ADVERTISEMENT

ADVERTISEMENT

സ്കൂൾ കെട്ടിടം നിർമാണോദ്ഘാടനം നടത്തി

അടൂർ: പുതുശേരിഭാഗം ഗവൺമെന്‍റ് എൽപി സ്കൂളിന് അടൂർ എംഎൽഎ യുടെ ആസ്തി വികസന ഫണ്ടിൽനിന്ന് 52.5 ലക്ഷം രൂപ ചെലവഴിച്ചു നിർമിക്കുന്ന പുതിയ കെട്ടിടത്തിന്‍റെ നിർമാണോദ്ഘാടനം ഡെപ്യൂട്ടി സ്പീക്കർ ചിറ്റയം ഗോപകുമാർ നിർവഹിച്ചു.

ഏറത്ത് ഗ്രാമപഞ്ചായത്ത് പ്രസിഡന്‍റ് രാജേഷ് അമ്പാടിയിൽ അധ്യക്ഷത വഹിച്ച യോഗത്തിൽ ബ്ലോക്ക് പഞ്ചായത്ത് വൈസ് പ്രസിഡന്‍റ് സരസ്വതി, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ അനിൽ പൂതക്കുഴി,

പഞ്ചായത്ത് മെംബർമാരായ ഡി. ജയകുമാർ, സന്തോഷ് കുമാർ, അസിസ്റ്റന്‍റ് എൻജിനിയർ ആഷ്, എഇഒ സീമാ ദാസ്, സ്കൂൾ ഹെഡ്മിസ്ട്രസ് മഞ്ജു, ഡി. സജി, രാജേഷ് മണക്കാല തുടങ്ങിയവർ പ്രസംഗിച്ചു.

ADVERTISEMENT

വിദ്യാർഥികൾ സ്വപ്നം കാണേണ്ടവർ: ചാണ്ടി ഉമ്മൻ

പത്തനംതിട്ട: ഇന്ത്യക്കാരെ സ്വപ്നം കാണുവാന്‍ പഠിപ്പിച്ച ഡോ. എ.പി.ജെ. അബ്ദുള്‍കലാമിന്‍റെ ചിന്തകളായിരിക്കണം വിദ്യാർഥികള്‍ പിന്തുടരേണ്ടതെന്ന് ചാണ്ടി ഉമ്മന്‍ എംഎല്‍എ. യൂത്ത് കോണ്‍ഗ്രസ് വള്ളിക്കോട് മണ്ഡലം കമ്മിറ്റിയുടെ നേതൃത്വത്തില്‍ സംഘടിപ്പിച്ച ഉമ്മന്‍ചാണ്ടി മെമ്മോറിയല്‍ മെറിറ്റ് അവാര്‍ഡ് വിതരണം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യൂത്ത് കോണ്‍ഗ്രസ് വള്ളിക്കോട് മണ്ഡലം പ്രസിഡന്‍റ് അലന്‍ ജേക്കബ് തോമസിന്‍റെ അധ്യക്ഷതയില്‍ കൂടിയ യോഗത്തില്‍ റോബിന്‍ പീറ്റര്‍, സജി കൊട്ടയ്ക്കാട്, വെട്ടൂര്‍ ജ്യോതിപ്രസാദ്, അലന്‍ ജിയോ മൈക്കിള്‍, എലിസബത്ത് അബു, എസ്.വി. പ്രസന്നകുമാര്‍, പ്രഫ. ജി. ജോണ്‍, ടി.എസ്. തോമസ്, കണല്‍ ഉണ്ണികൃഷ്ണന്‍ നായര്‍, ക്രിസ്റ്റോ അനില്‍ കോശി, ആരോണ്‍, സി. യേശുദാസന്‍, കോശിക്കുഞ്ഞ് അയ്യനേത്ത്, പത്മ ബാലന്‍, തോമസ് തോളൂര്‍ എന്നിവര്‍ പ്രസംഗിച്ചു.

ഉന്നതികളില്‍ ഓടിയെത്തി റേഷന്‍കട

2,98,096 കിലോ ഭക്ഷ്യധാന്യം വിതരണം ചെയ്തു പത്തനംതിട്ട: ജില്ലയിലെ ആദിവാസി ഉന്നതികളില്‍ റേഷന്‍ നേരിട്ട് എത്തിക്കുന്ന ഭക്ഷ്യപൊതുവിതരണ വകുപ്പിന്‍റെ സഞ്ചരിക്കുന്ന റേഷന്‍കട പദ്ധതി ജനകീയമായി. 2,98,096 കിലോഗ്രാം ഭക്ഷ്യധാന്യം ഇതേവരെ അര്‍ഹരുടെ കൈകളിലെത്തി. സമീപ റേഷന്‍കടകളില്‍ നിന്ന് സാധനങ്ങള്‍ ശേഖരിച്ച് ഉന്നതിയിലെ നിശ്ചിത കേന്ദ്രത്തിലെത്തി വിതരണം ചെയ്യുന്ന സഞ്ചരിക്കുന്ന റേഷന്‍കട പദ്ധതിക്ക് 2018ലാണ് തുടക്കമായത്. റാന്നി, കോന്നി താലൂക്കുകളിലെ 11 ഉന്നതികളിലായി 886 കുടുംബങ്ങള്‍ക്ക് പദ്ധതിയുടെ പ്രയോജനം ലഭിക്കുന്നുണ്ട്. അടിച്ചിപ്പുഴ, കരികുളം, ചൊള്ളനാവയല്‍, കുറുമ്പന്‍ മൂഴി, മണക്കയം, അട്ടത്തോട്, മഞ്ഞത്തോട്, പ്ലാപ്പള്ളി, ഒളികല്ല് ഉന്നതികളിലെ 849 കുടുംബങ്ങളും കോന്നിയിലെ കാട്ടാത്തിപ്പാറ, സായ്പ്പിന്‍ കുഴി ഉന്നതികളിലെ 37 കുടുംബങ്ങളും ഗുണഭോക്തക്കളാണ്. വനം വകുപ്പുമായി സഹകരിച്ചാണ് സഞ്ചരിക്കുന്ന റേഷന്‍കട യാഥാര്‍ഥ്യമായത്. സഞ്ചരിക്കുന്ന ആറ് റേഷന്‍കടകളിലൂടെ അര്‍ഹതപ്പെട്ടവര്‍ക്ക് എല്ലാ മാസവും ആദ്യ ആഴ്ചയില്‍ സാധനങ്ങള്‍ എത്തിക്കും. അരി, ഗോതമ്പ്, ആട്ട, പഞ്ചസാര എന്നിവയാണ് വിതരണം ചെയ്യുന്നത്. കൃത്യമായ അളവും തൂക്കവും ഉറപ്പാക്കി റേഷനിംഗ് ഇന്‍സ്പെക്ടറുടെ നേതൃത്വത്തിലാണ് വിതരണം. അതത് താലൂക്ക് സപ്ലൈ ഓഫീസര്‍മാര്‍ക്കാണ് ചുമതല. അതിദാരിദ്ര്യ നിര്‍മാര്‍ജനം ലക്ഷ്യമിട്ട് വകുപ്പിന്‍റെ നേതൃത്വത്തില്‍ ഒപ്പം പദ്ധതിയും നിലവിലുണ്ട്. നേരിട്ട് റേഷന്‍ കൈപ്പറ്റാന്‍ സാധിക്കാത്തവര്‍ക്ക് ഓട്ടോ തൊഴിലാളികളിലൂടെ സാധനങ്ങള്‍ വീട്ടില്‍ എത്തിക്കുന്നതാണ് പദ്ധതി. അതിദരിദ്രവിഭാഗത്തില്‍പ്പെട്ട 275 പേര്‍ക്ക് ഇതുവരെ മുന്‍ഗണന കാര്‍ഡ് നല്‍കി. കരുതലും കൈത്താങ്ങും താലൂക്ക്തല അദാലത്തിലൂടെ 33 റേഷന്‍കാര്‍ഡുകള്‍ മുന്‍ഗണന വിഭാഗത്തിലേക്കും തെളിമപദ്ധതിയിലൂടെ ബിപിഎല്‍ അപേക്ഷകളല്‍ 48 റേഷന്‍കാര്‍ഡ് പിഎച്ച്എച്ച് വിഭാഗത്തിലേക്കും മാറ്റി. .

മാനുഷിക മൂല്യങ്ങൾ നിലനിൽക്കണം: പി.ബി. നൂഹ്

മൗണ്ട് സിയോൺ മെഡിക്കൽ കോളജിൽ ബിരുദദാന ചടങ്ങ് അടൂർ: ഏതു മേഖലയിലായാലും മാനുഷിക മൂല്യങ്ങൾ കൈമോശം വരാതെ സൂക്ഷിക്കണമെന്ന് ഗതാഗതവകുപ്പ് സ്പെഷൽ സെക്രട്ടറി പി.ബി. നൂഹ്. അടൂർ മൗണ്ട് സിയോൺ മെഡിക്കൽ കോളജിലെ ബിരുദദാന ചടങ്ങ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഡോക്ടർമാർ മനുഷ്യത്വം നിറഞ്ഞ സമീപനത്തോടെ രോഗികളെ കാണണം. സ്വഭാവരൂപീകരണം ഏതു മേഖലയിലും പ്രാധാന്യമർഹിക്കുന്ന ഘടകമാണെന്നും നൂഹ് അഭിപ്രായപ്പെട്ടു. മൗണ്ട് സിയോൺ ഗ്രൂപ്പ് ചെയർമാൻ ഡോ. ഏബ്രഹാം കലമണ്ണിൽ അധ്യക്ഷത വഹിച്ചു. കോട്ടയം ഗവ. മെഡിക്കൽ കോളജിലെ ഹൃദയ ശസ്ത്രക്രിയ വിഭാഗം മേധാവി ഡോ.ടി.കെ. ജയകുമാർ, പ്ലാസ്റ്റിക് സർജറി വിഭാഗത്തിലെ ഡോ. ലക്ഷ്മി ജയകുമാർ, മൗണ്ട് സിയോൺ മെഡിക്കൽ കോളജ് ഡയറക്ടർ കേരള സർവകലാശാല മുൻ സിൻഡിക്കറ്റ് അംഗം പ്രഫ.ഡി.കെ. ജോൺ, മാനേജിംഗ് ഡയറക്ടർ ജോസഫ് ഏബ്രഹാം, വൈസ് ചെയർമാൻ സാമുവൽ ഏബ്രഹാം, ഡയറക്ടർ ഷിജു വർഗീസ്, ഡെപ്യൂട്ടി മെഡിക്കൽ സൂപ്രണ്ട് ഡോ. ഹരികൃഷ്ണൻ, വിദ്യാർഥി പ്രതിനിധി ഡോ. സ്റ്റീവ് ജി. തോമസ് എന്നിവർ പ്രസംഗിച്ചു. 2019 അധ്യയന വർഷത്തിലെ വിദ്യാർഥികളാണ് ബിരുദം ഏറ്റുവാങ്ങിയത്.

ബസ് സ്കൂട്ടറിൽ ഇടിച്ചു

റാന്നി: അത്തിക്കയം പാലത്തിനു സമീപം ബസും ഇരുചക്ര വാഹനവും അപകടത്തില്‍പ്പെട്ട് ഒരാള്‍ക്ക് പരിക്കേറ്റു. കുടമുരട്ടി ചണ്ണ കുന്നക്കാലില്‍ ശമുവേലിനാണ് ( 63 ) പരിക്കേറ്റത്. പരിക്കേറ്റ ഇദ്ദേഹത്തെ കോട്ടയം മെഡിക്കല്‍ കോളജിൽ പ്രവേശിപ്പിച്ചു. റാന്നി ഭാഗത്തുനിന്നും വന്ന ഇരുചക്ര വാഹനവും പെരുനാട് ഭാഗത്തുനിന്നും വന്ന സ്വകാര്യ ബസും ഒരേപോലെ അത്തിക്കയം ജംഗ്ഷനിലേക്ക് തിരിഞ്ഞതാണ് അപകടകാരണം. വാഹനങ്ങൾ വേഗം കുറയ്ക്കാതെ കടന്നുപോകുന്നതു കാരണം ജംഗ്ഷനിൽ അപകടം പതിവാണ്.

കെപിഎസ്ടിഎ ധർണ നടത്തി

പത്തനംതിട്ട: ശമ്പള കമ്മീഷൻ നിയമനത്തിൽ അനങ്ങാപ്പാറ നയം തുടരുന്ന എൽഡിഎഫ് സർക്കാരിനെതിരേ കേരള പ്രദേശ് സ്കൂൾ ടീച്ചേഴ്സ് അസോസിയേഷൻ ല്ലാ കേന്ദ്രങ്ങളിൽ സായാഹ്ന ധർണ നടത്തി. പത്തനംതിട്ടയിൽ ഡിസിസി ജനറൽ സെക്രട്ടറി ജോൺസൻ വിളവിനാൽ ഉദ്ഘാടനം ചെയ്തു. ജില്ലാ പ്രസിഡന്‍റ് ഫിലിപ്പ് ജോർജ് അധ്യക്ഷത വഹിച്ചു. സെക്രട്ടറി വി.ജി. കിഷോർ, സംസ്ഥാന സമിതി അംഗങ്ങളായ എസ്. പ്രേം, എസ്. ദിലീപ് കുമാർ, സി.കെ. ചന്ദ്രൻ, വി. ലിബികുമാർ, വൈസ് പ്രസിഡന്‍റുമാരായ ഫ്രെഡി ഉമ്മൻ, ആർ. ജ്യോതിഷ്, തോമസ് മാത്യു എന്നിവർ പ്രസംഗിച്ചു.

കതിർ ആപ്പ്: രജിസ്ട്രേഷൻ കാലാവധി നീട്ടണമെന്ന് കർഷക കോൺ.

പത്തനംതിട്ട: കർഷകർക്ക് സർക്കാരിൽ നിന്നും ലഭിക്കേണ്ട ആനുകൂല്യങ്ങൾക്കുള്ള കതിർ ആപ്പ് രജിസ്റ്റർ ചെയ്യാനുള്ള സമയ പരിധി ജൂലൈ 31 ൽ നിന്നും ഓഗസ്റ്റ് 31ലേക്ക് നീട്ടണമെന്ന് കർഷക കോൺഗ്രസ് സംസ്ഥാന ജനറൽസെക്രട്ടറി ജോസ് മുത്തനേത്ത്. കർഷക കോൺഗ്രസ് പത്തനംതിട്ട ജില്ലാ നേതൃ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വന്യമൃഗ ശല്യം മൂലം കൃഷിനാശം സംഭവിക്കുന്ന കർഷകർക്ക് നൽകാനുള്ള ആനുകൂല്യങ്ങളും മരണമടയുന്നവരുടെ ആശ്രിതർക്കുള്ള ധനസഹായവും സർക്കാർ വെട്ടിക്കുറയ്ക്കുന്നതായും ജോസ് മുത്തനേത്ത് ആരോപിച്ചു. ജില്ലാ പ്രസിഡന്‍റ് ടി.എച്ച്. സിറാജുദ്ദീൻ അധ്യക്ഷത വഹിച്ചു. ഡിസിസി സെക്രട്ടറി മാത്യു ചെറിയാൻ, കർഷക കോൺഗ്രസ് ഭാരവാഹികളായ സുരേഷ് കോശി, സതീഷ് പഴകുളം, എം. കെ. പുഷോത്തമൻ, അജി അലക്സ്, ജോജി നടുകുന്നിൽ, കെ. വി. രാജൻ, ജോജി കഞ്ഞിക്കുഴി, സജു മാത്യു തുടങ്ങിയവർ പ്രസംഗിച്ചു.

എസ്. ബിനുവിന് അന്ത്യാഞ്ജലി അർപ്പിക്കും

അടൂർ: പുഞ്ചിരിക്കുന്ന മുഖവുമായി അടൂരിന്‍റെ പൊതുരംഗത്തു നിറഞ്ഞുനിന്ന എസ്. ബിനുവിന്‍റെ വിയോഗം അടൂരിനു തീരാനോവായി. പറക്കോട് പിജിഎം ഹൈസ്കൂളിൽ കെഎസ്‌യുവിലൂടെ പൊതുപ്രവർത്തനം ആരംഭിച്ചു. പത്തനംതിട്ട കാതോലിക്കേറ്റ് കോളജിൽ നിന്നും1996ൽ മഹാത്മാഗാന്ധി യൂണിവേഴ്സിറ്റി യൂണിയൻ കൗൺസിലറായി. 2000ത്തിൽ അടൂർ നഗരസഭാ കൗൺസിലറായി തെരഞ്ഞെടുക്കപ്പെട്ടു. അക്കാലയളവിൽ കേരളത്തിലെ ഏറ്റവും പ്രായം കുറഞ്ഞ നഗരസഭാ കൗൺസിലറും വികസന സ്റ്റാൻഡിംഗ് കമ്മിറ്റി അധ്യക്ഷനുമായിരുന്നു. കെഎസ്‌യുവിന്‍റെ താലൂക്ക് പ്രസിഡന്‍റ്, യൂത്ത് കോൺഗ്രസ് ജില്ലാ ജനറൽ സെക്രട്ടറി, ഡിസിസി ജനറൽ സെക്രട്ടറി, പറക്കോട് സർവീസ് സഹകരണ ബാങ്ക് പ്രസിഡന്‍റ്, ജില്ലാ ടൂറിസം പ്രമോഷൻ കൗൺസിൽ എക്സിക്യൂട്ടീവ് കമ്മിറ്റി അംഗം, 2005ൽ വീണ്ടും നഗരസഭാ കൗൺസിലർ. നിലവിൽ കോൺഗ്രസ് അടൂർ ബ്ലോക്ക് പ്രസിഡന്‍റ്, പത്തനംതിട്ട ടൂറിസം ഡെവലപ്മെന്‍റ് കോ-ഓപ്പറേറ്റീവ് സൊസൈറ്റി ഡയറക്ടർ ബോർഡ് അംഗം, പറക്കോട് വൈഎംസിഎ ബോർഡ് അംഗം, അടൂർ താലൂക്ക് ഗവൺമെന്‍റ് ആശുപത്രിവികസന സമിതി അംഗം എന്നീ നിലകളിൽ പ്രവർത്തിക്കുകയായിരുന്നു. യാത്രകൾഏറെ ഇഷ്ടപ്പെട്ട ബിനു തികഞ്ഞ മതേതരവാദിയായിരുന്നു. എല്ലാ മതവിഭാഗങ്ങളുടെയും ആഘോഷങ്ങളിൽ സജീവസാന്നിധ്യമായിരുന്നു. പറക്കോട് പ്രദേശത്തെ പാവപ്പെട്ടവരുടെ ആവശ്യങ്ങൾക്കായി ഓടിനടന്നു. മൃതദേഹം ഇന്നു രാവിലെ ഒന്പതിന് അടൂർ ബ്ലോക്ക് കോൺഗ്രസ് ഓഫീസിലും പിന്നീട് അടൂർ ഗാന്ധി സ്മൃതി മൈതാനത്തും പൊതുദർശനത്തിനുവച്ചശേഷമായിരിക്കും വീട്ടിലെത്തിക്കുക.

മന്ദമരുതി - കക്കുടുമൺ റോഡ് നിർമാണം ഉടൻ പൂർത്തിയാക്കണം

റാന്നി : 20 വർഷത്തിലധികമായി അറ്റകുറ്റപ്പണികൾ നടത്താതെ മന്ദമരുതി - കക്കുടുമൺ റോഡ് തകർന്ന് തരിപ്പണമായതിനേ തുടർന്ന് ജനരോഷമുയരുന്നു. 12.55 കോടി രൂപ അനുവദിച്ചതുകൊണ്ട് ഫ്ലക്സ് ബോർഡുകൾ സ്ഥാപിച്ചതല്ലാതെ നിർമാണ പ്രവർത്തനം യാതൊന്നും നടന്നില്ലെന്ന് നാട്ടുകാർ കുറ്റപ്പെടുത്തി. ശബരിമല തീർഥാടകർക്ക് അടക്കം ഉപയോഗിക്കാവുന്ന റോഡിനോടു സർക്കാർ കാട്ടുന്ന അവഗണന അവസാനിപ്പിക്കണമെന്ന് ആവശ്യപ്പെട്ട് കോൺഗ്രസ് പഴവങ്ങാടി ടൗൺ മണ്ഡലം കമ്മിറ്റി എംഎൽഎ ഓഫീസിലേക്ക് മാർച്ചും ധർണയും നടത്തി. കെപിസിസി സെക്രട്ടറി അനീഷ് വരിക്കണ്ണാമല ഉദ്ഘാടനം ചെയ്തു. മണ്ഡലം പ്രസിഡന്‍റ് പ്രമോദ് മന്ദമരുതി അധ്യക്ഷത വഹിച്ചു. കെപിസിസി സെക്രട്ടറി റിങ്കു ചെറിയാൻ മുഖ്യപ്രഭാഷണം നടത്തി. പ്രകാശ് തോമസ്, സി. കെ. ബാലൻ, സിബി താഴത്തില്ലത്ത്, റൂബി കോശി, അന്നമ്മ തോമസ്, ബെന്നി മാടത്തുംപടി, റെഞ്ചി പതാലിൽ, ബിനോജ് ചിറയ്ക്കൽ, ജോസഫ് കാക്കാനംപള്ളിയിൽ, ഏബ്രഹാം കെ. ചാക്കോ എന്നിവർ പ്രസംഗിച്ചു.

സംവിധാനങ്ങൾ കുത്തഴിഞ്ഞു; ജനറൽ ആശുപത്രിയിൽ പരാതി പ്രളയം

വളർത്തുനായയുമായി ആർഎംഒ ആശുപത്രിയിലെത്തിയതും വിവാദത്തിൽ പത്തനംതിട്ട: കോന്നി മെഡിക്കൽ കോളജിന്‍റെ ഭാഗമാകാൻ തയാറെടുക്കുന്ന പത്തനംതിട്ട ജനറൽ ആശുപത്രിയിലെ സംവിധാനങ്ങൾ കുത്തഴിഞ്ഞു. സ്ഥലപരിമിതികളിൽ വീർപ്പുമുട്ടുന്നതിനിടെ മെഡിക്കൽ കോളജിലേക്ക് താത്കാലികാടിസ്ഥാനത്തിൽ മാറ്റം പ്രതീക്ഷിച്ചിരിക്കുകയാണ് ജീവനക്കാരും ഡോക്ടർമാരും. ആശുപത്രിയിലെ ബി ആൻഡ് സി ബ്ലോക്ക് അറ്റകുറ്റപ്പണികൾക്കായി അടച്ചിടുന്പോൾ നിലവിലെ സംവിധാനങ്ങൾ കോന്നി മെഡിക്കൽ കോളജിലേക്കു മാറ്റാൻ തീരുമാനമായിട്ടുണ്ട്. ഇതു സംബന്ധമായ ഉത്തരവ് വന്നാൽ നടപടികൾ പൂർണമാകും. രോഗികളുടെ കിടത്തിച്ചികിത്സ ഈയാഴ്ചയോടെ ഭാഗികമായി നിലയ്ക്കും. ഇപ്പോൾതന്നെ ഐപി വിഭാഗത്തിലേക്ക് രോഗികളെ അയയ്ക്കുന്നത് പരിമിതപ്പെടുത്തി. ഗുരുതരാവസ്ഥയിലുള്ളവരെയും ശസ്ത്രക്രിയകളും തുടർ ചികിത്സയും വേണ്ടവരെയും റഫർ ചെയ്യുകയാണ്. ഇതിനിടെ ആശുപത്രി ആർഎംഒ കഴിഞ്ഞ ദിവസം വളർത്തു നായയുമായി ആശുപത്രിയിലെത്തിയ നടപടി വിവാദമായി. ഇതു സംബന്ധിച്ച് മുഖ്യമന്ത്രിക്ക് ഇന്നലെ പരാതിയും ലഭിച്ചു. സംഭവത്തെക്കുറിച്ച് അന്വേഷിക്കാൻ മുഖ്യമന്ത്രിയുടെ ഓഫീസ് നിർദേശിച്ചിട്ടുണ്ടെന്ന് പരാതിക്കാരനായ അഡ്വ. കുളത്തൂർ ജയ്സിംഗ് അറിയിച്ചു. ആർഎംഒയുടെ നടപടിയിൽ പ്രതിഷേധിച്ച് ഇന്നലെ എസ്ഡിപിഐ പ്രവർത്തകർ ആശുപത്രിവളപ്പിൽ പ്രതിഷേധം സംഘടിപ്പിച്ചിരുന്നു. ആർഎംഒ ഡോ.ദിവ്യ രാജനെതിരേയുള്ള പരാതിയിൽ ഉചിത നടപടി സ്വീകരിക്കാൻ ആരോഗ്യ വകുപ്പ് ഡയറക്ടർക്കു മുഖ്യമന്ത്രിയുടെ ഓഫീസ് നിർദേശം നൽകി. വളർത്തുനായയുമായി കാറിലെത്തിയ ഡോക്ടർ ഇതിനെ ആശുപത്രിക്കുള്ളിൽ പ്രവേശിപ്പിച്ചതായി പറയുന്നു. രോഗികളും ആരോഗ്യ പ്രവർത്തകരും തികഞ്ഞ ജാഗ്രതയോടെ പ്രവർത്തിക്കുന്ന ആശുപത്രിയിൽ വളർത്തുനായയുമായി ഡോക്ടർ എത്തിയത് ആക്ഷേപങ്ങൾക്കിട നൽകിയിരുന്നു. കഴിഞ്ഞദിവസം നാല് താത്കാലിക ജീവനക്കാരെ പിരിച്ചുവിട്ട സംഭവത്തിൽ പ്രതിഷേധിച്ച് സമരം ചെയ്ത ജീവനക്കാർ തന്നെയാണ് ആർഎംഒയുടെ നടപടിയെ വിമർശിച്ച് ആദ്യം രംഗത്തെത്തിയത്. ആശുപത്രിയിലെ വൈദ്യുതി ഉപയോഗിച്ച് ആർഎംഒയുടെ കാർ ചാർജ് ചെയ്യുന്നതായും അവർ കുറ്റപ്പെടുത്തി. ആർഎംഒയുടെ നടപടിയിൽ പ്രതിഷേധിച്ച് എസ്ഡിപിഐ പത്തനംതിട്ട മുനിസിപ്പല്‍ കമ്മിറ്റി നടത്തിയ പ്രതിഷേധം പ്രസിഡന്‍റ് നിയാസ് കൊന്നമൂട് ഉദ്ഘാടനം ചെയ്തു. എസ്ഡിപി.ഐ ആറന്മുള നിയോജകമണ്ഡലം സെക്രട്ടറി അന്‍സാരി കൊന്നമൂട് അധ്യക്ഷത വഹിച്ചു. മണ്ഡലം വൈസ് പ്രസിഡന്‍റ് റമീസ് റഹീം, ഓര്‍ഗനൈസിംഗ് സെക്രട്ടറി പി. എം. നാസറുദ്ദീൻ, കമ്മിറ്റിയംഗം കെ. എച്ച്. ഷാജി, ഫൈസി, ബ്രാഞ്ച് ഭാരവാഹികള്‍ എന്നിവര്‍ പ്രസംഗിച്ചു.

വനമഹോത്സവം ഇന്ന് വെച്ചൂച്ചിറ നവോദയ വിദ്യാലയത്തിൽ

വെച്ചൂച്ചിറ: സംസ്ഥാന വനം, വന്യജീവി വകുപ്പ് സംഘടിപ്പിക്കുന്ന പത്തനംതിട്ട ജില്ലാതല വനമഹോത്സവം ഇന്ന് വെച്ചൂച്ചിറ ജവഹർ നവോദയ വിദ്യാലയത്തിൽ നടക്കും. രാവിലെ 10.30ന് പ്രമോദ് നാരായൺ എംഎൽഎ ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്‍റ് ഇ.വി. വർക്കി അധ്യക്ഷത വഹിക്കും. റാന്നി ഡിഎഫ്ഒ എൻ. രാജേഷ് മുഖ്യപ്രഭാഷണം നടത്തും. വനംവകുപ്പുദ്യോഗസ്ഥരും ജനപ്രതിനിധികളും പങ്കെടുക്കും.

ലഹരിവിരുദ്ധ ബോധവത്കരണം

അടൂർ: നഷാ മുക്ത് ഭാരത് അഭിയാന്‍ കാമ്പെയിന്‍റെ ഭാഗമായി ജില്ലാ സാമൂഹിക നീതി വകുപ്പിന്‍റെയും ഗാന്ധിഭവന്‍ ഐആര്‍സിഎ അടൂരിന്‍റെയും ആഭിമുഖ്യത്തില്‍ അടൂര്‍ എസ്എന്‍ ഐടി കോളജില്‍ ലഹരി വിരുദ്ധ ബോധവത്കരണം സംഘടിപ്പിച്ചു. എസ്എന്‍ ഐടി മാനേജിംഗ് ഡയറക്ടര്‍ എബിന്‍ അമ്പാടിയില്‍ ഉദ്ഘാടനം ചെയ്തു. കോളജ് പ്രിന്‍സിപ്പല്‍ രാധാകൃഷ്ണന്‍ നായര്‍ അധ്യക്ഷത വഹിച്ചു. ജില്ലാ സാമൂഹിക നീതി ഓഫിസര്‍ ജെ. ഷംലാ ബീഗം, ഗാന്ധിഭവന്‍ പ്രോജക്ട് ഡയറക്ടര്‍ ശ്രീലക്ഷ്മി , കൗണ്‍സിലര്‍ രേഷ്മ എന്നിവര്‍ പങ്കെടുത്തു. റാന്നി: നഷാ മുക്ത് ഭാരത് അഭിയാന്‍ ജില്ലാതല കാമ്പെയിന്‍റെ ഭാഗമായി അടിച്ചിപ്പുഴ പട്ടിക വര്‍ഗ നഗറിലെ വിദ്യാര്‍ഥികൾ, രക്ഷിതാക്കള്‍, സാമൂഹിക പ്രവര്‍ത്തകർ, കുടുംബശ്രീ പ്രവര്‍ത്തകര്‍ എന്നിവര്‍ക്കായി ഗാന്ധിഭവന്‍ ഐആര്‍സിഎ അടൂര്‍ സഹകരണത്തോടെ അടിച്ചിപ്പുഴ കമ്യൂണിറ്റി ഹാളില്‍ ലഹരി വിരുദ്ധ ബോധവത്കരണം സംഘടിപ്പിച്ചു. ജില്ലാ സാമൂഹിക നീതി ഓഫിസര്‍ ജെ. ഷംലാ ബീഗം ഉദ്ഘാടനം ചെയ്തു. നാറാണമൂഴി ഗ്രാമപഞ്ചായത്ത് സിഡിഎസ് ചെയര്‍പെഴ്‌സണ്‍ ബിദു നാരായണന്‍ അധ്യക്ഷത വഹിച്ചു. ജില്ലാ സാമൂഹിക നീതി ഓഫീസ് ജൂണിയര്‍ സൂപ്രണ്ട് എ. ഷിബിൽ, അടിച്ചിപ്പുഴ എസ് ടി അഡ്വൈസര്‍ രാജപ്പൻ, കുടുംബശ്രീ അടിച്ചിപ്പുഴ സെക്രട്ടറി രജനി, ഓള്‍ കേരള ഹിന്ദു മലവേട സംഘടന സംസ്ഥാന സെക്രട്ടറി കുഞ്ഞുമോൻ, ഗാന്ധിഭവന്‍ പ്രോജക്ട് ഡയറക്ടര്‍ ശ്രീലക്ഷ്മി, കൗണ്‍സിലര്‍ രേഷ്മ എന്നിവര്‍ പ്രസംഗിച്ചു.

കെ. മഹേഷ് കുമാർ അടൂർ നഗരസഭാ ചെയർമാൻ

അടൂർ: നഗരസഭാ ചെയർമാനായി സിപിഎമ്മിലെ കെ. മഹേഷ്കുമാർ തെരഞ്ഞെടുക്കപ്പെട്ടു. ആർഡിഒ വിപിൻ കുമാറായിരുന്നു വരണാധികാരി. യുഡിഎഫും ബിജെപിയും വിട്ടുനിന്നതിനാൽ മത്സരം ഏകകണ്ഠമായിരുന്നു. നഗരസഭയിലെ 27- ാം വാർഡിനെയാണ് മഹേഷ്കുമാർ പ്രതിനിധീകരിക്കുന്നത്. മഹേഷ് കുമാറിന്‍റെ പേര് സിപിഐയിലെ ഡി. സജി നിർദേശിച്ചു. അജി പാണ്ടിക്കുടി പിന്താങ്ങി. മുൻ നഗരസഭാ കൗൺസിലർ എസ്.ബിനുവിന്‍റെ നിര്യാണത്തെത്തുടർന്ന് യുഡിഎഫ് അംഗങ്ങൾ നഗരസഭാ ചെയർമാൻ തെരഞ്ഞെടുപ്പ് യോഗത്തിൽ പങ്കെടുത്തില്ല. അതിനാൽ മഹേഷ് കുമാറിനെതിരേ ആരും മത്സരരംഗത്തെത്തിയില്ല. നഗരസഭാ ചെയർപേഴ്സണായിരുന്ന ദിവ്യ റെജി മുഹമ്മദ് സിപിഎം നിർദേശത്തെത്തുടർന്ന് സ്ഥാനം രാജിവച്ചതോടെയാണ് പുതിയ ചെയർമാനെ തെരഞ്ഞെടുക്കേണ്ടിവന്നത്. ചുരുങ്ങിയ കാല‍യളവിലേക്കാണ് പദവിയെങ്കിലും ഘടകകക്ഷികളായ കേരള കോൺഗ്രസ് -എമ്മും എൻസിപി -എസും ചെയർമാൻസ്ഥാനത്തിന് അവകാശവാദം ഉന്നയിച്ചിരുന്നു. ഇപ്പോഴത്തെ ഭരണസമിതി അധികാരത്തിലെത്തിയശേഷമുള്ള മൂന്നാമത്തെ ചെയർമാനാണ് മഹേഷ് കുമാർ. ആദ്യടേമിൽ സിപിഐയിലെ ഡി. സജിയായിരുന്നു ചെയർമാൻ. രണ്ടരവർഷം കഴിഞ്ഞപ്പോഴാണ് ദിവ്യ റെജി മുഹമ്മദ് അധ്യക്ഷയായത്.

കുന്പനാട് വൈഎംസിഎ സുവർണ ജൂബിലി ഉദ്ഘാടനം അഞ്ചിന്

പത്തനംതിട്ട: കുമ്പനാട് വൈഎംസിഎ സുവർണ ജൂബിലി ആഘോഷങ്ങളുടെ ഉദ്ഘാടനം അഞ്ചിനു നടക്കുമെന്ന് ഭാരവാഹികൾ പത്രസമ്മേളനത്തിൽപറഞ്ഞു. വൈകുന്നേരം അഞ്ചിന് ജില്ലാ കളക്ടർ എസ് . പ്രേംകൃഷ്‌ണൻ ഉദ്ഘാടനം ചെയ്യും. ഡോ. യയാക്കിം മാർ കൂറിലോസ് സഫ്രഗൻ മെത്രാപ്പോലീത്ത ജൂബിലി പ്രവർത്തന പരിപാടികളുടെ ഉദ്ഘാടനവും അനുഗ്രഹപ്രഭാഷണവും നിർവഹിക്കും. വൈഎംസിഎ ദേശീയ ട്രഷറാർ റെജി ജോർജ് മുഖ്യപ്രഭാഷണം നടത്തും. വൈഎംസിഎയുടെ മുൻകാല നേതാക്കളെ ചടങ്ങിൽ ആദരിക്കും. കൂടാതെ പരമ്പരാഗത തൊഴിലുകളിൽ ദീർഘകാലം ഏർപ്പെട്ട് വിജയം കൈവരിച്ച സമീപവാസികളെയും ആദരിക്കും. ഒരു വർഷം നീണ്ടുനിൽക്കുന്ന ജൂബിലി പരിപാടികളിൽ ഭവനനിർമാണ സഹായം, വിവാഹ സഹായം, വിദ്യാഭ്യാസ സഹായം എന്നിവ കൂടാതെ 50 ഡയാലിസിസ് രോഗികൾക്ക് ചികിത്സാ സഹായവും നൽകും. പ്രസിഡന്‍റ് തോമസ് വി. ജോൺ, വൈസ് പ്രസിഡൻറ് ജോസഫ് നെല്ലാനിക്കൻ, സെക്രട്ടറി റോയി ഈപ്പൻ, ട്രഷറർ സിസിൽ ജോർജ് വർഗീസ്, ജൂബിലി കൺവീനർ എബി ജേക്കബ് എന്നിവർ പത്രസമ്മേളനത്തിൽ പങ്കെടുത്തു.

വനംവകുപ്പ് ബോധവത്കരണ ക്ലാസ് നടത്തി

പത്തനംതിട്ട: നീലിപിലാവ് ഗവ. എൽപി സ്കൂൾ , കട്ടച്ചിറ ഗവ. ട്രൈബൽ ഹൈസ്കൂൾ എന്നിവിടങ്ങളിൽ വനംവകുപ്പിന്‍റെ നേതൃത്വത്തിൽ പാമ്പുകളുടെ സാന്നിധ്യ പരിശോധനയും വിദ്യാർഥികൾക്കും അധ്യാപകർക്കും ബോധവത്കരണ ക്ലാസുകളും നടത്തി. പാമ്പ് കടിയേറ്റാൽ എടുക്കേണ്ട അടിയന്തര നടപടി, ആന്‍റിവനം ലഭ്യമായ ആശുപത്രികളുടെ വിവരങ്ങൾ തുടങ്ങിയ വിഷയങ്ങൾ ക്ലാസിൽ ഉൾപ്പെടുത്തി. വനം വകുപ്പ് വികസിപ്പിച്ച മൊബൈൽ ആപ്പ് ആയ സർപ്പയുടെ പ്രവർത്തനം വിദ്യാർഥികൾക്കും അധ്യാപകർക്കും പരിചയപ്പെടുത്തി. കേരളത്തിൽ ആന്‍റിവനം ലഭ്യമായ ആശുപത്രികളുടെ വിവരങ്ങൾ, അംഗീകൃത പാന്പു പിടിത്തക്കാരെ ബന്ധപ്പെടാനുള്ള ഫോൺ നമ്പർ എന്നിവ സ്കൂളുകളിലെ ഹെഡ്മാസ്റ്റർമാർക്ക് കൈമാറി. പത്തനംതിട്ട സോഷ്യൽ ഫോറസ്ട്രി റേഞ്ച് ഓഫീസർ ജെ. മുഹമ്മദ് സാബീർ, റാന്നി ആർആർടി ഡെപ്യൂട്ടി റേഞ്ച് ഫോറസ്റ്റ് ഓഫീസർ ജി. കൃഷ്ണകുമാർ, സെക്ഷൻ ഫോറസ്റ്റ് ഓഫീസർ പി.കെ. കൃഷ്ണകുമാർ, ബീറ്റ്ഫോറസ്റ്റ് ഓഫീസർമാരായ സതീഷ് കുമാർ, സോളമൻ ജോർജ് എന്നിവർ പങ്കെടുത്തു. പാമ്പ് വിഷബാധയേ തുടർന്ന് ഉണ്ടാകുന്ന ജീവഹാനി പൂർണമായി ഒഴിവാക്കുകയെന്നതാണ് പരിപാടിയുടെ മുഖ്യലക്ഷ്യമെന്ന് ഉദ്യോഗസ്ഥർ അറിയിച്ചു.

ഭക്ഷ്യസുരക്ഷാ പരിശോധന: 48 സ്ഥാപനങ്ങള്‍ക്ക് നോട്ടീസ്

പത്തനംതിട്ട: ആരോഗ്യ വകുപ്പിന്‍റെയും ഭക്ഷ്യസുരക്ഷാ വകുപ്പിന്റേയും സംയുക്ത പരിശോധനയില്‍ ജില്ലയിലെ 48 സ്ഥാപനങ്ങള്‍ക്ക് നോട്ടീസ് നല്‍കി. 10 ആരോഗ്യ ബ്ലോക്കുകളിലായി 168 സ്ഥാപനങ്ങളിലാണ് മിന്നല്‍ പരിശോധന നടത്തിയത്. നിയമ ലംഘനങ്ങള്‍ കണ്ടെത്തിയ സ്ഥാപനങ്ങള്‍ക്കെതിരേ ലംഘനത്തിന്റെ ഗൗരവമനുസരിച്ച് ബോധവത്കരണം, അടച്ചുപൂട്ടുന്നത് ഉള്‍പ്പടെയുളള കര്‍ശന ശിക്ഷാ നടപടി സ്വീകരിക്കുമെന്ന് ജില്ലാ മെഡിക്കല്‍ ഓഫീസര്‍ ഡോ. എല്‍ അനിതാ കുമാരി അറിയിച്ചു. ഭക്ഷണ ശാലകള്‍, ബേക്കറികള്‍, മറ്റ് ഭക്ഷ്യ വിതരണ സ്ഥാപനങ്ങള്‍ എന്നിവിടങ്ങളില്‍ ജീവനക്കാര്‍ വ്യക്തിശുചിത്വവും, പരിസരശുചിത്വവും പാലിക്കണം. അംഗീകാരമുളള ഡോക്ടര്‍ നേരിട്ടുകണ്ട് പരിശോധന നടത്തി നല്‍കുന്ന ഹെല്‍ത്ത് കാര്‍ഡുകള്‍ മാത്രമേ പരിഗണിക്കുകയുളളൂ. ചാത്തങ്കരിയില്‍ അടുക്കള വൃത്തിയായി സൂക്ഷിക്കാത്ത സ്ഥാപനം താത്കാലികമായി അടച്ചു. പുകയില നിയന്ത്രണ നിയമം പാലിക്കാത്ത 14 സ്ഥാപനങ്ങള്‍ക്ക് നോട്ടീസ് നല്‍കുകയും 2800 രൂപ പിഴ ഈടാക്കുകയും ചെയ്തു. നോട്ടീസ് കാലാവധിക്കുളളില്‍ പ്രശ്‌നങ്ങള്‍ പരിഹരിക്കാത്ത പക്ഷം കര്‍ശന നടപടി സ്വീകരിക്കും. ജില്ലയിലെ ആരോഗ്യസ്ഥാപനങ്ങളുടേയും പരിധിയിലുള്ള കടകളിലും സ്ഥാപനങ്ങളിലും നിയമാനുസൃത പരിശോധന തുടര്‍ച്ചയായി നടത്തുമെന്നും ജില്ലാ മെഡിക്കല്‍ ഓഫീസര്‍ അറിയിച്ചു.

കലഞ്ഞൂർ സ്കൂളിൽ ലഹരി വിരുദ്ധ പാവനാടകം

കലഞ്ഞൂർ: മോഡൽ ഹയർ സെക്കൻഡറി നാഷണൽ സർവീസ് സ്കീമും അടൂർ അനുഗ്രഹ ലഹരി വിമോചന കേന്ദ്രവും സംയുക്തമായി കലഞ്ഞൂർ ഗവ. എൽപി സ്കൂൾ വിദ്യാർഥികൾക്കായി ലഹരി വിരുദ്ധ പാവനാടകം നടത്തി. വായനവഴി ജീവിത വിജയമാണ് ലഹരി എന്ന സന്ദേശമുയർത്തിയ പാവനാടകം കുട്ടികൾക്ക് ഏറെ ആസ്വാദ്യകരമായി. പിടിഎ പ്രസിഡന്‍റ് എസ്. രാജേഷ് അധ്യക്ഷത വഹിച്ചു. പ്രിൻസിപ്പൽ എം.സക്കീന ഉദ്ഘാടനം ചെയ്തു. പ്രോഗ്രാം ഓഫീസർ സജയൻ ഓമല്ലൂർ, അനുഗ്രഹ ഡയറക്ടർ റവ.അജി ചെറിയാൻ, പ്രഥമാധ്യാപകൻ ഫിലി്പ് ജോർജ്, സീനിയർ അധ്യാപിക കെ. പി. ബിനിത എന്നിവർ പ്രസംഗിച്ചു.

ചിറ്റാറിലെ യുവകർഷകൻ മത്തായിയുടെ മരണം: തുടരന്വേഷണത്തിന് സിബിഐ സംഘമെത്തി

പത്തനംതിട്ട: ചിറ്റാറിലെ കർഷകനായ കുടപ്പനക്കുളം പടിഞ്ഞാറെ ചരിവിൽ പി.പി. മത്തായി ( പൊന്നു -41) വനപാലകരുടെ കസ്റ്റഡിയിൽ മരിച്ച സംഭവത്തിൽ സിബിഐ സംഘം പുനരന്വേഷണം തുടങ്ങി. സിബിഐ തിരുവനന്തപുരം യൂണിറ്റിലെ ഉദ്യോഗസ്ഥർ പത്തനംതിട്ടയിൽ ക്യാന്പ് ചെയ്താണ് അന്വേഷണം നടത്തുന്നത്. മത്തായിയുടെ ഭാര്യ ഷീബാമോളുടെ മൊഴി ഇന്നലെ ഇവർ രേഖപ്പെടുത്തി. ഇന്നലെ ഉച്ചയ്ക്ക് ഒരു മണിയോടെയാണ് സിബിഐ ഉദ്യോഗസ്ഥരെത്തിയത്. ഒരു മണിക്കൂറോളം ഷീബാമോളുമായി സംസാരിച്ച് മൊഴി രേഖപ്പെടുത്തി. വനം വകുപ്പ് ഉദ്യോഗസ്ഥർ മത്തായിയെ വീട്ടിൽ നിന്ന് വിളച്ചിറക്കി ജീപ്പിൽ കയറ്റി ക്കൊണ്ടുപോയത് ഉൾപ്പെടെയുള്ള വിവരങ്ങളാണ് അന്വേഷണസംഘം ചോദിച്ചതെന്നും കുറ്റക്കാരായ വനപാലകരെയും കൂട്ടുനിന്നവരെയും നിയമത്തിന് മുന്നിൽ കൊണ്ടുവരണമെന്ന് സിബിഐയോട് ആവശ്യപ്പെട്ടുവെന്നും ഷീബാമോൾ പറഞ്ഞു. മത്തായിക്കേസിൽ കഴിഞ്ഞ മാസമാണ് ഹൈക്കോടതി തുടരന്വേഷണിന് ഉത്തരവിട്ടത്. 2020 ജൂലൈ 28ന് അരീക്കക്കാവിലെ വാടക വീട്ടിൽ നിന്ന് ചിറ്റാർ ഫോറസ്റ്റ് സ്റ്റേഷൻ അധികൃതർ കസ്റ്റഡിയിലെടുത്ത മത്തായിയെ കുടുംബവീട്ടിലെ കിണറ്റിൽ മരിച്ച നിലയിൽ കണ്ടെത്തുകയായിരുന്നു. തെളിവെടുപ്പിനായി എത്തിച്ചപ്പോൾ കിണറ്റിലേക്ക് തള്ളിയിട്ടെന്നായിരുന്നു ആക്ഷേപം. എന്നാൽ മത്തായി കിണറ്റിൽ ചാടിയെന്നാണ് വനപാലകർ പറയുന്നത്. മൂന്ന് ഏജൻസികൾ അന്വേഷിച്ചിട്ടും മത്തായിയുടെ കുടുംബത്തിന് നീതി ലഭിച്ചില്ല. സിബിഐ ഏറ്റെടുത്ത അന്വേഷണത്തിൽ മത്തായിയെ കസ്റ്റഡിയിലെടുത്ത ഏഴ് വനപാലകർ മന:പൂർവമല്ലാത്ത നരഹത്യ നടത്തിയെന്നാണ് കണ്ടെത്തിയത്. എന്നാൽ മത്തായിയുടേത് കൊലപാതകമാണെന്ന ഉറച്ച വിശ്വാസത്തിലാണ് കുടുംബം. പ്രതിസ്ഥാനത്തുള്ള വനപാലകരെ അറസ്റ്റ് ചെയ്തിരുന്നില്ല. വകുപ്പുതല നടപടിയുടെ ഭാഗമായി സസ്പെൻഷനിലായ ഏഴ് വനപാലകരെ ആറുമാസം കഴിഞ്ഞ് സർവീസിൽ തിരിച്ചെടുത്തിരുന്നു. ഇതിൽ ഒരു വനിതാ ഫോറസ്റ്റ് ഓഫീസർ ആരോഗ്യ വകുപ്പിലേക്ക് മാറി. അന്വേഷണം അട്ടിമറിക്കാൻ രേഖകളിൽ കൃത്രിമം കാട്ടിയ ഉദ്യോഗസ്ഥൻ വിരമിച്ചു. അഞ്ച് പേർ വനംവകുപ്പിൽ ജോലിയിൽ തുടരുന്നു. പ്രതികളെ ശിക്ഷിക്കണമെന്ന് ആവശ്യപ്പെട്ടാണ് കുടുംബം ഹൈക്കോടതിയിൽ തുടരന്വേഷണ ഹർജി നൽകിയത്.

‌ജില്ലയിൽ ഒരു ദിവസം രണ്ട് ആനകൾ ചരിഞ്ഞു

കൊച്ചയ്യപ്പന്‍റെ വിയോഗം; ആനത്താവളത്തിനു നഷ്ടം കോന്നി: കുറുന്പ് കാട്ടിയും സഞ്ചാരികളോട് ഇടപഴകിയും പ്രിയങ്കരനായി മാറിയ കുട്ടിയാന കൊച്ചയ്യപ്പന്‍റെ പെട്ടെന്നുള്ള മരണം കോന്നി ആനത്താവളത്തിനു നഷ്ടമായി. അഞ്ച് വർഷം മുന്പ് കൊച്ചുകോയിക്കൽ വനമേഖലയിൽ കണ്ടെത്തിയ കുട്ടിയാനയെ വനംവകുപ്പ് ഏറ്റെടുത്ത് ആനത്താവളത്തിലെത്തിക്കുകയായിരുന്നു. പരിചരണങ്ങൾ നൽകി ആനയെ നിരീക്ഷിക്കാൻ പ്രത്യേക സംഘത്തെ തന്നെ നിയോഗിച്ചിരുന്നു. കൊച്ചയ്യപ്പന്‍റെ കുറുന്പ് കേട്ടറിഞ്ഞ് നിരവധിയാളുകൾ കൊച്ചുകുട്ടികളുമായി ആനത്താവളത്തിലെത്തി ദൃശ്യങ്ങൾ പകർത്തി. ആനത്താവളത്തിലെ പുതിയ അതിഥിയെ സന്ദർശിക്കാനെത്തിയ മന്ത്രി എ.കെ. ശശീന്ദ്രൻ തന്നെയാണ് കുട്ടിയാനയ്ക്ക് കൊച്ചയ്യപ്പൻ എന്ന പേരു നൽകിയത്. ആനയ്ക്കു പ്രത്യേക അസ്വസ്ഥതകൾ ഉണ്ടായിരുന്നില്ല. വൈറ്റമിന്‍റെ കുറവ് ഉള്ളതിനാൽ അതിനുള്ള ചികിത്സ നൽകി വന്നിരുന്നു. ഇന്നലെ രാവിലെ പാപ്പാൻ എത്തുന്പോഴാണ് ആന നിശ്ചലനായി കിടക്കുന്നതു കണ്ടത്. അപ്രതീക്ഷിതമായ അന്ത്യത്തിന്‍റെ കാരണങ്ങൾ കണ്ടെത്താൻ വനംവകുപ്പ് ശ്രമം തുടങ്ങിയിട്ടുണ്ട്. ഹെർപിസ് രോഗബാധയെന്ന് ഹെർപിസ് രോഗബാധയെ തുടർന്നാണ് ആനക്കുട്ടി ചരിഞ്ഞതെന്നാണ് പ്രാഥമിക നിഗമനം. കഴിഞ്ഞ ദിവസവും പതിവായുള്ള പ്രഭാത നടത്തം ഉൾപ്പെടെ ഉള്ള വ്യായാമങ്ങൾ കുട്ടിയാനയ്ക്കു ലഭിച്ചിരുന്നു. കോന്നി വനം വകുപ്പ് അസിസ്റ്റന്‍റ് വെറ്ററിനറി സർജൻ ഡോ. സിബി, കോട്ടൂർ ആനത്താവളത്തിലെ വെറ്ററിനറി ഓഫീസർ ഡോ. അരുൺ കുമാർ, പത്തനംതിട്ട വെറ്ററിനറി ഡോക്ടർ രാഹുൽ, ഡോ. ഷബീന തുടങ്ങിയവർ അടങ്ങിയ സംഘം പോസ്റ്റ് മോർട്ടം നടപടികൾ പൂർത്തിയാക്കിയ ശേഷം ജഡം കുമ്മണ്ണൂർ വനത്തിൽ മറവ് ചെയ്തു. കെ. യു. ജനീഷ് കുമാർ എംഎൽഎ, കോന്നി ഡിഎഫ്ഒ ആയുഷ് കുമാർ കോറി അടക്കമുള്ളവർ സ്ഥലത്തെത്തി. അന്വേഷണം നടത്തും കോന്നി : ആനക്കൂട്ടിലെ കുട്ടിയാന അഞ്ചു വയസുകാരൻ കൊച്ചയ്യപ്പൻ ചരിഞ്ഞ സംഭവത്തിൽ കൂടുതൽ അന്വേഷണം ഉണ്ടാകുമെന്ന് ഡിഎഫ്ഒ ആ‍യുഷ്മാൻ കോറി. രാവിലെ പാപ്പാൻ എത്തിയപ്പോഴാണ് ചലനമറ്റ നിലയിൽ കൊച്ചയ്യപ്പനെ കണ്ടത്. 2021ൽ ആങ്ങമൂഴി വനത്തിൽ നിന്നാണ് ആനക്കൂട്ടത്തിൽ നിന്നും തള്ളിയ നിലിൽ കൊച്ചയ്യപ്പനെ കണ്ടെത്തിയത്. ആനയ്ക്കു ചില ആരോഗ്യ പ്രശ്നങ്ങൾ നിലനിന്നിരുന്നതായും എന്നാൽ മരണകാരണം കണ്ടെത്താൻ പോസ്റ്റുമോർട്ടം റിപ്പോർട്ട് ലഭിക്കണമെന്നും ഡിഎഫ്ഒ പറഞ്ഞു. കോന്നി ഇക്കോ ടൂറിസം കേന്ദ്രത്തിന്‍റെ ആസ്ഥാനമായ ആനത്താവളത്തിൽ ആനകളെ കാണാനായി നിരവധിയാളുകളാണ് എത്തുന്നത്.. ആനകളെ പരിചരിക്കാൻ സ്ഥിരവും താത്കാലികവുമായ ജീവനക്കാരെയും നിയോഗിച്ചിട്ടുണ്ട്. കുട്ടിയാന ചരിഞ്ഞതിനേ തുടർന്ന് ഇന്നലെ ആനത്താവളത്തിന് അവധി നൽകി. ഓമല്ലൂരിന്‍റെ സ്വന്തം മണികണ്ഠനും വിടവാങ്ങി ഓമല്ലൂർ: ഗജരത്നം ഓമല്ലൂർ മണികണ്ഠൻ ചരിഞ്ഞു. ഓമല്ലൂർ രക്തകണ്ഠ സ്വാമി ക്ഷേത്ര വളപ്പിലാണ് ഇന്നലെ വൈകുന്നേരം 6.30ന് ആന ചരിഞ്ഞത്. ദേവസ്വം ബോർഡിന്‍റെ ഉടമസ്ഥതയിലുള്ള ആനയെ ഓമല്ലൂർ ക്ഷേത്രത്തിലാണ് പരിപാലിച്ചു വന്നിരുന്നത്. കഴിഞ്ഞ ഒരു മാസമായി ആനയ്ക്ക് എരണ്ട കെട്ടൽ രോഗം ബാധിച്ചിരുന്നു. ക്ഷേത്ര കോമ്പൗണ്ടിൽ തളച്ചിരുന്ന ആനയെ ദേവസ്വം ബോർഡിന്‍റെ വെറ്ററിനറി ഡോക്ടർ ബിനു ഗോപിനാഥ് പരിശോധന നടത്തുകയും എല്ലാ ദിവസവും ഡ്രിപ്പ് ഇടുകയും ചെയ്തിരുന്നു. ആനയ്ക്ക് വിദഗ്ധ ചികിത്സ നൽകണമെന്ന് നാട്ടുകാരും ആന പ്രേമി സംഘവും തിരുവിതാംകൂർ ദേവസ്വം ബോർഡ് പ്രസിഡന്‍റിനോട് ആവശ്യപ്പെട്ടതിനേ തുടർന്ന് തൃശൂരിൽ നിന്നും എറണാകുളത്തു നിന്നും വിദഗ്ധ ഡോക്ടർമാരെ എത്തിച്ച് ചികിത്സ നൽകിയിരുന്നു. കഴിഞ്ഞ രണ്ടു ദിവസമായി ആനയുടെ സ്ഥിതി വളരെ മോശമായിരുന്നു. ഡോക്ടർ എത്തി മരുന്നു നൽകിയെങ്കിലും ഇന്നലെ ഉച്ചയോടെ ആന കൊമ്പുകുത്തി ക്രെയിൻ ഉപയോഗിച്ച് പൊക്കി നിർത്താൻ ശ്രമിച്ചിട്ടും ഫലം കണ്ടില്ല. അസുഖബാധിതനായതിനേ തുടർന്ന് കഴിഞ്ഞ ഒരു മാസമായി ഡ്രിപ്പ് മാത്രമാണ് നൽകിയിരുന്നത്. തലയെടുപ്പിൽ മുന്പൻ തൃശൂർ എഴുത്തച്ഛൻ ഗ്രൂപ്പിൽ നിന്നും ചലച്ചിത്രതാരം കെ.ആർ. വിജയ വിലയ്ക്കു വാങ്ങി ശബരിമല ക്ഷേത്രത്തിൽ നടയ്ക്കു വച്ച കുട്ടിയാനയാണ് മണികണ്ഠൻ എന്ന പേരിൽ പിൽക്കാലത്ത് ഗജരാജനായത്. അന്നത്തെ ശബരിമല തന്ത്രിയാണ് ആനയ്ക്ക് മണികണ്ഠൻ എന്ന് നാമകരണം ചെയ്തത്. വർഷങ്ങളോളം ശബരിമല സന്നിധാനത്ത് തിടമ്പ് എടുത്തിരുന്നത് മണികണ്ഠനാണ്. കൂടാതെ ആറന്മുള പാർഥസാരഥി ക്ഷേത്രം, തിരുവല്ല ശ്രീവല്ലഭ ക്ഷേത്രം, തൃപ്പാറമഹാദേവക്ഷേത്രം മലയാലപ്പുഴ ദേവി ക്ഷേത്രം, കോയിക്കൽ ശ്രീധർമശാസ്ത ക്ഷേത്രത്തിലെ സ്വർണ തിടമ്പ് ഉൾപ്പെടെ മധ്യതിരുവിതാംകൂറിലെ ദേവസ്വം ബോർഡിന്റെയും അല്ലാത്തതുമായ എല്ലാ പ്രസിദ്ധ ക്ഷേത്രങ്ങളിലും ഉത്സവ ആഘോഷങ്ങൾക്ക് മണികണ്ഠൻ അവിഭാജ്യ ഘടകമായിരുന്നു. പത്തടി തലപ്പൊക്കവും 55 വയസുമുള്ള മണികണ്ഠൻ ലക്ഷണമൊത്ത ആനകളിൽ അഗ്രഗണ്യനായിരുന്നു.പെട്ടെന്നു പിണങ്ങുന്ന സ്വഭാവക്കാരനായിരുന്ന മണികണ്ഠൻ പലപ്പോഴും തലവേദന സൃഷ്ടിച്ചിരുന്നു. ‌പാപ്പാൻമാരോട് അത്രപെട്ടെന്ന് ഇണങ്ങുമായിരുന്നില്ല. എന്നാൽ ഓമല്ലൂരുകാരോടു പ്രത്യേക മമത ആനയ്ക്ക് ഉണ്ടായിരുന്നതായി പ്രദേശവാസികൾ പറഞ്ഞു. ഓമല്ലൂർ വിട്ടുള്ള സ്ഥലങ്ങളിലാണ് ആന ഇടഞ്ഞിട്ടുള്ളത്. ആനയുടെ മരണ വിവരം അറിഞ്ഞ് അമ്മമാർ ഉൾപ്പെടെ നൂറുകണക്കിന് ഭക്തജനങ്ങൾ ഇന്നലെ ക്ഷേത്രസന്നിധിയിൽ എത്തിച്ചേർന്നു. ആനത്താവളത്തിൽ അവശേഷിക്കുന്നത് നാല് ആനകൾ മാത്രം കൊച്ചയ്യപ്പൻ കൂടി ചരിഞ്ഞതോടെ ഇനിയും അവശേഷിക്കുന്നത് കോന്നി ആനത്താവളത്തിൽ നാല് ആനകൾ മാത്രം. പ്രിയദർശനി (42), മീന (34), ഈവ (23), കൃഷ്ണ (13) എന്നീ ആനകൾ മാത്രമാണ് കോന്നി ആനത്താവളത്തിൽ അവശേഷിക്കുന്നത്. 2015ൽ കുട്ടിയാനകളായ ലക്ഷ്മി 2020ൽ പിഞ്ചുവും അമ്മുവും മുതിർന്ന ആനകളായ മണിയനും 2024 ൽ കോടനാട് നീലകണ്ഠനും മണിയും കല്പനയും അടക്കമുള്ള കേരളം അറിയപ്പെടുന്ന ആനകളാണ് കോന്നി ആനത്താവളത്തിൽ ചരിഞ്ഞത്. കോന്നി ആനത്താവളത്തിലെ ആനകൾ തുടർച്ചയായി ചരിയുന്ന സംഭവത്തിൽ ചീഫ് വൈൽഡ് ലൈഫ് വാർഡൻ ഉന്നത ഉദ്യോഗസ്ഥരുടെ യോഗം വിളിച്ചു ചേർത്തിരുന്നു. ഒരു വർഷത്തിന് ഇടയിൽ മൂന്ന് ആനകൾ കോന്നി ആനത്താവളത്തിൽ ചരിഞ്ഞ സംഭവവും ഉണ്ടായിട്ടുണ്ട്. 24 വയസ് മാത്രം പ്രായമുണ്ടായിരുന്ന മണി എന്ന കൊമ്പനാന എരണ്ടകെട്ടിനേ തുടർന്നാണ് ചരിഞ്ഞത്. മൂന്ന് മാസം പ്രായമുള്ളപ്പോഴാണ് കുട്ടിയാന പിഞ്ചു ചരിഞ്ഞത്. ജൂണിയർ സുരേന്ദ്രനും കല്പനയും കുട്ടിയായിരുന്നപ്പോൾ ചരിഞ്ഞു. ഹെർപിസ് രോഗ ബാധയേ തുടർന്നാണ് ലക്ഷ്മി, അമ്മു എന്നീ കുട്ടിയാനകൾ ചരിഞ്ഞത്. മണി ചരിഞ്ഞത് സ്വാഭാവികം എന്ന് കരുതി എങ്കിലും കുട്ടിയാനകൾ തുടർച്ചയായി ചരിഞ്ഞത് വനം വകുപ്പ് ഉദ്യോഗസ്ഥർക്ക് ഇടയിൽ പോലും സംശയമുള്ളവാക്കിയിരുന്നു.കേരളത്തിൽ മുത്തങ്ങ, കോട്ടൂർ,കോടനാട് എന്നിവടങ്ങളിൽ വനം വകുപ്പിന്‍റെ ആന ക്യാമ്പുകൾ ഉണ്ടെങ്കിലും കോന്നിയിൽ ഇത്രയധികം ആനകൾ ചരിഞ്ഞത് എന്നും സംശയത്തിന്‍റെ നിഴലിലാണ്.

‌കരിക്കിനേത്ത് കേസിലെ സ്പെഷൽ പ്രോസിക്യൂട്ടർ നിയമനം: ഡിഐജി അന്വേഷിക്കും

പത്തനംതിട്ട: ഒരു ദശാബ്ദം പിന്നിട്ട കരിക്കിനേത്ത് കൊലപാതകവുമായി ബന്ധപ്പെട്ട് റൗഡി ലിസ്റ്റിൽ പ്പെട്ട അഭിഭാഷകനെ പബ്ളിക് പ്രോസിക്യൂട്ടറായി നിയമിച്ച സംഭവത്തിൽ ഡിഐജി അന്വേഷണം തുടങ്ങി. ആലപ്പുഴ ഡിവൈഎസ്പി എം.ആർ മധുബാബു മുഖ്യമന്ത്രിക്ക് നൽകിയ പരാതിയേ തുടർന്നാണ് അന്വേഷണം. പത്തനംതിട്ട കരിക്കിനേത്ത് ടെക്സ്റ്റൈൽസിലെ ജീവനക്കാരനായിരുന്ന ബിജു എം.ജോസഫ് 2013 നവംബർ അഞ്ചിന് കൊല്ലപ്പെട്ട സംഭവവുമായി ബന്ധപ്പെട്ട കേസിൽ സ്പെഷൽ പബ്ലിക് പ്രോസിക്യൂട്ടറായി പ്രശാന്ത് വി. കുറുപ്പിനെ നിയമിക്കാൻ പത്തനംതിട്ട ജില്ലാ പോലീസ് മേധാവി നൽകിയ നിർദേശമാണ് വിവാദമായത്. 2015 -ൽ കുറ്റപത്രം സമർപ്പിച്ച കേസിൽ പത്തുവർഷമായിട്ടും വിചാരണ ഉണ്ടായില്ല. എന്നാൽ ഇപ്പോൾ കേസ് കോടതിയിൽ പരിഗണിച്ചിരിക്കുകയാണ്. ഡിവൈഎസ്പി മധുബാബു പത്തനംതിട്ട സിഐ ആയിരുന്നപ്പോൾ, പത്തനംതിട്ട ബാറിലെ അഭിഭാഷകനായിരുന്ന പ്രശാന്ത് വി. കുറുപ്പുമായി ചില അഭിപ്രായ ഭിന്നതകൾ നിലനിന്നിരുന്നു. പിന്നീട് പത്തനംതിട്ടയിൽ നിന്നും സ്ഥലം മാറിപ്പോയ മധുബാബു ഇപ്പോൾ ആലപ്പുഴ ഡിവൈഎസ്പിയാണ്. പത്തു വർഷത്തിനു ശേഷം കേസ് കോടതിയിൽ വരുമ്പോൾ സ്പെഷൽ പ്രോസിക്യൂട്ടറായി പ്രശാന്ത് വി.കുറുപ്പ് എത്തുന്നത് അന്വേഷണ ഉദ്യോഗസ്ഥനായിരുന്ന തന്നെ പ്രതികൂലമായി ബാധിക്കുമെന്ന് ഭയന്നാണ് ഡിവൈഎസ്പി മധുബാബു പത്തനംതിട്ട എസ്പി വി.ജി. വിനോദ് കുമാറിനെതിരേ പരാതിയുമായി രംഗത്തു വന്നത്. ഇക്കാര്യം എസ്പി പത്രക്കുറിപ്പിലൂടെ വ്യക്തമാക്കുകയും ചെയ്തിരുന്നു. അഭിഭാഷകൻ പ്രശാന്ത് വി. കുറുപ്പ് റൗഡിലിസ്റ്റിൽ ഉൾപ്പെട്ടിട്ടുണ്ടോയെന്നതാണ് ഡിഐജി അന്വേഷിക്കുന്നത്. സ്പെഷൽ പ്രോസിക്യൂട്ടറായി അദ്ദേഹത്തെ നിയമിക്കുന്നതിന് മുമ്പു തയാറാക്കിയ പോലീസ് വേരിഫിക്കേഷൻ റിപ്പോർട്ടും പരിശോധിക്കും. കൂടാതെ കരിക്കിനേത്ത് കൊലപാതകത്തിന്‍റെ നാൾ വഴികളും ഇതിന്‍റെ ഭാഗമാകും. ഭാര്യയുമായി നിലനിന്ന കുടുംബ പ്രശ്നം മാത്രം കണക്കിലെടുത്ത് 2014 കാലത്താണ് അന്നത്തെ പത്തനംതിട്ട സിഐ ആയിരുന്ന മധു ബാബു പ്രശാന്തിനെ റൗഡി ലിസ്റ്റിൽ ഉൾപ്പെടുത്തുകയായിരുന്നുവെന്ന ആരോപണവുമുണ്ട്. സ്വഭാവദൂഷ്യം, കൊലപാതക ശ്രമം, സാക്ഷിയെ ഭീഷണിപ്പെടുത്തൽ, മകളെ അജ്ഞാത കേന്ദ്രത്തിൽ പാർപ്പിക്കുക തുടങ്ങിയവയാണ് കേസിന് ആധാരം. കരിക്കിനേത്ത് കേസിലെ പ്രതികൾക്കുവേണ്ടി കേരളത്തിലെ ഉന്നത അഭിഭാഷകരാണ് ഹാജരാകുന്നത്. ഒന്നാം പ്രതി കരിക്കിനേത്തിനു വേണ്ടി പ്രമുഖ അഭിഭാഷകൻ ബി.രാമൻപിള്ളയും രണ്ടാം പ്രതി ബേബി കരിക്കിനേത്തിനായി സുനിൽ മഹേശ്വരനും മൂന്നാം പ്രതി ജോഷ്വാ കരിക്കിനേത്തിനു വേണ്ടി നവീൻ എം. ഈശോയുമാണ് ഹാജരാകുന്നത്. പബ്ളിക് പ്രോസിക്യൂട്ടറായി നിയമിക്കാൻ പോലീസ് നിരവധി അഭിഭാഷകരെ സമീപിച്ചിരുന്നു. എന്നാൽ അവരെല്ലാം ഒഴിഞ്ഞു മാറിയപ്പോഴാണ് കേസ് എറ്റെടുക്കാൻ പ്രശാന്ത് വി. കുറുപ്പ് സന്നദ്ധത അറിയിച്ചതെന്നും പറയുന്നു.

നായ്ക്കളെ തത്കാലം പിടിക്കില്ല; കടിയേൽക്കാതെ സ്വയം പ്രതിരോധിക്കാം സ്കൂൾ അസംബ്ലികളിൽ ബോധവത്കരണം

പത്തനംതിട്ട: പേവിഷബാധ പ്രതിരോധ പ്രവര്‍ത്തങ്ങളുടെ ഭാഗമായി ജില്ലയില്‍ സര്‍ക്കാർ, എയ്ഡഡ് സ്‌കൂളുകളില്‍ സ്പെഷല്‍ അസംബ്ലിയും ബോധവത്കരണവും സംഘടിപ്പിച്ചു. ജില്ലാതല ഉദ്ഘാടനവും പോസ്റ്റര്‍ പ്രകാശനവും പത്തനംതിട്ട മാര്‍ത്തോമ്മ ഹയര്‍ സെക്കന്‍ഡറി സ്‌കൂളില്‍ ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം നിര്‍വഹിച്ചു. പത്തനംതിട്ട നഗരസഭ ചെയര്‍മാന്‍ ടി. സക്കീര്‍ ഹുസൈന്‍ അധ്യക്ഷത വഹിച്ചു. ജില്ലാ മെഡിക്കല്‍ ഓഫീസര്‍ ഡോ. എൽ. അനിതകുമാരി വിഷയാവതരണം നടത്തി. പേവിഷബാധ പ്രതിരോധ പ്രവര്‍ത്തനങ്ങളുടെ ഭാഗമായി കുട്ടികള്‍ക്ക് മാര്‍ഗനിര്‍ദേശം നല്‍കുന്ന ലഘുലേഖ പ്രകാശനം ആരോഗ്യകേരളം ജില്ലാ പ്രോഗ്രാം മാനേജര്‍ ഡോ. എസ്. ശ്രീകുമാര്‍ നിര്‍വഹിച്ചു. മൃഗങ്ങളുടെ കടിയേറ്റാല്‍ പ്രഥമ ശുശ്രൂഷയും വാക്‌സിനും പ്രധാനമാണ്. കടിയേറ്റാല്‍ കുട്ടികള്‍ക്ക് പെട്ടെന്ന് രോഗബാധയുണ്ടാകാനുള്ള സാധ്യത കൂടുതലാണ്. മൃഗങ്ങളുടെ കടിയോ മാന്തലോ പോറലോ ഏറ്റാല്‍ രോഗ പ്രതിരോധത്തിന്‍റെ ഭാഗമായി നല്‍കേണ്ട പ്രഥമ ശുശ്രൂഷ, വാക്‌സിനേഷൻ, മൃഗങ്ങളോട് ഇടപഴകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്നിവ സംബന്ധിച്ചു കുട്ടികള്‍ക്കും അധ്യാപകര്‍ക്കും ബോധവത്കരണം നല്‍കി. പേ വിഷബാധ, പുകയില വിരുദ്ധ ബോധവത്കരണ പ്രവര്‍ത്തനം എന്നിവയുടെ ഭാഗമായി വിദ്യാര്‍ഥികള്‍ തീം ഡാന്‍സും സൂംബയും അവതരിപ്പിച്ചു. ജില്ലാ സര്‍വൈലന്‍സ് ഓഫീസര്‍ ഡോ. എസ്. സേതുലക്ഷ്മി, ജില്ലാ എഡ്യൂക്കേഷന്‍ മീഡിയ ഓഫീസര്‍ എസ്. ഹരീകുമാര്‍, മാര്‍ത്തോമ്മ ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ജിജി മാത്യു സ്‌കറിയ, പ്രധാനധ്യാപിക മിനി തോമസ്, ഡെപ്യൂട്ടി മാസ് മീഡിയ ഓഫീസര്‍ ബിജു ഫ്രാന്‍സിസ് തുടങ്ങിയവര്‍ പങ്കെടുത്തു. Photo പേവിഷബാധ പ്രതിരോധ പ്രവര്‍ത്തങ്ങളുടെ പോസ്റ്റര്‍ പ്രകാശനം പത്തനംതിട്ട മാര്‍ത്തോമ്മ ഹയര്‍ സെക്കന്‍ഡറി സ്‌കൂളില്‍ ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം നിര്‍വഹിക്കുന്നു

പുഷ്പഗിരി - ആമല്ലൂർ - മാർത്തോമ്മ കോളജ് റോഡ് തകർച്ചയിൽ

തിരുവല്ല: നഗരസഭയിലെ പുഷ്പഗിരി - ആമല്ലൂർ - മാർത്തോമ്മ കോളജ് റോഡ് തകർച്ചയിൽ. നഗരസഭയുടെ ഒന്പത്, പത്ത് വാർഡുകളിലൂടെ കടന്നുപോകുന്ന റോഡാണിത്. വർഷങ്ങൾക്ക് മുമ്പ് ടാർ ചെയ്ത റോഡ് പലയിടങ്ങളിലും പൊട്ടിപ്പൊളിഞ്ഞ് വലിയ കുഴികൾ രൂപപ്പെട്ടതോടെ മഴക്കാലത്ത് ഗതാഗത യോഗ്യമല്ലാതെയായി. ചെളിവെള്ളം ഒഴുകിപ്പോകാൻ ഓടയുമില്ല. കാൽനടക്കാർക്ക് റോഡിലേക്കു പ്രവേശിക്കാൻ പോലുമാകാത്ത സ്ഥിതിയാണ്. മഴക്കാലത്ത് റോഡ് തോടിനു സമാനമാണ്. കാലാകാലങ്ങളിൽ നഗരസഭ അറ്റകുറ്റപ്പണി നടത്താതെ വന്നതോടെയാണ് തകർച്ച പൂർണമായത്. ടികെ റോഡിലൂടെ വരുന്ന വാഹനങ്ങൾക്ക് തിരുവല്ല ടൗണിൽ പ്രവേശിക്കാതെ മല്ലപ്പള്ളിക്ക് റോഡിലേക്കും റെയിൽവേ സ്റ്റേഷനിലേക്കും ബിലീവേഴ്സ് ആശുപത്രിയിലേക്കും മെഡിക്കൽ മിഷൻ ആശുപത്രിയിലേക്കും തിരക്കില്ലാതെ പ്രവേശിക്കാനുള്ള എളുപ്പമാർഗം കൂടിയാണിത്. പ്രതിദിനം നൂറുകണക്കിന് വാഹനങ്ങളാണ് ഇതുവഴി കടന്നു പോകുന്നത്. റോഡിലെ കുഴികളിൽ വീണ് അപകടങ്ങളും പതിവാണ്. റോഡിന്‍റെ തകർച്ച കാരണം ഓട്ടോറിക്ഷ, ടാക്സി വാഹനങ്ങൾ വരാൻ മടിക്കുന്നതായും പ്രദേശവാസികൾ പറയുന്നു.

പ്രവാസികളെ സംരംഭകത്വത്തിന് സജ്ജരാക്കി നോര്‍ക്ക റൂട്ട്സ് ശില്പശാല

കോഴഞ്ചേരി: നോര്‍ക്ക ബിസിനസ് ഫെസിലിറ്റേഷന്‍ സെന്‍ററിന്‍റെ (എന്‍ബിഎഫ്സി) ആഭിമുഖ്യത്തില്‍ കോഴഞ്ചേരി മാരാമണ്‍ മാര്‍ത്തോമ്മ റിട്രീറ്റ് സെന്‍ററില്‍ പ്രവാസികള്‍ക്കും നാട്ടില്‍ എത്തിയവര്‍ക്കുമായി സൗജന്യ ഏകദിന സംരംഭകത്വ ശില്പശാല സംഘടിപ്പിച്ചു. 70 പേരെ സംരംഭം തുടങ്ങുന്നതിന് സജ്ജരാക്കി. പ്രവാസത്തിനു ശേഷം മടങ്ങി എത്തിയവരാണ് പങ്കെടുത്ത എല്ലാവരും. ഓരോ വ്യക്തിയും ആഗ്രഹിച്ച സംരംഭം തുടങ്ങുന്നതിന് ആവശ്യമായ അറിവ് പകര്‍ന്നുനല്‍കിയതിനൊപ്പം, വിവിധ സഹായങ്ങളും സേവനങ്ങളും എവിടെ നിന്നൊക്കെ ലഭിക്കാം എന്ന മാര്‍ഗനിര്‍ദേശവും ലഭ്യമാക്കി. നോര്‍ക്ക റൂട്ട്സ് ജനറല്‍ മാനേജര്‍ ടി. രശ്മി ശില്പശാല ഉദ്ഘാടനം ചെയ്തു. ജില്ലാ വ്യവസായ കേന്ദ്രം ജനറല്‍ മാനേജര്‍ പി.എന്‍. അനില്‍കുമാര്‍ അധ്യക്ഷത വഹിച്ചു. നോര്‍ക്ക റൂട്ട്സ് എന്‍ബിഎഫ്സി പ്രോജക്ട്സ് മാനേജര്‍ കെ.വി. സുരേഷ് മാര്‍ഗനിര്‍ദേശ ക്ലാസ് നയിച്ചു. കേരള പ്രവാസി ക്ഷേമ ബോര്‍ഡ് ഡയറക്ടര്‍ ജോര്‍ജ് വര്‍ഗീസ്, നോര്‍ക്ക റൂട്ട്സ് പിആര്‍ഒ സി. മണിലാല്‍ എന്നിവര്‍ പ്രസംഗിച്ചു. സംരംഭകര്‍ നിര്‍ബന്ധമായും അറിഞ്ഞിരിക്കേണ്ട നിയമ വശങ്ങള്‍, ഐഡിയ ജനറേഷന്‍, പ്രോജക്ട് റിപ്പോര്‍ട്ട് തയാറാക്കുന്ന വിധം, സെയില്‍സ് ആന്‍ഡ് മാര്‍ക്കറ്റിംഗ്, ബാങ്കില്‍നിന്ന് ലഭിക്കുന്ന സാമ്പത്തിക സഹായങ്ങള്‍, ജിഎസ്ടി, സംരംഭം തുടങ്ങുന്നതിന് ആവശ്യമായ ലൈസന്‍സുകള്‍, വിജയിച്ച സംരംഭകരുടെ അനുഭവം പങ്കിടല്‍ ഉള്‍പ്പെടെ പുതിയ സംരംഭം തുടങ്ങാന്‍ ആഗ്രഹിക്കുന്നവര്‍ക്ക് അറിവു പകരുന്ന നിരവധി വൈവിധ്യം നിറഞ്ഞ സെഷനുകള്‍ ഉള്‍പ്പെടുത്തിയാണ് ശില്പശാല സംഘടിപ്പിച്ചത്. പ്രവാസികള്‍ക്കായി എല്ലാ മാസവും ത്രിദിന സൗജന്യ സംരംഭകത്വ പരിശീലനവും (റസിഡന്‍ഷല്‍), തിരുവനന്തപുരം നോര്‍ക്ക സെന്‍ററില്‍ എല്ലാ പ്രവൃത്തിദിനങ്ങളിലും നോര്‍ക്ക ബിസിനസ് ക്ലിനിക്ക് സേവനവും എന്‍ബിഎഫ്സി വഴി ലഭ്യമാണ്. കൂടുതല്‍ വിവരങ്ങള്‍ക്ക് 24 മണിക്കൂറും പ്രവര്‍ത്തിക്കുന്ന നോര്‍ക്ക ഗ്ലോബല്‍ കോണ്‍ടാക്ട് സെന്‍ററിന്‍റെ ടോള്‍ ഫ്രീ നമ്പറുകളായ 1800 425 3939 (ഇന്ത്യയില്‍ നിന്നും) +91-8802012345 (വിദേശത്തുനിന്നും, മിസ്ഡ് കോള്‍ സര്‍വീസ്) ബന്ധപ്പെടാം.

സണ്ണി സാറിന്‍റെ സ്മരണയ്ക്ക് അടനയന്പ് കുടുംബത്തിനു കൈമാറി പള്ളിയോടം കരക്കാർ

കോഴഞ്ചേരി: പമ്പാനദിയില്‍ വീണ് അപകട മരണം സംഭവിച്ച അമരക്കാരനെ സ്മരിച്ച് പള്ളിയോട കരയോഗം. അപകടം സംഭവിക്കുമ്പോള്‍ പിടിച്ചിരുന്ന അടനയമ്പ് മനോഹരമാക്കി കുറിയന്നൂര്‍ പള്ളിയോട ഭാരവാഹികള്‍ കുടുംബത്തിന് കൈമാറി. 2024ലെ അഷ്ടമി രോഹിണി വള്ളസദ്യയില്‍ കുറിയന്നൂര്‍ പള്ളിയോടത്തിന്‍റെ അടനയന്പുകാരനായി എത്തിയതായിരുന്നു കുറിയന്നൂര്‍ മാര്‍ത്തോമ്മ ഹൈസ്‌കൂള്‍ അധ്യാപകന്‍ കൂടി ആയിരുന്ന തോട്ടത്ത്മഠത്തില്‍ തോമസ് ജോസഫ് (സണ്ണി - 55). ആറന്മുള ക്ഷേത്രക്കടവിലേക്ക് പള്ളിയോടം അടുപ്പിക്കുന്നതിനിടെയാണ് അപകടം സംഭവിച്ചത്. ആറന്മുള ഉത്രട്ടാതി ജലമേളയില്‍ തോമസ് ജോസഫിന്‍റെ സ്മരണാർഥം കുറിയന്നൂര്‍ പള്ളിയോട കരയോഗം പ്രത്യേക ട്രോഫിയും ഏര്‍പ്പെടുത്തുന്നുണ്ട്. പള്ളിയോടകരയോഗം സെക്രട്ടറി സഞ്ജീവ് കുമാറില്‍ നിന്നും ജോസഫ് തോമസിന്‍റെ പിതാവ് ടി.എ.ജോസഫ് അടനയമ്പ് ഏറ്റുവാങ്ങി. പള്ളിയോട കരയോഗം ഭാരവാഹികളായ വിജയകുമാര്‍ ആര്യാട്ടയിൽ, രതീഷ്‌കുമാര്‍ കൊച്ചുപുരയ്ക്കല്‍, പ്രശാന്ത് ആർ. നായര്‍, ഗോവിന്ദ് മഠത്തിൽ, അഭിജിത്ത്, വിമല്‍ ആര്യാട്ടയിൽ, അനില്‍കുമാര്‍, രാജീവ് കാക്കുറുമ്പില്‍ അജിതാകുമാരി, തങ്കമ്മ മോഹന്‍ തുടങ്ങിയവര്‍ ചടങ്ങില്‍ പങ്കെടുത്തു.

ബ്രേക്കിംഗ് ഡി കാന്പെയ്നു തുടക്കമായി

പത്തനംതിട്ട: രാസലഹരിയുടെ വ്യാപനം തടയുന്നതിലേക്ക് കേരള പത്രപ്രവർത്തക യൂണിയൻ ബ്രേക്കിംഗ് ഡി കാന്പെയ്നു പത്തനംതിട്ടയിലും തുടക്കമായി. ലഹരി ഉത്പന്നങ്ങളുടെ വിപണനം, ഉപയോഗം സംബന്ധിച്ച രഹസ്യവിവരങ്ങളും ആശങ്കകളും കൈമാറുന്നതിലേക്ക് പ്രസ്ക്ലബ്ബിനു മുന്പിൽ ക്യുആർ കോർഡ് പതിപ്പിച്ചുകൊണ്ടാണ് കാന്പെയ്നു തുടക്കമായത്. ക്യു ആർ കോഡ് സ്കാൻ ചെയ്തു നൽകുന്ന വിവരങ്ങൾ രഹസ്യ സ്വഭാവമുള്ളതായിരിക്കും. എക്സൈസ് വകുപ്പിലേക്ക് വിവരങ്ങൾ കൈമാറി നടപടികളുണ്ടാകും. ക്യു ആർ കോഡ് പതിപ്പിക്കൽ പത്തനംതിട്ട എക്സൈസ് ഇൻസ്പെക്ടർ‌ എസ്. ഷാജി നിർവഹിച്ചു. പ്രസ്ക്ലബ് പ്രസിഡന്‍റ് ബിജു കുര്യൻ അധ്യക്ഷത വഹിച്ചു. സെക്രട്ടറി ജി. വിശാഖൻ, സംസ്ഥാന സമിതിയംഗം ബോബി ഏബ്രഹാം, ട്രഷറർ എസ്. ഷാജഹാൻ, മുൻ സംസ്ഥാന സമിതിയംഗം രാജേഷ് കുമാർ തുടങ്ങിയവർ പങ്കെടുത്തു.

മുഖ്യ തെരഞ്ഞെടുപ്പ് ഓഫീസര്‍ ഇലക്‌ഷന്‍ വെയര്‍ ഹൗസ് പരിശോധിച്ചു

പത്തനംതിട്ട: നിയമസഭാ തെരഞ്ഞെടുപ്പിനു മുന്നോടിയായി ജില്ലയിലെത്തിയ മുഖ്യ തെരഞ്ഞെടുപ്പ് ഓഫീസര്‍ രത്തന്‍ യു. ഖേല്‍ക്കര്‍ കളക്ടറേറ്റിലെ ഇലക്‌ഷന്‍ വെയര്‍ ഹൗസ് പരിശോധിച്ചു. ഇലക്ട്രോണിക് വോട്ടിംഗ് മെഷീനുകള്‍ സൂക്ഷിച്ചിട്ടുള്ള സ്‌ട്രോംഗ് റൂമുകളിലെ പ്രവര്‍ത്തനം വിലയിരുത്തി. തുടര്‍ന്ന് മുഖ്യതെരഞ്ഞെടുപ്പ് ഓഫീസറുടെയും രാഷ്‌ട്രീയ പാര്‍ട്ടി പ്രതിനിധികളുടെയും സാന്നിധ്യത്തില്‍ സ്‌ട്രോംഗ് റൂമുകള്‍ സീല്‍ ചെയ്തു. അഞ്ച് മണ്ഡലങ്ങളിലെയും ഇലക്ടറല്‍ രജിസ്‌ട്രേഷന്‍ ഓഫീസര്‍മാരുടെ യോഗവും കളക്ടറേറ്റില്‍ ചേര്‍ന്നു. എഡിഎം ബി. ജ്യോതി, ഡെപ്യൂട്ടി കളക്ടര്‍ ബീന എസ്. ഹനീഫ്, ഇലക്ടറല്‍ രജിസ്‌ട്രേഷന്‍ ഓഫീസര്‍മാരായ ആര്‍. ശ്രീലത, മിനി തോമസ്, മിനി കെ. ജോണ്‍, എം. ബിപിന്‍ കുമാര്‍, തിരുവല്ല അസിസ്റ്റന്‍റ് ഇലക്ടറല്‍ രജിസ്‌ട്രേഷന്‍ ഓഫീസര്‍ സിനിമോള്‍ മാത്യു തുടങ്ങിയവര്‍ പങ്കെടുത്തു.

ഓപ്പറേഷന്‍ ലൈഫ്: സംയുക്ത പരിശോധന നടത്തി

പത്തനംതിട്ട: ഭക്ഷണശാലകള്‍, ബേക്കറികൾ, മറ്റു ഭക്ഷ്യവില്പന സ്ഥാപനങ്ങളിൽ ജോലിചെയ്യുന്ന ജീവനക്കാരുടെ മെഡിക്കല്‍ ഫിറ്റ്‌നസ് സര്‍ട്ടിഫിക്കറ്റ്, ഹെല്‍ത്ത് കാര്‍ഡ് എന്നിവ ഉറപ്പാക്കുന്നതിനായി ഭക്ഷ്യ സുരക്ഷാ വകുപ്പും ആരോഗ്യ വകുപ്പും ചേര്‍ന്ന് നടത്തിയ പരിശോധനയില്‍ നിയമലംഘനങ്ങള്‍ കണ്ടെത്തി . ഭക്ഷ്യ സുരക്ഷാ കമ്മീഷണറുടെ നിര്‍ദേശപ്രകാരമുള്ള ഓപ്പറേഷൻ ലൈഫ് പരിപാടിയിൽ ജില്ലയുടെ വിവിധ ഭാഗങ്ങളില്‍ പരിശോധന നടത്തി. അടൂര്‍ ഭക്ഷ്യ സുരക്ഷാ ഓഫീസര്‍ ഡോ.ആർ.അസീം, ആറന്മുള ഭക്ഷ്യ സുരക്ഷാ ഓഫീസര്‍ ടി.ആർ.പ്രശാന്ത് കുമാര്‍, ആരോഗ്യവകുപ്പ് ഡെപ്യൂട്ടി ഡിഎംഒ സേതുലക്ഷ്മി എന്നിവരുടെ നേതൃത്വത്തില്‍ പത്തനംതിട്ട, അടൂര്‍ നഗരങ്ങളില്‍ പരിശോധന നടത്തി. 30 സ്ഥാപനങ്ങളില്‍ നടത്തിയ പരിശോധനയില്‍ നിയമലംഘനങ്ങള്‍ കണ്ടെത്തിയ എട്ട് സ്ഥാപനങ്ങള്‍ക്ക് നോട്ടീസ് നല്‍കി.

സമൃദ്ധി ഫ്രൂട്ട് ഫെസ്റ്റ് മാരാമണ്ണിൽ

കോഴഞ്ചേരി: തോട്ടപ്പുഴശേരി ഗ്രാമപഞ്ചായത്ത് സംഘടിപ്പിക്കുന്ന സമൃദ്ധി ഫ്രൂട്ട് ഫെസ്റ്റ് 2025 നോടനുബന്ധിച്ച് എഡിഎം ബി ജ്യോതിയുടെ അധ്യക്ഷതയില്‍ കളക്ടറേറ്റില്‍ യോഗം ചേര്‍ന്നു. മാരാമണ്‍ സെന്‍റ് ജോസഫ് കാത്തലിക് ചര്‍ച്ച് ഓഡിറ്റോറിയത്തില്‍ 10 മുതല്‍ 12 വരെയാണ് ഫെസ്റ്റ്. തോട്ടപ്പുഴശേരി സമൃദ്ധി കര്‍ഷകസംഘം, പഞ്ചായത്ത്, കൃഷി, വ്യവസായം, ടൂറിസം വകുപ്പുകള്‍ സഹകരണത്തോടെയാണ് ഫെസ്റ്റ് സംഘടിപ്പിക്കുന്നത്. പഴവര്‍ഗങ്ങളെക്കുറിച്ച് അവബോധം വര്‍ധിപ്പിക്കാനും പ്രാദേശിക കര്‍ഷകര്‍ക്ക് വിപണി കണ്ടെത്തുകയുമാണ് ലക്ഷ്യം. പഞ്ചായത്ത് പ്രസിഡന്‍റ് ‌ആര്‍.കൃഷ്ണകുമാര്‍, കൃഷി ഓഫീസര്‍ ലതാ മേരി തോമസ്, വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

പ്രതിഭാ സംഗമം

ഇലന്തൂർ: ഇലന്തൂർ ഈസ്റ്റ്‌ വിക്ടറി ആർട്സ് ആൻഡ് സ്‌പോർട്സ് ക്ലബ്ബിന്‍റെ നേതൃത്തിൽ എസ്എസ്എൽസി, പ്ലസ്ടു പാസായ വിദ്യാർഥികളെ അനുമോദിച്ചു. ഗ്രാമപഞ്ചായത്ത് പ്രസിഡന്‍റ് ജയശ്രീ മനോജ്‌ പ്രതിഭാസംഗമം ഉദ്ഘാടനം ചെയ്തു. പഞ്ചായത്ത്‌ വൈസ് പ്രസിഡന്‍റ് വിൻസൻ തോമസ് ചിറക്കാല മുഖ്യ പ്രസംഗം നടത്തി. സാമൂഹിക പ്രതിബദ്ധതയും വിദ്യാർഥികളും എന്ന വിഷയത്തെ ആസ്പദമാക്കി മാധ്യമ പ്രവർത്തകൻ സാം ചെമ്പകത്തിൽ ക്ലാസെടുത്തു. ക്ലബ്‌ പ്രസിഡന്‍റ് സാം നൈനാൻ അധ്യക്ഷത വഹിച്ചു. പ്രഫ.എ.വി. തോമസ്, എം.ബി. സത്യൻ, തോമസ് വറുഗീസ്, പി.ജി. മനോഹരൻ, ഷിബു തോമസ്, കെ. സതീഷ് കുമാർ എന്നിവർ പ്രസംഗിച്ചു.

ധന്യൻ മാർ ഈവാനിയോസ് ഓർമത്തിരുനാൾ പെരുനാട് കുരിശുമല പള്ളിയിൽ

പെരുനാട്: പുനരൈക്യ പ്രസ്ഥാനത്തിന്‍റെ പിള്ളത്തൊട്ടിലായ റാന്നി - പെരുനാട് കുരിശുമല തീർഥാടന പള്ളിയിൽ ധന്യൻ മാർ ഈവാനിയോസിന്‍റെ അനുസ്മരണവും 72 -ാമത് ഓർപ്പെരുന്നാളും പത്തുവരെ നടക്കും. എല്ലാദിവസവും വൈകുന്നേരം അഞ്ചിന് സന്ധ്യാപ്രാർഥനയേ തുടർന്ന് വിശുദ്ധ കുർബാന ഉണ്ടാകും. ഇന്ന് വൈകുന്നേരം പന്തളം വൈദികജില്ലയിലെ വൈദികരുടെ കാർമികത്വത്തിലാണ് തിരുനാൾ. നാളെ മാർത്തോമ്മ ശ്ലീഹയുടെ ദുക്റാനാ തിരുനാൾ ആചരണം. നാലിന് കുർബാനയ്ക്ക് കോന്നി വൈദികജില്ലയിലെയും അഞ്ചിന് സീതത്തോട് വൈദികജില്ലയിലെയും വൈദികർ ദിവ്യബലി അർപ്പിക്കും. ആറിനു രാവിലെ ഏഴിന് ബഥനി സുപ്പീരിയർ ജനറാൾ ഫാ. ഗീവർഗീസ് കുറ്റിയിൽ ഒഐസി കുർബാനയ്ക്കു കാർമികനാകും. ഏഴിനു പത്തനംതിട്ട വൈദികജില്ലയിലെയും എട്ടിന് പെരുനാട് വൈദികജില്ലയിലെയും വൈദികർ കുർബാന അർപ്പിക്കും. ഒന്പതിനു വൈകുന്നേരം 4.30ന് പത്തനംതിട്ട രൂപതാധ്യക്ഷൻ ഡോ. സാമുവേൽ മാർ ഐറേനിയോസിന്‍റെ കാർമികത്വത്തിൽ കുർബാന. തുടർന്ന് വള്ളിക്കുരിശ് പ്രയാണ സ്വീകരണം, പദയാത്ര ഒരുക്കധ്യാനം. തുടർന്ന് ‘മഹാരഥൻ മാർ ഈവാനിയോസ്’ കഥാപ്രസംഗ ആവിഷ്കാരം. കല്ലട വി. ജോസ് കാഥികനാകും. പത്തിനു രാവിലെ 6.30ന് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവയുടെ മുഖ്യകാർമികത്വത്തിൽ കുർബാനയെ തുടർന്ന് എംസിവൈഎം നേതൃത്വത്തിൽ തിരുവനന്തപുരത്ത് ധന്യൻ മാർ ഈവാനിയോസിന്‍റെ കബറിങ്കലേക്കുള്ള പദയാത്രയ്ക്കു തുടക്കമാകും. 14ന് തിരുവനന്തപുരത്തെത്തുന്ന കാൽനട തീർഥാടകസംഘം 15നു നടക്കുന്ന ഓർമപ്പെരുന്നാളിലും പങ്കെടുത്തശേഷമാകും മടങ്ങുക.

മാന്പഴം, ചക്കമേള ഉദ്ഘാടനം ചെയ്തു

തിരുവല്ല: വൈഎംസിഎയുടെ ആഭിമുഖ്യത്തിൽ നടത്തുന്ന മാമ്പഴ - ചക്ക കാർഷിക മേള മാമ്പഴം കഴിച്ചും ചക്ക മുറിച്ചും മാത്യു ടി. തോമസ് എംഎൽഎ ഉദ്ഘാടനം ചെയ്തു. വർഗീസ് മാമ്മൻ അധ്യക്ഷത വഹിച്ചു. ലിനോജ്‌ ചാക്കോ, ഇ.എം. ഏലിയാസ്, സാജൻ വർഗീസ്, ജേക്കബ് വർഗീസ്, റ്റി. ജയിംസ്, ജോയ് ജോൺ, ലോണി ടൈറ്റസ്, തോമസ് വർഗീസ് തുടങ്ങിയവർ പ്രസംഗിച്ചു. മേള ഏഴിനു സമാപിക്കും. വിവിധ സംസ്ഥാനങ്ങളിൽ നിന്നുള്ള ഇരുപതിൽപരം മാമ്പഴങ്ങളുടെ പ്രദർശനവും വില്പനയും ആരംഭിച്ചു. കൂടാതെ നടീൽ വസ്തുക്കൾ, വിത്തുകൾ, അടുക്കള ഉപകരണങ്ങൾ തുടങ്ങിയ സ്റ്റാളുകളും മേളയിലുണ്ട്. ചക്ക ഉത്പന്നങ്ങളുടെ വിപുലമായ സ്റ്റാളുകളും ഒരുക്കിയിട്ടുണ്ട്, കുടുംബശ്രീ ഒരുക്കുന്ന ഫുഡ് കോർട്ടും മേളയിലുണ്ട്.

തുടക്കത്തിലേ കല്ലുകടി; സിപിഎമ്മിന് എഴുമറ്റൂരില്‍ പുതിയ ഏരിയാ കമ്മിറ്റി

എഴുമറ്റൂർ: സിപിഎം മല്ലപ്പള്ളി ഏരിയാ കമ്മിറ്റി വിഭജിച്ച് എഴുമറ്റൂരില്‍ പുതിയ കമ്മിറ്റി. കമ്മിറ്റി രൂപീകരണവുമായി ബന്ധപ്പെട്ടുണ്ടായ തർക്കം തുടക്കത്തിലേ കല്ലുകടിയായി മാറി. ജില്ലാ നേതൃത്വം ഏകപക്ഷീയമായി പുതിയ ഏരിയ കമ്മിറ്റി അംഗങ്ങളെ നിശ്ചയിച്ചതാണ് പ്രദേശത്തെ ലോക്കല്‍ കമ്മിറ്റികളില്‍ രൂക്ഷമായ ഭിന്നതയ്ക്ക് ഇടവരുത്തിയിരിക്കുന്നത്. നിലവിലുണ്ടായിരുന്ന മല്ലപ്പള്ളി ഏരിയ കമ്മിറ്റി വിഭജിച്ചാണ് എഴുമറ്റൂരില്‍ പുതിയ ഏരിയ കമ്മിറ്റി നിലവില്‍ വന്നത്. കോഴഞ്ചേരി ഏരിയയിലെ അയിരൂര്‍, ചെറുകോല്‍ ലോക്കല്‍ കമ്മിറ്റികളും എഴുമറ്റൂര്‍ ഏരിയാ കമ്മിറ്റിയുടെ ഭാഗമായി. മല്ലപ്പള്ളി ഏരിയായിലെ കോട്ടാങ്ങൽ, കൊറ്റനാട്, എഴുമറ്റൂർ പഞ്ചായത്തുകൾ പുതിയ കമ്മിറ്റിയിലായി. കെഎസ്ടിഎ സംസ്ഥാന സെക്രട്ടറിയായിരുന്ന തെള്ളിയൂർ സ്വദേശി ബി. ഹരികുമാറാണ് പുതിയ ഏരിയാ സെക്രട്ടറി. എന്നാൽ വിഭാഗീയ പ്രവര്‍ത്തനം നടത്തുന്നവരെയും വര്‍ഷങ്ങളായി വിദേശത്ത് ജോലി നോക്കുന്നവരെയും പുതിയ കമ്മിറ്റിയില്‍ ഉള്‍പ്പെടുത്തിയതിനെതിരേ ഒരു വിഭാഗം പ്രതിഷേധവുമായി രംഗത്തെത്തി. അയിരൂരിൽ നിന്നുള്ള പ്രാദേശിക നേതാവിനെ കമ്മിറ്റിയംഗമാക്കിയതും ഒരു വിഭാഗത്തെ ചൊടിപ്പിച്ചു. അയിരൂർ വില്ലേജ് സർവീസ് സഹകരണബാങ്ക് തകർച്ചയുമായി ബന്ധപ്പെട്ട് ആരോപണ വിധേയനായ നേതാവിനെയാണ് കമ്മിറ്റിയിൽ ഉൾപ്പെടുത്തിയത്. ഒരുവിഭാഗം യോഗം ബഹിഷ്‌കരിക്കുന്ന ഘട്ടമെത്തിയപ്പോഴേക്കും മുതിര്‍ന്ന നേതാക്കളിടപ്പെടുകയായിരുന്നു. ജില്ലാ കമ്മിറ്റി അവതരിപ്പിച്ച ഏരിയ കമ്മിറ്റിയുടെ പാനലില്‍ പുതുതായി ഉള്‍പ്പെടുത്തിയ അംഗങ്ങളെ സംബന്ധിച്ച് ലോക്കല്‍ കമ്മിറ്റി അംഗങ്ങള്‍ക്ക് ഭിന്നാഭിപ്രായമാണുള്ളത്. നിലവിലുള്ള ലോക്കല്‍ കമ്മിറ്റി അംഗങ്ങളുടോ ഏരിയ കമ്മിറ്റി അംഗങ്ങളുടോ അഭിപ്രായം ചോദിക്കാതെ എടുത്ത തീരുമാനം അംഗീകരിക്കാനാകില്ലെന്ന് അംഗങ്ങള്‍ ആവശ്യപ്പെട്ടെങ്കിലും ജില്ലാ നേതൃത്വം അംഗീകരിച്ചില്ല. ഏരിയയിലെ പാര്‍ട്ടി ബഹുജന സംഘടനകളുടെ നേതൃനിരയിലുള്ള പ്രവര്‍ത്തകരെയും പരിഗണിക്കാതെയാണ് ജില്ലാ നേതൃത്വം ഇത്തരത്തില്‍ ലിസ്റ്റ് തയാറാക്കിയതെന്നും പ്രതിഷേധം അറിയിച്ചിട്ടും ജില്ലാ നേതൃത്വം കടുത്ത നിഷേധ നിലപാട് സ്വീകരിക്കുകയായിരുന്നുവെന്നും പ്രാദേശിക നേതാക്കള്‍ കുറ്റപ്പെടുത്തി. അതേ സമയം മല്ലപ്പള്ളി ഏരിയാ സെക്രട്ടറിയായി ബിനു തുടരും. കല്ലൂപ്പാറ, ആനിക്കാട്, കുന്നന്താനം, മല്ലപ്പള്ളി പഞ്ചായത്തുകളിലെ എട്ട് ലോക്കൽ കമ്മിറ്റികളാണ് ഇനി മല്ലപ്പള്ളി ഏരിയാ കമ്മിറ്റിയുടെ ഭാഗമായി ഉണ്ടാകുക.

തോമാശ്ലീഹ വിശ്വാസികൾക്ക് പ്രതീക്ഷ പകർന്നു: മാർ ജോസ് പുളിക്കൽ

നിലയ്ക്കൽ: വെല്ലുവിളികളുടെ മധ്യത്തിലും ധൈര്യപൂർവം മുന്നോട്ടു നീങ്ങാനുള്ള പ്രതീക്ഷയും പ്രത്യാശയുമാണ് തോമാശ്ലീഹയുടെ ജീവിതം നമ്മെ പഠിപ്പിക്കുന്നതെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. നിലയ്ക്കൽ സെന്‍റ് തോമസ് എക്യുമെനിക്കൽ ദേവാലയത്തിൽ ദുക്റാനാ തിരുനാൾ ആചരണത്തോടനുബന്ധിച്ച് ഇന്നലെ രാവിലെ വിശുദ്ധ കുർബാന അർപ്പിച്ചു സന്ദേശം നൽകുകയായിരുന്നു അദ്ദേഹം. ജീവിതം മുഴുവൻ ദൈവത്തിനു വിട്ടുകൊടുത്തുകൊണ്ടാണ് തോമാശ്ലീഹ ജീവിച്ചത്. ദൈവത്തിലുള്ള ആഴമായ വിശ്വാസം ഉണ്ടായിരുന്നതിനാലാണ് അവനോടുകൂടി നമുക്കും മരിക്കാമെന്ന് പ്രഘോഷിക്കാൻ അദ്ദേഹത്തെ പ്രേരിപ്പിച്ചതെന്ന് ബിഷപ് ചൂണ്ടിക്കാട്ടി. കാഞ്ഞിരപ്പള്ളി രൂപതയിലെ വൈദികരുടെ സഹകാർമികത്വത്തിലാണ് ദിവ്യബലി അർപ്പിച്ചത്. ഇന്നു രാവിലെ 6.30ന് ഓർത്തഡോക്സ് സഭയുടെ മാത്യൂസ് മാർ തേവോദോസിയോസ് മെത്രാപ്പോലീത്തയും ഒന്പതിന് മാർത്തോമ്മ സഭയുടെ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്തയും വിശുദ്ധ കുർബാന അർപ്പിക്കും. 12ന് സിഎസ്ഐ ബിഷപ് ഡോ. മലയിൽ സാബു കോശി ചെറിയാൻ ആരാധനയ്ക്കു നേതൃത്വം നൽകും. ദുക്റാനാ തിരുനാളിനോടനുബന്ധിച്ച് നാളെ രാവിലെ ബിഷപ് ഡോ.ജോഷ്വാ മാർ ഇഗ്നാത്തിയോസ് കുർബാനയ്ക്ക് കാർമികത്വം വഹിക്കും. തുടർന്ന് ഡോ.ജോഷ്വാ മാർ ഇഗ്നാത്തിയോസിനെ ആദരിക്കും.

40 ലിറ്റര്‍ മദ്യവുമായി അറസ്റ്റിൽ

അടൂർ: വില്പനയ്ക്കായി വീട്ടില്‍ സൂക്ഷിച്ച 40 ലിറ്റര്‍ മദ്യം എക്‌സൈസ് നാര്‍ക്കോട്ടിക് സെല്‍ പിടിച്ചെടുത്തു. മദ്യം സൂക്ഷിച്ച കടമ്പനാട് പറമല ദേശത്ത് അമ്പുന്തല വീട്ടില്‍ അഭിലാഷ‌ിനെ (45) പത്തനംതിട്ട എക്‌സൈസ് നാര്‍ക്കോട്ടിക് സെല്ലിലെ എക്‌സൈസ് ഇന്‍സ്‌പെക്ടര്‍ ജി.അജികുമാര്‍ അറസ്റ്റ് ചെയ്തു. ഇയാളുടെ വീട്ടില്‍ നിന്നും 25 ലിറ്റര്‍ വ്യാജമദ്യവും 15 ലിറ്റര്‍ വിദേശമദ്യവും പിടിച്ചെടുത്തു. അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ എസ്. മനോജ് , പ്രിവന്‍റീവ് ഓഫീസര്‍ ബി.എൽ. ഗിരീഷ്, സിവില്‍ എക്‌സൈസ് ഓഫീസര്‍മാരായ കൃഷ്ണകുമാര്‍, അജിത്, അഭിജിത്ത്, രാഹുൽ, വനിതാ സിവില്‍ ഓഫീസര്‍ സുബ്ബലക്ഷ്മി, ഹസീല, ഡ്രൈവര്‍ ശ്രീജിത്ത് എന്നിവരും എക്‌സൈസ് സംഘത്തില്‍ ഉണ്ടായിരുന്നു.

ഡോക്ടേഴ്സ് ദിനാചരണവുമായി സെന്‍റ് ജോർജ് സ്കൂൾ

കോട്ടാങ്ങൽ: ചുങ്കപ്പാറ സെന്‍റ് ജോർജ്സ് ഹൈസ്കൂളിൽ ലോക ഡോക്ടേഴ്സ് ദിനത്തോടനുബന്ധിച്ച് പൊതു വിദ്യാഭ്യാസ വകുപ്പിന്റെയും ആരോഗ്യ വകുപ്പിന്‍റെയും നേതൃത്വത്തിലുള്ള കുട്ടികളുടെ ആരോഗ്യ ശുചിത്വ അവബോധന ടീമായ കുട്ടിഡോക്ടർ സംഘം എത്തി. സ്കൂളിൽ കുട്ടികൾക്ക് അവബോധന ക്ലാസുകൾ നയിച്ചതും സംഘമാണ്. ഓരോ ക്ലാസിലും കുട്ടി ഡോക്ടർമാരുടെ സംഘമെത്തി ബോധവത്കരണം നടത്തി. പത്താം ക്ലാസ് വിദ്യാർഥികളായ കൈലാസ് രാജേഷ്, അർച്ചന ദേവദാസ്, ഒന്പതാം ക്ലാസിലെ ഇ.ബി. അക്ഷയ്, ഹസ്ന നിസാർ എന്നിവരാണ് കുട്ടി ഡോക്ടർമാരായി പ്രവർത്തിച്ചത്. കുട്ടി ഡോക്ടർ ഇൻ ചാർജ് ടി.ഇ. ബീന, അനി മാത്യു, ലൈജു കോശി മാത്യു എന്നിവർ നേതൃത്വം നൽകി. ഹെഡ്മാസ്റ്റർ വർഗീസ് ജോസഫ് ആശംസകൾ അറിയിച്ചു.

പോക്സോ കേസിൽ യുവാവ് അറസ്റ്റിൽ

പത്തനംതിട്ട: സ്നാപ് ചാറ്റ് ഓണ്‍ലൈന്‍ പ്ലാറ്റഫോം വഴി പരിചയപ്പെട്ട് പതിനാറുകാരിയെ ലൈംഗിക അതിക്രമത്തിന് വിധേയയാക്കുകയും പ്രലോഭിച്ച് കടത്തിക്കൊണ്ടുപോകുകയും ചെയ്ത യുവാവിനെ പോലീസ് അറസ്റ്റ് ചെയ്തു. മലപ്പുറം വലമ്പൂര്‍ പൂപ്പാലം പെരിന്തല്‍മണ്ണ നൂരിയ ഓര്‍ഫനേജില്‍ എ.പി. ഹാഷിമാണ് (22) അറസ്റ്റിലായത്. ഹാഷിമുമായി സ്നാപ് ചാറ്റ് ഓണ്‍ലൈന്‍ പ്ലാറ്റ്ഫോമിലൂടെ പെൺകുട്ടി ചാറ്റിംഗ് നടത്തിയിരുന്നതായി പോലീസ് പറഞ്ഞു. കഴിഞ്ഞ ഒരു വര്‍ഷമായി വെച്ചൂച്ചിറ അരയന്‍പാറയില്‍ വീട്ടില്‍ അമ്മയോടും രണ്ടാനച്ഛനോടുമൊപ്പം വാടകയ്ക്ക് താമസിക്കുന്ന ഇയാള്‍ മണിമലയിലുള്ള കോഴിക്കടയില്‍ ജോലി ചെയ്യുകയാണ്. കഴിഞ്ഞ ജൂൺ 24ന് പെണ്‍കുട്ടിയെ വിവാഹം കഴിക്കാമെന്ന് വാക്കുകൊടുത്തശേഷം കുട്ടിയുടെ വീടിന് സമീപം ലൈംഗിക അതിക്രമത്തിനു വിധേയയാക്കി. തുടര്‍ന്ന് 30ന് രാവിലെ സ്‌കൂളിലേക്ക് പോയ പെണ്‍കുട്ടിയെ പ്രലോഭിപ്പിച്ച് കടത്തിക്കൊണ്ടു പോകുകയും ചെയ്തു. പെണ്‍കുട്ടി സ്‌കൂളില്‍ എത്താത്തതിനെതുടര്‍ന്ന് പിതാവ് പോലീസില്‍ വിവരം അറിയിക്കുകയായിരുന്നു. തുടര്‍ന്ന് ഇവര്‍ യാത്ര ചെയ്തിരുന്ന ബസില്‍ നിന്നും കോട്ടയം പാമ്പാടി പോലീസ് ഇരുവരെയും കസ്റ്റഡയിലെടുത്തു. വയനാടിന് പുറപ്പെടാനായി തീരുമാനിച്ചിരുന്നെന്ന് യുവാവ് ചോദ്യം ചെയ്യലില്‍ സമ്മതിച്ചു. വെച്ചൂച്ചിറ പോലീസ് ഇന്‍സ്പെക്ടര്‍ എം.ആര്‍.സുരേഷ്, എസ്ഐ വിനോദ് പി.മധു തുടങ്ങിയവരുടെ നേതൃത്വത്തിലാണ് അന്വേഷണം.

സ്വകാര്യ ഫ്ളാറ്റിലെ നിയമലംഘനങ്ങൾക്കെതിരേ മനുഷ്യാവകാശ കമ്മീഷൻ

പത്തനതിട്ട: കാതോലിക്കേറ്റ് കോളജ് ജംഗ്ഷനിലെ ഫ്ലാറ്റ് സ‌മുച്ചയത്തിൽ ഗുരുതരമായ നിയമലംഘനങ്ങൾ വിവിധ സർക്കാർ ഏജൻസികൾ കണ്ടെത്തിയ സാഹചര്യത്തിൽ അപാകതകൾ അടിയന്തരമായി പരിഹരിക്കണമെന്ന് മനുഷ്യാവകാശ കമ്മീഷൻ അംഗം വി. ഗീത ഉത്തരവിട്ടു. ഫ്ലാറ്റ് സമുച്ചയത്തിൽ ദ്രവമാലിന്യസംസ്കരണസംവിധാനം പ്രവർത്തനക്ഷമമല്ലെന്ന് മുനിസിപ്പൽ സെക്രട്ടറി കമ്മീഷനെ അറിയിച്ചു. മലിനീകരണ നിയന്ത്രണ ബോർഡ് ഫ്ലാറ്റിന് നൽകിയ പ്രവർത്തനാനുമതി 2021 മേയിൽ കാലഹരണപ്പെട്ടു. സാനിറ്ററി മാലിന്യം സംസ്കരിക്കുന്നതിനുള്ള സംവിധാനമില്ല. കേരള മുൻസിപ്പാലിറ്റി ആക്റ്റിലെ വിവിധ വകുപ്പുകൾ ലംഘിക്കപ്പെട്ടു. മുൻസിപ്പൽ സെക്രട്ടറി കമ്മീഷനിൽ സമർപ്പിച്ച റിപ്പോർട്ടിലെ അപാകതകൾ 10 ദിവസത്തിനകം പരിഹരിക്കണമെന്ന് കമ്മീഷൻ ഫ്ലാറ്റ് ഉടമയ്ക്കു നിർദ്ദേശം നൽകി. നടപടി സ്വീകരിച്ചില്ലെങ്കിൽ മുൻസിപ്പാലിറ്റി ആക്റ്റിലെ വ്യവസ്ഥകൾ പ്രകാരം ഫ്ലാറ്റ് ഉടമക്കെതിരെ 15 ദിവസത്തിനകം മുൻസിപ്പൽ സെക്രട്ടറി നടപടി സ്വീകരിക്കണമെന്നും കമ്മീഷൻ ആവശ്യപ്പെട്ടു.

നെൽപ്പാടത്ത് ഓപ്പറേഷൻ സിന്ദൂർ വിരിയിച്ച് അജയകുമാർ

കോഴഞ്ചേരി: ഭാരതത്തിന് അഭിമാനമായി മാറിയ ഓപ്പറേഷന്‍ സിന്ദൂറിന് അഭിവാദ്യം അർപ്പിച്ച് പാടത്ത് നെൽവിത്തുകൾ മുളപ്പിച്ച് ജൈവ കര്‍ഷകൻ അജയകുമാര്‍ വല്ല്യൂഴത്തിൽ. അജയ് ഫാമെന്ന പുല്ലാട്- വള്ളിക്കാലയിലുള്ള കൃഷിയിടത്തിലാണ് ഓപ്പറേഷന്‍ സിന്ദൂര്‍ നെൽച്ചെടികൾ കിളിർത്തത്. ഇതോടൊപ്പം റാഫേല്‍ വിമാനങ്ങളും സൈനികരും നെല്‍ക്കതിരുകളായി മുളച്ചു നിൽക്കുന്നുണ്ട്. 25 സെന്‍റ് സ്ഥലത്താണ് ഓപ്പറേഷന്‍ സിന്ദൂര്‍ എന്ന സൈനിക നടപടിക്ക് അഭിവാദ്യം അർപ്പിച്ച് നെല്‍വിത്തുകള്‍ ഒരുക്കിയിരിക്കുന്നത്. മലയാളികള്‍ക്ക് അന്യമായിട്ടുള്ള 60ല്‍പരം ഔഷധ ഗുണങ്ങളുള്ള നെല്‍വിത്തുകളാണ് അജയകുമാര്‍ കഴിഞ്ഞ കാലങ്ങളില്‍ തന്‍റെ കൃഷിയിടത്തിലൂടെ പരിചയപ്പെടുത്തിയത്.മധ്യപ്രദേശിൽ നിന്നുള്ള സിന്ദൂര്‍ വയലറ്റ് എന്ന വിത്താണ് കൃഷിയിടത്തില്‍ വിതച്ചിരിക്കുന്നത്. മലയാളികള്‍ക്ക് പരിചയമുളള പച്ചയിൽനിന്നും വ്യത്യസ്തമായി കറുത്ത നിറത്തിലാണ് ഈ നെല്‍വിത്തുകള്‍ വളരുന്നത്. റാഫേല്‍ വിമാനം ഉപയോഗിച്ച് ഭാരതം ലക്ഷ്യം സാധൂകരിച്ചത് ജനഹൃദയങ്ങളിലെത്തിക്കുന്നതിനുവേണ്ടിയാണ് തന്‍റെ കൃഷിയിടം ഇത്തരത്തിൽ ഒരുക്കിയിരിക്കുന്നതെന്ന് അജയകുമാര്‍ പറഞ്ഞു. ഇന്ത്യന്‍ സൈനികര്‍ക്കുള്ള ഒരു ബിഗ് സല്യൂട്ട് കൂടിയാണെന്നും അദ്ദേഹം പറഞ്ഞു. നേരത്തേ ഈശോയുടെ രൂപം നെൽപ്പാടത്ത് വിരിയിച്ച് ശ്രദ്ധേയനായി. വിവാദമായ ആറന്മുള വിമാനത്താവളത്തിന് സമീപമുള്ള സ്ഥലത്ത് കരിമ്പുകൃഷിയും അജയകുമാര്‍ ചെയ്യുന്നുണ്ട്. ജൈവ വൈവിധ്യ ബോര്‍ഡിന്‍റെ അവാര്‍ഡ് ജേതാവുകൂടിയായ അജയകുമാര്‍ ഇന്ത്യയുടെ വ്യത്യസ്ത സംസ്ഥാനത്താനങ്ങളിലുള്ള നെല്‍വിത്തുകള്‍ തന്‍റെ കൃഷിയിടങ്ങളില്‍ ഉപയോഗിക്കുന്നതോടുകൂടി ദേശീയോദ്ഗ്രഥനവും ലക്ഷ്യമാക്കുന്നുണ്ട്. വ്യത്യസ്തമായ നെല്‍വിത്തുകളായതിനാല്‍ ചിങ്ങമാസത്തില്‍ ഉത്സവത്തോടുകൂടി കൊയ്ത്തു നടത്താനാണ് ലക്ഷ്യമിടുന്നത്. ജൈവ- പാരമ്പര്യ കൃഷി രീതിയാണ് അജയകുമാറിനെ വ്യത്യസ്തനാക്കുന്നത്.

കോന്നി മെഡിക്കൽ കോളജ് അനാസ്ഥയുടെ മുഖമുദ്ര: അടൂർ പ്രകാശ്

പത്തനംതിട്ട: സംസ്ഥാനത്തെ ആരോഗ്യവകുപ്പിന്‍റെ കെടുകാര്യസ്ഥതയുടെ ഉത്തമ ഉദാഹരണമാണ് കോന്നി സർക്കാർ മെഡിക്കൽ കോളജെന്ന് യുഡിഎഫ് കൺവീനർ അടൂർ പ്രകാശ് എംപി. സംസ്ഥാനത്തെ മെഡിക്കൽ കോളജുകളുടെ ശോച്യാവസ്ഥയ്ക്കും ആരോഗ്യവകുപ്പിലെ അഴിമതിക്കുമെതിരേ ഡിസിസി നേതൃത്വത്തിൽ കോന്നി മെഡിക്കൽ കോളജിലേക്കു നടത്തിയ മാർച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ശസ്ത്രക്രിയ ഉപകരണങ്ങളും മരുന്നുകളും ഇല്ലാതെ സംസ്ഥാനത്തെ മെഡിക്കല്‍ കോള‌കളുടെയും മറ്റ് സര്‍ക്കാര്‍ ആശുപത്രികളുടെയും പ്രവര്‍ത്തനം താറുമാറായിരിക്കുകയാണെന്നും ആരോഗ്യവകുപ്പില്‍ അഴിമതിയും കെടുകാര്യസ്ഥതയുമാണ് കൊടികുത്തി വാഴുന്നതെന്നും അടൂർ പ്രകാശ് പറഞ്ഞു. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍ അധ്യക്ഷത വഹിച്ചു. കെപിസിസി ജനറല്‍ സെക്രട്ടറി പഴകുളം മധു, ഡിസിസി മുൻ പ്രസിഡന്‍റ് പി. മോഹന്‍രാജ്, യുഡിഎഫ് ജില്ലാ കണ്‍വീനര്‍ എ. ഷംസുദ്ദീൻ, കെപിസിസി അംഗം മാത്യു കുളത്തിങ്കൽ, കെപിസിസി സെക്രട്ടറിമാരായ റിങ്കു ചെറിയാൻ, അനീഷ് വരിക്കണ്ണാമല തുടങ്ങി യവർ പ്രസംഗിച്ചു. ആരോഗ്യമന്ത്രി ഇരുട്ടുകൊണ്ട് ഓട്ട അടയ്ക്കുന്നു: പുതുശേരി പത്തനംതിട്ട: ഉപകരണങ്ങളും സാധനസാമഗ്രികളും ഇല്ലാത്തതിനാൽ ശാസ്ത്രക്രിയകൾ വരെ മാറ്റിവയ്ക്കേണ്ടിവരുന്ന സാഹചര്യം മെഡിക്കൽ കോളജ് ഡോക്ടർ ഡോ. ഹാരിസ് വിശദീകരിച്ചത് സിസ്റ്റത്തിന്‍റെ തകരാറാണെന്നു പറഞ്ഞു തടിതപ്പാൻ ആരോഗ്യമന്ത്രി നടത്തുന്ന ശ്രമം ഇരുട്ടുകൊണ്ട് ഓട്ടയടയ്ക്കുന്നതിന് തുല്യമാണെന്ന് കേരള കോൺഗ്രസ് വൈസ് ചെയർമാൻ ജോസഫ് എം. പുതുശേരി. സ്വകാര്യ ആശുപത്രികളിൽ വാങ്ങുന്നതുപോലെ സർക്കാർ ആശുപത്രിയിൽ ഉപകരണങ്ങൾ വാങ്ങാൻ കഴിയില്ലെന്ന അവാസ്തവമായ ന്യായവാദം ഉയർത്തി വീണിടത്ത് കിടന്ന് ഉരുളാനാണ് ഇപ്പോഴും മന്ത്രി ശ്രമിക്കുന്നത്. ഇത് ഒറ്റപ്പെട്ട കാര്യമല്ല, മറിച്ച് കഴിഞ്ഞ മൂന്നു വർഷത്തിലേറെയായി നിലനിൽക്കുന്ന സ്ഥിതി വിശേഷമാണെന്ന് പുതുശേരി അഭിപ്രായപ്പെട്ടു. സർക്കാർ ആശുപത്രികൾ ഓരോ വർഷവും മുൻകൂട്ടി നൽകുന്ന ഇൻഡന്‍റുകളുടെ അടിസ്ഥാനത്തിൽ മെഡിക്കൽ സർവീസ് കോർപറേഷൻ ടെൻഡർ വിളിച്ച് സാധനങ്ങൾ വാങ്ങി നൽകുന്ന രീതിയാണുണ്ടായിരുന്നത്. ഇതു തകർത്ത് പഞ്ഞിയും നൂലുമടക്കമുള്ള സാധനസാമഗ്രികൾ എല്ലാം രോഗികൾ വാങ്ങി നൽകേണ്ട ദുരവസ്ഥ മൂന്നു വർഷത്തിലേറെയായി നിലനിന്നിട്ടു അതു പരിഹരിക്കാതെ അതു സൗകര്യമായി കണ്ട് ഉപയോഗപ്പെടുത്തുകയായിരുന്നു മന്ത്രിയും സർക്കാരും. അത് ചൂണ്ടിക്കാട്ടിയവരെ പരിഹസിക്കുകയും സർക്കാർ വിരുദ്ധരായി ചിത്രീകരിക്കുകയുമാണ് ചെയ്തത്. ആരോഗ്യ കേരളം എന്ന അഭിമാന നേട്ടത്തിന് അടിത്തറ ഇട്ട മെഡിക്കൽ കോളജുകൾ അടക്കമുള്ള സർക്കാർ ആശുപത്രികളെ അസ്ഥിപഞ്ജരാക്കിയതിന്‍റെ പൂർണ ഉത്തരവാദിത്വം ആരോഗ്യമന്ത്രിക്കുള്ളതാണെന്നും പുതുശേരി പറഞ്ഞു.

അറസ്റ്റ് ചെയ്തു

പത്തനംതിട്ട: ട്യൂഷൻ ക്ലാസിൽ ആൺകുട്ടികളോടു മോശമായി പെരുമാറിയെന്ന പരാതിയിൽ കിടങ്ങന്നൂര്‍ കാക്കനാട്ട് പുത്തന്‍ പറമ്പില്‍ ഏബ്രഹാം അലക്‌സാണ്ടറെ ( 62) ആറന്മുള പോലീസ് അറസ്റ്റ് ചെയ്തു. കഴിഞ്ഞ ഒന്നര വര്‍ഷമായി കിടങ്ങന്നൂര്‍ ജംഗ്ഷനില്‍ ട്യൂഷന്‍ സെന്‍റര്‍ നടത്തുകയാണ് ഇയാൾ. പത്തനംതിട്ട: പരിചയമുള്ള പെണ്‍കുട്ടിയെ ഇന്‍സ്റ്റഗ്രാം വഴി അശ്ലീല സന്ദേശങ്ങളയച്ച് പ്രലോഭിപ്പിച്ച് ലൈംഗികാതിക്രമം നടത്തിയ യുവാവ് അറസ്റ്റിൽ. നെടുമ്പ്രം പൊടിയാടി വൈക്കത്തില്ലം മാധവം വീട്ടില്‍ സഞ്ജയ് എസ്.നായരാണ് (23) റിമാന്‍ഡിലായത്. പെണ്‍കുട്ടി ഒമ്പതാം ക്ലാസില്‍ പഠിക്കുമ്പോമ്പോഴാണ് യുവാവ് പരിചയപ്പെടുന്നത്. ഇരുവരുടെയും നഗ്ന ചിത്രങ്ങള്‍ ഇന്‍സ്റ്റഗ്രാം വഴി കൈമാറിയിട്ടുള്ളതായും അന്വേഷണത്തില്‍ വ്യക്തമായി. ഇതിനിടയില്‍ കഴിഞ്ഞ ഡിസംബറില്‍ കുട്ടിയെ കാറില്‍ കയറ്റി തടിയൂരുള്ള അരുവിക്കുഴി വെള്ളച്ചട്ടത്തില്‍ എത്തിച്ചശേഷം ലൈംഗിക അതിക്രമം കാട്ടുകയായിരുന്നു. ജില്ലാ ശിശുസംരക്ഷണ ഓഫീസറുടെ കാര്യാലയത്തില്‍ നിന്നും വിവരം ലഭിച്ചതിന്‍റെ അടിസ്ഥാനത്തിലാണ് പോലീസ് കേസെടുത്തത്.

സെന്‍റ് തോമസ് ദിനത്തിലെ മൂല്യനിർണയ ക്യാന്പ് മാറ്റണം: ടീച്ചേഴ്സ് ഗിൽ‌ഡ്

തിരുവല്ല: സെന്‍റ് തോമസ് ദിനത്തിലെ മൂല്യനിർണയ ക്യാമ്പ് മാറ്റിവയ്ക്കണമെന്ന് കാത്തലിക് ടീച്ചേഴ്സ് ഗിൽഡ് തിരുവല്ല അതിരൂപത സമിതി ആവശ്യപ്പെട്ടു. 2025ലെ രണ്ടാംവർഷ ഹയർ സെക്കൻഡറി ഇംപ്രൂവ്മെന്‍റ് പരീക്ഷയുടെ മൂല്യനിർണയ ക്യാന്പാണ് നാളെ നിശ്ചയിച്ചിരിക്കുന്നത്. ഭാരതത്തിന്‍റെ അപ്പോസ്തോലനായ സെന്‍റ് തോമസിന്‍റെ ഓർമത്തിരുനാൾ ക്രൈസ്തവ സമൂഹത്തിന് ഏറെ പ്രാധാന്യമുള്ള ദിവസമാണ്. ദേവാലയങ്ങളിൽ അന്ന് പ്രത്യേകമായി നടക്കുന്ന പ്രാർഥനാ ശുശ്രൂഷകളിലും ദിവ്യബലിയിലും പങ്കെടുക്കേണ്ടതുണ്ടെന്ന് ഗിൽഡ് സമിതി ചൂണ്ടിക്കാട്ടി. കാത്തലിക് ടീച്ചേഴ്സ് ഗിൽഡ് തിരുവല്ല അതിരൂപത ഡയറക്ടർ ഫാ. മാത്യു പുനക്കുളം അധ്യക്ഷത വഹിച്ച യോഗത്തിൽ റോബിൻ മത്തായി, പ്രമോദ് പി.എം, റോബിൻ മാത്യു, ജോസഫ് ചിറയിൽ, ലൈജു കോശി, ജിൻസി വർഗീസ്, മഞ്ജു വർക്കി, സിനു ചെറിയാൻ എന്നിവർ പ്രസംഗിച്ചു.

കരാർ ജീവനക്കാരെ പിരിച്ചുവിട്ടു, ഒപി കൗണ്ടർ തടസപ്പെട്ടു

പത്തനംതിട്ട: ജനറൽ ആശുപത്രിയിൽ നാല് താത്കാലിക ജീനക്കാരെ മുന്നറിയിപ്പില്ലാതെ പിരിച്ചുവിട്ടതോടെ ഒപി കൗണ്ടർ പ്രവർത്തനം മണിക്കൂറുകളോളം തടസപ്പെട്ടു. ഇന്നലെ മുതൽ നാല് ജീവനക്കാർ ജോലിക്ക് എത്തേണ്ടതില്ലെന്ന് തലേന്നു വൈകുന്നേരമാണ് അറിയിച്ചത്. 17 വർഷത്തോളമായി ജോലിയെടുക്കുന്ന ജീവനക്കാരെ അകാരണമായി പിരിച്ചുവിട്ടതിനെതിരേ ഇതര താത്കാലിക ജീവനക്കാർ ഉൾപ്പെടെ പ്രതിഷേധിച്ചു. പിരിച്ചുവിടപ്പെട്ടവരി‌ൽ രണ്ടു പേർ ഒപി വിഭാഗത്തിലും രണ്ടു പേർ എക്സ്റേ ഡ്യൂട്ടിയിലും ഉള്ളവരായിരുന്നു. രാവിലെ ഒപി കൗണ്ടറിൽ ജീവനക്കാർ ഇല്ലാതെ വന്നതോടെ ആശുപത്രിയിലെത്തിയ രോഗികളടക്കം വലഞ്ഞു. ഇതര താത്കാലിക ജീവനക്കാർ കൂടി സൂചന സമരം പ്രഖ്യാപിച്ചതോടെ രോഗികളുടെ തിരക്ക് വർധിച്ചു. ബദൽ സംവിധാനം ഏർപ്പെടുത്താനും കഴിഞ്ഞില്ല. രാവിലെ 6.30 മുതൽ ടിക്കറ്റ് എടുക്കാൻ ക്യൂവിൽ നിൽക്കുന്നവരായിരുന്നുരോഗികൾ. നാല് ഒപി കൗണ്ടറാണുള്ളത്. എല്ലാ കൗണ്ടറിന് മുന്നിലും മണിക്കൂറുകളോളം നീണ്ട നിരയുണ്ടായി. മണിക്കൂറോളം ക്യൂവിൽനിന്നു വലഞ്ഞ ആളുകൾ ബഹളംവയ്ക്കാനും തുടങ്ങി. ജീവനക്കാരുമായി തർക്കവും ഉണ്ടായി. ഇതിനിടെ പോലീസും വന്നു. പുതിയ ജീവനക്കാരെ കൗണ്ടറിലേക്ക് നിയോഗിച്ചു പ്രശ്ന പരിഹാരത്തിനു ശ്രമിച്ചെങ്കിലും ഇവരുടെ പരിചയക്കുറവ് തടസമായി. സമരത്തിന് ഐക്യദാർഢ്യവുമായി പ്രതിപക്ഷ സംഘടനകളും എത്തിയതോടെ പ്രശ്ന പരിഹാരത്തിന് ഭരണകക്ഷി നേതാക്കൾ ഇടപ്പെട്ടു. പിരിച്ചുവിപ്പെട്ടവർക്ക് സിപിഎം ബന്ധമുള്ളതിനാൽ പ്രശ്നപരിഹിരത്തിനു ചർച്ചയാകാമെന്നായി. ഇതോടെ സമരം പിൻവലിച്ച് ജീവനക്കാർ ജോലിക്കെത്തി. കാരണം കാണിക്കൽ നോട്ടീസില്ല പിരിച്ചുവിടപ്പെട്ട ജീവനക്കാർക്ക് കാരണം കാണിക്കൽ നോട്ടീസ് നൽകിയിട്ടില്ല. എച്ച്എംസി മുഖേന നിയമിതരായവരാണിവർ. ഗർഭിണിയായ യുവതിയും ഇക്കൂട്ടത്തിലുൾപ്പെടുന്നു. ഇവർക്കുള്ള ഇഎസ്ഐ ആനുകൂല്യം പോലും ഇതോടെ തടസപ്പെട്ടു. കുടുംബ പാരാബ്ദങ്ങളേറെയുള്ളവരാണ് പിരിച്ചുവിടപ്പെട്ടവരെന്നും വർഷങ്ങളായി ജോലി ചെയ്യുന്ന ഇവരെ രാഷ്ട്രീയ മര്യാദ പോലും കാട്ടാതെയാണ് പറഞ്ഞുവിട്ടതെന്നും സിപിഎം പ്രാദേശിക നേതാക്കൾക്കും അഭിപ്രായമുണ്ട്. സിപിഎം ബ്രാഞ്ച് സെക്രട്ടറി അടക്കം പിരിച്ചുവിടപ്പെട്ടവരിൽ ഉൾപ്പെടുന്നു. നിലവിൽ ജില്ലാ പഞ്ചായത്തിന്‍റെ അധീനതയിലാണ് ജനറൽ ആശുപത്രി. നിലവിലെ താത്കാലിക ജീവനക്കാരെ മുഴുവൻ പിരിച്ചുവിട്ട് പുതിയ ആളുകളെ നിയമിക്കാനുള്ള അണിയറ നീക്കങ്ങളും ഇതിനു പിന്നിലുള്ളതായി പറയുന്നു. ജീവനക്കാരെ സംബന്ധിച്ച കോൺഫിഡൻഷ്യൽ റിപ്പോർട്ടിൽ രോഗികളോട് അപമര്യാദയായി പെരുമാറിയെന്ന കാരണത്താലാണ് പിരിച്ചുവിടലെന്ന് ആശുപത്രി അധികൃതർ പറയുന്നു. എന്നാൽ ഇതൊരു കാരണം സൃഷ്ടിക്കലാണെന്നാണ് ജീവനക്കാരുടെ ഭിപ്രായം. എച്ച്എംസിക്കു ഫണ്ടില്ലെന്ന ന്യായീകരണത്തിലും കഴന്പില്ല. പ്രതിദിനം ജനറൽ ആശുപത്രി എച്ച്എംസിക്ക് ഒരു ലക്ഷം രൂപയുടെ വരുമാനമുണ്ട്.

ബി ആൻഡ് സി ബ്ലോക്കിന് അറ്റകുറ്റപ്പണികൾ; ജനറൽ ആശുപത്രിയിൽ കിടത്തി ചികിത്സ നിലയ്ക്കും

പത്തനംതിട്ട: ജനറൽ ആശുപത്രിയിലെ ബി ആൻഡ് സി ബ്ലോക്കിൽ പ്രവർത്തിച്ചിരുന്ന കിടത്തി ചികിത്സ വിഭാഗങ്ങളും പൂർണമായി നിലയ്ക്കും. കെട്ടിടത്തിന്‍റെ പണികൾക്കുവേണ്ടി അടച്ചിടുന്നതിനാലാണിത്. ഇതേ ബ്ലോക്കിലെ എല്ലാ ശസ്ത്ക്രിയ വിഭാഗങ്ങളും കോന്നി സർക്കാർ മെഡിക്കൽ കോളജിലേക്ക് മാറ്റുകയാണ്. ഇതിനൊപ്പം കിടത്തി ചികിത്സയും കോന്നിയിലേക്കു മാറ്റപ്പെടും. 414 കിടക്കകളാണ് നിലവിൽ ബി ആൻഡ് സി ബ്ലോക്കിലുള്ളത്. ആശുപത്രിയുടെ പഴയ അത്യാഹിത വിഭാഗം പൊളിച്ചുനീക്കിയതോടെ ഐപി വിഭാഗത്തിലെ കിടക്കകളുടെ എണ്ണം കുറഞ്ഞിരുന്നു. ഈ വാർഡിൽ പ്രവർത്തിച്ചിരുന്ന മൈനർ ഓപ്പറേഷൻ വിഭാഗത്തിലെ ഐപി വിഭാഗം നിലവിൽ ശബരിമല വാർഡിലുണ്ട്. എന്നാൽ ശസ്ത്രക്രിയ വിഭാഗം ഡോക്ടർമാർ കോന്നിയിലേക്ക് മാറുകയാണെങ്കിൽ രോഗികളെ ഇവിടെ കിടത്തി ചികിത്സിക്കാൻ ബുദ്ധിമുട്ടാകും. ഫലത്തിൽ ജനറൽ ആശുപത്രിയിൽ ഒപി, അത്യാഹിത വിഭാഗങ്ങൾ മാത്രമായിരിക്കും ഇനി ഉണ്ടാകുക. ശസ്ത്രക്രിയ വിഭാഗങ്ങളായ ഒബ്സ്റ്റട്രിക്സ് ആൻഡ് ഗൈനക്കോളജി, അസ്ഥിരോഗവിഭാഗം, ജനറൽ സർജറി, ഇഎൻടി എന്നിവ മെഡിക്കൽ കോളജിലേക്ക് മാറ്റുന്നതിനായാണ് തീരുമാനമെടുത്തിരിക്കുന്നത്. എല്ലാ വിഭാഗം ഒപിയും ജനറൽ ആശുപത്രിയിൽ തുടരും. ഒപിയിലെത്തുന്നവരിൽ കിടത്തി ചികിത്സ വേണ്ടവരെ കോന്നി മെഡിക്കൽ കോളജിലേക്ക് റഫർ ചെയ്യാനാണ് തീരുമാനം. അത്യാഹിത വിഭാഗത്തിൽ എത്തുന്നവരെയും ഇനി കോന്നിയിലേക്ക് മാറ്റും. 17 കിലോമീറ്റർ അകലെ കോന്നി മെഡിക്കൽ കോളജിലേക്ക് തുടർ ചികിത്സയ്ക്ക് ആളുകളെ എങ്ങനെ എത്തിക്കുമെന്നതിൽ അവ്യക്തത തുടരുകയാണ്. ഒപിയിലെത്തുന്നവരിൽ കിടത്തി ചികിത്സ വേണ്ടവരെ മെഡിക്കൽ കോളജിലെത്തിക്കാൻ വാഹനസൗകര്യം ഏർപ്പെടുത്തുമെന്ന നിർദേശം പ്രാവർത്തികമാക്കുന്നതു സംബന്ധിച്ചും തീരുമാനമുണ്ടായിട്ടില്ല. ഇതോടൊപ്പം നിലവിൽ ജനറൽ ആശുപത്രി ഡ്യൂട്ടിയിലുള്ള ഡോക്ടർമാരെയും ജീവനക്കാരെയും മെഡിക്കൽ കോളജിലേക്ക് എത്തിക്കാനും ക്രമീകരണം വേണ്ടിവരും. എച്ച്എംസി ഫണ്ട് ഉപയോഗപ്പെടുത്തി ചികിത്സാ സൗകര്യം ഉറപ്പാക്കാനാകില്ല. എച്ച്എംസി തീരുമാനം ഇക്കാര്യങ്ങളിലുണ്ടായിട്ടില്ലെന്നതു തന്നെ പ്രധാന കാരണമായി. ജില്ലാ പഞ്ചായത്ത് യോഗത്തിലും ഇതുമായി ബന്ധപ്പെട്ട ചർച്ചകൾ നടന്നിട്ടില്ല. ആശുപത്രി സംവിധാനങ്ങൾ കുറയുന്നതോടെ എച്ച്എംസി ഫണ്ടിലും ഭീമമായ കുറവുണ്ടാകും. എൻഎച്ച്എം ഫണ്ട് നൽകും; നിർമാണം അതിവേഗം ബി ആൻഡ് സി ബ്ലോക്കിന്‍റെ അറ്റകുറ്റപ്പണികൾക്കായി കേന്ദ്ര ഫണ്ടാണ് വിനിയോഗിക്കുക. നാഷണൽ ഹെൽത്ത് മിഷനിൽ നിന്നും 5.5 കോടി രൂപ ഇതിനായി ഉറപ്പാക്കിയിട്ടുണ്ട്. ഇൻകെല്ലാണ് നിർവഹണ ഏജൻസിയെങ്കിലും ഊരാളുങ്കൽ ലേബർ സൊസൈറ്റിയാണ് പണികൾ നടത്തുന്നത്. ഫണ്ട് ലഭ്യമാണെന്നതിനാൽ അതിവേഗം നിർമാണം പൂർത്തീകരിക്കുകയാണ് ലക്ഷ്യം. നിലവിലെ കെട്ടിടത്തിന്‍റെ ചോർച്ച, ശൗചാലയങ്ങളുടെയും ഡ്രെയിനേജ് സംവിധാനങ്ങളുടെയും തകരാറുകൾ എന്നിവ പരിഹരിക്കപ്പെടേണ്ടതുണ്ട്. ഇതിനായുള്ള തയാറെടുപ്പുകൾ തുടങ്ങി. ബ്ലോക്കിലെ ലിഫ്റ്റിന്‍റെ പണികൾ നടന്നുവരികയാണ്. ഇത് പൂർത്തിയാകുന്നതോടെ മെഷീനുകളടക്കം താഴെ ഇറക്കും. ശസ്ത്രക്രിയകൾ അടക്കം ജനറൽ ആശുപത്രിയിൽ തുടർന്ന് ഉണ്ടാകില്ല. ഇവയെല്ലാം കോന്നി മെഡിക്കൽ കോളജിലായിരിക്കും ചെയ്യുക. ജീവനക്കാരുടെ പുനർവിന്യാസം അടക്കമുള്ള ഉത്തരവുകൾ എത്തുന്നതോടെ ആശുപത്രി മാറ്റം പൂർണമാകും.

നാടിറങ്ങിയ കാട്ടാനയെ കാടു കയറ്റാൻ വനപാലകർ

പത്തനംതിട്ട: ആനയോടിക്കല്‍ ദൗത്യവുമായി കോന്നിയിലെ വനപാലകർ. കോന്നി വനം ഡിവിഷന്‍ പരിധിയില്‍ നടുവത്തുമൂഴി റേഞ്ചില്‍ കല്ലേലി തോട്ടം, കൊക്കത്തോട് ജനവാസ മേഖലയില്‍ കാട്ടാനകള്‍ വ്യാപകമായ ഇറങ്ങുന്ന സാഹചര്യത്തിലാണ് വനപാലകരുടെ നടപടി. ഡിഎഫ്ഒ ആയുഷ്മാൻ കോറിയുടെ നേതൃത്വത്തിൽ കോന്നി വനംഡിവിഷനിലെ വിവിധ ഓഫീസ് പരിധികളിൽ നിന്നുള്ള ഉദ്യോഗസ്ഥ സംഘമാണ് കൂട്ടമായി കാട് കയറിയത്. കോന്നി ആർ‌ആർ‌ടി, സൗത്ത് കുമരംപേരൂർ ഫോറസ്റ്റ് സ്റ്റേഷൻ, പാടംസ്റ്റേഷൻ, കൊക്കാത്തോട്, കരിപ്പാൻതോട് ഫോസ്റ്റ് സ്റ്റേഷനുകളിൽ നിന്നുള്ള 64 ജീവനക്കാരാണ് ദൗത്യത്തിൽ പങ്കെടുത്തത്. ജനവാസ മേഖലകളിലെത്തുന്ന കാട്ടാനകളെ തിരിച്ചറിഞ്ഞ് തിരികെ കാട്ടിലേക്ക് കടത്തി വിടുകയാണ് വനപാലക ദൗത്യം. ഇതിന്‍റെ ഭാഗമായി കോന്നി റേഞ്ചിന്‍റെ കീഴില്‍ സൗത്ത് കുമരംപേരൂര്‍ വനാതിര്‍ത്തിക്കുളളിലും വയക്കരവനമേഖലയിലുമാണ് ഇന്നലെ വ്യാപകമായി തെരച്ചില്‍ നടത്തിയത്. നദിക്കു സമീപമായി കണ്ട കാട്ടാനയെ ഉള്‍ക്കാട്ടിലേക്ക് കടത്തി വിടുകയും ചെയ്തു. ഇതിനിടയില്‍ കാട്ടാന വനപാലകർക്കു നേരേ പാഞ്ഞടുത്തു. പിന്തിരിഞ്ഞ് ഓടുന്നതിനിടയില്‍ എട്ടോളം വനപാലകര്‍ക്ക് വീണു പരിക്കേറ്റു. നിരീക്ഷണ സംഘം ജനവാസ മേഖലയില്‍ വൈകുന്നേരം നാലു മുതല്‍ പിറ്റേന്നു രാവിലെ ഒന്പതുവരെ നിരീക്ഷണ പട്രോളിംഗും ഇതുവഴി കടന്നു പോകുന്നവര്‍ക്ക് സുരക്ഷയും ഒരുക്കി പ്രത്യേക സംഘത്തെ നിയോഗിച്ചിട്ടുണ്ട്. സ്ഥിരമായി എത്തുന്ന ആനകളെ ശാസ്ത്രീയമായി തിരിച്ചറിഞ്ഞ് ഉള്‍ക്കാട്ടിലേക്ക് കടത്തിവിടുന്നത് വളരെ ശ്രമകരമാണ്. വനത്തിനുള്ളില്‍ പകല്‍ സമയത്ത് നിലയുറപ്പിച്ച ആനകള്‍ രാത്രികാലങ്ങളില്‍ അച്ചന്‍കോവിലാറും റോഡും കടന്ന് കൈതച്ചക്കത്തോട്ടത്തിലേക്ക് കൂട്ടത്തോടെ വരുന്ന സാഹചര്യമാണ് നിലവിലുള്ളതെന്ന് വനപാലകർ പറയുന്നു. കോന്നി കുളത്തുമൺ പ്രദേശത്ത് ഒരുമാസത്തിലേറെയായി നിരന്തരം കാട്ടാന ശല്യമുണ്ട്. ഇവയെ പലതവണ കാടു കയറ്റിയെങ്കിലും ഫലമുണ്ടായില്ല. കുളത്തുമൺ പ്രദേശത്തെ കൈതച്ചക്ക ത്തോട്ടമാണ് കാട്ടാനകളുടെ ലക്ഷ്യം.

എക്യുമെനിക്കൽ സാധ്യതകൾ പ്രയോജനപ്പെടുത്തണം: മാർത്തോമ്മ മെത്രാപ്പോലീത്ത

തിരുവല്ല: സാധ്യതകളുടെ കൂമ്പാരമാണ് എക്യുമെനിസമെന്ന് തിയഡോഷ്യസ് മാർത്തോമ്മ മെത്രാപ്പോലീത്ത. കേരള കൗൺസിൽ ഓഫ് ചർച്ചസിന്‍റെ ആസ്ഥാനമന്ദിരമായ ഡോ. ജോസഫ് മാർത്തോമ്മ എക്യുമെനിക്കൽ സെന്‍ററിന്‍റെ സമർപ്പണ ശുശ്രൂഷ നിർവഹിച്ചു പ്രസംഗിക്കുകയായിരുന്നു അദ്ദേഹം. കെസിസി പ്രസിഡന്‍റ് അലക്സിയോസ് മാർ യൗസേബിയോസ് മെത്രാപ്പോലീത്ത അധ്യക്ഷത വഹിച്ചു. ഡോ.ഗീവർഗീസ് മാർ കൂറിലോസ് ഡോ.ജോസഫ് മാർത്തോമ്മ അനുസ്മരണ പ്രഭാഷണം നടത്തി. സിറിൽ മാർ ബസേലിയോസ് മെത്രാപ്പോലീത്ത, സാമുവേൽ മാർ തെയോഫിലോസ് , ഔഗിൻ കുര്യാക്കോസ് മെത്രാപ്പോലീത്ത, ബിഷപ് ഡോ. ഉമ്മൻ ജോർജ്, ബിഷപ് ഡോ. ജോർജ് ഈപ്പൻ, ബിഷപ് സുന്ദർ സിംഗ്, മേജർ ബാബു പി. പൗലോസ്, ജനറൽ സെക്രട്ടറി ഡോ. പ്രകാശ് പി. തോമസ്, ട്രഷറർ റവ. ഡോ. ടി. ഐ. ജയിംസ് എന്നിവർ പ്രസംഗിച്ചു.

നഗരസഭാ സ്മാർട്ട് അങ്കണവാടി ഉദ്ഘാടനം ചെയ്തു

പത്തനംതിട്ട: നഗരസഭയിലെ സ്മാർട്ട് അങ്കണവാടി ചെയർമാൻ റ്റി. സക്കീർ ഹുസൈൻ നാടിനു സമർപ്പിച്ചു. അങ്കണവാടികൾ നാടിന്‍റെ വിദ്യാഭ്യാസത്തിന്‍റെയും സാംസ്കാരികതയുടെയും കേന്ദ്രമാണെന്ന് അദ്ദേഹം പറഞ്ഞു. ആറാം വാർഡിലെ 91-ാം നമ്പർ അങ്കണവാടിയാണ് നിർമാണം പൂർത്തിയാക്കി ആധുനിക സൗകര്യങ്ങളോടെ ഉദ്ഘാടനം ചെയ്തത്. 850 ചതുരശ്രയടി സ്ഥലത്ത് 25 ലക്ഷം രൂപ ചെലവിലാണ് അങ്കണവാടി നിർമിച്ചത്. കെട്ടിടം പൂർണമായും ശീതീകരിച്ചിട്ടുണ്ട്. കുട്ടികളുടെ കളിക്കോപ്പുകളും എത്തി. നഗരസഭയുടെ തനത് ഫണ്ടുപയോഗിച്ച് വാങ്ങിയ സ്ഥലത്താണ് പുതിയ അങ്കണവാടി നിർമിച്ചത്. വാർഡ് കൗൺസിലർ ആൻസി തോമസ് അധ്യക്ഷത വഹിച്ചു. ഡെപ്യൂട്ടി ചെയർപേഴ്സൺ ആമിന ഹൈദരാലി മുഖ്യപ്രഭാഷണം നടത്തി. ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ മേഴ്സി വർഗീസ്, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജെറി അലക്സ്, വിദ്യാഭ്യാസ കലാകായിക സ്റ്റാൻഡിംഗ് കമ്മിറ്റി ചെയർമാൻ എസ്. ഷമീർ, പ്രതിപക്ഷ നേതാവ് കെ. ജാസിംകുട്ടി, ജില്ലാ ആസൂത്രണ സമിതി അംഗം പി.കെ. അനീഷ്, കൗൺസിലർമാരായ എ. സുരേഷ് കുമാർ, റോസ്‌ലിൻ സന്തോഷ്, റോഷൻ നായർ, എം.സി. ഷെരീഫ്, ആനി സജി, അംബികാ വേണു, മുനിസിപ്പൽ എൻജിനീയർ സുധീർ രാജ് തുടങ്ങിയവർ പ്രസംഗിച്ചു. ഭൂമി വിട്ടു നൽകിയ സുമിത്ത് സി. തോമസിനെ ആദരിച്ചു. പ്രദേശവാസികൾ സന്തോഷസൂചകമായി പായസവിതരണവും കരിമരുന്ന് പ്രയോഗവും നടത്തി. നിലവിലെ ഭരണസമിതിയുടെ കാലയളവിൽ ആറ്‌ അങ്കണവാടികൾക്കാണ് സ്വന്തം കെട്ടിടം നിർമിച്ചത്. നഗരസഭ 22-ാം വാർഡിൽ നിർമിക്കുന്ന അങ്കണവാടിയും ഉടൻ ഉദ്‌ഘാടനം ചെയ്യും.

ലോക സാമൂഹിക മാധ്യമദിനത്തിൽ ജോർജിയൻ റേഡിയോ

ചുങ്കപ്പാറ: സെന്‍റ് ജോർജ് ഹൈസ്കൂളിൽ ഗ്രീൻ സ്റ്റുഡിയോയുടെയും മീഡിയ ക്ലബിന്‍റെയും ആഭിമുഖ്യത്തിൽ ജോർജിയൻ റേഡിയോയ്ക്ക് ആരംഭം കുറിച്ചു. സ്കൂൾ റേഡിയോ പ്രക്ഷേപണത്തിന്‍റെ ഉദ്ഘാടനം സ്കൂൾ ഹെഡ്മാസ്റ്റർ വർഗീസ് ജോസഫ് റേഡിയോയിലൂടെ ആദ്യ സന്ദേശം നൽകി നിർവഹിച്ചു. കുട്ടികൾ തന്നെയാണ് റേഡിയോ ജോക്കിയായി റേഡിയോ നിയന്ത്രിക്കുന്നത്. സ്റ്റുഡിയോ കോ ഓർഡിനേറ്റർ ലൈജു കോശി മാത്യു, അനി മാത്യു, ദീപ അഗസ്റ്റിൻ എന്നിവർ നേതൃത്വം നൽകുന്നു. സാമൂഹിക മാധ്യമങ്ങളുടെ നന്മയാർന്ന ഉപയോഗം കുട്ടികൾക്കു മനസിലാക്കാനുള്ള അവസരമാണ് സ്കൂളിൽ ക്രമീകരിക്കുന്നതെന്ന് ഹെഡ്മാസ്റ്റർ അറിയിച്ചു.

ജനറൽ ആശുപത്രി സംവിധാനങ്ങൾ മെഡിക്കൽ കോളജിലേക്ക്

പത്തനംതിട്ട: ജനറൽ ആശുപത്രിയുടെ ബി ആൻഡ് സി ബ്ലോക്ക് നവീകരിക്കുന്നതിന്‍റെ ഭാഗമായി നിലവിലെ സംവിധാനങ്ങൾ കോന്നി മെഡിക്കൽ കോളജിലേക്ക് മാറ്റുന്നതിനുള്ള ഉത്തരവ് ഉടനിറങ്ങും. നാലിനുശേഷം ജനറൽ ആശുപത്രിയിൽ ശസ്ത്രക്രിയകൾ എടുക്കേണ്ടതില്ലെന്ന നിർദേശം വന്നു. ശോച്യാവസ്ഥയിലായ ബി ആൻഡ് സി ബ്ലോക്കിന് അടിയന്തര അറ്റകുറ്റപ്പണി അനിവാര്യമായ സാഹചര്യത്തിൽ കെട്ടിടം അടച്ചിടേണ്ടിവരുമെന്നതിനാൽ ഇവിടെ പ്രവർത്തിച്ചിരുന്ന വിഭാഗങ്ങൾക്ക് മറ്റൊരിടം കണ്ടെത്താനാണ് ഇവ മെഡിക്കൽ കോളജിലേക്കു മാറ്റുന്നത്. പ്രധാന ശസ്ത്രക്രിയ വിഭാഗങ്ങളായ ഒബ്സ്റ്റട്രിക്സ് ആൻഡ് ഗൈനക്കോളജി, അസ്ഥിരോഗവിഭാഗം, ജനറൽ സർജറി, ഇഎൻടി എന്നിവയാണ് മെഡിക്കൽ കോളജിലേക്ക് മാറ്റുന്നത്. ഇതു സംബന്ധമായി മന്ത്രിതലത്തിലുൾപ്പെടെ ചർച്ച നടത്തി തീരുമാനമെടുത്തിരുന്നുവെങ്കിലും ഡോക്ടർമാരുടെ ഭാഗത്തു നിന്ന് എതിർപ്പുണ്ടായതോടെ ഉത്തരവ് വൈകുകയായിരുന്നു. എന്നാൽ കെട്ടിടത്തിന്‍റെ നിർമാണ ജോലികൾ ഉടൻ ആരംഭിക്കേണ്ട സാഹചര്യത്തിൽ മാറ്റങ്ങൾ ഉടൻ നടത്താൻ നിർദേശം വന്നു. സംവിധാനങ്ങൾ മാറ്റുന്നതിനൊപ്പം ഡോക്ടർമാരും ജീവനക്കാരും അടക്കം കുറെയധികം ആളുകളെ താത്കാലികാടിസ്ഥാനത്തിൽ മെഡിക്കൽ കോളജിലേക്കു മാറ്റേണ്ടിവരും. ജനറൽ ആശുപത്രിയിൽ ഒപി മാത്രമായിരിക്കും ഇനിയുണ്ടാകുക. നിലവിൽ രണ്ട് പ്രധാന കെട്ടിടങ്ങളുടെ പണികൾ നടന്നുവരികയാണ്. അതുകൊണ്ടുതന്നെ കിടത്തിച്ചികിത്സയ്ക്കു സൗകര്യങ്ങളില്ലെന്ന സ്ഥിതിയായി. നിലവിൽ ഐപി വാർഡും ശസ്ത്രക്രിയ വിഭാഗവും ബി ആൻഡ് സി ബ്ലോക്കിലായിരുന്നു. നിലവിലെ സംവിധാനങ്ങൾ കോന്നി മെഡിക്കൽ കോളജിലേക്കു മാറ്റുന്നതോടെ പത്തനംതിട്ട ജനറൽ ആശുപത്രിയും കോന്നി മെഡിക്കൽ കോളജിന്‍റെ ഭാഗമാകും. മെഡിക്കൽ വിദ്യാഭ്യാസ വകുപ്പിനു കീഴിലാണ് കോന്നി മെഡിക്കൽ കോളജിന്‍റെ പ്രവർത്തനം. നേരത്തേ ജനറൽ ആശുപത്രിയെ മെഡിക്കൽ കോളജിന്‍റെ ഭാഗമാക്കി ഉത്തരവിറക്കിയിരുന്നു. കോന്നി സർക്കാർ മെഡിക്കൽ കോളജിന് ദേശീയ മെഡിക്കൽ കമ്മീഷന്‍റെ അംഗീകാരം വാങ്ങാൻ വേണ്ടിയാണ് ഇത്തരമൊരു ഉത്തരവിറക്കിയിരുന്നത്. ജനറൽ ആശുപത്രിയിലെ കിടക്കകളും രോഗികളും ചൂണ്ടിക്കാട്ടിയാണ് അംഗീകാരം വാങ്ങിയത്. മെഡിക്കൽ കോളജിൽ ഐപി വിഭാഗം ശക്തിപ്പെടാത്തതിനാൽ നിലവിലും ബേസ് ആശുപത്രിയായി പത്തനതിട്ട ജനറൽ ആശുപത്രിയാണ് നിലനിന്നിരുന്നത്. പത്തനംതിട്ടയിലും പരിസരങ്ങളിലും സർക്കാർ നഴ്സിംഗ് കോളജുകൾക്കും സ്കൂളുകൾക്കും ബേസ് ആശുപത്രി ഇവിടെയായിരുന്നു. തകർച്ചയിലായത് 17 വർഷം മുന്പുള്ള കെട്ടിടം 17 വർഷം മുന്പ് നിർമാണം പൂർത്തീകരിച്ച കെട്ടിടമാണ് ബി ആൻഡ് സി ബ്ലോക്ക്. നിർമാണത്തിലെ പിഴവുകളാണ് തകർച്ചയ്ക്കു കാരണമായത്. കെട്ടിടത്തിനു ചോർച്ച ഉണ്ടാകാൻ തുടങ്ങിയിട്ട് വർഷങ്ങളായി. ലിഫ്റ്റ് പ്രവർത്തിപ്പിക്കുന്പോൾ കെട്ടിടം മൊത്തത്തിൽ കുലുങ്ങുന്ന സ്ഥിതിയുണ്ട്. ഡ്രെയിനേജ് സംവിധാനങ്ങളും ശൗചാലയങ്ങളും അടഞ്ഞു കിടക്കുകയാണ്. ഇവിടെനിന്നുള്ള മലിനജലം രോഗികളെ കിടത്തിയിരിക്കുന്ന വാർഡുകളിലേക്കാണ് വീണിരുന്നത്. നവീകരണത്തിന് നാലു കോടി രൂപയുടെ പദ്ധതിയാണ് നടപ്പാക്കുന്നത്. സർക്കാർ ഏജൻസിയായ ഇൻകെലാണ് പണികൾ നടത്തുന്നത്. കെട്ടിടത്തിന്‍റെ ഒരു നില നവീകരിച്ച് നേത്രചികിത്സാ വിഭാഗം ക്രമീകരിക്കും. കണ്ണ് ഓപ്പറേഷൻ തിയേറ്ററും വാർഡും ഇതിൽ ക്രമീകരിക്കും. നിലവിൽ ആശുപത്രിയിൽ ഒപി ബ്ലോക്കിന്‍റെയും അത്യാഹിത വിഭാഗത്തിന്‍റെയും പണികൾ നടന്നുവരികയാണ്. ഇതുകാരണം സ്ഥലസൗകര്യം തീരെയില്ല. ഒപി പ്രവർത്തിക്കുന്ന കെട്ടിടത്തിലും അത്യാഹിത വിഭാഗത്തിലം ഏറെ പരിമിതികളുണ്ട്. ഇത്തരം ഒരു സാഹചര്യത്തിൽ ബി ആൻ സി ബ്ലോക്കിലെ സൗകര്യങ്ങൾ കൂടി ആശുപത്രി വളപ്പിൽ തന്നെ നിലനിർത്താനാകില്ലെന്ന് കഴിഞ്ഞ എച്ച്എംസി യോഗത്തിൽ മന്ത്രി വീണാ ജോർജ് തന്നെ വ്യക്തമാക്കിയിരുന്നു. വെള്ളക്കരം കുടിശിക രണ്ടുകോടി, വൈദ്യുതി ചാർജ് എഴുതിത്തള്ളി ജനറൽ ആശുപത്രിയുടെ വെള്ളക്കരം കുടിശിക രണ്ടു കോടി രൂപയാണ്. ആശുപത്രിയുടെ നിയന്ത്രണാധികാരമുള്ള ജില്ലാ പഞ്ചായത്താണ് ഇത് അടയ്ക്കേണ്ടത്. വൈദ്യുതി ചാർജ് ഇനത്തിൽ കെഎസ്ഇബിക്ക് കോടികൾ നൽകാനുണ്ടായിരുന്നെങ്കിലും സർക്കാർ ഇടപെട്ട് ഒഴിവാക്കി നൽകി. ഇനി 24 ലക്ഷം രൂപ അടയ്ക്കണം. ആശുപത്രിയിലേക്ക് ആവശ്യമായ സാധനങ്ങൾ വാങ്ങിയതുമായി ബന്ധപ്പെട്ട് കുടിശിക ഏറെയുണ്ട്. ഇവ കൃത്യമായി നൽകാനാകുന്നില്ല. ആശുപത്രിയുടെ ബാധ്യതകൾ സംബന്ധിച്ച് ഇന്നലെ പോലീസ് സ്പെഷൽ ബ്രാഞ്ച് സംഘം പരിശോധനകൾ നടത്തി. എച്ച്എംസി അറിഞ്ഞിട്ടില്ല ജനറൽ ആശുപത്രി സംവിധാനങ്ങൾ മാറ്റുന്നതു സംബന്ധിച്ച് ആശുപത്രി മാനേജ്മെന്‍റ് കമ്മിറ്റിക്ക് അറിവില്ല. ഏറ്റവുമൊടുവിൽ ചേർന്ന എച്ച്എംസി യോഗത്തിൽ ബി ആൻഡ് സി ബ്ലോക്കിന്‍റെ നിർമാണം ഉടൻ ആരംഭിക്കുമെന്ന് അധ്യക്ഷത വഹിച്ച മന്ത്രി വീണാ ജോർജ് അറിയിച്ചിരുന്നു. എന്നാൽ ഇതോടെ ആശുപത്രി സംവിധാനങ്ങൾ എങ്ങനെ നിലനിർത്തണമെന്നതു സംബന്ധിച്ച് ആലോചിച്ചു തീരുമാനിക്കാമെന്നായിരുന്നു മറുപടി. മെഡിക്കൽ കോളജിലേക്ക് ആശുപത്രി സംവിധാനങ്ങൾ മാറ്റുന്നതു ജില്ലാ പഞ്ചായത്തിലും ചർച്ച ചെയ്തിട്ടില്ല. ഡോക്ടർമാരുടെ സംഘടനായ കെജിഎംഒഎ ഇക്കാര്യത്തിൽ തങ്ങൾക്കുള്ള എതിർപ്പ് അറിയിച്ചിരുന്നു. പച്ചപിടിക്കാതെ കോന്നി മെഡിക്കൽ കോളജ് പത്തനംതിട്ട: ഹരിതാഭ സുന്ദരമാണ് കോന്നി സർക്കാർ മെഡിക്കൽ കോളജ് പരിസരമെങ്കിലും അഞ്ചുവർഷമെത്തുന്പോഴും പ്രവർത്തനം പച്ചപിടിച്ചില്ല. കോടികൾ ചെലവഴിച്ചുള്ള നിർമാണങ്ങളും ഉദ്ഘാടനങ്ങളും തകൃതിയായി നടക്കുന്പോഴും അടിയന്തരഘട്ടത്തിൽ ചികിത്സ ലഭ്യമാക്കാനുള്ള സംവിധാനം കോന്നിയിൽ ഇപ്പോഴുമായിട്ടില്ല. പ്രതിദിനം 1000 രോഗികൾ ഒപി വിഭാഗത്തിലെത്തുന്നുണ്ടെന്നാണ് കണക്ക്. എന്നാൽ പരമാവധി പേരെ മാത്രമേ ഇപ്പോഴും കിടത്തി ചികിത്സിക്കാറുള്ളൂ. ഇതിനുള്ള സംവിധാനമേ മെഡിക്കൽ കോളജിൽ ആയിട്ടുള്ളൂവെന്നാണ് അധികൃതർ പറയുന്നത്. 300 കിടക്കകളുള്ള ആശുപത്രി കെട്ടിടം ഉദ്ഘാടനം ചെയ്തിട്ടു മൂന്നുവർഷമായി. അത്യാഹിതവിഭാഗം ഉദ്ഘാടനം ചെയ്തുവെങ്കിലും അതും പൂർണസജ്ജമായിട്ടില്ല. ഡോക്ടർമാരുടെ അഭാവമാണ് പ്രധാന പ്രശ്നം. തസ്തികകൾ അനുവദിച്ചെങ്കിലും നിയമനം പൂർണമാകാത്തതിനാൽ ഡോക്ടർമാരും അനുബന്ധ ജീവനക്കാരും ഇല്ല. ക്വാർട്ടേഴ്സിന്‍റെ പണികൾ പൂർത്തിയാകാത്തതിനാൽ താമസസൗകര്യം ഇല്ലെന്ന പേരിലാണ് ഡോക്ടർമാർ കോന്നിയിലേക്കുള്ള നിയമനം സ്വീകരിക്കാത്തത്. താത്കാലികാടിസ്ഥാനത്തിലുള്ള ഡോക്ടർ നിയമനമാണ് ഇപ്പോഴും. ഉന്നത നിലവാരത്തിലുള്ള സജ്ജീകരണങ്ങളാണ് മെഡിക്കൽ കോളജിൽ ഒരുക്കിയിരിക്കുന്നത്. സ്കാനിംഗ് സംവിധാനം, സർജറി യൂണിറ്റ്, ഐസിയു എന്നിവയെല്ലാം ആധുനിക സംവിധാനങ്ങളോടെയാണ് സജ്ജീകരിച്ചിരിക്കുന്നത്. ഇവയുടെ പ്രയോജനം രോഗികൾക്കു ലഭിച്ചു തുടങ്ങിയിട്ടില്ല. പീഡിയാട്രിക് ഐസിയുവില്‍ 15 കിടക്കകളാണ് സജ്ജീകരിച്ചിട്ടുള്ളത്. ഏറെ കാത്തിരിപ്പിനുശേഷം പോസ്റ്റുമോർട്ടം നടപടികൾ സമീപകാലത്ത് ആരംഭിച്ചു. എന്നാൽ പോലീസ് ഔട്ട്പോസ്റ്റ് ഉൾപ്പെടെ തുടങ്ങിയിട്ടില്ല. മോർച്ചറിയായിട്ടുണ്ട്. പ്രസവവാർഡും കുട്ടികളുടെ വാർഡും ഉടൻ തുറക്കുമെന്ന പ്രഖ്യാപനങ്ങളും പ്രാവർത്തികമായിട്ടില്ല. എംബിബിഎസിൽ 300 കുട്ടികൾ 2022ലാണ് കോന്നി മെഡിക്കൽ കോളജിൽ ആദ്യ എംബിബിഎസ് ബാച്ച് എത്തുന്നത്. 100 കുട്ടികൾക്ക് പ്രവേശനം ലഭിച്ചു. കഴിഞ്ഞ മൂന്നുവർഷത്തിനിടെ 300 കുട്ടികളെത്തി. ആദ്യബാച്ച് മൂന്നാം വർഷം പൂർത്തീകരിക്കുന്നു. നാലാമത്തെ ബാച്ചിന്‍റെ പ്രവേശന നടപടികൾ കീം ഫലം വന്നാലുടൻ ആരംഭിക്കും. മെഡിക്കൽ കോളജിലെ ചികിത്സാ സൗകര്യങ്ങൾ മെച്ചപ്പെടാത്തതും കൂടുതൽ രോഗികളെ കിടത്തി ചികിത്സിക്കാനാകാത്തതും കുട്ടികളുടെ പഠനത്തെ ബാധിക്കുന്നു. പത്തനംതിട്ട ജനറൽ ആശുപത്രി കേന്ദ്രീകരിച്ചാണ് കുട്ടികളുടെ ക്ലീനിക്കൽ പഠനം നടന്നുവന്നത്. നിർമാണ ജോലികൾ കാരണം ജനറൽ ആശുപത്രിയിൽ കൂടുതൽ രോഗികളെ പ്രവേശിപ്പിക്കാനാകാത്ത സാഹചര്യമുണ്ട്. അവിടെ എത്തുന്നവരെ കോന്നി മെഡിക്കൽ കോളജിലേക്ക് റഫർ ചെയ്യുന്നുമില്ല. അവസാനവർഷത്തിലേക്കു പ്രവേശിക്കുന്ന കുട്ടികൾക്കാവശ്യമായ പ്രാക്ടിക്കൽ സൗകര്യം ലഭ്യമാകേണ്ടതുണ്ട്. ക്ലിനിക്കൽ പഠനത്തിനും ക്രമീകരണം വേണം. ഇക്കാര്യങ്ങളിലെ മെല്ലപ്പോക്ക് കുട്ടികളുടെ പഠനത്തെ ബാധിക്കും. കുട്ടികളുടെ ഹോസ്റ്റൽ, ലൈബ്രറി, ലാബ് എന്നിവയെല്ലാം സജ്ജമാണ്. എന്നാൽ ഒരു മെഡിക്കൽ കോളജിന്‍റെ അന്തരീക്ഷത്തിലേക്ക് കോന്നി ഇപ്പോഴും എത്തിയിട്ടില്ല. കാന്പസ് മാത്രമായി ഇത് ഒതുങ്ങുകയാണെന്ന് കുട്ടികൾ പറയുന്നു. ഇതിനിടെ നഴ്സിംഗ് കോളജും ആരംഭിച്ചിട്ടുണ്ട്. ഇവരോടൊപ്പം പത്തനംതിട്ട സർക്കാർ നഴ്സിംഗ് കോളജിലെ കുട്ടികളെയും കോന്നി മെഡിക്കൽ കോളജിലേക്കാണ് അയയ്ക്കുന്നത്. ഒരുവർഷം കൂടി കഴിയുന്പോഴേക്കും ഹൗസ് സർജൻസി സൗകര്യം കുട്ടികൾക്കു നൽകേണ്ടതുണ്ട്. പിന്നാലെ പിജി കോഴ്സുകൾ ആരംഭിക്കുമെന്നും പറയുന്നു. എന്നാൽ അടിസ്ഥാന സൗകര്യ വിപുലീകരണത്തിൽ സമയബന്ധിത നടപടികൾ ഉണ്ടാകുന്നില്ലെന്നാണ് ആക്ഷേപം. ചെലവഴിച്ചത് കോടികൾ കിഫ്ബി ഫണ്ടിലൂടെ 352 കോടി രൂപയുടെ വികസനപ്രവര്‍ത്തനങ്ങളാണ് മെഡിക്കൽ കോളജുമായി ബന്ധപ്പെട്ടു നടന്നതായി പറയുന്നത്. വൻകിട കന്പനികൾക്കായിരുന്നു കരാറുകൾ. കിഫ്ബിയും കേന്ദ്രഫണ്ടുകളും ഉപയോഗപ്പെടുത്തിയാണ് നിർമാണം നടത്തിയത്. എന്‍എച്ച്എമ്മില്‍ നിന്ന് 15 ലക്ഷം രൂപ മുതല്‍ മുടക്കിലാണ് പീഡിയാട്രിക് ഐസിയു സജ്ജീകരിച്ചത്. ബോയ്സ് ഹോസ്റ്റൽ നിർമാണത്തിന് 12 കോടി രൂപ ചെലവായി. മെഡിക്കല്‍ കോളജിലെ നാലു കെട്ടിടങ്ങളുടെ നിര്‍മാണവും 11 നിലകളിലായി 40 അപ്പാര്‍ട്‌മെന്‍റുകള്‍ ഉള്‍പ്പെടുത്തിയ രണ്ട് ക്വാർ‌ട്ടേഴ്സ് സമുച്ചയങ്ങളുടെ നിർമാണങ്ങൾ പൂർത്തീകരിച്ചുവരുന്നു. പ്രിൻസിപ്പൽ ഡീൻ വില്ല പൂർത്തീകരിച്ചു. 800 പേർക്ക് ഇരിക്കാവുന്ന ഓഡിറ്റോറിയത്തിന്‍റെയും എക്സാമിനേഷൻ ഹാളിന്‍റെയും പാർക്കിംഗ് ലോഞ്ചിന്‍റെയും നിർമാണം നടക്കുന്നുണ്ട്. ഉദ്ഘാടനം നടന്നത് 2020ൽ 2011ലെ യുഡിഎഫ് മന്ത്രിസഭയുടെ കാലത്ത് അനുമതി ആകുകയും 2013ൽ അന്നത്തെ മുഖ്യമന്ത്രി ഉമ്മൻ ചാണ്ടി തറക്കല്ലിടുകയും ചെയ്ത മെഡിക്കൽ കോളജിന്‍റെ ഓഫീസ് സംവിധാനങ്ങളടക്കം 2015-ൽതന്നെ ആരംഭിക്കുകയും ചെയ്തു. കോന്നി മെഡിക്കൽ കോളജിന് ദേശീയ മെഡിക്കൽ കമ്മീഷൻ അംഗീകാരത്തിനു വേണ്ടി അന്നുതന്നെ ശ്രമം തുടങ്ങിയിരുന്നു. എന്നാൽ പിന്നീടുവന്ന എൽഡിഎഫ് സർക്കാർ തുടർപ്രവർത്തനങ്ങളിൽ താത്പര്യം കാട്ടിയിട്ടില്ല. തടസപ്പെട്ട നിർമാണ ജോലികൾ അടക്കം പുനരാരംഭിച്ചത് 2019ലാണ്. 2020 സെപ്റ്റംബർ 14ന് മെഡിക്കൽ കോളജ് ഉദ്ഘാടനം ചെയ്തു. ഐപി വിഭാഗം 2021 ഫെബ്രുവരി പത്തിനും തുറന്നു കൊടുത്തു. എന്നാൽ കിടത്തിച്ചികിത്സയും അത്യാഹിത വിഭാഗവും പൂർണ സജ്ജമല്ലെന്നാണ് ആരോഗ്യ വകുപ്പ് ഇപ്പോഴും പറയുന്നത്. അത്യാഹിത, ഐപി വിഭാഗങ്ങളിലേക്കെത്താനുള്ള യാത്രാ ബുദ്ധിമുട്ടും കാരണമായി പറയുന്നു. മെഡിക്കൽ കോളജ് റോഡിന്‍റെ വിപുലീകരണ പ്രവർത്തനങ്ങൾ ആരംഭിച്ചിട്ടേയുള്ളൂ. അടിയന്തരഘട്ടത്തിൽ ആംബുലൻസ് അടക്കമുള്ളവ എത്താനുള്ള ബുദ്ധിമുട്ടാണ് കാരണമയി പറയുന്നത്.

നഴ്സിംഗ് കോളജ്: അംഗീകാരമില്ലാതെ ഫലം തരില്ലെന്ന് കുഹാസ്

പത്തനംതിട്ട: പത്തനംതിട്ടയിലെ സർക്കാർ നഴ്സിംഗ് കോളജിലെ രണ്ടാം വർഷ വിദ്യാർഥികളുടെ കഴിഞ്ഞ സെമസറ്ററുകളുടെ ഫലം ആരോഗ്യ സർവകലാശാല പുറത്തുവിട്ടില്ല. രണ്ട് സെമസ്റ്ററുകളുടെ ഫലമാണ് ലഭിക്കാനുള്ളത്. സർവകലാശാലയിൽ ആരോഗ്യവകുപ്പ് സമ്മർദം ചെലുത്തിയതോടെ ഫലം പരിശോധിക്കാനുള്ള അവസരം കുട്ടികൾക്ക് ലഭിച്ചിരുന്നു. ഒരു തവണ മാത്രമേ ഇത്തരത്തിൽ പരിശോധിക്കാനാകൂ. അഖിലേന്ത്യ നഴ്സിംഗ് കൗൺസിലിന്‍റെ അംഗീകാരം കോളജിനു ലഭിക്കാത്തതാണ് പ്രശ്നം. ആരോഗ്യ സർവകാലാശാല താത്കാലിക അംഗീകാരം നൽകിയാണ് കുട്ടികളെ ബിഎസ് സി നഴ്സിംഗ് പഠനത്തിനു പ്രവേശിപ്പിച്ചത്. അടിസ്ഥാന സൗകര്യങ്ങളൊരുക്കി ഐഎൻസി അംഗീകാരം ഉടൻ വാങ്ങാമെന്ന ഉറപ്പിലായിരുന്നു പ്രവേശനം. എന്നാൽ രണ്ടുവർഷം കഴിഞ്ഞിട്ടും പത്തനംതിട്ട നഴ്സിംഗ് കോളജിന് അംഗീകാരമായിട്ടില്ല. 2023ൽ തുടങ്ങിയ സംവിധാനങ്ങൾ മാത്രമേ ഇപ്പോഴും ഉള്ളൂ. സ്വന്തമായി സ്ഥലം കണ്ടെത്തി ഐഎൻസി വ്യവസ്ഥകൾ പ്രകാരമുള്ള കെട്ടിടം നിർമിച്ചെങ്കിൽ മാത്രമേ അനുമതി ലഭ്യമാകൂ. സംസ്ഥാനത്ത് 2023ൽ പുതുതായി തുടങ്ങിയ അഞ്ച് നഴ്സിംഗ് കോളജിലെ ബാച്ചുകൾക്ക് അനുമതി ലഭിച്ചിരുന്നില്ല. എന്നാൽ മറ്റു നാലിടങ്ങളിൽ രണ്ടാംവർഷക്കാർക്ക് അനുമതി നൽകി. മെഡിക്കൽ കോളജുകളോടു ചേർന്നായതിനാൽ അനുമതിക്കു തടസമുണ്ടായില്ല. ഈ കോളജുകളിലെ ഒന്നാംവർഷ ബാച്ചിനും തുടർന്ന് അനുമതി ലഭിച്ചേക്കും. എന്നാൽ പത്തനംതിട്ടയിൽ ഒരു ബാച്ചിനും അംഗീകമുണ്ടായിട്ടില്ല. മൂന്നാമത്തെ ബാച്ചിന്‍റെ പ്രവേശന നടപടികളും ആരംഭിച്ചിട്ടുണ്ട്. കോളജിന്‍റെ അടിസ്ഥാന പ്രശ്നങ്ങൾ സംബന്ധിച്ചു ജില്ലാ കളക്ടറുമായി ഈയാഴ്ച ചർച്ച നടക്കുമെന്ന് പിടിഎ പറയുന്നു. മലയാലപ്പുഴയിലെ സ്വകാര്യ എൻജിനിയറിംഗ് കോളജ് കെട്ടിടത്തിലേക്ക് നഴ്സിംഗ് കോളജ് മാറ്റാനുള്ള ആലോചനയാണ് നടക്കുന്നത്. എൻജിനിയറിംഗ് കോളജ് പ്രവർത്തിച്ചിരുന്ന കെട്ടിടം ഇതിനായി സജ്ജമാക്കേണ്ടതുണ്ട്. നഴ്സിംഗ് കോളജ് കുട്ടികൾ ക്ലിനിക്കൽ പഠനത്തിനായി ഇനി കോന്നി മെഡിക്കൽ കോളജിലാണ് പോകേണ്ടത്. രണ്ടാംവർഷ കുട്ടികൾക്ക് കഴിഞ്ഞയിടെ ക്ലിനിക്കൽ പഠനം കോട്ടയം മെഡിക്കൽ കോളജിലായിരുന്നു. ഇവർക്ക് ബസ് വാങ്ങി നൽകുമെന്ന് മന്ത്രി വീണാ ജോർജ് നൽകിയ ഉറപ്പും പാലിക്കപ്പെട്ടിട്ടില്ല. ബസ് ഉടനെത്തുമെന്നാണ് അധികൃതർ പറയുന്നത്. ഹോസ്റ്റൽ ഫീസ്, ഭക്ഷണം, യാത്രാച്ചെലവ് തുടങ്ങിയ ചെലവുകൾ ഏറുന്നതോടെ രക്ഷിതാക്കളുടെ ആശങ്കയും വർധിച്ചു. ഇതിനിടെയാണ് അനുമതി ലഭ്യമാകാത്ത വിഷയങ്ങളും നേരിടുന്നത്.

മാർത്തോമ്മ ശ്ലീഹയുടെ ജീവിതദർശനങ്ങൾ പിന്തുടരാനാകണം: കർദിനാൾ മാർ ആലഞ്ചേരി

നിലയ്ക്കൽ: മാർത്തോമ്മ ജീവിതദർശനങ്ങൾ ഉൾക്കൊള്ളുകയും അതു സമൂഹത്തിനു പകർന്നു കൊടുക്കുകയും വേണമെന്ന് കർദിനാൾ മാർ ജോർജ് ആലഞ്ചേരി. നിലയ്ക്കൽ സെന്‍റ് തോമസ് എക്യുമെനിക്കൽ ദേവാലയത്തിൽ മാർത്തോമ്മ ശ്ലീഹയുടെ ദുക്റാനാ തിരുനാളിനോടനുബന്ധിച്ച് ഇന്നലെ രാവിലെ ദിവ്യബലി അർപ്പിച്ച് സന്ദേശം നൽകുകയായിരുന്നു അദ്ദേഹം. കാഞ്ഞിരപ്പള്ളി രൂപതയിലെ തുലാപ്പള്ളി, സീതത്തോട് ഇടവകാംഗങ്ങൾ കുർബാനയിൽ സന്നിഹിതരായിരുന്നു. ഫാ. ബെന്നി തട്ടാപറന്പിൽ, ഫാ. സോണി, ഫാ.ഷൈജു മാത്യു തുടങ്ങിയവർ നേതൃത്വം നൽകി. രാവിലെ യാക്കോബായ സഭ തുന്പമൺ ഭദ്രാസനത്തിലെ ഫാ. എബി സ്റ്റീഫൻ എന്നിവർ കുർബാന അർപ്പിച്ചു.

ജില്ലയില്‍ രണ്ട് ദുരിതാശ്വാസ ക്യാമ്പുകള്‍

‌പത്തനംതിട്ട: ജില്ലയില്‍ രണ്ട് ദുരിതാശ്വാസ ക്യാമ്പുകൾ. തിരുവല്ല താലൂക്കിലാണ് രണ്ട് ക്യാമ്പുകളും പ്രവര്‍ത്തിക്കുന്നത്. 15 കുടുംബങ്ങളിലായി 15 പുരുഷന്‍മാരും 20 സ്ത്രീകളും 12 കുട്ടികളും ഉള്‍പ്പെടെ 47 പേരാണ് ക്യാമ്പിലുള്ളത്. മേപ്രാല്‍ കുര്യാക്കോസ് മാര്‍ കൂറിലോസ് കമ്യൂണിറ്റി ഹാൾ, തിരുമൂലപുരം എസ്എന്‍വിഎസ് എച്ച്എസ് എന്നിവിടങ്ങളിലാണ് ക്യാമ്പ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]