മലപ്പുറം: ലോക്സഭാ തെരഞ്ഞെടുപ്പിനുള്ള വോട്ടിംഗ് യന്ത്രങ്ങളുടെയും മറ്റു പോളിംഗ് സാമഗ്രികളുടെയും വിതരണ,ശേഖരണ കേന്ദ്രങ്ങളുടെ പട്ടിക തയാറായി. ജില്ലയിലെ 16 നിയോജകമണ്ഡലങ്ങളിലേക്കും പ്രത്യേകം സജ്ജമാക്കിയ കേന്ദ്രങ്ങളിലാണ് പോളിംഗ് സാമഗ്രികള്‍ വിതരണം ചെയ്യുക.
അതത് നിയോജകമണ്ഡലങ്ങളുടെ ചുമതലയുള്ള ഉപവരണാധികാരികളുടെ നേതൃത്വത്തിലായിരിക്കും വിതരണം. വോട്ടെടുപ്പിന് ശേഷം നടപടിക്രമങ്ങള്‍ പൂര്‍ത്തിയാക്കി ഈ കേന്ദ്രങ്ങളില്‍ തന്നെയാണ് യന്ത്രങ്ങള്‍ തിരിച്ചേല്‍പ്പിക്കേണ്ടത്. ശേഖരണ കേന്ദ്രങ്ങളില്‍ നിന്നു വോട്ടിംഗ് യന്ത്രങ്ങള്‍ അന്നു തന്നെ സ്ട്രോംഗ് റൂമുകളിലേക്ക് മാറ്റും.
മലപ്പുറം ജില്ലയിലെ ശേഖരണ, വിതരണ കേന്ദ്രങ്ങള്‍:
കൊണ്ടോട്ടി (ഗവണ്‍മെന്‍റ് വൊക്കേഷണല്‍ ഹയര്‍ സെക്കന്‍ഡറി സ്കൂള്‍, മേലങ്ങാടി, കൊണ്ടോട്ടി), മഞ്ചേരി (ജിബിഎച്ച്എസ്എസ് മഞ്ചേരി ഹൈസ്കൂള്‍), പെരിന്തല്‍മണ്ണ (ഗവണ്‍മെന്‍റ് ഗേള്‍സ് ഹയര്‍ സെക്കന്‍ഡറി സ്കൂള്‍, പെരിന്തല്‍മണ്ണ), മങ്കട (ഗവണ്‍മെന്‍റ് മോഡല്‍ ഹയര്‍ സെക്കന്‍ഡറി സ്കൂള്‍, പെരിന്തല്‍മണ്ണ), മലപ്പുറം (ഗവണ്‍മെന്‍റ് കോളജ് മലപ്പുറം),
വേങ്ങര (കെ.എം. മൗലവി മെമ്മോറിയല്‍ ഓര്‍ഫനേജ് അറബിക് കോളജ്, തിരൂരങ്ങാടി), വള്ളിക്കുന്ന് (ഗവണ്‍മെന്‍റ് ഹയര്‍ സെക്കന്‍ഡറി സ്കൂള്‍, തിരൂരങ്ങാടി), ഏറനാട് (ജിയുപിഎസ് ചുള്ളക്കാട്, മഞ്ചേരി), നിലമ്പൂര്‍, വണ്ടൂര്‍ (മാര്‍ത്തോമ എച്ച്എസ്എസ് ചുങ്കത്തറ), തിരൂരങ്ങാടി (തിരൂരങ്ങാടി ഓര്‍ഫനേജ് അപ്പര്‍ പ്രൈമറി സ്കൂള്‍), തിരൂര്‍, താനൂര്‍, കോട്ടക്കല്‍ (സീതി സാഹിബ് മെമ്മോറിയല്‍ പോളിടെക്നിക് കോളജ് തിരൂര്‍),
തവനൂര്‍ (കേളപ്പജി കോളജ് ഓഫ് അഗ്രികല്‍ച്ചര്‍ എന്‍ജിനീയറിംഗ് ആന്‍ഡ് ടെക്നോളജി), പൊന്നാനി (അച്യുതവാര്യര്‍ ഹയര്‍ സെക്കന്‍ഡറി സ്കൂള്‍ പൊന്നാനി). പൊന്നാനി ലോക്സഭാ മണ്ഡലത്തില്‍ ഉള്‍പ്പെട്ട പാലക്കാട് ജില്ലയിലെ തൃത്താല മണ്ഡലത്തില്‍ ശ്രീനീലകണ്ഠ ഗവണ്‍മെന്‍റ് സംസ്കൃത കോളജ് പട്ടാമ്പിയാണ് പോളിംഗ് സാമഗ്രികളുടെ ശേഖരണ വിതരണ കേന്ദ്രം.
ജില്ലയില്‍ ഉപയോഗിക്കുക 3324 വോട്ടിംഗ് യന്ത്രങ്ങള്‍
മലപ്പുറം: ലോക്സഭാ തെരഞ്ഞെടുപ്പില്‍ മലപ്പുറം ജില്ലയിലെ 16 നിയമസഭാ മണ്ഡലങ്ങളിലേക്കുമായി ആകെ 3324 വോട്ടിംഗ് യന്ത്രങ്ങളാണ് അനുവദിച്ചിട്ടുള്ളത് . റിസര്‍വായി അനുവദിച്ച വോട്ടിംഗ് യന്ത്രങ്ങളുടെ എണ്ണം കൂടി ചേര്‍ത്തുള്ള കണക്കാണിത്.
ജില്ലയില്‍ ആകെ 2798 പോളിംഗ് സ്റ്റേഷനുകളാണുള്ളത്. ഓരോ മണ്ഡലത്തിലേക്കും ആവശ്യമായതിന്‍റെ 20 ശതമാനം ബാലറ്റ്, കണ്ട്രോള് യൂണിറ്റുകളും 30 ശതമാനം വിവിപാറ്റ് മെഷീനുകളുമാണ് റിസര്‍വായി അധികം ഉള്‍പ്പെടുത്തിയിട്ടുള്ളത്.
റിസര്‍വ് അടക്കം മലപ്പുറം, പൊന്നാനി (തൃത്താല അടക്കം) ലോക്സഭാ മണ്ഡലങ്ങളിലേക്കായി ആകെ 2827 വോട്ടിംഗ് യന്ത്രങ്ങളാണ് (പൊന്നാനി 1381, മലപ്പുറം 1446) അനുവദിച്ചിട്ടുള്ളത്.