മലയാള വിവര്‍ത്തകന്‍ കെ.കെ. ഭാസ്‌കരന്‍ അന്തരിച്ചു
Saturday, June 28, 2025 1:18 AM IST
പയ്യന്നൂര്‍: പ്രശസ്തനായ എഴുത്തുകാരനും മലയാളം വിവര്‍ത്തകനും പ്രസാധകനും ലിംകാ ബുക്ക് ഓഫ് റിക്കാര്‍ഡ് ജേതാവുമായ കെ.കെ. ഭാസ്‌കരന്‍ പയ്യന്നൂര്‍ (80) അഹമ്മദാബാദില്‍ അന്തരിച്ചു.
ജെയിംസ് ഹാഡ്‌ലി ചേസ് എഴുതിയ വിഖ്യാത ക്രൈം നോവലുകള്‍ മലയാളത്തിലേക്ക് വിവര്‍ത്തനം ചെയ്യാനുള്ള ഇന്ത്യയിലെ അവകാശം ലഭിച്ച ഏക മലയാളിയെന്ന ബഹുമതി നേടിയ ഇദ്ദേഹം 102 ജയിംസ് ഹാഡ്‌ലി ചേസ് നോവലുകള്‍ മലയാളത്തിലേക്കു വിവര്‍ത്തനം ചെയ്തിട്ടുണ്ട്.
അഹമ്മദാബാദിലെ നാഷണല്‍ ഇന്‍സ്റ്റിറ്റ്യൂട്ട് ഓഫ് ഡിസൈനില്‍ 30 വര്‍ഷത്തിലധികം ജോലി ചെയ്തിരുന്നു. കൂടാതെ ഗുജറാത്ത് വിദ്യാപീഠത്തില്‍ മലയാളം വകുപ്പ് മേധാവിയായി നിയമിതനായതോടെ അദ്ദേഹത്തെ സമീപിച്ച ഗുജറാത്തികളില്‍ പലരേയും മലയാളം പഠിപ്പിക്കാനുമായി. ഇക്കൂട്ടത്തിലാണ് നര്‍ത്തകിയും സാമൂഹിക പ്രവര്‍ത്തകയുമായ മല്ലികാ സാരാഭായിയെ മലയാളം പഠിപ്പിക്കാനായത്.
2014ല്‍ ഇദ്ദേഹത്തിന് അക്ഷയ നാഷണല്‍ അവാര്‍ഡ് ലഭിച്ചിരുന്നു. അരനൂറ്റാണ്ടോളമായി അഹമ്മദാബാദില്‍ താമസിക്കുന്ന ഇദ്ദേഹം മലയാളികള്‍ക്കുവേണ്ടി ഒരു മാസികയും പ്രസിദ്ധീകരിക്കുന്നുണ്ട്. ഭാര്യ: നളിനി. മക്കള്‍: ഗീത പൊതുവാള്‍, രാജീവ് പൊതുവാള്‍. സഹോദരങ്ങള്‍: മോഹനന്‍, മാലിനി, വാസന്തി, ശ്യാമള, വിനയന്‍, പരേതരായ സരോജിനി, സുധാകരന്‍.