ADVERTISEMENT

ADVERTISEMENT

ഗതാഗതക്കുരുക്ക് : അങ്ങാടിപ്പുറം വഴിയുള്ള ബസുകൾ സർവീസ് നിർത്തുന്നു

പെരിന്തൽമണ്ണ: കോഴിക്കോട് - പാലക്കാട് ദേശീയപാതയിലെ അങ്ങാടിപ്പുറം കേന്ദ്രീകരിച്ചുള്ള ഗതാഗത കുരുക്ക് കാരണം സമയത്തിന് ഓടിയെത്താൻ കഴിയാത്തതിനാൽ ഇതുവഴിയുള്ള സ്വകാര്യ ബസുകൾ സർവീസ് നിർത്തുന്നു. സമയനഷ്ടം കാരണം ബസുകൾക്ക് പെരിന്തൽമണ്ണ മൂസക്കുട്ടി മെമ്മോറിയൽ ബസ് സ്റ്റാൻഡിൽ പ്രവേശിക്കാൻ മിക്ക ദിവസങ്ങളിലും കഴിയുന്നില്ല. ഇത് ബസ് ഉടമകൾക്കും ജീവനക്കാർക്കും സാന്പത്തിക നഷ്ടമുണ്ടാക്കുന്നു.

25നകം ഈ വിഷയത്തിൽ അധികൃതർ നടപടി സ്വീകരിക്കാത്തപക്ഷം 26 മുതൽ അങ്ങാടിപ്പുറം വഴി സർവീസ് നടത്തുന്ന സ്വകാര്യ ബസുകൾ സർവീസുകൾ നിർത്തി അനിശ്ചിതകാല സമരം സംഘടിപ്പിക്കുമെന്ന് ബസുടമകളുടെ പ്രവർത്തക സമിതി യോഗം തീരുമാനിച്ചു.

പണിമുടക്കുമായി ബന്ധപ്പെട്ട് അധികൃതർക്ക് നോട്ടീസ് നൽകി. സമര പ്രഖാപ്യനത്തിന് ബസ് ജീവനക്കാരുടെ സിഐടിയു യൂണിയൻ പ്രതിനിധികൾ ഐക്യദാർഢൃം പ്രകടിപ്പിച്ചു.

സംയുകതമായാണ് സമര പ്രഖ്യാപനം. യോഗത്തിൽ പ്രസിഡന്‍റ് സി. ഹംസ അധ്യക്ഷത വഹിച്ചു. സെക്രട്ടറി കെ. മുഹമ്മദലിഹാജി, സഫാന മുഹമ്മദലി, പാസ്കോ സഫീർ, പി. ജബ്ബാർ, സുൽഫി, ക്ലാസിക് ഇബ്രാഹിം, ഷംസു, മദീനബാപ്പു, വിശ്വൻ എന്നിവർ പ്രസംഗിച്ചു.

ADVERTISEMENT

പുഴക്കാട്ടിരി പഞ്ചായത്ത് ഓഫീസിലേക്ക് സിപിഎം മാർച്ച് നടത്തി

പുഴക്കാട്ടിരി: പാലൂർക്കോട്ട മേഖലയിലെ ചെങ്കൽ ഖനനം നിർത്തിവക്കുക, പാലൂർക്കോട്ട വെള്ളച്ചാട്ടം സന്ദർശിക്കുന്ന വിനോദ സഞ്ചാരികളുടെ സുരക്ഷ ഉറപ്പുവരുത്താൻ നടപടികൾ സ്വീകരിക്കുക എന്നീ ആവശ്യങ്ങൾ ഉന്നയിച്ച് സിപിഎം പുഴക്കാട്ടിരി ലോക്കൽ കമ്മിറ്റി പഞ്ചായത്ത് ഓഫീസിലേക്ക് ജനകീയ മാർച്ച് സംഘടിപ്പിച്ചു. മങ്കട ഏരിയാ സെക്രട്ടറി മോഹനൻ പുളിക്കൽ ഉദ്ഘാടനം ചെയ്തു. ഉണ്ണി പാതിരിക്കോട് അധ്യക്ഷനായിരുന്നു. എം.പി. കൈരളി, പി.ടി. ബഷീർ, ലോക്കൽ കമ്മിറ്റി സെക്രട്ടറി എൻ. ഗോപാലകൃഷ്ണൻ, കെ.ടി. ജയദേവൻ എന്നിവർ പ്രസംഗിച്ചു.

വനഭൂമിയിലെ മരം വീണ് തകർന്ന വീട് മന്ത്രി സന്ദർശിച്ചു

പൂക്കോട്ടുംപാടം: അമരന്പലം പാട്ടക്കരന്പിൽ വനഭൂമിയിലെ മരം വീണ് വീട് വാസയോഗ്യമല്ലാതായ കുടുംബത്തെ വനംമന്ത്രി എ.കെ. ശശീന്ദ്രൻ സന്ദർശിച്ചു. കുന്നുമൽ സലാമിന്‍റെ വീട്ടിലെത്തിയ മന്ത്രി തകർന്ന വീട് വീക്ഷിച്ചു. കഴിഞ്ഞദിവസം വൈകിട്ട് ഏഴുമണിയോടെയാണ് കരുളായി വനഭൂമിയിൽ നിന്നുള്ള കൂറ്റൻ മരം സലാമിന്‍റെ വീടിന് മുകളിൽ പതിച്ചത്. വാസയോഗ്യമല്ലാതായ കുടുംബത്തിന് താമസിക്കാൻ കണ്ടെത്തിയ വീടിന്‍റെ വാടകയും മാറാനുള്ള ചെലവും ചികിത്സാ ചെലവും വനം വകുപ്പ് നൽകി. വീട് പുനർനിർമിക്കാനുള്ള ചെലവും വനംവകുപ്പ് വഹിക്കും. വീടിന് മുകളിൽ വീണ മരം വനംവകുപ്പ് മുറിച്ച് മാറ്റിയിരുന്നു. നിലവിലെ നിയമം അനുസരിച്ച് ഈ കുടുംബത്തിന് ചെയ്യാവുന്ന പരമാവധി സഹായം അടിയന്തരമായി ചെയ്യുമെന്നും പരിക്കേറ്റ കുടുംബാഗങ്ങൾക്കുള്ള ചികിത്സ സഹായവും നൽകുമെന്നും മന്ത്രി പറഞ്ഞു. ഒപ്പം തന്നെ പാട്ടക്കരിന്പ് നിവാസികൾ ’നവകിരണം’ പദ്ധതിയുൾപ്പെടെയുള്ള പ്രശ്നങ്ങൾ ചൂണ്ടിക്കാട്ടി മന്ത്രിക്ക് പരാതി നൽകിയിട്ടുണ്ട്. ഇവ പരിശോധിച്ച് നിയമാനുസൃതം കാര്യങ്ങൾ വേഗത്തിൽ ചെയ്യുമെന്നും മന്ത്രി പറഞ്ഞു. എൻസിപി ജില്ലാ പ്രസിഡന്‍റ് കെ.പി. രാമനാഥൻ, ബ്ലോക്ക് പ്രസിഡന്‍റ് പരുന്തൻ നൗഷാദ്, ജനാധിപത്യ കേരള കോണ്‍ഗ്രസ് ജില്ലാ പ്രസിഡന്‍റ് എം.എ. വിറ്റാജ്, ജൂബിറ്റ് സാബു, അനീഷ് കെ. പുന്നക്കുഴിയിൽ, കെ. വിജയൻ, റഹൂഫ് എന്നിവരും മന്ത്രിക്കൊപ്പമുണ്ടായിരുന്നു. തുടർന്ന് പാട്ടക്കരിന്പ് പട്ടികവർഗ ഉന്നതിയിലും മന്ത്രി സന്ദർശനം നടത്തി. ഇവിടുത്തെ വീടുകൾക്ക് ഭീഷണിയായ വനഭൂമിയിലെ മരങ്ങൾ മുറിച്ച് മാറ്റാനാവശ്യപ്പെട്ട് ആദിവാസികൾ മന്ത്രിക്ക് നിവേദനവും നൽകി.

ചെങ്കൽ ഖനനത്തിനെതിരേ നിവേദനം നൽകി

കൊളത്തൂർ: 2019 ലെ ഉരുൾപൊട്ടലിൽ നിരവധി നാശനഷ്ടങ്ങൾ സംഭവിച്ചതിനെത്തുടർന്ന് പാലൂർകോട്ട ഭാഗത്തുണ്ടായിരുന്ന ചെങ്കൽ ഖനനം പൊതുജനങ്ങളുടെ എതിർപ്പ് കാരണം നിർത്തിവച്ചിരുന്നു. ഇപ്പോൾ വീണ്ടും പ്രദേശത്ത് ഖനനം നടത്തുന്നതിനെതിരേ നാട്ടുകാർ മങ്കട ബ്ലോക്ക് പഞ്ചായത്ത് പ്രസിഡന്‍റിനും കൊളത്തൂർ പോലീസിനും പരാതി നൽകി. ബ്ലോക്ക് പഞ്ചായത്തിന്‍റെ ഉടമസ്ഥതയിലുള്ള ഇൻഡസ്ട്രിയൽ എസ്റ്റേറ്റിലേക്ക് മാത്രം അവകാശപ്പെട്ട വഴിയിലൂടെ കല്ലുകൾ കൊണ്ടുപോകുന്നത് പോലീസ് ഇടപെട്ട് നിർത്തിവയ്ക്കണമെന്ന് ആവശ്യപ്പെട്ട് പൊതുജനങ്ങളിൽ നിന്നും ഗ്രാമപഞ്ചായത്ത് അധികൃതരിൽ നിന്നും ലഭിച്ച പരാതികൾ ബ്ലോക്ക് പഞ്ചായത്ത് പ്രസിഡന്‍റ് ടി.അബ്ദുൾ കരീം, വൈസ് പ്രസിഡന്‍റ് കെ.വി. ജുവേരിയ, ബ്ലോക്ക് മെംബമാരായ ബിന്ദു കണ്ണൻ, കെ.പി. അസ്മാബി എന്നിവർ കൊളത്തൂർ പോലീസ് സ്റ്റേഷൻ അധികാരികൾക്ക് കൈമാറി.

വിദ്യാർഥികളിൽ നിന്ന് അമിത ബസ് ചാർജ് ഈടാക്കുന്നതായി പരാതി

രാമപുരം: ജില്ലാ കളക്ടറുടെ വാക്കുകൾക്ക് പുല്ലുവില കൽപ്പിച്ച് വിദ്യാർഥികളിൽ നിന്ന് അമിത ബസ് ചാർജ് ഈടാക്കുന്നതായി പരാതി. മലപ്പുറം -പെരിന്തൽമണ്ണ വഴി രാമപുരം റൂട്ടിൽ ഓടുന്ന ചില ലോക്കൽ ബസുകളാണ് അവർക്ക് തോന്നുന്നത് പോലെ ചാർജ് ഈടാക്കുന്നതായി ആക്ഷേപം. ഇതേത്തുടർന്ന് ജില്ലാ കളക്ടർക്കും ഗതാഗത വകുപ്പ് മന്ത്രിക്കും ബന്ധപ്പെട്ട അധികാരികൾക്കും രാമപുരം പൗരസമിതിയും രക്ഷിതാക്കളുടെ കൂട്ടായ്മയും സംയുക്തമായി പരാതി നൽകി. രണ്ടുദിവസം മുന്പ് ഒരു കുട്ടിയെ ഇതിന്‍റെ പേരിൽ ബസിൽ നിന്ന് വഴിയിൽ ഇറക്കിവിട്ടതായും ചില കുട്ടികളെ ശാരീരികവും മാനസികമായും ഉപദ്രവിച്ചതായും പരാതിയിൽ ഉന്നയിക്കുന്നു. ഇതിനെ തുടർന്ന് രാമപുരത്ത് നാട്ടുകാർ സ്വകാര്യബസ് തടഞ്ഞിരുന്നു. നിലവിൽ സർക്കാർ അടിസ്ഥാനത്തിൽ കണ്‍സഷൻ രണ്ടര രൂപയാണ്. എന്നാൽ വിദ്യാർഥികൾ നൽകുന്നത് അഞ്ചുരൂപയാണ്. രാവിലെ നേരത്തെ ട്യൂഷന് പോയി പിന്നീട് സ്കൂളിലേക്കാണ് കുട്ടികൾ പോകുന്നത്. അവർക്കും കണ്‍സഷൻ ബാധകമാണ്. വെക്കേഷൻ കാലയളവിൽ അല്ലാതെയും ട്യൂഷനു വേണ്ടി കണ്‍സഷൻ നൽകേണ്ടതാണ്. രാവിലെ പോകുന്ന ട്യൂഷൻ കുട്ടികളിൽ നിന്ന് പത്തുരൂപയാണ് വാങ്ങുന്നത്. ഇതു നിയമവിരുദ്ധമാണന്നും ശ്രദ്ധയിൽപെട്ടാൽ പരാതി നൽകാവുന്നതാണന്നും ഒരു കുട്ടിയും അഞ്ചിൽ കൂടുതൽ തുക സ്കൂൾ പ്രവൃത്തി ദിവസങ്ങളിൽ നൽകരുതെന്നും നിർദേശമുണ്ട്. രണ്ടര രൂപ ചാർജുള്ള സ്ഥലത്തേക്ക് അഞ്ച് രൂപയാണ് വാങ്ങുന്നതെന്നാണ് പരാതി. ചില ഘട്ടങ്ങളിൽ വിദ്യാർഥികളിൽ നിന്ന് ബസ് ജീവനക്കാർ ഫുൾ ചാർജ് വാങ്ങിക്കുന്നതായിട്ടും പരാതിയുണ്ട്. ട്യൂഷൻ ക്ലാസുകൾക്ക് ഇളവില്ലെന്ന് പറഞ്ഞാണ് വിദ്യാർഥികളോട് ഇങ്ങനെ പെരുമാറുന്നത്. ബസുകൾ സ്കൂൾ സമയങ്ങളിൽ സ്റ്റോപ്പിൽ നിർത്താതെ അകലെ പോയി നിർത്തി സാധാരണ യാത്രക്കാരെ മാത്രം കയറ്റി പോകുന്ന അവസ്ഥയുണ്ട്. വിദ്യാർഥികൾ ഓടിവരുന്പോൾ അവരെ കയറ്റാതെ അമിതവേഗതയിൽ ബസ് എടുത്തുപോകുന്നു. വിഷയത്തിൽ പരിഹാരമുണ്ടായിട്ടില്ലെങ്കിൽ സമരപരിപാടികളുമായി രംഗത്തിറങ്ങാനാണ് രാമപുരം പരസമിതിയുടെ തീരുമാനം. കഴിഞ്ഞ ദിവസം നാട്ടുകാരുമായി നടന്ന തർക്കങ്ങളെ തുടർന്ന് ബസ് ജീവനക്കാരുടെ പരാതിയിൽ കണ്ടാലറിയുന്ന നാട്ടുകാർക്കെതിരെ മങ്കട പോലീസ് കേസെടുത്തിട്ടുണ്ട്.

47 വർഷം മുന്പ് ഏറ്റെടുത്ത ഭൂമി വനം വകുപ്പിന് കൈമാറി

മഞ്ചേരി: 1978ൽ റവന്യൂ വകുപ്പ് ഏറ്റെടുത്ത ഭൂമി തിരികെ വനം വകുപ്പിനു തന്നെ കൈമാറി. റവന്യൂ വകുപ്പ് വഴി ഭൂരഹിതർക്ക് പതിച്ചു നൽകുന്നതിനായി വനംവകുപ്പിൽ നിന്ന് ഏറ്റെടുത്ത ഭൂമിയിൽ പതിച്ചു കൊടുത്തതിന് ശേഷം അവശേഷിക്കുന്ന ഭൂമിയാണ് സർവേ നടത്തി തിരിച്ചു നൽകിയത്. ഉൗർങ്ങാട്ടിരി, വെറ്റിലപ്പാറ, പെരകമണ്ണ, എടവണ്ണ വില്ലേജുകളിലായി 766.8779 ഹെക്ടർ ഭൂമിയാണ് എടവണ്ണ ഫോറസ്റ്റ് റേഞ്ച് ഓഫീസർക്ക് കൈമാറിയത്. സർവേ നടത്തിയ സ്കെച്ചും മഹസറുകളും ജില്ലാ കളക്ടർക്കും കൈമാറി. 1971 ലെ കേരള പ്രൈവറ്റ് ഫോറസ്റ്റ് (വെസ്റ്റിംഗ് ആൻഡ് അസൈൻമെന്‍റ്) ആക്ട് പ്രകാരം ഭൂരഹിതരായ വ്യക്തികൾക്ക് ഭൂമി പതിച്ചു നൽകുന്നതിലേക്കായി വനം വകുപ്പ് റവന്യു വകുപ്പിന് 1978 ൽ 1917.4840 ഹെക്ടർ നിക്ഷിപ്ത വനഭൂമി കൈമാറിയിരുന്നു. അതിൽ 1980 കേരള വന സംരക്ഷണ നിയമം പ്രാബല്യത്തിൽ വരുന്നതിനു മുന്പ് അർഹരായ വ്യക്തികൾക്ക് പതിച്ചുനൽകിയ വനഭൂമി ഒഴികെ അവശേഷിക്കുന്ന ഭൂമി വനം വകുപ്പിന് തിരികെ കൈമാറണമെന്നാവശ്യപ്പെട്ട് ഹൈക്കോടതിയിൽ പൊതുതാൽപര്യ ഹർജി ഫയൽ ചെയ്തിരുന്നു. ഹർജിയിൽ മേലുള്ള കോടതി ഉത്തരവനുസരിച്ച് വകുപ്പുകൾ സംയുക്തമായി സർവേ നടപടികൾ ആരംഭിച്ചിരുന്നെങ്കിലും നടപടികളിൽ വനം വകുപ്പിനെ ഉൾപ്പെടുത്തുകയോ സമയബന്ധിതമായ പൂർത്തികരിക്കുയോ ചെയ്തിരുന്നില്ല. തുടർന്ന് പൊതുപ്രവർത്തകനായ അബൂബക്കർ ഹൈക്കോടതിയെ സമീപിക്കുകയും റവന്യു, സർവേ, വനംവകുപ്പുകൾ സംയുക്തമായി സർവേ നടത്തി സർവേ നടപടികൾ അടിയന്തരമായി പൂർത്തീകരിക്കുന്നതിന് ഉത്തരവ് സന്പാദിക്കുകയുമായിരുന്നു. 2007ലാണ് സർവേ നടപടികൾ ആരംഭിക്കുന്നത്. 40 സർവേയർമാരടക്കം ആയിരത്തിലധികം പേർ വിവിധ സമയങ്ങളിലായി പ്രവൃത്തികളിൽ പങ്കെടുത്തിരുന്നു. ഏറനാട് താലൂക്കിൽ എടവണ്ണ, പെരകമണ്ണ, വെറ്റിലപ്പാറ, ഉൗർങ്ങാട്ടിരി വില്ലേജുകളിൽ ചെക്കുന്നു മലവാരം, ആലങ്ങാടൻ മലവാരം, ഉൗർങ്ങാട്ടിരി മലവാരം, കുറ്റാടൻ മലവാരം എന്നിവിടങ്ങളിലായാണ് ഭൂമിയുണ്ടായിരുന്നത്.

ബൈക്ക് യാത്രികനെ തെരുവ്നായ കടിച്ചു

അങ്ങാടിപ്പുറം: അങ്ങാടിപ്പുറം മേൽപ്പാലത്തിലൂടെ ബൈക്കിൽ വരികയായിരുന്ന അങ്ങാടിപ്പുറം സ്വദേശിയായ യുവാവിന് തെരുവ്നായയുടെ കടിയേറ്റു. ഇന്നലെ രാവിലെ പെരിന്തൽമണ്ണ ഭാഗത്ത് നിന്ന് മേൽപ്പാലം വഴി അങ്ങാടിപ്പുറത്തേക്ക് വരികയായിരുന്ന യുവാവിനാണ് മേൽപ്പാലം ഇറങ്ങിയ ഉടനെ നായയുടെ കടിയേറ്റത്. കാലിന്‍റെ മുട്ടിനു താഴെ കടിയേറ്റ ഇയാൾ പെരിന്തൽമണ്ണ ജില്ലാ ആശുപത്രിയിൽ ചികിത്സതേടി. പെരിന്തൽമണ്ണ ജൂബിലി ജംഗ്ഷനിൽ നാട്ടുകൽ 55-ാം മൈൽ സ്വദേശിക്കും ഇന്നലെ രാവിലെ നായയുടെ കടിയേറ്റിട്ടുണ്ട്. ഇദ്ദേഹവും പെരിന്തൽമണ്ണ ജില്ലാ ആശുപത്രിയിൽ ചികിത്സ തേടി. അങ്ങാടിപ്പുറം റെയിൽവേ സ്റ്റേഷൻ പരിസരത്തും അങ്ങാടിപ്പുറം പഞ്ചായത്ത് പതിമൂന്നാം വാർഡിലെ ഐഎച്ച്ആർഡിക്ക് സമീപമുള്ള ഗാന്ധിനഗറിലും തെരുവ്നായ്ക്കളുടെ ശല്യം രൂക്ഷമാണ്. മൗലാന നഴ്സിംഗ് കോളജ് വിദ്യാർഥികളും ഐഎച്ച്ആർഡി സ്കൂളിലേക്ക് പോകുന്ന വിദ്യാർഥികളും ഗാന്ധിനഗർ നിവാസികളും തെരുവുനായശല്യം നേരിടുന്നു. മാസങ്ങൾക്കു മുന്പാണ് അങ്ങാടിപ്പുറം പുത്തനങ്ങാടിയിൽ കൈക്കുഞ്ഞ് അടക്കമുള്ള നിരവധി പേർക്ക് നായയുടെ കടിയേറ്റത്. തിരൂർക്കാട് ഭാഗത്ത് തൊഴിലുറപ്പ് തൊഴിലാളികളെ അടക്കം നായ കടിച്ചിരുന്നു. ഇതിൽ ഒരു സ്ത്രീ ചികിത്സയിലിരിക്കെ മരിച്ചു.

ഉപതെരഞ്ഞടുപ്പ്: കണ്‍ട്രോൾ റൂം ശക്തമാക്കി

നിലന്പൂർ: ഉപതെരഞ്ഞെടുപ്പുമായി ബന്ധപ്പെട്ട് ചീഫ് ഇലക്ടറൽ ഓഫീസിൽ കണ്‍ട്രോൾ റൂമിന്‍റെ പ്രവർത്തനങ്ങൾ കൂടുതൽ ശക്തമാക്കിയതായി ചീഫ് ഇലക്ട്രൽ ഓഫീസർ ഡോ. രത്തൻ യു. കേൽക്കർ. പോളിംഗ് സ്റ്റേഷനുകൾ, ചെക്ക് പോസ്റ്റുകൾ എന്നിവിടങ്ങളിലെ തത്സമയ ദൃശ്യങ്ങൾ ചീഫ് ഇലക്ടറൽ ഓഫീസിലെ കണ്‍ട്രോൾ റൂമിൽ തയാറാക്കിയിട്ടുള്ള മോണിറ്ററിൽ നിരീക്ഷിച്ചു കൊണ്ടിരിക്കും. ജില്ലാ തെരഞ്ഞെടുപ്പ് ഓഫീസർ, റിട്ടേണിംഗ് ഓഫീസർ എന്നിവരുമായി ബന്ധപ്പെടുന്നതിന് പ്രത്യേക ടെലിഫോണ്‍ സംവിധാനവും ഏർപ്പെടുത്തിയിട്ടുണ്ട്. ഇന്ത്യൻ തെരഞ്ഞെടുപ്പ് കമ്മീഷന് തൽസമയ വിവരങ്ങൾ അറിയിക്കുന്നതിന് പ്രത്യേക ടീമിനെയും വ്യാജവാർത്തകളും തെറ്റായ വിവരങ്ങളും റിപ്പോർട്ട് ചെയ്യുന്നതിനും അവയ്ക്കെതിരെ നടപടി എടുക്കുന്നതിനും പ്രത്യേക സംഘത്തെയും സജ്ജമാക്കിയിട്ടുണ്ട്. പോളിംഗ് ദിനമായ 19 ന് രാവിലെ ഏഴു മുതൽ വൈകിട്ട് 6.30 വരെ എക്സിറ്റ് പോൾ, ഫലങ്ങൾ അച്ചടി, ഇലക്ട്രോണിക് മാധ്യമത്തിലോ മറ്റേതെങ്കിലും രീതിയിലോ പ്രസിദ്ധീകരിക്കുന്നതും പ്രചരിപ്പിക്കുന്നതും പോളിംഗിന്‍റെ അവസാന സമയത്തിന് മുന്പുളള 48 മണിക്കൂർ കാലയളവിൽ ഏതെങ്കിലും ഇലക്ട്രോണിക് മാധ്യമത്തിൽ അഭിപ്രായസർവേ, മറ്റ് സർവേ ഫലങ്ങൾ ഉൾപ്പെടെയുളള തെരഞ്ഞെടുപ്പ് വിഷയങ്ങൾ പ്രദർശിപ്പിക്കുന്നതും തെരഞ്ഞെടുപ്പ് കമ്മീഷൻ നിരോധിച്ചിട്ടുണ്ടെന്ന് മുഖ്യതെരഞ്ഞെടുപ്പ് ഓഫീസർ അറിയിച്ചു. ഉപതെരഞ്ഞെടുപ്പിന്‍റെ ഭാഗമായി ജില്ലാ തെരഞ്ഞെടുപ്പ് കണ്‍ട്രോൾ റൂം ജില്ലാ കളക്ടറുടെ കാര്യാലയത്തിലും (ഫോണ്‍: 0483 2734990) കോൾ സെന്‍റർ നിലന്പൂർ റസ്റ്റ് ഹൗസിലും ( ഫോണ്‍: 048931 220039) സജ്ജീകരിച്ചതായി ജില്ലാ കളക്ടർ അറിയിച്ചു.

മഞ്ചേരി ബസ് സ്റ്റാൻഡ് കെട്ടിട നിർമാണം പുരോഗമിക്കുന്നു

മഞ്ചേരി: മഞ്ചേരി നഗരമധ്യത്തിലുണ്ടായിരുന്ന പഴയ ബസ് സ്റ്റാൻഡ് കെട്ടിടം പൊളിച്ചു മാറ്റി നിർമിക്കുന്ന പുതിയ ബസ് ബേ കം ഷോപ്പിംഗ് കോംപ്ലക്സിന്‍റെ പ്രവൃത്തി ദ്രുതഗതിയിൽ പുരോഗമിക്കുന്നു. സെപ്റ്റംബർ മാസത്തോടെ പൂർത്തിയാകുമെന്ന് പ്രതീക്ഷിച്ചിരുന്ന കെട്ടിടത്തിന്‍റെ പ്രവൃത്തി പ്രതീക്ഷിച്ചതിലുമപ്പുറം വേഗത കൈവന്നതിനാൽ ഓഗസ്റ്റിൽ തന്നെ ഉദ്ഘാടനം ചെയ്യാനാകുമെന്ന് പ്രതീക്ഷിക്കുന്നതായി നഗരസഭാധ്യക്ഷ വി.എം. സുബൈദ പറഞ്ഞു. നഗരസഭയുടെ സ്വപ്ന പദ്ധതിയായ അഹമ്മദ് കുരിക്കൾ സ്മാരക ബസ് ബേ കം ഷോപ്പിംഗ് കോംപ്ലക്സിന് 2024 ഫെബ്രുവരി മൂന്നിനാണ് അഡ്വ. യു.എ. ലത്തീഫ് എംഎൽഎ തറക്കല്ലിട്ടത്. എറണാകുളം ആസ്ഥാനമായി പ്രവർത്തിക്കുന്ന ടി.എ. സേവിയർ ആൻഡ് സണ്‍സ് നിർമാണ കന്പനിയാണ് കരാർ ഏറ്റെടുത്തത്. ആദ്യഘട്ടത്തിൽ ഗ്രൗണ്ട് ഫ്ളോർ അടക്കം മൂന്ന് നിലയുണ്ടാകും. 114 മുറികളും സജ്ജമാക്കും. 5.72 കോടി രൂപക്കാണ് നിർമാണ പ്രവൃത്തി ടെൻഡർ എടുത്തത്. ഇതിന് പുറമെ ഒരു കോടി രൂപ വൈദ്യുതീകരണം, ലിഫ്റ്റ്, ഫയർ ആൻഡ് സംവിധാനം എന്നിവക്ക് 20 ലക്ഷം രൂപ വീതവും ചെലവ് വരും. ബസുകൾ കടന്നുപോകുന്ന ഭാഗത്ത് ഇന്‍റർലോക്ക് വിരിക്കും. ഇതിനുള്ള തുകയും എസ്റ്റിമേറ്റിലുണ്ട്. ഒന്പതര കോടി രൂപയുടെ എസ്റ്റിമേറ്റാണ് തയാറാക്കിയത്. ഇതിൽ ഒന്പത് കോടി രൂപ മഞ്ചേരി സർവീസ് സഹകരണ ബാങ്കിൽ നിന്ന് വായ്പയെടുക്കും. വാണിജ്യകേന്ദ്രങ്ങൾക്ക് പുറമെ, ഓപ്പണ്‍ ഓഡിറ്റോറിയം, പാർക്കിംഗ് ഏരിയ, ടോയ്ലറ്റ് കോംപ്ലക്സ് എന്നിവയും പുതിയ സമുച്ചയത്തിലുണ്ടാകും. നിലവിൽ ഇലക്ട്രിക് പണികൾ, പഴയ കെട്ടിടത്തിന്‍റെ ശേഷിക്കുന്ന ഭാഗം പൊളിച്ചുമാറ്റി കൂട്ടുകട്ടയിടുക തുടങ്ങിയ ചെറു പ്രവൃത്തികളാണ് അവശേഷിക്കുന്നത്. നിലവിൽ പ്രവർത്തിച്ചുകൊണ്ടിരിക്കുന്ന പഴയ കെട്ടിടത്തിലെ കട മുറികൾ പൊളിക്കുന്നതുമായി ബന്ധപ്പെട്ട് വ്യാപാരികളുമായി ചർച്ച നടത്തിയിരുന്നു. ജൂലൈ ഒന്നിന് അവരോട് കെട്ടിടത്തിൽ നിന്ന് മാറാൻ ആവശ്യപ്പെട്ടിട്ടുണ്ട്. അതിനു ശേഷം ബസ് സ്റ്റാൻഡിന്‍റെ മുൻഭാഗത്തുള്ള പഴയ കെട്ടിടം പൊളിച്ചു മാറ്റുകയും ഇന്‍റർലോക്ക് ചെയ്യാനുള്ള പ്രവൃത്തിയും മറ്റു ചില മിനുക്കുപണികളും പൂർത്തിയാകുന്നതോടെ മഞ്ചേരിയുടെ സ്വപ്ന പദ്ധതിയുടെ ആദ്യഘട്ടം പൂർണമാകും. മഞ്ചേരിയിൽ മൂന്ന് ബസ് സ്റ്റാൻഡുകൾ നിലവിൽ വന്നതോടെ ഒരെണ്ണം അനാവശ്യമെന്ന് അഭിപ്രായം ഉയർന്നതിനെ തുടർന്നും കെട്ടിടം കാലപ്പഴക്കം കാരണം നാശോൻമുഖമായതിനെ തുടർന്നുമാണ് പഴയ ബസ് സ്റ്റാൻഡ് പൊളിച്ച് ബസ് ബേ കം ഷോപ്പിംഗ് കോംപ്ലക്സ് നിർമിക്കുകയെന്ന അഭിപ്രായം ഉയർന്നു വന്നത്. ഇതുവഴി നഗരസഭയുടെ വരുമാനം വർധിപ്പിക്കുകയെന്ന ലക്ഷ്യവും അധികൃതർക്കുണ്ട്.

നിലന്പൂർ ഉപതെരഞ്ഞെടുപ്പ്: കോരിച്ചൊരിയുന്ന മഴയത്തും ആവേശം ചോരാതെ മുന്നണിപ്പോരാളികൾ

എടക്കര: നിലന്പൂർ ഉപതെരഞ്ഞെടുപ്പിന് രണ്ടു ദിവസം മാത്രം ശേഷിക്കേ, കോരിച്ചൊരിയുന്ന മഴയത്തും ആവേശം ചോരാതെ മുന്നണിപ്പോരാളികൾ പ്രചാരണരംഗത്ത്. റോഡ് ഷോകളും വോട്ട് തേടി വീടുവീടാന്തരം കയറിയിറങ്ങിയും വാഹന പ്രചാരണവും കുടുംബസംഗമങ്ങളും കോർണർ യോഗങ്ങളും വാർത്താസമ്മേളനങ്ങളും വിശദീകരണ യോഗങ്ങളുമായി രാഷ്ട്രീയ കക്ഷികളും സ്ഥാനാർഥികളും രംഗത്തുണ്ട്. കഴിഞ്ഞ രണ്ട് ദിവസമായി മേഖലയിൽ കനത്ത മഴ പെയ്തിറങ്ങുകയാണ്. നാളെ വരെ അതിശക്തമായ മഴ മുന്നറിയിപ്പിന്‍റെ ഭാഗമായി ജില്ലയിൽ റെഡ് അലർട്ട് പ്രഖ്യാപിച്ചിട്ടുമുണ്ട്. എന്നാൽ ഇതെല്ലാം അവഗണിച്ചാണ് സ്ഥാനാർഥികൾ മണ്ഡലത്തിന്‍റെ ഓരോ മുക്കിലും മൂലയിലും ശക്തമായ പ്രചാരണം നടത്തുന്നത്. പ്രവർത്തകരാകട്ടെ അതിലേറെ ആവേശത്തിലുമാണ്. ബാന്‍റ്, ശിങ്കാരിമേളങ്ങളും അവയ്ക്കെപ്പം താളത്തിൽ ചുവടുവയ്ക്കുന്ന നർത്തകരും പ്രചാരണത്തിന് കൊഴുപ്പേകുന്നു. കഴിഞ്ഞ പത്ത് ദിവസത്തിലധികമായി വിവിധ രാഷ്ട്രീയ കക്ഷികളുടെ സംസ്ഥാന, ദേശീയ നേതാക്കൾ നിലന്പൂരിൽ തന്പടിച്ച് അതിശക്തമായ പ്രചാരണമാണ് നടത്തിക്കൊണ്ടിരിക്കുന്നത്. മുഖ്യമന്ത്രിയടക്കം സംസ്ഥാനത്തെ മുഴുവൻ മന്ത്രിമാരും എംഎൽഎമാരും പ്രതിപക്ഷ നേതാക്കളും എംപിമാരും നിലന്പൂരിൽ പ്രചാരണ രംഗത്ത് സജീവമാണ്. ഇടത്പക്ഷത്തിനും വലതുപക്ഷത്തിനും നിർണായകമായ നിലന്പൂരിലെ ഉപതെരഞ്ഞെടുപ്പ് പോരാട്ടം അഭിമാന പ്രശ്നം കൂടിയാണ്. നാല്പത് വർഷത്തെ കോണ്‍ഗ്രസ് ആധിപത്യത്തിൽ നിന്ന് 2016 ലെ നിയമഭാ തെരഞ്ഞെടുപ്പിൽ ഇപ്പോൾ മണ്ഡലത്തിൽ സ്ഥാനാർഥിയായ പി.വി. അൻവറിലൂടെയാണ് ഇടത്പക്ഷം നിലന്പൂർ തിരിച്ച് പിടിക്കുന്നത്. 2021 ലെ തെരഞ്ഞെടുപ്പിലും ഈ വിജയം നിലനിർത്താൻ ഇടതുപക്ഷത്തിന് കഴിഞ്ഞു. എന്നാൽ ഭരണം അവസാനിക്കാൻ ഒരു വർഷം ബാക്കി നിൽക്കെ പി.വി. അൻവർ ഭരണനേതൃത്വത്തിനെതിരേ തിരിയുകയും എംഎൽഎ സ്ഥാനം രാജിവയ്ക്കുകയുമായിരുന്നു. ഇതോടെയാണ് നിലന്പൂരിൽ ഉപതെരഞ്ഞെടുപ്പ് അനിവാര്യമായി വന്നത്. നിലന്പൂർ നഗരസഭയടക്കം ഏഴ് ഗ്രാമപഞ്ചായത്തുകൾ ഉൾപ്പെടുന്ന മണ്ഡലത്തിൽ 2,32,000 ൽ പരം വോട്ടർമാരാണുള്ളത്. പുതുതായി അനുവദിച്ചതടക്കം 263 പോളിംഗ് സ്റ്റേഷനുകളാണ് നിലന്പൂർ മണ്ഡലത്തിലുള്ളത്. പത്ത് സ്ഥാനാർഥികളാണ് ഉപതെരഞ്ഞെടുപ്പിൽ മത്സരിക്കുന്നത്. ഇടതുസ്ഥാനാർഥി എം. സ്വരാജ്, യുഡിഎഫ് സ്ഥാനാർഥി ആര്യാടൻ ഷൗക്കത്ത്, തൃണമൂൽ കോണ്‍ഗ്രസ് പിന്തുണയ്ക്കുന്ന സ്വതന്ത്ര സ്ഥാനാർഥി പി.വി. അൻവർ, എൻഡിഎ സ്ഥാനാർഥി അഡ്വ. മോഹൻ ജോർജ് എന്നിവരാണ് പ്രമുഖ സ്ഥാനാർഥികൾ. കൂടാതെ എസ്ഡിപിഐ സ്ഥാനാർഥിയും അഞ്ച് സ്വതന്ത്രരും മത്സര രംഗത്തുണ്ട്. മണ്ഡലത്തിലേതും സംസ്ഥാനത്തെയും കഴിഞ്ഞ ഒന്പത് വർഷത്തെ ഭരണ നേട്ടങ്ങൾ എണ്ണിപ്പറഞ്ഞാണ് ഇടതുപക്ഷം വോട്ട് തേടുന്നത്. എന്നാൽ ഭരണപരാജയവും വികസന മുരടിപ്പുമടക്കമുള്ള വിഷയങ്ങളാണ് യുഡിഎഫും ബിജെപിയും പ്രചാരണ ആയുധമാക്കിയിട്ടുള്ളത്. സംസ്ഥാനത്തെ വിവിധ ജില്ലകളിൽ നിന്നുള്ള പാർട്ടി പ്രവർത്തകരും എൻജിഒ യൂണിയൻ, അസോസിയേഷൻ ഭാരവാഹികളും പ്രവർത്തകരും മണ്ഡലത്തിലെ പ്രവർത്തകർക്കൊപ്പം വീടുകൾ കയറിയിറങ്ങിയാണ് പ്രചാരണം നടത്തുന്നത്. വോട്ടെടുപ്പ് 19നും വോട്ടെണ്ണൽ 23 നും നടക്കും. ഇടതും വലതും തുല്യശക്തികളായി നിലകൊള്ളുന്ന നിലന്പൂരിൽ വിജയം പ്രവചനാതീതമാണെന്ന് വിലയിരുത്തപ്പെടുന്നു.

തെരഞ്ഞെടുപ്പ് കൊട്ടിക്കലാശം; ഗതാഗത നിയന്ത്രണമേർപ്പെടുത്തി

എടക്കര: നിലന്പൂർ ഉപതെരഞ്ഞെടുപ്പിനോടനുബന്ധിച്ച് ഇന്ന് എടക്കര, വഴിക്കടവ് മേഖലകളിൽ നടത്തേണ്ട വിവിധ പാർട്ടികളുടെ കൊട്ടിക്കലാശങ്ങളും റോഡ് ഗതാഗത നിയന്ത്രണങ്ങളും ക്രമീകരിച്ച് പോലീസ് അറിയിപ്പ് പുറപ്പെടുവിച്ചു. സ്വതന്ത്ര സ്ഥാനാർഥി പി.വി. അൻവറിന്‍റെ കൊട്ടിക്കലാശ പരിപാടികൾ വഴിക്കടവിലും എസ്ഡിപിഐ സ്ഥാനാർഥിയുടെ കൊട്ടിക്കലാശം എടക്കര മുസ്‌ലിയാരങ്ങാടി മുതൽ ചെമ്മണ്ണൂർ ജുവലറി വരെയും ബിജെപി സ്ഥാനാർഥിയുടെ കൊട്ടിക്കലാശം ഏറനാട് ആശുപത്രി ജംഗ്ഷൻ മുതൽ പുതിയ സ്റ്റാൻഡ് വരെയും യുഡിഎഫ് സ്ഥാനാർഥി ആര്യാടൻ ഷൗക്കത്തിന്‍റെ കൊട്ടിക്കലാശം കുരിക്കൾ ടെക്സൈറ്റൽ മുതൽ ഇന്ദിരാ ഗാന്ധി ബസ് ടെർമിനലിന്‍റെ പകുതി വരെയും ഇടത് സ്ഥാനാർഥി എം. സ്വരാജിന്‍റെ കൊട്ടിക്കലാശം മത്സ്യമാർക്കറ്റ് മുതൽ ഇന്ദിരാഗാന്ധി ബസ് ടെർമിനലിന്‍റെ പകുതി വരെയുമായി നിശ്ചയിച്ചു. വൈകുന്നേരം 4.30ന് ശേഷം മറ്റ് പാർട്ടികളുടെ കൊട്ടിക്കലാശം നടക്കുന്ന സ്ഥലത്തേക്ക് ഇതര പാർട്ടിക്കാരുടെ വാഹനവുമായി പ്രവേശിക്കാൻ പാടില്ല. ഇന്ന് വൈകുന്നേരം നാല് മണിക്ക് ശേഷം മാത്രമേ അതത് പാർട്ടികൾക്ക് നിശ്ചയിച്ച സ്ഥലത്ത് പ്രവർത്തകർ പ്രവേശിക്കാൻ പാടുള്ളൂ. കൊട്ടിക്കലാശത്തിന് ശേഷം ആറ് മണിക്ക് തന്നെ പ്രവർത്തകരെ അതത് പാർട്ടി നേതാക്കൾ പറഞ്ഞ് വിടേണ്ടതും പോലീസിന്‍റെ നിയമപരമായ നിർദേശങ്ങൾ പാലിക്കേണ്ടതുമാണ്. ഈ തീരുമാന പ്രകാരമല്ലാതെ മറ്റ് യാതൊരു പരിപാടികളും വഴിക്കടവ്, പോത്തുകൽ, മൂത്തേടം, എടക്കര, ചുങ്കത്തറ എന്നീ പഞ്ചായത്തുകളിൽ ഒരു പാർട്ടിയും നടത്താൻ പാടില്ല. ഇന്ന് വൈകുന്നേരം നാല്മുതൽ ആറര വരെ വഴിക്കടവ് ഭാഗത്ത് നിന്ന് നിലന്പൂർ ഭാഗത്തേക്ക് വരുന്ന വാഹനങ്ങൾ എടക്കര പാലത്തിങ്കൽ നിന്ന് മൂത്തേടം കരുളായി വഴി പോകേണ്ടതാണ്. നിലന്പൂർ ഭാഗത്ത് നിന്ന് വഴിക്കടവ് ഭാഗത്തേക്ക് വരുന്ന വാഹനങ്ങൾ എടക്കര മുസ്ലിയാരങ്ങാടിയിൽ നിന്ന് തിരിഞ്ഞ് പാലേമാട് പാലാട് വഴി പോകേണ്ടതുമാണെന്ന് എടക്കര സ്റ്റേഷൻ ഹൗസ് ഓഫീസർ അറിയിച്ചു. പുറത്തുനിന്നെത്തിയ രാഷ്ട്രീയ പ്രവർത്തകർ ആറിന് ശേഷം മണ്ഡലം വിട്ടുപോകണം നിലന്പൂർ: നിലന്പൂർ ഉപതെരഞ്ഞെടുപ്പിന്‍റെ പരസ്യപ്രചാരണം ഇന്ന് വൈകുന്നേരം ആറിന് അവസാനിക്കും. പ്രചാരണ കാലയളവ് അവസാനിക്കുന്നതോടെ നിയമവിരുദ്ധമായ സംഘംചേരൽ, പൊതുയോഗങ്ങൾ സംഘടിപ്പിക്കൽ, മൈക്ക് അനൗണ്‍സ്മെന്‍റ്, ഇലക്ട്രോണിക് മാധ്യമങ്ങളിലൂടെ തെരഞ്ഞെടുപ്പ് സംബന്ധിയായ കാര്യങ്ങളുടെ പ്രദർശനം, സംഗീത പരിപാടികളോ മറ്റു വിനോദ പരിപാടികളോ സംഘടിപ്പിച്ച് പ്രചാരണം നടത്തൽ എന്നിവയ്ക്ക് വിലക്കുണ്ട്. 1951 ലെ ജനപ്രാതിനിധ്യ നിയമത്തിലെ സെക്‌ഷൻ 126(1) പ്രകാരം വോട്ടെടുപ്പ് അവസാനിക്കുന്നതിന് 48 മണിക്കൂർ മുന്പ് പരസ്യ പ്രചാരണം അവസാനിപ്പിക്കണം. ഈ സമയം അവസാനിച്ച ഉടൻ പ്രചാരണത്തിനായി പുറത്ത് നിന്നെത്തിയ മുഴുവൻ രാഷ്ട്രീയ പ്രവർത്തകരും നേതാക്കളും മണ്ഡലം വിട്ടുപോകണമെന്ന് ജില്ലാ തെരഞ്ഞെടുപ്പ് ഓഫീസറായ ജില്ലാ കളക്ടർ അറിയിച്ചു.

കോട്ടയ്ക്കൽ സേക്രഡ് ഹാർട്ട് സ്കൂളിൽ ഉന്നത വിജയികളെ അനുമോദിച്ചു

കോട്ടയ്ക്കൽ: കോട്ടയ്ക്കൽ പുതുപ്പറന്പ് സേക്രഡ് ഹാർട്ട് സീനിയർ സെക്കൻഡറി സ്കൂളിൽ സിബിഎസ്ഇ നടത്തിയ എഐഎസ്എസ്‌സിഇ, എഐഎസ്എസ്ഇ എന്നീ പരീക്ഷകളിൽ വിജയിച്ചവരെ സ്കൂൾ ഓഡിറ്റോറിയത്തിൽ നടന്ന ചടങ്ങിൽ അനുമോദിച്ചു. വടകര ആർഡിഒയും സബ് ഡിവിഷണൽ മജിസ്ട്രേറ്റുമായ പി. അൻവർ സാദത്ത് പരിപാടി ഉദ്ഘാടനം ചെയ്തു. പത്താം ക്ലാസ് പരീക്ഷയിൽ ഫാസിൻ മുഹമ്മദ് 97 ശതമാനം മാർക്ക് നേടിയപ്പോൾ നിരുപമ എ. കുമാർ 96 ശതമാനം മാർക്കും അദ്യുത് കൃഷ്ണ 95.6 ശതമാനം മാർക്കും സ്വന്തമാക്കി. പന്ത്രണ്ടാം ക്ലാസ് പരീക്ഷയിൽ എൻ.ടി. അമൻ 90 ശതമാനം മാർക്ക് നേടി. വിജയികൾക്ക് ആർഡിഒ സർട്ടിഫിക്കറ്റുകളും കാഷ് അവാർഡും വിതരണം ചെയ്തു. എഡ്യൂക്കേഷൻ കൗണ്‍സിലർ സിസ്റ്റർ സീന ആന്‍റോ (സാന്തോം പ്രോവിൻസ് താമരശേരി) അധ്യക്ഷയായിരുന്നു. കോട്ടക്കൽ ലിറ്റിൽ ഫ്ളവർ പള്ളി വികാരി ഫാ. വിൻസെന്‍റ് കറുകമാലിൽ അനുഗ്രഹ പ്രഭാഷണവും പിടിഎ പ്രസിഡന്‍റ് ശരത്നാഥ് മുഖ്യപ്രഭാഷണവും നടത്തി. സ്കൂൾ ഡവലപ്മെന്‍റ എക്സിക്യൂട്ടീവ് മെന്പർ മുഹമ്മദ് ഷാഫി, പ്രിൻസിപ്പൽ സിസ്റ്റർ ആൻസില്ല ജോർജ്, പന്ത്രണ്ടാം ക്ലാസ് വിദ്യാർഥിനി കെ. ലെന മെഹ്റിൻ എന്നിവർ പ്രസംഗിച്ചു. സൈബർ സ്ക്വയറിന്‍റെ നേതൃത്വത്തിൽ എല്ലാ വർഷവും നടത്തുന്ന വിദ്യാർഥികൾ പങ്കെടുക്കുന്ന ഏറ്റവും വലിയ ടെക് എക്സ്പോ ഇക്കഴിഞ്ഞ മേയ് 10 ന് ദുബായിൽ നടത്തിയിരുന്നു. ഡിജിറ്റൽ ഫെസ്റ്റിൽ പങ്കെടുത്ത റയാൻ ജാഫർ, മുഹമ്മദ് സ്വാലിഹ്, ഒമർ ആര്യൻ, ആയിഷ നെയ്വിൻ, അഫീൻ മിൻസ, ഐസെൽ എന്നീ വിദ്യാർഥികളെയും ചടങ്ങിൽ അനുമോദിച്ചു. എസ്കെ ട്രെൻഡ്സ് മാനേജിംഗ് ഡയറക്ടർ ഹരികൃഷ്ണൻ സംസാരിച്ചു. വിദ്യാഭ്യാസ മേഖലയിലെ മികവിനെ അംഗീകരിക്കുന്ന ഇന്ത്യയിലെ മികച്ച 100 പ്രചോദനാത്മക വിദ്യാഭ്യാസ ഐക്കണുകളെ തെരഞ്ഞെടുക്കാൻ ഇന്ത്യൻ വിദ്യാഭ്യാസ വകുപ്പ് നടത്തിയ ഓണ്‍ലൈൻ സെർച്ചിൽ മികച്ച അധ്യാപികയായി തെരഞ്ഞെടുക്കപ്പെട്ട അധ്യാപിക സബിതയെയും ചടങ്ങിൽ അനുമോദിച്ചു.

ഉന്നത വിജയികളെ എംഎസ്എഫ് അനുമോദിച്ചു

പെരിന്തൽമണ്ണ: പാതായ്ക്കര മേഖല എംഎസ്എഫ് കമ്മിറ്റി മേഖലയിൽ എസ്എസ്എൽസി, പ്ലസ് ടു, എൽഎസ്എസ്, യുഎസ്എസ്, മദ്രസ പൊതുപരീക്ഷയിൽ ഉന്നത വിജയം നേടിയ വിദ്യാർഥികളെ അനുമോദിച്ചു. ജില്ലാ മുസ്‌ലിം ലീഗ് വൈസ് പ്രസിഡന്‍റ് സലീം കുരുവന്പലം ഉദ്ഘാടനം ചെയ്തു.വാർഡ് എംഎസ്എഫ് പ്രസിഡന്‍റ് സി. നസീഫ് അധ്യക്ഷത വഹിച്ചു. യൂത്ത് ലീഗ് അഖിലേന്ത്യ സെക്രട്ടറിയും പെരിന്തൽമണ്ണ ബ്ലോക്ക് സ്റ്റാൻഡിംഗ് കമ്മിറ്റി ചെയർപേഴ്സണുമായ അഡ്വ. നജ്മ തബ്ഷീറ, നഗരസഭ പ്രതിപക്ഷ നേതാവ് പച്ചീരി ഫാറൂഖ്, എസ്ടിയു നിയോജക മണ്ഡലം പ്രസിഡന്‍റ് തെക്കത്ത് ഉസ്മാൻ, മുനിസിപ്പൽ മുസ്‌ലിം ലീഗ് ജനറൽ സെക്രട്ടറി നാലകത്ത് ബഷീർ തുടങ്ങിയവർ പ്രസംഗിച്ചു. മേലാറ്റൂർ: എസ്എസ്എൽസി, സിബിഎസ്ഇ, പ്ലസ് ടു പരീക്ഷകളിൽ മുഴുവൻ വിഷയങ്ങളിലും എ പ്ലസ് നേടിയ വിദ്യാർഥികളെ മേലാറ്റൂർ കാട്ടുചിറ 16 -ാംവാർഡ് യൂത്ത് ലീഗ് കമ്മിറ്റി അനുമോദിച്ചു. പെരിന്തൽമണ്ണ ബ്ലോക്ക് പഞ്ചായത്ത് മെന്പർ യു.ടി. മുൻഷിറിന്‍റെ നേതൃത്വത്തിലാണ് അനുമോദനം സംഘടിപ്പിച്ചത്. ചടങ്ങിൽ യൂത്ത് ലീഗ് സെക്രട്ടറി സനൂബ്, ഹമീദ് പുൽപാറ, ടി.കെ. സക്കീർ, സി.ടി. ഷാഫി, റഷീദ്, സലീം ജൗഹർ, റംഷീദ്, യൂത്ത് ലീഗ് ട്രഷറർ എം. നിഷാദ് എന്നിവർ സംബന്ധിച്ചു.

"തപാൽ മേഖലയെ തകർക്കുന്ന പരിഷ്കാരങ്ങൾ പിൻവലിക്കണം’

പെരിന്തൽമണ്ണ: തപാൽ മേഖലയെ തകർക്കുന്ന പരിഷ്കാരങ്ങൾ പിൻവലിക്കണമെന്ന് എൻഎഫ്പിഇ പെരിന്തൽമണ്ണ ഏരിയ സമ്മേളനം ആവശ്യപ്പെട്ടു. കേന്ദ്ര സർക്കാരിന്‍റെ വികലമായ പരിഷ്കാരങ്ങളുടെ ഭാഗമായി നിരവധി ആർഎംഎസ് ഓഫീസുകൾ ഇതിനകം പൂട്ടികഴിഞ്ഞു. ഇത്തരം നടപടികളിൽ നിന്ന് കേന്ദ്രസർക്കാർ പിന്തിരിയണമെന്നും ജിഡിഎസ് ജീവനക്കാർ അടക്കമുള്ളവരുടെ വേതനം കാലോചിതമായി പരിഷ്കരിക്കണമെന്നും സമ്മേളനം പ്രമേത്തിലൂടെ ആവശ്യപ്പെട്ടു. സിഐടിയു ഏരിയ സെക്രട്ടറി എം. മുഹമ്മദ് മുസ്തഫ ഉദ്ഘാടനം ചെയ്തു. പി. രാജേഷ് അധ്യക്ഷത വഹിച്ചു. കേന്ദ്ര കോണ്‍ഫെഡറേഷൻ ജില്ലാ സെക്രട്ടറി ടി. രാജേഷ്, എൻഎഫ്പിഇ ഡിവിഷണൽ പ്രസിഡന്‍റ് ഇ. കൃഷ്ണപ്രസാദ്, വി.എം. രാമാനുണ്ണി, കെ.സി. ശശിധരൻ, കെ. പ്രസാദ്, ബിന്ദു, വിജയകുമാരി, പി. ഷിജിൻ തുടങ്ങിയവർ പ്രസംഗിച്ചു. ഭാരവാഹികൾ: പി. രാജേഷ് (പ്രസിഡന്‍റ്), പി. ഷിജിൻ (സെക്രട്ടറി), കെ. പ്രസാദ് (ട്രഷറർ).

കോഴിഫാം കത്തിനശിച്ചു; കർഷകന് ധനസഹായം നൽകി

പെരിന്തൽമണ്ണ: കോഴിഫാം കത്തിനശിച്ച സംഭവത്തിൽ കർഷകന് കേരള പൗൾട്രി ഫാർമേഴ്സ് അസോസിയേഷൻ സഹായധനം നൽകി. എടത്തനാട്ടുകര സ്വദേശി സമീർ തയ്യിലിന്‍റെ കോഴിഫാം കത്തിനശിച്ച് 2700 ലധികം കോഴിക്കുഞ്ഞുങ്ങൾ ചത്തിരുന്നു. ഏകദേശം മൂന്നുലക്ഷത്തോളം രൂപയുടെ നഷ്ടമാണ് സംഭവിച്ചത്. സാന്പത്തിക പ്രതിസന്ധി നേരിടുന്ന ഇദ്ദേഹത്തിന്‍റെ ഫാം പുനർനിർമാണത്തിനായാണ് അസോസിയേഷൻ സമാഹരിച്ച സഹായധനം പി. അബ്ദുൾഹമീദ് എംഎൽഎ കൈമാറിയത്. ചടങ്ങിൽ കേരള പൗൾട്രി ഫാർമേഴ്സ് അസോസിയേഷൻ ലീഗൽ അഡ്വൈസർ ഉമ്മർ, സ്റ്റേറ്റ് ട്രഷറർ സൈദ് മണലായ, വൈസ് പ്രസിഡന്‍റ് ഹുസൈൻ വടക്കൻ, നേതാക്കളായ ഷെബീർ പുളിങ്കാവ്, മുസ്തഫ മണ്ണാർമല, ആസിഫ് കരുവാരകുണ്ട് തുടങ്ങിയവർ പങ്കെടുത്തു.

നിർമാണ പ്രവൃത്തി പ്രളയത്തിൽ തകർന്നു; ഇൻഷ്വറസ് കന്പനി 23.31 ലക്ഷം നൽകണം

മലപ്പുറം: വാട്ടർ ട്രീറ്റ്മെന്‍റ് പ്ലാന്‍റ് തകർന്നതുമായി ബന്ധപ്പെട്ട് ബജാജ് അലൈൻസ് ഇൻഷ്വറൻസ് കന്പനി ക്ലെയിം നിഷേധിച്ചതിനെതിരേ നിർമാണ പ്രവൃത്തികൾ ഏറ്റെടുത്തു നടത്തിയ വ്യക്തി ഉപഭോക്തൃ കമ്മീഷനിൽ നൽകിയ പരാതിയിൽ 23.31 ലക്ഷം രൂപ നഷ്ടപരിഹാരം നൽകാൻ വിധിയായി. മലപ്പുറം മേൽമുറി താമരശേരി സ്വദേശി അബ്ദുൾ സമദ് നൽകിയ പരാതിയിലാണ് കമ്മീഷന്‍റെ വിധി. കാക്കനാട് സ്മാർട്ട് സിറ്റിയുടെ ഭാഗമായി കടന്പ്രയാർ തീരത്ത് നിർമിക്കുന്ന വാട്ടർ ട്രീറ്റ്മെന്‍റ് പ്ലാന്‍റിന്‍റെ നിർമാണ പ്രവൃത്തികൾ പരാതിക്കാരൻ ഇൻഷ്വർ ചെയ്തിരുന്നു. 2019 ഒക്ടോബർ മാസത്തെ വെള്ളപൊക്കത്തിൽ നിർമാണ പ്രവൃത്തികൾ തകർന്നു. ഇൻഷ്വറൻസ് കന്പനിയെ നഷ്ടപരിഹാരത്തിനായി സമീപിച്ചെങ്കിലും അനുവദിച്ചില്ല. അപകട വിവരം അറിയിക്കുന്നതിൽ കാലതാമസമുണ്ടായി എന്നും കാലവർഷം നേരത്തേ ആരംഭിച്ചിട്ടും മതിയായ മുൻകരുതൽ എടുക്കാതെ വീഴ്ച വരുത്തി എന്നും ആരോപിച്ചാണ് കന്പനി ഇൻഷ്വറൻസ് നിഷേധിച്ചത്. ഇതിനെതിരേയുള്ള പരാതിയിലാണ് കമ്മീഷന്‍റെ വിധി. അടിയന്തര സ്വഭാവമുള്ളതും സമയബന്ധിതമായി നിർമാണ പ്രവൃത്തികൾ പൂർത്തിയാക്കേണ്ടിയിരുന്നതിനാലുമാണ് കാലതാമസമുണ്ടായതെന്നും ബോധപൂർവം വീഴ്ചവരുത്തിയതല്ലെന്നുമുള്ള പരാതിക്കാരന്‍റെ വാദം കമ്മീഷൻ അംഗീകരിച്ചു. ഹൈദരാബാദിൽ നിന്ന് ഇൻഷ്വറൻസ് സർവേയർ സൗജയ് കുമാറിനെ കമ്മീഷൻ മുന്പാകെ വരുത്തി വിസ്തരിച്ചെങ്കിലും പരാതിക്കാരനെതിരേയുള്ള ആരോപണം തെളിയിക്കാനായില്ല.ഇതേ തുടർന്ന് ഇൻഷ്വറൻസ് തുകയായ 23,31,446 രൂപയും നഷ്ടപരിഹാരമായി 2,00,000 രൂപയും കോടതി ചെലവായി 15,000 രൂപയും ഒരു മാസത്തിനകം നൽകുന്നതിന് കെ. മോഹൻദാസ് പ്രസിഡന്‍റും പ്രീതി ശിവരാമൻ, സി.വി. മുഹമ്മദ് ഇസ്മായിൽ എന്നിവർ അംഗങ്ങളുമായ കമ്മിഷൻ വിധിച്ചു.

റോഡിൽ കുഴികളെടുക്കുന്നത് 23 വരെ നിർത്തിവയ്ക്കണം

നിലന്പൂർ: നിലന്പൂർ ഉപതെരഞ്ഞെടുപ്പിന്‍റെ വോട്ടെടുപ്പ്, വോട്ടെണ്ണൽ എന്നിവയുടെ സുഗമമായ നടത്തിപ്പിന്‍റെ ഭാഗമായി മണ്ഡലത്തിലും പരിസരപ്രദേശങ്ങളിലും പിഡബ്ല്യുഡി (റോഡ്സ്), വാട്ടർ അഥോറിറ്റി, കെഎസ്ഇബി എന്നീ വകുപ്പുകൾ നിർമാണ പ്രവൃത്തികളുടെ ഭാഗമായി റോഡിൽ കുഴികൾ എടുക്കുന്നത് 23ന് വോട്ടെണ്ണൽ കഴിയുന്നത് വരെ താൽക്കാലികമായി നിർത്തിവയ്ക്കണമെന്ന് ജില്ലാ തെരെഞ്ഞെടുപ്പ് ഓഫീസർ കൂടിയായ ജില്ലാ കളക്ടർ നിർദേശം നൽകി. തെരഞ്ഞെടുപ്പിന്‍റെ സുഗമമായ നടത്തിപ്പിനായി ഇന്ത്യൻ തെരഞ്ഞെടുപ്പ് കമ്മീഷൻ നിർദേശിച്ച പ്രകാരം ബിഎസ്എൻഎൽ വഴി ഏർപ്പെടുത്തിയിട്ടുള്ള ഇന്‍റർനെറ്റ്, ടെലിഫോണ്‍ സൗകര്യങ്ങളിൽ കുഴിയെടുക്കുന്നതു മൂലം സംഭവിച്ചേക്കാനിടയുള്ള കേടുപാടുകൾ ഒഴിവാക്കുന്നതിനാണ് താൽക്കാലിക വിലക്ക്.

പോളിംഗ് ബൂത്തുകളിൽ മൊബൈൽ ഫോണ്‍ അനുവദിക്കില്ല

നിലന്പൂർ: ഉപതെരഞ്ഞെടുപ്പിൽ വോട്ട് ചെയ്യാനെത്തുന്നവർ പോളിംഗ് ബൂത്തുകളിൽ മൊബൈൽ ഫോണുമായി പ്രവേശിക്കുന്നത് കേന്ദ്ര തെരഞ്ഞെടുപ്പ് കമ്മീഷൻ വിലക്കിയിട്ടുണ്ട്. അതിനാൽ വോട്ടർമാർ ബൂത്തുകളിൽ മൊബൈൽ ഫോണ്‍ കൊണ്ടുവരാതിരിക്കാൻ ശ്രദ്ധിക്കണമെന്ന് ജില്ലാ തെരഞ്ഞെടുപ്പ് ഓഫീസർ കൂടിയായ ജില്ലാ കളക്ടർ അഭ്യർഥിച്ചു.

റോഡുകൾ തകർന്നതിൽ നഗരസഭാധ്യക്ഷക്ക് പരാതി നൽകി

മഞ്ചേരി: എലന്പ്ര വാർഡിലെ തകർന്ന റോഡുകൾ നന്നാക്കണമെന്നാവശ്യപ്പെട്ട് സിപിഎം ബ്രാഞ്ച് സെക്രട്ടറി മരുന്നൻ മുഹമ്മദ്, അഷ്റഫ് മഞ്ചേരി എന്നിവർ നഗരസഭാ അധ്യക്ഷക്ക് പരാതി നൽകി. എലന്പ്ര-ഇടിഞ്ഞിലുമ്മൽ-ചെറുകുളം പള്ളിറോഡ്, എലന്പ്ര - കുഴലംപറന്പ് റോഡ്, കുഴലംപറന്പ്-തൊട്ടുപൊയിൽ പള്ളിപ്പടി റോഡ്, ചെറുകുളം-പള്ളിപ്പടി - വീന്പുംകുന്ന്, കാരാപ്പരന്പ് - എലിക്കോട് - കുണ്ടടിയിൽ റോഡ് എന്നിവയാണ് തകർന്നത്. വാർഡിനോട് നഗരസഭ അനുവർത്തിക്കുന്ന അവഗണന അവസാനിപ്പിക്കണമെന്നും പരാതിയിൽ ആവശ്യപ്പെടുന്നു. 19-ാം വാർഡിലെ ലക്ഷംവീട് കോളനി റോഡിന്‍റെ ഭിത്തി തകർന്നത് സംബന്ധിച്ച് മന്ത്രിമാരുടെ നേതൃത്വത്തിൽ നടന്ന താലൂക്ക് അദാലത്തിൽ പരാതി നൽകിയിരുന്നു. എന്നാൽ മന്ത്രി ആവശ്യപ്പെട്ടിട്ടുപോലും നടപടിയെടുക്കാൻ നഗരസഭ തയാറായിട്ടില്ല. തകർന്ന റോഡുകളിൽ വാഹന ഗതാഗതം മാത്രമല്ല, കാൽനടയാത്ര പോലും ദുഷ്കരമായിരിക്കുകയാണ്.

ഉപതെരഞ്ഞെടുപ്പ്: അവധി പ്രഖ്യാപിച്ചു

നിലന്പൂർ: ജൂണ്‍ 19ന് നടക്കുന്ന നിലന്പൂർ ഉപതെരഞ്ഞെടുപ്പുമായി ബന്ധപ്പെട്ട് ബൂത്ത് ക്രമീകരിക്കുന്നതിനും മറ്റു നടപടികൾക്കുമായി പോളിംഗ് സാമഗ്രികളുടെയും ഇവിഎം / വിവി പാറ്റ് മെഷീനുകളുടെയും വിതരണ സ്വീകരണ കേന്ദ്രമായി പ്രവർത്തിക്കുന്ന ചുങ്കത്തറ മാർത്തോമ ഹയർ സെക്കൻഡറി സ്കൂളിന് 18 മുതൽ 23 വരെയും പോളിംഗ് സ്റ്റേഷനുകളായി പ്രവർത്തിക്കുന്ന സ്ഥാപനങ്ങൾക്ക് 18, 19 തീയതികളിലും ജില്ലാ കളക്ടർ അവധി പ്രഖ്യാപിച്ചു.

പെൻഷൻ പരിഷ്കരണം നടപ്പാക്കണമെന്ന്

അങ്ങാടിപ്പുറം: സഹകരണ പെൻഷൻ പദ്ധതി കാലോചിതമായി പരിഷ്കരിക്കാനും പുന:ക്രമീകരിക്കാനും റിപ്പോർട്ട് സമർപ്പിക്കാൻ നിയോഗിച്ച പെൻഷൻ പരിഷ്കാര സമിതിയുടെ റിപ്പോർട്ടിൻ മേൽ ചർച്ചയല്ല പെൻഷൻ പരിഷ്കരണവും ഡിഎയുമാണ് ആവശ്യമെന്ന് കേരള പ്രൈമറി കോ ഓപ്പറേറ്റീവ് സർവീസ് പെൻഷനേഴ്സ് അസോസിയേഷൻ ജില്ലാ കമ്മിറ്റിയോഗം ആവശ്യപ്പെട്ടു. അങ്ങാടിപ്പുറത്ത് ചേർന്ന യോഗത്തിൽ ജില്ലാ പ്രസിഡന്‍റ് സി.എം. രവീന്ദ്രനാഥൻ അധ്യക്ഷത വഹിച്ചു. ജില്ലാ സെക്രട്ടറി ടി.മുരളീധരൻ റിപ്പോർട്ട് അവതരിപ്പിച്ചു. പി.രാധാകൃഷ്ണൻ, കെ. അലവി, പി.ടി. ജയദേവൻ, ടി.എൻ. വാസുദേവൻ, വി.വി. അബ്ദുറഹിമാൻ, ജോസ് ചുങ്കത്തറ, സ്റ്റെല്ല നിലന്പൂർ, എം.എ. ദിനേശൻ, വി. അനിൽകുമാർ തുടങ്ങിയവർ പ്രസംഗിച്ചു.

പരിയാപുരം സെന്‍റ് മേരീസ് സ്കൂളിൽ ലഹരിക്കെതിരേ വിദ്യാർഥി സംഗമം

അങ്ങാടിപ്പുറം: ലഹരിയെ പ്രതിരോധിക്കാൻ അണിചേർന്ന് പരിയാപുരം സെന്‍റ് മേരീസ് ഹയർ സെക്കൻഡറി സ്കൂളിലെ വിദ്യാർഥികൾ. ജീവിതത്തിൽ ഒരിക്കലും ലഹരി ഉപയോഗിക്കില്ലെന്നും ലഹരി വിരുദ്ധ പ്രവർത്തനങ്ങളിൽ സജീവമായി പ്രവർത്തിക്കുമെന്നും അവർ പ്രതിജ്ഞയെടുത്തു. രണ്ടു ദിനങ്ങളിലായി നടന്ന ലഹരി വിരുദ്ധ ശിൽപശാലയിൽ ആയിരത്തോളം വിദ്യാർഥികളാണ് പങ്കെടുത്തത്. ലഹരിക്കെതിരേ ബോധവത്കരണം ഉൾപ്പെടെ വ്യത്യസ്ത കർമപദ്ധതികളും തയാറാക്കി. സ്കൂളിലെ വിവിധ ക്ലബുകളുടെ നേതൃത്വത്തിലാണ് പ്രവർത്തനങ്ങൾ ഒരുക്കുന്നത്. സൈക്യാട്രിക് സോഷ്യൽ വർക്കർമാരായ പി.കെ.ഫാസിൽ, പി.റാസിഖ് എന്നിവർ ബോധവത്കരണ ക്ലാസ് നയിച്ചു. ശിൽപശാല പിടിഎ പ്രസിഡന്‍റ് സാജു ജോർജ് ഉദ്ഘാടനം ചെയ്തു. പ്രധാനാധ്യാപകൻ പി.ടി.ബിജു, പ്രോഗ്രാം കോ-ഓർഡിനേറ്റർ മനോജ് വീട്ടുവേലിക്കുന്നേൽ, അങ്ങാടിപ്പുറം ഫോർ ലൈഫ് കോ-ഓർഡിനേറ്റർ സി.പി.നൗഫൽ എന്നിവർ പ്രസംഗിച്ചു.

കേരള ബുക്ക് ഓഫ് റിക്കാർഡിന്‍റെ നിറവിൽ കടന്നമണ്ണ ശ്രീനിവാസൻ

മങ്കട: അനുഷ്ഠാന കലയായ കളമെഴുത്തുപാട്ടിനെ ശിൽപശാലകളിലൂടെ ജനകീയമാക്കിയ കലാകാരൻ കടന്നമണ്ണ ശ്രീനിവാസന് കേരള ബുക്ക് ഓഫ് റിക്കാർഡ് അംഗീകാരം. കോളജുകളിലും സ്കൂളുകളിലും സോഷ്യൽ മീഡിയകളിലുമായി 255 കളംപാട്ട് ശിൽപശാലകൾ പൂർത്തിയാക്കിയ പ്രവർത്തനങ്ങൾക്കാണ് അംഗീകാരം. എറണാകുളം മഹാരാജാസ് കോളജ്, കാലിക്കറ്റ് യൂണിവേഴ്സിറ്റി ഉൾപ്പെടെ നിരവധി കോളജുകളിലും സ്കൂളുകളിലുമായി ശ്രീനിവാസന്‍റെ കളംപാട്ട് ശിൽപശാല സംഘടിപ്പിച്ചിട്ടുണ്ട്. റിക്കാർഡ് സർട്ടിഫിക്കറ്റും പുരസ്കാരവും സിനിമ പിന്നണി ഗായിക രാധിക അശോക് സമ്മാനിച്ചു.

തേക്ക് മരം ഭീഷണിയാകുന്നു

പെരിന്തൽമണ്ണ: പെരിന്തൽമണ്ണ നഗര മധ്യത്തിലെ ടൗണ്‍ സ്ക്വയറിനകത്ത് പാലക്കാട് - കോഴിക്കോട് ദേശീയപാതയോട് ചേർന്ന് നിൽക്കുന്ന വൻ തേക്കുമരം അപകട ഭീഷണിയുയർത്തുന്നു. തേക്ക് മരത്തിന് താഴെയായി ട്രാൻസ്ഫോർമറും സ്ഥിതി ചെയ്യുന്നു. ഇരുചക്ര വാഹനങ്ങളും കാറുകളും ഇതിനടുത്ത് പാർക്ക് ചെയ്യുന്നതും പതിവാണ്. കാൽനട യാത്രക്കാരും ഇതിലൂടെ കടന്നുപോകാറുണ്ട്. പൂത്തുലഞ്ഞ് നിൽക്കുന്ന തേക്ക് മരം ശക്തമായ കാറ്റടിച്ചാൽ പൊട്ടി വീഴാൻ സാധ്യതയുണ്ട്. നഗരസഭയുടെ അധീനതയിലുള്ള തേക്കുമരത്തിന്‍റെ കൊന്പുകൾ വെട്ടിമാറ്റണമെന്നാണ് നാട്ടുകാരുടെ ആവശ്യം.

ജനദ്രോഹ ഭരണത്തിനെതിരായ വിധിയാകും നിലന്പൂരിൽ: സണ്ണി ജോസഫ്

നിലന്പൂർ: എൽഡിഎഫ് സർക്കാരിന്‍റെ അധികാര ദുരുപയോഗത്തിനും ജനദ്രോഹ ഭരണത്തിനും അഴിമതിക്കും എതിരായ ജനവിധിയായിരിക്കും നിലന്പൂരിലെ ഉപതെരഞ്ഞെടുപ്പ് ഫലമെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. കരുളായി പുല്ലാഞ്ചേരിയിൽ കുടുംബ സംഗമം ഉദ്ഘാടനം ചെയ്ത് സംസാരിക്കുകയായിരുന്നു. അദ്ദേഹം. സമസ്ത മേഖലയിലും ഭരണ സ്തംഭനമാണ്. സാധാരണക്കാരന് ജീവിക്കാൻ കഴിയാത്ത അവസ്ഥയാണ്. വിലക്കയറ്റവും വരുമാനം ഇല്ലായ്മയും തൊഴിലില്ലായ്മയും കൊണ്ടും ജനം വലഞ്ഞു. കാർഷിക, ആരോഗ്യ, പരന്പരാഗത വ്യവസായ മേഖലകൾ തകർന്നു. ഇതിനിടെയാണ് സർക്കാർ വക നികുതി ഭീകരത. തൊഴിലാളികളോട് പുച്ഛമാണ് ഇടതുസർക്കാരിന്. മദ്യമുതലാളിമാരോടാണ് തൽപര്യമേറെയും. വന്യമൃഗ ആക്രമണത്തിൽ മനുഷ്യ ജീവനുകൾ നഷ്ടപ്പെടുന്പോൾ വനം മന്ത്രി പാട്ടുപാടി നടക്കുകയാണെന്നും സണ്ണി ജോസഫ് പറഞ്ഞു. എം.ലിജു, സൈമണ്‍ അലക്സ് തുടങ്ങിയവർ പങ്കെടുത്തു.

മദ്യനിരോധന സമിതി പ്രവർത്തകരെ കൈയേറ്റം ചെയ്യാൻ ശ്രമം

എടക്കര: നിലന്പൂർ മണ്ഡലത്തിൽ കേരള മദ്യനിരോധനസമിതി നടത്തിക്കൊണ്ടിരുന്ന തെരഞ്ഞെടുപ്പ് ഇടപെടൽ കാന്പയിൻ തടസപ്പെടുത്താനും പ്രവർത്തകരെ കൈയേറ്റം ചെയ്യാനും എൽഡിഎഫ് പ്രവർത്തകർ ശ്രമിച്ചതായി പരാതി. ഇന്നലെ വഴിക്കടവ് പഞ്ചായത്തിലെ മുണ്ടയിൽ മദ്യനിരോധന സമിതി നടത്തിയ യോഗത്തിനിടെയാണ് സംഭവം. നാടെങ്ങും മദ്യമൊഴുക്കി കുടുംബം തകർക്കുന്ന എൽഡിഎഫിനെ നിലന്പൂരിൽ തിരുത്തണം എന്ന ആഹ്വാനവുമായി തെരഞ്ഞെടുപ്പ് പ്രഖ്യാപിച്ച സമയം മുതൽ മദ്യനിരോധനസമിതി നിലന്പൂരിൽ പ്രചാരണത്തിലാണ്. എൽഡിഎഫ് ഭരണകാലത്ത് മദ്യലോബിയെ സഹായിക്കാൻ സർക്കാർ സ്വീകരിച്ച നടപടികൾ വിശദീകരിച്ചപ്പോഴാണ് എൽഡിഎഫ് പ്രവർത്തകർ രോഷാകുലരായതും ജാഥാ പ്രവർത്തകരെ കൈയേറ്റം ചെയ്യാൻ മുതിർന്നതും. മദ്യനയവുമായി ബന്ധപ്പെട്ട്, എൽഡിഎഫ് പറഞ്ഞതും ചെയ്തതും വിശദീകരിക്കുന്ന ലഘുലേഖ വിതരണം ചെയ്തവർക്ക് നേരെയും ചീത്തവിളിയുണ്ടായി.

മദ്യനിരോധനസമിതി വിശദീകരണ ജാഥ നടത്തി

എടക്കര: കേരളം ഭരിക്കുന്നത് അബ്കാരികൾക്ക് വേണ്ടപ്പെട്ടവരാണെന്ന് കേരള മദ്യനിരോധന സമിതി സംസ്ഥാന പ്രസിഡന്‍റ് ഇയ്യച്ചേരി കുഞ്ഞികൃഷ്ണൻ. മദ്യനിരോധന സമിതി നടത്തുന്ന ഉപതെരഞ്ഞെടുപ്പ് നയ വിശദീകരണ ജാഥയുടെ എടക്കരയിലെ യോഗത്തിൽ പ്രസംഗിക്കുകയായിരുന്നു അദ്ദേഹം. ഭരണം ലഭിച്ചാൽ മദ്യത്തിന്‍റെ ലഭ്യതയും ഉപയോഗവും പടിപടിയായി കുറയ്ക്കുമെന്ന് പ്രകടന പത്രികയിൽ എൽഡിഎഫ് വാഗ്ദാനം ചെയ്തിരുന്നതാണ്. ഞങ്ങൾക്ക് അധികാരം ലഭിച്ചാൽ നിലവിലുള്ളതിനേക്കാൾ ഒരു തുള്ളി മദ്യം പോലും കൂടുതൽ വിൽക്കില്ല എന്നായിരുന്നു മാർക്സിസ്റ്റ് പാർട്ടിയുടെ സംസ്ഥാന സെക്രട്ടറി പൊതുതെരഞ്ഞെടുപ്പ് സമയത്ത് വേദികളിൽ പ്രസംഗിച്ചത്. എന്നാൽ ഭരണം ലഭിച്ചതോടെ മുന്പ് നൽകിയ ഉറപ്പുകളെല്ലാം അവഗണിച്ച സർക്കാരിന്‍റെയും പാർട്ടിയുടെയും മുഖ്യവരുമാന സ്രോതസാക്കി ബാർ ലൈസൻസ് നൽകുന്നതിനെ മാറ്റിയെന്ന് അദ്ദേഹം പറഞ്ഞു. എടക്കര, വഴിക്കടവ്, കരുളായി, അമരന്പലം പഞ്ചായത്തുകളിൽ നടന്ന യോഗങ്ങളിൽ സമിതി സംസ്ഥാന ജനറൽ സെക്രട്ടറി ഡോ. വിൻസെന്‍റ് മാളിയേക്കൽ, ചീഫ് കോ ഓർഡിറ്റേർ പ്രഫ. ടി.എം. രവീന്ദ്രൻ, ഇയ്യച്ചേരി പത്മിനി, പ്രഫ. ഒ.ജെ. ചിന്നമ്മ, മേഴ്സി ജോയി, പി. മോഹനകുമാരൻ, ജലീൽ വൈരങ്കോട്, കെ.എ.ഗോവിന്ദൻ എന്നിവർ പ്രസംഗിച്ചു.

വോട്ടിംഗ് യന്ത്രങ്ങളുടെ കമ്മീഷനിംഗ് പൂർത്തിയായി

എടക്കര: നിലന്പൂർ ഉപതെരഞ്ഞെടുപ്പിനുള്ള ഇലക്ട്രോണിക് വോട്ടിംഗ് മെഷീനുകൾ സജ്ജമാക്കുന്ന കമ്മീഷനിംഗ് പ്രക്രിയ ചുങ്കത്തറ മാർത്തോമ ഹയർ സെക്കൻഡറി സ്കൂളിൽ പൂർത്തിയായി. വരണാധികാരിയുടെ മേൽനോട്ടത്തിൽ തെരഞ്ഞെടുപ്പ് കമ്മീഷന്‍റെ നിരീക്ഷകന്‍റെയും സ്ഥാനാർഥികളുടെ പ്രതിനിധികളുടെയും സാന്നിധ്യത്തിൽ ഭാരത് ഇലക്ട്രോണിക് ലിമിറ്റഡിൽ നിന്നുള്ള എൻജിനീയർമാരാണ് കമ്മീഷനിംഗ് പ്രക്രിയ പൂർത്തീകരിച്ചത്. 263 പോളിംഗ് ബൂത്തുകളിലേക്ക് റിസർവ് ഉൾപ്പെടെയുള്ള മെഷീനുകൾ ഉപതെരഞ്ഞെടുപ്പിനായി സജ്ജമാക്കി. തെരഞ്ഞെടുപ്പ് കമ്മീഷന്‍റെ നിർദേശ പ്രകാരം സ്ഥാനാഥികളുടെ പ്രതിനിധികൾ റാൻഡം ആയി തെരഞ്ഞടുത്ത അഞ്ച് ശതമാനം മെഷീനുകളിൽ 1000 മോക്ക് വോട്ടുകൾ രേഖപ്പെടുത്തുകയും ഈ വോട്ടുകൾ വിവിപാറ്റ് സ്ലിപ്പുമായി താരതമ്യം ചെയ്തു കൃത്യത ബോധ്യപ്പെടുത്തുകയും ചെയ്തു. ജില്ലാ കളക്ടർ വി.ആർ. വിനോദ് സ്ഥലത്തെത്തി പ്രവർത്തനങ്ങൾ വിലയിരുത്തി.

കടുവയുടെ ആക്രമണത്തിൽ കൊല്ലപ്പെട്ട ഗഫൂറലിയുടെ വീട് മന്ത്രി സന്ദർശിച്ചു

കാളികാവ്: ടാപ്പിംഗ് നടത്തുന്നതിനിടെ കടുവ ആക്രമിച്ച് കൊലപ്പെടുത്തിയ ഗഫൂർ അലിയുടെ വീട് വ്യവസായവകുപ്പ് മന്ത്രി പി. രാജീവും സിപിഎം നേതാവ് എം.വി. ജയരാജനും സന്ദർശിച്ചു. ഗഫൂർ അലിയുടെ മക്കളുമായും കുടുംബാംഗങ്ങളുമായും ഏറെനേരം അവർ സംസാരിച്ചു. ഭാര്യയുടെ ജോലിയുടെ കാര്യവും നഷ്ടപരിഹാര തുക ലഭ്യമാക്കുന്നതുമായി ബന്ധപ്പെട്ട് നടപടികൾ സ്വീകരിച്ചിട്ടുണ്ടെന്നും മന്ത്രി പറഞ്ഞു. അടക്കാക്കുണ്ട് റാവുത്തൻകാട്ടിൽ വച്ച് ഗഫൂറലിയെ കടുവ ആക്രമിച്ച് കൊലപ്പെടുത്തിയ സംഭവത്തിനുശേഷം ആദ്യമായാണ് ഒരു മന്ത്രി അദ്ദേഹത്തിന്‍റെ വീട്ടിലെത്തുന്നത്. നിലന്പൂർ ഉപതെരഞ്ഞെടുപ്പുമായി ബന്ധപ്പെട്ട പ്രചാരണ പ്രവർത്തനങ്ങൾക്കിടെയാണ് മന്ത്രി പി. രാജീവ് ഗഫൂർ അലിയുടെ വീട്ടിലെത്തിയത്. ഗഫൂർ അലിയോടൊപ്പം ടാപ്പിംഗ് ചെയ്തിരുന്ന സമദ് മന്ത്രിയോട് സംഭവങ്ങളെല്ലാം വിവരിച്ചു. സിപിഎം നേതാവ് എം.വി. ജയരാജൻ ഉൾപ്പെടെയുള്ള നേതാക്കളോടൊപ്പമാണ് മന്ത്രി വന്നത്. ഡിഎഫ്ഒ ധനിക്ലാൽ നേരത്തെ വീട്ടിലെത്തി നഷ്ടപരിഹാര തുകയുടെ ചെക്ക് കൈമാറിയിരുന്നു. കോടതി മാനദണ്ഡപ്രകാരം രേഖകൾ ഹാജരാക്കിയാൽ ബാക്കി തുക കൂടി ഉടൻ അനുവദിക്കാനാകുമെന്ന് അദ്ദേഹം പറഞ്ഞു. സിപിഎം ലോക്കൽ സെക്രട്ടറി കെ.ടി. മുജീബ്, അനന്തകൃഷ്ണൻ, കെ.എസ്. അൻവർ, എം. അൻവർ, പി. സിദ്ദീഖ്, പി. ഉമ്മർ തുടങ്ങിയവർ സംബന്ധിച്ചു.

നിലന്പൂരിനെ ഇളക്കി മറിച്ച് യൂസഫ് പഠാനുമായി അൻവറിന്‍റെ റോഡ് ഷോ

നിലന്പൂർ: നിലന്പൂരിനെ ഇളക്കിമറിച്ച് പി.വി. അൻവറിന്‍റെ റോഡ് ഷോ. കോരിച്ചൊരിയുന്ന മഴയിലും കരുത്ത് അറിയിച്ച് അൻവർ. തൃണമൂൽ കോണ്‍ഗ്രസ് പിന്തുണയോടെ സ്വതന്ത്ര സ്ഥാനാർഥിയായി മത്സരിക്കുന്ന അൻവർ നടത്തിയ റോഡ് ഷോ ജനപങ്കാളിത്തം കൊണ്ട് ശ്രദ്ധേയമായി. പ്രധാന മുന്നണികളുടെ നേതൃത്വത്തിൽ നടക്കുന്ന റോഡ്ഷോക്ക് സമാനമായ റോഡ് ഷോയാണ് നിലന്പൂരിൽ നിന്ന് വഴിക്കടവിലേക്ക് നടത്തിയത്. നിലന്പൂർ വടപുറം പാലത്തിന് സമീപത്ത് നിന്ന് തുറന്ന വാഹനത്തിലാണ് തൃണമൂൽ കോണ്‍ഗ്രസ് എംപി യുസഫ് പഠാനും തൃണമൂൽ കോണ്‍ഗ്രസ് നേതാക്കൾക്കുമൊപ്പം അൻവർ റോഡ് ഷോയിൽ പങ്കാളിയായത്. നൂറുക്കണക്കിന് ഇരുചക്ര വാഹനങ്ങളിലും നൂറിലേറെ കാറുകളുടെയും അനവധി ഓട്ടോറിക്ഷകളിലുമായി തൃണമൂൽ കോണ്‍ഗ്രസിന്‍റെ കൊടിയും പിടിച്ച് അൻവറിന് പിന്തുണയുമായി യുവാക്കളും വയോജനങ്ങളും ഉൾപ്പെടെ വലിയ ജനങ്കൂട്ടം റോഡ് ഷോയിൽ അണിനിരന്നു. റോഡ്ഷോ വീക്ഷിക്കാൻ റോഡിന്‍റെ ഇരുവശങ്ങളിലായി വലിയ ജനക്കൂട്ടവും കാണപ്പെട്ടു. നിലന്പൂർ മണ്ഡലത്തിൽ പി.വി. അൻവറിന് അനുകൂലമായി നിൽക്കുന്ന അടിയൊഴുക്ക് ആരെയാണ് ബാധിക്കുക എന്നറിയാൻ 23 വരെ കാത്തിരിക്കേണ്ടിവരും. പ്രിയങ്കാഗാന്ധി എംപിയും മുഖ്യമന്ത്രി പിണറായി വിജയനും റോഡ്ഷോ നടത്തിയ ദിവസം തന്നെയാണ് ഇന്നലെ പി.വി. അൻവറും റോഡ് ഷോയുമായി എത്തിയതെന്നതും ശ്രദ്ധേയം.

ഇരുമുന്നണികളും വർഗീയത പറഞ്ഞ് വികസനം തടയുന്നു: ശിവസേന

നിലന്പൂർ:എൽഡിഎഫും യുഡിഎഫും വർഗീയത പറഞ്ഞു വികസനം തടയുന്നുവെന്ന് ശിവസേന. ശിവസേന കേന്ദ്രത്തിലും കേരളത്തിലും എൻഡിഎ മുന്നണിക്കൊപ്പമാണെന്ന് സംസ്ഥാന പ്രസിഡന്‍റ് അഡ്വ. പേരൂർക്കട ഹരികുമാർ പറഞ്ഞു. എൻഡിഎയുടെ വികസന മുദ്രാവാക്യം അട്ടിമറിക്കാൻ എൽഡിഎഫും യുഡിഎഫും വർഗീയതയെ കൂട്ടുപിടിക്കുകയാണ്. മണ്ഡലത്തിൽ വിഭജന രാഷ്ട്രീയം കൊണ്ടുവന്ന് വികസന അജണ്ടയ്ക്ക് തടയിടുകയാണ് ഇവർ. ജമാഅത്തെ ഇസ്ലാമിയുമായും പിഡിപി- വെൽഫെയർ പാർട്ടി എന്നിവരുമായി കൂട്ടുകെട്ടുണ്ടാക്കി അവരുടെ വർഗീയ നിലപാട് പരസ്യമാക്കിയിരിക്കുകയാണ്. നിലന്പൂരിൽ മത്സരിക്കുന്ന മുന്നണി എൻഡിഎ മാത്രമാണെന്നും ഹരികുമാർ പറഞ്ഞു. നിലന്പൂരിൽ ശിവസേന മത്സരരംഗത്തുണ്ടെന്ന് ചില വ്യാജൻമാർ പ്രചാരണം നടത്തുകയാണ്. വാർത്താസമ്മേളനത്തിൽ ശിവസേന മലപ്പുറം ജില്ലാ പ്രസിഡന്‍റ് രാജേഷ് കാടാന്പുഴ, സംസ്ഥാന കമ്മിറ്റി അംഗങ്ങളായ ഷാജിമോൻ അമരന്പലം, സുരേഷ് മണ്ണാർക്കാട്, ബാബുരാജ് കുന്നമംഗലം, വിജേന്ദ്രകുമാർ, സുരേഷ് വണ്ടൂർ, ടി.ഡി. സന്തോഷ് എന്നിവർ പങ്കെടുത്തു.

കടുവ കൊലപ്പെടുത്തിയ ഗഫൂറലിയുടെ വീട്ടിൽ പ്രിയങ്കയെത്തി

കാളികാവ്: ടാപ്പിംഗിനിടെ കടുവ കടിച്ചുകൊന്ന ഗഫൂറലിയുടെ വീട്ടിൽ പ്രിയങ്കാഗാന്ധി എംപിയെത്തി. ഗഫൂറലിയുടെ കുടുംബാംഗങ്ങളോടൊപ്പം 20 മിനിറ്റ് നേരം സംസാരിച്ച ശേഷമാണ് പ്രിയങ്ക മടങ്ങിയത്. കെ.സി. വേണുഗോപാൽ എംപി, എ.പി. അനിൽകുമാർ എംഎൽഎ എന്നിവർക്കൊപ്പമാണ് പ്രിയങ്കഗാന്ധി ഇന്നലെ ഗഫൂറലിയുടെ വീട് സന്ദർശിച്ചത്. കനത്ത സുരക്ഷാ വലയത്തിലായിരുന്നു സന്ദർശനം. കഴിഞ്ഞ മേയ് മാസം 15 നായിരുന്നു നാടിനെ നടുക്കിയ സംഭവം നടന്നത്. അടക്കാക്കുണ്ട് പാറശേരിയിലെ റാവുത്തൻകാട്ടിൽ സ്വകാര്യറബർ തോട്ടത്തിൽ ടാപ്പിംഗ് ചെയ്ത് കൊണ്ടിരിക്കെ രാവിലെ ഏഴ് മണിയോടെ കടുവ ഗഫൂറലിയുടെ മേലെ ചാടി വീഴുകയായിരുന്നു. കൂടെ ജോലി ചെയ്യുന്ന സമദ് സംഭവം നേരിൽ കാണുകയും ചെയ്തു. ഉടൻ ബഹളം കൂട്ടി നാട്ടുകാരുമായി എത്തിയപ്പോഴേക്കും ഗഫൂറലിയെ കടുവ കൊന്നിരുന്നു. ഈ സംഭവത്തിന് ശേഷം കൃത്യം ഒരു മാസമായ ഇന്നലെയാണ് സ്ഥലം എംപി കൂടിയായ പ്രിയങ്കാഗാന്ധി ഗഫൂറലിയുടെ വീട്ടിലെത്തിയത്. നിലന്പൂർ ഉപതെരഞ്ഞെടുപ്പിന്‍റെ പ്രചാരണഥമാണ് പ്രിയങ്കയെത്തിയത്. ചോക്കാട് ഗ്രാമപഞ്ചായത്ത് പ്രസിഡന്‍റ് ഇ.പി. സിറാജുദ്ദീൻ, വൈസ് പ്രസിഡന്‍റ് ശ്രീകല ജനാർദ്ദനൻ, അറക്കൽ സക്കീർ ഹുസൈൻ, പി. ഖാലിദ് തുടങ്ങിയവരും സംബന്ധിച്ചു. മാധ്യമ പ്രവർത്തകരെ കാണാൻ പ്രിയങ്ക തയാറായില്ല. കഴിഞ്ഞദിവസം വനം വകുപ്പ് മന്ത്രി എ.കെ. ശശീന്ദ്രനും വ്യവസായ മന്ത്രി പി. രാജീവും കല്ലാമൂലയിൽ ഗഫൂറലിയുടെ വീട്ടിൽ എത്തിയിരുന്നു.

വീടിന് മുകളിലേക്ക് മതിൽ വീണ് നാശം നേരിട്ടു

ചങ്ങരംകുളം: കനത്ത മഴയിൽ ചിയ്യാനൂരിൽ വീടിനു മുകളിലേക്ക് മതിൽ വീണ് വീട് ഭാഗികമായി തകർന്നു. ചങ്ങരംകുളം ചിയ്യാനൂരിൽ കോട്ടയിൽ ക്ഷേത്രത്തിനടുത്ത് ഇന്നലെ ഉച്ചയോടെയാണ് സംഭവം. മുതിരംപറന്പത്ത് സുരേഷ് ബാബു -വിജി ദന്പതിമാരുടെ വീടാണ് തകർന്നത്. ഓട്ടോ തൊഴിലാളിയായ സുരേഷ് ബാബുവും ഭാര്യ വിജിയും അസുഖം നേരിടുന്ന അമ്മയും രണ്ട് മക്കളും അടങ്ങുന്ന കുടുംബമാണ് ഇവിടെ താമസിച്ചിരുന്നത്. അപകട സമയത്ത് വീട്ടിൽ ആരും ഇല്ലാതിരുന്നതിനാൽ കുടുംബം പരിക്കേൽക്കാതെ രക്ഷപ്പെട്ടു. വീടിനോട് ചേർന്ന് ഉയർന്ന് നിൽക്കുന്ന സ്വകാര്യവ്യക്തിയുടെ മതിലാണ് വീടിന് മുകളിലേക്ക് ഇടിഞ്ഞ് വീണത്. വീടിന്‍റെ അടുക്കളയുടെ ചുമരും വാതിലും അടക്കം തകർന്ന് വീണിട്ടുണ്ട്. മറ്റു ഭിത്തികൾക്കും വിള്ളലേറ്റു. മുന്പ് മതിൽ ഒരു ഭാഗം തകർന്നിരുന്നതായും പഞ്ചായത്തിൽ പരാതി നൽകിയതായും സ്ഥലത്തിന്‍റെ ഉടമയോടും അപകടാവസ്ഥ ബോധ്യപ്പെടുത്തിയതാണെന്നും എന്നാൽ ഒരു വിധത്തിലുള്ള നടപടിയും ഉണ്ടായില്ലെന്നും സുരേഷ് ബാബു പറഞ്ഞു.

കനത്ത മഴയിൽ പൊന്നാനിയിൽ വീടുകളിൽ വെള്ളം കയറി

പൊന്നാനി: കനത്ത മഴയിൽ പൊന്നാനി നഗരസഭ പരിധിയിൽ കുന്പളത്തുപടി-കുട്ടാട് പ്രദേശം വെള്ളത്തിലായി. പ്രദേശത്തെ നൂറോളം വീടുകളിൽ വെള്ളം കയറി. നിരവധി പേർ ബന്ധുവീടുകളിലേക്ക് താമസം മാറിയിട്ടുണ്ട്. മഴ തുടർന്നാൽ കൂടുതൽ കുടുംബങ്ങൾ വീടൊഴിയേണ്ട അവസ്ഥയിലാണ്. കുട്ടാട് പാടശേഖരത്തിലേക്ക് പുതുതായി നിർമിച്ച അഴുക്കുചാലുകൾ കാരണം കുട്ടാട് പാടത്ത് നിന്ന് മഴവെള്ളം ഒഴുകി പോകാത്തതാണ് രൂക്ഷമായ വെള്ളക്കെട്ടിന് കാരണമാകുന്നതെന്നാണ് നാട്ടുകാർ ആരോപിക്കുന്നത്. റോഡിൽ വെള്ളം കയറിയതോടെ താമസം മാറിപോകുന്നവർക്ക് വാഹനങ്ങൾ ലഭിക്കുന്നില്ലെന്നും വീട്ടുസാധനങ്ങളുമായി നടന്നു പോകേണ്ട അവസ്ഥയിലാണ് പ്രദേശവാസികളെന്നും നാട്ടുകാർ പറയുന്നു. മഴക്കാലമായാൽ പ്രദേശത്ത് ദുരിതമാണെന്നും വാഹനങ്ങൾ, മോട്ടോർ പന്പ് സെറ്റുകൾ, മറ്റ് ഇലക്ട്രിക് ഉപകരണങ്ങൾ, വീട്ടുസാധനങ്ങൾ തുടങ്ങിയവ എല്ലാ വർഷവും മറ്റു പ്രദേശങ്ങളിലേക്ക് മാറ്റേണ്ട സ്ഥിതിയാണെന്നും നാട്ടുകാർ പറയുന്നു. നഗരസഭ ജനപ്രതിനിധികളും റവന്യൂ വകുപ്പ് ഉദ്യോഗസ്ഥരും സ്ഥലം സന്ദർശനം നടത്തി പോകുന്നതല്ലാതെ പരിഹാര നടപടികൾ സ്വീകരിക്കുന്നില്ലെന്നാണ് നാട്ടുകാരുടെ പരാതി. മുഖ്യമന്ത്രിയുടെ പരാതി പരിഹാര സെല്ലിൽ നൽകിയ പരാതിയെ തുടർന്ന് നഗരസഭാ സെക്രട്ടറി ഒന്നര വർഷം മുന്പ് തന്നെ ഡ്രൈനേജ് നിർമാണം നടത്തുമെന്ന് രേഖമൂലം അറിയിപ്പ് നൽകിയിട്ടും പരിഹാര നടപടി നഗരസഭാ സ്വീകരിച്ചില്ലെന്ന് പൊന്നാനി ബ്ലോക്ക് കോണ്‍ഗ്രസ് വൈസ് പ്രസിഡന്‍റ് പവിത്രകുമാർ പറഞ്ഞു. അടുത്ത മഴക്കാലത്തിനു മുന്പ് പൊന്നാനി നഗരസഭയിലെ ആറ്, ഏഴ്, എട്ട്, ഒന്പത് വാർഡുകളിൽ സംയുക്ത ഡ്രൈനേജ് നിർമാണം നടത്തി വെള്ളക്കെട്ട് പരിഹരിക്കാൻ നടപടികൾ സ്വീകരിക്കണമെന്ന് അദ്ദേഹം ആവശ്യപ്പെട്ടു.

അദാലത്ത് നടത്തി

മഞ്ചേരി: ജില്ലാ നിയമ സേവന അഥോറിറ്റിയുടെ ആഭിമുഖ്യത്തിൽ ജില്ലയിൽ നടന്ന ദേശീയ ലോക് അദാലത്തിൽ അയ്യായിരത്തിലേറെ കേസുകൾക്ക് തീർപ്പായി. തിരൂർ, പരപ്പനങ്ങാടി, പൊന്നാനി, നിലന്പൂർ, മലപ്പുറം, മഞ്ചേരി താലൂക്കുകളിലായി 12 ബെഞ്ചുകളിലായാണ് അദാലത്ത് നടന്നത്. ജില്ലയിലെ വിവിധ മജിസ്ട്രേറ്റ് കോടതികളിൽ കെട്ടിക്കിടന്ന പിഴയൊടുക്കി തീർക്കാവുന്ന കേസുകൾ, വാഹനാപകട നഷ്ടപരിഹാര കേസുകൾ, ബാങ്കിടപാടുകൾ സംബന്ധിച്ച കേസുകൾ, സിവിൽ കേസുകൾ, ഇലക്ട്രിസിറ്റി ഒപികൾ, മറ്റ് വിവിധ കേസുകൾ ഉൾപ്പെടെ എട്ടുകോടിയിലധികം രൂപയുടെ വ്യവഹാരങ്ങളാണ് തീർപ്പാക്കിയത്. അഡീഷണൽ ജില്ലാ ജഡ്ജ് എം. തുഷാർ, ജില്ലാ നിയമ സേവന അഥോറിറ്റി സെക്രട്ടറിയും സീനിയർ ഡിവിഷൻ സിവിൽ ജഡ്ജുമായ എം. ഷാബിർ ഇബ്രാഹിം എന്നിവർ അദാലത്തിന് നേതൃത്വം നൽകി. ജില്ലാ ജഡ്ജിമാരായ ടി.ജി. വർഗീസ്, കെ.പി. ജോയ്, സുബിത ചിറക്കൽ, ഫാത്തിമ ബീവി, എസ്. ശ്രീജിത്ത്, എം.പി. ഷൈജൽ, സബ് ജഡ്ജ് ടി.വി. വിൻസി, മുൻസിഫുമാരായ വിഷ്ണു സുഭാഷ്, അശ്വിനി നളിൻ, സി. സാനു എന്നിവർ വിവിധ ബെഞ്ചുകളിൽ കേസുകൾ പരിഗണിച്ചു.

വന്യജീവി ആക്രമണങ്ങളിൽ ഇരകളായവരുടെ സംഗമം

നിലന്പൂർ: കേരളത്തിൽ വന്യജീവി ആക്രമണത്തിൽ ഇരകളായ മലയോര കർഷകരെ തിരിഞ്ഞു നോക്കാത്ത കേരളത്തിലെ എൽഡിഎഫ് സർക്കാരിന്‍റെ നിലപാടല്ല യുഡിഎഫിനെന്ന് പ്രതിപക്ഷ നേതാവ് വി.ഡി. സതീശൻ. നിലന്പൂരിൽ യുഡിഎഫിന്‍റെ നേതൃത്വത്തിൽ നടത്തിയ വന്യജീവി ആക്രമണങ്ങളിൽ ഇരകളായവരുടെ സംഗമം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കർഷക കോണ്‍ഗ്രസ് സംസ്ഥാന അധ്യക്ഷൻ മാജുഷ് മാത്യു അധ്യക്ഷത വഹിച്ചു. കെപിസിസി പ്രസിഡന്‍റ് സണ്ണി ജോസഫ്, ഫ്രാൻസിസ് ജോർജ് എംപി, പി.എം.എ. സലാം, പി.സി. തോമസ്, പി.വി. വിഷ്ണുനാഥ് എംഎൽഎ, കുറുക്കോളി മൊയ്തീൻ എംഎൽഎ, എ.പി. രാജൻ, ലുക്മാൻ അരീക്കോട് എന്നിവർ പ്രസംഗിച്ചു.

യുഡിഎസ്എഫ് റാലിയിൽ വൻ വിദ്യാർഥി പങ്കാളിത്തം

എടക്കര: യുഡിഎഫ് സ്ഥാനാർഥി ആര്യാടൻ ഷൗക്കത്തിന്‍റെ തെരഞ്ഞെടുപ്പ് പ്രചാരണാർഥം യുഡിഎസ്എഫിന്‍റെ നേതൃത്വത്തിൽ എടക്കരയിൽ വിദ്യാർഥി റാലി സംഘടിപ്പിച്ചു. കെപിസിസി വർക്കിംഗ് പ്രസിഡന്‍റ് എ.പി. അനിൽകുമാർ എംഎൽഎ റാലി ഉദ്ഘാടനം ചെയ്തു. മുസ്ലിം ലീഗ് സംസ്ഥാന സെക്രട്ടറിയറ്റ് അംഗം നജീബ് കാന്തപുരം എംഎൽഎ മുഖ്യാതിഥിയായിരുന്നു. യുഡിഎസ്എഫ് നിയോജക മണ്ഡലം ചെയർമാൻ സഫ്വാൻ ഇല്ലിക്കൽ അധ്യക്ഷത വഹിച്ചു. മാത്യു കുഴൽനാടൻ എംഎൽഎ, റോജി എം. ജോണ്‍ എംഎൽഎ, ചാണ്ടി ഉമ്മൻ എംഎൽഎ, രമ്യ ഹരിദാസ്, അലോഷ്യസ് സേവിയർ, എംഎസ്എഫ് സംസ്ഥാന പ്രസിഡന്‍റ് പി.കെ. നവാസ്, കെ.എം. അഭിജിത്ത്, സി. നെജാഫ്, ഇ.കെ. അൻഷിദ് കബീർ മുതുപറന്പ്, ആരോമൽ ശ്രീകാന്ത് എന്നിവർ പ്രസംഗിച്ചു.

മുയ്തായ് ഗെയിംസിലും സുവർണ നേട്ടവുമായി ലക്ഷ്മി നന്ദ

പെരിന്തൽമണ്ണ: ദേശീയ കിക്ക് ബോക്സിംഗ് ചാന്പ്യൻഷിപ്പിലെ മെഡൽ നേട്ടത്തിന് ശേഷം ദേശീയ മുയ്തായ് ഗെയിംസിലും സുവർണ നേട്ടവുമായി പതിമൂന്ന്കാരി ലക്ഷ്മി നന്ദ. പെരിന്തൽമണ്ണ ശ്രീവള്ളുവനാട് വിദ്യാഭവനിൽ എട്ടാം ക്ലാസ് വിദ്യാർഥിയായ ലക്ഷ്മി നന്ദ കഴിഞ്ഞ വർഷമാണ് കർണാടകത്തിൽ നിന്ന് കേരളത്തിലെത്തിയത്. യുണൈറ്റഡ് മുയ്തായ് അസോസിയേഷൻ ഹരിയാന മഹർഷി ദയാനന്ദ് യൂണിവേഴ്സിറ്റിയിൽ സംഘടിപ്പിച്ച ഗെയിംസിൽ 46 കിലോഗ്രാം വിഭാഗത്തിലാണ് ലക്ഷ്മി നന്ദ നേട്ടം കരസ്ഥമാക്കിയത്. രാജസ്ഥാൻ താരത്തെയാണ് ലക്ഷ്മി ഫൈനലിൽ പരാജയപ്പെടുത്തിയത്. പെരിന്തൽമണ്ണയിലെ ബുഷിഡോ ബോക്സേഴ്സ് ക്ലബിലെ രാജ്യാന്തര പരിശീലകനായ ഫഹദ് ആനക്കായിയാണ് ഈയിനത്തിൽ ലക്ഷ്മിയുടെ പരിശീലകൻ. ഇതിനു പുറമേ കളരിയും കിക്ക് ബോക്സിംഗും ലക്ഷ്മി പരിശീലിക്കുന്നു. ഫോട്ടോഗ്രാഫിയിലും ലക്ഷ്മി പരിശീലനം നേടുന്നു. ലക്ഷ്മിക്ക് ആവേശവും പ്രചോദനവുമായി കിക്ക്് ബോക്സിംഗിലും ബോഡി ബിൽഡിംഗിലും പരിശീലനം നേടിയ അച്ഛൻ രവീഷ് കാവുങ്ങൽതൊടിയിൽ കൂടെയുണ്ട്. അന്താരാഷ്ട്ര മത്സരങ്ങളിലെ മെഡൽ നേട്ടമാണ് ലക്ഷ്മിയുടെ സ്വപ്നം.

കിംസ് അൽശിഫയിൽ രക്തദാതാ ദിനാചരണ കാന്പയിൻ

പെരിന്തൽമണ്ണ: ലോക രക്തദാതാ ദിനാചരണത്തിന്‍റെ ഭാഗമായി ബ്ലഡ് ഡോണേഴ്സ് കേരള പെരിന്തൽമണ്ണ താലൂക്ക് കമ്മിറ്റിയുടെ നേതൃത്വത്തിൽ ഐഎസ്എസ് കോളജ്, സിസ്കോ ഇൻസ്റ്റിറ്റ്യൂട്ട്, എൻടിസി എൻജിനീയറിംഗ് കോളജ് എന്നിവയുടെ സഹകരണത്തോടെ പെരിന്തൽമണ്ണ കിംസ് അൽശിഫ ബ്ലഡ് ബാങ്കിൽ ത്രിദിന സന്നദ്ധ രക്തദാനവും ബോധവത്കരണ പരിപാടിയും സംഘടിക്കും. സമൂഹത്തിന്‍റെ വിവിധ മേഖലകളിലെ നൂറിലേറെ പേർ ഇതിന്‍റെ ഭാഗമായി രക്തംദാനം ചെയ്യുകയും 300 ലേറെ പേർക്ക് രക്തദാനത്തിന്‍റെ പ്രാധാന്യത്തെക്കുറിച്ച് ബോധവത്ക്കരണവും നടത്തും. പരിപാടികളുടെ ഉദഘാടനം മെഡിക്കൽ സൂപ്രണ്ട് ഡോ. മുഹമ്മദ് യഹിയ നിർവഹിച്ചു. കിംസ് അൽശിഫ സിഇഒ കെ.സി. പ്രിയൻ അധ്യക്ഷനായിരുന്നു. ബോധവത്കരണ ക്ലാസിന് ബ്ലഡ് ബാങ്ക് മെഡിക്കൽ ഓഫീസർ ഡോ. ഷാഹിന, ക്ലിനിക്കൽ അഡ്മിനിസ്ട്രേറ്റർ ഡോ. ഷാഹുൽ ഹമീദ് എന്നിവർ നേതൃത്വം നൽകി. സീനിയർ ഓപ്പറേഷൻ മാനേജർ പ്രദീപ് കുമാർ, റിലേഷൻസ് ആൻഡ് ഓപ്പറേഷൻസ് മാനേജർ സി.എച്ച്. നാസർ, നഴ്സിംഗ് സൂപ്രണ്ട് ഷേർലി ജെയിസ്, എച്ച്ആർ ഹെഡ് ഫൈസൽ, പിആർ ഹെഡ് അബ്ദുള്ള ഷാക്കിർ, ബ്ലഡ് ഡോണർ കേരള കോ ഓർഡിനേറ്റർ ജയകൃഷ്ണൻ, സീനിയർ ജനറൽ മാനേജർ സി. സതീഷ് എന്നിവർ പ്രസംഗിച്ചു. ക്യാന്പിന് ബ്ലഡ് ഡോണേഴ്സ് കേരള കോ ഓർഡിനേറ്റേഴ്സായ കൃഷ്ണദാസ്, ഷഫീക്ക്് അമ്മിനിക്കാട്, വാസുദേവൻ, ഗിരീഷ് അങ്ങാടിപ്പുറം, ആഷിക് വേങ്ങൂർ എന്നിവർ നേതൃത്വം നൽകി. 24 മണിക്കൂറും പ്രവർത്തിക്കുന്ന കിംസ് അൽശിഫ ബ്ലഡ് സെന്‍ററിന്‍റെ സേവനങ്ങൾക്ക് 04933299160, +91 8547326851 നന്പറുകളിൽ ബന്ധപ്പെടണം.

അങ്ങാടിപ്പുറം സ്വാന്തന കേന്ദ്രത്തിന് സ്വന്തം കെട്ടിടമായി

അങ്ങാടിപ്പുറം : ഒരുകോടിയോളം രൂപ ചെലവിൽ നിർമിച്ച പുത്തനങ്ങാടിയിലെ അങ്ങാടിപ്പുറം പാലിയേറ്റീവ് കെട്ടിടത്തിന്‍റെ ഉദ്ഘാടനം 22ന് നടക്കും. കെട്ടിടം നിർമിക്കാൻ 23 സെന്‍റ് സ്ഥലം വിരമിച്ച സൈനികൻ ഹവിൽദാർ ടി.പി. കുഞ്ഞിരാമൻ നായർ സൗജന്യമായാണ് നൽകിയത്. അദ്ദേഹം തന്നെയാണ് രാവിലെ 10 മണിക്ക് സ്വാന്തന കേന്ദ്രം ഉദ്ഘാടനം ചെയ്യുന്നത്. 2500 ചതുരശ്രഅടി വിസ്തീർണമുള്ള ഇരുനില കെട്ടിടത്തിൽ വിപുലമായ സൗകര്യങ്ങളാണ് ഒരുക്കിയിട്ടുള്ളത്. ഒരു കോടി രൂപയോളം മതിപ്പു ചെലവ് പ്രതീക്ഷിക്കുന്ന കെട്ടിടം നിർമിക്കുവാൻ വിവിധ സ്ഥാപനങ്ങളും ഉദാരമതികളായ ജനങ്ങളും മറ്റും സംഭാവന നൽകിയാണ് കെട്ടിടം പണിതത്. കുട്ടികളും മുതിർന്നവരും സ്ഥാപനങ്ങളും ക്ലബുകളും ഇതിൽ പങ്കാളികളാണ്. സ്വന്തം കെട്ടിടത്തിലേക്ക് സ്വാന്തന കേന്ദ്രം മാറുന്നതോടെ കൂടുതൽ സ്ഥലങ്ങളിൽ സ്വാന്തന പരിചരണ വ്യാപിക്കുവാൻ കഴിയുമെന്ന് പെയിൻ ആൻഡ് പാലിയേറ്റീവ് ഭാരവാഹികൾ പറഞ്ഞു. 2017 മുതലാണ് അങ്ങാടിപ്പുറം പഞ്ചായത്തിലെ പാലിയേറ്റീവ് പ്രവർത്തനങ്ങൾക്ക് തുടക്കമായത്. 265ൽ പരം രോഗികൾക്ക് ഒരു മാസത്തിൽ പാലിയേറ്റീവ് സേവനം നൽകിവരുന്നുണ്ട്.

വിദ്യാഭ്യാസരംഗത്ത് മാറ്റങ്ങൾക്കനുസരിച്ച് അധ്യാപകർ ഉയരണമെന്ന്

പെരിന്തൽമണ്ണ:വിദ്യാഭ്യാസ രംഗത്ത് മാറ്റങ്ങൾക്കനുസരിച്ച് ഉയരാൻ അധ്യാപകർക്ക് കഴിയണമെന്ന് കേന്ദ്രീയ സർവകലാശാലയിലെ പ്രഫസറും വിദ്യാഭ്യാസ വിചക്ഷണനുമായ വി.പി. ജോഷിത് അഭിപ്രായപ്പെട്ടു. ശ്രീവള്ളുവനാട് വിദ്യാഭവനിൽ നടന്ന ഭാരതീയ വിദ്യാനികേതൻ മലപ്പുറം ജില്ലാ വിദ്യാഭ്യാസ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മുൻകാലങ്ങളിൽ അറിവിനു വേണ്ടി ലൈബ്രറികളിൽ നിന്ന് ലൈബ്രറികളിലേക്ക് യാത്ര ചെയ്താണ് പഠന ഗവേഷണ കാര്യങ്ങൾ ചെയ്തിരുന്നതെങ്കിൽ ഇന്നത് വിരൽതുന്പിൽ ലഭ്യമാണ്. ഈ മാറ്റം മനസിലാക്കി അധ്യാപക സമൂഹം ഉയർന്ന് ചിന്തിക്കണമെന്നും അദ്ദേഹം പറഞ്ഞു. ഭാരതീയ വിദ്യാനികേതൻ ജില്ലാ അധ്യക്ഷൻ പി.കെ. തരകൻ അധ്യക്ഷത വഹിച്ചു. ഭാരതീയ വിദ്യാനികേതൻ സംസ്ഥാന ഉപാധ്യക്ഷൻ ആർ.വി. ജയകുമാർ മുഖ്യപ്രഭാഷണം നടത്തി. വിവിധ മേഖലകളിൽ ഉന്നത വിജയം നേടിയ വിദ്യാർഥികളെയും വിദ്യാലയങ്ങളെയും അനുമോദിച്ചു. അഡ്വ.എം.കെ സുനിൽ, കെ.കൃഷ്ണകുമാർ, പി.ഹരിദാസ്, അഡ്വ. ഇന്ദിരാനായർ, ലിഷ ജയചന്ദ്രൻ, ലതശശി, എം.ജയപ്രകാശ്, കെ.വി സജിത്ത് കുമാർ എന്നിവർ പ്രസംഗിച്ചു. ഈ അധ്യയന വർഷത്തിൽ നടത്തേണ്ട പ്രവർത്തനങ്ങളെക്കുറിച്ച് സമ്മേളനം ചർച്ച ചെയ്തു. സമാപന യോഗത്തിൽ കെ.കൃഷ്ണകുമാർ, കെ.വി. സജിത്ത്കുമാർ എന്നിവർ പ്രസംഗിച്ചു.

മതിൽ തകർന്ന് വീടിന് മുകളിൽ വീണു

എടപ്പാൾ:കനത്ത മഴയിൽ എടപ്പാൾ വെങ്ങിനിക്കരയിൽ മതിൽ തകർന്ന് വീടിന് മുകളിൽ വീണു. ഇന്നലെ ഉച്ചക്ക് 12 മണിയോടെയാണ് അപകടം. വെങ്ങിനിക്കര മണ്ണായത്ത് വളപ്പിൽ ഷംസുദീന്‍റെ വീടിന്‍റെ മതിലാണ് തകർന്ന് വീണത്. ഷംസുദീന്‍റെ വീടിന്‍റെ താഴെ ഭാഗത്തുള്ള പള്ളിയാലിൽ സൈനബയുടെ വീടിന്‍റെ മുകളിലേക്കാണ് കോണ്‍ക്രീറ്റ് മതിൽ വീണത്. സൈനബയുടെ അടുക്കള ഭാഗവും ജനൽ, ചിമ്മിനിക്കൂട്, സമീപത്തെ വിറകുപുര എന്നിവ തകർന്നിട്ടുണ്ട്. മതിലിൽ വിള്ളൽ ഷംസുദീന്‍റെ ശ്രദ്ധയിൽ പെട്ടതിനാൽ പെട്ടെന്ന് തന്നെ സൈനബയുടെ വീട്ടുകാരെ മാറ്റുകയായിരുന്നു. ആളുകളെ മാറ്റി അധികസമയം ആകും മുന്പേ വലിയ ശബ്ദത്തോടെ മതിൽ തകർന്ന് വീഴുകയായിരുന്നു. സൈനബയുടെ വീടിന്‍റെ നാശനഷ്ടങ്ങൾക്ക് പുറമെ മതിൽ തകർന്നതിൽ മൂന്ന് ലക്ഷത്തിലേറേ രൂപയുടെ നഷ്ടം കണക്കാക്കുന്നു.

കാട്ടാനയുടെ ആക്രമണത്തിൽ നിന്ന് ആദിവാസി വയോധികൻ രക്ഷപ്പെട്ടു

എടക്കര: കാട്ടാനയുടെ ആക്രമണത്തിൽ നിന്ന് ആദിവാസി വയോധികൻ അത്ഭുതകരമായി രക്ഷപ്പെട്ടു. നല്ലംതണ്ണി മണക്കാട് ഉൗരിലെ വയോധികനാണ് ഉദിരകുളം ഉടുന്പൊയിൽ വനത്തിൽ വച്ച് കാട്ടാനയുടെ ആക്രമണത്തിൽ നിന്ന് രക്ഷപ്പെട്ടത്. ഇന്നലെ രാവിലെ എട്ട് മണിയോടെയാണ് സംഭവം. മണക്കാട് ഉൗരിൽ നിന്ന് മലച്ചി ഉൗരിലേക്ക് പോകുന്നതിനിടെയാണ് സംഭവം. ഉടുന്പൊയിൽ വനാതിർത്തിയിൽ കാഞ്ഞിര മരത്തിന്‍റെ തൂന്പ കൈ നോക്കാൻ കയറിയ ഇയാളെ കാട്ടാന ആക്രമിച്ച് ഓടിക്കുകയായിരുന്നു. കാട്ടാന ആക്രമിക്കാനൊരുങ്ങുന്നത് കണ്ട വനാതിർത്തിയിലെ താമസക്കാരനായ വാകത്താനം ബെന്നിയുടെ ഭാര്യ ഒച്ചവച്ചതോടെ നാട്ടുകാരും ഇറങ്ങി കാട്ടാനയെ ഓടിച്ചു. വനാതിർത്തിയിൽ സ്ഥാപിച്ചിട്ടുള്ള സോളാർ ഫെൻസിംഗിനടിയിൽ കൂടി നൂഴ്ന്ന് കടന്നാണ് വയോധികൻ രക്ഷപ്പെട്ടത്. പ്രദേശത്ത് കാട്ടാന ശല്യം രൂക്ഷമാണെന്ന് പ്രദേശവാസികൾ പറയുന്നു. ഇതിന് മുന്പ് ഇവിടെ കാണാത്ത ചെറിയ ആനയാണ് ഇന്നലെ ആക്രമണ ശ്രമം നടത്തിയതെന്നാണ് ദൃക്സാക്ഷികൾ പറയുന്നത്.

തണ്ണിക്കടവിൽ ഒറ്റയാൻ കൃഷി നശിപ്പിച്ചു

എടക്കര: തണ്ണിക്കടവ് ജനവാസ കേന്ദ്രത്തിൽ കാട്ടാന വ്യാപക കൃഷിനാശം വിതച്ചു. ശനിയാഴ്ച പുലർച്ചെ രണ്ടോടെയാണ് തണ്ണിക്കടവ് കോറിപ്പടിയിൽ ഒറ്റയാൻ കൃഷിനാശം വരുത്തിയത്. കരിയംമുരിയം വനത്തിൽ നിന്നെത്തിയ കാട്ടാന കോറിപ്പടിയിലെ തോട്ടേക്കാട് ഹുസൈൻ എന്ന ടി.കെ. കുഞ്ഞുട്ടി, തോട്ടേക്കാട് അബ്ദുൾസലാം എന്നിവരുടെ കൃഷിയിടമാണ് നശിപ്പിച്ചത്. ഇവരുടെ തോട്ടത്തിലെ വാഴ, കമുക്, തെങ്ങ് എന്നിവയെല്ലാം വ്യാപകമായി നശിപ്പിച്ചിട്ടുണ്ട്. കർഷകർ സ്ഥാപിച്ച ഫെൻസിംഗ് തകർത്താണ് കാട്ടാന കൃഷിയിടത്തിലേക്ക് പ്രവേശിച്ചത്. കാടിറങ്ങിയെത്തിയ ഒറ്റയാൻ പാലേമാട് തണ്ണിക്കടവ് റോഡിലൂടെയാണ് കൃഷിയിടങ്ങളിലേക്ക് എത്തിയത്. പുലർച്ചെ സമയത്ത് വാഹനങ്ങളില്ലാത്തതിനാൽ അപകടമൊഴിവായതായി നാട്ടുകാർ പറയുന്നു. ഒരു മാസത്തിലധികമായി പ്രദേശത്ത് കാട്ടാനശല്യം രൂക്ഷമാണ്. ജനങ്ങളുടെ ജീവനും സ്വത്തിനും സംരക്ഷണം ഉറപ്പാക്കാൻ വനം വകുപ്പ് തയാറാകണമെന്നാണ് കർഷകരുടെ ആവശ്യം.

തൃക്കലങ്ങോട് പ്രദേശത്ത് വീണ്ടും പുലി സാന്നിധ്യം? ജാഗ്രത പാലിക്കാൻ നിർദേശം

മഞ്ചേരി: തൃക്കലങ്ങോട് പ്രദേശത്ത് വീണ്ടും പുലി സാന്നിധ്യത്തെത്തുടർന്ന് ജാഗ്രത പാലിക്കാൻ വനം വകുപ്പിന്‍റെ നിർദേശം. കഴിഞ്ഞ രണ്ടാഴ്ചക്കിടെ അഞ്ച് പേരാണ് തൃക്കലങ്ങോട് പഞ്ചായത്തിൽ പുലിയെ കണ്ടതായി പറഞ്ഞത്. ആദ്യം ചെരണി - പന്നിപ്പാറ റോഡിൽ രണ്ടു പേർ പുലിയെ കണ്ടതായി പറഞ്ഞിരുന്നു. എന്നാൽ മതിയായ തെളിവില്ലാത്തതിനാൽ ഫോറസ്റ്റ് ഉദ്യോഗസ്ഥർ ഇത് മുഖവിലക്കെടുത്തില്ല. എന്നാൽ ഇക്കഴിഞ്ഞ ബുധനാഴ്ച രാത്രി പത്തര മണിക്ക് മരത്താണി - കിടങ്ങഴി റോഡിൽ വച്ച് പുലിയെ കണ്ടതായി പള്ളിയാളി നിധിൻ എന്ന ബൈക്ക് യാത്രികനും പറഞ്ഞതോടെ നാട്ടുകാരിൽ ആശങ്കയേറിയിരിക്കയാണ്. വാർഡ് മെംബർ കെ.ടി. ലൈല ജലീലും വില്ലേജ് ഓഫീസർ നാരായണൻകുട്ടിയും സ്ഥലത്തെത്തി പരിശോധന നടത്തിയിരുന്നു. പുലിയുടേതെന്ന് സംശയിക്കുന്ന കാൽപ്പാടുകൾ ഫോട്ടോയെടുത്ത് വനംവകുപ്പുദ്യോഗസ്ഥർക്ക് അയച്ചു നൽകിയെങ്കിലും ഇത് പുലിയുടേതല്ലെന്ന് പറഞ്ഞ് കൈയൊഴിയുകയായിരുന്നു. പുലി ഭീതിയിൽ നാട്ടുകാർ കഴിയുന്പോൾ വനം ഉദ്യോഗസ്ഥർ ഇതിന് വേണ്ട നടപടി സ്വീകരിക്കുന്നില്ലെന്ന് ആക്ഷേപമുയർന്നിരുന്നു. ഇതിനിടെ വെള്ളിയാഴ്ച രാത്രി എട്ടര മണിക്ക് മരത്താണി പുൽക്കലക്കണ്ടി ഭാഗത്ത് വച്ച് സുനിൽ പേരൂരും 12.30ന് ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന കൊങ്ങൻ നിസാമും പുലിയെ കണ്ടതായി വാർത്ത പരന്നു. മഞ്ചേരി നഗരസഭയുടെയും തൃക്കലങ്ങോട് പഞ്ചായത്തിന്‍റെയും അതിർത്തി പ്രദേശമാണിത്. മേലേ മരത്താണി സ്വദേശികളായ നിസാം കൊങ്ങൻ, സുനീർ പേരൂർ എന്നിവരാണ് പുലിയെ കണ്ടതായി അവകാശപ്പെട്ടത്. ഇതോടെ ഭയവിഹ്വലരായ നാട്ടുകാർ വനം വകുപ്പിന് പരാതി നൽകി. ഇതിന്‍റെ അടിസ്ഥാനത്തിൽ എടവണ്ണ റേഞ്ച് ഫോറസ്റ്റ് ഓഫീസിന് കീഴിലെ ബീറ്റ് ഫോറസ്റ്റ് ഓഫീസർമാർ ഇന്നലെ സ്ഥലത്തെത്തി പരിശോധന നടത്തി. പുലിയുടേതെന്ന് സംശയിക്കുന്ന കാൽപ്പാടുകളൊന്നും കണ്ടെത്താനായില്ല. എങ്കിലും രാത്രി 10ന് ശേഷം പുറത്തിറങ്ങരുതെന്നും കന്നുകാലികളെ വളർത്തുന്നവർ ജാഗ്രത പാലിക്കണമെന്നും വനം ഉദ്യോഗസ്ഥർ നിർദേശം നൽകി. പുലിയെ കണ്ടെന്ന് പറയുന്ന രണ്ട് സ്ഥലങ്ങളിലും ഉദ്യോഗസ്ഥർ പരിശോധിച്ചു. കഴിഞ്ഞ മാർച്ച് നാലിന് തൃക്കലങ്ങോട് കുതിരാടത്ത് ജനവാസ മേഖലയിൽ പുലി ഏഴ് ആടുകളെ കടിച്ചുകൊന്നിരുന്നു. നെല്ലിക്കുന്ന് വള്ളിയേമ്മൽ എൻ.സി. കരീമിന്‍റെ ഫാമിലെ ആടുകളെയാണ് പുലി ആക്രമിച്ചത്. എന്നാൽ അന്ന് തന്നെ വനം വകുപ്പ് സ്ഥാപിച്ച കെണിയിൽ പുലി അകപ്പെട്ടതോടെ ആശങ്ക ഒഴിഞ്ഞു. പിന്നീട് നെടുങ്കയത്ത് നിന്ന് 20 കലോമീറ്റർ ദൂരെയുള്ള വനത്തിലേക്ക് പുലിയെ തുറന്നു വിടുകയായിരുന്നു. രണ്ട് മാസത്തിന് ശേഷമാണ് വീണ്ടും പുലിയെ കണ്ടതായി നാട്ടുകാർ പറയുന്നത്. ബീറ്റ് ഫോറസ്റ്റ് ഓഫീസർമാരായ പി. പ്രബീഷ്, പി.കെ. ജോണ്‍സണ്‍, ഫോറസ്റ്റ് വാച്ചർ എം.ആർ. ബാബു, തൃക്കലങ്ങോട് വില്ലേജ് ഓഫീസർ കെ. നാരായണൻകുട്ടി, 22-ാം വാർഡ് മെംബർ ലൈല ജലീൽ, കെ.ടി. ജലീൽ എന്നിവരുടെ നേതൃത്വത്തിലാണ് പരിശോധന നടത്തിയത്.

നിലന്പൂർ ഉപതെരഞ്ഞെടുപ്പ്: കളം നിറഞ്ഞ് സ്ഥാനാർഥികൾ

നാലാം നാൾ ബൂത്തിലേക്ക് നിലന്പൂർ: നിലന്പൂർ ഉപതെരഞ്ഞെടുപ്പിന് ഇനി നാലുനാൾ മാത്രം. ശക്തമായ മഴക്കിടയിലും ആവേശം ചോരാതെ പ്രചാരണം അവസാനഘട്ടത്തിലേക്ക് കടക്കുന്പോൾ വിവാദങ്ങളും ആരോപണ, പ്രത്യാരോപണങ്ങളുമായി കളം നിറഞ്ഞ് സ്ഥാനാർഥികളും നേതാക്കളും. വിജയം ഉറപ്പിക്കാൻ മുന്നണികൾ ശക്തമായ പ്രവർത്തനത്തിലാണ്. അടിയൊഴുക്കുകളിൽ പ്രതീക്ഷയർപ്പിച്ച് തൃണമൂൽ കോണ്‍ഗ്രസ് പിന്തുണക്കുന്ന സ്വതന്ത്ര സ്ഥാനാർഥി പി.വി. അൻവർ. തെരഞ്ഞെടുപ്പിന് നാലുനാൾ മാത്രം ശേഷിക്കേ നിലന്പൂരിലേക്ക് പണം ഒഴുക്കാനുള്ള സാധ്യത മുന്നിൽ കണ്ട് പോലീസ് പരിശോധന ശക്തമാക്കിയിരിക്കുന്നു. നിലന്പൂർ നായാടംപൊയിൽ മലയോര ഹൈവേ, നാടുകാണി ചുരത്തിന്‍റെ വഴിക്കടവ് ചെക്ക്പോസ്റ്റ്, വടപുറം ഭാഗം എന്നിവിടങ്ങളിലാണ് വാഹന പരിശോധന ഉൗർജിതമാക്കാൻ പോകുന്നത്. പ്രചാരണം കൊഴുക്കുന്പോഴും വിജയം അത്ര എളുപ്പമല്ലെന്ന് തിരിച്ചറിവാണ് മുന്നണികളെ ആശങ്കയിലാഴ്ത്തുന്നത്. ഭരണനേട്ടത്തിൽ എൽഡിഎഫും ഭരണവിരുദ്ധ വികാരത്തിൽ യുഡിഎഫും പ്രതീക്ഷയർപ്പിക്കുന്നു. കേന്ദ്ര സർക്കാരിന്‍റെ ഭരണ നേട്ടങ്ങളിലും നിലന്പൂരിലെ വികസന മുരടിപ്പിലും ഉൗന്നൽ നൽകിയാണ് എൻഡിഎ പ്രചാരണം. മണ്ഡലത്തിൽ തനിക്ക് അനുകൂലമായ അടിയൊഴുക്കുകളിലാണ് പി.വി. അൻവറിന്‍റെ പ്രതീക്ഷ. എൽഡിഎഫ് സ്ഥാനാർഥി എം. സ്വരാജും യുഡിഎഫ് സ്ഥാനാർഥി ആര്യാടൻ ഷൗക്കത്തും എൻഡിഎ സ്ഥാനാർഥി മോഹൻ ജോർജും തികച്ചും ആത്മവിശ്വാസത്തിലാണ്. അതിനാൽ തന്നെ തെരഞ്ഞെടുപ്പ് ഫലം പ്രവചനാതീതമാണ്. വെൽഫെയർ പാർട്ടി പിന്തുണ യുഡിഎഫിന് ഗുണമോ ദോഷമോ എന്നറിയാൻ ഫലം വരും വരെ കാത്തിരിക്കേണ്ടിവരും. പിഡിപി ബന്ധം എൽഡിഎഫിനും തലവേദനയാകും. കത്തോലിക്ക കോണ്‍ഗ്രസ് ഇത്തരം പിന്തുണകൾക്കെതിരെ സർക്കുലർ ഇറക്കിയത് ഇരുമുന്നണികൾക്കും വലിയ പ്രതിസന്ധിയാകുമെന്ന ആശങ്കയും നിലനിൽക്കുന്നു. കത്തോലിക്ക കോണ്‍ഗ്രസ് ഇടപെടൽ മണ്ഡലത്തിൽ വലിയ തോതിൽ ചർച്ചയായിട്ടുണ്ട്. വിവാദങ്ങൾക്ക് ചെവി കൊടുക്കാതെ വന്യമ്യഗശല്യവും ജനകീയ വിഷയങ്ങളിലും ഉൗന്നിയാണ് പി.വി. അൻവറിന്‍റെ പ്രചാരണം. നിലന്പൂരിന്‍റെ വികസനത്തിന് ഒരു വോട്ട്. അതാണ് എൻഡിഎ പ്രചാരണ വിഷയം. നാല് സ്ഥാനാർഥികളുടെയും തെരഞ്ഞെടുപ്പ് പ്രചാരണങ്ങളിൽ വലിയ പ്രവർത്തക സാന്നിധ്യമാണുള്ളത്. അതിനാൽ ജനവിധിയറിയാൻ 23 വരെ കാത്തിരിക്കുക തന്നെ വേണം. പുറത്ത് വലിയ ഭൂരിപക്ഷം നേതാക്കൾ അവകാശപ്പെടുന്പോഴും ഉള്ളിൽ നിറയെ ആശങ്കയാണ്. നിലന്പൂർ ഉപതെരഞ്ഞെടുപ്പ് ഫലം മുന്നണികളുടെ രാഷ്ട്രീയ ഭാവിയുടെ ചൂണ്ടുപലകയാകും. നിലന്പൂരിൽ വിജയിച്ചില്ലെങ്കിൽയുഡിഎഫിന് അത് വലിയ പ്രത്യാഘാതമാകും. അത് മുന്നണിക്കുള്ളിലുംപെട്ടിത്തെറിക്ക് ഇടയാക്കുമെന്ന തിരിച്ചറിവും നേതാക്കൾക്കുണ്ട്. എൽഡിഎഫിന് സീറ്റ് നിലനിറുത്താനായില്ലെങ്കിൽ മൂന്നാം തവണയും തുടർ ഭരണം എന്നത് വലിയ കടന്പയായി മാറും. മാത്രമല്ല, കുഞ്ഞാലിയുടെ മണ്ണിൽ 1967 ന് ശേഷം പാർട്ടി ചിഹ്നത്തിൽ വിജയിച്ച ഒരു എംഎൽഎ എന്ന സ്വപ്നത്തിനും മങ്ങലേൽക്കും. കൂടാതെ പി.വി. അൻവറിന് മുന്നിലെ പരാജയവുമായി മാറും. മുഖ്യമന്ത്രി പിണറായി വിജയൻ മൂന്ന് ദിവസം തുടർച്ചയായി നിലന്പൂരിൽ ക്യാന്പ് ചെയ്ത്തെരഞ്ഞെടുപ്പിന് നേതൃത്വം നൽകുന്നുവെന്നത് എൽഡിഎഫ് ഈ തെരഞ്ഞെടുപ്പിനെ എത്ര മാത്രം ഗൗരവമായി കാണുന്നുവെന്ന് വ്യക്തമാണ്. പി.വി. അൻവറിനാകട്ടെ ഇത് രാഷ്ട്രീയ നിലനിൽപ്പിന്‍റെ പോരാട്ടമാണ്. അതേസമയം വോട്ട് വർധനവിലൂടെ സംസ്ഥാനത്ത് ബിജെപിയുടെയും എൻഡിഎയുടെയും അടിത്തറ ശക്തമാണ് എന്ന് തെളിയിക്കേണ്ടതുമുണ്ട് സ്ഥാനാർഥി മോഹൻ ജോർജിന്. മുഖ്യമന്ത്രി പിണറായി വിജയൻ, പ്രിയങ്കാഗാന്ധി എംപി, തൃണമൂൽ കോണ്‍ഗ്രസ് എംപി യൂസഫ് പഠാൻ എന്നിവർ ഇന്ന് പ്രചാരണത്തിനിറങ്ങുന്പോ്ൾ നിലന്പൂർ മണ്ഡലത്തിൽ വീറും വാശിയും നിറയും.

സ്കൂൾ സമയമാറ്റം പിൻവലിക്കണം: ജംഇയ്യത്തുൽ മുഅല്ലിമീൻ

തിരൂർക്കാട്: മദ്രസകളിലെ പഠന സമയം നഷ്ടപ്പെടുത്തുന്ന പുതിയ സ്കൂൾ സമയ മാറ്റം പിൻവലിക്കണമെന്ന് തിരൂർക്കാട് സ്വദേശി റേഞ്ച് ജംഇയ്യത്തുൽ മുഅല്ലിമീൻ സംഗമം ആവശ്യപ്പെട്ടു. തിരൂർക്കാട് ടൗണ്‍ ജുമാമസ്ജിദിൽ ചേർന്ന യോഗം സമസ്ത മങ്കട മണ്ഡലം ജനറൽ സെക്രട്ടറി കെ. അബൂബക്കർ ഫൈസി ഉദ്ഘാടനം ചെയ്തു. ചെയർമാൻ എ.കെ. അബ്ദുൾ മജീദ് ഫൈസി അധ്യക്ഷത വഹിച്ചു. ജില്ലാ ജം ഇയ്യത്തുൽ മുഅല്ലിമീൻ ഉപാധ്യക്ഷൻ ഷമീർ ഫൈസി ഒടമല ബാഫഖി തങ്ങൾ അനുസ്മരണ പ്രഭാഷണം നടത്തി. റേഞ്ച് ജനറൽ സെക്രട്ടറി പദ്ധതി അവതരണം നടത്തി. അബ്ദുസമദ് ഫൈസി, കെ.ടി. സൽമാൻ ഫൈസി, അബ്ദുനാസിർ ദാരിമി, അബ്ദുൾ ഹമീദ് ഫൈസി, ഹസൻ അൻവരി, ശരീഫ് ഫൈസി, റഫീഖ് മുസ്ലിയാർ തുടങ്ങിയവർ സംബന്ധിച്ചു.

ഇഎംഎസിന്‍റെ പ്രതിമയിൽ ഹാരാർപ്പണം നടത്തി

പെരിന്തൽമണ്ണ:ഇഎംഎസ് നന്പൂതിരിപ്പാടിന്‍റെ ജൻമദിന ആഘോഷത്തിനോടനുബന്ധിച്ച് പെരിന്തൽമണ്ണ ഇഎംഎസ് ആശുപത്രിയിലെ അർധകായ പ്രതിമയിൽ ചെയർമാൻ ഇൻചാർജുള്ള ഡോ. വി.യു. സീതി ഹാരാർപ്പണം നടത്തി. ആശുപത്രി ജനറൽ മാനേജർ എം. അബ്ദുനാസിർ, ചീഫ് നഴ്സിംഗ് ഓഫീസർ തനലെച്ച്മി വിജയകുമാർ, എച്ച്ആർ മാനേജർ സഗീർ, ഫിനാൻസ് മാനേജർ സരസ്വതി, കെസിഇയു ജില്ലാ കമ്മിറ്റി അംഗം ജയപ്രകാശ്, കെസിഇയു ഏരിയാ കമ്മറ്റി പ്രസിഡന്‍റ് സുബോധ, ഡെപ്യൂട്ടി നഴ്സിംഗ് സൂപ്രണ്ട് ദീപ എന്നിവർ പ്രസംഗിച്ചു.

ചങ്ങന്പുഴ നോവൽ പുരസ്കാരം കെ.എസ്. ഹരിഹരന്

പെരിന്തൽമണ്ണ: ചങ്ങന്പുഴ കൃഷ്ണപിള്ള അനുസ്മരണ സമിതി ഏർപ്പെടുത്തിയ ചങ്ങന്പുഴ നോവൽ പുരസ്കാരത്തിന് എഴുത്തുകാരനും സിനിമാ പ്രവർത്തകനുമായ കടുങ്ങപുരം കെ.എസ്. ഹരിഹരൻ അർഹനായി. ’രജസ്വല’ എന്ന നോവലിനാണ് പുരസ്കാരം. 10001 രൂപയും പ്രശസ്തി പത്രവും ചങ്ങന്പുഴയുടെ ചരമ വാർഷിക ദിനമായ 17 ന് തൃശൂർ സാഹിത്യ അക്കാഡമിയിൽ നടക്കുന്ന സാഹിത്യ സംഗമത്തിൽ സമ്മാനിക്കും.

സാംസ്കാരിക പ്രവർത്തകർക്ക് നേരെ സൈബർ ആക്രമണം പ്രതിഷേധാർഹം: കെ.കെ. ശൈലജ

നിലന്പൂർ: സാംസ്കാരിക പ്രവർത്തകർക്ക് നേരെ നടക്കുന്ന സൈബർ ആക്രമണം പ്രതിഷേധാർഹമെന്ന് കെ.കെ.ശൈലജ എംഎൽഎ. നിലന്പൂരിൽ എൽഡിഎഫ് സ്ഥാനാർഥി എം. സ്വരാജിന് പിന്തുണ പ്രഖ്യാപിച്ചതിന്‍റെ പേരിലാണ് നിലന്പൂർ ആയിഷ, കെ.ആർ.മീര എന്നിവർ ഉൾപ്പെടെയുള്ള സാംസ്കാരിക പ്രവർത്തകർക്കെതിരെ സൈബർ ആക്രമണം നടക്കുന്നത്. ഇത്തരം നീചമായ നിലപാടുകളിൽ നി്ന്ന് കോണ്‍ഗ്രസ് പിൻമാറണം. തങ്ങൾക്കെതിരെ നിലപാട് സ്വീകരിക്കുന്നവരെ നിശബ്ദരാക്കുക എന്നത് സമീപകാലത്ത് കോണ്‍ഗ്രസ് സ്വീകരിച്ച വരുന്ന രീതിയാണെന്നും അവർ പറഞ്ഞു. വടകരയിൽ പ്രയോഗിച്ച അതെ നിലപാടുകളാണ് നിലന്പൂരിലും കോണ്‍ഗ്രസ് സ്വീകരിക്കുന്നത്. സാംസ്കാരിക പ്രവർത്തകർ കേരളത്തിന്‍റെ പൊതുസ്വത്താണ്. അക്കാര്യം മറക്കരുത്. ഇത്തരം പ്രചാരണങ്ങൾ നടത്തുന്നവർക്കെതിരെ കർശന നടപടി സ്വീകരിക്കണമെന്നും കെ.കെ. ശൈലജ ആവശ്യപ്പെട്ടു.

ബിജെപി മണ്ഡലം ഭാരവാഹികൾക്ക് സ്വീകരണം നൽകി

മേലാറ്റൂർ: ബിജെപി പെരിന്തൽമണ്ണ മണ്ഡലം ഭാരവാഹികൾക്ക് സ്വീകരണവും മേലാറ്റൂർ പഞ്ചായത്ത് ഭാരവാഹികളുടെ പ്രഖ്യാപനവും എടയാറ്റൂർ കാര്യാലയത്തിൽ നടത്തി. ബിജെപിയുടെ സജീവ പ്രവർത്തകനായിരുന്ന വിശ്വനാഥൻ ചെമ്മാണിയോടിന്‍റെ വിയോഗത്തിൽ യോഗം അനുശോചിച്ചു. മലപ്പുറം ഈസ്റ്റ് ജില്ലാ വൈസ് പ്രസിഡന്‍റ് കെ.പി. ഗോപിനാഥൻ സ്വീകരണ യോഗം ഉദ്ഘാടനം ചെയ്തു. എടയാറ്റൂരിലെ മുതിർന്ന പ്രവർത്തകരായ ബാലകൃഷ്ണൻ, മുരളീധരൻ, ഗോപിനാഥൻ തുടങ്ങിയവരുടെ നേതൃത്വത്തിൽ പെരിന്തൽമണ്ണ മണ്ഡലം കമ്മിറ്റി ഭാരവാഹികളെ പൊന്നാടയണിയിച്ചു സ്വീകരിച്ചു. തുടർന്ന് ബിജെപി പെരിന്തൽമണ്ണ മണ്ഡലം പ്രസിഡന്‍റ് കെ. ബാലസുബ്രഹ്മണ്യൻ മേലാറ്റൂർ പഞ്ചായത്ത് ഭാരവാഹികളുടെ പ്രഖ്യാപനം നടത്തി. പെരിന്തൽമണ്ണ മണ്ഡലം ജനറൽ സെക്രട്ടറിമാരായ കെ. രാധാകൃഷ്ണൻ അഡ്വ. സൂരജ്, സെക്രട്ടറി കെ. സജീഷ് മാരാർ, സി. സുമേഷ്, എം.എസ്. പ്രവീണ്‍, എം. ജയചന്ദ്രൻ, മേലാറ്റൂർ മണ്ഡൽ കാര്യവാഹ് എം.കെ. അനീഷ് തുടങ്ങിയവർ പ്രസംഗിച്ചു. ബിജെപി മേലാറ്റൂർ പഞ്ചായത്ത് കമ്മിറ്റി ഭാരവാഹികൾ: സി.സുമേഷ് (പ്രസിഡന്‍റ്), റിട്ടയേർഡ് കേണൽ ജലജ, എ. സുരേഷ്, (വൈസ് പ്രസിഡന്‍റ്), എം.എസ്. പ്രവീണ്‍ (ജനറൽ സെക്രട്ടറി), കെ. ചന്ദ്രശേഖരൻ, എം. ജയചന്ദ്രൻ (ജോയിന്‍റ് സെക്രട്ടറി).

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]