കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രലിന്‍റെ ദ്വിശദാബ്ദി ആഘോഷങ്ങളോടനുബന്ധിച്ച് കത്തീഡ്രൽ കത്തോലിക്ക കോൺഗ്രസിന്‍റെ നേതൃത്വത്തിൽ ബിസിനസ് കോൺക്ലേവ്. കേരള റബർ ലിമിറ്റഡിന്‍റെ ചെയർപേഴ്സണും മാനേജിംഗ് ഡയറക്ടറുമായ ഷീല തോമസ് ഉദ്ഘാടനം നിർവഹിച്ചു. പുതിയ ബിസിനസ് രീതികളിൽ പരീക്ഷണങ്ങൾ നടത്തണമെന്നും കാഞ്ഞിരപ്പള്ളിയുടെ വികസനം മുന്നിൽക്കണ്ടുകൊണ്ടുള്ള രീതികളിലേക്ക് ബിസിനസുകാർ ചിന്തിക്കണമെന്നും കാഞ്ഞിരപ്പള്ളിയുടെ വികസനമുരടിപ്പ്‌ മാറ്റാൻ എല്ലാവരും കൈകോർക്കണമെന്നും ഷീല തോമസ് പറഞ്ഞു.
വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി അധ്യക്ഷത വഹിച്ചു. മണ്ണിൽ കുഴിച്ചിട്ട് കിളിർക്കാത്ത താലന്തുകളാകാതെ ഓരോരുത്തരും കഴിവുകളെ കണ്ടെത്തി സമൂഹനന്മയ്ക്ക് ഉപയോഗപ്രദമാക്കുവാനും പുതിയ ബിസിനസ് മേഖലകളെ അവസരങ്ങളാക്കി മാറ്റാനും പുതുതലമുറയ്ക്ക് കഴിയണമെന്ന് മുഖ്യപ്രഭാഷണം നടത്തിയ മലനാട് ഡെവലപ്മെന്‍റ് സൊസൈറ്റി ഡയറക്ടറും ഇൻഫാം ദേശീയ ചെയർമാനുമായ ഫാ. തോമസ് മറ്റമുണ്ടയിൽ പറഞ്ഞു.
ബിസിനസ് മേഖലയിൽ മികവ് തെളിയിച്ച ഓക്സിജൻ ഗ്രൂപ്പ് സിഇഒ ഷിജോ കെ. തോമസ്, എസ്എംആർ ഗ്രൂപ്പ് സിഇഒ സണ്ണി ജേക്കബ്, ഡിബിഎഫ്എസ് സിഇഒ പ്രിൻസ് ജോർജ്, റെഗർ ഫൗണ്ടർ അജേഷ് ജോർജ്, എലോയ്റ്റ് ഗ്രൂപ്പ് ഫൗണ്ടർ ഡോ. തോംസൺ ഫിലിപ്പ് എന്നിവരെ ബിസിനസ് എക്സലൻസ് അവാർഡ് നൽകി ആദരിച്ചു.
വലിയ മുതൽമുടക്കിൽ ബിസിനസ് തുടങ്ങാതെ പുതിയ ആശയങ്ങൾ കണ്ടെത്തി അവയ്ക്കുവേണ്ടി കഠിനാധ്വാനം ചെയ്തുവേണം വിജയങ്ങൾ സ്വായത്തമാക്കാനെന്ന് ജോ എ. സ്കറിയ നയിച്ച തുറന്ന സംവാദത്തിൽ നിർദേശങ്ങളുണ്ടായി. കാഞ്ഞിരപ്പള്ളിയിൽ കഴിഞ്ഞ 50 വർഷത്തിലേറെയായി വിജയകരമായി ബിസിനസ് നടത്തുന്നവരെ കോൺക്ലേവിൽ പ്രത്യേകം ആദരിച്ചു.
സാവിയോ ജോസഫ് പുൽപ്പേൽ, ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ, കെസിഎഫ് സെക്രട്ടറി ടെസി ബിജു പാഴിയാങ്കൽ, ഗ്ലോബൽ വൈസ് പ്രസിഡന്‍റുമാരായ രാജീവ് ഏബ്രഹാം, രാജേഷ് ജോൺ, രൂപത പ്രസിഡന്‍റ് ബേബി കണ്ടത്തിൽ, രൂപത ബിസിനസ് ഫോറം കോ-ഓർഡിനേറ്റർ ജിൻസ് പള്ളിക്കമ്യാലിൽ, ജിജി സെബാസ്റ്റ്യൻ പുത്തേട്ട്, ജൂബിലി പബ്ലിസിറ്റി കൺവീനർ ഫിലിപ്പ് നിക്കോളാസ് പള്ളിവാതുക്കൽ എന്നിവർ പ്രസംഗിച്ചു.
അസിസ്റ്റന്‍റ് വികാരിമാരായ ഫാ. തോമസുകുട്ടി ആലപ്പാട്ടുകുന്നേൽ, ഫാ. ടോണി മുളങ്ങാശേരിൽ, ജൂബിലി കമ്മിറ്റി കൺവീനർ സെബാസ്റ്റ്യൻ എള്ളൂക്കുന്നേൽ, ജയിംസുകുട്ടി ആശാരിപറമ്പിൽ, ജോസഫ് പണ്ടാരക്കളം, സാബു കൊച്ചുപുരയ്ക്കൽപറമ്പിൽ, ജിജി പുതിയടം, ജോഷി പുൽപ്പേൽ, ഉണ്ണി ചീരംവേലിൽ, റെജി കൊച്ചുകരിപ്പാപ്പറമ്പിൽ, സോജൻ പുതുപ്പറമ്പിൽ, ബിജു കക്കാട്ട് എന്നിവർ നേതൃത്വം നൽകി.