കടുത്തുരുത്തി: കോതനല്ലൂര്‍ സെന്‍റ് മേരീസ് ക്‌നാനായ കത്തോലിക്കാ പള്ളിയുടെ രജതജൂബിലി ഉദ്ഘാടനം ഇന്ന് നടക്കും. ക്രമീകരണങ്ങളെല്ലാം പൂര്‍ത്തിയായതായി വികാരി ഫാ. ജോസഫ് ഈഴാറത്ത് അറിയിച്ചു. നൂറ്റാണ്ടുകളായി കോതനല്ലൂര്‍ പ്രദേശത്ത് കുടിയേറിയ ക്‌നാനായക്കാര്‍ക്ക് ദേവാലയം വേണമെന്ന ആഗ്രഹം സഫലമായത് 1999 ഏപ്രില്‍ 11 നായിരുന്നു. കോട്ടയം അതിരൂപതയുടെ മെത്രോപ്പോലീത്തയായിരുന്ന മാര്‍ കുര്യാക്കോസ് കുന്നശേരിയാണ് കോതനല്ലൂര്‍ ഇടവക ദേവാലയം കൂദാശ ചെയ്തത്. 82 കുടുംബങ്ങളുമായി ആരംഭിച്ച ഇടവകയിലിപ്പോള്‍ 150 കുടുംബങ്ങളാണുള്ളത്.
ഇന്ന് ഉച്ചകഴിഞ്ഞ് 2.30 ന് ജൂബിലി വിളബരയാത്ര കടുത്തുരുത്തി വലിയപള്ളിയില്‍നിന്നാരംഭിക്കും. ഫൊറോന വികാരി ഫാ. ഏബ്രഹാം പറമ്പേട്ട് സന്ദേശം നല്‍കിയ ശേഷം റാലി ഫ്‌ളാഗ് ഓഫ് ചെയ്യും. അഞ്ചിന് ജൂബിലി ഉദ്ഘാടന വിശുദ്ധ കുര്‍ബാന ആരംഭിക്കും. ഫാ ഫിലിപ്പ് തൊടുകയില്‍ കാര്‍മികത്വം വഹിക്കും. ഫാ ജോസ് കുറുപ്പന്തറ, ഫാ വില്‍സണ്‍ കുരുട്ടുപ്പറമ്പില്‍, ഫാ. ജിബിന്‍ കുഴിവേലില്‍, ഫാ. ബിനു തറയില്‍, റവ. ഡോ. ജേക്കബ് മുല്ലൂര്‍, ഫാ. ബിനോ ചേരിയില്‍ എന്നിവര്‍ സഹകാര്‍മികത്വം വഹിക്കും. മോണ്‍. മാത്യു ഇളപ്പാനിക്കല്‍ സന്ദേശം നല്‍കും. 6.15 ന് അതിരൂപതാ സഹായ മെത്രാന്‍ ഗീവര്‍ഗീസ് മാര്‍ അപ്രേം ജൂബിലി ദീപം തെളിക്കും. തുടര്‍ന്ന് സ്‌നേഹവിരുന്ന്.
6.30 ന് പാരീഷ് ഹാളില്‍ ആരംഭിക്കുന്ന പൊതുസമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. ഗീവര്‍ഗീസ് മാര്‍ അപ്രേം അധ്യക്ഷത വഹിക്കും. വികാരി ഫാ. ജോസഫ് ഈഴാറത്ത്, തോമസ് ചാഴികാടന്‍ എംപി, മോന്‍സ് ജോസഫ് എംഎല്‍എ, ഫാ. ഏബ്രഹാം പറമ്പേട്ട്, കോതനല്ലൂര്‍ കന്തീശങ്ങള്‍ ഫൊറോന പള്ളി വികാരി ഫാ. സെബാസ്റ്റ്യന്‍ പടിക്കകുഴുപ്പില്‍, മാഞ്ഞൂര്‍ പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍, വൈസ് പ്രസിഡന്‍റ് ബിജു കൊണ്ടൂക്കാലാ, ഫാ. ബിജു തറയില്‍, സിസ്റ്റര്‍ റോമില്‍ഡ എല്‍ഡിഎസ്‌ജെജി, ലിജോ ലൂക്കോസ് പീടികയില്‍ തുടങ്ങിയവര്‍ പ്രസംഗിക്കും.