വാഹനങ്ങള്‍ കണ്ടുകെട്ടാന്‍ താലൂക്ക് തോറും യാര്‍ഡുകള്‍ ആരംഭിക്കാന്‍ എംവിഡി
Thursday, June 26, 2025 1:47 AM IST
ബിനു ജോര്‍ജ്
കോഴിക്കോട്: നിയമം ലംഘിക്കുന്ന വാഹനങ്ങള്‍ കണ്ടുകെട്ടുന്നതിനും അതുവഴി നികുതിപിരിവ് ഊര്‍ജിതമാക്കുന്നതിനുമായി സംസ്ഥാനത്ത് പബ്ലിക്-പ്രൈവറ്റ് പാര്‍ട്ണര്‍ഷിപ് (പിപിപി) മാതൃകയില്‍ അപ്രൂവ്ഡ് വെഹിക്കിള്‍ സീഷര്‍ യാര്‍ഡുകള്‍ (എവിഎസ്‌വൈ) സ്ഥാപിക്കാന്‍ സര്‍ക്കാര്‍ മോട്ടോര്‍ വാഹന വകുപ്പിന് അനുമതി നല്‍കി.
മോട്ടോര്‍ വാഹന വകുപ്പു കണ്ടുകെട്ടുന്ന വാഹനങ്ങള്‍ സൂക്ഷിക്കാന്‍ മതിയായ സ്ഥലസൗകര്യമില്ലാത്തതും കണ്ടുകെട്ടുന്ന വാഹനങ്ങളുടെ സുരക്ഷ ഉറപ്പാക്കാന്‍ വകുപ്പിനു കഴിയാത്തതും ചൂണ്ടിക്കാട്ടി ഗതാഗത വകുപ്പ് കമ്മീഷണര്‍ സമര്‍പ്പിച്ച പദ്ധതിയാണ് സര്‍ക്കാര്‍ അംഗീകരിച്ചത്.
മതിയായ വരുമാനം ലഭിച്ചാല്‍ പിപിപി മാതൃകയില്‍ വാഹനം കണ്ടുകെട്ടല്‍ യാര്‍ഡുകള്‍ ആരംഭിക്കാന്‍ സ്വകാര്യ സംരംഭകര്‍ തയാറാകുമെന്നും ഇതുവഴി മോട്ടോര്‍ വാഹനവകുപ്പിന്‍റെ തലവേദന ഒഴിവാകുമെന്നുമാണു ഗതാഗത കമ്മീഷണര്‍ ചൂണ്ടിക്കാട്ടിയത്.
യാര്‍ഡുകള്‍ സ്ഥാപിക്കാനാവശ്യമായ ഭൂമി സര്‍ക്കാര്‍ ഉടമസ്ഥതയില്‍ ലഭ്യമാകാത്തതുംകൂടി പരിഗണിച്ചാണു പദ്ധതിക്കു സര്‍ക്കാര്‍ അനുമതി നല്‍കിയത്. എല്ലാ താലൂക്കുകളിലും ഇത്തരം യാര്‍ഡുകള്‍ സ്ഥാപിക്കാനാണ് ഉദ്ദേശിക്കുന്നത്.
സര്‍ക്കാര്‍ അനുമതി നല്‍കിയ സാഹചര്യത്തില്‍ കേരള സ്റ്റാര്‍ട്ടപ് മിഷന്‍ വഴിയുള്ള എക്‌സ്പ്രഷന്‍ ഓഫ് ഇന്‍ററസ്റ്റ് ക്ഷണിച്ച് പദ്ധതി പ്രാവര്‍ത്തികമാക്കാനുള്ള നടപടികള്‍ ഉടന്‍ ആരംഭിക്കുമെന്നു മോട്ടോര്‍ വാഹന വകുപ്പ് അധികൃതര്‍ സൂചിപ്പിച്ചു.
നിക്ഷേപകര്‍ക്ക് മോട്ടോര്‍ വാഹന വകുപ്പിന്‍റെ ടാക്‌സ് മൊഡ്യൂള്‍ വഴി ഇസ്ക്രോ അക്കൗണ്ടിലൂടെ പ്രതിഫലം നല്‍കാനാണ് ഉദ്ദേശിക്കുന്നത്.
മോട്ടോര്‍ വാഹനവകുപ്പിനും സ്വകാര്യ സംരംഭകര്‍ക്കും ഇടയിലുള്ള മൂന്നാംകക്ഷി അക്കൗണ്ടായ ഇസ്ക്രോയിലൂടെയുള്ള ഇടപാട് സുരക്ഷിതമാണെന്നതിനാല്‍ വെഹിക്കിള്‍ യാര്‍ഡ് സ്ഥാപിക്കാന്‍ സ്വകാര്യ സംരംഭകര്‍ താത്പര്യം കാണിക്കുമെന്നാണു വിലയിരുത്തല്‍.