ADVERTISEMENT

ADVERTISEMENT

ആശ വർക്കർമാരുടെ രാപ്പകൽ സമര യാത്രയ്ക്ക് സ്വീകരണം നല്‍കി

ഈരാറ്റുപേട്ട: വിവിധ ആവശ്യങ്ങളുന്നയിച്ച് കേരള ആശാ ഹെൽത്ത് വർക്കേഴ്‌സ് അസോസിയേഷൻ ജനറൽ സെക്രട്ടറി എം.എ. ബിന്ദു നയിക്കുന്ന രാപ്പകൽ സമര യാത്രക്ക് ഈരാറ്റുപേട്ടയിൽ സ്വീകരണം നൽകി. യാത്രയുടെ കോട്ടയം ജില്ലാതല ഉദ്ഘാടനം ആന്‍റോ ആന്‍റണി എംപി നിർവഹിച്ചു. നഗരസഭാധ്യക്ഷ സുഹ്‌റ അബ്ദുൾ ഖാദർ അധ്യക്ഷത വഹിച്ചു. ഡിസിസി സെക്രട്ടറി ജോമോൻ ഐക്കര, കെ. സതീഷ് കുമാർ, മുഹമ്മദ് ഇല്യാസ്, ഓമന ഗോപാലൻ തുടങ്ങിയവർ പ്രസംഗിച്ചു.

പാലാ: കേരള ആശ ഹെല്‍ത്ത് വര്‍ക്കേഴ്സ് അസോസിയേഷന്‍ ജനറല്‍ സെക്രട്ടറി എം.എ. ബിന്ദു നയിച്ച രാപകല്‍ സമര യാത്രക്ക് ളാലം പാലം ജംഗ്ഷനില്‍ സ്വീകരണം നല്‍കി. ക്യാപ്റ്റന്‍ എം.എ ബിന്ദുവിനെ ഹാരമണിയിച്ചു സീകരിച്ചു. യുഡിഎഫ് പാലാ നിയോജക മണ്ഡലം ചെയര്‍മാന്‍ പ്രഫ.സതീശ് ചൊള്ളാനി അധ്യക്ഷത വഹിച്ചു. കെപിസിസി മെംബര്‍ തോമസ് കല്ലാടന്‍ സ്വീകരണ സമ്മേളനം ഉദ്ഘാടനം ചെയ്തു.

എ.കെ ചന്ദ്രമോഹന്‍, എന്‍. സുരേഷ്, മോളി പീറ്റര്‍, ജോര്‍ജ് പുളിങ്കാട്, ആര്‍. സജീവ്, ആര്‍. പ്രേംജി, അനസ് കണ്ടത്തില്‍, വിജയകുമാര്‍ സി.ജി, സന്തോഷ് കാവുകാട്ട്, ലിസമ്മ മത്തച്ചന്‍, സൗമ്യ സേവ്യര്‍, ആല്‍ബിന്‍ ഇമനശേരി തുടങ്ങിയവര്‍ പ്രസംഗിച്ചു.

ADVERTISEMENT

ആശാ വര്‍ക്കര്‍മാരോട് സര്‍ക്കാര്‍ കാട്ടുന്നത് കടുത്ത അനീതി: ജോസഫ് എം. പുതുശേരി

ചങ്ങനാശേരി: മര്യാദയോ മനുഷ്യപ്പറ്റോ ലവലേശം പോലുമില്ലാതെ വൈരനിര്യാതന ബുദ്ധിയോടുകൂടിയാണ് സര്‍ക്കാര്‍ ആശവര്‍ക്കര്‍മാരോട് പെരുമാറുന്നതെന്നും അതിന്‍റെ ഒടുവിലത്തെ ഉദാഹരണമാണ് പരിമിതമായ ഓണറേറിയം പോലും വെട്ടിക്കുറയ്ക്കുന്നതരത്തിലുള്ള നിബന്ധനകളെന്നും കേരള കോണ്‍ഗ്രസ് വൈസ് ചെയര്‍മാന്‍ ജോസഫ് എം. പുതുശേരി. ആശ ഹെല്‍ത്ത് വര്‍ക്കേഴ്‌സ് അസോസിയേഷന്‍ ജനറല്‍ സെക്രട്ടറി എം.എ. ബിന്ദു നയിക്കുന്ന രാപകല്‍ സമര യാത്രയ്ക്ക് ചങ്ങനാശേരിയില്‍ നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സ്വാഗത സംഘം ചെയര്‍മാന്‍ ബാബു കുട്ടന്‍ചിറ അധ്യക്ഷത വഹിച്ചു. കെഎസ്ആര്‍ടിസി ജംഗ്ഷനില്‍നിന്നാരംഭിച്ച റാലി കേരള കോണ്‍ഗ്രസ് ഉന്നതാധികാരിസമിതി അംഗം വി.ജെ. ലാലി ഉദ്ഘാടനം ചെയ്തു. ബി. രാധാകൃഷ്ണമേനോന്‍, സലിം പി. മാത്യു, പി.എച്ച്. നാസര്‍, പി.എന്‍. നൗഷാദ്, സാബു മുല്ലശേരി, പ്രഫ. ഗോപാലകൃഷ്ണപണിക്കര്‍, തോമസ് അക്കര, തോമസ് കെ. മാറാട്ടുകളം എന്നിവര്‍ പ്രസംഗിച്ചു.

മാടപ്പള്ളിയില്‍ വീട്ടമ്മ മുറിയില്‍ മരിച്ചനിലയില്‍ കാണപ്പെട്ട സംഭവം കൊലപാതകം; ഭര്‍ത്താവ് അറസ്റ്റില്‍

മാടപ്പള്ളി: മാടപ്പള്ളി അഴകാത്തുപടി ഭാഗത്ത് കാലായില്‍ കണ്ണമ്പള്ളില്‍ മല്ലിക (45)യെ മുറിയില്‍ മരിച്ചനിലയില്‍ കാണപ്പെട്ട സംഭവം പോലീസ് അന്വേഷണത്തില്‍ കൊലപാതകമെന്ന് തെളിഞ്ഞു. ഭര്‍ത്താവ് അനീഷ് (41) അറസ്റ്റിലായി. കഴിഞ്ഞ ഏപ്രില്‍ 28നാണ് മല്ലികയെ വീടിന്‍റെ മുറിക്കുള്ളില്‍ മരിച്ച നിലയില്‍ കാണപ്പെട്ടത്. അന്ന് തൃക്കൊടിത്താനം പോലീസ് അസ്വാഭാവിക മരണത്തിനു കേസെടുത്തിരുന്നു. മൃതദേഹത്തിന്‍റെ ഇന്‍ക്വസ്റ്റ് സമയത്ത് അന്വേഷണ ഉദ്യോഗസ്ഥനായ തൃക്കൊടിത്താനം പോലീസ് ഇന്‍സ്‌പെക്ടര്‍ എം.ജെ. അരുണിനു തോന്നിയ സംശയങ്ങള്‍ മൃതശരീരം പോസ്റ്റ്‌മോര്‍ട്ടം നടത്തിയ ഫോറന്‍സിക് സര്‍ജനുമായി പങ്കുവച്ചിരുന്നു. അന്നുതന്നെ ഭര്‍ത്താവ് അനിലിനെ കസ്റ്റഡിയില്‍ എടുത്ത് ചോദ്യം ചെയ്തിരുന്നെങ്കിലും ഭാര്യ ആത്മഹത്യ ചെയ്തതാണെന്ന വാദത്തില്‍ ഇയാള്‍ ഉറച്ചുനിന്നു. താനും ഭാര്യയുമായി സാമ്പത്തിക കാര്യങ്ങളെ ചൊല്ലി വഴക്കുണ്ടാകാറുണ്ടെന്ന് ഇയാള്‍ സമ്മതിച്ചിരുന്നു. തുടര്‍ന്ന് പോസ്റ്റ്‌മോര്‍ട്ടം റിപ്പോര്‍ട്ടില്‍ കഴുത്തിനു ചുറ്റും ഏല്‍പ്പിച്ച ശക്തമായ ബലപ്രയോഗമാണ് മരണകാരണമെന്ന് ഡോ. നീതു എം. ബാബുവിന്‍റെ കണ്ടെത്തലിനെത്തുടര്‍ന്ന് അനീഷിനെ വീണ്ടും കസ്റ്റഡിയിലെടുത്തു. വിശദമായ ചോദ്യം ചെയ്യലില്‍ താനും ഭാര്യയുമായി അന്നേ ദിവസം വഴക്കുണ്ടായെന്നും നിലത്തുവീണ ഭാര്യയുടെ കഴുത്തു ഞെരിച്ചു കൊലപ്പെടുത്തിയെന്നും പോലീസിനെ തെറ്റിധരിപ്പിക്കാന്‍ കഴുത്തില്‍ മുറിവുണ്ടാക്കിയെന്നും പ്രതി സമ്മതിച്ചു. പ്രതിയെ റിമാന്‍ഡ് ചെയ്തു.

പറാല്‍ പ്രദേശങ്ങളിലെ ജനങ്ങളും ബുദ്ധിമുട്ടില്‍

വണ്ടിപ്പേട്ട- പറാല്‍-കുമരങ്കരി റോഡിന്‍റെ വാഴപ്പള്ളി പടിഞ്ഞാറ് കൃഷിഭവന്‍, കുമരങ്കരി ശ്മശാനം, കള്ളുഷാപ്പ് ഭാഗങ്ങളില്‍ വെള്ളക്കെട്ട് ഒഴിഞ്ഞിട്ടില്ല. നിര്‍ത്തിവച്ചിരുന്ന കെഎസ്ആര്‍ടിസി ബസ് സര്‍വീസ് പുനരാരംഭിച്ചിട്ടുണ്ട്. ഓട്ടോറിക്ഷയും ഇരുചക്രവാഹനങ്ങളും സഞ്ചാരം നടത്തുന്നില്ല. കുമരങ്കരി-കിടങ്ങറ റൂട്ടിലെ വെള്ളം നേരിയതോതില്‍ ഇറങ്ങിയിട്ടുണ്ട്. നൂറുകണത്തിനു കുടുംബങ്ങളാണ് ഈ മേഖലകളില്‍ ദുരിതത്തില്‍ കഴിയുന്നുത്. എസി റോഡ്- മേപ്രാല്‍ തിരുവല്ല റോഡിൽ ഗതാഗതം നിലച്ചിട്ട് ഒരാഴ്ച എസി റോഡിനെ മേപ്രാല്‍ വഴി തിരുവല്ലയുമായി ബന്ധിപ്പിക്കുന്ന റോഡിലെ ഗതാഗതം നിശ്ചലമായിട്ട് ഒരാഴ്ച പിന്നിടുന്നു. നാല് കിലോമീറ്ററോളം ദൂരംവരുന്ന റോഡിന്‍റെ ഭൂരിഭാഗവും വെള്ളത്തിലാണ്. 2005 കാലഘട്ടത്തില്‍ നിര്‍മാണം പൂര്‍ത്തിയാക്കിയ റോഡിന്‍റെ ഒരു കിലോമീറ്റര്‍ ദൂരം ഉയര്‍ത്തി നിര്‍മിച്ചിരുന്നു. ഈ റോഡില്‍ ഇപ്പോഴും അരയറ്റം വെള്ളമുണ്ടെന്നാണ് നാട്ടുകാര്‍ ചൂണ്ടിക്കാട്ടുന്നത്. റോഡിന്‍റെ പലഭാഗങ്ങളിലും പോളയും അടിഞ്ഞുകൂടിയിട്ടുണ്ട്. വെള്ളം ഇറങ്ങിത്തുടങ്ങിയെങ്കിലും പായിപ്പാട് പഞ്ചായത്ത് ഒന്നാംവാര്‍ഡില്‍പ്പെട്ട അറുനൂറില്‍ പുതുവല്‍, മൂലേല്‍ പുതുവല്‍, നക്രാല്‍ ഭാഗങ്ങളിലെ ദുരിതത്തിനു കുറവില്ല. റോഡിലും വീടുകളിലും വെള്ളക്കെട്ടായതിനാല്‍ കുട്ടികള്‍ക്ക് സ്‌കൂളുകലിലും മുതിർന്നവര്‍ക്ക് ജോലിക്കും പോകാന്‍ പറ്റാത്ത അവസ്ഥയാണ്. വള്ളമുള്ളവര്‍ മാത്രമാണ് പാടശേഖരങ്ങളും തോടുകളും കടന്ന് എസി റോഡിലെത്തി വിവിധ സ്ഥലങ്ങളിലേക്കു പോകുന്നത്.

ഒറ്റപ്പെട്ട് കാവാലിക്കരി, വെട്ടിത്തുരുത്ത് ഭാഗങ്ങളിലെ വീടുകള്‍

ബോട്ടുജെട്ടി മുതല്‍ വെട്ടിത്തുരുത്ത് പള്ളിക്ക് പടിഞ്ഞാറ്ഭാഗത്ത് ഓടേറ്റി ബണ്ടുവരെ ജലപാതയില്‍ പോള തിങ്ങി നിറഞ്ഞുകിടക്കുകയാണ്. കാവാലിക്കരി പാടശേഖരത്തിന്‍റെ പുറംബണ്ടിലും കാവാലിക്കരി പഴയ പള്ളിയുടെ ഭാഗങ്ങളിലെ താമസക്കാരും വെള്ളത്താല്‍ ചുറ്റപ്പെട്ടതിനാല്‍ ഒറ്റപ്പെട്ടനിലിലാണ്. പായിപ്പാട് പഞ്ചായത്തിന്‍റെ ഒന്നാംവാര്‍ഡില്‍പ്പെട്ട ഈ ഭാഗത്ത് പതിഞ്ചോളം കുടുംബങ്ങളാണ് ഒറ്റപ്പെട്ട നിലയിലുള്ളത്. വെട്ടിത്തുരുത്തിന്‍റെ പടിഞ്ഞാറുള്ള ഓടേറ്റി ബണ്ട് ഭാഗത്തുള്ള മുപ്പതോളം വീടുകള്‍ ഇപ്പോഴും ദുരിതത്തിലാണ്. വെട്ടിത്തുരുത്തില്‍ ദുരിതാശ്വാസ ക്യാമ്പിന് സൗകര്യങ്ങളില്ലാത്തതിനാല്‍ ഇവിടുത്തുകാര്‍ രണ്ടരക്കിലോമീറ്റര്‍ ദുരത്ത് പ്രവര്‍ത്തിക്കുന്ന പറാല്‍ വിവേകാനന്ദ സ്‌കൂളിലെ ക്യാമ്പിനെ ആശ്രയിക്കേണ്ട അവസ്ഥയാണ്. ഇത്രയും ദുരത്തുള്ള ക്യാമ്പില്‍ പോകേണ്ടതിനാല്‍ വെട്ടിത്തുരുത്തിലെ പലകുടുംബങ്ങളും ക്യാമ്പിലേക്കു പോയതേയില്ല. വെള്ളക്കെട്ടിലകപ്പെട്ട വീടുകളില്‍തന്നെ കഴിയുകയാണ്. ദുരിതത്തില്‍ കഴിയുന്ന കുടുംബങ്ങളെ സന്ദര്‍ശിക്കാനോ അവശ്യ സാധനങ്ങള്‍ നല്‍കാനോ അധികാരികളാരും തയാറായില്ലെന്ന പരാതി ശക്തമാണ്. ബോട്ടു ജെട്ടി വെട്ടിത്തുരുത്തു റോഡിലെ വെള്ളക്കെട്ടും ഒഴിഞ്ഞിട്ടില്ല.

മാനം തെളിഞ്ഞിട്ടും ദുരിതമൊഴിയാതെ വെള്ളപ്പൊക്ക മേഖലകള്‍

ചങ്ങനാശേരി: മൂന്നു ദിവസങ്ങളിലായി മാനം തെളിഞ്ഞെങ്കിലും വെള്ളപ്പൊക്ക മേഖലകളില്‍ ദുതിതമൊഴിയുന്നില്ല. വെള്ളത്തിലകപ്പെട്ട നിരവധി വീടുകള്‍ ചെളിക്കുളമായ നിലയിലാണ്. കുട്ടനാട്, അപ്പര്‍കുട്ടനാട് പ്രദേശങ്ങളിലെ നിരവധി പള്ളികളും ക്ഷേത്രങ്ങളും വെള്ളക്കെട്ടിലാണ്. കുമരങ്കരി സെന്‍റ് മേരീസ് പള്ളിയുടെ മുറ്റത്തെ വെള്ളത്തിന് നേരിയ തോതില്‍ കുറവുണ്ട്. ഈര ലൂര്‍ദ്മാതാ പള്ളിയുടെ മുറ്റവും വെള്ളത്തിലാണ്. മഹേന്ദ്രപുരം സെന്‍റ് സെബാസ്റ്റ്യന്‍സ് പള്ളി, ദൈവപ്പറമ്പ് ക്ഷേത്രം എന്നീ ആരാധനാലയങ്ങള്‍ വെള്ളക്കെട്ടിലാണ്. മാനത്ത് വെളിച്ചം കണ്ടതോടെ ദുരിതാശ്വാസ ക്യാമ്പുകളിലും ബന്ധുവീടുകളിലും കഴിഞ്ഞിരുന്ന പലരും അവരവരുടെ വീടുകളിലെത്തി ശുചീകരണം നടത്തുന്ന തിരക്കിലാണ്. പലവീടുകളിലേയും ഫ്രിഡ്ജ്, ടിവി, വാഷിംഗ് മെഷീന്‍, വീടുകളുടെ വയറിംഗ് തുടങ്ങിയവയ്‍ക്ക് വെള്ളപ്പൊക്കത്തില്‍ നാശം നേരിട്ടിട്ടുണ്ട്. വീടുകളില്‍ പാര്‍ക്ക് ചെയ്തിരുന്ന ഇരുചക്രവാഹനങ്ങള്‍, ഓട്ടോറിക്ഷകള്‍ തുടങ്ങിയവയും വെള്ളവും ചെളിയും കയറിയ നിലയിലാണ്.

നഗരസഭയില്‍ ജോബ് സ്റ്റേഷന്‍ പ്രവര്‍ത്തനം ആരംഭിച്ചു

ചങ്ങനാശേരി: കേരള നോളജ് എക്കണോമി മിഷന്‍ വിജ്ഞാന കേരളം പദ്ധതിയുടെ ഭാഗമായി ചങ്ങനാശേരി നഗരസഭയില്‍ ജോബ്‌ സ്റ്റേഷന്‍ പ്രവര്‍ത്തനം ആരംഭിച്ചു. നഗരസഭ പരിധിയില്‍ അഭ്യസ്തവിദ്യരായ തൊഴില്‍രഹിതര്‍ക്ക് ജോലി കണ്ടെത്തി നല്‍കുന്നതിന് സഹായിക്കുക എന്നുള്ളതാണ് ജോബ് സ്റ്റേഷന്‍റെ ലക്ഷ്യം. ഡിജിറ്റല്‍ വര്‍ക്ക് ഫോഴ്‌സ് മാനേജ്‌മെന്‍റ് സിസ്റ്റത്തില്‍ രജിസ്റ്റര്‍ ചെയ്യിപ്പിച്ച് ആവശ്യമായ നൈപുണ്യ പരിശീലനം നല്‍കി തൊഴില്‍ മേളയില്‍ പങ്കെടുപ്പിച്ച് ജോലി ഉറപ്പാക്കുന്ന പ്രവര്‍ത്തനവും ജോബ്‌ സ്റ്റേഷനിലൂടെ നടക്കും. നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ ഉദ്ഘാടനം ചെയ്തു. വൈസ് ചെയര്‍മാന്‍ മാത്യൂസ് ജോര്‍ജ് അധ്യക്ഷത വഹിച്ചു. ക്ഷേമകാര്യ സ്റ്റാൻഡിംഗ് കമ്മിറ്റി ചെയര്‍മാന്‍ പി.എ. നിസാര്‍, കൗണ്‍സിലര്‍മാരായ റെജി കേളമാട്ട്, ബാബു തോമസ്, കെ. മുരുകന്‍, സിഡിഎസ് ചെയര്‍പേഴ്‌സണ്‍ സുജാത രാജു, കിലാ ജില്ലാ ഫെസിലിറ്റേറ്റര്‍ ബിന്ദു അജി, കിലാ ജില്ലാ റിസോഴ്‌സ് പേഴ്‌സണ്‍ സുനു മാത്യു എന്നിവര്‍ പ്രസംഗിച്ചു.

പെരുന്ന മുനിസിപ്പല്‍ ബസ് സ്റ്റാന്‍ഡിലെ ടേക്ക് എ ബ്രേക്ക് വീണ്ടും ബ്രേക്കായി

ചങ്ങനാശേരി: അരക്കോടിയോളം രൂപ മുടക്കി പെരുന്ന ബസ് സ്റ്റാന്‍ഡില്‍ നഗരസഭ നിര്‍മിച്ച ടേക്ക് എ ബ്രേക്ക് വീണ്ടും ബ്രേക്കായി. പ്രാഥമിക കാര്യങ്ങള്‍ക്കായി യാത്രക്കാര്‍ നെട്ടോട്ടത്തില്‍. നിര്‍മാണത്തിലെ ക്രമക്കേടുകള്‍ വിജിലന്‍സ് അന്വേഷിക്കണമെന്ന ആവശ്യം ഉയരുന്നു. അഞ്ചുവർഷക്കാലംകൊണ്ട് നിര്‍മാണം പൂര്‍ത്തീകരിച്ച് കഴിഞ്ഞ ജനുവരിയില്‍ തുറന്നുകൊടുത്ത ടേക്ക് എ ബ്രേക്കാണ് നഗരസഭാ ഭരണാധികാരികളുടെയും ഉദ്യോഗസ്ഥരുടെയും തികഞ്ഞ അനാസ്ഥയില്‍ അടച്ചുപൂട്ടിയത്. ഇതോടെ പെരുന്ന ബസ് സ്റ്റാന്‍ഡില്‍ യാത്രക്കെത്തുന്ന വിദ്യാര്‍ഥികളും സ്ത്രീകളും ഉള്‍പ്പെടെ നൂറുകണക്കുന്ന യാത്രക്കാരാണ് വലയുന്നത്. നിര്‍മാണത്തിലെ അപാകതമൂലം സെപ്റ്റിക് ടാങ്ക് കവിഞ്ഞ് ഒഴുകിയതോടെ ചുറ്റുപാടുകള്‍ വൃത്തിഹീനമാണ്. ഇവിടെ പൊതുകിണര്‍ ഉണ്ടായിരിക്കെ ഇവിടുത്തെ വെള്ളം ഉപയോഗിക്കുന്നതിന് സംവിധാനം ഏര്‍പ്പെടുത്താതെ വന്‍തുക നല്‍കി ദിവസേന ടാങ്കര്‍ ലോറികളില്‍ വെള്ളം എത്തിച്ചാണ് ടേക്ക് എ ബ്രേക്ക് പ്രവര്‍ത്തിപ്പിച്ചിരുന്നത്. വിലയ്ക്കു വാങ്ങുന്ന വെള്ളം ശൗചാലയ പ്രവര്‍ത്തനങ്ങള്‍ക്ക് തികയുന്നില്ലെന്നു മാത്രമല്ല നഗരസഭക്ക് ഭാരിച്ച സാമ്പത്തിക ബാധ്യതയും വരുത്തുകയായിരുന്നു. നഗരസഭയുടെ കെടുകാര്യസ്ഥത: അന്വേഷണം വേണം സി.എഫ്. തോമസ് എംഎല്‍എയുടെ ആസ്തി വികസന ഫണ്ടില്‍നിന്ന് അനുവദിച്ച 35 ലക്ഷവും നഗരസഭയുടെ പത്തുലക്ഷത്തോളംരൂപ പ്ലാനിംഗ് ഉണ്ടും വിനിയോഗിച്ചാണ് പെരുന്ന ബസ് സ്റ്റാന്‍ഡില്‍ എത്തുന്ന യാത്രക്കാര്‍ക്കായി ടേക്ക് എ ബ്രേക്ക് സംവിധാനം ഒരുക്കിയത്. സ്ത്രീകള്‍ക്കും പുരുഷന്മാര്‍ക്കും പ്രത്യേകം ബാത്ത്റൂമുകള്‍, ടോയ്‌ലറ്റുകള്‍, റിഫ്രഷ്‌മെന്‍റ് മുറികള്‍, കുട്ടികള്‍ക്കുള്ള ഫീഡിംഗ് മുറികള്‍ തുടങ്ങിയ സംവിധാനങ്ങളാണ് ഇവിടെ ഏര്‍പ്പെടുത്തിയിരുന്നത്. നിര്‍മാണം വൈകിയതിനെതിരേ പ്രതിഷേധം ഉയര്‍ന്നിരുന്നു. പിന്നീട് നിര്‍മാണം പൂര്‍ത്തിയാക്കി ആഘോഷപരമായ ഉദ്ഘാടനത്തോടെയാണ് കഴിഞ്ഞ ജനുവരിയില്‍ തുറന്നു കൊടുത്തത്. നഗരസഭ എന്‍ജിനിയറിംഗ് വിഭാഗത്തിന്‍റെ കെടുകാര്യസ്ഥതയാണ് ഈ ടേക്ക് എ ബ്രേക്കിന്‍റെ നിര്‍മാണത്തിലെ അപകതകള്‍ക്ക് കാരണമായി ചൂണ്ടിക്കാണിക്കപ്പെടുന്നത്. നിര്‍മാണത്തിലെ ക്രമക്കേടുകള്‍ വിജിലന്‍സ് അന്വേഷിക്കണമെന്ന ആവശ്യം ശക്തമാണ്. കരാറുകാരന്‍ നിരുത്തരവാദപരമായി പെരുമാറിയിട്ടുണ്ടെങ്കില്‍ അതും പരിശോധിക്കപ്പെട്ടേ മതിയാകൂ. മുനിസിപ്പല്‍ കാര്യാലയത്തില്‍ അരക്കോടിയോളം രൂപ മുടക്കി അടുത്തിടെ നവീകരിച്ച് ഉദ്ഘാടനം ചെയ്ത മുനിസിപ്പല്‍ കൗണ്‍സില്‍ ഹാളിന്‍റെ ഗ്രൗണ്ട് ഫ്ലോറിന് കേടുപാടുകള്‍ സംഭവിച്ചതായും പരാതി ഉയര്‍ന്നിട്ടുണ്ട്. പകരം സംവിധാനം ഏര്‍പ്പെടുത്തണം പെരുന്ന മുനിസിപ്പല്‍ ബസ് സ്റ്റാന്‍ഡിലെ ടേക്ക് എ ബ്രേക്ക് പൂട്ടിയ സാഹചര്യത്തില്‍ ഇവിടെയെത്തുന്ന നൂറുകണക്കിനു യാത്രക്കാര്‍ക്ക് പ്രാഥമിക കൃത്യങ്ങള്‍ നിര്‍വഹിക്കുന്നതിന് അടിയന്തര സംവിധാനം ഏര്‍പ്പെടുത്താന്‍ നഗരസഭ നടപടികള്‍ സ്വീകരിക്കണമെന്ന ആവശ്യം ഉയര്‍ന്നു. ഈ ആവശ്യം ഉന്നയിച്ച് യാത്രക്കാരുടെയും ബസ് ജീവനക്കാരുടെയും സംഘടനകള്‍ രംഗത്തുവന്നിട്ടുണ്ട്.

കെട്ടിടത്തിൽനിന്ന് വീണുമരിച്ചു

തലയോലപ്പറമ്പ്: ബൈബിൾ കോളജിലെ അന്തേവാസിയെ കെട്ടിടത്തിൽനിന്നു വീണുമരിച്ചനിലയിൽ കണ്ടെത്തി. വൈക്കം പടിഞ്ഞാറേനട നടുവിലെ വില്ലേജിൽ അമൃതഭവനിൽ ബാലഗോപാല പിളള(65) യാണ് മരിച്ചത്. തലയോലപ്പറമ്പ് സിലോൺ കവലയിലെ ബൈബിൾ കോളജിൽ ഇന്നലെ രാവിലെ 10 യോടെയായിരുന്നു സംഭവം. കോളജിന്‍റെ മുറ്റത്ത് വീണുമരിച്ച നിലയിലാണ് ഇയാളുടെ മൃതദേഹം കണ്ടെത്തിയത്. കുടുംബവുമായി അകന്നു കഴിഞ്ഞിരുന്ന ഇയാൾ മൂന്നു മാസം മുമ്പാണ് ഇവിടെ എത്തിയത്. പകൽ സമയങ്ങളിൽ ബന്ധുവീടുകളിൽപോകുന്ന ഇയാൾ രാത്രി കോളജിലെത്തി താമസിച്ചുവരികയായിരുന്നു. കടുത്തുരുത്തി പോലീസ് മേൽനടപടികൾ സ്വീകരിച്ചു.

റോഡരികിലെ പാറമടയ്ക്കു സമീപം മാലിന്യം തള്ളി

പെരുവ: റോഡരികിലെ പാറമടയ്ക്കു സമീപം മാലിന്യം തള്ളി. പെരുവ - തലയോലപ്പറമ്പ് റോഡില്‍ കുന്നപ്പള്ളി കല്ലുമല ജംഗ്ഷനിലെ പാറമടക്കുളത്തിലേക്കാണ് കഴിഞ്ഞ ദിവസം രാത്രിയില്‍ സാമൂഹ്യവിരുദ്ധര്‍ മാലിന്യം തള്ളിയത്. തൊഴിലാളികള്‍ വിശ്രമിക്കുന്ന ഷെഡിന് സമീപമാണ് മാലിന്യം തള്ളിയത്. ഇതോടെ ഇവിടെ ഇരിക്കാന്‍ കഴിയാത്ത അവസ്ഥയിലാണെന്ന് തൊഴിലാളികള്‍ പറഞ്ഞു. കാറ്ററിംഗ് സ്ഥാപനത്തിലെയും വ്യാപാര സ്ഥാപനങ്ങളിലെയും മാലിന്യമാണ് ഇവിടെ തള്ളിയിരിക്കുന്നത്. മാലിന്യമുക്ത പഞ്ചായത്തായ മുളക്കുളം പഞ്ചായത്തിലെ എട്ടാം വാര്‍ഡിലാണ് മാലിന്യം തള്ളിയത്. കഴിഞ്ഞദിവസം പതിനൊന്നാം വാര്‍ഡിലെ ഉദയഗിരിയില്‍ 30 ഏക്കര്‍ പുരയിടത്തിന് നടുവില്‍ അഞ്ച് ഏക്കര്‍ സ്ഥലത്ത് കാറ്ററിംഗ് സ്ഥാപനങ്ങളിലെയും ഹോട്ടലുകളിലെയും മാലിന്യം തള്ളിയത് കണ്ടെത്തിയിരുന്നു. ഇതിനെതിരേ നടപടി സ്വീകരിച്ചു വരുന്നതിനിടയിലാണ് കുന്നപ്പള്ളിയിലും മാലിന്യം തള്ളിയ സംഭവം ഉണ്ടായിരിക്കുന്നത്.

വർണക്കൂടാരം ഉദ്ഘാടനം ചെയ്തു

അക്കരപ്പാടം: അക്കരപ്പാടം ഗവൺമെന്‍റ് യുപി സ്കൂളിൽ നിർമിച്ച വർണക്കൂടാരം സി.കെ. ആശ എംഎൽഎ ഉദ്ഘാടനം ചെയ്തു. ഉദയനാപുരം പഞ്ചായത്ത് പ്രസിഡന്‍റ് പി.കെ. ആനന്ദവല്ലി അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, ഒ.എം. ഉദയപ്പൻ, ടി. പ്രസാദ്, ഗിരിജ പുഷ്കരൻ, കെ.ജി. രാജു, എ.പി. നന്ദകുമാർ, സ്കൂൾ ഹെഡ്മാസ്റ്റർ ഇ.ആർ. നടേശൻ തുടങ്ങിയവർ പ്രസംഗിച്ചു.

റോഡിലെ കുഴിയില്‍ മണ്ണിട്ടു : കാല്‍നടയാത്ര പോലും പറ്റാതെ നാട്ടുകാരും വിദ്യാര്‍ഥികളും

പെരുവ: മഴക്കാലത്ത് റോഡിലെ ചെറിയ കുഴിയില്‍ മണ്ണിട്ടതോടെ കാല്‍നടയാത്ര പോലും പറ്റാതെ നാട്ടുകാരും വിദ്യാര്‍ഥികളും. പെരുവ - പിറവം റോഡില്‍ ഗവണ്‍മെന്‍റ് ബോയ്‌സ് സ്‌കൂളിന് മുന്‍വശത്തുണ്ടായിരുന്ന ചെറിയ കുഴിയിലാണ് മണ്ണിട്ടത്. ഇതോടെ ഇതുവഴി നടന്നു പോകാന്‍പോലും കഴിയാതെ ബുദ്ധിമുട്ടുകയാണ് വിദ്യാര്‍ഥികളും നാട്ടുകാരും. ദിവസവും നൂറുകണക്കിന് വിദ്യാര്‍ഥികള്‍ പെരുവ ഗവണ്‍മെന്‍റ് ബോയ്‌സ് ഹയര്‍ സെക്കന്‍ഡറി സ്‌കൂളിലേക്കും ഗേള്‍സ് ഹൈസ്‌കൂളിലേക്കും പെരുവയില്‍ ബസ് ഇറങ്ങി നടന്നു പോകുന്ന വഴിയാണിത്. കൂടാതെ നൂറുകണക്കിന് ഇരുചക്രവാഹനങ്ങള്‍ ഉള്‍പ്പെടെ സഞ്ചരിക്കുന്ന വഴികൂടിയാണിത്. കുഴിയായി തകര്‍ന്ന റോഡില്‍ കഴിഞ്ഞദിവസം ബിജെപി പ്രവര്‍ത്തകര്‍ വാഴ വച്ചു പ്രതിഷേധിച്ചിരുന്നു. ഇതേത്തുടര്‍ന്ന് ജനപ്രതിനിധികളുടെ നേതൃത്വത്തില്‍ സിപിഎം പ്രവര്‍ത്തകര്‍ ഇവിടെ മണ്ണിട്ട് നികത്തുകയായിരുന്നു. മഴ പെയ്തതോടെ ചെളിക്കുഴിയായ റോഡിലൂടെ വാഹനങ്ങള്‍ പോകാന്‍ ബുദ്ധിമുട്ടുകയാണ്. കൂടാതെ വെയില്‍ തെളിഞ്ഞാല്‍ പൊടികൊണ്ട് ഇവിടത്തെ യാത്രക്കാരും വ്യാപാരികളും പൊറുതിമുട്ടും. റോഡ് തകര്‍ന്നതോടെ സമീപമുള്ള വ്യാപാരികള്‍ കച്ചവടമില്ലാതെ ബുദ്ധിമുട്ടുകയാണ്. റോഡിന് ഇരുവശവുമുള്ള കാല്‍നട യാത്രക്കാര്‍ കടന്നു പോകുന്ന വഴിയിലൂടെ ഇരുചക്രവാഹനങ്ങള്‍ ഓടിച്ചു പോകുന്നത് വ്യാപാരികള്‍ക്ക് ഏറെ ബുദ്ധിമുട്ടാണുണ്ടാക്കുന്നത്.

അട്ടാറ പാലത്തിലെ കുഴി അപകടക്കെണിയായി

വൈക്കം: വൈക്കം - വെച്ചൂർ റോഡിൽ അട്ടാറ പാലത്തിൽ രൂപപ്പെട്ട വൻ കുഴിയിൽ വാഹന യാത്രികർ അപകടപ്പെടുന്നു. വെള്ളം നിറഞ്ഞ ആഴമുള്ള കുഴിയറിയാതെ ഇരുചക്ര വാഹനയാത്രികരാണു വീണ് പരിക്കേൽക്കുന്നത്. കാറുകളടക്കമുള്ള വാഹനങ്ങൾ വലിയ ശബ്ദത്തോടെയാണ് കുഴിയിൽ അകപ്പെടുന്നത്. അട്ടാറ പാലത്തിന് സമീപം സോമില്ലിനു മുൻവശത്തും വൻകുഴി രൂപപ്പെട്ടിട്ടുണ്ട്.

തലയാഴത്തെ ഉൾപ്രദേശങ്ങളിൽ ദുരിതമൊഴിയുന്നില്ല

തലയാഴം: മഴയ്ക്കു ശമനമുണ്ടാകുകയുംപുഴയിലെയും ആറിലെയും ജലനിരപ്പ് താഴുകയും ചെയ്തിട്ടും ഉൾപ്രദേശങ്ങളിലെ കുടുംബങ്ങൾക്ക് ദുരിതം ഒഴിയുന്നില്ല. ഉൾപ്രദേശങ്ങളിലെ വഴികളും വീടുകളും ഇപ്പോഴും വെള്ളത്തിലായതിനാൽ കുടുംബങ്ങൾ ക്യാമ്പിൽ തുടരുകയാണ്. തലയാഴം പഞ്ചായത്തിന്‍റെ കിഴക്കൻ മേഖലയായ മുണ്ടാർ അഞ്ച്, സികെഎം, ഏഴാം ബ്ലോക്ക്, ചെട്ടിക്കരി ഭാഗങ്ങളിലുള്ളവർ തോട്ടകം ഗവൺമെന്‍റ് എൽപി സ്കൂളിലെ ദുരിതാശ്വാസ ക്യാമ്പിലാണ്.

മഴ മാറി... വെയില്‍ വന്നു...മുണ്ടാറുകാര്‍ വെള്ളക്കെട്ട് ഒഴിവാകാന്‍ ഇനിയും കാത്തിരിക്കണം

കടുത്തുരുത്തി: മഴ മാറി... വെയില്‍ വന്നു... മുണ്ടാറുകാര്‍ക്കും എഴുമാന്തുരുത്തുകാര്‍ക്കും വെള്ളക്കെട്ടില്‍നിന്ന് ആശ്വാസം ലഭിക്കാന്‍ ഇനിയും കാത്തിരിക്കണം. ജലനിരപ്പ് കുറയുന്നുണ്ടെങ്കിലും വെള്ളം പൂര്‍ണമായും ഇറങ്ങാന്‍ ഇനിയും ദിവസങ്ങള്‍ കഴിയണം. താഴ്ന്ന പ്രദേശങ്ങളിലെ വീടുകളില്‍നിന്ന് വെള്ളം ഇറങ്ങിയിട്ടുണ്ടെങ്കിലും മുറ്റത്തടക്കം ഇപ്പോഴും വെള്ളം കെട്ടിക്കിടക്കുകയാണ്. തോടുകളും പുഴകളും സമയത്ത് തെളിക്കാത്തതാണ് പ്രതിസന്ധിക്കു കാരണമെന്ന് മുണ്ടാറുകാര്‍ പറയുന്നു. പായലും പോളയും നിറഞ്ഞതോടെ വെള്ളം ഒഴുകിപ്പോകാനാവാത്ത സ്ഥിതിയിലാണ് തോടുകളും പുഴകളും. പ്രധാനപ്പെട്ട ഇടത്തോടുകളെല്ലാം അടഞ്ഞു കിടക്കുകയാണെന്ന് കല്ലറ പഞ്ചായത്തംഗം വി.കെ. ശശികുമാര്‍ പറഞ്ഞു. 200-ലധികം കുടുംബങ്ങളാണ് ദിവസങ്ങളായി വെള്ളപ്പൊക്കത്തിന്‍റെ ദുരിതം അനുഭവിക്കുന്നത്. അടിയന്തരമായി തോടുകളുടെ ആഴം കൂട്ടിയില്ലെങ്കില്‍ മഴ ശക്തമാകുമ്പോള്‍ വീണ്ടും പ്രതിസന്ധിയുണ്ടാകുമെന്ന് ശശികുമാര്‍ പറയുന്നു. വേമ്പനാട്ട് കായലിലേക്കാണ് ജലാശയങ്ങള്‍വഴി ഇവിടെനിന്ന് വെള്ളം ഇറങ്ങുന്നത്. പാടശേഖരങ്ങളിൽ വെള്ളം നിറഞ്ഞു കിടക്കുകയാണ്. വെള്ളപ്പൊക്കത്തെത്തുടര്‍ന്ന് താമസം മാറ്റിയ പലരും ഇപ്പോഴും തിരികെ വീടുകളിലേക്കെത്തിയിട്ടില്ല. വീട്ടില്‍ വന്നാല്‍ വീടും പരിസരവും വൃത്തിയാക്കുകയെന്നതാണ് കുടുംബങ്ങളുടെ ആദ്യത്തെ വെല്ലുവിളി. വീടുകള്‍ക്ക് ഉള്‍ഭാഗത്തെല്ലാം ചെളിയും മണ്ണും അടിഞ്ഞു കിടക്കുകയാണ്. ഇഴജന്തുക്കള്‍ വീട്ടിനുള്ളിലില്ലെന്ന് ഉറപ്പാക്കുകയും വേണം. എങ്കില്‍ മാത്രമേ ഇവര്‍ക്ക് പഴയപോലെ വീടിനുള്ളില്‍ താമസിക്കാനാകൂ. മുണ്ടാറില്‍ പലഭാഗത്തും ദിവസങ്ങളായി വൈദ്യുതിബന്ധം നിലച്ചിരിക്കുകയാണ്. ചുറ്റും വെള്ളമാണെങ്കിലും ഇവിടേക്കു കുടിവെള്ളം എത്തിയിട്ട് രണ്ടാഴ്ച കഴിഞ്ഞതായി പ്രദേശവാസികള്‍ പറയുന്നു. കല്ലുപുര-വാക്കേത്തറ റോഡില്‍നിന്ന് ഇപ്പോഴും വെള്ളം പൂര്‍ണമായും ഇറങ്ങിയിട്ടില്ല. കടുത്തുരുത്തി പഞ്ചായത്തിന്‍റെ പടിഞ്ഞാറന്‍ മേഖലയായ എഴുമാന്തുരുത്തിലും മുക്കം, കാന്താരിക്കടവ് എന്നിവിടങ്ങളിലെ താഴ്ന്ന പ്രദേശങ്ങളില്‍നിന്നും വെള്ളം പൂര്‍ണമായും ഇറങ്ങിയിട്ടില്ല. ഇതു മേഖലയിലെ നിരവധി കുടുംബങ്ങളെ ബുദ്ധിമുട്ടിലാക്കിയിട്ടുണ്ട്.

പാഠപുസ്തകങ്ങള്‍ തയാറാക്കിയ അധ്യാപകരെ ആദരിച്ചു

കോട്ടയം: ബിരുദ ഓണേഴ്‌സ് പ്രോഗ്രാമുകളുടെ (എംജിയു-യുജിപി) ഭാഷാ പാഠപുസ്തകങ്ങള്‍ സമയബന്ധിതമായി പ്രസിദ്ധീകരിക്കുന്നതിനുവേണ്ടി പ്രവര്‍ത്തിച്ച അധ്യാപകരെ എംജി സര്‍വകലാശാല ആദരിച്ചു. പുസ്തകങ്ങളുടെ എഴുത്തിലും എഡിറ്റിംഗിലും പങ്കാളികളായ അധ്യാപകര്‍ക്ക് വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ സാക്ഷ്യപത്രങ്ങള്‍ നല്‍കി. സിന്‍ഡിക്കേറ്റ് അംഗം ഡോ. എ.എസ്. സുമേഷ്, രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, സര്‍വകലാശാലയിലെ പ്രിന്‍റിംഗ് ആന്‍ഡ് പബ്ലിഷിംഗ് വകുപ്പിന്‍റെ ചുമതല വഹിക്കുന്ന ഡോ. സിബു ജി. നെറ്റോ എന്നിവര്‍ പ്രസംഗിച്ചു.

കോട്ടയം ടെക്സ്റ്റൈൽസ് തുറന്നു

ഏറ്റുമാനൂർ: വേദഗിരി കോട്ടയം ടെക്സ്റ്റൈൽസ് തുറന്നു. വൈദ്യുതി ചാർജ് യഥാസമയം അടയ്ക്കാൻ സാധിക്കാതെ വൻതുക കുടിശികയായതിനെത്തുടർന്ന് 2024 മാർച്ച് 20 മുതൽ സ്ഥാപനം അടച്ചിട്ടിരിക്കുകയായിരുന്നു. 150 ലേറെ തൊഴിലാളികൾ അന്നു മുതൽ ലേഓഫിലായി. സംസ്ഥാന സർക്കാർ പൊതുമേഖലാ സ്ഥാപനങ്ങളുടെ 2024 ഡിസംബർ വരെയുള്ള വൈദ്യുതി ചാർജ് കുടിശിക ഒഴിവാക്കിയതിന്‍റെ ഭാഗമായി കോട്ടയം ടെക്സ്റ്റൈൽസിന്‍റെ കുടിശികയിലും ഇളവ് ലഭിച്ചു. പിന്നീട് ഇതുവരെയുള്ള കുടിശിക ഗഡുക്കളായി അടയ്ക്കുന്നതിന് സ്ഥലം എംഎൽഎ മോൻസ് ജോസഫിന്‍റെ അപേക്ഷ പരിഗണിച്ച് സർക്കാർ നിർദേശം നൽകിയതനുസരിച്ച് കെഎസ്ഇബി അതിനു സാവകാശം നൽകുകയും വൈദ്യുതി റീ കണക്‌ഷൻ നൽകുകയും ചെയ്തു. കഴിഞ്ഞ 10 വർഷത്തിലധികമായി സേവന വേതന കരാർ പുതുക്കിയിരുന്നില്ല. യൂണിയനുകളും മാനേജ്മെന്‍റും തമ്മിൽ സേവന വേതന കരാർ പുതുക്കുന്നതിന് ധാരണയാവുകയും ചെയ്തിട്ടുണ്ട്. ഡയറക്ടർമാർ, മാനേജിംഗ് ഡയറക്ടർ, മറ്റ് ഉദ്യോഗസ്ഥർ, യൂണിയൻ പ്രതിനിധികൾ എന്നിവരുടെ സാന്നിധ്യത്തിൽ ടെക്സ്റ്റൈൽ കോർപറേഷൻ ചെയർമാൻ സി.ആർ. വത്സൻ സ്വിച്ച് ഓൺ ചെയ്തു കോട്ടയം ടെക്സ്റ്റൈൽസിന്‍റെ പ്രവർത്തനം പുനരാരംഭിക്കുകയും പുതുക്കിയ സേവന വേതന കരാർ ഒപ്പുവയ്ക്കുകയും ചെയ്തു.

അങ്കണവാടിയില്‍ പ്രവേശനോത്സവം നടത്തി

മണര്‍കാട്: മണര്‍കാട് പഞ്ചായത്ത് എട്ടാം വാര്‍ഡിലെ 156-ാം നമ്പര്‍ അക്ഷര അങ്കണവാടിയിലെ പ്രവേശനോത്സവം പഞ്ചായത്തംഗം ജിജി മണര്‍കാട് ഉദ്ഘാടനം ചെയ്തു. മാലം ഗവ. യുപി സ്‌കൂള്‍ ഹെഡ്മിസ്ട്രസ് കെ.പി. ബിന്ദു, ബബിത, ‌നമിത ജോര്‍ജ്, സി.കെ. ഷീന, കെ. അനുപ്രിയ എന്നിവര്‍ പ്രസംഗിച്ചു. അതിരമ്പുഴ: അമലഗിരി അങ്കണവാടി പ്രവേശനോത്സവം ജില്ലാ പഞ്ചായത്തംഗം റോസമ്മ സോണി ഉദ്ഘാടനം ചെയ്തു. പഞ്ചായത്തംഗം ഹരി പ്രകാശ് അധ്യക്ഷത വഹിച്ചു. സി.ടി. ജയശ്രീ, ഡോ. കെ.കെ. പ്രഭാകരന്‍, വി.എന്‍. മണി, പി.പി. സന്തോഷ്‌കുമാര്‍, എ.എം. കുര്യന്‍, എന്‍.എ. ഷീല എന്നിവര്‍ പ്രസംഗിച്ചു.

മീനടത്ത് തോട്ടിൽ കാൽവഴുതിവീണ് കാണാതായയാളെ നാലാം ദിനവും കണ്ടെത്താനായില്ല

മീനടം: മീനടത്ത് തോട്ടിൽ കാൽവഴുതിവീണ് കാണാതായ കാട്ടുമറ്റത്തിൽ ഈപ്പ (65) നെ നാലാം ദിനവും തെരച്ചിൽ നടത്തിയെങ്കിലും കണ്ടെത്താനായില്ല. മീനടം മുതൽ കൊടൂറാറ് വരെയുള്ള ഭാഗങ്ങളിലാണ് കഴിഞ്ഞ നാല് ദിവസങ്ങളായി തെരച്ചിൽ നടത്തിയിരുന്നത്. പാമ്പാടി പോലീസ്, അഗ്നിരക്ഷാസേന, സ്‌കൂബാ ടീം, നാട്ടുകാര്‍ തുടങ്ങിയവരുടെ നേതൃത്വത്തില്‍ കഴിഞ്ഞ നാലു ദിവസമായി സ്‌കൂബാ ടീമും ഈരാറ്റുപേട്ട നന്മ ടീമും തോട്ടില്‍ രക്ഷാദൗത്യം നടത്തുകയായിരുന്നു. തെരച്ചിൽ തുടരുമെന്ന് പാന്പാടി എസ്ഐ പി.ബി. ഉദയകുമാർ അറിയിച്ചു. ദീര്‍ഘനാളായി മുംബൈയിലായിരുന്ന ഈപ്പന്‍ കഴിഞ്ഞനാളിലാണ് നാട്ടിലെത്തിയത്.

ഭാരവാഹികളെ തെരഞ്ഞെടുത്തു

കോട്ടയം: ഇൻസ്റ്റിറ്റ്യൂട്ട് ഓഫ് കോസ്റ്റ് അക്കൗണ്ടന്‍റ്സ് ഓഫ് ഇന്ത്യ (ഐസിഎംഎഐ) കോട്ടയം ചാപ്റ്ററിന്‍റെ പുതിയ ഭാരവാഹികളെ തെരഞ്ഞെടുത്തു. ഭാരവാഹികളായി പി.കെ. സിജു (ചെയർമാൻ), എം.സി. ബേബി (വൈസ് ചെയർമാൻ), റോണി തോമസ് (സെക്രട്ടറി), എസ്. ശ്രീലകുമാർ (ട്രഷറർ) നാരായണൻ നമ്പൂതിരി (ഇൻഫ്രാസ്ട്രക്ചർ കമ്മിറ്റി ചെയർമാൻ), സി.ജെ. ജോസഫ് (പ്രഫഷണൽ ഡെവലപ്മെന്‍റ് കമ്മിറ്റി ചെയർമാൻ), തോമസ്കുട്ടി കുര്യൻ(ട്രെയിനിംഗ് ആൻഡ് പ്ലേസ്മെന്‍റ് കമ്മിറ്റി ചെയർമാൻ), സൈന സിറിയക് (കോച്ചിംഗ് കമ്മിറ്റി ചെയർമാൻ) എന്നിവരെയാണ് തെരഞ്ഞെടുത്തത്.

ബൈക്ക് ബസിൽ തട്ടി മറിഞ്ഞ് രണ്ടുപേർക്കു പരിക്ക്

മണർകാട്: മണർകാട്-കിടങ്ങൂർ റോഡിൽ ബസിനെ മറികടക്കുന്നതിനിടെ ബൈക്ക് അപകടത്തിൽപ്പെട്ട് ബൈക്ക് യാത്രികനും കാൽനടയാത്രക്കാരനും പരിക്കേറ്റു. പള്ളിക്കത്തോട് സ്വദേശി ജിബുമോൻ സെബാസ്റ്റ്യൻ (24), കാൽനടയാത്രികനായ പരിയാരത്തിൽ പി.എ. കുര്യൻ (78) എന്നിവർക്കാണ് പരിക്കേറ്റത്. മാലം പാലത്തിനു സമീപം ഇന്നലെ രാവിലെ ഒൻപതോടെയായിരുന്നു അപകടം. ഓട്ടോറിക്ഷയെ മറികടക്കാൻ ശ്രമിച്ച ബസിനെ ബൈക്ക് യാത്രികനും മറികടക്കാൻ ശ്രമിക്കുന്നതിനിടെ ബസിന്‍റെ സൈഡ് ഭാഗം ബൈക്കിൽ തട്ടി യാത്രികൻ തെറിച്ചുവീഴുകയും ബസിന്‍റെ ടയറിൽ കുടുങ്ങിയ ബൈക്ക് അൽപദൂരം മുൻപോട്ട് പോയി കാൽനട യാത്രികനെ തട്ടുകയും ചെയ്‌തു. ബൈക്ക് യാത്രികന്‍റെ കൈക്കും കാലിനു പരിക്കുണ്ട്. ഇരുവരെയും സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു.

ഓഫീസ് പ്രവർത്തനമാരംഭിച്ചു

കോട്ടയം: നാഷണൽ പീപ്പിൾസ് പാർട്ടി സംസ്ഥാന കമ്മിറ്റി ഓഫീസ് കോട്ടയത്ത് മദർ തെരേസ റോഡിലുള്ള ലോ പോയിന്‍റ് കോംപ്ലക്‌സിൽ പ്രവർത്തനമാരംഭിച്ചു. പാർട്ടി ദേശീയ വർക്കിംഗ് പ്രസിഡന്‍റ് ജയിംസ് സാംഗ്‌മ ഉദ്ഘാടനം ചെയ്തു. പ്രസിഡന്‍റ് കെ.ടി. തോമസിന്‍റെ അധ്യക്ഷതയിൽ ചേർന്ന സമ്മേളനത്തിൽ സംസ്ഥാന ജനറൽ സെക്രട്ടറി ബിജു ഗോവിന്ദ്, നിക്കി നോംഗ്‌ഗ്ലോ, ജോഷ് ജോസഫ്, ജേക്കബ് തോമസ്, ഷൈജു ഏബ്രഹാം, ശ്രീനിവാസൻ, ബിന്ദു പിള്ള എന്നിവർ പ്രസംഗിച്ചു. ഒളിമ്പ്യൻ അനിൽകുമാർ, ടി.എൻ. രാജൻ എന്നിവരെ സംസ്ഥാന സെക്രട്ടറിമാരായും പനവിള ജയകുമാറിനെ സംസ്ഥാന വൈസ്പ്രസിഡന്‍റായും ജയിംസ് സാംഗ്‌മ നിയമിച്ചു.

മുഹമ്മദ് ഇക്ബാല്‍: ബാസ്‌കറ്റ് ബോളിനെയും കോട്ടയത്തെയും നെഞ്ചോടുചേർത്ത പ്രതിഭ

കോട്ടയം: ബാസ്‌കറ്റ് ബോളിനെയും കോട്ടയത്തെയും തന്‍റെ പേരില്‍ ഒതുക്കിയ പ്രതിഭയായിരുന്നു കഴിഞ്ഞ ദിവസം അന്തരിച്ച ഇന്‍റര്‍നാഷണല്‍ ബാസ്‌കറ്റ് ബോള്‍ താരം മുഹമ്മദ് ഇക്ബാല്‍. മികച്ച ബാസ്‌കറ്റ്‌ബോള്‍ കളിക്കാരനു വേണ്ട ഉയരവും കായിക മികവുമായി 1970കളിലും 80കളിലും കോട്ടയത്തെ യുവത്വം ആരാധനയോടെ നോക്കി നിന്നയാളായിരുന്നു മുഹമ്മദ് ഇക്ബാല്‍. 1970കളില്‍ കോട്ടയത്ത് കോളജ് വിദ്യാര്‍ഥിയായിരുന്ന കാലത്തുതന്നെ അന്തര്‍ദേശീയ, ദേശീയ, ബാസ്‌കറ്റ്‌ബോള്‍ രംഗത്ത് കോട്ടയത്തിന്‍റെ അഭിമാനമായി മാറാന്‍ ഇദ്ദേഹത്തിനു കഴിഞ്ഞു. ഇതിനൊപ്പം കോട്ടയം വൈഎംസിഎ ബാസ്‌കറ്റ്‌ബോള്‍ ടൂര്‍ണമെന്‍റിലൂടെ അന്താരാഷ്‌ട്ര പ്രശസ്തിയിലേക്ക് ഉയര്‍ന്ന് സംസ്ഥാന, ദേശീയ ബാസ്‌കറ്റ്‌ബോള്‍ ടീം അംഗവുമായി. കോട്ടയം തിരുനക്കര സ്വദേശിയായ അദ്ദേഹം ബിസിനസ് കാര്യങ്ങള്‍ക്കായി ആലുവയിലേക്ക് താമസം മാറിയെങ്കിലും കോട്ടയത്തെയും സുഹൃത്തുക്കളെയും അദ്ദേഹം ഹൃദയത്തോടു ചേര്‍ത്തു. 1971ല്‍ ടോക്കിയോയില്‍ നടന്ന ആറാമത് ഏഷ്യന്‍ ബാസ്‌കറ്റ്‌ബോള്‍ ചാമ്പ്യന്‍ഷിപ്പിനെ പ്രതിനിധീകരിച്ച മുഹമ്മദ് ഇക്ബാല്‍. 1973-74ല്‍ കേരള സീനിയര്‍ ടീമിന്‍റെ ക്യാപ്റ്റനായിരുന്നു. 1975ല്‍ കോഴിക്കോട് മാനാഞ്ചിറയില്‍ നടന്ന ചാമ്പ്യന്‍ഷിപ്പില്‍ കപ്പ് നേടിയത് മുഹമ്മദ് ഇക്ബാലിന്‍റെ നിര്‍ണായക മുന്നേറ്റത്തിലൂടെയായിരുന്നു. കേരളത്തിലെ ബാസ്‌കറ്റ്‌ബോള്‍ കളിക്കാരുടെയും സംഘാടകരുടെയും കൂട്ടായ്മയും കളിയുടെ വളര്‍ച്ചയും ലക്ഷ്യമിട്ട് 2016ല്‍ സ്ഥാപിച്ച ടീം റീബൗണ്ടിന്‍റെ പ്രസിഡന്‍റായിരുന്നു. രാജ്യാന്തര ബാസ്‌കറ്റ്‌ബോള്‍ മത്സരത്തില്‍ തെന്നിന്ത്യന്‍ സംസ്ഥാനം ആദ്യ വിജയം നേടിയതിന്‍റെ 50-ാം വാര്‍ഷികം ആഘോഷിക്കാന്‍ വൈഎംസിഎയില്‍ നടന്ന പരിപാടിയില്‍ പങ്കെടുക്കാന്‍ രണ്ടു മാസം മുമ്പാണ് അദ്ദേഹം കോട്ടയത്തെത്തിയത്. കോട്ടയം നഗരത്തിലെ കേരള ഗ്ലാസ് പാലസ് കടയെ ചുറ്റിപ്പറ്റിയായിരുന്നു ഇക്ബാലിന്‍റെ സൗഹൃദം. റീബൗണ്ട് എന്ന കൂട്ടായ്മയിലൂടെയും കോട്ടയവുമായുള്ള സൗഹൃദവും അദ്ദേഹം ഊട്ടിയുറപ്പിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ, ചലച്ചിത്രതാരങ്ങളായ പ്രേം പ്രകാശ്, വിജയരാഘവന്‍, സംവിധായകന്‍ ജോഷി മാത്യു എന്നിവരെല്ലാം ഈ കൂട്ടായ്മയിലുണ്ടായിരുന്നു.

ബസ് സർവീസ് വെട്ടിക്കുറച്ചതിൽ യാത്രക്കാർ ദുരിതത്തിൽ

കൂരോപ്പട: പള്ളിക്കത്തോട്-കോട്ടയം-എറണാകുളം പെര്‍മിറ്റുള്ള സ്വകാര്യ ബസ് പള്ളിക്കത്തോട്ടിനുള്ള സര്‍വീസ് വെട്ടിക്കുറച്ചതോടെ യാത്രക്കാര്‍ ദുരിതത്തില്‍. രാവിലെ 7.45ന് പള്ളിക്കത്തോട്ടില്‍നിന്നു പുറപ്പെട്ട് കൂരോപ്പട, ളാക്കാട്ടൂര്‍ എംജിഎം ഹയര്‍ സെക്കന്‍ഡറി സ്‌കൂള്‍, പൂതിരി, ഒറവയ്ക്കല്‍ വഴി സര്‍വീസ് നടത്തിയിരുന്ന സ്വകാര്യബസാണ് മൂന്നു മാസത്തിലേറെയായി പള്ളിക്കത്തോട്ടില്‍നിന്നുള്ള സര്‍വീസ് നിര്‍ത്തിയത്. ഈ ബസ് ഇപ്പോള്‍ കോട്ടയം-എറണാകുളം റൂട്ടില്‍ മാത്രമായി സര്‍വീസ് ചുരുക്കുകയായിരുന്നു. ഇതുവഴി സര്‍വസ് നടത്തിയിരുന്ന കെഎസ്ആര്‍ടിസി ബസും കുറച്ചുനാളുകളായി ഓടുന്നില്ല. ഇതു കാരണം ഓഫീസില്‍ പോകേണ്ട ജോലിക്കാരും വിദ്യാര്‍ഥികളുമടക്കം യാത്ര ചെയ്യാന്‍ മാര്‍ഗമില്ലാതെ പ്രയാസമനുഭവിക്കുകയാണ്. നിലവില്‍ പെര്‍മിറ്റുള്ള ഈ ബസ് പള്ളിക്കത്തോടിന് ഓടുന്നതിനുവേണ്ട നടപടികള്‍ അധികൃതര്‍ സ്വീകരിക്കുകയോ സര്‍വീസ് നടത്താന്‍ തയാറുള്ള ബസുകള്‍ക്ക് പുതിയ പെര്‍മിറ്റ് അനുവദിക്കുകയോ വേണമെന്നാണ് നാട്ടുകാരുടെ ആവശ്യം.

തിരുനക്കരയിലെ വന്‍കുഴികളില്‍ നടുവൊടിയാതെ നോക്കണം

കോട്ടയം: യാത്രക്കാരുടെ നടുവൊടിക്കുന്ന കുഴി എന്നത് വെറും പ്രയോഗമല്ല, കോട്ടയം തിരുനക്കര ബസ് സ്റ്റാന്‍ഡിലെ ആയിരക്കണക്കിന് യാത്രക്കാരുടെ അനുഭവമാണ്. സ്റ്റാന്‍ഡില്‍ ബസ് വേയോടുചേര്‍ന്ന് ആറ് വന്‍ ഗര്‍ത്തങ്ങളാണ് രൂപപ്പെട്ടിരിക്കുന്നത്. സാക്ഷരനഗരിയിലെ നഗരസഭയുടെ വിളിപ്പാടകലെയുള്ള ബസ് സ്റ്റാന്‍ഡില്‍ വെള്ളംകെട്ടിനിറഞ്ഞൊഴുകുന്ന കുഴികള്‍ കല്ലോ മണ്ണോ ഇട്ടു നികത്താനുള്ള ഉത്തരവാദിത്വംപോലും ജനപ്രതിനിധികള്‍ക്കും ജനനായകര്‍ക്കുമില്ല. കുഴികള്‍ അടയ്ക്കാന്‍ സ്വകാര്യ ബസ് ജീവനക്കാരും യാത്രക്കാരും നഗരസഭയെ അറിയിച്ചാല്‍ നോക്കാം, ശ്രമിക്കാം എന്നുള്ള അഴകൊഴമ്പന്‍ മറുപടി മാത്രം. കോട്ടയം നഗരസഭയുടെ ഉടമസ്ഥതയിലുള്ള ബസ് സ്റ്റാന്‍ഡിന് 80 വര്‍ഷത്തെ പഴക്കമുണ്ട്. പഴയ കെട്ടിടങ്ങള്‍ പൊളിച്ചുമാറ്റിയശേഷം സ്‌പോണ്‍സറുടെ ചെലവില്‍ പണിത താത്കാലിക ബസ് സ്റ്റാന്‍ഡ് യാത്രക്കാര്‍ക്ക് മരണക്കെണിയായി മാറിയിരിക്കുന്നു. അമിത വേഗത്തിലെത്തുന്ന ബസുകള്‍ സ്റ്റാന്‍ഡിലെ ഓരോ കുഴിയിലേക്കും പതിക്കുമ്പോള്‍ യാത്രക്കാരുടെ നടുവൊടിയും. ബസില്‍ നിന്നു യാത്ര ചെയ്യുന്നവര്‍ പിടിവിട്ടുവീഴുന്നതും പതിവു സംഭവം. സ്വകാര്യ ബസുകളില്‍നിന്ന് ദിവസവും വരുമാനം കിട്ടുന്ന നഗരസഭയ്ക്ക് കുഴികള്‍ മൂടാന്‍ മണിക്കൂറുകളുടെ താമസമേയുള്ളൂ. കുഴികളിലേക്ക് ബസുകള്‍ വീഴുമ്പോള്‍ കാല്‍നടയാത്രക്കാരുടെയും ബസ് കാത്തിരുപ്പുകാരുടെയും വസ്ത്രങ്ങളിലേക്ക് ചെളിവെള്ളം തെറിച്ചുവീഴുന്നത് പതിവാണ്. മൈതാനം വാടകയ്ക്കു കൊടുത്തും നഗരസഭയ്ക്ക് വലിയ വരുമാനുമുണ്ട്. ഇവിടെ പന്തലുകള്‍ നിര്‍മിക്കാനെടുക്കുന്ന കുഴികള്‍ മൂടാതെ വരുന്നതും കെണിയായി മാറുന്നു.

വൈകല്യങ്ങളെ കൈവല്യങ്ങളാക്കാൻ ഹോളിക്രോസ് സ്‌പെഷൽ സ്‌കൂളിൽ ഡിജിറ്റൽ വിദ്യാഭ്യാസ പദ്ധതിയും

മണ്ണയ്ക്കനാട്: പ്രവേശനോത്സവത്തിന് ഇരട്ടി മധുരം സമ്മാനിച്ച് ഹോളിക്രോസ് സ്‌പെഷൽ സ്‌കൂളിൽ ഡിജിറ്റൽ വിദ്യാഭ്യാസ പദ്ധതിക്ക് ഇന്ന് തുടക്കമാകും. ഇന്ന് രാവിലെ 10.30 ന് മോൻസ് ജോസഫ് എംഎൽഎ പദ്ധതി ഉദ്ഘാടനം ചെയ്യും. വിദേശ രാജ്യങ്ങളിൽ നടപ്പിലാക്കിയ ഡിജിറ്റലൈസ്ഡ് ലേണിംഗ് പ്രോഗ്രാമിന്‍റെ മാതൃകയിലാണ് സ്‌പെഷൽ സ്‌കൂൾ വിദ്യാർഥികൾക്കായി ഈ പദ്ധതി ആരംഭിക്കുന്നതെന്ന് പ്രിൻസിപ്പൽ സിസ്റ്റർ ബോബി പോൾ പറഞ്ഞു. വെർജ് ടാബ് ഉപയോഗിച്ച് പതിനെട്ട് വയസിൽ താഴെയുള്ള 30 കുട്ടികൾക്ക് ഒരേ സമയം പഠിക്കാൻ കഴിയുന്ന രീതിയിലാണ് ക്രമീകരണം. പ്രത്യേക പരിശീലനം പൂർത്തിയാക്കിയ 22 അധ്യാപകർ സ്‌കൂളിലുണ്ട്. തൊഴിൽ നൈപുണ്യ പരിശീലനവും കലാ കായിക മേഖലയിൽ കഴിവ് വികസിപ്പിക്കുന്നതിനും പ്രത്യേക പദ്ധതികൾ സ്‌കൂളിൽ ക്രമീകരിച്ചിട്ടുണ്ട്. ഹോളിക്രോസ് അങ്കമാലി പ്രൊവിൻഷ്യൽ സിസ്റ്റർ എൽസി ജോർജ് അധ്യക്ഷത വഹിക്കും. ഡോ. ജിനോ മുഖ്യപ്രഭാഷണം നടത്തും. ഹോളിക്രോസ് പള്ളി വികാരി ഫാ. തോമസ് പഴവക്കാട്ടിൽ, കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി, മരങ്ങാട്ടുപിള്ളി പഞ്ചായത്തംഗം തുളസിദാസ്, സാന്താക്രൂസ് എൽപി സ്‌കൂൾ ഹെഡ്മിസ്ട്രസ് എൽസി സ്‌കറിയ, സ്‌കൂൾ മാനേജർ സിസ്റ്റർ ഫബി ജോസഫ് , പിടിഎ പ്രസിഡന്‍റ് സുനിൽ സിറിയക് , പ്രിൻസിപ്പൽ സിസ്റ്റർ ബോബി പോൾ എന്നിവർ പ്രസംഗിക്കും.

ആശാ പ്രവർത്തകരുടെ സമരം മാർക്സിസ്റ്റ് പാർട്ടിയുടെ ഇരട്ടത്താപ്പ് തുറന്നുകാട്ടിയെന്ന്

കാഞ്ഞിരപ്പള്ളി: കേരളത്തിലെ പൊതു സമൂഹം ഏറ്റെടുത്ത ആശാ വർക്കർമാരുടെ സമരം തൊഴിലാളി വർഗ പാർട്ടിയെന്ന് മേനി നടിക്കുന്ന മാർക്സിസ്റ്റ് പാർട്ടിയുടെ ഇരട്ടത്താപ്പ് തുറന്നുകാട്ടിയെ ന്ന് ആശാവർക്കർമാരുടെ രാപ്പകൽ സമര ജാഥയുടെ ക്യാപ്റ്റൻ എം.എ. ബിന്ദു പറഞ്ഞു. ഓണറേറിയം വർധിപ്പിക്കുക, വിരമിക്കൽ ആനുകൂല്യം പ്രഖ്യാപിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ട് കേരള ആശാ ഹെൽത്ത് വർക്കേഴ്സ് അസോസിയേഷൻ നടത്തുന്ന രാപ്പകൽ സമര യാത്രക്ക് യുഡിഎഫ് ടൗണിൽ നൽകിയ സ്വീകരണത്തിന് നന്ദി പറയുകയായിരുന്നു എം.എ. ബിന്ദു. കോൺഗ്രസ് കാഞ്ഞിരപ്പള്ളി ബ്ലോക്ക് പ്രസിഡന്‍റ് പി. ജീരാജിന്‍റെ അധ്യക്ഷതയിൽ ഡിസിസി ജനറൽ സെക്രട്ടറി പ്രഫ. റോണി കെ. ബേബി ഉദ്ഘാടനം ചെയ്തു. ഡിസിസി ജനറൽ സെക്രട്ടറി പി.എ ഷെമീർ മുഖ്യപ്രഭാഷണം നടത്തി. കേരള ആശാ ഹെൽത്ത് വർക്കേഴ്സ് അസോസിയേഷൻ സംസ്ഥാന വൈസ് പ്രസിഡന്‍റ് എസ് മിനി, അബ്ദുൾ കരീം മുസലിയാർ, ബിജു പത്യാല, നാസർ കോട്ടവാതിൽക്കൽ, സുനിൽ തേനമ്മാക്കൽ, ഡാനി ജോസ് കുന്നത്ത് തുടങ്ങിയവർ പ്രസംഗിച്ചു. മുണ്ടക്കയം: ആശാ വർക്കർമാർ നടത്തുന്ന രാപകൽ സമര യാത്രയ്ക്ക് മുണ്ടക്കത്ത് സ്വീകരണം നൽകി. ആന്‍റോ ആന്‍റണി എംപി ഉദ്ഘാടനം ചെയ്തു. സ്വാഗത സംഘം ചെയർമാൻ കെ.എസ്. രാജു അധ്യക്ഷത വഹിച്ചു. രാപകൽ സമര യാത്ര ക്യാപ്റ്റൻ എം.എ. ബിന്ദു, എസ്. മിനി, മേഖല കോ ഓർഡിനേറ്റർ കെ.പി. മായാമോൾ, ജോമോൻ ഐക്കര, പ്രകാശ് പുളിക്കൻ, ടി.സി. ഷാജി, ചാൾസ് ആന്‍റണി, ഷാഹിദ റഹിം, സിജു കൈതമറ്റം, ഇമാം അബ്ദുൾ റഷീദ്, രാജീവ് പുഞ്ചവയൽ, തമ്പി കാവുംപാടം, ബിനു മറ്റക്കര, പി.ടി. നൗഷാദ്, പി.കെ. റസാക്ക്, ടി.സി. സെയ്ദ് മുഹമ്മദ്, ഷാജി അറത്തിൽ, റോയി കപ്പലുമാക്കൽ, ടി.ടി. സാബു എന്നിവർ പ്രസംഗിച്ചു.

മുണ്ടക്കയം പഞ്ചായത്തിന്‍റെ കാമറ കണ്ണുകൾ പണി തുടങ്ങി മാലിന്യ നിക്ഷേപകർക്കെതിരേ കർശന നടപടി

മുണ്ടക്കയം: പൊതുനിരത്തിൽ മാലിന്യം തള്ളുന്നവർ സൂക്ഷിക്കുക. നിങ്ങളെ പിടികൂടാൻ കാമറ കണ്ണുകൾ തുറന്നിരിക്കുന്നു. മുണ്ടക്കയം പഞ്ചായത്തിന്‍റെ നേതൃത്വത്തിൽ വിവിധ ഇടങ്ങളിൽ സ്ഥാപിച്ചിരിക്കുന്ന കാമറകളിലാണ് മാലിന്യം തള്ളിയവർ കുടുങ്ങിത്തുടങ്ങിയത്. കഴിഞ്ഞദിവസം രാത്രിയിൽ മുണ്ടക്കയം ടൗണിൽ ദേശീയപാതയിൽ പച്ച മീൻ കടയിൽ നിന്നു മാലിന്യം തള്ളിയവർക്കെതിരേ നടപടി ആരംഭിച്ചു. കൂടാതെ കഴിഞ്ഞ ദിവസം രാത്രി 10ാടെ മുണ്ടക്കയം- എരുമേലി റൂട്ടിൽ ഇല്ലികൂപ്പ് ഭാഗത്ത് തള്ളിയ വ്യക്തിയെ കാമറ പരിശോധിച്ചതിന്‍റെ അടിസ്ഥാനത്തിൽ പോലീസിന്‍റെ സഹായത്തോടെ കണ്ടെത്തി. ആദ്യഘട്ടമെന്ന നിലയിൽ കേസ് എടുക്കാതെ താക്കീത് നൽകി 5000 രൂപ ഫൈൻ ഈടാക്കി വിട്ടയച്ചു. മാലിന്യം തള്ളുന്നവരെ പിടികൂടുകയെന്ന ലക്ഷ്യത്തോടെ മുണ്ടക്കയം പഞ്ചായത്ത് വിവിധ ഭാഗങ്ങളിലായി 12 കാമറകളാണ് സ്ഥാപിച്ചിരിക്കുന്നത്. പഞ്ചായത്ത് ഓഫീസിൽ ക്രമീകരിച്ചിരിക്കുന്ന മോണിറ്ററിൽ വിവിധ സ്ഥലങ്ങളിൽ നിന്നുള്ള കാമറയിലെ ദൃശ്യങ്ങൾ നിരീക്ഷിക്കുവാൻ കഴിയും. ഇതിനായി ഒരു ജീവനക്കാരെ പ്രത്യേകം നിയോഗിച്ചിട്ടുണ്ട്. 360 ഡിഗ്രി തിരിയുന്ന ആധുനിക സംവിധാനങ്ങളോടുകൂടിയ കാമറ പഞ്ചായത്ത് ഓഫീസിൽ ഇരുന്നുകൊണ്ടുതന്നെ നിയന്ത്രിക്കുവാൻ കഴിയുമെന്നതും പ്രത്യേകതയാണ്. അടുത്ത ഘട്ടത്തിൽ കൂടുതൽ കാമറകൾ വിവിധ സ്ഥലങ്ങളിൽ സ്ഥാപിച്ച് പഞ്ചായത്തിനെ മാലിന്യമുക്തമാക്കുവാനാണ് അധികാരികളുടെ തീരുമാനം.

മുക്കൂട്ടുതറയിൽ ക്ഷേത്രത്തിൽ മോഷണശ്രമം: കാണിക്കവഞ്ചി അപഹരിച്ചു

മുക്കൂട്ടുതറ: ടൗണിന് സമീപത്തെ തിരുവമ്പാടി ശ്രീ കൃഷ്ണ സ്വാമി ക്ഷേത്രത്തിൽ മോഷണശ്രമം. തിങ്കളാഴ്ച രാത്രി 11.30 ഓടെ ക്ഷേത്രത്തിൽ കടന്ന മോഷ്ടാവ് പുലർച്ചെ ഒന്നരെ വരെ മോഷണം നടത്താൻ ശ്രമിച്ചു. നേർച്ചക്കുറ്റികൾ കുത്തിതുറന്ന് എടുക്കാൻ നടത്തിയ ശ്രമങ്ങൾ വിഫലമായതിന് ഒടുവിൽ ക്ഷേത്രത്തിന്‍റെ മുന്നിൽ ഇളക്കി എടുക്കാവുന്ന കാണിക്കവഞ്ചി എടുത്തു സ്ഥലം വിട്ട മോഷ്ടാവ് അതിൽ കാര്യമായ തുക ഇല്ലെന്ന് അറിഞ്ഞതോടെ ക്ഷേത്രത്തിന് സമീപത്തെ റബർ തോട്ടത്തിൽ ഉപേക്ഷിച്ചു. സംഭവം സംബന്ധിച്ച് ക്ഷേത്ര ഭാരവാഹികൾ ഇന്നലെ എരുമേലി പോലിസ് സ്റ്റേഷനിൽ പരാതി നൽകി. ക്ഷേത്രത്തിൽ ഒരു വർഷമായി സിസി കാമറകൾ പ്രവർത്തിക്കുന്നുണ്ട്. കാമറകളിൽ പതിഞ്ഞ മോഷ്ടാവിന്‍റെ ദൃശ്യങ്ങൾ ക്ഷേത്ര ഭാരവാഹികൾ പോലീസിന് കൈമാറി. മോഷണ ശ്രമം ഉണ്ടായ ദിവസം പകൽ ക്ഷേത്രത്തിലെ കാണിക്കവഞ്ചികൾ തുറന്ന് സംഭാവന തുകകൾ ഭാരവാഹികൾ ക്ഷേത്രം വക അക്കൗണ്ടിലേക്ക് എടുത്തതിനാൽ മോഷ്ടാവിന് കാര്യമായ പണാപഹരണം നടത്താൻ കഴിഞ്ഞില്ലന്ന് കരുതുന്നു. ഇന്നലെ ക്ഷേത്ര ഭാരവാഹികൾ നടത്തിയ തെരച്ചിലിലാണ് കാണിക്കവഞ്ചി ഇളക്കി എടുത്തതായും സമീപത്തെ റബർ തോട്ടത്തിൽ ഉപേക്ഷിച്ച നിലയിലും കണ്ടെത്തിയത്. മോഷ്ടാവ് കൈകളിൽ ഗ്ലൗസ് ധരിച്ചതായി സിസി കാമറകളിൽ കാണാം. റെയിൻ കോട്ടും പുറകിൽ ബാഗും ധരിച്ച നിലയിലാണ് മോഷ്ടാവിന്‍റെ ദൃശ്യങ്ങൾ.

പെരുന്തേനരുവിയിൽ ഗ്ലാസ് നടപ്പാലം ഉൾപ്പടെ പദ്ധതികൾക്ക് ഏഴ് കോടി

മുക്കൂട്ടുതറ: പെരുന്തേനരുവിയിൽ ഗ്ലാസ് നടപ്പാലം അടക്കമുള്ള പദ്ധതികൾക്കായി സർക്കാർ ഏഴ് കോടി അനുവദിച്ചു. വെള്ളച്ചാട്ടം തൊട്ടുമുകളിൽനിന്ന് കാണത്തക്ക വിധമുള്ള കണ്ണാടി നടപ്പാലം, സുരക്ഷാ സംവിധാനങ്ങൾ, പൂന്തോട്ടം, നദീതീരത്തുകൂടിയുള്ള നടപ്പാത എന്നിവയ്ക്കാണ് തുക. പെരുന്തേനരുവി ടൂറിസം പദ്ധതിയുടെ വികസനം അടക്കമുള്ളവയ്ക്കായി തുക ആവശ്യപ്പെട്ട് നവകേരള സദസ്സിനിടെ പ്രമോദ് നാരായൺ എംഎൽഎ മുഖ്യമന്ത്രിക്ക് നിവേദനം നൽകിയിരുന്നു. ഇതിന്‍റെ അടിസ്ഥാനത്തിലാണ് തുക അനുവദിച്ചത്. ഒരു വർഷം കൊണ്ട് നിർമാണം പൂർത്തിയാക്കാനാണ് ഉദ്ദേശിക്കുന്നത്. ടൂറിസം വകുപ്പിലാണ് നിർമാണ ചുമതല. പഞ്ചായത്തും ഇറിഗേഷൻ വകുപ്പും സ്ഥലം ലഭ്യമാക്കുന്നതോടെ നിർമാണം ആരംഭിക്കാനാകുമെന്ന് എംഎൽഎ പറഞ്ഞു. വെച്ചൂച്ചിറ, നാറാണംമൂഴി പഞ്ചായത്തുകൾ അതിർത്തി പങ്കിടുന്ന പമ്പാനദിയിലെ പെരുന്തേനരുവി വെള്ളച്ചാട്ടം കേന്ദ്രീകരിച്ചുള്ള പെരുന്തേനരുവി ടൂറിസം പദ്ധതിയുടെ വികസനം ഇരുപഞ്ചായത്തുകളുടെയും വികസനത്തിന് വഴി തെളിക്കും. ദിവസേന നൂറു കണക്കിന് സഞ്ചാരികളാണ് ഇവിടെയെത്തുന്നത്. നേരത്തെ, ഇവിടെ വാഹനങ്ങൾക്കുള്ള പാർക്കിംഗ് ഗ്രൗണ്ട്, കുട്ടികളുടെ കളി സ്ഥലം, അരുവിയിലേക്ക് ഇറങ്ങാനുള്ള പടിക്കെട്ടുകൾ, കൈവരികൾ, രണ്ട് കെട്ടിടങ്ങൾ, വെള്ളച്ചാട്ടം ദൂരെ നിന്ന് വീക്ഷിക്കാനുള്ള സംവിധാനങ്ങൾ എന്നിവയെല്ലാം ഒരുക്കിയിട്ടുണ്ട്. അരുവിയിലേക്ക് വളഞ്ഞ് വാഹനം ഇറങ്ങുന്ന റോഡിലെ കൊടും വളവും കുത്തിറക്കവും വീതി കൂട്ടി സൗകര്യപ്രദമാക്കിയിട്ടുണ്ട്. അമിനിറ്റി സെന്‍ററും ഭക്ഷണശാലയും താമസിക്കാനുള്ള മുറികളും ഇപ്പോൾ ഇവിടെ നിലവിലുണ്ട്. ഇതിനൊപ്പമാണ് പുതിയ സൗകര്യങ്ങളും ഒരുക്കുന്നത്.

ബസ് സ്റ്റാൻഡ് കവാടത്തിലെ മലിനജലം യാത്രക്കാർക്കു ദുരിതമാകുന്നു

കാഞ്ഞിരപ്പള്ളി: കാഞ്ഞിരപ്പള്ളി ബസ് സ്റ്റാൻഡ് കവാടത്തിലേക്ക് ഒഴുകിയെത്തുന്ന മലിനജലം യാത്രക്കാർക്കും വ്യാപാരികൾക്കും ദുരിതമാകുന്നു. ഓടകൾ അടഞ്ഞതോടെയാണ് കറുത്ത നിറത്തിലുള്ള മലിന ജലം പുത്തനങ്ങാടി റോഡിലൂടെ ബസ് സ്റ്റാൻഡ് കവാടത്തിലും ദേശീയ പാതയിലുമടക്കം ഒഴുകി പരക്കുന്നത്. കറുത്ത നിറത്തിലുള്ള വെള്ളം ഒഴുകി പോകുന്ന പ്രദേശത്തൊക്കെ കടുത്ത ദുർഗന്ധമാണ് അനുഭവപ്പെടുന്നത്. മത്സ്യ-മാംസ അവശിഷ്ടങ്ങൾ വരെ ഇക്കൂട്ടത്തിലുണ്ടെന്നു വ്യാപാരികൾ പറയുന്നു. പുത്തനങ്ങാടി റോഡിലൂടെ ഒഴുകിയെത്തുന്ന മലിനജലം ദേശീയ പാതയിലാകെ ഒഴുകി പരക്കുന്ന സ്ഥിതിയാണ്. വ്യാപാര സ്ഥാപനങ്ങളുടെ മുന്പിലൂടെയാണ് ഇത് ഒഴുകിയെത്തുന്നത്. ഇവരാണ് ഏറ്റവും കൂടുതൽ ദുരിതം പേറുന്നതും. മൂക്ക് പൊത്തി ഇരിക്കേണ്ട ഗതികേടാണെന്നു വ്യാപാരികൾ പറയുന്നു. ഒഴുകിയെത്തുന്ന മലിനജലം സ്റ്റാൻഡിനു മുന്പിലായി കെട്ടി കിടക്കുന്ന സ്ഥിതിയുമുണ്ട്. മലിനജലമാണെന്നറിയാതെ ഈ വെള്ളത്തിൽ ചവിട്ടിയാണ് വഴിയാത്രക്കാരടക്കം കടന്നു പോകുന്നത്. ദേശീയപാതയിൽനിന്നു ബസുകൾ സ്റ്റാൻഡിലേയ്ക്കു പ്രവേശിക്കുമ്പോൾ വെള്ളം യാത്രക്കാരുടെ മേൽ പതിക്കുന്നതും പതിവാണ്. സമീപത്തായുള്ള ഓട്ടോറിക്ഷ സ്റ്റാൻഡിലെ ഡ്രൈവർമാരും ഇതിന്‍റെ ദുരിതം പേറുന്നവരാണ്. കൃത്യമായി ഓടകൾ വൃത്തിയാക്കിയിരുന്നുവെങ്കിൽ മലിനജലം ഓടകൾ വഴി ഒഴുകി പോയേനെയെന്ന് ഇവർ ചൂണ്ടിക്കാട്ടുന്നു.

ട്രീ ബാങ്കിംഗ് പദ്ധതിയുമായി വനംവകുപ്പ്

കോട്ടയം: പരിസ്ഥിതി സംരക്ഷണത്തിന്‍റെ ഭാഗമായി സ്വകാര്യ ഭൂമിയില്‍ വൃക്ഷത്തിന്‍റെ സാന്ദ്രത വര്‍ധിപ്പിക്കുന്നതിന്‍റെ ഭാഗമായി ട്രീ ബാങ്കിംഗ് പദ്ധതിയുമായി വനംവകുപ്പ്. പദ്ധതിയുടെ ഭാഗമായി അത്യാവശ്യം ഭൂമിയുണ്ടെങ്കില്‍ മരം നട്ടുവളര്‍ത്തി കാശുണ്ടാക്കാം. വനം വകുപ്പിനു കീഴിലുള്ള സോഷ്യല്‍ ഫോറസ്ട്രി വിഭാഗമാണ് പരിസ്ഥിതി ദിനാചരണത്തിന്‍റെ ഭാഗമായി പദ്ധതി നടപ്പാക്കുന്നത്. പദ്ധതിക്കുള്ള അപേക്ഷ സോഷ്യല്‍ ഫോറസ്ട്രി വിഭാഗം ക്ഷണിച്ചു. സ്വന്തമായി ഭൂമിയുള്ളവര്‍ക്കോ കുറഞ്ഞത് 15 വര്‍ഷം ലീസിന് ഭൂമി കൈവശമുള്ളവര്‍ക്കോ ഭൂമിയുമായി ബന്ധപ്പെട്ട രേഖകളോടെ അതത് സോഷ്യല്‍ ഫോറസ്ട്രി റേഞ്ച് ഓഫീസില്‍ പദ്ധതിക്കായി രജിസ്റ്റര്‍ ചെയ്യാം. സര്‍ക്കാര്‍ നിശ്ചയിച്ചിട്ടുള്ള വൃക്ഷത്തൈകള്‍ നട്ടുവളര്‍ത്തുന്ന വ്യക്തികള്‍ക്ക് 15 വര്‍ഷംവരെ ധനസഹായം ലഭിക്കും. 15 വര്‍ഷം പൂര്‍ത്തിയായശേഷം സ്ഥലം ഉടമയ്ക്ക് സോഷ്യല്‍ ഫോറസ്ട്രി ഡിവിഷണല്‍ ഓഫീസിന്‍റെ അനുമതിയോടെ മരങ്ങള്‍ സ്വന്തം ആവശ്യത്തിന് മുറിച്ച് ഉപയോഗിക്കുകയോ വില്‍പന നടത്തുകയോ ചെയ്യാം. പദ്ധതിയില്‍ അംഗങ്ങളാകുന്നവര്‍ വനംവകുപ്പുമായി കരാറില്‍ ഏര്‍പ്പെടണം. തേക്ക്, ഈട്ടി, ചന്ദനം, പ്ലാവ്, ആഞ്ഞിലി, തമ്പകം, കരിമരുത്, കുമ്പിള്‍, വെന്തേക്ക് എന്നീ മരങ്ങള്‍ വച്ചു പിടിപ്പിക്കുന്നതിനാണ് ധനസഹായം. ഈ വര്‍ഷം ചന്ദനത്തൈകള്‍ക്കാണ് മുന്‍തൂക്കം. ചുരുങ്ങിയത് 10 തൈകള്‍മുതല്‍ പരമാവധി 1000 തൈകള്‍വരെ നട്ടുപരിപാലിക്കണം. തൈകള്‍ സൗജന്യമായി വനംവകുപ്പ് നല്‍കും. തൈകള്‍ നട്ടു മൂന്നു വര്‍ഷത്തിനു ശേഷമാണ് ധനസഹായം നല്‍കിത്തുടങ്ങുക. 10 മുതല്‍ നൂറുവരെ മരങ്ങള്‍ക്ക് പ്രതിവര്‍ഷം ഒരു മരത്തിന് 30 രൂപയും 101-250 മരങ്ങള്‍ക്ക് പ്രതിവര്‍ഷം ഒരു മരത്തിന് 25 രൂപയും 251-500 മരങ്ങള്‍ക്ക് 20 രൂപയും 501-750 മരങ്ങള്‍ക്ക് 15 രൂപയും, 751-1000 മരങ്ങള്‍ക്ക് 10 രൂപയുമാണ് ധനസഹായമായി നല്‍കുന്നത്. പദ്ധതിക്കായി അപേക്ഷിക്കേണ്ട അവസാന തീയതി 15. കൂടുതല്‍ വിവരങ്ങള്‍ക്ക് വനം വകുപ്പിന്‍റെ വെബ്സൈറ്റോ സോഷ്യല്‍ ഫോറസ്ട്രി ഡിവിഷന്‍/റെയിഞ്ച് ഫോറസ്റ്റ് ഓഫീസുമായോ ബന്ധപ്പെടണം. ഫോണ്‍: 0481-2310412, 8547603640, 8547603650.

യൂണിഫോം വിതരണം വൈകും

കോട്ടയം: പാഠപുസ്തക വിതരണത്തിലെ ആവേശം യൂണിഫോം വിതരണത്തിലില്ല. പ്രവേശനോത്സവം കഴിഞ്ഞിട്ടും പകുതി യൂണിഫോം പോലും സ്‌കൂളുകളില്‍ എത്തിയിട്ടില്ല. യൂണിഫോമിനു മുഴുവന്‍ അലവന്‍സും അനുവദിച്ചതായി വിദ്യാഭ്യാസ മന്ത്രി കഴിഞ്ഞ മാസം പ്രഖ്യാപനം നടത്തിയിരുന്നു. ഒന്നുമുതല്‍ എട്ടു വരെയുള്ള കുട്ടികള്‍ക്ക് 600 രൂപ ക്രമത്തില്‍ 79 കോടി രൂപയാണ് അനുവദിച്ചത്. പൊതുവിദ്യാഭ്യാസ വകുപ്പിന്‍റെയും കൈത്തറി വകുപ്പിന്‍റെയും സംയുക്താഭിമുഖ്യത്തിലുള്ള പദ്ധതി രണ്ട് തരത്തിലാണ് നടപ്പിലാക്കുന്നത്. എല്‍പി, യുപി സര്‍ക്കാര്‍ സ്‌കൂളുകളിലും ഒന്നുമുതല്‍ നാലു വരെ എയ്ഡഡ് എല്‍പിയിലും കൈത്തറി വകുപ്പാണ് യൂണിഫോം നല്‍കുന്നത്. കൈത്തറി യൂണിഫോം ലഭിക്കാത്ത ഒന്നുമുതല്‍ എട്ടുവരെയുള്ള ഗവ. ഹൈസ്‌കൂളിലെ എപിഎല്‍ വിഭാഗം ആണ്‍കുട്ടികള്‍ക്കും ഒന്നുമുതല്‍ എട്ടുവരെ എയ്ഡഡ് സ്‌കൂളുകളിലെ മുഴുവന്‍ കുട്ടികള്‍ക്കും ഒന്നു മുതല്‍ അഞ്ചുവരെയുള്ള എയ്ഡഡ് എല്‍പി സ്‌കൂളിലെ മുഴുവന്‍ കുട്ടികള്‍ക്കും ഒരു കുട്ടിക്ക് രണ്ട് ജോഡിക്ക് 600 രൂപ നിരക്കില്‍ നല്‍കും. നിലവില്‍ അലവന്‍സ് ലഭിച്ചിട്ടില്ലെന്നു മാത്രമല്ല ഈ തുക യൂണിഫോമിന് തികയുകയുമില്ല. തുണിവിലയും തുന്നല്‍കൂലിയിലും കണക്കാക്കിയാല്‍ 1500 രൂപയോളം ചെലവ് വരും. കഴിഞ്ഞ വര്‍ഷത്തെ യൂണിഫോം വിഹിതം ലഭിക്കാത്ത വിദ്യാര്‍ഥികളുമുണ്ട്.

കോവിഡ് വ്യാപനത്തില്‍ ആശങ്ക; ആരോഗ്യവകുപ്പിനു നിസംഗത

കോട്ടയം: ഇന്നലെ ജില്ലയില്‍ ഒരു കോവിഡ് മരണം റിപ്പോര്‍ട്ട് ചെയ്തിട്ടും ജില്ലാ ആരോഗ്യ വിഭാഗത്തിന് നിസംഗത. കോവിഡ് സംബന്ധിച്ച യാതൊരു വിവരങ്ങളും ജില്ലാ മെഡിക്കല്‍ വിഭാഗം പുറത്തു വിടുന്നുമില്ല. ചങ്ങനാശേരി സ്വദേശിനിയായ വയോധികയാണു തിങ്കളാഴ്ച രാത്രി കോവിഡ് ബാധയെത്തുടര്‍ന്ന് സ്വകാര്യ ആശുപത്രിയില്‍ മരിച്ചത്. ദിവസം അന്‍പതിലേറെ പേരില്‍ കോവിഡ് പുതുതായി സ്ഥിരീകരിക്കുമ്പോഴും ജില്ലാ ആരോഗ്യവകുപ്പ് നിര്‍ദേശങ്ങള്‍ പുറപ്പെടുവിക്കുകയോ ജാഗ്രതാ നടപടികള്‍ സ്വീകരിക്കുകയോ ചെയ്യുന്നില്ല. നിലവില്‍ 250 കോവിഡ് ബാധിതര്‍ ജില്ലയില്‍ ചികിത്സയിലുണ്ട്. കോവിഡ് പ്രതിരോധ നിര്‍ദേശങ്ങള്‍ നല്‍കാനോ വീഴ്ചയില്ലാത്ത ചികിത്സാ സംവിധാനങ്ങള്‍ ഏര്‍പ്പെടുത്താനോ ജില്ലയില്‍ നടപടിയെടുക്കുന്നില്ല. സ്‌കൂള്‍ തുറക്കല്‍ പ്രമാണിച്ച് വിദ്യാഭ്യാസ സ്ഥാപനങ്ങള്‍ പുലര്‍ത്തേണ്ട ജാഗ്രതാനിര്‍ദേശങ്ങളെക്കുറിച്ചും അറിയിപ്പുകളില്ല. ജലദോഷവും പനിയുമായി ആശുപത്രിയിലെത്തുന്നവരില്‍ മാത്രമാണു പരിശോധനയില്‍ കോവിഡ് സ്ഥിരീകരിക്കുന്നത്. ജലദോഷവും പനിയും ബാധിച്ചശേഷം ചികിത്സ തേടാത്തവരില്‍ ഏറെപ്പേര്‍ക്കും കോവിഡ് ഉണ്ടെന്നാണ് വിദഗ്ധരുടെ അഭിപ്രായം. സംസ്ഥാനത്ത് ഏറ്റവുമധികം കോവിഡ് ബാധിതരും വ്യാപനവുമുള്ള ജില്ലയെന്ന നിലയില്‍ കോട്ടയത്ത് രോഗവ്യാപനം തടയാന്‍ നടപടിയില്ല. കോട്ടയം നഗരസഭാ പരിധിയിലാണ് ഏറ്റവും കൂടുതല്‍ രോഗികളുള്ളത്. സ്‌കൂള്‍ ബസുകളില്‍ മാസ്‌ക് നിര്‍ബന്ധമാക്കാനാണു ചില സ്‌കൂളുകളുടെ തീരുമാനം. പൊതുവാഹനങ്ങളെ ആശ്രയിക്കുന്ന വിദ്യാര്‍ഥികളും മാസ്‌ക് ധരിക്കണമെന്ന് നിര്‍ദേശിക്കുന്നു. മാസ്‌ക്, സാനിറ്റൈസര്‍ തുടങ്ങിയവ ഉപയോഗിക്കണമെന്നും ആള്‍ക്കൂട്ടങ്ങള്‍ പരമാവധി ഒഴിവാക്കണമെന്നാണ് സര്‍ക്കാര്‍ നിര്‍ദേശം. വയോധികരിലും ഗുരുതര രോഗങ്ങള്‍ ബാധിച്ചവരിലും കോവിഡ് വലിയ ആഘാതമുണ്ടാക്കുന്നുണ്ട്. തമിഴ്‌നാട്, കര്‍ണാടക, മഹാരാഷ്ട്ര സംസ്ഥാനങ്ങളിലും കോവിഡ് വ്യാപനമുണ്ട്. ഉപരിപഠനത്തിനും ജോലിക്കും ജില്ലയില്‍നിന്ന് ഏറെപ്പേര്‍ പോയിവരുന്നുണ്ട്. അതിഥി തൊഴിലാളികളിലും കോവിഡ് ബാധ റിപ്പോര്‍ട്ട് ചെയ്തിട്ടുണ്ട്. സംസ്ഥാനത്ത് 1416 പേര്‍ കോവിഡ് ചികിത്സയിലുണ്ട്. ഇതിനോടകം ഒന്‍പത് മരണവും സ്ഥിരീകരിച്ചു. കോവിഡ്, പനി ലക്ഷണങ്ങളുമായി ആശുപത്രികളില്‍ എത്തുന്നവര്‍ക്ക് ആന്‍റിജന്‍ ടെസ്റ്റ് നിര്‍ബന്ധമാക്കി. റാപ്പിഡ് ആന്‍റിജന്‍ ടെസ്റ്റ് നടത്തി ഫലം നെഗറ്റീവെങ്കില്‍ ആര്‍ടി പിസിആര്‍ ചെയ്യണമെന്നും ആരോഗ്യവകുപ്പ് നിര്‍ദേശിച്ചു. രോഗം സ്ഥിരീകരിക്കുന്നവരെ പ്രത്യേക വാര്‍ഡില്‍ പാര്‍പ്പിക്കണം.

ബിരിയാണി സദ്യയോടെ അങ്കണവാടി പ്രവേശനോത്സവം

കോട്ടയം: അങ്കണവാടി പ്രവേശനോത്സവം കുഞ്ഞുങ്ങള്‍ക്ക് കുശാലായിരുന്നു. പടികയറി ചെന്നപ്പോള്‍ ടീച്ചറുടെ വക ലഡുവും മിഠായിയും. ടീച്ചറിന്‍റെ കഥപറച്ചിലും പാട്ടും കഴിഞ്ഞപ്പോള്‍ മേശപ്പുറത്ത് ചൂടന്‍ മുട്ടബിരിയാണി. അച്ചാറും പപ്പടവും സാലഡും ബിരിയാണിക്കു ചുറ്റും വട്ടംകൂടിയപ്പോള്‍ തിന്നാന്‍ നല്ല ശേല്. കരച്ചിലും പിഴിച്ചിലുമില്ലാതെ ഇന്നലെ ഒന്നാം ദിവസംതന്നെ ടീച്ചറും ആയയും പിള്ളേരെ കൈയിലെടുത്തു. പുലാവും ഉപ്പുമാവും ചോറുമൊക്കെ മാറിമാറി തരുമെന്ന ഉറപ്പുംകൊടുത്താണ് കുഞ്ഞുങ്ങളെ മടക്കിയയച്ചത്. ആഴ്ചയില്‍ മൂന്നു ദിവസം മുട്ടയും പാലുമൊക്കെ നിര്‍ബന്ധമാക്കിയതോടെ കുഞ്ഞുങ്ങള്‍ക്ക് നല്ല കാലമായി. കിടിലൻ മെനു റെഡി അങ്കണവാടികളിലെ പരിഷ്‌കരിച്ച മെനു അനുസരിച്ച് ഓരോ ദിവസവും വൈവിധ്യമാർന്ന ഭക്ഷണം നല്‍കും. തിങ്കളാഴ്ച രാവിലെ പാല്‍, പിടി, കൊഴുക്കട്ട, ഇലയട, ഉച്ചയ്ക്ക് ചോറ്, ചെറുപയര്‍, ഇലക്കറി, ഉപ്പേരി, തോരന്‍, പരിപ്പ് പായസം. ചൊവ്വാഴ്ച രാവിലെ ന്യൂട്രി ലഡു, ഉച്ചയ്ക്ക് മുട്ട ബിരിയാണി അല്ലെങ്കില്‍ മുട്ട പുലാവ്, ഫ്രൂട്ട് കപ്പ്, റാഗി അട. ബുധനാഴ്ച രാവിലെ പാല്‍, പിടി, കൊഴുക്കട്ട അല്ലെങ്കില്‍ ഇലയട, കടല മിഠായി, ഉച്ചയ്ക്ക് പയര്‍ കഞ്ഞി, വെജ് കിഴങ്ങ് കൂട്ടുകറി, സോയ ഡ്രൈ ഫ്രൈ, പൊതുഭക്ഷണമായി ഇഡ്ഡലി, സാമ്പാര്‍, പുട്ട്, ഗ്രീന്‍പീസ് കറി. വ്യാഴാഴ്ച രാവിലെ റാഗി, അരിഅട അല്ലെങ്കില്‍ ഇലയപ്പം. ഉച്ചയ്ക്ക് ചോറ്, മുളപ്പിച്ച ചെറുപയര്‍, ചീരത്തോരന്‍, സാമ്പാര്‍, മുട്ട, ഓംലറ്റ്, പൊതുഭക്ഷണമായി അവല്‍, ശര്‍ക്കര, പഴം മിക്‌സ്. പഞ്ചസാരയുടെയും ഉപ്പിന്‍റെയും അളവ് കുറച്ചുകൊണ്ട് കുട്ടികളുടെ ആരോഗ്യം ഉറപ്പാക്കി പോഷക മാനദണ്ഡ പ്രകാരമാണ് മെനു പരിഷ്‌കരിച്ചത്.

കുറവിലങ്ങാട് അഗ്രിഫെസ്റ്റ്

പാലാ: കാര്‍ഷിക രംഗത്ത് ഫലപ്രദമായ ഇടപെടലുകള്‍ക്ക് നേതൃത്വം കൊടുക്കുന്ന പാലാ രൂപതയുടെ സാമൂഹ്യ പ്രവര്‍ത്തന വിഭാഗമായ പാലാ സോഷ്യല്‍ വെല്‍ഫെയര്‍ സൊസൈറ്റിയുടെ നേതൃത്വത്തില്‍ പാലാ അഗ്രിമ കാര്‍ഷിക നഴ്‌സറിയുടെ സഹകരണത്തോടുകൂടി കുറവിലങ്ങാട് മര്‍ത്ത് മറിയം ആര്‍ക്കിഎപ്പിസ്‌കോപ്പല്‍ പള്ളിയുടെ അങ്കണത്തില്‍ കുറവിലങ്ങാട് അഗ്രി ഫെസ്റ്റ് എന്ന പേരില്‍ കാര്‍ഷികമേള സംഘടിപ്പിക്കും. ആറ്, ഏഴ്, എട്ട് തീയതികളിലായി നടത്തപ്പെടുന്ന അഗ്രി ഫെസ്റ്റിന്‍റെ ഉദ്ഘാടനം ആറിന് രാവിലെ വികാരിയും സ്വാശ്രയസംഘം രക്ഷാധികാരിയുമായ റവ. ഡോ. തോമസ് മേനാച്ചേരി നിര്‍വഹിക്കും. പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍ ആദ്യ വില്‍പ്പന നിര്‍വഹിക്കും. സ്വാശ്രയസംഘം ഡയറക്ടര്‍ ഫാ. ജോസഫ് ചൂരയ്ക്കല്‍ അധ്യക്ഷത വഹിക്കും. ഹൈബ്രിഡ് പച്ചക്കറി തൈകള്‍, നാടന്‍, വിദേശ ഫല വൃക്ഷ തൈകള്‍, പുതിയ ഇനം പച്ചക്കറി വിത്തുകള്‍, കാര്‍ഷിക മൂല്യ വര്‍ദ്ധിത ഉത്പന്നങ്ങള്‍, കാര്‍ഷിക വിഭവങ്ങള്‍,കാര്‍ഷിക വിളകള്‍ എന്നിവയുടെ പ്രദര്‍ശനവും വിപണനവും ഉണ്ടായിരിക്കും. വിവിധ ജൈവ വളങ്ങള്‍, കീടനാശിനികള്‍, ചെടിച്ചട്ടികള്‍, കൃഷി ഉപകരണങ്ങള്‍ തുടങ്ങിയവ മേളയില്‍ ലഭ്യമാണ്. റീജിയണ്‍, സോണ്‍ കോഓര്‍ഡിനേറ്റര്‍മാരായ സിബി കണിയാംപടി, ലിജി ജോണ്‍, സംഘം ഭാരവാഹികളായ ജോണ്‍ എം.വി. കുന്നേല്‍, കുഞ്ഞുമോന്‍ ഈന്തുകുഴി, റാണി ജോസഫ്, മഞ്ജു മാണി, എല്‍സമ്മ ജോസഫ് , സെലിന്‍ ഷാജി തുടങ്ങിയവര്‍ നേതൃത്വം നല്‍കും.

ലോക പുകയില വിരുദ്ധ ദിനാചരണം

പാലാ: അഡാര്‍ട്ടിന്‍റെ ആഭിമുഖ്യത്തില്‍ ലോക പുകയില വിരുദ്ധ ദിനം ആചരിച്ചു. ഡയറക്ടര്‍ ഫാ. ജെയിംസ് പൊരുന്നോലില്‍ അധ്യക്ഷത വഹിച്ച യോഗം പാലാ മുന്‍സിപ്പല്‍ ചെയര്‍മാന്‍ തോമസ് പീറ്റര്‍ ഉദ്ഘാടനം ചെയ്തു. എക്‌സൈസ് അസിസ്റ്റന്‍റ് ഇന്‍സ്‌പെക്ടര്‍ ജക്‌സി ജോസഫ്, അഡാര്‍ട്ട് പ്രൊജക്ട് കോഓർഡിനേറ്റര്‍ എന്‍.എം സെബാസ്റ്റ്യന്‍, സീനിയര്‍ കൗണ്‍സിലര്‍ ജോയി കെ. മാത്യു, പ്രഫ. കെ.പി. ജോസഫ്, ഒ.ജെ.ജോസഫ്, ലിജോ ജോസ് തുടങ്ങിയവര്‍ പ്രസംഗിച്ചു.

ശബരി റെയില്‍: പാലാ നഗരത്തെയും ഉള്‍പ്പെടുത്തണമെന്ന് പ്രാദേശിക സമിതി

പാലാ: ശബരി റെയില്‍ പ്രൊജക്ടിന് കേന്ദ്രം പച്ചക്കൊടി വീശിയതോടെ പുനര്‍ജന്മം ലഭിക്കുന്ന സാഹചര്യത്തില്‍ വളരുന്ന പാലാ നഗരത്തെയും റെയില്‍ കണക്ടിവിറ്റി സാദ്ധ്യമാക്കുന്നതിന് രാഷ്ട്രീയ ഇടപെടല്‍ ഉണ്ടാവണമെന്ന് ശബരി റെയില്‍ ആക്ഷന്‍ കൗണ്‍സില്‍ പ്രാദേശിക സമിതി കണ്‍വീനര്‍ ജയ്‌സണ്‍ മാന്തോട്ടം ആവശ്യപ്പെട്ടു. തുടക്കത്തിലെ അലൈന്‍മെന്‍റ് പ്രകാരം പാലാ നഗരപ്രദേശത്തു റെയില്‍വേ സ്റ്റേഷനും ഉള്‍പ്പെടുത്തിയിരുന്നു.പിന്നീട് നടന്ന ഏരിയല്‍ സര്‍വെ പ്രകാരം നഗരത്തില്‍നിന്നു വളരെ അകലെ ഗതാഗത സൗകര്യങ്ങള്‍ പരിമിതമായതും ചെന്നെത്തുവാന്‍ കൂടുതല്‍ സമയം എടുക്കേണ്ടി വരികയും ചെയ്യുന്ന പ്രദേശമായ മേലമ്പാറ വഴിയാക്കി മാറ്റുകയാണ് ഉണ്ടായത്. പാലാ നഗരത്തിന്‍റെ ഭാവി വളര്‍ച്ചയ്ക്കും സാമ്പത്തികാഭിവൃദ്ധിക്കും വാണിജ്യ മുന്നേറ്റത്തിനും റെയില്‍ കണക്ടിവിറ്റി അനിവാര്യമാണ്. പിഴക് വരെ കല്ലിട്ടു വര്‍ഷങ്ങള്‍ മുന്നേ അതിര്‍ തിരിച്ചിരുന്നു. ബാക്കി മേഖലയില്‍ കടനാട്, കരൂര്‍ പഞ്ചായത്ത് മേഖലയില്‍ ഭൂമി ഏറ്റെടുക്കലിനു വിജ്ഞാപനം പുറപ്പെടുവിച്ചിരുന്നുവെങ്കിലും എതിര്‍പ്പുകളെ തുടര്‍ന്ന് കല്ലിടീല്‍ നിര്‍ത്തിവയ്ക്കുകയാണ് ഉണ്ടായത്. തൊടുപുഴ റോഡിലെ അന്തീനാട് നിന്നു മേലമ്പാറയിലേക്കാണ് ഇപ്പോള്‍ നിശ്ചയിച്ചിരിക്കുന്ന റൂട്ട്. ഭൂമി ഏറ്റെടുക്കലിനായി പാലാ സിവില്‍ സ്റ്റേഷനില്‍ പ്രത്യേക തഹസില്‍ദാര്‍ ഓഫീസും പ്രത്യേകം അനുവദിച്ച് പ്രവര്‍ത്തിച്ചിരുന്നു. കേന്ദ്ര തീരുമാനത്തോടെ അളന്നു തിരിച്ച് കല്ലിട്ട ഭൂഉടമകളുടെ കാത്തിരിപ്പിന് വിരാമമാകും എന്നും ചൂണ്ടിക്കാണിക്കപ്പെടുന്നു. കഴിഞ്ഞ 20 വര്‍ഷമായി ഈ ഭൂമിയില്‍ ദീര്‍ഘകാല വിളകള്‍ കൃഷി ചെയ്യുവാനോ, ഭൂമി വില്‍ക്കുവാനോ ഈടു നല്‍കി വായ്പ എടുക്കുവാനോ വീട് പുതുക്കി പണിയുന്നതിനോ കഴിയാത്ത സ്ഥിതിയിലായിരുന്നു.

ക്ലാസുകള്‍ ആരംഭിച്ചു

പാലാ: സിവില്‍ സര്‍വീസ് ഇന്‍സ്റ്റിറ്റ്യൂട്ടില്‍ സിവില്‍ സര്‍വീസ് ഉള്‍പ്പെടെയുളള മത്സരപരീക്ഷകള്‍ക്കുളള പരിശീലനത്തോടൊപ്പം നടത്തപ്പെടുന്ന ബിഎ പബ്ലിക് അഡ്മിനിസ്‌ട്രേഷന്‍ കോഴ്‌സിന്‍റെ ക്ലാസുകള്‍ ആരംഭിച്ചു. പാലാ സെന്‍റ് തോമസ് കോളജ് മുന്‍ പ്രിന്‍സിപ്പല്‍ ഡോ.കെ.ജെ ജോസ് ക്ലാസുകള്‍ ഉദ്ഘാടനം ചെയ്തു. ഇന്‍സ്റ്റിറ്റ്യൂട്ട് മാനേജര്‍ മോണ്‍ .സെബാസ്റ്റ്യന്‍ വേത്താനത്ത്, പ്രിന്‍സിപ്പല്‍ ഡോ. വി.വി. ജോര്‍ജുകുട്ടി ഒട്ടലാങ്കല്‍, വൈസ് പ്രിന്‍സിപ്പല്‍ ആന്‍ഡ് ഡീന്‍ ഫാ. സെബാസ്റ്റ്യന്‍ ചാമക്കാലയില്‍, അപര്‍ണാ റോമി ജോണ്‍ എന്നിവര്‍ പ്രസംഗിച്ചു. പ്രവേശനപരീക്ഷയില്‍ പങ്കെടുത്ത് പ്രവേശനം നേടുന്നതിന് ജൂണ്‍ 10 വരെ അവസരമുണ്ട്. ഫോൺ: 9539381100.

അല്‍ഫോന്‍സാ കോളജില്‍ ടോപ്പേഴ്‌സ് ഡേ

പാലാ: അല്‍ഫോന്‍സാ കോളജില്‍ ടോപ്പേഴ്‌സ് ഡേ ഇന്ന് രാവിലെ 10.30ന് നടക്കും. കോളജ് മാനേജര്‍ റവ.ഡോ. ജോസഫ് തടത്തില്‍ അധ്യക്ഷത വഹിക്കുന്ന മീറ്റിംഗില്‍ നാഷണല്‍ അക്കാദമി ഓഫ് കസ്റ്റംസ് ഇന്‍ഡയറക്ട് ടാക്‌സസ് ആന്‍ഡ് നാര്‍ക്കോട്ടിക്‌സ് മുന്‍ പ്രിന്‍സിപ്പല്‍ ഡയറക്ടര്‍ ജനറല്‍ ഡോ. കെ.എന്‍. രാഘവന്‍ ഐആര്‍എസ് മുഖ്യാതിഥിയാകും. എം.ജി യൂണിവേഴ്‌സിറ്റി സിന്‍ഡിക്കേറ്റ് മെംബര്‍ ഡോ. ജോജി അലക്‌സ്, പ്രിന്‍സിപ്പല്‍ ഡോ. സിസ്റ്റര്‍ മിനിമോള്‍ മാത്യു, വൈസ് പ്രിന്‍സിപ്പല്‍ ഡോ. സിസ്റ്റര്‍ മഞ്ജു എലിസബത്ത് കുരുവിള, മഞ്ജു ജോസ്, കോളജ് ബര്‍സാര്‍ ഫാ. കുര്യാക്കോസ് വെള്ളച്ചാലില്‍ എന്നിവര്‍ പ്രസംഗിക്കും. എംജി യൂണിവേഴ്‌സിറ്റി ഡിഗ്രി പരീക്ഷാഫലം പ്രഖ്യാപിച്ചപ്പോള്‍ തിളങ്ങുന്ന വിജയം സ്വന്തമാക്കിയ അല്‍ഫോന്‍സാ കോളജ് യൂണിവേഴ്‌സിറ്റി തലത്തില്‍ 29 റാങ്കുകളും വണ്‍ എസ് ഗ്രേഡും 51എ പ്ലസുകളും 41 എ ഗ്രേഡുകളും നേടി. വര്‍ഷങ്ങളായി എംജി യൂണിവേഴ്‌സിറ്റി പരീക്ഷകളില്‍ ഏറ്റവും കൂടുതല്‍ റാങ്കുകളും എ പ്ലസും കരസ്ഥമാക്കിവരുന്ന കോളജിന്‍റെ അക്കാദമിക രംഗത്തെ അദ്വിതീയ സ്ഥാനത്തിന് അടിവരയിടുന്നതാണ് ഇത്തവണത്തെ പരീക്ഷാഫലം. പാഠ്യേതര രംഗത്തും സജീവമായ കോളജ് കേരളത്തിന്‍റെ കായിക ചരിത്രത്തിലും മായാത്ത മുദ്ര പതിപ്പിച്ചിട്ടുണ്ട്. രണ്ടേമുക്കാല്‍ കോടി രൂപയുടെ കേന്ദ്ര ഗവണ്‍മെന്‍റ് ഗ്രാന്‍റുകള്‍, സംസ്ഥാന, സര്‍വകലാശാലതല അവാര്‍ഡുകള്‍ എന്നിവ നേടിയെടുക്കാനും കോളജിനു സാധിച്ചു.

ഇരട്ടപ്പാതയ്ക്കായി സ്ഥലം നൽകിയവര്‍ക്ക് നഷ്ടപരിഹാരം നല്‍കാതെ റെയില്‍വേ

കോട്ടയം: ഇരട്ടപ്പാതയ്ക്കായി സ്ഥലം വിട്ടുകൊടുത്തവര്‍ക്ക് റെയില്‍വേ ഇനിയും നഷ്ടപരിഹാരം നൽകാത്തതിൽ കടുത്ത പ്രതിഷേധം ഉയരുന്നു. ചിങ്ങവനം മുതല്‍ കോട്ടയം വരെയുള്ള ഇരട്ടപ്പാതയ്ക്കായി സ്ഥലം വിട്ടുനല്‍കിയ നൂറോളം കുടുംബങ്ങള്‍ക്കാണ് ഇരട്ടപ്പാതയുടെ ഉദ്ഘാടനം കഴിഞ്ഞ് ഒരു വര്‍ഷമാകാറായിട്ടും നഷ്ടപരിഹാരം നല്‍കാത്തത്. നാട്ടകം വില്ലേജ് ഓഫീസിനു കീഴിലുള്ള 85 കുടുംബങ്ങള്‍ തങ്ങള്‍ വിട്ടു നല്‍കിയ സ്ഥലത്തിനും വീടിനും നഷ്ടപരിഹാരം കുറവാണെന്നു പറഞ്ഞ് ഹൈക്കോടതിയെ സമീപിച്ചിരുന്നു. റെയില്‍വേ നല്‍കാമെന്നു പറഞ്ഞ നഷ്ടപരിഹാരം കുറവാണെന്നും നിലവിലുള്ള ഭൂമിവിലയനുസരിച്ച് കൂടുതല്‍ തുക നല്‍കണമെന്നുമുള്ള വിധി കഴിഞ്ഞ ഡിസംബറില്‍ കോടതി പുറപ്പെടുവിച്ചിരുന്നു. കോടതി ഉത്തരവിന്‍റെ അടിസ്ഥാനത്തില്‍ സ്ഥലം വിട്ടുനല്‍കിയവര്‍ റെയില്‍വേയെ സമീപിച്ചപ്പോള്‍ ഫണ്ടില്ലെന്ന മറുപടിയാണ് ലഭിച്ചത്. റെയില്‍വേ പണം നല്‍കിയാല്‍ ഉടന്‍ പണം നല്‍കുമെന്നാണ് സര്‍ക്കാരും അറിയിച്ചിരിക്കുന്നത്. ഇതിനിടയില്‍ സ്ഥലം ഏറ്റെടുക്കലിനായി തുറന്ന സ്‌പെഷല്‍ തഹസില്‍ദാറുടെ ഓഫീസ് അടച്ചു പൂട്ടാനും റെയില്‍വേ നീക്കം ആരംഭിച്ചു. നഷ്ടപരിഹാരം ഉള്‍പ്പെടെയുള്ള ആവശ്യങ്ങള്‍ക്കായുള്ള ഓഫീസാണ് റെയില്‍വേ മുന്നറിയിപ്പില്ലാതെ പൂട്ടാനൊരുങ്ങുന്നത്. സ്ഥലം വിട്ടുനല്‍കിയവര്‍ കഴിഞ്ഞദിവസം തിരുവഞ്ചൂര്‍ രാധാകൃഷ്ണന്‍ എംഎല്‍എയെ സമീപിച്ച് കാര്യങ്ങള്‍ ധരിപ്പിച്ചിരുന്നു. എംഎല്‍എ കളക്ടറെയും റെയില്‍വേ ഡിവിഷണല്‍ മാനേജരെയും ബന്ധപ്പെട്ടു. ഉടന്‍ പണം നല്‍കാമെന്നാണ് റെയില്‍വേ അധികൃതരും എംഎല്‍എയോടു പറഞ്ഞത്. എന്നാല്‍ നാളിതുവരെയായിട്ടും പണം നല്‍കുന്നതിനുള്ള യാതൊരു നടപടിയും റെയില്‍വേ അധികൃതരുടെ ഭാഗത്തുനിന്നുണ്ടായിട്ടില്ല. കോടിക്കണക്കിനു രൂപയുടെ വികസന പ്രവര്‍ത്തനങ്ങള്‍ നടത്തുന്ന റെയില്‍വേക്ക് സ്ഥലം ഏറ്റെടുത്തതിന്‍റെ നഷ്ടപരിഹാരത്തുക നല്‍കാനാവാത്തത് എന്ത് വിരോധാഭാസമാണെന്നും അധികൃതര്‍ ജനങ്ങളെ ബുദ്ധിമുട്ടിക്കുകയാണെന്നും സ്ഥലം ഉടമകള്‍ കുറ്റപ്പെടുത്തി. നഷ്ടപരിഹാരം ലഭിക്കാത്തതിനാല്‍ പലര്‍ക്കും പുതിയ ഭൂമിയോ വീടോ വാങ്ങാന്‍ സാധിച്ചിട്ടില്ല. ബന്ധുവീട്ടിലും വാടക വീട്ടിലുമാണു പലരുടെയും താമസം. നഷ്ടപരിഹാര തുക ഉടന്‍ നല്‍കിയില്ലെങ്കില്‍ സ്ഥലം വിട്ടുനല്‍കിയവരുടെ കൂട്ടായ്മയുടെ നേതൃത്വത്തില്‍ സമരം ആരംഭിക്കുമെന്ന് സ്ഥലം വിട്ടുനല്‍കിയ പൂവന്തുരുത്ത് സ്വദേശി രാജന്‍ മേട്ടുങ്കല്‍ പറഞ്ഞു.

ശബരി റെയില്‍പാത: സ്ഥലം ഏറ്റെടുക്കല്‍ അടുത്ത മാസം തുടങ്ങും

കോട്ടയം: അങ്കമാലി-എരുമേലി ശബരി റെയില്‍പാതയ്ക്ക് സ്ഥലം ഏറ്റെടുക്കല്‍ അടുത്ത മാസം ആരംഭിക്കുമെന്ന് കേന്ദ്ര സര്‍ക്കാരിന്‍റെ ഉറപ്പ്. 111 കിലോമീറ്റര്‍ പാതയ്ക്ക് 1998ല്‍ റെയില്‍വേ അംഗീകാരം നല്‍കിയതാണ്. 2030ല്‍ പാത കമ്മീഷന്‍ ചെയ്യാനാണ് ആലോചന. സ്ഥലമെടുപ്പ് ഇഴഞ്ഞതനുസരിച്ച് പണിച്ചെലവ് കൂടിയതിനാല്‍ പാത നിര്‍മാണം അനിശ്ചിതത്വത്തിലായിരുന്നു. നിലവിലെ സ്ഥിതി നിര്‍ദിഷ്ടപാതയില്‍ എട്ടു കിലോമീറ്റര്‍ മാത്രം സ്ഥലമെടുപ്പും അങ്കമാലി-കാലടി ഏഴു കിലോമീറ്റര്‍ പാത നിര്‍മാണവും പൂര്‍ത്തിയായി. ഇത്രയും ഭാഗത്ത് രണ്ട് മേല്‍പ്പാലങ്ങളും രണ്ട് അടിപ്പാതകളും പണിയേണ്ടതുണ്ട്. പെരിയാറിനു കുറുകെ കാലടിയില്‍ പാലവും നിര്‍മിച്ചു. നിലവില്‍ രാമപുരത്തിനു സമീപം നീലൂര്‍വരെ അലൈന്‍മെന്‍റ് നടത്തി കല്ലിട്ടു. രാമപുരം മുതല്‍ എരുമേലി വരെ ഏരിയല്‍ സര്‍വേ മാത്രം നടന്നിട്ടുണ്ട്. പാലായില്‍നിന്നു പൊന്‍കുന്നം, ചിറക്കടവ്, വിഴിക്കത്തോട് വഴി എരുമേലിയിലേക്കുള്ള ആദ്യ അലൈന്‍മെന്‍റ് ഉപേക്ഷിച്ചു. ഭരണങ്ങാനം, തിടനാട്, കൊരട്ടിവഴിയുള്ള ലൈനാണ് ഇപ്പോള്‍ പരിഗണനയില്‍. എരുമേലി ടൗണിന് ഒന്നര കിലോമീറ്റര്‍ പിന്നിലായിരിക്കും എരുമേലി സ്റ്റേഷന്‍. ഭാവിയില്‍ ഇത് പ്രപ്പോസ്, മുക്കൂട്ടുതറ വഴി പമ്പയിലേക്ക് നീട്ടാനുള്ള ആലോചനയുണ്ട്. തൊടുപുഴ വഴി പാത വരുന്നതോടെ ഇടുക്കി ജില്ലയും റെയില്‍ഭൂപടത്തില്‍ ഇടംനേടും. നേട്ടം കാലടിയില്‍നിന്ന് നെടുമ്പാശേരി വിമാനത്താവളത്തിലേക്കുള്ള ദൂരം അഞ്ചു കിലോമീറ്റര്‍ മാത്രം. എരുമേലിയില്‍നിന്ന് തിരുവനന്തപുരത്തേക്ക് പാത നീട്ടിയാല്‍ വിഴിഞ്ഞം തുറമുഖത്തുനിന്നുള്ള ചരക്കുനീക്കം വേഗത്തിലാകും. വിമാനത്താവളം യാത്ര എളുപ്പമാകും. ഇതാണ് ശബരി റെയില്‍വേ അടിയന്തരമായി നടപ്പാക്കാന്‍ കേന്ദ്രത്തെ പ്രേരിപ്പിക്കുന്നത്. സ്‌റ്റേഷനുകള്‍, പാലങ്ങള്‍ അങ്കമാലി, കാലടി, പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം, രാമപുരം, ഭരണങ്ങാനം (പാലാ), ചെമ്മലമറ്റം, കാഞ്ഞിരപ്പള്ളി, എരുമേലി എന്നിവയാണ് സ്റ്റേഷനുകള്‍. തൊടുപുഴ, മീനച്ചില്‍, മണിമല നദികള്‍ക്ക് വലിയ പാലങ്ങള്‍ പണിയണം. കൂടാതെ തോടുകള്‍ക്ക് കുറുകെ പത്തിലേറെ ചെറിയ പാലങ്ങളും. അടുത്തഘട്ടം ശേഷിക്കുന്ന 70 കിലോമീറ്റര്‍ സ്ഥലമെടുപ്പിന് വിജ്ഞാപനം പുറപ്പെടുവിച്ചിട്ടുണ്ട്. അടുത്ത ഘട്ടം മുപ്പത് കിലോമീറ്റര്‍ സര്‍വേയും അലൈന്‍മെന്‍റും പൂര്‍ത്തിയാക്കണം. പദ്ധതിയുടെ 50 ശതമാനം തുക സംസ്ഥാനം വഹിക്കണം. പുതുക്കിയ എസ്റ്റിമേറ്റ് പ്രകാരം ചെലവ് 3,800.93 കോടി രൂപയാണ്. സ്ഥലവും വീടും മറ്റ് കെട്ടിടങ്ങളും നഷ്ടപ്പെടുന്നവര്‍ക്ക് ഉടന്‍ നഷ്ടപരിഹാരം നല്‍കേണ്ടതുണ്ട്. പമ്പ പാത ഫയല്‍ മടക്കി ശബരി പാതയ്ക്ക് പകരം പരിഗണിച്ച ചെങ്ങന്നൂര്‍-പമ്പ (59 കി.മീ.) പാത വേണ്ടെന്നു വച്ചു. 8000 കോടി രൂപ ചെലവുള്ള പാത പണിയാന്‍ 213.687 ഹെക്ടര്‍ ഭൂമി വേണ്ടിവരും. ഇതില്‍ 127. 038 ഹെക്ടര്‍ സ്വകാര്യ ഭൂമിയും 81.367 ഹെക്ടര്‍ വനഭൂമിയുമാണ്. വനം, പരിസ്ഥിതി മന്ത്രാലയത്തിന്‍റെ അനുമതി ലഭിക്കണം. ശബരിമല സീസണില്‍ മാത്രമേ ഈ പാത നേട്ടമാകൂ. ചെങ്ങന്നൂര്‍, ആറന്മുള, വടശേരിക്കര, സീതത്തോട് സ്റ്റേഷനുകള്‍ ഒഴികെ വനംപ്രദേശമാണ്.

വർണാഭമായി പ്രവേശനോത്സവം

മാലം: ഗവണ്‍മെന്‍റ് യുപി സ്‌കൂളിലെ പ്രവേശനോത്സവം പഞ്ചായത്ത് പ്രസിഡന്‍റ് കെ.സി. ബിജു ഉദ്ഘാടനം ചെയ്തു. പഞ്ചായത്തംഗം ജിജി മണര്‍കാട് അധ്യക്ഷത വഹിച്ചു. പഞ്ചായത്തംഗം രാജീവ് രവീന്ദ്രന്‍, പ്രധാനാധ്യാപിക കെ.പി. ബിന്ദു, പിടിഎ പ്രസിഡന്‍റ് അമ്പിളി സജി, മുന്‍ അധ്യാപകരായ ജെസി ചാക്കോ, ജയപ്രകാശ്, അധ്യാപിക ജാസ്മിന്‍ ജോസഫ് എന്നിവര്‍ പ്രസംഗിച്ചു. ഓള്‍ കേരള ഫോട്ടോഗ്രഫേഴ്‌സ് അസോസിയേഷന്‍ കോട്ടയം ടൗണ്‍ യൂണിറ്റിന്‍റെ നേതൃത്വത്തില്‍ പഠനോപകരണങ്ങള്‍ വിതരണം ചെയ്തു. പാന്പാടി: പാമ്പാടി ബ്ലോക്ക് തല പ്രവേശനോത്സവം പനമറ്റം ഗവൺമെന്‍റ് ഹയർ സെക്കൻഡറി സ്കൂളിൽ ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്‍റ് പ്രഫ. എം.കെ രാധാകൃഷ്ണൻ അധ്യക്ഷത വഹിച്ച സമ്മേളനത്തിൽ റിട്ട. പ്രിൻസിപ്പൽ ഹരികൃഷ്ണൻ ചെട്ടിയാർ മുഖ്യപ്രഭാഷണം നടത്തി.

ആർപ്പൂക്കര: ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂൾ പ്രവേശനോത്സവം ജില്ലാ പഞ്ചായത്തംഗം പ്രഫ. ഡോ. റോസമ്മ സോണി ഉദ്ഘാടനം ചെയ്തു. പിടിഎ പ്രസിഡന്‍റ് സി.ആർ. ഹരി ലക്ഷ്മീനന്ദകുമാർ അധ്യക്ഷത വഹിച്ചു. സ്കൂൾ പ്രിൻസിപ്പൽ രെന്ദു സാറ കുര്യൻ, ഹയർ സെക്കൻഡറി സ്കൂൾ പ്രിൻസിപ്പൽ ടി.എസ്. ഷീജ, ഹെഡ്മിസ്ട്രസ് എ.എൻ. ജീനാ എന്നിവർ പ്രസംഗിച്ചു. കുടമാളൂര്‍: ഗവണ്‍മെന്‍റ് ഹയര്‍ സെക്കന്‍ഡറി സ്‌കൂള്‍ പ്രവേശനോത്സവം ജില്ലാ പഞ്ചായത്തംഗം പ്രഫ. ഡോ. റോസമ്മ സോണി ഉദ്ഘാടനം ചെയ്തു. പിടിഎ പ്രസിഡന്‍റ് സുജിത് എസ്. നായര്‍ അധ്യക്ഷത വഹിച്ചു. ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ജെ. റാണി, ഹെഡ്മിസ്ട്രസ് ആശ എ. നായര്‍, ബ്ലോക്ക് പഞ്ചായത്തംഗം കെ.കെ. ഷാജിമോന്‍, ബിന്ദു ഹരികുമാര്‍ എന്നിവര്‍ പ്രസംഗിച്ചു. അതിരമ്പുഴ: സെന്‍റ് മേരീസ് എൽപിഎസിലെ പ്രവേശനോത്സവത്തിൽ വേറിട്ട കാഴ്ചയൊരുക്കി മൂവർ സംഘം. ശിവപ്രിയ, ശിവപ്രീതി, ശിവപ്രഭ എന്നിവരാണ് പ്രവേശനോത്സവത്തിൽ ശ്രദ്ധാകേന്ദ്രമായത്. ഇവരെ കൂടാതെ മൂന്ന് ജോഡി ഇരട്ടകളും പ്രവേശനോത്സവത്തിന്‍റെ മാറ്റുകൂട്ടി. സ്കൂൾ മാനേജർ റവ. സിസ്റ്റർ ഡെയ്സ് മരിയ പതിയിൽ അധ്യക്ഷത വഹിച്ചു. ജില്ലാ പഞ്ചായത്ത് മെംബർ പ്രഫ. ഡോ. റോസമ്മ സോണി ഉദ്ഘാടനം ചെയ്തു. ഹെഡ്മിസ്ട്രസ് അൽഫോൻസാ മാത്യു, വാർഡ് മെംബർ ബേബിനാസ് അജാസ്, പ്രിൻസിപ്പൽ സിസ്റ്റർ ടെസ് മരിയ പഴേമഠം, പിടിഎ പ്രസിഡന്‍റ് മനോജ് പി. ജോൺ എന്നിവർ പ്രസംഗിച്ചു. കൈപ്പുഴ: കൈപ്പുഴ സെന്‍റ് ജോർജ് വിഎച്ച്എസ്എസിൽ പ്രവേശനോത്സവം നടത്തി. നവഗതരായ വിദ്യാർഥികളെ വാദ്യമേളങ്ങളുടെ അകമ്പടിയോടെ സ്വീകരിച്ചു. തുടർന്ന് നടന്ന സമ്മേളനം എംജി യൂണിവേഴ്സിറ്റി സ്കൂൾ ഓഫ് ലെറ്റേഴ്സിലെ അധ്യാപകനായ ഡോ. അജു കെ. നാരയണൻ ഉദ്ഘാടനം ചെയ്തു. അസിസ്റ്റന്‍റ് മാനേജർ ഫാ. ജഗിൽ കൊളങ്ങയിൽ അധ്യക്ഷത വഹിച്ചു. ഹെഡ്മാസ്റ്റർ കെ.എസ്. ബിനോയി, പ്രിൻസിപ്പൽ തോമസ് മാത്യു, പിടിഎ ഭാരവാഹികൾ തുടങ്ങിയവർ പ്രസംഗിച്ചു. ആർപ്പൂക്കര: ആർപ്പൂക്കര പഞ്ചായത്തു തല സ്കൂൾ പ്രവേശനോത്സവം തൊണ്ണംകുഴി ഗവൺമെന്‍റ് എൽപി സ്കൂളിൽ നടന്നു. പഞ്ചായത്ത് പ്രസിഡന്‍റ് ദീപ ജോസ് പ്രവേശനോത്സവം ഉദ്ഘാടനം ചെയ്തു.വാർഡ് മെംബർ ജസ്റ്റിൻ ജോസഫ് അധ്യക്ഷത വഹിച്ചു.

സ്ത്രീയുൾപ്പെട്ട ക്രിമിനൽ സംഘം ലഹരിവസ്തുക്കളുമായി പിടിയിൽ

മണർകാട്: വില്പനയ്ക്കായി സൂക്ഷിച്ച കഞ്ചാവും നിയമവിധേയമല്ലാതെ സൂക്ഷിച്ച നൈട്രോസെപാം ഗുളികകളുമായി സ്ത്രീയുൾപ്പെട്ട ക്രിമിനൽസംഘം പോലീസിന്‍റെ പിടിയിലായി. മണർകാട് മാമുണ്ടിയിൽ പ്രിൻസ് മാത്യു (25), തിരുവഞ്ചൂർ പള്ളിപ്പറമ്പിൽ ജിബുമോൻ പി. പീറ്റർ (23), സരസ്വതിവിലാസം അശ്വിൻ (23), ദീർതി രാജ് (26) എന്നിവരാണ് മണർകാട് പോലീസിന്‍റെ പിടിയിലായത്. ഞായറാഴ്ച രാത്രി ഓട്ടോറിക്ഷയിലാണ് സംഘം ലഹരി വസ്തുക്കൾ വില്പനയ്ക്കായി കൊണ്ടുവന്നത്. പിടിയിലായ പ്രിൻസ് മാത്യുവിന് കാപ്പാ നിയമപ്രകാരം കോട്ടയം ജില്ലയിൽ പ്രവേശിക്കുന്നതിനു വിലക്കും ലഹരിക്കച്ചവടം ഉൾപ്പെടെ പത്തിലധികം കേസുകളിൽ പ്രതിയുമാണ്. രണ്ടാം പ്രതി അശ്വിൻ മോഷണം ഉൾപ്പെടെ നാലു കേസുകളിൽ പ്രതിയാണ്.

ബാലികയെ പീഡിപ്പിച്ച വയോധികന് 12 വർഷം കഠിനതടവ്

കോട്ടയം: ബാലികയെ പീഡിപ്പിച്ച വയോധികന് 12 വർഷം കഠിനതടവ്. 14 വയസ് പ്രായമുള്ള ബാലികയെ ലൈംഗികമായി ചൂഷണം ചെയ്ത മൂലവട്ടം ചോതിനിവാസിൽ എം.കെ. സോമനാ(74)ണ് കോടതി 12 വർഷം തടവും 40,000 രൂപ പിഴയും ചുമത്തിയത്. ചിങ്ങവനം പോലീസ് രജിസ്റ്റർ ചെയ്ത കേസിലാണ് ചങ്ങനാശേരി ഫാസ്റ്റ് ട്രാക്ക് കോടതി ജഡ്‌ജ് പി.എസ്. സൈമ ശിക്ഷ വിധിച്ചത്. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടർ പി.എസ്. മനോജ് ഹാജരായി.

മീനച്ചിലാറില്‍ നീരൊഴുക്ക് തടസപ്പെട്ടു; ഇടപെട്ട് മന്ത്രി റോഷി അഗസ്റ്റിന്‍

കോട്ടയം: തിരുവാര്‍പ്പ് പഞ്ചായത്തില്‍ താഴത്തങ്ങാടി, ഇല്ലിക്കല്‍ ഭാഗത്ത് മീനച്ചിലാറിനു കുറുകെയുള്ള പാലത്തിനു താഴെ മാലിന്യം അടിഞ്ഞുകൂടി നീരൊഴുക്ക് തടസപ്പെട്ടത് എത്രയും വേഗം നീക്കം ചെയ്യാന്‍ കോട്ടയം മേജര്‍ ഇറിഗേഷന്‍ എക്സിക്യൂട്ടീവ് എന്‍ജിനിയര്‍ക്ക് ജലവിഭവ മന്ത്രി റോഷി അഗസ്റ്റിന്‍ നിര്‍ദേശം നല്‍കി. കനത്ത മഴയില്‍ ഒഴുകിയെത്തിയ മാലിന്യമാണ് പാലത്തിനു താഴെ തങ്ങിക്കിടന്ന് നീരൊഴുക്ക് തടസപ്പെടുത്തിയത്. ജില്ലയില്‍ മഴയ്ക്കു ശമനമായെങ്കിലും പടിഞ്ഞാറന്‍ മേഖലയില്‍നിന്നു വെള്ളം പൂര്‍ണമായും ഇറങ്ങിയിട്ടില്ല. വേമ്പനാട്ടു കായലില്‍ ചെളിയും മണ്ണു നിറഞ്ഞതും പോള നിറഞ്ഞ തോടുകളും മണ്ണിട്ടുയര്‍ത്തിയ പാടങ്ങളും മൂലമാണ് മഴ മാറിയിട്ടും വെള്ളം ഇറങ്ങാന്‍ മടിക്കുന്നത്. ഇതിനിടയിലാണ് താഴത്തങ്ങാടിയിലും ഇല്ലിക്കലും നീരൊഴുക്ക് തടസപ്പെടുത്തി പാലത്തിനടയില്‍ മാലിന്യങ്ങള്‍ അടിഞ്ഞുകൂടിയത്. കോട്ടയം താലൂക്കിലെ പടിഞ്ഞാറന്‍ പഞ്ചായത്തുകളിലെ താഴ്ന്ന പ്രദേശങ്ങളാണ് ഇപ്പോഴും വെള്ളത്തിനടിയിലുള്ളത്. സാധാരണ മഴ മാറി പിറ്റേന്നു മുതല്‍ അതിവേഗം ഇറങ്ങുന്ന വെള്ളം ഇത്തവണ ഇറങ്ങാന്‍ വൈകുന്നത് ജനങ്ങളിലൽ ആശങ്ക വര്‍ധിപ്പിച്ചിട്ടുണ്ട്. മീനച്ചിലാറും മണിമലയാറും തെളിഞ്ഞൊഴുകിത്തുടങ്ങിയെങ്കിലും ജലനിരപ്പ് കാര്യമായി താഴ്ന്നിട്ടില്ല. വേമ്പനാട്ട് കായല്‍ വെള്ളമെടുക്കാന്‍ മടിക്കുന്നതാണ് ജലനിരപ്പ് കുറയാത്തതിനു‍ കാരണം. കായലില്‍നിന്നു കടലിലേക്കു പോകുന്ന വെള്ളത്തിന്‍റെ അളവും മാര്‍ഗങ്ങളും കുറഞ്ഞതു തിരിച്ചടിയായി. കായലിന്‍റെ‍ അടിത്തട്ടില്‍ ചെളി അടിഞ്ഞതോടെ സംഭരണശേഷിയും കുറഞ്ഞു. ഇല്ലിക്കലും താഴത്തങ്ങാടിയിലും മാലിന്യം അടിഞ്ഞുകൂടി നീരൊഴുക്ക് തടസപ്പെട്ടതോടെ തിരുവാര്‍പ്പ് പഞ്ചായത്ത് ഭരണസമിതി പ്രശ്നം ചൂണ്ടിക്കാട്ടി മന്ത്രിയുടെ ഇടപെടല്‍ ആവശ്യപ്പെട്ട് പ്രമേയം പാസാക്കിയിരുന്നു. ഇതേത്തുടര്‍ന്നാണ് പ്രശ്നത്തില്‍ മന്ത്രി അടിയന്തരമായി ഇടപെടുകയും മാലിന്യം എത്രയും വേഗം നീക്കം ചെയ്യണമെന്ന് ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കുകയും ചെയ്തത്. കഴിഞ്ഞ വര്‍ഷവും കനത്ത മഴയെത്തുടര്‍ന്ന് സമാനമായ സാഹചര്യം നേരിട്ടപ്പോള്‍ മന്ത്രി റോഷി അഗസ്റ്റിന്‍ അടിയന്തരമായി ഇടപെടുകയും ഉദ്യോഗസ്ഥരുടെ നേതൃത്വത്തില്‍ മാലിന്യം നീക്കം ചെയ്തു നീരൊഴുക്ക് സുഗമമാക്കുകയും ചെയ്തിരുന്നു.

ശാസ്‌ത്രജ്ഞര്‍ കര്‍ഷകരുമായി അഭിമുഖം നടത്തി

അകലക്കുന്നം: വികസിത കൃഷി സങ്കല്‍പ്പ്‌ അഭിയാന്‍ പദ്ധതിയുടെ ഭാഗമായി കൃഷി വിജ്ഞാന്‍ കേന്ദ്രത്തിലെയും ഇന്ത്യന്‍ കാര്‍ഷിക ഗവേഷണ കേന്ദ്രത്തിലെയും ശാസ്‌ത്രജ്ഞര്‍ കര്‍ഷകരുമായി മുഖാമുഖം പരിപാടി നടത്തി. അകലക്കുന്നം പഞ്ചായത്ത്‌ ഹാളില്‍ നടന്ന പരിപാടിയുടെ ഉദ്‌ഘാടനം പഞ്ചായത്ത്‌ പ്രസിഡന്‍റ് സിന്ധു അനില്‍കുമാര്‍ നിര്‍വഹിച്ചു.പഞ്ചായത്ത്‌ വൈസ്‌ പ്രസിഡന്‍റ് മാത്തുക്കുട്ടി ഞായര്‍കുളം അധ്യക്ഷനായിരുന്നു. ഇന്ത്യന്‍ ഇന്‍സ്റ്റിറ്റ്യൂട്ട്‌ ഓഫ്‌ സ്‌പൈസസ്‌ റിസര്‍ച്ചിലെ സീനിയര്‍ സയന്‍റിസ്റ്റ് ബി. മണിമാരന്‍, കോട്ടയം കൃഷി വിജ്ഞാന്‍ കേന്ദ്രത്തിലെ അസി. പ്രഫസര്‍മാരായ ഡോ. ക്രിസ്‌ ജോസഫ്‌, മാനുവല്‍ അലക്‌സ്‌ എന്നിവർ ക്ലാസെടുക്കുകയും കർഷകരുടെ സംശയങ്ങള്‍ക്ക്‌ മറുപടി നല്‌കുകയും ചെയ്തു. മണ്ണ്‌ പരിപോഷണ പദ്ധതിയുടെ ഭാഗമായി ചടങ്ങിൽ കര്‍ഷകര്‍ക്ക്‌ സൂക്ഷ്‌മ മൂലകക്കൂട്ടുകളും വിതരണം ചെയ്തു.

ടി.എസ്. മുരളി പുരസ്‌കാരം സമ്മാനിച്ചു

കോട്ടയം: ബിഇഎഫ്‌ഐ കേരളയുടെ സ്ഥാപക ജനറല്‍ സെക്രട്ടറി ടി.എസ്. മുരളിയുടെ സ്മരണാര്‍ഥം ഏര്‍പ്പെടുത്തിയ എട്ടാമത് ടി.എസ്. മുരളി പുരസ്‌കാരത്തിന് വൈക്കം വിശ്വന്‍ അര്‍ഹനായി. മന്ത്രി വി.എന്‍. വാസവന്‍ പുരസ്‌കാരം കൈമാറി. സംഘാടക സമിതി ചെയര്‍മാന്‍ പ്രസിഡന്‍റ് ടി.ആര്‍. രഘുനാഥന്‍ അധ്യക്ഷതവഹിച്ചു. ബിഇഎഫ്‌ഐ അഖിലേന്ത്യാ പ്രസിഡന്‍റ് എസ്.എസ്. അനില്‍ മുഖ്യപ്രഭാഷണം നടത്തി. ബിഇഎഫ്‌ഐ സംസ്ഥാന പ്രസിഡന്‍റ് എന്‍. സനില്‍ ബാബു, ബിഒബിഇയു സംസ്ഥാന പ്രസിഡന്‍റ് ജി. സതീഷ്, ബിഇഎഫ്‌ഐ വനിതാ സബ് കമ്മിറ്റി കണ്‍വീനര്‍ രമ്യാ രാജ്, സിഐടിയു ജില്ലാ പ്രസിഡന്‍റ് റെജി സക്കറിയ, കര്‍ഷക സംഘം സംസ്ഥാന ജോയിന്‍റ് സെക്രട്ടറി കെ.എം. രാധാകൃഷ്ണന്‍, എന്‍ജിഒ യൂണിയന്‍ സംസ്ഥാന സെക്രട്ടറി സീമ എസ്. നായര്‍, പി.വി. സുനില്‍, ബിഇഎഫ്‌ഐ സംസ്ഥാന ജോയിന്‍റ് സെക്രട്ടറി കെ.പി. ഷാ, ജനറല്‍ കണ്‍വീനര്‍ കെ.കെ. ബിനു, ജില്ലാ പ്രസിഡന്‍റ് വി.പി. ശ്രീരാമന്‍ ജില്ലാ സെക്രട്ടറി കെ.കെ. ബിനു എന്നിവര്‍ പ്രസംഗിച്ചു.

എംഡിഎംഎയും കഞ്ചാവുമായി മൂന്നുപേർ അറസ്റ്റിൽ

കിടങ്ങൂർ: എംഡിഎംഎയും കഞ്ചാവുമായി മൂന്നുപേർ പോലീസ് പിടിയിലായി. പാലക്കാട് പരിത്തൂർ പുത്തൻപീടികയിൽ അലി ഇക്ബാൽ (35), പെരുമ്പായിക്കാട് ഉദയംപൂത്തർ സതീഷ് കുമാർ (51), അമയന്നൂർ കോയിക്കൽ സുധിൻ സുരേഷ് (31) എന്നിവരെയാണ് 13 ഗ്രാം കഞ്ചാവും 2.66 ഗ്രാം എംഡിഎംഎയുമായി കിടങ്ങൂർ പോലീസ് അറസ്റ്റ് ചെയ്തത്. ഇന്നലെ രാവിലെ 9.30ഓടെ കിടങ്ങൂർ തെക്ക് ഭാഗത്തുള്ള വടക്കേനകത്തു വീട്ടിൽനിന്നുമാണ് പ്രതികൾ പിടിയിലായത്.

ഗീവർഗീസ് മാർ തിമോത്തിയോസ് അനുസ്മരണവും എംസിഎ പ്രവർത്തനോദ്ഘാടനവും

കോട്ടയം: എംസിഎ കോട്ടയം മേഖലാസമിതിയുടെ ആഭിമുഖ്യത്തിൽ തിരുവല്ല രൂപതയുടെ അഞ്ചാമത്തെ അധ്യക്ഷനായിരുന്ന ഗീവർഗീസ് മാർ തിമോത്തിയോസിന്‍റെ ആറാമത് ഓർമ പെരുന്നാളിനോടനുബന്ധിച്ച് അനുസ്മരണ പ്രഭാഷണവും കോട്ടയം മേഖലയുടെ പ്രവർത്തന ഉദ്ഘാടനവും നടത്തി. അമയന്നൂർ സെന്‍റ് മേരീസ് മലങ്കര സുറിയാനി കത്തോലിക്കാ പള്ളിയിൽ നടന്ന ചടങ്ങിൽ മേഖലാ പ്രസിഡന്‍റ് ഏബ്രഹാം കെ. തോമസ് അധ്യക്ഷത വഹിച്ചു. ചാണ്ടി ഉമ്മൻ എംഎൽഎ ഉദ്ഘാടനം ചെയ്തു. ഫാ. മാത്യു പുനക്കുളം അനുസ്മരണ പ്രഭാഷണം നടത്തി. വികാരി ഫാ. മാത്യു ചിറയിൽ, ഫാ. രഞ്ജിത്ത് ആലുങ്കൽ, ഫാ. ഏബ്രഹാം വലിയ കുളത്തുങ്കൽ, ഫാ. ആൽബിൻ പാറത്താനം തുടങ്ങിയവർ പ്രസംഗിച്ചു.

കുമരകത്തെ ദുരിതാശ്വാസ ക്യാമ്പുകൾ കോൺഗ്രസ് നേതാക്കൾ സർശിച്ചു

കുമരകം: കോട്ടയം ഡിസിസി പ്രസിഡന്‍റ് നാട്ടകം സുരേഷിന്‍റെയും വൈസ് പ്രസിഡന്‍റ് ജി. ഗോപകുമാറിന്‍റെയും നേതൃത്വത്തിൽ കുമരകത്തെ കോൺഗ്രസ് പ്രവർത്തകർ ദുരിതാശ്വാസ ക്യാമ്പുകൾ സന്ദർശിച്ചു. മണ്ഡലം പ്രസിഡന്‍റ് സി.ജെ. സാബു, രഘു അകവൂർ, പഞ്ചായത്തംഗങ്ങളായ പി.കെ. മനോഹരൻ, ദിവ്യ ദാമോദരൻ, അലൽ കുര്യാക്കോസ് മാത്യു എന്നിവർ ഉൾപ്പെട്ട സംഘമാണ് സന്ദർശനം നടത്തിയത്.

തോട്ടില്‍ വീണ ഗൃഹനാഥനെ മൂന്നാം ദിനവും കണ്ടെത്താനായില്ല

മീനടം: തോട്ടില്‍ വീണ ഗൃഹനാഥനെ മൂന്നാം ദിനവും കണ്ടെത്താനായില്ല. മീനടം കാട്ടുമറ്റത്തില്‍ ഈപ്പന്‍ തോമസിനെ (കുഞ്ഞ്-67) യാണു ശനിയാഴ്ച ഉച്ചകഴിഞ്ഞ് 3.45 മുതല്‍ കാണാതായത്. പടിഞ്ഞാറേവീട്ടില്‍ കടവ് ഭാഗത്തെ സ്വന്തം പുരയിടത്തിലെ തേങ്ങയിടുന്നതിനിടെയാണ് അപകടം. തോട്ടില്‍ വീണ തേങ്ങ എടുക്കാന്‍ ശ്രമിക്കുന്നതിനിടെ കാല്‍ വഴുതി ഈപ്പന്‍ തോട്ടില്‍ വീഴുകയായിരുന്നെന്നു തെങ്ങുകയറ്റക്കാരന്‍ രമണന്‍ പോലീസിനോട് പറഞ്ഞു. മൂന്നു ദിവസമായി സ്‌കൂബാ ടീമും ഈരാറ്റുപേട്ട നന്മ ടീമും തോട്ടില്‍ തെരച്ചിൽ നടത്തിയെങ്കിലും കണ്ടെത്താനായില്ല. ദീര്‍ഘനാളായി മുംബൈയിലായിരുന്ന ഈപ്പന്‍ കഴിഞ്ഞനാളിലാണ് നാട്ടിലെത്തിയത്.

പ്രവേശനം ഉത്സവമാക്കി സ്കൂളുകൾ

ചങ്ങനാശേരി: പൂക്കളും മധുരവും നല്‍കി കുട്ടികളെ വരവേറ്റ് സ്‌കൂളുകളില്‍ പ്രവേശനേത്സവം ആഘോഷമായി. പല സ്‌കൂളുകളിലും റാലിയോടെയാണ് കുട്ടികളെ സ്കൂളുകളിലേക്കു സ്വീകരിച്ചത്. മുത്തുക്കുടകളും തോരണങ്ങളും വാദ്യഘോഷങ്ങളും കുഞ്ഞുമനസുകള്‍ക്ക് ഇമ്പകരമായി. എസ്ബി സ്‌കൂളില്‍ നടന്ന പ്രവേശനോത്സവത്തില്‍ നവാഗതരായി വന്ന 325 കുട്ടികളെ സ്‌കൂളില്‍ വരവേറ്റു. പ്രവേശനോത്സവ റാലി ജോബ് മൈക്കിള്‍ എംഎല്‍എ ഫ്‌ളാഗ് ഓഫ് ചെയ്തു. സ്‌കൂള്‍ മാനേജര്‍ റവ.ഡോ. ടോണി ചെത്തിപ്പുഴ അധ്യക്ഷത വഹിച്ചു. മുന്‍സിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ മുഖ്യപ്രഭാഷണം നടത്തി. വൈസ്‌ ചെയര്‍മാന്‍ മാത്യൂസ് ജോര്‍ജ്, മുന്‍സിപ്പല്‍ കൗണ്‍സിലര്‍ ജോമി ജോസഫ്, പ്രിന്‍സിപ്പല്‍ ഫാ. റോജി വല്ലയില്‍, പിടിഎ പ്രസിഡന്‍റ് ട്വിങ്കിള്‍ പി. ജോണ്‍, സോണിയ ജോര്‍ജ്, പ്രവീണ്‍ കെ. മാത്യു, ലീന ജോണ്‍, വി.സി. തോമസ്, റിന്‍സ് വര്‍ഗീസ് എന്നിവര്‍ പ്രസംഗിച്ചു. ചങ്ങനാശേരി: ക്ലൂണി പബ്ലിക് സ്‌കൂളില്‍ പ്രവേശനോത്സവം ഡോ. സെബിന്‍ എസ്. കൊട്ടാരം ഉദ്ഘാടനം ചെയ്തു. പ്രിന്‍സിപ്പല്‍ സിസ്റ്റര്‍ ദീപ്തി അധ്യക്ഷത വഹിച്ചു. മാനേജര്‍ സിസ്റ്റര്‍ അനൂപ മുഖ്യപ്രഭാഷണം നടത്തി. പായിപ്പാട്: പായിപ്പാട് ഗവണ്‍മെന്‍റ് യുപി സ്‌കൂളില്‍ പായിപ്പാട് പഞ്ചായത്ത് ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ജെസി തോമസിന്‍റെ അധ്യക്ഷതയില്‍ മാടപ്പള്ളി ബ്ലോക്ക് പഞ്ചായത്ത് മെംബര്‍ വിനു ജോബ് ഉദ്ഘാടനം നിര്‍വഹിച്ചു. പായിപ്പാട് പഞ്ചായത്ത് വികസന സ്റ്റാന്‍ഡിംഗ് കമ്മിറ്റി ചെയര്‍മാന്‍ എബി വര്‍ഗീസ് മുഖ്യപ്രഭാഷണം നടത്തി. കറുകച്ചാൽ: ചമ്പക്കര സുഭാഷ് മെമ്മോറിയൽ യുപി സ്കൂളിൽ ലഹരിവിരുദ്ധ പ്രതിജ്ഞ ചൊല്ലിയാണ് സ്കൂളിലെ ആദ്യദിനം ആരംഭിച്ചത്. കോട്ടയം നാർക്കോട്ടിക് സെൽ സിവിൽ പോലീസ് ഓഫീസർ വി.ബി. അമ്പിളി ബോധവത്കരണ ക്ലാസിനു നേതൃത്വം നൽകി. ചീഫ് വിപ്പ് ഡോ. എൻ. ജയരാജ് എംഎൽഎ ഉദ്ഘാടനം ചെയ്തു. സ്കൂൾ മാനേജർ അശോക് കുമാർ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ശ്രീജിഷ കിരൺ, ബ്ലോക്ക് പഞ്ചായത്തംഗം ലതാ ഷാജൻ, കിരൺ കുമാർ, രാജേഷ് കൈടാച്ചിറ എന്നിവർ പ്രസംഗിച്ചു. പ്രവേശനോത്സവത്തിൽ സർക്കാർ സ്‌കൂളിന് പുതിയ കെട്ടിടം നെടുംകുന്നം: പ്രവേശനോത്സവത്തിൽ നെടുംകുന്നം ഗവൺമെന്‍റ് ഹയർ സെക്കൻഡറി സ്‌കൂളിന് പുതിയ കെട്ടിടവും. എംഎൽഎ ഫണ്ടിൽനിന്നും 3.52 കോടി രൂപ ചെലവഴിച്ച് നിർമിച്ച കെട്ടിടം ചീഫ് വിപ്പ് എൻ. ജയരാജ് എംഎൽഎ ഉദ്ഘാടനം ചെയ്തു. രണ്ടു നിലകളിലായി 10,020 ചതുരശ്ര അടി വിസ്തൃതിയിലാണ് എട്ട് ക്ലാസ് മുറികളോട് കൂടിയ കെട്ടിടം ഉന്നത നിലവാരത്തിൽ നിർമിച്ചത്. ഓഫീസ്മുറി, ലൈബ്രറി, കൗൺസിലിംഗ് മുറി, ശൗചാലയങ്ങൾ തുടങ്ങിയ സൗകര്യങ്ങളുമുണ്ട്. ഭാവിയിൽ മുകളിലേക്ക് രണ്ട് നിലകൾകൂടി നിർമിക്കാനും ആലോചനയുണ്ട്. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ അധ്യക്ഷത വഹിച്ചു. ലഹരിവിരുദ്ധ ബോധവത്കരണം ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി ഉദ്ഘാടനം ചെയ്തു. ലതാ ഉണ്ണികൃഷ്ണൻ, കെ.എൻ. ശശീന്ദ്രൻ, റോഷ്‌ന അലിക്കുഞ്ഞ്, കെ.എ. സുനിത, എം. സ്വപ്ന, ഫാ. ജോജിമോൻ ജോർജ്, രഞ്ജി രവീന്ദ്രൻ, അജി കാരുവാക്കൽ, റെജി പോത്തൻ തുടങ്ങിയവർ പ്രസംഗിച്ചു.

ധന്യന്‍ മാര്‍ കുര്യാളശേരിയുടെ ഓർമകള്‍ക്കു മുന്നില്‍ പുഷ്പാഞ്ജലിയുമായി വിശ്വാസികൾ

ചങ്ങനാശേരി: ധന്യന്‍ മാര്‍ തോമസ് കുര്യാളശേരിയുടെ നൂറാം ചരമവാര്‍ഷികാചരത്തിന് ചങ്ങനാശേരി മെത്രാപ്പോലീത്തന്‍ പള്ളിയിലെ കബറിടത്തില്‍ പ്രാര്‍ഥനാപുഷ്പങ്ങളുമായി വിശ്വാസീ സാഗരം. രാവിലെ മുതല്‍ തുടര്‍ച്ചയായി വിശുദ്ധ കുര്‍ബാനയും അനുസ്മരണപ്രാര്‍ഥനകളും ഉച്ചകഴിഞ്ഞ് ദിവ്യകാരുണ്യ പരസ്യ ആരാധനയും നടന്നു. ഉച്ചയ്ക്കു നടന്ന നേര്‍ച്ചസദ്യയിലും നൂറുകണക്കിനു വിശ്വാസികള്‍ പങ്കെടുത്തു. മേയ് 26 മുതലാണ് അനുസ്മരണ ശുശ്രൂകള്‍ ആരംഭിച്ചത്. വിവിധ സമയങ്ങളില്‍ അതിരൂപതാ വികാരി ജനറാള്‍ മോണ്‍. സ്‌കറിയ കന്യാകോണില്‍, കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍, ചമ്പക്കുളം ബസലിക്ക റെക്ടര്‍ ഫാ. ജയിംസ് പാലയ്ക്കല്‍, എടത്വ ഫൊറോന പള്ളി വികാരി ഫാ. ഫിലിപ്പ് വൈക്കത്തുകാരന്‍, ഫാ. ജേക്കബ് കാട്ടടി, ഫാ. ജോസഫ് പുതുപ്പറമ്പില്‍, ഫാ. ആന്‍റണി അറയ്ക്കത്തറ, ഫാ. മാത്യു വടക്കേപ്പറമ്പില്‍, ഫാ. ജോസഫ് കുറശേരി എന്നിവര്‍ വിശുദ്ധ കുര്‍ബാനയര്‍പ്പിച്ചു. ജോസഫ് ആലഞ്ചേരി, കുര്യച്ചന്‍ ഒളശ, ചാള്‍സ് പാലാത്തറ, സൈബി അക്കര, ബിന്നി കല്ലൂക്കളം, ജസ്റ്റിന്‍ തോമസ്, ജോമി കാവാലം, പി.എ. തോമസ്‌കുട്ടി, ജോബി തൂമ്പുങ്കല്‍, സച്ചിന്‍ സാജന്‍ തുടങ്ങിയവര്‍ നേതൃത്വം നല്‍കി.

ചങ്ങനാശേരിക്കിനി കുടിവെള്ളം സുലഭമാകും

ചങ്ങനാശേരി: പെരുന്നയില്‍ ഉന്നതതല ജലസംഭരണിയുടെയും ഓഫീസ് സമുച്ചയത്തിന്‍റെയും നിര്‍മാണം അവസാനഘട്ടത്തില്‍. മുകളില്‍ 15 ലക്ഷം ലിറ്റര്‍ ശേഷിയുള്ള ജലസംഭരണിയും താഴത്തെ നിലയില്‍ ഓഫീസ് സംവിധാനങ്ങളുമാണ് സജ്ജമാകുന്നത്. നിര്‍മാണം പൂര്‍ത്തിയാക്കി ഈ വര്‍ഷം അവസാനത്തോടെ കമ്മീഷന്‍ ചെയ്യാനാണ് വാട്ടര്‍ അഥോറിറ്റി ആലോചിക്കുന്നത്. ചങ്ങനാശേരിയില്‍ റെയില്‍വേ ട്രാക്കിനടിയിലൂടെ കടന്നുപോകുന്ന കല്ലിശേരി, കറ്റോട് പദ്ധതികളുടെ പൈപ്പ് ലൈനുകളുടെ അറ്റകുറ്റപ്പണികള്‍ക്കായി റെയില്‍വേ അനുമതിക്കായി കാത്തിരിക്കേണ്ടിവരുന്നതിലുള്ള ബുദ്ധിമുട്ടുകള്‍ പരിഗണിച്ചാണ് പുതിയ പദ്ധതി വിഭാവനം ചെയ്യുന്നതിന് വിവിധ തലങ്ങളില്‍നിന്നു നിര്‍ദേശം ഉണ്ടായത്. ഇതേത്തുടർന്ന് ജല അഥോറിറ്റിക്ക് പെരുന്നയില്‍ ലഭ്യമായ സ്ഥലം പ്രയോജനപ്പെടുത്തി ഉന്നതതല ജലസംഭരണി ഉള്‍പ്പെടെ ഓഫീസ് സമുച്ചയം നിര്‍മിക്കുന്നതിന് പദ്ധതി ആസൂത്രണം ചെയ്യുകയായിരുന്നു. ജോബ് മൈക്കിള്‍ എംഎല്‍എ ഉള്‍പ്പെടെയുള്ള ജനപ്രതിനിധികള്‍ മുന്‍കൈയെടുത്ത് 2021-22 സാമ്പത്തികവര്‍ഷത്തെ ബജറ്റില്‍ ഇതിനായി 10 കോടി രൂപ ഉള്‍പ്പെടുത്തി ഭരണാനുമതി നേടി. 2023ലാണ് പദ്ധതിയുടെ നിര്‍മാണം ആരംഭിച്ചത്. ഈ പദ്ധതി പൂര്‍ത്തീകരിക്കുന്നതോടെ ചെറുകരക്കുന്നിലുള്ള ഓഫീസ് സമുച്ചയം പെരുന്നയിലെ പുതിയ കെട്ടിടത്തിലേക്ക് മാറ്റും. ചങ്ങനാശേരി നിവാസികൾക്കും ഉപഭോക്താക്കൾക്കും ചെറുകരക്കുന്നിലെ ഓഫീസില്‍ എത്താനുള്ള ബുദ്ധിമുട്ടുകള്‍ക്കു പരിഹാരമാകും. തടസമായി റെയില്‍വേ ട്രാക്കിനടിയിലെ പൈപ്പ് ലൈനുകളുടെ അറ്റകുറ്റപ്പണികള്‍ ചങ്ങനാശേരി നഗരസഭയിലും അനുബന്ധ പഞ്ചായത്തുകളിലും നിലവില്‍ കല്ലിശേരി, കറ്റോട് എന്നീ രണ്ടു പദ്ധതികളില്‍നിന്നാണ് ജല വിതരണം നടത്തിവരുന്നത്. അര്‍ബന്‍ വാട്ടര്‍ സപ്ലൈ സ്‌കീമായി കല്ലിശേരി പദ്ധതിയും റൂറല്‍ വാട്ടര്‍ സപ്ലൈ സ്‌കീമായി കറ്റോട് പദ്ധതിയുമാണ് നിലവിലുള്ളത്. ഈ രണ്ടു പദ്ധതികളുടെയും ജലസ്രോതസ് യഥാക്രമം കല്ലിശേരി പദ്ധതിയുടേത് പമ്പനദിയും കറ്റോട് പദ്ധതിയുടേത് മണിമലയാറുമാണ്. കല്ലിശേരി പദ്ധതിയുടെ ജലം കല്ലിശേരിയിലുള്ള ശുദ്ധീകരണ ശാലയില്‍ ശുദ്ധീകരിച്ച ശേഷം പെരുന്ന ഭൂതല ജലസേചന സംഭരണിയിലെത്തിച്ച് അവിടെനിന്നും പമ്പ് ചെയ്തു ചെറുകരക്കുന്നിലുള്ള ഉന്നതതല ജലസംഭരണിയില്‍ എത്തിച്ചാണ് വിതരണം ചെയ്യുന്നത്. കറ്റോട് പദ്ധതിയുടെ ജലം തിരുവല്ല ശുദ്ധീരണശാലയില്‍ ശുദ്ധീകരിച്ച് അവിടെനിന്നു പമ്പ് ചെയ്ത് നേരിട്ട് ചെറുകരക്കുന്നിലെ ഉന്നതതല ജലസംഭരണിയിലെത്തിച്ചാണ് വിതരണം ചെയ്യുന്നത്. ഇരുപദ്ധതികളുടെയും പൈപ്പ് ലൈനുകള്‍ ചങ്ങനാശേരി റെയില്‍വേ സ്റ്റേഷനോടു ചേര്‍ന്ന് പാതകളുടെ അടിയിലൂടെയാണ് ചെറുകരക്കുന്നിലേക്ക് കടന്നുപോകുന്നത്. പെരുന്നയില്‍നിന്നു ചെറുകരകുന്നിലേക്ക് പമ്പു ചെയ്തിരുന്ന പൈപ്പ്‌ലൈന്‍ മൂന്നുവര്‍ഷം മുമ്പ് റെയില്‍വേ ട്രാക്കിന് അടിയില്‍ പൊട്ടുകയും റെയില്‍വേ ട്രാക്കിനടിയിലൂടെയുള്ള പൈപ്പ് മാറ്റി സ്ഥാപിക്കുന്നതിന് ഒരു വര്‍ഷത്തോളം കാലതാമസം നേരിടുകയും ചെയ്തിരുന്നു. ചങ്ങനാശേരി റെയില്‍വേ സ്റ്റേഷനു കിഴക്ക്, പടിഞ്ഞാറ് ഭാഗങ്ങള്‍ക്കായി രണ്ടു പദ്ധതികള്‍ നിലവില്‍ പെരുന്ന ഭൂതല ജലസംഭരണിയില്‍ ലഭ്യമാകുന്ന ജലം പമ്പു ചെയ്ത് പുതുതായി നിര്‍മിച്ച ജലസംഭരണിയില്‍ സംഭരിച്ച് അവിടെനിന്നും ചങ്ങനാശേരി മുനിസിപ്പാലിറ്റിയുടെ റെയില്‍വേ ക്രോസിന് പടിഞ്ഞാറുവശത്തുള്ള മുഴുവന്‍ പ്രദേശങ്ങളിലും പായിപ്പാട് പഞ്ചായത്തിലെ ളായിക്കാട്, പൂവം, എസി റോഡ് പ്രദേശങ്ങളിലും വാഴപ്പള്ളി പഞ്ചായത്തിലെ പറാല്‍, വെട്ടിത്തുരുത്ത് പ്രദേശങ്ങളിലും ജലവിതരണം ചെയ്യുന്നതിനായാണ് ഈ പദ്ധതി ആവിഷ്‌കരിച്ചിട്ടുള്ളത്. ചങ്ങനാശേരി നഗരസഭയുടെ റെയില്‍വേ പാതയുടെ കിഴക്കന്‍ മേഖലയുള്‍പ്പെടെ സമീപ പഞ്ചായത്തുകളിൽ നിലവിലുള്ള ജലദൗര്‍ലഭ്യത്തിനു പരിഹാരമായി 22 ദശലക്ഷം ശേഷിയോടുകൂടിയ ശുദ്ധീകരണശാലയുള്‍പ്പെടെയുള്ള ബൃഹത് പദ്ധതി മോര്‍ക്കുളങ്ങര കേന്ദ്രമാക്കി നിര്‍മാണം നടന്നുവരികയാണ്. പെരുന്നയില്‍ അധികമായി ശുദ്ധജലം ശേഖരിച്ച് പടിഞ്ഞാറന്‍ മേഖലയില്‍ ജലവിതരണം നടത്തുമ്പോള്‍ കിഴക്കന്‍ മേഖലയിലുള്‍പ്പടെയുള്ള പഞ്ചായത്തുകള്‍ക്ക് ജലലഭ്യതക്കുറവുണ്ടാകുമെന്ന ആശങ്കകള്‍ക്കും ഇതോടെ പരിഹാരമാകും. ഈ ശുദ്ധീകരണശാലയോടൊപ്പം 20 ലക്ഷം ലിറ്റര്‍ ശേഷിയുള്ള ഓവര്‍ഹെഡ് ടാങ്കും മോര്‍ക്കുളങ്ങരയില്‍ നിര്‍മിക്കുന്നുണ്ട്. ഈ പ്രവൃത്തികള്‍ പൂര്‍ത്തിയാകുമ്പോള്‍ കല്ലിശേരിയില്‍നിന്നുള്ള വെള്ളം സംഭരിച്ചിരുന്ന ചെറുകരക്കുന്നിലുള്ള 20 ലക്ഷം ലിറ്റര്‍ ശേഷിയുള്ള ടാങ്ക് മോര്‍ക്കുളങ്ങരയില്‍നിന്നു പമ്പ് ചെയ്യുന്ന വെള്ളം സംഭരിക്കാന്‍ ഉപയോഗിക്കും. കൂടാതെ, മോര്‍ക്കുളങ്ങരയില്‍തന്നെ 20 ലക്ഷം ലിറ്റര്‍ ശേഷിയുള്ള ഉന്നതതല സംഭരണിയും നിര്‍മാണം നടന്നുവരികയാണ്. തൃക്കൊടിത്താനത്തും ഹോമിയോ കോളജിലും രണ്ട് പദ്ധതികള്‍ തൃക്കൊടിത്താനം കുന്നുംപുറത്ത് ഏഴു ലക്ഷം ലിറ്റര്‍ ശേഷിയുള്ള ഉന്നതതല സംഭരണിയും കുറിച്ചി ഹോമിയോ കോളജ് പരിസരത്ത് ഏഴു ലക്ഷം ലിറ്റര്‍ ശേഷിയുള്ള ഉന്നതതല ജലസംഭരണിയും വിതരണ ശൃംഖലകളും രണ്ടു വര്‍ഷത്തിനകം പൂര്‍ത്തിയാകുമെന്നാണു കരുതുന്നത്. ഇതോടെ ചങ്ങനാശേരി മണ്ഡലത്തിലെ എല്ലാ പ്രദേശങ്ങളിലും 24 മണിക്കൂറും ജലവിതരണം സാധ്യമാകും. ഇതോടൊപ്പം ചങ്ങനാശേരി നിയോജകമണ്ഡലത്തിലെ എല്ലാ പഞ്ചായത്തുകളിലും ജൽജീവന്‍ മിഷന്‍ പദ്ധതി മുഖേന പൈപ്പ്‌ലൈനുകള്‍ സ്ഥാപിക്കുന്ന പ്രവൃത്തികള്‍ നടന്നുവരുന്നുണ്ട്. തിരുവല്ല കറ്റോടുനിന്ന് ചങ്ങനാശേരി മോര്‍ക്കുളങ്ങരയിലേക്കു വെള്ളം എത്തിക്കുന്നതിന് ആവശ്യമായ 700 എംഎം ഡിഐ വാട്ടര്‍ പമ്പിംഗ് ലൈന്‍ സ്ഥാപിക്കാനുള്ള പദ്ധതിയുടെയും നിർമാണം നടന്നുവരികയാണ്. ചങ്ങനാശേരി മുനിസിപ്പാലിറ്റിയിലെ കാലപ്പഴക്കം ചെന്ന എസി പൈപ്പ്‌ലൈനുകള്‍ മാറ്റി സ്ഥാപിക്കുന്നതിനും പെരുന്നയില്‍ നിര്‍മിക്കുന്ന 15 ലക്ഷം ലിറ്റര്‍ ശേഷിയുള്ള ഉന്നതതല ജല സംഭരണിയില്‍നിന്ന് ഡിസ്ട്രിബൂഷന്‍ മെയിന്‍ സ്ഥാപിക്കുന്നതിനുമുള്ള ടെന്‍ഡര്‍ നടപടികളും നടന്നുവരുന്നു. അമൃത് പദ്ധതിയില്‍ ഉള്‍പ്പെടുത്തി 11.38 കോടി രൂപയുടെ ഭരണാനുമതി ഇതിനായി ലഭ്യമായിട്ടുണ്ട്.

‘സപ്പോര്‍ട്ട് ചൈല്‍ഡ് പദ്ധതി’ പ്രതീക്ഷയറ്റവര്‍ക്ക് കൈത്താങ്ങ്: മാര്‍ തോമസ് തറയില്‍

ചങ്ങനാശേരി: ആത്മതാ കേന്ദ്രത്തിന്‍റെ ആഭിമുഖ്യത്തില്‍ നടത്തിവരുന്ന സപ്പോര്‍ട്ട് ചൈല്‍ഡ് പദ്ധതി ജീവിതത്തില്‍ പ്രതീക്ഷയറ്റവര്‍ക്കുള്ള കൈത്താങ്ങാണെന്ന് ആര്‍ച്ച്ബിഷപ് മാര്‍ തോമസ് തറയില്‍. സപ്പോര്‍ട്ട് എ ചൈല്‍ഡ് പദ്ധതിയുടെ ഇരുപത്തിയൊന്നാമത് വാര്‍ഷികവും പഠനോപകരണ വിതരണവും ഉദ്ഘാടനം ചെയ്തു പ്രസംഗിക്കുകയായിരുന്നു മാർ തറയിൽ. വികാരി ജനറാൾ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. ആത്മതാ കേന്ദ്രം ഡയറക്ടര്‍ ഫാ. ജിന്‍സ് ചോരേട്ട് ചാമക്കാല, വ്യാപാരി വ്യവസായി ഏകോപന സമിതി പ്രസിഡന്‍റ് ജോണ്‍സണ്‍ പ്ലാത്തോട്ടം, ജെസിഐ പ്രസിഡന്‍റ് ഡോ. ജോര്‍ജി ജോര്‍ജ്, ഡോ. ശരത് ചന്ദ്രന്‍, ഡോ. എസ്.ജി. ബിജു, സച്ചു ലൂയിസ്, തോമസ് തേവരുപറമ്പില്‍, വി.എ. റോസമ്മ, അരുണ്‍ എസ്. ആലുങ്കല്‍, ഡോ. രാജു തോമസ്, ജോണി പാലമുറിയില്‍, ട്രീസാ മാത്യു, ഡോ. ബോബന്‍, ടി.എം. മാത്യു എന്നിവര്‍ പ്രസംഗിച്ചു.

എന്‍എസ്എസ് വനിതാ സ്വയംസഹായ സംഘങ്ങളുടെ ക്രയവിക്രയം 3,892 കോടി

ചങ്ങനാശേരി: സ്ത്രീശക്തീകരണത്തിലൂടെ സമഗ്ര പുരോഗതി ലക്ഷ്യമിട്ട് എന്‍എസ്എസ് ആരംഭിച്ച വനിതാ സ്വയംസഹായ സംഘങ്ങളുടെ ക്രയവിക്രയം 3,892 കോടി. 19,508 സ്വയംസഹായ സംഘങ്ങളില്‍ 3.60 ലക്ഷം വനിതകള്‍ അംഗങ്ങളാണ്. ഈ സാമ്പത്തിക വര്‍ഷം 20,000 സംഘങ്ങളും അംഗങ്ങളുടെ എണ്ണം നാല് ലക്ഷമാക്കി ക്രയവിക്രയം 4,000 കോടി രൂപയാക്കി ഉയര്‍ത്താനും എൻഎസ്എസ് ലക്ഷ്യമിടുന്നു. പുതുതായി 50 പത്മാ കഫേകള്‍ ആരംഭിക്കും. നൂതന സാങ്കേതികവിദ്യ ഉപയോഗിച്ച് കൃഷി ഉത്പാദനം വര്‍ധിപ്പിക്കുന്നതിനും കര്‍ഷകരെ ഇടനിലക്കാരുടെ ചൂഷണത്തില്‍നിന്നു രക്ഷിക്കുന്നതിനുമായി ആരംഭിച്ച ഫാര്‍മര്‍ പ്രൊഡ്യൂസര്‍ ഓര്‍ഗനൈസേഷന്‍ 20 താലൂക്ക് യൂണിയനുകളില്‍ ദീര്‍ഘിപ്പിക്കും. എന്‍എസ്എസ് ബജറ്റ് അവതരണത്തിലാണ് ജനറല്‍ സെക്രട്ടറി ജി. സുകുമാരന്‍ നായര്‍ ഇക്കാര്യങ്ങള്‍ അറിയിച്ചത്. എൻഎസ്എസ് സെക്രട്ടറി ഹരികുമാർ കോയിക്കൽ, ഡയറക്ടർ ബോർഡംഗങ്ങൾ തുടങ്ങിയവർ ബജറ്റ് സമ്മേളനത്തിൽ പങ്കെടുത്തു.

എസി റോഡിന്‍റെ പുനര്‍നിര്‍മാണം അശാസ്ത്രീയം: കത്തോലിക്ക കോണ്‍ഗ്രസ്

ചങ്ങനാശേരി: എസി റോഡില്‍ നിലവില്‍ നടത്തിയിട്ടുള്ള നിര്‍മാണപ്രവര്‍ത്തനങ്ങള്‍ പരിസ്ഥിതിയെ ദോഷകരമായി ബാധിക്കുന്നതാണെന്നും ആ മേഖലയില്‍ ജീവിക്കുന്നവരുടെ ജീവിതത്തെ കൂടുതല്‍ സങ്കീര്‍ണമാക്കുന്ന തരത്തിലുള്ള നിര്‍മാണ പ്രവര്‍ത്തനങ്ങളാണ് നടത്തിയിട്ടുള്ളതെന്നും കത്തോലിക്ക കോണ്‍ഗ്രസ് ചങ്ങനാശേരി അതിരൂപതാ സമിതി. വലിയതോതില്‍ മുതല്‍മുടക്കി നിര്‍മാണപ്രവര്‍ത്തനങ്ങള്‍ നടത്തിയിട്ടും ഈ കഴിഞ്ഞദിവസങ്ങളിലെ മഴയില്‍ റോഡില്‍ കിലോമീറ്ററുകളോളം വെള്ളക്കെട്ടുകള്‍ രൂപപ്പെട്ടു. വലിയ വാഹനങ്ങള്‍ക്ക് മാത്രമാണ് റോഡിലൂടെ സഞ്ചാരം സാധ്യമാകുന്നത്. അപാകതകള്‍ പരിഹരിക്കാന്‍ സര്‍ക്കാര്‍ ഉടന്‍ മുന്‍കൈയെടുക്കണമെന്നും കത്തോലിക്കാ കോണ്‍ഗ്രസ് ആവശ്യപ്പെട്ടു. അതിരൂപത പ്രസിഡന്‍റ് ബിജു സെബാസ്റ്റ്യന്‍റെ അധ്യക്ഷതയില്‍ ചേര്‍ന്ന നേതൃസമ്മേളനം അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല ഉദ്ഘാടനം ചെയ്തു. ജനറല്‍ സെക്രട്ടറി ബിനു ഡൊമിനിക്, ജോസ് വെങ്ങാന്തറ, സി.ടി. തോമസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസിലിന്‍ കുരുവിള, ജിനോ ജോസഫ് എന്നിവര്‍ പ്രസംഗിച്ചു.

വർണാഭമായി പ്രവേശനോത്സവം

വൈക്കം: അറിവിന്‍റെ ആദ്യാക്ഷരമധുരം നുണയാൻ അക്ഷരമുറ്റത്തെത്തിയ കുരുന്നുകൾക്ക് ഊഷ്മള വരവേൽപ്പ്. അലങ്കരിച്ച വിദ്യാലയങ്ങളുടെ കവാടങ്ങളിൽ നവാഗതരെ വരവേൽക്കാൻ അധ്യാപകരും രക്ഷാകർതൃ സമിതികളും എത്തി. വൈക്കം പള്ളിപ്രത്തുശേരി സെന്‍റ് ലൂയിസ് യുപി സ്കൂളിൽ പ്രവേശനോത്സവം ടിവി പുരം പഞ്ചായത്ത് പ്രസിഡന്‍റ് ശ്രീജി ഷാജി ഉദ്ഘാടനം ചെയ്തു. പിടിഎ പ്രസിഡന്‍റ് ഉദയകുമാർ അധ്യക്ഷത വഹിച്ചു. പൂർവവിദ്യാർഥി ഡീക്കൻ ജിബിൻജോയി മുക്കുടിക്കൽതറ അക്ഷരദീപം തെളിച്ചു.പഠനോപകരണ വിതരണം പള്ളിപ്രത്തുശേരി സർവീസ് സഹകരണ ബാങ്ക് പ്രസിഡന്‍റ് അഡ്വ. ജോർജ് ജോസഫ് നിർവഹിച്ചു. ടിവി പുരം പള്ളിപ്രത്തുശേരി സെന്‍റ് ജോസഫ് സ്കൂളിൽ സ്കൂൾ മാനേജർ സിസ്റ്റർ മീന ഡാനിയേൽ സിഎംസി പ്രവേശനോത്സവം ഉദ്ഘാടനം ചെയ്തു. എംപിടിഎ പ്രസിഡന്‍റ് ജീന ടെൽസൺ അധ്യക്ഷത വഹിച്ചു. ഉദയനാപുരം നേരേകടവ് ഗവൺമെന്‍റ് ഹരിജൻ വെൽഫെയർ എൽപി സ്കൂളിൽ പഞ്ചായത്തംഗം ഗിരിജ പുഷ്കരൻ പ്രവേശനോത്സവം ഉദ്ഘാടനം ചെയ്തു. അഡ്വ.അനിൽകുമാർ അധ്യക്ഷത വഹിച്ചു. വൈക്കം അയ്യർകുളങ്ങര ഗവൺമെന്‍റ് യുപി സ്കൂളിൽ നഗരസഭാ ചെയർപേഴ്സൺ പ്രീതാ രാജേഷ് പ്രവേശനോത്സവം ഉദ്ഘാടനം ചെയ്തു. പിടിഎ പ്രസിഡന്‍റ് സാബു അധ്യക്ഷത വഹിച്ചു. കടുത്തുരുത്തി: ആയാംകുടി ഹൈസ്‌കൂളിൽ പ്രവേശനോത്സവം സ്‌കൂള്‍ മാനേജര്‍ വാസുദേവന്‍ നമ്പൂതിരിയുടെ അധ്യക്ഷതയില്‍ മാംഗോ മെഡോസ് എംഡി എന്‍.കെ. കുര്യന്‍ ഉദ്ഘാടനം ചെയ്തു. കടുത്തുരുത്തി പഞ്ചായത്ത് മെംബര്‍മാരായ സി.ബി. പ്രമോദ്, പൗളി ജോര്‍ജ്, എസ്. വിഷ്ണു നമ്പൂതിരി, പിടിഎ പ്രസിഡന്‍റ് രവീന്ദ്രന്‍, ഹെഡ്മാസ്റ്റര്‍ ടി.എസ്. ബിജുകുമാര്‍ തുടങ്ങിയവര്‍ പ്രസംഗിച്ചു. ആയാംകുടി: സെന്‍റ് തെരേസ് ഇംഗ്ലീഷ് മീഡിയം സ്‌കൂളില്‍ആയാംകുടി: സെന്റ് തെരേസ് ഇംഗ്ലീഷ് മീഡിയം സ്‌കൂളില്‍ 2025-26 അധ്യയന വര്‍ഷത്തെ പ്രവേശനോത്സവം നടന്നു. സ്‌കൂള്‍ മാനേജര്‍ ബ്രദര്‍ ഷാജി വാഴേപ്പറമ്പില്‍ ഉദ്ഘാടനം നിര്‍വഹിച്ചു. പ്രിന്‍സിപ്പല്‍ സോജോ എബ്രഹാം, അഡ്മിനിസ്‌ട്രേറ്റര്‍ ബ്രദര്‍ മാര്‍ട്ടിന്‍ മേനാച്ചേരില്‍, മലപ്പുറം സെന്‍റ് തെരേസാസ് പള്ളി വികാരി ഫാ. തോമസ് ചില്ലയ്ക്കല്‍, സ്റ്റാഫ് സെക്രട്ടറി നിമിഷാമോള്‍ മണി എന്നിവര്‍ പ്രസംഗിച്ചു. വെച്ചൂർ:സെന്‍റ് മൈക്കിള്‍സ് ഹയര്‍സെക്കൻഡറി സ്കൂളിലെ പ്രവേശനോത്സവം പഞ്ചായത്ത് പ്രസിഡന്‍റ് കെ.ആർ. ഷൈലകുമാർ ഉദ്ഘാടനം ചെയ്തു. സ്കൂള്‍ മാനേജര്‍ഫാ. പോള്‍ആത്തപ്പള്ളി അധ്യക്ഷത വഹിച്ചു. പഞ്ചായത്ത് അംഗം പി. കെ.മണിലാല്‍,പി ടി എ പ്രസിഡന്‍റ് ബിജു മിത്രംപള്ളി,സഹവികാരി ഫാ. ആന്‍റണികളത്തില്‍, ഹെഡ്മിസ്ട്രസ് ഷൈജ എം. ജോസഫ് തുടങ്ങിയവർ സംബന്ധിച്ചു. വൈക്കം: വൈക്കം ലിസ്യു ഇംഗ്ലീഷ് സ്കൂളിൽ പ്രവേശനോത്സവം വൈക്കo കൊതവറ സെന്‍റ് സേവ്യേഴ്സ് കോളജ് പ്രിൻസിപ്പൽ ഡോ.കെ.ജി. ഏബ്രഹാം ഉദ്ഘാടനം ചെയ്തു. സ്കൂൾ മാനേജർ ഫാ. സെബാസ്റ്റ്യൻ നാഴിയംപാറ അധ്യക്ഷത വഹിച്ചു.

കൂട്ടുകാരുടെ മനംകവർന്ന് ഇരട്ടകൾ

ഉദയനാപുരം: നേരേകടവ് ഗവൺമെന്‍റ് ഹരിജൻ വെൽഫെയർ എൽപി സ്കൂളിൽ യുകെജിയിലും ഒന്നാംക്ലാസിലും എത്തിയ ഇരട്ടകൾ സഹപാഠികളുടെ മനംകവർന്നു. നേരേകടവ് കാട്ടുകണ്ടത്തിൽ അഖിൽ-ദീപ്തി ദമ്പതികളുടെ മക്കളായ അൽവിതയും അൻവിതയുമാണ് യുകെജിയിൽ പഠിക്കാനെത്തിയത്. ഒന്നാം ക്ലാസിൽ നേരേകടവ് പുത്തൻകരിയിൽ പി.ഡി. റെജി-ജെ. ജെ. ജോൾവി ദമ്പതികളുടെ മക്കളായ റാഫേലും റാഹേലുമാണ് എത്തിയത്.

പുറംബണ്ട് കവിഞ്ഞൊഴുകി 125 ഏക്കറിലെ കൃഷി നശിച്ചു

തലയോലപ്പറമ്പ്: വടയാർ പൊന്നുരുക്കംപാറ പാടശേഖരത്തിൽ പുറംബണ്ട് കവിഞ്ഞൊഴുകി 125 ഏക്കറിലെ വർഷകൃഷി നശിച്ചു. പത്തു ദിവസം പ്രായമായ നെൽ വിത്തുകളാണ് ദിവസങ്ങളോളം വെള്ളം കെട്ടിനിന്നതിനെത്തുടർന്ന് നശിച്ചത്. കഴിഞ്ഞ ദിവസങ്ങളിലുണ്ടായ മഴയിൽ രണ്ടു ദിവസത്തോളം വൈദ്യുതി നിലച്ചിരുന്നു. തുടർന്ന് പാടശേഖരത്തിൽ രണ്ട് മോട്ടോറുകൾ ഉപയോഗിച്ച് മുഴുവൻ സമയം പമ്പിംഗ് നടത്തിയിട്ടും വെള്ളം വറ്റിയില്ല. ജലനിരപ്പ് ഉയർന്ന് പുറംബണ്ടു കവിഞ്ഞൊഴുകിയാണ് കൃഷിനാശം ഉണ്ടായത്. പാടശേഖരസമിതി 10 ലക്ഷത്തോളം രൂപ വായ്പയെടുത്താണ് അടിസ്ഥാന ജോലികൾ ചെയ്തത്. കൂടാതെ വിത സംബന്ധമായ ജോലികൾ ചെയ്തതിന് ഏക്കറിന് 10,000 രൂപയോളം കർഷകർക്ക് ചെലവായിട്ടുണ്ട്. വീണ്ടും കൃഷി ഇറക്കുന്നതിന് കൃഷിവകുപ്പ് ആവശ്യമായ സഹായം നൽകണമെന്ന് കർഷകർ ആവശ്യപ്പെട്ടു.

മാൻവെട്ടത്തെ മോഷണം: അന്വേഷണം ഊര്‍ജിതമാക്കിയെന്നു പോലീസ്

കടുത്തുരുത്തി: മാന്‍വെട്ടത്ത് വീടിന്‍റെ മുന്‍വശത്തെ വാതില്‍ കുത്തിത്തുറന്ന് മുറിക്കുള്ളിലെ അലമാരയില്‍ സൂക്ഷിച്ചിരുന്ന 32 പവനും 25,000 രൂപയും കവര്‍ന്ന സംഭവത്തില്‍ അന്വേഷണം ഊര്‍ജിതമാക്കിയതായി പോലീസ്. സിസിടിവി കാമറകള്‍ കേന്ദ്രീകരിച്ചാണ് അന്വേഷണം പുരോഗമിക്കുന്നത്. മോഷ്ടാവിനെ സംബന്ധിച്ചു സൂചിനകള്‍ ലഭിച്ചതായി പോലീസ് പറയുമ്പോഴും ഇതില്‍ എത്രമാത്രം വ്യക്തതയുണ്ടെന്ന് അറിയില്ല. രണ്ടു ദിവസത്തിനുള്ളില്‍ മോഷ്ടാവിനെ സംബന്ധിച്ചു വിവരങ്ങള്‍ ലഭ്യമാക്കാമെന്നാണ് പോലീസ് പറയുന്നത്. മാന്‍വെട്ടം നെടുംതുരുത്തി മ്യാലില്‍ എന്‍.ജെ. ജോയിയുടെ വീട്ടില്‍ വെള്ളിയാഴ്ച രാത്രിയാണ് മോഷണം നടന്നത്. നഷ്ടപ്പെട്ടെന്നു കരുതിയ എടിഎം കാര്‍ഡ് ഇന്നലെ വീട്ടില്‍നിന്നു കണ്ടുകിട്ടി. വെള്ളിയാഴ്ച രാവിലെ ജോയിയും ഭാര്യ ലിസിയും മകള്‍ ജൂലിയുടെ ചികിത്സ ആവശ്യത്തിനായി ഏറ്റുമാനൂര്‍ കാരിത്താസ് ആശുപത്രിയില്‍ പോയിരുന്നു. ശനിയാഴ്ച രാവിലെ പത്തോടെ ജോയി വീട്ടിലെത്തിയപ്പോഴാണ് മോഷണവിവരം അറിയുന്നത്.

പുഞ്ച ഉത്പാദനത്തില്‍ 5,000 ടണ്‍ കുറവ്

കോട്ടയം: പുഞ്ച നെല്ല് സംഭരണം പൂര്‍ത്തിയായശേഷവും വില നല്‍കുന്നതില്‍ അനിശ്ചിതത്വം ബാക്കി. സപ്ലൈകോ ഫെബ്രുവരി പകുതിയോടെ സംഭരണം തുടങ്ങി മാര്‍ച്ച് 15 വരെ വാങ്ങിയ നെല്ലിന്‍റെ പണം അക്കൗണ്ടില്‍ നല്‍കി. ഇതാവട്ടെ ആകെ ഉത്പാദനത്തിന്‍റെ അഞ്ചു ശതമാനം മാത്രമായിരുന്നു. കര്‍ഷകര്‍ക്ക് ലഭിച്ചതാകട്ടെ 20 കോടി രൂപ. സപ്ലൈകോ സംഭരിച്ച് കുത്തുമില്ലുകള്‍ക്ക് കൈമാറിയ നെല്ലിനുള്ള പിആര്‍എസ് വാങ്ങാന്‍ പോലും ബാങ്കുകള്‍ മടിക്കുകയാണ്. നിലവില്‍ ഏപ്രില്‍ വരെയുള്ള പിആര്‍എസ് മാത്രമേ സംഭരണ കണ്‍സോര്‍ഷ്യത്തില്‍ ഉള്‍പ്പെട്ട സ്റ്റേറ്റ് ബാങ്കും കനറ ബാങ്കും വാങ്ങുന്നുള്ളൂ. മേയിലെ പിആര്‍എസ് വാങ്ങാന്‍ ബാങ്കുകള്‍ താത്പര്യപ്പെടുന്നില്ല. സംഭരിച്ച നെല്ലിന് എന്നു പണം നല്‍കുമെന്നതില്‍ യാതൊരു വ്യക്തതയുമില്ല. കോട്ടയം ജില്ലയില്‍ 47,000 മെട്രിക് ടണ്‍ ഉത്പാദനം നടക്കുമെന്നായിരുന്നു വിലയിരുത്തല്‍. എന്നാല്‍ വിളവുമോശവും സംഭരണത്തിലെ താമസവും മൂലം 42,110 മെട്രിക് ടണ്‍ മാത്രമാണ് സംഭരിച്ച് പിആര്‍എസ് നല്‍കിയത്. കഴിഞ്ഞ വിരിപ്പു നെല്ല് സംഭരണത്തിലെ കുടിശിക ഉള്‍പ്പെടെ 140 കോടി രൂപ ജില്ലയിലെ കര്‍ഷകര്‍ക്ക് ലഭിക്കാനുണ്ട്. ജില്ലയില്‍ ആദ്യമായി 30 കിലോ നെല്ല് കിഴിവു നല്‍കേണ്ടിവന്നതും കൊയ്ത്ത് ഏറ്റവും അനിശ്ചിതത്വത്തിലായതും ഇക്കൊല്ലത്തെ പുഞ്ച കൃഷിയിലാണ്.

നിലമ്പൂരില്‍ ആവേശം കൂട്ടാൻ‍ കോട്ടയത്തെ നേതാക്കളും

കോട്ടയം: നിലമ്പൂര്‍ ഉപതെരഞ്ഞെടുപ്പ് പ്രചാരണത്തിന് കോട്ടയത്തുനിന്നുള്ള നേതാക്കളും പ്രവര്‍ത്തകരും. മൂന്നു മുന്നണി സ്ഥാനാര്‍ഥികള്‍ക്കു പുറമേ തൃണമൂല്‍ സ്ഥാനാര്‍ഥി പി.വി. അന്‍വറിനൊപ്പവും കോട്ടയത്തുനിന്നുള്ള നേതാക്കള്‍ നിലമ്പൂര്‍ മണ്ഡലത്തിലുണ്ട്. തെരഞ്ഞെടുപ്പ് പ്രഖ്യാപനം വന്നയുടന്‍തന്നെ നേതാക്കള്‍ക്ക് മുന്നണികളും പാര്‍ട്ടികളും വിവിധയിടങ്ങളില്‍ ചുമതലകള്‍ നല്‍കിയിരുന്നു. യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്തിനായി ചാണ്ടി ഉമ്മന്‍ എംഎല്‍എയുടെ നേതൃത്വത്തിലാണ് പ്രവര്‍ത്തകര്‍ നിലമ്പൂരിലെത്തിയിരിക്കുന്നത്. ഒരു പഞ്ചായത്തിന്‍റെ പ്രചാരണച്ചുമതലയാണ് ചാണ്ടി ഉമ്മനു നല്‍കിയിരിക്കുന്നത്. കെപിസിസി അച്ചടക്ക സമിതി അധ്യക്ഷന്‍കൂടിയായ തിരുവഞ്ചൂര്‍ രാധാകൃഷ്ണന്‍ എംഎല്‍എയും നിലമ്പൂരിലെത്തിയിട്ടുണ്ട്. ഡിസിസി പ്രസിഡന്‍റ് നാട്ടകം സുരേഷ്, കെപിസിസി ജനറല്‍ സെക്രട്ടറി പി.എ. സലിം എന്നിവര്‍ക്കൊപ്പം ഭാരവാഹികളും പ്രവര്‍ത്തകരും നിലമ്പൂരിലെത്തും. കേരള കോണ്‍ഗ്രസില്‍ മോന്‍സ് ജോസഫ് എംഎല്‍എ, ഫ്രാന്‍സിസ് ജോര്‍ജ് എംപി എന്നിവരും പ്രവര്‍ത്തകരും പ്രചാരണരംഗത്തുണ്ട്. എല്‍ഡിഎഫ് സ്ഥാനാര്‍ഥി എം. സ്വരാജിനുവേണ്ടി സിപിഎം സംസ്ഥാന കമ്മിറ്റിയംഗം കെ. അനില്‍കുമാര്‍ മണ്ഡലത്തിലുണ്ട്. പ്രചാരണം, വിവിധ പഞ്ചായത്തുകളുടെ ഏകോപനം എന്നിങ്ങനെ ചുമതലകള്‍ അനില്‍കുമാറുണ്ട്. കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി കഴിഞ്ഞ ദിവസങ്ങളില്‍ നിലമ്പൂരിലുണ്ടായിരുന്നു. കേരള കോണ്‍ഗ്രസ് പ്രചാരണത്തിന് എംഎല്‍എമാരെയും നേതാക്കളെയും ചുമതലപ്പെടുത്തിയിട്ടുണ്ട്. ബിജെപി സ്ഥാനാര്‍ഥി മോഹന്‍ ജോര്‍ജിനുവേണ്ടി പ്രചാരണം നടത്താന്‍ ബിജെപി ജില്ലാ നേതാക്കള്‍ വൈകാതെ നിലമ്പൂരിലെത്തും. തൃണമൂല്‍ കോണ്‍ഗ്രസ് സ്ഥാനാര്‍ഥി പി.വി. അന്‍വറിന്‍റെ മുഖ്യ തെരഞ്ഞെടുപ്പ് പ്രചാരകനായി സജി മഞ്ഞക്കടമ്പില്‍ നിലമ്പൂരിലുണ്ട്. സ്ഥാനാര്‍ഥി പ്രഖ്യാപനം, പാര്‍ട്ടി യോഗങ്ങള്‍, പത്രികാ സമര്‍പ്പണം തുടങ്ങിയവയില്‍ അന്‍വറിനൊപ്പം സജിയുണ്ടായിരുന്നു. ജില്ലയില്‍നിന്നുള്ള ഏതാനും പ്രവര്‍ത്തകരുമുണ്ട്. പ്രചാരണം തീരുംവരെ ഇവര്‍ മണ്ഡലത്തിലുണ്ടാകും.

വാട്‌സ് ആപ്പില്‍ സഹായസന്ദേശവുമായി തട്ടിപ്പുസംഘം

കോട്ടയം: മൊബൈല്‍ ഫോണില്‍ നെറ്റ് ബാങ്കിംഗും യുപിഐ സംവിധാനവുമുള്ളവര്‍ ജാഗ്രത പാലിക്കുക. പരിചിതരും പ്രമുഖരുമായ വ്യക്തികളുടെ വാട്‌സ് ആപ്പിലൂടെ മെസേജ് അയച്ച് പണം തട്ടുന്ന സംഘം സജീവമായിരിക്കുന്നു. ജില്ലയില്‍ വൈദികര്‍ ഉള്‍പ്പെടെയുള്ള പ്രമുഖരുടെ മൊബൈല്‍ നമ്പറുകള്‍ ഹാക്ക് ചെയ്താണ് അവരുടെ നമ്പറുകളില്‍നിന്ന് ഒരാഴ്ചയായി അഭ്യര്‍ഥന വന്നുകൊണ്ടിരിക്കുന്നത്. പ്രെയിസ് ദി ലോഡ്, ഐ നീഡ് എ ഫേവര്‍ ഫ്രം യു എന്ന് അക്ഷരത്തെറ്റോടെയുള്ള ഇംഗ്ലീഷ് മെസേജാണ് വരിക. എന്ത് സഹായം എന്ന് തിരികെ മെസേജിട്ടാല്‍ നാല്‍പതിനായിരം രൂപ തന്ന് സഹായിക്കണമെന്നും ബാങ്ക് ഇടപാടിന് തടസം സംഭവിച്ചെന്നും രാവിലെ തിരികെ തരാമെന്നും മറുപടി വരും. നിജസ്ഥിതി ചോദിച്ചറിയാതെ നിരവധി പേര്‍ ഇത്തരത്തില്‍ പണം യുപിഐ വഴി ട്രാന്‍സ് ചെയ്ത് തട്ടിപ്പില്‍പ്പെട്ടു. മൊബൈലിലെ കോള്‍ ലിസ്റ്റില്‍ ഏറെപ്പെരുടെ നമ്പര്‍ സൂക്ഷിച്ചിരിക്കുന്നവരെ തെരഞ്ഞുപിടിച്ചാണ് സംഘം നുഴഞ്ഞുകയറി സന്ദേശം അയയ്ക്കുക. ഈ സാഹചര്യത്തില്‍ പോലീസ് സൈബര്‍ സെല്ലില്‍ നിരവധി പരാതികളാണ് ലഭിച്ചുകൊണ്ടിരിക്കുന്നത്. തട്ടിയെടുക്കുന്ന പണം ഏത് അക്കൗണ്ടിലേക്ക് പോകുന്നതെന്ന് വ്യക്തമായിട്ടില്ല. അക്ഷരത്തെറ്റുകളും ഗ്രാമര്‍ തെറ്റുകളുമുള്ള മെസേജുകള്‍ക്കു പിന്നില്‍ വിദേശ സംഘമാണോ എന്നും സംശയിക്കുന്നു. മറുപടി നല്‍കാതെ വന്നാല്‍ വിശേഷങ്ങള്‍ തിരക്കിയും ആശംസകള്‍ നേര്‍ന്നും ഇവര്‍ തുടര്‍ മെസേജുകള്‍ അയയ്ക്കുന്നുണ്ട്.

കര്‍ഷകരെ നഷ്ടക്കെണിയിലാക്കി പെരുമഴ ശമിച്ചു

കോട്ടയം: രണ്ടാഴ്ച നീണ്ട കാലവര്‍ഷക്കെടുതിയില്‍ വാഴ, കപ്പ, പച്ചക്കറി കര്‍ഷകര്‍ക്ക് ഭീമമായ നഷ്ടം. മീനച്ചില്‍, പമ്പ നദിയോരങ്ങ ളിലെ താഴ്ന്ന പ്രദേശങ്ങളിലും പാടങ്ങളിലും കൃഷിയിറക്കിയവര്‍ക്കാണ് വന്‍നഷ്ടം. വെള്ളക്കെട്ടിലായ കപ്പ പറിച്ച് നിസാരവിലയ്ക്ക് വില്‍ക്കാന്‍ നിര്‍ബന്ധിതരായവരുമുണ്ട്. പച്ചക്കപ്പവില മാര്‍ക്കറ്റില്‍ 40 രൂപയുണ്ടായിരിക്കെ ഇക്കൊല്ലം ആശ്വാസവില കണക്കുകൂട്ടിയവര്‍ ഇരുപതു രൂപയ്ക്ക് വഴിയോരങ്ങളില്‍ കപ്പ വില്‍ക്കാന്‍ കഴിഞ്ഞ ദിവസങ്ങളില്‍ തിരക്ക് കൂട്ടി. കഴിഞ്ഞ മാസങ്ങളില്‍ നട്ട കപ്പയും വാഴയും മഴയ്ക്കൊപ്പമുണ്ടായ കനത്ത കാറ്റില്‍ പിഴുതുവീണതും നഷ്ടം ഇരട്ടിയാക്കി. ഓണം വിപണി ലക്ഷ്യമാക്കി വാഴയും പച്ചക്കറിയും കൃഷി ചെയ്ത ചെറുകിടക്കാര്‍ക്കാണ് ഏറ്റവും നഷ്ടമുണ്ടായത്. സ്ഥലം പാട്ടത്തിനെടുത്തും ലോണെടുത്തും സംഘകൃഷി നടത്തിയവര്‍ക്ക് ലക്ഷങ്ങളുടെ ബാധ്യതയാണുണ്ടായിരിക്കുന്നത്. മറ്റുള്ളവരുടെ സ്ഥലത്ത് വാരത്തിന് കൃഷി നടത്തി നഷ്ടമുണ്ടായാല്‍ കൃഷിവകുപ്പിന്‍റെ നഷ്ടപരിഹാര തുക ലഭിക്കാന്‍ പരിമിതിയുണ്ട്. പലയിടങ്ങളില്‍ നഷ്ടം നിര്‍ണയിക്കാന്‍ കൃഷി വകുപ്പ് ഉദ്യോഗസ്ഥര്‍ സ്ഥലത്തെത്താതിരുന്നതും തിരിച്ചടിയായി. മഴ തുടരെ പെയ്തതിനാല്‍ പച്ചക്കറി ഇനങ്ങള്‍ ചീഞ്ഞും കായ് കൊഴിഞ്ഞും കര്‍ഷകര്‍ക്ക് നഷ്ടമുണ്ടായി. പാടങ്ങളില്‍ നട്ട വെള്ളരി, മത്തന്‍, പടവലം എന്നിവയുടെ ഫലവും പൂര്‍ണമായി അഴുകി. പയര്‍, പടവലം, പാവല്‍, വെണ്ട, വഴുതിന, ചീര തുടങ്ങിയ പച്ചക്കറി കര്‍ഷകരും പ്രതീക്ഷയറ്റ് കഴിയുകയാണ്. ജൂണ്‍, ജൂലൈ മാസങ്ങളില്‍ കൃഷിയിറക്കി വിളകൊയ്യാന്‍ പാകത്തിലെത്തിയ നെല്‍പ്പാടങ്ങളില്‍ വെള്ളം കയറി കതിരുകള്‍ ചീഞ്ഞളിഞ്ഞ് നശിച്ചു. ആയിരക്കണക്കിന് കര്‍ഷകരുടെ പ്രതീക്ഷയാണ് മഴയും കാറ്റും തല്ലിക്കെടുത്തിത്. കാലവര്‍ഷം ഇടമുറിയാം കോട്ടയം: മേയില്‍ ശക്തമായ മഴ തത്കാലം പിന്മാറി നില്‍ക്കുമെന്ന് കാലാവസ്ഥാ നിരീക്ഷണ വിഭാഗം. രണ്ടു വര്‍ഷം മുന്‍പ് സംഭവിച്ചതുപോലെ ജൂണ്‍, ജൂലൈ മാസങ്ങളില്‍ മണ്‍സൂണ്‍ പൂര്‍ണമായി പിന്മാറി വേനലിന്‍റെ ഘടനയിലെത്തുകയും ഓഗസ്റ്റ്, സെപ്റ്റംബറില്‍ ശക്തിപ്പെടുകയും ചെയ്യാനുള്ള സാധ്യത കുറവല്ല. കേരളം നേരിടുന്ന കാലാവസ്ഥാവ്യതിയാനത്തിന്‍റെ ഭാഗമായി കാലവര്‍ഷം ഇടമുറിയാന്‍ സാധ്യതയുണ്ട്. അങ്ങനയെങ്കില്‍ കാര്‍ഷികവിളവിനെ അത് പ്രതികൂലമായി ബാധിക്കും. കാപ്പി, കുരുമുളക് തുടങ്ങിയ ഫലങ്ങള്‍ നന്നേ കുറയും. നടീല്‍ കൃഷി പകമാകാന്‍ വൈകും. വിളവും കുറയും. ജില്ലയില്‍ 57 ദുരിതാശ്വാസ ക്യാമ്പുകള്‍; 717 കുടുംബങ്ങള്‍ സുരക്ഷിത കേന്ദ്രങ്ങളില്‍ കോട്ടയം: കനത്ത മഴ, വെള്ളപ്പൊക്കം എന്നിവയെത്തുടര്‍ന്ന് ജില്ലയില്‍ സുരക്ഷിത കേന്ദ്രങ്ങളില്‍ കഴിയുന്നത് 717 കുടുംബങ്ങള്‍. 57 ദുരിതാശ്വാസ ക്യാമ്പുകളാണു പ്രവര്‍ത്തിക്കുന്നത്. കോട്ടയം താലൂക്കിലാണ് കൂടുതല്‍ ക്യാമ്പുകളുള്ളത് -41. ചങ്ങനാശേരി-12, വൈക്കം-4 എന്നിങ്ങനെയാണു മറ്റു താലൂക്കുകളിലെ ക്യാമ്പുകളുടെ എണ്ണം. 2,095 പേരാണു ക്യാമ്പുകളിലുള്ളത്. വിദ്യാഭ്യാസ സ്ഥാപനങ്ങൾക്ക് അവധി കോട്ടയം: ജില്ലയിൽ ദുരിതാശ്വാസ ക്യാമ്പുകൾ പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്ക് ഇന്ന് ജില്ലാ കളക്ടർ ജോൺ വി. സാമുവൽ അവധി പ്രഖ്യാപിച്ചു.

പ്രവേശനോത്സവത്തിൽ അണിചേർന്ന് അഫ്ഗാൻ ദന്പതികളുടെ മകൾ ബഹ്സ കരീമിയും

ഗാന്ധിനഗർ: മുടിയൂർക്കര ഗവ. എൽപി സ്കൂളിൽ അഫ്ഗാൻ കാബൂൾ സ്വദേശികളുടെ മകളായ ബഹ്‌സ കരീമി എന്ന അഞ്ചുവയസുകാരി ഒന്നാം ക്ലാസിൽ പുതിയ അതിഥിയായെത്തിയത് പ്രവേശനോത്സവ ആഘോഷങ്ങൾക്ക് കൊഴുപ്പേകി. പുതിയ കൂട്ടുകാരിയെ ലഭിച്ചതിന്‍റെ സന്തോഷത്തിലായിരുന്നു സഹപാഠികളായെത്തിയവർ. മാതാപിതാക്ക ളായ മുഹമ്മദ് ഫാഹീമിനും എല്ലാഹ സാഹിറിനും സഹോദരൻ ബാഹർ കരീമിനും ഒപ്പമാണ് ബഹ്‌സാ ഒന്നാം ക്ലാസ് വിദ്യാർഥിയായി സ്‌കൂളിലേക്കെത്തിയത്. 2021ലാണ് മുഹമ്മദ് കുടുംബത്തോടൊപ്പം കോട്ടയത്തെത്തിയത്. എംജി യൂണിവേഴ്‌സിറ്റിയിൽ ബിസിനസ് സ്റ്റഡീസിൽ റിസർച്ച് ചെയ്യുകയാണ് മുഹമ്മദ്. മുടിയൂർക്കര ഹൗസിംഗ് കോളനിയിലാണ് താമസം. എസ്എച്ച് മൗണ്ടിലായിരുന്നു ബഹ്‌സ കെജി പഠനം നടത്തിയിരുന്നത്. മുടിയൂർക്കര സ്‌കൂളിന്‍റെ പ്രവർത്തനമികവും പാഠ്യ-പാഠ്യേതര മികവും സോഷ്യൽ മീഡിയാകളിലൂടെ യും മറ്റും അറിഞ്ഞാണ് ബഹ്‌സയെ ഇവിടെ ചേർത്തതെന്ന് മുഹമ്മദ് പറഞ്ഞു. മലയാളം അറിയുമോയെന്ന ചോദ്യത്തിന് “ലിറ്റിൽ മലയാളം’’ എന്ന് ബഹ്‌സ പറഞ്ഞെങ്കിലും ഇംഗ്ലീഷിലാണ് സംസാരിക്കുന്നത്. അഫ്ഗാനി, ഉറുദു എന്നീ ഭാഷകളും അറിയാം. മലയാളം പഠിക്കണമെന്നാണ് ആഗ്രഹം. പൂക്കൾ നൽകിയാണ് പുതിയ അതിഥിയെ ഒന്നാം ക്ലാസ് ടീച്ചറായ സോളിയമ്മ ജേക്കബും ഹെഡ്മിസ്ട്രസ് കെ.സിന്ധുമോളും മറ്റ് സഹഅധ്യാപകരും വരവേറ്റത്. രണ്ട് വർഷം മുമ്പാണ് ഈ സ്‌കൂളിലേക്ക് ഇതരസംസ്ഥാനത്തുനിന്നുള്ള കുട്ടികളെത്തിയത്. ആറ് ബീഹാർ സ്വദേശികളായിരുന്നു പ്രവേശനം നേടിയിരുന്നത്. കൂടാതെ, ഒരു ആസാം സ്വദേശിയും പഠിക്കുന്നുണ്ട്. രണ്ട്, മൂന്ന്, നാല് ക്ലാസുകളിലായാണ് ഇവർ പഠിക്കുന്നത്. പ്രവേശനോത്സവത്തിൽ മുനിസിപ്പൽ ചെയർപേഴ്സൺ ബിൻസി സെബാസ്റ്റ്യൻ, കൗൺസിലർ സാബു മാത്യു, മുടിയൂർക്കര ഹോളി ഫാമിലി പള്ളി വികാരി ഫാ. ഫിലിപ്പ് നെൽപ്പുരപ്പറമ്പിൽ, ഗാന്ധിനഗർ പോലീസ് സ്റ്റേഷനിലെ എസ്എച്ച്ഒ ടി. ശ്രീജിത്ത് തുടങ്ങിയവർ പങ്കെടുത്തു.

അറിവിന്‍റെ ലോകത്തേക്ക് കുരുന്നുകള്‍; വര്‍ണാഭമായി വരവേറ്റ് സ്‌കൂളുകള്‍

കോട്ടയം: മഴമേഘങ്ങള്‍ മാറിനിന്ന അന്തരീക്ഷത്തില്‍ കുരുന്നുകള്‍ക്ക് അറിവന്‍റെ ലോകത്തേക്ക് പുതുപ്രവേശം. രണ്ടുമാസത്തെ വേനലവധിക്കുശേഷം തിരികെയെത്തിയ കുട്ടികള്‍ക്കും സൗഹൃദത്തിന്‍റെയും അറിവിന്‍റെയും ലോകത്തേക്ക് വീണ്ടുമെത്തിയതിന്‍റെ ആഹ്ലാദം. വര്‍ണാഭമായി അലങ്കരിച്ച ക്ലാസ് മുറികളിലേക്ക് ആദ്യമായെത്തിയ നവാഗതരെ മധുരം നല്‍കി സ്വീകരിച്ചാണ് ജില്ലയിലെ സ്‌കൂളുകളില്‍ പ്രവേശനോത്സവം ആഘോഷിച്ചത്. പുത്തനുടുപ്പും ബാഗും കുടയും പുസ്തകവും ചോറ്റുപാത്രവുമൊക്കെയായി മാതാപിതാക്കളുടെ കൈപിടിച്ചെത്തിയ നവാഗതര്‍ അക്ഷരമുറ്റം കണ്ടപ്പോള്‍ ആദ്യമൊന്ന് അമ്പരന്നു. പിന്നീട് മധുരം കഴിച്ച് കളിയും ചിരിയുമായി കൂട്ടുകാര്‍ക്കൊപ്പം കൂടി. ചിലരാകട്ടെ മാതാപിതാക്കളെ കാണാതെ കരഞ്ഞു. ഇവരെ ആശ്വസിപ്പിക്കാന്‍ മുതിര്‍ന്ന കുട്ടികളും അധ്യാപകരും കളിപ്പാട്ടങ്ങളും മധുരപലഹാരങ്ങളുമായി എത്തി. പാട്ടും ഡാന്‍സും പഠനവും കളിചിരികളുമായി പുതിയ കൂട്ടുകാര്‍ക്കൊപ്പം ആദ്യദിനം ആഘോഷമാക്കിയാണ് മടങ്ങിയത്. നീണ്ടൂര്‍ എസ്‌കെവി ഹയര്‍ സെക്കന്‍ഡറി സ്‌കൂളില്‍ നടന്ന ജില്ലാതല പ്രവേശനോത്സവം മന്ത്രി വി.എന്‍. വാസവന്‍ ഉദ്ഘാടനം ചെയ്തു. സ്‌കൂളിന് സര്‍വശിക്ഷാ കേരളം ഫണ്ടിലൂടെ അനുവദിച്ച ടിങ്കറിംഗ് ലാബിന്‍റെ ഉദ്ഘാടനവും മന്ത്രി നിര്‍വഹിച്ചു. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ് അധ്യക്ഷത വഹിച്ചു. ഫ്രാന്‍സിസ് ജോര്‍ജ് എംപി മുഖ്യപ്രഭാഷണം നടത്തി. ജില്ലാ കളക്ടര്‍ ജോണ്‍ വി. സാമുവല്‍ നവാഗതരെ സ്വാഗതം ചെയ്തു. സാഹിത്യകാരനും പൂര്‍വവിദ്യാര്‍ഥിയുമായ എസ്. ഹരീഷ് സ്‌കൂളിന്‍റെ കൈയെഴുത്തു മാഗസിന്‍ പ്രകാശനം ചെയ്തു. ജില്ലാ വിദ്യാഭ്യാസ ഉപഡയറക്ടര്‍ ഹണി ജി. അലക്‌സാണ്ടര്‍, ത്രിതല പഞ്ചായത്തംഗങ്ങള്‍, പൊതുവിദ്യാഭ്യാസ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. ഉദ്ഘാടനത്തിനു മുന്നോടിയായി നീണ്ടൂര്‍ പ്രാവട്ടത്തുനിന്ന് സ്‌കൂളിലേക്കു സാംസ്‌കാരിക ഘോഷയാത്ര നടന്നു. വാദ്യമേളങ്ങളും നാടന്‍ കലാരൂപങ്ങളും ഘോഷയാത്രയെ വര്‍ണാഭമാക്കി. എന്‍സിസി, സ്‌കൗട്ട് വിഭാഗങ്ങളടക്കം നൂറുകണക്കിനു കുട്ടികള്‍ അണിചേർന്നു. ആലപ്പുഴ കലവൂരില്‍ നടന്ന സംസ്ഥാനതല പ്രവേശനോത്സവം ഉദ്ഘാടനം തത്സമയം ഓണ്‍ലൈനായി പ്രദര്‍ശിപ്പിച്ചു. സ്‌കൂളുകളില്‍ ഉരഗ പരിശോധനയുമായി വനം വകുപ്പ് കോട്ടയം: പുതിയ അധ്യയനവര്‍ഷാരംഭത്തോടനുബന്ധിച്ച് സ്‌കൂളുകളില്‍ വനംവകുപ്പിന്‍റെ സര്‍പ്പ വോളന്‍റിയര്‍മാര്‍ പരിശോധന നടത്തുന്നു. സ്‌കൂള്‍ അധികൃതരോ പിടിഎ ഭാരവാഹികളോ അറിയിക്കുന്നതു പ്രകാരമാണ് പരിശോധന. സ്‌കൂളുകളിലും പരിസരങ്ങളിലും വിഷപാമ്പുകളുടെ സാന്നിധ്യം ഒഴിവാക്കി കുട്ടികളുടെ സുരക്ഷ ഉറപ്പാക്കുകയാണ് ലക്ഷ്യം. വിദ്യാര്‍ഥികളുടെയും അധ്യാപകരുടെയും സുരക്ഷയ്ക്കായി വനംവകുപ്പ് നല്‍കുന്ന സുപ്രധാനമായ സേവനമാണിത്. ജില്ലാ സാമൂഹിക വനവത്കരണ വിഭാഗം അസിസ്റ്റന്‍റ് ഫോറസ്റ്റ് കണ്‍സര്‍വേറ്റര്‍മാരുടെ നേതൃത്വത്തിലാണ് പരിശോധനാ പ്രവര്‍ത്തനങ്ങള്‍ ഏകോപിപ്പിക്കുന്നത്. സര്‍പ്പ വോളന്‍റിയര്‍മാരുടെ സഹായം ആവശ്യമുള്ള സ്‌കൂള്‍ അധികൃതര്‍ക്ക് അതാത് ജില്ലയിലെ സാമൂഹിക വനവത്കരണ വിഭാഗവുമായി ബന്ധപ്പെടാവുന്നതാണ്. സഹായങ്ങള്‍ക്കും അന്വേഷണങ്ങള്‍ക്കും വനംവകുപ്പിന്‍റെ ടോള്‍ ഫ്രീ നമ്പരിലും വിളിക്കാം. നമ്പര്‍: 1800 425 4733. സോഷ്യല്‍ ഫോറസ്ട്രി ഡിവിഷന്‍ കോട്ടയം: 9447979133.

റൈസിംഗ് പൂഞ്ഞാർ: മുന്നൊരുക്ക സെമിനാർ ഇന്ന് മുണ്ടക്കയത്ത്

മുണ്ടക്കയം: പൂഞ്ഞാർ നിയോജക മണ്ഡലത്തിൽ സംരംഭകത്വം പ്രോത്സാഹിപ്പിക്കുന്നത് ലക്ഷ്യം വച്ച് നടത്തുന്ന റൈസിംഗ് പൂഞ്ഞാർ 2കെ25 എന്ന നിക്ഷേപ സംഗമത്തിന് മുന്നോടിയായി കാഞ്ഞിരപ്പള്ളി ബ്ലോക്ക് തല മുന്നൊരുക്ക സെമിനാർ ഇന്ന് രാവിലെ 10.30ന് മുണ്ടക്കയം പഞ്ചായത്ത് കോൺഫറൻസ് ഹാളിൽ നടക്കും. സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് അധ്യക്ഷത വഹിക്കും. ത്രിതല പഞ്ചായത്ത് ജനപ്രതിനിധികൾ, വ്യവസായ വകുപ്പ് ഉദ്യോഗസ്ഥർ, സംരംഭകർ, കുടുംബശ്രീ ഭാരവാഹികൾ തുടങ്ങിയവർ പ്രസംഗിക്കും. വനിതാ സംരംഭകർക്കുള്ള മാർഗനിർദേശങ്ങളും പ്രത്യേക ആനുകൂല്യങ്ങളും സംബന്ധിച്ച് സെമിനാറിൽ വിശദമാക്കും. കൂടാതെ കാർഷികാധിഷ്ഠിത ഭക്ഷ്യോൽപ്പന്നങ്ങളുടെ മൂല്യ വർധിത ഉൽപ്പന്ന നിർമാണം സംബന്ധിച്ചും വിദഗ്ധർ ക്ലാസുകൾ നയിക്കും. കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെ നേതൃത്വത്തിൽ വിവിധ പഞ്ചായത്തുകളിലെ യുവതികൾക്കായി നടത്തിയ ദേ രുചി 3.0 പരിശീലന പരിപാടി വിജയകരമായി പൂർത്തീകരിച്ചവർക്കും കൂടാതെ 30 ദിവസത്തെ ബ്യൂട്ടീഷൻ കോഴ്സ് പരിശീലനം പൂർത്തീകരിച്ചവർക്കുമുള്ള സർട്ടിഫിക്കറ്റ് വിതരണവും നടത്തും. ഒന്പതിന് ഈരാറ്റുപേട്ട ബർക്കത്ത് സ്ക്വയറിൽ നടക്കുന്ന ഇൻവെസ്റ്റേഴ്സ് മീറ്റിൽ ടൂറിസം ഇൻഡസ്ട്രി, കാർഷികാധിഷ്ഠിത മൂല്യ വർധിത ഉൽപന്ന നിർമാണം, ഐടി സംരംഭങ്ങൾ, സുഗന്ധവ്യഞ്ജനാധിഷ്ഠിത ഉൽപ്പന്നങ്ങൾ, വുഡൻ ബേസ്ഡ് ഇൻഡസ്ട്രി മുതലായവ കേന്ദ്രീകരിച്ചുള്ള സംരംഭകത്വ വികസനമാണ് പ്രധാനമായും ലക്ഷ്യം വയ്ക്കുന്നത്.

പ്രാഥമികാരോഗ്യ കേന്ദ്രത്തിൽ വിവിധ തസ്തികകളിലേക്ക് നിയമനം

മുണ്ടക്കയം: കോരുത്തോട് പ്രാഥമികാരോഗ്യകേന്ദ്രത്തിൽ ഈവനിംഗ് ഒപി നടത്തുന്നതിനായി ഡോക്ടർ, സ്റ്റാഫ് നഴ്സ്, ഫാർമസിസ്റ്റ് തസ്തികകളിലേക്ക് നിയമനം നടത്തുന്നു. കോരുത്തോട് പഞ്ചായത്ത് വാർഷിക പദ്ധതി 2025-26 ഭാഗമായാണ് ദിവസവേതനാടിസ്ഥാനത്തിൽ നിയമനം നടത്തുന്നത്. ഗ്രാമപഞ്ചായത്തിൽ ഉള്ളവർക്ക് മുൻഗണന. ഡോക്ടർ ഒഴികെയുള്ള തസ്തികകളിലേക്ക് അപേക്ഷിക്കുന്നവരുടെ പരമാവധി പ്രായം 36 വയസ്. രണ്ടുവർഷം പ്രവൃത്തിപരിചയവും വേണം. ഉദ്യോഗാർഥികൾ യോഗ്യത, രജിസ്ട്രേഷൻ മുതലായവ തെളിയിക്കുന്ന രേഖകൾ, ബയോഡേറ്റ എന്നിവ 15ന് വൈകുന്നേരം നാലിനു മുൻപായി പിഎച്ച്സി ഓഫീസിൽ എത്തിക്കണം.

പ്രവേശനോത്സവം ഏറ്റെടുത്ത് പെരുവന്താനം പോലീസ്

മുണ്ടക്കയം ഈസ്റ്റ്‌: സ്കൂളുകളിൽ സർക്കാരിന്‍റെയും സ്കൂൾ മാനേജുമെന്‍റിന്‍റെയും സന്നദ്ധ സംഘടനകളുടെയുമൊക്കെ നേതൃത്വത്തിൽ പ്രവേശനോത്സവങ്ങൾ സംഘടിപ്പിക്കാറുണ്ട്. എന്നാൽ, ഒരു സ്കൂളിലെ പ്രവേശനോത്സവം പൂർണമായും ഏറ്റെടുത്തു നടത്തി വ്യത്യസ്തരായി മാറിയിരിക്കുകയാണ് പെരുവന്താനം പോലീസ് സ്റ്റേഷനിലെ ഉദ്യോഗസ്ഥർ. പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ മാട്ടുപ്പെട്ടി എൽപി സ്കൂളിലാണ് പോലീസിന്‍റെ പ്രവേശനോത്സവം നടന്നത്. സ്കൂളിലെ പ്രവേശനോത്സവത്തിന്‍റെ അലങ്കാരം മുതൽ നവാഗതരെ സ്വീകരിക്കൽ വരെയും പോലീസ് ഉദ്യോഗസ്ഥരുടെ നേതൃത്വത്തിലാണ് നടന്നത്. മധുര പലഹാരങ്ങൾ നൽകി കുഞ്ഞുകുട്ടികളെ കാക്കിപ്പട കയ്യിലെടുത്തതോടെ കുരുന്നുകളുടെ മനസിലെ പേടിയും മാഞ്ഞു. പ്രവേശനോത്സവത്തിൽ പങ്കെടുത്ത കുട്ടികൾക്ക് ബാഗും കുടയും പഠനോപകരണങ്ങളും കൂടാതെ ഉച്ചക്കഞ്ഞി കുടിക്കുന്നതിനാവശ്യമായ പാത്രങ്ങളും ഉൾപ്പെടെയാണ് പോലീസ് ഒരുക്കി നൽകിയത്. വാർഡ് മെംബർ എം.സി. സുരേഷ് അധ്യക്ഷത വഹിച്ചു. പീരുമേട് ഡിവൈഎസ്പി വിശാൽ ജോൺസൺ ഉദ്ഘാടനം ചെയ്തു. പിടിഎ പ്രസിഡന്‍റ് ജെ. രതീഷ്, ടി ആര്‍ ആൻഡ് ടി എസ്റ്റേറ്റ് മാനേജർ ജോർജ് ജേക്കബ്, പെരുവന്താനം എസ്എച്ച്ഒ ത്രിദീപ് ചന്ദ്രൻ, സുനിൽ സുരേന്ദ്രൻ, ജോസഫ് കാവ്യസാന്ദ്രം, ആശ മോൾ, സ്റ്റാഫ് സെക്രട്ടറി ധന്യ അരുൺ തുടങ്ങിയവർ പ്രസംഗിച്ചു. എസ്ഐമാരായ ബിജു ജോസഫ്, അജ്മൽ, സെയ്ദ്, ജനമൈത്രി പോലീസ് ഉദ്യോഗസ്ഥരായ പ്രവീൺ, അശോകൻ, ജോബിൻ, ജനിഷ് തുടങ്ങിയവർ നേതൃത്വം നൽകി. വിദ്യാർഥികളും അധ്യാപകരും രക്ഷാകർത്താക്കളും പോലീസ് ഉദ്യോഗസ്ഥരും ചേർന്ന് പ്രവേശനോത്സവത്തിന്‍റെ ഭാഗമായി അക്ഷരദീപവും തെളിയിച്ചു.

പ്രവേശനോത്സവം: അക്ഷരമുറ്റത്തേക്ക് കളിചിരികളുമായി കുട്ടികളെത്തി

കാഞ്ഞിരപ്പള്ളി: രണ്ടുമാസത്തെ വേനലവധിക്കുശേഷം കുട്ടികൾ അക്ഷരമുറ്റത്തേക്ക് കളിചിരികളുമായി എത്തി. ആദ്യമായി സ്കൂളിലെത്തുന്പോൾ കരയുന്ന കുട്ടികളുടെ പതിവ് കാഴ്ച ഇക്കുറി കാണാനില്ലായിരുന്നു. കൂട്ടുകാർക്കൊപ്പം കളിച്ചും പഠിച്ചും നടക്കാനാണ് അവർക്ക് ഇഷ്ടം. കാഞ്ഞിരപ്പള്ളിയിലെ വിവിധ സ്കൂളുകളിൽ പ്രവേശനോത്സവം നടത്തി. മധുരപലഹാരങ്ങളും പൂക്കളും നൽകിയാണ് കുട്ടികളെ അധ്യാപകർ സ്വീകരിച്ചത്. കാഞ്ഞിരപ്പള്ളി സെന്‍റ് ഡൊമിനിക്സ് ഹയർ സെക്കൻഡറി സ്കൂളിൽ നടന്ന പ്രവേശനോത്സവം സ്കൂൾ മാനേജരും ആർച്ച് പ്രീസ്റ്റുമായ റവ.ഡോ. കുര്യൻ താമരശേരി ഉദ്ഘാടനം ചെയ്തു. പിടിഎ പ്രസിഡന്‍റ് പി.ജെ. തോമസ് അധ്യക്ഷതവഹിച്ചു. ഹെഡ്മാസ്റ്റർ പി.ജെ. തോമസ്, വാർഡ് മെംബർ ബിജു പത്യാല, മേഴ്സി ജോൺ, അനീസിയ മാർഗരറ്റ് ജോസ് എന്നിവർ പ്രസംഗിച്ചു കാഞ്ഞിരപ്പള്ളി സെന്‍റ് മേരീസ് ഗേൾസ് ഹൈസ്കൂളിലെ പ്രവേശനോത്സവം ജില്ലാ പഞ്ചായത്തംഗം ജെസി ഷാജൻ മണ്ണംപ്ലാക്കൽ ഉദ്ഘാടനം ചെയ്തു. സ്കൂൾ മാനേജർ സിസ്റ്റർ സലോമി സിഎംസി അധ്യക്ഷത വഹിച്ചു. എക്സൈസ് ഡിപ്പാർട്ട്മെന്‍റ് പ്രിവന്‍റ് ഓഫീസർ സ്റ്റാൻലി ചാക്കോ ലഹരിവിരുദ്ധ ബോധവത്ക്കരണ ക്ലാസ് നയിച്ചു. ഹെഡ്മിസ്ട്രസ് നിസ മോൾ ജോൺ, വാർഡ് മെംബർ ബിജു പത്യാല, പിടിഎ പ്രസിഡന്‍റ് മാത്യു സെബാസ്റ്റ്യൻ, സീനിയർ അസിസ്റ്റന്‍റ് ജാക്വിലിൻ സെബാസ്റ്റ്യൻ എന്നിവർ പ്രസംഗിച്ചു. തുടർന്ന് കുട്ടികളുടെ വിവിധ കലാപരിപാടികൾ അവതരിപ്പിച്ചു. കുന്നുംഭാഗം സെന്‍റ് ജോസഫ്‌സ് പബ്ലിക് സ്‌കൂളിലെ പ്രവേശനോത്സവംസെന്‍റ് ജോസഫ്സ് ഇടവക വികാരി ഫാ. ആന്‍റണി ചെന്നക്കാട്ടുകുന്നേല്‍ ഉദ്ഘാടനം ചെയ്തു. ഡീക്കന്‍ ആല്‍ജില്‍ പള്ളിവാതുക്കല്‍, പിടിഎ പ്രസിഡന്‍റ് ആന്‍റണി മാര്‍ട്ടിന്‍, പ്രിന്‍സിപ്പല്‍ സിസ്റ്റർ ലിറ്റില്‍ റോസ് എസ്എബിഎസ്, വൈസ് പ്രിന്‍സിപ്പല്‍ സിസ്റ്റർ റോസ്‌ബെല്‍ എസ്എബിഎസ് എന്നിവര്‍ പ്രസംഗിച്ചു. കുന്നുംഭാഗം സെന്‍റ് ജോസഫ് കിന്‍റർ ഗാർഡൻ സ്കൂളിലെ പ്രവേശനോത്സവം എസ്എബിഎസ് പ്രൊവിൻഷ്യൽ കൗൺസിലർ സിസ്റ്റർ ജ്യോതി കുന്നപ്ലാത്ത് എസ്എബിഎസ് ഉദ്ഘാടനം ചെയ്തു. പ്രിൻസിപ്പൽ സിസ്റ്റർ ആൻ ജോസ് എസ്എബിഎസ് അധ്യക്ഷത വഹിച്ചു. അധ്യാപികമാരായ റാണി ഫിലിപ്പ്, ബിജി ജോസഫ് എന്നിവർ പ്രസംഗിച്ചു. തുടർന്ന് കുട്ടികളുടെ വിവിധ കലാപരിപാടികളും നടത്തി. കുന്നുംഭാഗം ഗവൺമെന്‍റ് ഹൈസ്കൂളിലെ പ്രവേശനോത്സവം വാർഡ് മെംബർ ആന്‍റണി മാർട്ടിൻ ഉദ്ഘാടനം ചെയ്തു. പിടിഎ പ്രസിഡന്‍റ് കെ.ആർ. രാജേഷ് അധ്യക്ഷത വഹിച്ചു. ഹെഡ്മിസ്ട്രസ് ആച്ചിയമ്മ ജോസഫ്, കെ.ടി. സുരേഷ്, പോൾ ജേക്കബ് എന്നിവർ പ്രസംഗിച്ചു. എസ്എസ്എൽസി പരീക്ഷയിൽ വിജയികളായവർക്കുള്ള മെമെന്‍റോ വിതരണം ചെയ്തു. കാഞ്ഞിരപ്പള്ളി എകെജെഎം സ്കൂളിലെ പ്രവേശനോത്സവം സ്കൂൾ മാനേജർ ഫാ. സ്റ്റീഫൻ സി. തടം എസ്ജെയുടെ അധ്യക്ഷതയിൽ നടത്തി. പ്രിൻസിപ്പൽ ഫാ. അഗസ്റ്റിൻ പീടികമല എസ്ജെ നവാഗതർക്ക് സന്ദേശം നൽകി. വൈസ് പ്രിൻസിപ്പൽ ഫാ. വിൽസൺ പുതുശേരി എസ്ജെ, വാർഡ് മെംബർ മഞ്ജു മാത്യു, എൽപി കോഓർഡിനേറ്റർ മായാ മാത്യു എന്നിവർ പ്രസംഗിച്ചു. ഒന്നാം ക്ലാസിലേക്ക് പ്രവേശനം ലഭിച്ച കുട്ടിൾക്ക് എൽപി ടീച്ചേഴ്സ് തയാറാക്കിയ ബട്ടർ ഫ്ലൈ നൽകിയാണ് സ്വീകരിച്ചത്. കാഞ്ഞിരപ്പള്ളി പേട്ട ഗവൺമെന്‍റ് ഹൈസ്കൂളിലെ പ്രവേശനോത്സവം പഞ്ചായത്തംഗം പി.എ. ഷെമീർ ഉദ്ഘാടനം ചെയ്തു. ഹെഡ്മിസ്ട്രസ് എസ്. ഷിജ, പിടിഎ പ്രസിഡന്‍റ് കെ. സജി, റംല ബീവി, പി.ആർ. സജി, അധ്യാപകരായ ജെയ്സൺ തോമസ്, ടി.ഡി. രമണി, സുനിജ പി. ജോസ് എന്നിവർ പ്രസംഗിച്ചു. ചെങ്കൽ: ബൗദ്ധിക വെല്ലുവിളി നേരിടുന്ന കുട്ടികൾക്ക് പഠന പരിശീലനം നൽകുന്നതിനായി ചെങ്കൽ 19ാം മൈലിൽ പ്രവർത്തിക്കുന്ന എയ്ഞ്ചൽസ് വില്ലേജിലുള്ള ആശാനിലയം സ്പെഷൽ സ്കൂളിലെ പ്രവേശനോത്സവം കാഞ്ഞിരപ്പള്ളി രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ഉദ്ഘാടനം ചെയ്തു. ഡയറക്ടർ ഫാ. റോയി മാത്യു വടക്കേൽ അധ്യക്ഷത വഹിച്ചു. എയ്ഞ്ചൽസ് വില്ലേജ് അസിസ്റ്റന്‍റ് ഡയറക്ടർ ഫാ. തോമസ് കണ്ടത്തിൽ, വാഴൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, പ്രിൻസിപ്പൽ സിസ്റ്റർ ലിറ്റി സേവ്യർ എസ്‌സിജിജെ, വാഴൂർ പഞ്ചായത്ത് പ്രസിഡന്‍റ് തോമസ് വെട്ടുവേലിൽ, സീനിയർ കൺസൾട്ടന്‍റ് സ്പെഷൽ എഡ്യൂക്കേഷൻ ഡോ. എ.ടി. ത്രേസ്യാകുട്ടി, സുശീല കുര്യാച്ചൻ, ഫാൻസി ടോമി എന്നിവർ പ്രസംഗിച്ചു. പ്ലസ് ടു പരീക്ഷയിൽ ഉന്നത വിജയവും കാഞ്ഞിരപ്പള്ളി രൂപത മതബോധന 12ാം ക്ലാസ് പരീക്ഷയിൽ ഒന്നാം റാങ്കും നേടിയ മരിയ മോനിക്ക ഫിലിപ്പിനെ യോഗത്തിൽ ആദരിച്ചു. ചെങ്ങളം: സെന്‍റ് ആന്‍റണീസ് എൽപി സ്കൂളിന്‍റെ പ്രവേശനോത്സവം വാർഡ് മെംബർ ടെസി രാജു ഉദ്ഘാടനം ചെയ്തു. സ്കൂൾ മാനേജർ ഫാ. വർഗീസ് പരിന്തിരിക്കൽ അധ്യക്ഷത വഹിച്ചു. ഹെഡ്മിസ്ട്രസ് സൗമ്യ പി. ജോസ്, പിടിഎ പ്രസിഡന്‍റ് എം.എം. ജീവൻ, ഉമ്മൻചാണ്ടി ഫൗണ്ടേഷൻ കോഓർഡിനേറ്റർ മധു മോഹനൻ എന്നിവർ പ്രസംഗിച്ചു. നവാഗതരായ കുട്ടികൾക്ക് സ്കൂൾ ബാഗും കുടയും വിതരണം ചെയ്തു. ചേനപ്പാടി: ആർവി ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിലെ പ്രവേശനോത്സവം ജില്ലാ പഞ്ചായത്തംഗം ജെസി ഷാജൻ ഉദ്ഘാടനം ചെയ്തു. ഹെഡ് മാസ്റ്റർ ഇൻ ചാർജ് മുഹമ്മദ്‌ റാഫി, പ്രിൻസിപ്പൽ വി. രശ്മി, സിന്ധു സോമൻ, ജോളി മടുക്കക്കുഴി, കെ.ബി. സാബു, സന്തോഷ്‌ മഞ്ഞാക്കൽ, കെ.കെ. പരമേശ്വരൻ, കെ.ആർ. പുഷ്പലാൽ, എ.കെ. അജിത എന്നിവർ പ്രസംഗിച്ചു. മുണ്ടക്കയം: സെന്‍റ് ആന്‍റണീസ് ഹൈസ്കൂളിൽ പ്രവേശനോത്സവവും മെറിറ്റ്ഡേയും സംഘടിപ്പിച്ചു. എറണാകുളം ക്രൈം ബ്രാഞ്ച് എസ്പി വി.യു. കുര്യാക്കോസ് ഉദ്ഘാടനം ചെയ്തു. മാനേജർ ഫാ. ജെയിംസ് മുത്തനാട്ട് അധ്യക്ഷത വഹിച്ചു. ഹെഡ്മാസ്റ്റർ സാജു കുര്യൻ, അഴുത ബ്ലോക്ക് പഞ്ചായത്തംഗം കെ.ആർ. വിജയൻ, പീരുമേട് ഡിവൈഎസ്പി വിശാൽ ജോൺസൺ, കൊക്കയാർ പഞ്ചായത്തംഗം സ്റ്റാൻലി സണ്ണി, പെരുവന്താനം എസ്എച്ച്ഒ ത്രിദീപ് ചന്ദ്രൻ, എസ്.ആർ. സുരേഷ് ബാബു, അധ്യാപകരായ ടി.വി. ജോയിസ്, ജിസ്ജോ എം. ജോസ്, സുനിൽ സെബാസ്റ്റ്യൻ തുടങ്ങിയവർ പ്രസംഗിച്ചു. സിവിൽ സർവീസ് റാങ്ക് ജേതാവും പൂർവ വിദ്യാർഥിനിയുമായ സോണറ്റ് ജോസിനെയും കായികാധ്യാപകൻ സന്തോഷ് ജോർജിനെയും എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയ കുട്ടികളെയും എൻഎംഎംഎസ് നേടിയ വിദ്യാർഥികളെയും ചടങ്ങിൽ അനുമോദിച്ചു. എരുമേലി: സെന്‍റ് തോമസ് എൽ പി സ്കൂളിലെ പ്രവേശനോത്സവത്തിൽ മധുരമേറെ. അധ്യാപകരും രക്ഷിതാക്കളും ചേർന്ന് കുട്ടികൾക്ക് പായസവും തുടർന്ന് ഉച്ചഭക്ഷണവും നൽകി. ഒപ്പം കുട്ടികളുടെ വിവിധ കലാപരിപാടികൾ നടന്നു. സ്കൂൾ അസിസ്റ്റന്‍റ് മാനേജർ സിസ്റ്റർ ലൂസിറ്റ എഫ്സിസി, ഹെഡ്മിസ്ട്രസ് സിസ്റ്റർ റെജി സെബാസ്റ്റ്യൻ, വാർഡ് മെംബർ ഷാനവാസ്‌, പിടിഎ പ്രസിഡന്‍റ് പ്രശാന്ത് തോമസ്, സീനിയർ അധ്യാപിക ലൗലി പി. ജേക്കബ് എന്നിവർ നേതൃത്വം നൽകി. എരുമേലി: സ്കൂൾ പ്രവേശനത്തിൽ നേരിയ ചാറ്റൽ പോലുമില്ലാതെ മഴ മാറി നിന്ന അനുഭവം വർഷങ്ങൾക്ക് ശേഷം ഇതാദ്യം. പൂർണമായും വെയിൽ നിറഞ്ഞ തെളിഞ്ഞ കാലാവസ്ഥ അധ്യാപകരെയും കുട്ടികളെയും രക്ഷിതാക്കളെയും ഒരേപോലെ സന്തോഷമാക്കി. എരുമേലിയിൽ സ്കൂൾ ജംഗ്ഷനുകളിൽ കുട്ടികളെ കാത്ത് പോലീസ് ഉണ്ടായിരുന്നു. റോഡിലെ തിരക്ക് പരിഹരിച്ച് കുട്ടികളെ പോലിസ് കടത്തിവിട്ടു. ഇടകടത്തി പനയ്ക്കവയൽ ഗവ എൽ പി സ്കൂളിലായിരുന്നു പഞ്ചായത്ത്‌ തല പ്രവേശനോത്സവം. പഞ്ചായത്ത്‌ പ്രസിഡന്‍റ് സുബി സണ്ണി ഉദ്ഘാടനം നിർവഹിച്ചു. തുമരംപാറ, മുട്ടപ്പള്ളി, മൂക്കൻപെട്ടി, പാണപിലാവ്, നെടുങ്കാവുവയൽ, തുമരംപാറ, ചേനപ്പാടി എന്നിവിടങ്ങളിലെ സർക്കാർ സ്‌കൂളുകളിൽ പ്രവേശനോത്സവങ്ങൾ വിപുലമായ നിലയിലാണ് നടന്നത്. എയ്ഡഡ് മേഖലയിൽ ഏറ്റവും കൂടുതൽ വിദ്യാർഥികൾ ചേർന്ന എരുമേലി സെന്‍റ് തോമസ്, കണമല സാൻതോം, ചേനപ്പാടി തരകനാട്ടുകുന്ന് സെന്‍റ് ആന്‍റണീസ്, എരുമേലിയിലെ ദേവസ്വം ബോർഡ് സ്കൂൾ, വാവർ സ്മാരക സ്കൂൾ, കനകപ്പലം എൻഎംഎൽപിഎസ്, എംടിഎൽപി സ്കൂളുകളിലും സ്വകാര്യ മേഖലയിലെ എയ്ഞ്ചൽവാലി സെന്‍റ് മേരീസ്, എരുമേലി നിർമല പബ്ലിക് സ്കൂൾ, എലിവാലിക്കര കോൺവെന്‍റ സ്കൂൾ എന്നിവിടങ്ങളിലും നിരവധി കുട്ടികൾ ഒന്നാം ക്ലാസിൽ ചേർന്നു.

ഇരട്ടകളുടെ നിറ സാന്നിധ്യവുമായി ചെമ്മലമറ്റം ലിറ്റിൽ ഫ്ലവർ ഹൈസ്കൂൾ

ചെമ്മലമറ്റം: ഇരട്ടകളുടെ നിറ സാന്നിധ്യവുമായി ചെമ്മലമറ്റം ലിറ്റിൽ ഫ്ലവർ ഹൈസ്കൂൾ പുതിയ അധ്യയന വർഷത്തിൽ ഒന്നാം ക്ലാസിലാണ് മൂന്ന് ജോഡി ഇരട്ടകൾ എത്തിയത്. പിണ്ണാക്കനാട് കുരുവിൻപ്ലാക്കൽ നിതിൻ - മിന്‍റു ദമ്പതികളുടെ മക്കളാണ് സാറാ ആർ. നിതിൻ, റബേക്കാ ആർ. നിതിൻ എന്നിവർ. കാളകെട്ടി മുണ്ടയ്ക്കൽ രാജേഷ് - ആതിര ദമ്പതികളുടെ മക്കളാണ് മീനാക്ഷി അജേഷും പാർവതി അജേഷും. പിണ്ണാക്കനാട് ചേരാനി പൊങ്ങൻപാറയിൽ നിശാന്ത് - ഹണി മോൾ ദമ്പതികളുടെ മക്കളാണ് പി.ബി. ആദിദേവ്, പി.ബി ആദികേശ് എന്നിവർ.

തിടനാട്ടിൽ സ്കിൽ ഡവലപ്മെന്‍റ് സെന്‍റർ ഉദ്ഘാടനം ചെയ്തു

തിടനാട്: വിദ്യാഭ്യാസ വകുപ്പിനു കീഴില്‍ തിടനാട് വൊക്കേഷണല്‍ ഹയര്‍സെക്കന്‍ഡറി സ്‌കൂളിനോട് അനുബന്ധിച്ചു പുതുതായി രണ്ട് സ്‌കില്‍ ഡവലപ്‌മെന്‍റ് കോഴ്‌സുകള്‍ ആരംഭിച്ചു. ഫിറ്റ്‌നസ് ട്രെയിനര്‍, കോസ്‌മെറ്റോളജിസ്റ്റ് എന്നീ രണ്ടു കോഴ്‌സുകളാണ് ആരംഭിച്ചത്. അടിസ്ഥാന സൗകര്യങ്ങള്‍ ഒരുക്കുന്നതിന് 21.50 ലക്ഷം രൂപയും അനുവദിച്ചു. കോഴ്‌സുകളുടെ ഉദ്ഘാടനം സെബാസ്റ്റ്യന്‍ കുളത്തുങ്കല്‍ എംഎല്‍എ നിര്‍വഹിച്ചു. തിടനാട് പഞ്ചായത്ത് പ്രസിഡന്‍റ് സ്‌കറിയ ജോസഫ് പൊട്ടനാനി അധ്യക്ഷതവഹിച്ചു. ജില്ലാ പഞ്ചായത്ത് അംഗം ഷോണ്‍ ജോര്‍ജ്, ബ്ലോക്ക് പഞ്ചായത്ത് അംഗം ജോര്‍ജ് ജോസഫ് കല്ലങ്ങാട്ട്, പഞ്ചായത്ത് അംഗം ജോയിച്ചന്‍ കാവുങ്കല്‍, സന്ധ്യ ശിവകുമാര്‍, വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ വി.ജി. ശാലിനി റാണി, ഹെഡ്മിസ്ട്രസ് പ്രതിഭ പടനിലം, ബിആര്‍സി കോഓഡിനേറ്റര്‍ ബിന്‍സ് ജോസഫ്, പിടിഎ പ്രസിഡന്‍റ് സജിനി സതീഷ് തുടങ്ങിയവര്‍ പ്രസംഗിച്ചു. രണ്ട് കോഴ്‌സുകളിലും 25 വിദ്യാര്‍ഥികള്‍ക്കു വീതമാണ് പ്രവേശനം. കോഴ്‌സുകളുടെ പ്രവേശനവും പഠനവും സൗജന്യമാണ്.

പ്രവേശനോത്സവം വര്‍ണാഭമായി

പാലാ: അക്ഷരമുറ്റത്തിന്‍റെ പടിവാതിലിലെത്തിയ കുരുന്നുകള്‍ക്ക് വര്‍ണാഭമായ സ്വീകരണം. വിവിധ നിറങ്ങളിലുള്ള ബലൂണുകളും തൊപ്പികളും മധുരപലഹാരങ്ങളുമായാണ് അധ്യാപകര്‍ കുരുന്നുകളെ വരവേറ്റത്. നവാഗതര്‍ക്ക് ഹൃദ്യമായ സ്വീകരണമാണ് സ്‌കൂളുകള്‍ ഒരുക്കിയത്. പാട്ടും നൃത്തവും കളിചിരികളുമായി സ്‌കൂള്‍ അന്തരീക്ഷം ഹൃദ്യമാക്കി. പ്രവിത്താനം : സെന്‍റ് മൈക്കിള്‍സ് ഹയര്‍ സെക്കൻഡറി സ്‌കൂളിലെ പ്രവേശനോത്സവം പാലാ ഡിവൈഎസ്പി കെ. സദന്‍ ഉദ്ഘാടനം ചെയ്തു. നവാഗതരായ വിദ്യാര്‍ഥികളെയും അവധിക്കാലത്ത് സ്‌കൂള്‍ നടത്തിയ വിവിധ മത്സരങ്ങളില്‍ പങ്കെടുത്ത് വിജയം നേടിയ കുട്ടികളെയും സമ്മാനങ്ങള്‍ നല്‍കി ആദരിച്ചു.സ്‌കൂള്‍ മാനേജര്‍ ഫാ. ജോര്‍ജ് വേളൂപ്പറമ്പില്‍ അധ്യക്ഷത വഹിച്ച യോഗത്തില്‍ അസിസ്റ്റന്‍റ് മാനേജര്‍ ഫാ. ആന്‍റ്ണി കൊല്ലിയില്‍, പ്രിന്‍സിപ്പല്‍ ജിജി ജേക്കബ്, ഹെഡ്മാസ്റ്റര്‍ ജിനു ജെ. വല്ലനാട്ട്, ജിസ്‌മോന്‍ തുടിയന്‍പ്ലാക്കല്‍, ജാന്‍സി ജോസഫ്, സിസ്റ്റര്‍ ആന്‍സി ടോം എന്നിവര്‍ പ്രസംഗിച്ചു. അളനാട്: ഗവണ്‍മെന്‍റ് യുപി സ്‌കൂള്‍ പ്രവേശനോത്സവം വിപുലമായി ആചരിച്ചു. പുതിയതായി പ്രവേശനം ലഭിച്ച കുട്ടികള്‍ക്ക് മധുരം നല്‍കി പഞ്ചായത്ത് മെംബര്‍ വിനോദ് ചെറിയാന്‍ സ്വീകരിച്ചു. സ്‌കൂള്‍ ഓഡിറ്റോറിയത്തില്‍ നടന്ന സമ്മേളനത്തില്‍ വാര്‍ഡ് മെംബര്‍ അധ്യക്ഷത വഹിച്ചു. ളാലം ബ്ലോക്ക് വൈസ് പ്രസിഡന്‍റ് ആനന്ദ് മാത്യു ചെറുവള്ളി സമ്മേളനം ഉദ്ഘാടനം ചെയ്തു. ക്ഷേമ കാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ പഠനോപകരണങ്ങള്‍ വിവരണം ചെയ്തു. യോഗത്തില്‍ വ്യാപാരി വ്യവസായി ഏകോപന സമിതി പ്രവിത്താനം യൂണിറ്റ് പ്രസിഡന്‍റ് സജി എസ്. തെക്കേല്‍, ഹെഡ് മാസ്റ്റര്‍ എം.എന്‍. ബിന്ദു ,അശ്വന്ത് മഹേഷ് തുടങ്ങിയവര്‍ പ്രസംഗിച്ചു. മുത്തോലി: സെന്‍റ് ആന്‍റണീസ് ഹയര്‍ സെക്കൻഡറി സ്‌കൂളിലെ പ്രവേശനോത്സവം പഞ്ചായത്തംഗം രാജന്‍ മുണ്ടമറ്റം ഉദ്ഘാടനം ചെയ്തു. സ്‌കൂള്‍ മാനേജര്‍ റവ. ഡോ. മാത്യു ആനത്താരക്കല്‍ സിഎംഐ, പ്രിന്‍സിപ്പല്‍ മിനി മാത്യു, അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ കെ.വി. അനീഷ്‌കുമാര്‍, സ്റ്റാഫ് സെക്രട്ടറി ബിന്‍സി സെബാസ്റ്റ്യന്‍ എന്നിവര്‍ പ്രസംഗിച്ചു. കടനാട്: കുറുമണ്ണ് സെന്‍റ് ജോണ്‍സ് ഹൈസ്‌കൂളിലെ പ്രവേശനോത്സവം കടനാട് പഞ്ചായത്ത് പ്രസിഡന്‍റ് ജിജി തമ്പി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. തോമസ് മണിയഞ്ചിറ അധ്യക്ഷത വഹിച്ച ചടങ്ങില്‍ രാമപുരം ബിആര്‍സി ക്ലസ്റ്റര്‍ കോഓര്‍ഡിനേറ്റര്‍ പി.കെ.ശ്രീരേഖ മുഖ്യപ്രഭാഷണം നടത്തി. വാര്‍ഡ് മെംബര്‍ ബിന്ദു ജേക്കബ് കൈയെഴുത്തുമാസികയുടെ പ്രകാശനം നടത്തി. ഹെഡ്മാസ്റ്റര്‍ ബിജോയി ജോസഫ്, കടനാട് പഞ്ചായത്ത് വൈസ് പ്രസിഡന്‍റ് വി.ജി. സോമന്‍, പിടിഎ പ്രസിഡന്‍റ് സുബി തോമസ്, സ്റ്റാഫ് പ്രതിനിധി കെ.എം. ജോസഫ് എന്നിവര്‍ പ്രസംഗിച്ചു അകലക്കുന്നം: അകലക്കുന്നം പഞ്ചായത്തിലെ 16 സ്‌കൂളുകളിലെ പ്രവേശനോത്സവം കാഞ്ഞിരമറ്റം ലിറ്റില്‍ ഫ്‌ളവര്‍ എല്‍പി സ്‌കൂളില്‍ നടത്തി. പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ജോസഫ് മണ്ണനാല്‍ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് മാത്തുക്കുട്ടി ഞായര്‍കുളം മുഖ്യപ്രഭാഷണം നടത്തി. സ്‌കൂള്‍ അസിസ്റ്റന്‍റ് മാനേജര്‍ ഫാ. ജോസഫ് മഠത്തിപറമ്പില്‍, സ്‌കൂള്‍ പ്രഥമ അധ്യാപിക സിസ്റ്റര്‍ ജയ്‌മോള്‍ പുത്തന്‍പുരയ്ക്കല്‍, ബിആര്‍സി പ്രതിനിധി ഷൈനി കുര്യന്‍, പിടിഎ പ്രസിഡന്‍റ് ജിസ്‌മോന്‍ മുങ്ങാമാക്കല്‍ എന്നിവര്‍ പ്രസംഗിച്ചു. ചെമ്മലമറ്റം: ലിറ്റിൽ ഫ്ളവർ ഹൈസ്കൂളിലെ പ്രവേശനോത്സവം ശ്രദ്ധയമായി. അക്ഷര വൃഷം ഒരുക്കിയാണ് ഒന്നാം ക്ലാസിൽ പ്രവേശനം ലഭിച്ച 63 വിദ്യാർഥികൾ പ്രവേശനോത്സവം ആഘോഷമാക്കിയത്. വർണ തൊപ്പികൾ അണിഞ്ഞ് കത്തിച്ച മെഴുകുതിരികൾ പിടിച്ച് വിശിഷ്ടാതിഥികളോടൊപ്പമാണ് കുരുന്നുകൾ ദീപം തെളിച്ചത്. ബ്ലോക്ക് മെംബർ മിനി സാവിയോ പഞ്ചായത്ത് മെംബർ രമേശ് ഇലവുങ്കൽ, ഹെഡ് മാസ്റ്റർ ജോബൈറ്റ് തോമസ്, അസിസ്റ്റന്‍റ് മാനേജർ ഫാ. ജേക്കബ് കട്ടുതോടിൽ, പിടിഎ പ്രതിനിധി സെബാസ്റ്റ്യൻ ഈറ്റത്തോട്ട്, അധ്യാപക പ്രതിനിധി ജിജി ജോസഫ് തുടങ്ങിയവർ പ്രസംഗിച്ചു. വാകക്കാട് : പുതുതായി വിദ്യാലയത്തിലേത്തിയ കുഞ്ഞുങ്ങൾക്കെല്ലാം കൈ നിറയെ പാവകൾ നിർമിച്ചു നൽകിയാണ് വാകക്കാട് എൽപി സ്കൂളിൽ കുട്ടികളെ സ്വാഗതം ചെയ്തത്. പ്രവേശനോത്സവം മേലുകാവ് പഞ്ചായത്ത് മെംബർ അലക്സ് ടി. ജോസഫ് ഉദ്ഘാടനം ചെയ്തു. സ്കൂൾ മാനേജർ ഫാ. മൈക്കിൾ ചീരാംകുഴി അധ്യക്ഷത വഹിച്ചു. അസിസ്റ്റന്‍റ് വികാരി ഫാ. എബിൻ കാക്കാനിയിൽ, പിടിഎ പ്രസിഡന്‍റ് ജോർജ്കുട്ടി അലക്സ്, ഹെഡ്മിസ്ട്രസ് സിസ്റ്റർ ടെസിൻ ജോർജ് എന്നിവർ പ്രസംഗിച്ചു. വെള്ളികുളം: പുതിയ അധ്യയന വർഷത്തിൽ വെള്ളികുളം സെന്‍റ് ആന്‍റണീസ് സ്കൂളിലേക്ക് കടന്നുവന്ന നവാഗതരായ വിദ്യാർഥികൾക്ക് വർണാഭമായ സ്വീകരണമാണ് നൽകിയത്.സ്കൂൾ ഓഡിറ്റോറിയത്തിൽ നടന്ന ചടങ്ങിൽ സ്കൂൾ മാനേജർ ഫാ. സ്കറിയ വേകത്താനം അധ്യക്ഷത വഹിച്ചു. ഹെഡ്മാസ്റ്റർ സോജൻ ജോർജ് ഇളംതുരുത്തിയിൽ വിദ്യാർഥികൾക്ക് സ്വാഗതമേകി. പഞ്ചായത്ത് മെംബർ ബിനോയി ജോസഫ് പാലക്കൽ പ്രവേശനോത്സവം ഉദ്ഘാടനം ചെയ്തു.

പാലാ രൂപതയ്ക്ക് മൂന്ന് ഫൊറോനകള്‍ കൂടി

പാലാ: പാലാ രൂപതയുടെ പ്ലാറ്റിനം ജൂബിലി വര്‍ഷത്തില്‍ മൂന്ന് പുതിയ ഫൊറോനകള്‍ കൂടി രൂപീകരിച്ചു. ബിഷപ് മാര്‍ ജോസഫ് കല്ലറങ്ങാട്ടിന്‍റെ അധ്യക്ഷതയില്‍ കൂടിയ പ്രസ്ബിറ്ററല്‍ കൗണ്‍സിലിലാണ് രൂപീകരണം പ്രഖ്യാപിച്ചത്. കടപ്ലാമാറ്റം, കൊഴുവനാല്‍, കൂത്താട്ടുകുളം എന്നീ ഇടവകകളെയാണ് ഫൊറോനകളായി ഉയര്‍ത്തുന്നത്. ഇതുവരെ 17 ഫൊറോനകളാണ് രൂപതയില്‍ ഉണ്ടായിരുന്നത്. പുതിയതായി രൂപം കൊള്ളുന്ന ഫൊറോനകള്‍ നിലവില്‍ വരുന്നത് എട്ടിന് പന്തക്കുസ്ത തിരുനാളോടു കൂടിയാണ്. അന്നേ ദിവസം നിയുക്ത ഫൊറോനകളില്‍ നടത്തപ്പെടുന്ന സ്ഥാനാരോഹണശുശ്രൂഷയില്‍ ബിഷപ് മാര്‍ ജോസഫ് കല്ലറങ്ങാട്ട് പ്രധാന കാര്‍മികത്വം വഹിക്കും. സ്ഥാനാരോഹണശുശ്രൂഷകള്‍ രാവിലെ എട്ടിന് കൊഴുവനാല്‍ പള്ളിയിലും 9.15 ന് കടപ്ലാമറ്റം പള്ളിയിലും വൈകുന്നേരം നാലിന് കൂത്താട്ടുകുളം പള്ളിയിലും ബിഷപ് നിര്‍വഹിക്കും. കടപ്ലാമറ്റം സെന്‍റ് മേരീസ് പള്ളി സുറിയാനി കത്തോലിക്കാസഭയിലെ അതിപുരാതനമായ പള്ളികളില്‍ ശ്രദ്ധേയമായ പള്ളിയാണ് കടപ്ലാമറ്റം. എഡി 1009 ല്‍ പണികഴിക്കപ്പെട്ട ഈ പുരാതന പള്ളി പരിശുദ്ധ കന്യകാമറിയത്തിന്‍റെ നാമത്തിലുള്ളതാണ്. 660 കുടുംബങ്ങളുള്ള ഈ പള്ളിയുടെ നിര്‍മാണരീതിയും അതിന്‍റെ കൊത്തുപണികളും പഴമയുടെ സൗകുമാര്യം വിളിച്ചറിയിക്കുന്നതാണ്. ഈ പള്ളിയുടെ പഴക്കംതന്നെ ദേശവാസികള്‍ക്ക് പരിശുദ്ധ അമ്മയോടുള്ള ഭക്തിയും വണക്കവും അതിരറ്റതാണ് എന്നതിന്‍റെ തെളിവ് കൂടിയാണ്. കൊഴുവനാല്‍ സെന്‍റ് ജോണ്‍ നെപുംസ്യാനോസ് പള്ളി 1858 ല്‍ സ്ഥാപിതമായ കൊഴുവനാല്‍ സെന്‍റ് ജോണ്‍ നെപുംസ്യാനോസ് പള്ളി പാലാ രൂപതയിലെ പുരാതനമായ പള്ളികളില്‍ ഒന്നാണ്. ഏറ്റവും കൂടുതല്‍ രൂപതാ വൈദികര്‍ക്ക് ജന്മം നല്‍കിയ ഇടവകയാണ് കൊഴുവനാല്‍. പാലാ രൂപതയ്ക്ക് മാത്രമല്ല, തിരുസഭയ്ക്ക് ഏറ്റവും കൂടുതല്‍ വൈദികരെ പ്രദാനം ചെയ്തിട്ടുള്ള പള്ളിയാണ് ഇത്. 730 കുടുംബങ്ങള്‍ ഉള്ള കൊഴുവനാല്‍ പള്ളി ജോണ്‍ നെപുംസ്യാനോസ് സഹദായുടെ നാമത്തിലുള്ളതാണ്. കൂത്താട്ടുകുളം ഹോളി ഫാമിലി പള്ളി 1995ല്‍ സ്ഥാപിതമായ കൂത്താട്ടുകുളം ഹോളി ഫാമിലി പള്ളി ഒരു ദേശത്തിന്‍റെ സംസ്‌കാരത്തെ പേറുന്നതാണ്. വിവിധ ക്രൈസ്തവസഭകളായ യാക്കോബായ ഓര്‍ത്തഡോക്‌സ് വിഭാഗങ്ങളും സീറോ മലബാർ സമൂഹവും ഏക മനസോടെ തിങ്ങിപ്പാര്‍ക്കുന്ന സ്ഥലമാണ് ഇത്. സഭയുടെ എക്യുമെനിസത്തിന്‍റെ വാതില്‍ തുറന്നിട്ടിരിക്കുന്ന പ്രദേശമാണ് കൂത്താട്ടുകുളം. മാര്‍ യൂദാ തദേവൂസിനോടുള്ള ഭക്തിയും വണക്കവും ആയിരം തിരികളുള്ള നിലവിളക്കും ഹോളി ഫാമിലി പള്ളിയുടെ പ്രത്യേകതകളാണ്. 500 കുടുംബങ്ങളുള്ള ഈ പള്ളി എറണാകുളം ജില്ലയിലാണ് സ്ഥിതി ചെയ്യുന്നത്. പുതുതായി രൂപംകൊണ്ട ഫൊറോനകളിലേക്ക് ചേര്‍ക്കപ്പെടുന്ന ഇടവകകള്‍ കടപ്ലാമറ്റം: കടപ്ലാമറ്റം, മംഗളാരം, കൂടല്ലൂര്‍, മരങ്ങാട്ടുപള്ളി, വയല, പാലയ്ക്കാട്ടുമല, പാളയം. കൊഴുവനാല്‍: അല്‍ഫോന്‍സാഗിരി, കാഞ്ഞിരമറ്റം, കരിമ്പാനി, കൊഴുവനാല്‍, മണലുങ്കല്‍, മഞ്ഞാമറ്റം, മറ്റക്കര, മൂഴൂര്‍, പൈക, ഉരുളികുന്നം. കൂത്താട്ടുകുളം: കാക്കൂര്‍, കൂത്താട്ടുകുളം, പെരിയപ്പുറം, പൂവക്കുളം, തിരുമാറാടി, ഉദയഗിരി വടകര. ഇടവകകളില്‍ മാറ്റം വരുന്ന ഫൊറോനകള്‍ (1) പാലാ കത്തീഡ്രല്‍: അരുണാപുരം, കിഴതടിയൂര്‍, കുടക്കച്ചിറ, ളാലം പുത്തന്‍പള്ളി, ളാലം പഴയപള്ളി, മീനച്ചില്‍, മൂന്നാനി, നെല്ലിയാനി, പൈങ്ങുളം, പാലാ കത്തീഡ്രല്‍, പാലാക്കാട്, പൂവരണി, വലവൂര്‍. (2) ചേര്‍പ്പുങ്കല്‍: ചെമ്പിളാവ്, ചേര്‍പ്പുങ്കല്‍, കുരുവിനാല്‍, പാദുവ, മുത്തോലി, മേവട, തോടനാല്‍. (3) രാമപുരം: അന്ത്യാളം, ചക്കാമ്പുഴ, ചിറ്റാര‍, ഏഴാച്ചേരി, കരൂര്‍, കൊണ്ടാട്, കുറിഞ്ഞി, നീറന്താനം, രാമപുരം. (4) ഭരണങ്ങാനം: അമ്പാറനിരപ്പേല്‍, ഭരണങ്ങാനം, ചൂണ്ടച്ചേരി, ഇടപ്പാടി, ഇടമറ്റം, കിഴപറയാര്‍, മല്ലികശേരി, പ്ലാശനാല്‍, പൂവത്തോട്, വിളക്കുമാടം. (5) കുറവിലങ്ങാട്: കുറവിലങ്ങാട്, കാളികാവ്, കാട്ടാമ്പാക്ക്, കുറിച്ചിത്താനം, മണ്ണയ്ക്കനാട്, മോനിപ്പള്ളി, രത്‌നഗിരി, വാക്കാട്. (6) ഇലഞ്ഞി: ഇലഞ്ഞി, ജോസ്ഗിരി, മരങ്ങോലി, മുളക്കുളം, മുത്തോലപുരം, പിറവം, ശാന്തിപുരം, സേവ്യര്‍പുരം.

വെളിയന്നൂര്‍ ആയുര്‍വേദ ആശുപത്രി ഒപി ബ്ലോക്ക് നിര്‍മാണം പുരോഗമിക്കുന്നു

വെളിയന്നൂര്‍: സര്‍ക്കാര്‍ ആയുര്‍വേദ ആശുപത്രിയിലെ പുതിയ ഒപി ബ്ലോക്കിന്‍റെ നിര്‍മാണ പ്രര്‍ത്തനങ്ങള്‍ പുരോഗമിക്കുന്നു. മുപ്പതു കിടക്കകള്‍ ഉള്‍പ്പെടെ മെച്ചപ്പെട്ട സൗകര്യങ്ങള്‍ നിലവിലുള്ള ആശുപത്രിയില്‍ പുതിയ ഒപി ബ്ലോക്കിന്‍റെ നിര്‍മാണം പൂര്‍ത്തിയാക്കി ഓഗസ്റ്റില്‍ ഉദ്ഘാടനം ചെയ്യാനാണ് ലക്ഷ്യമിടുന്നത്. വെളിയന്നൂര്‍ ജംഗ്ഷനില്‍ സര്‍ക്കാര്‍ ഉടമസ്ഥതയിലുള്ള 50 സെന്‍റ് സ്ഥലത്താണ് നിര്‍മാണം. 1200 ചതുരശ്ര അടിയില്‍ നിര്‍മിക്കുന്ന കെട്ടിടത്തില്‍ താഴത്തെ നിലയില്‍ ഒപി ബ്ലോക്കും ലാബും രോഗികള്‍ക്കു ഭക്ഷണം പാകം ചെയ്യുന്നതിനായി അടുക്കളയും സജ്ജമാക്കും. മുകള്‍നിലയില്‍ ഓഫീസും നഴ്‌സുമാര്‍ക്കുള്ള വിശ്രമമുറിയുമാണ് നിര്‍മിക്കുന്നത്. ആയുഷ് മിഷന്‍ അനുവദിച്ച 1.10 കോടി രൂപ ഉപയോഗിച്ചാണ് നിര്‍മാണം. നിര്‍മാണം പൂര്‍ത്തിയാകുന്ന മുറയ്ക്ക് അടിസ്ഥാന സൗകര്യങ്ങള്‍ ഒരുക്കുന്നതിന് 15 ലക്ഷം രൂപ പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തിയിട്ടുണ്ട്. ബിനോയ് വിശ്വം എംപി അനുവദിച്ച ഫണ്ട് വിനിയോഗിച്ച് കഴിഞ്ഞ വര്‍ഷം ഓഗസ്റ്റിലാണ് കിടത്തി ചികിത്സയ്ക്കുള്ള പുതിയ മന്ദിരം നിര്‍മാണം പൂര്‍ത്തിയാക്കിയത്.

കെഎസ്ആര്‍ടിസി ഡിപ്പോയില്‍ ക്ലറിക്കല്‍ ജീവനക്കാരുടെ കുറവ്, പ്രവര്‍ത്തനം താളം തെറ്റുന്നു

ചങ്ങനാശേരി: കെഎസ്ആര്‍ടിസി ഡിപ്പോയില്‍ ക്ലറിക്കല്‍ ജീവനക്കാരുടെ കുറവു മൂലം പ്രവര്‍ത്തനം താളം തെറ്റുന്നു. ക്ലറിക്കല്‍ വിഭാഗത്തില്‍ ജോലി ചെയ്തിരുന്ന മൂന്ന് ബദലി ജീവനക്കാരെ പിരിച്ചുവിട്ടിരുന്നു. ഒരു വനിതാ ക്ലര്‍ക്ക് പിറവത്തിനു സ്ഥലംമാറി പ്പോയി. പൊന്‍കുന്നം ഡിപ്പോയില്‍നിന്നു വനിതാ ക്ലര്‍ക്ക് ചങ്ങനാശേരിയിലേക്കു സ്ഥലംമാറ്റമാവശ്യപ്പെട്ട് ഉത്തരവ് വാങ്ങിയെങ്കിലും 18 ദിവസമായിട്ടും ഇവര്‍ ഈ ഡിപ്പോയില്‍ എത്തിയിട്ടില്ല. ക്ലാര്‍ക്കുമാരുടെ കുറവുമൂലം ഈ വിഭാഗത്തിലുള്ളവര്‍ക്ക് ജോലിഭാരം കൂടുകയാണ്. ഇന്നുമുതല്‍ വിദ്യാര്‍ഥികളുടെ കണ്‍സഷന്‍ കാര്യങ്ങള്‍കൂടി നോക്കേണ്ടിവരുന്നതോടെ ഏറെ പ്രതിസന്ധിയുണ്ടാകുമെന്നാണ് ജീവനക്കാര്‍ ചൂണ്ടിക്കാട്ടുന്നത്.

ചങ്ങനാശേരിയില്‍ എട്ട് ദുരിതാശ്വാസ ക്യാമ്പുകള്‍

ചങ്ങനാശേരി: മഴ മാറി, മാനം തെളിഞ്ഞത് ആളുകള്‍ക്ക് ആശ്വാസമായി. കിഴക്കന്‍ വെള്ളത്തിന്‍റെ കുത്തൊഴുക്കില്‍ തോടുകളിലും ആറുകളിലും ജലനിരപ്പുയരുന്നു. താഴ്ന്ന പ്രദേശങ്ങളിലെ നൂറുകണക്കിനു വീടുകള്‍ വെള്ളത്തിലായി. താലൂക്കില്‍ ആകെ എട്ടു ദുരിതാശ്വാസ ക്യാമ്പുകള്‍ തുറന്നു. നൂറോളം കുടുംബങ്ങളിലെ നാനൂറോളം അംഗങ്ങള്‍ ദുരിതാശ്വാസ ക്യാമ്പില്‍ കഴിയുന്നുണ്ട്. ചങ്ങനാശേരി-ആലപ്പുഴ റൂട്ടില്‍ കെഎസ്ആര്‍ടിസി സര്‍വീസുകള്‍ നടത്തുന്നുണ്ട്. വെള്ളക്കെട്ടുള്ളതിനാല്‍ പല ചെറുറൂട്ടുകളിലും സര്‍വീസുകളില്ല. ഇന്ന് അധ്യയനവര്‍ഷം ആരംഭിക്കുമ്പോള്‍ ആലപ്പുഴ സെക്ടറിലെ ബസുകളുടെ കുറവ് വിദ്യാര്‍ഥികളെയും മറ്റു യാത്രക്കാരെയും ബാധിക്കാനിടയുണ്ട്. ഗവ. മോഡല്‍ ഹയര്‍ സെക്കൻഡറി സ്‌കൂളിലെ ദുരിതാശ്വാസ ക്യാമ്പില്‍ എസി കോളനിയിലെ 11 കുടുംബങ്ങളിലെ 26 അംഗങ്ങളും പണ്ടകശാലക്കടവ് സെന്‍റ് ജയിംസ് എല്‍പി സ്‌കൂളില്‍ ഒരു കുടുംബത്തിലെ ഒരു സ്ത്രീയും പുരുഷനും കുട്ടിയും ഉള്‍പ്പടെ മൂന്നുപേരും പെരുന്ന വെസ്റ്റ് യുപിഎസില്‍ 19 കുടുംബങ്ങളിലെ 90 അംഗങ്ങളും പുഴവാത് എല്‍പി സ്‌കൂളില്‍ 18 കുടുംബങ്ങളില്‍നിന്നായി 71 അംഗങ്ങളും എത്തിയിട്ടുണ്ട്. ചങ്ങനാശേരി ടൗണ്‍ എല്‍പി സ്‌കൂളില്‍ 10 കുടുംബങ്ങളിലെ ഉള്‍പ്പെടെ 31 അംഗങ്ങളും വാഴപ്പള്ളി വിഎച്ച്എസ് സ്‌കൂളില്‍ ഏഴ് കുടുംബങ്ങളിലെ 28 അംഗങ്ങളും പൂവം യുപി സ്‌കൂളില്‍ 12 കുടുംബങ്ങളില്‍നിന്നുള്ള 45 അംഗങ്ങളും പെരുന്ന ഗവ. എല്‍പിഎസില്‍ 13 കുടുംബങ്ങളിലെ 47 അംഗങ്ങളും താമസക്കാരായുണ്ട്. photo: ജലപ്രളയം...പറാലില്‍ നിന്നൊരു പ്രളയക്കാഴ്ച.

തകര്‍ന്ന റോഡില്‍ ചങ്ങാടമിറക്കി യൂത്ത് കോണ്‍ഗ്രസ് പ്രതിഷേധം

മാടപ്പള്ളി: തകര്‍ന്നടിഞ്ഞ കുറുമ്പനാടം അസംപ്ഷന്‍ പള്ളി-പുളിയാംകുന്ന് റോഡില്‍ ചങ്ങാടമിറക്കി യൂത്ത്‌ കോണ്‍ഗ്രസ് പ്രതിഷേധം. തകര്‍ന്ന ഈ റോഡില്‍ വെള്ളക്കെട്ടുകൂടിയായപ്പോള്‍ സഞ്ചാരം അതിദുരിതമാണ്. റോഡ് തകര്‍ന്നതുമൂലം അസംപ്ഷന്‍ പള്ളിയിലേക്കുള്ള വിശ്വാസികളുടെ യാത്രയും ബുദ്ധിമുട്ടിലാണ്. പ്രതിഷേധസമരം യൂത്ത് കോണ്‍ഗ്രസ് ജില്ലാ ജനറല്‍ സെക്രട്ടറി സോബിച്ചന്‍ കണ്ണമ്പള്ളി ഉദ്ഘാടനം ചെയ്തു. മണ്ഡലം പ്രസിഡന്‍റ് നിധീഷ് കൊച്ചേരി അധ്യക്ഷത വഹിച്ചു. ഷെയിന്‍ പോള്‍സണ്‍, സിനോയ് മാത്യു, നിഖില്‍ ഫിലിപ്പ്, പ്രതീഷ് ഓമനക്കുട്ടന്‍, ജെബിന്‍ സേവ്യര്‍, ജോയല്‍, ലിജോമോന്‍ തുടങ്ങിയവര്‍ പ്രസംഗിച്ചു. തുടർന്ന് യൂത്ത് കോണ്‍ഗ്രസ് പ്രവര്‍ത്തകര്‍ റോഡില്‍ മണ്ണിറക്കി താത്കാലിക അറ്റകുറ്റപ്പണി നടത്തി.

പെരുമ്പനച്ചിയില്‍ ഓടയ്ക്ക് സ്ലാബിട്ട് റോഡ് ഗതാഗതത്തിനായി തുറന്നു

വാക്കുപാലിച്ച് പൊതുമരാമത്തു വകുപ്പ് ചങ്ങനാശേരി: പെരുമ്പനച്ചിയില്‍ ഓടയ്ക്ക് സ്ലാബിട്ട് റോഡ് തുറന്നു. പുതിയ അധ്യയനവര്‍ഷം ആരംഭിക്കുന്ന ഇന്ന് വിദ്യാര്‍ഥികള്‍ ഉള്‍പ്പെടെ യാത്രക്കാര്‍ക്കു സുഗമമായി സഞ്ചരിക്കാം. പെരുമ്പനച്ചി ജംഗ്ഷനില്‍ തോട്ടയ്ക്കാട് റോഡിന്‍റെ തുടക്കത്തിലാണ് ഓടനിര്‍മാണം പൂര്‍ത്തീകരിച്ച് സ്ലാബിട്ടത്. പെരുമ്പനച്ചിയിലെ ഓട നിര്‍മാണംമൂലം മൂന്നാഴ്ചക്കാലമായി കുറുമ്പനാടം വഴിയുള്ള തോട്ടയ്ക്കാട് റോഡിലെ ഗതാഗതം തടസപ്പെട്ടിരുന്നു. ഓടയില്ലാത്തതുമൂലം മാടപ്പള്ളി സഹകരണബാങ്കിന്‍റെ പെരുമ്പനച്ചി ഹെഡ് ഓഫീസിനു മുമ്പില്‍ അനുഭവപ്പെടുന്ന വെള്ളക്കെട്ട് പരിഹരിക്കുന്നതിനാണ് പൊതുമരാമത്തുവകുപ്പ് 27 ലക്ഷം രൂപ മുടക്കി ഓട നിര്‍മാണമാരംഭിച്ചത്. വേണ്ടത്ര മുന്നൊരുക്കങ്ങളില്ലാതെ ഓടനിര്‍മാണം ആരംഭിച്ചതിൽ പരക്കെ ആക്ഷേപം ഉയര്‍ന്നിരുന്നു. മാടപ്പള്ളിയിലെ കോണ്‍ഗ്രസ് പഞ്ചായത്തംഗം ജിന്‍സണ്‍ മാത്യു ഓടനിര്‍മാണം വേഗത്തിലാക്കണമെന്നാവശ്യപ്പെട്ട് ഓടയില്‍ ഇറങ്ങിയിരുന്ന് പ്രതിഷേധിച്ചിരുന്നു. അന്ന് പൊതുമരാമത്തുവകുപ്പ് ഉദ്യോഗസ്ഥര്‍ സ്ഥലത്തെത്തി ജൂണ്‍ ഒന്നിനകം ഓടയ്ക്കു മുകളിൽ സ്ലാബുകള്‍ സ്ഥാപിച്ച് റോഡ് തുറക്കുമെന്ന് നല്‍കിയ ഉറപ്പാണ് പാലിക്കപ്പെട്ടത്. സ്‌കൂള്‍ തുറക്കുന്നതിന് ഒരു ദിവസം മുമ്പ് പെരുമ്പനച്ചി റോഡിലെ ഗതാഗതം സൗകര്യം പുനരാരംഭിക്കുമെന്ന് ജോബ് മൈക്കിള്‍ എംഎല്‍എ അറിയിച്ചിരുന്നു. ഇപ്പോള്‍ ബൈക്ക് യാത്രകള്‍ക്കും കാര്‍ ഓട്ടോറിക്ഷ തുടങ്ങി ചെറു വാഹനങ്ങള്‍ക്കും മാത്രമായുള്ള ഗതാഗത സൗകര്യമാണ് ഒരുക്കിയിരിക്കുന്നത്. രണ്ടാഴ്ചയ്ക്കുള്ളില്‍ പൂര്‍ണമായും ഭാരവാഹനങ്ങള്‍ പോകാന്‍ തരത്തിലുള്ള സൗകര്യമൊരുക്കുമെന്നും എംഎല്‍എ അറിയിച്ചു. photo: ചങ്ങനാശേരി-വാഴൂര്‍ റോഡില്‍ പെരുമ്പനച്ചി ജംഗ്ഷനില്‍ തോട്ടയ്ക്കാട് റോഡിന്‍റെ തുടക്കത്തില്‍ ഓടനിര്‍മാണം പൂര്‍ത്തിയാക്കി സ്ലാബിട്ട് റോഡ് തുറന്നു നല്‍കിയപ്പോള്‍.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]