ഇടതുസർക്കാർ കെഎസ്എഫ്ഇയെ കള്ളപ്പണം വെളുപ്പിക്കുന്ന സ്ഥാപനമാക്കി: ചെന്നിത്തല |

Click here for detailed news of all items

ഇടതുസർക്കാർ കെഎസ്എഫ്ഇയെ കള്ളപ്പണം വെളുപ്പിക്കുന്ന സ്ഥാപനമാക്കി: ചെന്നിത്തല

Monday, November 30, 2020 1:15 PM IST

പാലക്കാട്: കെഎസ്എഫ്ഇ കള്ളപ്പണം വെളുപ്പിക്കുന്ന സ്ഥാപനമായി മാറിയെന്നു പ്രതിപക്ഷ നേതാവ് രമേശ് ചെന്നിത്തല. വിജിലൻസ് കൂട്ടിലടച്ച തത്തയായി മാറിയെന്നും വിജിലൻസിനെ സർക്കാർ ഭീഷണിപ്പെടുത്തുന്നുവെന്നും പ്രതിപക്ഷനേതാവ് ആരോപിച്ചു.

കേരളത്തിൽ ഒരു അഴിമതിയും കൊള്ളയും കണ്ടെത്താൻ പാടില്ല. തങ്ങൾക്കിഷ്ടമുള്ള പോലെ ചെയ്യുമെന്നാണു സിപിഎം നിലപാട്. കേരളത്തിലെ വിജിലൻസ് സിപിഎം പറയുന്നതു പോലെ പ്രവർത്തിക്കണമെന്ന നിർബന്ധബുദ്ധിയുണ്ടെന്നതു വ്യക്തമാകുകയാണ്. കെഎസ്എഫ്ഇയുടെ വിശ്വാസ്യത നിലനിൽക്കണമെങ്കിൽ അന്വേഷണം വേണം. കുറ്റക്കാരെ കണ്ടെത്തണം. സംസ്ഥാന സർക്കാരിനു കൂട്ടുത്തരവാദിത്തം നഷ്ടപ്പെട്ടിരിക്കുകയാണെന്നും ചെന്നിത്തല പറഞ്ഞു.

സർക്കാരിന് ഇഷ്ടമുള്ളത് മാത്രം അന്വേഷിച്ചാൽ മതിയെന്നാണു നിർദേശിച്ചിട്ടുള്ളത്. വകുപ്പ് മന്ത്രി അറിയാതെ വിജിലൻസ് റെയ്ഡ് നടത്തില്ല. വിജിലൻസ് ഡയറക്ടർ അറിയാതെയും റെയ്ഡ് നടക്കില്ല. മുഖ്യമന്ത്രിയുടെ അറിവോടു കൂടി തന്നെയാണ് കെഎസ്എഫ്ഇയിൽ റെയ്ഡ് നടന്നത്. സിപിഎമ്മിനകത്തെ ശീതസമരത്തിന്‍റെ ഭാഗമായാണ് റെയ്ഡ്. മുഖ്യമന്ത്രിക്കെതിരെ സിപിഎമ്മിനകത്തു നീക്കം തുടങ്ങി. കെഎസ്എഫ്ഇയെ വെള്ളാനയാക്കി മാറ്റിയെന്നും ചെന്നിത്തല കുറ്റപ്പെടുത്തി.

തോമസ് ഐസക്ക് നടത്തുന്നത് മുഖ്യമന്ത്രിക്കെതിരായ നീക്കമാണ്. ധനമന്ത്രി മുഖ്യമന്ത്രിയുടെ വകുപ്പിനെതിരെ നിശിതമായ വിമർശനമാണ് നടത്തിയിരിക്കുന്നത്. എന്നിട്ടും മുഖ്യമന്ത്രി ഒന്നും മിണ്ടാത്തതെന്തെന്ന് വ്യക്തമാക്കണമെന്നും ചെന്നിത്തല ആവശ്യപ്പെട്ടു. വിജിലൻസ് ആൻഡ് ആന്‍റി കറപ്ഷൻ ബ്യൂറോ സിപിഎമ്മിന്‍റെ പോഷക സംഘടനയായി പ്രവർത്തിക്കുകയാണോയെന്നും പ്രതിപക്ഷ നേതാവ് ചോദിച്ചു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.