പ്രഫ. സാനുവിന്‍റെ പുസ്തകം മുഖ്യമന്ത്രി പ്രകാശനം ചെയ്തു
Sunday, June 22, 2025 1:02 AM IST
കൊച്ചി: അബലകള്‍ക്ക് ആശ്രയമായി ജീവിച്ച തപസ്വിനി അമ്മയുടെ ജീവിതത്തെ ആസ്പദമാക്കി പ്രഫ. എം.കെ. സാനു രചിച്ച പുസ്തകത്തിന്‍റെ പ്രകാശനം മുഖ്യമന്ത്രി പിണറായി വിജയന്‍ നിര്‍വഹിച്ചു. എറണാകുളം ഗസ്റ്റ് ഹൗസില്‍ നടന്ന ചടങ്ങില്‍ സാഹിത്യകാരന്‍ പ്രഫ. എം. തോമസ് മാത്യു പുസ്തകം ഏറ്റുവാങ്ങി.
പ്രായത്തിന്‍റെ അവശതകളും പരാധീനതകളും മറികടന്ന് തന്‍റെ 98-ാം വയസിലാണ് പ്രഫ. എം.കെ. സാനു പുസ്തകം രചിച്ചിരിക്കുന്നത്.
‘തപസ്വിനി അമ്മ: അബലകള്‍ക്ക് ശരണമായി ജീവിച്ച പുണ്യവതി’ എന്ന പുസ്തകം വരുംതലമുറയ്ക്കും മഹനീയ വ്യക്തിത്വത്തെക്കുറിച്ച് അറിവ് പകരുന്നതാണെന്നും മുഖ്യമന്ത്രി പറഞ്ഞു.
സംസ്ഥാന സര്‍ക്കാരിന്‍റെ ഡല്‍ഹിയിലെ പ്രതിനിധി കെ.വി. തോമസ്, മുന്‍ എംഎല്‍എ എസ്. ശര്‍മ, സിപിഎം ജില്ലാ സെക്രട്ടറി എസ്. സതീഷ്, ഷാജി ജോര്‍ജ് പ്രണത ബുക്‌സ് തുടങ്ങിയവര്‍ പങ്കെടുത്തു. പ്രണത ബുക്‌സാണ് പുസ്തകം പുറത്തിറക്കിയിരിക്കുന്നത്.