ഹേമ ഓണാഘോഷം ഗംഭീരമായി

അരുൺ ജോർജ് വാതപ്പള്ളിൽ

ഹെറിഫോർഡ്: ഹെറിഫോർഡ് മലയാളി അസോസിയേഷൻ(ഹേമ) സംഘടിപ്പിച്ച ഓണാഘോഷ പരിപാടികൾ ഗംഭീരമായി. 600റോളം അംഗങ്ങൾ പങ്കെടുത്ത പരിപാടി രാവിലെ 10.30ന് ആരംഭിച്ചു .

ഹെറിഫോഡിൽ വീണ്ടും എത്തിയ മഹാബലി തമ്പുരാൻ ഓണ വിളംബര പത്രിക ഹേമ പ്രസിഡന്‍റ് ജോജി വർഗീസ് ഈപ്പനു കൈമാറിയതോ‌ടെ പ്രസിഡന്‍റ് ചെണ്ട കൊട്ടി ഓണാഘോഷം വിളംബരം ചയ്തു.

തുടർന്നു ഹെരിഫോർഡിലെ സുന്ദരികളായ യുവതികൾ അണിയിച്ചൊരുക്കിയ തിരുവാതിര, ചെണ്ട മേളം, താലപ്പൊലി, മുത്തുക്കുട അകമ്പടിയോടെയുള്ള ഘോഷയാത്ര, അതിനു ശേഷം ഗ്ലോകസ്റ്റർ പഞ്ചാരിമേളത്തിന്‍റെ തകർപ്പൻ ചെണ്ട മേളത്തോടെ ആഘോഷത്തിന് തുടക്കം കുറിച്ചു.

കുട്ടികളുടേയും മുതിർന്നവരുടേയും അതിഗംഭീരമായ കലാപരിപാടികൾ നടന്നു. 12.30യോടു കൂടി അതിഗംഭീര ഓണസദ്യയും തുടർന്ന് നടന്ന കലാപരിപാടികളും ആഘോഷത്തിന് മാറ്റുകൂട്ടി.

ഓണാഘോഷത്തിന് ഇടയിലും മദ്യത്തിനും മയക്കുമരുന്നിനുമെതിരേ യുവ കലാകാരന്മാരുടെ ബോധവത്കരണ നാടകം എടുത്തു പറയേണ്ട ഒരു കലാപ്രകടനമായിരുന്നു. 3.30 ഓടു കൂടി ആരംഭിച്ച പൊതുസമ്മേളനം അംഗമായ സിത്താര അനോൺസ് സ്വാഗത പ്രസംഗം നടത്തുകയും പ്രസിഡന്‍റ് ജോജി വർഗീസ് ഈപ്പൻ അധ്യക്ഷത വഹിക്കുകയും ചെയ്തു.

തുടർന്ന് റോയൽ കോളജ് ഓഫ് നഴ്സിംഗ് കമ്മിറ്റി പ്രസിഡന്‍റ് ബിജോയി സെബാസ്റ്റ്യൻ ഉദ്ഘാടനം ചെയ്തു. യുകെയിലെ നഴ്സുമാരുടെ ഉന്നമനത്തിന് വേണ്ട പ്രവർത്തനങ്ങൾ നടപ്പിലാക്കുമെന്ന് അദ്ദേഹം ഉറപ്പുനൽകി.

കമ്മിറ്റി അംഗമായ ഡോ. നിഷാന്ത് ബഷീർ നന്ദി പ്രസംഗം നടത്തി. തുടർന്നു മലയാളം സിനിമാ താരങ്ങളായ ടിനി ടോം, പാഷാണം ഷാജി എന്നിവരുടെ നേതൃത്വത്തിൽ അവതരിപ്പിച്ച സ്റ്റേജ് ഷോപ്പ് ആഘോഷത്തിന് പ്രസരിപ്പും ഉന്മേഷവും നൽകി.

ഏകദേശം ഏഴരയോടെ അത്താഴത്തോടുകൂടി ആഘോഷ പരിപാടികൾ അവസാനിച്ചു.