കൊലപാതകശ്രമം: സഹോദരങ്ങള്‍ ഉള്‍പ്പെടെ മൂന്നുപേര്‍ അറസ്റ്റില്‍ : Deepika.com Nattu Visesham

KOTTAYAM

കൊലപാതകശ്രമം: സഹോദരങ്ങള്‍ ഉള്‍പ്പെടെ മൂന്നുപേര്‍ അറസ്റ്റില്‍

Thursday, March 28, 2024 6:40 AM IST

കോട്ടയം: യുവാവിനെ ആക്രമിച്ചു കൊലപ്പെടുത്താന്‍ ശ്രമിച്ച കേസില്‍ സഹോദരങ്ങള്‍ ഉള്‍പ്പെടെ മൂന്നുപേരെ പോലീസ് അറസ്റ്റ് ചെയ്തു. പനച്ചിക്കാട് നാല്‍ക്കവല പുളിമൂട് കവല തടത്തില്‍ രോഹിത്(23), ഇയാളുടെ സഹോദരന്‍ രഞ്ജിത്ത്(23), പനച്ചിക്കാട്, പൂവന്തുരുത്ത് പുത്തന്‍പറമ്പില്‍ അമല്‍ കൃഷ്ണ (21) എന്നിവരെയാണ് കോട്ടയം ഈസ്റ്റ് പോലീസ് അറസ്റ്റ് ചെയ്തത്.

ഇവര്‍ കഴിഞ്ഞ 24നു പുലര്‍ച്ചെ 3.30നു പനച്ചിക്കാട് മലമേല്‍ക്കാവ് ഭാഗത്ത് വച്ച് ജോലി കഴിഞ്ഞു ബൈക്കില്‍ വന്ന പനച്ചിക്കാട് സ്വദേശിയായ യുവാവിനെയും സുഹൃത്തിനെയും തടഞ്ഞുനിര്‍ത്തി, അസഭ്യം പറയുകയും വണ്ടിയില്‍ നിന്നു വലിച്ച് താഴെയിട്ട്, മര്‍ദിക്കുകയും തുടര്‍ന്ന് കമ്പിവടി കൊണ്ട് യുവാവിനെ ആക്രമിക്കുകയുമായിരുന്നു.

പ്രതികൾക്ക് യുവാവിനോട് മുന്‍വൈരാഗ്യമുണ്ടായിരുന്നു. ഇതിന്‍റെ തുടര്‍ച്ചയെന്നോണമാണ് ഇവര്‍ യുവാവിനെ ആക്രമിച്ചത്. പരാതിയെത്തുടര്‍ന്ന് കോട്ടയം ഈസ്റ്റ് പോലീസ് കേസെടുത്തു നടത്തിയ തെരച്ചില്‍ മൂവരേയും പിടികൂടുകയുമായിരുന്നു. രോഹിത്തിനും രഞ്ജിത്തിനും കോട്ടയം ഈസ്റ്റ് സ്റ്റേഷനില്‍ കൊലപാതകശ്രമം ഉള്‍പ്പെടെ ക്രിമിനല്‍ കേസുകള്‍ നിലവിലുണ്ട്.