അതിരമ്പുഴ: വിശുദ്ധ കുരിശിന്‍റെ തിരുശേഷിപ്പ് പ്രതിഷ്ഠിച്ചിട്ടുള്ള തീർഥാടന കേന്ദ്രമായ അതിരമ്പുഴ സെന്‍റ് മേരീസ് ഫൊറോനാ പള്ളിയിലെ പീഡാനുഭവ വെള്ളി ആചരണത്തോടനുബന്ധിച്ച് ഇന്ന് വിശുദ്ധ കുരിശിന്‍റെ തിരുശേഷിപ്പ് സംവഹിച്ചുകൊണ്ട് നഗരം ചുറ്റിയുള്ള കുരിശിന്‍റെ വഴി നടക്കും.
രാവിലെ 6.30 മുതൽ 12.30 വരെ വലിയ പള്ളിയിൽ ആരാധന നടക്കും. ഇടവകാംഗങ്ങൾ ഓരോ കൂട്ടായ്മയിൽ നിന്നും കുരിശിന്‍റെ വഴി നടത്തി ദേവാലയത്തിലെത്തി ആരാധനയിൽ സംബന്ധിക്കും. 12.30ന് നേർച്ച കഞ്ഞി വിതരണം.
ഉച്ചകഴിഞ്ഞ് രണ്ടിന് ചങ്ങനാശേരി അതിരൂപതാധ്യക്ഷൻ ആർച്ച്ബിഷപ് മാർ ജോസഫ് പെരുന്തോട്ടത്തിന്‍റെ മുഖ്യകാർമികത്വത്തിൽ പീഡാനുഭവ തിരുക്കർമങ്ങൾ ആരംഭിക്കും. തുടർന്ന് തിരുസ്വരൂപ ചുംബനം. 4.30ന് നഗരം ചുറ്റിയുള്ള ആഘോഷമായ കുരിശിന്‍റെ വഴി വലിയപള്ളിയിൽനിന്ന് ആരംഭിക്കും.
പീഡാനുഭവ ശനിയാഴ്ച രാവിലെ 5.45ന് വലിയപള്ളിയിലും 6.15ന് റീത്താ ചാപ്പലിലും 6.30ന് പാറോലിക്കൽ ചാപ്പലിലും വിശുദ്ധ കുർബാന. 9.30ന് പൊതു മാമോദീസ. വൈകുന്നേരം അഞ്ചിന് വിശുദ്ധ കുർബാന, പുത്തൻ വെള്ളവും പുത്തൻ തിരിയും ആശീർവാദം.
ഉയിർപ്പു ഞായറാഴ്ച പുലർച്ചെ 2.30ന് വലിയപള്ളിയിലും റീത്ത ചാപ്പലിലും പാറോലിക്കൽ ചാപ്പലിലും ഈസ്റ്റർ തിരുക്കർമങ്ങൾ. രാവിലെ ആറിനും എട്ടിനും വലിയ പള്ളിയിലും 6.15ന് റീത്ത ചാപ്പലിലും വിശുദ്ധ കുർബാന. വികാരി റവ.ഡോ. ജോസഫ് മുണ്ടകത്തിൽ തിരുക്കർമങ്ങളിൽ മുഖ്യ കാർമികത്വം വഹിക്കും.
മാന്നാനം ആശ്രമ ദേവാലയത്തിൽ
മാന്നാനം: മാന്നാനം സെന്‍റ് ജോസഫ്സ് ആശ്രമ ദേവാലയത്തിൽ ഇന്ന് രാവിലെ 6.30 മുതൽ ആരാധന. ഉച്ചകഴിഞ് 1.30ന് നേർച്ചക്കഞ്ഞി. 2.30ന് കുരിശിന്‍റെ വഴി. തുടർന്ന് പീഡാനുഭവ വായന. ഫാ. മാത്യു പോളച്ചിറ സിഎംഐ മുഖ്യകാർമികത്വം വഹിക്കും.
ഫാ. റോബിൻ പതിനാറിൽചിറ സിഎംഐ, ഫാ. ആന്‍റണി കാഞ്ഞിരത്തിങ്കൽ സിഎംഐ എന്നിവർ സഹകാർമികരാകും. ഫാ. സെബാസ്റ്റ്യൻ അട്ടിച്ചിറ സിഎംഐ സന്ദേശം നൽകും. തുടർന്ന് ഈശോയുടെ തിരുസ്വരൂപം വഹിച്ചുകൊണ്ട് നഗരികാണിക്കൽ, തിരുസ്വരൂപവും തിരുക്കുരിശും വണക്കം.
നാളെ രാവിലെ 6.30ന് ദുഃഖശനി തിരുക്കർമങ്ങൾ ആരംഭിക്കും. പുത്തൻ തീ, പുത്തൻ വെള്ളം വെഞ്ചരിപ്പ്, വിശുദ്ധ കുർബാന. ഫാ. കുര്യാക്കോസ് കളരിക്കൽ സിഎംഐ മുഖ്യകാർമികത്വം വഹിക്കും. ഫാ. ആന്‍റണി കാഞ്ഞിരത്തിങ്കൽ സിഎംഐ സഹകാർമികനാകും. സന്ദേശം - ഫാ. ഷാജി ഏണക്കാട്ട് സിഎംഐ.
ഞായറാഴ്ച പുലർച്ചെ മൂന്നിന് ഈസ്റ്റർ തിരുക്കർമങ്ങൾ ആരംഭിക്കും. ഉത്ഥാന അറിയിപ്പ്, പ്രദക്ഷിണം, വിശുദ്ധ കുർബാന. ഫാ. കുര്യൻ ചാലങ്ങാടി സിഎംഐ മുഖ്യകാർമികത്വം വഹിക്കും. ഫാ. ആന്‍റണി വള്ളവന്തറ സിഎംഐ സഹകാർമികനാകും. സന്ദേശം - ഫാ. സിജോ ചേന്നാട് സിഎംഐ. രാവിലെ 6.30നും എട്ടിനും 9.30നും 11നും വിശുദ്ധ കുർബാന.
മണർകാട് പള്ളിയിൽ
മണര്‍കാട്: മണര്‍കാട് വിശുദ്ധ മര്‍ത്തമറിയം യാക്കോബായ സുറിയാനി കത്തീഡ്രല്‍ കാല്‍ കഴുകല്‍ ശുശ്രൂഷയ്ക്ക് ക്‌നാനായ അതിഭദ്രാസനം റാന്നി മേഖലാധിപന്‍ കുര്യാക്കോസ് മാര്‍ ഈവാനിയോസ് പ്രധാന കാര്‍മികത്വം വഹിച്ചു.
സുന്നഹദോസ് സെക്രട്ടറിയും കോട്ടയം ഭദ്രാസനാധിപനുമായ തോമസ് മാര്‍ തീമോത്തിയോസ് വചന സന്ദേശം നല്‍കി.
ദുഃഖവെള്ളി ദിനമായ ഇന്ന് രാവിലെ അഞ്ചിന് പ്രഭാത നമസ്‌കാരം, 9.30ന് മധ്യാഹ്ന നമസ്‌കാരം. ഉച്ചയ്ക്ക് 12ന് സ്ലീബാ നമസ്‌കാരം - സ്ലീബാ ആഘോഷം, പ്രദക്ഷിണം, കുരിശ് കുമ്പിടീല്‍, ചൊറുക്ക നല്‍കല്‍. ഉച്ചയ്ക്ക് ഒന്നിന് കബറടക്ക ശുശ്രൂഷ.
ദുഃഖ ശനി ദിനമായ നാളെ രാവിലെ അഞ്ചിന് പ്രഭാത നമസ്‌കാരം (കത്തീഡ്രലില്‍). കരോട്ടെ പള്ളിയില്‍ രാവിലെ 9.30ന് മൂന്നാം മണി, ഉച്ച, ഒന്‍പതാം മണി നമസ്‌കാരം. 10ന് കുര്‍ബാന - കുര്യാക്കോസ് മോര്‍ ഈവാനിയോസ് മെത്രാപ്പോലീത്തായുടെ പ്രധാന കാര്‍മികത്വത്തില്‍. കത്തീഡ്രലില്‍ വൈകുന്നേരം അഞ്ചിന് സന്ധ്യാ, സൂത്താറ, പാതിരാ നമസ്‌കാരം.
ഏഴിന് ഉയര്‍പ്പ് ശുശ്രൂഷ, മൂന്നിന്മേല്‍ കുര്‍ബാന - കുര്യാക്കോസ് മോര്‍ ഈവാനിയോസ് മെത്രാപ്പോലീത്തായുടെ പ്രധാന കാര്‍മികത്വത്തില്‍. പ്രദക്ഷിണം. 31ന് രാവിലെ കരോട്ടെ പള്ളിയില്‍ രാവിലെ ആറിന് പ്രഭാത പ്രാര്‍ഥന, 6.15ന് കുര്‍ബാന.