ADVERTISEMENT

ADVERTISEMENT

കായംകുളം എംഎസ്എം കോളജ് യൂണിയൻ എസ്എഫ്ഐക്ക്

കായംകുളം: കായംകുളം എംഎസ്എം കോളജ് യൂണിയൻ കെഎസ്.‌യു - എംഎസ്എഫ് സഖ്യത്തിൽനിന്ന് എസ്എഫ്ഐ പിടിച്ചെടുത്തു.

കഴിഞ്ഞ മൂന്നുവർഷമായി കെഎസ്‌യു - എംഎസ്എഫ് സഖ്യം വിജയിച്ചുവന്ന കോളജിൽ എല്ലാ ജനറൽ സീറ്റുകളും നേടിക്കൊണ്ടാണ് എസ്എഫ്ഐ വിജയം. ചെയർമാൻ - അഭിജിത്ത് എസ്. ബാബു, വൈസ് ചെയർപേഴ്സൺ - എ. അസ്ന ഫാത്തിമ, ജനറൽ സെക്രട്ടറി - എച്ച്. അൻസിൽ, യുയുസി- എസ്. ഹരികൃഷ്ണൻ, എ. മുഹമ്മദ് അലി, മാഗസിൻ എഡിറ്റർ - ആർ. അഹമ്മദ് മനാർ, ആർട്സ് ക്ലബ് സെക്രട്ടറി - ടി. തൗഫീക്ക് എന്നിവരാണ് വിജയിച്ചത്.

ADVERTISEMENT

ഇടത് മുന്നണിക്ക് കടുത്ത തിരിച്ചടി ഉണ്ടാകും: ചാണ്ടി ഉമ്മൻ

ചമ്പക്കുളം: ത്രിതല പഞ്ചായത്ത് തെരഞ്ഞെടുപ്പില്‍ എല്‍ഡിഎഫ് മുന്നണിക്ക് കനത്ത തിരിച്ചടി നേരിടുമെന്ന് ചാണ്ടി ഉമ്മന്‍ എംഎൽഎ. മുട്ടാര്‍ മണ്ഡലം കോണ്‍ഗ്രസ് കമ്മിറ്റിയുടെ ഉമ്മന്‍ ചാണ്ടി മെമ്മോറിയല്‍ കോണ്‍ഗ്രസ് ഭവന്‍റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് ബ്ലസ്റ്റന്‍ തോമസ് അധ്യക്ഷത വഹിച്ച സമ്മേളനത്തില്‍ കെപിസിസി സെക്രട്ടറി കറ്റാനം ഷാജി, അനില്‍ ബോസ്, ഡിസിസി വൈസ് പ്രസിഡ‌ന്‍റ് സജി ജോസഫ്, ടിജിന്‍ ജോസഫ്, ഡിസിസി ജനറല്‍ സെക്രട്ടറിമാരായ ജെ.റ്റി. റാംസെ, കെ. ഗോപകുമാര്‍, ജോസഫ് ചെക്കോടന്‍, തോമസുകുട്ടി മാത്യു, വിശ്വനാഥ പിള്ള, വി.എന്‍. വിശ്വഭരന്‍, ബൈജു കെ. ആറുപറ, വി.എ. ജോസഫ് തുടങ്ങിയവര്‍ പ്രസംഗിച്ചു.

വേമ്പനാട്ടുകായലിൽ അനധികൃത മല്ലികക്ക വാരൽ വ്യാപകം

പൂച്ചാക്കല്‍: വേമ്പനാട്ടുകായലില്‍ കക്കയുടെ ലഭ്യത കുറഞ്ഞതിനാല്‍ തൊഴിലാളികള്‍ ആശങ്കയില്‍. വേമ്പനാട്ട് കായലില്‍ അനധികൃതമായി മല്ലികക്ക (ചെറിയ കക്ക) വാരുന്നതുമൂലം കക്കയുടെ ലഭ്യത കുറയുന്നതാണ് ആശങ്കയ്ക്കു കാരണം. ഇതുമൂലം സര്‍ക്കാരിനും നികുതി ഇനത്തില്‍ ലഭിക്കേണ്ട വന്‍തുക ഇല്ലാതാക്കുന്നു. മല്ലികക്ക വാരുന്നതിന്‍റെ പിന്നില്‍ വൻ റാക്കറ്റുകള്‍ പ്രവര്‍ത്തിക്കുന്നുണ്ടെന്നും ഇതിനു പിന്നില്‍ പ്രവര്‍ത്തിക്കുന്ന തൊഴിലാളികള്‍ക്കെതിരേ അധികൃതര്‍ നടപടി സ്വീകരിക്കുന്നില്ലെന്നും ആക്ഷേപമുയരുന്നുണ്ട്. അരൂക്കുറ്റി, അരയന്‍ കാവ്, തണ്ണീര്‍മുക്കം ഭാഗങ്ങളിലാണ് കൂടുതലായും മല്ലികക്ക അനധികൃതമായി വാരുന്നതെന്ന് കക്കാ തൊഴിലാളികള്‍ പറയുന്നത്. കായലില്‍ ഓര് കയറുന്ന ഡിസംബര്‍ മുതല്‍ മാര്‍ച്ച് വരെയുള്ള കാലയളവിലാണ് കക്കയുടെ പ്രജനനം നടക്കുന്നത്. പൂര്‍ണ വളര്‍ച്ചയെത്തുമ്പോള്‍ വാരിയെടുത്താല്‍ കക്ക തൊണ്ട് വിറ്റും കക്ക ഇറച്ചിയുടെ വില്പനയിലൂടെയും തൊഴിലാളികള്‍ക്ക് മികച്ച ഉപജീവനമാര്‍ഗമാണ് ലഭിക്കുന്നത്. എന്നാല്‍, താത്കാലിക നേട്ടം മുന്‍നിര്‍ത്തിയാണ് നാലിലൊന്നു വളര്‍ച്ച പോലുമെത്താത്ത മല്ലികക്ക വാരിവില്‍ക്കാന്‍ ചിലര്‍ തയാറാവുന്നത്. ഓരു ശക്തമാകുമ്പോഴാണ് കക്ക വ്യാപകമായി കായലില്‍ ഉത്പാദിപ്പിക്കപ്പെടുന്നത്. മല്ലികക്ക വാരുന്നതു കര്‍ശനമായി അധികൃതര്‍ നിരോധിച്ചിട്ടുള്ളതാണെങ്കിലും അനധികൃതമായി കക്കവാരല്‍ വേമ്പനാട്ടു കായലിന്‍റെ പല ഭാഗത്തും തുടരുകയാണ്. രാത്രികാലങ്ങളിലാണ് ഇത്തരക്കാര്‍ കക്കവാരുന്നത്. വലിയ വള്ളത്തില്‍ 15 ടണ്‍ മല്ലികക്കവരെ ശേഖരിച്ചാണ് വില്‍ക്കുന്നത്. ഇത്തരം അനധികൃത വില്‍പ്പനയിലൂടെ സര്‍ക്കാരിന് ലക്ഷക്കണക്കിന് രൂപയാണ് റോയല്‍റ്റിയായും ടാക്സായും നഷ്ടപ്പെടുന്നത്. കക്കാവ്യവസായ സംഘങ്ങള്‍ ഒരു ടണ്ണിന് റോയല്‍റ്റി, സെയില്‍ടാക്സ് എന്നിങ്ങനെ 450 രൂപ പ്രകാരം സര്‍ക്കാരിലേക്ക് അടച്ചാണ് കക്ക വില്‍പ്പന നടത്തുന്നത്. അനധികൃതമായി മല്ലികക്ക ശേഖരിച്ച് വില്‍ക്കുന്നതിലൂടെ സംഘങ്ങളിലെ കക്ക കെട്ടി കിടക്കുകയാണ്. കക്കാ സംഘങ്ങളും പഞ്ചായത്തുകളും മല്ലിക്കക്ക നിക്ഷേപിച്ച് കക്കയുടെ ലഭ്യത ഉറപ്പാക്കാന്‍ പദ്ധതികള്‍ ആവിഷ്‌കരിച്ച് പരമ്പരാകത കക്കാവാരല്‍ തൊഴിലാളികളുടെ തൊഴില്‍ സംരക്ഷിക്കുന്നതിനു നടപടി സ്വീകരിക്കണമെന്നാണ് തൊഴിലാളികളുടെ ആവശ്യം.

റിച്ചാര്‍ഡ് ലീ ബ്രൂക്‌സിന്‍റെ ബാസ്‌കറ്റ്‌ബോള്‍ ക്ലിനിക് 17ന്

ആലപ്പുഴ: പ്രമുഖ അന്തര്‍ദേശീയ ബാസ്‌കറ്റ്‌ബോള്‍ വിദഗ്ധ പരിശീലകന്‍ സ്ലൊവാക്യക്കാരന്‍ റിച്ചാര്‍ഡ് ലീ ബ്രൂക്‌സ് വൈഎംസിഎയില്‍ ബാസ്‌കറ്റ്‌ബോള്‍ ക്ലിനിക് നടത്തും. ബാസ്‌കറ്റ്ബോള്‍ പരിശീലകര്‍ക്കും വിദ്യാര്‍ഥികള്‍ക്കും അനുയോജ്യമായ പ്രഫഷണല്‍ വികസനത്തിനുള്ള അവസരം നല്‍കാന്‍ ലക്ഷ്യമിട്ടാണ് ക്ലിനിക് ഒരുക്കുന്നത്. 17ന് രാവിലെ 10ന് കോച്ചുകളുടെ ക്ലിനിക്കും ഉച്ചകഴിഞ്ഞ് രണ്ടിന് വിദ്യാര്‍ഥി ക്ലിനിക്കും നടത്തും. ബാസ്‌കറ്റ്‌ബോള്‍ വികസനത്തിനായുള്ള പദ്ധതിയില്‍പ്പെടുത്തി എഡിബിഎയുടെ സഹകരണത്തോടെ കെബിഎയാണ് ക്ലിനിക് സംഘടിപ്പിക്കുന്നത്. യൂത്ത് ബാസ്‌കറ്റ്‌ബോള്‍ ഡവലപ്‌മെന്‍റ് മേഖലയില്‍ വിദഗ്ധനായ ബ്രൂക്‌സ് വിവിധ വര്‍ഷങ്ങളില്‍ യുഎസ്, ഓസ്ട്രിയ തുടങ്ങിയ രാജ്യങ്ങളില്‍ കോച്ച് ഓഫ് ദ് ഇയറായി തെരഞ്ഞെടുക്കപ്പെട്ടിട്ടുണ്ട്. ഓര്‍ഗനൈസിംഗ് പ്രാക്ടീസ് സെഷന്‍, ബാസ്‌കറ്റ്‌ബോള്‍ ഫണ്ടമെന്‍റല്‍സ്, പന്ത് ഉപയോഗിച്ചും അല്ലാതെയും വ്യക്തിഗത പ്രതിരോധ സാങ്കേതിക വിദ്യകള്‍ എന്നിവയില്‍ കോച്ചുമാര്‍ക്കും ബോക്‌സൗട്ട്, റീബൗണ്ടിംഗ്, ഔട്ട്‌ലെറ്റ് പാസ്, വ്യക്തിഗത പ്രതിരോധ ടെക്‌നിക്കുകള്‍, പിക്ക് ആന്‍ഡ് റോള്‍, പാസിംഗ് ആന്‍ഡ് കട്ടിംഗ് സ്‌ക്രീന്‍, ഡ്രൈവ് ആന്‍ഡ് കിക്ക് പാസ്, ഡ്രിബിള്‍ ഹാന്‍ഡ്ഓഫ് എന്നിവയില്‍ വിദ്യാര്‍ഥികള്‍ക്കും പരിശീലനം നല്‍കും. ചോദ്യോത്തര വിഭാഗവുമുണ്ടായിരിക്കും. വിവരങ്ങള്‍ക്കും രജിസ്ട്രേഷനും 9447467936, 9447304020.

റാന്നിയില്‍ തിരുവനന്തപുരം സ്വദേശി മുങ്ങിമരിച്ചു

അച്ചന്‍കോവിലാറ്റില്‍ നിന്നു രണ്ട് മൃതദേഹങ്ങള്‍ കണ്ടെടുത്തു പത്തനംതിട്ട: അച്ചന്‍കോവിലാറ്റില്‍ ചാടിയതായി സംശയിക്കുന്ന രണ്ടു പേരുടെയും റാന്നിയില്‍ മുങ്ങിമരിച്ചയാളിന്‍റെയും മൃതദേഹങ്ങള്‍ ഫയര്‍ഫോഴ്‌സ് സ്‌കൂബാ ടീം കണ്ടെടുത്തു. കൈപ്പട്ടൂര്‍ പാലത്തില്‍ നിന്നു കഴിഞ്ഞ ബുധനാഴ്ച വൈകുന്നേരം അച്ചന്‍കോവിലാറ്റില്‍ ചാടി കാണാതായ പെണ്‍കുട്ടിയുടെ മൃതദേഹമാണ് ഇന്നലെ കണ്ടെത്തിയത്. ചന്ദനപ്പള്ളി നല്ലാനിക്കുന്ന് സന്തോഷ് - അജയശ്രീ ദമ്പതികളുടെ മകള്‍ എസ്. സന്ധ്യ (17) യുടെ മൃതദേഹമാണ് ഇന്നലെ രാവിലെ കൈപ്പട്ടൂരില്‍ അച്ചന്‍കോവിലാറ്റില്‍ കണ്ടെത്തിയത്. മൈലപ്രയിലെ സ്വകാര്യ ഐടിഐ യില്‍ ഡീസല്‍ മെക്കാനിക് കോഴ്‌സ് വിദ്യാര്‍ഥിനിയായിരുന്നു. ബുധനാഴ്ച വൈകുന്നേരം പെണ്‍കുട്ടി പാലത്തില്‍ നിന്നു ചാടിയതായി വിവരം ലഭിച്ചതിനേ തുടര്‍ന്ന് പത്തനംതിട്ടയില്‍ നിന്നും അഗ്‌നി രക്ഷാ സേന സ്‌കൂബാ ടീം തെരച്ചില്‍ ആരംഭിച്ചിരുന്നു. ഇന്നലെ രാവിലെ സ്‌കൂബ ടീം നടത്തിയ തെരച്ചിലില്‍ കൈപ്പട്ടൂര്‍ ആറാട്ട് കടവിന് ഒരു കിലോമീറ്റര്‍ അകലെ മുളങ്കൂട്ടത്തില്‍ കുടുങ്ങിക്കിടക്കുന്ന നിലയില്‍ മൃതദേഹം കണ്ടെത്തുകയായിരുന്നു. പരിശോധനയ്ക്കായി ഇന്നലെ എന്‍ഡിആര്‍എഫ് സംഘത്തെയും സ്ഥലത്തെത്തിച്ചിരുന്നുവെങ്കിലും അവര്‍ ശ്രമം തുടങ്ങുന്നതിനു മുമ്പേ മൃതദേഹം കണ്ടെത്തി. റാന്നി: പമ്പാനദിയില്‍ സുഹൃത്തിനൊപ്പം കുളിക്കാനിറങ്ങിയ തിരുവനന്തപുരം സ്വദേശി മുങ്ങിമരിച്ചു. തിരുവനന്തപുരം വലിയതുറ മുട്ടത്തറ വള്ളക്കടവ് അനിതാ ഭവനില്‍ ഷൈനു (45) വാണ് മുങ്ങിമരിച്ചത്. ഇന്നലെ രാവിലെ 8.45ന് റാന്നി രാമപുരം ഭജനമഠം കടവില്‍ സുഹൃത്തിനൊപ്പം കുളിക്കുന്നതിനിടെ ഷൈനു ഒഴുക്കില്‍പെടുകയായിരുന്നുവെന്ന് പറയുന്നു. പത്തനംതിട്ടയില്‍ നിന്നുള്ള ഫയര്‍ഫോഴ്‌സ് സ്‌കൂബാ ടീം ഉച്ചയോടെ കുളിക്കടവിനു സമീപത്തു നിന്ന് മൃതദേഹം കണ്ടെടുത്തു. മിന്നല്‍ രക്ഷാകവചത്തിന്‍റെ ജോലി നടത്തിവരികയായിരുന്നു ഷൈനു. മൃതദേഹം റാന്നിയിലെ സ്വകാര്യ ആശുപത്രി മോര്‍ച്ചറിയിൽ. കൊടുന്തറയില്‍ മരിച്ചത് കരിമാന്‍തോട് സ്വദേശി പത്തനംതിട്ട: അച്ചന്‍കോവിലാറ്റില്‍ കൊടുന്തറ ഭാഗത്ത് ശനിയാഴ്ച രാത്രി ചാടിയതായി കരുതുന്ന യുവാവിന്‍റെ മൃതദേഹം ഫയര്‍ഫോഴ്സ് സ്‌കൂബ ടീം നടത്തിയ തെരച്ചിലില്‍ കണ്ടെത്തി. കൊടുന്തറ പടിഞ്ഞാറേ പഴന്തറ അപ്പാര്‍ട്ട്മെന്‍റില്‍ താമസിക്കുന്ന കരിമാന്‍തോട് സ്വദേശി പ്രസാദ് - കലാകുമാരി ദമ്പതികളുടെ മകനായ നന്ദു പ്രസാദി (25)ന്‍റെ മൃതദേഹമാണ് ഇന്നലെ ഉച്ചയോടെ താഴൂര്‍ക്കടവ് ഭാഗത്തു നിന്ന് കണ്ടെടുത്തത് . കുടുംബ വഴക്കിനേ തുടര്‍ന്ന് ശനിയാഴ്ച രാത്രിയാണ് അച്ചന്‍കോവിലാറ്റില്‍ കൊടുന്തറ ഭാഗത്ത് നന്ദു ചാടിയതെന്ന് പറയുന്നു. ഭാര്യ നല്‍കിയ പരാതിയുടെ പരാതിയുടെ അടിസ്ഥാനത്തില്‍ തിരോധാനത്തിന് പോലീസ് കേസ് രജിസ്റ്റര്‍ ചെയ്തിരുന്നു. രാത്രിയില്‍ ബന്ധുക്കള്‍ നടത്തിയ തെരച്ചിലില്‍ കൊടുന്തറ സുബ്രഹ്‌മണ്യ സ്വാമി ക്ഷേത്രത്തിന് തൊട്ടടുത്തുള്ള ബലിക്കടവില്‍ നന്ദുവിന്‍റെ കുട, ചെരുപ്പ് എന്നിവ കണ്ടെടുത്തിരുന്നു. ഇതേ തുടര്‍ന്നാണ് ഇന്നലെ ഉച്ചയോടെ താഴൂര്‍ക്കടവ് ഭാഗത്ത് നിന്ന് മുകളിലേക്ക് ഫയര്‍ഫോഴ്സ് സ്‌കൂബ നടത്തിയതെരച്ചിലില്‍ മൃതദേഹം കണ്ടെടുത്തത്. പത്തനംതിട്ട പോലീസ് മേല്‍നടപടി സ്വീകരിച്ചു.‌ ഫയര്‍ഫോഴ്‌സിനു പിടപ്പതു പണി മൂന്നിടങ്ങളിലായി തിരക്കിട്ട ജോലികളാണ് ഇന്നലെ പത്തനംതിട്ട ഫയര്‍ഫോഴ്‌സ് സ്‌കൂബാ ടീമിനു നിര്‍വഹിക്കാനുണ്ടായിരുന്നത്. കൈപ്പട്ടൂരില്‍ ബുധനാഴ്ച കാണാതായ പെണ്‍കുട്ടിക്കുവേണ്ടി മൂന്നുദിവസം തെരച്ചില്‍ നടത്തിയിട്ടും ഫലമുണ്ടാകാതെ വന്നപ്പോള്‍ എന്‍ഡിആര്‍എഫ് സംഘത്തെയും പുറമേ നിന്നുള്ള മുങ്ങല്‍ വിദഗ്ധരെയും കൊണ്ടുവന്നെങ്കിലും ഫയര്‍ഫോഴ്‌സ് സംഘമാണ് കുടുങ്ങിക്കിടന്ന നിലയില്‍ മൃതദേഹം കണ്ടെടുത്തത്. പിന്നാലെ താഴൂര്‍ക്കടവില്‍ കാണാതായ യുവാവിന്‍റെ മൃതദേഹവും റാന്നിയില്‍ മുങ്ങിമരിച്ചയാളിന്‍റെ മൃതദേഹവും കണ്ടെടുത്തു. പ്രത്യേക പരിശീലനം നേടിയവരെ കൂടി ഉള്‍പ്പെടുത്തിയാണ് പത്തനംതിട്ടയിലെ സ്‌കൂബാ ടീം പ്രവര്‍ത്തിക്കുന്നത്. നദിയില്‍ ജലനിരപ്പ് കുറവാണെങ്കിലും അപകട സാധ്യത ഏറെയാണ്. കടവുകള്‍ ചെളി നിറഞ്ഞു കിടക്കുന്നതിനാല്‍ വെള്ളത്തിലേക്ക് അകപ്പെട്ടാല്‍ താഴ്ന്നു പോകാനാണ് സാധ്യത. കുറ്റിക്കാടുകളിലും മറ്റും കുടുങ്ങിയാല്‍ രക്ഷപ്പെടുത്തല്‍ ആയാസകരമാണ്. അസിസ്റ്റന്‍റ് സ്റ്റേഷന്‍ ഓഫീസര്‍ എ. സാബു, ഫയര്‍ ഓഫീസര്‍മാരായ കെ. പ്രേംകുമാർ, സുജിത് നായര്‍, ഹരിക്കുട്ടന്‍, അജിലേഷ്, എസ്. അസിം, ഗാര്‍ഡ് ആർ. രാജേഷ് എന്നിവരുടെ നേതൃത്തിലാണ് ഇന്നലെ സ്‌കൂബാ ടീം പ്രവര്‍ത്തിച്ചത്.

സെമിത്തേരിയുടെ കൈവരികൾ തകർത്ത രണ്ടുപേർ പിടിയിൽ

മാന്നാര്‍: ചെന്നിത്തലയില്‍ പള്ളി സെമിത്തേരിയുടെ കൈവരികള്‍ തകര്‍ത്ത സംഭവത്തില്‍ രണ്ടുപേര്‍ പിടിയിലായി. ചെന്നിത്തല മട്ടക്കല്‍ ഇളംപാത്ത് മോബിന്‍ (26), ചെന്നിത്തല തൃപ്പെരുന്തുറ ഇളമ്പാത്ത് മട്ടക്കല്‍ ജോണ്‍ വര്‍ഗീസ് (50) എന്നിവരെയാണ് മാന്നാര്‍ പോലീസ് അറസ്റ്റ് ചെയ്തത്. ചെന്നിത്തല സെന്‍റ് ജോര്‍ജ് ഓര്‍ത്തഡോക്‌സ് വലിയ പള്ളിയുടെ സെമിത്തേരിയില്‍ കല്ലറയ്ക്കു മുന്നിലുള്ള കൈവരിയാണ് കഴിഞ്ഞ 20നു രാത്രി ഇവര്‍ തകര്‍ത്തത്. പള്ളി മാനേജിംഗ് കമ്മിറ്റി പരാതി നല്‍കിയതിനെത്തുടര്‍ന്ന് നടത്തിയ അന്വേഷണത്തിലാണ് പ്രതികള്‍ പിടിയിലായത്. മാന്നാര്‍ പോലീസ് ഇന്‍സ്പെക്ടര്‍ ഡി. രെജീഷ് കുമാറിന്‍റെ നേതൃത്വത്തിലുള്ള പോലീ സ് സംഘം പ്രതികളെ ചെന്നിത്തലയില്‍നിന്നു പിടികൂടുകയായിരുന്നു.

തട്ടിപ്പുകേസ്: ദമ്പതികൾ 30 വർഷങ്ങൾക്കുശേഷം അറസ്റ്റിൽ

മാന്നാർ: തട്ടിപ്പ് കേസുകളിൽ പ്രതികളായ ദമ്പതികളെ 30 വർഷങ്ങൾക്കുശേഷം അറസ്റ്റ് ചെയ്തു. മാന്നാർ കുരട്ടിക്കാട് കണിച്ചേരിൽ ശശിധരൻ (71), ഭാര്യ ശാന്തിനി (65) എന്നിവരെയാണ് മാന്നാർ പോലീസ് മുംബൈയിലെ പൻവേലിൽനിന്ന് അറസ്റ്റ് ചെയ്തത്. 1995ൽ വിദേശത്ത് ജോലി വാഗ്ദാനം ചെയ്ത് പണം തട്ടിപ്പ് നടത്തിയതിന് മാന്നാർ പോലീസ് രജിസ്റ്റർ ചെയ്ത കേസിൽ പ്രതികളെ അന്ന് പോലീസ് അറസ്റ്റ് ചെയ്ത് റിമാൻഡ് ചെയ്തിരുന്നു. പിന്നീട് ജാമ്യത്തിൽ ഇറങ്ങിയ ശേഷം ഇവർ മാന്നാറിൽനിന്നു മുങ്ങുകയായിരുന്നു. പിന്നീട് കോടതിയിൽ ഹാജരായുമില്ല. ഇതിനിടെയാണ് 1997ൽ കെഎസ്എഫ്ഇയിൽ വസ്തു ഈടായി നൽകി വായ്പ എടുത്തും പിന്നിട് ബാങ്ക് അറിയാതെ വസ്തു കൈമാറ്റം ചെയ്തതും. ബാങ്കിനെ കബളിപ്പിച്ചു എന്ന കുറ്റത്തിന് മാന്നാർ പോലീസ് ശശിധരന്‍റെ പേരിൽ കേസ് രജിസ്റ്റർ ചെയ്തിരുന്നു. ഈ കേസിൽ പ്രതിയെ പോലീസിന് പിടികൂടാൻ കഴിഞ്ഞിരുന്നില്ല. ‌ ഈ രണ്ടു കേസുകളിലും കോടതിയിൽ ഹാജരാകാതിരുന്നതിനാൽ പ്രതികൾക്കെതിരേ കോടതി എൽപി വാറണ്ട് പുറപ്പെടുവിച്ച് പിടികിട്ടാപ്പുള്ളിയായി പ്രഖ്യാപിച്ചിരുന്നു. ജില്ലാ പോലീസ് മേധാവി മോഹനചന്ദ്രന്‍റെ നിർദേശപ്രകാരം ചെങ്ങന്നൂർ ഡിവൈ എസ്പി എം.കെ. ബിനുകുമാർ, മാന്നാർ പോലീസ് ഇൻസ്പെക്ടർ ഡി. രജീഷ് കുമാർ എന്നിവരുടെ നേതൃത്വത്തിൽ അന്വേഷണം നടത്തിയതിന്‍റെ ഭാഗമായി ഇവർ മുംബെയിലുണ്ടെന്ന് മനസിലാക്കിയത്. മാന്നാർ എസ്ഐ ശരത് ചന്ദ്രബോസ്, ജൂണിയർ എസ്ഐ ലിൻസി, സിവിൽ പോലീസ് ഓഫീസർമാരായ അൻസർ, സുമേഷ് എന്നിവർ ചേർന്ന് മുംബൈയിലെ പൻവേലിൽ എത്തിയാണ് അറസ്റ്റ് ചെയ്തത്.

വൈദ്യുത കമ്പിയിൽനിന്ന് ഷോക്കേറ്റു വീട്ടമ്മ മരിച്ചു, ഒരാൾക്കു പരിക്ക്

ഹരിപ്പാട്: വൈദ്യുത കമ്പിയിൽനിന്ന് ഷോക്കേറ്റ് വീട്ടമ്മ മരിച്ചു. ഒരാൾക്കു ഗുരുതരമായി പരിക്കേറ്റു. ഇന്നലെ രാവിലെ 11.30ന് പള്ളിപ്പാട് വടക്കേക്കര കിഴക്ക് പനമുട്ടുകാട് പാടശേഖരത്തിലാണ് അപകടമുണ്ടായത്. പള്ളിപ്പാട് വടക്കേക്കര കിഴക്ക് പുത്തൻപുരയിൽ പരേതനായ രഘുവിന്‍റെ ഭാര്യ സരള(64)യാണ് മരിച്ചത്. കൂടെ പണിയെടുത്തിരുന്ന പളളിപ്പാട് വടക്കേക്കര കിഴക്ക് നേര്യംപറമ്പിൽ വടക്കതിൽ ശ്രീലത(52)യ്ക്കാണ് ഗുരുതരമായി പൊള്ളലേറ്റത്. ഇവർ ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ ചികിത്സയിലാണ്. പാടത്ത് പണിയെടുത്തുകൊണ്ടിരുന്ന ഇരുവരും വിശ്രമത്തിനായി കരയിലേക്ക് കയറുമ്പോൾ വീഴാതിരിക്കാൻ അടുത്ത് കണ്ട വൈദ്യുതപോസ്റ്റിന്റെ സ്റ്റേ വയറിൽ കയറി പിടിക്കുകയായിരുന്നു. ആദ്യം ശ്രീലതയാണ് ഷോക്കേറ്റ് തെറിച്ചുവീണത്. ഇവരെ രക്ഷിക്കാൻ വേണ്ടി എത്തിയ സരളയ്ക്കും ഷോക്കേറ്റ് വെള്ളത്തിലേക്ക് തെറിച്ചു വീഴുകയായിരുന്നു. സംഭവം കണ്ടയുടൻ അടുത്തുളള മോട്ടോർ തറയിലെ തൊഴിലാളി ഓടിയെത്തി വൈദ്യുത ബന്ധം വിച്ഛേദിക്കുകയും ആളുകളെ വിളിച്ചുകൂട്ടി ഇരുവരേയും ഹരിപ്പാട് താലൂക്ക് ആശുപത്രിയിലെത്തിക്കുകയുമായിരുന്നു. സരള ആശുപത്രിയിലെത്തിച്ചപ്പോഴേക്കും മരിച്ചിരുന്നു. മരിച്ച സരള മാതാവ് ഗൗരിയുമൊന്നിച്ചായിരുന്നു താമസം. സംസ്കാരം ഇന്ന് വൈകിട്ട് മൂന്നിന് വീട്ടുവളപ്പിൽ. മക്കൾ: നിഷ, നീതു. മരുമക്കൾ: രതീഷ്, രാജേഷ്. വൈദ്യുതപോസ്റ്റിൽനിന്നുള്ള സ്റ്റേവയർ ഏതു സമയത്തും പൊട്ടിവീണ് അപകടമുണ്ടാകുമെന്നും തകരാർ പരിഹരിക്കണമെന്നും വൈദ്യുത ബോർഡ് ജീവനക്കാരോടും ഓഫീസിലും അറിയിച്ചിരുന്നതാണെന്നും അധികൃതരുടെ അനാസ്ഥ കാരണമാണ് പാവപ്പെട്ട കർഷകത്തൊഴിലാളിയുടെ ജീവൻ നഷ്ടപ്പെടാനിടയായതെന്നും നാട്ടുകാർ ആരോപിച്ചു.

ആൾക്കൂട്ട കൊലപാതകം: മുഴുവൻ പ്രതികളും പിടിയിൽ

കായംകുളം: ആൾക്കൂട്ട കൊലപാതകക്കേസിൽ മുഴുവൻ പ്രതികളും അറസ്റ്റിൽ. ഒളിവിലായിരുന്ന ഒന്നാം പ്രതി രതീഷ്, രണ്ടാം പ്രതി അശ്വിൻ, ആറാം പ്രതി ശ്രീനാഥ് എന്നിവരെ പിടികൂടി. സാഹസികമായാണ് പോലീസ് ഇവരെ പിടികൂടിയത്. കൊല്ലപ്പെട്ട സജി പണയംവച്ച സ്വർണച്ചെയിൻ പോലീസ് കണ്ടെടുത്തു. രണ്ടരവയസുകാരിയുടെ സ്വർണാഭരണം കാണാതായതിനെത്തുടർന്ന് മോഷണക്കുറ്റം ആരോപിച്ച്‌ ആൾക്കൂട്ടത്തിന്‍റെ ക്രൂരമർദനത്തിനിരയായ ചേരാവള്ളി കോയിക്കൽ കിഴക്കതിൽ താമസിക്കുന്ന തിരുവനന്തപുരം കാരക്കോണം കുന്നത്ത് കോയിക്ക പടീറ്റതിൽ സജി (ഷിബു-50) ആണ് കഴിഞ്ഞ ദിവസം മരിച്ചത്. ഇദ്ദേഹം താമസിക്കുന്ന വീടിനു സമീപത്തെ രണ്ടു വയസുള്ള കുട്ടിയുടെ സ്വർണച്ചെയിൻ കാണാതായതിനെത്തുടർന്നാണ് കുട്ടിയുടെ പിതാവും ബന്ധുക്കളും അയൽവാസികളും ഉൾപ്പെടെ ആറുപേർ ചേർന്ന് മധ്യവയസ്കനെ ക്രൂരമായി മർദിച്ചത്. സംഭവുമായി ബന്ധപ്പെട്ട് കായംകുളം ചേരാവള്ളി കുന്നത്ത് കോയിക്കൽ പടീറ്റതിൽ വിഷ്ണു (30), ഭാര്യ അഞ്ജന (ചിഞ്ചു -28 ), വിഷ്ണുവിന്‍റെ മാതാവ് കനി (51) എന്നിവരെ ആദ്യം കായംകുളം പോലീസ് അറസ്റ്റ് ചെയ്ത് റിമാൻഡ് ചെയ്തിരുന്നു. മർദനമേറ്റ് കുഴഞ്ഞുവീണ സജിയെ നാട്ടുകാർ കായംകുളം താലൂക്ക് ആശുപത്രിയിലും പിന്നീട് വണ്ടാനം മെഡിക്കൽ കോളജിലും എത്തിച്ചെങ്കിലും മരണം സംഭവിക്കുകയായിരുന്നു.

ഷാഫിയെ മര്‍ദിച്ചത് സ്വര്‍ണക്കൊള്ളയില്‍നിന്ന് ശ്രദ്ധ തിരിക്കാന്‍: കൊടിക്കുന്നില്‍ സുരേഷ്

എടത്വ: ഷാഫി പറമ്പില്‍ എംപിക്ക് നേര്‍ക്ക് ആക്രമണം അഴിച്ചുവിട്ട പോലീസ് നടപടി ശബരിമല സ്വര്‍ണക്കൊള്ള വിഷയത്തില്‍നിന്ന് ശ്രദ്ധ തിരിക്കാനുള്ള സംസ്ഥാന സര്‍ക്കാര്‍ ശ്രമമെന്ന് കോണ്‍ഗ്രസ് പ്രവര്‍ത്തകസമിതി അംഗം കൊടിക്കുന്നില്‍ സുരേഷ് എംപി. തകഴിയില്‍ നടന്ന കുട്ടനാട് സൗത്ത് ബ്ലോക്ക് കോണ്‍ഗ്രസ് കമ്മിറ്റിയുടെ പ്രതിഷേധ പ്രകടനം ഉത്ഘാടനം ചെയ്യുകയായിരുന്നു അദ്ദേഹം. ഷാഫിയെ ആക്രമിച്ച പോലീസുകാര്‍ക്കെതിരേ കര്‍ശന നടപടിവേണമെന്ന് അദ്ദേഹം ആവശ്യപ്പെട്ടു. ബ്ലോക്ക് കോണ്‍ഗ്രസ് പ്രസിഡന്‍റ് ജോര്‍ജ് മാത്യു പഞ്ഞിമരം അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് സജി ജോസഫ്, എക്‌സിക്യൂട്ടീവ് അംഗം വി.കെ. സേവ്യര്‍, റോബര്‍ട്ട് ജോണ്‍സണ്‍, കെ.വി. ചാക്കോ, കെ.ജെ. സേവ്യര്‍, പി.ജെ. ജോസഫ്, തങ്കച്ചന്‍ കൂലിപുരയ്ക്കല്‍, കെ.ബി രഘു, ബിജു വരമ്പത്ത്, സാജു കടമ്മാട്, വര്‍ഗീസ് വല്ലാക്കന്‍, പി.എസ്. തോമസ്, ലാലിച്ചന്‍ പള്ളിവാതുക്കല്‍, സന്തോഷ് താഴത്തുരുത്ത്, സുഭാഷ് തൈത്തറ, സുരേഷ് തൈത്തറ ഉണ്ണികൃഷ്ണന്‍, ജയശ്രീ വേണുഗോപാല്‍, എസ.് ശ്രീജിത്ത്, ഗോകുല്‍ ഷാജി, ജിയോ ചേന്നങ്കര, മണിയന്‍ തകഴി, ഷാജി മുടന്താഞ്ജലി, എന്‍.എസ്. കുഞ്ഞുമോന്‍, എസ്.ജി. ഗീതാഞ്ജലി, വില്‍സണ്‍ ചാക്കോ എന്നിവര്‍ പ്രസംഗിച്ചു.

മർദിച്ചതായി പരാതി

തുറവൂർ: എരമല്ലൂർ കോന്നനാട് ഭഗവതി ക്ഷേത്രം പ്രസിഡന്‍റും കുടപുറം ദേവസ്ഥാനപുരം സുബ്രഹ്മണ്യ ക്ഷേത്രം മേൽശാന്തിയുമായ എരമല്ലൂർ കായിപ്പുറത്ത് ടി. കമലനെ (കമലൻ ശാന്തി -54) മരുമകന്‍റെ ബന്ധുക്കൾ ക്രൂരമായി മർദിച്ചതായി പരാതി. മുൻഭാഗത്തെ രണ്ടു പല്ലുകൾ അടർന്നുപോകുകയും അവശനിലയിലാകുകയും ചെയ്ത കമലനെ എറണാകുളം ജനറൽ ആശുപത്രിയിൽ പ്രവേശിപ്പിച്ചു. ഇന്നലെ വൈകുന്നേരം മൂന്നിനായിരുന്നു സംഭവം. പ്രണയിച്ച യുവാവുമായി ശാന്തിയുടെ മകൾ ഏതാനും ദിവസങ്ങൾക്കു മുമ്പാണ് വിവാഹിതരായത്. വിവാഹത്തിന് പങ്കെടുത്തെങ്കിലും പിന്നീട് മകളെ കാണാനോ സംസാരിക്കാനോ കഴിയാതിരുന്നതിൽ കമലൻ വലിയ മനോവിഷമത്തിലായിരുന്നു. ഇതേത്തുടർന്നാണ് മകളെ വിവാഹം കഴിച്ചയച്ച വീട്ടിലേക്ക് കമലൻ ചില ബന്ധുക്കളുമായി പോയത്. സമീപത്തെ വീടിനു മുന്നിൽ എത്തിയ കമലനെ മരുമകൻ സ്നേഹത്തോടെ വീട്ടിലേക്കു ക്ഷണിച്ചു. എന്നാൽ, ഇത് തടഞ്ഞ ബന്ധുക്കളിൽ ചിലർ സംഘം ചേർന്ന് കമലനെ ക്രൂരമായി മർദിക്കുകയായിരുന്നു. ഇടിയുടെ ശക്തിയിൽ കമലന്‍റെ മുൻഭാഗത്തെ രണ്ടു പല്ലുകൾ അടർന്നുപോയി. തടയാനെത്തിയ കമലന്‍റെ മകൻ ഹരികൃഷ്ണ(21)നും മർദനമേറ്റു. അവശനിലയിലായ കമലനെ ഉടൻതന്നെ തുറവൂർ ഗവ. ആശുപത്രിയിലും തുടർന്ന് എറണാകുളം ജനറൽ ആശുപത്രിയിലും പ്രവേശിപ്പിച്ചു. അരൂർ പോലീസിൽ പരാതി നൽകി.

കണ്ടെയ്നറിലിടിച്ച് വള്ളത്തിനും വലയ്ക്കും കേടുപാട്

ഹരിപ്പാട്: കടലിൽ താഴ്ന്നുകിടന്ന കണ്ടെയ്നറിലിടിച്ച് വള്ളത്തിനും വലയ്ക്കും കേടുപറ്റി. ആറാട്ടുപുഴ നാലുതെങ്ങിൽ ഷാഫിയുടെ ഉടമസ്ഥതയിലുള്ള സഞ്ചാരി വള്ളം ആലപ്പാട് അമൃതാനന്ദമയി മഠത്തിൽ പടിഞ്ഞാറ് മത്സ്യബന്ധനം നടത്തുമ്പോഴാണ് കണ്ടെയ്നർ ഭാഗം വലയിൽ കുടുങ്ങിയത്. സമീപത്തുണ്ടായിരുന്ന മിന്നൽക്കൊടി വള്ളത്തിലെ തൊഴിലാളികളുടെ സഹായത്തോടെ കണ്ടെയ്നർ ഭാഗം വലിച്ചുകയറ്റി. വള്ളത്തിനും സാരമായ തകരാർ സംഭവിച്ചു. രണ്ടു ലക്ഷം രൂപയുടെ നഷ്ടം കണക്കാക്കുന്നു. കോസ്റ്റൽ പോലീസിനെ വിവരം അറിയിച്ചു.

പട്ടയത്തിനുള്ള വരുമാനപരിധി രണ്ടരലക്ഷം ആക്കും: മന്ത്രി കെ. രാജൻ

അമ്പലപ്പുഴ: പട്ടയത്തിനുള്ള വരുമാനപരിധി രണ്ടരലക്ഷം ആക്കി ഉയര്‍ത്തുമെന്ന് റവന്യു മന്ത്രി കെ. രാജന്‍. ഭട്ടതിരി പുരയിടവുമായി ബന്ധപ്പെട്ട നഗരസഭ മുന്നോട്ടുവച്ച പ്രശ്‌നങ്ങള്‍ക്കു പരിഹാരം കാണുന്നതിന് നാളെ ഉച്ചയ്ക്ക് 12ന് ഓണ്‍ലൈനായി ഉന്നതതലയോഗം ചേരും. ആലപ്പുഴ മുനിസിപ്പല്‍ തൊഴിലാളികളുടെ പട്ടയപ്രശ്‌നത്തിനും പരിഹാരം കാണുമെന്ന് മന്ത്രി പറഞ്ഞു. അമ്പലപ്പുഴ മണ്ഡലം വികസന മഹോത്സവത്തിന്‍റെയും പട്ടയ വിതരണത്തിന്‍റെ യും ഉദ്ഘാടനവും ആലപ്പുഴ പടിഞ്ഞാറ് സ്മാര്‍ട്ട് വില്ലേജ് ഓഫീസിന്‍റെ ശിലാസ്ഥാപനവും വലിയകുളം ജംഗ്ഷനില്‍ നിര്‍വഹിച്ചു സംസാരിക്കുകയായിരുന്നു മന്ത്രി. അമ്പലപ്പുഴ മണ്ഡലത്തോടൊപ്പം കേരളത്തിലെ എല്ലാ നിയോജക മണ്ഡലങ്ങളിലും വികസന കൊടുങ്കാറ്റ് വീശിയതായി മന്ത്രി കെ.രാജന്‍ പറഞ്ഞു. വരുന്ന നവംബര്‍ ഒന്നിന് കേരളം അതി ദരിദ്രരില്ലാത്ത സംസ്ഥാനമെന്ന ചരിത്ര നേട്ടത്തിലേക്ക് കടക്കുകയാണ്. ഭൂരഹിതര്‍ ഇല്ലാത്ത കേരളം എന്ന നയത്തിന്‍റെ ഭാഗമായി 4,09,998 പട്ടയങ്ങള്‍ വിതരണം ചെയ്തു കഴിഞ്ഞെന്നും മന്ത്രി കൂട്ടിച്ചേർത്തു. എച്ച്. സലാം എംഎല്‍എ ചടങ്ങില്‍ അധ്യക്ഷത വഹിച്ചു. 1809 കോടി രൂപയുടെ വികസനമാണ് അമ്പലപ്പുഴ മണ്ഡലത്തില്‍ ഉണ്ടായിരിക്കുന്നതെന്ന് എച്ച്. സലാം എംഎല്‍എ പറഞ്ഞു. ജില്ലാ കളക്ടര്‍ അലക്‌സ് വര്‍ഗീസ്, ആലപ്പുഴ നഗരസഭാ ചെയര്‍പേഴ്‌സണ്‍ കെ.കെ. ജയമ്മ, വൈസ് ചെയര്‍മാന്‍ പി.എസ്.എം. ഹുസൈന്‍, സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍മാരായ എ.എസ്. കവിത, എം.ആര്‍. പ്രേം, വാര്‍ഡ് കൗണ്‍സിലര്‍മാരായ ഇല്ലിക്കല്‍ കുഞ്ഞുമോന്‍, സിമി ഷാഫി ഖാന്‍, പ്രഭാ ശശികുമാര്‍, എഡിഎം ആശ ഏബ്രഹാം, അജയ് സുധീന്ദ്രന്‍, ആര്‍. സുരേഷ്, നസീര്‍ സലാം, ജമാല്‍ പള്ളാത്തുരുത്തി, എ.എം. നൗഫല്‍ തുടങ്ങിയവര്‍ പ്രസംഗിച്ചു.

കിഴക്കിന്‍റെ വെനീസിന് നിറച്ചാർത്തായി മെഗാ ഡ്രോയിംഗ് ആൻഡ് കളറിംഗ് മത്സരം

ആലപ്പുഴ: ചേർത്തല കെഇ കാർമൽ സിഎംഐ സ്കൂളിന്‍റെ നേതൃത്വത്തിൽ നടത്തിയ മൂന്നാമത് മെഗാ ഡ്രോയിംഗ് ആൻഡ് കളറിംഗ് മത്സരം കിഴക്കിന്‍റെ വെനീസിന് നിറച്ചാർത്തായി. ആലപ്പുഴ ശക്തി ഓഡിറ്റോറിയത്തിൽ നടന്ന മത്സരത്തിൽ ആയിരത്തോളം കുരുന്നുകൾ മാറ്റുരച്ചു. മേലുവള്ളി, ശക്തി, റോയൽ എന്നീ ഓഡിറ്റോറിയങ്ങളാണ് മത്സരത്തിന് വേദിയായത്. ആലപ്പുഴ എംഎൽഎ പി.പി. ചിത്തരഞ്ജനും മുൻസിപ്പൽ ചെയർപേഴ്സൻ കെ.കെ. ജയമ്മയും ചേർന്നാണ് ഉദ്ഘാടനം നിർവഹിച്ചത്. വർണവിസ്മയം തീർത്ത ഈ കലാവിരുന്നിൽ കേരളത്തിലെതന്നെ മികച്ച സ്കൂളുകളിൽനിന്നുള്ള വിദ്യാർഥികളാണ് പങ്കെടുത്തത്. നാടിന് അഭിമാനവും മാതൃകയുമായി മാറിക്കൊണ്ടിരിക്കുന്ന ചേർത്തല കെഇ കാർമൽ സിഎംഐ സ്കൂൾ പഠനമികവുകൾക്കൊപ്പം കുട്ടികളുടെ കലാപരമായ കഴിവുകളെ പ്രോത്സാഹിപ്പിക്കുന്നത് പ്രശംസനീയമാണെന്ന് പി.പി. ചിത്തരഞ്ജൻ പറഞ്ഞു. ഇത്തരം ഉദ്യമങ്ങൾക്കു നേതൃത്വം നൽകുന്ന സ്കൂളിനെയും മാനേജ്മെന്‍റിനെയും എംഎൽഎ അഭിനന്ദിച്ചു. വിദ്യാർഥികളുടെ സർഗാത്മക ചിന്തകൾ പ്രകടിപ്പിക്കാനും വരയിലൂടെ അവരുടെ ആശയങ്ങൾ ജീവസുറ്റതാക്കാനും മത്സരം ഒരു മികച്ച അവസരം ഒരുക്കുന്നുവെന്നും അദ്ദേഹം പറഞ്ഞു. പുതുതലമുറയ്ക്ക് അവസരങ്ങൾ ഒരുക്കുന്നതിലൂടെ നന്മയുള്ള ഒരു സമൂഹത്തെ വാർത്തെടുക്കുക എന്നതാണ് സ്കൂൾ ലക്ഷ്യമിടുന്നതെന്നും സ്കൂൾ പ്രിൻസിപ്പൽ ഡോ. സാംജി വടക്കേടം സിഎംഐ അഭിപ്രായപ്പെട്ടു. പങ്കെടുത്ത എല്ലാ കുട്ടികൾക്കും പാർട്ടിസിപ്പേഷൻ സർട്ടിഫിക്കറ്റും മെഡലുകളും സമ്മാനങ്ങളും വിതരണം ചെയ്തു. മത്സരഫലം 31ന് സ്കൂൾ വെബ്സൈറ്റ് വഴി പ്രസിദ്ധീകരിക്കും. ഒന്നാം സമ്മാനം 5000 രൂപയും രണ്ടാം സമ്മാനം 3000 രൂപയും മൂന്നാം സമ്മാനം 2000 രൂപയും 15 കുട്ടികൾക്ക് പ്രത്യേക പാരിതോഷികമായി 500 രൂപയും നൽകും. വിജയി കൾക്കുള്ള സമ്മാനദാനച്ചടങ്ങ് ഡിസംബർ അഞ്ചിന് സംഘടിപ്പിക്കും.

ലോകോത്തര വിദ്യാഭ്യാസം നൽകുക ലക്ഷ്യം: മന്ത്രി ശിവൻകുട്ടി

പൂച്ചാക്കൽ: വിദ്യാർഥികൾക്കു ലോകോത്തര വിദ്യാഭ്യാസം നൽകുകയാണ് സർക്കാരിന്‍റെ ലക്ഷ്യമെന്ന് വിദ്യാഭ്യാസ മന്ത്രി വി. ശിവൻകുട്ടി. അരൂർ എംഎൽഎയുടെ ആസ്തി വികസന ഫണ്ടും സംസ്ഥാന സർക്കാർ ഫണ്ടും വിനിയോഗിച്ചു നടത്തിയ വികസന പദ്ധതികളുടെ ഉദ്ഘാടനത്തിന്‍റെ ഭാഗമായുള്ള വികസനോത്സവത്തിൽ പ്രസംഗിക്കുകയായിരുന്നു മന്ത്രി. അരൂരിൽ ഉദ്ഘാടനം ചെയ്യപ്പെടുന്ന പുതിയ സ്‌കൂൾ കെട്ടിടങ്ങൾ ഇതിന്‍റെ തെളിവാണ്. 56 ലക്ഷം രൂപ ചെലവഴിച്ച തളിയാപറമ്പ് ഗവൺമെന്‍റ് എൽപി സ്‌കൂളിന്‍റെ പുതിയ കെട്ടിടം മികച്ച പഠനാന്തരീക്ഷം ഒരുക്കും. 40 ലക്ഷത്തിന്‍റെ രണ്ടാം കെട്ടിട നിർമാണവും പുരോഗമിക്കുന്നു. ജിഎച്ച്എസ്എസ് തേവർവട്ടം, ഓടമ്പള്ളി ഗവൺമെന്‍റ് യുപി സ്കൂളിലും പുതിയ കെട്ടിടങ്ങൾ വരുന്നു. ക്ലാസ് മുറികൾ ഹൈടെക് ആവുക മാത്രമല്ല അന്താരാഷ്‌ട്ര നിലവാരത്തിലുള്ള കെട്ടിടങ്ങളും ലാബുകളും ലൈബ്രറികളും കളിസ്ഥലങ്ങളും ഒരുക്കി കുട്ടികൾക്കു ലോകോത്തര വിദ്യാഭ്യാസം നൽകുക എന്നതാണ് ലക്ഷ്യം. തളിയാപറമ്പ് ഗവ.എൽപി സ്കൂളിൽ നടന്ന ചടങ്ങിൽ ദലീമ ജോജോ എംഎൽഎ അധ്യക്ഷയായി. തൈക്കാട്ടുശേരി ബ്ലോക്ക് പഞ്ചായത്ത് പ്രസിഡന്‍റ് വി.ആർ. രജിത മുഖ്യപ്രഭാഷണം നടത്തി. പാണാവള്ളി പഞ്ചായത്ത് രാഗിണി രമണൻ, തൈക്കാട്ടുശേരി പഞ്ചായത്ത് പ്രസിഡന്‍റ് ബി. ഷിബു, പഞ്ചായത്ത് വൈസ് പ്രസിഡന്‍റുമാരായ കെ.ഇ. കുഞ്ഞുമോൻ, അംബിക ശശിധരൻ, തൈക്കാട്ടുശേരി ബ്ലോക്ക് അംഗം പി.എം. പ്രമോദ്, സ്ഥിരംസമിതി അധ്യക്ഷയായ രാജി മോൾ, തൈക്കാട്ടുശേരി പഞ്ചായത്ത് മുൻ പ്രസിഡന്‍റ് ഡി. വിശ്വംഭരൻ, ഹാർബർ എൻജിയറിംഗ് എക്സിക്യൂട്ടീവ് എൻജിനിയർ എം.പി. സുനിൽ തുടങ്ങിയവർ പങ്കെടുത്തു.

ചെങ്ങന്നൂർ റെയിൽവേ സ്റ്റേഷൻ: മുഴുവൻ സമയം പോലീസ് വേണം

ചെങ്ങന്നൂർ: ശബരിമല സീസണിൽ തീർഥാടകർക്കായി തുറക്കുന്ന ചെങ്ങന്നൂർ റെയിൽവേ സ്റ്റേഷനിലെ പോലീസ് എയ്ഡ് പോസ്റ്റും പ്രീപെയ്ഡ് ഓട്ടോ-ടാക്സി കൗണ്ടറും വർഷം മുഴുവനും 24 മണിക്കൂറും പ്രവർത്തന സജ്ജമാക്കണമെന്ന ആവശ്യം ശക്തമാകുന്നു. ശബരിമല സീസൺ അവസാനിക്കുന്നതോടെ ഈ ക്രമീകരണങ്ങൾ നിലയ്ക്കുന്നതാണ് പതിവ്. ഇത് സീസൺ കഴിഞ്ഞും പ്രവർത്തിച്ചാൽ സ്റ്റേഷനിലെത്തുന്ന നൂറു കണക്കിനു യാത്രക്കാർക്ക് അതു പ്രയോജനം ചെയ്യുമെന്നു ചൂണ്ടിക്കാണിക്കപ്പെടുന്നു. വാഹനങ്ങൾ കിട്ടുന്നില്ല സീസൺ അല്ലാത്ത സമയങ്ങളിൽ ട്രെയിനിൽ വന്നിറങ്ങുന്ന യാത്രക്കാർ നേരിടുന്ന പ്രധാന വെല്ലുവിളി ഓട്ടോ-ടാക്സി ഡ്രൈവർമാരുടെ സഹകരണമില്ലായ്മയാണ്. പ്രത്യേകിച്ചും സ്റ്റേഷനിൽ നിന്ന് അടുത്തുള്ള സ്ഥലങ്ങളിലേക്കു പോകുന്നതിന് ഓട്ടം വിളിച്ചാൽ പലരും വരാറില്ലെന്നാണ് പരാതി. ശബരിമല സീസണിൽ സുഗമമായി പ്രവർത്തിക്കുന്ന പ്രീ പെയ്ഡ് കൗണ്ടർ സീസൺ കഴിഞ്ഞാൽ പ്രവർത്തിക്കാറില്ല. ഇതിനു മാറ്റം വരണം. ശബരിമല സീസണിൽ നൽകുന്ന സുരക്ഷാ-യാത്രാ സൗകര്യങ്ങൾ എല്ലാ ദിവസവും ലഭ്യമാക്കണമെന്നാണ് യാത്രക്കാരുടെ ആവശ്യം.

ആലപ്പുഴ സഹോദയ സ്കൂൾസ് ജില്ലാ കലോത്സവത്തിനു കൊടിയിറങ്ങി

അമ്പലപ്പുഴ: ആലപ്പുഴ സഹോദയ സ്കൂൾസ് കോംപ്ലക്സ് 19 -ാ മത് സിബിഎസ്ഇ ജില്ലാ കലോത്സവം സമാപിച്ചു. അഞ്ചു ദിവസങ്ങളിലായി ആലപ്പുഴ കളർകോട് ചിന്മയ വിദ്യാലയത്തിൽ നടന്ന കലോത്സവത്തിന്‍റെ സമാപന സമ്മേളനം നടന്നു. 6, 7 , 9, 10, 11 തീയതികളിലായി നടന്ന കലോത്സവത്തിൽ ആലപ്പുഴ ജില്ലയിലെ 53 സ്കൂളുകളിൽനിന്നായി 3000ത്തിലേറെ കുട്ടികൾ വിവിധ മത്സരങ്ങളിൽ മാറ്റുരച്ചു. സമാപന സമ്മേളനത്തിൽ സഹോദയ പ്രസിഡന്‍റ് ഡോ. എ. നൗഷാദ് അധ്യക്ഷത വഹിച്ചു. ചിന്മയ വിദ്യാലയ പ്രിൻസിപ്പൽ ഡോ. ആർ.എസ്. രേഖ സ്വാഗതം ആശംസിച്ചു. അമ്പലപ്പുഴ എംഎൽഎ എച്ച്. സലാം സമാപന സമ്മേളനവും സമ്മാനവിതരണവും ഉദ്ഘാടനം ചെയ്തു. സമ്മേളനത്തിൽ കലോത്സവം പ്രോഗ്രാം കമ്മിറ്റി കൺവീനർ, സഹോദയ സെക്രട്ടറി ആശ യതീഷ് , വിദ്യാലയ പ്രസിഡന്‍റ് ഡോ. കെ. നാരായണൻ, എക്സിക്യൂട്ടീവ് അംഗങ്ങൾ, ഫാ. ജെയ്സൺ പി.എ., മിനി ചാക്കോ, സവിത എസ്. ചന്ദ്രൻ എന്നിവർ സംസാരിച്ചു. ട്രഷറർ ഡയാന ജേക്കബ് നന്ദി പറഞ്ഞു.

ഇലഞ്ഞിമേൽ ഗാന്ധിഭവൻ ദേവാലയത്തിന്‍റെ അമ്മവീട് രണ്ടാം വാർഷികാഘോഷം

ചെങ്ങന്നൂർ: ഇലഞ്ഞിമേൽ ഗാന്ധിഭവൻ ദേവാലയത്തിന്‍റെ അമ്മവീട് രണ്ടാം വാർഷികാഘോഷം ഇന്ന് രാവിലെ 11ന് നടക്കും. സാംസ്കാരിക സമ്മേളനം മന്ത്രി സജി ചെറിയാൻ ഉദ്ഘാടനം ചെയ്യും. പുലിയൂർ പഞ്ചായത്ത് പ്രസിഡന്‍റ് എം.ജി. ശ്രീകുമാർ അധ്യക്ഷത വഹിക്കും. ഡോ. പുനലൂർ സോമരാജൻ ആമുഖ പ്രഭാഷണം നടത്തും. ബംഗളൂരു ഇന്ദിരാഗാന്ധി കോളജ് ഓഫ് നഴ്സിംഗ് ഡയറക്ടർ പി.വി. പ്രസാദ് പട്ടശേരിയിൽ സംഭാവന ചെയ്ത വാഹനത്തിന്‍റെ താക്കോൽദാനവും നടക്കും. മാന്നാർ എസ്എൻഡിപി യൂണിയൻ കൺവീനർ അനിൽ പി. ശ്രീരംഗം മുഖ്യപ്രഭാഷണം നടത്തും. സ്വാമി ശിവബോധാനന്ദ, സഫലബത്ത് ദാരിമി, ഫാ. സൈമൺ വർഗീസ്, ജി. വേണുഗോപാൽ, ഡോ. ഷാഹിദാ കമാൽ തുടങ്ങിയവർ അനുഗ്രഹപ്രഭാഷണങ്ങൾ നടത്തുമെന്ന് ഗാന്ധിഭവൻ ദേവാലയം ഡയറക്ടർ ഗംഗാധരൻ ശ്രീഗംഗ, വെൽഫെയർ ഓഫീസർ ബാബു കല്ലുത്തറ, മാനേജർ പ്രസന്ന തുടങ്ങിയവർ പറഞ്ഞു.

മാരാരിക്കുളം തെക്ക് ഗ്രാമപഞ്ചായത്ത് വികസനസദസ് ഇന്ന്

ആലപ്പുഴ: സംസ്ഥാനത്തെ മുഴുവന്‍ തദ്ദേശ സ്ഥാപനങ്ങളിലും സംഘടിപ്പിക്കുന്ന വികസന സദസുകളില്‍ മാരാരിക്കുളം തെക്ക് പഞ്ചായത്തിന്‍റെ വികസനസദസ് ഇന്നു രാവിലെ 10.30ന് മാരൻകുളങ്ങര ക്ഷേത്രം ഓഡിറ്റോറിയത്തിൽ പി.പി. ചിത്തരഞ്ജൻ എംഎൽഎ ഉദ്ഘാടനം ചെയ്യും. അതിദാരിദ്ര്യമുക്ത പഞ്ചായത്ത് പ്രഖ്യാപനവും പ്രമുഖ വ്യക്തികളെ ആദരിക്കലും ജില്ലാ പഞ്ചായത്ത് പ്രസിഡന്‍റ് കെ. ജി. രാജേശ്വരിയും ലൈഫ് ഭവനപദ്ധതി താക്കോൽ ദാനകർമം ആര്യാട് ബ്ലോക്ക് പഞ്ചായത്ത് പ്രസിഡന്‍റ് കെ.ഡി. മഹീന്ദ്രനും നിർവഹിക്കും. ഉദ്ഘാടന ചടങ്ങിൽ പഞ്ചായത്ത് പ്രസിഡന്‍റ് പി.പി. സംഗീത അധ്യക്ഷയാകും. ജില്ലാ പഞ്ചായത്ത് സെക്രട്ടറി വി. പ്രദീപ്കുമാർ പ്രോഗ്രസ് റിപ്പോർട്ട് പ്രകാശനം ചെയ്യും. തദ്ദേശ സ്വയംഭരണ സ്ഥാപനം കൈവരിച്ച നേട്ടങ്ങൾ പഞ്ചായത്ത് സെക്രട്ടറി കെ. സാബുമോൻ അവതരിപ്പിക്കും. സംസ്ഥാന സർക്കാരിന്‍റെ വികസന, ക്ഷേമ പ്രവർത്തനങ്ങൾ റിസോഴ്സ് പേഴ്സൺ ജി. വിനോദ്കുമാർ അവതരിപ്പിക്കും. പഞ്ചായത്ത് വൈസ് പ്രസിഡന്‍റ് ടി.പി. ഷാജി ഓപ്പൺ ഫോറം നയിക്കും. ജില്ലാ പഞ്ചായത്തംഗം അഡ്വ. ആർ. റിയാസ്, ഗ്രാമവാസികള്‍, ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുക്കും. ചേർത്തല നഗരസഭയുടെ ആഭിമുഖ്യത്തില്‍ നടത്തുന്ന കേരളോത്സവത്തിന്‍റെ ഉദ്ഘാടനം നഗരസഭാ ചെയര്‍പേഴ്സണ്‍ ഷേർളി ഭാർഗവൻ നിർവഹിക്കുന്നു.

മുട്ടാർ സെന്‍റ് ജോർജ് എച്ച്എസ്എസിൽ ത്രിദിന ക്യാമ്പ്

ചമ്പക്കുളം: മുട്ടാർ സെന്‍റ് ജോർജ് ഹയർ സെക്കൻഡറി സ്കൂളിൽ ഭാരത് സ്കൗട്ട് ആൻഡ് ഗൈഡ് യൂണിറ്റിന്‍റെ ത്രിദിന ക്യാമ്പ് ആരംഭിച്ചു. ഭാരത് സ്കൗട്ട് ആൻഡ് ഗൈഡ് ജില്ലാ സെക്രട്ടറി ജെസി സേവ്യർ ക്യാമ്പ് ഉദ്ഘാടനം ചെയ്തു. പ്രിൻസിപ്പൽ ഈശോ തോമസ് അധ്യക്ഷത വഹിച്ചു. മുട്ടാർ പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ലിബിമോൾ വർഗീസ്, അധ്യാപക പ്രതിനിധി പിന്‍റു ഡി. കളരിപ്പറമ്പിൽ, പിടിഎ പ്രസിഡന്‍റ് സിബിച്ചൻ സി., സ്കൗട്ട് മാസ്റ്റർ ബിൻസു ജേക്കബ്, റെയിഞ്ചർ ലീഡർ റീത്താമ്മ തോമസ് എന്നിവർ പ്രസംഗിച്ചു. പ്രഥമശുശ്രൂഷ പരിശീലനം, ലഹരിവിരുദ്ധ ബോധവത്കരണം, പരിസ്ഥിതി ശുചീകരണം എന്നീ വിഷയങ്ങളെ അടിസ്ഥാനപ്പെടുത്തിയാണ് ക്യാമ്പ് നടത്തുന്നത്.

വാറ്റുചാരായവുമായി പിടിയില്‍

ചേര്‍ത്തല: എക്‌സൈസ് പരിശോധനയില്‍ വീടിനോടു ചേര്‍ന്ന ഷെഡില്‍നിന്നു 4.5 ലിറ്റര്‍ വാറ്റുചാരായവും 50 ലിറ്റര്‍ കോടയും വാറ്റുപകരണങ്ങളുമായി ഒരാള്‍ പിടിയില്‍. മാരാരിക്കുളം വടക്ക് പഞ്ചായത്ത് ഒമ്പതാം വാര്‍ഡ് വളയംചിറവീട്ടില്‍ വി.എന്‍. വിനോദാണ് പിടിയിലായത്. ചേര്‍ത്തല എക്‌സൈസ് റേഞ്ച് ഓഫീസിലെ ഗ്രേഡ് എസ്‌ഐ പി. ബിനേഷിന്‍റെ നേതൃത്വത്തിലായിരുന്നു പരിശോധന. ഗ്രേഡ് എസ്‌ഐ ഉണ്ണികൃഷ്ണന്‍നായര്‍, പ്രിവന്‍റീവ് ഓഫീസര്‍ പി.ഒ. സാലിച്ചന്‍, സിഇഒമാരായ ഉമേഷ്, ശ്രീജ, ഡ്രൈവര്‍ ഓസ്ബര്‍ട്ട് ജോസ് എന്നിവരുമുണ്ടായിരുന്നു.

ഗൃഹനാഥൻ വെള്ളക്കെട്ടിൽ മരിച്ചനിലയിൽ

അമ്പലപ്പുഴ: ഗൃഹനാഥനെ വെള്ളക്കെട്ടിൽ വീണു മരിച്ചനിലയിൽ കണ്ടെത്തി. കാക്കാഴം പുതിയവീട് കന്നിട്ടചിറയിൽ ഗോപി (73)യെയാണ് ശനിയാഴ്ച വൈകിട്ട് 3.30ന് നാലുപാടം പാടശേഖരത്തെ സ്വന്തം കൃഷിയിടത്തിനു സമീപം മരിച്ചനിലയിൽ കണ്ടെത്തിയത്. രാവിലെ പാടത്തേക്കു പോയ ഗോപി ഏറെ നേരമായിട്ടും തിരികെ എത്താതായതിനെത്തുടർന്നു നടത്തിയ അന്വഷണത്തിനൊടുവിലാണ് മൃതദേഹം കണ്ടെത്തിയത്. വണ്ടാനം മെഡിക്കൽ കോളജ് ആശുപത്രി മോർച്ചറിയിൽ പോസ്റ്റ്മോർട്ടത്തിനു ശേഷം സംസ്കാരം ഇന്നു വീട്ടുവളപ്പിൽ നടത്തും. ഭാര്യ: രഘുപതി. മക്കൾ: അനീഷ്, വിനീഷ്, നിഷ. മരുമക്കൾ: സുനിത, നീതു, സുധാകരൻ.

സംഘര്‍ഷത്തിനിടെ പരിക്കേറ്റ വയോധികന്‍ മരിച്ചു

ചേർത്തല: സംഘർഷത്തിനിടെ പരിക്കേറ്റ് ചികിത്സയിലായിരുന്ന വയോധികൻ മരിച്ചു. ചേർത്തല തെക്ക് പഞ്ചായത്ത് 11ാം വാർഡ് ഇലഞ്ഞിയിൽ ഭാഗം ചാരക്കാപറമ്പ് ദേവിപ്രസാദാണ് (61) മരിച്ചത്. കഴിഞ്ഞ 30ന് 11ാം മൈലിനു പടിഞ്ഞാറ് പിഎസ് കവലയ്ക്കു സമീപം പ്രദേശവാസികളായ രണ്ടു പേർ തമ്മിൽ സംഘർഷം നടക്കുന്നതിനിടെയാണ് ദേവീപ്രസാദിനു പരിക്കേറ്റത്. നാടക കലാകാരനായ ഇയാൾ നിലവിൽ ലോട്ടറി വിൽപ്പന നടത്തുകയായിരുന്നു. പരിക്കേറ്റ പ്രസാദ് ചികിത്സയിലിരിക്കെ ആലപ്പുഴ മെഡിക്കൽ കോളജിൽ വെള്ളിയാഴ്ച വൈകിട്ട് മരിച്ചു. അർത്തുങ്കൽ പോലീസ് അസ്വഭാവിക മരണത്തിന് കേസെടുത്തു. സംസ്കാരം നടത്തി. ഭാര്യ: ലത. മകൾ:ശ്രീക്കുട്ടി (ഗ്രാമീൺ ഡാക് സേവക്, മാരാരിക്കുളം പോസ്റ്റ് ഓഫീസ്). മരുമകൻ: ആദിത്ത്

കരുണാലയ ഹോസ്പീസ്‌ പാലിയേറ്റീവ് ദിനചാരണം

ആലപ്പുഴ: ഉമ്മൻ ചാണ്ടി ഫൗണ്ടേഷൻ ആൻഡ് പാലിയേറ്റീവ് കെയർ നടത്തിവരുന്ന നിരവധി സാമൂഹ്യ, സന്നദ്ധ പ്രവർത്തനങ്ങളുടെ ഭാഗമായി വേൾഡ് ഹോസ്പീസ് ആൻഡ് പാലിയേറ്റീവ് കെയർ ദിനംകരുണാലയ ഹോസ്പീസ്‌ അങ്കണത്തിൽ ആചരിച്ചു. നിരവധി അസുഖങ്ങൾ ബാധിച്ച് അവശതയിൽ കരുണാലയ ഹോസ്പീസിൽ കഴിയുന്നവർക്കുവേണ്ടി വീൽചെയറും ശുചീകരണ സാമഗ്രികളും ഹോസ്പീസ് ചുമതല വഹിക്കുന്ന സിസ്റ്റർ ലിറ്റൽ മേരിക്കു കൈമാറി. പാലിയേറ്റീവ് ദിനചാരണം ഡോ. ആർ പ്രഭാഷ് ഉദ്ഘാടനം ചെയ്തു, ഫൗണ്ടേഷൻ പ്രസിഡന്‍റ് അഡ്വ. പി.ജെ. മാത്യു അധ്യക്ഷത വഹിച്ചു, സുനിൽ ജോർജ്, ഷഫീഖ് പാലിയേറ്റീവ്, ടോമിച്ചൻ മേത്തശേരി, മുജീബ് അസീസ്, ലത്തീഫ് വയലാർ, എ.സി. മാർട്ടിൻ, ജമീല ബീവി, സി. സുഭാഷ്, കരുണാലയ ഹോസ്പീസ് ചുമതലക്കാരായ സിസ്റ്റർമാരായ ലിറ്റിൽ മേരി, ജോസ്മി, ടിസ തുടങ്ങിയവർ പ്രസംഗിച്ചു.

ദേശീയപാതയിലെ ആദ്യത്തെ നടപ്പാലം പൂർത്തീകരണത്തിലേക്ക്

തുറവൂർ: ദേശീയപാതയിലെ ആദ്യത്തെ നടപ്പാല നിർമാണം പൂർത്തീകരണത്തിലേക്ക്. പട്ടണക്കാട് മിൽമ ഫാക്ടറിക്കു മുമ്പിലെ നടപ്പാലമാണ് ഉയർന്നത്. 45 മീറ്റർ നീളത്തിലും രണ്ടു മീറ്റർ വീതിയിലും ആണ് മേൽ നടപ്പാലങ്ങൾ നിർമിക്കുന്നത്. 18 നടപ്പാലങ്ങളാണ് ഇത്തരത്തിൽ നിർമിക്കുന്നത്. മുഖ്യമായും സ്കൂളുകളുടെയും ദേവാലയങ്ങളുടെയും മറ്റു തിരക്കേറിയ സ്ഥലങ്ങളിലുമാണ് ഇത്തരത്തിൽ മേൽപ്പാലം നിർമിക്കുന്നത്. പൊന്നാംവെളിയിലും പുത്തൻചന്തയിലും മേൽ നടപ്പാലം നിർമിക്കാൻ നീക്കമുണ്ടായെങ്കിലും ഇവിടങ്ങളിൽ അടിപ്പാത നിർമിക്കണമെന്ന ജനകീയ ആവശ്യത്തെത്തുടർന്ന് നിർമാണം നിർത്തിവച്ചിരിക്കുകയാണ്. പൊന്നാംവെളിയിൽ അടിപ്പാത നിർമിക്കണമെന്ന് ഹൈക്കോടതിയുടെ ഉത്തരവും നിലനിൽക്കുന്നു. തിരക്കുള്ള സ്ഥലങ്ങളിലും സ്കൂൾ, ദേവാലയപരിസരങ്ങളിലും ഇത്തരം നടപ്പാലം നിർമിക്കുന്നത് ഇവിടുത്തെ ജനങ്ങൾക്കും സ്കൂൾകുട്ടികൾക്കും വളരെ ഉപകാരപ്രദമാണ്.

ആലപ്പുഴ നഗരസഭാ കേരളോത്സവം 24ന്

ആലപ്പുഴ: ഈ വര്‍ഷത്തെ ആലപ്പുഴ നഗരസഭാ കേരളോത്സവം 24, 25, 26 തീയതികളിൽ സംഘടിപ്പിക്കും. കേരളോത്സവത്തിന്‍റെ സ്വാഗതസംഘം രൂപീകരണയോഗം കൗണ്‍സിൽ ഹാളിൽ നഗരസഭാധ്യക്ഷ കെ.കെ. ജയമ്മ ഉദ്ഘാടനം ചെയ്തു. നഗരസഭ വൈസ് ചെയര്‍മാന്‍ പിഎസ്എം ഹുസൈൻ അധ്യക്ഷത വഹിച്ചു. സംഘാടകസമിതി രക്ഷാധികാരികളായി കെ.സി. വേണുഗോപാൽ എംപി, എംഎൽഎ മാരായ പി.പി. ചിത്തരഞ്ജൻ, എച്ച്. സലാം, ചെയർപേഴ്സണായി അധ്യക്ഷ കെ.കെ. ജയമ്മ, വൈസ് ചെയർ പേഴ്സണായി നഗരസഭാ വൈസ് ചെയര്‍മാന്‍ പി.എസ്.എം. ഹുസൈന്‍, വർക്കിംഗ്‌ കമ്മിറ്റി ചെയർപേഴ്സണായി ആർ. വിനിത എന്നിവരെ തെരഞ്ഞെടുത്തു. ഷിബു നാലപ്പാട്ടാണ് ജനറൽ കൺവീനര്‍. നഗരസഭയിലെ 52 കൗണ്‍സിലര്‍മാരെയും കലാ-കായിക, യുവജന സംഘടന നേതൃത്വത്തെയും ഉള്‍പ്പെടുത്തി 14 സബ് കമ്മറ്റികളും എക്സിക്യൂട്ടീവ് കമ്മറ്റിയും രൂപീകരിച്ചു. നഗരസഭാ പരിധിയിലെ 15നും 40നും ഇടയില്‍ പ്രായമുള്ള യുവജനങ്ങള്‍ക്ക് മത്സരങ്ങളില്‍ പങ്കെടുക്കാം. മത്സരാര്‍ഥികള്‍ക്ക് വ്യക്തിപരമായും ക്ലബ്ബുകളുടെ പേരിലും മത്സരിക്കാം. 13 മുതൽ 18 വരെ രാവിലെ 10.30 മുതൽ വൈകുന്നേരം അഞ്ചു വരെ നഗരസഭയിലെത്തി പേര് രജിസ്റ്റര്‍ ചെയ്യാവുന്നതാണ്. യോഗത്തില്‍ നഗരസഭാ സ്ഥിരംസമിതി അധ്യക്ഷരായ എം.ആർ. പ്രേം, നസീർ പുന്നക്കൽ, എ.എസ്. കവിത, ആർ. വിനിത, എം.ജി. സതീദേവി നഗരസഭാ മുൻ അധ്യക്ഷ സൗമ്യരാജ്, കൗണ്‍സിലര്‍മാര്‍, യുവജന ക്ഷേമ ബോര്‍ഡ് അംഗം ജാക്സൺ പീറ്റർ, കായിക, സംഗീത അധ്യാപകര്‍, യൂത്ത് ക്ലബ്ബ് ഭാരവാഹികള്‍, സംസ്കാരിക സംഘടനകൾ, സ്പോർട്സ് ക്ലബ്ബുകൾ, സന്നദ്ധസംഘടനകൾ, യുവജന-രാഷ്ട്രീയ സംഘടനകൾ, കലാകായിക പ്രതിനിധികള്‍ തുടങ്ങിയവർ പങ്കെടുത്തു.

ഇന്ന് പള്‍സ് പോളിയോ ദിനം: കുഞ്ഞുങ്ങള്‍ക്ക് പ്രതിരോധ വാക്‌സിന്‍ നൽകും

ആലപ്പുഴ: നാഷണല്‍ ഇമ്യൂണൈസേഷന്‍ ഡേയുടെ ഭാഗമായി ജില്ലയിലെ അഞ്ചു വയസിനു താഴെ പ്രായമുള്ള എല്ലാ കുഞ്ഞുങ്ങള്‍ക്കും ഇന്ന് പോളിയോ പ്രതിരോധ വാക്‌സിന്‍ നൽകും. പോളിയോ ദിനാചരണ പരിപാടിയുടെ ജില്ലാതല ഉദ്ഘാടനം രാവിലെ എട്ടിന് മാവേലിക്കര ചുനക്കര സാമൂഹ്യകേന്ദ്രത്തില്‍ എം.എസ്. അരുണ്‍കുമാര്‍ എംഎൽഎ നിർവഹിക്കും. പോളിയോ വാക്‌സിന്‍ നല്‍കുന്നതിനായി ജില്ലയില്‍ 109423 കുട്ടികളുണ്ട്. തുള്ളിമരുന്ന് വിതരണത്തിനായി 1430 ബൂത്തുകള്‍ ജില്ലയില്‍ സജ്ജമാണ്. എല്ലാ സര്‍ക്കാര്‍ ആരോഗ്യ കേന്ദ്രങ്ങളിലും തെരഞ്ഞെടുക്കപ്പെട്ട അങ്കണവാടികള്‍, വായനശാല, ക്ലബ്ബ്, റെയില്‍വേ സ്റ്റേഷന്‍, ബസ് സ്റ്റാന്‍ഡ്, ബോട്ട് ജെട്ടി എന്നിവിടങ്ങകളിലും ബൂത്തുകള്‍ പ്രവര്‍ത്തിക്കുന്നതാണ് . ആശുപത്രികളിലും അങ്കണവാടികളിലും രാവിലെ എട്ടു മുതല്‍ വൈകുന്നേരം അഞ്ചു വരെ തുള്ളിമരുന്ന് ലഭ്യമാണ്. റെയില്‍വേ സ്റ്റേഷന്‍, ബസ് സ്റ്റേഷന്‍ തുടങ്ങിയയിടങ്ങളില്‍ സജ്ജീകരിച്ചിട്ടുള്ള ട്രാന്‍സിറ്റ് ബൂത്തുകളില്‍ രാത്രി എട്ടു വരെയും നല്‍കുന്നതാണ്. ഇതരസംസ്ഥാന തൊഴിലാളികള്‍ കൂടുതലായുള്ള ഇടങ്ങള്‍, എത്തിപ്പെടാന്‍ ബുദ്ധിമുട്ടുള്ള സ്ഥലങ്ങള്‍ എന്നിവിടങ്ങളിലേക്ക് മൊബൈല്‍ യൂണിറ്റുകളും സേവനം നടത്തുന്നുണ്ട്. ജില്ലയില്‍ 16 മൊബൈല്‍ യൂണിറ്റുകളുടെ സേവനം സജ്ജീകരിച്ചിട്ടുണ്ട്. അഞ്ചു വയസിനു താഴെ പ്രായമുള്ള കുഞ്ഞുങ്ങള്‍ക്ക് തൊട്ടടുത്തുള്ള ബൂത്തിലെത്തി ഉറപ്പായും പ്രതിരോധ തുള്ളിമരുന്ന് നല്‍കണമെന്ന് ജില്ലാ മെഡിക്കൽ ഓഫീസർ അറിയിച്ചു . പോളിയോയ്ക്കു മേലുള്ള വിജയം ഉറപ്പാക്കുക. ഏതെങ്കിലും കാരണത്താല്‍ അന്നേ ദിവസം തുള്ളിമരുന്ന് നല്‍കാത്ത കുട്ടികള്‍ക്ക് ഒക്ടോബര്‍ 13, 14 (മോപ്പ് അപ്പ് ദിനങ്ങളില്‍) പ്രതിരോധ വാക്‌സിന്‍ ലഭ്യമാക്കുന്നതാണ്.

അതിജീവനശേഷിയുള്ളവരായി തീരദേശമക്കളെ യേശു കണ്ടു: കൊമദോര്‍ വര്‍ഗീസ് മാത്യു

ആലപ്പുഴ: യേശു മീന്‍പിടിത്തക്കാരെ തന്‍റെ ശിഷ്യഗണത്തിലേക്കു വിളിച്ചത് അവര്‍ ധീരരും സഹനശക്തിയുള്ളവരും അതിജീവനശേഷിയുള്ളവരുമായതു കൊണ്ടാണെന്ന് കൊമദോര്‍ വര്‍ഗീസ് മാത്യു. ആലപ്പുഴ രൂപതയുടെ രൂപതാദിനാഘോഷത്തോടനുബന്ധിച്ച് മുഖ്യപ്രഭാഷണം നടത്തുകയായിരുന്നു അദ്ദേഹം. കേരളത്തിന്‍റെ നേവല്‍ ഓഫീസര്‍ ഇന്‍ ചാര്‍ജായി സേവനമനിഷ്ഠിക്കുന്ന അദ്ദേഹം തീരദേശ സുരക്ഷയെക്കുറിച്ചും വിശദമായി സംസാരിച്ചു. വാടക്കല്‍ ദൈവജനമാതാ ദേവാലയത്തില്‍ നടന്ന സമ്മേളനത്തില്‍ അധ്യക്ഷപ്രസംഗവും സമ്മേളന ഉദ്ഘാടനവും ബിഷപ് ജയിംസ് ആനാപറമ്പില്‍ നിര്‍വഹിച്ചു. രൂപതാ ചാന്‍സലര്‍ ഫാ. ജൂഡ് കൊപ്പണ്ടശേരി രൂപതയുടെ പ്രവര്‍ത്തനറിപ്പോര്‍ട്ട് അവതരിപ്പിച്ചു. രതീഷ് ഭജനമഠം രചിച്ച ലിയോ പതിന്നാലാമന്‍ മിഷണറിയായ പാപ്പാ എന്ന പുസ്തകം ബിഷപ് ജയിംസ് ആനാപറമ്പില്‍ പ്രകാശനം ചെയ്തു. തുടര്‍ന്ന് രൂപതാ സമൂഹത്തില്‍നിന്ന് തിളക്കമാര്‍ന്ന നേട്ടങ്ങള്‍ കൈവരിച്ചവരെ അവാര്‍ഡുകള്‍ നലകി ആദരിച്ചു. വിവിധ കലാപരിപാടികള്‍ക്കു ശേഷം ഉച്ചഭക്ഷണത്തോടെ സമ്മേളനം സമാപിച്ചു.

അങ്കണവാടി ഭക്ഷ്യമേള നാടിന്‍റെ മനം കവർന്നു

മുഹമ്മ: ഐസിഡിഎസ് മുഹമ്മ പഞ്ചായത്ത് കമ്മിറ്റി ദേശീയപോഷക മാസാചരണ പരിപാടിയുടെ ഭാഗമായി നടത്തിയ ഭക്ഷ്യമേള നാടിന്‍റെ മനം കവർന്നു. നാട്ടിൻപുറങ്ങളിലെ വിഭവങ്ങൾ കുറഞ്ഞ ചെലവിൽ പോഷകസമ്യദ്ധമായ ഭക്ഷണം ഒരുക്കുന്നതിൽ മത്സരബുദ്ധിയോടെയാണ് ഓരോ അങ്കണവാടിയും അണിനിരന്നത്. ചീര, വാഴക്കൂമ്പ്, പപ്പായ, റാഗി, നേന്ത്രപ്പഴം എന്നിവകൊണ്ടുള്ള ഉത്പന്നങ്ങൾ നിറവൈവിധ്യംകൊണ്ടും ശ്രദ്ധേയമായി. വർണ പുട്ടുകൾ, പപ്പായ പായസം, ഓഡ്സിന്‍റെ സ്മൂത്തി എന്നിവ മേളയെ ആകർഷകമാക്കി. ശംഖുപുഷ്പം, ചെമ്പരത്തി, കാരറ്റ്, ചോളപ്പൊടി എന്നിവകൊണ്ടുള്ള പുട്ടുകൾ മേളയ്ക്ക് മാരിവിൽ ശോഭയേകി. ഉണ്ണിയപ്പം, ബിസ്കറ്റ്, കേക്ക്, അച്ചപ്പം എന്നിവയും മേളയെ ആകർഷകമാക്കി. പഞ്ചായത്ത് പ്രസിഡന്‍റ് സ്വപ്ന ഷാബു മേള ഉദ്ഘാടനം ചെയ്തു. നാട്ടിൻപുറങ്ങളിലെ പോഷകമൂല്യമുള്ള ഭക്ഷ്യവസ്തുക്കളെക്കുറിച്ച് സമൂഹത്തിന് അറിവ് നൽകാൻ ഇത്തരം മേളകൾ പര്യാപ്തമാണെന്ന് സ്വപ്ന ഷാബു പറഞ്ഞു. പഞ്ചായത്ത് വൈസ് പ്രസിഡന്‍റ് എൻ.ടി. റെജി അധ്യക്ഷത വഹിച്ചു. പഞ്ചായത്തംഗങ്ങളായ കെ.എസ്. ദാമോദരൻ, പി.എ. നസീമ, ഷെജിമോൾ സജീവ്, സിഡിഎസ് ചെയർപേഴ്സൻ സേതു ഭായി, ദീപാ അജിത്കുമാർ, ഐസിഡിഎസ് സൂപ്പർവൈസർ അശ്വതി എന്നിവർ പ്രസംഗിച്ചു.

പ്രകടനവും പ്രതിഷേധ ജ്വാലയും നടത്തി

എടത്വ: ശബരിമലയിലെ സ്വര്‍ണ ദ്വാരപാലക ശില്പങ്ങളും കട്ടിളയും അടിച്ചുമാറ്റി മറിച്ചുവിറ്റ കൊള്ളസംഘമാണ് കേരളം ഭരിക്കുന്നതെന്നും മോഷണ ഉത്തരവാദിത്വം ഏറ്റെടുത്ത് ദേവസ്വം മന്ത്രി രാജിവയ്ക്കണമെന്നും ദേവസ്വം ബോര്‍ഡിനെ പുറത്താക്കണമെന്നും ഡിസിസി വൈസ് പ്രസിഡന്‍റ് സജി ജോസഫ് പറഞ്ഞു. ശബരിമലയിലെ സ്വര്‍ണം മോഷ്ടിച്ച സംസ്ഥാന സര്‍ക്കാരിനും ദേവസ്വം ബോര്‍ഡിനുമെതിരേ പ്രതിഷേധിച്ച് എടത്വ മണ്ഡലം കോണ്‍ഗ്രസ് കമ്മിറ്റി ജംഗ്ഷനില്‍ സംഘടിപ്പിച്ച പ്രകടനവും പ്രതിഷേധ ജ്വാലയും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് ആന്‍റണി കണ്ണംകുളം അധ്യക്ഷത വഹിച്ചു. ബിജു വരമ്പത്ത്, തങ്കച്ചന്‍ ആശാംപറമ്പില്‍, എം.വി. സുരേഷ്, മറിയാമ്മ ജോര്‍ജ്, ആന്‍സി ബിജോയി, ആനി ഈപ്പന്‍, സ്റ്റാര്‍ലി ജോസഫ്, വിജയമ്മ സോമന്‍, എസ.് സനല്‍കുമാര്‍, കൃഷ്ണന്‍കുട്ടി, കെ. ശിവന്‍, ജോളി ലുക്കോസ്, സോണിച്ചന്‍ തെക്കേടം, ജോസി പറത്തറ, ജസ്റ്റിന്‍ മാളിയേക്കല്‍, നിബിന്‍ കെ. തോമസ്, ജിയോ ചേന്നങ്കര, റ്റി.റ്റി. തോമസ്‌കുട്ടി, തോമസ് കാട്ടുങ്കല്‍, ബാബു പടിത്താറെക്കര, സുബിന്‍ നെറ്റിത്തറ, മനോജ് മാത്യു, ഷൈജു മണക്കളം, ആന്‍ഡ്രൂസ്, കൊച്ചൂട്ടി നൈനാപാടം, ബേബന്‍ സക്കറിയ, ഡിജു വെണ്‍മേലില്‍, സാജുമോന്‍ തെക്കേടം, മോഹനന്‍, പിള്ള, ബ്ലെസ്സി പനയ്ക്കല്‍, തമ്പി കുന്തിരിക്കല്‍, തോമസ് ഇരേത്ര എന്നിവര്‍ പ്രസംഗിച്ചു.

കവലയ്ക്കൽ- മുപ്പത്താറിൽചിറ റോഡ് ഗതാഗത യോഗ്യമാക്കണം

ചമ്പക്കുളം: നെടുമുടി പഞ്ചായത്തിലെ 14-ാം വാർഡിലൂടെ കടന്നുപോകുന്ന കവലയ്ക്കൽ- മുപ്പത്താറിൽചിറ വഴി ഉപയോഗിക്കാനാവാത്തവിധം താറുമാറായി. പുളിക്കൽകാവ് പാലത്തിൽനിന്ന് ആരംഭിച്ച് കാവിപ്പാടത്തിനു ചുറ്റുമായുള്ള വഴി കവലയ്ക്കൽ വരെയുള്ളത് മെറ്റൽ വിരിച്ചതാണ്. ബാക്കിയുള്ള ഒരു കിലോമീറ്ററോളം വരുന്ന ഭാഗം കാൽനട യാത്രയ്ക്കുപോലും സാധ്യമല്ലാതായി. മഴ പെയ്താൽ ഇവിടത്തെ ദുരിതം പറഞ്ഞറിയിക്കാനാവാത്ത അവസ്ഥയിലാണ്. നെടുമുടി പഞ്ചായത്തിലെ കഴിഞ്ഞ രണ്ടു ഭരണസമിതികളിലും ഭരണപക്ഷത്തുള്ള അംഗങ്ങൾ ഈ വാർഡിനെ പ്രതിനിധികരിച്ചിട്ടും ഒരു മാറ്റവും ഉണ്ടായില്ല എന്ന പരാതിയാണ് നാട്ടുകാർക്ക്. നൂറു കണക്കിന് ആളുകളാണ് കൃഷി ആവശ്യത്തിനും മറ്റ് ആവശ്യങ്ങൾക്കായും ദിവസേന ഇതുവഴി യാത്രചെയ്യുന്നത്. കൃഷി സമയത്ത് പാടത്തേയ്ക്കുള്ള വിത്ത്, വളം മുതലായവ പലരും വള്ളത്തിലാണ് നിലത്തിൽ എത്തിക്കുന്നത്. നെല്ല് സംഭരണ സമയത്തും വഴിയുടെ ദുരവസ്ഥ കർഷകർക്ക് ഇവിടെ വലിയ സാമ്പത്തിക ബാധ്യത ഉണ്ടാക്കുന്നു. ഇരുചക്രവാഹനങ്ങളുള്ളവർ അവ വീടുകളിൽ എത്തിക്കാനാവാത്തതിനാൽ വഴിയിറമ്പിലും മറ്റുമാണ് സൂക്ഷിക്കുന്നത്.

സ്തനാർബുദ ബോധവത്കരണ കാമ്പയിൻ പിങ്ക് പ്രോമിസ് - സമാപനം ചെങ്ങന്നൂരിൽ

ചെങ്ങന്നൂർ: ഡോ. കെ.എം. ചെറിയാൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിന്‍റെ നേതൃത്വത്തിൽ സർക്കാരുമായി ചേർന്ന് സംസ്ഥാനത്തിന്‍റെ വിവിധ ഇടങ്ങളിൽ ഒരു വർഷമായി നടത്തിവരുന്ന സ്തനാർബുദ ബോധവൽക്കരണ പരിപാടിയായ -പിങ്ക് പ്രോമിസ് - ക്യാംപയിൻ സമാപനം ഇന്നു രാവിലെ 10.30 ന് നടക്കും. ചെങ്ങന്നൂർ കെ.എം.സി. ഹോസ്പിറ്റലിൽ നടക്കുന്ന സമാപന സമ്മേളനം സിനിമാ താരം മല്ലിക സുകുമാരൻ ഉദ്ഘാടനം ചെയ്യും. ആശുപത്രി മാനേജിംഗ് ഡയറക്ടർ റവ. ഡോ. അലക്സാണ്ടർ കൂടാരത്തിൽ അധ്യക്ഷത വഹിക്കും. ഡോ. മരിയ ഉമ്മൻ മുഖ്യപ്രഭാഷണം നടത്തും. കാൻസർ ചികിത്സയിലെ നൂതന രീതികളെക്കുറിച്ചു ഓങ്കോളജി വിഭാഗം മെഡിക്കൽ ഡയറക്ടർ ഡോ. സാറ ഈശോ, സർജിക്കൽ ഓങ്കോളജിസ്റ്റ് ഡോ. ജോൺ തോമസ്, റേഡിയേഷൻ ഓങ്കോളജിസ്റ്റ് ഡോ. ബോവസ് വിൻസെന്‍റ്, മെഡിക്കൽ ഓങ്കോളജിസ്റ്റ് ഡോ. നിഥുൻ വി. അശോക് എന്നിവർ ക്ലാസെടുക്കും. സമാപന സമ്മേളനത്തിന് മുന്നോടിയായി പൊതുജന പങ്കാളിത്തത്തോടെ വോക്കത്തോണും നടക്കും. ചെങ്ങന്നൂർ കെഎസ്ആർടിസി ബസ് സ്റ്റാൻഡിൽ നിന്ന് ആരംഭിക്കുന്ന വോക്കത്തോൺ ചെങ്ങന്നൂർ ഡിവൈഎസ്പി എം.കെ. ബിനുകുമാർ ഫ്ലാഗ് ഓഫ് ചെയ്യും. ഇരുനൂറോളം പേർ പങ്കെടുക്കുന്ന വോക്കത്തോൺ, സ്തനാർബുദത്തെക്കുറിച്ച് സമൂഹത്തിൽ അവബോധം സൃഷ്ടിക്കുന്നതിൽ വലിയ പങ്കുവഹിക്കും. സംസ്ഥാനത്തിന്റെ വിവിധ ഭാഗങ്ങളിൽ ഒരു വർഷം നീണ്ടുനിന്ന -പിങ്ക് പ്രോമിസ് - കാമ്പയിൻ വഴി നിരവധി ആളുകളിലേക്ക് സ്തനാർബുദത്തിന്റെ പ്രാധാന്യത്തെക്കുറിച്ചും രോഗം നേരത്തെ കണ്ടെത്തിയാലുള്ള ചികിത്സാ സാധ്യതകളെക്കുറിച്ചുമുള്ള വിവരങ്ങൾ എത്തിക്കാൻ സാധിച്ചു.

രാജീവ്ഗാന്ധി ഫൗണ്ടേഷന്‍ രണ്ടാംഘട്ട മെറിറ്റ് അവാര്‍ഡും പാലിയേറ്റീവ് പ്രവര്‍ത്തകര്‍ക്ക് ആദരവും

ചേര്‍ത്തല: രാജീവ്ഗാന്ധി ഫൗണ്ടേഷന്‍ സംസ്ഥാനകമ്മിറ്റി നടത്തുന്ന രണ്ടാംഘട്ട മെരിറ്റ് അവാര്‍ഡുവിതരണവും പാലിയേറ്റീവ് പ്രവര്‍ത്തകര്‍ക്ക് ആദരവും പാലിയേറ്റീവ് ഉപകരണങ്ങള്‍ ഏറ്റുവാങ്ങല്‍ സമ്മേളനവും നാളെ നടക്കും. ചേര്‍ത്തല എന്‍എസ്എസ് യൂണിയന്‍ഹാളില്‍ നാളെ‍ 2.30 ന് നടക്കുന്ന സമ്മേളനം കെ.സി. വേണുഗോപാല്‍ എംപി ഉദ്ഘാടനം ചെയ്യും. ചേര്‍ത്തല നഗരസഭയിലെയും ചേര്‍ത്തല തെക്ക്, കഞ്ഞിക്കുഴി, മുഹമ്മ, തണ്ണീര്‍മുക്കം പഞ്ചായത്തുകളിലെ ഉന്നത വിജയികളായ 350 വിദ്യാര്‍ഥികള്‍ക്കാണ് അവാര്‍ഡ് നല്‍കുന്നതെന്ന് സംസ്ഥാന പ്രസിഡന്‍റ് അഡ്വ. ടി.എച്ച്. സലാം, ഭാരവാഹികളായ അഡ്വ. വി.എന്‍. അജയന്‍, അഡ്വ. സി.ഡി. ശങ്കര്‍, ടി.കെ. അനിലാല്‍, സി.ആര്‍. സാനു, ബാബുവയലാര്‍ എന്നിവര്‍ പത്രസമ്മേളനത്തില്‍ അറിയിച്ചു. ഫൗണ്ടേഷന്‍ നടത്തുന്ന പാലിയേറ്റീവ് പ്രവര്‍ത്തന രംഗത്തു പ്രവര്‍ത്തിക്കുന്ന സന്നദ്ധ പ്രവര്‍ത്തകരെ സമ്മേളനത്തില്‍ ആദരിക്കും. പാലിയേറ്റീവ് പ്രവര്‍ത്തനങ്ങള്‍ക്കായി വിവിധയിടങ്ങളില്‍നിന്നും നല്‍കുന്ന ഉപകരണങ്ങള്‍ ഏറ്റുവാങ്ങും. സമ്മേളനത്തില്‍ സംസ്ഥാന രക്ഷാധികാരി ഡോ. കെ.എസ്. മനോജ് മുഖ്യ പ്രഭാഷണം നടത്തും. സിനിമാതാരം സാജന്‍ പളളൂരുത്തി, ഗാനരചയിതാവ് രാജീവ് ആലുങ്കല്‍, കെ.പി. നടരാജന്‍ എന്നിവര്‍ വിശിഷ്ടാതിഥികളാകും.

കേരളോത്സവം 2025: നഗരസഭാതല സംഘാടകസമിതി രൂപീകരിക്കും

ആലപ്പുഴ: നഗരസഭാ "കേരളോത്സവം 2025' 24, 25, 26 തീയതികളില്‍ സംഘടിപ്പിക്കും. കേരളോത്സവത്തിന്‍റെ നഗരസഭാതല സ്വാഗതസംഘ രൂപീകരണയോഗം നഗരസഭാധ്യക്ഷ കെ.കെ. ജയമ്മ ഉദ്ഘാടനം ചെയ്തു. നഗരസഭാ കൗണ്‍സില്‍ ഹാളില്‍ സംഘടിപ്പിച്ച സ്വാഗതസംഘ രൂപീകരണ യോഗത്തില്‍ വൈസ് ചെയര്‍മാന്‍ പി.എസ്.എം. ഹുസൈന്‍ അധ്യക്ഷത വഹിച്ചു. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ആർ. വിനീത സ്വാഗതം പറഞ്ഞു. സ്ഥിരംസമിതി അധ്യക്ഷരായ എം.ആർ. പ്രേം, നസീർ പുന്നക്കൽ, എ.എസ്. കവിത, എം.ജി. സതീദേവി, നഗരസഭ മുൻ അധ്യക്ഷ സൗമ്യ രാജ്, കൗണ്‍സലര്‍മാര്‍, യുവജന ക്ഷേമ ബോര്‍ഡ് അംഗം ജാക്സൺ പീറ്റർ, കായിക-സംഗീത അധ്യാപകര്‍, യൂത്ത് ക്ലബ്ബ് ഭാരവാഹികള്‍, സംസ്കാരിക സംഘടനകൾ, സ്പോർട്സ് ക്ലബ്ബുകൾ, സന്നദ്ധ സംഘടനകൾ, യുവജന-രാഷ്‌ട്രീയ സംഘടനകൾ, കലാകായിക പ്രതിനിധികള്‍ തുടങ്ങി വിവിധ മേഖലയിലുള്ളവര്‍ പങ്കെടുത്തു. നഗരസഭാതല സംഘാടക സമിതിയുടെ രക്ഷാധികാരികളായി കെ.സി. വേണുഗോപാൽ എംപി, എംഎല്‍എമാരായ പി.പി. ചിത്തരഞ്ജന്‍, എച്ച്. സലാം, യുവജനക്ഷേമ ബോര്‍ഡ് അംഗങ്ങളായ ടി.ടി. ജിസ്മോന്‍, എസ് ദീപു, ചെയര്‍പേഴ്സണായി നഗരസഭാധ്യക്ഷ കെ.കെ. ജയമ്മ, വൈസ് ചെയര്‍മാന്മാരായി നഗരസഭാ വൈസ് ചെയര്‍മാന്‍ പി.എസ്.എം. ഹുസൈന്‍, സ്ഥിരം സമിതി അധ്യക്ഷന്മാരായ എം.ജി. സതീദേവി, എ.എസ്. കവിത, നസീർ പുന്നക്കൽ, എം.ആർ. പ്രേം, സൗമ്യ രാജ്, ഡി.പി. മധു, അഡ്വ. റീഗോ രാജു, ഇല്ലിക്കല്‍ കുഞ്ഞുമോന്‍, എല്‍ജിന്‍ റിച്ചാഡ്, ഷീല മോഹന്‍, സോഫി എന്നിവരെയും വര്‍ക്കിംഗ് ചെയര്‍മാനായി വിദ്യാഭ്യാസ സ്റ്റാൻഡിംഗ് കമ്മിറ്റി ചെയര്‍പേഴ്സണ്‍ ആര്‍. വിനിതയും ജനറല്‍ കണ്‍വീനറായി മുനിസിപ്പല്‍ സെക്രട്ടറി ഷിബു നാലപ്പാട്ട് , ജോയിന്‍റ് കണ്‍വീനറായി ബീന ജി., കോ-ഓര്‍ഡിനേറ്റേഴ്സ് പ്രവീൺ ജോയ്, ഒ. സാലിൻ എന്നിവരെയും തെരഞ്ഞെടുത്തു. വിശദവിവരങ്ങള്‍ക്ക് രജിസ്ട്രേഷന്‍ കമ്മിറ്റി ചെയര്‍മാന്‍ ബി. നസീർ, കണ്‍വീനര്‍ സിമി ഷാഫിഖാന്‍ എന്നിവരെ 9847033394, 9061170303, 9745835335 ബന്ധപ്പെടാവുന്നതാണ്.

കലാ മത്സരങ്ങൾക്ക് ഇന്നു സമാപനം

അമ്പലപ്പുഴ: ആലപ്പുഴ സഹോദയ കോംപ്ലക്സ് 19 -ാമത് സിബിഎസ്ഇ ജില്ലാ കലോത്സവത്തിലെ കലാ മത്സരങ്ങൾക്ക് ഇന്നു സമാപനം. കഴിഞ്ഞ അഞ്ചു ദിവസങ്ങളിലായി ആലപ്പുഴ കളർകോട് ചിന്മയ വിദ്യാലയത്തിലാണ് കലോത്സവം നടന്നുവരുന്നത്. ജില്ലയിലെ 53 സ്കൂളുകളിൽനിന്നായി 3000ത്തിലേറെ കുട്ടികൾ വിവിധ മത്സരങ്ങളിൽ മാറ്റുരച്ചു. ഇന്നു വൈകുന്നേരം അഞ്ചിനു നടക്കുന്ന സമാപന സമ്മേളനത്തിൽ എച്ച് .സലാം എംഎൽഎ സമ്മാനദാനം നിർവഹിക്കും. ജോര്‍ജിയന്‍ പബ്ലിക് സ്‌കൂളിന് മികച്ച വിജയം എടത്വ: സിബിഎസ്ഇ ആലപ്പുഴ സഹോദയ ജില്ലാ കലോത്സവത്തില്‍ എടത്വ ജോര്‍ജിയന്‍ പബ്ലിക് സ്‌കൂളിന് മികച്ച വിജയം. രചനാ മത്സരത്തില്‍ കാറ്റഗറി 2 മലയാളം ഉപന്യാസ രചനയിൽ ദേവനന്ദ എം. ഒന്നാം സ്ഥാനവും കാറ്റഗറി 2 ഇംഗ്ലീഷ് ഉപന്യാസ രചനയിൽ സായന്തന പ്രദീപ് രണ്ടാം സ്ഥാനവും ആണ്‍കുട്ടികളുടെ വിഭാഗം ഭരതനാട്യം കാറ്റഗറി രണ്ടില്‍ അസിന്‍ ജോ സജി രണ്ടാം സ്ഥാനവും കരസ്ഥമാക്കി.

"സ്മൃതി 2025' എക്‌സ്‌പോ ശ്രദ്ധേയമായി

ചെങ്ങന്നൂർ: ചെറിയനാട് ദേവസ്വം ബോർഡ് ഹയർ സെക്കൻഡറി സ്കൂൾ രജത ജൂബിലി ആഘോഷം "സ്മൃതി 2025'-ന്‍റെ ഭാഗമായി സംഘടിപ്പിച്ച എക്‌സ്‌പോ ശ്രദ്ധേയമായി. സ്കൂൾ പ്രിൻസിപ്പൽ എസ്. ജയന്തി എക്‌സ്‌പോ ഉദ്ഘാടനം ചെയ്തു. ഹയർ സെക്കൻഡറിയുടെ ആദ്യവർഷങ്ങളിലെ പിടിഎ പ്രസിഡന്‍റ് കെ.പി.എസ്. ശർമ അധ്യക്ഷത വഹിച്ചു. പൂർവ വിദ്യാർഥി സംഘടനയുടെ ഭാരവാഹിയും ഓൾ കേരള ഫോട്ടോഗ്രാഫേഴ്സ് അസോസിയേഷൻ പ്രവർത്തകനുമായ കെ.ജി. മുരളി പ്രസംഗിച്ചു. വിവിധങ്ങളായ പവലിയനുകളും പ്രദർശനങ്ങളും എക്‌സ്‌പോയുടെ മാറ്റുകൂട്ടി. ഐടിബിപി ആയുധപ്രദർശനം, ഫയർഫോഴ്‌സ്, സഞ്ജീവനി ആശുപത്രിയുടെ മെഡിക്കൽ വിംഗ് എന്നിവരുടെ പവലിയനുകൾ സന്ദർശകരെ ആകർഷിച്ചു. ഇതിനു പുറമേ, ഫോട്ടോഗ്രഫിക് അസോസിയേഷന്‍റെ ഫോട്ടോപ്രദർശനം, കേരളീയ ചുവർചിത്ര പ്രദർശനം, എൻസിസി എക്‌സ്‌പോ, മൈലാഞ്ചി ചലഞ്ച് എന്നിവയും എക്‌സ്‌പോയുടെ ഭാഗമായി സംഘടിപ്പിച്ചു.

ഡോക്‌ടർക്ക് വെട്ടേറ്റ സംഭവം: ഐഎംഎ പ്രതിഷേധ മാർച്ച് നടത്തി

ആലപ്പുഴ: താമരശേരി താലൂക്ക് ആശുപത്രിയിൽ യുവഡോക്ടർക്ക് വെട്ടേറ്റ സംഭവത്തിൽ പ്രതിഷേധിച്ച് ഇന്ത്യൻ മെഡിക്കൽ അസോസിയേഷൻ ആലപ്പുഴ ബ്രാഞ്ചിന്‍റെ നേതൃത്വത്തിൽ പ്രതിഷേധ പരിപാടി സംഘടിപ്പിച്ചു. ആലപ്പുഴ സ്ത്രീകളുടെയും കുട്ടികളുടെയും ആശുപത്രിയിൽ നടന്ന പ്രതിഷേധ പരിപാടിയിൽ ആശുപത്രി സുപ്രണ്ട് കെ.കെ. ദീപ്തി, ഡോ. എൻ. അരുൺ, മനീഷ് നായർ, ഡോ. ബീന, നഴ്സിംഗ് സൂപ്രണ്ട് ബിന്ദു എന്നിവർ പ്രസംഗിച്ചു. വൈകിട്ട് ജില്ലയിലെ ഡോക്ടർമാർ ജനറൽ ആശുപത്രിയിൽ, ആരോഗ്യമേഖലയിൽ വെളിച്ചം പകരുന്നവരെ ആക്രമിക്കരുതെന്ന സന്ദേശം മുൻനിർത്തി മെഴുകുതിരി തെളിച്ചു നടത്തിയ പ്രധിഷേധ പ്രകടനം ഐഎംഎ ജില്ലാ ബ്രാഞ്ച് പ്രസിഡന്‍റ് ഡോ. കെ. കൃഷ്ണകുമാർ ഉദ്ഘാടനം ചെയ്തു. സംസ്ഥാന വൈസ് പ്രസിഡന്‍റ് ഡോ. ആർ. മദനമോഹനൻ നായർ, സംസ്ഥാന ജോയിന്‍റ് സെക്രട്ടറി ഡോ. എ.പി. മുഹമ്മദ്, ഡോ. കെ.പി. ദീപ, ഡോ. എൻ. അരുൺ, ഡോ. ഹരിപ്രസാദ്, ഷാലിമ കൈരളി, ഡോ. ഉണ്ണിക്കൃഷ്ണ കർത്ത എന്നിവർ പ്രസംഗിച്ചു.

സമരപ്രഖ്യാപനവും പ്രതിഷേധ ധര്‍ണയും

മാവേലിക്കര: കേരള സംസ്ഥാന വൈദ്യുതി ബോര്‍ഡിലെ ജീവനക്കാരെയും പെന്‍ഷന്‍കാരെയും കരാര്‍ തൊഴിലാളികളെയും ബാധിക്കുന്ന കാതലായ ആവശ്യങ്ങളില്‍ സി എംഡിയും നാഷണല്‍ കോ-ഓര്‍ഡിനേഷന്‍ കമ്മിറ്റി ഓഫ് ഇലക്‌ട്രിസിറ്റി എംപ്ലോയീസ് ആൻഡ് എന്‍ജിനിയേഴ്‌സ് നേതൃത്വവുമായി നടത്തിയ ചര്‍ച്ചയില്‍ തീരുമാനമായ കാര്യങ്ങള്‍ ഫുള്‍ ബോര്‍ഡ് മീറ്റിംഗില്‍ അട്ടിമറിക്കപ്പെട്ടതിനെതിരേ സംസ്ഥാന വ്യാപകമായി പ്രതിഷേധ ധര്‍ണയും സമരപ്രഖ്യാപന കണ്‍വന്‍ഷനും നടത്തി. മാവേലിക്കര ഇലക്‌ട്രിസിറ്റി ഡിവിഷൻ ഓഫീസിന് മുന്നില്‍ നടന്ന ധര്‍ണയും സമരപ്രഖ്യാപന കണ്‍വന്‍ഷനും കെഎസ്ഇബി പെന്‍ഷനേഴ്‌സ് അസോസിയേഷന്‍ സംസ്ഥാന വൈസ് പ്രസിഡന്‍റ് പി.എസ്. ഉദയകുമാര്‍ ഉദ്ഘാടനം ചെയ്തു. കെഎസ്ഇബിഒഎ നേതാവ് റജി മോഹന്‍ അധ്യക്ഷത വഹിച്ചു. കെഎസ്ഇബി പെന്‍ഷനേഴ്‌സ് അസോസിയേഷന്‍ കേന്ദ്ര കമ്മിറ്റി അംഗം കെ. മോഹനന്‍ ഉണ്ണിത്താന്‍, കെഎസ്ഇബി വര്‍ക്കേഴ്‌സ് അസോസിയേഷന്‍ ഡിവിഷന്‍ സെക്രട്ടറി എ. അനില്‍കുമാര്‍, കെഎസ്ഇബി വര്‍ക്കേഴ്‌സ് ഫെഡറേഷന്‍ ഡിവിഷന്‍ സെക്രട്ടറി പി. ജയദേവ്, കെഎസ്ഇബി വര്‍ക്കേഴ്‌സ് അസോസിയേഷന്‍ വനിതാ വിഭാഗം ജില്ലാ കണ്‍വീനര്‍ ഷെഹന എന്നിവര്‍ പ്രസംഗിച്ചു.

പി.ഡി. ലൂക്ക് അനുസ്മരണം

ചമ്പക്കുളം: കേരള കോൺഗ്രസ് സ്ഥാപക നേതാവും വള്ളംകളി ദൃക്സാക്ഷി വിവരണക്കാരനുമായിരുന്ന പി.ഡി. ലുക്കിന്‍റെ 21-ാമത് അനുസ്മരണാ സമ്മേളനം പി.ഡി. ലുക്ക് ഫൗണ്ടേഷന്‍റെ ആഭിമുഖ്യത്തിൽ നടത്തി. യോഗം കേരള കോൺഗ്രസ് ഡെപ്യൂട്ടി ചെയർമാൻ ഫ്രാൻസിസ് ജോർജ് എംപി ഉദ്ഘാടനം ചെയ്തു. മൂല്യാധിഷ്ഠത രാഷ്‌ട്രീയത്തിന്‍റെ ഉടമയായിരുന്നു പി.ഡി. ലുക്കെന്ന് അദ്ദേഹം അഭിപ്രായപ്പെട്ടു. ഫൗണ്ടേഷൻ ചെയർമാൻ ബാബു പാറക്കാടൻ അധ്യക്ഷത വഹിച്ചു. വള്ളംകളി വഞ്ചിപ്പാട്ട് രംഗത്തെ സമഗ്ര സംഭാവനയ്ക്ക് മുൻ എംഎൽഎ സി.കെ. സദാശിവനും നാടക-സിനിമാ നടൻ പ്രമോദ് വെളിയനാടിനും പ്രത്യക പുരസ്‌കാരങ്ങൾ നൽകി. വിവിധ മേഖലകളിലെ പ്രവർത്തനങ്ങൾക്ക് കെ.ടി. ആന്‍റണി കാട്ടുതറ, തോമസുകുട്ടി മാത്യു, സിബിച്ചൻ കണ്ണോട്ടുതറ, ബാബു സേവ്യർ, സാബു തോട്ടുങ്കൽ, പ്രകാശ് പനവേലി, ഹരികൃഷ്ണൻ ബേബി പാറക്കാടൻ, പ്രവീൺ ഐക്കര, ചമ്പക്കളം ബേബി, പി.കെ. വിജയൻ, രാരിച്ചൻ മാത്യു, കുമ്മനം അഷറഫ്, സൈജോപ്പൻ ഐസക്, ഐപ്പ് ചക്കിട്ട ജയിംസ് കല്ലുപാത്ര, സിബിച്ചൻ തറയിൽ എന്നിവരെ ആദരിച്ചു. യോഗത്തിൽ ജേക്കബ് ഏബ്രഹാം ആമുഖപ്രസംഗം നടത്തി. ഫാ. തോമസ് ഇരുമ്പുകുത്തി സിഎംഐ അനുഗ്രഹ പ്രഭാഷണം നടത്തി. ഡോ. ജോബിൻ എസ്. കൊട്ടാരം, ജോസ് കാവനാട്, ജോസ് കൊച്ചു കളപ്പുരയ്ക്കൽ, എം.സി. മാത്യു, മാമ്പറ ജിജപ്പൻ കൊലവന്തറ, പി.പി. മനോഹരൻ, സജി ചാവറ എന്നിവർ പ്രസംഗിച്ചു.

കഞ്ചാവുമായി അസം സ്വദേശി പിടിയിൽ

ചെങ്ങന്നൂർ: ചെങ്ങന്നൂർ റെയിൽവേ സ്റ്റേഷനിൽ രണ്ടരക്കിലോ കഞ്ചാവുമായി അസം സ്വദേശി സഫിക്കുർ റഹ്മാൻ (22) അറസ്റ്റിലായി. ഹോജയി സ്വദേശിയായ ഇയാളെ ആർപിഎഫ് ക്രൈം ഇന്‍റലിജൻസ് ബ്രാഞ്ചും ചെങ്ങന്നൂർ ആർപിഎഫും ചെങ്ങന്നൂർ എക്സൈസ് റേഞ്ചും സംയുക്തമായി നടത്തിയ പരിശോധനയിലാണ് പിടികൂടിയത്. കന്യാകുമാരിക്ക് പോകുന്ന വിവേക് എക്സ്പ്രസ് സ്റ്റേഷൻ വിട്ട ഉടൻ, ഒന്നാം നമ്പർ പ്ലാറ്റ്‌ഫോമിന്‍റെ വടക്കേ അറ്റത്ത് സംശയാസ്പദമായ സാഹചര്യത്തിൽ കണ്ട ഇയാളെ പിടികൂടുകയായിരുന്നു. സിലിഗുഡിയിൽനിന്നു വാങ്ങിയ കഞ്ചാവുമായി റെയിൽവേ സ്റ്റേഷനു പുറത്തേക്ക് കുറുക്കുവഴിയിലൂടെ കടക്കാൻ ശ്രമിക്കുന്നതിനിടെയാണ് പ്രതി വലയിലായത്. പിടിച്ചെടുത്ത കഞ്ചാവിന് വിപണിയിൽ ഏകദേശം ഒന്നരലക്ഷം രൂപ വിലവരും. ചെറുപൊതികളാക്കി വടക്കേ ഇന്ത്യൻ സംസ്ഥാന തൊഴിലാളികൾക്ക് മറിച്ചുവിറ്റ് അമിത ലാഭം നേടാനാണ് കഞ്ചാവ് കൊണ്ടുവന്നതെന്നു പ്രതി സമ്മതിച്ചു. ചെങ്ങന്നൂർ റെയിൽവേ സ്റ്റേഷനിൽ സമാനമായ രീതിയിൽ കഴിഞ്ഞ രണ്ടു മാസത്തിനിടെ റിപ്പോർട്ട് ചെയ്യുന്ന നാലാമത്തെ കേസാണിതെന്ന് എക്സൈസ് സംഘം പറഞ്ഞു. തിരുവോണസമയത്ത് ക്രിക്കറ്റ് ബാറ്റിനുള്ളിൽ 15 കിലോ കഞ്ചാവ് കടത്തിയ ബംഗാൾ സ്വദേശിയെയും ഒരു മാസം മുമ്പ് ഇതേ സ്റ്റേഷനിൽ അറസ്റ്റ് ചെയ്തിരുന്നു.

ലോക മാനസികാരോഗ്യ ദിനാചരണം

ചേര്‍ത്തല: ലോക മാനസികാരോഗ്യ ദിനത്തോടനുബന്ധിച്ചു ജില്ലാ ലീഗൽ സർവീസ് സൊസൈറ്റിയും സെന്‍റർ ഫോർ ഇന്നർ പീസും സ്കൂൾ ഓഫ് ലൈഫ് സ്‌കിൽസ് ആലപ്പുഴയും സംയുക്തമായി നടത്തിയ ലോക മാനസികാരോഗ്യ ദിനാചരണം സിവിൽ ജഡ്‌ജും ഡിഎൽഎസ്എ സെക്രട്ടറിയുമായ അഡ്വ. പ്രമോദ് മുരളി ഉദ്ഘാടനം ചെയ്തു. സെന്‍റർ ഫോർ ഇന്നർ പീസ് മാനേജിംഗ് ഡയറക്ടർ ഡോ. വി.വി. പ്യാരിലാൽ അധ്യക്ഷത വഹിച്ചു. ഡയറക്ടർ അഡ്വ. ജി. രാജേഷ്, സ്കൂൾ ഓഫ് ലൈഫ് സ്കിൽ ഡയറക്ടർ പി.എ. ഷാജി, സീനിയർ കൺസള്‍ട്ടന്‍റ് സൈക്യാട്രിസ്റ്റ് ഡോ. ഡാനി വിൻസെന്‍റ്, സീനിയർ കൺസള്‍ട്ടന്‍റ് സൈക്യാട്രിസ്റ്റ് ഡോ. പ്രഭാസ് അരവിന്ദ്, ക്ലിനിക്കൽ സൈക്കോളജിസ്റ്റ് ഷഫീന ജേക്കബ്, മാനേജർ ബിജി സുരേഷ് എന്നിവർ പ്രസംഗിച്ചു.

പ്രവാസികള്‍ക്കായി നോർക്ക-ഇന്ത്യന്‍ ബാങ്ക് സംരംഭക വായ്പാ നിര്‍ണയ ക്യാമ്പ്

ആലപ്പുഴ: പ്രവാസിസംരംഭകര്‍ക്കായി നോർക്ക റൂട്ട്സും ഇന്ത്യന്‍ ബാങ്കും സംയുക്തമായി സംഘടിപ്പിക്കുന്ന സംരംഭക വായ്പാ നിര്‍ണയ ക്യാമ്പ് 16ന് ആലപ്പുഴയില്‍. രണ്ടു വര്‍ഷമെങ്കിലും വിദേശത്ത് ജോലി ചെയ്തശേഷം നാട്ടില്‍ തിരിച്ചെത്തിയ പ്രവാസികളുടെ പുനരധിവാസത്തിനായി സംസ്ഥാന സര്‍ക്കാര്‍ നോര്‍ക്ക റൂട്ട്സ് വഴി നടപ്പിലാക്കിവരുന്ന നോര്‍ക്ക ഡിപ്പാര്‍ട്ട്മെന്‍റ് പ്രോജക്ട് ഫോര്‍ റിട്ടേണ്‍ഡ് എമിഗ്രന്‍സ് അഥവാ എന്‍ഡിപിആര്‍ഇഎം പദ്ധതി പ്രകാരമാണ് ക്യാമ്പ്. ആലപ്പുഴ മുല്ലക്കൽ അമ്മൻകോവില്‍ സ്ട്രീറ്റിലെ ഗുരുവിനായഗർ കോവില്‍ ഹാളിലാണ് ക്യാമ്പ്. പങ്കെടുക്കാന്‍ താത്പര്യമുള്ളവര്‍ 24 മണിക്കൂറും പ്രവര്‍ത്തിക്കുന്ന നോര്‍ക്ക ഗ്ലോബല്‍ കോണ്‍ടാക്ട് സെന്‍ററിന്‍റെ ടോള്‍ഫ്രീ നമ്പറുകളായ 1800 425 3939 (ഇന്ത്യയില്‍നിന്നും) +91-8802 012 345 (വിദേശത്തുനിന്നും, മിസ്ഡ് കോള്‍ സര്‍വീസ്) ബന്ധപ്പെട്ട് രജിസ്റ്റര്‍ ചെയ്യേണ്ടതാണ്. പാസ്പോർട്ട്, ആധാർ, പാൻകാർഡ്, ഇലക്‌ഷൻ ഐഡി, റേഷൻ കാർഡ് എന്നിവയുടെ ഒറിജിനലും പകര്‍പ്പുകളും രണ്ടു പാസ്പോർട്ട് സൈസ് ഫോട്ടോകള്‍ പദ്ധതി-വിശദീകരണം, പദ്ധതിക്കാവശ്യമായ മറ്റു രേഖകൾ എന്നിവ സഹിതമാണ് പങ്കെടുക്കേണ്ടത്. പ്രവാസി കൂട്ടായ്മകള്‍, പ്രവാസികള്‍ ചേര്‍ന്ന് രൂപീകരിച്ച കമ്പനികള്‍, സൊസൈറ്റികള്‍ എന്നിവര്‍ക്കും അപേക്ഷിക്കാന്‍ അര്‍ഹതയുണ്ട്. പ്രവാസികള്‍ക്ക് സംരംഭങ്ങള്‍ ആരംഭിക്കുന്നതിനും നിലവിലുളളവയുടെ വിപുലീകരണത്തിനും എന്‍ഡിപിആര്‍ഇഎം പദ്ധതി പ്രയോജനപ്പെടുത്താം. നോര്‍ക്ക റൂട്ട്‌സിന്‍റെ www.norkaroots.kerala.gov.in വെബ്‌സൈറ്റുവഴി പ്രവാസികള്‍ക്ക് അപേക്ഷ നല്‍കാവുന്നതാണ്.

തീരദേശപാത റെയില്‍പ്പാത ഇരട്ടിപ്പിക്കൽ മൂന്നു ഘട്ടമായി നടപ്പിലാക്കും

അമ്പലപ്പുഴ: തീരദേശപാത ഇരട്ടിപ്പിക്കല്‍ മൂന്നു ഘട്ടമായി നടപ്പിലാക്കുമെന്നും ആദ്യഘട്ടം അമ്പലപ്പുഴ മുതല്‍ ആലപ്പുഴ വരെയാണെന്നും കെ.സി. വേണുഗോപാല്‍ എംപി. ആലപ്പുഴ വഴിയുള്ള തീരദേശ റെയില്‍പ്പാത ഇരട്ടിപ്പിക്കല്‍ മൂന്നു പ്രത്യേക പദ്ധതികളാക്കി വിഭജിച്ച് നടത്തിപ്പ് വേഗത്തിലാക്കാന്‍ റെയില്‍വേ ബോര്‍ഡ് നിര്‍ദേശം നല്‍കിയതായി കെ.സി. വേണുഗോപാല്‍ എംപി അറിയിച്ചു. ഇതോടെ കഴിഞ്ഞ പത്തു വര്‍ഷമായി തുടരുന്ന അനിശ്ചിതത്വത്തിന് വിരാമമാകും. ആകെ പദ്ധതിച്ചെലവ് 1,726 കോടി രൂപയായി നിശ്ചയിച്ചിരുന്ന എസ്റ്റിമേറ്റ് തുക ഇതോടെ മൂന്നായി വിഭജിക്കും. ഇതനുസരിച്ച് അമ്പലപ്പുഴ മുതല്‍ ആലപ്പുഴ വരെയുള്ള 14 കിലോമീറ്റര്‍ പാത ഇരട്ടിപ്പിക്കുന്നത് ആദ്യഘട്ടമായി ഏറ്റെടുക്കും. ഈ മേഖലയിലെ എസ്റ്റിമേറ്റ് വിശദ പരിശോധന നടത്തിവരികയാണ്. ജനുവരിയോടെ ഡിപിആര്‍ പൂര്‍ത്തിയാക്കും. തുടര്‍ന്ന് ബോര്‍ഡിന്‍റെ അംഗീകാരം വാങ്ങി തുടര്‍നടപടികളിലേക്കു കടക്കുമെന്നും തിരുവനന്തപുരം ഡിവിഷണല്‍ റെയില്‍വേ മാനേജര്‍ ഇന്നലെ നടന്ന അവലോകന യോഗത്തില്‍ എംപിയെ അറിയിച്ചു. ഇതോടെ തിരുവനന്തപുരം മുതല്‍ ആലപ്പുഴവരെ ഇരട്ടപ്പാത പൂര്‍ത്തിയാകും. ദീര്‍ഘദൂര ട്രെയിനുകള്‍ക്കുള്‍പ്പെടെ കൂടുതല്‍ സ്റ്റോപ്പുകള്‍ അനുവദിക്കുന്നതിനും ട്രെയിനുകളുടെ വേഗം കൂട്ടുന്നതിനും ഇതു സഹായകരമാകുമെന്നും എംപി പറഞ്ഞു. കരുനാഗപ്പള്ളി മുതല്‍ തുറവൂര്‍ വരെയുള്ള ലോക്‌സഭാ മണ്ഡലത്തിലെ ഏഴു പ്രധാന റെയില്‍വേ സ്റ്റേഷനുകളില്‍ ഉന്നതതല റെയില്‍വേ ഉദ്യോഗസ്ഥ സംഘത്തോടൊപ്പം എംപി. സന്ദര്‍ശനം നടത്തിയതിന്‍റെ ഭാഗമായാണ് അവലോകന യോഗം ചേര്‍ന്നത്. കരുനാഗപ്പള്ളിയില്‍ കഴിഞ്ഞമാസം അനുവദിച്ച ആറു കോടിയുടെ വികസന പദ്ധതികള്‍ക്കായുള്ള എസ്റ്റിമേറ്റ് ഉടന്‍ പൂര്‍ത്തിയാകും. ടെന്‍ഡര്‍ നടപടികള്‍ പൂര്‍ത്തിയാക്കി നവംബറോടെ നിര്‍മാണപ്രവര്‍ത്തനങ്ങള്‍ ആരംഭിക്കും. രണ്ടു ലിഫ്റ്റുകള്‍ക്ക് അനുമതിയായി. പ്രധാന സ്റ്റേഷന്‍ കവാടം നവംബറോടെ യാത്രക്കാര്‍ക്ക് തുറന്നു കൊടുക്കാനാകുമെന്ന് ഉദ്യോഗസ്ഥര്‍ ഉറപ്പു നല്‍കി. അമ്പലപ്പുഴയില്‍ കൂടുതല്‍ മിനി പ്ലാറ്റ്‌ഫോം ഷെല്‍ട്ടറുകള്‍ സ്ഥാപിക്കും. ദൈനംദിന ഹ്രസ്വദൂര എക്‌സ്പ്രസ് ട്രെയിനുകള്‍ ഒന്നാം നമ്പര്‍ പ്ലാറ്റ്‌ഫോം വഴി കടത്തിവിടാനാകുമോ എന്നത് പരിശോധിക്കാന്‍ എം പി. നിര്‍ദേശിച്ചു. ഒരു ടോയ്‌ലറ്റ് കടി നിര്‍മ്മിക്കും. അപ്രോച്ച് റോഡ് അറ്റകുറ്റപ്പണി നടത്തി ഉപയോഗയോഗ്യമാക്കും. സ്റ്റേഷനില്‍ ലിഫ്റ്റ് സ്ഥാപിക്കുന്നതിനുള്ള നടപടികള്‍ സ്വീകരിക്കാന്‍ എം പി. നിര്‍ദേശിച്ചു. ആലപ്പുഴയിലെ അമൃത് ഭാരത് നിര്‍മ്മാണ പ്രവര്‍ത്തനങ്ങളും നവംബറോടെ പൂര്‍ത്തിയാകും. പ്ലാറ്റ്‌ഫോമുകളുടെ എണ്ണം വര്‍ധിപ്പിക്കാന്‍ ഒരു ഐലന്‍ഡ് പ്ലാറ്റ്‌ഫോം കൂടി നിര്‍മ്മിക്കുന്നതിനുള്ള സാധ്യത തേടും. ചേര്‍ത്തലയില്‍ ദേശീയപാതയില്‍ നിന്നും റെയില്‍വേ സ്റ്റേഷനിലേയ്ക്കുള്ള പ്രവേശനം സുഗമമാക്കുന്നതിന് സര്‍വീസ് റോഡ് നിര്‍മ്മിക്കാന്‍ ആവശ്യമായ ഭൂമി റെയില്‍വേ ലീസ് അടിസ്ഥാനത്തില്‍ ദേശീയപാതാ അതോറിറ്റിക്ക് വിട്ടുനല്‍കും. ഇതിനാവശ്യമായ ജോയിന്റ് സര്‍വേ പൂര്‍ത്തിയായി. ചേര്‍ത്തലയിലെ ഒന്നും രണ്ടും പ്ലാറ്റ്‌ഫോമുകളില്‍ ലിഫ്റ്റുകള്‍ സ്ഥാപിക്കും. കൂടുതല്‍ ദൈനംദിന ഹ്രസ്വദൂര എക്‌സ്പ്രസ് ട്രെയിനുകള്‍ ഒന്നാം നമ്പര്‍ പ്ലാറ്റ്‌ഫോം വഴി കടത്തിവിടുന്നതിന്‍റെ സാധ്യത പരിശോധിക്കും. മാരാരിക്കുളത്ത് പ്ലാറ്റ്‌ഫോമിന്‍റെ നീളം കൂട്ടും. പ്ലാറ്റ്‌ഫോമിന്‍റെ ഉയരം കൂട്ടുന്ന പ്രവൃത്തിയും ഉടന്‍ ആരംഭിക്കും. സ്റ്റേഷനില്‍ ഫുട്ഓവര്‍ ബ്രിഡ്ജ് അനുവദിച്ചതായും എംപി പറഞ്ഞു. അരൂര്‍, എഴുപുന്ന, കലവൂര്‍, വയലാര്‍, തുമ്പോളി എന്നിവിടങ്ങളിലും പ്ലാറ്റ്‌ഫോമിന്‍റെ ഉയരം കൂട്ടുന്നതിനുള്ള നടപടികള്‍ പുരോഗമിക്കുകയാണ്. മെമുവിന്‍റെ റേക്കുകള്‍ മെയിന്‍റനന്‍സിനായി ചെന്നൈയിലേയ്ക്ക് കൊണ്ടുപോകുന്നതുകാരണം ആലപ്പുഴവഴി പോകുന്ന മെമു ട്രെയിനുകളില്‍ 16 കോച്ചിനു പകരം 12 കോച്ചായി കുറയുന്നതുമൂലം വലിയ തിരക്കണ് അനുഭവപ്പെടുന്നത്. ഇതിനു പരിഹാരമായി മെയിന്‍റനന്‍സിനുള്ള റേക്കുകള്‍ക്കു പകരം ഉപയോഗിക്കുന്നതിന് എട്ടു കോച്ചുകളുള്ള ഒരു റേക്ക് കൂടി അനുവദിപ്പിക്കാന്‍ റെയില്‍വേ ബോര്‍ഡില്‍ സമ്മര്‍ദം ചെലുത്തുമെന്ന് എംപി പറഞ്ഞു.

കായംകുളം റെയിൽവേ സ്റ്റേഷൻ റോഡ് തകർന്നു

കായംകുളം: കെപി റോഡിൽനിന്നു റെയിൽവേ സ്റ്റേഷനിലേക്കുള്ള റോഡ് തകർന്ന് കുളമായി. ദിനം പ്രതി ആയിരകണക്കിന് യാത്രക്കാർ സഞ്ചരിക്കുന്ന റോഡാണ് തകർന്ന് വലിയ കുഴികൾ രൂപപ്പെട്ട് കിടക്കുന്നത്. രാത്രിയിൽ ട്രെയിനിൽ വന്നിറങ്ങി ഇരുചക്രവാഹനങ്ങളിൽ പോകുന്നവർ റോഡിന് മധ്യത്തിലെ വലിയ കുഴിയിൽ വീഴുന്ന അവസ്ഥയാണ്. ഇതുമൂലം കായംകുളം റെയില്‍വേ സ്റ്റേഷനിലേക്ക് എത്തുന്ന വാഹനങ്ങള്‍ അപകടത്തില്‍പെടുന്നത് പതിവായി. പുനരുദ്ധാരണ പ്രവൃത്തികള്‍ നടത്തിയ റെയില്‍വേ സ്റ്റേഷന്‍ റോഡിലാണ് ഇപ്പോൾ വലിയ കുഴികൾ രൂപപ്പെട്ട് യാത്ര ദുഷ്കരമായിരിക്കുന്നത്. വര്‍ഷങ്ങളായി തകര്‍ന്നുകിടന്ന റെയില്‍വേ സ്റ്റേഷന്‍ റോഡിന് റെയില്‍വേ അനുവദിച്ച 28 ലക്ഷം രൂപ വിനിയോഗിച്ചാണ് ഏഴു വർഷം മുമ്പ് പൂർത്തിയാക്കിയത്. റോഡ് പുനര്‍നിര്‍മിച്ച വേളയില്‍ അശാസ്ത്രീയമായി റോഡിൽ ഹമ്പുകള്‍ സ്ഥാപിച്ചത് വാഹനയാത്രക്കാര്‍ക്ക് അപകടഭീഷണിയായി മാറുകയും യാത്രക്കാരുടെ വലിയ പ്രതിഷേധത്തിന് ഇടയാക്കുകയും ചെയ്തിരുന്നു.

അതിവിശാലം സെന്‍റ് മേരീസ് പാലം, ചേർത്തലയ്ക്കിത് അഭിമാനം

ചേർത്തല: നീണ്ടനാളത്തെ കാത്തിരിപ്പിനൊടുവിൽ ചേർത്തല സെന്‍റ് മേരീസ് പാലത്തിന്‍റെ നിർമാണം പൂർത്തിയാവുന്നു. ഗതാഗതം മുടക്കിയും വഴിതിരിച്ചുവിട്ടും യാത്രക്കാർ കഷ്ടപ്പെട്ടതിന്‍റെ പ്രയോജനം യാത്രക്കാരെ സംതൃപ്തരാക്കുന്നു. വിശാലമായ രണ്ട് കവലകളാണ് പാലത്തിന് ഇരുപുറവും തയാറായിരിക്കുന്നത്. പാലത്തിന്‍റെ കിഴക്ക് ഭാഗത്ത് ആലപ്പുഴ - ചേർത്തല റോഡിലേക്ക് പോകുന്നതു കൂടാതെ വലത്തേക്ക് തിരിഞ്ഞ് ഹൈവേയിലേക്ക് പോകാനും ഇടത്തേക്ക് തിരിഞ്ഞ് അരൂക്കുറ്റി തുടങ്ങിയ ഭാഗത്തേക്ക് പോകുവാനും സാധിക്കുന്നു. സെന്‍റ് മേരീസ് പാലത്തിന് പടിഞ്ഞാറു ഭാഗത്തും അർത്തുങ്കൽ, ഹൈവേ, മുട്ടം പട്ടണം തുടങ്ങിയ ദിശകളിലേക്കു പോകാനും കഴിയും. ജില്ലയിലെ തന്നെ പ്രധാന ഗേൾസ് ഹൈസ്കൂളായ സെന്‍റ് മേരീസ് ജിഎച്ച്എസിനു മുന്നിൽ വലതുഭാഗത്തായി തലയെടുപ്പോടെ വിശാലമായ റോഡ് സൗകര്യത്തോടെ ഒരുങ്ങുന്ന പാലം ചേർത്തല നിവാസികൾക്ക് വലിയ യാത്രാസൗകര്യം ഒരുക്കിയിരിക്കുന്നു. ചേർത്തലയിലെ റോഡുകളുടെ പ്രധാന സംഗമസ്ഥാനങ്ങളാണ് ഇരുമ്പുപാലം, പടയണിപ്പാലം, സെന്‍റ് മേരീസ് പാലം എന്നിവ. ദേശീയപാത കടന്നുപോകുന്ന ആഹ്വാനം കലിങ്ക് പാലവും ചേർത്തലയുടെ കണക്കിൽ പെടുത്താമെങ്കിലും തോടിന് ഇരുപുറവുമുള്ള ചേർത്തല നഗരത്തിലെ ഇരുകരകളെ പ്രധാനമായി ബന്ധിപ്പിക്കുന്ന മൂന്നു പാലങ്ങൾ മുകളിൽ പറഞ്ഞതാണ്. അതിൽ തെക്കേ ഭാഗത്തെ പാലമായ സെന്‍റ് മേരീസ് പാലമാണ് ടാർ ചെയ്തത്. ഇനി വടക്കുഭാഗത്തെ ഇരുമ്പു പാലവും നടുഭാഗത്തെ പടയണി പാലവുമാണ് നവീകരിക്കാനുള്ളത്. ഏറെ തിരക്കുകളുള്ള ഈ രണ്ടു പാലങ്ങളും നവീകരണ ഭാഗമായി ബ്ലോക്ക് ചെയ്യുമ്പോൾ ആശ്രയമാകേണ്ട സെന്‍റ് മേരീസ് പാലത്തിന്‍റെ പൂർത്തീകരണം യാത്രക്കാർക്ക് അനുഗ്രഹം തന്നെ. ചേർത്തല നഗരത്തിന്‍റെ മുഖഛായ തന്നെ മാറുന്നതായിരിക്കും ഇരുമ്പുപാലം, പടയണി പാലം എന്നിവ കൂടി നവീകരിക്കുമ്പോൾ സംഭവിക്കുന്നത്. ദേശീയപാതയിൽനിന്ന് നഗരത്തിലേക്ക് കടന്നുവരുന്ന വാഹനങ്ങളുടെ പ്രധാന കവാടമാകുന്ന വടക്കേ അങ്ങാടി കവല സഞ്ചാരയോഗ്യമായെങ്കിലും മുഴുവൻ പണിയും കഴിഞ്ഞിട്ടില്ല. ട്രാഫിക് നിയന്ത്രണ സംവിധാനങ്ങൾ വച്ച് പൂർത്തിയാക്കി ഇരുമ്പുപാലത്തിലേക്ക് കണക്ട് ചെയ്യുമ്പോൾ വലിയ സഞ്ചാര സൗകര്യമാണ് ഉണ്ടാവാൻ പോകുന്നത്. കാര്യങ്ങൾ സമയബന്ധിതമായി നടക്കണമെന്നാണ് പൊതുജനങ്ങളുടെ ആവശ്യം.

മാവേലിക്കര ബിജെപിയിൽ സേവ് ലോട്ടസ് പൊട്ടിത്തെറി ; നേതൃത്വത്തിനെതിരേ പ്രവര്‍ത്തകര്‍, നഗരസഭയിൽ കൂട്ടരാജി ഭീഷണി

മാവേലിക്കര: മാവേലിക്കരയിലെ ബിജെപിയില്‍ വന്‍ പൊട്ടിത്തെറി. സേവ് ലോട്ടസ് എന്ന ഗ്രൂപ്പിലൂടെ സംഘടിച്ചാണ് നേതൃത്വത്തിനെതിരേ വിമര്‍ശനവുമായി ഒരു വിഭാഗം പ്രവർത്തകർ രംഗത്തുവന്നിരിക്കുന്നത്. നിയോജക മണ്ഡലം നേതാക്കള്‍ അടക്കമുള്ളവർക്കെതിരേ സാമ്പത്തിക അഴിമതി ഉള്‍പ്പെടെയുള്ള ഗുരുതര ആരോപണങ്ങളാണ് ഉയര്‍ത്തിയിരിക്കുന്നത്. സംസ്ഥാന നേതൃത്വം ഇടപെട്ട് ആരോപണ വിധേയര്‍ക്കതിരേ നടപടി സ്വീകരിച്ചില്ലെങ്കില്‍ മാവേലിക്കര നഗരസഭയിലെ ബിജെപി മെംബര്‍മാര്‍ ഒന്നടങ്കം രാജിവയ്ക്കുമെന്ന ഭീഷണിയും സേവ് ലോട്ടസ് മുഴക്കിയിട്ടുണ്ട്. നിയോജക മണ്ഡലം പ്രസിഡന്‍റ് വിനീതിനെ സ്ഥാനത്തുനിന്നു നീക്കിയതു മുതല്‍ മാവേലിക്കര ബിജെപിയില്‍ അസ്വസ്ഥതകള്‍ ഉയര്‍ന്നു തുടങ്ങിയിരുന്നു. ഇതിനിടെ, പ്രവര്‍ത്തന സ്വാതന്ത്ര്യം ഇല്ലായെന്ന ആക്ഷേപം ഉയര്‍ത്തി മാവേലിക്കര നഗരസഭ ബിജെപി പാര്‍ലമെന്‍ററി ലീഡര്‍ സ്ഥാനത്തുനിന്നു നഗരസഭ ഒന്നാം വാര്‍ഡ് മെമ്പര്‍ എച്ച്. മേഘനാഥ് രാജിവച്ചു. ഇതിനു പിന്നാലെയാണ് നേതൃത്വത്തിനെതിരേ പരസ്യവിമര്‍ശനം ഉയര്‍ന്നിരിക്കുന്നത്. അടുത്ത രണ്ട് തെരഞ്ഞെടുപ്പുകളിൽ സാന്പത്തിക നേട്ടം ലക്ഷ്യമിട്ടവരാണ് വിനീതിനെതിരേ കരുനീക്കിയതെന്നാണ് ആരോപണം. വിനീതിനെ മാറ്റിയതോടെ ഉയര്‍ന്ന പൊട്ടിത്തെറി സംസ്ഥാന അധ്യക്ഷന്‍തന്നെ നേരിട്ടിറങ്ങിയാണ് പരിഹരിച്ചത്. ആരോപണങ്ങൾ ഇങ്ങനെ എന്നാല്‍, വീണ്ടും പ്രശ്നങ്ങൾ രൂക്ഷമാവുകയാണ്. നിലവില്‍ നഗരത്തിലെ നാലേക്കര്‍ സ്ഥലം നികത്തുന്നത് അവസാനിപ്പിക്കാനായി നഗരസഭ മെംബര്‍മാരും പ്രവര്‍ത്തകരും നേതൃത്വത്തിനു നല്‍കിയ രേഖകള്‍ ഉപയോഗിച്ച് വസ്തു ഉടമയുടെ പക്കല്‍നിന്നു പണം വാങ്ങി, വസ്തു നികത്താന്‍ കൂട്ടുനിന്നു, ബിജെപി ജില്ലാ ഓഫീസിന്‍റെ പേരില്‍ വ്യാപക പണപ്പിരിവ്, വിവിധ അനധികൃത പണപരമായ ആരോപണങ്ങള്‍ എന്നിവയാണ് സേവ് ലോട്ടസ് ഉയര്‍ത്തിയിരിക്കുന്നത്. ആശങ്കയിൽ നേതൃത്വം നഗരസഭയിലെ ഒരു വാര്‍ഡ് മെംബര്‍ അഡ്മിനായ ഗ്രൂപ്പില്‍ നിരവധി മുന്‍നിര നേതാക്കളും അംഗങ്ങളായുണ്ട്. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് പടിവാതിൽക്കല്‍ എത്തിയപ്പോഴുള്ള ഈ പൊട്ടിത്തെറി നേതൃത്വത്തെ ആശങ്കയിലാക്കിയിരിക്കുകയാണ്. ബിജെപി ഭരണം പിടിക്കാൻ ലക്ഷ്യമിടുന്ന നഗരസഭ കൂടിയാണിത്. നിലവില്‍ യുഡിഎഫ്, എല്‍ഡിഎഫ് ഘടക കക്ഷിയായ ജനാധിപത്യ കേരള കോണ്‍ഗ്രസ് അംഗത്തിന്‍റെ പിന്തുണയോടെ ഭരിക്കുന്ന നഗരസഭയില്‍ കോണ്‍ഗ്രസ്-9, ബിജെപി-9, സിപിഎം-8, ജനാധിപത്യ കേരള കോണ്‍ഗ്രസ് -1, സ്വതന്ത്രന്‍ -1 ഇങ്ങനെയാണ് കക്ഷിനില. ഈ തെരഞ്ഞെടുപ്പില്‍ ഭരണം പിടിക്കാമെന്ന ബിജെപി മോഹത്തിനാണ് പുതിയ തർക്കങ്ങൾ ഭീഷണിയായിരിക്കുന്നത്. പരാതിയുള്ളവര്‍ കോടതിയെ സമീപിക്കട്ടെ: സന്ദീപ് വചസ്പതി മാവേലിക്കര: സമ്പത്തിക ആരോപണവുമായും ഇപ്പോള്‍ ഉയര്‍ന്നുവരുന്ന വിഷയങ്ങളുമായോ ബന്ധപ്പെട്ടു പാര്‍ട്ടിയെ പരാതിയുമായി ആരും സമീപിച്ചിട്ടില്ലെന്ന് ബിജെപി ആലപ്പുഴ തെക്കന്‍ ജില്ല അധ്യക്ഷന്‍ സന്ദീപ് വചസ്പതി. പരാതി ഉണ്ടെങ്കില്‍ അവര്‍ പോലീസിനേയോ കോടതിയെയോ സമീപിക്കട്ടെ. രാജിഭീഷണി മുഴക്കുന്നവർ പേര് പുറത്തുവിടണം. മുന്‍ ജില്ലാ അധ്യക്ഷന്‍ ഉള്‍പ്പെടെയുള്ള ഗ്രൂപ്പാണ് സേവ് ലോട്ടസ്. അതിൽ ആരോ ഇട്ട ഒരു പോസ്റ്റാണ് വിവാദത്തിനു കാരണം. താനതില്‍ അംഗമല്ലെന്നും വിഷയത്തില്‍ കൂടുതല്‍ കാര്യങ്ങള്‍ പറയാനില്ലെന്നും സന്ദീപ് പറഞ്ഞു.

കലകളുടെ ഉത്സവത്തിനു തുടക്കം

അമ്പലപ്പുഴ: ആലപ്പുഴ സഹോദയ കോംപ്ലക്‌സ് 19-ാമത് സി ബിഎസ്ഇ ജില്ലാ കലോത്സവം സിനിമാ താരവും ആലപ്പുഴ ചിന്മയ വിദ്യാലയ പൂര്‍വ വിദ്യാര്‍ഥിനിയുമായ ഡോ. ആരതി ഹരികുമാര്‍ ഉദ്ഘാടനം ചെയ്തു. തൊഴില്‍ പരമായും കലാപരമായും തന്നെ വാര്‍ത്തെടുത്തതില്‍ ചിന്മയ വിദ്യാലയത്തിലെ അധ്യാപകരുടെ പങ്കിനെ ഉദ്ഘാടന പ്രസംഗത്തില്‍ അവര്‍ അനുസ്മരിച്ചു. കളര്‍കോട് ചിന്മയ വിദ്യാലയ ദിവ്യാഞ്ജലി ഗോള്‍ഡന്‍ ജൂബിലി ഓഡിറ്റോറിയത്തില്‍ നടന്ന ഉദ്ഘാടന സമ്മേളനത്തില്‍ സഹോദയാ ജില്ലാ പ്രസിഡന്‍റ് ഡോ. എ. നൗഷാദ് അധ്യക്ഷത വഹിച്ചു. എ.എം. ആരിഫ് മുഖ്യാതിഥിയായി. സ്‌കൂള്‍ വിദ്യാഭാസ കാലത്തെ മധുരസ്മരണകള്‍ നമ്മളില്‍ എല്ലാക്കാലവും ഉണ്ടാകുമെന്ന് അദ്ദേഹം പറഞ്ഞു. സഹോദയ ജില്ലാ കലോത്സവ കണ്‍വീനര്‍ ചിന്മയാ വിദ്യാലയ പ്രിന്‍സിപ്പല്‍ ഡോ.ആര്‍.എസ്. രേഖ സ്വാഗതം പറഞ്ഞു. ഡോ.കെ. നാരായണന്‍ ചിന്മയ വിദ്യാലയ പ്രസിഡന്‍റ് ആശ യത്തീസ് സഹോദയ സെക്രട്ടറി, സിസ്റ്റര്‍ സെബി മേരി സഹോദയ ജോയിന്‍റ് സെക്രട്ടറി, എക്‌സിക്യൂട്ടീവ് കമ്മിറ്റി അംഗങ്ങളായ പി. ചന്ദ്രന്‍, ഗീത വി. പ്രഭു എന്നിവര്‍ പ്രസംഗിച്ചു. ജില്ലയിലെ സിബിഎസ്ഇ വിദ്യാലയങ്ങളിലെ മാനേജര്‍മാര്‍, പ്രധാനാധ്യാപകര്‍ തുടങ്ങി പ്രമുഖര്‍ 50 നിലവിളക്കുകള്‍ കൊളുത്തിയാണ് ചടങ്ങിന് ആരംഭം കുറിച്ചത്. സഹോദയ ട്രഷറര്‍ ഡയാന ജേക്കബ് നന്ദി രേഖപ്പെടുത്തി.

വയോധികന്‍റെ ശ്വാസനാളത്തിൽ താക്കോൽ; ബ്രോങ്കോസ്കോപ്പിയിലൂടെ പുറത്തെടുത്തു

അമ്പലപ്പുഴ: വയോധികന്‍റെ ശ്വാസനാളത്തിൽ കുടുങ്ങിയ താക്കോൽ ബ്രോങ്കോ സ്കോപ്പി പരിശോധനയിലൂടെ പുറത്തെടുത്ത് ആലപ്പുഴ മെഡിക്കൽ കോളജ് ആശുപത്രി ഡോക്ടർമാർ. ഹരിപ്പാട് ലക്ഷ്മി ഭവനത്തിൽ ചെല്ലപ്പൻപിള്ള (77)യുടെ ശ്വാസനാളത്തിൽ കുടുങ്ങിയ താക്കോലാണ് രണ്ടു മണിക്കൂർ നീണ്ട ബ്രോങ്കോ സ്കോപ്പി വഴി പുറത്തെടുത്തത്. ചൊവ്വാഴ്ച വീട്ടിൽ ബോധമറ്റു വീണ ചെല്ലപ്പൻപിള്ളയെ വീട്ടുകാർ ഉടൻ മെഡിക്കൽ കോളജ് ആശുപത്രിയിൽ എത്തിക്കുകയായിരുന്നു. ശ്വാസതടസവും ചുമയും അനുഭവപ്പെട്ട ഇദ്ദേഹത്തെ ഉടൻ എക്സ്റേ പരിശോധനയ്ക്ക് വിധേയനാക്കിയപ്പോഴാണ് താക്കോൽ ശ്വാസനാളത്തിൽ കുടുങ്ങിയ നിലയിൽ കണ്ടെത്തിയത്. ഉടൻ മറ്റ് ആരോഗ്യ പരിശോധനകളെല്ലാം പൂർത്തിയാക്കിയ ചെല്ലപ്പൻപിള്ളയെ ബുധനാഴ്ച ബ്രോങ്കോ സ്കോപ്പിക്ക് വിധേയനാക്കുകയായിരുന്നു. എന്നാൽ, താക്കോൽ എങ്ങനെ ഉള്ളിൽ പോയെന്ന് അറിയില്ലെന്ന് ചെല്ലപ്പൻപിള്ള പറഞ്ഞു. പുറത്തെടുത്ത താക്കോൽ അടുത്ത ദിവസങ്ങളിൽ ഉള്ളിൽ പോയതല്ലെന്നും മാസങ്ങളുടെ പഴക്കമുണ്ടെന്നും ഡോക്ടർമാർ പറഞ്ഞു. കാർഡിയോ വാസ്കുലർ സർജൻ ഡോ. ആനന്ദക്കുട്ടൻ, അനസ്തേഷ്യ വിഭാഗം പ്രഫസറും ആശുപത്രി സൂപ്രണ്ടുമായ ഡോ. എ. ഹരികുമാർ, അനസ്തേഷ്യ വിഭാഗം പ്രഫസർ ഡോ. വിമൽപ്രദീപ്, ജൂണിയർ റസിഡന്‍റ് ഡോ. ജോജി ജോർജ് എന്നിവർ ഉൾപ്പെട്ട സംഘമാണ് താക്കോൽ പുറത്തെടുത്തത്. ആരോഗ്യ നില തൃപ്തികരമായതിനാൽ ഇദ്ദേഹത്തെ ഡിസ്ചാർജ് ചെയ്തു.

ആൾക്കൂട്ട കൊലപാതകം: ബോധം പോകുന്നതുവരെ ക്രൂര മർദനമെന്ന് പരാതി

കായംകുളം: ചേരാവള്ളിയിൽ കുട്ടിയുടെ സ്വർണം മോഷ്ടിച്ചെന്ന് ആരോപിച്ച് മധ്യവയ്സകനെ ആൾക്കൂട്ടം മർദിച്ചു കൊലപ്പെടുത്തിയതു വളരെ ക്രൂരമായിട്ടാണെന്നു പോലീസ് കണ്ടെത്തി. മധ്യവയസ്കന്‍റെ ബോധം പോകുന്നതു വരെ പ്രതികൾ മർദനം തുടർന്നു. കായംകുളം ചേരാവള്ളി കോയിക്കൽ കിഴക്കതിൽ താമസിക്കുന്ന തിരുവനന്തപുരം കാരക്കോണം കുന്നത്ത് കോയിക്കപടീറ്റതിൽ സജി (ഷിബു-50 )ആണ് മർദനമേറ്റ് മരിച്ചത്. ഇദ്ദേഹം താമസിക്കുന്ന വീടിനു സമീപത്തെ രണ്ടു വയസുള്ള കുട്ടിയുടെ സ്വർണച്ചെയിൻ കാണാതായതിനെ തുടർന്നാണ് കുട്ടിയുടെ പിതാവും ബന്ധുക്കളും അയൽവാസികളും ഉൾപ്പടെ ഏഴു പേർ സംഘം ചേർന്നു മർദിച്ചതായി പറയുന്നത്. അറസ്റ്റിലായ മൂന്നു പേരെ കായംകുളം ഡിവൈഎസ്പിയുടെ നേതൃത്വത്തിലുള്ള സംഘം വിശദമായി ചോദ്യം ചെയ്തു വരികയാണ്. മർദനത്തിനിടെ സമീപത്തെ കനാലിലേക്കു വീണ സജിയെ പ്രതികൾ കരയ്ക്കു കയറ്റി വീണ്ടും മർദിച്ചു. തുടർന്ന് ഇയാൾ ബോധംകെട്ടു കുഴഞ്ഞു വീഴുകയായിരുന്നു. പിന്നീട് നാട്ടുകാർ ചേർന്നു കായംകുളം താലൂക്കാശുപത്രിയിലും തുടർന്നു വണ്ടാനം മെഡിക്കൽ കോളജിലും എത്തിച്ചെങ്കിലും മരണം സംഭവിച്ചു.കൊല്ലപ്പെട്ട സജിയുടെ ഭാര്യ സുധയുടെ പരാതിയിലാണ് പോലീസ് കേസെടുത്തത്.

വീട്ടമ്മ ചീങ്കണ്ണിയെ കണ്ടെന്ന്, നാട് ഭീതിയില്‍

ചേർത്തല: ചീങ്കണ്ണിയെ കണ്ടെന്ന് വീട്ടമ്മ പറഞ്ഞതോടെ നാട്ടിൽ ഭീതിപരന്നു. സംഭവം പിന്നീട് ഗൗരവമായതോടെ അർത്തുങ്കൽ പോലീസ് പ്രദേശത്ത് ജാഗ്രതാ നിർദേശം നൽകി. ചേർത്തല തെക്ക് പഞ്ചായത്ത് ആറാം വാർഡിൽ ഉൾപ്പെട്ട കരിപ്പേൽച്ചാൽ പ്രദേശത്ത് ഞായറാഴ്ച ഉച്ചയോടെ പുതുവൽ നികർത്തിൽ പ്രസന്നയാണ് ചീങ്കണ്ണിയെ കണ്ടെന്ന് വെളിപ്പെടുത്തിയത്. കഴിഞ്ഞ ഞായറാഴ്ച ഉച്ചയ്ക്കാണ് കണ്ടത്. വാർഡ് മെംബർ രാജഗോപാൽ അർത്തുങ്കൽ പോലീസിൽ വിവരം അറിയിച്ചതോടെ തെരച്ചിൽ നടത്തിയെങ്കിലും ചീങ്കണ്ണി ആണെന്ന് കണ്ടെത്താൻ കഴിഞ്ഞിട്ടില്ല. ചീങ്കണ്ണി എത്താനുള്ള സാഹചര്യമില്ലാത്തതിനാൽ ഉടുമ്പിനെയാകും പ്രസന്ന കണ്ടതെന്ന നിഗമനത്തിലാണ് പോലീസ്. ചാലിന് സമീപം നിൽക്കുന്ന മരത്തിന് ചുവട്ടിൽ സ്ഥിരമായി ചീങ്കണ്ണി വന്നു പോകുന്ന പാടും കൂടും പ്രസന്ന പോലീസിന് കാണിച്ചുകൊടുത്തിട്ടുണ്ട്. വർഷങ്ങളായി തൊഴിലുറപ്പ് ജോലിക്കു പോകുന്ന പ്രസന്ന ഉടുമ്പുകളെ സ്ഥിരമായി കാണാറുണ്ട്. എന്നാൽ, കഴിഞ്ഞദിവസം താന്‍ കണ്ടത് ചീങ്കണ്ണീയാണെന്ന് പ്രസന്ന ഉറപ്പിച്ചുതന്നെ പറയുന്നു. വർഷങ്ങൾക്ക് മുമ്പ് ഇവിടെ ചീങ്കണ്ണിയെ കണ്ടിട്ടുണ്ടെന്ന് പഴമക്കാർ പറയുന്നത് ഭീതിയുടെ ആഴം കൂട്ടുന്നുണ്ട്. കരിപ്പേൽചാൽ അറബിക്കടലുമായി ബന്ധപ്പെട്ട് കിടക്കുന്ന ചാലാണ്. ചാലിലും മറ്റ് പ്രദേശത്തും കുറ്റിക്കാടു പിടിച്ചുകിടക്കുന്നതിനാൽ ഉൾപ്രദേശങ്ങളിലേക്കു കൂടുതൽ തിരച്ചിൽ നടത്താനും ബുദ്ധിമുട്ടുണ്ടെന്ന് പോലീസ് പറഞ്ഞു.

റെയിൽവേ സ്റ്റേഷനുകളുടെ വികസനം : കെ.സി. വേണുഗോപാൽ എംപിയും റെയിൽവേ ഉദ്യോഗസ്ഥരും ഇന്ന് സന്ദർശനം നടത്തും

ആലപ്പുഴ: ആലപ്പുഴ ലോക്സഭാ മണ്ഡലത്തിലെ ഏഴു റെയിൽവേ സ്റ്റേഷനുകളിലെ അടിസ്ഥാന സൗകര്യങ്ങൾ ഉൾപ്പെടെയുള്ള യാത്രക്കാരുടെ പ്രശ്നങ്ങളും ആവശ്യങ്ങളും പരിശോധിക്കുന്നതിനായി കെ.സി. വേണുഗോപാൽ എംപിയും ഡിവിഷണൽ റെയിൽവേ മാനേജർ ഉൾപ്പെടെയുള്ള റെയിൽവേ ഉന്നതതല ഉദ്യോഗസ്ഥ സംഘവും ഇന്ന് ആലപ്പുഴ ലോക്സഭാ മണ്ഡലത്തിലെ വിവിധ സ്റ്റേഷനുകളിൽ സന്ദർശനം നടത്തും. കെ.സി. വേണുഗോപാൽ കഴിഞ്ഞദിവസം ഡൽഹിയിൽ റെയിൽവേ മന്ത്രിയുമായി നടത്തിയ കൂടിക്കാഴ്ചയുടെ തുടർച്ചയായാണ് സന്ദർശനം. രാവിലെ 9.30ന് കരുനാഗപള്ളി സ്റ്റേഷനിൽനിന്നു പരിശോധന ആരംഭിക്കും. തുടർന്ന് 10ന് കായംകുളം, 10.30ന് ഹരിപ്പാട്, 11ന് അമ്പലപ്പുഴ സ്റ്റേഷനുകളിലും പരിശോധന നടത്തും. 11.30ന് ആലപ്പുഴ സ്റ്റേഷനിലെത്തുന്ന സംഘം അവിടെ അവലോകന യോഗം ചേരും. അതിനുശേഷം ഉച്ചയ്ക്ക് ഒന്നിന് ചേർത്തലയിലും 1.30ന് തുറവൂരും സ്റ്റേഷനുകൾ സന്ദർശിച്ച് നിലവിലെ സ്ഥിതിഗതികൾ മനസിലാക്കും. കായംകുളവും ആലപ്പുഴയുമടക്കം വിവിധ റെയിൽവേ സ്റ്റേഷനുകളിൽ നടന്നുവരുന്ന അമൃത് ഭാരത് നിർമാണ പ്രവർത്തനങ്ങളുടെ പുരോഗതിയും സംഘം വിലയിരുത്തും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]