ബാങ്ക് വായ്പയെടുത്ത് തിരിമറി: ഹീര കണ്‍സ്ട്രക്‌ഷന്‍സ് എംഡി അറസ്റ്റിൽ
Wednesday, December 6, 2023 1:16 AM IST
കൊച്ചി: ബാങ്ക് വായ്പയായെടുത്ത 14കോടി രൂപ തിരിമറി നടത്തിയെന്ന കേസില്‍ തിരുവനന്തപുരം ആസ്ഥാനമായ ഹീരാ കണ്‍സ്ട്രക്‌ഷന്‍സ് മാനേജിംഗ് ഡയറക്ടര്‍ അബ്ദുള്‍ റഷീദിനെ എന്‍ഫോഴ്‌സ്‌മെന്‍റ് ഡയറക്ടറേറ്റ്(ഇഡി)അറസ്റ്റ് ചെയ്തു.
ഇഡി കൊച്ചി യൂണിറ്റാണ് അറസ്റ്റ് രേഖപ്പെടുത്തിയത്. എസ്ബിഐയില്‍നിന്നു 14 കോടി വായ്പയെടുത്ത് വഞ്ചിച്ചെന്നാണു കേസ്.
ആക്കുളത്തെ ഫ്ലാറ്റ് സമുച്ചയ നിര്‍മാണത്തിനായി 2013ലാണു വായ്പയെടുത്തത്. നിര്‍മാണം പൂര്‍ത്തിയാക്കി ഫ്ലാറ്റുകള്‍ വില്പന നടത്തിയിട്ടും വായ്പ തിരിച്ചടച്ചില്ലെന്നാണു ബാങ്കിന്‍റെ പരാതി.
കേസുമായി ബന്ധപ്പെട്ട് നേരത്തേ സിബിഐ കേസ് രജിസ്റ്റര്‍ ചെയ്തിരുന്നു. ഇതിന്‍റെ തുടര്‍ച്ചയായിട്ടാണ് ഇഡിയും കേസെടുത്തത്. തുടര്‍ന്ന് ഫെബ്രുവരിയില്‍ ഹീരാ ഗ്രൂപ്പിന്‍റെ വിവിധ സ്ഥാപനങ്ങളില്‍ ഇഡി റെയ്ഡ് നടത്തി കംപ്യൂട്ടര്‍ ഉള്‍പ്പെടെ പിടിച്ചെടുത്തിരുന്നു.