പ്ലസ് വൺ സപ്ലിമെന്‍ററി അലോട്ട്‌മെന്‍റിനുള്ള അപേക്ഷ സമർപ്പിക്കാം
Saturday, June 28, 2025 2:40 AM IST
തിരുവനന്തപുരം: പ്ലസ് വൺ മുഖ്യ അലോട്ട്‌മെന്‍റിൽ അപേക്ഷിച്ചിട്ടും അലോട്ട്‌മെന്‍റ് ലഭിക്കാതിരുന്നവർക്കും ഇതുവരെയും അപേക്ഷിക്കാൻ കഴിയാതിരുന്നവർക്കും സപ്ലിമെന്‍ററി അലോട്ട്‌മെന്‍റിന് പരിഗണിക്കുന്നതിനായി ഇന്നുമുതൽ ഓൺലൈനായി അപേക്ഷ സമർപ്പിക്കാം.
വേക്കൻസിയും മറ്റു വിവരങ്ങളും അഡ്മിഷൻ വെബ്‌സൈറ്റായ https:// hscap.kerala.gov.in ൽ പ്രസിദ്ധീകരിക്കും. എന്നാൽ നിലവിൽ ഏതെങ്കിലും ക്വോട്ടയിൽ പ്രവേശനം നേടിക്കഴിഞ്ഞ വിദ്യാർഥികൾക്കും മുഖ്യഘട്ടത്തിൽ അലോട്ട്‌മെന്‍റ് ലഭിച്ചിട്ട് പ്രവേശനത്തിന് ഹാജരാകാത്തവർക്കും (നോൺ-ജോയിനിംഗ് ആയവർ) പ്രവേശനം ക്യാൻസൽ ചെയ്തവർക്കും ഏതെങ്കിലും ക്വോട്ടയിൽ പ്രവേശനം നേടിയ ശേഷം വിടുതൽ സർട്ടിഫിക്കറ്റ് വാങ്ങിയവർക്കും ഈ ഘട്ടത്തിൽ വീണ്ടും അപേക്ഷിക്കാൻ സാധിക്കില്ല.