റാന്നി: മണ്ഡലത്തിലെ ജനങ്ങളുടെ വിഷയങ്ങൾക്കു ശാശ്വത പരിഹാരം നല്കുന്ന വിവിധ പദ്ധതികൾ എൽഡിഎഫ് ആസൂത്രണം ചെയ്യുമെന്ന് സ്ഥാനാർഥി തോമസ് ഐസക്. റാന്നി മണ്ഡലത്തിലെ വിവിധ സ്വീകരണയോഗങ്ങളിൽ പ്രസംഗിക്കുകയായിരുന്നു അദ്ദേഹം.
തൊഴിലില്ലായ്മ, സംരംഭകത്വ വികസനം, ടൂറിസം, മെച്ചപ്പെട്ട വിദ്യാഭ്യാസം എന്നീ മേഖലകളിൽ ശ്രദ്ധ കേന്ദ്രീകരിക്കേണ്ടതുണ്ടെന്നും ഐസക് പറഞ്ഞു.
ഞായറാഴ്ച രാവിലെ കോട്ടാങ്ങൽ പഞ്ചായത്തിലെ ചുങ്കപ്പാറയിൽ മാത്യു ടി. തോമസ് എംഎൽഎ പര്യടന പരിപാടി ഉദ്ഘാടനം ചെയ്തു. അനീഷ് ചുങ്കപ്പാറ അധ്യഷത വഹിച്ചു. എഴുമറ്റൂർ, കൊറ്റനാട്, അയിരൂർ പഞ്ചായത്തുകളിൽ പര്യടനം നടത്തി രാത്രി മുക്കുഴി സ്റ്റാർ മുക്കിൽ സമാപിച്ചു. വിവിധ കേന്ദ്രങ്ങളിൽ എൽഡിഎഫ് നേതാക്കളായ ചിറ്റയം ഗോപകുമാർ, പ്രമോദ് നാരായണൻ എംഎൽഎ, രാജു ഏബ്രഹാം, പി.ആർ. പ്രസാദ്, റോഷൻ റോയി മാത്യു, കെ. സതിഷ്, കെ. അൻസാരി, സുരേഷ്, സന്തോഷ് കെ. ചാണ്ടി, ജോയി വള്ളിക്കാല, പ്രസാദ് എം. ഭാസ്കർ, ലീല ഗംഗാധരൻ, ബിന്ദു ചന്ദ്രമോഹൻ തുടങ്ങിയവർ പ്രസംഗിച്ചു.
കാഞ്ഞിരപ്പള്ളിയിൽ
കാഞ്ഞിരപ്പള്ളി: എൽഡിഎഫ് സ്ഥാനാർഥി ഡോ. തോമസ് ഐസക് ഇന്നലെ കാഞ്ഞിരപ്പള്ളി മണ്ഡലത്തിൽ സ്വീകരണപര്യടനം നടത്തി.
രാവിലെ കങ്ങഴ പഞ്ചായത്തിലെ കാനം ചന്തക്കവലയിൽ നിന്നും ആരംഭിച്ച പര്യടനം സിപിഐ ജില്ലാ സെക്രട്ടറി വി.ബി. ബിനു ഉദ്ഘാടനം ചെയ്തു. സുരേഷ് കെ. ഗോപാൽ അധ്യക്ഷത വഹിച്ചു.
നെടുംകുന്നം, കറുകച്ചാൽ പഞ്ചായത്തുകളിലെ വിവിധ കേന്ദ്രങ്ങളിൽ പര്യടനം നടത്തി വൈകുന്നേരം ശാന്തിപുരത്ത് സമാപിച്ചു.
തുറന്ന വാഹനത്തിൽ എത്തിയ സ്ഥാനാർഥിയെ പൂക്കളും പുസ്തകങ്ങളും പഴവർഗങ്ങളും നല്കിയാണ് ഓരോ സ്വീകരണ കേന്ദ്രങ്ങളിലും വരവേറ്റത്. വിവിധ സ്വീകരണ കേന്ദ്രങ്ങളിൽ ചീഫ് വിപ്പ് ഡോ. എൻ. ജയരാജ്. എൽഡിഎഫ് നേതാക്കളായ കെ. ജെ. തോമസ്, എ.വി. റസൽ, കെ.എം. രാധാകൃഷ്ണൻ, ഗിരീഷ് എസ്. നായർ, ഷെമീം അഹമ്മദ്. വി.ജി. ലാൽ, എ.എം. മാത്യു, എം.എ. ഷാജി, പി.എ. താഹ തുടങ്ങിയവർ പ്രസംഗിച്ചു.
പ്രമുഖ ഫുട്ബോൾ ക്ലബ്ബായ മാഞ്ചസ്റ്റർ സിറ്റി അബുദാബിയിൽ സംഘടിപ്പിച്ച അബുദാബി കപ്പിൽ മത്സരിച്ച കാനം സ്വദേശി ദയാൽ ഡേവഡ് സാമുവലിനെയും പാറമടക്കുളത്തിൽ വീണ ആളെ സാഹസികമായി രക്ഷപ്പെടുത്തിയ എം.ഡി. മോനിഷയേയും സ്വീകരണ പര്യടനത്തിടെ തോമസ് ഐസക് ആദരിച്ചു.