ADVERTISEMENT

ADVERTISEMENT

മെറിറ്റ് അവാര്‍ഡ് വിതരണം

മുഹമ്മ: എബി വിലാസം ഹയര്‍ സെക്കന്‍ഡറി സ്‌കൂളില്‍ പൊന്‍തിളക്കം 2025 മെറിറ്റ് അവാര്‍ഡ് വിതരണം സംഘടിപ്പിച്ചു. പ്ലസ് ടു, പ്ലസ് വണ്‍, എസ്എസ്എല്‍സി പരീക്ഷകളില്‍ മികച്ച വിജയം നേടിയ കുട്ടികള്‍, യുഎസ്എസ്, എന്‍എംഎംഎസ് പരീക്ഷകളില്‍ വിജയിച്ചവര്‍, രാജ്യ പുരസ്‌കാര്‍ നേടിയ കേഡറ്റുകള്‍ എന്നിവര്‍ ഉള്‍പ്പെടെ 150 ഓളം പേരെ അനുമോദിച്ചു. മുഖ്യമന്ത്രിയുടെ ഫോറസ്റ്റ് മെഡലിനര്‍ഹനായ ബീറ്റ് ഫോറസ്റ്റ് ഓഫീസര്‍ ബി. സന്തോഷ് കുമാറിനെ ആദരിച്ചു.
എന്‍.പി. പുരുഷോത്തമന്‍ സ്മാരക സ്‌കൂള്‍ ഓഡിറ്റോറിയത്തില്‍ ചേര്‍ന്ന ചടങ്ങ് സിവില്‍ സര്‍വീസ് പരീക്ഷ ജേതാവ് സി.ആര്‍. വൈശാഖ് ഉദ്ഘാടനം ചെയ്തു.

പിടിഎ പ്രസിഡന്‍റ് കെ.എസ്. ലാലിച്ചന്‍ അധ്യക്ഷനായി. ഹയര്‍ സെക്കന്‍ഡറി റിട്ട. ആര്‍ഡിഡി വി.കെ. അശോക് കുമാര്‍ മുഖ്യാതിഥിയായി. സ്‌കൂള്‍ മാനേജര്‍ ജെ. ജയലാല്‍ മുഖ്യ പ്രഭാഷണവും ആര്യക്കര ദേവസ്വം പ്രസിഡന്‍റ് കെ.കെ. അശോക് കുമാര്‍ കാഷ് അവാര്‍ഡ് വിതരണവും നടത്തി. പഞ്ചായത്ത് വൈസ് പ്രസിഡന്‍റ് എന്‍.ടി. റെജി, സംസ്ഥാന അധ്യാപക അവാര്‍ഡ് ജേതാവ് വി. സവിനയന്‍, പിടിഎ വൈസ് പ്രസിഡന്‍റ് പി.എസ്. സനല്‍കുമാര്‍, എംപിടിഎ പ്രസിഡന്‍റ് നിഷ പ്രദീപ്, സീനിയര്‍ അസിസ്റ്റന്‍റുമാരായ എസ് പ്രവീണ്‍, എന്‍.കെ. സുപ്രിയ, സ്റ്റാഫ് സെക്രട്ടറി എസ്. സോളി, പ്രിന്‍സിപ്പല്‍ ബിജോ കെ. കുഞ്ചെറിയ, പ്രധാനാധ്യാപിക നിഷ ദയാനന്ദന്‍ എന്നിവര്‍ പ്രസംഗിച്ചു.

ADVERTISEMENT

"ആലപ്പുഴക്കാർ ഇൻ കൊച്ചി...’ ഹൃദ്യമായ ഒത്തുചേരൽ

കൊച്ചി: ആലപ്പുഴയിൽ വേരുകളുള്ളവരും നിലവിൽ കൊച്ചിയിൽ താമസിക്കുന്നവരുമായ ആളുകൾക്കായി സംഘടിപ്പിച്ച "ആലപ്പുഴക്കാർ ഇൻ കൊച്ചി’ സംഗമം ഹൃദയസ്പർശിയായി. ആലപ്പുഴയിലെ പഴയകാല ഓർമകൾ അയവിറക്കിയും സൗഹൃദങ്ങൾ പുതുക്കിയും കൊച്ചിയിലെ ആലപ്പുഴക്കാർ സന്തോഷം പങ്കുവച്ചു. കേരള പിഡബ്ല്യുഡി മുൻ ചീഫ് എൻജിനിയർ എം.എ. ചാക്കോ എട്ടുകെട്ടിൽ, ആലപ്പുഴ സൗത്ത് ഇന്ത്യൻ റബർ വർക്സ് മുൻ സിഇഒ ജി. കൃഷ്ണൻ എന്നിവരെ ചടങ്ങിൽ ആദരിച്ചു. എറണാകുളം രാമവർമ ക്ലബ്ബിൽ നടന്ന ചടങ്ങിൽ പ്രമുഖ സംവിധായകൻ സിബി മലയിൽ, വ്യവസായി ജോസ് പട്ടാറ, ഓം കുമാർ, ശ്രീകുമാർ, ബിന്ദു മാധവ്, രാജ്കുമാർ, ജോണി വാര്യംപറമ്പിൽ, ഔസേപ്പച്ചൻ വാളക്കുഴി തുടങ്ങി നിരവധി പേർ പങ്കെടുത്തു. പ്രഫ. അയ്യങ്കാർ ഉൾപ്പെടെ അന്തരിച്ച ആലപ്പുഴയിലെ പ്രമുഖരെ യോഗം അനുസ്മരിച്ചു. ആലപ്പുഴ മുല്ലക്കൽ ചിറപ്പ്, പള്ളിപ്പെരുന്നാളുകൾ, ബീച്ചിലെ കറക്കം, ദിൽഖുഷ്, ഐസിഎച്ച്, ബ്രദേഴ്സ് തുടങ്ങിയ ഇഷ്ടഭക്ഷണശാലകൾ, സിആർ ലെതർ വർക്സ്, സെന്‍റ് ജോർജ് അംബ്രല്ല മാർട്ടിനടുത്തുള്ള കടകൾ, ലിയോ തേർട്ടീൻത് സ്കൂൾ, സെന്‍റ് ജോസഫ്സ് ഗേൾസ് സ്കൂൾ, കോളജ്, ഗോപിച്ചേട്ടന്‍റെ മുറുക്കാൻ കട, ആലപ്പുഴ ബീച്ച് തുടങ്ങിയ ആലപ്പുഴയുടെ ഓർമകൾ എല്ലാവരും പങ്കുവച്ചു. കൊച്ചിയിൽ സ്ഥിരതാമസമാക്കിയ ആലപ്പുഴക്കാരുടെ സംഗമം വരുംവർഷങ്ങളിലും നടത്തുമെന്നു സംഘാടകർ അറിയിച്ചു.

പുറക്കാട് പഞ്ചായത്തിന്‍റെ തീരപ്രദേശത്ത് വീണ്ടും നീലത്തിമിംഗലം അടിഞ്ഞു

അമ്പലപ്പുഴ: പുറക്കാട് പഞ്ചായത്തിന്‍റെ തീരപ്രദേശത്ത് ദിവസങ്ങൾക്കുള്ളിൽ രണ്ടാമതും നീലത്തിമിംഗലം അടിഞ്ഞു. പുറക്കാട് പഴയങ്ങാടി തീരത്താണ് ചൊവ്വാഴ്ച ഉച്ചകഴിഞ്ഞ് മൂന്നരയോടെ ചത്ത നിലയിലുള്ള കൂറ്റൻ തിമിംഗലമടിഞ്ഞത്. ഏകദേശം 30 മീറ്റർ നീളമുള്ള ഇത് ദിവസങ്ങൾക്കു മുൻപ് ചത്തതാണെന്ന് സംശയമുണ്ട്. അധികം അഴുകിയിട്ടില്ല. എങ്കിലും അതിരൂക്ഷമായ ദുർഗന്ധമാണ് പ്രദേശത്തുള്ളത്. ഇവിടെ കടൽഭിത്തിയില്ലാത്തതിനാൽ തീരത്തോട് ചേർന്നാണ് തിമിംഗലമടിഞ്ഞത്. നൂറു കണക്കിന് പേരാണ് ഇതിനെ കാണാനായി എത്തിച്ചേരുന്നത്. പഞ്ചായത്ത് പ്രസിഡന്‍റ് എ.എസ്. സുദർശനന്‍റെ നേതൃത്വത്തിൽ പഞ്ചായത്ത് അധികൃതരും തോട്ടപ്പള്ളി തീരദേശ പോലീസും സ്ഥലത്തെത്തി. തിമിംഗലമടിഞ്ഞു കയറിയത് ജില്ലാ കളക്ടർ, വനംവകുപ്പ് എന്നിവരെ അറിയിച്ചിട്ടുണ്ടെന്ന് പഞ്ചായത്ത് പ്രസിഡന്‍റ് പറഞ്ഞു. മൂന്നു ദിവസം മുമ്പ് ഇവിടെനിന്നു രണ്ടു കിലോമീറ്റർ തെക്ക് പുന്തലയിലും കൂറ്റൻ നീലത്തിമിംഗലമടിഞ്ഞു കയറിയിരുന്നു. വളരെയധികം അഴുകിയ നിലയിലായിരുന്നു അന്നത്തെ തിമിംഗലം.

തീരവും തീരജനതയും സംരക്ഷിക്കപ്പെടണം: ഫാ. സേവ്യര്‍ കുടിയാംശേരി

ആലപ്പുഴ: കടല്‍ത്തീരവും തീരജനതയും സംരക്ഷിക്കപ്പെടാന്‍ അടിയന്തര നടപടികള്‍ സ്വീകരിക്കണമെന്ന് ആലപ്പുഴ രൂപത പിആര്‍ഒയും കോസ്റ്റൽ എഡ്യൂക്കേഷണല്‍ സൊസൈറ്റി പ്രസിഡന്‍റുമായ ഫാ. സേവ്യര്‍ കുടിയാംശേരി സര്‍ക്കാരിനോട് ആവശ്യപ്പെട്ടു. അമ്പലപ്പുഴ മുതല്‍ ചെല്ലാനം വരെയുള്ള തീരപ്രദേശം അതിതീവ്രമായ കടല്‍ക്ഷോഭത്തെ നേരിടുകയാണ്. ചെല്ലാനത്തെ തീരദേശ റോഡ് മുഴുവന്‍ കടല്‍ജലം കയറി മുങ്ങിയതിനാല്‍ യാത്രപോലും മുടങ്ങിയിരിക്കുന്നു. കടല്‍ഭിത്തിയില്ലാത്ത ഒറ്റമശേരി, പുന്നപ്ര, പറവൂര്‍, നര്‍ബോന തുടങ്ങിയ പ്രദേശങ്ങള്‍ എത്രയും വേഗം കടല്‍ഭിത്തി കെട്ടി സംരക്ഷിക്കണം. തീരത്തുള്ള അനേകം വീടുകള്‍ തകര്‍ന്നുവീഴാറായിരിക്കുന്നു. അപകടങ്ങളില്‍പ്പെട്ട കപ്പലുകളില്‍നിന്നുള്ള കണ്ടെയ്‌നറുകള്‍ തീരത്തടിയുന്നത് തീരത്ത് വലിയ പരിഭ്രാന്തി പരത്തിയിരിക്കുകയാണ്. ഇതിനെല്ലാം പരിഹാരം കണ്ടെത്താൻ സർക്കാർ തയാറാകണമെന്ന് അദ്ദേഹം പറഞ്ഞു. കാറ്റും കോളും വരുമ്പോള്‍ മീന്‍പിടിക്കാന്‍ പോകരുതെന്നു പറയുന്ന ദിവസങ്ങള്‍ ഏറെയാകുന്ന സാഹചര്യത്തില്‍ എങ്ങനെ ജീവിക്കും എന്നതു ഗൗരവമുള്ള വിഷയമാണ്. അത്തരം ദിവസങ്ങളില്‍ നഷ്ടപരിഹാരം നല്‍കാന്‍ മനുഷ്യാവകാശ കമ്മീഷന്‍റെ വിധിയുള്ളതാണെങ്കിലും കൃത്യമായി നല്‍കുന്നില്ല. ഈ സാഹചര്യത്തില്‍ അടിയന്തര നടപടികള്‍ സ്വീകരിക്കപ്പെടണമെന്നും അദ്ദേഹം ആവശ്യപ്പെട്ടു. റോയി പി. തിയോച്ചന്‍, ഗര്‍ഷോം രാഹുല്‍, റാഫേല്‍ കൊമ്മാടി എന്നിവര്‍ പ്രസംഗിച്ചു.

ആറാട്ടുപുഴ, തൃക്കുന്നപ്പുഴ പഞ്ചായത്തുകളിൽ കടലാക്രമണം

കായംകുളം: ഇടവേളയ്ക്കുശേഷം വീണ്ടും കടലാക്രമണം ശക്തമായത് തൃക്കുന്നപ്പുഴ, ആറാട്ടുപുഴ തീരദേശവാസികളെ ദുരിതത്തിലാഴ്ത്തി. പാഞ്ഞുകയറിയ തിരമാലയ്ക്കു മുന്നിൽ നിസഹായരായി നോക്കിനിൽക്കാനേ അവർക്ക് കഴിഞ്ഞുള്ളൂ. കനത്ത മഴയ്ക്കൊപ്പം കടലാക്രമണവും ശക്തമായതോടെ തീരവാസികളുടെ ദുരിതം കടുത്തതായി. കഴിഞ്ഞ ദിവസം ഉച്ചയോടെ ആരംഭിച്ച കടലാക്രമണം കനത്ത നാശമാണ് തീരത്ത് വിതച്ചത്. നിരവധി വീടുകൾ ഏതുനിമിഷവും കടലെടുക്കാവുന്ന അവസ്ഥയിലാണ്. തീരദേശ റോഡിന് പടിഞ്ഞാറുഭാഗം കടൽവെള്ളം കെട്ടിനിൽക്കുന്നു. വരും ദിവസങ്ങളിലും കടൽ ദുരിതം തീർക്കുമെന്ന ഭീതി ജനങ്ങൾക്കുണ്ട്. ആറാട്ടുപുഴ വലിയഴിക്കൽ, പെരുമ്പള്ളി, കള്ളിക്കാട് മീശമുക്ക്, എസി പള്ളി ജംഗ്ഷൻ വടക്കു മുതൽ എംഇഎസ് ജംഗ്ഷൻ വരെ, പടിഞ്ഞാറെ ജുമാമസ്ജിദിന് വടക്കുഭാഗം മുതൽ കാർത്തിക ജംഗ്ഷൻ, മംഗലം എന്നിവിടങ്ങൾ വരെയും കടലാക്രമണം ജനജീവിതം ദുരിതത്തിലാഴ്ത്തി. കരയിലേക്ക് അടിച്ചുകയറിയ തിരമാല തീരദേശ റോഡ് കവിഞ്ഞ് ശക്തമായി കിഴക്കോട്ട് ഒഴുകി. തീരദേശ റോഡിന് പടിഞ്ഞാറും കിഴക്കുമുള്ള നൂറിലധികം വീടുകളിൽ വെള്ളം കയറി. പെരുമ്പള്ളി ഭാഗത്ത് നിർമിച്ച ജിയോ കടൽഭിത്തി ഭാഗികമായി തകർന്നു. ഇവിടെ ഏത് നിമിഷവും റോഡ് കടലെടുക്കാവുന്ന അവസ്ഥയിലാണ്. പെരുമ്പള്ളി ഭാഗത്ത് വൻതോതിലാണ് തീരം കടലെടുക്കുന്നത്. ഇവിടെ പേരിനു പോലും കടൽഭിത്തി നിലവിലില്ല. എസി പള്ളി ജംഗ്ഷന് വടക്കുഭാഗത്ത് തീരദേശ റോഡിൽ മണ്ണടിഞ്ഞു തുടങ്ങി. നിരവധി കുടുംബങ്ങൾ ബന്ധുവീടുകളിലേക്ക് താമസം മാറി. നിരവധി കച്ചവട സ്ഥാപനങ്ങളിലും വെള്ളം കയറി. കായംകുളം പൊഴിയുടെ വടക്കേക്കരയിലെ കായലോരത്തും കടലേറ്റം നാശം വിതയ്ക്കുകയാണ്. ഇവിടെ കൽക്കെട്ട് ഇടിഞ്ഞ് കര നഷ്ടപ്പെടുന്നു. കായംകുളം പൊഴിയിലേക്ക് കയറുന്ന തിരമാലകൾ കരയിലേക്ക് ആഞ്ഞടിക്കുന്നത് വലിയഴീക്കൽ സ്കൂളിന്‍റെ ഭാഗത്തും പരിസരത്തും തീരം നഷ്ടപ്പെടാൻ കാരണമാകുന്നു. ഈ ഭാഗത്തെയും ജനങ്ങൾ കടുത്ത ഭീതിയിലാണ്. തൃക്കുന്നപ്പുഴ പഞ്ചായത്തിലെ മതുക്കൽ ചേലക്കാട്, പാനൂർ ഭാഗങ്ങളിലും കടലാക്രമണം ദുരിതം തീർത്തു. കടലാക്രമണത്തിൽ നാശം സംഭവിച്ച മതുക്കൽ ചേലക്കാട് തീരദേശ റോഡിന് കൂടുതൽ നാശമുണ്ടായി. വീടുകളുടെ സംരക്ഷണത്തിനായി അടുക്കിവച്ച മണൽചാക്കുകൾ കൂടി കടലെടുത്തത് വീട്ടുകാരെ സങ്കടത്തിലാഴ്ത്തിയിരിക്കുകയാണ്.

പന്നിക്കെണിയിൽനിന്ന് കർഷകൻ ഷോക്കേറ്റ് മരിച്ച സംഭവത്തിൽ അയൽവാസി അറസ്റ്റിൽ

ചാരുംമൂട്: താമരക്കുളത്ത് പന്നിക്കെണിയിൽനിന്നു ഷോക്കേറ്റ് കർഷകനായ ശിവൻകുട്ടി കെ. പിള്ള (67) കഴിഞ്ഞ ദിവസം മരിച്ച സംഭവത്തിൽ അയൽവാസിയായ കർഷകനെ നൂറനാട് പോലീസ് അറസ്റ്റ് ചെയ്തു. താമരക്കുളം കിഴക്കേമുറി ചരുവിള ജോൺസൺ (സജി-61) ആണ് അറസ്റ്റിലായത്. മനഃപൂർവമല്ലാത്ത നരഹത്യക്കാണ് പോലീസ് കേസെടുത്തത് . ജോൺസൺ അനധികൃതമായി സ്ഥാപിച്ച വൈദ്യുതിവേലിയിൽ നിന്നാണ് കർഷകന് ഷോക്കേറ്റതെന്ന് പോലീസും വൈദ്യുതിവകുപ്പ് ഉദ്യോഗസ്ഥരും നടത്തിയ അന്വേഷത്തിൽ കണ്ടെത്തിയിരുന്നു. ഇതേത്തുടർന്നാണ് കസ്റ്റഡിയിലായ ജോൺസന്‍റെ അറസ്റ്റ് ഇന്നലെ പോലീസ് രേഖപ്പെടുത്തിയത്. പോസ്റ്റുമോർട്ടത്തിന്‍റെ പ്രാഥമിക റിപ്പോർട്ടിൽ മരണം ഷോക്കേറ്റാണ് സംഭവിച്ചിരിക്കുന്നതെന്ന് പോലീസ് പറഞ്ഞു. താമരക്കുളം പഞ്ചായത്തിലെ കിഴക്കേമുറി ഒൻപതാം വാർഡിലെ താമസക്കാരാണ് ഷോക്കേറ്റ് മരിച്ച ശിവൻകുട്ടിപിള്ളയും അറസ്റ്റിലായ ജോൺസണും. തൊട്ടടുത്ത കൃഷിഭൂമികളിലാണ് ഇരുവരും കൃഷി ചെയ്തിരുന്നത്. ജോൺസന്‍റെ കൃഷിസ്ഥലത്തിന് ചുറ്റുമായി പന്നികളെ കൊല്ലാൻ സ്ഥാപിച്ചിരുന്ന വൈദ്യുതികമ്പിയിൽനിന്നാണ് ശിവൻകുട്ടിക്ക് ഷോക്കേറ്റ് മരണം സംഭവിച്ചത്. പന്നിക്കെണിയിലേക്കുള്ള വൈദ്യുതി കട്ട് ചെയ്യാൻ മറന്നുപോയതാണ് അപകടകാരണമെന്ന് അറസ്റ്റിലായ ജോൺസൺ പോലീസിന് മൊഴി നൽകി. മാവേലിക്കര കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വാടക്കൽ അറപ്പപൊഴിയിൽ രക്ഷാബോട്ട് വടംകെട്ടി സുരക്ഷയൊരുക്കി

അമ്പലപ്പുഴ: വാടക്കൽ അറപ്പപൊഴിയിൽ രക്ഷാബോട്ട് വടം കെട്ടി സുരക്ഷയൊരുക്കി. പൊഴിയിലേക്കു ശക്തമായ തിരമാലകൾ അടിച്ചുകയറി ആടിയുലയുന്ന ബോട്ട് തിരികെ കടലിലേക്ക് ഒഴുകാതിരിക്കാൻ കപ്പൽ കമ്പനി ജീവനക്കാരും ദുരന്ത നിവാരണ സേനയും ഇന്നലെ വൈകിട്ടും അറപ്പപൊഴി തീരത്തു സുരക്ഷ ഒരുക്കാൻ എത്തിയിരുന്നു. കസ്റ്റംസ് ഉദ്യോഗസ്ഥരും പോലീസുമെത്തി ബോട്ടു കൊണ്ടുപോകുന്നതിനു വേണ്ട നടപടിക്രമങ്ങൾ നടത്തി. ‌കണ്ണൂർ ബേപ്പൂർ കടലിൽ അഗ്നിക്കിരയായ സിംഗപ്പൂർ ചരക്കുകപ്പൽ വാൻഹായിൽനിന്നുള്ള ലൈഫ് ബോട്ട് ഞായറാഴ്ച രാത്രിയാണ് വാടക്കൽ തീരത്തേക്കു അടിഞ്ഞു കയറിയത്. മത്സ്യ ത്തൊഴിലാളികൾ വിവരമറിയിച്ചതനുസരിച്ചു ദുരന്ത നിവാരണ വിഭാഗവും പോലീസും സ്ഥലത്തെത്തി തീരത്തെ ജനങ്ങൾക്ക് മുന്നറിയിപ്പ് നൽകിയിരുന്നു. പ്രത്യക രൂപകല്പനയുള്ള രക്ഷാബോട്ടിൽ പത്തു പേർക്കോളം കയറി രക്ഷനേടാം. കൊല്ലത്ത് കസ്റ്റംസിന്‍റെ യാഡിലേക്ക് രാത്രിയോടെ കൊണ്ടുപോകാനാണ് നീക്കം.

അപ്പർ കുട്ടനാട്ടില്‍ ജലനിരപ്പ് ഉയരുന്നു; റോഡുകളില്‍ വെള്ളം കയറി

എടത്വ: ശക്തമായ മഴയിലും കിഴക്കന്‍ വെള്ളത്തിന്‍റെ വരവിലും അപ്പര്‍ കുട്ടനാട്ടില്‍ ജലനിരപ്പ് വീണ്ടും ഉയര്‍ന്നു. ഗ്രാമീണ റോഡുകള്‍ പലതും വെള്ളം കയറി മുങ്ങി. മുട്ടാര്‍, തായങ്കരി, കളങ്ങര റോഡുകളില്‍ വെള്ളം കയറിയതിനെത്തുടര്‍ന്ന് കെഎസ്ആര്‍ടിസി സര്‍വീസുകള്‍ താത്കാലികമായി നിര്‍ത്തിവച്ചു ഒരാഴ്ച മുന്‍പുണ്ടായ വെള്ളപ്പൊക്കത്തില്‍ വീടുവിട്ട് ക്യാമ്പുകളില്‍ അഭയം തേടിയ ദുരിതബാധിതര്‍ തിരികെ വീടുകളിലെത്തി സാധാരണ നിലയിലേക്കു മടങ്ങുമ്പോഴാണ് അടുത്ത വെള്ളം വീട്ടുമുറ്റത്ത് എത്തിയത്. മഴയ്ക്ക് അല്പം ശമനം വന്നെങ്കിലും പമ്പ, മണിമല, അച്ചന്‍കോവിലാറുകളില്‍ ജലനിരപ്പ് ഉയരുന്നുണ്ട്. തലവടി, വീയപുരം, തകഴി, മുട്ടാര്‍, ചെറുതന പഞ്ചായത്തിലെ ഒട്ടുമിക്ക വീടുകൾക്കു ചുറ്റും വെള്ളം കെട്ടിനില്‍ക്കുകയാണ്. വെള്ളം ഇനിയും ഉയര്‍ന്നാല്‍ തലവടി പ്രദേശത്തെ നിരവധി വീടുകളില്‍ വെള്ളം കയറും. ആശങ്കയോടു കൂടിയാണ് താമസക്കാര്‍ വീടിനുള്ളില്‍ കഴിയുന്നത്. ചക്കുളത്തുകാവ് ക്ഷേത്ര മൈതാനവും വെള്ളത്തില്‍ മുങ്ങി. തലവടി കുന്നുമ്മാടി -കുതിരച്ചാല്‍ പ്രദേശങ്ങളും വെള്ളത്തില്‍ മുങ്ങിയ നിലയിലാണ്. ദിവസങ്ങള്‍ക്ക് മുന്‍പാണ് ഇവര്‍ ക്യാമ്പുകളില്‍ നിന്ന് വീട്ടിലേക്കു മടങ്ങിയത്. കാലവര്‍ഷം ആരംഭിച്ച് രണ്ടാം തവണയാണ് അപ്പര്‍ കുട്ടനാട് വെള്ളത്തില്‍ മുങ്ങുന്നത്. കഴിഞ്ഞ കെടുതിയില്‍ പ്രദേശത്ത് മഴയ്‌ക്കൊപ്പം ശക്തമായ കാറ്റും വീശിയടിച്ച് നിരവധി വീടുകള്‍ മരം വീണും മേല്‍ക്കൂര പറന്നുപോയും തകര്‍ന്നിരുന്നു. കുട്ടനാട്, അപ്പര്‍ കുട്ടനാട് മേഖലയില്‍ നൂറിലേറെ വീടുകള്‍ തകര്‍ന്നിരുന്നു. താഴ്ന്ന പ്രദേശങ്ങളിലെ സ്‌കൂള്‍ മുറ്റങ്ങള്‍ വെള്ളത്തിലായി. കൂടാതെ ഉള്‍പ്രദേശങ്ങളില്‍ നിന്നുള്ള വിദ്യാര്‍ഥികള്‍ക്ക് സ്‌കൂളില്‍ എത്താനും കഴിയാത്ത അവസ്ഥയാണ്.

യാത്രക്കാരനെയും 15 നായ്ക്കളെയും കടിച്ച തെരുവുനായ ചത്തു; നാട് ആശങ്കയിൽ

അമ്പലപ്പുഴ: കാൽനടയാത്രക്കാരനെയും മറ്റു 15ഓളം നായ്ക്കളെയും കടിച്ച തെരുവുനായ ചത്തതോടെ നാട് ആശങ്കയിൽ. പുറക്കാട് കിഴക്ക് തൈച്ചിറയിലാണ് സംഭവം. കെപിഎംഎസ് തൈച്ചിറ ശാഖാ സെക്രട്ടറി കൂടിയായ മണക്കൽ ഗോപി (60)ക്കാണ് നായയുടെ കടിയേറ്റത്. സമീപത്തുള്ള ഒരു വീട്ടിലെ ചടങ്ങിൽ പങ്കെടുത്ത് മടങ്ങിയ ഇദ്ദേഹത്തെ റോഡിൽവച്ചാണ് തെരുവുനായ ആക്രമിച്ചത്. ഇതിന് ശേഷം ഈ നായ സമീപത്തെ പുരയിടത്തിലുണ്ടായിരുന്ന 15 ഓളം നായ്ക്കളെയും കടിച്ചതായി നാട്ടുകാർ പറഞ്ഞു. പിന്നീട് രണ്ടു മണിക്കൂറിന് ശേഷം ഈ നായയെ സമീപത്തെ വാഴത്തോട്ടത്തിൽ ചത്ത നിലയിൽ കണ്ടെത്തുകയായിരുന്നു. ഇവിടെയുണ്ടായിരുന്ന നിരവധി വാഴകളും നായ കടിച്ചു. ഈ നായയുടെ കടിയേറ്റ മറ്റ് തെരുവുനായ്ക്കൾ അവശനിലയിലാണ്. ഈ നായ്ക്കൾക്കും പേവിഷബാധയേറ്റതായാണ് സംശയം. ഇതോടെയാണ് നാട്ടുകാർ ആശങ്കയിലായത്. ദിവസവും നൂറുകണക്കിന് പേർ സഞ്ചരിക്കുന്ന റോഡിനരികിലാണ് തെരുവുനായ്ക്കൾ വിഹരിക്കുന്നത്. നായയുടെ കടിയേറ്റ ഗോപിയെ പിന്നീട് ആലപ്പുഴ മെഡിക്കൽ കോളജാശുപത്രിയിൽ പ്രവേശിപ്പിച്ചു.

തലവടി പഞ്ചായത്തില്‍ സിപിഎം-സിപിഐ പോര്; അവിശ്വാസപ്രമേയത്തിന് നോട്ടീസ്

എടത്വ: എല്‍ഡിഎഫ് ഭരിക്കുന്ന തലവടി പഞ്ചായത്തില്‍ സിപിഎം പ്രസിഡന്‍റിനും വൈസ് പ്രസിഡന്‍റിനുമെതിരേ സിപിഐ അവിശ്വാസ പ്രമേയത്തിന് നോട്ടീസ് നല്‍കി. അഴിമതി ആരോപണവും വികസന പോരായ്മയും സ്വജനപക്ഷപാതവും ചൂണ്ടിക്കാട്ടിയാണ് സിപിഐ അംഗവും ഇടത് സ്വതന്ത്രനും ചമ്പക്കുളം ബിഡിഒ ഷാജുമോന്‍ പത്രോസിന് നോട്ടീസ് നല്‍കിയത്. തദ്ദേശസ്വയംഭരണ തെരഞ്ഞെടുപ്പ് പടിവാതിക്കല്‍ എത്തിയപ്പോഴാണ് എല്‍ഡിഎഫില്‍ ചേരിപ്പോര് രൂക്ഷമായത്. കുറച്ചു നാളുകളായി തലവടിയില്‍ സിപിഎം-സിപിഐ പോര് ശക്തമായിരുന്നു. 2020ലെ ഭരണമുന്നണിയായ യുഡിഎഫിനെ തറപറ്റിച്ച് മുന്നില്‍രണ്ട് ഭൂരിപക്ഷത്തിലേറെ സീറ്റിന് വിജയിച്ച എല്‍ഡിഎഫിന്‍റെ വികസന പോരായ്മയാണ് സിപിഐ മുഖ്യമായി ചൂണ്ടിക്കാട്ടുന്നത്. സിപിഎമ്മിനെതിരേ വിവിധ വിഷയങ്ങള്‍ ഉന്നയിച്ചാണ് അവിശ്വാസപ്രമേയത്തിന് സിപിഐ നോട്ടീസ് നല്‍കിയത്. നിലംപറ്റാറായ പഴയ പഞ്ചായത്ത് ഓഫീസ് കെട്ടിടം പുനര്‍നിര്‍മിക്കാനുള്ള ഒരു നടപടിയും സ്വീകരിക്കാതെ സ്വകാര്യ കെട്ടിടത്തിലേക്കു പ്രവര്‍ത്തനം മാറ്റുകയും ഓഫീസ് പ്രവര്‍ത്തനം മാറ്റി ഒരുവര്‍ഷം കഴിഞ്ഞിട്ടും പഞ്ചായത്ത് സ്ഥലത്തെ കെട്ടിടം നിര്‍മിക്കാനുള്ള നടപടി ഇതുവരെ ആരംഭിച്ചില്ല, പ്രാദേശിക വഴികള്‍, കുടിവെള്ള പ്രശ്‌നം, വഴിവിളക്കുകള്‍ തുടങ്ങി ഒട്ടേറെ വികസന പോരായ്മകൾ സിപിഐ ആരോപിക്കുന്നു. ഭരണമുന്നണിയില്‍ സിപിഐക്കു പ്രാമുഖ്യം നല്‍കാത്തതും പ്രമേയ നോട്ടീസിന് കാരണമായിട്ടുണ്ട്. കൂടാതെ അഴിമതി ആരോപണവും ചൂണ്ടിക്കാട്ടുന്നു. 15 അംഗ ഭരണസമിതിയിൽ എല്‍ഡിഎഫില്‍നിന്ന് സിപിഎം- 6, കേരള കോണ്‍ഗ്രസ്-എം-1, സിപിഐ -1, ഇടതു സ്വതന്ത്രര്‍ -3, യുഡിഫില്‍നിന്ന് കോണ്‍ഗ്രസ് -2, കേരള കോണ്‍ഗ്രസ് -1, ബിജെപി-1 എന്നിങ്ങനെയാണ് കക്ഷിനില.

പരുമല തിരുമേനിയുടെ 177-ാമത് ജന്മദിനം ആചരിച്ചു

മാന്നാർ: പരിശുദ്ധ പരുമല കൊച്ചുതിരുമേനിയുടെ 177-ാമത് ജന്മദിനം വിവിധ പരിപാടികളോടെ ആഘോഷിച്ചു. ഇതോടനുബന്ധിച്ച് സെന്‍റ് ഗ്രിഗോറിയോസ് യുവജനപ്രസ്ഥാനം പരുമല പള്ളി യൂണിറ്റിന്‍റെ നേതൃത്വത്തിൽ തിരുവല്ല താലൂക്ക് ആശുപത്രിയിലെ രോഗികൾക്കും കൂട്ടിരിപ്പുകാർക്കും ഉച്ചഭക്ഷണം നൽകി. ഭക്ഷണത്തിന്‍റെ വിതരണോദ്ഘാടനം പരുമല സെമിനാരി മാനേജർ ഫാ. എൽദോസ് ഏലിയാസ് നിർവഹിച്ചു. ഫാ. തോമസ് വർഗീസ്, ഓർത്തഡോക്സ് സഭ മാനേജിംഗ് കമ്മിറ്റിയംഗം മത്തായി ടി. വർഗീസ്, യുവജനപ്രസ്ഥാനം യൂണിറ്റ് സെക്രട്ടറി ലിന്‍റു ജേക്കബ്, വൈസ് പ്രസിഡന്‍റ് ബാബു പി. തോമസ് എന്നിവർ പ്രസംഗിച്ചു.

ദീപികയെ നെഞ്ചിലേറ്റിയ മോൻസിച്ചായൻ മടങ്ങി; മോൻസിക്കടവ് മൂകമായി

സ്വന്തം ലേഖകൻ കോട്ടയം: ഒരു തൊഴിൽ എന്ന നിലയിലും വരുമാനം എന്ന നിലയിലും പത്രത്തിന്‍റെ ഏജൻസി എടുക്കുന്നവരാണ് എല്ലാവരുംതന്നെ. എന്നാൽ, അവരിൽനിന്നു തികച്ചും വ്യത്യസ്തനായിരുന്നു കഴിഞ്ഞ ദിവസം അന്തരിച്ച പള്ളം നങ്ങച്ചിവീട്ടിൽ ആന്‍റണി ജോസഫ് എന്ന നാട്ടുകാരുടെ മോൻസിച്ചായൻ. ദീപികയോടുള്ള സ്നേഹത്തെപ്രതി പത്രം വായിക്കാൻ കിട്ടാൻ വേണ്ടി മാത്രം ദീപികയുടെ ഏജൻസി എടുത്തയാളാണ് മോൻസിച്ചായൻ. പതിനഞ്ചു വർഷങ്ങൾക്കു മുന്പ് ദീപികയുടെ ഏജൻസിയിൽ ചില തടസങ്ങളുണ്ടായി ഇവർ താമസിക്കുന്ന പ്രദേശത്തു ദീപിക പത്രം കിട്ടാൻ ബുദ്ധിമുട്ട് വന്നു. പല രീതിയിലും ശ്രമിച്ചിട്ടും പത്രം കൃത്യമായി കിട്ടാതെ വന്നതോടെ മോൻസിച്ചായൻ സ്വന്തം നിലയിൽ ദീപികയുടെ ഏജൻസി എടുക്കാൻ തീരുമാനിച്ചു. സമീപവാസികളായ ചില സുഹൃത്തുക്കളെയും വരിക്കാരായി കൂട്ടി. അങ്ങനെ അഞ്ചു പത്രത്തിന്‍റെ ഏജൻസിക്കു തുടക്കമിട്ടു. ഇങ്ങനെ വരുത്തിയ പത്രം വിതരണം ചെയ്യുന്നവരെ ഏല്പിച്ച് ഈ വീടുകളിൽ എത്തിക്കുകയായിരുന്നു. കുറെക്കാലത്തിനു ശേഷം അദ്ദേഹം ഏജൻസിയുടെ നടത്തിപ്പ് മറ്റൊരു ഏജന്‍റിനെ ഏൽപ്പിച്ചു. കൈനകരിയിൽനിന്നു പള്ളം ബോർമക്കവലയ്ക്കു സമീപം താമസമാക്കിയ മോൻസിച്ചായൻ മികച്ച കർഷകൻകൂടിയായിരുന്നു. എൺപത്തിനാലാം വയസിലും കൃഷിയിൽ സജീവമായി നിന്നു. കുട്ടനാട്ടിൽ അടുത്ത കാലംവരെ കായൽ കൃഷി ചെയ്തു. കൂടാതെ പള്ളത്ത് നെൽകൃഷി, ഫാം, മീൻ വളർത്തൽ ഉൾപ്പെടെ നടത്തിയിരുന്നു. കഴിഞ്ഞ ദിവസം കൃഷി ഒാഫീസിലേക്കു പോകവേയാണ് കുഴഞ്ഞുവീണു മരിച്ചത്. ഇദ്ദേഹവും കുടുംബവും താമസിക്കുന്ന സ്ഥലത്തിനു സമീപമുള്ള കടവിന്‍റെ പേരുതന്നെ മോൻസിക്കടവ് എന്നാണ്. ചങ്ങനാശേരിയിൽനിന്നു നടത്തുന്ന അൽഫോൻസാ തീർഥാടനത്തിനു പള്ളം സെന്‍റ് പോൾസ് ഒാർത്തഡോക്സ് പള്ളി പരിസരത്തു വിശ്രമത്തിനും ഭക്ഷണത്തിനുമുള്ള ക്രമീകരണങ്ങളെല്ലാം ചെയ്യാൻ പതിറ്റാണ്ടുകളായി മോൻസിച്ചായൻ നേതൃനിരയിലുണ്ടായിരുന്നു. ഫാ. ജോർജ് നങ്ങച്ചിവീട്ടിൽ (അമേരിക്ക), സിസ്റ്റർ മേരി ഗ്രേസ് സിഎംസി, സിസ്റ്റർ റീമ എംഎസ്ജെ എന്നിവർ സഹോദരങ്ങളാണ്. ഏഷ്യയിലെ മാർത്തോമ്മ സഭകൾ എന്ന പ്രശസ്തമായ ഗ്രന്ഥം രചിച്ച റവ.ഡോ. എൻ.എ. തോമസ് നങ്ങച്ചിവീട്ടിൽ ഇദ്ദേഹത്തിന്‍റെ പിതൃസഹോദരനാണ്. സംസ്കാരശുശ്രൂഷ ഇന്നു രാവിലെ 11ന് വീട്ടിൽ ആരംഭിച്ച് കടുവാക്കുളം ലിറ്റിൽ ഫ്ളവർ പള്ളിയിൽ. ഭാര്യ എൽസി ആന്‍റണി കാഞ്ഞിരപ്പള്ളി ഏർത്തയിൽ കുടുംബാംഗം. മക്കൾ: റോസി, മേഴ്സി. മരുമക്കൾ: ബിജു ഡൊമിനിക് നടുവിലേഴം (അബുദാബി, പ്രസിഡന്‍റ്; കത്തോലിക്ക കോൺഗ്രസ് യുഎഇ), ബിജോയി ജോസ് വെള്ളാമത്ര (അബുദാബി).

ചെങ്ങന്നൂരിൽ റോഡ് ഇടിഞ്ഞു; അഞ്ചു വീടുകൾ ഭീഷണിയിൽ

ചെങ്ങന്നൂര്‍: തിരുവന്‍വണ്ടൂര്‍ പഞ്ചായത്തിലെ അഞ്ചാം വാര്‍ഡില്‍ വാണിയപ്പുരക്കല്‍പടി-തുരുത്തേല്‍ പടി റോഡും അനുബന്ധ തിട്ടയും കഴിഞ്ഞദിവസമുണ്ടായ കനത്ത മഴയില്‍ ഇടിഞ്ഞ് വരട്ടാറ്റില്‍ പതിച്ചു. റോഡ് അവസാനിക്കുന്ന വരട്ടാറിന്‍റെ തീരപ്രദേശത്ത് അഞ്ചോളം കുടുംബങ്ങളാണ് താമസിക്കുന്നത്. ഇവരുടെ യാത്രാമാര്‍ഗവും സുരക്ഷയും ഇതോടെ അപകടത്തിലായി. 2018ലെ പ്രളയകാലത്ത് ഈ റോഡിന്‍റെ പടിഞ്ഞാറു ഭാഗം പൂര്‍ണമായും ഇടിഞ്ഞുതാഴ്ന്ന് പ്രദേശവാസികള്‍ക്ക് നടവഴി പോലും ഇല്ലാത്ത അവസ്ഥയായിരുന്നു. തുടര്‍ന്ന് പഞ്ചായത്ത് ഈ വഴി കോണ്‍ക്രീറ്റ് ചെയ്തിരുന്നു. എന്നാല്‍, മുന്‍ വര്‍ഷങ്ങളിലും മഴയിലും വെള്ളപ്പൊക്കത്തിലും ഇതിന്‍റെ മധ്യഭാഗം രണ്ടു പ്രാവശ്യം ഇടിഞ്ഞു തകര്‍ന്നിരുന്നു. ഇതിനു പിന്നാലെയാണ് ഇന്നലെ രാവിലെ റോഡും തിട്ടയും പൂര്‍ണമായി ഇടിഞ്ഞ് ആറ്റിലേക്ക് പതിച്ചത്. റോഡരികില്‍ സ്ഥാപിച്ചിരുന്ന വൈദ്യുതിപോസ്റ്റും ആറ്റിലേക്കു വീണു. സംഭവം ശ്രദ്ധയില്‍പ്പെട്ടയുടന്‍ അധികൃതരെ വിവരമറിയിക്കുകയും വൈദ്യുതിബന്ധം വിച്ഛേദിക്കുകയും ചെയ്തു. റോഡ് അവസാനിക്കുന്ന ഭാഗത്തെ താമസക്കാരനായ വിമുക്തഭടന്‍ ശ്രീകുമാര്‍ ശ്രീവിലാസത്തിന്‍റെ വീട്ടിലേക്കുള്ള വഴിയാണ് പ്രധാനമായും തകര്‍ന്നത്. സമീപവാസികളായ പ്രകാശ് തുരുത്തേല്‍, രാജപ്പന്‍പിള്ള രാജമംഗലത്ത്, രാജപ്പന്‍ നായര്‍ ഗുരുനാഥന്‍പറമ്പില്‍ എന്നിവരുടെ വീടുകളും തീരമിടിയല്‍ ഭീഷണി നേരിടുകയാണ്. ഏത് നിമിഷവും റോഡും തിട്ടയും വീണ്ടും ഇടിഞ്ഞ് ആറ്റിലേക്ക് പതിക്കാവുന്ന അവസ്ഥയാണുള്ളത്. ആശങ്കയില്‍ പ്രദേശവാസികള്‍ തിട്ട ഇടിയുന്നതോടെ വീടുകളും നദീതീരവും തമ്മിലുള്ള അകലം കുറഞ്ഞു വരികയാണ്. മഴ ശക്തമാകുന്നതോടെ ഏറെ ഭയത്തോടെയാണ് ഈ വീട്ടുകാര്‍ കഴിഞ്ഞുകൂടുന്നത്. തങ്ങളുടെ ജീവനും സ്വത്തിനും ഭീഷണിയുണ്ടോയെന്ന ആശങ്കയിലാണ് ഇവര്‍. മണല്‍വാരല്‍ കാരണമായെന്ന് ആരോപണം വില്ലേജ് ഓഫീസര്‍, പഞ്ചായത്ത് എഇ, പ്രസിഡന്‍റ്, വാര്‍ഡ് മെംബര്‍ തുടങ്ങിയവര്‍ സ്ഥലം സന്ദര്‍ശിച്ചു സ്ഥിതിഗതികള്‍ വിലയിരുത്തി. എന്നാല്‍, ഈ പ്രദേശത്ത് മുന്‍പ് രൂക്ഷമായ മണല്‍വാരല്‍ നടന്നതാണ് തിട്ടയ്ക്ക് ബലക്ഷയമുണ്ടാകാനും തുടര്‍ന്ന് ഇടിയാനും കാരണമായതെന്ന് പ്രദേശവാസികള്‍ക്കിടയില്‍ ശക്തമായ ആരോപണമുണ്ട്. ഇത് സംബന്ധിച്ച് വിശദമായ അന്വേഷണം നടത്തണമെന്ന ആവശ്യവും ഉയര്‍ന്നിട്ടുണ്ട്.

തണ്ണീര്‍മുക്കം ഹൗസ് ബോട്ട് ടെർമിനൽ നോക്കുകുത്തി

ചേര്‍ത്തല: തണ്ണീർമുക്കത്ത് ഏഴു വർഷങ്ങൾക്ക് മുമ്പ് സംസ്ഥാന ടൂറിസം വകുപ്പ് ഒരു കോടി 62 ലക്ഷം രൂപ ചെലവാക്കി നിർമാണം പൂര്‍ത്തീകരിച്ച ഹൗസ് ബോട്ട് ടെർമിനൽ ഇന്നും നോക്കുകുത്തിയായി ഉപയോഗശൂന്യമായി നശിച്ചുകൊണ്ടിരിക്കുന്നു. ഇപ്പോൾ ഇവിടെ സാമൂഹ്യവിരുദ്ധരുടെ താവളവും തെരുവ് നായ്ക്കളുടെ വിശ്രമ കേന്ദ്രവുമാണ്. തണ്ണീര്‍മുക്കം-കുമരകം വേമ്പനാട്ട് കായലിന്‍റെ ടൂറിസത്തിനുള്ള പ്രാധാന്യം പരിഗണിച്ച് ടുറിസം വകുപ്പിന്‍റെ നേതൃത്വത്തില്‍ 17 വര്‍ഷം മുമ്പാണ് ടെര്‍മിനിലിന്‍റെ നിര്‍മാണം ആരംഭിക്കുന്നത്. നിര്‍മാണം പൂര്‍ത്തീകരിക്കുന്നതിനായി പത്തുവര്‍ഷത്തോളം പിന്നിട്ടു. ടെര്‍മിനലില്‍ ഒരേസമയം അഞ്ച് ഹൗസ് ബോട്ടുകള്‍ക്കുവരെ നങ്കൂരമിടാന്‍ സൗകര്യമുണ്ട്. ടോയ്‌ലറ്റ്, ലഘുഭക്ഷണശാല, കായല്‍ക്കാഴ്ചകാണാനുള്ള പവലിയന്‍, സഞ്ചാരികള്‍ക്ക് വിശ്രമിക്കാനുള്ള സൗകര്യം തുടങ്ങിയവ ഉള്‍പ്പെടെയുള്ള സൗകര്യങ്ങള്‍ ടെര്‍മിനലില്‍ ഉണ്ട്. എന്നാല്‍, നിര്‍മാണം പൂര്‍ത്തിയാക്കി ഏഴുവര്‍ഷം കഴിഞ്ഞിട്ടും ടെര്‍മിനല്‍ ഉദ്ഘാടനം ചെയ്ത് തുറന്നുകൊടുക്കാന്‍ അധികൃതര്‍ക്ക് കഴിഞ്ഞില്ല. പഞ്ചായത്ത് അധികൃതര്‍ കെട്ടിട നമ്പർ നൽകാത്തതാണ് പ്രധാനപ്രശ്നം. കെട്ടിടത്തിന്‍റെ അലൈൻമെന്‍റ് കായലിലോട്ട് നീണ്ടുനിൽക്കുന്നു എന്ന് പറഞ്ഞാണ് പഞ്ചായത്ത് കെട്ടിടനമ്പർ നൽകുന്നതില്‍ വിമുഖത കാണിച്ചത്. തീരദേശ പരിപാലന നിയമപ്രകാരം ടെര്‍മിനല്‍ നിര്‍മിച്ച സ്ഥലത്ത് അനുമതി ലഭിക്കാന്‍ ആദ്യം തടസങ്ങള്‍ ഉണ്ടായിരുന്നെങ്കിലും ബണ്ടിന്‍റെ തെക്ക് ഭാഗം ഈ പരിധിയില്‍ വരുന്നതല്ലെന്നാണ് ടൂറിസം വകുപ്പ് അധികൃതര്‍ പറയുന്നത്. ഇതിനിടയില്‍ ലോക നേതാക്കള്‍ പങ്കെടുത്ത ജി 20 കുമരകത്ത് നടന്നപ്പോൾ അടിയന്തരമായി വൈദ്യുതി കണക‌്ഷൻ നൽകിയെങ്കിലും പിന്നീട് വിച്ഛേദിച്ചു. അടുത്തു നടന്ന തണ്ണീർമുക്കം ഫെസ്റ്റിനോടനുബന്ധിച്ച് ടെർമിനൽ തുറന്നുകൊടുക്കും എന്ന പ്രഖ്യാപനം ഉണ്ടായിരുന്നെങ്കിലും നടന്നില്ല. കെട്ടിടത്തിന്‍റെ വാതിലുകളും മറ്റും നശിച്ചു തുടങ്ങി. നിലത്ത് പാകിയിട്ടുള്ള ടൈൽസുകളും പൊട്ടിപ്പൊളിഞ്ഞു. കെട്ടിടത്തിനുള്ളിൽ ആല് കിളിർത്തു. തെരുവുനായ്ക്കളോടൊപ്പം കമിതാക്കളുടെ ഒളിസങ്കേതവുമായി ഇവിടം മാറിയിരിക്കുകയാണ്. അറ്റകുറ്റപ്പണികൾ നടത്തി എത്രയും വേഗം ഹൗസ് ബോട്ട് ടെർമിനൽ തുറന്നു കൊടുക്കണമെന്ന് കേരള കോൺഗ്രസ് തണ്ണീർമുക്കം മണ്ഡലം കമ്മിറ്റി യോഗം ആവശ്യപ്പെട്ടു. കേരള കോൺഗ്രസ് സംസ്ഥാന ഉന്നത അധികാര സമിതി അംഗം സിറിയക് കാവിലിന്‍റെ നേതൃത്വത്തിൽ മണ്ഡലം പ്രസിഡന്‍റ് തോമസ് പേരേമഠം, ജില്ലാ കമ്മിറ്റി മെംബർ ജോസഫ് ലൂക്ക, മണ്ഡലം സെക്രട്ടറി സിബി കുന്നുമ്മേൽപറമ്പിൽ എന്നിവർ ടെർമിനൽ സന്ദർശിച്ചു. ടെര്‍മിനല്‍ എത്രയും വേഗം തുറന്നുകൊടുത്തില്ലെങ്കിൽ ശക്തമായ സമരപരിപാടികൾ ആരംഭിക്കുമെന്ന് യോഗം മുന്നറിയിപ്പ് നല്കി.

കൃഷ്ണപുരം പഞ്ചായത്തിൽ കശുമാവ് കൃഷി വികസന പദ്ധതിക്കു തുടക്കം

കായംകുളം: സംസ്ഥാന കശുമാവ്കൃഷിവികസന ഏജൻസിയും കൃഷ്ണപുരം കൃഷിഭവനും സംയുക്തമായി കശുമാവ്കൃഷി വികസിപ്പിക്കാനുള്ള പദ്ധതിക്ക് കൃഷ്ണപുരം പഞ്ചായത്തിൽ തുടക്കമായി. കശുമാവിൻ തൈകളുടെ വിതരണോദ്ഘാടനം പഞ്ചായത്ത് പ്രസിഡന്‍റ് ശ്രീഹരി കോട്ടീരേത്ത് നിർവഹിച്ചു. പഞ്ചായത്തംഗം അനിതാ വാസുദേവൻ അധ്യക്ഷത വഹിച്ചു. കൃഷ്ണപുരം കൃഷി ഓഫീസർ രേഷ്മ രമേശ്, അസി. കൃഷി ഓഫീസർ പ്രദീപ്കുമാർ, കൃഷി അസിസ്റ്റന്‍റുമാരായ ഇന്ദു സി. നായർ, എം. ഷമീർ, ഫീൽഡ് ഓഫീസർ പ്രദീപ് എന്നിവർ പ്രസംഗിച്ചു. പദ്ധതിപ്രകാരം ധന ഇനത്തിൽപ്പെട്ട 1700 അത്യുത്പാദനശേഷിയുള്ള ഗ്രാഫ്റ്റ് ചെയ്ത കശുമാവിൻ തൈകളാണ് തെരഞ്ഞെടുത്ത നൂറോളം കർഷകർക്ക് വിതരണം ചെയ്യുന്നത്. കേരളത്തിൽ കശുമാവ്കൃഷിയുടെ വിസ്തൃതിയിലും ആഭ്യന്തര ഉത്പാദനത്തിലും വന്ന കുറവ് പരിഹരിക്കുന്നതിനാണ് സംസ്ഥാന കശുമാവ്കൃഷി വികസന ഏജൻസി പദ്ധതി നടപ്പിലാക്കുന്നത്.

കാര്‍ കനാലില്‍ വീണു യുവാവ് മരിച്ചു

ആലപ്പുഴ: പിറന്നാള്‍ ആഘോഷത്തിനുശേഷം ഭക്ഷണം കഴിക്കാന്‍ പോകുന്നതിനിടെ കാര്‍ കനാലില്‍ വീണ് യുവാവ് മരിച്ചു. ആലപ്പുഴ തത്തംപള്ളി വാര്‍ഡില്‍ കുറ്റിച്ചിറ വീട്ടില്‍ ബേബിച്ചന്‍റെയും പുഷ്പമ്മയുടെയും മകന്‍ ബിജോയ് ആന്‍റണി (32) ആണ് മരിച്ചത്. കൂടെയുണ്ടായിരുന്ന സുഹൃത്തുക്കളായ ജോജോ ലോനന്‍, ടിജു തോമസ് എന്നിവര്‍ നീന്തി രക്ഷപ്പെട്ടു. പുന്നമട രാജീവ് ജെട്ടിക്കു സമീപത്തെ വളവില്‍ ഞായറാഴ്ച പുലര്‍ച്ചെ ഒന്നരയോടെയായിരുന്നു അപകടം. പിറന്നാളാഘോഷം കഴിഞ്ഞു ഭക്ഷണം കഴിക്കാനായി സുഹൃത്തുക്കള്‍ക്കൊപ്പം കാറില്‍ കെഎസ്ആര്‍ടിസി സ്റ്റാന്‍ഡിനു സമീപത്തേക്കു പോകുന്നതിനിടെയാണ് അപകടമുണ്ടായത്. ബിജോയിയാണ് കാര്‍ ഓടിച്ചിരുന്നത്. വളവുതിരിയുന്നതിനിടെ കാര്‍ നിയന്ത്രണം വിട്ടു കനാലില്‍ പതിച്ചതാകാമെന്നു പോലീസ് പറഞ്ഞു. കനാലില്‍ വീണ കാറിന്‍റെ വാതില്‍ തുറന്നു സുഹൃത്തുക്കള്‍ പുറത്തിറങ്ങി. ബിജോയിയെയും ഇവര്‍ പുറത്തെത്തിച്ചു. എന്നാല്‍, നീന്തലറിയാത്ത ബിജോയിയെ കരയ്‌ക്കെത്തിക്കാനുള്ള ശ്രമത്തിനിടെ താഴ്ന്നുപോകുകയായിരുന്നു. പിന്നീട് സുഹൃത്തുക്കള്‍ നീന്തി കരയിലെത്തി നോര്‍ത്ത് പോലീസില്‍ വിവരമറിയിച്ചു. അഗ്‌നിരക്ഷാസേനയും ഉടന്‍ സ്ഥലത്തെത്തി. ഇരുപതടി താഴ്ചയുള്ള ഭാഗത്താണ് കാര്‍ മുങ്ങിയത്. അഗ്‌നിരക്ഷാ സേനയാണ് മുങ്ങിപ്പോയ ബിജോയിയെ കണ്ടെത്തി കരയ്‌ക്കെത്തിച്ചത്. ഉടന്‍ ആലപ്പുഴ ജനറല്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. രക്ഷാപ്രവര്‍ത്തനത്തിനായി മുങ്ങുന്നതിനിടെ നേതൃത്വം നല്‍കിയ അസി. സ്റ്റേഷന്‍ ഓഫീസര്‍ ജോജി എന്‍. ജോയിയുടെ കാലില്‍ പൊട്ടിയ കുപ്പി കുത്തിക്കയറി ആഴത്തില്‍ മുറിവേറ്റു. ഓഫീസര്‍മാരായ ഹരീഷ്, ജിജോ, അനീഷ് കണ്ണന്‍, ജോബിന്‍ വര്‍ഗീസ്, ഹാഷിം, അര്‍ജുന്‍, ശശി അഭിലാഷ്, പുഷ്പരാജ്, കണ്ണന്‍ ഉദയകുമാര്‍ എന്നിവരാണ് രക്ഷാപ്രവര്‍ത്തനത്തില്‍ പങ്കെടുത്തത്. സഹോദരന്‍ ബിനോയ്. സംസ്‌കാരം നടത്തി.

കിഴക്കന്‍ വെള്ളത്തിന്‍റെ വരവ്: പാടശേഖരങ്ങളിൽ മടവീഴ്ച

അമ്പലപ്പുഴ: കിഴക്കന്‍ വെള്ളത്തിന്‍റെ വരവ് ശക്തമായതോടെ കൃഷിക്കായി ഒരുക്കിയ പാടശേഖരങ്ങളിൽ മടവീഴ്ച. പുന്നപ്ര തെക്ക് പഞ്ചായത്ത് പരപ്പില്‍ പാടശേഖരമാണ് മടവീണത്. ഞായറാഴ്ച രാത്രി 11 ഓടെ പാടശേഖരത്തിന്‍റെ കിഴക്കേബണ്ടിലാണ് മടവീണത്. മാതൃകാപാടശേഖരമായി തെരഞ്ഞെടുത്ത് വിത്ത് ഉത്പാദന കേന്ദ്രമാക്കാനുള്ള നടപടിക്രമങ്ങള്‍ നടന്നുവരുകയായിരുന്നു. ഇതിന്‍റെ ഭാഗമായി പുറംബണ്ട് കല്ലുകെട്ടി സംരക്ഷിക്കുന്ന ജോലി നടക്കവേ പാതിവഴിയിലായ ബണ്ടിലെ കല്ലുള്‍ പത്ത് മീറ്ററോളം നീളത്തില്‍ ഒലിച്ചുപോയി. ‌ രണ്ടാം കൃഷിക്ക് നിലം ഒരുക്കുന്നതിനിടെയായിരുന്നു കഴിഞ്ഞ വെള്ളപ്പൊക്കം. അന്നും വെള്ളം കയറി പാടശേഖരം മുങ്ങിയിരുന്നു. തുടര്‍ന്ന് വെള്ളം വറ്റിച്ച് കഴിഞ്ഞ രണ്ടു ദിവസമായി ട്രാക്ടര്‍ ഉപയോഗിച്ച് നിലം ഉഴുതുകൊണ്ടിരിക്കെയാണ് മടവീണത്. ഇന്നലെ വൈകിട്ട് ട്രാക്ടറുകള്‍ കരയ്ക്കു കയറ്റിയതിനാല്‍ വണ്ടിക്ക് തകരാര്‍ സംഭവിച്ചില്ല. പരപ്പില്‍ പാടശേഖരം 42 ഏക്കറാണ്. തോട്ടിലുണ്ടായിരുന്ന പോളയും പാടശേഖരത്തില്‍ നിറഞ്ഞിരിക്കുകയാണ്.

സ്വകാര്യബസ് തൊഴിലാളികളുടെ പണിമുടക്ക് യാത്രക്കാരെ വലച്ചു

കായംകുളം: വേതനവർധന ആവശ്യപ്പെട്ട് സ്വകാര്യബസ് ജീവനക്കാർ ഇന്നലെ ആഹ്വാനം ചെയ്ത പണിമുടക്കിൽ യാത്രക്കാരും വിദ്യാർഥികളും ദുരിതത്തിലായി. ജില്ലയിലെ സ്വകാര്യബസ് തൊഴിലാളികളാണ് ഇന്നലെ പണിമുടക്കിയത്. കായംകുളം-പുനലൂർ റോഡിൽ ഭാഗികമായി സ്വകാര്യബസുകൾ സർവീസ് നടത്തി. കെഎസ്ആർടിസി ചെയിൻ സർവീസ് ഉള്ളതിനാൽ യാത്രക്കാർക്ക് വലിയ ബുദ്ധിമുട്ട് നേരിടേണ്ടിവന്നില്ല. എന്നാൽ, സ്‌കൂൾ വിദ്യാർഥികൾ വലഞ്ഞു. കൊല്ലം-തേനി ദേശീയപാത വഴിയുള്ള ഭരണിക്കാവ് - ചെങ്ങന്നൂർ റൂട്ടിൽ സ്വകാര്യ ബസുകൾ ഭൂരിഭാഗവും പണിമുടക്കി. റൂട്ടിൽ കൊല്ലം-ചെങ്ങന്നൂർ വേണാട് സർവീസിനെ കൂടുതലായി യാത്രക്കാർ ഇന്നലെ ആശ്രയിച്ചു. ചാരുംമൂട്-കുറത്തികാട്, കറ്റാനം-മാവേലിക്കര, പന്തളം-മാവേലിക്കര റൂട്ടിലും പണിമുടക്ക് സർവീസുകളെ ബാധിച്ചു. ഇന്നലെ രാവിലെ പണിമുടക്ക് അറിയാതെ ബസ് സ്റ്റോപ്പുകളിൽ എത്തിയ വിദ്യാർഥികളും വിവിധ ജോലികൾക്ക് പോകുന്ന ജനങ്ങളും ദുരിതത്തിലായി. മിക്ക സ്വകാര്യബസുകളും സർവീസ് നടത്താൻ തയാറായെങ്കിലും തൊഴിലാളികൾ സംഘടിച്ച് സർവീസുകൾ തടയുമെന്ന് മുന്നറിയിപ്പ് നൽകിയതിനെതുടർന്ന് സാമ്പത്തിക നഷ്ടം കണക്കിലെടുത്താണ് പല ബസ് ഉടമകളും സർവീസ് നടത്തുന്നതിൽ നിന്നു പിൻ വാങ്ങിയത്.

മൂലം വള്ളംകളി ആചാരപരമായി കൊണ്ടാടണം

അമ്പലപ്പുഴ: ചരിത്ര പ്രസിദ്ധമായ അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലെ വിഗ്രഹ പ്രതിഷ്ഠയുമായി ബന്ധപ്പെട്ട് ചമ്പക്കുളം ആറ്റിൽ നടക്കുന്ന വള്ളംകളി മൂലക്കാഴ്ചയുടെ ആചാരാനുഷ്ഠാനങ്ങൾ പാലിച്ച് നടത്തണമെന്ന് അമ്പലപ്പുഴയിൽ കൂടിയ സ്വാഗതസംഘ യോഗം അധികൃതരോട് ആവശ്യപ്പെട്ടു. ജൂലൈ 9നാണ് വള്ളംകളി. 8ന് കുറിച്ചി കരിങ്കുളം ശ്രീകൃഷ്ണ സ്വാമി ക്ഷേത്രത്തിൽനിന്ന് രാവിലെ 6ന് ആരംഭിക്കുന്ന ശ്രീകൃഷ്ണ വിഗ്രഹ ഘോഷയാത്രയ്ക്ക് അമ്പലപ്പുഴയിൽ സ്വീകരണം നൽകും. വൈകിട്ട് അഞ്ചിന് ഇരട്ടകുളങ്ങര ക്ഷേത്ര സന്നിധിയിൽ എത്തുന്ന രഥഘോഷയാത്ര വിവിധ ക്ഷേത്രങ്ങളുടെയും സംഘടനകളുടെയും സ്വീകരണങ്ങൾ ഏറ്റുവാങ്ങി ഏഴിന് അമ്പലപ്പുഴ ക്ഷേത്ര സന്നിധിയിൽ സമാപിക്കും. 8ന് ചമ്പക്കുളം മഠം മഹാലക്ഷ്മി ക്ഷേത്രത്തില്‍ വള്ളസദ്യ നടക്കും. സ്വാഗതസംഘം ചെയർമാൻ ടി.ആർ. രാജീവ്‌ അധ്യക്ഷത വഹിച്ച യോഗം അമ്പലപ്പുഴ ക്ഷേത്രം മേൽശാന്തി കണ്ണമംഗലം കേശവൻ നമ്പൂതിരി ഉദ്ഘാടനം ചെയ്തു. മൂലം പൈതൃക സമിതി രക്ഷാധികാരി വി.ജെ. ശ്രീകുമാർ വലിയമഠം, പ്രസിഡന്‍റ് സജയൻ ചമ്പക്കുളം, സെക്രട്ടറി രതീഷ് രവി, ശ്രീകുമാർ തത്തമത്, നാരായണ ദാസ്, ശ്രീകുമാരപ്പണിക്കർ, ബി. ബിന്ദു എന്നിവർ സംസാരിച്ചു.

വെളിച്ചെണ്ണ വിപണി തകരുന്നു; തിരിഞ്ഞുനോക്കാതെ അധികാരികള്‍

മുഹമ്മ: വെളിച്ചെണ്ണ വിപണിയിലെ പ്രതിസന്ധിയെ അധികാരികള്‍ നോക്കിക്കാണുന്നത് നിസംഗമായാണ്. പതിറ്റാണ്ടുകളായി തുടരുന്ന ഈ നിസംഗനിലപാടാണ് ആലപ്പുഴയെ വ്യവസായങ്ങളുടെ ശവപ്പറമ്പാക്കുന്നതെന്ന ആക്ഷേപത്തിനു കാലങ്ങളുടെ പഴക്കമുണ്ട്്. കഴിഞ്ഞ ഓണക്കാലം മുതലാണ് വെളിച്ചെണ്ണ വിപണിയുടെ താളം തെറ്റിയത്. നാളികേരത്തിന്‍റെ ക്ഷാമം മില്ലുകളുടെ പ്രവര്‍ത്തനം താറുമാറാക്കി. എന്നാല്‍, അധികാരികളുടെ ഭാഗത്തുനിന്ന് യാതൊരുവിധ ഇടപെടലും ഉണ്ടായില്ലെന്ന് മില്ലുടമകള്‍ കുറ്റപ്പെടുത്തുന്നു. മില്ലുകള്‍ പ്രതിസന്ധിയിലായതോടെ മായം കലര്‍ന്ന എണ്ണ വിപണിയില്‍ സജീവമായി. ഗുരുതരമായ ആരോഗ്യപ്രശ്‌നങ്ങളിലൂടെ സമൂഹം കടന്നുപോകേണ്ട സാഹചര്യമാണ് ഇതിലൂടെ സംജാതമായത്. ഒരു കിലോ വെളിച്ചെണ്ണയ്ക്ക് 500 രൂപ വേണ്ടി വരുമ്പോള്‍ 220 രൂപയ്ക്ക് വ്യാജ വെളിച്ചെണ്ണ കിട്ടും. എണ്ണവിപണിയില്‍ വ്യാജന്‍റെ വിളയാട്ടമാണെങ്കിലും നടപടി കടലാസിലാണ്. ഹോട്ടലുകളിലും എണ്ണപ്പലഹാര നിര്‍മാണകേന്ദ്രങ്ങളിലും ഉപയോഗ ശേഷം വരുന്ന എണ്ണ ശേഖരിച്ച് രാസവസ്തുക്കള്‍ ചേര്‍ത്ത് വെളിച്ചെണ്ണയെന്ന പേരില്‍ മാര്‍ക്കറ്റില്‍ എത്തിക്കുന്നുണ്ട്. എണ്ണയാട്ടു മില്ലുകളില്‍നിന്ന് പിണ്ണാക്ക് ശേഖരിച്ച് വീണ്ടും ആട്ടി എണ്ണയെടുക്കുന്ന രീതിയുമുണ്ട്. ചില മിശ്രിതങ്ങള്‍ ചേര്‍ത്താണ് വീണ്ടും ആട്ടുന്നത്. ഇങ്ങനെ ശേഖരിക്കുന്ന എണ്ണയും ശുദ്ധമായ വെളിച്ചെണ്ണയെന്ന ലേബലില്‍ മോഹവിലയോടെ മാര്‍ക്കറ്റില്‍ എത്താറുണ്ട്. ആലപ്പുഴയില്‍ ചുങ്കമായിരുന്നു കൊപ്രാവ്യവസായത്തിന്‍റെ കേന്ദ്രം. ഇവിടെ മാത്രം 20 മില്ലുകളോളം പ്രവര്‍ത്തിച്ചിരുന്നതായി മേഖലയുമായി ബന്ധപ്പെട്ടവര്‍ പറയുന്നു. ആയിരക്കണക്കിന് തൊഴിലാളികള്‍ രാപകല്‍ ഭേദമെന്യേ മില്ലുകളില്‍ ജോലി നോക്കിയിരിന്നു. ചുമട് ജോലിക്കായി അന്യ സംസ്ഥാനങ്ങളില്‍നിന്നുള്ളവരും ഉണ്ടായിരുന്നു. ചുങ്കത്തെ കനാല്‍ മേഖലയില്‍ കൊപ്രയുമായി എത്തുന്ന ചെറുതും വലുതുമായ വള്ളങ്ങള്‍ നിരനിരയായി കിടക്കുമായിരുന്നു. കുട്ടനാട്, കോട്ടയം, ചങ്ങനാ ശേരി തുടങ്ങിയ സ്ഥലങ്ങളില്‍നിന്നുള്ള ജലയാനങ്ങളായിരുന്നു കൂടുതലായി എത്തിയിരുന്നത്. വിജയ ഓയില്‍ മില്‍, ചന്ദ്രാ ഓയില്‍ മില്‍ എന്നിങ്ങനെയുള്ള മില്ലുകളില്‍ ബാബു ഓയില്‍ മില്‍ മാത്രമാണ് പഴമയുടെ സുഗന്ധവുമായി ഇപ്പോഴുള്ളത്. ചേര്‍ത്തല നഗരവും കൊപ്രാ വ്യവസായത്തില്‍ പെരുമ നേടിയിരുന്നു. മണ്ഡരി പോലുള്ള രോഗങ്ങളാണ് കേര കൃഷിക്ക് തിരിച്ചടിയായത്. തമിഴ്‌നാട് പോലെയുള്ള സ്ഥലങ്ങളിലേക്ക് വ്യവസായികള്‍ ചേക്കേറിയത് ഇങ്ങനെയാണ്. തമിഴ്‌നാട്ടിലെ കാങ്കേയം, പൊള്ളാച്ചി മേഖലകളിലെ കടുത്ത ചൂടും കൊപ്രാ സംസ്‌ക്കരണത്തിന് അനുകൂലമായി. നാളികേര കൃഷിയുടെ സംരക്ഷണത്തിന് കൈക്കൊണ്ട നടപടികളാന്നും വേണ്ടത്ര ഫലം കാണാതെ വന്നപ്പോള്‍. ശ്രീലങ്ക, മലേഷ്യ പോലുള്ള രാജ്യങ്ങളില്‍നിന്ന് ആദ്യമൊക്കെ നാളികേരം ഇറക്കുമതി ചെയ്തിരുന്നു. ശ്രീലങ്കയില്‍നിന്ന് തേങ്ങാ കൊണ്ടുവരുന്നതിന് പ്രത്യേകരീതി അവലംബിച്ചിരുന്നു. ലക്ഷക്കണക്കിന് തേങ്ങ നെറ്റില്‍ കെട്ടി കടലില്‍ നിക്ഷേപിക്കുകയാണ് ആദ്യം ചെയ്യുക. കടലില്‍ ഉയര്‍ന്ന് കിടക്കുന്ന തേങ്ങ ബോട്ടുമായി വടത്തില്‍ ബന്ധിച്ച ശേഷം വലിച്ച്‌കൊണ്ട് രാമേശ്വരം വരെ എത്തുകയാണ് ചെയ്തിരുന്നത്. രാഷ്ട്രീയരംഗത്ത് മകുടമായി മാറിയ ആലപ്പുഴക്കാര്‍ നിരവധിയാണെങ്കിലും ആലപ്പുഴയ്ക്കായി ഇച്ഛാശക്തിയോടെ നിലകൊണ്ടവര്‍ ആരുമില്ലെന്നാണ് ആക്ഷേപം. ഈ സ്ഥിതി തുടര്‍ന്നാല്‍ കയര്‍ വ്യവസായവും കൊപ്രാ വ്യവസായവും തമിഴ്‌നാട്ടിലേയ്ക്ക് പൂര്‍ണമായും ചേക്കേറുന്ന കാലം വിദൂരമല്ലെന്നാണ് വിദഗ്ധരുടെ പക്ഷം. തേങ്ങായുടെ ക്ഷാമവും വിലക്കയറ്റവും പരിഹരിയ്ക്കാന്‍ കേന്ദ്ര-സംസ്ഥാന സര്‍ക്കാരുകള്‍ മുന്നിട്ടിറങ്ങണം. അഭ്യന്തര ഉത്പാദനം കൂട്ടാന്‍ നടപടി വേണം. തൊഴിലുറപ്പ് പദ്ധതി കേര കൃഷിയുമായി ബന്ധിപ്പിച്ചാല്‍ വലിയ മാറ്റമുണ്ടാകും. തമിഴ്‌നാടിന് പുറമേ കര്‍ണ്ണാടക, ആന്ധ്രാപ്രദേശ് എന്നിവിടങ്ങളില്‍നിന്നു നാളികേരം എത്തിക്കണം. തദ്ദേശ സ്ഥാപനങ്ങള്‍ക്കും തേങ്ങാ സംഭരിച്ച് ചെറുകിടക്കാര്‍ക്ക് നല്‍കാന്‍ കഴിയും. ശ്രീലങ്ക, മലേഷ്യ പോലുള്ള വിദേശ രാജ്യങ്ങളില്‍നിന്ന് തേങ്ങാ ഇറക്കുമതി ചെയ്തും നിലവിലെ പ്രതിസന്ധി പരിഹരിക്കാന്‍ കഴിയും. കൊപ്രാ വ്യവസായത്തിന്‍റെയും കയര്‍ വ്യവസായത്തിന്‍റെയും പോയകാല പ്രൗഢി വിണ്ടെടുക്കാന്‍ കുട്ടനാട് പാക്കേജ് പോലുള്ള പാക്കേജ് നാളികേര കൃഷിയുടെ പുനരുദ്ധാരണത്തിനായും നടപ്പാക്കണം. ഫെയ്‌സി വി. ഏറനാട് എയ്ഞ്ചലാ എക്‌സ്‌പോര്‍ട്ട്‌സ്, മുഹമ്മ.

യുജി, പിജി വിദ്യാര്‍ഥിനികള്‍ക്ക് ബിരുദദാനം

ചങ്ങനാശേരി: അസംപ്ഷന്‍ ഓട്ടോണമസ് കോളജില്‍ വിവിധ യുജി, പിജി കോഴ്‌സുകള്‍ പാസായ വിദ്യാര്‍ഥിനികള്‍ക്ക് ബിരുദദാനം നല്‍കി. ഹയര്‍ എഡ്യൂക്കേഷന്‍ പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫ് ഉദ്ഘാടനം നിര്‍വഹിച്ചു. ജീവിതവിജയം നേടാന്‍ കഠിന പരിശ്രമങ്ങള്‍ക്കൊപ്പം മൂല്യാധിഷ്ഠിത വിദ്യാഭ്യാസവും അനിവാര്യമാണെന്ന് ഡോ. ശര്‍മിള പറഞ്ഞു. കോളജ് ഇന്‍ഡോര്‍ സ്റ്റേഡിയത്തില്‍ നടന്ന സമ്മേളനത്തില്‍ കോളജ് മാനേജര്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. വിദ്യാഭ്യാസത്തിലൂടെ വെല്ലുവിളികളെ അതിജീവിക്കാനും പ്രതിസന്ധികളെ തരണം ചെയ്യാനുമുള്ള കഴിവ് നേടണമെന്ന് വികാരിജനറാള്‍ പറഞ്ഞു. പൂര്‍വ വിദ്യാര്‍ഥിനിയും 2024 ലെ സിവില്‍ സര്‍വീസ് 569-ാം റാങ്ക് ജേതാവുമായ വി. ഹേമയെ സമ്മേളനത്തില്‍ ആദരിച്ചു. ജോബ് മൈക്കിള്‍ എംഎല്‍എ മുഖ്യാതിഥിയായിരുന്നു. കോളജ് പ്രന്‍സിപ്പല്‍ ഡോ. റാണി മരിയ തോമസ്, വൈസ് പ്രിന്‍സിപ്പല്‍ ഡോ. ജിസി മാത്യു, വിദ്യാര്‍ഥി പ്രതിനിധി ഷൈന്‍ മരിയ ഷാജി എന്നിവര്‍ പ്രസംഗിച്ചു.

മൂന്നുകോടി തട്ടിയെടുത്തു

കായംകുളം: ദേശീയപാതയിൽ ചേപ്പാട് സിനിമ സ്‌റ്റൈൽ കവർച്ച. കോയമ്പത്തൂരിൽനിന്ന് കൊല്ലത്തേക്ക് പാഴ്സൽ ലോറിയിൽ കൊണ്ടുപോയ മൂന്നുകോടിയോളം രൂപ രണ്ടു കാറുകളിലായെത്തിയ സംഘം തട്ടിയെടുത്തു. ചേപ്പാട് രാമപുരത്ത് കഴിഞ്ഞദിവസം പുലർച്ചെ നാലിനായിരുന്നു സംഭവം. ലോറിക്ക് കുറുകെ കാർ നിർത്തിയ സംഘം ഡ്രൈവറെ ആക്രമിച്ച ശേഷമാണ് പണം തട്ടിയെടുത്തത്. ഇവർ രക്ഷപ്പെട്ടതിനു ശേഷം ഡ്രൈവർ ലോറിയുമായി കൊല്ലത്ത് എത്തി പണം ഏറ്റുവാങ്ങാനിരുന്ന കൊല്ലത്തെ ജ്വല്ലറി ഉടമയെ വിവരം അറിയിച്ചു. ഇദ്ദേഹം കരീലക്കുളങ്ങര പോലീസിൽ പരാതി നൽകി. കരീലക്കുളങ്ങര പോലീസും ജില്ലാ പോലീസ് മേധാവിയുടെ സ്ക്വാഡ് ഉൾപ്പെടെയുള്ള സംഘവും പണം തട്ടിയെടുത്ത സംഘത്തെക്കുറിച്ച് അന്വേഷണം നടത്തിയെങ്കിലും ഇതുവരെ സൂചന ലഭിച്ചിട്ടില്ല. കോയമ്പത്തൂർ സ്വദേശിയായ ഡ്രൈവറെ പോലീസ് ചോദ്യം ചെയ്തെങ്കിലും ഇയാളിൽനിന്ന് ലഭിച്ച വിവരങ്ങൾ പൂർണമായി വിശ്വാസത്തിലെടുക്കാതെയാണ് അന്വേഷണം നീങ്ങുന്നത്. പാഴ്സലിൽ പണമാണെന്ന് ഡ്രൈവർക്ക് നേരത്തേ അറിയാമായിരുന്നോ എന്നതടക്കമുള്ള വിശദാംശങ്ങളാണ് പോലീസ് പരിശോധിക്കുന്നത്. കൊല്ലത്തെ വ്യാപാരി കോയമ്പത്തൂരിൽ സ്വർണ വ്യാപാരവുമായി ബന്ധമുള്ളവരുമായി നടത്തിയ ഇടപാടിന്‍റെ ഭാഗമായാണ് അവിടെനിന്ന് പാഴ്സൽ എന്ന വ്യാജേന ചാക്കിൽ പണം അയച്ചതെന്നാണ് പോലീസിന്‍റെ നിഗമനം. സംഭവ സ്ഥലത്തെ സിസിടിവി ദൃശ്യങ്ങൾ പോലീസ് പരിശോധിച്ചുവരികയാണ്.

നൂറുമേനി മത്സരവിജയികളെ പ്രഖ്യാപിച്ചു

ആലപ്പുഴ: ചങ്ങനാശേരി അതിരൂപത കുടുംബകൂട്ടായ്മയും ബൈബിൾ അപ്പസ്തോലിക് മാക് ടിവിയും ചേർന്ന് ഒരുക്കുന്ന നൂറുമേനി മത്സരത്തിന്‍റെ മൂന്നാംലവൽ മത്സരം ആലപ്പുഴ, ചമ്പക്കുളം, പുളിങ്കുന്ന്, എടത്വ, മുഹമ്മ ഫൊറോനകളിലെ വിജയിച്ച ടീം അംഗങ്ങളുടെ കുട്ടനാട് റീജണൽ തല മത്സരം ആലപ്പുഴ മാർ സ്ലീവാ ഫൊറോന തീർഥാടന പള്ളിയിൽ നടത്തി. വചന പഠനത്തിന്‍റെ ഭാഗമായി നടത്തപ്പെടുന്ന വചനം എഴുത്തു മത്സരത്തിൽ ബൈബിൾ കാണാപ്പാഠം വാക്യങ്ങൾ എഴുതിയവരിൽ ഏറ്റവും കുടുതൽ വചനം മനപ്പാഠമാക്കിയ വിവിധ ഫൊറോനകളിലെ ടീം അംഗങ്ങളാണ് റീജണൽ മത്സരത്തിൽ പങ്കുചേർന്നത്. മത്സരത്തിൽ ഒന്നാം സ്ഥാനം പുളിങ്കുന്ന് ഫൊറോനയിലെ മേരിക്കുട്ടി തോമസ്, രണ്ടാം സ്ഥാനം ചമ്പക്കുളം ഫൊറോനയിലെ ഷൈനി കെ.ജെ, മൂന്നാം സ്ഥാനം ചമ്പക്കുളം ലിസമ്മ ജോസഫും പുളിങ്കുന്നിലെ അൽറികും, നാലാം സ്ഥാനം മുഹമ്മ ഫൊറോനായിലെ എവലിൻ ആന്‍റണി എന്നിവർക്കു ലഭിച്ചു. മത്സരവിജയികളുടെ വിവരങ്ങൾ ആലപ്പുഴ ഫൊറോന വികാരി ഫാ. മാത്യു നടമുഖം പ്രഖ്യാപിച്ചു. ഫാ. ജോർജ് മാന്തുരുത്തി, ഷാജി പോൾ ഉപ്പൂട്ടിൽ, സണ്ണി ഇടിമണ്ണിക്കൽ, ഫാ. വർഗീസ് കായിത്തറ, റോയി വേലികെട്ടിൽ, ഫെൻസി സേവ്യർ, അമൽ വർഗീസ് തുടങ്ങിയവർ പ്രസംഗിച്ചു.

കെസിഎസ്എല്‍ അതിരൂപത പ്രവര്‍ത്തനവർഷോദ്ഘാടനം

ചങ്ങനാശേരി: കെസിഎസ്എല്‍ അതിരൂപതാതല പ്രവര്‍ത്തനവര്‍ഷാരംഭവും അനിമേറ്റേഴ്സ് സംഗമവും അവാര്‍ഡ് വിതരണവും എസ്ബി സ്‌കൂള്‍ ഓഡിറ്റോറിയത്തില്‍ നടത്തി. ആര്‍ച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്തു. 2024-25 വര്‍ഷത്തെ മാര്‍ഗരേഖ പ്രകാശനം ചെയ്തു. മികച്ച കെസിഎസ്എല്‍ യൂണിറ്റുകള്‍ക്ക് അതിരൂപത കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍ അവാര്‍ഡുകള്‍ വിതരണം ചെയ്തു. എല്‍പി വിഭാഗത്തില്‍ ചങ്ങനാശേരി സെന്‍റ് ആന്‍സ്, യുപി വിഭാഗത്തില്‍ സെന്‍റ് ജോസഫ്, ഹൈസ്‌കൂള്‍ വിഭാഗത്തില്‍ കുറുമ്പനാടം സെന്‍റ് പീറ്റേഴ്‌സ്, ഹയര്‍ സെക്കന്‍ഡറി വിഭാഗത്തില്‍ എസ്ബി സ്‌കൂളുകള്‍ അവാര്‍ഡുകള്‍ നേടി. ഇന്നവേറ്റിവ് പ്രോഗ്രാമില്‍ യുപി വിഭാഗത്തില്‍ ആര്യങ്കാവ് സെന്‍റ് മേരീസും ഹൈസ്‌കൂള്‍ വിഭാഗത്തില്‍ പായിപ്പാട് സെന്‍റ് ജോസഫും അവാര്‍ഡുകള്‍ കരസ്ഥമാക്കി. അതിരൂപത ചെയര്‍പേഴ്‌സണ്‍ തെരേസ ബിജു സെബാസ്റ്റ്യന്‍ അധ്യക്ഷത വഹിച്ചു. സ്‌കൂള്‍ മാനേജര്‍ റവ.ഡോ. ടോണി ചെത്തിപ്പുഴ, ഹെഡ്മാസ്റ്റര്‍ വിനോദ് ബാബു, ഡയറക്ടര്‍ ഫാ. ജോജോ പള്ളിച്ചിറ, പ്രസിഡന്‍റ് റിന്‍സ് വര്‍ഗീസ്, സംസ്ഥാന ചെയര്‍പേഴ്‌സണ്‍ നേഹ മരിയ ജോസഫ്, ടിന്‍റു ആന്‍ ജയിംസ്, നോയല്‍ മാത്യു, സജിന്‍ എന്‍., സിസ്റ്റര്‍ അലീന മ്ലാവില്‍, സിസ്റ്റര്‍ സീനി, മനോജ് ചാക്കോ, ടോം ചാക്കോ, ജിജോമോന്‍ തോമസ് എന്നിവര്‍ പ്രസംഗിച്ചു.

കുട്ടനാടിനുവേണ്ടി ശബ്ദമുയര്‍ത്താന്‍ റേഡിയോ മീഡിയ വില്ലേജ്

ചങ്ങനാശേരി: കുട്ടനാടിന്‍റെ വിവിധങ്ങളായ പ്രശ്‌നങ്ങള്‍ ജന മനഃസാക്ഷിയില്‍ എത്തിക്കുകയെന്ന ലക്ഷ്യത്തോടെ റേഡിയോ മീഡിയാ വില്ലേജും ചമ്പക്കുളം ഫെറോനാ യുവദീപ്തി എസ്എംവൈഎമ്മും സംയുക്തമായി സംഘടിപ്പിക്കുന്ന സേവ് കുട്ടനാട് ഓപ്പണ്‍ റേഡിയോ കാമ്പയിന് മങ്കൊമ്പില്‍ തുടക്കമായി. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്തു. കുട്ടനാടിന് ലഭിച്ചിരിക്കുന്ന അനുഗ്രഹങ്ങളെ കാലാനുസൃതമായി പ്രയോജനപ്പെടുത്താന്‍ ഭരണകൂടം തയാറാകാത്തതാണ് ഇവിടത്തെ നിരവധിയായ പ്രശ്‌നങ്ങള്‍ക്ക് കാരണമെന്നും ഈ പ്രദേശത്തിന്‍റെ അന്തസും മഹിമയും ഉയര്‍ത്താന്‍ ഈ കാമ്പയിൻ വഴിതെളിക്കുമെന്നും അദ്ദേഹം പറഞ്ഞു. രാജ്യാന്തര കായല്‍ കൃഷി ഗവേഷണ കേന്ദ്രം ഡയറക്ടറും കൃഷി ശാസ്ത്രജ്ഞനുമായ കെ.ജി. പത്മകുമാര്‍, റിട്ട. ഡെപ്യൂട്ടി തഹസീല്‍ദാര്‍ ആന്‍റണി ആറില്‍ച്ചിറ, ടൂറിസ്റ്റ് അഡ്വൈസര്‍ ജൂബി കാട്ടാമ്പള്ളി, ഇറിഗേഷന്‍ വിഭാഗം റിട്ട: അസിസ്റ്റന്‍റ് എന്‍ജിനിയര്‍ ജോസഫ് മാത്യു, കേരള ഗവ. കോണ്‍ട്രാക്ടേഴ്‌സ് അസോസിയേഷന്‍ സംസ്ഥാന പ്രസിഡന്‍റ് വര്‍ഗീസ് കണ്ണമ്പള്ളി, ആലപ്പുഴ ജില്ലാ മുന്‍ മെഡിക്കല്‍ ഓഫീസര്‍ മുരളീധരന്‍പിള്ള എന്നിവര്‍ ചര്‍ച്ചകളില്‍ പങ്കെടുത്തു. മീഡിയാ വില്ലേജ് എക്‌സിക്യുട്ടീവ് ഡയറക്ടര്‍ ഫാ. ജോഫി പുതുപ്പറമ്പ്, എസ്‌ജെസിസി പ്രിന്‍സിപ്പല്‍ ഫാ. മാത്യു മുര്യങ്കരി, ബര്‍സാര്‍ ഫാ. ലിപിന്‍ തുണ്ടുകളം, കെ.സി. ജോജോ, കെ. വിപിന്‍ രാജ്, ജയിംസ് കല്ലുപാത്ര, ജസ്റ്റിന്‍ ജോസ് എന്നിവര്‍ പ്രസംഗിച്ചു. കാമ്പയിന്‍റെ ഭാഗമായി കുട്ടനാടിന്‍റെ വിവിധ പ്രദേശങ്ങളില്‍ ഓപ്പണ്‍ റേഡിയോ പരിപാടി സംഘടിപ്പിക്കുമെന്ന് ഡയറക്ടര്‍ ഫാ. ജോഫി പുതുപ്പറമ്പ് പറഞ്ഞു.

ഫ്ലൈറ്റ് ടിക്കറ്റ് തട്ടിപ്പ്: പ്രതി പിടിയിൽ

തുറവൂർ: ഫ്ലൈറ്റ് ടിക്കറ്റ് ബുക്ക് ചെയ്ത് കൊടുക്കാമെന്ന് വിശ്വസിപ്പിച്ച് പലരിൽനിന്നു പണം കൈപ്പറ്റിയിട്ട് ഫ്ലൈറ്റ് ടിക്കറ്റ് എടുത്തു നല്കാതെ കടന്നുകളഞ്ഞ പ്രതി പിടിയിൽ. തൃശൂർ ചാവക്കാട് താലൂക്കിൽ അരിമ്പൂർ തച്ചംപ്പിള്ളി തുപ്പേലി വീട്ടിൽ അനീഷ( 27)യാണ് അറസ്റ്റിലായത്. വിദേശത്ത് പോകുന്നതിനും വരുന്നതിനും മറ്റുമായി ഫ്ലൈറ്റ് ടിക്കറ്റ് എടുക്കാൻ ശ്രമിക്കുന്നവരെ നോട്ടമിട്ട് ഇടനിലക്കാരിയായിനിന്ന് വേഗത്തിൽ ഫ്ലൈറ്റ് ടിക്കറ്റ് ബുക്ക് ചെയ്ത് ശരിയാക്കാമെന്ന് പറഞ്ഞ് വിശ്വസിപ്പിച്ചാണ് പ്രതി പലരിൽനിന്നു പണം കൈപ്പറ്റിയിരുന്നത്. കാനഡയിൽനിന്ന് നാട്ടിലേക്ക് വരുന്നതിനായി മൂന്ന് ഫ്ലൈറ്റ് ടിക്കറ്റ് ശരിയാക്കി കൊടുക്കാമെന്ന് പറഞ്ഞ് വിശ്വസിപ്പിച്ച് തുറവൂർ മനക്കോടം സ്വദേശിയിൽനിന്ന് 2,55,000 രൂപ വാങ്ങിയിട്ട് ടിക്കറ്റ് നൽകാതെ പറ്റിച്ച പരാതിയിൽ കുത്തിയതോട് പോലീസ് രജിസ്റ്റർ ചെയ്ത കേസിലാണ് അറസ്റ്റിലായത്. പ്രതിക്കെതിരേ കേരളത്തിലെ വിവിധ പോലീസ് സ്റ്റേഷനുകളിൽ ഇത്തരത്തിൽ നിരവധി കേസ്സ് രജിസ്റ്റർ ചെയ്തിട്ടുണ്ട്. കേസ് രജിസ്റ്റർ ചെയ്ത കാര്യം അറിവായതോടെ ഒളിവിൽപ്പോ യ പ്രതിയെ പലവിധ നിരീക്ഷണത്തിലൂടെയാണ് അറസ്റ്റ് ചെയ്യാൻ സാധിച്ചത്. ചേർത്തല അസിസ്റ്റന്‍റ് സൂപ്രണ്ട് ഓഫ് പോലീസ് ഹാരീഷ് ജയ്ൻ ഐപിഎസിന്‍റെ നിർദേശാനുസരണം കുത്തിയതോട് സിഐ അജയമോഹൻ, സബ് ഇൻസ്പെക്ടർ രാജീവ്, സിവിൽ പോലീസ് ഓഫീസർമാരായ കിഷോർചന്ദ്, വിജേഷ്, വൈശാഖൻ, നിത്യ എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്. ചേർത്തല കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

സുഹൃത്തുക്കളോടൊപ്പം ബീച്ചില്‍ കുളിക്കുന്നതിനിടെ കാണാതായ വിദ്യാര്‍ഥിയുടെ മൃതദേഹം കണ്ടെത്തി

ആലപ്പുഴ: ആലപ്പുഴ ബീച്ചില്‍ കുളിക്കാനിറങ്ങുന്നതിനിടെ കാണാതായ വിദ്യാര്‍ഥിയുടെ മൃതദേഹം കണ്ടെത്തി. ആലപ്പുഴ പാലസ് വാര്‍ഡ് കൊട്ടാരച്ചിറയില്‍ ജോസഫ്-ഷിജി ദമ്പതികളുടെ മകന്‍ ഡോണ്‍ തോമസ് ജോസഫ് (15) ആണ് മരിച്ചത്. കൂട്ടുകാര്‍ക്കൊപ്പം കുളിക്കുന്നതിനിടെ തിരയില്‍ പെടുകയായിരുന്നു. ഞായറാഴ്ച വൈകിട്ട് അഞ്ചിനായിരുന്നു സംഭവം. ആലപ്പുഴ നോര്‍ത്ത് പോലീസ് സ്റ്റേഷന്‍ പരിധിയില്‍ വിജയ പാര്‍ക്കിന് സമീപമാണ് ഡോണ്‍ തോമസടക്കം എട്ടുപേര്‍ കടലിലിറങ്ങിയത്. ശക്തമായ മഴയും കടല്‍ക്ഷോഭവും കാരണം തിരച്ചില്‍ പൂര്‍ത്തിയാക്കാന്‍ കഴിഞ്ഞില്ല. ഇന്നു രാവിലെ മൃതദേഹം പുറക്കാടുനിന്നു കണ്ടെത്തുകയായിരുന്നു. പോസ്റ്റ്‌മോര്‍ട്ട നടപടികള്‍ക്കായി മൃതദേഹം ആലപ്പുഴ മെഡിക്കല്‍ കോളജിലേക്ക് മാറ്റി. ആലപ്പുഴ തത്തംപള്ളി സ്‌കുളിലെ പത്താം ക്ലാസ് വിദ്യാര്‍ഥിയാണ്. സ്‌കുളില്‍ നടക്കുന്ന പൊതുദര്‍ശനത്തിനുശേഷം രാവിലെ 10.30ന് പഴവങ്ങാടി മാര്‍സ്ലീവ ഫെറോന പള്ളിയില്‍ സംസ്‌കാരം നടക്കും.

തീരവാസികളെ ആശങ്കയിലാക്കി ലൈഫ് ബോട്ടും ടാങ്കും അടിഞ്ഞു

അമ്പലപ്പുഴ: ലൈഫ് ബോട്ട് അടിഞ്ഞതിന് മണിക്കൂറുകള്‍ക്ക് പിന്നാലെ ടാങ്ക് അടിഞ്ഞത് തീരദേശ ജനതയെ ആശങ്കയിലാക്കി. പുന്നപ്ര അറപ്പപ്പൊഴി കടൽത്തീരത്ത് ഞായറാഴ്ച രാത്രിയോടെയാണ് ലൈഫ് ബോട്ട് കണ്ടെത്തിയത്. തിങ്കളാഴ്ച പുലര്‍ച്ചെയാണ് വളഞ്ഞവഴി തീരത്ത് വെള്ളനിറത്തിലുള്ള ടാങ്ക് അടിഞ്ഞത്. പുന്നപ്ര തീരത്തടിഞ്ഞ ചുവപ്പ് നിറത്തിലുള്ള ബോട്ടിന് ഏകദേശം അഞ്ചു മീറ്ററോളം നീളവും മൂന്നു മീറ്ററോളം വീതിയും വരും. ശക്തമായ തിരമാലയിലും കാറ്റിലും തീരത്തുലയുന്ന ബോട്ട് ശ്രദ്ധയില്‍പ്പെട്ട തീരദേശവാസികള്‍ പുന്നപ്ര പോലീസിനെ വിവരമറിയിച്ചു. പുന്നപ്ര പോലീസ് വിവരമറിയിച്ചതിനെത്തുടര്‍ന്ന് ഡിസാസ്റ്റർ മാനേജ്മെന്‍റ് ഡെപ്യൂട്ടി കളക്ടർ സി. പ്രേംജി, കോസ്റ്റൽ പോലീസ് എന്നിവർ സ്ഥലത്തെത്തി പരിശോധന നടത്തി. തിങ്കളാഴ്ച രാവിലെ ജെസിബി ഉപയോഗിച്ച് കരയിൽ കയറ്റി കാറ്റാടി മരത്തില്‍ കെട്ടി സുരക്ഷിതമാക്കി. കഴിഞ്ഞദിവസം കണ്ടെയ്നറുമായി എത്തിയ വാൻ ഹായ് കപ്പലിന്‍റേതാണ് ലൈഫ് ബോട്ട്. കപ്പലില്‍ അപകടം ഉണ്ടായാല്‍ ജീവനക്കാരുടെ സുരക്ഷയ്ക്കായുള്ള ലൈഫ് ബോട്ടാണ് തീരത്തൊഴുകി എത്തിയത്. സിംഗപ്പൂരില്‍ നിന്നുള്ള കസ്റ്റംസ് വിഭാഗത്തിന് ലൈഫ് ബോട്ട് കൈമാറും. കപ്പലിലേക്കുള്ള പാചകവാതക ഗ്യാസ് എത്തിക്കുന്നതിനുള്ള ടാങ്കാണ് വളഞ്ഞവഴിയില്‍ അടിഞ്ഞത്. തിങ്കളാഴ്ച രാവിലെ അപ്രതീക്ഷിതമായി തീരത്ത് തിരമാലയില്‍ ആടി ഉലയുന്ന ടാങ്ക് ശ്രദ്ധയില്‍പെട്ട നാട്ടുകാര്‍ വിവരം അമ്പലപ്പുഴ പോലീസിനെ അറിയിക്കുകയായിരുന്നു. തുടര്‍ന്ന് പോലീസ് എത്തി വേണ്ട സുരക്ഷിതം ഒരുക്കി. സിംഗപ്പൂരില്‍നിന്നുള്ള കസ്റ്റംസ് ഉദ്യോഗസ്ഥരും സ്ഥലത്തെത്തി. കാലിയാണെന്ന് ഉറപ്പാക്കിയശേഷം വൈകിട്ടോടെ ടാങ്ക് കരയ്ക്കുകയറ്റി. പിന്നീട് ഇവിടെനിന്നു നീക്കം ചെയ്യും.

കുട്ടനാട് വീണ്ടും വെള്ളത്തില്‍ മുങ്ങുന്നു

എടത്വ: കനത്ത മഴയില്‍ അപ്പര്‍ കുട്ടനാട് വീണ്ടും വെള്ളത്തില്‍ മുങ്ങുന്നു. മഴ ശക്തി പ്രാപിക്കുകയും കിഴക്കന്‍ വെള്ളം എത്തുകയും ചെയ്തതോടെ അപ്പര്‍ കുട്ടനാട്ടുകാര്‍ വെള്ളപ്പൊക്കത്തെ അഭിമുഖീകരിക്കേണ്ട അവസ്ഥയാണ്. പമ്പ, മണിമല ആറുകളില്‍ ജലനിരപ്പ് ഉയര്‍ന്നുതുടങ്ങി. പ്രദേശങ്ങളിലെ കനത്ത മഴയും വെള്ളപ്പൊക്കത്തിന് ആക്കം കൂട്ടിയിട്ടുണ്ട്. ജൂണിലെ ആദ്യദിനങ്ങളില്‍ പെയ്ത ശക്തമായ മഴയിലും കിഴക്കന്‍ വെള്ളത്തിന്‍റെ വരവിലും ജലനിരപ്പ് ക്രമാതീതമായി ഉയര്‍ന്ന് ക്യാമ്പുകളില്‍ അഭയം തേടിയ ദുരിതബാധിതര്‍ മടങ്ങിയെത്തി ദിവസങ്ങള്‍ കഴിയുമ്പോഴാണ് അടുത്ത മഴ എത്തിയത്. ഏതാനും ദിവസങ്ങളില്‍ ഒറ്റപ്പെട്ട ശക്തമായ മഴ പെയ്‌തെങ്കിലും ജലനിരപ്പിന് കാര്യമായ മാറ്റം സംഭവിച്ചിരുന്നില്ല. പതിവുപോലെ തലവടി പഞ്ചായത്തിലാണ് വെള്ളം ആദ്യം എത്തിയത്. പ്രദേശത്തെ താഴ്ന്ന സ്ഥലങ്ങള്‍ വെള്ളത്തില്‍ മുങ്ങി. തലവടി പത്താം വാര്‍ഡിലുള്ളവരുടെ വീട്ടുമുറ്റത്ത് ഒരടിയിലേറെ വെള്ളം ഉയര്‍ന്നിട്ടുണ്ട്. മഴ തുടരുകയും കിഴക്കന്‍ വെള്ളത്തിന്‍റെ വരവ് വര്‍ധിക്കുകയും ചെയ്താല്‍ ഇന്നു വൈകിട്ടോടെ വീടുകളില്‍ വെള്ളം കയറാന്‍ സാധ്യതയുണ്ട്. തലവടി കുന്നുമ്മാടി -കുതിരച്ചാല്‍ പ്രദേശങ്ങളിലെ താമസക്കാരാണ് ഏറെ ദുരിതം അനുഭവിക്കേണ്ടിവരുന്നത്. ഏതാനും ദിവസങ്ങൾ മുന്പുണ്ടായ വെള്ളപ്പൊക്കത്തില്‍ കുന്നുമ്മാടി-കുതിരച്ചാല്‍ പ്രദേശത്തെ നിരവധി കുടുംബ ങ്ങളാണ് ക്യാമ്പുകളില്‍ അഭയം തേടിയത്. ക്യാമ്പുകളില്‍നിന്ന് മടങ്ങിയെത്തി വീടും പരിസരവും വൃത്തിയാക്കി താമസം തുടങ്ങിയപ്പോഴാണ് കാലവര്‍ഷം വീണ്ടും കനത്തത്. പ്രദേശത്തെ ഇടവഴികളില്‍ ഇപ്പോള്‍ ത്തന്നെ ഒരടിയിലേറെ വെള്ളം ഉയര്‍ന്നിട്ടുണ്ട്. ഏതു സമയവും വീടുകളില്‍ വെള്ളം ഇരച്ചെത്താവുന്ന അവസ്ഥയാണ്. കുട്ടികളും വൃദ്ധരും അംഗപരിമിതരും കിടപ്പുരോഗികളും ഉള്‍പ്പെടെ നിരവധി താമസക്കാര്‍ കുന്നുമ്മാടി-കുതിരച്ചാല്‍ പ്രദേശങ്ങളിലുണ്ട്. ഒട്ടുമിക്ക താമസക്കാരും കൂലിപ്പണി ചെയ്ത് ഉപജീവനമാര്‍ഗം കണ്ടെത്തുന്നവരാണ്. കഴിഞ്ഞ വെള്ളപ്പൊക്കത്തില്‍ വീട്ടുപകരണങ്ങള്‍ ഉള്‍പ്പെടെ നിരവധി നിത്യോപയോഗ സാധനങ്ങള്‍ നശിച്ച് ലക്ഷങ്ങളുടെ നഷ്ടം വന്നിരുന്നു. ഇനിയൊരു വെള്ളപ്പൊക്കം താങ്ങാന്‍ കഴിയാത്ത അവസ്ഥയാണ്. തലവടി പ്രദേശത്തു‍ മാത്രമല്ല ദുരിതം അനുഭവിക്കുന്നത്. മുട്ടാര്‍, വീയപുരം, എടത്വ, തകഴി പഞ്ചായത്തിലും സമാന അവസ്ഥയാണുള്ളത്. ഈ പ്രദേശങ്ങളിലെ താഴ്ന്ന സ്ഥലങ്ങളെല്ലാം വെള്ളത്തില്‍ മുങ്ങിയിരിക്കുകയാണ്. കിഴക്കന്‍ വെള്ളത്തിന്‍റെ വരവ് വര്‍ധിച്ചാല്‍ പ്രദേശം വെള്ളത്തില്‍ മുങ്ങുകയും ജനജീവിതം താറുമാറാകുകയും ചെയ്യും. മങ്കൊമ്പ്: ഒന്നരയാഴ്ചത്തെ ഇടവേളയ്ക്കുശേഷം കുട്ടനാട്ടിൽ വീണ്ടും ജലനിരപ്പുയരുന്നു. കഴിഞ്ഞ ഏതാനും ദിവസങ്ങളായി പെയ്യുന്ന ശക്തമായ മഴയ്ക്കു പിന്നാലെ കിഴക്കൻവെള്ളത്തിന്‍റെ വരവു തുടങ്ങിയതോടെയാണ് വീണ്ടും കുട്ടനാട് വെള്ളപ്പൊക്കക്കെടുതിയിലേക്കു നീങ്ങുന്നത്. കുട്ടനാടിന്‍റെ താഴ്ന്ന പ്രദേശങ്ങളെല്ലാം ഇതിനകം വെള്ളത്തിനടിയിലായി. താഴ്ന്ന റോഡുകളിലും ഗതാഗത തടസം നേരിടുന്നുണ്ട്. മുളയ്ക്കാംതുരുത്തി-വാലടി, മങ്കൊമ്പ്-ചതുർത്ഥാ്യാകരി, കാവാലം-തിരുവിളങ്ങാട്-നാൽപതിൽ റോഡ്, മങ്കൊമ്പ് ക്ഷേത്രം റോഡ് എന്നിവിടങ്ങളിലും വെള്ളം കയറി ഗതാഗതം ദുഷ്‌കരമായിട്ടുണ്ട്. വരും ദിവസങ്ങളിലും മഴതുടർന്നാൽ ഇതുവഴിയുള്ള ഗതാഗതം തടസപ്പെടും. കൂടുതൽ പ്രദേശങ്ങൾ വെള്ളത്തിലാകും. മങ്കൊമ്പ് പ്രദേശത്തെ മിക്ക പുരയിടങ്ങളും വീടുകളും വെള്ളക്കെട്ടിലായിട്ടുണ്ട്. പല ഗ്രാമപഞ്ചായത്തുകളിലും ജലനിരപ്പ് അപകടകരായ നിലയിലേക്കുയർന്നിട്ടുണ്ട്. പള്ളാത്തുരുത്തിയിൽ 1.43 അടിയാണ് നിലവിലെ ജലനിരപ്പ്. 1.40 അടിയാണ് അപകടനില. നെടുമുടിയിൽ 1.45 അടിയാണ് അപകടനില. എന്നാൽ ഇന്നലെ വൈകുന്നേരം ജലനിരപ്പ് മങ്കൊമ്പിൽ നിലവിൽ 1.35 ആണ്. ചമ്പക്കുളം 1.63 (1.69), കിടങ്ങറ 1.65 (1.97), നീരേറ്റുപുറം 2.42 (2.42) എന്നിങ്ങനെയാണ് ഇന്നലെ വൈകുന്നേരത്തെ ജലനിരപ്പ്. ജലനിരപ്പുയർന്നതോടെ കുട്ടനാട്ടിൽ ഒരു ദിരിതാശ്വാസ ക്യാമ്പ് തുറന്നു. രാമങ്കരി ഗ്രാമപഞ്ചായത്ത് 13 ാം വാർഡിലാണ് ക്യാമ്പ് തുറന്നത്. ഇവിടുത്തെ അരിക്കൊടിച്ചിറ, കുഴിക്കാല നഗർ പ്രദേശങ്ങളിൽ വെള്ളക്കെട്ടു രൂക്ഷമായി വീടുകളിൽ കയറിയതതോടെ സർവീസ് കോ-ഓപ്പറേറ്റീവ് ബാങ്ക് ഹാളിലാണ് ക്യാമ്പ് പ്രവർത്തനമാരംഭിച്ചത്.

കായംകുളത്തിന്‍റെ പടിഞ്ഞാറൻമേഖല വെള്ളപ്പൊക്ക ഭീഷണിയിൽ

കായംകുളം: തോരാതെ പെയ്യുന്ന കനത്ത മഴയിൽ കായംകുളം നഗരത്തിന്‍റെ വടക്ക് പടിഞ്ഞാറൻ മേഖലകൾ വെള്ളപ്പൊക്ക ഭീഷണിയിലായി.മേഖലയിലെ താഴ്ന്ന പ്രദേശങ്ങളും ഗ്രാമീണ റോഡുകളും പൂർണമായി വെള്ളത്തിനടിയിലായി. കൊറ്റുകുളങ്ങര, പുളിമുക്ക്, വേരുവള്ളി, ഐക്യ ജംഗ്ഷൻ തുടങ്ങിയ പ്രദേശങ്ങളിലെ റോഡുകളും വീടുകളുമാണ് കൂടുതലും വെള്ളത്തിലായത്. പടിഞ്ഞാറൻ പ്രദേശങ്ങളിൽ വേണ്ടത്ര നീരൊഴുക്ക് സംവിധാനങ്ങൾ ഇല്ലാത്തതും ഓടകൾ മാലിന്യത്തിൽ മുങ്ങിയതും വെള്ളക്കെട്ട് രൂക്ഷമാക്കി. ചിലയിടങ്ങളിൽ ഓടകൾ സ്വകാര്യ വ്യക്തികൾ കൈയേറിയതും വെള്ളപ്പൊക്കത്തിന്‍റെ കാഠിന്യം വർധിക്കാൻ ഇടയാക്കിയെന്ന് നാട്ടുകാർ ആരോപിക്കുന്നു. ഐക്യ ജംഗ്ഷൻ ചേലിക്കുളങ്ങര റോഡിനു സമാന്തരമായുള്ള ഓടയിലൂടെയുള്ള നീരൊഴുക്ക് നിലച്ചതുമൂലം പ്രദേശത്തെ വീടുകളിൽ വെള്ളം കയറുകയാണ് ഇതോടെ ഐക്യ ജംഗ്‌ഷൻ - ചേലിക്കുളങ്ങര റോഡ് വെള്ളത്തിനടിയിലായി. വീടുകളിൽ വെള്ളം കയറിയതോടെ പ്രദേശവാസികൾ ബന്ധുവീടുകളിലും മറ്റും മാറി താമസിച്ചുതുടങ്ങി. നഗര പ്രദേശത്തെ ഉൾപ്പെടെ നിരവധി റോഡുകൾ വെള്ളത്തിൽ മുങ്ങിയിരിക്കുകയാണ്.

സിപിഐയുടെ വിമര്‍ശനങ്ങള്‍ എല്‍ഡിഎഫിനെ ശക്തിപ്പെടുത്താന്‍: ബിനോയ് വിശ്വം

ചേര്‍ത്തല: അമേരിക്ക കണ്ണുരുട്ടിയാല്‍ മൂത്രമൊഴിക്കുന്ന പ്രധാനമന്ത്രിയാണ് രാജ്യം ഭരിക്കുന്നതെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. സിപിഐ ചേര്‍ത്തല മണ്ഡലം സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഭാരതാംബയെന്നത് സങ്കൽപ്പവും ഓരോ പൗരന്‍റെയും അഭിമാനബോധവുമാണ്. അതിന് രൂപമില്ല. അമ്മ സങ്കല്‍പത്തില്‍ നിന്നാണ് ഭാരത് മാതാകീ ജയ് വിളിയുണ്ടായത്. സ്വാതന്ത്ര്യസമര ചരിത്രം തുടങ്ങിയ നാള്‍ മുതല്‍ ആ വിളിയുണ്ടായതാണ്. ഭാരത മാതാവിനെ കാണുന്നത് ദേശീയ പതാകയിലൂടെയാണ് അല്ലാതെ ആര്‍എസ്എസ് പ്രതീകങ്ങളിലൂടെയല്ല. കലുഷിതമായ കാലത്തു ജനങ്ങളുടെ പ്രതീക്ഷയും വിശ്വാസവും ഇടതുമുന്നണിയിലാണ്. മുന്നണിക്കുള്ളില്‍നിന്നുള്ള സിപിഐ വിമര്‍ശനങ്ങള്‍ എല്‍ഡിഎഫിനെ ശക്തിപ്പെടുത്താന്‍ ലക്ഷ്യമിട്ടുളളതു മാത്രമാണ്. മുയലിനൊപ്പം ഓടുകയും വേട്ടപ്പട്ടിക്കൊപ്പം വേട്ടയാടുകയും ചെയ്യുന്ന നാണംകെട്ട നിഷ്പക്ഷതയാണ് പാലസ്തീന്‍ വിഷയത്തില്‍ രാജ്യം സ്വീകരിക്കുന്നത്. ഇസ്രയേലിനും അമേരിക്കയ്ക്കും പക്ഷംപിടിക്കുന്ന നയം രാജ്യത്തിന്‍റെ പാരമ്പര്യം മറന്നുള്ളതാണെന്നും ബിനോയ് വിശ്വം പറഞ്ഞു. മുതിര്‍ന്ന നേതാവ് കെ.കെ.സിദ്ധാര്‍ത്ഥന്‍ പതാക ഉയര്‍ത്തി. സിപിഐ ജില്ലാ കൗൺസിൽ അംഗം എ.പി. പ്രകാശന്‍ അധ്യക്ഷത വഹിച്ചു. മണ്ഡലം സെക്രട്ടറി എം.സി. സിദ്ധാര്‍ത്ഥന്‍ പ്രവര്‍ത്തന റിപ്പോര്‍ട്ടും, കെ. ഉമയാക്ഷന്‍ രാഷ്‌ട്രീയ റിപ്പോര്‍ട്ടും അവതരിപ്പിച്ചു. മന്ത്രി പി. പ്രസാദ്, ജില്ലാ സെക്രട്ടറി ടി.ജെ. ആഞ്ചലോസ്, പി.വി. സത്യനേശന്‍, എസ്.സോളമന്‍, ടി.ടി. ജിസ്‌മോന്‍, ജി. കൃഷ്ണപ്രസാദ്, എം.കെ.ഉത്തമന്‍, എന്‍.എസ്. ശിവപ്രസാദ്, സി.എ. അരുണ്‍കുമാര്‍, സന്ധ്യാ ബെന്നി, ടി.കെ രാമനാഥന്‍, കെ.സി. ശ്യാം, പി.ഡി. ബിജു എന്നിവർ പ്രസംഗിച്ചു.

ചേര്‍ത്തല സെന്‍റ് മേരീസ് പാലം നിര്‍മാണം അടിയന്തരമായി പൂര്‍ത്തീകരിക്കണമെന്ന്

ചേര്‍ത്തല: ചേര്‍ത്തല സെന്‍റ് മേരീസ് പാലം നിര്‍മാണം അടിയന്തിരമായി പൂര്‍ത്തീകരിച്ച് ജനങ്ങളുടെ സഞ്ചാര സ്വാതന്ത്ര്യം പുനസ്ഥാപിക്കണമെന്ന് ഹ്യൂമന്‍ റൈറ്റ്‌സ് പ്രൊട്ടക്ഷന്‍ വിംഗ് ചേര്‍ത്തല താലൂക്ക് കമ്മിറ്റി ഭാരവാഹികള്‍ പത്രസമ്മേളനത്തില്‍ ആവശ്യപ്പെട്ടു. പാലം നിര്‍മാണത്തിലെ അപാകവും അഴിമതിയും അന്വേഷിക്കണമെന്ന് ആവശ്യപ്പെട്ട് വിജിലന്‍സിന് പരാതി നല്‍കിയതായും പ്രസിഡന്റ് ഐസക് വര്‍ഗ്ഗീസ്, സെക്രട്ടറി സി. മുത്തുസ്വാമി, ലീഗല്‍ അ‍ഡ്വൈസര്‍ അഡ്വ. സോമനാഥന്‍, മറ്റ് ഭാരവാഹികളായ ടി.പി. ഉത്തമന്‍, സ്റ്റഫെര്‍ഡ് ബര്‍ക്കലിന്‍, കെ.എന്‍.കെ. കുറുപ്പ്, പി.എ. പരമേശ്വരന്‍, ശിവദാസ പണിക്കര്‍, അഡ്വ.വിജയന്‍ നായര്‍ എന്നിവര്‍ പറഞ്ഞു. 2022 ല്‍ പാലം പൊളിക്കുന്ന വിവരം അറിഞ്ഞപ്പോള്‍ തന്നെ പാലം പൊളിക്കരുതെന്ന് അധികൃതര്‍ക്ക് നിവേദനം നല്‍കിയിരുന്നു. പാലം അപകടാവസ്ഥയിലാണെന്ന് ആരും റിപ്പോര്‍ട്ട് നല്‍കിയിരുന്നില്ലെന്ന് അവര്‍ പറഞ്ഞു. കാലപ്പഴക്കമില്ലാത്ത പാലം പൊളിച്ച് ചേര്‍ത്തല നഗരത്തെ ഗതാഗതകുരുക്കിലേക്ക് തള്ളി വിട്ടു. ആറ് മാസത്തിനുള്ളില്‍ പണി പൂര്‍ത്തീകരിക്കും എന്ന് പ്രഖ്യാപിച്ചിട്ട് സാങ്കേതിക തകരാറുകള്‍ ഉണ്ടാക്കി വകുപ്പുകള്‍ തന്നെ കാലതാമസം വരുത്തി. 60ശതമാനം പണി പൂര്‍ത്തിയാക്കിയപ്പോള്‍ ഇറിഗേഷന്‍ വകുപ്പ് സ്റ്റോപ്പ് മെമ്മോ നല്‍കി തടസം സൃഷ്ടിച്ചു. 2024 ജനുവരിയില്‍ ഈ തടസം മാറിയെങ്കിലും പണി തുടങ്ങാന്‍ കരാറുകാരനോ നടത്തിപ്പിക്കാന്‍ ഉദ്യോഗസ്ഥരോ തയ്യാറായില്ല. പരാതികള്‍ വ്യാപകമായപ്പോള്‍ നിര്‍മാണ പ്രവര്‍ത്തനങ്ങള്‍ വീണ്ടും തുടങ്ങിയെങ്കിലും തീര്‍ത്തും ഗുണമേന്മയില്ലാത്ത നിര്‍മാണ വസ്തുക്കളാണ് ഉപയോഗിച്ചതെന്ന് അവര്‍ ആരോപിച്ചു. ഈ സാഹചര്യത്തിലാണ് വിജിലന്‍സ് അന്വേഷണത്തിന് പരാതി നല്‍കിയതെന്നും അവര്‍ പറഞ്ഞു.

വെള്ളക്കെട്ടുള്ള പ്രദേശങ്ങളിൽ അടിയന്തര പമ്പിംഗ് നടത്തണം: കൊടിക്കുന്നിൽ സുരേഷ് എംപി

മാവേലിക്കര: കുട്ടനാട്ടിലെ കൈനകരി, ചമ്പക്കുളം, വെളിയനാട് ഉൾപ്പെടെയുള്ള വെള്ളപ്പൊക്കബാധിത പ്രദേശങ്ങളിൽ അടിയന്തര നടപടി ആവശ്യപ്പെട്ട് കൊടിക്കുന്നിൽ സുരേഷ് എംപി ജില്ലാ കളക്ടർക്ക് കത്ത് നൽകി. വെള്ളപ്പൊക്കം ഏറ്റവും കൂടുതൽ ബാധിച്ച പ്രദേശങ്ങളിൽ ആവശ്യത്തിന് മൊബൈൽ, സ്റ്റേഷനറി പമ്പുകൾ വിന്യസിക്കാനും ദുരന്ത പ്രതികരണ, പൊതുജനാരോഗ്യ ടീമുകളെ സജ്ജമാക്കാനും ഫണ്ടിംഗിലും ലോജിസ്റ്റിക്കൽ തടസങ്ങളിലും കാലതാമസമില്ലാതെ പരിഹാരം കാണാനും അദ്ദേഹം ജില്ലാ ഭരണകൂടത്തോട് ആവശ്യപ്പെട്ടു. നടപടിക്രമങ്ങളിലെ തടസങ്ങൾ കാരണം കുട്ടനാട്ടിലെ ജനങ്ങളെ കഷ്ടപ്പെടുത്താൻ അനുവദിക്കരുത്. ജില്ലാ ഭരണകൂടം വേഗത്തിൽ പ്രവർത്തിക്കുകയും വെള്ളപ്പൊക്കം ഒഴിവാക്കുകയും ദുരിതാശ്വാസം ആവശ്യമുള്ളവർക്ക് അടിയന്തരമായി ലഭ്യമാക്കുകയും വേണം- കൊടിക്കുന്നിൽ സുരേഷ് പറഞ്ഞു.

ബൈക്ക് തോട്ടില്‍ വീണു കാണാതായ ആളുടെ മൃതദേഹം കണ്ടെത്തി

കോന്നി: ബൈക്ക് തോട്ടില്‍ വീണു കാണാതായ മെഡിക്കല്‍ സ്‌റ്റോര്‍ ഉടമയുടെ മൃതദേഹം കണ്ടെത്തി. കോന്നി പരമേശ്വര മെഡിക്കല്‍സ് എന്ന സ്ഥാപനം നടത്തി വന്നിരുന്ന അതിരുങ്കല്‍ അര്‍ച്ചനയില്‍ (മൂക്കന്നൂർ) പ്രവീണിന്‍റെ (47 ) മൃതദേഹമാണ് ഇന്നലെ രാവിലെ അരുവാപ്പുലം കൃഷിഭവനു സമീപം വലിയ തോട്ടില്‍ നിന്നു ഞായറാഴ്ച കണ്ടെടുത്തത്. 13ന് വെള്ളിയാഴ്ച രാത്രി 11 ഓടെയാണ് പ്രവീണിനെ കാണാതായത്. കോന്നിയില്‍ നിന്ന് വീട്ടിലേക്ക് മടങ്ങുന്ന വഴിയില്‍ വകയാറിനും മുറിഞ്ഞകല്ലിനും ഇടയില്‍ മുറിഞ്ഞകല്‍ പുളിഞ്ചാണി തോട്ടിലേക്ക് വീഴുകയായിരുന്നു. ഫോണില്‍ വിളിച്ചിട്ട് പ്രവീണിനെ ബന്ധപ്പെടാന്‍ കഴിഞ്ഞില്ല. തുടര്‍ന്ന് വീട്ടുകാര്‍ സമീപത്തെ വീടിന്‍റെ സിസിറ്റിവി ദൃശ്യങ്ങള്‍ പരിശോധിച്ചപ്പോള്‍ പ്രവീണ്‍ തോട്ടിലേക്ക് വീഴുന്ന ദൃശ്യങ്ങളും ലഭിച്ചു. ശനിയാഴ്ച കോന്നിയില്‍ നിന്ന് അഗ്‌നിരക്ഷാ സേനയും നാട്ടുകാരും എത്തി തോട്ടില്‍ തെരച്ചില്‍ നടത്തിയെങ്കിലും പ്രവീണിനെ കണ്ടെത്താന്‍ കഴിഞ്ഞിരുന്നില്ല. ഇന്നലെ രാവിലെ വീണ്ടും തെരച്ചില്‍ നടത്തിയപ്പോഴാണ് മൃതദേഹം കണ്ടെത്തിയത്. സംസ്‌കാരം ഇന്ന് രണ്ടിന് വീട്ടുവളപ്പിൽ. ഭാര്യ: അനു കോന്നി ബ്ലോക്ക് ഓഫീസ് ഉദ്യോഗസ്ഥയാണ്. മക്കൾ: അദ്വൈത്, ഗൗരി (ഇരുവരും കുമ്പഴ മൗണ്ട് ബഥനി ഇംഗ്ലീഷ് സ്‌കൂള്‍ വിദ്യാര്‍ഥികള്‍)

ചെങ്ങന്നൂർ റെയിൽവേ സ്റ്റേഷനിലെ പാർക്കിംഗ് നിരക്ക് വർധന ; യാത്രക്കാരെ വലയ്ക്കുന്നു; പ്രതിഷേധം ശക്തം

ചെങ്ങന്നൂര്‍: ചെങ്ങന്നൂര്‍ ഉള്‍പ്പെടെയുള്ള റെയില്‍വേ സ്റ്റേഷനുകളിലെ വാഹന പാര്‍ക്കിംഗ് നിരക്കുകള്‍ കുത്തനെ കൂട്ടിയതില്‍ യാത്രക്കാര്‍ക്കു പ്രതിഷേധം. പഴയ നിരക്കില്‍നിന്ന് 20 മുതല്‍ 30 ശതമാനം വരെയാണ് ഒറ്റയടിക്ക് വര്‍ധന വരുത്തിയത്. ഇതിനു പുറമേ വാഹന പാര്‍ക്കിംഗ് കരാറെടുത്തവര്‍ തോന്നിയപോലെ പല നിരക്കുകള്‍ ഈടാക്കുന്നു എന്ന ആക്ഷേപവും ശക്തമാണ്. 2018നു ശേഷം ആദ്യമായിട്ടാണ് റെയില്‍വേ സ്റ്റേഷനുകളിലെ പാര്‍ക്കിംഗ് നിരക്ക് പരിഷ്‌കരിക്കുന്നത്. പുതിയ നിരക്കുകള്‍ പ്രകാരം ഇരുചക്ര വാഹനങ്ങള്‍ക്ക് രണ്ട് മണിക്കൂര്‍ വരെ പത്തു രൂപയും എട്ടു മണിക്കൂര്‍ വരെ 20 രൂപയും 24 മണിക്കൂര്‍ വരെ 30 രൂപയുമാണ് ഈടാക്കുന്നത്. മുച്ചക്ര വാഹനങ്ങള്‍ക്കും നാല് ചക്ര വാഹനങ്ങള്‍ക്കും ഇത് യഥാക്രമം 30 രൂപ, 50 രൂപ, 80 രൂപ എന്നിങ്ങനെയാണ് വര്‍ധിപ്പിച്ചിരിക്കുന്നത്. മുന്‍പ് 2 മണിക്കൂര്‍ മുതല്‍ 12 മണിക്കൂര്‍ വരെയുള്ള ഫീസിനു പകരം ഇപ്പോള്‍ 2 മുതല്‍ 8 മണിക്കൂര്‍ വരെയുള്ള ഫീസാണ് ഈടാക്കുന്നത്. തൊഴിലിടങ്ങളിലേക്കു പോകുന്ന സാധാരണ യാത്രക്കാര്‍ക്ക് ഈ സമയക്രമത്തിലെ മാറ്റം വലിയ തിരിച്ചടിയായിരിക്കുകയാണ്. പുതിയ നിരക്കുകള്‍ പ്രകാരം 10 രൂപ മുതല്‍ 400 രൂപ വരെയാണ് വര്‍ധന രേഖപ്പെടുത്തുന്നത്. 10 രൂപയുടെ പ്ലാറ്റ്‌ഫോം ടിക്കറ്റ് എടുക്കുന്ന അതേ റെയില്‍വേ സ്റ്റേഷനില്‍ കാര്‍ പാര്‍ക്ക് ചെയ്യുന്നതിന് 30 രൂപ നല്‍കേണ്ടിവരുന്നത് വിരോധാഭാസമായി യാത്രക്കാര്‍ ചൂണ്ടിക്കാട്ടുന്നു. സീസണ്‍ ടിക്കറ്റിനേക്കാള്‍ ഉയര്‍ന്ന മാസനിരക്കാണ് പാര്‍ക്കിംഗിനായി ഈടാക്കുന്നതെന്ന പരാതിയും ഉയര്‍ന്നിട്ടുണ്ട്. നിരക്ക് വര്‍ധിപ്പിച്ചതല്ലാതെ യാത്രക്കാര്‍ക്ക് ആവശ്യമായ അടിസ്ഥാന സൗകര്യങ്ങള്‍ ഒരുക്കുന്നതില്‍ അധികൃതര്‍ അലംഭാവം കാണിക്കുന്നു എന്ന ആക്ഷേപവും ശക്തമാണ്. പാര്‍ക്കിംഗ് നിരക്ക് താങ്ങാനാവാത്തതിനാല്‍ പല യാത്രക്കാരും റെയില്‍വേ സ്റ്റേഷന് പുറത്ത് വാഹനങ്ങള്‍ പാര്‍ക്ക് ചെയ്യാന്‍ നിര്‍ബന്ധിതരാകുന്നുണ്ട്. കൂടാതെ, പാര്‍ക്ക് ചെയ്യുന്ന വാഹനങ്ങള്‍ക്ക് യാതൊരു സുരക്ഷിതത്വവും നല്‍കുന്നില്ലെന്നും യാത്രക്കാര്‍ പരാതിപ്പെടുന്നു. ഈ‍ മാസം ഒന്നുമുതലാണ് പുതിയ നിരക്ക് പ്രാബല്യത്തില്‍ വന്നതെങ്കിലും നിരക്ക് വര്‍ധന യാത്രക്കാരെ ബുദ്ധിമുട്ടിക്കാത്ത തരത്തിലാണെന്നാണ് റെയില്‍വേയുടെ വിശദീകരണം. എന്നാല്‍, അടിസ്ഥാന സൗകര്യങ്ങള്‍ ഒരുക്കി വിപുലമായ പാര്‍ക്കിംഗ് സൗകര്യങ്ങള്‍ നല്‍കുകയും വാഹനങ്ങള്‍ക്കു വേണ്ടത്ര സുരക്ഷിതത്വം ഉറപ്പാക്കുകയും ചെയ്യണമെന്നാണ് യാത്രക്കാരുടെ ആവശ്യം. പാര്‍ക്കിംഗ് ഫീസിലെ വര്‍ധന റെയില്‍വേയും കാറുകാരും പുനഃപരിശോധിച്ച് അടിയന്തരമായി പ്രശ്‌നം പരിഹരിക്കണമെന്നും യാത്രക്കാര്‍ ആവശ്യപ്പെടുന്നു.

കാവാലം സ്‌റ്റേ ബസ് സർവീസുകൾ നിലച്ചു; യാത്രക്കാർ ദുരിതത്തിൽ

മങ്കൊമ്പ്: കോട്ടയം, ചങ്ങനാശേരി ഡിപ്പോകളില്‍നിന്നുള്ള കാവാലം സ്റ്റേ ബസുകള്‍ നിലച്ചത് യാത്രക്കാരെ ദുരിതത്തിലാക്കുന്നു. ബസ് ജീവനക്കാര്‍ക്കു രാത്രികാല വിശ്രമത്തിനുള്ള അടിസ്ഥാന സൗകര്യങ്ങളുടെ പരിമിതികള്‍ ഉന്നയിച്ചാണ് ഒരാഴ്ചയിലേറെയായി കെഎസ്ആര്‍ടിസി സര്‍വീസുകള്‍ നിര്‍ത്തിയത്. ഇതുമൂലം നിരവധി പതിവു യാത്രക്കാരാണ് ദുരിതത്തിലായിരിക്കുന്നത്. ജീവനക്കാര്‍ക്കു രാത്രികാലത്തു വിശ്രമിക്കുന്നതിനായി ബസ്‌സ്റ്റാൻഡിനു സമീപത്തു തന്നെയാണ് സൗകര്യമൊരുക്കിയിരിക്കുന്നത്. എന്നാല്‍ മഴ ആരംഭിച്ചതോടെ വിശ്രമകേന്ദ്രത്തിനു ചുറ്റിലും വെള്ളക്കെട്ടു രൂപപ്പെട്ടിരുന്നു. ഏതാനും ദിവസങ്ങളായി ഇവിടെ വൈദ്യുതിബന്ധവും തകരാറിലായിരുന്നു. വിശ്രമമുറിയില്‍ പാമ്പിനെ കണ്ടെന്നും ജീവനക്കാര്‍ പറയുന്നു. ഇതോടെ ജീവനക്കാര്‍ സ്റ്റേ സര്‍വീസ് നടത്തുന്നതില്‍നിന്നു പിന്‍മാറുകയായിരുന്നു. സര്‍വീസ് നിലച്ചതോടെ ഗ്രാമപഞ്ചായത്തധികൃതര്‍ ഇടപെട്ടു വൈദ്യുതി തടസം പരിഹരിച്ചു. കഴിഞ്ഞ ദിവസം കെഎസ്ആര്‍ടിസി അധികൃതര്‍ സ്ഥലം സന്ദര്‍ശിച്ചിരുന്നു. വിശ്രമമുറിക്കു സമീപത്തെ വെള്ളക്കെട്ടിനു പരിഹാരം കാണണമെന്ന് ഇവര്‍ ആവശ്യപ്പെട്ടതായാണ് അറിയുന്നത്. ഇതിനു പുറമെ ജീവനക്കാര്‍ക്കായി ഒരു കട്ടില്‍കൂടി ആവശ്യപ്പെട്ടതായും അറിയുന്നു. നിലവില്‍ ഒരു ഡബിള്‍കോട്ട് കട്ടിലും ഒരു സിംഗിള്‍ കോട്ട് കട്ടിലും മാത്രമാണ് ഇവിടെയുള്ളത്. ചങ്ങനാശേരി, കോട്ടയം ഡിപ്പോകളില്‍നിന്നുള്ള ഓരോ സര്‍വീസുകളാണ് നടത്തിയിരുന്നത്. പുലര്‍ച്ചെ 5.15 മുതലാണ് സര്‍വീസ് നടത്തിയിരുന്നത്. നേരത്തേ ഇരു ഡിപ്പോകളില്‍ നിന്നുമായി നാലു സര്‍വീസുകള്‍ നടത്തിയിരുന്നു. കോവിഡ് സാഹചര്യങ്ങളെത്തുടര്‍ന്ന് ഈ സര്‍വീസുകള്‍ നിലച്ചിരുന്നു. പിന്നീട് നാട്ടുകാര്‍ പലവട്ടം അധികൃതര്‍ക്കു പരാതി നല്‍കിയെങ്കിലും നടപടികളായിരുന്നില്ല. മാസങ്ങള്‍ക്കു മുന്‍പ് സ്റ്റേ സര്‍വീസ് സംരക്ഷണ സമിതിയുടെ നേതൃത്വത്തില്‍ വകുപ്പു മന്ത്രിക്കു നല്‍കിയ പരാതിയെത്തുടര്‍ന്നാണ് രണ്ടു സര്‍വീസുകള്‍ പുനരാരംഭിച്ചത്. ജീവനക്കാര്‍ക്കുള്ള വിശ്രമമുറി വൃത്തിയാക്കി കിടക്കകളും, കട്ടിലുമടക്കം ഇവര്‍തന്നെയാണ് ഒരുക്കിയത്. കെഎസ്ആര്‍ടിസിക്കു സർ വീസ് ലാഭകരമായിരുന്നു. ദൂരസ്ഥലങ്ങളില്‍ ജോലി ചെയ്യുന്നവര്‍, നിര്‍മാണത്തൊഴിലാളികള്‍, നഗപ്രദേശങ്ങളില്‍ മത്സ്യക്കച്ചവടം നടത്തുന്നവര്‍ എന്നിവര്‍ക്കെല്ലാം സര്‍വീസ് എറെ പ്രയോജനകരമായിരുന്നു. സര്‍വീസ് നിലച്ചതോടെ വലിയ തുക നല്‍കി ഓട്ടോറിക്ഷകളിലാണ് നിലവില്‍ ഇവര്‍ യാത്രചെയ്യുന്നത്. അടിസ്ഥാന സൗകര്യങ്ങളൊരുക്കി അടിയന്തിരമായി സര്‍വീസുകള്‍ പുനരാരംഭിക്കണമെന്നാണ് യാത്രക്കാരുടെ ആവശ്യം.

വിമാനദുരന്തത്തിൽ മരണമടഞ്ഞവർക്കായി തങ്കിപ്പള്ളിയിൽ പ്രാർഥന നടത്തി

ചേർത്തല: അഹമ്മദാബാദ് വിമാന ദുരന്തത്തിൽ ജീവൻ പൊലിഞ്ഞ ഹതഭാഗ്യർക്ക് പ്രണാമമർപ്പിച്ച് തീർഥാടന കേന്ദ്രമായ തങ്കിപ്പള്ളിയിൽ കെസിവൈഎമ്മിന്‍റെ നേതൃത്വത്തിൽ അനുസ്മരണ ചടങ്ങുകൾ നടത്തി. കറുത്ത വസ്ത്രങ്ങളണിഞ്ഞ് കത്തിച്ച മെഴുകുതിരി കൈയിലേന്തി യുവജനങ്ങൾ പ്രാർഥനകളിൽ പങ്കെടുത്തു. ഫാ.ലോബോ ലോറൻസ് ചക്രശേരി ദിവ്യബലിക്ക് കാർമികത്വം വഹിച്ചു. ഡീക്കൻ ജോബിൻ വചനപ്രഘോഷണം നടത്തി. ചടങ്ങുകൾക്ക് വികാരി ഫാ. ജോർജ് എടേഴത്ത്, റിച്ചാർഡ് കുന്നുംപുറത്ത്, അമല ജോയി, എയ്ഞ്ചൽ ജോബ്, ജിയ മേരി, ജിന്‍റു ടോമി, ഫെർമിൻ ജോജി എന്നിവർ നേതൃത്വം നൽകി.

കടലിൽ കുളിക്കാനിറങ്ങിയ വിദ്യാർഥിയെ കാണാതായി

ആലപ്പുഴ: കടലിൽ കുളി ക്കാ നിറങ്ങിയ വിദ്യാർ ഥിയെ തെരയി ൽപ്പെട്ടു കാണാതായി. പാലസ് വാര്‍ഡ് കൊട്ടാരച്ചിറയില്‍ ജോസഫിന്‍റെ മകന്‍ ഡോണ്‍ തോമസിനെ (15)യാണ് കാണാതായത്. കൂട്ടുകാര്‍ക്കൊപ്പം കുളിക്കുന്നതിനിടെ തിരയില്‍പ്പെടുകയായിരുന്നു. ഇന്നലെ വൈകിട്ട് അഞ്ചോടെ യാണ് സംഭവം. തത്തംപള്ളി സെന്‍റ് മൈക്കിള്‍സ് സ്‌കൂളിലെ പത്താം ക്ലാസ് വിദ്യാര്‍ഥിയാണ് ഡോൺ. ഫയര്‍ഫോഴ്‌സ്, നോര്‍ത്ത് പോലീസ്, അര്‍ത്തുങ്കല്‍ കോസ്റ്റല്‍ പോലീസ് എന്നിവര്‍ തെരച്ചില്‍ നടത്തുന്നുണ്ട്. ഡോണ്‍ തോമസ് അടക്കം എട്ടു പേരാണ് കടലിലിറങ്ങിയത്.

നാളികേര വ്യവസായം തകര്‍ച്ചയുടെ വക്കില്‍

മുഹമ്മ: കേരളത്തില്‍ ഏറ്റവും കൂടുതല്‍ തൊഴിലവസരങ്ങള്‍ സൃഷ്ടിച്ചിരുന്നത് നാളികേരവുമായി ബന്ധപ്പെട്ട വ്യവസായങ്ങളാണ്. വെളിച്ചെണ്ണയുടെയും കയറിന്‍റെയും പേരില്‍ പെരുമയേറിയ നാട് ആലപ്പുഴയായിരിന്നു. ആലപ്പുഴ, അമ്പലപ്പുഴ, ചേര്‍ത്തല, വൈക്കം മേഖലകളില്‍ നിരവധി കോപ്രാ മില്ലുകളും കയര്‍ വ്യവസായ സ്ഥാപനങ്ങളും പ്രവര്‍ത്തിച്ചിരുന്നു. ലക്ഷക്കണക്കിനാളുകള്‍ ഈ മേഖലകളില്‍ പണിയെടുത്തിരുന്നു. വിദേശ രാജ്യങ്ങളില്‍ ആലപ്പുഴ കയറിനായിരുന്നു ഏറെ പ്രിയം. നാട്ടിന്‍പുറത്തെ ജനങ്ങളുടെ പ്രധാന വരുമാന മാര്‍ഗം നാളികേരമായിരുന്നു. ചെറിയ ഭൂമിയുള്ള കുടുംബമാണെങ്കിലും വീട് പുലര്‍ത്താനുള്ള വരുമാനം നാളികേരത്തില്‍ നിന്ന് ലഭിച്ചിരുന്നു. വലിപ്പമുള്ളതും എണ്ണ കൂടുതല്‍ കിട്ടുന്നതുമായ നാളികേരമാണ് തീരപ്രദേശങ്ങളില്‍നിന്ന് ലഭിച്ചിരുന്നത്. ആലപ്പുഴയുടെ ചൂടു കൂടിയ കാലാവസ്ഥയും കൊപ്രാ വ്യവസായത്തിന് അനുകുലമായിരുന്നു. കൊപ്ര ഉണക്കുന്ന വെളിപ്രദേശങ്ങളും എരിപ്പുരകളും ഗ്രാമപ്രദേശങ്ങളില്‍ എവിടെയും ദൃശ്യമായിരുന്നു. ജനങ്ങളുടെ ആരോഗ്യ രക്ഷ ഉറപ്പാക്കുന്നതില്‍ വെളിച്ചെണ്ണ ഏറെ പങ്കുവഹിച്ചിരുന്നു. കലര്‍പ്പില്ലാത്ത വെളിച്ചെണ്ണയാണ് എവിടെയും ഉണ്ടായിരുന്നത്. വീട്ടാവിശ്യത്തിനും മരുന്നു നിര്‍മാണത്തിനും ഭക്ഷ്യ വസ്തുക്കളുടെ നിര്‍മാണത്തിനും തലയില്‍ തേച്ച് കുളിക്കുന്നതിനുമെല്ലാം ശുദ്ധമായ എണ്ണയാണ് ഉപയോഗിച്ചിരുന്നത്. ഇന്നുള്ളതുമായി നോക്കുമ്പോള്‍ രോഗം വളരെ കുറഞ്ഞ സമൂഹമാണ് മുന്‍പുണ്ടായിരുന്നതെന്ന് പഴമക്കാര്‍ പറയുന്നു. ഡോക്ടര്‍മാരുടെ കുറിപ്പടികള്‍ ഫയലായി സൂക്ഷിക്കുന്ന തലമുറയാണ് ഇന്നുള്ളത്. മുന്‍ കാലങ്ങളില്‍ ഇത് ഒറ്റപ്പെട്ട കാഴ്ചയായിരുന്നുവെന്നും ആവര്‍ പറയുന്നു. തെങ്ങിന് വളം ഇടുന്നതും കൃത്യമായ ഇടവേളകളില്‍ രോഗപ്രതിരോധ മാര്‍ഗങ്ങള്‍ സ്വീകരിക്കുന്നതും മുന്‍പ് മുടക്കമില്ലാതെ ചെയ്യുമായിരുന്നു. തെങ്ങിന് തടം എടുക്കാനും മണ്ണ് കിളച്ച് കൂമ്പല്‍ കോരാനും ജലസ്രോതസുകള്‍ ശുചിയാക്കാനും ഒരു വിഭാഗം ആള്‍ക്കാര്‍ എവിടെയും ഉണ്ടായിരുന്നു. വര്‍ഷത്തില്‍ എല്ലാ ദിവസവും ഇവര്‍ക്ക് ജോലി ലഭിച്ചിരുന്നു. ഈ തൊഴില്‍ മേഖല ഇന്ന് അന്യംനിന്ന നിലയിലാണ്. രോഗതുര സമൂഹത്തെ സൃഷ്ടിക്കുന്നത് മാറിയ ഭക്ഷണ ശീലങ്ങള്‍ ആണെന്ന് ആരോഗ്യ വിദഗ്ധര്‍ പറയുന്നു. വീട്ടാവശ്യത്തിനും എണ്ണപലഹാരങ്ങള്‍ ഉണ്ടാകുന്നതിനും നല്ലൊരു പങ്ക് ഇന്ന് ഉപയോഗിക്കുന്നത് കൃത്രിമ എണ്ണകളാണ്. ഉദര രോഗങ്ങളും ജീവിത ശൈലി രോഗങ്ങളുമെല്ലാം സമൂഹത്തെ കാര്‍ന്ന് തിന്നുന്ന അവസ്ഥയില്‍ എത്തി. ഒരു തിരിച്ചു പോക്ക് അനിവാര്യമായതിനാലാണ് വെളിച്ചെണ്ണ ഉത്പാദനം നാട്ടിന്‍പുറങ്ങളില്‍ വീണ്ടും മുള പൊട്ടിയത്. ചെറിയ യന്ത്രങ്ങളുടെ സഹായത്തോടെ വെളിച്ചെണ്ണ ഉത്പാദിപ്പിച്ചു വില്‍ക്കുന്ന കേന്ദ്രങ്ങള്‍ ഇപ്പോള്‍ സര്‍വസാധാരണമായി. ചക്കിലാട്ടുന്ന വെളിച്ചെണ്ണയും ലഭ്യമാണ്. ജനങ്ങളുടെ ആരോഗ്യ രക്ഷ ഉറപ്പാക്കുന്ന ചെറുതും വലുതുമായ ഇത്തരം മില്ലുകളാണ് പുതുതായുണ്ടായ സാഹചര്യം മൂലം അടച്ചുപൂട്ടല്‍ ഭീഷണി നേരിടുന്നു. ആരോഗ്യ സംരക്ഷണത്തിലും സൗന്ദര്യ സംരക്ഷണത്തിലും ശുദ്ധമായ വെളിച്ചെണ്ണയ്ക്കുള്ള പ്രാധാന്യം വളരെ വലുതാണ്. ആയൂര്‍വേദ മരുന്നുകളുടെ നിര്‍മാണത്തില്‍ പ്രധാന ചേരുവയാണ് വെളിച്ചെണ്ണ. തൈലങ്ങള്‍ വെളിച്ചെണ്ണയിലും നല്ലെണ്ണയിലുമാണ് തയ്യാറാക്കുന്നത്. വെളിച്ചെണ്ണയില്‍ തയാറാക്കുന്ന മരുന്നുകള്‍ക്ക് ഫലപ്രാപ്തി കൂടുതലാണ്. ഭക്ഷണാവശ്യത്തിനും ഉത്തമം വെളിച്ചെണ്ണ തന്നെയാണ്. രുചിക്കും ഗുണത്തിനും ഇതാണ് നല്ലത്. ഭക്ഷണത്തിലെ വിഷാംശങ്ങളാണ് പല രോഗങ്ങളും ക്ഷണിച്ചുവരുത്തുന്നത്. വെളിച്ചെണ്ണയില്‍ മായം കലര്‍ന്നാല്‍ പലവിധ രോഗങ്ങള്‍ ഉണ്ടാകും. തലയില്‍ തേക്കുന്ന എണ്ണ ശുദ്ധമല്ലെങ്കില്‍ രോഗം ഉറപ്പാണ്. മായം കലർന്ന എണ്ണ ഭക്ഷണത്തില്‍ കലരുന്നതാണ് ഉദര രോഗങ്ങള്‍ക്ക് ഹേതുവാകുന്നത്. വില കുറഞ്ഞ എണ്ണയുടെ പിന്നാലെ പോയാല്‍ ആരോഗ്യമാകും നഷ്ടമാകുക. ശരീരകാന്തി വര്‍ദ്ധിപ്പിക്കാനുള്ള കഴിവ് വെളിച്ചെണ്ണയ്ക്ക് ഉണ്ട്. ത്വക്ക് രോഗങ്ങളുടെ ശമനത്തിനും ത്വക്കിന് മാര്‍ദവം ധിപ്പിക്കുന്നതിനും വെളിച്ചെണ്ണ ഉത്തമമാണ് . - ഡോ. ജയകുമാര്‍ ബിഎഎംഎസ്

ബൈക്കിടിച്ചു പരിക്കേറ്റ് ചികിത്സയിലിരുന്ന യുവാവ് മരിച്ചു

എടത്വ: ബൈക്കിടിച്ച് പരിക്കേറ്റ് ചികിത്സയിലിരുന്ന യുവാവ് മരിച്ചു. തലവടി ആനപ്രമ്പാല്‍ തെക്ക് പുത്തന്‍പറമ്പില്‍ വീട്ടില്‍ പി.ജി. രവീന്ദ്രന്‍റെ മകന്‍ പി.ആര്‍. ദിനീഷ് (40) ആണ് മരിച്ചത്. എംസി റോഡില്‍ തിരുവല്ല ടിബി ജംഗ്ഷനു സമീപമുള്ള ഹോട്ടലിലെ ജീവനക്കാരനായ ദിനീഷ് മുത്തൂറ്റ് ഭാഗത്തേക്കു പോകവേ കഴിഞ്ഞ വെള്ളിയാഴ്ച രാത്രി 11 നാണ് അപകടം. അമിത വേഗത്തില്‍ എത്തിയ ബൈക്ക് ദിനീഷിനെ ഇടിച്ച ശേഷം കടന്നുകളഞ്ഞു. തലയ്ക്കും കാലിനും ഗുരുതര പരിക്കേറ്റ ദിനീഷിനെ തിരുവല്ലയിലെ സ്വകാര്യ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും ഇന്നലെ പുലര്‍ച്ചയോടെ മരിച്ചു. അപകടം കണ്ട് ഓടിയെത്തിയ സമീപ സ്ഥാപനത്തിലെ ജീവനക്കാരന്‍ അപകടത്തിനിടയാക്കിയ ബൈക്കും യാത്രക്കാരനെയും തടഞ്ഞുവയ്ക്കാന്‍ ശ്രമിച്ചെങ്കിലും ഇയാള്‍ സംഭവ സ്ഥലത്തുനിന്നു കടക്കുകയായിരുന്നു. ഇയാള്‍ക്കായുള്ള അന്വേഷണം ഊര്‍ജിതമാക്കിയതായി പോലീസ് പറഞ്ഞു. മാതാവ് : മണി, സഹോദരി : ദീപ. സംസ്‌കാരം ഇന്ന് 11ന് വീട്ടുവളപ്പില്‍.

വള്ളികുന്നം, താമരക്കുളം പഞ്ചായത്തുകളിൽ മഞ്ഞപ്പിത്തം പടരുന്നു

ചാരുംമൂട്: താമരക്കുളം, വള്ളികുന്നംപഞ്ചായത്തുകളില്‍ മഞ്ഞപ്പിത്തം പടരുന്നു. മഞ്ഞപ്പിത്തരോഗ ബാധിതരായ മുപ്പതിലേറെ പേര്‍ വിവിധ ആശുപത്രി കളില്‍ ചികിത്സയിലാണ്. മൂന്നു പേരുടെ നില അതീവ ഗുരുതരമാണ്. ഹെപ്പറ്റൈറ്റിസ്-എ ആണ് ഇവരെ ബാധിച്ചിരിക്കുന്നത്. ചത്തിയറ പുതുച്ചിറ ഭാഗത്ത് വിവാഹച്ചടങ്ങിന്‍റെ ഭാഗമായി നടന്ന സത്്കാരത്തില്‍ പങ്കെടുത്തവര്‍ക്കാണ് മഞ്ഞപ്പിത്ത രോഗലക്ഷണങ്ങള്‍ കണ്ടുതുടങ്ങിയത്. രോഗബാധിതര്‍ ആലപ്പുഴ, കോട്ടയം മെഡിക്കല്‍ കോളേജ് ആശുപത്രികളിലും സ്വകാര്യ ആശുപത്രികളിലും ചികിത്സയിലാണ്. വള്ളികുന്നം പഞ്ചായത്തിലെ കടുവിനാല്‍, കാഞ്ഞിരത്തുംമൂട് വാര്‍ഡുകളിലും താമരക്കുളം പഞ്ചായത്തിലെ ചത്തിയറയിലുമാണ് രോഗം പടരുന്നത്. താമരക്കുളം, വള്ളികുന്നം കുടുംബാരോഗ്യ കേന്ദ്രങ്ങളുടെ നേതൃത്വത്തില്‍ മേഖലയില്‍ പ്രതിരോധപ്രവര്‍ത്തനങ്ങള്‍ നടന്നുവരുന്നുണ്ട്.മേഖലയിലെ പൊതുകിണറുകള്‍ ഉള്‍പ്പെടെ കുടിവെള്ള സ്രോതസുകളില്‍ ക്ലോറിനേഷന്‍ നടത്തി. ഇടവിട്ടുള്ള ദിവസങ്ങളില്‍ സൂപ്പര്‍ ക്ലോറിനേഷന്‍ നടത്തിവരുന്നു. ആരോഗ്യപ്രവര്‍ത്തകര്‍ വീടുകള്‍തോറും ബോധവത്കരണവും നടത്തുന്നുണ്ട്. കഴിഞ്ഞ രണ്ടുമൂന്നു ദിവസങ്ങളിലായി പുതിയ കേസുകള്‍ റിപ്പോര്‍ട്ട് ചെയ്യപ്പെട്ടിട്ടില്ലെന്നാണ് ആരോഗ്യവകുപ്പ് അധികൃതര്‍ പറയുന്നു. ജനപ്രതിനിധികളുടെ നേതൃത്വത്തില്‍ ആരോഗ്യപ്രവര്‍ത്തകര്‍ പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കിയിട്ടുണ്ട്. വൈറല്‍ പനിയും അതിസാരവും പടര്‍ന്നുപിടിക്കുന്നതായും റിപ്പോര്‍ട്ടുകളുണ്ട്. മഴക്കാലപൂര്‍വ ശുചീകരണം കാര്യക്ഷമമായി പഞ്ചായത്തുകള്‍ നടത്താതെ പോയതാണ് രോഗങ്ങള്‍ പടര്‍ന്നുപിടിക്കാന്‍ കാരണമെന്നാണ് ആക്ഷേപം. നീരൊഴുക്കു തടസപ്പെട്ട് രൂപപ്പെട്ട വെ ള്ളക്കെട്ടുകളില്‍ കൊതുകിന്റെ സാന്നിധ്യം കൂടുതലാണ്. തോടുകളിലും പറമ്പുകളിലുമായി അഴുകിയ മാലിന്യങ്ങള്‍ ഈച്ചകളുടെയും കൊതുകുകളുടെയും പ്രജനന കേന്ദ്രങ്ങളായി മാറി. മാലിന്യങ്ങള്‍ വന്‍ തോതില്‍ കുടിവെള്ള സ്രോതസുകളില്‍ എത്തുന്നതു പകര്‍ച്ചവ്യാധി കൂടുവാന്‍ കാരണമാകുമെന്ന് ആരോഗ്യ വിദഗ്ധര്‍ പറഞ്ഞു. ജലജന്യ രോഗങ്ങളെ തടയാന്‍ ശുചീകരണവും ക്ലോറിനേഷനും കൂടുതല്‍ സമയങ്ങളില്‍ ഏര്‍പ്പെടുത്തണമെന്നാണ് നാട്ടുകാരുടെ ആവശ്യം.

പോരാട്ടവീര്യത്തോടെ പടയാളികൾ അങ്കം കുറിച്ചു; യുദ്ധസ്മരണയിൽ ഓച്ചിറക്കളിക്ക് തുടക്കം

കായംകുളം: അങ്കച്ചുവടുവച്ച് വായ്ത്താരി മുഴക്കി പോരാട്ട വീര്യത്തോടെ പടയാളികള്‍ അങ്കംകുറിച്ചതോടെ യുദ്ധസ്മരണയില്‍ ചരിത്ര പ്രസിദ്ധമായ ഓച്ചിറക്കളിക്ക് തുടക്കമായി. ഓച്ചിറ പരബ്രഹ്‌മ ക്ഷേത്ര സന്നിധിയിലെ എട്ടുകണ്ടത്തെ പോര്‍ക്കളമാക്കി വടിയും പരിചയുമായി ആയോധന കലാഭ്യാസികള്‍ പ്രതീകാത്മകമായി ഏറ്റുമുട്ടിയപ്പോള്‍ കളി കാണാനെത്തിയ ജനങ്ങള്‍ ആവേശത്തോടെ ആര്‍പ്പുവിളിച്ചു. ഓണാട്ടുകരയുടെ ആയോധന പാരമ്പര്യവും കാര്‍ഷിക പാരമ്പര്യവും പ്രകടമാക്കുന്നു എന്നതാണ് ഓച്ചിറക്കളിയുടെ പ്രത്യേകത. ഇന്നലെ രാവിലെ കളരി പൂജയെത്തുടർന്നു പടയാളികള്‍ സംഘങ്ങളായി ക്ഷേത്ര ദര്‍ശനത്തിനു ശേഷം കരകളില്‍ അഭ്യാസ പ്രദര്‍ശനം നടത്തി. തുടര്‍ന്ന് അന്നദാന മന്ദിരത്തിനു മുന്നിലെത്തി ക്ഷേത്ര ഭാരവാഹികളുമായി ചേര്‍ന്ന് ഋഷഭ ഘോയാത്രയായി കിഴക്കേ ആല്‍ത്തറയും പടിഞ്ഞാറെ ആല്‍ത്തറയും മീനാക്ഷി ക്ഷേത്രവും ഒണ്ടിക്കാവും വലംവച്ചു. തുടര്‍ന്ന് ഋഷഭ ഘോഷയാത്രയ്ക്കു ശേഷം കരപ്രതിനിധികള്‍ എട്ടുകണ്ടത്തിലെത്തി കര പറഞ്ഞു പരസ്പരം ഹസ്തദാനം നടത്തിയതോടെ ഇരുകരകളില്‍നിന്നും പടയാളികള്‍ ആര്‍ത്തിരമ്പി എട്ടുകണ്ടത്തിലിറങ്ങി പ്രതീകാത്മക അങ്കം കുറിക്കുകയായിരുന്നു. പ്രതികൂലമായ കാലാവസ്ഥയിലും ഓണാട്ടുകരയുടെ വിവിധഭാഗങ്ങളില്‍നിന്ന് അനേകം പേരാണ് ഓച്ചിറക്കളി ദര്‍ശിക്കാന്‍ എത്തിയത്. അധിനിവേശ ശക്തികള്‍ക്കെതിരേ ആത്മാഭിമാനം കൈമുതലാക്കി ഒരു ജനത നടത്തിയ പടയോട്ടത്തിന്‍റെ ഓര്‍മപുതുക്കലാണ് ഓച്ചിറക്കളി. കായംകുളം രാജ്യത്തിന് നേരേ വേണാട് രാജവംശം പടകൂട്ടി എത്തിയപ്പോള്‍ കായംകുളം രാജ്യത്തെ ജനങ്ങളുടെ നേതൃത്വത്തില്‍ ജാതിമതവ്യത്യാസമില്ലാതെ നടത്തിയ ചെറുത്തുനില്‍പ്പിന്‍റെ ഓര്‍മയ്ക്കായിട്ടാണ് ഓച്ചിറക്കളി നടത്തുന്നതെന്നും രണ്ട് സൈന്യങ്ങളും ഓച്ചിറ പടനിലത്താണ് ഏറ്റുമുട്ടിയതെന്നുമാണ് ഐതിഹ്യം. യുദ്ധസ്മരണയില്‍ എല്ലാ വര്‍ഷവും മിഥുനം ഒന്നും രണ്ടും ദിവസങ്ങളിലാണ് ഓച്ചിറക്കളി അരങ്ങേറുക. കരുനാഗപ്പള്ളി, കാര്‍ത്തികപ്പള്ളി, മാവേലിക്കര താലൂക്കുകളിലെ 52 കരകളിലെ നാനൂറിലേറേ കളരികളില്‍ പരിശീലനം നടത്തിയ നൂറുകണക്കിന് പടയാളികളാണ് ഓച്ചിറക്കളിയില്‍ പങ്കെടുക്കുന്നത്. ഇന്ന് സമാപിക്കും.

ചെങ്ങന്നൂരിൽ ചുഴലിക്കാറ്റ്; നിരവധി വീടുകൾ തകർന്നു

ചെങ്ങന്നൂർ: ചെങ്ങന്നൂർ മേഖല യിൽ ഇന്നലെയുണ്ടായ കാറ്റിലും മഴയിലും വൻമരങ്ങൾ കടപുഴകിയും ശിഖരങ്ങൾ അടർന്നുവീണും നിരവധി വീടുകൾക്കും വസ്തുവകകൾക്കും വ്യാപക നാശം. ചെറിയനാട് നാലാം വാർഡ് അരിയന്നൂർശേരി നഗറിൽ വിദ്യാഭവനം വിജയന്‍റെ വീടിനു മുകളിലും സമീപത്തെ പൂവണ്ണാത്തറയിൽ അനിലിന്‍റെ ശുചിമുറിയുടെ മുകളിലും മരങ്ങൾ വീണാണ് നാശനഷ്ടങ്ങൾ സംഭവിച്ചത് . അയൽപുരയിടത്തിൽ അപകടാവസ്ഥയിൽ നിന്ന മഹാഗണിയും കൊന്നത്തെങ്ങും കടപുഴകി വിജയന്‍റെ വീടിനു മുകളിൽ വീഴുകയായിരുന്നു. മേൽക്കൂരയിലെ ഷീറ്റുകൾ പൊട്ടി. ഭിത്തികൾക്കും സാരമായ കേടുപാടുകളുണ്ട്. പൂവണ്ണാത്തറയിൽ അനിലിന്‍റെ ശുചിമുറിയുടെ മുകളിൽ വൻ ആഞ്ഞിലിമരം കടപുഴകി വീഴുകയായിരുന്നു. മേൽക്കൂര തകർന്നു. ഭിത്തികൾക്കും കേടുപാടുണ്ട്. ഇന്നലെ ഉച്ചകഴിഞ്ഞ് മൂന്നിനായിരുന്നു സംഭവം. ഈ സമയം വിദ്യാഭവനം വീട്ടിൽ വിജയൻ, ഭാര്യ മായ, ഇവരുടെ മകൾ വിദ്യ, വിദ്യയുടെ സ്കൂൾ വിദ്യാർഥികളായ മൂന്നു കുട്ടികൾ എന്നിവർ ഉണ്ടായിരുന്നു. ശബ്ദം കേട്ട് പുറത്തേക്ക് ഓടിയതിനാൽ വൻ അപകടം ഒഴിവായി.

നാളികേരവില കുതിച്ചുയരുന്നു ; വെളിച്ചെണ്ണ ഉത്പാദന കേന്ദ്രങ്ങൾ പ്രതിസന്ധിയിൽ

മുഹമ്മ: നാളികേരവില കുതിച്ചുയരുന്നത് വെളിച്ചെണ്ണ ഉത്പാദന കേന്ദ്രങ്ങളെ പ്രതിസന്ധിയിലാക്കുന്നു. ആറു മാസം കൊണ്ട് വെളിച്ചെണ്ണയുടെ വിലയിലുണ്ടായ വർധന ഇരട്ടിയിലേറെയാണ്. ഒരു ലിറ്റർ വെളിച്ചെണ്ണയ്ക്ക് 170 രൂപയായിരുന്ന സ്ഥാനത്ത് ഇന്ന് 400 രൂപയാണു വില. ആലപ്പുഴ ജില്ലയിൽ ചെറുതും വലുതുമായി ആയിരത്തോളം മില്ലുകൾ പ്രവർത്തിക്കുന്നുണ്ട്. നാളികേരത്തിന്‍റെ സംസ്കരണം, എണ്ണയുത്പാദനം, വിപണനം എന്നീ മേഖലകളിലായി ആയിരക്കണക്കിനാളുകൾ ജോലിചെയ്യുന്നുണ്ട്. ശുദ്ധമായ എണ്ണ കിട്ടുമെന്നതിനാൽ ധാരാളം ആളുകൾ ഇത്തരം മില്ലുകളെ ആശ്രയിക്കുന്നുണ്ട്. വില കുതിച്ചുയരുന്നതും നാളികേരത്തിന്‍റെ ലഭ്യത കുറയുന്നതും എണ്ണയാട്ട് മില്ലുകൾക്ക് കനത്ത തിരിച്ചടിയാണ്. എണ്ണയുടെ വില താങ്ങാനാവാത്ത നിലയിലേക്കു മാറുന്നതിനാൽ വാങ്ങാൻ ആളില്ലാത്ത സാഹചര്യമാണ്. ഉപഭോഗം കുറയുന്നതിനാൽ മില്ലുകൾ പലതും പ്രവർത്തനം നിർത്തിവച്ചിരിക്കുകയാണ്. കേരം തിങ്ങും കേരള നാട് എന്നത് കേരമില്ലാത്ത നാടായി പരിണമിക്കുകയാണ്. കൊപ്രാ വ്യവസായത്തിനൊപ്പം കയർ വ്യവസായവും തമിഴ്നാട്ടിലേക്കു ചേക്കേറുകയാണ്. ഏറ്റവും കൂടുതൽ വിദേശനാണ്യം നേടിത്തരുന്ന കയർമേഖല തകർച്ചയിലേക്ക് കൂപ്പുകുത്താൻ തുടങ്ങിയിട്ട് പതിറ്റാണ്ടുകളായെങ്കിലും വ്യവസായത്തിന്‍റെ പുനരുദ്ധാരണത്തിന് ആരും മുൻകൈയെടുക്കുന്നില്ല. കയർ വ്യവസായത്തപ്പോലെ തമിഴ്നാടിനെ ആശ്രയിച്ചാണ് കൊപ്രാ വ്യവസായവും നിലനിൽക്കുന്നത്. കണ്ണൂർ, പാലക്കാട്, മലപ്പുറം മേഖലകളിൽനിന്ന് നാളികേരം എത്തുന്നുണ്ടെങ്കിലും തമിഴ്നാടിനാണ് ഈ രംഗത്ത് മേൽകൈ. വെളിച്ചെ ണ്ണവില ദിവസേന കൂടുന്ന സ്ഥിതിയായതിനാൽ നാളികേരത്തിന് ദൗർലഭ്യം സൃഷ്ടിച്ച് വില കൂടുതലായി ഈടാക്കാൻ തമിഴ്നാട്ടിലെ വ്യാപാരികൾ മത്സരിക്കുന്നതും തിരിച്ചടിയാകുന്നു. പച്ചക്കറി ഇനങ്ങൾക്ക് തമിഴ്നാട് വില കൂട്ടിയാൽ കേരളത്തിലെ കർഷകർക്ക് ഉത്പാദനം കൂട്ടി പ്രതിരോധിക്കാം. എന്നാൽ നാളികേരത്തിന്‍റെ വില കൂട്ടിയാൽ കേരളത്തിന് പ്രതിരോധിക്കാൻ കഴിയില്ല. ഈ സാഹചര്യം തമിഴ്നാട് പ്രയോജനപ്പെടുത്തുകയാണ്. കരിക്ക് വിപണി സജീവമായതും തിരിച്ചടിയായെന്ന് പ്രമുഖ വ്യാപാരിയും കഞ്ഞിക്കുഴി പഞ്ചായത്തംഗവുമായ ഫെയ്സി വി. ഏറനാട് പറയുന്നു. കേന്ദ്ര - സംസ്ഥാന സർക്കാരുകൾ അടിയന്തരമായി ഇടപെട്ടില്ലെങ്കിൽ വ്യവസായം കടുത്ത പ്രതിസന്ധിയിലാകുമെന്ന് മുഹമ്മ എയ്ഞ്ചലാ എക്സ്പോർട്ട്സ് ഉടമയായ ഫെയ്സി പറഞ്ഞു. കരിക്ക്, തേങ്ങാ പൗഡർ എന്നിവയുടെ കയറ്റുമതി വർധിച്ചതും തേങ്ങയുടെ ദൗർലഭ്യം രൂക്ഷമാക്കുന്നു. തേങ്ങായെക്കാൾ വില കരിക്കിന് കിട്ടുമെന്നതും നേരത്തേ വിളവെടുക്കാമെന്നതും കരിക്ക് കൃഷിയിലേക്ക് കർഷകരെ ആകർഷിക്കുന്നു. വെളിച്ചെണ്ണ കൂടുതൽ ലഭിക്കുന്ന പരമ്പരാഗത തെങ്ങിനങ്ങളുടെ സ്ഥാനത്ത് ഹൈബ്രിഡ് തെങ്ങുകൾ വരുന്നതും വിനയാണ്. ഹൈബ്രിഡ് തെങ്ങുകളിൽനിന്നുള്ള നാളികേരം പാചകത്തിനു മാത്രമാണ് പ്രയോജനപ്പെടുക. നിലവിലെ പ്രതിസന്ധി പരിഹരിക്കാൻ ശ്രീലങ്ക, മലഷ്യേ പോലുള്ള രാജ്യങ്ങളിൽനിന്ന് നാളികേരം ഇറക്കുമതി ചെയ്യണമെന്ന് ഫെയ്സി പറഞ്ഞു.

ചത്ത തിമിംഗലം തീരത്തടിഞ്ഞു

അമ്പലപ്പുഴ: ചത്ത തിമിംഗലം തീരത്തടിഞ്ഞു. പുറക്കാട് പുന്തല തീരത്ത് ശനിയാഴ്ച പകല്‍ ഒന്നരയോടെയാണ് കടല്‍ഭിത്തിയുടെ കല്ലുകള്‍ക്കിടയില്‍ കുടുങ്ങിയ നിലയില്‍ മത്സ്യത്തൊഴിലാളികള്‍ ചത്ത തിമിംഗലത്തെ കണ്ടത്. തിമിംഗലത്തിന് 25 മീറ്ററോളം നീളമുണ്ട്. മത്സ്യത്തൊഴിലാളികള്‍ വിവരമറിയിച്ചതിനെത്തുടര്‍ന്ന് പുറക്കാട് പഞ്ചായത്ത് പ്രസിഡന്‍റ് എ.എസ്. സുധര്‍ശനന്‍ സ്ഥലത്തെത്തിയശേഷം തോട്ടപ്പള്ളി കോസ്റ്റല്‍ പോലീസിനെ വിവരമറിയിച്ചു. തുടര്‍ന്ന് ഫിഷറീസ്, ഫോറസ്റ്റ്, റവന്യുവകുപ്പ് ഉദ്യോഗസ്ഥരും സ്ഥലത്തെത്തി. കോസ്റ്റല്‍ പോലീസ് സീ റെസ്ക്യു വിഭാഗത്തിന്‍റെ നേതൃത്വത്തില്‍ മത്സ്യത്തൊഴിലാളികളുടെ സഹകരണത്തോടെ രണ്ട് വള്ളങ്ങളിലായി വടംകെട്ടി തിമിംഗലത്തെ വലിച്ചെടുക്കാന്‍ ശ്രമിച്ചെങ്കിലും വടം പൊട്ടിയതോടെ ശ്രമം ഉപേക്ഷിച്ചു. അഴീക്കലില്‍ നങ്കൂരമിട്ടിരിക്കുന്ന ബോട്ട് കൊണ്ടുവന്ന് തിമിംഗലത്തെ പുറത്തെടുക്കാനുള്ള ശ്രമം രാത്രി ഏറെ വൈകിയും നടത്തിവരികയാണ്. ട്രോളിംംഗ് നിരോധനം നിലവില്‍വന്നതോടെ ബോട്ട് കടലില്‍ ഇറക്കുന്നതിന് നിയമതടസങ്ങളുണ്ട്. ഇത് പൂര്‍ത്തിയാക്കിയശേഷമാണ് ബോട്ട് കടലില്‍ ഇറക്കാനായത്. തിമിംഗലത്തെ തോട്ടപ്പള്ളി പൊഴിമുഖത്ത് പോസ്റ്റ്മോര്‍ട്ടം നടത്തി അടക്കം ചെയ്യാനാണ് തീരുമാനം.

സ്വർണച്ചേന തട്ടിപ്പ് കേസിൽ പത്തു വർഷത്തിനു ശേഷം പ്രതി പിടിയിൽ

കായംകുളം: സ്വർണച്ചേന തട്ടിപ്പുകേസിൽ പത്തു വർഷമായി ഒളിവിൽ കഴിഞ്ഞ പ്രതിയെ പോലീസ് അറസ്റ്റ് ചെയ്തു. കായംകുളം ഏവൂർ തെക്ക് രതീഷ് ഭവനം വീട്ടിൽ ഗിരീഷിനെയാണ് കരീലകുളങ്ങര പോലീസ് അറസ്റ്റ് ചെയ്തത്. കരീലകുളങ്ങര പോലീസ് സ്റ്റേഷനിൽ അഞ്ചോളം കേസിൽ പ്രതിയാണ് ഇയാളെന്ന് പോലീസ് പറഞ്ഞു. സ്വർണച്ചേന കൈവശം ഉണ്ടെന്നു പറഞ്ഞു വിശ്വസിപ്പിച്ച് അയൽവാസികളിൽനിന്നു സ്വർണവും പണവും വാങ്ങി കബളിപ്പിച്ചതിനും അയൽവാസിയായ സ്ത്രീയോട് അപമാര്യദയായി പെരുമാറിയതിനുമാണ് ഇയാൾക്കെതിരേ കേസുകൾ രജിസ്റ്റർ ചെയ്തിട്ടുള്ളത്. ഇയാൾ ഒളിവിൽ കഴിഞ്ഞുവരികയായിരുന്നു. ഒടുവിൽ കോടതി പ്രതിക്കെതിരേ വാറണ്ട് പുറപ്പെടുവിച്ചു. കായംകുളം ഡിവൈഎസ്പി ബാബുക്കുട്ടന്‍റെ നേത്യത്വത്തിൽ കരീലകുളങ്ങര പോലീസ് സ്റ്റേഷനിലെ സിവിൽ പോലീസ് ഓഫീസർമാരായ അജീഷ്, വിഷ്ണു‌ എന്നിവർ എറണാകുളം കാക്കനാട്ടുനിന്നാണ് പ്രതിയെ അറസ്റ്റ് ചെയ്‌തത്. പ്രതിയെ ഹരിപ്പാട് ജുഡീഷൽ ഫസ്റ്റ് ക്ലാസ് കോടതിയിൽ ഹാജരാക്കി.

തകർന്ന റോഡിൽ വലവീശി പ്രതിഷേധം

മുതുകുളം: മുതുകുളം ഉമ്മർമുക്ക് - ചക്കിലിക്കടവ് റോഡ് സഞ്ചാരയോഗ്യമാക്കാത്തതിൽ പ്രതിഷേധിച്ച് ബിജെപി മുതുകുളം പഞ്ചായത്ത് കമ്മിറ്റിയുടെ നേതൃത്വത്തിൽ റോഡിൽ വലവീശി പ്രതിഷേധിച്ചു. ഒരു വർഷമായി ഈ റോഡിന് ഹാർബർ എൻജിനിയറിംഗ് വകുപ്പിൽനിന്ന് ഒരു കോടി രൂപ അനുവദിച്ചെന്ന് എൽഡിഎഫും യുഡിഎഫും അവകാശവാദം ഉന്നയിച്ച് ഫ്ലക്സ് ബോർഡ് വച്ചതല്ലാതെ ഒരു ലോഡ് ഗ്രാവൽ പോലും ഇറക്കാൻ കഴിഞ്ഞിട്ടില്ലെന്ന് ബിജെപി ആരോപിച്ചു. ബിജെപി കാർത്തികപ്പള്ളി മണ്ഡലം ജനറൽ സെക്രട്ടറി കെ.ഹരികൃഷ്ണൻ കാവിലേത്ത് ഉദ്ഘാടനം ചെയ്തു. ബിജെപി മുതുകുളം പഞ്ചായത്ത് കമ്മിറ്റി വൈസ് പ്രസിഡന്‍റ് വിജയൻ അധ്യക്ഷത വഹിച്ചു.

പോരാട്ട സ്മരണയിൽ ഓച്ചിറക്കളിക്ക് ഇന്നു തുടക്കം

കായംകുളം: എട്ടുകണ്ടത്തെ പടക്കളമാക്കി മാറ്റി പോരാട്ട സ്മരണയിൽ ഓണാട്ടുകരയുടെ താളവും മെയ്‌വഴക്കവും മാറ്റുരയ്ക്കുന്ന ഓച്ചിറക്കളി ഇന്നും നാളെയുമായി ഓച്ചിറ പരബ്രഹ‌്മ സന്നിധിയിലെ എട്ടുകണ്ടത്തിൽ നടക്കും. ആവേശപ്പോര് നേരിൽ ദർശിക്കാൻ നാടിന്‍റെ വിവിധ ഭാഗങ്ങളിൽ നിന്ന് അനേകം പേർ ഓച്ചിറയിൽ എത്തും. അധിനിവേശ ശക്തികള്‍ക്കെതിരേ ആത്മാഭിമാനം കൈമുതലാക്കി ഒരു ജനത നടത്തിയ പടയോട്ടത്തിന്‍റെ ഓര്‍മപുതുക്കലാണ് ഓച്ചിറക്കളി. കായംകുളം രാജ്യത്തിനു നേരേ വേണാട് രാജവംശം പടകൂട്ടി എത്തിയപ്പോള്‍ കായംകുളം രാജ്യത്തെ ജനങ്ങളുടെ നേതൃത്വത്തില്‍ ജാതിമത വ്യത്യാസമില്ലാതെ നടത്തിയ ചെറുത്തുനില്‍പ്പിന്‍റെ ഓര്‍മയ്ക്കായിട്ടാണ് ഓച്ചിറക്കളി നടത്തുന്നതെന്നും രണ്ട് സൈന്യങ്ങളും ഓച്ചിറ പടനിലത്താണ് ഏറ്റുമുട്ടിയതെന്നുമാണ് ഓച്ചിറക്കളിയെപ്പറ്റിയുള്ള ഐതിഹ്യം. അതിനാലാണ് യുദ്ധസ്മരണയിൽ എല്ലാ വർഷവും മിഥുനം ഒന്നും രണ്ടും ദിവസങ്ങളിൽ ഓച്ചിറക്കളി അരങ്ങേറുന്നത്. കരുനാഗപ്പള്ളി, കാര്‍ത്തികപ്പള്ളി, മാവേലിക്കര താലൂക്കുകളിലെ 52 കരകളിലെ നാനൂറിലേറേ കളരികളില്‍നിന്നായി ജനങ്ങള്‍ ഈ ആചാരത്തില്‍ പങ്കുകൊളളും. ഇടവമാസം ആദ്യം മുതലേ കളരികളില്‍ ആയോധനകലകളുടെ പരിശീലനം ആരംഭിക്കും. പരിശീലനം പൂര്‍ത്തിയായ പടയാളികള്‍ കളരിപൂജ നടത്തുകയും സമീപവാസികളോടും ബന്ധുമിത്രാദികളോടും യുദ്ധാനുമതി വാങ്ങിക്കുകയും ചെയ്യും. ഇന്നു രാവിലെ ഘോഷയാത്രയോടുകൂടി പടനിലത്തെത്തി കരപ്പയറ്റ് എന്ന പ്രദര്‍ശന അങ്കം നടത്തും. തുടര്‍ന്ന് ക്ഷേത്രഭരണസാരഥികള്‍ ഋഷഭവീരന്മാരുടെയും താളവാദ്യങ്ങളുടെയും അകമ്പടിയോടെ കരനാഥന്മാരെയും പടയാളികളെയും ആഘോഷപൂര്‍വം പടനിലത്തേക്ക് ആനയിക്കും. തുടര്‍ന്ന് എട്ടുകണ്ടത്തിന്‍റെ ഇരുഭാഗത്തുമായി നിലയുറപ്പിക്കുന്ന പടയാളികള്‍ കരനാഥന്മാര്‍ ഇരുവശത്തുനിന്നുമിറങ്ങി പോര് തുടങ്ങുന്നതോടെ എട്ടുകണ്ടത്തിലേക്കിറങ്ങി പയറ്റ് കാഴ്ചവയ്ക്കും. തുടര്‍ന്ന് തകിടിക്കണ്ടം എന്ന വയലിലേക്കും പോരാട്ടം വ്യാപിക്കും. കാഴ്ചക്കാര്‍ക്ക് ആവേശം നൽകുന്ന തരത്തിൽ പടയാളികള്‍ പരസ്പരം പൊരുതുമെങ്കിലും തികച്ചും സൗഹൃദപരമായ പോരാട്ടമാണ് ഓച്ചിറക്കളിയുടെ പ്രത്യേകത.

പ്രേഷിതപ്രവര്‍ത്തനത്തിന്‍റെ ഊര്‍ജം തീക്ഷ്ണതയേറിയ പ്രാര്‍ഥന: മാര്‍ പെരുന്തോട്ടം

ചങ്ങനാശേരി: തീഷ്ണതയേറിയ പ്രാര്‍ഥനയിലൂടെയാണ് പ്രേഷിത പ്രവര്‍ത്തനത്തിനുള്ള ഊര്‍ജം ആര്‍ജിക്കുന്നതെന്ന് ആര്‍ച്ച്ബിഷപ് മാര്‍ ജോസഫ് പെരുന്തോട്ടം. അതിരൂപത ചെറുപുഷ്പ മിഷന്‍ലീഗ് 2025-26 പ്രവര്‍ത്തനവര്‍ഷം എസ്ബി കോളജ് കാവുകാട്ട് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു ആര്‍ച്ച്ബിഷപ്. അതിരൂപത പ്രസിഡന്‍റ് ഫെബിന്‍ അഗസ്റ്റിന്‍ മാത്യു അധ്യക്ഷത വഹിച്ചു. അതിരൂപത വികാരി ജനറാള്‍ മോണ്‍. സ്‌കറിയ കന്യാകോണില്‍ മാര്‍ഗരേഖയും പഠനഗ്രന്ഥ പ്രകാശനവും നടത്തി. ചെറുപുഷ്പ മിഷന്‍ ലീഗ് അതിരൂപത ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസിസ്റ്റന്‍റ് ഡയറക്ടര്‍ ഫാ. സെബാസ്റ്റ്യന്‍ മാമ്പ്ര, ഓര്‍ഗനൈസിംഗ് പ്രസിഡന്‍റ് ടിന്‍റോ സെബാസ്റ്റ്യന്‍, ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, ജനറല്‍ സെക്രട്ടറി എബിന്‍ ജോസഫ്, ഓഫീസ് സെക്രട്ടറി സിസ്റ്റര്‍ മേരി റോസ്, ജോണ്‍സണ്‍ കാഞ്ഞിരക്കാട്, ലൂക്ക് അലക്‌സ്, ആനിമേറ്റര്‍ ബോബി തോമസ്, റോഹന്‍ ബെന്നി, ജോയല്‍ ജോണ്‍, സാലിച്ചന്‍ തുമ്പേക്കളം എന്നിവര്‍ പ്രസംഗിച്ചു. കഴിഞ്ഞ പ്രവര്‍ത്തനവര്‍ഷ കാലയളവില്‍ നടത്തപ്പെട്ട വിവിധ മത്സരങ്ങളില്‍ മികച്ച പ്രകടനം കാഴ്ചവച്ച കുഞ്ഞുമിഷനറിമാരെ സമ്മാനങ്ങള്‍ നല്കി ആദരിച്ചു. കുഞ്ഞേട്ടന്‍ പുരസ്‌കാര ജേതാവ് ജോണ്‍സണ്‍ കാഞ്ഞിരങ്ങാട്ടിനെ ആദരിച്ചു. തുടര്‍ന്ന് നടന്ന സെമിനാറില്‍ റവ.ഡോ. മാണി പുതിയിടം കുട്ടികള്‍ക്കായി ക്ലാസ് നയിച്ചു.

സർക്കാർ ഓഫീസ് പരിസരം സാമൂഹ്യവിരുദ്ധരുടെ താവളം

അമ്പലപ്പുഴ: സർക്കാർ ഓഫീസ് പരിസരം സാമൂഹ്യവിരുദ്ധരുടെ താവളമാകുന്നു. പരാതി നൽകിയിട്ടും പോലീസ് നടപടി സ്വീകരിക്കുന്നില്ലെന്ന് ആക്ഷേപം. കാക്കാഴം റെയിൽവേ മേൽപ്പാലത്തിനു താഴെ പ്രവർത്തിക്കുന്ന പൊതുമരാമത്ത് ബ്രിഡ്ജസ് ഡിവിഷൻ സൂപ്രണ്ടിംഗ് എൻജിനിയർ ഓഫീസ് പരിസരമാണ് മദ്യപാനികളും സാമൂഹ്യവിരുദ്ധരും കൈയടക്കിയിരിക്കുന്നത്. കഴിഞ്ഞ ഏതാനും ദിവസമായി സൂപ്രണ്ടിംഗ് എൻജിനിയർ ഓഫീസിനു മുന്നിൽ മലമൂത്ര വിസർജനം ചെയ്യുന്നത് പതിവായിരിക്കുകയാണ്. രാവിലെ വനിതാ ജീവനക്കാർ ഉൾപ്പെടെയുള്ളവർ എത്തുമ്പോൾ ഓഫീസിലേക്ക് കയറാൻ കഴിയാത്ത സ്ഥിതിയാണ്. ഓഫീസിന് മുൻവശം വൃത്തിയാക്കിയ ശേഷമാണ് അകത്തു കയറുന്നത്. ഇത് നിത്യസംഭവമായതോടെ പലതവണ അമ്പലപ്പുഴ പോലീസിൽ പരാതി നൽകിയെങ്കി ലും ഫലമുണ്ടായില്ലെന്ന് ജീവനക്കാർ പറയുന്നു. അമ്പലപ്പുഴ പോലീസ് സ്റ്റേഷനു തൊട്ടടുത്താണ് ഈ സാമൂഹ്യ വിരുദ്ധ പ്രവർത്തനം നടക്കുന്നത്. ഇതരസംസ്ഥാന തൊഴിലാളികൾ തമ്പടിക്കുന്ന ഇവിടം സാമൂഹിക വിരുദ്ധ കേന്ദ്രമായി മാറിയിട്ടും പോലീസ് തിരിഞ്ഞുനോക്കിയിട്ടില്ല. രാത്രി കാല പട്രോളിംഗ് ശക്തമാക്കിയാൽ ഓഫീസ് പരിസരത്തെ മദ്യപാനവും സാമൂഹികവിരുദ്ധ പ്രവർത്തനവും ഒഴിവാക്കാൻ കഴിയുമെന്നാണ് ജീവനക്കാർ പറയുന്നത്.

കലാ സാംസ്‌കാരികമേള നടത്തി

ചേര്‍ത്തല: ചേർത്തല സംസ്കാരയുടെ ആഭിമുഖ്യത്തിൽ സംഘടിപ്പിച്ച കലാ സാംസ്‌കാരികമേളയും ആദരിക്കലും നഗരസഭ മുൻ ചെയര്‍മാന്‍ പി. ഉണ്ണികൃഷ്ണൻ ഉദ്ഘാടനം ചെയ്തു. പ്രസിഡന്‍റ് വെട്ടയ്ക്കൽ മജീദ് അധ്യക്ഷത വഹിച്ചു. യോഗത്തിൽ അഹമ്മദാബാദ് വിമാന ദുരന്തത്തിൽ മരണമടഞ്ഞവർക്ക് അനുശോചനം രേഖപ്പെടുത്തി. കെ.പി. സുധാകരൻ മുഖ്യപ്രഭാഷണം നടത്തി. ശില്പിയും എഴുത്തുകാരനുമായ പി. വി. സലിയപ്പനെയും മികച്ച വിജയം വരിച്ച വിദ്യാർഥികളെയും ആദരിച്ചു. ജോസ് ആറു കാട്ടി, ബേബി തോമസ്, സുരേന്ദ്രൻ എഴുപുന്ന, കമലസനൻ വൈഷ്ണവം, പി.കെ. സെൽവരാജ്, സുലോചന, പ്രദീപ് കൊട്ടാരം എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]