പത്തനംതിട്ട: ലോക്സഭാ തെരഞ്ഞെടുപ്പു പ്രചാരണ പരിപാടികളുടെ രണ്ടാംഘട്ടത്തിലാണ് സ്ഥാനാർഥികൾ.മണ്ഡലത്തിൽ ഓട്ടപ്രദക്ഷിണം നടത്തിയ മുന്നണി സ്ഥാനാർഥികൾ രണ്ടാംഘട്ടത്തിൽ നിയോജക മണ്ഡലങ്ങൾ കേന്ദ്രീകരിച്ച് കൂടുതൽ സ്ഥലങ്ങളിലെ സ്വീകരണ പരിപാടികളിൽ പങ്കെടുത്തുവരികയാണ്. എൽഡിഎഫ് സ്ഥാനാർഥി തോമസ് ഐസക് ഏഴ് അസംബ്ലി മണ്ഡലങ്ങളിലും ആദ്യഘട്ട പ്രചാരണം പൂർത്തീകരിച്ചു. രണ്ടാംഘട്ട പര്യടന പരിപാടിയിലാണ് അദ്ദേഹം.
യുഡിഎഫ് സ്ഥാനാർഥി ആന്റോ ആന്റണിയും ആദ്യഘട്ടത്തിൽ മണ്ഡലം കൺവൻഷനുകളും സ്വീകരണ പരിപാടികളും നടത്തി. എൻഡിഎ സ്ഥാനാർഥി അനിൽ ആന്റണി ആദ്യഘട്ടത്തിൽ കുടുംബയോഗം പരിപാടികളിലാണ് പങ്കെടുത്തത്. പര്യടന പരിപാടികളാണ് ഇപ്പോൾ നടന്നുവരുന്നത്.
ആന്റോ ആന്റണി ഇന്ന് കോന്നി മണ്ഡലത്തിൽ
പത്തനംതിട്ട: യുഡിഎഫ് സ്ഥാനാർഥി ആന്റോ ആന്റണി ഇന്ന് കോന്നി മണ്ഡലത്തിൽ പര്യടനം നടത്തും. ഏനാദിമംഗലം, കലഞ്ഞൂർ, അരുവാപ്പുലം, വള്ളിക്കോട്, പ്രമാടം, കോന്നി പഞ്ചായത്തുകളിലാണ് പര്യടനം. രാവിലെ തിരുമങ്ങാട് ജംഗ്ഷനിൽ ഡിസിസി പ്രസിഡന്റ് പ്രഫ. സതീഷ് കൊച്ചുപറന്പിൽ പര്യടന പരിപാടി ഉദ്ഘാടനം ചെയ്യും.
കർഷകരെ ദ്രോഹിച്ച സർക്കാരുകൾക്കെതിരേ ജനം വിധിയെഴുതും: ജോയ് ഏബ്രഹാം
പൂഞ്ഞാർ: യുഡിഎഫ് സ്ഥാനാർഥി ആന്റോ ആന്റണിയുടെ പൂഞ്ഞാർ ബ്ലോക്ക് പര്യടനം വഴിക്കടവിൽനിന്ന് ആരംഭിച്ചു. പൂഞ്ഞാർ ബ്ലോക്ക് പര്യടനം മുൻ എംപി ജോയ് ഏബ്രഹാം ഉദ്ഘാടനം ചെയ്തു. കർഷകരെ ദ്രോഹിച്ച കേന്ദ്ര, സംസ്ഥാന സർക്കാരുകൾക്കെതിരേയുള്ള വിധിയെഴുത്താകണം ലോക്സഭാ തെരഞ്ഞെടുപ്പെന്ന് ജോയ് ഏബ്രഹാം പറഞ്ഞു.
സാധാരണക്കാർക്കും കർഷകർക്കും വേണ്ടിയാണ് കഴിഞ്ഞ 15 വർഷങ്ങളായി പ്രവർത്തിച്ചിട്ടുള്ളതെന്ന് യുഡിഎഫ് സ്ഥാനാർഥി ആന്റോ ആന്റണി പറഞ്ഞു. യുഡിഎഫ് മണ്ഡലം ചെയർമാൻ ജോയ് പൊട്ടനാനിയിൽ അധ്യക്ഷത വഹിച്ചു.
മജു പുളിക്കൽ, ജോമോൻ ഐക്കര, പ്രകാശ് പുളിക്കൽ, വി.ജെ. ജോസ്, സതീഷ് കുമാർ, കെ.സി. ജെയിംസ്, തോമസുകുട്ടി മൂന്നാനിപള്ളി, പയസ് കവളമാക്കൽ, ഹരി മണ്ണുമഠം, അസീസ് പത്താഴപ്പടി, ജോർജ് ജേക്കബ്, എ.ജെ. ജോർജ്, ടി.ഡി. ജോർജ്,
ബിനോയ് ജോസഫ്, ഓമന ഗോപാലൻ, ബേബി മുത്തനാട്ട്, ജയറാണി തോമസുകുട്ടി, പി. മുരുകൻ, സിറിൽ റോയ്, ജി.എസ്. റെജി, ജെസിൻ മേക്കാട്ട്, ഡോ. തോമസ് പുളിക്കൻ, വർക്കിച്ചൻ വയമ്പത്തനാൽ, ടോമി മാടപ്പള്ളി, റിജോ കാഞ്ഞമല, ടോം കുന്നക്കാട് തുടങ്ങിയവർ പ്രസംഗിച്ചു.
വഴിക്കടവ് നിന്നാരംഭിച്ച പര്യടനം തീക്കോയി, വെയിൽകാണാംപാറ, തിടനാട് ടൗൺ, ചേന്നാട് അമ്പലംഭാഗം, നെല്ലിക്കച്ചാൽ, പൂഞ്ഞാർ ടൗൺ, അനക്കുഴി, പറത്താനം വഴി ഏന്തയാർ ടൗണിൽ അവസാനിച്ചു. സമാപന സമ്മേളനം ഡിസിസി പ്രസിഡന്റ് നാട്ടകം സുരേഷ് ഉദ്ഘാടനം ചെയ്തു.