ആർഎസ്എസ് ഇന്ത്യയുടെ ആത്മാവിനെ ഇല്ലാതാക്കാൻ ശ്രമിക്കുന്നു: സണ്ണി ജോസഫ്
Saturday, June 28, 2025 2:40 AM IST
തിരുവനന്തപുരം: ഭരണഘടനയുടെ ആമുഖത്തിൽ നിന്ന് സോഷ്യലിസവും മതേതരത്വവും നീക്കം ചെയ്യണമെന്ന ആർഎസ്എസ് നേതാവ് ദത്താത്രേയ ഹൊസബളേയുടെ പ്രസ്താവനയെ ഇന്ത്യയുടെ ആത്മാവിനെ ഇല്ലാതാക്കാനുള്ള ശ്രമമെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. കോണ്ഗ്രസ് രാഷ്‌ട്രീയകാര്യ സമിതിയോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ആർഎസ്എസിന് ഭരണഘടനാരൂപീകരണത്തിൽ പങ്കില്ല. മതേതരത്വവും സോഷ്യലിസവും ഭരണഘടനയുടെ ഹൃദയമാണെന്നും അതിനെ ഇല്ലാതാക്കാനുള്ള ശ്രമങ്ങൾക്കെതിരേ കോണ്ഗ്രസ് ശക്തമായി പ്രതികരിക്കുമെന്നും അദ്ദേഹം പറഞ്ഞു.
രാജ്ഭവനെ രാഷ്‌ട്രീയവേദിയാക്കി മാറ്റുന്ന ഗവർണറുടെ നിലപാടുകൾ അപലപനീയമാണെന്നും, ഭരണഘടനാ സ്ഥാപനങ്ങളുടെ വിശ്വസ്യത നശിപ്പിക്കാനുള്ള നീക്കങ്ങൾ അവസാനിപ്പിക്കണമെന്നും കെപിസിസി ആവശ്യപ്പെട്ടു.
ദേശീയപാത നിർമാണത്തിൽ നടന്ന അഴിമതി സർക്കാർ മറച്ചുവെക്കുകയാണെന്നും ഇത് കേന്ദ്ര-സംസ്ഥാന സർക്കാരുകൾ അഴിമതിക്കാരെ സംരക്ഷിക്കുന്നതിനുളള ഉദാഹരണമാണെന്നും യോഗം വിലയിരുത്തി.
നിലന്പൂർ ഉപതിരഞ്ഞെടുപ്പിലെ യുഡിഎഫ് വിജയം ടീം വർക്കിന്‍റെ വിജയമാണെന്നും സണ്ണി ജോസഫ് അഭിപ്രായപ്പെട്ടു.
ലഹരിവ്യാപനത്തിനെതിരേ ‘ക്വിറ്റ് ഡ്രഗ്സ്’ മുദ്രാവാക്യത്തോടെ ഓഗസ്റ്റ് ഒൻപതിന് കൊച്ചിയിൽ യൂത്ത്, വിദ്യാർഥി, വനിതാ വിഭാഗങ്ങളുടെ നേതൃത്വത്തിൽ കോണ്ഗ്രസ് വിപുലമായ പ്രചാരണം നടത്തുമെന്നും അദ്ദേഹം കൂട്ടിച്ചേർത്തു.