സഞ്ജു സാംസൺ
ചണ്ഡിഗഡ്: സയ്യിദ് മുഷ്താഖ് അലി ട്വന്റി-20 ക്രിക്കറ്റ് എലൈറ്റ് ഗ്രൂപ്പ് സിയില് കേരളത്തിനായി രോഹന് കുന്നുമ്മലിന്റെയും (47 പന്തില് 75) സഞ്ജു സാംസണിന്റെയും (16 പന്തില് 47) തകര്പ്പന് ബാറ്റിംഗ്. ടോസ് നേടി ആദ്യം ബാറ്റ് ചെയ്ത കേരളം 20 ഓവറില് എട്ടു വിക്കറ്റ് നഷ്ടത്തില് 211 റണ്സ് നേടി. എതിരാളികളായ മഹാരാഷ്ട്ര 16 ഓവറില് 117 റണ്സിനു പുറത്തായി. നാല് ഓവറില് 27 റണ്സ് വഴങ്ങി അഞ്ചു വിക്കറ്റ് സ്വന്തമാക്കിയ കേരളത്തിന്റെ പേസര് എം.ഡി. നിധീഷാണ് പ്ലെയര് ഓഫ് ദ മാച്ച്.
മുഹമ്മദ് അസ്ഹറുദ്ദീന്റെ (1) വിക്കറ്റ് നഷ്ടത്തോടെയാണ് കേരളം ഇന്നിംഗ്സ് ആരംഭിച്ചത്. മൂന്നാം നമ്പറില് എത്തിയ അഹമ്മദ് ഇമ്രാനും (13) പിന്നാലെ മടങ്ങി. എന്നാല്, മൂന്നാം വിക്കറ്റില് രോഹന് കുന്നുമ്മലും സഞ്ജു സാംസണും ചേര്ന്ന് സ്കോര് 118ല് എത്തിച്ചു. മൂന്നു സിക്സും ഒമ്പതു ഫോറും അടങ്ങുന്നതായിരുന്നു രോഹന്റെ ഇന്നിംഗ്സ്. സഞ്ജുവിന്റെ ബാറ്റില്നിന്ന് അഞ്ചു സിക്സും മൂന്നു ഫോറും പിറന്നു. സല്മാന് നിസാര് 13 പന്തില് 29 റണ്സുമായി പുറത്താകാതെ നിന്നു.
212 റണ്സ് ലക്ഷ്യവുമായി ക്രീസിലെത്തിയ മഹാരാഷ്ട്രയുടെ ക്യാപ്റ്റന് പൃഥ്വി ഷാ (6) തുടക്കത്തിലേ പുറത്ത്. ഏഴാമനായെത്തിയ രാമകൃഷ്ണ ഘോഷാണ് (28) അവരുടെ ഇന്നിംഗ്സിലെ ടോപ് സ്കോറര്. രണ്ടു മത്സരങ്ങളില്നിന്ന് നാലു പോയിന്റുമായി നാലാം സ്ഥാനത്താണ് കേരളം.
Tags : Cricket Sanju Kerala Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash