ADVERTISEMENT

ADVERTISEMENT

പഹൽഗാം തീവ്രവാദി ആക്രമണം: ആദരാഞ്ജലികൾ അർപ്പിച്ചു

നേമം: ജമ്മുകശ്മീരിലെ പഹൽഗാമിൽ തീവ്രവാദികളുടെ വെടിയേറ്റു കൊല്ലപ്പെട്ടവർക്ക് ആദരാ ഞ്ജലിയർപ്പിക്കാൻ ദീനദയാൽ സാംസ്കാരിക സമിതിയുടെ ആഭിമുഖ്യത്തിൽ ശാന്തിവിള ജംഗ്ഷനിൽ അനുസ്മരണ യോഗം ചേർന്നു. പുഷ്പാർച്ചനയും നടത്തി.

സമിതി ചെയർമാൻ ശാന്തിവിള വിനോദ് അധ്യക്ഷത വഹിച്ചു. നഗരസഭ പ്രതിപക്ഷ നേതാവ് എം.ആർ. ഗോപൻ അനുസ്മരണ സമ്മേളനം ഉദ്ഘാടനം ചെയ്തു. കല്ലിയൂർ പഞ്ചായത്ത്‌ പ്രസിഡന്‍റ് എം. സോമശേഖരൻ നായർ, പഞ്ചായത്ത്‌ മുൻ പ്രസിഡന്‍റ് ചന്തു കൃഷ്ണ, ശാന്തിവിള മുജീബ് റഹ്‌മാൻ-സിപിഐ, നേമം രാജൻ -കോൺഗ്രസ്‌ ഐ, വെള്ളായണി മനോജ്‌ - ബിജെ പി, സി. കൃഷ്ണകുമാർ എന്നിവർ യോഗത്തിൽ പ്രസംഗിച്ചു.

ADVERTISEMENT

ബസിനുള്ളില്‍ കഞ്ചാവ്; ഡ്രൈവര്‍ അറസ്റ്റില്‍

പേരൂര്‍ക്കട: പ്രാവച്ചമ്പലം-ആറ്റുകാല്‍ റൂട്ടില്‍ ഓടുന്ന സ്വകാര്യബസില്‍നിന്നു കഞ്ചാവ് കണ്ടെത്തി. സംഭവവുമായി ബന്ധപ്പെട്ട് ഡ്രൈവർ നെയ്യാറ്റിന്‍കര പെരുങ്കടവിള സ്വദേശി ഷീന്‍ രാജിനെ (30) പോലീസ് അറസ്റ്റുചെയ്തു. തമ്പാനൂര്‍ റെയില്‍വേ സ്റ്റേഷനുമുന്നില്‍ ബസ് എത്തിയപ്പോഴാണ് പോലീസ് പരിശോധന നടത്തിയത്. രണ്ടുഗ്രാം കഞ്ചാവ് ഷീന്‍രാജില്‍ നിന്ന് കണ്ടെടുത്തു. അറസ്റ്റിലായ ഇയാളെ പിന്നീട് ജാമ്യത്തില്‍ വിട്ടയച്ചു.

സേവാഭാരതി തുണയായി; സ്വന്തം വീടെന്ന സ്വപ്നം യാഥാര്‍ഥ്യമായി

പാറശാല: പാറശാല സ്വദേശിയായ സതീഷ്‌കുമാര്‍-മാലു ദമ്പതികളുടെയും രണ്ടു പെണ്‍മക്കളുടെയും വീടെന്ന സ്വപ്നം യാഥാര്‍ഥ്യമായി. സേവാഭാരതിയും കെ. ചിറ്റിലപ്പിള്ളി ഫൗണ്ടേഷനും തുണയായതോടെ ഇവര്‍ പുതിയ വീട്ടിലേയ്ക്ക് താമസമായി. സതീഷിന്‍റെ കുടുംബം വര്‍ഷങ്ങളായി കഴിഞ്ഞിരുന്നത് വാടക കെട്ടിടത്തിലായിരുന്നു. സ്വന്തമായി ഒരു വീട് എന്നതായിരുന്നു ഇവരുടെ സ്വപ്നം. സര്‍ക്കാരിന്‍റെ വിവിധ പദ്ധതികള്‍ ഉണ്ടെങ്കിലും പല കാരണങ്ങളാല്‍ സതീഷിന്‍റെ മുന്നില്‍ ആ വാതിലുകള്‍ അടഞ്ഞു. ഒടുവിലാണ് കെ. ചിറ്റിലപ്പള്ളി ഫൗണ്ടേഷന്‍റെ സഹായത്തോടെ സേവാഭാരതിയുടെ തല ചായ്ക്കാനൊരിടം പദ്ധതിയിലൂടെ സതീഷിന്‍റെയും കുടുംബത്തിന്‍റെയും വീടെന്ന സ്വപ്നത്തിനായുള്ള വഴി തെളിഞ്ഞത്. സതീഷിനും കുടുംബത്തിനും സേവാഭാരതിയും കെ. ചിറ്റിലപ്പള്ളി ഫൗണ്ടേഷനും നല്‍കുന്ന വിഷു കൈനീട്ടമാണ് ഈ പുതിയ വീട്. കഴിഞ്ഞ ദിവസം പാറശാല ഭാരതീയ വിദ്യാപീഠം സ്‌കൂളില്‍ നടന്ന ചടങ്ങില്‍ സതീഷിനും കുടുംബത്തിനും രാഷ്ട്രീയ സ്വയം സേവക സംഘം ദക്ഷിണ പ്രാന്ത സംഘചാലക് പ്രഫ. എം.എസ് രമേശന്‍ വീടിന്‍റെ താക്കോല്‍ കൈമാറി. സേവാഭാരതി സംസ്ഥാന ഉപാധ്യക്ഷന്‍ ഡി. വിജയന്‍ മംഗള പത്രം നല്‍കി. സേവാഭാരതി പാറശാല പഞ്ചായത്ത് പ്രസിഡന്‍റ് ഹേമ അധ്യക്ഷത വഹിച്ചു .രാഷ്ട്രീയ സ്വയംസേവക സംഘം പാറശാല ഖണ്ഡ് സംഘചാലക് അശോകന്‍ സന്ദേശ പ്രഭാഷണം നടത്തി. പാറശാല പഞ്ചായത്ത് സെക്രട്ടറി സ്വാഗതം പറഞ്ഞ ചടങ്ങില്‍ പ്രദീപ് നന്ദി പറഞ്ഞു.

ലഹരിവിരുദ്ധ സന്ദേശവുമായി ക്രിക്കറ്റ് ടൂര്‍ണമെന്‍റ്

നെയ്യാറ്റിന്‍കര : ലഹരിക്കെതിരെ ബോധവത്കരണസന്ദേശം വിളംബരം ‍ചെയ്ത് ക്രിക്കറ്റ് ടൂര്‍ണമെന്‍റുമായി ഫാ. ആന്‍റണി മെമ്മോറിയല്‍ ക്രിക്കറ്റ് ക്ലബ്. മൂന്നു പതിറ്റാണ്ടുകള്‍ക്ക് മുന്പ് കളിച്ച ബാലരാമപുരത്തെ പഴയ മൈതാനത്തില്‍ പ്രായത്തെ വെല്ലുന്ന മികവുമായി സുഹൃത്തുക്കള്‍ വിവിധ ടീമുകളെ പ്രതിനിധീകരിച്ചെത്തി. നേരത്തെ അവര്‍ക്കൊപ്പം കളിച്ചിരുന്ന ജോണി എന്ന സ്നേഹിതന്‍റെ സ്മരണാര്‍ഥമാണ് ടൂര്‍ണമെന്‍റ് സംഘടിപ്പിച്ചത്. പുതിയ കാലത്തു ലഹരി വല്ലാതെ പിടിമുറുക്കുന്ന സാഹചര്യം കണക്കിലെടുത്താണ് നോ ഡ്രഗ്സ്, ഒണ്‍ലി സ്പോര്‍ട്സ് എന്ന ആശയം ടൂര്‍ണമെന്‍റ് മുന്നോട്ടു വയ്ക്കുന്നതെന്ന് സംഘാടകര്‍ അറിയിച്ചു. ലജന്‍ററി ക്രിക്കറ്റ് ടൂര്‍ണമെന്‍റ് ആയതിനാല്‍ കളിക്കാരില്‍ മധ്യവയസ്കരാണ് നല്ലൊരു ശതമാനവും. അന്പതു വയസ് കഴിഞ്ഞ എണ്‍പതോളം പേര്‍ കളിക്കളത്തിലിറങ്ങുന്നുണ്ട്. ജേതാക്കള്‍ക്ക് ജോണി മെമ്മോറിയല്‍ ട്രോഫി നല്‍കും. മുന്‍ കേരള ക്രിക്കറ്റ് ടീം ക്യാപ്റ്റന്‍ രംഗനാഥന്‍, മുന്‍ രഞ്ജി താരം സതീഷ് കുമാര്‍ എന്നിവര്‍ ചേര്‍ന്ന് ടൂര്‍ണമെന്‍റ് ഉദ്ഘാടനം ചെയ്തു. പഴയ ക്രിക്കറ്റ് താരം കൂടിയായ അഡ്വ. എം. വിന്‍സെന്‍റ് എംഎല്‍എ, ഇടവക വികാരി, പഞ്ചായത്ത് അംഗങ്ങള്‍ മുതലായവരും ടൂര്‍ണമെന്‍റിന്‍റെ ഭാഗമായി.

നാട്ടിൻപുറങ്ങളിൽ വ്യാജ വെളിച്ചെണ്ണ റെഡി

കാട്ടാക്കട: നാട്ടിൻ പുറങ്ങളിൽ വ്യാജ വെളിച്ചെണ്ണ വ്യാപകമായി. ചെറുകിട വ്യാപാരികളും ഗ്രാമീണമേഖലയിലുള്ള വ്യാപാരികളും ഉൾപ്പെടെയുള്ളവർ ഇത് വിൽക്കേണ്ടുന്ന അവസ്ഥയാണ്. കിലോയ്ക്ക് 300 വരെ കിട്ടുന്ന വെളിച്ചെണ്ണ വ്യാജനായി എത്തുമ്പോൾ അത് 110നും 120നും കിട്ടും. ഹോട്ടൽ, തട്ടുകടകൾ എന്നിവിടങ്ങളിൽ വറുക്കാനുപയോഗിക്കുന്ന എണ്ണയുടെ ഗുണനിലവാരം കുറയുന്നെന്നും ആക്ഷേപമുണ്ട്. തെങ്ങിനുണ്ടാകുന്ന രോഗബാധയും തേങ്ങായിടാൻ ആളെ കിട്ടാത്തതുംമൂലം വീടുകളിൽ അധികം തേങ്ങലഭിക്കാത്ത സ്ഥിതിയാണ്. മുൻകാലങ്ങളെ അപേക്ഷിച്ചു തേങ്ങയുടെ ഉൽപ്പാദനം മൂന്നിലൊന്നായി കുറഞ്ഞെന്നു കർഷകർ പറയുന്നു. കാലാവസ്ഥാ വ്യതിയാനമാണ് ഇതിനു കാരണമായി പറയുന്ന്. തമിഴ്‌നാട്ടിൽനിന്നാണു പ്രധാനമായും തേങ്ങ വിപണിയിലെത്തുന്നത്. ജില്ലയിൽ പലയിടത്തും തമിഴ്‌നാട്ടിൽനിന്നു ലോഡുകണക്കിനു പച്ചത്തേങ്ങയെത്തുന്നുണ്ട്. ഇവരിൽനിന്നു ചെറുകിട കച്ചവടക്കാർ വാങ്ങിയാണു വിപണിയിലെത്തിക്കുന്നത്. എണ്ണക്കുറവുള്ള തേങ്ങയ്ക്കു രുചിക്കുറവ് സ്വാഭാവികമാണ്. ഇതുമൂലം കറിയുടെ രുചിയും കുറയുന്നു. അതിനിടെയാണ് വ്യാജ വെളിച്ചെണ്ണ സുലഭമായി കിട്ടുന്നു. പുതിയതും എന്നാൽ പ്രമുഖ കമ്പനികളുടെ അപരനാമത്തിലുള്ള വെളിച്ചെണ്ണകളാണ് കിട്ടുന്നത്. അതാകട്ടെ രോഗം പരത്തുന്നതും. തിരുവനന്തപുരം കേന്ദ്രീകരച്ചുള്ള ഒരു സംഘമാണ് പല പേരുകളിലും വെളിച്ചെണ്ണ നിർമിക്കുന്നതെന്നും സൂചനയുണ്ട്. സർക്കാരിന്‍റെ ഉടമസ്ഥതയിലുള്ള കേര വെളിച്ചെണ്ണയ്ക്കു പോലും അപരന്മാരുണ്ട്. നേരത്തേ പരിശോധന ശക്തമാക്കുകയും വ്യാജ ഉൽപ്പന്നങ്ങൾക്കെതിരേ കേസെടുക്കുകയും ചെയ്തിരുന്നു. എന്നാൽ ഇപ്പോൾ റെയിഡ് ഇല്ലാതെയായി. താൻസർ പോലുള്ള മാരക രോഗത്തിനിടവരുത്തിയേക്കാവുന്ന പാംകർണൽ ഓയിലും പാരഫിൻ ഓയിലും അമിത അളവിൽ ചേർത്ത വെളിച്ചെണ്ണയാണ് വിറ്റഴിക്കുന്നത്. കഴിഞ്ഞ വർഷം സർക്കാർ ലാബുകളിൽ അറുപതോളം കമ്പനികളുടെ വെളിച്ചെണ്ണ സാമ്പിളുകൾ പരിശോധനയ്ക്ക് വിധേയമാക്കിയിരുന്നു. വിപണിയിൽനിന്നു ശേഖരിച്ച സാമ്പിളുകളിൽ പതിനേഴ് ബ്രാൻഡുകളിൽ പാരാഫിന്‍റെയും പാം കർണൽ ഓയിലിന്‍റെയും അമിത സാന്നിധ്യം കണ്ടെത്തിയിരുന്നു. കച്ചവടക്കാർക്ക് ഒരു ലിറ്റർ വെളിച്ചെണ്ണ വിൽക്കുന്നത് 100 രൂപയ്ക്ക്. അതു വാങ്ങാൻ എത്തുന്നവർക്ക് വിൽക്കുന്നത് 175നും 180നും. ഇത്തരം വിൽപ്പന വ്യാപകമായിട്ടും ഒരു നടപടിയും ബന്ധപ്പെട്ടവർ എടുക്കുന്നില്ല.

കരിക്ക് വെട്ടുകാരനെ കുത്തിയ കേസിലെ പ്രതി പിടിയില്‍

വെള്ളറട: കരിക്കു വിലകുറച്ചു കൊടുത്തില്ലെന്നാരോപിച്ച് കരിക്കുവെട്ട് തൊഴിലാളിയുടെ കഴുത്തില്‍ കുത്തിയ പ്രതി പിടിയിലായി. അരുവിയോട് മേമല ജംഗ്ഷനില്‍ കരിക്ക് കച്ചവടം ചെയ്യുന്ന ജസ്റ്റസി(63)നെയാണ് കുത്തി പരിക്കേല്‍പ്പിച്ചത്. കഴുത്തിനു ഗുരുതരമായി പരിക്കേറ്റ ജസ്റ്റിസ് തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. പാലിയോട് കോട്ടയ്ക്കല്‍ ആറടിക്കര വീട്ടില്‍ ചെട്ടിക്കണ്ണന്‍ എന്ന കണ്ണ(37)നെ പോലീസ് പിടികൂടി. ആക്രമണം നടത്തിയ ശേഷം ഒളിവില്‍ പോയ പ്രതിയെ മാരയമുട്ടം പോലീസ് വളരെ പണിപട്ടാണ് പിടികൂടിയത്. സര്‍ക്കിള്‍ ഇന്‍സ്‌പെക്ടര്‍ ധനപാലന്‍റെ നേതൃത്വത്തിലുള്ള പോലീസ് അംഗമാണ് അക്രമിയെ പിടികൂടിയത്. പ്രതിയെ കോടതിയില്‍ ഹാജരാക്കി റിമാൻഡുചെയ്തു.

വഴയില കെപ്കോയിൽ ഓൺലൈൻ ബൂസ്റ്റര്‍ പമ്പ്ഹൗസ് നിർമാണം തുടങ്ങി

നെടുമങ്ങാട്: കേരള ജലഅഥോറിറ്റി നഗരസഞ്ചയ പദ്ധതിയിൽ ഉൾപ്പെടുത്തി വഴയില കെപ്കോയില്‍ രണ്ടു കോടി രൂപ ചെലവിൽ സ്ഥാപിക്കുന്ന ഓൺലൈൻ ബൂസ്റ്റര്‍ പമ്പ് ഹൗസിന്‍റെ നിര്‍മാണം തുടങ്ങി. എല്ലാ ഘട്ടത്തിലും കൃത്യമായ ധാരണയോടെ പ്രവര്‍ത്തനം നടക്കണമെന്നു മന്ത്രി ജി.ആർ. അനില്‍ ഉദ്യോഗസ്ഥര്‍ക്ക് നിര്‍ദേശം നല്‍കി. ആഴ്ച തോറും വിശകലന യോഗങ്ങള്‍ ചേര്‍ന്ന് പ്രവര്‍ത്തനം വിലയിരുത്തും. വഴയിലയില്‍നിന്നു് കല്ലയം ഉപരിതല ജല സംഭരണിയിലേയ്ക്ക് വെള്ളമെത്തിക്കുന്നതിനാണു ബൂസ്റ്റര്‍ പമ്പ് സ്ഥാപിക്കുന്നത്. കരകുളം പഞ്ചായത്തിലെ കുടിവെള്ള പ്രശ്‌നത്തിനു ശാശ്വത പരിഹാരത്തിനായി കേരള ജല അഥോറിറ്റി നഗര സഞ്ചയ പദ്ധതിയില്‍ ഉള്‍പ്പെടുത്തി 12.29 കോടി രൂപയുടെ 5 പ്രവൃത്തികളായാണ് ടെൻഡർ ചെയ്തിരുന്നത്. കല്ലയം ഉപരിതല ജലസംഭരണി (രണ്ടു ലക്ഷം ലിറ്റർ) - 1.4 കോടി, മൈലാടുംപാറയിൽ ഉപരിതല ജലസംഭരണി (1 ലക്ഷം ലിറ്റർ) - 77 ലക്ഷം, വഴയില കെപ്കോയിൽ ഓൺലൈൻ ബൂസ്റ്റർ പമ്പ് ഹൗസിന്‍റെ നിർമാണം-രണ്ടുകോടി, കെപ്കോ പമ്പ് ഹൗസ് മുതൽ കല്ലയം ജലസംഭരണി വരെയുള്ള പമ്പിംഗ് ലൈൻസ്ഥാപിക്കൽ - 2.67 കോടി, കല്ലയം മുതൽ തണ്ണീർപൊയ്ക വരെയുള്ള ട്രാൻസ്മിഷൻ ലൈൻ സ്ഥാപിക്കൽ- 3.11 കോടി എന്നിങ്ങനെയാണ് തുക ചെല വഴിക്കുക. ഇതിൽ പഞ്ചായത്തിലെ കല്ലയം, മൈലാടുംപാറ എന്നീ സ്ഥലങ്ങളിലെ ജലസംഭരണികളുടെ നിർമാണം പൂർത്തിയായിട്ടുണ്ട്. പൈപ്പ് ലൈനിന്‍റെ മറ്റനുബന്ധ പ്രവര്‍ത്തനങ്ങളും ഉടൻ തുടങ്ങും. പൂർത്തീകരിച്ചാൽ എം.സി. റോഡിൽ മണ്ണന്തല മുതൽ വട്ടപ്പാറ വരെയുള്ള ഭാഗങ്ങളിൽ 24 മണിക്കൂറും കുടിവെള്ള വിതരണം നടത്താൻ കഴിയും. ചടങ്ങില്‍ കരകുളം പഞ്ചായത്ത് പ്രസിഡന്‍റ് യു. ലേഖാറാണി, മെമ്പര്‍ വി. രാജീവ്, എക്‌സിക്യൂട്ടീവ് എന്‍ജിനീയര്‍ മനോജ് തുടങ്ങിയവര്‍ പങ്കെടുത്തു.

ഫ്‌ളക്‌സ് വേസ്റ്റിനു തീപിടിച്ചു

പേരൂര്‍ക്കട: പുതുതായി പണിയുന്ന മൂന്നുനില കടമുറിക്കു സമീപം കൂട്ടിയിട്ടിരുന്ന ഫ്‌ളക്‌സ് വേസ്റ്റുകള്‍ക്ക് തീപിടിച്ചു. ബുധനാഴ്ച പുലര്‍ച്ചെ ഒരുമണിയോടുകൂടി കവടിയാര്‍-അമ്പലമുക്ക് റോഡ് ബാങ്ക് ഓഫ് ബറോഡയ്ക്ക് എതിര്‍വശത്താണു സംഭവം. അമ്പലമുക്ക് സ്വദേശി മഹേഷിന്‍റെ ഉടമസ്ഥതയിലുള്ളതാണ് കടമുറി. ഉപയോഗശൂന്യമായ ഫ്‌ളക്‌സുകള്‍ കൂടിക്കിടന്നതിനാണ് തീ കത്തിയത്. തീയും പുകയും ഉയരുന്നതു കണ്ടവരാണ് വിവരം ഫയര്‍ഫോഴ്‌സില്‍ അറിയിച്ചത്. തിരുവനന്തപുരം നിലയത്തില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജിയുടെ നേതൃത്വത്തിലുള്ള സംഘമെത്തിയാണ് തീ കെടുത്തിയത്.

ബില്ലിൽ യഥാസമയം ഒപ്പിടുന്നില്ലെന്നു പരാതി : പഞ്ചായത്ത് സെക്രട്ടറിയെ മണിക്കൂറുകളോളം തടഞ്ഞുവച്ചു

വിഴിഞ്ഞം: സിപിഎം ഭരിക്കുന്ന കോട്ടു കാൽ പഞ്ചായത്തിൽ പാസാക്കിയ ബില്ലിൽ യഥാസമയം ഒപ്പിടുന്നില്ലെന്ന് ആരോപിച്ച് പഞ്ചായത്ത് സെക്രട്ടറിയെ മണിക്കൂറുകളോളം തടഞ്ഞുവച്ചു. ചൊവ്വാഴ്ച്ച വൈകുന്നേര ത്തോടെയാണ് ഭരണകക്ഷി നേതാവായ പ്രസിഡന്‍റിന്‍റെ നേതൃത്വത്തിലുള്ള ഭരണ-പ്രതിപക്ഷ മെമ്പർമാർ സെക്രട്ടറി ബിന്ദുവിനെ ഉപരോധിച്ചത്. കമ്മിറ്റികളിൽ ചായ വാങ്ങിയതുൾപ്പെടെ ആയിരം രൂപയിൽ താഴെ വരുന്ന ബില്ലുകൾ പോലും അനാവശ്യമായി തടഞ്ഞു വയ്ക്കുന്നതായി ജനപ്രതിനിധികൾ പറയുന്നു. പണം ലഭിക്കാനുള്ളവർ നിരന്തരം പഞ്ചായത്തിൽ കയറി ഇറങ്ങുകയാണെന്നും പ്രതിപക്ഷാംഗങ്ങ ൾ ചൂണ്ടിക്കാട്ടി. കഴിഞ്ഞ ഡിസംബർ മുതലുള്ള ഇത്തരം ബില്ലുകൾ കുടിശികയായി കെട്ടിക്കിടക്കുന്നു. സെക്രട്ടറിയുടെ അലംഭാവമായ സമീപനമാണു ബില്ലുകൾ പാസാക്കാത്തതിനു പിന്നിലെന്നു പഞ്ചായത്ത് പ്രസിഡന്‍റ് കെ. ചന്ദ്രലേഖ പറഞ്ഞു. ബില്ലുകൾ ഒപ്പിടാത്തതിനുപിന്നിൽ സിപിഎമ്മിലെ പടല പിണക്കവും ഒരു വിഭാഗത്തിന്‍റെ ചട്ടുകമായി പ്രവർത്തിക്കുന്നതുമാണെന്നും ആരോപണമുണ്ട്. ഉപരോധത്തിൽ നിന്നും ചില മെമ്പർമാർവിട്ടു നിന്നതും ചർച്ചയായിട്ടുണ്ട്. വൈകുന്നേരം ആരംഭിച്ച ഉപരോധം രാത്രി 8.30 വരെ നീണ്ടുനിന്നു. സംഭവമറിഞ്ഞ് വിഴിഞ്ഞം പോലീസ് പഞ്ചായത്ത് ഓഫീസിൽ എത്തി. ഫയലുകൾ ഒരാഴ്ചയ്ക്കുള്ളിൽ തീർപ്പാക്കാമെന്ന് അസിസ്റ്റന്‍റ് ഡയറക്ടറും പഞ്ചായത്ത് സെക്രട്ടറിയും ഉറപ്പ് നൽകിയതോടെയാണ് ഉപരോധം അവസാനിപ്പിച്ചത്.

വിതുരയിലെ കുട്ടിപ്പോലീസിനു ശുചിത്വ മിഷൻ പുരസ്കാരം

വിതുര: പരിസ്ഥിതി സംരക്ഷണ പ്രവർത്തനങ്ങളിൽ മാതൃകയായ വിതുര ഗവ. വിഎച്ച്എസ്എസിലെ കുട്ടിപ്പോലീസിനു ശുചിത്വ മിഷന്‍റെ ഹരിത പുരസ്കാരം. ശാസ്ത്രീയ മാലിന്യ സംസ്കരണ മാതൃകയിൽ മികവു പുലർത്തിയതിനാണ് സ്റ്റുഡന്‍റ് പോലീസ് കേഡറ്റ് പദ്ധതിക്കു പുരസ്കാരം. പാഴ്‌വസ്തുക്കളിൽനിന്ന് അലങ്കാര വസ്തുക്കൾ, പഴയ വസ്ത്രങ്ങളിൽനിന്ന് കുട്ടിപ്പാവകൾ, കരകൗശല വസ്തുക്കൾ എന്നിവയുടെ നിർമാണം, പ്ലാസ്റ്റിക് മാലിന്യ സംസ്കരണത്തിനുവേണ്ടി ഇക്കോ ബ്രിക്സ് പദ്ധതി, മധുര വനം, ഔഷധ ഗാർഡൻ തുടങ്ങിയ പദ്ധതികളെ മുൻ നിർത്തിയാണ് പുരസ്കാര ലബ്ധി. സ്കൂളിൽ നടപ്പാക്കിയ പദ്ധതികൾ മറ്റുസ്‌കൂളുകളിലേക്കു വ്യാപിപ്പിക്കുന്നതിൽ നൽകുന്ന ശ്രദ്ധയും പുരസ്കാത്തിനു യൂണിറ്റിനെ അർഹമാക്കി. കലക്ടറേറ്റിൽ നടന്ന ചടങ്ങിൽ വി.കെ. പ്രശാന്ത് എംഎൽഎയിൽനിന്ന് കേഡറ്റുകളായ എൻ.എ. ആമിന, ഡി. ആർദ്ര, ധനുഷ് കുമരൻ, വി.എസ്. വൈഷ്ണവ് എന്നിവരും അധ്യാപകരായ കെ. അൻവർ, പ്രിയ ഐ.വി. നായർ, നൗഫിയ റഷീദ് എന്നിവരും ചേർന്നു പുരസ്കാരം ഏറ്റുവാങ്ങി.

കൈവരികളില്ലാത്ത മരുതൂര്‍ തോട് നാട്ടുകാർക്കു പേടിസ്വപ്‌നമാകുന്നു

മഴ ആരംഭിച്ചതോടെ പ്രദേശവാസികൾക്ക് ആശങ്ക പേരൂര്‍ക്കട: മഴ ഏതുനിമിഷവും ശക്തമാകുമെന്ന ആശങ്ക നിലനില്‍ക്കുന്നതിനാല്‍ കൈവരികളില്ലാത്ത മരുതൂര്‍ തോട് പേടിസ്വപ്‌നമാകുന്നു. കഴിഞ്ഞവര്‍ഷം നവംബറിൽ ഒരു ഓട്ടോറിക്ഷ പൂർണമായും തോട്ടിലേക്ക് വീഴുകയും സവാരിക്കാരനായ കല്ലയം പ്ലാവിള സ്വദേശി വിജയന്‍ (54) മരിക്കുകയും ചെയ്തിരുന്നു. ഓട്ടോഡ്രൈവര്‍ സുരേഷ് തോട്ടില്‍ വീണുവെങ്കിലും ഒരു മരച്ചില്ലയാണ് ഇദ്ദേഹത്തിന്‍റെ ജീവന്‍ രക്ഷിച്ചത്. കല്ലയം ഇടമണ്‍ ഭാഗത്തുകൂടി ഒഴുകുന്ന മുതൂര്‍ തോട് പൗഡിക്കോണം, പോത്തന്‍കോട് ഭാഗത്തുകൂടി കടന്നുപോകുന്നതാണ്. അപകടം നടന്ന സ്ഥലത്തുനിന്നും ഏതാനും മീറ്ററുകള്‍ക്കു മുമ്പാണ് രണ്ടുതോടുകള്‍ സന്ധിച്ചശേഷം മരുതൂര്‍തോടായി ഒഴുകുന്നത്. തോടിന്‍റെ ഒന്നരകിലോമീറ്ററോളം ഭാഗമാണ് അത്യന്തം അപകടാവസ്ഥയിലുള്ളത്. ഇവിടെ കൈവരികള്‍ നിര്‍മിക്കണമെന്ന നാട്ടുകാരുടെ ആവശ്യം അപകടമുണ്ടായി അഞ്ചുമാസം പിന്നിട്ടിട്ടും നടപ്പാക്കപ്പെട്ടിട്ടില്ല. കോണ്‍ക്രീറ്റ് ചെയ്ത റോഡാണ് ഈ ഭാഗത്തുള്ളത്. ശക്തമായ മഴ പെയ്തുകഴിഞ്ഞാല്‍ തോടും റോഡും തിരിച്ചറിയാന്‍ സാധിക്കാത്ത അവസ്ഥയാണ് ഇപ്പോഴും. തോടിന്‍റെ കരയില്‍ കാട്ടുചെടികള്‍ വളര്‍ന്നുനില്‍ക്കുന്നതും പ്രശ്‌നം സൃഷ്ടിക്കുന്നു. മരുതൂര്‍ ചന്ത പിന്നിട്ടുകഴിഞ്ഞാല്‍ തോടിന് കഷ്ടിച്ച് ഒന്നരയാള്‍ വീതി മാത്രമാണ് ഉള്ളത്. തോട്ടിലെ കരിങ്കല്‍ക്കെട്ടും തകര്‍ച്ചയുടെ വക്കിലാണ്. ഇരുചക്ര വാഹനങ്ങളും ഓട്ടോറിക്ഷകളും കാറുകളും റോഡിലൂടെ സഞ്ചരിക്കുന്നുണ്ട്. ഏകദേശം രണ്ടുമൂന്നു മണിക്കൂര്‍ ശക്തമായ മഴപെയ്തു കഴിഞ്ഞാല്‍ തോട്ടില്‍ റോഡിനോളം പൊക്കത്തില്‍ വെള്ളം പൊങ്ങും. ഈ വെള്ളം ഇടറോഡുകളിലേക്ക് ഒഴുകുകയും ചെയ്യും. ഈയൊരവസരത്തില്‍ സ്ഥലപരിചയമുള്ള പരിസരവാസികള്‍ക്കുപോലും റോഡിലൂടെ അപകടമുണ്ടാകാതെ സഞ്ചരിക്കുക പ്രയാസമാണ്. മഴ ശമിച്ചുകഴിഞ്ഞാലും കുറഞ്ഞതു മൂന്നു മണിക്കൂര്‍ വേണം വെള്ളം റോഡില്‍നിന്ന് ഇറങ്ങാന്‍. സ്ഥലപരിചയം ഇല്ലാത്തവരാണ് റോഡിലൂടെ സഞ്ചരിക്കുന്നതെങ്കില്‍ പെട്ടുപോകുമെന്ന് ഉറപ്പാണെന്നു പ്രദേശവാസികള്‍ പറയുന്നു. നാട്ടുകാര്‍ നിരവധി തവണ അധികൃതര്‍ക്കു മുന്നില്‍ നിവേദനങ്ങള്‍ നല്‍കിയെങ്കിലും മരുതൂര്‍ തോടിനെ സുരക്ഷിതമാക്കാനുള്ള നടപടികളൊന്നും സ്വീകരിച്ചിട്ടില്ല. തിരുവനന്തപുരം നഗരസഭയുടെയും കരകുളം പഞ്ചായത്തിന്‍റെ അതിര്‍ത്തിപ്രദേശത്തുള്ള തോടായതുകൊണ്ടാണ് അധികൃതര്‍ ജനങ്ങളുടെ ആവശ്യം നിരാകരിക്കുന്നതെന്നാണ് ഇവരുടെ പരാതി. ഇപ്പോഴും മരുതൂര്‍തോട്ടിലുണ്ടായ അപകടം ജനളുടെ മനസില്‍ ഒരു ഭീതിയായി നിലനില്‍ക്കുന്നതിനാല്‍ വരുന്ന മഴക്കാലവും ഇവരുടെ പേടിസ്വപ്‌നമാകും.

മുതലപൊഴിയിൽ വീണ്ടും വള്ളംമറിഞ്ഞു

തിരുവനന്തപുരം: മുതലപൊഴിയിൽ വീണ്ടും വള്ളം മറിഞ്ഞു. മൂന്നു മത്സ്യത്തഴിലാളികൾ കടലിൽ വീണു. ഇവർ നീന്തി കരയ്ക്കു കയറി രക്ഷപെട്ടു. ഇന്നലെ രാവിലെ 6.45 ഓടെ ആയിരുന്നു സംഭവം. പൊഴിമുഖത്തെ കൂറ്റൻ തിരമാലയിൽപെട്ടാണ് പ്രദേശവാസിയുടെ വള്ളം മറിഞ്ഞത്. കഴിഞ്ഞ ദിവസം പൂന്തുറ സ്വദേശി ലിജോയുടെ വള്ളം തലകീഴായി 17 മത്സ്യത്തൊഴിലാളികൾ കടലിൽ വീണിരുന്നു. പിന്നീട് ഇവർ നീന്തി കരയ്ക്ക് കയറി. ആർക്കും പരിക്കേറ്റില്ല. പൊഴിമുഖത്തെ മണൽ ഭാഗികമായി മാറ്റുന്നതിനിടെ വള്ളങ്ങൾ മറിയുന്നതു മത്സ്യത്തൊഴിലാളികളെ വൻതോതിൽ ആശങ്കയിൽ ആഴ്ത്തിയിട്ടുണ്ട്.

ആർ.ശങ്കർ ജന്മദിനം: കെപിസിസിയിൽ പുഷ്പാർച്ചന

തിരുവനന്തപുരം: മുൻ മുഖ്യമന്ത്രിയും കെപിസിസി പ്രസിഡന്‍റുമായിരുന്ന ആർ.ശങ്കറിന്‍റെ ജ·ദിന വാർഷികത്തോട് അനുബന്ധിച്ച് കെപിസിസി ഓഫീസിൽ ആർ. ശങ്കറിന്‍റെ ചിത്രത്തിൽ പുഷ്പാർച്ചന നടത്തി. കോണ്‍ഗ്രസ് പ്രവർത്തക സമിതി അംഗം രമേശ് ചെന്നിത്തല, യുഡിഎഫ് കണ്‍വീനർ എം.എം. ഹസൻ, കെ.മുരളീധരൻ, കെപിസിസി സംഘടനാ ചുമതലയുള്ള ജനറൽ സെക്രട്ടറി എം.ലിജു, എൻ.ശക്തൻ, ജി.എസ്. ബാബു, ജി. സുബോധൻ, മരിയാപുരം ശ്രീകുമാർ, ഡിസിസി പ്രസിഡന്‍റ് പാലോട് രവി, വി.എസ്. ശിവകുമാർ, ടി. ശരത്ചന്ദ്ര പ്രസാദ്, മണക്കാട് സുരേഷ്, ഡോ.ആരിഫ്, കൊറ്റാമം വിമൽകുമാർ, എകെ ശശി തുടങ്ങിയവർ പങ്കെടുത്തു.

യുവാവിനെ കാണാനില്ലെന്ന് പരാതി

നെടുമങ്ങാട് : ഈ ഫോട്ടോയിൽ കാണുന്ന കൊല്ലം മേക്കോൺ സ്വദേശി സുഹൈൽ(21) എന്ന യുവാവിനെ തിങ്കളാഴ്ച മുതൽ( 28. 4.25) രാവിലെ 10 മണി മുതൽ തിരുവനന്തപുരം പാലോട് നിന്നും കാണാതായിരിക്കുന്നു. ഇക്ബാൽ കോളേജിൽ ബി എ അവസാന വർഷ പരീക്ഷ എഴുതാൻ വന്ന വിദ്യാർത്ഥിനിയാണ് സുഹൈൽ.കണ്ടു കിട്ടുന്നവർ താഴെ കാണുന്ന നമ്പറിൽ ബന്ധപെടുക. ഫോൺ: 9447591892, 8075311653

നെടുമങ്ങാട് ബൈബിൾ കൺവൻഷൻ ആരംഭിച്ചു

നെടുമങ്ങാട്: 13-മത് നെടുമങ്ങാട് ബൈബിൾ കൺവൻഷൻ ആരംഭിച്ചു. നെയ്യാറ്റിൻകര രൂപത സഹായ മെത്രാൻ റവ. ഡോ. ഡി. സെൽവരാജൻ ഉദ്ഘാടനം ചെയ്തു. മോൺ. റൂഫസ് പയസ്‌ലീൻ, ഫാ. സോജി ഓലിക്കൽ, ഫാ. ക്രിസ്റ്റോ, ഫാ. ഷാജി ഡി. സാവിയോ, ഫാ. ഷൈജു ദാസ്, ഫാ. ജെറാൾസ് മത്യാസ്, ഫാ. വിജീൻ ആഞ്ചലോസ്, ജനറൽ കൺവീനർ സെബാസ്റ്റ്യൻ എന്നിവർ സന്നിഹിതരായിരുന്നു. മേയ് നാലുവരെയാണ് കൺവൻഷൻ നടക്കുന്നത്. അട്ടപ്പാടി സെഹിയോൻ ധ്യാനകേന്ദ്രത്തിലെ ഫാ. സോജി ഓലിക്കലും സംഘവുമാണ് നേതൃത്വം നൽകുന്നത്.

എൻ. അശോകൻ വിശ്വാസ്യതയും സത്യസന്ധതയും മുഖമുദ്രയാക്കിയ മാധ്യമ പ്രവർത്തകൻ: പിണറായി വിജയൻ

തിരുവനന്തപുരം: മാധ്യമ പ്രവർത്തനത്തിൽ അരനൂറ്റാണ്ട് പൂർത്തിയാക്കുന്ന എൻ. അശോകന്‍റെ മുഖമുദ്ര വിശ്വാസ്യതയും സത്യസന്ധതയുമാണെന്ന് മുഖ്യമന്ത്രി പിണറായി വിജയൻ. മാധ്യമപ്രവർത്തകനെന്ന നിലയിൽ അരനൂറ്റാണ്ട് പൂർത്തിയാക്കുന്ന എൻ. അശോകനെ ആദരിക്കുന്നതിനായി കേരള പത്രപ്രവർത്തക യൂണിയൻ തിരുവനന്തപുരം ജില്ലാ കമ്മിറ്റിയുടെ സഹകരണത്തോടെ കേരള മീഡിയ അക്കാദമി, മാസ്കറ്റ് ഹോട്ടലിലെ സിംഫണി ഹാളിൽ സംഘടിപ്പിച്ച "അശോകനും മാധ്യമലോകവും’ എന്ന സൗഹൃദക്കൂട്ടായ്മയിൽ മുഖ്യാതിഥിയായി സപ്രസംഗിക്കുകയായിരുന്നു പിണറായി വിജയൻ. രാജ്യതലസ്ഥാനത്ത് നാലു പതിറ്റാണ്ട് കാലത്തെ മാധ്യമജീവിതമെന്നത് അത്യപൂർവനേട്ടമാണ്. 55 വർഷംനീണ്ട മാധ്യമപ്രവർത്തക ജീവിതത്തിൽ ഇന്ത്യൻ രാഷ്ട്രീയത്തിന്‍റെ ഗതിവിഗതികൾ മാറ്റിമറിച്ച ധാരാളം സുപ്രധാന സംഭവങ്ങളുടെ കാലത്ത് അശോകൻ ഡൽഹിയിൽ ഉണ്ടായിരുന്നുവെന്നും ഉൗർജ്ജസ്വലതയോടെ ഇന്നും ഈ മേഖലയിൽ തുടരുന്നുവെന്നും അശോകന് കേരള മീഡിയ അക്കാദമിയുടെ ഉപഹാരം സമ്മാനിച്ചുകൊണ്ട് മുഖ്യമന്ത്രി പറഞ്ഞു. മീഡിയ അക്കാദമി ചെയർമാൻ ആർ.എസ്.ബാബു അധ്യക്ഷത വഹിച്ചു.

ആനാട് പഞ്ചായത്തിൽ കുടുംബശ്രീ വഴി നിർബന്ധിത ഇൻഷ്വറൻസ് ചേർക്കലും പിരിവുമെന്നു വ്യാപകപരാതി

നെടുമങ്ങാട്: ദാരിദ്ര്യ നിർമാർജനത്തിനായി ലക്ഷ്യമിട്ട് ആരംഭിച്ചു പ്രവർത്തിച്ചുവരുന്ന കുടുംബശ്രീയുടെ ആനാട് പഞ്ചായത്തിലെ സിഡിഎസ് വഴി സ്വകാര്യ ഇൻഷ്വറൻസ് കമ്പനിയുടെ പ്രീമിയം നിർബന്ധിതമായി എടുപ്പിക്കുന്നതായും, യൂണിറ്റുകളിൽനിന്ന് സിഡിഎസിന്‍റെ നേതൃത്വത്തിൽ വ്യാപകമായ പിരിവ് നടക്കുന്നതായും പരാതി. ആനാട് പഞ്ചായത്തിൽ പ്രവർത്തിച്ചുവരുന്ന കമ്മ്യൂണിറ്റി ഡെവലപ്മെന്‍റ് സൊസൈറ്റിക്കെതിരെയാണ്, പഞ്ചായത്തിലെ തന്നെ നിരവധി കുടുംബശ്രീ അംഗങ്ങളും യൂണിറ്റുകളും ആരോപണവുമായി രംഗത്തു വന്നിട്ടുള്ളത്. കുടുംബശ്രീ പ്രസ്ഥാനത്തിന്‍റെ പ്രവർത്തനംകണ്ടു സ്വകാര്യ ഇൻഷ്വറൻസ് കമ്പനി വാർഡു തലത്തിൽ പ്രവർത്തിക്കുന്ന കുടുംബശ്രീ യൂണിറ്റിലെ ഓരോ അംഗത്തിൽനിന്നും 200 രൂപ വാർഷിക പ്രീമിയം വാങ്ങി, അത്യാഹിതം സംഭവിച്ചാൽ രണ്ടു ലക്ഷം രൂപ വരെ അപകട ഇൻഷ്വറൻസ് നൽകാമെന്നു വാഗ്ദാനം നൽകിയാണ് ആളുക ളെ ചേർക്കുന്നത്. ആനാട് പഞ്ചായത്തിലെ നിലവിലുള്ള 19 വാർഡുകളിലും ഓരോ വാർഡിലും 15 മുതൽ 20 വരെ കുടുംബശ്രീ യൂണിറ്റുകൾ ഉണ്ട്. ഇതിൽ തന്നെ ഓരോ യൂണിറ്റിലും 15 നും 20 നും ഇടയിൽ അംഗങ്ങളും ഉണ്ട്. എല്ലാ കുടുംബശ്രീ അംഗങ്ങളും സ്വകാര്യ ഇൻഷ്വറൻസ് പോളിസി നിർബന്ധമായും എടുക്കണമെന്നും, സ്വകാര്യ പോളിസി എടുക്കാത്ത യൂണിറ്റുകൾക്ക് കുടുംബശ്രീ വഴിയുള്ള ആനുകൂല്യങ്ങൾ നൽകില്ലെന്നും ഭീഷണിയുണ്ട്. പ്രധാനമായും ബാങ്കുകൾ നൽകുന്ന വായ്പയ്ക്ക് വേണ്ടിയുള്ള അധികാരപത്രം നൽകില്ലെന്ന ഭീഷണിയാണ് സിഡിഎസ് കമ്മിറ്റി കുടുംബശ്രീ യൂണിറ്റുകൾക്കു നേരെ ഉയർത്തുന്നത്. എൽഐസി, ഭാരത സർക്കാരിന്‍റെ പോസ്റ്റൽ ഡിവിഷൻ ഇൻഷ്വറൻസ് സ്കീം തുടങ്ങിയ പല അംഗീകൃത സ് കീമുകളിലും അംഗമായിട്ടുള്ളവരും നിർബന്ധമായും ഈ ഇൻഷ്വറൻസ് സ്കീമിൽ അംഗമാകണമെന്നും സിഡിഎസ് കമ്മിറ്റി നിർബന്ധം പിടിക്കുന്നത് വ്യാപകമായ എതിർപ്പിന് കാരണമായിട്ടുണ്ട്. സ്വകാര്യ ഇൻഷ്വറൻസ് കമ്പനി സിഡിഎസ് കമ്മിറ്റിക്ക് നിശ്ചിത ശതമാനം തുക കമ്മീഷനായി നൽകുന്നത് കൈക്കലാക്കാനുള്ള വ്യഗ്രതയാണ് എല്ലാ കുടുംബശ്രീ യൂണിറ്റുകളെയും ഇതിൽ അംഗങ്ങൾ ആക്കുവാൻ സിഡിഎസ് നിർബന്ധം പിടിക്കുന്നതിനു പിന്നിലെന്നും ആരോപണമുണ്ട്.

പ്രധാനമന്ത്രിയുടെ സന്ദർശനം : ഇന്നും നാളെയും ഗതാഗത നിയന്ത്രണം

വലിയതുറ: പ്രധാനമന്ത്രി നരേന്ദ്ര മോദിയുടെ സന്ദര്‍ശനത്തോടനുബന്ധിച്ച് ഇന്നും നാളെയും നഗരത്തില്‍ ഗതാഗത നിയന്ത്രണം ഏര്‍പ്പെടുത്തുമെന്ന് സിറ്റി പോലീസ് അറിയിച്ചു. ഇന്നുച്ചയ്ക്ക് രണ്ടു മുതല്‍ രാത്രി പത്തുവരെയും നാളെ രാവിലെ 6.30 മുതല്‍ ഉച്ചയ്ക്ക് രണ്ടുവരെയുമാണ് നഗരത്തിലെ വിവിധ ഭാഗങ്ങളില്‍ ഗതാഗത നിയന്ത്രണവും പാര്‍ക്കിംഗ് നിരോധനവും നടപ്പിലാക്കിയിട്ടുളളത്. ഇന്നുച്ചയ്ക്ക് രണ്ടു മുതല്‍ രാത്രി 10.00 വരെ ശംഖുമുഖം -ചാക്ക-പേട്ട-പളളിമുക്ക്-പാറ്റൂര്‍-ജനറല്‍ ആശുപത്രി-ആശാന്‍ സ്‌ക്വയര്‍-മ്യൂസിയം-വെള്ളയമ്പലം-കവടിയാര്‍ റോഡിന്‍റെ ഇരുവശങ്ങളിലും വാഹനങ്ങള്‍ പാര്‍ക്ക് ചെയ്യാന്‍ അനുവദിക്കില്ല. നാളെ രാവിലെ 6.30 മുതല്‍ ഉച്ചയ്ക്ക് രണ്ടുവരെ കവടിയാര്‍-വെള്ളയമ്പലം-ആല്‍ത്തറ-ശ്രീമൂലംക്ലബ്-ഇടപ്പഴഞ്ഞി-പാങ്ങോട് മിലിറ്ററി ക്യാമ്പ്-പളളിമുക്ക് വരെയുളള റോഡിന്‍റെ ഇരുവശങ്ങളിലും പാര്‍ക്കിംഗ് നിരോധനം ഉണ്ടായിരിക്കും. ഇന്നും നാളെയും ശംഖുമുഖം - വലിയതുറ-പൊന്നറ , കല്ലുംമൂട്-ഈഞ്ചയ്ക്കല്‍-അനന്തപുരി ആശുപത്രി-മിത്രാനന്ദപുരം-എസ്പി ഫോര്‍ട്ട്-ശ്രീകണ്ഠേശ്വരം പാര്‍ക്ക്-തകരപ്പറമ്പ് മേല്‍പ്പാലം-ചൂരക്കാട്ടുപാളയം-തമ്പാനൂര്‍ ഫ്‌ളൈ ഓവര്‍-തമ്പാനൂര്‍-ഓവര്‍ബ്രിഡ്ജ് , കിഴക്കേക്കോട്ട-മണക്കാട്-കമലേശ്വരം-അമ്പലത്തറ-തിരുവല്ലം-വാഴമുട്ടം-വെളളാര്‍-കോവളം-പയറുംമൂട്-പുളിങ്കുടി, മുല്ലൂര്‍ മുക്കോല വരെയുളള റോഡിലും, തിരുവല്ലം-കുമരിചന്ത-കല്ലുംമൂട്-ചാക്ക- ഓള്‍സെയിന്റ്‌സ് കോളജ്-ശംഖുമുഖം റോഡിലും വാഹനങ്ങള്‍ക്കു നിയന്ത്രണം ഏര്‍പ്പെടുത്തും. ഗതാഗത നിയന്ത്രണം ഏര്‍പ്പെടുത്തിയിട്ടുളള പ്രധാന റോഡുകളിലും സമീപത്തുളള ഇടറോഡുകളിലും വാഹനങ്ങള്‍ പാര്‍ക്ക് ചെയ്യാന്‍ അനുവദിക്കില്ല. ഇവിടങ്ങളില്‍ പാര്‍ക്ക് ചെയ്യുന്ന വാഹനങ്ങളെ റിക്കവറി വാഹനം ഉപയോഗിച്ച് നീക്കം ചെയ്യുന്നത് ഉള്‍പ്പെടെയുള്ള നിയമനടപടികള്‍ സ്വീകരിക്കുമെന്ന് പോലീസ് അറിയിച്ചു. പ്രധാനമന്ത്രിയുടെ യാത്രയ്ക്ക് തൊട്ടുമുമ്പ് പ്രധാന റോഡില്‍ വന്നുചേരുന്ന ഇടറോഡുകളിലെ വാഹന ഗതാഗതത്തിന് നിയന്ത്രണമേര്‍പ്പെടുത്തുകയും ഗതാഗതം വഴിതിരിച്ചു വിടുകയും ചെയ്യും. വിമാനത്താവളത്തിലേയ്ക്ക് വരുന്ന യാത്രക്കാര്‍ മുന്‍കൂട്ടി യാത്ര ക്രമീകരിക്കണം. ഡൊമസ്റ്റിക് എയര്‍പോര്‍ട്ടിലേക്ക് പോകുന്ന യാത്രക്കാര്‍ വെണ്‍പാലവട്ടം, ചാക്ക ഫ്‌ളൈ ഓവര്‍, ഈഞ്ചക്കല്‍ കല്ലുംമൂട്, പൊന്നറ പാലം, വലിയതുറ വഴിയും ഇന്‍റര്‍നാഷണല്‍ ടെര്‍മിനലിലേയ്ക്കു പോകുന്ന യാത്രക്കാര്‍ വെണ്‍പാലവട്ടം ചാക്ക ഫ്‌ളൈ ഓവര്‍, ഈഞ്ചക്കല്‍, കല്ലുംമൂട് അനന്തപുരി ആശുപത്രി സര്‍വീസ് റോഡ് വഴിയും പോകണം.

പോത്തൻകോട് സുധീഷ് വധക്കേസ്: 11 പ്രതികൾക്കും ജീവപര്യന്തം തടവ്

തിരുവനന്തപുരം: പോത്തൻകോട് സുധീഷ് കൊലക്കേസിൽ 11 പ്രതികൾക്കും ജീവപര്യന്തം തടവുശിക്ഷ. നെടുമങ്ങാട് പട്ടികജാതി പട്ടിക വർഗ പ്രത്യേക കോടതിയാണ് ശിക്ഷ വിധിച്ചത്. ചെന്പകമംഗലം ലക്ഷംവീട് കോളനിയിൽ സുധീഷിനെ (35) പോത്തൻകോട് കല്ലൂർ പാണൻവിളയിൽ വീട്ടിൽ കയറി കൊലപ്പെടുത്തിയ കേസിലാണ് മുഴുവൻ പ്രതികൾക്കും ജീവപര്യന്തം വിധിച്ചത്. സുധീഷ് ഉണ്ണി, ഗുണ്ടാത്തലവൻ ഒട്ടകം രാജേഷ്, ശ്യാംകുമാർ, നിധീഷ്, നന്ദീഷ്, രഞ്ജിത്, അരുണ്‍, സച്ചിൻ, സൂരജ്, ജിഷ്ണു, പ്രദീപ്, നന്ദു എന്നിവരെയാണു ശിക്ഷിച്ചത്. 2021 ഡിസംബർ 11 നാണു സംഭവം. കൊലപാതകശ്രമത്തിനുള്ള കേസിൽ പെട്ട് ബന്ധുവീട്ടിൽ ഒളിവിൽ കഴിഞ്ഞിരുന്ന സുധീഷിനെ കല്ലൂരിലെ സജീവിന്‍റെ വീടിനുള്ളിൽ ഗുണ്ടാസംഘം കൊലപ്പെടുത്തിയത്. അക്രമികളെ കണ്ട് രക്ഷപ്പെടാനായി സജീവിന്‍റെ വീട്ടിൽ ഓടിക്കയറിയപ്പോൾ പിന്തുടർന്നെത്തി കുട്ടികളുടെയും വീട്ടുകാരുടെയും മുന്നിൽവച്ച് വെട്ടിക്കൊലപ്പെടുത്തുകയായിരുന്നു. സുധീഷിന്‍റെ കാൽ വെട്ടിയെടുത്ത് കല്ലൂർ ജംഗ്ഷനിൽ കൊണ്ടു വന്ന് എറിയുകയും ചെയ്തു. സാക്ഷികൾ പലരും കൂറുമാറിയപ്പോൾ ശാസ്ത്രീയ തെളിവുകളുടെ അടിസ്ഥാനത്തിലാണ് കുറ്റം തെളിയിച്ചത്. കോടതിയിലേക്കു വരുന്ന വഴിയിൽ ഉൾപ്പെടെ ഗുണ്ടാസംഘത്തിന്‍റെ ആളുകൾ സാക്ഷികളെ ഭയപ്പെടുത്തിയിരുന്നു. പത്താം പ്രതി ഒഴികെയുള്ള എല്ലാ പ്രതികളും മറ്റു പല കേസുകളിലും പ്രതികളാണ്.

ഐസിഎസ്ഇ, ഐഎസ്‌സി പരീക്ഷ : ജില്ലയിലെ സ്കൂളുകൾക്കും മിന്നും ജയം

തിരുവനന്തപുരം: ഐസിഎസ്ഇ, ഐഎസ്‌സി പരീക്ഷാ ഫലം പ്രഖ്യാപിച്ചപ്പോൾ മിന്നും വിജയവുമായി ജില്ലയിലെ സ്കൂളുകൾ. കവടിയാർ ക്രൈസ്റ്റ് നഗർ സ്കൂളിൽ ഐസിഎസ്ഇ പരീക്ഷ എഴുതിയ 202 വിദ്യാർഥികളിൽ 189 വിദ്യാർഥികളും ഡിസ്റ്റിംഗ്ഷൻ നേട്ടത്തിന് ഉടമയായി. ഇതിൽ 103 വിദ്യാർഥികൾക്കും 90 ശതമാനത്തിൽ കൂടുതൽ മാർക്കാണ്. 98.2 ശതമാനം മാർക്കോടെ ആർച്ച അനീഷ് നായർ സ്കൂളിലെ ടോപ്പറായി. എം.എസ്. ഋഷികേശ് , ചൈതന്യ പാഢ്യ എന്നിവർ 98 ശതമാനവുമായി രണ്ടാമതും അൻവിതാ എൻ. അരവിന്ദ് 97.8 ശതമാനം മാർക്കോടെ മൂന്നാമതുമെത്തി. ഐഎസ്ഇ പരീക്ഷയിൽ ആകെ പരീക്ഷ എഴുതിയ 79 വിദ്യാർഥികളിൽ 69 പേരും ഡിസ്റ്റിംഗ്ഷൻ നേട്ടത്തിന് അർഹരായി. ദേവ്നാ ലക്ഷ്മി മനോജ് 98.75 ശതമാനം മാർക്കുമായി ഒന്നാമതെത്തിയപ്പോൾ ആദിത്യ എസ് ഘോഷ് (98.50) രണ്ടാമതും ആർദ്ര എസ്. ഡേവിഡ്സണ്‍ (97.50) മൂന്നാമതുമെത്തി. നന്ദൻകോട് ഹോളി ഏഞ്ചൽസിൽ ഐഎസ്്സി പരീക്ഷയിൽ സയൻസ് ബാച്ചിൽ പരീക്ഷ എഴുതിയ 69 വിദ്യാർഥികളിൽ 43 പേർക്ക് ഡിസ്റ്റിംഗ്ഷനും 24 പേർക്ക് ഫസ്റ്റ് ക്ലാസും രണ്ടുപേർക്ക് സെക്കന്‍റ് ക്ലാസും ലഭിച്ചു. കല്യാണി വി. വിശ്വം (98.25 ശതമാനം), ഗായത്രി അയ്യപ്പദാസ് (98 ശതമാനം), ഗൗരി പാർവതി സൂരജ് (95.25 ശതമാനം) എന്നിവരാണ് ആദ്യ മൂന്നു സ്ഥാനങ്ങളിൽ എത്തിയവർ. കൊമേഴ്സ് ബാച്ചിൽ ആകെ പരീക്ഷ എഴുതിയ 12 പേരിൽ ഒൻപതു പേർക്ക് ഡിസ്റ്റിംഗ്ഷനും ഒരാൾക്ക് ഫസ്റ്റ് ക്ലാസും രണ്ടു പേർക്ക് സെക്കന്‍റ് ക്ലാസും ലഭിച്ചു. സൈറാ നിഷാദ് ( 92.75), ഏഞ്ചലീന ജോണ്‍സണ്‍ (85.5), വി.എസ്. പാർവതി (81.75) എന്നിവർക്കാണ് കൂടുതൽ മാർക്ക് ലഭിച്ചത്. ഐസിഎസ്ഇ പരീക്ഷ എഴുതിയ 164 പേരിൽ 148 പേർക്ക് ഡിസ്റ്റിംഗ്ഷൻ ലഭിച്ചപ്പോൾ 16 പേർക്ക് ഫസ്റ്റ് ക്ലാസ് നേട്ടം ലഭിച്ചു. അവന്തിക വിനോദ് 99 ശതമാനം മാർക്കുമായി ഒന്നാമതെത്തിയപ്പോൾ ആർ.എസ്. ദിയ 98.8 ശതമാനം മാർക്കുമായി രണ്ടാമതും ഹർഷ സത്യലക്ഷ്മി 98.6 ശതമാനം മാർക്കുമായി മൂന്നാമതുമെത്തി. ശ്രീകാര്യം ലൊയോളാ സ്കൂളിനും മികച്ച വിജയം. ഐസിഎസ് ഇ പത്താം ക്ലാസ് പരീക്ഷ എഴുതിയ 100 വിദ്യാർഥികളിൽ 97 പേർക്ക് ഡിസ്റ്റിംഗ്ഷനും മൂന്നു പേർക്ക് ഫസ്റ്റ് ക്ലാസും ലഭിച്ചു. 98.4 ശതമാനം മാർക്ക് നേടിയ വൈഭവ് എ. നായർ ഒന്നാം സ്ഥാനവും 98.2 ശതമാനം മാർക്കോടെ എൽ. അനന്തകൃഷ്ണനും റോഹൻ ഫിലിപ്പും രണ്ടാം സ്ഥാനവും നേടി. 97.8 ശതമാനം മാർക്കോടെ ബഞ്ചമിൻ ജയിംസ് പയോ, അർഷത് മുഹമ്മദ്, ഇഷാൻ സജയ്, സിദ്ധാർഥ് ബി നായർ എന്നിവർ മൂന്നാം സ്ഥാനവും കരസ്ഥമാക്കി. ഐഎസ്സി പന്ത്രണ്ടാം ക്ലാസിൽ 58 വിദ്യാർഥികൾ പരിക്ഷ എഴുതിയതിൽ 48 പേർ ഡിസ്റ്റിംഗ്ഷനും ഒൻപതു പേർ പേർ ഫസ്റ്റ് ക്ലാസും നേടി. 9.25 ശതമാനം മാർക്കു നേടി ജഗൻ വാസുദേവൻ ഒന്നാമത് എത്തിയപ്പോൾ 99 ശതമാനം മാർക്കോടെ നിവേദിതാ മനോജ് നായർ രണ്ടാം സ്ഥാനത്തും 97.75 ശതമാനം മാർക്കോടെ ശ്രേയാ രാജേഷ് മൂന്നാം സ്ഥാനത്തും എത്തി. മുക്കോലയ്ക്കൽ സെന്‍റ് തോമസ് റസിഡൻഷ്യൽ സ് കൂളിൽ ഐഎസ് സി സയൻസ് ബാച്ച് പരീക്ഷ എഴുതിയ 131 വിദ്യാർഥികളിൽ 116 പേർക്ക് ഡിസ്റ്റിംഗ്ഷൻ ലഭിച്ചു. 14 പേർ ഫസ്റ്റ് ക്ലാസിന് അർഹരായി. 99.5 ശതമാനം മാർക്കു നേടിയ റിയ മരിയ മനോജാണ് ടോപ്പർ. ഡെൻസൽ ഡി ജോർജ് 99 ശതമാനം മാർക്കുമായി രണ്ടാമതും എസ്. ഗൗതമി, നിതാ ആൻ. ഏബ്രഹാം എന്നിവർ 98.5 ശതമാനം മാർക്കുമായി മൂന്നാം സ്ഥാനത്തുമെത്തി. ഐഎസ്്സി കൊമേഴ്സ് വിഭാഗത്തിൽ പരീക്ഷ എഴുതിയ 20 പേരിൽ 16 പേർക്ക്് ഡിസ്റ്റിംഗ്ഷനും മൂന്നു വിദ്യാർഥികൾക്ക് ഫസ്റ്റ് ക്ലാസും ലഭിച്ചു. ഹന്ന പി. ജോസഫ് 96.75 ശതമാനം മാർക്കോടെ ഒന്നാം സ്ഥാനത്തെത്തിയപ്പോൾ ആൻഡ്രിട കെ. സന്തോഷ് 95.75 ശതമാനം മാർക്കുമായി രണ്ടാമതും വി. ഭവ്യ 95.5 ശതമാനം മാർക്കുമായി മൂന്നാമതുമെത്തി. ഹ്യൂമാനിറ്റീസിൽ ആകെ പരീക്ഷ എഴുതിയ 12 പേരും ഡിസ്റ്റിംഗ്ഷൻ നേടി. നന്ദിതാ രാജീവ് ഒന്നാമതും കാശിനാഥ് എസ് മനു രണ്ടാമതും അമൽ ശരത്ത് മൂന്നാമതുമെത്തി.ഐസിഎസ്ഇ പരീക്ഷ എഴുതിയ 205 പേരിൽ 184 വിദ്യാർഥികൾ ഡിസ്റ്റിംഗ്ഷൻ നേട്ടത്തിന് അർഹരായി 19 വിദ്യാർഥികൾക്ക് ഫസ്റ്റ് ക്ലാസ് ലഭിച്ചു. ദേവിഷ അഗർവാൾ 99 ശതമാനം മാർക്കുമായി ഒന്നാം സ്ഥാനത്തെത്തി. റിനിറ്റ എൽസാ ജേക്കബ് 98.8 ശതമാനവുമായി രണ്ടാം സ്ഥാനത്തും ആരോണ്‍ പ്രവീണ്‍ 98.6 ശതമാനവുമായി മൂന്നാം സ്ഥാനത്തുമെത്തി.

രാഷ്ട്രീയ പാർട്ടികളുടെ പിതൃത്വം ഏറ്റെടുക്കൽ വാദത്തിന് കുറവില്ലാതെ വിഴിഞ്ഞം തുറമുഖം

എസ്. രാജേന്ദ്രകുമാർ വിഴിഞ്ഞം: അന്താരാഷ്ട്ര തുറമുഖത്തിന്‍റെ പിതൃത്വം ഏറ്റെടുക്കാൻ രാഷ്ട്രീയ പാർട്ടികളുടെയും നേതാക്കൻമാരുടെയും മത്സരം. തങ്ങളാണ് കാരണക്കാരെന്ന അവകാശവാദവുമായി നാടെങ്ങും ഫ്ലക്സ് ബോർഡുകൾ നിരത്തിയുള്ള ആഘോഷം തുടരുമ്പോഴും കരയിൽ വികസനത്തിന്‍റെ കണികപോലും കാണാത്തതിനാൽ ജനത്തിനുമാത്രം ആവേശമില്ല. പ്രധാനമന്ത്രി ഉദ്ഘാടനത്തിനായി എത്തുന്ന തുറമുഖത്തിനുള്ളിൽ ആഘോഷത്തിന്‍റെ ആരവങ്ങളുണ്ടെങ്കിലും പുറത്ത് അത് കാണാനില്ലതാനും. ‌ ഇടതുപക്ഷവും ബിജെപിയും കമ്മീഷനിംഗ് ഒരാഘോഷമാക്കി മാറ്റാൻ തയാറെടുക്കുമ്പോൾ തുറമുഖം വരാൻ കാരണക്കാരായ കോൺഗ്രസിന്‍റെ പ്രവർത്തകരും നേതാക്കൻമാരും വിട്ടുനിൽക്കുമെന്നതും ആഘോഷത്തിന്‍റെ മാറ്റുകുറയ്ക്കും. വിഴിഞ്ഞം അന്താരാഷ്ട്ര തുറമുഖം കേരളത്തിന്‍റെ വികസന സ്വപ്നമെന്ന് അവകാശപ്പെടുമ്പോഴും പാർട്ടി പരമായ ചേരിതിരിവ് ആദ്യ കപ്പലടുപ്പിച്ചുള്ള ട്രയൽ റണ്ണിലും പ്രകടമായിരുന്നു. വർഷങ്ങൾ നീണ്ട കാത്തിരിപ്പിനൊടുവിൽ കടലിൽ മാത്രം വികസനം കൊണ്ടു വന്ന ശേഷം നടക്കുന്ന രാജ്യസമർപ്പണ ചടങ്ങിലും പിതൃത്വ അവകാശത്തിന് കുറവില്ല. തുറമുഖത്തിന്‍റെ വികസനം പൊതുജനം തൊട്ടറിയണമെങ്കിൽ ഇനിയും വർഷങ്ങൾ കാത്തിരിക്കണം. തുറമുഖ നിർമാണ പ്രവർത്തനം ഇഴഞ്ഞതുപോലെ കരയിലെ നിർമാണ പ്രവർത്തനങ്ങൾഇപ്പോഴും ഒച്ചിഴയും പോലെയാ ണ്. ഇതിനു പരിഹാരം കാണാൻ ആരുമില്ല താനും. തിരുവിതാംകൂർ ദിവാൻ മുതൽ മുൻ മന്ത്രി എം.വി. രാഘവൻ വരെ സ്വപ്നംകണ്ട വിഴിഞ്ഞത്തിന്‍റെ വികസന സാധ്യത സഫലമാക്കിയത് ഉമ്മൻ ചാണ്ടി സർക്കാരിന്‍റെ അവസാന കാലത്താണ്. തൊട്ട് മുൻപ് വി.എസ്. അച്യുതാനന്ദൻ സർക്കാരിന്‍റെ കാലത്ത് പദ്ധതിക്കെന്നപേരിൽ രണ്ടു തവണ ഉദ്ഘാടനം നടത്തിയെങ്കിലും ലക്ഷ്യം കാണാതെ അവസാനിച്ചു. ഒടുവിൽ നിയമപരമായ രീതിയിൽ ടെൻഡർ ക്ഷ ണിച്ച് , പാരിസ്ഥിതിക അംഗീകാരം ഉൾപ്പെടെയുള്ള കടമ്പകൾ കടന്ന് പൊതുജനങ്ങളുടെ അംഗീകാരത്തോടെ 2015 ഡിസംബർ അഞ്ചിന് ഉമ്മൻചാണ്ടി വിഴിഞ്ഞം അന്താരാഷ്ട്ര തുറമുഖത്തിന്‍റെ ഉദ്ഘാടനം ഔദ്യോഗികമായി നിർവഹിച്ച് പ്രവർത്തനങ്ങൾക്ക് തുടക്കം കുറിച്ചു. ആരംഭം ആവേശത്തോടെയായിരുന്നെങ്കിലും പിന്നെയെല്ലാം മന്ദഗതിയിലായി. പ്രകൃതിക്ഷോഭങ്ങളും മത്സ്യ ത്തൊഴിലാളികളുടെ അതിജീവന സമരവും നിർമാണത്തെ ബാധിച്ചെങ്കിലും പുലിമുട്ടു നിർമാണത്തിനാവശ്യമായ പാറയുടെ ലഭ്യതക്കുറവ് പ്രവർത്തനത്തെ പിന്നോട്ടടിച്ചു. കല്ലുകൾ കിട്ടാതെ നിർമാണത്തിന്‍റെ താളം തെറ്റിയപ്പോഴും സർക്കാർ ഏജൻസികൾ അനങ്ങിയില്ല. ഏറെ വിവാദങ്ങൾക്കുശേഷം അധികൃതർ ഇടപെട്ട് ആവശ്യമായ പാറക്കല്ലുകൾ ലഭ്യമാക്കി പുലിമുട്ടിനു പരിഹാരം കണ്ടപ്പോഴെക്കും വർഷങ്ങൾ പലതു കഴിഞ്ഞു. നിർമാണം തുടങ്ങി പത്തു വർഷത്തോടടുക്കുമ്പോഴും വികസനം കടലിൽ മാത്രം ഒതുങ്ങി. തുറമുഖം നിർമിച്ചു കപ്പലടുപ്പിക്കാൻ വ്യഗ്രത കാട്ടിയ അധികൃതർ കരയിലൂടെയുള്ള വികസനം മറന്നു. നാളെ തുറമുഖം രാജ്യത്തിനു സമർപ്പിക്കുന്ന ചടങ്ങു നടക്കുമ്പോഴും തുറമുഖത്തെ ബൈപ്പാസുമായി ബന്ധിപ്പിക്കുന്ന റോഡ് പണി തുടരും. കഷ്ടിച്ചു രണ്ടു കിലോമീറ്റർ പോലുമില്ലാത്ത റോഡിന്‍റെ നിർമാണം തുടങ്ങിയിട്ട് ഒൻപത് വർഷം കഴിഞ്ഞു. തുറമുഖ അനുബന്ധ വികസനത്തിനായി ഉമ്മാൻ ചാണ്ടി സർക്കാർ വിഴിഞ്ഞം, കോട്ടുകാൽ പഞ്ചായത്തുകളിൽ നിന്നായി ഏക്കർ കണക്കിനു വസ്തുക്കൾ മോഹവിലക്ക് ഏറ്റെടുത്ത് നൽകിയിരുന്നെങ്കിലും ആ ഭൂമിയിൽ നാളിതുവരെ ഒരു നിർമാണ പ്രവൃത്തികളും നടത്തിയിട്ടില്ല. ഇടതുപക്ഷ സർക്കാർ അധികാരത്തിൽ വന്നശേഷം തുറമുഖതീരത്തു തർക്കത്തിൽ കിടന്ന ഏകദേശം പന്ത്രണ്ടര ഏക്കറോളം വസ്തുക്കൾ ഏറ്റെടുത്തതു മാത്രമാണ് എടുത്ത് പറയാനുള്ളത്. വിഴിഞ്ഞത്തെ വികസന കുതിപ്പിൽ എത്തിക്കുമെന്ന് ഇടവിട്ട് മന്ത്രിമാർ പറയുന്ന റിംഗ് റോഡും, കാര്യമായ നടപടികൾ ഒന്നുമാകാത്ത റെയിൽവേയും ലക്ഷ്യം കാണണമെങ്കിൽ ഇനിയും വർഷങ്ങൾ വേണ്ടി വരും. ഇതൊന്നും നടത്താൻ ആർജവമില്ലെങ്കിലും തുറമുഖ നിർമാണത്തിന്‍റെ മൂന്നു ഘട്ടങ്ങളിൽ ഒന്നാംഘട്ടം മാത്രം പൂർത്തിയായ വേളയിലും അവകാശവാദത്തിനു കുറവില്ല.

അഭിനയ പരിശീലന വർക്ക്ഷോപ്പ്

തിരുവനന്തപുരം : അപർണ ഫൗണ്ടേഷൻ ട്രിവാൻഡ്രം ഹൈനസ് ലയണ്‍സ് ക്ലബിന്‍റെ സഹകരണത്തോടെ പ്രായോഗിക അഭിനയപരിശീലന വർക്ക്ഷോപ്പ് സംഘടിപ്പിക്കുന്നു. മേയ് ഒന്ന്, രണ്ട് ദിവസങ്ങളിൽ സെക്രട്ടേറിയറ്റിനു അടുത്തുള്ള പദ്മ കഫേയിലാണ് വർക്ക് ഷോപ്പ് സംഘടിപ്പിച്ചിട്ടുള്ളത്. രാവിലെ 9.30നു ചലച്ചിത്ര നടനും സംവിധായകനുമായ മധുപാലും ചലച്ചിത്ര നടനും നിർമാതാവും സംവിധായകനുമായ ശങ്കർ രാമകൃഷ്ണനും ചേർന്നു ചടങ്ങിന്‍റെ ഉദ്ഘാടനം നിർവഹിക്കും. നാടകസംവിധായകനും അഭിനേതാവും സെന്‍റർ ഫോർ പെർഫോമിംഗ് ആർട്സ് മുൻ മേധാവിയുമായ ഡോ. രാജാവാര്യരാണ് ക്യാന്പ് ഡയറക്ടർ. നടനും സംവിധായകനും നാടകരചയിതാവുമായ കെ. കലാധരൻ, നാടക സംവിധായകനും ആകാശവാണി ട്രെയിനിംഗ് സെന്‍റർ മുൻ ഡയറക്ടറുമായ എസ്. രാധാകൃഷ് ണൻ, നാടക പ്രവർത്തകനും നടനുമായ ഗിരീഷ് സോപാനം, തിരക്കഥാകൃത്തും നാടകരചയിതാവുമായ ഡോ. ടി. ആരോമൽ, അഭിനേത്രിയും നാടക പ്രവർത്തകയുമായ ഗിരിജ സുരേന്ദ്രൻ എന്നിവരാണ് രണ്ടുദിവസം നീണ്ടുനില്ക്കുന്ന പ്രായോഗിക അഭിനയ ക്ലാസുകൾ നയിക്കുന്നത്. രണ്ടിനു വൈകുന്നേരം 3.30ന് നടക്കുന്ന സമാപന സമ്മേളനം മുൻ ചീഫ് സെക്രട്ടറി കെ. ജയകുമാർ ഉദ്ഘാടനം ചെയ്യും. വർക്ക്ഷോപ്പിൽ പങ്കെടുത്തവർക്കുള്ള സർട്ടിഫിക്കറ്റ് വിതരണവും കെ. ജയകുമാർ നിർവഹിക്കും. രജിസ്ട്രേഷനു താല്പര്യമുള്ളവർ 9495376760 എന്ന നന്പറിൽ ബന്ധപ്പെടണം എന്ന് സംഘാടകർ അറിയിച്ചു.

സ്കൂൾ കുട്ടികൾ തയാറാക്കിയ ഉത്പന്നങ്ങളുടെ പ്രദർശനം ഇന്നു മാനവീയം വീഥിയിൽ

തിരുവനന്തപുരം: സംസ്ഥാനത്തെ യുപിസ്കൂൾ കുട്ടികൾ പഠനത്തിന്‍റെ ഭാഗമായി തയാറാക്കിയ വിവിധ ഉത്പന്നങ്ങളുടെ പ്രദർശനം ക്രീയേറ്റീവ് ഫെസ്റ്റ് എന്ന പേരിൽ ഇന്നു മാനവീയം വീഥിയിൽ നടക്കും. കൃഷി, പാചകം, പ്ലംബിംഗ്, കാർപെന്‍ററി, ഫാഷൻ ഡിസൈനിംഗ്, ഇലക്ട്രിക്കൽ, ഇലക്ട്രോണിക്സ് എന്നീ തൊഴിലുകളുടെ ഭാഗമായി തയാറാക്കിയ ഉത്പന്നങ്ങളാണ് ഇന്നു രാവിലെ 10 മുതൽ മാനവീയം വീഥിയിൽ നടക്കുന്ന ക്രീയേറ്റീവ് ഫെസ്റ്റിലെ സ്റ്റാളുകളിൽ കാണാനാകുകയെനന് സമഗ്ര ശിക്ഷാ കേരളം ജില്ലാ പ്രോജക്ട് കോ- ഓർഡിനേറ്റർ ഡോ. ബി. നജീബും എസ്എസ്കെ സ്റ്റാർസ് കണ്‍സൾട്ടന്‍റ് സി. രാധാകൃഷ്ണൻനായരും പത്രസമ്മേളനത്തിൽ അറിയിച്ചു. പൊതുവിദ്യാഭ്യാസ പാഠ്യപദ്ധതിയുടെ സുപ്രധാന മാറ്റമായ തൊഴിൽ ഉദ്ഗ്രഥിത വിദ്യാഭ്യാസം പഠന പ്രവർത്തനങ്ങൾക്ക് പിന്തുണ നൽകുന്നതിനാണ് സമഗ്ര ശിക്ഷാ കേരളം സ്റ്റാർസ് പദ്ധതിയിലെ ക്രീയേറ്റീവ് കോർണറുകളിലൂടെ ലക്ഷ്യമിടുന്നത്. സമഗ്ര ശിക്ഷാ കേരളയുടെ നേതൃത്വത്തിൽ കുസാറ്റുമായി സഹകരിച്ചാണ് ക്രീയേറ്റീവ് ഫെസ്റ്റ് സംഘടിപ്പിക്കുന്നത്. വൈകാതെ സംസ്ഥാനമൊട്ടാകെ 600 ക്രീയേറ്റീവ് കോർണറുകൾ സംഘടിപ്പിക്കും. ഒരു പഞ്ചായത്തിൽ ഒരു സർക്കാർ സ്കൂൾ എന്ന രീതിയിലാണ് പദ്ധതി നടപ്പാക്കുക. മാനവീയം വീഥിയിൽ നടക്കുന്ന പരിപാടി മന്ത്രി വി. ശിവൻകുട്ടി ഉദ്ഘാടനം ചെയ്യും. ആന്‍റണി രാജു എംഎൽഎ അധ്യക്ഷത വഹിക്കും.

ടിപ്പർലോറി തോട്ടിലേക്ക് മറിഞ്ഞു

പോത്തൻകോട്: ടിപ്പർ ലോറി തോട്ടിലേക്കു മറിഞ്ഞു ഡ്രൈവർ അത്ഭുതകരമായി രക്ഷപ്പെട്ടു. ചൊവ്വാഴ്ച പകൽ പ ന്ത്രണ്ടരയോടെയായിരുന്നു സംഭവം. ചേങ്കോട്ടുകോണം പോത്തൻകോട് റോഡിൽ ശാസ്തവട്ടം ജംഗ്ഷനു സമീപം വാവറകോണം ഇടറോഡിലേക്കു വീടുപണിക്കായി പാറയുമായി വന്ന ടിപ്പർ ലോറിയാണ് ശാസ്തവട്ടം തോട്ടിലേക്ക് മറിഞ്ഞത്. റോഡിന്‍റെ സംരക്ഷണഭിത്തി തകർന്നു. ഡ്രൈവർ നിസാര പരിക്കോടെ രക്ഷപ്പെട്ടു.

ഏഴുവയസുകാരന്‍റെ കാൽ‍ ക്ലോസറ്റില്‍ കുടുങ്ങി; ഫയര്‍ഫോഴ്‌സ് രക്ഷപ്പെടുത്തി

പേരൂര്‍ക്കട: ക്ലോസറ്റിനുള്ളില്‍ കാല്‍കുടുങ്ങിയ ഏഴുവയസുകാരനെ തിരുവനന്തപുരം നിലയത്തില്‍നിന്ന് ഫയര്‍ഫോഴ്‌സ് എത്തി രക്ഷപ്പെടുത്തി. ചൊവ്വാഴ്ച വൈകുന്നേരം ആറുമണിയോടുകൂടി പാറോട്ടുകോണത്തായിരുന്നു സംഭവം. മൈത്രി നഗര്‍ എംഎന്‍ആര്‍എ 82-എയില്‍ നൈജീരിയന്‍ യുവതി റൂഥര്‍ ഗിഫ്റ്റിന്‍റെ മകന്‍ എറിക് കിച്ച്യു ഡൂക്കിന്‍റെ വലതുകാലാണ് ക്ലോസറ്റിനുള്ളില്‍ കുടുങ്ങിയത്. കളിച്ചുകൊണ്ടിരുന്ന കളിപ്പാട്ടം ക്ലോസറ്റില്‍വീണതോടെ അതെടുക്കാനാണ് കുട്ടി ഇറങ്ങിയത്. വിവരമറിഞ്ഞു സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സുധീഷ് ചന്ദ്രന്‍റെ നേതൃത്വത്തില്‍ ഫയര്‍ ആൻഡ്് റസ്‌ക്യു ഓഫീസര്‍മാരായ ബി. ജീവന്‍, മഹേഷ് കുമാര്‍, പ്രമോദ്, സവിന്‍, അനില്‍കുമാര്‍, ഡ്രൈവര്‍ എസ്.പി. സജന്‍ എന്നിവര്‍ ചേര്‍ന്നു മുക്കാല്‍ മണിക്കൂര്‍ പരിശ്രമിച്ച് ക്ലോസറ്റ് പൊട്ടിച്ചാണ് കുട്ടിയെ രക്ഷപ്പെടുത്തിയത്. കാലിനു ചെറിയ മുറിവേറ്റ കുട്ടിയെ ആശുപത്രിയിലെത്തിച്ചു പ്രാഥമിക ചികിത്സ നല്‍കി.

അലക്ഷ്യമായി ചവറുകൾ കൂട്ടിയിട്ട് കത്തിച്ചത് പരിഭ്രാന്തി പരത്തി

പാറശാല: അലക്ഷ്യമായി ചവറുകൾ കൂട്ടിയിട്ടു കത്തിച്ചത് പരിഭ്രാന്തി സൃഷ്ടിച്ചു. പൊതുജനങ്ങളുടെ സമയോചിത ഇടപെടൽമൂലം ഒഴിവായത് വൻ ദുരന്തം. പാറശാല ബ്ലോക്ക് പഞ്ചത്തിലായിരുന്നു സംഭവം. വർഷങ്ങളായി ഉപയോഗ ശൂന്യമായി കിടക്കുകയായിരുന്ന പേപ്പറുകളാണ് ഇന്നലെ ഉച്ചയോടെ പഞ്ചായത്തിനു മുൻവശത്തിട്ടു കത്തിച്ചത്. തീ ആളിപ്പടരുകയും അമിതമായി പുക ഉയരുകയും ചെയ്തോതോടെ പഞ്ചായത്തിൽ വിവിധ ആവശ്യങ്ങൾക്കായി വന്ന പൊതുജനങ്ങൾക്ക് അസ്വസ്ഥയുണ്ടാവുകയും അവർ അധികൃതരോടു തീയണക്കാൻ ആവശ്യപ്പെടുകയും ചെയ്തു. എന്നാൽ അധികൃതർ ഷുഭിതരാവുകയാണ് ചെയ്തത്. തുടർന്ന് പൊതുജനങ്ങൾ സമീപത്തെ പൈപ്പിൽനിന്നും ബക്കറ്റിൽ വെള്ള ശേഖരിച്ചു ഒഴിച്ചുവെങ്കിലും തീ ശമിച്ചില്ല. അവർ തന്നെ ഫയർ ഫോഴ്സ് അതികൃതരെ വിളിച്ചു വരുത്തുകയായിരുന്നു. എന്നാൽ അടിയന്തിര ഘട്ടത്തിൽ ഇടപെട്ട പൊതുജനങ്ങളോടു കയർക്കുകയാണ് ബിഡിഒയും ജോയിന്‍റ് ബിഡിഒയും ചെയ്തത്. തീ കത്തിയതിന്‍റെ മുൻവശത്തു മെഡിക്കൽ സ്റ്റോർ, സഹകരണ സംഘം ഉൾപ്പെടെ ആറ് സ്ഥാപനങ്ങൾ പ്രവർത്തിക്കുന്നു. അതിലെ ജീവനക്കാർക്കും പുക അസ്വസ്ഥതയുണ്ടാക്കി.

സാമൂഹ്യവിരുദ്ധന്‍റെ മർദനത്തിൽ സിപിഎം നേതാവിനു പരിക്ക്

കാട്ടാക്കട: സിപിഐ നേതാവിനെ സാമൂഹ്യ വിരുദ്ധൻ മർദിച്ചു. പരിക്കേറ്റ നേതാവ് ചികിത്സ തേടി. സംഭവത്തിൽ പോലീസ് അന്വേഷണം വൈകുന്നതായി പരാതി. കാട്ടാക്കട ആമച്ചൽ സിപിഐ ലോക്കൽ കമ്മിറ്റി അംഗം കുരുതംകോട് സ്വദേശി രാജുവിനാണു ക്രൂരമായി മർദനമേറ്റത്. കുരുതംകോട് ജംഗ്ഷനിലെ റേഷൻകടയ്ക്കു സമീപം മറ്റെരാളോടു സംസാരിച്ചു നിൽക്കുകയായിരുന്ന രാജുവിന്‍റെ അടുത്ത് മദ്യപച്ചെത്തിയ യുവാവ് സംസാരിക്കുന്നതിനായി എത്തിയിരുന്നു. പിന്നീട് മറ്റു കാരണങ്ങളില്ലാതെ രാജുവിനെ മർദിക്കുകയായിരുന്നു. അടിയേറ്റു തറയിൽ വീണ രാജുവിനെ വലിച്ചിഴക്കുകയും ചെയ്തു. നാട്ടുകാർ ഓടിയെത്തിയതോടെ മദ്യപൻ രക്ഷപ്പെടുകയായിരുന്നു. തുടർന്നു നാട്ടുകാർ രാജുവിനെ മെഡിക്കൽ കോളജിൽ എത്തിച്ചു. കൈയ്ക്ക് പൊട്ടലുണ്ട്. മർദനമേറ്റ് ശരീരത്ത് ചതവുമുണ്ട്. ഇതു സംബന്ധിച്ച് രാജു കാട്ടാക്കട പോലീസിൽ പരാതി നൽകി. എന്നാൽ പ്രതിയെ പിടികൂടാൻ ഇതുവരെ കഴിഞ്ഞിട്ടില്ല. പോലീസ് അനാസ്ഥ കാട്ടുകയാണെന്നു രാജുവും പാർട്ടി നേതൃത്വവും പറയുന്നു. ‌ പ്രതിയെ ഉടൻ പിടികൂടിയില്ലെങ്കിൽ സമരത്തിലേക്കു നീങ്ങുമെന്നും അവർ പറയുന്നു. കഞ്ചാവിന്‍റെയും മദ്യ ത്തിന്‍റെ പിടിയിലാണ് ഇയാളെന്നും രാജു പറയുന്നു.

വിരമിക്കുന്നവര്‍ക്ക് യാത്രയയപ്പ് നല്‍കി

മെഡിക്കല്‍കോളജ്: സര്‍വീസില്‍ നിന്നും വിരമിക്കുന്ന മെഡിക്കല്‍ വിദ്യാഭ്യാസ ഡയറക്ടര്‍ ഡോ. തോമസ് മാത്യുവിനും മെഡിക്കല്‍ കോളജ് പ്രിന്‍സിപ്പല്‍ ഡോ. ലിനറ്റ് ജെ. മോറിസിനും യാത്രയയപ്പ് നല്‍കി. തിരുവനന്തപുരം എസ്എടി ആശുപത്രി ഹെല്‍ത്ത് എജ്യൂക്കേഷന്‍ സൊസൈറ്റിയുടെ ആഭിമുഖ്യത്തില്‍ മെഡിക്കല്‍ കോളജ് പ്രിന്‍സിപ്പല്‍ ഓഫീസ് കോണ്‍ഫറന്‍സ് ഹാളില്‍ നടന്ന പരിപാടിയില്‍ കടകംപള്ളി സുരേന്ദ്രന്‍ എംഎല്‍എ ഉപഹാരങ്ങള്‍ സമ്മാനിച്ചു. എസ്എടി ആശുപത്രി സൂപ്രണ്ട് ഡോ. എസ്. ബിന്ദു അധ്യക്ഷത വഹിച്ചു. ഡെപ്യൂട്ടി സൂപ്രണ്ട് ഡോ. എസ്. അജിത്ത്, വകുപ്പുമേധാവികളായ ഡോ. എസ്.വി. ബീന, ഡോ. മേരി ഐപ്പ്, ഡോ. എസ്. ലക്ഷ്മി, സൊസൈറ്റി എക്‌സിക്യൂട്ടീവ് കൗണ്‍സില്‍ അംഗം എസ്.എസ്. രാജലാല്‍, എം.ജെ. നിസാം, അഡ്മിനിസ്‌ട്രേറ്റീവ് ഓഫീസര്‍ യു. സുഭാഷ് എന്നിവര്‍ പങ്കെടുത്തു.

ബ്രഡിൽ ഒളിപ്പിച്ചു എംഡിഎംഎ കടത്തിയ കേസ്: പ്രതികൾ പിടിയിൽ

കാട്ടാക്കട: കാട്ടാക്കടയിൽ ബ്രഡിൽ ഒളിപ്പിച്ച നിലയിൽ 200 ഗ്രാം എംഡിഎംഎയുമായി കൊലക്കേസ് പ്രതി ഉൾപ്പെടെ പിടിയിലായ സംഭവത്തിലെ പ്രധാന പ്രതിയും കൂട്ടാളിയും പിടിയിൽ. പ്രധാന പ്രതി കൊല്ലം മുതുകുളം കുളത്തൂർക്കോണത്ത് നന്ദു ഭവനിൽ നന്ദു വി. നായർ (24) ഇയാളുടെ കൂട്ടാളി കോഴിക്കോട് ചെറുമണ്ണാരം പറമ്പിൽ വീട്ടിൽ ഉസ്മിനാൽ അഫാൻ (23)എന്നിവരാണു മംഗളൂരുവിൽ നിന്നും കാട്ടാക്കട പോലിസിന്‍റെ പിടിയിലായത്. കഴിഞ്ഞ മാസം 23 നാണു കാട്ടാക്കട പോലീസ് സ്റ്റേഷനിലെ പത്തോളം കേസുകളിലെ പ്രതിയായ വിഷ്ണുവിന്‍റെ ആമച്ചലിലുള്ള വീട്ടിൽനിന്നും 200 ഗ്രാം എംഡിഎംഎ പോലീസ് കണ്ടെടുത്തത്. ഇയാൾക്കൊപ്പം ഇവിടെ ഉണ്ടായിരുന്ന പൂജപ്പുര സ്വദേശിയും നിരവധി കേസിലെ പ്രതിയും കൊലക്കേസിൽ ജാമ്യത്തിൽ കഴിയുന്നയാളുമായ അനൂപുമാണ് അന്ന് പിടിയിലായത്. ഇവരെ ചോദ്യം ചെയ്തതിൽ നിന്നും ബംഗളൂരുവിൽനിന്നാണ് കഞ്ചാവെത്തിക്കുന്നതെന്നും ഇതിന്‍റെ പ്രധാനികളെകുറിച്ചുള്ള വിവരങ്ങളും ലഭിച്ചിരുന്നു. ഇതിന്‍റെ അടിസ്ഥാനത്തിൽ പോലീസ് അന്വേഷണം ഊർജിതപെടുത്തുകയും പ്രധാന പ്രതി ഉൾപ്പെടെ രണ്ടുപേരെ പിടികൂടുകയുമായിരുന്നു. പ്രതികളെ കോടതി റിമാൻഡ് ചെയ്തു.

ആദിശേഖർ വധക്കേസ്: വിധി പറയുന്നത് മേയ് ആറിലേക്കു മാറ്റി

തിരുവനന്തപുരം: പത്താം ക്ലാസ് വിദ്യാർഥി ആദിശേഖറിനെ കാറിടിച്ചു കൊലപ്പെടുത്തിയ കേസിൽ വിധി പറയുന്നതു മേയ് ആറിലേ ക്കു മാറ്റി. നടപടിക്രമങ്ങൾ പൂർത്തിയാക്കാൻ സമയമെടുക്കുമെന്നു ചൂണ്ടിക്കാട്ടിയാണു കോടതിയുടെ നടപടി. തിരുവനന്തപുരം ആറാം അഡീഷണൽ സെഷൻസ് കോടതിയാണ് കേസ് പരിഗണിക്കുന്നത്. തിരുവനന്തപുരം പൂവച്ചൽ സ്വദേശി പ്രിയരഞ്ജനാണ് കേസിലെ പ്രതി. പൂവച്ചൽ പുളിങ്കോട് ഭദ്രകാളി ക്ഷേത്രത്തിന്‍റെ മതിലിൽ പ്രിയരഞ്ജൻ മൂത്രമൊഴിച്ചതിനെ ആദിശേഖർ ചോദ്യം ചെയ്തിരുന്നു. ഇതിലുള്ള വൈരാഗ്യം നിമിത്തം ഓഗസ്റ്റ് 30 ന് ആദിശേഖറിനെ പ്രതി കാറിടിച്ചു കൊലപ്പെടുത്തുകയായി രുന്നുവെന്നാണ് കേസ്. ക്ഷേത്രത്തിനു സമീപത്തെ റോഡിൽ സൈക്കിളിൽ കയറാൻ ആദിശേഖർ ശ്രമിക്കുന്നതിനിടെ പിന്നിലൂടെ കാറിലെത്തിയ പ്രതി ഇടിച്ചു തെറിപ്പിച്ചശേഷം നിർത്താതെ ഓടിച്ചു പോവുകയായിരുന്നു. ഭാര്യ വിദേശത്തു ജോലി ചെയ്യുകയാണെന്നും അവരുമായി ഫോണിൽ സംസാരിച്ചുകൊണ്ടു കാർ മുന്നോട്ടെടുത്തപ്പോൾ സൈക്കിളിൽ ഇടിച്ചതാണെന്നുമായിരുന്നു പ്രിയരഞ്ജന്‍റെ വാദം. പുതിയ ഇലക്ട്രിക് കാറായിരുന്നതിനാൽ പരിചയക്കുറവുമുണ്ടായിരുന്നു. തനിക്കെതിരെ കൊ ലപാതകക്കുറ്റം നിലനിൽക്കില്ലെന്നും ഹർജിയിൽ വാദിച്ചിരുന്നു.

വെണ്ണിയൂർ സെന്‍റ് ജോസഫ് മലങ്കര കത്തോലിക്കാ പള്ളി കൂദാശയും തിരുനാളും

വിഴിഞ്ഞം: വെണ്ണിയൂർ സെന്‍റ് ജോസഫ് മലങ്കര സുറിയാനി കത്തോലിക്കാ പള്ളിയുടെ കൂദാശയും പെരുന്നാൾ മഹാമഹവും ഇന്നാരംഭിക്കും. നാലിനു സമാപിക്കും. ദിവസവും വൈകുന്നേരം അഞ്ചിന് ജപമാല, സന്ധ്യാ പ്രാർഥന വിശുദ്ധ കുർബാന. ഇന്നു വൈകുന്നേരം ആഘോഷമായ കൊടിയേറ്റ് കർമ്മം, ഇടവക വികാരി ഫാ. സാമുവൽ പുത്തൻപുരയിൽ നിർവഹിക്കും. നാളെ നടക്കുന്ന വിശുദ്ധ കുർബാനയ്ക്ക് ഫാ. അഭിലാഷ് അറത്തലയ്ക്കൽ മുഖ്യകാർമികനായിരിക്കും. തുടർന്നു ഭക്തിനിർഭരമായ പെരുന്നാൾ റാസ. രണ്ടാം തീയതി സമൂഹ ദിവ്യബലി.ഫാ. അലോഷ്യസ് തുണ്ടുതട്ടിൽ, ഫാ. ബനഡിക്ട് വാറു വിള, ഫാ. അൽഫോൺസ് ഉഴുന്നുവിള എന്നിവർ കാർമികരായിരിക്കും. ശനിയാഴ്ച ഉച്ചയ്ക്കു രണ്ടരയ്ക്ക് ബിഷപുമാരായ ഡോ. തോമസ് മാർ യൗസേബിയോസ്, ഡോ. സാമുവൽ മാർ ഐറേനിയോസ്, യൂഹാനോൻ മാർ ക്രിസോസ്റ്റം എന്നിവർക്കു സ്വീകരണം. തുടർന്നു പള്ളി കൂദാശ, സ്നേഹവിരുന്ന്. ഞായറാഴ്ച രാവിലെ ആറരക്ക് പ്രഭാത പ്രാർഥന. കൊടിമരവും, പിയാത്തയും കൂദാശ. ആഘോഷമായ പൊന്തിഫിക്കൽ കുർബാന. പാറശാല ഭദ്രാസനാധ്യക്ഷൻ ഡോ. തോമസ് മാർ യൗസേബിയോസ് മുഖ്യകാർമികനായിരിക്കും. തുടർന്ന് ആദ്യകുർബാന സ്വീകരണം, കൊ ടിയിറക്ക്, സ്നേഹ ഭോജനം.

എംഡിഎംഎ സഹിതം യുവാവ് പിടിയില്‍

പേരൂര്‍ക്കട: മാരക ലഹരിമരുന്നായ എം ഡിഎംഎയുമായി യുവാവ് പേട്ട പോലീസിന്‍റെ പിടിയിലായി. തിരുമല പുന്നയ്ക്കാമുകള്‍ സ്വദേശി ആകാശ് (23) ആണ് പിടിയിലായത്. കൊച്ചുവേളി റെയില്‍വേ എക്‌സിറ്റ് ഗേറ്റിനു മുന്‍വശത്തുനിന്നാണ് ഇയാള്‍ പിടിയിലായത്. പേട്ട എസ്ഐ വിനോദ്കുമാറിനു ലഭിച്ച രഹസ്യവിവരത്തിന്‍റെ അടിസ്ഥാനത്തിലായിരുന്നു പരിശോധന. വാഹനത്തില്‍ സൂക്ഷിച്ചിരുന്ന 13.91 ഗ്രാം കഞ്ചാവാണ് പോലീസ് പിടിച്ചെടുത്തത്. അറസ്റ്റിലായ പ്രതിയെ കോടതിയില്‍ റിമാന്‍ഡ് ചെയ്തു

പൊന്നെടുത്തകുഴി സെന്‍റ് ജോർജ് പള്ളി തിരുനാൾ കൊടിയേറി

പൂവച്ചൽ: പൂവച്ചൽ പൊന്നെടുത്തകുഴി സെന്‍റ് ജോർജ് മലങ്കര കത്തോലിക്ക പള്ളിയിലെ ഇടവക തിരുനാളിനു വികാരി ഫാ. ജോഷ്വാ തേനുവിള കൊടിയേറ്റി. മേയ് നാലിന് ആഘോഷമായ ദിവ്യബലിയോടെ സമാപിക്കും. ഇന്നും നാളെയും രണ്ടിനും വൈകുന്നേരം ആറിനു നടക്കുന്ന വിശുദ്ധ കുർബാനകൾക്ക് ഫാ. ജോബിൻ പൂവണ്ണത്തിൽ, ഫാ. ഫിലിപ്പ്, തോമസ് പൊറ്റപ്പുരയിടം, ഫാ. ജെറോം കുന്നുംപുറത്ത് എന്നിവർ മുഖ്യകാർമികരാകും. തുടർന്നു കുടുംബ നവീകരണ ധ്യാനം. മൂന്നിനു വൈകുന്നേരം ആറിനു വിശുദ്ധ കുർബാനയ്ക്ക് ഫാ. ജോബിൻ പോൾ കാർമികനാകും. തുടർന്നു തിരുനാൾ റാസ. നാലിനു വൈകുന്നേരം 6.30-ന് സമൂഹദിവ്യബലിക്ക് ഫാ. സേവ്യർ കോണത്തുവിള, ഫാ. മേക്കുംകര ജോസഫ്, ഫാ. കാരവിള ബോസ്‌കോ, ഫാ. തോമസ് പാറയിൽക്കട എന്നിവർ കാർമികരാകും

നെടുമങ്ങാട് ബൈബിൾ കൺവൻഷൻ ഇന്നു തുടങ്ങും

ഇത്തവണത്തേത് 13-ാമത് കൺവൻഷൻ നെടുമങ്ങാട്: നെയ്യാറ്റിൻകര ലത്തീൻ രൂപതയുടെ ആഭിമുഖ്യത്തിൽ നെടുമങ്ങാട് റീജണൽ സംഘടിപ്പിച്ചു വരുന്ന പതിമൂന്നാമത് ബൈബിൾ കൺവൻഷൻ ഇന്നു തുടങ്ങും. അട്ടപ്പാടി സെഹിയോൻ ധ്യാനകേന്ദ്രം ഡയറക്ടർ ഫാ. സോജി ഓലിക്കലും സംഘവും നേതൃത്വം നൽകും. ഇന്നു വൈകുന്നേരം 4.30നു വചന വായന, ജപമാല, പൊന്തിഫിക്കൽ സമൂഹ ദിവ്യബലി. നെയ്യാറ്റിൻകര രൂപത സഹ മെത്രാൻ റവ.ഡോ. ഡി സെൽവരാജൻ മുഖ്യകാർമികത്വം വഹിക്കും. നാളെ വൈകുന്നേരം 4.30ന് വചന വായന, ജപമാല, പൊന്തിഫിക്കൽ സമൂഹ ദിവ്യബലി. നെയ്യാറ്റിൻകര രൂപത വികാരി ജനറാൾ മോൺ. ഡോ. വിൻസന്‍റ് കെ. പീറ്റർ മുഖ്യകാർമികത്വം വഹിക്കും. രണ്ടിനു വൈകുന്നേരം 4.30ന് വചന വായന, ജപമാല, പൊന്തിഫിക്കൽ സമൂഹ ദിവ്യബലി. ആര്യനാട് ഫെറോന വികാരി ഫാ. ഷൈജു ദാസ് മുഖ്യകാർമികത്വം വഹിക്കും. മൂന്നിനു രാവിലെ ഒന്പതുമുതൽ ഏകദിന ധ്യാനം, വൈകുന്നേരം 4.30ന് വചന വായന, ജപമാല, പൊന്തിഫിക്കൽ സമൂഹ ദിവ്യബലി. നെടുമങ്ങാട് റീജണൽ കോ-ഓർഡിനേറ്റർ മോൺ. റൂഫസ് പയസ്‌ലീൻ മുഖ്യകാർമികത്വം വഹിക്കും. നാലിനു വൈകുന്നേരം വൈകുന്നേരം 4.30ന് വചന വായന, ജപമാല, പൊന്തിഫിക്കൽ സമൂഹ ദിവ്യബലി. നെയ്യാറ്റിൻകര രൂപത മെത്രാൻ റവ. ഡോ. വിൻസന്‍റ് സാമുവൽ മുഖ്യകാർമികത്വം വഹിക്കും.

പ്രധാനമന്ത്രിയുടെ വരവ് : ഏറ്റവും വലിയ സുരക്ഷാസന്നാഹം ഒരുക്കി വിഴിഞ്ഞം തീരം

വിഴിഞ്ഞം: കേരളത്തിന്‍റെ വികസന പദ്ധതിയായ അന്താരാഷ്ട്ര തുറമുഖം രാഷ്ട്രത്തിനു സമർപ്പിക്കാനെത്തുന്ന പ്രധാനമന്ത്രിക്കായികേരളം കണ്ടിട്ടുള്ളതിൽവച്ച് ഏറ്റവും വലിയ സുരക്ഷാ സന്നാഹത്തിനു വിഴിഞ്ഞം സാക്ഷ്യം വഹിക്കും. ഇന്ത്യയുടെ ഇന്നത്തെസാഹചര്യം കണക്കിലെടുത്ത് കടലിലും കരയിലും പഴുതടച്ചുള്ള സുരക്ഷയൊരുക്കാനാണ് അധികൃതരുടെ തീരുമാനം. കേരളത്തിലെ വിവിധ സ്റ്റേഷനുകളിലും ക്യാമ്പുകളിൽ നിന്നുമായി 2500 ഓളം പോലീസുകാർ കരയിലെ ക്രമസമാധാനപാലനത്തിനുണ്ടാകും. ഉന്നത പോലീസ് ഉദ്യോഗസ്ഥരുടെ മേൽനോട്ടത്തിൽ തുറമുഖമേഖലയിലും വിഴിഞ്ഞത്തുമായി ഇവരെ വിന്യസിക്കും. കടലിൽ സേനകളുടെ യുദ്ധക്കപ്പലുകളും പട്രോൾ ബോട്ടുകളും ഇന്നു മുതൽ അണിനിരക്കും. വിവിധതീരദേശ സ്റ്റേഷനിൽ നിന്നുള്ള അഞ്ച് ഇന്‍റർസെപ്റ്റർ ബോട്ടുകൾ രംഗത്തിറങ്ങും . വിഴിഞ്ഞം തീരദേശ സ്റ്റേഷനിലെ പോലീസുകാർക്കു പുറമെ 50 പേർ അധികമായി കടൽ പട്രോളിംഗിനുണ്ടാകും. കോസ്റ്റ് ഗാർഡിന്‍റെ വിഴിഞ്ഞം, കൊച്ചിൻ യൂണിറ്റിൽ നിന്നുമായി അഞ്ച് കപ്പലുകൾ സുരക്ഷയൊരുക്കാൻ വിഴിഞ്ഞം കടലിൽ നങ്കൂരമിടും. ആവശ്യമെങ്കിൽ നിമിഷ നേരം കൊണ്ട് വിഴിഞ്ഞത്ത് എത്താൻ പാകത്തിൽ ഹെലികോപ്റ്ററുകളും സഞ്ജമാക്കി നിർത്തുമെന്നും അധികൃതർ പറയുന്നു. കൂടാതെ ഉൾക്കടലിൽ നേവിയുടെ വമ്പൻ യുദ്ധക്കപ്പലുകളും സർവ്വസന്നാഹങ്ങളുമായി നിലയുറപ്പിക്കും. കടൽ യാനങ്ങളും കപ്പലുകളും പ്രധാനമന്ത്രി വന്നു മടങ്ങുന്നതുവരെ കർശന നിരീക്ഷണ വിധേയമാക്കുമെന്നും അധികൃതർ അറിയിച്ചു. ചാരക്കണ്ണുകളുമായി എയർ ഫോഴ്സിന്‍റെ ഹെലികോപ്റ്ററുകളും വിമാനങ്ങളു ആകാശത്ത് വട്ടമിട്ടു പറന്നു നിരീക്ഷണം നടത്തും. ഇതിനുപരി മറൈൻ എൻഫോഴ്സ്മെന്‍റിന്‍റെ മറൈൻ ആംബുലൻസും കടലിൽ മുഴുസമയം ഉണ്ടാകും. എന്നാൽ എസ്പിജിയുടെ പൂർണ നിയന്ത്രണത്തിലും നിർദേശത്തിലുമായിരിക്കും എല്ലാ വിഭാഗത്തിന്‍റെയും സുരക്ഷയൊരുക്കൽ. ഉദ്ഘാടന ദിവസം തുറമുഖത്തു ചരക്കുമായി കപ്പൽ അടുക്കുന്നതിനു നിയന്ത്രണമില്ലെന്ന് അധികൃതർ പറയുന്നു. എന്നാൽ സുരക്ഷാ കാരണങ്ങളാൽ എസ്പിജിയുടെ നിർദേശാനുസരണം കാര്യങ്ങൾ തീരുമാനിക്കുമെന്നും അറിയുന്നു. തുറമുഖം ഇന്നു മുതൽ എസ്പിജിയുടെ നിയന്ത്രണത്തിലായി. ഇവരുടെ നിർദേശാനുസരണം ഉദ്ഘാടന വേദിയുടെയും ഹെലിപാഡിന്‍റെ നിർമാണവും ഏതാണ്ട് പൂർത്തിയായി. കർശന പരിശോധനകൾക്കു ശേഷമാണു വേദി ഉൾപ്പെടെയുള്ള നിർമാണത്തിനെത്തിയ തൊഴിലാളികളെയും കടത്തിവിട്ടത്.

ഉറിയാക്കോട്ടെ എസ് വളവ് ഇനിയും നിവർത്തിയില്ല

പൂവച്ചൽ: ഉറിയാക്കോട്ടെ എസ് വളവ് മാറ്റാനുള്ള നടപടികൾ നീളുന്നതായി പരാതി. കൊടും വളവുകളുള്ള റോഡിൽ അപകടങ്ങൾ പതിവാണ്. മൂന്നുമാസങ്ങൾക്കുമുൻപ് ഇവിടെ നിയന്ത്രണംവിട്ട കാർ സമീപത്തെ പറമ്പിലേക്കു മറിഞ്ഞെങ്കിലും ആളപായമുണ്ടായില്ല. എസ് വളവിനെക്കുറിച്ചുള്ള നാട്ടുകാരുടെ നിരന്തരമായ പരാതിയെത്തുടർന്നു നാലുവർഷം മുൻപ് സ്ഥലത്തെത്തിയ മന്ത്രി മുഹമ്മദ് റിയാസും മറ്റു ജനപ്രതിനിധികളും റോഡും പരിസരവും പരിശോധിച്ചശേഷം ഉടൻ പരിഹാരം കാണുമെന്നു നാട്ടുകാർക്ക് ഉറപ്പു നൽകിയെങ്കിലും നാളിതുവരെ വളവു നിവർന്നില്ല. വാഹനാപകടങ്ങൾ പതിവായതിനെത്തുടർന്നു നാട്ടുകാർ പ്രതിഷേധവുമായി വീണ്ടും രംഗത്തെത്തിയതിനെത്തുടർന്ന് ആഴ്ചകൾക്കുമുൻപ് റോഡ് നിവർത്താനാണെന്നുപറഞ്ഞ് സമീപത്തെ പറമ്പിൽ കല്ലുകൾ സ്ഥാപിച്ചെങ്കിലും തുടർനടപടികളൊന്നും ഉണ്ടായില്ല.വളവ് നിവർത്താനുള്ള നടപടികൾ വേഗത്തിലാക്കണമെന്നു നാട്ടുകാർ ആവശ്യപ്പെട്ടു. റോഡ് നിവർക്കുന്നതിനുവേണ്ടി വസ്തു ഏറ്റെടുക്കൽ, നഷ്ടപരിഹാരം നൽകൽ എന്നിവയെ സംബന്ധിച്ച് നാട്ടുകാർക്ക് അറിയിപ്പൊന്നും നൽകിയിട്ടില്ല. നാട്ടുകാരുടെ പങ്കാളിത്തത്തോടെ അടിയന്തരമായി വളവ് നിവർത്തണമെന്നും അല്ലാത്തപക്ഷം സമരപരിപാടികൾ സംഘടിപ്പിക്കുമെന്നും നാട്ടുകാർ പറയുന്നു. അപകടകെണിയുമായി ഉറിയാക്കോട് ജംഗ്ഷൻ നവീകരിക്കാൻ 2.5 കോടി വകയിരുത്തിയെന്നാണു പറയുന്നത്. എന്നാൽ നടപടികൾ ഒന്നും ആരംഭിച്ചിട്ടില്ല. കാട്ടാക്കട-വെള്ളനാട് റോഡിലെ ഉറിയാക്കോട് ജംഗ്ഷനിൽ റോഡ് തകർന്നത് അപകടകെണിയാണ്. നിരവധി വാഹനങ്ങളാണ് ദിവസവും ഇവിടെ അപകടത്തിൽപെടുന്നത്. മുളയറയിൽനിന്നും ഉറിയാക്കോട് വഴി വെള്ളനാട്ടേക്ക് വരുന്നതിനായി തിരിയുന്ന വാഹനങ്ങളും ഇവിടെ അപകടത്തിൽപെടുന്നുണ്ട്. ഇരുചക്രവാഹനങ്ങളാണ് അപകടത്തിൽപെടുന്നതിൽ അധികവും. കാട്ടാക്കട ഉൾപ്പടെയുള്ള പ്രദേശങ്ങളിൽനിന്ന് നെടുമങ്ങാട്ടേയ്ക്കും വെള്ളനാട്ടേയ്ക്കും പോകുന്ന തിരക്കേറിയ റോഡാണിത്. കൊടുംവളവായ ഇവിടെ ആറു മാസത്തിനിടെ മുപ്പതിലധികം ഇരുചക്രവാഹനങ്ങൾ അപകടത്തിൽപെട്ടിട്ടുണ്ടെന്നു സമീപത്തെ ഓട്ടോസ്റ്റാന്‍റിലെ ഡ്രൈവർമാർ പറഞ്ഞു. മുൻപ് മുളയറ ഉറിയാക്കോട് റോഡിന്‍റെ നവീകരണത്തിനായി ഇറക്കിയ മെറ്റലുകൾ ജംഗ്ഷനിൽ അപകടത്തിന് ഇടയാക്കിയിരുന്നു.

വിതുര ശിവൻകോവിൽ ജംഗ്ഷനിലെ പാലം പുനർനിർമിക്കണമെന്ന് ആവശ്യം

വിതുര: പൊന്മുടിപ്പാതയിലെ വിതുര ശിവന്‍കോവില്‍ ജംഗ്ഷനിലുള്ള പാലം പുനർനിർമിക്കണമെന്ന ആവശ്യം ശക്തമാകുന്നു. നൂറ്റാണ്ടിന്‍റെ പഴക്കമുള്ള പാലം അപകടാവസ്ഥയിലാണെന്നും കൃത്യമായി അറ്റകുറ്റപ്പണി ചെയ്യാത്താണ് പ്രധാന കാരണമെന്നും നാട്ടുകാർ പറയുന്നു. പൊന്മുടിയിലേക്കുള്ള സുഗമ യാത്രയ്ക്കായി ഒരു നൂറ്റാണ്ടിനുമുമ്പു ബ്രിട്ടീഷുകാരാണ് കോട്ടിയത്തറ-തള്ളച്ചിറ തോടിനു കുറുകെ പാലം നിർമിച്ചത്. വലിയ ഒറ്റക്കല്ലുകള്‍ കൊണ്ടു പണിഞ്ഞ പാലത്തിനു മുകളിലൂടെ റോഡു നിര്‍മിക്കുകയായിരുന്നു. അടിഭാഗത്തെ കൽക്കെട്ട് ഇടിഞ്ഞ് കല്ലുകള്‍ ഇളകി മാറിയതും കൈവരികൾ പൊളിഞ്ഞതുമാണു പ്രധാന പ്രശ്നങ്ങൾ. റോഡിലെ വളവും അപകടസാധ്യത കൂട്ടുന്നു. ഇടുങ്ങിയ പാലത്തിലൂടെ വാഹനങ്ങള്‍ പോകുന്നത് ഏറെ ബുദ്ധിമുട്ടിയാണ്. അവധി ദിവസങ്ങളില്‍ പൊന്മുടിയിലേക്കും പേപ്പാറയിലേക്കുമായി നൂറുകണക്കിനു വാഹനങ്ങളാണ് ഇതു വഴി പോകുന്നത്. ബോണക്കാട്, കല്ലാര്‍, ഐസർ, ജെഴ്സിഫാം എന്നിവിടങ്ങളിലേക്കും ആദിവാസി മേഖലകളായ പൊടിയക്കാല, മണലി, ആനപ്പാറ എന്നിവിടങ്ങളിലേക്കു പോകണമെങ്കിലും പാലത്തെ ആശ്രയിക്കണം. പഴകുറ്റി പൊന്മുടിപ്പാത നവീകരണത്തിന്‍റെ ഭാഗമായി പാലം പൊളിച്ചു പണിയുമെന്ന പ്രതീക്ഷയിലാണ് നാട്ടുകാർ.

ശുചീകരണമില്ല; ഇഴജന്തു ഭീഷണിയിൽ കറ്റച്ചക്കോണം സ്കൂൾ ഗ്രൗണ്ട്

പേരൂർക്കട: ശുചീകരണം ഇല്ലാതായതോടെ പാറോട്ടുകോണം കറ്റച്ചക്കോണം സ്കൂളിന്‍റെ വകയായയുള്ള കളിസ്ഥലം കാടുകയറിയ നിലയിൽ. ഏകദേശം 50 സെന്‍റ് വരുന്ന കളിസ്ഥലമാണ് കാടുകയറി കിടക്കുന്നത്. സമീപത്തെ സ്വകാര്യവ്യക്തിയുടെ ഭൂമിയായിരുന്നു പ്രസ്തുത കളിസ്ഥലം. പിന്നീട് സ്കൂളിനായി ഈ ഭൂമി വിട്ടുനൽകുകയായിരുന്നു. എന്നാൽ ഇവരുടെ പിൻതലമുറക്കാരുമായി നിലനിൽക്കുന്ന തർക്കമാണ് ശുചീകരണം നടക്കാത്തതിനുള്ള കാരണം. ഫുട്ബോൾ, ക്രിക്കറ്റ് തുടങ്ങിയ മത്സരങ്ങൾ നടത്താറുള്ള സ്കൂൾ ഗ്രൗണ്ടിൽ പല പ്രമുഖ ഇന്ത്യൻ ഫുട്ബോളർമാരും മാറ്റുരച്ചിട്ടുണ്ട്. ഗ്രൗണ്ടിന്‍റെ ചുറ്റുമതിൽ റോഡിന്‍റെ ഭാഗത്തു വന്നവസാനിക്കുകയാണ്. നാലുപാടും കാടുകയറി കിടക്കുന്നതിനാൽ റോഡിന്‍റെ ഭാഗത്തുനിന്ന് നോക്കിയാൽ ഗ്രൗണ്ട് പൂർണമായും തിരിച്ചറിയാൻ സാധിക്കില്ല. വൈകുന്നേരങ്ങളിൽ സ്കൂൾ കുട്ടികൾ ഈ ഗ്രൗണ്ടിലാണ് വിനോദങ്ങളിൽ ഏർപ്പെടുന്നത്. ചിലപ്പോൾ ഇതു രാത്രി 7 മണി വരെ നീളാറുണ്ട്. അതുകൊണ്ടുതന്നെ ഇഴജന്തുക്കളെ ഭയന്നു വേണം ഗ്രൗണ്ട് ഉപയോഗപ്പെടുത്താൻ. സ്കൂളിനായി ഫണ്ട് അനുവദിക്കപ്പെട്ടു വികസന പ്രവർത്തനങ്ങൾ നടക്കുമ്പോഴും വിനോദോപാധിയായ സ്കൂൾ ഗ്രൗണ്ട് അവഗണിക്കപ്പെടുന്നതായി നാട്ടുകാർ പറയുന്നു. ഗ്രൗണ്ടിന്‍റെ നാലുപാടുമുള്ള കാടുകൾ വെട്ടിത്തെളിച്ചാൽ മാത്രമേ കുട്ടികൾക്കു സുരക്ഷിതമായി വിനോദങ്ങളിൽ ഏർപ്പെടാൻ സാധിക്കൂ. നല്ലൊരു കായിക തലമുറയെ വാർത്തെടുക്കാൻ ഉപയുക്തമായ സ്കൂൾ ഗ്രൗണ്ട് അനാഥമായി കിടക്കുന്നതിൽ പ്രദേശവാസികൾക്ക് അമർഷമുണ്ട്.

ബൈക്ക് പെട്രോള്‍ ഒഴിച്ച് കത്തിച്ച യുവാവ് അറസ്റ്റില്‍

പേരൂര്‍ക്കട: വീടിന്‍റെ കോമ്പൗണ്ടില്‍ നിർത്തിയിട്ടിരുന്ന ബൈക്ക് പെട്രോള്‍ ഒഴിച്ചു കത്തിച്ചയാളെ പേരൂര്‍ക്കട പോലീസ് അറസ്റ്റുചെയ്തു. ഏണിക്കര സ്വദേശി അനില്‍കുമാര്‍ (42) ആണ് അറസ്റ്റിലായത്. ഞായറാഴ്ച രാത്രി 10.30നായിരുന്നു കേസിനാസ്പദമായ സംഭവം. കുടപ്പനക്കുന്ന് ദയാനഗര്‍ പണയില്‍ വീട്ടില്‍ അനീഷിന്‍റെ (40) ബൈക്കാണ് അഗ്നിക്കിരയായത്. അനീഷിന്‍റെ ബന്ധുവാണ് അനില്‍കുമാര്‍. വീട്ടുകാര്‍ തമ്മിലുണ്ടായിരുന്ന തര്‍ക്കവും വ്യക്തിവിരോധവുമാണു വാഹനം കത്തിക്കാന്‍ കാരണമായത്. സംഭവദിവസം ഒരുകുപ്പി പെട്രോളുമായി അനീഷിന്‍റെ വീട്ടിലെത്തിയ അനില്‍കുമാര്‍ ബൈക്കില്‍ ഒഴിച്ചു തീ കത്തിക്കുകയായിരുന്നു. ബൈക്ക് ഏറെക്കുറെ കത്തിപ്പോയി. പേരൂര്‍ക്കട എസ്ഐമാരായ പ്രസാദ്, സുനില്‍, എഎസ്ഐ പ്രസന്നന്‍, ഗ്രേഡ് എസ്‌സിപിഒമാരായ സിബി, മനോജ്, ഹോം ഗാര്‍ഡ് രാജു എന്നിവരാണ് പ്രതിയെ പിടികൂടിയത്. ഇയാളെ കോടതിയില്‍ ഹാജരാക്കി.

പോക്‌സോ കേസില്‍ മധ്യവയസ്‌കനും പീഡനക്കേസില്‍ യുവാവും അറസ്റ്റില്‍

പേരൂര്‍ക്കട: പോക്‌സോ കേസില്‍ മധ്യവയസ്‌കനെയും യുവതിയെ പീഡിപ്പിച്ച കേസില്‍ യുവാവിനെയും തമ്പാനൂര്‍ പോലീസ് അറസ്റ്റുചെയ്തു. പൂന്തുറ പുത്തന്‍കര സ്വദേശി അബ്ദുള്‍ ഷിബു (50), മുട്ടത്തറ മാണിക്യവിളാകം സ്വദേശി എം. അന്‍സാര്‍ (22) എന്നിവരാണ് അറസ്റ്റിലായത്. അബ്ദുള്‍ ഷിബു ഓട്ടോറിക്ഷാ ഡ്രൈവറാണ്. പാറശാല സ്വദേശിനിയായ പെണ്‍കുട്ടിയെ പീഡിപ്പിച്ചതിനാണ് ഇയാള്‍ പിടിയിലായത്. വിവാഹ ബ്രോക്കറാണെന്ന വ്യാജേന പെണ്‍കുട്ടിയുടെ അമ്മയുമായി സൗഹൃദത്തിലായ ഇയാള്‍ ഗള്‍ഫില്‍നിന്നു വിവാഹാലോചനയുണ്ടെന്നു പറഞ്ഞ് പെണ്‍കുട്ടിയുമായും അടുത്തു. കുട്ടിയെ ഇയാള്‍ തമ്പാനൂര്‍ എസ്എസ് കോവില്‍ റോഡിനടുത്തുള്ള ലോഡ്ജിലെത്തിച്ചാണ് പീഡിപ്പിച്ചതെന്നാണു പരാതിയില്‍ പറയുന്നത്. ആലപ്പുഴ സ്വദേശിനിയായ 22 വയസുകാരിയെ പീഡിപ്പിച്ചതിനാണ് അന്‍സാര്‍ പിടിയിലായത്. ആഴ്ചകള്‍ക്കു മുമ്പായിരുന്നു കേസിനാസ്പദമായ സംഭവം. ഇരുവരെയും കോടതിയില്‍ ഹാജരാക്കി റിമാന്‍ഡ് ചെയ്തു.

പ്രധാനമന്ത്രിയുടെ വരവുംകാത്ത് വിഴിഞ്ഞം തുറമുഖം

വിഴിഞ്ഞം: പ്രധാനമന്ത്രി നരേന്ദ്ര മോദിയുടെ വരവിനായി വിഴിഞ്ഞം അന്താരാഷ്ട്ര തുറമുഖം തയാറെടുത്തു. കേരളത്തിന്‍റെയും ഇന്ത്യയുടെയും വികസന സ്വപ്നമായ തുറമുഖത്തെ രാജ്യത്തിനു സമർപ്പിക്കുന്ന ധന്യമുഹൂർത്തത്തിന് ഇനി മൂന്നുനാൾ മാത്രം ബാക്കി നിൽക്കെ ഒരുക്കങ്ങൾ അവസാന ഘട്ടത്തിലേക്കു കടന്നു. ഇന്നലെ രാവിലെ മുതൽ തുറമുഖം എസ്പിജിയുടെ നിയന്ത്രണത്തിലായി . ഇനി മേയ് രണ്ടിനു പ്രധാനമന്ത്രി വന്നു മടങ്ങും വരെ കാര്യങ്ങൾ എസ്പിജി ഉദ്യോഗസ്ഥർ തീരുമാനിക്കും. കേരളത്തിന്‍റെ മുഖച്ഛായ തന്നെ മാറ്റിമറിക്കുന്ന പദ്ധതിയുടെ സമർപ്പണം ഒരുനാടിന്‍റെ ആഘോഷമായി മാറ്റാനാണ് അധികൃതരുടെ തീരുമാനം. ഉദ്ഘാടനത്തിനു സാക്ഷികളാകാൻ നാടിന്‍റെ നാനാ ദിക്കിൽ നിന്നെത്തുന്ന ആയിരങ്ങളെ വരവേൽക്കാനുള്ള വേദി നിർമാണം തുടങ്ങിക്കഴിഞ്ഞു. തുറമുഖ കവാടത്തിനു വലതു ഭാഗത്തായി പതിനായിരം പേരെ പ്രതീക്ഷിച്ചാണ് പടുകൂറ്റൻ വേദിയൊരുക്കുന്നത്. ആകാശമാർഗമെത്തുന്ന പ്രധാനമന്ത്രിയെ വരവേൽക്കാൻ തുറമുഖ ഓഫീസിനും, വേദിക്കും കവാടത്തിനും സമീപവുമായി മൂന്ന് ഹെലിപാടുകളും ഒരുങ്ങുന്നുണ്ട്. പ്രത്യേക സഹാചര്യം കണക്കിലെടുത്ത് തിരുവനന്തപുരവും വിഴിഞ്ഞവും ഇന്നുമുതൽ കനത്ത സുരക്ഷയിലാണ്. ഐജിഎസ്‌വിമാർ ഉൾപ്പെടെ പോലീസിന്‍റെയും, മിലിറ്ററിയുടെയും, എസ്പിജി യുടെയും ഉന്നത ഉദ്യോഗസ്ഥർ, ചീഫ് സെക്രട്ടറി, ജില്ലാ കളക്ടർ, ഫയർ ഫോഴ്സ്, കെഎസ്ഇബി ഉൾപ്പെടെ വിവിധ വകുപ്പുകളുടെ ഉന്നതർ എന്നിവരുമായുള്ള അവലോകന യോഗം ഇന്നലെ രാവിലെ തുറമുഖ ഓഫീസിൽ നടന്നു. വേദിയിലെയും കപ്പലുകൾ അടുക്കുന്ന വാർഫ്,പുലിമുട്ട് എന്നിവിടങ്ങളിലെയും സുരക്ഷ അധികൃതർ വിലയിരുത്തി. കരയിലെ സുരക്ഷക്കൊപ്പം കടലിലും സേനകളുടെ വൻ പടയുണ്ടാകും. കോസ്റ്റ് ഗാർഡിന്‍റെ സി. 441, സി.427, അതിവേഗ കപ്പൽ അനഘ്, നേവിയുടെ കപ്പലുകൾ, തീരദേശ പോലീസിന്‍റെയും, മറൈൻ എൻഫോഴ്സ്മെന്‍റിന്‍റെയും പട്രോൾ ബോട്ടുകളും കടലിൽ നിലയുറപ്പിച്ചു നിരീക്ഷണം ആരംഭിച്ചു. കൂടാതെ തുറമുഖ കമ്പനിയുടെ പ്രത്യേക പരിശീലനം നേടിയ പത്ത് റാപ്പിഡ് ആക്ഷൻ അംഗങ്ങളെയും സുരക്ഷക്കായി നിയോഗിക്കും. പരിപാടിയിൽ പങ്കെടുക്കാനെത്തുന്നവരെ കർശനമായി നിരീക്കാനുള്ള സംവിധാനവും ഉണ്ടാകും. ഉന്നതരുടെ നിർദേശങ്ങൾക്കും നിയന്ത്രണങ്ങൾക്കും നടുവിലാകും വിഴിഞ്ഞം തുറമുഖത്തിന്‍റെ ഇനിയുള്ള ദിവസങ്ങൾ. എസ്. രാജേന്ദ്രകുമാർ

കഴക്കൂട്ടം സൈനിക സ്കൂളിൽ 1983 ബാച്ചിലെ പൂർവവിദ്യാർഥികൾ സന്ദർശനം നടത്തി

തിരുവനന്തപുരം: 1983 ബാച്ചിലെ ഓൾഡ് ബോയ്സ് അസോസിയേഷൻ പൂർവ വിദ്യാർഥികൾ അവരുടെ മാതൃസ്ഥാപനമായ കഴക്കൂട്ടം സൈനിക് സ്കൂളിൽ സന്ദർശനം നടത്തി. സ്കൂളിന്‍റെ പാരന്പര്യത്തെ ആദരിച്ചും വീരമൃത്യു വരിച്ചവരെ അഭിവാദ്യം ചെയ് തും സ്മൃതിസ്തൂപത്തിൽ പുഷ്പാർച്ചന നടത്തിയുമാണ് ദിനാചരണ നടപടികൾ ആരംഭിച്ചത്. തുടർന്ന് ക്ലാസ് മുറികളിലൂടെയും ലബോറട്ടറികളിലൂടെയും അവരുടെ രൂപീകരണ വർഷങ്ങളുടെ പ്രിയപ്പെട്ട ഓർമകൾ ഉണർത്തുന്ന സന്ദർശനമായി. ദക്ഷിണ വ്യോമസേനാ മേധാവിയും കഴക്കൂട്ടം സൈനിക സ് കൂളിലെ പൂർവ വിദ്യാർഥിയുമായ എയർ മാർഷൽ ബാലകൃഷ്ണൻ മണികണ്ഠൻ, സ്കൂൾ കാന്പസിന്‍റെ ഗംഭീരമായ പെയിന്‍റിംഗ് അനാച്ഛാദനം ചെയ്തത് ചടങ്ങിൽ ശ്രദ്ധേയമായി. എയർ മാർഷലിന്‍റെ പ്രിയപ്പെട്ട സ്ഥാപനത്തിന് ആദരവ് അർപ്പിക്കുന്ന ഈ കലാസൃഷ്ടി പൂർവ വിദ്യാർഥിയും സ്കൂളും തമ്മിൽ നിലനിൽക്കുന്ന ബന്ധത്തിന്‍റെ കാലാതീതമായ ഓർമപ്പെടുത്തലായി നിലകൊള്ളും. 2023 മേയ് മുതൽ ലോക്കൽ ബോർഡ് ഓഫ് അഡ്മിനിസ്ട്രേഷന്‍റെ ചെയർമാനായി സേവനമനുഷ്ഠിക്കുന്ന എയർ മാർഷൽ ബാലകൃഷ്ണൻ മണികണ്ഠന്‍റെ ദീർഘവീക്ഷണമുള്ള നേതൃത്വത്തിൽ, സ് കൂൾ വിവിധ മേഖലകളിൽ ശ്രദ്ധേയമായ പരിവർത്തനത്തിന് സാക്ഷ്യം വഹിച്ചു.

ലഹരിവിരുദ്ധ ബോധവത്കരണവും സന്ദേശയാത്രയും സംഘടിപ്പിച്ചു

നെടുമങ്ങാട്: പുതുക്കുളങ്ങര ചാരുംമൂട് തേപ്പിൽമേലെ റസിഡൻസ് അസോസിയേഷന്‍റെ ആഭിമുഖ്യത്തിൽ ലഹരിവിരുദ്ധ ബോധവത്കരണവും ലഹരിവിരുദ്ധ സന്ദേശയാത്രയും സംഘടിപ്പിച്ചു. ആര്യനാട് സർക്കിൾ ഇൻസ് പെക്ടർ വി.എസ്. അജീഷ് ഉദ് ഘാടനം ചെയ്തു. അസോസിയേഷൻ പ്രസിഡന്‍റ് സുനിൽകുമാർ അധ്യക്ഷനായി. പഞ്ചായത്തംഗം ഒസൻകുഞ്ഞ്, അസോസിയേഷൻ സെക്രട്ടറി എം.ഷാഫി, എഡ്യൂപോയിന്‍റ് സ്കിൽ ഡെവലപ്മെന്‍റ് അക്കാഡമി പ്രിൻസിപ്പൽ പൂവച്ചൽ ഫിറോസ്ഖാൻ ബാഖവി, ആര്യനാട് എക്സൈസ് ഇൻസ്പെക്ടർ എസ്. കുമാർ, അസിസ്റ്റന്‍റ് എക്സൈസ് ഇൻസ്പെക്ടർ വി. ഗിരീഷ്, ഡോ. അബ്ദുൽസലാം, എസ്. സബീർ തുടങ്ങിയവർ സംസാരിച്ചു. മികച്ച സേവനത്തിന് ഡിജിപിയുടെ ബാഡ്ജ് ഓഫ് ഓണർ അവാർഡ് കരസ്ഥമാക്കിയ തിരുവനന്തപുരം അഗ്നിശമന രക്ഷാനിലയത്തിലെ സീനിയർ ഫയർ ആൻഡ് റെസ്ക്യൂ ഓഫീസർ എം.ഷാഫിയെ ചടങ്ങിൽ ആദരിച്ചു. ചാരുംമൂട്ടിൽ ലഹരിവിരുദ്ധ സന്ദേശയാത്ര സംഘടിപ്പിച്ചു.

റോഡുവശത്ത് കഞ്ചാവ് ചെടി കണ്ടെത്തി

പേരൂര്‍ക്കട: തിരുവനന്തപുരം എക്‌സൈസ് റേഞ്ച് ഇന്‍സ്‌പെക്ടര്‍ എസ്. ഹരികൃഷ്ണന്‍റെ നേതൃത്വത്തിലുള്ള സംഘം നടത്തിയ പരിശോധനയില്‍ റോഡുവശത്ത് കഞ്ചാവ് ചെടി കണ്ടെത്തി. മണ്ണന്തല സ്റ്റേഷന്‍ പരിധിയില്‍ പരുത്തിപ്പാറ പാണന്‍വിള ഭാഗത്തെ ബിഎസ്എന്‍എല്‍ ഓഫീസിനു മുന്‍വശത്തെ റോഡരികിൽനിന്നാണ് കഞ്ചാവ് ചെടി കണ്ടെത്തിയത്. രഹസ്യവിവരത്തെ തുടര്‍ന്നാണ് റേഞ്ച് ഇന്‍സ്‌പെക്ടര്‍ ഉള്‍പ്പെട്ട സംഘം ഇവിടെ പരിശോധന നടത്തിയത്. റോഡുവശത്ത് കാട്ടുചെടികള്‍ പടര്‍ന്നു കിടക്കുന്ന ഭാഗത്താണ് 90 സെന്‍റി മീറ്റർ വലുപ്പം വരുന്ന കഞ്ചാവ് ചെടി കണ്ടെത്തിയത്. തുടര്‍പരിശോധനയ്ക്കായി ചെടി ശേഖരിച്ചിട്ടുണ്ട്. ആരാണ് ഈ ഭാഗത്ത് കഞ്ചാവ് ചെടി നട്ടുവളര്‍ത്തിയതെന്നു വ്യക്തമായിട്ടില്ല. എക്‌സൈസ് സംഘം ഇതുസംബന്ധിച്ച് അന്വേഷണം തുടരുന്നുണ്ട്.

പോഷൺ അഭിയാൻ: പോഷകാഹാര എക്സിബിഷൻ

നെയ്യാറ്റിൻകര: പോഷൻ അഭിയാന്‍റെ ഭാഗമായി പോഷന്‍ പക്വാഡ- 2025 നോടനുബന്ധിച്ച് പെരുമ്പഴുതൂർ സെക്ടറിലെ 22 അങ്കണവാടികളും ചേർന്നു പോഷക ആഹാര എക്സിബിഷൻ സംഘടിപ്പിച്ചു. തൊഴുക്കൽ അങ്കണവാടിയിൽ നടത്തിയ എക്സിബിഷൻ നെയ്യാറ്റിൻകര നഗരസഭ ആരോഗ്യ സ്റ്റാൻഡിംഗ് കമ്മറ്റി ചെയർമാൻ ജെ. ജോസ് ഫ്രാങ്ക്ളിൻ ഉദ്ഘാടനം ചെയ്തു. ഐസിഡിഎസ് സൂപ്പർവൈസർ ഷിനി, ഹെൽത്ത് സ്റ്റാഫുകൾ, അങ്കണവാടി അധ്യാപകർ, രക്ഷിതാക്കൾ, കുട്ടികൾ എന്നിവർ പരിപാടിയിൽ പങ്കെടുത്തു.

സ്വതന്ത്ര കർഷകസംഘം സുവർണ ജൂബിലി ആഘോഷം

നെടുമങ്ങാട്: പാലക്കാട് മേയ് 16 മുതൽ നടക്കുന്ന സ്വതന്ത്ര കർഷക സംഘത്തിന്‍റെ സുവർണ ജൂബിലി സമ്മേളനം വിജയിപ്പിക്കുന്നതിന്‍റെ ഭാഗമായി നെടുമങ്ങാട് നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച പ്രവർത്തക യോഗത്തിന്‍റെ ഉദ്ഘാടനവും നിയോജക മണ്ഡലതല പ്രചാരണ സമിതിയുടെ പോസ്റ്റർ പ്രകാശനവും മുസ്‌ലിം ലീഗ് ജില്ലാ സെക്രട്ടറി കന്യാകുളങ്ങര ഷാജഹാൻ നിർവഹിച്ചു. സ്വതന്ത്ര കർഷകസംഘം നിയോജക മണ്ഡലം പ്രസിഡന്‍റ് വെമ്പായം സലാം അധ്യക്ഷത വഹിച്ചു. മുസ്‌ലിം ലീഗ്, കർഷകസംഘം ഭാരവാഹികളായ നെടുമങ്ങാട് എം. നസീർ, മുഹമ്മദ് ബഷീർ, പുലിപ്പാറ യൂസഫ്, കരകുളം സന്തോഷ്, അബ്ദുൽ ഹക്കീം, സൈഫുദ്ദീൻ, സലീം, വെമ്പായം സുബൈർ, വെമ്പായം ഷെരീഫ്, ഷിബിൻ, പോത്തൻകോട് റാഫി തുടങ്ങിയവർ സംസാരിച്ചു.

ജെ.സി. ഡാനിയേല്‍ സ്മൃതിദിനവും ആദരവും

പാറശാല: മലയാള സിനിമയുടെ പിതാവ് ജെ.സി. ഡാനിയേലിന്‍റെ 50-ാമത് ഓര്‍മദിനം ജെ. സി. ഡാനിയേല്‍ ഫൗണ്ടേഷന്‍ ട്രസ്റ്റിന്‍റെ ആഭിമുഖ്യത്തില്‍ നെയ്യാറ്റിന്‍കര നഗരസഭാ സ്റ്റേഡിയത്തിലെ ജെ. സി. ഡാനിയേലിന്‍റെ സ്മൃതി മണ്ഡപത്തിന് മുന്നില്‍ സംഘടിപ്പിച്ചു. സി.കെ. ഹരീന്ദ്രന്‍ എംഎല്‍എ ഉദ്ഘാടനം നിര്‍വഹിച്ചു. കേരളത്തില്‍ ആദ്യമായി ജെ.സി. ഡാനിയേലിന്‍റെ പ്രതിമ ജന്മനാട്ടില്‍ സ്ഥാപിച്ച നഗരസഭ ചെയര്‍മാന്‍ പി.കെ. രാജമോഹനനെ ജെ.സി. ഡാനിയേലിന്‍റെ മകന്‍ ഹാരിസ് ഡാനിയേല്‍ ഉപഹാരം നല്‍കി ആദരിച്ചു. ഫൗണ്ടേഷന്‍ ചെയര്‍പേഴ്‌സണ്‍ സോന എസ്. നായര്‍ പ്രശസ്തിപത്രവും സെക്രട്ടറി സാബുകൃഷ്ണ മെഡലും സമര്‍പ്പിച്ചു. അഡ്വ. ബി. ജയചന്ദ്രന്‍ നായര്‍ അധ്യക്ഷനായിരിന്നു. കേരള ഗാന്ധി സ്മാരക നിധി ജോയിന്‍റ് സെക്രട്ടറി വി. കെ മോഹന്‍, വിനോദ് വൈശാഖി, കെ.ആര്‍. അജയന്‍, സജിലാല്‍ നായര്‍, സുരേഷ് തമ്പി, സുശീല ഡാനിയേല്‍, ജെ. രാഗീഷ്, ഗോപന്‍ ശാസ്തമംഗലം, റഹിം പനവൂര്‍, ഡോ. അനീഷ് കുറുപ്പ്, ഗോപകുമാര്‍, ജോണ്‍ സെല്‍വനാഥന്‍, മുരളി കോട്ടയ്ക്കകം എന്നിവര്‍ സംസാരിച്ചു.

വിദ്യാഭ്യാസ സ്ഥാപനങ്ങളുടെ വികസനത്തില്‍ മുന്നേറ്റം: വി.കെ. പ്രശാന്ത് എംഎല്‍എ

പേരൂര്‍ക്കട: വിദ്യാഭ്യാസ സ്ഥാപനങ്ങളുടെ അടിസ്ഥാന സൗകര്യ വികസനത്തില്‍ വന്‍ മുന്നേറ്റം സൃഷ്ടിക്കാന്‍ കഴിഞ്ഞതായി വി.കെ. പ്രശാന്ത് എംഎല്‍എ. റീജണല്‍ ഇന്‍സ്റ്റിറ്റ്യൂട്ട് ഓഫ് ലാംഗ്വേജ് ട്രെയിനിംഗിലെ പുതിയ മന്ദിരത്തിന്‍റെ തറക്കല്ലിടല്‍ വട്ടിയൂര്‍ക്കാവ് മണ്ഡലത്തിലെ കുന്നുകുഴി വാര്‍ഡില്‍ പിഎംജിയില്‍ നിര്‍വഹിക്കുകയായിരുന്നു അദ്ദേഹം. പുതിയ ഹൈടെക് മന്ദിരങ്ങള്‍, കമ്പ്യൂട്ടര്‍ ലാബുകള്‍, ജലഗുണനിലവാര പരിശോധന ലാബുകള്‍, സ്മാര്‍ട്ട് ക്ലാസ് റൂമുകള്‍, സ്‌കൂള്‍ ബസുകള്‍, ശുചിമുറികള്‍, പാചകപ്പുരകള്‍ തുടങ്ങി നിരവധി സൗകര്യങ്ങളാണ് സര്‍ക്കാരിന്‍റെ വിവിധ ഫണ്ടുകള്‍ ഉപയോഗിച്ച് തയാറാക്കിയിട്ടുള്ളതെന്നും അദ്ദേഹം കൂട്ടിച്ചേര്‍ത്തു. പുതിയ മന്ദിരം നിര്‍മിക്കുന്നതിനായി രണ്ടു കോടി രൂപയുടെ ഭരണാനുമതിയാണ് ലഭിച്ചത്. 2660 സ്‌ക്വയര്‍ ഫീറ്റ് വിസ്തീര്‍ണമുള്ള കെട്ടിടത്തില്‍ ക്ലാസ്മുറി, ടോയ്ലറ്റ് ബ്ലോക്ക്, വരാന്ത, സ്റ്റെയര്‍കേസ് റൂം എന്നിവ നിര്‍മിക്കും. ചടങ്ങില്‍ നഗരസഭ സ്റ്റാന്റിംഗ് കമ്മിറ്റി ചെയര്‍മാന്‍ മേടയില്‍ വിക്രമന്‍, റീജണല്‍ ഇന്‍സ്റ്റിറ്റ്യൂട്ട് ഓഫ് ലാംഗ്വേജ് ട്രെയിനിംഗ് പിടിഎ പ്രസിഡന്‍റ് സി.ആര്‍. രവീന്ദ്ര രാജന്‍, കുന്നുകുഴി വാര്‍ഡ് കൗണ്‍സിലര്‍ എ. മേരിപുഷ്പം, പൊതുമരാമത്ത് കെട്ടിടവിഭാഗം എഇഇ എസ്. സനല്‍ കുമാര്‍ എന്നിവര്‍ പങ്കെടുത്തു.

അന്പൂരി എച്ച്്എസ് വിദ്യാര്‍ഥികളുടെ കൂട്ടായ്മ ഇന്ന്

വെള്ളറട: അമ്പൂരി സെന്‍റ് തോമസ് ഹൈസ്‌കൂളിലെ 1975 ബാച്ച് പത്താം ക്ലാസ് വിദ്യാര്‍ഥികളുടെ കൂട്ടായ്മ ഇന്നു നടക്കും. മായം അഗസ്ത്യ വെബ് റിസോര്‍ട്ടില്‍ കൂടുന്ന യോഗത്തില്‍ ഗോള്‍ഡന്‍ ജൂബിലി വര്‍ഷം എന്ന പ്രത്യേകതയുണ്ട്. ഈ വിദ്യാര്‍ഥി കൂട്ടായ്മയില്‍ സഹകരിക്കാന്‍ താല്പര്യമുള്ള എല്ലാവരും പങ്കെടുക്കണമെന്ന് വിദ്യാര്‍ഥി കൂട്ടായ്മ അറിയിച്ചു.

ഉണ്ടൻകോട് പള്ളിയിൽ തിരുനാൾ കൊടിയേറി

നിലമാമൂട്: ഉണ്ടൻകോട് സെന്‍റ് ജോസഫ്സ് ഫൊറോന ഇടവക പള്ളിയിൽ 111-ാമത് ഇടവക തിരുനാളിനു വികാരി ഫാ. ജോസഫ് അനിൽ കൊടിയേറ്റി. പ്രാരംഭ തിരുനാൾ ദിവ്യബലിക്ക് നെയ്യാറ്റിൻകര രൂപത വികാരി ജനറാൾ മോൺ. വിൻസന്‍റ് കെ. പീറ്റർ, നെടുമങ്ങാട് റീജണൽ കോ-ഓർഡിനേറ്റർ മോൺ. റൂഫസ് പയസ്‌ലീൻ എന്നിവർ മുഖ്യകാർമികത്വം ഹിച്ചു. ഫാ. സുജിൻ വചനസന്ദേശം നൽകി. ഇന്നു വൈകുന്നേരം 4.30ന് ബൈബിൾ പാരായണം, ജപമാല, ലിറ്റിനി, 6.30ന് ഫാ. രാജദാസിന്‍റെ മുഖ്യകാർമികത്വത്തിൽ ദിവ്യബലി എന്നിവയുണ്ടാകും. നാളെ വൈകുന്നേരം 6.30നു ഫാ. ക്രിസ്തുദാസ് തോംസന്‍റെ മുഖ്യകാർമികത്വത്തിൽ ദിവ്യബലി. ഫാ. അരുൺകുമാർ വചനസന്ദേശം നൽകും. എട്ടിനു ദിവ്യകാരുണ്യ പ്രദക്ഷിണം. വ്യാഴാഴ്ച വൈകുന്നേരം 6.30ന് ഫാ. ജയരാജിന്‍റെ മുഖ്യകാർമികത്വത്തിൽ തിരുനാൾ സമാപന ദിവ്യബലി. ഫാ. റോബർട്ട് വിൻസന്‍റ് വചനസന്ദേശം നൽകും.രാത്രി എട്ടിനു ടെലി സീരിയൽ പ്രദ ർശനവും ഉണ്ടായിരിക്കും.

അല്മായ ദിനാഘോഷ സമ്മേളനവും ഫ്രാൻസിസ് മാർപാപ്പ അനുസ്മരണവും

തിരുവനന്തപുരം: മലങ്കര കാത്തലിക് അസോസിയേഷൻ എംസിഎ സഭാതല സമിതിയുടെ ആഭിമുഖ്യത്തിൽ എംസിഎ പാറശാല രൂപതാ സമിതിയുടെ ആതിഥേയത്വത്തിൽ അല്മായ ദിനാഘോഷസമ്മേളനവും ഫ്രാൻസിസ് മാർപാപ്പ അനുസ്മരണവും മേയ് നാലിനു ഉച്ചയ്ക്കു രണ്ടിനു പാറശാല സെന്‍റ് മേരീസ് കോട്ടവിള കത്തീഡ്രൽ ദേവാലയത്തിൽ നടത്തും. മാവേലിക്കര രൂപത അധ്യക്ഷനും എംസിഎയുടെ സഭാതല ചെയർമാനുമായ ഡോ. ജോഷ്വ ഇഗ്നാത്തിയോസ് ഉദ്ഘാടനം ചെയ്യും. പാറശാല രൂപതാ മെത്രാൻ ഡോ. തോമസ് മാർ യൗസേബിയോസ് മുഖ്യപ്രഭാഷണം നടത്തും. മലങ്കര കാത്തലിക് അസോസിയേഷൻ എസ്.ആർ. ബൈജു അധ്യക്ഷത വഹിക്കും. സഭാതല, രൂപതാതല, ജില്ലാതല, യൂണിറ്റുതല ഭാരവാഹികളും എംസിയുടെ അംഗങ്ങളും പങ്കെടുക്കും. സമ്മേളനത്തിന്‍റെ ഒരുക്കങ്ങൾ പൂർത്തിയായതായി സ്പിരിച്വൽ ഡയറക്ടർ ഫാ. തോമസ് പൊറ്റപുരയിടം, എംസിഎയുടെ പാറശാല രൂപത പ്രസിഡന്‍റ് സബീഷ് പീറ്റർ, തിരുവല്ലം ജനറൽ സെക്രട്ടറി അനീഷ് വടകര, വൈസ് പ്രസിഡന്‍റ് ജോൺ ഷൈജു, പാറശാല ട്രഷറർ സുമനലാൽ, വൈദിക ജില്ലാ പ്രസിഡന്‍റ് ഷൈൻ കുടയാൽ, മുൻ സഭാതല സെക്രട്ടറിയും കെസിഎഫ് വൈസ് പ്രസിഡന്‍റുമായ ധർമരാജ് പിൻങ്കുളം തുടങ്ങിയവർ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]