തീപിടിച്ച കപ്പലിന്‍റെ വിഡിആർ: പ്രാഥമിക പരിശോധന പൂര്‍ത്തിയായി
Friday, June 27, 2025 2:43 AM IST
കൊച്ചി: ബേപ്പൂരിനു സമീപം പുറംകടലില്‍ തീപിടിച്ച ‘വാന്‍ഹായ് 503’ കപ്പലിലെ വോയേജ് ഡാറ്റാ റെക്കോഡറി(വിഡിആര്‍)ന്‍റെ പ്രാഥമിക പരിശോധന പൂര്‍ത്തിയായി. കപ്പലില്‍ തീ പിടിച്ച നിമിഷം മുതല്‍ ആദ്യഘട്ടം നടത്തിയ രക്ഷാപ്രവര്‍ത്തനങ്ങള്‍ ഉള്‍പ്പെടെ വിഡിആറിലുണ്ട്.
വിഡിആര്‍ വിശദമായ പരിശോധനയ്ക്ക് വിധേയമാക്കും. ഇതിനു ശേഷമേ അപകടത്തിന്‍റെ കാരണം വ്യക്തമാകൂ. ടി ആന്‍ഡ് ടി സാല്‍വേജ് അധികൃതര്‍, കപ്പല്‍ ക്യാപ്റ്റന്‍, കപ്പല്‍ കമ്പനി പ്രതിനിധികള്‍ എന്നിവരടങ്ങുന്ന സംഘമാണ് വിഡിആര്‍ പ്രാഥമിക പരിശോധന നടത്തിയത്. ലഭ്യമായ വിവരഡങ്ങള്‍ ഡയറക്ടറേറ്റ് ഓഫ് ജനറല്‍ ഷിപ്പിംഗിന് കൈമാറി.
ഇന്നലെയും കപ്പലില്‍ നിന്നും തീ ഉയര്‍ന്നു. എന്നാല്‍ അധികം വൈകാതെ അണച്ചു. നിലവില്‍ പുക ഉയരുന്നുണ്ട്. കപ്പലിലെ എന്‍ജിന്‍ ഭാഗത്തുള്‍പ്പെടെ വെള്ളമുണ്ട്. തീയണക്കാന്‍ ഉപയോഗിച്ച വെള്ളമാണിത്. ഇത് നീക്കുന്ന നടപടികള്‍ നടക്കുകയാണ്.
ഡിജി ഷിപ്പിംഗ് നിര്‍ദേശപ്രകാരം കപ്പലിലെ ഇന്ധനനീക്കത്തിനുള്ള കര്‍മപദ്ധതി തയാറാക്കാന്‍ തുടങ്ങി. അതേസമയം കൊച്ചി പുറംകടലില്‍ മുങ്ങിയ ലൈബീരിയന്‍ ചരക്ക് കപ്പല്‍ എംഎസ്‌സി എല്‍സ3 ല്‍ നിന്നും ഇന്ധനനീക്കം ഇതുവരെ ആരംഭിക്കാനായിട്ടില്ല. മോശം കാലാവസ്ഥയെ തുടര്‍ന്നാണിത്.