ADVERTISEMENT

ADVERTISEMENT

പത്തനംതിട്ട ഫൊറോന മാതൃവേദി അസംബ്ലി

പത്തനംതിട്ട: പത്തനംതിട്ട ഫൊറോന മാതൃവേദിയുടെ ഫൊറോന അസംബ്ലി മെസഞ്ചർ മീറ്റ് എന്ന പേരിൽ പത്തനംതിട്ട മേരിമാതാ ഫൊറോന പള്ളിയിൽ നടത്തി. ഫൊറോന വികാരി ഫാ. സെബാസ്റ്റ്യൻ മാടപ്പള്ളി ഉദ്ഘാടനം ചെയ്തു. ഫൊറോന ഡയറക്ടർ ഫാ. സെബിൻ ഉള്ളാട്ട് അധ്യക്ഷത വഹിച്ചു.

രൂപതാ ഡയറക്ടർ ഫാ. മാത്യു ഓലിക്കൽ ആമുഖസന്ദേശം നൽകി. രൂപത അനിമേറ്റർ സിസ്റ്റർ റോസ്മി വെട്ടിപ്ലാക്കൽ എസ്എബിഎസ്, സിസ്റ്റർ ടോംസി സിഎംസി എന്നിവർ പ്രസംഗിച്ചു. ഫൊറോനയിലെ എല്ലാ ഇടവകകളിൽനിന്നുമുള്ള എക്സിക്യൂട്ടീവ് അംഗങ്ങൾ പങ്കെടുത്തു.

ADVERTISEMENT

അധ്യാപകധ്യാനവും വാർഷികവും

തിരുവല്ല: കേരള കാത്തലിക് ടീച്ചേഴ്‌സ് ഗിൽഡ് തിരുവല്ല അതിരൂപത വാർഷികവും അധ്യാപകധ്യാനവും തിരുവല്ല ശാന്തിനിലയത്തിൽ നടന്നു. ഫാ. ബോബി ജോസ് കട്ടിക്കാട് ധ്യാനം നയിച്ചു. വാർഷികസമ്മേളനം തിരുവല്ല അതിരൂപതാധ്യക്ഷൻ ഡോ. തോമസ് മാർ കൂറിലോസ് മെത്രാപ്പോലീത്ത ഉദ്ഘാടനം ചെയ്തു. സഭയുടെ ശുശ്രൂഷയാണ് ഓരോ അധ്യാപകനും ചെയ്യുന്നതെന്നും അതിനാൽ ജാഗ്രതയോടുകൂടി ഉത്തരവാദിത്വം നിർവഹിക്കണമെന്നും മെത്രാപ്പോലീത്ത പറഞ്ഞു. അതിരൂപത ഡയറക്ടർ ഫാ. മാത്യു പുനക്കുളം അധ്യക്ഷത വഹിച്ച യോഗത്തിൽ റോബിൻ മത്തായി, പി.എം. പ്രമോദ്, റോബിൻ മാത്യു, ജോസഫ് ചിറയിൽ, ലൈജു കോശി, മാത്യൂസ് ഡാനിയേൽ, ജിൻസി വര്‍ഗീസ്, മഞ്ജു വർക്കി, സിനു ചെറിയാൻ എന്നിവർ പ്രസംഗിച്ചു.

പുതമൺ പാലം സമയബന്ധിതമായി പൂർത്തിയാക്കും

റാന്നി: പുതമൺ പാലത്തിന്‍റെ നിർമാണം സമയബന്ധിതമായി പൂർത്തിയാക്കുമെന്ന് പൊതുമരാമത്ത് വകുപ്പ് പാലം വിഭാഗം ചീഫ് എൻജിനിയർ അറിയിച്ചു. റാന്നി - കീക്കൊഴൂർ - കോഴഞ്ചേരി പാതയിലെ പാലത്തിന്‍റെ പുനർനിർമാണം വൈകുന്നത് പ്രമോദ് നാരായൺ എംഎൽഎ പൊതുമരാമത്ത് മന്ത്രി മുഹമ്മദ് റിയാസിന്‍റെ ശ്രദ്ധയിൽപ്പെടുത്തിയിരുന്നു. മന്ത്രിയുടെ നിർദേശപ്രകാരമാണ് ചീഫ് എൻജിനിയർ ഐജിൻ റോബർട്ട് സ്ഥലം സന്ദർശിച്ച് നിർമാണ പുരോഗതി വിലയിരുത്തിയത്. സെപ്റ്റംബറിൽതന്നെ പാലത്തിന്‍റെ കോൺക്രീറ്റിംഗ് പൂർത്തിയാക്കും. അപ്രോച്ച് റോഡുകളുടെ നിർമാണം പൂർത്തിയാക്കി ഒക്‌ടോബറിൽ പാലം തുറന്നു കൊടുക്കാനാകും. നിലവിൽ കരാറുകാരന്‍റെ കാലാവധി ഒക്‌ടോബർ വരെയാണ്. ഇപ്പോൾ വാഹന ഗതാഗതം തിരിച്ചു വിട്ടിരിക്കുന്ന താത്കാലിക പാതയുടെ അറ്റകുറ്റപ്പണികളും ഇതോടൊപ്പം ആരംഭിച്ചു. തോടിന്‍റെ മധ്യത്തിൽ ഒരു തൂണും ഇരുവശങ്ങളിലുമായി ഓരോ തൂണുകളുമാണ് പാലത്തിനുള്ളത്. ഇവയുടെ നിർമാണം പൂർത്തിയായി. തോട്ടിലൂടെയുള്ള വെള്ളമൊഴുക്കിന് അനുസരിച്ച് പൈലിംഗ് ഉൾപ്പെടെയുള്ള നിർമാണ പ്രവൃത്തികൾ നടത്തേണ്ടി വന്നതിനാലാണ് തൂണുകളുടെ നിർമാണം വൈകാനിടയായത്. തോട്ടിലൂടെ ഇടയ്ക്കെത്തുന്ന അമിത വെള്ളപ്പാച്ചിലാണ് സ്ലാബ് വാർക്കുന്നതിനും തടസമായി നിൽക്കുന്നത്. കീക്കൊഴൂർ പുതമണ്ണിനു സമീപം പെരുന്തോടിനു കുറുകെയുള്ള പുതമൺ പഴയപാലം അപകടാവസ്ഥയിലായതോടെയാണ് അതു പൊളിച്ചുമാറ്റി പുതിയ പാലം നിർമിക്കുന്നത്. വാഹനഗതാഗതത്തിനായി 30 ലക്ഷം രൂപ ചെലവിൽ പാലത്തിനു താഴെക്കൂടി താത്കാലിക പാത നിർമിച്ചിരുന്നു. എന്നാൽ മഴ ശക്തമാകുന്പോൾ താത്കാലിക പാത മുങ്ങുന്ന സാഹചര്യമുണ്ട്. ഓരോ മഴയിലും പാത തകരുകയും ചെയ്തു വരികയാണ്. ഇവയ്ക്കെല്ലാം പരിഹാരം തേടിയാണ് പാലം നിർമാണം പൂർത്തീകരിക്കണമെന്ന ആവശ്യവുമായി എംഎൽഎ മന്ത്രിയെ സമീപിച്ചത്.

ഭാരത ക്രൈസ്തവ ദിനാചരണം ഉദ്ഘാടനം ചെയ്തു

പത്തനംതിട്ട: നാഷണൽ ക്രിസ്ത്യൻ മൂവ്മെന്‍റ് ഫോർ ജസ്റ്റീസിന്‍റെ ആഭിമുഖ്യത്തിൽ ക്രൈസ്തവ ദിനാചരണം പത്തനംതിട്ട സിഎസ്ഐ പള്ളിയിൽ നടന്നു. എൻസിഎംജെ പ്രസിഡന്‍റ് ഡോ. പ്രകാശ് പി. തോമസ് അധ്യക്ഷത വഹിച്ച യോഗം നഥാനിയേൽ റമ്പാൻ ഉദ്ഘാടനം ചെയ്തു. ജില്ലാ പഞ്ചായത്ത് അംഗം റോബിൻ പീറ്റർ മുഖ്യപ്രഭാഷണം നടത്തി. ഫാ. ബെന്യാമിൻ ശങ്കരത്തിൽ, റവ. ജോണി ആൻഡ്രൂസ്, റവ. ഷാജി കെ. ജോർജ്, റവ. സജു തോമസ്, ഫാ. പി.കെ. മാത്തുക്കുട്ടി, അനീഷ് തോമസ്, ഏബ്രഹാം വർഗീസ്, റവ. ആർ.ആർ. തോമസ്, മാത്യൂസൺ പി. തോമസ്, ബാബു വെൺമേലി, ഷിജു മാത്യു എന്നിവർ പ്രസംഗിച്ചു.

വന്യജീവി ആക്രമണം ഒഴിവാക്കാൻ വേണ്ടത് ശാസ്ത്രീയമാർഗങ്ങളെന്ന് എംഎൽഎമാർ

പത്തനംതിട്ട: വന്യജീവികൾ ജനവാസമേഖലയിൽ കടന്നു പ്രശ്നങ്ങൾ സൃഷ്ടിക്കുന്നത് ഒഴിവാക്കാൻ ശാസ്ത്രീയ മാർഗങ്ങൾ തേടണമെന്ന് എംഎൽഎമാർ. വന്യജീവി സംഘർഷം ലഘൂകരിക്കുന്നതിനു നിർദേശം നൽകുന്നതിലേക്കും പുരോഗതി വിലയിരുത്താനുമായി ചേർന്ന ജില്ലാതല നിയന്ത്രണസമിതി യോഗത്തിൽ പങ്കെടുത്ത എംഎൽഎമാരായ കെ.യു. ജനീഷ് കുമാറും പ്രമോദ് നാരായണനുമാണ് ഇതു സംബന്ധിച്ച നിർദേശങ്ങൾ നൽകിയത്. സോളാര്‍വേലി സ്ഥാപിക്കുന്നതിനൊപ്പം പരിപാലനവും ഉറപ്പാക്കണമെന്ന് കെ.യു. ജനീഷ് കുമാര്‍ എംഎൽഎആവശ്യപ്പെട്ടു. വനഭൂമി കൈമാറ്റത്തിന് സമയബന്ധിതമായി നിരാക്ഷേപപത്രം നല്‍കണം. ജനവാസ മേഖലയില്‍ എത്തുന്ന വന്യജീവികളെ തിരിച്ചയക്കുന്ന പ്രവര്‍ത്തനം കൂടുതല്‍ ഊര്‍ജിതമാക്കണമെന്നും എംഎല്‍എ നിര്‍ദേശിച്ചു. വെള്ളം, ഭക്ഷണം, ആവാസവ്യവസ്ഥ എന്നിവ തേടിയെത്തുന്ന വന്യമൃഗങ്ങള്‍ക്ക് വനത്തിനുള്ളില്‍ അവയുടെ ലഭ്യത വർധിപ്പിക്കണമെന്ന് പ്രമോദ് നാരായൺ എംഎല്‍എ പറഞ്ഞു. യോഗത്തില്‍ ജില്ലാ കളക്ടര്‍ എസ്. പ്രേം കൃഷ്ണന്‍ അധ്യക്ഷത വഹിച്ചു. വനത്തോടു ചേര്‍ന്നുള്ള സ്വകാര്യഭൂമി കാടുപിടിക്കുന്നത് വൃത്തിയാക്കാന്‍ ഉടമസ്ഥന് കര്‍ശന നിര്‍ദേശം നല്‍കണമെന്ന് അദ്ദേഹം പറഞ്ഞു. വന്യമൃഗങ്ങളുടെ ആക്രമണം തടയുന്നതിന് പ്രായോഗികവും ഫലപ്രദവുമായ മാര്‍ഗങ്ങള്‍ ഏകോപനത്തോടെ സ്വീകരിക്കാന്‍ വകുപ്പ് മേധാവികള്‍ക്ക് ജില്ലാ കളക്ടര്‍ നിര്‍ദേശം നല്‍കി. റാന്നി ഡിഎഫ്ഒ എന്‍. രാജേഷ്, കോന്നി ഡിഎഫ്ഒ ആയുഷ് കുമാര്‍ കോറി, ഡെപ്യൂട്ടി കളക്ടര്‍ ആര്‍. രാജലക്ഷ്മി, ഡിഎംഒ ഡോ. എല്‍. അനിതാകുമാരി, വകുപ്പ് മേധാവികള്‍ എന്നിവര്‍ പങ്കെടുത്തു. കാട്ടുപന്നിശല്യം: ഷൂട്ടര്‍മാരെ നിയോഗിച്ചു ഇലന്തൂര്‍: ഗ്രാമപഞ്ചായത്തില്‍ വനേതര ജനവാസ മേഖലകളില്‍ ജനങ്ങളുടെ ജീവനും സ്വത്തിനും നാശം വരുത്തുന്ന കാട്ടുപന്നികളെ കൊല്ലുന്നതിന് പഞ്ചായത്തില്‍നിന്ന് അനുമതി ലഭിച്ച ഷൂട്ടര്‍മാരുടെ വിവരങ്ങള്‍ പേര്, വിലാസം, ഫോണ്‍ എന്ന ക്രമത്തില്‍. സാം കെ. വറുഗീസ്, റാന്നി - 7012416692, 9995341562.വി.കെ. രാജീവ്, കോട്ടയം - 9747909221. പി.പി ഫിലിപ്പ്, അയിരൂര്‍ - 9946586129.

വിദ്യാർഥികളുടെ യാത്രാക്ലേശം : കെഎസ്ആർടിസി ബസുകൾ പുനഃക്രമീകരിക്കും

റാന്നി: വെച്ചൂച്ചിറ മേഖലയിലെ സ്കൂൾ വിദ്യാർഥികളുടെ സൗകര്യാർഥം കെഎസ്ആർടിസി ഷെഡ്യൂളുകൾ പുനഃക്രമീകരിക്കും. യാത്രാക്ലേശം നേരിടുന്ന വെച്ചൂച്ചിറ, കടുമീൻചിറ ഹയർ സെക്കൻഡറി സ്കൂളുകളിലെ വിദ്യാർഥികളുടെ പ്രശ്നങ്ങൾ പരിഹരിക്കുന്നതിലേക്ക് പ്രമോദ് നാരായൺ എംഎൽഎ വിളിച്ചുചേർത്ത യോഗത്തിലാണ് തീരുമാനം. നാറാണംമൂഴി കടുമീൻചിറ ഗവ. ഹയർ സെക്കൻഡറി സ്കൂളിലെയും വെച്ചൂച്ചിറ കോളനി ഗവൺമെന്‍റ് ഹയർ സെക്കൻഡറി സ്കൂളിലെയും കുട്ടികൾക്ക് സമയത്തിന് എത്താനും മടക്കയാത്രയ്ക്കും ബസ് സൗകര്യമില്ലെന്ന പരാതിക്കാണ് പരിഹാരമായത്. പൊതുപ്രവർത്തകരുടെയും സ്കൂൾ അധികൃതരുടെയും കെഎസ്ആർടിസി അധികൃതരുടെയും സംയുക്തയോഗം എംഎൽഎതന്നെ വിളിച്ചുചേർക്കുകയായിരുന്നു. ഷെഡ്യൂളുകളിൽ മാറ്റംവരുത്താതെ സർവീസുകൾ പുനഃക്രമീകരിക്കാനാണ് തീരുമാനം. രാവിലെയുള്ള സർവീസുകൾ കുട്ടികൾക്കുകൂടി പ്രയോജനമാകുന്ന തരത്തിൽ ക്രമീകരിക്കുമെന്നും ചൊവ്വാഴ്ച മുതൽ ഇതു പ്രാവർത്തികമാക്കാമെന്നും കെഎസ്ആർടിസി ഡിടിഒ ഉറപ്പു നൽകി. റാന്നിയിൽനിന്നു മണ്ണടിശാലയിൽ രാവിലെ ഒന്പതിന് എത്തിച്ചേരുന്ന ബസ് കടുമീൻചിറയിലേക്ക് ദീർഘിപ്പിക്കും. കടുമീൻചിറ സ്കൂളിലെ കുട്ടികൾക്കും അധ്യാപകർക്കും ഇതു പ്രയോജനപ്പെടും. മുക്കൂട്ടുതറയിൽ നിന്നും 110 കുട്ടികളോളം വെച്ചൂച്ചിറ കോളനി ഗവൺമെന്‍റ് എച്ച്എസ്എസിൽ പഠിക്കുന്നുണ്ട്. ഈ കുട്ടികൾ നിലവിൽ എരുമേലിവഴി ചുറ്റിക്കറങ്ങിയാണ് എത്തുന്നത്. ഇതിനു പരിഹാരമായി രാവിലെ എട്ടിന് നവോദയ ജംഗ്ഷനിൽ എത്തുന്ന ബസ് ചാത്തൻതറവരെ ദീർഘിപ്പിക്കും. മുക്കൂട്ടുതറയിൽനിന്ന് മണ്ണടിശാലയിൽ രാവിലെ 8.30ന് എത്തുന്നതുപോലെ ബസ് സർവീസ് പുനഃക്രമീകരിക്കുന്നതും പരിഗണിക്കും. നിലവിലെ ഷെഡ്യൂളുകളിൽ അഞ്ച് മിനിട്ടിൽ കൂടുതൽ സമയവ്യത്യാസം വരാതെയാണ് പുനഃക്രമീകരണം.

സ്കൂളിൽ ബഷീർ കഥാപാത്രങ്ങൾ എത്തി

പന്തളം: കടയ്ക്കാട് ഗവ. എൽപി സ്കൂളിൽ വൈക്കം മുഹമ്മദ്‌ ബഷീറിന്‍റെ കഥാപാത്രങ്ങൾ എത്തി. അദ്ദേഹത്തിന്‍റെ ചരമദിനത്തോടനുബന്ധിച്ചാണ് കുട്ടികൾ ബഷീർ കഥാപാത്രങ്ങളുടെ വേഷത്തിൽ എത്തിയത്. വൈക്കം മുഹമ്മദ്‌ ബഷീറായി നാലാം ക്ലാസുകാരൻ കൻസുൽ ഹഖ് മികച്ച പ്രകടനം കാഴ്ചവച്ചു. ഫാത്തിമയായി നാലാം ക്ലാസുകാരി ഫിദ റിയാസ്, ഒന്നാം ക്ലാസുകാരി അസിൻ താജുദ്ദീൻ എന്നിവരും താച്ചുമ്മയായി ഒന്നാം ക്ലാസുകാരി ആയിഷ ഷംനാദ്, അഞ്ചാം ക്ലാസുകാരി ഹഫ്സ ഫാത്തിമ എന്നിവരും ഉണ്ടായിരുന്നു. ഒറ്റക്കണ്ണൻ പോക്കറായി നാലാം ക്ലാസിലെ സുഹൈൽ മാലിക് എത്തിയപ്പോൾ അത് കുട്ടികളിൽ ചിരി പടർത്തി. നാലാം ക്ലാസുകാരൻ ആബിദ് മുഹമ്മദ്‌ മുബാറക് ആനവാരി രാമൻനായർ, ഒന്നാം ക്ലാസുകാരി മർജാന മർവ കുഞ്ഞിപാത്തുമ്മ, മൂന്നാം ക്ലാസുകാരൻ ആദം മുഹമ്മദ്‌ എട്ടുകാലി മമ്മൂഞ്ഞ്,അഞ്ചാം ക്ലാസുകാരി ഹുസ്ന ഫാത്തിമയുടെ നാരായണി, അയാന ഫാത്തിമയുടെ സാറാമ്മ, ഫിദയുടെ പാത്തുമ്മ, ബഹിയയുടെ സുഹറ എന്നിവരും വേദിയിൽ മികച്ച പ്രകടനം കാഴ്ചവച്ചു. പോസ്റ്ററുകളും പതിപ്പുകളും കുട്ടികൾ തയാറാക്കി.

പള്ളിയോടങ്ങൾ നീരണിഞ്ഞു

കോഴഞ്ചേരി: ആറന്മുള വള്ളസദ്യകള്‍ ആരംഭിക്കാന്‍ ദിവസങ്ങള്‍ മാത്രം ബാക്കി നില്‍ക്കേ നീരണിഞ്ഞ പള്ളിയോടങ്ങള്‍ ആറന്മുള പാർഥസാരഥി ക്ഷേത്രക്കടവില്‍ എത്തിത്തുടങ്ങി. ആദ്യമായി എത്തിയ വെണ്‍പാല - കദളിമംഗലം പള്ളിയോടത്തിന് പള്ളിയോടസേവാസംഘം ഭാരവാഹികള്‍ ദക്ഷിണ നൽകി ആചാരാനുഷ്ഠാനങ്ങളോടെ പാർഥസാരഥി ക്ഷേത്രമതിലകത്തേക്ക് സ്വീകരിച്ചു. 13നാണ് വള്ളസദ്യകള്‍ ആരംഭിക്കുന്നത്. 370 ഓളം വള്ളസദ്യകള്‍ ബുക്കു ചെയ്തുകഴിഞ്ഞു. 500 വള്ളസദ്യകള്‍ നടത്താനാണ് പള്ളിയോട സേവാസംഘം ലക്ഷ്യമിടുന്നത്. ഒക്‌ടോബര്‍ രണ്ടുവരെ നീളുന്നതാണ് വള്ളസദ്യക്കാലം. 15 ഊട്ടുപുരകളാണ് ഇതിനുവേണ്ടി സജ്ജമാക്കിയിരിക്കുന്നത്. ഇതില്‍ ആറെണ്ണം ക്ഷേത്രമതിലകത്തിനു പുറത്തുള്ള ഓഡിറ്റോറിയങ്ങളാണ്. 44 വിഭവങ്ങളാണ് വള്ളസദ്യയുടെ ഭാഗമായി ഇലയില്‍ വിളമ്പുന്നത്. 20 വിഭവങ്ങള്‍ പള്ളിയോട കരക്കാര്‍ പാടി ചോദിക്കുന്നതിനനുസരിച്ച് ഇലയില്‍ വിളമ്പും. പള്ളിയോട സദ്യ നടത്തുന്ന ആറന്മുള ക്ഷേത്രഭക്തര്‍ നിറഞ്ഞ മനസോടെ വേണം തിരിച്ചു പോകേണ്ടതെന്ന അടിസ്ഥാനത്തിലുള്ള സൗകര്യങ്ങളാണ് ക്രമീകരിച്ചിരിക്കുന്നതെന്ന് പള്ളിയോട സേവാസംഘം പ്രസിഡന്‍റ് കെ.വി. സാംബദേവനും സെക്രട്ടറി പ്രസാദ് ആനന്ദഭവനും പറഞ്ഞു. പള്ളിയോട സേവാസംഘത്തിന്‍റെ സംയുക്ത പൊതുയോഗം ഇന്ന് ഉച്ചകഴിഞ്ഞ് മൂന്നിന് ആറന്മുള പാർഥസാരഥി ക്ഷേത്രത്തിന്‍റെ കിഴക്കേ നടയിലുള്ള പാഞ്ചജന്യം ഓഡിറ്റോറിയത്തില്‍ നടക്കും. പള്ളിയോടങ്ങള്‍ക്കുള്ള ഗ്രാന്‍റ് വിതരണം മന്ത്രി സജി ചെറിയാന്‍ നിർവഹിക്കും. സേവാസംഘം പ്രസിഡന്‍റ് കെ.വി. സാംബദേവന്‍ അധ്യക്ഷത വഹിക്കും.

പാഴാകുന്നത് 1.90 കോടി : ജില്ലാ ആശുപത്രിയിൽ ഓക്സിജൻ പ്ലാന്‍റ് ഉപേക്ഷിക്കുന്നു

കോഴഞ്ചേരി: ജില്ലാ ആശുപത്രിയില്‍ 1.90 കോടി രൂപ ചെലവഴിച്ച് ജില്ലാ പഞ്ചായത്ത് നിർമിച്ച ഓക്‌സിജന്‍ പ്ലാന്‍റ് ഉപേക്ഷിക്കുന്നു. പ്ലാന്‍റ് പൊട്ടിത്തെറിച്ചതിനു പിന്നാലെയുള്ള അറ്റകുറ്റപ്പണികൾ വേണ്ടെന്നുവച്ചിരിക്കുകയാണ്. പ്ലാന്‍റ് പ്രവർത്തിപ്പിക്കുന്നതു നഷ്ടമാണെന്നും ഓക്സിജൻ പുറമേനിന്നു വാങ്ങുന്നതാണ് ലാഭമെന്നുമാണ് ആശുപത്രി സൂപ്രണ്ടിന്‍റെ വിശദീകരണം. കോവിഡ് കാലത്ത് 2021-22 ജില്ലാ പഞ്ചായത്തിന്‍റെ വാര്‍ഷിക പദ്ധതിയില്‍ ഉള്‍പ്പെടുത്തിയാണ് ജില്ലാ ആശുപത്രിയില്‍ ഓക്‌സിജന്‍ പ്ലാന്‍റ് സ്ഥാപിച്ചത്. 1.90 കോടി രൂപ ചെലവഴിച്ച് 1,000 ലിറ്റര്‍ ഓക്‌സിജന്‍ ഉത്പാദിപ്പിക്കാനുള്ള പ്ലാന്‍റാണ് നിർമിച്ചതെങ്കിലും 18 മാസം കഴിഞ്ഞപ്പോള്‍ പൊട്ടിത്തെറിച്ചതോടെ ‌ഓക്സിജൻ ഉത്പാദനം നിലച്ചു. നിർമാണ കന്പനിയുടെ വാറണ്ടി നിലനിന്നിരുന്നുവെങ്കിലും ഇതിന്‍റെ പേരിൽ പുനർനിർമാണം വേണ്ടെന്നുവച്ചു. ജില്ലാ പഞ്ചായത്ത് സ്ഥാപിച്ച 1,000 ലിറ്റര്‍ പ്ലാന്‍റിനു പുറമേ 300 ലിറ്റര്‍ ഓക്‌സിജന്‍ ഉത്പാദിപ്പിക്കാനുള്ള പ്ലാന്‍റ് സ്ഥാപിക്കാന്‍ ഒരു പ്രവാസി ഗ്രൂപ്പിനും അധികൃതര്‍ അനുമതി നല്‍കിയിരുന്നു. പ്ലാന്‍റിനുള്ള സ്ഥലം, കെട്ടിടസമുച്ചയം, വൈദ്യുതി ലൈന്‍, ജനറേറ്റര്‍ എന്നിവയുള്‍പ്പെടെ 1.90 കോടി രൂപയാണ് ചെലവഴിച്ചത്. എറണാകുളം കേന്ദ്രമായി പ്രവര്‍ത്തിക്കുന്ന ഒരു ഏജന്‍സിയാണ് പ്ലാന്‍റ് സ്ഥാപിച്ചത്. പ്ലാന്‍റ് പൊട്ടിത്തെറിച്ചതിനെത്തുടര്‍ന്ന് അഗ്നിശമനസേനയടക്കമുള്ള സംവിധാനങ്ങള്‍ നടത്തിയ പരിശോധനയില്‍ പൊട്ടിത്തെറിക്കുള്ള കാരണം എയര്‍ കംപ്രസറിനുണ്ടായ തകരാറാണെന്നാണ് പറയപ്പെടുന്നത്. സേഫ്റ്റി വാല്‍വിനുണ്ടായ തകരാറും പ്ലാന്‍റിലേക്കുള്ള ജലത്തിന്‍റെ പരിശോധനയില്‍ വന്ന അപാകതകളും പൊട്ടിത്തെറിക്കു കാരണമായിട്ടുണ്ടെന്നാണ് നിഗമനം. തകരാറു വന്ന യന്ത്രഭാഗങ്ങള്‍ നവീകരിക്കുന്നതിനുവേണ്ടി പ്ലാന്‍റ് സ്ഥാപിച്ച ഏജന്‍സി കൊണ്ടുപോയെങ്കിലും ഇതേവരെയും പണികള്‍ പൂര്‍ത്തീകരിച്ച് സ്ഥാപിച്ചിട്ടില്ല. ഇതുമായി ബന്ധപ്പെട്ട അന്വേഷണ റിപ്പോര്‍ട്ടില്‍ സംസ്ഥാനത്തെ പലയിടങ്ങളിലായി ഈ ഏജന്‍സി സ്ഥാപിച്ച പ്ലാന്‍റുകളുടെ നിർമാണം നിര്‍ത്തിവയ്ക്കാനും ആരോഗ്യവകുപ്പ് ഉത്തരവായിട്ടുണ്ട്. മെഡിക്കൽ കോളജിൽനിന്നു രക്തം വാങ്ങാൻ അനുമതി തേടി ജില്ലാ ആശുപത്രിയില്‍ രക്തബാങ്കില്ലെങ്കിലും 90 ബാഗ് രക്തം സൂക്ഷിക്കാനുള്ള സൗകര്യമുണ്ടെന്ന് ആശുപത്രി സൂപ്രണ്ട് ഡോ. നിതീഷ് ഐസക് ശാമുവേല്‍ പറഞ്ഞു. ജനറല്‍ ആശുപത്രിക്കു പുറമേ കോന്നി മെഡിക്കല്‍ കോളജ് ആശുപത്രിയില്‍നിന്നു രക്തം ലഭിക്കുന്നതിന് അനുമതി നല്‍കണമെന്നാവശ്യപ്പെട്ട് സംസ്ഥാന ഡ്രഗ്‌സ് കണ്‍ട്രോളര്‍ക്ക് കത്ത് നല്‍കിയിട്ടുണ്ടെന്നും സൂപ്രണ്ട് പറഞ്ഞു. നേത്രവിഭാഗം പ്രവര്‍ത്തിക്കുന്ന പുതിയ കെട്ടിടസമുച്ചയത്തിന്‍റെ ഭൂരിപക്ഷം പണികളും പൂര്‍ത്തീകരിച്ചിട്ടുണ്ടെന്നും മൂന്നാം നിലയുടെ വൈദ്യുതീകരണം മാത്രമാണ് പൂര്‍ത്തീകരിക്കാനുള്ളതെന്നും സൂപ്രണ്ട് പറഞ്ഞു. ജില്ലാ ആശുപത്രിയിലെത്തുന്ന രോഗികള്‍ക്ക് എല്ലാ സൗകര്യങ്ങളും ക്രമീകരിച്ചിട്ടുണ്ടെന്നും ആശുപത്രി സൂപ്രണ്ട് പറഞ്ഞു. പ്ലാന്‍റ് പ്രവർത്തിക്കാതിരുന്നാൽ രണ്ടു ലക്ഷം ലാഭമെന്ന് ഓക്‌സിജന്‍ പ്ലാന്‍റ് പ്രവര്‍ത്തിക്കുമ്പോള്‍ വൈദ്യുതി ചാർജ് ഇനത്തിൽനാലു ലക്ഷം രൂപ പ്രതിമാസം അടയ്‌ക്കേണ്ടി വന്നിരുന്നു. പുറമേനിന്ന് ഓക്‌സിജന്‍ വാങ്ങുന്നതിന് പ്രതിമാസം രണ്ടു ലക്ഷം രൂപ മാത്രം മതിയാകും. ഇക്കാരണത്താലാണ് ഓക്‌സിജന്‍ പ്ലാന്‍റ് നവീകരിക്കാതെയിരിക്കുന്നതെന്നു പറയപ്പെടുന്നു. ദീര്‍ഘവീക്ഷണമില്ലാതെയും ശാസ്ത്രീയ പഠനങ്ങളില്ലാതെയും പ്ലാന്‍റ് നിർമിച്ചതിലൂടെ 1.9 കോടി രൂപ നഷ്ടമാകുകയായിരുന്നു. കോവിഡ് കാലത്ത് ഓക്സിജൻ സിലിണ്ടറുകളുടെ ലഭ്യതക്കുറവാണ് ആശുപത്രികൾ കേന്ദ്രീകരിച്ചു പ്ലാന്‍റുകൾ സ്ഥാപിക്കുന്നതിലേക്ക് പദ്ധതികൾ ഉണ്ടായത്. എന്നാല്‍ പ്ലാന്‍റ് പ്രവർത്തിച്ചു തുടങ്ങിയപ്പോഴേക്കും കോവിഡ് രോഗികളുടെ എണ്ണം കുറഞ്ഞു. എന്നാല്‍ ആരോഗ്യവകുപ്പിന്‍റെ കെടുകാര്യസ്ഥത മൂലമാണ് ഓക്‌സിജന്‍ പ്ലാന്‍റ് നവീകരിക്കാതിരിക്കുന്നതെന്നും ഓക്‌സിജന്‍ പുറത്തുനിന്നു വാങ്ങുന്നതില്‍ വന്‍ അഴിമതിയുണ്ടെന്നും ഇതുമായി ബന്ധപ്പെട്ട് സമഗ്രമായ അന്വേഷണം നടത്തണമെന്നും കോഴഞ്ചേരി ഗ്രാമപഞ്ചായത്ത് മുന്‍ വൈസ് പ്രസിഡന്‍റ് എം.എസ്. പ്രകാശ്കുമാര്‍ ആവശ്യപ്പെട്ടു.

ലഹരിവിരുദ്ധ പോരാട്ടത്തിൽ മുന്നണിപ്പോരാളികളാകണം: കുര്യാക്കോസ് മാർ ഈവാനിയോസ്

റാന്നി: ലഹരിവിരുദ്ധ പോരാട്ടത്തിൽ മുന്നണിപ്പോരാളികളായി പ്രവർത്തിക്കുവാനുള്ള ഉത്തരവാദിത്വം വൈഎംസിഎകൾക്കുണ്ടെന്ന് കുര്യാക്കോസ് മാർ ഈവാനിയോസ് മെത്രാപ്പോലീത്ത. വൈഎംസിഎ റാന്നി സബ് റീജൺ പ്രവർത്തനോദ്ഘാടനവും 2025-27ലേക്ക് തെരഞ്ഞെടുക്കപ്പെട്ട കേരള റീജൺ ഭാരവാഹികളുടെ സ്വീകരണയോഗവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരള റീജൺ വൈസ് ചെയർമാൻ ജയൻ മാത്യു അധ്യക്ഷത വഹിച്ചു. നാഷണൽ കൗൺസിൽ ഓഫ് ഇന്ത്യ വൈഎംസിഎ കേരള ജനറൽ സെക്രട്ടറി എൻ.വി. എൽദോ സബ് റീജൺ പ്രഖ്യാപനം നടത്തി. കേരള റീജൺ ചെയർമാൻ പ്രഫ. അലക്സ് തോമസ്, റവ. തോമസ് കോശി പനച്ചമൂട്ടിൽ, ടി.കെ. സാജു, സണ്ണി മാത്യു, റെജി ജോർജ് ഇടയാറന്മുള, ജോസ് നെറ്റിക്കാടൻ, ജോർജ് ജോസഫ് അറയ്ക്കമണ്ണിൽ, റെജി വർഗീസ്, ജോസ് മാത്യൂസ്, അഡ്വ. ഏബ്രഹാം മാത്യു പനച്ചമൂട്ടിൽ, ജേക്കബ് കരിങ്കുറ്റി, സാംസൺ മാത്യു എന്നിവർ പ്രസംഗിച്ചു.

വന്യമൃഗ ആക്രമണം അവസാനിപ്പിക്കാൻ നടപടി സ്വീകരിക്കണം: ഡി.കെ. ജോൺ

കോന്നി: മലയോര മേഖലയിൽ തുടർച്ചയായുണ്ടാകുന്ന വന്യമൃഗ ആക്രമണത്തിന് ശാശ്വത പരിഹാരം വേണമെന്ന് കേരള കോൺഗ്രസ് വൈസ് ചെയർമാൻ പ്രഫ. ഡി.കെ. ജോൺ. കർഷക യൂണിയൻ ജില്ലാ കമ്മിറ്റിയുടെ ആഭിമുഖ്യത്തിൽ കോന്നി ടൗണിൽ നടന്ന കർഷക ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആനയും കടുവയും കാട്ടുപന്നിയും തെരുവുനായ്ക്കളും ജനവാസമേഖലയിൽ ഇറങ്ങുന്നത് നിത്യസംഭവമായിരിക്കുന്നു. വീടും കൃഷിയിടവും ഉപേക്ഷിച്ച് കർഷകർ പലായനം ചെയ്യുകയാണ്. ജനങ്ങളെ സംരക്ഷിക്കേണ്ട സർക്കാരും വനംവകുപ്പും നോക്കുകുത്തികളായി മാറിയെന്നും ഡി.കെ. ജോൺ പറഞ്ഞു. കർഷക യൂണിയൻ ജില്ലാ പ്രസിഡന്‍റ് സാം ഈപ്പൻ അധ്യക്ഷത വഹിച്ചു. കേരള കോൺഗ്രസ് സീനിയർ ജനറൽ സെക്രട്ടറി കുഞ്ഞുകോശി പോൾ, ജില്ലാ പ്രസിഡന്‍റ് വർഗീസ് മാമ്മൻ, ഷാജൻ മാത്യു, ജോസ് കൊന്നപ്പാറ, വൈ. രാജൻ, ഉമ്മൻ മാത്യു വടക്കേടം, വർഗീസ് ചള്ളയ്ക്കൽ, തോമസുകുട്ടി കുമ്മണ്ണൂർ, രജീവ് താമരപള്ളി, ദീപു ഉമ്മൻ, ജോൺ വട്ടപ്പാറ, കെ.പി. തോമസ്, ഏബ്രഹാം കലയന്തറ, കെ.സി. നായർ, ഏബ്രഹാം ചെങ്ങറ, ജോർജ് കുളഞ്ഞിക്കൊമ്പിൽ, ബിജു ജോഷ്വ, ജെൻസി കടുവുങ്കൽ, ടി.ജി. വർഗീസ് എന്നിവർ പ്രസംഗിച്ചു.

സ്വകാര്യ ബസ് സർവീസ് മേഖല കടുത്ത പ്രതിസന്ധിയിലെന്ന്, എട്ടിന് പണിമുടക്ക്

പത്തനംതിട്ട: സ്വകാര്യബസ് സർവീസ് മേഖല കടുത്ത പ്രതിസന്ധിയിലാണെന്ന് ഉടമ സംഘടന. എട്ടിനു ജില്ലയിലും സർവീസ് നിർത്തിവച്ച് സൂചനാപണിമുടക്ക് നടത്തുമെന്ന് ബസുടമ സംയുക്ത സമിതി ഭാരവാഹികൾ പത്രസമ്മേളനത്തിൽ പറഞ്ഞു. ബസുടമകളുടെ വിവിധ ആവശ്യങ്ങൾ ഉന്നിയിച്ച് മുഖ്യമന്ത്രി, ഗതാതാഗത മന്ത്രി, മറ്റു മന്ത്രിമാർ എന്നിവർക്ക് നിവേദനങ്ങൾ നൽകുകയും പ്രതിഷേധ സമരങ്ങൾ നടത്തിയിട്ടും യാതൊരു നടപടിയും ഉണ്ടാകാത്ത സാഹചര്യത്തിലാണ് പണിമുടക്കിലേക്കു നീങ്ങുന്നതെന്നും ഉടമകൾ പറഞ്ഞു. 22 മുതൽ അനശ്ചിതകാല സമരവും പ്രഖ്യാപിച്ചു. നഷ്ടത്തിലോടുന്ന കെഎസ്ആർടിസിയെ സംരക്ഷിക്കാനായി 241 ദീർഘദൂര സൂപ്പർക്ലാസ് സർവീസുകളുടെ പെർമിറ്റുകൾ ഏറ്റെടുത്ത് സ്വകാര്യബസുകൾക്ക് അവ പുതുക്കി നൽകാതെയിരിക്കുകയാണ്. ഇതു കൂടാതെ 140 കിലോമീറ്ററിനു മുകളിൽ സർവീസ് നടത്തുന്ന ബസുകളുടെയും പെർമിറ്റുകൾ ഹൈക്കോടതി ഡിവിഷൻ ബഞ്ചിൽനിന്ന് അനുകൂലവിധി ലഭിച്ചിട്ടുപോലും പുതുക്കി നൽകുന്നില്ല. അർഹതയുള്ള വിദ്യാർഥികൾക്ക് മാത്രമായി കൺസഷൻ നിജപ്പെടുത്തണം. വിദ്യാർഥികൾക്ക് നൽകിവരുന്ന കൺസഷൻ അഞ്ചു ശതമാനം ആക്കിയില്ലെങ്കിൽ സർവീസുകൾ മുഴുവൻ നിലയ്ക്കും. ബസ് ജീവനക്കാർക്ക് പിസിസി വേണമെന്നുള്ള കരിനിയമം പിൻവലിക്കണം. അക്രമം, മോഷണം, സ്ത്രീകളെയും കുട്ടികളെയും ഉപദ്രവിക്കൽ, പോക്സോ, കൊലപാതകം എന്നീ കുറ്റക്യത്യങ്ങളിൽ ഏർപ്പെട്ടിട്ടുള്ള കുറ്റവാളികൾക്ക് അവരുടെ ലൈസൻസുകൾ മരവിപ്പിക്കുന്നതിന് പോലീസ് റിപ്പോർട്ട് വാങ്ങി നടപടി എടുക്കാൻ എംവിഡിക്ക് അധികാരമുണ്ടെന്നിരിക്കേ എല്ലാത്തരം ജീവനക്കാരെയും വർഷാവർഷം പോലീസ് ക്ലിയറൻസ് എടുപ്പിച്ച് സാമ്പത്തിക നഷ്ട‌ം വരുത്തുന്നത് അവസാനിപ്പിക്കണം. ഇ-ചെലാൻ വഴിയുള്ള അന്യായമായ പിഴ ചുമത്തലും അവസാനിപ്പിക്കണം. ഇ-ചെലാൻ സംബന്ധിച്ചുള്ള നടപടി ക്രമങ്ങൾ ഒന്നും പാലിക്കാറില്ല. ബസുടമാ സംയുക്ത സമിതി കൺവീനർ ലാലു മാത്യു, ജോയിന്‍റ് കൺവീനർ മുഹമ്മദ് ഷാ, പി.ആർ. പ്രമോദ്കുമാർ, എസ്. ഷിബു, എസ്. ഷിജു എന്നിവർ പങ്കെടുത്തു.

വിദ്യാർഥിക്കുനേരേ ലൈംഗികാതിക്രമം; പ്രതിക്ക് 9 വർഷം തടവും പിഴയും

പത്തനംതിട്ട: ആറാം ക്ലാസ് വിദ്യാർഥിക്കു നേരേ ലൈംഗികാതിക്രമം കാട്ടിയ ആൾക്ക് ഒന്പതു വര്‍ഷം കഠിനതടവും 85,000 പിഴയും ശിക്ഷ വിധിച്ച് പത്തനംതിട്ട അതിവേഗ സ്‌പെഷല്‍ കോടതി. കോന്നി ഐരവണ്‍ കുമ്മണ്ണൂര്‍ നെടിയകാലാ പുത്തന്‍വീട്ടില്‍ സിദ്ദീഖ് ജമാലുദീനെയാണ് (54) കുറ്റക്കാരനെന്ന് കണ്ടെത്തി ജഡ്ജി ടി. മഞ്ജിത് വിധി പ്രസ്താവിച്ചത്. 2024 മേയ് 22ന് കോന്നി പോലീസ് രജിസ്റ്റര്‍ ചെയ്ത കേസിലാണ് വിധി പുറപ്പെടുവിച്ചത്. പോക്‌സോ നിയമത്തിലെ ബന്ധപ്പെട്ട വകുപ്പുകള്‍ പ്രകാരം അഞ്ചുവര്‍ഷത്തെ കഠിനതടവും 50,000 രൂപ പിഴയും, കടത്തിക്കൊണ്ടുപോകലിന് മൂന്നുവര്‍ഷവും 25,000 രൂപയും പട്ടികജാതി പട്ടികവര്‍ഗ പീഡന നിരോധന നിയമം അനുസരിച്ച് ഒരു വര്‍ഷവും 10,000 രൂപയുമാണ് കോടതി ശിക്ഷിച്ചത്. പിഴ അടയ്ക്കാത്തപക്ഷം നാലു മാസവും 10 ദിവസവും കഠിന തടവുകൂടി അനുഭവിക്കണമെന്നും കോടതിവിധിയില്‍ പറയുന്നു. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടര്‍ റോഷന്‍ തോമസ് കോടതിയില്‍ ഹാജരായി. എ എസ്ഐ ഹസീന പ്രോസിക്യൂഷന്‍ നടപടികളില്‍ സഹായിയായി.

ബിജെപി നേതൃത്വത്തിൽ മന്ത്രിയുടെ വസ‌തിയിലേക്ക് മാർച്ച്

കൊടുമൺ: ബിജെപി കൊടുമൺ ഏരിയാ കമ്മിറ്റിയുടെ നേതൃത്വത്തിൽ മന്ത്രി വീണാ ജോർജിന്‍റെ അങ്ങാടിക്കലിലെ വസതിയിലേക്ക് നടത്തിയ പ്രതിഷേധ മാർച്ചിൽ സംഘർഷം. പ്രതിഷേധ യോഗത്തിനു മുന്പേ പ്രവർത്തകരെ പോലീസ് അറസ്റ്റ് ചെയ്തത് സംഘർഷത്തിനിടയാക്കി. പ്രവർത്തകർ ബാരിക്കേഡ് തകർത്ത് ഉള്ളിലേക്ക് കയറാൻ ശ്രമിച്ചതോടെയാണ് പോലീസ് ഇടപെടലുണ്ടായത് . ബിജെപി ജില്ലാ സെക്രട്ടറി നിതിൻ എസ്. ശിവയെ പോലീസ് ബലംപ്രയോഗിച്ച് അറസ്റ്റ് ചെയ്തു. ബിജെപി പ്രവർത്തകരും പോലീസും തമ്മിൽ വീണ്ടും ഉന്തും തള്ളുമുണ്ടായി. കൊടുമൺ പോലീസ് സ്റ്റേഷനിലേക്ക് എത്തിച്ച പ്രവർത്തകരെ പിന്നീട് ജാമ്യത്തിൽ വിട്ടയച്ചു. ബിജെപി ജില്ലാ പ്രസിഡന്‍റ് വി.എ. സൂരജ് ഉൾപ്പെടെ സ്ഥലത്തെത്തിയിരുന്നു.

മന്ത്രിയെ സംരക്ഷിച്ചു പ്രതിരോധം തീർക്കുമെന്ന് ഡിവൈഎഫ്ഐ

പത്തനംതിട്ട: മന്ത്രി വീണാ ജോർജിനെ വേട്ടയാടാനാണ് യുഡിഎഫ് തീരുമാനമെങ്കിൽ അതിനെ ശക്തമായിത്തന്നെ നേരിടുമെന്ന് ഡിവൈഎഫ്ഐ. പ്രതിഷേധത്തിന്‍റെ പേരിൽ അക്രമം അഴിച്ചുവിടാനാണ് ഉദ്ദേശ്യമെങ്കിൽ ജനങ്ങളെ അണിനിരത്തി പ്രതിരോധിക്കുമെന്ന് ഡിവൈഎഫ്ഐ ജില്ലാ സെക്രട്ടറി ബി. നിസാം, പ്രസിഡന്‍റ് എം.സി അനീഷ് കുമാർ എന്നിവർ പറഞ്ഞു. കേരളത്തിന്‍റെ ആരോഗ്യ സംവിധാനത്തെയും പൊതുവിൽ കേരളം കൈവരിച്ച എല്ലാ നേട്ടങ്ങളെയും തകർക്കാൻ നടത്തുന്ന ഗൂഢനീക്കത്തിന്‍റെ ഭാഗമാണ് ഇപ്പോൾ നടത്തുന്ന അക്രമസമരങ്ങൾ. മരണത്തിൽനിന്ന് മുതലെടുപ്പ് നടത്തുന്നവരായി കേരളത്തിലെ കോൺഗ്രസ്‌ മാറുകയാണ്. ഇത് കേരളത്തോടുള്ള വെല്ലുവിളിയാണ്. കഴിഞ്ഞ 10 വർഷമായി അധികാരം നഷ്ടപ്പെട്ട കോൺഗ്രസും യുഡിഎഫും എങ്ങനെയെങ്കിലും അധികാരം പിടിക്കണമെന്ന ഉദ്ദേശ്യത്തോടെ കേരളത്തെ ബോധപൂർവം കലാപ ഭൂമിയാക്കാൻ ശ്രമിക്കുകയാണെന്നും ഡിവൈഎഫ്ഐ ആരോപിച്ചു.

ജില്ലയിൽ നടന്നത് 970 കോടിയുടെ വികസനം : ആരോഗ്യമന്ത്രിയെ പിന്തുണച്ച് എൽഡിഎഫ് ജില്ലാ കമ്മിറ്റി

പത്തനംതിട്ട: തെറ്റായ പ്രചാരണങ്ങളിലൂടെ ആരോഗ്യമന്ത്രിയെ‌ ആക്രമിക്കാനുള്ള ശ്രമത്തെ നേരിടുമെന്ന് എൽഡിഎഫ് ജില്ലാ നേതാക്കൾ. മന്ത്രിയെ ഒറ്റപ്പെടുത്തി ആക്രമിക്കുന്നത് തുടർന്നാൽ സർക്കാർ നൽകുന്ന സംരക്ഷണത്തിനു പുറമേ വീണാ ജോർജിന് സംരക്ഷണം നൽകാനുള്ള ഉത്തരവാദിത്വം എൽഡിഎഫും ഏറ്റെടുക്കുമെന്ന് സിപിഎം ജില്ലാ സെക്രട്ടറി രാജു ഏബ്രഹാം പത്രസമ്മേളനത്തിൽ പറഞ്ഞു. വീണാ ജോർജിനെതിരേ നടക്കുന്നത് അസൂയയും കണ്ണുകടിയും കാരണമുള്ള സമരാഭാസമാണ്. ആശയപരമായി നേരിടേണ്ടതിനു പകരം രാഷ്‌ട്രീയലക്ഷ്യങ്ങളോടെയുള്ള ആക്രമണമാണ് പ്രതിപക്ഷം നടത്തുന്നത്. മന്ത്രിയുടെ വീട്ടിലേക്ക് സമരം നടത്തുന്നതിനു പിന്നിലെ ലക്ഷ്യമെന്താണെന്നും വ്യക്തമാക്കണം. സ്വാതന്ത്ര്യം നേടിയശേഷം ഇതേവരെ നേടിയതിലും കൂടുതൽ വികസന നേട്ടങ്ങളാണ് എൽഡിഎഫ് സർക്കാർ കഴിഞ്ഞ പത്തുവർഷത്തിനിടെ പത്തനംതിട്ട ജില്ലയിൽ കൊണ്ടുവന്നത്. ആരോഗ്യ രംഗത്തുണ്ടായ വലിയ വികസന നേട്ടങ്ങൾ ജനങ്ങൾ ശ്രദ്ധിച്ച് തുടങ്ങിയിട്ടുണ്ട്. കഴിഞ്ഞ ഒന്പതു വർഷത്തിനിടെ 970 കോടി രൂപയുടെ വികസനമാണ് ആരോഗ്യ രംഗത്ത് ഉണ്ടായത്. അതിനു മുന്പുള്ള യുഡിഎഫ് ഭരണകാലത്ത് 15 കോടി രൂപയാണ് ആരോഗ്യമേഖലയ്ക്ക് ജില്ലയിൽ അനുവദിച്ചത്. 2021 - 25 കാലയളവിൽ 115.58 കോടി രൂപയുടെ വികസന പ്രവർത്തനങ്ങൾ ആറന്മുള നിയോജക മണ്ഡലത്തിൽ മാത്രം നടപ്പിലാക്കി. പത്തനംതിട്ട ജനറൽ ആശുപത്രിയുടെ മുഖച്ഛായ തന്നെ മാറുകയാണ്. പഴയ കെട്ടിടങ്ങൾക്കു പകരം പുതിയ കെട്ടിടങ്ങളുണ്ടാകുന്നു. തകർച്ച നേരിട്ട കെട്ടിടം നവീകരിക്കുകയാണ്. ആധുനിക ചികിത്സാ സംവിധാനങ്ങൾ ഏർപ്പെടുത്തി. കോന്നി മെഡിക്കൽ കോളജ് പൂർണസജ്ജമായിക്കൊണ്ടിരിക്കുകയാണ്. 368 കോടി രൂപയുടെ രണ്ടാംഘട്ട വികസനമാണ് മെഡിക്കൽ കോളജിൽ നടക്കുന്നത്. ഒന്നാംഘട്ടത്തിൽ 167.33 കോടി രൂപ അനുവദിച്ച് വികസന പ്രവർത്തനങ്ങൾ നടപ്പാക്കി. ജില്ലാ ആശുപത്രിയിലും 30 കോടിയുടെ നിർമാണ പ്രവർത്തനങ്ങൾ നടന്നുവരുന്നു. സിഎച്ച്സികളും താലൂക്ക് ആശുപത്രികളും നവീകരിച്ചു. മെച്ചപ്പെട്ട ചികിത്സാ സംവിധാനങ്ങൾ ഏർപ്പെടുത്തി. പത്തനംതിട്ട, കോന്നി, സീതത്തോട് എന്നിവിടങ്ങളിൽ പുതിയ നഴ്സിംഗ് കോളജുകൾ നിലവിൽ വന്നു. വികസന നേട്ടങ്ങളെ ഇകഴ്ത്താനുള്ള ശ്രമമാണ് യുഡിഎഫും ബിജെപിയും നടത്തുന്നതെന്നും എൽഡിഎഫ് കുറ്റപ്പെടുത്തി. എൽഡിഎഫ് ജില്ലാ കൺവീനർ അലക്സ് കണ്ണമല, സിപിഎം സംസ്ഥാന കമ്മിറ്റി അംഗം കെ.പി. ഉദയഭാനു, സിപിഎം ജില്ലാ കമ്മിറ്റി അംഗം ആർ. അജയകുമാർ എന്നിവരും പത്രസമ്മേളനത്തിൽ പങ്കെടുത്തു.

ജനറൽ ആശുപത്രി കെട്ടിടം ബലപ്പെടുത്തൽ വൈകിപ്പിച്ചത് കോൺഗ്രസെന്ന്

പത്തനംതിട്ട: ജനറൽ ആശുപത്രിയിലെ ബി ആൻഡ് സി ബ്ലോക്കിന്‍റെ അറ്റകുറ്റപ്പണികൾ വൈകിപ്പിച്ചത് കോൺഗ്രസാണെന്ന് എൽഡിഎഫ് കുറ്റപ്പെടുത്തി. എച്ച്എംസി യോഗത്തിൽ ആശുപത്രി മാറ്റത്തെ സംബന്ധിച്ച തീരുമാനം എടുക്കാൻ തടസമുണ്ടാക്കിയത് അനാവശ്യമായി യോഗത്തിൽ കടന്നുകയറിയ കോൺഗ്രസ് അംഗമാണ്. എംപിയുടെ പ്രതിനിധിയെന്ന പേരിൽ എത്തിയ ഇയാൾക്ക് യോഗത്തിൽ പങ്കെടുക്കാനാകുമായിരുന്നില്ല. ബി ആൻഡ് സി ബ്ലോക്കിലെ സംവിധാനങ്ങൾ കോന്നി മെഡിക്കൽ കോളജിലേക്ക് മാറ്റുന്നതിനെ കോൺഗ്രസ് എതിർക്കുകയായിരുന്നു. ആശുപത്രി സംവിധാനങ്ങൾ മെഡിക്കൽ കോളജിലേക്ക് മാറ്റുന്നതുമായി ബന്ധപ്പെട്ട ഉത്തരവ് വൈകാതെ ഇറങ്ങുമെന്നും എൽഡഎഫ് നേതാക്കൾ പറഞ്ഞു. കെട്ടിടനിർമാണവുമായി ബന്ധപ്പെട്ടുണ്ടാകുന്ന അസൗകര്യങ്ങൾ രോഗികൾ മനസിലാക്കണം. എന്നാൽ മെഡിക്കൽ കോളജിൽ എല്ലാ സൗകര്യങ്ങളും ഉറപ്പാക്കുമെന്നും എൽഡിഎഫ് നേതാക്കൾ പറയുന്നു. ജനറൽ ആശുപത്രി സൗകര്യങ്ങൾ ഉപയോഗപ്പെടുത്താൻ ബദൽ നിർദേശങ്ങളുണ്ടായെങ്കിലും പ്രായോഗികമായിരുന്നില്ല. പത്തനംതിട്ട സർക്കാർ നഴ്സിംഗ് കോളജിന്‍റെ പ്രശ്നങ്ങൾ പരിഹരിച്ച് അനുമതി ഉറപ്പാക്കും. കോഴ്സ് ആരംഭിച്ച സർക്കാരിനു കുട്ടികൾക്ക് അനുമതി വാങ്ങി നൽകാനും ബാധ്യതയുണ്ടെന്ന് സിപിഎം ജില്ലാ സെക്രട്ടറി ചൂണ്ടിക്കാട്ടി. നഴ്സിംഗ് കോളജ് കുട്ടികളെ കോന്നി മെഡിക്കൽ കോളജിൽ ക്ലിനിക്കൽ പഠനത്തിനെത്തിക്കാൻ കെഎസ്ആർടിസി യാത്രാസൗകര്യം ഉറപ്പാക്കിയിട്ടുണ്ട്. എംഎൽഎയുടെ ആസ്തിവികസന ഫണ്ടുപയോഗിച്ച് കോളജിന് ബസ് വാങ്ങി നൽകും. ക്ലാസ് മുറികൾ കൂടുതൽ അടിസ്ഥാന സൗകര്യങ്ങളോടെ മാറ്റുന്നതിനും തീരുമാനമായിട്ടുണ്ടെന്ന് രാജു ഏബ്രഹാം പറഞ്ഞു. പത്തനംതിട്ട ജനറൽ ആശുപത്രിയുടെ നിയ‌ന്ത്രണാധികാരം നഗരസഭയിൽനിന്നു ജില്ലാ പഞ്ചായത്തിനെ ഏല്പിച്ചതുമായി ബന്ധപ്പെട്ട് സിപിഎമ്മിൽ തർക്കമില്ലെന്നും അദ്ദേഹം അഭിപ്രായപ്പെട്ടു.

താലൂക്ക് ആശുപത്രികളിലേക്ക് മാർച്ച് എട്ടിന്

പത്തനംതിട്ട: ആരോഗ്യമന്ത്രി വീണാ ജോര്‍ജിന്‍റെ രാജിയാവശ്യപ്പെട്ടും സര്‍ക്കാര്‍ ആശുപത്രികളുടെ തകര്‍ച്ചയ്ക്ക് പരിഹാരം ഉണ്ടാക്കണമെന്ന് ആവശ്യപ്പെട്ടും ജില്ലയിലെ താലൂക്ക് ആശുപത്രികളിലേക്ക് എട്ടിനു ബ്ലോക്ക് കോണ്‍ഗ്രസ് കമ്മിറ്റികളുടെ നേതൃത്വത്തില്‍ ജനകീയ മാര്‍ച്ച് നടത്തും. തിരുവല്ലയില്‍ കെപിസിസി രാഷ്‌ട്രീയകാര്യ സമിതി അംഗം പ്രഫ. പി.ജെ. കുര്യന്‍, അടൂരില്‍ ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍, പത്തനംതിട്ടയില്‍ കെപിസിസി ജനറല്‍ സെക്രട്ടറി പഴകുളം മധു, മല്ലപ്പള്ളിയില്‍ മുന്‍ എംഎല്‍എ കെ. ശിവദാസന്‍ നായര്‍, റാന്നിയില്‍ മുന്‍ ഡിസിസി പ്രസിഡന്‍റ് പി. മോഹന്‍രാജ് എന്നിവര്‍ ജനകീയ മാര്‍ച്ചുകള്‍ ഉദ്ഘാടനം ചെയ്യും.

ആരോഗ്യമന്ത്രിക്കെതിരേ സമരം കടുപ്പിച്ച് പ്രതിപക്ഷം

പത്തനംതിട്ട: ആരോഗ്യമന്ത്രിയുടെ രാജിയാവശ്യപ്പെട്ട് ജില്ലയിൽ പ്രതിപക്ഷ സംഘടനകൾ സമരം ശക്തമാക്കി. മന്ത്രിയുടെ വീട്ടിലേക്കുൾപ്പെടെ ഇന്നലെയും സമരം നടന്നു. ജില്ലയിലെ വിവിധ പ്രദേശങ്ങളിൽ പ്രകടനങ്ങളും യോഗങ്ങളും നടന്നു. പത്തനംതിട്ടയിൽ യൂത്ത് കോൺഗ്രസ് വൈകുന്നേരം കപ്പലും കപ്പിത്താനുമായി നടത്തിയ പ്രതീകാത്മക സമരം ശ്രദ്ധേയമായി. മുഖ്യമന്ത്രി പിണറായി വിജയന്‍റെയും മന്ത്രി വീണാ ജോർജിന്‍റെയും മുഖംമൂടി ധരിച്ച് രണ്ടു യൂത്ത് കോൺഗ്രസ് പ്രവർത്തകരെ മുന്നിൽ നിർത്തിയായിരുന്നു പ്രകടനം. കപ്പൽ ഉരുട്ടിയുള്ള സമരം നഗരത്തിനു പുതുമയായി. ഇതിനിടെ ജനറൽ ആശുപത്രി ബി ആൻഡ് സി ബ്ലോക്കിന്‍റെ ശോച്യാവസ്ഥ ചൂണ്ടിക്കാട്ടി ഡിസിസി വൈസ് പ്രസിഡന്‍റ് എ. സുരേഷ് കുമാർ, യൂത്ത് കോൺഗ്രസ് സംസ്ഥാന സെക്രട്ടറി നഹാസ് പത്തനംതിട്ട തുടങ്ങിയവരുടെ നേതൃത്വത്തിൽ ചുവരുകളിൽ തൂണു നാട്ടി പ്രതിഷേധിച്ചു. ശോച്യാവസ്ഥ കാരണം കെട്ടിടത്തിന്‍റെ പല ഭാഗങ്ങളും ഇളകിത്തുടങ്ങിയിട്ടുണ്ട് . കോൺഗ്രസ്, യൂത്ത് കോൺഗ്രസ് പ്രവർത്തകർ തൂണുകളുമായി എത്തി കെട്ടിടത്തിന് താങ്ങു കൊടുത്ത് നിർത്തി. ഡിസിസി ജനറൽ സെക്രട്ടറി കെ. ജാസിംകുട്ടി, കെഎസ്‌യു ജില്ലാ ജനറൽ സെക്രട്ടറി സുഹൈൽ നജീബ്, ജില്ലാ ജനറൽ സെക്രട്ടറി കാർത്തിക് മുരിങ്ങമംഗലം, നസീം കുമ്മണ്ണൂർ, ബാബുജി ഈശോ, അബ്ദുൽ ഷുക്കൂർ, അജ്മൽ കരിം, സജി അലക്സാണ്ടർ എന്നിവർ നേതൃത്വം നൽകി.

ബി ആൻഡ് സി ബ്ലോക്കിന് അറ്റകുറ്റപ്പണി : പത്തനംതിട്ട ജനറൽ ആശുപത്രിയിൽ ശസ്ത്രക്രിയകൾ ഇനി ഇല്ല

പത്തനംതിട്ട: ജനറൽ ആശുപത്രി വളപ്പിൽ അപകടാവസ്ഥയിലായ ബി ആൻഡ് സി ബ്ലോക്കിലെ ശസ്ത്രക്രിയകൾ ഉൾപ്പെടെയുള്ള ചികിത്സകൾ നിർത്തി. ഇതേ ബ്ലോക്കിലെ എല്ലാ ശസ്ത്രക്രിയാ വിഭാഗങ്ങളും കോന്നി സർക്കാർ മെഡിക്കൽ കോളജിലേക്ക് മാറ്റുകയാണ്. ഇതിനൊപ്പം കിടത്തിച്ചികിത്സയും കോന്നിയിലേക്കു മാറ്റപ്പെടും. 414 കിടക്കകളാണ് നിലവിൽ ബി ആൻഡ് സി ബ്ലോക്കിലുണ്ടായിരുന്നത്. ആശുപത്രിയുടെ പഴയ അത്യാഹിതവിഭാഗം പൊളിച്ചുനീക്കിയതോടെ ഐപി വിഭാഗത്തിലെ കിടക്കകളുടെ എണ്ണം കുറഞ്ഞിരുന്നു. ഈ വാർഡിൽ പ്രവർത്തിച്ചിരുന്ന മൈനർ ഓപ്പറേഷൻ വിഭാഗത്തിലെ ഐപി വിഭാഗം നിലവിൽ ശബരിമല വാർഡിലുണ്ട്. എന്നാൽ ശസ്ത്രക്രിയാ വിഭാഗം ഡോക്ടർമാർ കോന്നിയിലേക്ക് മാറുകയാണെങ്കിൽ രോഗികളെ ഇവിടെ കിടത്തി ചികിത്സിക്കാൻ ബുദ്ധിമുട്ടാകും. ഫലത്തിൽ ജനറൽ ആശുപത്രിയിൽ ഒപി, അത്യാഹിത വിഭാഗങ്ങൾ മാത്രമായിരിക്കും ഇനി ഉണ്ടാകുക. ശസ്ത്രക്രിയാ വിഭാഗങ്ങളായ ഒബ്സ്റ്റട്രിക്സ് ആൻഡ് ഗൈനക്കോളജി, അസ്ഥിരോഗവിഭാഗം, ജനറൽ സർജറി, ഇഎൻടി എന്നിവ മെഡിക്കൽ കോളജിലേക്ക് മാറ്റുന്നതിനായാണ് തീരുമാനമെടുത്തിരിക്കുന്നത്. എല്ലാ വിഭാഗം ഒപിയും ജനറൽ ആശുപത്രിയിൽ തുടരും. ഒപിയിലെത്തുന്നവരിൽ കിടത്തി ചികിത്സ വേണ്ടവരെ കോന്നി മെഡിക്കൽ കോളജിലേക്ക് റഫർ ചെയ്യാനാണ് തീരുമാനം. അത്യാഹിത വിഭാഗത്തിൽ എത്തുന്നവരെയും ഇനി കോന്നിയിലേക്ക് മാറ്റും. ഉത്തരവുകൾ വന്നില്ല, അവ്യക്തതകൾ ബാക്കി ബി ആൻഡ് സി ബ്ലോക്ക് നവീകരിക്കാൻ തീരുമാനമുണ്ടായിട്ടു വർഷങ്ങളായെങ്കിലും ഇതിലെ സംവിധാനങ്ങൾ മാറ്റുന്നതിലെ അവ്യക്തത തുടരുകയാണ്. ഇതേവരെ ഉത്തരവുകൾ വന്നിട്ടില്ലെങ്കിലും ആശുപത്രി അധികൃതർ ഇന്നലെ മുതൽ ബി ആൻഡ് സി ബ്ലോക്കിലെ സംവിധാനങ്ങൾ താത്കാലികമായി നിർത്തിവയ്ക്കുകയായിരുന്നു. 2023 ഡിസംബറിൽ പഴയ അത്യാഹിത വിഭാഗം പൊളിച്ച് പണികൾ തുടങ്ങിയതോടെ ബി ആൻഡ് സി ബ്ലോക്കിന്‍റെ നില കൂടുതൽ പരുങ്ങലിലാകുകയായിരുന്നു. തുടർന്നാണ് അടിയന്തര നടപടിയെന്നോണം അറ്റകുറ്റപ്പണിക്കു തീരുമാനമുണ്ടായത്. എൻഎച്ച്എം മുഖേന 5.5 കോടിരൂപയും ലഭ്യമാക്കി. നേരത്തെ 2.5 കോടി രൂപയ്ക്ക് എസ്റ്റിമേറ്റെടുത്ത ജോലികൾക്കാണ് പൊടുന്നനെ തുക ഉയർന്നതെന്നതും ശ്രദ്ധേയമാണ്. ആരോഗ്യവകുപ്പിനു കീഴിലുള്ള ജനറൽ ആശുപത്രിയിലെ സംവിധാനങ്ങൾ ആരോഗ്യ വിദ്യാഭ്യാസ വകുപ്പിനു കീഴിലെ കോന്നി മെഡിക്കൽ കോളജിലേക്കു മാറ്റുന്നതും സാങ്കേതിക പ്രശ്നങ്ങൾക്കു കാരണമായിട്ടുണ്ട്. ഡോക്ടർമാരുടെ സംഘടനകൾ ആശുപത്രി മാറ്റത്തെ അംഗീകരിച്ചിട്ടില്ല. ഡോക്ടർമാരെയും ജീവനക്കാരെയും ഉൾപ്പെടെ മാറ്റണമെങ്കിൽ ഇത് സാങ്കേതിക കുരുക്കുകൾ വർധിപ്പിക്കും. ജനറൽ ആശുപത്രിയിൽ ഒപിയും തുടർചികിത്സ മെഡിക്കൽ കോളജിലുമെന്ന നിർദേശവും പ്രായോഗികമല്ലെന്ന് പറയുന്നു. ഇതിലെല്ലാം ഡോക്ടർമാർ വിയോജിപ്പ് അറിയിച്ചിട്ടുണ്ട്. 17 കിലോമീറ്റർ അകലെ കോന്നി മെഡിക്കൽ കോളജിലേക്ക് തുടർചികിത്സയ്ക്ക് ആളുകളെ എങ്ങനെ എത്തിക്കുമെന്നും വ്യക്തമല്ല. ഒപിയിലെത്തുന്നവരിൽ കിടത്തിച്ചികിത്സ വേണ്ടവരെ മെഡിക്കൽ കോളജിലെത്തിക്കാൻ വാഹനസൗകര്യം ഏർപ്പെടുത്തുമെന്ന നിർദേശം പ്രാവർത്തികമാക്കുന്നതു സംബന്ധിച്ചും തീരുമാനമുണ്ടായിട്ടില്ല. ഒപി ഇവിടെ തുടരുന്ന സാഹചര്യത്തിൽ തുടർചികിത്സ വേണ്ടവരെ പരിശോധിക്കാനും ശസ്ത്രക്രിയകൾക്കും ജനറൽ ആശുപത്രി ഡ്യൂട്ടിയിലുള്ള ഡോക്ടർമാരെയും ജീവനക്കാരെയും മെഡിക്കൽ കോളജിലേക്ക് എത്തിക്കാനും ക്രമീകരണം വേണ്ടിവരും. സാധനങ്ങൾ താഴെയിറക്കാൻ എൻഎച്ച്എം ഫണ്ട് ജനറൽ ആശുപത്രി ബി ആൻഡ് സി ബ്ലോക്കിലെ ശസ്ത്രക്രിയാ ഉപകരണങ്ങളടക്കം താഴെ എത്തിക്കുന്നത് എൻഎച്ച്എം ഫണ്ടുപയോഗിച്ച്. ഇതുമായി ബന്ധപ്പെട്ട അനുമതി എൻഎച്ച്എമ്മിൽനിന്നു ലഭിക്കാൻ വൈകിയതോടെയാണ് നടപടിക്രമങ്ങൾ വൈകിയത്. എട്ടു ലക്ഷം രൂപയാണ് എൻഎച്ച്എം ഇതിനായി നൽകുന്നത്. എച്ച്എംസി യോഗം കൂടി തീരുമാനങ്ങളെടുക്കാനായിട്ടില്ല. ഇതുമായി ബന്ധപ്പെട്ട അവ്യക്തതകൾ തുടരുന്നതിനിടെ 21 മുതൽ അറ്റകുറ്റപ്പണികൾ തുടങ്ങാനുള്ള ഒരുക്കത്തിലാണ് കരാറുകാർ. ഉത്തരവിറങ്ങിക്കഴിഞ്ഞാൽ എച്ച്എംസി കൂടി തീരുമാനമെടുക്കേണ്ടതുണ്ട്.

ഇരവിപേരൂർ ഗവ.യുപിഎസിൽ ക്രിയേറ്റീവ് കോർണർ

ഇരവിപേരൂർ: ഗവൺമെന്‍റ് യുപി സ്കൂളിൽ ക്രിയേറ്റീവ് കോർണർ ഉദ്ഘാടനം ഗ്രാമപഞ്ചായത്ത് പ്രസിഡന്‍റ് കെ.ബി. ശശിധരൻപിള്ള നിർവഹിച്ചു. പൊതുവിദ്യാഭ്യാസ മേഖലയിലെ അപ്പർ പ്രൈമറി ക്ലാസുകളിലെ കുട്ടികളുടെ പഠന പ്രവർത്തനങ്ങൾ കൂടുതൽ ക്രിയാത്മകമാക്കുന്നതിനുള്ള പഠനാന്തരീക്ഷം ഒരുക്കുന്ന പദ്ധതിയാണിത്. സമഗ്രശിക്ഷ കേരളയുടെ നേതൃത്വത്തിൽ കൊച്ചി ശാസ്ത്ര സാങ്കേതിക സർവകലാശാലയുമായി സഹകരിച്ചാണ് പദ്ധതി നടപ്പിലാക്കുന്നത്. ഗ്രാമപഞ്ചായത്ത് വൈസ് പ്രസിഡന്‍റ് സാലി ജേക്കബ് അധ്യക്ഷത വഹിച്ച യോഗത്തിൽ സ്റ്റാൻഡിംഗ് കമ്മിറ്റി ചെയർമാൻ ജോസഫ് മാത്യു, പഞ്ചായത്തംഗങ്ങളായ അമ്മിണി ചാക്കോ, എം.എസ്. മോഹൻ, വിദ്യാസാഗർജി, ജോളിമോൾ ജോർജ്, പ്രഥമാധ്യാപകൻ മനോജ് ഇ. തോമസ്, കോ ഓർഡിനേറ്റർമാരായ മഞ്ജുഷ രാജൻ, എസ്. ദേവിമോൾ എന്നിവർ പ്രസംഗിച്ചു.

കെഎച്ച്ആർഎ ലഹരിവിരുദ്ധ കാന്പെയിൻ

പത്തനംതിട്ട: കേരള ഹോട്ടൽ ആൻഡ് റസ്റ്ററന്‍റ് അസോസിയേഷൻ സംസ്ഥാന വ്യാപകമായി ലഹരിക്കെതിരേ നടത്തിവരുന്ന ബോധവത്കരണ പരിപാടികളുടെ ഭാഗമായി പത്തനംതിട്ട യൂണിറ്റ് കാന്പെയിൻ ആരംഭിച്ചു. കൈപ്പട്ടൂരിൽ പത്തനംതിട്ട പോലീസ് സബ് ഇൻസ്പെക്ടർ എസ്.അലക്സ്കുട്ടി ഉദ്ഘാടനം ചെയ്തു. യൂണിറ്റ് പ്രസിഡന്‍റ് നവാസ് തനിമ അധ്യക്ഷത വഹിച്ചു. പത്തനംതിട്ട വനിത സിവിൽ എക്സൈസ് ഓഫീസർ എ.എസ്. ഗീതാലക്ഷ്മി ബോധവത്കരണ ക്ലാസ് നടത്തി. കെഎച്ച്ആർഎ സംസ്ഥാന വൈസ് പ്രസിഡന്‍റ് കെ.എം. രാജ, സംസ്ഥാന കമ്മിറ്റി അംഗം എൻ.കെ. നന്ദകുമാർ, ജില്ല പ്രസിഡന്‍റ് സജി കോശി ജോർജ്, സക്കീർ ശാന്തി സുനിത ബിജു, റംല ഇസ്മായിൽ തുടങ്ങിയവർ പ്രസംഗിച്ചു.

സ്‌കൂള്‍ ലൈബ്രറികള്‍ സജീവമാക്കണം: ഡെപ്യൂട്ടി സ്പീക്കര്‍

അടൂർ: സ്‌കൂള്‍ ലൈബ്രറികള്‍ സജീവമായി ഉപയോഗിക്കാന്‍ കുട്ടികളെ പ്രേരിപ്പിക്കണമെന്ന് നിയമസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. അടൂര്‍ മണ്ഡലത്തില്‍ എംഎല്‍എ ഫണ്ട് വിനിയോഗിച്ച് സ‌്കൂള്‍ ലൈബ്രറികള്‍ക്ക് നല്‍കിയ പുസ്തകങ്ങളുടെ വിതരണോദ്ഘാടനം അടൂര്‍ ബിആര്‍സി ഹാളില്‍ നിര്‍വഹിച്ചു പ്രസംഗിക്കുകയായിരുന്നു അദ്ദേഹം. അടൂര്‍ നഗരസഭ ചെയര്‍മാന്‍ കെ. മഹേഷ് കുമാര്‍ അധ്യക്ഷത വഹിച്ചു. അങ്ങാടിക്കല്‍ എസ്എന്‍വി സ്‌കൂള്‍ മാനേജര്‍ എസ്.ടി. ബോസ് പ്രസംഗിച്ചു. മണ്ഡലത്തിലെ മുഴുവന്‍ സ്‌കൂളുകള്‍ക്കും പുസ്തകങ്ങള്‍ വിതരണം ചെയ്തു.

പാഠഭാഗങ്ങൾ ചിത്രകഥയായി അവതരിപ്പിച്ച് കാർട്ടൂണിസ്റ്റ് ഷാജി മാത്യു

മലയാലപ്പുഴ: മുമ്പിലെ ബോർഡിൽ പാഠഭാഗങ്ങൾ ചിത്രകഥയായി വരച്ചുകണ്ടപ്പോൾ വായിച്ചു രസിച്ച് കുട്ടികൾ. വായനപക്ഷാചരണത്തിന്‍റെ ഭാഗമായി കോഴികുന്നം കെഎച്ച്എം എൽപി സ്കൂളിൽ നടന്ന പരിപാടിയിലാണ് പാഠപുസ്തക ചിത്രകാരൻ കാർട്ടൂണിസ്റ്റ് ഷാജി മാത്യു മൂന്ന്, നാല് ക്ലാസുകളിലെ മലയാളം പാഠഭാഗങ്ങൾ ചിത്രകഥയായി കുട്ടികൾക്കു മുന്നിൽ വരച്ചത്. ഇതേ പാഠപുസ്തകങ്ങളിലെ വരകൾ നിർവഹിച്ചിട്ടുള്ളതു ഷാജി മാത്യുവാണ്. പ്രധാനാധ്യാപിക ഗീതാരാജ് അധ്യക്ഷത വഹിച്ചു. ഷൈനി വചനപാലൻ, സുധാകുമാരി, രാജി മുരുകൻ, ചിത്ര, സുമ, കെ.എസ്. ശാലു എന്നിവർ പ്രസംഗിച്ചു.

ത്രിദിന വ്യക്തിത്വ വികസന പരിശീലനോദ്ഘാടനം നടത്തി

പെരുനാട്: റാന്നി പെരുനാട് ഗ്രാമപഞ്ചായത്ത് വിജ്ഞാന കേരളം പദ്ധതിയുടെ ഭാഗമായി സംഘടിപ്പിക്കുന്ന ത്രിദിന വ്യക്തിത്വ വികസന പരിശീലന പരിപാടിയുടെ ഉദ്ഘാടനം പ്രസിഡന്‍റ് പി.എസ്. മോഹനന്‍ നിര്‍വഹിച്ചു. വൈസ് പ്രസിഡന്‍റ് ഡി. ശ്രീകല അധ്യക്ഷത വഹിച്ചു. റാന്നി ബ്ലോക്ക് പഞ്ചായത്ത് പ്രസിഡന്‍റ് കെ.എസ്. ഗോപി മുഖ്യപ്രഭാഷണം നടത്തി. പരിശീലക ജൂലി മേരി ഏബ്രഹാം ത്രിദിന പരിശീലനത്തിനു നേതൃത്വം നല്‍കും. ഗ്രാമ പഞ്ചായത്ത് അംഗം സുകുമാരന്‍, ആസൂത്രണ സമിതി ഉപാധ്യക്ഷന്‍ പി.എൻ.വി ധരന്‍, സെക്രട്ടറി സുനില്‍ കുമാര്‍, പ്രോഗ്രാം മാനേജര്‍ ഡോ. ശ്രീകാന്ത് എന്നിവര്‍ പങ്കെടുത്തു.

ബൈക്ക് യാത്രികന് പരിക്കേറ്റു

അടൂർ: എംസി റോഡിൽ അരമനപ്പടി മാരുതി ഷോറൂമിന്‍റെ മുൻവശത്തായി വൃക്ഷശിഖരം ഒടിഞ്ഞുവീണ‌് അതുവഴി വന്ന ബൈക്ക് യാത്രക്കാരന് സാരമായ പരിക്കേറ്റു. അടൂരിൽനിന്നു ഫയർഫോഴ്സ് എത്തി ബൈക്ക് യാത്രക്കാരനെ ആശുപത്രിയിലാക്കുകയും റോഡിൽ വീണ മരം മുറിച്ചുമാറ്റി ഗതാഗതതടസം നീക്കുകയും ചെയ്തു. ഇന്നലെ രാവിലെ 8 30ഓടെയാണ് സംഭവം. എംസി റോഡിൽ അരമണിക്കൂറോളം ഗതാഗതതടസം നേരിട്ടു.

വിദ്യാകിരണം സ്‌കോളര്‍ഷിപ്പ് പദ്ധതി

പത്തനംതിട്ട: ഭിന്നശേഷിക്കാരായ മാതാപിതാക്കളുടെ കുട്ടികള്‍ക്ക് വിദ്യാഭ്യാസ ധനസഹായം അനുവദിക്കുന്ന സാമൂഹിക നീതി വകുപ്പിന്‍റെ വിദ്യാകിരണം സ്‌കോളര്‍ഷിപ്പ് പദ്ധതിയിലേക്ക് അപേക്ഷ ക്ഷണിച്ചു. സര്‍ക്കാര്‍, എയ്ഡഡ് മേഖലയില്‍ പഠിക്കുന്ന വിദ്യാര്‍ഥികള്‍ക്ക് പുറമെ സ്വകാര്യ, സ്വാശ്രയ സ്ഥാപനങ്ങളില്‍ മെറിറ്റ് ക്വാട്ടയില്‍ പ്രവേശനം നേടിയിട്ടുള്ള വിദ്യാര്‍ഥികള്‍ക്കും സ്‌കോളര്‍ഷിപ്പിന് ഓണ്‍ലൈനായി അപേക്ഷിക്കാം. മെറിറ്റ് ക്വാട്ടയില്‍ പ്രവേശനം നടിയെന്നുള്ള സ്‌കൂൾ,കോളജ് പ്രിന്‍സിപ്പലിന്‍റെ സാക്ഷ്യപത്രം അപേക്ഷയോടൊപ്പം ഹാജരാക്കണം. അവസാന തീയതി ഡിസംബര്‍ 31. ഫോണ്‍ : 0468 2325168.

ഐസിഎസ്ഇ ബാസ്കറ്റ് ബോൾ ചാന്പ്യൻഷിപ്പ്: ബഥനി അക്കാദമി ഫൈനലിൽ

വെണ്ണിക്കുളം: ബഥനി അക്കാദമി ഇൻഡോർ സ്റ്റേഡിയത്തിൽ നടന്ന ഐസിഎസ്ഇ സോൺ ബി റീജിയണൽ ബാസ്കറ്റ്ബോൾ ചാമ്പ്യൻഷിപ്പിൽ ആതിഥേയരായ ബഥനി അക്കാദമി ആൺകുട്ടികളുടെ വിഭാഗത്തിൽ ( അണ്ടർ 19) ഫൈനലിൽ പ്രവേശിച്ചു. അണ്ടർ 19 ഡിവിഷൻ സെമി ഫൈനലിൽ ബഥനി അക്കാദമി വെണ്ണിക്കുളം ചെറിയനാട് സെന്‍റ് ജോസഫ്‌സിനെ (37-30) പരാജയപ്പെടുത്തി. മറ്റൊരു മത്സരത്തിൽ പാറയിക്കുളം സെന്‍റ് ജോസഫ് കോൺവെന്‍റ് സ്‌കൂളിനെ (36-33) കോഴഞ്ചേരി മുളമൂട്ടിൽ സെൻട്രൽ സ്കൂൾ പരാജയപ്പെടുത്തി. ഫൈനലിൽ ബഥനി അക്കാദമി മുളമൂട്ടിൽ സെൻട്രൽ സ്കൂളിനെ നേരിടും. അണ്ടർ 14 സെമി ഫൈനലിൽ ചെറിയനാട് സെന്‍റ് ജോസഫ്‌സ് ബഥനി അക്കാദമിയെ (19 -10 ) പരാജയപ്പെടുത്തി. ചേർത്തല സെന്‍റ് ആൻസ് ടീം മല്ലപ്പള്ളി സോഫിയ ഇന്‍റർനാഷണൽ അക്കാദമിയെ പരാജയപ്പെടുത്തി (14 - 2). ആൺകുട്ടികളുടെ അണ്ടർ 17 ഡിവിഷനിൽ ചെറിയനാട് സെന്റ് ജോസഫ്‌സ്, മാവേലിക്കര സെന്‍റ് ആൻസ് ചേർത്തല ഇൻഫന്‍റ് ജീസസ് സ്‌കൂൾ മാവേലിക്കര, വെണ്ണിക്കുളം ബഥനി അക്കാദമി എന്നിവർ സെമിഫൈനലിൽ പ്രവേശിച്ചു. അണ്ടർ 17 ക്വാർട്ടർ ഫൈനലിൽ സെന്‍റ് ജോസഫ്‌സ് ചെറിയനാട്, സെന്‍റ് ജോസഫ്‌സ് പറയകുളം, സെന്റ് ജോസഫ്‌സ് എന്നിവയെ പരാജയപ്പെടുത്തി. ആൻസ് ചേർത്തല ബിഎംവി മാവേലിക്കരയെയും (41-2) ഇൻഫന്‍റ് ജീസസ് മാവേലിക്കര, തിരുവല്ല മാർത്തോമ്മ റസിഡൻഷൽ സ്കൂളിനെയും (27-5) ബഥനി അക്കാദമി പട്ടണക്കാട് സെന്‍റ് ജോസഫിനെയും പരാജയപ്പെടുത്തി.

ക്നാനായ മലങ്കര പുനരൈക്യം 104-ാമത് വാര്‍ഷികം ഇന്ന് കല്ലിശേരിയില്‍

കല്ലിശേരി: ക്നാനായ മലങ്കര പുനരൈക്യത്തിന്‍റെയും കേരള കത്തോലിക്കാ സഭയില്‍ അന്ത്യോക്യന്‍ സുറിയാനി റീത്ത് (മലങ്കര റീത്ത്) അനുവദിക്കപ്പെട്ടതിന്‍റെയും 104-ാമത് വാര്‍ഷികം ഇന്ന് കല്ലിശേരിയില്‍ സംഘടിപ്പിക്കും. കല്ലിശേരി സെന്‍റ് മേരീസ് ക്നാനായ മലങ്കര കത്തോലിക്കാ മെത്രാസന ദേവാലയത്തില്‍ നടക്കുന്ന ആഘോഷങ്ങള്‍ക്ക് ഉച്ചകഴിഞ്ഞ് മൂന്നിന് ഉമയാറ്റിന്‍കര ഓര്‍ത്തഡോക്സ് ഇടവക കുരിശടിയില്‍നിന്ന് ആരംഭിക്കുന്ന പുനരൈക്യ റാലിയോടെ തുടക്കമാകും. തുടര്‍ന്ന് സഹായമെത്രാന്‍ ഗീവര്‍ഗീസ് മാര്‍ അപ്രേമിന്‍റെ അധ്യക്ഷതയില്‍ പൊതുസമ്മേളനം സഹായമെത്രാന്‍ മാര്‍ ജോസഫ് പണ്ടാരശേരില്‍ ഉദ്ഘാടനം ചെയ്യും. പ്രൊ-പ്രോട്ടോസിഞ്ചലൂസ് ഫാ. തോമസ് ആനിമൂട്ടില്‍, ഫൊറോന വികാരി ഫാ. റെന്നി കട്ടേല്‍, ഫാ. ജീസ് ഐക്കര, കെസിസി മലങ്കര ഫൊറോന പ്രസിഡന്‍റ് സാബു പാറാനിക്കല്‍, കെസിഡബ്ല്യുഎ ഫൊറോന പ്രസിഡന്‍റ് ജെസി ലൂക്കോസ്, കെസിവൈഎല്‍ ഫൊറോന പ്രസിഡന്‍റ് എയ്ബി സുധീര്‍, അതിരൂപതാ പാസ്റ്ററല്‍ കൗണ്‍സില്‍ അംഗം സില്‍വി തയ്യില്‍ തുടങ്ങിയവര്‍ പ്രസംഗിക്കും. മലങ്കര ഫൊറോനയിലെ വിവിധ മേഖലകളില്‍ പ്രാഗത്ഭ്യം തെളിയിച്ചവരെ സമ്മേളനത്തില്‍ ആദരിക്കും.

മന്ത്രിയുടെ രാജി ആവശ്യപ്പെട്ട് സമരം, സംഘർഷം

പത്തനംതിട്ട: കോട്ടയം മെഡിക്കൽ കോളജിലെ കെട്ടിടം തകർന്നു വീണ് ‌വീട്ടമ്മ മരിക്കാനിടയായ സംഭവത്തിൽ മന്ത്രി വീണാ ജോർജിന്‍റെ രാജി ആവശ്യപ്പെട്ട് പ്രതിപക്ഷ സംഘടനകൾ തെരുവിലിറങ്ങിയതോടെ നാടൊട്ടുക്ക് ഇന്നലെ സമര കോലാഹലം. വിവിധയിടങ്ങളിൽ പോലീസുമായി സംഘർഷവുമുണ്ടായി. പത്തനംതിട്ടയിലും പ്രധാന ടൗണുകളിലും കോൺഗ്രസ്, യുഡിഎഫ് പ്രവർത്തകർ പ്രതിഷേധ പ്രകടനങ്ങൾ നടത്തി. ബിജെപിയും വിവിധയിടങ്ങളിൽ പ്രതിഷേധം സംഘടിപ്പിച്ചു. മന്ത്രിയുടെ പത്തനംതിട്ടയിലെ എംഎൽഎ ഓഫീസിലേക്കും മൈലപ്ര - കുന്പഴവടക്കുള്ള മാതൃഗൃഹത്തിലേക്കും അങ്ങാടിക്കലിലെ വീട്ടിലേക്കും പ്രതിഷേധ മാർച്ചുകൾ നടന്നു. എല്ലായിടത്തും പ്രവർത്തകരും പോലീസും തമ്മിൽ സംഘർഷമുണ്ടായി. രാവിലെ കോൺഗ്രസ് നേതൃത്വത്തിൽ പത്തനംതിട്ടയിൽ ആരോഗ്യ മന്ത്രിയുടെ ഓഫീസിലേക്ക് നടത്തിയ പ്രതിഷേധ മാർച്ചിൽ സംഘർഷം ഉണ്ടായി. കപ്പിത്താൻ അമേരിക്കയിലേക്ക് പോവാ വീണമന്ത്രി ആസ്ട്രേലിയലിലേക്ക് വിട്ടോളു എന്ന പ്ലക്കാർഡ് പിടിച്ചാണ് പ്രവർത്തകർ എത്തിയത്. പോലീസ് ബാരിക്കേഡ് ഉപയോഗിച്ച് മാർച്ച് മാർച്ച് തടയാൻ ശ്രമിച്ചെങ്കിലും തള്ളി മറിച്ചിടാൻ പ്രവർത്തകർ തുനിഞ്ഞതോടെ പോലീസുമായി ബലപ്രയോഗത്തിനും ഉന്തിനും തള്ളിനും ഇടയാക്കി. ഇതിനിടയിൽ ചിലർ ബാരിക്കേഡ് ഭേദിച്ച് ഉള്ളിൽ കടന്നത് വീണ്ടും സംഘർഷത്തിനു കാരണമായി. ഉള്ളിൽ കടന്നവരെ പോലീസ് അറസ്റ്റു ചെയ്തു നീക്കി. ഇതിൽ പ്രതിഷേധിച്ച് കോൺഗ്രസ് നേതൃത്വത്തിൽ പോലീസ് സ്റ്റേഷൻ മാർച്ചും നടന്നു. പോലീസ് സ്റ്റേഷനു മുന്പിൽ കൂടുതൽ പോലീസിനെ നിയോഗിച്ചിരുന്നു. കോൺഗ്രസ് പ്രവർത്തകരും നേതാക്കളും എത്തിയതോടെ മുദ്രാവാക്യം വിളികളുമായി പ്രവർത്തകർ റോഡിൽ നിരന്നു. പോലീസ് റോഡിൽ നിരന്ന് പ്രവർത്തകരെ തടഞ്ഞു. എംഎൽഎ ഓഫീസ് മാർച്ചിൽ പങ്കെടുത്ത് അറസ്റ്റ് ചെയ്തവരെ വിട്ടയക്കണമെന്നാവശ്യപ്പെട്ട് എത്തിയ ഡിസിസി പ്രസിഡന്‍റ് പ്രഫ.സതീഷ് കൊച്ചുപറന്പിലിന്‍റെ നേതൃത്വത്തിൽ ഏതാനും നേതാക്കളെ സ്റേഷനിലേക്ക് പോകാൻ അനുവദിച്ചു . പിന്നീട് അറസ്റ്റു ചെയ്ത പ്രവർത്തകരെ ജാമ്യത്തിൽ വിട്ടു. തുടർന്ന് കോൺഗ്രസ് പ്രവർത്തകർ ടൗണിൽ പ്രകടനവും നടത്തി. കനത്ത പോലീസ് ‌സുരക്ഷയാണ് മന്ത്രിയുടെ ഓഫീസ് പരിസരത്ത് ഒരുക്കിയിരുന്നത്. ഡിസിസി ഓഫീസ് അങ്കണത്തിൽ നിന്നും ആരംഭിച്ച മാർച്ചിൽ നിരവധി പ്രവർത്തകർ പങ്കെടുത്തു. കെപിസിസി ജനറൽ സെക്രട്ടറി പഴകുളം മധു മാർച്ച് ഉദ്ഘാടനം ചെയ്തു. ഡിസിസി പ്രസിഡന്‍റ് സതീഷ് കൊച്ചു പറമ്പിൽ അധ്യക്ഷത വഹിച്ചു. രാവിലെ ബിജെപി, എസ്ഡിപിഐ സംഘടനകളും മന്ത്രിയുടെ ഓഫീസിലേക്ക് മാർച്ച് നടത്തിയിരുന്നു. തിരുവല്ലയിൽ കോട്ടയം മെഡിക്കൽ കോളജ് കെട്ടിട്ടം തകർന്നു വീണത് മൂലം ബിന്ദു എന്ന സ്ത്രീ മരണപ്പെട്ട ഉത്തരവാദിത്വം ഏറ്റെടുത്ത് ആരോഗ്യമന്ത്രിയുടെ രാജി ആവശ്യപ്പെട്ട് നെടുമ്പ്രം കോൺഗ്രസ് മണ്ഡലം കമ്മിറ്റി പ്രതിഷേധ പ്രകടനവും, യോഗവും തുടർന്ന കോലം കത്തിക്കുകയും ചെയ്തു. മണ്ഡലം പ്രസിഡന്‍റ് ബിനു കുര്യൻ അധ്യക്ഷത വഹിച്ചു. ഡിസിസി എക്സിക്യൂട്ടീവ് അംഗം ആർ. ജയകുമാർ ഉദ്ഘാടനം ചെയ്തു. യൂത്ത് കോൺഗ്രസ് സംസ്ഥാന സെക്രട്ടറി ജിജോ ചെറിയാൻ, ബ്ലോക്ക് കോൺഗ്രസ് ജനറൽ സെക്രട്ടറി അനിൽ സി.ഉഷ്സ്, കെ.ജെ.മാത്യു, എ. പ്രദീപ് കുമാർ, പിസി തോമസ്, കെ.സി.ജോൺ തുടങ്ങിയവർ പ്രസംഗിച്ചു. മല്ലപ്പള്ളിയിൽ കോട്ടയം മെഡിക്കൽ കോളേജിലെ ദുരന്തത്തിന്‍റെ ഉത്തരവാദിത്വം ഏറ്റെടുത്തു ആരോഗ്യമന്ത്രി വീണാ ജോർജ് രാജിവയ്ക്കണമെന്ന് ആവശ്യപ്പെട്ട് കോൺഗ്രസ്‌ മല്ലപ്പള്ളി മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ പ്രകടനം നടത്തി. പ്രതിഷേധ യോഗം കെപിസിസി മുൻ എക്സിക്യൂട്ടീവ് അംഗം റെജി തോമസ് ഉദ്ഘാടനം ചെയ്തു. മണ്ഡലം പ്രസിഡന്റ് എം. കെ. സുഭാഷ്കുമാർ അധ്യക്ഷത വഹിച്ചു. എ. ഡി. ജോൺ, സാം പട്ടേരിൽ, റെജി പണിക്കമുറി, സുനിൽ നിരവുപുലം,കെ. ജി. സാബു, കൃഷ്ണൻകുട്ടി മുള്ളങ്കുഴി, റെജി തെക്കുംകൽ, അനിൽ. എൻ. ചെറിയാൻ, തമ്പി കോട്ടച്ചേരിൽ, സജി തോട്ടത്തിമലയിൽ, സിന്ധു സുഭാഷ്, ജീനാ ചെറിയാൻ, അനു ഊത്തുകുഴിയിൽ, കെ. കെ. വാസുകുട്ടൻ, മിഥുൻ. കെ. ദാസ്, അനീഷ്‌.കെ. മാത്യു മധു പുന്നാനിൽ എന്നിവർ പ്രസംഗിച്ചു. കോന്നിയിൽ ആരോഗ്യമന്ത്രി രാജി വയ്ക്കണമെന്ന് ആവശ്യപ്പെട്ട് കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ കോന്നി ടൗണിൽ പ്രതിഷേധ പ്രകടനം നടത്തി. മന്ത്രിയുടെ കോലം കത്തിച്ചു. തുടർന്ന് നടന്ന പ്രതിഷേധ ജ്വാല സംഗമത്തിൽ കോൺഗ്രസ് മണ്ഡലം കമ്മിറ്റി പ്രസിഡന്‍റ് പ്രവീൺ പ്ലാവിളയിൽ അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് റോബിൻ പീറ്റർ ഉദ്ഘാടനം ചെയ്തു. യുഡിഎഫ് നിയോജക മണ്ഡലം ചെയർമാൻ എസ്. സന്തോഷ് കുമാർ, ഡിസിസി സെക്രട്ടറി എലിസബത്ത് അബു, റോജി ഏബ്രഹാം, ശ്യാം. എസ് കോന്നി, സൗദ റഹിം, അനിസാബു, തോമസ് കാലായിൽ തുടങ്ങിയവർ പ്രസംഗിച്ചു. ശവപ്പെട്ടിയുമായി മന്ത്രിയുടെ വീട്ടിലേക്ക് ഉച്ചയോടെ ശവപ്പെട്ടിയുമായി മന്ത്രിയുടെ മാതൃഗൃഹമായ കുന്പഴ വടക്ക് ഭാഗത്തെ വീട്ടിലേക്ക് പ്രവർത്തകർ എത്തിയതും സംഘർഷത്തിനിടയാക്കി. വീട് അടഞ്ഞു കിടക്കുകയായിരുന്നുവെങ്കിലും പോലീസ് കനത്ത സുരക്ഷാ വലയം തീർത്തിരുന്നു. ഇതു ഭേദിച്ച് അകത്തുകടക്കാനുള്ള പ്രവർത്തകരുടെ ശ്രമം പോലീസ് തടഞ്ഞു. പിന്നീട് ശവപ്പെട്ടി ഉപേക്ഷിച്ച് പ്രവർത്തകർ പോകാൻ ശ്രമിക്കുന്നതിനിടെ പോലീസ് ഇതു പിടിച്ചെടുത്ത് കേസാക്കി. അങ്ങാടിക്കൽ വീട്ടിലേക്കും മാർച്ച് ‌മന്ത്രി വീണാ ജോർജിന്‍റെ അങ്ങാടിക്കലിലെ വീട്ടിലേക്ക് വൈകുന്നേരം യൂത്ത് കോൺഗ്രസ്, കോൺഗ്രസ് പ്രവർത്തകർ മാർച്ച് നടത്തി. പോലീസ് രാവിലെ മുതൽ തന്നെ വീട്ടുപരിസരത്ത് കാവൽ ഏർപ്പെടുത്തിയിരുന്നു. മാർച്ച് വഴിയിൽ തടഞ്ഞു. റോഡിൽ കുത്തിയിരുന്ന പ്രവർത്തകരെ പിന്നീട് അറസ്റ്റു ചെയ്തു നീക്കി. ബിജെപി മാർച്ച് നടത്തി പത്തനംതിട്ട: കോട്ടയം മെഡിക്കൽ കോളജിൽ കെട്ടിടം തകർന്നുണ്ടായ അപകടത്തിന്റെ പൂർണ ഉത്തരവാദിത്തം ഏറ്റെടുത്ത് മന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ട് ബിജെപി പത്തനംതിട്ട മണ്ഡലം കമ്മറ്റിയുടെ നേതൃത്വത്തിൽ പത്തനംതിട്ടയിലെ എംഎൽഎ ഓഫീസിലേക്ക് പ്രതിഷേധ മാർച്ച്‌ നടത്തി. ജില്ലാ ജനറൽ സെക്രട്ടറി കെ.ബിനുമോൻ യോഗം ഉദ്ഘാടനം ചെയ്തു. പത്തനംതിട്ട മണ്ഡലം പ്രസിഡൻറ് വിപിൻ വാസുദേവ് അധ്യക്ഷത വഹിച്ചു. മണ്ഡലം ജനറൽ സെക്രട്ടറി കെ.സി.മണിക്കുട്ടൻ, വൈസ് പ്രസിഡന്‍റുമാരായ വിദ്യാധിരാജൻ, സുമാരവി , രഞ്ജിനി അടകൽ, മണ്ഡലം ജനറൽ സെക്രട്ടറിമാരായ, ശംഭു ഇലന്തൂർ, വർഗീസ് മാത്യു, മഹിളാമോർച്ച ഭാരവാഹികളായ ശ്രീവിദ്യ, പ്രിയ സതീഷ് തുടങ്ങിയവർ പ്രസംഗിച്ചു. പത്തനംതിട്ടയിലെ സിപിഎമ്മുകാർക്ക് വേണ്ടാത്ത മന്ത്രിയെ കേരളത്തിനും വേണ്ട: പഴകുളം മധു പത്തനംതിട്ട: സിപിഎം ലോക്കൽ, ഏരിയാ കമ്മിറ്റികൾക്കു പോലും വേണ്ടാത്ത കഴിവുകേടിന്റെ പര്യായമായ ആരോഗ്യ മന്ത്രി വീണാ ജോർജിനെ കേരളത്തിനും വേണ്ട എന്നതാണ് പൊതു സമൂഹത്തിന്റെ നിലപാടെന്ന് കെപിസിസി ജനറൽ സെക്രട്ടറി പഴകുളം മധു. ആരോഗ്യ മന്ത്രി വീണാ ജോർജിന്റെ രാജി ആവശ്യപ്പെട്ട് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ മന്ത്രിയുടെ പത്തനംതിട്ടയിലെ ഓഫീസിലേക്ക് നടത്തിയ പ്രതിഷേധ മാർച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കോട്ടയം മെഡിക്കൽ കോളജിലെ തകർന്ന കെട്ടിടത്തിനുള്ളിൽ കുടുങ്ങി ജീവൻ വെടിഞ്ഞ വീട്ടമ്മയുടെ മരണത്തിന് ഉത്തരവാദി വസ്തുതാ വിരുദ്ധമായ പ്രഖ്യാപനം നടത്തി രക്ഷാപ്രവർത്തനം വൈകിപ്പിച്ച ആരോഗ്യ മന്ത്രിയാണെന്ന് കെപിസിസി ജനൽ സെക്രട്ടറി പറഞ്ഞു. ഡിസിസി പ്രസിഡന്‍റ് സതീഷ് കൊച്ചുപറമ്പിൽ അധ്യക്ഷത വഹിച്ചു. കെപിസിസി അംഗം പി.മോഹൻരാജ്, ഡിസിസി ഭാരാവാഹികളായ എ.സുരേഷ് കുമാർ, വെട്ടൂർ ജ്യോതിപ്രസാദ്, സാമുവൽ കിഴക്കുപുറം, ഏഴംകുളം അജു, കെ.ജാസിം കുട്ടി, സജി കൊട്ടക്കാട്, ജോൺസൺ വിളവിനാൽ, എം സി ഷെരീഫ്, റോജി പോൾ ഡാനിയേൽ, സിന്ധു അനിൽ, വിനീത അനിൽ തുടങ്ങിയവർ പ്രസംഗിച്ചു. പ്രതിഷേധക്കാരെ തടയുവാൻ മന്ത്രിയുടെ ഓഫീസിനു മുന്നിൽ സ്ഥാപിച്ചിരുന്ന ബാരിക്കേഡുകൾ പ്രവർത്തകർ മറിച്ചിടുകയും പോലീസുമായ സംഘർഷമുമുണ്ടാകയുംഓഫീസിലേക്ക് ചാടിക്കടക്കുവാൻ ശ്രമിച്ച യൂത്ത് കോൺഗ്രസ് പ്രവർത്തകാരയ വിജയ് ഇന്ദുചൂഡൻ, നഹാസ് പത്തനംതിട്ട, നിതിൻ മണക്കാട്ടു മണ്ണിൽ, അലൻ ജിയോ മൈക്കിൾ, ഷിജു അറപ്പുരക്കൽ, ജോമി വർഗീസ്, അഖിൽ സന്തോഷ്, ടേറിൻ ജോർജ് എന്നിവരെ അറസ്റ്റ് ചെയ്തു. ഇവരെ വിട്ടയക്കണമെന്ന് ആവിശ്യപ്പെട്ട് നേതാക്കൾ സെൻട്രൽ സ്റ്റേഷൻ ഉപരോധിച്ച് പോലീസ് സ്റ്റേഷനിലേക്ക് മാർച്ച് നടത്തി. അധികാരത്തിൽ തുടരുന്നത് ജനാധിപത്യത്തോടുള്ള വെല്ലുവിളി: വർഗീസ് മാമ്മൻ പത്തനംതിട്ട: സംസ്ഥാനത്തെ ആരോഗ്യ സംവിധാനം തകരാറിലാണെന്നു സ്വയം സമ്മതിക്കുകയും ഏറ്റവും അവസാനം കോട്ടയത്ത് ഒരു പാവപ്പെട്ട സ്ത്രീയുടെ ജീവൻ പോലും ബലികഴിക്കേണ്ടി വരികയും ചെയ്തതിന്‍റെ ഉത്തരവാദിത്വം ഏറ്റെടുത്ത് രാജിവയ്ക്കേണ്ട മന്ത്രി വീണാ ജോർജ് അധികാരത്തിൽ തുടരുന്നത് ജനാധിപത്യ സംവിധാനങ്ങളോടുള്ള വെല്ലുവിളിയാണെന്ന് യുഡിഎഫ് ജില്ലാ ചെയർമാൻ വർഗീസ് മാമ്മൻ. സംസ്ഥാനത്തെ മെഡിക്കൽ കോളേജുകളു സർക്കാർ ആശുപത്രികളും ഇന്ന് കേവലം നോക്കു കുത്തികളായി മാറിയിരിക്കുകയാണ് .ആരോഗ്യ മേഖലയിൽ പേരുകേട്ട സംസ്ഥാനത്തിന്‍റെ സൽപ്പേര് കളങ്കപ്പെടുത്തിയതിന്‍റെ പൂർണ ഉത്തരവാദിത്വം ആരോഗ്യ മന്ത്രിക്കും വകുപ്പിനുമാണെന്നും ഇതേ മന്ത്രിയുടെ കീഴിൽ ആരോഗ്യവകുപ്പ് ജനങ്ങളുടെ ജീവനു തന്നെ വെല്ലുവിളിയായി മാറുകയാണെന്നും വർഗീസ് മാമ്മൻ പറഞ്ഞു.

ഡിഎംഒ ഓഫീസിന്‍റെ സീലിംഗ് അടർന്നുവീണു

പത്തനംതിട്ട: പത്തനംതിട്ട കളക്ടറേറ്റിൽ ജില്ലാ മെഡിക്കൽ ഓഫീസ് പ്രവർത്തിക്കുന്ന കെട്ടിടത്തിന്‍റെ സീലിംഗ് ഭാഗം അടർന്നുവീണു. ആർക്കും പരിക്കില്ല. കെട്ടിടത്തിന്‍റെ പല ഭാഗങ്ങളും ഇളകിത്തുടങ്ങിയിട്ടുണ്ട്. സിവിൽ സ്റ്റേഷൻ കെട്ടിട സമുച്ചയത്തിന്‍റെ മുകൾ നിലയിലാണ് ഡിഎംഒ ഓഫീസ് പ്രവർത്തിക്കുന്നത്.

ബിനുവിന്‍റെ വീട് കെപിസിസി പ്രസിഡന്‍റ് സന്ദർശിച്ചു

അടൂർ: കഴിഞ്ഞ ദിവസം അന്തരിച്ച കോൺഗ്രസ്‌ ബ്ലോക്ക് പ്രസിഡന്‍റ് എസ്. ബിനുവിന്‍റെ ഭവനം കെപിസിസി പ്രസിഡന്‍റ് സണ്ണി ജോസഫ് സന്ദർശിച്ചു. ജനറൽ സെക്രട്ടറി പഴകുളം മധു, ഡിസിസി പ്രസിഡന്‍റ് സതീഷ് കൊച്ചു പറമ്പിൽ, വൈസ് പ്രസിഡന്‍റ് എ. സുരേഷ് കുമാർ, ഏഴംകുളം അജു,പഴകുളം ശിവദാസൻ, തോപ്പിൽ ഗോപകുമാർ, ബാബു ദിവാകരൻ, ജെ.എസ്. അടൂർ തുടങ്ങിയവർ സന്നിഹിതരായിരുന്നു. ഡോ. സഖറിയാസ് മാർ അപ്രേം മെത്രാപ്പോലീത്ത ബിനുവിന്‍റെ ഭവനം സന്ദർശിച്ച് ബന്ധുക്കളെ ആശ്വസിപ്പിച്ചു.

കനാലിൽ വീണ പശുവിനെ അഗ്നിരക്ഷാസേന രക്ഷപ്പെടുത്തി

അടൂർ: കനാലിൽ വീണ പശുവിനെ അഗ്നി രക്ഷാസേന രക്ഷപ്പെടുത്തി. പറക്കോട് കൊച്ചനായ്യെത്ത് രമാദേവിയുടെ പശുവാണ് ഉച്ചകഴിഞ്ഞ് രണ്ടോടെ പന്നിവിഴ കുളങ്ങര അമ്പലത്തിനു സമീപത്തെ കനാലിൽ അകപ്പെട്ടത്. 20 അടി ആഴമുള്ള കനാലിൽ നിന്നും പശുവിനെ കയറ്റാൻ വീട്ടുകാർ ശ്രമിച്ചെങ്കിലും നടന്നില്ല. തുടർന്ന് ഫയർഫോഴ്സ് എത്തി കനാലിൽ ഇറങ്ങി പശുവിനെ രക്ഷപ്പെടുത്തി.

മഞ്ഞത്തോട്ടിലെ കുട്ടികൾക്ക് തുടർ പഠനത്തിനു സൗകര്യം

റാന്നി: മഞ്ഞത്തോട്ടിലെ കുഞ്ഞുങ്ങൾക്ക് തുടർ പഠനത്തിന് വഴിയൊരുക്കി എംഎൽഎയുടെ ഇടപെടൽ. പത്താം ക്ലാസ് ജയിച്ചവരുടെ തുടർ പഠനത്തിനാണ് സൗകര്യം ചെയ്തിരിക്കുന്നത്. മഞ്ഞത്തോട്ടിൽ ശബരിമല വനമേഖലയ്ക്കുള്ളിൽ താമസിക്കുന്ന മൂന്ന് കുട്ടികളാണ് ഇത്തവണത്തെ പത്താം ക്ലാസ് പരീക്ഷ വിജയിച്ചത്. കൃത്യസമയത്ത് അപേക്ഷ സമർപ്പിക്കാൻ കഴിയാതെ പോയ ഇവർക്ക് എംഎൽഎ ഇടപെട്ടാണ് അഡ്മിഷൻ ഉറപ്പാക്കിയത്. പത്താം ക്ലാസ് പരീക്ഷ കഴിഞ്ഞ മൂന്ന് കുട്ടികൾക്കും തുടർ പഠനത്തിന് വടശേരിക്കര മോഡൽ റസിഡൻഷൽ സ്കൂൾ പ്രിൻസിപ്പലുമായി ബന്ധപ്പെട്ട് പഠനത്തിനും താമസത്തിനുമുള്ള സൗകര്യം ഒരുക്കി നൽകി. എംഎൽഎയുടെ നിർദേശപ്രകാരം ട്രൈബൽ ഡെവലപ്മെന്‍റ് ഓഫീസറുടെ നേതൃത്വത്തിൽ ട്രൈബൽ വകുപ്പ് കുട്ടികൾ പഠനോപകരണങ്ങളും മറ്റ് സൗകര്യങ്ങളും ഒരുക്കി നൽകി. എല്ലാ കുട്ടികളും സ്കൂളിൽ പോകുന്നത് ഉറപ്പാക്കാൻ രക്ഷിതാക്കൾക്കും ഊരുമൂപ്പനും ട്രൈബൽ അധികൃതർക്കും നിർദേശം നൽകി. മഞ്ഞത്തോട്ടിലെ കുട്ടികൾക്കായി ഒരു അങ്കണവാടി ആരംഭിക്കണമെന്ന് ആവശ്യം പെരുനാട് ഗ്രാമപഞ്ചായത്ത് നേരത്തേ ഉന്നയിച്ചിരുന്നു സമർപ്പിക്കാൻ കളക്ടർക്കും വനിത ശിശുക്ഷേമ ഓഫീസർക്കും നിർദ്ദേശം നൽകി.

തോട്ടപ്പുഴശേരി സമൃദ്ധി പഴവർഗഗ്രാമം ഫ്രൂട്ട് ഫെസ്റ്റ് പത്തുമുതൽ

പത്തനംതിട്ട: തോട്ടപ്പുഴശേരി ഗ്രാമപഞ്ചായത്തിന്‍റെ ആഭിമുഖ്യത്തിൽ സമൃദ്ധി ഫ്രൂട്ട് ഗ്രാമം പദ്ധതിയിൽ സമൃദ്ധി ഫ്രൂട്ട് ഫെസ്റ്റ് 2025 പത്തു മുതൽ 12 വരെ മാരാമൺ സെന്‍റ് ജോസഫ് കാത്തലിക് ചർച്ച് ഓഡിറ്റോറിയത്തിൽ നടക്കും. കാർഷിക മേഖലയ്ക്ക് പുത്തനുണർവ് പകർന്ന്, തോട്ടപ്പുഴശേരിയെ കേരളത്തിലെ ഒരു പ്രധാന പഴവർഗ ഉത്പാദന കേന്ദ്രമാക്കി മാറ്റുക എന്ന ദീർഘവീക്ഷണത്തോടെ തുടക്കം കുറിച്ച സമൃദ്ധി ഫ്രൂട്ട് ഗ്രാമം പദ്ധതിയുടെ ഭാഗമായുള്ള രണ്ടാമത്തെ പഴവർഗ വിപണന മേളയാണിത്. പ്രാദേശികമായി ഉത്പാദിപ്പിക്കുന്ന പഴവർഗങ്ങളും അവയിൽ നിന്നുള്ള ഉത്പന്നങ്ങളും ഗുണമേന്മയുള്ള തൈകളും പ്രദർശിപ്പിക്കാനും വിപണനം ചെയ്യാനും കർഷകർക്ക് അവസരമൊരുക്കും. വിവിധതരം പഴവർഗങ്ങളുടെ ശാസ്ത്രീയ കൃഷി പ്രോത്സാഹിപ്പിക്കുന്നതിലൂടെ കർഷകർക്ക് പുതിയ വരുമാന മാർഗങ്ങൾ തുറക്കുകയാണ് ലക്ഷ്യമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. തരിശുഭൂമികൾ പോലും ഫലപ്രദമായി ഉപയോഗിക്കാനും ഉയർന്ന വിളവു നേടാനും ഇതു സഹായിക്കും. തോട്ടപ്പുഴശേരി കർഷക സംഘം, ഗ്രാമപഞ്ചായത്ത്, കൃഷി, ടൂറിസം, വ്യവസായം വകുപ്പുകളുടെ സഹകരണത്തിലാണ് മേള സംഘടിപ്പിക്കുന്നത്. കൃഷി, വിളവെടുപ്പ്, സംസ്കരണം, വിപണനം, ടൂറിസം എന്നിവയുമായി ബന്ധപ്പെട്ട് നിരവധി തൊഴിലവസരങ്ങൾ പ്രാദേശികമായി ലഭ്യമാക്കുകയെന്ന ലക്ഷ്യത്തോടെയാണ് കർഷക സംഘം പ്രവർത്തിക്കുന്നത്. ഇതിനാവശ്യമായ ക്രമീകരണങ്ങൾ കർഷക സംഘം ചെയ്തുവരുന്നു. പഴങ്ങളിൽ നിന്ന് ജാം, സ്ക്വാഷ്, അച്ചാർ, ജ്യൂസുകൾ തുടങ്ങിയ ഉത്പന്നങ്ങൾ നിർമിക്കുന്നതിലൂടെ കർഷകർക്ക് കൂടുതൽ വരുമാനം ഉറപ്പാക്കുകയാണ് സമൃദ്ധി പദ്ധതിയിലൂടെ ലക്ഷ്യമിടുന്നത്. ഇത് ചെറുകിട വ്യവസായ സംരംഭങ്ങൾക്ക് വഴിയൊരുക്കുകയും പ്രാദേശിക സംരംഭകരെ വളർത്തുകയും ചെയ്യും. പദ്ധതി പ്രാദേശികമായും സംസ്ഥാന തലത്തിലും ദേശീയ തലത്തിലും പഴവർഗങ്ങൾക്കും അവയുടെ ഉത്പന്നങ്ങൾക്കും പുതിയ വിപണന സാധ്യതകൾ വർധിപ്പിക്കുന്നു. കൃഷി വകുപ്പ്, കൃഷി വിജ്ഞാന കേന്ദ്ര എന്നിവയുടെ സഹകരണത്തിൽ ശാസ്ത്രീയമായ കൃഷി രീതികൾ, ഗുണമേന്മയുള്ള നടീൽ വസ്തുക്കളുടെ ലഭ്യത ഉറപ്പാക്കൽ, സാങ്കേതിക സഹായം, കർഷകർക്ക് ആവശ്യമായ പരിശീലനം എന്നിവ ഉറപ്പാക്കും. പഴങ്ങൾ സംസ്കരിച്ച് മൂല്യവർധിത ഉത്പന്ന യൂണിറ്റുകൾ സ്ഥാപിക്കുന്നതിനും ചെറുകിട വ്യവസായ സംരംഭകർക്ക് ആവശ്യമായ സാമ്പത്തിക, സാങ്കേതിക സഹായങ്ങൾ നൽകുന്നതിനും വ്യവസായ വകുപ്പും പിന്തുണ നൽകും. സമൃദ്ധി ഫ്രൂട്ട് ഗ്രാമം ടൂറിസം പദ്ധതിയായി വികസിപ്പിക്കാനും ലക്ഷ്യമിടുന്നുണ്ട്. ഫാം ടൂറിസം, കാർഷിക പ്രദർശനങ്ങൾ എന്നിവയിലൂടെ ഇതു നടപ്പിലാക്കും. സാംസ്കാരിക പരിപാടികളോടുകൂടിയാണ് ഫെസ്റ്റ് സംഘടിപ്പിക്കുന്നത്. കൂടുതൽ സന്ദർശകരെ ആകർഷിക്കുകയും ടൂറിസം സാധ്യതകൾ വർധിപ്പിക്കുകയും ചെയ്യും. സമൃദ്ധി ഫ്രൂട്ട് ഗ്രാമം പദ്ധതിയിലൂടെ തോട്ടപ്പുഴശേരിയെ കേരളത്തിലെ ഒരു പ്രധാന പഴവർഗ ഉത്പാദന കേന്ദ്രമാക്കി മാറ്റാനും അതുവഴി സാമൂഹികവും സാമ്പത്തികവുമായി സ്വയംപര്യാപ്തമാക്കാനുമാണ് ലക്ഷ്യമിടുന്നത്. സമൃദ്ധി കർഷക സംഘം പ്രസിഡന്‍റ് ഗോപകുമാർ, ഭാരവാഹികളായ ജോർജ് വർഗീസ്, ഫിലിപ്പ് കുര്യൻ, ആർ. സുരാജ് എന്നിവർ പത്രസമ്മേളനത്തിൽ പങ്കെടുത്തു.

ആദിവാസി കുട്ടികളെ സ്കൂളുകളിൽ തിരികെ എത്തിക്കാൻ പദ്ധതി

റാന്നി: ആദിവാസി ഉന്നതികളിൽ പഠനം മുടങ്ങിയ കുട്ടികളെ കണ്ടെത്തി സ്കൂളുകളിൽ എത്തിക്കാൻ പട്ടിക വർഗ വികസന വകുപ്പിന്‍റെ പദ്ധതി. ഷർട്ടും പാന്‍റ്സുമില്ലാത്തതിനാൽ സ്കൂളിൽ വരുന്നില്ല എന്നു പറഞ്ഞ കുട്ടിയെ ചേർത്തു പിടിച്ച് അതു വാങ്ങിത്തരാമെന്ന ഉറപ്പിലാണ് കൊണ്ടുവന്നതെന്ന് ട്രൈബൽ ഡെവലപ്മെന്‍റ് ഓഫീസർ നജീം പറഞ്ഞു. കേരള സർക്കാരിന്‍റെ സമഗ്ര ഗുണമേന്മാ വിദ്യാഭ്യാസ പദ്ധതിയുടെ ഭാഗമായി പട്ടിക വർഗ വികസന വകുപ്പും പൊതുവിദ്യാഭ്യാസ വകുപ്പ് സമഗ്ര ശിക്ഷാ കേരള റാന്നി ബിആർസിയും സംയുക്തമായി ആദിവാസി ഉന്നതികളിൽ പഠനം മുടക്കിയ കഴിയുന്ന കുട്ടികളെ കണ്ടെത്താൻ പ്രത്യേക സന്ദർശനം നടത്തി. ട്രൈബൽ ഡവലപ്മെന്‍റ് ഓഫീസർ എസ്.എ. നജീം, റാന്നി ബിപിസി ഷാജി എ. സലാം എന്നിവരുടെ നേതൃത്വത്തിലാണ് സന്ദർശനം നടത്തിയത്. ഒരു വർഷമായി വിദ്യാലയത്തിൽ പോകാത്ത ഒരു കുട്ടിയേയും സ്കൂൾ തുറന്ന് ഇന്നേവരെ സ്കൂളിൽ പോകാത്ത 13 കുട്ടികളേയും കണ്ടെത്തി വടശേരിക്കര മോഡൽ റസിഡൻഷൽ സ്കൂളിൽ തുടർ പഠനത്തിനാവശ്യമായ ക്രമീകരണം ചെയ്തു. രക്ഷിതാക്കളുടെയും കുട്ടികളുടെയും താത്പര്യക്കുറവാണ് കുട്ടികളെ വിദ്യാലയങ്ങളിൽ നിന്നകറ്റാൻ കാരണമാകുന്നതെന്ന് പറയുന്നു. ആദ്യഘട്ട സന്ദർശനം മഞ്ഞത്തോട് പ്ലാപ്പള്ളി ഉന്നതികളിൽ ആയിരുന്നു. ഹോസ്റ്റലിൽ എത്തിയ കുട്ടികൾക്ക് കൗൺസിലിംഗും പ്രത്യേക പഠന പിന്തുണാ പരിപാടികളും സംഘടിപ്പിക്കും. ഉന്നതികളിലും പട്ടികവഗ വികസന വകുപ്പും റാന്നി ബിആർസിയും വനം വകുപ്പും സംയുക്തമായി പ്രത്യേക പരിപാടികൾ സംഘടിപ്പിക്കും. ട്രൈബൽ എക്സറ്റൻഷൻ ഓഫീസർ വി. ഗോപകുമാർ, മഹിള സമഖ്യ വോളണ്ടിയർ രജനി എന്നിവരും സംഘാംഗങ്ങളായി. ട്രൈബർ ഡവലപ്മെന്‍റ് ഓഫീസർ വാങ്ങി നൽകിയ പുതുവസ്ത്രങ്ങളണിഞ്ഞാണ് കുട്ടികൾ വിദ്യാലയത്തിലെത്തിയത്. പരിപാടിയുടെ ഭാഗമായി മഞ്ഞത്തോട് അങ്കണവാടിയിൽ വിവിധ വകുപ്പ് പ്രതിനിധികളുടെ യോഗം ചേർന്നു ഭാവി പരിപാടികൾ ആസൂത്രണം ചെയ്തു. യോഗത്തിൽ രാജാംപാറ ഡെപ്യൂട്ടി റേഞ്ച് ഓഫീസർ ബിജു തോമസ്, ബീറ്റ് ഫോറസ്റ്റ് ഓഫീസർ സുബി മോൾ, അട്ടത്തോട് ട്രൈബൽ ഗവൺമെന്‍റ് എൽപി സ്കൂൾ അധ്യാപകൻ കെ.എം. സുബീഷ്, ‌ഐസിഡിഎസ് സൂപ്പർവൈസർ യു.അർച്ചന അങ്കണവാടി വർക്കർ സുലൈഖ ബീവി തുടങ്ങിയവരും പങ്കെടുത്തു.

കോഴഞ്ചേരി ജില്ലാ ആശുപത്രിയിൽ രക്തബാങ്കില്ല, അടിസ്ഥാന സൗകര്യങ്ങൾ പരിമിതം

കോഴഞ്ചേരി: ജില്ലാ ആശുപത്രി വളപ്പില്‍ കോടിക്കണക്കിന് രൂപ ചെലവഴിച്ച് കെട്ടിടം നിർമിക്കുന്പോഴും അടിസ്ഥാന പ്രശ്നങ്ങൾക്കു പരിഹാരമില്ല. ജില്ലാ ആശുപത്രിയില്‍ രക്തബാങ്ക് ഇല്ലാതായിട്ട് വര്‍ഷങ്ങളാകുന്നു. രക്തബാങ്കുമായി ബന്ധപ്പെട്ട ചോദ്യങ്ങള്‍ക്ക് യുഡിഎഫിന്‍റെ ഭരണ കാലത്തു തന്നെ ആക്ഷേപം ഉണ്ടായിരുന്നുവെന്നും ഇതു സംബന്ധിച്ച് അന്വേഷണത്തിനു കമ്മീഷനെ നിയോഗിക്കുമെന്ന സ്ഥിരം മറുപടിയാണ് ഇപ്പോഴും ലഭിക്കുന്നത്. ഒരു മാസം നൂറു മേജര്‍ ശസ്ത്രക്രിയകളും ഇരുനൂറിലധികം മൈനര്‍ ശസ്ത്രക്രിയകളുമാണ് കോഴഞ്ചേരിയിലെ ജില്ലാ ആശുപത്രിയില്‍ നടക്കുന്നത്. ശസ്ത്രക്രിയ നടക്കുന്ന അവസരത്തില്‍ രോഗികള്‍ രക്തം ആവശ്യമായി വരുമ്പോള്‍ പത്തനംതിട്ട ജനറല്‍ ആശുപത്രിയിലെ രക്തബാങ്കിലും കോഴഞ്ചേരിയില്‍ തന്നെയുള്ള സ്വകാര്യ ആശുപത്രിയിലെ രക്തബാങ്കുകളെയുമാണ് ആശ്രയിക്കുന്നത്. ആവശ്യത്തിനുള്ള രക്തത്തിനുപകരം രക്തമോ അല്ലെങ്കില്‍ പണമോ നല്‍കിയാണ് രക്തം സ്വീകരിക്കുന്നത്. ജില്ലാ ആശുപത്രിയില്‍ രക്തബാങ്ക് സ്ഥാപിക്കാത്തത് സ്വകാര്യ ആശുപത്രികളിലെ രക്തബാങ്കുകളെ സഹായിക്കാനാണെന്ന ആക്ഷേപം നിലനിൽക്കുന്നുണ്ട്. എന്നാല്‍ രക്തബാങ്ക് സ്ഥാപിതമായാല്‍ ശീതീകരണ യന്ത്രങ്ങളും ആധുനിക സംവിധാനങ്ങളും ജീവനക്കാരെയും വേണമെന്നാണ് ആരോഗ്യവകുപ്പ് അധികൃതര്‍ പറയുന്നത്. കോടിക്കണക്കിന് രൂപ ചെലവഴിച്ച് കെട്ടിട സമുച്ചയങ്ങള്‍ നിര്‍മിക്കുമ്പോള്‍ എന്തുകൊണ്ട് രക്തബാങ്ക് സ്ഥാപിക്കുന്നില്ല എന്ന ചോദ്യത്തിന് ശാശ്വതമായ മറുപടി ആരോഗ്യ വകുപ്പില്‍ നിന്നുണ്ടാകുന്നില്ല. അൾട്രാ സൗണ്ട് സ്കാനിംഗും ഫലപ്രദമല്ല അള്‍ട്രാ സൗണ്ട് സ്‌കാനിംഗ് യ്ത്രം ആശുപത്രിയിലുണ്ടെങ്കിലും ഫലപ്രദമായി പ്രവര്‍ത്തിക്കുന്നില്ല. പ്രവര്‍ത്തിക്കാത്തതിന്‍റെ കാരണം യന്ത്രത്തകരാറാണെന്നാണ് അധികൃതര്‍ പറയുന്നത്. സംസ്ഥാനത്തെ ആരോഗ്യവകുപ്പിന്‍റെ കീഴിലുള്ള ഇത്തരം യന്ത്രങ്ങളും മറ്റു ശസ്ത്രക്രിയ ഉപകരണങ്ങളും നവീകരിക്കുന്നതിന് ചുമതലയുള്ള സ്വകാര്യ കമ്പനിക്ക് കൃത്യമായി പണം ലഭിക്കാത്തതിനാല്‍ നവീകരണ ജോലി നടത്തുന്നില്ലെന്ന് ആരോഗ്യവകുപ്പിലെ ഡോക്ടര്‍മാര്‍ തന്നെ പറയുന്നു. പ്രവര്‍ത്തന ക്ഷമത ഉള്ളപ്പോള്‍ തന്നെ ആഴ്ചയില്‍ ഒരു ദിവസം മാത്രമാണ് അള്‍ട്രാസൗണ്ടിന്‍റെ സേവനം രോഗികള്‍ക്ക് ലഭിച്ചിരുന്നത്. മുപ്പതിലധികം സ്‌കാനിംഗുകളാണ് നടന്നിരുന്നത്. ജില്ലാ ആശുപത്രിയിലെ സ്‌കാനിംഗും ലാബ് പരിശോധനകളും ഫലപ്രദമായി നടക്കാത്തതിന്‍റെ ഗുണം സ്വകാര്യ മേഖലയ്ക്കാണ് ലഭിക്കുന്നത്. ജില്ലാ പഞ്ചായത്തിന്‍റെ ഉടമസ്ഥതയിലുള്ള ആശുപത്രിയായതിനാല്‍ ഓക്‌സിജന്‍ പ്ലാന്‍റിന്‍റെ നവീകരണം ജില്ലാ പഞ്ചായത്താണ് ചെയ്യേണ്ടതെന്നാണ് ആരോഗ്യവകുപ്പിന്‍റെ വിശദീകരണം. സാങ്കേതിക കാരണം പറഞ്ഞു നവീകരണം മുടക്കുന്നതുമൂലം രോഗികള്‍ ബുദ്ധിമുട്ടുകയാണ്. പ്ലാന്‍റില്‍ പൊട്ടിത്തെറി ഉണ്ടായപ്പോഴും ഡിഎംഒയുടെ റിപ്പോര്‍ട്ട് ആവശ്യപ്പെട്ടിട്ടുണ്ടെന്നാണ് മന്ത്രിപറഞ്ഞത്. ഡോക്ടർമാരുടെ കുറവ് ശസ്ത്രക്രിയ വിഭാഗത്തിൽ ആവശ്യത്തിനു ഡോക്ടർമാരില്ലെന്നതും നഴ്സിംഗ് അസിസ്റ്റന്‍റുമാരെ നിയമിക്കാത്തതു ബാധിക്കുന്നത് രോഗികളെയാണ്. നഴ്സിംഗ് അസിസ്റ്റന്‍റുമാരുടെ പത്തിലധികം ഒഴിവുകളുണ്ട്. ലേബര്‍ മുറിയിലും മറ്റുമാണ് ഇവരുടെ സേവനം ആവശ്യമായിട്ടുള്ളത്. സ്‌കാനിംഗ് യന്ത്രം പ്രവര്‍ത്തിക്കുന്പോൾ സ്ഥിരമായി റേഡിയോളജിസ്റ്റിന്‍റെ സേവനം ലഭിക്കുന്നില്ലെന്ന് ഡോക്ടര്‍മാര്‍ തന്നെ പറയുന്നു. ശസ്ത്രക്രിയ ഉപകരണങ്ങളുടേതടക്കം ലഭ്യതയിലും കാലതാമസമുണ്ട്. മാതൃ ശിശു വാര്‍ഡുകളില്‍ രണ്ടെണ്ണം നിർമിച്ചിട്ടുണ്ടെങ്കിലും 90 ശതമാനംഇതുമായി ബന്ധപ്പെട്ട ശസ്ത്രക്രിയ വിഭാഗത്തിനുവേണ്ട സൗകര്യം ഒരുക്കിയിട്ടില്ല എന്ന ആക്ഷേപം നിലനില്‍ക്കുകയാണ്. ആശുപത്രി വളപ്പിലെ ഓടകള്‍ പൊട്ടിപൊളിഞ്ഞുകിടക്കുകയാണ്. നൂറുകണക്കിന് രോഗികളാണ് ദിവസവും ജില്ലാ ആശുപത്രിയില്‍ ചികിത്സ തേടിയെത്തുന്നത്. പുതിയ കെട്ടിടങ്ങളുടെ നിർമാണം നടക്കുന്നതിനാൽ നിലവിൽ സ്ഥലപരിമിതിയുണ്ട്. നിർമാണം പൂർത്തീകരിച്ച കെട്ടിടങ്ങൾ അടിയന്തരമായി തുറന്നു നൽകാൻ നടപടി വേണമെന്നാവശ്യം ഉ‍യർന്നിരുന്നു. ഇതേത്തുടർന്ന് ഫിറ്റ്നസ് സർട്ടിഫിക്കറ്റ് ലഭിക്കുന്നതിനു മുന്പേ പുതിയ കെട്ടിടം തുറക്കാനുള്ള ശ്രമമാണ് ആരോഗ്യവകുപ്പ് നടത്തുന്നത്. ഓക്സിജൻ പ്ലാന്‍റും പൊളിഞ്ഞു കോവിഡ് കാലത്ത് ഓക്‌സിജന്‍ ക്ഷാമം ഉണ്ടായതിനേതുടര്‍ന്ന് ആരോഗ്യവകുപ്പും സ്വകാര്യ ഗ്രൂപ്പും ജില്ലാ ആശുപത്രിയില്‍ സംയുക്തമായി ഓക്സിജൻ പ്ലാന്‍റ് ആരംഭിച്ചിരുന്നു. 2022 ജൂലൈ ഒന്പതിന് മന്ത്രി വീണാ ജോര്‍ജാണ് പ്ലാന്‍റ് ഉദ്ഘാടനം ചെയ്തത്. ജില്ലാ പഞ്ചായത്ത് ഫണ്ട് കൂടി ഉപയോഗപ്പെടുത്തിയാണ് പ്ലാന്‍റ് നിർമിച്ചത്. പ്ലാന്‍റില്‍ പൊട്ടിത്തെറി ഉണ്ടായതിനേ തുടര്‍ന്ന് ഉത്പാദനം നിര്‍ത്തിവയ്ക്കുകയായിരുന്നു. ഇതേവരെയും പ്ലാന്‍റ് നവീകരണം പൂര്‍ത്തീകരിച്ചിട്ടില്ല. പുറത്തുനിന്ന് വിലകൊടുത്താണ് ആശുപത്രിയില്‍ ഓക്‌സിജന്‍ വാങ്ങുന്നത്. ആരോഗ്യവകുപ്പിന്‍റെ കെടുകാര്യസ്ഥതയാണ് നവീകരണം പൂര്‍ത്തീകരിക്കാത്തതെന്ന വിമര്‍ശനം നിലനില്‍ക്കുകയാണ്.

ജോലി സമയത്തല്ലാതെ ജീവനക്കാർ ആശുപത്രിയിലെത്തരുതെന്ന് ഉത്തരവ്

പത്തനംതിട്ട: ജോലി സമയത്തല്ലാതെ ജീവനക്കാർ ആശുപത്രിയിൽ വരേണ്ടതില്ലെന്ന് ജനറൽ ആശുപത്രി സൂപ്രണ്ടിന്‍റെ ഉത്തരവ്. ജോലി സമയത്ത് മദ്യപിച്ച് എത്തരുതെന്നും ഉത്തരവിൽ പറയുന്നു. സർക്കുലർ വിവാദമായതോടെ ഇത് തത്കാലം മരവിപ്പിക്കാനും നിർദേശമുണ്ടായി. ജോലി സമയത്ത് അല്ലാതെ എത്തുന്നവർ സിഎംഒയുടെ അനുമതി വാങ്ങണമെന്നും പറയുന്നു. താത്കാലിക ജീവനക്കാരിൽ ചിലർ മദ്യപിച്ച് ജോലിക്ക് എത്തിയതായി പരാതി ലഭിച്ചിരുന്നുവെന്നും അതിനാലാണ് സർക്കുലറെന്നുമാണ് സൂപ്രണ്ടിന്‍റെ വിശദീകരണം. കഴിഞ്ഞ ദിവസം ആർഎംഒ വളർത്തുനായയുമായി ഓഫീസിൽ എത്തിയതും വിവാദമായിരുന്നു. ഇതിനിടെ നാല് കരാർ ജീവനക്കാരെ പിരിച്ചുവിടുകയും ചെയ്തു. സർക്കുലറുകൾ പുറത്തുപോകുന്നതും മാധ്യമങ്ങൾ വാർത്തയാക്കുന്നതിനുമെതിരേ നിയമനടപടി സ്വീകരിക്കാനും ഇതിനിടെ നീക്കമുണ്ടായതായി പറയുന്നു.

55 വർഷം പഴക്കമുള്ള കെട്ടിടം അടൂർ ജനറൽ ആശുപത്രിക്ക്

അടൂർ: അടൂർ ജനറൽ ആശുപത്രിയിൽ 55 വർഷം പഴക്കമുള്ള കെട്ടിടം ഇപ്പോഴുമുണ്ട്. പുതിയ കെട്ടിടങ്ങൾ പണിതപ്പോഴും പഴയ കെട്ടിടം പൊളിച്ചുനീക്കിയിട്ടില്ല. 1970ൽ അന്നത്തെ ആരോഗ്യമന്ത്രി കെ.എം. ജോർജ് ഉദ്ഘാടനം ചെയ്ത കെട്ടിടത്തിലാണ് ഇപ്പോഴും എക്സ്റേ യൂണിറ്റ് പ്രവർത്തിക്കുന്നത്. കെട്ടിടത്തിന് കാര്യമായ തകരാറുകളില്ലെന്നാണ് അധികൃതർ പറയുന്നത്. ഫിറ്റ്നസ് സർട്ടിഫിക്കറ്റ് അടക്കമുണ്ടെന്നും പറയുന്നു.

പൊളിഞ്ഞുവീഴാറായ കെട്ടിടങ്ങൾ തിരുവല്ലയിൽ‌

തിരുവല്ല: താലൂക്ക് ആശുപത്രിക്ക് പുതിയ കെട്ടിടങ്ങൾ പണിതു നൽകിയെങ്കിലും പഴ‍യ കെട്ടിടങ്ങളൽ പലതും വിട്ടൊഴിഞ്ഞിട്ടില്ല. ആശുപത്രി വളപ്പിൽ തന്നെ സുരക്ഷിതമല്ലാത്ത രീതിയിൽ ഈ കെട്ടിടങ്ങളുണ്ട്. ഇവയിൽ പലതിലും ആശുപത്രി സംവിധാനങ്ങൾ തുടരുന്നുമുണ്ട്. വയോമിത്രം സംവിധാനം പ്രവർത്തിക്കുന്നത് ഇത്തരത്തിൽ ഒരു കെട്ടിടത്തിലാണ്. കാലപ്പഴക്കം കാരണം ശോച്യാവസ്ഥയിലായി കെട്ടിട സമുച്ചയങ്ങളാണിത്. പഴയ ഓടിട്ട കെട്ടിടങ്ങളുടെ മേൽക്കൂര ദ്രവിച്ച മട്ടാണ്. കാറ്റു മഴയുമേറ്റ് ഈ കെട്ടിടങ്ങൾ ഏതു നിമിഷവും നിലംപൊത്താവുന്ന അവസ്ഥയിലാണ്. നൂറുകണക്കിനാളുകൾ ദിവസവും വന്നു പോകുന്ന ആശുപത്രി വളപ്പിൽ തന്നെയാണ് ഇത്തരം കെട്ടിടങ്ങൾ സ്ഥിതി ചെയ്യുന്നത്. രാവിലെ ഒന്പത് മുതൽ ഉച്ചകഴിഞ്ഞ് രണ്ടുവരെ ഈ കെട്ടിടത്തിൽ വയോമിത്രം സേവനം നൽകുന്നുണ്ട്. വയോധികരുൾപ്പെടെ നിരവധിയാളുകളാണ് ഇവിടെ എത്തുന്നത്.

തകർച്ചയിലായ ആശുപത്രി കെട്ടിടങ്ങൾ ഇവിടെയുമുണ്ട് : ബലപ്പെടുത്തൽ നടപടികൾക്ക് ഒരുങ്ങി ജനറൽ ആശുപത്രി ബി ആൻഡ് സി ബ്ലോക്ക്

പത്തനംതിട്ട: ജനറൽ ആശുപത്രിയിൽ 17 വർഷം മാത്രം പഴക്കമുള്ള ബി ആൻഡ് സി ബ്ലോക്കിന്‍റെ ബലപ്പെടുത്തൽ നടപടികൾ വൈകുന്നതിൽ ആശങ്ക. ബി ആൻഡ് സി ബ്ലോക്ക് അടച്ചിട്ട് പണികൾ തുടങ്ങണമെന്ന നിർദേശം ആറുമാസത്തിനു മുന്പ് ഉണ്ടായതാണ്. എന്നാൽ സ്ഥലപരിമിതിയിൽ വീർപ്പുമുട്ടുന്ന ആശുപത്രിയിലെ നിലവിലെ സംവിധാനങ്ങൾ താറുമാറാകുമെന്നു വന്നതോടെയാണ് പണികൾ വൈകിയത്. എന്നാൽ ആശുപത്രി കെട്ടിടം ഇപ്പോഴും സജീവമാണ്. നിലവിലെ സംവിധാനങ്ങൾ കോന്നി മെഡിക്കൽ കോളജിലേക്ക് മാറ്റുന്നതിനുള്ള ഉത്തരവ് ഉടനിറങ്ങും. ഇതു വന്നാലുടൻ ബി ആൻഡ് സി ബ്ലോക്ക് പൂർണമായി അടയ്ക്കും. ആശുപത്രിയിലെ ഐപി വിഭാഗത്തിൽ പ്രവേശിപ്പിക്കുന്നവരുടെ എണ്ണം കുറച്ചു കൊണ്ടുവരികയാണ്. ശസ്ത്രക്രിയ വിഭാഗങ്ങളിലും പുതിയ അഡ്മിഷൻ പരിമിതപ്പെടുത്തിയിട്ടുണ്ട്. ഒപിയിൽ വരുന്ന ഇത്തരം രോഗികളെ മെഡിക്കൽ കോളജുകളിലേക്ക് റഫർ ചെയ്യുകയാണ്. ബി ആൻഡ് സി ബ്ലോക്ക് ഗുരുതരമായ പ്രശ്നങ്ങളാണ് നേരിടുന്നത്. നിർമാണം പൂർത്തിയായി അധികകാലം കഴിയുന്നതിനു മുന്പേ പ്രശ്നങ്ങൾ ഉടലെടുത്തിരുന്നു. ചോർച്ചയും ഡ്രെയിനേജ് വിഷയങ്ങളും ശൗചാലയത്തിന്‍റെ തകരാറുകളുമെല്ലാം പ്രശ്നങ്ങളായി. ഏറ്റവുമൊടുവിൽ ചോർച്ച അസഹ്യമാകുകയും വാർഡുകൾ പ്രവർത്തിക്കാൻ തന്നെ ബുദ്ധിമുട്ടാകുകയും ചെയ്ത സാഹചര്യത്തിലാണ് അടിയന്തര അറ്റകുറ്റപ്പണി നിർദേശിച്ചത്. നിലവിലെ ആശുപത്രി സംവിധാനങ്ങൾ പ്രധാനമായും സ്ഥിതി ചെയ്യുന്നത് ഈ കെട്ടിടത്തിലാണ്. കെട്ടിടത്തിന്‍റെ ലിഫ്റ്റ് മാസങ്ങളായി തകരാറിലാണ്. ഇതു പ്രവർത്തിക്കുന്പോൾ കെട്ടിടം കുലുങ്ങുന്നതും കോൺക്രീറ്റ് അടർന്നു വീഴുന്നതുമായ പ്രശ്നങ്ങളുണ്ടായി. നിർമാണത്തിലെ പിഴവുകളാണ് തകർച്ചയ്ക്കു കാരണമായത്. കെട്ടിടത്തിനു ചോർച്ച ഉണ്ടാകാൻ തുടങ്ങിയിട്ട് വർഷങ്ങളായി. ഇടയ്ക്ക് അറ്റകുറ്റപ്പണികൾ നടത്തിയെങ്കിലും ഫലപ്രദമായില്ല. മലിനജലം രോഗികളെ കിടത്തിയിരിക്കുന്ന വാർഡുകളിലേക്കാണ് വീണിരുന്നത്. സർക്കാർ ഏജൻസിയായ ഇൻകെലിനെയാണ് നവീകരണ ജോലികൾക്ക് ചുമതലപ്പെടുത്തിയിരിക്കുന്നത്. നാഷണൽ ഹെൽത്ത് മിഷനിൽ നിന്നും 5.5 കോടി രൂപ ഇതിനായി ഉറപ്പാക്കിയിട്ടുണ്ട്. ഊരാളുങ്കൽ ലേബർ സൊസൈറ്റിയെ പണികൾ ഏല്പിച്ചിരിക്കുകയാണ്. ഫണ്ട് ലഭ്യമാണെന്നതിനാൽ അതിവേഗം നിർമാണം പൂർത്തീകരിക്കുകയാണ് ലക്ഷ്യം. കെട്ടിടത്തിന്‍റെ ഒരു നില നവീകരിച്ച് നേത്രചികിത്സാ വിഭാഗം ക്രമീകരിക്കും. കണ്ണ് ഓപ്പറേഷൻ തിയേറ്ററും വാർഡും ഇതിൽ ക്രമീകരിക്കും. നിലവിൽ ആശുപത്രിയിൽ ഒപി ബ്ലോക്കിന്‍റെയും അത്യാഹിത വിഭാഗത്തിന്‍റെയും പണികൾ നടന്നുവരികയാണ്. ഇതുകാരണം സ്ഥലസൗകര്യം തീരെയില്ല.

ആർ‌ട്ട് ഗാലറി ഉദ്ഘാടനം നാളെ

പത്തനംതിട്ട: പത്തനംതിട്ട ക്ലിന്‍റ് ആർട്ട് ഗാലറി ആൻഡ് ചാരിറ്റബിൾ സൊസൈറ്റി നേതൃത്വത്തിൽ പത്തനംതിട്ടയിൽ ആരംഭിക്കുന്ന ആർട്ട് ഗാലറിയുടെ ഉദ്ഘാടനം നാളെ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. പത്തനംതിട്ട പഴയ ബസ് സ്റ്റാൻഡ് - കെഎസ്ആർടിസി ക്രോസ് റോഡിനു സമീപം നടക്കുന്ന ചടങ്ങിൽ നഗരസഭ ചെയർമാൻ ടി. സക്കീർ ഹുസൈൻ ഉദ്ഘാടനം ചെയ്യും. പ്രഫ.ടെൻസിംഗ് ജോസഫ് മുഖ്യാതിഥിയായിരിക്കും. എട്ടോളം ചിത്രകാരന്മാരുടെ പെയ്ന്റിംഗുകളാണ് ഗാലറിയിൽ ഉദ്ഘാടനത്തോടനുബന്ധിച്ച് പ്രദർശിപ്പിക്കുന്നത്. പുറത്തുള്ള മറ്റു ചിത്രകാരന്മാർക്കും അവസരമൊരുക്കും. നാല്‌പതോളം പെയിന്‍റിംഗുകൾ പ്രദർശനത്തിൽ ഉണ്ടാകും. ആവശ്യക്കാർക്ക് ചിത്രങ്ങൾ വിലയ്ക്ക് വാങ്ങാനുള്ള സൗകര്യവും ക്രമീകരിച്ചിട്ടുണ്ട്. സൊസൈറ്റി സെക്രട്ടറി പ്രേംദാസ് പത്തനംതിട്ട, പ്രസിഡന്‍റ് ഷേർലി സൂസൻ തോമസ്, ട്രഷറാർ റോയ് ഡാനിയൽ, ഷീല വടശേരിക്കര, എം. എസ്. കലാദേവി എന്നിവർ പത്രസമ്മേളനത്തിൽ പങ്കെടുത്തു.

നൈപുണ്യ വികസനത്തിന് പ്രാധാന്യം നൽകും: മന്ത്രി

ഏഴംകുളം: നൈപുണ്യ വികസനത്തിന് വലിയ പ്രാധാന്യമാണ് സർക്കാർ നൽകുന്നതെന്ന് മന്ത്രി ആർ.ബിന്ദു. അടൂർ എസ്എൻ ഐടി കോളജിലെ ബിരുദ ദാന ചടങ്ങ് ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. തൊഴിൽ വികസനത്തിന് ആവശ്യമായ പ്ലാറ്റ്ഫോമുകൾ വികസിപ്പിക്കുകയാണെന്നും മന്ത്രി പറഞ്ഞു. ഡെപ്യൂട്ടി സ്പീക്കർ ചിറ്റയം ഗോപകുമാർ അവാർഡ് വിതരണം നടത്തി. എസ്എൻഐടി കോളേജ് ചെയർമാൻ കെ.സദാനന്ദൻ അധ്യക്ഷത വഹിച്ചു. കോളജ് മാനേജിംഗ് ഡയറക്ടർ എബിൻ അമ്പാടിയിൽ, പ്രിൻസിപ്പൽ ഇൻ ചാർജ് എൻ.രാധാകൃഷ്ണൻ നായർ, എംബിഎ വിഭാഗം ഡയറക്ടർ ജി.ഹരിസുന്ദർ, വിവിധ വകുപ്പ് മേധാവികളായ ആർ.എസ്.ചിപ്പി, സുജാ പൗലോസ്, ലക്ഷ്മി ആർ. നായർ, എം.സി.മല്ലിക, ഒ.അമ്പാടി, ആർ.ലക്ഷ്മിപ്രിയ, ജൂബിത്ത് ബാനർജി എന്നിവർ പ്രസംഗിച്ചു.

സിഎസ്ഐ സഭ സെൻട്രൽ സോൺ മഹാ ഇടവകദിനാചരണം നാളെ തോലശേരിയിൽ

പത്തനംതിട്ട: സിഎസ്ഐ സഭ സെൻട്രൽ സോൺ നേതൃത്വത്തിൽ 147 -മത് മഹാ ഇടവകദിനം നാളെ തിരുവല്ല തോലശേരി സെന്‍റ് തോമസ് സിഎസ്ഐ പള്ളിയിൽ നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. സിഎസ്ഐ മധ്യകേരള മഹാഇടവകയുടെ 150 -ാമത് വാർഷികാഘോഷങ്ങളുടെ മുന്നോടിയായാണ് വിവിധ സോണുകളായി അടുത്ത മൂന്നുവർഷം പ്രത്യേകമായ സമ്മേളനങ്ങൾ ക്രമീകരിച്ചുവരുന്നതെന്ന് ഭാരവാഹികൾ പത്രസമ്മേളനത്തിൽ പറഞ്ഞു. സെൻട്രൽ സോണിലെ തിരുവല്ല, ഇലന്തൂർ, കുന്പളാംപൊയ്ക വൈദികജില്ലകളിലെ ഇടവകകളിൽ നിന്നുള്ള വൈദികരും വിശ്വാസികളുമാണ് സമ്മേളനത്തിൽ പങ്കെടുക്കുന്നത്. ഉച്ചകഴിഞ്ഞ് മൂന്നിന് മന്ത്രി വീണാ ജോർജ് ഉദ്ഘാടനം ചെയ്യും. ബിഷപ് ഡോ. മലയിൽസാബു കോശി ചെറിയാൻ അധ്യക്ഷത വഹിക്കും. ആർച്ച് ബിഷപ് ഡോ.തോമസ് മാർ കൂറിലോസ്അനുഗ്രഹ പ്രഭാഷണം നടത്തും. ആന്‍റോ ആന്‍റണി എംപി, മാത്യു ടി.തോമസ് എംഎൽഎ, അഡ്വ. ഷീബാ തരകൻ, റവ. ജിജി ജോസഫ്, റവ .ജോണി ആൻഡ്രൂസ് തുടങ്ങിയവർ പ്രസംഗിക്കും. സംഘാടക സമിതി കൺവീനർ റവ. സി. വൈ. തോമസ്, വൈദിക ജില്ലാ ചെയർമാൻമാരായ റവ. സോജി വർഗീസ് ജോൺ, റവ. മാത്യു പി. ജോർജ്, സെക്രട്ടറിമാരായ ജോജി തോമസ്, റിജോ തോമസ് നൈനാൻ, സുകു മാത്യു എന്നിവർ പത്രസമ്മേളനത്തിൽ പങ്കെടുത്തു.

സിബിഐ സംഘം ചിറ്റാറിലെത്തി അന്വേഷണം നടത്തി

പത്തനംതിട്ട: വനപാലകരുടെ കസ്റ്റഡിയിൽ ചിറ്റാറിലെ കർഷകൻ പി. പി. മത്തായി മരിച്ച സംഭവത്തിൽ സിബിഐ സംഘം ചിറ്റാറിലും കുടപ്പനയിലുമെത്തി വിവരങ്ങൾ ശേഖരിച്ചു. മത്തായിയെ വനപാലകർ വിളിച്ചുകൊണ്ടുപോയ വനമേഖലയിലും മൃതദേഹം കണ്ടെത്തിയ കുടപ്പനയിലെ കുടുംബവീടിനോടു ചേർന്ന കിണറും സംഘം പരിശോധന നടത്തി. ഹൈക്കോടതി നിർദേശപ്രകാരം കേസിൽ സിബിഐ പുനരന്വേഷണത്തിനായി പ്രത്യേക സംഘത്തെ നിയോഗിച്ചിരിക്കുകയാണ്. ഇവർ കഴിഞ്ഞദിവസം മത്തായിയുടെ ഭാര്യ ഷീബാമോളുടെ മൊഴി രേഖപ്പെടുത്തിയിരുന്നു.

പരിയാരം റോഡിലെ തേരടപ്പുഴ വളവ് നേരേയാക്കണം; കേരള കോൺ. സമരം നടത്തി

മല്ലപ്പള്ളി: മല്ലപ്പള്ളി - പരിയാരം - കോമളം റോഡിലെ തേരടപ്പുഴ കലുങ്കിനു സമീപം നിരന്തരമായുണ്ടാകുന്ന അപകടങ്ങൾ പരിഹരിക്കുവാൻ അടിയന്തര നടപടികൾ സ്വീകരിക്കണമെന്ന് കേരള കോൺഗ്രസ് സീനിയർ ജനറൽ സെക്രട്ടറി കുഞ്ഞുകോശി പോൾ. തേരടപ്പുഴ കലുങ്കിനു സമീപം നിരന്തരമായുണ്ടാകുന്ന അപകടങ്ങൾക്കു പരിഹാരം തേടി കേരള കോൺഗ്രസ് നടത്തിയ ശ്രദ്ധക്ഷണിക്കൽ സമരം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. റോഡ് നിർമിച്ച കെഎസ്ടിപിക്ക് അഞ്ചു വർഷത്തേക്ക് പരിപാലന ചുമതല ഉണ്ടായിരിക്കേ, തുടർച്ചയായി അപകടങ്ങളും ഒരു മരണവും നടന്നിട്ടും ബന്ധപ്പെട്ടവർ തിരിഞ്ഞു നോക്കിയില്ലെന്ന് അദ്ദേഹം കുറ്റപ്പെടുത്തി. റോഡ് സുരക്ഷാ വിഭാഗം സ്ഥലം സന്ദർശിക്കണമെന്നും കുഞ്ഞുകോശി പോൾ ആവശ്യപ്പെട്ടു. ടി.എസ്. ചന്ദ്രശേഖരൻ നായർ അധ്യക്ഷത വഹിച്ചു. ഉന്നതാധികാര സമിതി അംഗം ജോൺസൺ കുര്യൻ, സംസ്ഥാന കമ്മിറ്റി അംഗം എം. എസ്. ശ്രീദേവി, കോൺഗ്രസ് ബ്ലോക്ക് വൈസ് പ്രസിഡന്‍റ് സാം പട്ടേരിൽ, ഗ്രാമപഞ്ചായത്തു പ്രസിഡന്‍റുമാരായ എസ്. വിദ്യമോൾ, സൂസൻ ദാനിയേൽ, അംഗം സജി ഡേവിഡ്, ബ്ലോക്ക് പഞ്ചായത്തംഗം ലൈല അലക്സാണ്ടർ, അനിൽ കയ്യാലാത്ത്, രാജൻ എണാട്ട്, ഏബ്രഹാം ജോർജ് , ജോസ് കുഴിമണ്ണിൽ, ബാബു പടിഞ്ഞാറെക്കൂറ്റ്, ജോൺസൺ ജേക്കബ്, ജോസഫ് മാത്യു, ബിജു പണിക്കമുറി, അലക്സാണ്ടർ കുളങ്ങര, ജേക്കബ് ജോർജ്, സതീഷ് കരിങ്ങടംപള്ളി , സാബു കളർമണ്ണിൽ , എം. കെ. കുര്യൻഎന്നിവർ പ്രസംഗിച്ചു.

ആനപ്രേമികളെ കണ്ണീരിലാഴ്ത്തി ഓമല്ലൂർ മണികണ്ഠൻ വിടവാങ്ങി

ഓമല്ലൂർ: ആനപ്രേമികളെ കണ്ണീരിലാഴ്ത്തി ഓമല്ലൂർ മണികണ്ഠൻ വിടവാങ്ങി. ഓമല്ലൂർ രക്തകണ്ഠസ്വാമി ക്ഷേത്രത്തിലെ ആനത്തറയിൽ വിശ്വാസികളൊരുക്കിയ അന്തിമോപചാര ചടങ്ങുകൾക്ക്‌ ശേഷം വനംവകുപ്പ്‌ ഏറ്റുവാങ്ങിയ ജഡം കല്ലേലി -അച്ചൻകോവിൽ പാതയിലെ ഉൾവനത്തിൽ സംസ്‌കരിച്ചു. എരണ്ടകെട്ടിനെ തുടർന്ന്‌ ഒരു മാസമായി ചികിത്സയിലായിരുന്ന മണികണ്ഠൻ വ്യാഴാഴ്ച വൈകുന്നേരമാണ് ചരിഞ്ഞത്‌. 50 വർഷമായി ഓമല്ലൂർ ക്ഷേത്രത്തിന്‍റെ ഭാഗമായിരുന്നു മണികണ്ഠൻ. ആനയുടെ വിയോഗ വാർത്തയറിഞ്ഞ്‌ നിരവധിപേർ ഓമല്ലൂരിൽ എത്തിയിരുന്നു. ക്ഷേത്രാചാര ചടങ്ങുകൾക്ക്‌ ശേഷം ഉച്ചയോടെയാണ്‌ വനം വകുപ്പ്‌ അധികൃതർ ആനയെ ക്രെയിൻ ഉപയോഗിച്ച്‌ ലോറിയിൽ കയറ്റി കൊണ്ടുപോയത്‌. തിരുവിതാംകൂർ ദേവസ്വംബോർഡ്‌ അധികൃതരും പ്രദേശവാസികളും അനുഗമിച്ചു. പോസ്‌റ്റ്‌മോർട്ടത്തിനു ശേഷമായിരുന്നു ജഡം സംസ്കരിച്ചത്.

പീഡനക്കേസിൽ അറസ്റ്റ് ചെയ്തു

പത്തനംതിട്ട: ഫേസ്ബുക്കിലൂടെ പരിചയം മുതലെടുത്ത് യുവതിയെ ലോഡ്ജുകളിലെത്തിച്ച് പീഡിപ്പിച്ചെന്ന കേസിൽ മധ്യവയസ്‌കന്‍ അറസ്റ്റിൽ. ഇടുക്കി തൊടുപുഴ ഉടുമ്പന്നൂര്‍ മലയിഞ്ചി തെങ്ങനാരക്കല്‍ വീട്ടില്‍ ടി.ആർ. ബൈജുവാണ് (49) തിരുവല്ല പോലീസിന്‍റെ പിടിയിലായത്. യുവതിയുടെ പരാതിയേ തുടർന്ന് പോലീസ് ഇൻസ്പെക്ടർ എസ്.സന്തോഷിന്‍റെ നേതൃത്വത്തില്‍ അന്വേഷണം നടക്കുന്നതിനിടെ ബൈജു യുവതിയെ കാണാന്‍ തിരുവല്ലയില്‍ എത്തിയതായി രഹസ്യ വിവരം ലഭിച്ചു. തുടര്‍ന്ന് കെഎസ്ആര്‍ടിസി സ്റ്റാന്‍ഡില്‍ നിന്നും ഇയാളെ പോലീസ് കസ്റ്റഡിയിലെടുക്കുകയായിരുന്നു. 2022 ജൂണ്‍ ഒന്നിനും 2025 മേയ് നാലിനും ഇടയിലുള്ള കാലയളവിലാണ് പീഡനം. അവിവാഹിതയായ യുവതിയുമായി ഫേസ് ബുക്കിലൂടെ പരിചയം സ്ഥാപിച്ച ഇയാൾ തുടര്‍ച്ചയായി സന്ദേശങ്ങള്‍ അയച്ചും ഫോണില്‍ വിളിച്ചും ബന്ധം തുടര്‍ന്നു. വിവാഹമോചിതനാണെന്നും വിവാഹം കഴിക്കാന്‍ താല്പര്യം ഉണ്ടെന്നും പറഞ്ഞു വിശ്വസിപ്പിച്ച ഇയാൾ, വീട്ടിലെത്തി യുവതിയുടെ അമ്മയെയും സ്വാധീനിച്ചു. തുടര്‍ന്ന് തിരുവനന്തപുരം, കോട്ടയം, ചെങ്ങന്നൂർ, തിരുവല്ല, കോഴഞ്ചേരി, ഇടുക്കി എന്നിവടങ്ങളില്‍ കൊണ്ടുപോയി പീഡിപ്പിച്ചുവെന്നാണ് യുവതി മൊഴി നല്‍കിയിട്ടുള്ളത്. വിവാഹിതനും രണ്ട് കുട്ടികളുടെ പിതാവുമാണ് ബൈജു. തിരുവല്ല ജെഎഫ്എം കോടതിയിലും മൊഴിരേഖപ്പെടുത്തി. ഇയാളുടെ മൊബൈല്‍ ഫോണ്‍ പോലീസ് പിടിച്ചെടുത്തു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

വെച്ചൂച്ചിറ നവോദയ വിദ്യാലയത്തിൽ വനമഹോത്സവം

വെച്ചൂച്ചിറ: പത്തനംതിട്ട ജില്ലാതല വനമഹോത്സവം വെച്ചൂച്ചിറ ജവഹർ നവോദയ വിദ്യാലയത്തിൽ നടന്നു. സാമൂഹ്യവനവത്കരണ വിഭാഗം പത്തനംതിട്ട, റാന്നി - കോന്നി ഡിവിഷനുകളുടെ ആഭിമുഖ്യത്തിൽ നടന്ന പരിപാടി പ്രമോദ് നാരായൺ എംഎൽഎ ഉദ്ഘാടനം ചെയ്തു. വെച്ചൂച്ചിറ ഗ്രാമപഞ്ചായത്ത് പ്രസിഡന്‍റ് ഇ.വി.വർക്കിയുടെ അധ്യക്ഷതയിൽ ഗ്രാമപഞ്ചായത്ത് മുൻ പ്രസിഡന്‍റ് ടി.കെ.ജയിംസ്, വാർഡ് മെംബർ പ്രസന്നകുമാരി, റാന്നി ഡിഎഫ്ഒ എൻ. രാജേഷ്, കോന്നി ഡിഎഫ്ഒ രാജേഷ് കുമാർ കോറി, സോഷ്യൽ ഫോറസ്ട്രി ഡിഎഫ്ഒ രാഹുൽ, റേഞ്ച് ഓഫീസർമാരായ ബി.ആ. ജയൻ, ജി.എസ്. രഞ്ജിത്, വി.എസ്. ഷുഹൈബ്, നവോദയ പ്രിൻസിപ്പൽ വി.സുധീർ, ടസ് പ്രിൻസിപ്പൽ രശ്മി എന്നിവർ പ്രസംഗിച്ചു. അമ്മയ്ക്കൊരു മരം പദ്ധതിയുടെ ഭാഗമായി വിശിഷ്ടാതിഥികൾ സ്കൂളിലെ വിദ്യാവനം സന്ദർശിച്ച് വൃക്ഷത്തൈകൾ നട്ടു.

കുറ്റൂർ - ഈരടിച്ചിറ റോഡ് തകർന്നു

തിരുവല്ല: കുറ്റൂർ ഗ്രാമപഞ്ചായത്തിലെ 13,14 വാർഡുകളിൽകൂടി കടന്നുപോകുന്ന പൊതുമരാമത്തുവകുപ്പിന്‍റെ ഉടമസ്ഥതയിലുള്ള കുറ്റൂർ - തോണ്ടറ - ഈരടിച്ചിറ - പനച്ചമൂട്ടിൽകടവ് റോഡ് പൂർണമായും തകർന്നു. റീ ടാറിംഗ് നടന്നിട്ടു 10 വർഷത്തിലേറെയായി. രണ്ട് വർഷങ്ങൾ കൂടുമ്പോൾ കുഴികൾ അടച്ചു നവീകരണം നടത്തുക മാത്രമാണ് ചെയ്യുന്നത്. റോഡിന്‍റെ ഭൂരിഭാഗം സ്ഥലത്തും 10 മീറ്ററിലധികം വീതി ഉള്ളപ്പോൾ നാലു മീറ്റർ വീതിയിൽ മാത്രമാണ് ടാറിംഗ് നടത്തിയിട്ടുള്ളത്. ഇരുവശങ്ങളിലുമുള്ള ആറു മീറ്റർ സ്ഥലത്തു കാടുകയറി ഇഴജന്തുക്കളുടെയും ഉപദ്രവകാരികളായ ജന്തുക്കളുടെയും വാസസ്ഥലമായി മാറിയിരിക്കുകയാണ്. നിലവിൽ റോഡ് പൂർണമായി തകർന്ന അവസ്ഥയിലാണ്. തെങ്ങേലി നിവാസികൾക്കു തിരുവല്ല, ചെങ്ങന്നൂർ, കുറ്റൂർ എന്നിവിടങ്ങളിലേക്ക് എത്തുന്നതിനുള്ള ഏക യാത്രാമാർഗമാണിത്. ദിനംപ്രതി ആയിരക്കണക്കിനാളുകൾ ഉപയോഗിച്ച് വരുന്നതും നൂറു കണക്കിന് വാഹനങ്ങൾ കടന്നുപോകുന്നതുമായ പാതയാണ്. തെങ്ങേലി നിവാസികൾക്ക് മാവേലിക്കര ഭാഗത്തേക്ക്‌ പോകുവാനുള്ള എളുപ്പവഴിയുമാണ്. റോഡിലെ കുഴിയിൽ ചാടി ഇരുചക്രവാഹനങ്ങളിൽ യാത്ര ചെയ്യുന്നവർക്ക് അപകടം സംഭവിക്കുക പതിവായി. റോഡിന്‍റെ അവസാനഭാഗം 100 മീറ്റർ ദൂരം പൊതുമരാമത്തു വകുപ്പിന്‍റെ ആസ്തിയിൽ ഇല്ലെന്നു പറഞ്ഞ് അവിടെ നവീകരണം നടത്തിയിട്ടു വർഷങ്ങളായി. എന്നാൽ മാമ്മൻ മത്തായി എംഎൽഎയുടെ കാലത്ത് പൊതുമരാമത്തു വകുപ്പാണ് റോഡ് നിർമിച്ചതെന്നു നാട്ടുകാർ പറയുന്നു. പനച്ചമൂട്ടിൽ കടവ് പാലത്തിന്‍റെ അപ്രോച്ചു റോഡ് പൊതുമരാമത്ത് വകുപ്പിന്‍റേതുമാണ്. അപ്രോച്ച് റോഡിനും ഈരടിച്ചിറ ജംഗ്ഷനും ഇടയ്ക്കുള്ള ഭാഗത്താണ് 100 മീറ്റർ ദൂരം ആസ്തിയിൽ പെടാത്തത്. എന്നാൽ വിഷയത്തിൽ പൊതുമരാമത്തുവകുപ്പോ എംഎൽഎയോ ശ്രദ്ധിക്കുന്നില്ലെന്നു പഞ്ചായത്ത്‌ മെംബർ ജോ ഇലഞ്ഞിമൂട്ടിൽ കുറ്റപ്പെടുത്തി.

വിദ്യാലയ വിശേഷങ്ങളുമായി ലൂസി ടീച്ചറുടെ കത്ത് തപാലിൽ എത്തും

മൈലപ്ര: നവമാധ്യമങ്ങളും സ്കൂൾ, ക്ലാസ് ഗ്രൂപ്പുകളുമൊക്കെ സജീവമാണെങ്കിലും കുട്ടികളും രക്ഷിതാക്കളും സ്കൂളും തമ്മിലുള്ള ബന്ധം ദൃഢപ്പെടുത്താനായി ലൂസി ടീച്ചർ കത്ത് എഴുതുകയാണ്. മൈലപ്ര എസ്എച്ച് ഹൈസ്കൂൾ ഹെഡ്മിസ്ട്രസായി ചുമതലയേറ്റതിനു പിന്നാലെയാണ് വിദ്യാലയ വിശേഷങ്ങൾ ഉൾക്കൊള്ളിച്ച് എം. ലൂസി കത്ത് തയാറാക്കി തുടങ്ങിയത്. പത്താം ക്ലാസിലെ കുട്ടികളുടെ രക്ഷിതാക്കൾക്കാണ് ആദ്യഘട്ടത്തിൽ കത്തുകൾ അയയ്ക്കുന്നത്. അധ്യയന വർഷത്തെ പ്രവർത്തനങ്ങൾ ചർച്ച ചെയ്യുന്നതിനും കുട്ടികളുടെ മാനസിക, ശാരീരിക വളർച്ചയ്ക്കൊപ്പം ബോധന നിലവാരം വളർത്തിയെടുത്ത് മൊബൈൽ ഗെയിമുകളിൽ നിന്നും ലഹരി ഉത്പന്നങ്ങളിൽ നിന്നും കുട്ടികളെ അകറ്റി നിർത്തുന്നതിനും കൂട്ടായ കൈകോർക്കൽ എന്ന സന്ദേശം കൂടി കത്തിന്‍റെ ഉള്ളടക്കത്തിലുണ്ട്. ശനിയാഴ്ച നടക്കുന്ന അധ്യാപക രക്ഷാകർത്തൃ യോഗത്തിലേക്കും രക്ഷിതാക്കളെ ക്ഷണിച്ചിരിക്കുകയാണ്. കത്തുകളും ആശംസാ കാർഡുകളും പോസ്റ്റൽ വഴി കൈകളിൽ എത്തുമ്പോഴുണ്ടാകുന്ന സന്തോഷം നവ മാധ്യമ സന്ദേശങ്ങൾക്ക് നൽകാനാകില്ലെന്ന് ടീച്ചർ ചൂണ്ടിക്കാട്ടി. ഇൻലൻഡ് ഉപയോഗം കുറഞ്ഞിരിക്കുന്ന കാലഘട്ടത്തിൽ പോസ്റ്റ് ഓഫീസിൽ അധികഎണ്ണം ലഭിക്കാൻ തന്നെ ബുദ്ധിമുട്ടുണ്ട്. 2.50 രൂപയാണ് ഇപ്പോഴത്തെ വില. 220 കത്തുകളാണ് ആദ്യഘട്ടത്തിൽ പോസ്റ്റ് ചെയ്തിരിക്കുന്നത്. സ്കൂൾ വിശേഷങ്ങൾ ഇൻലൻഡ് കത്തിലൂടെ വീടുകളിലെത്തുന്നത് കത്തുകളുടെ പഴയ പ്രതാപം വീണ്ടെടുക്കാനുള്ള പ്രേരണ കൂടിയാകുമെന്നും വിദ്യാഭ്യാസ സ്ഥാപനങ്ങൾ ഈ രീതി പിന്തുടർന്നാൽ നന്നാകും എന്ന വിശ്വാസം കൂടി ലൂസി ടീച്ചർ പങ്കിടുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]