വാഹനപരിശോധനയുടെ മറവിൽ മോഷണം; യുപിയിൽ നാല് പോലീസ് ഉദ്യോഗസ്ഥർ അറസ്റ്റിൽ |

Click here for detailed news of all items

വാഹനപരിശോധനയുടെ മറവിൽ മോഷണം; യുപിയിൽ നാല് പോലീസ് ഉദ്യോഗസ്ഥർ അറസ്റ്റിൽ

Friday, January 22, 2021 11:56 AM IST

ലക്നോ: വാഹനപരിശോധനയുടെ മറവിൽ സ്വർണ കവർച്ച നടത്തിയ നാല് പോലീസ് ഉദ്യോഗസ്ഥരെ അറസ്റ്റ് ചെയ്തു. ഉത്തർപ്രദേശിലെ ഗോരഖ്പുരിലാണ് സംഭവം. തലസ്ഥാനമായ ലക്നോവിൽ നിന്നും 200 കിലോമീറ്റർ അകലെ ബസ്തി എന്ന സ്ഥലത്താണ് നാല് പേരെയും നിയമിച്ചത്. ജ്വല്ലറി ഉടമയെക്കുറിച്ചുള്ള വിവരങ്ങൾ ഇവർക്ക് കൈമാറിയ രണ്ടു പേരെയും പോലീസ് അറസ്റ്റ് ചെയ്തു.

സബ് ഇൻസ്പെക്ടർ ധർമേന്ദ്ര യാദവും മൂന്ന് കോൺസ്റ്റബിളുമാരുമാണ് അറസ്റ്റിലായത്. ജ്വല്ലറി ഉടമയും സഹായിയും ബുധനാഴ്ച ഗോരഖ്പുരിൽ നിന്നും ലക്നോവിലേക്ക് ബസിൽ വരുന്നതിനിടെയാണ് വാഹന പരിശോധനയെന്ന വ്യാജേന ഇവർ വാഹനം തടഞ്ഞത്.

തുടർന്ന് ജ്വല്ലറി ഉടമയോടും സഹായിയോടും പരിശോധനയ്ക്കായി വാഹനത്തിൽ നിന്നുമിറങ്ങാൻ ഇവർ ആവശ്യപ്പെട്ടു. ഇവരെ ഒറ്റപ്പെട്ട സ്ഥലത്ത് കൊണ്ടുപോയതിന് ശേഷം ഇവർ സ്വർണവുമായി കടന്നുകളയുകയായിരുന്നു.

അറസ്റ്റിലായവരിൽ നിന്നും 19 ലക്ഷം രൂപയും 16 ലക്ഷം രൂപ വിലമതിക്കുന്ന സ്വർണവും വെള്ളിയും മോഷണത്തിന് ഉപയോഗിച്ച കാറും കണ്ടെടുത്തതായി പോലീസ് പറഞ്ഞു. ഇവർ നാലു പേരെയും പോലീസ് സേനയിൽ നിന്നും പുറത്താക്കുമെന്ന് ഗോരഖ്പുർ പോലീസ് മേധാവി ജോഗേന്ദ്ര കുമാർ അറിയിച്ചു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.