എസ്എൻ പുരം: ശ്രീനാരായണപുരം ഗ്രാമപഞ്ചായത്ത് ജൈവ വൈവിധ്യ പരിപാലന സമിതിയുടെ ആഭിമുഖ്യത്തിൽ ലോക കാലാവസ്ഥ ദിനാചരണത്തിൻ്റെ ഭാഗമായി വിവിധ പരിപാടികൾ സംഘടിപ്പിച്ചു. ശംഖുകുളങ്ങര കാവ് പരിസരത്ത് വച്ച് നടത്തിയ വൃക്ഷതൈ നടീലിന്‍റേയും സെമിനാറിന്‍റെയും ഉദ്‌ഘാടനം സംസ്ഥാന ജൈവ വൈവിധ്യ ബോർഡ് അംഗം കെ.വി. ഗോവിന്ദൻമാസ്റ്റർ നിർവഹിച്ചു. പഞ്ചായത്ത് സെക്രട്ടറി രഹന. പി .ആനന്ദ് അധ്യക്ഷത വഹിച്ചു.
കാലാവസ്ഥ വ്യതിയാനത്തിൻ്റെ അപകടരമായ പ്രത്യാഘാതങ്ങളെ പ്രതിരോധിക്കാൻ ലക്ഷ്യമിട്ടുകൊണ്ട് ഗ്രാമപഞ്ചായത്ത് ജൈവ വൈവിധ്യ പരിപാലന സമിതിയും കേരള സ്റ്റേറ്റ് ബയോഡൈവേഴ്സിറ്റി ബോർഡും സഹകരിച്ച് നിരവധി പ്രവർത്തനങ്ങൾക്ക് തുടക്കും കുറിച്ചു. മലിനീകരണം തടയുന്നതിനും അതിലൂടെ ഹരിത ഗൃഹ വാതകങ്ങളുടെ അനിയന്ത്രിതമായ പുറം തള്ളൽ തടയുന്നതിനും പദ്ധതികൾ ആവിഷ്ക്കരിച്ചു.
അന്യം നിന്നു പോകുന്ന നിരവധി മരങ്ങൾ നട്ടു വളർത്തി വനവത്ക്കരണം,കാവ് സംരക്ഷണം, കണ്ടൽ വനവത്ക്കരണം,സോളാർ മേൽക്കൂര സ്ഥാപിക്കൽ. ജലസംരക്ഷണം തുടങ്ങിയ വിവിധ പ്രവർത്തനങ്ങൾ നടപ്പിലാക്കും.
കരിംമ്പുടാൻ, മൂട്ടിൽപഴം, കരിമരം തുടങ്ങിയ വൃക്ഷത്തൈകൾ ചടങ്ങിൽ വച്ച് ശംഖുകുളങ്ങരകാവ് ട്രസ്റ്റ് ഭാരവാഹികളായ ദേവീപ്രസാദിനും, ദിനകരനും കൈമാറി. കെ സതീഷ്കുമാർ മുഖ്യാതിഥിയായി. ഡോ അമിതാബച്ചൻ സെമിനാറിൽ ക്ലാസ് നയിച്ചു. ഗ്രാമപഞ്ചായത്ത് പ്രസിഡന്‍റ് എം.എസ്. മോഹനൻ, വൈസ് പ്രസിഡൻ്റ് സജിത പ്രദീപ്,സ്റ്റാൻറിംഗ് കമ്മിറ്റി ചെയർമാൻമാരായ അയൂബ്, സി.സി. ജയ, പി.എ. നൗഷാദ് , ജനപ്രതിനിധികളായ ജിബിമോൾ, ഇബ്രാഹിംകുട്ടി,ആസൂത്രണസമിതി ഉപാധ്യക്ഷൻ കെ. രഘുനാഥ്, ബിഎംസി ജോയിന്‍റ് കൺവീനർ എൻ. എം. ശ്യാംലി, ദേവിക, ബിഎംസി അംഗങ്ങളായ വരുണൻ, പി.ആർ.രതീഷ് തുടങ്ങിയവർ പ്രസംഗിച്ചു.