ക്രെഡിറ്റ് കാർഡിന്‍റെ പേരിൽ ഓണ്‍ലൈൻ തട്ടിപ്പ്; 3.69 ലക്ഷം തട്ടിയ ജാർഖണ്ഡ് സ്വദേശി പിടിയിൽ : Deepika.com Kerala News |

Click here for detailed news of all items

ക്രെഡിറ്റ് കാർഡിന്‍റെ പേരിൽ ഓണ്‍ലൈൻ തട്ടിപ്പ്; 3.69 ലക്ഷം തട്ടിയ ജാർഖണ്ഡ് സ്വദേശി പിടിയിൽ

Friday, June 2, 2023 1:07 AM IST

തൃശൂർ: ദേശസാത്കൃത ബാങ്കിന്‍റെ ക്രെഡിറ്റ് കാർഡ് ആക്ടിവേറ്റ് ചെയ്യാനെന്ന വ്യാജേന മൂന്നര ലക്ഷത്തിലധികം രൂപ തട്ടിയെടുത്ത കേസിൽ ജാർഖണ്ഡ് സ്വദേശി അറസ്റ്റിൽ. മാഡഗോമുണ്ട മുർളി പഹാരി വില്ലേജ് സ്വദേശി അജിമുദ്ദീൻ അൻസാരി(26)യാണു തൃശൂർ സിറ്റി സൈബർ ക്രൈം പോലീസിന്‍റെ പിടിയിലായത്.

കുന്നംകുളം സ്വദേശിനിയായ സ്ത്രീയുടെ അക്കൗണ്ടിൽനിന്നാണ് ഏഴു തവണയായി 3,69,300 രൂപ തട്ടിയെടുത്തത്. സ്ത്രീയുടെ പരാതിയെത്തുടർന്നു തൃശൂർ സൈബർ ക്രൈം പോലീസ് സ്റ്റേഷനിൽ രജിസ്റ്റർ ചെയ്ത കേസിന്‍റെ അന്വേഷണത്തിൽ പണം തട്ടിയെടുത്തത് ജാർഖണ്ഡിൽനിന്നാണെന്നു കണ്ടെത്തി.

2023 ഫെബ്രുവരിയിൽ കുന്നംകുളം സ്വദേശിനിയായ പരാതിക്കാരിക്കു ബാങ്കിൽനിന്നെന്ന വ്യാജേന ക്രെഡിറ്റ് കാർഡ് ആക്ടിവേറ്റ് ചെയ്യാൻ ഫോണ്‍കോൾ ലഭിച്ചു. പരാതിക്കാരി പുതിയ ക്രെഡിറ്റ് കാർഡിന് അപേക്ഷിച്ച് അത് ലഭിച്ചിരുന്നതിനാൽ സംശയം തോന്നിയില്ല. ബാങ്കിന്‍റേതാണെന്നു വിശ്വസിപ്പിച്ച് പരാതിക്കാരിയുടെ ഫോണിൽ ആപ്ലിക്കേഷൻ ഇൻസ്റ്റാൾ ചെയ്യിപ്പിച്ച് ബാങ്ക് വിവരങ്ങൾ ചോർത്തി.

ഏഴു തവണകളായി 3,21,300 രൂപയും ക്രെഡിറ്റ് കാർഡിൽനിന്ന് 48,000 രൂപയുമടക്കം ആകെ 3,69,300 രൂപ തട്ടിയെടുത്തു. ഇതേത്തുടർന്നാണു പരാതി നൽകിയത്. ബാങ്ക് അക്കൗണ്ട് കേന്ദ്രീകരിച്ചു നടത്തിയ അന്വേഷണത്തിലാണു പ്രതിയെ കണ്ടെത്തിയത്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.