എസ്.ബി. നീലിമ ലാലിനെ ആദരിച്ചു

നെടുമങ്ങാട്: മെഡിക്കൽ എൻട്രൻസ് പരീക്ഷയിൽ മെറിറ്റിൽ പ്രവേശനം എസ്.ബി. നീലിമ ലാലിന് സിപിഎം നെടുമങ്ങാട് ഏരിയ കമ്മിറ്റിയുടെ സ്നേഹോപഹാരം ഏരിയ സെക്രട്ടറി കെ.പി. പ്രമോഷ് കൈമാറി. ഏരിയ കമ്മിറ്റി അംഗങ്ങളായ എസ്.എസ്. ബിജു, കെ. രാജേന്ദ്രൻ, ലേഖ സുരേഷ്, കെ. റഹീം, ലോക്കൽ കമ്മിറ്റി സെക്രട്ടറി ബി. നജീബ്, ബ്രാഞ്ച് സെക്രട്ടറി സുധീർഖാൻ, കൗൺസിലർ ബി. ബിജു തുടങ്ങിയവർ പങ്കെടുത്തു.

സിപിഎം നേതാവായിരുന്ന സി. രാജപ്പൻ, നഗരസഭ മുൻ കൗൺസിലർ ജെ.കെ. സുധ എന്നിവരുടെ ചെറുമകളും പേരുമല രാസുലാലിൽ എസ്.ആർ. ഷൈജുലാൽ-ബീന ദന്പതികളുടെ മകളുമാണ് എസ്.ബി. നീലിമ ലാൽ.

ADVERTISEMENT

ഗുരുധര്‍മപ്രചാരണ സമാപനവും ചതയദിനാഘോഷവും

പാറശാല: കന്യാകുമാരി ജില്ലയിലെ പിരാകോട് ശ്രീനാരായണ ഗുരുദേവ ചാരിറ്റബിള്‍ ട്രസ്റ്റ് കീഴിലുള്ള ഗുരുമന്ദിരത്തില്‍ ഒരാഴ്ചയായി നീണ്ടു നിന്നിരുന്ന ഗുരുധര്‍മപ്രചാരണത്തിന്‍റെ സമാപനസമ്മേളനവും ചതയദിനാഘോഷവും നടന്നു. കേണല്‍ സെക്യൂരിറ്റി സര്‍വീസ് എംഡിയും, കേരള നാടാര്‍ മഹാജന സംഘം സംസ്ഥാന പ്രസിഡന്‍റുമായ ഡോ. ജെ. ലോറന്‍സ് ഉദ്ഘാടനം ചെയ്തു. ട്രസ്റ്റ് പ്രസിഡന്‍റ് പി. ശോഭനം അധ്യക്ഷത വഹിച്ചു. ട്രസ്റ്റ് സെക്രട്ടറി കെ. രാമചന്ദ്രന്‍ സ്വാഗതം ആശംസിച്ചു. ഗാന്ധി മിത്ര മണ്ഡലം ചെയര്‍മാന്‍ അഡ്വ. ജയചന്ദ്രന്‍ നായര്‍, യോഗാചാര്യൻ ഡോ.വേണുഗോപാലന്‍ നായര്‍, ബിജെപി സംസ്ഥാന സമിതി അംഗം മഞ്ചവിളാകം കാര്‍ത്തികേയന്‍, സിനിമ- സീരിയല്‍ നിര്‍മാതാവ് പ്രദീപ് മരുതത്തൂര്‍, സീരിയല്‍ നിര്‍മാതാവ് അമരവിള ശിവരാമന്‍ തുടങ്ങിയവര്‍ പ്രസംഗിച്ചു.

വലയില്‍ കുടുങ്ങിയ മൂങ്ങയെ രക്ഷപ്പെടുത്തി

പേരൂര്‍ക്കട: വലയില്‍ കുടുങ്ങിക്കിടന്ന മൂങ്ങയെ ഫയര്‍ഫോഴ്‌സ് സംഘമെത്തി രക്ഷപ്പെടുത്തി. പേരൂര്‍ക്കട കണ്‍കോര്‍ഡിയ സ്‌കൂള്‍ ഗ്രൗണ്ടില്‍ ക്രിക്കറ്റ് പരിശീലനത്തിനുവേണ്ടി കെട്ടിയിരുന്ന വലയിലാണു മൂങ്ങക്കുഞ്ഞ് കുടുങ്ങിയത്. ഇവിടെ പ്രാക്ടീസ് ചെയ്യാനെത്തിയ സിഐഎഎഫ് അക്കാഡമിയിലെ കുട്ടികളാണ് മൂങ്ങ വലയില്‍ കുടുങ്ങിക്കിടക്കുന്ന വിവരം ഫയര്‍ഫോഴ്‌സില്‍ അറിയിക്കുന്നത്. തിരുവനന്തപുരം നിലയത്തില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ശ്രീജിത്തിന്‍റെ നേതൃത്വത്തില്‍ ഓഫീസര്‍മാരായ ഷഹീര്‍, വിഷ്ണു നാരായണന്‍, രതീഷ്, ഷിബിന്‍, എഫ്ആര്‍ഒ ഡ്രൈവര്‍ നന്ദകുമാര്‍ എന്നിവര്‍ ചേര്‍ന്നാണു മൂങ്ങയെ രക്ഷപ്പെടുത്തിയത്. ചിറകിനു പരിക്കേറ്റ മൂങ്ങയെ പ്രാഥമിക ശുശ്രൂഷകള്‍ക്കുശേഷം വഴുതക്കാട്ടെ വനംവകുപ്പിനു കൈമാറി.

ഓണ്‍ലൈന്‍ തട്ടിപ്പ്: നാലാഞ്ചിറ സ്വദേശിക്കു നഷ്ടമായത് 15 ലക്ഷം

പേരൂര്‍ക്കട: ഓണ്‍ലൈന്‍ ട്രേഡിംഗിൽ നാലാഞ്ചിറ സ്വദേശിക്ക് 15.80 ലക്ഷം രൂപ നഷ്ടമായി. ഇതുസംബന്ധിച്ച് ഇദ്ദേഹം സൈബര്‍ സെല്ലില്‍ പരാതി നല്‍കിയിട്ടുണ്ട്. വാട്ട്‌സ്ആപ്പ് വഴി വന്ന പരസ്യത്തിന്‍റെ ലിങ്ക് ഇദ്ദേഹം തുറക്കുകയായിരുന്നു. പരാതിക്കാരനെ നിരന്തരം ഫോണില്‍ ബന്ധപ്പെട്ടും ടെലിഗ്രാം എന്ന സോഷ്യല്‍ മീഡിയയുടെ ഗ്രൂപ്പില്‍ അംഗമാക്കിയും വിവിധ തട്ടിപ്പ് ആപ്ലിക്കേഷനുകളും വെബ്‌സൈറ്റും ഡൗണ്‍ലോഡ് ചെയ്യിച്ചുമാണ് തട്ടിപ്പു നടത്തിയത്. വന്‍തുക നല്‍കാമെന്നു വിശ്വസിപ്പിച്ച് കഴിഞ്ഞമാസം മുതല്‍ വിവിധ അക്കൗണ്ടുകളിലായി ഇദ്ദേഹം പണം നിക്ഷേപിക്കുകയായിരുന്നു. തട്ടിപ്പിന്‍റെ ഉറവിടം സൈബര്‍സെല്‍ ടീം അന്വേഷിച്ചുവരുന്നുണ്ട്.

യുവാവിനെ കള്ളക്കേസില്‍ കുടുക്കി മാനസിക രോഗാശുപത്രിയില്‍ ആക്കിയെന്നു പരാതി

വെള്ളറട: യുവാവിനെ കള്ളക്കേസില്‍ കുടുക്കി മാനസിക രോഗാശുപത്രിയില്‍ ആക്കിയെന്നു പരാതി. ഖത്തറിലെ ഷിപ്പ് ജീവനക്കാരനും പൂഴനാട് ആദര്‍ശ് ഭവനില്‍ കെ. തോമസിന്‍റെ മകന്‍ ആദര്‍ശി (32)നെയാണ് ഭാര്യ വീട്ടുകാര്‍ കള്ളക്കേസില്‍ കുടുക്കിയതായി പരാതിയുള്ളത്. ആര്യങ്കോട് പോലീസ് പിടികൂടിയ ആദര്‍ശിനെ മാനസികരോഗ ആശുപത്രിയില്‍ ആക്കുകയായിരുന്നു. ആദര്‍ശ് എട്ടു വര്‍ഷം മുന്‍പ് പൂഴനാട് സ്വദേശിയായ വിജിഷ (30)യെ വിവാഹം കഴിക്കുകയും ദുബായില്‍ ജോലി തരപ്പെടുത്തികൊടുക്കുകയും ചെയ്തിരുന്നു. എന്നാല്‍ 2023-ല്‍ ദുബായില്‍വച്ചു വിജിഷ മരണപ്പെടുകയും ആദർശിനെ അറിയിക്കാതെ വിജിഷയുടെ വീട്ടുകാര്‍ ശവസംസ്‌കാരം നടത്തുകയും ചെയ്യുകയായിരുന്നു. കഴിഞ്ഞമാസം 28നു വിജിഷയുടെ വീട്ടുകാര്‍ ആദര്‍ശില്‍നിന്നു വാങ്ങിയ ഏഴു ലക്ഷം രൂപയും സ്വര്‍ണാഭരണങ്ങളും മടക്കി നല്‍കാമെന്നു പറഞ്ഞു വിളിച്ചുവരുത്തിയ ശേഷം മുളകുപൊടി കണ്ണില്‍ വിതറി മർദിക്കുകയും ആര്യങ്കോട് പോലീസിനെ ഉപയോഗിച്ചു കള്ളക്കേസ് ചുമത്തി തിരുവനന്തപുരം മാനസികാരോഗ്യ കേന്ദ്രത്തില്‍ പ്രവേശിപ്പിക്കുകയുമായിരുന്നുവെന്നു പരാതിയിൽ പറയുന്നു. ആദര്‍ശിനെ കൊല്ലാന്‍ ശ്രമിച്ചതിനെതിരെയും വീട്ടുകാരറിയാതെ ആര്യങ്കോട് പോലീസിനെ ഉപയോഗിച്ചു മാനസിക രോഗ ആശുപത്രിയില്‍ പ്രവേശിപ്പിക്കുകയും ചെയ്തതിനെതിരെയാണു വീട്ടുകാർ പരാതി നൽകിയത്. ആദര്‍ശ് ഇപ്പോഴും തിരുവനന്തപുരം മാനസികാരോഗ്യ കേന്ദ്ര ആശുപത്രിയില്‍ ചികിത്സയിലാണ്. ഇതിനെതിരെ മുഖ്യമന്ത്രിക്കും, ഡിജിപി ആദര്‍ശിന്‍റെ പിതാവ് തോമസ് പരാതി നല്‍കി.

കെഎസ്ആർ‌ടിസി മൂഴിയാർ സർവീസിന് ആദരം

കാട്ടാക്കട: പത്തനംതിട്ട മൂഴിയാറിലേക്കു പോകുന്ന ബസിന് ആദരവുമായി മലയിൻകീഴ് പഞ്ചായത്ത്. 60 വർഷത്തിലേറെയായി കെഎസ്ആർടിസി കാട്ടാക്കട ഡിപ്പോയിൽനിന്നു പത്തനംതിട്ട മൂഴിയാറിലേക്കു പോകുന്ന കാട്ടാക്കട - മൂഴിയാർ ഫാസ്റ്റ് പാസഞ്ചർ കെഎസ്ആർടിസി സർവീസിനാണ് മലയിൻകീഴ് പഞ്ചായത്ത് ആദരമൊരുക്കി ശ്രദ്ധനേടിയത്. ആദ്യ കാലത്ത് തിരുവനന്തപുരം ഡിപ്പോയിൽ നിന്നായിരുന്നു സർവീസ് നടത്തിയിരുന്നത്. 1992 മുതലാണ് കാട്ടാക്കടയിലേക്കു നീട്ടിയത്. മൂഴിയാർ ഡാമിന്‍റെ നിർമാണത്തിനായി തൊഴിലാളികളെ എത്തിക്കുന്നതിനാണ് ബസ് സർവീസ് തുടങ്ങിയത്. പിന്നീട് സർക്കാർ ഉദ്യോഗസ്ഥർ, മറ്റു തൊഴിലാളികൾ, വിദ്യാർഥികൾ എന്നിവരുടെ സ്ഥിരം വാഹനമായി മാറി. അന്നും ഇന്നും പുലർച്ചെ മലയിൻകീഴ് വഴി കടന്നു പോകുന്ന ആദ്യ സർവീസാണിത്. ബസിൽ ഏറെക്കാലം യാത്ര ചെയ്തതിന്‍റെ ഓർമകൾ സൂക്ഷിക്കുന്ന ഒട്ടേറെ പേരുണ്ട്. നിലവിൽ പുലർച്ചെ 4.30ന് കാട്ടാക്കടയിൽനിന്ന് തുടങ്ങുന്ന സർവീസ് ഉച്ചയോടെ മുഴിയാറിൽ എത്തിച്ചേരും. ഉച്ചയ്ക്ക് 2.45 മുഴിയാറിൽനിന്ന് തലസ്ഥാനത്തേക്കു യാത്ര പുറപ്പെടും. ഇതിനാണ് ഇന്നലെ ആദരവുമായി പഞ്ചായത്ത് എത്തിയത്. ഇതിലെ ഡ്രൈവറേയും കണ്ടക്ടറേയും ആദരിച്ചു. മാത്രമല്ല നിരവധി പേർ മൂഴിയാറിലേയ്ക്ക് യാത്രയും നടത്തി. ആദരവിന് ഐ.ബി. സതീഷ് എംഎൽഎ മുഖ്യാതിഥിയായി.

യൂത്ത് കോൺഗ്രസ് നേതാവിനു മർദനം: പ്രതിഷേധം സംഘടിപ്പിച്ചു

വിതുര: യൂത്ത് കോണ്‍ഗ്രസ് നേതാവ് സുജിത്തിനെതിരെയുള്ള അതിക്രൂര പോലീസ് നടപടിക്കെതിരെ തൊളിക്കോട് ജംഗ്ഷനിൽ യൂത്ത് കോൺഗ്രസ് പ്രധിഷേധ പ്രകടനവും യോഗവും സംഘടിപ്പിച്ചു. ജില്ലാ സെക്രട്ടറി അജീഷ്നാഥ്‌ ഉദ്ഘാടനം ചെയ്തു. മണ്ഡലം പ്രസിഡന്‍റ് ഷൈൻ പുളിമൂട് അധ്യക്ഷത വഹിച്ചു. അസംബ്ലി സെക്രട്ടറി ഇജാസ് തൊളിക്കോട് സ്വാഗതം പറഞ്ഞു. അഖിൽ ദിലീപ്, ഫിറോസ് പാമ്പാടി, നൗഫാൻ നസീർ, ബിലാൽ ഇരപ്പിൽ, അഫ്സൽ ഹൽവ, അഫ്സൽ ഇരപ്പിൽ, മുബീൻ തുരുത്തി, ബാസിത്ത് തോട്ടുമുക്ക്, ഷിബിൻ ആനപ്പെട്ടി, ഷാൻ താന്നിമൂട്, ഷാൻ പുളിമൂട്, ഷബീബ് പുളിമൂട്, സെയ്ദ് അഫ്സൽ, സഫ്‌ദർ ബിൻ ഹാഷിം, അജ്മൽ തോട്ടുമുക്ക്, കുഞ്ഞാലികുട്ടി, അൻസിൽ പതിനെട്ടിൽ, ആദിൽ തേക്കുംമൂട് തുടങ്ങിയവർ പങ്കെടുത്തു.

ജൈവ പച്ചക്കറി-മത്സ്യക്കൃഷി വിളവെടുപ്പ്

നെടുമങ്ങാട്: കർഷക സംഘം ജില്ലാകമ്മിറ്റി അംഗവും ജില്ലാ പഞ്ചായത്ത്‌ മുൻ അംഗവും അരുവിക്കര ഫാർമേഴ്‌സ് സർവീസ് സഹകരണ ബാങ്ക് മുൻ പ്രസിഡന്‍റുമായിരുന്ന അഡ്വ. ആർ. രാജ്‌മോഹൻ സ്വന്തമായി ചെയ്ത കൃഷിയിൽ മിന്നുംനേട്ടം. പൂർണിമ അഗ്രി ഫാമിലും വീട്ടുമുറ്റത്തെ തോട്ടത്തിലും ഉൽപ്പാദിപ്പിച്ച ജൈവ പച്ചക്കറി വിളകളുടെയും നൂതന സാങ്കേതിക വിദ്യ ഉപയോഗിച്ചുള്ള ബയോ ഫ്ലോക്ക് മത്സ്യകൃഷിയുടെയും വിളവെടുപ്പ് നടത്തി. വീട്ടുവളപ്പിലെ രണ്ടേക്കർ സ്ഥലത്തും സ്വന്തമായിട്ടുള്ള 39 സെന്‍റ് പുരയിടത്തിലുമാണു വീട്ടാവശ്യത്തിനായുള്ള വാഴ, ചീര പച്ചകറികൾ തുടങ്ങിയ പത്തോളം ഉത്പന്നങ്ങൾ കൃഷിയാണ് ഇറക്കിയത്. കൂടാതെ ഗിഫ്റ്റ് തിലോപ്പിയ ഇനത്തിൽപെട്ട 1000 ത്തോളം മത്സ്യക്കുഞ്ഞുങ്ങളെയും നിക്ഷേപിച്ചു. ആറു മാസം പൂർത്തിയായതോടെയാണ് മത്സ്യ വിളവെടുപ്പും നടത്തിയത്. കൃഷി വകുപ്പിന്‍റെ യും കർഷക സംഘടനയുടെയും കർഷക കൂട്ടായ്മയുടെയും സഹകരണത്തോടെ പച്ചക്കറി - പഴവർഗ രംഗത്തും പാൽ, മുട്ട, മാംസ്യം എന്നിവയിലും വലിയ വിജയം കൈവരിച്ചു. വിൽപ്പന വിപണിയുടെ ഉദ്ഘാടനം സിപിഎം ജില്ലാ സെക്രട്ടറി അഡ്വ. വി. ജോയി എംഎൽഎ നിർവഹിച്ചു. അഡ്വ. ജി സ്റ്റീഫൻ എംഎൽഎ, കർഷക സംഘം ജില്ലാ സെക്രട്ടറി കെ.സി. വിക്രമൻ, സംസ്ഥാന വൈസ് പ്രസിഡന്‍റ് വി.എസ്. പദ്മകുമാർ, വിളപ്പിൽ ഏരിയ കമ്മിറ്റി പ്രസിഡന്‍റ് വെള്ളനാട് എം. രാജേന്ദ്രൻ എന്നിവർ പങ്കെടുത്തു. മട്ടുപ്പാവ് പച്ചക്കറി കൃഷിയിൽ 2023-ൽ സംസ്ഥാന അവാർഡ് നേടിയ കർഷക ഡി. വിജയ ഭാസ്കരൻ നായർ, വി. ജോയി എംഎൽഎയിൽനിന്നും പച്ചക്കറികളും, പഞ്ചായത്ത് മെമ്പർ ഷജിത മത്സ്യവും ഏറ്റുവാങ്ങി. കർഷക സംഘം അരുവിക്കര മേഖല കമ്മിറ്റി നേതാക്കൾ വി.ആർ. ഹരിലാലും എ.എം. ഇല്യാസും വിൽപ്പന വിപണിക്ക് നേതൃത്വം നൽകി.

നെടുമങ്ങാട് നഗരസഭയുടെ ഓണോത്സവം സമാപിച്ചു

നെടുമങ്ങാട്: ടൂറിസം വകുപ്പും നെടുമങ്ങാട് നഗരസഭയും സംയുക്തമായി സംഘടിപ്പിച്ച ഓണാഘോഷ പരിപാടിയായ ഓണോത്സവം 2025 സമാപിച്ചു. മന്ത്രി ജി.ആർ. അനിൽ സമാപന സമ്മേളനം ഉദ്ഘാടനം ചെയ്തു. നെടുമങ്ങാട് മുനിസിപ്പാലിറ്റിയിലെ രണ്ടു കുടുംബത്തിന് കൂടി വീടുവച്ചു നൽകുന്നതോടെ അതിദാരിദ്ര്യത്തിൽനിന്നും മോചനം നേടിയ മുനിസിപ്പാലിറ്റിയായി നെടുമങ്ങാടിനെ പ്രഖ്യാപിക്കാൻ കഴിയുമെന്നു മന്ത്രി പറഞ്ഞു. സമാപന സമ്മേളനത്തിനു ശേഷം നെടുമങ്ങാട് ടൗണിൽ സ്ഥാപിച്ച " ഐ ലവ് നെടുമങ്ങാട് " ഫോട്ടോ പോയിന്‍റിന്‍റെ സ്വിച്ച് ഓൺ കർമ്മവും മന്ത്രി നിർവഹിച്ചു. കല്ലിംഗൽ ഗ്രൗണ്ടിലായിരുന്നു ഓണോത്സവം സംഘടിപ്പിച്ചിരുന്നത്. 2025 അരങ്ങേറിയത്. പിന്നണി ഗായിക അഞ്ജു ജോസഫിന്‍റെ ലൈവ് മ്യൂസിക് ബാന്‍റ് പെർഫോമൻസും അരങ്ങേറി. ഇരുപതോളം ഗാനങ്ങൾ അണിനിരന്ന ബാന്‍റ് പെർഫോമൻസിനോടൊപ്പം തന്നെ വേദിയിൽ അരങ്ങേറിയ നൃത്തവും ദൃശ്യവിരുന്നായി. നെടുമങ്ങാട് നഗരസഭാ ചെയർപേഴ്സൺ സി.എസ്. ശ്രീജ അധ്യക്ഷത വഹിച്ചു. ചലച്ചിത്ര താരം അർജുൻ അശോകൻ വിശിഷ്ടാതിഥിയായി. നെടുമങ്ങാട് ആർഡിഒ കെ.പി. ജയകുമാർ, നെടുമങ്ങാട് നഗരസഭാ വൈസ് ചെയർമാൻ എസ്. രവീന്ദ്രൻ, കൗൺസിലർ സിന്ധു കൃഷ്ണകുമാർ എന്നിവർ പങ്കെടുത്തു.

പൂവച്ചൽ ഖാദർ സ്മാരക പാർക്ക് നിർമാണം ഇഴയുന്നു

പൂവച്ചൽ: ഒരു നാടിനെ മലയാളക്കരയിൽ പ്രശസ്തമാക്കിയ നായകന്‍റെ പേരിൽ ആരംഭിച്ച സ്മാരക നിർമാണം പാതി വഴിയിൽ. കവിയും ഗാനരചയിതാവുമായ അന്തരിച്ച പൂവച്ചൽ ഖാദറിന്‍റെ സ്മരണയ്ക്കായി നിർമിക്കുന്ന പാർക്കാണ് സ്വപ്നങ്ങളിലൊതുങ്ങുന്നത്. പൂവച്ചൽ പഞ്ചായത്ത്, സാംസ്‌കാരിക വകുപ്പിന്‍റെ സഹായത്തോടെ നക്രാംചിറ മിനി നഗറിലെ കുളവും പരിസരവും, മിനി ഡെസ്റ്റിനേഷൻ പോയിന്‍റാക്കി മാറ്റാനുള്ള പദ്ധതിയാണ് വൈകുന്നത്. പദ്ധതിക്കായി പഞ്ചായത്ത് 1.50 കോടിയുടെ പദ്ധതിയാണ് വിഭാവനം ചെയ്തത്. ഇതിന്‍റെ ആദ്യഘട്ടമായി 83 ലക്ഷം രൂപയുടെ നിർമാണം ഇക്കഴിഞ്ഞ ജൂണിൽ പൂർത്തിയാക്കുമെന്നാണ് പറഞ്ഞിരുന്നത്. സാംസ്‌കാരിക വകുപ്പിന്‍റെ 50 ലക്ഷം, പഞ്ചായത്ത് തനത് ഫണ്ടിൽനിന്നുള്ള 20 ലക്ഷം, ശുചിത്വമിഷന്‍റെ 13 ലക്ഷം ഉൾപ്പടെയാണ് പാർക്കിന്‍റെ ചെലവിനായി ഉൾപ്പെടുത്തിയിരുന്നത്. നക്രാംചിറ കുളം നവീകരിച്ച് ചുറ്റിലും പൂന്തോട്ടം, ഇരിപ്പിടങ്ങൾ, ടോയ്‌ലെറ്റ്, അലങ്കാര വിളക്കുകൾ, പ്രഭാത-സായാഹ്ന സവാരിക്കുള്ള സൗകര്യങ്ങൾ എന്നിവയാണ് ആദ്യഘട്ടത്തിൽ ഒരുക്കാനിരുന്നത്. രണ്ടാംഘട്ടത്തിൽ കലാപരിപാടികൾക്കുള്ള സ്റ്റേജ്, ചുറ്റുമതിൽ എന്നിവ നിർമിക്കും. കൂടാതെ ചിറയ്ക്ക് സമീപമുള്ള കുറച്ചു ഭൂമി കൂടി ഏറ്റെടുത്ത് പാർക്ക് വിപുലീകരിക്കുമെന്നും പ്രഖ്യാപിച്ചിരുന്നു. പഞ്ചായത്തിലെ ചാമവിള വാർഡിൽ ഉൾപ്പെടുന്നതാണ് വർഷങ്ങളുടെ പഴക്കമുള്ള ഒരേക്കറോളം വരുന്ന ഈ കുളം. പ്രദേശത്തെ കൃഷിക്കും കുടിവെള്ളത്തിനുമൊക്കെ ഉപയോഗപ്പെടുത്തിയിരുന്ന ചിറ ഉപയോഗശൂന്യമാണിപ്പോൾ. കാട്ടാക്കട, പൂവച്ചൽ ജംഗ്ഷനുകളിൽ നിന്നും രണ്ടുകിലോമീറ്റർ അകലത്തിലാണ് ചിറ. അടുത്ത ജൂണിൽ പൂവച്ചൽ ഖാദറിന്‍റെ അനുസ്മരണ ചടങ്ങിനു മുൻപെങ്കിലും പാർക്ക് യാഥാർഥ്യമാക്കണമെന്നാണ് നാട്ടുകാരുടെ ആവശ്യം. പാർക്ക് നിർമാണം ആരംഭിച്ചതോടെ കുളം വൃത്തിയാക്കി സൈഡ് വാൾ നിർമിച്ച് കുളത്തിനു ചുറ്റുമായി കമ്പിവേലി സ്ഥാപിച്ച പണികൾ മാത്രമാണിപ്പോൾ നടന്നിട്ടുള്ളത്. സമീപത്തെ വാട്ടർ അതോറിട്ടിയുടെ പമ്പ് ഹൗ സ് ഉൾപ്പടെ പൊളിച്ചുമാറ്റി. പാർക്ക് നിർമാണത്തിനായി പണികൾ നടത്തിയപ്പോൾ റോഡരികിൽ നിന്നിരുന്ന തണൽ മരങ്ങൾ അടുത്തകാലത്ത് റോഡിലേക്കു മറിഞ്ഞ് ഓടിക്കൊണ്ടിരുന്ന ബസിനു മുകളിലൂടെ വീണു. തലനാരിഴയ്ക്കാണു ബസിലെ യാത്രാക്കാർ രക്ഷപ്പെട്ടത്. ആ മരങ്ങളുടെ അവശിഷ്ടങ്ങളും മാറ്റിയിട്ടില്ല. ചിറയോടു ചേർന്നു പ്രവർത്തിക്കുന്ന വർഷങ്ങൾ പഴക്കമുള്ള മിനിനഗർ ഗ്രന്ഥശാലയ്ക്ക് പുതിയ മന്ദിരം ഉൾപ്പെടെ പണിത് പാർക്കിനൊപ്പം പ്രയോജനപ്പെടുത്താനും പദ്ധതി വിഭാവനം ചെയ്തെങ്കിലും നടപ്പാക്കാനായില്ല.

അന്വേഷണത്തിനായി പോലീസുകാർ കൊണ്ടുപോയ കുട്ടിയെ കാണാനില്ലെന്നു പരാതി

കുളത്തൂർ: രാത്രിയിൽ തുമ്പ പോലീസ് 17 കാരനെ കൊണ്ടുപോയി വിട്ടയച്ചെങ്കിലും കുട്ടിയെ കാണാനില്ലെന്ന പരാതിയുമായി കുട്ടിയുടെ മാതാപിതാക്കൾ. ‍ഇക്കാര്യം ചൂണ്ടിക്കാട്ടി തുമ്പ പോലിസിൽ പരാതി നൽകി. പള്ളിത്തുറ വലിയവിളാകംവീട്ടിൽ സെബാസ്റ്റ്യന്‍റെ മകൻ സെബി(17)നെയാണ് കാണാതായത്. കഴിഞ്ഞ ദിവസം പള്ളിത്തുറ പള്ളിയിലെ ഗാനമേളക്കിടെ ഡാൻസ് ചെയ്തതുമായി ബന്ധപ്പെട്ടു യുവാക്കൾ തമ്മിൽ വാക്കേറ്റമുണ്ടായതുമായി ബന്ധപ്പെട്ടു മറ്റൊരു യുവാവിനെ അന്വേഷിച്ചാണ് തുമ്പ എസ്ഐയുടെ നേതൃത്വത്തിലുള്ള പോലീസ് സംഘം സെബിന്‍റെ വീട്ടിലെത്തിയത്. യുവാവിന്‍റെ വീട് കാണിക്കാൻ മകനെ കൊണ്ടുപോകുന്നുവെന്നാണു പോലീസ് വീട്ടുകാരോട് പറഞ്ഞത്. ജീപ്പിൽ കയറ്റാൻ ശ്രമിച്ചപ്പോൾ, സൈക്കിളിൽ വരാമെന്നു പറഞ്ഞു സെബിൻ സൈക്കിളുമായാണു പോലിസിനൊപ്പം പോയത്. പിന്നെ സൈക്കിളിൽ വീട്ടിലെത്തിയ സെബിനെ പോലീസ് ജീപ്പിൽ കയറ്റിക്കൊണ്ടുപോയതായി വീട്ടുകാർ പറയുന്നു. സെബിനുൾപ്പെടെ മൂന്നു പേരെ സംഭവത്തിൽ പോലിസ് പിടികൂടി സ്റ്റേഷനിൽ നിർത്തിയായും പിറ്റേന്നു രാവിലെ മറ്റു യുവാക്കളുടെ ബന്ധുക്കളുടെ കൂടെ മൂന്നു പേരെയും വിട്ടതായി തുമ്പ പോലീസ് പറയുന്നു. മകൻ എത്താത്തതിനെ തുടർന്നുവീട്ടുകാരും ബന്ധുക്കളും തിരക്കിയിട്ടും കണ്ടെത്താത്തതിനെ തുടർന്നാണു വീട്ടുകാർ പരാതിയുമായി സ്റ്റേഷനിൽ എത്തിയത്.

അനധികൃതമായി സൂക്ഷിച്ച മണ്ണെണ്ണയും ഗ്യാസ് സിലിണ്ടറുകളും പിടിച്ചെടുത്തു

പൂവാർ: പുതിയ തുറയിൽ അനധികൃതമായി സൂക്ഷിച്ചിരുന്ന മണ്ണെണ്ണയും ഗ്യാസ് കുറ്റികളും പിടിച്ചെടുത്തു. ഇന്നലെ ഉച്ചയ്ക്കു നെയ്യാറ്റിൻകര പുതിയതുയിൽ ഗോതമ്പ് റോഡിലാണ് സംഭവം. ജില്ലാ കളക്ടർക്കു ലഭിച്ച രഹസ്യ വിവരത്തെതുടർന്നു നെയ്യാറ്റിൻകര താലൂക്ക് സപ്ലൈ ഓഫീസർ പ്രവീണും സംഘവും കാഞ്ഞിരംകുളം പോലീസും ചേർന്നു നടത്തിയ പരിശോധനയിലാണ് 2400 ലിറ്റർ മണ്ണെണ്ണയും എട്ടു കുറ്റി ഗ്യാസ് സിലിണ്ടറുകളും പിടിച്ചെടുത്തത്. തമിഴ്നാട്ടിൽനിന്നു കടത്തിക്കൊണ്ടുന്ന റേഷൻ മണ്ണെണ്ണയാണ്. ഗ്യാസ് കുറ്റികൾ ഗാർഹിക ഉപയോഗത്തിനുള്ള വയാണെന്നും അധികൃതർ അറിയിച്ചു. റെയ്ഡിനെത്തിയ ടിഎസ്ഒ പ്രവീൺ കുമാറിനെയും ഗിരീഷ്, അജിത്ത്, സുനിൽ ദത്ത് തുടങ്ങി റേഷനിംഗ് ഇൻസ്പെക്ടർമാരെയും കണ്ട് അനധികൃത മണ്ണെണ്ണ കച്ചവടക്കാരനും സംഘവും ഓടി രക്ഷപ്പെട്ടു. പിടിച്ചെടുത്ത മണ്ണെണ്ണയും സിലിണ്ടറുകളും കേരള സിവിൽ സപ്ലൈസ് ഓഫീസിലേക്ക് മാറ്റിയിട്ടുണ്ട്. തമിഴ്നാട്ടിൽ 68 രൂപയ്ക്ക് വിൽക്കുന്ന വെള്ളയും നീലയും കളറിലുള്ള മണ്ണെണ്ണ പൊഴിയൂർ തീരപ്രദേശത്തുള്ളവർക്ക് 120 രൂപയ്ക്കും നിറച്ച ഗ്യാസ് സിലിണ്ടറുകൾ 1200 രൂപയ്ക്കും വിൽപന നടത്തുകയാണു പതിവെന്നു നാട്ടുകാർ പറഞ്ഞു.

യുവതിയുടെ മരണം: ഹൈദരാബാദ് സ്വദേശിയെ കേന്ദ്രീകരിച്ച് അന്വേഷണം

മെഡിക്കല്‍കോളജ്: യുവതിയെ ഫ്‌ളാറ്റിനുളളില്‍ മരിച്ചനിലയില്‍ കണ്ടെത്തിയ സംഭവത്തില്‍ ഹൈദരാബാദ് സ്വദേശിയായ യുവാവിനെ കേന്ദ്രീകരിച്ച് ക ന്‍റോൺമെന്‍റ് പോലീസ് അന്വേഷണം ആരംഭിച്ചു. പോണ്ടിച്ചേരി കാരിക്കല്‍ മുക്കുളം സ്ട്രീറ്റ് 13-ല്‍ അളകര്‍സാമിയുടെ മകള്‍ എ. അക്ഷയയെ (25) ആണ് തിങ്കളാഴ്ച രാവിലെ 11 മണിയോടുകൂടി ഇവര്‍ താമസിച്ചുവന്ന ജനറല്‍ ആശുപത്രിക്കു സമീപം തമ്പുരാന്‍മുക്കിലെ ആര്‍ടെക് തമ്പുരാന്‍സ് ഫ്‌ളാറ്റിലെ അഞ്ചാം നിലയില്‍ 5-ബി അപ്പാര്‍ട്ട്‌മെന്‍റിനുള്ളില്‍ തൂങ്ങിമരിച്ച നിലയില്‍ കണ്ടെത്തിയത്. താമസിക്കുന്ന മുറിയിലെ ഫാനിനുള്ളില്‍ ബഡ്ഷീറ്റ് കഴുത്തില്‍ മുറുക്കിയായിരുന്നു മരണം. ഓണ്‍ലൈന്‍ വഴിയാണ് അക്ഷയ യുവാവുമായി പരിചയപ്പെടുന്നത്. ഇവര്‍ തമ്മില്‍ അടുത്ത സുഹൃത്തുക്കളായിരുന്നുവെന്നും വിവാഹം കഴിക്കാന്‍ തീരുമാനിച്ചിരുന്നുവെന്നുമാണ് ബന്ധുക്കള്‍ പോലീസിനോടു പറഞ്ഞത്. കഴിഞ്ഞ വെള്ളിയാഴ്ച യുവാവും അക്ഷയയും തമ്മില്‍ സംസാരമുണ്ടായി എന്നും പെട്ടെന്നുള്ള സൗന്ദര്യപ്പിണക്കത്തിന്‍റെ പേരില്‍ ഫോണ്‍ കട്ട് ചെയ്ത യുവാവ് അക്ഷയയുടെ ഫോണ്‍ നമ്പര്‍ ബ്ലോക്ക് ചെയ്തുവെന്നും അന്വേഷണത്തില്‍ അറിയാന്‍ സാധിച്ചു. ഇതുമൂലമുള്ള മാനസിക വിഷമമാണ് അക്ഷയയെ തൂങ്ങിമരിക്കാന്‍ പ്രേരിപ്പിച്ചത്. സംഭവത്തില്‍ ആത്മഹത്യാ പ്രേരണാക്കുറ്റമാണ് പോലീസ് ചുമത്തിയിട്ടുള്ളത്. അക്ഷയയുടെ മൃതദേഹം മേല്‍നടപടികള്‍ക്കുശേഷം ബന്ധുക്കള്‍ക്കു വിട്ടുനല്‍കി.

ക്രിക്കറ്റ് ഫെസ്റ്റിൽ സിക്സർ അടിച്ചുപറത്തി ഡിവൈഎസ്പി

കാട്ടാക്കട: ക്രിക്കറ്റ് ഫെസ്റ്റിവലിൽ സിക്സർ അടിച്ചു പായിച്ച് കാട്ടാക്കട ഡിവൈഎസ്പി റാഫി. മൈലോട്ടുമൂഴി ജനതാ ഗ്രന്ഥശാലയുടെ 74-ാമത് വാർഷികാഘോഷങ്ങളുടെ ഭാഗമായുള്ള ജനതാ ക്രിക്കറ്റ് ഫെസ്റ്റിനു മുഖ്യാതിഥിയായി എത്തിയതായിരുന്നു കാട്ടാക്കട ഡിവൈഎസ്പി റാഫി. അഡ്വ ജി. സ്റ്റീഫൻ എംഎൽഎ ആയിരുന്നു ഉദ്ഘാടകൻ. ചടങ്ങു കഴിഞ്ഞ് എംഎൽഎ മടങ്ങി. അതേസമയം മുഖ്യാതിഥിയായിരുന്ന ഡിവൈഎസ്പി കളി കണ്ട് ഗാലറിയിൽ തുടർന്നു. എന്നാൽ ഏറേ നേരത്തിനുശ്ഷം ഡിവൈഎസ്പിയും കളത്തിലേക്ക് ഇറങ്ങി. ആദ്യം ബോളറായി, പിന്നെ ബാറ്റ്മാൻ ആയി. യോർക്കും ഗുഡ് ലെങ്ക്തും എറിഞ്ഞുശേഷം എതിരാളിയെ പതറിച്ചു പിന്നെ ബാറ്റുമെടുത്തു ക്രീസിലുമെത്തി. തികഞ്ഞ കളിക്കാരന്‍റെ ശാരീരിക ഭാഷയോടെ നിലയുറപ്പിച്ചു.പിന്നെ നേർക്കു വന്ന ഓരോ പന്തും ഫീൽഡർമാരെ തലങ്ങും വിലങ്ങും പായിച്ചു. ഫ്രണ്ട് ഫുട്ട് ഡ്രൈവ്, കവർ ഡ്രൈവ്, സ്‌ട്രെയിറ്റ് ഡ്രൈവ് എന്നു വേണ്ട പന്തുകൾ ബൗണ്ടറിയിലേക്കു പായിച്ച് ഡിവൈഎസ്പി തകർത്താടി. കാണികൾക്കും കളിക്കാർക്കും ആവേശം നിറച്ചു കുറച്ചു നേരം കാണികളുടെ കൂട്ടത്തിൽ ഇരുന്നു ക്രിക്കറ്റ് ആസ്വദിച്ച ശേഷമാണ് അദ്ദേഹം മടങ്ങിയത്. കുട്ടികളുടെ കായികവും കലാപരമായ കഴിവുകളെ പ്രോത്സാഹിപ്പിക്കുകയും അവരെ അതിലേക്കു കൂടുതൽ ആകൃഷ്ടരാക്കുകയും ചെയ്യേണ്ടതു നമ്മുടെ കടമയാണെന്നും ഇത്തരം പരിപാടികളിൽ കുട്ടികൾ മുഴുകുന്നതോടെ അവർ നേർവഴി നയിക്കപ്പെടുമെന്നും അദ്ദേഹം പറഞ്ഞു. സംഘാടക സമിതി ചെയർമാൻ ജ്യോതിഷ് വിശ്വംഭരൻ അധ്യക്ഷനായ പരിപാടിയിൽ തിരുവനന്തപുരം ജില്ലാ ലൈബ്രറി കൗൺസിൽ അംഗം കെ. ഗിരി, ജനത പ്രസിഡന്‍റ് എ.ജെ. അലക്സ് റോയ്, സെക്രട്ടറി എസ്. രതീഷ് കുമാർ, പട്ട കുളം തകഴി ഗ്രന്ഥാലയം പ്രസിഡന്‍റ് പി. മണികണ്ഠൻ, എസ്. നാരായണൻ കുട്ടി, എസ്.പി. സുജിത്ത്, പി. രതീഷ്, രാഹുൽമൈലോട്ടു മൂഴി, എ.വിജയകുമാരൻ നായർ തുടങ്ങിയവർ പങ്കെടുത്തു.

പേരൂർക്കട മാല മോഷണക്കേസിൽ വഴിത്തിരിവ് : വീട്ടുജോലിക്കാരിയെ മോഷ്ടാവാക്കാൻ പോലീസ് കഥമെനഞ്ഞെന്ന് റിപ്പോർട്ട്

തിരുവനന്തപുരം: പേരൂർക്കട മാല മോഷണക്കേസിൽ വീട്ടുജോലിക്കാരിയായ ദളിത് യുവതി ബിന്ദുവിനെ മോഷ്ടാവാക്കാൻ പോലീസ് കഥ മെനഞ്ഞുവെന്നു പുനരന്വേഷണം നടത്തിയ പത്തനംതിട്ട ക്രൈംബ്രാഞ്ച് ഡിവൈഎസ്പി വിദ്യാധരന്‍റെ കണ്ടെത്തൽ. പേരൂർക്കടയിലെ വീട്ടിൽനിന്നു മാല മോഷണം പോയിട്ടേ ഇല്ലെന്നും മറവി പ്രശ്നമുള്ള ഓമന ഡാനിയേൽ മാല സ്വന്തം വീട്ടിലെ സോഫയ്ക്കു താഴെവച്ചു മറക്കുകയായിരുന്നുവെന്നും പ്രത്യേക അന്വേഷണ സംഘം കണ്ടെത്തി. മാല പിന്നീട് ഓമന തന്നെ കണ്ടെത്തിയെന്നും റിപ്പോർട്ടിൽ പറയുന്നു. കാണാതായ മാല വീടിനു പിന്നിലെ ചവറുകൂനയിൽ നിന്നും കണ്ടെത്തി എന്ന പേരൂർക്കട പോലീസിന്‍റെ കഥ നുണയാണ്. ബിന്ദുവിന്‍റെ അന്യായ കസ്റ്റഡിയെ ന്യായീകരിക്കാൻ പോലിസ് മെനഞ്ഞ കഥയാണ് ഇതെ ന്നും റിപ്പോർട്ടിൽ ചൂണ്ടിക്കാട്ടുന്നു. ബിന്ദുവിനെ അന്യായമായി സ്റ്റേഷനിൽ തടഞ്ഞു വച്ചതു സ്റ്റേഷൻ ഹൗസ് ഓഫീസർ ശിവകുമാർ അറിഞ്ഞിരുന്നു. രാത്രിയിൽ ശിവകുമാർ ബിന്ദുവിനെ ചോദ്യം ചെയ്തതു സിസിടിവി ദൃശ്യങ്ങളിൽ വ്യക്തമാണ്. വീട്ടുജോലിക്കാരിയെ മോഷണക്കേസിൽ കുടുക്കാൻ ശ്രമിച്ച പേരൂർക്കട എസ്എച്ച്ഒ ശിവകുമാർ, വീട്ടുടമ ഓമന ഡാനിയേൽ എന്നിവർക്കെതിരെ നടപടി വേണമെനും റിപ്പോർട്ടിൽ പറയുന്നു. സ്വർണാഭരണം കാണാനില്ലെന്ന വീട്ടുടമ ഓമനയുടെ പരാതിയിലാണു വീട്ടിൽ ജോലിക്കു നിന്നിരുന്ന ചുള്ളിമാനൂർ സ്വദേശി ബിന്ദുവിനെതിരെ പേരൂർക്കട പോലീസ് കേസെടുത്തത്. പരാതി നൽകിയതിനു നാലു ദിവസം മുന്പുമാത്രം വീട്ടുജോലിക്കെത്തിയ ബിന്ദുവിനെ പോലീസ് കസ്റ്റഡിലെടുത്ത് രാത്രിയിൽ സ്റ്റേഷനിലിരുത്തി മാനസികമായി പീഡിപ്പിക്കുകയായിരുന്നു. നഷ്ടപ്പെട്ടെന്നു പറഞ്ഞ സ്വർണം അടുത്ത ദിവസം പരാതിക്കാരിയുടെ വീടിനു പിന്നിലെ ചവറുകൂനയിൽനിന്നും കിട്ടിയെന്ന് ഓമന ഡാനിയേൽ തന്നെ പോലീസിനെ അറിയിച്ചു. പിന്നാലെ പോലീസ് ബിന്ദുവിനെ വിട്ടയച്ചു. പോലീസിനു നാണക്കേടായ സംഭവത്തിൽ എസ്ഐയെയും എഎസ്ഐയും സസ്പെൻഡ് ചെയ്തിരുന്നു. സ്റ്റേഷൻ ഇൻസ്പെക്ടറെ കോഴിക്കോട്ടേയ്ക്കു സ്ഥലം മാറ്റി. കാണാതായ സ്വർണം എങ്ങനെ ചവറുകൂനയിലെത്തിയെന്നുപോലും അന്വേഷിക്കാതെയാണ് കേസ് അവസാനിപ്പിച്ചത്. പോലീസ് പീഡനത്തിൽ ഉൾപ്പെടെ സമഗ്രമായ അന്വേഷണം ആവശ്യപ്പെട്ട ബിന്ദു നൽകിയ പരാതി ജില്ലയ് ക്കു പുറത്തുള്ള ഡിവൈഎസ്പി അന്വേഷിക്കാൻ മനുഷ്യാവകാശ കമ്മീഷൻ ഉത്തരവിട്ടിരുന്നു. അതിന്‍റെ അടിസ്ഥാനത്തിലാണ് പുനരന്വേഷണം നടത്തിയത്.

ക്ഷീര വികസന, ഫിഷറീസ് വകുപ്പുകൾക്ക് പുരസ്കാരം

തിരുവനന്തപുരം: ഓണം വാരാഘോഷത്തിനു സമാപനംകുറിച്ചു നഗരത്തിൽ നടന്ന സാംസ്കാരിക ഘോഷയാത്രയിൽ പങ്കെടുത്ത ഫ്ളോട്ടുകൾക്കും കലാരൂപങ്ങൾക്കുമുള്ള പുരസ്കാരങ്ങൾ പ്രഖ്യാപിച്ചു. കേന്ദ്രസർക്കാർ സ്ഥാപന വിഭാഗത്തിൽ ഒന്നാംസ്ഥാനം വിഎസ്എസ്‌സിക്കും രണ്ടാം സ്ഥാനം തെരഞ്ഞെടുപ്പ് കമ്മീഷന്‍റെ ഫ് ളോട്ടുകൾക്കും ലഭിച്ചു. സംസ്ഥാന സർക്കാർ വകുപ്പുകളുടെ വിഭാഗത്തിൽ ക്ഷീര വികസന വകുപ്പും മത്സ്യബന്ധന വകുപ്പും ഒന്നും രണ്ടും സ്ഥാനങ്ങൾ നേടി. സർക്കാരിതര സ്ഥാപന വിഭാഗത്തിൽ ഒന്നാമത് ശുചിത്വ മിഷനും രണ്ടാം സ്ഥാനം എനർജി മാനേജ്മെന്‍റ് സെന്‍ററും പുരസ്കാരങ്ങൾ നേടി. തദ്ദേശ സ്ഥാപനങ്ങളുടെ വിഭാഗത്തിൽ തിരുവനന്തപുരം കോർപറേഷനും ജില്ലാ പഞ്ചായത്തുമൊരുക്കിയ ഫ്ളോട്ടുകൾക്ക് യഥാക്രമം ഒന്നും രണ്ടും സ്ഥാനങ്ങൾ ലഭിച്ചു. പൊതുമേഖലാ സ്ഥാപന വിഭാഗത്തിൽ കെൽട്രോണും വാട്ടർ അഥോറിറ്റിയും ഒന്നും രണ്ടും സ്ഥാനങ്ങൾ നേടി. ബാങ്കിംഗ് മേഖലയിൽ കേരള ബാങ്കും നബാർഡും ഒന്നും രണ്ടും സ്ഥാനം സ്വന്തമാക്കി. ദൃശ്യകലാരൂപ വിഭാഗത്തിൽ ഝാർഖണ്ഡിലെ ഗ്രാമീണരുടെ തനതു നൃത്തവും ഉത്തർപ്രദേശിലെ തനതു നൃത്തവും ഒന്നും രണ്ടും സ്ഥാനം നേടി. വിജയികൾക്കുള്ള സമ്മാനം ഓണം വാരാഘോഷത്തിന്‍റെ സമാപന വേദിയിൽ മന്ത്രി പി.എ മുഹമ്മദ് റിയാസ് വിതരണം ചെയ്തു.

താള-വർണ വിസ്മയം തീർത്ത് സമാപന ഘോഷയാത്ര

ഓണം വാരാഘോഷത്തിനു കൊടിയിറങ്ങി തിരുവനന്തരം: നഗരത്തിന്‍റെ രാജവീഥികളിൽ തിങ്ങിനിറഞ്ഞ പതിനായിരങ്ങളെ സാക്ഷി നിർത്തി താള-വർണ വിസ്മയം വിരിയിച്ച ഘോഷയാത്രയോടെ ഓണം വരാഘോഷത്തിനു സമാപനമായി. ഇന്നലെ വൈകുന്നേരം 4.15 ന് വെള്ളയമ്പലത്തുനിന്നും ആരംഭിച്ച സാംസ്‌കാരിക ഘോഷയാത്ര രാജവീഥികൾ പിന്നിട്ടു കിഴക്കേകോട്ടയില്‍ അവസാനിച്ചു. ഗവര്‍ണര്‍ രാജേന്ദ്ര വിശ്വനാഥ അര്‍ലേക്കര്‍ ഘോഷയാത്ര ഫ്ലാഗ് ഓഫ് ചെയ്തു. ഘോഷയാത്രയുടെ വരവറിയിച്ചുകൊണ്ട് 51 കലാകരന്മാര്‍ ശംഖനാദം മുഴക്കുകയും തുടര്‍ന്നു വാദ്യോപകരണമായ കൊമ്പ്, ടൂറിസം മന്ത്രി പി.എ. മുഹമ്മദ് റിയാസ് മുഖ്യകലാകാരനു കൈമാറിക്കൊണ്ട് സാംസ്‌കാരിക ഘോഷയാത്രയുടെ താളമേളങ്ങള്‍ക്കു തുടക്കം കുറിക്കുകയും ചെയ്തു. വര്‍ണ വൈവിധ്യങ്ങള്‍ക്കൊപ്പം ആട്ടവും പാട്ടുമായി നൂറോളം കലാരൂപങ്ങളാണ് ഇക്കുറി ഓണം ഘോഷയാത്രയില്‍ അണിനിരന്നത്. കേരളീയതയുടെ സംസ്‌കൃതി പ്രകാശിപ്പിക്കുന്ന അനുഷ്ഠാന കലകള്‍, ഗോത്രകലകള്‍, നാടന്‍ കലകള്‍, ക്‌ളാസിക്കല്‍ കലാരൂപങ്ങള്‍, പുതുകാലത്തിന്‍റെ ജനകീയ കലകള്‍ എന്നീ അവതരണങ്ങള്‍ക്കൊപ്പം ഭാരത് ഭവന്‍റെ നേതൃത്വത്തില്‍ ജാര്‍ഖണ്ഡ്, ഉത്തര്‍പ്രദേശ്, മധ്യപ്രദേശ്, മഹാരാഷ്ട്ര, ആന്ധ്രാപ്രദേശ്, തെലുങ്കാന, കര്‍ണാടക, തമിഴ്‌നാട് എന്നീ സംസ്ഥാനങ്ങളില്‍ നിന്നുള്ള ഇന്ത്യന്‍ ഗ്രാമീണ കലകളും നാനാത്വത്തില്‍ ഏകത്വം എന്ന പ്രമേയത്തെ മുന്‍നിര്‍ത്തി ഘോഷയാത്രയില്‍ ഒത്തുചേർന്നു. ഇന്ത്യയിലെ എട്ട് ക്ലാസിക്കല്‍ നൃത്ത രൂപങ്ങള്‍ കേരളത്തിന്‍റെ മുടിയേറ്റ്, തെയ്യം, പടയണി, ഗൊപ്പിയാളനൃത്തം, മംഗലംകളി, ഇരുളനൃത്തം, രുധിരക്കോലം, അലാമിക്കളി, വനിതാകോല്‍ക്കളി, പാവപ്പൊലിമകള്‍, ട്രാന്‍സ്‌ജെന്‍ഡേഴ്‌സിന്‍റെ സംഘം അവതരിപ്പിക്കുന്ന അര്‍ദ്ധനാരീനൃത്തം, മുറം ഡാന്‍സ്, ഉലക്ക ഡാന്‍സ്, പള്ളിവാള്‍ നൃത്തം, മാവേലിയും ഓണപ്പാട്ടുകളും, പുലികളി, കുമ്മാട്ടി, വേലകളി, ഓണപ്പൊട്ടന്‍, കാളയും തേരും, കമ്പേറ്, മയൂര നൃത്തം, 10 അടി ഉയരമുള്ള കാരിക്കേച്ചര്‍ രൂപങ്ങള്‍, ശലഭ, അരയന്ന, മുയല്‍ നൃത്തങ്ങള്‍ തുടങ്ങി ഒരു കാലഘട്ടത്തിന്‍റെ ഓര്‍മയായ സൈക്കിള്‍ യജ്ഞമടക്കം കാണികള്‍ക്ക് ദൃശ്യവിരുന്നായി.

സഹപാഠിക്ക് സുരക്ഷിത ഭവനമൊരുക്കാന്‍ എന്‍എസ്എസ് വോളണ്ടിയര്‍മാര്‍ രംഗത്ത്

നെയ്യാറ്റിന്‍കര: സഹപാഠിക്ക് സുരക്ഷിതമായ കിടപ്പാടം ഒരുക്കുക എന്ന ലക്ഷ്യത്തോടെ ഭവന നിര്‍മാണ ധനസമാഹരണ യജ്ഞവുമായി നാഷണല്‍ സര്‍വീസ് സ്കീം (എന്‍എസ്എസ്) യൂണിറ്റ് വോളണ്ടിയര്‍മാര്‍. നെയ്യാറ്റിന്‍കര ഗവ. ഹയര്‍സെക്കന്‍ഡറി സ്കൂളിലെ എന്‍എസ്എസ് വോളണ്ടിയര്‍മാരാണ് ഈ ദൗത്യം ഏറ്റെടുത്തിരിക്കുന്നത്. സ്വന്തമായി വസ്തുവോ കിടപ്പാടമോ ഇല്ലാത്ത ഒരു സഹപാഠിക്കുവേണ്ടി രൂപംനല്‍കിയ പദ്ധതിയുടെ വിജയകരമായ നടത്തിപ്പിനായി ധനസമാഹരണത്തിന്‍റെ ആദ്യഘട്ടമെന്ന നിലയില്‍ ലോഷന്‍ അടക്കമുള്ള ഉത്പന്നങ്ങളുടെ വില്‍പ്പനയ്ക്ക് തുടക്കം കുറിച്ചുകഴിഞ്ഞു. ആറാലുംമൂട് ഗ്രൗണ്ടില്‍ നടക്കുന്ന നെയ്യാര്‍ മേളയില്‍ സംഘാടക സമിതി ഈ ഉത്പന്നങ്ങളുടെ വിപണനത്തിനായി സ്റ്റാള്‍ അനുവദിച്ച് നല്‍കി. പ്രോഗ്രാം ഓഫീസര്‍ ശുഭശ്രീയുടെ നേതൃത്വത്തില്‍ യൂണിറ്റ് വോളണ്ടിയര്‍മാര്‍ സജീവമായി രംഗത്തുണ്ട്. ഈ ഉത്പന്നങ്ങള്‍ വില്‍ക്കുന്നതിലൂടെ ലഭ്യമാകുന്ന തുക ഭവന നിര്‍മാണത്തിനായി ഉപയോഗിക്കാനാണ് തീരുമാനിച്ചിട്ടുള്ളത്.

നിറംപകർന്നു നെയ്യാർഡാമിലെ സാംസ്‌കാരിക ഘോഷയാത്ര

നെയ്യാർഡാം : നിറം പകർന്ന് നെയ്യാർഡാമിലെ സാംസ്‌കാരിക ഘോഷയാത്ര. നിശ്ചലദൃശ്യങ്ങളും, കളരിപ്പയറ്റും, നൃത്തവുമായി നെയ്യാർഡാമിലെ ഓണം സാംസ്‌കാരിക ഘോഷയാത്ര കാണികൾക്ക് കാഴ്ചയുടെ വിസ്മയമൊരുക്കി. ഇന്നലെ വൈകുന്നേരം സി.കെ. ഹരീന്ദ്രൻ എംഎൽഎ ഘോ ഷയാത്ര ഫ്‌ളാഗ് ഓഫ് ചെയ്തു. കള്ളിക്കാട് പഞ്ചായത്ത് പ്രസിഡന്‍റ് പന്ത ശ്രീകുമാർ അധ്യക്ഷനായി. സ്‌കൂളുകൾ, തുറന്ന ജയിൽ, പ്രദേശത്തെ ആർട്‌സ് ആൻഡ് സ്‌പോർട്‌സ് ക്ലബുകൾ, പുരുഷ, വനിതാ സ്വയംസഹായ സംഘങ്ങൾ, കുടുംബശ്രീ, ശിവാനന്ദാശ്രമം, റസിഡന്‍റ്സ് അസോസിയേഷനുകൾ തുടങ്ങിയവർ വിവിധ നാടൻ കലാരൂപങ്ങളുമായി ഘോഷയാത്രയിൽ അണിചേർന്നു. കള്ളിക്കാട് മുതൽ നെയ്യാർഡാം വരെ റോഡിനിരുവശവും നൂറുകണക്കിനു പേരാണു ഘോ ഷയാത്ര കാണാനായി എത്തിയത്. നെയ്യാർഡാമിൽ ചേർന്ന സമാപന സമ്മേളനം സി.കെ.ഹരീന്ദ്രൻ എംഎൽഎ ഉദ്ഘാടനം ചെയ്തു. തുടർന്ന് കലാപരിപാടികളും ഉണ്ടായിരുന്നു. ഘോഷയാത്രയോടെ ഈ വർഷത്തെ ഓണം വാരാഘോഷം സമാപിച്ചു. വനം വകുപ്പ് ഫിഷറീസ് വകുപ്പ് ജലവിഭവ വകുപ്പ് ഡിടിപിസി എന്നിവ ചേർന്നാണ് ഇവിടെ ആഘോഷം സംഘടിപ്പിച്ചത്. കഴിഞ്ഞ അഞ്ചിനാണ് ഓണാലോഷം തുടങ്ങിയത്. വൻ ജന തിരക്കാണ് ഇവിടെ എത്തിയത്.

നബിദിന മതസൗഹാര്‍ദ കുടുംബ സംഗമം സംഘടിപ്പിച്ചു

തിരുവനന്തപുരം: ദേശീയ മലയാള വേദിയുടെ ആഭിമുഖ്യത്തില്‍ പൂജപ്പുര ഗവ. ചില്‍ഡ്രന്‍സ് ഹോമില്‍ സംഘടിപ്പിച്ച നബിദിന മതസൗഹാര്‍ദ കുടുംബ സംഗമം കെപിസിസി മുന്‍ പ്രസിഡന്‍റും മുന്‍ എംപിയുമായ കെ. മുരളീധരന്‍ ഉദ്ഘാടനം ചെയ്തു. പോലീസ് അസിസ്റ്റന്‍റ് കമ്മീഷണര്‍ എന്‍. ഷിബു മുഖ്യാതിഥിയായിരുന്നു. സിഡബ്ല്യൂസി ചെയര്‍പേഴ്‌സണ്‍ അഡ്വ. ഷാനിബാ ബീഗം മുഖ്യപ്രഭാഷണം നടത്തി. ദേശീയ മലയാള വേദി വര്‍ക്കിംഗ് പ്രസിഡന്‍റ് അഡ്വ. ഫസീഹ റഹീം അധ്യക്ഷത വഹിച്ചു. ലൂഥര്‍ സഭ മേജര്‍ ആര്‍ച്ച്ബിഷപ്പ് റോബിന്‍സണ്‍ ഡേവിഡ് മതസൗഹാര്‍ദസന്ദേശം നല്‍കി. സംസ്ഥാന പ്രസിഡന്‍റ് മുജീബ് റഹ്മാന്‍ സ്വാഗതവും, സംസ്ഥാന ചെയര്‍മാന്‍ പനച്ചമൂട് ഷാജഹാന്‍ നന്ദിയും പറഞ്ഞു. അപകടത്തെ തുടര്‍ന്നു ചികിത്സയിലിരുന്ന ശേഷം മടങ്ങിയെത്തിയ പ്രമുഖ വിദ്യാഭ്യാസജീവകാരുണ്യ പ്രവര്‍ത്തക യാസ്മിന്‍ സുലൈമാനെ ചടങ്ങില്‍ ആദരിച്ചു. നടന്‍ ശിവ മുരളി, എം.എച്ച്. സുലൈമാന്‍, ഡോ. അരുണ്‍ കുമാര്‍, ബി. പ്രഭാകരന്‍, എസ്. ഗിരിജാ ദേവി, അട്ടക്കുളങ്ങര സുലൈമാന്‍, ആറ്റിങ്ങല്‍ സുരേഷ് തുടങ്ങിയവര്‍ സംസാരിച്ചു. വിവിധ മേഖലയില്‍ മികവു പുലര്‍ത്തിയ വ്യക്തികളെ ആദരിച്ചു. ചില്‍ഡ്രന്‍സ് ഹോമിലെ കുട്ടികള്‍ക്കും അംഗങ്ങള്‍ക്കുമായി വിവിധ കലാകായിക മത്സരങ്ങള്‍ നടത്തി വിജയികള്‍ക്ക് സമ്മാനങ്ങളും നല്‍കി. ദേശീയ മലയാള വേദിയുടെ ഗായകര്‍ ഒരുക്കിയ ഗാനവിരുന്നും, നൃത്തവും ഉണ്ടായിരുന്നു. വൈകുന്നേരം പനച്ചമൂട് ഷാജഹാന്‍റെ അധ്യക്ഷതയില്‍ നടന്ന സമാപനസമ്മേളനം സൂപ്രണ്ട് ബിനു ജോണ്‍ ഉദ്ഘാടനം ചെയ്തു. അഡ്വ. ഫസീഹ റഹീം, മുജീബ് റഹ്മാന്‍, അഡ്വ. ജയകുമാരന്‍, വിഴിഞ്ഞം ലത്തീഫ് എന്നിവര്‍ പ്രസംഗിച്ചു. സമ്മാനവിതരണവും നടന്നു.

വെളിയംകോട് ഹോളിക്രോസ് ദേവാലയത്തിലെ ഗ്രോട്ടോയും കുരിശടിയും തകര്‍ത്ത് മോഷണം

മാറനല്ലൂരിൽ വീണ്ടും മോഷണം മാറനല്ലൂർ: മാറനല്ലൂരില്‍ വീണ്ടും മോഷണം. വെളിയംകോട് ഹോളി ക്രോസ് ദേവാലയത്തിലെ ഗ്രോട്ടോയും കുരിശടിയും തകര്‍ത്താണു മോഷണം നടത്തി യത്. പണം നഷ്ടപ്പെട്ടിട്ടുണ്ടോ എന്ന് കമ്മറ്റി അംഗങ്ങള്‍ പരിശോധിച്ചു വരികയാണ്. മാറനല്ലൂർ പോലിസിൽ പരാതി നൽകി. കഴിഞ്ഞ ദിവസം മേലാരിയോട് മദര്‍ തെരേസ നഗറിലെ രവീന്ദ്രന്‍റെ വീട്ടില്‍നിന്ന് 13 പവന്‍റെ ആഭരണങ്ങള്‍ മോഷ്ടാവ് കൊണ്ടു പോയിരുന്നു. ആഴ്ചകൾക്ക് മുൻപ് സപ്ലൈക്കോ ഉൾപ്പെടെ സ്ഥാപനങ്ങളിലും നിരവധി വീടുകളിലും മോഷണവും മോഷണ ശ്രമവും നടന്നിരുന്നു. ഒരു മാസമായി പ്രദേശത്ത് 15-ാമത്തെ മോഷണമാണിത്. കഴിഞ്ഞ ദിവസമാണ് ആളില്ലാത്ത വീടു കുത്തിത്തുറന്ന് 13 പവൻ കവർന്നത് . മാറനല്ലൂർ മേലാരിയോട് ഹരിലയത്തിൽ വിമുക്തഭടൻ ഹരീന്ദ്രന്‍റെ വീട്ടിലാണ് മോഷണം നടന്നത്. ഹരീന്ദ്രനും ഭാര്യയും മകനും മരുമകളുമാണ് വീട്ടിൽ താമസിക്കുന്നത്. ഹരീന്ദ്രനും ഭാര്യയും നെയ്യാർ മേള കാണുന്നതിനുവേണ്ടി നാലുമണിയോടുകൂടി വീട്ടിൽനിന്നിറങ്ങി. പിന്നാലെ മകനും മരുമകളും ഒരു വിവാഹചടങ്ങിൽ പങ്കെടുക്കാനും പോയി. എട്ടുമണിയോടെ വീട്ടിലെത്തിയപ്പോഴാണ് ഗേറ്റ് അകത്തുനിന്നു പൂട്ടിയ നിലയിൽ കണ്ടത്. അകത്തു കയറിയപ്പോൾ വീടിന്‍റെ മുൻവശത്തുള്ള വാതിലും തുറക്കാനായില്ല. ഇതേത്തുടർന്നു നടത്തിയ അന്വേഷണത്തിലാണു പിന്നിലെ വാതിൽ തുറന്നുകിടക്കുന്നതു കണ്ടത്. അകത്തുകയറി പരിശോധിച്ചപ്പോഴാണ് മുറിയിലുള്ള അലമാരകളെല്ലാം തുറന്നിട്ട നിലയിൽ കണ്ടത്. അലമാരയിൽ സൂക്ഷിച്ചിരുന്ന 13 പവനോളം സ്വർണം നഷ്ടപ്പെട്ടെന്നാണ് ഹരീന്ദ്രൻ മാറനല്ലൂർ പോലീസിൽ നൽകിയ പരാതിയിൽ പറയുന്നത്. ഒരു മാസത്തിനിടെ മാറനല്ലൂരിൽ സമാനരീതിയിൽ നിരവധി മോഷണങ്ങൾ നടന്നു. കൂവളശേരിയിലും ചെന്നിയോട്ടും വീടിന്‍റെ പിൻവശത്തെ വാതിൽ പൊളിച്ചാണ് മോഷ്ടാക്കൾ അകത്തുകയറിയത്. മുൻവശത്തെ വാതിൽ അകത്തുനിന്നു പൂട്ടിയ ശേഷമാണ് മോഷണം നടത്തുന്നത്. പെട്ടെന്നു വീട്ടുടമസ്ഥൻ എത്തിയാൽ പിൻവശത്തുകൂടി കടന്നുകളയുന്നതിനുവേണ്ടിയാണ് ഇത്തരത്തിൽ മോഷണം നടത്തുന്നതെന്നു സംശയിക്കുന്നു. ഇവിടെ അടുത്തിടെ നടന്ന മോഷണങ്ങളിൽ കണ്ടലയിലെ മൊബൈൽ കട കുത്തിത്തുറന്നു മോഷണം നടത്തിയ രണ്ടുപേരിൽ ഒരാളെ മാത്രമാണു പോലീസിനു പിടിക്കാൻകഴിഞ്ഞത്.

വേണ്ടത്ര ഡോക്ടർമാരും ജീവനക്കാരും ഇല്ലാതെ നേമം താലൂക്ക് ആശുപത്രി

പദവി പേരിലുമാത്രം ഒതുങ്ങി നേമം: താലൂക്ക് ആശുപത്രിയായി പദവി ലഭിച്ച് വര്‍ഷങ്ങളായിട്ടും ഇപ്പോഴും വേണ്ടത്ര ഡോക്ടര്‍മാരും ജീവനക്കാരുമില്ലാതെ നേമം താലൂക്ക് ആശുപത്രി. കോര്‍പ്പറേഷന്‍റെ ഭാഗമായ നേമം മേഖലയിലെ പൊന്നുമംഗലം, നേമം, മേലാംകോട്, പാപ്പനംകോട്, എസ്റ്റേറ്റ് വാര്‍ഡുകളിലേയും സമീപ പഞ്ചായത്തുകളായ കല്ലിയൂര്‍, പള്ളിച്ചല്‍ എന്നിവിടങ്ങളിൽ നിന്നുമുള്ള സാധാരണക്കാരായ നൂറുകണക്കിന് രോഗികള്‍ ചികിത്സയ്ക്കായി എത്തുന്നത് ഇവിടെയാണ്. ദിവസവും അഞ്ഞൂറിലധികം രോഗികള്‍ ഒപിയിലെത്തുന്നുണ്ട്. വേണ്ടുന്ന ജീവനക്കാരുടെയും ഡോക്ടര്‍മാരുടെയും എണ്ണത്തില്‍ പകുതിയില്‍ താഴെ മാത്രമാണ് ഇപ്പോൾ ആശുപത്രിയിലുള്ളത്. ഈ അവസ്ഥയില്‍ രോഗികള്‍ക്ക് നല്ല ചികിത്സ ലഭിക്കുന്നില്ലെന്ന പരാതിയുമുണ്ട്. ഉച്ച വരെയുള്ള ഒപി കഴിഞ്ഞാല്‍ വൈകുന്നേരം ഒരു ഡോക്ടറുടെ സേവനം മാത്രമാണ് അത്യാഹിത വിഭാഗത്തില്‍ ലഭിക്കുന്നത്. പനി ബാധിതരുടെ എണ്ണം കൂടിയപ്പോള്‍ വൈകുന്നേരവും രാത്രിയിലും രോഗികൾക്കു ഫലപ്രദമായ ചികിത്സ കിട്ടാതെ വന്നിരുന്നു. ദേശീയപാതയില്‍ നെയ്യാറ്റിന്‍കര കഴിഞ്ഞാല്‍ നഗരത്തില്‍ പ്രവേശിപ്പിക്കുന്നതിനു മുമ്പുള്ള ഏക സര്‍ക്കാര്‍ ആശുപത്രിയാണിത്. രാത്രിയില്‍ അപകടങ്ങളോ മറ്റോ സംഭവിച്ച് ആശുപത്രിയിലെത്തിയാല്‍ ഒരു ഡോക്ടറുടെ സേവനം മാത്രമാണ് ലഭിക്കുന്നത്. രാത്രി ഡ്യൂട്ടിക്ക് രണ്ട് ഡോക്ടര്‍മാരെയെങ്കിലും നിയമിക്കണമെന്ന ആവശ്യവും ശക്തമാണ്. ഗൈനക്കോളജി യില്‍ പുതിയ നിയമനമായിട്ടില്ല. ജനറല്‍ ഡ്യൂട്ടി ചെയ്യുന്ന ഡോക്ടര്‍മാര്‍ക്ക് തന്നെ അത്യാഹിത വിഭാഗത്തിലും ജോലി നോക്കേണ്ടി വരുന്നത് പലപ്പോഴും ബുദ്ധിബുട്ടുകളുണ്ടാക്കുന്നു. സ്‌പെഷലിസ്റ്റ് ഡോക്ടര്‍മാരുടെ കുറവും രോഗികളെ വലയ്ക്കുന്നുണ്ട്. ആശുപത്രി വികസനത്തിനായി 30 കോടി രൂപയുടെ അടിസ്ഥാന സൗകര്യ പദ്ധതി നടന്നുവരികയാണ്. രണ്ടു ബഹുനില കെട്ടിടങ്ങളും മറ്റ് ആധുനിക സൗകര്യങ്ങളും വികസന പദ്ധതിയിലുണ്ട്. നബാര്‍ഡ് ധനസഹായത്തോടെ 22.24 കോടി രൂപ ചെലവാക്കി ആറു നിലകളുള്ള കെട്ടിടവും എന്‍എച്ച്എമ്മിന്‍റെ ധനസഹായത്തോടെ എട്ടുകോടി രൂപ ചെലവാക്കി നിർമിക്കുന്ന മൂന്നുനില കെട്ടിടവും ഉള്‍പ്പെട്ടതാണ് ഈ പദ്ധതി. നിർമാണം പൂർത്തിയാക്കാൻ ഒരു വര്‍ഷമെങ്കിലും എടുത്തേക്കും.

ബുള്ളറ്റ് ഇടിച്ചുകയറി ആറുപേർക്ക് പരിക്കേറ്റു

പോത്തൻകോട്: ബുള്ളറ്റ് ഇടിച്ചുകയറി ആറുപേർക്കു പരിക്കേറ്റു. മങ്ങാട്ടുക്കോണം സ്വദേശികളായ സാജൻ (23), വിഷ്ണു (30), നിതിൻ (38), സുമേഷ് (39), സജു (37) നും ആറുമാസം പ്രായമുള്ള കുഞ്ഞിനുമാണു പരിക്കേറ്റത്. മങ്ങാട്ടുക്കോണം തമ്പുരാൻ ബ്രദേഴ്സിന്‍റെ ഓണാഘോഷ പരിപാടിയുടെ ഭാഗമായി നടന്ന വടംവലി മത്സരത്തിന് ഇടയിലേക്കാണ് നരിക്കൽ സ്വദേശി അമൽ എന്നയാൾ ഓടിച്ച ബുള്ളറ്റ് ഇടിച്ചു കയറിയത്. സജന്‍റെ തുടയെല്ലിനും കാൽമുട്ടുകൾക്കും പൊട്ടലുണ്ട്. വിഷ്ണുവിന്‍റെ തലയ്ക്കാണ് ഗുരുതര പരിക്കേറ്റത്. ഇരുവരേയും സ്വകാര്യ ആശുപത്രിയിൽ പ്രവേശിപ്പിച്ചു. നിതിൻ, സുമേഷ്, സച്ചു എന്നിവർ മെഡിക്കൽ കോളജ് ആശുപത്രിയിലാണു ചികിത്സയിലുള്ളത്. ആറുമാസം പ്രായമുള്ള കുഞ്ഞിനെ മെഡിക്കൽ കോളജ് എസ്എടി ആശുപത്രിയിൽ പ്രവേശിപ്പിച്ചു. അമലിനും തലയ്ക്കും കൈകാലുകൾക്കും പരിക്കേറ്റു. പോത്തൻകോട് പോലീസ് കേസെടുത്തു.

ജഗതിയില്‍ പെയിന്‍റ് റോഡില്‍ വീണു; ബൈക്ക് യാത്രികര്‍ തെന്നിവീണു

പേരൂര്‍ക്കട: ജഗതി-ഇടപ്പഴിഞ്ഞി റോഡില്‍ പെയിന്‍റ് റോഡില്‍ വീണത് വാഹനയാത്ര ദുഷ്‌കരമാക്കി. ഇന്നലെ പകല്‍സമയത്താണ് അജ്ഞാത വാഹനത്തില്‍ കൊണ്ടുപോകുകയായിരുന്ന 20 ലിറ്റര്‍ പെയിന്‍റ് റോഡില്‍ വീണത്. വാഹനയാത്ര തടസപ്പെട്ടതോടെ തിരുവനന്തപുരം ഫയര്‍‌സ്റ്റേഷനില്‍നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ ഷഹീര്‍, ഓഫീസര്‍മാരായ രാഹുല്‍, ഫിറോസ് ഖാന്‍, രശ്മി, അഖില, എഫ്ആര്‍ഒ ഡ്രൈവര്‍ സജി എന്നിവര്‍ ചേര്‍ന്ന് റോഡില്‍നിന്നു പെയിന്‍റ് നീക്കം ചെയ്തു. മ്യൂസിയത്ത് ജനമൈത്രി സ്റ്റേഷനു സമീപം വാഹനത്തില്‍നിന്ന് ഓയില്‍ ചോര്‍ന്നു. രണ്ടുബൈക്ക് യാത്രക്കാ ര്‍ റോഡില്‍ തെന്നിവീണു. തിരുവനന്തപുരത്തുനിന്ന് ഫയര്‍ഫോഴ്‌സ് സംഘമെത്തിയാണ് വെള്ളം ചീറ്റി ഓയില്‍ റോഡില്‍നിന്നു നീക്കിയത്.

കാടുപിടിച്ച പുരയിടത്തിൽ തീപിടിത്തം

വിഴിഞ്ഞം: കാടു പിടിച്ചു കിടന്ന പുരയിടത്തിൽ തീ പിടിത്തമുണ്ടായി. ആളിപ്പടർന്ന തീ സമീപത്തെ വീടുകളെ ബാധിക്കുന്ന അവസ്ഥയിലായി. വിഴിഞ്ഞത്തുനിന്നു ഫയർഫോഴ്സെത്തി തീയണച്ചതിനാൽ അപകടം ഒഴിവായി. പരിഭ്രാന്തിയിലായ ജനം പ്രതിഷേധവുമായിരംഗത്തെത്തി. വിഴിഞ്ഞം കല്ലുവെട്ടാൻ കുഴി ടർഫിനു പുറകുവശത്തുള്ള പ്രിൻസ് എന്നയാളുടെ ആളൊഴിഞ്ഞ പുരയിട ത്തിനാണ് ഇന്നലെ വൈകുന്നേരം മൂന്നോടെ തീപടർന്നത്. കാടു കത്തുന്ന ശബ്ദവും തീയും പുകയും കണ്ട് പേടിച്ച നാട്ടുകാർ ഫയർഫോഴ്സി നെവിവരമറിയിച്ചു. ഫയർഫോഴ്സ് എത്തിയെങ്കിലും വാഹനം കടന്നുപോകാൻ പാകത്തിൽ റോഡില്ലായിരുന്നതും പ്രശ്നമായി. തുടർന്ന് സ്ഥലത്തു നടന്നെ ത്തിയ അധികൃതർ എറെ പണിപ്പെട്ടു തീയണച്ചു. വസ്തുവിന്‍റെ ഉടമസ്ഥൻ തീയിട്ടതാണ് പ്രശ്നങ്ങൾക്ക് കാരണമെന്നു നാട്ടുകാർ ആരോപിച്ചു. മുകളിൽ കൂടി വിഴിഞ്ഞം അന്താരാഷ്ട്ര തുറമുഖ സബ് സ്റ്റേഷനിൽ വൈദ്യുതി എത്തിക്കാനുള്ള ലൈൻ കടന്നുപോയിരുന്നതും ആശങ്കക്കിടവരുത്തിയതായി.

പെൺകുട്ടികളും യുവാവും അബോധാവസ്ഥയിൽ; നാട്ടുകാർ ആശുപത്രിയിലെത്തിച്ചു

നെടുമങ്ങാട്: വെള്ളച്ചാട്ടത്തിനു സമീപം അബോധാവസ്ഥയിൽ കണ്ടെത്തിയ മൂന്നു പെൺകുട്ടികളെയും ഒരു ആൺകുട്ടിയെയും നാട്ടുകാരും പോലീസും ചേർന്ന് ആശുപത്രിയിൽ പ്രവേശിപ്പിച്ചു. ഇന്നലെ രാവിലെ 11.30-ഓടെ ഇരിഞ്ചയം കൈരളി നഗറിനു സമീപമാണ് ഇവരെ കണ്ടെത്തിയത്. രണ്ടു ടൂവീലറിലായി കൈരളി നഗറിലെ വെള്ളച്ചാട്ടം കാണാൻ എത്തിയതായിരുന്നു എല്ലാവരും. നാട്ടുകാർ അറിയിച്ചതനുസരിച്ച് നെടുമങ്ങാട് പോലീസ് ജില്ലാ ആശുപത്രിയിലെത്തിച്ചു. പ്രാഥമിക ശുശ്രൂഷകൾക്കു ശേഷം തിരുവനന്തപുരം മെഡിക്കൽ കോളജ് ആശുപത്രിയിലേയ്ക്ക് മാറ്റി.പൊഴിയൂർ, അമ്പലത്തറ സ്വദേശികളായ 18 വയസുകാരെയാണ് അവശനിലയിൽ കണ്ടെത്തിയത്.

സഹോദരങ്ങളെ ഇടിച്ചിട്ട കാര്‍ നിര്‍ത്താതെ പോയി; ഒരാള്‍ പരിക്കേറ്റു ചികിത്സയില്‍

മ്യൂസിയം പോലീസ് അന്വേഷണം തുടങ്ങി പേരൂര്‍ക്കട: സ്‌കൂട്ടറില്‍ സഞ്ചരിക്കുകയായിരുന്ന സഹോദരങ്ങളെ ഇടിച്ചിട്ട കാര്‍ നിര്‍ത്താതെ പോയി. പിറകേ വന്ന മറ്റൊരു കാറിലുണ്ടായിരുന്നവര്‍ ഇരുവരെയും പട്ടം കോസ്‌മോ ആശുപത്രിയില്‍ പ്രവേശിപ്പിച്ചു. കഴിഞ്ഞ ശനിയാഴ്ച ഉച്ചയ്ക്ക് ഒരുമണിയോടുകൂടി നന്തന്‍കോട്ടെ ഒരു ഹോട്ടലിനു സമീപമായിരുന്നു സംഭവം. പേരൂര്‍ക്കട ഹിന്ദുസ്ഥാന്‍ ലാറ്റക്‌സിനു സമീപം താമസിക്കുന്ന എസ്.എസ്. സുനിത, ഇവരുടെ സഹോദരന്‍ വട്ടിയൂര്‍ക്കാവ് പുതൂര്‍ക്കോണം സ്വദേശി എസ്.എസ് സുനില്‍ എന്നിവരെയാണ് കാര്‍ ഇടിച്ചിട്ടത്. കാര്‍ ഓടിച്ചിരുന്നയാള്‍ വാഹനം നിര്‍ത്തി അപകടം വീക്ഷിച്ചശേഷം യാതൊന്നും പ്രതികരിക്കാതെ വാഹനം ഓടിച്ചുപോകുകയായിരുന്നു. ഇതിനു പിറകേയെത്തിയ മറ്റൊരു കാറിലുണ്ടായിരുന്നവരാണ് ഇരുവരെയും ആശുപത്രിയില്‍ എത്തിച്ചത്. സുനിതയുടെ മകന്‍ അതിന്‍ എസ്. പ്രസാദ് വയറുവേദനയെ തുടര്‍ന്ന് കോസ്‌മോ ആശുപത്രിയില്‍ ചികിത്സയിലായിരുന്നു. മകന്‍റെ സാധനസാമഗ്രികള്‍ വീട്ടില്‍നിന്ന് എടുക്കുന്നതിനു പേരൂര്‍ക്കടയിലേക്ക് പോകുന്നതിനിടെയാണ് സുനിലും സുനിതയും സഞ്ചരിച്ചിരുന്ന സ്‌കൂട്ടറിനു പിറകില്‍ കാര്‍ വന്നിടിക്കുന്നത്. വീഴ്ചയില്‍ സാരമായി പരിക്കേറ്റത് സുനിലിനാണ്. സംഭവത്തെ തുടര്‍ന്ന് ഇരുവരും മ്യൂസിയം സ്റ്റേഷനിലെത്തി പരാതി നല്‍കുകയായിരുന്നു. അപകടത്തില്‍ ഏറെക്കുറെ തകര്‍ന്ന സ്‌കൂട്ടര്‍ മരുതംകുഴിയിലെ വര്‍ക്‌ഷോപ്പിലേക്കു മാറ്റി. മ്യൂസിയം പോലീസ് കേസെടുത്ത് അന്വേഷണം ആരംഭിച്ചു.

മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിനു കൊടിയേറി

നെയ്യാറ്റിന്‍കര: മദര്‍ തെരേസയുടെ നാമഥേയത്തിലെ ലോകത്തിലെ ആദ്യ ദേവാലയമായ നെയ്യാറ്റിന്‍കര രൂപതയിലെ മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിനു തുടക്കയി. ഇടവക വികാരി ഫാ. കെ. പി. ജോണ്‍ കൊടിയേറ്റുകര്‍മം നിര്‍വഹിച്ചു. ഇന്നലെ പരിശുദ്ധ മാതാവിന്‍റെ ജനന തിരുനാള്‍ ദിനത്തില്‍ രാവിലെ ഒന്പതു മുതല്‍ ലീജിയന്‍ ഓഫ് മേരി സംഘടിച്ച അഖണ്ഡ ജപമാല നടന്നു. വൈകുന്നേരം ദിവ്യബലിയെ തുടര്‍ന്നു മാതാവിന്‍റെ തിരുസ്വരൂപം വഹിച്ച് ആഘോഷമായ തിരുസ്വരൂപ പ്രദക്ഷിണം സംഘടിപ്പിച്ചു. 13ന് വൈകുന്നേരം ദിവ്യബലിയെ തുടര്‍ന്ന് ആഘോഷമായ ചപ്രദക്ഷിണം നടക്കും. 14നു നടക്കുന്ന സമാപന ദിവ്യബലിയെ തുടര്‍ന്ന് ആഘോഷമായ ദിവ്യകാരുണ്യ പ്രദക്ഷിണം. നെയ്യാറ്റിന്‍കര രൂപതയിലെ വിവിധ വൈദികര്‍ തിരുകര്‍മങ്ങളില്‍ മുഖ്യകാര്‍മികത്വം വഹിക്കും. തിരുനാള്‍ ദിനങ്ങളില്‍ വൈ കുന്നേരം അഞ്ചുമുതല്‍ ബൈബിള്‍ പാരായണം, ജപമാല, ലിറ്റിനി, നൊവേന, ദിവ്യബലി എന്നിവ ഉണ്ടാവും. വിശുദ്ധ മദര്‍ തെരേസയുടെ തിരുശേഷിപ്പു വണങ്ങി പ്രാര്‍ഥിക്കാനുള്ള പ്രത്യേക ക്രമീകരണം ഒരുക്കിയിട്ടുണ്ടെന്നു ഇടവക വികാരി ഫാ. കെ.പി. ജോണ്‍ അറിയിച്ചു.

ഓണം വാരാഘോഷം ഇന്നു സമാപിക്കും

ഘോഷയാത്ര വൈകുന്നേരം നാലിന് തിരുവനന്തരം: ഓണപ്പൊലിമയ് ക്കു നിറച്ചാർത്തേകി താളമേളങ്ങളും കലാരൂപങ്ങളും അണിനിരക്കുന്ന ഘോഷയാത്രയോടെ സംസ്ഥാന സർക്കാരിന്‍റെ ഓണം വാരാഘോഷത്തിന് ഇന്നു സമാപനം. വൈകുന്നേരം നാലിനു വെള്ളയന്പലത്തുനിന്ന് ആരംഭിക്കുന്ന സാംസ്കാരിക ഘോഷയാത്ര കിഴക്കേകോട്ടയിൽ അവസാനിക്കും. ഗവർണർ രാജേന്ദ്ര വിശ്വനാഥ അർലേക്കർ ഫ്ളാഗ് ഓഫ് നിർവഹിക്കും. ഘോഷയാത്രയുടെ വരവ് അറിയിച്ചുകൊണ്ട് 51 കലാകരന്മാർ ശംഖനാദം മുഴക്കുകയും തുടർന്നു വാദ്യോപകരണമായ കൊന്പ്, ടൂറിസം മന്ത്രി പി.എ. മുഹമ്മദ് റിയാസ് മുഖ്യ കലാകാരനു കൈമാറിക്കൊണ്ട് സാംസ്കാരിക ഘോഷയാത്രയുടെ താളമേളങ്ങൾക്ക് തുടക്കം കുറിക്കുകയും ചെയ്യും. വർണ വൈവിധ്യങ്ങൾക്കൊപ്പം ആട്ടവും പാട്ടുമായി 91 കലാരൂപങ്ങളാണ് ഇക്കുറി ഓണം ഘോഷയാത്രയിൽ അണിനിരക്കുക. കേരളീയതയുടെ സംസ് കൃതി പ്രകാശിപ്പിക്കുന്ന അനുഷ്ഠാന കലകൾ, ഗോത്രകലകൾ, നാടൻ കലകൾ, ക്ലാസിക്കൽ കലാരൂപങ്ങൾ, പുതുകാലത്തിന്‍റെ ജനകീയകലകൾ എന്നീ അവതരണങ്ങൾക്കൊപ്പം ഭാരത് ഭവന്‍റെ നേതൃത്വത്തിൽ ജാർഖണ്ഡ്, ഉത്തർപ്രദേശ്, മധ്യപ്രദേശ്, മഹാരാഷ്ട്ര, ആന്ധ്രാപ്രദേശ്, തെലുങ്കാന, കർണാടക, തമിഴ്നാട് എന്നീ സംസ്ഥാനങ്ങളിൽ നിന്നുള്ള ഇന്ത്യൻ ഗ്രാമീണ കലകളും നാനാത്വത്തിൽ ഏകത്വം എന്ന പ്രമേയത്തെ മുൻനിർത്തി ഘോഷയാത്രയിൽ ഒത്തുചേരും. ഇന്ത്യയിലെ എട്ട് ക്ലാസിക്കൽ നൃത്തരൂപങ്ങൾ കേരളത്തിന്‍റെ മുടിയേറ്റ്, തെയ്യം, പടയണി, ഗൊപ്പിയാളനൃത്തം, മംഗലംകളി, ഇരുളനൃത്തം, രുധിരക്കോലം, അലാമിക്കളി, വനിതാകോൽക്കളി, പാവപ്പൊലിമകൾ, ട്രാൻസ് ജെൻഡേഴ്സ് സംഘം അവതരിപ്പിക്കുന്ന അർദ്ധനാരീനൃത്തം, മുറം ഡാൻസ്, ഉലക്ക ഡാൻസ്, പള്ളിവാൾനൃത്തം, മാവേലിയും ഓണപ്പാട്ടുകളും, പുലികളി, കുമ്മാട്ടി, വേലകളി, ഓണപ്പൊട്ടൻ, കാളയും തേരും, കന്പേറ്, മയൂര നൃത്തം, 10 അടി ഉയരമുള്ള കാരിക്കേച്ചർ രൂപങ്ങൾ, ശലഭ, അരയന്ന, മുയൽ നൃത്തങ്ങൾ തുടങ്ങി ഒരു കാലഘട്ടത്തിന്‍റെ ഓർമ്മയായ സൈക്കിൾ യജ്ഞമടക്കം കാണികൾക്ക് ദൃശ്യവിരുന്നാകും. ഗ്രീൻ പ്രോട്ടോകോൾ പാലിച്ചുകൊണ്ടാണ് ഫ്ളോട്ടുകൾ വിഭാവനം ചെയ്തിരിക്കുന്നത്. പബ്ലിക് ലൈബ്രറിക്കു മുന്നിൽ ഘോഷയാത്ര വീക്ഷിക്കുന്നതിന് ഒരുക്കിയിട്ടുള്ള വിവിഐപി പവലിയനു മുന്നിലും യൂണിവേഴ്സിറ്റി കോളജിനു മുൻവശത്തെ വിഐപി പവലിയന് മുന്നിലും മ്യൂസിയം ഗേറ്റിന് സമീപത്തെ പ്രത്യേക സ്റ്റേജിലും കലാരൂപങ്ങൾ അവതരിപ്പിക്കും. ഘോഷയാത്രയിൽ പങ്കെടുക്കുന്നവരും കാണികളും ഹരിത ചട്ടം പാലിക്കണമെന്ന് ഓണം വാരാഘോഷവുമായി ബന്ധപ്പെട്ട ഗ്രീൻ പ്രോട്ടോക്കോൾ കമ്മിറ്റി അഭ്യർഥിച്ചു.

നെയ്യാറ്റിൻകരയിലെ ബൈപ്പാസ് റോഡിൽ സുരക്ഷാവേലി വേണമെന്ന ആവശ്യം ശക്തമാകുന്നു

പൂവാർ: നെയ്യാറിന്‍റെ കരയിൽ അവസാനിക്കുന്ന ബൈപ്പാസ് സർവീസ് റോഡിനു ശക്തമായ സുരക്ഷാവേലിയും മുന്നറിയിപ്പു സംവിധാനങ്ങളും വേണമെന്ന ആവശ്യം ശക്തമാകുന്നു. വഴിയറിയാതെ എത്തുന്ന നിരവധി വാഹനങ്ങൾ നെയ്യാറിലേക്ക് പതിക്കാതെ രക്ഷപ്പെട്ടതു തലനാരിഴക്കെന്നു നാട്ടുകാർ പറയുന്നു. ആറുവരിപ്പാതയായ കോവളം കാരോട് ബൈപ്പാസ് നെയ്യാറിന്‍റെ കരയിൽ നാലു വരിപ്പാതയായി ചുരുക്കിയതാണ് പൊതുജനത്തിനു തിരിച്ചടിയായത്. ഇരുവശത്തുമായി കടന്നുപോകാനുള്ള സർവീസ് റോഡുകളെ ആറിന്‍റെ കരയിൽ അവസാനിപ്പിച്ചു. എന്നാൽ പതിയിരിക്കുന്ന അപകടമറിയാതെ വരുന്ന വാഹനങ്ങൾക്ക് സുരക്ഷയൊരുക്കുന്ന കാര്യത്തിലും അധികൃതർ അലംഭാവം കാണിച്ചു. ആറിന്‍റെ കരയോടു ചേർന്നു രണ്ടടി മാത്രം പൊക്കമുള്ള ബാരിക്കേട് സ്ഥാപിച്ച അധികൃതർ തൊട്ടടുത്തായി റോഡ് അവസാനിക്കുന്നു എന്ന് എഴുതിയ ഒരു ചെറിയ ബോർഡും സ്ഥാപിച്ചു. ചെങ്കൽ, തിരുപുറം പഞ്ചായത്തുകളുടെ പ്രധാന അതിർത്തിയാണ് നെയ്യാർ. ഇരുകരകളെയും പാലം നിർമിച്ച് ബന്ധിപ്പിക്കുന്നതിനു പകരം സർലീസ് റോഡ് കട്ട് ചെയ്ത് ദേശീയപാതാ ഉദ്യോഗസ്ഥർ സമീപത്തെ ബണ്ട് റോഡുമായി ബന്ധിപ്പിച്ചു. കിഴക്കുഭാഗത്തുനിന്ന് സർവീസ് റോഡുവഴിവരുന്ന വാഹനങ്ങൾ ആറിന്‍റെ കരയിൽ എത്തുമ്പോഴാണ് മറുകരയെത്താനുള്ള റോഡില്ലെന്ന കാര്യമറിയുന്നത്. അവിടെനിന്ന് ബണ്ട് റോഡിൽ ചെറിയ വാഹനങ്ങൾക്ക് പ്രവേശിക്കാൻ മേൽ പാലത്തിനടിയിലൂടെ ഇടിഞ്ഞ് പൊളിഞ്ഞ ആറടിപ്പാത അനുവദിച്ചു നൽകി. കാറുകൾക്കു പോലും ഇതുവഴി കടന്നുപോകാൻ പറ്റില്ലെന്നു നാട്ടുകാർ പറയുന്നു. നിലവിൽ ഇവിടെ ഗതാഗതം ഒറ്റവരിയിലായി ചുരുങ്ങി. കഴിഞ്ഞ മഴയിൽ ആറ്റിലുണ്ടായ വെള്ളപ്പൊക്കത്തിൽ പാലത്തോടു ചേർന്ന ബണ്ട് റോഡിന്‍റെ ഒരു ഭാഗം ഇടിഞ്ഞു താണതുംഅപകടത്തിന്‍റെ തോത് വർധിപ്പിച്ചു. ലോകത്തെ ഏറ്റവും വലിയ ശിവലിംഗ നിർമിതിയുള്ള ചെങ്കൽ ശിവക്ഷേത്രവും നെയ്യാറ്റിൻകര രൂപതയിലെ പ്രമുഖ തീർഥാടന കേന്ദ്രമായ വ്ലാത്താങ്കര മാതാവിന്‍റെ പള്ളിയും സന്ദർശിക്കാൻ മറ്റു സംസ്ഥാനങ്ങളിൽനിന്നു നിരവധി വാഹനങ്ങളിൽ ആളുകൾ എത്തുന്നുണ്ട്. ഈ വാഹനങ്ങൾ ബൈപ്പാസിൽ പ്രവേശിക്കണമെങ്കിൽ ബണ്ട് റോഡിൽ നാലു ലോമീറ്ററോളം ചുറ്റണം. നിരപ്പായ റോഡു കണ്ടു വേഗത്തിൽ വരുന്ന വാഹനങ്ങൾ അപകടം മനസിലാക്കി വെട്ടിച്ചവിട്ടി രക്ഷപ്പെടുകയാണ് പതിവ്. കണ്ണൊന്നു തെറ്റിയാൽ ആഴമേറിയ നെയ്യാറിലേക്കു പതിച്ചു വൻ അപകടമുണ്ടാകുമെന്നും നാട്ടുകാർ പറയുന്നു. ഇതിനെതിരെ പരാതികൾ നിരവധി ഉണ്ടായെങ്കിലും അപകട സൂചന നൽകുന്ന ലൈറ്റുകൾ സ്ഥാപിക്കാനോ, ബാരികകേഡുകൾ ശക്തിപ്പെടുത്തുന്നതിനേ മുന്നറിയിപ്പു ബോർഡുകൾ സ്ഥാപിക്കാനോ അധികൃതർ തയാറായില്ലെന്നും ആക്ഷേപം ഉയരുന്നു. സർവീസ് റോഡ് മുറിച്ചതോടെ നെയ്യാറിന്‍റെ ഇരുകരയിലുമുള്ള നാട്ടുകാരുടെ പരസ്പര ബന്ധവും ഇല്ലാതാക്കി. കഷ്ടിച്ചു നൂറു മീറ്റർ മാത്രം വീതിയുള്ള നെയ്യാറിന്‍റെ ഇരുകരകളും താണ്ടാൻ പൊതുജനം നാലു കിലോമീറ്റർ വരെ ദൂരം ചുറ്റണമെന്ന അവസ്ഥയിലായി. തലമുകളായി ഇവിടെ ഉണ്ടായിരുന്ന കടത്തുവള്ളവും അധികൃതർ ഇല്ലാതാക്കി ജനത്തെ ഒറ്റപ്പെടുത്തി.

മദ്യപാനം ചോദ്യം ചെയ്ത യുവാവിനും കുടുംബത്തിനും കുത്തേറ്റു

ശ്രീകാര്യം: മദ്യപാനം ചോദ്യം ചെയ്ത ഗൃഹനാഥനുൾപ്പെടെ നാലുപേർക്ക് കുത്തേറ്റു. പൗഡിക്കോണത്താണ് സംഭവം. പുതുവൽ പുത്തൻവീട്ടിൽ രാജേഷ് (40), സഹോദരൻ രതീഷ് (35), രാജേഷിന്‍റെ മകൾ പ്രിൻസി (19), രഞ്ജിത്ത് (35) എന്നിവർക്കാണ് കുത്തേറ്റത്. ഇവരെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. വീടിന് മുന്നിൽ ഒരുസംഘം ആളുകൾ സ്ഥിരമായി മദ്യപിക്കുകയും പരസ്പരം ചീത്തവിളിച്ചു ബഹളംവയ്ക്കുകയും ചെയ്തിരുന്നത് രാജേഷ് ചോദ്യം ചെയ്തിരുന്നു. ഇതിന്‍റെ പ്രതികാരമായി ഞായറാഴ്ച മൂന്നുപേർ രാജേഷിനേയും കുടുംബത്തേയും ആക്രമിക്കുകയായിരുന്നു. സംഭവത്തിൽ പനങ്ങോട്ടുകോണം സ്വദേശികളായ സഞ്ചയ് (21), രജിത (40), കണ്ടാലറിയാവുന്ന മൂന്നു പേർ എന്നിവർക്കെതിരെ പോലിസ് കേസെടുത്തു.

യൂത്ത് കോണ്‍ഗ്രസ് സെക്രട്ടേറിയറ്റ് മാര്‍ച്ചില്‍ സംഘര്‍ഷം

തിരുവനന്തപുരം: സെക്രട്ടേറിയറ്റിനുമുന്നില്‍ യൂത്ത് കോണ്‍ഗ്രസ് പ്രവര്‍ത്തകര്‍ നടത്തിയ മാര്‍ച്ചില്‍ സംഘര്‍ഷം. സെക്രട്ടേറിയറ്റ് സമരഗേറ്റിനു മുന്നില്‍ തുടങ്ങിയ പ്രതിഷേധം പിന്നീട് ആസാദ് ഗേറ്റിനു മുന്നിലേക്കും വ്യാപിച്ചു. ഇതിനിടെ പ്രവര്‍ത്തകര്‍ സെക്രട്ടേറിയറ്റിന്‍റെ മതില്‍ചാടി അക ത്ത് കടക്കാൻ ശ്രമിച്ചത് സംഘര്‍ഷത്തിന് ഇയടാക്കി. പോലീസും യൂത്ത്‌കോണ്‍ഗ്രസ് പ്രവര്‍ത്തകരും തമ്മില്‍ ഉന്തുംതള്ളും വാക്കേറ്റവും അരങ്ങേറി. യൂത്ത് കോണ്‍ഗ്രസ് സംസ്ഥാന നേതാക്കള്‍ ഉള്‍പ്പെടെ പ്രവര്‍ത്തകരെ പോലീസ് കസ്റ്റഡിയിലെടുത്തു. കേരളത്തിലെ പോലീസ് മര്‍ദനങ്ങളില്‍ പ്രതിഷേധിച്ചും മണ്ഡലം പ്രസിഡന്‍റ് സുജിത്തിനെ ആക്രമിച്ച പോലീസുകാരെ സര്‍വീസില്‍നിന്ന് നീക്കണമെന്നാവശ്യപ്പെട്ടുമാണ് യൂത്ത് കോണ്‍ഗ്രസ് പ്രതിഷേധ മാര്‍ച്ച് സംഘടിപ്പിച്ചത്. പ്രതിഷേധത്തിനിടെ ആറു യൂത്ത് കോണ്‍ഗ്രസ് പ്രവര്‍ത്തകരെ പോലീസ് കസ്റ്റഡിയിലെടുത്തു. കസ്റ്റഡിയിലെടുത്ത ജില്ലാ സെക്രട്ടറി ഷബിന്‍ ഹാഷിമിനെ ക്ലിഫ് ഹൗസിലേക്കു മാര്‍ച്ച് നടത്തിയ കേസില്‍ റിമാന്‍ഡ് ചെയ്യുകയും ചെയ്തു. ഇന്നലെ ഉച്ചയ്ക്ക് ഒന്നോടെ പാളയത്തുനിന്നും പ്രതിഷേധവുമായെത്തിയ പ്രവര്‍ത്തകരെ സമരഗേറ്റിനു മുന്നില്‍ പോലീസ് ബാരിക്കേ‍ഡ് ഉപയോഗിച്ച് തടഞ്ഞു. പ്രവര്‍ത്തകര്‍ ബാരിക്കേഡ് മറിച്ചിടാന്‍ ശ്രമിച്ചതോടെ പോലീസമായി ഉന്തുംതള്ളും അരങ്ങേറി. തുടര്‍ന്നു പ്രവര്‍ത്തകരെ തുരത്താന്‍ പോലീസ് മൂന്നു റൗണ്ട് ജലപീരങ്കി പ്രയോഗിച്ചു. ചിതറിയോടിയ പ്രവര്‍ത്തകര്‍ വീണ്ടും സംഘടിച്ചു. തുടര്‍ന്നാണ് സെക്രട്ടേറിയറ്റിന്‍റെ സുരക്ഷാഭിത്തി മറികടന്നും നോര്‍ത്ത് ഗേറ്റുവഴിയും അകത്തു കടക്കാന്‍ ശ്രമിച്ചത്. തുടര്‍ന്ന് സൗത്ത് ഗേറ്റിനു മുന്നില്‍ പ്രതിഷേധം തുടര്‍ന്നതോടെ പോലീസ് അറസ്റ്റ് നടപടികളിലേക്കു കടന്നു. ബാരിക്കേഡിന് ഒരുവശത്തുകൂടെ പ്രതിഷേധക്കാര്‍ സെക്രട്ടേറിയറ്റിനകത്തേക്കു കയറാന്‍ ശ്രമിച്ചതും പോലീസ് ചെറുത്തു. ഇതും സംഘര്‍ഷാവസ്ഥ രൂക്ഷമാക്കി. യൂത്ത് കോണ്‍ഗ്രസ് ജില്ല പ്രസിഡന്‍റ് നേമം ഷജീര്‍ അധ്യക്ഷത വഹിച്ച മാര്‍ച്ച് സംസ്ഥാന വൈസ് പ്രസിഡന്‍റ് ഒ.ജെ. ജെനീഷ് ഉദ്ഘാടനം ചെയ്തു. സംസ്ഥാന സെക്രട്ടറി സജിത് മുട്ടപ്പാലം, അഫ്‌സല്‍ ബാലരാമപുരം, ആര്‍.എസ്. വിപിന്‍, ഫൈസല്‍ നന്നാട്ടുക്കാവ് തുടങ്ങിയവര്‍ നേതൃത്വം നല്‍കി.

യുവതി ഫ്‌ളാറ്റില്‍ മരിച്ച നിലയിൽ

തിരുവനന്തപുരം: യുവതിയെ ഫ്‌ളാറ്റിനുളളില്‍ മരിച്ചനിലയില്‍ കണ്ടെത്തി. പോണ്ടിച്ചേരി കാരിക്കല്‍ മുക്കുളം സ്ട്രീറ്റ് 13ല്‍ അളകര്‍സാമിയുടെ മകള്‍ എ. അക്ഷയ (25) ആണ് മരിച്ചത്. തിങ്കളാഴ്ച രാവിലെ ഇവര്‍ താമസിച്ചുവന്ന ജനറല്‍ ആശുപത്രിക്കു സമീപം തമ്പുരാന്‍ മുക്കിലെ ആര്‍ടെക് തമ്പുരാന്‍സ് ഫ്‌ളാറ്റിലെ അഞ്ചാം നിലയില്‍ 5ബി അപ്പാര്‍ട്ട്‌മെന്‍റിനുള്ളിലാണ് മൃതദേഹം കണ്ടെത്തിയത്. ഫ്‌ളാറ്റിലെ ബെഡ്‌റൂമിനുള്ളില്‍ തൂങ്ങിയ നിലയിലാണ് മൃതദേഹം കണ്ടെത്തിയത്. മുന്‍വശത്തെ വാതിലിന്‍റെ മൂന്നു കുറ്റികളും ഭദ്രമായി ലോക്ക് ചെയ്ത നിലയിലായിരുന്നു. തിരുവനന്തപുരം ഫയര്‍‌സ്റ്റേഷനില്‍ നിന്ന് ഫയര്‍ ആൻഡ് റസ്‌ക്യു ഓഫീസര്‍ ഷഹീര്‍, ഓഫീസര്‍മാരായ രാഹുല്‍, നൂറുദ്ദീന്‍, സനിത്ത്, എഫ്ആര്‍ഒ ഡ്രൈവര്‍ ശ്രീരാജ് ആര്‍. നായര്‍ എന്നിവര്‍ ഫ്‌ളാറ്റിലെ മുറിയുടെ പിന്‍വാതിലൂടെ കടന്ന് നടത്തിയ പരിശോധനയിലാണ് മൃതദേഹം കണ്ടെത്തുന്നത്. ജര്‍മന്‍ഭാഷ പഠിക്കുന്നതിനുവേണ്ടി ഒരുമാസത്തിനു മുമ്പാണ് അക്ഷയ തിരുവനന്തപുരത്തെ ഒരു ഇന്‍സ്റ്റിറ്റ്യൂട്ടില്‍ ചേര്‍ന്നത്. 15 ദിവസത്തിനു മുമ്പാണ് തമ്പുരാന്‍മുക്കിലെ ഫ്‌ളാറ്റില്‍ താമസമാക്കുന്നത്. ഒറ്റയ്ക്കാണ് അക്ഷയ കഴിഞ്ഞുവന്നിരുന്നതെന്നു പോലീസ് അറിയിച്ചു. ആത്മഹത്യാക്കുറിപ്പൊന്നും കണ്ടെത്താനായിട്ടില്ല. മരണകാരണം വ്യക്തമായിട്ടില്ലെന്നു കന്‍റോണ്‍മെന്‍റ് പോലീസ് അറിയിച്ചു. മൃതദേഹം ഇന്‍ക്വസ്റ്റ് നടപടികള്‍ പൂര്‍ത്തിയാക്കിയശേഷം തിരുവനന്തപുരം മെഡിക്കല്‍കോളജ് മോര്‍ച്ചറിയിലേക്കു മാറ്റി.

മധ്യവയസ്കൻ ലോഡ്ജിൽ മരിച്ച നിലയിൽ

വെഞ്ഞാറമൂട് : വേറ്റിനാട് സ്വദേശിയെ വെഞ്ഞാറമൂട്ടിലെ ലോഡ്ജിൽ മരിച്ച നിലയിൽ കണ്ടെത്തി. വെമ്പായം വേറ്റിനാട് ഈഴക്കോട്ടുകോണം പുത്തൻവീട്ടിൽ പരേതനായ കുട്ടന്‍റെ മകൻ സുരേന്ദ്രൻ ( 60 )നെയാണ് വെഞ്ഞാറമൂട് ജംഗ്ഷനിലെ ലോഡ്ജിൽ മരിച്ച നിലയിൽ കണ്ടത്. നാളുകളായി ഇയാൾ ഇവിടത്തെ ലോഡ്ജിലാണ് താമസിച്ച് വന്നിരുന്നത്. മരിച്ച് കിടന്ന മുറിയിൽ ഏറെ മദ്യക്കുപ്പികളും ഉണ്ടായിരുന്നു. വെഞ്ഞാറമൂട് പോലീസ് എത്തി മേൽ നടപടികൾ സ്വീകരിച്ചു.

തൃപ്പാദത്തിൽ ഓണക്കോടിയുമായി വിദ്യാർഥികൾ എത്തി

നെടുമങ്ങാട്: തൃപ്പാദം അഗതി മന്ദിരത്തിൽ അറുപതോളം വരുന്ന അന്തേവാസികൾക്ക് ഓണക്കോടിയുമായി നെടുമങ്ങാട് വെർട്ടെക്സ് സ്റ്റഡീസിലെ വിദ്യാർഥികൾ എത്തി. വെർട്ടെക്സിന്‍റെ ഓണാഘോഷപരിപാടിയുടെ ഭാഗമായാണ് 150 ഓളം വിദ്യാർഥികളും അധ്യാപകരും ഓണക്കോടിയുമായി തൃപ്പാദത്തിൽ എത്തിയത്. തുടർന്നു കലാകായിക പരിപാടികളും ഓണസദ്യയുമായി അന്തേവാസികൾക്കൊപ്പം ചെലവഴിച്ചിട്ടാണു വിദ്യാർഥികൾ യാത്രയായത്. ഓണാഘോഷ പരിപാടികളുടെ ഉദ്ഘാടനം നെടുമങ്ങാട് നഗരസഭ ചെയർപേഴ്സൺ സി.എസ്. ശ്രീജ നിർവഹിച്ചു. തൃപ്പാദത്തിനുവേണ്ടി ഫാ. വിജയാനന്ദ വർഗീസ്, വാർഡ് കൗൺസിലർ സജിതയിൽ നിന്നും ഓണക്കോടി ഏറ്റുവാങ്ങി.

സമത ഗ്രാമീണ ഗ്രന്ഥശാല വാർഷികവും ഓണാഘോഷവും

നെടുമങ്ങാട്: പുനലാൽ സമത ഗ്രാമീണ ഗ്രന്ഥശാലയുടെ മൂന്നാം വാർഷികവും ഓണാഘോഷവും ജി. സ്റ്റീഫൻ എംഎൽഎ ഉദ്ഘാടനം ചെയ്തു. ഡെയിൽ വ്യൂ സ്ഥാപകരായ ക്രിസ്തുദാസ്, ശാന്താദാസ് എന്നിവരുടെ സ്മരണാർഥം ഗ്രന്ഥശാല ഏർപെടുത്തിയ ക്രിശാന്താ പ്രതിഭാ പുരസ്കാരം അച്ചു ജി. ദാസിന് വിതരണം ചെയ്തു. വിവിധ മേഖലകളിൽ സേവനം ചെയ്തവരെ യോഗത്തിൽ ആദരിച്ചു. വിവിധ പരീക്ഷകളിൽ വിജയിച്ചവർക്ക് സമ്മാനം വിതരണം ചെയ്തു. യുവ എഴുത്തുകാരി ഊർമിള അഗസ്ത്യ മുഖ്യാതിഥിയായി പങ്കെടുത്തു. ഡെയിൽ വ്യൂ ഡയറക്ടർ ഡിപിൻദാസ് പുരസ്കാര വിതരണം നടത്തി. താലൂക്ക് ലൈബ്രറി കൗൺസിൽ ജോ. സെക്രട്ടറി മുരുകൻ കാച്ചാണി, വെള്ളനാട് പഞ്ചായത്ത് മുൻ പ്രസിഡന്‍റ് എം. രാജേന്ദ്രൻ, മുൻ സ്റ്റാൻഡിംഗ് കമ്മിറ്റി ചെയർമാൻ എൽ. സത്യദാസ് തുടങ്ങിയവർ സംസാരിച്ചു. ഗ്രന്ഥശാല പ്രസിഡന്‍റ് ഡി. സ്റ്റുവർട്ട് അധ്യക്ഷത വഹിച്ച യോഗത്തിൽ സെക്രട്ടറി ഡി. ജോൺദാസ് സ്വാഗതവും ജോ. സെക്രട്ടറി രജിത്ത് രാജു നന്ദിയും പറഞ്ഞു.

തുരുത്തിയിൽ പൂക്കൃഷി വിളവെടുത്തു

വിതുര: തൊളിക്കോട് പഞ്ചായത്തിലെ തുരുത്തി വാർഡിൽ ജെ എൽ ജി ഗ്രൂപ്പ് തുടങ്ങിയ ഓണക്കനി നിറപ്പൊലിമ പുഷ്പകൃഷിയുടെ വിളവെടുപ്പിന്‍റെ ഉദ്ഘാടനം വാർഡ് മെമ്പർ എൻഎസ് ഹാഷിം നിർവഹിച്ചു. അഗ്രി സിആർപി ശ്രീജ, എഡിഎസ് അംഗം സിന്ധു കണ്ണങ്കര, ജെഎൽജി ഗ്രൂപ്പ് അംഗങ്ങളായ സതീഷ്, ശോഭ, രാധ, സുരേന്ദ്രൻ എന്നിവർ സന്നിഹിതരായിരുന്നു.

ജയന്‍റ് വീലിനു മുകളില്‍ മരം വീണു; ഇരിപ്പിടങ്ങള്‍ തകര്‍ന്നു

പേരൂര്‍ക്കട: കുട്ടികള്‍ക്കുള്ള ജയന്‍റ് വീലിനു മുകളില്‍ മരം വീണ് ഇരിപ്പിടങ്ങള്‍ തകര്‍ന്നു. കഴിഞ്ഞദിവസം വൈകുന്നേരം 4.30ന് കനകക്കുന്ന് വളപ്പില്‍ സ്ഥാപിച്ചിരുന്ന ചില്‍ഡ്രന്‍സ് ജയന്‍റ് വീലിനു മുകളിലാണ് കൂറ്റന്‍ തണല്‍മരത്തിന്‍റെ ശിഖരം ഒടിഞ്ഞുവീണത്. തിരുവനന്തപുരം ഫയര്‍‌സ്റ്റേഷനില്‍ നിന്ന് ഉദ്യോഗസ്ഥരെത്തിയാണു ശിഖരം മുറിച്ചുനീക്കിയത്. സംഭവസമയം ജയന്‍റ് വീല്‍ നിര്‍ത്തിവച്ചിരിക്കുകയായിരുന്നു. കുട്ടികളാരും ഇതിനു സമീപത്ത് ഇല്ലാത്തത് അപകടം ഒഴിവാക്കി. ജയന്‍റ് വീലില്‍ കുട്ടികള്‍ ഇരിക്കുന്ന ഭാഗം കുറച്ചു തകര്‍ന്നുപോയി. തിരുവനന്തപുരം ഫയര്‍‌സ്റ്റേഷനില്‍ നിന്ന് സീനിയര്‍ എഫ്ആര്‍ഒ അനില്‍കുമാറും സംഘവും നേതൃത്വം നല്‍കി.

സഹോദരിയുടെ മകളെ തലയ്ക്കടിച്ച് പരിക്കേല്‍പ്പിച്ചയാള്‍ അറസ്റ്റില്‍

പൂന്തുറ: മദ്യ ലഹരിയില്‍ സഹോദരിയുടെ മകളെ തലയ്ക്കടിച്ച് പരിക്കേല്‍പ്പിച്ചയാളെ പൂന്തുറ പോലീസ് അറസ്റ്റ് ചെയ്തു. മുട്ടത്തറ വടുവത്ത് ക്ഷേത്രത്തിനു സമീപം താമസിക്കുന്ന സതീഷ് (32) ആണ് പോലീസിന്‍റെ പിടിയിലായത്. ശനിയാഴ്ച രാത്രി എട്ടരയോടെയായിരുന്നു സംഭവം. മദ്യലഹരിയിലായിരുന്ന സതീഷ്, പെൺകുട്ടി രാത്രിയിൽ ചൂലുപയോഗിച്ചു വീടു വൃത്തിയാക്കുന്നത് ചോദ്യം ചെയ്യുകയും സമീപത്തിരുന്ന വടിയെടുത്ത് മർദിക്കുകയുമായിരുന്നു. മർദനത്തിൽ തലപൊട്ടി രക്തം ഒഴുകിയതുകണ്ട കുട്ടിയുടെ അമ്മ പൂന്തുറ പോലീസിൽ വിവരം അറിയിച്ചു. ഈ സമയം കൈയിലിരുന്ന വടികൊണ്ട് സതീഷ്, സ്വന്തം തലയിൽ അടിച്ചു മുറിവേൽപ്പിക്കുകയും ചെയ്തു. സഹോദരിയുടെ പരാതിയിൽ കേസെടുത്ത പോലീസ് സതീഷിനെ അറസ്റ്റുചെയ്തു. പൂന്തുറ എസ്എച്ച്ഒ സജീവിന്‍റെ നേതൃത്വത്തില്‍ എസ്ഐ സുനില്‍, ഗ്രേഡ് എസ്ഐ സുധീര്‍, ഗ്രേഡ് സിപിഒ സജി, സിപിഒ മാരായ പത്മകുമാര്‍, അനീഷ്‌കുമാര്‍ എന്നിവരുടെ നേതൃത്വത്തില്‍ അറസ്റ്റ് ചെയ്ത പ്രതിയെ കോടതിയില്‍ റിമാന്‍ഡ് ചെയ്തു.

ചാലയിലെ ക്ഷേത്രമോഷണം; ബംഗാള്‍ സ്വദേശി അറസ്റ്റില്‍

പേരൂര്‍ക്കട: ചാലയിലെയും ആര്യശാലയിലെയും ക്ഷേത്രത്തില്‍ മോഷണം നടത്തിയ സംഭവത്തില്‍ ബംഗാള്‍ സ്വദേശിയുടെ അറസ്റ്റ് ഫോര്‍ട്ട് പോലീസ് രേഖപ്പെടുത്തി. വെസ്റ്റ് ബംഗാള്‍ മാള്‍ഡ ബങ്കി ഡോല സ്വദേശി സഞ്ജീബ് മണ്ഡല്‍ (27) ആണ് അറസ്റ്റിലായത്. കഴിഞ്ഞമാസം 31ന് ചാലയിലെ മുത്തുമാരിയമ്മന്‍ ക്ഷേത്രത്തിലെ കാണിക്കവഞ്ചി കുത്തിത്തുറന്ന ഇയാള്‍ 3000-ഓളം രൂപയാണ് കവര്‍ന്നത്. ക്ഷേത്ര കോമ്പൗണ്ടിലുണ്ടായിരുന്ന കാണിക്കവഞ്ചിയാണ് ഇയാള്‍ കവര്‍ന്നത്. ഇതിന്‍റെ അന്വേഷണം നടന്നുവരുന്നതിനിടെയാണ് ശനിയാഴ്ച പുലര്‍ച്ചെ രണ്ടോടെ ആര്യശാലയിലെ ഉജ്ജയിനി മഹാകാളി ക്ഷേത്രത്തില്‍നിന്നു കിണ്ടികളും വിളക്കുകളും മോഷ്ടിച്ചത്. ഈ സംഭവത്തിനുശേഷം തൊണ്ടിമുതല്‍ ചാക്കിലാക്കി നടന്നുവരുന്നതിനിടെ കണ്‍ട്രോള്‍ റൂമിലെ പോലീസ് ഉദ്യോഗസ്ഥര്‍ സംശയംതോന്നി ചോദ്യം ചെയ്തതോടെയാണ് മോഷണവിവരം അറിയുന്നത്. ചാലയില്‍നിന്നു മോഷ്ടിച്ച പണം തന്നില്‍ നിന്നു മറ്റാരോ കവര്‍ന്നുവെന്നാണ് ഫോര്‍ട്ട് സിഐ വി.ആര്‍ ശിവകുമാറിന്‍റെ നേതൃത്വത്തിലുള്ള സംഘം ചോദ്യം ചെയ്തപ്പോള്‍ ഇയാള്‍ പറഞ്ഞത്. തമ്പാനൂര്‍ റെയില്‍വേ സ്റ്റേഷന്‍ പരിസരത്താണ് സഞ്ജീബ് മണ്ഡല്‍ തമ്പടിച്ചിരിക്കുന്നത്. എസ്ഐ ബിജു, സിപിഒമാരായ അജീഷ്, സജു, ഹോം ഗാര്‍ഡ് സന്തോഷ് എന്നിവരും അന്വേഷണസംഘത്തില്‍ ഉണ്ടായിരുന്നു. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ഭക്ഷ്യമന്ത്രിയുടെ മണ്ഡലത്തിൽ തൂശനിലയിൽ കഞ്ഞിവിളമ്പി പ്രതിഷേധം

നെടുമങ്ങാട്: ഉപ്പുതൊട്ട് കർപ്പൂരം വരെയുള്ള വസ്തുക്കൾക്കു വില കയറ്റം നിലനിൽക്കെ സപ്ലൈ കോയിൽ എല്ലാ സാധനങ്ങൾക്കും വിലകുറവെന്ന സർക്കാർ പരസ്യം ജനങ്ങളെ കബളിപ്പിച്ച സൂത്രതന്ത്രമായി മാറിയെന്നു കെപിസിസി ജനറൽ സെക്രട്ടറി അഡ്വ. ജി സുബോധൻ. മൂന്നര കോടി ജനങ്ങളുള്ള കേരളത്തിൽ ആകെ 89 ലക്ഷം പേർക്കാണ് റേഷൻകാർഡ് ഉള്ളത്. ഇതിൽ സൗജന്യ കിറ്റിനർഹരായവർ വെറും 5,62,323 പേരാണെങ്കിലും അതുലഭിച്ചവർ ആകെ മൂന്നുലക്ഷത്തിനകത്തുള്ളവർ മാത്രമാണെന്നും ജി. സുബോധ ൻ കുറ്റപ്പെടുത്തി. വിലക്കയറ്റത്തിൽ പ്രതിഷേധിച്ച് കോൺഗ്രസ് നെടുമങ്ങാട് നിയോജക മണ്ഡലം കമ്മിറ്റി തൂശ നിലയിൽ കഞ്ഞി വിളമ്പി നടത്തിയ പ്രതിഷേധ സമരം ഉദ്ഘാടനം ചെയ്യുകയായിരുന്നു അഡ്വ. ജി. സുബോധൻ. കോൺഗ്രസ്‌ നെടുമങ്ങാട് ബ്ലോക് പ്രസിഡന്റ് എ. അർജുനൻ അധ്യക്ഷനായി. നേതാക്കളായ അഡ്വ. എം. അൽത്താഫ്, അഡ്വ. എം. മുനീർ, വട്ടപ്പാറ ചന്ദ്രൻ, നെ ട്ടറച്ചിറ ജയൻ, അഡ്വ. തേക്കട അനിൽ, അഡ്വ. വെമ്പായം അനിൽ, അഡ്വ. അരുൺകുമാർ, അഡ്വ. മനോജ്‌, അഡ്വ. ഫാത്തിമ, പുങ്കുമൂട് അജി, അഡ്വ. മഹേഷ്‌ ചന്ദ്രൻ തുടങ്ങിയവർ പ്രസംഗിച്ചു.

കെട്ടിട നിര്‍മാണ തൊഴിലാളികള്‍ക്ക് 18 മാസത്തെ വേതനം മുടക്കമുള്ളതായി പരാതി

വെള്ളറട: കെട്ടിട നിര്‍മാണ തൊഴിലാളികള്‍ക്കു സര്‍ക്കാര്‍ 18 മാസത്തെ പെന്‍ഷന്‍ മുടക്കം വരുത്തിയതായി വ്യാപക പരാതി. പ്രതിമാസം 1,600 രൂപയാണ് കെട്ടിട നിര്‍മാണ തൊഴിലാളികള്‍ക്ക് സര്‍ക്കാര്‍ നല്‍കുന്നത്. ശാരീരികമായി ബലഹീനതയുള്ളവരും വാര്‍ധക്യത്തിലായവരും ദാരിദ്ര്യത്തില്‍ കഴിയുന്നവരുമാണു കെട്ടിട നിര്‍മാണ തൊഴിലാളി പെന്‍ഷന്‍ വാങ്ങുന്നവര്‍. അവര്‍ക്കാണു സര്‍ക്കാര്‍ 18 മാസത്തെ പെന്‍ഷന്‍ നല്‍കാനുള്ളത്. ഓണത്തിന് ഒരു മാസത്തെ പെന്‍ഷന്‍ 1600 രൂപ മാത്രം നല്‍കുക മാത്രമാണ് ചെയ്തത്. കുടിശികയുള്ള 18 മാസത്തെ പെന്‍ഷന്‍ അടിയന്തിരമായി നല്‍കി മരണാവസ്ഥയിലും ദാരിദ്ര്യത്തിലും കഴിയുന്നവരെ രക്ഷിക്കണമെന്നാണ് കെട്ടിട നിര്‍മാണ തൊഴിലാളികള്‍ ഒന്നടങ്കം ആവശ്യപ്പെടുന്നത്.

നെയ്യാർ ഡാമിലെ ഓണാഘോഷം ഇന്നു സമാപിക്കും

നെയ്യാർഡാം: നെയ്യാർ ഡാമിലെ ഓണാഘോഷത്തിന് ഇന്ന് സമാപനം. നാലിന് ആരംഭിച്ച ആഘോഷങ്ങൾക്ക് ഇന്നത്തെ സാംസ്കാരിക ഘോഷയാത്രയോടെ സമാപനമാകും. ദീപാലങ്കാരം കാണാനും വിവിധ കലാപരിപാടികൾ ആസ്വദിക്കാനും അയൽ സംസ്ഥാനങ്ങളിൽ നിന്ന് പോലും സഞ്ചാരികളെത്തിയിരുന്നു. സമാപന ദിവസമായന്നു പകൽ രണ്ടിനു നാടൻപാട്ട്, വൈകുന്നേരം നാലിനു സാംസ്കാരിക ഘോഷയാത്ര കള്ളിക്കാട് ജംഗ്ഷനിൽനിന്ന്‌ സി.കെ. ഹരീന്ദ്രൻ എംഎൽഎ ഉദ്‌ഘാടനം ചെയ്യും. പഞ്ചായത്ത് പ്രസിഡന്‍റ് പന്ത ശ്രീകുമാർ അധ്യക്ഷനാകും. വിവിധ നൃത്തങ്ങൾ, കാവടി, പൂരക്കാവടി, തെയ്യം, ആയോധന കലാപ്രകടനം എന്നിവ ഘോഷയാത്രയ്ക്കു കൊഴുപ്പേകും. കുടുംബശ്രീ, വിവിധ വാർഡുകൾ, വ്യാപാരി സംഘടനകൾ, സർക്കാർ വകുപ്പുകൾ എന്നിവ ഫ്ലോട്ടുകളുമായി ഘോഷയാത്രയിൽ അണിനിരക്കും, വാദ്യമേളങ്ങളും അകമ്പടിയേകും. ഗ്രീൻ പ്രോട്ടോ കോൾ പാലിച്ചാവും പരിപാടികൾ. നെയ്യാർഡാമിൽ ഘോ ഷയാത്ര സമാപിക്കും. രാത്രി 7.30-ന് സമാപനസമ്മേളനം. തുടർന്ന് റഹ്‌മാൻ പത്തനാപുരം നയിക്കുന്ന ഗാനമേള. കോട്ടൂർ ഇക്കോ ടൂറിസം ഓണാഘോഷം എട്ടിന് സമാപിക്കും. ഉത്രാടത്തിനു തുടങ്ങിയ ആഘോഷങ്ങളുടെ ഭാഗമായുള്ള വൈദ്യുത ദീപാലങ്കാരം, ജൈവ-കാർഷിക-കരകൗശല-പ്രദർശന-വിപണന മേള എന്നിവിടങ്ങളിൽ വലിയ തിരക്കാണ്. കലാപരിപാടികൾ ആസ്വദിക്കാനും വിവിധ ഇടങ്ങളിൽനിന്നും നിരവധിപ്പേർ എത്തുന്നുണ്ട്. സമാപനദിവസമായ എട്ടിന് വൈകുന്നേരം നാലിനു വർണശബളമായ സാംസ്കാരിക ഘോഷയാത്ര കാപ്പുകാട് ആനപാർക്കിൽനിന്നു തുടങ്ങി കോട്ടൂർ ജംഗ്ഷനിൽ സമാപിക്കും.

പാതയോരങ്ങളില്‍ പ്ലാസ്റ്റിക് മാലിന്യങ്ങള്‍ കുന്നുകൂടുന്നു

മാലിന്യ നിര്‍മാര്‍ജനം പ്രഖ്യാപനങ്ങളില്‍ മാത്രം പാറശാല: മാലിന്യമുക്ത പ്രഖ്യാപനം നടത്തിയ മലയോര പഞ്ചായത്തുകളിലെ പാതയോരങ്ങളിൽ മാലിന്യം തള്ളുന്നത് കൂടുന്നതായി ആക്ഷേപം. മാലിന്യമുക്ത പദ്ധതികള്‍ പ്രഖ്യാപനങ്ങളില്‍ ഒതുങ്ങു ന്നതല്ലാതെ പ്രാവര്‍ത്തികമാകുന്നില്ല. മാസങ്ങള്‍ക്കു മുന്‍പാണ് മണ്ഡലത്തിലെ ഭൂരിഭാഗം പഞ്ചായത്തുകളും മാലിന്യമുക്ത പദ്ധതിക്കു തുടക്കം കുറിച്ചത്. ഗ്രാമപഞ്ചായത്തുകളിലെ ശുചീകരണ തൊഴിലാളികളും ഹരിതകര്‍മ സേനയും മാലിന്യനീക്കം നടത്തുമെന്നായിരുന്നു തീരുമാനം. വീടുകളില്‍ നിന്നുള്ള പ്ലാസ്റ്റിക് മാലിന്യം ശേഖരിക്കുന്നതിലൊഴികെ പ്രഖ്യാപനം നടപ്പിലായില്ല. പാതയോരങ്ങളിലെ മാലിന്യനീക്കം പലയിടത്തും നടപ്പിലായില്ല. മാലിന്യമുക്ത പ്രഖ്യാപനം നടത്തിയ പഞ്ചായത്തുകളിലും പാതയോരങ്ങളില്‍ ഭക്ഷണാവശിഷ്ടവും, ഇറച്ചിക്കടകളില്‍ നിന്നുള്ള മാലിന്യവും തള്ളിയ നിലയിലാണ്.പാറശാല മുതല്‍ വെള്ളറട വരെ നീളുന്ന അതിര്‍ത്തി മലയോര പാതയില്‍ പഞ്ചായത്ത് ലൈസന്‍സ് പോലുമില്ലാതെ അനധികൃതമായി പ്രവര്‍ത്തിക്കുന്ന നൂറു കണക്കിന് അറവുശാലകളില്‍ നിന്നുള്ള മാലിന്യം പാതയോരങ്ങളിലും പൊതു ഇടങ്ങളിലും തള്ളുന്നത് തുടരുകയാണ്. പാറശാല ചെറുവാരക്കോണം സിഎസ്ഐ ലോ കോളജിനു സമീപത്തും പരശുവയ്ക്കലിലും പാതയോരത്ത് നിക്ഷേപിച്ചിട്ടുള്ള അറവുമാലിന്യം അഴുകി ദുര്‍ഗന്ധം വമിക്കുന്ന നിലയിലാണ് കണ്ടെത്താറുള്ളത്. സ്ഥിരം മാലിന്യ നിക്ഷേപ കേന്ദ്രങ്ങളില്‍ സിസിടിവി കാമറ സ്ഥാപിച്ചാല്‍ പ്രശ്‌നത്തിനു പരിഹാരമാകുമെങ്കിലും പഞ്ചായത്ത് അധികൃതർ ഇക്കാര്യത്തില്‍ നടപടി യെടുത്തിട്ടില്ല. കുളത്തൂര്‍ പഞ്ചായത്തില്‍ പൊഴിക്കര ഭാഗത്തും മാലിന്യ നിക്ഷേപമുണ്ട്. പഞ്ചായത്തുകളിൽ മാലിന്യം സംസ്‌കരിക്കാന്‍ സംവിധാനമില്ലാത്തതാണ് പാതയോരങ്ങള്‍ മാലിന്യനിക്ഷേപ കേന്ദ്രങ്ങളാകുന്നതിന് പ്രധാന കാരണം. ഭക്ഷ്യ-മാംസ അവശിഷ്ടങ്ങള്‍ ചാക്കുകളില്‍ കെട്ടി രാത്രിയില്‍ പൊതു ഇടങ്ങളില്‍ വാഹനങ്ങളില്‍ കൊണ്ടുവന്നു തള്ളുന്നതിനുള്ള കാരണവും ഇതാണ്. വീടുകളില്‍നിന്നും ഹോട്ടലുകളില്‍ നിന്നും വിവാഹ പാര്‍ട്ടികള്‍ നടക്കുന്ന സ്ഥലങ്ങളിലെയും മാലിന്യങ്ങള്‍ തെരുവുനായ്ക്കളും പക്ഷികളും കൊത്തി വലിച്ചു റോഡിലും കിണറുകളിലും മറ്റും ഇടുന്നതു കാരണം പകര്‍ച്ച വ്യാധി ഭീഷണിയുമുണ്ട്. വെള്ളറട കുന്നത്തുകാല്‍ പഞ്ചായത്തുകളുടെ പല ഭാഗങ്ങളിലും മാലിന്യനിക്ഷേപം കാണാം. ഒരു ഘട്ടത്തി ല്‍ പ്രതികളെ കണ്ടെത്തുന്നതിനു കാമറ സ്ഥാപിച്ചെങ്കിലും കാര്യമായ പ്രയോജനമുണ്ടായില്ല. കാമറ ദൃശ്യങ്ങളില്‍പെടാതെ തൊട്ടടുത്തു തന്നെ മാലിന്യങ്ങള്‍ കൊണ്ടുവന്നു നിക്ഷേപിക്കുകയാണ് പുതിയരീതി. വെള്ളറടയിലെ ആറാട്ടുകുഴി കടുക്കറ റോഡില്‍മുതുവാന്‍കോണം മുതല്‍ കടുക്കറവരെ മാലിന്യങ്ങള്‍ നിക്ഷേപിക്കുന്നു. കുന്നത്തുകാല്‍ പഞ്ചായത്തിലെ വണ്ടിത്തടം റോഡിലും കട്ടച്ചല്‍വിള കോട്ടുക്കോണം റോഡിലെ സര്‍ക്കാര്‍ ആശുപത്രികള്‍ക്ക് സമീപവുമാണു സ്ഥിരമായി മാലിന്യങ്ങള്‍ നിക്ഷേപിക്കുന്നത്. കുടപ്പനമൂട്, നെടുമങ്ങാട് റോഡിലെ വാഴിച്ചലിനു സമീപവും മാലിന്യനിക്ഷേപം കാണാം. പഞ്ചായത്തുകളില്‍ മാലിന്യം ശേഖരിച്ച് സംസ്‌കരിക്കാനുള്ള സംവിധാനങ്ങള്‍ ഏര്‍പ്പെടുത്തുകയും പൊതു ഇടങ്ങളില്‍ മാലിന്യം നിക്ഷേപിക്കുന്നവരെ കണ്ടെത്തി നിയമ നടപടികള്‍ സ്വീകരിക്കുകയും ചെയ്താല്‍ ഒരു പരിധിവരെ മാലിന്യനിക്ഷേപം കുറയ്ക്കാനാകും. തെരുവ് നായ്ക്കളുടെ വര്‍ധനയ്ക്കും പകര്‍ച്ച വ്യാധി ഭീഷണിക്കും ഇടയാകകുന്ന മാലിന്യപ്രശ്‌നം പരിഹരിക്കാന്‍ പഞ്ചായത്തുകള്‍ സത്വര നടപടികള്‍ സ്വീകരിക്കണമെന്നാണ് ആവശ്യം.

കരുത്ത് തെളിയിച്ച് എംഎസ്‌സി വിർജീനിയ വിഴിഞ്ഞത്ത്

വിഴിഞ്ഞം: എത്ര വലിയ ചരക്ക് കപ്പലുകൾക്കും ആഴമേറിയ അന്താരാഷ്ട്ര തുറമുഖത്ത് അടുക്കാമെന്നു ലോകത്തിന് മുന്നിൽ തെളിയിച്ച് എംഎസ്‌സി വിർജീനിയ. കേരളത്തിന് ഓണസമ്മാനമായി എത്തി 16.95 മീറ്റർ ആഴമുള്ള കണ്ടെയ്നർ കപ്പൽ കൈകാര്യം ചെയ്തതിന്‍റെ റെക്കോർഡുമായാണ് 478-മനായി വിർജീനിയയുടെ വരവ്. ഓണദിനത്തിൽനങ്കുരമിട്ട കപ്പൽ ദൗത്യം പൂർത്തിയാക്കി ഇന്നലെ രാവിലെ സ്പെയിൻ ലക്ഷ്യമാക്കി തീരംവിട്ടു. ഇന്ത്യൻ തുറമുഖങ്ങളിൽ ഇതുവരെ കൈകാര്യം ചെയ്തതിൽ രണ്ടാമത്തെ ഏറ്റവും വലിയ ഡ്രാഫ്റ്റ് കൂടിയ കപ്പൽ എന്ന പേരുമായാണ് എംഎസ്സിയുടെ അഭിമാന മടക്കം. അദാനി മുന്ദ്ര തുറമുഖത്തുനിന്ന് വിഴിഞ്ഞത്ത് എത്തുമ്പോൾ 16 മീറ്റർ ആയിരുന്നു കപ്പലിന്‍റെ ഡ്രാഫ്റ്റ് (കപ്പലിന്‍റെ അടിത്തട്ടു മുതൽ കടൽ നിരപ്പ് വരെയുള്ള ഉയരം). ഏതാണ്ട് 5,000 കണ്ടെയ്നർ ചരക്ക് വിഴിഞ്ഞത്ത് കൈകാര്യം ചെയ്ത ശേഷമാണ് ഡ്രാഫ്റ്റ് 16.95 ആയി വർധിച്ചത്. ഇതിനു മുൻപു 16.8 മീറ്റർ ആയിരുന്നു വിഴിഞ്ഞത്ത് എത്തിയ ആഴം കൂടിയ കപ്പൽ. 16.5 മീറ്ററിൽ കൂടുതൽ ഡ്രാഫ്റ്റ് ഉള്ള 17 കപ്പലുകളാണ് ഇതുവരെ വിഴിഞ്ഞത്ത് എത്തി ലക്ഷ്യം പൂർത്തിയാക്കി മടങ്ങിയത്. 18 മീറ്റർ മുതൽ 20 മീറ്റർ വരെ സ്വഭാവിക ആഴമുള്ള വിഴിഞ്ഞം തുറമുഖത്തിന്‍റെ കരുത്ത് ആഗോള മാരിടൈം മേഖലയ്ക്കു മുന്നിൽ ഒന്നുകൂടി തെളിയിക്കാനും കഴിഞ്ഞു. ട്രയൽ റണ്ണും കഴിഞ്ഞ് കൊമേഴ്സ്യൽ തുറമുഖമായി മുന്നോട്ട് കുതിക്കുന്ന തുറമുഖത്ത് 10.55 ലക്ഷം കണ്ടെയ്നറുകൾ കൈകാര്യം ചെയ്യാൻ കഴിഞ്ഞതിന്‍റെ അഭിമാന നേട്ടത്തിലാണ് വിഴിഞ്ഞം.

ഓണപ്പൂക്കള വിവാദം : സാമൂഹിക മാധ്യമങ്ങൾ നിരീക്ഷിക്കാൻ പോലീസ്

ശാസ്താംകോട്ട പോലീസ് സ്റ്റേഷനിലേക്ക് ഇന്ന് ബിജെപി മാർച്ച് കൊല്ലം: ശാസ്താംകോട്ട മുതുപിലാക്കാട് പാർഥസാരഥി ക്ഷേത്രത്തിലെ ഓണപ്പൂക്കള വിവാദവുമായി ബന്ധപ്പെട്ട കേസിൽ സാമൂഹിക മാധ്യമങ്ങളിലെ പോസ്റ്റുകൾ നിരീക്ഷിക്കാൻ പോലീസ്. പോലീസിനെതിരേ സോഷ്യൽ മീഡിയയിൽ ഈ വിഷയത്തിൽ തെറ്റിദ്ധാരണാജനകമായ പോസ്റ്റുകൾ പ്രചരിക്കുന്ന സാഹചര്യത്തിലാണ് തീരുമാനം. പൂക്കളമിട്ട എല്ലാവർക്ക ുമെതിരെ കെസെടുത്തിട്ടില്ലെന്നും പോലീസിന്‍റെ നിർദേശത്തിനു വിരുദ്ധമായി ഓണപ്പൂക്കളം ഇട്ടവർക്ക് എതിരേ മാത്രമാണ് കേസെ ടുത്തിട്ടുള്ളതെന്നും പോലീസ് പറഞ്ഞു. പൂക്കളമിട്ട എല്ലാവർക്കുമെതിരേ കേസെടുത്തു എന്ന് പ്രചരിക്കുന്ന വാർത്ത തെറ്റാണെന്നും ഇത്തരം വ്യാജവാർത്തകൾ പ്രചരിപ്പിക്കുന്ന വാട്സ്ആപ്പ് ഗ്രൂപ്പുകളെയടക്കം സൈബർ സെല്ലിന്‍റെ സഹായത്തോടെ തിരിച്ചറിഞ്ഞു കർശന നടപടി സ്വീകരിക്കുമെന്ന് ശാസ്താംകോട്ട പോലീസ് വ്യക്തമാക്കി. തിരുവോണ ദിവസം ക്ഷേത്രപരിസരത്ത് പോലീസ് നിർദേശത്തിന് വിരുദ്ധമായി പൂക്കളം ഒരുക്കിയ 27 പേർക്ക് എതിരേയാണ് പോലീസ് കേസ് എടുത്തിട്ടുള്ളത്. ഇവർ എല്ലാവരും ഒരു സംഘടനയിലെ അംഗങ്ങളുമാണ്. ക്ഷേത്ര പരിസരത്ത് രാഷ്‌ട്രീയ പാർട്ടികളുടെ കൊടിതോരണങ്ങളും ഫ്ലക്സ് ബോർഡുകളും നിരോധിച്ചുള്ള കോടതി ഉത്തരവ് നിലവിലുണ്ട്. ഇത് ലംഘിച്ചാണ് പൂക്കളം ഒരുക്കിയത്. മാത്രമല്ല ഇവർ ക്ഷേത്ര പരിസരത്ത് ഫ്ലക്സ് ബോർഡും സ്ഥാപിച്ചു. വ്യാഴാഴ്ച രാത്രിയോടെയാണ് ഏറെ വിവാദമായി മാറിയ സംഭവങ്ങളുടെ തുടക്കം. ക്ഷേത്രസഭ പൂക്കളം ഇടാൻ തയാറാക്കിയ സ്ഥലത്ത് ഒരു സംഘം ആൾക്കാർ പൂക്കളം ഒരുക്കാൻ എത്തിയതോടെയാണ് പ്രശ്നങ്ങൾ ആരംഭിച്ചത്. തുടർന്ന് ക്ഷേത്ര സഭ (ഭരണ സമിതി) ശാസ്താംകോട്ട പോലീസിൽ പരാതി നൽകി. തുടർന്നു പോലീസ് ഇരുവിഭാഗത്തെയും സ്റ്റേഷനിൽ വിളിപ്പിച്ചു. രണ്ടു കൂട്ടർക്കും പൂക്കളം ഇടാനുള്ള സ്ഥലവും പോലീസ് തന്നെ കണ്ടെത്തി നൽകുകയും ചെയ്തു. മാത്രമല്ല പൂക്കളത്തിൽ രാഷ്ട്രീയ പാർട്ടികളുടെ പേരോ കൊടിയോ ഉണ്ടാവരുതെന്ന കർശന നിർദേശവും പോലീസ് നൽകുകയുണ്ടായി. എന്നാൽ ഇത് ലംഘിച്ച് പൂക്കളം നിർമിച്ചതുമായി ബന്ധപ്പെട്ടാണ് കലാപശ്രമത്തിന് പോലീസ് 27 പേർക്കെതിരെ കേസെടുത്തത്. പൂക്കളത്തിനു സമീപം ഇവർ ബോർഡും സ്ഥാപിക്കുകയുണ്ടായി. തുടർന്നാണ് ഓപ്പറേഷൻ സിന്ദൂർ എന്നെഴുതി പൂക്കളം ഇട്ടതിനെതിരേ പോലീസ് കേസെടുത്തു എന്ന പ്രചാരണം ഉയർന്നത്. സോഷ്യൽ മീഡിയയിൽ ഇത് വലിയ രീതിയിൽ വ്യാജമായി പ്രചരിപ്പിക്കപ്പെട്ടു എന്നു പോലീസിന് ബോധ്യപ്പെടുകയും ചെയ്തു. പോലീസ് എടുത്ത എഫ് ഐആറിലെ വിവരങ്ങളും പുറത്ത് വന്നിട്ടുണ്ട്. അതിൽ ഓപ്പറേഷൻ സിന്ദൂർ എന്ന വാക്ക് പരാമർശിക്കുന്നു പോലുമില്ല. ഈ സാഹചര്യത്തിലാണു കർശന നടപടികളുമായി മുന്നോട്ട് പോകാൻ പോലീസ് തീരുമാനിച്ചിട്ടുള്ളത്. അതേ സമയം പോലീസിന്‍റെ നടപടിയിൽ പ്രതിഷേധിച്ച് ഇന്ന് ശാസ്താംകോട്ട പോലീസ് സ്റ്റേഷനിലേയ്ക്ക് മാർച്ച് നടത്തുമെന്ന് ബിജെപി നേതൃത്വം അറിയിച്ചു. രാവിലെ 10ന് മാർച്ചിന്‍റെ ഉദ്ഘാടനം സംസ്ഥാന ജനറൽ സെക്രട്ടറി അനൂപ് ആന്‍റണി നിർവഹിക്കും. പോലീസ് നടപടിയെ ചോദ്യം ചെയ്ത് കോടതിയെ സമീപിക്കാൻ ബിജെപി സംസ്ഥാന നേതൃത്വവും തീരുമാനിച്ചിട്ടുണ്ട്. പോലീസ് എടുത്ത കേസ് പിൻവലിച്ചില്ലെങ്കിൽ ശക്തമായ പ്രക്ഷോഭം സംഘടിപ്പിക്കുമെന്ന് യുവമോർച്ച ജില്ലാ ഭാരവാഹികളും മുന്നറിയിപ്പ് നൽകി.

പൂവാർ മേഖലയിൽ മിന്നൽ പരിശോധന

പൂവാർ: അനധികൃത ഉല്ലാസ ബോട്ടുകൾ പിടികൂടാൻ പൂവാർ മേഖലയിൽ കേരള മാരിടൈം ബോർഡ്‌ അധികൃതരുടെ മിന്നൽ പരിശോധന. പത്തോളം ബോട്ടുകളിൽ ക്രമക്കേട് കണ്ടെത്തി. വിഴിഞ്ഞം തുറമുഖത്തെ ഇൻലാൻഡ് വെസൽസ്‌ ആക്ട് എൻഫോഴ്സ്മെന്‍റ് വിഭാഗമാണു കഴിഞ്ഞ ദിവസം ജില്ലയിൽ ഏറ്റവും കൂടുതൽ ഉല്ലാസബോട്ടുകൾ പ്രവർത്തിക്കുന്ന പൂവാർ മേഖലയിൽ മിന്നൽ പരിശോധന നടത്തിയത്. ക്രമക്കേട്‌ കണ്ടെത്തിയ പത്തോളം ബോട്ടുകൾക്ക്‌ അധികൃതർ അമ്പതിനായിരത്തോളം രൂപാ പിഴയും ചുമത്തി. നിയമാനുസൃത ലൈസൻസ്‌, രജിസ്ട്രേഷൻ, സർവ്വേ തുടങ്ങിയവ ഇല്ലാത്ത ബോട്ടുകൾക്കാണു പിഴ ചുമത്തിയത്‌. പൂവാർ പോലീസും പരിശോധനയുടെ ഭാഗമായിട്ട്‌ ഉണ്ടായിരുന്നു. ‌തുടർന്നും ഈ മേഖലയിൽ കർശന പരിശോധന ഉണ്ടാകുമെന്ന് അധികൃതർ അറിയിച്ചു.

കൊലപാതകം മദ്യലഹരിയിൽ : മകനെ കൊലപ്പെടുത്തിയ പിതാവ് അറസ്റ്റിൽ

പോത്തൻകോട് : മദ്യ ലഹരിയിൽ മകനെ കുത്തിക്കൊലപ്പെടുത്തിയ പിതാവ് പിടിയിൽ. കാര്യവട്ടം ഗ്രീൻഫീൽഡ് സ്റ്റേഡിയത്തിനു സമീപം നവോദയ നഗർ ഉള്ളൂർക്കാേണം വലിയവിള പുത്തൻവീട്ടിൽ ഉല്ലാസ് (35)നെയാണ് വീട്ടിലെ ഹാളിൽ വെട്ടേറ്റ് മരിച്ച നിലയിൽ കണ്ടത്. പിതാവ് ഉണ്ണികൃഷ്ണൻ നായരെ (59) പോലീസ് അറസ്റ്റ് ചെയ്തു. തിരുവോണ ദിവസം ഉച്ചക്കാണു കൊലപാതകം നടന്നതെന്നാണ് പോലീസ് നിഗമനം. ഞായറാഴ്ചയാണ് രാവിലെ എട്ടോ ടെ ഹാളിൽ ഉല്ലാസിനെ രക്തം വാർന്നു മരിച്ച നിലയിൽ അമ്മ ഉഷ കാണ്ടെത്തിയത്. തുടർന്ന് പോത്തൻകോട് പോലീസിൽ വിവരം അറിയിച്ചു. ഉണ്ണികൃഷ് ണനും മകൻ ഉല്ലാസും മദ്യ ലഹരിയിൽ അടിയും വഴക്കുമുണ്ടാകുന്നത് പതിവാണ്. ഉത്രാട ദിവസം രാത്രി ഉല്ലാസ് ഭാര്യ വിദ്യയുമായി വഴക്കുണ്ടാകുകയും അതിനെ തുടർന്നു രണ്ടു കുട്ടികളുമായി വിദ്യ തിരുവോണ ദിവസം രാവിലെ ചെങ്ങന്നൂരുള്ള വീട്ടിൽ പോവുകയും ചെയ്തിരുന്നു. ഉഷയും ബന്ധുവീട്ടിൽ പോയി. തൊട്ടടുത്ത വീട്ടിലായിരുന്ന ഉഷയോട് ഉല്ലാസ് രക്തത്തിൽ കുളിച്ചുകിടക്കുന്നതായി ഉണ്ണികൃഷ് ണൻ തന്നെയാണ് പറഞ്ഞത്. തുടർന്ന് ഉഷ വന്നു നോക്കിയപ്പോ ഴാണ് കത്തി കൊണ്ടു വെട്ടി പരിക്കേൽപ്പതിനെ തുടർന്നു രക്തം വാർന്നു മരിച്ചു കിടക്കുന്ന നില യിൽ കണ്ടെത്തിയത്. ടിപ്പർ ലോറി ഡ്രൈവറാണ് മരിച്ച ഉല്ലാസ്.

വാടകയ്ക്ക് കാർ ഓടിയതുമായുള്ള തർക്കം : പനച്ചമൂട് സ്വദേശിയായ കാര്‍ ഡ്രൈവർ ചെന്നൈയിൽ കൊല്ലപ്പെട്ട നിലയില്‍

വെള്ളറട: പനച്ചമൂട് സ്വദേശിയായ കാര്‍ ഡ്രൈവറെ ചെന്നൈ മണിപ്പക്കം പോലീസ് സ്റ്റേഷന്‍ പരിധിയില്‍ കൊല്ലപ്പെട്ട നിലയില്‍ കണ്ടെത്തി. മൂന്നു മാസമായി ചെന്നൈ മണിപ്പക്കത്ത് ഷണ്മുഖം എന്നയാളിന്‍റെ വാഹനം ഓടിച്ചു വരികയായിരുന്ന അസുറുദ്ദീന്‍ ഷാ(34)യെയാണ് കൊല്ലപ്പെട്ട നിലയിൽ കണ്ടെത്തിയത്. വാഹനം ഓടിയതുമായി ബന്ധപ്പെട്ട് ഉടമയുമായി ചെറിയ സാമ്പത്തിക തര്‍ക്കങ്ങള്‍ നിലനില്‍ക്കവെ വെള്ളറട പനച്ചമൂട് പാറവളവ് സ്വദേശിയായ ഹാജാ (30), പനച്ചമൂട് സ്വദേശി ഷമീര്‍ (27) എന്നിവർ ചെന്നൈയിലെത്തി അസുറുദ്ദീന്‍ ഷായെ ക്രൂരമായി മര്‍ദിച്ചു കൊലപ്പെടുത്തിയെന്നാണ് കേസ്. സംഭവവുമായി ബന്ധപ്പെട്ട് മണിപ്പക്കം പോലീസ് പനച്ചമൂട്ടില്‍നിന്നും ഹാജ (30)നെ അസ്റ്റുചെയ്തു. പനച്ചമൂട് സ്വദേശി ഷമീര്‍(27)ഒളിവിലാണ്. ഇയാളെ പിടികൂടാനുള്ള തത്രപ്പാടിലാണ് മണിപ്പക്കം പോലീസ്. ഓണ്‍ലൈന്‍ ഊബര്‍ വണ്ടി മൂന്നു മാസമായി ഓടിയതിനെച്ചൊല്ലിയുണ്ടായ സാമ്പത്തിക തര്‍ക്കമാണ് ഉടമയുമായി ഉണ്ടായിരുന്നത്. പനച്ചമൂട്ടില്‍നിന്നും ഹാജയും, ഷമീറും ചെന്നൈ മണിപ്പക്കത്തെത്തി റൂമില്‍ പൂട്ടിയിട്ട് മര്‍ദിച്ചവശനാക്കിയെന്നും പതിനായിരം രൂപ അടിയന്തരമായി എത്തിച്ചുകൊടുക്കണമെന്ന് ആവശ്യപ്പെട്ടിരുന്നുവെന്നും അസുറുദ്ദീന്‍ ഷാ ഭാര്യയേയും ബന്ധുക്കളേയും അറിയിച്ചിരുന്നു. ഇതേ തുടർന്നു ഷായുടെ ഭാര്യ നാതിയ 7,000 രൂപ തരപ്പെടുത്തി ഷണ്‍മുഹത്തിന്‍റെ അക്കൗണ്ടല്‍ ഇട്ടുകൊടുക്കുകയും ചെയ്തിരുന്നു. ഇതിനുശേഷമാണു ഷായെ ഷണ്‍മുഖവും ഷിയാനും ചേർന്ന് ആശുപത്രിയില്‍ പ്രവേശിപ്പിച്ചത്. ചെന്നൈ മെഡിക്കല്‍ കോളജ് ആശുപത്രി അതികൃതര്‍ക്കു മരണത്തില്‍ ദുരൂഹതയുണ്ടന്നു ബോധ്യപ്പെട്ടതിനാല്‍ മാണിപ്പാക്കം പോലീസ് സ്റ്റേഷനില്‍ അറിയിക്കുകയായിരുന്നു. ക്രൂരമര്‍ദനത്തിന് ഇരയായാണ് മരണം സംഭവിച്ചതെന്നാണ് പ്രാഥമിക വിവരം. മർദിച്ച സംഘത്തിൽ രണ്ടുപേര്‍ കൂടി ഉള്ളതായി പറയപ്പെടുന്നു. രണ്ടാം പ്രതിയായ ഷമീര്‍ (27) ഒളിവിലാണ്.

ഗുരുദേവജയന്തി ആഘോഷിച്ചു

നെടുമങ്ങാട്: എസ്എൻഡിപി യോഗം ഇരിഞ്ചയം ശാഖയിൽ ഗുരുദേവജയന്തി ആഘോഷിച്ചു. വിളംബരഘോഷയാത്ര ശാഖമന്ദിരത്തിൽ നിന്നാരംഭിച്ച് താന്നിമൂട്, ഇരിഞ്ചയം, കുശർകോട്, മീൻമൂട്, പറയങ്കാവ്, ചിറയിൻകോണം, തോപ്പുവിള, ഗ്രാങ്കോട്ടുകോണം, മുണ്ടൈക്കോണം വഴി ഗുരുമന്ദിരത്തിൽ സമാപിച്ചു. ഷിബു ഇരിഞ്ചയം ഫ്‌ളാഗ് ഓഫ് ചെയ്തു. ശാഖാ പ്രസിഡന്‍റ് വാഴക്കാട്‌ മോഹനൻ പതാക ഉയർത്തി. നെടുമങ്ങാട് യൂണിയൻ പ്രസിഡന്‍റ് എ.മോഹൻദാസ് ഉദ്‌ഘാടനം ചെയ്തു. യൂണിയൻ കൗൺസിലർ സുരാജ് ചെല്ലാങ്കോട് സ്വാഗതം പറഞ്ഞു. ശാഖാ സെക്രട്ടറി അനിൽ, വനിതാസംഘം യൂണിയൻ പ്രസിഡന്‍റ് ലതാകുമാരി,തുടങ്ങിയവർ പങ്കെടുത്തു.

ഓണം വാരാഘോഷം : സാംസ്‌കാരിക ഘോഷയാത്ര നാളെ

തിരുവനന്തരം : സംസ്ഥാന സർക്കാരിന്‍റെ ഓണം വാരാഘോഷത്തിനു സമാപനം കുറിച്ചുള്ള സാംസ്‌കാരിക ഘോഷയാത്ര നാളെ വെള്ളയമ്പലത്തുനിന്നും ആരംഭിച്ച് കിഴക്കേകോട്ടയിൽ അവസാനിക്കും. തലസ്ഥാനനഗരിയെ താളലയ- വിസ്മയങ്ങളിൽ ആറാടിച്ചുകൊണ്ട് ആയിരത്തിൽപ്പരം കലാകാരന്മാർ അവതരിപ്പിക്കുന്ന സാംസ്‌കാരിക കലാരൂപങ്ങളുടെ അകമ്പടിയോടെ അറുപതോളം ഫ്‌ളോട്ടുകളും ഘോഷയാത്രയിൽ അണിനിരക്കുന്നതാണ്. നാളെ വൈകുന്നേരം നാലിന് വെള്ളയമ്പലത്തെ മാനവീയം വീഥിയിൽ ഗവർണർ രാജേന്ദ്ര ആർലേക്കർ ഫ്‌ളാഗ് ഓഫ് ചെയ്യുന്നതോടെ ഘോഷയാത്ര ആരംഭിക്കും. ഘോഷയാത്രയുടെ വരവ് അറിയിച്ചുകൊണ്ട് 51 കലാകരന്മാർ ശംഖനാദം മുഴക്കുകയും തുടർന്ന് വാദ്യോപകരണമായ കൊമ്പ്, ടൂറിസം മന്ത്രി പി.എ. മുഹമ്മദ് റിയാസ് മുഖ്യ കലാകാരനു കൈമാറിക്കൊണ്ട് സാംസ്‌കാരിക ഘോഷയാത്രയുടെ താളമേളങ്ങൾക്ക് തുടക്കം കുറിക്കുകയും ചെയ്യും. സംസ്ഥാന സർക്കാരിന്‍റെ വികസന പ്രവർത്തനങ്ങളെ ചിത്രീകരിച്ചുകൊണ്ട് വിവിധ വകുപ്പുകൾ തയാറാക്കുന്ന അറുപതോളം ഫ്‌ളോട്ടുകൾ ഘോഷയാത്രയുടെ പ്രത്യേകതയാണ്. കൂടാതെ 91 ദൃശ്യ- ശ്രവ്യകലാരൂപങ്ങളും ഇന്ത്യൻ ആർമിയുടെ ബാന്‍റ് സംഘവും ഘോഷയാത്രയ്ക്കു നിറവേകും. നാനാത്വത്തിൽ ഏകത്വം എന്ന പ്രമേയം മുൻനിർത്തി ജാർഖണ്ഡ്, ഉത്തർപ്രദേശ്, മധ്യപ്രദേശ്, മഹാരാഷ്ട്ര, ആന്ധ്രാപ്രദേശ്, തെലങ്കാന, കർണാടക, തമിഴ്‌നാട് എന്നിവിടങ്ങളിൽ നിന്നുള്ള ഇന്ത്യൻ ഗ്രാമീണ കലാ രൂപങ്ങളും ഘോഷ യാത്രയിൽ ഒത്തുചേരും. കേരളീയ പൈതൃകവും, സിനിമയും, സാഹിത്യവും, സ്ത്രീശാക്തീകരണവും, സ്ത്രീ സുരക്ഷയും ആരോഗ്യശീലങ്ങളും ശാസ്ത്ര സാങ്കേതിക വിദ്യയും, വിവിധ തരത്തിലുള്ള ജീവ സുരക്ഷാ സന്ദേശങ്ങളും ഫ്‌ളോട്ടുകളുടെ വിഷയങ്ങളായി അവതരിപ്പിക്കപ്പെടും. വിജ്ഞാനവും വിസ്മയവും കൗതുകവുമുണർത്തുന്നതുമായ സാംസ്‌കാരിക ഘോഷയാത്ര ഒരു പോയിന്‍റ് കടക്കാൻ ഉദ്ദേശം ഒന്നര മണിക്കൂർ വേണ്ടിവരുമെന്നാണ് കണക്കാക്കുന്നത്. ആനുകാലിക പ്രാധാന്യമുള്ളതും കഴിയുന്നത്ര കൃത്രിമത്വം ഒഴിവാക്കിയുള്ളതുമായ ഫ്‌ളോട്ടുകളാണ് തെരഞ്ഞെടുക്കപ്പെട്ടിട്ടുള്ളത്. പബ്ലിക് ലൈബ്രറിക്ക് മുന്നിൽ ഘോഷയാത്ര വീക്ഷിക്കുന്നതിന് ഒരുക്കിയിട്ടുള്ള വിവിഐപി പവലിയന് മുന്നിലും യൂണിവേഴ്‌സിറ്റി കോളജിന് മുൻവശത്തെ വിഐപി പവലിയന് മുന്നിലും മ്യൂസിയം ഗേറ്റിന് സമീപത്തെ പ്രത്യേക സ്റ്റേജിലും കലാരൂപങ്ങൾ അവതരിപ്പിക്കും. ഓണം വാരാഘോഷം നിശാഗന്ധിയിൽ ജുഗൽബന്ദി വൈകുന്നേരം ആറിന് കനകക്കുന്ന് സൂര്യകാന്തിയിൽ ഗാനമേള രാത്രി ഏഴിന് തൈക്കാട് ഭാരത് ഭവനിൽ നൃത്തനൃത്യങ്ങൾ വൈകുന്നേരം 6.15 മുതൽ കിഴക്കേ കോട്ട ഗാന്ധിപാർക്കിൽ കഥാപ്രസംഗം വൈകുന്നേരം 4.15 മുതൽ പബ്ലിക് ലൈബ്രറി ഹാളിൽ കഥയരങ്ങ്, കവിയരങ്ങ് ഉച്ചകഴിഞ്ഞ് മൂന്നു മുതൽ വൈലോപ്പിള്ളി സംസ്കൃതിഭവനിൽ കലാമണ്ഡലം വൈഷ്ണവിയുടെ കുച്ചിപ്പുടി വൈകുന്നേരം 6.15.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]