ADVERTISEMENT

ADVERTISEMENT

റോഡില്‍ നിര്‍ത്തി മരം കയറ്റി; ലോറിക്ക് പിഴ

രാജപുരം: മറ്റു വാഹനങ്ങള്‍ക്ക് പോകാൻ തടസമുണ്ടാക്കുന്ന തരത്തിൽ റോഡിൽ ലോറി നിർത്തി മരം കയറ്റിയതിന് ഉടമയ്ക്ക് പിഴ. കൊട്ടോടി വാഴവളപ്പ് റോഡിലാണ് സംഭവം. മറ്റു വാഹനങ്ങളിലെ യാത്രക്കാരുടെ പരാതിയിൽ രാജപുരം എസ്ഐ സി.പ്രദീപ് കുമാറാണ് ലോറി ഉടമ എം.ജുനൈദിന് 1500 രൂപ പിഴയിട്ടത്. ഇനി ഇത്തരം നടപടികള്‍ ആവർത്തിക്കരുതെന്ന കർശന നിർദേശവും ഉടമയ്ക്ക് നൽകിയിട്ടുണ്ട്.

ADVERTISEMENT

അധ്യാപകരുടെയും പിടിഎ ഭാരവാഹികളുടെയും യോഗം വിളിച്ച് വെള്ളരിക്കുണ്ട് പോലീസ്

വെള്ളരിക്കുണ്ട്: പുതിയ അധ്യയനവർഷം ആരംഭിക്കുന്നതിന് മുന്നോടിയായി വെള്ളരിക്കുണ്ട് പോലീസ് സ്റ്റേഷൻ പരിധിയിൽ വരുന്ന സ്കൂളുകളിലെ അധ്യാപകരുടെയും പിടിഎ ഭാരവാഹികളുടെയും യോഗം വിളിച്ച് വെള്ളരിക്കുണ്ട് പോലീസ്. സ്കൂളുകളിലും പുറത്തും കുട്ടികളുടെ സുരക്ഷ ഉറപ്പു വരുത്തുന്നതിനുള്ള നടപടികൾ ഉറപ്പാക്കുകയാണ് ലക്ഷ്യം. സ്കൂളുകൾക്ക് സമീപമുള്ള കടകളിൽ ലഹരിവസ്തുക്കളുടെ വില്പന തടയാനുള്ള നടപടികൾ സ്വീകരിക്കും. കുട്ടികൾ രാവിലെ വീട്ടിൽ നിന്നും പുറപ്പെട്ടാൽ നേരെ സ്കൂളുകളിൽ എത്തുന്നുണ്ടോ എന്നും സ്കൂൾ വിട്ടുകഴിഞ്ഞാൽ അവർ പെട്ടെന്നുതന്നെ വീട്ടിൽ മടങ്ങിയെത്തുന്നുണ്ടോ എന്നും ഉറപ്പാക്കണമെന്നും പോലീസ് നിർദേശിച്ചു. സ്കൂൾ വാഹനങ്ങൾ ഓടിക്കുന്ന ഡ്രൈവർമാർ നിറബന്ധമായും പോലീസ് ക്ലിയറൻസ് എടുക്കണം. ഡ്രൈവർമാരുടെ പൂർണ വിവരങ്ങൾ അടങ്ങിയ രജിസ്റ്റർ സ്കൂളുകളിൽ സൂക്ഷിക്കണം. കുട്ടികളുടെ അമിതമായ മൊബൈൽ ഫോൺ ഉപയോഗം തടയണം. പകർച്ചവ്യാധികൾ തടയാൻ പരിസര ശുചീകരണ പ്രവർത്തനങ്ങൾ നടത്തണം. സ്കൂൾ പരിസരങ്ങളിൽ ഇഴജന്തുക്കളുടെ സാന്നിധ്യം ഇല്ലെന്ന് ഉറപ്പുവരുത്തണം. സ്കൂൾ കെട്ടിടങ്ങളുടെ സുരക്ഷ ഉറപ്പു വരുത്തണം. മഴ ശക്തി പ്രാപിക്കുന്ന സാഹചര്യത്തിൽ വിദ്യാർത്ഥികളുടെ യാത്രാ സുരക്ഷിതത്വം കൂടി ഉറപ്പുവരുത്തണമെന്നും അവശ്യഘട്ടങ്ങളിൽ പോലീസിന്‍റെ സഹായം തേടാമെന്നും വെള്ളരിക്കുണ്ട് ഇൻസ്‌പെക്ടർ ടി.കെ. മുകുന്ദൻ അറിയിച്ചു.

വനം വകുപ്പ് പനത്തടി സെക്ഷനിൽ ആയിരം വിത്തുണ്ടകൾ തയാറായി

രാജപുരം: വനത്തിനുള്ളിൽ പ്രകൃതിദത്ത ഫലവൃക്ഷങ്ങൾ വളർത്തിയെടുക്കുകയെന്ന ലക്ഷ്യത്തോടെ വനംവകുപ്പ് നടപ്പിലാക്കുന്ന വിത്തൂട്ട് പദ്ധതിക്കായി പനത്തടി സെക്ഷനിൽ ആയിരത്തോളം വിത്തുണ്ടകൾ തയാറായി. മാവ്, പ്ലാവ്, ആഞ്ഞിലി, പേര, ഞാവൽ, ഇലഞ്ഞി, കുടംപുളി, വാളംപുളി തുടങ്ങി മുപ്പതോളം ഫലവൃക്ഷങ്ങളുടെ വിത്തുകളാണ് ഇവയിൽ ഉൾക്കൊള്ളിച്ചിട്ടുള്ളത്. ചാമുണ്ഡിക്കുന്ന് വനമേഖലയിലാണ് ഇവ നിക്ഷേപിക്കാൻ ഉദ്ദേശിക്കുന്നത്. സെക്ഷൻ ഫോറസ്റ്റ് ഓഫീസർ ബി. ശേഷപ്പ, ബീറ്റ് ഫോറസ്റ്റ് ഓഫീസർമാരായ വി.വി. പ്രകാശൻ, ഡി. വിമൽരാജ്, വി. വിനീത്, കെ. രതീഷ്, ജി. സൗമ്യ, റിസർവ് ഫോറസ്റ്റ് വാച്ചർ എം.എസ്. സുമേഷ് കുമാർ എന്നിവർ വിത്തുണ്ടകളൊരുക്കുന്നതിൽ പങ്കാളികളായി.

വീടിന്‍റെ മുൻവാതില്‍ കുത്തിത്തുറന്ന് 22 പവൻ സ്വർണാഭരണങ്ങൾ കവർന്നു

തൃക്കരിപ്പൂർ: സന്ധ്യാസമയത്ത് വീടിന്‍റെ മുൻവാതിൽ കുത്തിത്തുറന്ന് 22 പവൻ സ്വർണാഭരണങ്ങൾ കവർന്നു. മാണിയാട്ട് സഹകരണ ബാങ്കിന് സമീപത്തെ കെ.സിദ്ദിഖിന്‍റെ വീട്ടിലാണ് കവർച്ച നടന്നത്. നെക് ലെയ്സ്, വളകള്‍, മോതിരങ്ങള്‍, ബ്രേയ്സ് ലെറ്റ് ഉൾപ്പെടെ 15 ലക്ഷത്തിൽപ്പരം രൂപയുടെ സ്വർണാഭരണങ്ങളാണ് കവർച്ച ചെയ്യപ്പെട്ടത്. സിദ്ദിഖ് രണ്ടാഴ്ച മുമ്പ് ഹജ്ജ് കർമത്തിനായി പോയതാണ്. ഭാര്യ ജസീല വെള്ളിയാഴ്ച ഉച്ചകഴിഞ്ഞ് മൂന്നരയോടെ മക്കളേയുംകൂട്ടി പയ്യന്നൂരിലേക്ക് പോയിരുന്നു. രാത്രി പത്ത് മണിയോടെ തിരിച്ചെത്തിയപ്പോഴാണ് വീടിന്‍റെ മുൻവാതിലിന്‍റെ ഓടാമ്പലിനോടു ചേർന്ന ഭാഗം തകർത്ത നിലയിൽ കണ്ടത്. താഴത്തെ നിലയിലുള്ള കിടപ്പുമുറിയിലെ അലമാര തുറന്നാണ് സ്വർണാഭരണങ്ങൾ എടുത്തത്. ചന്തേര ഇന്‍സ്‌പെക്ടര്‍ കെ. പ്രശാന്ത്, പ്രിൻസിപ്പൽ എസ്ഐ കെ.പി. സതീഷ്, പ്രൊബേഷൻ എസ്ഐ സി.ആർ. മൗഷ്മി എന്നിവരുടെ നേതൃത്വത്തില്‍ പോലീസും വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി.

മാലോം വലിയപുഞ്ചയിൽ ആർആർടി സംഘമെത്തി

മാലോം: ദിവസങ്ങളായി കാട്ടാനക്കൂട്ടം തമ്പടിച്ച കാപ്പിത്തട്ട്, വലിയ പുഞ്ച, ബന്തമല പ്രദേശങ്ങളിൽ വനംവകുപ്പിന്‍റെ ആർആർടി സംഘമെത്തി. ആനകളെ ഉൾക്കാട്ടിലേക്ക് തുരത്താനുള്ള ശ്രമങ്ങൾ ആരംഭിച്ചു. ഇന്നലെ പുഞ്ച, ബന്തമല ഭാഗങ്ങളിലെ കൃഷിയിടങ്ങളിൽ കാട്ടാനകൾ വ്യാപകമായി നാശം വിതച്ചിരുന്നു. വരാച്ചേരി ബിനുവിന്‍റെ തോട്ടത്തിലെ കമുകുകൾ മറിച്ചിട്ട് ചവിട്ടിമെതിച്ച നിലയിലാണ്. ആർആർടി സെക്ഷൻ ഫോറസ്റ്റ് ഓഫീസർ പ്രവീൺ കുമാർ, അഭിലാഷ്, രവീന്ദ്ര, നിവേദ്, നിധിൻ ചന്ദ്രൻ, ജിഷ്ണു, സുധീഷ്, സന്തോഷ്, ബിനു, പ്രദീപ് കുമാർ എന്നിവരുടെ നേതൃത്വത്തിലാണ് ആർആർടി സംഘമെത്തിയത്.

സ്ത്രീകളുടെയും കുട്ടികളുടെയും ആശുപത്രി വീണ്ടും അടച്ചുപൂട്ടലിന്‍റെ വക്കിൽ

കാഞ്ഞങ്ങാട്: കഴിഞ്ഞ നിയമസഭാ തെരഞ്ഞെടുപ്പ് കാലത്ത് ധൃതിപിടിച്ച് ഉദ്ഘാടനം നടത്തിയ കാഞ്ഞങ്ങാട് നഗരമധ്യത്തിലെ ഗവ. സ്ത്രീകളുടെയും കുട്ടികളുടെയും ആശുപത്രി പിന്നെയും രണ്ടുവർഷത്തോളം അടഞ്ഞുകിടന്നിരുന്നതാണ്. യൂത്ത് കോൺഗ്രസും ലീഗും ബിജെപിയുമടക്കമുള്ള സംഘടനകൾ പലതവണ പ്രതിഷേധസമരങ്ങൾ നടത്തിയതിനു ശേഷമാണ് ആശുപത്രി തുറന്ന് പ്രവർത്തനക്ഷമമാക്കിയത്. ഇവിടെ ഡോക്ടർമാരും നഴ്സുമാരും മറ്റു ജീവനക്കാരുമടക്കം 152 സ്ഥിരം തസ്തികകൾ അനുവദിക്കുന്നതിനാണ് ജില്ലാ മെഡിക്കൽ ഓഫീസിൽ നിന്ന് സംസ്ഥാന ആരോഗ്യവകുപ്പിലേക്ക് നിർദേശം സമർപ്പിച്ചിരുന്നത്. എന്നാൽ ഒരു സ്ഥിരനിയമനം പോലും ഇതുവരെ ഉണ്ടായിട്ടില്ല. ചട്ടഞ്ചാലിലെ അടച്ചുപൂട്ടിയ ടാറ്റ ആശുപത്രിയിൽ നിന്നും നീലേശ്വരം, തൃക്കരിപ്പൂർ താലൂക്ക് ആശുപത്രികളിൽ നിന്നും ജോലി ക്രമീകരണത്തിലൂടെ ഡോക്ടർമാരെയും നഴ്സുമാരെയും മറ്റു ജീവനക്കാരെയും എത്തിച്ചാണ് ആശുപത്രി പ്രവർത്തനസജ്ജമാക്കിയത്. അടുത്തുതന്നെ സ്ഥിരം തസ്തികകൾ അനുവദിച്ച് ആശുപത്രി പൂർണതോതിൽ പ്രവർത്തനസജ്ജമാക്കുമെന്ന വാഗ്ദാനം ആവർത്തിക്കുന്നതിനിടയിലാണ് ആരോഗ്യവകുപ്പ് ഇവിടെ അത്യാഹിത വിഭാഗത്തിലുള്ള മൂന്നു ഡോക്ടർമാരെയും സ്ഥലംമാറ്റിയത്. ഇനി ദിവസങ്ങൾക്കകം മറ്റെവിടെയെങ്കിലും നിന്ന് ജോലി ക്രമീകരണത്തിലൂടെയോ മറ്റുതരത്തിലോ പകരം ഡോക്ടർമാരെ എത്തിച്ചില്ലെങ്കിൽ അത്യാഹിതവിഭാഗം തത്കാലം അടച്ചുപൂട്ടേണ്ട നിലയാകും. മറ്റു വിഭാഗങ്ങളിലും നിലവിലുള്ള ഡോക്ടർമാരുടെ ജോലി ക്രമീകരിച്ചാണ് ആശുപത്രി നടന്നുപോകുന്നത്. അത്യാവശ്യഘട്ടങ്ങളിൽ ആരെങ്കിലും ലീവെടുത്താൽപോലും ആ വിഭാഗം അടഞ്ഞുകിടക്കുമെന്ന നിലയാണ്.

പള്ളി ഭണ്ഡാരം കുത്തിത്തുറന്ന് കവർച്ച നടത്തിയയാൾ പിടിയിൽ

ചിറ്റാരിക്കാൽ: തോമാപുരം സെന്‍റ് തോമസ് ഫൊറോന പള്ളിയുടെ ഭണ്ഡാരം കുത്തിത്തുറന്ന് കവർച്ച നടത്തിയ ആൾ പിടിയിൽ. ചിറ്റാരിക്കാൽ പള്ളിക്കുന്നിലെ ബി.ടി. രാജേഷി(50)നെയാണ് ചിറ്റാരിക്കാൽ പോലീസ് അറസ്റ്റ് ചെയ്തത്. കഴിഞ്ഞ 28 ന് പുലർച്ചെയായിരുന്നു സംഭവം. ഭണ്ഡാരം കുത്തിത്തുറക്കുന്ന ദൃശ്യം സമീപത്തെ സിസിടിവിയിൽ പതിഞ്ഞിരുന്നു. ആറായിരത്തോളം രൂപയാണ് കവർച്ച ചെയ്യപ്പെട്ടത്. സിസിടിവി ദൃശ്യങ്ങൾ പിന്തുടർന്ന് നടത്തിയ അന്വേഷണത്തിലാണ് മുമ്പും കവർച്ചക്കേസുകളിൽ പ്രതിയായിട്ടുള്ള രാജേഷിനെ കണ്ടെത്തിയത്. ഇൻസ്പെക്ടർ രഞ്ജിത് രവീന്ദ്രൻ, എസ്ഐ അനിൽ കുമാർ എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്. രാജേഷിനെ ഹോസ്ദുർഗ് ജുഡീഷ്യൽ മജിസ്ട്രേറ്റ് കോടതിയിൽ ഹാജരാക്കി 14 ദിവസത്തേക്ക് റിമാൻഡ് ചെയ്തു.

എം സാൻഡ് ഉപയോഗിച്ച് അടയ്ക്കാനുള്ള ശ്രമം തടഞ്ഞു

കാസർഗോഡ്: ചട്ടഞ്ചാലിൽ ദേശീയപാതയുടെ മേൽപ്പാലത്തിൽ വിള്ളലുകൾ. കഴിഞ്ഞ ദിവസം മലവെള്ളപ്പാച്ചിലിൽ പുതിയ ദേശീയപാതയുടെ ഒരു ഭാഗം ഒലിച്ചുപോയ സ്ഥലത്തിന് സമീപം തന്നെയാണ് വിള്ളലുകളും പ്രത്യക്ഷപ്പെട്ടത്. ഈ ഭാഗം ഇതുവരെ വാഹനങ്ങൾക്കായി തുറന്നുകൊടുത്തിട്ടില്ല. വിള്ളലുകൾ കണ്ടതിനു പിന്നാലെ നിർമാണ കരാറുകാരായ മേഘ കൺസ്ട്രക്ഷൻസ് അധികൃതരെത്തി വിള്ളൽഎം സാൻഡ് നിറച്ച് അടക്കാൻ ശ്രമിച്ചത് നാട്ടുകാർ തടഞ്ഞു. ആകെ 50 മീറ്റർ നീളത്തിലുള്ള ഭാഗത്താണ് വിള്ളലുകളുള്ളത്. ജില്ലാ കളക്ടർ ഇവിടെയെത്തി പരിശോധന നടത്തുമെന്ന് തഹസിൽദാർ അറിയിച്ചു.

ഉന്നതവിജയികൾക്ക് കാഞ്ഞങ്ങാട്ട് ദീപികയുടെ ആദരം

കാഞ്ഞങ്ങാട്: പത്താം ക്ലാസ്, പ്ലസ്ടു പരീക്ഷകളിൽ ഉന്നതവിജയം നേടിയ കാഞ്ഞങ്ങാട് മേഖലയിലെ വിദ്യാർഥികൾക്കും സ്കൂളുകൾക്കും മലയാളത്തിലെ പ്രഥമ ദിനപത്രമായ ദീപികയുടെ ആദരവ്. വിദേശ വിദ്യാഭ്യാസരംഗത്തെ വഴികാട്ടിയായ സാന്‍റാ മോണിക്ക സ്റ്റഡി എബ്രോഡുമായി സഹകരിച്ച് പടന്നക്കാട് ഗുഡ് ഷെപ്പേർഡ് ചർച്ച് ഹാളിൽ "ആദരം-2025' എന്ന പേരിൽ സംഘടിപ്പിച്ച പരിപാടി രാജ്മോഹൻ ഉണ്ണിത്താൻ എംപി ഉദ്ഘാടനം ചെയ്തു. ആഗോളതലത്തിൽ വിദ്യാഭ്യാസരംഗം അത്യധികം മത്സരാധിഷ്ഠിതമാകുന്ന കാലത്ത് ഒട്ടും പിന്നിലാകാതെ മുന്നേറ്റം തുടരാൻ നമ്മുടെ കുട്ടികൾക്ക് കഴിയണമെന്നും ഉയർന്ന നിലവാരമുള്ള വിദേശ സർവകലാശാലകളും സ്വകാര്യ സർവകലാശാലകളും ഇവിടെ ഉണ്ടാകേണ്ടത് അനിവാര്യമാണെന്നും അദ്ദേഹം പറഞ്ഞു. ഓരോ കുട്ടിയുടെയും നൈസർഗികമായ കഴിവുകൾ പ്രോത്സാഹിപ്പിക്കപ്പെടുമ്പോൾ അവസരങ്ങൾ അവരെ തേടിയെത്തും. മത്സരങ്ങളിൽ മുന്നേറുന്നതിനൊപ്പം ധാർമികബോധത്തിന്‍റെ പാഠങ്ങൾ വിടാതെ മനസ്സിൽ സൂക്ഷിക്കാനും നമ്മുടെ കുഞ്ഞുങ്ങളെ പ്രാപ്തരാക്കണം. എല്ലാ കാര്യങ്ങളിലും ജനപക്ഷത്ത് നിന്നുകൊണ്ട് ധാർമികമായ നിലപാടുകൾ ഉയർത്തിപ്പിടിക്കുന്ന ദീപികയെ പോലുള്ള പത്രങ്ങൾക്ക് ഇക്കാര്യത്തിൽ വലിയ പങ്ക് വഹിക്കാൻ കഴിയുമെന്നും ഉണ്ണിത്താൻ പറഞ്ഞു. തലശേരി അതിരൂപത വികാരി ജനറാൾ മോൺ. മാത്യു ഇളംതുരുത്തിപടവിൽ അധ്യക്ഷത വഹിച്ചു. ശാരീരികമായ വളർച്ചയ്ക്കൊപ്പം ബുദ്ധിപരവും ധാർമികവുമായ വളർച്ച കൂടി നേടുമ്പോഴാണ് നമുക്ക് നല്ല മനുഷ്യരാകാൻ കഴിയുന്നതെന്ന് അദ്ദേഹം പറഞ്ഞു. തെളിഞ്ഞ നിലവിളക്കുപോലെ കുടുംബത്തിലും സമൂഹത്തിലും പ്രകാശം പരത്താൻ നമ്മുടെ കുട്ടികൾക്ക് കഴിയണമെന്ന് പരിപാടിയിൽ മുഖ്യാതിഥിയായ കാഞ്ഞങ്ങാട് ഡിവൈഎസ്പി ബാബു പെരിങ്ങേത്ത് പറഞ്ഞു. ദീപിക കണ്ണൂർ യൂണിറ്റ് റസിഡന്‍റ് മാനേജർ ഫാ.ജോബിൻ വലിയപറമ്പിൽ, മാർക്കറ്റിംഗ് കോ-ഓർ‌ഡിനേറ്റർ ഫാ. വിപിൻ വെമ്മേനിക്കട്ടയിൽ, സാന്‍റാ മോണിക്ക സ്റ്റഡി എബ്രോഡ് ഫാക്കൽട്ടി പ്രത്യുഷ് ശ്രീവാസ്തവ, ദീപിക സർക്കുലേഷൻ എക്സിക്യൂട്ടീവ് ബാബു പതിപ്പള്ളിൽ എന്നിവർ പ്രസംഗിച്ചു. കാസർഗോഡ് ജില്ലയിലെ വിവിധ സ്കൂളുകളിൽ നിന്ന് സംസ്ഥാന സിലബസ്, സിബിഎസ്ഇ, ഐസിഎസ്ഇ സിലബസുകളിൽ മികച്ച വിജയം കരസ്ഥമാക്കിയ കുട്ടികൾക്ക് സ്വർണമെഡലുകളും 100 ശതമാനം വിജയം നേടിയ സ്കൂളുകൾക്ക് ആദരഫലകങ്ങളും സമ്മാനിച്ചു. നൂറു ശതമാനം വിജയം കൈവരിച്ച പടുപ്പ് സാൻജിയോ സെൻട്രൽ സ്കൂൾ, പനത്തടി സെന്‍റ് മേരീസ് ഇംഗ്ലീഷ് മീഡിയം സ്കൂൾ, കാഞ്ഞങ്ങാട് ക്രൈസ്റ്റ് സിഎംഐ പബ്ലിക് സ്കൂൾ, കൊട്ടോടി സെന്‍റ് ആൻസ് ഇംഗ്ലീഷ് മീഡിയം സ്കൂൾ, നീലേശ്വരം സെന്‍റ് പീറ്റേഴ്സ് സ്കൂൾ, പരപ്പ ഗവ. ഹയർ സെക്കൻഡറി സ്കൂൾ, പെരിയാട്ടടുക്കം സെന്‍റ് മേരീസ് ഇംഗ്ലീഷ് മീഡിയം സ്കൂൾ, രാജപുരം ഹോളി ഫാമിലി ഹയർ സെക്കൻഡറി സ്കൂൾ, പടന്നക്കാട് സ്റ്റെല്ലാ മാരിസ് ഇംഗ്ലീഷ് മീഡിയം സ്കൂൾ, രാജപുരം ടാഗോർ പബ്ലിക് സ്കൂൾ, കാസർഗോഡ് ജയ്മാതാ സീനിയർ സെക്കൻഡറി സ്കൂൾ, ചായ്യോത്ത് മദർ അലക്സിയ ഇംഗ്ലീഷ് മീഡിയം സ്കൂൾ, കാഞ്ഞങ്ങാട് ലിറ്റിൽ ഫ്ളവർ ഗേൾസ് ഹയർ സെക്കൻഡറി സ്കൂൾ എന്നീ സ്ഥാപനങ്ങൾക്ക് ആദരം നല്കി.

ദേശീയപാതയിൽ കാറും ലോറിയും കൂട്ടിയിടിച്ച് യുവതി മരിച്ചു

ഉപ്പള: ദേശീയപാതയിൽ കാറും ലോറിയും കൂട്ടിയിടിച്ച് യുവതി മരിച്ചു. മംഗളൂരു സ്വദേശിയായ പത്മനാഭന്‍റെ ഭാര്യ നവ്യ (30) ആണ് മരിച്ചത്. പദ്മനാഭനും ഇവരുടെ മകനും ഗുരുതരമായി പരിക്കേറ്റു. ഇന്നലെ ഉച്ചകഴിഞ്ഞ് മൂന്നോടെ ഉപ്പള ഗേറ്റിന് സമീപമായിരുന്നു അപകടം. ഉപ്പളയിൽ നിന്ന് മംഗളൂരുവിലേക്ക് പോവുകയായിരുന്ന കാർ എതിർദിശയിൽനിന്ന് വന്ന ലോറിയുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ കാറിന്‍റെ മുൻഭാഗം പൂർണമായും തകർന്നു. ലോറി റോഡിലേക്ക് മറിഞ്ഞു. ഗുരുതരമായി പരിക്കേറ്റ മൂന്നുപേരെയും പുറത്തെടുത്ത് മംഗളൂരുവിലെ സ്വകാര്യ ആശുപത്രിയിലെത്തിച്ചെങ്കിലും നവ്യയുടെ ജീവൻ രക്ഷിക്കാനായില്ല.

കർഷക സ്വരാജ് സത്യഗ്രഹത്തിന് പിന്തുണയുമായി മാതൃവേദി

വെള്ളരിക്കുണ്ട്: കർഷക സ്വരാജ് സത്യഗ്രഹത്തിന് മുന്നോടിയായി നടക്കുന്ന 48 മണിക്കൂർ ഉപവാസത്തിന് പിന്തുണയുമായി മാലോം മേഖലയിലെ മാതൃവേദി പ്രവർത്തകർ സമരപ്പന്തലിലെത്തി. ഡയറക്ടർ ഫാ. ഷാജി കണിയാംപറമ്പിൽ, മേഖലാ പ്രസിഡന്‍റ് അന്നമ്മ തലാപ്പിള്ളി എന്നിവരുടെയും ആനിമേറ്റർ സിസ്റ്റർമാരുടെയും നേതൃത്വത്തിലാണ് ഫൊറോനയിലെ എല്ലാ ഇടവകകളിൽ നിന്നുമുള്ള അമ്മമാർ ഉപവാസ സമരത്തിന് ഐക്യദാർഢ്യമറിയിച്ച് സത്യഗ്രഹ പന്തലിലെത്തിയത്.

ലഹരിക്കെതിരേ സ്കൂൾ പ്രൊട്ടക്ഷൻ ഗ്രൂപ്പ് രൂപീകരിച്ചു

വെള്ളരിക്കുണ്ട്: പുതിയ അധ്യയനവർഷത്തിൽ ലഹരിക്കെതിരായ പ്രവർത്തനങ്ങളുടെ ഭാഗമായി വെള്ളരിക്കുണ്ട് സെന്‍റ് ജൂഡ്സ് ഹയർ സെക്കൻഡറി, ഹൈസ്കൂൾ, സെന്‍റ് ജോസഫ്സ് യുപി, നിർമലഗിരി എൽപി സ്കൂളുകൾ സംയുക്തമായി സ്കൂൾ പ്രൊട്ടക്ഷൻ ഗ്രൂപ്പ് രൂപീകരിച്ചു. സെന്‍റ് ജൂഡ്‌സ് ഹയർ സെക്കൻഡറി സ്കൂൾ ഓഡിറ്റോറിയത്തിൽ നടന്ന യോഗം ബളാൽ പഞ്ചായത്ത് പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. സ്കൂൾ മാനേജർ റവ.ഡോ. ജോൺസൺ അന്ത്യാംകുളം അധ്യക്ഷത വഹിച്ചു. ഹയർ സെക്കൻഡറി സ്കൂൾ പ്രിൻസിപ്പൽ റവ.ഡോ. സന്തോഷ് കെ. പീറ്റർ, മുഖ്യാധ്യാപികമാരായ കെ.എം. അന്നമ്മ, സിസ്റ്റർ റെജീന മാത്യു, ഷാന്‍റി സിറിയക് എന്നിവർ പ്രസംഗിച്ചു. വെള്ളരിക്കുണ്ട് പോലീസ് ഇൻസ്പെക്ടർ ടി.കെ. മുകുന്ദൻ, ഹെൽത്ത് ഇൻസ്പെക്ടർ സാജു സെബാസ്റ്റ്യൻ എന്നിവർ പ്രവർത്തനങ്ങളുടെ മാർഗനിർദേശം നല്കി. പിടിഎ പ്രസിഡന്‍റുമാരായ ജോസ് ചിത്രക്കുഴി, പി. അരവിന്ദാക്ഷൻ, ബിബിൻ ഡൊമിനിക് എന്നിവർ പങ്കെടുത്തു.

കാട്ടിലേക്ക് വിത്തുണ്ടകളെറിയാൻ വനംവകുപ്പ്

കാഞ്ഞങ്ങാട്: കാട്ടിൽ ഫലവൃക്ഷങ്ങൾ മുളപ്പിച്ച് വളർത്തുന്നതിനായി വനംവകുപ്പ് വിത്തുണ്ടകൾ തയ്യാറാക്കുന്നു. ആഞ്ഞിലി, ഞാവൽ, പ്ലാവ്, മാവ്, പേരയ്ക്ക, ചാമ്പങ്ങ, വാളൻ പുളി, കൊടംപുളി എന്നിവയുടെ വിത്തുകളാണ് ജില്ലയിൽ വിത്തുണ്ടകൾ തയ്യാറാക്കാൻ ഉപയോഗിക്കുന്നത്. ഓരോ ഇനത്തിന്‍റെയും വിത്തുകൾ മണ്ണ്, ചാണകം, മഞ്ഞൾ, മറ്റു ജൈവവളങ്ങൾ എന്നിവയിൽ പൊതിഞ്ഞാണ് വിത്തുണ്ടകൾ തയ്യാറാക്കുന്നത്. വനംവകുപ്പിന്‍റെ ജില്ലയിലെ ആറ് സെക്ഷനുകളിലായി വനംവകുപ്പ് ജീവനക്കാരുടെയും വനസംരക്ഷണ സമിതി അംഗങ്ങളുടെയും സന്നദ്ധ പ്രവർത്തകരുടെയും നേതൃത്വത്തിലാണ് വിത്തുണ്ടകൾ തയ്യാറാക്കുന്നത്. വയനാട്ടിൽ നിന്നും മുളയരി എത്തിച്ച് മുളയുടെ വിത്തുണ്ടകൾ കൂടി തയ്യാറാക്കാൻ ശ്രമം നടക്കുന്നുണ്ട്. ജില്ലയിലെ വനസംരക്ഷണ സമിതികൾ മുഖേന ഈ വിത്തുണ്ടകൾ കാട്ടിൽ എറിയാനാണ് പദ്ധതി. ലോക പരിസ്ഥിതി ദിനവും കാലവർഷാരംഭവും പരിഗണിച്ച് ജൂൺ ആദ്യവാരത്തിലായിരിക്കും ഇവ നിക്ഷേപിക്കുക. കാടിന്‍റെ പ്രകൃതിദത്ത ആവരണം കുറവായ സ്ഥലങ്ങൾക്കായിരിക്കും മുൻഗണന. അടുത്തിടെ അക്കേഷ്യ, മാഞ്ചിയം മരങ്ങൾ മുറിച്ചുനീക്കിയ കാറഡുക്ക, മുളിയാർ മേഖലയിലാണ് ഇവ കൂടുതലായി നിക്ഷേപിക്കാൻ ഉദ്ദേശിക്കുന്നത്. മണ്ണും ജൈവവളങ്ങളും കൊണ്ട് പൊതിയുന്നതിലൂടെ ജീവികൾ വിത്തുകളെ തന്നെ ആഹാരമാക്കുന്നത് തടയാനാകും. മുളച്ചുപൊങ്ങുന്ന തൈകളുടെ ആദ്യഘട്ട വളർച്ചയ്ക്കാവശ്യമായ പോഷകങ്ങളും ഇതുവഴി ലഭ്യമാക്കാനാകും. കാടുകളിൽ നിന്ന് അധിനിവേശ സസ്യങ്ങളെ ഒഴിവാക്കി നാടിന്‍റെ പ്രകൃതിക്കിണങ്ങിയ സസ്യജാലങ്ങൾ വളർത്തിയെടുക്കുക, വന്യജീവികൾക്ക് കാട്ടിനുള്ളിൽ തന്നെ ആഹാരം ലഭ്യമാക്കുക എന്നിവയാണ് പദ്ധതിയുടെ ലക്ഷ്യം. ഈ വർഷം ഒരുലക്ഷം വിത്തുണ്ടകൾ നിക്ഷേപിക്കാനാണ് ലക്ഷ്യമിടുന്നത്.

ബിരിക്കുളം-കൊല്ലംപാറ റോഡ് വെള്ളക്കെട്ടിലായി

ബിരിക്കുളം: ടാറിംഗ് ഇളകി കുണ്ടും കുഴിയുമായ ബിരിക്കുളം-കൊല്ലംപാറ ജില്ലാ പഞ്ചായത്ത് റോഡ് മഴക്കാലം തുടങ്ങിയതോടെ മിക്കയിടങ്ങളിലും വെള്ളക്കെട്ടിലായി. വെള്ളംനിറഞ്ഞ കുഴികളുടെ ആഴമറിയാതെ വാഹനങ്ങൾ അപകടത്തിൽ പെടുന്നതും പതിവായി. ഇരുചക്രവാഹനങ്ങൾ കുഴികളിൽ മറിഞ്ഞുവീഴുന്നത് പതിവുകാഴ്ചയാണ്. ഭാഗ്യംകൊണ്ടു മാത്രമാണ് പലരും അപകടത്തിൽ നിന്ന് രക്ഷപ്പെടുന്നത്. ചെറുതും വലുതുമായ റോഡുകളെല്ലാം ദേശീയപാത നിലവാരത്തിൽ നവീകരിക്കുന്ന കാലത്താണ് ബസുകളടക്കം നിരവധി വാഹനങ്ങൾ കടന്നുപോകുന്ന ബിരിക്കുളം-കൊല്ലംപാറ റോഡിന്‍റെ അറ്റകുറ്റപണികൾ പോലും നീണ്ടുപോകുന്നത്. ജില്ലാ പഞ്ചായത്ത് അനുവദിച്ച ഫണ്ട് ഉപയോഗിച്ച് കൊല്ലംപാറ മുതൽ പുല്ലാഞ്ഞിപ്പാറ വരെയുള്ള ഭാഗത്ത് അടുത്തിടെ കുഴികൾ നികത്തി അറ്റകുറ്റപണി നടത്തിയിരുന്നു. അതുകഴിഞ്ഞ് കാട്ടിപ്പൊയിൽ പള്ളം വരെയുള്ള ഒന്നര കിലോമീറ്റർ ഭാഗമാണ് ഇപ്പോൾ പൊട്ടിപ്പൊളിഞ്ഞ് കിടക്കുന്നത്. ഇവിടുത്തെ അറ്റകുറ്റപണിക്ക് ഇനി മഴ തീരുംവരെ കാത്തുനില്ക്കുമോ എന്നാണ് നാട്ടുകാരുടെ ആശങ്ക.

അന്തർസംസ്ഥാന പാതയിടിഞ്ഞ് ഗതാഗതം ഭാഗികമായി തടസപ്പെട്ടു

പാണത്തൂർ: കല്ലപ്പള്ളി പാടികൊച്ചി ജംഗ്ഷനിൽ മണ്ണിടിഞ്ഞ് പാണത്തൂർ-സുള്ള്യ അന്തർസംസ്ഥാനപാതയിൽ ഗതാഗതം ഭാഗികമായി തടസപ്പെട്ടു. റോഡിന്‍റെ പാർശ്വഭിത്തി കെട്ടുന്നതിനായി മണ്ണെടുത്തതാണ് മണ്ണിടിയാൻ കാരണമായതെന്ന് നാട്ടുകാർ പറയുന്നു. പനത്തടി പഞ്ചായത്ത് റോഡ് മെയിന്‍റനൻസ് ഫണ്ട് പദ്ധതിയിൽപ്പെടുത്തി കല്ലപ്പള്ളി പാടികൊച്ചി ജംഗ്ഷനിൽ കലുങ്കിനോട് ചേർന്ന ഭാഗം കോൺക്രീറ്റ് ചെയ്ത് ബലപ്പെടുത്തുന്നതിനായി 7.5 ലക്ഷം രൂപ അനുവദിച്ചിരുന്നു. ഇതിന്‍റെ ഭാഗമായി റോഡിനോട് ചേർന്ന മണ്ണ് മാറ്റിയതാണ് ശക്തമായ മഴ തുടങ്ങിയതോടെ മണ്ണിടിഞ്ഞ് റോഡ് അപകടാവസ്ഥയിൽ ആവുകയും ഇതേതുടർന്ന് വാഹന ഗതാഗതം ഭാഗികമായി തടസപ്പെടുവാനും കാരണമായത്. പ്രവൃത്തി ആരംഭിച്ചപ്പോൾ തന്നെ പാണത്തൂരിൽ നിന്ന് സുള്ള്യയിലേക്കുള്ള കെഎസ്ആർടിസി ബസ് സർവീസ് നിർത്തിയിരുന്നു. അതുകഴിഞ്ഞും സുള്ള്യയിൽ നിന്നും കർണാടകയിലെ കരിക്കയിലേക്ക് പോകുന്ന ഒരു സ്വകാര്യ ബസ് ഇതുവഴി ദിവസേന സർവീസ് നടത്തുന്നുണ്ട്. എന്നാൽ ഇപ്പോൾ റോഡ് ഇടിഞ്ഞതിനാൽ ഈ ബസ് ആളുകളെ പാലത്തിന് ഇപ്പുറം ഇറക്കി അക്കരെ നിന്നു മറ്റൊരു ബസിലാണ് ആളുകൾ പോകുന്നത്.മാസങ്ങൾക്കു മുൻപേ പ്രവർത്തി തുടങ്ങുന്നതിനു വേണ്ടി കരാറുകാരൻ പഞ്ചായത്തിൽ എഗ്രിമെന്‍റ് വച്ചിരുന്നുവെങ്കിലും പഞ്ചായത്തുമായുള്ള ചില തർക്കത്തെ തുടർന്നാണ് പ്രവർത്തി ആരംഭിക്കാൻ താമസിച്ചത് എന്ന് പറയുന്നു. പിന്നീട് തർക്കങ്ങൾ പരിഹരിച്ച് മെയ് മാസത്തിലാണ് പ്രവൃത്തി ആരംഭിച്ചത്. എന്നാൽ പ്രവർത്തി തീരും മുമ്പ് തന്നെ ശക്തമായ മഴ ആരംഭിച്ചതാണ് റോഡ് ഇടിയാനും ഗതാഗത തടസ്സത്തിനും കാരണമായത്. നിരവധി വാഹനങ്ങൾ കടന്നുപോകുന്ന അന്തർസംസ്ഥാന പാതയിലാണ് ഇത്തരത്തിൽ സംഭവിച്ചിരിക്കുന്നത്. നിലവിൽ ബസ് ഗതാഗതം പൂർണമായും നിർത്തിവെച്ചിരിക്കുകയാണ്. കാർ, ജീപ്പ് തുടങ്ങിയ ചെറിയ വാഹനങ്ങൾ മാത്രമാണ് ഇതിലൂടെ കടന്നു പോകുന്നത്. ഇതോടെ നിരവധി ആളുകളാണ് ദുരിതത്തിലായത്. മഴ ഇനിയും നീണ്ടു നിന്നാൽ റോഡ് പൂർണമായും തകരുകയും ഗതാഗതം പൂർണമായും നിലക്കുകയും ചെയ്യും. മഴ തുടങ്ങും മുമ്പ് പ്രവർത്തി പൂർത്തിയാക്കാത്തത് പഞ്ചായത്തിന്‍റെ അനാസ്ഥ കൊണ്ട് മാത്രം എന്നാണ് നാട്ടുകാർ പറയുന്നത്.

മുള്ളേരിയ 110 കെവി സബ്‌സ്റ്റേഷനില്‍ തീപിടിത്തം

മുള്ളേരിയ: മുള്ളേരിയ 110 കെവി സബ്‌സ്റ്റേഷന്‍ യാര്‍ഡില്‍ പൊട്ടന്‍ഷ്യല്‍ ട്രാന്‍സ്‌ഫോമറിന് തീപിടിച്ചു. ഇന്നലെ പുലര്‍ച്ചെ 3.30ഓടെയാണ് സംഭവം. ഡ്യൂട്ടിയിലുണ്ടായിരുന്ന ജീവനക്കാര്‍ യാര്‍ഡിലെ പത്തോളം എസ്റ്റിംഗ്യുഷര്‍ ഉപയോഗിച്ച് തീയണയ്ക്കാന്‍ ശ്രമം നടത്തിയെങ്കിലും തീ നിയന്ത്രണവിധേയമായില്ല. തുടര്‍ന്ന് കാസര്‍ഗോഡ് അഗ്‌നിരക്ഷാ സേനയെ വിവരം അറിയിക്കുകയായിരുന്നു. സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ വി.എന്‍. വേണുഗോപാലിന്‍റെ നേതൃത്വത്തില്‍ സേന എത്തി തീ അണയ്ക്കുകയായിരുന്നു. ചെര്‍ക്കള, മുള്ളേരിയ, ബദിയടുക്ക, എരിഞ്ഞിപ്പുഴ, കുറ്റിക്കോല്‍ എന്നീ സ്ഥലത്തിലെ വൈദ്യുത ബന്ധം ഈ സമയത്ത് വിച്ഛേദിച്ചു. പിന്നീട് തീപിടിച്ച യാഡ് ഒഴിവാക്കിക്കൊണ്ട് പിന്നീട് ബന്ധം പുനഃസ്ഥാപിച്ചു.

മേഘ കണ്‍സ്ട്രക്ഷന്‍ കമ്പനിയെ കരിമ്പട്ടികയില്‍പ്പെടുത്തണം: എംപി

പൊയിനാച്ചി: അശാസ്ത്രീയമായ ദേശീയപാത നിര്‍മ്മാണത്തിലൂടെ വന്‍ അഴിമതി നടത്തിയ മേഘ കണ്‍സ്ട്രക്ഷന്‍ കമ്പനിയെ കരിമ്പട്ടികയില്‍പ്പെടുത്തണമെന്ന് രാജ്മോഹന്‍ ഉണ്ണിത്താന്‍ എംപി. ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ ദേശീയപാത നിര്‍മാണത്തിലെ അഴിമതിക്കെതിരെയും അശാസ്ത്രീയമായ നിര്‍മാണത്തിനുമെതിരെ പൊയിനാച്ചി ടൗണില്‍ നിന്നും മയിലാട്ടിയിലുള്ള മേഘ കണ്‍സ്ട്രക്ഷന്‍ കമ്പനിയുടെ റീജണല്‍ ഓഫീസിലേക്ക് നടത്തിയ ബഹുജന മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മഹാരാഷ്ട്രയിലെ പനവേലില്‍ നിന്നും ആരംഭിച്ച് കേരളത്തിലെ കളയിക്കാവിളയില്‍ അവസാനിക്കുന്ന ദേശീയ പാത 66 ന്‍റെ പ്രവര്‍ത്തിയില്‍ കേരളത്തിലൂടെ പോകുന്ന ദേശീയ പാത നിര്‍മ്മാണത്തില്‍ ഞെട്ടിക്കുന്ന അഴിമതിയാണ് നടക്കുന്നത്. ആയിരക്കണക്കിന് കോടികള്‍ ചെലവുവരുന്ന ബൃഹത്തായ ഒരു നിര്‍മാണ പദ്ധതി നടക്കുമ്പോള്‍ ആദ്യഘട്ടത്തില്‍ തന്നെ സമഗ്രമായ പാരിസ്ഥികാഘാതപഠനവും സാമൂഹികാഘാത പഠനവും നടത്തേണ്ടതുണ്ട്. അതിനുവേണ്ടി പദ്ധതിയുടെ ഡിപിആര്‍ തയാറാക്കി ജനങ്ങളുടെ മുന്നില്‍ അവതരിപ്പിക്കേണ്ടതായിരുന്നു. ദേശീയപാത 66 മൂന്നു സ്ട്രെച്ചറുകളായാണ് നടക്കേണ്ടിയിരുന്നത്. ഇതുപ്രകാരം റോഡ് നിര്‍മ്മാണം ആരംഭിക്കുമ്പോള്‍ ഡിപിആര്‍ പുറത്തിറക്കുകയും പാരിസ്ഥിക ,സാമൂഹികാഘാത പഠനവും നിര്‍ബന്ധമായും നടത്തേണ്ടതായിരുന്നു. ഇതു പാടേ ഒഴിവാക്കിക്കൊണ്ട് കേന്ദ്ര സര്‍ക്കാര്‍ വന്‍ കള്ളക്കളിയാണ് ദേശീയപാത നിര്‍മ്മാണത്തില്‍ നടത്തിയിരിക്കുന്നത്. ഇതുപ്രകാരം മൂന്നു സ്ട്രെച്ചറുകളായി നടത്തേണ്ട റോഡ് നിര്‍മാണം 50 കിലോമീറ്ററിന് ഒരു സ്ട്രെച്ച് പ്രകാരം 19 സ്ട്രെച്ചറുകളാക്കിയാണ് കേന്ദ്രസര്‍ക്കാര്‍ ദേശീയപാത നിര്‍മ്മാണത്തിന് അനുവാദം നല്‍കിയത്. ഇന്ത്യയിലെ ഭീമന്‍ നിര്‍മാണകമ്പനിയായ അദാനി ഗ്രൂപ്പിന് എന്‍എച്ച്എഐ ദേശീയപാത 66 ന്‍റെ കരാര്‍ നല്‍കുകയും മേഘ ഉള്‍പ്പടെയുള്ള നിര്‍മ്മാണ കമ്പനികള്‍ക്ക് കരാര്‍ മറിച്ചുനല്‍കി അദാനിയും കേന്ദ്രസര്‍ക്കാരും വന്‍ അഴിമതിയാണ് നടത്തിയത്. അതിന്‍റെ ഫലമായി കേരളത്തിലെ ജനങ്ങള്‍ക്ക് മുന്‍പില്‍ തീരാശാപമായി ദേശീയപാത നിര്‍മാണം മാറിയിരിക്കുകയുമാണെന്ന് എംപി ആരോപിച്ചു. ദേശീയപാത നിര്‍മാണത്തില്‍ മേഘ കണ്‍സ്ട്രക്ഷന്‍ കമ്പനി വന്‍ അഴിമതി നടത്തിയതായി ബോധ്യപ്പെട്ടിരിക്കുകയാണ്. സര്‍വീസ് റോഡുകളും പാലങ്ങളും ഓവുചാലുകളും പല സ്ഥലങ്ങളിലും തകര്‍ന്നിട്ടുണ്ട്. അശാസ്ത്രീയമായ മണ്ണെടുപ്പ് മൂലം ദേശീയപാതയുടെ സമീപ പ്രദേശങ്ങളില്‍ താമസിക്കുന്ന ജനങ്ങള്‍ക്ക് ശുദ്ധജലക്ഷാമം രൂക്ഷമാണ്. കിണറുകളില്‍ ചെളിയും മലിനജലവും നിറഞ്ഞ സ്ഥിതിയിലാണ് മഴയാരംഭിക്കുമ്പോള്‍ തന്നെ ഇത്ര ഗുരുതരമായ നിലയില്‍ റോഡ് തകര്‍ന്നപ്പോള്‍ മഴയുടെ മൂര്‍ധന്യതയില്‍ കേരളത്തിന്‍റെ അവസ്ഥ എന്തായിരിക്കുമെന്ന് ചിന്തിക്കേണ്ടിയിരിക്കുന്നുവന്നും അദ്ദേഹം പറഞ്ഞു. ഡിസിസി പ്രസിഡന്‍റ് പി.കെ. ഫൈസല്‍ അധ്യക്ഷത വഹിച്ചു. ഹക്കീം കുന്നില്‍, എ. ഗോവിന്ദന്‍ നായര്‍, എം.സി. പ്രഭാകരന്‍, കെ. നീലകണ്ഠന്‍, രമേശന്‍ കരുവാച്ചേരി, കരിമ്പില്‍ കൃഷ്ണന്‍, മീനാക്ഷി ബാലകൃഷ്ണന്‍, പി.ജി. ദേവ്, സാജിദ് മവ്വല്‍, സോമശേഖര ഷേണി, ഗീത കൃഷ്ണന്‍, ഹരീഷ് പി.നായര്‍, മാമുനി വിജയന്‍, ധന്യ സുരേഷ്, മധുസൂദനന്‍ ബാലൂര്‍, ഉമേശന്‍ വേളൂര്‍, ജോയ് ജോസഫ്, കാര്‍ത്തികേയന്‍ പെരിയ, മിനി ചന്ദ്രന്‍, ഷിബിന്‍ ഉപ്പിലിക്കൈ എന്നിവര്‍ സംസാരിച്ചു.

ചെറുപനത്തടിയിൽ രണ്ട് വീടുകൾ അപകടാവസ്ഥയിൽ

പനത്തടി: കാഞ്ഞങ്ങാട് പാണത്തൂർ സംസ്ഥാന പാതയുടെ വികസനത്തിനുവേണ്ടി അശാസ്ത്രീയമായ തരത്തിൽ മലയിടിച്ചതിനെ തുടർന്ന് ചെറുപനത്തടിയിൽ രണ്ട് വീടുകൾ അപകടാവസ്ഥയിൽ. ചെറുപനത്തടിയിലെ റഹീമിന്‍റെയും സഹോദരിയുടെയും വീടുകളാണ് അപകടാവസ്ഥയിലായത്. എൻഡോസൾഫാൻ ദുരിതബാധിതയുൾപ്പെടെയുള്ള കുടുംബം രാവും പകലും ഭീതിയോടെയാണ് വീടുകൾക്കുള്ളിൽ കഴിച്ചുകൂട്ടുന്നത്. റോഡ് വികസനവുമായി ബന്ധപ്പെട്ട് ഈ വീടുകളുടെ വളരെ അടുത്തുവരെ മലയിടിച്ചിട്ടുണ്ട്. മഴ കനത്തതോടെ കുതിർന്നു നിൽക്കുന്ന ബാക്കിഭാഗം എപ്പോൾ വേണമെങ്കിലും വീടുകൾക്കൊപ്പം ഇടിഞ്ഞു നിലംപൊത്താമെന്ന നിലയിലാണ്. അനിയന്ത്രിതമായ മലയിടിക്കലിനെതിരെ നേരത്തേ വീട്ടുകാർ ജില്ലാ കളക്ടർക്കുൾപ്പെടെ പരാതി നല്കിയിരുന്നു. എന്നാൽ ബന്ധപ്പെട്ടവരുടെ ഭാഗത്തുനിന്ന് ഒരു പരിഹാരനടപടികളും ഇതുവരെ ഉണ്ടായിട്ടില്ലെന്ന് ഇവർ പറയുന്നു. ശക്തമായ മഴയിൽ വീടുകളുൾപ്പെടെ സംസ്ഥാന പാതയിലേക്ക് ഇടിഞ്ഞുവീണാൽ റോഡിലെ വാഹനങ്ങൾക്കും യാത്രക്കാർക്കുമടക്കം അത് അപകട ഭീഷണിയാകും. വീടുകൾക്ക് തൊട്ടുതാഴെയായി വൈദ്യുത ലൈനുകളും കടന്നുപോകുന്നുണ്ട്. കഴിഞ്ഞ ദിവസം പൊതുമരാമത്ത് മന്ത്രിയുടെ ഓഫീസുമായി ബന്ധപ്പെട്ടതിനെ തുടർന്ന് കെആർഎഫ്ബി എക്സി. എൻജിനീയർ കെ.വി. വിനോദ് കുമാർ, അസി.എ ൻജിനീയർ രവീന്ദ്രൻ എന്നിവർ സ്ഥലം സന്ദർശിച്ചിരുന്നു. മണ്ണിടിഞ്ഞു വീഴാതിരിക്കാനുള്ള അടിയന്തിര നടപടിയെന്ന നിലയിൽ ഈ ഭാഗത്ത് കരിങ്കല്ല് അടുക്കിവയ്ക്കാൻ കരാർ കമ്പനിക്ക് നിർദേശം നല്കി. മഴ മാറുന്ന മുറയ്ക്ക് ഇവിടെ സംരക്ഷണഭിത്തി നിർമിച്ചു നല്കാമെന്നും അവർ പറഞ്ഞു. പക്ഷേ ഈ വാഗ്ദാനം എത്രകണ്ട് നിറവേറുമെന്ന കാര്യത്തിൽ വീട്ടുകാർക്ക് സംശയമുണ്ട്. പഞ്ചായത്ത് അംഗം കെ.കെ. വേണുഗോപാൽ, മലനാട് വികസന സമിതി ജനറൽ സെക്രട്ടറി ബി. അനിൽ കുമാർ, മോണിറ്ററിംഗ് കമ്മിറ്റി കൺവീനർ അരുൺ ബാലകൃഷ്ണൻ എന്നിവർ വീട്ടുടമയുടെ സഹോദരൻ ഷെരീഫിനൊപ്പം സ്ഥലത്തെത്തി ഉദ്യോഗസ്ഥരുമായി ചർച്ച നടത്തി.

വീട്ടമ്മ പുഴയിലെ ഒഴുക്കില്‍പ്പെട്ട് മരിച്ചു

ബോവിക്കാനം: പുഴയില്‍ തുണി അലക്കാന്‍ പോയ വീട്ടമ്മ ഒഴുക്കില്‍പ്പെട്ട് മരിച്ചു. മുളിയാര്‍ മല്ലം ദുര്‍ഗാപരമേശ്വരി ക്ഷേത്രത്തിനു സമീപത്തെ പരേതനായ നാണു മണിയാണിയുടെ ഭാര്യ ഗോപി (75) ആണ് മരിച്ചത്. ഇന്നലെ രാവിലെ പത്തോടെ വീടിന് 20 മീറ്റര്‍ മാത്രം അകലെയുള്ള പുഴയില്‍ തുണി അലക്കാന്‍ പോയതായിരുന്നു. ഏറെ നേരം കഴിഞ്ഞിട്ടും തിരിച്ചെത്താത്തതിനെ തുടര്‍ന്ന് നാട്ടുകാര്‍ തെരച്ചില്‍ ആരംഭിച്ചു. ഉച്ചയോടെയാണ് നാലു കിലോമീറ്റര്‍ അകലെ കല്ലുകണ്ടത്ത് മൃതദേഹം കണ്ടെത്തിയത്. മക്കള്‍: ബാലകൃഷ്ണന്‍, രാജീവി, കുസുമ, മാലിങ്കന്‍, മധു, സുധനന്‍, പരേതയായ കലാവതി. മരുമക്കള്‍: ചന്ദ്രാവതി, ബാലകൃഷ്ണന്‍, ദിവ്യ, രേഖ, അനില, ഉമേശന്‍, പരേതനായ കൊഗ്ഗു മണിയാണി.

സാമ്പത്തിക ക്രമക്കേട്: മുന്‍ കൃഷി അസി. ഡയറക്ടര്‍ക്ക് 37 വര്‍ഷം തടവ്

കാസര്‍ഗോഡ്: കാസര്‍ഗോഡ് പ്രിന്‍സിപ്പല്‍ കൃഷി ഓഫീസിലെ മുന്‍ അസി.ഡയറക്ടറെ അഞ്ചു കേസുകളില്‍ വിജിലന്‍സ് കോടതി 37 വര്‍ഷം വീതം കഠിനതടവിന് ശിക്ഷിച്ചു. എം.അബ്ദുള്‍ റഹ്‌മാനെയാണ് തലശേരി വിജിലന്‍സ് കോടതി എന്‍ക്വയറി കമ്മീഷണര്‍ ആന്‍ഡ് സ്‌പെഷല്‍ ജഡ്ജ് (വിജിലന്‍സ്) കെ.രാമകൃഷ്ണന്‍ ശിക്ഷിച്ചത്. കാസര്‍ഗോഡ് ജില്ലാ കാര്‍ഷിക ഉത്പന്ന സംഭരണ വിതരണ സൊസൈറ്റിയില്‍ നിന്ന് പണാപഹരണം നടത്തിയതിന് വിജിലന്‍സ് കുറ്റപത്രം സമര്‍പ്പിച്ച അഞ്ചു കേസുകളില്‍ തലശേരി വിജിലന്‍സ് കോടതി കുറ്റക്കാരനാണെന്ന് കണ്ടെത്തി ഓരോ കേസിനും വിവിധ വകുപ്പുകളിലായി ആകെ 37 വര്‍ഷം വീതം കഠിനതടവിനും മൂന്നുലക്ഷം രൂപ വീതം പിഴ ഒടുക്കുന്നതിനും ശിക്ഷിക്കുകയായിരുന്നു. ശിക്ഷ ഒരുമിച്ച് അനുഭവിച്ചാല്‍ മതി. ജില്ലയില്‍ കര്‍ഷകരില്‍ നിന്നും നേരിട്ട് കാര്‍ഷിക ഉത്പന്നങ്ങള്‍ ശേഖരിച്ച് വില്‍പന നടത്തുന്നതിനായി പ്രിന്‍സിപ്പല്‍ കൃഷി ഓഫീസിലെ മാര്‍ക്കറ്റിംഗ് വിഭാഗം അസി.ഡയറക്ടര്‍ സെക്രട്ടറിയും കര്‍ഷക പ്രതിനിധികള്‍ പ്രസിഡന്‍റും ട്രഷററുമായി ഒരു കാര്‍ഷിക ഉത്പന്ന സംഭരണ വിതരണ സൊസൈറ്റി രൂപീകരിച്ചിരുന്നു. 2004-2008 കാലയളവില്‍ ഈ സൊസൈറ്റിയുടെ സെക്രട്ടറിയായി അബ്ദുള്‍ റഹ്‌മാന്‍ ചുമതല വഹിച്ചിരുന്നു. ഇക്കാലത്ത് ജോയിന്‍റ് അക്കൗണ്ടില്‍ നിന്നും സൊസൈറ്റി ചെയര്‍മാന്‍റെയും ട്രഷററുടെയും വ്യാജ ഒപ്പിട്ട് 9,41,888 രൂപ പിന്‍വലിച്ച് പണാപഹരണം നടത്തിയിരുന്നു. കാസര്‍ഗോഡ് വിജിലന്‍സ് യൂണിറ്റാണ് കേസ് രജിസ്റ്റര്‍ ചെയ്ത് അന്വേഷണം പൂര്‍ത്തിയാക്കിയത്. വിജിലന്‍സിനു വേണ്ടി പബ്ലിക് പ്രോസിക്യൂട്ടര്‍ കെ.ഉഷാകുമാരി ഹാജരായി. പ്രതിയെ കണ്ണൂര്‍ സെന്‍ട്രല്‍ ജയിലിലടച്ചു.

കല്‍ക്കണ്ടലഹരി ! നടപടിക്ക് നിര്‍ദേശം

കാസര്‍ഗോഡ്: കല്‍ക്കണ്ടപ്പൊടി എംഡിഎംഎയെന്ന് വരുത്തി കള്ളക്കേസ് എടുത്ത സംഭവത്തില്‍ നടപടി സ്വീകരിക്കാന്‍ മുഖ്യമന്ത്രിയുടെ ഓഫീസിന്‍റെ നിര്‍ദേശം. ഈ സംഭവത്തിലൂടെ നിരപരാധികളായ യുവാക്കള്‍ക്ക് അഞ്ചുമാസം ജയിലില്‍ കഴിയേണ്ടി വന്ന സംഭവത്തില്‍ കുറ്റക്കാരായ പോലീസ് ഉദ്യോഗസ്ഥര്‍ക്ക് എതിരെ നടപടി സ്വീകരിക്കണമെന്ന പരാതിയില്‍ ഉചിത നടപടി സ്വീകരിക്കാനാണ് സംസ്ഥാന പോലീസ് മേധാവിയോട് മുഖ്യമന്ത്രിയുടെ ഓഫീസ് നിര്‍ദേശിച്ചിരിക്കുന്നത്. ഹൈക്കോടതി അഭിഭാഷകനും പൊതുപ്രവര്‍ത്തകനുമായ അഡ്വ. കുളത്തൂര്‍ ജയ്സിംഗ് ന പരാതി നല്കിയത്. കണ്ണൂര്‍ വാരത്തെ നന്ദനം വീട്ടില്‍ മണികണ്ഠൻ, കാസര്‍ഗോഡ് മാലക്കല്ല് ഞരളേറ്റ് വീട്ടില്‍ ബിജു മാത്യു എന്നിവര്‍ക്ക് എതിരെ നടക്കാവ് പോലീസാണ് വ്യാജ ലഹരി കേസ് രജിസ്റ്റര്‍ ചെയ്ത് ഇരുയുവാക്കളെയും ജയിലില്‍ അടച്ചത്. യുവാക്കളുടെ കൈയിൽ നിന്ന് പിടികൂടിയത് കല്‍ക്കണ്ടപ്പൊടിയാണെന്ന് അറിയിച്ചിട്ടും എംഡിഎംഎ കൈവശം വച്ചുവെന്ന പേരില്‍ കള്ളക്കോസ് എടുത്തു. 15 ദിവസത്തിനകം കെമിക്കല്‍ അനാലിസിസ് റിപ്പോര്‍ട്ട് ഹാജരാക്കാന്‍ പോലീസ് നടപടിയും സ്വീകരിച്ചില്ല. 150 ദിവസം കഴിഞ്ഞ് കെമിക്കല്‍ അനാലിസിസ് റിപ്പോര്‍ട്ട് വന്നപ്പോഴാണ് എംഡിഎംഎ എന്ന് വരുത്തി അയച്ച പൊടികള്‍ കല്‍ക്കണ്ടപ്പൊടിയെന്ന വിവരം പുറത്തു വരുന്നത്. എന്നാല്‍ രജിസ്റ്റര്‍ ചെയ്തത് കള്ളക്കോസ് എന്ന് വെളിവായിട്ടും സംഭവത്തിന് കാരണക്കാരായ പോലീസ് ഉദ്യോഗസ്ഥര്‍ക്ക് എതിരെ യാതൊരു നടപടിയും സ്വീകരിച്ചിട്ടില്ലെന്നാണ് അഡ്വ. കുളത്തൂര്‍ ജയ്സിംഗിന്‍റെ പരാതിയില്‍ പറയുന്നു. നിരപരാധികളെ കള്ളക്കോസില്‍ കുടുക്കിയ സംഭവത്തില്‍ ഉത്തര മേഖല ഐജിയും സംസ്ഥാന പോലീസ് മേധാവി ഓഫീസിലെ ചില ഉന്നതരും മൗനം പാലിക്കുകയാണെന്നും പരാതിയില്‍ ആരോപിക്കുന്നു. പ്രതികള്‍ കുറ്റം സമ്മതിച്ചിരുന്നതായി പോലീസ് കോഴിക്കോട്: ഡാന്‍സാഫിന്‍റെ ഭാഗത്തുനിന്നോ പോലീസിന്‍റെ ഭാഗത്തുനിന്നോ വീഴ്ച സംഭവിച്ചിട്ടില്ലെന്നാണ് അധികൃതരുടെ വിശദീകരണം. ഡാന്‍സാഫ് സംഘം പിടികൂടിയ രണ്ടുപേരെയും 2024 നവംബര്‍ 26ന് പോലീസിന് കൈമാറുകയായിരുന്നു. മുന്‍പും ഇവര്‍ക്കെതിരേ പരാതിയുണ്ടായിരുന്നുവെന്നും പ്രതികള്‍ സ്‌റ്റേഷനില്‍ എത്തിയപ്പോള്‍ കുറ്റം സമ്മതിച്ചിരുന്നതായും നടക്കാവ് പോലീസ് പറയുന്നു.പരിശോധനാഫലം മാറിവരാന്‍ കാരണമെന്താണെന്ന് അറിയില്ല. ഇക്കാര്യത്തില്‍ സാധാരണ നടപടിക്രമങ്ങളാണ് പാലിച്ചതെന്നും പോലീസ് പറഞ്ഞു.

ദുരന്ത സാധ്യതാ മേഖലകളിൽ എൻഡിആർഎഫ് സംഘം പരിശോധനയ്ക്കെത്തി

ചെറുവത്തൂർ: മഴ കനത്തതോടെ അപകടസാധ്യതയുള്ള മേഖലകളിൽ എൻഡിആർഎഫ് സംഘം സന്ദർശനം നടത്തി. ദേശീയപാതയിലെ ചെറുവത്തൂർ വീരമലകുന്ന്, മട്ടലായി കുന്ന് എന്നിവയുടെ താഴ്‌വാരവും മയിച്ചയിലും എൻഡിആർഎഫ് സംഘം സന്ദർശനം നടത്തിയത്. ചെന്നൈ ആർക്കോണം നാലാം യൂണിറ്റിലെ ടീം കമാൻഡർ അർജുൻപാൽ രജപുത്, എസ്ഐ വികാസ് യാദവ് എന്നിവരുടെ നേതൃത്വത്തിലുള്ള 26 അംഗ സംഘമാണ് പരിശോധന നടത്തിയത്. കാസർഗോഡ് സോയൽ സർവേ അസിസ്റ്റന്‍റ് ഡയറക്ടർ പി.വി. പ്രമോദ്, ജിയോളജിസ്റ്റ് എസ്. സൂരജ്, ചന്തേര പോലീസ് ഇൻസ്പെക്ടർ കെ. പ്രശാന്ത്, ഹോസ്ദുർഗ് തഹസിൽദാർ ടി. ജയപ്രസാദ്, പി.വി. തുളസിരാജ് എന്നിവരും കൂടെയുണ്ടായിരുന്നു. ചെറുവത്തൂർ പഞ്ചായത്ത് പരിധിയിലെ സന്ദർശനത്തിൽ പ്രസിഡന്‍റ് സി.വി. പ്രമീള, സെക്രട്ടറി പി. വനജ എന്നിവരും സംഘത്തോടൊപ്പം രണ്ട് സ്ഥലങ്ങളിലുമെത്തിയിരുന്നു.നീലേശ്വരം നഗരസഭയിലെ ചാത്തമത്ത് പൊടോത്തുരുത്തി, പാലായി എന്നിവിടങ്ങളിലും എൻഡിആർഎഫ് സംഘം സന്ദർശനം നടത്തി.

കർഷക സത്യഗ്രഹത്തിന് പിന്തുണയുമായി വ്യാപാരി വ്യവസായി ഏകോപന സമിതി

വെള്ളരിക്കുണ്ട്: വെള്ളരിക്കുണ്ടിൽ തുടങ്ങുന്ന കർഷകസ്വരാജ് സത്യഗ്രഹത്തിന് വ്യാപാരി സമൂഹം പൂർണ പിന്തുണ നല്കുമെന്ന് വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റും സംസ്ഥാന വൈസ് പ്രസിഡന്‍റുമായ കെ. അഹമ്മദ് ഷെരീഫ് പ്രഖ്യാപിച്ചു. കർഷകസ്വരാജ് സത്യഗ്രഹത്തിന് മുന്നോടിയായി വെള്ളരിക്കുണ്ടിൽ നടന്നുവരുന്ന 48 മണിക്കൂർ ഉപവാസത്തിന്‍റെ രണ്ടാം ദിവസത്തെ പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വന്യമൃഗശല്യം മൂലം കർഷകർ പ്രതിസന്ധിയിലായതിന്‍റെ പ്രതിഫലനം ചെറുകിട വ്യാപാര മേഖലയിലുണ്ടെന്നും വന്യമൃഗശല്യത്തിന് ശാശ്വതപരിഹാരം കാണാനുള്ള സമരത്തിൽ കർഷകരും ആദിവാസികളും ചെറുകിട വ്യാപാരികളും തൊഴിലാളികളും ഒറ്റക്കെട്ടായി അണിചേരേണ്ടതുണ്ടെന്നും അദ്ദേഹം പറഞ്ഞു. 48 മണിക്കൂർ സത്യഗ്രഹം നടത്തുന്ന ജിമ്മി ഇടപ്പാടി, ബേബി ചെമ്പരത്തി, പി.സി. രഘുനാഥൻ എന്നിവരെ അഹമ്മദ് ഷെരീഫ് ഹാരമണിയിച്ചു. ബ്ലോക്ക് പഞ്ചായത്ത് അംഗം ഷോബി ജോസഫ് അധ്യക്ഷത വഹിച്ചു. രാഷ്ട്രീയ കിസാൻ മഹാസംഘ് നേതാവ് കെ.വി. ബിജു, എം.ജെ. ലോറൻസ്, ശ്രീരാമൻ കൊയ്യോൻ, അഡ്വ. ജോൺ ജോസഫ്, പി.ജി. ദേവ്, ജോമോൻ ജോസഫ്, കെ.വി. അബ്ദുൾ ഖാദർ, കൂക്കൾ ബാലകൃഷ്ണൻ, കെ.ആർ. വിനു, ജോസ് മണിയങ്ങാട് എന്നിവർ പ്രസംഗിച്ചു. സത്യഗ്രഹത്തിന് ഐക്യദാർഢ്യവുമായി 24 മണിക്കൂർ ഉപവാസമാരംഭിച്ച രാഷ്ട്രീയ കിസാൻ മഹാസംഘ് നേതാവ് കെ.വി. ബിജുവിനെ ടി.എം. ബഷീർ ഹാരമണിയിച്ചു.

മാലക്കല്ല് സബ് ട്രഷറി കെട്ടിടത്തിന് ശിലയിട്ടു

മാലക്കല്ല്: മാലക്കല്ല് സബ് ട്രഷറി ശിലാസ്ഥാപനം സെന്‍റ് മേരീസ് എയുപി സ്‌കൂള്‍ അങ്കണത്തില്‍ ധനകാര്യമന്ത്രി കെ.എന്‍. ബാലഗോപാല്‍ നിര്‍വഹിച്ചു. ഇ. ചന്ദ്രശേഖരന്‍ എംഎല്‍എ അധ്യക്ഷത വഹിച്ചു. ബ്ലോക്ക് പ്രസിഡന്‍റ് എം. ലക്ഷ്മി, പഞ്ചായത്ത് പ്രസിഡന്‍റുമാരായ ടി.കെ. നാരായണന്‍, പ്രസന്ന പ്രസാദ്, മുരളി പയ്യങ്ങാനം, പി. ശ്രീജ, ജില്ലാ പഞ്ചായത്തംഗം ഷിനോജ് ചാക്കോ, ബ്ലോക്ക് പഞ്ചായത്തംഗം ജോസ് മാവേലി, വാര്‍ഡ് മെംബര്‍ മിനി ഫിലിപ്പ്, സെന്‍റ് മേരീസ് സ്‌കൂള്‍ മാനേജര്‍ ഫാ. ഡിനോ കുമ്മാനിക്കാട്ട്, പൂക്കയം എസ്റ്റേറ്റ് മാനേജര്‍ ജോമോന്‍ പ്രതിനിധി, ട്രഷറി സ്ഥലം വാങ്ങല്‍ കമ്മിറ്റി കണ്‍വീനര്‍ പി.ജെ. ജോണ്‍, പ്രസ് ഫോറം പ്രസിഡന്‍റ് ഗണേശന്‍ എന്നിവര്‍ പങ്കെടുത്തു. ട്രഷറി വകുപ്പ് ഡയറക്ടര്‍ വി. സാജന്‍ സ്വാഗതവും ജില്ലാ ട്രഷറി ഓഫീസര്‍ കെ. റീജ നന്ദിയും പറഞ്ഞു. കള്ളാര്‍, പനത്തടി, കോടോം-ബേളൂര്‍ പഞ്ചായത്തുകളും 120 ഡിഡിഒമാരും 450 പെന്‍ഷന്‍കാരും പൊതുജനങ്ങളും ആശ്രയിച്ചു വരുന്ന മാലക്കല്ല് സബ് ട്രഷറി പത്തുവര്‍ഷത്തിലേറെയായി കള്ളാര്‍ പൂക്കയം എസ്റ്റേറ്റിന്‍റെ വാടക കെട്ടിടത്തിലാണ് പ്രവര്‍ത്തിച്ചു വരുന്നത്. വര്‍ഷങ്ങള്‍ നീണ്ട ജനകീയ കമ്മിറ്റിയുടെ പരിശ്രമത്തിനൊടുവിലാണ് സബ് ട്രഷറിക്ക് സ്വന്തമായൊരു കെട്ടിടം എന്ന സ്വപ്നങ്ങളുടെ ആദ്യ പടിയെന്ന നിലയില്‍ പൂക്കയം എസ്റ്റേറ്റ് മാനേജ്‌മെന്‍റില്‍നിന്നും 10 സെന്‍റ് സ്ഥലം വാങ്ങുന്നത്. കേരള സര്‍ക്കാരിന്‍റെ ട്രഷറി അടിസ്ഥാന സൗകര്യ വികസന പദ്ധതിയില്‍ ഉള്‍പ്പെടുത്തി 1.38 കോടി രൂപ ചെലവ് കണക്കാക്കി ഒമ്പത് മാസത്തിനുള്ളില്‍ പൂര്‍ത്തീകരിക്കാന്‍ വകുപ്പ് ലക്ഷ്യമിടുന്ന പുതിയ കെട്ടിടത്തിന്‍റെ നിര്‍മാണച്ചുമതല എച്ച്എല്‍എല്‍ കമ്പനിക്കാണ്.

മൊബൈൽ വെറ്ററിനറി യൂണിറ്റ് ആരംഭിച്ചു

പരപ്പ: കർഷകർക്ക് രാത്രികാലങ്ങളിൽ വീട്ടുപടിക്കൽ മൃഗചികിത്സ സേവനം ലഭ്യമാക്കുന്നതിനായി മൊബൈൽ വെറ്ററിനറി യൂണിറ്റ് ആരംഭിച്ചു. പരപ്പ ബ്ലോക്കിലെ ഏഴു പഞ്ചായത്തുകളിലും ഈ സേവനം ലഭ്യമാണ്. 1962 എന്ന ടോൾഫ്രീ നമ്പറിൽ കേന്ദ്രികൃത കോൾ സെന്‍റർ സംവിധാനത്തിലൂടെയാണ് ഇതിന്‍റെ പ്രവർത്തനം. ടോൾഫ്രീ നമ്പറായ 1962 ൽ കർഷകൻ വിളിക്കുമ്പോൾ ഡോക്ടറുമായി കർഷകന്‍റെ കോൾ കണക്ട് ചെയ്യും. വിവരങ്ങൾ ചോദിച്ചറിഞ്ഞ് കർഷകന്‍റെ വീട്ടുപടിക്കൽ മൊബൈൽ വെറ്ററിനറി യൂണിറ്റ് എത്തി സേവനങ്ങൾ നൽകുന്നു. വൈകുന്നേരം ആറു മുതൽ പുലർച്ചെ അഞ്ചു വരെയാണ് പ്രവർത്തന സമയം. മൃഗാശുപത്രി പ്രവർത്തന സമയത്തിന് ശേഷവും അടിയന്തര ചികിത്സ സേവനം കർഷകരുടെ വീട്ടുപടിക്കൽ മിതമായ നിരക്കിൽ ലഭ്യമാക്കുക എന്നതാണ് ഈ പദ്ധതിയുടെ ലക്ഷ്യം. പ്രത്യേക പരിശീലനം ലഭിച്ച വെറ്ററിനറി ഡോക്ടർ, ഡ്രൈവർ കം അറ്റെൻഡർ എന്നിവർ അടങ്ങുന്നതാണ് ഈ യൂണിറ്റ്. കന്നുകാലികൾ, കോഴികൾ മുതലായവയെ കർഷകരുടെ വീട്ടുപടിക്കൽ എത്തി ചികിത്സ നൽകുന്നതിന് 450 രൂപയാണ് നിരക്ക്. കന്നുകാലികളിൽ കൃത്രിമ ബീജദാനവും ചെയ്യുന്നതാണ്. അതാത് രോഗങ്ങൾക് ഗവൺമെന്‍റ് നിർദേശിച്ച പ്രകാരമുള്ള ഫീസ് ഈടാക്കുന്നതാണ്. ബ്ലോക്ക്‌ പഞ്ചായത്തിന്‍റെ വാർഷിക പദ്ധതിയുടെ ഭാഗമായി പകൽ സമയങ്ങളിൽ മൊബൈൽ വെറ്ററിനറി യൂണിറ്റ് പ്രവർത്തിക്കുന്നുണ്ട്. ഇതിനു പുറമേ ആണ് രാത്രി കാലങ്ങളിൽ കൂടി മൃഗ സംരക്ഷണമേഖലയിൽ ഈ സേവനവും കൂടി ലഭ്യമായത്. ബ്ലോക്ക്‌ പഞ്ചായത്ത്‌ പ്രസിഡന്‍റ് എം. ലക്ഷ്മി യൂണിറ്റിന്‍റെ ഫ്ലാഗ് ഓഫ് കർമ്മം നിർവഹിച്ചു. വൈസ്പ്രസിഡന്‍റ് കെ. ഭൂപേഷ്, സ്ഥിരം സമിതി അധ്യക്ഷ രജനി കൃഷ്ണൻ എന്നിവർ പങ്കെടുത്തു. സീനിയർ വെറ്റനറി സർജൻ ഡോ. കാർത്തികേയൻ സ്വാഗതവും ജോയിന്‍റ് ബിഡിഒ ബിജുകുമാർ നന്ദിയും പറഞ്ഞു.

മടിക്കൈയിലെ വാഴക്കർഷകർക്ക് ഇത്തവണയും നിരാശ

നീലേശ്വരം: ജില്ലയുടെ വാഴത്തോട്ടമായ മടിക്കൈയിലെയും സമീപപ്രദേശമായ അരയിയിലെയും വാഴക്കർഷകരെ കാലാവസ്ഥാമാറ്റം ഇത്തവണയും ചതിച്ചു. കാലവർഷം ശക്തിപ്രാപിക്കുന്നതിനു മുമ്പേ വിളവെടുക്കാമെന്ന് കണക്കുകൂട്ടി വാഴകൾ നേരത്തേ നട്ടുവളർത്തിയിട്ടും കുല വരുന്ന സമയമായപ്പോഴേക്ക് വാഴത്തോട്ടങ്ങൾ വെള്ളത്തിലായി. കാലവർഷം പതിവിലും നേരത്തേ എത്തിയതും തുടക്കത്തിൽ തന്നെ മഴ കനത്തതുമാണ് ഇത്തവണ തിരിച്ചടിയായത്. മടിക്കൈയിലും അരയി മേഖലയിലും കുല വന്നുതുടങ്ങിയ വാഴത്തോട്ടങ്ങളിലെല്ലാം ഇപ്പോൾ വെള്ളം കയറിയ നിലയിലാണ്. പല ഭാഗങ്ങളിലും കാറ്റിൽ വാഴകൾ ഒടിഞ്ഞുവീണു. ആയിരത്തോളം വാഴകൾ നിലംപൊത്തിയതായാണ് കൃഷിവകുപ്പിന്‍റെ കണക്ക്. കാലാവസ്ഥാ മുന്നറിയിപ്പ് പോലെ വരുംദിവസങ്ങളിലും ശക്തമായ മഴ പെയ്താൽ തോട്ടങ്ങളിൽ വെള്ളം കെട്ടിക്കിടന്ന് ബാക്കിയുള്ളവയും ചീഞ്ഞു നശിക്കുന്ന സ്ഥിതിയാകും. പി.കെ.മധു, നാസർ, പി.ഇബ്രാഹിം, മൊയ്തു തോയമ്മൽ, ഇക്ബാൽ എന്നിവരുടെ തോട്ടങ്ങളിലെ വാഴകളാണ് കഴിഞ്ഞ ദിവസങ്ങളിൽ നശിച്ചത്. കാലവർഷം ശക്തമാകുമ്പോൾ വാഴത്തോട്ടങ്ങളിൽ വെള്ളംകയറി കൃഷിനാശമുണ്ടാകുന്നത് പതിവായതോടെയാണ് കർഷകർ നേരത്തേ വാഴവിത്തുകൾ നടാൻ തുടങ്ങിയത്. എന്നാൽ മുൻവർഷം തമിഴ്നാട്ടിൽ നിന്നുള്ള ഏജന്‍റുമാർ സാധാരണ നേന്ത്രവാഴയ്ക്കു പകരം വിളഞ്ഞു പാകമാകാൻ പത്തുമാസത്തിലേറെയെടുക്കുന്ന ക്വിന്‍റൽ വാഴയുടെ വിത്തുകൾ എത്തിച്ചുനല്കിയത് ഇവർക്ക് വലിയ നഷ്ടമുണ്ടാക്കിയിരുന്നു. ഇത്തവണ വീണ്ടും സാധാരണ വാഴവിത്തുകൾ തന്നെ നട്ടെങ്കിലും അവ മുളച്ചുതുടങ്ങിയതിന് തൊട്ടുപിന്നാലെ നീലേശ്വരം പുഴയിൽ രണ്ടു പാലങ്ങളുടെ നിർമാണത്തിനായി മണ്ണിട്ടതോടെ പുഴവെള്ളം കയറി വലിയൊരു ശതമാനം വാഴക്കന്നുകൾ നശിച്ചിരുന്നു. വെള്ളമിറങ്ങിക്കഴിഞ്ഞ് വീണ്ടും നട്ടുവളർത്തിയ വാഴകളാണ് ഇപ്പോൾ കാലംതെറ്റിയെത്തിയ മഴ മൂലം വെള്ളത്തിലായത്.

ബഡ്സ് സ്‌കൂള്‍ കെട്ടിടം ഉദ്ഘാടനം ചെയ്തു

നീലേശ്വരം: കാസര്‍ഗോഡ് വികസന പാക്കേജില്‍ ഉള്‍പ്പെടുത്തി നീലേശ്വരം ചിറപ്പുറത്ത് നിര്‍മിച്ച പ്രത്യാശ ബഡ്സ് സ്‌കൂളിനുള്ള പുതിയ കെട്ടിടം പിന്നോക്ക ക്ഷേമ മന്ത്രി ഒ.ആര്‍. കേളു ഉദ്ഘാടനം ചെയ്തു. എം. രാജഗോപാലന്‍ എംഎല്‍എ അധ്യക്ഷത വഹിച്ചു. നഗരസഭ എന്‍ജിനിയര്‍ പി. സാജു റിപ്പോര്‍ട്ട് അവതരിപ്പിച്ചു. നഗരസഭ വൈസ് ചെയര്‍മാന്‍ പി.പി. മുഹമ്മദ് റാഫി, സ്ഥിരംസമതി അധ്യക്ഷരായ കെ.പി. രവീന്ദ്രന്‍, ഷംസുദ്ദീന്‍ അരിഞ്ചിറ, വി. ഗൗരി, ടി.പി. ലത, പി. ഭാര്‍ഗവി, കാസര്‍ഗോഡ് വികസന പാക്കേജ് സ്പെഷല്‍ ഓഫീസര്‍ വി. ചന്ദ്രന്‍, കൗണ്‍സിലര്‍മാരായ ഇ. അശ്വതി, കെ. ജയശ്രീ, ദാക്ഷായണി കുഞ്ഞിക്കണ്ണന്‍, വി.വി. ശ്രീജ, രാഷ്‌ട്രീയപാര്‍ട്ടി പ്രതിനിധികളായ എം. രാജന്‍, എറുവാട്ട് മോഹനന്‍, എം. അസിനാര്‍, ഇ.എം. കുട്ടിഹാജി, റസാഖ് പുഴക്കര, പി.യു. വിജയകുമാര്‍, കൈപ്രത്ത് കൃഷ്ണന്‍ നമ്പ്യാര്‍, സുരേഷ് പുതിയേടത്ത്, കെ.വി. ചന്ദ്രന്‍, എം.ജെ. ജോയി, സിഡിഎസ് ചെയര്‍പേഴ്സണ്‍ പി.എം. സന്ധ്യ, കെ.വി. ദാമോദരന്‍, എ.വി. സുരേന്ദ്രന്‍, പ്രിന്‍സിപ്പല്‍ കെ.വി. ജലജ, പിടിഎ പ്രസിഡന്‍റ് എ.ടി. കുമാരന്‍, സേതു ബങ്കളം, നഗരസഭ ചെയര്‍പേഴ്‌സണ്‍ ടി.വി. ശാന്ത, സെക്രട്ടറി കെ. മനോജ്കുമാര്‍ എന്നിവര്‍ പ്രസംഗിച്ചു.

കയ്റോസ് ലഹരിവിരുദ്ധ കാമ്പയിന് തുടക്കമായി

തൃക്കരിപ്പൂർ: ലഹരിക്കെതിരെ അവബോധ കാമ്പയിന് കണ്ണൂർ രൂപത സാമൂഹ്യ സേവന ഗവേഷണ വിഭാഗമായ കയ്റോസ് നേതൃത്വത്തിൽ നടക്കാവിൽ തുടക്കമിട്ടു. എക്സൈസ് നീലേശ്വരം റേയ്ഞ്ചും കയ്റോസ് കാഞ്ഞങ്ങാട് ഫെഡറേഷനും ചേർന്ന് നടക്കാവ് വികസന സമിതിയുടെ സഹകരണത്തോടെ നടത്തിയ ലഹരി വിരുദ്ധ ബോധവത്കരണ കാമ്പയിൻ കമ്യൂണിറ്റി ഓർഗനൈസർ ഫാ. ഷിജു ജോസഫ് മുകളേൽ ഉദ്ഘാടനം ചെയ്തു. ടി. റീജ അധ്യക്ഷതവഹിച്ചു. ബിൻസി ഷാജു, പീറ്റർ കോളക്കാട്, ഷൈമ വിശ്വനാഥൻ, ജോളി മൈക്കിൾ എന്നിവർ സംസാരിച്ചു. എക്സൈസ് ഹൊസ്ദുർഗ് പ്രിവന്‍റീവ് ഓഫീസർ കെ. അബ്‌ദുൾ സലാം ബോധവത്കരണ ക്ലാസ് നയിച്ചു.

നെഹ്റു അനുസ്മരണം നടത്തി

കാഞ്ഞങ്ങാട്: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ കാഞ്ഞങ്ങാട് നെഹ്റു സ്മൃതി മണ്ഡപത്തിൽ നടത്തിയ നെഹ്റു അനുസ്മരണവും പുഷ്പാർച്ചനയും ബ്ലോക്ക് കോൺഗ്രസ് പ്രസിഡന്‍റ് ഉമേശൻ വേളൂർ ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് കെ.പി. ബാലകൃഷ്ണൻ അധ്യക്ഷത വഹിച്ചു. എം. കുഞ്ഞികൃഷ്ണൻ, കെ.കെ. ബാബു, എ. പുരുഷോത്തമൻ, ഭാസ്കരൻ സൗത്ത്, എം.എം. നാരായണൻ, പി.വി. ചന്ദ്രശേഖരൻ, സുജിത് പുതുക്കൈ, ഭാസ്കരൻ കല്ലഞ്ചിറ, ലക്ഷ്മണൻ കല്ലഞ്ചിറ, ചന്ദ്രൻ, നിയാസ് ഹോസ്ദുർഗ്, രാജൻ ഐങ്ങോത്ത്, എം.കെ. മണിയൻ എന്നിവർ പ്രസംഗിച്ചു.

കാറ്റിലും മഴയിലും കൃഷിനാശം

ചീമേനി: ശക്തമായ കാറ്റിലും മഴയിലും പെരിങ്ങാരപൊയിലിൽ കാർഷിക വിളകൾ പൊട്ടിവീണ് നശിച്ചു. ദിവസങ്ങളായി തിമിർത്ത് പെയ്യുന്ന മഴയിലും കാറ്റിലും ചീമേനി പെരിങ്ങാരപൊയിലിലെ കെ.കെ. സുമതിയുടെ വീട്ടുവളപ്പിലെ തെങ്ങുകളും കവുങ്ങുകളും ഒടിഞ്ഞു വീണ് നശിച്ചു. കാറ്റിൽ ഇവരുടെ വിറക്പുരയും തകർന്നു വീണു. പഞ്ചായത്ത് അധികൃതരും റവന്യു വകുപ്പ് അധികൃതരും സ്ഥലത്തെത്തി.

മംഗലംകളി സംഗമം നടത്തി

അമ്പലത്തറ: മംഗലംകളി അക്കാദമി ഫോര്‍ ട്രൈബ്‌സിന്‍റെ നേതൃത്വത്തില്‍ അമ്പലത്തറ ജിവിഎച്ച്എസ്എസില്‍ നടന്ന ജോമോ ജോവ്വ് മംഗലംകളി സംഗമം കിര്‍ത്താഡ്‌സ് ഡയറക്ടര്‍ ഡോ.എസ്. ബിന്ദു ഉദ്ഘാടനം ചെയ്തു. അക്കാദമി ചെയര്‍മാന്‍ ഒ.കെ. പ്രഭാകരന്‍ അധ്യക്ഷതവഹിച്ചു. രതീഷ് കാട്ടുമാടം, രജനി നാരായണന്‍, ഉമേശന്‍ മുടന്തേന്‍പ്പാറ, ഗംഗാധരന്‍ ബിദിയാല്‍, ഷിബു പാണത്തൂര്‍, മുഖ്യാധ്യാപകന്‍ പി.വി. രാജേഷ് എന്നിവര്‍ പ്രസംഗിച്ചു. രതീഷ് വെള്ളംതട്ട സ്വാഗതവും ചിഞ്ചു മാരിക്കളം നന്ദിയും പറഞ്ഞു.

ശ്രേയസ് ഏരിയ സംഗമം

കമ്പല്ലൂര്‍: ബത്തേരി രൂപതയുടെ സാമൂഹ്യ സേവന വിഭാഗമായ ശ്രേയസിന്‍റെ കമ്പല്ലൂര്‍ ഏരിയ സംഗമം കമ്പല്ലൂര്‍ ജിഎച്ച്എസ്എസ് ഓഡിറ്റോറിയത്തില്‍ നടന്നു. പഞ്ചായത്ത് വൈസ് പ്രസിഡന്‍റ് ഫിലോമിന ജോണി ആക്കാട്ട് ഉദ്ഘാടനം ചെയ്തു. യൂണിറ്റ് പ്രസിഡന്‍റ് ഷാജി തച്ചനംകോട്ട് അധ്യക്ഷതവഹിച്ചു. സിവില്‍ പോലീസ് ഓഫീസര്‍ രഞ്ജിത് കുമാര്‍ ലഹരി വിരുദ്ധ പ്രതിഞ്ജ ചൊല്ലി കൊടുത്തു. പഞ്ചായത്തംഗങ്ങളായ സതിദേവി, സോണിയ, ശ്രേയസ് കോഓർ ഡിനേറ്റര്‍മാരായ ഷാജി മാത്യു, വി.വി. നളിനാക്ഷന്‍, സിഡിഒ വിലാസിനി ചന്ദ്രന്‍, ബൈജു, ജോണ്‍ ബ്രിട്ടോ എന്നിവര്‍ പ്രസംഗിച്ചു.

ചിറ്റാരിക്കാൽ വൈസ് നിവാസിൽ ഗ്രന്ഥാലയം തുറന്നു

ചിറ്റാരിക്കാൽ: വൈസ് നിവാസ് ഓൾഡ് ഏജ് ഹോമിനോടുചേർന്ന് ഗ്രന്ഥാലയം തുറന്ന് പ്രവർത്തനമാരംഭിച്ചു. വൈസ് മെൻ ഡിസ്ട്രിക്ട് ഗവർണർ ഷീന ജോണി ഉദ്ഘാടനം നിർവഹിച്ചു. ചിറ്റാരിക്കാൽ വൈസ്മെൻ പ്രസിഡന്‍റ് എൻ.ടി. സെബാസ്റ്റ്യൻ, സെക്രട്ടറി ഷാജു ജോർജ്, വൈസ് നിവാസ് പ്രസിഡന്‍റ് എം.എ. അഗസ്റ്റിൻ, ജിയോ തോമസ്, ബിജോയ് തോമസ്, ജോണി ഇടക്കര എന്നിവർ പ്രസംഗിച്ചു. വൈസ് നിവാസിൽ താമസിക്കുന്നവർക്കും പൊതുജനങ്ങൾക്കും ഉപയോഗിക്കാവുന്ന രീതിയിലാണ് ഗ്രന്ഥാലയം പ്രവർത്തിക്കുക.

കെസിഎസ്പിഎ ജില്ലാസമ്മേളനം

കാഞ്ഞങ്ങാട്: കേരള കോഓപ്പറേറ്റീവ് സര്‍വീസ് പെന്‍ഷനേഴ്‌സ് അസോസിയേഷന്‍ ജില്ലാസമ്മേളനം നാളെ രാവിലെ 10.30നു ഹൊസ്ദുര്‍ഗ് സര്‍വീസ് സഹകരണ ബാങ്ക് ഹാളില്‍ രാജ്‌മോഹന്‍ ഉണ്ണിത്താന്‍ എംപി ഉദ്ഘാടനം ചെയ്യും. പത്രസമ്മേളനത്തില്‍ ഭാരവാഹികളായ പി.വി. ഭാസ്‌കരന്‍, വി. മുകുന്ദന്‍, എം. വിജയന്‍, എം. കുഞ്ഞിരാമന്‍ നായര്‍, കെ.വി. മോഹന്‍കുമാര്‍, പി.വി. കുഞ്ഞിരാമന്‍, കെ.വി. കുഞ്ഞിക്കണ്ണന്‍ എന്നിവര്‍ സംബന്ധിച്ചു.

കെഎസ്എസ്പിഎ കുടുംബസംഗമം

റാണിപുരം: കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ കളളാർ-പനത്തടി മണ്ഡലം കമ്മറ്റി കുടുംബസംഗമം റാണിപുരം ഒലിവ് റിസോർട്ടിൽ ജില്ലാ വൈസ് പ്രസിഡന്‍റ് എം.യു. തോമസ് ഉദ്ഘാടനം ചെയ്തു. മണ്ഡലം പ്രസിഡന്‍റ് വി.കെ. ബാലകൃഷ്ണൻ അധ്യക്ഷതവഹിച്ചു. ജില്ലാ കമ്മിറ്റി അംഗം പി.ജെ. മാത്യു മുഖ്യപ്രഭാഷണം നടത്തി. ടി.പി. പ്രസന്നൻ, പി.റ്റി. മേരി, ഒ.സി. ജയിംസ്, ഇ. രാമചന്ദ്രൻ, മോളി ഫിലിപ്പ് എന്നിവർ പ്രസംഗിച്ചു. എം.എ. ജോസ് സ്വാഗതവും കെ. ബാലകൃഷ്ണൻ നന്ദിയും പറഞ്ഞു.

നെഹ്റു അനുസ്മരണം നടത്തി

ചിറ്റാരിക്കാൽ: നവഭാരത ശില്പി പണ്ഡിറ്റ് ജവഹർലാൽ നെഹ്‌റുവിന്‍റെ 61-ാം ചരമവാർഷിക ദിനത്തിൽ ഈസ്റ്റ് എളേരി മണ്ഡലം കോൺഗ്രസ്‌ കമ്മിറ്റിയുടെ നേതൃത്വത്തിൽ പുഷ്പാർച്ചനയും അനുസ്മരണവും നടത്തി. ബ്ലോക്ക് കോൺഗ്രസ്‌ പ്രസിഡന്‍റ് ജോയി ജോസഫ് കിഴക്കരക്കാട്ട് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോർജ് കരിമഠം അധ്യക്ഷത വഹിച്ചു. തോമസ് മാത്യു, ജോയ് മാരൂർ, മാത്യു പടിഞ്ഞാറയിൽ, സെബാസ്റ്റ്യൻ പൂവത്താണി, ബെന്നി കമ്പല്ലൂർ, ജോണി പള്ളത്തുകുഴി, അഗസ്റ്റിൻ ജോസഫ്, സോണി പൊടിമറ്റം, ജോഷി തെങ്ങുംപള്ളി, പ്രശാന്ത് പാറേക്കുടി, ജോൺസൺ മുണ്ടമറ്റം എന്നിവർ പ്രസംഗിച്ചു.

വ്യാപാരി വ്യവസായി ഏകോപന സമിതി യോഗം

ചിറ്റാരിക്കാൽ: കേരള വ്യാപാരി വ്യവസായി ഏകോപന സമിതി ചിറ്റാരിക്കാൽ യൂണിറ്റ് വാർഷിക പൊതുയോഗം ജില്ലാ പ്രസിഡന്‍റ് കെ. അഹമ്മദ് ഷെരീഫ് ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോയിച്ചൻ ജോസഫ് അധ്യക്ഷത വഹിച്ചു. ജില്ലാ ജനറൽ സെക്രട്ടറി കെ.ജെ. സജി മുഖ്യപ്രഭാഷണം നടത്തി. ജില്ലാ വൈസ് പ്രസിഡന്‍റ് തോമസ് കാനാട്ട് റിപ്പോർട്ട്‌ അവതരിപ്പിച്ചു. യൂണിറ്റ് സെക്രട്ടറി ഷിജോ മാത്യു, വനിത വിംഗ് പ്രസിഡന്‍റ് രമ വത്സലൻ, യൂത്ത് വിംഗ് പ്രസിഡന്‍റ് ജിബിൻ തോമസ്, ടി.എം. ജോസ് തയ്യിൽ, പി. മുരളീധരൻ എന്നിവർ പ്രസംഗിച്ചു.

കോൺക്രീറ്റ് മാലിന്യപ്രശ്നം പരിഹരിക്കാൻ സംസ്കരണ പ്ലാന്‍റ് നിർമിക്കാമെന്ന് കരാർ കമ്പനി

അമ്പലത്തറ: ദേശീയപാത നിർമാണ കരാറുകാരായ മേഘ എൻജിനിയറിംഗിന്‍റെ കോൺക്രീറ്റ് മിക്സിംഗ് പ്ലാന്‍റിൽ നിന്നുള്ള മലിനജലം സമീപപ്രദേശങ്ങളിൽ ഒഴുകിപ്പരക്കുന്നത് തടയാൻ സംസ്കരണ പ്ലാന്‍റ് നിർമിക്കാമെന്ന് കമ്പനി അധികൃതരുടെ ഉറപ്പ്. പുല്ലൂർ-പെരിയ പഞ്ചായത്ത് ഓഫീസിൽ പ്രസിഡന്‍റ് സി.കെ. അരവിന്ദനുമായി നടത്തിയ ചർച്ചയിലാണ് കമ്പനി പ്രതിനിധികൾ ഈ ഉറപ്പ് നല്കിയത്. ജൂൺ 15നകം സംസ്കരണ പ്ലാന്‍റിന്‍റെ നിർമാണം പൂർത്തീകരിക്കണമെന്ന് പഞ്ചായത്ത് പ്രസിഡന്‍റ് ആവശ്യപ്പെട്ടു. എന്നാൽ, കനത്ത മഴ നിർമാണത്തിന് തടസമാകുമെന്നും അല്പദിവസംകൂടി നീട്ടിക്കിട്ടണമെന്നും കമ്പനി പ്രതിനിധികൾ ആവശ്യപ്പെട്ടു. സിമന്‍റ് ലായനി പുറത്തേക്ക് ഒഴുകുന്നത് തടയാൻ പ്ലാന്‍റിനകത്ത് വലിയ കുഴി നിർമിക്കുമെന്നും മേഘ കമ്പനി പ്രതിനിധികൾ ഉറപ്പുനല്കി. മിക്സിംഗ് പ്ലാന്‍റ് പ്രദേശത്തെ മഴവെള്ളം മലിനജലം കലരാത്തവിധത്തിൽ ഒഴുക്കിവിടാൻ പ്രത്യേക ഓവുചാൽ നിർമിക്കാനും തീരുമാനമായി. നിശ്ചിത തീയതിക്കകം ഉറപ്പുകൾ പാലിച്ചില്ലെങ്കിൽ കോൺക്രീറ്റ് മിക്സിംഗ് പ്ലാന്‍റിന് പഞ്ചായത്ത് സ്റ്റോപ്പ് മെമ്മോ നല്കുമെന്ന് പഞ്ചായത്ത് പ്രസിഡന്‍റ് വ്യക്തമാക്കി. മീങ്ങോത്ത് പന്നിക്കുന്നിലുള്ള മേഘ കമ്പനിയുടെ കോൺക്രീറ്റ് മിക്സിംഗ് പ്ലാന്‍റിൽ നിന്നും കോൺക്രീറ്റ് കലർന്ന വെള്ളം സമീപപ്രദേശങ്ങളിലെ കൃഷിയിടങ്ങളിലേക്കും ജലസ്രോതസുകളിലേക്കും ഒഴുകിപ്പരന്ന് ഗുരുതരമായ മാലിന്യപ്രശ്നം സൃഷ്ടിക്കുന്നതായി കഴിഞ്ഞ ദിവസം ദീപിക അടക്കമുള്ള മാധ്യമങ്ങൾ റിപ്പോർട്ട് ചെയ്തിരുന്നു. തുടർന്ന് ജില്ലാ കളക്ടർ കമ്പനി അധികൃതരുമായി ബന്ധപ്പെട്ട് വിശദീകരണം തേടിയിരുന്നു. പഞ്ചായത്ത് പ്രസിഡന്‍റിന്‍റെ നേതൃത്വത്തിലുള്ള സംഘം സ്ഥലം സന്ദർശിച്ച് പ്രശ്നത്തിന്‍റെ ഗൗരവം വിലയിരുത്തുകയും ചെയ്തു. ഇതിനു പിന്നാലെയാണ് കമ്പനി പ്രതിനിധികൾ ചർച്ചയ്ക്കായി പഞ്ചായത്ത് ഓഫീസിലെത്തിയത്. മേഘ എൻജിനിയറിംഗ് ലെയ്സൺ ഓഫീസർ വി.എസ്. വിജിൻ, ഡപ്യൂട്ടി മാനേജർ എസ്.പി. അർജുനൻ, പഞ്ചായത്ത്‌ ആരോഗ്യ സ്ഥിരം സമിതി അധ്യക്ഷ വി.വി. സുമ, അസി. സെക്രട്ടറി കെ. സുദേവൻ, ഹെൽത്ത് ഇൻസ്പെക്ടർ വി.കെ. ദീപ എന്നിവർ ചർച്ചയിൽ പങ്കെടുത്തു.

നീലേശ്വരത്ത് റിംഗ് റോഡും ചെളിക്കുളമായി

നീലേശ്വരം: ദേശീയപാത നവീകരണവും ബസ് സ്റ്റാൻഡ് നിർമാണവും മൂലം ഗതാഗതക്കുരുക്കിലായ നീലേശ്വരം നഗരത്തെ കൂടുതൽ വലച്ച് നഗരമധ്യത്തിലെ റിംഗ് റോഡ് നിർമാണം. ദേശീയപാതയിൽ നിന്ന് അഞ്ഞൂറ്റമ്പലം-തെരു റോഡ് വഴി നഗരമധ്യത്തിൽ പഴയ നഗരസഭാ ഓഫീസിന് സമീപത്തേക്കും അവിടെനിന്ന് തളിയിലമ്പലം റോഡ് വഴി ബസ് സ്റ്റാൻഡിലേക്കും എത്തുന്ന ദൂരം കുറഞ്ഞ റോഡുകളെ വികസിപ്പിച്ച് നഗരത്തിലെ ഗതാഗതക്കുരുക്കിന് ശാശ്വത പരിഹാരം കാണാനായിരുന്നു പദ്ധതിയിലൂടെ ലക്ഷ്യമിട്ടത്. എന്നാൽ, മഴയ്ക്കു മുമ്പ് പൂർത്തിയാക്കാനിരുന്ന പദ്ധതി പണി തുടങ്ങിക്കഴിഞ്ഞപ്പോൾ മെല്ലെപ്പോക്കിലായി. പഴയ റോഡുകൾ ഇടിച്ചുനിരത്തി മെറ്റൽ പാകിയതല്ലാതെ നിർമാണം ഇനിയും പൂർത്തിയായില്ല. അതിനിടയിൽ മാർക്കറ്റ് ജംഗ്ഷനിൽ ദേശീയപാതയുടെ പ്രവൃത്തികൾ തുടങ്ങിയതോടെ അവിടെ ഗതാഗതക്കുരുക്ക് ഒഴിയാതായി. റിംഗ് റോഡ് ഇതിനകം പൂർത്തിയായിരുന്നെങ്കിൽ ഒരു വശത്തേക്കുള്ള വാഹനങ്ങളെയെങ്കിലും ഇതുവഴി തിരിച്ചുവിടാമായിരുന്നു. മഴ തുടങ്ങിയതോടെ റിംഗ് റോഡും അവിടവിടെ ചെളിക്കുളമായിരിക്കുകയാണ്. ഓവുചാലുകളുടെ നിർമാണം പൂർത്തിയാകാത്തതാണ് കാരണം. പ്രധാന റോഡിലെ കുരുക്കിൽനിന്ന് രക്ഷപ്പെടാൻ നാട്ടുകാർ പതിവായി ആശ്രയിച്ചിരുന്നത് ഈ റോഡുകളെയായിരുന്നു. ഇപ്പോൾ അതും വഴിമുട്ടിയ നിലയിലായി. ഇനി മഴയുടെ പേരുപറഞ്ഞ് പ്രവൃത്തികൾ കൂടുതൽ നീണ്ടുപോകുമോ എന്നാണ് നാട്ടുകാരുടെ ആശങ്ക.

ദേശീയപാതയില്‍ അപകടഭീഷണി നിലനില്‍ക്കുന്ന മേഖലകളില്‍ ഡ്രോണ്‍ പരിശോധന നടത്തും

കാസര്‍ഗോഡ്: ദേശീയപാത 66 നിര്‍മാണത്തിന്‍റെ ഭാഗമായി കുന്നിടിച്ചതിനെ തുടര്‍ന്ന് അപകട ഭീഷണി നിലനില്‍ക്കുന്ന മേഖലകളില്‍ ഡ്രോണ്‍ പരിശോധന നടത്താന്‍ ജില്ലാ ദുരന്തനിവാരണ അതോറിറ്റി യോഗം തീരുമാനിച്ചു. വീരമലകുന്ന്, മട്ടലായികുന്ന്, ബേവിഞ്ച എന്നിവിടങ്ങളിലാണ് പരിശോധന നടത്തുക. ജിയോളജി മണ്ണ് പര്യവേഷണ വകുപ്പുകളുടെ നേതൃത്വത്തില്‍ സംയുക്ത സര്‍വേ നടത്താനും തീരുമാനിച്ചു. ഡ്രോണ്‍ പരിശോധനയിലൂടെ മലമുകളില്‍ വിള്ളലുകള്‍ വീണിട്ടുണ്ടോ എന്ന് പരിശോധിക്കുകയും അപകടം തടയാനുള്ള മുന്‍കരുതല്‍ സ്വീകരിക്കുകയും ആണ് ലക്ഷ്യം. ദേശീയപാതയില്‍ അപകടസധ്യത മേഖലകളില്‍ ഡ്രോണ്‍ പരിശോധന നടത്തും. അഡീഷണല്‍ റെയിന്‍ ഗേജ് വാങ്ങുന്നതിനുള്ള അനുമതി നല്‍കി റെയിന്‍ ഗേജ് സ്ഥാപിക്കുന്നതിനുള്ള പ്ലാറ്റ്ഫോം ഉള്‍പ്പെടെ നിര്‍മാണം ആവശ്യമാണെങ്കില്‍ ജില്ലാ നിര്‍മിതി കേന്ദ്രത്തെ ചുമതലപ്പെടുത്തുന്നതിനും തീരുമാനിച്ചു. ഉപകരണങ്ങള്‍ ഉപയോഗിച്ച് സ്വകാര്യസ്ഥാപനങ്ങളോ വ്യക്തികളോ മഴ അളവ് വിവരശേഖരണം നടത്തുന്നുണ്ടെങ്കില്‍ വിവരം ജില്ലാ ദുരന്തനിവാരണ അതോറിറ്റിക്ക് കൈമാറണമെന്ന് ജില്ലാ കളക്ടര്‍ അറിയിച്ചു. ജില്ലാ എമര്‍ജന്‍സി ഓപ്പറേഷന്‍ സെന്‍ററില്‍ ആണ് വിവരങ്ങള്‍ നല്‍കേണ്ടത്. ഫോണ്‍: 919446601700. ദേശീയപാത നിര്‍മാണമേഖലയില്‍ ജിഐഎസ് സ്റ്റഡി നടത്തുന്നതിന് ജിയോളജി ബിരുദാനന്തര ബിരുദമുള്ള വിദ്യാര്‍ഥികളില്‍ നിന്നും അപേക്ഷ ക്ഷണിച്ചു. ജിയോളജി വിദ്യാര്‍ഥകള്‍ക്ക് ജില്ലാ കളക്ടറുടെ ഇന്‍റേണ്‍ ആയി പ്രവര്‍ത്തിക്കാം. പ്രതിഫലം നല്‍കുന്നതല്ല. ജില്ലാ കളക്ടര്‍ കെ ഇമ്പശേഖറിന്‍റെ അധ്യക്ഷതയില്‍ ചേമ്പറില്‍ ചേര്‍ന്ന യോഗത്തില്‍ എഡിഎം പി. അഖില്‍, ഡപ്യൂട്ടി കളക്ടര്‍ എന്‍ഡോസള്‍ഫാന്‍ സെല്‍ ലിപു എസ്. ലോറന്‍സ്, ജില്ലാ മെഡിക്കല്‍ ഓഫീസര്‍ ഡോ. ബി. സന്തോഷ്, ജില്ലാ ഫയര്‍ ആന്‍ഡ് റെസ്‌ക്യു ഓഫീസര്‍ ബി. രാജ്, ഫിഷീസ ഡപ്യൂട്ടി ഡയറക്ടര്‍ ലബീബ് എന്നിവര്‍ സംസാരിച്ചു.

റാണിപുരം റോഡിൽ മരം വീണ് ഗതാഗതം തടസപ്പെട്ടു

പനത്തടി: റാണിപുരം വിനോദസഞ്ചാര കേന്ദ്രത്തിലേക്കുള്ള റോഡിൽ പെരുതടി എസ്റ്റേറ്റിനു സമീപം മരം വീണ് ഗതാഗതം തടസപ്പെട്ടു. ഇന്നലെ ഉച്ചയോടെയാണ് റോഡിനു കുറുകേ മരം വീണത്. റാണിപുരം വനസംരക്ഷണ സമിതി പ്രസിഡന്‍റ് എസ്. മധുസൂദനൻ, റാണിപുരം ഇക്കോ ടൂറിസം അസോസിയേഷൻ പ്രസിഡന്‍റ് സജി മുളവനാൽ എന്നിവരുടെ നേതൃത്വത്തിൽ നാട്ടുകാരും മഞ്ചേശ്വരം ഹൊസങ്കടിയിൽ നിന്നെത്തിയ വിനോദ സഞ്ചാരികളുടെ സംഘവും ചേർന്നാണ് മരം വെട്ടിമാറ്റി ഗതാഗതം പുനഃസ്ഥാപിച്ചത്. മഴ ശക്തമായതിനെ തുടർന്ന് റാണിപുരത്തേക്കുള്ള വിനോദ സഞ്ചാരത്തിന് നിയന്ത്രണം ഏർപ്പെടുത്തിയിട്ടുണ്ടെങ്കിലും ഇപ്പോഴും നിരവധി സഞ്ചാരികൾ ഇവിടെയെത്തുന്നുണ്ട്.

കാഞ്ഞങ്ങാട് ബസ് സ്റ്റാന്‍ഡ് കോംപ്ലക്‌സ് കെട്ടിടത്തിനു വിള്ളല്‍

കാഞ്ഞങ്ങാട്: ബസ് സ്റ്റാന്‍ഡ് ഷോപ്പിംഗ് കോംപ്ലക്സ് കെട്ടിടത്തിനു വിള്ളല്‍. ഇന്നലെ രാവിലെയാണ് പഴയ ബസ് സ്റ്റാന്‍ഡ് പ്രവേശന കവാടത്തിനടുത്തു വിള്ളല്‍ കാണപ്പെട്ടത്. ഇതു കണ്ടവര്‍ വിവരം പോലീസിനെയും നഗരസഭ അധികൃതരെ മറ്റും അറിയിച്ചു. മുന്നറിയിപ്പായി ഈ ഭാഗത്ത് ബാരിക്കേഡുകള്‍ സ്ഥാപിച്ചു. വാഹനങ്ങളും ആളുകളും ബസ് സ്റ്റാന്‍ഡ്, ഷോപ്പിംഗ് കോംപ്ലക്സ് പരിസരത്തു തങ്ങരുതെന്ന് പോലീസ് നിര്‍ദേശിച്ചു. ഫയര്‍ഫോഴ്‌സും സ്ഥലത്തെത്തി. റോഡില്‍ നിന്നു ബസുകള്‍ ബസ് സ്റ്റാന്‍ഡിനുള്ളില്‍ കയറുന്ന വഴിയുടെ ഭാഗത്താണ് ഷോപ്പിംഗ് കോംപ്ലക്സില്‍ വിള്ളല്‍ പ്രകടമായിട്ടുള്ളത്. മഴ ശക്തമായതിനാല്‍ സിമന്‍റോ, കോണ്‍ക്രീറ്റ് കഷ്ണമോ തലയില്‍ വീഴരുതെന്ന് കരുതിയാണ് മുന്‍കരുതല്‍ സ്വീകരിച്ചതെന്ന് സ്ഥലം സന്ദര്‍ശിച്ച നഗരസഭ ഉദ്യോഗസ്ഥര്‍ പറഞ്ഞു. നിലവില്‍ കെട്ടിടം സംബന്ധിച്ച് ഭയപ്പെടാന്‍ ഒന്നുമില്ലെന്ന് നഗരസഭ അധികൃതര്‍ അറിയിച്ചു. കെട്ടിടത്തിന്‍റെ പല ഭാഗങ്ങളിലും വര്‍ഷങ്ങളായി കോണ്‍ക്രീറ്റ് അടര്‍ന്ന് വീഴുന്നത് പതിവാണ്.

ഓടിക്കൊണ്ടിരുന്ന വാഹനങ്ങൾക്കു മുകളില്‍ മരം വീണു

കാസര്‍ഗോഡ്: ഓടിക്കൊണ്ടിരുന്ന കറിനുമുകളില്‍ മരം വീണു. കാറിലുണ്ടായിരുന്ന ചൗക്കി സ്വദേശികളായ അഞ്ചുപേര്‍ പരിക്കേല്‍ക്കാതെ അത്ഭുതകരമായി രക്ഷപെട്ടു. ഇന്നലെ ഉച്ചയ്ക്കു രണ്ടോടെ ചെട്ടുംകുഴിയിലാണ് സംഭവം. ചൗക്കിയില്‍ നിന്നും വിദ്യാനഗറിലേക്ക് പോവുകയായിരുന്ന കാറാണ് അപകടത്തില്‍പ്പെട്ടത്. വാഹനത്തിന് സാരമായ കേടുപാടുകള്‍ സംഭവിച്ചെങ്കിലും യാത്രക്കാര്‍ പരിക്കേല്‍ക്കാതെ രക്ഷപ്പെട്ടു. വിവരമറിഞ്ഞതിനെ തുടര്‍ന്ന് കാസര്‍ഗോഡ് അഗ്‌നിരക്ഷാനിലയത്തില്‍ നിന്നും സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ വി.എം. സതീശനെ നേതൃത്വത്തില്‍ എത്തിയ സംഘം മരം മുറിച്ചുനീക്കി കാര്‍ സുരക്ഷിതമായി പുറത്തെടുത്ത് ഗതാഗതം പുനഃസ്ഥാപിച്ചു. ഓടിക്കൊണ്ടിരുന്ന കാറിനു മുകളില്‍ മരം പൊട്ടിവീണു. ഡ്രൈവര്‍ വിദ്യാനഗര്‍ സ്വദേശി പവിത്രന്‍ തലനാരിഴയ്ക്കു രക്ഷപ്പെട്ടു. ഇന്നലെ ഉച്ചയ്ക്ക് 1.30ഓടെ വിദ്യാനഗര്‍ ജില്ലാ പഞ്ചായത്ത് ഓഫീസനു മുന്‍വശത്തെ റോഡിലാണ് സംഭവം. വൈദ്യതി ലൈന്‍ അടക്കം മരം പൊട്ടി ഓടിക്കൊണ്ടിണ്ടിരുന്ന കാറിന് മുകളിലേയ്ക്കു വീഴുകയായിരുന്നു. കാസര്‍ഗോഡ് അഗ്‌നിരക്ഷാസേനയും കെഎസ്ഇബി അധികൃതരും എത്തി ലൈന്‍ ഓഫ് ആക്കിയ ശേഷമാണ് ഡ്രൈവറെ പുറത്തിറക്കിയത്. കാറിന് സാരമായ കേടുപാടുകള്‍ ഉണ്ട്. അതിനുശേഷം അഗ്‌നിരക്ഷാസേന മരം മുറിച്ചുമാറ്റി ഗതാഗതം പുനഃസ്ഥാപിച്ചു. മരം പൊട്ടി ബൈക്കിന്‍റെ മുകളില്‍ വീണു മാധ്യമപ്രവര്‍ത്തകന് പരിക്ക് കാഞ്ഞങ്ങാട്: ബൈക്കില്‍സഞ്ചരിക്കവേ മരം പൊട്ടി വീണ് മാധ്യമപ്രവര്‍ത്തകന് പരിക്കേറ്റു. കാസര്‍ഗോഡ് വിഷന്‍റെ കാമറമാന്‍ മടിക്കൈ ആലയി അടമ്പില്‍ സ്വദേശി സജേഷിനാണ് സാരമായി പരിക്കേറ്റത്. ഇന്നലെ രാവിലെ 10.30 ഓടെയാണ് അപകടം. ബൈക്കില്‍ കാഞ്ഞങ്ങാട് ഭാഗത്തേക്ക് വരുന്നതിനിടെ ചെമ്മട്ടംവയല്‍ കുറ്റിയടുക്കത്ത് വച്ചാണ് അപകടം. സജേഷ് തെറിച്ച് മറ്റൊരു വശത്തേക്ക് വീണതിനാല്‍ പരിക്കുകളോടെ രക്ഷപ്പെട്ടു. ബൈക്കിന് കേടുപാടുകള്‍ സംഭവിച്ചു.

കാലവർഷം; തുടക്കത്തിൽത്തന്നെ ജില്ലയിൽ ഒന്നരക്കോടിയുടെ കൃഷിനാശം

കാസർഗോഡ്: കാലവർഷാരംഭത്തിൽതന്നെ ജില്ലയിലുണ്ടായത് ഒന്നരക്കോടിയോളം രൂപയുടെ കൃഷിനാശം. വിവിധ കൃഷിഭവനുകളിൽ നിന്ന് ലഭിച്ച പ്രാഥമിക റിപ്പോർട്ടുകളുടെ അടിസ്ഥാനത്തിലാണ് ഈ വിലയിരുത്തൽ. നാശനഷ്ടങ്ങൾ സംബന്ധിച്ച കണക്കെടുപ്പ് പൂർത്തിയാകുമ്പോൾ ഇത് രണ്ടുകോടിയോടടുത്താകുമെന്നാണ് സൂചന. കൃഷിവകുപ്പിന്‍റെ ഇതുവരെയുള്ള കണക്കുകൾ പ്രകാരം 3986 കുലച്ച കവുങ്ങുകളും 1011 തെങ്ങുകളുമാണ് കഴിഞ്ഞ 10 ദിവസത്തിനുള്ളിൽ ജില്ലയിൽ നിലംപൊത്തിയത്. കവുങ്ങ് കൃഷിയുമായി ബന്ധപ്പെട്ട് 477 കർഷകർക്കായി 11.95 ലക്ഷം രൂപയുടെയും തെങ്ങുകൃഷിയുമായി ബന്ധപ്പെട്ട് 508 കർഷകർക്കായി 52.2 ലക്ഷം രൂപയുടെയും നഷ്ടം സംഭവിച്ചു. 841 റബർ മരങ്ങൾ കടപുഴകി. ഇതുമായി ബന്ധപ്പെട്ട് 16.79 ലക്ഷം രൂപയുടെ നഷ്ടമാണ് കണക്കാക്കുന്നത്. ജില്ലയിലുടനീളം 6700 വാഴകൾ നശിച്ചു. ഇതിൽ 95 ശതമാനവും കുല വന്നവയാണ്. കുരുമുളക്, നെല്ല്, പച്ചക്കറി എന്നിവയുമായി ബന്ധപ്പെട്ട നാശനഷ്ടങ്ങൾ കണക്കാക്കി വരുന്നതേയുള്ളൂ. ആകെ 40.55 ഹെക്ടർ കൃഷിയിടങ്ങളിൽ വെള്ളം കയറി. കാഞ്ഞങ്ങാട് ബ്ലോക്കിൽ 38.45 ലക്ഷം രൂപയുടെയും പരപ്പയിൽ 32.9 ലക്ഷം രൂപയുടെയും കാസർഗോഡ് 27.85 ലക്ഷം രൂപയുടെയും നീലേശ്വരത്ത് 19.47 ലക്ഷം രൂപയുടെയും നഷ്ടമാണ് ഇതുവരെ കണക്കാക്കിയിട്ടുള്ളത്. വൈദ്യുതി മേഖലയിൽ 3.7 കോടി രൂപയുടെ നഷ്ടം കഴിഞ്ഞ ദിവസങ്ങളിൽ ജില്ലയിലുണ്ടായ ശക്തമായ കാറ്റിലും മഴയിലും വൈദ്യുതി മേഖലയിലുണ്ടായത് 3.7 കോടിയോളം രൂപയുടെ നഷ്ടം. 41 ഹൈടെൻഷൻ വൈദ്യുത തൂണുകളും 635 സാധാരണ ലോടെൻഷൻ തൂണുകളും തകർന്നു. 24 സ്ഥലങ്ങളിൽ ഹൈടെൻഷൻ കമ്പികളും 1449 സ്ഥലങ്ങളിൽ ലോടെൻഷൻ കമ്പികളും പൊട്ടിവീണു. ചോയ്യംകോട്, നല്ലോംപുഴ എന്നിവിടങ്ങളിലെ ട്രാൻസ്ഫോർമറുകൾ വെള്ളംകയറി തകരാറിലായി. കാസർഗോഡ് ഡിവിഷനിൽ 2.75 കോടി രൂപയുടെയും കാഞ്ഞങ്ങാട് ഡിവിഷനിൽ 1.44 കോടി രൂപയുടെയും നഷ്ടമാണ് സംഭവിച്ചത്. ഭീമനടി, ബളാംതോട് സെക്ഷൻ ഓഫീസുകളുടെ പരിധിയിലാണ് ഏറ്റവുമധികം നാശനഷ്ടങ്ങൾ സംഭവിച്ചത്.

വന്യജീവി പ്രശ്നം പരിഹരിക്കാൻ മലയോരജനത ഒരുമിച്ച് നിൽക്കണം: മാർ ജോസഫ് പാംപ്ലാനി

വെള്ളരിക്കുണ്ട്: വന്യജീവി ആക്രമണത്തിൽ പൊറുതിമുട്ടുന്ന മലയോരജനത ഒരുമിച്ചു നിന്നാൽ ഈ പ്രതിസന്ധി പരിഹരിക്കാൻ പത്തുദിവസം മതിയെന്ന് തലശേരി ആർച്ച്ബിഷപ് മാർ ജോസഫ് പാംപ്ലാനി. വിവിധ കർഷക സംഘടനകളുടെ നേതൃത്വത്തിൽ വെള്ളരിക്കുണ്ടിൽ തുടങ്ങുന്ന അനിശ്ചിതകാല കർഷകസ്വരാജ് സത്യാഗ്രഹത്തിന് മുന്നോടിയായി നടത്തുന്ന 48 മണിക്കൂർ സത്യാഗ്രഹം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വന്യജീവി ആക്രമണങ്ങൾ നാൾക്കുനാൾ വർധിക്കുന്നതിന്‍റെ പ്രധാന ഉത്തരവാദിത്വം വനം വകുപ്പിനു തന്നെയാണെന്ന് ആർച്ച്ബിഷപ് പറഞ്ഞു. ജില്ലാ പഞ്ചായത്തംഗം ഷിനോജ് ചാക്കോ അധ്യക്ഷത വഹിച്ചു. നാരായണ ഗുരുകുലം ഗൃഹസ്ഥശിഷ്യൻ ഡോ. പി.കെ. സാബു മുഖ്യപ്രഭാഷണം നടത്തി. ബളാൽ പഞ്ചായത്ത് പ്രസിഡന്‍റ് രാജു കട്ടക്കയം സത്യഗ്രഹികളെ ഹാരമണിയിച്ചു. ബേബി ചെമ്പരത്തി, പി.സി. രഘുനാഥൻ, ജിമ്മി ഇടപ്പാടി എന്നിവരാണ് 48 മണിക്കൂർ ഉപവാസമനുഷ്ഠിക്കുന്നത്. ഇവർക്കൊപ്പം ഏകതാ പരിഷത്ത് സംസ്ഥാന സെക്രട്ടറി രമേഷ് മേത്തല അനുഭാവ സത്യഗ്രഹവും നടത്തുന്നുണ്ട്. ഉപവാസത്തിന് അഭിവാദ്യമർപ്പിച്ചു കൊണ്ട് കരിച്ചേരി പ്രഭാകരൻ നായർ, പി.ആർ. ശശിധരൻ, പി.ജി. ദേവ്, മധു പുങ്ങംചാൽ, തോമസ് ചെറിയാൻ, ജെറ്റോ ജോസഫ്, കെ.ആർ. വിനു എന്നിവർ പ്രസംഗിച്ചു.

കോളജ് വിദ്യാർഥി ഹോസ്റ്റലില്‍ തൂങ്ങി മരിച്ച നിലയില്‍

കാസർഗോഡ്: കാസർഗോഡ് ഗവ. കോളേജിലെ ഒന്നാംവര്‍ഷ ബിരുദ വിദ്യാര്‍ഥിയെ ഹോസ്റ്റലില്‍ തൂങ്ങിമരിച്ച നിലയില്‍ കണ്ടെത്തി. പാണത്തൂര്‍ പള്ളിക്കാലിലെ പി.ഡി. അഭിഷേക് (19) ആണ് മരിച്ചത്. വിദ്യാനഗര്‍ ഗവ. പോസ്റ്റ് മെട്രിക് ഹോസ്റ്റലിന്‍റെ താഴത്തെ നിലയിലെ മൂന്നാം നമ്പര്‍ മുറിയിലെ ഫാനില്‍ തൂങ്ങിയ നിലയിലാണ് മൃതദേഹം കാണപ്പെട്ടത്. ഫോണ്‍ വിളിച്ചിട്ടും എടുക്കാത്തതിനെ തുടര്‍ന്ന് ജനല്‍ വഴി നോക്കിയപ്പോഴാണ് തൂങ്ങിയ നിലയില്‍ കണ്ടത്. തിങ്കളാഴ്ച വൈകുന്നേരം ആറോടെ അഭിഷേക് അമ്മ സിന്ധുവിനെ ഫോണ്‍ ചെയ്തതായി ബന്ധുക്കള്‍ പറഞ്ഞു. അഭിഷേകിന്‍റെ ഏകസഹോദരി അവന്തികയുടെ പിറന്നാള്‍ ദിനം ചൊവ്വാഴ്ചയാണ്. വൈകുന്നേരം വീട്ടിലെത്തുമെന്ന് അറിയിച്ചാണ് ഫോണ്‍ വച്ചതെന്നും ബന്ധുക്കള്‍ പറഞ്ഞു. തൊട്ടുപിന്നാലെയാണ് മരണവാര്‍ത്ത എത്തിയത്. ജീവനൊടുക്കാനുള്ള കാരണം വ്യക്തമല്ലെന്ന് ബന്ധുക്കള്‍ പറയുന്നു. ഹോസ്റ്റല്‍ അധികൃതരുടെ പരാതി പ്രകാരം കാസർഗോഡ് ടൗണ്‍ പോലീസ് അസ്വാഭാവിക മരണത്തിനു കേസെടുത്തു. മൃതദേഹം പോസ്റ്റ്‌ മോർട്ടത്തിന് വീട്ടിൽ എത്തിച്ച് സംസ്കരിച്ചു.

പി സാഹിത്യ പുരസ്‌കാരം സമ്മാനിച്ചു

കാഞ്ഞങ്ങാട്:മഹാകവി പി സ്മാരക സമിതി ഏര്‍പ്പെടുത്തിയ പി സാഹിത്യ പുരസ്‌കാരം യുവകവയത്രി സി. രേഷ്മയ്ക്ക് മാധ്യമപ്രവര്‍ത്തകന്‍ മാങ്ങാട് രത്‌നാകരന്‍ സമ്മാനിച്ചു. പി സ്മാരക മന്ദിരത്തില്‍ നടന്ന പരിപാടിയില്‍ പി.മുരളീധരന്‍ അധ്യക്ഷതവഹിച്ചു. പിയുടെ മക്കളായ ലീല, രവീന്ദ്രന്‍, രാധമ്മ എന്നിവരെ ആദരിച്ചു. പി.കൃഷ്ണദാസ്, കുഞ്ഞിക്കണ്ണന്‍ കക്കാണത്ത്, രാജ്‌മോഹന്‍ നീലേശ്വരം, ഗോവിന്ദരാജ് എന്നിവര്‍ പ്രസംഗിച്ചു. കെ.വി.സജീവന്‍ സ്വാഗതവും രാമകൃഷ്ണന്‍ വാണിയമ്പാറ നന്ദിയും പറഞ്ഞു.

റെയിൽവേ വൈദ്യുത ലൈനിനു മുകളിൽ തെങ്ങ് വീണു

കാസർഗോഡ്: മൊഗ്രാൽപുത്തൂരിനു സമീപം പള്ളിക്കുന്നിൽ റെയിൽവേ വൈദ്യുത ലൈനിനു മുകളിലേക്ക് തെങ്ങ് വീണു. ഇതേത്തുടർന്ന് കാസർഗോഡിനും മംഗളൂരുവിനും ഇടയിൽ ഏറെനേരം ട്രെയിൻ ഗതാഗതം തടസപ്പെട്ടു. ഇന്നലെ രാവിലെ എട്ടരയോടെയായിരുന്നു സംഭവം. ഒടിഞ്ഞുവീണ തെങ്ങിന്‍റെ തലഭാഗം വൈദ്യുതലൈനിൽ തട്ടിനിൽക്കുകയായിരുന്നു. റെയിൽവേ ജീവനക്കാരും അഗ്നിരക്ഷാസേനയുമെത്തിയാണ് തെങ്ങ് മുറിച്ചുമാറ്റിയത്.

കോട്ടിക്കുളത്തും തൃക്കണ്ണാടും കടലേറ്റം രൂക്ഷമായി

ബേക്കൽ: പതിവിലും നേരത്തേ മഴ കനത്തതോടെ കോട്ടിക്കുളം, തൃക്കണ്ണാട് തീരങ്ങളിൽ കടലേറ്റം രൂക്ഷമായി. തൃക്കണ്ണാട് ക്ഷേത്രത്തിന്‍റെ പള്ളിവേട്ട ഗോപുരത്തിനു സമീപം നേരത്തേ ജിയോ ബാഗ് കൊണ്ട് നിർമിച്ച കടൽ ഭിത്തിയുടെ ഒരുഭാഗം കഴിഞ്ഞവർഷം തകർന്നിരുന്നു. ഇതുമൂലം ഗോപുരം കടന്ന് സംസ്ഥാനപാതയുടെ അടുത്തേക്കുവരെ കടൽവെള്ളം ഇരച്ചെത്തി. വർഷാവർഷം കടലേറ്റം നടക്കുന്ന ഈ ഭാഗങ്ങളിൽ ചെല്ലാനം മാതൃകയിൽ ടെട്രാപോഡ് കടൽഭിത്തി നിർമിക്കണമെന്ന ആവശ്യം ഈ വർഷവും നടപ്പായില്ല.

കളക്ടറേറ്റ് വളപ്പിലെ ഉണങ്ങിയ മരം വീണ് കാർ തകർന്നു

കാസർഗോഡ്: കളക്ടറേറ്റ് വളപ്പിൽ ഉണങ്ങിനിന്ന മരത്തിന്‍റെ കൊമ്പ് പൊട്ടിവീണ് തൊട്ടടുത്ത വ്യവസായ എസ്റ്റേറ്റിലെ വർക്ക് ഷോപ്പിനു സമീപം നിർത്തിയിട്ടിരുന്ന സ്വകാര്യ വ്യക്തിയുടെ കാർ തകർന്നു. ഇന്നലെ പുലർച്ചെയായിരുന്നു സംഭവം. മരത്തിന്‍റെ മറ്റു ഭാഗങ്ങൾ കഴിഞ്ഞ ദിവസങ്ങളിൽ ഒടിഞ്ഞുവീണിരുന്നു. അപകടാവസ്ഥയിലായിട്ടും മരം മുറിച്ചുമാറ്റാതിരുന്ന അധികൃതരുടെ അനാസ്ഥയാണ് ലക്ഷങ്ങളുടെ നഷ്ടം വരുത്തിവച്ചതെന്ന് നാട്ടുകാർ ചൂണ്ടിക്കാട്ടി.

മഞ്ചേശ്വരം കടൽതീരത്ത് ഡോൾഫിൻ ചത്ത നിലയിൽ

മഞ്ചേശ്വരം: മഞ്ചേശ്വരം കൊണ്ടുകൊളക്ക കടൽതീരത്ത് ഡോൾഫിനെ ചത്ത നിലയിൽ കണ്ടെത്തി. ഞായറാഴ്ച വൈകുന്നേരത്തോടെയാണ് ഡോൾഫിൻ കരയ്ക്കടിഞ്ഞത്. മറ്റേതോ കടൽജീവിയുടെ ആക്രമണത്തിൽ പരിക്ക റ്റതിന്‍റെ പാടുകൾ ശരീരത്തിലുണ്ട്. ഫിഷറീസ് അധികൃതരെത്തി പരിശോധന നടത്തിയതിനുശേഷം തീരത്തുതന്നെ കുഴിച്ചുമൂടി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]