ADVERTISEMENT

ADVERTISEMENT

സെന്‍റ് പീറ്റേഴ്‌സില്‍ പ്രതിഭാ സംഗമം

കുറുമ്പനാടം: സെന്‍റ് പീറ്റേഴ്‌സ് സ്‌കൂള്‍ ഹയര്‍ സെക്കന്‍ഡറി വിഭാഗം പ്രതിഭാ സംഗമം ലൊറേറ്റ്‌സ് ഡേ 2025 അസംപ്ഷന്‍ കോളജ് പ്രിന്‍സിപ്പല്‍ ഡോ. റാണി മരിയ തോമസ് ഉദ്ഘാടനം ചെയ്തു.
സ്‌കൂള്‍ മാനേജര്‍ റവ. ഡോ. ജോബി കറുകപ്പറമ്പില്‍ അധ്യക്ഷത വഹിച്ചു.

പ്രിന്‍സിപ്പല്‍ ജയിംസ് കെ. മാളിയേക്കല്‍, ഹെഡ്മാസ്റ്റര്‍ എം.സി. മാത്യു, പിടിഎ പ്രസിഡന്‍റ് ജയ്‌സണ്‍ ചെറിയാന്‍, എം.സി. ബിനു, ജോണിയാ ഗ്രേസ് ജോസഫ്, സുബിമോള്‍ സിബിച്ചന്‍, തെരേസ് തോമസ്, സോനു പ്രീത് എന്നിവര്‍ പ്രസംഗിച്ചു.

ADVERTISEMENT

മണ്ണെടുപ്പിനെതിരേയുള്ള നിയമപോരാട്ടത്തിനു തുക കണ്ടെത്താന്‍ ബിരിയാണി ചലഞ്ച്

നെടുംകുന്നം: മണ്ണും പ്രകൃതിയും സംരക്ഷിക്കാനുള്ള നിയമ പോരാട്ടത്തിനായി പഞ്ചായത്തും ജനകീയ സമിതിയും ചേർന്നു നടത്തിയ മെഗാ ബിരിയാണി ചലഞ്ച് നെഞ്ചിലേറ്റി നെടുംകുന്നം. നെടുംകുന്നം പഞ്ചായത്തിലെ വീരൻ മല ചമ്പന്നൂർപ്പടിയിലെ മണ്ണെടുപ്പിനെതിരേ നിയമ പോരാട്ടം നടത്താൻ ജനകീയ സമിതിയും പഞ്ചായത്തും ചേർന്ന് ഇന്നലെ നടത്തിയ ബിരിയാണി ചലഞ്ചിൽ 2500 ഓളം ബോക്സുകളാണ് തയറാക്കിയത്. ഇവ പഞ്ചായത്തംഗങ്ങളും സമിതി അംഗങ്ങളും ചേർന്ന് 15 വാർഡുകളിലായി വിതരണം ചെയ്തു. ബിരിയാണി വിൽപ്പനയിലൂടെ ലഭിക്കുന്ന തുക മണ്ണെടുപ്പിനെതിരേ പഞ്ചായത്ത് കോടതിയിൽ നടത്തുന്ന നിയമപോരാട്ടത്തിനായി ചെലവഴിക്കും. പഞ്ചായത്ത് പ്രസിഡന്‍റ് രാജമ്മ രവീന്ദ്രൻ ജനകീയ സമിതി കൺവീനർ തോമസ് പീലിയാനിക്കലിന് ബിരിയാണി കൈമാറി വിതരണോദ്ഘാടനം നടത്തി. വൈസ് പ്രസിഡന്‍റ് വി.എം. ഗോപകുമാർ അധ്യക്ഷത വഹിച്ചു. പഞ്ചായത്തംഗങ്ങളായ മാത്യു വർഗീസ്, ബീനാ വർഗീസ്, ഷിനുമോൾ ജോസഫ്, സി.ജെ. ബീനാ, റോയി നെച്ചുകാട്ട്, വീണാ ബി. നായർ, പ്രിയാ ശ്രീരാജ്, ശ്രീജാ മനു, മേഴ്‌സി റെൻ, ജനകീയ സമിതിയംഗങ്ങൾ തുടങ്ങിയവർ നേതൃത്വം നൽകി.

ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ആരംഭിക്കും: മന്ത്രി

കോട്ടയം: മാറിയ പാഠപുസ്തകത്തിനനുസരിച്ച് ഒന്നു മുതല്‍ 10 വരെ ക്ലാസുകള്‍ക്കുള്ള ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ആരംഭിക്കുമെന്ന് മന്ത്രി വി. ശിവന്‍കുട്ടി. കുട്ടികള്‍ക്കുള്ള അധിക പിന്തുണ എന്ന തരത്തിലാണ് ഈ ക്ലാസുകള്‍ തയാറാക്കിയിട്ടുള്ളത്. സമഗ്രഗുണമേന്മ വിദ്യാഭ്യാസ പദ്ധതിയുടെ ഭാഗമായി അക്കാദമിക് മോണിറ്ററിംഗ് പ്ലാറ്റ്‌ഫോമുകള്‍ പരിചയപ്പെടുത്താന്‍ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍റെ (കൈറ്റ്) നേതൃത്വത്തില്‍ ജില്ലയില്‍ നടന്ന ഹൈസ്‌കൂള്‍ പ്രഥമാധ്യാപക ശില്പശാലയില്‍ വീഡിയോ കോണ്‍ഫറന്‍സിംഗിലൂടെ പ്രസംഗിക്കുകയായിരുന്നു മന്ത്രി. കൈറ്റ് സിഇഒ കെ. അന്‍വര്‍ സാദത്തും പങ്കെടുത്തു. സമഗ്ര പ്ലസ് (www.samagra. kite.kerala.gov.in) പോര്‍ട്ടലിലൂടെ ടീച്ചര്‍ക്ക് ഡിജിറ്റല്‍ പ്ലാനുകള്‍ തയാറാക്കി സൂക്ഷിക്കാനും പ്രഥമാധ്യാപകര്‍ക്ക് സമര്‍പ്പിക്കാനും കഴിയും. അതോടൊപ്പം ഈ പോര്‍ട്ടലിലുള്ള ഡിജിറ്റല്‍ റിസോഴ്‌സുകള്‍ ലേണിംഗ് റൂം സംവിധാനം വഴി കുട്ടികള്‍ക്കും രക്ഷിതാക്കള്‍ക്കും ഒരുപോലെ പ്രയോജനപ്പെടുത്താനുമാവും. സ്‌കീം ഓഫ് വര്‍ക്കിനനുസരിച്ചാണോ തന്‍റെ പ്രവര്‍ത്തനങ്ങള്‍ മുന്നോട്ടു പോകുന്നതെന്ന് ടീച്ചര്‍ക്ക് സ്വയം വിലയിരുത്താം. നേരത്തേ വിദ്യാഭ്യാസ ഓഫീസര്‍മാര്‍ക്കും പ്രൈമറി സ്‌കൂളിലെ പ്രഥമാധ്യാപകര്‍, ഐ.ടി. കോ-ഓര്‍ഡിനേറ്റര്‍മാര്‍, എസ്. ആര്‍.ജി. കണ്‍വീനര്‍മാര്‍ തുടങ്ങിയവര്‍ക്കും കൈറ്റ് പരിശീലനം നല്‍കിയിരുന്നു. ശില്പശാലയില്‍ ജില്ലയിലെ 243 ഹൈസ്‌കൂള്‍ പ്രഥമാധ്യാപകര്‍ പങ്കെടുത്തു. തുടര്‍ന്ന് ഹൈസ്‌കൂള്‍ വിഭാഗം ഐടി കോ-ഓര്‍ഡിനേറ്റര്‍മാര്‍ക്കും എസ്.ആര്‍.ജി. കണ്‍വീനര്‍മാര്‍ക്കും പരിശീലനം നല്‍കും. ഇവരാണ് സ്‌കൂളുകളിലെ മറ്റ് അധ്യാപകര്‍ക്ക് പരിശീലനം നല്‍കുക.

മെറിറ്റ് അവാര്‍ഡ് വിതരണം

ചങ്ങനാശേരി: എസ്എസ്എല്‍സി, പ്ലസ് ടു പരീക്ഷകളിലും മറ്റ് മത്സര പരീക്ഷകളിലും ഉന്നതവിജയം കരസ്ഥമാക്കിയ വിദ്യാര്‍ഥികള്‍ക്ക് പുതൂര്‍ പള്ളി മുസ്‌ലിം ജമാഅത്ത് വക മെറിറ്റ് അവാര്‍ഡും ജമാ അത്ത് മുന്‍ പ്രസിഡന്‍റ് തരകന്‍ വീട്ടില്‍ ടി.എന്‍. അഹമ്മദ്കണ്ണ് റാവുത്തര്‍ മെമ്മോറിയല്‍ കാഷ് അവാര്‍ഡും വിതരണം ചെയ്തു. കട്ടപ്പന ഡിവൈഎസ്പി നിഷാദ്മോന്‍ ഉദ്ഘാടനം ചെയ്തു. ജമാഅത്ത് പ്രസിഡന്‍റ് അഡ്വ. ടി.പി. അബ്ദുല്‍ ഹമീദ് അധ്യക്ഷത വഹിച്ചു. കോട്ടയം മെഡിക്കല്‍ കോളജ് കാര്‍ഡിയോളജി വിഭാഗം മുന്‍ മേധാവി ഡോ. എസ്. അബ്ദുല്‍ ഖാദര്‍, ജമാഅത്ത് സെക്രട്ടറി സാജിത് മുഹമ്മദ്, ഖജാന്‍ജി അഡ്വ. റിയാസ് മമ്മറാന്‍, തന്‍സിം ആലയില്‍, സിനാജ് പറക്കവെട്ടി എന്നിവര്‍ പ്രസംഗിച്ചു.

സീനിയര്‍ ചേംബര്‍ ഡോക്ടേഴ്‌സ് ദിനാചരണം

ചങ്ങനാശേരി: സീനിയര്‍ ചേംബര്‍ ഇന്‍റര്‍നാഷണല്‍ ചങ്ങനാശേരി ലീജിയന്‍ ഡോക്ടേഴ്‌സ് ദിനാചരണം നടത്തി. വിവിധ മേഖലകളില്‍ സേവനമനുഷ്ഠിക്കുന്ന ഡോക്ടര്‍മാരെ ആദരിച്ചു. പ്രസിഡന്‍റ് ജയിംസുകുട്ടി ഞാലിയില്‍ അധ്യക്ഷത വഹിച്ചു. ഡോ. മനോജ് വാടപ്പറമ്പില്‍, ഡോ. ഹരീഷ് കോനാടന്‍, ഡോ. മനോജ് അയ്യപ്പന്‍ എന്നിവരെ ആദരിച്ചു. മാത്യു ജോസഫ് പുന്നശേരി, സാജു പൊട്ടുകളം, ജോണി ജോസഫ് കൊല്ലമന, ബിജു നെടിയകാലാപറമ്പില്‍, സോണി പാലത്തിങ്കല്‍ എന്നിവര്‍ പ്രസംഗിച്ചു.

ചങ്ങനാശേരി റെയില്‍വേ സ്റ്റേഷന്‍ : നിര്‍മാണപ്രവര്‍ത്തനങ്ങളുടെ അവലോകനം ഇന്ന്

ചങ്ങനാശേരി: കൊടിക്കുന്നില്‍ സുരേഷ് എംപിയുടെ നേതൃത്വത്തില്‍ ചങ്ങനാശേരി റെയില്‍വേ സ്റ്റേഷനില്‍ നടന്നുവരുന്ന അമൃത് ഭാരത് പദ്ധതി പ്രകാരമുള്ള നിര്‍മാണപ്രവര്‍ത്തനങ്ങളുടെ അവലോകനം ഇന്ന് 2.30ന് റെയില്‍വേ സ്റ്റേഷനില്‍ നടക്കും. അമൃത് ഭാരത് പദ്ധതി പ്രകാരം 90 ശതമാനത്തിലധികം നിര്‍മാണപ്രവര്‍ത്തനങ്ങള്‍ പൂര്‍ത്തിയായ സ്റ്റേഷനില്‍ അവസാനവട്ട ക്രമീകരണങ്ങള്‍ നേരില്‍ കാണുന്നതിനും വിലയിരുത്തുന്നതിനുമാണ് യോഗം വിളിച്ചുചേര്‍ത്തതെന്ന് കൊടിക്കുന്നില്‍ സുരേഷ് എംപി പറഞ്ഞു. യോഗത്തില്‍ ദക്ഷിണ റെയില്‍വേ തിരുവനന്തപുരം ഡിവിഷനിലെ ഉന്നത ഉദ്യോഗസ്ഥരും അമൃത് ഭാരത് പദ്ധതി നടപ്പിലാക്കുന്ന നിര്‍വഹണ ഉദ്യോഗസ്ഥരും പങ്കെടുക്കും. യാത്രക്കാര്‍ക്കും പരിസരവാസികള്‍ക്കും നിര്‍ദേശം നല്‍കാനുള്ള അവസരം ഉണ്ടായിരിക്കുന്നതാണെന്നും എംപി കൂട്ടിച്ചേര്‍ത്തു. ആവശ്യങ്ങള്‍ ഒട്ടനവധി ചങ്ങനാശേരി: ചങ്ങനാശേരി റെയില്‍വേ സ്‌റ്റേഷനില്‍നിന്നു ഗുഡ്‌സ്‌ഷെഡ് റോഡിലേക്കുള്ള രണ്ടാം കവാടം തുറക്കണമെന്ന ആവശ്യത്തിനു പ്രസക്തിയേറുന്നു. വാഴൂര്‍ റോഡില്‍നിന്ന് എത്തുന്ന യാത്രക്കാര്‍ക്കും ട്രെയിനില്‍നിന്നിറങ്ങി വാഴൂര്‍ റോഡ് ഭാഗത്തേക്കു പോകേണ്ട യാത്രക്കാര്‍ക്കും ഇതു ഗുണകരമാകും. ഒന്നും രണ്ടും പ്ലാറ്റ്ഫോമുകളെ ബന്ധിപ്പിച്ച് എസ്‌കലേറ്റര്‍ നിര്‍മിക്കണം. തകര്‍ന്നുകിടക്കുന്ന ഗുഡ്‌സ്‌ഷെഡ് റോഡിന്‍റെ അറ്റകുറ്റപ്പണികള്‍ വേഗത്തിലാക്കി ഗതാഗതം സുഗമമാക്കണം. ഗുഡ്‌സ്‌ഷെഡ് റോഡിന്‍റെ വശങ്ങളിലും റെയില്‍വേ സ്‌റ്റേഷന്‍ വളപ്പിലും അപകടകരമായ സാഹചര്യത്തില്‍ നില്‍ക്കുന്ന മരങ്ങളും ശിഖരങ്ങളും വെട്ടിമാറ്റണം. വാഴൂര്‍ റോഡിലെയും ഫാത്തിമാപുരത്തെയും മേല്‍പ്പാലങ്ങളുടെ അപ്രോച്ചിന്‍റെ തകര്‍ച്ച പരിശോധിക്കണം. സെന്‍റ് ആന്‍സ് സ്‌കൂളില്‍നിന്ന് ആനന്ദാശ്രമത്തിലേക്കുള്ള പാവനാശ്രമം റോഡിന്‍റെ റെയില്‍വേ അധീനതയിലുള്ള ഭാഗത്തെ അറ്റകുറ്റപ്പണികള്‍ നടത്തണം. വടക്കേക്കര റെയില്‍വേ ക്രോസില്‍ മേല്‍പ്പാലം നിര്‍മിക്കണമെന്ന ആവശ്യവും ശക്തമാണ്. പെരുന്തുരുത്തി-ഏറ്റുമാനൂര്‍ ബൈപാസിലെ നാലുകോടി റെയില്‍വേ ഓവര്‍ബ്രിഡ്ജിന്‍റെ നിര്‍മാണത്തിനുള്ള നടപടികള്‍ വേഗത്തിലാക്കണമെന്ന ആവശ്യവും ഉയര്‍ന്നിട്ടുണ്ട്. സ്റ്റേറ്റഷനിലെ ഒന്നാം പ്ലാറ്റ്ഫോമില്‍ ബാക്കിയുള്ള ഭാഗത്തുകൂടിയുള്ള മേല്‍ക്കൂര നിര്‍മാണം, പ്ലാറ്റ് ഫോമിലെ യാത്രക്കാര്‍ക്കുള്ള ബെഞ്ചുകള്‍, നിര്‍മാണത്തിലിരിക്കുന്ന ലിഫ്റ്റ്, പാര്‍ക്കിംഗ് ഏരിയ വികസനം, പ്രധാന കവാടം തുടങ്ങിയ നിര്‍മാണങ്ങള്‍ എന്നിവയും കൊടിക്കുന്നില്‍ സുരേഷ് എംപിയുടെ നേതൃത്വത്തിലെത്തുന്ന റെയില്‍വേ ഉദ്യോഗസ്ഥ സംഘം വിലയിരുത്തും. വേളാങ്കണ്ണി എക്‌സ്പ്രസിനു സ്വീകരണം ഇന്ന് ചങ്ങനാശേരി: കൊടിക്കുന്നില്‍ സുരേഷ് എംപിയുടെ ശ്രമഫലമായി പുതുതായി അനുവദിച്ച എല്‍എച്ച്ബി കോച്ച് ഉപയോഗിച്ച് നടത്തുന്ന എറണാകുളം വേളാങ്കണ്ണി എക്‌സ്പ്രസിന്‍റെ ആദ്യയാത്രയില്‍ ട്രെയിനിന് ചങ്ങനാശേരി റെയില്‍വേ സ്റ്റേഷനില്‍ ഇന്ന് സ്വീകരണം നല്‍കും. ഉച്ചകഴിഞ്ഞ് 2.30നാണ് ട്രെയിന്‍ ചങ്ങനാശേരി സ്റ്റേഷനില്‍ എത്തുന്നത്.

കുടുംബക്കൂട്ടായ്മ ഭാരവാഹികൾക്ക് പരിശീലനമൊരുക്കി ഇഗ്‌നൈറ്റ്-2025

കുറവിലങ്ങാട്: ഇടവകയിലെ കൂടംബക്കൂട്ടായ്മ പ്രവർത്തനങ്ങൾ സജീവമാക്കാനായി കൂട്ടായ്മ ഭാരവാഹികൾക്കായി ഇഗ്‌നൈറ്റ്-2025 എന്ന പേരിൽ പഠനപരിശീലന കളരിയൊരുക്കി. ഇടവകയിലെ യോഗപ്രതിനിധികൾ, കൂട്ടായ്മ സമ്മേളനങ്ങളിൽ പങ്കെടുക്കുന്ന സന്യാസിനിമാർ, 81 കൂട്ടായ്മ യൂണിറ്റുകളിലെ പ്രസിഡന്‍റുമാർ, സെക്രട്ടറിമാർ എന്നിവർ പരിശീലന പരിപാടിയിൽ പങ്കെടുത്തു. പരിപാടി ആർച്ച്പ്രീസ്റ്റ് റവ.ഡോ. തോമസ് മേനാച്ചേരി ഉദ്ഘാടനം ചെയ്തു. ഒരു വർഷത്തേക്കുള്ള കർമപരിപാടികളുടെ ചർച്ചയും പ്രവർത്തന രൂപീകരണവും നടത്തി. കൂട്ടായ്മ ഡയറക്ടർ അസി. വികാരി ഫാ. പോൾ കുന്നുംപുറത്ത് അധ്യക്ഷത വഹിച്ചു. സീനിയർ അസി.വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, കൂട്ടായ്മ ജനറൽ ലീഡർ ബോബിച്ചൻ നിധീരി, ഡോ. സിമിമോൾ സെബാസ്റ്റ്യൻ, സിസ്റ്റർ റീജ മരിയ, ബിജു താന്നിക്കതറപ്പേൽ എന്നിവർ പ്രസംഗിച്ചു. കുടുംബകൂട്ടായ്മ രൂപത റിസോഴ്സ് ടീം അംഗങ്ങളായ സണ്ണി വടക്കേടത്ത്, ലിജോ മുക്കത്ത്, പള്ളിയോഗം സെക്രട്ടറി ബെന്നി കോച്ചേരി എന്നിവർ ക്ലാസിന് നേതൃത്വം നൽകി. സോൺ ഭാരവാഹികളായ ഷൈജു പാവുത്തിയേൽ, ജിയോ കരികുളം, ജോസ് സി. മണക്കാട്ട്, സണ്ണി വെട്ടിക്കാട്ടിൽ, ജോളി ടോമി എണ്ണംപ്രായിൽ, ഷൈനി സാബു മഞ്ഞപ്പള്ളിൽ, സ്മിത ഷിജു പുതിയിടത്ത്, ആശ വിക്‌ടർ കുന്നുമല എന്നിവർ നേതൃത്വം നൽകി.

നാലമ്പല തീര്‍ഥാടനം: മുളക്കുളത്ത് ആലോചനാ യോഗം

പെരുവ: മുളക്കുളം ലക്ഷ്മണ സ്വാമി ക്ഷേത്രത്തില്‍ കര്‍ക്കിടകം ഒന്നാം തീയതി ആരംഭിക്കുന്ന നാലമ്പല തീര്‍ഥാടനത്തിന്‍റെ മുന്നൊരുക്കങ്ങള്‍ വിലയിരുത്തുന്നതിനുള്ള ആലോചനാ യോഗം ക്ഷേത്രം അന്നദാനമണ്ഡപത്തില്‍ നടന്നു. ക്ഷേത്രോപദേശക പ്രസിഡന്‍റ് സുധീഷ് പുളിക്കക്കുഴി അധ്യക്ഷത വഹിച്ചു. മുളക്കുളം പഞ്ചായത്തംഗം അജിത് കുമാര്‍ ഉദ്ഘാടനം ചെയ്തു. സബ് ഗ്രൂപ്പ് ഓഫീസര്‍ രാമചന്ദ്രന്‍, ഉപദേശക സമിതി വൈസ് പ്രസിഡന്‍റ് രഘുനാഥ്, സെക്രട്ടറി സൂരജ് വണ്ടാനത്ത് തുടങ്ങിയവര്‍ പ്രസംഗിച്ചു. തീര്‍ഥാടകരുടെ വാഹനങ്ങള്‍ സുഗമമായി എത്തിച്ചേരാന്‍ പെരുവ-മുളക്കുളം റോഡിലെ കുഴികളടച്ചു താത്കാലിക അറ്റകുറ്റപ്പണികള്‍ അടിയന്തരമായി നടത്തണമെന്ന് അധികാരികളോട് ആവശ്യപ്പെടാന്‍ യോഗം തീരുമാനിച്ചു. ക്ഷേത്രത്തില്‍ തീര്‍ഥാടകര്‍ക്ക് മുന്‍വര്‍ഷങ്ങളില്‍ നല്‍കിയിട്ടുള്ള സേവനങ്ങള്‍ ഈ വര്‍ഷവും നടത്തുന്നതിനു നിശ്ചയിച്ചു. എല്ലാ ദിവസവും മുന്‍കാലങ്ങളിലെ പോലെ രാവിലെ മുതല്‍ തന്നെ അന്നദാനവും നടത്തും.

ബഷീർ അനുസ്മരണം നടത്തി ‌

തലയോലപ്പറമ്പ്: വൈക്കം മുഹമ്മദ് ബഷീറിന്‍റെ 31-ാം ചരമ വാർഷിക ദിനാചരണം തലയോലപ്പറമ്പിലെ വൈക്കം മുഹമ്മദ് ബഷീര്‍ സ്മാരക മന്ദിരത്തില്‍ നടത്തി. അനുസ്മരണ സമ്മേളനം മഹാത്മാഗാന്ധി സർവകലാശാല സ്കൂൾ ഓഫ് ലെറ്റേഴ്സ് ഡയറക്ടർ പ്രഫ. ജോസ് കെ. മാനുവൽ ഉദ്ഘാടനം ചെയ്തു. മുൻ പഞ്ചായത്ത് പ്രസിഡന്‍റ് ടി.കെ. ഗോപി അധ്യക്ഷത വഹിച്ചു. തലയോലപ്പറമ്പ് ദേവസ്വം ബോര്‍ഡ് കോളജ് ഇംഗ്ലീഷ് വിഭാഗം അധ്യാപകൻ ആശിഷ് മാർട്ടിൻ ടോം, കടുത്തുരുത്തി സെൻട്രൽ സ്കൂൾ അധ്യാപകൻ കെ.വി. രാജേഷ്, വൈക്കം മുഹമ്മദ് ബഷീർ സ്മാരക ട്രസ്റ്റ് സെക്രട്ടറി ഡോ. സി.എം. കുസുമൻ, ആർ. പ്രസന്നന്‍, സുഭാഷ് പുഞ്ചക്കോട്ടിൽ, ബ്ലോക്ക് പഞ്ചായത്ത് അംഗങ്ങളായ തങ്കമ്മ വർഗീസ്, രേഷ്മ പ്രവീൺ, എം. അനിൽകുമാർ, നാസർ മൂസ, വി.സി. ലൂക്കോസ്, കെ. വിജയൻ, വി.എൻ. ബാബു എന്നിവർ പ്രസംഗിച്ചു. കായംകുളം ജോൺ എഫ്. കെന്നഡി ഹയർ സെക്കന്‍ഡറി സ്കൂള്‍, പിറവം എം.കെ.എം. ഹൈസ്കൂൾ, പെരുവ ഗവൺമെന്‍റ് ഹയർ സെക്കൻഡറി സ്കൂള്‍, കാഞ്ഞിരപ്പള്ളി ചിറക്കടവ് വി.എസ്.യു.പി. സ്കൂൾ തുടങ്ങിയ സ്കൂളുകളിലെ വിദ്യാർഥികളും അധ്യാപകരും ബഷീർ സ്മാരക കേന്ദ്രത്തിലെ ആർട്ട് ഗാലറിയും ഗവേഷണ കേന്ദ്രവും ബഷീർ പ്രതിമയും മറ്റും കാണുന്നതിന് എത്തിയിരുന്നു.

ഉദയഗിരിയിലെ അനധികൃത മാലിന്യ സംഭരണ യൂണിറ്റിന് 50,000 രൂപ പിഴ ചുമത്തി

കടുത്തുരുത്തി: മുളക്കുളം പഞ്ചായത്തിലെ പതിനൊന്നാം വാര്‍ഡില്‍ ഉദയഗിരി പ്രദേശത്ത് റബര്‍ തോട്ടത്തില്‍ അനധികൃതമായി പ്രവര്‍ത്തിച്ചിരുന്ന മാലിന്യസംഭരണ യൂണിറ്റിന് പഞ്ചായത്ത് പിഴ ചുമത്തി. പഞ്ചായത്ത് രാജ് നിയമത്തിലെ വിവിധ വകുപ്പുകള്‍ പ്രകാരം 50,000 രൂപയാണ് പിഴ ഈടാക്കിയത്. ആലപ്പുഴ അമ്പലപ്പുഴ പുഷ്പഭവനില്‍ വിപിന്‍ രാജിന്‍റെ ഉടമസ്ഥതയിലുള്ള അക്സോ അഗ്രോ സോള്‍ജിയര്‍ പ്രൈവറ്റ് ലിമിറ്റഡിനാണ് പഞ്ചായത്ത് പിഴയിട്ടത്. ഡെങ്കിപ്പനി നിയന്ത്രണ പ്രവര്‍ത്തനങ്ങളുടെ ഭാഗമായി നടന്നുവന്ന പരിശോധനയില്‍ ആരോഗ്യവകുപ്പാണ് കഴിഞ്ഞ മെയ് 28ന് ഗുരുതരമായ നിയമലംഘനം കണ്ടെത്തിയത്. കമ്പോസ്റ്റ് വളം നിര്‍മാണത്തിനാണ് എറണാകുളം ജില്ലയില്‍നിന്ന് ഇവിടേക്ക് മാലിന്യങ്ങള്‍ ശേഖരിച്ചിരുന്നത്. മുട്ടുചിറ നീരാക്കല്‍ എെജുവിന്‍റെ ഉടമസ്ഥതയിലുള്ള 25 ഏക്കര്‍ സ്ഥലത്തില്‍നിന്നു അഞ്ചേക്കര്‍ പാട്ടത്തിനെടുത്താണ് യൂണിറ്റിന്‍റെ പ്രവര്‍ത്തനം തുടങ്ങിയത്. ഒന്നര ഏക്കറോളം പ്രദേശത്ത് അശാസ്ത്രീയമായി ജൈവ-അജൈവ മാലിന്യങ്ങള്‍ കൂട്ടിയിട്ടിരിക്കുന്നതായാണ് ആരോഗ്യവകുപ്പ് പരിശോധനയില്‍ കണ്ടെത്തിയത്. ഈ പ്രദേശത്തുനിന്നു മാലിന്യങ്ങള്‍ പൂര്‍ണമായി നീക്കം ചെയ്ത് അണുവിമുക്തമാക്കുന്ന പ്രവര്‍ത്തനങ്ങള്‍ ഉള്‍പെടെ സ്ഥാപന ഉടമകളെ കൊണ്ട് പഞ്ചായത്ത് ചെയ്യിപ്പിച്ചു.കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി, മുളക്കുളം പഞ്ചായത്ത് പ്രസിഡന്‍റ് ടി.കെ. വാസുദേവന്‍ നായര്‍ എന്നിവരുടെ നേരിട്ടുള്ള ഇടപെടലാണ് നിയമലംഘനത്തിനെതിരേ ശക്തമായ നടപടികള്‍ വേഗത്തിലാക്കിയത്.

വൈദ്യുതി പോസ്റ്റ് വലിച്ചു കെട്ടിയ കമ്പിയിലൂടെ കാട് കയറുന്നത് അപകടഭീഷണി ഉയര്‍ത്തുന്നു

കീഴൂര്‍: വൈദ്യുതി പോസ്റ്റ് വലിച്ചു കെട്ടിയ കമ്പിയിലൂടെ കാട് കയറുന്നത് അപകട ഭീഷണി ഉയര്‍ത്തുന്നു. തലയോലപ്പറമ്പ്-പെരുവ റോഡില്‍ കീഴൂര്‍ പ്ലാംചുവട് ക്ഷേത്രത്തിനു മുന്‍വശത്തു നില്‍ക്കുന്ന വൈദ്യുത പോസ്റ്റിന്‍റെ കമ്പിയിലാണ് വള്ളിച്ചെടികള്‍ വളര്‍ന്നു കയറുന്നത്. സമീപത്തെ ട്രാന്‍സ്‌ഫോര്‍മറിലേക്ക് പോകുന്ന 11 കെവി ലൈനാണ് ഈ പോസ്റ്റിലൂടെ പോകുന്നത്. നിരവധിതവണ കെഎസ്ഇബി അധികൃതരെ വിവരം അറിയിച്ചെങ്കിലും നടപടിയുണ്ടായില്ലെന്ന് നാട്ടുകാര്‍ പറയുന്നു.

വൈക്കം ആയുർവേദ ആശുപത്രിയിലെ കെട്ടിടങ്ങൾ ജീർണാവസ്ഥയിൽ

വൈക്കം: വൈക്കം താലൂക്ക് ആയുർവേദ ആശുപത്രിയിലെ കെട്ടിടം ജീർണാവസ്ഥയിലെന്ന് പരാതി. ജില്ലയിലെ ആയുർവേദ ആശുപത്രികളിൽ ഏറ്റവും പഴക്കമേറിയ ആശുപത്രിയാണ് വൈക്കം താലൂക്ക് ആയുർവേദ ആശുപത്രി. സമീപ ജില്ലകളിൽ നിന്നടക്കം രോഗികൾ ഇവിടെ ചികിത്സ തേടുന്നുണ്ട്. സ്ഥല പരിമിതിയുള്ളതിനാൽ ഇവിടെ കെട്ടിടങ്ങൾ അടുത്തടുത്താണ് സ്ഥിതി ചെയ്യുന്നത്. 10 വർഷങ്ങൾക്ക് മുമ്പ് കെ. അജിത് എംഎൽഎ ആയിരുന്നപ്പോൾ മൂന്നു നിലകളിലായി നിർമിച്ച പേയ്മെന്‍റ് ബ്ലോക്ക് ഇപ്പോൾ അപകടാവസ്ഥയിലാണ്. ഇതിലെ സ്യൂട്ടുകളും സിങ്കിൾ മുറികളും തീർത്തും ഉപയോഗശൂന്യമാണ്. സ്യൂട്ട് ഇതുവരെ ആരും എടുക്കുകയോ ഉപയോഗിക്കുകയോ ചെയ്തിട്ടില്ല. കെട്ടിടത്തിൽ പതിക്കുന്ന മഴവെള്ളം മുഴുവനും കെട്ടിടത്തിനുള്ളിലേക്ക് വീഴുന്ന സ്ഥിതിയാണ്. ആശുപത്രിയുടെ തുടക്ക കാലത്ത് ഉണ്ടായിരുന്ന പഴയ കെട്ടിടം ഇപ്പോൾ പൊളിച്ചു നീക്കിയിട്ടുണ്ട്. കേന്ദ്ര പദ്ധതിയിൽ ഒരു കോടി രൂപ പുതിയ കെട്ടിടം പണിയാൻ അനുവദിച്ചിട്ടുണ്ട്. ഇപ്പോഴത്തെ ഫാർമസിയും കഞ്ഞിവെപ്പ് മുറിയും മരുന്ന് സ്റ്റോർ മുറിയും അതിനോടു ചേർന്നുള്ള ശുചിമുറികളും ചോർന്നൊലിക്കുകയാണ്. കഷായപ്പാത്രങ്ങളും മരുന്നു പൊടികളും കുടയുടെ അടിയിൽ ഭദ്രമായി സൂക്ഷിച്ചാണ് ജോലിക്കാർ വിതരണം നടത്തുന്നത്. ഈ കെട്ടിടത്തിന് ഇപ്പോഴും ഉദ്യോഗസ്ഥർ ഫിറ്റ്നസ് സർട്ടിഫിക്കറ്റ് നൽകുന്നുണ്ടെന്ന് നാട്ടുകാർ ആരോപിക്കുന്നു.

ഭൂമിശാസ്ത്രം സയന്‍സ് പാഠ്യവിഷയത്തില്‍ ഉള്‍പ്പെടുത്തണം: ഡോ. എം.ജി. മനോജ്

കോട്ടയം: കാലാവസ്ഥാ വ്യതിയാനം ഭൂവിനിയോഗപ്രശ്‌നങ്ങള്‍ എന്നിവ നിലനില്‍ക്കുന്ന സാഹചര്യത്തില്‍ ഹ്യുമാനിറ്റീസ് വിഭാഗത്തിലുള്ള ഭൂമിശാസ്ത്ര വിഷയം സയന്‍സ് വിഭാഗത്തില്‍ ഉള്‍പ്പെടുത്തുന്നതിനെക്കുറിച്ച് ഗൗരവമായി ചിന്തിക്കണമെന്ന് കൊച്ചിന്‍ യൂണിവേഴ്‌സിറ്റി അറ്റ്‌മോസ്ഫെറിക് റഡാര്‍ റിസര്‍ച്ച് സെന്‍റര്‍ ശാസ്ത്രജ്ഞന്‍ ഡോ. എം.ജി. മനോജ്. ജില്ലാ ജ്യോഗ്രഫി ടീച്ചേഴ്‌സ് അസോസിയേഷന്‍ നടത്തിയ അനുമോദന സമ്മേളനത്തില്‍ മുഖ്യപ്രഭാഷണവും ജില്ലാതല ജ്യോഗ്രഫി ക്ലബിന്‍റെ ഉദ്ഘാടനവും നിര്‍വഹിച്ചു പ്രസംഗിക്കുകയായിരുന്നു അദ്ദേഹം. അസോസിയേഷന്‍ 2024-25 അധ്യയന വര്‍ഷത്തില്‍ ഒന്നാം വര്‍ഷ ഹയര്‍ സെക്കന്‍ഡറി പരീക്ഷയില്‍ ജില്ലയില്‍ ഉന്നത വിജയം നേടിയ വിദ്യാര്‍ഥികളെ ആദരിച്ചു. ഉദ്ഘാടന സമ്മേളനം കോട്ടയം നഗരസഭ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ നിര്‍വഹിച്ചു. അസോസിയേഷന്‍ പ്രസിഡന്‍റ് കെ.വി. സുരേഷ് അധ്യക്ഷത വഹിച്ചു. നഗരസഭാംഗം കെ. ശങ്കരന്‍, സെക്രട്ടറി വി.എന്‍. സായിരാജ്, വിദ്യ പി. നായര്‍, എന്‍. രവി, പി. ബാബു, എസ്. അഖില്‍, പി.ആര്‍. പ്രിജു എന്നിവര്‍ പ്രസംഗിച്ചു.

കാഞ്ഞിരത്തിൻമൂട്-വെന്നിമല റോഡ് പണി ; നിരാഹാരസമരം നടത്തി

പയ്യപ്പാടി: അഞ്ചു കോടി രൂപ അനുവദിച്ചിട്ടും കാഞ്ഞിരത്തിൻ മൂട്-വെന്നിമല റോഡ് നിർമാണം ആരംഭിക്കാത്തത് സർക്കാരിന്‍റെ അവഗണനകാരണമെന്ന് ചാണ്ടി ഉമ്മൻ എംഎൽഎ. പയ്യപ്പാടി കവലയിൽ അഞ്ചാം വാർഡ് മെംബർ മോനിച്ചൻ കുറ്റിപ്പുറം നടത്തിയ 12 മണിക്കൂർ നിരാഹാരസസമരം ഉദ്ഘാടനം ചെയ്യുകയായിരുന്നു അദ്ദേഹം. കെപിസിസി നിർവാഹകസമിതിയംഗം ജോഷി ഫിലിപ്, നേതാക്കളായ കുഞ്ഞ് ഇല്ലമ്പള്ളി, പ്രഫ. സി. മാമച്ചൻ, ജിനു കെ. പോൾ, തമ്പി ചന്ദ്രൻ, വത്സമ്മ മാണി, വർഗീസ് ചാക്കോ, പി.എം. സ്കറിയ, സാബു പുതുപ്പറമ്പിൽ, കെ.ബി. ഗിരീശൻ, സാം കെ. വർക്കി, ഇ.കെ. പ്രകാശൻ, അജിത് പി. കുര്യൻ, രാധാകൃഷ്ണൻ നായർ, വിനീഷ് ബെന്നി, ബിനീഷ് ബെന്നി, ജസ്റ്റിൻ ജോൺ, വിനു വരയപ്പള്ളി എന്നിവർ പ്രസംഗിച്ചു.

വിലക്കയറ്റത്തിനെതിരേ സമരവുമായി മഹിളാ മോർച്ച

പള്ളിക്കത്തോട് :വിലക്കയറ്റത്തിനെതിരേ പള്ളിക്കത്തോട് മഹിളാ മോർച്ചയുടെ നേതൃത്വത്തിൽ സിവിൽ സപ്ലൈസ് സൂപ്പർ മാർക്കറ്റിലേക്ക് നടത്തിയ പ്രതിഷേധ മാർച്ചും ധർണയും ബിജെപി മധ്യമേഖല പ്രസിഡന്‍റ് എൻ. ഹരി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് മഞ്ജു ബിജു അധ്യക്ഷത വഹിച്ചു. പഞ്ചായത്തംഗങ്ങളായ അശ്വതി സതീഷ്, പഞ്ചായത്തംഗം ആശ ഗിരീഷ്, മഹിളാ മോർച്ച ജില്ലാ ജനറൽ സെക്രട്ടറി ജ്യോതി ബിനു, സന്ധ്യാ അജികുമാർ, അഖിൽ രവീന്ദ്രൻ, ടി.ബി. ബിനു, സതീഷ് ചന്ദ്രൻ എന്നിവർ പ്രസംഗിച്ചു.

ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ചെയ്യും: മന്ത്രി

കോട്ടയം: മാറിയ പാഠപുസ്തകത്തിനനുസരിച്ച് ഒന്നു മുതല്‍ 10 വരെ ക്ലാസുകള്‍ക്കുള്ള ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒന്‍പതു മുതല്‍ കൈറ്റ് വിക്ടേഴ്‌സില്‍ സംപ്രേഷണം ആരംഭിക്കുമെന്ന് മന്ത്രി വി. ശിവന്‍കുട്ടി. കുട്ടികള്‍ക്കുള്ള അധിക പിന്തുണ എന്ന തരത്തിലാണ് ഈ ക്ലാസുകള്‍ തയാറാക്കിയിട്ടുള്ളത്. സമഗ്രഗുണമേന്മ വിദ്യാഭ്യാസ പദ്ധതിയുടെ ഭാഗമായി അക്കാദമിക് മോണിറ്ററിംഗ് പ്ലാറ്റ്‌ഫോമുകള്‍ പരിചയപ്പെടുത്താന്‍ കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍റെ (കൈറ്റ്) നേതൃത്വത്തില്‍ ജില്ലയില്‍ നടന്ന ഹൈസ്‌കൂള്‍ പ്രഥമാധ്യാപക ശില്പശാലയില്‍ വീഡിയോ കോണ്‍ഫറന്‍സിംഗിലൂടെ പ്രസംഗിക്കുകയായിരുന്നു മന്ത്രി. കൈറ്റ് സിഇഒ കെ. അന്‍വര്‍ സാദത്തും പങ്കെടുത്തു. സമഗ്ര പ്ലസ് (www.samagra. kite.kerala.gov.in) പോര്‍ട്ടലിലൂടെ ടീച്ചര്‍ക്ക് ഡിജിറ്റല്‍ പ്ലാനുകള്‍ തയാറാക്കി സൂക്ഷിക്കാനും പ്രഥമാധ്യാപകര്‍ക്ക് സമര്‍പ്പിക്കാനും കഴിയും. അതോടൊപ്പം ഈ പോര്‍ട്ടലിലുള്ള ഡിജിറ്റല്‍ റിസോഴ്‌സുകള്‍ ലേണിംഗ് റൂം സംവിധാനം വഴി കുട്ടികള്‍ക്കും രക്ഷിതാക്കള്‍ക്കും ഒരുപോലെ പ്രയോജനപ്പെടുത്താനുമാവും. സ്‌കീം ഓഫ് വര്‍ക്കിനനുസരിച്ചാണോ തന്‍റെ പ്രവര്‍ത്തനങ്ങള്‍ മുന്നോട്ടു പോകുന്നതെന്ന് ടീച്ചര്‍ക്ക് സ്വയം വിലയിരുത്താം. നേരത്തേ വിദ്യാഭ്യാസ ഓഫീസര്‍മാര്‍ക്കും പ്രൈമറി സ്‌കൂളിലെ പ്രഥമാധ്യാപകര്‍, ഐ.ടി. കോ-ഓര്‍ഡിനേറ്റര്‍മാര്‍, എസ്. ആര്‍.ജി. കണ്‍വീനര്‍മാര്‍ തുടങ്ങിയവര്‍ക്കും കൈറ്റ് പരിശീലനം നല്‍കിയിരുന്നു. ശില്പശാലയില്‍ ജില്ലയിലെ 243 ഹൈസ്‌കൂള്‍ പ്രഥമാധ്യാപകര്‍ പങ്കെടുത്തു. തുടര്‍ന്ന് ഹൈസ്‌കൂള്‍ വിഭാഗം ഐടി കോ-ഓര്‍ഡിനേറ്റര്‍മാര്‍ക്കും എസ്.ആര്‍.ജി. കണ്‍വീനര്‍മാര്‍ക്കും പരിശീലനം നല്‍കും. ഇവരാണ് സ്‌കൂളുകളിലെ മറ്റ് അധ്യാപകര്‍ക്ക് പരിശീലനം നല്‍കുക. ജില്ലയില്‍ ശില്പശാലയ്ക്ക് ജില്ലാ കോ-ഓര്‍ഡിനേറ്റര്‍ തോമസ് വര്‍ഗീസ് നേതൃത്വം നല്‍കി. ജില്ലയിലെ മാസ്റ്റര്‍ ട്രയിനര്‍മാര്‍ വിവിധ വിഷയങ്ങളില്‍ ക്ലാസുകള്‍ നയിച്ചു.

കേരള കത്തോലിക്കാ സഭയില്‍ മലങ്കര റീത്ത് അനുവദിച്ചതിന്‍റെ വാര്‍ഷികാഘോഷം

കല്ലിശേരി: ക്‌നാനായ മലങ്കര പുനരൈക്യത്തിന്‍റെയും കേരള കത്തോലിക്കാ സഭയില്‍ അന്ത്യോക്യന്‍ സുറിയാനി റീത്ത് (മലങ്കര റീത്ത്) അനുവദിച്ചതിന്‍റെയും 104-ാം വാര്‍ഷികാഘാഷം നടത്തി. ഉമയാറ്റുകര ഓര്‍ത്തഡോക്‌സ് ഇടവക കുരിശടിയില്‍നിന്നു പുനരൈക്യ റാലിയോടെ പരിപാടികള്‍ക്കു തുടക്കമായി. കോട്ടയം അതിരൂപത സഹായമെത്രാന്‍ ഗീവര്‍ഗീസ് മാര്‍ അപ്രേമിന്‍റെ അധ്യക്ഷതയില്‍ ചേര്‍ന്ന സമ്മേളനം സഹായ മെത്രാന്‍ മാര്‍ ജോസഫ് പണ്ടാരശേരില്‍ ഉദ്ഘാടനം ചെയ്തു. ഫാ. തോമസ് ആനിമൂട്ടില്‍, ഫാ. റെന്നി കട്ടേല്‍, സാബു പാറാനിക്കല്‍, സല്‍വി തയ്യില്‍, ഏയ്ബു നെടിയുഴത്തില്‍, ജെസി ചെറുമണത്ത് എന്നിവര്‍ പ്രസംഗിച്ചു. വിവിധ മേഖലകളില്‍ പ്രാഗത്ഭ്യം തെളിയിച്ച മലങ്കര ഫൊറോന അംഗങ്ങളെ ആദരിച്ചു.

പുസ്തകപ്രേമികള്‍ക്കു സന്തോഷിക്കാം : കോട്ടയം പബ്ലിക് ലൈബ്രറിയിലെ പഴയ പുസ്തകങ്ങള്‍ ഡിജിറ്റലാക്കുന്നു

കോട്ടയം: പഴക്കമുള്ള പുസ്തകങ്ങള്‍ ഇനി ലോകത്തിന്‍റെ ഏതു കോണിലിരുന്നും വായിക്കാം. കോട്ടയം പബ്ലിക് ലൈബ്രറിയിലെ 1960ന് മുമ്പുള്ള എല്ലാ പുസ്തകങ്ങളും ഡിജിറ്റലാക്കുന്ന ജോലികള്‍ പുരോഗമിക്കുകയാണ്. ലൈബ്രറിയില്‍ സൂക്ഷിച്ചിരിക്കുന്ന വര്‍ഷങ്ങള്‍ പഴക്കമുള്ള മലയാളം, ഇംഗ്ലീഷ് ഭാഷകളിലുള്ള തെരഞ്ഞെടുത്ത 30,000 പുസ്തകങ്ങളാണ് ആദ്യഘട്ടത്തില്‍ ഡിജിറ്റല്‍ രൂപത്തിലാക്കുന്നത്. പാലക്കാട് മണ്ണാര്‍ക്കാട് കേന്ദ്രമായി പ്രവര്‍ത്തിക്കുന്ന ഇന്‍ഡിക് ഡിജിറ്റല്‍ ആര്‍ക്കൈവ് ഫൗണ്ടേഷന്‍ പ്രവര്‍ത്തകരുടെ നേതൃത്വത്തിലാണ് ഡിജിറ്റലൈസേഷന്‍ പ്രവര്‍ത്തനങ്ങള്‍ ആരംഭിച്ചിരിക്കുന്നത്. ആദ്യഘട്ടത്തില്‍ തെരഞ്ഞെടുത്തിരിക്കുന്ന 30,000 പുസ്തകങ്ങള്‍ ഡിജിറ്റലാക്കുന്ന പ്രവര്‍ത്തനങ്ങള്‍ അടുത്ത ദിവസം ആരംഭിക്കും. വലിയ ഡിജിറ്റല്‍ സ്‌കാനര്‍ ഉപയോഗിച്ചാണ് പുസ്തകങ്ങള്‍ സ്‌കാന്‍ ചെയ്യുന്നത്. ഫൗണ്ടേഷന്‍റെ രണ്ടു പ്രവര്‍ത്തകര്‍ പുസ്തങ്ങള്‍ സ്‌കാന്‍ ചെയ്യുന്നതു പൂര്‍ത്തിയാക്കി. ചുരുങ്ങിയ ദിവസങ്ങള്‍ക്കുള്ളില്‍ പുസ്തകങ്ങള്‍ ഡിജിറ്റല്‍ രൂപത്തിലാക്കും. ഏതാണ്ട് ആറു മാസത്തിനുള്ളില്‍ പുസ്തകങ്ങള്‍ ഡിജിറ്റലാക്കി കോട്ടയം പബ്ലിക് ലൈബ്രറിയുടെ വെബ്‌സൈറ്റില്‍ പ്രസിദ്ധീകരിക്കും. ഇതിനു പുറമേ ഇന്‍ഡിക് ഡിജിറ്റല്‍ ആര്‍ക്കൈവ് ഫൗണ്ടേഷന്‍റെ ഗ്രന്ഥപ്പുര എന്ന വെബ്‌സൈറ്റിലും പുസ്തങ്ങള്‍ പ്രസിദ്ധീകരിക്കുന്നുണ്ട്. ലോകത്തെവിടെയുമുള്ള ആളുകള്‍ക്കും സൗജന്യമായി പുസ്തകങ്ങള്‍ വായിക്കാം. ഇതിന് ലൈബ്രറിയുടെ അംഗത്വം ആവശ്യമില്ല. രണ്ടാം ഘട്ടമായി മറ്റു പുസ്തകങ്ങളും ഡിജിറ്റലാക്കുന്ന ജോലികള്‍ ആരംഭിക്കും. ലൈബ്രറിയില്‍ ഇപ്പോള്‍ മലയാളത്തിലും ഇംഗ്ലീഷിലുമായി രണ്ടരലക്ഷത്തില്‍പ്പരം പുസ്തകങ്ങളാണുള്ളത്. ഇവയില്‍ ആറുപതിനായിരത്തോളം പുസ്തകങ്ങള്‍ ഡിജിറ്റലാക്കാനാണ് ഇപ്പോള്‍ തീരുമാനിച്ചിരിക്കുന്നത്. മോഹവിലയുള്ള പുസ്തകങ്ങള്‍ക്കു പുറമേ 1950ല്‍ പ്രസിദ്ധീകരിച്ച കേരള പാഠാവലി, 70 വര്‍ഷത്തിലേറെ പഴക്കമുള്ള വര്‍ത്തമാന പത്രങ്ങള്‍, മാസികകള്‍, സുവനീറുകള്‍, നോട്ടീസുകള്‍ എന്നിവയും ഡിജിറ്റലാക്കുന്നുണ്ട്. ഏതെങ്കിലും പുസ്തകത്തിന്‍റെ ഗ്രന്ഥകര്‍ത്താവ് ജീവിച്ചിരിപ്പുണ്ടെങ്കില്‍ ഡിജിറ്റൈസ് ചെയ്യാന്‍ അനുമതി വാങ്ങുകയും ചെയ്യും. വിലമതിക്കാനാവാത്ത പുസ്തകങ്ങള്‍ ഡിജിറ്റല്‍ രൂപത്തിലാക്കുന്നതു ഗവേഷണ വിദ്യാര്‍ഥികള്‍ ഉള്‍പ്പെടെയുള്ളവര്‍ക്കു വലിയ പ്രയോജനമാകും. കോട്ടയം സിഎംഎസ് പ്രസില്‍ അച്ചടിച്ച മലയാളത്തിലെ ആദ്യത്തെ പുസ്തകം മുതല്‍ 1960 മുമ്പ് അച്ചടിച്ച അപൂര്‍വ പുസ്തകങ്ങളുടെ വലിയ ശേഖരമാണ് പബ്ലിക് ലൈബ്രറിയിലുള്ളത്. ഇവയെല്ലാം ഓണ്‍ലൈനില്‍ സൗജന്യമായി ലഭ്യമാകുന്നത് അക്ഷരപ്രേമികള്‍ക്കും യുവ തലമുറയ്ക്കും വലിയ മുതല്‍ക്കൂട്ടാകും. ഇന്‍ഡിക് ഡിജിറ്റല്‍ ആര്‍ക്കൈവ് ഫൗണ്ടേഷന്‍ സൗജന്യമായിട്ടാണ് ഡിജിറ്റലാക്കുന്നതിനുള്ള പ്രവര്‍ത്തനങ്ങള്‍ ചെയ്യുന്നത്. ഉദ്ഘാടനം ഇന്ന് കോട്ടയം: പബ്ലിക് ലൈബ്രറിയില്‍ പഴയ പുസ്തകങ്ങള്‍ ഡിജിറ്റൈസ് ചെയ്യുന്നതിന്‍റെ ഉദ്ഘാടനം ഇന്നു ഉച്ചകഴിഞ്ഞു രണ്ടിനു നടക്കും. ലൈബ്രറി പ്രസിഡന്‍റ് ഏബ്രഹാം ഇട്ടിച്ചെറിയ ഉദ്ഘാടനം ചെയ്യും. സംസ്ഥാനത്ത് ഗ്രന്ഥശേഖരം വരും തലമുറയ്ക്കു നഷ്ടമാകാതെ ഡിജിറ്റൈസ് ചെയ്ത് സംരക്ഷിക്കുന്ന ആദ്യ ലൈബ്രറിയാണ് കോട്ടയം പബ്ലിക് ലൈബ്രറി.

ബേക്കര്‍ ജംഗ്ഷനിൽ വീണ്ടും ഗതാഗത പരിഷ്‌കാരം

പഴയ ഗതാഗത പരിഷ്‌കാരം പിന്‍വലിച്ചു കോട്ടയം: നഗരത്തില്‍ വീണ്ടും ഗതാഗത പരിഷ്‌കാരവുമായി പോലീസ്. ബേക്കര്‍ ജംഗ്ഷനിലാണ് കുരുക്കൊഴിവാക്കാന്‍ പുതിയ പരിഷ്‌കാരം ഏര്‍പ്പെടുത്തുന്നത്. കഴിഞ്ഞ മൂന്നാഴ്ച പരീക്ഷണാടിസ്ഥാനത്തില്‍ നടപ്പാക്കിയ പരിഷ്‌കാരങ്ങള്‍ കുരുക്കൊഴിവാക്കാന്‍ കാര്യമായി പ്രയോജനപ്പെട്ടില്ലെന്നു മാത്രമല്ല, യാത്രക്കാര്‍ക്കും പൊതുജനങ്ങള്‍ക്കും കൂടുതല്‍ ബുദ്ധിമുട്ടുണ്ടാക്കുകയാണ് ചെയ്തത്. ഇതു പരിഗണിച്ചാണ് ജില്ലാ പോലീസ് ചീഫിന്‍റെ നിര്‍ദേശ പ്രകാരം ഇന്നു മുതല്‍ പുതിയ പരിഷ്‌കാരം നടപ്പാക്കുന്നത്. ഇതിന്‍പ്രകാരം കുമരകം, അയ്മനം, കുടമാളൂര്‍ ഭാഗത്തുനിന്നു വരുന്ന സ്വകാര്യ ബസുകളും കെഎസ്ആര്‍ടിസി ബസുകളും എംസി റോഡില്‍ ഇറക്കി നിര്‍ത്താതെ സൂഡിയോ കടയുടെ മുന്‍വശത്തു നിര്‍ത്തി യാത്രക്കാരെ ഇറക്കി സീസേഴ്‌സ് ജംഗ്ഷന്‍ വഴി നാഗമ്പടം സ്റ്റാന്‍ഡിലേക്ക് പോകണം. ഈ ഭാഗത്തുനിന്നു വരുന്ന ബസുകള്‍ ബേക്കര്‍ ജംഗ്ഷനിലെത്തി ശാസ്ത്രീ റോഡ് ബസ്‌റ്റോപ്പില്‍ ആളെ ഇറക്കി കുര്യന്‍ ഉതുപ്പ് റോഡുവഴി നാഗമ്പടത്തേക്ക് പോകുന്ന രീതിയായിരുന്നു മൂന്നാഴ്ച നടപ്പാക്കിയിരുന്നത്. ഇതു യാത്രക്കാരെ വലച്ചിരുന്നു. എംസി റോഡു വഴി ഏറ്റുമാനൂര്‍, മെഡിക്കല്‍ കോളജ് ഭാഗങ്ങളിലേക്ക് പോകുന്ന സ്വകാര്യ ബസുകളും കെഎസ്ആര്‍ടിസി ബസുകളും ശക്തി ഹോട്ടലിനു സമീപമുള്ള വെയിറ്റിംഗ് ഷെഡിനു മുന്‍വശം നിര്‍ത്തി യാത്രക്കാരെ കയറ്റി ഉടന്‍ തന്നെ പേകണം. ഇതാണ് പുതിയ പരിഷ്‌കാരം. പരിഷ്‌കാരത്തിന്‍റെ ഭാഗമായി ബേക്കര്‍ ജംഗ്ഷനില്‍ ഇപ്പോള്‍ ബസ് നിര്‍ത്തുന്ന എവിജി പമ്പിനു സമീപം ട്രാഫിക് കോണ്‍ ഉപയോഗിച്ച് കയര്‍ കെട്ടി ബ്ലോക്ക് ചെയ്തിട്ടുണ്ട്. യാത്രക്കാര്‍ മുന്നോട്ടു മാറി വെയിറ്റിംഗ് ഷെഡിൽ നില്‍ക്കണമെന്ന ബോര്‍ഡുമുണ്ട്. പുതിയ ഗതാഗത പരിഷ്‌കാരങ്ങള്‍ നടപ്പാക്കാനും നിയന്ത്രിക്കാനും ഇന്നു മുതല്‍ പോലീസന്‍റെ നിരീക്ഷണവുമുണ്ടാകും. പരിഷ്‌കാരങ്ങള്‍ ഏര്‍പ്പെടുത്തിയാലും പലപ്പോഴും പാലിക്കപ്പെടാതെ പോകുന്നതയാണ് കാണാന്‍ കഴിയുന്നത്. ബേക്കര്‍ ജംഗ്ഷനിലെ ബസ്റ്റോപ്പ് മാറ്റം എത്രത്തോളം പ്രായോഗികമാകുമെന്ന് കണ്ടറിയേണ്ടതാണ്. ഇവിടെ പോലീസിന്‍റെ നിയന്ത്രണം ഉണ്ടെങ്കിലേ പരിഷ്‌കാരം വിജയിക്കുകയുള്ളൂ. അല്ലെങ്കില്‍ ബസുകള്‍ തോന്നും പടി നിര്‍ത്തും. ബേക്കര്‍ ജംഗ്ഷനില്‍ ശക്തി ഹോട്ടലിനു മുന്‍വശത്തു വാഹനങ്ങള്‍ യുടേണ്‍ എടുക്കുന്നതും ഗതാഗതക്കുരുക്കിനു കാരണമാകുന്നുണ്ട്. ഇത് നിയന്ത്രിക്കാന്‍ പോലീസ് തയാറാകുന്നില്ല. അതേപോലെ, കുമരകം റോഡിലും ട്രാഫിക് കോണുകള്‍ തീരുന്ന ഭാഗത്ത് വാഹനങ്ങള്‍ യുടേണ്‍ എടുക്കുന്നു. ഇതു നിയന്ത്രിക്കണം. സൂഡിയോയ്ക്കു മുമ്പിലുടെയുള്ള റോഡില്‍ ഓട്ടോറിക്ഷ സ്റ്റാന്‍ഡുമുണ്ട്. ഇവിടെ പലപ്പോഴും രണ്ടു വരിയായിട്ടാണ് ഓട്ടോറിക്ഷകള്‍ പാര്‍ക്കു ചെയ്യുന്നത്. കഷ്ടിച്ച് ഒരു വാഹനത്തിനു മാത്രം കടന്നു പോകാനേ സാധിക്കുന്നുള്ളൂ. അതേപോലെ വണ്‍വേയായ റോഡില്‍ കൂടി വാഹനങ്ങള്‍ കയറി വരുന്നതും കുരുക്കുണ്ടാക്കുന്നുണ്ട്. ഇവിടെ വണ്‍വേയാണെന്നുള്ള ബോര്‍ഡ് പോലുമില്ല.

നീർനായയുടെ കടിയേറ്റ വീട്ടമ്മ കുഴഞ്ഞുവീണ് മരിച്ചു

കോട്ടയം: നീർനായയുടെ (കഴുന്ന) കടിയേറ്റ വീട്ടമ്മ കുഴഞ്ഞുവീണു മരിച്ചു. വേളൂർ പാണംപടി കലയംകേരിൽ ഇബ്രാഹിംകുട്ടിയുടെ ഭാര്യ നിസാനി (53) ആണ് മരിച്ചത്. ഇന്നലെ രാവിലെ 10.30 ഓടെ ആറ്റിൽ തുണി കഴുകുന്നതിനിടെ നീർനായ കടിക്കുകയായിരുന്നു. തുടർന്ന് ജനറൽ ആശുപത്രിയിൽ പ്രാഥമിക ചികിത്സയ്ക്ക് ശേഷം വീട്ടിലേക്കു മടങ്ങി. പിന്നീട്, വൈകുന്നേരം കുഴഞ്ഞ് വീണതിനെ തുടർന്ന് കോട്ടയം മെഡിക്കൽ കോളജ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഫോറസ്റ്റ് ഡിപ്പാർട്ട്‌മെന്‍റിൽ വിവരം അറിയിച്ചു. പോസ്റ്റുമോർട്ടം റിപ്പോർട്ട് ലഭിച്ചാൽ മാത്രമേ മരണകാരണം വ്യക്തമാകൂ. മകൾ: ജാസ്മിൻ. മരുമകൻ: മുബാറക്. കബറടക്കം ഇന്ന് വൈകുന്നേരം മൂന്നിന് താഴത്തങ്ങാടി ജുമാ മസ്ജിദ് കബർസ്ഥാനിൽ.

വിശുദ്ധ തോമ്മാശ്ലീഹായുടെ ധീരമായ മാതൃക അനുകരിക്കണം: മാര്‍ തോമസ് തറയില്‍

നിരണം: ക്രിസ്തുശിഷ്യനായ മാര്‍ തോമ്മാശ്ലീഹായുടെ പാദസ്പര്‍ശത്താല്‍ പവിത്രമായ നിരണം തീര്‍ഥാടനകേന്ദ്രത്തിലേക്കുള്ള തീര്‍ഥാടനം ഭക്തജനപ്രവാഹമായി. ചങ്ങനാശേരി അതിരൂപത യുവദീപ്തി എസ്എംവൈഎമ്മിന്‍റെ നേതൃത്വത്തില്‍ പത്തൊമ്പതാമത് നിരണം തീര്‍ഥാടനമാണ് ഭക്തജനനിബിഡമായത്. അതിരൂപതയുടെ 18 ഫൊറോനകളില്‍ നിന്നുള്ള യുവജനങ്ങളും മുതിര്‍ന്നവരുമായ വിശാസികളാണ് കോരിച്ചൊരിഞ്ഞ മഴയെ അവഗണിച്ച് പ്രാര്‍ഥനാപൂര്‍വം തീര്‍ഥാടനത്തില്‍ അണിചേര്‍ന്നത്. രാവിലെ ഏഴിന് ചങ്ങനാശേരി സെന്‍റ് മേരീസ് മെത്രാപ്പോലീത്തന്‍പള്ളിയിലെ അഭിവന്ദ്യ പിതാക്കന്മാരുടെ കബറിട പള്ളിയില്‍ അര്‍പ്പിച്ച വിശുദ്ധ കുര്‍ബാനയ്ക്കുശേഷം തീര്‍ഥാടനത്തിനു തുടക്കംകുറിച്ചു. അതിരൂപത വികാരി ജനറാൾ മോണ്‍. ആന്‍റണി എത്തയ്ക്കാട്ട് കത്തിച്ചതിരി പ്രസിഡന്‍റ് അരുണ്‍ ടോം തോപ്പിലിനും യുവദീപ്തി പതാക ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസിനും കൈമാറി തീര്‍ഥാടനം ഉദ്ഘാടനം ചെയ്തു. അതിരൂപത ഡയറക്ടര്‍ ഫാ. സാവിയോ മാനാട്ട് ആമുഖപ്രസംഗവും കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍ അനുഗ്രഹ പ്രഭാഷണവും നടത്തി. ചങ്ങനാശേരി സെന്‍ട്രല്‍ ജംഗ്ഷന്‍, ളായിക്കാട്, ഇടിഞ്ഞില്ലം, വേങ്ങല്‍, കാവുംഭാഗം, പൊടിയാടിവഴിയാണ് തീര്‍ഥാടകര്‍ നിരണത്ത് എത്തിച്ചേര്‍ന്നത്. ആര്‍ച്ച്ബിഷപ് മാര്‍ തോമസ് തറയില്‍ പൊടിയാടിമുതല്‍ തീര്‍ഥാടകരോടൊപ്പം ചേര്‍ന്നത് യുവജനങ്ങള്‍ക്ക് ആവേശമായി. നിരണം തീര്‍ഥാടന കേന്ദ്രത്തില്‍ തീര്‍ഥാടനം എത്തിയശേഷം മാര്‍ തോമസ് തറയില്‍ കല്‍വിളക്കില്‍ തിരി തെളിച്ചു. ക്രിസ്തുശിഷ്യനായ ഭാരതത്തിന്‍റെ അപ്പസ്‌തോലന്‍ വിശുദ്ധ തോമ്മാശ്ലീഹായുടെ ധീരതയും മാതൃകയും വിശ്വാസ തീര്‍ഥാടനത്തില്‍ യുവജനങ്ങള്‍ മാതൃകയാക്കണമെന്ന് മാര്‍ തോമസ് തറയില്‍ സന്ദേശത്തില്‍ പറഞ്ഞു. മാര്‍ത്തോമ്മാ ശ്ലീഹായുടെ തിരുശേഷിപ്പ് കൂടാരത്തിലെ പ്രാര്‍ഥനയ്ക്ക് ശേഷം തീര്‍ഥാടകര്‍ക്ക് നേര്‍ച്ചഭക്ഷണം വിതരണം ചെയ്തു. അതിരൂപത ഡയറക്ടര്‍ ഫാ. സാവിയോ മാനാട്ട് പ്രാര്‍ഥന നയിച്ചു. ഫാ.ടോണി പുതുവീട്ടില്‍ക്കളം, ക്രിസ്റ്റി കെ. കുഞ്ഞുമോന്‍, അലക്സ് മഞ്ഞുമേല്‍, ലാലിച്ചന്‍ മറ്റത്തില്‍, സിസ്റ്റര്‍ തെരസീന, ക്രിസ്റ്റിന്‍ സേവ്യര്‍, ജോയല്‍ ജോണ്‍ റോയി, ലൂസി ഫിലിപ്പോസ്, ഡെന്നി തോമസ്, റിയ പുന്നശേരി എന്നിവര്‍ നേതൃത്വം നല്‍കി. തീര്‍ഥാടനകേന്ദ്രത്തില്‍ രാവിലെ ആര്‍ച്ച്ബിഷപ് മാര്‍ ജോസഫ് പെരുന്തോട്ടം വിശുദ്ധകുര്‍ബാന അര്‍പ്പിച്ച് സന്ദേശം നല്‍കി. തീര്‍ഥാടനകേന്ദ്രം റെക്ടര്‍ ഫാ.ജോര്‍ജ് മൂലംകുന്നം, സ്പിരിച്വല്‍ ഡയറക്ടര്‍ ഫാ.ജോര്‍ജ് വല്ലയില്‍ എന്നിവര്‍ തീര്‍ഥാടകരെ സ്വീകരിച്ചു. കൊടിയിറക്കോടെ തീര്‍ഥാടനത്തിനു പ്രൗഢസമാപനമായി.

പാലാ സാന്തോം ഫുഡ് ഫാക്ടറി 14ന് ഉദ്ഘാടനം ചെയ്യും

കോട്ടയം: പാലാ രൂപതയുടെ പ്ലാറ്റിനം ജൂബിലി സ്മാരകമായി ഫുഡ് ഫാക്ടറി യാഥാര്‍ഥ്യമാകുന്നു. രൂപത ആവിഷ്‌കരിച്ച കര്‍ഷക ശക്തീകരണ പദ്ധതിയായ കര്‍ഷക ബാങ്കിന്‍റെ 10-ാം വാര്‍ഷിക മേളയില്‍ കാര്‍ഷിക മൂല്യവര്‍ധിത സംരംഭം എന്ന വിധത്തിലാണ് പാലാ സാന്തോം എന്ന പേരില്‍ ഫുഡ് ഫാക്ടറി യാഥാര്‍ഥ്യമാക്കിയിരിക്കുന്നത്. രൂപതയുടെ ഉടമസ്ഥതയിലൂള്ള കരൂര്‍ മുണ്ടുപാലം സ്റ്റീല്‍ ഇന്ത്യ കാമ്പസിലെ ആറേക്കറോളം സ്ഥാലത്തുള്ള അഗ്രോ ഇന്‍ഡസ്ട്രിയല്‍ പാര്‍ക്കിലാണ് ഫുഡ് ഫാക്ടറി. കൃഷി വകുപ്പില്‍നിന്നു രൂപതയ്ക്ക് അനുവദിച്ച് പാലാ രൂപത സോഷ്യല്‍ വെല്‍ഫെയര്‍ സൊസൈറ്റി പ്രമോട്ട് ചെയ്യുന്ന പാലാ സാന്തോം ഫാര്‍മേഴ്‌സ് പ്രൊഡ്യൂസര്‍ കമ്പനിയുടെ നേതൃത്വത്തില്‍ ആരംഭിക്കുന്ന സാന്തോം ഫുഡ് ഫാക്ടറിയുടെ ഉദ്ഘാടനം 14ന് നടക്കും. മീനച്ചില്‍ താലൂക്കിലും പരിസരത്തും സുലഭമായുള്ള ചക്കയും കപ്പയും കൈതച്ചക്കയും ഏത്തയ്ക്കയും ഇതര പഴവര്‍ഗങ്ങളും പച്ചക്കറികളും കര്‍ഷകരില്‍നിന്നു ന്യായവിലയ്ക്ക് സംഭരിച്ച് മൂല്യവര്‍ധിത ഉത്പന്നങ്ങളാക്കി വിപണിയിലിറക്കുക എന്നതാണ് ഫുഡ് ഫാക്ടറിയിലൂടെ ലക്ഷ്യമിടുന്നത്. വിദേശ രാജ്യങ്ങളിലേക്കും വിപണി ശൃംഖല വ്യാപിപ്പിച്ച് ഗുണമേന്മമുള്ള ഭക്ഷ്യ വസ്തുക്കള്‍ ലോകത്തിന്‍റെ വിവിധ ഭാഗങ്ങളില്‍ എത്തിക്കാനും ലക്ഷ്യമിടുന്നു. കൃഷി വകുപ്പിന്‍റെ സ്‌മോള്‍ ഫാര്‍മേഴ്‌സ് അഗ്രി ബിസിനസ് കണ്‍സോര്‍ഷ്യമെന്ന എസ്എഫ്എസിയില്‍ നിന്നും ജില്ലയില്‍ അനുവദിച്ച നാല് എഫ്പിഒകളില്‍ ഒന്നാണ് സാന്തോം എഫ്പിഒ. രൂപതയിലെ വിവിധ ഇടവകകളില്‍ പ്രവര്‍ത്തിക്കുന്ന ഉത്പാദക സംഘടനകള്‍, കമ്പനികള്‍, കര്‍ഷക ദള ഫെഡറേഷനുകള്‍, ഫാര്‍മേഴ്‌സ് ക്ലബുകള്‍, സ്വാശ്രയ സംഘങ്ങള്‍ തുടങ്ങിയവര്‍ ഉത്പാദിപ്പിക്കുന്ന മൂല്യവര്‍ധിത ഉത്പന്നങ്ങള്‍ തനതു ബ്രാന്‍ഡില്‍ ആഭ്യന്തര, വിദേശ വിപണനത്തിനു സാധ്യമാക്കും. ആധുനിക സാങ്കേതികവിദ്യയോടുകൂടിയ 18 യന്ത്രസാമഗ്രികളാണ് ഫാക്ടറിയിലുള്ളത്. അത്യാധുനികവും വിശാലവുമായ കോള്‍ഡ് സ്‌റ്റോജ്, ഡീ ഹൈഡ്രേറ്റ് യൂണിറ്റ്, പള്‍പ്പിംഗ്, വറ, പൊരി, പൗഡറിംഗ് യൂണിറ്റുകളും ഫാക്ടറിയിലുണ്ട്. കര്‍ഷകര്‍ക്ക് അവരുടെ വിളകളും ഉത്പന്നങ്ങളും ഉണങ്ങുവാനുള്ള യൂണിറ്റിനപ്പുറം ന്യായവില ഉറപ്പാക്കി മൂല്യവർധിത ഉത്പന്നങ്ങളാക്കി മാറ്റുന്നതിനുള്ള സാധ്യതയാണ് ഫാക്ടറി ഉറപ്പുതരുന്നത്. പാലാ സോഷ്യല്‍ സര്‍വീസ് സൊസൈറ്റിയുടെ നേതൃത്വത്തില്‍ നിലവില്‍ കാഞ്ഞിരമറ്റം അഗ്രോ പ്രൊഡ്യൂസര്‍ കമ്പനിയുടെ കാന്‍ വേ പ്രൊഡക്‌ഷന്‍സ് യൂണിറ്റ്, മൂഴൂര്‍ കര്‍ഷക ദള ഫെഡറേഷന്‍റെ കാര്‍ഷിക മൂല്യവര്‍ധിത സംഭരണ കേന്ദ്രവും മൂഴൂര്‍ മിത്രം പ്രൊഡക്‌ഷന്‍ യൂണിറ്റും, മാന്‍വെട്ടം, വയലാ, വെള്ളിയാമറ്റം എന്നിവിടങ്ങളിലെ സംസ്‌കരണ കേന്ദ്രങ്ങളില്‍ ആയിരക്കണക്കിനു കിലോ കാര്‍ഷിക വിളകളുടെ സംസ്‌കരണം എന്നിവയും നടന്നുവരുന്നുണ്ട്. 14ന് ഉച്ചകഴിഞ്ഞ് മൂന്നിന് സ്റ്റീല്‍ ഇന്ത്യാ കാമ്പസില്‍ നടക്കുന്ന ചടങ്ങില്‍ കൃഷിമന്ത്രി പി. പ്രസാദ് ഫാക്ടറി ഉദ്ഘാടനം ചെയ്യും. ബിഷപ് മാര്‍ ജോസഫ് കല്ലറങ്ങാട്ട് അധ്യക്ഷത വഹിക്കും. മന്ത്രിമാരും ജനപ്രതിനിധികളും യോഗത്തില്‍ പങ്കെടുക്കും. സമ്മേളനത്തില്‍ രൂപതയുടെ പ്ലാറ്റിനം ജൂബിലിയോടനുബന്ധിച്ച് 75 മാതൃകാ കര്‍ഷകരെ ആദരിക്കും. കൃഷിയിടങ്ങള്‍ പാഴായി കിടക്കാതെ സംഘകൃഷി സാധ്യതകള്‍ വളര്‍ത്തി വിഷരഹിത കൃഷിയിലൂടെ മായം കലരാത്ത ഉത്പന്നങ്ങൾ നാട്ടുകാര്‍ക്കും പ്രവാസി സമൂഹത്തിനും എത്തിക്കാനാണ് ഫുഡ് ഫാക്ടറി ലക്ഷ്യമിടുന്നതെന്ന് പാലാ രൂപത സോഷ്യല്‍ വെല്‍ഫെയര്‍ സൊസൈറ്റി ഡയറക്ടര്‍ ഫാ. തോമസ് കിഴക്കേല്‍ പറഞ്ഞു.

ജില്ലാ അതിർത്തിയിൽ പോലീസ് പരിശോധന

മുണ്ടക്കയം: കോട്ടയം - ഇടുക്കി ജില്ലകൾ അതിർത്തി പങ്കിടുന്ന മുണ്ടക്കയത്ത് ശനിയാഴ്ച രാത്രിയിൽ പോലീസിന്‍റെ വ്യാപക പരിശോധന. ലഹരി സംഘങ്ങളെ പിടികൂടുകയെന്ന ലക്ഷ്യത്തോടെയാണ് പരിശോധന നടത്തിയത്. രാത്രി ഒന്പതോടെ ലോക്കൽ പോലീസിനെ കൂടാതെ സ്പെഷൽ സ്ക്വാഡും ഡോഗ് സ്ക്വാഡും അടങ്ങുന്ന വൻ പോലീസ് സന്നാഹത്തിന്‍റെ നേതൃത്വത്തിലായിരുന്നു പരിശോധന. കെഎസ്ആർടിസി, സ്വകാര്യ ബസുകൾ, ടൂറിസ്റ്റ് ബസുകൾ, ചരക്കു ലോറികൾ തുടങ്ങിയ വാഹനങ്ങളിൽ കയറി ഡോഗ് സ്ക്വാഡ് പരിശോധന നടത്തി. ടൂ വീലർ, സ്വകാര്യ, ടാക്സി വാഹനങ്ങളും തടഞ്ഞുനിർത്തി പോലീസ് പരിശോധിച്ചു. വാഹന പരിശോധനയിൽ മദ്യപിച്ച് വാഹനമോടിച്ചെത്തിയവരും പോലീസ് വലയിലായി. അയൽ സംസ്ഥാനങ്ങളിൽനിന്നു വ്യാപകമായാണ് കോട്ടയം, ഇടുക്കി ജില്ലകളിലേക്ക് കഞ്ചാവ് ഉൾപ്പെടെയുള്ള ലഹരി മരുന്നുകൾ ഒഴുകുന്നത്. ഇരുചക്രവാഹനത്തിലും ചരക്കുവാഹനങ്ങളിലുമാണ് കൂടുതലായും മയക്കുമരുന്ന് കടത്തുന്നത്. ഇത്തരം സംഘങ്ങളെ പിടികൂടുകയെന്ന ലക്ഷ്യത്തോടെയാണ് പരിശോധന നടത്തിയതെന്നും വരുംദിവസങ്ങളിലും പരിശോധന തുടരുമെന്നും പോലീസ് അധികാരികൾ അറിയിച്ചു.

ബിന്ദുവിന്‍റെ കുടുംബത്തിന് ധനസഹായവുമായി ടെക്‌സ്റ്റൈൽസ് ഉടമ

തലയോലപ്പറമ്പ്: കോട്ടയം മെഡി. കോളജ് ആശുപത്രിയിൽ കെട്ടിടം തകർന്നു വീണു മരിച്ച ഡി.ബിന്ദുവിന്‍റെ കുടുംബത്തിന് സാമ്പത്തിക സഹായവുമായി ബിന്ദു ജോലി ചെയ്തിരുന്ന ടെക്സ്റ്റൈൽസ് ഉടമ എത്തി. തലയോലപ്പറമ്പിലെ ശിവാസ് ടെക്സ്റ്റൈൽസ് ഉടമ ആനന്ദാക്ഷനാണ് ഇന്നലെ രാവിലെ വീട്ടിലെത്തി ഒരു ലക്ഷം രൂപ കൈമാറിയത്. പുറമെ മാസംതോറും 5000 രൂപ ബിന്ദുവിന്‍റെ മാതാവിന് നൽകുമെന്നും ആനന്ദാക്ഷൻ പറഞ്ഞു.

രമേശ് ചെന്നിത്തല ബിന്ദുവിന്‍റെ വീട് സന്ദർശിച്ചു

തലയോലപ്പറമ്പ്: കോട്ടയം മെഡിക്കൽ കോളജ് ആശുപത്രി കെട്ടിടം ഇടിഞ്ഞ് വീണുണ്ടായ അപകടത്തിൽ മരിച്ച ബിന്ദുവിന്‍റെ കുടുംബത്തിന് സംസ്ഥാന സർക്കാർ 25 ലക്ഷം രൂപ അനുവദിക്കണമെന്നും സിവിൽ എൻജിനിയറിംഗ് പാസായ മകൻ നവനീതിന് സ്ഥിരം നിയമനം നൽകണമെന്നും എഐസിസി വർക്കിംഗ് കമ്മിറ്റി അംഗം രമേശ് ചെന്നിത്തല ആവശ്യപ്പെട്ടു. തലയോലപ്പറമ്പ് ഉമ്മാംകുന്നിലുള്ള ബിന്ദുവിന്‍റെ വീട്ടിലെത്തി കുടുംബാംഗങ്ങളെ ആശ്വസിപ്പിച്ച ശേഷമാണ് മാധ്യമപ്രവർത്തകരുടെ ചോദ്യത്തിന് മറുപടിയായി അദ്ദേഹം കുടുംബത്തിന് സഹായധനം ലഭ്യമാക്കണമെന്ന് പറഞ്ഞത്. ഇന്നലെ വൈകുന്നേരമാണ് ചെന്നിത്തല തലയോലപ്പറമ്പിലെ വീട്ടിൽ എത്തിയത്. കെപിസിസി സെക്രട്ടറി ഫിലിപ്പ് ജോസഫ്, പി.വി. പ്രസാദ്, എം.കെ.ഷിബു, എം.വി. മനോജ്, വിജയമ്മ ബാബു, വി.ടി. ജയിംസ്, ഇടവട്ടം ജയകുമാർ, അക്കരപ്പാടം ശശി, കെ.ഡി. ദേവരാജൻ, പി .എം മക്കാർ തുടങ്ങിയവർ ചെന്നിത്തലയ്ക്കൊപ്പമെത്തിയിരുന്നു. നേരത്തെ കോട്ടയം മെഡിക്കൽ കോളജ് ആശുപത്രി സന്ദർശിച്ച അദ്ദേഹം ആശുപത്രിയിലെ കെട്ടിടം ഇടിഞ്ഞ സ്ഥലം സന്ദർശിച്ചു. സംസ്ഥാനത്തെ ആരോഗ്യമേഖല കുത്തഴിഞ്ഞു കിടക്കുകയാണെന്ന് അദ്ദേഹം പറഞ്ഞു.

ബിന്ദുവിന്‍റെ കുടുംബത്തിന് 25 ലക്ഷം നഷ്ടപരിഹാരം കൊടുക്കണം: തിരുവഞ്ചൂർ

കോട്ടയം: മെഡിക്കൽ കോളജിൽ കെട്ടിടം തകർന്നുവീണ് മരിച്ച ബിന്ദുവിന്‍റെ കുടുംബത്തിന് 25 ലക്ഷം രൂപ നഷ്ടപരിഹാരം കൊടുക്കണമെന്ന് തിരുവഞ്ചൂർ രാധാകൃഷ്ണൻ എംഎൽഎ. ബിന്ദുവിന്‍റെ മകന് സ്ഥിരം ജോലി നൽകണമെന്നും മകളുടെ ചികിത്സ സൗജന്യമാക്കണമെന്നും തിരുവഞ്ചൂർ രാധാകൃഷ്ണൻ ആവശ്യപ്പെട്ടു. മെഡിക്കൽ കോളജിലെ എച്ച്എംസി ചേർന്നിട്ട് രണ്ട് വർഷമായി. എന്നാൽ ഫണ്ട് ചെലവഴിക്കുന്നുണ്ട്. എച്ച്എംസി ചേരാതെ ഫണ്ട് ചെലവാക്കിയതെങ്ങനെയെന്ന് ജനങ്ങളോട് വിശദീകരിക്കണം. എച്ച്എംസി ചേരാൻ നടപടിയെടുക്കണം. ഒൻപതു വർഷത്തെ എച്ച്പിസി ഫണ്ട് എന്തുചെയ്തുവെന്നും വിശദീകരിക്കണം. അടിയന്തരമായി 12 ഓപ്പറേഷൻ തിയറ്ററും സജ്ജമാക്കാൻ നടപടിയെടുക്കണം. ഇപ്പോൾ നാലെണ്ണമാണ് പ്രവർത്തിക്കുന്നതെന്ന് പറയുന്നു. എന്നാൽ നാലെണ്ണത്തിൽ രണ്ട് തിയറ്റർ പ്രവർത്തിക്കുന്നില്ല. കാരണം രണ്ട് തിയറ്റർ അണുവിമുക്തമല്ല. ഇക്കാര്യത്തിൽ ബാക്ടീരിയോളജി, മൈക്രോബയോളജി വിഭാഗങ്ങളുടെ റിപ്പോർട്ട് കിട്ടിയിട്ടുണ്ടോയെന്ന് അധികൃതർ വ്യക്തമാക്കണം. ട്രോമാ കെയർ പ്രവർത്തിക്കുന്ന വാർഡ് 26 ഉൾപ്പെട്ട കെട്ടിടം ചോർന്നൊലിക്കുകയാണ്. 2023 ൽ പുതിയ കെട്ടിടത്തിന് തീ പിടിച്ചു. ബിൽഡിംഗ് ചട്ടങ്ങൾ പാലിക്കാതെയാണ് കെട്ടിടം പണിതതെന്ന് അന്ന് ബോധ്യപ്പെട്ടിട്ടും നടപടിയെടുത്തില്ല. കെട്ടിടങ്ങളുടെ ശോച്യാവസ്ഥ പരിഹരിച്ച് സുരക്ഷ ഉറപ്പാക്കണമെന്ന് തിരുവഞ്ചൂർ രാധാകൃഷ്ണൻ ആവശ്യപ്പെട്ടു. ഡിസിസി പ്രസിഡന്‍റ് നാട്ടകം സുരേഷ്, യുഡിഎഫ് ജില്ലാ കൺവീനർ ഫിൽസൺ മാത്യൂസ് എന്നിവരും പത്രസമ്മേളനത്തിൽ പങ്കെടുത്തു.

ഗ്രാമീണറോഡുകളുടെ നവീകരണം സെപ്റ്റംബറില്‍ പൂര്‍ത്തിയാക്കും

കോട്ടയം: മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തിയ ജില്ലയിലെ ഗ്രാമീണറോഡുകളുടെ നവീകരണം സെപ്റ്റംബറില്‍ പൂര്‍ത്തിയാക്കും. ജില്ലയില്‍ 234 റോഡുകളാണ് സിഎംഎല്‍ആര്‍ആര്‍പിക്കു കീഴില്‍ വരുന്നത്. ഇതില്‍ 192 എണ്ണത്തിന്‍റെ നവീകരണത്തിന് സാങ്കേതികാനുമതി ലഭിച്ചിട്ടുണ്ടെന്ന് കോട്ടയത്തു നടന്ന മുഖ്യ മന്ത്രിയുടെ മേഖലാ അവലോ കന യോഗത്തിൽ ജില്ലാ കളക്ടര്‍ ജോണ്‍ വി. സാമുവല്‍ പറഞ്ഞു. 156 റോഡുകള്‍ക്ക് കരാര്‍ നല്‍കാനായിട്ടുണ്ട്. ഇതില്‍ 96 റോഡുകളുടെ (41 ശതമാനം) നവീകരണ പ്രവൃത്തികള്‍ ആരംഭിച്ചിട്ടുണ്ട്. ജില്ലയില്‍ 13 ഗ്രാമീണറോഡുകള്‍ക്കാണ് നവീകരണവുമായി ബന്ധപ്പെട്ട് എന്‍ഒസി. അടക്കമുള്ള പ്രശ്നങ്ങള്‍ നേരിടുന്നത്. ആസ്തി രജിസ്റ്ററില്‍ ഉള്‍പ്പെട്ടിട്ടില്ലാത്ത റോഡുകള്‍ ആസ്തി രജിസ്റ്ററില്‍ ഉള്‍പ്പെടുത്തുന്നതിനുള്ള നടപടികള്‍, ഭരണാനുമതി ലഭിച്ച പ്രവൃത്തികള്‍ക്ക് പേരിലും തുകയിലും വരുത്തേണ്ട ഭേദഗതികള്‍, 2021ല്‍ പുതുക്കിയ ഡിഎസ്ഒആര്‍ നിരക്ക് വന്നിട്ടുള്ളതിനാല്‍ ഇനി ടെന്‍ഡര്‍ ചെയ്യാനുള്ള പ്രവൃത്തികള്‍ക്ക് പുതുക്കിയ നിരക്കുകള്‍ ഉപയോഗിക്കാനുള്ള ഉത്തരവ് ലഭ്യമാകല്‍ തുടങ്ങിയവയാണ് പ്രവൃത്തികള്‍ പൂര്‍ത്തീകരിക്കുന്നതിന് നിലവില്‍ നേരിട്ടിരുന്ന തടസങ്ങള്‍. നിരക്കുകള്‍ പുതുക്കിയിട്ടുണ്ടെന്നും ഇതു സംബന്ധിച്ച വ്യക്തമായ നിര്‍ദേശങ്ങള്‍ ചീഫ് സെക്രട്ടറി തലത്തില്‍ പുറപ്പെടുവിച്ച് താഴേത്തട്ടിലേക്കു നല്‍കണമെന്നും യോഗത്തില്‍ മുഖമന്ത്രി പിണറായി വിജയന്‍ നിര്‍ദേശം നല്‍കിയിട്ടുണ്ട്. ജില്ലയില്‍ മൂന്നുറോഡുകളാണ് ആസ്തി രജിസ്റ്ററില്‍ ചേര്‍ക്കാനുണ്ടായിരുന്നത്. 15 റോഡുകളുടെ പേരുമാറ്റവും 24 റോഡുകള്‍ക്ക് പുതിയ ഡിഎസ്ഒആര്‍ നിരക്കും ലഭ്യമാക്കണമായിരുന്നു. ഓഗസ്റ്റോടെ ഇവ പൂര്‍ത്തീകരിച്ച് സെപ്റ്റംബറോടെ ജില്ലയിലെ 234 ഗ്രാമീണറോഡുകളുടെ നവീകരണം പൂര്‍ത്തിയാക്കാന്‍ സാധിക്കുമെന്നു ജില്ലാ കളക്ടര്‍ ജോണ്‍ വി. സാമുവല്‍ അറിയിച്ചു.

കർഷകസഭയും ഞാറ്റുവേലയും

എരുമേലി: പഞ്ചായത്തിന്‍റെയും കൃഷിഭവന്‍റെയും സംയുക്ത നേതൃത്വത്തിൽ കൃഷിഭവനിൽ കർഷക സഭയും ഞാറ്റുവേലച്ചന്തയും നടത്തി. മുതിർന്ന കർഷകനായ കെ.കെ. ഭാസ്കരൻ പിള്ളയ്ക്ക് തൈകൾ നൽകി കർഷകർക്കുള്ള പച്ചക്കറിത്തൈ വിതരണത്തിന്‍റെ ഉദ്ഘാടനം കനകപ്പലം വാർഡ് അംഗം സുനിൽ ചെറിയാൻ നിർവഹിച്ചു. നേർച്ചപ്പാറ വാർഡ് അംഗം ജസ്‌ന നജീബ് അധ്യക്ഷത വഹിച്ചു. കൃഷി ഓഫീസർ അനില, കാർഷിക വികസനസമിതി അംഗങ്ങളായ ടി.വി. ജോസഫ്, കെ.ജെ. ഏബ്രഹാം, കൃഷി അസിസ്റ്റന്‍റ് അമൃത വിജയൻ എന്നിവർ പ്രസംഗിച്ചു. ഞാറ്റുവേലയുടെ പ്രാധാന്യത്തെക്കുറിച്ചും പ്രകൃതി കൃഷിയെക്കുറിച്ചും കൃഷി അസിസ്റ്റന്‍റ് ബോബൻ ക്ലാസ് നയിച്ചു. കർഷകർ നേരിടുന്ന വിവിധ പ്രശ്നങ്ങൾ കർഷകസഭയിൽ ചർച്ചയായി. കർഷകർ കൊണ്ടുവന്ന ഉത്പന്നങ്ങൾ വില്പന നടത്തി. 50 ശതമാനം സബ്‌സിഡിയിൽ തെങ്ങിൻതൈ വിതരണവും പച്ചക്കറിവിത്ത്, തൈ എന്നിവയുടെ വിതരണവും നടത്തി. കൂട്ടിക്കൽ: പഞ്ചായത്തിന്‍റെയും കൃഷിഭവന്‍റെയും ആഭിമുഖ്യത്തിൽ കർഷകസഭയും ഞാറ്റുവേലച്ചന്തയും നടത്തി. പഞ്ചായത്ത് പ്രസിഡന്‍റ് ബിജോയ് ജോസ് മുണ്ടുപാലം ഉദ്ഘാടനം നിർവഹിച്ചു. വാർഡ് മെംബർമാരായ എം.വി. ഹരിഹരൻ, രജനി സലിലൻ, സിന്ധു മുരളീധരൻ, കെ.എൻ. വിനോദ്, പി.എസ്. സജിമോൻ, സൗമ്യ കനി, കെ.എസ്. മോഹനൻ, ബ്ലോക്ക് മെംബർ അനു ഷിജു, ഫാ. സേവ്യർ മാമ്മൂട്ടിൽ, ജോണി മാത്യു പൊട്ടംകുളം, കൃഷി ഓഫീസർ ആർ. രമ്യ, കൃഷി അസിസ്റ്റന്‍റുമാരായ കെ.എ. നവാസ്, എം.വി. വിനു, ഫെസിലിറ്റേറ്റർ അഖിൽ തുടങ്ങിയവർ പ്രസംഗിച്ചു. കാർഷിക വികസനസമിതി അംഗങ്ങൾ, കർഷക മാർക്കറ്റ്, കാർഷിക സേവന കേന്ദ്രം, ഫാം ക്ലബ് അംഗങ്ങൾ തുടങ്ങിയവർ പങ്കെടുത്തു.

പുലിയെ കണ്ടതായി പ്രചാരണം; പിന്നാലെ മോഷണം

മുണ്ടക്കയം: മലയോര മേഖലയിൽ വർധിച്ചുവരുന്ന വന്യമൃഗശല്യം മുതലെടുത്ത് മോഷ്ടാക്കളും സാമൂഹ്യവിരുദ്ധരും. പുലിയടക്കമുള്ള വന്യമൃഗങ്ങളെ കണ്ടെന്നു പ്രചരിപ്പിക്കുകയും തൊട്ടുപിന്നാലെ രാത്രിയിൽ മോഷണം നടത്തുന്നതും മലയോരമേഖലയിൽ വ്യാപകമാകുകയാണ്. യഥാർഥത്തിൽ പുലി ഇറങ്ങിയോ ഇല്ലയോ എന്ന് തിരിച്ചറിയുവാൻ കഴിയാത്ത അവസ്ഥയിലാണ് പൊതുജനം. പുലിപ്പേടി മുതലെടുത്ത് മോഷണം കഴിഞ്ഞ മാസം പെരുവന്താനം പഞ്ചായത്തിലെ അമ്പലംഭാഗത്ത് പുലിക്കു സമാനമായ ജീവിയുടെ കാൽപ്പാട് കണ്ടെത്തിയിരുന്നു. ഇതോടെ പുലിയിറങ്ങിയതായി വ്യാപക പ്രചാരണം നടന്നു. ഭയപ്പാടിലായ നാട്ടുകാർ രാത്രികാലങ്ങളിലുള്ള പുറത്തിറക്കം കുറച്ചു. പിന്നാലെ മേഖലയിൽ മോഷണവും പതിവായി. പ്രദേശത്തെ നിരവധി സോളാർ വഴിവിളക്കുകളുടെ ബാറ്ററികളാണ് സാമൂഹ്യവിരുദ്ധർ രാത്രിയിൽ കവർന്നത്. പുലിയെ കണ്ടെന്ന് അഭ്യൂഹം പെരുകുന്നു കഴിഞ്ഞ ശനിയാഴ്ച രാത്രിയിൽ കൊക്കയാർ ഭാഗത്തും പുലിയെ കണ്ടതായി വ്യാപകമായ പ്രചാരണം നടക്കുന്നുണ്ട്. എന്നാൽ, വനം വകുപ്പോ മറ്റ് അധികാരികളോ പുലിയുടെ സാന്നിധ്യം സ്ഥിരീകരിച്ചിട്ടില്ല. മാസങ്ങൾക്കു മുമ്പ് കൂട്ടിക്കൽ പഞ്ചായത്തിലെ ഉറുമ്പിക്കരയിൽ പുലിയെ ചത്ത നിലയിൽ കണ്ടെത്തിയിരുന്നു. ഇതിനു പിന്നാലെ കൂട്ടിക്കൽ തേൻപുഴയിൽ പുലിയെ കണ്ടതായി പ്രചാരണം നടന്നു. പിന്നീട് പറത്താനത്തും അമലഗിരിയിലും പുലിയെ കണ്ടതായി വ്യാപക പ്രചാരണം നടന്നിരുന്നു. ഇതിന് പിന്നിലെ സത്യമെന്തെന്നും വെളിവായിട്ടില്ല. പുലിയുടെ സാന്നിധ്യം സ്ഥിരീകരിച്ച് വനം വകുപ്പ് പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ പല ഭാഗങ്ങളിലും പുലിയുടെയും കടുവയുടെയും സാന്നിധ്യം മുന്പ് വനം വകുപ്പ് സ്ഥിരീകരിച്ചിട്ടുണ്ട്. ചില സ്ഥലങ്ങളിൽ വളർത്തുമൃഗങ്ങളെ പുലി ആക്രമിക്കുകയും വനം വകുപ്പ് ഉദ്യോഗസ്ഥരെത്തി കാമറ സ്ഥാപിച്ച് പുലിയുടെ സാന്നിധ്യം സ്ഥിരീകരിക്കുകയും ചെയ്യുന്നുണ്ട്. എന്നാൽ, മറ്റ് ചില സ്ഥലങ്ങളിൽ എത്തിയത് പുലിയാണെങ്കിലും പിന്നീട് മേഖലയിൽ സ്വീകരിക്കേണ്ട നടപടിക്രമങ്ങളോർത്ത് വനം വകുപ്പ് പുറത്തുപറയാറുമില്ല. ഇതെല്ലാം ഇപ്പോൾ സാമൂഹ്യവിരുദ്ധരും ലഹരിസംഘങ്ങളും മുതലെടുക്കുകയാണെന്ന് ആക്ഷേപവും വ്യാപകമായിരിക്കുകയാണ്. പുലിയെ കണ്ടെന്ന പേരിൽ പല സ്ഥലങ്ങളിലും നടക്കുന്ന പ്രചാരണത്തിന് പിന്നിൽ ലഹരികടത്ത് സംഘങ്ങളും മോഷ്ടാക്കളുമാണോയെന്ന സംശയവുമുണ്ട്. വന്യമൃഗശല്യം അതിരൂക്ഷമാണെന്ന് പറയുന്ന മലയോര മേഖലയിൽനിന്നു രാത്രികാലങ്ങളിൽ വ്യാപകമായി തടി അടക്കമുള്ളവ കടത്തുന്നുണ്ടെന്നും പറയപ്പെടുന്നു. ഒരുവശത്ത് വന്യജീവികളും മറുവശത്ത് മോഷ്ടാക്കളും മലയോര ജനതയുടെ സ്വൈരജീവിതം കെടുത്തുകയാണ്.

105 പേരുടെ ജീവൻ രക്ഷിച്ച കരിമ്പനാൽ അപ്പച്ചൻ ഓർമയായി

കാഞ്ഞിരപ്പള്ളി: 105 പേരുടെ ജീവൻ രക്ഷിച്ച കരിമ്പനാൽ അപ്പച്ചൻ എന്ന ടി.ജെ. കരിമ്പനാൽ (87) ഓർമയായി. 1986 നവംബറിലായിരുന്നു സംഭവം. പ്ലാന്‍ററായിരുന്ന ടി.ജെ. കരിമ്പനാൽ ചെറുവള്ളിക്കുളത്തെ എസ്റ്റേറ്റിൽനിന്നു കാഞ്ഞിരപ്പള്ളിയിലേക്ക് വരികയായിരുന്നു. ഈ സമയമാണ് ബ്രേക്ക് നഷ്ടപ്പെട്ട് നിയന്ത്രണംവിട്ട കെഎസ്ആർടിസി ബസിലെ യാത്രക്കാരുടെ നിലവിളി കേട്ടത്. നിറയെ ശബരിമല തീർഥാടകരുണ്ടായിരുന്ന ബസിന്‍റെ ബ്രേക്ക് പോയതാണെന്ന് മനസിലാക്കിയ ഡ്രൈവർ ഗിയർ ഡൗൺ ചെയ്തും കല്ലുകളുടെ മുകളിൽ കയറ്റിയുമൊക്കെ ബസ് നിർത്താൻ ശ്രമിക്കുന്നുണ്ടായിരുന്നു. മെക്കാനിക്കൽ എൻജിനിയറിംഗിൽ ബിരുദവും കരാട്ടെ ബ്രൗൺ ബെൽറ്റുമുണ്ടായിരുന്ന ടി.ജെ. കരിമ്പനാൽ അസാമാന്യ ധൈര്യശാലിയായിരുന്നു. ഉടൻതന്നെ അദ്ദേഹം ബസിനെ ഓവർടേക്ക് ചെയ്ത ശേഷം ഫോർ വീൽ ഡ്രൈവ് മോഡിലാക്കി വേഗം കുറച്ചുകുറച്ചു വന്നു ബസിന്‍റെ മുൻഭാഗം ജീപ്പിന്‍റെ പിന്നിൽ ഇടിക്കാൻ അവസരം കൊടുത്തു. ജീപ്പിന്‍റെ പിന്നിൽ ബസ് ഇടിച്ചതോടെ ജീപ്പ് ബ്രേക്ക് ചെയ്ത് സാവധാനം ബസും ജീപ്പും നിന്നു. കുമളിയിൽനിന്ന് എരുമേലിയിലേക്കു 105ഓളം തീർഥാടകരുമായി പോകുകയായിരുന്ന പൊൻകുന്നം ഡിപ്പോയിലെ കെഎസ്ആർടിസി ബസായിരുന്നു അപകടത്തിൽപ്പെട്ടത്. തിരുവനന്തപുരം സിഇടി കോളജിൽനിന്നു മെക്കാനിക്കൽ എൻജിനിയറിംഗ് പഠനം കഴിഞ്ഞ് ടി.ജെ. കരിമ്പനാൽ ജർമനിയിൽ എൻജിനിയറായി ജോലിയിൽ പ്രവേശിച്ചു. സഹോദരന് അപകടമുണ്ടായതോടെ ഒരു വർഷത്തിനു ശേഷം തിരിച്ചു നാട്ടിലേക്കു മടങ്ങി. കോളജ് പഠനകാലം മുതലേ കൃഷിയിൽ താത്പര്യമുണ്ടായിരുന്ന ടി.ജെ. പിന്നീടു മുഴുവൻസമയ പ്ലാന്‍ററായി. സംസ്കാരം ഇന്ന് രാവിലെ 10.30ന് സെന്‍റ് ഡൊമിനിക്സ് കത്തീഡ്രലിൽ നടക്കും.

മഹിളാ സാഹസ് കേരള യാത്രയ്ക്ക് സ്വീകരണം

കൂരാലി: അഡ്വ. ജെബി മേത്തർ എംപി നയിക്കുന്ന മഹിളാ സാഹസ് കേരള യാത്രയ്ക്ക് എലിക്കുളത്ത് സ്വീകരണം നൽകി. ഡിസിസി പ്രസിഡന്‍റ് നാട്ടകം സുരേഷ് ഉദ്ഘാടനം ചെയ്തു. മഹിളാ കോൺഗ്രസ് മണ്ഡലം പ്രസിഡന്‍റ് ഗീതാ സജി അധ്യക്ഷത വഹിച്ചു. മദ്യത്തിന്‍റെയും മയക്കുമരുന്നിന്‍റെയും ഹബ്ബായി കേരളത്തെ മാറ്റിയ ഇടതുസർക്കാരിനെ ജനങ്ങൾ ആട്ടിപ്പുറത്താക്കുമെന്ന് ജെബി മേത്തർ എംപി പറഞ്ഞു. സംസ്ഥാന ജനറൽ സെക്രട്ടറി ജയലക്ഷ്മി ദത്തൻ, ജില്ലാ പ്രസിഡന്‍റ് ബെറ്റി ടോജോ എന്നിവർ മുഖ്യപ്രഭാഷണം നടത്തി. ഗീതാ രാജു, അനുപമ വിശ്വനാഥ്, ആനി ബിജോയി, ലൂസി ജോർജ്, എൻ. സുരേഷ്, പി.ജെ. തോമസ് പാലക്കുഴ, ജിഷ്ണു പറപ്പള്ളിൽ, യമുനാ പ്രസാദ്, സിനിമോൾ കാക്കശേരി, ജയിംസ് ചാക്കോ ജീരകത്തിൽ തുടങ്ങിയവർ പ്രസംഗിച്ചു.

പൊതുപണിമുടക്ക്: സംയുക്ത ട്രേഡ് യൂണിയൻ ജാഥ നടത്തി

കാഞ്ഞിരപ്പള്ളി: ഒന്പതിന് നടത്തുന്ന അഖിലേന്ത്യാ പണിമുടക്കിന്‍റെ പ്രചാരണാർഥം സംയുക്ത ട്രേഡ് യൂണിയൻ കാഞ്ഞിരപ്പള്ളി നിയോജകമണ്ഡലം കമ്മിറ്റി ജാഥ നടത്തി. കാഞ്ഞിരപ്പള്ളി പേട്ടക്കവലയിൽ സിഐടിയു അഖിലേന്ത്യ വർക്കിംഗ് കമ്മിറ്റിയംഗം കെ.ജെ. തോമസ് ജാഥാ ക്യാപ്റ്റൻ സി.ജി. ജ്യോതിരാജിന് പതാക കൈമാറി ഉദ്ഘാടനം ചെയ്തു. ഡി. ബൈജു അധ്യക്ഷത വഹിച്ചു. വൈസ്‌ ക്യാപ്റ്റൻ പി.കെ. നസീർ, മാനേജർ സണ്ണിക്കുട്ടി അഴകമ്പ്രായിൽ, വി.പി. ഇസ്മായിൽ, വി.പി. ഇബ്രാഹിം, ജെസി ഷാജൻ, സിജോ പ്ലാത്തോട്ടം, ഷമീം അഹമ്മദ്, ടി.കെ. ജയൻ, വി.എൻ. രാജേഷ് എന്നിവർ പ്രസംഗിച്ചു. പൊന്തൻപുഴ, മണിമല, പത്തനാട്, നെടുംകുന്നം, കറുകച്ചാൽ, കൊടുങ്ങൂർ, പള്ളിക്കത്തോട് എന്നിവിടങ്ങളിൽ പര്യടനം നടത്തി പൊൻകുന്നം ടൗണിൽ പൊതുസമ്മേളനത്തോടെ സമാപിച്ചു. സമാപനസമ്മേളനം എം.എ. ഷാജി ഉദ്ഘാടനം ചെയ്തു. എഐടിയുസി മണ്ഡലം കമ്മിറ്റിയംഗം പി. പ്രജിത്ത് അധ്യക്ഷത വഹിച്ചു. ഹേമലത പ്രേംസാഗർ, അജി കാരുവാക്കൽ, രാജൻ ചെറുകാപ്പള്ളി, ശരത് മണിമല, ഫസൽ മാടത്താനി തുടങ്ങിയവർ പ്രസംഗിച്ചു.

ഹൈക്കോടതിവിധി ഇന്നു വരാനിരിക്കേ എരുമേലിയിലെ വാപുര ക്ഷേത്രം പൊളിച്ചു

എരുമേലി: ടൗണിന് സമീപം നിർമാണം ആരംഭിച്ച വാപുര ക്ഷേത്രം അനധികൃത നിർമാണമെന്ന പരാതിയിൽ ഇടക്കാല വിധി നൽകിയ ഹൈക്കോടതി ഇന്ന് ഹർജി പരിഗണിക്കാനിരിക്കേ ക്ഷേത്രം പൊളിച്ചു. ഇന്ന് ക്ഷേത്രത്തിൽ പ്രതിഷ്ഠാച്ചടങ്ങുകൾ നടക്കാനിരിക്കെയാണ് ഇന്നലെ പുലർച്ചെ പൊളിച്ച നിലയിൽ കണ്ടത്. ബാലാലയ പ്രതിഷ്ഠയായി ഉയർന്ന തറയിൽ ചെറിയ ഒരു മുറി ആണ് ക്ഷേത്ര നിർമാണ ഭാഗമായി നിർമിച്ചിരുന്നത്. തറ ഒഴികെ ബാക്കി ഭാഗം പൂർണമായും ഇടിച്ചു പൊളിച്ചിട്ട നിലയിലാണ്. സംഭവം സംബന്ധിച്ച് ക്ഷേത്ര നിർമാണവുമായി ബന്ധപ്പെട്ടവർ ആരും തന്നെ പരാതി നൽകിയിട്ടില്ലെന്ന് എരുമേലി പോലീസ് പറഞ്ഞു. എരുമേലി ടൗണിൽ പഴയ അയ്യപ്പാസ് സിനിമ തിയറ്റർ പ്രവർത്തിച്ച സ്ഥലത്താണ് ക്ഷേത്രനിർമാണം ആരംഭിച്ചിരുന്നത്. ഇതിനെതിരേ നോർത്ത് പറവൂർ സ്വദേശി പദ്മനാഭൻ നൽകിയ ഹർജിയിലാണ് കഴിഞ്ഞ ദിവസം ഹൈക്കോടതി ഇടക്കാല വിധി നൽകിയത്. നിർമാണം അനുമതി തേടാതെയാണെന്ന് ഹർജിയിൽ ഹൈക്കോടതി തേടിയ വിശദീകരണത്തിന് മറുപടിയായി എരുമേലി പഞ്ചായത്ത്‌ അറിയിച്ചിരുന്നു. ക്ഷേത്ര നിർമാണവുമായി ബന്ധമില്ലെന്ന് വിശ്വഹിന്ദു പരിഷത്ത് ഹൈക്കോടതിയുടെ ചോദ്യത്തിന് മറുപടി നൽകിയിരുന്നു. ഇതേത്തുടർന്ന് നിർമാണം തടഞ്ഞ നടപടികൾക്ക് പോലീസ് സംരക്ഷണം അനു വദിച്ച കോടതി ഇന്ന് കേസ് പരിഗണിക്കുമെന്ന് അറിയിച്ചിരുന്നത്.

പെരിങ്ങുളം സ്കൂളിൽ ഇംഗ്ലീഷ് ക്ലബ് തുടങ്ങി

പെരിങ്ങുളം: കുട്ടികൾക്ക് രസകരവും ആകര്‍ഷകവുമായ പഠനമേഖല സൃഷ്ടിക്കാനുള്ള ലക്ഷ്യത്തോടെ പെരിങ്ങുളം സെന്‍റ് അഗസ്റ്റിൻസ് ഹൈസ്കൂളിൽ ഇംഗ്ലീഷ് ക്ലബ്ബിന്‍റെ ഉദ്ഘാടനവും സ്പോക്കൺ ഇംഗ്ലീഷ് വർക്ക്ഷോപ്പും സ്കൂള്‍ മാനേജര്‍ ഫാ. ജോര്‍ജ് മടുക്കാവിൽ നിർവഹിച്ചു. പ്രോഗ്രാമിന്‍റെ പ്രധാന ആകര്‍ഷണം അമേരിക്കയില്‍നിന്നുള്ള വിദഗ്ധ റിസോഴ്‌സ് പേഴ്‌സണ്‍മാരായ ക്രിസ്റ്റന്‍ ജോഷി, ആന്‍റണ്‍ ജോഷി, ഇസബല്‍ ജോഷി, ജയ്റോണ്‍ ജോഷി എന്നിവരുടെ പങ്കാളിത്തമാണ്. ഇവര്‍ വിദ്യാര്‍ഥികളുമായി സംവദിച്ച് ഇംഗ്ലീഷ് പഠനത്തിലെ നവീനരീതികള്‍ പരിചയപ്പെടുത്തി. രസകരമായ ഗെയിമുകള്‍, ഗ്രൂപ്പ് ചർച്ചകൾ, ട്യൂട്ടറിംഗ് സെഷനുകള്‍, മികച്ച പഠനോപകരണങ്ങളുടെ ലഭ്യത എന്നിവ ശ്രദ്ധേയമായി. റിസോഴ്‌സ് ടീം വിദ്യാര്‍ഥികളെ സംഘപ്രവർത്തനങ്ങളിൽ പങ്കെടുക്കാനും രസകരമായ രീതികളിലൂടെ പുതിയ പഠനമാര്‍ഗങ്ങള്‍ അന്വേഷിക്കാനും പ്രോത്സാഹിപ്പിച്ചു.

കുടുംബ കൂട്ടായ്മ ഭാരവാഹികൾക്ക് പരിശീലനമൊരുക്കി ഇഗ്‌നൈറ്റ്-2025

കുറവിലങ്ങാട്: ഇടവകയിലെ കൂടംബകൂട്ടായ്മ പ്രവർത്തനങ്ങൾ സജീവമാക്കാനായി കൂട്ടായ്മ ഭാരവാഹികൾക്കായി ഇഗ്‌നൈറ്റ്-2025 എന്ന പേരിൽ പഠനപരിശീലന കളരിയൊരുക്കി. ഇടവകയിലെ യോഗപ്രതിനിധികൾ, കൂട്ടായ്മ സമ്മേളനങ്ങളിൽ പങ്കെടുക്കുന്ന സന്യാസിനിമാർ, 81 കൂട്ടായ്മ യൂണിറ്റുകളിലെ പ്രസിഡന്‍റുമാർ, സെക്രട്ടറിമാർ എന്നിവർ പരിശീലന പരിപാടിയിൽ പങ്കെടുത്തു. പരിപാടി ആർച്ച്പ്രീസ്റ്റ് റവ.ഡോ. തോമസ് മേനാച്ചേരി ഉദ്ഘാടനം ചെയ്തു. ഒരുവ ർഷത്തേക്കുള്ള കർമപരിപാടികളുടെ ചർച്ചയും പ്രവർത്തന രൂപീകരണവും നടത്തി. കൂട്ടായ്മ ഡയറക്ടർ അസി. വികാരി ഫാ. പോൾ കുന്നുംപുറത്ത് അധ്യക്ഷത വഹിച്ചു. സീനിയർ അസി.വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, കൂട്ടായ്മ ജനറൽ ലീഡർ ബോബിച്ചൻ നിധീരി, ഡോ. സിമിമോൾ സെബാസ്റ്റ്യൻ, സിസ്റ്റർ റീജ മരിയ, ബിജു താന്നിക്കതറപ്പേൽ എന്നിവർ പ്രസംഗിച്ചു. കുടുംബകൂട്ടായ്മ രൂപത റിസോഴ്സ് ടീം അംഗങ്ങളായ സണ്ണി വടക്കേടത്ത്, ലിജോ മുക്കത്ത്, പള്ളിയോഗം സെക്രട്ടറി ബെന്നി കോച്ചേരി എന്നിവർ ക്ലാസിന് നേതൃത്വം നൽകി. സോൺ ഭാരവാഹികളായ ഷൈജു പാവുത്തിയേൽ, ജിയോ കരികുളം, ജോസ് സി. മണക്കാട്ട്, സണ്ണി വെട്ടിക്കാട്ടിൽ, ജോളി ടോമി എണ്ണംപ്രായിൽ, ഷൈനി സാബു മഞ്ഞപ്പള്ളിൽ, സ്മിത ഷിജു പുതിയിടത്ത്, ആശ വിക്‌ടർ കുന്നുമല എന്നിവർ നേതൃത്വം നൽകി.

ലഹരിവിരുദ്ധ ബോധവത്കരണ സെമിനാര്‍

കാഞ്ഞിരമറ്റം: മാര്‍ സ്ലീവാ പള്ളി ശതോത്തര രജതജൂബിലിയോടനുബന്ധിച്ച് പിതൃവേദിയുടെ ആഭിമുഖ്യത്തില്‍ ഇടവക ജനങ്ങള്‍ക്കായി ലഹരിവിരുദ്ധ ബോധവത്കരണ സെമിനാര്‍ നടത്തി. പാരിഷ് ഹാളില്‍ നടന്ന സെമിനാര്‍ വികാരി ഫാ. ജോസഫ് മണ്ണനാല്‍ ഉദ്ഘാടനം ചെയ്തു. തുടര്‍ന്ന് ജനമൈത്രി ഈരാറ്റുപേട്ട എസ്ഐ ബിനോയി തോമസ് ലഹരിവിരുദ്ധ ബോധവത്കരണ ക്ലാസ് നയിച്ചു. ഈ വര്‍ഷം പ്ലസ് ടുവിനും എസ്എസ്എല്‍സിക്കും ഫുൾ എ പ്ലസ് നേടിയ വിദ്യാര്‍ഥികളെ ആദരിച്ചു. പിതൃവേദി സെക്രട്ടറി ഡോ. പ്രിന്‍സ് മണിയങ്ങാട്ട്, പ്രസിഡന്‍റ് സജി നാഗമറ്റത്തില്‍, ഫാ. ജോസഫ് മഠത്തിപ്പറമ്പില്‍, അനില്‍ ചെരിപുറം, ടോണി പായിക്കാട്ട്, തങ്കച്ചന്‍ മുത്തുമാക്കുഴിയില്‍, സജി പാറേശേരിയില്‍, ജോസുകുട്ടി വരിക്കമാക്കല്‍ എന്നിവര്‍ പ്രസംഗിച്ചു.

പാലാ റിംഗ് റോഡ് രണ്ടാംഘട്ടം നടപടികള്‍ അന്തിമ ഘട്ടത്തില്‍

പാലാ: പാലാ-പൊന്‍കുന്നം സംസ്ഥാന പാതയിലെ പന്ത്രണ്ടാംമൈല്‍ ഭാഗത്തു നിന്ന് ആരംഭിച്ച് കണ്ണാടിയുറുമ്പ് സ്‌കൂള്‍ ജംഗ്ഷന്‍ വഴി പൂഞ്ഞാര്‍ റോഡിലെ ചെത്തിമറ്റത്ത് എത്തിച്ചേരുന്ന വിധം വിഭാവനം ചെയ്തിരിക്കുന്ന പാലാ റിംഗ് റോഡിന്‍റെ രണ്ടാംഘട്ട നിര്‍മാണത്തിനായുള്ള നടപടികള്‍ അന്തിമ ഘട്ടത്തില്‍. കിഫ്ബി പദ്ധതിയില്‍ ഉള്‍പ്പെടുത്തി നിര്‍മിക്കുന്ന റിംഗ് റോഡിന്‍റെ അവസാനഘട്ട നടപടിയില്‍പ്പെട്ട ഫീല്‍ഡ് പ്രോജക്‌ട് വിലയിരുത്തല്‍ കിഫ്ബിയില്‍നിന്നുള്ള സീനിയര്‍ ട്രാന്‍സ്‌പോര്‍ട്ടേഷന്‍ എന്‍ജിനിയറുടെയും ഡെപ്യൂട്ടി പ്രോജക്‌ട് മാനേജരുടെയും നേതൃത്വത്തിലുള്ള സംഘവും കിഫ്ബിയുടെ പ്രോജക്‌ട് മാനേജ്‌മെന്‍റ് യൂണിറ്റായ കേരള റോഡ് ഫണ്ട് ബോര്‍ഡ് എന്‍ജിനിയര്‍മാരും ചേര്‍ന്ന് കഴിഞ്ഞ ദിവസം നടത്തി. ഏറ്റെടുക്കേണ്ട സ്ഥലങ്ങളും നടപ്പാക്കേണ്ട നിര്‍മാണ പ്രവര്‍ത്തനങ്ങളും സംഘം സമഗ്രമായി പരിശോധിച്ചു. പദ്ധതിയുടെ വിശദമായ പ്രോജക്‌ട് റിപ്പോര്‍ട്ട് സംസ്ഥാന പൊതുമരാമത്ത് വകുപ്പിന്‍റെ ഹൈവേ ഡിസൈന്‍ വിംഗ് തയാറാക്കി കഴിഞ്ഞ മാസം കിഫ്ബിയില്‍ സമര്‍പ്പിച്ചിരുന്നു. കളരിയാമ്മാക്കല്‍ പാലം വരെയുള്ള 2.115 കിലോമീറ്ററില്‍ 1.940 കിലോമീറ്റര്‍ വരെ കിഫ്ബിയുടെ 52 കോടി രൂപ വിനിയോഗിച്ച് നിര്‍മാണം നടത്തും. ആവശ്യമായ ഭൂമി ഏറ്റെടുക്കാനും വൈദ്യുതി, ജല, വാര്‍ത്താവിനിമയ വകുപ്പുകളുടെ തൂണുകള്‍, കേബിളുകള്‍, പൈപ്പ് ലൈനുകള്‍ എന്നിവ മാറ്റിയിടാനും നിര്‍ദേശം നല്‍കിയിട്ടുണ്ട്. അവശേഷിക്കുന്ന കളരിയാമ്മാക്കല്‍ പാലം വരെയുള്ള ഭാഗം പൊതുമരാമത്ത് നിരത്തു വിഭാഗം 13 കോടി മുതല്‍മുടക്കില്‍ ഭൂമി ഏറ്റെടുത്ത് നിര്‍മിക്കും. നിലവിലുള്ള റോഡിലൂടെ വളരെ കുറച്ച് സ്ഥലങ്ങളില്‍ മാത്രമേ പുതിയ പാത കടന്നുപോകുന്നുള്ളൂ. കൂടുതലും ഭാഗങ്ങളില്‍ പുതിയ റോഡാണ് നിര്‍ദേശിച്ചിരിക്കുന്നത്. നിര്‍ദിഷ്ട റോഡിന്‍റെ ആകെയുള്ള വീതി 12 മീറ്ററും അതില്‍ ഏഴ് മീറ്റര്‍ കാരിയേജ് വേയും ഒരു മീറ്റര്‍ പേവിംഗ് ഷോള്‍ഡറും 1.50 മീറ്റര്‍ ഫുട്പാത്ത് കം ഡ്രെയിനേജുമായാണ് റോഡ് ഡിസൈന്‍ ചെയ്തിരിക്കുന്നത്. ഇരുവശത്തും മൂടിയ ഡ്രെയിനേജുകളാണ് നല്‍കിയിരിക്കുന്നത്. രണ്ടു മേൽപ്പാലങ്ങളും പദ്ധതിയില്‍ ഉള്‍പ്പെടുത്തിയിട്ടുണ്ട്. അടുത്ത കിഫ്ബി ബോര്‍ഡ് യോഗത്തില്‍ അന്തിമ അനുമതി ലഭ്യമാക്കാന്‍ ധനമന്ത്രി കെ.എന്‍. ബാലഗോപാൽ, കിഫ്ബി ചീഫ് എക്‌സിക്യൂട്ടീവ് ഓഫീസര്‍ കെ.എം. ഏബ്രഹാം എന്നിവരുമായി കഴിഞ്ഞ ദിവസം ജോസ് കെ. മാണി എംപി ചര്‍ച്ച നടത്തിയിരുന്നു. ഭൂവുടമകള്‍ സ്ഥലം വിട്ടു നല്‍കാന്‍ മുന്‍കൂര്‍ സമ്മതം അറിയിച്ചിട്ടുണ്ടെന്നും വൈകിപ്പോയ ഭൂമിഏറ്റെടുക്കലിനുകൂടി ഇത് പരിഹാരമാവുകയാണെന്നും അദ്ദേഹം പറഞ്ഞു.

കേറ്ററിംഗ് മേഖലയിലെ പ്രതിസന്ധി; പ്രചാരണ വാഹനജാഥ നടത്തി

കാഞ്ഞിരപ്പള്ളി: കേറ്ററിംഗ് മേഖല നേരിടുന്ന പ്രതിസന്ധികൾക്ക് പരിഹാരമാവശ്യപ്പെട്ട് ഓൾ കേരള കേറ്ററേഴ്സ് അസോസിയേഷൻ കോട്ടയം ജില്ലാ കമ്മിറ്റി പ്രചാരണ വാഹനജാഥ സംഘടിപ്പിച്ചു. ജാഥയ്ക്ക് ജില്ലയിലെ വിവിധ കേന്ദ്രങ്ങളിൽ സ്വീകരണം നൽകി. നാളെ സെക്രട്ടേറിയറ്റ് പടിക്കൽ നടക്കുന്ന പ്രതിഷേധ സമരത്തിന് ഐക്യദാർഢ്യം പ്രഖ്യാപിച്ചായിരുന്നു എകെസിഎ ജില്ലാ പ്രസിഡന്‍റ് സജി ജേക്കബ് ക്യാപ്റ്റനായുള്ള ജാഥ കോട്ടയം ജില്ലയിൽ പര്യടനം നടത്തിയത്. കാഞ്ഞിരപ്പള്ളി പേട്ടക്കവലയിൽ നിന്നാരംഭിച്ച ജാഥ സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. ജാഥാ ക്യാപ്റ്റനും എകെസിഎ ജില്ലാ പ്രസിഡന്‍റുമായ സജി ജേക്കബ് ജാഥയുടെ ഉദ്ദേശ്യ ലക്ഷ്യങ്ങൾ വിശദീകരിച്ചു. എകെസിഎ ജില്ലാ സെക്രട്ടറി ബിജു തോമസ് പ്രസംഗിച്ചു. വിവിധയിടങ്ങളിലെ സ്വീകരണ യോഗങ്ങൾ കെപിസിസി സെക്രട്ടറി പി.എസ്. രഘുറാം, യുഡിഎഫ് കൺവീനർ ഫിൽസൺ മാത്യൂസ്, മോൻസ് ജോസഫ് എംഎൽഎ എന്നിവർ ഉദ്ഘാടനം ചെയ്തു. പാലായിൽ ജാഥ സമാപിച്ചു. സമാപന സമ്മേളനം മാണി സി. കാപ്പൻ എംഎൽഎ ഉദ്ഘാടനം ചെയ്തു. ഭക്ഷ്യ ഉത്പന്നങ്ങളുടെയും പെട്രോളിയം ഉത്പന്നങ്ങളുടെയും എൽപിജി സിലിണ്ടറിന്‍റെയും അമിതമായ വിലക്കയറ്റം കേറ്ററിംഗ് മേഖലയെ പ്രതിസന്ധിയിലാക്കിയിരിക്കുകയാണ്. ഇതിനൊപ്പം അനധികൃത കേറ്ററിംഗ് സ്ഥാപനങ്ങളുടെ കടന്നുവരവിനെതിരേ കൂടി നടപടിയാവശ്യപ്പെട്ടാണ് ഓൾ കേരള കേറ്ററേഴ്സ് അസോസിയേഷൻ നാളെ സെക്രട്ടേറിയറ്റ് മാർച്ച് സംഘടിപ്പിക്കുന്നത്.

ദേശീയ പണിമുടക്ക് ട്രേഡ് യൂണിയന്‍ വാഹനജാഥ നടത്തി

ചങ്ങനാശേരി: കേന്ദ്ര ഗവണ്‍മെന്‍റിന്‍റെ തൊഴിലാളി വിരുദ്ധ നയങ്ങള്‍ക്കെതിരേ, ട്രേഡ് യൂണിയന്‍ സംയുക്ത സമിതിയുടെ ആഭിമുഖ്യത്തില്‍ ഒമ്പതിനു നടത്തുന്ന ദേശീയ പണിമുടക്കിന് മുന്നോടിയായി ട്രേഡ് യൂണിയന്‍ വാഹന ജാഥയ്ക്ക് ചങ്ങനാശേരിയില്‍ സ്വീകരണം നല്‍കി. എഐടിയുസി ജില്ലാ പ്രസിഡന്‍റ് ഒപിഎ സലാം ജാഥ ക്യാപ്റ്റന്‍ സിഐടിയു ജില്ല വൈസ് പ്രസിഡന്‍റ് കെ.സി ജോസഫിന് പതാക കൈ മാറി ഉദ്ഘാടനം ചെയ്തു. ജോര്‍ജ് എന്‍, വാണിയപുരയ്ക്കല്‍ അധ്യക്ഷത വഹിച്ചു. ടി.പി. അജികുമാര്‍, കെ. ലക്ഷ്മണന്‍, റജിമോന്‍ എന്നിവരുടെ നേതൃത്വത്തിലാണ് ജാഥ നടത്തിയത്. വിവിധ യൂണിയന്‍ നേതാക്കളായ കെ.ഡി. സുഗതന്‍, പി.ആര്‍. അനില്‍ കുമാര്‍, സി. സനല്‍ കുമാര്‍, കെ. മാധവന്‍ പിള്ള, പി.എ. നസീര്‍, ലാലിച്ചന്‍ കുന്നിപ്പറമ്പില്‍, പ്രിന്‍സ് മാത്യു, ടോണി കുര്യന്‍, സാജന്‍ എന്നിവര്‍ പ്രസംഗിച്ചു. പുന്നമൂട്, കുറിച്ചി ഔട്ട് പോസ്റ്റ്, ചാലച്ചിറ, ഏനാചിറ, കുരിശുംമൂട്, തെങ്ങണ, മാമ്മൂട്, കോട്ടമുറി, പായിപ്പാട്, നാലുകോടി എന്നിവിടങ്ങളിലെ പര്യടനത്തിനു ശേഷം ജാഥ കുന്നുംപുറത്ത് സമാപിച്ചു.

ചങ്ങനാശേരി താലൂക്കില്‍ 18 കുടുംബങ്ങള്‍ക്ക് പട്ടയം നല്‍കും

മുനിസിപ്പല്‍ ഭൂമി പതിവ് കമ്മിറ്റി തീരുമാനം ചങ്ങനാശേരി: ചങ്ങനാശേരി താലൂക്കില്‍ പട്ടയ വിതരണവുമായി ബന്ധപ്പെട്ട് ചേര്‍ന്ന മുനിസിപ്പല്‍ ഭൂമി പതിവ് കമ്മിറ്റി യോഗത്തില്‍ 18 കുടുംബങ്ങള്‍ക്ക് പട്ടയം അനുവദിക്കുന്നതിന് തീരുമാനിച്ചു. ജോബ് മൈക്കിള്‍ എംഎല്‍എ അധ്യക്ഷത വഹിച്ചു. മുനിസിപ്പല്‍ ഭൂമി പതിവ് കമ്മിറ്റി കണ്‍വീനര്‍ സബ് കളക്ടര്‍ ഡി. രഞ്ജിത്ത് പട്ടയ വിതരണം സംബന്ധിച്ച വിഷയം അവതരിപ്പിച്ചു. താലൂക്കില്‍ ചങ്ങനാശേരി വില്ലേജില്‍പ്പെട്ട ചങ്ങനാശേരി മുനിസിപ്പാലിറ്റി 12, 13 വാര്‍ഡുകളില്‍ ഉള്‍പ്പെട്ട കുന്നുംപുറം താഴ്ച നിവാസികളായ 14 കുടുംബങ്ങള്‍ക്കും പുതൂര്‍പ്പള്ളിക്കടുത്ത് നാല് കുടുംബങ്ങളും ഉള്‍പ്പെടെ 18 കടുംബങ്ങള്‍ക്കാണ് പട്ടയം അനുവദിക്കുന്നതിന് ഭൂമി പതിവ് കമ്മിറ്റി അനുമതി നല്‍കിയത്. യോഗത്തില്‍ കെ.എസ്. ഹലില്‍ റഹ്മാന്‍, ജോണി ജോസഫ്, പി.എ. നസീര്‍, കെ.ടി. തോമസ്, ആന്‍റണി കുന്നുംപുറം, പി.ജി. കുട്ടപ്പന്‍, ഉഷ എം. ഷാജി, വില്ലേജ് ഓഫീസര്‍ പ്രീതി ഗോപാല്‍ എന്നീ കമ്മിറ്റി അംഗങ്ങളും തഹസില്‍ദാര്‍ നിജു കുര്യന്‍, ഡെപ്യൂട്ടി തഹസില്‍ദാര്‍മാരായ ടി.പി. അജിമോന്‍, മഞ്ജുഷ എന്നിവരും പങ്കെടുത്തു.

ബഷീർ മാനവികതയുടെ കഥാകാരൻ: വി.ഡി. സതീശൻ

തലയോലപ്പറമ്പ്: ഉയർന്ന മാനവിക മൂല്യങ്ങളും ആത്മിയ അന്വേഷണവും കുസൃതിയും വിമർശനവും ഉൾക്കാമ്പിൽ നിറഞ്ഞ നർമ്മവുമാണ് ബഷീറിനെ മലയാളത്തിലെ വ്യത്യസ്തനായ കഥാകാരനാക്കിയതെന്ന് പ്രതിപക്ഷ നേതാവ് വി.ഡി.സതീശൻ. ബഷീറിന്‍റെ 31-ാം ചരമദിനത്തോടനുബന്ധിച്ച് വൈക്കം മുഹമ്മദ് ബഷീർ സ്മാരക സമിതി, ഫെഡറൽ ബാങ്ക് എന്നിവയുടെ സംയുക്താഭിമുഖ്യത്തിൽ നടത്തിയ ബഷീർദിന പരിപാടിയും ബഷീർ പുരസ്കാര സമ്മേളനവും ഉദ്ഘാടനം ചെയ്തു പ്രസംഗിക്കുകയായിരുന്നു പ്രതിപക്ഷ നേതാവ്. സമിതി വൈസ് ചെയർമാൻ ഡോ. പോൾ മണലിൽ അധ്യക്ഷത വഹിച്ചു. ബഷീർ ബാല്യകാലസഖി പുരസ്കാരം കെ.വി. മോഹൻകുമാറിനും ബഷീർ അമ്മ മലയാളം പുരസ്കാരം ചലച്ചിത്ര സംവിധായകൻ തരുൺ മൂർത്തിക്കും പ്രതിപക്ഷ നേതാവ് നൽകി. പുരസ്കാര ജേതാക്കൾക്കുള്ള പ്രശസ്തിപത്രം കാൻസർരോഗ ചികിത്സാ വിദഗ്ധൻ ഡോ.വി.പി.ഗംഗധരനും നൽകി. മോഹൻ ഡി. ബാബു, പി.ജി.ഷാജിമോൻ, ടോമി കല്ലാനി, ഡോ.യു. ഷംല, ഡോ.എസ്. ലാലിമോൾ, ഡോ.അംബിക എ. നായർ, എം.ഡി.ബാബുരാജ് എന്നിവർ പ്രസംഗിച്ചു. ബഷീർ കഥാപാത്രങ്ങളായ സെയ്തുമുഹമ്മദ്, ഖദിജ എന്നിവർ പങ്കെടുത്തു.

കായലോരബീച്ചിലെ കൈയേറ്റം ഒഴിപ്പിക്കണം

വൈക്കം: കായലോര ബീച്ചിലെ കൈയേറ്റങ്ങൾ ഒഴിപ്പിക്കണമെന്ന് ആവശ്യപ്പെട്ട് സിപിഎം കൗൺസിലർമാർ നഗരസഭാ ഓഫീസിനു മുന്നിൽ കുത്തിയിരിപ്പുസമരം നടത്തി. ബീച്ചിൽ കൈയേറ്റം നടക്കുമ്പോഴും ഒരു നടപടിയും സ്വീകരിക്കാൻ നഗരസഭ തയാറാകുന്നില്ലെന്ന് കൗൺസിലർമാർ കുറ്റപ്പെടുത്തി. നഗരസഭാ ഓഫീസിനു മുന്നിൽ നടന്ന പ്രതിഷേധ സമരം നഗരസഭ മ ുൻ ചെയർപേഴ്സൺ എസ്.ഇന്ദിരദേവി ഉദ്ഘാടനം ചെയ്തു.കെ. പി.സതീശൻ അധ്യക്ഷത വഹിച്ചു.പാർലമന്‍ററി പാർട്ടി ലീഡർ എസ്. ഹരിദാസൻ നായർ, കൗൺസിലർ കവിതാ രാജേഷ്, സിപിഎം ഏരിയാ കമ്മറ്റി അംഗം എം.സുജിൻ, വൈക്കം ടൗൺ സൗത്ത് ലോക്കൽ സെക്രട്ടറി പി.സി. അനിൽകുമാർ എന്നിവർ പ്രസംഗിച്ചു.

കടുത്തുരുത്തി വലിയതോട്ടില്‍ മാലിന്യക്കൂമ്പാരം

കടുത്തുരുത്തി: വെള്ളപ്പൊക്കത്തില്‍ ഒഴുകിയെത്തിയ മാലിന്യക്കൂമ്പാരം വലിയതോട്ടില്‍ കെട്ടികിടക്കുന്നു. കുപ്പികളും പ്ലാസ്റ്റിക്കും അടങ്ങിയ ചാക്കുകെട്ട് ഉള്‍പ്പെടെയുള്ള മാലിന്യങ്ങളാണ് പലയിടത്തായി കെട്ടിനില്‍ക്കുന്നത്. തോട്ടില്‍ മാലിന്യങ്ങള്‍ കെട്ടിനില്‍ക്കുന്നത് ഗുരുതരമായ ആരോഗ്യ പ്രശ്‌നങ്ങള്‍ക്കു കാരണമാകുമെന്നും അതിനാൽ മാലിന്യം നീക്കം ചെയ്യാന്‍ നടപടി സ്വീകരിക്കണമെന്നും നാട്ടുകാര്‍ ആവശ്യപ്പെട്ടു. കടുത്തുരുത്തി വലിയതോട്ടില്‍ ബൈപാസിന്‍റെ പാലത്തിനു സമീപത്ത് മരം വീണുകിടക്കുന്ന ഭാഗത്ത് ഉള്‍പ്പെടെയാണ് മാലിന്യങ്ങള്‍ കെട്ടിക്കിടക്കുന്നത്. മരം തോട്ടിലേക്കു വീണതുകൊണ്ടാണ് തോട്ടിലൂടെ ഒഴുക്കിവിടുന്ന മാലിന്യങ്ങളുടെ വ്യാപ്തി ഇത്രയേറേയുണ്ടെന്ന് മനസിലാക്കാനായതെന്ന് നാട്ടുകാര്‍ പറയുന്നു. നാട്ടുകാർ കുളിക്കുന്നതിനും അലക്കുന്നതിനുമുപയോഗിക്കുന്ന തോട്ടിലാണ് ഇത്തരത്തില്‍ മാലിന്യങ്ങള്‍ ഒഴുക്കിവിടുന്നത്. വലിയതോട്ടിലും ചുള്ളിത്തോട്ടിലും ഉള്‍പ്പെടെ ഇത്തരത്തില്‍ മാലിന്യം ഒഴുക്കി വിടുന്നത് പലയിടത്തായി കെട്ടിക്കിടക്കുന്നുണ്ട്. ജലസ്രോതസുകളായ തോടുകളിലും പുഴകളിലുമെല്ലാം സാമൂഹ്യവിരുദ്ധര്‍ മാലിന്യം തള്ളുന്നതാണ് ഒഴുക്ക് ശക്തമാകുമ്പോള്‍ താഴേക്ക് ഒഴുകിയെത്തുന്നത്. തോടുകളിലും മറ്റും പ്ലാസ്റ്റിക്ക് കുപ്പികളടക്കമുള്ള മാലിന്യങ്ങള്‍ നിറഞ്ഞിരിക്കുകയാണ്. തോടുകളിലും റോഡു വശങ്ങളിലുമെല്ലാം സാമൂഹ്യവിരുദ്ധർ മാലിന്യം തള്ളുകയാണ്. ജലാശയങ്ങളില്‍ മാലിന്യം നിറയുന്നത് ഗുരുതരമായ ഭവിഷത്താണ് ക്ഷണിച്ചുവരുത്തുന്നത്. പലയിടത്തും മാലിന്യം മലപോലെ പെരുകുകയാണ്. ഇക്കാര്യത്തില്‍ അധികൃതരുടെ ഭാഗത്തുനിന്നു യാതൊരു നടപടികളുമില്ലെന്നു നാട്ടുകാര്‍ പറയുന്നു. തോടുകളിലും റോഡുവക്കിലും ‍ മാലിന്യങ്ങള്‍ പ്ലാസ്റ്റിക് കവറുകളിലാക്കി വാഹനങ്ങളിലെത്തിച്ചു തള്ളുകയാണ്. ഇത്തരക്കാരെ കണ്ടെത്തി ശക്തമായ നടപടി സ്വീകരിക്കണമെന്നാണ് ജനങ്ങളുടെ ആവശ്യം.

പൂര്‍വികര്‍ പിന്നിട്ട ചരിത്രവഴികള്‍ സത്യസന്ധമായി കണ്ടെത്തണം: പി.എസ്. ശ്രീധരന്‍പിള്ള

കടുത്തുരുത്തി: പൂര്‍വീകര്‍ പിന്നിട്ട ചരിത്രവഴികള്‍ കണ്ടെത്താന്‍ ശ്രമിക്കുമ്പോള്‍ ചരിത്രത്തിന്‍റെ വിട്ടുപോയ ഭാഗങ്ങളും സത്യസന്ധമായി കണ്ടെത്താന്‍ ശ്രമിക്കണമെന്ന് ഗോവ ഗവര്‍ണര്‍ പി.എസ്. ശ്രീധരന്‍പിള്ള. കടുത്തുരുത്തി കേന്ദ്രമായി പ്രവര്‍ത്തിച്ചു വരുന്ന വടക്കുംകൂര്‍ ഹിസ്റ്ററി പ്രമോഷന്‍ സൊസൈറ്റി കൗണ്‍സിലിന്‍റെ നേതൃത്വത്തില്‍ കടുത്തുരുത്തിയില്‍ നടന്ന വടക്കുംകൂര്‍ രാജ്യവും കടുത്തുരുത്തിയും എന്ന വിഷയത്തിൽ ചരിത്ര സെമിനാര്‍ ഉദ്ഘാടനം ചെയ്യുകയായിരുന്നു അദേഹം. ചരിത്രത്തിന്‍റെ തനിമയെ നിലനിര്‍ത്താന്‍ വര്‍ത്തമാനകാലത്തിലെ തലമുറയാണ് ശ്രദ്ധിക്കേണ്ടതെന്നും ഇന്ത്യയുടെതന്നെ ശ്രദ്ധിക്കപ്പെടാതെപോയ ചരിത്രം കണ്ടെത്താനും വടക്കൂംകൂറിന്‍റെ ചരിത്രം പഠിച്ചിറങ്ങുമ്പോള്‍ കഴിഞ്ഞേക്കുമെന്നും അദ്ദേഹം പറഞ്ഞു. വടക്കുംകൂറിന്‍റെ ചരിത്രവും കടുത്തുരുത്തിയുമായുള്ള പൗരാണിക ബന്ധങ്ങളും വ്യക്തമാക്കാന്‍ കഴിയുന്ന വിധത്തില്‍ തയാറാക്കിയ ചരിത്രഗ്രന്ഥത്തിന്‍റെ പ്രീ പബ്ലിക്കേഷന്‍ ബിഷപ് മാര്‍ ജോസഫ് കല്ലറങ്ങാട്ടിന് നല്‍കി പി.എസ്. ശ്രീധരന്‍പിള്ള നിര്‍വഹിച്ചു. ചരിത്രം പഠിക്കുമ്പോള്‍ വേരുകളിലേക്ക് പോകണമെന്നും വേരുകളാണ് ഭാവി കണിച്ചു തരുന്നതെന്നും വടക്കൂംകൂര്‍ രാജാക്കന്മാരുടെ ആത്മീയത എടുത്ത് പറയേണ്ടതാണെന്നും ഇക്കാര്യങ്ങള്‍ മനസിലാക്കാനായാല്‍ ഇന്ന് രാജ്യം നേരിടുന്ന നിരവധിയായ പ്രശ്‌നങ്ങള്‍ക്ക് പരിഹാരം കാണാനാവുമെന്നും സമ്മേളനത്തില്‍ അനുഗ്രപ്രഭാഷണം നടത്തിയ ബിഷപ് മാര്‍ ജോസഫ് കല്ലറങ്ങാട്ട് പറഞ്ഞു. കടുത്തുരുത്തി താഴത്തുപള്ളിയുടെ സെന്റ് ആന്റണീസ് പാരീഷ് ഹാളില്‍ നടന്ന സമ്മേളനത്തില്‍ മോന്‍സ് ജോസഫ് എംഎല്‍എ അധ്യക്ഷത വഹിച്ചു. ജസ്റ്റിസ് സിറിയക് ജോസഫ്, മുന്‍ ഡിജിപി ഡോ.അലക്സാണ്ടര്‍ പി.ജേക്കബ്, ഫാ.മാത്യു ചന്ദ്രന്‍കുന്നേല്‍, ഫാ.ജോണ്‍സണ്‍ നീലനിരപ്പേല്‍, വടക്കുംകൂര്‍ രാജവംശ കുടുംബാംഗംങ്ങളായ കെ.എസ്. സോമവര്‍മരാജ, ഗോദവര്‍മരാജ, രാധാകൃഷ്ണപ്പണിക്കര്‍ ചന്ദ്രത്തില്‍ എന്നിവര്‍ പ്രസംഗിച്ചു. സെമിനാറിന് മുന്നോടിയായി നടന്ന ശില്‍പശാല ആര്‍ച്ച്ബിഷപ് മാര്‍. മാത്യൂ മൂലക്കാട് ഉദ്ഘാടനം ചെയ്തു. മുന്‍ ഡിജിപി ഡോ.അലക്സാണ്ടര്‍ പി.ജേക്കബ് വടക്കുംകൂര്‍ വിഷയാവതരണം നടത്തി.

നിരണം തീര്‍ഥാടനം ഇന്ന്

ചങ്ങനാശേരി: അതിരൂപതയുടെ ആഭിമുഖ്യത്തില്‍ യുവദീപ്തി എസ്എംവൈഎം നേതൃത്വം നല്‍കുന്ന 19-ാംമത് നിരണം തീര്‍ഥാടനം ഇന്ന് നടത്തും. രാവിലെ ഏഴിന് മെത്രാപ്പോലീത്തന്‍ പള്ളിയിലെ മെത്രാന്മാ രുടെ കബറിട പള്ളിയില്‍ അര്‍പ്പിക്കുന്ന വിശുദ്ധ കുര്‍ബാനയ്ക്കുശേഷം തീര്‍ഥാടനം ആരംഭിക്കും. കത്തിച്ച തിരി പ്രസിഡന്‍റ് അരുണ്‍ ടോം തോപ്പിലിനും യുവദീപ്തി പതാക ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസിനും നല്‍കി അതിരൂപത വികാരി ജനറല്‍ മോണ്‍. ആന്‍റണി എത്തക്കാട്ട് തീര്‍ഥാടനം ഉദ്ഘാടനം ചെയ്യും. അതിരൂപത ഡയറക്ടര്‍ ഫാ. സാവിയോ മാനാട്ട് ആമുഖപ്രസംഗവും കത്തീഡ്രല്‍ വികാരി ഫാ. ജോസഫ് വാണിപ്പുരക്കല്‍ അനുഗ്രഹപ്രഭാഷണവും നടത്തും. ചങ്ങനാശേരി സെന്‍ട്രല്‍ ജംഗ്ഷന്‍, ളായിക്കാട്, ഇടിഞ്ഞില്ലം, വേങ്ങല്‍, കാവുംഭാഗം, പൊടിയാടിവഴി നിരണത്ത് എത്തും. തുടര്‍ന്ന് കല്‍വിളക്കില്‍ തിരിതെളിക്കും. അതിരൂപതയിലെ വിവിധ ഫൊറോനകളില്‍നിന്നുള്ള ആയിരക്കണക്കിനു യുവജനങ്ങള്‍ അണിനിരക്കും. തീര്‍ഥാടകര്‍ തിരുശേഷിപ്പ് കൂടാരത്തിലെ പ്രാര്‍ഥനയ്ക്ക് ശേഷം നേര്‍ച്ചഭക്ഷണം സ്വീകരിക്കും. അതിരൂപത ഡയറക്ടര്‍ ഫാ. സാവിയോ മാനാട്ട് എന്താനാ പ്രാര്‍ഥനയും സന്ദേശവും നല്‍കും. ഫാ. ടോണി പുതുവീട്ടില്‍ക്കളം, ക്രിസ്റ്റി കെ. കുഞ്ഞുമോന്‍, സിസ്റ്റര്‍ തെരസിന, അലക്‌സ് മഞ്ഞുമേല്‍, ലാലിച്ചന്‍ മറ്റത്തില്‍, ക്രിസ്റ്റിന്‍ സേവ്യര്‍, ജോയല്‍ ജോണ്‍ റോയി, ലൂസി ഫിലിപ്പോസ്, ഡെന്നി തോമസ്, റിയ പുന്നശേരി എന്നിവര്‍ നേതൃത്വം നല്‍കും.

കാരുണ്യ ലോട്ടറിയുടെ ഒരു കോടിരൂപ സമ്മാനം പൊൻകുന്നത്ത്

പൊൻകുന്നം: ഇന്നലെ നറുക്കെടുത്ത കാരുണ്യ കെ.ആർ. 713 ലോട്ടറിയുടെ ഒന്നാംസമ്മാനം ഒരു കോടി രൂപ പൊൻകുന്നത്ത് വിറ്റ ടിക്കറ്റിന്. പൊൻകുന്നം ബസ് സ്റ്റാൻഡിലെ ഗണേശ ലക്കി സെന്‍ററിൽനിന്ന് വിറ്റ കെ.എൻ. 195227 ടിക്കറ്റിനാണ് സമ്മാനം. ഇളങ്ങുളം സ്വദേശിയായ വിൽപ്പനക്കാരൻ സിജിമോനാണ് ഗണേശ സെന്‍ററിൽനിന്ന് സമ്മാനാർഹമായ ടിക്കറ്റ് വിറ്റത്. സമ്മാനാർഹനെ കണ്ടെത്തിയിട്ടില്ല.

സർക്കാരിനെതിരേ രൂക്ഷമായ ജനരോഷം: ആര്യാടൻ ഷൗക്കത്ത്

പുതുപ്പള്ളി: സർക്കാരിനെതിരേ ജനരോഷം രൂക്ഷമാണെന്ന് ആര്യാടൻ ഷൗക്കത്ത് എംഎൽഎ. നിലമ്പൂർ ഉപതെരഞ്ഞെടുപ്പ് ഫലം ഇതിന്‍റെ ആഴം വ്യക്തമാക്കുന്നതാണെന്നും അദ്ദേഹം പറഞ്ഞു. വാകത്താനം ഞാലിയാകുഴിയിൽ ഉമ്മൻ ചാണ്ടി കുടുംബസംഗമത്തിൽ പങ്കെടുത്തു പ്രസംഗിക്കുകയായിരുന്നു അദ്ദേഹം. പ്രചാരണരംഗത്ത് ചാണ്ടി ഉമ്മനെ വോട്ടർമാർ താരപരിവേഷത്തോടെയാണ് വരവേറ്റതെന്നും അദ്ദേഹം പറഞ്ഞു. മുതിർന്ന നേതാവ് കെ.സി. ജോസഫ് സംഗമം ഉദ്ഘാടനം ചെയ്തു. മണ്ഡലം പ്രസിഡന്‍റ് പി.പി. പുന്നൂസ് അധ്യക്ഷത വഹിച്ചു. കെപിസിസി നിർവാഹക സമിതി അംഗം ജോഷി ഫിലിപ്പ്, യൂത്ത് ലീഗ് സംസ്ഥാന വൈസ് പ്രസിഡന്‍റ് ഫൈസൽ ബാഫഖി തങ്ങൾ, ജില്ലാ പഞ്ചായത്ത്‌ മെമ്പർ സുധാ കുര്യൻ, ഷേർലി തര്യൻ, കുഞ്ഞ് പുതുശേരി, പി.സി. സണ്ണി, കെ.ബി. ഗിരീഷൻ തുടങ്ങിയവർ പ്രസംഗിച്ചു.

എസ്‌ഐയെ കൈയേറ്റം ചെയ്തു : സിപിഎം നേതാവിന് എതിരേ കേസ്

ചങ്ങനാശേരി: ബ്രത്ത്‌ലൈസര്‍ പരിശോധിക്കുന്നത് സംബന്ധിച്ച് തര്‍ക്കത്തെത്തുടര്‍ന്ന് സിപിഎം നേതാവും എസ്‌ഐയും തമ്മില്‍ തര്‍ക്കം ഉന്തിലും തള്ളിലുമെത്തിയ സംഭവത്തിൽ സിപിഎം നേതാവിനെതിരേ ചങ്ങനാശേരി പോലീസ് കേസെടുത്തു. സിപിഎം ഏരിയ കമ്മിറ്റി അംഗവും ചങ്ങനാശേരി നഗരസഭ 29-ാംവാര്‍ഡ് കൗണ്‍സിലറുമായ പി.എ. നിസാറിനെതിരേയാണ് പോലീസ് കേസെടുത്തത്. പോലീസിന്‍റെ കൃത്യനിര്‍വഹണം തടസപ്പെടുത്തുക, കൈയേറ്റം ചെയ്യുക തുടങ്ങിയ വകുപ്പുകള്‍ പ്രകാരമാണ് കേസ് എടുത്തത്. എസ്എച്ച്ഒ ബി. വിനോദ്കുമാറാണ് കേസ് അന്വേഷിക്കുന്നത്. ചങ്ങനാശേരി സ്‌റ്റേഷനിലെ ജൂണിയര്‍ എസ്‌ഐ ടിനുവിനു നേരേയാണ് ഭീഷണിയും കൈയേറ്റവും അരങ്ങേറിയത്. വെള്ളിയാഴ്ച രാത്രി 8.30ന് ചങ്ങനാശേരി സെന്‍ട്രല്‍ ജംഗ്ഷന് സമീപം മുനിസിപ്പല്‍ ആര്‍ക്കേഡ് ഭാഗത്താണ് മദ്യപിച്ചു വാഹനമോടിക്കുന്നവരെ പിടികൂടാന്‍ ജൂണിയര്‍ എസ്‌ഐ ടിനുവിന്‍റെ നേതൃത്വത്തില്‍ വാഹന പരിശോധന നടത്തിയത്. അതുവഴി ബൈക്കിലെത്തിയ പി.എ. നിസാറിനെ തടഞ്ഞുനിര്‍ത്തിയ ജൂണിയര്‍ എസ്‌ഐ ബ്രത്തലൈസറില്‍ ഊതണമെന്ന് ആവശ്യപ്പെട്ടെങ്കിലും നിസാര്‍ നിരസിക്കുകയും യന്ത്രം തട്ടിമാറ്റുകയും ചെയ്തു. പരിശോധിക്കണമെന്ന് എസ്‌ഐ നിലപാടെടുത്തതോടെ വാക്കേറ്റവും പിടിവലിയും തുടര്‍ന്ന് കൈയേറ്റത്തിലെത്തുകയുമായിരുന്നു. തുടര്‍ന്ന് സിപിഎം, സിഐടിയു പ്രവര്‍ത്തകരും മറ്റാളുകളും സംഘടിച്ചെത്തി. സംഭവത്തിനിടയില്‍ ഒരുസംഘം ആളുകള്‍ എസ്‌ഐയെ ഉന്തിത്തള്ളി പോലീസ് ജീപ്പില്‍ കയറ്റുകയായിരുന്നുവെന്ന് ദൃക്‌സാക്ഷികള്‍ പറയുന്നു. സംഘര്‍ഷത്തിനിടയില്‍ എസ്‌ഐയെ അക്രമിക്കാന്‍ ശ്രമിച്ചവരെ സിസിടിവി ദൃശ്യങ്ങള്‍ പരിശോധിച്ച് പോലീസ് നടപടി സ്വീകരിക്കും. സംഭവത്തില്‍ പി.എ. നിസാര്‍ പരാതി നല്‍കിയെങ്കിലും പോലീസ് കേസെടുത്തിട്ടില്ല. എസ്‌ഐ ടിനു രാത്രിയില്‍ ചികിത്സ തേടിയ ചങ്ങനാശേരി ജനറല്‍ ആശുപത്രിയിലേക്ക് സിപിഎം, എസ്എഫ്‌ഐ പ്രവര്‍ത്തകര്‍ എത്തിയതോടെ എസ്‌ഐ സ്വകാര്യ ആശുപത്രിയിലേക്കു മാറുകയായിരുന്നു.

ഏതു നിമിഷവും വീഴാം...സര്‍ക്കാര്‍ ആശുപത്രി കെട്ടിടങ്ങൾ ശോചനീയ നിലയിൽ

കോട്ടയം മെഡിക്കല്‍ കോളജില്‍ സംഭവിച്ചതുപോലെ ഏതു നിമിഷവും വീഴാവുന്ന കെട്ടിടങ്ങള്‍ വിവിധ സര്‍ക്കാര്‍ ആശുപത്രികളിലുണ്ട്. നൂറ്റാണ്ടിലേറെ പഴക്കമുള്ളതും ഇതില്‍പ്പെടും. ചിലയിടങ്ങളില്‍ പഴയ കെട്ടിടങ്ങളില്‍ ചികിത്സ നടക്കുന്നുണ്ട്. ഉപേക്ഷിക്കപ്പെട്ട കെട്ടിടങ്ങള്‍ പൊളിച്ചുമാറ്റാത്തതിനാല്‍ അവിടം പലരുടെയും വിശ്രമകേന്ദ്രമാണ്. വിവിധ സര്‍ക്കാര്‍ ആശുപത്രികളിലെ സ്ഥിതി ഇങ്ങനെ... കാഞ്ഞിരപ്പള്ളിയില്‍ ഒന്‍പത് പുരാവസ്തുക്കള്‍ കിഴക്കന്‍ മേഖലയില്‍ അനേകരുടെ ചികിത്സാലയമായ ജനറല്‍ ആശുപത്രിയില്‍ നാലു തലമുറ ചികിത്സ വാങ്ങിയ കെട്ടിടം ഇപ്പോഴുമുണ്ട്.

നൂറ്റാണ്ടു തികച്ചതാണ് ഒരു കെട്ടിടം. കൂടാതെ ചേര്‍ത്തുവച്ചു പണിത ഒന്‍പത് കെട്ടിടങ്ങളും അത്യാസന്നനിലയിലാണ്. പഴയ ഒപി, ഓഫീസ്, ഫാര്‍മസി, നഴ്‌സിംഗ് ക്വാര്‍ട്ടേഴ്‌സ് എന്നിവ പ്രവര്‍ത്തിച്ചിരുന്ന കെട്ടിടം, കുട്ടികളുടെ വിഭാഗം, എക്‌സ്‌റേ, ഇസിജി, ലബോറട്ടറി, പുരുഷ വാര്‍ഡ്, കാന്‍റീന്‍, പോസ്റ്റ്മോര്‍ട്ടം മുറി, മോര്‍ച്ചറി തുടങ്ങിയവ പ്രവര്‍ത്തിച്ചിരുന്ന കെട്ടിടങ്ങള്‍ വെറുതെ കിടക്കുന്നു. വിവിധ ഡിപ്പാര്‍ട്ടുമെന്‍റുകള്‍ പുതിയ കെട്ടിടത്തിലേക്കു മാറ്റിയതോടെയാണു പഴയ കെട്ടിടങ്ങള്‍ ഉപയോഗിക്കാതെ വന്നത്. പഴക്കം ചെന്നവ പൊളിച്ചുമാറ്റി അമ്മയും കുഞ്ഞും വാര്‍ഡ് നിര്‍മിക്കാന്‍ 6.16 കോടി രൂപയുടെ പദ്ധതിക്ക് ഭരണാനുമതി ലഭിച്ചിട്ടുണ്ട്. പഴയ കെട്ടിടം ഒട്ടേറെപ്പേരുടെ വിശ്രമകേന്ദ്രമാണ്. പാലാ ആശുപത്രിക്ക് ചികിത്സ വേണം പാലാ ജനറല്‍ ആശുപത്രിയില്‍ മുന്‍കൂര്‍ അനുമതിയില്ലാതെയും സുരക്ഷ പാലിക്കാതെയുമാണു പല കെട്ടിടങ്ങളും പണിതിരിക്കുന്നതെന്ന് പൊതുമരാമത്ത്, വൈദ്യുതി വകുപ്പുകള്‍ കണ്ടെത്തിയിരുന്നു. ഇലക്ട്രിക്കല്‍ ഇന്‍സ്പെക്ടറേറ്റ് വിഭാഗവും അഗ്നിരക്ഷാസേനാ വകുപ്പും മുനിസിപ്പാലിറ്റിയും നടത്തിയ പരിശോധനയിലും ഗുരുതര വീഴ്ച കണ്ടെത്തി. ഫയര്‍ ആന്‍ഡ് റെസ്‌ക്യു വിഭാഗത്തിന്‍റെ എന്‍ഒസി ഇല്ലാതെയാണ് ആശുപത്രി പ്രവര്‍ത്തിക്കുന്നത്. പൊതുമരാമത്ത് വകുപ്പ് ഇവിടെ ഗുരുതരമായ പത്ത് അപാകതകള്‍ അക്കമിട്ട് നിരത്തിയിട്ടുണ്ട്. കെട്ടിടങ്ങള്‍ക്ക് ഫയര്‍ ആന്‍ഡ് റെസ്‌ക്യൂ വിഭാഗത്തിന്‍റെ എന്‍ഒസി ഇല്ല. കെട്ടിടങ്ങളുടെ നിര്‍മിതിയിലും ഇലക്ട്രിക്കല്‍ വര്‍ക്കുകളിലും ഗുരുതര അപാകതകള്‍ ഉണ്ടെന്ന് വിവിധ വകുപ്പുകളുടെ സംയുക്ത പരിശോധനയില്‍ കണ്ടു. എപ്പോഴും ആള്‍ക്കൂട്ടമുള്ള ഇവിടെ തീപിടിത്തമുണ്ടാല്‍ എല്ലാം കൈവിട്ടുപോകും. അഗ്‌നി രക്ഷാ ഉപകരണങ്ങളില്‍ ഒരെണ്ണവും പ്രവര്‍ത്തനക്ഷമമല്ല. വൈദ്യുതി വയറുകള്‍ പലയിടത്തും കൂട്ടിപ്പിടിച്ചും ഉരുകിയും കിടക്കുന്നു. ജില്ലാ ആശുപത്രി വെന്‍റിലേറ്ററില്‍ കോട്ടയം ജില്ലാ ജനറല്‍ ആശുപത്രിയില്‍ കാലപ്പഴക്കം ചെന്ന കെട്ടിടങ്ങള്‍ പലതാണ്. ഇവ അറ്റകുറ്റപ്പണികള്‍ നടത്തി നിലനിര്‍ത്തുകയാണ്. നാല്, അഞ്ച് വാര്‍ഡുകള്‍ പുനരുദ്ധരിച്ചു. ഏഴ് മുതല്‍ 10 വരെ വാര്‍ഡുകള്‍ പൊളിച്ചുനീക്കി 12 നില കെട്ടിടം നിര്‍മിക്കാനുള്ള തീരുമാനം ഫയലില്‍ കുരുങ്ങി. കെട്ടിടം നിര്‍മിക്കാനുള്ള ഭാഗത്തെ മണ്ണ് നീക്കം ചെയ്യുന്നത് സംബന്ധിച്ച് ധാരണയാകാത്തതാണു പ്രശ്‌നം. പാമ്പാടിയില്‍ മേല്‍ക്കൂര പറന്നുപോയി പാമ്പാടി താലൂക്ക് ആശുപ്രതിയുടെ അഡ്മിനിസ്ട്രേറ്റീവ് ബ്ലോക്കിന്‍റെ മേല്‍ക്കൂര കഴിഞ്ഞ മാസം 16നുണ്ടായ ശക്തമായ കാറ്റില്‍ പറന്നുപോയിരുന്നു. കെട്ടിടം കോണ്‍ക്രീറ്റ് ഇളകി കമ്പി തെളിഞ്ഞ നിലയിലാണ്. ബലക്ഷയം ചൂണ്ടിക്കാട്ടി അപേക്ഷ സമര്‍പ്പിച്ചെങ്കിലും അണ്‍ഫിറ്റ് സര്‍ട്ടിഫിക്കറ്റ് ലഭിക്കാത്തതിനാല്‍ ഇവിടെ പ്രവര്‍ത്തനം തുടരുന്നു. ചങ്ങനാശേരിയിലും പെരുന്നയിലും പ്രതിസന്ധി ചങ്ങനാശേരി ജനറലാശുപത്രിയുടെ ഐസൊലേഷന്‍ വാര്‍ഡിന്‍റെ പോര്‍ച്ചിനുമുകളിലെ കോണ്‍ക്രീറ്റിനു കേടുപാടുകള്‍ നേരിട്ടിട്ടുണ്ട്. നിരവധി ആളുകള്‍ എത്തുന്ന സ്ഥലമാണ്. പെരുന്നയില്‍ പ്രവര്‍ത്തിക്കുന്ന മുനിസിപ്പല്‍ ആയുര്‍വേദാശുപത്രി കെട്ടിടം ജീര്‍ണാവസ്ഥയിലാണ്. പുതിയ കെട്ടിടം നിര്‍മിക്കാനുള്ള നടപടികള്‍ വൈകുന്നു.

ക്‌നാനായ സമുദായം സീറോ മലബാര്‍ സഭയുടെ അവിഭാജ്യഘടകം: മാർ റാഫേൽ തട്ടിൽ

കോട്ടയം: ക്‌നാനായ സമുദായം സീറോ മലബാര്‍ സഭയുടെ അവിഭാജ്യഘടകമാണെന്നും സഭയിലെ പാരമ്പര്യങ്ങളുടെ മേല്‍ത്തരം കലവറയാണ് ക്‌നാനായ ഭദ്രാസനമെന്നും സീറോമലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍. പുന്നത്തുറ സെന്‍റ് തോമസ് ക്നാനായ കത്തോലിക്ക പള്ളിയുടെ ചതുര്‍ശതാബ്ദി ആഘോഷ സമാപനം ഉദ്ഘാടനം ചെയ്യുകയായിരുന്നു മേജര്‍ ആര്‍ച്ച്ബിഷപ്. കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് അധ്യക്ഷതവഹിച്ചു. തുടര്‍ പദ്ധതികളുടെ ഉദ്ഘാടനം മന്ത്രി വി.എന്‍. വാസവനും പ്രതിപക്ഷ നേതാവ് വി.ഡി. സതീശന്‍ മുഖ്യപ്രഭാഷണവും നടത്തി. ചാണ്ടി ഉമ്മന്‍ എംഎല്‍എ സുവനീര്‍ പ്രകാശനം ചെയ്തു. പള്ളി വികാരി ഫാ. ബിബിന്‍ കണ്ടോത്ത്, മോന്‍സ് ജോസഫ് എംഎല്‍എ, സിനിമാതാരം ദിലീഷ് പോത്തന്‍, ഫാ. സ്റ്റാനി ഇടത്തിപ്പറമ്പില്‍, ശ്രീജിത്ത് കെ. നമ്പൂതിരി, ഫാ. ജയിംസ് ചെരുവില്‍, ഫാ. ഏബ്രഹാം കരിപ്പിങ്ങാമ്പുറം, സിസ്റ്റര്‍ കൊച്ചുറാണി, ബിനു പല്ലോന്നില്‍ എന്നിവര്‍ പ്രസംഗിച്ചു. ശതാബ്ദി ആഘോഷ സമാപനത്തോടനുബന്ധിച്ച് കിടങ്ങൂരില്‍നിന്നു പുന്നത്തുറയിലേക്ക് ചതുര്‍ ശതാബ്ദി സമാപന റാലിയും നടന്നു. കിടങ്ങൂര്‍ എസ്എച്ച്ഒ കെ.എല്‍. മഹേഷ് റാലി ഫ്ലാഗ് ഓഫ് ചെയ്തു. വാദ്യമേളങ്ങളും ഫ്ലോട്ടുകളും റാലി വര്‍ണാഭമാക്കി. വികാരി ഫാ. ബിബിന്‍ കണ്ടോത്ത്, ബിനു സ്റ്റീഫന്‍ പല്ലോന്നില്‍, ബിബീഷ് ഒലീക്കമുറി, സാബു ഒഴുങ്ങാലില്‍, സാബു വയലില്‍ എന്നിവര്‍ പരിപാടിക്ക് നേതൃത്വം നല്‍കി.

പി.ജെ. ജോസഫ് നന്മയുടെ പ്രകാശഗോപുരം: ഗോവ ഗവര്‍ണര്‍ പി.എസ്. ശ്രീധരന്‍പിള്ള

കോട്ടയം: കേരള രാഷ്‌ട്രീയത്തിലെ നന്മയുടെ പ്രകാശഗോപുരമാണ് പി.ജെ. ജോസഫ് എന്ന് ഗോവ ഗവര്‍ണര്‍ പി.എസ്. ശ്രീധരന്‍പിള്ള. ശതാഭിഷിക്തനായ മുന്‍ മന്ത്രി പി.ജെ. ജോസഫിന് കോട്ടയം പൗരാവലിയുടെ ആഭിമുഖ്യത്തില്‍ നാഗമ്പടം ഹോട്ടല്‍ സീസര്‍ പാലസ് ഓഡിറ്റോറിയത്തില്‍ നല്‍കിയ സ്വീകരണപരിപാടി ഉദ്ഘാടനം ചെയ്യുകയായിരുന്നു ഗവര്‍ണര്‍. എതിരാളികളുടെ പോലും ആദരവ് ഏറ്റുവാങ്ങിയ രാഷ്‌ട്രീയ നേതാവായ പി.ജെ. ജോസഫ് അധികാരസ്ഥാനത്തിരുന്നപ്പോള്‍ അനീതിക്കെതിരേ ശക്തമായ നിലപാടെടുത്തു. ഉന്നത സ്ഥാനത്തെത്തിയപ്പോഴും ഗാന്ധിയന്‍ ആദര്‍ശങ്ങള്‍ അദ്ദേഹം കൈവിട്ടില്ല. എളിമയായതും തെളിമയായതുമായ വ്യക്തിത്വം എപ്പോഴും പുലര്‍ത്താന്‍ അദ്ദേഹത്തിനു കഴിഞ്ഞെന്നും ശ്രീധരന്‍പിള്ള പറഞ്ഞു. ചീഫ് വിപ്പ് ഡോ. എന്‍. ജയരാജ്, ഫ്രാന്‍സിസ് ജോര്‍ജ് എംപി, വൈക്കം വിശ്വന്‍, കോട്ടയം അതിരൂപത വികാരി ജനറാള്‍ ഫാ. മൈക്കിള്‍ വെട്ടിക്കാട്ട്, മോന്‍സ് ജോസഫ് എംഎല്‍എ, നഗരസഭാ ചെയര്‍പേഴ്സണ്‍ ബിന്‍സി സെബാസ്റ്റ്യന്‍, ചലച്ചിത്രതാരം പ്രേം പ്രകാശ്, ദര്‍ശന സാംസ്‌കാരികകേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, പ്രോഗ്രാം കോ ഓര്‍ഡിനേറ്റര്‍ മാത്യു കൊല്ലമലക്കരോട്ട് എന്നിവര്‍ പ്രസംഗിച്ചു. പൗരാവലിയുടെ ഉപഹാരം ഗവര്‍ണര്‍ പി.എസ്. ശ്രീധരന്‍പിള്ള പി.ജെ. ജോസഫിനു സമ്മാനിച്ചു. പി.ജെ. ജോസഫ് മറുപടി പ്രസംഗം നടത്തി.

ആശുപത്രി വികസനസമിതി നോക്കുകുത്തി; മെഡി. കോളജിൽ കാര്യങ്ങൾ തോന്നുംപടി

ആർപ്പൂക്കര: മെഡിക്കൽ കോളജ് ആശുപത്രിയിൽ ആശുപത്രി വികസന സമിതിയെ നോക്കുകുത്തിയാക്കി പിൻവാതിൽ ഭരണമെന്ന് ആക്ഷേപം. ആശുപത്രി വികസന സമിതിയുടെ യോഗം കൂടുന്നേയില്ല. വികസന സമിതിയുടെ എക്സിക്യൂട്ടീവ് കമ്മിറ്റി മാത്രമാണ് കൂടാറുള്ളത്. സ്ഥലം എംഎൽഎയായ മന്ത്രി വി.എൻ. വാസവൻ, വികസന സമിതി ചെയർമാനായ ജില്ലാ കളക്ടർ, ആശുപത്രി സൂപ്രണ്ട്, ആർഎംഒ തുടങ്ങിയവർക്കൊപ്പം മന്ത്രിയുടെ പ്രതിനിധി എന്ന പേരിൽ നാമനിർദേശം ചെയ്യപ്പെട്ട ഒരു സിപിഎം നേതാവും അനധികൃതമായി പങ്കെടുക്കാറുണ്ടെന്ന് വികസന സമിതി അംഗങ്ങൾ പറയുന്നു. രണ്ടാം പിണറായി സർക്കാർ അധികാരമേറ്റശേഷം പുനഃസംഘടിപ്പിച്ച വികസന സമിതിയുടെ യോഗം കഴിഞ്ഞ നാലു വർഷത്തിനിടയിൽ ചേർന്നത് രണ്ടു തവണ മാത്രമാണ്. ആശുപത്രി വികസന സമിതിയുടെ നിയമാവലി പ്രകാരം മൂന്നു മാസം കൂടുമ്പോൾ യോഗം കൂടേണ്ടതാണെന്ന് വികസന സമിതി അംഗങ്ങൾ ചൂണ്ടിക്കാട്ടുന്നു. നിയമസഭയിൽ പ്രാതിനിധ്യമുള്ള എല്ലാ രാഷ്ട്രീയ കക്ഷികളുടെയും പ്രതിനിധികൾ വികസന സമിതിയിൽ അംഗങ്ങളാണ്. സമിതി യോഗം വിളിച്ചുകൂട്ടാത്തതിൽ സിപിഎം ഒഴികെയുള്ള എല്ലാ ഭരണ, പ്രതിപക്ഷ കക്ഷികളുടെയും പ്രതിനിധികൾ അമർഷത്തിലാണ്. മുമ്പ് കൃത്യമായി വികസന സമിതി യോഗം കൂടുകയും ആശുപത്രിയുമായി ബന്ധപ്പെട്ട വിഷയങ്ങൾ വിശദമായി ചർച്ച ചെയ്യുകയും ചെയ്യുമായിരുന്നെന്ന് മുമ്പ് വികസന സമിതി എക്സിക്യൂട്ടീവ് കമ്മിറ്റി അംഗമായിരുന്ന സാബു മാത്യു പറഞ്ഞു. എച്ച്ഒഡിമാരും യോഗത്തിൽ പങ്കെടുത്തിരുന്നു. ആശുപത്രിയുമായി ബന്ധപ്പെട്ട് പരാതികൾ ഉയർന്നാൽ സമിതി അംഗങ്ങളും ആശുപത്രി അധികൃതരും സംയുക്തമായി സന്ദർശനം നടത്തി പരിഹാരം കണ്ടിരുന്നു. ആ സംവിധാനം നിലനിന്നിരുന്നുവെങ്കിൽ ഇപ്പോൾ ഉണ്ടായ ദുരന്തം ഒഴിവാകുമായിരുന്നെന്ന് എൽഡിഎഫ് ഘടകകക്ഷി പ്രതിനിധിയായ ഒരു അംഗം പറഞ്ഞു. ആശുപത്രി വികസന സമിതി വഴിയുള്ള നിയമനങ്ങൾ, വേതന വർധന, പാർക്കിംഗ് ഫീസ് തുടങ്ങിയവയെല്ലാം മുമ്പ് വികസന സമിതിയിൽ ചർച്ച ചെയ്താണ് തീരുമാനിച്ചിരുന്നതെങ്കിൽ ഇപ്പോൾ എല്ലാം ഏകപക്ഷീയമായ തീരുമാനമാണ്. ഒന്നും സുതാര്യമല്ലെന്ന ആക്ഷേപവും ഉയരുന്നു. ജനകീയ താത്പര്യങ്ങൾ പാടേ അവഗണിക്കപ്പെടുകയാണെന്ന ആക്ഷേപമാണ് ഉയരുന്നത്.

ജുഡീഷല്‍ അന്വേഷണം വേണം: ചാണ്ടി ഉമ്മന്‍ എംഎല്‍എ

ഗാന്ധിനഗര്‍: കോട്ടയം മെഡിക്കല്‍ കോളജ് ആശുപത്രി കെട്ടിടം തകര്‍ന്നുവീണ് സ്ത്രീ മരിച്ച സംഭവത്തില്‍ കളക്ടറുടെ അന്വേഷണമല്ല പകരം ജുഡീഷല്‍ അന്വേഷണം നടത്തണമെന്ന് ചാണ്ടി ഉമ്മന്‍ എംഎല്‍എ. സോളാര്‍ കേസില്‍ ജുഡീഷല്‍ അന്വേഷണം വേണമെന്ന് ആവശ്യപ്പെട്ടവര്‍ എന്തിനാണ് ഇപ്പോള്‍ ജുഡീഷല്‍ അന്വേഷണത്തെ ഭയക്കുന്നതെന്നും ചാണ്ടി ഉമ്മന്‍ ചോദിച്ചു. ബിന്ദുവിന്‍റെ കുടുംബത്തിന് സ്ഥിരം ജോലി നല്‍കാന്‍ സര്‍ക്കാര്‍ ഇടപെടണം.

ബിന്ദുവിന്‍റെ വീട് നവീകരിച്ചു നല്‍കുമെന്ന് മന്ത്രി ഡോ. ആര്‍. ബിന്ദു

തലയോലപ്പറമ്പ്: കോട്ടയം മെഡിക്കല്‍ കോളജില്‍ മരണമടഞ്ഞ ബിന്ദുവിന്‍റെ വീട് ഉന്നതവിദ്യാഭ്യാസ വകുപ്പിനു കീഴിലുള്ള നാഷണല്‍ സര്‍വീസ് സ്‌കീം ആഭിമുഖ്യത്തില്‍ നവീകരിച്ചു നല്‍കുമെന്ന് മന്ത്രി ഡോ. ആര്‍. ബിന്ദു കുടുംബത്തെ അറിയിച്ചു. ബിന്ദുവിന്‍റെ ഭര്‍ത്താവ് വിശ്രുതനെയും അമ്മ സീതമ്മയെയും ഫോണില്‍ വിളിച്ചാണ് മന്ത്രി ഡോ. ബിന്ദു ഇക്കാര്യമറിയിച്ചത്. നാഷണല്‍ സര്‍വീസ് സ്‌കീം അധികൃതര്‍ എത്രയും വേഗംതന്നെ വേണ്ട നടപടികള്‍ എന്തൊക്കെയെന്ന് വിലയിരുത്തും. ഒട്ടും കാലതാമസം കൂടാതെതന്നെ ആവശ്യമായ നിര്‍മാണ പ്രവര്‍ത്തനങ്ങളിലേക്ക് കടക്കും. പ്രവൃത്തിയുടെ പുരോഗതി നാഷണല്‍ സര്‍വീസ് സ്‌കീം അധികൃതരുമായി ബന്ധപ്പെട്ട് വിലയിരുത്തുകയും ചെയ്യും - മന്ത്രി ഡോ. ബിന്ദു പറഞ്ഞു.

ബിജെപിയുടെ മെഡി.‍ കോളജ് മാര്‍ച്ച് നാളെ

കോട്ടയം: മെഡിക്കല്‍ കോളജിലെ കെട്ടിടം തകര്‍ന്ന് വീട്ടമ്മ മരിക്കാനിടയായ സംഭവത്തിലെ കുറ്റക്കാരായ ആരോഗ്യമന്ത്രി വീണാ ജോര്‍ജും മന്ത്രി വി.എന്‍. വാസവനും രാജിവയ്ക്കണമെന്നാവശ്യപ്പെട്ട് ബിജെപിയുടെ നേതൃത്വത്തില്‍ നാളെ മെഡിക്കല്‍ കോളജിലേക്ക് മാര്‍ച്ച് സംഘടിപ്പിക്കും. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ ഉദ്ഘാടനം ചെയ്യും. ജനങ്ങളുടെ ജീവനും സ്വത്തിനും സംരക്ഷണം നല്‍കുമെന്ന് സത്യപ്രതിജ്ഞ ചെയ്തു ചുമതലയേറ്റ മന്ത്രിമാര്‍ക്ക് ധാര്‍മികമായി അധികാരത്തില്‍ തുടരാന്‍ അവകാശമില്ലെന്ന് ബിജെപി കോട്ടയം വെസ്റ്റ് ജില്ലാ പ്രസിഡന്‍റ് ജി. ലിജിന്‍ ലാല്‍ പറഞ്ഞു.

നവമിയെ തിങ്കളാഴ്ച മെഡിക്കൽ കോളജിൽ പ്രവേശിപ്പിക്കും

തലയോലപ്പറമ്പ്: കോട്ടയം മെഡിക്കൽകോളജ് ആശുപത്രിയിൽ ശുചിമുറി സമുച്ചയം തകർന്നു വീണുണ്ടായ അപകടത്തിൽ മരണപ്പെട്ട ഡി. ബിന്ദുവിന്‍റെ മകൾ നവമിയെ (21) തിങ്കളാഴ്ച ചികിത്സയ്ക്കായി മെഡിക്കൽ കോളജ് ആശുപത്രിയിൽ പ്രവേശിപ്പിക്കും. തിങ്കളാഴ്ച രാവിലെ 7.30ന് ആശുപത്രിയിലെത്തി ബന്ധപ്പെട്ട ഡോക്ടർമാരെ കാണാനാണ് ആശുപത്രി അധികൃതരുടെ നിർദേശം ലഭിച്ചതെന്ന് നവമിയുടെ പിതാവ് വിശ്രുതൻ പറഞ്ഞു. ചികിത്സാച്ചെലവ് പൂർണമായും സർക്കാർ വഹിക്കുമെന്നാണ് മന്ത്രി വാസവൻ അറിയിച്ചത്.

ഇടിഞ്ഞുവീണ കെട്ടിടാവശിഷ്ടങ്ങൾ നീക്കുന്നത് അവസാന ഘട്ടത്തിൽ

ഗാന്ധിനഗർ: മെഡിക്കൽ കോളജ് ആശുപത്രിയിലെ ഇടിഞ്ഞുവീണ കെട്ടിടത്തിന്‍റെ അവശിഷ്ടങ്ങൾ നീക്കം ചെയ്യുന്നത് പുരോഗമിക്കുന്നു. ജെസിബി ഉപയോഗിച്ച് കല്ലും മണ്ണും നീക്കം ചെയ്യുന്നത് നടന്നു വരികയാണ്. ഇന്നുകൊണ്ട് കല്ലും മണ്ണും നീക്കം ചെയ്യുന്നത് പൂർത്തിയാക്കാൻ കഴിയുമെന്നാണ് വിചാരിക്കുന്നതെന്ന് ആശുപത്രി ആർഎംഒ ഡോ. സാംക്രിസ്റ്റി മാമ്മൻ പറഞ്ഞു. ഇടിഞ്ഞുവീണ കെട്ടിടം പൊളിച്ചുനീക്കാൻ പിഡബ്ല്യുഡിയുടെ അനുമതിയായിട്ടില്ല. പിഡബ്ല്യുഡിയാണ് പൊളിച്ചു നീക്കേണ്ടത്.

അറ്റകുറ്റപ്പണി: കാഞ്ഞിരപ്പള്ളി ബസ് സ്റ്റാൻഡ് 15 വരെ അടച്ചിടും

കാഞ്ഞിരപ്പള്ളി: ബസ് സ്റ്റാൻഡ് ജംഗ്ഷനിലെ ശോച്യാവസ്ഥയ്ക്കു പരിഹാരം കാണാൻ ഒടുവിൽ ദേശീയപാതാ അധികൃതർ രംഗത്ത്. മാലിന്യം നിറഞ്ഞ ഓടകൾ വൃത്തിയാക്കുന്ന ജോലികളും തകർന്ന സ്ലാബുകൾ പുനഃസ്ഥാപിക്കുന്ന ജോലികളുമാണ് നടത്തുന്നത്. ദേശീയപാതയിൽനിന്നു കാഞ്ഞിരപ്പള്ളി ബസ് സ്റ്റാൻഡിലേക്കു പ്രവേശിക്കുന്നതും ഇറങ്ങുന്നതുമായ റോ‍ഡിലെ കോൺക്രീറ്റിംഗും ഓടയ്ക്കു മീതെയുള്ള സ്ലാബുകളും തകർന്നു ബസുകൾക്കു കേടുപാടുകൾ പതിവായതോടെ പ്രതിഷേധം ശക്തമായിരുന്നു. വെള്ളിയാഴ്ച രാത്രിമുതൽ ബസ് സ്റ്റാൻഡ് അടച്ചിട്ടാണ് ഓട വൃത്തിയാക്കുന്നത്. കോൺക്രീറ്റിംഗ് ഉൾപ്പെടെയുള്ള ജോലികൾ നടക്കുന്നതിനാൽ 15 വരെ ബസ് സ്റ്റാൻഡ് അടച്ചിടും. നാളുകളായി അടഞ്ഞുകിടന്ന ഓടയുടെ മീതെയുള്ള സ്ലാബുകൾ മാറ്റിയപ്പോൾ മണ്ണും മാലിന്യങ്ങളും നിറഞ്ഞു പൂർണമായും അടഞ്ഞ നിലയിലായിരുന്നു. തുടർന്നു ജെസിബി ഉപയോഗിച്ചാണ് ഓടയിലെ മാലിന്യങ്ങൾ നീക്കുന്നത്. ബസ് സ്റ്റാൻഡിൽനിന്നു ബസുകൾ ഇറങ്ങുന്ന ഭാഗത്തെ ഓട വൃത്തിയാക്കുന്ന ജോലികളാണ് വെള്ളിയാഴ്ച രാത്രി ആരംഭിച്ചത്. ഇന്നലെ രാത്രി ബസ് കയറുന്ന ഭാഗത്തെ ജോലികളും ആരംഭിച്ചു. കൂടാതെ ബസ് സ്റ്റാൻഡ് റോഡുകൾ ദേശീയപാതയിൽ ചേരുന്ന ഭാഗങ്ങളും നവീകരിക്കും. ഹ്രസ്വകാല പുനരുദ്ധാരണ പദ്ധതിയിൽപ്പെടുത്തിയാണ് നവീകരണം നടത്തുന്നതെന്ന് ദേശീയപാതാ വിഭാഗം അധികൃതർ അറിയിച്ചു. ടൗണിലെ തിരക്കു പരിഗണിച്ച് രാത്രി സമയത്താണ് അറ്റകുറ്റപ്പണികൾ നടക്കുകയെന്നും ജോലികൾ എത്രയും പെട്ടെന്നു പൂർത്തിയാക്കി ഗതാഗതം പുനഃസ്ഥാപിക്കാൻ നടപടി സ്വീകരിച്ചുവരുന്നതായും ചീഫ് വിപ്പ് ഡോ. എൻ. ജയരാജും അറിയിച്ചു. ബസ് സ്റ്റാൻഡ് റോഡിന്‍റെ ശോച്യാവസ്ഥയെക്കുറിച്ചു പറയുന്പോൾ പഞ്ചായത്തും ദേശീയപാതാ വിഭാഗവും പരസ്പരം കൈയൊഴിയുകയാണെന്നതു സംബന്ധിച്ച് ദീപിക കഴിഞ്ഞ ദിവസം വാർത്ത പ്രസിദ്ധീകരിച്ചിരുന്നു. അനുവാദം നൽകിയാൽ പണം മുടക്കി കോൺക്രീറ്റ് ചെയ്തു നവീകരിക്കാൻ തയാറാണെന്നു ബസുടമകളും അറിയിച്ചിരുന്നു. ഇതിനൊടുവിലാണ് ഇപ്പോൾ നിർമാണ പ്രവർത്തനങ്ങൾ ആരംഭിച്ചിരിക്കുന്നത്.

മലയോര മേഖലയിൽ പരിഹാരമില്ലാതെ വന്യമൃഗശല്യം; പൊറുതിമുട്ടി നാട്ടുകാര്‌

മുണ്ടക്കയം: കോട്ടയം, ഇടുക്കി ജില്ലാ അതിർത്തികൾ പങ്കിടുന്ന മലയോര മേഖലയിൽ വന്യമൃഗശല്യം അതിരൂക്ഷമാകുന്നു. ആന, കാട്ടുപോത്ത്, പുലി, കാട്ടുപന്നി, കുരങ്ങ് അടക്കമുള്ള വന്യമൃഗങ്ങൾ ജനവാസ മേഖലയിൽ വിഹരിക്കുകയാണ്. നടപടി സ്വീകരിക്കേണ്ട വനംവകുപ്പ് അധികൃതരാകട്ടെ നിയമത്തിലെ പഴുതുകളിൽ പഴിചാരി രക്ഷപ്പെടുന്നെന്നും ആക്ഷേപം. മുണ്ടക്കയം, കോരുത്തോട്, പെരുവന്താനം പഞ്ചായത്തുകളിലാണ് വന്യമൃഗശല്യം ഏറ്റവും രൂക്ഷമായിട്ടുള്ളത്. പെരുവന്താനം പഞ്ചായത്തിലെ ശബരിമല വനാതിർത്തി പങ്കിടുന്ന ടിആർ ആൻഡ് ടി എസ്റ്റേറ്റിലെ മതമ്പ, ചെന്നാപ്പാറ, കൊമ്പുകുത്തി അടക്കമുള്ള മേഖലയിൽ കാട്ടാന, കാട്ടുപോത്ത്, പുലി, കടുവ അടക്കമുള്ള വന്യമൃഗങ്ങൾ നാട്ടുകാരുടെ സ്വൈരജീവിതം കെടുത്തുകയാണ്. ജനവാസ മേഖലയായ കൊടുകുത്തി, അമലഗിരി, അഴങ്ങാട് മേഖലയിൽ കഴിഞ്ഞ ദിവസം പുലിയുടെ സാന്നിധ്യമുണ്ടായത് ജനങ്ങളിൽ ആശങ്ക വർധിപ്പിക്കുകയാണ്. വനാതിർത്തി മേഖലയിൽ പലയിടങ്ങളിലും സുരക്ഷാക്രമീകരണങ്ങൾ ഒരുക്കുമെങ്കിലും അവയെല്ലാം തകർത്ത് വന്യമൃഗങ്ങൾ ജനവാസ മേഖലയിലേക്ക് ഇറങ്ങുകയാണ്. കഴിഞ്ഞ ദിവസം പെരുവന്താനം പഞ്ചായത്തിലെ മുസ്‌ലിം പള്ളി ഭാഗത്ത് തുവരംമുടി മുത്തേട്ട് സൈനുദീന്‍റെ പുരയിടത്തിൽ കാട്ടുപന്നി വ്യാപകമായാണ് കൃഷി നശിപ്പിച്ചത്. ജനങ്ങൾ തിങ്ങിപ്പാർക്കുന്ന മേഖലയിൽ കൂട്ടമായെത്തുന്ന കാട്ടുപന്നികൾ ജനങ്ങളുടെ ജീവന് ഭീഷണിയായി മാറിയിരിക്കുകയാണ്. പെരുവന്താനം പഞ്ചായത്തിലെ പുറക്കയം, കൊയിനാട്, ചെറുവള്ളിക്കുളം, കണയങ്കവയൽ, മുറിഞ്ഞുപുഴ മേഖലയിൽ കാട്ടുപോത്തും കാട്ടാനയും കുരങ്ങും കാട്ടുപന്നിയും വലിയ കൃഷിനാശമാണ് വിതയ്ക്കുന്നത്. മലയോര മേഖലയിലെ ജനങ്ങളുടെ ഏക ആശ്രയമാണ് കൃഷി. ഏറ്റവുമധികം ദുരിതം പേറുന്നതും കർഷകരാണ്. രാവിലെ ടാപ്പിംഗിന് പോകുന്ന കർഷകർ ജീവൻ പണയപ്പെടുത്തിയാണ് ജോലി ചെയ്യുന്നത്. നട്ടു നനച്ചു വളർത്തിയ വിളകൾ വിളവെടുപ്പിന് പാകമാകുമ്പോൾ കുരങ്ങും കാട്ടുപന്നിയും നശിപ്പിക്കും.

കാഞ്ഞിരപ്പള്ളി ബൈപാസ് നിർമാണം അട്ടിമറിക്കുന്നു; ഐഎൻടിയുസി പ്രക്ഷോഭത്തിലേക്ക്

കാഞ്ഞിരപ്പള്ളി: കാഞ്ഞിരപ്പള്ളിയുടെ സ്വപ്നപദ്ധതിയായ ബൈപാസിന്‍റെ നിർമാണം പാതിവഴിയിൽ നിലച്ചതിന് പിന്നിൽ സർക്കാരിന്‍റെ അനാസ്ഥയാണെന്ന് ഐഎൻടിയുസി കാഞ്ഞിരപ്പള്ളി മണ്ഡലം കമ്മിറ്റി ആരോപിച്ചു. സർക്കാരിന്‍റെ വീഴ്ച മറച്ചുവയ്ക്കുന്നതിന് കരാർ കമ്പനിക്കെതിരേ കാഞ്ഞിരപ്പള്ളി എംഎൽഎ ഉൾപ്പെടെയുള്ളവർ ആരോപണങ്ങൾ ഉന്നയിക്കുന്നത് അപഹാസ്യവും ജനങ്ങളുടെ കണ്ണിൽ പൊടിയിടുന്നതിനും വേണ്ടിയാണ്. ആവശ്യത്തിന് ഫണ്ടില്ലാത്തതിനാൽ നിർമാണം മുന്നോട്ടുകൊണ്ടുപോകാൻ കഴിയുന്നില്ലെന്ന കരാർ കമ്പനിയുടെ പരാതികൾ വസ്തുതാപരമായി പരിശോധിക്കുന്നതിനു പകരം കമ്പനിയെ കരിമ്പട്ടികയിൽ ഉൾപ്പെടുത്തുമെന്ന അധികാരികളുടെ പ്രസ്താവന ബൈപാസ് നിർമാണം അട്ടിമറിക്കാൻ വേണ്ടിയാണോ എന്നു സംശയിക്കേണ്ടിയിരിക്കുന്നു. പല തവണ ടെൻഡറും റീ ടെൻഡറും ചെയ്തതിനുശേഷമാണ് ഗുജറാത്തിലെ ബാക്ബോൺ കൺസ്ട്രക്‌ഷൻസ് പ്രൈവറ്റ് ലിമിറ്റഡ് കമ്പനി കരാർ ഏറ്റെടുത്തത്. ബൈപാസിനു വേണ്ടി അനുവദിച്ച തുക അപര്യാപ്‍തമായതിനാലാണ് മുന്പ് നിർമാണ കമ്പനികൾ ടെൻഡർ നടപടികളിൽനിന്നു വിട്ടുനിന്നത്. നിലവിൽ കരാറെടുത്തിരിക്കുന്ന കമ്പനിയെ ഒഴിവാക്കി പദ്ധതി റീടെൻഡർ ചെയ്ത് മറ്റ് കമ്പനിക്ക് കരാർ നൽകാനുള്ള തീരുമാനം ബൈപാസ് പദ്ധതിയെത്തന്നെ ഇല്ലാതാക്കുന്നതിനുവേണ്ടിയാണ്. കഴിഞ്ഞ വർഷം ഫെബ്രുവരിയിൽ ആരംഭിച്ച നിർമാണം ഈ വർഷം മാർച്ച്‌ മാസത്തിൽ പൂർത്തീകരിക്കാനാണു‌ തീരുമാനിച്ചതെങ്കിലും അതിന് യാതൊരു നടപടിയും ഉണ്ടാകാത്ത സാഹചര്യത്തിൽ ശക്തമായ സമര പരിപാടികൾ ആരംഭിക്കാനും ഐഎൻടിയുസി മണ്ഡലം കമ്മിറ്റി തീരുമാനിച്ചു. ഡിസിസി ജനറൽ സെക്രട്ടറി റോണി കെ. ബേബി യോഗം ഉദ്ഘാടനം ചെയ്തു. ഐഎൻടിയുസി മണ്ഡലം പ്രസിഡന്‍റ് റസിലി തേനമ്മാക്കൽ അധ്യക്ഷത വഹിച്ചു. റീജണൽ കമ്മിറ്റി വൈസ് പ്രസിഡന്‍റ് അജ്മൽ പാറയ്ക്കൽ തുടങ്ങിയവർ പ്രസംഗിച്ചു. കരാർ കമ്പനിക്കെതിരേ നടപടി വേണമെന്ന് കാഞ്ഞിരപ്പള്ളി: കാഞ്ഞിരപ്പള്ളി ബൈപാസ് നിർമാണത്തിൽ ഗുരുതരവീഴ്ച വരുത്തിയ കരാർ കമ്പനിക്കെതിരേ അടിയന്തര നിയമനടപടി സ്വീകരിക്കണമെന്ന് സിപിഐ കാഞ്ഞിരപ്പള്ളി ലോക്കൽ കമ്മിറ്റി ആവശ്യപ്പെട്ടു. റീ ടെൻഡർ നടപടികൾ വേഗത്തിലാക്കി മുൻ നിശ്ചയപ്രകാരം നിർമാണ പ്രവർത്തനങ്ങൾ പൂർത്തീകരിക്കണമെന്നും കമ്മിറ്റി ആവശ്യപ്പെട്ടു. സർക്കാരിന് വൻ സാമ്പത്തിക ബാധ്യതയുണ്ടാക്കിയ കരാർകമ്പനിയെ കരിമ്പട്ടികയിൽ ഉൾപ്പെടുത്തുന്നതിനുള്ള നടപടി സ്വീകരിക്കണമെന്നും സിപിഐ ആവശ്യപ്പെട്ടു. എം.എ. ഷാജി, സിജോ പ്ലാത്തോട്ടം, ജെയ്‌മോൻ ജോസ്, സലിം അമരീസ് എന്നിവർ പ്രസംഗിച്ചു.

കാരുണ്യ ലോട്ടറിയുടെ ഒരു കോടി സമ്മാനം പൊൻകുന്നത്ത്

പൊൻകുന്നം: ഇന്നലെ നറുക്കെടുത്ത കാരുണ്യ കെ.ആർ. 713 ലോട്ടറിയുടെ ഒന്നാംസമ്മാനം ഒരു കോടി രൂപ പൊൻകുന്നത്ത് വിറ്റ ടിക്കറ്റിന്. പൊൻകുന്നം ബസ് സ്റ്റാൻഡിലെ ഗണേശ ലക്കി സെന്‍ററിൽനിന്ന് വിറ്റ കെ.എൻ. 195227 ടിക്കറ്റിനാണ് സമ്മാനം. ഇളങ്ങുളം സ്വദേശിയായ വിൽപ്പനക്കാരൻ സിജിമോനാണ് ഗണേശ സെന്‍ററിൽനിന്ന് സമ്മാനാർഹമായ ടിക്കറ്റ് വിറ്റത്. സമ്മാനാർഹനെ കണ്ടെത്തിയിട്ടില്ല.

പൊൻകുന്നം എൻഎസ്എസ് യൂണിയനിൽ 3.34 കോടിയുടെ ബജറ്റ്

പൊൻകുന്നം: പൊൻകുന്നം എൻഎസ്എസ് യൂണിയന്‍റെ 88-ാം വാർഷികപൊതുയോഗവും ബജറ്റ് സമ്മേളനവും നടത്തി. യൂണിയൻ പ്രസിഡന്‍റും നായകസഭാംഗവുമായ എം.എസ്. മോഹൻ അധ്യക്ഷത വഹിച്ചു. യൂണിയൻ സെക്രട്ടറി പ്രവീൺ ആർ. നായർ റിപ്പോർട്ടും ബജറ്റും അവതരിപ്പിച്ചു. യൂണിയന്‍റെ ഉടമസ്ഥതയിലുള്ള പുതിയകാവ് ദേവസ്വം, തൃപ്പാലപ്ര ദേവസ്വം, പൂതക്കുഴി ദേവസ്വം എന്നിവയുടേതുൾപ്പെടെ 3.34 കോടി രൂപയുടെ ബജറ്റാണ് അവതരിപ്പിച്ചത്. 53 കരയോഗങ്ങളിൽനിന്നുള്ള പ്രതിനിധികൾ പങ്കെടുത്തു. യൂണിയൻ കമ്മിറ്റിയംഗങ്ങളായ എം.ജി. ബാലകൃഷ്ണൻനായർ, പി.കെ. ബാബുക്കുട്ടൻനായർ, കെ.പി. മുകുന്ദൻ, പി.വി. രാധാകൃഷ്ണൻനായർ, കെ.ആർ. രവീന്ദ്രനാഥ്, ജയകുമാർ ഡി. നായർ, കെ.എസ്. ജയകൃഷ്ണൻനായർ, എം.ജി. മോഹൻദാസ്, കെ.ആർ. സുരേഷ്ബാബു എന്നിവർ പ്രസംഗിച്ചു.

വിദ്യാഭ്യാസ സഹായനിധി രൂപീകരിക്കും

പൊൻകുന്നം: ചിറക്കടവ് പബ്ലിക് ലൈബ്രറി രക്ഷാധികാരിയായിരുന്ന അന്തരിച്ച ഇരിക്കാട്ട് എ.ആർ. കുട്ടപ്പൻനായരുടെ സ്മരണ നിലനിർത്താൻ വിദ്യാഭ്യാസ സഹായനിധിക്ക് രൂപംനൽകാൻ ചിറക്കടവ് പബ്ലിക് ലൈബ്രറി യോഗം തീരുമാനിച്ചു. ഗ്രന്ഥശാല മേഖലയിലും കലാരംഗത്തും അദ്ദേഹം നൽകിയ സംഭാവനകളെ മാനിച്ച് ഉപരിപഠനം നടത്തുന്ന വിദ്യാർഥികൾക്കാണ് പഠനസഹായം നൽകുന്നത്. തുടർവിദ്യാഭ്യാസത്തിന് മാർഗമില്ലാത്ത നിർധനരായ വിദ്യാർഥികളെയാണ് പരിഗണിക്കുന്നത്. കലാരംഗത്ത് സംഭാവനകളെ മാനിച്ച് സബ് ജില്ലാ തലത്തിൽ വിജയം തേടുന്ന പ്രതിഭകൾക്ക് പുരസ്‌കാരം നൽകുന്നതിനും തീരുമാനിച്ചു. ചെയർമാൻ വി.ആർ. കുമാർ യോഗം ഉദ്ഘാടനം ചെയ്തു. പ്രസിഡന്‍റ് ശ്രീജ അജിത്ത് അധ്യക്ഷത വഹിച്ചു. ലൈബ്രറി സെക്രട്ടറി രാജേഷ്‌ കുമാർ പദ്ധതി രൂപരേഖ അവതരിപ്പിച്ചു. ശ്രീനിവാസൻ നായർ, രാഹുൽരാജ് തുടങ്ങിയവർ പ്രസംഗിച്ചു.

ഈരാറ്റുപേട്ട ടൗൺ ഗതാഗതക്കുരുക്കിൽ വലയുന്നു

ഈരാറ്റുപേട്ട: ടൗണിലെ ഗതാഗതക്കുരുക്കിൽ വലഞ്ഞ് ജനം. ഗതാഗതം നിയന്ത്രിക്കാൻ ട്രാഫിക് യൂണിറ്റെന്ന ആവശ്യം സ്വപ്നമായി അവശേഷിക്കുന്നു. വർഷങ്ങളായുള്ള ഈ ആവശ്യത്തിന് ഏതാനും നാൾ മുൻപ് അനുമതിയായതാണ്. എന്നാൽ തുടർനടപടി ഒന്നുമായില്ല. ഗതാഗതക്കുരുക്കുകൊണ്ടും ഗതാഗത നിയമലംഘനം കൊണ്ടും ശ്രദ്ധേയമാണ് ഈരാറ്റുപേട്ട. ഇക്കാര്യം ചൂണ്ടിക്കാട്ടിയാണ് ട്രാഫിക് പോലീസെന്ന ആവശ്യം ഉയർന്നത്. എന്നാൽ അത് ഇന്നും ഫയലിൽ ഉറങ്ങുകയാണ്. നഗരസഭാ അധികൃതർ ആഭ്യന്തര വകുപ്പിനു ട്രാഫിക് യൂണിറ്റിനായി നേരിട്ട് നിവേദനം നൽകിയെങ്കിലും ഒന്നും നടന്നില്ല. ബസ് സ്റ്റാൻഡ് പൊളിച്ചു പണിയുന്നതിനാൽ കുരുക്ക് കൂടുതലുമാണ്. ജനസാന്ദ്രതയേറിയ ഇവിടത്തെ ഗതാഗതം നിയന്ത്രിക്കുന്നത് ഒരു ഹോം ഗാർഡാണ്. സെൻട്രൽ ജംഗ്ഷനിൽ ഇടയ്ക്കൊക്കെ രണ്ടു പോലീസുകാരുണ്ട്. കുരിക്കൾ നഗറിലും കോളജ് റോഡിലുമാണ് ഏറ്റവുമധികം ഗതാഗതക്കുരുക്ക്. ഗതാഗത നിയമലംഘനം നടത്തുന്നവർക്കെതിരേ നടപടിയെടുക്കുന്നതിന് ഇവിടെ സ്ഥാപിച്ച കാമറകൾ ഉപയോഗിക്കുമെന്നായിരുന്നു നഗരസഭയുടെ വാദം. എന്നാൽ ഒന്നുമുണ്ടായില്ല. ഈ കാമറയുടെ സെർവർ നഗരസഭാ ഓഫീസിലായിരുന്നു. ഇവിടെയെത്തി പോലീസിന് ഇവ ശേഖരിക്കുന്നതിനുണ്ടായ ബുദ്ധിമുട്ടാണു നടപടിയെടുക്കാൻ സാധിക്കാതിരുന്നത്. കാമറയുടെ ഒരു സെർവർ പോലീസ് സ്റ്റേഷനിൽ സ്ഥാപിക്കുന്നതിനുള്ള നടപടികൾ നടന്നുവരികയാണ്. ഇതിനായി കേബിൾ വലിക്കുന്ന പണികൾ പൂർത്തിയായി. പ്രൈവറ്റ് ബസ് സ്റ്റാൻഡ് പൊളിച്ചതോടെയാണ് നഗരത്തിൽ ഗതാഗതക്കുരുക്ക് ഇത്രയും രൂക്ഷമായത്. പണികൾ പൂർത്തിയാക്കി സ്റ്റാൻഡ് തുറക്കണമെങ്കിൽ വർഷങ്ങളെടുക്കാം. പകരം സംവിധാനം ഏർപ്പെടുത്തുകയും ട്രാഫിക് യൂണിറ്റ് ആരംഭിക്കുന്നതിനു നടപടികൾ എടുക്കുകയും ചെയ്തില്ലെങ്കിൽ നഗരത്തിലെത്തുന്ന യാത്രക്കാർ വലയും.

പന്തംകൊളുത്തി പ്രകടനം നടത്തി

എലിക്കുളം: കോട്ടയം മെഡിക്കൽ കോളജിലുണ്ടായ ദുരന്തത്തിന്‍റെ പശ്ചാത്തലത്തിൽ കേരളത്തിലെ ആരോഗ്യ വകുപ്പിന്‍റെ ഏകോപനത്തിന്‍റെ അനാസ്ഥയ്ക്കും സർക്കാരിന്‍റെ കെടുകാര്യസ്ഥതയ്ക്കും എതിരേ കോൺഗ്രസ് എലിക്കുളം മണ്ഡലം കമ്മിറ്റിയുടെ നേതൃത്വത്തിൽ പന്തംകൊളുത്തി പ്രകടനം നടത്തി. ഉത്തരവാദിത്വം ഏറ്റെടുത്ത് ആരോഗ്യമന്ത്രി വീണാ ജോർജ് രാജിവയ്ക്കണെന്ന് ആവശ്യപ്പെട്ട് മന്ത്രിയുടെ കോലം കത്തിച്ചു. കോൺഗ്രസ് മണ്ഡലം പ്രസിഡന്‍റ് ജയിംസ് ചാക്കോ ജീരകത്തിൽ അധ്യക്ഷത വഹിച്ചു. കോൺഗ്രസ് പാലാ ബ്ലോക്ക് ജനറൽ സെക്രട്ടറി പി.ജെ. തോമസ് പാലക്കുഴിയിൽ, സെക്രട്ടറി ജിഷ്ണു പറപ്പള്ളിൽ, മെംബർമാരായ യമുന പ്രസാദ്, സിനിമോൾ കാക്കശേരി, മഹിളാ കോൺഗ്രസ് മണ്ഡലം പ്രസിഡന്‍റ് ഗീതാ സജി, മണ്ഡലം ജനറൽ സെക്രട്ടറിമാരായ ഗോപകുമാർ ഏലപ്പള്ളിൽ, സിജോ ചെമ്മനാട്ട്, ഇ.ആർ. ഷാജി ഇടത്തിപ്പറമ്പിൽ, നേതാക്കളായ ബിനു തലച്ചിറ, സെബാസ്റ്റ്യൻ മരുതൂർ, തോമസ് താഴത്തുവരിക്കയിൽ, സാലിക്കുട്ടി മരുതൂർ, മാത്യു ഇലഞ്ഞിമറ്റം, റോയി ഞുണ്ടന്മാക്കൽ, ജോഷി മാണാക്കുഴി തുടങ്ങിയവർ പ്രസംഗിച്ചു.

മെഡി. കോളജ് ബോയ്സ് ഹോസ്റ്റലും ശോച്യാവസ്ഥയിൽ

ഗാന്ധിനഗര്‍: മെഡിക്കല്‍ കോളജ് ബോയ്‌സ് ഹോസ്റ്റലും കാലപ്പഴക്കത്തെ തുടര്‍ന്ന് ശോച്യാവസ്ഥയില്‍. ഇതേത്തുടര്‍ന്നു വിദ്യാര്‍ഥികള്‍ ദുരിതം നേരിടുകയാണ്. വിവിധ ജില്ലകളില്‍ നിന്നുള്ള വിദ്യാര്‍ഥികളാണ് ഇവിടെ താമസിക്കുന്നത്. 1964 കാലഘട്ടത്തില്‍ നിര്‍മിച്ചതാണ് കെട്ടിടം. മെഡിക്കല്‍ കോളജിന്‍റെ തുടക്കകാലത്ത് അറുപതില്‍പ്പരം വിദ്യാര്‍ഥികള്‍ക്ക് താമസ സൗകര്യത്തിനായി നിര്‍മിച്ച ഹോസ്റ്റലാണിത്. 60 വര്‍ഷം പിന്നിട്ടിട്ടും മതിയായ അറ്റകുറ്റപ്പണികള്‍ നടത്തിയിട്ടില്ല. ഒരു മുറിക്കുള്ളില്‍ രണ്ടു പേര്‍ എന്ന രീതിയില്‍ താമസിക്കാനുള്ള സൗകര്യത്തോടെയായിരുന്നു നിര്‍മാണം. പിന്നീട് എംബിബിഎസ് സീറ്റ് വര്‍ധിപ്പിച്ചു. രണ്ട് കെട്ടിടങ്ങളിലായി പാരാ മെഡിക്കല്‍ വിദ്യാര്‍ഥികളടക്കം 350ല്‍പ്പരം പേര്‍ ഇവിടെ താമസിക്കുന്നുണ്ട്. ഹോസ്റ്റലിന്‍റെ ശോച്യാവസ്ഥ ഭീകരമാണ്. കെട്ടിടത്തിന്‍റെ കോണ്‍ക്രീറ്റ് പാളികള്‍ പൊട്ടിപ്പൊളിഞ്ഞ് താഴെ വീഴുന്നതു പതിവാണ്. ജനല്‍പ്പാളികള്‍ ഇളകിയതും ജനല്‍ക്കമ്പികള്‍ തുരുമ്പെടുത്ത് നശിച്ചതുമാണ്. ഒന്നാം നിലയില്‍ താമസിക്കുന്നവരാണ് ഏറെ ദുരിതത്തില്‍. ജനല്‍പ്പാളികള്‍ തകര്‍ന്ന ഭാഗത്ത് കാട് കയറിയ സ്ഥിതിയാണ്. കെട്ടിടങ്ങള്‍ക്ക് മുകളിലും ഭിത്തികളിലും മുറികള്‍ക്കുള്ളിലും മരച്ചില്ലകള്‍ വളര്‍ന്നുനില്‍ക്കുകയാണ്. ഹോസ്റ്റല്‍ മെസിലെ ഭക്ഷണം പാകം ചെയ്യുന്ന ഇടങ്ങള്‍ തെരുവ് നായ്ക്കളുടെ വിഹാരകേന്ദ്രമാണ്. ഒരു മുറിക്കുള്ളില്‍ അഞ്ചും ആറും പേര്‍ അടിസ്ഥാന സൗകര്യവുമില്ലാതെ ദുരിതത്തിലാണ് കഴിയുന്നത്. ചാണ്ടി ഉമ്മന്‍ എംഎല്‍എ ഇന്നലെ ഹോസ്റ്റല്‍ സന്ദര്‍ശിച്ചു വിദ്യാര്‍ഥികളോട് വിവരങ്ങള്‍ ചോദിച്ചറിഞ്ഞു.

ശുചിമുറി മാലിന്യം തള്ളി

പാലാ: ഏറ്റുമാനൂര്‍-പൂഞ്ഞാര്‍ സംസ്ഥാന പാതയില്‍ അരുണാപുരം പിഡബ്ല്യുഡി റസ്റ്റ് ഹൗസിന് എതിര്‍വശം സാമൂഹികവിരുദ്ധര്‍ ശുചിമുറി മാലിന്യം തള്ളി. ഇന്നലെ പുലര്‍ച്ചെ പ്രഭാതസവാരിക്കിറങ്ങിയവരാണ് മാലിന്യം തള്ളിയതു കണ്ടത്. നിരവധി ആളുകള്‍ കാല്‍നടയായി സഞ്ചരിക്കുന്ന ഭാഗത്താണ് മാലിന്യം തള്ളിയിരിക്കുന്നത്. ആശുപത്രികളിലേക്കും സ്‌കൂളുകളിലേക്കും ആളുകള്‍ കാല്‍നടയായി സഞ്ചരിക്കുന്ന വഴി കൂടിയാണിത്. സമീപത്തായി കുടിവെള്ളത്തിനായി ആശ്രയിക്കുന്ന നിരവധി ജലസ്രോതസുകളും സ്ഥിതിചെയ്യുന്നുണ്ട്. ഇവിടെ ഇതിനുമുമ്പും പലതവണ മാലിന്യം തള്ളിയിട്ടുണ്ട്. പ്രദേശത്ത് എത്രയും വേഗം സിസിടിവി കാമറ സ്ഥാപിക്കണമെന്നും സാമൂഹ്യവിരുദ്ധരെ പിടികൂടണമെന്നും നാട്ടുകാര്‍ ആവശ്യപ്പെട്ടു.

ജനറല്‍ ആശുപത്രിയിലെ പുതിയ കെട്ടിടം: എന്‍ഒസി ഇല്ലെന്ന് സമ്മതിച്ച് വിവിധ വകുപ്പുകള്‍

പാലാ: കെ.എം. മാണി മെമ്മോറിയല്‍ പാലാ ജനറല്‍ ആശുപത്രിയിലെ മൂന്നു പുതിയ കെട്ടിടങ്ങള്‍ക്ക് അഗ്‌നി സുരക്ഷാസേനയുടെ നിരാക്ഷേപ പത്രം (നോ ഒബ്ജക്‌ഷന്‍ സര്‍ട്ടിഫിക്കറ്റ്) ഇല്ലെന്ന് ഇന്നലെ നടന്ന താലൂക്ക് വികസനസമിതി യോഗത്തില്‍ സമ്മതിച്ച് പൊതുമരാമത്ത് വകുപ്പ് കെട്ടിട, ഇലക്‌ട്രിക്കല്‍ ഇന്‍സ്‌പെക്‌ടറേറ്റ് വിഭാഗങ്ങളും അഗ്‌നി രക്ഷാസേനയും. ജനറല്‍ ആശുപത്രിയില്‍ ഒരു മാസം മുന്‍പ് നടത്തിയ പരിശോധനയില്‍ ഒട്ടേറെ അപാകതകള്‍ കണ്ടെത്തിയിരുന്നു. ഇവ പരിഹരിക്കുന്നതിനുള്ള നടപടികള്‍ ആരംഭിച്ചതായി വകുപ്പുതല ഉദ്യോഗന്ഥര്‍ അറിയിച്ചു. കഴിഞ്ഞ താലൂക്ക് വികസനസമിതി യോഗത്തില്‍ അംഗം പീറ്റര്‍ പന്തലാനി കോഴിക്കോട് മെഡിക്കല്‍ കോളജില്‍ തീപിടിത്തമുണ്ടായ പശ്ചാത്തലത്തില്‍ ജനറല്‍ ആശുപത്രി കെട്ടിട നിര്‍മാണത്തിലെ അപാകതകള്‍ ശ്രദ്ധയില്‍പ്പെടുത്തി പരാതി നല്‍കിയതിനെത്തുടര്‍ന്നാണ് ഉദ്യോഗസ്ഥര്‍ സംയുക്തമായി പരിശോധിച്ചത്. ഏഴു വര്‍ഷം മുന്‍പ് നിര്‍മാണം പൂര്‍ത്തീകരിച്ച മൂന്നു കെട്ടിടങ്ങള്‍ക്ക് എന്‍ഒസി ഇല്ലാത്തതിനാല്‍ ഇവിടെ ഏതെങ്കിലും വിധത്തില്‍ അപകടങ്ങള്‍ ഉണ്ടായാല്‍ വ്യക്തികള്‍ക്ക് ഇന്‍ഷ്വറന്‍സ് തുക പോലും ലഭിക്കില്ലെന്നു പറയുന്നു. ആശുപത്രി കെട്ടിടങ്ങള്‍ക്ക് ഫയര്‍ എന്‍ഒസി നല്‍കുന്നതിന് ബന്ധപ്പെട്ട വകുപ്പുതല ഉദ്യോഗസ്ഥര്‍ അടിയന്തര നടപടി സ്വീകരിക്കണമെന്നും ഇതു സംബന്ധിച്ച് കളക്‌ടര്‍ക്ക് റിപ്പോര്‍ട്ട് നല്‍കണമെന്നും യോഗത്തില്‍ അധ്യക്ഷത വഹിച്ച മാണി സി. കാപ്പന്‍ എംഎൽഎ നിര്‍ദേശം നല്‍കി. ആശുപത്രി സ്ഥലത്തിന് ചുറ്റുമതില്‍ നിര്‍മിക്കുന്നതിന് ബജറ്റില്‍ അനുവദിച്ച ഒന്നരക്കോടി രൂപയും നവകേരള സദസിലൂടെ അനുവദിച്ച 3.5 കോടി രൂപയും മാറ്റിവച്ചിട്ടുണ്ട്. ആശുപത്രി സ്ഥലം അതിരുകെട്ടി സംരക്ഷിക്കുന്നതിനായി അതിരുകള്‍ നിര്‍ണയിച്ചു നല്‍കാനും കൈ‍‍യേറ്റം കണ്ടെത്തിയാല്‍ ഒഴിപ്പിക്കാനും തഹസില്‍ദാരെ ചുമതലപ്പെടുത്തി. പഞ്ചായത്ത് പ്രസിഡന്‍റുമാരായ സജേഷ് ശശി, സോജന്‍ തൊടുക, ഇ.എം. ബിനു, തഹസില്‍ദാര്‍ ലിറ്റി ജോസഫ്, എ.കെ. ചന്ദ്രമോഹന്‍, ജോസുകുട്ടി പൂവേലില്‍, ജോര്‍ജ് പുളിങ്കാട്, പീറ്റര്‍ പന്തലാനി, തോമസ് ഉഴുന്നാലില്‍, ഡോ. തോമസ് കാപ്പന്‍, അഡ്വ. ആന്‍റണി ഞാവള്ളി, സണ്ണി മാത്യു, പി.എസ്. ബാബു, ബിജി മണ്ഡപം, സതീഷ് ബാബു, വിവിധ വകുപ്പുതല ഉദ്യോഗസ്ഥര്‍ എന്നിവര്‍ പങ്കെടുത്തു.

കാറ്റും മഴയും: രാമപുരത്ത് നാശനഷ്ടം

രാമപുരം: പഞ്ചായത്തില്‍ കഴിഞ്ഞ ദിവസമുണ്ടായ കനത്ത കാറ്റിലും മഴയിലും നാശനഷ്ടമുണ്ടായി. കപ്പ, വാഴ തുടങ്ങിയ കൃഷികള്‍ നശിക്കുകയും നിരവധി വീടുകളുടെ മുകളിലേക്ക് മരം ഒടിഞ്ഞുവീഴുകയും ചെയ്തു. രാമപുരം-കൂത്താട്ടുകുളം റോഡില്‍ അമനകരയ്ക്കു സമീപം പുളിമരം കടപുഴകി വീണ് ഗതാഗതം തടസപ്പെടുകയും വൈദ്യുതിബന്ധം തകരാറിലാവുകയും ചെയ്തു. അമനകര താന്നിയില്‍ ബെന്നിയുടെ വീടിന് മുകളിലേക്ക് ആഞ്ഞിലിമരം വീണു വീട് ഭാഗികമായി തകര്‍ന്നു. കൃഷി നശിച്ച കര്‍ഷകര്‍ക്ക് അടിയന്തര സഹായമെത്തിക്കാന്‍ കൃഷി വകുപ്പ് തയാറാകണമെന്ന് നാട്ടുകാര്‍ ആവശ്യപ്പെട്ടു.

അമ്പത് സ്നേഹവീടുകള്‍ പൂര്‍ത്തീകരിച്ച് സ്നേഹദീപം ഭവനപദ്ധതി

പാലാ: ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നേതൃത്വം നൽകുന്ന സ്നേഹദീപം ഭവനപദ്ധതി അമ്പത് സ്നേഹവീടുകളുടെ നിര്‍മാണം പൂര്‍ത്തീകരിച്ചു. 2022ല്‍ തുടക്കംകുറിച്ചതാണ് സ്നേഹദീപം ഭവനപദ്ധതി. കെഴുവംകുളം സ്വദേശി നല്‍കിയ രണ്ടു ലക്ഷം രൂപയും ജോസ്മോന്‍ മുണ്ടയ്ക്കലിന്‍റെ ജില്ലാ പഞ്ചായത്ത് മെംബര്‍ എന്ന നിലയ്ക്കുള്ള ഓണറേറിയവും പ്രതിമാസം ആയിരം രൂപ വീതം ഒരു വര്‍ഷത്തേക്ക് നൽകാന്‍ സന്മനസ് കാണിച്ച കൊഴുവനാല്‍ പഞ്ചായത്തിലെ 250 സുമനസുകളുടെ സഹകരണത്തോടെയും തുടക്കംകുറിച്ച പദ്ധതി പിന്നീട് മുത്തോലി, കിടങ്ങൂര്‍, അകലക്കുന്നം, എലിക്കുളം, മീനച്ചില്‍, കരൂര്‍ പഞ്ചായത്തുകളിലേക്ക് പ്രവര്‍ത്തനങ്ങള്‍ വ്യാപിപ്പിച്ചു. 1250 സുമനസുകള്‍ നാളിതു വരെ കണ്ണികളായി. സ്നേഹദീപം പദ്ധതിയില്‍ നിര്‍മിച്ച 50 വീടുകള്‍ക്ക് പുറമേ സ്നേഹദീപം മോഡലിലുള്ള 10 വീടുകള്‍ വിവിധ സംഘടനകള്‍ക്കും വ്യക്തികള്‍ക്കും അവരുടെ പണം ഉപയോഗിച്ച് ചെലവുകുറഞ്ഞ രീതിയിലുള്ള വീടുകള്‍ സ്നേഹദീപത്തിന്‍റെ നേതൃത്വത്തില്‍ വിവിധ സ്ഥലങ്ങളില്‍ നിര്‍മിച്ച് നല്‍കുന്നതിനും സാധിച്ചു. മൂന്നു കിടപ്പുമുറി, അടുക്കള, ഹാള്‍, രണ്ടു ശുചിമുറി എന്നിവയോടുകൂടിയ 550 ചതുരശ്രയടി വിസ്തീര്‍ണമുള്ള വീടുകളാണ് നിര്‍മിച്ചു നല്‍കുന്നത്. സ്നേഹദീപം പദ്ധതിപ്രകാരമുള്ള 48-ാം സ്നേഹവീടിന്‍റെ താക്കോല്‍ സമര്‍പ്പണം നാളെ ഉച്ചകഴിഞ്ഞ് 3.30ന് കരൂര്‍ പഞ്ചായത്തിലെ ഇടനാട് എന്‍എസ്എസ് സ്‌കൂളിന് സമീപം സന്തോഷ് ജോര്‍ജ് കുളങ്ങര നിര്‍വഹിക്കും. 49-ാം സ്നേഹവീടിന്‍റെ താക്കോല്‍ സമര്‍പ്പണം എട്ടിനു രാവിലെ 9.30ന് മീനച്ചിലില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗറും 50-ാം സ്നേഹവീടിന്‍റെ താക്കോല്‍ സമര്‍പ്പണം എട്ടിന് വൈകുന്നേരം നാലിന് പൂവരണിയില്‍ ചാണ്ടി ഉമ്മന്‍ എംഎല്‍എയും നിര്‍വഹിക്കും. 50 വീടുകള്‍ നിര്‍മിച്ചതിലെ 26 വീടുകള്‍ നിര്‍മിക്കുന്നതിനുള്ള തുക 20 വ്യക്തികളില്‍നിന്നു ലഭ്യമായതാണ്. ബാക്കി 24 വീടുകള്‍ ആറു പഞ്ചായത്തുകളിലെ സ്നേഹദീപം കൂട്ടായ്മയില്‍ പ്രതിമാസം മിനിമം 1000 രൂപ എന്ന നിലയ്ക്ക് നിക്ഷേപിച്ച സുമനസുകളുടെ സംഭാവനകള്‍ കൊണ്ടും നിര്‍മിച്ചതാണ്.

ജനറല്‍ ആശുപത്രി പ്രശ്‌നം: കേരള കോണ്‍ഗ്രസ് ധര്‍ണ നടത്തി

പാലാ: ജനറല്‍ ആശുപത്രിയിലെ കെട്ടിടങ്ങളുടെ സുരക്ഷ ഉറപ്പാക്കണമെന്നും അനധികൃത കൈയേറ്റങ്ങള്‍ ഒഴിപ്പിക്കണമെന്നും കേരള കോണ്‍ഗ്രസ് സെക്രട്ടറി ജനറല്‍ ജോയി ഏബ്രഹാം. പാർട്ടി നിയോജകമണ്ഡലം കമ്മിറ്റിയുടെ ആഭിമുഖ്യത്തില്‍ ജനറല്‍ ആശുപത്രിക്കു മുമ്പില്‍ നടത്തിയ ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. ആരോഗ്യ മേഖല തകര്‍ന്നടിഞ്ഞതിന്‍റെ തെളിവാണ് ചികിത്സയ്ക്കായി മുഖ്യമന്ത്രിയുടെ അമേരിക്കയിലേക്കുള്ള യാത്ര. നല്ല ഡോക്ടർമാരുണ്ടെങ്കിലും മരുന്നും ഉപകരണങ്ങളുമില്ലാതെ ആശുപത്രികളുടെ പ്രവര്‍ത്തനം‍ നിശ്ചലമാകുന്നു. ഉത്തരവാദിത്വം ഏറ്റെടുത്ത് ആരോഗ്യമന്ത്രി രാജിവയ്ക്കണമെന്നും അദ്ദേഹം ആവശ്യപ്പെട്ടു. നിയോജകമണ്ഡലം ‌പ്രസിഡന്‍റ് ജോര്‍ജ് പുളിങ്കാട് അധ്യക്ഷത വഹിച്ചു. സംസ്ഥാന കോ-ഓര്‍ഡിനേറ്റര്‍ അപു ജോണ്‍ ജോസഫ്, ജില്ലാ പ്രസിഡന്‍റ് അഡ്വ. ജയ്‌സണ്‍ ജോസഫ്, ഉന്നതാധികാര സമിതി അംഗങ്ങളായ സന്തോഷ് കാവുകാട്ട്, തോമസ് ഉഴുന്നാലില്‍, കുര്യാക്കോസ് പടവന്‍, സംസ്ഥാന ജനറല്‍ സെക്രട്ടറിമാരായ തങ്കച്ചന്‍ മണ്ണൂശേരി, ഷിബു പൂവേലില്‍, ഡോ. സി.കെ. ജയിംസ്, മത്തച്ചന്‍ പുതിയിടത്തുചാലില്‍, ജോബി കുറ്റിക്കാട്ട്, ജോഷി വട്ടക്കുന്നേല്‍, മത്തച്ചന്‍ അരീപ്പറമ്പില്‍, ജോസ് കുഴികുളം, തോമസ് പാലക്കുടി, ജോസ് വടക്കേക്കര, ചാര്‍ലി ഐസക്, ബാബു മുകാല, കെ.സി. കുഞ്ഞുമോന്‍, ജോസ് എടേട്ട്, സിജി ടോണി, മൈക്കിള്‍ കാവുകാട്ട് എന്നിവർ പ്രസംഗിച്ചു.

പുരസ്‌കാരം സമ്മാനിച്ചു

പാലാ: ചന്ദ്രഹാസ് എഴുതിയ "പഞ്ച കൈലാസങ്ങളിലൂടെ' എന്ന കൃതിക്ക് കൊണ്ടൂപ്പറമ്പില്‍ കുടുംബയോഗം ഏര്‍പ്പെടുത്തിയ ലിപി സരസ്വതി പുരസ്‌കാരം ലഭിച്ചു. ഗുരുവായൂര്‍ ദേവസ്വം ബോര്‍ഡ് മെംബറും എന്‍എസ്എസ് മീനച്ചില്‍ താലൂക്ക് യൂണിയന്‍ പ്രസിഡന്‍റുമായ മനോജ് ബി. നായര്‍ അധ്യക്ഷത വഹിച്ച യോഗത്തില്‍ മാണി സി. കാപ്പന്‍ എംഎല്‍എ പുരസ്‌കാരം സമര്‍പ്പിച്ചു. ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടയ്ക്കല്‍, സുനില്‍ പാലാ, ടി.എന്‍. രാജന്‍, പ്രസാദ് കൊണ്ടൂപ്പറമ്പില്‍, അഡ്വ. എസ്. ജയസൂര്യന്‍ തുടങ്ങിയവര്‍ പ്രസംഗിച്ചു.

യാത്രയയപ്പ് നല്‍കി

പാലാ: സര്‍വീസില്‍നിന്നു വിരമിക്കുന്ന എന്‍ജിഒ യൂണിയന്‍ സംസ്ഥാന കൗണ്‍സില്‍ അംഗം എസ്. സൗമിനി, ജില്ലാ കൗണ്‍സില്‍ അംഗങ്ങളായ ആര്‍. തെയ്യാമ്മ, ആര്‍. സജീവ് കുമാര്‍ എന്നിവര്‍ക്ക് കേരള എന്‍ജിഒ യൂണിയന്‍ മീനച്ചില്‍ ഏരിയ കമ്മിറ്റിയുടെ ആഭിമുഖ്യത്തില്‍ യാത്രയയപ്പു നൽകി. പാലാ മില്‍ക്ക് ബാര്‍ ഓഡിറ്റോറിയത്തില്‍ നടന്ന സമ്മേളനം സംസ്ഥാന സെക്രട്ടറി സീമ എസ്. നായര്‍ ഉദ്ഘാടനം ചെയ്തു. ഏരിയ പ്രസിഡന്‍റ് കെ.എസ്. റെജിമോന്‍ അധ്യക്ഷത വഹിച്ചു. ജില്ലാ സെക്രട്ടറി കെ.ആര്‍.അനില്‍ കുമാര്‍, ജില്ലാ പ്രസിഡന്‍റ് ടി. ഷാജി, ജില്ല സെക്രട്ടേറിയറ്റംഗം ജി. സന്തോഷ് കുമാര്‍, മീനച്ചില്‍ ഏരിയ സെക്രട്ടറി കെ.ടി. അഭിലാഷ് എന്നിവര്‍ പ്രസംഗിച്ചു.

വർധിപ്പിച്ച ഭൂനികുതി പിൻവലിക്കണമെന്ന്

പൈക: വർധിപ്പിച്ച ഭൂനികുതിയും വൈദ്യുതി മീറ്റർ ചാർജ് ഡിപ്പോസിറ്റും അടിയന്തരമായി സർക്കാർ പിൻവലിക്കണമെന്ന് കേരള കോൺഗ്രസ്-എം സംസ്ഥാന സ്റ്റിയറിയിംഗ് കമ്മിറ്റി അംഗം സാജൻ തൊടുക. കേരള കോൺഗ്രസ്-എം എലിക്കുളം മണ്ഡലം സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദേഹം. മണ്ഡലം പ്രസിഡന്‍റ് ടോമി കപ്പിലുമാക്കൽ അധ്യക്ഷത വഹിച്ചു. ഏബ്രഹാം കോക്കാട്ട്, സെൽവി വിൽസൺ, ജിമ്മിച്ചൻ മണ്ഡപത്തിൽ, ഷൈസ് കോഴിപൂവനാനിക്കൽ, കുര്യാച്ചൻ ചീരാംകുഴി, മഹേഷ് ചെത്തിമറ്റം, ജോസഫ് പാലക്കുഴയിൽ, മോൻസി വളവനാൽ, ജോമോൻ കൊല്ലകൊമ്പിൽ, തോമസ് ആയില്യക്കുന്നേൽ, ജോസ് കുന്നപ്പള്ളി, ജോർജ് കാഞ്ഞമല, ജോയി ശൗര്യാംകുഴി, ജോസ് അയർക്കുന്നം, സിബി ഈരൂരിക്കൽ തുടങ്ങിയവർ പ്രസംഗിച്ചു.

ശുചിമുറി മാലിന്യം തള്ളി

പാലാ: ഏറ്റുമാനൂര്‍-പൂഞ്ഞാര്‍ സംസ്ഥാന പാതയില്‍ അരുണാപുരം പിഡബ്ല്യുഡി റസ്റ്റ് ഹൗസിന് എതിര്‍വശം സാമൂഹികവിരുദ്ധര്‍ ശുചിമുറി മാലിന്യം തള്ളി. ഇന്നലെ പുലര്‍ച്ചെ പ്രഭാതസവാരിക്കിറങ്ങിയവരാണ് മാലിന്യം തള്ളിയതു കണ്ടത്. നിരവധി ആളുകള്‍ കാല്‍നടയായി സഞ്ചരിക്കുന്ന ഭാഗത്താണ് മാലിന്യം തള്ളിയിരിക്കുന്നത്. ആശുപത്രികളിലേക്കും സ്‌കൂളുകളിലേക്കും ആളുകള്‍ കാല്‍നടയായി സഞ്ചരിക്കുന്ന വഴി കൂടിയാണിത്. സമീപത്തായി കുടിവെള്ളത്തിനായി ആശ്രയിക്കുന്ന നിരവധി ജലസ്രോതസുകളും സ്ഥിതിചെയ്യുന്നുണ്ട്. ഇവിടെ ഇതിനുമുമ്പും പലതവണ മാലിന്യം തള്ളിയിട്ടുണ്ട്. പ്രദേശത്ത് എത്രയും വേഗം സിസിടിവി കാമറ സ്ഥാപിക്കണമെന്നും സാമൂഹ്യവിരുദ്ധരെ പിടികൂടണമെന്നും നാട്ടുകാര്‍ ആവശ്യപ്പെട്ടു.

വചനപ്രഘോഷണവും ദിവ്യകാരുണ്യ ആരാധനയും

പാലാ: ബൈബിള്‍ പ്രീച്ചേഴ്‌സ് സൊസൈറ്റിയുടെ ആഭിമുഖ്യത്തില്‍ ഇന്ന് ഉച്ചയ്ക്ക് 12.30 മുതല്‍ വൈകുന്നേരം 4.15 വരെ പാലാ സെന്‍റ് തോമസ് സ്‌കൂള്‍ ഓഡിറ്റോറിയത്തില്‍ വചനപ്രഘോഷണവും ദിവ്യകാരുണ്യ സൗഖ്യാരാധനയും നടക്കും. ഫാ. ദീപക് വട്ടപ്പലം വചനപ്രഘോഷണം നടത്തും. ഫാ. ജോസഫ് അരിമറ്റത്ത്, ഫാ. തോമസ് പുതുപ്പറമ്പില്‍, കോ-ഓര്‍ഡിനേറ്റര്‍ സാബു മൂന്നുതൊട്ടിയില്‍ എന്നിവര്‍ ശുശ്രൂഷകള്‍ക്ക് നേതൃത്വം നല്‍കും.

വിശ്വാസപരിശീലനത്തിന് സാധ്യതാ മാർഗരേഖയുമായി റവ.ഡോ. തോമസ് മൂലയിൽ

പാലാ: റവ.ഡോ. തോമസ് മൂലയിൽ രചിച്ച് പാലായിലെ വിശ്വാസ പരിശീലന കേന്ദ്രം പ്രസിദ്ധീകരിക്കുന്ന "മാറിയ സാഹചര്യത്തിൽ വിശ്വാസക്കൈമാറ്റം ഒരു സാധ്യതാ മാർഗരേഖ' പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് പാലാ രൂപത മെത്രാസന മന്ദിരത്തിൽ വച്ച് പ്രകാശനം ചെയ്തു. പാലാ രൂപത മുൻ അധ്യക്ഷൻ മാർ ജോസഫ് പള്ളിക്കാപറമ്പിൽ പുസ്തകത്തിന്‍റെ ആദ്യപകർപ്പ് ഏറ്റുവാങ്ങി. സഭയുടെ കാതൽ മനസിലാക്കിയിട്ടുള്ള വ്യക്തിയാണ് റവ.ഡോ. തോമസ് മൂലയിലെന്ന് മാർ ജോസഫ് കല്ലറങ്ങാട്ട് പറഞ്ഞു. പാലാ രൂപത വികാരിജനറാൾ വെരി റവ.ഡോ. ജോസഫ് മലേപ്പറമ്പിൽ, വിശ്വാസ പരിശീലന കേന്ദ്രം ഡയറക്‌ടർ റവ.ഡോ. ജോർജ് വർഗീസ് ഞാറക്കുന്നേൽ തുടങ്ങിയവർ ചടങ്ങിൽ സംസാരിച്ചു. റവ.ഡോ. തോമസ് മൂലയിലച്ചനിൽ നിന്ന് പരിശീലനം നേടിയ നിരവധി വൈദികരും സന്യസ്തരും സമൂഹത്തിന്‍റെ നാനാമേഖലകളിൽനിന്നുള്ള പ്രമുഖരും ചടങ്ങിൽ സംബന്ധിച്ചു. റവ.ഡോ. തോമസ് മൂലയിൽ തന്‍റെ ദീർഘകാലത്തെ വിശ്വാസപരിശീലനാനുഭവങ്ങളിൽ നിന്ന് രൂപപ്പെടുത്തിയ പ്രായോഗിക നിർദേശങ്ങളും മാർഗങ്ങളുമാണ് പുസ്തകത്തിൽ ഉൾപ്പെടുത്തിയിരിക്കുന്നത്. ഇടവകയിലും കുടുംബത്തിലും വിശ്വാസം എങ്ങനെ അർഥവത്തായി പരിശീലിപ്പിക്കാം എന്ന് പുസ്തകം പറയുന്നു.

നാടകരചന ശില്പശാല സംഘടിപ്പിച്ചു

കടുത്തുരുത്തി: നാടക് കോട്ടയം ജില്ലാ കമ്മിറ്റിയുടെ നേതൃത്വത്തില്‍ നാടക രചന, സംവിധാനം എന്നിവ ഉള്‍കൊള്ളിച്ച് കളിത്തട്ട് എന്ന നാടക ശില്‍പ്പശാല നടത്തി. കടുത്തുരുത്തി ഗൗരീശങ്കരം ഓഡിറ്റോറിയത്തില്‍ നടന്ന ശില്‍പ്പശാല നാടക് കോട്ടയം ജില്ലാ സെക്രട്ടറി കെ.എസ്. സോമശേഖരന്‍ ഉദ്ഘാടനം ചെയ്തു. ജില്ലാ പ്രസിഡന്റ് കെ.രമേശന്‍ വൈക്കം അധ്യക്ഷത വഹിച്ച യോഗത്തില്‍ ക്യാമ്പ് ഡയറക്ടര്‍ ജോസ് കല്ലറക്കല്‍ നാടകരചനാ സങ്കേതങ്ങളെയും എഴുത്തിന്‍റെ വഴികളെയും നാടക സംവിധാന നിര്‍വഹണത്തെക്കുറിച്ചും ക്ലാസെടുത്തു. സംസ്ഥാന ജോയിന്‍റ് സെക്രട്ടറി സി.കെ. അജയന്‍, കോട്ടയം മേഖലാ പ്രസിഡന്‍റ് കെ.പി. പ്രസാദ്, തലയോലപ്പറമ്പ് മേഖലാ സെക്രട്ടറി കെ.ജി. ചന്ദ്രന്‍, കടുത്തുരുത്തി മേഖലാ പ്രസിഡന്‍റ് കെ.എം. വിജയന്‍ എന്നിവര്‍ ക്യാമ്പില്‍ വിവിധ വിഷയങ്ങള്‍ അവതരിപ്പിച്ചു. ബാബുരാജ് വട്ടക്കാട്ടില്‍, ജോഷി ചാക്കോ എന്നിവര്‍ ക്യാമ്പ് ഡിസൈനിംഗ് നടത്തി.

പുന്നത്തുറ സെന്‍റ് തോമസ് ക്‌നാനായ കത്തോലിക്കാ പള്ളി ചതുര്‍ശതാബ്ദി ആഘോഷ സമാപനം ഇന്ന്

കോട്ടയം: പുന്നത്തുറ സെന്‍റ് തോമസ് ക്‌നാനായ കത്തോലിക്ക പള്ളിയില്‍ ചതുര്‍ശതാബ്ദി ആഘോഷ സമാപനം ഇന്നു നടക്കും. വൈകുന്നേരം 5.15നു ചേരുന്ന സമ്മേളനം സീറോ മലബാര്‍ സഭാ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്യും. കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് അധ്യക്ഷത വഹിക്കും. തുടര്‍പദ്ധതികളുടെ ഉദ്ഘാടനം മന്ത്രി വി.എന്‍. വാസവനും പ്രതിപക്ഷ നേതാവ് വി.ഡി. സതീശന്‍ മുഖ്യപ്രഭാഷണവും നടത്തും. ചാണ്ടി ഉമ്മന്‍ എംഎല്‍എ സുവനീര്‍ പ്രകാശനം ചെയ്യും.

പോളയും പുല്ലും ചെളിയും കെവി കനാലിലെ നീരൊഴുക്ക് തടസപ്പെട്ടു

വൈക്കം: കരിയാറിനെയും വേമ്പനാട്ടുകായലിനെയും കൂട്ടിയിണക്കുന്ന കെവി കനാലിൽ മാലിന്യങ്ങളും ചെളിയും പോളപ്പായലും പുല്ലും അടിഞ്ഞു നീരൊഴുക്കു തടസപ്പെട്ടത് വെള്ളപ്പൊക്ക ദുരിതം വർധിപ്പിക്കുന്നു.തോട്ടുവക്കം പാലത്തിന്‍റെ മുൻവശത്താണ് വൻതോതിൽ മാലിന്യം അടിഞ്ഞുതിങ്ങി തോട് നികന്ന നിലയിലായത്. തോട്ടരികിൽ നിന്ന മരങ്ങളുടെ ഭാഗങ്ങളും തോട്ടിൽ വീണു കിടക്കുന്നത് നീരൊഴുക്കു തടസപ്പെടുത്തുന്നുണ്ട്. അടിഞ്ഞുകൂടിയ ചെളിയുംമാലിന്യങ്ങളും പാലത്തിന്‍റെ അടിത്തട്ടിൽ മൂടപ്പെട്ടതിനാൽ പാലത്തിന്‍റെ തെക്കേ അറ്റത്തുകൂടി മാത്രമാണ് വെള്ളമൊഴുകുന്നത്. നീരൊഴുക്കു തടസപ്പെടുന്നത് കാർഷിക മേഖലയിൽ ശുദ്ധജലഭ്യത കുറയ്ക്കുന്നു.തോട്ടിലെ നീരൊഴുക്കു തടസപ്പെട്ടത് ജലമലിനീകരണത്തിനിടയാക്കുന്നതിനാൽ സാംക്രമികരോഗ ഭീഷണിയുണ്ടെന്ന് തോട്ടുവക്കം നിവാസികൾ ആരോപിക്കുന്നു. തോടടഞ്ഞതോടെ ചെറുവള്ളങ്ങളിൽ കായലിലും കരിയാറിലും തുഴഞ്ഞെത്തുന്ന മത്സ്യ-കക്കാ തൊഴിലാളികളുടെയും പുല്ലുചെത്തുതൊഴിലാളികളുടേയും സഞ്ചാരം തടസപ്പെട്ടു.കെവി കനാലിലെ നീരൊഴുക്കു സുഗമമാക്കുന്നതിന് ഹിറ്റാച്ചി ഉപയോഗിച്ചു ആഴത്തിൽ ചെളി നീക്കണമെന്നാണ് തോട്ടുവക്കം നിവാസികളുടെ ആവശ്യം. തോട് തെളിക്കുന്നതിന് അധികൃതർ നടപടി സ്വീകരിച്ചില്ലെങ്കിൽ പ്രദേശവാസികളെയും ബഹുജന സംഘടനകളെയും ഉൾപ്പെടുത്തി സമരപരിപാടികൾ ആരംഭിക്കുമെന്ന് കേരള കർഷകസംഘം ഭാരവാഹി ബി.ഗോപാലകൃഷ്ണൻ പറഞ്ഞു.

പിതാവിനെ ആക്രമിച്ചു പരിക്കേൽപ്പിച്ച പ്രതി അറസ്റ്റിൽ

തലയോലപ്പറമ്പ്:പിതാവിനെ ആക്രമിച്ചു പരിക്കേൽപ്പിച്ച പ്രതി അറസ്റ്റിൽ. വടയാർ ചാക്കാല കോളനി മഞ്ഞക്കണ്ടത്തിൽ അൻസാരിയാ(37)ണ് പോലീസ് പിടിയിലായത്. പിതാവ് ബഷീർ വിരമിച്ച ഒഴിവിൽ മാർക്കറ്റിൽ ചുമട്ടുജോലി വാങ്ങി നൽകാത്തതിലുള്ള വിരോധത്തിൽ അൻസാരി പിതാവിനെ മർദിക്കുകയും ഫ്ലാസ്ക് ഉപയോഗിച്ച് തലയ്ക്ക് അടിച്ച് മുറിവേൽപ്പിക്കുകയും ചെയ്തു. സംഭവത്തിൽ കേസെടുത്ത് അന്വേഷണം നടത്തിയ തലയോലപ്പറമ്പ് പോലീസ് അൻസാ രിയെ അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]