ADVERTISEMENT

ADVERTISEMENT

അനധികൃത പാക്കിസ്ഥാനി - ബംഗ്ലാദേശി കുടിയേറ്റക്കാർ രാജ്യസുരക്ഷയ്ക്ക് ഭീഷണി: രാജീവ്‌ ചന്ദ്രശേഖർ

കൊട്ടാരക്കര: അനധികൃതമായി താമസിക്കുന്ന പാക്കിസ്ഥാനി-ബംഗ്ലാദേശി കുടിയേറ്റക്കാർ രാജ്യത്തിന്‍റെ സുരക്ഷയ്ക്ക് വലിയ ഭീഷണിയാണെന്ന് ബിജെപി സംസ്ഥാന അധ്യക്ഷൻ രാജീവ്‌ ചന്ദ്രശേഖർ.

അനധികൃത കുടിയേറ്റക്കാരെ കേരളത്തിൽ നിന്നും പുറത്താക്കാൻ സംസ്ഥാന സർക്കാർ ഉടൻ നടപടി എടുക്കണമെന്നും ബിജെപി അധ്യക്ഷൻ ആവശ്യപ്പെട്ടു. ബിജെപി കൊല്ലം ഈസ്റ്റ് ജില്ലാ വികസിത കേരളം കൺവൻഷൻ കൊട്ടാരക്കരയിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.

ബിജെപി കൊല്ലം ഈസ്റ്റ് ജില്ലാ പ്രസിഡന്‍റ് രാജിപ്രസാദ് അധ്യക്ഷത വഹിച്ചു. യോഗത്തിൽ ബിജെപി സംസ്ഥാന സെക്രട്ടറി അഡ്വ. എസ്.സുരേഷ്, ജില്ലാ ഇൻ ചാർജ് വി.വി രാജേഷ് എന്നിവർ പ്രസംഗിച്ചു.

ADVERTISEMENT

കാട്ടുപോത്തുകളും കാട്ടാനകളും നാട്ടുകാരുടെ ഉറക്കം കെടുത്തുന്നു

കുളത്തൂപ്പുഴ: കാട്ടുപോത്തുകൾ,കാട്ടാനകൾ തുടങ്ങി വന്യ മൃഗങ്ങളെ പേടിച്ച് രാത്രി മുഴുവൻ ഉറങ്ങാൻ കഴിയാതെ കഴിച്ചുകൂട്ടേണ്ട അവസ്ഥയിലാണ് മലയോര മേഖലയിലെ ജനങ്ങൾ. സന്ധ്യയോടെ കല്ലടയാർ നീന്തി കടന്നെത്തുന്ന കാട്ടാനക്കൂട്ടം വിൽപാലം പത്തേക്കർ ഭാഗത്തെ ജനവാസ മേഖലയിലെത്തി പ്രദേശവാസികളുടെ കൃഷിയും കാർഷിക വിളയും നശിപ്പിച്ചതോടെ പ്രദേശവാസികൾ ഭയപ്പാടിലാണ്. പത്തേക്കർ റിയാസ് മൻസിൽ റംല, അശോകമന്ദിരത്തിൽ അശോകൻ എന്നിവരുടെയും ഇവരുടെ സമീപവാസികളായ ഉമാ, പ്രമീള, പണയിൽ വീട്ടിൽ ബിന്ദു എന്നിവരുടെയും കാർഷിക വിളകളാണ് കാട്ടാനക്കൂട്ടം നശിപ്പിച്ചത്. തെങ്ങ്, പ്ലാവ്, വാഴ, മറ്റു ചെറിയ കൃഷികൾ എന്നിവയെല്ലാം പിഴുതെടുത്തും തള്ളിയിട്ടും ഭക്ഷണമാക്കിയും വന്യമൃഗങ്ങൾ പ്രദേശവാസികൾക്ക് തലവേദനയാവുകയാണ്. പ്രദേശത്തെ കൃഷി പൂർണമായി നശിപ്പിച്ച ശേഷമാണ് നേരം പുലർന്നശേഷം കാട്ടാനക്കൂട്ടം മടങ്ങിയത്. രാത്രിയിൽ കാട്ടാനക്കൂട്ടം എത്തിയത് അറിഞ്ഞെങ്കിലും വെളിച്ചക്കുറവും മഴയും മൂലം പുറത്തിറങ്ങാനോ ആനകളെ വിരട്ടിയോടിക്കാനും കഴിയാതെ വന്നു. പ്രദേശത്ത്‌ ജനങ്ങളിൽ അധികവും വീടുകളിൽ തന്നെ ഭയന്ന് കഴിച്ചു കൂട്ടേണ്ട സ്ഥിതിയാണ് നിലവിലുള്ളത്. ഇതിനിടെ ജോലിക്കായി രാവിലെപോയ തൊഴിലാളികൾ കാട്ടാന കൂട്ടത്തിന്‍റെ മുന്നിൽ അകപ്പെടാതെ കഷ്്‌ടിച്ച് രക്ഷപ്പെടുകയായിരുന്നു. ജനവാസ മേഖ ലയിൽ നിരന്തരം വന്യമൃഗങ്ങൾ എത്തുന്നത് നിയന്ത്രിക്കുന്നതിന് ആവശ്യമായ നടപടികൾ വനംവകുപ്പ് സ്വീകരിക്കണമെന്നു ഈ പ്രദേശത്തെ താമസക്കാർ നിരന്തരം ആവശ്യപ്പെടുന്നുണ്ടെങ്കിലും വനംവകുപ്പ് അതൊന്നും ചെവികൊള്ളുന്നില്ല. ഇഎസ്എം കോളനിയിൽ സ്ഥിതി ചെയ്യുന്ന എൽപി സ്കൂൾ ഗ്രൗണ്ടിൽ കഴിഞ്ഞ ദിവസം വൈകുന്നേരം കാട്ടുപോത്തുകൾ കൂട്ടത്തോടെയാണ് എത്തിയത്. സ്കൂൾ വളപ്പിൽ ഉണ്ടായിരുന്ന കൃഷികൾ കാട്ടുപോത്തുകൾ നശിപ്പിച്ചു. സ്കൂൾ അവധി ആയതിനാൽ വൻ വിപത്താണ് ഒഴിവായത്. ഈ പ്രദേശങ്ങളിൽ ആനകളുടെയും കാട്ടുപോത്തുകളുടെയും കാട്ടുപന്നികളുടെയും കുരങ്ങന്മാരുടെയും ശല്യംമൂലം ജനം പൊറുതി മുട്ടിയ അവസ്ഥയിലാണ്. കൃഷിഭൂമിയിൽ യാതൊന്നും കൃഷി ചെയ്യാൻ കഴിയുന്നില്ലെന്നാണ് കർഷകർ ഒന്നടങ്കം പറയുന്നത്. ഇക്കാര്യത്തിൽ ഒരു ശാശ്വത പരിഹാരം ഉണ്ടാകണമെന്നാണ് നാട്ടുകാരുടെ ആവശ്യം. വനംവകുപ്പു ഉദ്യോഗസ്ഥരെ വിവരം അറിയിച്ചാൽ അവർ വന്ന് കാർഷിക നഷ്‌ടങ്ങൾ നോക്കുന്നത് അല്ലാതെ യാതൊരുവിധ സഹായങ്ങളും ലഭിക്കുന്നില്ലെന്നും കർഷകർ പറഞ്ഞു.

കൊട്ടാരക്കര ഗണപതി ക്ഷേത്ര വികസനം: വിശദമായ മാസ്റ്റർപ്ലാൻ തയാറാക്കും- മന്ത്രി കെ.എൻ.ബാലഗോപാൽ

കൊല്ലം: അനേകം ഭക്തജനങ്ങൾ ദിനംപ്രതി എത്തുന്ന കൊട്ടാരക്കര ഗണപതി ക്ഷേത്രം വികസനത്തിന് വിശദമായ മാസ്റ്റർ പ്ലാൻ തയാറാക്കാൻ നിർദേശം നൽകി മന്ത്രി കെ.എൻ.ബാലഗോപാൽ. ദീർഘകാല അടിസ്ഥാനത്തിലുള്ള ആവശ്യങ്ങൾ മുൻകൂട്ടി കണ്ടുള്ള പദ്ധതിയാണ് നടപ്പാക്കുക. ഇവിടെ എത്തുന്ന സന്ദർശകർക്കായി പിൽഗ്രിം ഹൗസും അമിനിറ്റി സെന്‍ററും നിർമിക്കുന്നതിന് സംസ്ഥാന സർക്കാർ ബജറ്റിൽ അഞ്ചു കോടി വകയിരുത്തിയിട്ടുണ്ട്. ഇതിനുപുറമേ ദേവസ്വം ബോർഡിന്‍റെ 25 കോടിയുടെ പ്രവർത്തനങ്ങൾ കൂടി ഉൾപ്പെടുത്തിയാകും പദ്ധതി തയാറാക്കുക. കൊല്ലം - ചെങ്കോട്ട റോഡിൽ ചന്തമുക്കിൽ ക്ഷേത്രത്തിന് 400 മീറ്റർ മുൻപിലായി ദേവസ്വം ബോർഡിന്‍റെ ഉടമസ്ഥതയിലുള്ള 93സെന്‍റ് സ്ഥലത്താണ് വികസന പ്രവർത്തനങ്ങൾ നടത്തുക. ആദ്യഘട്ടമായി അടിയന്തരമായി പാർക്കിംഗ് സംവിധാനമൊരുക്കുന്നതിന് നടപടി സ്വീകരിക്കും. ഇവിടെ നാലുനിലകളിലായി നിർമിക്കുന്ന കെട്ടിടത്തിൽ താഴത്തെ നിലയിൽ പാർക്കിംഗ്, മുകൾ നിലകളിലായി കല്യാണമണ്ഡപം, ഊട്ടുപുര, തീർഥാടകർക്ക് താമസിക്കാനുള്ള മുറികൾ, ഫെസിലിറ്റേഷൻ സെന്‍റർ, റസ്റ്റോറന്‍റ്,ശുചിമുറികൾ തുടങ്ങിയവ പണിയും. ഏറെ പഴക്കമുള്ള അസി. കമ്മീഷണർ, അസി.എൻജിനിയർ ഓഫീസുകളും മാറ്റി സ്ഥാപിക്കും. ഈ സ്ഥലത്തിനോട് ചേർന്ന് തന്നെ ബജറ്റിൽ അനുവദിച്ച അഞ്ചു കോടി രൂപ വിനിയോഗിച്ച് പിൽഗ്രിം ഹൗസും അമിനിറ്റി സെന്‍ററും ഒരുക്കും. ഇവിടെനിന്നും ക്ഷേത്രത്തിലേക്ക് സുഗമമായി എത്തുന്നതിനുള്ള പാസേജ് ഒരുക്കുന്നതിനുള്ള സാധ്യതകൾ പരിശോധിക്കാനും മന്ത്രി നിർദേശിച്ചു. വലിയമ്പലം, തിട്ടമ്പലം, പ്രദർശന വഴി, ഉപദൈവ പ്രതിഷ്ഠകൾ ഉൾപ്പെട്ടവയുടെ നവീകരണം, ഓഡിറ്റോറിയം, സ്റ്റേജ്, കംപ്യൂട്ടർവത്കരണത്തിന്‍റെ ഭാഗമായുള്ള കൗണ്ടറുകൾ, ഓയിൽ മിൽ, തുടങ്ങിയവയെല്ലാം ഒരുക്കുന്ന വിധത്തിലുള്ള മാസ്റ്റർ പ്ലാനാണ് തയാറാക്കുന്നതെന്നും കോടതിയുടെ അനുമതിയോടെ പ്രവർത്തികൾ പൂർത്തിയാക്കുമെന്നും തിരുവിതാംകൂർ ദേവസ്വം ബോർഡ് പ്രസിഡന്‍റ് പി.എസ്.പ്രശാന്ത് പറഞ്ഞു. കൊട്ടാരക്കര മഹാഗണപതി ക്ഷേത്രം വികസനവുമായി ബന്ധപ്പെട്ട് ദേവസ്വം ബോർഡ് ഗസ്റ്റ് ഹൗസിൽ ചേർന്ന യോഗത്തിൽ കൊട്ടാരക്കര നഗരസഭ ചെയർമാൻ ഉണ്ണികൃഷ് ണ മേനോൻ തുടങ്ങിയവർ പങ്കെടുത്തു.

സ്വർണ വ്യാപാര മേഖലയിൽ നിന്നുള്ള നികുതി വരുമാനം വെളിപ്പെടുത്തണം: ഗോൾഡ് മർച്ചന്‍റ്സ് അസോ.

കൊല്ലം: കേരളത്തിലെ സ്വർണാഭരണ വ്യാപാര മേഖലയിൽ നിന്നുള്ള വാർഷിക വിറ്റുവരവും നികുതി വരുമാനവും വെളിപ്പെടുത്തണമെന്ന് ഓൾ കേരള ഗോൾഡ് ആൻഡ് സിൽവർ മർച്ചന്‍റ്സ് അസോസിയേഷൻ സംസ്ഥാനസംസ്ഥാന പ്രസിഡന്‍റ് കെ.സുരേന്ദ്രൻ സർക്കാരിനോട് ആവശ്യപ്പെട്ടു. ജില്ലാ കൺവൻഷൻ കൊല്ലം പ്രസ് ക്ലബ് ഹാളിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സംസ്ഥാന പ്രസിഡന്‍റായി തെരഞ്ഞെടുക്കപ്പെട്ട കെ.സുരേന്ദ്രന് സ്വീകരണവും നൽകി. ജൂൺ 27 മുതൽ 29വരെ അങ്കമാലി അറ്റ്‌ലസ് ഇന്‍റർനാഷണൽ കൺവൻഷൻ സെന്‍ററിൽ നടക്കുന്ന കേരള ഇന്‍റർനാഷണൽ ജ്വല്ലറി ഫെയറിന്‍റെ റോഡ് ഷോയും സംഘടിപ്പിച്ചു. ജില്ലാ പ്രസിഡന്‍റ് അഡ്വ.എസ്.അബ്‌ദുൾ നാസർ അധ്യക്ഷത വഹിച്ചു. ജില്ലാ ജനറൽ സെക്രട്ടറി ബി.പ്രേമാനന്ദ്, സംസ്ഥാന വൈസ് പ്രസിഡന്‍റ് നവാസ് പുത്തൻവീട്, എം.സി.ദിനേശൻ തുടങ്ങിയവർ പ്രസംഗിച്ചു. കൊല്ലം ജില്ലാ പ്രസിഡന്‍റായിരുന്ന അഡ്വ.എസ്.അബ്‌ദുൾ നാസർ സംസ്ഥാന ജനറൽ സെക്രട്ടറിയായി തെരഞ്ഞെടുക്കപ്പെട്ടതിനെ തുടർന്ന് പുതിയ ജില്ലാ പ്രസിഡന്‍റായി ബി. പ്രേമാനന്ദ് തെരഞ്ഞെടുക്കപ്പെട്ടു. ജില്ലാ ജനറൽ സെക്രട്ടറിയായി എസ്.പളനി, ജില്ലാ ട്രഷററായി എസ്.സാദിഖ് എന്നിവരെയും തെരഞ്ഞെടുത്തു.

പേവിഷബാധയേറ്റ് ഏഴുവസുകാരി മരിച്ച സംഭവം : ഉത്തരവാദി സംസ്ഥാന സർക്കാരാണെന്ന് കൊടിക്കുന്നിൽ

കൊല്ലം: തെരുവുനായയുടെ ആക്രമണത്തിൽ പേവിഷബാധയേറ്റ് കൊട്ടാരക്കര വിളക്കുടിയിൽ ഏഴു വയസുകാരി നിയ ഫൈസൽ മരണപ്പെട്ടതിന്‍റെ ഉത്തരവാദിത്വം സംസ്ഥാന സർക്കാരിനാണെന്ന് കെപിസിസി വർക്കിംഗ് പ്രസിഡന്‍റ് കൊടിക്കുന്നിൽ സുരേഷ് എംപി. മൂന്ന് തവണ പേ വിഷബാധയ്ക്കുള്ള വാക്സിൻ എടുത്തിട്ടും രോഗം ഭേദമാകാതെ കുട്ടി മരണപ്പെട്ടത് ഗൗരവകരമാണ്. ഗുണനിലവാരമില്ലാത്ത വാക്സിൻ വിതരണം ചെയ്തത് മൂലമാണ് മരണം സംഭവിച്ചതെന്നും ഇത് ആരോഗ്യവകുപ്പിന്‍റെ അനാസ്ഥയുടെയും അഴിമതിയുടെയും തെളിവാണെന്നും കൊടിക്കുന്നിൽ സുരേഷ് പറഞ്ഞു. മരുന്നു വിതരണം ചെയ്ത കമ്പനിക്കെതിരേ നിയമനടപടി സ്വീകരിക്കണമെന്നും കുട്ടിയുടെ മാതാപിതാക്കൾക്ക് സംസ്ഥാന സർക്കാർ മതിയായ നഷ്‌ടപരിഹാരം നൽകണമെന്നും എംപി ആവശ്യപ്പെട്ടു. കൊടിക്കുന്നിൽ സുരേഷ് എംപി

പ്രായപൂർത്തിയാകാത്ത പെൺകുട്ടിയെ പീഡിപ്പിച്ച യുവാവ് അറസ്റ്റിൽ

ഓയൂർ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച 20 കാരൻ അറസ്റ്റിലായി. കല്ലമ്പലം ശങ്കരംമുക്ക് വിളയിൽ വീട്ടിൽ ആദിത്യൻ (20)നെയാണ് പൂയപ്പള്ളി പോലീസ് അറസ്റ്റ് ചെയ്തത്. 2023-ൽ ഇൻസ്റ്റാഗ്രാം വഴി പരിചയപ്പെട്ട വെളിനല്ലൂർ സ്വദേശിനിയായ പെൺകുട്ടിയുമായി പ്രണയത്തിലായ ആദിത്യൻ കുട്ടിയെ കഴിഞ്ഞ രണ്ടുവർഷമായി വിവിധ സ്ഥലങ്ങളിൽ കൊണ്ടുപോയി നിരവധി തവണ ലൈംഗിക പീഡനത്തിനിരയാക്കിയതായി പെൺകുട്ടി പോലീസിന് മൊഴി നൽകിയിരുന്നു. ദിവസങ്ങൾക്ക് മുമ്പ് വീട്ടിൽ നിന്നിറങ്ങിയ പെൺകുട്ടി രാത്രിയായിട്ടും മടങ്ങി എത്താത്തതിനെ തുടർന്ന് വീട്ടുകാർ നടത്തിയ അന്വേഷണത്തിൽ പെൺകുട്ടിയെ ആദിത്യന്‍റെ വീട്ടിൽ കണ്ടെത്തി. വീട്ടുകാർ പെൺകുട്ടിയെ വീട്ടിലേക്ക് കൂട്ടിക്കൊണ്ട് പോകാൻ ശ്രമിച്ചെങ്കിലും വീട്ടുകാരോടൊപ്പം പോകാൻ കുട്ടി തയാറായില്ല. തുടർന്ന് വീട്ടുകാർ ചൈൽഡ് വെൽഫെയർ കമ്മിറ്റിയിൽ വിവരമറിയിക്കുകയും വെൽഫെയർ കമ്മിറ്റിപ്രവർത്തകർ സ്ഥലത്തെത്തി പെൺകുട്ടിയെ കൊല്ലം സ്നേഹതീരം കേന്ദ്രത്തിലേക്ക് മാറ്റി. ചൈൽഡ് വെൽഫെയർ കമ്മിറ്റി നൽകിയ പരാതിയെ തുടർന്ന് പൂയപ്പള്ളി പോലീസ് പെൺകുട്ടിയുടെ മൊഴി രേഖപ്പെടുത്തുകയും ആദിത്യനെ അറസ്റ്റ് ചെയ്യുകയുമായിരുന്നു. പൂയപ്പള്ളി എസ്എച്ച്ഒ എസ്.ടി.ബിജുവിന്‍റെ നിർദേശപ്രകാരം എസ്ഐ രജനീഷ് മാധവൻ, സിപിഒമാരായ റിജു,സാബു,അൻവർ എന്നിവരടങ്ങുന്ന പോലീസ് സംഘം പ്രതിയെ അറസ്റ്റ് ചെയ്തത് കോടതിയിൽ ഹാജരാക്കി റിമാൻഡ് ചെയ്തു.

റഫറി സൽമാൻ ഫാരിസിയെ ആദരിച്ചു

പന്മന : ദാമൻ ആൻഡ് ദിയുവിൽ 19 മുതൽ നടക്കുന്ന ഖേലോ ഇന്ത്യ ദേശീയ ബീച്ച് സോക്കർ മത്സരങ്ങൾ നിയന്ത്രിക്കുന്ന റഫറീസ് പാനലിലേക്ക് കൊല്ലം ജില്ലാ റഫറീസ് അസോസിയേഷൻ സെക്രട്ടറി സൽമാൻ ഫാരിസിയയേയും തെരഞ്ഞെടുത്തു. തുടർച്ചയായി രണ്ടാം തവണയാണ് ദേശീയ മത്സരങ്ങളിലേക്ക് സൽമാനെ തെരഞ്ഞെടുക്കുന്നത്. ഇന്‍റർ യൂണിവേഴ്സിറ്റി സംസ്ഥാന ഫുട്ബോൾ മത്സരങ്ങൾ ഉൾപ്പെടെ നിരവധി മത്സരങ്ങൾ നിയന്ത്രിച്ചിട്ടുള്ള സൽമാൻ ഫാരിസിയായെ ജില്ലാ ഫുട്ബോൾ അസോസിയേഷ െ ന്‍റ ആഭിമുഖ്യത്തിൽ ആദരിച്ചു. ഫുട്ബോൾ പരിശീലന കേന്ദ്രത്തിൽ നടന്ന ചടങ്ങിൽ ജില്ലാ പഞ്ചായത്ത് അംഗം അഡ്വ. സി.പി.സുധീഷ് കുമാറാണ് സൽമാനെ ആദരിച്ചത്. ജില്ലാ ഫുട്ബോൾ അസോസിയേഷൻ പ്രസിഡന്‍റ് പന്മന മഞ്ചേഷ്, നിസാറുദീൻ കന്നയിൽ, സി.മനോജ് കുമാർ,അബ്‌ദുൾറഹീം, നിയാസുദീൻ, നജീബ്,നിസാം സന, മഠത്തിൽ നൗഷാദ്, ഇർഷാദ്,പ്രമോദ്, വിനോദ് കുമാർ, സോനു തേവലക്കര എന്നിവരും എംഎഫ്എ സോക്കർ സ്കൂളിലെ വിദ്യാർഥികളും പങ്കെടുത്തു.

എന്‍സിസി മേധാവി പരിശീലന അവലോകനം നടത്തി

കൊല്ലം: എന്‍സിസി കൊല്ലം, ആലപ്പുഴ ജില്ലകളില്‍ നടത്തുന്ന ക്യാമ്പുകളുടെ പ്രവര്‍ത്തനം വിലയിരുത്തി മേധാവി കൂടിയായ മേജര്‍ ജനറല്‍ ഷണ്‍മുഖം. കൊല്ലം ഗ്രൂപ്പ് ആസ്ഥാനത്ത് ഗ്രൂപ്പ് കമാൻഡര്‍ ബ്രിഗേഡിയര്‍ ജി. സുരേഷിന്‍റെ സാന്നിധ്യത്തില്‍ നടത്തിയ യോഗത്തില്‍ നേവല്‍ യൂണിറ്റിലെ കേഡറ്റുകള്‍ക്കായുള്ള ക്യാമ്പ് കെട്ടിടത്തിന്‍റെ നിർമാണ പുരോഗതിയും പരിശോധിച്ചു. സിവില്‍ ഉദ്യോഗസ്ഥരും കൊല്ലം-ആലപ്പുഴ യൂണിറ്റിലെ സൈനിക ഉദ്യോഗസ്ഥരും പങ്കെടുത്തു.

സ്വയംസഹായ സംഘങ്ങളുടെ വാർഷികാഘോഷം

ചാത്തന്നൂർ : നടയ്ക്കൽ എൻഎസ്എസ് കരയോഗത്തിൽ കുടുംബസംഗമവും സ്വയം സഹായ സംഘങ്ങളുടെ വാർഷികവും നടന്നു. പരിപാടികളുടെ ഉദ്ഘാടനം ചാത്തന്നൂർ താലൂക്ക് യൂണിയൻ പ്രസിഡന്‍റ് ചാത്തന്നൂർ മുരളി നിർവഹിച്ചു. കരയോഗം പ്രസിഡന്‍റ് സി.പുഷ്പജൻ പിള്ള അധ്യക്ഷനായിരുന്നു. സെക്രട്ടറി ഗിരീഷ്കുമാർ, യൂണിയൻ ഇൻസ്‌പെക്‌ടർ പ്രകാശ്, വനിതാ യൂണിയൻ ട്രഷറർ ജലജകുമാരി, മേഖല കോർഡിനേറ്റർ അംബിക മൗലീധരൻ, താലൂക്ക് യൂണിയൻ അംഗം എസ്.ആർ.മുരളീധരകുറുപ്പ് പാർവതി ദേവി, ഭദ്രദീപം, ലക്ഷ്മിദേവി എന്നിവർ പ്രസംഗിച്ചു. താലൂക്ക് യൂണിയൻ പ്രസിഡന്‍റ് സംഘത്തിന്‍റെ പ്രവർത്തനങ്ങളെ പറ്റി വിശദീകരിച്ചു. തുടർന്ന് സംഘ അംഗങ്ങളുടെയും കുട്ടികളുടെയും കലാ പരിപാടികൾ നടന്നു. പരിപാടിയിൽ പങ്കെടുത്ത കുട്ടികൾക്ക് വനിതാ സമാജം സമ്മാനങ്ങൾ നൽകി. ഉച്ചഭക്ഷണത്തോടെ വാർഷിക പരിപാടികൾ സമാപിച്ചു.

ലഹരിക്കെതിരേ ഫുട്ബോൾ മത്സരം നടത്തി

ചവറ : കൊല്ലം രൂപതാ മദ്യവിരുദ്ധ സമിതിയുടെയും കോവിൽത്തോട്ടം ഫുട്ബോൾ ക്ലബിന്‍റെയും സംയുക്താഭിമുഖ്യത്തിൽ ലഹരിക്കെതിരേ കായിക പ്രതിരോധം എന്ന സന്ദേശവുമായി ഫുട്ബാൾ ടുർണമെന്‍റ് സംഘടിപ്പിച്ചു. യുവാക്കളെ കായികരംഗത്തേക്ക് ആകർഷിച്ച് ജീവിതം ക്രിയാത്മകമാക്കി ലഹരിക്കെതിരേ പ്രതിരോധങ്ങൾ സൃഷ്‌ടിക്കുക എന്ന ഉദ്ദേശ്യത്തോടെയാണ് ടുർണമെന്‍റ് നടത്തിയത്. ടുർണമെന്‍റ് കെസിബിസി മദ്യവിരുദ്ധ സമിതിയുടെ യോഹന്നാൻ ആന്‍റണി ലഹരി വിരുദ്ധ സന്ദേശം നൽകി ഉദ്ഘാടനം നിർവഹിച്ചു. ചവറ പഞ്ചായത്ത് അംഗം ആൻസി ജോർജ് അധ്യക്ഷയായി. ജോയൽ അജു, റൊണാർഡോ, ജിബിൻ, പ്രിൻസ് എന്നിവർ പ്രസംഗിച്ചു. കൊല്ലം രൂപതാ മദ്യവിരുദ്ധ കമ്മീഷൻ ഡയറക്‌ടർ റവ.ഡോ.മിൽട്ടൺ ജോർജ് വിജയികൾക്കുള്ള സമ്മാനദാനം നിർവഹിച്ചു. പന്തളം റെഡ്സ്റ്റാർ ഒന്നാം സ്ഥാനവും കൊല്ലം ബോക്ക ജൂനിയേഴ്സ് രണ്ടാംസ്ഥാനവും കരസ്ഥമാക്കി. അഞ്ച് ജില്ലകളിൽ നിന്നായി 24 ടീമുകൾ ടൂർണമെന്‍റിൽ പങ്കെടുത്തു.

ഉറ്റവരെ സങ്കടക്കടലിലാക്കി നിയ യാത്രയായി...

കൊല്ലം: ഒപ്പമുണ്ടായിരുന്ന ഉറ്റവര്‍ക്ക് അവസാനമായി ഒരു നോക്ക് കാണാനോ ആ കുഞ്ഞിക്കവിളിൽ മുത്താനോ സാധിക്കാതെയാണ് ഏഴുവയസുകാരി നിയയുടെ മണ്ണിലേക്കുള്ള മടക്കം. പ്രോട്ടോക്കോള്‍ പാലിച്ച് പൊതുദര്‍ശനത്തിന് പോലും വയ്ക്കാതെയാണ് ഖബറടക്കിയത്. തിരുവനന്തപുരം എസ്എടി ആശുപത്രിയില്‍ നിന്ന് നേരിട്ട് പുനലൂര്‍ പേപ്പര്‍മില്‍ ആലഞ്ചേരി മുസ്‌ലിം ജമാഅത്തില്‍ എത്തിക്കുകയും മയ്യിത്ത് നിസ്‌കാരത്തിന് ശേഷം പ്രോട്ടോക്കോള്‍ പ്രകാരം ഖബറടക്കുകയായിരുന്നു. വളരെ കുറഞ്ഞ ആളുകള്‍ മാത്രമായിരുന്നു ചടങ്ങിൽ പങ്കെടുക്കാനായത്. അടുത്ത ദിവസം വരെ തന്നോടൊപ്പം കളിചിരികളുമായുണ്ടായിരുന്ന നിയയുടെ മരണം ഉള്‍ക്കൊള്ളാനാകാതെ മൃതദേഹത്തിന് അരികിലും ബന്ധുവിന്‍റെ നെഞ്ചോരം ചേർന്നും പൊട്ടിക്കരഞ്ഞ സഹോദരൻ മുഹമ്മദ് ഇഷാൻ ചടങ്ങുകളിൽ പങ്കെടുത്തവരുടെ കണ്ണുനിറയിച്ചു. ചുറ്റും നിന്ന് ബന്ധുക്കൾ ഇഷാനെ പലകുറി ആശ്വസിപ്പിക്കാൻ ശ്രമിച്ചെങ്കിലും "അവൾ പോയത് എനിക്ക് സഹിക്കാൻ കഴിയില്ല " എന്ന് ആവർത്തിച്ചു പറഞ്ഞ് ഉച്ചത്തിൽ കരയുന്ന ഇഷാന്‍ സങ്കടക്കാഴ്ചയായി. പിന്നീട് ബന്ധുക്കൾ നിർബന്ധപൂർവമാണ് ഇഷാനെ ഖബറിന് സമീപത്തു നിന്നും തിരികെ വീട്ടിലേക്ക് കൊണ്ടുപോയത്. പ്രഭാതത്തിലെ ശാന്തമായ അന്തരീക്ഷത്തിൽ ഖബറടക്കത്തിനായി എത്തിയ ഏവരും ഉള്ളിൽ തേങ്ങലൊതുക്കിയാണ് ചടങ്ങുകൾക്കു ശേഷം പള്ളിയിൽ നിന്ന് വിട പറഞ്ഞത്.

ദേശീയ പണിമുടക്ക്; 500 കേന്ദ്രങ്ങളിൽ തൊഴിലാളി സദസ്

കൊല്ലം: ദേശീയ പണിമുടക്കിന് മുന്നോടിയായി ജില്ലയിലെ തൊഴിലാളികൾ പണിയെടുക്കുന്ന 500 കേന്ദ്രങ്ങളിൽ തൊഴിലാളി സദസുകൾ സംഘടിപ്പിക്കും. 20നാണ് ദേശീയ പണിമുടക്കിന് ആഹ്വാനം ചെയ്തിരിക്കുന്നത്. നിയോജക മണ്ഡലം കൺവൻഷനുകൾ ജില്ലയിൽ പൂർത്തിയായി. പഞ്ചായത്ത് കൺവൻഷനുകൾ 10നകം പൂർത്തീകരിക്കും. സംസ്ഥാന സമര പ്രചാരണ ജാഥയ്ക്ക് 13ന് രാവിലെ ഒന്പതിന് പത്തനാപുരത്ത് ജില്ലാ അതിർത്തിയിൽ സ്വീകരണം നൽകും. ജില്ലയിലെ സ്വീകരണ പരിപാടികളുടെ ഉദ്ഘാടനം സിപിഐ. ജില്ലാ സെക്രട്ടറി പി.എസ്.സുപാൽ പത്തനാപുരത്ത് നിർവഹിക്കും. പുനലൂർ, കടയ്ക്കൽ, കൊട്ടാരക്കര, ഭരണിക്കാവ്, കരുനാഗപ്പള്ളി എന്നിവിടങ്ങളിലെ സ്വീകരണത്തിനു ശേഷം കൊല്ലത്ത് പ്രചാരണ ജാഥ സമാപിക്കും. സിഐടിയു ദേശീയ വൈസ് പ്രസിഡന്‍റ് ജെ.മേഴ്‌സിക്കുട്ടിയമ്മയാണ് ജാഥാ ക്യാപ്റ്റൻ. ടോമി മാത്യു വൈസ് ക്യാപ്റ്റനും അഡ്വ. ജി. ലാലു ജാഥാ മാനേജറും, എസ്. ഹരിലാൽ സ്ഥിരാംഗവുമാണ്. വൈകുന്നേരം ചിന്നക്കടയിൽ നടക്കുന്ന സമാപന സമ്മേളനം സിഐടിയു സംസ്ഥാന ജനറൽ സെക്രട്ടറി എളമരം കരീം ഉദ്ഘാടനം ചെയ്യും. ഇ.കാസിം സ്‌മാരക ഹാളിൽ നടന്ന സംയുക്ത സമര സമിതിയുടെ പ്രവർത്തനയോഗം സിഐടിയു ജില്ലാ സെക്രട്ടറി എസ്. ജയമോഹൻ ഉദ്ഘാടനം ചെയ്തു. എഐടിയുസി ജില്ലാ സെക്രട്ടറി ജി.ബാബു അധ്യക്ഷത വഹിച്ചു.

പേപ്പർ മില്ലിലെ മലിനജലം ഇത്തിക്കരയാറ്റിലേക്ക് ഒഴുക്കുന്നുവെന്ന്

ചാത്തന്നൂർ: കൈതക്കുഴി ഗവ.എൽപി സ്കൂളിനു സമീപത്തെ സ്വകാര്യ പേപ്പർ മില്ലിൽനിന്നു പുറന്തള്ളുന്ന മലിനജലം ജനത്തിനു ഭീഷണിയാകുന്നതായി പരാതി. മലിനജലം ഇത്തിക്കരയാറ്റിലേക്കാണ് ഒഴുക്കിവിടുന്നത്. പ്രദേശവാസികളുടെ കിണറുകളിലെ കുടിവെള്ളം ഇത് മൂലം ഉപയോഗശൂന്യമാകുന്നതായാണ് പ്രധാന പരാതി. കുമ്മല്ലൂർ, കോയിപ്പാട്, കൈതക്കുഴി, കട്ടച്ചൽ, ആദിച്ചനല്ലൂർ തുടങ്ങിയ പ്രദേശങ്ങളിലെ നാട്ടുകാരാണ് ദുരിതമനുഭവിക്കുന്നത്. ഫാക്‌ടറിയിൽ നിലവിൽ മാലിന്യശുചീകരണ പ്ലാന്‍റുണ്ടെങ്കിലും ഇതിന്‍റെ പ്രവർത്തനം നടക്കുന്നില്ലെന്നാണ് ആക്ഷേപം. വിഷയവുമായി ബന്ധപ്പെട്ട് നിരവധി പരാതികൾ മലിനീകരണനിയന്ത്രണ ബോർഡിനും പഞ്ചായത്ത് അധികൃതർക്കും മറ്റും നാട്ടുകാർ നൽകിയെങ്കിലും ഒരു നടപടിയും ഉണ്ടായിട്ടില്ല. കേന്ദ്ര ആരോഗ്യമന്ത്രാലയത്തിനും കേന്ദ്ര ഹരിത ട്രിബ്യൂ ണലിനും സംസ്ഥാന ആരോഗ്യമന്ത്രിക്കും മലിനീകരണനിയന്ത്രണ ബോർഡിനും പഞ്ചായത്ത് അംഗം ഷാജി ലൂക്കോസ്, പൗരധ്വനി ഫൗണ്ടേഷൻ,കൈതക്കുഴി മോഹൻ, അനു പി. തമ്പാൻ എന്നിവരുടെ നേതൃത്വത്തിൽ പൊതുജനങ്ങൾ പരാതി നൽകി.

അനധികൃത പാക്കിസ്ഥാൻ പൗരന്മാരെ പുറത്താക്കണമെന്ന്

കൊല്ലം: അനധികൃത പാക്കിസ്ഥാൻ പൗരന്മാരെ പുറത്താക്കണമെന്നാവശ്യപ്പെട്ടു ബിജെപി കൊല്ലം വെസ്റ്റ് ജില്ലാ കമ്മിറ്റി സംഘടിപ്പിച്ച പ്രതിഷേധ ധർണ നടത്തി. സംസ്ഥാന സെൽ കോർഡിനേറ്റർ അശോകൻ കുളനട ഉദ്ഘാടനം ചെയ്തു. ജില്ലാ പ്രസിഡന്‍റ് എസ്.പ്രശാന്ത് അധ്യക്ഷനായി. ബിജെപി മുൻ ജില്ലാ അധ്യക്ഷൻ ബി.ബി.ഗോപകുമാർ മുഖ്യപ്രഭാഷണം നടത്തി. ജില്ലാ ജനറൽ സെക്രട്ടറിമാരായ ഇടവട്ടം വിനോദ്, പ്രകാശ് പാപ്പാടി എന്നിവർ പ്രസംഗിച്ചു.

ട്രാഫിക്ക് സംവിധാനം പരിഷ്‌കരിക്കണം: കൊല്ലം താലൂക്ക് വികസന സമിതി

കൊല്ലം: നഗരത്തില്‍ പുതിയ റോഡുകളും സംവിധാനങ്ങളും കാര്യക്ഷമമാക്കാന്‍ ട്രാഫിക്ക് സംവിധാനം കാലോചിതമായി പരിഷ്‌കരിക്കണമെന്ന് കൊല്ലം താലൂക്ക് വികസന സമിതി ആവശ്യപ്പെട്ടു. ലിങ്ക് റോഡ് പാലം തോപ്പില്‍ക്കടവ് വരെ നീട്ടണം, കൊല്ലം നഗരത്തിലെ കടകളില്‍ വില നിലവാരം ഏകീകരിക്കാന്‍ നടപടി സ്വീകരിക്കണം തുടങ്ങിയ ആവശ്യങ്ങള്‍ ഉന്നയിച്ചു. ഭക്ഷ്യവസ്തുക്കള്‍ വില്‍ക്കുന്ന സ്ഥാപനങ്ങളില്‍ പരിശോധനകള്‍ നടത്തണം. കൊല്ലം കോര്‍പ്പറേഷനിലെ ഓടകള്‍ വൃത്തിയാക്കല്‍, വഴിവിളക്ക് പുനഃസ്ഥാപിക്കല്‍, ജില്ലാ ആശുപത്രിയുമായി ബന്ധപ്പെട്ട കാര്യങ്ങള്‍, റോഡ് സുരക്ഷ തുടങ്ങിയ വിഷയങ്ങള്‍ സമിതി ചര്‍ച്ച ചെയ്തു. താലൂക്ക് വികസന സമിതി കണ്‍വീനറായ തഹസില്‍ദാര്‍ ജാസ്മിന്‍ ജോര്‍ജ്, ജനപ്രതിനിധികളായ കുരീപ്പുഴ യഹിയ, ഈച്ചംവീട്ടില്‍ നയാസ് മുഹമ്മദ്, പാറയ്ക്കല്‍ നിസാമുദ ീന്‍, എന്‍ എസ് വിജയന്‍, എം സിറാജുദീന്‍, തടത്തിവിള രാധാകൃഷ്ണന്‍, പോള്‍ ഫെര്‍ണാണ്ടസ്, ജി ഗോപകുമാര്‍, കിളികൊല്ലൂര്‍ ശിവപ്രസാദ്, എം തോമസ് കുട്ടി, ഡി.ഗീതാകൃഷ്ണന്‍ എന്നിവരും, വിവിധ വകുപ്പുകളില്‍നിന്നുള്ള ഉദ്യോഗസ്ഥരും പങ്കെടുത്തു.

വിമലഹൃദയ സ്കൂളിൽ എസ്പിസി അവധിക്കാല ക്യാമ്പ് 'മഞ്ജീരം 2025'തുടങ്ങി

കൊല്ലം : പട്ടത്താനം വിമല ഹൃദയ ഗേൾസ് ഹയർ സെക്കൻഡറി സ്കൂളിൽ എസ്പിസി യൂണിറ്റിന്‍റെ അവധിക്കാല ക്യാമ്പ് 'മഞ്ജീരം 2025' ആരംഭിച്ചു. കൊല്ലം ഈസ്റ്റ് പോലീസ് സ്റ്റേഷൻ സബ് ഇൻസ്പെക്‌ടർ വി.വിപിൻ ഉദ്ഘാടനം നിർവഹിച്ചു. ഒ.ബി.രാജേഷ് അധ്യക്ഷത വഹിച്ചു. പ്രഥമ അധ്യാപിക സിസ്റ്റർ ഫ്രാൻ‌സിനി മേരി, പോലീസ് ഓഫീസർമാരായ വൈ.സാബു,എം.ജെ. ബിജോയ്, റെജീന ബീവി, സിപിഒമാരായ പ്രമീള പയസ്, ബി.ലിസി എന്നിവർ പ്രസംഗിച്ചു. ലഹരിക്കെതിരേയുള്ള വിവിധ പരിപാടികൾ ക്യാമ്പിൽ ഉൾപ്പെടുത്തിയിട്ടുണ്ട്.

കുടുംബശ്രീ സംരംഭക പരിശീലന പരിപാടി നടത്തി

കൊല്ലം: ബിസിനസ് മേഖലയിലെ നൂതന സാധ്യതകളെ പരിശീലിപ്പിക്കുന്ന കുടുംബശ്രീ കൊല്ലം ജില്ലാ മിഷ െ ന്‍റ കെ ടിക് - കുടുംബശ്രീ ട്രൈബല്‍ എന്റര്‍പ്രൈസസ് ഇന്നവേഷന്‍ സെന്‍റ ര്‍- നടത്തിവരുന്ന ത്രിദിന റസിഡന്‍ഷ്യല്‍ പരിശീലന പരിപാടിയുടെ മൂന്നാം ഘട്ടം നടന്നു. ജില്ലയിലെ സംരംഭക തല്‍പരരായ യുവാക്കള്‍ക്ക് പരിശീലനം നല്‍കി അവരുടെ ആശയങ്ങളെ വികസിപ്പിച്ച് പിന്തുണ നല്‍കുകയാണ് കെ ടിക് പദ്ധതിയുടെ ലക്ഷ്യം. 18നും 40 വയസിനും ഇടയ്ക്ക് പ്രായമുള്ളവര്‍ക്കാണ് പരിശീലനം. ജില്ലയിലെ 14 ഉന്നതികളില്‍ നിന്നും 50 പേര്‍ പങ്കെടുത്തു. പരിശീലനത്തിന് നേതൃത്വം നല്‍കിയത് കെ ടിക് ഇന്‍ക്യുബേറ്റര്‍മാരായ എന്‍. യു. നിഷ, അലീന, ജ്യോതിര്‍മായി എന്നിവരാണ്. കുടുംബശ്രീ അസി. ജില്ലാ മിഷന്‍ കോ ഓര്‍ഡിനേറ്റര്‍ എ, അനീസ, സാമൂഹ്യ വികസനം പ്രോഗ്രാം മാനേജര്‍ കെ. സിന്ധുഷമോള്‍ എന്നിവരും പങ്കെടുത്തു. മൂന്നാം ഘട്ട പരിശീലനത്തിന് മുന്നോടിയായി ഗുണഭോക്താക്കള്‍ കെ ടിക് ആനിമേറ്റര്‍മാരുടെ പിന്തുണയോടെ അഞ്ചു സംരംഭങ്ങള്‍ സന്ദര്‍ശിച്ച് റിപ്പോര്‍ട്ട് തയാറാക്കി. പരിശീലനത്തില്‍ പങ്കെടുത്തവര്‍ക്ക് 300 രൂപ സ്‌റ്റൈപ്പന്‍റ ും 300 രൂപ യാത്ര ബത്തയും നല്‍കി.

കാൻസർ മരുന്നു ഫണ്ട് വർധിപ്പിക്കണമെന്ന്

പുനലൂർ: കേരളത്തിൽ കാൻസർ രോഗം വർധിച്ചു വരുന്ന സാഹചര്യത്തിൽ സർക്കാർ കാൻസർ മരുന്ന് വാങ്ങുന്നതിന് നൽകുന്ന ഫണ്ട് വിഹിതം വർധിപ്പിക്കണമെന്ന് ജീവനം കാൻസർ സൊസൈറ്റി ആവശ്യപ്പെട്ടു. കാൻസർ മരുന്ന് വാങ്ങുന്നതിന് മെഡിക്കൽ സർവീസ് കോർപറേഷന് നൽകുന്ന ഫണ്ടിൽ കുറവ് വരുത്തുന്നത് ആശുപത്രികളിലെ ചികിത്സയെ ബാധിക്കും. പുതുതായി വിപണിയിൽ ലഭ്യമാകുന്ന മരുന്നുകൾ വാങ്ങുന്നതിന് കൂടുതൽ തുക ആവശ്യമായി വരുന്നുണ്ട്. സർക്കാർ കൂടുതൽ തുക അനുവദിച്ചാൽ മാത്രമേ കാൻസർ ചികിത്സാകേന്ദ്രങ്ങൾക്ക് കൂടുതൽ മരുന്നുകൾ ലഭിക്കുകയുള്ളൂ. സർക്കാർ നൽകുന്ന ഫണ്ടിൽ വർധനവ് വരുത്താൻ ആവശ്യമായ നടപടി സ്വീകരിക്കണമെന്ന് ജീവനം കാൻസർ സൊസൈറ്റി സംസ്ഥാന ജനറൽ സെക്രട്ടറി ബിജു തുണ്ടിൽ ആവശ്യപ്പെട്ടു.

കാവനാട് അത്യാധുനിക മത്സ്യമാര്‍ക്കറ്റിന് തറക്കല്ലിട്ടു

ചവറ : നിയോജകമണ്ഡലത്തില്‍പ്പെട്ട കാവനാട് പബ്ലിക് മാര്‍ക്കറ്റ് ആധുനിക സംവിധാനങ്ങളോടെ പുനര്‍നിര്‍മിച്ച് നവീകരിക്കുന്ന ജോലിക്ക് തുടക്കമായി. നവീകരണത്തിന്‍റെ ശിലാസ്ഥാപന കർമം സുജിത് വിജയന്‍പിളള എംഎല്‍എ നിർവഹിച്ചു. തിരക്കേറിയ മാര്‍ക്കറ്റുകളിലൊന്നാണ് കാവനാട് മാര്‍ക്കറ്റ്. പുതിയ മാര്‍ക്കറ്റിനായി കിഫ്ബിയില്‍നിന്നും 2.95 കോടി രൂപ അനുവദിച്ചെങ്കിലും സാങ്കേതിക കാരണങ്ങളാല്‍ നിർമാണം വൈകി.നിലവിലുളള മാര്‍ക്കറ്റ് പോലീസ് സ്റ്റേഷന് സമീപം പി ഡബ്ല്യു ഡി പുറമ്പോക്ക് സ്ഥലത്തേക്ക് മാറ്റി സ്ഥാപിച്ചിട്ടുണ്ട്. തീരദേശ വികസനകോര്‍പറേഷന്‍ വഴിയാണ് പദ്ധതി നടപ്പാക്കുന്നത്. ശിലാസ്ഥാപന ചടങ്ങില്‍ മേയര്‍ ഹണി ബഞ്ചമിന്‍ അധ്യക്ഷയായി. ഡപ്യൂട്ടിമേയര്‍ ജയന്‍, മുന്‍ ഡപ്യൂട്ടിമേയര്‍ കൊല്ലം മധു, ആരോഗ്യസ്റ്റാൻഡിംഗ് കമ്മിറ്റി ചെയര്‍പേഴ്സണ്‍ യു.പവിത്ര, കൗണ്‍സിലര്‍മാരായ പുഷ്പാംഗദന്‍, ആശ, ദീപു ഗംഗാധരന്‍, എക്സിക്യൂട്ടീവ് എൻജിനിയര്‍ ഷീലു, യു.വി.വിനോദ്, എസ്.സുധീഷ് തുടങ്ങിയവര്‍ പങ്കെടുത്തു.

1000 ഡിജിറ്റൽ സേവാകേന്ദ്രങ്ങൾ ; അക്ഷയ സംരംഭകർ ആശങ്കയിൽ

ചാത്തന്നൂർ : കേരള സ്റ്റേറ്റ് ഐടി മിഷന്‍റെ അധീനതയിൽ ഉള്ള അക്ഷയ സെന്‍ററ ുകൾക്ക് സമാന്തരമായി സംസ്ഥാനത്ത് 1000 ഡിജിറ്റൽ സേവാ കേന്ദ്രങ്ങൾ ആരംഭിക്കാനുള്ള സർക്കാരിന്‍റെ നീക്കത്തിൽ അക്ഷയ സംരംഭകർ ആശങ്കയിലാണെന്ന് കേരള അക്ഷയ എന്‍റർ പ്രണേഴ്‌സ് കോൺഫെഡറേഷൻ (എഇസി) സംസ്ഥാന ജനറൽ സെക്രട്ടറി ആർ.നന്ദകുമാർ ആരോപിച്ചു. കേരള സ്റ്റേറ്റ് റൂട്രോണിക്‌സ് എന്ന സഹകരണ സ്ഥാപനം അവരുടെ പ്രിൻസിപ്പൽ അഫിലിയേറ്റഡ് (പിഎ) ആയ പ്രൈവറ്റ് ഏജൻസി ഗ്രോവെയർ എജ്യുക്കേഷണൽ സൊല്യൂഷൻ എന്ന സ്ഥാപനം വഴിയാണ് പുതുതായി ഡിജിറ്റൽ സേവാകേന്ദ്രങ്ങൾ ആരംഭിക്കുന്നത്. കേരളത്തിലെ 3000 ത്തിലധികം വരുന്ന അക്ഷയ സംരംഭകരും 15000-ൽ അധികം വരുന്ന അക്ഷയ ജീവനക്കാരും അവരെ ആശ്രയിച്ചു ജീവിക്കുന്ന കുടുംബാംഗങ്ങളും ഇതോടെ ആശങ്കയിലാണ്. സർക്കാർ നിർദേശിക്കുന്ന തുച്ഛമായ സർവീസ് ചാർജാണ് അക്ഷയ സെന്‍ററുകൾ വഴി ഉപഭോക്താക്കളിൽ നിന്നും ഈടാക്കുന്നത്. 2018ന് ശേഷം സർവീസ് ചാർജ് വർധിപ്പിച്ചിട്ടില്ല. അക്ഷയ സംരംഭകർ ഭൂരിഭാഗവും കടക്കെണിയിലാണന്നും നന്ദകുമാർ ആരോപിച്ചു.

പുറ്റിംഗൽ വെടിക്കെട്ട് ദുരന്തക്കേസ്; നാളെ വീണ്ടും പരിഗണിക്കും

കൊല്ലം: പുറ്റിംഗൽ വെടിക്കെട്ട് ദുരന്തക്കേസിൽ പിടികിട്ടാപ്പുള്ളിയായി പ്രഖ്യാപിച്ച അടൂർ സ്വദേശി അനുരാജിന്‍റെ ജാമ്യക്കാർ സമർപ്പിച്ച അപേക്ഷ കോടതി നാളെ പരിഗണിക്കും. കരുനാഗപ്പള്ളി മണപ്പള്ളി സ്വദേശി ഗോപിനാഥൻ അടക്കമുള്ളവരായിരുന്നു ജാമ്യക്കാർ. ജാമ്യത്തിന്‍റെ ബോണ്ട് തുകയായ ഒരു ലക്ഷം രൂപ വീതം അടയ്ക്കണമെന്ന് കോടതി ഇവരോട് ആവശ്യപ്പെട്ടിരുന്നു.ഗോപിനാഥൻ ഡയാലിസിസിന് വിധേയനായി കൊട്ടിയത്തെ സ്വകാര്യ ആശുപത്രിയിൽ ചികിത്സയിലാണെന്നും അജിതയുടെ ഭർത്താവ് രോഗം ബാധിച്ച് കിടപ്പിലാണെന്നും ഇവർ കോടതിയെ ബോധിപ്പിച്ചു. ഈ സാഹചര്യത്തിൽ പിഴ തുകയിൽ പരമാവധി ഇളവ് നൽകണമെന്ന് ഇവരുടെ അഭിഭാഷകരും കോടതിയിൽ അപേക്ഷ നൽകി. ഇതേ തുടർന്ന് ചാർജ് ജഡ്ജിയായ നാലാം അഡീഷണൽ ഡിസ്ട്രിക്്‌ട് ആന്‍ഡ് സെഷൻസ് ജഡ്ജ് എസ്.സുഭാഷ് ഈ വിഷയത്തിൽ ഉത്തരവ് പാസാക്കുന്നതിന് കേസ് നാളത്തേയ്ക്ക് മാറ്റി വയ്ക്കുകയായിരുന്നു. മറ്റ് പ്രതികളും അന്ന് ഹാജരാകണമെന്നും കോടതി നിർദേശിച്ചിട്ടുണ്ട്.പ്രോസിക്യൂഷന് വേണ്ടി സ്പെഷൽ പബ്ലിക് പ്രോസിക്യൂട്ടർ കെ.പി.ജബാർ,അഡ്വ.അമ്പിളി ജബാർ എന്നിവർ ഹാജരായി.

ഇടയനോടൊപ്പം ഒരുദിനം 10ന്

കൊല്ലം : കെസിബിസി പ്രോലൈഫ് സമിതി കൊല്ലം രൂപതയുടെ ആഭിമുഖ്യത്തിൽ തങ്കശേരി ഇൻഫന്‍റ് ജീസസ് സ്കൂളിൽ 10ന് രാവിലെ ഒൻപതിന് ഇടയനോടൊപ്പം ഒരുദിനം എന്ന പരിപാടി സംഘടിപ്പിക്കുന്നു. 1999 ലോ അതിന് ശേഷമോ വിവാഹിതരായ നാലോ അതിലധികമോ മക്കളുള്ള കുടുംബങ്ങൾ മാതാപിതാക്കളും കുഞ്ഞുങ്ങളുമായി കൊല്ലം ബിഷപ് ഡോ.പോൾ ആന്‍റണി മുല്ലശേരിക്കൊപ്പം ചെലവഴിക്കുന്ന പരിപാടിയാണ് ഇടയനോടൊപ്പം ഒരുദിനം. ഉദ്ഘാടന സമാപന ചടങ്ങുകളോ പ്രസംഗങ്ങളോ ഉണ്ടാകില്ല. കുടുംബാംഗങ്ങൾ പറയാനുള്ളത് ബിഷപിനോട് പറയും. ബിഷപ് അത് കേൾക്കുകയും അദ്ദേഹത്തിന് പറയാനുള്ളത് അവരോട് പറയുകയും അവരുടെ പ്രശ്നങ്ങൾക്ക് കഴിയുന്ന പരിഹാരങ്ങൾ കണ്ടെത്തുവാൻ ശ്രമിക്കുകയും ചെയ്യും. ആർക്കെങ്കിലും പിതാവിനോട് വ്യക്തിപരമായി സംസാരിക്കണമെങ്കിൽ തുടർന്ന് അതിനുള്ള അവസരവും ഒരുക്കും. ഇടയൻ അവന്‍റെ ആടുകളുടെ ഇടയിലേക്ക് കടന്നു ചെല്ലുന്ന മഹനീയ ദിനമാണ് ഇടയനോടൊപ്പം ഒരു ദിനം. അപ്പനും മക്കളും ഒരുമിച്ചിരുന്നു സങ്കടങ്ങളും സന്തോഷങ്ങളും വിശേഷങ്ങളും പങ്കുവെയ്ക്കുന്ന, പരസ്പരം പങ്കിട്ടു ഭക്ഷിക്കുന്ന,തങ്ങളുടെ കഴിവുകൾ വെളിപ്പെടുത്തുന്ന ആനന്ദ ദിനം സഭ ആഗ്രഹിക്കുന്നതുപോലെ ജീവന്‍റെ മഹോത്സവമാണ് കെസിബിസി ഫാമിലി കമ്മീഷൻ ചെയർമാൻ കൂടിയായ കൊല്ലം ബിഷപ് സംഘടിപ്പിക്കുന്നത്. ഇടയൻ അവന്‍റെ ആടുകളുടെ സ്വരം ശ്രവിക്കുന്നു. പിതാവിനോട് മക്കൾ മനസ് തുറക്കുന്നു. ക്രിസ്തുവിന്‍റെ കാരുണ്യകരങ്ങളാൽ അവനവരെ ചേർത്തുപിടിക്കുന്നു എന്നുള്ളതാണ് ഇടയനോടൊത്തൊരു പരിപാടിയുടെ ആദർശവാക്യം. കൂടുതൽ വിവരങ്ങൾക്ക് 9387676757 എന്ന നമ്പറിൽ വിളിക്കാമെന്ന് ഫാമിലി അപ്പോസ്റ്റലേറ്റ് ഫാ.ഷാജൻ വർഗീസ്, കൊല്ലം രൂപത കെസിബിസി പ്രോലൈഫ് സമിതി കോർഡിനേറ്റർ ജോർജ് എഫ്. സേവ്യർ വലിയവീട് എന്നിവർ അറിയിച്ചു.

ആർ.ബാലകൃഷ്ണപിള്ളയുടെ ഓർമകൾക്ക് പുനർജനിയായി സാംസ്കാരിക കേന്ദ്രം

കൊല്ലം: കേരള കോൺഗ്രസ് - ബി നേതാവും മുൻ മന്ത്രിയുമായ ആർ.ബാലകൃഷ്ണപിള്ളയുടെ സ്മരണാർഥമുള്ള സാംസ്കാരിക കേന്ദ്രത്തിന്‍റെ നിർമാണത്തിന് തുടക്കം. നാലാം ചരമ വാർഷികത്തോടനുബന്ധിച്ചാണ് നിർമാണ ഉദ്ഘാടനം മന്ത്രി കെ.എൻ.ബാലഗോപാൽ നിർവഹിച്ചത്. കൊട്ടാരക്കര ചന്തമുക്ക് മൈതാനിയിലാണ് നിർമിക്കുക. സംസ്ഥാന സർക്കാർ കഴിഞ്ഞ ബജറ്റിൽ രണ്ട് കോടി രൂപ അനുവദിച്ചത് വിധിയോഗിച്ചാണ് പൂർത്തിയാക്കുക. അടുത്ത വർഷത്തോടെ പൂർത്തിയാകുമെന്നും മന്ത്രി പറഞ്ഞു. മന്ദിരവും പാർക്കുമാണ് പിതാവിന്‍റെ സ്മരണകളായി പുനർജനിക്കുകയെന്ന് അധ്യക്ഷനായ മന്ത്രി കെ.ബി.ഗണേഷ് കുമാർ പറഞ്ഞു. ശബരിമല ബെപാസിന്‍റെ ആശയം മുന്നോട്ടുവച്ചത് ബാലകൃഷ്ണ പിള്ളയാണെന്നും സ്മാരകത്തിനോടൊപ്പം അദ്ദേഹത്തിന്‍റെ പ്രതിമയും സ്ഥാപിക്കുമെന്നും ഗണേഷ് കുമാർ പറഞ്ഞു. കേരള കോൺഗ്രസ് - ബി ജില്ലാ പ്രസിഡന്‍റ് എ. ഷാജു, കൊട്ടാരക്കര നഗരസഭാ ചെയർമാൻ അഡ്വ. ഉണ്ണികൃഷ്ണ മേനോൻ തുടങ്ങിയവർ പങ്കെടുത്തു.

പുത്തൂർ ഗവ.എച്ച്എസ്എസിൽ സ്റ്റെം ക്യാമ്പ്‌

കൊട്ടാരക്കര: കേരള സർവകലാശാലയിലെ വിദ്യാഭ്യാസ വകുപ്പും സെന്‍റർ ഫോർ ലേണിംഗ് എൻജിനിയറിംഗ് ആന്‍ഡ് സസ്റ്റൈനബിലിറ്റി എജ്യുക്കേഷനും ന്യൂഡൽഹിയിലെ ഇന്ത്യൻ കൗൺസിൽ ഫോർ സോഷ്യൽ സയൻസ് റിസർച്ചിന്‍റെ സാമ്പത്തിക സഹായത്തോടെ ജിഎച്ച്എസ്എസ് പുത്തൂരിൽ ഏഴ് ദിവസത്തെ സ്റ്റെം ക്യാമ്പ് നടത്തും. "നൂതന ലിംഗ പ്രതികരണശേഷിയുള്ള സ്റ്റെം പെഡഗോഗിയിലൂടെ ശാസ്ത്ര അഭിരുചി വളർത്തി കുട്ടികളെ ശാക്തീകരിക്കുന്നതിനുള്ള നൈപുണ്യ പരിശീലനവും വിലയിരുത്തലും' എന്നതാണ് സ്റ്റെം ക്യാമ്പിന്‍റെ ഉദ്ദേശ്യം. പെൺകുട്ടികൾക്ക് മാത്രമുള്ളതാണ് ക്യാമ്പ്.കേരളത്തിലെ വിവിധ സ്കൂളുകളിൽ ക്യാമ്പുകൾ നടത്താൻ സർവകലാശാല ലക്ഷ്യമിടുന്നുണ്ട്. ജെൻഡർ റെസ്പോൺസീവ് പെഡഗോഗിയുമായി സ്റ്റെം യോജിപ്പിച്ച ഇത്തരത്തിലുള്ള ആദ്യ ക്യാമ്പാണിത്. ജിഎച്ച്എസ്എസ് പുത്തൂരിന്‍റെ സഹകരണത്തോടെയാണ് കേരളത്തിലുടനീളമുള്ള സ്റ്റെം ക്യാമ്പുകളുടെ സംസ്ഥാനതല ഉദ്ഘാടനം സംഘടിപ്പിക്കുന്നത്. കേരള സർവകലാശാലയിലെ സെന്‍റർ ഫോർ ലേണിംഗ് എൻജിനിയറിംഗ് ആൻഡ് സസ്റ്റൈനബിലിറ്റി എജ്യുക്കേഷൻ ഡയറക്ടറും വിദ്യാഭ്യാസ വകുപ്പ് അസി.പ്രഫസറുമായ ഡോ. ദിവ്യ.സി.സേനൻ ആണ് പദ്ധതിയുടെ ഡയറക്‌ടർ. ക്യാമ്പിലെ പാഠ്യപദ്ധതി, സ്റ്റെം പ്രവർത്തനങ്ങളിൽ ആരംഭിച്ച് ഒടുവിൽ റോബോട്ടിക്സ് വിദ്യാഭ്യാസത്തോടെ അവസാനിക്കുന്നു. ക്യാമ്പിന്‍റെ അവസാനത്തിൽ വിദ്യാർഥികൾ പ്രാദേശിക സന്ദർഭോചിതമായ യഥാർഥ ലോക പ്രശ്നങ്ങൾ പരിഹരിക്കുന്നതിന് റോബോട്ടുകൾ വികസിപ്പിക്കും.കേരളത്തിലുടനീളം നടക്കുന്ന ക്യാമ്പ് പരമ്പരയുടെ അവസാനത്തിൽ കാര്യവട്ടത്തെ യൂണിവേഴ്സിറ്റി കാമ്പസിൽ സ്റ്റെം കാർണിവൽ സംഘടിപ്പിക്കാനും ലക്ഷ്യമിട്ടിട്ടുണ്ട്.

തീരദേശ ജാഥയ്ക്ക് സ്വീകരണം നൽകും

കൊല്ലം: കടലവകാശം കടലിന്‍റെ മക്കൾക്ക് എന്ന മുദ്രാവാക്യം ഉയർത്തി യൂത്ത് ഫ്രണ്ട് - എം സംസ്ഥാന പ്രസിഡന്‍റ് സിറിയക് ചാഴിക്കാടൻ നയിക്കുന്ന തീരദേശ സംരക്ഷണ ജാഥയ്ക്ക് എട്ടിന് കൊല്ലത്ത് സ്വീകരണം നൽകും. ജില്ലയുടെ തീരദേശ മേഖലയായ അഴീക്കലിൽ രാവിലെ 10നാണ് സ്വീകരണം നൽകുക. തുടർന്ന് തീരദേശ മേഖലകളിലെ വിവിധ സ്വീകരണ പോയിന്‍റുകൾ സന്ദർശിച്ച് കൊല്ലം പോർട്ടിൽ ജാഥ സമാപിക്കും. കേരള കോൺഗ്രസിന്‍റെയും പോഷക സംഘടനകളുടെയും നേതൃത്വത്തിലാകും സ്വീകരണം നൽകുന്നത്. പ്രതിനിധി സമ്മേളനം പാർട്ടി ജില്ലാ പ്രസിഡന്‍റും ട്രാക്കോ കേബിൾ കോർപ റേഷൻ ചെയർമാനുമായ വഴുതാനത്ത് ബാലചന്ദ്രൻ ഉദ്ഘാടനം ചെയ്തു. യൂത്ത് ഫ്രണ്ട് ജില്ലാ പ്രസിഡന്‍റ ശ്രീരാഗ് കൃഷ്ണൻ അധ്യക്ഷത വഹിച്ചു. സംസ്ഥാന സെക്രട്ടേറിയറ്റ് അംഗങ്ങളായ ആദിക്കാട് മനോജ്, ഇഖ്ബാൽ കുട്ടി, ജോസ് മത്തായി, യൂത്ത്ഫ്രണ്ട് സംസ്ഥാന ജനറൽ സെക്രട്ടറി കെ.വൈ.സുനറ്റ്, പാർട്ടി നേതാക്കളായ വാളത്തുംഗൽ വിനോദ്, അബ്ദുൾ സലാം അൽഹാന, തഴവ മുജീബ്, ശാന്താലയം സുരേഷ്, എ.ജി.അനിത, യൂത്ത് ഫ്രണ്ട് നേതാക്കളായ ജോബിൻ എലിക്കാട്ടൂർ, ഷബീർ ഷാ, സജീർ കുന്നത്തൂർ, ബൈജു പതാരം എന്നിവർ പ്രസംഗിച്ചു.

കയർ ഭൂവസ്ത്ര നിർമാണം ഉടൻ ആരംഭിക്കാൻ സർക്കാർ വേണ്ട നടപടി സ്വീകരിക്കണം: സിഐടിയു

ചവറ : ചവറയിൽ പ്രവർത്തിക്കുന്ന മാറ്റ്സ് ആന്‍ഡ് മാറ്റിംഗ്സ് സംഘത്തിൽ കയർ ഭൂവസ്ത്ര നിർമാണം ഉടൻ ആരംഭിക്കാൻ സർക്കാർ വേണ്ട നടപടി സ്വീകരിക്കണമെന്ന്കൊല്ലം ജില്ലാ കയർ വർക്കേഴ്സ് യൂണിയൻ സിഐടിയു ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. ഇടപ്പള്ളികോട്ട വലിയം ബിഎഡ് കോളജിൽ ആനത്തലവട്ടം ആനന്ദൻ നഗറിൽ നടന്ന സമ്മേളനം സംസ്ഥാന കയർ വർക്കേഴ്സ് സെന്‍റർ സിഐടിയു ജനറൽ സെക്രട്ടറി കെ.കെ.ഗണേശൻ ഉദ്ഘാടനം ചെയ്തു. യൂണിയൻ ജില്ലാ പ്രസിഡന്‍റ് കെ.പി.കുറുപ്പ് അധ്യക്ഷനായി. സമ്മേളനത്തിൽ കയർ തൊഴിലാളികൾക്ക് കാലോചിതമായി കൂലി വർധിപ്പിക്കുക, കയർ സംഘത്തിൽ നിന്നും വിരമിച്ച തൊഴിലാളികൾക്ക് വിരമിക്കൽ ആനുകൂല്യം വിതരണം ചെയ്യുന്നതിലെ കാലതാമസം ഒഴിവാക്കുക, കൂലി വർധനവ് ആവശ്യപ്പെട്ട് എല്ലാ കയർ സർക്കിൾ ഓഫീസിനു മുന്നിലേക്കും 15ന് കയർ വർക്കേഴ്സ് യൂണിയൻ നടത്തുന്ന മാർച്ച് വിജയിപ്പിക്കുക, 20 ന് നടക്കുന്ന ദേശീയ പണിമുടക്ക് വിജയിപ്പിക്കുക തുടങ്ങിയ പ്രമേയങ്ങളും സമ്മേളനം അംഗീകരിച്ചു. സമ്മേളനത്തിൽ സിഐടിയു ജില്ലാ സെക്രട്ടറി എസ്.ജയമോഹൻ, പ്രസിഡന്‍റ് ബി.തുളസീധരകുറുപ്പ്, മത്സ്യഫെഡ് ചെയർമാൻ ടി.മനോഹരൻ, കയർ സെന്‍റർ ട്രഷറർ കെ.കരുണാകരൻ, സ്വാഗതസംഘം ചെയർമാൻ ആർ.രവീന്ദ്രൻ, യൂണിയൻ ജില്ലാ വൈസ് പ്രസിഡന്‍റുമാരായ ആർ.ഗോപി, വി.അശോകൻ പിള്ള,യൂണിയൻ ജില്ലാ സെക്രട്ടറി ഡി.സുരേഷ് കുമാർ, ട്രഷറർ ബി.രവികുമാർ,ആർ.സുരേന്ദ്രൻ പിള്ള, കെ.വി.ദിലീപ് കുമാർ എന്നിവർ പ്രസംഗിച്ചു. സമ്മേളനത്തിൽ യൂണിയന്‍റെ മുതിർന്ന നേതാക്കളായ എസ്.ശശിവർണൻ, കൃഷ്ണൻകുട്ടി പിള്ള എന്നിവരെ ആദരിച്ചു. ജില്ലാ ഭാരവാഹികളായി എം .ശോഭന -പ്രസിഡന്‍റ് , എസ്.എൽ.സജികുമാർ,കെ.പി.കുറുപ്പ്, ആർ.ഗോപി,ഡി.അരുന്ധതി,ആർ.സുലേഖ, സോമൻ പിള്ള, കെ .വി.ദിലീപ് കുമാർ, ബീനാറാണി- വൈസ് പ്രസിഡന്‍റുമാർ,ഡി.സുരേഷ് കുമാർ - സെക്രട്ടറി, ടി.എസ്.ഗിരി, ബി.അശോക് കുമാർ, ജി.അനിൽകുമാർ, സുധർമ, ഗീത, സിന്ധു മോൾ-ജോ. സെക്രട്ടറിമാർ, ബി. രവികുമാർ - ട്രഷറർ എന്നിവരെ തെരഞ്ഞെടുത്തു.

വന്യജീവി ആക്രമണത്തില്‍ മരിച്ചവരുടെ ആശ്രിതരെ സര്‍ക്കാര്‍ കബളിപ്പിക്കുന്നു: കര്‍ഷക കോണ്‍ഗ്രസ്

അഞ്ചല്‍ : വന്യജീവി ആക്രമണത്തിൽ മരണപ്പെടുന്നവർക്ക് കേന്ദ്ര സംസ്ഥാന സർക്കാരുകൾ 24 ലക്ഷം രൂപ നഷ്‌ടപരിഹാരം നൽകേണ്ടതാണെന്ന നിയമ വ്യവസ്ഥയുള്ളപ്പോൾ വെറും നാല് ലക്ഷം രൂപ മാത്രം നൽകി മരണപ്പെടുന്നവരുടെ ആശ്രിതരെ സർക്കാരുകൾ കബളിപ്പിക്കുകയാണെന്ന് കർഷക കോൺഗ്രസ് സംസ്ഥാന ജനറൽ സെക്രട്ടറി വിളക്കുപാറ ദാനിയേൽ പറഞ്ഞു. വന്യജീവി ആക്രമണത്തിൽ ജീവൻ നഷ്‌ടപ്പെടുന്നവർക്ക് 1980-ലെ വനം നിയമമനുസരിച്ച് സംസ്ഥാന സർക്കാർ 10 ലക്ഷവും വന്യമൃഗസങ്കേതങ്ങളുടെ സമഗ്ര വികസന പദ്ധതിക്ക് കീഴിൽ കേന്ദ്ര സർക്കാർ 10 ലക്ഷവും ദുരന്തനിവാരണ നിയമ പരിധിയിൽ വരുന്നതിനാൽ മരണപ്പെടുന്നവരുടെ ആശ്രിതർക്കും പരുക്കേറ്റവർക്കും നാലു ലക്ഷം രൂപ ഉൾപ്പെടെ 24 ലക്ഷം രൂപ സർക്കാർ മുൻകാല പ്രാബല്യത്തോടെ മരിച്ചവരുടെ ആശ്രിതർക്ക് നൽകണമെന്നും അദ്ദേഹം സർക്കാരിനോട് ആവശ്യപ്പെട്ടു. ഇടിമിന്നലേറ്റ് മരണപ്പെട്ടവർക്കും ഈ വ്യവസ്ഥ ബാധകമാക്കാൻ ആവശ്യമായ നിയമ ഭേദഗതി വരുത്താൻ സർക്കാരുകൾ തയാറാവണമെന്നും തടിക്കാട് ഇടിമിന്നലേറ്റ് മരിച്ച കർഷകന്‍റെ ആശ്രിതർക്ക് എത്രയും പെട്ടെന്ന് നഷ്ടപരിഹാരം നൽകണമെന്നും അദ്ദേഹം ആവശ്യപ്പെട്ടു. കർഷക കോൺഗ്രസ് നിയോജക മണ്ഡലം പ്രസിഡന്‍റ് പ്രസാദ് കോടിയാട്ട്, ജില്ലാ ജനറൽ സെക്രട്ടറിമാരായ അഞ്ചൽ ബിനോയ്, നെടുങ്കയം നാസർ, തെന്മല രഘുനാഥ് തുടങ്ങിയവര്‍ പ്രസംഗിച്ചു.

ഉദ്യോഗസ്ഥരുടെ ഒത്താശ: കൊല്ലം കോർപറേഷനിൽ അനധികൃത നിർമാണങ്ങൾ പൊടിപൊടിക്കുന്നു

കൊല്ലം: കൊല്ലം കോർപറേഷൻ പരിധിയിലെ വടക്കേവിള, ഇരവിപുരം സോണൽ ഓഫീസുകൾക്ക് കീഴിൽ വ്യാപകമായ അനധികൃത നിർമാണ പ്രവർത്തികൾ നടക്കുന്നതായി പരാതി. ബിൽഡിംഗ് ലൈസൻസി,ബിൽഡിംഗ് ഇൻസ്‌പെക്ടർ, ഓവർസിയർ അടക്കമുള്ളവരാണ് ചട്ടങ്ങൾ മറികടന്നു നടക്കുന്ന കെട്ടിട നിർമാണത്തിന് സഹായങ്ങൾ ചെയ്തു കൊടുക്കുന്നത്. ലൈസൻസി ഒരു പ്ലാൻ നൽകി നിർമാണത്തിന് പെർമിറ്റ് വാങ്ങിയെടുത്ത ശേഷം പ്ലാനിൽ മാറ്റം വരുത്തി കെട്ടിടം നിർമിക്കാൻ ഉദ്യോഗസ്ഥ ലോബി കണ്ണടച്ചു പോക്കറ്റ് വീർപ്പിക്കുകയാണ്. കോർപറേഷനിലെയും സോണൽ ഓഫീസുകളിലെയും രേഖകളിൽ ആവശ്യമായ സെറ്റ് ബാക്കുകൾ നൽകി അപ്രൂവൽ വാങ്ങിയ പ്ലാനുകൾ നിർമാണം നടക്കുമ്പോൾ മാറ്റി മറിക്കപ്പെടുകയാണ്. തങ്ങൾക്ക് ചോദിച്ചാൽ ആവശ്യത്തിലധികം കിട്ടുമെന്നതിനാൽ ഉദ്യോഗസ്ഥർ ഈ ക്രമക്കേടിന് കൂട്ട് നിൽക്കുകയാണ്. മതിയായ അനുമതികളില്ലാതെയും നിലവിലുള്ള കെട്ടിട നിർമാണ ചട്ടങ്ങൾ കാറ്റിൽ പറത്തിയുമാണ് പലയിടത്തും നിർമാണങ്ങൾ പുരോഗമിക്കുന്നത്. ചട്ടങ്ങൾ ലംഘിച്ച് കൊണ്ടുള്ള ഈ നിർമാണങ്ങൾ സമീപവാസികൾക്കും പൊതുജനങ്ങൾക്കും ഒരുപോലെ ബുദ്ധിമുട്ടുണ്ടാക്കുന്നുണ്ട്. റോഡ് അരികിൽ നടക്കുന്ന അനധികൃത നിർമാണം സംബന്ധിച്ച് വടക്കേവിള സ്വദേശി സനീഷ് പരാതി നൽകിയിട്ടുണ്ട്. ഈ വിഷയത്തിൽ കോർപറേഷൻ അധികൃതർ ഇടപെടണമെന്നും അനധികൃത നിർമാണങ്ങൾക്കെതിരേ ശക്തമായ നടപടി സ്വീകരിക്കണമെന്നും ഉള്ള ആവശ്യം ശക്തമായിരിക്കുകയാണ്.

മുക്ത്യോദയം പദ്ധതിയ്ക്ക് തുടക്കമായി

കൊല്ലം: ലഹരിക്കെതിരായി കൊല്ലം സിറ്റി പോലീസ്, വിവിധ വകുപ്പുകളുടെ സഹ കരണത്തോടെ ആവിഷ്കരിച്ചിരിക്കുന്ന മുക്ത്യോദയം സംയുക്ത കര്‍മപദ്ധതിയുടെ കൗണ്‍സിലിംഗ് ഹെല്‍പ്പ് ഡെസ്ക്കിന്‍റെ ഉദ്ഘാടനം എം.മുകേഷ് എംഎല്‍എനിർവഹിച്ചു. കരിയര്‍ ഗൈഡന്‍സ് ക്ലാസുകള്‍, മിനി റഫറന്‍സ് ലൈബ്രറി എന്നിവയുടെ ഉദ്ഘാടനം മേയര്‍ ഹണി ബഞ്ചമിനും നിര്‍വഹിച്ചു. കൊല്ലം പുള്ളിക്കട നഗറില്‍ ചേര്‍ന്ന വിപുലമായ പ്രവര്‍ത്തനോദ്ഘാടനത്തില്‍ കൊല്ലം സിറ്റി പോലീസ് കമ്മീഷണര്‍ കിരണ്‍ നാരായണന്‍ അധ്യക്ഷത വഹിച്ചു. യോഗത്തില്‍ ജില്ലാ സബ് കളക്ടര്‍ നിഷാന്ത് സിഹാറ മുഖ്യ പ്രഭാഷണം നടത്തി. സി.ഡബ്ലു.സി ചെയര്‍മാര്‍ സനില്‍ വെള്ളിമണ്‍, ശിശുക്ഷേമ സമിതി ജില്ലാ സെക്രട്ടറി അഡ്വ. ഡി.ഷൈന്‍ ദേവ് , ജില്ലാ മെന്‍റല്‍ ഹെല്‍ത്ത് പ്രോജക്റ്റ് നോഡല്‍ ഓഫീസര്‍ ഡോ.നമിതാ നസീര്‍, ഡെപ്യൂട്ടി എക്സൈസ് കമ്മീഷണര്‍ നൗഷാദ്, കരുനാഗപ്പള്ളി എഎസ്പി അഞ്ജലി ഭാവന, ജില്ലാ സ്പെഷ്യല്‍ ബ്രാഞ്ച് എസിപി പ്രതീപ്കുമാര്‍ ,കൊല്ലം സിറ്റി അഡീഷണല്‍ പോലീസ് സൂപ്രണ്ട് എൻ. ജീജി, കൊല്ലം എസിപി ഷെരീഫ്എന്നിവര്‍ പ്രസംഗിച്ചു. പദ്ധതിയുടെ ഭാഗമായി സഫയര്‍ അക്കാഡമിയില്‍ നിന്നുള്ള വിധഗ്ദര്‍ കരിയര്‍ ഗൈഡന്‍സ് ക്ലാസുകള്‍ നയിച്ചു. ക്ലാസില്‍ നിന്നും തെരഞ്ഞെടുത്ത കുട്ടികള്‍ക്കുള്ള തുടര്‍ സൗജന്യ പരിശീലനം സഫയര്‍ അക്കാഡമി നിര്‍വഹിക്കും. പോലീസ് ഊദ്യോഗസ്ഥരില്‍ നിന്നും സ്റ്റുഡന്‍റ് പോലീസ് കേഡറ്റുകളില്‍ നിന്നും മറ്റ് സന്നദ്ധ പ്രവര്‍ത്തകരില്‍ നിന്നും സമാഹരിച്ച പുസ്തകങ്ങള്‍ ഉപയോഗിച്ചാണ് മിനി ലൈബ്രറി സജ്ജമാക്കിയിട്ടുള്ളത്. ഡിസിആര്‍സി കൗണ്‍സിലര്‍മാരായ ഡോ. പാര്‍വതി, ക്ലോഡറ്റ് ലാംബര്‍ട്ട് എന്നിവര്‍ കൗണ്‍സിലിംഗ് ഹെല്‍പ്പ് ഡെസ്ക്കിന്‍റെ പ്രവര്‍ത്തനങ്ങള്‍ വിശദീകരിച്ചു. കൊല്ലം സിറ്റി പരിധിയിലെ വിവിധ ദുര്‍ബല മേഖലകളില്‍ കൗണ്‍സിലിങ്ങ് ഹെല്‍പ് ഡെസ്ക്ക് ആരംഭിക്കുന്നതിലേക്കായി നൂറോളം കൗണ്‍സിലര്‍മാര്‍ക്കുള്ള മാസ്റ്റര്‍ ട്രെയിനിംഗ് 15 ന് ജില്ലാ മെന്‍റല്‍ ഹെല്‍ത്ത് വിഭാഗത്തിന്‍റെ സഹകരണത്തോടെ നടത്തുവാന്‍ തീരുമാനിച്ചു. പരിശീലനം കഴിയുന്ന മുറക്ക് കൊല്ലം സിറ്റി പരിധിയിലെ അറുപതോളം ദുര്‍ബല മേഖലകളില്‍ കൂടി കൗണ്‍സിലിങ്ങ് ഹെല്‍പ് ഡെസ്ക്കുകള്‍ ആരംഭിക്കും.

നീണ്ടകര താലൂക്ക് ആശുപത്രിയുടെ നിർമാണം ഉടൻ പൂർത്തിയാക്കണം: ആശുപത്രി സംരക്ഷണ സമിതി

ചവറ : നീണ്ടകര താലൂക്ക് ആശുപത്രിയുടെ നിർമാണ പ്രവർത്തനം ഉടൻ പൂർത്തിയാക്കണമെന്ന് ആശുപത്രി സംരക്ഷണ സമിതി യോഗം ആവശ്യപ്പെട്ടു. 2019 കിഎഫ്ബി ഫണ്ട് ഉപയോഗിച്ച് ഹൗസിംഗ് ബോർഡ് ഏറ്റെടുത്ത ആശുപത്രിയുടെ നിർമാണ പ്രവർത്തനം ഇഴഞ്ഞു നീങ്ങുകയാണ്.നിലവിലെ നിർമാണങ്ങൾ മുഴുവൻ സമയബന്ധിതമായി പൂർത്തിയാക്കാത്തതിനാൽ ഭാഗികമായി നശിച്ച നിലയിലാണ് .മാത്രമല്ല ഈ നിർമാണ പ്രവർത്തനത്തിന്‍റെ പേരിൽ ആശുപത്രിയുടെ പ്രവർത്തനങ്ങൾ പോലും താറുമാറായി കൊണ്ട് ഇരിക്കുകയാണ്. സാധാരണക്കാരുടെ ഏക ആശ്രയമായ ആശുപത്രിയിൽ എക്സ് റേ, ഇസിജി ലബോറട്ടറി, തുടങ്ങിയവയുടെ പ്രവർത്തനം ഭാഗികമായിട്ട് മാത്രമാണ് നടക്കുന്നത്. ആവശ്യമായ സൗകര്യങ്ങൾ ഇല്ല എന്ന് പറഞ്ഞ് നിസാര രോഗങ്ങളുമായി എത്തുന്ന വരെ പോലും ജില്ലാ ആശുപത്രിയിലേക്ക് റഫർ ചെയ്യുകയാണ് . അടിയന്തരമായി നിർമാണംപൂർത്തിയാക്കി ആശുപത്രിയുടെ പ്രവർത്തനം കാര്യക്ഷമമാക്കണമെന്നും അല്ലാത്തപക്ഷം ശക്തമായ സമര പരിപാടിയുമായി മുന്നോട്ടു പോകാൻ യോഗത്തിൽ തീരുമാനിച്ചതായി നീണ്ടകര താലൂക്ക് ആശുപത്രി സംരക്ഷണ ചാരിറ്റബിൾ സൊസൈറ്റി ഭാരവാഹികളായ രാജീവൻപിള്ള, ഷാൻ മുണ്ടകത്തിൽ, അഭിലാഷ്, കൊല്ലംശേഖർ, ഉമ, പ്രിയ ഷിനു, ഷൈൻ എന്നിവർ അറിയിച്ചു.

കെഎസ്ആർടിസിക്ക് 10 റാപ്പിഡ് റിപ്പയർ ടീം പ്രവർത്തന സജ്ജം

കൊട്ടാരക്കര: കെഎസ്ആർടിസി ബസുകൾ ബ്രേക്ക്ഡൗൺ ആകുന്ന സാഹചര്യങ്ങളിൽ യാത്രക്കാരുടെ ബുദ്ധിമുട്ടുകൾ പരമാവധി ലഘൂകരിക്കാനും ബസുകൾ തുടർയാത്രയ്ക്ക് സജ്ജമാക്കാനുമായി റാപ്പിഡ് റിപ്പയർ ടീം പ്രവർത്തന സജ്ജമായി. 10 മിനി മൊബൈൽ വർക്ക്‌ഷോപ് വാനുകളാണ് ഇതിനായി തയാറാക്കിയിരിക്കുന്നത്. ഇതിന്‍റെ സംസ്ഥാനതല ഉദ്ഘാടനം കൊട്ടാരക്കര കെഎസ്ആർടിസി ഡിപ്പോയിൽ മന്ത്രി കെ.എൻ. ബാലഗോപാലും മന്ത്രി കെ. ബി. ഗണേഷ് കുമാറും സംയുക്തമായി നിർവഹിച്ചു. മുനിസിപ്പൽ ചെയർമാൻ കെ. ഉണ്ണികൃഷ്ണമേനോൻ ചടങ്ങിൽ അധ്യക്ഷനായിരുന്നു. കെഎസ്ആർടിസി മാനേജിംഗ് ഡയറക്്‌ടർ പി.എസ്. പ്രമോദ് ശങ്കർ, എക്സിക്യൂട്ടിവ് ഡയറക്ടർമാരായ എ.ഡേവിഡ്, പ്രദീപ് കുമാർ, ഫിനാൻസ് മാനേജർ ഷാജി, ചീഫ് ട്രാഫിക് ഓഫീസർ റോയ് ജേക്കബ്, അശോക് ലെയ്‌ലാൻഡ് റീജണൽ മാനേജർ മുഹമ്മദ് ഏലിയാസ്, ഏരിയ മാനേജർ ജേക്കബ് തോമസ്, കൊട്ടാരക്കര അസിസ്റ്റന്‍റ് ട്രാൻസ്പോർട്ട് ഓഫീസർ ബി.അജിത്കുമാർ എന്നിവർ പ്രസംഗിച്ചു. പാറശാല, തിരുവനന്തപുരം സിറ്റി, കൊട്ടാരക്കര, പത്തനാപുരം, എറണാകുളം, മൂന്നാർ, പാലക്കാട്, താമരശേരി, സുൽത്താൻ ബത്തേരി, കാസർകോട് ഡിപ്പോകൾക്കാണ് മിനി വാനുകൾ അനുവദിച്ചത്. ഈ വാഹനങ്ങളുടെ താക്കോലും വർക് ഷോപ് ടീമിനുള്ള മൊബൈൽ ഫോണും മന്ത്രിമാർ കൈമാറി. കെഎസ്ആർടിസിയുടെ കേന്ദ്രീകൃത ഇൻവെന്‍ററി സംവിധാനം കാര്യക്ഷമമാക്കുന്നതിന്‍റെ ഭാഗമായി രൂപം നൽകിയ ഇ സുതാര്യം സോഫ്റ്റ്‌വെയറിന്‍റെയും യാത്രക്കാരുടെ സുരക്ഷ ഉറപ്പാക്കുന്നതിനായി കെഎസ്ആർടിസി സംസ്ഥാനത്തെ എല്ലാ ബസ് സ്റ്റേഷനുകളിലും ബ്ലൈൻഡ് സ്പോട്ടുകളായി സ്ഥാപിക്കുന്ന സമഗ്ര സി സിടിവി നിരീക്ഷണസംവിധാനങ്ങളുടെയും ഉദ്ഘാടനവും മന്ത്രിമാരായ കെ.എൻ.ബാലഗോപാലും കെ.ബി.ഗണേഷ് കുമാറും നിർവഹിച്ചു.

പഴയേരൂര്‍ സെന്‍റ് ജോര്‍ജ് മലങ്കര സുറിയാനി കത്തോലിക്കാ പള്ളിയിൽ റാസയും ചെമ്പെടുപ്പും നടന്നു

അഞ്ചല്‍ : പഴയേരൂര്‍ സെന്‍റ് ജോര്‍ജ് മലങ്കര സുറിയാനി കത്തോലിക്കാ പള്ളിയിലെ വിശുദ്ധ ഗീവര്‍ഗീസ് സഹാദയുടെ തിരുനാളിനോട് അനുബന്ധിച്ചുള്ള റാസയും ചെമ്പെടുപ്പും ഭക്തസാന്ദ്രമായ അന്തരീക്ഷത്തില്‍ നടന്നു. 11-ാംമൈല്‍ ഹോളിഫാമിലി പള്ളിയില്‍ നിന്നും രാത്രി ഏഴോടെ ആരംഭിച്ച റാസയില്‍ നൂറുകണക്കിന് വിശ്വാസികള്‍ പങ്കെടുത്തു. റാസ രാത്രി 8.30ഓടെ ഇടവക പള്ളിയില്‍ സമാപിച്ചു. ഇന്നലെ നടന്ന ആഘോഷയമായ വിശുദ്ധകുര്‍ബാനയ്ക്കും കുട്ടികളുടെ പ്രഥമ ദിവ്യകാരുണ്യ സ്വീകരണത്തിനും തിരുവനന്തപുരം മേജര്‍ അതിരൂപത വികാരി ജനറാൾ മോൺ.ഡോ.വര്‍ക്കി ആറ്റുപുറത്ത് കോര്‍ എപ്പിസ്കോപ്പ കാര്‍മികത്വം വഹിച്ചു. ഇടവക വികാരി ഫാ. ഷോജി വെച്ചൂര്‍കരോട്ട്, ട്രസ്റ്റി സാറാമ ചാക്കോ വരമണ്‍, സെക്രട്ടറി തോമസ് മൂഴിക്കല്‍ എന്നിവര്‍ നേതൃത്വം നല്‍കി. നേര്‍ച്ച വിളമ്പിനു ശേഷം നടന്ന കൊടിയിറക്കോടെ ഈവര്‍ഷത്തെ തിരുനാള്‍ ആഘോഷത്തിന് സമാപനമായി.

കുളത്തൂപ്പുഴ സെന്‍റ് ജോർജ് ഓർത്തഡോക്സ് പള്ളിയിൽ വിശുദ്ധ ഗീവർഗീസിന്‍റെ ഓർമ പെരുന്നാളിന് കൊടിയേറി

കുളത്തൂപ്പുഴ : കുളത്തൂപ്പുഴ സെന്‍റ് ജോർജ് ഓർത്തഡോക്സ് പള്ളിയിൽ വിശുദ്ധ ഗീവർഗീസിന്‍റെ ഓർമ പെരുന്നാളിന് കഴിഞ്ഞദിവസം ഇടവക വികാരി ഫാ. മാത്യു നൈനാൻ കോടിയേറ്റി. 10 വരെ നീണ്ടുനിൽക്കുന്ന പെരുന്നാൾ ആഘോഷങ്ങൾക്ക് തുടക്കം കുറിച്ചു. കുളത്തൂപ്പുഴ സിലോൺ ജംഗ്ഷനിലെ കുരിശടിയിൽ സന്ധ്യാനമസ്കാരത്തെ തുടർന്ന്. ഫാ. വർഗീസ് ടി.വർഗീസ് വചന ശുശ്രൂഷ നിർവഹിച്ചു. ചൊവ്വ, ബുധൻ, വ്യാഴം ദിവസങ്ങളിൽ വൈകുന്നേരം ആറിന് പള്ളിയിൽ സന്ധ്യാനമസ്കാരത്തെ തുടർന്ന് നടക്കുന്ന കൺവൻഷൻ യോഗങ്ങളിൽ ഇടവക ഗായക സംഘം ഗാനങ്ങൾ ആലപിക്കും. തുടർന്ന് ഫാ.സീ.ഡി.രാജൻ കുണ്ടറ, ഫാ. ടൈറ്റസ് ജോൺ തലവൂർ, ഫാ.മാത്യു ഏബ്രഹാം തലവൂർ എന്നിവർ വചന ശുശ്രൂഷ നിർവഹിക്കും. തുടർന്ന് സമർപ്പണ പ്രാർഥനയോടുകൂടി കൺവൻഷൻ സമാപിക്കും. ഒന്പതിന് വൈകുന്നേരം 5.30ന് നെല്ലിമൂട് കുരിശടിയിൽ നടക്കുന്ന സന്ധ്യാനമസ്കാരത്തിന് ശേഷം ഭക്തിനിർഭരമായ റാസ കുളത്തൂപ്പുഴ ജംഗ്ഷൻ വഴി പള്ളിയിൽ എത്തിച്ചേരും. ധൂമാർപ്പണത്തിനും ആശിർവാദത്തിനും ശേഷം ആകാശ ദീപക്കാഴ്ച നടക്കും. 10ന് രാവിലെ ഏഴിന് ആരംഭിക്കുന്ന പ്രഭാത നമസ്കാരത്തെ തുടർന്ന് നടക്കുന്ന വിശുദ്ധ മൂന്നിന്മേൽ കുർബാനയ്ക്ക് തിരുവിതാങ്കോട് അരപ്പള്ളി മാനേജർ ബർശ്ലീബി റമ്പാൻ കോർഎപ്പിസ്കോപ്പ മുഖ്യകാർമികത്വം വഹിക്കും. തുടർന്ന് പള്ളിക്ക് ചുറ്റുമുള്ള പ്രദക്ഷിണത്തിനും ആശിർവാദത്തിനും നേർച്ചവിളമ്പിനും ശേഷം കൊടിയിറക്കുന്നതോടുകൂടി ഈ വർഷത്തെ പെരുന്നാൾ ആഘോഷങ്ങൾ സമാപിക്കും. ഇടവക വികാരി.ഫാ.മാത്യു നൈനാൻ, കൈസ്ഥാനി ഷിബു വർഗീസ്, സെക്രട്ടറി റോയ് ജോസഫ്, കൺവീനേഴ്സ് വില്യം ജോർജ്, മത്തായി മാത്യു എന്നിവർ നേതൃത്വം നൽകും.

ആയൂർ സെന്‍റ് ജോർജ് ലാറ്റിൻ കത്തോലിക്കാ ഫൊറോന പള്ളിയിൽ ഇടവക തിരുനാളിന് കൊടിയിറങ്ങി

ആയൂർ : സെന്‍റ് ജോർജ് ലാറ്റിൻ കത്തോലിക്കാ ഫൊറോന പള്ളിയിൽ ഇടവക തിരുനാൾ ഒന്നുമുതൽ നാലുവരെ നടന്നു. ഒന്നിന് കുളത്തുപ്പുഴ സെന്‍റ് മേരീസ് പള്ളി വികാരി ഫാ. ജീസൻ തണ്ണിക്കോട്ട് ഒഎസ്ജെ തിരുനാൾ സമാരംഭ ദിവ്യബലി അർപ്പിച്ചു. വചന പ്രഘോഷണം ഫാ. ജോയ് ഡി.കാനായിൽ (സെന്‍റ് ജോൺസ് ചർച്ച്, ചണ്ണപ്പേട്ട ) നടത്തി. പ്രസിദേന്തിവാഴിക്കലും പ്രാർഥനയും ഫാ .ജോണി ജാക്സൺ ഒഎസ്ഡി,ഫാ.സണ്ണി തോമസ് നടത്തി. രണ്ടിന് ആയൂർ ക്രിസ്തുരാജ് പള്ളി ഫൊറോന വികാരി ഫാ.ഇമ്മാനുവേൽ നെല്ലുവേലിൽ സീറോ മലബാർ റീത്തിൽ ദിവ്യബലി അർപ്പിച്ചു. മൂന്നിന് ഫാ.ജോൺ അരീക്കൽ (ആയൂർ വൈദിക ജില്ല വികാരി, സെന്‍റ് മേരീസ് മലങ്കര കാത്തലിക് ചർച്ച്, ആയൂർ ) സീറോ മലങ്കര റീത്തിൽ ദിവ്യബലി അർപ്പിച്ചു. നാലിന് ഫാ.ഡോ.ക്രിസ്റ്റി ജോസഫ് (പിആർഒ പുനലൂർ രൂപത, ഇടവക വികാരി പാണ്ടിതിട്ട ദിവ്യരക്ഷക പള്ളി) ആഘോഷമായ തിരുനാൾ ദിവ്യബലി അർപ്പിച്ചു. ആയൂർ ഫൊറോനയിലെ എല്ലാ വൈദികരും സഹകാർമികത്വം നൽകി. വചന പ്രഘോഷണം മോൺ.ജോസഫ് റോയി ഒഎഫ്എം (സുപ്പീരിയർ, കപ്പുച്ചിൻ ആശ്രമം ആനപുഴയ്ക്കൽ) നടത്തി. തിരുനാൾ പ്രദക്ഷിണത്തിന് ഫാ. സണ്ണി തോമസ് തിരുസ്വരൂപം ആശീർവദിക്കൽ നിർവഹിച്ചു.ഇടവക വികാരി ഫാ. ജസ്റ്റിൻ ലോറൻസ് തിരുനാൾ കൊടിയിറക്കി.

എംസിഎ ആയൂർ വൈദിക ജില്ലയുടെ അൽമായ ദിനാഘോഷ പരിപാടികൾക്ക് തുടക്കമായി

ആയൂർ : മലങ്കര കാത്തലിക് അസോസിയേഷൻ ആയൂർ വൈദിക ജില്ലാ അൽമായ ദിനാഘോഷ പരിപാടികളുടെ ജില്ലാതല ഉദ്ഘാടനം നടത്തി. സെന്‍റ്മേരീസ് മലങ്കര കത്തോലിക്കാ പള്ളിയിൽ എംസിഎ ആയൂർ ജില്ല വൈദിക ഉപദേഷ്‌ടാവ് ഫാ. അരുൺ ഏറത്ത് പതാക ഉയർത്തി. ആയൂർ വൈദിക ജില്ലാ വികാരി ഫാ.ജോൺ അരീക്കൽ സന്ദേശം നൽകി. ജില്ലാ പ്രസിഡന്‍റ് ജേക്കബ് കളപ്പുരയ്ക്കൽ എംസിഎ പ്രതിജ്ഞ ചൊല്ലി കൊടുത്തു. ജില്ലാ ജനറൽ സെക്രട്ടറി രാജീവ് കോശി, ട്രഷറർ ഐസക്ക് ഇളമാട്, മേജർ അതിരൂപത വൈസ് പ്രസിഡന്‍റ് പോൾ രാജ് പൂയപ്പള്ളി, യൂണിറ്റ് പ്രസിഡന്‍റ് ലാലു ശങ്കരവേലിൽ, യൂണിറ്റ് സെക്രട്ടറി ലാലു വർഗീസ്,യൂണിറ്റ് ട്രഷറർ ജോർജ്കുട്ടി പുളിമൂട്ടിൽ എന്നിവർ പ്രസംഗിച്ചു.

പ്രവാസി കോൺഗ്രസ് കൺവൻഷൻ

കൊട്ടാരക്കര :കേരള പ്രദേശ് പ്രവാസി കോൺഗ്രസ്‌ സംഘടിപ്പിച്ച ചടയമംഗലം, ചിതറ ബ്ലോക്ക്‌ സംയുക്ത കൺവൻഷൻ കടയ്ക്കൽ കോൺഗ്രസ്‌ ഭവനിൽ വച്ച് നടന്നു. കെപിസിസി ജനറൽ സെക്രട്ടറി എം.എം.നസീർ ഉദ്ഘാടനം ചെയ്തു. കേരള പ്രദേശ് പ്രവാസി കോൺഗ്രസ്‌ കൊല്ലം ജില്ലാ പ്രസിഡന്‍റ് കുമ്മിൽ സാലി ആമുഖ പ്രസംഗം നടത്തി. പ്രവാസി കോൺഗ്രസ്‌ ചടയമംഗലം ബ്ലോക്ക്‌ പ്രസിഡന്‍റ് ഇമാംഷാ കടയ്ക്കൽ അധ്യക്ഷത വഹിച്ചു. പ്രവാസി കോൺഗ്രസ്‌ ചിതറ ബ്ലോക്ക്‌ പ്രസിഡന്‍റ് അനിൽ പൊയ്കവിള കോൺഗ്രസ്‌ സംസ്ഥാന കമ്മിറ്റി അംഗം ടി.വി.സലാഹുദീൻ,കോൺഗ്രസ് ചടയമംഗലം ബ്ലോക്ക്‌ പ്രസിഡന്‍റ് പി.ആർ.സന്തോഷ്‌, ഡിസിസി ജനറൽ സെക്രട്ടറി ചിതറ മുരളി, ജി. മോഹനൻ, ചന്ദ്രബോസ്, അലയമൺ സഹകരണ ബാങ്ക് പ്രസിഡന്‍റ് ചാർളി, കോൺഗ്രസ് മണ്ഡലം പ്രസിഡന്‍റ് അനിൽ ആരാമം, ഷാനവാസ്‌ കുമ്മിൽ, കുമ്മിൽ പഞ്ചായത്ത്‌ വാർഡ് മെമ്പർ നിഫാൽ, മുനീർ കുമ്മിൽ, കടയ്ക്കൽ താജുദീൻ,,കേരള പ്രദേശ് പ്രവാസി കോൺഗ്രസ്‌ മണ്ഡലം പ്രസിഡന്‍റ് നദിർഷ ഓയൂർ, റഹീം വെളിനല്ലൂർ,സജീർ കുമ്മിൽ, പ്രവാസി കോൺഗ്രസ്‌ കൊല്ലം ജില്ലാ സെക്രട്ടറി ബാബു തുടങ്ങിയവർ പ്രസംഗിച്ചു.

കുളങ്ങര ക്ഷേത്രത്തിന്‍റെ പുനർനിർമാണം ; ശിലാസ്ഥാപനം എട്ടിന്

കൊല്ലം: വടക്കേവിള കുളങ്ങര പാണ്ഡ്യാംമൂട് ശ്രീ ദുർഗാദേവി ക്ഷേത്രത്തിലെ പുനർനിർമാണ പ്രവർത്തനങ്ങൾക്കു തുടക്കമാകുകയാണ്. പുനർനിർമാണത്തിന്‍റെ ഭാഗമായുള്ള ശിലാസ്ഥാപനം മേയ് എട്ടിന് ഉച്ചയ്ക്ക് 12നും 12.45ന് മധ്യേ നടക്കും. ശിലാസ്ഥാപനത്തിനു മുന്നോടിയായുള്ള കുറ്റിയടിക്കൽ ചടങ്ങ് നാളെ രാവിലെ 7.10നും 8.21നും മധ്യേ നടക്കും. ക്ഷേത്രം തന്ത്രി മങ്ങാട് കമ്മാംചേരി മഠത്തിൽ സുബ്രഹ്മണ്യൻ തന്ത്രി, ജ്യോതിഷി വാക്കനാട് കുന്തിരിക്കുളത്ത് മഠത്തിൽ നാരായണൻ നന്പൂതിരി എന്നിവർ പങ്കെടുക്കും. ദേവതമാരുടെ പ്രധാന ശ്രീകോവിൽ, ഉപദേവതകളുടെ ആലയങ്ങൾ, സേവാപന്തൽ, ചുറ്റന്പലം തുടങ്ങിയവ ഉൾക്കൊള്ളുന്ന ക്ഷേത്ര സമുച്ചയം രൂപകൽപന ചെയ്തത് മാവേലിക്കര ഓലകെട്ടിയന്പലം രാജേന്ദ്രൻ ആചാരിയാണ്. ക്ഷേത്രശിൽപി മാർത്താണ്ഡം നടേശന്‍റെ നേതൃത്വത്തിലാണ് നിർമാണ പ്രവർത്തനം നടക്കുക. ഒന്നര വർഷത്തിനകം ക്ഷേത്രനിർമാണം പൂർത്തിയാക്കുകയാണു ലക്ഷ്യമെന്നു ക്ഷേത്രഭരണസമിതി പ്രസിഡന്‍റ് കെ. ഇന്ദ്രജിത്തും സെക്രട്ടറി യു.ഹരിസുതനും അറിയിച്ചു.

പുനലൂർ താലൂക്ക് ആശുപത്രിയിൽ കൂടുതൽ ഡോക്്‌ടർമാരെ നിയമിച്ച് പ്രവർത്തനം കാര്യക്ഷമമാക്കണം: താലൂക്ക് വികസന സമിതി

പുനലൂർ : താലൂക്ക് ആശുപത്രിയിൽ കൂടുതൽ ഡോക്‌ടർമാരെ നിയമിച്ച് അത്യാഹിത വിഭാഗത്തിന്‍റെയും ഒപി വിഭാഗത്തിന്‍റെയും പ്രവർത്തനം കൂടുതൽ കാര്യക്ഷമമാക്കണമെന്ന് താലൂക്ക് വികസന സമിതി യോഗത്തിൽ ആവശ്യം. തെന്മല ഡാമിന്‍റെ സംഭരണശേഷി കുറഞ്ഞിരിക്കുന്നതിനാൽ മണൽ നീക്കം ചെയ്തു തെക്കൻ ജില്ലകളിലെ നിർമാണ മേഖലയ്ക്കായി ഉപയോഗിക്കണമെന്നും ഒപ്പം എക്കലും ചെളിയും നീക്കംചെയ്യണമെന്ന ആവശ്യവും താലൂക്ക് വികസന സമിതി യോഗത്തിൽ ഉയർന്നു. ശ്രീരാമവർമപുരം മാർക്കറ്റിൽ നിന്ന് ഒഴിപ്പിക്കുന്ന വ്യാപാരികളുടെ പുനരധിവാസം ഉറപ്പാക്കണമെന്നും യോഗത്തിൽ അംഗങ്ങൾ ആവശ്യപ്പെട്ടു. കാർഷിക മേഖലയുമായി ബന്ധപ്പെട്ട ഒട്ടനവധി വിഷയങ്ങൾ ചർച്ച ചെയ്യേണ്ട സമിതിയിൽ കൃഷിവകുപ്പിന്‍റെ പ്രതിനിധികൾ എത്താത്തതിനെപ്പറ്റി യോഗത്തിൽ ആക്ഷേപം ഉയർന്നു. റെയിൽവേ പുറമ്പോക്കിൽ താമസിക്കുന്നവർക്കു പട്ടയം അനുവദിക്കുന്നതുമായി ബന്ധപ്പെട്ട് റെയിൽവേ, വനം, റവന്യൂ വകുപ്പുകൾ സംയുക്തമായി നടത്തിയ സർവേയുടെ വിവരങ്ങൾ ലഭ്യമാക്കണമെന്ന് എൻ.കെ.പ്രേമചന്ദ്രൻ എംപിയുടെ പ്രതിനിധി എം.നാസർ ഖാൻ ആവശ്യപ്പെട്ടു. ആര്യങ്കാവ് ശാസ്താ ക്ഷേത്രത്തിനു സമീപത്തുള്ള പോലീസ് ഔട്ട്പോസ്റ്റിൽ കൂടുതൽ പോലീസുകാരെ നിയമിച്ച് ദേശീയപാതയിലെ പരിശോധന കൂടുതൽ ശക്തമാക്കുന്നതിനുള്ള നടപടികൾ സ്വീകരിക്കണമെന്ന് പി.എസ്.സുപാൽ എംഎൽഎയുടെ പ്രതിനിധി ബി.അജയൻ ആവശ്യപ്പെട്ടു. പുനലൂർ കെഎസ്ആർടിസി ഡിപ്പോ, തൂക്കുപാലം ഭാഗങ്ങളിൽ വർധിച്ചുവരുന്ന സാമൂഹ്യവിരുദ്ധ ശല്യം യോഗത്തിൽ ചർച്ചയായി. സാമൂഹ്യവിരുദ്ധ ശല്യം പരിശോധിക്കണമെന്നും ലഹരി വിരുദ്ധ സ്ക്വാഡുകളുടെ പ്രവർത്തനം കാര്യക്ഷമമാക്കുവാനും പോലീസ്, എക്സൈസ് വകുപ്പുകൾ ജാഗ്രത പാലിക്കാനും സമിതി നിർദേശിച്ചു. യോഗത്തിൽ അഞ്ചൽ ബ്ലോക്ക് പഞ്ചായത്ത് പ്രസിഡന്‍റ് എ.നൗഷാദ് അധ്യക്ഷത വഹിച്ചു.

ഷോക്കേറ്റ് ഗുരുതരമായി പരിക്കേറ്റ കെഎസ്ഇബി ജീവനക്കാരൻ മരിച്ചു

കരുനാഗപ്പള്ളി: ജോലിക്കിടെ ഷോക്കേറ്റ് ഗുരുതരമായി പരിക്കേറ്റു ചികിത്സയിലായിരുന്ന കെഎസ്ഇബി ലൈൻമാൻ മരിച്ചു. കുലശേഖരപുരം ആദിനാട് സൗത്ത് കൃഷ്ണായനത്തിൽ അനിലാൽ (51) ആണ് മരിച്ചത്. കഴിഞ്ഞ ദിവസം കൊച്ചാലുംമൂടിനു സമീപത്തായിരുന്നു അപകടം. ഇന്നലെ ഉച്ചയോടെയാണ് മരിച്ചത്. ഭാര്യ രജിത. മക്കൾ: ഗൗരി, ഗായത്രി

സ്നേഹിത ജെന്‍ഡര്‍ ഹെല്‍പ്പ് ഡെസ്‌ക് പ്രവർത്തനം അഞ്ചുകല്ലുംമൂടിലേക്ക് മാറ്റി

കൊല്ലം: കുടുംബശ്രീ കൊല്ലം ജില്ലാ മിഷന്‍റെ നേതൃത്വത്തില്‍ പ്രവര്‍ത്തിക്കുന്ന സ്നേഹിത ജെന്‍ഡര്‍ ഹെൽപ് ഡെസ്‌ക് അഞ്ചുകല്ലുംമൂട് ജംഗ്ഷന്‍ രാമേശ്വരം ക്ഷേത്രത്തിനടുത്തേക്ക് മാറ്റി പ്രവര്‍ത്തനം തുടങ്ങി. ജില്ലാ കളക്‌ടര്‍ എന്‍.ദേവിദാസ് ഉദ്ഘാടനം നിര്‍വഹിച്ചു. കോര്‍പറേഷന്‍ ആരോഗ്യ സ്റ്റാൻഡിംഗ് കമ്മിറ്റി ചെയര്‍പേഴ്സണ്‍ യു.പവിത്ര അധ്യക്ഷയായി. കെഎസ്എഫ്ഇ ചെയര്‍മാന്‍ കെ.വരദരാജന്‍ മുഖ്യാതിഥിയായി. രാമന്‍കുളങ്ങര മരുത്തടി റോഡില്‍ പ്രവര്‍ത്തിച്ചിരുന്ന സ്നേഹിത നഗരത്തിലേക്ക് കൂടുതല്‍ ഇറങ്ങി പ്രവര്‍ത്തിക്കുന്നതിന്‍റെ ആവശ്യം കണക്കിലെടുത്താണ് അഞ്ചുകല്ലുംമൂടിലേക്ക് സ്ഥലം മാറിയത്. 2017-ല്‍ ജില്ലയില്‍ പ്രവര്‍ത്തനം ആരംഭിച്ച സ്നേഹിതയില്‍ നാളിതുവരെ 2803 പരാതികളാണ് റിപ്പോര്‍ട്ട് ചെയ്യപ്പെട്ടത്. 2768 പേര്‍ക്ക് മാനസിക പിന്തുണയും 388 പേര്‍ക്ക് താല്‍ക്കാലിക അഭയവും നല്‍കാന്‍ കഴിഞ്ഞു. അതിക്രമങ്ങള്‍ക്കും പീഡനങ്ങള്‍ക്കും വിധേയരാകുന്ന സ്ത്രീകള്‍ക്കും 18 വയസിന് താഴെയുള്ള കുട്ടികള്‍ക്കും രാത്രി യാത്രകളില്‍ ഒറ്റപെടുന്ന സ്ത്രീകള്‍ക്കും സ്നേഹിതയുടെ സേവനങ്ങള്‍ ലഭ്യമാക്കി വരുന്നു. കുടുംബശ്രീ അസി. ജില്ലാ മിഷന്‍ കോ - ഓര്‍ഡിനേറ്റര്‍ രതീഷ് കുമാര്‍, ജില്ലാ മിഷന്‍ കോഡിനേറ്റര്‍ ആര്‍. വിമല്‍ ചന്ദ്രന്‍, ജെന്‍ഡര്‍ വിഭാഗം ജില്ലാ പ്രോഗ്രാം മാനേജര്‍ ആര്‍. ബീന, സ്നേഹിത സ്റ്റാഫ്, കമ്യുണിറ്റി കൗണ്‍സിലര്‍മാര്‍, എഫ്എന്‍എച്ച് ഡബ്ല്യു റിസോഴ്സ്പേഴ്സണ്‍മാര്‍ തുടങ്ങിയവര്‍ പങ്കെടുത്തു. സ്നേഹിത ഓഫീസ്: 0474-2799760 സ്നേഹിത ടോള്‍ ഫ്രീ നമ്പര്‍: 1800-425-3565.

കുളത്തൂപ്പുഴയിൽ ഫയര്‍സ്റ്റേഷന്‍ അനുവദിക്കണം; താലൂക്ക് സഭയില്‍ പ്രമേയം അവതരിപ്പിച്ചു

കുളത്തൂപ്പുഴ: കഴിഞ്ഞദിവസം കൂടിയ താലൂക്ക് സഭയിൽ കിഴക്കന്‍ മലയോര മേഖല ഉള്‍പ്പെടുന്ന പ്രദേശത്തിന്‍റെ ഭൂവിസ്തൃതിയും ആദിവാസി സങ്കേതങ്ങളും തോട്ടം മേഖലയും ഉള്‍പ്പെടുന്ന കുളത്തൂപ്പുഴ പ്രദേശത്ത് എത്രയും പെട്ടെന്ന് ഒരു ഫയര്‍സ്റ്റേഷന്‍റെ ആവശ്യകത ബോധ്യപ്പെടുത്തുന്ന ഒരു പ്രമേയം പുനലൂർ നിയോജകമണ്ഡലം യുഡിഎഫ് കൺവീനർ റോയി ഉമ്മൻ അവതരിപ്പിച്ചു . ഈ പ്രദേശത്തെ നാട്ടുകാരുടെയും വ്യാപാരി വ്യവസായികളുടെയും ആവശ്യം ഏറെക്കാലമായുള്ളതാണ്. പ്രകൃതി ക്ഷോഭവും തീപിടിത്തവും വന്യമൃഗങ്ങളുടെ ആക്രമണവും തുടങ്ങി എന്തു തരം അത്യാഹിതമുണ്ടായാലും മുപ്പതും നാല്‍പതും കിലോമീറ്ററുകള്‍ അകലെ നിന്നുമാണ് അഗ്നിശമന സേന യെത്തേണ്ടെതെന്നതിനാല്‍ ഓരോ തവണയും ദുരന്തത്തിന്‍റെ വ്യാപ്തി വര്‍ധിക്കുന്നു. ഏതാനും ദിവസങ്ങള്‍ക്ക് മുമ്പ് കുളത്തൂപ്പുഴ ടൗണിലെ മൂന്നു വ്യാപാര ശാലകള്‍ തീപിടിത്തത്തില്‍ കത്തിനശിച്ച് കോടികളുടെ നഷ്ടമുണ്ടായതിനു പിന്നിലും അഗ്നിശമന സേനയുടെ അഭാവം പ്രകടമായിരുന്നു. ആഴ്ചകള്‍ക്ക് മുമ്പ് കണ്ടന്‍ചിറ ഓയില്‍പാം എസ്റ്റേറ്റില്‍ ഹെക്ടറുകള്‍ കത്തി നശിച്ചപ്പോഴും അഗ്നിശമന സേനയെത്തിയത് മണിക്കൂറുകള്‍ കഴിഞ്ഞായിരുന്നു. അതേ സമയം മലയോര മേഖലയായ കുളത്തൂപ്പുഴയില്‍ അഗ്നിശമന സേനാ വിഭാഗത്തെ വിന്യസിച്ചാല്‍ കുളത്തൂപ്പുഴയെ കൂടാതെ സമീപ പ്രദേശങ്ങളായി തെന്മല, ആര്യങ്കാവ്, മടത്തറ തുടങ്ങിയ പ്രദേശങ്ങളിലേക്കും ഇവയുടെ സേവനം എത്തിക്കാമെന്നതിനാല്‍ കുളത്തൂപ്പുഴ കേന്ദ്രീകരിച്ച് അടിയന്തിരമായി ഫയര്‍ സ്റ്റേഷന്‍ സ്ഥാപിക്കണമെന്നാവശ്യപ്പെട്ട് താലൂക്ക് സഭയില്‍ അവതരിപ്പിച്ച പ്രമേയം ഐക്യകണ്ഠേന പാസാക്കി.

ജില്ലാതല കുളമ്പുരോഗ പ്രതിരോധ യജ്ഞം തുടങ്ങി

കൊല്ലം: ദേശീയ ജന്തുരോഗ നിയന്ത്രണ പദ്ധതി പ്രകാരം മൃഗസംരക്ഷണ വകുപ്പിന്‍റെ നേതൃത്വത്തില്‍ നടത്തിവരുന്ന ആറാംഘട്ട കുളമ്പുരോഗ പ്രതിരോധ യജ്ഞത്തിന് തുടക്കം കുറിച്ചു. ജില്ലാതല ഉദ്ഘാടനം ജില്ലാ വെറ്ററിനറി കേന്ദ്രത്തില്‍ ജില്ലാ പഞ്ചായത്ത് പ്രസിഡന്‍റ് ഡോ.പി.കെ.ഗോപന്‍ നിര്‍വഹിച്ചു. കുളമ്പ് രോഗം ശരീരമാകെ ബാധിക്കുന്ന വൈറസ് രോഗമായതിനാല്‍ പ്രതിരോധ കുത്തിവെപ്പ് അനിവാര്യമാണ്. കുത്തിവയ്പ്പിനോടൊപ്പം വൈറസ് പടര്‍ന്നു പിടിക്കുമ്പോള്‍ സ്വീകരിക്കേണ്ട നടപടികളെപ്പറ്റിയും ഡോക്‌ടര്‍മാര്‍ കര്‍ഷകര്‍ക്ക് ബോധവത്കരണം നല്‍കണമെന്ന് ജില്ലാ പഞ്ചായത്ത് പ്രസിഡന്‍റ്പറഞ്ഞു. 23വരെ നടത്തുന്ന കുളമ്പ് രോഗ പ്രതിരോധ യജ്ഞത്തിലൂടെ 110542 പശുക്കള്‍ക്കും 8658 എരുമകള്‍ക്കും കുത്തിവയ്പ്പ് നല്‍കും. കര്‍ഷകരുടെ വീട്ടുപടിക്കലെത്തുന്ന മൃഗസംരക്ഷണ വകുപ്പിന്‍റെ സ്‌ക്വാഡുകള്‍ കുത്തിവെയ്പ്പ് നല്‍കി ചെവിയില്‍ ടാഗ് പതിപ്പിക്കും. 140 സ്‌ക്വാഡുകളെ പ്രവര്‍ത്തന സജ്ജമാക്കിയിട്ടുള്ള കുളമ്പുരോഗ പ്രതിരോധ കുത്തിവയ്പ്പ് പൂര്‍ണമായും സൗജന്യമാണ്. നാല് മാസത്തില്‍ താഴെ പ്രായമുള്ള കിടാങ്ങള്‍, രോഗമുള്ള പശുക്കള്‍, പ്രസവിക്കാറായ ഉരുക്കള്‍ എന്നിവയെ കുത്തിവെയ്പ്പില്‍ നിന്നും ഒഴിവാക്കും. ജില്ലാ മൃഗസംരക്ഷണ ഓഫീസര്‍ ഡോ.എ.എല്‍.അജിത് അധ്യക്ഷത വഹിച്ചു.

മയക്കുമരുന്നിനെതിരേ നടപടി വേണമെന്ന്

കൊല്ലം: അനുവദനീയമായ അളവില്‍കൂടുതല്‍ മദ്യം വാങ്ങുന്നത് തടയാനും മയക്കുമരുന്നിന്‍റെ വില്‍പന ഇല്ലാതാക്കാനും കര്‍ശന പരിശോധന നടത്തണമെന്ന് ജില്ലാതല ചാരായനിരോധന ജനകീയ നിരീക്ഷണസമിതി. ജില്ലാ കളക്‌ടര്‍ എന്‍. ദേവിദാസിന്‍റെ അധ്യക്ഷതയില്‍ ചേര്‍ന്ന യോഗത്തില്‍ പരിശോധന ഊര്‍ജിതമാക്കുന്നതിന് ബന്ധപ്പെട്ട വകുപ്പുകള്‍ക്ക് നിര്‍ദേശം നല്‍കി. 'ഓപറേഷന്‍ ക്ലീന്‍ സ്ലേറ്റ്' എന്ന പേരില്‍ ജില്ലയില്‍ കഴിഞ്ഞ രണ്ടു മാസത്തിനിടെ എക്സൈസ് വകുപ്പ് 2173 റെയ്ഡുകള്‍ നടത്തി. 263 മയക്കുമരുന്ന് കേസുകളിലായി 272 പേരെ അറസ്റ്റ് ചെയ്തു. വിമുക്തിയുടെ ഭാഗമായി സ്‌കൂള്‍തലത്തിലും 201 കോളജുകളിലുമായി 96 ബോധവത്കരണ ക്ലാസുകള്‍ നല്‍കി. എക്സൈസ് വകുപ്പിന്‍റെ ജാഗ്രതയോടെയുള്ള പ്രവര്‍ത്തനം വ്യാജമദ്യം തടയാനും മയക്കുമരുന്ന് വിപണനം കുറയ്ക്കാനും സഹായിച്ചുവെന്ന് സമിതി വിലയിരുത്തി. മണ്‍റോതുരുത്തില്‍ അനധികൃത മദ്യ-മയക്കുമരുന്ന് വില്‍പനയെന്ന പരാതിക്കെതിരേ ശക്തമായ നടപടി സ്വീകരിക്കണമെന്ന് ആവശ്യം യോഗത്തിൽ ഉയര്‍ന്നു. കല്ലുവാതുക്കല്‍, കല്ലുംതാഴം, ചാത്തന്നൂര്‍, മയ്യനാട്, മുഖത്തല, കരുനാഗപ്പള്ളി എന്നിവിടങ്ങളില്‍ പോലീസും എക്സൈസും സംയുക്ത പരിശോധന നടത്തും. ടൂറിസ്റ്റ് കേന്ദ്രങ്ങള്‍, സംശയകരമായ ഫ്ലാറ്റുകള്‍, വിജനമായ കേന്ദ്രങ്ങള്‍ എന്നിവിടങ്ങളിലും പരിശോധന കൂടുതല്‍ ശക്തമാക്കാനും നിര്‍ദേശമുണ്ട്. ചെറുമൂട് ഓവര്‍ബ്രിഡ്ജിനു താഴെയും പരിശോധന ശക്തമാക്കും. സ്‌കൂളുകള്‍ കേന്ദ്രീകരിച്ചുള്ള ബോധവത്കരണം കൂടുതല്‍ സജീവമാക്കും. കോളജ് ഹോസ്റ്റലുകള്‍, റെയില്‍വേ, ബസ് സ്റ്റാൻഡുകൾ, അരിഷ്ടം വില്‍ക്കുന്ന കടകള്‍ എന്നിവ കേന്ദ്രീകരിച്ചും പരിശോധന നടത്തും. ലഹരിവസ്തുകളുടെ ഉപയോഗത്തിനെതിരേ ശക്തമായ നടപടികള്‍ തുടരെ നടത്തണമെന്ന് പി.സി.വിഷ്ണുനാഥ് എംഎല്‍എ ആവശ്യപ്പെട്ടു. ജില്ലാ കളക്ടറുടെ ചേമ്പറില്‍ ചേര്‍ന്ന യോഗത്തില്‍ ആര്‍.മെഹജാബ്, ഡെപ്യൂട്ടി എക്സൈസ് കമ്മീഷണര്‍ എം.നൗഷാദ്, അസി.എക്സൈസ് കമ്മീഷണര്‍ വി.സി.ബൈജു, ജില്ലാതല ചാരായനിരോധന നിരീക്ഷണസമിതി അംഗങ്ങള്‍ തുടങ്ങിയവര്‍ പങ്കെടുത്തു.

ആധാരം രജിസ്‌ട്രേഷന്‍ പൂര്‍ണമായും ഡിജിറ്റലൈസേഷനിലേക്ക് മാറും: മന്ത്രി രാമചന്ദ്രൻ കടന്നപ്പള്ളി

കൊല്ലം: ഡിജിറ്റല്‍ സര്‍വെ പൂര്‍ത്തിയാകുന്നതോടെ ആധാരം രജിസ്‌ട്രേഷന്‍ സംവിധാനം പൂര്‍ണമായും ഡിജിറ്റലൈസേഷനിലേക്ക് മാറുമെന്നും ആധാരം എഴുത്തുകാരുടെ എഴുത്ത് ഫീസ് വര്‍ധിപ്പിക്കണമെന്ന വര്‍ഷങ്ങളായുള്ള ആവശ്യം സര്‍ക്കാര്‍ അംഗീകരിച്ചതായും മന്ത്രി രാമചന്ദ്രന്‍ കടന്നപ്പള്ളി. ഓള്‍ കേരള ഡോക്യുമെന്‍റ് റൈറ്റേഴ്‌സസ് ആന്‍റ് സ്‌ക്രൈബ്‌സ് അസോസിയേഷന്‍ സംസ്ഥാന കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു മന്ത്രി. രജിസ്റ്റര്‍ ചെയ്യുന്ന അന്ന് തന്നെ ആധാരങ്ങള്‍ നല്‍കാന്‍ ഓണ്‍ലൈന്‍ സംവിധാനങ്ങളോടെ സാധിക്കും. 1980 മുതലുള്ള ആധാരങ്ങള്‍ ഡിജിറ്റലൈസേഷന്‍ ചെയ്യുന്ന ജോലികള്‍ നടന്നുവരികയാണ്. ഇതോടെ ആധാരങ്ങളുടെ പകര്‍പ്പ്, ബാധ്യതാ സര്‍ട്ടിഫിക്കറ്റ് എന്നിവ നല്‍കുന്നതു വേഗത്തിലാക്കാന്‍ കഴിയുമെന്നും മന്ത്രി പറഞ്ഞു. വയനാട്ടിലുണ്ടായ പ്രളയത്തില്‍ ആധാരം നഷ്ടപ്പെട്ടവര്‍ക്ക് സൗജന്യമായി ആധാര പകര്‍പ്പുകള്‍ നല്‍കാന്‍ സര്‍ക്കാര്‍ തീരുമാനിച്ചിട്ടുണ്ടെന്നും മന്ത്രി പറഞ്ഞു. സംസ്ഥാന പ്രസിഡന്‍റ് കെ.ജി. ഇന്ദു കലാധരന്‍ അധ്യക്ഷത വഹിച്ചു. വെല്‍ഫെയര്‍ സൊസൈറ്റിയുടെ ഉദ്ഘാടനം ജി.എസ്.ജയലാല്‍ എംഎല്‍എയും സേവന പ്രവര്‍ത്തന ഭാഗമായി നിര്‍മിച്ചു നല്‍കിയ വീടിന്‍റെ താക്കോല്‍ദാനം പി.സി.വിഷ്ണുനാഥ് എംഎല്‍എയും നിര്‍വഹിച്ചു. വൈസ് പ്രസിഡന്‍റ് ബി.മോഹന്‍കുമാര്‍, എ.എം.ദിനകരന്‍, പി.എം.തങ്കച്ചന്,‌‍ അഗസ്റ്റിന്‍ ജോസ്, സുനില്‍കുമാര്‍ കൊട്ടറ, പി.വേണുഗോപാലന്‍ നായര്‍, എം.കെ .മണിലാല്‍ എന്നിവര്‍ പ്രസംഗിച്ചു. പ്രതിനിധി സമ്മേളനം സംസ്ഥാന ഉപദേശകസമിതി ചെയര്‍മാന്‍ ഒ.എം.ദിനകരന്‍ ഉദ്ഘാടനം ചെയ്തു.

ക്ഷീരകര്‍ഷകര്‍ക്ക് ‘അമൃതായി' വെട്ടിക്കവല ബ്ലോക്ക് പഞ്ചായത്ത്

കൊല്ലം : പാലിന്‍റെ പരിശുദ്ധിയിലാണ് വെട്ടിക്കവല പഞ്ചായത്തിന്‍റെ ‘ഐശ്വര്യദിനങ്ങള്‍’. ‘ക്ഷീരാമൃതം' നൂതനപദ്ധതി നടപ്പാക്കി കര്‍ഷകര്‍ക്ക് കൈത്താങ്ങായി മാറുകയാണ് ഭരണസമിതി. ക്ഷീരകര്‍ഷകരുടെ ധാരാളിത്തമുള്ള ഗ്രാമത്തില്‍ പശുക്കളുടെ ആരോഗ്യ സംരക്ഷണത്തിന് കാലിത്തീറ്റ, വൈക്കോല്‍ എന്നിവ സബ്‌സിഡി നിരക്കില്‍ നല്‍കുന്നു. ധാതുലവണ മിശ്രിതം സൗജന്യവുമാണ്. ബ്ലോക്ക്പരിധിയില്‍ വരുന്ന പഞ്ചായത്തുകളിലെ 500 ക്ഷീരകര്‍ഷകര്‍ക്ക് കാലിത്തീറ്റയും വൈക്കോലും ധാതുലവണ മിശ്രിതവും ലഭ്യമാക്കി. 2024-25 വാര്‍ഷിക പദ്ധതിയില്‍ ഉള്‍പ്പെടുത്തി വികസനഫണ്ടില്‍നിന്ന് 10 ലക്ഷം രൂപ ചെലവഴിച്ചാണ് പദ്ധതി നടപ്പിലാക്കിയത്. കര്‍ഷകര്‍ നേരിടുന്ന പ്രധാന പ്രശ്‌നങ്ങളായ തീറ്റ ചെലവ്, പശുക്കളുടെ ആരോഗ്യ കുറവുമൂലം ഉണ്ടാകുന്ന രോഗങ്ങള്‍, പ്രത്യുല്‍പാദനശേഷിക്കുറവ് തുടങ്ങിയവയ്ക്ക് പരിഹാരമാകുന്ന നടപടികളാണ് സ്വീകരിച്ചുവരുന്നതും. ക്ഷീരസംഘം വഴി വൈക്കോല്‍, സൈലേജ് എന്നിവ വാങ്ങി നല്‍കി. വിപണിയില്‍ നിന്നും കര്‍ഷകര്‍ വാങ്ങുന്ന വിലയുടെ പകുതി തുക കര്‍ഷകന്‍റെ ബാങ്ക് അക്കൗണ്ടിലേക്ക് അനുവദിക്കുന്നത് തുടരുകയുമാണ്. ഉത്പാദന ചെലവ് കുറയ്ക്കുന്നതിന് കേരള ഫീഡ്‌സ്, മില്‍മ എന്നീ സ്ഥാപനങ്ങളില്‍ നിന്നും ക്ഷീരസംഘം മുഖേന വാങ്ങുന്ന കാലി തീറ്റയ്ക്ക് 50 ശതമാനം സബ്‌സിഡിയുണ്ട്. സാമ്പത്തികനഷ്‌ടം പരിഹരിക്കാന്‍ 100 ശതമാനം സബ്‌സിഡിയോടുകൂടി ധാതുലവണ മിശ്രിതവും വിതരണം ചെയ്യുന്നു. ഗുണഭോക്താവ് വളര്‍ത്തുന്ന കറവപ്പശുക്കളുടെ എണ്ണത്തിന്‍റെയും ക്ഷീരസംഘത്തില്‍ അളക്കുന്ന പാലിന്‍റെ യും അളവ് അനുസരിച്ചാണ് ആനുകൂല്യം നല്‍കുന്നത്. 10 ലിറ്റര്‍ വരെ പാല്‍ അളക്കുന്ന കര്‍ഷകന് ഒരു ദിവസം അഞ്ചുകിലോ വൈക്കോല്‍ അല്ലെങ്കില്‍ ഏഴുകിലോ സൈലേജ് എന്ന് കണക്കാക്കി ഒരു കിലോ വൈക്കോലിനും സൈലേജിനും പരമാവധി നാല് രൂപ വീതം ധനസഹായമായി ഗുണഭോക്താവിന്‍റെ ബാങ്ക് അക്കൗണ്ടിലേക്ക് നല്‍കുകയാണ്. പ്രതിദിനം 10 ലിറ്ററില്‍ കൂടുതല്‍ പാല് അളക്കുന്ന കര്‍ഷകര്‍ക്ക് അതനുസരിച്ച് ധനസഹായം ലഭിക്കും. ഒരു ഗുണഭോക്താവിന് നല്‍കുന്ന പരമാവധി ധനസഹായം 5000 രൂപയാണ്. പദ്ധതി നടപ്പിലാക്കിയതോടെ പശുക്കളുടെ ആരോഗ്യപരിരക്ഷ, പാലുല്‍പാദനത്തില്‍ വര്‍ധനവ്, മറ്റ് ചെലവ് ചുരുക്കല്‍ എന്നിവ സാധ്യമായെന്ന് വെട്ടിക്കവല ബ്ലോക്ക് പഞ്ചായത്ത് പ്രസിഡന്‍റ് എസ്.രഞ്ജിത് കുമാര്‍ പറഞ്ഞു.

കുളങ്ങള്‍ കുപ്പത്തൊട്ടികളായി മാറുന്നു: മന്ത്രി പി.പ്രസാദ്

അഞ്ചല്‍: കുളങ്ങളും ചിറകളും സംരക്ഷിക്കുന്നതില്‍ മലയാളികള്‍ സംസ്കാരശൂന്യരാണെന്നും ചിലയിടങ്ങളില്‍ കുളങ്ങള്‍ കുപ്പത്തൊട്ടികളായി മാറുന്നുവെന്നും മന്ത്രി പി. പ്രസാദ് പറഞ്ഞു. ഏരൂര്‍ ഗ്രാമപഞ്ചായത്തില്‍ നവീകരിച്ച ചിറയുടെയും സ്കൂള്‍ ജംഗ്ഷന്‍ നടുക്കുന്നുംപുറം പാതയില്‍ സ്ഥാപിച്ച വൈദ്യുതി ലൈറ്റുകളുടെ ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. പി.എസ്.സുപാല്‍ എംഎല്‍എ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ഓമനാമുരളി, ജില്ലാ പഞ്ചായത്ത് അംഗം സി അംബികാകുമാരി, ഓയില്‍പാം ചെയര്‍മാന്‍ ആര്‍. രാജേന്ദ്രന്‍, ബ്ലോക്ക് പഞ്ചായത്ത് അംഗം സന്ധ്യ ബിനു, സ്ഥിരം സമിതി അധ്യക്ഷന്‍ ഷൈന്‍ ബാബു, പഞ്ചായത്ത് അംഗങ്ങളായ ടി.അജയന്‍, പി.എസ്. സുമന്‍ തുടങ്ങിയവര്‍ പ്രസംഗിച്ചു. കേരള ലാൻഡ് ഡവലപ്മെന്‍റ് കോര്‍പറേഷന്‍ അനുവദിച്ച 21 ലക്ഷം രൂപ വിനിയോഗിച്ചാണ് കാടുകയറി ഉപയോഗ ശൂന്യമായ ഏരൂര്‍ ചിറ നവീകരിച്ചത്. കൃഷി ആവശ്യങ്ങള്‍ക്ക് ജലം എത്തിക്കുന്നതിനൊപ്പം കുട്ടികള്‍ക്ക് നീന്തല്‍ പരിശീലനത്തിനുൾപ്പെടെയുള്ള സൗകര്യം ചിറയില്‍ ഒരുക്കിയിട്ടുണ്ട്. ചുറ്റും ആവശ്യമായ വെളിച്ച സൗകര്യവും തയാറാക്കിയിട്ടുണ്ട്. എംഎല്‍എയുടെ പ്രാദേശിക വികസന ഫണ്ടില്‍ നിന്നും അഞ്ച് ലക്ഷം രൂപ വിനിയോഗിച്ച് പാതയുടെ നവീകരണവും, ആസ്തി വികസന ഫണ്ടില്‍നിന്നും 15 ലക്ഷം രൂപ വിനിയോഗിച്ച് തെരുവ് വിളക്കുകള്‍ സ്ഥാപിക്കല്‍ പ്രവര്‍ത്തനവും പൂര്‍ത്തീകരിച്ചത്.

മാവടി-കുളക്കട റോഡിൽ വെള്ളക്കെട്ട് ; യാത്രക്കാർ ദുരിതത്തിൽ

കൊട്ടാരക്കര: മഴ പെയ്ത് രണ്ട് ദിവസം കഴിഞ്ഞിട്ടും വെള്ളക്കെട്ട് റോഡിൽ തന്നെ. മാവടി-കുളക്കട റോഡിലെ തെങ്ങുവിള മുക്കിലാണ് വെള്ളക്കെട്ട് രൂപപ്പെട്ടിട്ടുള്ളത്. തെങ്ങുവിള മുക്കിൽ നിന്ന് മാവടിയിലേക്ക് പോകുന്ന വളവിലാണ് റോഡിലെ വെള്ളക്കെട്ട്.പൊതുമരാമത്ത് വകുപ്പു വക റോഡാണിത്. വെള്ളക്കെട്ട് പരിസരവാസികൾക്ക് തലവേദനായി മാറിയിട്ടുണ്ട്. വെള്ളം ഒഴുകിപോകാൻ ഓടകളോ ചാലുകളോ ഒന്നുമില്ല ഇവിടെ. വെള്ളം റോഡിൽ കെട്ടിക്കിടക്കുന്നതിനാൽ വണ്ടികൾ ചെളി വെള്ളം അടിച്ചു തെറിപ്പിച്ച് സമീപത്തെ വീടുകളിൽ താമസിക്കാൻ പോലും പറ്റാത്ത അവസ്ഥയാണ്. കാൽനടയാത്രക്കാർക്കും ഈ വളവിൽ വെള്ളത്തിലൂടെ നടന്നുവേണം യാത്ര ചെയ്യാൻ.അശാസ്ത്രീയമായ ടാറിംഗ് കാരണം റോഡിൽ തന്നെ മഴവെള്ളം കെട്ടിക്കിടക്കുകയാണ്.

പിണറായി ഭരണം തിരുട്ട് ഗ്രാമത്തിലെ കൊള്ളക്കാരെ പോലും നാണിപ്പിക്കുന്നത്: എ.ഷാനവാസ്ഖാൻ

കൊല്ലം : പിണറായി ഭരണം തിരുട്ട് ഗ്രാമത്തിലെ കൊള്ളക്കാരെ പോലും നാണിപ്പിക്കുന്നതാണെന്നും അഴിമതിയുടെ ആൾരൂപമായി മാറിയ പിണറായി വിജയൻ അഴിമതിയുടെ കാര്യത്തിൽ ഗിന്നസ്ബുക്കിൽ സ്ഥാനം പിടിക്കാൻ മത്സരിക്കുകയാണെന്നും കെപിസിസി നിർവാഹക സമിതി അംഗം എ. ഷാനവാസ്ഖാൻ. കൊട്ടിയം വെസ്റ്റ് മണ്ഡലത്തിലെ നാലാം വാർഡ് മഹാത്മാഗാന്ധി കുടുംബസംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വാർഡ് കോൺഗ്രസ് കമ്മിറ്റി പ്രസിഡന്‍റ് ഹാഷിം അധ്യക്ഷത വഹിച്ചു. കോൺഗ്രസ് നേതാക്കളായ എസ്. വിപിനചന്ദ്രൻ, എം.നാസർ, കെ.ബി.ഷഹാൽ, എസ്.വിഷ്ണു, ഉമേഷ്, അജയകുമാർ, നാസർ കുഴിവേലിൽ എന്നിവർ പ്രസംഗിച്ചു.

ആശാപ്രവർത്തകയെ അനുമോദിച്ചു

കുളത്തൂപ്പഴ : കുളത്തൂപ്പുഴ സാമൂഹ്യ ആരോഗ്യകേന്ദ്രത്തിന്‍റെ കീഴിൽ മികച്ച പ്രവർത്തനം കാഴ്ചവച്ച ആശാ പ്രവർത്തകയെ അനുമോദിച്ചു. കുളത്തൂപ്പുഴ സാംനഗർ വാർഡിലെ ആശാ പ്രവർത്തക ബിന്ദു ശിവദാസിനെയാണ് അനുമോദിച്ചത്. ജീവിതശൈലി രോഗനിയന്ത്രണ പരിപാടിയോടനുബന്ധിച്ച് അരികിലുണ്ട് പദ്ധതിയുടെ ഭാഗമായാണ് അനുമോദന ചടങ്ങ് സംഘടിപ്പിച്ചത്. ബ്ലോക്ക് പഞ്ചായത്ത് പ്രസിഡന്‍റ് ഓമന മുരളി അനുമോദന ചടങ്ങ് യോഗം ഉദ്ഘാടനം ചെയ്തു. കുളത്തൂപ്പുഴ പഞ്ചായത്ത് പ്രസിഡന്‍റ് പി.ലൈലാ ബീവി അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗങ്ങളായ ഇ.കെ.സുധീർ ,റീന ഷാജഹാൻ ,റെജി ഉമ്മൻ, പഞ്ചായത്ത് വൈസ് പ്രസിഡന്‍റ് ടി.തുഷാര ,ഹെൽത്ത് ഇൻസ്പെക്‌ടർ ഷൈജു, ഹെൽത്ത് സൂപ്പർവൈസർ സി.ആർ.അരുൺകുമാർ തുടങ്ങിയവർ പ്രസംഗിച്ചു.

ശരീരദാന സമ്മതപത്ര സമർപ്പണം നടത്തി

ചാത്തന്നൂർ:വേളമാനൂർഭൂമിക്കാരൻ ആനന്ദാശ്രമം പബ്ലിക് ചാരിറ്റബിൾ ട്രസ്റ്റിന്‍റെ കൂട്ടുജീവനകേന്ദ്രത്തിലെ സ്ഥിരാംഗങ്ങളുൾപ്പെടെ 10 പേർ അവരുടെ മരണശേഷം ശരീരം കൊല്ലം ഗവ. മെഡിക്കൽ കോളജിന് സമർപ്പിക്കുന്നതിനുള്ള സമ്മതപത്രം സമർപ്പിച്ചു. അവർക്കുള്ള സർട്ടിഫിക്കറ്റുകൾ ഇന്ന് വേളമാനൂർ ഭൂമിക്കാരൻ ബന്ധുത്വ ജീവിത ആനന്ദാശ്രമത്തിൽ നടന്ന ചടങ്ങിൽ മെഡിക്കൽ കോളജ് അധികൃതർ കൈമാറി. ശരീരദാനത്തിന്‍റെ പ്രാധാന്യം വിവരിച്ചുകൊണ്ട് കൊല്ലം ഗവ.മെഡിക്കൽ കോളജ് അനാട്ടമി വിഭാഗത്തിലെ ഡോ.ആർ.രജത്ത്, ഡോ.ഗരീഷ് പ്രദായ്, ഡോ. എസ്.മായ എന്നിവർ പ്രസംഗിച്ചു. മരണശേഷം ശരീരം മെഡിക്കൽ കോളജിന് ദാനം ചെയ്യുന്നതിലൂടെ മരിച്ചുപോയവർ ജീവിച്ചിരിക്കുന്നവരെ പഠിപ്പിക്കുന്ന മഹത്തായ പ്രവർത്തിയാണ് ചെയ്യുന്നതെന്ന് ഡോക്‌ടർമാർ ഓർമിപ്പിച്ചു. എം.സുദേവൻ, എൻ.അരുൺജിത്ത്, ആർ.ബിനുകുമാർ, എസ്.ദീപ, വി.ജി.സജിതകുമാരി, ബിന്ദു ബഞ്ചമിൻ, ലേയാമ്മ ബഞ്ചമിൻ, ശീകല ഭൂമിക്കാരൻ, ഉജ്വൽ ഭൂമിക്കാരൻ, ജേപ്പി ഭൂമിക്കാരൻ എന്നിവരാണ് കൊല്ലം ഗവ. മെഡിക്കൽ കോളജിന് മരണാനന്തരം ശരീരം ദാനം ചെയ്യാനുള്ള സമ്മതപത്രം നൽകിയത്. അവർക്കുള്ള സർട്ടിഫിക്കറ്റുകൾ ഇന്നലെ ഭൂമിക്കാരൻ ബന്ധുത്വ ജീവിത ആനന്ദാശ്രമത്തിൽ നടന്ന ചടങ്ങിൽ വച്ച് വിതരണം ചെയ്തു. സന്തോഷ് മാനവം, സുൾഫി ഓയൂർ, ഉണ്ണിക്കുറുപ്പ്, ഉമാസാന്ദ്ര, സുധീർ ദേവ്, സുരേഷ്കുമാർ തിരൂർ, സച്ചിൻ രാജ് തുടങ്ങിയവർ ചർച്ചകൾ നയിച്ചു.പ്ലാക്കാട് ശ്രീകുമാർ, ഷീന രാജീവ്, ഓയൂർ രാമചന്ദ്രൻ, കിഴക്കനേല രാധാമണിയമ്മ, മുരളീരാഘവ്, പൂതക്കുളം ശ്രീധരൻ തുടങ്ങിയവർ കവിതകൾ അവതരിപ്പിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]