ADVERTISEMENT

ADVERTISEMENT

സിഒഡിയുടെ ആശാകിരൺ പദ്ധതി ഉദ്ഘാടനം ചെയ്തു

കോടഞ്ചേരി: താമരശേരി രൂപതയുടെ സാമൂഹ്യ സേവന വിഭാഗമായ സിഒഡിയുടെ കീഴിലുള്ള ഗ്രാമ വികസന സമിതിയുടെ (ജിവിഎസ്) 24-ാം വാർഷികാഘോഷം നടത്തി. ചടങ്ങിൽ വിദ്യാർഥികൾക്ക് പഠനോപകരണ വിതരണം ചെയ്തു.

കോടഞ്ചേരി സെന്‍റ് മേരീസ് ഫൊറോന വികാരി ഫാ. കുര്യാക്കോസ് ഐക്കുളമ്പിൽ സിഒഡിയുടെ ആശാകിരൺ പദ്ധതി ഉദ്ഘാടനം ചെയ്തു. ജിവിഎസ് പ്രസിഡന്‍റ് കെ.സി റോസമ്മയുടെ അധ്യക്ഷത വഹിച്ചു. സിഒഡി ഡയറക്ടർ ഫാ. സായി പാറൻകുളങ്ങര ആമുഖ പ്രഭാഷണം നടത്തി.

ഏരിയ കോഡിനേറ്റർ ഷീജ ടോബി, വാർഡ് മെമ്പർ സിസിലി കോട്ടുപ്പള്ളി, സിഒഡി പ്രോഗ്രാം കോഡിനേറ്റർ കെ.സി. ജോയ്, ജിവിഎസ് സെക്രട്ടറി ആലീസ് തോമസ് എന്നിവർ പ്രസംഗിച്ചു.

ADVERTISEMENT

മലയോര ഹൈവേ പ്രവൃത്തി നേരായ രീതിയിൽ നടത്തണം: ജനകീയ കമ്മറ്റി

ചക്കിട്ടപാറ: നാടിന്‍റെ യഥാർഥ വികസനമാണ് അധികാരികൾ ലക്ഷ്യമിടുന്നതെങ്കിൽ ചക്കിട്ടപാറ ടൗണിലെ മലയോര ഹൈവേ നിർമാണം സുതാര്യമായി നടത്തണമെന്ന് വ്യാപാര ഭവനിൽ ചേർന്ന ജനകീയ കമ്മിറ്റി രൂപീകരണ യോഗം ആവശ്യപ്പെട്ടു. ഒരേ റോഡിൽ വ്യത്യസ്ത അളവ് നടത്തി പാതയുടെ വീതി നിർണയിക്കുന്ന പരിപാടി അനുവദിക്കില്ല. ജനം എല്ലാം മനസിലാക്കിയിട്ടുണ്ട്. അശാസ്ത്രീയമായി റോഡ് നിർമാണം നടത്തിയാൽ ശക്തമായി പ്രതിരോധിക്കും. പ്രശ്നത്തിൽ ഒരു സംഘടനയും രംഗത്തു വരാത്ത സാഹചര്യത്തിൽ ബിജെപി നേതൃത്വമാണ് എല്ലാവരെയും ബന്ധപ്പെട്ട് ജനകീയ യോഗം വിളിച്ചത്. ബാബു പുതുപ്പറമ്പിൽ ഉദ്ഘാടനം ചെയ്തു. പി.ബി.സന്തോഷ് അധ്യക്ഷത വഹിച്ചു. പി.പി.പ്രദീപ് കുമാർ, രാജൻ വർക്കി, പത്മനാഭൻ കോറോത്ത്, കെ.കെ. രാജേഷ്, ശ്രീനിവാസൻ മനക്കൽ, വി.വി. രാജൻ, പി. ശ്രീധരൻ, ടി.സി.സന്തോഷ്, പി.വിവേക്, ശിവദാസൻ കക്കുടുമ്പിൽ എന്നിവർ പ്രസംഗിച്ചു. ഭാരവാഹികൾ: ബാബു പുതുപ്പറമ്പിൽ (ചെയർമാൻ), വി.വി.രാജൻ (വൈസ് ചെയർമാൻ), രാജൻ വർക്കി (കൺവീനർ), പി.ബി.സന്തോഷ് (ജോ.കൺവീനർ), പി.പി.പ്രദീപൻ(ട്രഷറർ).

തോട്ടിലെ വെള്ളത്തിൽ പാൽനിറം കണ്ടത് ആശങ്ക പടർത്തി

കൂരാച്ചുണ്ട്: കൂരാച്ചുണ്ട് അങ്ങാടിയോട് ചേർന്ന് ഒഴുകുന്ന തോട്ടിൽ വെള്ളത്തിൽ പാൽ നിറം കണ്ടത് ആശങ്ക പടർത്തി. ഇന്നലെ രാവിലെ 11 ന്നോടു കൂടിയാണ് കൂരാച്ചുണ്ട് അങ്ങാടിയിലെ ബാലുശേരി റോഡിന് സമീപമുള്ള മത്സ്യ മാർക്കറ്റിന്‍റെ ഭാഗത്താണ് വെള്ളത്തിൽ നിറമാറ്റം കണ്ടത്. പലരും ഓവുചാലിലും മറ്റും പരിശോധന നടത്തിയെങ്കിലും എവിടെ നിന്നാണ് ഇത് ഉത്ഭവിച്ചതെന്ന് കണ്ടെത്താൻ കഴിഞ്ഞില്ല. പിന്നീട് ആരോഗ്യവകുപ്പ് ഉദ്യോഗസ്ഥരായ ഹെൽത്ത് ഇൻസ്പെക്ടർ എ.സി. അരവിന്ദ്, ജൂനിയർ ഹെൽത്ത് ഇൻസ്പെക്ടർ ജോൺസൺ ജോസഫ് എന്നിവർ സ്ഥലത്തെത്തി പരിശോധന നടത്തി. തോട്ടിൽ നിന്നുള്ള വെള്ളം കോഴിക്കോട് കുന്നമംഗലത്തുള്ള കെമിക്കൽ ലാബിലേക്ക് പരിശോധനയ്ക്കായി നൽകാൻ ശേഖരിച്ചിട്ടുണ്ട്.

കക്കയം - തലയാട് റോഡിൽ ഗതാഗതം പുനസ്ഥാപിച്ചു

കൂരാച്ചുണ്ട്: ശക്തമായ മഴയെ തുടർന്ന് മണ്ണിടിച്ചിലുണ്ടായ മലയോര ഹൈവേ നിർമാണ റോഡിലെ ഇരുപത്തെട്ടാംമൈൽ - തലയാട് റോഡിൽ ഗതാഗതം നിരോധിച്ചിരുന്നത് നിയന്ത്രണങ്ങളോടെ പുനസ്ഥാപിച്ചു. റോഡിന്‍റെ ഇരുപത്താറാം മൈൽ മേഖലയിലാണ് വൻ തോതിൽ മണ്ണിടിഞ്ഞത്. അഞ്ചുദിവസമായി റോഡിൽ കല്ലും മണ്ണും നിറഞ്ഞത് ഭാഗീകമായി നീക്കി ഗതാഗതം നിയന്ത്രണങ്ങളോടെ പുനസ്ഥാപിച്ചതായി അധികൃതർ അറിയിച്ചു. ഇതുവഴി വാഹനങ്ങൾ കടന്നു പോകുന്നുണ്ടെങ്കിലും മഴ തുടർന്നാൽ മണ്ണിടിയാൻ വീണ്ടും സാധ്യതയുള്ളതിനാൽ ജാഗ്രത പാലിക്കണമെന്നും യാത്രാ നിരോധനം തുടരാനിടയുണ്ടെന്നും അറിയിച്ചു.

അനധികൃത നിർമാണ പ്രവർത്തനങ്ങൾ നിർത്തിവയ്ക്കണമെന്ന്

താമരശേരി: പുതുപ്പാടി പഞ്ചായത്തിലെ മൈലള്ളാംപാറ പ്രദേശത്ത് മലയോര മേഖലയിലെ വനാതിർത്തിയോട് ചേർന്ന് കിടക്കുന്ന സ്വകാര്യ വ്യക്തിയുടെ പറമ്പിലെ അനധികൃത നിർമാണ പ്രവർത്തനങ്ങൾ നിർത്തിവയ്ക്കണമെന്ന് മണ്ഡലം കോൺഗ്രസ്‌ കമ്മിറ്റി ആവശ്യപ്പെട്ടു. മാലിന്യ പ്ലാന്‍റാണ് നിർമിക്കുന്നതെന്ന പരിസരവാസികളുടെ ആശങ്കയുടെയും പരാതിയുടേയും അടിസ്ഥാനത്തിൽ ജില്ലാ പഞ്ചായത്ത് മെമ്പർ അംബിക മംഗലത്ത്, പഞ്ചായത്ത് മെമ്പർമാരായ ബീന തങ്കച്ചൻ, ആയിഷ കുട്ടി സുൽത്താൻ, ജാസിൽ പെരുമ്പള്ളി കോൺഗ്രസ്‌ നേതാക്കളായ കമറുദ്ധീൻ അടിവാരം, സജോ വർഗീസ്, ജോർജ് തോമസ് തുടങ്ങിയവർ നാട്ടുകാർക്കൊപ്പം സ്ഥലം സന്ദർശിച്ചു. പരിസ്ഥിതി ലോല പ്രദേശമായ മൈലള്ളാംപാറയിൽ പഞ്ചായത്തിന്‍റെ അനുമതി ഇല്ലാതെയാണ് നിർമാണ പ്രവർത്തനങ്ങൾ നടത്തുന്നതെന്നും ഉടമസ്ഥന് പഞ്ചായത്ത് സ്റ്റോപ്പ് മെമ്മോ നൽകിയിട്ടുണ്ടെന്നും പഞ്ചായത്ത് വൈസ് പ്രസിഡന്‍റ് ഷിജു ഐസക് പറഞ്ഞു.

ജില്ലയിലെ സ്ഥാപനങ്ങളില്‍ അഗ്നിസുരക്ഷ പരിശോധന നടത്തണം: ജില്ലാ വികസന സമിതി

കോഴിക്കോട്: മൊഫ്യൂസില്‍ ബസ്റ്റാന്‍ഡ് കെട്ടിടത്തിലുണ്ടായ അഗ്നിബാധയുടെ പശ്ചാത്തലത്തില്‍ അത്തരം സംഭവങ്ങള്‍ ആവര്‍ത്തിക്കാതിരിക്കാന്‍ ആവശ്യമായ നടപടികള്‍ കൈക്കൊള്ളാന്‍ ജില്ലാ ഭരണകൂടത്തിന്‍റെ ഭാഗത്ത് നിന്നും നടപടിയുണ്ടാവണമെന്ന് ജില്ല വികസന സമിതി യോഗം. സംഭവത്തില്‍ ജില്ലാ ഭരണകൂടത്തിന്‍റെ ഭാഗത്തു നിന്ന് സമഗ്രമായ അന്വേഷണം യോഗം ആവശ്യപ്പെട്ടു. നഗരത്തിലെ തീപിടുത്ത സാധ്യത തടയാന്‍ ആവശ്യമായ നടപടി സ്വീകരിക്കുന്നതിന്റെ ഭാഗമായി സ്ഥാപനങ്ങളില്‍ ഇതിനായി പരിശോധനകള്‍ നടക്കത്തണമെന്നും യോഗത്തില്‍ ടി.പി. രാമകൃഷ്ണന്‍ എംഎല്‍എ ആവശ്യപ്പെട്ടു. പുതിയസ്റ്റാന്‍ഡിലെ തീപ്പിടുത്തത്തില്‍ സമയോചിതമായും കാര്യക്ഷമമായും ഇടപെട്ട ചുമട്ടു തൊഴിലാളികള്‍, മോട്ടോര്‍ തൊഴിലാളികള്‍, ഫയര്‍ ഫോഴ്‌സ്, പോലീസ്, ജില്ലാ ഭരണകൂടം എന്നിവരെ ജില്ലാ വികസന സമിതി അഭിനന്ദിച്ചു. കനാല്‍ സിറ്റി പ്രവൃത്തി പുരോഗതി സംബന്ധിച്ച തടസ്സങ്ങള്‍ പരിശോധിക്കണമെന്ന് തോട്ടത്തില്‍ രവീന്ദ്രന്‍ എംഎല്‍എ ആവശ്യപ്പെട്ടു. 2026 ജനുവരിയോടെ പ്രവൃത്തി അരംഭിക്കാന്‍ കഴിയുമെന്ന് യോഗം വിലയിരുത്തി. ഭൂമി തരം മാറ്റവുമായി ബന്ധപ്പെട്ട് കോഴിക്കോട് താലൂക്കിലാണ് ഏറ്റവും കൂടുതല്‍ ഫയലുകള്‍ കെട്ടി കിടക്കുന്നതെന്നും ഇത് പരിഹരിക്കാന്‍ ആവശ്യമായനടപടികള്‍ ഉണ്ടാവണമെന്നും എംഎല്‍എ പറഞ്ഞു.

60 കുടുംബങ്ങളുടെ നികുതി സ്വീകരിക്കാൻ റവന്യൂ വകുപ്പ് ഉത്തരവിട്ടു

പേരാമ്പ്ര: നെച്ചാട് പഞ്ചായത്തിലെ നൊച്ചാട് വില്ലേജിൽ നികുതി സ്വീകരിക്കാത്തത് മൂലം ഏറെ കഷ്ടതകൾ അനുഭവിച്ചിരുന്ന 60 കുടുംബങ്ങളുടെ നികുതി സ്വീകരിക്കാൻ വകുപ്പ് മന്ത്രിയുടെ അടിയന്തിര ഇടപെടലിന്‍റെ ഭാഗമായി റവന്യൂ വകുപ്പ് ഉത്തരവ് പുറപ്പെടുവിച്ചു. 18.88 ഏക്കർ ഭൂമിയുടെ 69 കുടുംബങ്ങളുടെ അവകാശികൾക്കാണ് ഇതിന്‍റെ ഗുണം ലഭിച്ചിട്ടുള്ളത്. ഏറെ വർഷങ്ങളായി വില്ലേജിൽ നികുതി അടക്കാൻ കഴിയാതിരുന്നത് മൂലം തൊഴിലാളികളും, കർഷകരുമായിട്ടുള്ള കുടുംബങ്ങൾ ദുരിതങ്ങൾ അനുഭവിക്കുകയായിരുന്നു. വിവാഹം, വീട് നിർമാണം തുടങ്ങിയ അത്യാവശ്യങ്ങൾക്ക് ബാങ്ക് വായപ ലഭിക്കുന്നതിനോ, നികുതിശീട്ട് ഹാജരാക്കാനോ കഴിയാതിരുന്നത് ഏറെ പ്രയാസത്തിലാക്കിയിരുന്നു. സിപിഐ മണ്ഡലം കമ്മിറ്റി അംഗം ശശി അമ്പാളി, കിസാൻ സഭ ഭാരവാഹികൾ എന്നിവർ റവന്യു വകുപ്പ് മന്ത്രിയെ നേരിൽ കണ്ട് കാര്യങ്ങൾ ബോധിപ്പിച്ചതിനെ തുടർന്നാണ് വകുപ്പ് കാര്യങ്ങൾ പരിശോധിച്ച് റിപ്പോർട്ട് തയാറാക്കിയത്. ഇതിനെ തുടർന്ന് കൊയിലാണ്ടി താലൂക്കിൽ റവന്യൂ വകുപ്പ് നടത്തിയ അദാലത്തിൽ ഒന്പത് പേരുടെ നികുതി സ്വീകരിക്കാൻ ആദ്യം അനുമതി ലഭിച്ചിരുന്നു. തുടർന്നും സംഘടനാ ഭാരവാഹികൾ നിരന്തരം ഇടപെട്ടാണ് 60 കുടുംബങ്ങളുടെ ജീവിത പ്രശ്നങ്ങളുടെ കുരുക്കഴിക്കാൻ കഴിഞ്ഞത്.

നാലുവരിപ്പാതയുടെ നിർമ്മാണം ഉടൻ തുടങ്ങണമെന്ന്

തിരുവമ്പാടി : ആനക്കാംപൊയിൽ മേപ്പാടി തുരങ്ക പാതയിലേക്ക് കോഴിക്കോട് നിന്നും എളുപ്പത്തിൽ എത്തിച്ചേരാൻ കഴിയുന്ന രൂപത്തിൽ ടണൽ റോഡിന്‍റെ കവാടമായ മറിപ്പുഴയിലേക്ക് നാലുവരിപ്പാതയുടെ നിർമ്മാണവും ആരംഭിക്കണമെന്ന് കേരള വ്യാപാരി വ്യവസായി ഏകോപന സമിതി ആനക്കാംപൊയിൽ യൂണിറ്റ് ആവശ്യപ്പെട്ടു. സെന്‍റ് മേരിസ് പാരീഷ് ഹാളിൽ ചേർന്ന വാർഷിക പൊതുയോഗത്തിൽ വ്യാപാരി വ്യവസായി ഏകോപനസമിതി യൂണിറ്റ് പ്രസിഡന്‍റ് ജോൺസൺ വയലിൽ അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് റഫീഖ് മാളിക പൊതുസമ്മേളനം ഉദ്ഘാടനം ചെയ്തു. ആനക്കാംപൊയിൽ ഗ്രാമീണ ബാങ്ക് മാനേജർ ബാബു മുണ്ടക്കനി അസി. മാനേജർ അമൽ ദേവിനും യാത്രയയപ്പ് നൽകി. വനിതാ വിങ്ങ് ആനക്കാംപൊയിൽ യൂണിറ്റ് പ്രസിഡന്‍റ് ദീപ ഷൈജോയെ യോഗത്തിൽ ആദരിച്ചു. വ്യാപാരികളുടെ മക്കളിൽ ഫുൾ എ പ്ലസ് വാങ്ങിയ വിദ്യാർഥികളെ അനുമോദിക്കുകയും ക്യാഷ് അവാർഡുകൾ നൽകുകയും ചെയ്തു.

ഇരുവഴിഞ്ഞി പുഴയിൽ വൻതോതിൽ അറവുമാലിന്യം തള്ളി

മുക്കം: നിരവധി പേർ വിവിധ ആവശ്യങ്ങൾക്കായി ഉപയോഗിക്കുന്ന ഇരുവഴിഞ്ഞി പുഴയിൽ വൻതോതിൽ അറവുമാലിന്യം തള്ളി. കൊയിലാണ്ടി - എടവണ്ണ സംസ്ഥാന പാതയോരത്ത മുക്കം അരീക്കോട് റോഡിലെ പാലത്തിന് സമീപത്തുനിന്നും ചോണാട് പോവുന്ന റോഡരികിൽ നിന്നാണ് രാത്രിയുടെ മറവിൽ പെട്ടികണക്കിന് കോഴിയുടെ പഴകിയ അറവു മാലിന്യം തള്ളിയത്. നിരവധി പേർ കുടിവെള്ളത്തിനായി ഉപയോഗിക്കുന്ന കുടിവെള്ള പദ്ധതിയുടെ പമ്പ് ഹൗസിന് സമീപമാണ് മാലിന്യം തള്ളിയത്.പുഴയിലെ വെള്ളത്തിൽ പരന്നു കിടക്കുന്ന നിലയിലാണ് മാലിന്യം ഉള്ളത്.അസഹ്യമായ ദുർഗന്ധം കാരണം തൊട്ടടുത്ത നിരവധി വീട്ടുകാർക്കും റോഡിലൂടെ യാത്രചെയ്യുന്നവർക്കും. വീടുകളിൽ നിൽക്കാനോ യാത്ര ചെയ്യാനോ കഴിയാത്ത അവസ്ഥയാണുള്ളത്.നാട്ടുകാരുടെ നേതൃത്വത്തിൽ നടത്തിയ പരിശോധനയിൽ മാലിന്യം കൊണ്ടുവന്ന വാഹനത്തിന്റെ ദൃശ്യം ലഭ്യമായിട്ടുണ്ട്. ശനിയാഴ്ച പുലർച്ചെ 3:37 ഓടെ സ്കൂട്ടറിൽ ഒരു സ്ത്രീയും പുരുഷനും. മുക്കം പാലത്തിന് സമീപമെത്തുകയും തൊട്ടുപുറകേ മാലിന്യവുമായി ഒരു ലോറി വരുന്നതും ദൃശ്യങ്ങളിൽ വ്യക്തമാണ്. സ്ത്രീയെ അവിടെ നിർത്തി സ്കൂട്ടറിൽ വന്ന ആൾ മാലിന്യവുമായി വന്ന ലോറിയിൽ കയറി പോയി മാലിന്യം തട്ടിയതിന് ശേഷം 4:20 ത്തോടെ തിരിച്ചു വന്ന് സ്കൂട്ടറിൽ കയറി പോവുന്നതും ദൃശ്യങ്ങളിലുണ്ട്. മുക്കം പോലീസ്, കാരശ്ശേരി പഞ്ചായത് സ്ക്രട്ടറി എന്നിവർ സ്ഥലത്തെത്തി പരിശോധിച്ച് മാലിന്യം തള്ളിയവരെ കണ്ടെത്താനുള്ളനടപടികൾ ആരംഭിച്ചു.

തണ്ണീര്‍ത്തട കയ്യേറ്റത്തില്‍ നൂറോളം വീടുകള്‍ വെള്ളക്കെട്ട് ഭീതിയില്‍

കോഴിക്കോട്: സരോവരം, കോട്ടൂളി മേഖലയിലെ തണ്ണീര്‍ത്തട കയ്യേറ്റത്തില്‍ നൂറോളം വീടുകള്‍ വെള്ളക്കെട്ട് ഭീതിയില്‍. സ്വകാര്യ വ്യക്തികള്‍ തണ്ണീര്‍ത്തടം മണ്ണിട്ട് നികത്തിയതോടെ മഴ പെയ്താല്‍ വെള്ളം വീടുകളിലേക്ക് കയറുകയാണ്. കിടപ്പുരോഗികളും പ്രായമായവരുമുള്‍പ്പെടെ ഭീതിയോടെയാണ് കഴിയുന്നത്.സ്വകാര്യ സ്ഥാപനങ്ങള്‍ തണ്ണീര്‍ത്തടം കയ്യേറിയതിനെതിരെ നാട്ടുകാരുടെ നേതൃത്വത്തില്‍ പ്രക്ഷോഭങ്ങള്‍ സംഘടിപ്പിച്ചെങ്കിലും അധികാരികള്‍ തിരിഞ്ഞു നോക്കുന്നില്ല. സംഭവത്തില്‍ റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടറോട് മനുഷ്യവകാശ കമ്മീഷന്‍ ആവശ്യപ്പെട്ടിട്ടുണ്ട്.

കെഎസ്ആര്‍ടിസി സ്‌റ്റേ റൂമിന് ചോര്‍ച്ച : ജീവനക്കാര്‍ക്ക് ദുരിതം

കോഴിക്കോട് : പാവങ്ങാട് കെഎസ്ആര്‍ടിസി ഡിപ്പോയില്‍ ഡ്രൈവര്‍മാര്‍ക്കും കണ്ടക്ടര്‍മാര്‍ക്കും ഉറങ്ങാനുള്ള സ്‌റ്റേ റൂമില്‍ ചോര്‍ച്ച. മഴക്കാലമായതോടെ പഴയ കെട്ടിടം മുഴുവന്‍ ചോരുകയാണ്. ജീവനക്കാര്‍ക്ക് വിശ്രമിക്കാനുള്ള കേന്ദ്രമാണ് മഴയില്‍ വെള്ളത്തില്‍ മുങ്ങി നില്‍ക്കുന്നത്. സ്‌റ്റേ റൂമിലെ കട്ടില്‍ വരെ പൊട്ടി കിടക്കുകയാണ്. റൂമില്‍ രണ്ട് ഫാനുകള്‍ ഉണ്ടെങ്കിലും പ്രവര്‍ത്തനരഹിതമാണ്. പുലര്‍ച്ചേ ഡ്യൂട്ടിയുള്ളവര്‍ തലേന്ന് വന്ന് താമസിക്കുന്ന മുറിയാണിത്. ഈ മുറിയില്‍ വന്ന് കിടന്നാല്‍ ഉറക്കം നഷ്ടപ്പെട്ട് ഡ്യൂട്ടി തന്നെ അവതാളത്തിലാകുമെന്നാണ് ജീവനക്കാര്‍ പരാതിപ്പെടുന്നു. നിലവില്‍ മുറിയില്‍ വെള്ളം കെട്ടികിടന്ന് നടക്കാനാവാത്ത സാഹചര്യമാണുള്ളത്. അഞ്ച് കട്ടിലുകളാണ് മുറിയില്‍ ആകെ അനുവദിച്ചിരുന്നത്. മഴയില്‍ ഇവയില്‍ പലതും നനഞ്ഞ് നശിക്കുകയാണ്. ചോര്‍ച്ച അടച്ചില്ലെങ്കില്‍ പിന്നെ റൂമിന് പുറത്ത് കിടക്കുന്നതിന് തുല്യമാണ് അകത്തുള്ള അവസ്ഥയെന്നും ഇവര്‍ പറയുന്നു.

എന്നു വരും പൂനൂർ പുഴയ്ക്കു കുറുകെ പാലം

പടനിലം: പുതിയ അധ്യയന വർഷം തുടങ്ങാൻ ദിവസങ്ങൾ മാത്രം ബാക്കിയിരിക്കെ, പടനിലത്തെ ഗതാഗതക്കുരുക്കിനു പരിഹാരമാകുമെന്നു കരുതുന്ന പുതിയ പാലം ഇത്തവണയും പൂർത്തിയായില്ല പടനിലം– സിഎം– മഖാം നരിക്കുനി റൂട്ടിൽ പൂനൂർ പുഴയ്ക്കു കുറുകെ 50 വർഷത്തോളം പഴക്കമുള്ള പാലത്തിന് സമീപമാണ് പുതിയ പാലം നിർമിക്കുന്നത്. ഒന്നര വർഷം മുൻപ് തുടങ്ങിയ പ്രവൃത്തി പാതി പോലും പൂർത്തിയായിട്ടില്ല. എട്ട് കോടിയോളം ചെലവഴിച്ച് പൊതുമരാമത്ത് വകുപ്പിന്‍റെ മേൽനോട്ടത്തിൽ ഊരാളുങ്കൽ സൊസൈറ്റി ആണ് പാലം നിർമാണം നടത്തുന്നത്. പുഴയിലെ രണ്ട് തൂണുകളും അപ്രോച്ച് റോഡ് ഭാഗത്തെ രണ്ട് തൂണുകളും സ്പാൻ സ്ലാബുകളിൽ 4 എണ്ണവും മാത്രമാണ് പൂർത്തിയായത്. പുഴയുടെ പ്രധാന ഭാഗത്ത് നിർമാണം ഇതുവരെ തുടങ്ങിയിട്ടില്ല. മഴ തുടങ്ങി പുഴയിൽ ജലനിരപ്പ് ഉയർന്നതോടെ പ്രവൃത്തി പൂർണമായി തടസ്സപ്പെട്ട നിലയിലാണ്. സ്പാൻ നിർമാണത്തിനുള്ള കമ്പിയും മറ്റും തയാറാക്കി വച്ചത് മഴയിൽ തുരുമ്പെടുത്ത് നിർമാണത്തകരാറിന് ഇടയാക്കുമോ എന്ന ആശങ്കയിലാണ് നാട്ടുകാർ. പാലം പൂർത്തിയായാലും അപ്രോച്ച് റോഡും ടാറിങ്ങും പൂർത്തിയാക്കാൻ പിന്നെയും സമയമെടുക്കും.

കോഴിക്കോട് കോര്‍പറേഷനില്‍ നടക്കുന്നത് കൊള്ളയടി: രമേശ് ചെന്നിത്തല

കോൺഗ്രസ് കോർപറേഷന്‍ ഓഫീസ് ഉപരോധിച്ചു കോഴിക്കോട് : മേയറും ഡെപ്യൂട്ടി മേയറും സിപിഎമ്മും ചേര്‍ന്ന കോക്കസിന്‍റെ കൊള്ളയടിയാണ് കോഴിക്കോട് കോര്‍പറേഷനില്‍ നടക്കുന്നതെന്ന് കോണ്‍ഗ്രസ് പ്രവര്‍ത്തക സമിതി അംഗം രമേശ് ചെന്നിത്തല. കോഴിക്കോട് കോര്‍പ്പറേഷന്‍റെ കമ്മീഷന്‍ കൊള്ളക്കും അഴിമതിക്കുമെതിരെ ജില്ല കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടത്തിയ കോര്‍പറേഷന്‍ ഓഫീസ് ഉപരോധം ഉദ്ഘാടനം ചെയ്യുകയായിരുന്നു അദ്ദേഹം. കോര്‍പറേഷന്‍റെ കൊള്ള പണം എങ്ങോട്ടു പോകുന്നുവെന്നതിന്‍റെ മറുപടിയാണ് കോര്‍പറേഷന്‍ സൂപ്രണ്ടിങ് എന്‍ജിനിയറുടെ വീട്ടില്‍ നടന്ന വിജിലന്‍സ് റെയ്ഡ്. കോര്‍പറേഷന്‍ അഴിമതി മഞ്ഞുമലയുടെ ഒരറ്റം മാത്രമാണിത്. മേയര്‍ക്കും ഡെപ്യൂട്ടി മേയര്‍ക്കും വൈകാതെ രാജി വെയ്‌ക്കേണ്ടി വരുമെന്നും ചെന്നിത്തല പറഞ്ഞു. സംസ്ഥാനത്തെ ഒന്‍പത് വര്‍ഷം കട്ടു മുടിച്ച പിണറായി ഭരണത്തിന്റെ അഴിമതി തുടര്‍ച്ചയുടെ ഭാഗമാണ് കോഴിക്കോട് കോര്‍പറേഷനിലും നടക്കുന്നത്. കോര്‍പറേഷനില്‍ കഴിഞ്ഞ അന്‍പത് വര്‍ഷം ഭരിച്ചിട്ട് കോഴിക്കോടിന് വേണ്ടി എന്ത് ചെയ്തതെന്ന് പറയാനുള്ള ബാധ്യത സിപിഎമ്മിനുണ്ട്. കമ്മീഷന്‍ ഭരണമാണ് കോര്‍പ്പറേഷന്‍ നടത്തുന്നത്. കമ്മീഷന്‍ ഉറപ്പിച്ചാണ് പാളയത്ത് നിന്നും പച്ചക്കറി മാര്‍ക്കറ്റ് മാറ്റുന്നത്. കമ്മീഷന്‍ ഉറപ്പിക്കാത്തതിനാലാണ് മെഡിക്കല്‍ കോളേജ് ബസ് ടെര്‍മിനല്‍ ഉള്‍പ്പെടെ നടപ്പിലാകാത്തത്. കമ്മീഷനും കൊള്ളയടിയും തുടരുന്നവര്‍ വാര്‍ഡ് വിഭജിച്ച് വീണ്ടും ഭരണം പിടിക്കാന്‍ ശ്രമിക്കുകയാണ്. പ്രബുധരായ ജനത്തെ ഇനിയും വിഡ്ഢികളാക്കാനാകില്ലെന്നും ഇതുവരെ കൊള്ളയടിച്ച ഒരോ രൂപക്കും കോര്‍പറേഷന്‍ മറുപടി നല്‍കേണ്ടി വരുമെന്നും അദ്ദേഹം കൂട്ടിചേര്‍ത്തൂ. രാവിലെ 6.30ന് കോര്‍പ്പറേഷന്‍ ഓഫീസ് പരിസരത്ത് എത്തിയ കോണ്‍ഗ്രസ് നേതാക്കളും പ്രവര്‍ത്തകരുടെ ഓഫീസിന്‍റെ പ്രധാന കവാടം ഉള്‍പ്പെടെ മൂന്ന് ഗേറ്റുകളും വളഞ്ഞു. ഗേറ്റിന് മുന്നില്‍ പ്രതിഷേധിച്ച പ്രവര്‍ത്തകരെ മാറ്റാന്‍ പോലീസ് ശ്രമിച്ചത് നേരിയ ഉന്തും തള്ളിനും ഇടയാക്കി. ഓഫീസിലേക്ക് കടക്കാനുള്ള ജീവനക്കാരുടെ ശ്രമത്തെ പ്രവര്‍ത്തകര്‍ ശക്തമായി തടഞ്ഞതോടെ ജീവനക്കാര്‍ ബീച്ച് പരിസരത്തേക്ക് മടങ്ങി. രാവിലെ ആരംഭിച്ച കനത്ത മഴയെ പോലും അവഗണിച്ച് സ്ത്രീകളുള്‍പ്പെടെയുള്ള ആയിരകണക്കിന് പ്രവര്‍ത്തകരാണ് ഉപരോധസമരത്തില്‍ പങ്കെടുത്തത്. പത്തുമണിയോടെ എത്തിയ രമേശ് ചെന്നിത്തല മൂന്നു ഗേറ്റിലുമായി തമ്പടിച്ച പ്രവര്‍ത്തകരെ നേരിട്ട് കണ്ട് അഭിവാദ്യമര്‍പ്പിച്ചതിന് ശേഷമാണ് ഉദ്ഘാടന വേദിയിലേക്ക് എത്തിയത്. ഉച്ചക്ക് 12മണിയോട് കൂടിയാണ് ഉപരോധം അവസാനിപ്പിച്ച് പ്രവര്‍ത്തകര്‍ മടങ്ങിയത്. ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അധ്യക്ഷത വഹിച്ചു. എം.കെ രാഘവന്‍ എംപി, അഡ്വ. ടി. സിദ്ദിഖ് എംഎല്‍എ, മുസ്ലീം ലീഗ് ജില്ല പ്രസിഡന്‍റ് എം.എ റസാഖ്, കെപിസിസി ജനറല്‍ സെക്രട്ടറിമാരായ അഡ്വ. കെ. ജയന്ത്, പി.എം നിയാസ് ഉള്‍പ്പെടെയുള്ളവര്‍ പ്രസംഗിച്ചു.

യുവാവിനെ മരിച്ച നിലയിൽ കണ്ടെത്തി

‌കോഴിക്കോട്: ചാലപ്പുറത്ത്‌ നിന്ന് കഴിഞ്ഞ ദിവസം കാണാതായ യുവാവിനെ മാവൂർ റോഡിൽ മരിച്ച നിലയിൽ കണ്ടെത്തി. ചാലപ്പുറം അച്യുതൻ ഗേൾസ് സ്‌കൂളിന് സമീപം പിവിഎസ് ടവേർസിൽ 7ഡിയിൽ താമസിക്കുന്ന കോട്ടയം ചങ്ങനാശേരി വാഴപ്പള്ളി സ്വദേശി മഹേഷ് ഗോപാല കൃഷ്ണൻ (45) ആണ് മരിച്ചത്. ശനിയാഴ്ച രാവിലെ 8.45ന് മാവൂർ റോഡിൽ റാവിസ് ഹോട്ടലിനും ഹിറാ സെന്‍ററിനുമിടിയിലാണ് മൃതദേഹം കണ്ടെത്തിയത്. സ്ഥിരമായി നടക്കാൻ പോകുന്നയാളാണ് മഹേഷ്. വെള്ളിയാഴ്ച വൈകിട്ട് നടക്കാനിറങ്ങിയ മഹേഷ് ഏറെ കഴിഞ്ഞിട്ടും തിരിച്ചെത്തിയില്ല. തുടർന്ന് വീട്ടുകാരും സുഹൃത്തുക്കളും കസബ പോലീസിൽ പരാതി നൽകുകയായിരുന്നു. എല്ലാദിവസവും പോകുന്ന വഴിയിൽ പോലീസും സുഹൃത്തുക്കളും തെരഞ്ഞെങ്കിലും കണ്ടെത്തിയില്ല. ഇന്നലെ രാവിലെ റോഡിന് സമീപം മൃതദേഹം കണ്ട നാട്ടുകാരാണ് പോലീസിൽ അറിയിച്ചത്. ഹൃദയാഘാദമാണ് മരണകാരണമെന്നാണ് പ്രാഥമിക പോസ്റ്റ് മോർട്ടം റിപ്പോർട്ട്. മഹേഷ് ഷിപ്പിൽ ക്യാപ്റ്റാണ്. അച്ഛൻ: ഗോപാല കൃഷ്ണൻ. അമ്മ: രാജലക്ഷ്മി. ഭാര്യ: മേഘ്‌ന മഹേഷ്. മകൾ: മഞ്ജു മഹേഷ്. സഹോദരൻ: രാംപ്രകാശ്. സംസ്‌കാരം ഇന്ന് പത്തിന് പുതിയപാലം ബ്രാഹ്‌മണ ശ്മശാനത്തിൽ.

കോടഞ്ചേരി പഞ്ചായത്തിനെ അതിദാരിദ്ര്യ മുക്ത പഞ്ചായത്തായി പ്രഖ്യാപിച്ചു

കോടഞ്ചേരി: കോടഞ്ചേരി പഞ്ചായത്ത് അതിദരിദ്രരായി കണ്ടെത്തിയ 77 പേർക്കായി വിവിധങ്ങളായ പദ്ധതികളുടെ സഹായത്തോടുകൂടി ആവശ്യമായ 60 ലക്ഷം രൂപയുടെ സഹായങ്ങൾ നൽകി അതി ദാരിദ്ര്യ മുക്ത പഞ്ചായത്തായി കോടഞ്ചേരി പഞ്ചായത്തിനെ പ്രസിഡന്‍റ് അലക്സ് തോമസ് ചെമ്പകശേരി പ്രഖ്യാപിച്ചു. വൈസ് പ്രസിഡന്‍റ് ജമീല അസീസിന്‍റെ അധ്യക്ഷതയിൽ ചേർന്ന യോഗത്തിൽ ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സൂസൻ വർഗീസ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സിബി ചിരണ്ടായത്ത്, പഞ്ചായത്ത് മെമ്പർമാരായ ജോർജുകുട്ടി വിളക്കുന്നൽ, റോസിലി മാത്യു, റിയാനസ് സുബൈർ, വനജാ വിജയൻ, ലീലാമ്മ കണ്ടത്തിൽ, റോസമ്മ കയത്തുങ്കൽ, ലിസി ചാക്കോ, ഷാജി മുട്ടത്ത്, ബിന്ദു ജോർജ്, ചിന്നാ അശോകൻ തുടങ്ങിയവർ ചടങ്ങിൽ സംബന്ധിച്ചു.

ടാര്‍സന്‍ ജോസ് ആര്‍ജെഡി മണ്ഡലം പ്രസിഡന്‍റ്

കോഴിക്കോട്: ആര്‍ജെഡി തിരുവമ്പാടി നിയോജകമണ്ഡലം പ്രസിഡന്‍റായി ടാര്‍സന്‍ ജോസ് കോക്കാപ്പിള്ളിയെ തിരഞ്ഞെടുത്തു. അബ്രാഹം മാനുവല്‍, ഇളമന ഹരിദാസ്.ജോണ്‍സണ്‍ കുളത്തുങ്കല്‍, അന്നമ്മ മംഗയില്‍ ,സുബൈര്‍ അത്തുളി, മുഹമ്മദ് കുട്ടി പുളിക്കല്‍, നിസ്താര്‍, മനോജ് മൂത്തേടത്ത്, രാജേഷ് പൊട്ടിയില്‍, റഷീദ് തോട്ടപ്പാളി, ജോര്‍ജ് പ്ലാക്കാട്ട്, ജില്‍സ് ഇടമനശ്ശേരി മാത്യു മഗര, സത്യന്‍ പനക്കച്ചാല്‍ എന്നിവരെ നിയോജക മണ്ഡലം കമ്മിറ്റി അംഗങ്ങളായി തിരഞ്ഞെടുത്തു. തിരഞ്ഞെടുപ്പ് നടപടികള്‍ റീട്ടേണിംഗ് ഓഫിസര്‍ വി.എ. ജോസ് വരകാപ്പള്ളി നിയന്ത്രിച്ചു. വിജയിച്ചവരെ ദേശീയ കണ്‍സില്‍ അംഗം പി.എം. തോമസ് , ജില്ലാ സെക്രട്ടറി വില്‍സന്‍ പുല്ലുവേലി, ജോര്‍ജ് മംഗര എന്നിവര്‍ അനുമോദിച്ചു.

വാർഷികാഘോഷവും കുടുംബസംഗമവും

കൂടരഞ്ഞി: ബത്തേരി രൂപതയുടെ സാമൂഹ്യക്ഷേമ പ്രസ്ഥാനമായ സോഷ്യൽ സർവീസ് സെന്‍റർ കൂടരഞ്ഞി യൂണിറ്റിന്‍റെ ഒന്നാം വാർഷികവും കുടുംബ സംഗമവും നടത്തി. കോഴിക്കോട് മേഖല ഡയറക്ടർ ഫാ. തോമസ് മണ്ണിത്തോട്ടത്തിൽ അധ്യക്ഷനായിരുന്ന പൊതുയോഗം ലിന്‍റോ ജോസഫ് എംഎൽഎ ഉദ്ഘാടനം ചെയ്തു. കൂടരഞ്ഞി പഞ്ചായത്ത് പ്രസിഡന്‍റ് ആദർശ് ജോസഫ് മുഖ്യാതിഥിയായിരുന്നു. കൂടരഞ്ഞി സെന്‍റ് സെബാസ്റ്റ്യൻസ് പള്ളി വികാരി ഫാ. ബിനോയ് പുരയിടത്തിൽ അനുഗ്രഹ പ്രഭാഷണം നടത്തി. ജനപ്രതിനിധികളായ ജെറീന റോയ്, ബിന്ദു ജയൻ എന്നിവരെ പൊന്നാടയണിയിച്ച് ആദരിച്ചു. കൂടാതെ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ ശ്രേയസ് കുടുംബാംഗങ്ങളായ 19 കുട്ടികൾക്ക് മൊമെന്‍റോ നൽകി. ശ്രേയസ് കോഴിക്കോട് മേഖല കോഡിനേറ്റർ ലിസി റെജി മുഖ്യപ്രഭാഷണം നടത്തി. മേഖല ആനിമേറ്റർ ഐസക്ക് മനക്കത്തോട്ടം, യൂണിറ്റ് സെക്രട്ടറി സജി പുളിക്കണ്ടം, കമ്മിറ്റി അംഗമായ ജോമ സുരേഷ് എന്നിവർ പ്രസംഗിച്ചു.

വികസിത് കൃഷി സങ്കൽപ് അഭിയാൻ പദ്ധതിയ്ക്ക് ജില്ലയിൽ തുടക്കമായി

കോഴിക്കോട്: രാജ്യത്തെ ഒന്നരകോടി കർഷകരുമായി കാർഷിക ശാസ്ത്രജ്ഞരും വിദഗ്ധരും നേരിട്ടു സംവദിക്കുന്ന ‘വികസിത് കൃഷി സങ്കൽപ് അഭിയാൻ’ പദ്ധതിക്ക് ജില്ലയിൽ തുടക്കമായി. കോഴിക്കോട് ജില്ലയിൽ ഐസിഎആർ - ഭാരതീയ സുഗന്ധവിള ഗവേഷണ സ്ഥാപനവും കൃഷി വിജ്ഞാന കേന്ദ്രവും സംയുക്തമായി സംഘടിപ്പിക്കുന്ന കാമ്പയിനിന്‍റെ പര്യടന വാഹനം ഗവേഷണ സ്ഥാപനത്തിൽ നടന്ന ചടങ്ങിൽ ഡയറക്ടർ ഡോ. ആർ. ദിനേശ് ഫ്ലാഗ് ഓഫ് ചെയ്തു. ജൂൺ 12 വരെ ജില്ലയുടെ വിവിധ പ്രദേശങ്ങളിൽ ഇതിന്‍റെ ഭാഗമായി ശാസ്ത്രജ്ഞരും ഉദ്യോഗസ്ഥരുമടങ്ങുന്ന സംഘം കർഷകരെ നേരിൽ കണ്ട് സംവദിക്കും. ഗവേഷണവും പ്രായോഗിക പ്രയോഗവും തമ്മിലുള്ള വിടവ് നികത്താനും, സമഗ്രവും സുസ്ഥിരവുമായ വളർച്ചയ്ക്കായി കർഷക നേതൃത്വത്തിലുള്ള നവീകരണങ്ങളെ പ്രോത്സാഹിപ്പിക്കാനും വികസിപ്പിക്കാനും ലക്ഷ്യമിട്ടാണ് വികസിത കൃഷി സങ്കൽപ് കാമ്പയിന് തുടക്കമിട്ടിരിക്കുന്നത്. ജില്ലയിൽ ആദ്യദിനം എലത്തൂർ, ഒളവണ്ണ, നല്ലളം എന്നിവിടങ്ങളിലായാണ് കർഷകരുമായുള്ള സംവാദം സംഘടിപ്പിച്ചത്. ഇതിനോടൊപ്പം കെവികെയുടെ നേതൃത്വത്തിൽ സുവർണ്ണ സമൃദ്ധി സുഗന്ധവിള യാത്രയും ജില്ലയിൽ പര്യടനം നടത്തി.

ചക്കിട്ടപാറയിൽ ചുഴലിക്കാറ്റ്: വൻ നാശനഷ്ടം

പേരാമ്പ്ര: ചക്കിട്ടപാറ പഞ്ചായത്തിലെ 9, 12.13, 14 വാർഡ് പ്രദേശങ്ങളിൽ വ്യാഴാഴ്ച രാത്രി പത്തരയോടെയുണ്ടായ ചുഴലിക്കാറ്റിൽ വ്യാപക നാശ നഷ്ടം. നിരവധി വീടുകൾക്കുമേൽ മരങ്ങൾ കടപുഴകി വീണു. റോഡിൽ ഗതാഗത തടസമുണ്ടായി. അനേകം വൈദ്യുതി തൂണുകളും കമ്പിയും തകർന്നു. വ്യാപകമായ കൃഷി നശിച്ചു. നരിനട പനമറ്റത്തിൽ ജിന്‍റോയ്ക്ക് വലിയ കൃഷി നാശമാണ് സംഭവിച്ചിരിക്കുന്നത്. വല്ലനാട്ട് അന്നമ്മ, തങ്കച്ചൻ, സിജോ, ജോയി എന്നിവർക്കും കൃഷി നാശമുണ്ടായി. പറക്കൽ ബെന്നിയുടെ കോഴിഫാമിനു തകരാർ പറ്റി. ഷൈജൻ പാറുകുന്നേൽ, കനവ് സുരേഷ്, അത്തിക്കോളിൽ അസീസ്, സജി പുളിക്കൽ, വിജയൻ കണയങ്കൽ, പൊതിക്കനാട്ട് ജോസഫ്, ബിജു പനമറ്റം, പ്രകാശ്‌ തലച്ചിറ, ചക്കാലയിൽ ജോസ്, ശ്രീനി കുറ്റിപ്ലായി, റോബി കുരിശൃം മൂട്ടിൽ, ഫിലിപ്പ് പാറപ്പുറത്ത്, ആനീസ് പാറപ്പുറത്ത്, സിബി പനമറ്റത്തിൽ, തോട്ടുപുറം ജെയിംസ് എന്നിവർക്കും കൃഷി നാശമുണ്ടായി. റിസോർട്ട് ഉടമ കോമത്ത് സവിതക്കും നഷ്ടം നേരിട്ടു. ടോം പനമറ്റം, സുജിത്ത്, രാജൻ കുളത്തുവയൽ, നാരായണൻ, ബഷീർ കുരിട്ടിയത്ത്, ലിസി കിഴക്കേടത്ത്, ബിനു വട്ടക്കണ്ടി, രജ്ഞിത്ത് ഇലവന്തിക്കൽ, സുരേഷ് കരുമാം തടത്തിൽ എന്നിവർക്കും കാറ്റിൽ നാശനഷ്ടമുണ്ടായി. ചക്കിട്ടപാറ കൂടക്കൊല്ലിയിൽ വിരണപ്പുറത്ത് മൂസയുടെ വീടിനു മേൽ മരം വീണു. എടാട്ട് ഷിബുവിന്‍റെ വീടിന്‍റെ മതിൽ മരം വീണ് തകർന്നു. കണിയാങ്കണ്ടി ആണ്ടി, ദാമോദരൻ കിഴക്കേപറമ്പിൽ എന്നിവർക്കും നാശമുണ്ടായി. മാളിയേക്കൽ വർക്കി (ബേബി) ക്കും റബർ ഉൾപ്പടെ വൻ കൃഷി നാശമുണ്ടായി. കൂത്രപ്പള്ളിൽ വിജയകുമാർ, ജോസഫ് കാരിമറ്റം, രമാ മണി ആലോകൂട്ടത്തിൽ, വിജയൻ ചെറിയ കോട്ടച്ചാലിൽ എന്നിവർക്കും നാശനഷ്ടം നേരിട്ടു. ചക്കിട്ടപാറ അമ്പലം ഭാഗത്ത് വിനയ പുരി അനിയന്‍റെ ഇരുനില വീടിനു മീതെ തെങ്ങും വലിയ മരങ്ങളും പതിച്ച് മേൽ കൂര തകർന്നു. സമീപവാസി കണിയാങ്കണ്ടി അശോകന്‍റെ കൃഷിയിടം നശിച്ചു. ഡോ. ലീല രാമകൃഷ്ണനും, പാറക്കൽ രഘുവരനും കൃഷി നാശ നഷ്ടം നേരിട്ടു. ചെമ്പ്ര റോഡിൽ ചെരിയം പുറത്ത് തോമസിന്‍റെ വീടിനു മീതെ വലിയ തെങ്ങ് കടപുഴകി വീണ് തകരാർ സംഭവിച്ചു. ജോസ്‌ തോണക്കര, സജി കാരിമറ്റം എന്നിവർക്കും കൃഷി നാശമുണ്ടായി. മറുമണ്ണ് ഭാഗത്ത് ചെറുവുള്ളാട്ട് അപ്പച്ചൻ, വിജയകുമാർ മുക്കള്ളിൽ എന്നിവർക്കും ചക്കിട്ടപാറയിൽ കാപ്പുകാട്ടിൽ ബേബിക്കും കൃഷി നാശമുണ്ടായി. വാർഡ് 9, 12 വാർഡുകളിലാണ് നഷ്ടങ്ങൾ ഏറെയും.

കൂറ്റൻ പരസ്യബോർഡുകൾ: ജനങ്ങളുടെ സുരക്ഷ ഉറപ്പാക്കണമെന്ന്

കോഴിക്കോട്: മലാപറമ്പ്-വെങ്ങളം ബൈപാസിൽ മൊകവൂർ-പൂളാടിക്കുന്ന് സർവീസ് റോഡിൽ കൂറ്റൻ പരസ്യബോർഡ് കാറ്റിൽ നിലംപതിച്ച സാഹചര്യത്തിൽ പൊതുജനങ്ങളുടെ സുരക്ഷക്കായി കർശന നടപടികൾ സ്വീകരിക്കണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് ഉത്തരവിട്ടു. കോഴിക്കോട് കോർപറേഷൻ സെക്രട്ടറിക്കാണ് കമ്മീഷൻ നിർദേശം നൽകിയത്. 15 ദിവസത്തിനകം റിപ്പോർട്ട് സമർപ്പിക്കണം. ജൂൺ 26ന് കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തയുടെ അടിസ്ഥാനത്തിലാണ് കമ്മീഷൻ സ്വമേധയാ കേസെടുത്തത്. സ്വകാര്യ വ്യക്തികളുടെ സ്ഥലം വാടകയ്ക്കെടുത്താണ് കൂറ്റൻ പരസ്യഹോർഡിംഗുകൾ സ്ഥാപിക്കുന്നത്. വേങ്ങേരി, ചേവരമ്പലം തുടങ്ങിയ സ്ഥലങ്ങളിലുള്ള കൂറ്റൻ ഹോർഡിംഗുകളും അപകടാവസ്ഥയിലാണ്. ഇവ മാറ്റണമെന്ന് ദേശീയപാതാ അഥോറിറ്റി കോർപറേഷൻ സെക്രട്ടറിക്ക് നോട്ടീസ് നൽകിയിരുന്നതായും മനസിലാക്കുന്നു. നഗരത്തിൽ വിവിധ സ്ഥലങ്ങളിലായി സ്ഥാപിച്ചിട്ടുള്ള 43 ബോർഡുകൾ അപകടാവസ്ഥയിലാണെന്ന് സിറ്റി പോലീസ് ജില്ലാ ദുരന്തനിവാരണ വകുപ്പിന് കത്ത് നൽകിയതായും മനസിലാക്കുന്നു.

മാലിന്യം വലിച്ചെറിയല്‍; നടപടി കടുപ്പിച്ച് ശുചിത്വമിഷന്‍

കോഴിക്കോട്: പൊതു ഇടങ്ങളില്‍ മാലിന്യങ്ങള്‍ വലിച്ചെറിയുന്ന സംഭവങ്ങളില്‍ കര്‍ശന നടപടിയുമായി ശുചിത്വമിഷന്‍. അലക്ഷ്യമായി മാലിന്യങ്ങള്‍ വലിച്ചെറിഞ്ഞ സംഭവങ്ങളില്‍ ഇതുവരെ ലഭിച്ച 4772 പരാതികളില്‍ 30.67 ലക്ഷം രൂപ പിഴ ഈടാക്കിയതായി അധികൃതര്‍ അറിയിച്ചു. പൊതുജനങ്ങള്‍ക്ക് പരാതി നല്‍കാനുള്ള സിംഗിള്‍ വാട്സപ്പ് നമ്പറില്‍ 7921 പരാതികളാണ് ഇതുവരെ വന്നത്. പൊതു ഇടങ്ങളിലും മറ്റും മാലിന്യ കൂമ്പാരങ്ങളും മാലിന്യം നിറഞ്ഞ വെള്ളക്കെട്ടുകളും ശ്രദ്ധയില്‍ പെട്ടാല്‍ 9446 700 800 എന്ന നമ്പറില്‍ ഫോട്ടോയെടുത്ത് അയക്കാനുള്ള നിര്‍ദേശമാണ് ശുചിത്വമിഷന്‍ നല്‍കിയിരിക്കുന്നത്. തദ്ദേശ സ്വയം ഭരണ സ്ഥാപനങ്ങളുടെ നേതൃത്വത്തില്‍ ശുചീകരണ പ്രവര്‍ത്തനങ്ങള്‍ നടക്കുന്നുണ്ടെങ്കിലും കാണാതെ പോകുന്ന മാലിന്യക്കൂമ്പാരങ്ങള്‍ പൊതുജനങ്ങള്‍ അറിയിക്കുന്നത് മൂലം നീക്കാന്‍ സാധിക്കുമെന്നാണ് ഈ പദ്ധതിയിലൂടെ ലക്ഷ്യമിടുന്നതെന്നും അധികൃതര്‍ അറിയിച്ചു. പരാതി അറിയിക്കുന്നവര്‍ക്ക് 25,000 രൂപ വരെ പാരിതോഷികമായി നല്‍കും. അതേസമയം, തദ്ദേശസ്ഥാപനങ്ങളുടെ നേതൃത്വത്തില്‍ മഴക്കാല പൂര്‍വ ശുചീകരണ പ്രവര്‍ത്തനങ്ങള്‍ നടത്തിയതായും ജില്ലയില്‍ ഹോട്ട്സ്പോട്ടുകളായി കണക്കാക്കിയിരിക്കുന്ന ഇടങ്ങളെല്ലാം കണ്ടെത്തി വൃത്തിയാക്കിയതായും ജില്ലാ ശുചിത്വ മിഷന്‍ കോ-ഓര്‍ഡിനേറ്റര്‍ കെ.ടി.രാകേഷ് അറിയിച്ചു. ജില്ലയില്‍ വാര്‍ഡ് തലത്തില്‍ കമ്മിറ്റികള്‍ രൂപീകരിച്ചുള്ള പ്രവര്‍ത്തനങ്ങളില്‍ 2091 സ്ഥലങ്ങളില്‍ ശുചീകരണ പ്രവര്‍ത്തികള്‍ നടന്നു. സന്നദ്ധ സംഘടനകള്‍ വഴി 569 സ്ഥലങ്ങളിലും, ഓടകളും അഴുക്കുചാലുകളുമടക്കം 4652 ജലസ്രോതസ്സുകള്‍ ശുചീകരിച്ചതായും അദ്ദേഹം പറഞ്ഞു.

ജില്ലയില്‍ മഴക്കെടുതികള്‍ തുടരുന്നു : മൂന്നു ക്യാമ്പുകളിലായി കഴിയുന്നത് 130 പേർ

കോഴിക്കോട്: മഴക്കെടുതികളെ തുടര്‍ന്ന് ജില്ലയില്‍ ആരംഭിച്ച മൂന്ന് ദുരിതാശ്വാസ ക്യാമ്പുകളിലായി നിലവില്‍ കഴിയുന്നത് 43 കുടുംബങ്ങളില്‍ നിന്നുള്ള 130 പേര്‍. വടകര താലൂക്കിലെ വിലങ്ങാട് വില്ലേജില്‍ ഒന്നും കോഴിക്കോട് താലൂക്കിൽ കസബ, ചേവായൂര്‍ വില്ലേജുകളിലായി ഓരോന്നും ക്യാമ്പുകളാണ് നിലവിലുള്ളത്. വിലങ്ങാട് വില്ലേജിലെ ക്യാമ്പില്‍ 44 കുടുംബങ്ങളില്‍ നിന്നുള്ള 50 പുരുഷന്മാരും 37 സ്ത്രീകളും 21 കുട്ടികളുമായി 108 പേരാണ് കഴിയുന്നത്. വിലങ്ങാട് ഉരുള്‍പൊട്ടല്‍ ഭീഷണി നിലനില്‍ക്കുന്ന പ്രദേശങ്ങളിലെ താമസക്കാരെയാണ് ക്യാമ്പിലേക്ക് മാറ്റിയിരിക്കുന്നത്. കോഴിക്കോട് താലൂക്കിലെ രണ്ട് ക്യാമ്പുകളിൽ 6 കുടുംബങ്ങളില്‍നിന്നായി 6 പുരുഷന്മാരും 9 സ്ത്രീകളും 7 കുട്ടികളും അടക്കം 22 പേരെ മാറ്റിപ്പാര്‍പ്പിച്ചിട്ടുണ്ട്. വീടുകളില്‍ വെള്ളം കയറിയതിനെ തുടര്‍ന്നാണ് ഇവരെ ക്യാമ്പുകളിലേക്ക് മാറ്റിയത്. ഇതിനു പുറമെ, ജില്ലയുടെ വിവിധ ഭാഗങ്ങളില്‍ വീടുകളില്‍ വെള്ളം കയറുകയും മരവും മറ്റും വീണ് വീടുകള്‍ക്ക് ഭാഗികമായി കേടുപാടുകള്‍ സംഭവിക്കുകയും ചെയ്തതിനെ തുടര്‍ന്ന് നിരവധി കുടുംബങ്ങള്‍ ബന്ധുവീടുകളിലേക്ക് മാറിത്താമസിച്ചിട്ടുണ്ട്. അഴിയൂര്‍ വില്ലേജില്‍ വീടുകളില്‍ വെള്ളം കയറിയതിനാല്‍ 9 കുടുംബങ്ങളാണ് ഈ രീതിയില്‍ ബന്ധുവീട്ടുകളിലേക്ക് മാറിയത്. ശക്തമായ മഴയില്‍ പലയിടങ്ങളിലും റോഡുകളും താഴ്ന്ന പ്രദേശങ്ങളും വെള്ളത്തിനടിയിലായി. പലയിടങ്ങളിലും ഗതാഗതം മുടങ്ങി. കൊയിലാണ്ടി ദേശീയപാതയില്‍ മൂരാട് പാലത്തിനടുത്ത് വെള്ളം കെട്ടിക്കിടന്നതിനെ തുടര്‍ന്ന് ഗതാഗത തടസം അനുഭവപ്പെട്ടു. ഇവിടെ ഓട്ടോ കുഴിയില്‍ വീണ് മറിഞ്ഞു. അവിടനല്ലൂര്‍ വില്ലേജില്‍ പടിഞ്ഞാറെ അണിയോത്ത് ഗംഗാധരന്‍റെ വീട്ടിന് ശക്തമായ മഴയില്‍ ഭാഗിക നാശനഷ്ടം സംഭവിച്ചു. ഇതേ വില്ലേജില്‍ വാഴയിലകത്തൂട്ട് രാമകൃഷ്ണന്‍റെ വീടിന് മുകളില്‍ മരം വീണ് ഭാഗികമായി നാശനഷ്ടമുണ്ടായി. കോട്ടൂര്‍ വില്ലേജ് തിരുവോട് പീറ്റക്കണ്ടി രാമന്‍കുട്ടിയുടെ വീടിനോട് ചേര്‍ന്നുള്ള ഷെഡ്, ശുചിമുറി എന്നിവ തകര്‍ന്നു. കുറ്റ്യാടി ജലവൈദ്യുത പദ്ധതിയുടെ ഭാഗമായുള്ള കക്കയം ഡാമിലെ ജലനിരപ്പ് 756.7 മീറ്ററായി ഉയര്‍ന്ന സാഹചര്യത്തില്‍ രണ്ടാംഘട്ട മുന്നറിയിപ്പായ ഓറഞ്ച് അലര്‍ട്ട് പ്രഖ്യാപിച്ചു. ജലനിരപ്പ് റെഡ് അലര്‍ട്ട് ലെവല്‍ ആയ 758 മീറ്ററില്‍ എത്തിയാല്‍ ഡാമിലെ അധികജലം തുറന്നു വിടേണ്ടതുള്ളതിനാല്‍ കുറ്റ്യാടി പുഴയുടെ തീരനിവാസികള്‍ ജാഗ്രത പാലിക്കണമെന്ന് ജില്ലാ കലക്ടര്‍ അറിയിച്ചു. ശക്തമായ മഴയെതുടര്‍ന്ന് പൂനൂര്‍ പുഴയിലെ ജലനിരപ്പ് വലിയ തോതില്‍ ഉയര്‍ന്നിട്ടുണ്ട്. കുന്ദമംഗലം ഭാഗത്ത് ജലനിരപ്പ് അപകട നിരപ്പായ എട്ട് മീറ്ററിനേക്കാള്‍ ഉയര്‍ന്നു. കോളിക്കല്‍ ഭാഗത്തും ജലനിരപ്പ് മുന്നറിയിപ്പ് നിരപ്പിനേക്കാള്‍ മുകളിലാണ് - 20.434 മീറ്റര്‍. തീരങ്ങളിലുള്ളവര്‍ക്ക് ജാഗ്രതാ നിര്‍ദ്ദേശം നല്‍കിയിട്ടുണ്ട്. കൊയിലാണ്ടി: കഴിഞ്ഞ ദിവസമുണ്ടായ കാറ്റിലും മഴയിലും തെങ്ങ് വീണ് വീടു തകർന്നു. കൊരയങ്ങാട് തെരു പുത്തൻപുരയിൽ ശൈലജയുടെ വീടാണ് സ്വകാര്യ വ്യക്തിയുടെ പറമ്പിലെ തെങ്ങ് വീണ് തകർന്നത്. വീട്ടിൽ ആരും ഇല്ലാത്തതിനാൽ ദുരന്തം ഒഴിവായി. ലക്ഷങ്ങളുടെ നഷ്ടം കണക്കാക്കുന്നു. വില്ലേജിൽ പരാതി നൽകിയിട്ടുണ്ട്. സംസ്ഥാന പാതയില്‍ പെരിങ്ങത്തൂര്‍ പാലത്തിന് സമീപത്തെ വന്‍മരം കടപുഴകി. മരം വീണത് പുലര്‍െച്ചയായതിനാല്‍ വന്‍ ദുരന്തം ഒഴിവായി. കണ്ണൂര്‍ ജില്ലാ അതിര്‍ത്തിയിലെ കായപ്പനച്ചിയിലാണ് ഇന്നലെ പുലര്‍ച്ചെ മൂന്നുമണിയോടെ വന്‍മരം റോഡിന് കുറുകെ കടപുഴകി വീണത്. മരം വീണതിനെ തുടര്‍ന്ന് നാദാപുരം - തലശ്ശേരി റൂട്ടില്‍ വാഹന ഗതാഗതം നിലച്ചു.

മുതിർന്ന സിപിഐ നേതാവ് സി.എം. കേശവൻ അന്തരിച്ചു

കോഴിക്കോട്: മുതിർന്ന സിപിഐ നേതാവും എഴുത്തുകാരനും സാമൂഹിക-സാംസ്ക്കാരിക രംഗത്തെ നിറസാന്നിധ്യവുമായിരുന്ന വേങ്ങേരി 'സുസനിയി'ൽ സി.എം. കേശവൻ (84-റിട്ട. സൂപ്രണ്ട്, സോയിൽ കൺസർവേഷൻ വകുപ്പ്) അന്തരിച്ചു. ഭാര്യ: പഴേടത്ത് സൗമിനി. മക്കൾ: സുകേഷ് (ഇഷ ക്രിയേഷൻസ് നടക്കാവ്), നികേഷ് (കെൽട്രോൺ, കോഴിക്കോട്), സവീന (അധ്യാപിക, ഗവ. ഹയർ സെക്കൻഡറി സ്കൂൾ, ചേളാരി). മരുമക്കൾ: ഷൈജ (ഇഷ ക്രിയേഷൻസ് നടക്കാവ്), സബിത (കെഎസ്എഫ്ഇ നരിക്കുനി), രാജൻ (സെക്ഷൻ ഓഫീസർ, കാലിക്കട്ട് യൂണിവേഴ്സിറ്റി). സഹോദരങ്ങൾ: കാർത്ത്യായനി, അംബുജാക്ഷി, രാധ, പരേതരായ സി.എം. വേലായുധൻ, സി.എം. ശങ്കരൻ. സിപിഐ കോഴിക്കോട് സിറ്റി കമ്മിറ്റി അംഗം, ജോയിന്‍റ് കൗൺസിൽ ജില്ലാ സെക്രട്ടറി, സംസ്ഥാന കമ്മിറ്റി അംഗം, യുവകലാസാഹിതി ജില്ലാ സെക്രട്ടറി, പ്രസിഡന്‍റ്, സംസ്ഥാന എക്സി. കമ്മിറ്റി അംഗം എന്നീ നിലകളിൽ ദീർഘകാലം പ്രവർത്തിച്ചു. ഇപ്റ്റ, ഐപ് സോ, കെഎ കേരളീയൻ സ്മാരക സമിതി തുടങ്ങിയ സാംസ്ക്കാരിക പ്രസ്ഥാനങ്ങളിലും സജീവ സാന്നിധ്യമായിരുന്നു. കവി, ബാലസാഹിത്യകാരൻ, ഗ്രന്ഥകാരൻ എന്നീ നിലകളിലും ശ്രദ്ധേയനായിരുന്നു. "അക്കുത്തിക്കുത്ത്' എന്ന ബാലസാഹിത്യകൃതി പ്രസിദ്ധീകരിച്ചിട്ടുണ്ട്. സംസ്ക്കാരം മാവൂർ റോഡ് ശ്മശാനത്തിൽ നടന്നു. തുടർന്ന് അനുശോചന യോഗവും ചേർന്നു.

മലയോര ഹൈവേ: ചക്കിട്ടപാറ ടൗണിൽ അളവെടുത്തു

ചക്കിട്ടപാറ: റോഡിന്‍റെ വീതി സംബന്ധിച്ച് തർക്കം നിലനിൽക്കുന്നതിനാൽ മലയോര ഹൈവേയുടെ പണി ആഴ്ചകളായി മുടങ്ങി കിടക്കുന്ന ചക്കിട്ടപാറ ടൗണിൽ സർക്കാരിന്‍റെ സർവേ ടീം ഇന്നലെ അളവെടുപ്പ് നടത്തി. അളവെടുപ്പിൽ ടൗണിൽ എവിടെയും 12 മീറ്റർ വീതിയില്ല. പെരുവണ്ണാമൂഴി മുതൽ ഈ വീതിയിലാണ് ഹൈവേ നിർമിച്ചു വരുന്നത്. ഏഴ് മുതൽ പത്ത് മീറ്ററാണ് പുതിയ അളവിൽ കണ്ടെത്തിയത്. പല ഭാഗത്തും പല അളവ്. അതു കൊണ്ട് തന്നെ ഒരാളുടെ ഒഴിച്ച് ആരുടേയും കെട്ടിടങ്ങൾക്ക് പ്രശ്നവുമില്ല. സിംഹ ഭാഗ മാർക്കിംഗ് നടത്തിയത് റോഡിലുമാണ്. 12 മീറ്റർ വീതിയില്ലാതെ കേരള റോഡ് ഫണ്ട് ബോർഡിനു ഹൈവേ നിർമിക്കാൻ സാധ്യമല്ല. പഴയ ടീം അളന്നപ്പോൾ കടകൾക്കുള്ളിലാണ് മാർക്കിംഗ് നടത്തിയിരുന്നത്. ആരുടേയൊക്കെയോ ഇടപെടൽ കൊണ്ട് ഇവരിൽ പലരും ഇതിൽ നിന്നു പിന്നീട് ഒഴിവായി. ഇതോടെയാണ് ഒരു പറ്റം ആളുകൾ ടൗണിലെ ഹൈവേ പ്രവർത്തി തടഞ്ഞത്. പുതിയ ടീമിന്‍റെ ഇന്നലത്തെ വിചിത്ര അളവോടു കൂടി ആർക്കും വിഷമമില്ലാതായി. കെആർഎഫ്ബിക്കാർക്ക് റോഡ് പണിയാൻ എവിടെ നിന്നു 12 മീറ്റർ സ്ഥലം കിട്ടുമെന്നതാണ് പുതിയ ചോദ്യം.1981ൽ പെരുവണ്ണാമൂഴി - ചക്കിട്ടപാറ - ചെമ്പ്ര പിഡബ്ല്യുഡി റോഡ്‌ വികസനത്തിനു വേണ്ടി സ്ഥലം സർക്കാർ പണം നൽകി അക്വയർ ചെയ്തിരുന്നു. ഇതനുസരിച്ച് പാതക്ക് 12 മുതൽ 16 വരെ മീറ്റർ വീതിയിൽ സ്ഥലമുണ്ട്. ഇതെവിടെ പോയി എന്ന ജനത്തിന്‍റെ ചോദ്യത്തിനു ഉദ്യോഗസ്ഥർക്ക് മറുപടിയില്ല. റോഡ്‌ കയ്യേറ്റക്കാരെ അന്യായമായി സംരംക്ഷിക്കാൻ പിന്നിൽ കളിക്കുന്നവർക്കും. ഈ അനീതിക്കെതിരേ സംഘടിക്കാൻ നാട്ടുകാർ തയാറെടുപ്പിലാണ്.

എലിപ്പനി: പ്രതിരോധ മാര്‍ഗങ്ങള്‍ സ്വീകരിക്കണം

കോഴിക്കോട്: മഴയെ തുടര്‍ന്ന് ജില്ലയിലെ ചില പ്രദേശങ്ങളില്‍ വെള്ളക്കെട്ടുകള്‍ രൂപപ്പെടുകയും ദുരിതാശ്വാസ ക്യാമ്പുകള്‍ ആരംഭിക്കുകയും ചെയ്ത സാഹചര്യത്തില്‍ മലിനജലവുമായി സമ്പര്‍ക്കത്തിലാകുന്ന എല്ലാവരും എലിപ്പനി പ്രതിരോധ മാര്‍ഗങ്ങള്‍ സ്വീകരിക്കണമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു. ദുരിതാശ്വാസ ക്യാമ്പുകളില്‍ കഴിയുന്നവരും ക്യാമ്പുകളുമായി ബന്ധപ്പെട്ട് പ്രവര്‍ത്തിക്കുന്നവരും വീട്ടുപരിസരങ്ങളിലും വഴികളിലും മലിനജലത്തില്‍ ചവിട്ടി സഞ്ചരിക്കേണ്ടി വരുന്നവരും തൊഴില്‍ സാഹചര്യങ്ങളുമായി ബന്ധപ്പെട്ട് മലിനജല സമ്പര്‍ക്കമുണ്ടാകുന്നവരും ശുചീകരണ പ്രവര്‍ത്തനങ്ങളില്‍ ഏര്‍പ്പെടുന്നവരും എലിപ്പനിക്കെതിരായ പ്രതിരോധ ഗുളികയായ "ഡോക്സിസൈക്ലിന്‍' ആരോഗ്യപ്രവര്‍ത്തകരുടെ നിര്‍ദേശപ്രകാരം കഴിക്കണം.

പുന്നക്കലിൽ കാട്ടാന ശല്യം രൂക്ഷം

കോഴിക്കോട്: പുന്നക്കൽ ഓളീക്കൽ പ്രദേശത്തു കാട്ടാന ശല്യം രൂക്ഷം. ഒരാഴ്ചക്കാലമായി ഈ പ്രദേശത്ത് സ്ഥിരമായി കാട്ടാന ഇറങ്ങുകയും കർഷകരുടെ വിളകൾ നശിപ്പിക്കുകയും ചെയ്യുന്നുണ്ട്. തെങ്ങ്, ജാതി, കൊക്കോ, വാഴ തുടങ്ങിയ നിരവധി വിളകളാണ് നശിപ്പിച്ചത്. മേനം മൂട്ടിൽ ജെയ്സൺ, മങ്ങാട്ട് സിജോ, പട്ടാപുരയിടത്തിൽ രാധാമണി, ഇടിമിനാംപൊയികയിൽ അനൂപ്, യൂനസ് വില്ലൻ, ജോസ് വടക്കേപടവിൽ, സലാം തുടങ്ങിയവരുടെ കൃഷി ആണ് നശിപ്പിച്ചത്. കൃഷി നാശം സംഭവിച്ച കർഷകർക്ക് അടിയന്തര ധനസഹായം ലഭ്യമാക്കണമെന്ന് കർഷക കോൺഗ്രസ് തിരുവമ്പാടി മണ്ഡലം കമ്മിറ്റി ആവശ്യപ്പെട്ടു. മണ്ഡലം പ്രസിഡന്‍റ് ഷിജോ പടിഞ്ഞാറ്കുറ്റ് അധ്യക്ഷത വഹിച്ചു. റോബർട്ട് നെല്ലിക്കെതെരുവിൽ, ജിബിൻ മണ്ണു കുശുമ്പിൽ,സോണി മണ്ഡപത്തിൽ, ബേബിച്ചൻ കൊച്ചുവേലികകത്ത്, ഷിബിൻ കുരീക്കാട്ടിൽ തുടങ്ങിയവർ പ്രസംഗിച്ചു.

ദി ഗ്രാന്‍ഡ് ഗോള്‍ഡ് ആന്‍ഡ് ഡയമണ്ട്‌സ് ഉദ്ഘാടനം ചെയ്തു

കോഴിക്കോട്: കോഴിക്കോട് ദി ഗ്രാന്‍ഡ് ഗോള്‍ഡ് ആന്‍ഡ് ഡയമണ്ട്‌സ് പ്രവര്‍ത്തനം ആരംഭിച്ചു. ദി ഗ്രാന്‍ഡ് ഗോള്‍ഡ് ആന്‍ഡ് ഡയമണ്ട്‌സ് ചെയര്‍മാന്‍ ഷുക്കൂര്‍ കിനാലൂരും മാനേജിംഗ് ഡയറക്ടര്‍ അബ്ദുല്‍ കരീമും എക്‌സിക്യൂട്ടീവ് ഡയറക്ടര്‍ നിഷാന്ത് തോമസും മറ്റ് ഡയറക്ടര്‍മാരും ചേര്‍ന്ന് ഷോറൂമിന്‍റെ സോഫ്റ്റ് ലോഞ്ച് നടത്തി. സ്വര്‍ണത്തിന്‍റെ ആദ്യ വില്‍പന ഫൗസിയക്ക് നല്‍കി ഡോ. മൊയ്തീനും ഡയമണ്ട് ആദ്യ വില്‍പ്പന റിന്‍സിക്ക് നല്‍കി പഴേരിയില്‍ മുഹമ്മദ് ഷെരീഫ് ഹാജിയും നിര്‍വ്വഹിച്ചു. കോഴിക്കോട് അരയിടത്തുപാലം മിനി ബൈപ്പാസ് റോഡിലാണ് ഷോറൂം. ഉദ്ഘാടനത്തോടനുബന്ധിച്ചു നടന്ന വിസിറ്റ് ആന്‍ഡ് വിന്‍ ഓഫറിന്‍റെ ഭാഗമായി അഞ്ച് ഭാഗ്യശാലികള്‍ക്ക് 10,000 രൂപ വീതം സമ്മാനവും നല്‍കി. വടകര, താമരശേരി, പട്ടാമ്പി, മാനന്തവാടി, എടവണ്ണപ്പാറ, പനമരം, ചക്കരക്കല്‍, താനൂര്‍, ബാലുശ്ശേരി, മുക്കം, തൊടുപുഴ, മണ്ണാര്‍ക്കാട്, ഈരാറ്റുപേട്ട, കാഞ്ഞങ്ങാട്, അട്ടപ്പാടി തുടങ്ങി 25 ഓളം സ്ഥലങ്ങളിലാണ് ദി ഗ്രാന്‍ഡ് ഗോള്‍ഡ് ആന്‍ഡ് ഡയമണ്ട്‌സ് ഗ്രൂപ്പ് അസോസിയേറ്റ് ഷോറൂമുകള്‍ പ്രവര്‍ത്തിക്കുന്നത്. ഫോണ്‍: 9567 455 916.

പഞ്ചായത്ത് ഓഫീസ് കെട്ടിടത്തിൽ കാടുകയറിയിട്ടും കാണാതെ അധികൃതർ

കൂരാച്ചുണ്ട്: കൂരാച്ചുണ്ട് പഞ്ചായത്ത് ഓഫീസിന്‍റെ പിൻഭാഗം കാടുമൂടുകയും കെട്ടിടത്തിൽ വള്ളിപടർപ്പുകൾ കയറി മൂടിയിട്ടും കണ്ടില്ലെന്ന് നടിച്ച് അധികൃതർ. ഓഫീസിന്‍റെ പിൻഭാഗം വൻതോതിൽ കാടുമൂടി ഇഴജന്തുക്കളുടെയും കൊതുകുകളുടെയും താവളമായി മാറിയെന്നാണ് പരാതി. ഇവിടെ വളർന്ന വള്ളിപടർപ്പുകൾ കെട്ടിടത്തിൽ കയറി ജനാലകളിലൂടെ ഓഫീസിനുള്ളിൽ പ്രവേശിക്കുന്ന നിലയിലാണുള്ളത്. ഇവിടെ പലരും ഇഴജന്തുക്കളെ കണ്ടിട്ടുണ്ടെന്നും പറയുന്നു.ഇത് ബന്ധപ്പെട്ട അധികൃതരുടെ അനാസ്ഥയും അശ്രദ്ധയുമാണെന്നാണ് നാട്ടുകാർ ആരോപിക്കുന്നത്. മഴക്കാലമായതോടെ പകർച്ചവ്യാധികൾക്കെതിരേയുള്ള പ്രതിരോധ പ്രവർത്തനങ്ങൾ പഞ്ചായത്തിന്‍റെയും ആരോഗ്യ വകുപ്പിന്‍റെയും നേതൃത്വത്തിൽ നടപ്പാക്കി വരുന്നുണ്ട്. പഞ്ചായത്ത് ഓഫീസ് പരിസരവും സമീപത്തെ കാടും വെട്ടിനീക്കി ശുചീകരണ പ്രവൃത്തി നടത്തണമെന്നാണ് പൊതുജനങ്ങൾ ആവശ്യപ്പെടുന്നത്.

മിനിലോറി കുഴിയിൽ വീണ് ഗതാഗതം സ്തംഭിച്ചു

കൊയിലാണ്ടി: ദേശീയ പാതയിൽ പൊയിൽക്കാവിൽ ഗതാഗത തടസം തുടർക്കഥയാകുന്നു. കഴിഞ്ഞ ദിവസം രാവിലെ ആറോടെ സർവീസ് റോഡിലൂടെ ചരക്കുമായി പോവുകയായിരുന്ന മിനിലോറി കുഴിയിൽ വീണ് ഗതാഗതം ഏറെ നേരം സ്തംഭിച്ചു. അപകടത്തിൽ ആർക്കും പരിക്കില്ല. പോലീസ് എത്തി വാഹനങ്ങൾ തിരിച്ചുവിട്ട ശേഷം എട്ടോടെ അപകടത്തിൽപെട്ട ലോറി കുഴിയിൽ നിന്നും പൊക്കി ഗതാഗത തടസം നീക്കി. എന്നാൽ രാവിലെ 9.30 ഓടെ പൊയിൽക്കാവ് അടിപ്പാതക്ക് സമീപം വീണ്ടും സ്വകാര്യ ബസ് ചളിയിൽ താഴ്ന്ന് ഗതാഗതം തടസപ്പെട്ടു. കോഴിക്കോട്ടേക്ക് പോവുകയായിരുന്ന ദേവിക ബസാണ് ചളിയിൽ താഴ്ന്നത്. ഉച്ചകഴിഞ്ഞും വാഹനങ്ങൾ മറ്റ് വഴികളിലൂടെ തിരിച്ചു വിടുകയായിരുന്നു. രാവിലെ സർവീസ് നടത്തിയ ബസുകൾക്ക് കോഴിക്കോട് നിന്നും കൊയിലാണ്ടിയിലെത്താൻ മണിക്കൂറുകൾ എടുത്തതോടെ സർവീസ് നിർത്തി വച്ചു.

തലയാട് റൂട്ടിലെ മണ്ണിടിച്ചിൽ: മണ്ണുനീക്കൽ പ്രവർത്തി തുടരുന്നു

കൂരാച്ചുണ്ട്: കനത്ത മഴയെ തുടർന്ന് മലയോര ഹൈവേ നിർമാണം നടന്നുവരുന്ന ഇരുപത്തെട്ടാംമൈൽ - തലയാട് റൂട്ടിലെ നിരവധിയിടങ്ങളിൽ മണ്ണിടിച്ചിലുണ്ടായി. ഈ റൂട്ടിൽ ദിവസങ്ങളായി ഗതാഗതം നിലച്ചതിനെത്തുടർന്ന് റോഡിലെ കല്ലും മണ്ണും നീക്കുന്ന പ്രവർത്തി തുടരുകയാണ്. കഴിഞ്ഞ ദിവസവും ശക്തമായ മഴയിൽ മണ്ണിടിഞ്ഞു. ഇരുപത്താറാം മൈൽ മേഖലയിലാണ് കൂടുതൽ മണ്ണിടിച്ചിലുണ്ടായത്. നാലു ദിവസങ്ങളായി മണ്ണുമാന്തിയന്ത്രം ഉപയോഗിച്ച് കല്ലും മണ്ണും നീക്കുന്ന പ്രവർത്തി തുടരുകയാണ്. മഴ ശക്തമാകുന്നത് ഇതിന് തടസമായി മാറുന്നുണ്ട്. കൂടുതൽ ഇടിച്ചിലിനും സാധ്യത വർധിപ്പിക്കുന്നുണ്ട്. ഇന്ന് വൈകുന്നേരത്തോടുകൂടി റോഡിലെ തടസങ്ങൾ നീക്കി ഗതാഗതം പുനസ്ഥാപിക്കുമെന്നാണ് അറിയുന്നത്.

കോഴിഫാം മരം വീണ് തകർന്നു

കോടഞ്ചേരി: ശക്തമായ കാറ്റിൽ മരം വീണ് കോഴിഫാം തകർ‌ന്നു. മഞ്ഞുവയൽ ഇലന്തുകടവിൽ പാറേകുന്നത്ത് തോമസിന്‍റെ കോഴിഫാമിന് മുകളിലേക്കാണ് ശക്തമായ കാറ്റിൽ ആഞ്ഞിലിമരം കടപുഴകി വീണത്. ഫാം പൂർണമായും തകർന്നു. കഴിഞ്ഞദിവസം കോഴികളെ പിടിച്ചതിനാലും പുതിയ കുഞ്ഞുങ്ങളെ ഇടാത്തതിനാലും വൻ നാശനഷ്ടം ഒഴിവായി.

കക്കയത്തുനിന്നും കൂരാച്ചുണ്ടിലെത്താൻ ദുരിതം പേറി യാത്രക്കാർ

കൂരാച്ചുണ്ട്: മഴ കനത്ത് മലയോര ഹൈവേ നിർമാണം നടന്നു വരുന്ന ഇരുപത്തെട്ടാംമൈൽ - തലയാട് റൂട്ടിൽ മണ്ണിടിച്ചിൽ മൂലം ഗതാഗതം നിലച്ചതോടെ കക്കയത്ത് നിന്നും കൂരാച്ചുണ്ടിലേക്ക് എത്തിപ്പെടാൻ യാത്രാദുരിതം പേറി യാത്രക്കാർ. കൂരാച്ചുണ്ട് പഞ്ചായത്തിലെ പ്രധാന സർക്കാർ ഓഫീസുകൾ ഉൾപ്പെടെ വിവിധ ബാങ്കുകൾ എന്നിവയെല്ലാം പ്രവർത്തിക്കുന്ന കൂരാച്ചുണ്ടിലേക്ക് എത്തിപ്പെടാൻ കക്കയം, കരിയാത്തുംപാറ എന്നിവിടങ്ങളിൽ നിന്നുള്ള നിരവധി യാത്രക്കാരാണ് ദുരിതമനുഭവിക്കുന്നത്. കക്കയം - തലയാട് റൂട്ടിലോടുന്ന ബസിൽ കയറി ഇരുപത്തെട്ടാംമൈൽ ഇറങ്ങി അവിടെ നിന്നും ടാക്സി വാഹനങ്ങളെ ആശ്രയിച്ചാണ് ഇവർ കൂരാച്ചുണ്ടിൽ എത്തിച്ചേരുന്നത്. എന്നാൽ ഈ റൂട്ടിൽ ഗതാഗതം നിലച്ചതോടെ ഈ പ്രദേശങ്ങളിലുള്ളവർ ഏറെ ബുദ്ധിമുട്ടിലായിട്ടുണ്ട്. കാലങ്ങളായി കക്കയം - കൂരാച്ചുണ്ട് റൂട്ടിൽ അതിരാവിലെ ഒരു സ്വകാര്യ ബസ് മാത്രമാണ് സർവീസ് നടത്തുന്നത്. വിനോദസഞ്ചാര കേന്ദ്രങ്ങളടക്കം പ്രധാന ജലവൈദ്യുത പദ്ധതികളും എല്ലാം തന്നെ പ്രവർത്തിക്കുന്ന പ്രദേശവുമാണ് കക്കയം. ഈ റൂട്ടിൽ നേരിടുന്ന യാത്രാപ്രശ്നം പരിഹരിക്കാൻ അടിയന്തിര നടപടി വേണമെന്ന ആവശ്യം വർഷങ്ങളായി നാട്ടുകാർ ഉയർത്തുന്നുണ്ട്. ഇതുവഴി മുമ്പ് സർവീസ് നടത്തിയിരുന്ന കെഎസ്ആർടിസി ബസ് സർവീസ് നിർത്തിയിട്ട് കാലങ്ങളായി. പകരം ബസ് അനുവദിച്ചിട്ടില്ല. ഇതു മൂലം വൻതുകയാണ് യാത്രാ ചെലവ് വഹിക്കേണ്ടിവരുന്നത്. ഒട്ടേറെ വിദ്യാർഥികൾ, ഉദ്യോഗസ്ഥർ, തൊഴിലാളികൾ അടക്കമുള്ളവരാണ് യാത്രാക്ലേശം അനുഭവിക്കുന്നത്. കക്കയം മേഖലയിലേക്ക് കെഎസ്ആർടിസി ബസുകൾ അനുവദിക്കണമെന്നാവശ്യപ്പെട്ട് നാട്ടുകാർ പലതവണ നിവേദനങ്ങൾ നൽകിയെങ്കിലും ഒരു നടപടിയുമില്ല. പ്രദേശത്തിന്‍റെ പ്രാധാന്യം കണക്കിലെടുത്ത് അടിയന്തരമായി ഈ റൂട്ടിൽ കൂടുതൽ ബസ് അനുവദിക്കണമെന്ന ആവശ്യമാണ് നാട്ടുകാർ ഉയർത്തുന്നത്.

മഴ കുറഞ്ഞു; ഒരു ക്യാമ്പ് കൂടി ഒഴിവാക്കി

ഇന്ന് ജില്ലയില്‍ ഓറഞ്ച് അലേര്‍ട്ട് കോഴിക്കോട്: ജില്ലയില്‍ മഴ കുറഞ്ഞതോടെ ഒരു ദുരിതാശ്വാസ ക്യാമ്പിലുള്ളവര്‍ വീടുകളിലേക്ക് തിരിച്ചുപോയി. രാമനാട്ടുകര വില്ലേജില്‍ പ്രവര്‍ത്തിച്ചിരുന്ന ക്യാമ്പാണ് ഇന്നലെ ഒഴിവാക്കിയത്. നിലവില്‍ വടകര താലൂക്കില്‍ ഒന്നും കോഴിക്കോട് താലൂക്കില്‍ രണ്ടും ക്യാമ്പുകളാണുള്ളത്. വടകര വിലങ്ങാട് വില്ലേജിലെ ക്യാമ്പില്‍ 41 കുടുംബങ്ങളില്‍ നിന്നുള്ള 47 പുരുഷന്മാരും 35 സ്ത്രീകളും 18 കുട്ടികളുമായി 100 പേരാണ് കഴിയുന്നത്. കോഴിക്കോട്ടെ രണ്ട് ക്യാന്പുകളില്‍ നിന്ന് ഒന്പത് കുടുംബങ്ങളില്‍ നിന്നായി 11 പുരുഷന്മാരും 19 സ്ത്രീകളും ഒന്പത് കുട്ടികളും അടക്കം 39 പേരുണ്ട്. ഇന്ന് ജില്ലയില്‍ ഓറഞ്ച് അലേര്‍ട്ടാണ് പ്രവചിച്ചിരിക്കുന്നത്. ഇന്നലെയും ജില്ലയുടെ വിവിധ ഭാഗങ്ങളില്‍ മഴയിലും കാറ്റിലും നാശനഷ്ടങ്ങളുണ്ടായി. കെടവൂര്‍ വില്ലേജില്‍ നേരോംപാറമ്മല്‍ പ്രമോദിന്‍റെ വീട് കനത്ത മഴയില്‍ ഭാഗികമായി തകര്‍ന്നു. കൊടുവള്ളി വില്ലേജില്‍ അരീക്കോട്ടുകാവ് സരോജിനിയുടെ വീടിനു മുകളില്‍ കമുങ്ങ് വീണ് ഭാഗിക നാശം സംഭവിച്ചു. കൊയിലാണ്ടി അവിടനല്ലൂര്‍ വില്ലേജില്‍ അയല്‍വാസിയുടെ വീട്ടിലെ തെങ്ങ് മറിഞ്ഞുവീണ് കുറ്റ്യോറക്കണ്ടിമീത്തല്‍ നാരായണിയുടെ വീടിന് ഭാഗികമായ നാശനഷ്ടം സംഭവിച്ചു. കനത്ത കാറ്റിലും മഴയിലും വീടുകൾക്ക് നാശനഷ്ടം കൊയിലാണ്ടി: കഴിഞ്ഞ ദിവസം പെയ്ത കനത്ത മഴയിലും കാറ്റിലും മരം വീണ് നിരവധി വീടുകൾക്ക് നാശനഷ്ടം. പന്തലായനി നെല്ലിക്കോട്ടുകുന്നിൽ പുനയംകണ്ടി ഹേമന്ദ് കുമാറിന്‍റെ വീടിനു മുകളിലേക്കാണ് മരം കടപുഴകി വീണത്. വീടിന്‍റെ മുകളിലെ ഓടിട്ട ഭാഗം തകർന്നു. തൊട്ടടുത്ത് താമസിക്കുന്ന പുനയംകണ്ടി കമലയുടെ പറമ്പിലെ മരമാണ് വീണത്. കമലയുടെ പറമ്പിലെ മതിലും തകർന്നിട്ടുണ്ട്. ഏകദേശം 50000 രൂപയുടെ നഷ്ടം കണക്കാക്കുന്നു. കോതമംഗലത്ത് തേക്ക് കടപുഴകി വീണ് വീട് ഭാഗികമായി തകർന്നു. കോമത്തുകര സി.എം. വിജയന്‍റെ വീടിന്‍റെ മുകളിലാണ് അയൽവാസിയുടെ പറമ്പിൽ നിന്ന് തേക്ക് കടപുഴകി വീണത്. വീടിന്‍റെ കോൺക്രീറ്റ് സ്ലാബ് തകർന്നിട്ടുണ്ട്. ആഞ്ഞടിച്ച കാറ്റിന്‍റെ ശക്തിയിൽ തേക്ക് മരം വേരോടെ പിഴുതു വീഴുകയായിരുന്നു. വീടിന് വലിയ നാശനഷ്ടം ഉണ്ടായതായാണ് കണക്കാക്കുന്നത്. കണയങ്കോട് ചെറിയ കടവത്ത് മമ്മത് കോയയുടെ വീടിനു മുകളിൽ തെങ്ങ് വീണ് വീടിന്‍റെ ഒരു ഭാഗം തകർന്നു. റവന്യൂ അധികൃതർ സംഭവ സ്ഥലങ്ങൾ സന്ദർശിച്ചു. മരം വീണ് ഗതാഗതം തടസപ്പെട്ടു മുക്കം: ശക്തമായ കാറ്റിലും മഴയിലും മരം പൊട്ടിവീണ് കൊയിലാണ്ടി- എടവണ്ണ സംസ്ഥാന പാതയിൽ മുക്കത്ത് ഗതാഗതം പൂർണമായും തടസപ്പെട്ടു. ബുധനാഴ്ച വൈകുന്നേരം ആറോടുകൂടിയായിരുന്നു സംഭവം. യാത്രക്കാർ വിവരമറിയിച്ചതിനെ തുടർന്ന് മുക്കം ഫയർ സ്റ്റേഷനിൽ നിന്ന് അസിസ്റ്റന്‍റ് സ്റ്റേഷൻ ഓഫീസർ ജോയ് ഏബ്രഹാമിന്‍റെ നേതൃത്വത്തിൽ സീനിയർ ഫയർ ആൻഡ് റെസ്ക്യൂ ഓഫീസർ എൻ. രാജേഷ്, ഫയർ ആൻഡ് റെസ്ക്യൂ ഓഫീസർമാരായ എ.എസ്. പ്രദീപ്, കെ.എം. ജിഗേഷ്, പി. ജിതിൻ, ഹോം ഗാർഡ് കെ.എസ്. വിജയകുമാർ തുടങ്ങിയവർ സ്ഥലത്തെത്തി ചെയിൻസോ ഉപയോഗിച്ച് മരം മുറിച്ചു നീക്കി ഗതാഗതം പുനസ്ഥാപിച്ചു. ബ്ലൂ അലേര്‍ട്ട് കോഴിക്കോട്: കെഎസ്ഇബിയുടെ അധീനതയിലുള്ള കുറ്റ്യാടി ജലവൈദ്യുത പദ്ധതിയുടെ ഭാഗമായ കക്കയം ജലസംഭരണിയില്‍ ജലനിരപ്പ് ഉയര്‍ന്ന് 755.66 മീറ്ററില്‍ എത്തിയതിനാല്‍ ബ്ലൂ അലേര്‍ട്ട് പ്രഖ്യാപിക്കുന്നതായി എക്സിക്യൂട്ടീവ് എൻജിനീയര്‍ അറിയിച്ചു.

സ്പെക്ട്രം തൊഴില്‍ മേള ഉദ്ഘാടനം ചെയ്തു

കോഴിക്കോട്: വ്യവസായിക പരിശീലന വകുപ്പിന്‍റെ ആഭിമുഖ്യത്തില്‍ മാളിക്കടവ് ഗവ.ഐടിഐ നടന്ന സ്പെക്ട്രം ജോബ് ഫെയര്‍ 2025 തോട്ടത്തില്‍ രവീന്ദ്രന്‍ എംഎല്‍എ ഉദ്ഘാടനം ചെയ്തു. തൊഴില്‍ മേളയില്‍ വിവിധ മേഖലകളില്‍ നിന്ന് 85 കമ്പനികളും 1432 തൊഴിലന്വേഷകരും പങ്കെടുത്തു. 176 പേര്‍ക്ക് ഓഫര്‍ ലെറ്റര്‍ ലഭിച്ചു. ട്രെയിനികള്‍ക്ക് ഒന്നിലധികം കമ്പനികളില്‍ അഭിമുഖത്തിന് പങ്കെടുക്കാന്‍ അവസരം ഉണ്ടായിരുന്നു. അഭിമുഖത്തില്‍ പങ്കെടുത്ത 1715 പേര്‍ ഷോര്‍ട്ട് ലിസ്റ്റ് ചെയ്യപ്പെട്ടു. ചടങ്ങില്‍ ഉത്തരമേഖല ഇന്‍സ്പെക്ടര്‍ ഓഫ് ട്രെയിനിംഗ് എന്‍. സന്തോഷ് കുമാര്‍ അധ്യക്ഷത വഹിച്ചു. വനിത ഐടിഐ പ്രിന്‍സിപ്പൽ‌ കെ.പി. ഷാജു, ഐടിഐ പ്രിന്‍സിപ്പൽ ഇ.കെ. മുഹമ്മദ് അഷ്റഫ്, പിടിഎ പ്രസിഡന്‍റ് കെ.പി. സതീഷ്, ജില്ല എംപ്ലോയ്മെന്‍റ് ഓഫീസര്‍ പി.കെ. സജീഷ്, ഐടിഐ വൈസ് പ്രിന്‍സിപ്പൽ എ.ജി. സുധീര്‍, സ്റ്റാഫ് സെക്രട്ടറി ടി.എ. ഗിരീഷ് കുമാര്‍, ട്രെയിനീസ് കൗണ്‍സില്‍ ചെയര്‍മാന്‍ യു. വിഷ്ണു തുടങ്ങിയവര്‍ പ്രസംഗിച്ചു.

വോട്ടർ ബോധവത്കരണമായി ഫ്ലാഷ്മോബ് സംഘടിപ്പിച്ചു

കോഴിക്കോട്: വോട്ടർ പട്ടികയിൽ പേര് ചേർക്കുന്നതിനും തെരഞ്ഞെടുപ്പ് പ്രക്രിയയിൽ പങ്കാളികളാകുന്നതിനുമുള്ള ബോധവത്കരണവുമായി ഫ്ലാഷ്മോബ് സംഘടിപ്പിച്ചു. ജില്ലാ ഭരണകൂടത്തിന്‍റെയും ജില്ലാ തെരഞ്ഞെടുപ്പ് വിഭാഗത്തിന്‍റെയും നേതൃത്വത്തിൽ ‘സ്വീപ്പ്’ പരിപാടിയുടെ ഭാഗമായാണ് ഹൈലൈറ്റ് മാളിൽ പരിപാടി സംഘടിപ്പിച്ചത്. സാമൂതിരി ഗുരുവായൂരപ്പൻ കോളജിലെ ഇലക്ടറൽ ലിറ്ററസി ക്ലബ്ബിന്‍റെ നേതൃത്വത്തിലായിരുന്നു ഫ്ലാഷ് മോബ്. യുവജനങ്ങളെ വോട്ടർ പട്ടികയിൽ പേര് ചേർക്കാനും അതുവഴി തെരഞ്ഞെടുപ്പ് പ്രക്രിയയിൽ പങ്കാളികളാവാനും പ്രേരിപ്പിക്കുകയെന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. സബ് കളക്ടർ ഹർഷിൽ ആർ. മീണ മുഖ്യാതിഥിയായി. ഇലക്ഷൻ ഡെപ്യൂട്ടി കളക്ടർ വി.ജി. ഗോപിക, സ്വീപ്പ് ജില്ലാ നോഡൽ ഓഫീസറും ഡെപ്യൂട്ടി കളക്ടറുമായ സി. ബിജു, ജില്ലാ ഇലക്ടറൽ ലിറ്ററസി ക്ലബ് കോഓഡിനേറ്റർ ഡോ. നിജീഷ് ആനന്ദ് തുടങ്ങിയവർ സംബന്ധിച്ചു.

പൂഴിത്തോട്- പടിഞ്ഞാറത്തറ പാത : ഷാഫി പറമ്പിൽ എംപിയുമായി ജനകീയ കർമ സമിതി ചർച്ച നടത്തി

പേരാമ്പ്ര: പൂഴിത്തോട് - പടിഞ്ഞാറത്തറ പാതയുടെ ഇൻവെസ്റ്റിഗേഷൻ നടപടികൾ വയനാട് ജില്ലയിൽ പൂർത്തിയാവുകയും കോഴിക്കോട് ജില്ലയിൽ ചീഫ് വൈൽഡ് ലൈഫ് വാർഡന്‍റെ അനുമതി കഴിഞ്ഞ ജനുവരി മുതൽ ലഭ്യമാകാത്ത സാഹചര്യത്തിൽ ജനകീയ കർമ സമിതി ഭാരവാഹികൾ വടകര എംപി ഷാഫി പറമ്പിലുമായി ചർച്ച നടത്തി. ഈ വിഷയത്തിൽ ചീഫ് വൈൽഡ് ലൈഫ് വാർഡനുമായി നേരിട്ട് ബന്ധപ്പെടുകയും ഉടൻ നടപടി സ്വീകരിക്കാമെന്ന് ഉറപ്പ് തരുകയും ചെയ്തു. തുടർന്നും ഈ വിഷയത്തിൽ ആവശ്യമായ ഇടപെടൽ ഉണ്ടാവുമെന്ന് അദ്ദേഹം സമിതിക്ക് ഉറപ്പു നൽകി. ബ്ലോക്ക് കോൺഗ്രസ് പ്രസിഡന്‍റ് പോൾസൻ കൂവയ്ക്കൽ, വയനാട് കർമസമിതി പ്രവർത്തകരായ യു.സി. ഹുസൈൻ, പ്രകാശ് കുമാർ, നാസർ കൈപ്രവൻ, അസീസ് കളത്തിൽ, ഉലഹന്നാൻ പട്ടർമടം ചെമ്പനോട കർമ്മസമിതി ചെയർമാൻ ടോമി മണ്ണൂർ, കൺവീനർ മാത്യു പേഴത്തിങ്കൽ, വൈസ് ചെയർമാൻമാരായ ജോബി ഇലന്തൂർ,സജി ജോസഫ് ഇല്ലിക്കൽ, ജയേഷ് ചെമ്പനോട എന്നിവർ നേതൃത്വം നൽകി.

വർക്ക് വിസയുടെ പേരിലുള്ള തട്ടിപ്പ് അന്വേഷിക്കണമെന്ന്

കോഴിക്കോട്: വർക്ക് വിസയുടെ പേരിൽ മലയാളികൾ ഉൾപ്പെടെയുളള്ളവരിൽ നിന്നും മൂന്ന് കോടിയിലധികം തട്ടിയെന്ന പരാതി അന്വേഷിക്കണമെന്ന് മനുഷ്യാവകാശ കമ്മീഷൻ ഉത്തരവിട്ടു. കോഴിക്കോട് സിറ്റി പോലീസ് കമ്മീഷണർക്കാണ് കമ്മീഷൻ ജുഡീഷ്യൽ അംഗം കെ. ബൈജുനാഥ് നിർദേശം നൽകിയത്. 15 ദിവസത്തിനകം റിപ്പോർട്ട് നൽകണം. ജൂൺ 25 ന് കോഴിക്കോട് ഗവ.ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. ദ്യശ്യമാധ്യമവാർത്തയുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിലാണ് നടപടി. മുംബൈ ആസ്ഥാനമായി പ്രവർത്തിക്കുന്ന സ്വകാര്യ കമ്പനിക്കെതിരേയാണ് പരാതി. കോഴിക്കോട് സ്വദേശി അനുരാഗിൽ നിന്നും ഉൾപ്പെടെ ലക്ഷങ്ങൾ തട്ടിച്ചതായി പരാതി ഉയർന്നു. 2024 ജൂലൈയിലാണ് കമ്പനിയുമായി അനുരാഗ് ബന്ധപ്പെട്ടത്. യൂറോപ്പിലെ ലക്സംബർഗിൽ ജോലിക്ക് വേണ്ടിയാണ് പല തവണയായി പണം നൽകിയത്. ഇൻസ്റ്റാഗ്രാമിൽ നിന്നാണ് കമ്പനിയെ കുറിച്ച് മനസിലാക്കിയതെന്ന് അനുരാഗ് പറഞ്ഞു. ബാങ്ക് വഴിയാണ് പണം നൽകിയത്. കഴിഞ്ഞ മാർച്ചിലാണ് കമ്പനിയുമായി ഒടുവിൽ ബന്ധപ്പെട്ടത്. അക്ഷയ് എന്ന മലയാളി ഏജന്‍റ് ആണ് അനുരാഗിനെ ബന്ധപ്പെട്ടതെന്ന് പറയുന്നു. 139 പേരാണ് വഞ്ചിക്കപ്പെട്ടത്. ഇവർ മുംബൈ പോലീസിൽ പരാതി നൽകി. കേരളത്തിൽ നിന്ന് നാലുപേരാണ് വഞ്ചിക്കപ്പെട്ടത്. പറ്റിക്കപ്പെട്ടവർക്ക് സ്വന്തം വാട്സാപ്പ് കൂട്ടായ്മയുണ്ട്.

വളയം, വാണിമേൽ പഞ്ചായത്തുകളിൽ ജലവിതരണം നിലച്ചു

നാദാപുരം: പുഴക്ക് കുറുകെ സ്ഥാപിച്ച ജലവിതരണ കുഴലുകൾ ഒഴുകി പോയതിനെത്തുടർന്ന് വളയം, വാണിമേൽ പഞ്ചായത്തുകളിൽ കുടിവെള്ള വിതരണം നിലച്ചു. വളയം നിരവുമ്മൽ, വാണിമേൽ, ഇരുന്നലാട് എന്നീ ജലസംഭരണിയിലേക്ക് വെള്ളമെത്തിക്കുന്ന പ്രധാന പൈപ്പുകളാണ് വാണിമേൽ താവോട്ടുമുക്ക് പുഴയിലെ കുത്തൊഴുക്കിനെ തുടർന്ന് ഒഴുകി പോയത്. ഇതിനെ തുടർന്നാണ് ഈ രണ്ട് പഞ്ചായത്തിലേക്കുള്ള കുടിവെളള വിതരണം പൂർണമായും തടസപ്പെട്ടത്. മാത്രവുമല്ല പുഴയിലെ ശക്തമായ നീരൊഴുക്ക് കാരണം നിലവിൽ യാതൊരുവിധ അറ്റകുറ്റപണികളും നടത്തുവാൻ കഴിയുന്നില്ലെന്നും നീരൊഴുക്കും മഴയുടെ കാഠിന്യവും കുറയുന്ന മുറക്ക് തകരാർ പരിഹരിക്കുന്നതിനുളള നടപടികൾ സ്വീകരിക്കുമെന്ന് വാട്ടർ അഥോറിറ്റി അസി. എക്സിക്യൂട്ടീവ് എൻജിനിയർ അറിയിച്ചു.

നെഹ്‌റു അനുസ്മരണം നടത്തി

കൂരാച്ചുണ്ട്: പ്രധാനമന്ത്രി ജവാഹർലാൽ നെഹ്‌റുവിന്‍റെ ചരമ വാർഷികത്തോടനുബന്ധിച്ച് യൂത്ത് കോൺഗ്രസ്‌ കൂരാച്ചുണ്ട് മണ്ഡലം കമ്മിറ്റിയുടെ നേതൃത്വത്തിൽ അനുസ്മരണം നടത്തി. കോൺഗ്രസ്‌ മണ്ഡലം വൈസ് പ്രസിഡന്‍റ് ജെറിൻ കുര്യാക്കോസ് ഉദ്ഘാടനം ചെയ്തു. യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. കെഎസ്‌യു മണ്ഡലം പ്രസിഡന്‍റ് രാഹുൽ രാഘവൻ, യൂത്ത് കോൺഗ്രസ്‌ നിയോജക മണ്ഡലം ജനറൽ സെക്രട്ടറി വിഷ്ണു തണ്ടോറ, ജോസ്ബിൻ കുര്യാക്കോസ്, സുബിൻ കൊച്ചുവീട്ടിൽ, ജ്യോതിഷ് രാരപ്പൻകണ്ടി, അജ്മൽ ചാലിടം, ദീപു കിഴക്കേനകത്ത് എന്നിവർ പ്രസംഗിച്ചു.

ശക്തമായ മഴ തുടരുന്നു, ദുരിതവും

കോഴിക്കോട്: കോഴിക്കോട് ജില്ലയില്‍ ഇടവിട്ടിടവിട്ട് ശക്തമായ മഴ തുടരുന്നു. ഇന്നലെയും വ്യാപക നാശനഷ്ടങ്ങളുണ്ടായി. കോരപ്പുഴയിലെ ജലനിരപ്പ് അപകടകരമായ നിലയില്‍ തുടരുകയാണ്. മരങ്ങള്‍ തകര്‍ന്നു വീണു വാഹനങ്ങള്‍ക്കും വീടുകള്‍ക്കും കേടുപാടുകള്‍ സംഭവിച്ചു. കനത്ത മഴയെ തുടര്‍ന്ന് ജില്ലയില്‍ ആരംഭിച്ച ദുരിതാശ്വാസ ക്യാമ്പുകളില്‍ ശേഷിക്കുന്നത് 52 കുടുംബങ്ങളില്‍ നിന്നുള്ള 145 പേരാണ്. കോഴിക്കോട് താലൂക്കിലെ മൂന്ന് ക്യാമ്പുകളിലായി 11 കുടുംബങ്ങളില്‍നിന്നുള്ള 45 പേരാണ് കഴിയുന്നത്. 13 പുരുഷന്മാരും 21 സ്ത്രീകളും 11 കുട്ടികളുമാണ് ഇതിലുള്ളത്. വടകര താലൂക്കിലെ ഒരു ക്യാമ്പില്‍ 41 കുടുംബങ്ങളില്‍ നിന്നുള്ള 100 പേരാണുള്ളത്. ഇതില്‍ 47 പുരുഷന്മാരും 35 സ്ത്രീകളും 18 കുട്ടികളുമുണ്ട്. കൊയിലാണ്ടി താലൂക്കിലെ ചങ്ങാരോത്ത് വില്ലേജില്‍ കടിയങ്ങാട് എഎല്‍പി സ്‌കൂളില്‍ പ്രവര്‍ത്തിച്ചിരുന്ന ക്യാമ്പ് വെള്ളം ഇറങ്ങിയതിനെ തുടര്‍ന്ന് പിരിച്ചുവിട്ടു. കോഴിക്കോട് മെഡിക്കല്‍ കോളജിലെ ഡെന്‍റല്‍ കോളജിനു മുന്‍പിലെ മരം ഒടിഞ്ഞുവീണ് കാര്‍ തകര്‍ന്നു. ഇന്നലെ ഉച്ചകഴിഞ്ഞാണ് സംഭവം. റേഡിയോഗ്രാഫര്‍ അബ്ദുല്‍ റഹ്‌മാന്‍റെ കാര്‍ ആണ് തകര്‍ന്നത്. അഗ്നിരക്ഷാ സേന എത്തി മരം മുറിച്ചുനീക്കി. ഇന്നലെ ഉച്ചയോടെ വീശിയടിച്ച കനത്ത മഴയിലും കാറ്റിലും ഒളവണ്ണയില്‍ മരം കടപുഴകി വീണ് വീടിന്‍റെ മേല്‍ക്കൂര പൂര്‍ണമായും തകര്‍ന്നു. ഒളവണ്ണ 12-ാം വാര്‍ഡ് ചാത്തോത്തറ പുല്ലര് റീനയുടെ വീടിന്‍റെ മേല്‍ക്കൂരയാണ് തകര്‍ന്നത്. മരം വീഴുന്ന ശബ്ദം കേട്ടതോടെ വീട്ടുകാര്‍ വീട്ടില്‍ നിന്ന് ഇറങ്ങിയോടിയതിനാല്‍ ആര്‍ക്കും പരിക്കില്ല. മാവൂര്‍ കണ്ണിപറമ്പ് കുറ്റിക്കടവ് റോഡില്‍ നൂറ്റാണ്ടുകള്‍ പഴക്കമുള്ള വന്‍ ആല്‍മരവും തേക്കുമരവും കടപുഴകി വീണ് റോഡ് ഗതാഗതം തടസപ്പെട്ടു. ഇന്നലെ രാവിലെ പത്തോടെ ആയിരുന്നു സംഭവം. നിരവധി വൈദ്യുത പോസ്റ്റുകളും ലൈനുകളും പൊട്ടി വീണതിനാല്‍ വൈദ്യുതി വിതരണം മുടങ്ങി. മുക്കം അസിസ്റ്റന്‍റ് സ്റ്റേഷന്‍ ഓഫീസര്‍ ജോയ് ഏബ്രഹാമിന്‍റെ നേതൃത്വത്തില്‍ മണിക്കൂറുകളോളം നീണ്ട കഠിനപരിശ്രമത്തിനൊടുവില്‍ മരം മുറിച്ചു നീക്കി ഗതാഗതം പുനഃസ്ഥാപിച്ചു. കൂത്താളിയിൽ വീടിനു മേൽ തെങ്ങ് വീണു പേരാമ്പ്ര: തെങ്ങ് വീണ് വീടിന്‍റെ മേൽക്കൂര തകർന്നു. കൂത്താളി വെട്ടിയോട്ടു കുന്നുമ്മൽ ബാലകൃഷ്ണന്‍റെ വീടിന്‍റെ മേൽക്കൂരയാണ് തെങ്ങു വീണ് തകർന്നത്. ഇന്നലെയുണ്ടായ ശക്തമായ കാറ്റിലാണ് തെങ്ങ് വീണത്. തുടർന്ന് വില്ലേജ് അധികൃതർക്ക് പരാതി നൽകി. റോഡിലേക്ക് മരം വീണു കൊയിലാണ്ടി: കനത്തമഴയിൽ ദേശീയപാതയിൽ മൂടാടി പാലക്കുളത്ത് റോഡിലേക്ക് മരം വീണു. ഇന്നലെ രാത്രി 7.30 ഓടെയായിരുന്നു സംഭവം. ഇതേ സമയം അത് വഴി പോവുകയായിരുന്ന കാർ യാത്രക്കാർ കാർ വെട്ടിച്ചതിനാൽ രക്ഷപ്പെട്ടു. കാർ നിർത്തി യാത്രക്കാർ ഇറങ്ങി ഓടി. കാർ മരത്തിനടിയിലായി. അഗ്നിരക്ഷാ സേനയും പോലീസും നാട്ടുകാരും ചേർന്ന് മരം മുറിച്ചുമാറ്റി. ഏറെ നേരം ഗതാഗതം തടസപ്പെട്ടു. മരം വീണ് ഗതാഗതം സ്തംഭിച്ചു കൊയിലാണ്ടി: കൊയിലാണ്ടിയിൽ മരങ്ങൾ വീണ് ഗതാഗത തടസം. കൊയിലാണ്ടി ഹാർബർ റോഡ് ഉപ്പാല കണ്ടി ക്ഷേത്രത്തിന് മുൻവശവും കൊല്ലം മന്ദമംഗലം സ്വാമിയാർ കാവ് ബീച്ച് റോഡ് എന്നിവിടങ്ങളിലാണ് മരം പൊട്ടി വീണ് ഗതാഗതം സ്തംഭിച്ചത്. വിവരം കിട്ടിയതിനെ തുടർന്ന് കൊയിലാണ്ടിയിൽ നിന്നും അഗ്നിരക്ഷസേനയെത്തി മരങ്ങൾ മുറിച്ചുമാറ്റി ഗതാഗതം പുനസ്ഥാപിച്ചു. അസിസ്റ്റന്‍റ് സ്റ്റേഷൻ ഓഫീസർ പി.എം. അനിൽകുമാറിന്‍റെ നേതൃത്വത്തിൽ എസ്എഫ്ആർഒ ബി.കെ. അനൂപ്, സേനാംഗങ്ങളായ കെ.ബി. സുരേഷ്, പി.എം. ലിനീഷ്, പി.എം. രജിലേഷ്, കെ. നവീൻ, ഹോം ഗാർഡ് ടി.പി. ബാലൻ, പ്രദീപ്‌, സുധീഷ് എന്നിവർ പ്രവർത്തനത്തിൽ ഏർപ്പെട്ടു.

തുണി വിരിക്കുന്നതിടെ വീട്ടമ്മ ഷോക്കേറ്റു മരിച്ചു

കോഴിക്കോട്: അലക്കിയ തുണി അഴയില്‍ വിരിക്കുന്നതിനിടെ വീട്ടമ്മ ഷോക്കേറ്റു മരിച്ചു. കല്ലായി. ചിറക്കല്‍ പറമ്പില്‍ അസീസിന്‍റെ ഭാര്യ സുഹറ(67) ആണ് മരിച്ചത്. ഇന്നലെ ഉച്ചയ്ക്കാണ് സംഭവം. തുണി അലക്കി വിരിക്കുന്നതിനു വേണ്ടി കെട്ടിയ കമ്പിയില്‍ നിന്നും വൈദ്യുതാഘാതമേല്‍ക്കുകയായിരുന്നു. ഉടന്‍ തന്നെ സ്വകാര്യ ആശുപത്രിയില്‍ എത്തിച്ചെങ്കിലും രക്ഷിക്കാന്‍ ആയില്ല. എസിയുടെ ഔട്ട്‌ഡോര്‍ സ്റ്റാന്‍ഡില്‍ നിന്നും തെങ്ങിലേക്ക് വലിച്ചു കെട്ടിയ കമ്പിയില്‍ നിന്നാകാം ഷോക്കേറ്റാതെന്നാണ് പ്രാഥമിക നിഗമനം.

കാര്‍ സ്‌കൂട്ടറില്‍ ഇടിച്ച് അപകടം മുന്‍ എക്‌സൈസ് ഉദ്യോഗസ്ഥന്‍ മരിച്ചു

അത്തോളി: സ്വകാര്യ മെഡിക്കല്‍ കോളജിലെ പി ജി മെഡിക്കല്‍ വിദ്യാര്‍ഥിനി ഓടിച്ച കാര്‍ സ്‌കൂട്ടറില്‍ ഇടിച്ച് പരിക്കേറ്റ് ചികിത്സയിലായിരുന്ന മുന്‍ എക്‌സൈസ് ഉദ്യോഗസ്ഥന്‍ മരിച്ചു. കൊങ്ങന്നൂര്‍ വലിയാറമ്പില്‍ സുബിത നിവാസ് കുനിയില്‍ കൃഷ്ണന്‍കുട്ടി നായരാ (78)ണ് മരിച്ചത്.ഇക്കഴിഞ്ഞ 23 ന് വൈകുന്നേരം 5.15 ഓടെ കുനിയില്‍ കടവ് - അത്തോളി ജംഗ്ഷനിലാണ് അപകടം ഉണ്ടായത്. മെഡിക്കല്‍ വിദ്യാര്‍ഥിനിയും സുഹൃത്തും അത്താണിയില്‍ നിന്നും ഭക്ഷണം കഴിച്ച് മടങ്ങുകയായിരുന്നു. കൃഷ്ണന്‍ കുട്ടി നായര്‍ ഉള്ളിയേരില്‍ നിന്നും കൊങ്ങനൂരിലേക്ക് സ്‌കൂട്ടറില്‍ യാത്ര ചെയ്യുകയായിരുന്നു. അപകടത്തിന്‍റെ സിസി ടിവി ദൃശ്യങ്ങള്‍ പുറത്തുവന്നിട്ടുണ്ട്. കാര്‍ സ്‌കൂട്ടറില്‍ ഇടിച്ചതാണെന്നാണ് സൂചന. ഇടിയുടെ ആഘാതത്തില്‍ കൃഷ്ണന്‍ കുട്ടിയുടെ പള്‍സ് കുറച്ച് നേരം നിലച്ചുപോയി. അതിനിടെ മെഡിക്കല്‍ വിദ്യാര്‍ഥികളായിട്ടും കൃഷ്ണന്‍കുട്ടിക്ക് സിപിആര്‍ കൊടുക്കാന്‍ അവര്‍ തയ്യാറായില്ലന്നും ആരോപണമുയര്‍ന്നിട്ടുണ്ട്. ഉടന്‍ തന്നെ കൃഷ്ണന്‍കുട്ടിയെ മെഡിക്കല്‍ കോളജിലെത്തിച്ചു. രാത്രിയോടെ സ്വകാര്യ ആശുപത്രിയിലേക്കു മാറ്റി. ചൊവ്വാഴ്ച രാത്രി 10.30 ഓടെയാണ് മരിച്ചത്. ഭാര്യ: പങ്കജാക്ഷിയമ്മ. മക്കള്‍: സുരേഷ്, സുബിത. മരുമക്കള്‍: സന്ധ്യ, ഉദയകുമാര്‍.

ഇന്ന് ജില്ലയില്‍ റെഡ് അലര്‍ട്ട്; വെള്ളക്കെട്ട് തുടരുന്നു, നാശ നഷ്‌ടവും

കോഴിക്കോട്: തിങ്കളാഴ്ച രാത്രിയും ഇന്നലെ രാവിലെയുമായി കോഴിക്കോട് ജില്ലയില്‍ പെയ്ത ശക്തമായ മഴയ്ക്ക് ഉച്ചകഴിഞ്ഞ് നേരിയ ശമനം. കോഴിക്കോട് ടൗണ്‍ പരിസരങ്ങളില്‍ ഇന്നലെ ഉച്ചകഴിഞ്ഞ് മഴയുടെ ശക്തി തെല്ല് കുറഞ്ഞു. ഉച്ചക്ക് മാനം തെളിഞ്ഞ് വെയില്‍ വീശിയെങ്കിലും വൈകീട്ടായതോടെ വീണ്ടും കാര്‍മേഘങ്ങള്‍ ഉരുണ്ടുകൂടി. അതേ സമയം ജില്ലയുടെ മറ്റു പ്രദേശങ്ങളിലും മലയോരങ്ങളിലും മഴ തുടരുകയാണ്. ഈ പ്രദേശങ്ങളില്‍ വ്യാപകമായ നാശനഷ്ടവുമുണ്ടായി. വെള്ളപ്പൊക്ക ഭീഷണിയുള്ള കൂടുതല്‍ കുടുംബങ്ങളെ അധികൃതര്‍ ദുരിതാശ്വാസ ക്യാമ്പുകളിലേക്കു മാറ്റി. അതിതീവ്ര മഴയ്ക്ക് സാധ്യതയുള്ളതിനാല്‍ ഇന്ന് കോഴിക്കോട് ജില്ലയില്‍ റെഡ് അലര്‍ട്ടാണ്. 24 മണിക്കൂറില്‍ 204.4 മില്ലീമീറ്ററില്‍ കൂടുതല്‍ മഴ ലഭിക്കുമെന്നാണ് അതിതീവ്രമായ മഴ എന്നതു കൊണ്ട് കാലാവസ്ഥ വകുപ്പ് അർഥമാക്കുന്നത്.അപകടകരമായ രീതിയില്‍ ജലനിരപ്പുയരുന്നതിനെ തുടര്‍ന്ന് കോഴിക്കോട് ജില്ലയിലെ കോരപ്പുഴ നദിയിലെ കുന്നമംഗലം സ്റ്റേഷന്‍പരിധിയില്‍ ഓറഞ്ച് അലേര്‍ട്ട് നിലനില്‍ക്കുകയാണ്. ഈ നദികളുടെ കരയില്‍ താമസിക്കുന്നവര്‍ ജാഗ്രത പുലര്‍ത്തണം. ചാലിയാറിന്‍റെ തീരങ്ങളിലുള്ള പ്രദേശങ്ങളിലെ വെള്ളക്കെട്ട് തുടരുകയാണ്. കോഴിക്കോട് കോര്‍പറേഷന്‍ പരിധിയിലെ 54- ാംവാര്‍ഡ് കപ്പക്കലില്‍ വീശിയടിച്ച കാറ്റില്‍ വ്യാപക നാശനഷ്ടമുണ്ടായി. കപ്പക്കലിലെ മുട്ടിയാറക്കല്‍ അസീസിന്‍റെയും കീരിക്കണ്ടി മൊയ്ദീന്‍കോയയുടെയും വീടിന്‍റെ മേല്‍ക്കൂര പൂര്‍ണമായും തകര്‍ന്നു. ശബ്ദം കേട്ടപ്പോള്‍ ആളുകള്‍ വീട്ടില്‍ നിന്ന് ഇറങ്ങിയോടിയതിനാല്‍ ആളപായമില്ല. ഈ പ്രദേശത്തെ അഞ്ച് തെങ്ങുകളും വൈദ്യുതി പോസ്റ്റും തകര്‍ന്നു. കനത്തമഴയിൽ‌ 20 ല്‍ പരം വീടുകളില്‍ വെള്ളം കയറി: കെ.കെ. രമ സ്ഥലം സന്ദര്‍ശിച്ചു വടകര: മുനിസിപ്പല്‍ 46-ാം വാര്‍ഡില്‍ കസ്റ്റംസ് റോഡ് പരിസരത്തെ ചെറിയ വളപ്പ്, പൂക്കാപ്പുറം ഭാഗത്ത് കനത്ത മഴയില്‍ വെള്ളം പൊങ്ങി. 20 ല്‍ പരം വീടുകളില്‍ വെള്ളം കയറി. ഇവിടെ നിന്ന് അഞ്ച് കുടുംബങ്ങളെ സൈക്ലോണ്‍ ഷെല്‍ട്ടറിലേക്ക് മാറ്റി പാര്‍പിച്ചു. ചെറിയവളപ്പില്‍ ചെറിയത്ത് കുഞ്ഞാമി, ചെറിയവളപ്പില്‍ ജുബില, ചെറിയവളപ്പില്‍ ആഷിര്‍ സിവി, വളപ്പില്‍ സലാം, ജുബില ചെറിയവളപ്പില്‍ എന്നിവരുടെ കുടുംബങ്ങളെയാണ് മാറ്റിപാര്‍പിച്ചത്. കെ.കെ. രമ എംഎല്‍എ സ്ഥലം സന്ദര്‍ശിച്ചു. കൗണ്‍സിലര്‍മാരായ പി.വി. ഹാഷിം, നിസാബി, മുസ്‌ലിം ലീഗ് കസ്റ്റംസ് റോഡ് ശാഖാ സെക്രട്ടറി പി.വി. നിസാര്‍, സി.വി. മമ്മു, സി. മായന്‍കുട്ടി എന്നിവര്‍ ഒപ്പമുണ്ടായിരുന്നു. വടകര ടൗണില്‍ നിന്നുള്ള മഴവെള്ളം അങ്ങാടിത്തോട് വഴിയാണ് കടന്നുപോകുന്നത്. ഈ തോടിന് ആവശ്യമായ വീതിയും ആഴവും ഇല്ലാത്തതാണ് രൂക്ഷമായ തോതില്‍ വെള്ളം കയറാന്‍ ഇടയാക്കിയതെന്ന് ഇവര്‍ എംഎല്‍എയെ ബോധ്യപ്പെടുത്തി. കൂറ്റന്‍ മരം വീണ് ക്ഷേത്രം തകര്‍ന്നു വടകര: മഴയോടൊപ്പമെത്തിയ ശക്തമായ കാറ്റില്‍ കൂറ്റന്‍ മരം വീണ് ക്ഷേത്രം തകര്‍ന്നു. വില്യാപ്പള്ളി അരയാക്കൂല്‍താഴ പാങ്ങോട്ടൂര് ഭഗവതി ക്ഷേത്രമാണ് തകര്‍ന്നത്. ഇന്നലെ ഉച്ചയ്ക്ക് ആഞ്ഞു വീശിയ ശക്തമായ കാറ്റിലാണ് സമീപത്തെ കൂറ്റന്‍ മരം ക്ഷേത്രത്തിന് മേല്‍ പതിച്ചത്. ക്ഷേത്രം പാടേ തകര്‍ന്നു. വിവരമറിഞ്ഞ് ഒട്ടേറെ പേര്‍ ക്ഷേത്രത്തിലെത്തി. മണ്ണിടിച്ചിൽ വീടിന് വിള്ളൽ വിലങ്ങാട്: ശക്തമായ മഴയിൽ വിലങ്ങാട് പാലൂരിൽ മണ്ണിടിഞ്ഞ് വീടിന് വിള്ളൽ. പുലികുത്തിയിൽ ഷാജിയുടെ വീടിന്‍റെ മുൻ വശത്താണ് മണ്ണിടിഞ്ഞ് താഴ്ന്നത്. ഇതോടെ വീടിന്‍റെ ചുമരിൽ വിള്ളൽ വീണു. പന്നിയേരിയിലും കഴിഞ്ഞ ദിവസം ശക്തമായ മഴയിൽ മണ്ണിടിഞ്ഞ് കുടുംബത്തെ മാറ്റി പാർപ്പിച്ചിരുന്നു. വീട് അപകടവസ്ഥയിലാണ്. ശക്തമായ കാറ്റിലും മഴയിലും വ്യാപക കൃഷി നാശം നാദാപുരം: കനത്ത കാറ്റിലും മഴയിലും അഭയഗിരി മേഖലയിൽ വ്യാപക നാശനഷ്ടം. തുടർച്ചയായി പെയ്യുന്ന മഴയിലും കഴിഞ്ഞ ദിവസമുണ്ടായ ശക്തമായ കാറ്റിലുമാണ് കൃഷി നാശമുണ്ടായത്. തടിക്കൻ ജോസഫ്, കായലോടൻ ചന്ദ്രൻ ,കായലോടൻ കുങ്കൻ, കടുവത്താഴ മനോജ്, എന്നിവരുടെയും കവുങ്ങ്, മരച്ചീനി, കൊക്കോ വാഴ ഉൾപ്പടെയുള്ള കൃഷികളാണ് വ്യാപകമായി നശിച്ചത്. സ്വർണമുഖി ഇനത്തിൽ ഉൾപ്പെട്ട മുന്നൂറിലധികം നേന്ത്ര വാഴകളാണ് തടിക്കൻ ജോസഫിന്‍റെ പറമ്പിൽ നിന്ന് മാത്രം കടപുഴകിയത്. ശക്തമായ മഴയിലും കാറ്റിലും കൃഷി നാശമുണ്ടായ പ്രദേശങ്ങൾ പഞ്ചായത്ത് പ്രസിഡന്‍റ് കെ.പി. പ്രദീഷ്, വില്ലേജ് ഓഫീസർ എം. ഷൈമ ഉൾപ്പെടെയുള്ളവർ സന്ദർശിച്ചു. മഴ ശക്തി പ്രാപിക്കുന്ന പക്ഷം അഭയിഗിരി, ആയോട് ഭാഗങ്ങളിലെ നാൽപതോളം കുടുംബങ്ങളെ ക്യാമ്പിലേക്ക് മാറ്റാൻ തീരുമാനിച്ചു. വീടിനു മുകളിൽ പ്ലാവ് വീണ് നാശം പേരാമ്പ്ര: പഞ്ചായത്തിലെ പതിനെട്ടാം വാർഡിൽ കോമത്ത് മീത്തൽ വത്സൻ നായരുടെ വീടിന് മുകളിൽ പ്ലാവ് മുറിഞ്ഞുവീണു. ഇന്നലെ ഉച്ചക്ക് ശേഷമുണ്ടായ ശക്തമായ മഴയിലും കാറ്റിലുമാണ് മരം മുറിഞ്ഞ് വീടിന് മുകളിലേക്ക് പതിച്ചത്. ലക്ഷങ്ങളുടെ നഷ്ടമാണ് സംഭവിച്ചത്. നാട്ടുകാർ മരം മുറിച്ചു മാറ്റി. റോഡരികിലെ മരം പാലത്തിന് അപകട ഭീഷണിയാകുന്നു കൂരാച്ചുണ്ട്: മഴ കനത്തതോടെ കൂരാച്ചുണ്ട് ടൗണിനു സമീപം നിൽക്കുന്ന മരം യാത്രക്കാർക്കും പാലത്തിനും ഭീഷണിയാകുന്നതായി ആക്ഷേപം. പാലത്തിന്‍റെ സംരക്ഷണ മതിലിനോട് ചേർന്നു അപകടകരമായി വളർന്നു നിൽക്കുന്ന മരം റോഡിലേക്ക് ചാഞ്ഞാണുള്ളത്. മഴ ശക്തമായതോടെ പലയിടങ്ങളിലും മരങ്ങൾ കടപുഴകി വീഴുന്നത് പതിവ് കാഴ്ചയാണ്. ടൗണിലായതിനാൽ ഏറെ ഭീഷണി ഉയർത്തുന്നുണ്ട്. നിരന്തരം ഒട്ടനവധി ആൾക്കാർ ബസ് സ്റ്റാൻഡിലേക്കു പോകുന്നതോടൊപ്പം ഒട്ടേറെ ബസുകൾ അടക്കമുള്ള വാഹനങ്ങളും ഇതുവഴി സഞ്ചരിക്കുന്നുണ്ട്. ബാങ്ക്, സർക്കാർ ഓഫീസുകൾ എന്നിവിടങ്ങളിലേക്ക് പോകണമെങ്കിലും ഇതുവഴിയാണ് കടന്നു പോകുന്നത്. ഭീഷണി ഉയർത്തുന്ന മരം മുറിച്ചുനീക്കാൻ നടപടി വേണമെന്ന ആവശ്യമാണ് ഉയരുന്നത്. വീടിന് മുകളിൽ മരം വീണ് മേൽക്കൂര തകർന്നു കൂരാച്ചുണ്ട്: ശക്തമായ കാറ്റിലും മഴയിലും മരം വീണ് വീടിന്‍റെ മേൽക്കൂര തകർന്നു. കൂരാച്ചുണ്ട് പഞ്ചായത്ത് ഒന്നാം വാർഡ് ഓഞ്ഞിലിലെ കർഷകൻ ഇല്ലിക്കൽ ജോർജിന്‍റെ വീടിനു മുകളിലാണ് കഴിഞ്ഞ ദിവസം മരം വീണത്. ഓട് മേഞ്ഞ വീടിന്‍റെ മേൽക്കൂര ഭാഗികമായി തകർന്നു. ഈ സമയം വീട്ടിൽ ആളില്ലാതിരുന്നതിനാൽ വലിയ അപകടം ഒഴിവായി. പഞ്ചായത്ത് പ്രസിഡന്‍റ് ഒ.കെ. അമ്മദ്, വൈസ് പ്രസിഡന്‍റ് വിൻസി തോമസ്, പഞ്ചായത്ത് അംഗങ്ങളായ വിൽസൺ പാത്തിച്ചാലിൽ, സണ്ണി പുതിയകുന്നേൽ തുടങ്ങിയവർ സന്ദർശിച്ചു. മണ്ണിടിച്ചില്‍:രാമനാട്ടുകരയിലെ ഇഎച്ച്ടി ടവര്‍ നിലംപതിക്കുമെന്ന് ആശങ്ക കോഴിക്കോട്: രാമനാട്ടുകര വില്ലജ് പരുത്തിപ്പാറ -മൂര്‍ക്കനാട് റോഡില്‍ ഉള്ള കെഎസ്ഇബിയുടെ ഇഎച്ച്ടി ടവര്‍ സ്ഥാപിച്ച സ്ഥലത്ത് മണ്ണിടിച്ചില്‍. ഏകദേശം 30 അടി ഉയരത്തില്‍ ഉള്ള സ്ഥലത്തിന്‍റെ ഒരു ഭാഗത്ത് മണ്ണിടിഞ്ഞു റോഡിലേക്ക് വീണു. ടവര്‍ നിലം പതിക്കുമോയെന്ന ഭീതിയിലാണ് നാട്ടുകാര്‍. ടവറിന് സമീപത്തുള്ള മൂന്നു വീട്ടുകാരോട് രാത്രിയില്‍ ബന്ധുവീടുകളിലേക്ക് മാറി താമസിക്കുന്നതിന് നിര്‍ദേശം നല്‍കിയിട്ടുണ്ട്.

ജവഹര്‍ലാല്‍ നെഹ്‌റുവിനെ അനുസ്മരിച്ചു

കോഴിക്കോട്: മുന്‍ പ്രധാനമന്ത്രി ജവഹര്‍ലാല്‍ നെഹ്‌റുവിനെ ജില്ലാ കോണ്‍ഗ്രസ് കമ്മിറ്റിയുടെ ആഭിമുഖ്യത്തില്‍ അനുസ്മരിച്ചു. ഡിസിസി ഓഡിറ്റോറിയത്തില്‍ നടന്ന അനുസ്മരണ സമ്മേളനം മുന്‍ കെപിസിസി പ്രസിഡന്‍റ് മുല്ലപ്പള്ളി രാമചന്ദ്രന്‍ ഉദ്ഘാടനം ചെയ്തു. ശാസ്ത്ര സാഹിത്യ പരിഷത്ത് മുന്‍ സംസ്ഥാന പ്രസിഡന്‍റും പ്രശസ്ത എഴുത്തുകാരനുമായ പ്രഫ. ടി.പി. കുഞ്ഞിക്കണ്ണന്‍ മുഖ്യപ്രഭാഷണം നടത്തി. ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അധ്യക്ഷത വഹിച്ചു. കെപിസിസി ജനറല്‍ സെക്രട്ടറി അഡ്വ. പി.എം. നിയാസ്, മുന്‍ ഡിസിസി പ്രസിഡന്‍റ് കെ.സി. അബു, ഗൗരി പുതിയോത്ത് പ്രസംഗിച്ചു.

കെഎസ്ഇബി ഓഫീസിലേക്ക് മാർച്ചും ധർണയും നടത്തി

കോടഞ്ചേരി: തോട്ടിൽ കുളിക്കുന്നതിനിടെ വൈദ്യുതി ലൈൻ പൊട്ടിവീണ് കുട്ടികൾ മരിക്കാൻ ഇടയായ സംഭവം കെഎസ്ഇബിയുടെ സുരക്ഷാ മുൻ കരുതലുകളുടെ വീഴ്‌ചമൂലം സംഭവിച്ചതാണെന്ന് ആരോപിച്ച് മണ്ഡലം കോൺഗ്രസ് കമ്മിറ്റി കോടഞ്ചേരി കെഎസ്ഇബി ഓഫീസിലേക്ക് മാർച്ചും ധർണയും നടത്തി. പൊതുജനങ്ങൾ നിരന്തരം പരാതിപ്പെട്ടിട്ടും നടപടി സ്വീകരിക്കാത്ത കെഎസ്ഇബി നടപടി പ്രതിഷേധാർഹമാണ്. കുടുംബത്തിന് 25 ലക്ഷം രൂപ നഷ്ട പരിഹാരം നൽകണം. ഡിസിസി ജനറൽ സെക്രട്ടറി പി.സി. ഹബീബ് തമ്പി മാർച്ച് ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് വിൻസന്‍റ് വടക്കേ മുറിയിൽ അധ്യക്ഷത വഹിച്ചു. ബ്ലോക്ക് കോൺഗ്രസ് പ്രസിഡന്‍റ് ജോബി ഇലന്തൂർ മുഖ്യപ്രഭാഷണം നടത്തി. പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, ജില്ലാ പഞ്ചായത്ത് മെമ്പർ ബോസ് ജേക്കബ്, കർഷക കോൺഗ്രസ് സംസ്ഥാന സെക്രട്ടറി സണ്ണി കാപ്പാട്ട് മല, ജോസ് പെരുമ്പള്ളി, ബ്ലോക്ക് കോൺഗ്രസ് കമ്മിറ്റി വൈസ് പ്രസിഡന്‍റ് ജോസ് പൈക, ഐഎൻടിയുസി നിയോജകമണ്ഡലം പ്രസിഡന്‍റ് ഫ്രാൻസിസ് ചാലിൽ, ടോമി ഇല്ലിമൂട്ടിൽ, ബിജു ഓത്തിക്കൽ എന്നിവർ പ്രസംഗിച്ചു.

ലഹരി വിരുദ്ധ ദിനം: കൂരാച്ചുണ്ടിൽ സംഘാടകസമിതി രൂപീകരിച്ചു

കൂരാച്ചുണ്ട്: അന്താരാഷ്ട്ര ലഹരി വിരുദ്ധ ദിനമായ ജൂൺ 26 ന് ജില്ലാ പഞ്ചായത്തിന്‍റെ നേതൃത്വത്തിൽ ലഹരി മുക്ത കോഴിക്കോട് ജില്ല എന്ന ലക്ഷ്യത്തോടുകൂടി സംഘടിപ്പിക്കുന്ന പരിപാടിയുടെ ഭാഗമായി കൂരാച്ചുണ്ട് പഞ്ചായത്തിൽ സംഘാടക സമിതി രൂപീകരണയോഗം ചേർന്നു. പഞ്ചായത്ത് തലത്തിൽ നടക്കുന്ന ലഹരി വിരുദ്ധ പ്രതിജ്ഞയിൽ പന്ത്രണ്ടായിരം ആൾക്കാരെ സംഘടിപ്പിക്കുന്നതിന് യോഗം തീരുമാനിച്ചു. പഞ്ചായത്ത് പ്രസിഡന്‍റ് ഒ.കെ. അമ്മദ് അധ്യക്ഷത വഹിച്ചു. വൈസ് പ്രസിഡന്‍റ് വിൻസി തോമസ്, സ്ഥിരം സമിതി അംഗങ്ങളായ ഡാർലി ഏബ്രഹാം, സിമിലി ബിജു, പഞ്ചായത്ത് അംഗങ്ങളായ റസീന യൂസഫ്, ആൻസി ജോസഫ്, വിജയൻ കിഴക്കയിൽമീത്തല്‍, നേതാക്കളായ ജോസ് വെളിയത്ത്, വി.എസ്. ഹമീദ്, സിഡിഎസ് ചെയർപേഴ്സൺ കാർത്തിക വിജയൻ എന്നിവർ പ്രസംഗിച്ചു.

കോണ്‍ഗ്രസ് പദയാത്ര സമാപിച്ചു

മുക്കം: കൊടിയത്തൂര്‍ മണ്ഡലം കോണ്‍ഗ്രസ് പ്രസിഡന്‍റ് സുജ ടോം നയിച്ച പദയാത്ര സമാപിച്ചു. ഡിസിസി ജനറല്‍ സെക്രട്ടറി സി.ജെ. ആന്‍റണി സുജ ടോമിന് പതാക കൈമാറി ഉദ്ഘാടനം ചെയ്തു. എം. സിറാജുദ്ദീന്‍, കെ.ടി. മന്‍സൂര്‍, അഡ്വ. കെ.പി. സൂഫിയാന്‍, മമ്മദ് പുളിക്കല്‍, ഹരിദാസന്‍ പരപ്പില്‍, കണ്ണന്‍ ചെറുവാടി, അബ്ദു പന്നിക്കോട്, മോയിന്‍ ബാപ്പു ചെറുവാടി, മാധവന്‍ കുളങ്ങര, ധന്യ ബാബുരാജ്, ജംഷിദ് എരഞ്ഞിമാവ്, സുബ്രഹ്‌മണ്യന്‍ മാട്ടുമുറി, അബ്ദു തിരുനിലത്ത്, മറിയംകുട്ടിഹസന്‍ തുടങ്ങിയവര്‍ പ്രസംഗിച്ചു. ബഷീര്‍ പുതിയോട്ടില്‍, റിനീഷ് കളത്തിങ്ങല്‍ എന്നിവര്‍ നേതൃത്വം നല്‍കി.

നാല് ക്യാമ്പുകളിലായി 151 പേര്‍

കോഴിക്കോട്: ശക്തമായ മഴയെ തുടര്‍ന്ന് ജില്ലയില്‍ ആരംഭിച്ച നാല് ദുരിതാശ്വാസ ക്യാമ്പുകളിലായി മാറ്റിപ്പാര്‍പ്പിച്ചത് 44 കുടുംബങ്ങളെ. 56 പുരുഷന്മാരും 52 സ്ത്രീകളും 43 കുട്ടികളും അടക്കം 151 പേരാണ് ഈ ക്യാമ്പുകളില്‍ കഴിയുന്നത്. കോഴിക്കോട് താലൂക്കില്‍ രണ്ട് ക്യാമ്പുകളിലായി ഏഴ് കുടുംബങ്ങളില്‍ നിന്നുള്ള 30 പേരും (9 പുരുഷന്മാര്‍, 14 സ്ത്രീകള്‍, ഏഴ് കുട്ടികള്‍) വടകര താലൂക്കില്‍ ഒരു ക്യാമ്പില്‍ 36 കുടുംബങ്ങളില്‍ നിന്നുള്ള 119 പേരും (46 പുരുഷന്മാര്‍, 37 സ്ത്രീകള്‍, 36 കുട്ടികള്‍) കൊയിലാണ്ടി താലൂക്കിലെ ക്യാമ്പില്‍ രണ്ടുപേരുമാണുള്ളത്.

കെഎസ്ഇബിയുടെ നഷ്ടം 1.85 കോടിയായി

കോഴിക്കോട്: ജില്ലയില്‍ ഇന്നലെ ഉണ്ടായ കനത്ത കാറ്റിലും മഴയിലും കെഎസ്ഇബിക്കുണ്ടായത് 60 ലക്ഷം രൂപയുടെ നഷ്ടം. കോഴിക്കോട് സര്‍ക്കിളിന് കീഴില്‍ വിവിധ ഇടങ്ങളിലായി 130 എല്‍ടി പോളുകളും 15 എച്ച്ടി പോളുകളും തകര്‍ന്നു. മരം വീണും മറ്റും 400 എല്‍ടി കണ്ടക്ടറുകളും 10 എച്ച്ടി കണ്ടക്ടറുകളും തകരാറിലായി. ഇതേത്തുടര്‍ന്ന് 10 ലക്ഷം രൂപയുടെ നാശനഷ്ടമാണ് ഉണ്ടായത്. വടകര സര്‍ക്കിളില്‍ ഇന്നലെ മാത്രം 175 എല്‍ടി പോളുകളും 10 എച്ച്ടി പോളുകളും തകര്‍ന്നു. 700 എല്‍ടി കണ്ടക്ടറുകളാണ് ഇന്നലെ തകരാറിലായത്. ഇവിടെ ഇന്നലെ 50 ലക്ഷം രൂപയുടെ നാശനഷ്ടമാണ് കണക്കാക്കുന്നത്. ഇതോടെ കഴിഞ്ഞ നാലു ദിവസത്തിനിടയില്‍ ജില്ലയിലെ രണ്ട് സര്‍ക്കിളുകളിലുമായി 1.85 കോടിയുടെ നഷ്ടമുണ്ടായതായി അധികൃതര്‍ അറിയിച്ചു.

കോട്ടമുഴി പാലത്തിലെ മണ്ണിടിച്ചില്‍: ജനകീയ സമിതി മാര്‍ച്ച് നടത്തി

മുക്കം: പൊതുമരാമത്ത് വകുപ്പ് 4.21 കോടി രൂപ മുടക്കി മുക്കം ചെറുവാടി എന്‍.എം. ഹുസൈന്‍ ഹാജി റോഡില്‍ പുനര്‍ നിര്‍മിക്കുന്ന കോട്ടമുഴി പാലത്തില്‍ മണ്ണിടിച്ചില്‍ തുടര്‍ക്കഥയായതോടെ പ്രതിഷേധം വ്യാപകമായി. സംസ്ഥാന പൊതുമരാമത്ത് വകുപ്പിന്‍റെയും കരാര്‍ കമ്പനിയുടേയും അനാസ്ഥയില്‍ പ്രതിഷേധിച്ച് ജനകീയ സമിതിയുടെ ആഭിമുഖ്യത്തില്‍ പാലത്തിലേക്ക് മാര്‍ച്ച് നടത്തി. പാലം നിർമാണത്തില്‍ അഴിമതിയുണ്ടെന്നും കരാര്‍ കമ്പനിക്ക് കൂടുതല്‍ പണം ഉണ്ടാക്കി നല്‍കാന്‍ എംഎല്‍എ പണിയെടുക്കുകയാണന്നും ജനകീയ സമിതി ഭാരവാഹികള്‍ പറഞ്ഞു. കെ.ടി. മന്‍സൂര്‍ ഉദ്ഘാടനം ചെയ്തു. കൊടിയത്തൂര്‍ പഞ്ചായത്ത് വൈസ് പ്രസിഡന്‍റ് ഫസല്‍ കൊടിയത്തൂര്‍ അധ്യക്ഷത വഹിച്ചു. ടി.കെ. അബൂബക്കര്‍, യു.പി. മമ്മദ്, ആമിന, കെ.പി. അബ്ദുറഹിമാന്‍, എന്‍.കെ. അഷ്‌റഫ്, റഫീഖ് കുറ്റിയോട്ട്, ഷുക്കൂര്‍ മുട്ടാത്ത്, അഹമ്മദ് കുട്ടി മഞ്ചറ തുടങ്ങിയവര്‍ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]