കണ്ണൂര്‍: സംസ്ഥാന കായിക വകുപ്പിനു കീഴിലുള്ള തിരുവനന്തപുരം ജി.വി.രാജ സ്പോര്ട്സ് സ്‌കൂള്‍, കണ്ണൂര്‍ സ്പോര്ട്സ് സ്‌കൂള്‍, തൃശൂര്‍ സ്പോര്ട്സ് ഡിവിഷന്‍ എന്നിവിടങ്ങളിലേക്കുള്ള സെലക്‌ഷന്‍ ട്രയല്‍സ് ഇന്നാരംഭിക്കും. ജില്ലയില്‍ മൂന്നു കേന്ദ്രങ്ങളിലാണ് ട്രയല്‍സ് സംഘടിപ്പിക്കുന്നത്. ജില്ലാടിസ്ഥാനത്തിലല്ല ട്രയല്‍സ് സംഘടിപ്പിക്കുന്നത്. ഏതു ജില്ലക്കാരായ വിദ്യാര്‍ഥികള്‍ക്കും ട്രയല്‍സില്‍ പങ്കെടുക്കാം.
ഇന്ന് വയക്കര ഗവ എച്ച്എസ്എസിലും 30ന് ഇരിട്ടി എംജി കോളജിലും കണ്ണൂര്‍ പോലീസ് പരേഡ് ഗ്രൗണ്ടിലുമാണ് ട്രയല്‍സ് സംഘടിപ്പിക്കുന്നത്. ട്രയല്‍സ് രാവിലെ എട്ടിന് ആരംഭിക്കും. ആറു മുതല്‍ 11 വരെയുള്ള ക്ലാസുകളിലേക്കുള്ള വിദ്യാര്‍ഥികള്‍ക്കുവേണ്ടിയാണ് ട്രയല്‍സ് നടത്തുന്നത്. 9,10 ക്ലാസുകളിലെ ഒഴിവുള്ള സീറ്റുകളിലേക്ക് സംസ്ഥാനതലത്തില്‍ മെഡല്‍ നേടിയവര്‍ക്കു മാത്രമാണ് പ്രവേശനം അനുവദിക്കുക. അത്‌ലറ്റിക്സ്, ബോക്സിംഗ്, ജൂഡോ, ക്രിക്കറ്റ് (പെണ്‍കുട്ടികള്‍), തായ്ക്കോണ്ടോ (പെണ്‍കുട്ടികള്‍), വോളിബോള്‍, ബാസ്‌കറ്റ്ബോള്‍, ഹോക്കി, റസ്‌ലിംഗ് എന്നീ ഇനങ്ങളിലേക്കാണ് ട്രയല്‍സ് നടത്തുന്നത്. ഫുട്ബോളിനുള്ള സെലക്‌ഷന്‍ ട്രയല്‍സ് ഇതിനോടൊപ്പം ഉണ്ടായിരിക്കില്ല. ട്രയല്‍സില്‍ പങ്കെടുക്കാനെത്തുന്ന കുട്ടികള്‍ ജനന സര്‍ട്ടിഫിക്കറ്റും ആധാര്‍ കാര്‍ഡും രണ്ടു പാസ്പോര്‍ട്ട് സൈസ് ഫോട്ടോയും നിര്‍ബന്ധമായും കൊണ്ടുവരേണ്ടതാണ്. വിശദവിവരങ്ങള്‍ക്ക് ബന്ധപ്പെടേണ്ട നമ്പറുകള്‍- അത് ലറ്റിക്സ്- 9744583819, ബോക്സിംഗ്- 807872 9176, ജൂഡോ- 9020523931, ക്രിക്കറ്റ്- 9745832762, തായ്ക്കോണ്ടോ- 9744934028, വോളിബോള്‍- 9747620308, ബാസ്‌ക്കറ്റ്ബോള്‍- 9562374762, ഹോക്കി- 9747578311, റസ് ലിംഗ് - 9847324168.