ഗുഡ്സ് ട്രെയിനിനു മുകളിൽ തെങ്ങു വീണ് ബോഗികൾ വേർപെട്ടു
Monday, June 9, 2025 3:24 AM IST
പുതുക്കാട്: ഓടിക്കൊണ്ടിരുന്ന ഗുഡ്സ് ട്രെയിനിനു മുകളിൽ തെങ്ങുവീണ് ബോഗികൾ വേർപ്പെട്ടു. തൃശൂർ-ആലുവ റൂട്ടിൽ മുക്കാൽ മണിക്കൂറോളം ട്രെയിൻ ഗതാഗതം തടസപ്പെട്ടു. ഞായറാഴ്ച രാവിലെ ആറരയോടെ പുതുക്കാട് റെയിൽവേ സ്റ്റേഷനു സമീപത്തായിരുന്നു സംഭവം.
റെയിൽപാതയ്ക്കു സമീപത്തെ പറന്പിലെ തെങ്ങ് ട്രെയിനിനു മുകളിലേക്കു വീഴുകയായിരുന്നു. ഇതോടെ ട്രെയിനിന്‍റെ നടുഭാഗത്തുവച്ച് ബോഗികൾ വേർപ്പെട്ടു. ട്രെയിനിലെ ജീവനക്കാർതന്നെ പുറത്തിറങ്ങി തെങ്ങ് മുറിച്ചുമാറ്റി. 6.50നു ഗതാഗതം പുനഃസ്ഥാപിച്ചു.
ചാലക്കുടി ഭാഗത്തുനിന്ന് പാലക്കാട്ടേക്കു പോവുകയായിരുന്നു ട്രെയിൻ. യാത്രക്കാരുമായി വന്ന ഗുരുവായൂർ എക്സ്പ്രസ് എത്തുന്നതിനു തൊട്ടുമുന്പായിരുന്നു അപകടം. ചെന്നൈ -എഗ്‌മോർ ഗുരുവായൂർ എക്സ്പ്രസ് അരമണിക്കൂറോളം വൈകിയാണു സർവീസ് പുനരാരംഭിച്ചത്.