കൊച്ചി: ലോക്‌സഭാ തെരഞ്ഞെടുപ്പിന് ഇക്കുറി ജില്ലയില്‍ 27,786 പുതിയ വോട്ടര്‍മാര്‍. 18നും 19നും മധ്യേ പ്രായമുള്ള യുവ വോട്ടര്‍മാര്‍ ഏറ്റവും കൂടുതലുള്ളത് കുന്നത്തുനാട് മണ്ഡലത്തിലാണ്. ഇവിടെ 1411 പുതിയ പുരുഷ വോട്ടര്‍മാരും 1292 പുതിയ സ്ത്രീ വോട്ടര്‍മാരുമാണുള്ളത്. തെരഞ്ഞെടുപ്പിനോട് അനുബന്ധിച്ച് പ്രസിദ്ധീകരിച്ച വോട്ടര്‍ പട്ടിക പ്രകാരം 25 വരെയുള്ള കണക്കുകളാണിത്.
പുതിയ വോട്ടര്‍ പട്ടിക പ്രകാരം ജില്ലയില്‍ ആകെ 25,98,291 വോട്ടര്‍മാരാണ് ഉളളത്. 1264623 പുരുഷ വോട്ടര്‍മാരും, 1333640 സ്ത്രീ വോട്ടര്‍മാര്‍ക്കും പുറേമേ 28 ട്രാന്‍സ്‌ജെൻഡറുകളുമാണ് ഉള്ളത്. അന്തിമ വോട്ടര്‍ പട്ടിക പ്രസിദ്ധീകരിച്ചെങ്കിലും അവസാന നാളുകളില്‍ ലഭിച്ച അപേക്ഷകളിലെ നടപടിക്രമങ്ങള്‍ പുരോഗമിക്കുകയാണ്. പുതിയ അപേക്ഷകള്‍ സ്വീകരിക്കുന്നത് തുടരും.
പെരുമ്പാവൂര്‍ ( പുതിയ പുരുഷ വോട്ടര്‍മാര്‍ -925,പുതിയ സ്ത്രീ വോട്ടര്‍മാര്‍-904), അങ്കമാലി (1075, 1029), ആലുവ (1155, 1150), കളമശേരി (1191, 1294), പറവൂര്‍ (1030, 1095 ), വൈപ്പിന്‍ (688, 744), കൊച്ചി (540, 559), തൃപ്പൂണിത്തുറ (807, 922), എറണാകുളം (747, 747, ട്രാന്‍ഡ്‌ജെന്‍ഡര്‍-1), തൃക്കാക്കര (903, 849), പിറവം (946, 970, ട്രാന്‍സ്‌ജെന്‍ഡര്‍-1 ), മൂവാറ്റുപുഴ (1225, 1116), കോതമംഗലം (1271, 1199) എന്നിങ്ങനെയാണ് മണ്ഡലം തിരിച്ചുള്ള പുതിയ വോട്ടര്‍മാരുടെ കണക്ക്.