഗം പിടികൂടാൻ കഴിയുമെന്ന പ്രതീക്ഷയിലാണ് പയ്യന്നൂർ പോലീസ്.

മാടായിപ്പാറയിൽ സായാഹ്ന സത്യഗ്രഹം തുടങ്ങി

പഴയങ്ങാടി: മാടായിപ്പാറ സംരക്ഷണ സമിതിയുടെ നേതൃത്വത്തിൽ പ്രദേശത്ത് 11 വരെ നടക്കുന്ന പഞ്ചദിന സായാഹ്ന സത്യഗ്രഹത്തിന് തുടക്കമായി. സസ്യജൈവവൈവിധ്യ കേന്ദ്രമായ മാടായിപ്പാറയുടെ പൈതൃകം നിലനിർത്താനും സംരക്ഷിക്കുവാനും കൈയേറ്റം തടയുന്നതിനും വേണ്ടിയാണ് സത്യഗ്രഹം നടത്തുന്നത്. കണ്ണൂർ രൂപത വികാരി ജനറാൾ മോൺ. ക്ലാരൻസ് പാലിയത്ത് ഉദ്ഘാടനം ചെയ്തു. മാടായിപ്പാറ സംരക്ഷണ സമിതി ചെയർമാൻ പി.പി. കൃഷ്ണൻ അധ്യക്ഷത വഹിച്ചു. കെ.പി. ചന്ദ്രാംഗദൻ, ബിജെപി ജില്ലാ പ്രസിഡന്‍റ് കെ.കെ. വിനോദ് കുമാർ, എൻ. നാരായണ പിടാരർ, സി. നാരായണൻ, വി.പി. മുഹമ്മദലി, മഹമൂദ് മാട്ടൂൽ തുടങ്ങിയവർ പ്രസംഗിച്ചു.

വ്യാപാരി സാന്ത്വനം മെഗാ നറുക്കെടുപ്പ് പദ്ധതി ഏരിയാതല കൂപ്പൺ വിതരണോദ്ഘാടനം

ഇരിട്ടി: വ്യാപാരി വ്യവസായി സമിതി വ്യാപാരി സാന്ത്വനം ട്രസ്റ്റിന്‍റെ നേതൃത്വത്തിൽ ജീവകാരുണ്യ പദ്ധതിയുടെ ഭാഗമായി നടക്കുന്ന മെഗാ നറുക്കെടുപ്പ് പദ്ധതിയുടെ ഏരിയാതല കൂപ്പൺ വിതരണോദ്ഘാടനം ഇരിട്ടി നഗരസഭ ചെയർപേഴ്സൺ കെ. ശ്രീലത നിർവഹിച്ചു. ഒന്നാം സമ്മാനം 25 പവനും രണ്ടാം സമ്മാനം നിസാൻ മാഗ്‌നൈറ്റ് കാറും, മൂന്നാം സമ്മാനമായ ഇലക്‌ട്രിക്ക് സ്‌കൂട്ടറും തുടങ്ങി അഞ്ഞൂറോളം പേർക്ക് പ്രോത്സാഹന സമ്മാനങ്ങൾ ഉൾപ്പടെ നൽകുന്ന പദ്ധതിയുടെ നറുക്കെടുപ്പ് ജൂൺ 10ന് നടക്കും. 500 രൂപയാണ് ടിക്കറ്റിന്‍റെ വില. ദുരിതം അനുഭവിക്കുന്ന വ്യാപാരികളെ സഹായിക്കാൻ ലക്ഷ്യമിട്ടാണ് പദ്ധതി നടപ്പിലാക്കുന്നതെന്ന് വ്യാപാരി നേതാക്കൾ പറഞ്ഞു.

ആശമാരുടെ രാപ്പകൽ സമരയാത്രയ്ക്ക് കണ്ണൂരിൽ സ്വീകരണം നല്കി

കണ്ണൂർ: ആശാസമരം ഒത്തുതീർക്കാൻ സർക്കാർ അടിയന്തരമായി സമവായമുണ്ടാക്കാൻ ഇടപെടണമെന്ന് പ്രശസ്ത കവി മാധവൻ പുറച്ചേരി ആവശ്യപ്പെട്ടു. മേയ് അഞ്ചിന് കാസർഗോഡ് നിന്നാരംഭിച്ച ആശമാരുടെ രാപ്പകൽ സമരയാത്രയുടെ കണ്ണൂർ ജില്ലാ പര്യാടനം ഉദ്ഘാടനം ചെയ്യുകയായിരുന്നു അദ്ദേഹം. പയ്യന്നൂർ പുതിയ ബസ് സ്റ്റാൻഡിലെത്തിയ സമരയാത്രയെ കെ-റെയിൽ സമരനായികമാരായ പി. പദ്മിനി, യശോദാമ്മ എന്നിവർ ക്യാപ്റ്റൻ എം.എ. ബിന്ദുവിനെ ഹാരമണിയിച്ച് സ്വീകരിച്ചു. തുടർന്ന് സമരയാത്ര പ്രകടനമായി പെരുമ്പയിൽ എത്തിച്ചേർന്നു. ‌ സ്വാഗത സംഘം ചെയർമാൻ കെ. ജയരാജ് സ്വീകരണ സമ്മേളനത്തിൽ അധ്യക്ഷത വഹിച്ചു. സ്വാഗതസംഘം സമാഹാരിച്ച സംഭാവന സാമൂഹ്യ പ്രവർത്തക എം. സുൽഫത്ത് സമരയാത്രയ്ക്ക് നല്കി.

1500 തിരുശേഷിപ്പുകളുടെ പൊതുദർശനവും വണക്കവും തളിപ്പറമ്പ് ഫൊറോന പള്ളിയിൽ

തളിപ്പറന്പ്: ഈശോയുടെ തിരുസ്ലീവായുടെ തിരുശേഷിപ്പ് മുതൽ പുതിയ തലമുറയിലെ വിശുദ്ധനായ കാർലോസിന്‍റെ വരെ തിരുസഭ വണങ്ങുന്ന 1500 ൽ പരം തിരുശേഷിപ്പുകളുടെ പൊതുദർശനവും വണക്കവും തളിപ്പറന്പ് സെന്‍റ് മേരീസ് ഫൊറോന മരിയൻ തീർഥാടന പള്ളിയിൽ നടക്കും. 17, 18 തീയതികളിൽ രാവിലെ 7.30 മുതൽ രാത്രി 7.30 വരെയാണ് പൊതുദർശനവും വണക്കവും. 17 ന് രാവിലെ 9.30 തിന് തലശേരി ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്യും. ഈശോയുടെ ശിരസിൽ അണിയിച്ച മുൾക്കിരീടത്തിന്‍റെ അംശം, പരിശുദ്ധ മാതാവിന്‍റെ ശിരോവസ്ത്ര ഭാഗം, വിശുദ്ധ യൗസേപ്പിതാവിന്‍റെ വസ്ത്രഭാഗം, 12 ശ്ലീഹന്മാർ, വിശുദ്ധ എസ്‌തപ്പാനോസ്, പൗരസ്ത്യ പിതാക്കന്മാർ എന്നിവരുടെ പുണ്യശേഷിപ്പുകൾ, ഭാരതത്തിൽ നിന്നുള്ള വിശുദ്ധ അൽഫോൻസ, വിശുദ്ധ ചാവറയച്ചൻ, മറിയം ത്രേസ്യ തുടങ്ങിയ വിശുദ്ധരുടെ തിരുശേഷിപ്പുകളെല്ലാം ഇവിടെ കാണാൻ സാധിക്കും. പൊതുദർശനത്തിന് മുന്നൊരുക്കമായി വികാരി ഫാ. മാത്യു ആശാരിപറമ്പിൽ ചെയർമാനും ഡായി മാത്യു പ്ലാത്തോട്ടം, സിസ്റ്റർ ജെസ്‌ന എഫ്സിസി, ബാബു ഇടത്തുപറമ്പിൽ, സണ്ണി മണ്ണാപറമ്പിൽ, അനിൽ ഇമ്മാനുവേൽ, തോമസ് അർത്തശേരി, ജെറി കാരന്താനം, മാർട്ടിൻ കൊട്ടാരം, മരിയ പ്ലാത്തോട്ടം, സുബി കൊട്ടാരത്തിൽ, സിബി ഐക്കരയിൽ, ബാബു കൊരട്ടിക്കൽ, ഷാജി പൊന്നാംകുടത്ത്, സിബി പരിയാനിക്കൽ എന്നിവർ കൺവീനർമാരായും വിവിധ കമ്മിറ്റികൾ രൂപീകരിച്ച് പ്രവർത്തനം ആരംഭിച്ചു. പ്രവേശനം സൗജന്യമാണ്. ആയിരക്കണക്കിന് ആളുകൾ പ്രദർശനത്തിന് എത്തിച്ചേരുമെന്ന് പ്രതീക്ഷിക്കുന്നതായി സംഘാടകർ അറിയിച്ചു.

കാനോനിക നടപടികള്‍ക്ക് വിധേയരായ വൈദികര്‍ കൂദാശ പരികർമം ചെയ്തത് അപലപനീയം: മാർ ജോസഫ് പാംപ്ലാനി

കൊച്ചി: കാനോനിക നിയമ നടപടികള്‍ നേരിടുന്ന വൈദികര്‍ കൂദാശകള്‍ പരികർമം ചെയ്യാതിരിക്കാനും അവര്‍ മറ്റു വൈദികരെ തിരുക്കര്‍മങ്ങള്‍ക്ക് നിയോഗിക്കാതിരിക്കാനും പള്ളികളുടെ സുഗമമായ പ്രവര്‍ത്തനത്തിന് യാതൊരു തടസവും സൃഷ്ടിക്കാതിരിക്കാനും നിർദേശിക്കുന്നതായി മേജര്‍ ആര്‍ച്ച്ബിഷപ്പിന്‍റെ വികാരി ആര്‍ച്ച്ബിഷപ് മാര്‍ ജോസഫ് പാംപ്ലാനി.എറണാകുളം റിന്യൂവല്‍ സെന്‍ററില്‍, എറണാകുളം സെന്‍റ് മേരീസ് ബസിലിക്ക അംഗങ്ങളായ കുട്ടികള്‍ക്കും മാതാനഗര്‍ വേളാങ്കണ്ണിമാതാ, പാലാരിവട്ടം സെന്‍റ് മാര്‍ട്ടിന്‍ ഡി പോറസ്, തൃപ്പൂണിത്തുറ സെന്‍റ് മേരീസ് ഫൊറോന എന്നീ പള്ളികളിലെ കുട്ടികള്‍ക്കു നല്‍കപ്പെട്ട പ്രഥമ ദിവ്യകാരുണ്യ കൂദാശ പരികര്‍മത്തില്‍, കാനോനിക നടപടികള്‍ക്ക് വിധേയരായ വൈദികർ പൂർണമായോ ഭാഗികമാ‌യോ പങ്കെടുക്കുകയും അവർ മറ്റു വൈദികരെ നിയോഗിക്കുകയും ചെ‌‌യ്തതായി അറിയാൻ കഴിഞ്ഞു. ഇത് വിശ്വാസിസമൂഹത്തിന് വളരെ വേദനയുളവാക്കി. കാനോനിക നടപടികള്‍ക്ക് വിധേയരായ ഫാ. വര്‍ഗീസ് മണവാളന്‍, ഫാ. ബെന്നി പാലാട്ടി, ഫാ. തോമസ് വാളൂക്കാരന്‍, ഫാ. ജോഷി വേഴപ്പറമ്പില്‍ എന്നിവർ കൂദാശ പരികർമം ചെയ്തത് അപലപനീയമാണെന്നും എറണാകുളം-അങ്കമാലി അതിരൂപത പബ്ലിക് റിലേഷൻസ് ഓഫീസർ ഫാ. ജോഷി പുതുവ പത്രക്കുറിപ്പിൽ അറിയിച്ചു.

കൈതപ്രത്തെ രാധാകൃഷ്ണൻ വധം: കുറ്റപത്രം 90 ദിവസത്തിനകം

തലശേരി: ബിജെപി പ്രാദേശിക നേതാവും ഗുഡ്സ് വാഹന ഡ്രൈവറുമായ പരിയാരം പാണപ്പുഴ കൈതപ്രത്തെ രാധാകൃഷ്ണനെ നാടൻ തോക്കുപയോഗിച്ച് വെടിവച്ച് കൊന്ന കേസിന്‍റെ അന്വേഷണം അവസാനഘട്ടത്തിലേക്ക്. 90 ദിവസത്തിനകം കുറ്റപത്രം സമർപ്പിക്കാനുള്ള ഒരുക്കത്തിലാണ് പരിയാരം പോലീസ്. പ്രതികൾക്കെതിരേ ഇതിനകം നിർണായക തെളിവുകൾ പോലീസ് ശേഖരിച്ചു കഴിഞ്ഞു. കഴിഞ്ഞ മാർച്ച് 22 ന് രാത്രി 7.10 നാണ് രാധാകൃഷ്ണൻ വെടിയേറ്റ് മരിച്ചത്. കേസിലെ പ്രതി സന്തോഷിനെ സംഭവദിവസം തന്നെ പോലീസ് അറസ്റ്റ് ചെയ്തിരുന്നു. തുടർന്നുള്ള ദിവസങ്ങളിൽ രാധാകൃഷ്ണന്‍റെ ഭാര്യ മിനി, സന്തോഷിന് തോക്ക് നൽകിയ തിമിരിയിലെ സജോ ജോസഫ് എന്നിവരും അറസ്റ്റിലായിരുന്നു. മൂന്നു പ്രതികളും ഇപ്പോൾ റിമാൻഡിലാണുള്ളത്. "ഞാൻ പറയുന്നത് കേട്ട് എന്‍റെ പെണ്ണിന്‍റെ നെഞ്ചത്തു കേറിയ നിന്‍റെ അടിയന്തിരം ഞാൻ നടത്തുമെന്ന് ഒന്നാം പ്രതി സന്തോഷ് രാധാകൃഷ്ണന് സന്ദേശം അയച്ചതായി അന്വേഷണ സംഘം കണ്ടെത്തി. രാധാകൃഷ്ണനു നേരേ വെടി വയ്ക്കുന്നതിന് അഞ്ചുമിനിറ്റ് മുമ്പാണ് ഒന്നാം പ്രതി ഈ സന്ദേശം അയച്ചത്. അന്നേ ദിവസം സന്തോഷും മിനിയും ചേർന്നുള്ള 10 ഫോട്ടോകൾ രാധാകൃഷ്ണൻ സന്തോഷിന് അയച്ചിരുന്നു. തുടർന്ന് നീ ഇനിയും തെളിവുണ്ടാക്കെടാ.... എന്‍റെ പെണ്ണാണവൾ എന്ന് സന്തോഷ് മറുപടി നൽകിയതായും പോലീസ് കണ്ടെത്തിയിരുന്നു. സന്തോഷും മിനിയും തമ്മിൽ 3015 തവണ ഫോണിൽ സംസാരിച്ചതിന്‍റെ രേഖകളും കണ്ടെത്തിയിട്ടുണ്ട്. കൊല്ലപ്പെട്ട ദിവസം ഇരുവരും 13 തവണ സംസാരിച്ചു. 1207 സെക്കൻഡ് നില നിന്ന ഫോൺ കോളും കണ്ടെത്തിയിട്ടുണ്ട്. ഇരുവരും തമ്മിൽ മണിക്കൂറുകളോളം വാട്സാപ്പ് കോളിലും സംസാരിച്ചിട്ടുണ്ട്. സംഭവദിവസം വൈകുന്നേരം 6.28 ന് 125 സെക്കൻഡും 6.32 ന് 27 സെക്കൻഡും 6.35 ന് 45 സെക്കൻഡും മിനിയും സന്തോഷും ഫോണിൽ സംസാരിച്ചിരുന്നു. ഇത് കേസിൽ നിർണായക തെളിവായി മാറിയിട്ടുണ്ട്.

എഐഎംഐടിയും ജഡ്സൺ യൂണിവേഴ്സിറ്റിയുമായി ധാരണ

മംഗളൂരു: മംഗളൂരുവിലെ സെന്‍റ് അലോഷ്യസ് ഡീംഡ്-ടു-ബി യൂണിവേഴ്സിറ്റിയോടനുബന്ധിച്ച സെന്‍റ് അലോഷ്യസ് ഇൻസ്റ്റിറ്റ്യൂട്ട് ഓഫ് മാനേജ്മെന്‍റ് ആൻഡ് ഇൻഫർമേഷൻ ടെക്നോളജി (എഐഎംഐടി) യുഎസ്എയിലെ ജഡ്സൺ യൂണിവേഴ്സിറ്റിയുമായി പുതിയ ധാരണാപത്രം ഒപ്പുവച്ചു. ജഡ്സൺ, എയു, കാമ്പസ് യുഎസ്എ എന്നിവയുടെ അന്താരാഷ്ട്ര അക്കാദമിക് സഹകരണം, ഗവേഷണ പങ്കാളിത്തം, വിഭവങ്ങൾ പങ്കിടൽ, ഒരു സെന്‍റർ ഓഫ് എക്സലൻസ് (COE) സ്ഥാപിക്കാനുള്ള സാധ്യത പ്രോത്സാഹിപ്പിക്കുക എന്നതാണ് ഈ ധാരണാപത്രത്തിന്‍റെ ലക്ഷ്യം. എഐഎംഐടി ഡയറക്ടർ റവ. ഡോ. കിരൺ കോത്തും ജഡ്സൺ യൂണിവേഴ്സിറ്റി വൈസ് പ്രസിഡന്‍റ് ഡോ. നിക്കി ഫെന്നറുമാണ് ധാരണാപത്രത്തിൽ ഒപ്പുവച്ചത്. സംയോജിത മാനുഷിക വിദ്യാഭ്യാസത്തിനുള്ള പ്രശസ്തിക്ക് പുറമേ, സെന്‍റ് അലോഷ്യസ് ഡീംഡ്-ടു-ബി യൂണിവേഴ്സിറ്റി അതിന്‍റെ സ്കൂൾ ഓഫ് മാനേജ്മെന്‍റ് ആൻഡ് ഐടിക്ക് കീഴിൽ നൂതനവും സമഗ്രവുമായ പ്രോഗ്രാമുകളാണ് നടത്താൻ ഉദ്ദേശിക്കുന്നതെന്ന് സെന്‍റ് അലോഷ്യസ് യൂണിവേഴ്സിറ്റി അധികൃതർ അറിയിച്ചു.

കല്യാണവീട്ടിലെ ജോലിക്കിടയിൽ ഷോക്കേറ്റ് ഇലക്‌ട്രീഷൻ മരിച്ചു

തലശേരി: കല്യാണവീട്ടിലെ ജോലിക്കിടയിൽ ഷോക്കേറ്റ് ഇലക്‌ട്രീഷൻ മരിച്ചു. കഴിഞ്ഞ ദിവസം രാത്രി ഒമ്പതിന് പാനൂരിനടുത്ത മൊകേരിയിലാണ് സംഭവം. എലാങ്കോട് പാലത്തായി പുഞ്ചവയലിലെ ഗുരിക്കള പറമ്പത്ത് ഉനൈസാണ് (29) മരിച്ചത്. ലൈറ്റിംഗ് സംവിധാനമൊരുക്കുകയായിരുന്ന ഉനൈസ് ഷോക്കേറ്റ് തെറിച്ച് വീഴുകയായിരുന്നു. തലയ്ക്ക് ഗുരുതരമായി പരിക്കേറ്റ ഉനൈസിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പരേതനായ അബ്ദുൾ റഹ്മാൻ - സുലൈഖ ദമ്പതികളുടെ മകനാണ്. റസ്നയാണ് ഭാര്യ. റിഫ ഏക മകളാണ്. സഫ്‌വാൻ സഹോദരനാണ്.

വാഹനാപകടത്തിൽ പരിക്കേറ്റ വിദ്യാർഥി മരിച്ചു

ഇരിട്ടി: ടൂറിസ്റ്റ് ബസും സ്കൂട്ടറും കൂട്ടിയിടിച്ചുണ്ടായ അപകടത്തിൽ പരിക്കേറ്റ് ചികിത്സയിലായിരുന്ന വിദ്യാർഥി മരിച്ചു. വള്ളിത്തോട് സ്വദേശിയും അങ്ങാടിക്കടവ് സേക്രട്ട് ഹാർട്ട് ഹയർസെക്കൻഡറി സ്കൂൾ വിദ്യാർഥിയുമായ കെ. മുഹമ്മദ് സ്വബീഹ് (17) ആണ് മരിച്ചത്. ഏപ്രിൽ 17ന് രാത്രി വള്ളിത്തോടിലായിരുന്നു അപകടം. സ്വബീഹും ബന്ധു റസീമും സഞ്ചരിച്ച സ്കൂട്ടർ ടൂറിസ്റ്റ് ബസുമായി കൂട്ടിയിടിക്കുകയായിരുന്നു. അപകടത്തിൽ രണ്ടുപേർക്കും ഗുരുതരമായി പരിക്കേറ്റ് ചികിത്സയിലായിരുന്നു. കല്ലനാട്ടി ഇബ്രാഹിം-അഫ്സത്ത് ദന്പതികളുടെ മകനാണ്. സഹോദരങ്ങൾ: മുഹമ്മദ് സഹൽ, മുഹമ്മദ് സിമാക്.

ഹോട്ടൽ തൊഴിലാളി കുഴഞ്ഞുവീണു മരിച്ചു

കണ്ണൂർ: ഹോട്ടൽ തൊഴിലാളി കുഴഞ്ഞുവീണു മരിച്ചു. സ്കൈ പാലസ് ഹോട്ടലിലെ ജീവനക്കാരനായ ആലപ്പുഴ മാരാരിക്കുളത്തെ മധുവിന്‍റെ മകൻ പി.എം. മനുവാണ് (31) മരിച്ചത്. കഴിഞ്ഞ ദിവസം രാത്രി എട്ടോടെയാണ് മനു ജോലിക്കിടെ കുഴഞ്ഞുവീണത്. ഉടൻ, ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

കോൺഗ്രസ് കളക്ടറേറ്റ് മാർച്ചിൽ സംഘർഷം; സർക്കാർ വാർഷികത്തിന്‍റെ ബോർഡ് തകർത്തു

കണ്ണൂര്‍: അഴിമതിയിൽ മുങ്ങിക്കുളിച്ച മുഖ്യമന്ത്രി പിണറായി വിജയൻ രാജി വെക്കണമെന്നാവശ്യപ്പെട്ട് കണ്ണൂർ ഡിസിസിയുടെ നേതൃത്വത്തിൽ കളക്ടറേറ്റിലേക്ക് നടത്തിയ മാർച്ചിൽ സംഘർഷം. പോലീസ് ജല പീരങ്കി പ്രയോഗിച്ചു. കളക്ടറേറ്റ് പരിസരത്ത് സ്ഥാപിച്ചിരുന്ന സംസ്ഥാന സർക്കാരിന്‍റെ നാലാം വാർഷികത്തിന്‍റെ പ്രചാരണ ബോർഡുകൾ സമരക്കാർ തകർത്ത് കീറി നശിപ്പിച്ചു. സ്റ്റേഡിയം കോർണറിനെ നെഹ്റു സ്തൂപത്തിനടുത്ത് നിന്നും പ്രകടനമായെത്തിയ പ്രവർത്തകരെ കളക്ടറേറ്റിന് മുന്നിൽ പോലീസ് ബാരിക്കേഡ് നിരത്ത് തടഞ്ഞു. ബാരിക്കേഡ് മറി കടന്ന് അകത്തേക്ക് പ്രവേശിക്കാനുള്ള പ്രവർത്തകരുടെ ശ്രമം പോലീസ് തടഞ്ഞു. ഇതേ തുടർന്ന് പോലീസും പ്രവർത്തകരും ഉന്തും തള്ളുമുണ്ടായി. ഇതിനിടെ ബാരിക്കേഡുകൾ തള്ളിയിടാൻ സമരക്കാർ ശ്രമിച്ചതോടെ പോലീസ് ജലപീരങ്കി പ്രയോഗിക്കുകയായിരുന്നു. ജലപീരങ്കിയിൽ നിന്ന് വെള്ളം ചീറ്റിയതോടെ സമരക്കാർ പലരും റോഡിൽ തെറിച്ചു വീണു. ജലപീരങ്കി പ്രയോഗം നിർത്തിയതോടെ വീണുകിടന്ന പ്രവർത്തകർ ഉൾപ്പടെയുള്ളവർ പോലീസിനു നേരെ ഓടിച്ചെന്ന് തട്ടിക്കയറി. ഇതോടെ വാക്കേറ്റവും കൈയേറ്റവുമുണ്ടായി. സമരക്കാർ വീണ്ടും ബാരിക്കേഡ് മറികടക്കാൻ ശ്രമിച്ചതോടെ നേതാക്കളിടപെട്ട് പിന്തിരിപ്പിക്കുകയായിരുന്നു. ഇതിനിടെയാണ് കളക്ടറേറ്റ് മതിലിന് സമീപം സ്ഥാപിച്ച സർക്കാരിന്‍റെ നാലാം വാർഷികാഘോഷത്തിന്‍റെ പ്രചാരണ ബോർഡ് സമരക്കാർ വലിച്ചു കീറി നശിപ്പിച്ചത്. മാർച്ച് കെപിസിസി വർക്കിംഗ് പ്രസിഡന്‍റ് ടി. സിദ്ദിഖ് എംഎൽഎ ഉദ്ഘാടനം ചെയ്തു. മുഖ്യമന്ത്രി പിണറായി വിജയൻ കേരളത്തിലെ സാധാരണക്കാരുടെ പ്രശ്നങ്ങൾക്ക് പരിഹാരം കാണുന്നതിന് പകരം ഭരണത്തിന്‍റെ മറവിൽ തന്‍റെ കുടുംബത്തിന്‍റെ സാന്പത്തിക ഭദ്രത ഉറപ്പാക്കുകയാണെന്ന് ടി. സിദ്ദിഖ് ആരോപിച്ചു. മുഖ്യമന്ത്രിയുടെ മകൾ വൻ അഴിമതിയാണ് നടത്തിയിരിക്കുന്നത്. വിശ്വസ്തരും അടുപ്പക്കാരും നടത്തുന്ന അഴിമതി മുഖ്യമന്ത്രിയുടെ അറിവോടെയും മൗനാനുവാദത്തോടെയുമാണെന്നും ടി. സിദ്ദിഖ് കുറ്റപ്പെടുത്തി ഡിസിസി പ്രസിഡന്‍റ് മാർട്ടിൻ ജോർജ് അധ്യക്ഷത വഹിച്ചു. സജീവ് ജോസഫ് എംഎൽഎ, പി.ടി. മാത്യു, വി.എ.നാരായണൻ, ചന്ദ്രൻ തില്ലങ്കേരി, രാജീവൻ എളയാവൂർ, ടി.ഒ. മോഹനൻ എന്നിവർ പ്രസംഗിച്ചു. മാർച്ചിന് സജീവ് മാറോളി, കെ. പ്രമോദ്, കെ.പി.സാജു, വി.വി. പുരുഷോത്തമൻ, കെ.വി.ഫിലോമിന, രജിത്ത് നാറാത്ത്, ടി.ജയകൃഷ്ണന്‍, മുഹമ്മദ് ബ്ലാത്തൂര്‍, മുഹമ്മദ് ഷമ്മാസ്, എം.സി.അതുല്‍, എം.കെ. മോഹനന്‍,എം.സി. ശ്രീജ എന്നിവർ നേതൃത്വം നൽകി.

സൂരജിനും ബിൻസിക്കും നാടിന്‍റെ അന്ത്യാഞ്ജലി

മണ്ടളം: കുവൈറ്റ് അബാസിയയിലെ ഫ്ലാറ്റിനുള്ളിൽ മരിച്ച നിലയിൽ കാണപ്പെട്ട മലയാളി നഴ്സ് ദമ്പതികളായ സൂരജിനും ബിൻസിക്കും നാടിന്‍റെ അന്ത്യാഞ്ജലി. ഇന്നലെ പുലർച്ചെ കണ്ണൂർ വിമാനത്താവളത്തിൽ എത്തിച്ച മൃതദേഹങ്ങൾ ഇരുവരുടേയും ബന്ധുക്കൾ ഏറ്റുവാങ്ങി സൂരജിന്‍റെ മണ്ടളത്തെ വസതിയിൽ എത്തിച്ചു. രാവിലെ എട്ടു മുതൽ പൊതുദർശനത്തിനു വച്ച ശേഷം ഉച്ചയോടെ മണ്ടളം സെന്‍റ് ജൂഡ് തീർഥാടന പള്ളിയിൽ ഒരേ കല്ലറയിലാണ് ഇരുവർക്കും അന്ത്യനിദ്രയേകിയത്. എറണാകുളം പുല്ലുവഴിയിൽ നിന്ന് ബിൻസിയുടെ ബന്ധുക്കളും അയൽക്കാരും സംസ്കാര ചടങ്ങുകളിൽ പങ്കെടുത്തു. വീട്ടിലും പള്ളിയിലും സെമിത്തേരിയിലും നടന്ന സംസ്കാര ശുശ്രൂഷകൾക്ക് മണ്ടളം സെന്‍റ് ജൂഡ് പള്ളി വികാരി ഫാ. മാത്യു വേങ്ങക്കുന്നേൽ കാർമികത്വം വഹിച്ചു.

മദ്യലഹരിയിൽ പോലീസ് സ്റ്റേഷനിൽ അതിക്രമം നടത്തിയ യുവാവ് പിടിയിൽ‌

നീലേശ്വരം: മദ്യലഹരിയിൽ പോലീസ് സ്റ്റേഷനിലെത്തി അതിക്രമം നടത്തിയ യുവാവ് പിടിയിൽ. ലോറി ഡ്രൈവറായ ചായ്യോത്ത് മാനൂരിയിലെ കിഴക്കേവീട്ടിൽ സന്തോഷ് (40) ആണ് അറസ്റ്റിലായത്. തിങ്കളാഴ്ച രാത്രി ഏഴരയോടെ പരാതി നല്കാനുണ്ടെന്ന് പറഞ്ഞ് നീലേശ്വരം പോലീസ് സ്റ്റേഷനിലെത്തിയ ഇയാൾ ഓഫീസ് മുറിയിലെ കസേരയും മറ്റും വലിച്ചെറിയുകയും എസ്ഐ അരുൺ മോഹനെയും സിപിഒ നിതീഷിനെയും കൈയേറ്റം ചെയ്യുകയുമായിരുന്നു. പരാതിയുണ്ടെന്നു പറഞ്ഞ് പോലീസ് സ്റ്റേഷനിലെത്തിയ സന്തോഷിനോട് പരാതി എഴുതി നല്കാൻ പിആർഒ ഡ്യൂട്ടിയിലുണ്ടായിരുന്ന എഎസ്ഐ പ്രകാശൻ ആവശ്യപ്പെട്ടിരുന്നു. എന്നാൽ മദ്യലഹരിയിലായിരുന്ന സന്തോഷ് പരാതി എഴുതി നല്കാൻ തയ്യാറാകാതെ അക്രമാസക്തനാവുകയായിരുന്നു. ബഹളം കേട്ട് ഓടിയെത്തിയ എസ്ഐ അരുൺ മോഹന്‍റെ കോളറിൽ പിടിക്കുകയും യൂണിഫോമിലെ നെയിംപ്ലേറ്റ് പിടിച്ചുപറിച്ച് കൈയേറ്റം ചെയ്യുകയും ചെയ്തു. തടയാൻ ചെന്ന സിവിൽ പോലീസ് ഓഫീസർ നിതീഷിനെയും ആക്രമിച്ചു. തുടർന്ന് സ്റ്റേഷനിൽ ഉണ്ടായിരുന്ന മറ്റു പോലീസുകാർ ബലം പ്രയോഗിച്ചാണ് സന്തോഷിനെ കീഴടക്കിയത്. പരിക്കേറ്റ പോലീസുകാർ നീലേശ്വരം താലൂക്ക് ആശുപത്രിയിൽ ചികിത്സ തേടി.

പാര്‍ലമെന്‍റില്‍ പ്രസംഗിക്കാന്‍ കേന്ദ്ര സര്‍വകലാശാല വിദ്യാര്‍ഥിനി

പെരിയ: രവീന്ദ്രനാഥ ടാഗോര്‍ അനുസ്മരണത്തില്‍ പാര്‍ലമെന്‍റില്‍ പ്രസംഗിക്കാന്‍ കേരള കേന്ദ്ര സര്‍വകലാശാല വിദ്യാര്‍ഥിനിയും. ഇക്കണോമിക്സ് വിഭാഗം ബിരുദാനന്തരബിരുദ വിദ്യാര്‍ഥിനി പി.അനുശ്രീയാണ് ടാഗോറിന്‍റെ ജന്മദിനത്തോടനുബന്ധിച്ച് ഒമ്പതിന് പാര്‍ലമെന്‍റിന്‍റെ സെന്‍ട്രല്‍ ഹാളില്‍ നടക്കുന്ന പരിപാടിയില്‍ പ്രസംഗിക്കാൻ തെരഞ്ഞെടുക്കപ്പെട്ടത്. രാജ്യത്താകെ ഉന്നത വിദ്യാഭ്യാസ സ്ഥാപനങ്ങളിലെ 12 പേര്‍ക്കാണ് അവസരം ലഭിച്ചത്. ഇതില്‍ കേരളത്തില്‍നിന്ന് അനുശ്രീ മാത്രമാണുള്ളത്. കര്‍ണാടക, ഝാര്‍ഖണ്ഡ്, മധ്യപ്രദേശ്, മഹാരാഷ്ട്ര, മണിപ്പൂര്‍, മിസോറാം, നാഗാലാന്‍ഡ്, ഡല്‍ഹി, ജമ്മു കാഷ്മീര്‍ എന്നിവിടങ്ങളിലുള്ളവരാണ് മറ്റുള്ളവര്‍. ഓരോരുത്തര്‍ക്കും രണ്ടു മിനിട്ട് വീതമാണ് പ്രസംഗത്തിന് ലഭിക്കുക. വിവിധ മത്സരപരീക്ഷകളിലൂടെയാണ് ഇവര്‍ തെരഞ്ഞെടുക്കപ്പെട്ടത്. കോഴിക്കോട് വടകര സ്വദേശിനിയാണ് അനുശ്രീ. കേന്ദ്ര വിദ്യാഭ്യാസ മന്ത്രാലയത്തിന്‍റെ നേതൃത്വത്തില്‍ പാര്‍ലമെന്‍ററി റിസര്‍ച്ച് ആന്‍ഡ് ട്രെയിനിംഗ് ഇന്‍സ്റ്റിറ്റ്യൂട്ട് ഫോര്‍ ഡെമോക്രസീസ് (പ്രൈഡ്), ലോക്സഭാ സെക്രട്ടേറിയറ്റ് എന്നിവയുമായി സഹകരിച്ച് സംഘടിപ്പിക്കുന്ന നേതാക്കളെ അറിയുക എന്ന പദ്ധതിയുടെ ഭാഗമായാണ് വിദ്യാര്‍ഥികളെ തെരഞ്ഞെടുത്തത്.

സ്ഥലം ഉടമയിൽ നിന്നു കൈക്കൂലി; സ്‌പെഷൽ വില്ലേജ് ഓഫീസർ അറസ്റ്റിൽ

ഇരിട്ടി: സ്ഥലം ഉടമയിൽ നിന്നു15,000 രൂപ കൈക്കൂലി വാങ്ങുന്നതിനിടെ സ്‌പെഷൽ വില്ലേജ് ഓഫീ സറെ വിജിലൻസ് സംഘം അറസ്റ്റ് ചെയ്തു. പായം വില്ലേജിലെ സ്‌പെഷൽ വില്ലേജ് ഓഫീസർ കൊല്ലം കുണ്ടറ സ്വദേശി ബിജു അഗസ്റ്റിനെയാണ് വിജിലൻസ് ഡിവൈഎസ്പി കെ.പി. സുരേഷ് ബാബുവിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. പായം വില്ലേജിലെ ഒരു സ്ഥലം ഉടമയിൽനിന്ന് സ്കെച്ചും പ്ലാനും തയാറാക്കുന്നതിനായി ഓഫീസർ 15000 രൂപ ആവശ്യപ്പെട്ടിരുന്നു. ഈ വിവരം സ്ഥലം ഉടമ വിജിലൻസിനെ അറിയിക്കുകയായിരുന്നു. ഇവർ ആവശ്യപ്പെട്ട പ്രകാരം സ്ഥലം ഉടമ ഇരിട്ടി പയഞ്ചേരി മുക്കിൽ നിന്നും സ്‌പെഷൽ വില്ലേജ് ഓഫീസർക്ക് വിജിലൻസ് ഉദ്യോഗസ്ഥർ നൽകിയ നോട്ടുകൾ കൈമാറി. ഇതിനിടെ മഫ്ടിയിലെത്തിയ വിജിലൻസ് സംഘം വില്ലേജ് ഓഫീസറിൽനിന്നു നോട്ടുകൾ പിടികൂടുകയും പരിശോധനയ്ക്കുശേഷം അറസ്റ്റ് ചെയ്യുകയായിരുന്നു. വിജിലൻസ് സംഘത്തിൽ ഇൻസ്‌പെക്ടർ സി. ഷാജു, എസ്ഐ മാരായ എൻ.കെ. ഗിരീഷ്, എൻ. വിജേഷ്, രാധാകൃഷ്ണൻ, എ എസ്ഐ രാജേഷ് എന്നിവരും ഉണ്ടായിരുന്നു.

കഞ്ചാവുമായി സിനിമ അസി. ഡയറക്ടര്‍ പിടിയില്‍

പയ്യന്നൂര്‍: കഞ്ചാവുമായി സിനിമ അസിസ്റ്റന്‍റ് ഡയറക്ടര്‍ എക്‌സൈസിന്‍റെ പിടിയില്‍. പയ്യന്നൂർ കണ്ടങ്കാളി റെയില്‍വേ ഗേറ്റിന് സമീപം താമസിക്കുന്ന എന്‍. നദീഷ് നാരായണനാണ്(31) എക്‌സൈസിന്‍റെ പിടിയിലായത്. ഇന്നലെ വൈകുന്നേരം ആറോടെ പയ്യന്നൂര്‍ എക്‌സൈസ് ഇന്‍സ്‌പെക്ടര്‍ കെ. ദിനേശന്‍റെ നേതൃത്വത്തില്‍ കണ്ടങ്കാളി റെയില്‍വേ ഗേറ്റിന് സമീപം നടത്തിയ പരിശോധനയിലാണ് ഇയാള്‍ കുടുങ്ങിയത്. ഇയാള്‍ കഞ്ചാവ് കടത്തുന്നതായുള്ള രഹസ്യ വിവരത്തെ തുടര്‍ന്നായിരുന്നു പരിശോധന. ഇയാളില്‍നിന്ന് 115 ഗ്രാം കഞ്ചാവ് പിടികൂടിയ എക്‌സൈസ് സംഘം എന്‍ഡിപിഎസ് വകുപ്പു പ്രകാരം കേസെടുത്തു. ഇയാള്‍ സഞ്ചരിച്ചിരുന്ന ബൈക്കും കസ്റ്റഡിയിലെടുത്തു. അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍മാരായ ടി.വി. കമലാക്ഷന്‍, പ്രിവന്‍റീവ് ഓഫീസര്‍ വി.കെ. വിനോദ്, വി.വി. ഷിജു, എക്‌സൈസ് ഓഫീസര്‍ കെ.ശരത്ത്, കെ.വിനീഷ്, വനിത സിവില്‍ എക്‌സൈസ് ഓഫീസര്‍ ടി.വി. ജൂന എന്നിവരുൾപ്പെട്ട സംഘമാണ് ഇയാളെ പിടികൂടിയത്. കാസര്‍ഗോള്‍ഡുള്‍പ്പെടെ ഒട്ടേറെ ചിത്രങ്ങളില്‍ അസി.ഡയറക്ടറായും അസോസിയേറ്റ് ഡയറക്ടറായും ഇയാള്‍ പ്രവര്‍ത്തിച്ചിട്ടുണ്ട്.

ആനപ്പന്തി ബാങ്കിലെ മുക്കുപണ്ട തട്ടിപ്പ്; മുഖ്യപ്രതി കർണാടകയിൽ പിടിയിൽ

ഇരിട്ടി: ആനപ്പന്തി സർവീസ് സഹകരണ ബാങ്കിന്‍റെ കച്ചേരിക്കടവ് ശാഖയിലെ മുക്കുപണ്ട തട്ടിപ്പ് കേസിലെ മുഖ്യപ്രതി സിപിഎം മുൻ ബ്രാഞ്ച് സെക്രട്ടറി സുധീർ തോമസ് (51) കർണാടകയിൽ പിടിയിൽ. മൈസൂരുവിലെ ഹോട്ടലിൽ വൈയിറ്ററായി ജോലി ചെയ്യുമ്പോഴാണ് ഇയാൾ പിടിയിലാകുന്നത്. ബാങ്കിൽ തട്ടിപ്പു നടത്തിയശേഷം ഇക്കഴിഞ്ഞ രണ്ടിനു രാവിലെയാണ് പ്രതി താക്കോലും ബാഗും മൊബൈലും ബാങ്കിനു മുന്നിൽ വച്ചശേഷം ഒളിവിൽ പോയത്. ബാങ്കിലെ സ്‌ട്രോംഗ് റൂമിൽ സൂക്ഷിച്ചിരുന്ന പണയം വച്ചിരുന്ന 18 പാക്കറ്റ് സ്വർണം മാറ്റി പകരം മുക്കുപണ്ടം വച്ചാണ് ബാങ്കിലെ കാഷ്യറായ പ്രതി തട്ടിപ്പ് നടത്തിയത്. ഇതിന്‍റെ സിസിടിവി ദൃശ്യങ്ങളടക്കം ലഭിച്ചിട്ടുണ്ട്. തട്ടിപ്പിൽ ബാങ്കിന് 60 ലക്ഷം രൂപയുടെ നഷ്‌ടം സംഭവിച്ചിരിക്കുന്നതായാണു സെക്രട്ടറിയുടെ പരാതി. ബാങ്കിൽ സ്വർണം പണയം വച്ചിരുന്ന ഒരാൾ സ്വർണം തിരികെ എടുക്കാൻ എത്തിയതോടെയാണു തട്ടിപ്പ് പുറത്തറിയുന്നത്. പ്രതി ഇടപെട്ട് തൂക്കം നോക്കുന്ന ത്രാസ് പ്രവർത്തിക്കുന്നില്ലെന്നു പറഞ്ഞ് ആദ്യദിവസം സ്വർണം തിരികെ എടുക്കാൻ വന്നയാളെ മടക്കിയിരുന്നു. പിന്നീട് പണയം വച്ച അത്രയും സ്വർണം ഇരിട്ടിയിലെ ഒരു വ്യാപാര സ്ഥാപനത്തിൽ നിന്നും വാങ്ങി ബാങ്കിൽ തിരികെ വച്ചിരുന്നു. ഇതിന്‍റേയും സിസിടിവി ദൃശ്യങ്ങൾ പോലീസിന് ലഭിച്ചു. ഇതോടെ തട്ടിപ്പിൽ പിടിക്കപ്പെടുമെന്ന് ഉറപ്പായതോടെയാണു മുഖ്യപ്രതി പിടികൊടുക്കാതെ മുങ്ങിയത്. രണ്ടിനു രാവിലെ കച്ചേരിക്കടവിൽനിന്നും പുറപ്പെട്ട പ്രതി വള്ളിത്തോട് പാർട്ടി ഓഫീസിനു മുന്നിൽ ഇരുചക്ര വാഹനം ഉപേക്ഷിച്ച ശേഷം ബസ് കയറി മാടത്തിൽ ഭാഗത്തേക്കു പോയി. മാടത്തിൽ ടൗണിൽ ബസ് ഇറങ്ങാതെ കാമറ ഇല്ലാത്ത പള്ളിക്കു സമീപം ബസ് ഇറങ്ങി. ഇവിടെ നിന്നുമാണ് പേരാവൂർ വയനാട് വഴി കർണാടകയിൽ എത്തിയത്. കർണാടകയിലെ മൈസൂരുവിൽ ഹോട്ടൽ ജീവനക്കാരനായി കയറിയ പ്രതിയെക്കുറിച്ച് പോലീസിനു ലഭിച്ച രഹസ്യ വിവരമാണ് ചുരുങ്ങിയ ദിവസത്തിനുള്ളിൽ ഇയാളെ കണ്ടെത്താൻ സഹായിച്ചത്. ഹോട്ടലിൽ മുഴുവൻ സമയം മാസ്ക് വച്ച് ജോലിചെയ്യുന്നത് കണ്ട് സംശയം തോന്നിയ മലയാളിയായ ഹോട്ടൽ ഉടമ കേരളത്തിലെ സുഹൃത്തായ പോലീസ് ഉദ്യോഗസ്ഥനെ വിവരം അറിയിക്കുകയായിരുന്നു. തുടർന്ന് കണ്ണൂരിലെ ബാങ്ക് തട്ടിപ്പുമായി സംശയം തോന്നിയ ഉദ്യോഗസ്ഥൻ ഇരിട്ടി എസ്എച്ചഒ കുട്ടികൃഷ്ണനുമായി ബന്ധപ്പെട്ടു. ഹോട്ടൽ അധികൃതർ നല്കിയ ഫോട്ടോ കണ്ടതോടെയാണ് പ്രതിയെ ഇരിട്ടി പോലീസ് തിരിച്ചറിഞ്ഞത്. പ്രതിക്ക് യാതൊരു സംശയവും തോന്നാത്ത രീതിയിൽ ഇരിട്ടിയിൽ നിന്നെത്തിയ പ്രത്യേക അന്വേഷണ സംഘം ഹോട്ടലിൽ നിന്നു തന്നെ പ്രതിയെ കസ്റ്റഡിയിലെടുക്കുകയായിരുന്നു. ഇരിട്ടി ഡിവൈഎസ്പി ധനഞ്ജയ ബാബുവിന്‍റെ നിർദേശപ്രകാരം ഇരിട്ടി എസ്എച്ച്ഒ കുട്ടിക്കൃഷ്ണന്‍റെ നേതൃത്വത്തിലുള്ള പോലീസ് സംഘമാണ് മൈസൂരുവിൽ എത്തി പ്രതിയെ കസ്റ്റഡിയിൽ എടു ത്തത്. ഇരിട്ടി പോലീസ് സ്റ്റേഷനിലെത്തിച്ച പ്രതിയെ ചോദ്യം ചെയ്തതോടെ ബാങ്കിൽ നടത്തിയ ക്രമക്കേടുകൾ പോലീസിനോട് സമ്മതിച്ചു. തുടർന്ന് അറസ്റ്റ് രേഖപ്പെടുത്തിയ പ്രതിയെ കോടതി യിൽ ഹാജരാക്കി. അന്വേഷണ സംഘത്തിൽ ഇരിട്ടി സ്റ്റേഷൻ എസ്ഐ രാജ് നവാസ്, സീനിയർ സിവിൽ പോലീസ് ഓഫീസർമാരായ അബ്ദുൾ നവാസ്, എ.എം. ഷിജോയ്, ഡിവൈഎസ്പിയുടെ പ്രത്യേക അന്വേഷണ സംഘത്തിലെ അംഗങ്ങൾ എന്നിവർ ഉണ്ടായിരുന്നു. തട്ടിപ്പിന് മുഖ്യപ്രതിയെ സഹായിച്ച പ്രാദേശിക കോൺഗ്രസ് നേതാവ് സുനീഷ് തോമസിനെ നേരത്തെ പോലീസ് അറസ്റ്റ് ചെയ്തിരുന്നു.

കാക്കയങ്ങാട് ബസ്‌സ്റ്റാൻഡിനായി കോടികൾ വിലവരുന്ന സ്ഥലം സൗജന്യമായി നൽകി അഞ്ചു പേർ

ഇരിട്ടി: കാക്കയങ്ങാടിന്‍റെ വികസന കുതിപ്പിന് കരുത്തേകാൻ ബസ്‌സ്റ്റാൻഡ് എന്ന സങ്കൽപം യാഥാർഥ്യത്തോടടുക്കുന്നു. അടയ്ക്കാത്തോടെ ഇട്ടിയവിര ജോസഫ്, കേളകം സ്വദേശി വാളുവെട്ടിക്കൽ ജോർജ്, സൗജത്ത് സുലൈമാൻ, മുസ്‌തഫ പാറപ്പുറത്ത്, അറ്റ്‌ലസ് നാസർ എന്നിവർ തങ്ങളുടെ കൈവശമുള്ള കോടികൾ വിലവരുന്ന സ്ഥലം സൗജന്യമായി പഞ്ചാത്തിന് വിട്ടു നൽകിയതോടെയാണ് ബസ് സ്റ്റാൻഡ് കം ഷോപ്പിംഗ് കോംപ്ലക്സ് എന്ന സ്വപ്നത്തിന്‍റെ ആദ്യ കടന്പ തരണം ചെയ്തത്. കാക്കയങ്ങാട് - പാലപ്പുഴ റോഡിൽ ടൗണിനോട് ചേർന്ന് പഴയ പോലീസ് സ്റ്റേഷന് സമീപം അഞ്ചു പേരുടെ കൈവശമുള്ള 66 സെന്‍റ് സ്ഥലമാണ് പഞ്ചായത്തിന് വിട്ടു നൽകിയത്. സ്ഥലത്തിന് ഏതാണ്ട് മൂന്നു കോടിയോളം രൂപ വിലവരും. കാക്കയങ്ങാട് ടൗണിൽ നടന്ന ചടങ്ങിൽ സ്ഥലമുടമകൾ രേഖകൾ കൈമാറി. ജില്ലാ പഞ്ചായത്ത് പ്രസിഡന്‍റ് ബിനോയ് കുര്യൻ സ്ഥലമുടമകളിൽ നിന്ന് ആധാരങ്ങൾ ഏറ്റുവാങ്ങി. മുഴക്കുന്ന് പഞ്ചായത്ത് പ്രസിഡന്‍റ് ടി.ബിന്ദു അധ്യക്ഷത വഹിച്ചു. വൈസ് പ്രസിഡന്‍റ് വി.വി. വിനോദ്, സ്റ്റാൻഡിംഗ് കമ്മിറ്റി ചെയർപേഴ്സൺമാരായ എ. വനജ, കെ.വി. ബിന്ദു, ചെയർമാൻ സി.കെ. ചന്ദ്രൻ, അംഗങ്ങളായ ധന്യ രാകേഷ്, ജാഫർ നല്ലൂർ, കെ.മോഹനൻ, ടി.വി. സിനി, കെ.വി. റഷീദ്, കാര്യത്ത് വത്സൻ, പഞ്ചായത്ത് സെക്രട്ടറി പി.കെ. വിനോദ്, എ. ഷിബു, വി. രാജു, ഒമ്പാൻ ഹംസ, സി. പ്രദീപൻ, എം. ഹരിദാസ്, ഒമ്പാൻ മുനീർ, ടി.എഫ്. സെബാസ്റ്റ‌്യൻ, കെ.ടി. ടോമി, എൻ.എൻ. ബാലകൃഷ്‌ണൻ, എ.പി. മുഹമ്മദ് എന്നിവർ പ്രസംഗിച്ചു. സ്ഥലപരിമിതികൊണ്ട് വീർപ്പുമുട്ടിയിരുന്ന കാക്കയങ്ങാട് ടൗണിൽ പ്രവർത്തിച്ചിരുന്ന മുഴക്കുന്ന് പോലീസ് സ്റ്റേഷന് പുതിയ കെട്ടിടം അനിവാര്യമായിരുന്നു. ഇതിനായി സ്ഥലം വാങ്ങി നൽകിയത് ടൗണിലെ വ്യാപാരികളായിരുന്നു.

വയോജനങ്ങൾക്ക് ആദരവും ലഹരിക്കെതിരേ സൈക്കിൾ റാലിയും നടത്തി

ഇരിട്ടി: ചീങ്ങാക്കുണ്ടം ലഹരിവിരുദ്ധ സമിതി 18ന് സംഘടിപ്പിക്കുന്ന "ചീങ്ങാക്കുണ്ടം മഹോത്സവത്തിന്‍റെ' ഭാഗമായി വയോജനങ്ങളെ ആദരിക്കുകയും ലഹരിക്കെതിരെ കുട്ടികളുടെ സൈക്കിൾ റാലിയും നടത്തി. ലഹരിക്കെതിരെയുള്ള കൂട്ടായ്മ പ്രദേശത്തെ വീടുകൾ തോറും കയറിയിറങ്ങി പ്രചാരണവും ബോധവത്കരണവും നടത്തിവരികയാണ്. സൈക്കിൾ റാലിയും ആദരവും പായം പഞ്ചായത്ത് വൈസ് പ്രസിഡന്‍റ് എം. വിനോദ്കുമാർ ഉദ്ഘാടനം ചെയ്തു. സമിതി പ്രസിഡന്‍റ് കെ. പ്രദോഷ്കുമാർ അധ്യക്ഷത വഹിച്ചു. ലഹരി വിരുദ്ധ സമിതി സെക്രട്ടറി ജോമോൻ സെബാസ്റ്റ്യൻ, ഷാജി ഒതയോത്ത് എന്നിവർ പ്രസംഗിച്ചു.

ലഹരിവിരുദ്ധ സന്ദേശയാത്രയ്ക്ക് സ്വീകരണം

പയ്യന്നൂർ: 'ചെറുക്കാൻ ഒന്നിച്ചു നിൽക്കാം കളിക്കാം കരുത്തുനേടാം' എന്ന സന്ദേശമുയർത്തി സംഘടിപ്പിച്ച ലഹരി വിരുദ്ധ സന്ദേശയാത്രയ്ക്ക് പയ്യന്നൂരിൽ സ്വീകരണം നൽകി. കളിക്കളങ്ങൾ സജീവമാക്കുക എന്ന മുദ്രാവാക്യവുമായി മന്ത്രി വി. അബ്‌ദുറഹ്‌മാന്‍റെ നേതൃത്വത്തിൽ സംഘടിപ്പിച്ച ലഹരി വിരുദ്ധ സന്ദേശ യാത്രയ്ക്കാണ് പയ്യന്നൂരിൽ സ്വീകരണം നൽകിയത്. മാത്തിൽ മുതൽ പയ്യന്നൂർ പെരുമ്പ വരെ മാരത്തോണും പെരുമ്പ മുതൽ ഷേണായി സ്ക്വയർ വരെ വാക്കത്തോണുമാണ് സംഘടിപ്പിച്ചത്. മാരത്തോൺ ടി.ഐ. മധുസൂദനൻ എംഎൽഎ ഫ്ലാഗ് ഓഫ് ചെയ്തു. തുടർന്ന് പെരുമ്പയിൽ നിന്നാരംഭിച്ച വാക്കത്തോൺ മന്ത്രി വി. അബ്ദുറഹിമാൻ ഫ്ലാഗ് ഓഫ് ചെയ്തു. ഷേണായി സ്ക്വയറിൽ നടന്ന സ്വീകരണ ചടങ്ങിൽ മാരത്തോണിൽ വിജയിച്ചവർക്കുള്ള സമ്മാനദാനം മന്ത്രി നിർവഹിച്ചു. ടി.ഐ. മധുസൂദനൻ എംഎൽഎ അധ്യക്ഷത വഹിച്ചു. നഗരസഭ ചെയർപേഴ്സൺ കെ.വി. ലളിത, വി.കെ. സനോജ്, പനക്കിൽ ബാലകൃഷ്ണൻ, വിവിധ രാഷ്ട്രീയകക്ഷി നേതാക്കൾ, സ്പോർട്സ് താരങ്ങൾ തുടങ്ങിയവർ പങ്കെടുത്തു. പഴയങ്ങാടിയിൽ സ്വീകരണം പഴയങ്ങാടി: ലഹരിവിരുദ്ധ പ്രവർത്തനങ്ങളുടെ ഭാഗമായി കളിക്കളങ്ങൾ സജീവമാക്കുക എന്ന ലക്ഷ്യത്തോടെ കായിക മന്ത്രി വി. അബ്ദുറഹ്മാന്‍റെ നേതൃത്വത്തിലുള്ള ലഹരി വിരുദ്ധ സന്ദേശ യാത്രയ്ക്ക് പഴയങ്ങാടിയിൽ സ്വീകരണം നൽകി.പഴയങ്ങാടി ബസ് സ്റ്റാൻഡ് പരിസരത്ത് മന്ത്രി വി.അബ്ദുറഹ്മാൻ ഉദ്ഘാടനം ചെയ്തു. എം.വിജിൻ എംഎൽഎ അധ്യക്ഷത വഹിച്ചു. വിവിധ പഞ്ചായത്ത് പ്രസിഡന്‍റുമാർ, രാഷ്ട്രീയ സാമൂഹിക രംഗത്തെ പ്രമുഖർ തുടങ്ങിയവർ പ്രസംഗിച്ചു. പഴയങ്ങാടി റെയിൽവേ ഗ്രൗണ്ടിൽ മന്ത്രി സ്പോർട്സ് കിറ്റ് വിതരണവും നടത്തി.

നഴ്സസ് വാരാഘോഷത്തിനു തുടക്കം

കണ്ണൂർ: ആധുനിക നഴ്സിംഗിന്‍റെ ഉപജ്ഞാതാവായ ഫ്ലോറൻസ് നൈറ്റിംഗേലിന്‍റെ 205ാമത് ജൻമദിനാഘോഷത്തോടനുബന്ധിച്ച് നട‌ത്തുന്ന നഴ്സസ് വാരാഘോഷത്തിന് തുടക്കമായി. വാരാഘോഷത്തിന്‍റെ ഭാഗമായി കണ്ണൂർ റെയിൽവേ സ്റ്റേഷനിൽ നിന്നും ജില്ലാ ആശുപത്രിയിലേക്ക് വിളംബര റാലി നടത്തി. കണ്ണൂർ റെയിൽവേ സ്റ്റേഷനിൽ സ്റ്റേഷൻ മാനേജർ സജിത്ത്കുമാർ ഫ്ലാഗ് ഓഫ് ചെയ്തു ജില്ലാ ആശുപത്രിയിൽ ജില്ലാ നഴ്സിംഗ് ഓഫീസർ വി.എസ്. ശ്രീദേവി പതാക ഉയർത്തി. വാരാചരണത്തിന്‍റെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്‍റ് കെ.കെ.രത്നകുമാരി നിർവഹിച്ചു. ഡിഎംഒ ഡോ.എം. പിയൂഷ് നന്പൂതിരിപ്പാട് അധ്യക്ഷത വഹിച്ചു. ജില്ലാ എംസിഎച്ച് ഓഫീസർ ടി.ജി. പ്രീത പ്രതിഞ്ജ ചൊല്ലിക്കൊടുത്തു. ആശുപത്രി സൂപ്രണ്ട് ഡോ.എം.കെ.ഷാജ്, കണ്ണൂർ ഗവ. സ്കൂൾ ഓഫ് നഴ്സിംഗ് കോളജ് പ്രിൻസിപ്പൽ എൻ.ജെ. സോളി, നഴ്സിംഗ് സൂപ്രണ്ടുമാരായ വി.വി.മാലതി, പി.ജെ.ലൂസി, സിന്ധു രാജേഷ്, ജില്ലാ പ്രോഗ്രാം മാനേജർ ഡോ.പി.കെ. അനിൽകുമാർ, വി.എസ്. ശ്രീദേവി, എസ്. ജയശ്രീ, കെ.എൻ.രമണി എന്നിവർ പ്രസംഗിച്ചു. തുടർന്ന് കത്തോസ കോളജ് ഓഫ് നഴ്സിംഗ് വിദ്യാർഥികൾ തുടർന്ന് നഴ്സസ് ഡേ തീം അവതരിപ്പിച്ചു. നഴ്സസ് വാരാഘോഷത്തിന്‍റെ ഭാഗമായി നഴ്സിംഗ് വിദ്യാർഥികൾ ഇന്ന് പിലാത്തറയിലെ പുരധിവാസ കേന്ദ്രമായ ഹോപ്പ് സന്ദർശിച്ച് സേവനം ചെയ്യും. സ്കൂൾ ഓഫ് നഴ്സിംഗിൽ ക്വിസ് മത്സരവും നടത്തും. വിവിധ ദിവസങ്ങളിലായി വിവിധ മത്സരങ്ങൾ സെമിനാർ എന്നിവയും നടക്കും. 12ന് കണ്ണൂർ കൃഷ്ണമേനോൻ വനിതാ കോളജിൽ നടക്കുന്ന സമാപന സമ്മേളനം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. ജില്ലാ കളക്ടർ അരുൺ കെ. വിജയൻ അധ്യക്ഷത വഹിക്കും. സിനിമാ നടൻ സന്തോഷ് കീഴാറ്റൂർ മുഖ്യാതിഥിയായിരിക്കും.

ലഹരി മാഫിയകൾക്കെതിരേ ഒറ്റക്കെട്ടായി പോരാടണം: കെ.കെ. ശൈലജ

കണ്ണൂർ: ജീവിതമാണ് ലഹരി, അതിനെ രാസവസ്തുക്കൾ കൊണ്ട് തകിടം മറിക്കരുതെന്ന് കെ.കെ. ശൈലജ എംഎൽഎ. കായിക വകുപ്പ് സംഘടിപ്പിക്കുന്ന ‘കിക്ക് ഡ്രഗ്സ് സേ യെസ്ടു സ്പോർട്സ്' ലഹരി വിരുദ്ധ സന്ദേശയാത്രയുടെ സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയാ യിരുന്നു അവർ. കേരളത്തെ കാർന്നുതിന്നുന്ന ലഹരി മാഫിയകൾക്കെതിരേ ഒറ്റക്കെട്ടായി പോരാടണം. നമ്മുടെ കേരളം സാമൂഹ്യ-സാംസ്കാരിക രംഗങ്ങളിൽ മുന്നിട്ടുനില്ക്കുന്ന സംസ്ഥാനമാണ്. എന്നാൽ, ഈ മുന്നേറ്റത്തെ പിന്നോട്ട് വലിക്കാൻ ശ്രമിക്കുന്ന ചില ശക്തികൾ ലഹരിയുടെ രൂപത്തിൽ നമ്മുടെ യുവതലമുറയെ ലക്ഷ്യം വയ്ക്കുന്നവെന്നും. ഇത് ഗുരുതരമായ സാമൂഹിക പ്രത്യാഘാതങ്ങൾ സൃഷ്ടിക്കുമെന്നും എംഎൽഎ പറഞ്ഞു. കോർപറേഷൻ മേയർ മുസ്‌ലിഹ് മഠത്തിൽ അധ്യക്ഷത വഹിച്ചു. മന്ത്രി വി. അബ്ദുറഹ്മാൻ, വി. ശിവദാസൻ എംപി, കണ്ണൂർ ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി, ദേശീയ ബോക്സിംഗ് താരവും ധ്യാൻചന്ദ് അവാർഡ് ജേതാവുമായ കെ.സി. ലേഖ, സംസ്ഥാന സ്പോർട്സ് കൗൺസിൽ അംഗങ്ങൾ തുടങ്ങിയവർ പങ്കെടുത്തു.

യൂത്ത് കോൺഗ്രസ് സ്ഥാനാരോഹണവും ലഹരിക്കെതിരേ ദീപം തെളിക്കലും നടത്തി

കാർത്തികപുരം: യൂത്ത് കോൺഗ്രസ് ഉദയഗിരി മണ്ഡലം കമ്മിറ്റി സ്ഥാനാരോഹണവും ലഹരിക്കെതിരേ ദീപം തെളിയിക്കലും നടത്തി. മണ്ഡലം പ്രസിഡന്‍റ് ജോസഫ് നോബിൾ ചുമതല ഏറ്റെടുത്തു, യൂത്ത് കോൺഗ്രസ് കണ്ണൂർ ജില്ലാ പ്രസിഡന്‍റ് വിജിൽ മോഹൻ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് പ്രിൻസ് പി.ജോർജ് അധ്യക്ഷത വഹിച്ചു. നേതാക്കളായ തോമസ് വെക്കത്താനം, ബിജു പുളിയൻതൊട്ടി, ജോഷി കണ്ടത്തിൽ, ജോസ് പറയൻകുഴി, ജോയിച്ചൻ പളളിയാലിൽ എന്നിവർ പ്രസംഗിച്ചു.

നവപുരം ദ്രാവിഡ ഭാഷാ സാഹിത്യ പുരസ്കാരം ഡോ. വൈ.വി. കണ്ണന് സമ്മാനിച്ചു

ചെറുപുഴ: ദ്രാവിഡ ഭാഷകളിലെ ശ്രദ്ധേയരായ എഴുത്തുകാരുടെ സമഗ്രമായ സാഹിത്യ സംഭാവനകൾക്ക് നവപുരം മതാതീത ദേവാലയം ഏർപ്പെടുത്തിയ ദ്രാവിഡ ഭാഷാ സാഹിത്യ പുരസ്കാരം ഡോ. വൈ.വി. കണ്ണന് സമ്മാനിച്ചു. മതാതീതദേവാലയ സ്ഥാപകൻ പ്രാപ്പൊയിൽ നാരായണനാണ് പുരസ്കാര സമർപ്പണം നടത്തി. കേരളത്തിലെ ശ്രദ്ധേയനായ തെയ്യം ഗവേഷകനും ഗ്രന്ഥകാരനുമാണ് ഡോ. വൈ.വി. കണ്ണൻ. ഒൻപതു നാളുകളിലായി നടന്നുവരുന്ന നവപുരം മതാതീത ദേവാലയ മഹോത്സവത്തിന്റെ ഭാഗമായി ചെറുശേരി കലാ മണ്ഡപത്തിൽ സംഘടിപ്പിച്ച പരിപാടിക്ക് അജിത് കൂവോട് അധ്യക്ഷത വഹിച്ചു. കൃഷ്ണൻ നടുവലത്ത്, സാബു മാളിയേക്കൽ, രാധാകൃഷ്ണൻ കാനായി, വി.കെ.റീന, ഇ.ആർ. ശോഭന, ആർച്ച ആഷ, ഷിനോജ് കെ. ആചാരി എന്നിവർ പ്രസംഗിച്ചു. ചടങ്ങിൽ എഴുത്തുകാരായ ഇ.ആർ. ശോഭന, ഷിനോജ് കെ. ആചാരി, ആർച്ച ആഷ, ടി. നിഷാകുമാരി എന്നിവരെ ആദരിച്ചു.

അങ്കണവാടികൾക്ക് കിടക്ക വിതരണം ചെയ്തു

നടുവിൽ: നടുവിൽ പഞ്ചായത്തിലെ അങ്കണവാടി കുട്ടികൾക്കുള്ള കിടക്കകളുടെ വിതരണോദ്ഘാടനം സജീവ് ജോസഫ് എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് ബേബി ഓടംപള്ളിൽ അധ്യക്ഷത വഹിച്ചു. എംഎൽഎയുടെ പ്രത്യേക വികസന നിധിയിൽ ഉൾപ്പെടുത്തി നടുവിൽ പഞ്ചായത്തിലെ 38 അങ്കണവാടികൾക്ക് 88 കിടക്കകളാണ് വിതരണം ചെയ്യുന്നത്. സർക്കാർ അംഗീകൃത ഏജൻസിയായ കയർഫെഡ് പ്രത്യേകം തയാറാക്കി നൽകിയതാണ് കിടക്ക. സി.എച്ച്. സീനത്ത്, ജോഷി കണ്ടത്തിൽ, വി.പി. ഷാജി പാണക്കുഴി, വി.പി. മുഹമ്മദ് കുഞ്ഞി, രേഖ രഞ്ജിത്ത്, ലിസി ജോസഫ്, പി.പി. റെജിമോൻ, ഷിബു മാത്യു, സിഡിപിഒ ലക്ഷ്മിക്കുട്ടി, സൂപ്പർവൈസർ സി. എം. ഷൈന തുടങ്ങിയവർ പങ്കെടുത്തു.

കുടുംബസംഗമവും ലഹരിവിരുദ്ധ റാലിയും നടത്തി

ആലക്കോട്: ബത്തേരി രൂപതയുടെ സാമൂഹ്യ സേവന വിഭാഗമായ ശ്രേയസ് കരുവഞ്ചാൽ യൂണിറ്റിന്‍റെ ആഭിമുഖ്യത്തിൽ വിവിധ സ്വാശ്രയ സംഘങ്ങളുടെ കുടുംബസംഗമവും ഏരിയ വാർഷികവും ലഹരിവിരുദ്ധ സന്ദേശറാലിയും നടത്തി. കരുവഞ്ചാലിൽ നടന്ന റാലിയിൽ സ്ത്രീകൾ ഉൾപ്പെടെ നൂറ് കണക്കിന് പ്രവർത്തകർ പങ്കെടുത്തു. തുടർന്ന് നടന്ന സമ്മേളനം നബാർഡ് കണ്ണൂർ സിഡിഎം ജിഷിമോൻ ഉദ്ഘാടനം ചെയ്‌തു. ശ്രേയസ് യൂണിറ്റ് ഡയറക്‌ടർ എം. വർഗീസ് കടയ്ക്കേത്ത് അധ്യക്ഷത വഹിച്ചു. ഫാ. ജോൺ കയത്തിങ്കൽ, സാജൻ വർഗീസ്, ഫാ.ജോസഫ് ഈനാച്ചേരിൽ, പി.കെ.ബാലകൃഷ്‌ണൻ, സൈനുദീൻ ബാഫഖി, റിന്‍റോ മാത്യു , ശ്യാമള മോഹനൻ, സിജി റോയ് എന്നിവർ പ്രസംഗിച്ചു.

ഉത്തരമേഖലാ കൈകൊട്ടിക്കളി മത്സരം: റെഡ് സ്റ്റാർ ചെറുവത്തൂർ ജേതാക്കൾ

പെരുമ്പടവ്: തലവിൽ ദേശീയ വായനശാല ആൻഡ് ഗ്രന്ഥാലയത്തിന്‍റെ നേതൃത്വത്തിൽ തലവിൽ ഇഎംഎസ് ഗ്രാണ്ടിൽ നടന്ന ഉത്തര മേഖലാ കൈകൊട്ടിക്കളി മൽസരത്തിൽ റെഡ് സ്റ്റാർ ചെറുവത്തൂരിന് ഒന്നാം സ്ഥാനം. ശ്രീ പാർവതി തൃക്കരിപ്പൂർ രണ്ടാം സ്ഥാനം നേടി, താൽദർപ്പണ കുണിയൻ, കാശിനാഥ സ്കൂൾ ഓഫ് ആർട്സ് എന്നിവ മൂന്നാം സ്ഥാനവും നേടി. വിജയികൾക്ക് ബ്ലോക്ക് പഞ്ചയത്ത് വൈസ് പ്രസിഡന്‍റ് പി. പ്രേമലത സമ്മാനദാനം നടത്തി. പഞ്ചായത്ത് അംഗം എം. പി. ജ്യോതിലക്ഷ്മി അധ്യക്ഷത വഹിച്ചു. എം.പി.ഗോപി, വി.ഉണ്ണികൃഷ്ണൻ , അനില അഭിരാജ്, വി.കെ.അനിൽ , ടി.വി. വിനീത് എന്നിവർ പ്രസംഗിച്ചു

വിളിക്കാം 1962 ലേക്ക്; മൃഗചികിത്സാ സേവനം വീട്ടുപടിക്കൽ ലഭിക്കും

കണ്ണൂർ: രാത്രികാലങ്ങളിൽ വളർത്തു മൃഗങ്ങൾക്കുണ്ടാകുന്ന അസുഖങ്ങൾ ഉൾപ്പെടെയുള്ളവയ്ക്ക് ചികിത്സ ലഭ്യമാക്കാൻ ഇനി ഒറ്റ ഫോൺ കോൾ മതിയാകും. 1962 എന്ന നന്പറിലേക്ക് വിളിച്ചാൽ ചികിത്സാ സേവനം വീട്ടുപടിക്കലിലെത്തുന്ന സംവിധാനം കണ്ണൂർ ജില്ലയിൽ ആരംഭിച്ചു. രാത്രികാല ചികിത്സാ സേവനത്തിനായി ജില്ലയിൽ പുതുതായി മൂന്ന് മൊബൈൽ വെറ്ററിനറി യൂണിറ്റുകളാണ് പ്രവർത്തനമാരംഭിച്ചത്. റീ ബിൽഡ് കേരള പദ്ധതിയിൽ ഉൾപ്പടുത്തി സംസ്ഥാനത്ത് നടപ്പാക്കുന്ന വീട്ടുപടിക്കൽ ചികിത്സയുടെ ഭാഗമായാണ് കണ്ണൂരിലും മൊബൈൽ വെറ്ററിനറി യൂണിറ്റുകൾ അനുവദിച്ചത്. സംസ്ഥാനത്ത് അനുവദിച്ച 47 മൊബൈൽ വെറ്ററിനറി ക്ലിനിക്കുകളിൽ മൂന്നെണ്ണമാണ് ഇപ്പോൾ കണ്ണൂരിൽ ലഭ്യമാക്കിയത്. തലശേരി, തളിപ്പറന്പ്, കൂത്തുപറന്പ് ബ്ലോക്കുകളിലാണ് ഇവയെടു സേവനം ലഭ്യമാക്കുക. മൊബൈൽ ക്ലിനിക്കുകൾക്കുള്ള മൂന്ന് വാഗണർ വാഹനങ്ങൾ കണ്ണൂർ ജില്ലാ മൃഗസംരക്ഷണ ഓഫീസർ ഡോ. ഒ.എം. അജിത തളിപ്പറന്പ്, കൂത്തുപറന്പ് സീനിയർ വെറ്ററിനറി സർജൻമാർ, പിണറായി വെറ്ററിനറി സർജൻ എന്നിവർക്ക് കൈമാറി. ബ്ലോക്ക് പഞ്ചായത്തുകളുടെ സഹകരണത്തോയാണ് മൊബൈൽ ക്ലിനിക്കുകൾ പ്രവർത്തിക്കുക. വൈകുന്നേരം ആറു മുതൽ പുലർച്ച അഞ്ചുവരെയാണ് മൊബൈൽ ക്ലിനിക്കുകളുടെ സേവനം. ഒരു വെറ്ററിനറി ഡോക്ടർ,ഡ്രൈവർ കം അറ്റൻഡന്‍റ് എന്നിവരാണ് ഓരോ യൂണിറ്റിലുമുണ്ടാകുക. 1962ലേക്ക് വിളിച്ചാൽ ഫോൺ ചെയ്ത സ്ഥലത്തിന് ഏറ്റവും അടുത്തുള്ള യൂണിറ്റ് സ്ഥലത്തെത്തി ചികിത്സ നൽകും. കന്നുകാലികൾക്ക് 450 രൂപയും നായ, പൂച്ച ഉൾപ്പടെയുള്ളവയ്ക്ക് 900 രൂപയുമാണ് ഫീസ്. രണ്ടു വർഷം മുന്പ് ലൈവ് സ്റ്റോക്ക് ഹെൽത്ത് ആൻഡ് ഡിസീസ് കൺട്രോൾ പ്രോഗ്രാമിന്‍റെ ഭാഗമായി ഇരിട്ടി, പയ്യന്നൂർ ബ്ലോക്കുകളിൽ നേരത്തെ വാഹനങ്ങൾ അനുവദിച്ചിരുന്നു. ഇതിന്‍റെ പ്രയോജനം ക്ഷീര കർഷകർ ഉൾപ്പടെയുള്ളവർക്ക് ഏറെ ഗുണകരമാണെന്ന് കണ്ടെത്തിയ സാഹചര്യത്തിലാണ് കൂടുതൽ മൊബൈൽ യൂണിറ്റുൾ ആരംഭിച്ചതെന്ന് ജില്ലാ മൃഗസംരക്ഷണ ഓഫീസർ ഡോ. ഒ.എം. അജിത പറഞ്ഞു. നിലവിൽ ജില്ലയിലെ അഞ്ച് യൂണിറ്റുകളുടെ പ്രയോജനം ജില്ലയ്ക്ക് മുഴുവൻ ഗുണകരമാകും. മൊബൈൽ യൂണിറ്റുകളുടെ സേവനം കൂടാതെ ജില്ലാ മൃഗാശുപത്രിയിലെ മൊബൈൽ ടെലി വെറ്ററിനറി യൂണിറ്റിന്‍റെ സേവനവും ജില്ലയിൽ ലഭ്യമാണ്. ജില്ലാ മൃഗാശുപത്രി കോന്പൗണ്ടിൽ നടന്ന വാഹനം കൈമാറൽ ചടങ്ങിൽ ചീഫ് വെറ്ററിനറി ഓഫീസർ ഡോ. പി.കെ. പത്മരാജ്, ഡെപ്യൂട്ടി ഡയറക്ടർ ഡോ. അനിൽകുമാർ, പ്രോജക്ട് ഓഫീസർ കെ.വി. സന്തോഷ് എന്നിവർ പങ്കെടുത്തു.

സോളാർ പാനൽ തലയിൽവീണ് ചികിത്സയിലായിരുന്ന വിദ്യാർഥി മരിച്ചു

പഴയങ്ങാടി: സോളാർ പാനൽലൈറ്റ് തലയിൽ വീണ് ചികിത്സയിലായിരുന്ന ബൈക്ക് യാത്രികനായ വിദ്യാർഥി മരിച്ചു. ചെറുകുന്ന് കീഴറ സ്വദേശിയും മോറാഴ ആംസ്റ്റക്ക് കോളജ് ബിരുദ വിദ്യാർഥിയുമായ ആദിത്യനാണ് (19) മരിച്ചത്. കഴിഞ്ഞ മാസം 27ന് കീഴറ വള്ളുവൻകടവിന് സമീപമായിരുന്നു അപകടം. ബൈക്കിൽ സഞ്ചരിക്കുന്നതിനിടെ റോഡരികിലെ സോളാർ പാനൽ ദേഹത്തുവീണ് ഗുരുതരമായി പരിക്കേൽക്കുകയായിരുന്നു. തുരുമ്പെടുത്ത സോളാർ ലൈറ്റിന്‍റെ തൂണ് ഉൾപ്പെടെ പൊട്ടി ദേഹത്ത് വീഴുകയായിരുന്നു. അപകടത്തിൽ പരിക്കേറ്റ ആദിത്യനെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും പരിക്ക് ഗുരുതരമായതിനാൽ മംഗളൂരുവിലെ ആശുപത്രിയിലേക്ക് മാറ്റുകയായിരുന്നു. ഇവിടെ ചികിത്സയിൽ കഴിയുന്നതിനിടെ കഴിഞ്ഞദിവസം രാത്രിയായിരുന്നു മരണം. അധികൃതരുടെ അനാസ്ഥയാണ് അപകടത്തിന് കാരണമെന്ന ആക്ഷേപവുമുണ്ട്. കീഴറയിലെ രാധാകൃഷ്ണൻ- ഷൈജ ദന്പതികളുടെ മകനാണ് മരിച്ച ആദിത്യൻ. സഹോദരൻ: ആഷിദ്.

കാണാതായ യുവാവ് പുഴയിൽ മരിച്ച നിലയിൽ

ഇരിട്ടി: കാണാതായ യുവാവിനെ പുഴയിൽ മരിച്ച നിലയിൽ കണ്ടെത്തി. ചീങ്ങാകുണ്ടം സ്വദേശി പി.ഡി. സിജുവിനെ (38) യാണ് ഇരിട്ടി പുഴയുടെ പാട്ടാരം ഭാഗത്ത് മരിച്ച നിലയിൽ കണ്ടെത്തിയത്. തിങ്കളാഴ്ച രാവിലെയാണ് സിജുവിനെ കാണാതായത്. നാട്ടുകാരും ബന്ധുക്കളും ചേർന്ന് നടത്തിയ തെരച്ചിലിൽ ഇന്നലെ രാവിലെ പുഴയിൽ മൃതദേഹം കണ്ടെത്തുകയായിരുന്നു. ചീങ്ങാകുണ്ടത്തെ പണ്ടാരവളപ്പിൽ ദാസൻ- ദേവി ദമ്പതികളുടെ മകനാണ്. സഹോദരങ്ങൾ: മധു, സിന്ധു, സിനി.

റോഡ് ഉദ്ഘാടനം ചെയ്തു

ഉളിയിൽ: ഇരിട്ടി നഗരസഭ അയ്യങ്കാളി തൊഴിലുറപ്പ് പദ്ധതിയിലുൾപ്പെടുത്തി കോൺക്രീറ്റ് ചെയ്ത് നിർമിച്ച കല്ലേരിക്കൽ വി.പി. റോഡ് നഗരസഭാ ചെയർപേഴ്സൺ കെ. ശ്രീലത ഉദ്ഘാടനം ചെയ്തു. നഗരസഭാ കൗൺസിലർ യു.കെ. ഫാത്തിമ അധ്യക്ഷത വഹിച്ചു. നഗരസഭാ കൗൺസിലർ പി. ഫൈസൽ, എം.വി. ആബിദ്, യു.കെ. യൂസഫ്, എം.കെ. യൂനസ്, എം. സത്താർ എന്നിവർ പ്രസംഗിച്ചു.

റിക്രിയേഷൻ ക്ലബ് ഫോർ ദി ഡംപ് ഉദ്ഘടനം

ഇരിട്ടി: ഇരിട്ടി താലൂക്ക് റിക്രിയേഷൻ ക്ലബ് ഫോർ ദി ഡമ്പിന് തുടക്കമായി. ഇരിട്ടി എസ്ഐ കെ. ഷറഫുദീൻ ഉദ്ഘാടനം ചെയ്തു. ഇരിട്ടി താലൂക്കിൽപ്പെടുന്ന സംസാരശേഷിയില്ലാത്ത 60 ഓളം വരുന്ന അംഗങ്ങൾക്ക് ഒത്തുകൂടാൻ ഒരിടമായാണ് ക്ലബ് രൂപീകരിച്ചത്. പയഞ്ചേരി മുക്കിലാണ് ക്ലബ് തുടങ്ങിയത്. വി.ജി. സുനിൽ അധ്യക്ഷത വഹിച്ചു. ഇരിട്ടി എസ്ഐ ജയശീലൻ, പ്രസിഡന്‍റ് ജയിംസ്, ജനറൽ സെക്രട്ടറി ടി.വി. സതീശൻ, ജില്ലാ പ്രസിഡന്‍റ് ദേവരാജൻ, എ.ജെ. ജെസി എന്നിവർ പ്രസംഗിച്ചു.

കാർ മരത്തിലിടിച്ച് അപകടം

മട്ടന്നൂർ: കാരയിൽ കാർ നിയന്ത്രണം വിട്ടു മരത്തിലിടിച്ച് അപകടം. മട്ടന്നൂർ - അഞ്ചരക്കണ്ടി റോഡിൽ കാര കള്ള് ഷാപ്പിന് സമീപത്തെ വളവിലായിരുന്നു അപകടം. അഞ്ചരക്കണ്ടി ഭാഗത്ത് നിന്ന് മട്ടന്നൂരിലേക്ക് വരികയായിരുന്ന കാറാണ് നിയന്ത്രണം വിട്ടു റോഡരികിലെ മരത്തിലിടിച്ചത്. അപകടത്തിൽ കാറിന്‍റെ മുൻ ഭാഗം തകർന്നു.

ആറളം ഫാമിലെ കാർഷിക നഴ്സറിയിൽ തൊഴിലാളികൾക്ക് പരിശീലനം ആരംഭിച്ചു

ഇരിട്ടി: ആറളം ഫാമിൽ കാർഷിക നഴ്സറിയിൽ നിന്ന് ഗുണമേന്മയുള്ള തൈകൾ ഉത്പാദിപ്പിച്ച് വിതരണം ചെയ്യുന്നതിനായി തൊഴിലാളികൾക്ക് പരിശീലന പരിപാടി ആരംഭിച്ചു. ഫാം ഓഫീസിൽ നടന്ന ചടങ്ങിൽ ആറളം പഞ്ചയത്ത് പ്രസിഡന്‍റ് കെ.പി. രാജേഷ് പരിശീലന പരിപാടി ഉദ്ഘാടനം ചെയ്തു. ആറളം ഫാം അഡ്മിനിസ്ട്രേറ്റീവ് ഓഫീസർ ഡോ. കെ.പി. നിതീഷ് കുമാർ, ഫാം സൂപ്രണ്ട് എം.എസ്. പ്രണവ്, മാലൂർ എക്കോ ഫാമിലെ ജീവനക്കാർ എന്നിവർ പരിപാടിയിൽ പങ്കെടുത്തു. ആറളം ഫാമിന്‍റെ വൈവിധ്യവത്കരണത്തിന്‍റെ ഭാഗമായാണ് ആർഎആർഎസ് പട്ടാമ്പിയിലെ സ്കിൽ അസിസ്റ്റന്‍റ് ബിജുവിന്‍റെ നേതൃത്വത്തിൽ മാലൂർ ഇക്കോ ഫാമിന്‍റെ സഹായത്തോടു കൂടി പദ്ധതി നടക്കുന്നത്. ഫാമിലെ 25 തൊഴിലാളികൾക്കാണ് പരിശീലനം നടത്തുന്നത്. ആറളം ഫാം വൈവിധ്യ വത്കരണത്തിന്‍റെ ഭാഗമായി നിർമിച്ച എക്സോട്ടിക്ക് ഫ്രൂട്സ് പ്ലാന്‍റുകളുടെ മാതൃവൃക്ഷത്തോട്ടത്തിൽ നിന്ന് തൈകൾ ഉത്പാദിപ്പിക്കുകയാണ് പദ്ധതിയുടെ ലക്ഷ്യം.

ജില്ലാതല കുട്ടി ഗവേഷക സംഗമം തുടങ്ങി

കണ്ണൂർ: സംസ്ഥാന പൊതുവിദ്യാഭ്യാസ വകുപ്പ് സമഗ്രശിക്ഷാ കേരളം കണ്ണൂര്‍, കൊച്ചി ശാസ്ത്ര സാങ്കേതിക സര്‍വകലാശാല എന്നിവയുടെ ആഭിമുഖ്യത്തില്‍ രണ്ട് ദിവസങ്ങളിലായി നടക്കുന്ന സ്ട്രീം അക്കാദമിക് പ്രോജക്ടുകളുടെ ജില്ലാതല അവതരണം മാങ്ങാട്ടുപറമ്പ് കണ്ണൂര്‍ സര്‍വകലാശാല കാമ്പസില്‍ കുസാറ്റ് ഡയറക്ടര്‍ ഡോ. എ.യു. അരുണ്‍ ഉദ്ഘാടനം ചെയ്തു. ജില്ലയിലെ വിവിധ ഉപജില്ലകളില്‍ നിന്ന് തെരഞ്ഞെടുക്കപ്പെട്ട 45 വിദ്യാര്‍ഥികളാണ് അവതരണത്തിന്‍റെ ഭാഗമാകുന്നത്. ലോകത്ത് ഏറെ ചര്‍ച്ച ചെയ്യുന്ന സ്റ്റെം പഠനത്തിന്‍റെ രീതിശാസ്ത്രം അനുസരിച്ചാണ് പ്രോജക്ട് റിപ്പോര്‍ട്ടുകള്‍ തയാറാക്കിയത്. കുട്ടികള്‍ക്ക് ഗവേഷണത്തില്‍ ഉള്‍പ്പെടെ ദിശാബോധം നല്കുന്നതിന് വിവിധ ഘട്ടങ്ങളില്‍ കൊച്ചി ശാസ്ത്ര സാങ്കേതിക സര്‍വകലാശാലയുടെ ശാസ്ത്ര സാമൂഹിക പഠനകേന്ദ്രത്തില്‍ പല ഘട്ടങ്ങളായി അധ്യാപകരുടെ നേതൃത്വത്തില്‍ ശില്‍പശാലകള്‍ നടത്തിയാണ് സ്ട്രീം തനത് പ്രോജക്ടിന്‍റെ രീതിശാസ്ത്രം വികസിപ്പിച്ചത്. ഓരോ ഉപജില്ലയില്‍ നിന്ന് മൂന്ന് പ്രോജക്ടുകളാണുള്ളത്. വിവിധ വിദ്യാലയങ്ങളിലെ 30 കുട്ടികള്‍, അധ്യാപകരായ ഗൈഡുകള്‍ എന്നിവര്‍ അടങ്ങിയ സംഘമാണ് പ്രോജക്ട്പ്രവര്‍ത്തനങ്ങള്‍ക്ക് നേതൃത്വം നല്‍കിയത്. സര്‍വകലാശാലകള്‍, ദേശീയ ഇന്‍സ്റ്റിറ്റ്യൂട്ടുകള്‍, കോളജ് റിസര്‍ച്ച് സെന്‍ററുകള്‍, വിവിധ സര്‍ക്കാര്‍ വകുപ്പുകള്‍ എന്നിവയുമായി ചേര്‍ന്നുകൊണ്ടാണ് പ്രോജക്ട് പ്രവര്‍ത്തനങ്ങള്‍ നടത്തിയത്. ഗവേഷണത്തിന്‍റെ ഭാഗമായുള്ള പഠനയാത്രകള്‍ ഉള്‍പ്പെടെ അധ്യാപകരും കുട്ടികളും ചേര്‍ന്ന് സംഘടിപ്പിച്ചിരുന്നു. ജില്ലാപഞ്ചായത്തംഗം സി.പി. ഷിജു അധ്യക്ഷനായിരുന്നു. സമഗ്ര ശിക്ഷാ സംസ്ഥാന പ്രോഗ്രാം കോ ഓര്‍ഡിനേറ്റര്‍ ഡോ. ബി. ഷാജി, ജില്ലാ പ്രോഗ്രാം ഓഫീസര്‍ ഡോ. പി.കെ. സബിത്ത്, കുസാറ്റ് ഡയറക്ടര്‍ പി. ഷൈജു, ഡോ. ആര്‍.കെ. സുനില്‍, പ്രഫ. ശ്രീകാന്ത്, ഡോ. സ്വരണ്‍ എന്നിവര്‍ പ്രസംഗിച്ചു.

അസംബ്ലി പന്തൽ ഉദ്ഘാടനം

ഇരിട്ടി: 12 ലക്ഷം രൂപ ചെലവഴിച്ച് പിതാവിന്‍റെ സ്മരണയ്ക്കും വിളക്കോട് ഗവ.യുപി സ്കൂളിൽ നൂറാം വാർഷിക ഉപഹാരമായും മക്കൾ തയാറാക്കിയ മായൻ ഹാജി സ്മാരക അസംബ്ലി പന്തലിന്‍റെ ഉദ്ഘാടനം വി. ശിവദാസൻ എംപി നിർവഹിച്ചു. പഞ്ചായത്ത് പ്രസിഡന്‍റ് ടി. ബിന്ദു അധ്യക്ഷത വഹിച്ചു. സണ്ണി ജോസഫ് എംഎൽഎ, പഞ്ചായത്ത് വൈസ് പ്രസിഡന്‍റ് വി.വി. വിനോദ്, ടി.പി. മുഹമ്മദ്, ഗ്രാമപഞ്ചായത്ത് അംഗങ്ങളായ കെ.വി. ബിന്ദു, സി.കെ.ചന്ദ്രൻ, ബി. മിനി, ഷഫീന മുഹമ്മദ്, പിടിഎ പ്രസിഡന്‍റെ സി. ഹുസയിൻ, സി.കെ.റസാഖ്, എം.പി.അബ്ദുൽ മജീദ്, പ്രധാന അധ്യാപകൻ എം.പി.സിറാജുദ്ദീൻ, കെ.സി. മുനീർ എന്നിവർ പ്രസംഗിച്ചു.

കണ്ണൂർ റെയിൽവേ സ്റ്റേഷൻ പരിസരത്ത് മയക്കു മരുന്ന് വേട്ട; രണ്ട് യുവാക്കൾ അറസ്റ്റിൽ

കണ്ണൂർ: റെയിൽവേ സ്റ്റേഷൻ ഭാഗങ്ങളിൽ എക്സൈസ് നടത്തിയ പരിശോധനയിൽ അതിമാരക മയക്കു മരുന്നുമായി രണ്ടു യുവാക്കൾ അറസ്റ്റിൽ. കൊളച്ചേരി മെച്ചാൽ വീട്ടിൽ കെ.പി. സജ്ഫീർ (40), തലശേരി ശാന്തി മൻസിലിൽ എ. റിയാസ് (46) എന്നിവരേയാണ് കണ്ണൂർ സർക്കിൾ ഓഫീസിലെ സർക്കിൾ ഇൻസ്‌പെക്ടർ അരുൺ അശോകിന്‍റ നേതൃത്വത്തിൽ പിടികൂടിയത്. ഇവരിൽ നിന്ന് 6.28 ഗ്രാം മെത്തഫിറ്റാമിൻ ആണ് പിടികൂടിയത്. കണ്ണൂർ എക്‌സൈസ് എൻഫോഴ്സ്മെന്‍റ് ആൻഡ് ആന്‍റി നാർകോട്ടിക് സ്പെഷൽ സ്‌ക്വാഡ് ഓഫീസി ലെ പ്രിവൻറ്റീവ് ഓഫീസർ (ഗ്രേഡ് ) പി.പി. സുഹൈലിന് ലഭിച്ച രഹസ്യ വിവരത്തിന്‍റെ അടിസ്ഥാന ത്തിലായിരുന്നു പരിശോധന. പിടികൂടിയ സംഘത്തിൽ അസിസ്റ്റന്‍റ് ഇസ്പെക്ടർമാരായ സന്തോഷ്‌ തൂനോളി, പി.കെ. അനിൽകുമാർ, ആർ.പി. അബ്ദുൾ നാസർ, നിസാർ കൂലോത്ത്, ബി. നസീർ, എം.കെ. സന്തോഷ്‌, പ്രിവന്‍റീവ് ഓഫീസർ ഗ്രേഡുമാരായ പി.പി. സുഹൈൽ, പി. ജലീഷ്, എൻ രജത് കുമാർ തുടങ്ങിയവരാണ് എക്സൈസ് സംഘത്തിൽ ഉണ്ടായിരുന്നത്.

ഏറ്റുപാറ സെന്‍റ് അൽഫോൻസ പള്ളിയിൽ തിരുനാൾ തുടങ്ങി

പയ്യാവൂർ: ഏറ്റുപാറ സെന്‍റ് അൽഫോൻസ തീർഥാടന പള്ളിയിൽ വിശുദ്ധ അൽഫോൻസ, പരിശുദ്ധ കന്യകാമറിയം, വിശുദ്ധ സെബസ്റ്റ്യാനോസ് എന്നിവരുടെ സംയുക്ത തിരുനാളിന് തുടക്കമായി. വിശുദ്ധ ഗീവർഗീസ് സഹദായുടെ കപ്പേളയിൽ ജപമാലയ്ക്ക് ശേഷം വിശുദ്ധ കുർബാന, ലദീഞ്ഞ് എന്നിവക്ക് ഫാ. ജെറിൻ പന്തല്ലൂപ്പറമ്പിൽ കാർമികത്വം വഹിച്ചു. ഇന്ന് വൈകുന്നരം 4.15ന് ജപമാല പ്രാർഥനയെ തുടർന്ന് വികാരി ഫാ. ജോസഫ് ചെരിയംകുന്നേൽ കൊടിയേറ്റും. തിരുസ്വരൂപ പ്രതിഷ്ഠയും നിർവഹിക്കും. അഞ്ചിന് ആഘോഷമായ വിശുദ്ധ കുർബാന, വചനസന്ദേശം എന്നിവക്ക് ഫാ. അഖിൽ മുക്കുഴി നേതൃത്വം നൽകും. സെമിത്തേരി സന്ദർശനം ഒപ്പീസ് എന്നിവക്ക് ശേഷം സൺഡേ സ്കൂളും ഭക്തസംഘടനകളും ഒരുക്കുന്ന കലാസന്ധ്യ അരങ്ങേറും. നാളെ വൈകുന്നേരം നാലിന് വാദ്യമേളങ്ങൾ, 4.30 ന് ജപമാല, അഞ്ചിന് ഫാ. ഗിഫ്റ്റിൻ മണ്ണൂരിന്‍റെ കാർമികത്വത്തിൽ വിശുദ്ധ കുർബാന, ലദീഞ്ഞ് എന്നിവ നടക്കും. ദീപിക കണ്ണൂർ യൂണിറ്റ് റസിഡന്‍റ് മാനേജർ ഫാ. ജോബിൻ വലിയപറമ്പിൽ വചനസന്ദേശം നൽകും. 6.30 ന് ഏറ്റുപാറ സെന്‍റ് ജോസഫ്സ് കപ്പേളയിലേക്ക് ആഘോഷമായ വിശ്വാസ പ്രഘോഷണ റാലി. രാത്രി ഒന്പതിന് ഫ്യൂഷൻ വാദ്യമേളം. സമാപന ദിനമായ എട്ടിന് വൈകുന്നേരം നാലിന് ജപമാല, 4.30 ന് ഫാ.വർഗീസ് കളപ്പുരയ്ക്കലിന്‍റെ കാർമികത്വത്തിൻ വിശുദ്ധ കുർബാന, വചന സന്ദേശം, ലദീഞ്ഞ്, ആറിന് ഏറ്റുപാറ ടൗണിലേക്ക് തിരുനാൾ പ്രദക്ഷിണം, രാത്രി 7.30 ന് സമാപനാശീർവാദം. രാത്രി എട്ടിന് ഗാനമേളയും ഉണ്ടായിരിക്കും.

മയക്കുമരുന്നുമായി യുവാവ് അറസ്റ്റിൽ

പാപ്പിനിശേരി: ഉറക്കഗുളികകൾ, വേദന സംഹാരികൾ എന്നിവ ലഹരിക്കായി ദുരുപയോഗം ചെയ്ത് വിൽക്കുന്ന യുവാവിനെ എക്സൈസ് സംഘം അറസ്റ്റ് ചെയ്തു. പുതിയങ്ങാടി ഷാദുലി പള്ളിക്ക് സമീപത്തെ പി.ഫിറാഷിനെ (33)യാണ് എക്സൈസ് ഇൻസ്പെക്ടർ പി. സന്തോഷ് കുമാറിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. പഴയങ്ങാടി റെയിൽവേ സ്റ്റേഷൻ പരിസരത്ത് വച്ചാണ് ഇയാളെ അറസ്റ്റ് ചെയ്തത്. ഉറക്കഗുളികയായ നിട്രോസൺ-10, വേദനാ സംഹാരിയായ ട്രമോഡോൾ -99 എന്നിവയുടെ ശേഖരവുമായാണ് ഇയാളെ പാപ്പിനിശേരി എക്സൈസ് സംഘം അറസ്റ്റ് ചെയ്തത്. ഡോക്ടർമാരുടെ കുറിപ്പടിയോടെ മാത്രം മെഡിക്കൽ ഷോപ്പുകളിൽ നിന്ന് ലഭിക്കുന്ന ഗുളികകളാണിവ. ഡോക്ടർമാരുടെ കുറിപ്പടി കൃത്രിമമായി ഉണ്ടാക്കി മെഡിക്കൽ ഷോപ്പുകളിൽ നിന്ന് വാങ്ങി ലഹരി ഉപയോഗിക്കുന്നവർക്ക് വിൽക്കുകയായിരുന്നു. രഹസ്യ വിവരത്തെ തുടർന്ന് ഇയാളെ എക്സൈസ് സംഘം നിരീക്ഷിച്ചു വരുന്നതിനിടെയാണ് പിടിയിലാകുന്നത്. പാപ്പിനിശേരി, മാട്ടൂൽ, പുതിയങ്ങാടി, മാടായി, പയ്യന്നൂർ എന്നിവിടങ്ങളിൽ സ്കൂൾ, കോളജ് കുട്ടികളെ കേന്ദ്രീകരിച്ചാണ് വില്പനെയെന്ന് കണ്ടെത്തിയിട്ടുണ്ട്. ഓരോയിടങ്ങളിലും ഏജന്‍റുമാരെ നിയോഗിച്ചും സോഷ്യൽ മീഡിയ വഴിയുമായിരുന്നു ആവശ്യക്കാരെ കണ്ടെത്തിയിരുന്നത്. ഫിറാഷ് പിടിയിലായത് അറിയാതെ നിരവധിപേർ ഗുളികകൾക്കായി ഇയാളുടെ ഫോണിൽ വിളിച്ചിരുന്നു. ഈ കോളുകൾ കേന്ദ്രീകരിച്ചും എക്സൈസ് അന്വേഷണം ആരംഭിച്ചിട്ടുണ്ട്. അസി. എക്സൈസ് ഇൻസ്പെക്ടർ ഗ്രേഡ് എം.പി. സർവജ്ഞൻ, കെ.രാജീവൻ, പ്രിവന്‍റീവ് ഓഫിസർ ഗ്രേഡ് വി.പി.ശ്രീകുമാർ പി.പി.രജിരാഗ്, സിവിൽ എക്സൈസ് ഓഫിസർമാരായ കെ.സനീബ്, കെ.അമൽ എന്നിവരും പ്രതിയെ പിടികൂടുന്ന സംഘത്തിലുണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വ്യാപാരികൾ പ്രതിഷേധ പ്രകടനം നടത്തി

കാർത്തികപുരം: സർവീസ് സെന്‍റർ ഉടമ ഇസ്മയിലിനെ വാഹനമിടിച്ച് അപായപ്പെടുത്താൻ ശ്രമിച്ചതിൽ പ്രതിഷേധിച്ച് കേരള വ്യാപാര വ്യവസായി ഏകോപന സമിതി കാർത്തികപുരം യൂണിറ്റ് പ്രതിഷേധ പ്രകടനം നടത്തി. യൂണിറ്റ് പ്രസിഡന്‍റ് കെ.എസ്. സന്തോഷ് കുമാർ, മേഖലാ പ്രസിഡന്‍റ് എം.എ.ജോൺസൺ , യൂണിറ്റ് സെക്രട്ടറി ജോഷി മൈലപ്പറമ്പിൽ എന്നിവർ നേതൃത്വം നൽകി. വ്യാപാരികൾക്കും വ്യാപാര സ്ഥാപനങ്ങൾക്കും എതിരേയുള്ള ആക്രമണങ്ങളിൽ കർശന നടപടികൾ സ്വീകരിക്കണമെന്നും നേതാക്കൾ ആവശ്യപ്പെട്ടു.

ജോസ്മൗണ്ട് സെന്‍റ് ജോസഫ്സ് പള്ളിയിൽ തിരുനാൾ തുടങ്ങി

പയ്യാവൂർ: കുഞ്ഞിപ്പറമ്പ് ജോസ്മൗണ്ട് ഇടവകയിലെ സെന്‍റ് ജോസഫ്സ് പള്ളിയിൽ തിരുനാൾ തുടങ്ങി. വികാരി ഫാ. വർഗീസ് കുന്നത്ത് കൊടിയേറ്റി. തുടർന്ന് ആഘോഷമായ തിരുനാൾ കുർബാന, വചന സന്ദേശം, നൊവേന, സെമിത്തേരി സന്ദർശനം എന്നിവയ്ക്ക് ഫാ.ജോസഫ് ചാത്തനാട്ട് കാർമികത്വം വഹിച്ചു. ഇന്ന് വൈകുന്നേരം നാലിന് ജപമാല, തിരുനാൾ കുർബാന, നൊവേന എന്നിവയ്ക്ക് ഫാ. ലൂക്കോസ് മറ്റപ്പിള്ളിൽ കാർമികനാകും. ഫാ. മനോജ് കൊച്ചുപുരയ്ക്കൽ വചന സന്ദേശം നൽകും. ഏഴിന് ടൗൺ പന്തലിലേക്ക് തിരുനാൾ പ്രദക്ഷിണം, എട്ടിന് മ്യൂസിക്കൽ നൈറ്റ് ഗാനമേള. നാളെ വൈകുന്നേരം നാലിന് ജപമാല, ആഘോഷമായ തിരുനാൾ കുർബാന, വചന സന്ദേശം, ലദീഞ്ഞ് എന്നിവക്ക് ഫാ. ജോസഫ് റാത്തപ്പിള്ളിൽ കാർമികത്വം വഹിക്കും. ഗ്രോട്ടോ ചുറ്റി പ്രദക്ഷിണം, സമാപനാശീർവാദം, നേർച്ചഭക്ഷണം എന്നിവയോടെ തിരുനാൾ സമാപിക്കും.

തൂക്കുവേലി നിർമാണത്തിനെതിരേ പ്രതിഷേധം

കാർത്തികപുരം: ഉദയഗിരി ഗ്രാമപഞ്ചായത്തിൽ മുട്ടത്താംവയൽ മുതൽ അരിവിളഞ്ഞപൊയിൽ വരെയുള്ള വനാതിർത്തിയിൽ തൂക്കുവേലി നിർമിക്കുന്ന പ്രവൃത്തിക്കെതിരേ പ്രതിഷേധം ശക്തമാകുന്നു. ത്രിതല പഞ്ചായത്തുകളുടെയും എംഎൽഎയുടെയും ഫണ്ടിൽ നിന്ന് ഒരു കോടിയിൽപരം രൂപ മുടക്കി തൂക്കു വേലി നിർമിക്കുന്ന പ്രവൃത്തിക്കെതിരേയാണ് പ്രതിഷേധം. ആർക്കും ഉപകാരമില്ലാത്ത രീതിയിലാണ് പണി നടത്തുന്നതെന്നാണ് കോൺഗ്രസിന്‍റെ ആരോപണം. ഒരു വർഷം മുമ്പ് പ്രദേശവാസികളുടെ സഹകരണത്തോടെ 5 മീറ്റർ വീതിയിൽ കാട് തെളിച്ചു നൽകിയിരുന്നു. ഇപ്പോൾ കാട് വെട്ടി തെളിക്കാതയാണ് ഫെൻസിംഗ് എന്നാണ് ആരോപണം. പ്രദേശവാസികളുടെ കായ്ഫലമുള്ള തെങ്ങുകളും, നട്ടുവളർത്തിയ തേക്കു മരങ്ങളും മുറിക്കുന്നതായും പരാതിയുണ്ട്. പ്രദേശവാസികളെ അറിയിക്കുക പോലും ചെയ്യാതേയാണ് പണികൾ നടത്തുന്നത് എന്ന് ആക്ഷേപമുണ്ട്. ചില സ്ഥലങ്ങളിൽ തൂക്കു വേലിക്ക് പകരം കേബിൾ ഇട്ടിരിക്കുന്നതായും ആരോപണമുണ്ട്. പഞ്ചായത്ത് പ്രസിഡന്‍റിന്‍റെ നേതൃത്വത്തിൽ പരിശോധനയും നിരീക്ഷണവും നടക്കുന്ന സ്ഥലത്താണ് ഇത്തരം പ്രവർത്തനങ്ങൾ നടക്കുന്നതെന്നാണ് പ്രതിപക്ഷ ആരോപണം. ഭരണസമിതി യോഗത്തിൽ വാർഡ് മെംബറെ ഇക്കാര്യം അവതരിപ്പിക്കാൻ അനുവദിക്കുന്നില്ലെന്നും, വണ്ടിവന്നാൽ പ്രക്ഷോഭം ആരംഭിക്കുമെന്നും നേതാക്കൾ പറഞ്ഞു.

എന്‍റെ കേരളം പ്രദർശന വിപണന മേള എട്ടു മുതൽ പോലീസ് മൈതാനിയിൽ

കണ്ണൂർ: സർക്കാരിന്‍റെ നാലാം വാര്‍ഷികാഘോഷത്തിന്‍റെ ഭാഗമായി എട്ട് മുതല്‍ 14 വരെ കണ്ണൂര്‍ പോലീസ് മൈതാനിയില്‍ എന്‍റെ കേരളം പ്രദര്‍ശന വിപണന മേള നടക്കും. ജനകീയ സര്‍ക്കാരിന്‍റെ വികസനക്കുതിപ്പിന്‍റെ അടയാളപ്പെടുത്തലാകും മേളയെന്ന് മന്ത്രി കടന്നപ്പള്ളി രാമചന്ദ്രന്‍ പത്രസമ്മേളനത്തില്‍ പറഞ്ഞു. മേള എട്ടിന് വൈകുന്നേരം നാലിന് മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്യും. കെ.കെ. ശൈലജ എംഎൽഎ അധ്യക്ഷത വഹിക്കും. 14 ന് വൈകുന്നേരം അഞ്ചിന് സമാപനസമ്മേളനം വി.ശിവദാസൻ എംപി ഉദ്ഘാടനം ചെയ്യും. കെ.വി. സുമേഷ് എംഎല്‍എ അധ്യക്ഷത വഹിക്കും. ഭക്ഷണ വൈവിധ്യങ്ങളുമായി കുടുംബശ്രീ ഭക്ഷ്യമേളയും ഉണ്ടായിരിക്കും. പത്രസമ്മേളനത്തിൽ വി.ശിവദാസന്‍ എംപി, കെ.വി.സുമേഷ് എംഎല്‍എ, ജില്ലാപഞ്ചായത്ത് പ്രസിഡന്‍റ് കെ.കെ. രത്നകുമാരി, ജില്ലാ കളക്ടര്‍ അരുണ്‍ കെ.വിജയന്‍, എഡിഎം സി.പദ്മചന്ദ്രകുറുപ്പ്, ജില്ലാ ഇന്‍ഫര്‍മേഷന്‍ ഓഫീസര്‍ പി.പി.വിനീഷ് എന്നിവരും പങ്കെടുത്തു. മുഖ്യമന്ത്രിയുടെ മുഖാമുഖം പരിപാടി ഒമ്പതിന് മേളയുടെ ഭാഗമായി മുഖ്യമന്ത്രി പങ്കെടുക്കുന്ന ജില്ലാതല യോഗം ഒമ്പതിന് രാവിലെ 10.30 മുതല്‍ 12.30 വരെ കണ്ണൂര്‍ ദിനേശ് ഓഡിറ്റോറിയത്തില്‍ നടക്കും. ജില്ലയിലെ വിവിധ മേഖലയില്‍ നിന്നുള്ള പ്രത്യേക ക്ഷണിതാക്കളായ 500 ലധികം വ്യക്തികളെ മുഖ്യമന്ത്രി നേരില്‍ കണ്ട് സംവദിക്കും. മന്ത്രി കടന്നപ്പള്ളി രാമചന്ദ്രന്‍ അധ്യക്ഷത വഹിക്കും.

കണ്ണൂർ യൂണിവേഴ്സിറ്റിയിലേക്ക് എസ്എഫ്ഐ മാർച്ച്; സംഘർഷം

കണ്ണൂർ: സിൻഡിക്കേറ്റ് യോഗം നടക്കുന്നതിനിടെ കണ്ണൂർ യൂണിവേഴ്സിറ്റിയിലേക്ക് എസ്എഫ്ഐ പ്രവർത്തകർ നടത്തിയ മാർച്ചിൽ സംഘർഷം. യോഗഹാളിലേക്ക് പ്രവർത്തകർ ഇരച്ചുകയറി. യൂണിവേഴ്സിറ്റി ഓഫീസ് വാതിലുകൾ പ്രവർത്തകർ തകർത്തു. പ്രതിഷേധിച്ച പ്രവർത്തകരെ പോലീസ് അറസ്റ്റ് ചെയ്തു മാറ്റുന്നതിനിടെ എസ്എഫ്ഐ തളിപ്പറമ്പ് ഏരിയാ സെക്രട്ടറി അതുലിന് മുഖത്ത് മുറിവേറ്റു. ഇന്നലെ രാവിലെ പത്തരയോടെയാണ് സിൻഡിക്കേറ്റ് യോഗ ഹാളിന് പുറത്ത് എസ്എഫ് ഐ ജില്ലാ പ്രസിഡന്‍റ് ടി.പി. അഖിലയുടെ നേതൃത്വത്തിൽ ഏഴോളം പ്രവർത്തകർ മുദ്രാവാക്യം വിളിച്ച് പ്രതിഷേധിച്ചത്. ഇവരെ അറസ്റ്റ് ചെയ്തു മാറ്റുന്നതിനിടെ പുറത്ത് എസ്എഫ്ഐ പ്രവർത്തകർ നടത്തിയ പ്രതിഷേധമാണ് സംഘർഷത്തിന് ഇടയാക്കിയത്. രണ്ടും ഗേറ്റിലും പ്രവർത്തകർ മാറി മാറി പ്രതിഷേധം നടത്തി. ഇതിനിടയിലാണ് പ്രവർത്തകർ ഓഫീസ് വാതിൽ തകർത്തത്. ഇതോടെ അകത്ത് അറസ്റ്റ് ചെയ്തപ്രവർത്തകരെ പുറത്ത് എത്തിക്കാനും താമസം നേരിട്ടു. പോലീസും പ്രവർത്തകരും തമ്മിൽ ഏറെ നേരം ഉന്തുംതള്ളുമുണ്ടായി. കൂടുതൽ പോലീസെത്തിയാണ് പ്രവർത്തകരെ ബലം പ്രയോഗിച്ച് അറസ്റ്റ് ചെയ്തു നീക്കിയത്. ചട്ടവിരുദ്ധമായി ഡീൻമാരെ നിയമിച്ചതിലും കഴിഞ്ഞ ദിവസം എസ്എഫ്ഐ നടത്തിയ സമരത്തിൽ വൈസ് ചാൻസലർ നൽകിയ ഉറപ്പ് പാലിക്കാത്തതിലും പ്രതിഷേധിച്ചായിരുന്നു സമരം. ജോയൽ തോമസ്, കെ.നിവേദ് , സനന്ദ് കുമാർ,സായന്ത് അഴീക്കോടൻ എന്നിവർ പ്രതിഷേധത്തിന് നേതൃത്വം നൽകി.

കിക്ക് ഡ്രഗ്‌സ് ലഹരിവിരുദ്ധ കാമ്പയിനു തുടക്കം

കാസര്‍ഗോഡ്: കായികവകുപ്പിന്‍റെ നേതൃത്വത്തില്‍ സംഘടിപ്പിക്കുന്ന ലഹരിവിരുദ്ധ സന്ദേശപ്രചാരണ കാമ്പയിന്‍ കിക്ക് ഡ്രഗ്‌സിന്‍റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിച്ചു. കായികമന്ത്രി വി. അബ്ദുറഹ്‌മാന്‍ അധ്യക്ഷത വഹിച്ചു. ജില്ലാ സ്‌പോര്‍ട്സ് കൗണ്‍സില്‍ പ്രസിഡന്‍റ് പി. ഹബീബ് റഹ്‌മാന്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. എംഎല്‍എമാരായ എം. രാജഗോപാലന്‍, സി.എച്ച്. കുഞ്ഞമ്പു, ഇ. ചന്ദ്രശേഖന്‍, നഗരസഭാ ചെയര്‍മാന്‍ അബ്ബാസ് ബീഗം, ജില്ലാ കളക്ടര്‍ കെ. ഇമ്പശേഖര്‍, ജില്ലാ പോലീസ് മേധാവി വിജയ് ഭാരത് റെഡ്ഢി, സംസ്ഥാന സ്പോര്‍ട്സ് കൗണ്‍സില്‍ പ്രസിഡന്‍റ് യു. ഷറഫലി, ഇന്‍റർനാഷണല്‍ കബഡി താരം ജഗദീഷ് കുമ്പള എന്നിവര്‍ പങ്കെടുത്തു. ജില്ലാപഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ സ്വാഗതവും ജില്ലാ സ്പോര്‍ട്സ് കൗണ്‍സില്‍ സെക്രട്ടറി എ.വി. പ്രദീപന്‍ നന്ദിയും പറഞ്ഞു. പരിപാടിയോടനുബന്ധിച്ച് ഖേലോ ഇന്ത്യ സ്റ്റുഡന്‍റ്സ് നടത്തിയ ഫെന്‍സിംഗ്, ചെറുവത്തൂര്‍ കൈരളി പൂരക്കളി സംഘം അവതരിപ്പിച്ച പൂരക്കളി, ചെറുവത്തൂര്‍ കൈരളി കളരി സംഘത്തിന്‍റെ കളരിപ്പയറ്റ്, യോഗ അസോസിയേഷന്‍ നടത്തിയ യോഗ, തൈക്കൊണ്ടോ അസോസിയേഷന്‍ നടത്തിയ തൈക്കൊണ്ടോ, ലഹരിക്കെതിരേ നൃത്തശില്പം, സൂംബ ഡാന്‍സ് എന്നിവ അരങ്ങേറി.സംസ്ഥാനതല ഉദ്ഘാടനത്തിനു മുന്നോടിയായി കളക്ടറേറ്റില്‍ നിന്ന് പുതിയ ബസ് സ്റ്റാന്‍ഡിലേക്കു നടത്തിയ വാക്കത്തോണ്‍ മന്ത്രി വി.അബ്ദുറഹ്‌മാന്‍ ഫ്ളാഗ് ഓഫ് ചെയ്തു. 1500ലധികം പേര്‍ വാക്കത്തോണിന്‍റെ ഭാഗമായി. ലഹരിവിരുദ്ധ പ്രചാരണത്തിന്‍റെ മിനി മാരത്തോണ്‍ ഫ്ലാഗ് ഓഫ് ഉദുമ പാലക്കുന്നില്‍ ജില്ലാ പോലീസ് മേധാവി വിജയ്ഭരത് റെഡ്ഢി നിര്‍വഹിച്ചു. മിനി മാരത്തണ്‍ മത്സരങ്ങള്‍ വിദ്യാനഗര്‍ കളക്ടറേറ്റിനു സമീപം സമാപിച്ചു. പുരുഷ വിഭാഗത്തില്‍ സി. മിഥുന്‍രാജും വനിതാ വിഭാഗത്തില്‍ പി.വി. നിരഞ്ജനയും ഒന്നാമതെത്തി.

മയിൽപ്പീലി, ഓം ശിവശക്തി ഓം പുരസ്കാരങ്ങൾ സമ്മാനിച്ചു

കണ്ണൂർ: കൃഷ്ണ ജ്വൽസ്, കൃഷ്ണ ബീച്ച് റിസോർട്ട്, ശിവോഹം ടെമ്പിൾ ഓഫ് കോൺഷ്യസ്നെസ് ട്രസ്റ്റ് എന്നിവ ഏർപ്പെടുത്തി ഡോ. സി.വി.രവീന്ദ്രനാഥ് രൂപകല്പന ചെയ്ത ഓം ശിവശക്തി ഓം പുരസ്കാരം, മയിൽപ്പീലി പുരസ്കാരം എന്നിവ ശ്രീ ശങ്കരജയന്തി ദിനത്തിൽ സമ്മാനിച്ചു. ഗൂഡല്ലൂർ നീലഗിരി ചിന്താമണി യോഗേശ്വരി മൂകാംബിക ടെമ്പിൾ മഠാധിപതി ഡോ. ബ്രഹ്മയോഗിനി ശ്രീ ശ്രീ ശ്രീ മാതാ അംബിക ചൈതന്യമയി , ഗോവ മഹാഋഷി അധ്യാത്മ വിശ്വവിദ്യാലയ റിസർച്ച് ഹെഡ് അഞ്ജലി മുഗൾ ഗാഡ്ഗിൽ എന്നിവർക്കാണ് ഓം ശിവശക്തി ഓം പുരസ്കാരം സമ്മാനിച്ചത്. ലോക സമാധാന സംഘടനയായ വേൾഡ് പീസ് ഓർഗനൈസേഷൻ ഇന്‍റർനാഷണൽ സെക്രട്ടറി ജനറലായ സീനിയർ പ്രഫ. ഡോ. സുരേഷ് കെ. ഗുപ്തൻ, ശാന്തിഗ്രാം മാനവീയം ചാരിറ്റബിൾ ട്രസ്റ്റ് ഫൗണ്ടർ പ്രസിഡന്‍റും ശാസ്ത്രജ്ഞനുമായ ബി. ലാൽമോഹൻ, ശാന്തി ഗ്രാം മാനവീയം ചാരിറ്റബിൾ ട്രസ്റ്റ് വൈസ് പ്രസിഡന്‍റും നാഷണൽ ഹെൽത്ത് മിഷൻ കൺസൾട്ടന്‍റുമായ ഡോ. ജയ ലാൽമോഹൻ, നാട്യാചാര്യ ഗുരു എൻ.വി. കൃഷ്ണൻ മാസ്റ്റർ എന്നിവരെയാണ് മയിൽപ്പീലി പുരസ്കാരം നൽകി ആദരിച്ചത്. പുരസ്കാര വിതരണ ചടങ്ങിൽ സനാതന ഇല്ലം വാസ്തുരത്ന കുലപതി ബ്രഹ്മശ്രീ ഡോ. സോമരാജരാഘവാചാര്യ മുഖ്യാതിഥിയായിരുന്നു. ശിവോഹം സ്പിരിച്വൽ വെൽനസ് സെന്‍റർ ചീഫ് ഫിസിഷ്യൻ ഡോ.ജ്യോതിഷമിത്ത് വിശിഷ്ടാതിഥിയായി. കൃഷ്ണാ ബീച്ച് റിസോർട്ട് മാനേജിംഗ് ഡയറക്ടർ ശുഭ രവീന്ദ്രനാഥ് അധ്യക്ഷത വഹിച്ചു. കൃഷ്ണ ബീച്ച് റിസോർട്ട് ചീഫ് ഫിനാൻഷ്യൽ ഓഫീസർ രത്തൻ പ്രമോദ് സ്വാഗതവും കൃഷ്ണബീച്ച് റിസോർട്ട് ജനറൽ മാനേജർ സുമൽ നന്ദിയും പറഞ്ഞു

കണ്ണൂര്‍ സര്‍വകലാശാല ചോദ്യപേപ്പര്‍ ചോര്‍ച്ച: ഗ്രീന്‍വുഡ് കോളജിന്‍റെ അഫിലിയേഷന്‍ റദ്ദാക്കും

കണ്ണൂര്‍: കണ്ണൂര്‍ സര്‍വകലാശാല അവസാന സെമസ്റ്റര്‍ ബിസിഎ പരീക്ഷയുടെ ചോദ്യങ്ങള്‍ പ്രിൻസിപ്പൽ ചേർത്തിക്കൊടുത്ത സംഭവവുമായി ബന്ധപ്പെട്ട് കാസർഗോഡ് പാലക്കുന്ന് ഗ്രീന്‍ വുഡ്‌സ് ആര്‍ട്‌സ് ആന്‍ഡ് സയന്‍സ് കോളജിന്‍റെ അഫിലിയേഷൻ അനിശ്ചിതകാലത്തേക്ക് റദ്ദാക്കാന്‍ ഇന്നലെ ചേര്‍ന്ന സിന്‍ഡിക്കേറ്റ് യോഗം തീരുമാനിച്ചു. കോളജിന് ഒന്നര ലക്ഷം രൂപ പിഴയും ചുമത്തി. ചോദ്യപേപ്പര്‍ ചോര്‍ത്തിയ പ്രിന്‍സിപ്പലിനെ പരീക്ഷ ചുമതലയില്‍ നിന്ന് ഒഴിവാക്കാനും സിന്‍ഡിക്കേറ്റ് യോഗത്തില്‍ തീരുമാനമായി. ചോദ്യപേപ്പര്‍ ചോര്‍ന്ന പരീക്ഷകള്‍ വീണ്ടും നടത്തും. പ്രിന്‍സിപ്പലിന്‍റെ നടപടിയുമായി ബന്ധപ്പെട്ട് നടത്തിയ അന്വേഷണ റിപ്പോര്‍ട്ടിന് സിന്‍ഡിക്കേറ്റ് അംഗീകാരം നല്‍കി. സിന്‍ഡിക്കേറ്റ് ഉപസമിതിയുടെ ശുപാര്‍ശ പ്രകാരമാണ് തീരുമാനം. സംഭവത്തില്‍ പ്രിന്‍സിപ്പല്‍ ഇന്‍ ചാര്‍ജ് പി. അജീഷിനെ കോളജ് സസ്‌പെന്‍ഡ് ചെയ്തിട്ടുണ്ട്. ഒമ്പത് വിദ്യാര്‍ഥികള്‍ ഉള്‍പ്പെട്ട വാട്സ് ആപ്പ് ഗ്രൂപ്പില്‍ പരീക്ഷയ്ക്ക് ഒരു മണിക്കൂര്‍ മുമ്പാണ് പ്രിന്‍സിപ്പല്‍ ചോദ്യങ്ങള്‍ അയച്ചത്. ചോദ്യങ്ങള്‍ ചോര്‍ന്നതുമായി ബന്ധപ്പെട്ട് സിന്‍ഡിക്കേറ്റ് സമിതി വിസിക്ക് റിപ്പോര്‍ട്ട് കൈകമാറുകയും അജീഷിനെതിരേ പോലീസ് കേസെടുക്കുകയും ചെയ്തിരുന്നു. മാര്‍ച്ച് 18 മുതല്‍ ഏപ്രില്‍ രണ്ടുവരെയായിരുന്നു പരീക്ഷ. ഏപ്രില്‍ രണ്ടിന് നടന്ന അവസാന പരീക്ഷയില്‍ സര്‍വകലാശാല സക്വാഡ് നടത്തിയ പരിശോധനയിലാണ് ചോദ്യങ്ങള്‍ ചോര്‍ത്തിയത് കണ്ടെത്തിയത്. സര്‍വകലാശാല നടത്തിയ അന്വേഷണത്തിലാണ് അധ്യാപകരാണ് ചോദ്യപേപ്പര്‍ ചോര്‍ത്തിയതെന്ന് കണ്ടെത്തിയത്.

കണ്ണൂർ യൂണിവേഴ്സിറ്റിയിലെ ഫാക്കല്‍റ്റി ഡീന്‍മാരുടെ നിയമനം; പ്രതിഷേധം ശക്തം

കണ്ണൂര്‍: കണ്ണൂർ യൂണിവേഴ്സിറ്റിയിൽ ചട്ടങ്ങൾക്ക് വിരുദ്ധമായി ഫാക്കല്‍റ്റി ഡീന്‍മാരെ നിയമിച്ചതുമായി ബന്ധപ്പെട്ട് വ്യാപക പ്രതിഷേധം. അധ്യാപകരും വിദ്യാർഥികളുമാണ് പ്രതിഷേധവുമായി രംഗത്തെത്തിയത്. ഇന്നലെ ചേര്‍ന്ന സിന്‍ഡിക്കേറ്റ് യോഗത്തില്‍ അംഗങ്ങള്‍ പ്രതിഷേധം രേഖപ്പെടുത്തി. നിയമനവുമായി ബന്ധപ്പെട്ട പ്രതിഷേധം ഡിന്‍ഡിക്കേറ്റ് യോഗത്തില്‍ പ്രമേയമായി അവതരിപ്പിക്കുകയും പാസാക്കുകയും ചെയ്തു. കണ്ണൂര്‍ യൂണിവേഴ്സിറ്റി ആക്ട് 1996 പ്രകാരം റൊട്ടേഷന്‍ അടിസ്ഥാനത്തില്‍ സര്‍വകലാശാലയിലെ വകുപ്പ് തലവന്മാരില്‍ നിന്നോ പ്രഫസര്‍മാരില്‍ നിന്നോ അല്ലെങ്കില്‍ വിദഗ്ധരായവരില്‍ നിന്നോ ആയിരിക്കണം നോമിനേഷനെന്ന് പറയുന്നുണ്ടെങ്കിലും ഒരാളെ പോലും സര്‍വകലാശാലയില്‍ നിന്ന് പരിഗണിക്കാതെയാണ് സര്‍വകലാശാലയ്ക്ക് പുറമേനിന്നുള്ള പത്ത് പേരെ ഫാക്കല്‍റ്റി ഡീന്‍മാരായി നിയോഗിച്ച് ഗവര്‍ണര്‍ ഉത്തരവിറക്കിയത്. ഡോ. പി. രമേശന്‍ (ഐഐഎം കോഴിക്കോട്), ഡോ. മനു(കേന്ദ്ര സര്‍വകലാശാല കാസർഗോഡ്), ഡോ.കെ.ഗിരീഷ് കുമാര്‍ (കുസാറ്റ്), ഡോ. കെ.ശിവരാമ റാവു (കേന്ദ്ര സര്‍വകലാശാല ഹിമാചല്‍ പ്രദേശ്), ഡോ. ടി.വി. മണികണ്ഠന്‍ (ഡല്‍ഹി സര്‍വകലാശാല), ഡോ.എന്‍. സന്തോഷ് ഗൗഡ (ബംഗളൂരു സര്‍വകലാശാല), ഡോ.എം. ഭാസി (കുസാറ്റ്), ഡോ. ശ്രീകല എടന്നൂര്‍ (പോണ്ടിച്ചേരി സർകലാശാല), ഡോ. എം.ബി സന്തോഷ് കുമാര്‍ (കുസാറ്റ്), ഡോ.ജി. കിഷോര്‍ (പ്രിന്‍സിപ്പല്‍, സായി തിരുവന്തപുരം) എന്നിവരെയാണ് നിയമിച്ചത്.

സിപിഎം മുൻ ബ്രാഞ്ച് സെക്രട്ടറി ഒളിവിൽ; കോൺഗ്രസ് നേതാവ് അറസ്റ്റിൽ

ഇരിട്ടി: സിപിഎം നിയന്ത്രണത്തിലുള്ള ആനപ്പന്തി സർവീസ് സഹകരണ ബാങ്കിന്‍റെ കച്ചേരിക്കടവ് ശാഖയിൽ പണയ സ്വർണത്തിന് പകരം മുക്കുപണ്ടം വച്ച് തട്ടിപ്പ് നടത്തിയ സംഭവത്തിൽ മുഖ്യപ്രതിയെ സഹായിച്ച കൂട്ടുപ്രതി അറസ്റ്റിൽ. മുഖ്യപ്രതിയും ബാങ്കിലെ കാഷ്യറും സിപിഎം മുൻ ബ്രാഞ്ച് സെക്രട്ടറിയുമായിരുന്ന സുധീർ തോമസി (51) ന്‍റെ സുഹൃത്ത് സുനീഷ് തോമസ് (32) ആണ് അറസ്റ്റിലായത്. ഇയാൾ കച്ചേരിക്കടവ് കോൺഗ്രസ് ബൂത്ത് പ്രസിഡന്‍റും യൂത്ത് കോൺഗ്രസ് അയ്യൻകുന്ന് മണ്ഡലം വൈസ് പ്രസിഡന്‍റുമാണ്. അതിനിടെ സംഭവവുമായി ബന്ധപ്പെട്ട് കച്ചേരിക്കടവ് ബ്രാഞ്ച് മാനേജർ വിനോദിനെ ഭരണസമിതി സസ്പെൻഡ് ചെയ്തു. സ്ട്രോംഗ് റൂമിൽ സൂക്ഷിച്ച 18 പായ്ക്കറ്റ് പണയ സ്വർണ ഉരുപ്പടികൾ എ‌ടുത്ത് മാറ്റി മുഖ്യപ്രതി സുധീർ തോമസ് മുക്കുപണ്ടം വച്ചതിൽ കൂടുതലും സുനീഷ് തന്നെ പണയം വച്ചവയാണ്. അതുകൊണ്ടുതന്നെ ഇരുവരും ആസൂത്രിതമായി നടപ്പാക്കിയ പദ്ധതിയാണിതെന്നാണ് പ്രാഥമിക നിഗമനം. ‍ സ്വർണം മാറ്റി മുക്കുപണ്ടം വയ്ക്കുന്നതിൽ മുഖ്യപ്രതിക്ക് സഹായം എത്തിച്ചു നല്കിയത് കൂട്ടുപ്രതി ആണെന്നാണ് പോലീസ് പറയുന്നത്. തട്ടിപ്പിന്‍റെ സൂത്രധാരൻ ഒളിവിലായതുകൊണ്ട് കേസിന്‍റെ കൂടുതൽ വിവരങ്ങൾ വെളിപ്പെടുത്താനാകില്ലെന്നും അത് കേസന്വേഷണത്തെ ബാധിക്കുമെന്നും ഇരിട്ടി എസ്എച്ച്ഒ എ. കുട്ടികൃഷ്ണൻ പറഞ്ഞു. കോടതിയിൽ ഹാജരാക്കിയ സുനീഷിനെ റിമാൻഡ് ചെയ്തു. തട്ടിപ്പിൽ കൂടുതൽ പേർ ഉൾപ്പെട്ടിട്ടുണ്ടോ എന്നതും അന്വേഷിച്ചു വരികയാണ്. അതിനിടെ ഒളിവിൽ പോയ സുധീർ തോമസിനായി പോലീസ് അന്വേഷണം കർണാടകയിലേക്കും വ്യാപിപ്പിച്ചു. പ്രതി ബംഗളൂരുവിലേക്ക് കടന്നതായാണ് വിവരം. വെള്ളിയാഴ്ച രാവിലെ ബാങ്കിന് മുന്നിൽ താക്കോലുകൾ അടങ്ങിയ ബാഗ് കൊണ്ടുവച്ച് ഇയാൾ ഇരുചക്രവാഹനത്തിൽ പോകുന്നതിന്‍റെ സിസിടിവി ദൃശ്യങ്ങൾ ലഭിച്ചിട്ടുണ്ട്. വാഹനം പിന്നീട് വള്ളിത്തോട്ടിൽ കണ്ടെത്തി. ബാങ്കിൽ സ്വർണം പണയം വച്ചയാൾ കഴിഞ്ഞ ദിവസം ഉരുപ്പടി തിരികെ എടുക്കാൻ എത്തിയപ്പോൾ കാഷ്യർ ആദ്യദിവസം തൂക്കം നോക്കിയ ത്രാസ് പ്രവർത്തിക്കുന്നില്ലെന്ന് പറഞ്ഞ് മടക്കി അയയ്ക്കുകയായിരുന്നു. പിന്നീട് പണയംവച്ച അത്രയും സ്വർണം ഇയാൾ ഇരിട്ടിയിലെ ഒരു ജ്വല്ലറിയിൽനിന്ന് വാങ്ങി ബാങ്കിൽ തിരികെ വച്ചതായും അന്വേഷണത്തിൽ കണ്ടെത്തി. ഇതിന്‍റെ സിസിടിവി ദൃശ്യങ്ങളും ലഭിച്ചു. പിടിക്കപ്പെടുമെന്നുറപ്പായതോടെയാണ് സുധീർ തോമസ് മുങ്ങിയതെന്ന് സംശയിക്കുന്നു. ഏപ്രിൽ 24നും മേയ് അഞ്ചിനുമിടയിലാണ് സ്ട്രോംഗ് റൂമിൽ സൂക്ഷിച്ച പണയപണ്ടങ്ങൾ മാറ്റി മുക്കുപണ്ടം വച്ചത്. കൂടാതെ മുഖ്യപ്രതിയുടെ ഭാര്യയുടെ പേരിൽ പണയംവച്ച സ്വർണാ ഭരണങ്ങൾ കവർന്നതായും ബാങ്ക് അധികൃതർ പോലീസിൽ നൽകിയ പരാതിയിൽ പറയുന്നു. സംഭവത്തിൽ 60 ലക്ഷം രൂപയുടെ നഷ്ടം സംഭവിച്ചതായാണ് ബാങ്കിന്‍റെ പരാതി. സമഗ്ര അന്വേഷണം വേണമെന്ന് കോൺഗ്രസ്‌ ഇരിട്ടി: ആനപ്പന്തി സഹകരണ ബാങ്കിന്‍റെ കച്ചേരിക്കടവ് ബ്രാഞ്ചിൽ നടന്ന തിരിമറി അടക്കം ഇപ്പോൾ നടക്കുന്ന എല്ലാ പ്രവർത്തനങ്ങളെക്കുറിച്ചും വിശദമായ വകുപ്പുതല അന്വേഷണം നടത്തി ജനങ്ങളുടെ ആശങ്കകൾ പരിഹരിക്കണമെന്ന് കോൺഗ്രസ്‌ കരിക്കോട്ട ക്കരി മണ്ഡലം പ്രസിഡന്‍റ് മനോജ്‌ എം. കണ്ടത്തിൽ ആവശ്യപ്പെട്ടു. യുഡിഎഫ് നേതൃത്വത്തിൽ ദീർഘകാലം മികച്ച പ്രവർത്തനങ്ങൾ നടത്തിയ ഈ സ്ഥാപനം 2023 ൽ ആക്രമണത്തിലൂടെ എൽഡിഎഫ് പിടിച്ചെടുത്തശേഷം നടന്നിരിക്കുന്ന കാര്യങ്ങളെക്കുറിച്ചും അന്വേഷണം നടത്തണമെന്നും അദ്ദേഹം ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]