ADVERTISEMENT

ADVERTISEMENT

മർച്ചന്‍റ്സ് അസോ. പൊതുയോഗം നടത്തി

തൊടുപുഴ: മർച്ചന്‍റ്സ് അസോസിയേഷൻ വാർഷിക പൊതുയോഗം നടത്തി. പ്രസിഡന്‍റ് രാജു തരണിയിൽ അധ്യക്ഷത വഹിച്ചു. ജില്ലാ പ്രസിഡന്‍റ് സണ്ണി പൈന്പള്ളിൽ ഉദ്ഘാടനം ചെയ്തു. വിവിധ മേഖലകളിൽ വ്യക്തിമുദ്ര പതിപ്പിച്ച ന്യൂമാൻ കോളജ് ബർസാർ ഫാ.ബെൻസണ്‍ എൻ.ആന്‍റണി ഓൾ കേരള ബ്ലഡ് ഡൊണേഷൻ കൂട്ടായ്മ സ്ഥാപകൻ എം.എം. അൻസാരി എന്നിവരെയും എസ്എസ്എൽസി , പ്ലസ്ടു പരീക്ഷയിൽ മികച്ച വിജയം കരസ്ഥമാക്കിയ അംഗങ്ങളുടെ കുട്ടികളെയും യോഗത്തിൽ ആദരിച്ചു.

നജീബ് ഇല്ലത്തുപറന്പിൽ ഐഡികാർഡും ജില്ലാ വർക്കിംഗ് പ്രസിഡന്‍റ് കെ.ആർ.വിനോദ് പ്രിവിലേജ് കാർഡും ജില്ലാ ട്രഷറർ ആർ.രമേശ് ഹെൽത്ത് കൂപ്പണും വിതരണം ചെയ്തു. സി.കെ.നവാസ്, അനിൽ പീടികപ്പറന്പിൽ, ടി.എൻ.പ ്രസന്നകുമാർ തങ്കച്ചൻ കോട്ടയ്ക്കകം, എൻ.പി. ചാക്കോ, ജോസ് തോമസ് കളരിക്കൽ, പി. അജീവ്, കെ.കെ. നാവൂർ കനി, നാസർ സൈര, ഷെരീഫ് സർഗം, കെ.പി.ശിവദാസ്, എം.എച്ച്. ഷിയാസ്, ലിജോണ്‍സ് ഹിന്ദുസ്ഥാൻ , ജഗൻ ജോർജ് , പ്രശാന്ത് കുട്ടപ്പാസ്, ലാലി വിൽസണ്‍ എന്നിവർ പ്രസംഗിച്ചു.

ADVERTISEMENT

ബൈക്കും ജീപ്പും കൂട്ടിയിടിച്ച് രണ്ടു യുവാക്കൾ മരിച്ചു

അണക്കര: ബൈക്ക് ജീപ്പുമായി ഇടിച്ച് ബൈക്ക് യാത്രക്കാരായ രണ്ടു യുവാക്കൾ മരിച്ചു. അണക്കര എട്ടാംമൈൽ വെള്ളറ ഷൈജുവിന്‍റെ മകൻ ഷാനെറ്റ് (18), കൊടുവേലിക്കുളത്ത് ഷിബുവിന്‍റെ മകൻ അലൻ (17) എന്നിവരാണു മരിച്ചത്. ഇന്നലെ ഉച്ചകഴിഞ്ഞ് മൂന്നോടെ ചെല്ലാർകോവിൽ-മൈലാടുംപാറ റോഡിലാണ് അപകടമുണ്ടായത്. കൊച്ചറയിൽനിന്ന് ചെല്ലാർകോവിലിലേക്കുവരുകയായിരുന്ന ബൈക്കും ചെല്ലാർകോവിൽനിന്ന് കന്പംമെട്ടു വഴി തമിഴ്നാട്ടിലേക്കു തൊഴിലാളികളുമായി പോയ ജീപ്പുമായി ഇടിക്കുകയായിരുന്നു. അമിത വേഗതയിലായിരുന്ന ബൈക്ക് നിയന്ത്രണംവിട്ടു മറിഞ്ഞ് ജീപ്പിലിടിക്കുകയായിരുന്നെന്ന് പോലീസ് പറഞ്ഞു. സംഭവ സ്ഥലത്തു വച്ചുതന്നെ ഒരാൾ മരിച്ചു. ഒരാൾ പുറ്റടി സർക്കാർ ആശുപത്രിയിലേക്കു കൊണ്ടുപോകുന്ന വഴി മധ്യയുമാണ് മരിച്ചത്. ഇരുവരും അണക്കര സർക്കാർ സ്കൂളിൽ പ്ലസ് ടു വിദ്യാർഥികളായിരുന്നു. പരീക്ഷാ ഫലം വന്ന് ഇരുവരും ഉപരി പഠനത്തിനു തയാറെടുക്കുകയായിരുന്നു. കുവൈറ്റിൽ ജോലി ചെയ്യുന്ന ജിനുവാണ് ഷാനെറ്റിന്‍റെ അമ്മ. ഇളയ സഹോദരൻ ഷിയോ (ആറ്). ബീനയാണ് അലന്‍റെ അമ്മ. വിദേശത്ത് ജോലിക്കാരിയാണ്. അക്ഷയാണ് സഹോദരി. മൃതദേഹങ്ങൾ പോസ്റ്റുമോർട്ടത്തിനായി ഇടുക്കി മെഡിക്കൽ കോളജ് ആശുപത്രിയിൽ സൂക്ഷിച്ചിരിക്കുകയാണ്.

ആലക്കോട് പഞ്ചായത്തിൽ വ്യാപക നാശം

തൊടുപുഴ: കഴിഞ്ഞദിവസം ഉണ്ടായ കാറ്റിലും മഴയിലും ആലക്കോട് പഞ്ചായത്തിൽ വ്യാപക നാശം. തലയനാട് പ്രദേശത്താണ് കൂടുതൽ നാശ നഷ്ടമുണ്ടായത്. തലയനാട് കോളപ്ര റൂട്ടിൽ പള്ളിക്ക് സമീപം തച്ചപ്പിള്ളിൽ ഓമനക്കുട്ടന്‍റെ വീടിന്‍റെ സംരക്ഷണഭിത്തി റോഡിലേക്ക് ഇടിഞ്ഞു വീണ് വീട് അപകടാവസ്ഥയിലായി. ഇത് മൂലം വീട് വിണ്ടു കീറി താമസ യോഗ്യമല്ലാതായി. അഞ്ചു ലക്ഷത്തോളം രൂപ മുടക്കി നിർമിച്ച കരിങ്കൽകെട്ടാണ് മഴയിൽ തകർന്നത്. ഇളംദേശം ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലത്തിന്‍റെ നേതൃത്വത്തിൽ ഇവരെ മാറ്റി പാർപ്പിക്കാനുള്ള നടപടികൾ ആരംഭിച്ചു. കനത്ത കാറ്റിലും മഴയിലും മരങ്ങൾ കടപുഴകി വീണ് മുണ്ടയ്ക്കൽ ബെന്നിയുടെ 45 വർഷത്തോളം പഴക്കമുള്ള ജാതിമരങ്ങൾ നശിച്ചു. മരങ്ങളും വൈദ്യുതി പോസ്റ്റുകളും വീണ് തലയനാട്-കോളപ്ര റോഡിലെ ഗതാഗതവും പൂർണമായി നിലച്ചിരിക്കുകയാണ്.

പൊന്മുടി ഡാം രണ്ടാം തവണയും തുറന്നുവിട്ടു

രാജാക്കാട്: പൊന്മുടി ഡാം രണ്ടാം തവണയും തുറന്നു വിട്ടു. മൂന്നു ഷട്ടറുകൾ 60 സെന്‍റീമീറ്റർ വീതമാണ് ഉയർത്തിയത്. ഇന്നലെ വൈകുന്നേരം നാലിനാണ് ഷട്ടർ തുറന്ന് വെള്ളം പന്നിയാർ പുഴയിലേക്ക് ഒഴുക്കിവിട്ടത്. ഞായറാഴ്ച സംഭരണശേഷിയുടെ 83.7 ശതമാനം വെള്ളം ഡാമിലെത്തിയതിനെത്തുടർന്ന് ബ്ലൂ അലർട്ട് പ്രഖ്യാപിച്ചിരുന്നു. വൃഷ്ടിപ്രദേശത്ത് ശക്തമായ മഴയും നീരൊഴുക്കും തുടരുന്നതിനാലാണ് ഡാം വീണ്ടും തുറന്നത്. മേയ് അവസാനം ശക്തമായ മഴ പെയ്തതിനെത്തുടർന്ന് ഡാം തുറന്നിരുന്നു. പന്നിയാറിന്‍റെ ഇരു കരകളിലും താമസിക്കുന്നവർ ജാഗ്രത പുലർത്തണമെന്ന് ജില്ലാ കളക്ടർ അറിയിച്ചു.

റിട്ട. എസ്ഐ രക്ഷകനായി, നിതീഷിന് ജീവൻ തിരിച്ചുകിട്ടി

മൂലമറ്റം: ത്രിവേണി സംഗമത്തിൽ ഒഴുക്കിൽപ്പെട്ട് ജീവനുവേണ്ടി നിലവിളിച്ച നിതീഷിന്‍റെ ജീവൻ രക്ഷിച്ചത് റിട്ട.എസ്ഐ തോമസ് പുതുപ്പറന്പിലിന്‍റെ സമയോചിതമായ ഇടപെടൽ. ഇന്നലെ ഉച്ചകഴിഞ്ഞ് 3.15-ഓടെ എകെജി കോളനിയിലെ തോട്ടുങ്കരയിൽ നിതീഷ് രാജേഷ് (19) നടുപ്പറന്പിൽ അതുൽ ബൈജു (20) എന്നിവർ മറ്റുരണ്ടുപേരോടൊപ്പം ത്രിവേണി സംഗമത്തിൽ കുളിക്കാനിറങ്ങുകയായിരുന്നു. എന്നാൽ നിതീഷും അതുലും ചുഴിയിൽപ്പെട്ടു. ഒപ്പമുണ്ടായിരുന്ന രണ്ടുപേർ നീന്തിക്കയറി സമീപവീട്ടിലെത്തി രക്ഷിക്കണമെന്ന് ആവശ്യപ്പെട്ടപ്പോൾ തോമസ് പുതുപ്പറന്പിൽ കയറുമായി ഇവിടേക്ക് ഓടിയെത്തുകയായിരുന്നു. ചുഴിയിൽപ്പെട്ട നിതീഷ് രാജേഷിന് ആദ്യം കയറിൽ പിടികിട്ടിയെങ്കിലും കൈവിട്ടുപോയി. വീണ്ടും കയർ എറിഞ്ഞുകൊടുത്ത് കരയിലേക്ക് ഇദ്ദേഹം വലിച്ചുകയറ്റുകയായിരുന്നു. തുടർന്നു മൂലമറ്റം ബിഷപ് വയലിൽ ആശുപത്രിയിൽ എത്തിക്കുകയായിരുന്നു. നിതീഷിന്‍റെ ആരോഗ്യനില തൃപ്തികരമാണ്. എന്നാൽ കൂടെയുണ്ടായിരുന്ന അതുൽ ബൈജുവിനെ രക്ഷിക്കാനായില്ല. പിന്നീട് ഫയർഫോഴ്സെത്തി തെരച്ചിൽ നടത്തിയാണ് അതുലിന്‍റെ മൃതദേഹം പുറത്തെടുത്തത്. ഇന്നലെ മൂലമറ്റം പവർഹൗസിലെ അഞ്ചു ജനറേറ്ററുകൾ വൈദ്യുതി ഉത്പാദനത്തിനായി പ്രവർത്തിപ്പിച്ചിരുന്നു. ഇതുമൂലം ടെയിൽറേസ് കനാലിലൂടെ ഒഴുകിയെത്തുന്ന വെള്ളത്തിന്‍റെ അളവ് കൂടുതലായിരുന്നു. ഇതിനു പുറമേ മഴക്കാലമായതിനാൽ വലിയാറിലൂടെയും നാച്ചാറിലൂടെയും കൂടുതൽ വെള്ളം ഒഴുകിയെത്തിയിരുന്നു. ഇതുമൂന്നും കൂടിച്ചേരുന്ന ത്രിവേണി സംഗമത്തിൽ ശക്തമായ ഒഴുക്കും വിയർകെട്ടിനു താഴെ ശക്തമായ ചുഴിയുമുണ്ടായിരുന്നു. ഈ ചുഴിയിലാണ് കുളിക്കാനിറങ്ങിയ ഇവർ അപകടത്തിൽപ്പെട്ടത്. രണ്ടുവർഷം മുന്പ് എകെജി കോളനിയിൽ തന്നെയുള്ള ബിജു, സന്തോഷ് എന്നിവർ ഇവിടെ അപകടത്തിൽപ്പെട്ട് മരിച്ചിരുന്നു. മറ്റു ജില്ലകളിൽനിന്നുമുൾപ്പെടെയുള്ളവർ ത്രിവേണി സംഗമത്തിന്‍റെ മനോഹാരിത ദർശിക്കാനും ഇവിടെ കുളിക്കാനുമായി എത്താറുണ്ട്. കഴിഞ്ഞ അഞ്ചുവർഷത്തിനിടെ 30ലേറെപ്പേർ ഇവിടെ അപകടത്തിൽപ്പെട്ടിട്ടുണ്ട്. ഏതാനും വർഷങ്ങൾക്കിടെ നിരവധി അപകടങ്ങൾ ഇവിടെ ഉണ്ടായിട്ടുണ്ടെങ്കിലും മുന്നറിയിപ്പ് ബോർഡുപോലും ഇവിടെ അധികൃതർ സ്ഥാപിച്ചിട്ടില്ല. ചുഴിയുള്ള സ്ഥലത്ത് ഭിത്തിയിൽ അടയാളം സ്ഥാപിച്ചിരുന്നെങ്കിൽ ഈ ഭാഗത്തേക്ക് കുളിക്കാൻ ആളുകൾ ഇറങ്ങാതിരിക്കുകയും അപകടങ്ങൾ ഉണ്ടാകാതെ സുരക്ഷിതത്വം ഉറപ്പാക്കാനും കഴിയുമായിരുന്നു.

അനധികൃത മണ്ണെടുപ്പ്; വീടിന്‍റെ സംരക്ഷണഭിത്തി തകർന്നു

ചെറുതോണി: അതിർത്തിയിൽനിന്നു വേണ്ടത്ര അകലം പാലിക്കാതെ അയൽവാസി മണ്ണിടിച്ചു മാറ്റിയതിനെത്തുടർന്ന് വീടിന്‍റെ സംരക്ഷണഭിത്തി ഇടിഞ്ഞുവീണ് വീട് അപകടാവസ്ഥയിലായി. പതിനാറാംകണ്ടം ടൗണിനോടു ചേർന്ന് താമസിക്കുന്ന വരിക്കപ്ലാക്കൽ ജെസിയുടെ വീടിന്‍റെ പിൻഭാഗത്തെ സംരക്ഷണഭിത്തിയാണ് ഇടിഞ്ഞത്. അയൽവാസി മണ്ണെടുത്തുതുടങ്ങിയപ്പോൾത്തന്നെ വീട്ടുകാർ ഉപ്പുതോട് വില്ലേജ് ഓഫീസിലും മറ്റ് റവന്യൂ അധികൃതരെയും ഇക്കാര്യം അറിയിച്ചിരുന്നു. തുടർന്ന് വില്ലേജ് ഓഫീസർ സ്ഥലം സന്ദർശിച്ച് രണ്ടടി അകലം പാലിച്ച് മണ്ണെടുക്കാൻ ഇയാൾക്ക് നിർദ്ദേശം നൽകിയിരുന്നതാണ്. എന്നാൽ, വില്ലേജ് ഓഫീസർ പോയശേഷം നിർദേശം പാലിക്കാതെ പല സ്ഥലങ്ങളിലായി സംരക്ഷണ ഭിത്തിയോടു ചേർന്ന് മണ്ണിടിച്ചു നീക്കി. കല്ലുകെട്ടിനുള്ളിലേക്ക് വളർന്നിരുന്ന മരത്തിന്‍റെ വേരുകൾ മണ്ണുമാന്തിയന്ത്രം ഉപയോഗിച്ച് പറിച്ചുമാറ്റുകയും ചെയ്തു. ഇതേത്തുടർന്ന് തൊട്ടടുത്ത ദിവസംതന്നെ സംരക്ഷണഭിത്തിയുടെ ഒരു ഭാഗം നിലം പതിച്ചു. ഇതു സംബന്ധിച്ച് വീട്ടുകാർ മുരിക്കാശേരി പോലീസിലും ഉപ്പുതോട് വില്ലേജിലും ഇടുക്കി താലൂക്ക് ഓഫീസിലും ജില്ലാ കളക്ടർക്കും ഉൾപ്പെടെ പരാതി നൽകി. പരാതി നൽകിയ ശേഷം തിരികെ വീട്ടിൽ എത്തിയതോടെ ഉച്ചകഴിഞ്ഞ് പെയ്ത കനത്ത മഴയിൽ സംരഷണ ഭിത്തിയുടെ ബാക്കി ഭാഗം കൂടി ഇടിഞ്ഞു വീണു. ഇതോടെ വീട് ഏതു നിമിഷവും നിലംപതിക്കാമെന്ന അവസ്ഥയിലാണ്. കനത്ത മഴയിൽ ജില്ലാ കളക്ടർ പാറഖനനം, മണ്ണെടുപ്പ് ഉൾപ്പടെയുള്ള പ്രവൃത്തികൾക്ക് നിരോധനം ഏർപ്പെടുത്തിയിരുന്ന ദിവസങ്ങളിലാണ് അയൽവാസി മണ്ണുമാന്തിയന്ത്രം ഉപയോഗിച്ച് മണ്ണെടുത്തതെന്നും വീട്ടുകാർ പറഞ്ഞു. വീട്ടുടമ ജെസി ജോലിക്കായി വിദേശത്താണ്. കഴിഞ്ഞ മാസം നാട്ടിൽ വന്ന് തിരികെ പോയ ശേഷമാണ് അയൽവാസി വില്ലേജിൽനിന്നുള്ള അനുമതി പോലുമില്ലാതെ മണ്ണിടിച്ച് നീക്കിയത്. മഴ ശക്തമായി തുടരുന്ന സാഹചര്യത്തിൽ വീട് നിലം പതിക്കുമോയെന്ന ആശങ്കയിലാണ് വീട്ടുകാർ. അടിയന്തരമായി ജില്ലാ ഭരണകൂടം ഇടപെടണമെന്നും വീട്ടുകാർ ആവശ്യപ്പെട്ടു.

തൊമ്മൻകുത്തിൽ കർഷകരെ കുടിയിറക്കാനുള്ള ആസൂത്രിതനീക്കം: ബിജോ മാണി

തൊമ്മൻകുത്ത്: വണ്ണപ്പുറം വില്ലേജിലെ തൊമ്മൻകുത്ത് ഭാഗത്തെ 458 കുടുംബങ്ങളെ വനംവകുപ്പ് കൈയേറ്റക്കാരുടെ ലിസ്റ്റിൽ ഉൾപ്പെടുത്തിയതിന്‍റെ തുടർച്ചയായാണ് കൈവശഭൂമിയിൽ സ്ഥാപിച്ചിരുന്ന കുരിശ് പൊളിച്ചതെന്നും ഇതു കർഷകരെ കുടിയിറക്കാനുള്ള സർക്കാരിന്‍റെ ആസൂത്രിത നീക്കത്തിന്‍റെ ഭാഗമാണെന്നും ഡിസിസി ജനറൽ സെക്രട്ടറി ബിജോ മാണി പത്രസമ്മേളനത്തിൽ ആരോപിച്ചു. കൈവശഭൂമിയിൽനിന്ന് ആളുകളെ കുടിയിറക്കി വനമാക്കി മാറ്റാനാണ് സർക്കാർ ശ്രമിക്കുന്നത്. ജില്ലാ കളക്ടർക്കു തഹസിൽദാർ നൽകിയ റിപ്പോർട്ടിൽ പഴയരേഖയിൽ പ്രദേശംവനമാണെങ്കിലും നിലവിലുള്ള കൈവശം പരിശോധിച്ച് പട്ടയനടപടികൾ സ്വീകരിക്കേണ്ടതു കരിമണ്ണൂർ ലാന്‍റ് അസൈൻമെന്‍റ് ഓഫീസാണെന്നും വ്യക്തമാക്കിയിട്ടുണ്ട്. അതേ സമയം ജണ്ടയ്ക്കു പുറത്ത് പതിറ്റാണ്ടുകളായി താമസിക്കുന്ന 458 കുടുംബങ്ങളെയാണ് ഇപ്പോൾ കൈയേറ്റക്കാരാക്കിയിരിക്കുന്നത്. ഒരുവശത്ത് ഈ പ്രദേശം സന്ദർശിച്ച ഇടതുപക്ഷ നേതാക്കൾ ഇവിടം വനമല്ലന്നും ആളുകളുടെ കൈവശ ഭൂമിയാണെന്ന് പറയുകയും മറുവശത്ത് സർക്കാർ ഇവിടെ വനമാണെന്നു റിപ്പോർട്ട് തയാറാക്കുകയും ചെയ്തത് ആസൂത്രിതമാണ്. നാരങ്ങാനത്ത് ആളുകളുടെ കൈവശഭൂമിയും വന ഭൂമിയും തമ്മിൽ വേർതിരിക്കാൻ ജണ്ട സ്ഥാപിച്ചിട്ടുണ്ട് . നാരങ്ങാനത്ത് 1968 മുതൽ ആളുകളുടെ കൈവശം ഭൂമിയുണ്ടന്ന് തെളിയിക്കുന്ന നിരവധി രേഖകളാണ് പുറത്തുവന്നിട്ടുള്ളത്. 980-ലെ തൊടുപുഴ മുൻസിഫ് കോടതിയുടെ ഉത്തരവിൽ ഇക്കാര്യ ചൂണ്ടിക്കാട്ടിയിട്ടുമുണ്ട്. വണ്ണപ്പുറം വില്ലേജിൽ 3,846 പേരാണ് 2024 ലെ സർക്കാരിന്‍റെ പട്ടയത്തിന് അപേക്ഷ നൽകി കാത്തിരിക്കുന്നത്. ജില്ലയിൽ ഏറ്റവും കൂടുതൽ അപേക്ഷകരുള്ളതും ഈ പഞ്ചായത്തിൽ നിന്നാണ്. ഈ വസ്തുതകൾ നിലനിൽക്കേ ഈ പ്രദേശം വനമാക്കി മാറ്റാൻ വനം-റവന്യു വകുപ്പുകൾ നടത്തുന്ന നീക്കം അനുവദിക്കാനാവില്ലെന്നും അദ്ദേഹം പറഞ്ഞു. ഡിസിസി വൈസ് പ്രസിഡന്‍റ് മുകേഷ് മോഹൻ, ബ്ലോക്ക് കോണ്‍ഗ്രസ് പ്രസിഡന്‍റ് ഷിബിലി സാഹിബ്, മണ്ഡലം പ്രസിഡന്‍റ് രാജേഷ് ബാബു, ബ്ലോക്ക് കോണ്‍ഗ്രസ് ജനറൽ സെക്രട്ടറി അഡ്വ രാജീവ് പാടത്തിൽ, എന്നിവർ പങ്കെടുത്തു.

യുവാവ് കുളത്തിൽ മുങ്ങിമരിച്ചു

തൊടുപുഴ: ഒല്ലൂരിലെ ബന്ധുവീട്ടിലെത്തിയ യുവാവ് കുളത്തിൽ മുങ്ങിമരിച്ചു. മാങ്കുളം നെല്ലൻകുഴിയിൽ സണ്ണിയുടെ മകൻ ബിറ്റോ(22)യാണ് മരിച്ചത്. ഞായറാഴ്ച ഉച്ചയ്ക്ക് ബന്ധുവിനൊപ്പം ചിയ്യാരം കാരമുക്ക് കുളത്തിൽ കുളിക്കുന്നതിനിടെയാണ് അപകടം. ഫയർഫോഴ്സെത്തി പുറത്തെടുത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്നു പത്തിന് മാങ്കുളം സെന്‍റ് മേരീസ് ഫൊറോന പള്ളിയിൽ. ഫോറൻസിക് സയൻസ് പാസായ ബിറ്റോ നെടുങ്കണ്ടം ബാലഗ്രാം ജവഹർലാൽ ഇൻസ്റ്റിറ്റ്യൂട്ട് ഓഫ് ആർട്സ് ആന്‍ഡ് സയൻസ് കോളജിൽ ജോലിയിൽ പ്രവേശിക്കാനിരിക്കുകയായിരുന്നു. മാതാവ്: ഷിനി. സഹോദരങ്ങൾ: ബ്രിറ്റോ, ബ്രിന്‍റോ.

പള്ളിക്കുന്നില്‍ മണ്ണിടിഞ്ഞ് വീട് തകര്‍ന്നു; ഒരു വീട് അപകടാവസ്ഥയിൽ

അടിമാലി: കഴിഞ്ഞ രാത്രിയില്‍ പെയ്ത ശക്തമായ മഴയിൽ അടിമാലി ടൗണിനു സമീപം പള്ളിക്കുന്നില്‍ മണ്ണിടിഞ്ഞ് രണ്ടു വീടുകള്‍ അപകടാവസ്ഥയിൽ. ഇരു വീടുകളിലും കുടുംബങ്ങള്‍ വാടകയ്ക്ക് താമസിക്കുന്നവരാണ്. ജലജയെന്ന 60കാരി തനിച്ച് വാടകയ്ക്ക് താമസിക്കുന്ന വീടിന് പിന്‍ഭാഗത്തേക്ക് മണ്‍തിട്ട ഇടിഞ്ഞുവീഴുകയായിരുന്നു. മണ്ണിടിഞ്ഞതിനെത്തുടര്‍ന്ന് വീടിന്‍റെ പിൻഭാഗം തകര്‍ന്നു. ജലജ താമസിച്ചുവരുന്ന വീടിനു പിറകുഭാഗത്തുള്ള വീടും അപകടാവസ്ഥയിലാണ്. ഈ വീടിനോടു ചേര്‍ന്നാണ് മണ്ണിടിഞ്ഞു പോന്നിട്ടുള്ളത്. കനത്ത മഴ തുടര്‍ന്നാല്‍ കൂടുതല്‍ മണ്ണിടിയുമോയെന്ന ആശങ്കയിലാണ് സമീപവാസികൾ.

അടിമാലിയില്‍ വീടിന്‍റെ കിണര്‍ ഇടിഞ്ഞു താഴ്ന്നു

അടിമാലി: കഴിഞ്ഞ രണ്ടു ദിവസങ്ങളിലായി പെയ്യുന്ന ശക്തമായ മഴയില്‍ അടിമാലി മേഖലയില്‍ വിവിധയിടങ്ങളില്‍ ചെറുതും വലുതുമായ നാശനഷ്ടങ്ങളാണ് ഉണ്ടായിട്ടുള്ളത്. അടിമാലി അമ്പലപ്പടിയില്‍ വീടിന്‍റെ കിണര്‍ ഇടിഞ്ഞു താഴ്ന്നു. മണലേല്‍ ഷാജിയുടെ വീട്ടുമുറ്റത്തെ 13 കോല്‍ താഴ്ചയുള്ള കിണറാണ് ഇടിഞ്ഞു താഴ്ന്ന് വലിയ ഗര്‍ത്തം ഉണ്ടായിട്ടുള്ളത്. കിണറിനോടു ചേര്‍ന്ന് സ്ഥാപിച്ചിരുന്ന മോട്ടോര്‍ അടക്കമുള്ള സാധന സാമഗ്രികളും നശിച്ചു. എഴുപത്തഞ്ച് വര്‍ഷത്തോളം പഴക്കമുള്ള കിണറാണ് ഈ കാലവര്‍ഷക്കെടുതിയില്‍ ഇല്ലാതായത്. കിണര്‍ ഇടിഞ്ഞു താഴ്ന്നത് പ്രദേശവാസികളില്‍ ആശങ്ക ഉയര്‍ത്തിയിട്ടുണ്ട്. റവന്യു അധികൃതര്‍ സ്ഥലത്തെത്തി സ്ഥിതി വിലയിരുത്തി. അടിമാലി- കുമളി ദേശിയപാതയില്‍ കോളജ് കുന്നിനു സമീപം നേരിയ മണ്ണിടിച്ചില്‍ ഉണ്ടായി. മണ്‍തിട്ടയിടിഞ്ഞ് റോഡരികിലേക്കെത്തുകയായിരുന്നു. ഈ ഭാഗത്തുണ്ടായിരുന്ന വഴിയോരക്കടയും മണ്ണിനൊപ്പം നിരങ്ങി റോഡരികിലേക്കെത്തി. കൊച്ചി - ധനുഷ്‌ക്കോടി ദേശീയപാതയില്‍ കൂമ്പന്‍പാറക്കു സമീപവും മണ്ണിടിച്ചില്‍ ഭീഷണി നിലനില്‍ക്കുണ്ട്. നവീകരണ ജോലികളുടെ ഭാഗമായി മണ്ണ് നീക്കിയ ഭാഗത്ത് മണ്ണിടിച്ചില്‍ ഉണ്ടായതാണ് പ്രതിസന്ധിയായിട്ടുള്ളത്. ഇതിനു മുകള്‍ ഭാഗത്തുള്ള രണ്ടു വീടുകള്‍ അപകടാവസ്ഥയിലാണ്.

അഞ്ചിരി മേഖലയിൽ വൈദ്യുതി മുടക്കം പതിവ്

തൊടുപുഴ: മഴക്കാലം തുടങ്ങിയാൽ ആലക്കോട് കഐസ്ഇബി സെക്ഷനു കീഴിൽ വരുന്ന ഇടവെട്ടി പഞ്ചായത്തിലെ അയ്യന്പാറ, ആലക്കോട് പഞ്ചായത്തിലെ അഞ്ചിരി, ആനക്കയം മേഖലകളിൽ വൈദ്യുതി മുടക്കം പതിവാകുന്നതായി പരാതി. മിക്ക ദിവസവും പകൽ മാത്രമാണ് വൈദ്യുതി ലഭിക്കുന്നത്. പലപ്പോഴും വൈകുന്നേരം മഴയും കാറ്റും ഉണ്ടായാൽ നിലയ്ക്കുന്ന വൈദ്യുതി പിറ്റേ ദിവസമാണ് പുനഃസ്ഥാപിക്കുന്നത്. കുറേ ഭാഗം മരങ്ങൾക്കിടയിലൂടെയാണ് 11 കെവി ലൈൻ വലിച്ചിരിക്കുന്നത്. മരങ്ങളുടെ ചില്ലകൾ തട്ടിയും ശിഖരം ഒടിഞ്ഞു വീണും വൈദ്യുതി നിലയ്ക്കുന്നത് പതിവാണ്. ആലക്കോട് സെക്ഷൻ ഓഫിസിൽ വിളിച്ചാലും നടപടി ഉണ്ടാകാറില്ലെന്നാണ് നാട്ടുകാരുടെ പരാതി. ഈ വർഷം മഴക്കാലം തുടങ്ങിയതിൽ പിന്നെ തുടർച്ചയായി വൈദ്യുതി ലഭിച്ചത് ചുരുക്കം ദിവസങ്ങളിൽ മാത്രമാണ്. ഇനി വൈദ്യുതി ഉണ്ടായാലും ഇടക്കിടെ വൈദ്യുതി നിലയ്ക്കും. വൈദ്യുതി വരുന്നത് കാത്തിരുന്ന മോട്ടോറും ഗ്യഹോപകരണങ്ങളും പ്രവർത്തിപ്പിക്കേണ്ട സ്ഥിതിയാണ്. വൈദ്യുതി പതിവായി മുടങ്ങുന്നതിനാൽ ചെറുകിട സംരഭങ്ങളും പ്രതിസന്ധിയിലാണ്. ആലക്കോട് സെക്ഷനു കിഴിൽ കുറച്ച് ജീവനക്കാർ മാത്രമാണ് ഉള്ളതെന്നും മൂന്നു പഞ്ചായത്തുകളിലായുള്ള വിശാലമായ പ്രദേശങ്ങളിൽ തകരാർ ഉണ്ടായാൽ യഥാ സമയം ഓടിയത്താൻ കഴിയില്ലെന്നാണ് ജീവനക്കാർ പറയുന്നത്. അഞ്ചിരി ഭാഗത്തേക്ക് നാലര പതിറ്റാണ്ടു മുന്പ് സ്ഥാപിച്ച 11 കെവി ലൈനുകൾ പുരയിടങ്ങളിൽനിന്ന് മാറ്റി റോഡരികിലൂടെ ആക്കാനാവശ്യപ്പെട്ട് അഞ്ച് വർഷം മുൻപ് എം.എം. മണി വൈദ്യുതി മന്ത്രി ആയിരുന്നപ്പോൾ നടത്തിയ അദാലത്തിലും പിന്നീട് തൊടുപുഴയിൽ മുഖ്യമന്ത്രിയുടെ നേത്യത്വത്തിൽ നടത്തിയ നവകേരള സദസിലും പരാതി നൽകിയിട്ടും നടപടിയില്ലെന്ന് നാട്ടുകാർ പറഞ്ഞു. പരാതി നൽകിയപ്പോൾ ബന്ധപ്പെട്ട ഉദ്യോഗസ്ഥർ സ്ഥലത്തെത്തി ലൈൻ പരിശോധന നടത്തിയിരുന്നെങ്കിലും പിന്നീട് തുടർ നടപടികൾ ഒന്നും ഉണ്ടായില്ല. മരങ്ങൾക്കിടിയിലൂടെ വലിച്ചിരിക്കുന്ന ലൈൻ റോഡരികിലൂടെ മാറ്റി സ്ഥാപിച്ച് വൈദ്യുതി മുടക്കം ഒഴിവാക്കണമെന്നാണ് ജനങ്ങളുടെ ആവശ്യം.

ആന്‍റോപുരം പാലം അപകടാവസ്ഥയിൽ

ചെറുതോണി: പാലത്തിന്‍റെ കൽക്കെട്ടിടിഞ്ഞ് പാലം അപകടാവസ്ഥയിൽ. മരിയാപുരം പഞ്ചായത്തിനെയും വാത്തിക്കുടി പഞ്ചായത്തിനെയും തമ്മിൽ ബന്ധിപ്പിക്കുന്ന ആന്‍റോപുരം പള്ളിയോടു ചേർന്നുള്ള പാലത്തിന്‍റെ കൽക്കട്ടാണ് തകർന്നിരിക്കുന്നത്. 2018ലെ പ്രളയത്തിൽ ഭാഗി കമായി തകർന്ന പാലം പുതുക്കിപ്പണിയാൻ നടപടിയുണ്ടായില്ല. നൂറുകണക്കിന് സ്കൂൾ കുട്ടികളും വാഹനങ്ങളും യാത്രകാരും നിത്യേന കടന്നുപോകുന്ന പാലം കുമരകം - കമ്പം ഹൈവേയും ആലപ്പുഴ - മധുര ഹൈവേയുമായി എളുപ്പത്തിൽ ബന്ധിപ്പിക്കുന്ന റോഡിലാണ്. നാളുകൾ കഴിയുന്തോറും കല്ല് അടർന്ന് പാലം കൂടുതൽ അപകടാവസ്ഥയിലേക്കു മാറിക്കൊണ്ടിരിക്കയാണ്. അടിയന്തരമായി പാലത്തിന്‍റെ അപകടാവസ്ഥ പരിഹരിക്കാൻ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

ഓണക്കനി, നിറപ്പൊലിമ പദ്ധതിയുമായി കുടുംബശ്രീ

തൊടുപുഴ: ഓണത്തിന് വിഷരഹിത പച്ചക്കറികളും വിവിധയിനം പൂക്കളും വിപണിയിലെത്തിക്കാനായി കുടുംബശ്രീ പദ്ധതിയൊരുക്കുന്നു. എല്ലാവർഷത്തെയും പോലെ ഇത്തവണയും ജൈവരീതിയിൽ കൃഷിയിറക്കാനുള്ള പദ്ധതിയാണ് കുടുംബശ്രീ ഒരുക്കുന്നത്. ഓണത്തോടനുബന്ധിച്ച് വിളവെടുക്കാനായി ജില്ലയിൽ 124.68 ഏക്കറിൽ കൃഷിയിറക്കുമെന്നും ഇതിനുള്ള തയാറെടുപ്പുകൾ അവസാനഘട്ടത്തിലാണെന്നും അധികൃതർ പറഞ്ഞു. ഓണച്ചന്തകൾ ലക്ഷ്യമിട്ട് ജില്ലയിലെ 52 സിഡിഎസുകളിൽനിന്നായി തെരഞ്ഞെടുത്ത 457 കാർഷിക ഗ്രൂപ്പുകളാണ് കൃഷിയിറക്കുന്നത്. നിറപ്പൊലിമ എന്ന പേരിലാണ് പൂ കൃഷി ചെയ്യുന്നത്. പച്ചക്കറി കൃഷി ഓണക്കനി എന്ന പേരിലും നടപ്പാക്കും. കുടുംബശ്രീയുടെ ജൈവിക പ്ലാൻ പദ്ധതിയിലൂടെയാണ് കൃഷി ചെയ്യുന്നത്. നിലവിലുള്ള കുടുംബശ്രീ ജൈവിക നഴ്സറിയിൽനിന്ന് കൃഷി ചെയ്യുന്നവരുടെ ആവശ്യപ്രകാരം ഓർഡർ എടുത്ത് തൈകൾ ലഭ്യമാക്കും. കൃഷിഭവനുകളിൽ പരിസ്ഥിതി ദിനത്തോടനുബന്ധിച്ച് സൗജന്യമായി നടത്തിയ തൈ വിതരണത്തിലൂടെയും കൃഷിക്കൂട്ടങ്ങൾക്ക് തൈകൾ ലഭ്യമാക്കിയിട്ടുണ്ട്. ജൂലൈ ആദ്യവാരത്തോടെ കൃഷി ആരംഭിച്ച് ഓഗസ്റ്റ് പകുതിയോടെ വിളവെടുക്കാനാകുമെന്നാണ് പ്രതീക്ഷയെന്ന് ജില്ലാ പ്രോഗ്രാം മാനേജർ ലക്ഷ്മി സുഗതൻ പറഞ്ഞു. മഴക്കാലമായതിനാൽ വിളകൾക്ക് രോഗബാധയും കീടങ്ങളുടെ ആക്രമണവും ഉണ്ടാകാനുള്ള സാധ്യത പരിഗണിച്ച് കൃഷി രീതികളെക്കുറിച്ച് സിഡിഎസുകളിൽ ക്ലാസുകൾ നൽകിയിട്ടുണ്ട്. കൃഷി ഓഫീസർമാരുടെയും മറ്റു ജീവനക്കാരുടെയും സഹായത്തോടെയാണിത്. കർഷകർക്ക് ആത്മവിശ്വാസത്തോടെ കൃഷിചെയ്യാൻ ഇത് ഉപകരിക്കും. മത്തങ്ങ, തക്കാളി, വഴുതന, മല്ലി, മുളക്, ചീര, പയർ, ബീൻസ്, കോവൽ, ഇഞ്ചി, വാഴ, വെണ്ട, പാവൽ, മഞ്ഞൾ, കിഴങ്ങ് വിളകൾ, പടവലം തുടങ്ങിയവയാണ് പ്രധാനമായും കൃഷിചെയ്യുന്ന പച്ചക്കറികൾ. മുല്ല, ജമന്തി, ചെണ്ടുമല്ലി തുടങ്ങിയ പൂക്കളും കൃഷി ചെയ്യും. ജില്ലാ തലത്തിലും നഗരസഭകൾ, പഞ്ചായത്ത് തലങ്ങളിലും ഓണച്ചന്തകൾ ആരംഭിച്ച് ഉത്പന്നങ്ങൾക്ക് വിപണിയും ഉറപ്പാക്കും. ഇതിലൂടെ കൃഷി ഗ്രൂപ്പുകൾക്ക് വരുമാനവും ലഭ്യമാകും. ഈ മാസം അവസാനത്തോടെ നടീൽ ഉദ്ഘാടനം നടത്തും.

ഭൂവിഷയങ്ങൾ ശാശ്വത പരിഹാരത്തിലേക്ക്: ജോസ് പാലത്തിനാൽ

ഇരട്ടയാർ: ജില്ലയിലെ ഭൂമി സംബന്ധമായ വിഷയങ്ങൾക്ക് ചട്ടരൂപീകരണത്തോടെ ശ്വശ്വതപരിഹാരമാകുമെന്ന് കേരള കോണ്‍ഗ്രസ് (എം) ജില്ലാ പ്രസിഡന്‍റ് ജോസ് പാലത്തിനാൽ. കേരള കോണ്‍ഗ്രസ് (എം) വാർഡ് മുന്നൊരുക്ക സായാഹ്ന സദസുകൾ പൂർത്തിയാക്കി മണ്ഡലം കണ്‍വൻഷനുകൾ ആരംഭിച്ചതിന്‍റെ ജില്ലാ തലത്തിലെ ആദ്യ കണ്‍വൻഷൻ ഇരട്ടയാർ സാസ്കാരിക നിലയത്തിൽ ഉദ്ഘാടനം ചെയ്യുകയായിരുന്നു പാലത്തിനാൽ. എൽഡിഎഫ് സർക്കാരിന്‍റെ ഇച്ഛാശക്തിയും മന്ത്രി റോഷി അഗസ്റ്റ്യന്‍റെ ഇടപെടലുമാണ് ഭൂവിഷയങ്ങൾക്ക് ശാശ്വത പരിഹാരം ഉണ്ടാക്കുന്നതിനു കാരണമായതെന്നും ജില്ലാ പ്രസിഡന്‍റ് പറഞ്ഞു. ജില്ലാ പഞ്ചായത് പ്രസിഡന്‍റ് രാരിച്ചൻ നീറണാകുന്നേൽ മുഖ്യപ്രഭാഷണം നടത്തി. ഇടുക്കി ജില്ലയുടെ വികസന മുന്നേറ്റം കണ്ട നാളുകളാണ് കടന്നുപോകുന്നതെന്ന് അദ്ദേഹം പറഞ്ഞു. എസ്എൽസി , പ്ലസ് ടു പരീക്ഷകളിൽ ഫുൾ എ പ്ലസ് കിട്ടിയ വിദ്യാർഥികളെ ചടങ്ങിൽ ആദരിച്ചു. പാർട്ടി മണ്ഡലം പ്രസിഡന്‍റ് ലാലച്ചൻ വെള്ളക്കട അധ്യക്ഷത വഹിച്ചു. നിയോജക മണ്ഡലം പ്രസിഡന്‍റ് ജിൻസണ്‍ വർക്കി, സംസ്ഥാന കമ്മിറ്റി അംഗം ജോസുകുട്ടി കണ്ണമുണ്ട, ജിമ്മിച്ചൻ കാര്യമറ്റം, ടി.കെ. അപ്പുക്കുട്ടൻ, ഷേർളി സൽജൂ, സണ്ണി കുഴിയാംപ്ലാവിൽ,ബിനോയി അഗസ്റ്റ്യൻ, ബെന്നി കുഴിയോടി തുടങ്ങിയവർ പ്രസംഗിച്ചു.

തണൽ പദ്ധതി: ലഭിച്ചത് 36 അപേക്ഷകൾ

ഇടുക്കി: ജില്ലയിലെ മുതിർന്ന പൗരന്മാരുടെ ക്ഷേമത്തിനായി ആരംഭിച്ച തണൽ പദ്ധതിയുടെ ആദ്യഘട്ടത്തിൽ ലഭിച്ചത് 36 അപേക്ഷകൾ. ഇടുക്കി സബ് കളക്ടർ അനൂപ് ഗാർഗിന്‍റെ നേതൃത്വത്തിലാണ് പദ്ധതിയുടെ പ്രവർത്തനങ്ങൾ ഏകോപിപ്പിക്കുന്നത്. രക്ഷിതാക്കളുടെയും മുതിർന്ന പൗരന്മാരുടെയും പരിപാലന, ക്ഷേമ കാര്യങ്ങളും മുതിർന്ന പൗരന്മാർക്ക് അനുകൂലമായി പുറപ്പെടുവിക്കുന്ന ട്രൈബ്യൂണൽ ഉത്തരവുകൾ ഫലപ്രദമായി പാലിക്കുന്നുണ്ടെന്ന് ഉറപ്പാക്കുകയുമാണ് ലക്ഷ്യം. തൊടുപുഴ, ഇടുക്കി, പീരുമേട് താലൂക്കുകളിൽ നിന്ന് തെരഞ്ഞെടുത്ത 18 വോളന്‍റിയർമാരാണ് പദ്ധതിയുടെ ഭാഗമായി പ്രവർത്തിക്കുന്നത്. കുടുംബത്തിൽനിന്നുള്ള അവഗണനയും ചൂഷണങ്ങളും, സ്വത്ത് തർക്കങ്ങൾ, ഉടമസ്ഥാവകാശ രേഖകളിൽ കൃത്രിമത്വം കാണിക്കുന്നത്, ഒറ്റയ്ക്ക് താമസിക്കുന്ന വൃദ്ധരിൽ ഏകാന്തത, മാനസിക, സാമൂഹിക ഒറ്റപ്പെടലുകൾ, ഓർമക്കുറവ്, ചലനശേഷി പരിമിതി തുടങ്ങിയ ആരോഗ്യപ്രശ്നങ്ങൾ, മാനസികവും ശാരീരികവുമായ പ്രശ്നങ്ങൾ, അനധികൃത മരം മുറിക്കൽ, ഭൂമി കൈയേറ്റം, തുടങ്ങിയ വിവിധ വിഷയങ്ങളിലാണ് പരാതികൾ ലഭിച്ചത്. വോളന്‍റിയർ പരാതിക്കാരുമായി നിരന്തരം ബന്ധപ്പെട്ട് അവരുടെ പ്രശ്നങ്ങൾ സംബന്ധിച്ച് റിപ്പോർട്ട് തയാറാക്കി. അടുത്ത അഞ്ച് മാസത്തേക്ക് പരിശോധന തുടരും. നിയമസഹായം, സാമൂഹിക പിന്തുണ, പരിചരണത്തിനായുള്ള കേസുകൾ റഫർ ചെയ്യുന്നത് ഉൾപ്പെടെയുള്ള കാര്യങ്ങളിൽ നടപടികൾ സ്വീകരിക്കും. ആറുമാസത്തിനുശേഷം അന്തിമ റിപ്പോർട്ട് തയാറാക്കും.

മുല്ലപ്പെരിയാർ: പുസ്തകം പ്രകാശനം

തൊടുപുഴ: മുല്ലപെരിയാർ സമരസമിതി മുൻ ചെയർമാൻ പ്രഫ. സി. പി. റോയി എഴുതിയ മുല്ലപ്പെരിയാർ ഡാം 999+999 എന്ന പുസ്തകം പി.ജെ. ജോസഫ് എംഎൽഎ പ്രകാശനം ചെയ്തു. തൊടുപുഴ മുനിസിപ്പൽ ചെയർമാൻ കെ.ദീപക്, മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ, ബേബി ഐസക് തുടങ്ങിയവർ പ്രസംഗിച്ചു. മുല്ലപ്പെരിയാർ ഡാമിനു താഴെ താമസിക്കുന്ന മുരുകേശൻ, ഷാജി, വണ്ടിപ്പെരിയാറിലെ സമരസമിതി പ്രവർത്തകരായിരുന്ന പി. ആർ.അയ്യപ്പൻ, പി.വി. ലാലു, വി.ആർ. രാധാകൃഷ്ണൻ, ചപ്പാത്ത് സമരസമിതി പ്രവർത്തകരായ കെ.കെ.വിശ്വംഭരൻ, അൻപയ്യൻ, കെ.വി. ഷണ്മുഖൻ, എം.ആർ.വർഗീസ്, ഞാനപ്പൻ, വൈപ്പിനിലെ മുല്ലപ്പെരിയാർ ടണൽ സമരസമിതി പ്രവർത്തകർ എന്നിവർ പുസ്തകം ഏറ്റു വാങ്ങി. തൊടുപുഴ പ്രസ് ക്ലബ് ഹാളിൽ സെക്രട്ടറി ജെയിസ് വാട്ടപ്പിള്ളിൽ പുസ്തകത്തിന്‍റെ കോപ്പി ഏറ്റുവാങ്ങി. മുല്ലപ്പെരിയാർ ഡാമിനെ സംബന്ധിച്ച ആധികാരിക വിവരങ്ങളെല്ലാം പുസ്തകത്തിൽ പരാമർശിച്ചിട്ടുണ്ടെന്ന് പ്രഫ.സി.പി.റോയി പത്രസമ്മേളനത്തിൽ പറഞ്ഞു. മുല്ലപ്പെരിയാർ കരാർ ഒപ്പിടാൻ നിർബന്ധിതമായ സാഹചര്യം, കേരളത്തിൽനിന്ന് തമിഴ്നാടിന് വെള്ളം കൊടുക്കുന്ന മറ്റ് അണക്കെട്ടുകൾ, കരാർ കാലാവധി കഴിഞ്ഞ ഡാമുകളുടെ കരാർ പുതുക്കുന്നതിന് കേരളം മടിക്കുന്നതെന്ത്,2014-ലെ സുപ്രീം കോടതി വിധിയിൽ പറഞ്ഞിരിക്കുന്ന പുതിയ ടണൽ നടപ്പാക്കാതെ കേരളവും തമിഴ് നാടും ഒളിച്ചു കളിക്കുന്നതെന്തു കൊണ്ട്, കരാർ നിരുപാധികം പുതുക്കി നൽകിയതിൽ മുൻ മുഖ്യമന്ത്രി സി. അച്യുതമേനോൻ വരുത്തിയ വീഴ്ചകൾ, തമിഴ് നാടിന്‍റെ പണം കേരളത്തെ സ്വാധീനിക്കുന്നുണ്ടോ, പൊതുതാത്പര്യ ഹർജികളുടെ സാധ്യതകളും അപകടങ്ങളും തുടങ്ങിയവയാണ് പുസ്തകത്തിലെ ഉള്ളടക്കം. കൊച്ചൗസേപ്പ് ചിറ്റിലപ്പള്ളി, അഡ്വ. കാളീശ്വരം രാജ്, സി.ആർ. നീലകണ്ഠൻ, ഇ. ശ്രീധരൻ എന്നിവരുടെ ലേഖനങ്ങളും പുസ്തകത്തിൽ ഉൾക്കൊള്ളിച്ചിട്ടുണ്ട്.

അടിമാലി ടൗണില്‍ വെള്ളക്കെട്ട്; വ്യാപാരശാലകളില്‍ വെള്ളം കയറി

അടിമാലി: മഴ കനക്കുന്നതോടെ അടിമാലി ടൗണിന്‍റെ വിവിധയിടങ്ങളില്‍ വെള്ളക്കെട്ട് രൂക്ഷമായി. ദേശീയപാത -85 കടന്നുപോകുന്ന ടൗണില്‍ ഹില്‍ഫോര്‍ട്ട് ജംഗ്ഷനിലാണ് ഇത്തവണ വെള്ളക്കെട്ട് വ്യാപാരികളെ വലച്ചത്. വെള്ളമുയര്‍ന്നതോടെ റോഡിനോടു ചേര്‍ന്ന് താഴ്ഭാഗത്തായി പ്രവര്‍ത്തിച്ചു വന്നിരുന്ന വ്യാപാരസ്ഥാപനങ്ങളിലെ ആളുകള്‍ വലഞ്ഞു. വെള്ളം കടകള്‍ക്കുള്ളിലേക്ക് ഒഴുകിയെത്തുന്ന സ്ഥിതിയുണ്ടായി. മഴ പെയ്യുന്നതോടെ കൃത്യമായി ഓടകളിലൂടെ വെള്ളമൊഴുകാത്തതും ഓടകളില്‍ മാലിന്യം അടിഞ്ഞിട്ടുള്ളതും ടൗണില്‍ വെള്ളക്കെട്ടിന് കാരണമാണ്. ബസ് സ്റ്റാന്‍ഡ് ജംഗ്ഷന്‍ ഭാഗത്ത് റോഡില്‍ വലിയതോതില്‍ വെള്ളക്കെട്ടുണ്ടാവുന്ന സാഹചര്യം കഴിഞ്ഞദിവസം ഉണ്ടായി. ഇതു വാഹനയാത്രികര്‍ക്കും കാല്‍നടയാത്രികര്‍ക്കും ഒരേപോലെ പ്രതിസന്ധിയായി. ദേശീയപാതയിലടക്കം ടൗണില്‍ ഉണ്ടാകുന്ന വെള്ളക്കെട്ട് പൂര്‍ണമായി ഒഴിവാക്കാന്‍ ബന്ധപ്പെട്ട വകുപ്പുകളുടെ ഇടപെടല്‍ വേണമെന്നാണ് ആവശ്യം.

അൽഫാസിന്‍റെ റാങ്കിന് തങ്കത്തിളക്കം

ചെറുതോണി: പ്രതികൂല സാഹചര്യങ്ങളോട് പടവെട്ടി മെഡിക്കൽ നീറ്റ് എൻട്രൻസ് പരീക്ഷയിൽ ദേശീയ തലത്തിൽ അൽഫാസ് ഷെക്കീർ നേടിയ റാങ്കിന് തങ്കത്തിളക്കം. വാഴത്തോപ്പ് പഞ്ചായത്തിൽ മണിയാറൻകുടി സ്വദേശി ഓട്ടോറിക്ഷ ഡ്രൈവറായ കെ.എം. ഷെക്കീറിന്‍റെ മകനാണ് അൽഫാസ്. 7-ാം ക്ലാസ് വരെ ലക്ഷംകവല കെസിഡബ്ല്യു സിബിഎസ്ഇ സ്കൂളിലും തുടർന്ന് പ്ലസ് ടു വരെ വാഴത്തോപ്പ് സെന്‍റ് ജോർജ് എച്ച്എസ്എസിലുമാണ് പഠനം പൂർത്തിയാക്കിയത്. 8ാം ക്ലാസിൽ പഠിക്കുമ്പോൾ ഇടുക്കി വോളിബോൾ അക്കാദമിയിൽ പ്രവേശനം ലഭിച്ചു. ജില്ലാ വോളിബോൾ സബ് ജൂനിയർ ടീമിൽ അംഗമായിരുന്നു. പ്ലസ് ടുവിന് 98.6. ശതമാനം മാർക്കോടെ ഉപരിപഠനത്തിന് യോഗ്യത നേടി. തുടർന്ന് തന്‍റെ ജീവിതസ്വപ്നമായ എംബിബിഎസ് ലക്ഷ്യത്തിനുവേണ്ടി ഓൺലൈൻ ബാച്ച് തെരഞ്ഞെടുത്തു. ലക്ഷങ്ങൾ ഫീസ് നൽകി പഠിക്കാനുള്ള സാമ്പത്തിക സാഹചര്യവും ചുറ്റുപാടും അൽ ഫാസിനില്ലായിരുന്നില്ല. ദേശീയ തലത്തിൽ 7042 -ാം റാങ്കോടെ നീറ്റ് പരീക്ഷ വിജയിച്ചു. സംസ്ഥാനതലത്തിൽ 564 -ാം റാങ്കുമുണ്ട്. കേരളത്തിലെ മെഡിക്കൽ കോളജിൽ പ്രവേശനം ലഭിച്ച് തുടർപഠനത്തിന് കാത്തിരിക്കുകയാണ് അൽഫാസ്. കോട്ടയം, തൃശൂർ മെഡിക്കൽ കോളജിൽ അഡ്മിഷൻ ലഭിക്കണമെന്നാണ് അൽഫാസിന്‍റെ ആഗ്രഹം. റാങ്ക് വിവരമറിഞ്ഞതോടെ ജനപ്രതിനിധികളും നാട്ടുകാരും വിവിധ സാമൂഹ്യ പ്രവർത്തകരും അൽഫാസിനെ നേരിൽക്കണ്ട് അഭിനന്ദനമറിയിക്കാൻ എത്തിക്കൊണ്ടിരിക്കുകയാണ്. നസീനയാണ് മാതാവ്. സഹോദരി അഫിയ.

തൊടുപുഴ സഹകരണബാങ്ക് ശതാബ്ദി നിറവിലേക്ക്

തൊടുപുഴ: തൊടുപുഴ സഹകരണ ബാങ്കിന്‍റെ ശതാബ്ദി ആഘോഷത്തിന്‍റെ ഭാഗമായി വിവിധ ജീവകാരുണ്യ പ്രവർത്തനങ്ങൾക്ക് തുടക്കം കുറിച്ചതായി ബാങ്ക് ഭരണസമിതിയംഗങ്ങൾ പത്രസമ്മേളനത്തിൽ അറിയിച്ചു. 1925 ജൂണ്‍ 14ന് 25 അംഗങ്ങളുള്ള പരസ്പര സഹായ സഹകരണ സംഘമായാണ് പ്രവർത്തനം തുടങ്ങിയത്. പിന്നീട് 1962-ൽ കോലാനി സർവീസ് സഹകരണ ബാങ്കായി. 1988-ൽ തൊടുപുഴ ടൗണിൽ സ്വന്തമായി കെട്ടിടം നിർമിച്ച് ഹെഡ് ഓഫീസ് പ്രവർത്തനം തുടങ്ങി. 1990 ജൂലായ് ഒന്ന് മുതൽ തൊടുപുഴ സർവീസ് സഹകരണ ബാങ്ക് എന്ന പേരിലേക്ക് മാറി. കഴിഞ്ഞ 30 വർഷമായി ലാഭത്തിൽ പ്രവർത്തിക്കുന്ന ബാങ്ക് അംഗങ്ങൽക്ക് ലാഭവിഹിതം നൽകുന്നുണ്ട്. ക്ലാസ്1 ഗ്രേഡിലാണ് നിലവിൽ ബാങ്ക് പ്രവർത്തിക്കുന്നത്.ശതാബ്ദി ആഘോഷത്തിന്‍റെ ഭാഗമായി ബാങ്കിന്‍റെ അംഗങ്ങൾക്കോ അവരുടെ ഉറ്റവർക്കോ മാരകരോഗങ്ങൾ പിടിപെട്ടാൽ ചികിത്സാ സഹായം നൽകുന്നതിന് കാരുണ്യസ്പർശം പദ്ധതി നടപ്പാക്കിയിട്ടുണ്ട്. കാൻസർ, വൃക്ക രോഗം, കരൾരോഗം, ഹൃദയ സംബന്ധമായ രോഗങ്ങൾ എന്നിവ പിടിപെട്ട 100 പേർക്ക് കാരുണ്യസ്പർശം ബെനവലന്‍റ് ഫണ്ടിൽനിന്നും ചികിത്സാ സഹായം വിതരണം ചെയ്യും. ഇതിനായി ബോർഡ് മെംബറുടെ ശിപാർശയോടെ മെഡിക്കൽ സർട്ടിഫിക്കറ്റ് സഹിതം ബാങ്കിൽ അപേക്ഷ സമർപ്പിക്കണം. ബാങ്കിലെ അംഗങ്ങളുടെ പെണ്‍മക്കളുടെ വിവാഹ ആവശ്യത്തിലേക്ക് അഞ്ചു ശതമാനം പലിശ നിരക്കിൽ മംഗല്യസൂത്ര വായ്പാ പദ്ധതിയും നടപ്പാക്കുന്നുണ്ട്. ശതാബ്ദിയോടനുബന്ധിച്ച് ഓക്ടോബറിൽ നടക്കുന്ന യോഗം മന്ത്രി വി.എൻ.വാസവൻ ഉദ്ഘാടനം ചെയ്യും. ബാങ്കിന്‍റെ ആദ്യകാല മുതിർന്ന സഹകാരികളെ യോഗത്തിൽ ആദരിക്കും. വിദ്യാഭ്യാസ രംഗത്ത് ഉന്നത വിജയം കരസ്ഥമാക്കിയ അംഗങ്ങളുടെ കുട്ടികൾക്ക് വിദ്യാഭ്യാസ പാരിതോഷികം നൽകും. ചടങ്ങിൽ വിവിധ സഹായ പദ്ധതികളുടെ വിതരണം നടത്തുമെന്നും ഭരണസമിതിയംഗങ്ങൾ അറിയിച്ചു. പത്രസമ്മേളനത്തിൽ ബാങ്ക് പ്രസിഡന്‍റ് പ്രശോഭ് ആർ.നായർ, സെക്രട്ടറി പി.ജയശ്രീ, ഭരണസമിതിയംഗങ്ങളായ ഹബി കാസിം, എം.സി.ജയൻ, പി.പി.ജേക്കബ് എന്നിവർ പങ്കെടുത്തു.

ദീപിക-സീക് അവർഡ് വിതരണം പ്രൗഢോജ്വലം

കട്ടപ്പന: ദീപിക - സീക് അക്കാദമിക് എക്സലൻസ് അവാർഡ് - ആദരവ് -2025 കട്ടപ്പന സെന്‍റ് ജോർജ് ഫൊറോന ഓഡിറ്റോറിയത്തിൽ നടന്നു. എസ്എസ്എൽസി, പ്ലസ് ടു പരീക്ഷകളിൽ എല്ലാവിഷയങ്ങൾക്കും എ പ്ലസ് നേടിയ വിദ്യാർഥികൾ, സയൻസ് വിഷയങ്ങളിൽ 80 ശതമാനത്തിനു മുകളിൽ മാർക്കുവാങ്ങിയ വിദ്യാർഥികൾ, എസ്എസ്എൽസി, പ്ലസ് ടൂ പരീക്ഷകളിൽ 100 ശതമാനം വിജയം നേടിയ സ്കൂളുകൾ എന്നിവരെയാണ് ആദരിച്ചത്. ഹൈറേഞ്ച് മേഖലയിലെ സ്കൂളൂകളിൽനിന്നുള്ള 800ഓളം വിദ്യാർഥികൾ പങ്കെടുത്തു. ഇടുക്കി എഡിഎം ഷൈജു പി. ജേക്കബ് ഉദ്ഘാടനം ചെയ്തു. ഇടുക്കി രൂപത മുഖ്യ വികാരി ജനറാൾ മോണ്‍. ജോസ് കരിവേലിക്കൽ അധ്യക്ഷത വഹിച്ചു. കട്ടപ്പന നഗരസഭാ അധ്യക്ഷ ബീന ടോമി മുഖ്യ പ്രഭാഷണം നടത്തി. കട്ടപ്പന സെന്‍റ് ജോർജ് ഫൊറോന വികാരി ഫാ. ജോസ് മംഗലത്തിൽ, ഡിഎഫ്സി ഇടുക്കി രൂപതാ ഡയറക്ടർ ഫാ. ജോസഫ് കൊല്ലക്കൊന്പിൽ, ഡിഎഫ്സി ഇടുക്കി രൂപതാ പ്രസിഡന്‍റ് വി.ടി. തോമസ് എന്നിവർ പ്രസംഗിച്ചു. ദീപിക എജിഎം (മാർക്കറ്റിംഗ്) കം പിആർഒ മാത്യു കൊല്ലമലക്കരോട്ട് സ്വാഗതവും ദീപിക ഇടുക്കി റീജിയൻ ബിസിനസ് മാനേജർ റോബിൻ കെ. സെബാസ്റ്റ്യൻ നന്ദിയും പറഞ്ഞു. സീക് ലിമിറ്റഡ് കരിയർ കണ്‍സൾട്ടന്‍റ് ജിബിൻ ബിനു ജോസഫ് ക്ലാസെടുത്തു.

വിദ്യാർഥികൾ അവസരങ്ങൾ ഉപയോഗപ്പെടുത്താൻ പ്രാപ്തിയുള്ളവരാകണം: എഡിഎം

കട്ടപ്പന: മുന്നിൽ തുറക്കപ്പെട്ടിരിക്കുന്ന അവസരങ്ങൾ പ്രയോജനപ്പെടുത്താൻ വിദ്യാർഥികൾ പ്രാപതരായിത്തീരണമെന്ന് ഇടുക്കി എഡിഎം ഷൈജു പി. ജേക്കബ്. കട്ടപ്പന സെന്‍റ് ജോർജ് ഫൊറോന ഓഡിറ്റോറിയത്തിൽ ദീപിക -സീക് അക്കദമിക് എക്സലൻസ് അവാർഡ്ദാനച്ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. പുതിയ തലമുറ മുൻ തലമുറയെ അപേക്ഷിച്ച് കൂടുതൽ അനുഗൃഹീതരാണ്. ആധുനിക കാലത്ത് വിവധ മേഖലകളിൽ ഒട്ടേറെ അവസരങ്ങളുണ്ട്. അതു കണ്ടെത്താനും ഉപയോഗപ്പെടുത്താനും എല്ലാവർക്കും ഒരുപോലെ കഴിയും. ഡിജിറ്റൽ യുഗം നമുക്കുമുന്നിൽ തുറന്നിട്ടിരിക്കുന്നത് വിശാലമായ ലോകമാണ്. എല്ലാവരും ഒരേ അഭിരുചിയും കഴിവും ഉള്ളവരല്ല. എന്നാൽ, എല്ലാവരും അഭിരുചിയും കഴിവും ഉള്ളവരാണ്. അതു തിരിച്ചറിഞ്ഞ് പ്രയോജനപ്പെടുത്തുന്പോഴാണ് ജീവിതവിജയം നേടുന്നത്. പ്രതിസന്ധികളെ തരണം ചെയ്യുന്പോഴാണ് വിജയം ഉണ്ടാകുന്നത്. പ്രതിസന്ധികൾ ഒരിക്കലും നമ്മെ തളർത്തരുത്. ജീവിതവഴിയിൽ പ്രതിസന്ധികളും പരാജയങ്ങളും വിജയങ്ങളും നേട്ടങ്ങളും എല്ലാം ഉണ്ടാകും. അതിനെയെല്ലാം സമചിത്തതയോടെ അഭിമുഖീകരിക്കാനുള്ള കഴിവാണ് വിദ്യാഭ്യാസത്തിലൂടെ ആർജിക്കേണ്ടതെന്നും എഡിഎം വിദ്യാർഥികളെ ഉദ്ബോദിപ്പിച്ചു. സഹജീവി സ്നേഹവും കരുതലുമാണ് നല്ല മനുഷ്യത്വത്തിന്‍റെ അടയാളമെന്ന് ചടങ്ങിൽ അധ്യക്ഷത വഹിച്ച ഇടുക്കി രൂപത മുഖ്യ വികാരി ജനറാൾ മോണ്‍. ജോസ് കരിവേലിക്കൽ പറഞ്ഞു. ഏതു തൊഴിലും മഹത്വരമാണ്. തൊഴിലിലെ മഹത്വം തൊഴിൽ ചെയ്യുന്നവരുടെ മഹത്വമാണ്. നാം ആയിരിക്കുന്നിടത്തെ വിജയമാണ് പരമപ്രധാനം. കഠിനാധ്വാനവും ദൈവാശ്രയവും അത്മവിശ്വാസവുമാണ് ജീവിത വിജയത്തിന്‍റെ അടിസ്ഥാന ഘടകമെന്നും മോണ്‍. ജോസ് കരിവേലിക്കൽ പറഞ്ഞു.

പാറക്കടവിലെ ബയോമൈനിംഗ് പദ്ധതി അന്തിമഘട്ടത്തിൽ

തൊടുപുഴ: നഗരസഭയുടെ പാറക്കടവ് ഡംപിംഗ് യാർഡിലെ മാലിന്യമല നീക്കി ഇവിടം ഉപയോഗയോഗ്യമാക്കും. ഇവിടെ കുന്നുകൂടിയ മാലിന്യക്കൂന്പാരം നീക്കം ചെയ്യുന്ന ബയോമൈനിംഗ് പദ്ധതി അന്തിമഘട്ടത്തിലാണെന്ന് അധികൃതർ അറിയിച്ചു. ശുചിത്വ മിഷന്‍റെ സഹകരണത്തോടെയാണ് പദ്ധതി നടപ്പാക്കുന്നത്. മാലിന്യം ശാസ്ത്രീയമായി വേർതിരിച്ച് സംസ്കരിക്കുകയും ഭൂമി ഉപയോഗയോഗ്യമാക്കുകയുമാണ് ലക്ഷ്യം. നാൽപ്പത് വർഷത്തോളമായി തൊടുപുഴ നഗരസഭയിൽനിന്നുള്ള മാലിന്യങ്ങൾ നിക്ഷേപിച്ചിരുന്നത് പാറക്കടവിലാണ്. മാലിന്യം നീക്കം ചെയ്യാത്തതു മൂലം ഇത് കുന്നുപോലെ ഉയർന്ന് മാലിന്യമലയായി മാറിയിരുന്നു. ഈ സാഹചര്യത്തിലാണ് പദ്ധതിയുമായി നഗരസഭാധികൃതർ രംഗത്തെത്തിയത്. കോഴിക്കോട് ആസ്ഥാനമായ സ്വകാര്യ സ്ഥാപനമാണ് മാലിന്യം നീക്കംചെയ്യുന്നത്. അഞ്ചു മാസം കൊണ്ട് 1.24 ഏക്കർ വിസ്തീർണമുള്ള പ്രദേശത്തെ 26,683 ക്യൂബിക് മീറ്റർ മാലിന്യമാണ് നീക്കം ചെയ്തത്. ഇതിനായി 2.83 കോടിയുടെ ധനസഹായമാണ് സർക്കാർ വകയിരുത്തിയത്. ഇതുവരെ 18,000 ക്യൂബിക് മീറ്ററോളം മാലിന്യം ശാസ്ത്രീയമായി വേർതിരിച്ചു. കാലവർഷം ആരംഭിച്ചതിനാൽ മാലിന്യം മഴയിൽ നനഞ്ഞ് വേർതിരിക്കൽ ശ്രമകരമായതിനാൽ മഴ മാറിയ ശേഷമേ പ്രവൃത്തികൾ പുനഃനാരംഭിക്കു. ശുചിത്വത്തിലും ആരോഗ്യ പരിസ്ഥിതി സംരക്ഷണ മേഖലകളിലും പദ്ധതി വലിയ നേട്ടമാകും. മാലിന്യം നീക്കം ചെയ്ത പ്രദേശത്ത് ബയോമൈനിംഗ് പ്ലാന്‍റും പാർക്കുകളും ആരംഭിക്കാനാണ് പദ്ധതിയിടുന്നത്. പരിസ്ഥിതി സംരക്ഷണത്തിൽ മാതൃകയായി പാറക്കടവ് ഡംപിംഗ് യാർഡ് മാറുമെന്നാണ് പ്രതീക്ഷയെന്ന് അധികൃതർ പറഞ്ഞു.

ജില്ലയിലെ‍ അണക്കെട്ടുകളില്‍ ജലനിരപ്പ് ഉയരുന്നു

അടിമാലി: കാലവര്‍ഷം ശക്തമായതോടെ ജില്ലയിലെ അണക്കെട്ടുകളില്‍ ജലനിരപ്പ് ഉയരുന്നു. കാലവര്‍ഷം ശക്തമാകുന്നതിന് മുമ്പേതന്നെ ഇത്തവണ ജില്ലയിലെ അണക്കെട്ടുകള്‍ ജലസമൃദ്ധമായിരുന്നു. ഇടുക്കി അണക്കെട്ടില്‍ മാത്രമാണ് ജലനിരപ്പ് താഴ്ന്ന് നില്‍ക്കുന്നത്. 2403 അടി പരമാവധി സംഭരണ ശേഷിയുള്ള ഇടുക്കി അണക്കെട്ടില്‍ നിലവിലെ ജലനിരപ്പ് 2343.24 അടിയാണ്. ജലനിരപ്പ് ഉയര്‍ന്ന് 2365 അടിയിലെത്തിയാല്‍ ബ്ലൂ അലര്‍ട്ട് പ്രഖ്യാപിക്കും. 2371 അടിയില്‍ ഓറഞ്ച് അലര്‍ട്ടും 2372 അടിയില്‍ എത്തുമ്പോള്‍ റെഡ് അലര്‍ട്ടും പ്രഖ്യാപിക്കും. ജലനിരപ്പ് പരമാവധി സംഭരണ ശേഷിയില്‍ എത്തിയതിനെത്തുടര്‍ന്ന് കല്ലാര്‍കുട്ടി, ലോവര്‍ പെരിയാര്‍ അണക്കെട്ടുകളില്‍നിന്നും വെള്ളം പുറത്തേക്ക് ഒഴുക്കുന്നുണ്ട്. 456.59 അടിയാണ് കല്ലാര്‍കുട്ടി അണക്കെട്ടിന്‍റെ പരമാവധി സംഭരണശേഷി. പൊന്മുടി അണക്കെട്ടിന്‍റെ പരമാവധി സംഭരണശേഷിയിലേക്ക് ജലനിരപ്പ് അടുക്കുകയാണ്. നിലവില്‍ അണക്കെട്ടില്‍ ബ്ലൂ അലര്‍ട്ട് പ്രഖ്യാപിച്ചിട്ടുണ്ട്. വരും മണിക്കൂറുകളിൽ മഴ ശക്തമായാല്‍ പൊന്മുടിയും തുറക്കേണ്ടി വരും. കാലവര്‍ഷ ആരംഭത്തില്‍ അണക്കെട്ടിന്‍റെ മൂന്ന് ഷട്ടറുകളും ഉയര്‍ത്തിയിരുന്നു. മലങ്കര, മാട്ടുപ്പെട്ടി, കുണ്ടള, ആനയിറങ്കല്‍, ഇരട്ടയാര്‍ അണക്കെട്ടുകളിലും ജലനിരപ്പുയര്‍ന്നിട്ടുണ്ട്. അണക്കെട്ടുകളുടെയെല്ലാം വ്യഷ്ടിപ്രദേശങ്ങളില്‍ കഴിഞ്ഞ രണ്ടു ദിവസങ്ങളിലായി ശക്തമായ മഴ ലഭിക്കുന്നുണ്ട്. തോടുകളിലും പുഴകളിലും ഒഴുക്ക് വര്‍ധിച്ചു. വെള്ളച്ചാട്ടങ്ങള്‍ ജലസമൃദ്ധമായി.

മഴ ശക്തി പ്രാപിച്ചു: ജില്ലയിൽ ഇന്നും നാളെയും ജാഗ്രത

തൊടുപുഴ: ജില്ലയിൽ വീണ്ടും കാലവർഷം ശക്തി പ്രാപിച്ചു. മൂന്നു ദിസമായി ഒറ്റപ്പെട്ട ശക്തമായ മഴയാണ് വിവിധയിടങ്ങളിൽ പെയ്യുന്നത്. തീവ്രമഴയുണ്ടാകുമെന്ന കാലാവസ്ഥാ മുന്നറിയിപ്പിന്‍റെ പശ്ചാത്തലത്തിൽ ഇന്നും നാളെയും ജില്ലയിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. എന്നാൽ, റെഡ് അലർട്ടിനു സമാനമായ ജാഗ്രതയാണ് ജില്ലാ ഭരണകൂടം ഏർപ്പെടുത്തിയിരിക്കുന്നത്. കഴിഞ്ഞ മാസമുണ്ടായ ശക്തമായ കാറ്റിലും മഴയിലും കനത്ത നാശനഷ്ടമാണ് ജില്ലയിലുണ്ടായത്. മരം ഒടിഞ്ഞു വീണും മറ്റുമുണ്ടായ അപകടങ്ങളിൽ മൂന്നു പേർക്ക് ജീവഹാനിയുണ്ടായി. കനത്ത മഴയിൽ 138 വീടുകൾ ഭാഗികമായും 10 വീടുകൾ പൂർണമായും തകർന്നു. 5.48 കോടി രൂപയുടെ കൃഷിനാശം ഉണ്ടായതായാണ് പ്രാഥമിക കണക്കുകൾ. 350.8 ഹെക്ടറിലായി 3,218 കർഷകരുടെ കാർഷിക വിളകളാണ് കനത്ത മഴയിൽ നശിച്ചത്. കനത്ത മഴയുടെ സാധ്യത കണക്കിലെടുത്ത് ഖനനം, മണ്ണെടുപ്പ്, റോഡ് നിർമാണ പ്രവർത്തനങ്ങൾ എന്നിവ ജില്ലയിൽ നിരോധിച്ചിട്ടുണ്ട്. വിനോദസഞ്ചാര മേഖലകളിലും നിയന്ത്രണമേർപ്പെടുത്തി. ജലാശയങ്ങളിലെ ബോട്ടിംഗ്, കയാക്കിംഗ്, റാഫ്റ്റിംഗ്, കുട്ടവഞ്ചി സവാരി ഉൾപ്പെടെയുള്ള എല്ലാവിധ ജലവിനോദങ്ങളും നിരോധിച്ചിട്ടുണ്ട്. ദുരന്തനിവാരണവുമായി ബന്ധപ്പെട്ട എല്ലാ വകുപ്പുകളിലെയും ജീവനക്കാർ അലർട്ടുകൾ പിൻവലിക്കുന്നതുവരെ ആസ്ഥാനം വിട്ടുപോകാനോ ജില്ലാതല ഉദ്യോഗസ്ഥരുടെ അനുമതിയില്ലാതെ അവധിയെടുക്കാനോ പാടില്ലെന്നും കളക്ടർ ഉത്തരവിട്ടിട്ടുണ്ട്. ഇന്നലെ രാവിലെ വരെയുള്ള 24 മണിക്കൂറിൽ 45.52 മില്ലീമീറ്റർ മഴ ജില്ലയിൽ ലഭിച്ചതായാണു കണക്ക്. ദേവികുളം -65.4, ഉടുന്പൻചോല - 29.6, പീരുമേട് - 34, ഇടുക്കി -50.6, തൊടുപുഴ-48 എന്നിങ്ങനെയാണ് ഓരോ താലൂക്കിലും ലഭിച്ച മഴയുടെ അളവ്. മഴ വീണ്ടും ശക്തിപ്രാപിച്ചതോടെ അണക്കെട്ടുകളിലെ ജലനിരപ്പും ഉയർന്നു തുടങ്ങി. ഇടുക്കി അണക്കെട്ടിലെ ജലനിരപ്പ് 2,343.24 അടിയായി ഉയർന്നു. പരമാവധി സംഭരണശേഷിയുടെ 40.17 ശതമാനമാണിത്. കഴിഞ്ഞ വർഷം ഇതേസമയം 29.79 ശതമാനമായിരുന്നു ജലനിരപ്പ്. 2,403 അടിയാണ് പരമാവധി സംഭരണശേഷി. മുല്ലപ്പെരിയാർ ഡാമിലെ ജലനിരപ്പ് 128.40 അടിയിലെത്തി. 142 അടിയാണ് അനുവദനീയമായ പരമാവധി സംഭരണശേഷി. കല്ലാർകുട്ടി, പാംബ്ല, മലങ്കര അണക്കെട്ടുകൾ തുറന്ന് വെള്ളം പുറത്തേയ്ക്കൊഴുക്കുന്നുണ്ട്.

ഭീമൻ കല്ലുവീണ് വീട് ഭാഗികമായി തകർന്നു

കട്ടപ്പന: കൊച്ചുതോവാളയിൽ കനത്ത മഴയെത്തുടർന്ന് ഭീമൻ കല്ല് വീണ് വീടു തകർന്നു. ശൗര്യംകുഴിയിൽ ജോസിന്‍റെ വീടിനു പിൻഭാഗത്തുണ്ടായിരുന്ന കല്ലാണ് വീടിനുള്ളിൽ പതിച്ചത്. ഇന്നലെ ഉച്ചയ്ക്ക് 12.45 ഓടെയാണ് സംഭവം. കഴിഞ്ഞ ദിവസങ്ങളിൽ മേഖലയിൽ ശക്തമായ മഴയാണ് അനുഭവപ്പെട്ടിരുന്നത്. ഞായറാഴ്ച മഴയ്ക്ക് അല്പം ശമനമുണ്ടായെങ്കിലും മണ്ണ് കുതിർന്ന സ്ഥിതിയിലാണ്. ഈ സാഹചര്യത്തിലാണ് വീടിനു പിൻവശത്തായി സ്ഥിതി ചെയ്തിരുന്ന കൂറ്റൻ കല്ല് ഉരുണ്ട് വീണത്. കല്ല് വീടിന്‍റെ ഭിത്തി തകർത്ത് ഉള്ളിലെത്തി. കിടപ്പുമുറിയാണ് തകർന്നത്. ഏകദേശം 20 അടിയോളം ഉയരത്തിൽനിന്നാണ് കല്ല് താഴേക്കു വീണത്. ഈ സമയം മുറ്റത്തുണ്ടായിരുന്ന ശൗര്യാംകുഴിയിൽ ജോസിന്‍റെ ഭാര്യ ഗ്രേസി അത്ഭുതകരമായാണ് രക്ഷപ്പെട്ടത്. വീടിനുള്ളിലുണ്ടായിരുന്ന കട്ടിൽ, അലമാര, പാത്രങ്ങൾ, മറ്റു രേഖകൾ എന്നിവയെല്ലാം പൂർണമായും നശിച്ചു. കട്ടപ്പന വില്ലേജ് ഓഫീസ് ഉദ്യോഗസ്ഥർ സ്ഥലത്തെത്തി പരിശോധന നടത്തുകയും ഇവരെ വീട്ടിൽ നിന്ന് ഒഴിയാൻ നിർദേശം നൽകുകയും ചെയ്തു. കല്ല് കീറിമുറിച്ച് നീക്കാനുള്ള നടപടി സ്വീകരിക്കുമെന്ന് വാർഡ് കൗൺസിലർ സിബി പാറപ്പായി അറിയിച്ചു.

ദിവ്യരക്ഷാലയം വാർഷികാഘോഷങ്ങൾക്കു തുടക്കം

തൊടുപുഴ: മൈലക്കൊന്പ് ദിവ്യരക്ഷാലയത്തിന്‍റെ 30-ാം വാർഷികാഘോഷങ്ങൾക്കു തുടക്കമായി. കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കലിന്‍റെ മുഖ്യകാർമികത്വത്തിൽ നടന്ന ദിവ്യബലിയോടെ ഒരു വർഷം നീണ്ടു നിൽക്കുന്ന ആഘോഷങ്ങൾക്കു തുടക്കമായി. നവീകരിച്ച ഗ്രോട്ടോയുടെ വെഞ്ചരിപ്പും അദ്ദേഹം നിർവഹിച്ചു. അഗതികളെയും നിരാലംബരെയും രോഗികളെയും ശുശ്രൂഷിക്കുന്പോൾ ദൈവശുശ്രൂഷ തന്നെയാണ് ചെയ്യുന്നതെന്ന ബോധ്യമാണ് ദിവ്യരക്ഷാലയം പ്രസിഡന്‍റ് ടോമി മാത്യു ഓടയ്ക്കലിനെയും ഇവിടെ ശുശ്രൂഷ ചെയ്യുന്നവരെയും മുന്നോട്ടു നയിക്കുന്നതെന്ന് അദ്ദേഹം പറഞ്ഞു. കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ചു. കരുണയും സ്നേഹവും ഒരുമയും ശുശ്രൂഷകളിൽ ദൈവസാന്നിധ്യത്തിനുള്ള വഴികളായി മാറുമെന്ന് അദ്ദേഹം പറഞ്ഞു. ദിവ്യരക്ഷാലയം രക്ഷാധികാരി ഏലിയാമ്മ മാത്യു, ജോഷി മാത്യു, ഫാ. ബെന്നി ഓടയ്ക്കൽ എന്നിവരെ മാർ ജോർജ് മഠത്തിക്കണ്ടത്തിൽ ആദരിച്ചു. സാമൂഹിക, സാംസ്കാരിക, ആധ്യാത്മിക രംഗങ്ങളിൽ വ്യക്തിമുദ്ര പതിപ്പിച്ച കോതമംഗലം രൂപത ഫാമിലി അപ്പോസ്തലേറ്റ് ഡയറക്ടർ ഫാ. ആന്‍റണി പുത്തൻകുളം, കെസിബിസി പ്രോ-ലൈഫ് സമിതി അനിമേറ്റർ സാബു ജോസ്, ഫിയാത്ത് മിഷൻ ഡയറക്ടർ സീറ്റ്‌ലി, ജയ്സണ്‍ ചെറുപുഷ്പം, മാത്യു കണ്ടിരിക്കൽ. കുര്യാക്കോസ് വടക്കുംപാടത്ത്, ലിസി ഏബ്രഹാം കാഞ്ഞിരക്കൊന്പിൽ, സിസ്റ്റർ എലിസബത്ത് എന്നിവർക്ക് ബിഷപ് പുരസ്കാരം സമ്മാനിച്ചു. സബ് ജഡ്ജി എൻ.എൻ. സിജി മുഖ്യപ്രഭാഷണം നടത്തി. സാബു ജോസ്, ഫാ. ജോസഫ് കൊച്ചുപറന്പിൽ, സിസ്റ്റർ ജോസി എസ്എച്ച്, ഫാ. ആന്‍റണി പുത്തൻകുളം, ഗ്രേസി തോമസ്, മായ ദിനേശൻ എന്നിവർ പ്രസംഗിച്ചു. ടോമി മാത്യു ഓടയ്ക്കൽ സ്വാഗതവും ബിന്ദു ഓടയ്ക്കൽ നന്ദിയും പറഞ്ഞു.

വിദ്യാഭ്യാസ സ്ഥാപനങ്ങൾക്ക് ഇന്ന് അവധി

ഇടുക്കി: ജില്ലയിൽ കനത്ത മഴയും കാറ്റും തുടരുന്ന സാഹചര്യത്തിൽ പ്രഫഷണൽ കോളജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും ഇന്നു ജില്ലാ കളക്ടർ അവധി പ്രഖ്യാപിച്ചു. അങ്കണവാടികൾ, മദ്രസകൾ, ട്യൂഷൻ സെന്‍ററുകൾ, ട്രെയിനിംഗ് ഇൻസ്റ്റിറ്റ്യൂട്ടുകൾ, കേന്ദ്രീയവിദ്യാലയം ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകമാണ്. എന്നാൽ, റെസിഡൻഷ്യൽ വിദ്യാഭ്യാസ സ്ഥാപനങ്ങൾക്ക് അവധി ഉണ്ടായിരിക്കില്ല. നഷ്ടപ്പെടുന്ന പഠന സമയം ഓണ്‍ലൈൻ ക്ലാസുകൾ ഉൾപ്പെടെ നടത്തി ക്രമീകരിക്കുന്നതിന് വിദ്യാഭ്യാസ സ്ഥാപന മേധാവികൾ നടപടി സ്വീകരിക്കണമെന്ന് ഉത്തരവിൽ പറയുന്നു.

കുരങ്ങാട്ടി തോട്ടിലേക്കിടിഞ്ഞെത്തിയ മണ്ണും മരവും നീക്കണമെന്ന്

അടിമാലി: കാലവർഷം ശക്തിപ്രാപിച്ചതോടെ കുരങ്ങാട്ടി തോട്ടിൽ അടിഞ്ഞുകൂടിയിരിക്കുന്ന മണ്ണും തടികളും നീക്കംചെയ്യണമെന്ന ആവശ്യം ശക്തമായി. തോടിന് വീതി വര്‍ധിപ്പിച്ചതിനരികില്‍ നിന്നും കൂടുതലായി മണ്ണിടിയുകയും മരങ്ങളടക്കം നിലംപതിക്കുകയും ചെയ്തിട്ടുണ്ട്. ശക്തമായ മഴ തുടരുകയും തോട്ടില്‍ ജലനിരപ്പുയരുകയും ചെയ്താല്‍ കൂടുതലായി ഇവിടെ മണ്ണിടിയാനുള്ള സാധ്യതയുണ്ട്. അങ്ങനെ സംഭവിച്ചാല്‍ തോടിന്‍റെ ഒഴുക്ക് തടസപ്പെടുകയും സമീപത്തെ നെല്‍ക്കൃഷിയെ പ്രതികൂലമായി ബാധിക്കുകയും ചെയ്യും.

വാളറ കാവേരിപ്പടിക്ക് സമീപം മണ്‍തിട്ടയില്‍ നിന്നിരുന്ന ഭീമന്‍ ഇല്ലിത്തുറു റോഡിൽ പതിച്ചു

അടിമാലി: ദേവികുളം താലൂക്കില്‍ മഴ ശക്തമായി. ഒറ്റപ്പെട്ടയിടങ്ങളില്‍ അതിശക്തമായ മഴയും പെയ്യുകയാണ്. തുടര്‍ച്ചയായി മഴ പെയ്യുന്നതിനാല്‍ പലയിടത്തും മണ്ണിടിച്ചില്‍ ഭീഷണി രൂപം കൊണ്ടിട്ടുണ്ട്. നവീകരണ ജോലികള്‍ നടക്കുന്ന ദേശീയപാത - 85 ലാണ് കൂടുതലായി മണ്ണിടിച്ചില്‍ സാധ്യത നിലനില്‍ക്കുന്നത്. കൊച്ചി - ധനുഷ്‌കോടി ദേശീയപാതയില്‍ വാളറ കാവേരിപ്പടിക്ക് സമീപം നേരിയ മണ്ണിടിച്ചിലുണ്ടായി ഗതാഗതം ഭാഗികമായി തടസപ്പെട്ടു. മണ്‍തിട്ടയില്‍ നിന്നിരുന്ന ഭീമന്‍ ഇല്ലിത്തുറു റോഡിലേക്ക് പതിക്കുകയായിരുന്നു. ദേശീയപാതയില്‍ മണ്ണ് നീക്കിയ ഇടങ്ങളിലെ വീടുകള്‍ പലതും അപകടഭീഷണിയിലാണ്. പരക്കെ മഴ ലഭിച്ചതോടെ വിവിധ അണക്കെട്ടുകളിലേക്കൊഴുകിയെത്തുന്ന വെള്ളത്തിന്‍റെ അളവും വര്‍ധിച്ചു. കല്ലാര്‍കുട്ടി അണക്കെട്ടിന്‍റെ ഷട്ടറുകള്‍ തുറന്ന് വെള്ളം പുറത്തേക്കൊഴുക്കുന്നുണ്ട്. മാട്ടുപ്പെട്ടി, കുണ്ടള, പൊന്‍മുടി അണക്കെട്ടുകളിലേക്കും കൂടുതല്‍ വെള്ളം ഒഴുകിയെത്തി. വിനോദസഞ്ചാര മേഖലയേയും മഴ പ്രതികൂലമായി ബാധിച്ചു. മണ്ണിടിച്ചില്‍ സാധ്യതയുള്ള പ്രദേശങ്ങളിലെ സാഹസിക വിനോദ സഞ്ചാരത്തിനും ജലവിനോദങ്ങള്‍ക്കും നിയന്ത്രണമുണ്ട്. മൂന്നാര്‍ ഗ്യാപ് റോഡില്‍ ഈ മാസം 17 വരെ രാത്രിയാത്രയ്ക്ക് നിരോധനമുണ്ട്.

വ്യാപാര സ്ഥാപനങ്ങൾക്കു നേരേ ഗുണ്ടാ ആക്രമണം

കരിമണ്ണൂർ: ടൗണിലും പരിസര പ്രദേശങ്ങളിലുമുള്ള വ്യാപാരസ്ഥാപനങ്ങളിൽ സാമൂഹ്യദ്രോഹികളുടെ ആക്രമണം പതിവാകുന്നതായി പരാതി. കഴിഞ്ഞ ദിവസം കരിമണ്ണൂർ ടൗണിലെ വ്യാപാരസ്ഥാപനത്തിന്‍റെ ഉടമയെയും ജീവനക്കാരെയും അസഭ്യം പറയുകയും സമീപത്തെ വീട്ടിൽ നിന്നും തൂന്പ എടുത്തുകൊണ്ടുവന്ന് കടയുടെ മുൻവശത്ത് ഭീകരാന്തരീക്ഷം സൃഷ്ടിക്കുകയും കടയിലുള്ളവരെ ഉപദ്രവിക്കാൻ ശ്രമിക്കുകയും ചെയ്തു. വഴിയാത്രക്കാർക്കുപോലും സഞ്ചരിക്കാൻ കഴിയാത്ത അവസ്ഥയാണ് സാമൂഹികവിരുദ്ധരിൽ നിന്നും ഉണ്ടാകുന്നത്. ഇതിന് മുന്പും ഈ കടയിൽ അക്രമം ഉണ്ടാക്കിയിട്ടുണ്ട്. കഴിഞ്ഞ രാത്രിയിൽ കുറുന്പാലമറ്റത്തുള്ള കടയിലും സമാന രീതിയിലുള്ള സംഭവമുണ്ടായി. കടയിൽ സാധനം വാങ്ങാനെന്ന വ്യാജേനയെത്തിയ ഏതാനും യുവാക്കൾ കടയുടമയുടെ ഭാഗത്തുനിന്ന് യാതൊരു പ്രകോപനവുമില്ലാതെ അദ്ദേഹത്തെ അസഭ്യം പറയുകയും കടയിലുണ്ടായിരുന്ന സാധനങ്ങൾ നശിപ്പിക്കുകയും ചെയ്തു. ഇത്തരത്തിൽ തുടരെയുണ്ടാകുന്ന സാമൂഹ്യദ്രോഹികളുടെ ആക്രമണങ്ങൾ കടയുടെ പ്രവർത്തനങ്ങളെ സാരമായി ബാധിക്കുകയാണെന്ന് വ്യാപാരികൾ പറയുന്നു. ഇത്തരം പ്രവർത്തനങ്ങളെ നിയന്ത്രിക്കാനും കുറ്റക്കാരുടെമേൽ ശക്തമായ നിയമ നടപടികൾ സ്വീകരിച്ച് നിയമത്തിനു മുന്പിൽ കൊണ്ടുവരാനും പോലീസ് അധികൃതർ നടപടി സ്വീകരിക്കണമെന്ന് കരിമണ്ണൂർ മർച്ചന്‍റ്സ് അസോസിയേഷൻ ആവശ്യപ്പെട്ടു.

കണ്ണംപടിയിൽ ആദിവാസിക്കോളനിയിൽ നീറ്റ് റാങ്ക്

ഉപ്പുതറ: നീറ്റ് പരീക്ഷയിൽ 416 മാർക്ക് നേടി കണ്ണംപടി ആദിവാസി കോളനിയിൽ റാങ്ക് തിളക്കം. കണ്ണംപടി കിഴുകാനം പുത്തൻപുരയ്ക്കൽ പി.കെ. ലിയോ ആണ് അഭിമാന നേട്ടം കൈവരിച്ചത്. കണ്ണംപടി ആദിവാസിക്കുടിയിൽനിന്നും ഡോക്ടറാകാനൊരുങ്ങുന്ന ആദ്യത്തെ പുരുഷ വിദ്യാർഥിയാണ് ലിയോ. ഓൾ ഇന്ത്യാതലത്തിൽ യോഗ്യത നേടിയ 15,000 വിദ്യാർഥികളിൽ 2441 -ാം റാങ്കാണ് ലിയോയിക്ക്. ഇവിടെനിന്ന് രണ്ടുപേർ മെഡിസിൽ ബിരുദം നേടിയിട്ടുണ്ടെങ്കിലും ഇരുവരും പെണ്‍കുട്ടികളാണ്. കണ്ണംപടി കിഴുകാനം പുത്തൻപുരയ്ക്കൽ പി.കെ. കുമാരന്‍റെയും സിജിമോളുടെയും മൂന്നു മക്കളിൽ മൂന്നാമത്തെ മകനാണ് ലിയോ. പിതാവ് കൃഷിക്കാരനും പ്രേഷിത പ്രവർത്തകനുമാണ്. ആദിവാസി പിന്നാക്ക സമുദായങ്ങൾക്കിടയിൽ സേവനം ചെയ്യുകയാണ് ലിയോയുടെ സ്വപ്നം. മാട്ടുതാവളം സെന്‍റ് സെബാൻ സ്കൂൾ, മേരികുളം മരിയൻ സ്കൂൾ, ജവഹർ നവോദയ വിദ്യാലയം എന്നിവിടങ്ങളിലായിരുന്നു പഠനം. പട്ടികവർഗ വകുപ്പിന്‍റെ സ്കോളർഷിപ്പോടെ എറണാകുളത്തുള്ള സ്വകാര്യ സ്ഥാപനത്തിലാണ് നീറ്റ് പരിശീലനം. മൂത്ത സഹോദരൻ ഫ്രെഡി സിഎ വിദ്യാർഥിയാണ്. രണ്ടാമത്തെ സഹോദരൻ ടൈറ്റസ് ചരിത്രവിഭാഗം ബിരുദാനന്തര ബിരുദ വിദ്യാർഥിയുമാണ്.

എസ്ഐയെ ഇടിച്ചുവീഴ്ത്തിയ കാർ തൊടുപുഴയിൽ കണ്ടെത്തി

തൊടുപുഴ: പോലീസിന്‍റെ വാഹന പരിശോധനയ്ക്കിടെ എസ്ഐയെ വാഹനമിടിപ്പിച്ച് അപായപ്പെടുത്താൻ ശ്രമിച്ച കേസിൽ രണ്ടു പേർ പോലീസ് കസ്റ്റഡിയിൽ. പോലീസ് ഉദ്യോഗസ്ഥനെ ഇടിച്ചശേഷം നിർത്താതെപോയ കാർ ഉപേക്ഷിച്ച നിലയിൽ കണ്ടെത്തി. തൊടുപുഴ - വെങ്ങല്ലൂർ - ആരവല്ലിക്കാവ് റോഡിലാണ് ഇന്നലെ ഉച്ചയോടെ ഉപേക്ഷിച്ച നിലയിൽ കാർ കണ്ടെത്തിയത്. വിവരമറിഞ്ഞ് കല്ലൂർക്കാട് സ്റ്റേഷനിൽനിന്ന് പോലീസ് സ്ഥലത്തെത്തി. തുടർന്ന് ഫോറൻസിക് സംഘം വാഹനത്തിൽ വിശദമായ ശാസ്ത്രീയ പരിശോധന നടത്തി. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം. മുഹമ്മദിനെയാണ് ശനിയാഴ്ച വൈകുന്നേരം നാലോടെ കല്ലൂർക്കാട് വഴിയാഞ്ചിറ ഭാഗത്തുവച്ച് അപായപ്പെടുത്താൻ ശ്രമിച്ചത്. സാരമായി പരിക്കേറ്റ എസ്ഐയെ തൊടുപുഴയിലെ സ്വകാര്യ ആശുപത്രിയിൽ അടിയന്തര ശസ്ത്രക്രിയയ്ക്ക് വിധേയനാക്കിയിരുന്നു. കാറിലുണ്ടായിരുന്നവരുടെ സുഹൃത്തുക്കളായ ഈരാറ്റുപേട്ട സ്വദേശികളായ ഷാഹിദ്, റഫ്സൽ എന്നിവരെയാണ് പോലീസ് കസ്റ്റഡിയിലെടുത്തത്. എസ്ഐയെ ഇടിച്ചുവീഴ്ത്തിയ കാർ ഓടിച്ചിരുന്നത് ഇടുക്കി മണിയാറൻകുടി സ്വദേശി മുഹമ്മദ് ഷെരീഫും ഒപ്പമുണ്ടായിരുന്നത് ആസിഫ് നിസാർ എന്ന ആളുമാണെന്ന് പോലീസ് പറഞ്ഞു. ഇവരെ മറ്റു വാഹനത്തിൽ കയറ്റി സംഭവസ്ഥലത്തുനിന്നു മാറ്റുന്നതിന് സഹായം നൽകിയത് കസ്റ്റഡിയിലുള്ളവരാണെന്ന് കല്ലൂർക്കാട് പോലീസ് അറിയിച്ചു. കെഎൽ 63 ഡി 7933 നന്പറിലുള്ള സാൻട്രോ കാറാണ് പോലീസ് കസ്റ്റഡിയിലെടുത്തത്. പഴക്കമുള്ള വാഹനത്തിന്‍റെ മുന്നിലും പിന്നിലും വിവിധയിടങ്ങളിൽ തട്ടിയതും ഉരഞ്ഞതുമായ പാടുകൾ കണ്ടെത്തിയിട്ടുണ്ട്. ഇത് എപ്പോൾ സംഭവിച്ചതാണെന്ന കാര്യങ്ങളിൽ പ്രതികളെ പിടികൂടി ചോദ്യം ചെയ്താൽ മാത്രമേ വ്യക്തമാകൂവെന്ന് പോലീസ് പറഞ്ഞു. പരിശോധനകൾ പൂർത്തിയാക്കിയശേഷം വാഹനം പോലീസ് സ്റ്റേഷനിലേക്ക് മാറ്റി. പ്രതികളെ പിടികൂടാനായി മൂവാറ്റുപുഴ ഡിവൈഎസ്പിയുടെ നേതൃത്വത്തിലുള്ള പ്രത്യേക സംഘം അന്വേഷണം ഊർജിതമാക്കിയതായി പോലീസ് പറഞ്ഞു.

സാഹിത്യകാരന്മാർക്ക് രാഷ്‌ട്രീയം വേണം: ബെന്യമിൻ

അണക്കര: എഴുത്തുകാർക്കും സാഹിത്യകാരന്മാർക്കും രാഷ്‌‌ട്രീയം വേണമെന്ന് പ്രശസ്ത എഴുത്തുകാരൻ ബെന്യമിൻ. അണക്കര എസ്എൻ ഓഡിറ്റോറിയത്തിൽ വിവിധ സാംസ്കാരിക സംഘടനകൾ ചേർന്ന് സംഘടിപ്പിച്ച ജില്ലയിലെ സർഗാത്മക പ്രതിഭകളെ ആദരിക്കുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. എഴുത്തുകാർ രാഷ്‌ട്രീയം പറയണമോ വേണ്ടയോ എന്ന ചർച്ച സജീവമായ കാലഘട്ടത്തിൽ അരാഷ്‌ട്രീയ സമീപനം അനുചിതമല്ലെന്ന് ബെന്യമിൻ പറഞ്ഞു. അരാഷ്‌ട്രീയ നിലപാടുകളുടെ ഉത്പന്നമാണ് അമേരിക്കൻ പ്രസിഡന്‍റ് ഡോണൾഡ് ട്രംപ്. വലിയ ധനികൻ പ്രസിഡന്‍റായാൽ രക്ഷപ്പെടുമെന്ന അമേരിക്കൻ ജനതയുടെ അരാഷ്‌ട്രീയ മനോഭാവം ആപത്തായതായി ബെന്യമിൻ പറഞ്ഞു. കഥകളും നോവലുകളും മാനവികതയും സംസ്കാരവും വളർത്തും. ഗുഹാജീവികളായിരുന്ന മനുഷ്യനെ മാനവികതയിലേക്ക് ഉയർത്തിയത് കഥകളും സാഹിത്യ സൃഷ്ടികളുമാണ്. മനുഷ്യന്‍റെ ഉള്ളിൽ നീതിബോധം സൃഷ്ടിക്കുവാൻ കഥകൾക്കും നോവലുകൾക്കും കഴിഞ്ഞിട്ടുണ്ട്. പൗരാണിക കഥകളാണ് പലപ്പോഴും സംസ്കൃതികളായിട്ടുള്ളത്. വൈഞ്ജാനിക വായനകൾക്ക് ആധുനിക കാലഘട്ടത്തിൽ പ്രസക്തിയില്ല. പരീക്ഷകൾക്കു മാർക്കുവാങ്ങാനുള്ള ഉപാധിമാത്രമാണ് വൈജ്ഞാനിക വായനകൾ - ബെന്യമിൻ പറഞ്ഞു. സാഹിത്യകാരൻ ജിജി കെ. ഫിലിപ്പ് അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ, ജില്ലാ വികസനസമിതി ഉപാധ്യക്ഷൻ സി.വി. വർഗീസ്, ദ്രോണാചാര്യ തോമസ് മാഷ്, മാധ്യമ പ്രവർത്തകൻ ഹർഷൻ, ബാബു സുരഭി, മെറീന ജോണ്‍, ജോസ് വെട്ടിക്കുഴ തുടങ്ങിയവർ പ്രസംഗിച്ചു.

ഡോ. ആന്‍റണി കല്ലമ്പള്ളിക്ക് ലൈഫ് ടൈം അച്ചീവ്മെന്‍റ് അവാർഡ്

പെരുവന്താനം: സെന്‍റ് ആന്‍റണീസ് കോളജ് പ്രിൻസിപ്പൽ ഡോ. ആന്‍റണി കല്ലമ്പള്ളിക്ക് ലൈഫ് ടൈം അച്ചീവ്മെന്‍റ് അവാർഡ് ഫോർ എഡ്യുക്കേഷണൽ എക്സലൻസ് സമ്മാനിച്ചു. കോട്ടയം മാമ്മൻ മാപ്പിള ഹാളിൽ നടന്ന സമ്മേളനത്തിൻ ഗോവ ഗവർണർ പി.എസ്. ശ്രീധരൻപിള്ള അവാർഡ് നൽകി. എഴുത്തുകാരനും മോട്ടിവേഷണൻ സ്പീക്കറും എംജി യൂണിവേഴ്സിറ്റിയുടെയും ഭാരതിയാർ യൂണിവേഴ്സിറ്റിയുടെയും റിസർച്ച് ഗൈഡും കോളമിസ്റ്റും ട്രെയിനറും പതിനാല് പുസ്തകങ്ങളുടെ രചയിതാവുമായ ഡോ. ആന്‍റണി കല്ലമ്പള്ളി നിരവധി സാമൂഹിക, സാംസ്കാരിക, സഹകരണ മേഖലയിലും അതുല്യ സംഭാവനകൾ നൽകി പ്രവർത്തിച്ചുവരുന്നു. ഈ വർഷം കേരള സർക്കാരിന്‍റെ ലഹരിവിരുദ്ധ പ്രവൃത്തനങ്ങൾക്ക് പിന്തുണ നൽകി നൂറിലേറെ സ്കൂളുകൾ സന്ദർശിച്ച് അവബോധ ക്ലാസുകൾ സംഘടിപ്പിച്ചു. 81 സൺഡേ സ്കൂളുകൾ സന്ദർശിച്ച് ലഹരിവിരുദ്ധ പ്രവർത്തനങ്ങൾക്ക് നേതൃത്വം നൽകി. കൂടാതെ 101 സ്കൂളുകൾ സന്ദർശിച്ച് പരീക്ഷാഭയം മാറ്റുന്നതിന് ഉൾപ്പെടെ നൽകിയ സമഗ്ര സംഭാവനകൾ പരിഗണിച്ചാണ് അവാർഡ് സമ്മാനിച്ചത്. പെരുവന്താനം സെന്‍റ് ആന്‍റണീസ് കോളജ് വിദ്യാഥികൾക്ക് 2021 മുതൽ തുടർച്ചയായി റാങ്ക് നേട്ടങ്ങൾ കൈവരിക്കുന്നതിനു പുലർത്തുന്ന വ്യത്യസ്തങ്ങളായ സമീപനങ്ങൾ ഏറെ ശ്രദ്ധേയമാണ്.

സീതയുടെ മരണത്തിലെ ദുരൂഹത: പോലീസ്, ഫോറൻസിക് സംഘങ്ങൾ വനത്തിനുള്ളിൽ പരിശോധന നടത്തി

പീരുമേട്: വനവിഭവങ്ങൾ ശേഖരിക്കാൻ പോയ ആദിവാസി സ്ത്രീ സീത (42)യുടെ മരണവുമായി ബന്ധപ്പെട്ട് പോലീസും ഫോറൻസിക് വിഭാഗവും വനത്തിനുള്ളിൽ പരിശോധന നടത്തി. പ്ലാക്കതടത്തിൽനിന്നു മൂന്ന് കിലോമീറ്റർ ഉൾവനത്തിൽ എത്തിയാണ് പോലീസും ഫോറൻസിക് സംഘവും പരിശോധന നടത്തിയത്. ആനയുടെ ആക്രമണത്തിലാണ് സീത മരിച്ചതെന്നു ഭർത്താവ് പറയുന്പോൾ കൊലപാതകമാണെന്നാണ് മൃതദേഹം പോസ്റ്റുമോർട്ടം നടത്തിയ പീരുമേട് താലൂക്ക് ആശുപത്രിയിലെ ഡോക്ടറുടെ നിഗമനം. ഇതോടെ വിവാദമായ വിഷയത്തിലാണ് ഇപ്പോൾ പോലീസ്, ഫോറൻസിക് സംഘങ്ങൾ പരിശോധന നടത്തുന്നത്. സംഭവം നടന്ന വനത്തിനുള്ളിലെ മീൻമുട്ടി അരുവിക്ക് സമീപത്തുനിന്നും ഫോറൻസിക് സംഘം ശാസ്ത്രീയ തെളിവുകൾ ശേഖരിച്ചിട്ടുണ്ട്. തന്നെ കള്ളക്കേസിൽ കുടുക്കാൻ വനംവകുപ്പ് ശ്രമിക്കുന്നതായി സീതയുടെ ഭർത്താവ് ബിനു ആരോപിക്കുന്നു. സംഭവത്തിൽ ദുരൂഹത നിലനിൽക്കുന്നതിനാൽ ബിനുവിന്‍റെയും സീതയുടെയും ഒപ്പം കാട്ടിലുണ്ടായിരുന്ന ഇവരുടെ 13-ഉം 14-ഉം വയസുള്ള മക്കളിൽനിന്ന് പോലീസ് വീണ്ടും മൊഴിയെടുക്കും. ബിനു ഇപ്പോഴും പോലീസ് നിരീക്ഷണത്തിലാണ്.

ദീപിക-സീക് അവാർഡ് ദാനം- ആദരവ് ഇന്ന്

കട്ടപ്പന: ദീപിക - സീക് അക്കാദമിക് എക്സലൻസ് അവാർഡ് - ആദരവ് - 2025 ഇന്ന്. രാവിലെ 9.30ന് കട്ടപ്പന സെന്‍റ് ജോർജ് ഫൊറോന പള്ളി ഓഡിറ്റോറിയത്തിൽ ഇടുക്കി എഡിഎം ഷൈജു പി. ജേക്കബ് ഉദ്ഘാടനം ചെയ്യും. ഇടുക്കി രൂപത മുഖ്യ വികാരി ജനറാൾ മോണ്‍. ജോസ് കരിവേലിക്കൽ അധ്യക്ഷത വഹിക്കും. കട്ടപ്പന നഗരസഭാധ്യക്ഷ ബീന ടോമി, കട്ടപ്പന സെന്‍റ് ജോർജ് ഫൊറോന വികാരി ഫാ. ജോസ് മംഗലത്തിൽ, ഡിഎഫ്സി ഇടുക്കി രൂപത ഡയറക്ടർ ഫാ. ജോസഫ് കൊല്ലക്കൊന്പിൽ, ഇടുക്കി രൂപത ഡിഎഫ്സി പ്രസിഡന്‍റ് വി.ടി. തോമസ് എന്നിവർ പ്രസംഗിക്കും. സീക് ലിമിറ്റഡ് കരിയർ കണ്‍സൾട്ടന്‍റ് ബിനു ജോസഫ് ക്ലാസെടുക്കും. എസ്എസ്എൽസി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ വിദ്യാർഥികൾ, പ്ലസ് ടു സയൻസ് വിഷയങ്ങളിൽ 80 ശതമാനത്തിനു മുകളിൽ മാർക്ക് നേടിയ വിദ്യാർഥികൾ, സയൻസ് അധ്യാപകർ, എസ്എസ്എൽസി, പ്ലസ് ടു പരീക്ഷകളിൽ 100 ശതമാനം വിജയം നേടിയ സ്കൂളുകൾ എന്നിവരെ ആദരിക്കും.

അങ്കണവാടി കുട്ടികളോട് പഞ്ചായത്തിന് അവഗണന

മൂലമറ്റം: പന്നിമറ്റം കുറുവാക്കയം അങ്കണവാടി പ്രവർത്തിക്കുന്നത് കാടും പടലും വളർന്ന് സുരക്ഷിതമല്ലാത്ത കെട്ടിടത്തിൽ. പിഞ്ചുകുട്ടികളെ പഠിപ്പിക്കുന്നത് അപകടകരമായ സാഹചര്യത്തിലായതിനാൽ രക്ഷിതാക്കളും ആശങ്കയിലാണ്. രണ്ടു വർഷം മുന്പാണ് കുറുവാക്കയം അങ്കണവാടി കെട്ടിടത്തിന് ബലക്ഷയമുണ്ടെന്നു കണ്ടെത്തുന്നത്. ഇതേത്തുടർന്ന് കുട്ടികളെ സമീപത്തെ മിനി വ്യവസായ കേന്ദ്രത്തിന്‍റെ കെട്ടിടത്തിലേയ്ക്ക് മാറ്റിയാണ് അങ്കണവാടിയുടെ പ്രവർത്തനം തുടർന്നത്. ഇതിനിടെ അങ്കണവാടിക്ക് പുതിയ കെട്ടിടം നിർമിക്കാൻ സ്വകാര്യ വ്യക്തി 10 സെന്‍റ് സ്ഥലം വാങ്ങി നൽകി. എന്നാൽ പിഞ്ചുകുട്ടികൾ പഠിക്കുന്ന കുറുവാക്കയം അങ്കണവാടിക്ക് സ്വന്തമായി കെട്ടിടം നിർമിക്കാൻ വെള്ളിയാമറ്റം പഞ്ചായത്ത് അധികൃതർ തയാറായിട്ടില്ല. സാമൂഹ്യക്ഷേമ വകുപ്പിന്‍റെ ഓഫീസായും തെരഞ്ഞെടുപ്പ് കാലത്ത് പോളിംഗ് ബൂത്തായും ബലക്ഷയമുള്ള അങ്കണവാടി കെട്ടിടം ഉപയോഗിച്ചിരുന്നു. ഇന്ധനം ഉൾപ്പെടെ നിർമിക്കുന്ന സ്ഥാപനത്തിന് ഇളംദേശം ബ്ലോക്ക് പഞ്ചായത്ത് ലീസിന് നൽകിയിരിക്കുന്ന മിനി വ്യവയായ കേന്ദ്രത്തിലെ ഒരു ഭാഗത്താണ് നിലവിൽ അങ്കണവാടി പ്രവർത്തിക്കുന്നത്. കുടുംബശ്രീ മിഷന്‍റെ ബാംബൂ പ്രോഡക്റ്റ് യൂണിറ്റും അങ്കണവാടിയോടു ചേർന്ന് പ്രവർത്തിക്കുന്നുണ്ട്. ഒന്നര ഏക്കറോളം വരുന്ന ഈ വ്യവസായ കേന്ദ്രത്തിന്‍റെ കൂടുതൽ സ്ഥലവും കാടുപിടിച്ച് കിടക്കുകയാണ്. ഇഴജന്തുക്കളുടെ ശല്യവുമുണ്ട്. വിവിധ ഉത്പന്ന നിർമാണത്തിനായി അസംസ്കൃത വസ്തുക്കൾ സൂക്ഷിക്കുന്നുമുണ്ട്. ഇത്തരം സാഹചര്യങ്ങളായതിനാൽ കുട്ടികളെ അങ്കണവാടിയിൽ അയയ്ക്കാൻ മാതാപിതാക്കൾക്കു ഭയമാണ്. പ്രശ്നത്തിൽ ബാലാവകാശ കമ്മീഷനും സർക്കാരും ഇടപെടണമെന്നും അടിയന്തരമായി പഞ്ചായത്ത് അങ്കണവാടിക്കായി കെട്ടിടം നിർമിച്ചു നൽകണമെന്നും കർഷകസംഘം ഇളംദേശം മേഖലാ കമ്മിറ്റി ആവശ്യപ്പെട്ടു.

ലൈഫ് മിഷൻ ഫ്ലാറ്റ്: അടി മുടി തകരാർ

തൊടുപുഴ: കരിമണ്ണൂർ പഞ്ചായത്തിൽ വേനപ്പാറ ലൈഫ് മിഷൻ ഫ്ളാറ്റ് സമുച്ചയത്തിന്‍റെ ചോർച്ചയ്ക്ക് താത്കാലിക പരിഹാരമായെങ്കിലും മറ്റ് അറ്റകുറ്റപ്പണികൾ വൈകുന്നു. ഫ്ളാറ്റിന്‍റെ ചോർച്ചയുള്ള ഭാഗത്ത് റൂഫിംഗ് നടത്തിയാണ് താത്കാലികമായി പ്രശ്നം പരിഹരിച്ചത്. എന്നാൽ കെട്ടിടത്തിൽ സീലിംഗ് ചെയ്തിരിക്കുന്ന ഭാഗത്തെ ജിപ്സം അടർന്ന് വീഴുന്നതിനു പരിഹാരമായിട്ടില്ല. ഇതിനും ശാശ്വത പരിഹാരം കാണുമെന്ന് ലൈഫ് മിഷൻ അധികൃതർ പഞ്ചായത്തിന് ഉറപ്പു നൽകിയിരുന്നെങ്കിലും ഇതിനുള്ള നടപടിയായില്ല. കോടികൾ മുടക്കി നിർമിച്ച ലൈഫ് ഫ്ളാറ്റ് സമുച്ചയം ചോർച്ചയും ജീർണതയും മൂലം അന്തേവാസികൾക്ക് താമസിക്കാൻപോലും കഴിയാത്ത അവസ്ഥയിലെത്തിയതോടെ ഇതിനെതിരേ പ്രതിഷേധം ശക്തമായിരുന്നു. ഇതിനിടെ ഫ്ളാറ്റിന്‍റെ ഭിത്തി പലയിടത്തും വെള്ളം വീണ് പൊളിഞ്ഞു തുടങ്ങിയിട്ടുണ്ട്. കരിമണ്ണൂർ പഞ്ചായത്ത് പന്ത്രണ്ടാം വാർഡിൽ വേനപ്പാറയിലാണ് ലൈഫ് മിഷൻ ഫ്‌ളാറ്റ് സമുച്ചയം നിർമിച്ചിരിക്കുന്നത്. ലൈറ്റ് ഗേജ് സ്റ്റീൽ ഫ്രെയിം ടെക്നോളജി ഉപയോഗിച്ച് സിമന്‍റും ഇഷ്ടികയും ഇല്ലാതെ ഗുജാത്ത് മാതൃകയിൽ കേരളത്തിൽ ആദ്യം പൂർത്തീകരിച്ച ഭവന സമുച്ചയമാണിത്. ആറു കോടി ചെലവഴിച്ച് 42 കുടുംബങ്ങൾക്കായി നിർമിച്ച ഈ സമുച്ചയത്തിൽ നിലവിൽ 36 കുടുംബങ്ങളാണുള്ളത്. രണ്ട് കിടപ്പുമുറികളും ഹാളും അടുക്കളയും, ബാൽക്കണിയും ശൗചാലയവും അടങ്ങുന്ന 420 ചതുരശ്ര അടി വിസ്തീർണമുള്ളതാണ് ഓരോ വീടും. ഫ്ളാറ്റ് നിർമാണം പൂർത്തിയായി രണ്ടു വർഷം മുന്പാണ് താമസത്തിനായി തുറന്നു കൊടുത്തത്. ഇതിനിടെ ഫ്ളാറ്റിന് ചോർച്ച ഉൾപ്പെടെ തകരാറുകൾ കണ്ടെത്തിയത് പ്രതിഷേധത്തിനിടയാക്കുകയായിരുന്നു. താമസക്കാരുള്ള പല ഭാഗത്തും കെട്ടിടം ചോർന്ന നിലയിലാണ്. ഓരോ ദിവസവും കെട്ടിടത്തിൽ സീൽ ചെയ്തിരിക്കുന്ന ജിപ്സം അടർന്ന് വീഴുകയും ചെയ്യുന്നുണ്ട്. മിക്ക ഫ്ളാറ്റുകളുടെ അകവും ഈർപ്പം മൂലം കുതിർന്ന് നശിക്കുകയാണ്. നാലു നിലകളുള്ള കെട്ടിടത്തിന്‍റെ ഗ്രൗണ്ട് ഫ്ളോറിലാണ് സീൽ വ്യാപകമായി അടർന്നിരിക്കുന്നത്. ഇതോടെയാണ് ഫ്ളാറ്റിലെ താമസക്കാർ ഏറെ ഭയപ്പാടിലായത്. താമസക്കാരുടെയും വിവിധ സംഘടനകളുടെയും പ്രതിഷേധത്തെത്തുടർന്ന് ലൈഫ് മിഷൻ സിഇഒ, ചീഫ് എൻജിനിയർ അടക്കമുള്ളവർ കഴിഞ്ഞ ദിവസം സ്ഥലം സന്ദർശിച്ചാണ് അടിയന്തരമായി പ്രശ്നം പരിഹരിക്കുമെന്ന് ഉറപ്പു നൽകിയത്. എന്നാൽ വെള്ളം ഉള്ളിലേക്ക് വീഴാതെ താത്കാലികമായി റൂഫിംഗ് നടത്തിയതൊഴിച്ചാൽ മറ്റു പ്രവർത്തനങ്ങളൊന്നും നടത്തിയില്ല. ഇതിനിടെ തകർന്ന ജിപ്സം സീലിംഗ് മാറ്റി സ്ഥാപിക്കാനായി എത്തിച്ച പുതിയ സീൽ ഗുണനിലവാരമില്ലാത്തതായിരുന്നു. താമസക്കാർ പ്രതിഷേധിച്ചതോടെ ഇത് മാറ്റി സ്ഥാപിക്കാതെ അധികൃതർ മടങ്ങുകയായിരുന്നു. മഴ മൂലമാണ് മറ്റ് അറ്റകുറ്റപ്പണികൾ നടത്താൻ വൈകുന്നതെന്നാണ് ലൈഫ് മിഷൻ അധികൃതർ അറിയിച്ചതെന്ന് പഞ്ചായത്ത് പ്രസിഡന്‍റ് നിഷാമോൾ ഷാജി പറഞ്ഞു. ഫ്ളാറ്റ് സമുച്ചയത്തിന്‍റെ അപാകതകൾ സംബന്ധിച്ച് മുഖ്യമന്ത്രി, തദ്ദേശ മന്ത്രി, ജില്ലാ കളക്ടർ ഉൾപ്പെടെയുള്ളവർക്ക് നിവേദനം നൽകിയിരുന്നു. നിലവിൽ ലൈഫ് മിഷൻ അധികൃതർ താത്കാലിക സംവിധാനമെന്ന നിലയ്ക്ക് റൂഫിംഗ് നടത്തുകയും മറ്റു ജോലികൾ മഴ മാറി നിൽക്കുന്ന മുറയ്ക്ക് ചെയ്യാമെന്ന് ഉറപ്പു നൽകിയിട്ടുണ്ടെന്നും പഞ്ചായത്ത് പ്രസിഡന്‍റ് പറഞ്ഞു. തീരാ ദുരിതം, പരിഹാരം അകലെ ഫ്ളാറ്റിലേക്ക് പാചകത്തിനും മറ്റുമുള്ള ശുദ്ധജലം സമീപത്തെ വീടുകളിൽനിന്നാണ് എടുക്കുന്നത്. ശുദ്ധജലത്തിനായി കുഴൽക്കിണർ നിർമിച്ചിട്ടുണ്ടെങ്കിലും ഇത് കുടിക്കാനും മറ്റും സാധിക്കില്ല. ഈ വെള്ളം ഉപയോഗിച്ച് പാചകം ചെയ്ത് ഭക്ഷണം കഴിച്ചാൽ ശാരീരിക അസ്വസ്ഥതകൾ ഉണ്ടാകുമെന്നാണ് താമസക്കാർ പറയുന്നത്. തുണിയലക്കാനും പാത്രങ്ങൾ കഴുകാനും കുളത്തിലെ വെള്ളമാണെടുക്കുന്നത്. എന്നാൽ ഇതിനും ദുർഗന്ധമാണെന്ന് ഇവർ പറയുന്നു. കുളം നവീകരിക്കാൻ 10 ലക്ഷം അനുവദിക്കുമെന്ന് ഉദ്ഘാടനത്തോടനുബന്ധിച്ച് മന്ത്രി റോഷി അഗസ്റ്റിൻ പ്രഖ്യാപിച്ചെങ്കിലും പണം ലഭിച്ചില്ലെന്നും ഇവർ പറയുന്നു. ഫ്ളാറ്റിന്‍റെ അതിരിൽ നിൽക്കുന്ന മരങ്ങൾ ചാഞ്ഞു നിൽക്കുന്നതും അപകടാവസ്ഥ സൃഷ്ടിക്കുന്നുണ്ട്. ഏത് നിമിഷവും ഇവ ഓടിഞ്ഞ് കെട്ടിട സമുച്ചയത്തിലേക്ക് വീഴാവുന്ന സ്ഥിതിയാണ്. പല തവണ ആവശ്യപ്പെട്ടിട്ടും ഇക്കാര്യത്തിൽ നടപടിയില്ല. മരം ഉടൻ വെട്ടിമാറ്റുമെന്ന് പ്രസിഡന്‍റ് അറിയിച്ചു. ഫ്ളാറ്റിലെ ആവശ്യത്തിനായി ജനറേറ്റർ സ്ഥാപിച്ചിട്ടുണ്ടെങ്കിലും ഉദ്ഘാടന ദിവസം മുതൽ ഇത് നിശ്ചലാവസ്ഥയിലാണ്.

വന്യജീവി ആക്രമണത്തിനു തടയിടാൻ വിത്തുണ്ടകൾ എറിയും

മറയൂർ: വന്യമൃഗങ്ങൾ നാട്ടിലിറങ്ങി ആക്രമണം നടത്തുന്നതിനു തടയിടാൻ വിത്തുണ്ട പരീക്ഷണം. മൂന്നാർ വന്യജീവി ഡിവിഷന്‍റെ കീഴിലുള്ള മൂന്ന് സംരക്ഷിത മേഖലകളിൽ ഇന്നുമുതൽ വിത്തുണ്ടയേറ് നടത്തും. കാടിനുള്ളിൽ സസ്യഭുക്കുകൾക്ക് ഭക്ഷ്യയോഗ്യമായ പുല്ലു വർഗങ്ങളും വൃക്ഷങ്ങളും മറ്റും വ്യാപകമായി നട്ടു വളർത്തുന്നിന്‍റെ ഭാഗമായാണ് വിത്തുണ്ടയെറിയുന്നത്. വട്ടവട ഊർക്കാട് കെ.ഇ. ഹൈസ്‌കൂളിലെയും കടലാർ ഗവ. യുപി സ്‌കൂളിലെയും വിദ്യാർഥികളുടെ സഹകരണത്തോടെ 50,000 വിത്തുണ്ടകളാണ് തയാറാക്കിയിരിക്കുന്നത്. മൂന്നാർ വന്യജീവി ഡിവിഷനിൽ ഷോല നാഷണൽ പാർക്ക്, ഇരവികുളം നാഷണൽ പാർക്ക്, ചിന്നാർ വന്യജീവി സങ്കേതം എന്നീ മൂന്ന് റേഞ്ചുകളിലും വിത്തുണ്ടയേറിന്‍റെ ഭാഗമായി വിപുലമായ പരിപാടികളാണ് തയാറാക്കിയിട്ടുള്ളത്. കഴിഞ്ഞ ഒരു മാസമായി തയാറാക്കിക്കൊണ്ടിരിക്കുന്ന വിത്തുണ്ടകൾ ഇന്നുമുതൽ തെരഞ്ഞെടുക്കപ്പെട്ട വനമേഖലകളിൽ തദ്ദേശ സ്വയംഭരണ സ്ഥാപനങ്ങളുടെയും വിദ്യാഭ്യാസ സ്ഥാപനങ്ങളുടെയും സന്നദ്ധ സംഘടനകളുടെയും ഇക്കോ ഡെവലപ്മെന്‍റ് കമ്മിറ്റികളുടെയും മറ്റു പൊതുജനങ്ങളുടെയും സഹായത്തോടെ നിക്ഷേപിക്കും. ചലച്ചിത്ര പിന്നണി ഗായകൻ ജി. വേണുഗോപാൽ പരിപാടിയുടെ ഉദ്ഘാടനം നിർവഹിക്കും. പാമ്പാടുംഷോല നാഷണൽ പാർക്കിൽ വനം വകുപ്പ് ഉദ്യോഗസ്ഥരുടെയും ഇക്കോ ഡെവലപ്മെന്‍റ് കമ്മിറ്റികളുടെയും ആഭിമുഖ്യത്തിൽ നടക്കുന്ന പരിപാടി ഇന്നു രാവിലെ ഉദ്ഘാടനം ചെയ്യും. ക്രിസോഫോഗൻ, പെന്നിസെറ്റം, അഗ്രോസ്റ്റിസ് തുടങ്ങിയ വനത്തിനുള്ളിൽനിന്നുതന്നെ ശേഖരിച്ച തെരഞ്ഞെടുക്കപ്പെട്ട പുല്ലു വർഗങ്ങളുടെ വിത്തുകളാണ് വിത്തുണ്ടകളായി കാട്ടിൽ നിക്ഷേപിക്കുന്നത്. വന്യജീവി ആക്രമണം രൂക്ഷമായ മറയൂർ, കാന്തല്ലൂർ മേഖലകളോടു ചേർന്നുള്ള ചിന്നാർ വന്യജീവി സങ്കേതത്തിൽ വന്യജീവി സംഘർഷം കുറയ്ക്കുന്നതിനായി ഈറ്റ മുള വർഗത്തിലുള്ള ചെടികളുടെ വിത്തുകളാണ് ശേഖരിച്ച് പരിപാലിച്ച് വിത്തുണ്ടകളാക്കി വിതരണം ചെയ്യുന്നത്. മൂന്നാർ വൈൽഡ് ലൈഫ് വാർഡൻ കെ.വി. ഹരികൃഷ്ണന്‍റെ നേതൃത്വത്തിൽ അസി. വൈൽഡ് ലൈഫ് വാർഡൻമാരായ നിഥിൻ ലാൽ, കെ.കെ. അനന്തപത്മനാഭൻ, രാജശേഖരൻ എന്നിവർ ഓരോ മേഖലകളിലായി പദ്ധതി നടപ്പാക്കും.

കാലവർഷത്തിൽ പശുപ്പാറയിൽ വീട് തകർന്നു

ഉപ്പുതറ: ശക്തമായ മഴയിൽ ഉപ്പുതറ പഞ്ചായത്ത് പശുപ്പാറ ലക്ഷം വീട് കോളനിക്ക് സമീപം വീട് തകർന്നു. റിച്ചു ഹൗസിൽ കെ.സി. വിജയന്‍റെ വീടാണ് തകർന്ന് വാസയോഗ്യമല്ലാതായത്. ഇന്നലെ ഉച്ചകഴിഞ്ഞുള്ള മഴയിലാണ് വീടിന്‍റെ ഫൗണ്ടേഷൻ അടക്കം ഒരു ഭാഗം തകർന്നുവീണത്. ഈ സമയം വിജയന്‍റെ ഭാര്യ സുഗതമ്മയും ഏക മകൾ ഭവ്യയും മാത്രമായിരുന്നു വീട്ടിലുണ്ടായിരുന്നത്. മഴയത്ത് വലിയ ശബ്ദം കേട്ടതോടെ പുറത്തേക്ക് ഇവർ ഇറങ്ങി ഓടി. മഴ കഴിഞ്ഞ് വന്നുനോക്കിയപ്പോഴാണ് വീടിന്‍റെ ഒരു ഭാഗം പൂർണമായും തകർന്നതായി കണ്ടത്. ഇവർക്ക് ഏഴ് സെന്‍റ് ഭൂമിയും വീടും മാത്രമാണുണ്ടായിരുന്നത്. മാറി താമസിക്കാൻ മറ്റൊരിടം ഇല്ലാത്തതിനാൽ നിലം പൊത്താറായ വീട്ടിലാണ് ഇവർ താമസിക്കുന്നത്. വീടിന്‍റെ ദുരവസ്ഥ മനസിലാക്കി മുൻ ഉപ്പുതറ പഞ്ചായത്ത് ഭരണ സമിതി ലൈഫ് ഭവന പദ്ധതിയിൽ ഉൾപ്പെടുത്തിയിരുന്നു. എന്നാൽ, ചില പരാതിയുടെ അടിസ്ഥാനത്തിൽ ഗ്രാമസഭയുടെ ലിസ്റ്റിൽ ഉൾപ്പെട്ടില്ല.

അടിമാലി ഇരുമ്പുപാലത്ത് വിനോദസഞ്ചാരിക്ക് തെരുവ് നായയുടെ കടിയേറ്റു

അടിമാലി: അടിമാലി ഇരുമ്പുപാലത്ത് വിനോദസഞ്ചാരിക്ക് തെരുവ് നായയുടെ കടിയേറ്റു. ഏതാനും ദിവസങ്ങള്‍ക്കുമുമ്പ് മൂന്നാറില്‍ ഉണ്ടായ തെരുവ് നായ ആക്രമണത്തിന് പിന്നാലെയാണ് അടിമാലി ഇരുമ്പുപാലത്തും വിനോദ സഞ്ചാരിക്ക് തെരുവ് നായയുടെ കടിയേറ്റത്. ഇരുമ്പുപാലത്ത് വഴിയോരത്ത് കടയില്‍ ചായ കുടിച്ചുകൊണ്ടുനില്‍ക്കവേ ഈ ഭാഗത്തുണ്ടായിരുന്ന ഒരു നായ ആക്രമിക്കുകയായിരുന്നു. കാലടിയില്‍നിന്ന് മൂന്നാറിൽ വിനോദ സഞ്ചാരത്തിനെത്തിയ ഏഴംഗ സംഘത്തില്‍പ്പെട്ട ഒരാളെയാണ് തെരുവ് നായ ആക്രമിച്ചത്. കാലിന് പരിക്കേറ്റ ഇയാള്‍ അടിമാലി താലൂക്കാശുപത്രിയില്‍ ചികിത്സ തേടി. ഇരുമ്പുപാലം മേഖലയില്‍ തെരുവ് നായ ശല്യം രൂക്ഷമാണെന്നും പരാതിയുണ്ട്. പ്രായമായവരും സ്ത്രീകളും കുട്ടികളുമൊക്കെ നായ്ക്കളെ ഭയന്ന് യാത്ര ചെയ്യേണ്ട സ്ഥിതിയുണ്ട്. ദിവസങ്ങള്‍ക്കുമുമ്പ് മൂന്നാറില്‍ പത്തിലധികം ആളുകള്‍ക്കാണ് തെരുവ് നായയുടെ കടിയേറ്റത്. അടിമാലി ടൗണില്‍ കഴിഞ്ഞ ദിവസം തെരുവ് നായ ഒരാളെ ആക്രമിക്കാന്‍ മുതിരുകയും ആളുകള്‍ ബഹളം ഉണ്ടാക്കിയതോടെ നായ പിന്‍മാറുകയും ചെയ്തു. മാങ്കുളത്ത് കഴിഞ്ഞ ദിവസം തെരുവ് നായ ഇരുചക്രവാഹനത്തിന് കുറുകെ ചാടി വാഹനം മറിഞ്ഞ് ബൈക്ക് യാത്രികന്‍റെ മുഖത്തിന് പരിക്കേറ്റിരുന്നു.

വന്യജീവികളെ തുരത്താൻ "ആന ലൈറ്റ്'

മറയൂർ: വന്യജീവികളെ തുരത്താൻ "ആന ലൈറ്റ്'. വന്യജീവി ശല്യം രൂക്ഷമായ ജില്ലയിൽ കാന്തല്ലൂർ, മറയൂർ പഞ്ചായത്തുകളിലായി 200 ലൈറ്റുകളാണ് വിതരണത്തിനെത്തിച്ചിട്ടുള്ളത്. വന്യമൃഗ ശല്യമുള്ള മേഖലകളിലെ കർഷകർക്ക് സൗജന്യമായാണ് ലൈറ്റുകൾ വിതരണം ചെയ്യുന്നതെന്ന് കൃഷിവകുപ്പ് അധികൃതർ അറിയിച്ചു. രാത്രിയിൽ ഇടവിട്ട് നീല വെളിച്ചം പുറപ്പെടുവിക്കുന്നതാണ് ഉപകരണത്തിന്‍റെ പ്രവർത്തന രീതി. സോളാർ പാനലുകളിൽ നിന്നുള്ള വൈദ്യുതി ഉപയോഗപ്പെടുത്തിയാണ് ഉപകരണം പ്രവർത്തിക്കുന്നത്. ഉപകരണം പുറപ്പെടുവിക്കുന്ന പ്രകാശം മൃഗങ്ങളെ അലോസരപ്പെടുത്തുമെന്നും ഇതുമൂലം ഇവ ലൈറ്റ് സ്ഥാപിച്ചിട്ടുള്ള മേഖലയിൽ പ്രവേശിക്കില്ലന്നുമാണ് അധികൃതരുടെ വിലയിരുത്തൽ. പന്നിശല്യമുള്ള പ്രദേശങ്ങളിൽ ഇവയുടെ ഉയരത്തിലും ആന ശല്യമുള്ള പ്രദേശത്ത് ആനയുടെ ഉയരത്തിലും ലൈറ്റുകൾ സ്ഥാപിക്കണമെന്നാണ് കൃഷി വകുപ്പ് അധികൃതർ നിർദേശിച്ചിട്ടുള്ളത്. പരീക്ഷണം വിജയിച്ചാൽ ഇ-ലൈറ്റ് വന്യമൃഗ ശല്യമുള്ള മുഴുവൻ മേഖലകളിലും വിതരണം നടത്തുന്നതിനാണ് കൃഷിവകുപ്പ് ലക്ഷ്യമിട്ടിട്ടുള്ളത്.

ലോക മെഡിക്കൽ ആൻഡ് ഹെൽത്ത് ഗെയിംസിൽ ഇരട്ട സ്വർണവുമായി ഡോ. ആൽവിൻ ആന്‍റണി

ചെറുതോണി: സ്പെയിനിലെ ബാഴ്സിലോണയിൽ നടന്ന 44-ാമത് ലോക മെഡിക്കൽ ആൻഡ് ഹെൽത്ത് ഗെയിംസിൽ ഇന്ത്യക്കുവേണ്ടി സ്പ്രിന്‍റ് ഇനങ്ങളിൽ മത്സരിച്ച ഡോ. ആൽവിൻ ആന്‍റണി ഇരട്ട സ്വർണം നേടി. 100, 200 മീറ്റർ മത്സരത്തിലാണ് നേട്ടം. ഇടുക്കി മെഡിക്കൽ കോളജിലെ കമ്യൂണിറ്റി മെഡിസിൻ അസോസിയേറ്റ് പ്രൊഫസറും ഐഎംഎ കൊച്ചി ജോയിന്‍റ് സെക്രട്ടറിയുമാണ് ഡോ. ആൽവിൻ ആന്‍റണി. 2023ൽ വിജയവാഡയിലും 2024ൽ ഔറംഗ ബാദിലും നടന്ന ഐഎംഎ ദേശീയ കായികമേളകളിൽ 100, 200 മീറ്റർ മത്സരത്തിൽ ഡോ. ആൽവിൻ വെള്ളി മെഡൽ നേടിയിരുന്നു. 2025ൽ നടന്ന "മാക്’ ഓപ്പണ്‍ നാഷണൽ മാസ്റ്റേഴ്സ് അത് ലറ്റിക്സ് ചാന്പ്യൻ ഷിപ്പിൽ സ്വർണമെഡൽ ജേതാവായി. വേൾഡ് മെഡിക്കൽ ഗെയിംസിൽ 50 ലധികം രാജ്യങ്ങളിൽനിന്നുള്ള ആരോഗ്യപ്രവർത്തകരാണ് പങ്കെടുക്കുന്നത്. ഏഷ്യൻ ഗെയിംസ് സ്വർണമെഡൽ ജേതാവും അർജുന അവാർഡ് ജേതാവുമായ ജോസഫ് ജി. ഏബ്രഹാമിന്‍റെ കീഴിലാണ് പരിശീലനം. രാജ്യത്തെ പ്രതിനിധീകരിച്ച് സ്വർണം നേടിയതിൽ അഭിമാനമുണ്ടെന്ന് ഡോ. ആൽവിൻ ആന്‍റണി പറഞ്ഞു. തൃശൂർ ആലപ്പാട് സ്വദേശിയായ ഡോ. ആൽവിൻ എറണാകുളം തൃക്കാക്കരയിലാണ് താമസം. ഭാര്യ: ഡോ. അശ്വതി വർഗീസ്. പനന്പിള്ളി നഗറിലെ ഡിഡിആർസിയിൽ കണ്‍സൾട്ടന്‍റാണ് . ഏഴ് വയസുകാരൻ ആഷ്‌ലിനും നാല് വയസുകാരൻ അബ്രാമുമാണ് മക്കൾ.

സഹകരണ ബാങ്ക് പ്രതിഭാ സംഗമം സംഘടിപ്പിച്ചു

കട്ടപ്പന: കട്ടപ്പന സർവീസ് സഹകരണ ബാങ്ക് പ്രതിഭാ സംഗമം നടത്തി. ഇടുക്കി എഡിഎം ഷൈജു പി. ജേക്കബ് ഉദ്ഘാടനം ചെയ്തു. ബാങ്ക് പ്രസിഡന്‍റ് ജോയി വെട്ടിക്കുഴി അധ്യക്ഷത വഹിച്ചു. 70 വർഷത്തെ ചരിത്രമുള്ള കട്ടപ്പന സർവീസ് സഹകരണ ബാങ്ക് ഇടുക്കിയുടെ വിജയത്തിന്‍റെ പ്രതീകമാണെന്നും കട്ടപ്പനയിലെ ജനങ്ങളും സഹകാരികളും ചേർന്ന് കെട്ടിപ്പടുത്ത പ്രസ്ഥാനമാണിതെന്നും ഷൈജു പി. ജേക്കബ് അഭിപ്രായപ്പെട്ടു. എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയ 72 വിദ്യാർഥികളെയും പ്ലസ് ടു പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയ 62 വിദ്യാർഥികളെയും വിവിധ തലങ്ങളിൽ ഉന്നത വിജയം കരസ്ഥമാക്കിയ നാലുപേരെയും ചടങ്ങിൽ അനുമോദിച്ചു.

റീജണൽ സമ്മേളനം നടത്തി

തൊടുപുഴ: ലയണ്‍സ് ക്ലബുകളുടെ റീജണൽ സമ്മേളനം നടത്തി. ഫസ്റ്റ് വൈസ് ഡിസ്ട്രിക്ട് ഗവർണർ വി.എസ്. ജയേഷ് ഉദ്ഘാടനം ചെയ്തു. റീജണൽ ചെയർമാൻ ജെയ്സ് ജോണ്‍ അധ്യക്ഷത വഹിച്ചു. സോണ്‍ ചെയർമാൻമാരായ സൈജൻ സ്റ്റീഫൻ, ജോയ് അഗസ്റ്റിൻ, ജെയ്സണ്‍ കുര്യൻ, പ്രോജക്ട് സെക്രട്ടറി ഷിൻസ് സെബാസ്റ്റ്യൻ, സണ്ണിച്ചൻ സെബാസ്റ്റ്യൻ, റോയ് ലൂക്ക്, നോബി സുദർശൻ, വിനോദ് കണ്ണോളി എന്നിവർ പ്രസംഗിച്ചു.

അപകട ഭീഷണിയിലായ പാറ പൊട്ടിച്ചു മാറ്റണം

എഴുകുംവയൽ: നെടുംകണ്ടം ഗ്രാമപഞ്ചായത്ത് 19 -ാം വാർഡിൽപ്പെട്ട ഈട്ടിത്തോപ്പ് കുരിശുമല ഭാഗത്ത് കൂറ്റൻ പാറ അടർന്നുവീഴാറായി നിൽക്കുന്നത് നാട്ടുകാർക്ക് ഭീഷണിയായി. കൂറ്റൻപാറ ഏതാനും മരങ്ങളിൽ തട്ടിനിൽക്കുകയാണ്. പാറ താങ്ങിനിൽക്കുന്ന മരങ്ങൾ പിഴുത് വീണാൽ പാറയുടെ അടിഭാഗത്തുള്ള കാർഷിക മേഖല പൂർണമായും തകരും. മേഖലയിൽ അധിവസിക്കുന്ന കർഷകരും അപകട ഭീഷണിയിലാണ്. കൽകൂന്തൽ വില്ലേജ് അധികാരികളുടെയും നെടുങ്കണ്ടം ഗ്രാമപഞ്ചായത്ത് അധികാരികളുടെയും അടിയന്തര ശ്രദ്ധ ഉണ്ടാകണമെന്ന് നാട്ടുകൂട്ടം കൂട്ടായ്മ പ്രവർത്തകർ ആവശ്യപ്പെട്ടു.

ചെന്പകപ്പാറ സ്കൂളിൽ ദീപിക നമ്മുടെ ഭാഷ പദ്ധതിയും വാർഷികാഘോഷവും

ചെന്പകപ്പാറ: ചെന്പകപ്പാറ സെന്‍റ് പീറ്റേഴ്സ് എൽപി സ്കൂളിൽ പ്രഥമ പിടിഎ പൊതുയോഗവും വിവിധ ക്ലബ്ബുകളുടെ ഉദ്ഘാടനവും ദീപിക നമ്മുടെ ഭാഷാ പദ്ധതിയുടെ ഉദ്ഘാടനവും നടത്തി. യോഗത്തിൽ സ്കൂൾ മാനേജർ റവ. ഡോ. ജോർജ് തുന്പനിരപ്പേൽ, അസി. മാനേജർ ഫാ. തോമസ് മടിക്കിയാങ്കൽ, പിടിഎ പ്രസിഡന്‍റ് സതീഷ് ഏബ്രഹാം, സ്കൂൾ ഹെഡ്മിസ്ട്രസ് ജയ തോമസ്, പി.എം. തോമസ്, സിസ്റ്റർ ആൻഗ്രെയ്സ് എഫ്സിസി, സിസ്റ്റർ കൃപ എഫ്സിസി എന്നിവർ പ്രസംഗിച്ചു.

വേദനിക്കുന്നവരെ പരിഗണിക്കുന്നത് മഹത്തരം: മാർ റാഫേൽ തട്ടിൽ

മൂലമറ്റം: വേദനിക്കുന്നവരെ പരിഗണിക്കുന്നത് മഹത്തരമാണെന്ന് സീറോ മലബാർ സഭ മേജർ ആർച്ച് ബിഷപ് മാർ റാഫേൽ തട്ടിൽ. മൂലമറ്റം സ്നേഹവില്ലയിൽ പാലിയേറ്റീവ് കെയർ യൂണിറ്റിന്‍റെ ഉദ്ഘാടനത്തോടനുബന്ധിച്ചു നടന്ന സമ്മേളനത്തിൽ അധ്യക്ഷത വഹിച്ചു പ്രസംഗിക്കുകയായിരുന്നു അദ്ദേഹം. ബൈബിളിലെ നല്ല സമറായക്കാരനെപ്പോലെ പെരുമാറാനാണ് നാം വിളിക്കപ്പെട്ടിരിക്കുന്നത്. അതുവഴി ദൈവത്തിന്‍റെ മുഖമാണ് വെളിപ്പെടുന്നതെന്നും ഭൂമിയിൽ സ്വർഗം തീർക്കുകയാണ് ഇതിലൂടെ ചെയ്യുന്നതെന്നും മേജർ ആർച്ച് ബിഷപ് പറഞ്ഞു. മന്ത്രി റോഷി അഗസ്റ്റിൻ സമ്മേളനം ഉദ്ഘാടനം ചെയ്തു. സമാധാനവും സുരക്ഷിതത്വവും കുറഞ്ഞുവരുന്ന ഈ കാലഘട്ടത്തിൽ പാലിയേറ്റീവ് ശുശ്രൂഷ ലഭിക്കുന്നത് ഏറെ ആശ്വാസകരമാണെന്ന് അദ്ദേഹം പറഞ്ഞു. തക്കല ബിഷപ് മാർ ജോർജ് രാജേന്ദ്രൻ മുഖ്യപ്രഭാഷണം നടത്തി. ജോയി കിഴക്കേൽ വിഷയാവതരണം നടത്തി. ഗീതാ വില്ലേജിന്‍റെയും സ്നേഹവില്ലയുടെയും സ്ഥാപക മേഴ്സി ജോസ് തര്യൻ ഇലഞ്ഞിക്കൽ, വയനാട് ദുരന്ത ബാധിതർക്ക് 101 കട്ടിൽ സംഭാവന ചെയ്ത സൈമണ്‍ സെബാസ്റ്റ്യൻ ഇടക്കര എന്നിവരെ മാർ റാഫേൽ തട്ടിലും മന്ത്രി റോഷി അഗസ്റ്റിനും ചേർന്ന് ആദരിച്ചു. തക്കല രൂപത വികാരി ജനറാൾ മോണ്‍. തോമസ് പവ്വത്തുപറന്പിൽ, മൂലമറ്റം സെന്‍റ് ജോർജ് ഫൊറോന വികാരി ഫാ. കുര്യൻ കാലായിൽ, സ്നേഹവില്ല ഡയറക്ടർ ഫാ. ജിനോയ് തോമസ്, രൂപത ചാൻസലർ ഫാ. ജോഷി കുളത്തിങ്കൽ എന്നിവർ പ്രസംഗിച്ചു. നേരത്തേ നടന്ന ചടങ്ങിൽ മാർ റാഫേൽ തട്ടിൽ പാലിയേറ്റീവ് കെയർ യൂണിറ്റിന്‍റെ വെഞ്ചരിപ്പ് നിർവഹിച്ചു.

യൂത്ത് ലീഗ് പ്രതിഷേധ മാർച്ച് നടത്തി

തൊടുപുഴ: പോലീസ് സ്റ്റേഷനിൽ തൊണ്ടിമുതലായി സൂക്ഷിച്ചിരുന്ന സൈക്കിൾ മോഷ്ടിച്ച പോലീസുകാരനെതിരേ കേസെടുക്കുക, വണ്ടിപ്പെരിയാർ പോലീസ് സ്റ്റേഷനിൽ ഒളികാമറ വച്ച് വനിതാ പോലീസ് ഉദ്യോഗസ്ഥരുടെ ദൃശ്യങ്ങൾ പകർത്തിയ പോലീസുകാരനെ സർവീസിൽനിന്നു പിരിച്ചുവിടുക തുടങ്ങിയ ആവശ്യങ്ങൾ ഉന്നയിച്ച് മുസ്‌ലിം യൂത്ത് ലീഗ് തൊടുപുഴ നിയോജക മണ്ഡലം കമ്മിറ്റിയുടെ നേതൃത്വത്തിൽ തൊടുപുഴയിൽ പ്രതിഷേധ മാർച്ച് നടത്തി. മാർച്ച് പോലീസ് സ്റ്റേഷനുമുന്നിൽ ബാരിക്കേഡ് സ്ഥാപിച്ച് തടഞ്ഞു. യൂത്ത് ലീഗ് ജില്ലാ പ്രസിഡന്‍റ് പി.എച്ച്. സുധീർ മാർച്ച് ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് കെ.എം. നിഷാദ് അധ്യക്ഷത വഹിച്ചു. പി.എം. നിസാമുദീൻ, അൻസാരി മുണ്ടയ്ക്കൽ, ഷബീർ മുട്ടം, വി.എം. ജലീൽ, എം.എ. സബീർ, ഷാഹുൽ കപ്രാട്ടിൽ, ഷാമൽ അസീസ്, പി.എ. നജീബ് എന്നിവർ പ്രസംഗിച്ചു.

വിശ്വാസ പരിശീലന കണ്‍വൻഷൻ നടത്തി

വാഴക്കുളം: വിശ്വാസ പരിശീലനം കാലാനുസൃതമായി നവീകരിക്കപ്പെടണമെന്ന് ബിഷപ് മാർ ജോർജ് മഠത്തിക്കണ്ടത്തിൽ.കോതമംഗലം രൂപത വിശ്വാസ പരിശീലന കണ്‍വൻഷൻ വാഴക്കുളം വിശ്വജ്യോതി എൻജിനിയറിംഗ് കോളജിൽ ഉദ്ഘാടനം ചെയ്യുകയായിരുന്നു അദ്ദേഹം. വിജ്ഞാന ഭവൻ ഡയറക്ടർ ഫാ. ജോസഫ് കല്ലറയ്ക്കൽ ആമുഖപ്രഭാഷണം നടത്തി. രൂപത വികാരി ജനറാൾ മോണ്‍. പയസ് മലേക്കണ്ടത്തിൽ, മോണ്‍. വിൻസന്‍റ് നെടുങ്ങാട്ട് എന്നിവർ പ്രസംഗിച്ചു. ഫാ. സെബാസ്റ്റ്യൻ കുറ്റിയാനിക്കൽ ക്ലാസ് നയിച്ചു. കുട്ടികൾക്കുള്ള സ്കോളർഷിപ്പ് വിതരണവും നടത്തി. രൂപതയിലെ മികച്ച 14 വിശ്വാസ പരിശീലകരെ യോഗത്തിൽ ആദരിച്ചു.

ലഹരിവിരുദ്ധ ബൈക്ക് റാലി നടത്തി

തൊടുപുഴ: പോലീസ് അസോസിയേഷൻ സംസ്ഥാന കണ്‍വൻഷനോടനുബന്ധിച്ച് തൊടുപുഴയിൽ ലഹരിവിരുദ്ധ ഇരുചക്രവാഹന റാലി നടത്തി. തൊടുപുഴ ഡിവൈഎസ്പി ഇമ്മാനുവൽ പോൾ ഫ്ളാഗ് ഓഫ് ചെയ്തു. ജില്ലാ സെക്രട്ടറി ഇ.ജി. മനോജ് കുമാർ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. സംസ്ഥാന വൈസ് പ്രസിഡന്‍റ് സഞ്ജു വി. കൃഷ്ണൻ, ജില്ലാ പ്രസിഡന്‍റ് എസ്. അനീഷ് കുമാർ, വൈസ് പ്രസിഡന്‍റ് എം.എസ്. റിയാദ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]