ADVERTISEMENT

ADVERTISEMENT

വനിതാ ഫുട്ബോൾ: ഡൈനാമിക് എഫ്സി, ഡ്രീംസ് അക്കാദമി ജേതാക്കൾ

തൃക്കരിപ്പൂർ:തൃക്കരിപ്പൂർ ജിവിഎച്ച്എസ്എസ് മിനി സ്റ്റേഡിയത്തിൽ നടന്ന ഉത്തരകേരള വനിതാ ഫുട്ബോൾ ടൂർണമെന്‍റിൽ സീനിയർ വിഭാഗത്തിൽ കോഴിക്കോട് ഡൈനാമിക് എഫ്സി ജേതാക്കളായി. ഫൈനലിൽ ഏകപക്ഷീയമായ മൂന്നു ഗോളുകൾക്കാണ് അവർ മംഗളുരു യുണൈറ്റഡിനെ പരാജയപ്പെടുത്തിയത്.

അണ്ടർ-13 വിഭാഗത്തിൽ ഒന്നിനെതിരെ രണ്ടു ഗോളുകൾക്ക് കോഴിക്കോട് ഡൈനാമിക് എഫ്സിയെ തോൽപ്പിച്ച് ആതിഥേയരായ തൃക്കരിപ്പൂർ ഡ്രീംസ് ഗേൾസ് ഫുട്ബോൾ അക്കാദമി ചാമ്പ്യൻമാരായി.

സംസ്ഥാന സ്പോർട്സ് കൗൺസിൽ അംഗം ടി.വി. ബാലൻ സമ്മാനദാനം നിർവഹിച്ചു.ഡോ.വി.രാജീവൻ അധ്യക്ഷതവഹിച്ചു. വി.എം.മുകേഷ്, രാജേഷ് മാപ്പിടിച്ചേരി എന്നിവർ പ്രസംഗിച്ചു.

ADVERTISEMENT

ലൈംഗികാതിക്രമ കേസുകളില്‍ വിചാരണ നേരിടുന്ന അധ്യാപകന്‍റെ സസ്‌പെന്‍ഷന്‍ പിന്‍വലിച്ചു

കാസര്‍ഗോഡ്: രണ്ടു വ്യത്യസ്ത ലൈംഗികാതിക്രമ കേസുകളില്‍ വിചാരണ നേരിടുന്ന അസി.പ്രഫസര്‍ ഇഫ്തിക്കര്‍ അഹമ്മദിന്‍റെ സസ്പെന്‍ഷന്‍ കേരള കേന്ദ്രസര്‍വകലാശാല പിന്‍വലിച്ചു. സര്‍വകലാശാലയുടെ സസ്പെന്‍ഷന്‍ അവലോകന സമിതിയുടെ ശിപാര്‍ശകളുടെ അടിസ്ഥാനത്തില്‍ വൈസ് ചാന്‍സലര്‍ പ്രഫ. സിദ്ധു പി.അല്‍ഗൂര്‍ ആണ് തീരുമാനമെടുത്തത്. ഉത്തരവ് പ്രകാരം, അധ്യാപനം, ഗവേഷണം തുടങ്ങിയ അക്കാദമിക് ജോലികള്‍ പുനരാരംഭിക്കാന്‍ അഹമ്മദിനെ അനുവദിച്ചിട്ടുണ്ടെങ്കിലും വകുപ്പിലോ സര്‍വകലാശാലയിലോ ഉള്ള ഭരണപരവും അക്കാദമിക് ഉത്തരവാദിത്തങ്ങളും വഹിക്കുന്നതില്‍നിന്നോ തീരുമാനമെടുക്കുന്ന യോഗങ്ങളിൽ പങ്കെടുക്കുന്നതില്‍നിന്നോ വിലക്കിയിട്ടുണ്ട്. ഇംഗ്ലീഷ്, താരതമ്യ സാഹിത്യവകുപ്പിലെ അസി.പ്രഫസറായ ഇഫ്തിക്കര്‍ കവിത പഠിപ്പിക്കുന്നതിനിടെ പ്രഭാഷണങ്ങള്‍ക്കിടെ ലൈംഗികച്ചുവയുള്ള പരാമര്‍ശങ്ങള്‍ നടത്തിയെന്ന് ഒന്നാം വര്‍ഷ എംഎ വിദ്യാര്‍ഥിനികള്‍ ആരോപിച്ചതിനെത്തുടര്‍ന്ന് 2023 നവംബര്‍ 28ന് ആദ്യം സസ്പെന്‍ഡ് ചെയ്യപ്പെട്ടത്. നവംബര്‍ 13നു പരീക്ഷയ്ക്കിടെ ബോധരഹിതയായപ്പോള്‍ ഇയാള്‍ ലൈംഗികാതിക്രമം നടത്തിയെന്ന് അതേ ബാച്ചിലെ ഒരു വിദ്യാര്‍ഥിനി പിന്നീട് ആരോപിച്ചു. ബേക്കല്‍ പോലീസ് അവരുടെ മൊഴിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്തു. 2024 ഫെബ്രുവരി 23ന് ആ സസ്പെന്‍ഷന്‍ പിന്‍വലിച്ചു. ഇതു വിദ്യാര്‍ഥികളുടെ പ്രതിഷേധത്തിനിടയാക്കി. പിന്നീട് ഫെബ്രുവരി 29ന് അന്നത്തെ വൈസ് ചാന്‍സലര്‍ ഇന്‍ ചാര്‍ജ് പ്രഫ. കെ.സി. ബൈജു അദ്ദേഹത്തെ വീണ്ടും സസ്പെന്‍ഡ് ചെയ്തു. ഹൈക്കോടതി അദ്ദേഹത്തിന് മുന്‍കൂര്‍ ജാമ്യം അനുവദിച്ചെങ്കിലും രണ്ടു മാസത്തേക്ക് സര്‍വകലാശാലയുടെ ആഭ്യന്തര അന്വേഷണം പൂര്‍ത്തിയാകുന്നതുവരെയോ ഹൊസ്ദുര്‍ഗ് താലൂക്കില്‍ പ്രവേശിക്കുന്നതില്‍നിന്നു വിലക്കിയിരുന്നു. പിന്നീട് സസ്പെന്‍ഷനും റദ്ദാക്കി. ഇതിനിടെ 22കാരി നല്‍കിയ പുതിയ പരാതിയുടെ അടിസ്ഥാനത്തില്‍ തളിപ്പറമ്പ് പോലീസാണ് ഇഫ്ത്തിക്കറിനെ വീണ്ടും അറസ്റ്റ് ചെയ്തത്. കണ്ണൂര്‍ പറശിനിക്കടവിലെ ഒരു വാട്ടര്‍ തീം പാര്‍ക്കില്‍ വച്ച് തന്നെ ലൈംഗികമായി പീഡിപ്പിക്കാന്‍ ശ്രമിച്ചെന്നായിരുന്നു പരാതി.

ഡോ. ഹരിദാസ് വേർക്കോട്ടിന് നീലേശ്വരത്തിന്‍റെ യാത്രാമൊഴി

നീലേശ്വരം: പാലക്കാട്ടു നിന്നെത്തി കർമംകൊണ്ട് നീലേശ്വരത്തുകാരനായി മാറിയ ഡോ.ഹരിദാസ് വേർക്കോട്ടിന് പ്രിയനാടിന്‍റെ യാത്രാമൊഴി. തിങ്കളാഴ്ച കോഴിക്കോട്ടെ സ്വകാര്യ ആശുപത്രിയിൽ അന്തരിച്ച ഡോ.ഹരിദാസിന്‍റെ മൃതദേഹം അദ്ദേഹത്തിന്‍റെ ആഗ്രഹപ്രകാരം ഇന്നലെ രാവിലെ ഒൻപതുമണിയോടെയാണ് നീലേശ്വരം ചിറപ്പുറത്തെ വീട്ടിലെത്തിച്ചത്. പാമ്പുകടിയേറ്റ് ഗുരുതരാവസ്ഥയിലായി ഡോക്ടറുടെ ചികിത്സകൊണ്ട് ജീവിതത്തിലേക്ക് തിരിച്ചുകയറിയവരുൾപ്പെടെ നൂറുകണക്കിന് സാധാരണക്കാരാണ് ഡോക്ടർക്ക് അന്തിമോപചാരമർപ്പിക്കാൻ ചിറപ്പുറത്തെ വീട്ടിലെത്തിയത്. രാജ്മോഹൻ ഉണ്ണിത്താൻ എംപി, സിപിഎം ജില്ലാ സെക്രട്ടറി എം.രാജഗോപാലൻ എംഎൽഎ, ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ, നീലേശ്വരം നഗരസഭാധ്യക്ഷ ടി.വി.ശാന്ത, കാഞ്ഞങ്ങാട് നഗരസഭാധ്യക്ഷ കെ.വി.സുജാത, കിനാനൂർ-കരിന്തളം പഞ്ചായത്ത് പ്രസിഡന്‍റ് ടി.കെ.രവി, മടിക്കൈ പഞ്ചായത്ത് പ്രസിഡന്‍റ് എസ്.പ്രീത, പ്രഫ.കെ.പി.ജയരാജൻ തുടങ്ങിയവർ ആദരാഞ്ജലികളർപ്പിച്ചു. ഉച്ചയ്ക്ക് ഒരുമണിയോടെ ചിറപ്പുറത്തെ നഗരസഭാ വാതകശ്മശാനത്തിൽ മൃതദേഹം സംസ്കരിച്ചു. സമാന്തര സിനിമകളെ സ്നേഹിച്ച ഡോക്ടർ നീലേശ്വരം: ഹിപ്പിത്തലമുടിയും കൂളിംഗ് ഗ്ലാസുമൊക്കെയായി പഴയകാല സിനിമാ നായകരുടെ രൂപത്തിലാണ് ഡോ.ഹരിദാസ് വേർക്കോട്ടിനെ എന്നും എല്ലാവരും കണ്ടിട്ടുള്ളത്. പക്ഷേ നായകനാകാനല്ല, സംവിധായകനാകാൻ മോഹിച്ച ഒരു യൗവനകാലം അദ്ദേഹത്തിനുണ്ടായിരുന്നു. കച്ചവട സിനിമയേക്കാൾ സമാന്തര സിനിമകളായിരുന്നു അദ്ദേഹത്തിന് പ്രിയം. ആ ഇഷ്ടംകൊണ്ട് ജി.അരവിന്ദൻ മുതൽ ഋതുപർണ ഘോഷ് വരെയുള്ളവരുമായി ബന്ധം കാത്തുസൂക്ഷിച്ചിരുന്നു. ചെറുപ്പകാലത്ത് കഥകളെഴുതി പ്രമുഖ വാരികകളിൽ പ്രസിദ്ധീകരിച്ചിരുന്നു.

ഡോക്ടറും എഴുത്തുകാരനുമായിരുന്ന ഡോ.പുനത്തിൽ കുഞ്ഞബ്ദുള്ളയുമായി അടുപ്പമുണ്ടായത് ആ വഴിക്കാണ്. കോഴിക്കോട്ടുണ്ടായിരുന്നപ്പോൾ ഒരുതവണ വൈക്കം മുഹമ്മദ് ബഷീറിനെ നേരിട്ടു കാണാൻ പോയ കഥയും ഡോ.ഹരിദാസ് പലപ്പോഴും നീലേശ്വരത്തുകാരുമായി പങ്കുവച്ചിരുന്നു.

വിദ്യാർഥികളെ കാത്ത് ഉൾപ്രദേശങ്ങളിലെ പ്ലസ്ടു സ്കൂളുകൾ

കാഞ്ഞങ്ങാട്: നഗരമേഖലകളിലെ സ്കൂളുകളിൽ ചെന്ന് പഠിക്കാനുള്ള കുട്ടികളുടെ താൽപര്യം മൂലം ഉൾപ്രദേശങ്ങളിലെ പ്ലസ് വൺ ക്ലാസുകളിൽ സീറ്റുകൾ ഒഴിഞ്ഞുകിടക്കുന്ന പതിവിന് ഇത്തവണയും മാറ്റമുണ്ടാകാനിടയില്ലെന്ന് അധ്യാപകർ. മികച്ച കോഴ്സ് കോമ്പിനേഷനുകളും അടിസ്ഥാനസൗകര്യങ്ങളും ഉണ്ടായിട്ടും പഠിക്കാൻ കുട്ടികളെ കിട്ടാത്ത അവസ്ഥയായിരുന്നു മുൻവർഷങ്ങളിൽ ജില്ലയിലെ പല സ്കൂളുകളിലും. തുടർച്ചയായി മൂന്നു വർഷം ആവശ്യത്തിന് കുട്ടികളില്ലെങ്കിൽ ആ കോഴ്സ് നിർത്തലാക്കുകയാണ് പതിവ്. ഇങ്ങനെ കഴിഞ്ഞ മൂന്നുവർഷത്തിനിടെ ജില്ലയിൽ ഏഴു സ്കൂളുകൾക്ക് പ്ലസ് വൺ കോഴ്സുകൾ നഷ്ടമായിട്ടുണ്ട്. ഉപരിപഠന സൗകര്യവും കൂടുതൽ അവസരങ്ങളും മുൻനിർത്തി ജില്ലയിൽ നിന്നുള്ള നിരവധി കുട്ടികൾ പ്ലസ് വൺ പഠനത്തിനായി കോട്ടയം, എറണാകുളം, തൃശൂർ ജില്ലകളിലേക്ക് ചേക്കേറുന്നുണ്ട്. ഇതിനു പുറമേയാണ് ജില്ലയിലെതന്നെ മികച്ച സ്കൂളുകളും നഗരമേഖലകളും തേടിയുള്ള പരക്കംപാച്ചിൽ. നഗരമേഖലകളിൽ കൊമേഴ്സ്, ഹ്യുമാനിറ്റീസ് അടക്കമുള്ള എല്ലാ കോമ്പിനേഷനുകളും ആദ്യഘട്ടത്തിൽതന്നെ നിറയുമ്പോൾ ഉൾപ്രദേശങ്ങളിൽ സയൻസ് ബാച്ചുകൾ പോലും ഒഴിഞ്ഞുകിടക്കുന്നതാണ് ഇതിന്‍റെ ഫലം. നഗരമേഖലകളോടു ചേർന്ന വിഎച്ച്എസ്ഇ സ്കൂളുകളിലും മിക്കവാറും ആദ്യഘട്ടത്തിൽതന്നെ സീറ്റുകൾ നിറയുന്നുണ്ട്. അടിസ്ഥാന സൗകര്യങ്ങളുടെ കുറവും അധ്യാപകക്ഷാമവും മതിയായ യാത്രാസൗകര്യമില്ലാത്തതുമൊക്കെയാണ് ഉൾപ്രദേശങ്ങളിലെ സ്കൂളുകളുടെ കുറവായി കുട്ടികളും രക്ഷിതാക്കളും ചൂണ്ടിക്കാണിക്കുന്നത്. എന്നാൽ കെട്ടിടവും ലാബും അടക്കമുള്ള അടിസ്ഥാനസൗകര്യങ്ങൾ ഇപ്പോൾ മിക്കയിടങ്ങളിലും ലഭ്യമാണെന്ന് അധ്യാപകർ ചൂണ്ടിക്കാട്ടുന്നു. എസ്എസ്എൽസി പരീക്ഷയിൽ ഇത്തവണ ജില്ലയിൽ 20,311 പേരാണ് ഉപരിപഠനത്തിന് യോഗ്യത നേടിയത്. മുൻവർഷം പ്ലസ് വൺ പ്രവേശനം നേടിയ കുട്ടികളുടെ എണ്ണം 18419 ആയിരുന്നു. സർക്കാർ സ്കൂളുകളിൽ 30 ശതമാനവും എയ്ഡഡ് സ്കൂളുകളിൽ 20 ശതമാനവും അൺ എയ്ഡഡ് വിഭാഗത്തിൽ 10 ശതമാനവും സീറ്റുകൾ വർധിപ്പിക്കാൻ സർക്കാർ അനുമതിയായിട്ടുണ്ട്. ഇതിനു പുറമേ 1600 സീറ്റുകൾ വിഎച്ച്എസ്ഇ വിഭാഗത്തിലും അതിലേറെ സീറ്റുകൾ പോളിടെക്നിക്, ഐടിഐ മേഖലകളിലുമുണ്ട്. ജില്ലയുടെ വടക്കൻ മേഖലയിൽനിന്ന് ഒട്ടനവധി കുട്ടികൾ കർണാടകയിൽ ഉപരിപഠനസൗകര്യം കിട്ടുന്നതിനായി അവിടെതന്നെ പിയുസിക്ക് ചേരാറുണ്ട്. ഇതെല്ലാം കണക്കാക്കുമ്പോൾ ഇത്തവണ ജില്ലയിൽ പ്ലസ് വൺ സീറ്റുകൾക്ക് ക്ഷാമം അനുഭവപ്പെടാനിടയില്ലെന്നാണ് വിലയിരുത്തൽ. എന്നാൽ ഇഷ്ട്പെട്ട സ്കൂളുകളും കോഴ്സ് കോമ്പിനേഷനുകളും കിട്ടാനുള്ള മത്സരമാണ് നടക്കുന്നത്. അതിൽ എസ്എസ്എൽസി പരീക്ഷയിലെ ഗ്രേഡുകൾക്കൊപ്പം വിവിധ വെയിറ്റേജുകളും നിർണായകമാകും.

അന്താരാഷ്‌ട്ര നഴ്‌സസ് വരാഘോഷം സമാപിച്ചു

കാസര്‍ഗോഡ്: അന്താരാഷ്‌ട്ര നഴ്‌സസ് വാരാഘോഷത്തിന്‍റെ ജില്ലാതല സമാപനം കാസര്‍ഗോഡ് മുനിസിപ്പല്‍ ടൗണ്‍ ഹാളില്‍ എന്‍.എ.നെല്ലിക്കുന്ന് എംഎല്‍എ ഉദ്ഘാടനം ചെയ്തു. നഗരസഭ ചെയര്‍മാന്‍ അബ്ബാസ് ബീഗം അധ്യക്ഷതവഹിച്ചു. ജില്ലാ കളക്ടര്‍ കെ.ഇമ്പശേഖര്‍ മുഖ്യാതിഥിയായി. ഡെപ്യൂട്ടി ഡിഎംഒ ഡോ. ബി.സന്തോഷ്, ആരോഗ്യ സ്ഥിരംസസമിതി അധ്യക്ഷന്‍ ഖാലിദ് പച്ചക്കാട്, ജില്ലാ ആശുപത്രി സൂപ്രണ്ട് ഡോ. എം.പി.ജീജ, ജനറല്‍ ആശുപത്രി സൂപ്രണ്ട് ഇന്‍ ചാര്‍ജ് ഡോ. ജനാദ്ദന നായ്ക്ക്, കാഞ്ഞങ്ങാട് ഗവ.നഴ്‌സിംഗ് സ്‌കൂള്‍ പ്രിന്‍സിപ്പല്‍ സി.പി.കെ.ജയപ്രകാശ്, കാസര്‍ഗോഡ് ഗവ.ജെപിഎച്ച്എന്‍ ട്രെയിനിംഗ് സ്‌കൂള്‍ പ്രിന്‍സിപ്പല്‍ ടിജിമോള്‍ എന്‍.തോമസ്, അലക്‌സ് കെ.ജോര്‍ജ്, എ.ലത, ടി.വി. സ്‌നേഹലത, ഒ.ടി.സല്‍മത്ത്, പി.വി. പവിത്രന്‍, ജോബി ജോര്‍ജ്, എന്‍.നന്ദന എന്നിവര്‍ സംസാരിച്ചു. മിനി ജോസഫ് സ്വാഗതവും എം.ശോഭന നന്ദിയും പറഞ്ഞു.

എളേരി ബ്ലോക്ക് കോൺഗ്രസ് കമ്മിറ്റി ഓഫീസ് ഉദ്ഘാടനം 21ന്

ചിറ്റാരിക്കാൽ: കോൺഗ്രസ് എളേരി ബ്ലോക്ക് കമ്മിറ്റിക്കു വേണ്ടി നവീകരിച്ച ഈസ്റ്റ് എളേരി മഹാത്മാഗാന്ധി മന്ദിരത്തിൽ ആരംഭിക്കുന്ന ഓഫീസിന്‍റെ ഉദ്ഘാടനം 21ന് ഉച്ചകഴിഞ്ഞ് മൂന്നിന് ചിറ്റാരിക്കാലിൽ രാജ്മോഹൻ ഉണ്ണിത്താൻ എംപി നിർവഹിക്കും. അതോടൊപ്പം വർധിച്ചു വരുന്ന ലഹരി ഉപയോഗത്തിനും ലഹരി മാഫിയക്കെതിരെയുള്ള ലഹരിവിരുദ്ധ റാലിയും സംലടിപ്പിക്കും. മഹാത്മാഗാന്ധി ശ്രീനാരായണ ഗുരുസംഗമത്തിന്‍റെ ശതാബ്ദി വാർഷിക പൊതുസമ്മേളനം ചിറ്റാരിക്കാൽ വെള്ളിയേപ്പള്ളിൽ ഓഡിറോറിയത്തിലും നടക്കും. ഉദ്ഘാടനത്തിന്‍റെയും അനുബന്ധ പരിപാടികളുടെയും വിജയകരമായ നടത്തിപ്പിന് സംഘാടക സമിതി രൂപീകരിച്ചു.ഡിസിസി പ്രസിഡന്‍റ് പി.കെ. ഫൈസൽ ഉദ്ഘാടനം ചെയ്തു. ജോയി ജോസഫ് അധ്യക്ഷതവഹിച്ചു. കരിമ്പിൽ കൃഷ്ണൻ, ശാന്തമ്മ ഫിലിപ്പ്, ടോമി പ്ലാച്ചേരി, ജോർജുകുട്ടി കരിമഠം, കെ.വി.ഭാസ്കരൻ, എ.പി.സുരേന്ദ്രൻ, തോമസ് മാത്യു, സെബാസ്റ്റ്യൻ പൂവത്താനി, സോണി പൊടിമറ്റം, മാത്യു സെബാസ്റ്റ്യൻ ജോയി മാരൂർ, കെ.വി.നാരായണൻ, ജോണി പള്ളത്തുകുഴി, സന്തോഷ് ചൈതന്യ, ജോസ് കുത്തിയതോട്ടിൽ, അന്നമ്മ മാത്യു എന്നിവർ പ്രസംഗിച്ചു.

നൂറുമേനി നേട്ടവുമായി സെന്‍റ് എലിസബത്ത്

വെള്ളരിക്കുണ്ട്: സിബിഎസ്ഇ പത്ത്, പന്ത്രണ്ട് ക്ലാസ് പരീക്ഷയിൽ നൂറുമേനി വിജയം ആവർത്തിച്ച് വെള്ളരിക്കുണ്ട് സെന്‍റ് എലിസബത്ത് കോൺവെന്‍റ് സ്കൂൾ. പന്ത്രണ്ടാം ക്ലാസിലെ ആൻ ജോസഫ് മണിക്കുട്ടി, ജോസ്നമോൾ ജോൺസൺ, റോസ്മോൾ ബിനോയ് എന്നിവർ സ്കൂൾ ടോപ്പർ ആയി. പത്താം ക്ലാസിൽ ജെ.എസ്.ഡോണ, ഗ്രേസ് തെരേസ ബിജു, ആൻ ഗ്രേസ് വിനോദ് എന്നിവർ ഉന്നതശതമാനം നേടി സ്കൂൾ ടോപ് ആയി. വിജയികളെ പ്രിൻസിപ്പൽ സിസ്റ്റർ ജ്യോതി മലേപറമ്പിൽ, മാനേജ്മെന്‍റ്, സ്റ്റാഫ് അനുമോദിച്ചു. സെന്‍റ് മേരീസിന് മധുരപത്തൊമ്പത് പനത്തടി: തുടര്‍ച്ചയായി പത്തൊമ്പതാം വര്‍ഷവും സിബിഎസ്ഇ പത്താംക്ലാസ് പരീക്ഷയില്‍ നൂറുശതമാനം വിജയവുമായി ചെറുപനത്തടി സെന്‍റ് മേരീസ് ഇംഗ്ലീഷ് മീഡിയം സ്‌കൂള്‍. 42 കുട്ടികള്‍ പരീക്ഷ എഴുതിയതില്‍ 14 കുട്ടികള്‍ 90 ശതമാനത്തിന് മുകളില്‍ മാര്‍ക്കും 21 കുട്ടികള്‍ 75 ശതമാനത്തിനു മുകളില്‍ മാര്‍ക്കും ഏഴു കുട്ടികള്‍ ഫസ്റ്റ് ക്ലാസും നേടിയാണ് തിളക്കമാര്‍ന്ന ഈ വിജയം കരസ്ഥമാക്കിയത്. 96.4 ശതമാനം മാര്‍ക്കും ഫുള്‍ എവണ്‍ നേടി നീലാഞ്ജന നികുഞ്ചം ഒന്നാം സ്ഥാനം നേടി. വിജയികളെ സ്‌കൂള്‍ മാനേജ്‌മെന്‍റും പ്രിന്‍സിപ്പലും അനുമോദിച്ചു. ഉജ്വലവിജയവുമായി ഉര്‍സുലൈന്‍ സ്‌കൂള്‍ കാഞ്ഞിരടുക്കം: സിബിഎസ്ഇ പത്താംക്ലാസ് പരീക്ഷയില്‍ കാഞ്ഞിരടുക്കം ഉര്‍സുലൈന്‍ പബ്ലിക് സ്‌കൂളിന് തുടർച്ചയായി 13-ാം വര്‍ഷവും നൂറുമേനിതിളക്കം. ആകെ പരീക്ഷയെഴുതിയ 19 കുട്ടികളില്‍ മൂന്നു പേര്‍ ഫുള്‍ എ വണ്‍ ഗ്രേഡ് കരസ്ഥമാക്കി.

വി.ജി.ആന്‍മരിയ (96.6%), മരീന സിജു പോള്‍ (96%), ബി.ടി.അഥീന (94.8%) എന്നിവരാണ് ഫുള്‍ എ വണ്‍ കരസ്ഥമാക്കിയത്. അന്ന ഷോബി ജോസഫ് (94.4), എല്‍വിന്‍ ബിനോയ് (92.4) അല്‍ഫോന്‍സ ജോബി (91.2) എന്നിവരും മികച്ച വിജയം കരസ്ഥമാക്കി. വിജയികളെ പ്രിന്‍സിപ്പല്‍ സിസ്റ്റര്‍ ബിജി മാത്യു അഭിനന്ദിച്ചു.

കുടുംബസഹായനിധി വിതരണം ചെയ്തു

കാസര്‍ഗോഡ്: കേരള ഹോട്ടല്‍ ആന്‍ഡ് റസ്റ്റോറന്‍റ് അസോസിയേഷന്‍ കുടുംബ സുരക്ഷാപദ്ധതിയില്‍ ജില്ലയില്‍ മരണമടഞ്ഞ മൂന്നു കുടുംബങ്ങള്‍ക്ക് 10 ലക്ഷം രൂപ വീതം ധനസഹായം നല്‍കി. രാജ്‌മോഹന്‍ ഉണ്ണിത്താന്‍ എംപി പദ്ധതി ഉദ്ഘാടനം ചെയ്തു. ജില്ലാ പ്രസിഡന്‍റ് നാരായണ പൂജാരി അധ്യക്ഷതവഹിച്ചു. സംസ്ഥാന പ്രസിഡന്‍റ് ജി.ജയപാല്‍ മുഖ്യാതിഥി ആയിരുന്നു. ജനറല്‍ സെക്രട്ടി ബാലകൃഷ്ണ പൊതുവാള്‍, ട്രഷറര്‍ ഷെരീഫ്, വര്‍ക്കിംഗ് പ്രസിഡന്‍റ് ബിജുലാല്‍, ജി.സുഗുണന്‍, റോയി മഡോണ, ഷിനോജ് റഹ്‌മാന്‍, നാസര്‍ താജ്, സമദ് മലപ്പുറം, രഘുവീര്‍ പൈ എന്നിവര്‍ സംസാരിച്ചു. ജില്ലാ സെക്രട്ടറി ബിജു ചുള്ളിക്കര സ്വാഗതവും രാജന്‍ കളക്കര നന്ദിയും പറഞ്ഞു.

യുവതിയുടെയും ഗര്‍ഭസ്ഥശിശുവിന്‍റെയും മരണം: പ്രതിഷേധം കടുപ്പിക്കാന്‍ കര്‍മസമിതി

കാഞ്ഞങ്ങാട്: പ്രസവചികിത്സക്കിടെ പള്ളിക്കര ചേറ്റുകുണ്ടിലെ പ്രവാസി സാഗറിന്‍റെ ഭാര്യ ദീപയും ഗര്‍ഭസ്ഥശിശുവും മരണപ്പെട്ട സംഭവത്തില്‍ ശക്തമായ പ്രക്ഷോഭത്തിനൊരുങ്ങി കര്‍മസമിതി. ഇതിന്‍റെ ഭാഗമായി നാളെ രാവിലെ എട്ടു മുതല്‍ രാത്രി എട്ടുവരെ കര്‍മസമിതി ഭാരവാഹികള്‍ കാഞ്ഞങ്ങാട് പത്മ പോളിക്ലിനിക്കിനു മുന്നില്‍ നിരാഹാരസമരം നടത്തും. ഇവിടുത്തെ ഗൈനക്കോളജിസ്റ്റ് ഡോ.രേഷ്മ സുവര്‍ണയുടെ ചികിത്സയിലായിരുന്നു ദീപ. ഈ വര്‍ഷം ഫെബ്രുവരി മൂന്നിന് ആശുപത്രിയില്‍ പരിശോധനയ്‌ക്കെത്തിയ ദീപയെ ഗര്‍ഭപാത്രം തുറന്നിരിക്കുകയാണെന്ന് പറഞ്ഞ് ഡോ.രേഷ്മയും ഭര്‍ത്താവായ അനസ്‌തേഷ്യസ്റ്റ് ഡോ.താരാനാഥും അഡ്മിറ്റ് ചെയ്തു. വൈകുന്നേരം ഏഴിനാണ് ദീപയ്ക്ക് പ്രസവവേദനയുണ്ടാകുന്നത്. കൂടാതെ രക്തസമ്മര്‍ദ്ദവും ഓക്‌സിജന്‍ അളവും കുറയുകയും ചെയ്തു. രാത്രി 8.04ന് സാധാരണ നിലയില്‍ പെണ്‍കുഞ്ഞിന് ജന്മം നല്‍കിയിരുന്നത്. എന്നാല്‍ ശ്വാസമെടുക്കുകയോ കരയുകയോ ചെയ്തില്ല. രാത്രി 10.10നാണ് കുഞ്ഞ് മരണപ്പെട്ട വിവരമറിയുന്നത്. പ്രസവാനന്തരം ദീപയ്ക്ക് അനിയന്ത്രിതമായി രക്തസ്രാവമുണ്ടാവുകയും സ്ഥിതി വഷളാവുകയും ചെയ്തു. തുടര്‍ന്ന് കണ്ണൂര്‍ ഗവ.മെഡിക്കല്‍ കോളജിലേക്ക് കൊണ്ടുപോകാന്‍ ഡോക്ടര്‍മാര്‍ നിര്‍ദേശം നല്‍കി. ഇവിടെയെത്തിച്ച് ശസ്ത്രക്രിയയ്ക്കു വിധേയമാക്കിയെങ്കിലും ഫെബ്രുവരി നാലിന് പുലര്‍ച്ചെ 3.17ന് ദീപ മരണപ്പെടുകയായിരുന്നു. 38കാരിയായ ദീപയുടെ രണ്ടാമത്തെ പ്രസവമായിരുന്നു. ആദ്യ പ്രസവം 12 വര്‍ഷം മുമ്പായിരുന്നു. ആദ്യ പ്രസവം കഴിഞ്ഞ് വര്‍ഷങ്ങള്‍ക്കുശേഷം നടക്കുന്ന പ്രസവം എന്ന നിലയ്ക്ക് സങ്കീര്‍ണതയുണ്ടാവുമെന്ന കാര്യത്തെക്കുറിച്ച് ഗൈനക്കോളജിസ്റ്റ് ജാഗ്രത കാട്ടണമായിരുന്നെന്ന് ദീപയുടെ ഭര്‍തൃസഹോദരന്‍ കെ.സോഹന്‍ പറഞ്ഞു. ‘പ്രസവത്തിനു മുന്നോടിയായി ദീപയുടെ ഒ നെഗറ്റീവ് ബ്ലഡ് ഗ്രൂപ്പ് കരുതിവയ്ക്കാനും ഡോക്ടര്‍മാര്‍ പറഞ്ഞില്ല. രക്തം വാര്‍ന്ന് അവശയായ ദീപയെ ഓക്‌സിജന്‍റെ സഹായത്തോടെയാണ് പരിയാരത്തേയ്ക്ക് കൊണ്ടുപോയത്. പ്രസ്തുത ഡോക്ടറെക്കുറിച്ച് ചികിത്സപിഴവുമായി ബന്ധപ്പെട്ട് നിരവധി പരാതികള്‍ ഉയര്‍ന്നുവന്നിട്ടുണ്ട്.'-സോഹന്‍ പറഞ്ഞു. പത്രസമ്മേളനത്തില്‍ പള്ളിക്കര പഞ്ചായത്ത് പ്രസിഡന്‍റും കര്‍മസമിതി ചെയര്‍മാനുമായ എം.കുമാരന്‍, വൈസ്പ്രസിഡന്‍റും വര്‍ക്കിംഗ് ചെയര്‍പേഴ്‌സണുമായ നസ്‌നിം വഹാബ്, ട്രഷറര്‍ സുകുമാരന്‍ പൂച്ചക്കാട്, പി.കെ.അബ്ദുള്ള, ഗോപാലകൃഷ്ണന്‍ തച്ചങ്ങാട് എന്നിവരും സംബന്ധിച്ചു.

നഴ്സസ് ദിനാഘോഷം നടത്തി

വെള്ളരിക്കുണ്ട്: കെ.ജെ.തോമസ് മെമ്മോറിയൽ സഹകരണ ആശുപത്രിയിൽ അന്താരാഷ്ട നഴ്സസ് ദിനാഘോഷം സംഘടിപ്പിച്ചു. ഭരണസമിതി പ്രസിഡന്‍റ് പി.ജി. ദേവ് കേക്ക് മുറിച്ച് നഴ്‌സുമാർക്ക് നല്കി പരിപാടി ഉദ്ഘാടനം ചെയ്തു. ഭരണസമിതി അംഗം ഷോബി ജോസഫ് അധ്യക്ഷത വഹിച്ചു. ഡോ. അൽസാഗർ, സി.കെ.ബാലകൃഷ്ണൻ നായർ, ടെസി ജോൺസൺ എന്നിവർ പ്രസംഗിച്ചു.

വോളിബോള്‍ ടൂര്‍ണമെന്‍റ് മാറ്റിവച്ചു

കാസര്‍ഗോഡ്: ഫ്രണ്ട്‌സ് പൊവ്വലിന്‍റെ ആഭിമുഖ്യത്തില്‍ 18 മുതല്‍ 22 വരെ പൊവ്വലില്‍ നടത്താനിരുന്ന കെ.എന്‍.ഹനീഫ് മെമ്മോറിയല്‍ അഖിലേന്ത്യ വോളിബോള്‍ ടൂര്‍ണമെന്‍റ് മാറ്റിവെച്ചു. ഇന്ത്യന്‍ വോളി ബോള്‍ ടീമിലേയ്ക്കുള്ള ഓപ്പണ്‍ സെലക്ഷന്‍ നടന്നതിനാല്‍ കളിക്കാര്‍ യഥാസമയം കളിയില്‍ പങ്കെടുക്കുന്നതില്‍ ബുദ്ധിമുട്ട് ഉള്ളതിനാലാണ് കളി മാറ്റിവെക്കേണ്ടി വന്നത്. ടൂര്‍ണമെന്‍റ് ഡിസംബറില്‍ സംഘടിപ്പിക്കും. ഇതിന്‍റെ മുന്നോടിയായുള്ള കൂടിയാലോചനായോഗം നാളെ വൈകുന്നേരം നാലിനു പൊവ്വല്‍ ബെഞ്ച് കോടതിയിലെ കാറഡുക്ക പഞ്ചായത്ത് കോണ്‍ഫറന്‍സ് ഹാളില്‍ നടത്തും. പത്രസമ്മേളനത്തില്‍ പി.എ.മജീദ്, ബി.എച്ച്.മുനീര്‍, പി.സി.ജമാല്‍, എം.പി.നാസര്‍, ജയന്‍ വെള്ളിക്കോത്ത് എന്നിവര്‍ സംബന്ധിച്ചു.

ദേശീയപാതയോരത്തെ മാവുകൾക്ക് കരുവാച്ചേരി തോട്ടത്തിൽ പുനർജന്മം

നീലേശ്വരം: കാർഷിക സർവകലാശാലയ്ക്കു കീഴിൽ നീലേശ്വരം കരുവാച്ചേരിയിലുള്ള തോട്ടത്തിന്‍റെ ഒരുഭാഗം ദേശീയപാത വികസനത്തിനായി വിട്ടുകൊടുക്കേണ്ടിവന്നപ്പോൾ മുറിച്ചുമാറ്റേണ്ടിവന്നത് നാടനും അപൂർവ ഇനങ്ങളുമടക്കമുള്ള മാവുകളാണ്. പക്ഷേ ആ നഷ്ടത്തെ ഇപ്പോൾ കാർഷിക സാങ്കേതികവിദ്യയിലൂടെ നികത്താനൊരുങ്ങുകയാണ് ഉത്തരമേഖലാ കാർഷിക ഗവേഷണകേന്ദ്രം. മുറിച്ചുമാറ്റേണ്ടിവന്ന എല്ലാ മാവുകളുടെയും ഗ്രാഫ്റ്റ് ചെയ്തെടുത്ത തൈകളാണ് തോട്ടത്തിൽ വീണ്ടും വളർത്തിയെടുക്കുന്നത്. തനത് ഇനങ്ങളായി ഇവിടെ സംരക്ഷിക്കുന്നതിനൊപ്പം കർഷകർക്ക് വില്പന നടത്താനായും തൈകൾ ഒരുക്കിയിട്ടുണ്ട്. വിവിധ ഇനങ്ങളിൽ പെട്ട മുപ്പതിലധികം പുതിയ മാവുകളാണ് തോട്ടത്തിൽ വളർന്നുവരുന്നത്. കേസരി, വെള്ളരി കുളുമ്പൻ, ചന്ദ്രക്കാരൻ, മൽഗോവ, മെർക്കുറി, സുവർണരേഖ, കാലാപാടി, ഫിറങ്കിലഡുവ, പനക്കാൽ, കർപ്പൂരം, നീലം, ബംഗളൂരു, കുറ്റ്യാട്ടൂർ എന്നിവയെല്ലാം ഇക്കൂട്ടത്തിലുണ്ട്. ഞെട്ടിനടുത്ത് അല്പം കുഴിഞ്ഞ് കാണപ്പെടുന്ന വലിപ്പമേറിയ നാട്ടുമാങ്ങ, നീലം, അൽഫോൻസ, ബംഗനപ്പള്ളി തുടങ്ങിയ ജനപ്രിയ ഇനങ്ങൾ വളർച്ചയും പ്രതിരോധശേഷിയും കൂടിയ നാടൻ ഇനങ്ങളിൽ ഗ്രാഫ്റ്റ് ചെയ്ത് വളർത്തിയെടുക്കുന്ന മാവുകൾ തുടങ്ങിയവ ശ്രദ്ധേയമാണ്. ഇതോടൊപ്പം അന്യംനിന്നുപോകുന്ന പരമ്പരാഗത നാട്ടുമാവിനങ്ങൾക്കും ഇടമൊരുക്കിയിട്ടുണ്ട്.

എസ്എസ്എല്‍സി വിജയശതമാനം 99.57

കാസര്‍ഗോഡ്: എസ്എസ്എല്‍സി പരീക്ഷയില്‍ കാസര്‍ഗോഡ് ജില്ലയ്ക്ക് 99.57 ശതമാനം വിജയം. സംസ്ഥാനതലത്തില്‍ ആറാംസ്ഥാനത്താണ് കാസര്‍ഗോഡ്. കഴിഞ്ഞവര്‍ഷം 99.64 ആയിരുന്നു വിജയശതമാനം. ഇത്തവണ ആകെ പരീക്ഷയെഴുതിയ 20,436 വിദ്യാര്‍ഥികളില്‍ 20,348 പേര്‍ ഉപരിപഠനത്തിന് യോഗ്യത നേടി. ഇതില്‍ 10,742 പേര്‍ ആണ്‍കുട്ടികളും 9,606 പേര്‍ പെണ്‍കുട്ടികളുമാണ്. കാഞ്ഞങ്ങാട് വിദ്യാഭ്യാസജില്ലയില്‍ 99.94ഉം കാസര്‍ഗോഡ് വിദ്യാഭ്യാസജില്ലയില്‍ 99.27മാണ് വിജയശതമാനം. 2,422 കുട്ടികള്‍ മുഴുവന്‍ വിഷയങ്ങള്‍ക്കും എപ്ലസ് കരസ്ഥമാക്കി. ഇതില്‍ 1552 പേര്‍ പെണ്‍കുട്ടികളും 870 പേര്‍ ആണ്‍കുട്ടികളുമാണ്. കഴിഞ്ഞവര്‍ഷം 2,910 കുട്ടികള്‍ ഫുള്‍ എപ്ലസ് നേടിയിരുന്നു. 133 സ്‌കൂളുകളാണ് ഇത്തവണ നൂറുശതമാനം വിജയം കരസ്ഥമാക്കിയത്. ഇതില്‍ 80 ഗവ.സ്‌കൂളുകളും 29 അണ്‍ എയ്ഡഡ് സ്‌കൂളുകളും 24 എയ്ഡഡ് സ്‌കൂളുകളും ഉള്‍പ്പെടും. കഴിഞ്ഞവര്‍ഷം 134 സ്‌കൂളുകളാണ് നൂറുശതമാനം വിജയം നേടിയത്. ചട്ടഞ്ചാല്‍ സിഎച്ച്എസ്എസ് ആണ് ഏറ്റവുമധികം കുട്ടികളെ പരീക്ഷയ്ക്കിരുത്തി നൂറുശതമാനം വിജയം കരസ്ഥമാക്കിയത്. 617 കുട്ടികളാണ് ഇവിടെ പരീക്ഷയെഴുതിയത്. ഇവിടെ നിന്നും 125 വിദ്യാര്‍ഥികള്‍ ഫുള്‍ എപ്ലസ് നേടി. എരുതുംകടവ് എന്‍എ ഗേള്‍സ് എച്ച്എസ്എസിലാണ് ഏറ്റവും കുറവ് കുട്ടികള്‍ പരീക്ഷയെഴുതിയത്. എട്ടുപേര്‍ മാത്രമാണ് ഇവിടെ പരീക്ഷയെഴുതിയത്. നൂറുശതമാനം വിജയം നേടിയ സ്‌കൂളുകള്‍ സര്‍ക്കാര്‍ സ്‌കൂളുകള്‍ (പരീക്ഷയെഴുതിയ കുട്ടികളുടെ എണ്ണം ബ്രായ്ക്കറ്റില്‍) കാസര്‍ഗോഡ് ജിവിഎച്ച്എസ്എസ് ഫോര്‍ ഗേള്‍സ് (92), കുഞ്ചത്തൂര്‍ ജിവിഎച്ച്എസ്എസ് (94), ഷിറിയ ജിഎച്ച്എസ്എസ് (49), ബങ്കരമഞ്ചേശ്വരം ജിഎച്ച്എസ്എസ് (55), പൈവളിഗെനഗര്‍ ജിഎച്ച്എസ്എസ് (182,ആലംപാടി ജിഎച്ച്എസ്എസ് (76), ഇരിയണ്ണി ജിവിഎച്ച്എസ്എസ് (168), ബന്തടുക്ക ജിഎച്ച്എസ് (134), മൊഗ്രാല്‍ ജിവിഎച്ച്എസ്എസ് (253), അഡൂര്‍ ജിഎച്ച്എസ്എസ് (173), പാണ്ടി ജിഎച്ച്എസ്എസ് (42), ദേലംപാടി ജിവിഎച്ച്എസ്എസ് (61), പദ്രെ ജിഎച്ച്എസ്എസ് (27), ആദൂര്‍ ജിഎച്ച്എസ്എസ് (67), മുള്ളേരിയ ജിവിഎച്ച്എസ്എസ് (164), കാറഡുക്ക ജിവിഎച്ച്എസ്എസ് (140), ബെള്ളൂര്‍ ജിഎച്ച്എസ്എസ് (69), ചെമ്മനാട് ജിഎച്ച്എസ്എസ് (183), പട്‌ള ജിഎച്ച്എസ്എസ് (149), കുണ്ടംകുഴി ജിഎച്ച്എസ്എസ് (240), ബേത്തൂര്‍പാറ ജിഎച്ച്എസ്എസ് (75), കാസര്‍ഗോഡ് ജിഎംആര്‍എച്ച്എസ് ഫോര്‍ ഗേള്‍സ് (35), കടമ്പാര്‍ ജിഎച്ച്എസ് (69), മൂഡംബയല്‍ ജിഎച്ച്എസ് (12), ഉദ്യാവര്‍ ജിഎച്ച്എസ് (44), കൊളത്തൂര്‍ ജിഎച്ച്എസ് (52), മുന്നാട് ജിഎച്ച്എസ് (52), സൂരംബയല്‍ ജിഎച്ച്എസ് (65), കുറ്റിക്കോല്‍ ജിഎച്ച്എസ് (78), രാംനഗര്‍ എസ്ആര്‍എംജിഎച്ച്ഡബ്ല്യുഎച്ച്എസ് (83), ബല്ല ഈസ്റ്റ് ജിഎച്ച്എസ്എസ് (119), ഹൊസ്ദുര്‍ഗ് ജിഎച്ച്എസ്എസ് (146), കാഞ്ഞങ്ങാട് ജിവിഎച്ച്എസ്എസ് (195), ബേക്കല്‍ ജിഎഫ്എച്ച്എസ്എസ് (71), പള്ളിക്കര ജിഎച്ച്എസ്എസ് (243), പെരിയ ജിഎച്ച്എസ്എസ് (192), പാക്കം ജിഎച്ച്എസ്എസ് (101), കല്യോട്ട് ജഎചച്എസ്എസ് (25), ഉദുമ ജിഎച്ച്എസ്എസ് (258), കുണിയ ജിവിഎച്ച്എസ്എസ് (99), മടിക്കൈ ജിഎച്ച്എസ്എസ് (51), വെള്ളിക്കോത്ത് എംപിഎസ് ജിവിഎച്ച്എസ്എസ് (183), രാവണീശ്വരം ജിഎച്ച്എസ്എസ് (109), ബളാന്തോട് ജിഎച്ച്എസ്എസ് (189), കക്കാട്ട് ജിഎച്ച്എസ്എസ് (188), ഉപ്പിലിക്കൈ ജിഎച്ച്എസ് (40), മടിക്കൈ സെക്കന്‍ഡ് ജിഎച്ച്എസ് (116), കുട്ടമത്ത് ജിഎച്ച്എസ്എസ് (253), പിലിക്കോട് ജിഎച്ച്എസ്എസ് (168), തൃക്കരിപ്പൂര്‍ വിപിപിഎംകെപിഎസ് ജിഎച്ച്എസ്എസ് (146), ഇളമ്പച്ചി ജിസിഎസ് ജിഎച്ച്എസ്എസ് (106), കോട്ടപ്പുറം ജിവിഎച്ച്എസ്എസ് (28), ചെറുവത്തൂര്‍ ജിഎഫ്‌വിഎച്ച്എസ്എസ് (156), പടന്നകടപ്പുറം ജിഎഫ്‌വിഎച്ച്എസ്എസ് (111), കാലിച്ചാനടുക്കം ജിഎച്ച്എസ് (89), കയ്യൂര്‍ ജിവിഎച്ച്എസ്എസ് (70), ചായ്യോത്ത് ജിഎച്ച്എസ്എസ് (327), തായന്നൂര്‍ ജിഎച്ച്എസ്എസ് (29), പരപ്പ ജിഎച്ച്എസ്എസ് (156), ബളാല്‍ ജിഎച്ച്എസ് (35), മാലോത്ത്കസബ ജിഎച്ച്എസ്എസ് (124), കമ്പല്ലൂര്‍ ജിഎച്ച്എസ്എസ് (65), ചീമേനി ജിഎച്ച്എസ്എസ് (143), അമ്പലത്തറ ജിവിഎച്ച്എസ്എസ് (125), അട്ടേങ്ങാനം ജിഎച്ച്എസ് (53), കോടോത്ത് ഡോ.അംബേദ്കര്‍ ജിഎച്ച്എസ്എസ് (117), ഉദിനൂര്‍ ജിഎച്ച്എസ്എസ് (292), തച്ചങ്ങാട് ജിഎച്ചഎസ്(279), കാഞ്ഞങ്ങാട് ജിആര്‍എഫ് ടിഎച്ച്എസ് ഫോര്‍ ഗേള്‍സ് (28), നടക്കാവ് ജിഎംആര്‍എസ് ഫോര്‍ ബോയ്‌സ് (33), പെരുമ്പട്ട സി.എച്ച്.മുഹമ്മദ്‌കോയ സ്മാരക ജിഎച്ച്എസ്എസ് (14), പാണത്തൂര്‍ ജിഡബ്ല്യുഎച്ച്എസ് (57), തയ്യേനി ജിഎച്ച്എസ് (23), മരക്കാപ്പ് കടപ്പുറം ജിഎഫ്എച്ച്എസ് (98), ബാര ജിഎച്ച്എസ് (148), ചാമുണ്ഡിക്കുന്ന് ജിഎച്ച്എസ് (43), കാഞ്ഞിരപ്പൊയില്‍ ജിഎച്ച്എസ് (38), പുല്ലൂര്‍ ഇരിയ ജിഎച്ച്എസ് (45), കൂളിയാട് ജിഎച്ച്എസ് (55), ബാനം ജിഎച്ച്എസ് (23). എയ്ഡഡ് സ്‌കൂളുകള്‍ അഗല്‍പാടി എസ്എപി എച്ച്എസ് (95), കാസര്‍ഗോഡ് ബിഇഎംഎച്ച്എസ് (237), മിയാപദവ് എസ്‌വിവി എച്ച്എസ് (148), കുരുഡപദവ് കെവിഎസ്എംഎച്ച്എസ് (37), ബോവിക്കാനം ബിഎആര്‍എച്ച്എസ് (189), കാട്ടുകുക്കെ എസ്എസ് എച്ച്എസ്എസ് (63), ഷേണി എസ്എസ്എച്ച്എസ് (238), പെര്‍ഡാല എന്‍എച്ച്എസ് (455), എടനീര്‍ സ്വാമിജീസ് എച്ച്എസ്എസ് (27), ചെമ്മനാട് സിജെഎച്ച്എസ്എസ് (359), കുഡ്‌ലു എസ്ജികെഎച്ച്എസ് (89), ചട്ടഞ്ചാല്‍ സിഎച്ച്എസ്എസ് (617), കാഞ്ഞങ്ങാട് ദുര്‍ഗ എച്ച്എസ്എസ് (522), പുല്ലൂര്‍ ഉദയനഗര്‍ എച്ച്എസ്എസ് (55), രാജപുരം ഹോളിഫാമിലി എച്ച്എസ്എസ് (199), കുമ്പളപ്പള്ളി കരിമ്പില്‍ എച്ച്എസ്എ് (5), വരക്കാട് വികെഎന്‍എസ് എച്ച്എസ്എസ് (112), കുട്ടമത്ത് എംകെഎസ് എച്ച്എസ് (51), കൊടക്കാട് കെഎംവിഎച്ച്എസ്എസ് (97), പടന്ന എംആര്‍വിഎച്ച്എസ്എസ് (202), തോമാപുരം സെന്‍റ് തോമസ് എച്ച്എസ്എസ് (156), കടുമേനി സെന്‍റ് മേരീസ് എച്ച്എസ് (61), വെള്ളരിക്കുണ്ട് സെന്‍റ് ജൂഡ്‌സ് എച്ച്എസ്എസ് (198), ഉദുമ പടിഞ്ഞാര്‍ ജമാഅത്ത് ഇഎംഎച്ച്എസ് (26). അണ്‍ എയ്ഡഡ് സ്‌കൂളുകള്‍ ഉദയനഗര്‍ ഉദയ ഇഎം എച്ച്എസ്എസ് (64), എരുതുംകടവ് എന്‍എ ഗേള്‍സ് എച്ച്എസ്എസ് (8), നായന്മാര്‍മൂല എന്‍എ മോഡല്‍ എച്ച്എസ്എസ് (15), മഞ്ചേശ്വരം സിറാജുല്‍ ഹുദ ഇഎംഎച്ച്എസ്എസ് (94), നെല്ലിക്കട്ട പിബിഎം ഇഎച്ച്എസ്എസ് (46), തളങ്കര ദഖീറത്ത് ഇഎംഎച്ച്എസ്എസ് (67), കുഞ്ചാര്‍ എച്ച്എസ് (146), മുഹിമ്മാത്ത് നഗര്‍ മുഹിമ്മാത്ത് എച്ച്എസ്എസ് (222), ഉദ്യാവര്‍ അല്‍ സഖാഫ് ഇഎംഎസ് (56), ബേള സെന്‍റ് മേരീസ് എച്ച്എസ് (35), മഞ്ചേശ്വരം ഇന്‍ഫന്‍റ് ജീസസ് ഇഎംഎസ് (54), മഞ്ചേശ്വരം പൊസോട്ട് ജമാഅത്ത് ഇഎംഎസ് (38), ബദിയടുക്ക ശ്രീഭാരതി വിദ്യാപീഠം (13), കരിവേടകം സെന്‍റ് മേരീസ് എച്ച്എസ് (42), പച്ചമ്പള മല്‍ജ ഉല്‍ ഇസ്ലാം ഇഎംഎസ് (16), മുള്ളേരിയ വിദ്യാശ്രീ ശിക്ഷണകേന്ദ്ര (29), കുറ്റിക്കോല്‍ സഫ പബ്ലക് ഇഎഎസ് (13), കൊടിബയല്‍ സര്‍വോദയ ഇഎംഎസ് (24), ദേളി സഅദിയ എച്ച്എസ് (165), മുജുംഗാവ് ശ്രീഭാരതി വിദ്യാപീഠം (11), കാഞ്ഞങ്ങാട് ലിറ്റില്‍ ഫ്‌ളവര്‍ ഗേള്‍സ് എച്ച്എസ്എസ് (150), പെരിയ അംബേദ്കര്‍ വിദ്യാനികേതന്‍ (14), ചിത്താരി ജമാഅത്ത് എച്ച്എസ്എസ് (94), മെട്ടമ്മല്‍ സിഎച്ച്എംകെഎസ് എച്ച്എസ്എസ് (40), ചിറ്റാരിക്കാല്‍ സെന്‍റ് മേരീസ് ഇഎംഎച്ച്എസ് (33), പള്ളിക്കര ഐഇഎം എച്ച്എസ്എസ് (26), തുരുത്തി ആര്‍യുഇഎംഎച്ച്എസ് (34), ബേക്കല്‍ നൂറുല്‍ ഹുദ ഇഎംഎസ് (54), കള്ളാര്‍ ബൂണ്‍ പബ്ലിക് സ്‌കൂള്‍ (14).

രാപ്പകല്‍സമരം സമാപിച്ചു

കാഞ്ഞങ്ങാട്: സുപ്രീം കോടതി വിധിയുടെ പശ്ചാത്തലത്തില്‍ ഭിന്നശേഷി നിയമനങ്ങള്‍ അംഗീകരിച്ച് അധ്യാപകര്‍ക്ക് ശമ്പള സ്‌കെയില്‍ അനുവദിക്കണമെന്ന് ഡിസിസി പ്രസിഡന്‍റ് പി.കെ.ഫൈസല്‍. കാഞ്ഞങ്ങാട് ഡിഇഒ ഓഫീസ് പരിസരത്ത് നടന്ന കെപിഎസ്ടിഎ രാപ്പകല്‍ സമരത്തിന്‍റെ സമാപനപരിപാടി ഉദ്ഘാടനം ചയയുകയായിരുന്നു അദ്ദേഹം. റവന്യു ജില്ലാ പ്രസിഡന്‍റ് പി.ടി.ബെന്നി അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് ജി.കെ. ഗിരീഷ് മുഖ്യഭാഷണം നടത്തി. ഡിസിസി വൈസ് പ്രസിഡന്‍റുമാരായ ബി.പി.പ്രദീപ്കുമാര്‍, സാജിദ് മവ്വല്‍, ഡിസിസി ജനറല്‍ സെക്രട്ടറി പി.വി.സുരേഷ് എന്നിവര്‍ പ്രസംഗിച്ചു. റവന്യു ജില്ലാ സെക്രട്ടറി കെ.ഗോപാലകൃഷ്ണന്‍ സ്വാഗതവും ജില്ലാ ജോയിന്‍റ് സെക്രട്ടറി രജനി കെ.ജോസഫ് നന്ദിയും പറഞ്ഞു.

ഓടക്കൊല്ലി റബർ ഉത്പാദകസംഘം ഓഫീസ് ഉദ്ഘാടനം ചെയ്തു

പാലാവയൽ: ഓടക്കൊല്ലി റബർ ഉത്പാദകസംഘത്തിന്‍റെ പുതുതായി നിർമിച്ച ഓഫീസ് കെട്ടിടം പഞ്ചായത്ത് പ്രസിഡന്‍റ് ജോസഫ് മുത്തോലി ഉദ്ഘാടനം ചെയ്തു. സംഘം പ്രസിഡന്‍റ് ചെറിയാൻ കാപ്പിൽ അധ്യക്ഷനായി. പഞ്ചായത്ത് സ്ഥിരം സമിതി ചെയർമാൻ പ്രശാന്ത് പാറേക്കുടിയിൽ, ചിറ്റാരിക്കാൽ റബർ ഉത്പാദകസംഘം പ്രസിഡന്‍റ് റെനി മംഗലത്ത്, പാലാവയൽ സംഘം പ്രസിഡന്‍റ് മാത്യു താമരശേരിൽ, തോമസ് കൊറ്റനാൽ, ടോമി കലവനാൽ എന്നിവർ പ്രസംഗിച്ചു. അസി. കൃഷി ഓഫീസർ ജയപ്രകാശ് വിള ഇൻഷുറൻസ് പദ്ധതികൾ വിശദീകരിച്ചു. ജോൺ തോണക്കര, മത്തായി കളമ്പുകാട്ട്, എബ്രഹാം കടുകൻമാക്കൽ, ഷാജു കാപ്പിൽ എന്നിവരെ ആദരിച്ചു.

അന്തർജില്ലാ ജൂണിയർ കബഡിയിൽ വിജയ് അച്ചാംതുരുത്തി ജേതാക്കൾ

ചെറുവത്തൂർ: ദേശീയ കായികവേദി ജില്ലാ കമ്മിറ്റി അച്ചാംതുരുത്തിയിൽ സംഘടിപ്പിച്ച അന്തർജില്ലാ ജൂണിയർ കബഡി ഫെസ്റ്റിൽ വിജയ് അച്ചാംതുരുത്തി ടീം ജേതാക്കളായി. എരോൽ പ്രതിഭ രണ്ടാം സ്ഥാനം നേടി. 17 വയസിൽ താഴെ പ്രായമുള്ളവർക്കായി സംഘടിപ്പിച്ച മത്സരത്തിൽ കണ്ണൂർ - കാസർഗോഡ് ജില്ലകളിലെ 18 ടീമുകളാണ് പങ്കെടുത്തത്. രാജ്മോഹൻ ഉണ്ണിത്താൻ എംപി ഉദ്ഘാടനം ചെയ്തു. ദേശീയ കായികവേദി ജില്ലാ പ്രസിഡന്‍റ് വിനോദ് അച്ചാംതുരുത്തി അധ്യക്ഷത വഹിച്ചു. സംസ്ഥാന സെക്രട്ടറിയും അന്താരാഷ്ട്ര വോളിബോൾ റഫറിയുമായ ടി.വി.അരുണാചലം മുഖ്യാതിഥിയായി. ചെറുവത്തൂർ ഫാർമേഴ്സ് ബാങ്ക് വൈസ് പ്രസിഡന്‍റ് ഡോ.കെ.വി.ശശിധരൻ ജഴ്സി പ്രകാശനം നിർവഹിച്ചു. കെ.വിജയകൃഷ്ണൻ, കെ.ബാലകൃഷ്ണണൻ, എൻ.കെ.കൃഷ്ണൻ, ടി.പി.ഭരതൻ, വി.ഗോപിനാഥൻ, എം.ധനേഷ് കുമാർ, എ.വി.ബാബു എന്നിവർ പ്രസംഗിച്ചു. പി.ഗോപാലകൃഷ്ണൻ, ഒ. ഉണ്ണികൃഷ്ണൻ എന്നിവരെ ആദരിച്ചു. പഞ്ചായത്തംഗം ടി.വി.ശ്രീജിത്ത് സമ്മാനവിതരണം നിർവഹിച്ചു.

എംഡിഎംഎയുമായി അറസ്റ്റിൽ

തൃക്കരിപ്പൂർ: പൂച്ചോലിൽ സ്കൂട്ടറിൽ കടത്തുകയായിരുന്ന രാസലഹരിയുമായി രണ്ടുപേലെ ചന്തേര പോലീസ് അറസ്റ്റ് ചെയ്തു. പയ്യന്നൂർ വെള്ളൂർ കാറമേലിലെ ജാബിർ അബ്ദുൾ ഖാദർ(34), ടി.മുഷ്ഫിക്(30) എന്നിവരെയാണ് ഇൻസ്പെക്ടർ കെ.പ്രശാന്ത്, പ്രൊബേഷൻ എസ്ഐ സി.ആർ.മൗഷ്മി എന്നിവരുടെ നേതൃത്വത്തിലുള്ള പോലീസ് സംഘം പിടികൂടിയത്. സീറ്റിനടിയിൽ പഴ്സിൽ ഒളിപ്പിച്ച നിലയിൽ 2.5 ഗ്രാം എംഡിഎംഎ പിടികൂടി.

മണ്ണിന്‍റെ പിഎച്ച് മൂല്യം: ടെക്നിക്കൽ നൈറ്റ് ‌ 20 ന് വെള്ളരിക്കുണ്ടിൽ

വെള്ളരിക്കുണ്ട്: മണ്ണിന്‍റെ പിഎച്ച് മൂല്യവുമായി ബന്ധപ്പെട്ട അറിവുകൾ പങ്കുവയ്ക്കുന്നതിനും ബോധവത്കരണത്തിനുമായി ചുള്ളി ഫാം ക്ലബ്, ഹരിതം വെള്ളരിക്കുണ്ട്, വ്യാപാരി വ്യവസായി ഏകോപന സമിതി വെള്ളരിക്കുണ്ട് യൂണിറ്റ് എന്നിവയുടെ സംയുക്താഭിമുഖ്യത്തിൽ ടെക്നിക്കൽ നൈറ്റ് സംഘടിപ്പിക്കുന്നു. 20 ന് വൈകിട്ട് അഞ്ചുമണി മുതൽ രാത്രി ഒൻപത് മണി വരെ വെളളരിക്കുണ്ട് ദർശന ഓഡിറ്റോറിയത്തിൽ നടക്കുന്ന പരിപാടിക്ക് കേരള കാർഷിക സർവകലാശാലയിൽ നിന്ന് ഈ വർഷം വിരമിച്ച കാർഷിക ശാസ്ത്രജ്ഞൻ ഡോ.കെ.എം. ശ്രീകുമാർ നേതൃത്വം നല്കും. മണ്ണിന്‍റെ ആരോഗ്യം മെച്ചപ്പെടുത്തുന്നതിനും മികച്ച വിളവ് നേടുന്നതിനുമുള്ള ശാസ്ത്രീയ മാർഗങ്ങൾ അവതരിപ്പിക്കുന്ന സെമിനാറും കര്‍ഷകരുമായുള്ള സംവാദവും നടക്കുമെന്ന് ബളാൽ പഞ്ചായത്ത് പ്രസിഡന്‍റ് രാജു കട്ടക്കയം, ചുള്ളി ഫാം ക്ലബ് ചെയർമാൻ പി.സി.ബിനോയ് എന്നിവർ പത്രസമ്മേളനത്തിൽ അറിയിച്ചു. പരിപാടിയിൽ പങ്കെടുക്കാൻ താത്പര്യമുള്ളവർക്ക് 8197815243 എന്ന നമ്പറിൽ ബന്ധപ്പെടാം.

ഹയര്‍സെക്കന്‍ഡറി ഒഴിവുകള്‍ യഥാസമയം റിപ്പോര്‍ട്ട് ചെയ്യാതിരിക്കുന്നത് മനുഷ്യാവകാശ ലംഘനമെന്ന് കമ്മീഷന്‍

കാസര്‍ഗോഡ്: ഹയര്‍സെക്കന്‍ഡറി വിഭാഗത്തിലുള്ള ഒഴിവുകള്‍ പിഎസ്‌സിക്ക് യഥാസമയം റിപ്പോര്‍ട്ട് ചെയ്യണമെന്ന് മനുഷ്യാവകാശകമ്മീഷന്‍ ജുഡീഷല്‍ അംഗം കെ.ബൈജുനാഥ്. ഇപ്രകാരം ചെയ്യാതിരിക്കുന്നത് ഗുരുതരമായ മനുഷ്യാവകാശ ലംഘനമാണെന്നും ഉത്തരവില്‍ പറഞ്ഞു. റാങ്ക് പട്ടികയില്‍ ഇടം നേടിയിട്ടും ഉദ്യോഗസ്ഥതലത്തിലുള്ള അനാസ്ഥയും സ്ഥാപിതതാല്‍പര്യവും കാരണം ഉദ്യോഗാര്‍ഥികള്‍ക്ക് ജോലിയെന്ന സ്വപ്നം മരീചികയായി തുടരുന്നത് കടുത്ത നീതിനിഷേധമാണെന്നും കമ്മീഷന്‍ ഉത്തരവില്‍ പറഞ്ഞു. മാന്യതയോടെയും അന്തസ്സോടെയും ജീവിക്കാനുള്ള സൗകര്യമാണ് ജോലി നല്‍കുന്നത്. അനാസ്ഥ കാണിച്ചും നിയമാനുസൃതമല്ലാതെ പ്രവര്‍ത്തിച്ചും അത് ഇല്ലാതാക്കുക എന്നത് മനുഷ്യാവകാശ ലംഘനമാണ്. ഒഴിവുള്ള തസ്തികകള്‍ പിഎസ്‌സിക്ക് റിപ്പോര്‍ട്ട് ചെയ്യാതിരിക്കുന്നത് സര്‍ക്കാര്‍, പിഎസ്‌സി നിര്‍ദേശങ്ങളുടെ ലംഘനമാണെന്നും ഉത്തരവില്‍ പറയുന്നു. പരാതിക്കാരി കമ്മീഷനില്‍ ഉന്നയിച്ചിരിക്കുന്ന വിഷയങ്ങളില്‍ കാലതാമസം കൂടാതെ നടപടിയെടുക്കണമെന്നും കമ്മീഷന്‍ ആവശ്യപ്പെട്ടു. 2024 ഓഗസ്റ്റ് 21നു മന്ത്രിസഭാ തീരുമാനപ്രകാരം സൃഷ്ടിച്ച ഹയര്‍സെക്കന്‍ഡറി തസ്തികകളില്‍ നിയമനം നടത്തുന്ന കാര്യം പരിശോധിക്കണമെന്നും കമ്മീഷന്‍ നിര്‍ദേശിച്ചു. സ്റ്റാഫ് ഫിക്‌സേഷന്‍റെ പേരിലും ബൈ ട്രാന്‍സ്ഫറിന്‍റെ പേരിലും തസ്തികകള്‍ മാറ്റിവച്ച് ഒഴിവുകള്‍ പിഎസ്‌സിയില്‍ നിന്നും മറച്ചുവയ്ക്കുന്നതിനെതിരെ സമര്‍പ്പിച്ച പരാതിയിലാണ് ഉത്തരവ്. നിലവിലെ മുഴുവന്‍ ഒഴിവുകളും പിഎസ്‌സിക്ക് റിപ്പോര്‍ട്ട് ചെയ്യണമെന്ന പരാതിക്കാരിയുടെ ആവശ്യം സര്‍ക്കാര്‍ പരിഗണിക്കണമെന്ന് കമ്മീഷന്‍ ആവശ്യപ്പെട്ടു. ബൈ ട്രാന്‍സ്ഫറിന്‍റെ പേരില്‍ കാലങ്ങളായി മാറ്റി വച്ചിരിക്കുന്ന തസ്തികകളും പിഎസ്‌സിക്ക് നല്‍കണമെന്നാണ് പരാതിക്കാരിയുടെ ആവശ്യം. ഡയറക്ട് ലിസ്റ്റില്‍ നിലവിലുള്ള തസ്തികകളില്‍ 75 ശതമാനം പിഎസ്‌സിക്ക് നല്‍കണമെന്നും പരാതിക്കാരിയായ കെ.വി.സൗമ്യ ആവശ്യപ്പെട്ടു. പരാതിക്കാരിയുടെ ആവശ്യങ്ങള്‍ നിലവിലെ കോടതി വിധികള്‍ക്കും നിയമങ്ങള്‍ക്കും അനുസൃതമായി തീരുമാനമെടുക്കണമെന്നും കമ്മീഷന്‍ ആവശ്യപ്പെട്ടു. ഉത്തരവിന്‍റെ അടിസ്ഥാനത്തില്‍ സ്വീകരിച്ച നടപടികള്‍ നാലാഴ്ചക്കകം അറിയിക്കണമെന്നും കമ്മീഷന്‍ ആവശ്യപ്പെട്ടു.

അമിതനിരക്ക് കുറച്ചില്ല; ബസുകള്‍ക്കെതിരേ നടപടി തുടങ്ങി മോട്ടോര്‍വാഹന വകുപ്പ്

കാഞ്ഞങ്ങാട്: യാത്രക്കാരില്‍ നിന്ന് അമിത നിരക്ക് ഈടാക്കുന്ന സ്വകാര്യ ബസുടമകള്‍ക്കെതിരേ മോട്ടോര്‍ വാഹന വകുപ്പ് നടപടി തുടങ്ങി. കാസര്‍ഗോഡ് ആര്‍ടിഒ ജി.എസ്.സജിപ്രസാദിന്‍റെ നിര്‍ദേശപ്രകാരം കാഞ്ഞങ്ങാട് ജോയിന്‍റ് ആര്‍ടിഒ ഓഫീസിലെ എംവിഐമാരായ എം.വിജയന്‍, കെ.വി.ജയന്‍ എന്നിവരാണ് പരിശോധനക്കെത്തിയത്. കാഞ്ഞങ്ങാട് -പാണത്തൂര്‍ റൂട്ടിലെ അമ്പലത്തറയില്‍ ഇന്നലെ വൈകുന്നേരം എട്ടു ബസുകള്‍ പരിശോധിച്ചതില്‍ ഒന്നൊഴികെ മറ്റെല്ലാം അമിത നിരക്ക് വാങ്ങിയെന്ന് ബോധ്യപ്പെട്ടു. ഇതോടെ ഇവക്കെതിരെ നടപടി സ്വീകരിച്ചു. അമിത നിരക്ക് അവസാനിപ്പിക്കുന്നതുവരെയും നിയമനടപടി സ്വീകരിക്കാനാണ് ആര്‍ടിഒയുടെ കര്‍ശന നിര്‍ദേശം. നിരക്ക് കുറച്ച വിവരം തങ്ങള്‍ അറിഞ്ഞില്ലെന്ന് ബസ് ജീവനക്കാര്‍ ഉദ്യോഗസ്ഥരോട് പറഞ്ഞു. അത്തരം ന്യായീകരണമൊന്നും അംഗീകരിക്കില്ലെന്ന് ഉദ്യോഗസ്ഥര്‍ മറുപടി നല്‍കി. തിങ്കളാഴ്ചയാണ് കാഞ്ഞങ്ങാട് -കൊന്നക്കാട്, ഏഴാംമൈല്‍-കാലിച്ചാനടുക്കം റൂട്ടുകളിലെ ബസ് നിരക്ക് കുറച്ച ഉത്തരവ് പ്രാബല്യത്തില്‍ വന്നത്. മോട്ടോര്‍ വാഹനവകുപ്പിന്‍റെ വെബ്‌സൈറ്റില്‍ പ്രസിദ്ധീകരിക്കുകയും മാധ്യമങ്ങളില്‍ വാര്‍ത്തയാകുകയും ചെയ്തിരുന്നു. എന്നാല്‍ ഇതു അംഗീകരിക്കില്ലെന്ന് ബസുടമകളുടെ സംഘടന പറഞ്ഞിരുന്നു. ഇതിന് പിന്നാലെ യാത്രക്കാര്‍ ബസ് ടിക്കറ്റ് സഹിതം പരാതിപ്പെട്ടു. ഇതോടെയാണ് നടപടി ആരംഭിച്ചത്. കാഞ്ഞങ്ങാട് നിന്ന് കയറുന്ന യാത്രക്കാരന് മാവുങ്കാല്‍ മുതല്‍ കല്ലംചിറ വരെ രണ്ട് മുതല്‍ മൂന്ന് രൂപ വരെയും വെള്ളരിക്കുണ്ട് മുതല്‍ കൊന്നക്കാട് വരെ അഞ്ചു രൂപയുമാണ് കുറഞ്ഞത്. ഏഴാംമൈലില്‍ നിന്ന് കയറുന്നയാള്‍ക്ക് മുക്കുഴിയിലേക്ക് മൂന്ന് രൂപയും കാലിച്ചാനടുക്കത്തേക്ക് അഞ്ചുരൂപയും കുറഞ്ഞു.

സംസ്‌കാരസാഹിതി ഭാരവാഹികള്‍ ചുമതലയേറ്റു

കാസര്‍ഗോഡ്: കെപിസിസി കലാസാംസ്‌കാരിക വിഭാഗമായ സംസ്‌കാരസാഹിതിയുടെ ജില്ലാഭാരവാഹികള്‍ ചുമതലയേറ്റു. ഡിസിസി ഓഫീസില്‍ നടന്ന പരിപാടി ഡിസിസി പ്രസിഡന്‍റ് പി.കെ.ഫൈസല്‍ ഉദ്ഘാടനം ചെയ്തു. സംസ്ഥാന വൈസ്പ്രസിഡന്‍റ് പ്രദീപ്കുമാര്‍ പയ്യന്നൂര്‍ മുഖ്യപ്രഭാഷണം നടത്തി. ഗംഗാധരന്‍ കുട്ടമത്ത്, രമേശന്‍ കരുവാച്ചേരി, എം.സി.പ്രഭാകരന്‍, മിനി ചന്ദ്രന്‍, കെ.കെ.ബാബു, എം.കുഞ്ഞികൃഷ്ണന്‍, കെ.പി. ബാലകൃഷ്ണന്‍, സംസ്‌കാര സാഹിതി ജില്ലാ കണ്‍വീനര്‍ ദിനേശന്‍ മൂലക്കണ്ടം, ട്രഷറര്‍ ഡോ. വിവേക് സുധാകരന്‍, ബഷീര്‍ ആറങ്ങാടി, പി.കെ.വിനയകുമാര്‍, പി.പി.കുഞ്ഞികൃഷ്ണന്‍ നായര്‍, ജോയ് മാരൂര്‍, അനില്‍ വാഴുന്നോറൊടി, രാജന്‍ തെക്കേക്കര, സുകുമാരന്‍ ആശിര്‍വാദ്, ബിജുകൃഷ്ണ, ചന്ദ്രന്‍ നാലപ്പാടം, ടി.വി.രാജീവന്‍, അഷറഫ് കൈന്താര്‍, ടി.രാഘവേന്ദ്ര, അക്ഷയ എസ്.ബാലന്‍ എന്നിവര്‍ സംസാരിച്ചു.

മാലിന്യസംസ്‌കരണ സംവിധാനമില്ലാത്ത അപ്പാര്‍ട്ട്മെന്‍റുകള്‍ക്ക് പിഴ ചുമത്തി

കാസര്‍ഗോഡ്: ഭക്ഷണഅവശിഷ്ടങ്ങള്‍ ഉള്‍പ്പെടെയുള്ള ജൈവമാലിന്യങ്ങള്‍ സംസ്‌കരിക്കുന്നതിന് സംവിധാനമില്ലാത്ത അപ്പാര്‍ട്ട്മെന്‍റുകള്‍ക്കും കോര്‍ട്ടേഴ്സുകള്‍ക്കും പിഴ ചുമത്തി ജില്ലാ എന്‍ഫോഴ്സ്മെന്‍റ് സ്‌ക്വാഡ്. മഞ്ചേശ്വരത്തുള്ള അപ്പാര്‍ട്ട്മെന്‍റുകളില്‍ ജൈവമാലിന്യസംസ്‌കരണ സംവധനം ഒരുക്കാത്തത്തിനും അജൈവമാലിന്യങ്ങള്‍ അലക്ഷ്യമായി കൈകാര്യം ചെയ്തതിനും 10,000 രൂപ വീതം ഉടമകള്‍ക്ക് പിഴ ചുമത്തുകയും റിംഗ് കമ്പോസ്റ്റുകള്‍ സ്ഥാപിക്കുന്നതിന് നിര്‍ദ്ദേശം നല്‍കുകയും ചെയ്തു. കരിമ്പളപ്പിലുള്ള ക്വാര്‍ട്ടേഴ്സ് ഉടമയ്ക്ക് മാലിന്യങ്ങള്‍ അലക്ഷ്യമായി കൈകാര്യം ചെയ്തതിന് 3000 രൂപയും പിഴ ചുമത്തിയിട്ടുണ്ട് . ചെങ്കള പഞ്ചായത്തിലെ ചര്‍ളടുക്കയിലുള്ള ക്വാര്‍ട്ടേഴ്സ് ഉടമകള്‍ക്കും ശാസ്ത്രീയ മാലിന്യ സംസ്‌കരണ സംവിധാനമില്ലാത്തതിന് പിഴ ചുമത്തിയിട്ടുണ്ട്. നെല്ലിക്കട്ടയിലെ കോംപ്ലക്സിനകത്തുള്ള റസ്റ്റോറന്‍റിലെ മലിനജലം തുറസായ സ്ഥലത്തേക്ക് ഒഴുക്കി വിട്ടതിന് 7500 രൂപ പിഴ ചുമത്തുകയും സോക്ക് പിറ്റ് സ്ഥാപിച്ച് ശാസ്ത്രീയമായി സംസ്‌കരിക്കുന്നതിന് നിര്‍ദേശവും നല്‍കി. ‌ജില്ലാ എന്‍ഫോഴ്സ്മെന്‍റ് സ്‌ക്വാഡ് ലീഡര്‍ കെ.വി.മുഹമ്മദ് മദനിയുടെ നേതൃത്വത്തിലുള്ള പരിശോധനാ സംഘത്തില്‍ ഹെല്‍ത്ത് ഇന്‍സ്പെക്ടര്‍ രശ്മി, സ്‌ക്വാഡ് അംഗം ഇ.കെ ഫാസില്‍, എന്‍.ആദര്‍ശ് എന്നിവരുമുണ്ടായിരുന്നു.

തൃശൂർ പൂരത്തിൽ വടക്കിന്‍റെ മേളപ്പെരുമ തീർത്ത് രാധാകൃഷ്ണ മാരാർ

കാഞ്ഞങ്ങാട്: തൃശൂർ പൂരത്തിന്‍റെ ഇലഞ്ഞിത്തറ മേളത്തിൽ വടക്കിന്‍റെ മേളപ്പെരുമ തീർത്ത് മഡിയൻ രാധാകൃഷ്ണ മാരാർ. കിഴക്കൂട്ട് അനിയൻ മാരാർ നയിച്ച പാറമേക്കാവ് വിഭാഗത്തിന്‍റെ മേളക്കാരുടെ നിരയിൽ അഞ്ചാമനായാണ് രാധാകൃഷ്ണ മാരാർ കൊട്ടിക്കയറിയത്. മട്ടന്നൂർ ശങ്കരൻകുട്ടി മാരാർക്കു ശേഷം വടക്കൻ കേരളത്തിൽ നിന്ന് ഇലഞ്ഞിത്തറ മേളത്തിൽ മുൻനിരക്കാരനായെത്തുന്ന ആളെന്ന ബഹുമതിക്കൊപ്പം കാസർഗോഡ് ജില്ലയിൽ നിന്നുള്ള ആദ്യത്തെ ആളെന്ന നേട്ടവും രാധാകൃഷ്ണ മാരാർക്ക് സ്വന്തമായി. കാഞ്ഞങ്ങാട് മഡിയൻ കൂലോത്തെ പാരമ്പര്യ വാദ്യകലാ കുടുംബത്തിൽ ജനിച്ചുവളർന്ന രാധാകൃഷ്ണ മാരാർ സ്കൂൾ കലോത്സവങ്ങളിലൂടെയാണ് ആദ്യമായി സംസ്ഥാനതലത്തിൽ അംഗീകാരം നേടിയത്. മട്ടന്നൂർ ശങ്കരൻകുട്ടി മാരാരുടെ ശിഷ്യനായി നിരവധി വേദികളിൽ കൊട്ടിക്കയറി. വാദ്യകലാരംഗത്തെ സംഭാവനകൾക്ക് ദേശീയതലത്തിലുൾപ്പെടെ അംഗീകാരങ്ങൾ നേടിയിട്ടുണ്ട്. രാധാകൃഷ്ണ മാരാർക്കൊപ്പം ശിഷ്യനായ ശ്രീരാഗ് കാഞ്ഞങ്ങാടും ഇത്തവണ പാറമേക്കാവ് സംഘത്തിലുണ്ടായിരുന്നു.

നീലേശ്വരത്തെ പുതിയ ബസ് സ്റ്റാൻഡ് രണ്ടുമാസത്തിനകം

നീലേശ്വരം: തുടക്കത്തിലെ മെല്ലെപ്പോക്കിനൊടുവിൽ വേഗംവച്ച നീലേശ്വരത്തെ പുതിയ ബസ് സ്റ്റാൻഡ് ഷോപ്പിംഗ് കോംപ്ലക്സ് കെട്ടിടത്തിന്‍റെ നിർമാണം അന്തിമഘട്ടത്തിലേക്ക്. കെട്ടിടത്തിന്‍റെ വൈദ്യുതീകരണ പ്രവൃത്തികൾക്ക് കഴിഞ്ഞ ദിവസം സർക്കാരിന്‍റെ സാങ്കേതികാനുമതി ലഭിച്ചതോടെ ടെൻഡർ നടപടികൾ തുടങ്ങി. തുടർന്ന് ടൈൽസ്, സാനിറ്ററി പ്രവൃത്തികളും പെയിന്‍റിംഗും പൂർത്തിയാക്കി രണ്ടുമാസത്തിനകം ബസ് സ്റ്റാൻഡ് തുറന്നുകൊടുക്കാനാകുമെന്നാണ് പ്രതീക്ഷ. പഴയ ബസ് സ്റ്റാൻഡ് കെട്ടിടം ഉണ്ടായിരുന്ന സ്ഥലത്തിനും രാജാറോഡിനും അഭിമുഖമായാണ് 10 കോടി രൂപ ചെലവിൽ നാലു നിലകളുള്ള പുതിയ കെട്ടിടം നിർമിച്ചിട്ടുള്ളത്. താഴത്തെ നിലയില്‍ 16 കടമുറികളും ഒന്നാംനിലയില്‍ 28 കടമുറികളും രണ്ടാംനിലയില്‍ 10 കടമുറികളും ഓഫീസ് ആവശ്യങ്ങള്‍ക്കുള്ള എഴ് മുറികളുമാണ് കെട്ടിടത്തിലുള്ളത്. മുകളിൽ 8000 ചതുരശ്ര അടി വിസ്തീർണമുള്ള കോൺഫറൻസ് ഹാളുമുണ്ട്. ഒരേസമയം 20 ബസുകൾക്ക് പാർക്ക് ചെയ്യുന്നതിനുള്ള സൗകര്യമുണ്ടാകും. ഇതിനു സമീപത്തായി ഓട്ടോറിക്ഷകൾക്കുള്ള പാർക്കിംഗ് സൗകര്യവും ഒരുക്കും. കെട്ടിടത്തിന്‍റെ താഴത്തെ നിലയിൽ കാറുകൾക്കും മറ്റു സ്വകാര്യ വാഹനങ്ങൾക്കും പാർക്കിംഗ് സൗകര്യമൊരുക്കും.

കെജിഒഎ പഠനക്യാമ്പ് നടത്തി

കാഞ്ഞങ്ങാട്: കേരള ഗസറ്റഡ് ഓഫീസേഴ്‌സ് അസോസിയേഷന്‍ ജില്ലയിലെ ഏരിയ, യൂണിറ്റ് ഭാരവാഹികള്‍ക്ക് പഠനക്ലാസ് നടത്തി. ഹൊസ്ദുര്‍ഗ് സര്‍വീസ് സഹകരണബാങ്ക് ഹാളില്‍ നടന്ന പരിപാടി സംസ്ഥാന വൈസ്പ്രസിഡന്‍റ് പി.പി.സുധാകരന്‍ ഉദ്ഘാടനം ചെയ്തു. മധു കരിമ്പില്‍ അധ്യക്ഷതവഹിച്ചു. കെ.വി.രാഘവന്‍, കെ.പി.ഗംഗാധരന്‍, കോളിക്കര രമേശന്‍, സി.എസ്.സുമേ്,വിക്രം കൃഷ്ണന്‍, എ.ഷൈന, ഡി.ദിവ്യ, പി.വി.മനോജ്കുമാര്‍ എന്നിവര്‍ പ്രസംഗിച്ചു.

കെപിഎസ്ടിഎ രാപ്പകല്‍ സമരം ആരംഭിച്ചു

കാഞ്ഞങ്ങാട്: അധ്യാപക നിയമനകാര്യത്തില്‍ സുപ്രീം കോടതി വിധി വന്നിട്ടും കേരളത്തിലെ അധ്യാപക നിയമനങ്ങള്‍ അട്ടിമറിക്കാനുള്ള ആസൂത്രിത നീക്കമാണ് ഇടതുസര്‍ക്കാര്‍ സ്വീകരിക്കുന്നതെന്നും പൊതുവിദ്യഭ്യാസ മേഖലയെ തകര്‍ക്കുന്ന ഇത്തരം നീക്കത്തില്‍ നിന്നും സര്‍ക്കാര്‍ പിന്‍മാറണമെന്നും രാജ്‌മോഹന്‍ ഉണ്ണിത്താന്‍ എംപി ആവശ്യപ്പെട്ടു. കെപിഎസ്ടിഎ രാപ്പകല്‍ സമരം ഉദ്ഘാടനം ചെയ്തു കൊണ്ട് സംസാരിക്കുകയായിരുന്നു അദ്ദേഹം. ഭിന്നശേഷി നിയമനങ്ങളുടെ പേരില്‍ കേരളത്തിലെ വര്‍ഷങ്ങളായുള്ള അധ്യാപക നിയമനങ്ങളുടെ കുരുക്കഴിക്കാവുന്ന വിധം വിശാല വിധി പ്രസ്താവിച്ചിട്ടും സര്‍ക്കാര്‍ സ്വാര്‍ത്ഥ താല്‍പര്യങ്ങളുടെ പേരില്‍ അത് നടപ്പിലാക്കാന്‍ തയ്യാറാകാത്തത് ന്യായീകരിക്കാന്‍ കഴിയില്ല. ആയരിക്കണക്കിന് അധ്യാപകര്‍ ആത്മഹത്യയുടെ വക്കിലാണ്. സാങ്കേതികത്വം പൂര്‍ണ്ണമായും നീങ്ങിയിട്ടും സര്‍ക്കാര്‍ മാത്രം അതിനു തയ്യാറാകാത്തത് എയ്ഡഡ് വിദ്യഭ്യാസ മേഖലയെ തകര്‍ക്കാനുള്ള നീക്കമായേ കാണാന്‍ സാധിക്കുകയുള്ളു. ഹൈക്കോടതിയും ഇക്കാര്യത്തില്‍ അനുകൂലമായ വിധി പുറപ്പെടുവിച്ച സാഹചര്യം പരിഗണിച്ച് പൊതുവിദ്യഭ്യാസ മേഖലയോട് അല്‍പമെങ്കിലും ആത്മാര്‍ത്ഥതയുണ്ടെങ്കില്‍ സുപ്രീം കോടതി വിധി നടപ്പിലാക്കി കേരളത്തിലെ മുഴുവന്‍ അധ്യാപക നിയമനങ്ങള്‍ക്കും അംഗീകാരം നല്‍കാന്‍ അടിയന്തിര നടപടി സ്വീകരിക്കണമെന്നും എംപി ആവശ്യപ്പെട്ടു. റവന്യൂജില്ലാ പ്രസിഡന്‍റ് പി.ടി.ബെന്നി അധ്യക്ഷത വഹിച്ചു. കെപിസിസി സെക്രട്ടറി എം.അസിനാര്‍ മുഖ്യഭാഷണം നടത്തി. സംസ്ഥാന വൈസ് പ്രസിഡന്‍റ് ജി.കെ. ഗിരീഷ്, സംസ്ഥാന നിര്‍വാഹക സമിതി അംഗം അലോഷ്യസ് ജോര്‍ജ്, ജോമി ടി. ജോസ്, എം.കെ. പ്രിയ, പി.ജലജാക്ഷി, വി.കെ. പ്രഭാവതി, എ.വി. ഗിരീശന്‍, ടി. രാജേഷ്‌കുമാര്‍, പി.കെ. ബിജു എന്നിവര്‍ സംസാരിച്ചു. സെക്രട്ടറി കെ. ഗോപാലകൃഷ്ണന്‍ സ്വാഗതം പറഞ്ഞു.

ബസ് ബേകളില്ല; കാത്തിരിപ്പുകേന്ദ്രങ്ങളും സർവീസ് റോഡരികിൽ

കാസർഗോഡ്: ദേശീയപാതയുടെ ഒന്നാംറീച്ചിന്‍റെ നിർമാണം അവസാനഘട്ടത്തിലെത്തുമ്പോൾ സ്ഥലദൗർലഭ്യം മൂലമുണ്ടായ ഞെരുക്കം കൂടുതൽ പ്രകടമാകുന്നു. കർണാടകയിലും മറ്റും നിർമിച്ചതുപോലെ ഇവിടെ ദേശീയപാതയോരത്തെ ബസ് കാത്തിരിപ്പുകേന്ദ്രങ്ങളോടു ചേർന്ന് ബസുകൾ നിർത്തിയിടുന്നതിനായി ബസ് ബേകൾ നിർമിക്കാൻ കഴിയില്ലെന്നാണ് ദേശീയപാത അഥോറിറ്റിയുടെ തീരുമാനം. സ്ഥലപരിമിതി തന്നെയാണ് കാരണം. പകരം സർവീസ് റോഡുകളോട് ചേർന്നു തന്നെയാകും ബസ് കാത്തിരിപ്പുകേന്ദ്രങ്ങൾ നിർമിക്കുക. ആളുകളെ ഇറക്കാനും കയറ്റാനുമായി ബസുകൾ സർവീസ് റോഡുകളിൽ തന്നെ നിർത്തേണ്ടിവരും. ഓരോ സ്റ്റോപ്പിലും നിശ്ചിതസമയം നിർത്തിയിടുന്ന ബസുകൾ സ്വതവേ വീതി കുറഞ്ഞ സർവീസ് റോഡുകളിലെ ഗതാഗതക്കുരുക്ക് ഒന്നുകൂടി വർധിപ്പിക്കുമെന്ന കാര്യവും ഉറപ്പാണ്. തലപ്പാടി മുതൽ ചെങ്കള വരെയുള്ള ഒന്നാം റീച്ചിൽ ആകെ 77 ഇടങ്ങളിൽ ബസ് കാത്തിരിപ്പുകേന്ദ്രങ്ങൾ നിർമിക്കാനാണ് ദേശീയപാത അഥോറിറ്റിയുടെ അംഗീകാരമായിട്ടുള്ളത്. ഇതിന്‍റെ ആദ്യമാതൃകയായി കുമ്പള ദേവിനഗർ സ്റ്റോപ്പിൽ ഒരു ബസ് കാത്തിരിപ്പുകേന്ദ്രത്തിന്‍റെ നിർമാണം ഏതാണ്ട് പൂർത്തിയായിട്ടുണ്ട്. 77 ഇടങ്ങളിലും ഒരേ രൂപത്തിലും വലിപ്പത്തിലുമാണ് ബസ് കാത്തിരിപ്പുകേന്ദ്രങ്ങൾ നിർമിക്കുക. സ്റ്റെയിൻലസ് സ്റ്റീൽ ഉപയോഗിച്ചാണ് നിർമാണം. യാത്രക്കാർക്ക് ഇരിക്കുന്നതിനായി നാലു മീറ്റർ നീളത്തിൽ ഒരു സ്റ്റീൽ ബെഞ്ചും സ്ഥാപിക്കും. 76 ബസ് കാത്തിരിപ്പുകേന്ദ്രങ്ങളുടെയും നിർമാണം മഴക്കാലത്തിനുമുമ്പ് പൂർത്തിയാക്കാനാണ് ലക്ഷ്യമിടുന്നത്. സർവീസ് റോഡുകൾക്കരികിലായി പ്രത്യേക നടപ്പാത നിർമിക്കുമെന്നും തണൽമരങ്ങൾ വച്ചുപിടിപ്പിക്കുമെന്നും ദേശീയപാതയുടെ നിർമാണം തുടങ്ങുന്നതിനു മുമ്പ് അധികൃതർ പറഞ്ഞിരുന്നതും വെറുതേയായി. ഇനി ഇതെല്ലാം നടപ്പാക്കണമെങ്കിൽ സർവീസ് റോഡുകളോടുചേർന്ന് കൂടുതൽ സ്ഥലം ഏറ്റെടുക്കേണ്ടിവരുമെന്ന നിലയാണ്. വൈദ്യുത തൂണുകൾ പോലും മിക്കയിടങ്ങളിലും സർവീസ് റോഡുകളോട് തൊട്ടുരുമ്മിയാണ് നിൽക്കുന്നത്.

അടിപ്പാതയൊരുങ്ങുന്നു; കുരുക്കിലായി മാർക്കറ്റ് ജംഗ്ഷൻ

നീലേശ്വരം: നാലുവശങ്ങളിലേക്കും റോഡുകളുമായി തിരക്കേറിയ നീലേശ്വരം മാർക്കറ്റ് ജംഗ്ഷനിൽ വീതികുറഞ്ഞ ഒരു അടിപ്പാത കൊണ്ട് കാര്യമുണ്ടാവില്ലെന്ന് പുതിയ ദേശീയപാതയുടെ പണി തുടങ്ങിയ കാലത്തുതന്നെ നാട്ടുകാരും ജനപ്രതിനിധികളുമെല്ലാം ചൂണ്ടിക്കാട്ടിയതാണ്. എന്നിട്ടും മേൽപ്പാലം നിർമിക്കുന്നതിനോ അനുവദിച്ച അടിപ്പാതയുടെ തന്നെ വീതി കൂട്ടുന്നതിനോ ഉള്ള നടപടികളൊന്നും ദേശീയപാത അഥോറിറ്റിയുടെ ഭാഗത്തുനിന്നുണ്ടായില്ല. ഇപ്പോൾ അടിപ്പാതയുടെ പണി തുടങ്ങിയപ്പോൾ തന്നെ മാർക്കറ്റ് ജംഗ്ഷൻ ഗതാഗതക്കുരുക്കിലമർന്നിരിക്കുകയാണ്. കണ്ണൂർ ഭാഗത്തുനിന്നു വരുന്ന വാഹനങ്ങൾക്ക് നീലേശ്വരം ടൗണിലേക്കു പ്രവേശിക്കണമെങ്കിൽ കോട്ടപ്പുറം റോഡ് ജംഗ്ഷൻ വരെ മുന്നോട്ടുപോയതിനു ശേഷം യു ടേൺ എടുത്ത് തിരിച്ചുവരേണ്ടിവരുന്ന രീതിയിലാണ് ഇപ്പോൾ ഗതാഗതക്രമീകരണം നടത്തിയിട്ടുള്ളത്. എന്നാൽ മറുവശത്തുള്ള വീതി കുറഞ്ഞ റോഡിലേക്ക് ബസുകളടക്കമുള്ള വലിയ വാഹനങ്ങൾ യു ടേൺ എടുത്ത് പ്രവേശിക്കുന്നത് മിക്കപ്പോഴും ഗതാഗതക്കുരുക്കിന് വഴിവയ്ക്കുന്നു. രാജാറോഡിലൂടെ നീലേശ്വരം ടൗണിലേക്ക് പ്രവേശിച്ച ബസുകൾക്ക് തിരിച്ച് ദേശീയപാതയിലെത്തണമെങ്കിൽ പോലീസ് സ്റ്റേഷനു മുന്നിലെത്തി അവിടെ നിർമാണം നടക്കുന്ന അടിപ്പാതയിലൂടെ വീണ്ടും യു ടേൺ എടുക്കണം. കണ്ണൂർ ഭാഗത്തുനിന്ന് വരുന്ന ടൗൺ ടു ടൗൺ അടക്കമുള്ള ദീർഘദൂര ബസുകൾക്ക് ഇത് ഏരെ സമയനഷ്ടവും ഉണ്ടാക്കുന്നുണ്ട്. ബസുകൾ രണ്ടിടങ്ങളിലായി യു ടേൺ എടുക്കുന്നതിനിടയിൽ ചെറുവാഹനങ്ങൾ കുരുക്കിൽപ്പെട്ട് നട്ടംതിരിയുകയാണ്. മാർക്കറ്റ് ജംഗ്ഷനിൽ ദേശീയപാതയുടെ പണി നടക്കുമ്പോൾ ഒരു വശത്തേക്കുള്ള വാഹനങ്ങളെയെങ്കിലും അഞ്ഞൂറ്റമ്പലത്തിനു മുന്നിലൂടെയുള്ള തെരു-മെയിൻ ബസാർ റോഡിലൂടെ തിരിച്ചുവിട്ടിരുന്നെങ്കിൽ ഗതാഗതക്കുരുക്കിന് കുറച്ചെങ്കിലും ആശ്വാസമാകുമായിരുന്നുവെന്ന് നാട്ടുകാർ ചൂണ്ടിക്കാട്ടുന്നു. എന്നാൽ ഈ റോഡ് ഇപ്പോൾ നവീകരണത്തിനായി മെറ്റൽ പാകിയ നിലയിൽ അടച്ചിട്ടിരിക്കുകയാണ്. ഒരേസമയത്ത് രണ്ടു റോഡുകളിലും പണി തുടങ്ങിയത് യാത്രാദുരിതം ഇരട്ടിക്കാനിടയാക്കി. നഗരസഭാ അധികൃതർ ഇടപെട്ട് ഈ റോഡിലെ ടാറിംഗ് പെട്ടെന്ന് പൂർത്തിയാക്കി തുറന്നുനല്കണമെന്നാണ് ഇപ്പോഴത്തെ ആവശ്യം.

യുവതിക്കുനേരെ ആസിഡ് ആക്രമണം; പ്രതി തൂങ്ങിമരിച്ചു

കമ്പല്ലൂർ (കാസർഗോഡ്): പട്ടാപ്പകൽ ഫാൻസി സ്റ്റോർ ഉടമയായ യുവതിക്കു നേരെ ആസിഡ് ആക്രമണം. സംഭവത്തിനു പിന്നാലെ പ്രതിയായ യുവാവ് തൂങ്ങിമരിച്ചു. കമ്പല്ലൂർ ഗവ.ഹയർസെക്കൻഡറി സ്കൂളിനു സമീപത്തെ സഞ്ജന സ്റ്റോർ ഉടമ കെ.ജി. ബിന്ദു (44) ആണ് ആക്രമണത്തിനിരയായത്. കമ്പല്ലൂർ സ്വദേശി എം.വി. രതീഷ് എന്ന പച്ചരി രതീഷ് (34) ആക്രമണം നടത്തിയത്. ഇന്നലെ രാവിലെ 11 ഓടെയായിരുന്നു സംഭവം. ഇരുചക്രവാഹനത്തിലാണ് രതീഷ് കമ്പല്ലൂർ സ്കൂൾ പരിസരത്ത് എത്തിയത്. വാഹനത്തിൽ പ്ലാസ്റ്റിക് പാത്രത്തിൽ ആസിഡും പ്ലാസ്റ്റിക്ക് കയറും കരുതിയിരുന്നു. വാഹനം റോഡരികിൽ നിർത്തിയിട്ട ശേഷം പോസ്റ്റ് ഓഫീസ് കെട്ടിടത്തിന് പിറകിലൂടെയാണ് രതീഷ് ബിന്ദുവിന്‍റെ കടയിൽ എത്തിയത്. കൈയിൽ കരുതിയിരുന്ന ആസിഡ് പ്ലാസ്റ്റിക്ക് മഗ്ഗിലേക്ക് മാറ്റി ബിന്ദുവിന് നേരെ ഒഴിക്കുകയായിരുന്നു. നിലവിളി കേട്ടെത്തിയവരാണ് ബിന്ദുവിനെ കണ്ണൂർ ഗവ. മെഡിക്കൽ കോളജിൽ എത്തിച്ചത്. മുഖത്തിന്‍റെ ഇടതുഭാഗത്തും കണ്ണിനും കഴുത്തിനും തുടയ്ക്കും ഗുരുതരമായി പൊള്ളലേറ്റ ബിന്ദുവിനെ ഐസിയുവിൽ പ്രവേശിപ്പിച്ചു. ആസിഡ് ആക്രമണം ബിന്ദുവിന്‍റെ കാഴ്ചശക്തിയെ ബാധിക്കുമോയെന്ന് ആശങ്കയുണ്ടെന്ന് ബന്ധുക്കൾ അറിയിച്ചു. മൂന്നോ നാലോ ദിവസങ്ങൾക്കുശേഷമേ എന്തെങ്കിലും പറയാൻ സാധിക്കുകയുള്ളൂവെന്ന് ഡോക്ടർമാർ പറയുന്നു. സ്ഥലത്തെത്തിയ ചിറ്റാരിക്കാൽ പോലീസ് പ്രതിയായ രതീഷിനെ തിരയുന്നതിനിടയിലാണ് കൊല്ലാടയിലെ പറന്പിലെ മരത്തിൽ തൂങ്ങിമരിച്ച നിലയിൽ കണ്ടെത്തിയത്. രതീഷ് തന്നെ പതിവായി ശല്യം ചെയ്യുന്നെന്ന് കാട്ടി ബിന്ദു ചിറ്റാരിക്കാൽ പോലീസിൽ പരാതി നൽകിയിരുന്നു. ഇതിനു പിന്നാലെയാണ് ആക്രമണമുണ്ടായത്. പെരിങ്ങോത്ത് ടയർ വർക്സ് നടത്തുന്ന രാജേഷിന്‍റെ ഭാര്യയാണ് ബിന്ദു. കുഴൽക്കിണർ ലോറിയിലെ ജീവനക്കാരനാണ് രതീഷ്. കമ്പല്ലൂരിലെ പരേതനായ രാഘവന്‍റേയും എം.വി.തമ്പായിയുടെയും മകനാണ്. സഹോദരങ്ങൾ: പ്രിയ, ലത.

ആശമാരുടെ സമരം ഒത്തുതീർപ്പാക്കണം: കെഎസ്എസ്പിഎ

പരപ്പ: ന്യായമായ അവകാശങ്ങൾ നേടിയെടുക്കാനായി കാസർഗോഡ് നിന്നും തിരുവനന്തപുരത്തേക്ക് രാപകൽ സമരയാത്ര നടത്തുന്ന ആശ പ്രവർത്തകരുടെ സമരം ഒത്തുതീർപ്പാക്കാൻ നടപടി സ്വീകരിക്കണമെന്ന് കെഎസ്എസ്പിഎ പരപ്പ മണ്ഡലം കമ്മിറ്റി യോഗം ആവശ്യപ്പെട്ടു. സംസ്ഥാന കമ്മിറ്റി അംഗം ടി.കെ. എവുജിൻ ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് മാത്യു സേവ്യർ അധ്യക്ഷത വഹിച്ചു. ബി.റഷീദ, എം.കെ. ദിവാകരൻ, കെ. കുഞ്ഞമ്പു നായർ, പി.എ. ജോസഫ്, ജോസുകുട്ടി അറക്കൽ, ആലീസ് കുര്യൻ, സി.എ.ജോസഫ്, എ.കെ. ജയിംസ്, പി.ജെ. ജോസ്, വി.ജെ. ജോർജ്, സി.വി.ശ ്രീധരൻ, സി.ജെ. ജയിംസ് എന്നിവർ പ്രസംഗിച്ചു.

വലിയ പാമത്തട്ടിലെ 14 കുടുംബങ്ങൾക്ക് പട്ടയം ലഭ്യമാക്കാൻ നിവേദനം നൽകി

വെള്ളരിക്കുണ്ട്: ബളാൽ പഞ്ചായത്ത് ഒൻപതാം വാർഡിലെ വലിയ പാമത്തട്ടിലെ 14 കുടുംബങ്ങൾക്ക് പട്ടയം ലഭിക്കാനുള്ള നിയമതടസം മാറ്റാൻ ഇടപെടണമെന്നും അഞ്ചാം വാർഡിലെ മരുതോം-കപ്പള്ളി റോഡ് കൽവെർട്ടുകൾ പണിത് ടാറിംഗ് ചെയ്ത് ഗതാഗതയോഗ്യമാക്കുന്നതിന് കാസർഗോഡ് വികസന പാക്കേജിൽ ഉൾപ്പെടുത്തി ഫണ്ട് അനുവദിക്കണമെന്നാവശ്യപ്പെട്ട് ജില്ലാകളക്ടർ കെ.ഇന്പാശേഖറിന് ബളാൽ പഞ്ചായത്ത് പ്രസിഡന്‍റ് രാജു കട്ടക്കയം നിവേദനം നൽകി. മണ്ഡലം കോൺഗ്രസ് പ്രസിഡന്‍റ് എം.പി.ജോസഫ്, വാർഡ് മെംബർമാരായ ബിൻസി ജെയിൻ, മോൻസി ജോയി, പ്രദേശവാസികളായ ബെന്നി കിഴക്കേൽ, ബാലകൃഷ്ണൻ മരുതോം, രാജൻ മരുതോം എന്നിവരും ഒപ്പമുണ്ടായിരുന്നു.

നഴ്‌സസ് വാരാഘോഷം ആരംഭിച്ചു

കാഞ്ഞങ്ങാട്: അന്താരാഷ്ട്ര നഴ്‌സസ് വരാഘോഷത്തിന്‍റെ ജില്ലാതല പരിപാടികള്‍ക്ക് കാഞ്ഞങ്ങാട് തിരി തെളിഞ്ഞു. ജില്ലയിലെ വിവിധ ആരോഗ്യ സ്ഥാപനങ്ങളിലെ നഴ്‌സിംഗ് ഓഫീസര്‍മാരും പബ്ലിക് ഹെല്‍ത്ത് നഴ്‌സുമാരും നഴ്‌സിംഗ് കോളേജ്കളിലെയും സ്‌കൂള്‍ ഓഫ് നഴ്സിംഗിലെയും അധ്യാപകരും വിദ്യാര്‍ഥികളും അണിനിരന്ന വിളംബര ജാഥയോടെ ആരംഭിച്ച വരാഘോഷ പരിപാടികളുടെ ഔപചാരിക ഉദ്ഘാടനം കാഞ്ഞങ്ങാട് ബ്ലോക്ക് കോണ്‍ഫറന്‍സ് ഹാളില്‍ ജില്ലാ മെഡിക്കല്‍ ഓഫീസര്‍ ഇന്‍ ചാര്‍ജ് ഡോ.ബി.സന്തോഷ് നിര്‍വഹിച്ചു. ജില്ലാ എംസിഎച്ച് ഓഫീസര്‍ എം.ശോഭന പതാക ഉയര്‍ത്തി. ജില്ലാ നഴ്‌സിംഗ് ഓഫീസര്‍ ചുമതലയുള്ള എ.ലത നഴ്‌സസ് പ്രതിജ്ഞ ചൊല്ലി. കാഞ്ഞങ്ങാട് ഗവ.നഴ്‌സിംഗ് സ്‌കൂള്‍ പ്രിന്‍സിപ്പല്‍ സി.പി.കെ.ജയപ്രകാശ് അധ്യക്ഷതവഹിച്ചു. ജില്ലാ ആശുപത്രി സൂപ്രണ്ട് ഡോ.എം.പി.ജീജ, ജില്ലാ ആശുപത്രി നഴ്‌സിംഗ് സൂപ്രണ്ട് ടി.വി.സ്‌നേഹലത, ജില്ലാ പാലിയേറ്റീവ് കോഓര്‍ഡിനേറ്റര്‍ ഷിജി ശേഖര്‍, സീനിയര്‍ നഴ്‌സിംഗ് ഓഫീസര്‍ പി.ബിനി, കെജിഎന്‍എ സംസ്ഥാന സെക്രട്ടറിയേറ്റ് അംഗം പി. വി.പവിത്രന്‍, നഴ്‌സിംഗ് ഓഫീസര്‍ പി.വിജേഷ് കുമാര‍ എന്നവര്‍ സംസാരിച്ചു. തുടര്‍ന്ന് നടന്ന സാംസ്‌കാരിക സദസില്‍ വത്സന്‍ പിലിക്കോട് മുഖ്യപ്രഭാഷണം നടത്തി.

നൃത്തവേദിയുടെ മനം കവർന്ന് നിതാര

പെരിയ: ഗോകുലം ഗോശാലയിൽ നടന്നുവരുന്ന വൈശാഖനടനം ദേശീയ നൃത്തോത്സവത്തിൽ വേദിയുടെയും സദസ്സിന്‍റെയും മനസ് കവർന്ന് ദുബായിൽ നിന്നെത്തിയ പതിനൊന്നുകാരി നിതാരയുടെ ഭരതനാട്യം. നൃത്താധ്യാപിക പൂജാ ഉണ്ണിക്കൊപ്പമെത്തിയ നിതാര ഭാവാഭിനയത്തിലും ചുവടുകളിലും പ്രായത്തെ വെല്ലുന്ന പ്രകടനമാണ് കാഴ്ചവെച്ചത്. ശ്രീലത നിക്ഷിത്തിന്‍റെ നേതൃത്വത്തിൽ ബംഗളൂരുവിൽ നിന്നുള്ള നടനതരംഗിണി സംഘം അവതരിപ്പിച്ച കാമധേനുവൈഭവം എന്ന നൃത്തസംഗീത നാടകവും ശ്രദ്ധേയമായി. ഇന്നലെ അമൃത വാസുദേവൻ, എസ്.മാനസ, അനിന്ദിത കുളൂർ, സുപ്രിയ ശിവരുദ്രപ്പ ബംഗളൂരു, വിധാത്രി ഭട്ട് മംഗളൂരു, വാണി അനീഷ് കാക്കനാട്, മഞ്ജു വി.നായർ, ലിബിൻ ബെന്നി, നവ്യ ഭട്ട് എന്നിവരും വിവിധ നൃത്തസംഘങ്ങളും ഭരതനാട്യവും അശ്വിനി നമ്പ്യാർ കുച്ചുപ്പുടിയും മുംബൈ ഐശ്വര്യ ഹരീഷ് ഭരതനൃത്യവും ഗുരുവായൂർ ഗംഗാമൃതം സംഘം തിരുവാതിരയും അവതരിപ്പിച്ചു. ജില്ലയിലെ മുതിർന്ന നൃത്താധ്യാപകനായ നീലേശ്വരം രാജു മാസ്റ്ററെ ആദരിച്ചു. ഇന്ന് എം.സ്ഫൂർത്തി, എം.പ്രീതി, മമത പൈ ബംഗളൂരു, ചൈത്ര അരവിന്ദും സംഘവും, അനുശ്രീ, ശ്രവ്യ ബംഗളൂരു, മാളവിക, ശ്രുതി നൃത്തവിദ്യാലയം, വാഗേയ നൃത്തവിദ്യാലയം, ഗോപിക ഗോവിന്ദ്, വൈഷ്ണവി മുകുന്ദ്, അനഘ ഭട്ട്, മിഹിര ഭട്ട്, ദേവിക സജീവൻ, രാധിക കല്ലൂരായ, മധുചന്ദ്ര എന്നിവർ ഭരതനാട്യം അവതരിപ്പിക്കും. ബിന്ദു മാരാരുടെ ശിക്ഷണത്തിലുള്ള ക്ഷേത്രകലാ അക്കാദമിയുടെ മോഹിനിയാട്ടവും അഞ്ജന ആനന്ദിന്‍റെ കുച്ചുപ്പുടിയും ഉണ്ടാകും.

കായികരംഗത്ത് വൈഎംസിഎയുടേത് നിസ്തുല സംഭാവനകൾ : റെജി ഇടയാറന്മുള

പരപ്പ: ജീവകാരുണ്യ പ്രവര്‍ത്തനരംഗത്ത് മാത്രമല്ല കായികരംഗത്തും വൈ എംസിഎ ലോകത്തിന് സ്ഥായിയായ സംഭാവനകള്‍ നല്‍കിയിട്ടുണ്ടെന്ന് വൈ എം സി എ ദേശീയ ട്രഷറര്‍ റെജി ഇടയാറന്മുള. കായികവിനോദങ്ങളായ ബാസ്കറ്റ്ബോളും വോളിബോളും കണ്ടുപിടിച്ച് വികസിപ്പിച്ച് ലോകത്തിന് സമര്‍പ്പിച്ചത് വൈഎംസിഎയാണ്. 1924 ല്‍ ഫ്രാന്‍സില്‍ നടന്ന ഒളിമ്പിക്സിന് കായികതാരങ്ങളെ തെരഞ്ഞെടുത്ത് പരിശീലിപ്പിച്ച് വൈഎംസിഎ ഇന്ത്യാരാജ്യത്തിന് നല്‍കിയതിന്‍റെ കാസർഗോഡ് സബ് റീജിയണ്‍തല ശതാബ്ദിയാഘോഷം പരപ്പ വൈഎംസിഎ ഹാളില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സബ് റീജിയണ്‍ ചെയര്‍മാന്‍ സണ്ണി മാണിശേരി അധ്യക്ഷതവഹിച്ചു. ഫാ.ജയിംസ് മൂന്നാനപ്പള്ളി, ഫാ.ജോബിന്‍ കൊട്ടാരത്തില്‍, വൈഎംസിഎ കേരള റീജിയണ്‍ മുന്‍ വൈസ് ചെയര്‍മാന്‍ മാനുവല്‍ കുറിച്ചിത്താനം, പരപ്പ വൈഎംസിഎ പ്രസിഡന്‍റ് ജോസ് പാലക്കുടി, ജോയി കളരിക്കല്‍, പി.എം. അഗസ്റ്റിൻ, ഡോ.കെ.എം.തോമസ്, വി.എം.മത്തായി, ജിയോ ജേക്കബ്, സിബി വാഴക്കാല, ജയിംസ് ആലക്കുളം, കെ.എ.സാലു, ചെറിയാന്‍ ഊത്തപ്പാറക്കല്‍, ഷിജിത് കുഴിവേലി, ബേബി മാടപ്പള്ളി എന്നിവര്‍ പ്രസംഗിച്ചു. സി.എം.ബൈജു സ്വാഗതം പറഞ്ഞു.

അപേക്ഷകളില്‍ കാലതാമസമരുത്: ആന്‍റണി രാജു

കാസര്‍ഗോഡ്: സാധാരണക്കാര്‍ നല്‍കുന്ന നിയമപരമായ അപേക്ഷകളിലെ ന്യൂനതകള്‍ പരിഹരിച്ച് ശരിയായ രീതിയില്‍ പരാതി പരിഹരിക്കാന്‍ ആവശ്യമായ നടപടികളും നിയമങ്ങളും നിര്‍ദേശിക്കാന്‍ ഉദ്യോഗസ്ഥര്‍ തന്നെ മുന്‍കൈ എടുക്കണമെന്നും കേരള നിയമസഭയുടെ ഹര്‍ജികള്‍ സംബന്ധിച്ച സമിതി ചെയര്‍മാന്‍ ആന്‍റണി രാജു എംഎല്‍എ. കേരള നിയമസഭയുടെ ഹര്‍ജികള്‍ സംബന്ധിച്ച സമിതിയുടെ തെളിവെടുപ്പ് കളക്ടറേറ്റ് കോണ്‍ഫറന്‍സ് ഹാളില്‍നത്തിയ തെളിവെടുപ്പില്‍ സംസാരിക്കുകയായിരുന്നു അദ്ദേഹം. വര്‍ഷങ്ങളായി പട്ടയം ലഭിക്കാതെ കിടന്ന നിരവധിഹര്‍ജികളില്‍ സമയബന്ധിതമായി പട്ടയം നല്‍കുന്നതിനുള്ള നടപടികള്‍ പൂര്‍ത്തിയാക്കാന്‍ സമിതിയുടെ തെളിവെടുപ്പിലൂടെ സാധിച്ചു. ജില്ലയില്‍ ലഭിച്ച പരാതികളിലേറെയും ഭൂമിയുമായി ബന്ധപ്പെട്ടവയായിരുന്നു. അവയില്‍ പലതും ഉദ്യോഗസ്ഥരുടെ അനാസ്ഥയെ തുടര്‍ന്ന് പരിഹാരമാകാതെ കിടക്കുന്നത് ശ്രദ്ധയില്‍ പെട്ടിട്ടുണ്ട്. പുതിയ 10 പരാതികള്‍ സ്വീകരിച്ചു. പുതിയപരാതികളടക്കം 31 പരാതികള്‍ സമിതി പരിഗണിച്ചു. ജില്ലാ കളക്ടറുടെ നേതൃത്വത്തില്‍ റവന്യൂ വകുപ്പിന്‍റെ പരാതികളിന്‍മേല്‍ സമയബന്ധിതമായ ഇടപെടല്‍ നടത്തുമെന്ന ഉറപ്പ് സമിതിക്ക് ലഭിച്ചുവെന്നും എംഎല്‍എ പറഞ്ഞു. സമിതി അംഗങ്ങളായ ജി.എസ്.ജയലാല്‍ എംഎല്‍എ, എം.രാജഗോപാലന്‍ എംഎല്‍എ, തോട്ടത്തില്‍ രവീന്ദ്രന്‍ എംഎല്‍എ, കെ.കെ.രമ എംഎല്‍എ എന്നിവരും കാസര്‍ഗോഡ് എംഎല്‍എ എന്‍.എ.നെല്ലിക്കുന്ന്, ജില്ലാ കളക്ടര്‍ കെ.ഇമ്പശേഖര്‍, എഡിഎം പി.അഖില്‍ എന്നിവരും യോഗത്തില്‍ പങ്കെടുത്തു. സ്വാതന്ത്ര്യസമരസേനാനി ചന്തുവിന്‍റെ ഭൂമി പതിച്ച് നല്‍കും സ്വാതന്ത്ര്യസമര സേനാനിയായിരുന്ന തന്‍റെ അച്ഛന്‍റെ ഓര്‍മ്മകളുറങ്ങുന്ന വീടും പുരയിടവും തങ്ങള്‍ക്ക് വേണം എന്ന ആവശ്യവുമായാണ് കിനാനൂര്‍ വില്ലേജിലെ വി.നാരായണന്‍ സമിതിക്ക് മുന്നിലെത്തിയത്. 15 സെന്‍റ് സ്ഥലവും വീടുമാണ് നാരായണന്‍ ആവശ്യപ്പെട്ടത്. വിഷയം നേരത്തെ തന്നെ സമിതി പരിശോധിക്കുകയും ഭൂമി പതിച്ച് നല്‍കുന്നതുമായി ബന്ധപ്പെട്ടുള്ള നടപടിയുടെ നിയമ വശങ്ങള്‍ അന്വേഷിക്കുകയുയും ചെയ്തിരുന്നു. വിഷയത്തില്‍ അപേക്ഷ വെള്ളരിക്കുണ്ട് താലൂക്ക് ഭൂപതിവ് കമ്മറ്റിയില്‍ ഉള്‍പ്പെടുത്തിയിട്ടുണ്ടെന്നും മരണപ്പെട്ട സ്വാതന്ത്ര്യസമരസേനാനി വി. ചന്തുവിന്‍റെ ഓര്‍മ്മകള്‍ ഉറങ്ങുന്ന ഭൂമി മകനായ നാരായണന് ലഭിക്കുമെന്നും താഹസില്‍ദാര്‍ അറിയിച്ചു.

ആശ പ്രവർത്തകരുടെ രാപകൽ സമരയാത്രയ്ക്ക് സ്വീകരണം നൽകി

പരപ്പ: ആശ പ്രവർത്തകരുടെ രാപകൽ സമരയാത്രയ്ക്ക് പരപ്പയിൽ സ്വീകരണം നല്കി. കെഎസ്എസ്പിഎ സംസ്ഥാന കമ്മിറ്റിയംഗം ടി.കെ. എവുജിൻ ഉദ്ഘാടനം ചെയ്തു. ആലീസ് കുര്യൻ അധ്യക്ഷത വഹിച്ചു. കേരള ആശ ഹെൽത്ത് വർക്കേഴ്സ് അസോസിയേഷൻ സംസ്ഥാന വൈസ് പ്രസിഡന്‍റ് കെ.പി.റോസമ്മ, ജില്ലാ സ്വാഗതസംഘം ചെയർമാൻ വി.കെ.രവീന്ദ്രൻ, സിഎംപി സെൻട്രൽ എക്സിക്യൂട്ടീവ് അംഗം ടി.വി.ഉമേശൻ, ജനകീയ പ്രതിരോധ സമിതി നേതാവ് മാധവൻ മാസ്റ്റർ, കെ.ജെ.ഷീല എന്നിവർ പ്രസംഗിച്ചു. ആശ പ്രവർത്തകരായ സരസ്വതി, രേഖ, ഐഎൻടിയുസി നേതാവ് പുഷ്പൻ ചാങ്ങാട് എന്നിവർ യാത്രയെ സ്വീകരിച്ചു. യാത്രയ്ക്ക് നേതൃത്വം നല്കുന്ന കേരള ആശ ഹെൽത്ത് വർക്കേഴ്സ് അസോസിയേഷൻ സംസ്ഥാന ജനറൽ സെക്രട്ടറി എം.എ.ബിന്ദു നന്ദിപ്രസംഗം നടത്തി.

കോണ്‍ഗ്രസ് ബഹുജനമാര്‍ച്ച് നടത്തി

കാസര്‍ഗോഡ്: അഴിമതിയും ധൂര്‍ത്തും സ്വജനപക്ഷപാതവും മുഖമുദ്രയാക്കിയ പിണറായി വിജയന്‍ മുഖ്യമന്ത്രി സ്ഥാനം രാജി വെക്കണമെന്നാവശ്യപ്പെട്ട് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ കളക്ടറേറ്റിലേക്ക് ബഹുജന മാര്‍ച്ച് നടത്തി. കെപിസിസി ജനറല്‍ സെക്രട്ടറി സോണി സെബാസ്റ്റ്യന്‍ ഉദ്ഘാടനം ചെയ്തു. ഡിസിസി പ്രസിഡന്‍റ് പി.കെ.ഫൈസല്‍ അധ്യക്ഷ വഹിച്ചു. ഹക്കീം കുന്നില്‍, എ. ഗോവിന്ദന്‍ നായര്‍. കെ. നീലകണ്ഠന്‍, എം. അസൈനാര്‍, രമേശന്‍ കരുവാച്ചേരി, കരിമ്പില്‍ കൃഷ്ണന്‍, കെ.വി. ഗംഗാധരന്‍, മീനാക്ഷി ബാലകൃഷ്ണന്‍, ശാന്തമ്മ ഫിലിപ്പ്, പി.ജി. ദേവ്, കെ.കെ. രാജേന്ദ്രന്‍, സാജിദ് മൗവ്വല്‍, ജയിംസ് പന്തമാക്കല്‍, ബി.പി. പ്രദീപ്കുമാര്‍, എം.സി. പ്രഭാകരന്‍, പി.വി. സുരേഷ്, ടോമി പ്ലാച്ചേരി ,ജെ.എസ്. സോമശേഖര, സി.വി. ജയിംസ്, ഹരീഷ് പി. നായര്‍,ഗീത കൃഷണന്‍, ധന്യ സുരേഷ്, ജോയ് ജോസഫ്, മധുസൂദനന്‍ ബാലൂര്‍, രാജു കട്ടക്കയം, കെ. ആര്‍ കാര്‍ത്തികേയന്‍, മിനി ചന്ദ്രന്‍ എന്നിവര്‍ സംസാരിച്ചു.

ഇരുചക്രവാഹനങ്ങൾ മുതൽ ലൈൻ ബസുകൾ വരെ; ദേശീയപാതയുടെ സർവീസ് റോഡുകളിൽ തിരക്കേറും

കാസർഗോഡ്: ഉദ്ഘാടനത്തിനൊരുങ്ങുന്ന പുതിയ ആറുവരി ദേശീയപാതയിൽ ഇരുചക്രവാഹനങ്ങൾക്ക് പ്രവേശനമുണ്ടാവില്ലെന്ന കാര്യം ഏതാണ്ടുറപ്പായി. ഇരുവശങ്ങളിലേക്കുമുള്ള മൂന്നുവരിപ്പാതയിൽ ഇരുചക്രവാഹനങ്ങൾക്കായി പ്രത്യേക ട്രാക്ക് കൂടി അനുവദിക്കാനുള്ള സ്ഥലമില്ലാത്തതിനാൽ അവ സർവീസ് റോഡുകൾ ഉപയോഗിച്ചാൽ മതിയെന്നാണ് ദേശീയപാത അഥോറിറ്റിയുടെ നിലപാട്. എന്നാൽ പാലങ്ങളിൽ സർവീസ് റോഡുകളില്ലാത്തതിനാൽ അവിടങ്ങളിൽ മാത്രം ദേശീയപാതയിലേക്ക് പ്രവേശിക്കാൻ ഇരുചക്രവാഹനങ്ങളെ അനുവദിക്കും. രാജ്യത്തെ എക്സ്പ്രസ് ഹൈവേകളിലൊന്നും ഇരുചക്രവാഹനങ്ങളെ അനുവദിക്കാറില്ല. കൂടിയ വേഗതയിൽ വാഹനങ്ങളോടിക്കാൻ അനുമതിയുള്ള പാതകളിൽ ഇരുചക്രവാഹനങ്ങളുടെ സാന്നിധ്യം അപകടസാധ്യത വർധിപ്പിക്കുമെന്ന വിലയിരുത്തലിന്‍റെ കൂടി അടിസ്ഥാനത്തിലാണ് ഇത്. അതേസമയം കന്യാകുമാരിയിൽ നിന്ന് കാഷ്മീരിലേക്കും മറ്റും സാഹസിക ബൈക്ക് യാത്രകൾ നടത്തുന്നവർക്ക് മുൻകൂർ അപേക്ഷകളുടെ അടിസ്ഥാനത്തിൽ പ്രത്യേക അനുമതി നല്കിയേക്കും. ഇവർ കൃത്യമായ സുരക്ഷാ സംവിധാനങ്ങൾ പാലിക്കുന്നുണ്ടെന്ന കാര്യവും ഉറപ്പുവരുത്തും. സർവീസ് റോഡുകളിലും ഇരുചക്രവാഹനങ്ങൾക്കായി പ്രത്യേക ട്രാക്ക് അനുവദിക്കില്ല. മറ്റു സംസ്ഥാനങ്ങളിൽ 60 മീറ്റർ വീതിയിൽ നിർമിച്ച പുതിയ ദേശീയപാത കേരളത്തിൽ 45 മീറ്ററിലേക്ക് ചുരുങ്ങിയപ്പോൾ ഏറ്റവുമധികം ഞെരുങ്ങിയത് സർവീസ് റോഡുകളാണ്. സർവീസ് റോഡുകളിൽ ഇരുവശങ്ങളിലേക്കും ഗതാഗതം അനുവദിക്കാമെന്നതാണ് ദേശീയപാത അഥോറിറ്റിയുടെ പൊതുവേയുള്ള ചട്ടമെങ്കിലും സംസ്ഥാനത്ത് മിക്കയിടങ്ങളിലും ഒറ്റവരി ഗതാഗതം മാത്രം സാധ്യമാകുന്ന വീതിയിലാണ് സർവീസ് റോഡുകൾ നിർമിച്ചിട്ടുള്ളത്. ഇരുചക്രവാഹനങ്ങൾ മുതൽ സ്റ്റോപ്പുകളിൽ ആളെയിറക്കാനെത്തുന്ന ലൈൻ ബസുകൾ വരെ ഇതുവഴിയാണ് പോകേണ്ടിവരിക. ഓട്ടോറിക്ഷകൾക്ക് ദേശീയപാതയിൽ പ്രവേശിക്കാൻ വിലക്കില്ലെങ്കിലും പൊതുവേ ഹ്രസ്വദൂര യാത്രകൾ നടത്തുമ്പോൾ സർവീസ് റോഡുകളിലൂടെ തന്നെ പോകേണ്ടിവരും. ബസുകൾക്ക് പൊതുവേ ദേശീയപാതയിലൂടെ പോകാമെങ്കിലും സ്റ്റോപ്പുകളിൽ ആളെയിറക്കാനും കയറ്റാനും മിക്കയിടങ്ങളിലും സർവീസ് റോഡുകളിൽ പ്രവേശിക്കേണ്ടിവരും. പുതിയ ദേശീയപാതയിൽ ബസ് ഷെൽട്ടറുകൾ സ്ഥാപിക്കുന്നത് സർവീസ് റോഡുകളോടു ചേർന്നാണ്. ഹ്രസ്വദൂര ബസുകൾക്ക് പലപ്പോഴും സർവീസ് റോഡുകളിലൂടെ തന്നെയാകും പോകേണ്ടിവരിക. പാതയോരത്തെ കടകളിലും വീടുകളിലും സാധനങ്ങൾ ഇറക്കാനെത്തുന്ന കണ്ടയ്നർ ലോറികൾ മുതൽ പാഴ്സൽ വാനുകൾ വരെയുള്ള വാഹനങ്ങൾക്കും ടിപ്പർ ലോറികൾക്കുമെല്ലാം ദേശീയപാതയിൽ നിന്നിറങ്ങി സർവീസ് റോഡുകളിലൂടെ സഞ്ചരിക്കേണ്ടിവരും. കാറുകളടക്കമുള്ള സ്വകാര്യ വാഹനങ്ങൾക്കും ദേശീയപാതയിൽ നിന്ന് മറ്റു വഴികളിലേക്ക് തിരിയണമെങ്കിൽ കുറച്ചുദൂരമെങ്കിലും സർവീസ് റോഡുകളിലൂടെ പോകേണ്ടിവരും. ഇത്രയേറെ വാഹനങ്ങളുടെ തിരക്ക് താങ്ങാൻ ഒറ്റവരി സർവീസ് റോഡുകൾക്ക് കഴിയുമോ എന്ന ചോദ്യം ഇപ്പോൾതന്നെ പലയിടങ്ങളിലും ഉയർന്നുകഴിഞ്ഞു. സ്കൂൾകുട്ടികളടക്കമുള്ളവരുടെ സൈക്കിളുകളുടെയും ബസ് കയറാനും ഇറങ്ങാനും എത്തുന്നവരുടെയും കാൽനടയാത്രക്കാരുടെയും തിരക്ക് ഇതിനു പുറമേയും. പാലങ്ങളിലെത്തുമ്പോൾ സർവീസ് റോഡുകളിലെ വാഹനങ്ങളെല്ലാം ദേശീയപാതയിലേക്ക് പ്രവേശിക്കേണ്ടിവരുന്നത് കൂടുതൽ ഗതാഗതക്കുരുക്കിനും അപകടസാധ്യതയ്ക്കും വഴിവെക്കുമെന്ന ആശങ്കയും ഉയർന്നിട്ടുണ്ട്. ജില്ലയിൽ പലയിടങ്ങളിലും രണ്ടുവരിയിൽ മാത്രം ഗതാഗതം സാധ്യമാകുന്ന പഴയ പാലങ്ങൾ അതേപടി നിലനിർത്തിയിരിക്കുകയാണ്. പുതിയ ദേശീയപാതയിലൂടെ സാമാന്യം വേഗതയിൽ മൂന്നുവരിയായെത്തുന്ന വാഹനങ്ങൾ പാലങ്ങളിലെത്തുമ്പോൾ പെട്ടെന്ന് രണ്ടുവരിയിലേക്ക് ചുരുങ്ങേണ്ടിവരുന്നതിനൊപ്പമാണ് സർവീസ് റോഡുകളിൽ നിന്നുള്ള വാഹനങ്ങൾ കൂടി ഇതിനിടയിലെത്തുന്നത്. പാലങ്ങളുടെ കാര്യത്തിൽ സുരക്ഷാ സംവിധാനങ്ങളും വേഗത നിയന്ത്രിക്കാനുള്ള ഉപാധികളും സ്ഥാപിക്കുകയല്ലാതെ തത്കാലം മറ്റൊന്നും ചെയ്യാനാകാത്ത അവസ്ഥയാണ്. എന്നാൽ സർവീസ് റോഡുകളുടെ വീതി രണ്ടുവരി ഗതാഗതമെങ്കിലും സാധ്യമാകുന്ന തരത്തിൽ കൂട്ടണമെന്ന ആവശ്യം ഇപ്പോൾതന്നെ പലയിടങ്ങളിലും ഉയർന്നുകഴിഞ്ഞു. ദേശീയപാതയുടെ ആദ്യറീച്ച് ഏതാണ്ട് പൂർത്തിയായ കുമ്പള, മൊഗ്രാൽപുത്തൂർ പഞ്ചായത്തുകളിലും കാസർഗോഡ് നഗരസഭയിലും ഈ ആവശ്യം ഉയർന്നിട്ടുണ്ട്. ബന്ധപ്പെട്ട തദ്ദേശസ്ഥാപനങ്ങൾ ഇടപെട്ട് പാതയോരത്ത് കൂടുതൽ ഭൂമി ഏറ്റെടുത്ത് സർവീസ് റോഡുകളുടെ വീതി കൂട്ടണമെന്നാണ് ആവശ്യം. പുതിയ ദേശീയപാത പൂർത്തിയാകുന്നതോടെ കൂടുതൽ സ്ഥലങ്ങളിൽ ഈ ആവശ്യം ഉയർന്നുവരാനാണ് സാധ്യത.

ലോറിയുടെ പിറകിലിടിച്ച് സ്‌കൂട്ടര്‍ യാത്രികന്‍ മരിച്ചു

മഞ്ചേശ്വരം: ലോറിയുടെ പിന്നില്‍ സ്‌കൂട്ടറിടിച്ച് യുവാവ് മരിച്ചു. ഉപ്പള ഐലയിലെ കല്‍പേഷ്(35) ആണ് മരിച്ചത്. ഇന്നലെ രാവിലെ കുഞ്ചത്തൂരിലാണ് അപകടമുണ്ടായത്. ഉമേഷ്-സരയു ദമ്പതികളുടെ മകനായ കല്‍പേഷ് മംഗളൂവിലെ സ്വകാര്യ സ്ഥാപനത്തിലെ ജീവനക്കാരനാണ്. ഭാര്യ: സ്വാതി. സഹോദരി: പൂര്‍ണിമ.

നിറമാര്‍ന്ന ഓര്‍മയായി അര്‍ജുന്‍

ബേക്കല്‍: ഈ പിറന്നാളിനും മകനായി ഒരു സര്‍പ്രൈസ് സമ്മാനം അവരൊരുക്കി. വര്‍ണങ്ങള്‍ വാരിവിതറിയ ഒരു ചിത്രമതില്‍. കഴിഞ്ഞ 10 വര്‍ഷമായി ആ അച്ഛനും അമ്മയും മകന്‍റെ പിറന്നാള്‍ ആഘോഷിക്കുന്നത് ഇങ്ങനെയാണ്. അകാലത്തില്‍ പൊലിഞ്ഞുപോയ യുവചിത്രകാരന്‍ അര്‍ജുന്‍ കെ.ദാസിന്‍റെ ഓര്‍മയ്ക്കായാണ് അച്ഛന്‍ മോഹന്‍ദാസിന്‍റെയും അമ്മ കരുണയുടെയും നേതൃത്വത്തില്‍ ചിത്രമതില്‍ ഒരുക്കിയത്. കാസര്‍ഗോഡിന്‍റെ സാംസ്‌കാരിക പശ്ചാത്തലമാണ് ബേക്കല്‍ ബീച്ചിലെ ചുവരുകളില്‍ അടയാളപ്പെടുത്തിയത്. അഹമ്മദാബാദ് നാഷണല്‍ ഇന്‍സ്റ്റിറ്റ്യൂട്ട് ഓഫ് ഡിസൈനിലെ വിദ്യാര്‍ത്ഥികളായ അര്‍ജുന്‍റെ സുഹൃത്തുക്കളും പത്തോളം ചിത്രകാരന്‍മാരുമാണ് വര്‍ണമതില്‍ സാക്ഷാത്കരിച്ചത്. ടൂറിസം മേഖലക്ക് കൂടി മുതല്‍ക്കൂട്ടാകുന്ന പ്രവര്‍ത്തനങ്ങള്‍ക്ക് പിന്തുണയുമായി ബിആര്‍ഡിസിയും അണിനിരന്നു. നാലുദിവസമെടുത്താണ് ഈ ചിത്രങ്ങള്‍ പൂര്‍ത്തിയാക്കിയത്. 2015നു ജൂണ്‍ 20നാണ് സിക്കിമിലെ ഗാംഗ്‌ടോക്കിലാണ് അര്‍ജുന്‍ മരണപ്പെടുന്നത്. അതിനുശേഷംഎല്ലാ വര്‍ഷവും ജന്മദിനമായ മെയ് രണ്ടിന് എല്ലാവരും ഒത്തുകൂടും. അര്‍ജുന്‍ അതുവരെ വരച്ചുതീര്‍ത്ത ചിത്രങ്ങളുടെ പ്രദര്‍ശനമായിരുന്നു ആദ്യ വര്‍ഷങ്ങളില്‍ നടന്നത്. കാഞ്ഞങ്ങാട്, പയ്യന്നൂര്‍, കണ്ണൂര്‍, കോഴിക്കോട്, ഗാംഗ്‌ടോക്ക് എന്നിവിടങ്ങളില്‍ അര്‍ജുന്‍റെ ചിത്രങ്ങളുമായി ഇവരെത്തി. ചിത്രകാരന്‍മാരുടെ സംഗമവും കുട്ടികള്‍ക്കുള്ള മത്സരങ്ങളുമെല്ലാം അര്‍ജുന്‍ ദാസ് ഫൗണ്ടേഷന്‍റെ നേതൃത്വത്തില്‍ സംഘടിപ്പിച്ചു. കഴിഞ്ഞ മൂന്നുവര്‍ഷമായി വിവിധ കേന്ദ്രങ്ങളില്‍ ചിത്രമതില്‍ ഒരുക്കുകയാണ്. കോഴിക്കോട് സരോവരം പാര്‍ക്കിലും കണ്ണൂര്‍ റെയില്‍വേ സ്റ്റേഷന്‍ പരിസരത്തും ഇത്തരം ചിത്രമതില്‍ ഒരുക്കിയിരുന്നു. ബേക്കല്‍ ബീച്ച് പാര്‍ക്കിലെ ചിത്രമതില്‍ സി.എച്ച്.കുഞ്ഞമ്പു എംഎല്‍എ ഉദ്ഘാടനം ചെയ്തു. ജി.എസ്.പ്രദീപ് മുഖ്യാതിഥിയായിരുന്നു. ലളിതകല അക്കാദമി സെക്രട്ടറി എബി എന്‍.ജോസഫ്, ബ്ലോക്ക് പഞ്ചായത്ത് പ്രസിഡന്‍റ് കെ.മണികണ്ഠന്‍, ബിആര്‍ഡിസി എംഡി പി.ഷിജിന്‍, അനസ് മുസ്തഫ, ബാലന്‍ പടിയൂര്‍ എന്നിവര്‍ സംസാരിച്ചു.

വടംവലി മത്സരം നടത്തി

പാലാവയൽ: ദർശന ആർട്സ് ആന്‍റ് സ്പോർട്സ് ക്ലബിന്‍റെ ഒന്നാം വാർഷികാഘോഷത്തോടനുബന്ധിച്ച് നടത്തുന്ന കാരുണ്യ പ്രവർത്തനങ്ങളുടെ ധനശേഖരണാർത്ഥം കണ്ണൂർ-കാസർഗോഡ് ജില്ലാതല വടംവലി മത്സരം സംഘടിപ്പിച്ചു. പുരുഷ വിഭാഗത്തിൽ യുവധാര നടുവിലും വനിതാ വിഭാഗത്തിൽ ഇഎംഎസ് ചീമേനിയും ജേതാക്കളായി. ചിറ്റാരിക്കാൽ പോലീസ് ഇൻസ്പെക്ടർ രഞ്ജിത്ത് രവീന്ദ്രൻ മത്സരങ്ങൾ ഉദ്ഘാടനം ചെയ്തു. ക്ലബ് പ്രസിഡന്‍റ് മനോജ് ചിറ്റടിയിൽ അധ്യക്ഷത വഹിച്ചു. പഞ്ചായത്ത് അംഗങ്ങളായ വി.ബി ബാലചന്ദ്രൻ, പ്രശാന്ത് പാറേക്കുടിയിൽ, സെന്‍റ് ജോൺസ് എച്ച്എസ്എസ് പ്രിൻസിപ്പൽ മെൻഡലിൻ മാത്യു, എൽപി സ്കൂൾ മുഖ്യാധ്യാപിക എം.വി.ഗീതമ്മ, സിബി ഓലിക്കൽ, റെന്നി വേലിക്കകത്ത് എന്നിവർ പ്രസംഗിച്ചു. പാലാവയൽ സെന്‍റ് ജോൺസ് പള്ളി അസി.വികാരി ഫാ.അമൽ ചെമ്പകശേരിൽ സമ്മാനങ്ങൾ വിതരണം ചെയ്തു.

കമ്യൂണിസ്റ്റ് പാര്‍ട്ടിക്ക് ശത്രുരാജ്യങ്ങളോടാണ് മമത : കെ.സുരേന്ദ്രന്‍

കാസര്‍ഗോഡ്: കമ്യൂണിസ്റ്റ് മാര്‍കിസ്റ്റ് പാര്‍ട്ടിക്ക് എല്ലാ കാലത്തും ശത്രുരാജ്യങ്ങളെ അനുകൂലിക്കുന്ന നിലപാടാണ് സ്വീകരിച്ചതെന്ന് ബിജെപി മുന്‍ സംസ്ഥാന പ്രസിഡന്‍റ് കെ.സുരേന്ദ്രന്‍. പാകിസ്ഥാനികളെ രാജ്യത്ത് നിന്ന് പുറത്താക്കണമെന്നാവശ്യപ്പെട്ട് ബിജെപി ജില്ലാകമ്മറ്റി സംഘടിപ്പിച്ച ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. പാകിസ്ഥാനെ സഹായിക്കുന്ന ചൈനയോടാണ് സിപിഎമ്മിന് പ്രതിബദ്ധത. ഏപ്രില്‍ 29 ആകുമ്പോള്‍ കേരളത്തിലുള്ള 150 പരം പാകിസ്ഥാനികളില്‍ 145 പേര്‍ ഭാരതം വിട്ടിരിക്കണമെന്ന കേന്ദ്ര ആഭ്യന്തര മന്ത്രാലയത്തിന്‍റെ ഉത്തരവിനെ തികഞ്ഞ അലംഭാവത്തോടെയാണ് കേരളം പ്രതികരിച്ചത്. നാമമാത്രമായ ആളുകള്‍ മാത്രമാണ് കേരളത്തില്‍ നിന്ന് തിരിച്ചുപോയത്. മറ്റൊരിടത്തും കാണാത്ത തരത്തില്‍ പാകിസ്ഥാന്‍ റോഡും മുക്കും, കവലകളും ഉള്ളത് കേരളത്തിലാണ്. ആ പേരുകള്‍ എടുത്ത് കളയാതെ പാക് അനുകൂലികളെ തലോലിക്കുകയാണ് സി പി എമ്മും ഇടത് സര്‍ക്കാരുമെന്നും അദ്ദേഹം കൂട്ടിച്ചേര്‍ത്തു. ജില്ലാ പ്രസിഡന്‍റ് എം.എല്‍.അശ്വിനി അധ്യക്ഷതവഹിച്ചു. കെ.ശ്രീകാന്ത്, വി.രവീന്ദ്രന്‍, വി.ബാലകൃഷ്ണ ഷെട്ടി, രവീശതന്ത്രി കുണ്ടാര്‍, സതീഷ്ചന്ദ്ര ഭണ്ഡാരി, പി.ആര്‍.സുനില്‍, കെ. കെ.നാരായണന്‍, എം.ബല്‍രാജ്, മുരളീധര യാദവ്, എം.ജനനി, മണികണ്ഠ റൈ, എച്ച്. ആര്‍.സുകന്യ, എ.കെ.കയ്യാര്‍, കെ.സവിത, പ്രമീള മജല്‍, കെ.എം.അശ്വിനി , പുഷ്പ ഗോപാലന്‍, മഹേഷ് ഗോപാല്‍, സഞ്ജീവ പുളിക്കൂര്‍, വീണ അരുണ്‍ ഷെട്ടി എന്നിവര്‍ സംബന്ധിച്ചു. മനുലാല്‍ മേലത്ത് സ്വാഗതവും എന്‍.ബാബുരാജ് നന്ദിയും പറഞ്ഞു.

ഇറച്ചികോഴിക്ക് ലെഗ് പീസ് നാല് !

തൃക്കരിപ്പൂർ: കോഴിക്ക് കാലുകൾ നാല് എന്ന് പറഞ്ഞാൽ ചിലപ്പോൾ നമ്മൾ മൂക്കത്ത് വിരൽ വെക്കും. എന്നിട്ട് ഒരു ചോദ്യവും വെറുതേ പറയുന്നതല്ലേ. എന്നാൽ അങ്ങിനെ പറയാൻ വരട്ടെ. തൃക്കരിപ്പൂർ ടൗണിലെ വെള്ളാപ്പ് റോഡ്‌ റെയിൽവേ ഗേറ്റിനടുത്തുള്ള ടികെ ചിക്കൻ സെന്‍ററിൽ നാട്ടുകാരെ അൽഭുതപ്പെടുത്തുന്ന ഒരു കോഴി ഇന്നലത്തെ ലോഡിലെത്തി. രാവിലെ ഏഴിന് വന്ന 120 കോഴികളിൽ ഒന്നാണ് ആളുകളെ വിസ്മയിപ്പിക്കുന്ന തരത്തിൽ കണ്ടത്. കോഴി മുറിച്ച് വിൽപ്പന നടത്താൻ പിടിച്ചപ്പോഴാണ് കാലുകളുടെ എണ്ണം കടയുടമ പി.കെ.ഇസ്മയിൽ കണ്ടത്. രണ്ട് കാലിന് പകരം ഇരട്ടി എണ്ണം കാലുകൾ ബ്രോയിലർ വിഭാഗത്തിലുള്ള പിടക്കോഴിക്കാണ് കണ്ടത്. വൈകുന്നേരം വരെ നാട്ടുകാർ അത്ഭുത കോഴിയെ കാണാൻ കടയിൽ തിക്കി തിരക്കി. തളിപ്പറമ്പിലെ ഫാമിൽ നിന്നാണ് കോഴികളെ കൊണ്ട് വന്നത്. അപൂർവതയുള്ള ഈ കോഴിയെ വാങ്ങുന്നവർക്ക് ഇറച്ചി ഉപയോഗിക്കുമ്പോൾ നാല് ലെഗ് പീസുകൾ കിട്ടുമെന്ന കമന്‍റാണ് കോഴിയെ കാണാനെത്തിയ നാട്ടുകാർ പറയുന്നത്.

പാചകപ്പുര ഉദ്ഘാടനം നടത്തി

മണ്ഡപം: സെന്‍റ് ജോസഫ് യുപി സ്കൂളിലെ പുതുതായി നിർമിച്ച പാചകപ്പുരയുടെ ഉദ്ഘാടനം എം.രാജഗോപാലൻ എംഎൽനിർവ്വഹിച്ചു. വെസ്റ്റ് എളേരി പഞ്ചായത്ത് പ്രസിഡന്‍റ് ഗിരിജ മോഹനൻ അധ്യക്ഷത വഹിച്ചു. ചിറ്റാരിക്കാൽ വിദ്യാഭ്യാസ ഉപജില്ല നൂൺ മിൽ ഓഫീസർ പി.പി. ജയപ്രകാശ്, സ്കൂൾ പിടിഎ പ്രസിഡന്‍റ് ജയിംസ് മാരൂർ, ഇടവക ട്രസ്റ്റി സിവിക്കുട്ടി വർഗീസ്, എംപിടിഎ പ്രസിഡന്‍റ് ശ്രീജ ബിനു, സീനിയർ അസിസ്റ്റന്‍റ് പ്രെറ്റി മരിയ ജോസ്, സ്കൂൾ ലീഡർ ടി.ബി. ശ്രീലക്ഷ്മി എന്നിവർ പ്രസംഗിച്ചു. സ്കൂളിൽ നിന്ന് സ്ഥലംമാറി പോകുന്ന മാനേജർ ഫാ. തോമസ് കീഴാരത്തിലിനുള്ള യാത്രയയപ്പും ഉപഹാര സമർപ്പണവും ഇതോടൊപ്പം നടത്തി.

മടിക്കൈയില്‍ മിനി സ്‌റ്റേഡിയം സ്ഥാപിക്കും: കായികമന്ത്രി

മടിക്കൈ: പഞ്ചായത്തില്‍ നിലവിലുള്ള അഞ്ച് ഏക്കര്‍ കളിയിടത്തില്‍ ഖേലോ ഇന്ത്യ പദ്ധതിയില്‍ ഉള്‍പ്പെടുത്തി മിനി സ്റ്റേഡിയം നിര്‍മിക്കാനുള്ള നടപടി സ്വീകരിക്കുമെന്ന് കായികമന്ത്രി വി.അബ്ദുള്‍ റഹ്‌മാന്‍. മടിക്കൈ കാഞ്ഞിരപ്പൊയിലില്‍ സ്‌പോര്‍ട്‌സ് കിറ്റ് വിതരണം ഉദ്ഘാടനം ചെയ്യുകയായിരുന്നു അദ്ദേഹം. പഞ്ചായത്ത് പ്രസിഡന്‍റ് എസ്.പ്രീത അധ്യക്ഷതവഹിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, കേരള സ്‌പോര്‍ട്‌സ് കൗണ്‍സില്‍ പ്രസിഡന്‍റുമായ യു. ഷറഫലി, ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റ് പി. ഹബീബ് റഹ്‌മാന്‍ എന്നിവര്‍ മുഖ്യാതിഥിയായിരുന്നു. പഞ്ചായത്ത് വൈസ് പ്രസിഡന്‍റ് വി. പ്രകാശന്‍ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു ബ്ലോക്ക് വൈസ് പ്രസിഡന്‍റ് കെ.വി.ശ്രീലത, വികസനകാര്യ സ്ഥിരംസമിതി അധ്യക്ഷന്‍ എം.അബ്ദുള്‍ റഹ്‌മാന്‍, വാര്‍ഡ് മെംബര്‍ എം.ശൈലജ, എന്‍. ബാലകൃഷ്ണന്‍, എം.രാജന്‍, അനില്‍ ബങ്കളം, ടി.വി.കൃഷ്ണന്‍, എ.വി.ബാലകൃഷ്ണന്‍, ടി.വി.അനൂപ് എന്നിവര്‍ സംസാരിച്ചു. പി.വിജയന്‍ സ്വാഗതവും എം.മുകേഷ് നന്ദിയും പറഞ്ഞു.

സംസ്ഥാന ജേര്‍ണലിസ്റ്റ് വടംവലി ലോഗോ പ്രകാശനം

കാസര്‍ഗോഡ്: പ്രസ് ക്ലബ് ആതിഥ്യമരുളുന്ന സംസ്ഥാന ജേര്‍ണലിസ്റ്റ് വടംവലി ചാമ്പ്യന്‍ഷിപ്പിന്‍റെ ലോഗോ പ്രകാശനം കായികമന്ത്രി വി.അബ്ദുറഹ്‌മാന്‍ നിര്‍വഹിച്ചു. എം.രാജഗോപാലന്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്‍റ് യു.ഷറഫലി, ജില്ല സ്‌പോര്‍ട്‌സ് കൗണ്‍സില്‍ പ്രസിഡന്‍റ് പി.ഹബീബ് റഹ്‌മാന്‍, വി.വി.രമേശന്‍, പ്രസ് ക്ലബ് പ്രസിഡന്‍റ് സിജു കണ്ണന്‍, സെക്രട്ടറി പ്രദീപ് നാരായണന്‍, അബ്ദുല്ലക്കുഞ്ഞി ഉദുമ, പുരുഷോത്തമ പെര്‍ള, കെ.വി.പത്മേഷ്, സതീശന്‍ കരിച്ചേരി എന്നിവര്‍ പങ്കെടുത്തു.

ഡിവൈഎസ്പിയ്ക്കെതിരേ സിവില്‍ പോലീസ് ഓഫീസറുടെ വധഭീഷണി

കാഞ്ഞങ്ങാട്: ഡിവൈഎസ്പി ബാബു പെരിങ്ങേത്തിനെ വധിക്കുമെന്ന് സിവില്‍ പോലീസ് ഓഫീസറുടെ ഭീഷണി സന്ദേശം. കാഞ്ഞങ്ങാട് സിവില്‍ പോലീസ് ഓഫീസര്‍ സനൂപ് ജോണ്‍ ആണ് ഭീഷണി സന്ദേശം അയച്ചത്. പോലീസ് കണ്‍ട്രോള്‍ വിഭാഗത്തിലെ വാട്‌സ് ആപ് ഗ്രൂപ്പിലാണ് സനൂപിന്‍റെ ഭീഷണി സന്ദേശം വന്നത്. എന്നെ എന്തിനാണ് ഇങ്ങനെ ദ്രോഹിക്കുന്നതെന്നും ഞാന്‍ പോകുന്നുണ്ടെങ്കില്‍ ഡിവൈഎസ്പിയെ കൊന്നിട്ടേ പോകുകയുള്ളൂവെന്നും സിവില്‍ പോലീസ് ഓഫീസറുടെ ശബ്ദസന്ദേശത്തില്‍ പറയുന്നു. സനൂപ് അവധി അപേക്ഷ നല്‍കാതെ ഒരാഴ്ച സ്റ്റേഷനില്‍ ഹാജരാകാത്തതിനെതുടര്‍ന്ന് താക്കീതെന്ന നിലയില്‍ കാഞ്ഞങ്ങാട് സൗത്ത് ജംഗ്ഷനിലും കോട്ടച്ചേരി ട്രാഫിക്കിലും ഡിവൈഎസ്പി അധികചുമതല നല്‍കിയിരുന്നു. ഇതില്‍ പ്രകോപിതനായാണ് സനൂപിന്‍റെ ഭീഷണി സന്ദേശം. മദ്യലഹരിയില്‍ അബദ്ധത്തിലാണ് സന്ദേശമിട്ടതെന്ന് സനൂപ് പറഞ്ഞു.

മലയോരത്തേക്കുള്ള ബസ് നിരക്ക് കുറഞ്ഞു

കാഞ്ഞങ്ങാട്: മലയോരഗ്രാമങ്ങളിലേക്കുള്ള ബസ് നിരക്ക് പുനഃക്രമീകരിച്ചുള്ള തീരുമാനം മോട്ടോര്‍ വാഹന വകുപ്പ് പ്രസിദ്ധീകരിച്ചു. കൊന്നക്കാട് - കാഞ്ഞങ്ങാട് (പരപ്പ വഴി), കാലിച്ചാനടുക്കം -ഏഴാംമൈല്‍ റൂട്ടുകളിലെ ബസ് യാത്രക്കാണ് ചെലവ് കുത്തനെ കുറയുക. 1974ല്‍ നിര്‍ണയിച്ച ഫെയര്‍‌സ്റ്റേജാണ് മടിക്കൈ സ്വദേശിയായ വിവരാവകാശപ്രവര്‍ത്തകന്‍റെ പരാതിയില്‍ പരിഷ്‌കരിച്ചത്. കാഞ്ഞങ്ങാടിനും മാവുങ്കാലിനും ഇടയില്‍ ഈടാക്കിയിരുന്ന കിഴക്കുംകര സ്റ്റേജ് ഈ പട്ടികയിലും ഇടംപിടിക്കാത്തതോടെ പാറപ്പള്ളി ഭാഗത്തേക്കുള്ള ഓരോ സ്ഥലത്തേക്കും രണ്ടു മുതല്‍ മൂന്നു രൂപ വരെ കുറയും. വെള്ളരിക്കുണ്ടിനും പരപ്പയ്ക്കും ഇടയില്‍ മങ്കയം സ്റ്റേജ് ഒഴിവാക്കിയതോടെ ഇവിടെയും നിരക്ക് കുറയും. ഏഴാംമൈലിനും കാലിച്ചാനടുക്കത്തിനും ഇടയില്‍ പോര്‍ക്കളം ഒഴിവാക്കുകയും തായന്നൂരും വളാപ്പാടിയും ഒഴിവാക്കി എട്ടുപൊതിപ്പാട് സ്റ്റേജായി നിര്‍ണയിക്കുകയും ചെയ്തു. ഇതോടെ ഏഴാംമൈല്‍ കാലിച്ചാനടുക്കം യാത്രയ്ക്ക് 23 രൂപയ്ക്ക് പകരം 18 രൂപ നല്‍കിയാല്‍ മതിയാകും. കൊന്നക്കാട്, വെള്ളരിക്കുണ്ട് - കാഞ്ഞങ്ങാട് യാത്രയ്ക്കും അഞ്ചു രൂപ കുറയും. കാഞ്ഞങ്ങാട് പഴയ ബസ് സ്റ്റാന്‍ഡില്‍ നിന്നും മലയോരത്തേക്കുള്ള പുതുക്കിയ ബസ് നിരക്ക് (നിലവില്‍ വാങ്ങുന്ന നിരക്ക് ബ്രാക്കറ്റില്‍) കാഞ്ഞങ്ങാട് - കൊന്നക്കാട് റൂട്ട് കിഴക്കുംകര 10(10), മാവുങ്കാല്‍ 10(13), കോട്ടപ്പാറ 13(15), പാറപ്പള്ളി 15(18), മുട്ടിച്ചരല്‍ 18(20), ഇരിയ 20(23), ഏഴാംമൈല്‍ 23(25), അട്ടേങ്ങാനം 25(28), ഒടയംചാല്‍ 28(30), നായ്ക്കയം 30(33), ഇടത്തോട് 33(35), പരപ്പ 35(38), കനകപ്പള്ളിത്തട്ട്38(40), കല്ലംചിറ 40 (43), മങ്കയം 43(45), വെള്ളരിക്കുണ്ട് 43(48), പാത്തിക്കര 45 (50),പു്നക്കുന്ന് 48 (53), നാട്ടക്കല്ല് 50 (55), മാലോം 53 (58), മാലോത്ത് കസബ എച്ച്എസ്എസ് 55(60), കൊന്നക്കാട് 58(63). കാഞ്ഞങ്ങാട് - ഏഴാംമൈല്‍ - കാലിച്ചാനടുക്കം റൂട്ട് മുക്കുഴി 25 (30), എണ്ണപ്പാറ 28 (33), എട്ടുപൊതിപ്പാട് 30 (38), കാലിച്ചാനടുക്കം 33 (40)

പെൺകരുത്തായി ഡ്രീംസ് ഗേൾസ് ഫുട്ബോൾ അക്കാദമി; വനിത ടൂർണമെന്‍റ് എട്ടിന് തുടങ്ങും

തൃക്കരിപ്പൂർ: തൃക്കരിപ്പൂരിൽ വനിതാ ഫുട്ബോളിന്‍റെ കരുത്തായി മാറുകയാണ് ഡ്രീംസ് ഗേൾസ് ഫുട്ബോൾ അക്കാദമി. കഴിഞ്ഞ മൂന്ന് വർഷമായി പ്രവർത്തിച്ചു വരുന്ന അക്കാദമിയിൽ 60ൽ പരം പെൺകുട്ടികൾക്ക് സൗജന്യമായി പരിശീലനം നൽകി വരികയാണെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ജില്ലാ, സംസ്ഥാന, ദേശീയ, സ്‌കൂൾ ഫുട്ബോൾ ടൂർണമെന്‍റുകളിൽ വ്യക്തി മുദ്ര പതിപ്പിക്കാൻ ചുരുങ്ങിയ കാലയളവിൽ ഡ്രീംസ് അക്കാദമിയിലെ കുട്ടികൾക്ക് കഴിഞ്ഞിട്ടുണ്ട്. കഴിഞ്ഞവർഷത്തെ ദേശീയ സീനിയർ സ്‌കൂൾ ഫുട്ബോൾ ടീമിൽ കേരളത്തെ പ്രതിനിധീകരിച്ച് പങ്കെടുത്ത ശിവനന്ദ തമ്പാൻ, ദേശീയ സ്‌കൂൾസ് ഫുട്ബോൾ മത്സരത്തിൽ റണ്ണറപ്പായ കേരള ടീമിന്‍റെ ഗോൾ വലയം കാത്ത ഇഷിത, സ്ട്രൈക്കർ അനന്യ തുടങ്ങിയവർ ഡ്രീംസിന്‍റെ അഭിമാന താരങ്ങളാണ്. സ്പോർട്‌സ് ഡിവിഷനും സ്പോർട്‌സ് സ്കൂളുകളിലുമായി ഡ്രീംസിലെ ആറ് പേർ നിലവിൽ യോഗ്യത നേടിയിട്ടുണ്ട്. അക്കാദമിയുടെ മൂന്നാം വാർഷികാഘോഷവും വനിതാ ഫുട്ബോൾ ടൂർണമെന്‍റും എട്ടു മുതൽ 11 വരെ തൃക്കരിപ്പൂർ ജിവിഎച്ച്എസ്എസ് ഗ്രൗണ്ടിൽ നടക്കും. നളെ വൈകുന്നേരം അഞ്ചിന് വാർഷികാഘോഷ മുന്നോടിയായി വിളംബര ഘോഷാത്ര നടക്കും. തങ്കയം മുക്കിൽ ചന്തേര പോലീസ് ഇൻസ്പെക്ടർ കെ.പ്രശാന്ത് ഫ്ളാഗ് ഓഫ് ചെയ്യുന്ന വിളംബര ഘോഷാത്രയും ചന്തേര ജനമൈത്രി പോലീസ് സ്റ്റേഷന്‍റെയും ഉദിനൂർ ജിഎച്ച്എസ്എസ് സ്റ്റുഡന്‍റ് പോലീസിന്‍റെയും സഹകരണത്തോടെ ലഹരി വിരുദ്ധ പ്രതിജ്ഞയും ഗോൾ ചലഞ്ചും നടക്കും. രണ്ടു വിഭാഗങ്ങളിലായാണ് ഫുട്ബോൾ മത്സരങ്ങൾ നടക്കുന്നത്. 13 വയസിൽ താഴെയുള്ളതും സീനിയർ വിഭാഗത്തിൽ കർണാടക, കേരള സംസ്ഥാനങ്ങളിൽ നിന്നായി എട്ട് ടീമുകൾ മാറ്റുരക്കും. എല്ലാ ദിവസവും രാവിലെ എട്ടു മുതലും വൈകുന്നേരം നാലു മുതലും പെൺകുട്ടികളുടെ മൽസരങ്ങൾ നടക്കും. 11നു വൈകുന്നേരം രണ്ട് വിഭാഗങ്ങിലെയും ഫൈനൽ മത്സരങ്ങൾ നടക്കും. അതിനു ശേഷം ഡ്രീംസ് കുടുംബാംഗങ്ങളുടെ സംഗമം വെള്ളാപ്പ് ടർഫിൽ നടക്കും. പത്ര സമ്മേളനത്തിൽ സംഘാടക സമിതി ചെയർമാൻ എം.മനേഷ് കുമാർ, ജനറൽ കൺവീനർ വി.എം.മകേഷ്, ഡ്രീംസ് അക്കാദമി പ്രസിഡന്‍റ് ഡോ.വി.രാജീവൻ, സെക്രട്ടറി രാജേഷ് മാപ്പിടിച്ചേരി, ട്രഷറർ ഇ.അജേഷ്, ടീം പരിശീലകൻ വി.വി.ഗണേശൻ, നിഖില രാജേഷ് എന്നിവർ പങ്കെടുത്തു.

കാറുകള്‍ കൂട്ടിയിടിച്ച് യുവാവ് മരിച്ചു

കാസര്‍ഗോഡ്: സംസ്ഥാനപാതയില്‍ കാറുകള്‍ കൂട്ടിയിടിച്ച് മത്സ്യത്തൊഴിലാളിയായ യുവാവ് മരിച്ചു. നാലുപേര്‍ക്ക് പരിക്കേറ്റു. ബേക്കല്‍ മലാംകുന്ന് തെല്ലാഞ്ഞിയിലെ അശോകന്‍-ലത ദമ്പതികളുടെ മകന്‍ എ.അനന്തു (അപ്പു-26)ആണ് മരിച്ചത്. ഒപ്പമുണ്ടായിരുന്ന പ്രണവ് (26), അക്ഷയ് (26) എന്നിവര്‍ മംഗളുരുവിലെയും സൗരവ് (26), അശ്വിന്‍ (25) എന്നിവരെ കാസര്‍ഗോഡ് നുള്ളിപ്പാടിയിലെയും ആശുപത്രികളില്‍ പ്രവേശിപ്പിച്ചു. ഞായറാഴ്ച രാത്രി കളനാട് ബസ് സ്റ്റോപ്പിന് സമീപമാണ് അപകടം. സെക്കന്‍ഡ് ഷോ കഴിഞ്ഞ് കാസര്‍ഗോട്ടു നിന്ന് കാഞ്ഞങ്ങാട് ഭാഗത്തേക്ക് പോവുകയായിരുന്ന അനന്തുവും സുഹൃത്തുക്കളും സഞ്ചരിച്ചിരുന്ന കാറില്‍ കാഞ്ഞങ്ങാട് ഭാഗത്തു നിന്നും എത്തിയ കാറിടിച്ചാണ് അപകടം. സഹോദരങ്ങള്‍: അനീഷ്, ജയശ്രീ.

ജീസസ് ആൻഡ് മീ ഫൊറോന യുവജനസംഗമം

നീലേശ്വരം: സെന്‍റ് പീറ്റേഴ്സ് പള്ളിയിൽ ജീസസ് യൂത്ത് ടീമിന്‍റെ നേതൃത്വത്തിൽ ജീസസ് ആൻഡ് മീ ഫൊറോന യുവജനസംഗമം കണ്ണൂർ രൂപത ബിഷപ് ഡോ.അലക്സ് വടക്കുംതല ഉദ്ഘാടനം ചെയ്തു. സഹായമെത്രാൻ ഡോ. ഡെന്നീസ് കുറുപ്പശേരി, ഇടവക വികാരി ഫാ.ആൻസിൽ പീറ്റർ, ഫാ.ജസ്റ്റിൻ എടത്തിൽ, ഫാ. ജീനിയസ് ക്ലീറ്റസ്, ഫാ. പീറ്റർ പാറേക്കാട്ടിൽ, ഫാ.ജോസ്, ഫാ.ജിനോ ചക്കാലക്കൽ, ഫാ.അനിൽ അറക്കൽ, ബ്രദർ മിഷേൽ എന്നിവർ സംസാരിച്ചു. കാഞ്ഞങ്ങാട് ഫൊറോനക്ക് കീഴിൽ കണ്ണൂർ -കാസർഗോഡ് ജില്ലകളിലെ 13 ഇടവകകളിലെ 250 ൽപരം യുവതീയുവാക്കൾ സംബന്ധിച്ചു. ജീസസ് യൂത്ത് മിനിസ്ട്രിയിലെ ജിത്ത് ജോർജ്, ക്രിസ്റ്റീൻ മാനുവൽ, ആൻസൽമാത്യു ഫ്രാൻസിസ്, ജിജോ ജോർജ്, പി.എസ്.യേശുദാസ്, ആഷിൻ കെ.സിജു എന്നിവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]