ADVERTISEMENT

ADVERTISEMENT

കെഎസ്ഇബി പെൻഷനേഴ്സ് അസോ. ചാത്തന്നൂർ ഡിവിഷൻ സമ്മേളനം

ചാത്തന്നൂർ : കെഎസ്ഇ ബി പെൻഷനേഴ്സ് അസോസിയേഷൻ ചാത്തന്നൂർ ഡിവിഷൻ സമ്മേളനം കെഎസ്ഇബി പെൻഷനേഴ്സ് അസോസിയേഷൻ സംസ്ഥാന ട്രഷറർ വി.തുളസീധരൻ ഉദ്ഘാടനം ചെയ്തു.

കുടിശിക ക്ഷാമബത്തയും ക്ഷാമാശ്വാസവും വിതരണം ചെയ്യുക, ആരോഗ്യ ഇൻഷുറൻസ് പദ്ധതി നടപ്പിലാക്കുക, പെൻഷൻ സുരക്ഷ ഉറപ്പ് വരുത്താനായി മാസ്റ്റർട്രസ്റ്റിലേക്ക് നീക്കിവയ്ക്കപ്പെട്ട തുക സർക്കാരും ബോർഡും അടിയന്തിരമായി നൽകുക എന്നീ ആവശ്യങ്ങൾ സമ്മേളനം ഉന്നയിച്ചു.

വയനാട് മുണ്ടക്കൈ - ചുരൽമല പുനരധിവാസ ഫണ്ടിലേക്ക് സമ്മതപത്രം നൽകി 5,60000 രൂപ സമാഹരിച്ച് നൽകിയ ചാത്തന്നൂർ പെൻഷൻ കമ്മിറ്റിയെ സമ്മേളനം അനുമോദിച്ചു.സംസ്ഥാന സെക്രട്ടറിമാരായ ശ്രീകുമാരിയമ്മ മുഖ്യപ്രഭാഷണവും ഡി. ലാൽ പ്രകാശ് റിപ്പോർട്ടും അവതരിപ്പിച്ചു.

ഡിവിഷൻ പ്രസിഡന്‍റ് എസ്.ശ്രീകുമാർ അധ്യക്ഷത വഹിച്ച സമ്മളനത്തിൽ കേന്ദ്ര കമ്മിറ്റി അംഗം എൻ.സദാനന്ദൻ പിള്ള ,കെ.വി.മധു, എസ്.സുരേഷ്ബാബു, എം.ജെ.പ്രദീപ്കുമാർ ,ടി.സുദർശനൻ,ആർ.മോഹൻദാസ് എന്നിവർ പ്രസംഗിച്ചു.

ADVERTISEMENT

പാറക്വാറിക്കെതിരേ കോടതി വിധി

പട്ടാഴി: ഒരു നാടിന്‍റെ ജനകീയ പോരാട്ടത്തിന് ഫലം കണ്ടു. പട്ടാഴി മയിലാടുംപാറ കുളപ്പാറ ക്വാറിക്ക് എതിരായ നിയമപോരാട്ടത്തിനാണ് കോടതിയുടെ അനുകൂലമായ വിധിയുണ്ടായത്. ഇന്നലെഹൈക്കോടതിയിൽ നിന്നാണ് നിർണായക ഉത്തരവു വന്നത്. ആവശ്യമായ അനുമതിയില്ലാതെയാണ് പാറഖനനത്തിന് ക്വാറി മാഫിയ നീക്കം നടത്തിയത്. സേവ് പട്ടാഴി ഫോറം ഭാരവാഹികളായ റജിമോൻ ജേക്കബ്, മീനം രാജേഷ്, അബ്ദുൽമജീദ് എന്നിവർ കക്ഷി ചേർന്ന കേസിലാണ് ഉത്തരവുണ്ടായത്. വാദികൾക്കായി അഡ്വ. അമൽ, അഡ്വ. അജയ് കൃഷ്ണൻ എന്നിവരാണ് നിയമ പോരാട്ടത്തിലൂടെ അനുകൂല വിധി നേടിയത്. നാട്ടുകാർ സമരരംഗത്തു വരികയും വലിയ പ്രതിഷേധങ്ങൾ സംഘടിപ്പിയ്ക്കുകയും ചെയ്തിരുന്നു. ജനപ്രതിനിധികളും സാംസ്കാരിക പ്രവർത്തകരുമെല്ലാം മാഫിയയ്ക്കെതിരെ രംഗത്തുവന്നിരുന്നു.

ഇടറോഡ് കമ്പി ഉപയോഗിച്ച് കെട്ടി അടച്ചതായി പരാതി

ചവറ: ഇടറോഡ് കമ്പി ഉപയോഗിച്ച് കെട്ടി അടച്ചതായി പരാതി. ചവറ ടൈറ്റാനിയം ജംഗ്ഷന് സമീപം പന്മന പഞ്ചായത്ത് കോലം പതിനഞ്ചാം വാർഡിൽ കെഎം എംഎൽ ഗ്രൗണ്ടിനും പഴയ ദേശീയപാതയോടും ചേർന്നുള്ള റോഡാണ് മഴ പെയ്ത് വെള്ളം കെട്ടി നിൽക്കുന്നു എന്ന പേരിൽ ചില സ്വകാര്യ വ്യക്തികൾ കമ്പി വേലി ഉപയോഗിച്ച് കെട്ടി അടച്ച് തടസം സൃഷ്ടിച്ചത്. പൊതുഗതാഗതം തടസപ്പെടുത്തൽ ക്രിമിനൽ കുറ്റമായിരിക്കെയാണ് ചിലരുടെ ഇത്തരം നടപടി എന്നതാണ് ശ്രദ്ധേയം. ഇത് മൂലം പരിസര പ്രദേശങ്ങളിലുള്ള വീട്ടുകാരും യാത്രക്കാരും ബുദ്ധിമുട്ടിലാണ്.ഈ റോഡിൽ തന്നെ സ്ഥിതിചെയ്യുന്ന ഇടത് - വലത് കക്ഷികളുടെ ഓഫീസിലേക്കും സമീപത്തെ പള്ളിയിലേക്കും മദ്രസയിലേക്കും വരുന്ന കുട്ടികൾ ഉൾപ്പെടെയുള്ളവർ ദുരിതത്തിലാണ്. യാത്രക്കാരുടെ ബുദ്ധിമുട്ട് മനസിലാക്കിയ കെ എം എം എൽ അധികൃതർ റോഡ് നവീകരിച്ച് കുറച്ച് ഭാഗം ഇന്‍റർലോക്ക് ചെയ്തിട്ടുണ്ട്. ബാക്കിയുള്ള ഭാഗം കൂടി ഇൻറർലോക്ക് ചെയ്ത് വെള്ളം ഒഴുകിപ്പോകാൻ ഓട നിർമിച്ച് നൽകാം എന്ന് കെഎം എംഎൽ അധികൃതർ അറിയിച്ചുവെങ്കിലും നവീകരിച്ചാൽ റോഡ് ഉയരുമെന്നും വീട്ടിൽ വെള്ളം കയറുമെന്നും പറഞ്ഞ് ചിലർ ബോധപൂർവം വഴി അടച്ചതാണെന്നും വ്യാപക ആക്ഷേപമുണ്ട്. സംഭവവുമായി ബന്ധപ്പെട്ട് ജില്ലാ കളക്ടർക്ക് പരാതി നൽകിയിട്ടുണ്ട്.പ്രശ്നത്തിന് എത്രയും വേഗം പരിഹാരം കാണണമെന്ന ആവശ്യത്തിലാണ് യാത്രക്കാർ.

മെഹന്തി ഫെസ്റ്റ് നടത്തി

കൊട്ടിയം : ബക്രീദ് ആഘോഷ ഭാഗമായി കൊട്ടിയം എൻ എസ് എംജി എച്ച് എസിൽ മെഹന്തി ആഘോഷം നടത്തി. ഹെഡ്മിസ്ട്രസ് ജൂഡിത്ത് ലത മെഹന്തി ഫെസ്റ്റ് ഉദ്ഘാടനം ചെയ്തു. ഹൈസ്കൂളിൽ നിന്നും യുപി വിഭാഗത്തിൽ നിന്നുമുള്ളകുട്ടികൾ മൈലാഞ്ചിയുടെ വിവിധതരത്തിലുള്ള ഡിസൈനുകൾ കൈകളിൽ വരച്ചു. കൂടാതെ മാപ്പിളപ്പാട്ട് ,ഒപ്പന തുടങ്ങിയ കലാപരിപാടികളും ഫുഡ് ഫെസ്റ്റും നടത്തി. ആഘോഷ പരിപാടികൾക്ക് അധ്യാപകർ നേതൃത്വം നൽകി.

ലോകത്തിന്‍റെ എല്ലാ കോണിലും മലയാളികൾ പുതിയ ചരിത്രം രചിക്കുന്നു: മന്ത്രി കെ.എൻ.ബാലഗോപാൽ

കൊട്ടാരക്കര: ഉന്നതവിദ്യാഭ്യാസത്തോടൊപ്പം ഉയർന്ന ജീവിതമൂല്യങ്ങളും നെഞ്ചോട് ചേർത്ത് ലോകത്തിന്‍റെ എല്ലാ കോണിലും മലയാളികൾ പുതിയ ചരിത്രം രചിക്കുകയാണെന്ന് മന്ത്രി കെ. എൻ. ബാലഗോപാൽ. കലയപുരം ആശ്രയ സങ്കേതത്തിൽ നടന്ന ഷിക്കാഗോ മലയാളി അസോസിയേഷന്‍റെ താങ്ക്സ് ഗിവിങ് ഡേ ആഘോഷവും പ്രഥമ ചാരിറ്റി അവാർഡ് വിതരണവും ഉദ്ഘാടനം ചെയ്ത് പ്രസംഗിക്കുകയായിരുന്നു ബാലഗോപാൽ. പത്തനംതിട്ട ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം അസോസിയേഷന്‍റെെ വിവിധ സഹായങ്ങൾ വിതരണം ചെയ്തു. ഷിക്കാഗോ മലയാളി അസോസിയേഷന്‍റെ പ്രഥമ ചാരിറ്റി അവാർഡ് മൂന്നരലക്ഷം രൂപ പ്രസിഡന്‍റ് ജെസി റിൻസിയിൽ നിന്നും ആശ്രയ രക്ഷാധികാരി ഡോ.യൂഹാനോൻ മാർ തേവോദോറോസ് ഏറ്റുവാങ്ങി.

അപരനോടുള്ള സഹോദര്യവും ഐക്യവുമാണ് ദൈവബന്ധം ദൃഡമാക്കുന്നത്: വികാരി ജനറാൾ മോൺ.ബൈജു ജൂലിയാൻ

കൊല്ലം : അപരനുമായുള്ള നമ്മുടെ സഹോദര്യത്തിലൂടെയും ഐക്യത്തിലൂടെയുമാണ് ദൈവ ബന്ധം ദൃഡമാക്കുന്നതെന്ന് വികാരി ജനറാൾ മോൺ.ബൈജു ജൂലിയാൻ. അടിസ്ഥാന ക്രൈസ്തവ സമൂഹം സ്‌നേഹത്തി െന്‍റ സമൂഹമാണെന്നും മനുഷ്യനെ ദൈവ സ്‌നേഹത്തിലേക്കും പരസ്‌നേഹത്തിലേക്കും ഐക്യത്തിലേക്കും നയിക്കുക എന്നതാണ് അതി െ ന്‍റ ലക്ഷ്യമെന്നും അദ്ദേഹം പറഞ്ഞു. കൊല്ലം രൂപത അടിസ്ഥാന ക്രൈസ്തവ സമൂഹത്തിലെ ഇടവക സന്യസ്ത കോർഡിനേറ്റർമാരുടെയും അൽമായ കോർഡിനേറ്റർമാരുടെയും സംഗമം ബിഷപ് ജെറോം കോൺഫറൻസ് ഹാളിൽ ഉദ്ഘാടനം ചെയ്ത് പ്രസംഗിക്കുകയായിരുന്നു മോൺ.ബൈജു ജൂലിയാൻ. രൂപത പ്രൊക്യുറേറ്റർ ഫാ.ജോളി ഏബ്രഹാം, കേരള റീജണൽ സെക്രട്ടറി ഫാ. ജോൺസൺ പുത്തൻ വീട്ടിൽ, പ്ലാസിഡ് ഗ്രഗറി, സെബാസ്റ്റ്യൻ, ഇ.എ.മേഴ്സൺ, സാജു കുരിശിങ്കൽ, ശോഭാ തോമസ് എന്നിവർ പ്രസംഗിച്ചു. സഭയ്ക്ക് രാഷ്‌ട്രത്തോടുള്ള കടമകളെ കുറിച്ച് എന്ന വിഷയത്തിൽ പ്ലാസിഡ് ഗ്രഗറി ക്ലാസെടുത്തു.

റെയില്‍വേ മേല്‍പ്പാല നിര്‍മാണത്തിന് ഭൂമിയേറ്റെടുക്കല്‍ നടപടി ആരംഭിച്ചു: പി.സി.വിഷ്ണുനാഥ് എംഎല്‍എ

കുണ്ടറ: പളളിമുക്ക് റയില്‍വേ മേല്‍പ്പാല നിര്‍മാണവുമായി ബന്ധപ്പെട്ട് റയില്‍വേയുടെ പുതുക്കിയ ജി എ ഡി (ജനറല്‍ അലൈമന്‍റ് ഡ്രോയിംഗ്) ലഭിച്ചതിനെ തുടര്‍ന്ന് ഭൂമി ഏറ്റെടുക്കുന്നതിനുളള പ്രാഥമിക നടപടികളിലേയ്ക്ക് കടന്നുവെന്ന് പി.സി.വിഷ്ണുനാഥ് എംഎല്‍എ അറിയിച്ചു. ഇതോടെ ഈ പ്രദേശത്തെ നാട്ടുകാരുടെ ചിരകാല അഭിലാഷമായ റയില്‍വേ മേല്‍പ്പാലം യാഥാര്‍ഥ്യത്തിലേക്ക് കടക്കുകയാണ്. ഭൂമി ഏറ്റെടുക്കലിന്‍റെ ഭാഗമായി റവന്യൂ വകുപ്പില്‍ നിന്നും ഭരണാനുമതി ലഭിക്കുന്നതിനായുളള രേഖകള്‍ പൊതുമരാമത്ത് വകുപ്പ് വഴി സമര്‍പ്പിച്ചിട്ടുണ്ടെന്നും അതോടൊപ്പം ഒരു ലാന്‍ഡ് അക്യൂസിയേഷന്‍ ഓഫീസറെ നിയമിക്കണമെന്ന് ആവശ്യപ്പെട്ട് കത്തുകള്‍ നല്‍കിയിട്ടുണ്ടെന്നും നിയമിക്കുന്ന മുറയ്ക്ക് എല്‍എ നടപടികള്‍ ആരംഭിക്കുമെന്നും എംഎല്‍എ അറിയിച്ചു. ഒന്നിലധികം മേല്‍പ്പാല നിര്‍മ്മാണവുമായി ബന്ധപ്പെട്ട് ഒന്നിലധികം ഏജന്‍സികളുടെ സാന്നിധ്യമുളളത് ഒഴിവാക്കണമെന്ന് ആവശ്യപ്പെട്ടുസര്‍ക്കാരിന് കത്ത് നല്‍കുകയും, തുടര്‍ന്ന് പൊതുമരാമത്ത് സെക്രട്ടറിയുടെ സാന്നിധ്യത്തില്‍ കിഫ്ബി, കെആര്‍എഫ്ബി, ആര്‍ബിഡിസികെ, എന്‍എച്ച്എഐ ഉദ്യോഗസ്ഥരുടെ ഒരു യോഗം വിളിച്ചു ചേര്‍ത്ത്, പദ്ധതിയുടെ നിര്‍വഹണ ചുമതല ആര്‍ബിഡിസികെയെ ചുമതലപ്പെടുത്തി. പുതുക്കിയ എസ്റ്റിമേറ്റ് പ്രകാരം 43.32 കോടി രൂപയുടെ ഭരണാനുമതി നേടിയെടുത്തുവെന്നും എംഎല്‍എ അറിയിച്ചു.

തെരുവുനായ്ക്കളെ വിളക്കുടിയിൽ തള്ളാനുള്ള ശ്രമം നാട്ടുകാർ തടഞ്ഞു

കുണ്ടറ: നാഷണൽ പെർമിറ്റ് ലോറി നിറയെ തെരുവുനായ്ക്കളെ ഗ്രാമപ്രദേശത്ത് കൊണ്ട് തള്ളാൻ ശ്രമിച്ചത് നാട്ടുകാർ തടഞ്ഞു. കൊട്ടാരക്കര വിളക്കുടി പഞ്ചായത്തിന്‍റെ അതിർത്തി പ്രദേശത്താണ് സംഭവം. തൃപ്പൂണിത്തുറ റെയിൽവേ സ്റ്റേഷൻ പരിസരത്ത് നിന്നും പിടിച്ച നായ്ക്കളാണെന്ന് ലോറിയിൽ ഉണ്ടായിരുന്നവർ പറയുന്നു. കഴിഞ്ഞ ദിവസം രാവിലെ ഈ പ്രദേശത്ത് കുറച്ചു നായ്ക്കളെ ഇറക്കി വിട്ടിരുന്നു . അത് മുഴുവനും നാട്ടുകാർ തിരിച്ചു ലോറിയിൽ കയറ്റി. തുടർന്ന് പഞ്ചായത്ത് അധികൃതരും പോലീസും സ്ഥലത്തെത്തി മേൽനടപടികൾ സ്വീകരിച്ചു.

ശബരി റെയിൽപാത കൊല്ലം - ചെങ്കോട്ട റെയിൽവേ ലൈനുമായി ബന്ധിപ്പിക്കണമെന്ന്

പുനലൂർ: ശബരിമല തീർഥാടകർക്ക് പ്രയോജനപ്പെടുന്നവിധം ശബരി റെയിൽ പാത പുനലൂർ വരെ നീട്ടി കൊല്ലം - ചെങ്കോട്ട റെയിൽവേ ലൈനുമായി ബന്ധിപ്പിക്കണമെന്ന് കൊല്ലം ചെങ്കോട്ട റെയിൽവേ പാസഞ്ചേഴ്സ് അസോസിയേഷൻ യോഗം ആവശ്യപ്പെട്ടു. കാലടി സ്റ്റേഷൻ വരെ എത്തി നിലച്ചുനിൽക്കുന്ന പാത നിർമാണം ഉടൻ തന്നെ പുനരാരംഭിച്ച് സമയബന്ധിതമായി പൂർത്തീകരിക്കണം. ഇക്കാര്യത്തിൽ കേന്ദ്ര- സംസ്ഥാന സർക്കാരുകളും റെയിൽവേയും വേണ്ട ശുഷ്കാന്തി പുലർത്തുകയും പ്രവൃത്തികൾ ത്വരിതപ്പെടുത്തുകയും വേണമെന്നും യോഗം ആവശ്യപ്പെട്ടു. മാമ്പഴത്തറ - അച്ചൻകോവിൽ വഴി ചെങ്കോട്ടയിൽ എത്തുന്ന തരത്തിൽ തുരങ്കങ്ങളും എലിവേറ്റഡ് ലൈനുകളും മറ്റും ഉൾക്കൊള്ളിച്ച് പുതിയ റയിൽപ്പാത നിർമിച്ചാൽ പുനലൂരിൽ നിന്ന് ഒരു മണിക്കൂർ കൊണ്ട് ചെങ്കോട്ടയിൽ എത്തിച്ചേരാൻ സാധിക്കും. കൊല്ലം - ചെങ്കോട്ട റൂട്ടിൽ പാസഞ്ചേഴ്സ് അസോസിയേഷൻ നിരന്തരം ആവശ്യപ്പെടുന്ന പഴനി വഴി തിരുവനപുരം - കോയമ്പത്തൂർ, കൊല്ലം - തിരുച്ചെന്തൂർ മെമു, കൊല്ലം - മധുര മെമു ; ബംഗ്ളൂർ, മംഗലാപുരം ഭാഗങ്ങളിലേക്ക് പുതിയ സർവീസുകൾ , ചെങ്കോട്ടയിൽ അവസാനിക്കുന്ന മയിലാടും തുറൈ എക്സ്പ്രസ് കൊല്ലത്തേക്കു ദീർഘിപ്പിക്കൽ, താംബരം എസി എക്സ്പ്രസ് സർവീസുകൾ എന്നിവ അടിയന്തിരമായി നടപ്പാക്കണമെന്നും യോഗം ആവശ്യപ്പെട്ടു. കോച്ചുകളുള്ള ട്രയിൻ സർവീസുകൾ നടത്തുന്നതിന് റെയിൽവേ അംഗീകാരം നൽകിയ സ്ഥിതിക്ക് പ്ലാറ്റ് ഫോമുകളുടെ നീളവും ഉയരവും വർധിപ്പിക്കണം. പുനലൂർ സബ്സ്റ്റേഷനിലെ വൈദ്യുതികരണം, മേൽപ്പാലങ്ങളുടെ നിർമാണം എന്നിവ സമയബന്ധിതമായി പൂർത്തീകരിക്കണം തുടങ്ങിയ ആവശ്യങ്ങളും യോഗം മുന്നോട്ടു വച്ചു. പാസഞ്ചേഴ്സ് അസോസിയേഷൻ പ്രസിഡന്‍റ് അഡ്വ. എൻ.ചന്ദ്രമോഹനന്‍റെ അധ്യക്ഷതയിൽ ചേർന്ന യോഗത്തിൽ ഭാരവാഹികളായ രാജഗോപാൽ, ദിപു രവി, അജീഷ് പുന്നല , ലീ, സുമേഷ്,രമേശ് അവണൂർ, വി. അനിൽകുമാർ, സന്തോഷ് വെട്ടിക്കവല എന്നിവർ പ്രസംഗിച്ചു.

ആശമാരുടെ സമരയാത്ര; ജില്ലാപര്യടനം പൂർത്തിയാക്കി

കൊല്ലം: ആശാപ്രവർത്തകർ നടത്തിവന്ന രാപകൽ സമരയാത്രയുടെ ജില്ലയിലെ പര്യടനം പൂർത്തിയാക്കി. സമാപനം ചിന്നക്കട സാംബശിവൻ സ്ക്വയറിൽ ഡിസിസി പ്രസിഡന്‍റ് പി. രാജേന്ദ്ര പ്രസാദ് ഉദ്ഘാടനം ചെയ്തു. സ്വാഗത സംഘം ജില്ലാ ചെയർമാൻ രാജു ഡി. മംഗലത്ത് അധ്യക്ഷതവഹിച്ചു. ജില്ലാ കൺവീനർ ബിനി സുദർശൻ, ഡിസിസി വൈസ് പ്രസിഡന്‍റ് എസ് .വിപിൻ ചന്ദ്രൻ, ആർവൈഎഫ് സംസ്ഥാന പ്രസിഡന്‍റ് അഡ്വ.വിഷ്ണു മോഹൻ, യുടിയുസി സംസ്ഥാന കമ്മിറ്റിയംഗം എൽ.ബീന, ആംആദ്മി പാർട്ടി സംസ്ഥാന പ്രസിഡന്‍റ് അഡ്വ.വിനോദ് മാത്യു വിൽസൺ, വനിതാ ലീഗ് ജില്ലാ പ്രസിഡന്‍റ് മാജിദാ വഹാബ്, അഡ്വ.ഫ്രാൻസിസ് ജെ. നെറ്റോ,സണ്ണി,എസ് യു സിഐ (കമ്യൂണിസ്റ്റ്) ജില്ലാ കമ്മിറ്റിയംഗം ബി.വിനോദ്, മുസ്‌ലീം ലീഗ് ജില്ലാ പ്രസിഡന്‍റ് നൗഷാദ് യൂനുസ് തുടങ്ങിയവർ പ്രസംഗിച്ചു. ആശമാരുടെ ജീവിതം വരച്ചു കാട്ടുന്ന 'വൈറ്റ്റോസ്' സാംസ്കാരിക കൂട്ടായ്മ അവതരിപ്പിച്ച ‘ആശാഭരിതം' തെരുവു നാടകഅവതരണവും നടന്നു. കഴിഞ്ഞ ദിവസം രാവിലെ ചവറയിൽ നിന്നാരംഭിച്ച പര്യടനം ആർഎസ്പി സംസ്ഥാന സെക്രട്ടറി ഷിബു ബേബി ജോൺ ഉദ്ഘാടനം ചെയ്തു. തുടർന്ന് കുണ്ടറയിൽ നടന്ന സ്വീകരണ സമ്മേളനം ഫാ. റൊമാൻസ് ആന്‍റണിയും പരവൂരിൽ കെപിസിസി സെക്രട്ടറി തൊടിയൂർ രാമചന്ദ്രനും ഉദ്ഘാടനം ചെയ്തു.

‘ഫിറ്റ്‌നസ് ഗ്രാമം' പദ്ധതിയുമായി അഞ്ചല്‍ ബ്ലോക്ക് പഞ്ചായത്ത്

കൊല്ലം: അരോഗ്യദൃഡഗാത്രരായ സ്ത്രീകളാല്‍ സമ്പന്നമാകണം നാട് എന്ന ലക്ഷ്യം സാക്ഷാത്്കരിക്കാൻ ‘ഫിറ്റ്‌നസ് ഗ്രാമം' പദ്ധതിയുമായി അഞ്ചല്‍ ബ്ലോക്ക് പഞ്ചായത്ത്. ഇതിനായി ആദ്യം വനിതാ ‘ജിം’ തുടങ്ങിയാണ് തുടക്കം. ജീവിതശൈലി രോഗങ്ങള്‍ വ്യായാമത്തിലൂടെ ചെറുക്കുന്നതിനോടൊപ്പം വനിതകളുടെ ആരോഗ്യസംരക്ഷണം ഉറപ്പാക്കുക എന്നത് ലക്ഷ്യമിടുകയാണ് ബ്ലോക്ക് പഞ്ചായത്ത്. കാര്‍ഡിയോ, വെയിറ്റ്‌ട്രെയിനിംഗ്, യോഗ, സുംബ തുടങ്ങിയ വ്യായാമമുറകള്‍ ചെയ്യാനുള്ള സൗകര്യം നെടിയറയിലെ വനിത ഫിറ്റ്‌നസ് സെന്‍ററില്‍ ലഭ്യമാണ്. മുതിര്‍ന്ന സ്ത്രീകള്‍ക്കും ഇവിടെ ‘ഒരു കൈ’ നോക്കാം'. അഞ്ചല്‍ ബ്ലോക്ക് പഞ്ചായത്തിന്‍റെ വനിതാ ഘടകം പദ്ധതിയില്‍ ഉള്‍പ്പെടുത്തി 4.49 ലക്ഷം രൂപ ചെലവഴിച്ചാണ് സംവിധാനങ്ങള്‍ ഒരുക്കിയത്. തുടക്കമെന്ന നിലയ്ക്ക് ഒരു ട്രെയിനറാണുള്ളത്. കൂടുതല്‍ പരിശീലകരെ നിയോഗിക്കാനും ആലോചിക്കുന്നുണ്ട്. പ്രദേശത്തെ സ്ത്രീകള്‍ക്ക് പരിശീലനം നല്‍കി ട്രെയിനര്‍മാരാക്കാനും ഉദ്ദേശിക്കുന്നു. അഞ്ചല്‍ പഞ്ചായത്തിന്‍റെ പകല്‍ വീടിന്‍റെ മുകളിലാണ് വ്യായാമകേന്ദ്രം. അവിടുത്തെ അന്തേവാസികളും സൗകര്യം പ്രയോജനപ്പെടുത്തുന്നു. സൗജന്യമായി രാവിലെയും വൈകുന്നേരവും ഫിറ്റ്‌നസ് സെന്‍റര്‍ ഉപയോഗിക്കാവുന്നതാണ്. അഞ്ചല്‍ ബ്ലോക്കിലെ ഓരോ പഞ്ചായത്തിലും ഇത്തരം കേന്ദ്രങ്ങള്‍ സ്ഥാപിക്കാനുള്ള പദ്ധതിയും തയാറാകുന്നുണ്ട്. ബ്ലോക്കിന്‍റെ ഈ വര്‍ഷത്തെ ബജറ്റിലും 24 ലക്ഷം രൂപ വകയിരുത്തിയിട്ടുണ്ട്. ഫിറ്റ്‌നസ് കേന്ദ്രം ഒരു തുടര്‍ പദ്ധതിയായി മാറ്റുമെന്ന് ബ്ലോക്ക് പഞ്ചായത്ത് പ്രസിഡന്‍റ് ഓമന മുരളി പറഞ്ഞു.

അഞ്ചൽ മിഷന്‍ ആശുപത്രി-അഗസ്ത്യക്കോട് റോഡ് : തകർന്ന നിലയിൽ

അഞ്ചല്‍ : അഞ്ചലില്‍ ഏറ്റവുമധികമാളുകള്‍ നിത്യവും ഉപയോഗിക്കുന്ന ആംബുലന്‍സുകള്‍ ഉള്‍പ്പെടെ ദിനവും നൂറുകണക്കിനു വാഹനങ്ങള്‍ എത്തുന്ന മിഷന്‍ ആശുപത്രി അഗസ്ത്യക്കോട് റോഡ് തകര്‍ച്ചയ്ക്ക് വര്‍ഷങ്ങളുടെ പഴക്കമുണ്ട്. അഞ്ചല്‍ പഞ്ചായത്തിലെ കോളജ് വാര്‍ഡില്‍ ഉള്‍പ്പെടുന്ന ഈ റോഡ് നവീകരിക്കാനോ അറ്റകുറ്റപണികള്‍ നടത്താനോ പഞ്ചായത്ത് അധികൃതര്‍ കാര്യമായ ഒരു നടപടിയും സ്വീകരിച്ചിട്ടില്ല. പാതയുടെ നവീകരണത്തിന് ആവശ്യമായ ഫണ്ട് പഞ്ചായത്ത് വകയിരുത്തുമെന്ന് മുന്‍ പ്രസിഡന്‍റ് പറഞ്ഞിരുന്നുവെങ്കിലും അതുമുണ്ടായില്ല. പിന്നീട് ഏതാനും മാസങ്ങള്‍ക്ക് മുമ്പ് പാതയുടെ നവീകരണത്തിനായി എംഎല്‍എ ഫണ്ടില്‍ നിന്നും 45 ലക്ഷം രൂപ അനുവദിച്ചതായി എംഎല്‍യുടെ ഓഫീസ് അറിയിച്ചിരുന്നു. എന്നാല്‍ നാളിതുവരെ ഒരു നടപടിയും റോഡിന്‍റെ കാര്യത്തില്‍ ഉണ്ടായിട്ടില്ല. കോളജ് ജംഗ്ഷനില്‍ നിന്നും മിഷന്‍ ആശുപത്രി പടിക്കല്‍ വരെ ഏകദേശം 150 മീറ്റര്‍ ദൂരത്തില്‍ പലയിടത്തായി റോഡ് തകര്‍ന്നു വലിയ കുഴികള്‍ രൂപപ്പെട്ടിരിക്കുകയാണ്. മലയോര മേഖലയിലെ ഏറ്റവും വലിയ ആശുപത്രികളില്‍ ഒന്നായ മിഷന്‍ ആശുപത്രിയിലേക്ക് രോഗികളുമായി എത്തുന്ന ആംബുലന്‍സ് അടക്കമുള്ള വാഹനങ്ങള്‍ കുഴിയില്‍ പ്പെടുകയാണ്. മഴകൂടി കനത്തതോടെ വെള്ളക്കെട്ട് രൂപപ്പെട്ടിരിക്കുന്നു. ഇതോടെ കാല്‍നട യാത്രയും ദുരിതം. ഇരുചക്രവാഹനങ്ങള്‍ കുഴിയില്‍പ്പെട്ട് അപകടത്തിലാകുന്നത് പതിവ് കാഴ്ചയായിരിക്കുന്നു. പ്രധാനപ്പെട്ട ആശുപത്രി പ്രവര്‍ത്തിക്കുന്നതിന്‍റെ ഗൗരവം കണക്കിലെടുത്തെങ്കിലും പാതയുടെ നവീകരണം വേഗത്തിലാക്കണമെന്ന് നാട്ടുകാര്‍ ആവശ്യപ്പെടുന്നു. അതേസമയം എംഎല്‍എ ഫണ്ടില്‍ നിന്നും അനുവദിച്ച തുക ഉപയോഗിച്ച് റോഡ് നിര്‍മാണം നടത്താനുള്ള നടപടികള്‍ പൂര്‍ത്തിയായി വരികയാണെന്നും ടെണ്ടര്‍ ക്ഷണിച്ചുകൊണ്ടു നിര്‍മാണം വേഗത്തില്‍ പൂര്‍ത്തീകരിക്കുമെന്നും വാര്‍ഡ് അംഗം കൂടിയായ അഞ്ചല്‍ പഞ്ചായത്ത് വൈസ് പ്രസിഡന്‍റ് ബിന്ദു തിലകന്‍ പറഞ്ഞു.

സ്‌കൂട്ടര്‍ യാത്രികനെ തടഞ്ഞുനിർത്തി മര്‍ദിച്ച യുവാവ് റിമാൻഡിൽ

പേരൂര്‍ക്കട: സ്‌കൂട്ടര്‍ യാത്രികനെ തടഞ്ഞുനിര്‍ത്തി മര്‍ദിച്ചയാളെ പോലീസ് അറസ്റ്റുചെയ് തു. മണക്കാട് സ്വദേശിയും നിലവില്‍ കല്ലിയൂര്‍ നിലമ ടര്‍ഫിനു സമീപം വാടകയ്ക്കു താമസിച്ചുവരുന്നയാളുമായ മനു എന്നുവിളിക്കുന്ന ആഷിഖ് (29) ആണ് അറസ്റ്റിലായത്. ജൂണ്‍ 12ന് രാത്രി 8.45നാണ് കേസിനാസ്പദമായ സംഭവം. കരമന ആണ്ടിയിറക്കത്തുനിന്നു തിരുവനന്തപുരത്തേക്കു പോകുകയായിരുന്ന നെടുങ്കാട് സ്വദേശി സഞ്ജയന്‍ (24) ആണ് ആക്രമണത്തിന് ഇരയായത്. ഇരുവരും ഒരേദിശയില്‍ സഞ്ചരിക്കുകയായിരുന്നു. ആഷിഖ് സഞ്ചരിച്ചിരുന്ന സ്‌കൂട്ടര്‍ സഞ്ജയന്‍റെ സ്‌കൂട്ടറില്‍ വന്നിടിച്ചതിനെത്തുടര്‍ന്ന് ഇയാള്‍ സഞ്ജയനെ തടഞ്ഞുനിര്‍ത്തുകയും അസഭ്യം പറയുകയും ചെയ്തു. തുടര്‍ന്നു തന്‍റെ കൈയില്‍ കരുതിയിരുന്ന ഹെല്‍മെറ്റ് ഉപയോഗിച്ച് ഇയാള്‍ സഞ്ജയനെ മര്‍ദിക്കുകയായിരുന്നു. നെഞ്ചിനും ഇടതു ഷോള്‍ഡറിനും അടിയേറ്റ സഞ്ജയന്‍റെ കണ്ണിനും സാരമായി പരിക്കേറ്റിട്ടുണ്ട്. ഇദ്ദേഹം ആദ്യം തിരുവനന്തപുരം ജനറല്‍ ആശുപത്രിയിലും തുടര്‍ന്ന് തിരുവനന്തപുരം മെഡിക്കല്‍കോളജ് ആശുപത്രിയിലും ചികിത്സ തേടി. നിരവധി ക്രിമിനല്‍ കേസുകളിലെ പ്രതിയാണ് ആഷിഖ് എന്നു പോലീസ് അറിയിച്ചു. കരമന സിഐ അനൂപ്, എസ്ഐമാരായ സന്ദീപ്, അജിത്കുമാര്‍, സി പിഒ ഹിരണ്‍ എന്നിവരാണു പ്രതിയെ പിടികൂടിയത്. ഇയാളെ കോടതി റിമാന്‍ഡ് ചെയ്തു.

പുനലൂർ രൂപതയിൽ വനിതാസംഗമം നടത്തി

പുനലൂർ: ജൂബിലി 2025ന്‍റെ ഭാഗമായി പുനലൂർ രൂപതയിലെ വിവിധ ഇടവകയിലെ വനിതകളുടെ സംഗമം പുനലൂർ സെന്‍റ്മേരീസ് കത്തീഡ്രൽ അങ്കണത്തിൽ നടത്തി.വനിതാ സംഗമം വിളക്കുടി പഞ്ചായത്ത് പ്രസിഡന്‍റ് റെജീന തോമസ് ഉദ്ഘാടനം ചെയ്തു. രൂപതാ വൈസ് പ്രസിഡന്‍റ് സീന ജോജോ സംഗമത്തിൽ അധ്യക്ഷത വഹിച്ചു.പുനലൂർ രൂപതാ ബിഷപ് ഡോ. സെൽവിസ്റ്റർ പൊന്നുമുത്തൻ ഓൺലൈനായി അനുഗ്രഹ പ്രഭാഷണം നടത്തി. സ്ത്രീ പങ്കാളിത്തം സഭയിലും സമൂഹത്തിലും എന്നവിഷയത്തെക്കുറിച്ച്കെ ആർ എൽ സി സി വൈസ് പ്രസിഡന്‍റ് ജോസഫ് ജൂഡ് ക്ലാസ് നയിച്ചു.വനിതാ സംരംഭകത്വം , കുടുംബ ബജറ്റ് എന്ന വിഷയങ്ങളെക്കുറിച്ച് ജോൺസൺ ഏലിയാസ് ക്ലാസുകൾ നയിച്ചു. ആഗോള കത്തോലിക്കസഭാ ജൂബിലിയുടെ ഭാഗമായുള്ള രൂപതാതല ജൂബിലി ആഘോഷങ്ങൾക്ക് നേതൃത്വം നൽകുന്ന രൂപതാ വികാരി ജനറാൾ മോൺ.സെബാസ്റ്റ്യൻ വാസ്, ഫാ. ഷിന്‍റോ എന്നിവർ സംഗമത്തിന് നേതൃത്വം നൽകി. ഡയറക്ടർ റവ. സിസ്റ്റർ ലാൻസി സംഗമത്തിന് വേണ്ട ക്രമീകരണങ്ങൾ നടത്തി.

അലയമണ്‍ പഞ്ചായത്ത് ‘മികവ് 2025’ സംഘടിപ്പിച്ചു

അഞ്ചല്‍ : എസ്എസ്എല്‍സി, പ്ലസ്ടു പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് നേടിയ കുട്ടികളെ അനുമോദിക്കുന്നതിനായി അലയമണ്‍ പഞ്ചായത്ത് മികവ് 2025 സംഘടിപ്പിച്ചു. അലയമണ്‍ ന്യൂ എല്‍പി സ്കൂള്‍ ഓഡിറ്റോറിയത്തില്‍ സംഘടിപ്പിച്ച അനുമോദന ചടങ്ങ് പഞ്ചായത്ത് പ്രസിഡന്‍റ് എം. ജയശ്രീയുടെ അധ്യക്ഷതയില്‍ മന്ത്രി ജെ. ചിഞ്ചുറാണി ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ജി. പ്രമോദ്, ജില്ലാ പഞ്ചായത്ത് അംഗം സി. അംബികാകുമാരി, ബ്ലോക്ക് പഞ്ചായത്ത് അംഗം ഇ.കെ. സുധീര്‍, ഗ്രാമപഞ്ചായത്ത് സ്ഥിരം സമിതി അധ്യക്ഷന്‍മാരായ എം. മുരളി, മിനി ദാനിയേല്‍, ഗീതാകുമാരി, ഗ്രാമപഞ്ചായത്ത് അംഗങ്ങളായ അസീന മനാഫ്, ജി. രാജു, ബിന്ദുലേഖ, അമ്പിളി, ഷൈനി, പിടിഎ പ്രസിഡന്‍റ് പി. സനില്‍കുമാര്‍ തുടങ്ങിയവര്‍ പ്രസംഗിച്ചു.

കണ്ടെയ്നറുകൾ കടൽ തീരത്തെത്താം; ജാഗ്രത പുലർത്തണമെന്ന്

കൊല്ലം: വാൻ ഹായ് 503 കപ്പലിൽ നിന്ന് താഴേയ്ക്ക് പതിച്ച കണ്ടെയ്‌നറുകൾ നാളെ മുതൽ 18വരെ എറണാകുളം ജില്ലയുടെ തെക്കു ഭാഗത്തും ആലപ്പുഴ- കൊല്ലം ജില്ലകളുടെ തീരങ്ങളിലുമായി വന്നടിയാൻ സാധ്യതയുള്ളതായി കോസ്റ്റ് ഗാർഡിൽ നിന്നും വിവരം ലഭിച്ചിട്ടുണ്ട്. പൊതുജനങ്ങൾ കപ്പലിൽ നിന്ന് വീണത് എന്ന് സംശയിക്കുന്നതായ ഒരു വസ്തുവും കടൽ തീരത്ത് കണ്ടാൽ സ്പർശിക്കാൻ പാടുള്ളതല്ല. 200 മീറ്റർ എങ്കിലും അകലം പാലിച്ച് മാത്രം നിൽക്കുക. ഇത്തരം വസ്തുക്കൾ കാണുന്നുണ്ടെങ്കിൽ ഉടൻ തന്നെ 112-ൽ വിളിച്ച് വസ്തു കാണപ്പെട്ട സ്ഥലം എവിടെയാണെന്ന വിവരം അറിയിക്കണമെന്ന് സംസ്ഥാന ദുരന്തനിവാരണ അഥോറിറ്റി മുന്നറിയിപ്പ് നൽകി.

വലിയത്ത് മുക്ക് - ആറുമുറിക്കട റോഡ് ഗതാഗത യോഗ്യമാക്കണമെന്ന്

ചവറ : പന്മന വലിയത്ത് മുക്ക് - ആറുമുറിക്കട പാതയിലൂടെയുള്ള യാത്ര ദുഷ്‌കരമായി മാറുകയാണ്. മഴ പെയ്താല്‍ പൊട്ടിപ്പൊളിഞ്ഞ റോഡിലൂടെ കാല്‍നടയാത്രക്കാര്‍ക്ക് പോകാന്‍ പോലും പറ്റാത്തവസ്ഥയാണ്. മൂന്ന് സ്‌കൂളുകളിലെ കുട്ടികള്‍ ഇതുവഴിയാണ് പോകേണ്ടത്. സ്‌കൂള്‍ ബസുള്‍പ്പെടെ പോകാന്‍ പോലും കഷ്ടപ്പെടുകയാണ്. വലിയ വാഹനങ്ങള്‍ വരുമ്പോള്‍ കാല്‍ നടയാത്രക്കാര്‍ക്ക് മാറി നില്‍ക്കാന്‍ പോലും പറ്റാത്ത സാഹചര്യമാണിവിടുള്ളതെന്ന് നാട്ടുകാര്‍ പറയുന്നു. സൈക്കിളില്‍ വരുന്ന വിദ്യാര്‍ഥികളുള്‍പ്പെടെ ഉള്ളവർ വെള്ളം നിറഞ്ഞ് കിടക്കുന്ന റോഡിലെ കുഴിയിലെ വെള്ളക്കെട്ടിൽ വീണ് അപകടം ഉണ്ടാകുന്നതും നിത്യ സംഭവമാണെന്ന് നാട്ടുകാര്‍ പറയുന്നു.

കുളത്തൂപ്പുഴ കളങ്കുന്നിൽ കടുവയുടെ സാന്നിധ്യം

കുളത്തൂപ്പുഴ: കിഴക്കൻ മലയോര മേഖലയായ കുളത്തൂപ്പുഴ അഞ്ചൽ റേഞ്ചിലെ കളങ്കുന്ന് സെക്ഷനിൽപെട്ട പതിനാറ് ഏക്കർ പ്രദേശത്ത് കടുവയുടെ സാന്നിധ്യം ഉണ്ടായതോടെ പ്രദേശവാസികൾ ഭീതിയിൽ. കഴിഞ്ഞദിവസം രാത്രിയിൽ പ്രദേശത്തെ താമസക്കാർ കടുവയെ കാണുകയും ഉടനെ തന്നെ ആർ ആർടി സംഘത്തെ അറിയിക്കുകയും ചെയ്തു. ഒരു മാസത്തിനു മുന്പ് രാവിലെ ജോലിക്ക് പോയ ആൾക്കാർ കടുവയെ കണ്ടിരുന്നു. ആ കടുവയുടെ ജഡം ദിവസങ്ങൾക്ക് ശേഷം തെന്മല നെടുവന്നൂർ കടവ് പൂമ്പാറ പ്രദേശത്ത് ആറ്റിൻ തീരത്ത് കണ്ടെത്തി. ആറ്റിൽ കുളിക്കാൻ വന്നവരാണ് കടുവയുടെ ജഡം കണ്ടത്. ഈ പ്രദേശങ്ങളിൽ കാട്ടുപോത്തിന്‍റെയും ആനയുടെയും മറ്റ് മൃഗങ്ങളുടെയും ശല്യം രൂക്ഷമാണ്. അഞ്ചൽ റെയ്ഞ്ച് ഓഫീസർ അജിത് കുമാറിന്‍റെ നേതൃത്വത്തിൽ ആർആർടി സംഘവും കളങ്കുന്ന് സെക്ഷൻ ഫോറസ്റ്റ് ഓഫീസർ ഉല്ലാസ്, ബീറ്റ് ഫോറസ്റ്റ് ഓഫീസർമാരായ ശ്രീകുമാർ, രമ്യ, അഭിലാഷ്, എന്നിവരുടെ നേതൃത്വത്തിൽ പ്രദേശത്ത് പരിശോധന നടത്തി. ആവശ്യമെങ്കിൽ പ്രദേശത്ത് കാമറ സ്ഥാപിച്ച് നിരീക്ഷണം നടത്തുമെന്ന് അഞ്ചൽ റേഞ്ച് ഓഫീസർ അജികുമാർ അറിയിച്ചു.

യുവാവ് കായലിൽ മുങ്ങി മരിച്ച നിലയിൽ

കൊല്ലം: യുവാവിനെ കായലിൽ മുങ്ങി മരിച്ച നിലയിൽ കണ്ടെത്തി. കൊല്ലം തങ്കശേരി തോട്ടയ്ക്കാട് നഗർ–10 കലവറ തെക്കതിൽ ഹൗസിൽ ഷാനവാസിന്‍റെയും സജീന ബീഗത്തിന്‍റെയും മകൻ സിനാൻ ഷാനവാസ് (20) ആണു മരിച്ചത്. കഴിഞ്ഞ ദിവസം വൈകിട്ടു വീട്ടിൽ നിന്നു പോയ സിനാൻ രാത്രിയായിട്ടും തിരച്ചെത്തിയില്ല. മൊബൈൽ സ്വിച്ച് ഓഫ് ചെയ്ത നിലയിലായിരുന്നു. തുടർന്നു ബന്ധുക്കൾ വെസ്റ്റ് പോലീസിൽ പരാതി നൽകി. ഇതിനിടെ ഇദ്ദേഹത്തിന്‍റെ ബൈക്ക് അഷ്ടമുടി കായലിലെ ഓലയിൽക്കടവ് പാലത്തിനു സമീപത്തു നിന്നു കണ്ടെത്തി. തുടർന്ന് തിരച്ചിൽ നടത്തുന്നതിനിടെ ആണു മൃതദേഹം കണ്ടെത്തിയത്. കബറടക്കം ഇന്ന് ഒന്നിന് മുളങ്കാടകം മാവള്ളി മുസ്‌ലിം ജുമാ മസ്ജിദിൽ. സഹോദരൻ: സഹദ് ഷാനവാസ്. വെസ്റ്റ് പോലീസ് കേസെടുത്തു.

പണം നൽകിയില്ല; പുനലൂർ നഗരസഭ കൗൺസിൽ ഹാളിലെ കസേരകൾ തിരികെ കൊണ്ടുപോയി

പുനലൂർ : നഗരസഭയിൽ കൗൺസിൽ ഹാളിൽ ചെയർപേഴ്സൺ ഉൾപ്പെടെയുള്ള കൗൺസിലർമാർക്കുള്ള പുതിയ കസേരകൾക്ക് പണം നൽകിയില്ലെന്ന് ആരോപിച്ച് നാലു മാസങ്ങള്‍ക്ക് ശേഷം കസേര നല്‍കിയ സ്ഥാപനം കസേരകൾ തിരികെ എടുത്തു കൊണ്ടു പോയത് വിവാദമാകുന്നു. മാർച്ച് ആദ്യം നഗരസഭയിൽ കൂടിയ പ്രക്ക്വയര്‍മെന്‍റ് കമ്മിറ്റിയുടെ തീരുമാനപ്രകാരമാണ് നഗരസഭ കൗൺസിൽ ഹാളിൽ കസേരകൾ ഇട്ടത്. എന്നാൽ ഇതേ ചൊല്ലി ഭരണ ഭരണപക്ഷങ്ങൾക്കിടയിൽ കടുത്ത അഭിപ്രായവ്യത്യാസങ്ങൾ ഉണ്ടായതോടെ സ്ഥാപനത്തിന് തുക നൽകുന്നതിന് സെക്രട്ടറി തയാറായില്ല. കസേര നൽകിയ കമ്പനി മാസങ്ങളോളം പണത്തിനുവേണ്ടി നഗരസഭ ഓഫീസിൽ കയറിയിറങ്ങിയെങ്കിലും തുക ലഭിക്കുകയില്ലെന്ന് ബോധ്യപ്പെട്ടതിനെ തുടർന്ന് കഴിഞ്ഞദിവസം നഗരസഭ ഓഫീസിൽ എത്തി കസേരകൾ തിരികെ എടുത്തുകൊണ്ടു പോവുകയായിരുന്നു. ഇന്നലെ രാവിലെ നഗരസഭ ഓഫീസിൽ എത്തിയ പ്രതിപക്ഷ അംഗങ്ങൾ കൗൺസിൽ ഹാളിൽ കസേരകൾ ഇല്ലാത്ത വിഷയം ചൂണ്ടി കാണിച്ചു ചെയർപേഴ്സന്‍റെ മുറിയിൽ സ്റ്റിയറിംഗ് കമ്മിറ്റി യോഗം കൂടിക്കൊണ്ടിരിക്കെ തള്ളിക്കയറി സെക്രട്ടറിയെ തടഞ്ഞുവച്ചു. കസേര കൊണ്ടു ഇട്ടത് താൻ അറിഞ്ഞില്ലെന്നും പണം നൽകാൻ കഴിയില്ലെന്നും അതിനാലാണ് കസേര എടുത്തുകൊണ്ടു പോയതെന്നും സെക്രട്ടറി പ്രതിഷേധക്കാരെ അറിയിച്ചു. ഇക്കാര്യത്തിൽ സെക്രട്ടറിയുടെ ഭാഗത്ത് വീഴ്ച ഉണ്ടായതായി ചെയർപേഴ്സൺ ചൂണ്ടികാട്ടി. ഭരണസമിതിയേയും ഉദ്യോഗസ്ഥരേയും പ്രതിപക്ഷ അംഗങ്ങൾ നിശിതമായി വിമർശിക്കുകയും ബഹളം ഉണ്ടാക്കുകയും ചെയ്തെങ്കിലും ഭരണസമിതി അംഗങ്ങളോ ഉദ്യോഗസ്ഥരോ പ്രതികരിക്കാൻ തയാറായില്ല. എന്നാൽ പ്രതിഷേധക്കാർ മുറി വിട്ടിറങ്ങിയശേഷം ഈ വിഷയത്തെ ചൊല്ലി ഭരണപക്ഷത്തെ വൈസ് ചെയർമാനും മരാമത്ത് കാര്യ ചെയർമാനും തമ്മിൽ വാക്കേറ്റം ഉണ്ടാവുകയും ചെയ്തു. നഗരസഭയുടെ പേരിൽ വരേണ്ട അക്കൗണ്ട് ഇടതു നേതാക്കളുടെ പേരിൽ ആരംഭിക്കുകയും അതിൽ കൂടി ലക്ഷങ്ങൾ മാറി എടുക്കുക തുടങ്ങിയ കാര്യങ്ങളാണ് നഗരസഭ ഓഫീസിൽ നടക്കുന്നതെന്നും യുഡിഎഫ് പാർലമെന്‍ററി പാർട്ടി ലീഡർ ജി. ജയപ്രകാശ് ,കൗൺസിലർമാരായ സാബു അലക്സ്, എൻ. സുന്ദരേശൻ, കെ കനകമ്മ, കെ.ബിജു, കെ.എന്‍. ബിപിന്‍ കുമാര്‍, ഷെമി അസീസ്, നിര്‍മ്മല സത്യന്‍, ജ്യോതി സന്തോഷ് എന്നിവര്‍ അറിയിച്ചു.

നീരൊഴുക്ക് തടസപ്പെടുത്തി റോഡ് നവീകരിച്ചു : മരണ വീട്ടിലേക്ക് പോകാൻ റോഡിലെ ചെളിവെള്ളം വറ്റിച്ച് നാട്ടുകാർ

കുളത്തൂപ്പുഴ : നീരൊഴുക്ക് തടസപ്പെടുത്തി റോഡ് നവീകരിച്ചതോടെ ചെളിവെള്ളക്കെട്ട് രൂക്ഷമായി. പാതയോരത്തെ മരണ വീട്ടിലേക്ക് പോകാൻ നാട്ടുകാർക്ക് ചെളിവെള്ളം വറ്റിക്കേണ്ടി വന്നു. കുളത്തൂപ്പുഴ ആറ്റിനുകിഴക്കേകര കരയോഗമന്ദിരം - ഉരിയരികുന്ന് പാതയില്‍ അങ്കണവാടിക്ക് സമീപം ഗൗരി ശങ്കരത്തില്‍ സജികുമാറിന്‍റെ വീടിനു മുന്നിലെ പാതയിലാണ് മഴവെളളം ഒഴുകി പോകാതെ കെട്ടിനിന്നു ചെളിക്കുളമായി മാറിയത്. കഴിഞ്ഞ ദിവസമാണ് സജികുമാറിന്‍റെ ഭാര്യ ഷീലാകുമാരി മരിച്ചത്. തുടര്‍ന്ന് പരിസരവാസികളും നാട്ടുകാരും ബന്ധുക്കളുമെത്തുമ്പോള്‍ വീടിനു മുന്നിലായുള്ള പാത മുഴുവന്‍ ചെളിവെള്ളം നിറഞ്ഞ് വീട്ടിലേക്ക് കടക്കാനാവാത്ത അവസ്ഥയായിരുന്നു. തുടര്‍ന്ന് പരിസര വാസികളില്‍ ചിലര്‍ ചേര്‍ന്ന് റോഡിലെ ചെളിവെള്ളം കോരി സമീപത്തെ ചാലിലേക്ക് ഒഴുക്കി വിടുകയാണ് ഉണ്ടായത്. മഴവെള്ളം കൂടുതലായി ഒഴുകി എത്തിയതോടെ പുറമെ നിന്നും മോട്ടോര്‍ എത്തിച്ച് പാതയിലെ ചെളിവെള്ളം പമ്പ് ചെയ്ത് ഒഴിവാക്കിയാണ് മരണ വീട്ടിലേക്ക് നാട്ടുകാർ പോയത്. കഴിഞ്ഞ ഭരണ സമിതിയുടെ കാലത്ത് ജില്ലാ പഞ്ചായത്ത് ഫണ്ട് ഉപയോഗിച്ചാണ് റോഡ് നവീകരണം നടത്തിയത്. പാതയുടെ നിർമാണത്തിനിടെ ഇരുവശത്തു നിന്നും ഒഴികിയെത്തുന്ന മഴവെളളം കെട്ടിനില്‍ക്കാതെ നീര്‍ച്ചാലിലൂടെ സമീപത്തെ തോട്ടിലേക്ക് പതിച്ചിരുന്നത് തടസപ്പെടുത്തിയതാണ് നിലവിലെ ദുരിതത്തിന് കാരണമായത്. വാഹനങ്ങള്‍ കടന്നുപോകുമ്പോഴും മഴശക്തമാകുമ്പോവും സജിയുടെ വീട്ടിലേക്ക് റോഡിലെ വെളളം ഇരച്ചു കയറുന്നത് പതിവാണ്. പാതയുടെ ഇരുവശവും മതില്‍ കെട്ടിയിരിക്കുന്നതിനാൽ വെള്ളം ഒഴുകിപ്പോകാനും മാർഗമില്ല.

കണ്ണുകൊണ്ട് സംസാരിക്കാൻ നേത്രവാദ്

അമൃതപുരി (കൊല്ലം): കണ്ണിന്‍റെ ചലനങ്ങൾ ഉപയോഗിച്ച് ആശയവിനിമയം സാധ്യമാക്കുന്ന സാങ്കേതികവിദ്യ വികസിപ്പിച്ചെടുത്ത് അമൃത വിശ്വവിദ്യാപീഠം അമൃത പുരി കാമ്പസിലെ ഗവേഷകർ. നേത്രവാദ് എന്ന പേരിട്ടിരിക്കുന്ന ഉപകരണം തയാറാക്കിയിരിക്കുന്നത് അമൃതപുരി കാമ്പസിൽ പ്രവർത്തിക്കുന്ന ഹ്യൂമാനിറ്റേറിയൻ ടെക്നോളജി ലാബ്സിലെ (ഹട്ട് ലാബ്സ്) ഡോ. രാജേഷ് കണ്ണൻ മേഘലിംഗത്തിന്‍റെ നേതൃത്വത്തിലാണ്. ശരീരം തളർന്നുപോയവർക്കും മറ്റു സംസാര വൈകല്യങ്ങൾ ഉള്ളവർക്കും കണ്ണിന്‍റെ ചലനങ്ങൾ കൊണ്ട് ആശയവിനിമയം സാധ്യമാക്കുന്ന വിധത്തിലാണ് ഇതിന്‍റെ പ്രവർത്തനം. ഈ ഉപകരണം കണ്ണുകളുടെ ചലനം നിരീക്ഷിക്കുകയും അത് വാക്കുകളാക്കി മാറ്റുകയുമാണ് ചെയ്യുന്നത്. കണ്ണിന്‍റെ ചലനം വിശകലനം ചെയ്ത് വാക്കുകളാക്കി സ്ക്രീനിൽ കാണിക്കുകയും സ്പീക്കറിലൂടെ പുറത്തു പറയുകയും ചെയ്യുന്ന എ ഐ ആൽഗോരിതമാണ് ഉപകരണത്തിന്‍റെ പ്രധാന ഭാഗം. നേത്രവാദ് കണ്ണിന്‍റെ ചലനങ്ങൾ വഴി ഇംഗ്ലീഷ് അക്ഷരമാലയും സംഖ്യകളും വ്യക്തമാക്കുകയും വാക്കുകളും വാക്യങ്ങളും രൂപീകരിച്ച് ആശയവിനിമയം സാധ്യമാക്കുകയും ചെയ്യുന്നു. ഇതിനുപുറമേ പ്രഡിക്റ്റീവ് ടെക്സ്റ്റ് സാങ്കേതിക വിദ്യയും, ഉപയോഗിക്കാൻ സാധ്യതയുള്ള വാക്കുകളുടെ പട്ടികയും ഇതിൽ ഉൾപ്പെടുത്തിയിട്ടുണ്ട്. കാമറ, മോണിറ്റർ, സ്പീക്കർ, കൺട്രോൾ പാനൽ, ചാർജ് ചെയ്ത് ഉപയോഗിക്കാവുന്ന ബാറ്ററി എന്നിവയടങ്ങുന്നതാണ് ഉപകരണം. നിലവിൽ ഇംഗ്ലീഷ്, മലയാളം, ഹിന്ദി എന്നീ ഭാഷകളിൽ മാത്രം ലഭ്യമാകുന്ന ഉപകരണം ഉടൻതന്നെ മറ്റു പ്രാദേശിക ഭാഷകളിലും ലഭ്യമാകും. വിദേശരാജ്യങ്ങളിൽ ലഭ്യമാകുന്ന ഇത്തരം ഉപകരണങ്ങളേക്കാൾ ചെലവ് കുറഞ്ഞതാണ് എന്നതും നേത്രവാദിന്‍റെ സവിശേഷതയാണ്. ടി റ്റു എച്ച് എന്ന സ്റ്റാർട്ടപ്പ് കമ്പനിയാണ് നേത്രവാദിന്‍റെ ഉൽപാദനം കൈകാര്യം ചെയ്യുന്നത്. അമൃത വിശ്വവിദ്യാപീഠം ഹട്ട്‌ലാബ്‌സിന്‍റെ നേതൃത്വത്തിലുള്ള ഈ സ്റ്റാർട്ടപ്പ് കമ്പനി ആരോഗ്യരംഗത്തെ റോബോട്ടിക്സ് മേഖലയിലാണ് പ്രവർത്തിക്കുന്നത്.

ജില്ലയിൽ പകര്‍ച്ചവ്യാധി പ്രതിരോധം ശക്തമാക്കാന്‍ നടപടി

കൊല്ലം: ജില്ലയില്‍ പകര്‍ച്ചവ്യാധി പ്രതിരോധം ശക്തമാക്കാൻ എ ഡി എം ജി. നിര്‍മല്‍കുമാറിന്‍റെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. മാസ്‌ക് ഉപയോഗം പരമാവധി പ്രോത്സാഹിപ്പിക്കും. മഴക്കാലപൂര്‍വ ശുചീകരണം, പകര്‍ച്ചവ്യാധി പ്രതിരോധപ്രവര്‍ത്തനങ്ങള്‍ എന്നിവ നടപ്പിലാക്കുന്നതിന് വിവിധ വകുപ്പുകള്‍ക്ക് ചുമതലകള്‍ നല്‍കി. വെള്ളക്കെട്ടുകൾ ഒഴിവാക്കാനും തടയാനുമുള്ള നടപടികള്‍ക്ക് പ്രാമുഖ്യം നല്‍കും. കൊതുകിന്‍റെ പ്രജനനം തടയാനുമുള്ള നടപടികള്‍ ഊര്‍ജിതമാക്കും. വെള്ളം സംഭരിക്കുന്ന ടാങ്കുകള്‍, കിണറുകള്‍ എന്നിവയുടെ വൃത്തി ഉറപ്പാക്കണം. കൊതുകിന്‍റെ ഉറവിടനശീകരണം, മാലിന്യനിര്‍മാര്‍ജനം, കുടിവെള്ളശുദ്ധീകരണം എന്നിവയില്‍ പ്രത്യേക ശ്രദ്ധ പുലര്‍ത്താനും തീരുമാനമായി. ജലദൗര്‍ലഭ്യമുള്ള സ്ഥലങ്ങളില്‍ കുടിവെള്ളലഭ്യത ഉറപ്പാക്കും. ക്ലോറിനേഷനോടൊപ്പം കുടിവെള്ളഗുണമേന്മ പരിശോധിക്കും. നിര്‍മാണ സ്ഥലങ്ങളില്‍ കൊതുക്, ഈച്ച, എലി എന്നിവ പെരുകാനുള്ളസാഹചര്യങ്ങള്‍ ഒഴിവാക്കണമെന്ന് നിര്‍ദേശിച്ചു.സ്‌കൂളും പരിസരവും വൃത്തിയാക്കിയിരിക്കണം. കിണറുകള്‍ ക്ലോറിനേറ്റ് ചെയ്യണം. ശുചിമുറികളും വൃത്തിയാണെന്ന് ഉറപ്പാക്കണം. സ്‌കൂളുകളില്‍ ഡ്രൈഡേ ആചരിക്കണം. വിദ്യാര്‍ഥികള്‍ക്കും ജീവനക്കാര്‍ക്കും പകര്‍ച്ചവ്യാധി പ്രതിരോധ ബോധവത്കരണം നല്‍കും. അങ്കണവാടികളിലും നഴ്സറികളിലും കൊതുക്, ഈച്ച, എലി എന്നിവയുടെ ഉറവിടങ്ങള്‍ ഇല്ലെന്ന് സാമൂഹ്യനീതി വകുപ്പ് ഉറപ്പുവരുത്തണം. റബര്‍, അടയ്ക്ക, കൈതച്ചക്ക, മുള, കൊക്കോ തുടങ്ങിയ തോട്ടങ്ങളില്‍ വെള്ളം കെട്ടിനിന്ന് കൊതുക് വളരാനുള്ള സാഹചര്യം ഒഴിവാക്കണം. കൃഷിപ്പണിക്കാര്‍ എലിപ്പനിക്കെതിരെ വ്യക്തിഗത സുരക്ഷാമാര്‍ഗങ്ങള്‍ സ്വീകരിക്കണമെന്നും എഡിഎം നിർദേശിച്ചു. അതിഥി തൊഴിലാളികളുടെ വിവരശേഖരണം-രജിസ്‌ട്രേഷന്‍, ആരോഗ്യപരിശോധന, ബോധവത്ക്കരണം എന്നിവ തൊഴില്‍ വകുപ്പ് ഏകോപിപ്പിക്കാന്‍ നിര്‍ദേശം നല്‍കിയിട്ടുണ്ട്. തീരപ്രദേശങ്ങളില്‍ ഉപയോഗശൂന്യമായ ബോട്ടുകള്‍, ഐസ് പ്ലാന്‍റുകള്‍, മീന്‍ വില്‍ക്കുന്ന ബോക്‌സുകള്‍ എന്നിവയില്‍ കൊതുക് വളരുന്നില്ലെന്ന് ഫിഷറീസ് വകുപ്പ് ഉറപ്പാക്കണം. എ ഡി എമ്മിന്‍റെ ചേമ്പറില്‍ ചേര്‍ന്ന യോഗത്തില്‍ ജില്ലാ സര്‍വൈലന്‍സ് ഓഫീസര്‍ ഡോ. സിന്ധു ശ്രീധരന്‍, ജില്ലാ എപിഡമോളജിസ്റ്റ് ഡോ. അഖില്‍ രാജ്, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ചണ്ണപ്പേട്ട ഓന്തുപച്ച വനപാതയില്‍ ശുചിമുറി മാലിന്യം തള്ളി; പ്രതിഷേധവുമായി നാട്ടുകാർ

അഞ്ചല്‍ : മലയോരഹൈവേയിൽ നിന്നും ചണ്ണപ്പേട്ട ഓന്തുപച്ച വനപാതയില്‍ ജനവാസമേഖലയോട് ചേർന്ന് കിടക്കുന്ന കേരള ഫോറെസ്റ്റ് ഡെവലപ്പ്മെന്‍റ് കോർപറേഷൻ വക വനഭൂമിയിൽ വ്യാപകമായി ശുചിമുറി മാലിന്യം തള്ളുന്നതായി പരാതി. വന്‍തോതില്‍ മാലിന്യം തള്ളിയതോടെ അസഹ്യമായ ദുർഗന്ധം കാര ണം പാതയിൽ കൂടി യാത്ര ചെയ്യാൻ പറ്റാത്ത അവസ്ഥ യാണ്. അലയമണ്‍ കുളത്തൂപ്പുഴ പഞ്ചായത്തുകളെ ബന്ധിപ്പിക്കുന്ന പാതയില്‍ പല ഭാഗങ്ങളിലായി ലോഡ് കണക്കിന് മാലിന്യങ്ങളാണ് തള്ളിയത്. കെഎഫ്ഡിസി വിവിധയിടങ്ങളില്‍ ചെക്ക് പോസ്റ്റുകൾ സ്ഥാപിച്ചിട്ടുണ്ടെങ്കിലും നിലവിൽ പോസ്റ്റുകൾ ഘടിപ്പിച്ച തൂണുകൾ മാത്രമേ ഉള്ളു. വർഷങ്ങളായി ഈ ഭാഗങ്ങളിൽ മാലിന്യം തള്ളിയത് ചൂണ്ടി കാട്ടി പലതവണ അധികൃതരെ അറിയിച്ചിട്ടും യാതൊരു നടപടിയും ബന്ധപ്പെട്ടവരുടെ ഭാഗത്ത് നിന്നുണ്ടായിട്ടില്ല. മാലിന്യം തള്ളുന്നവരെ പിടികൂടാൻ സിസിടിവി കാമറ സ്ഥാപിക്കാൻ ആവശ്യപ്പെട്ടിട്ടും യാതൊരു നടപടിയുമില്ല. തൊഴിലുറപ്പ് തൊഴില്‍പോലും ചെയ്യാന്‍ പറ്റാത്ത അവസ്ഥ യാണ് ഇപ്പോൾ ഉള്ളത്. സംഭവത്തില്‍ പോലീസ്, വനം വകുപ്പ് അധികാരികള്‍ കൃത്യമായി ഇടപെടുകയും നടപടി സ്വീകരിക്കുകയും വേണമെന്ന് ആവശ്യപ്പെട്ടു കുളത്തൂപ്പുഴ അലയമണ്‍ പഞ്ചായത്തുകളിലെ ജനപ്രതിനിധികള്‍, ഇടവക വികാരി, പൊതുപ്രവര്‍ത്തകര്‍ ഉള്‍പ്പടെയുള്ളവര്‍ പ്രതിഷേധിച്ചു. നടപടിയില്ലെങ്കില്‍ ശക്തമായ സമരപരിപാടികളിലേക്ക് നീങ്ങാനാണ് ഇവരുടെ തീരുമാനം. ഫാ. സുനിത് മാത്യു, ജനപ്രതിനിധികളായ ഉദയകുമാര്‍, ജേക്കബ് മാത്യു, ബിനു സി ചാക്കോ, പൊതുപ്രവര്‍ത്തകരായ ഷഫീക് ചോഴിയക്കോട്, സജി ഇല്ലിക്കല്‍, ലിജോ തടത്തില്‍ എന്നിവരുടെ നേതൃത്വത്തിലായിരുന്നു പ്രതിഷേധം. അതേസമയം മാലിന്യം മുഴുവൻ മഴ പെയ്യുമ്പോൾ തകരമൺതോട് വഴി ഒലിച്ചു ഇത്തിക്കര ആറ്റിലേക്ക് എത്തുമെന്നും വന്യമൃഗങ്ങൾക്ക് അടക്കം പകർച്ചവ്യാധി രോഗങ്ങൾ പിടിപെടാൻ സാധ്യത ഏറെയാണെന്നും നാട്ടുകാര്‍ പറയുന്നു. അടിയന്തരമായി ബന്ധപ്പെട്ട അധികൃതർ ഇടപെട്ടു മാലിന്യം തള്ളുന്നവർക്ക്‌ എതിരെ ശക്തമായ നിയമനടപടികൾ സ്വീകരിക്കണമെന്ന് നാട്ടുകാർ പറഞ്ഞു.

ദേശീയപാതയിൽ മരം കടപുഴകി വീണു

എഴുകോൺ : കൊല്ലം തിരുമംഗലം ദേശീയപാതയിൽ മരം കടപുഴകി വീണു. എഴുകോണിനും ചീരങ്കാവിനും മധ്യേ പെട്രോൾ പമ്പിന് സമീപം നിന്ന യൂക്കാലി മരമാണ് കടപുഴകി വീണത്. ഇന്നലെ പുലർച്ചെ 5. 30 തിന് ആയിരുന്നു സംഭവം. മരം ഇലവൻ കെവി ലൈനിൽ തട്ടിയതോടെ കമ്പികൾ പൊട്ടി താഴെ വീണു. തുടർന്ന് വൈദ്യുത ലൈനിൽ തട്ടി നിന്നു വലിയ ശബ്ദവും തീയും ഉണ്ടായത് നാട്ടുകാരിൽ ഭീതി പരത്തി. മരത്തിന് സമീപത്തായി ഉള്ള ചായക്കട തുറക്കാൻ ഉടമസ്ഥ എത്തുന്നതിന് തൊട്ടുമുൻപ് ആയിരുന്നു അപകടം. ഇലക്ട്രിസിറ്റി സബ്സ്റ്റേഷൻ അടുത്ത് ആയതിനാൽ ജീവനക്കാരെത്തി പെട്ടെന്ന് വൈദ്യുതി വിച്ഛേദിക്കാൻ കഴിഞ്ഞത് ദുരന്തമൊഴിവാക്കി. എഴുകോൺ ഇലക്ട്രിസിറ്റി സബ്സ്റ്റേഷന്‍റെ അധീനതയിലുള്ള പ്രദേശങ്ങളിൽഏറെനേരം വൈദ്യുതി വിതരണം തടസപ്പെട്ടു. ക്രെയിൻ എത്തിച്ച് മരം നീക്കം ചെയ്ത് വൈദ്യുത തടസം പുനസ്ഥാപിക്കുകയായിരുന്നു. എഴുകോൺ റെയിൽവേ സ്റ്റേഷൻ പരിസരം മുതൽ പെട്രോൾ പമ്പ് വരെയുള്ള വളവിന്‍റെ ഭാഗം വരെ വർഷങ്ങൾ പഴക്കമുള്ള നിരവധി മരങ്ങളാണ് ജനങ്ങളുടെ ജീവനു ഭീഷണിയായി നിൽക്കുന്നത്. ഒരു ദുരന്തം ഉണ്ടാകുന്നതിനു മുമ്പ് അധികാരികൾ കണ്ണ് തുറക്കണമെന്നാണ് നാട്ടുകാരുടെ ആവശ്യം.

കനത്ത മഴ; പുനലൂരിൽ വീട് തകർന്നു

പുനലൂർ : കനത്ത മഴയിൽ വീട് പൂർണമായി തകർന്നു.ഗൃഹനാഥൻ അത്ഭുതകരമായി രക്ഷപ്പെട്ടു. പുനലൂർ നഗരസഭയിൽ കലങ്ങുംമുകൾ പകിടിയില്‍ ചരുവിള പുത്തൻവീട്ടിൽ കുമാറിന്‍റെ വീടാണ് കഴിഞ്ഞദിവസം രാത്രിയിൽ കനത്ത മഴയിൽ തകർന്നു വീണത്. രാത്രി പന്ത്രണ്ടരയോടെ അടുത്ത മുറിയിൽ കേട്ട ശബ്ദം എലിയുടേതാണെന്ന് കരുതി അത് നോക്കാനായി അകത്തെ മുറിയിലേക്ക് കുമാർ പോയ സമയത്ത് വീടിന്‍റെ മേൽക്കൂരയും ഭിത്തിയും കട്ടിൽ കിടന്ന സ്ഥലത്തേക്ക് പൂർണമായും തകർന്നു വീഴുകയായിരുന്നു. ഭാര്യ സുമിനയും മക്കളും ഇതിനോട് ചേർന്ന സഹോദരിയുടെ വീട്ടിൽ കിടന്നുറങ്ങുകയായിരുന്നു. സംഭവമറിഞ്ഞ് സ്ഥലത്തെത്തിയ വാർഡ് കൗൺസിലർ ജി.ജയപ്രകാശ് അറിയിച്ചതിനെ തുടർന്ന് പുനലൂര്‍ വില്ലേജ് ഓഫീസര്‍ ബിനീഷിന്‍റെ നേതൃത്വത്തിൽ റവന്യൂ ഉദ്യോഗസ്ഥ സംഘം സ്ഥലത്ത് എത്തുകയും പരിശോധന നടത്തി തുടർനടപടികൾ ആരംഭിക്കുകയും ചെയ്തു.

പത്തടി, തുമ്പോട്, ഭാരതീപുരം മേഖലയിൽ പുലി ഇറങ്ങിയെന്ന് നാട്ടുകാർ

അഞ്ചല്‍ : വനം വകുപ്പ് അഞ്ചല്‍ റേഞ്ചില്‍ ഉള്‍പ്പെടുന്ന പത്തടി, തുമ്പോട്, ഭാരതീപുരം മേഖലകളില്‍ പുലിയെ കണ്ടുവെന്ന് നാട്ടുകാര്‍ പറഞ്ഞതോടെ പ്രദേശങ്ങളില്‍ ജനങ്ങള്‍ വലിയ ഭീതിയിലാണ്. വനാതിര്‍ത്തിയില്‍ താമസിക്കുന്ന വീട്ടമ്മയും ഓട്ടോറിക്ഷ ഡ്രൈവറും പുലിയെ കണ്ടുവെന്ന് പറയുന്നു. നാട്ടുകാര്‍ പുലിയെന്ന് ആവര്‍ത്തിക്കുമ്പോഴും നാട്ടുകാർ കണ്ടത് പുലിയല്ലെന്നാണ് വനം വകുപ്പ് പറയുന്നത്. അതേസമയം നാട്ടുകാരുടെ ഭീതിയകറ്റാന്‍ ശക്തമായ നടപടി സ്വീകരിക്കണമെന്ന് ആവശ്യപ്പെട്ട് അഞ്ചല്‍ റേഞ്ച് ഫോറസ്റ്റ് ഓഫീസര്‍ക്ക് ഡിവൈഎഫ്ഐ അഞ്ചല്‍ ബ്ലോക്ക് കമ്മിറ്റി നിവേദനം നല്‍കി. സെക്രട്ടറി ഷൈന്‍ ബാബുവിന്‍റെ നേതൃത്വത്തിലുള്ള സംഘമാണ് റേഞ്ച് ഓഫീസര്‍ അജികുമാറിന് കഴിഞ്ഞ ദിവസം നിവേദനം നല്‍കിയത്. ഡിവൈഎഫ്ഐ നൽകിയ നിവേദനത്തേ തുടര്‍ന്നു പുലിയെ കണ്ടുവെന്ന് നാട്ടുകാര്‍ പറഞ്ഞ സ്ഥലത്തു വനം വകുപ്പ് ട്രാപ് കാമറകള്‍ സ്ഥാപിച്ചു. കുതിരച്ചിറയിലും, ഓയില്‍പാം കണ്‍വന്‍ഷന്‍ സെന്‍ററിന് സമീപത്തുമാണ് കാമറകള്‍ സ്ഥാപിച്ചിട്ടുള്ളത്. ഇതോടൊപ്പം നിരീക്ഷണം കൂടി ശക്തമാക്കുമെന്നും റേഞ്ച് ഓഫീസര്‍ അറിയിച്ചു. ഒരാഴ്ച മുമ്പ് പത്തടിയില്‍ ഫാമിന് പരിസരത്ത് നാട്ടുകാര്‍ പുലിയെ കണ്ടതായി വനം വകുപ്പ് അധികൃതരെ വിവരം അറിയിച്ചിരുന്നു. പുലിയുടേതിന് സമാനമായ സിസിടിവി ദൃശ്യങ്ങളും കൈമാറിയിരുന്നു. ഇത് പുലിയല്ലെന്നും കാട്ടുപൂച്ചയാണെന്നും പറയുന്ന വനം വകുപ്പ് പക്ഷേ ഇക്കാര്യത്തില്‍ കൃത്യമായ സ്ഥിരീകരണം നല്‍കാത്തത് ജനങ്ങളില്‍ ആശങ്ക ഉയര്‍ത്തുകയാണ്. ഒരു മാസം മുമ്പ് കുളത്തൂപ്പുഴയില്‍ നാട്ടുകാര്‍ കടുവയെ കണ്ടുവെന്ന് പറഞ്ഞിരുന്നുവെങ്കിലും വനം വകുപ്പ് ഇത് മുഖവിലക്കെടുത്തിരുന്നില്ല. പിന്നീട് കല്ലടയാറ്റില്‍ കടുവയുടെ ജഡം കണ്ടെത്തുകയും ചെയ്തിരുന്നു. മറ്റൊരു കടുവയുമായുള്ള സംഘട്ടനത്തെ തുടര്‍ന്നുള്ള പരിക്കാണ് കടുവയുടെ മരണ കാരണം എന്നാണ് പ്രാഥമിക നിഗമനം. ഇത് പ്രദേശത്ത് കൂടുതല്‍ കടുവകളുടെ സാന്നിധ്യം ഉറപ്പിക്കുകയാണ്. വനം വകുപ്പ് ക്രിയാത്മകമായി ഇക്കാര്യത്തില്‍ ഇടപെടണം എന്നു നാട്ടുകാരും ജനപ്രതിനിധികളും പൊതുപ്രവര്‍ത്തകരും ആവശ്യപ്പെടുന്നു.

ലഹരിവിരുദ്ധ ക്ലാസ് സംഘടിപ്പിച്ചു

കുളത്തൂപ്പുഴ : കുളത്തൂപ്പുഴ ഗവ. മോഡൽ റസിഡൻഷ്യൽ സ്കൂളിൽ കുളത്തൂപ്പുഴ ജനമൈത്രി പോലീസിന്‍റെയും സ്കൂൾ എസ്പി സി യൂണിറ്റിന്‍റെയും ആഭിമുഖ്യത്തിൽ സ്കൂളിൽ ലഹരി വിരുദ്ധ ബോധവത്കരണ ക്ലാസ് സംഘടിപ്പിച്ചു. കുളത്തൂപ്പുഴ പോലീസ് സബ് ഇൻസ്പെക്‌ടർ എം.ഷാജഹാൻ, അസി. സബ് ഇൻസ്പെക്‌ടർ എ.റഹീം എന്നിവർ ബോധവത്കരണ ക്ലാസെടുത്തു. എംആർഎസ് സ്കൂളിൽ ഹയർ സെക്കനൻഡറിയിൽ ഉന്നത വിജയം നേടിയ വിദ്യാർഥി എം.സുജിത്തിനെ ചടങ്ങിൽ ആദരിച്ചു. സ്കൂൾപ്രഥമാധ്യാപിക സി.ഗിരിജ, എസ്പിസി യൂണിറ്റ് സിപിഒ ആർ.സന്തോഷ്, സ്റ്റാലിൻ എന്നിവർ പ്രസംഗിച്ചു.

സ്കിൽ ഡെവലപ്മെന്‍റ് സെന്‍റർ ഉദ്ഘാടനം

ചവറ: സമഗ്ര ശിക്ഷാ കേരള, ചവറ ബിആർസി എന്നിവയുടെ സംയുക്താഭിമുഖ്യത്തിൽ നടപ്പിലാക്കുന്ന സ്കിൽ ഡെവലപ്മെന്‍റ് സെന്‍ററിന്‍റെ ഉദ്ഘാടനവും പ്രവർത്തനവും കൊറ്റംകുളങ്ങര ഗവ. വൊക്കേഷണൽ ഹയർ സെക്കൻഡറി സ്കൂളിൽ ആരംഭിച്ചു. പരിപാടിയുടെ ഉദ്ഘാടനം സുജിത് വിജയൻ പിള്ള എംഎൽഎ നിർവഹിച്ചു. നമുക്ക് ലഭിക്കുന്ന വിജ്ഞാനത്തെ സമ്പത്താക്കി മാറ്റാൻ ഓരോരുത്തർക്കും കഴിയണമെന്ന് ഉദ്ഘാടന പ്രസംഗത്തിൽ എംഎൽഎ അഭിപ്രായപ്പെട്ടു. പിടിഎ പ്രസിഡന്‍റ് ജി .ഉണ്ണികൃഷ്ണൻ ചടങ്ങിൽ അധ്യക്ഷനായി. വിദ്യാ കിരണം ജില്ലാ മിഷൻ കോ ഓർഡിനേറ്റർ കിഷോർ കെ .കൊച്ചയം പദ്ധതിയെ പറ്റി വിശദീകരിച്ചു. ചവറ ഐ ആർ ഇ എൽ ജനറൽ മാനേജർ ആന്‍റ് ഹെഡ് എൻ.എസ്. അജിത്ത്, ചവറ ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി, ജില്ലാ പഞ്ചായത്തംഗം സി.പി. സുധീഷ് കുമാർ, ചവറ പഞ്ചായത്ത് വൈസ് പ്രസിഡന്‍റ് ജയലക്ഷ്മി, ബ്ലോക്ക് പഞ്ചായത്ത് അംഗം സി.രതീഷ്, എസ്എസ്കെ കൊല്ലം ഡിപിഒ എച്ച്. ആർ. അനിത, എസ് എം സി ചെയർമാൻ പ്രസന്നകുമാർ , ഹയർസെക്കൻഡറി പ്രിൻസിപ്പൽ എസ്. മായാദേവി, വിഎച്ച്എസ്ഇ വിഭാഗം പ്രിൻസിപ്പാൾ രജിമോൾ, ഹൈസ്കൂൾ വിഭാഗം പ്രഥമഅധ്യാപിക എ.സുലത, ബിആർസി ട്രെയിനർ പി. മേരി ഉഷ, ആർ.ആതിര, ടി.കെ.ഗീത, എ.കെ.ദിലീപ് കുമാർ തുടങ്ങിയവർ പ്രസംഗിച്ചു. നൈപുണ്യവികസന കെട്ടിടത്തിന്‍റെ പുനരുദ്ധാരണ നിർമാണ പ്രവർത്തനങ്ങൾ ചവറ ഐആർഇയുടെ സഹായത്തോടെയാണ് നടപ്പിലാക്കിയത്.

പോലീസുകാരെ നായയെവിട്ടു കടിപ്പിച്ച യുവാവ് അറസ്റ്റിൽ

കുണ്ടറ : അടിപിടി കേസിൽ അറസ്റ്റ് ചെയ്യാനെത്തിയ എസ്ഐയേയും പോലീസുകാരേയും നായയെ വിട്ടു കടിപ്പിച്ച യുവാവിനെ പോലീസ് അറസ്റ്റ് ചെയ്തു. പടപ്പക്കര നെല്ലിമുക്കിലാണ് എസ്ഐയേയും കൂടെയുണ്ടായിരുന്ന പോലീസുകാരേയും ജിജേഷ് നായയെ വിട്ട് കടിപ്പിച്ചത്. കഴിഞ്ഞ ദിവസം രാത്രി നെല്ലിമുക്കിൽ ഉണ്ടായ അടിപിടി കേസിൽ ജിജേഷിനെ അറസ്റ്റ് ചെയ്യാനെത്തിയതാണ് എസ്ഐ യും പോലീസുകാരും. പ്രതിയായ ജിജേഷിനെ അറസ്റ്റ് ചെയ്യാൻ ശ്രമിക്കുന്നതിനിടെ എസ്ഐയെ തള്ളി താഴെയിട്ട ജിജേഷ് എസ് ഐ യുടെ കാലിൽ കടിച്ചു. തുടർന്ന് ചാടി എണീറ്റ് കൂടെയുണ്ടായിരുന്ന നായയെ ഉപയോഗിച്ച് എസ്ഐ യേയും പോലീസുകാരെയും കടിപ്പിച്ചു. എസ് ഐ അറിയിച്ചതനുസരിച്ച് കൂടുതൽ പോലീസ് എത്തിയാണ് ഇയാളെ കീഴ്പ്പെടുത്തുന്നത്. പിടികൂടിയ ശേഷം പോലീസ് ജീപ്പിന്‍റെ ഗ്ലാസുകളും ഇയാൾ അടിച്ചു പൊട്ടിച്ചു. പ്രതി നേരത്തെ പല കേസുകളിലും പ്രതിയാണെന്ന് പോലീസ് അറിയിച്ചു. പരിക്കേറ്റ എസ്ഐയും മറ്റു പോലീസുകാരും പ്രാഥമിക ചികിത്സയ്ക്ക് ശേഷം ജോലിയിൽ പ്രവേശിച്ചു.

അനുമോദിച്ചു

ചവറ : കേരള മത്സ്യത്തൊഴിലാളി ക്ഷേമനിധി ബോർഡ് (മത്സ്യബോർഡ്) സംസ്ഥാനത്തെ മത്സ്യതൊഴിലാളികളുടെയും മത്സ്യ മേഖലയിലെ അനുബന്ധ തൊഴിലാളികളുടെയും കുട്ടികൾക്ക് വിദ്യാഭ്യാസ അവാർഡും കായിക പ്രോത്സാഹന അവാർഡും നൽകി. 2025 വർഷത്തെ വിദ്യാഭ്യാസ- കായിക പ്രോത്സാഹന അവാർഡ് വിതരണ ജില്ലാതല ഉദ്ഘാടനം നീണ്ടകര സെന്‍റ് സെബാസ്റ്റ്യൻ പാരിഷ് ഹാളിൽ സുജിത്ത് വിജയൻ പിള്ള എംഎൽഎ ഉദ്ഘാടനം ചെയ്തു. മത്സ്യഫെഡ് ചെയർമാൻ ടി.മനോഹരൻ അധ്യക്ഷനായി. 2024-25 വർഷത്തിൽ എസ്എസ്എൽസി, ടിഎച്ച് എസ്എസ്എൽസി, പ്ലസ് ടു, വെക്കേഷണൽ ഹയർസെക്കൻഡറി, ഫിഷറീസ് ടെക്നിക്കൽ സ്കൂൾ തലങ്ങളിൽ ഉന്നത വിജയം നേടിയ ജില്ലയിലെ അർഹരായ വിദ്യാർഥികൾക്കും കായിക മത്സരങ്ങളിൽ ദേശീയതലത്തിലും സംസ്ഥാനതലത്തിലും ശ്രദ്ധേയമായ വിജയം കരസ്ഥമാക്കിയ വിദ്യാർഥികൾക്കും കാഷ് അവാർഡും മൊമെന്‍റോയും നൽകി. ആകെ 77 ലക്ഷം രൂപയുടെ കാഷ് അവാർഡ് ആണ് വിതരണം ചെയ്തത്. ചവറ ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി, നീണ്ടകര പഞ്ചായത്ത് പ്രസിഡന്‍റ് കെ.രാജീവൻ, ജോളി പീറ്റർ, സലീം, സോളമൻ വെട്ടുകാട്, സി. പയസ്, എ.എ.അനിരുദ്ധൻ, കെ. അനിൽ, തോംസൺ ഗിൽബർട്ട് തുടങ്ങിയവർ പങ്കെടുത്തു.

കഞ്ചാവുമായി യുവാവ് പിടിയിൽ

കൊല്ലം : സ്കൂട്ടറിൽ കടത്തിയ കഞ്ചാവുമായി യുവാവിനെ എക്സൈസ് സംഘം അറസ്റ്റ് ചെയ്തു.മുളങ്കാടകം പള്ളി തെക്കതിൽ വീട്ടിൽ സുനേഷ് (45) ആണ് പിടിയിലായത്. ഒന്നേകാൽ കിലോഗ്രാം കഞ്ചാവ്, 5070 രൂപ, മൊബൈൽ ഫോൺ എന്നിവ ഇയാളിൽ നിന്ന് കണ്ടെടുത്തു. വാടകയ്ക്ക് താമസിക്കുന്ന വീട്ടിൽ സ്കൂട്ടറിൽ ഒളിപ്പിച്ച് വച്ചിരിക്കുകയായിരുന്നു കഞ്ചാവ്.ശക്തികുളങ്ങര മത്സ്യബന്ധന ഹാർബർ, മുളങ്കാടകം, തിരുമുല്ലവാരം, അഞ്ചുകല്ലുംമൂട് എന്നിവിടങ്ങൾ കേന്ദ്രീകരിച്ചാണ് ഇയാൾ കഞ്ചാവ് വില്പ ന നടത്തി വന്നിരുന്നത്. അന്യസംസ്ഥാനങ്ങളിൽ നിന്ന് കഞ്ചാവ് കടത്തി കൊണ്ടുവന്ന് വിവിധ പ്രദേശങ്ങളിലെ ചെറുകിട കച്ചവടക്കാർക്ക് മൊത്ത വിൽപ്പന നടത്തുന്നതായിരുന്നു ഇയാളുടെ രീതി. ശക്തികുളങ്ങര ഹാർബറിൽ ഇത്തരത്തിൽ വൻ തോതിൽ കഞ്ചാവ് കച്ചവടം നടക്കുന്നു എന്ന രഹസ്യ വിവരത്തിന്‍റെ അടിസ്ഥാനത്തിൽ നടത്തിയ നിരീക്ഷണത്തെതുടർന്നാണ് പ്രതിയെ അറസ്റ്റ് ചെയ്തതെന്ന് കൊല്ലം എക്സൈസ് റേഞ്ച് ഇൻസ്പെക്‌ടർ പി.ശങ്കർ പറഞ്ഞു.

കല്ലുവാതുക്കൽ പഞ്ചായത്തിലെ വികസന പ്രവർത്തനങ്ങളെ താറടിച്ചു കാണിക്കുന്നുവെന്ന്

കല്ലുവാതുക്കല്‍ : പഞ്ചായത്തിലെ വികസന പ്രവര്‍ത്തനങ്ങളെ താറടിച്ചു കാണിക്കാനാണ് ഇടതുപക്ഷത്തോടൊപ്പം ചേര്‍ന്നു വികസന സ്റ്റാൻഡിംഗ് കമ്മിറ്റി ചെയര്‍പേഴ്സണ്‍ ശ്രമിക്കുന്നതെന്ന് യുഡിഫ് പാര്‍ലമെന്‍ററി പാര്‍ട്ടി ആരോപിച്ചു . പഞ്ചായത്ത് ഭരണസമിതി ഏറ്റെടുക്കുന്ന പ്രവര്‍ത്തനങ്ങള്‍ക്കൊപ്പം നിന്നു റോഡുകളുടെ നവീകരണ പ്രവര്‍ത്തികള്‍ കൃത്യസമയത്തു ടെണ്ടര്‍ ചെയ്യിക്കുകയോ പുരോഗതി വിലയിരുത്തുകയോ ചെയ്യാതെ എല്‍ഡിഎഫില്‍ കയറികൂടാനാണ് ചെയര്‍പേഴ്സണും കൂട്ടരും ശ്രമിക്കുന്നതെന്നും യുഡിഎഫ് ആരോപിച്ചു. ഏറ്റവും കൂടുതല്‍ ഗ്രാമീണ റോഡിന്‍റെ പ്രവര്‍ത്തികള്‍ നടന്നത് കഴിഞ്ഞ സാമ്പത്തിക വര്‍ഷമാണ്. ജല്‍ജീവന്‍ വര്‍ക്കുകള്‍ ചെയ്താല്‍ കരാറുകാര്‍ക്ക് നല്‍കാന്‍ സര്‍ക്കാരിന്‍റെ കൈയില്‍ പണമില്ലാത്തതിനാല്‍ ഒരാള്‍ പോലും ടെണ്ടര്‍ എടുത്തില്ല. പാറയില്‍ ടൂറിസത്തിനു ഭൂമി വിട്ടു കിട്ടി 20 വര്‍ഷം ഭരിച്ച ഇടതുപക്ഷത്തിനു ഒന്നും ചെയ്യാന്‍ സാധിച്ചില്ല. ഇപ്പോൾ ദേശീയപാത വികസനം കഴിയാതെ മറ്റു പ്രവർത്തികൾ ചെയ്യാൻ സാധിക്കാത്ത സാഹചര്യമാണ്. എംജിഎന്‍ആര്‍ഇഎസ് വര്‍ക്കുകള്‍ എല്ലാം ടെണ്ടര്‍ ചെയ്തു . ഏറ്റവും കൂടുതല്‍ തെരുവുവിളക്കുകള്‍ പുതുക്കി സ്ഥാപിച്ചത് ഈ ഭരണസമിതിയുടെ കാലത്താണ്. മഴക്കാലം മാറിയാലുടന്‍ പുതിയ എല്‍ഇഡി ലൈറ്റുകള്‍ സ്ഥാപിക്കുന്നതിനുള്ള നടപടികള്‍ പൂര്‍ത്തിയായിട്ടുണ്ട്. യാഥാര്‍ഥ്യം ഇതായിരിക്കെ വ്യാജ വാര്‍ത്താ പ്രചരണത്തില്‍ നിന്നും എല്‍ഡിഎഫ് പിന്‍മാറി വികസനത്തിന്‍റെ ഭാഗമാകണമെന്നും യുഡിഫ് പാര്‍ലമെന്‍ററി പാര്‍ട്ടി ലീഡര്‍ പി.പ്രതീഷ്കുമാർ, പഞ്ചായത്ത് പ്രസിഡന്‍റ്എന്‍. ശാന്തിനി , ക്ഷേമകാര്യ സ്റ്റാന്‍റിംഗ് കമ്മിറ്റി ചെയര്‍പേഴ്സണ്‍ ഡി. സുഭദ്രാമ്മ അംഗങ്ങളായ റീനമംഗലത്ത് ,രജനിരാജന്‍, പി.പ്രമീള ,ഹരീഷ് പൂവത്തൂര്‍ , ഉഷാകുമാരി എന്നിവര്‍ ആവശ്യപ്പെട്ടു.

ഡിഇഒയെ നിയമിക്കാത്തത് പ്രതിഷേധാർഹമെന്ന്

കൊല്ലം: ഏറ്റവും കൂടുതൽ ഹൈസ്കൂളുകൾ പ്രവർത്തിക്കുന്ന കൊല്ലം വിദ്യാഭ്യാസ ജില്ലയിൽ ഡിഇഒ യെ നിയമിക്കാത്തത് പ്രതിഷേധാർഹമാണെന്ന് കാത്തലിക് സ്കൂൾ സ്റ്റാഫ് അസോസിയേഷൻ കൊല്ലം രൂപത . ജില്ലയിൽ ഏറ്റവും കൂടുതൽ ഹൈസ്കൂളുകൾ പ്രവർത്തിക്കുന്നത് കൊല്ലം വിദ്യാഭ്യാസ ജില്ലയിലാണ്. കഴിഞ്ഞ കുറേ മാസങ്ങളായി ഡിഇഒ തസ്തിക ഒഴിഞ്ഞു കിടക്കുകയാണ്. പിഎഫ് അടക്കമുള്ള നൂറുകണക്കിന് അപേക്ഷകൾ ഓഫീസിൽ കെട്ടികിടക്കുന്നു .പ്രധാന അധ്യാപകർ വിരമിക്കുകയും സ്ഥലം മാറ്റം ഉണ്ടാകുകയും ചെയ്ത എയ്ഡഡ് സ്കൂളുകളിലെ ശമ്പള ബിൽ മാറുന്നത് ഡിഇഒ മാർ മുഖേനയാണ്. അതിനാൽ നിരവധി എയിഡഡ് സ്കൂൾ അധ്യാപകർക്ക് ശമ്പളം ലഭിക്കാത്ത അവസ്ഥയാണ് നിലവിലുള്ളത്.നിയമന അംഗീകാരം ലഭിക്കുവാനുള്ള അധ്യാപകരുടെ ഫയലുകളുടെ പരിശോധനയും പൂർണമായും സ്തംഭിച്ച അവസ്ഥയാണ്. ഡിഇഒയുടെ പിഎയും അവധിയിൽ പ്രവേശിച്ചതിനാൽ വിദ്യാഭ്യാസ ഓഫീസിന്‍റെ പ്രവർത്തനം പൂർണമായും നിലച്ചു. ഡിഇഒയെ അടിയന്തരമായി നിയമിക്കണമെന്നും അല്ലാത്ത പക്ഷം ശക്തമായ പ്രതിഷേധ പരിപാടികളുമായി മുന്നോട്ട് പോകുമെന്ന് സിഎസ്എസ്എ നേതൃയോഗം ആവശ്യപ്പെട്ടു. നേതൃയോഗം കൊല്ലം രൂപത വിദ്യാഭ്യാസ സെക്രട്ടറി ഫാ. ബിനു തോമസ് ഉദ്ഘാടനം ചെയ്തു. രൂപത പ്രസിഡന്‍റ് ആർ.ബർണാഡ് , സെക്രട്ടറി സുമേഷ് ദാസ് എന്നിവർ പ്രസംഗിച്ചു.

വൈസ്മെന്‍സ് ക്ലബ് വാര്‍ഷികം

കൊട്ടാരക്കര: കൊട്ടാരക്കര വൈസ്മെന്‍സ് ക്ലബിന്‍റെ വാര്‍ഷികവും ഭാരവാഹികളുടെ സ്ഥാനാരോഹണവും നടത്തി. രാജ്യാന്തര കൗണ്‍സില്‍ അംഗംപ്രഫ.തോമസ് ലൂക്കോസ് ഉദ്ഘാടനം ചെയ്തു. പ്രസിഡന്‍റ് മാത്യൂ വര്‍ഗീസ് അധ്യക്ഷത വഹിച്ചു. സ്ഥാനാരോഹണ ശുശ്രൂഷക്കു റീജിയണല്‍ ഡയറക്‌ടർ‍ അഡ്വ. ഡോ. തോമസ്കെ.ജോര്‍ജ് നേതൃത്വം നല്‍കി. കെ. വെങ്കടേശ്, തോമസ് തരകന്‍, ഡോ. മനോജ് ചന്ദ്രസേനന്‍, എസ് .ഉദയകുമാര്‍, വി .തുളസീധരന്‍ പിള്ള, റവ.ഡോ.പി.ജെ .മാമച്ചന്‍, സാബു ജോണ്‍, സൂസന്‍ ഫിലിപ്പ്, സെറിന്‍ , സജി വര്‍ഗീസ്, ജേക്കബ് മാത്യൂ കുരാക്കാരന്‍, ഡോ. ജേക്കബ് തോമസ്, പ്രഫ. പി.കെ.വര്‍ഗീസ് തുടങ്ങിയവര്‍ പ്രസംഗിച്ചു. ഭാരവാഹികളായി പ്രഫ.ജി ജേക്കബ് -പ്രസിഡന്‍റ്, പ്രഫ. കെ.ഒ.ജോണ്‍സന്‍- സെക്രട്ടറി , മാത്യൂ വര്‍ഗീസ് ട്രക്ഷറർഎന്നിവരാണ് ചുമതലയേറ്റത്.

സൗജന്യ നേത്ര ചികിത്സാ ക്യാമ്പ് നാളെ

കുണ്ടറ : തിരുനെൽവേലി അരവിന്ദ് കണ്ണാശുപത്രിയുടെ സഹകരണത്തോടെ കച്ചേരിമുക്ക് സഹൃദയ കലാകേന്ദ്രം, സഹൃദയ നഗർ റസിഡന്‍റ്സ് അസോസിയേഷൻ, വി.വി.ജോസ് ലൈബ്രറി എന്നിവയുടെ സംയുക്താഭിമുഖ്യത്തിൽ നടത്തുന്ന സൗജന്യ നേത്ര ചികിത്സാ ക്യാമ്പ് നാളെ നടക്കുമെന്ന് ഭാരവാഹികൾ അറിയിച്ചു. ജില്ലാ പഞ്ചായത്ത് പ്രസിഡന്‍റ് പി. കെ.ഗോപൻ ഉദ്ഘാടനം ചെയ്യും. കലാകേന്ദ്രം പ്രസിഡന്‍റ് വി.ശിവ പ്രസാദ് അധ്യക്ഷനാകും. രാവിലെ ഏഴു മുതൽ ഉച്ചയ്ക്ക് ഒന്ന് വരെ കാഞ്ഞിരകോട് സെന്‍റ് ആന്‍റണീസ് പള്ളി പാരിഷ് ഹാളിൽ നടക്കുന്ന ക്യാമ്പിൽ തിമിരം, മാല കണ്ണ്, ഹ്രസ്വ ദൃഷ്‌ടി, ദീർഘ ദൃഷ്‌ടി, ചത വളർച്ച തുടങ്ങിയവർക്ക് ചികിത്സ ലഭിക്കും. മാത്രമല്ല സംഘടനയുടെ ചെലവിൽ സമിതി അംഗങ്ങളുടെ സംരക്ഷണയിൽ മുന്നൂറോളം വരുന്ന രോഗികളെ തിരുനെൽവേലി ആശുപത്രിയിൽ കൊണ്ടുപോയി സർജറിക്ക് ശേഷം തിരികെ എത്തിക്കും. കൂടെ പോകാൻ ആഗ്രഹിക്കുന്ന ബന്ധുക്കൾ സ്വന്തം ചെലവിൽ വരേണ്ടതാനാണെന്നും റസിഡൻസ് അസോസിയേഷൻ പ്രസിഡന്‍റ് ജോബ് ആൻഡ്രൂ, കലാകേന്ദ്രം പ്രസിഡന്‍റ് വി.ശിവപ്രസാദ്, തോമസ് ആന്‍റണി, ഗോഡ് വിൻ ബാബു, സിൽവരാജ് എന്നിവർ വാർത്താസമ്മേളനത്തിൽ അറിയിച്ചു.

കാലാവസ്ഥാ വ്യതിയാനം : ഉൾനാടൻ മത്സ്യബന്ധന മേഖല പ്രതിസന്ധിയിൽ

കൊല്ലം: കാലാവസ്ഥാ വ്യതിയാനം കാരണം ഉൾനാടൻ മത്സ്യബന്ധന മേഖല പ്രതിസന്ധി നേരിടുന്നതായി തൊഴിലാളികൾ. കായൽ ജലത്തിലെ ഉപ്പിന്‍റെ അളവ് കൂടുതൽ, അനധികൃത മത്സ്യ ബന്ധനം തുടങ്ങി നിരവധി പ്രശ്‌നങ്ങൾ ഉൾനാടൻ മത്സ്യബന്ധനത്തെ ദോഷമായി ബാധിക്കുന്നതായി മത്സ്യത്തൊഴിലാളികൾ പറയുന്നു. അഷ്‌ടമുടി കായലിൽ അടക്കം മത്സ്യസമ്പത്തിന്‍റെഅളവിനെ ഇത് ഗണ്യമായി ബാധിച്ചിട്ടുണ്ട്. ട്രോളിംഗ് നിരോധന കാലം ഉൾനാടൻ മത്സ്യത്തൊഴിലാളികൾക്ക് ചാകര കാലമെന്നാണ് സാധാരണ പറയപ്പെടുന്നത്. പക്ഷേ ഇപ്പോൾ അതെല്ലാം പഴങ്കഥയായി മാറി. അഷ്്‌ടമുടിയുടെ ഭാഗമായ കാഞ്ഞിരകോട് കായലിലെ കരിമീനിന് ഇപ്പോൾ കിലോഗ്രാമിന് 900 രൂപ വരെയായി വില ഉയർന്നിട്ടുണ്ട്. മത്സ്യം ലഭിക്കാത്തതു കാരണം വിലകൂടിയതിന്‍റെ പ്രയോജനം തൊഴിലാളികൾക്കു ലഭിക്കുന്നുമില്ല. കഴിഞ്ഞ അഞ്ചു വർഷമായാണ് മത്സ്യ സമ്പത്ത് ഗണ്യമായി കുറഞ്ഞിട്ടുള്ളതെന്ന് മത്സ്യതൊഴിലാളികൾ പറയുന്നു. അന്തരീക്ഷ താപനിലയിൽ വന്ന മാറ്റം മത്സ്യ സമ്പത്തിനെയും മീനുകളുടെ ആവാസ വ്യവസ്ഥയെയും ഏറെ പ്രതികൂലമായി ബാധിച്ചിട്ടുണ്ട്. മാത്രമല്ല ചൂട് കൂടുമ്പോൾ മത്സ്യത്തൊഴിലാളികളുടെ ശരീരത്തിൽ ചൊറിച്ചിലും കുരുക്കളും ഉണ്ടാകുന്നതും ഇപ്പോൾ പതിവായിട്ടുണ്ട്. കായലിന്‍റെ ഉപരിതലത്തിൽ ക്രമാതീതമായി ചൂട് കൂടുന്നതിനാൽ മീനുകൾ അടിത്തട്ടിലോട്ടു പോകും. വല ഇട്ടാൽ മത്സ്യം കിട്ടില്ല. കുമ്പളം, പടപ്പക്കര ഭാഗങ്ങളിൽ നിന്നു ചവറ, കരുനാഗപ്പള്ളി ഭാഗങ്ങളിൽ വരെ കായലിൽ മീൻ പിടിക്കാൻ പോകുന്നവരുണ്ട്. നദിയിൽ നിന്നും കനാലുകളിൽ നിന്നും മാലിന്യം ഒഴുകി എത്തുന്നുണ്ട്. ഇതിനാലാണ് ജലജന്യ രോഗങ്ങൾ തൊഴിലാളികൾക്കിടയിൽ വ്യാപകമാകുന്നത്. വൈകുന്നേരം നാലുമുതൽ കായലിൽ ഇറങ്ങി പുലർച്ചെയാണ് ഭൂരിഭാഗം തൊഴിലാളികളും തിരികെ എത്തുന്നത്. രണ്ടു കിലോമീറ്റർ ദൂരെവരെ പോയി കായലിൽ വലയെറിഞ്ഞാൽ കിട്ടുന്നത് വളരെ കുറച്ചു മത്സ്യം മാത്രമെന്നാണ് പരവൂർ പൊഴിക്കര, മുക്കം മേഖലയിലെ മത്സ്യത്തൊഴിലാളികൾ പറയുന്നത്. അഞ്ചു വർഷം മുമ്പ് വരെ ലഭിച്ചിരുന്ന പല മത്സ്യങ്ങളും ഇന്നു ലഭിക്കുന്നില്ല. കൂഴവാലി, മുരൽ, കളിമീൻ, നെത്തോലി പോലെയുള്ള ചെറു മത്സ്യങ്ങളും പള്ളത്തി, പരൽ തുടങ്ങിയ മറ്റ് മീനുകളും കായലിൽ കാണാനേയില്ല. കടലിനൊപ്പം ഉപ്പു രസമുണ്ട് കായലിലെ ജലത്തിനെന്നതും മത്സ്യ സമ്പത്തിനെ ദോഷമായി ബാധിക്കുന്നു. കൂടാതെ മാലിന്യം തള്ളുന്നത് അടക്കമുള്ള പല കാരണങ്ങളാൽ കായൽ ജലത്തിലെ ഓക്‌സിജന്‍റെ അളവ് കുറയുന്നതും മത്സ്യ സമ്പത്തിനെ പ്രതികൂലമായി ബാധിക്കുന്നുവെന്ന് തൊഴിലാളികൾ പറയുന്നു. പ്രവചനാതീതമായ കാലാവസ്ഥയും മത്സ്യബന്ധനത്തെ ഏറെ ബുദ്ധിമുട്ടിക്കുന്നുണ്ട്. രാത്രിയിലെ കനത്ത മഴയും അതിശക്തമായ കാറ്റും കാരണം നല്ലൊരു പങ്ക് തൊഴിലാളികളും ഇപ്പോൾ മത്സ്യബന്ധനത്തിന് പോകുന്നില്ല.

മരക്കൊന്പ് തോട്ടി കൊണ്ട് മുറിക്കവേ ഷോക്കേറ്റ് മരിച്ചു

കൊല്ലം: അയൽ വീട്ടിലെ മാവിൻ കൊമ്പുകൾ ഇരുമ്പ് തോട്ട ഉപയോഗിച്ച് മുറിക്കവേ ഷോക്കേറ്റ് മരിച്ചു. അയത്തിൽ സുരഭി നഗർ 44 എൻഎസ് ബിൽഡിംഗിൽ എൻ. എസ്. രാജേഷ് (50) ആണ് മരിച്ചത്. രാജേഷിന്‌റെ വീട്ടുമുറ്റം നിറയെ വെള്ളം കെട്ടി കിടക്കുകയായിരുന്നു. അയൽ വീട്ടിലെ മാവി െ ന്‍റ കൊമ്പുകൾ രാജേഷി െ ന്‍റ വീട്ടിന് മുകളിലേയ്ക്ക് ചാഞ്ഞു കിടക്കുന്നുണ്ടായിരുന്നു. ഈ കൊമ്പുകൾ ഇരുമ്പ് തോട്ടയിൽ ഘടിപ്പിച്ച കൊങ്കികത്തി കൊണ്ടു ത െ ന്‍റ വീട്ടിന് മുമ്പിൽ നിന്നു കൊണ്ടു താഴേക്ക് പിടിച്ചിടുകയായിരുന്നു രാജേഷ്. ഈ സമയം ഇരുമ്പ് തോട്ട സമീപത്തെ വൈദ്യുതി കമ്പിയിൽ ഉരസിയായിരുന്നു അപകടം. വീട്ടുമുറ്റത്ത് കെട്ടിക്കിടന്ന വെളളക്കെട്ടിലും വൈദ്യുതി വ്യാപിച്ചു. ഇതോടെ കണ്ടുനിന്ന ബന്ധുക്കൾക്കും രക്ഷിക്കാൻ കഴിഞ്ഞില്ല. ലൈൻ ഓഫാക്കി ആശുപത്രിയിലേയ്ക്ക് കൊണ്ടുപോയെങ്കിലും ജീവൻ രക്ഷിക്കാനായില്ല. രാജേഷിന് മുൻപ് ഗൾഫിലായിരുന്നു ജോലി. നാട്ടിലെത്തി മറ്റ് ബിസിനസുകൾ ചെയ്യുകയായിരുന്നു. അവിവാഹിതനാണ്. പിതാവ് കെ. നടരാജൻ, മാതാവ്: സുഷമ, സഹോദരി: രജി, സംസ്കാരം ഇന്ന് ഉച്ചകഴിഞ്ഞ് രണ്ടിന് പോളയത്തോട് വിശ്രാന്തിയിൽ.

കശുമാവിന്‍ തോട്ടം പദ്ധതിക്ക് കെഎംഎംഎല്ലില്‍ തുടക്കം

ചവറ : ഖനനം പൂര്‍ത്തിയായ സ്ഥലങ്ങളിലെ ജൈവ പുനരുജ്ജീവനം ലക്ഷ്യമിട്ട് കെഎംഎം എല്ലില്‍ അഞ്ച്ഏക്കറില്‍ കശുമാവിന്‍ തോട്ടമൊരുക്കുന്ന പദ്ധതിക്ക് തുടക്കമായി. കശുമാവ് കൃഷി വ്യാപനത്തിനായുള്ള സംസ്ഥാന ഏജന്‍സിയായ കെ എസ് എ ഇ കാഷ്യൂ കള്‍ട്ടിവേഷനുമായി ചേര്‍ന്നാണ് പുതിയ പദ്ധതി. ലോക പരിസ്ഥിതി വാരാചരണ ഭാഗമായാണ് പുതിയ പദ്ധതിക്ക് മിനറല്‍ സെപ്പറേഷന്‍ യൂണിറ്റില്‍ തുടക്കമായത്. പദ്ധതിയുടെ ഉദ്ഘാടനം കെഎംഎം എല്‍ മാനേജിംഗ് ഡയറക്ടര്‍ പി. പ്രദീപ്കുമാര്‍ നിര്‍വഹിച്ചു. ഹരിതകേരളം മിഷന്‍റെ ഏകോപനത്തോടെ നടപ്പാക്കുന്ന പുനര്‍ജ്ജനി പച്ചത്തുരുത്ത് പദ്ധതി കെഎംഎംഎല്ലില്‍ നടന്നുവരികയാണ്. അത് കൂടാതെയാണ് പുതിയ പദ്ധതി ആവിഷ്‌കരിച്ചത്. ഒപ്പം എംഎസ് യൂണിറ്റിലെ മുഴുവന്‍ ജീവനക്കാര്‍ക്കും വൃക്ഷതൈകള്‍ വിതരണവും നടത്തുന്നുണ്ട്. ഖനനമേഖലയില്‍ ജൈവ ഉദ്യാനമൊരുക്കുന്ന'ഹരിതം ഈ തീരം' പദ്ധതിയും വിജയകരമായി നടന്നുവരികയാണ്. കെഎസ്എഇ കാഷ്യൂ കള്‍ട്ടിവേഷന്‍ ചെയര്‍മാന്‍ കെ.ഷിരീഷ് മുഖ്യപ്രഭാഷണം നടത്തി. നവകേരളം കര്‍മപദ്ധതി അസി. കോ-ഓര്‍ഡിനേറ്റര്‍ ടി.പി. സുധാകരന്‍ പരിസ്ഥിതി സംരക്ഷണ സന്ദേശം നല്‍കി. മിനറല്‍ സെപ്പറേഷന്‍ യൂണിറ്റ് ഹെഡ് എം.യു .വിജയകുമാര്‍ ചടങ്ങിൽ അധ്യക്ഷനായി. എം.എസ് ഡിപ്പാര്‍ട്ട്മെന്‍റ് ഹെഡ് റ്റി. കാര്‍ത്തികേയന്‍, ഫിനാന്‍സ് ഹെഡ് പ്രതീപ്കുമാര്‍,പരിസ്ഥിതി സംരക്ഷണ അവാര്‍ഡ് ജേതാവ് എം.സി. പ്രശാന്തന്‍, എംഎസ് യൂണിറ്റിലെ യൂണിയന്‍ നേതാക്കൾ തുടങ്ങിയവര്‍ പ്രസംഗിച്ചു.

പേരൂർക്കട സ്റ്റേഷനിൽ യുവതിക്ക് മാനസിക പീഡനം; പോലീസുകാരുടെ മൊഴി രേഖപ്പെടുത്തി

തിരുവനന്തപുരം: മാലമോഷണക്കുറ്റം ആരോപിച്ചു ബിന്ദു എന്ന ദളിത് യുവതിയെ പേരൂർക്കട പോലീസ് സ്റ്റേഷനിൽ തുടർച്ചയായി 21 മണിക്കൂർ വെള്ളം പോലും നൽകാതെ അപഹസിക്കുകയും മാനസികമായി പീഡിപ്പിക്കുകയും ചെയ്ത സംഭവത്തിൽ ആരോപണ വിധേയർ അടക്കം പേരൂർക്കട സ്റ്റേഷനിൽ അന്നു ഡ്യൂട്ടിയിലുണ്ട ായിരുന്ന മുഴുവൻ പോലീസുകാരുടെയും മൊഴി പ്രത്യേക അന്വേഷണ സംഘം രേഖപ്പെടുത്തി. പത്തനംതിട്ട ജില്ലാ ക്രൈംബ്രാഞ്ച് ഡിവൈഎസ്പി കെ.എ. വിദ്യാധരന്‍റെ നേതൃത്വത്തിലുള്ള സംഘം കഴിഞ്ഞ മൂന്നു ദിവസമായാണ് മൊഴി രേഖപ്പെടുത്തിയത്. സസ്പെൻഷനിലുള്ള ഉദ്യോഗസ്ഥരടക്കം ആരോപണ വിധേയരായ വനിതാ പോലീസ് ഉദ്യോഗസ്ഥരുടേത് അടക്കമുള്ള മൊഴികളാണ് ശേഖരിച്ചത്. സസ്പെൻഷനിലുള്ള അന്നത്തെ പേരൂർക്കട സ്റ്റേഷനിലെ എസ്ഐ എസ്.ജെ. പ്രസാദ്, ഗ്രേഡ് എഎസ്ഐ പ്രസന്നകുമാർ അടക്കമുള്ളവരുടെ മൊഴികളാണു വിശദമായി രേഖപ്പെടുത്തിയത്.

മാർ ഈവാനിയോസ് അനുസ്മരണം നാളെ മുതൽ

ആയൂർ : മലങ്കര കത്തോലിക്കാ സഭയുടെ സ്ഥാപകനും പുനരൈക്യ ശില്പിയുമായ മാർ ഈവാനിയോസ് മെത്രാപ്പോലീത്തയുടെ 62-ാം ചരമവാർഷികം ജൂലൈ 15ന് നടക്കും. ഇതിനോടനുബന്ധിച്ച് മലങ്കര കാത്തലിക് അസോസിയേഷൻആയൂർ വൈദിക ജില്ലയുടെ നേതൃത്വത്തിൽ മാർ ഈവാനിയോസ് അനുസ്മരണം ജില്ലയിലെ വിവിധ പള്ളികളിൽ നടത്തും. നാളെ തിരുവനന്തപുരം പട്ടം പള്ളിയിൽ മാർ ഈവാനിയോസിന്‍റെ കബറിങ്കൽ എംസി എ ജില്ലാ വൈദിക ഉപദേഷ്‌ടാവ് ഫാ. അരുൺ ഏറത്ത് വൈകുന്നേരം നാലിന് വിശുദ്ധ കുർബാനയും ധൂപപ്രാർഥനയും നടത്തും. 15ന് ഓടനവട്ടം സെന്‍റ് തോമസ് മലങ്കര കത്തോലിക്ക പള്ളിയിൽ ജില്ലാ വികാരി ഫാ. ജോൺ അരിയ്ക്കൽ അനുസ്മരണ സമ്മേളനം ഉദ്ഘാടനം ചെയ്യും. തിരുവനന്തപുരം മേജർ അതിരൂപത എംസിഎ ആത്മിയ ഉപദേഷ‌ടാവ് ഫാ. ഗീവർഗീസ് നെടിയത്ത് റമ്പാൻ അനുസ്മരണ സന്ദേശം നൽകും. ജില്ലാ വൈദിക ഉപദേഷ്‌ടാവ് ഫാ.അരുൺ ഏറത്ത്, അതിരൂപത പ്രസിഡന്‍റ് റെജിമോൻ വർഗീസ് എന്നിവർ സന്ദേശങ്ങൾ നൽകും. 22ന് വൈകുന്നേരം നാലിന് പെരിങ്ങള്ളൂർ സെന്‍റ് മേരീസ് പള്ളിയിലും 29ന് ഒഴുകുപാറയ്ക്കൽ സെന്‍റ് സെബസ്റ്റ്യാനോസ് പള്ളിയിലും ജൂലൈ ആറിന് സമാപനം പൊടിയാട്ടുവിള സെന്‍റ് മേരീസ് മലങ്കര കത്തോലിക്കാ പള്ളിയിൽ മേജർ അതിരൂപത വികാരി ജനറാൾ ഫാ. തോമസ് കയ്യാലയ്ക്കൽ നിർവഹിക്കും. വിവിധ ഇടവകകളിൽ ഫാ. ജോൺ അരിയ്ക്കൽ, ഫാ. അരുൺ ഏറത്ത്, ഫാ. തോമസ് മരോട്ടി മൂട്ടിൽ, ഫാ. ഫിലിപ്പോസ് ജോൺ, ഫാ. അനു ജോസ്, ജില്ലാ പ്രസിഡന്‍റ് ജേക്കബ് കളപ്പുരയ്ക്കൽ, ജില്ലാ സെക്രട്ടറി രാജീവ് കോശി, ജില്ലാ ട്രഷറർ ഐസക്ക് ഇടമാട്, എംസിഎ ഇടവക യൂണിറ്റ് ഭാരവാഹികൾ, ജില്ലാ പ്രതിനിധികൾ എന്നിവർ നേതൃത്വം നൽകും.

ബോണക്കാട്ടെ ലയങ്ങളുടെ നവീകരണം തുടങ്ങി

വിതുര: ബോണക്കാട്ടെ ശോച്യാവസ്ഥയിലായ ലയങ്ങളുടെ നവീകരണ പ്രവർത്തനങ്ങൾ ആരംഭിച്ചു. 43-കെട്ടിടങ്ങളിലെ ലയങ്ങളിലായി 187 കുടുംബങ്ങളാണ് ഇവിടെയുള്ളത്. രണ്ടുവർഷം മുമ്പ് ബോണക്കാട് സന്ദർശിച്ച മന്ത്രിമാരായ വി. ശിവൻകുട്ടി, കെ.എൻ.ബാലഗോപാൽ എന്നിവർ നൽകിയ ഉറപ്പാണ് നവീകരണത്തിലൂടെ യാഥാർഥ്യമാകുന്നത്. തോട്ടം പൂട്ടിയതോടെയുണ്ടായ തൊഴിൽ നഷ്ടത്തിനൊപ്പം വാസയോഗ്യമല്ലാത്ത ലയങ്ങളും തൊഴിലാളികളുടെ ജീവിതം ദുരിതത്തിലാക്കിയിരു ന്നു. തൊഴിലാളികൾ നയിക്കുന്ന ദുരിത ജീവിതത്തെക്കുറിച്ച് ജി. സ്റ്റീഫൻ എംഎൽഎ നിയമസഭയിൽ അവതരിപ്പിച്ച സബ്മിഷന്‍റെ അടിസ്ഥാനത്തിലായിരുന്നു മന്ത്രിമാരുടെ സന്ദർശനം. പൊട്ടിപ്പൊളിഞ്ഞ മേൽക്കൂരക്കു കീഴിൽ കഴിയുന്ന തൊഴിലാളികളെ സന്ദർശിച്ച ശേഷമാണു ശോച്യാവസ്ഥയിലായ ലയങ്ങൾ നവീകരിക്കാൻ തുക അനുവദിച്ചതായി മന്ത്രിമാർ അറിയിച്ചത് . നാലുകോടി രൂപയാണ് ചെലവ് പ്രതീക്ഷിക്കുന്നത്. 147 ലയങ്ങൾ പൂർണമായും നവീകരിക്കും. ബാക്കിയുള്ളവ അറ്റകുറ്റപ്പണി നടത്തും. മേൽക്കൂരയിൽ ഷീറ്റു പാകുന്നതിനൊപ്പം തറ സിമെന്‍റുചെയ്യും. വാതിൽ, ജനാല എന്നിവമാറ്റും. ചവിട്ടു പടികൾ നിർമിക്കും. ലയങ്ങളിൽ പുകയില്ലാത്ത അടുപ്പ് സ്ഥാപിക്കും. ലയങ്ങൾക്കൊപ്പം റേഷൻ കട, തപാലോഫീസ് എന്നിവയുടെ നവീകരണവും നടത്തും.

തട്ടിപ്പ് കേസ് റദ്ദാക്കണമെന്ന ഹർജി ഹൈക്കോടതി തള്ളി

കൊട്ടാരക്കര: തട്ടിപ്പ് കേസ് റദ്ദാക്കണമെന്ന ആവശ്യവുമായി പ്രതി നൽകിയ ഹർജി ഹൈക്കോടതി തള്ളി . 2014-ൽ കുന്നിക്കോട് പോലീസ് ചാർജ് ചെയ്‌ത കേസിലാണ് വിധി. സാമ്പത്തിക ഇടപാടുകൾ തീർത്തശേഷവും രേഖകൾ തിരികെ കൊടുക്കാതെ ദുരുപയോഗപ്പെടുത്തുകയും വഞ്ചിക്കുകയും ചെയ്തതായി കുന്നിക്കോട് പോലീസ് സമർപ്പിച്ച കുറ്റപത്രം റദ്ദാക്കണമെന്ന് ആവശ്യപ്പെട്ട് പ്രതിയും മുൻ ആരോഗ്യവകുപ്പ് ജീവനക്കാരനുമായിരുന്ന കൊല്ലം വടക്കേവിളയിൽ രാജ് ഭവനിൽ കെ.ബാബുരാജ് നൽകിയ കേസിലാണ് വിധി. കൊട്ടാരക്കര സ്വദേശിയും ചെങ്ങമനാട് മംഗലശേരി മോട്ടർ കമ്പനി ഉടമയുമായ ദിനേഷ് മംഗലശേരിയെ ചതിച്ചും വഞ്ചിച്ചും വ്യാജ രേഖ ഉണ്ടാക്കിയും കബളിപ്പിച്ചെന്ന പരാതിയിൽ ബാബുരാജിനെ ഒന്നാം പ്രതിയാക്കി പുനലൂർ ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതിയിൽ കുന്നിക്കോട് പോലീസ് കുറ്റപത്രം സമർപ്പിച്ചി രുന്നു. കുറ്റപത്രം റദ്ദാക്കാനുള്ള ഒരു സാഹചര്യവും നിലവിലില്ലെന്നും കേസിന്‍റെ ഗൗരവം കണക്കാക്കി തെളിവുകളുടെ അടിസ്ഥാനത്തിൽ മജിസ്ട്രേറ്റിന് മുൻപാകെ വിചാരണയ്ക്ക് വിധേയനാവുകയാണ് ബാബുരാജ് ചെയ്യേണ്ടതെന്നും കോടതി നിർദേശിച്ചു . പുനലൂർ ജുഡീഷ്യൽ മജിസ്ട്രേറ്റ് കോടതി മുൻപാകെ ബാബുരാജിനെതിരെയുള്ള പ്രോസിക്യൂഷൻ നടപടികൾ ആരംഭിക്കുവാനും ഹൈക്കോടതി ഉത്തരവിട്ടു. ദിനേഷ് മംഗലശേരിക്ക് വേണ്ടി അഡ്വ.മനു രാമചന്ദ്രൻ ഹൈക്കോടതിയിൽ ഹാജരായി .

‘സ്കൂൾ വണ്ടി’യുമായി കൈകോർത്ത് മരിയ ആഗ്നസ് സ്കൂൾ

കൊല്ലം : കിടപ്പുരോഗികളുടെയും മറ്റുരോഗാവസ്ഥയിലുള്ളവരുടെയും മക്കൾക്ക് അവരുടെ വീട്ടിൽ ചെന്ന് സ്കൂൾ ആവശ്യത്തിനുള്ള കുട, ബാഗ്, പുസ്തകങ്ങൾ, പേന, പെൻസിൽ എന്നിവ കൊണ്ടെത്തിക്കുന്ന വി കെയർ പാലിയേറ്റീവ് ആൻഡ് ചാരിറ്റബിൾ ട്രസ്റ്റിന്‍റെ സ്കൂൾ വണ്ടിയുമായി കുരീപ്പുഴ മരിയ ആഗ്നസ് സ്കൂൾ പാലിയേറ്റീവ് ക്ലബ്‌ കൈകോർത്തു. മാനേജർ സിസ്റ്റർ ഫ്ലാവിയ മാർട്ടിൻ, പ്രിൻസിപ്പൽ ഉഷപോൾ എന്നിവരിൽ നിന്ന് കുട്ടികൾക്കാവശ്യമുള്ള ഉത്പന്നങ്ങൾ വി കെയർ പാലിയേറ്റീവ് ചെയർമാൻ ജോർജ് എഫ്. സേവ്യർ വലിയവീട്, ട്രഷറർ ബെറ്റ്സി എഡിസൺ എന്നിവർ ചേർന്ന് ഏറ്റുവാങ്ങി. സിസ്റ്റർ ഫ്ലാവിയ മാർട്ടിൻ ഉദ്ഘാടനം നിർവഹിച്ചു. കുഞ്ഞുങ്ങളിൽ സഹജീവികളെ സ്നേഹിക്കുക എന്ന ആശയം പകരുവാൻ കൂടിയാണ് മരിയ ആഗ്നസ് പാലിയേറ്റീവ് ക്ലബിന്‍റെ ഇത്തരം പ്രവർത്തനങ്ങളെന്ന് സിസ്റ്റർ പറഞ്ഞു. പ്രിൻസിപ്പൽ ഉഷ പോൾ അധ്യക്ഷത വഹിച്ചു.ജോർജ് എഫ്. സേവ്യർ വലിയവീട്, ബെറ്റ്സി എഡിസൻ, സിസ്റ്റർ ഷൈബി, ശാന്തിനി പ്രകാശ്, ജെസി മാർട്ടിൻ, സാഹിറ, സുഹാന,അജ്മിയ എന്നിവർ പ്രസംഗിച്ചു.

ബാലവേല വിരുദ്ധ ദിനത്തിൽ പ്രതിരോധ ചങ്ങല തീർത്ത് കുട്ടികൾ

കൊല്ലം: ബാലവേല വിരുദ്ധ ദിനത്തിൽ അമൃതുകുളം മുണ്ടയ്ക്കൽ ഈസ്റ്റ് ഗവ.എൽപി സ്കൂളിലെ കുട്ടികൾ ബാലവേലയ്‌ക്കെതിരെ പ്രതിരോധ ചങ്ങല തീർത്തു. ല്ലാ ശിശുക്ഷേമ സമിതി ചെയർമാൻ സനിൽ വെള്ളിമൺ ചങ്ങലയിലെ ആദ്യ കണ്ണിയായി. ബാലാവകാശങ്ങളെ കുറിച്ച് അദ്ദേഹം കുട്ടികളുമായി സംവദിച്ചു. പ്രധാനാധ്യാപിക എസ്.ലളിതാ ഭായ് ബാലവേല വിരുദ്ധദിന സന്ദേശം നൽകി. സീനിയർ അധ്യാപകൻ ഡി.ഡിക്‌സൺ, അധ്യാപകരായ എസ്.സുമിന, ഗ്രേസ് മൈക്കിൾ എന്നിവർ നേതൃത്വം നൽകി.

ബാലവേല കര്‍ശനമായി തടയും: മന്ത്രി വി.ശിവന്‍കുട്ടി

കൊല്ലം : തൊഴിലിടങ്ങളിലെ ബാലവേല കര്‍ശനമായി തടയുമെന്ന് മന്ത്രി വി .ശിവന്‍കുട്ടി. ബാലവേലവിരുദ്ധ ദിനാചരണ സംസ്ഥാനതല ഉദ്ഘാടനം ജില്ലാ പഞ്ചായത്ത് ഹാളില്‍ നിര്‍വഹിക്കുകയായിരുന്നു അദ്ദേഹം. രാജ്യത്ത് ബാലവേല പൂര്‍ണമായും അവസാനിപ്പിച്ച ഏക സംസ്ഥാനമാണ് കേരളം. കുട്ടികളുടെ ജനാധിപത്യപരമായ അവകാശം സര്‍ക്കാര്‍ സംരക്ഷിക്കും. ബാലവേലയ്‌ക്കെതിരെ അവബോധത്തിനായും കര്‍ശന നടപടികള്‍ സ്വീകരിക്കുന്നതിനും വിവിധ പദ്ധതികള്‍ ആവിഷ്‌കരിച്ചിട്ടുണ്ട്. വ്യക്തിയെയും സമൂഹത്തെയും മികവുറ്റ ജീവിതത്തിലേക്ക് നയിക്കുന്ന കാഴ്ചപ്പാടാണ് സംസ്ഥാന സര്‍ക്കാരിന്‍റെതെന്നും മന്ത്രി പറഞ്ഞു. പുതിയ അധ്യയനവര്‍ഷാരംഭത്തിന്‍റെ തുടക്കത്തില്‍ പാഠ്യേതര വിഷയങ്ങള്‍കൂടി ക്ലാസുകളിലേക്ക് ഉള്‍പ്പെടുത്തുന്ന മാതൃകയും നടപ്പിലാക്കി. ലഹരിവിരുദ്ധ സന്ദേശം, ഗതാഗതനിയമങ്ങള്‍, വ്യക്തിശുചിത്വം തുടങ്ങിയ വിഷയങ്ങളില്‍ പകരുന്ന അറിവുകള്‍ വിദ്യാര്‍ഥികളെ സാമൂഹികബോധമുള്ളവരാക്കുന്നതിന് സഹായകമായി എന്നും മന്ത്രി വ്യക്തമാക്കി. ബാലവേലവിരുദ്ധ സ്റ്റിക്കര്‍ പ്രകാശനവും നിര്‍വഹിച്ചു. ജില്ലാ പഞ്ചായത്ത് പ്രസിഡന്‍റ് ഡോ. പി.കെ. ഗോപന്‍ അധ്യക്ഷനായി. അഡീഷണല്‍ ലേബര്‍ കമ്മീഷണര്‍ കെ .ശ്രീലാല്‍ ബാലവേല വിരുദ്ധ പ്രതിജ്ഞ ചൊല്ലിക്കൊടുത്തു. ലേബര്‍ കമ്മീഷണര്‍ സഫ്‌നാ നസറുദ്ദീന്‍, ജില്ലാ ശിശുക്ഷേമ സമിതി ചെയര്‍മാന്‍ സനില്‍ വെള്ളിമണ്‍, വ്യാപാരി വ്യവസായി സമിതി കൊല്ലം ജില്ലാ ജോയിന്‍റ് സെക്രട്ടറി വൈ. രാജന്‍, ഹോട്ടല്‍ ആന്‍ഡ് റസ്റ്റോറന്‍റ് അസോസിയേഷന്‍ ജില്ലാ പ്രസിഡന്‍റ് ആര്‍ .ചന്ദ്രശേഖരന്‍, റീജണല്‍ ജോയിന്‍റ് ലേബര്‍ കമ്മീഷണര്‍ എം .ജി .സുരേഷ് തുടങ്ങിയവര്‍ പ്രസംഗിച്ചു.

വനിതാ കമ്മീഷന്‍ സിറ്റിംഗ്: 23 കേസുകള്‍ തീര്‍പ്പാക്കി

കൊല്ലം :സംസ്ഥാന വനിതാകമ്മീഷന്‍ അംഗം അഡ്വ. ഇന്ദിര രവീന്ദ്രന്‍റെ അധ്യക്ഷതയില്‍ ആശ്രാമം സര്‍ക്കാര്‍ അതിഥി മന്ദിരത്തില്‍ നടത്തിയ സിറ്റിങ്ങില്‍ 23 കേസുകള്‍ തീര്‍പ്പാക്കി. 70 കേസുകളാണ് പരിഗണിച്ചത്. നാല് കേസുകള്‍ റിപ്പോര്‍ട്ടിനയച്ചു. ഒരു കേസ് പഞ്ചായത്ത് ജാഗ്രതസമിതിക്ക് കൈമാറി. ബാക്കിയുള്ളവ അടുത്ത സിറ്റിങ്ങിലേക്ക് മാറ്റി. സര്‍ക്കാര്‍ സ്ഥാപനങ്ങളിലും സ്വകാര്യതൊഴിലിടങ്ങളിലും പോഷ് ആക്‌ട് പ്രകാരം ഉണ്ടാകേണ്ട ആഭ്യന്തരസമിതികള്‍ അടിയന്തരമായി രൂപീകരിക്കണം. ആക്‌ട് സംബന്ധിച്ച ബോധവത്കരണം ശക്തമാക്കും. കുടുംബ ബന്ധങ്ങളിലെ പ്രശ്‌നങ്ങള്‍, തൊഴിലിടങ്ങളിലെ തര്‍ക്കങ്ങള്‍, ഭൂമി കൈയേറ്റം, സാമ്പത്തികഇടപാട് തുടങ്ങിയ വിഷയങ്ങളിലുള്ള കേസുകളായിരുന്നു കൂടുതലും. അഭിഭാഷകരായ ജെ. സീനത്ത് ബീഗം, എസ്. ഹേമാ ശങ്കര്‍, ബെച്ചി കൃഷ്ണ, സിറ്റി വനിതസെല്‍ പോലീസ് ഓഫീസര്‍ കെ. ബദറുന്നിസ തുടങ്ങിയവര്‍ പങ്കെടുത്തു.

പൊതുവിദ്യാഭ്യാസമേഖല കൂടുതല്‍ ശക്തിപ്പെടുത്തും: മന്ത്രി വി.ശിവന്‍കുട്ടി

കൊല്ലം: പാഠ്യപദ്ധതി പരിഷ്‌കരണം വിദ്യാര്‍ഥികളെ ആധുനിക ലോകത്തെ മനുഷ്യരായി വളരാന്‍ സഹായിക്കുമെന്നും പൊതുവിദ്യാഭ്യാസ മേഖല കൂടുതല്‍ ശക്തിപ്പെടുത്തുമെന്നും മന്ത്രി വി .ശിവന്‍കുട്ടി. അഷ്‌ടമുടി സര്‍ക്കാര്‍ ഹയര്‍ സെക്കന്‍ഡറി സ്‌കൂളില്‍ രണ്ടുകോടി രൂപ ചെലവില്‍ നിര്‍മിച്ച കെട്ടിടസമുച്ചയം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാനത്ത് കിഫ്ബി ഫണ്ടില്‍ നിന്ന് 2,460 കോടി രൂപ നിക്ഷേപിച്ച് 973 സ്‌കൂള്‍ കെട്ടിടങ്ങള്‍ക്ക് അനുമതിനല്‍കിയതില്‍ 548 കെട്ടിടങ്ങള്‍ പൂര്‍ത്തിയായിട്ടുണ്ട്. 5,000 കോടി രൂപയുടെ വികസനപദ്ധതികള്‍ വിവിധ ഫണ്ടുകള്‍ വഴി നടപ്പാക്കുന്നു. ഹൈടെക് ക്ലാസ്മുറികള്‍, എഐ പരിശീലനം, റോബോട്ടിക്‌സ് ലാബുകള്‍ തുടങ്ങിയവയിലൂടെ പഠനരീതികള്‍ കാലാനുസൃതമായി മാറ്റി. കൈറ്റ് വിക്‌ടേഴ്‌സ് മുഖേന നാല് ലക്ഷം അമ്മമാര്‍ക്ക് സൈബര്‍ സുരക്ഷ പരിശീലനം നല്‍കി. വേനലവധി തുടങ്ങുന്നതിന് മുമ്പു തന്നെ പാഠപുസ്തകങ്ങള്‍ ലഭ്യമാക്കി. അധ്യാപകര്‍ക്കുള്ള പരിശീലന കാലയളവ് വര്‍ധിപ്പിച്ചു. അധ്യാപകര്‍ രക്ഷിതാക്കള്‍ക്ക് സമാനമായി പ്രവര്‍ത്തിക്കണമെന്നും മന്ത്രി ഓര്‍മിപ്പിച്ചു. എം.മുകേഷ് എംഎല്‍എ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് ഡോ.പി.കെ. ഗോപന്‍ മുഖ്യപ്രഭാഷണം നടത്തി. ജില്ലാ പഞ്ചായത്ത് അംഗം ബി. ജയന്തി, ബ്ലോക്ക് പഞ്ചായത്ത് പ്രസിഡന്‍റ് ജയദേവി മോഹന്‍, സ്റ്റാന്‍ഡിംഗ് കമ്മിറ്റി ചെയര്‍മാന്‍ ആര്‍ .രതീഷ്, മുരളി നാരായണന്‍, ഹെഡ്മാസ്റ്റര്‍ എ.എം ഷഫീഖ്, പ്രിന്‍സിപ്പല്‍ എ. പോള്‍ തുടങ്ങിയവര്‍ പങ്കെടുത്തു.

അരിപ്പയിലെ ഭൂപ്രശ്നം വേഗത്തിൽ പരിഹരിക്കാൻ തീരുമാനം

കൊല്ലം : പുനലൂരിലെ അരിപ്പ ഭൂപ്രശ്നം പരിഹരിക്കുന്നതിനുള്ള നടപടിക്രമങ്ങൾ വേഗത്തിൽ പൂർത്തിയാക്കാൻ മന്ത്രി കെ.രാജന്‍റെ അധ്യക്ഷതയിൽ പി.എസ്. സുപാൽ എംഎൽഎയുടെ സാന്നിധ്യത്തിൽ ചേർന്ന യോഗത്തിൽ തീരുമാനം. അരിപ്പയിലെ ഭൂപ്രശ്നം പരിഹരിക്കാൻ പട്ടയ മിഷന്‍ വഴി നടപടികൾ സ്വീകരിച്ചിരുന്നു. പുനലൂര്‍ താലൂക്കില്‍ തിങ്കൾക്കരിക്കം വില്ലേജിലെ 94 ഏക്കര്‍ സര്‍ക്കാര്‍ പുറമ്പോക്ക്‌ ഭൂമി, കുത്തകപ്പാട്ട വ്യവസ്ഥ ലംഘിച്ച്‌ കൈവശം വച്ചിരുന്ന തങ്ങള്‍ കുഞ്ഞ്‌ മുസലിയാരുടെ അവകാശികളില്‍ നിന്നും 1997-ല്‍ തിരികെ ഏറ്റെടുത്തിരുന്നു. ഇതില്‍ നിന്നും 21.54 ഏക്കര്‍ ഭൂമി ചെങ്ങറ ഭൂസമര പുനരധിവാസ പാക്കേജിലുള്‍പ്പെടുത്തി 20 ആദിവാസി കുടുംബങ്ങള്‍ക്കായി ഒരു ഏക്കര്‍ ഭൂമി വീതവും, 1.54 ഏക്കര്‍ ഭൂമി ഈ കുടുംബങ്ങളുടെ പൊതു ആവശ്യത്തിലേക്കും എന്ന നിലയിലുമാണ് മാറ്റിവച്ചത്. അവശേഷിക്കുന്ന ഭൂമിയില്‍ 2013 ജനുവരി മുതല്‍ വിവിധ സംഘടനകളുടെ നേതൃത്വത്തില്‍ ഭൂരഹിതരായ ആളുകള്‍ കൈയേറി കുടില്‍ കെട്ടി ഭൂസമരം ആരംഭിച്ചതാണ് അരിപ്പ ഭൂസമരത്തിന്‍റെ പശ്ചാത്തലം. അരിപ്പ സമരഭൂമിയിൽ ആദ്യകാലങ്ങളിൽ നടത്തിയ വിവരശേഖരണത്തിൽ വിവിധ സമുദായങ്ങളിൽപ്പെട്ട 516 കുടുംബങ്ങൾ അവിടെ കുടിൽകെട്ടി താമസിച്ചുവരുന്നതായും ഇതിൽ 336 പട്ടികജാതിക്കാർ, 54 പട്ടിക വർഗക്കാർ, 126 മറ്റ്‌ വിഭാഗക്കാർ എന്നിങ്ങനെ ഉണ്ടെന്ന്‌ കണക്കാക്കിയിരുന്നു. നിലവിൽ ആകെ കൈവശങ്ങളുടെ എണ്ണം 297 ആണ്. 32 പട്ടികവർഗ വിഭാഗക്കാരും 198 പട്ടികജാതി വിഭാഗക്കാരും മറ്റു വിഭാഗത്തിലുള്ള 67 പേരും ഉണ്ട്. ഇതിൽ കൊല്ലം ജില്ലയിൽ നിന്നും 163, തിരുവനന്തപുരം - 72, കോട്ടയം - 33, പത്തനംതിട്ട - 22, ആലപ്പുഴ, കണ്ണൂർ, ഇടുക്കി രണ്ടു വീതം, പാലക്കാട് ഒന്ന് എന്നിങ്ങനെയാണ് കൈവശങ്ങൾ. ഭൂരഹിതരില്ലാത്ത പുനലൂര്‍ എന്ന പദ്ധതിയില്‍ അരിപ്പ സമര ഭൂമിയില്‍ കുടില്‍ കെട്ടി താമസിക്കുന്ന അര്‍ഹരായവര്‍ക്ക് പട്ടയം നല്‍കുന്നതിനുള്ള നടപടികളുടെ തുടർച്ചയായാണ് മന്ത്രിയുടെ അധ്യക്ഷയിൽ വീണ്ടും യോഗം ചേർന്നത്. യോഗത്തിലെ മന്ത്രിയുടെ നിർദേശങ്ങൾ അരിപ്പ ഭൂസമരവുമായി ബന്ധപ്പെട്ടവരുമായി ചർച്ച നടത്തി അവതരിപ്പിക്കും. ധാരണയായാൽ ഒരു മാസത്തിനകം നടപടികൾ പൂർത്തിയാക്കാനാണ് തീരുമാനം. യോഗത്തിൽ ലാൻഡ് റവന്യൂ ജോയിന്‍റ് കമ്മീഷണർ എ .ഗീത, കൊല്ലം ജില്ലാ കളക്ടർ എൻ. ദേവീദാസ്, റവന്യൂ വകുപ്പ് അഡീഷണൽ സെക്രട്ടറി ആർ .എൽ. ഗോപകുമാർ, കൊല്ലം ജില്ലാ ഡെപ്യൂട്ടി കളക്‌ടർ (എൽആർ) ബീനാ റാണി, കൊല്ലം ലാനൻഡ് റവന്യൂ ജൂനിയർ സൂപ്രണ്ട് വിനോദ്, കൊല്ലം ജില്ലാ സർവേ സൂപ്രണ്ട് എ .ഷൈൻ, പുനലൂർ തഹസീൽദാർ അജിത് ജോയി എന്നിവരും പങ്കെടുത്തു.

‘കൂടെയുണ്ട് കരുത്തേകാന്‍’പദ്ധതി ഉദ്ഘാടനം

ചവറ : പൊതുവിദ്യാഭ്യാസ വകുപ്പ് ഹയര്‍സെക്കന്‍ഡറി കുട്ടികള്‍ക്കായി നടപ്പിലാക്കുന്ന കൂടെയുണ്ട് കരുത്തേകാന്‍ പദ്ധതിയുടെ സംസ്ഥാന സ്‌കൂള്‍ തല പ്രവര്‍ത്തന ഉദ്ഘാടനം നടന്നു. ചവറ ശങ്കരമംഗലം സര്‍ക്കാര്‍ ഹയര്‍സെക്കന്‍ഡറി സ്‌കൂളില്‍ നടന്ന പരിപാടി മന്ത്രി വി.ശിവന്‍ കുട്ടി ഉദ്ഘാടനം ചെയ്തു.ചടങ്ങില്‍ സുജിത് വിജയന്‍പിള്ള എംഎല്‍എ അധ്യക്ഷനായി.അക്കാദമിക് ഹയര്‍സെക്കന്‍ഡറി വിഭാഗം ജെ ഡി ഡോ. എസ്. ഷാജിത പദ്ധതി വിശദീകരിച്ചു. ഹയർസെക്കൻഡറി പ്രിൻസിപ്പാൾ പി.അര്‍ച്ചന, ഹൈസ്കൂൾ ഹെഡ്മിസ്ട്രസ് എലിസബത്ത് ഉമ്മന്‍, ചവറ ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി, ജില്ലാ പഞ്ചായത്തംഗം സി.പി.സുധീഷ് കുമാര്‍,എന്‍.കൊച്ചനുജന്‍, എല്‍.എസ് .ജയകുമാര്‍, പിടിഎ പ്രസിഡന്‍റ് ബീനാ ജയന്‍, മദർ പിടിഎ പ്രസിഡന്‍റ് ശിവരഞ്ജിനി,എന്‍എസ്എസ് കണ്‍വീനര്‍ ആര്‍.ഗീരീഷ് തുടങ്ങിയവര്‍ പ്രസംഗിച്ചു. എല്ലാ വിഭാഗം സര്‍ക്കാര്‍ സംവിധാനങ്ങളുടെ സഹായത്തോടെ സമഗ്ര വിദ്യാര്‍ഥി രക്ഷകര്‍ത്താ ,അധ്യാപക ശാക്തീകരണ പദ്ധതിയാണ് കൂടെയുണ്ട് കരുത്തേകാന്‍ എന്നത്. കൗമാര വിദ്യാർഥികളിലെ അക്രമ വാസന ,പൊതു മുതൽ നശീകരണം, ലഹരി ഉപയോഗം, വാഹന ദുരുപയോഗം തുടങ്ങിയ അനഭിലഷണീയ പ്രവണതകൾ മുളയിലെ നുള്ളുക എന്നതാണ് ഈ പദ്ധതിയുടെ പ്രധാന ലക്ഷ്യം. ഇതോടൊപ്പം രക്ഷിതാക്കള്‍ക്കും ബോധവത്കരണം നല്‍കി നല്ല തലമുറയെ വാര്‍ത്തെടുക്കുക എന്നതാണ് പദ്ധതി കൊണ്ട് ലക്ഷ്യമിടുന്നത്.

കുംഭാവുരുട്ടി വിനോദസഞ്ചാര കേന്ദ്രം തുറന്നു പ്രവർത്തിപ്പിക്കണം: റോയി ഉമ്മൻ

ആര്യങ്കാവ് : കുംഭാവുരുട്ടി വിനോദസഞ്ചാര കേന്ദ്രം തുറന്നു പ്രവർത്തിപ്പിക്കണമെന്ന് കെടിയു സി (ജോസഫ്) സംസ്ഥാന പ്രസിഡന്‍റ് റോയി ഉമ്മൻ താലൂക്ക് വികസന സമിതി യോഗത്തിൽആവശ്യപ്പെട്ടു. അച്ചൻകോവിലിൽ സംസ്ഥാന ടൂറിസം വകുപ്പ് നടത്തിവന്നിരുന്ന കുംഭാവുരുട്ടി വിനോദസഞ്ചാര കേന്ദ്രം രണ്ടു വർഷമായി അടഞ്ഞുകിടക്കുകയാണ് .മേഖലയിൽ ഇതുമൂലം 120 പേർക്ക് ജോലി നഷ്‌ടപ്പെടുകയും ലക്ഷക്കണക്കിന് രൂപയുടെ വരുമാനമാർഗവും നിലച്ചു. നവീകരണ പ്രവർത്തനങ്ങൾ പൂർത്തീകരിച്ച് വിനോദസഞ്ചാര കേന്ദ്രം തുറന്നു പ്രവർത്തിക്കാത്തതിനാൽ അച്ചൻകോവിലിന്‍റെ വികസനം മുരടിച്ചിരിക്കുകയാണെന്നും റോയി ഉമ്മൻ ആരോപിച്ചു. വനം മേഖലയിലെ തടി കയറ്റിറക്ക് ജോലിയിലൂടെ ലഭിക്കുന്ന തുച്ഛമായ വരുമാനം കൊണ്ടാണ് ഈ പ്രദേശത്തെ തൊഴിലാളി കുടുംബങ്ങൾ കഴിഞ്ഞു വരുന്നത് . ‌കഴിഞ്ഞ ഒരു വർഷ ത്തിലേറെയായി തൊഴിലാളികൾ ദുരിതത്തിലാണ് . വനംവകുപ്പിന്‍റെ അനാസ്ഥയാണ് തൊഴിലാളികൾക്ക് തൊഴിൽ നഷ്‌ടം വരുത്താൻ ഇടയാക്കിയത്. വന്യമൃഗ ആക്രമണത്തിൽ പരിക്ക് പറ്റി ഗുരുതര അവസ്ഥയിൽ ആകുന്നവർക്ക് അടിയന്തര ചികിത്സ ലഭിക്കാൻ അച്ചൻകോവിലിൽ ആംബുലൻസ് അനുവദിക്കണമെന്ന് ആവശ്യപ്പെട്ടെങ്കിലും നടപടി ഉണ്ടായില്ല. ഈ പ്രദേശത്തെ ജനങ്ങളുടെ ദുരിതം അവസാനിപ്പിക്കുന്നതിന് ബന്ധപ്പെട്ട വകുപ്പ് തല ഉദ്യോഗസ്ഥരും ജനപ്രതിനിധികളും വേണ്ട നടപടി സ്വീകരിച്ചില്ലെങ്കിൽ ശക്തമായ ജനകീയസമര ത്തിന് കെടിയുസി നേതൃത്വം നൽകുമെന്നും സംസ്ഥാന പ്രസിഡന്‍റ് അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]