ADVERTISEMENT

ADVERTISEMENT

വനിതാ കമ്മീഷന്‍ അദാലത്ത് നാളെ

തിരുവല്ല: കേരള വനിതാ കമ്മീഷന്‍ സംഘടിപ്പിക്കുന്ന ജില്ലാതല അദാലത്ത് നാളെ നടക്കും. തിരുവല്ല മാമന്‍ മത്തായി ഹാളില്‍ രാവിലെ 10ന് ആരംഭിക്കുന്ന അദാലത്തില്‍ പുതിയ പരാതികളും സ്വീകരിക്കും.

ADVERTISEMENT

സ്കൂൾ ഹ്യൂമൻ ലൈബ്രറി ഉദ്ഘാടനം ചെയ്തു

ഇരവിപേരൂർ: ഒഇഎം പബ്ലിക് സ്കൂളിൽ പ്രഥമ സ്കൂൾ ഹ്യൂമൻ ലൈബ്രറി വൈഎംസിഎ കേരള റീജിയൻ വൈസ് ചെയർമാനും ഇൻഫ്ളുവൻസറുമായ കുര്യൻ തുമ്പുങ്കൽ ഉദ്ഘാടനം ചെയ്തു. വ്യക്തികൾ പുസ്തകങ്ങളായി മാറുന്ന ഈ നൂതന സംരംഭത്തിൽ പങ്കെടുത്ത് അവയവദാനത്തിന്‍റെ മാഹാത്മ്യവും പ്രതിസന്ധികളിൽ തളരാതെ മുന്നേറുന്നതിന്‍റെ ആവശ്യകതയും സ്വന്തം അനുഭവത്തിന്‍റെ വെളിച്ചത്തിൽ അദ്ദേഹം കുട്ടികളുമായിപങ്കുവച്ചു.‌ അക്കാദമിക് ഡയറക്ടർ ഡോ. റൂബിൾ രാജ് അധ്യക്ഷത വഹിച്ചു. അഡ്മിനിസ്ട്രേറ്റീവ് മാനേജർ രഹന രഞ്ജിത്ത്, സീനിയർ വൈസ് പ്രിൻസിപ്പൽ അജമോൻ ജോസഫ് എന്നിവർ പ്രസംഗിച്ചു.

ലഹരി വിരുദ്ധ കാന്പസ് പ്രചാരണത്തിനു തുടക്കമായി

തിരുവല്ല : വൈഎംസിഎ സബ് റീജിയന്‍റെ നേതൃത്വത്തിൽ ലഹരി വിരുദ്ധ കാമ്പസ് പ്രചാരണ പദ്ധതിക്ക് തുടക്കമായി. പദ്ധതിയുടെ ഭാഗമായി വിവിധ വിദ്യാഭ്യാസ സ്ഥാപനങ്ങളിൽ സെമിനാറുകൾ, ബോധവത്കരണ നോട്ടീസുകൾ, കായിക മത്സരങ്ങൾ എന്നിവ സംഘടിപ്പിക്കും. കലാലയങ്ങളിൽ പോസ്റ്ററുകൾ പതിക്കുകയും കുട്ടികൾക്ക് ബുക്കിൽ ഒട്ടിക്കുന്നതിനായി ലഹരി വിരുദ്ധ സന്ദേശ സ്റ്റിക്കറുകൾ നൽകുകയും ചെയ്യും. പദ്ധതിയുടെ ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. സബ് റീജിയൻ ചെയർമാൻ ജോജി പി. തോമസ് അധ്യക്ഷത വഹിച്ചു. സംസ്ഥാന യൂത്ത് വർക്ക് ചെയർമാൻ ലിനോജ് ചാക്കോ, മുൻ ജില്ലാ പഞ്ചായത്തംഗം സജി അലക്സ്, മുൻ സബ് - റീജിയണൽ ചെയർമാൻമാരായ വർഗീസ് ടി.മങ്ങാട്, ജൂബിൻ ജോൺ, ജോ ഇലഞ്ഞിമൂട്ടിൽ, ജനറൽ കൺവീനർ സുനിൽ മറ്റത്ത്, വൈസ് ചെയർമാൻ നിതിൻ വർക്കി ഏബ്രഹാം, പ്രോഗ്രാം കൺവീനർ സജി മാമ്പ്രക്കുഴി, കുര്യൻ ചെറിയാൻ, ജോയ് ആറ്റുമാലി, ജോസ് പി. മാത്യു എന്നിവർ പ്രസംഗിച്ചു.

ബംഗളുരുവില്‍ നിന്നെത്തിച്ച എംഡിഎംഎയുമായി യുവാവ് പിടിയില്‍

പത്തനംതിട്ട: ബംഗളുരുവില്‍ നിന്നു ബസില്‍ കൊണ്ടുവന്ന എംഡിഎംഎയുമായി യുവാവിനെ ഡാന്‍സാഫ് സംഘവും പന്തളം പോലീസും ചേര്‍ന്ന് പിടികൂടി. പന്തളം തുമ്പമണ്‍ മുട്ടം വടക്കടത്ത് മണ്ണില്‍ വീട്ടില്‍ ബ്രില്ലി മാത്യുവാണ് (40) അറസ്റ്റിലായത്. കുളനട ഇന്ത്യന്‍ ഓയില്‍ പമ്പിന്‍റെ മുന്നില്‍, തിരുവല്ല ഭാഗത്തുനിന്നു ബസില്‍ വന്നിറങ്ങിയപ്പോഴാണ് പിടിയിലായത്. പ്രതിയില്‍ നിന്നു 36.55 ഗ്രാം എംഡിഎംഎ പിടിച്ചെടുത്തു. എട്ട് ചെറിയ സിറിഞ്ചുകള്‍ ഉള്‍പ്പെടെയുള്ള വസ്തുക്കളും പ്രതിയില്‍നിന്നു പോലീസ് കണ്ടെടുത്തു. ഇന്നലെ ഉച്ചകഴിഞ്ഞ് 2.35 നാണ് ഇയാളെ ഡാന്‍സാഫ് സംഘവും പന്തളം പോലീസും പിടികൂടിയത്. പ്ലാസ്റ്റിക് കവറില്‍ പൊതിഞ്ഞ്, കൈവശമുണ്ടായിരുന്ന ബാഗിന്‍റെ അറയ്ക്കുള്ളില്‍ സൂക്ഷിച്ച നിലയിലാണ് എംഡിഎംഎ കണ്ടെത്തിയത്. സ്‌കൂള്‍ കോളജ് വിദ്യാര്‍ഥികള്‍ക്കും യുവാക്കള്‍ക്കുമായി രാസലഹരി സംസ്ഥാനത്തിനു പുറത്തുനിന്നു എത്തിക്കുന്നതായ സംശയിച്ചതിനേ തുടര്‍ന്ന് ഇയാള്‍ ഡാന്‍സാഫിന്‍റെ നിരീക്ഷണത്തിലായിരുന്നു. ബംഗളൂരുവില്‍നിന്നെത്തിച്ച എംഡിഎംഎ ആലപ്പുഴ, പത്തനംതിട്ട ജില്ലകളില്‍ ആവശ്യക്കാര്‍ക്ക് വിതരണം ചെയ്യുന്നതിന് ഉദ്ദേശിച്ചു കൊണ്ടുവന്നതാണെന്ന് അന്വേഷണത്തില്‍ വെളിവായി. ഉറവിടം സംബന്ധിച്ചു വിശദമായ അന്വേഷണം നടക്കുകയാണെന്ന് പോലീസ് അറിയിച്ചു. ജില്ലാ പോലീസ് മേധാവിക്ക് ലഭിച്ച രഹസ്യവിവരം കൈമാറിയതിനെ തുടര്‍ന്ന്, അടൂര്‍ ഡിവൈഎസ്പി ജി സന്തോഷ് കുമാറിന്‍റെ നിര്‍ദേശപ്രകാരം, പന്തളം പോലീസ് ഇന്‍സ്പെക്ടര്‍ ടി. ഡി. പ്രജീഷിന്‍റെ മേൽനോട്ടത്തിലാണ് സംയുക്ത പരിശോധന നടന്നത്. പന്തളം പോലീസ് സ്റ്റേഷനിലെ എസ്‌ഐ സി. വി. വിനോദ് കുമാർ, സിപിഒമാരായ നിയാസ്, അര്‍ച്ചിത് എന്നിവരാണ് സംഘത്തില്‍ ഉണ്ടായിരുന്നത്. പന്തളം പോലീസ് തുടര്‍നടപടികള്‍ സ്വീകരിച്ചു.

മാലിന്യമുക്ത നവകേരളം പ്രവര്‍ത്തനം മാതൃകാപരം: മന്ത്രി

പുളിക്കീഴ്: മാലിന്യമുക്ത നവകേരളം യാഥാർഥ്യമാക്കാനുള്ള സംസ്ഥാനത്തിന്‍റെ പ്രവര്‍ത്തനം മാതൃകാപരമാണെന്ന് മന്ത്രി റോഷി അഗസ്റ്റിൻ. പുളിക്കീഴ് ബ്ലോക്ക് പഞ്ചായത്തില്‍ ബ്ലോക്ക്തല റിസോഴ്സ് റിക്കവറി ഫെസിലിറ്റി സെന്‍റര്‍ നിര്‍മാണോദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. മാലിന്യത്തില്‍ നിന്ന് ഊര്‍ജോത്പാദനം, വളനിര്‍മാണം തുടങ്ങിയവയിലൂടെ മാറ്റം കൊണ്ടു വരാനാകും. ഹരിതകര്‍മ സേനയുടെ പ്രവര്‍ത്തനം ശ്രദ്ധേയമാണ്. വീടും പരിസരവും വൃത്തിയാക്കുന്നതുപോലെ പൊതുഇടവും സൂക്ഷിക്കണമെന്ന ബോധവത്കരണം ഉണ്ടാകണം. ജലജീവന്‍ മിഷന്‍റെ പ്രവര്‍ത്തനത്തിലൂടെ 44 ലക്ഷം ഗ്രാമീണ കുടുംബങ്ങള്‍ക്ക് കുടിവെള്ളം എത്തിച്ചു. ശേഷിക്കുന്നവര്‍ക്കും കുടിവെള്ളം ലഭ്യമാക്കും. പുളിക്കീഴ് കോലറയാറിന്‍റെ തുടര്‍സംരക്ഷണം സംബന്ധിച്ച് പഠനം നടത്താന്‍ വകുപ്പിന് നിര്‍ദ്ദേശം നല്‍കുമെന്നും മന്ത്രി പറഞ്ഞു. മാത്യു ടി. തോമസ് എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് സോമന്‍ താമരച്ചാലില്‍ പദ്ധതി വിശദീകരണം നടത്തി. ബ്ലോക്ക് പഞ്ചായത്ത് പരിധിയിലുള്ള അഞ്ച് ഗ്രാമപഞ്ചായത്തുകളില്‍ നിന്നും ഹരിതകര്‍മ സേന അംഗങ്ങള്‍ ശേഖരിക്കുന്ന അജൈവ മാലിന്യങ്ങളും പ്ലാസ്റ്റിക് പാഴ്വസ്തുക്കളും ബ്ലോക്ക് തലത്തില്‍ തരം തിരിച്ച് ബെയിലിംഗ് നടത്തി ക്ലീന്‍ കേരള കമ്പനിക്ക് നല്‍കുന്നതിനാണ് ബ്ലോക്ക് തലത്തില്‍ ആര്‍ആര്‍എഫ് സ്ഥാപിക്കുന്നത്. പുളിക്കീഴ് ബ്ലോക്ക് പഞ്ചായത്ത് പ്രസിഡന്‍റ് സി. കെ. അനു, ഗ്രാമപഞ്ചായത്ത് പ്രസിഡന്‍റുമാരായ നിഷ അശോകന്‍, റ്റി. പ്രസന്നകുമാരി, അന്നമ്മ ജോര്‍ജ്, അനുരാധ സുരേഷ്, ഏബ്രഹാം തോമസ്, ജില്ലാ പഞ്ചായത്ത് അംഗം മായ അനില്‍കുമാര്‍, ബ്ലോക്ക് പഞ്ചായത്ത് സ്ഥിരം സമിതി അംഗങ്ങളായ മറിയാമ്മ ഏബ്രഹാം, എം.ബി. അനീഷ് തുടങ്ങിയവര്‍ പങ്കെടുത്തു.

തദ്ദേശതെരഞ്ഞെടുപ്പ്: വോട്ടര്‍ ബോധവത്കരണത്തിനായി ലീപ് കേരള

പത്തനംതിട്ട: തദ്ദേശപൊതു തെരഞ്ഞെടുപ്പിനായി വോട്ടര്‍പട്ടികയില്‍ പേരു ചേര്‍ക്കുന്നതുള്‍പ്പെടെയുള്ള തെരഞ്ഞെടുപ്പ് പ്രക്രിയകളെ കുറിച്ചുള്ള ബോധവത്കരണവുമായി സംസ്ഥാന തെരഞ്ഞെടുപ്പ് കമ്മീഷൻ. വോട്ടര്‍മാര്‍ക്കും രാഷ്‌ട്രീയപാര്‍ട്ടി പ്രതിനിധികള്‍ക്കും തെരഞ്ഞെടുപ്പ് ഉദ്യോഗസ്ഥര്‍ക്കും വോട്ടര്‍പട്ടിക പുതുക്കലുള്‍പ്പെടെയുള്ള തദ്ദേശ തെരഞ്ഞെടുപ്പു പ്രക്രിയകളില്‍ അവബോധമുണ്ടാക്കുകയാണ് ലീപ് കേരളയിലൂടെ ലക്ഷ്യമിടുന്നത്. ആദ്യമായാണ് സംസ്ഥാന തെരഞ്ഞെടുപ്പ് കമ്മീഷന്‍ വോട്ടര്‍ ബോധവത്കരണത്തിനായി പ്രത്യേക പ്രചാരണപരിപാടി സംഘടിപ്പിക്കുന്നത്. ഇതിനായി ജില്ലാ കളക്ടര്‍ അധ്യക്ഷനായി ജില്ലാതല സമിതി രൂപീകരിച്ചു. ഇലക്‌ഷന്‍ ഡെപ്യൂട്ടി കളക്ടർ, ജില്ലാ ഇന്‍ഫര്‍മേഷന്‍ ഓഫീസര്‍ എന്നിവര്‍ അംഗങ്ങളായ കമ്മിറ്റിയുടെ കണ്‍വീനര്‍ തദ്ദേശവകുപ്പ് ജില്ലാ ജോയിന്‍റ് ഡയറക്ടറാണ്. കോളജ് വിദ്യാര്‍ഥികൾ, യുവജനങ്ങള്‍ എന്നിവരെ പരമാവധി വോട്ടര്‍പട്ടികയില്‍ ചേര്‍ക്കുകയാണ് ലീപ് കേരളയുടെ ഉദ്ദേശ്യം. ലീപ് കേരളയുടെ ഭാഗമായി ജില്ലാ ഇന്‍ഫര്‍മേഷന്‍ ഓഫീസര്‍മാര്‍ക്കും മാധ്യമപ്രവര്‍ത്തകര്‍ക്കുമായി ഏകദിന ശില്പശാല സംസ്ഥാന തെരഞ്ഞെടുപ്പ് കമ്മീഷന്‍ ആസ്ഥാനത്ത് നടന്നു . അര്‍ഹരായ മുഴുവന്‍ പേരെയും വോട്ടര്‍പട്ടികയില്‍ ഉള്‍പ്പെടുത്തുക, വോട്ടര്‍പട്ടികയില്‍ ഉള്‍പ്പെട്ട മുഴുവന്‍പേരും വോട്ടു ചെയ്യുക എന്നതാണ് കമ്മീഷന്‍റെ ലക്ഷ്യം. ‘വോട്ടിനായി പേരു ചേര്‍ത്തിടാം, നാടിനായി വോട്ടു ചെയ്തിടാം’ എന്നതാണ് ലീപ് കേരളയുടെ മുദ്രാവാക്യം. ലീപ് കേരള പ്രചാരണ പരിപാടിക്കായി ആകര്‍ഷകമായ ലോഗോയും പ്രസിദ്ധീകരിച്ചു.

കോന്നി മെഡിക്കല്‍ കോളജിലേത് സ്വകാര്യ ആശുപത്രികളെ വെല്ലുന്ന സൗകര്യം: മന്ത്രി

കോന്നി: സ്വകാര്യ ആശുപത്രികളെ വെല്ലുന്ന സൗകര്യമാണ് കോന്നി മെഡിക്കല്‍ കോളജില്‍ ക്രമീകരിച്ചിരിക്കുന്നതെന്ന് മന്ത്രി വീണാ ജോര്‍ജ്. കോന്നി മെഡിക്കല്‍ കോളജിലെ പുതിയ ലേബര്‍ റൂം, ഓപ്പറേഷന്‍ തിയറ്റർ, എച്ച്എല്‍എല്‍ ഫാര്‍മസി എന്നിവ ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. ലക്ഷ്യനിലവാരത്തില്‍ മൂന്നര കോടി രൂപ ചെലവഴിച്ചാണ് ലേബര്‍ റൂമും ഓപ്പറേഷന്‍ തിയറ്ററും നിര്‍മിച്ചത്. 27,922 ചതുരശ്ര അടി വിസ്തീര്‍ണത്തിലാണ് ലേബര്‍ റൂം. ഒപി, അള്‍ട്രാ സൗണ്ട് സ്‌കാനിംഗ് റൂം, ട്രയേജ് ഏരിയ, ഗൈനക് മോഡുലാര്‍ ഓപ്പറേഷന്‍ തിയറ്റർ, മൈനര്‍ ഓപ്പറേഷന്‍ തിയറ്റർ, സെപ്റ്റിക് മോഡുലാര്‍ ഓപ്പറേഷന്‍ തിയറ്റർ, രണ്ട് എല്‍ഡിആര്‍ സ്യൂട്ടുകൾ, പ്രസവത്തിനായി എത്തുന്നവരുടെ ആദ്യ, രണ്ടാം, മൂന്നാം ഘട്ട ചികിത്സയ്ക്കുള്ള സൗകര്യം, റിക്കവറി റൂമുകൾ, വാര്‍ഡുകള്‍, ഡെമോ റൂം, എച്ച്ഡിയു, ഐസിയു, ഐസൊലേഷന്‍ യൂണിറ്റുകള്‍ എന്നിവയുണ്ട്. നിലവില്‍ 300 കുട്ടികള്‍ പഠിക്കുന്നുണ്ട്. പിജി കോഴ്‌സ് തുടങ്ങാനുള്ള നടപടി പുരോഗമിക്കുകയാണെന്ന് മന്ത്രി പറഞ്ഞു. കെ. യു. ജനീഷ് കുമാര്‍ എംഎല്‍എ അധ്യക്ഷത വഹിച്ചു. മെഡിക്കല്‍ എഡ്യുക്കേഷന്‍ ഡയറക്ടര്‍ ഇന്‍ ചാര്‍ജ് ഡോ. കെ. വി. വിശ്വനാഥൻ, കോന്നി മെഡിക്കല്‍ കോളജ് പ്രിന്‍സിപ്പല്‍ ഡോ. ആര്‍.എസ്.നിഷ, സൂപ്രണ്ട് ഡോ.എ. ഷാജി തുടങ്ങിയവർ പ്രസംഗിച്ചു.

ദൗത്യ നിര്‍വഹണത്തില്‍ അല്മായ പങ്കാളിത്തം ഉറപ്പാക്കണം: മാര്‍ത്തോമ്മ മെത്രാപ്പോലീത്ത

തിരുവല്ല: നിഖ്യാ വിശ്വാസപ്രമാണത്തിന്‍റെ 1700-ാം വാര്‍ഷികം ആഘോഷിക്കുമ്പോള്‍ സമൂഹത്തില്‍ തുല്യതയും സമത്വവും പാരസ്പരികതയും വൈവിധ്യവും കൈവരിക്കാനുള്ള ദര്‍ശനം വിശ്വാസജീവിതത്തിലൂടെ ലോകത്തിന് മുമ്പാകെ സാക്ഷ്യപ്പെടുത്തണമെന്ന് ഡോ. തിയഡോഷ്യസ് മാര്‍ത്തോമ്മ മെത്രാപ്പോലീത്ത. കാവുംഭാഗം എബനേസര്‍ മാര്‍ത്തോമ്മ പള്ളിയില്‍ മാര്‍ത്തോമ്മ സുറിയാനി സഭ നിരണം -മാരാമണ്‍ ഭദ്രാസന അസംബ്ലി യോഗത്തില്‍ അധ്യക്ഷത വഹിച്ചു പ്രസംഗിക്കുകയായിരുന്നു അദ്ദേഹം. കാലഘട്ടത്തിന്‍റെ വെല്ലുവിളികളില്‍ പരാജിതരാകാതെ വെല്ലുവിളികളെ സാധ്യതകളാക്കി മാറ്റുവാന്‍ സാധിക്കണമെന്നും ക്രിസ്തുഭാവം നമ്മുടെ പ്രവര്‍ത്തനങ്ങളെ അടയാളപ്പെടുത്തണമെന്നും മെത്രാപ്പോലീത്താ പറഞ്ഞു. ഫ്രാന്‍സിസ് മാര്‍പാപ്പ, ശ്രേഷ്ഠ ബസേലിയോസ് തോമസ് പ്രഥമന്‍ ബാവ, മാര്‍ അപ്രേം മെത്രാപ്പോലീത്ത, മുന്‍ മുഖ്യമന്ത്രി വി. എസ്. അച്യുതാനന്ദൻ, വൈദികര്‍, അല്മായ നേതാക്കള്‍ തുടങ്ങിയവരുടെ ദേഹവിയോഗത്തില്‍ യോഗം അനുശോചിച്ചു. റവ. ഡോ. ഏബ്രഹാം മാത്യു ധ്യാനപ്രസംഗം നടത്തി. ഭദ്രാസനത്തിന്‍റെ 2024 ഏപ്രില്‍ ഒന്നു മുതല്‍ 2025 മാര്‍ച്ച് 31 വരെയുള്ള പ്രവര്‍ത്തന റിപ്പോര്‍ട്ട്, വരവ് - ചെലവ് കണക്ക് എന്നിവ ഭദ്രാസന സെക്രട്ടറി റവ. മാത്യൂസ് എ. മാത്യു അവതരിപ്പിച്ചു. ഭദ്രാസന ട്രഷറര്‍ അനീഷ് കുന്നപ്പുഴ 2025-26 ലേക്കുള്ള ബജറ്റ് അവതരിപ്പിച്ചു . റവ. മാത്യു ജോൺ, സഭാ സെക്രട്ടറി റവ. എബി റ്റി. മാമ്മൻ, ഭദ്രാസന സെക്രട്ടറി റവ. മാത്യൂസ് എ. മാത്യു, ട്രഷറാര്‍ അനീഷ് കുന്നപ്പുഴ, മാര്‍ത്തോമ്മ മെത്രാപ്പോലിത്തന്‍ സെക്രട്ടറി റവ. കെ. ഇ. ഗീവറുഗീസ്, ഭദ്രാസനകൗണ്‍സില്‍ അംഗങ്ങളായ ലിനോജ് ചാക്കോ, ബിനു ജോണ്‍, സി. തോമസ്, ഇടവക വികാരി റവ. മാത്യു കെ. ജാക്‌സൺ, എന്നിവര്‍ പ്രസംഗിച്ചു. ഭദ്രാസനത്തിലെ മികച്ച സണ്‍ഡേസ്‌കൂളായി തെരഞ്ഞെടുക്കപ്പെട്ട തിരുവല്ല സെന്‍റ് തോമസ് മാര്‍ത്തോമ്മാ സണ്‍ഡേ സ്‌കൂളിന് മാര്‍ത്തോമ്മ മെത്രാപ്പോലീത്ത ട്രോഫി സമ്മാനിച്ചു. വിവിധ ഇടവകകള്‍ക്കും സെന്‍ററിനുമുള്ള സര്‍ട്ടിഫിക്കറ്റുകള്‍ വിതരണം ചെയ്തു.

ബിലീവേഴ്സ് ആശുപത്രിയിൽ ശ്വാസകോശം മാറ്റിവയ്ക്കൽ ശസ്ത്രക്രിയ പ്രാരംഭ പ്രവർത്തനങ്ങൾക്ക് തുടക്കമായി

തിരുവല്ല : ഇന്ത്യയിൽ ഏറ്റവും അധികം ശ്വാസകോശം മാറ്റിവ‍യ്ക്കൽ ശസ്ത്രക്രിയ നടത്തുന്ന ആശുപത്രികളിൽ ഒന്നായ ഹൈദരാബാദ് യശോദ ആശുപത്രിയുമായി സഹകരിച്ച് ബിലീവേഴ്സ് ചർച്ച് മെഡിക്കൽ കോളജ് ആശുപത്രിയുടെ പൾമണോളജി വിഭാഗം ആരംഭിക്കുന്ന ശ്വാസകോശം മാറ്റിവയ്ക്കൽ ശസ്ത്രക്രിയ സംവിധാനത്തിന്‍റെ പ്രാരംഭ പ്രവർത്തനങ്ങൾ ഉദ്ഘാടനം ചെയ്തു. ബിലീവേഴ്സ് ആശുപത്രി ഡയറക്ടറും സിഇഒയുമായ ഡോ.ജോർജ് ചാണ്ടി മറ്റീത്ര അധ്യക്ഷത വഹിച്ചു. യശോദ ആശുപത്രി സിഇഒ ഡോ.ജി.വിജയ്കുമാർ സംവിധാനത്തിന്‍റെ ഉദ്ഘാടനം നിർവഹിച്ചു. പൾമണോളജി വിഭാഗം മേധാവി ഡോ. ലൂക്ക് മാത്യു, ഡോ.കെ.ആർ. ബാലസുബ്രഹ്മണ്യം, ഡോ. ജോൺ വല്യത്ത്, ഡോ. അനന്തു ജോസഫ്, റവ.തോമസ് വർഗീസ് തുടങ്ങിയവർ പ്രസംഗിച്ചു.

സാമൂഹിക വനവത്കരണം ഉപേക്ഷിച്ചു; ഇനി വിദ്യാവനം, നഗരവനം പദ്ധതികള്‍

പത്തനംതിട്ട: പതിറ്റാണ്ടുകള്‍ നീണ്ട സാമൂഹിക വനവത്കരണം വനംവകുപ്പ് ഉപേക്ഷിച്ചു.. പദ്ധതിമൂലം സാമ്പത്തിക പ്രതിസന്ധിയിലായ വനംവകുപ്പ് പദ്ധതി മൂടോടെ പിഴുതെറിയുമെന്നാണ് സൂചന. പകരം വിദ്യാവനം, നഗരവനം പദ്ധതികള്‍ കേന്ദ്രസഹായം പ്രയോജനപ്പെടുത്തി നടപ്പാക്കുകയാണ് ലക്ഷ്യം. ലോക ബാങ്കിന്‍റെ ധനസഹായത്തോടെ തുടങ്ങിയ സാമൂഹിക വനവത്കരണ പദ്ധതിക്കായി യാതൊരു പഠനവും നടത്താതെ അക്കേഷ്യ, അല്‍ബീസിയ തുടങ്ങിയ വിദേശ വൃക്ഷങ്ങള്‍ കേരളം മുഴുവന്‍ നട്ടുവളര്‍ത്തുകയാണ് വനംവകുപ്പ് ചെയ്തത്. ഇതോടെ നാട്ടിലും കാട്ടിലും ഫലവൃക്ഷങ്ങള്‍ ഇല്ലാതായ സ്ഥിതിയായി. ലോകബാങ്ക് സഹായം അവസാനിച്ചതോടെ സംസ്ഥാന സര്‍ക്കാരിനുമേല്‍ പദ്ധതി അമിത ഭാരമായി. യാതൊരു ഫലവും ഇല്ലാതെ ഓരോ വര്‍ഷവും സംസ്ഥാനത്ത് നട്ടുവരുന്ന ലക്ഷണക്കിന് തൈകളില്‍ 20 ശതമാനം പോലും സംരക്ഷിക്കാന്‍ കഴിയില്ലെന്ന് വ്യക്തമായതോടെയാണ് പദ്ധതി ഉപേക്ഷിക്കാന്‍ അധികൃതര്‍ തയാറായത്. വിതരണം ചെയ്ത തൈകള്‍ ഏറെയും പാഴ്മരങ്ങളായിരുന്നു. ഇവ സംരക്ഷിച്ചു നിര്‍ത്തിയാല്‍ പ്രയോജനമില്ലെന്നു കണ്ടതോടെ കര്‍ഷകര്‍ അതുവെട്ടിമാറ്റാനും നിര്‍ബന്ധിതരായി. അക്കേഷ്യ, അല്‍ബീസിയ മരങ്ങള്‍ കഴിഞ്ഞ വര്‍ഷങ്ങളില്‍ നല്‍കിയില്ല. ആത്ത, പേര, അമ്പഴം, മാവ് തുടങ്ങിയവ നല്‍കിയെങ്കിലും കൂടുതല്‍ ലാഭകരമായ വിദേശ ഇനം പഴവര്‍ഗങ്ങള്‍ വിളയുന്ന മരങ്ങളോടാണ് ആളുകള്‍ താത്പര്യം കാട്ടുന്നത്. പത്തനംതിട്ടയെ മാതൃകയാക്കി സംസ്ഥാനത്ത് സാമൂഹിക വനവത്കരണം വന്‍ നേട്ടമാണെന്നും ഇക്കാര്യത്തില്‍ പത്തനംതിട്ട ജില്ല മാതൃകയാണെന്നുമായിരുന്നു വനംവകുപ്പ് കഴിഞ്ഞവര്‍ഷംവരെയും അവകാശപ്പെട്ടുവന്നത്. പത്തനംതിട്ടയില്‍ ഫലവൃക്ഷത്തൈകളാണ് കൂടുതലായി വിതരണം ചെയ്തത്. ഇവയില്‍ 82.68 ശതമാനവും സംരക്ഷിക്കപ്പെട്ടുവെന്നും പത്തനംതിട്ടയുടെ ഈ രീതി രാജ്യത്തിന് മാതൃകയാണെന്ന് വനംവകുപ്പിന്‍റെ സാമൂഹിക വനവത്കരണ പദ്ധതിയുടെ റിപ്പോര്‍ട്ട് പറയുന്നു, 51.12 ശതമാനം തൈകള്‍ സംരക്ഷിച്ച തൃശൂരിനാണ് രണ്ടാം സ്ഥാനം നല്‍കിയിരിക്കുന്നത്. 54.60 ശതമാനം സംരക്ഷണം രേഖപ്പെടുത്തിയ കൊല്ലം ജില്ല മൂന്നാമതായി. എന്നാല്‍ വനംവകുപ്പിന്‍റെ അവകാശവാദങ്ങള്‍ പൊള്ളയാണെന്നും സാമൂഹിക വനവത്കരണത്തിലൂടെ നല്‍കിയ തൈകളില്‍ പത്തു ശതമാനം പോലും സംരക്ഷിക്കപ്പെട്ടിട്ടില്ലെന്നും പറയുന്നു. റബര്‍ മരങ്ങള്‍ വെട്ടിമാറ്റിയ സ്ഥാനത്ത് ഈ ജില്ലകളില്‍ പലയിടത്തും ഫലവൃക്ഷത്തൈകള്‍ നട്ടുപിടിപ്പിച്ചിട്ടുള്ളത് ചൂണ്ടിക്കാട്ടിയാണ് സാമൂഹിക വനവത്കരണത്തിന്‍റെ നേട്ടമായി വിലയിരുത്തുന്നത്. വനവത്കരണം പറഞ്ഞു വൈദ്യുതി കമ്പികള്‍ക്ക് താഴെയും റോഡരികിലും നട്ടുവളര്‍ത്തിയ തൈകള്‍ പിഴുതു വീഴുകയോ വെട്ടിമാറ്റുകയോ ചെയ്തിട്ടുണ്ട്. ചിലയിടങ്ങളില്‍ സംരക്ഷണ വേലികള്‍ മാത്രം അവശേഷിച്ചു. വൃക്ഷത്തൈ വിതരണം വെട്ടിക്കുറച്ചു വൃക്ഷത്തൈ വിതരണത്തില്‍ നിന്നു ഘട്ടംഘട്ടമായി പിന്‍വാങ്ങാനാണ് വനംവകുപ്പ് തീരുമാനം. ഇത്തവണ പരിസ്ഥിതിദിനത്തില്‍ വളരെക്കുറച്ചു തൈകള്‍ മാത്രമേ വനംവകുപ്പ് നേരിട്ടു വിതരണം ചെയ്തുള്ളൂ. മുന്‍ വര്‍ഷങ്ങളില്‍ ഓരോ പരിസ്ഥിതിദിനത്തിലും ആറ് ലക്ഷം തൈകളാണ് ഉത്പാദിപ്പിച്ച് വിതരണം ചെയ്തിരുന്നത്. ഇനിയത് ഒരു ലക്ഷമാക്കും. വൈകാതെ മുപ്പതിനായിരമാക്കി ചുരുക്കും. തൈ ഉത്പാദനം, സംരക്ഷണം, വിതരണം എന്നിവയുടെ പേരില്‍ വന്‍തോതില്‍ പണം ചെലവഴിക്കുകയും ഇതിന്‍റെ പ്രയോജനം ഇല്ലാതെവരികയും ചെയ്യുന്ന സാഹചര്യത്തിലാണ് പദ്ധതിയില്‍ നിന്നും ഘട്ടംഘട്ടമായി പിന്‍വാങ്ങാനുള്ള തീരുമാനമെത്തിയത്. പകരം വിദ്യാലയങ്ങള്‍ കേന്ദ്രീകരിച്ച് വിദ്യാവനം പദ്ധതിക്കും നഗരപ്രദേശത്ത് തദ്ദേശസ്ഥാപനവുമായി ചേര്‍ന്ന് നഗരവനം പദ്ധതിക്കും തുടക്കമിടും. വിദ്യാലയങ്ങളില്‍ 15 സെന്‍റില്‍ മിയാവാക്കി രൂപത്തില്‍ മിനിയേച്ചര്‍ ഫോറസറ്റ് സൃഷ്ടിക്കാനാണ് വിദ്യാവനം പദ്ധതി ലക്ഷ്യമിടുന്നത്. മുനിസിപ്പാലിറ്റി, കോര്‍പറേഷന്‍ പ്രദേശത്ത് നടപ്പാക്കുന്നതാണ് നഗരവനം പദ്ധതി. ജില്ലയില്‍ രണ്ട് വിദ്യാവനവും ഒരു നഗരവനം പദ്ധതിയുമാണ് സാമൂഹിക വനവത്കരണത്തിന്‍റെ ഭാഗമായി നടപ്പാക്കുന്നത്. ഇതിനൊപ്പം പഞ്ചായത്തുകളില്‍ തൊഴിലുറപ്പുപദ്ധതിയുമായി ചേര്‍ന്നുകൊണ്ട് വൃക്ഷ സംയോജന പദ്ധതിയും നടപ്പാക്കാന്‍ ആലോചിക്കുന്നുണ്ട്.

സ്‌കൂളുകളില്‍ കെഎസ്ഇബി പരിശോധന പൂര്‍ത്തിയാക്കണമെന്ന്

പത്തനംതിട്ട: സ്‌കൂളുകളില്‍ കെഎസ്ഇബി സുരക്ഷാ പരിശോധന അടിയന്തരമായി പൂര്‍ത്തിയാക്കണമെന്ന് മാത്യു ടി തോമസ് എംഎല്‍എ. ജില്ലാ വികസനസമിതി യോഗത്തിലാണ് എംഎല്‍എയുടെ നിര്‍ദേശം. സ്‌കൂള്‍ പരിസരത്ത് അപകടാവസ്ഥയിലുള്ള വൈദ്യുത പോസ്റ്റ്, ലൈന്‍ എന്നിവയില്ലെന്ന് ഉറപ്പാക്കണം. പെരിങ്ങര പഞ്ചായത്തിലെ മൂന്നൊന്നില്‍പടി തോട്ടിലെ സര്‍വേ നടപടി പൂര്‍ത്തിയാക്കണം. തിരുവല്ല ബൈപാസിലെ തെരുവ് വിളക്കുകള്‍ പ്രവര്‍ത്തനക്ഷമമാണെന്ന് ഉറപ്പാക്കണമെന്നും എംഎല്‍എ പറഞ്ഞു. അപകടാവസ്ഥയിലുള്ള മരങ്ങള്‍ മുറിച്ച് മാറ്റുന്നതിന് വകുപ്പുകള്‍ കൃത്യമായ നടപടി സ്വീകരിക്കണമെന്ന് ഡെപ്യൂട്ടി സ്പീക്കര്‍ ചിറ്റയം ഗോപകുമാറിന്‍റെ പ്രതിനിധി ഡി. സജി പറഞ്ഞു. പള്ളിക്കൽ, ചായലോട് പ്രദേശത്തെ ഗതാഗത പ്രശ്നം പരിഹരിക്കെണമെന്നും നിര്‍ദേശിച്ചു. തെങ്ങമം - കൊല്ലായിക്കല്‍ പാലത്തിന് സമീപമുള്ള റോഡിലെ ട്രാന്‍സ്ഫോര്‍മറിനു് ചുറ്റുമുള്ള വെള്ളക്കെട്ട് പരിഹരിച്ച് അപകടാവസ്ഥ ഒഴിവാക്കണമെന്ന് ആന്‍റോ ആന്‍റണി എംപിയുടെ പ്രതിനിധി തോപ്പില്‍ ഗോപകുമാര്‍ പറഞ്ഞു. ജില്ലയില്‍ ഫിറ്റ്നെസ് ഇല്ലാതെ ഒരു സ്‌കൂളും പ്രവര്‍ത്തിക്കുന്നില്ലെന്ന് അധ്യക്ഷനായ ജില്ലാ കളക്ടര്‍ എസ്. പ്രേംകൃഷ്ണന്‍ പറഞ്ഞു. ജില്ലാ പഞ്ചായത്തിന്‍റെ പരിധിയില്‍ ചില സ്‌കൂളുകളില്‍ കാലപ്പഴക്കമുള്ള ഉപയോഗശൂന്യമായ കെട്ടിടങ്ങളുണ്ട്. അവ അടിയന്തരമായി പൊളിച്ച് നീക്കുന്നതിന് ജില്ലാ പഞ്ചയാത്ത് സെക്രട്ടറി, ജില്ലാ വിദ്യാഭ്യാസ ഉപഡയറക്ടര്‍ എന്നിവരെ ചുമതലപ്പെടുത്തി. പൊതുയിടങ്ങളില്‍ ഭീഷണിയായുള്ള മരങ്ങള്‍ ബന്ധപ്പെട്ട വകുപ്പ് മേധാവി മുറിച്ച് മാറ്റണം. സ്വകാര്യ ഭൂമിയില്‍ അപകടാവസ്ഥയിലുള്ള മരങ്ങള്‍ ഭൂഉടമ മുറിച്ചു മാറ്റാത്തപക്ഷം പഞ്ചായത്ത് കര്‍ശന നടപടി സ്വീകരിക്കണമെന്നും കളക്ടര്‍ നിര്‍ദേശിച്ചു.

ആചാരാനുഷ്ഠാനങ്ങള്‍ക്കു വിരുദ്ധമായ വള്ളസദ്യകള്‍ക്കെതിരേ പ്രതിഷേധം തുടരുമെന്ന്

ആറന്മുള : തിരുവിതാംകൂര്‍ ദേവസ്വംബോര്‍ഡ് ആചാരാനുഷ്ഠാനങ്ങള്‍ക്ക് വിരുദ്ധമായി നടത്തുന്ന വള്ളസദ്യകള്‍ക്ക് എതിരേ സമാധാനപരമായ പ്രതിഷേധങ്ങള്‍ ഉയരുമെന്ന് പള്ളിയോടസേവാസംഘം പ്രസിഡന്‍റ് കെ.വി.സാംബദേവന്‍. ഇന്നും ഓഗസ്റ്റ് മൂന്നിനും സദ്യ നടത്തുന്നതിന് തിരുവിതാംകൂര്‍ ദേവസ്വംബോര്‍ഡ് ഓണ്‍ലൈനിലൂടെ ടിക്കറ്റ് വില്പന നടത്തിയതിന്‍റെ അടിസ്ഥാനത്തില്‍ ഭക്തര്‍ക്ക് ബുദ്ധിമുട്ടുണ്ടാകാനുള്ള ഒരു സാഹചര്യവും പള്ളിയോടസേവാസംഘത്തിന്‍റെ ഭാഗത്തുനിന്നും ഉണ്ടാകുകയില്ലെന്നും പ്രസിഡന്‍റ് അറിയിച്ചു എന്നാല്‍ ഈ നില തുടര്‍ന്നാല്‍ ആചാരലംഘനത്തിനെതിരേ പള്ളിയോട കരക്കാരുടെ പ്രതിഷേധം ഉയരുമെന്ന് കെ.വി.സാംബദേവന്‍ പറഞ്ഞു. ആറന്മുള ക്ഷേത്ര മതിലകവും കരകളും ഇതിന്‍റെ പേരില്‍ സംഘര്‍ഷഭൂമിയാകാന്‍ പാടില്ല എന്നതാണ് പള്ളിയോടസേവാസംഘത്തിന്‍റെ താത്പര്യം. ഏത് അനുരഞ്ജനമാര്‍ഗങ്ങളും സ്വാഗതാര്‍ഹമാണെന്നും പ്രസിഡന്‍റ് പറഞ്ഞു. ആറന്മുള വള്ളസദ്യയെ കച്ചവടവത്കരിക്കില്ലെന്ന ദേവസ്വംബോര്‍ഡ് പ്രസിഡന്‍റിന്‍റെ പ്രസ്താവനയെ സ്വാഗതം ചെയ്യുന്നതായും പള്ളിയോടസേവാസംഘം പ്രസിഡന്‍റ് കെ.വി.സാംബദേവനും സെക്രട്ടറി പ്രസാദ് ആനന്ദഭവനും പറഞ്ഞു.

ക്രിസ്തുസ്‌നേഹത്തിന്‍റെ വക്താക്കളാകണം: സഫ്രഗന്‍ മെത്രാപ്പോലീത്ത

കുമ്പനാട്: ക്രിസ്തു സ്‌നേഹത്തിന്‍റെ വക്താക്കളായി ഇടവകകള്‍ മാറണമെന്ന് ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്ത. കൂര്‍ത്തമല സെന്‍റ് തോമസ് മാര്‍ത്തോമ്മ ഇടവക വജ്രജൂബിലി ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. ഇടവക വികാരി റവ.ജോസഫ് മാത്യു അധ്യക്ഷത വഹിച്ചു. കുര്യാക്കോസ് മാര്‍ ക്ലീമിസ് വലിയ മെത്രാപ്പോലീത്ത അനുഗ്രഹപ്രഭാഷണം നടത്തി. വലിയ മെത്രാപ്പോലീത്തയുടെ 90 ാം ജന്മദിനം കേക്ക് മുറിച്ച് ആഘോഷിച്ചു. റവ. കെ.എ. മാമ്മൻ, ഫാ. ഐപ്പ് പി, സാം, ഗ്രാമപഞ്ചായത്തംഗം മുകേഷ് മുരളി, റവ. തോമസ് ജോണ്‍, ജനറല്‍ കണ്‍വീനര്‍ സി. തോമസ്, ഇടവക സെക്രട്ടറി സതീഷ് ജോര്‍ജ്, ചെറിയാന്‍ ജോണ്‍, ക്രിസ്റ്റിന്‍ ആലീസ് കെന്നി, റിയാ മാത്യു തുടങ്ങിയവര്‍ പ്രസംഗിച്ചു.

ഓമല്ലൂരില്‍ പന്നി വേട്ടയ്ക്ക് കര്‍ഷക കൂട്ടായ്മ രൂപീകരിച്ചു

ഓമല്ലൂർ: കേരള കര്‍ഷക സംഘം ഓമല്ലൂര്‍ പഞ്ചായത്തു കമ്മിറ്റിയുടെ ആഭിമുഖ്യത്തില്‍ വന്യമൃഗ ശല്യത്തിനെതിരേ കര്‍ഷക കൂട്ടായ്മ രൂപീകരിച്ചു. അംഗീകൃത ഷൂട്ടര്‍മാരെ ഉപയോഗിച്ച് നാട്ടിലിറങ്ങുന്ന പന്നിയെ വെടിവെച്ചു കൊല്ലുന്നതിന് പഞ്ചായത്ത് മുന്‍കൈ എടുക്കണമെന്ന് യോഗം നിര്‍ദേശിച്ചു. ഇതിനായി പ്രാദേശിക ജാഗ്രതാ സമിതികള്‍ രൂപീകരിക്കണം. കാട്ടുപന്നി ശല്യം നിമിത്തം കൃഷിക്കാര്‍ കൃഷി ഉപേക്ഷിക്കുകയാണ്. കര്‍ഷക കൂട്ടായ്മയില്‍ ഉയര്‍ന്ന ആവശ്യങ്ങളടങ്ങിയ നിവേദനം കര്‍ഷക സംഘം ഭാരവാഹികള്‍ ഓമല്ലൂര്‍ പഞ്ചായത്ത് പ്രസിഡന്‍റിന് നല്കി. കണ്‍വന്‍ഷന്‍ കര്‍ഷക സംഘം സംസ്ഥാന ജോയിന്‍റ് സെക്രട്ടറി ഓമല്ലൂര്‍ ശങ്കരന്‍ ഉദ്ഘാടനം ചെയ്തു. മേഖലാ പ്രസിഡന്‍റ് എം.ആര്‍ അനില്‍കുമാര്‍ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ജെ. ഇന്ദിരാദേവി, കര്‍ഷക സംഘം ഏരിയ സെക്രട്ടറി എസ്. മനോജ് കുമാര്‍, പാടശേഖരസമിതി പ്രസിഡന്‍റ് തോമസ് ലുക്ക്, കര്‍ഷക സംഘം മേഖലാ സെക്രട്ടറിമാരായ എസ്. മണി, പി.എന്‍. അരവിന്ദാക്ഷന്‍ എന്നിവര്‍ പ്രസംഗിച്ചു.

മണിപ്പുഴയില്‍ വാഹനം ഇടിച്ച് പൂച്ചപ്പുലി ചത്തനിലയിൽ

തിരുവല്ല: മണിപ്പുഴയില്‍ പൂച്ച പുലിയെ വാഹനം ഇടിച്ചു ചത്ത നിലയില്‍ കണ്ടെത്തി. തിരുവല്ല - അമ്പലപ്പുഴ സംസ്ഥാന പാതയില്‍ മണിപ്പുഴ ഇന്ത്യന്‍ ഓയില്‍ കോര്‍പറേഷന്‍റെ പെട്രോള്‍ പമ്പിന് സമീപത്ത് ശനിയാഴ്ച പുലര്‍ച്ചെ ആറോടെ പത്ര വിതരണക്കാരനാണ് പൂച്ചപ്പുലിയെ ചത്തനിലയില്‍ കണ്ടത്. മണിപ്പുഴയിലുള്ള ഹിന്ദുസ്ഥാന്‍ പെട്രോള്‍ പമ്പിന് പിന്‍വശത്തെ കാടുപിടിച്ച പുരയിടത്തില്‍ മൂന്നാഴ്ച മുമ്പ് പുലിക്ക് സമാനമായ ജീവിയെ കണ്ടതിനേ തുടര്‍ന്ന് നാടാകെ ഭീതി പടര്‍ന്നിരുന്നു. തുടര്‍ന്ന് റാന്നിയില്‍ നിന്നും എത്തിയ വനപാലക സംഘം കണ്ടത് പൂച്ചപ്പുലി ആണെന്ന് സ്ഥിരീകരിച്ചിരുന്നു. എന്നാല്‍ അതിനെ കണ്ടെത്താന്‍ കഴിഞ്ഞിരുന്നില്ല. സംഭവം അറിഞ്ഞ് റാന്നിയില്‍ നിന്നും വനം വകുപ്പ് ഉദ്യോഗസ്ഥര്‍ എത്തി. ജഡം റാന്നിയില്‍ എത്തിച്ച് പോസ്റ്റുമോര്‍ട്ടം ചെയ്ത ശേഷം മറവു ചെയ്തതായി വനം വകുപ്പ് അധികൃതര്‍ പറഞ്ഞു.

ടോറസ് ലോറി ഇടിച്ച് വൈദ്യുതി പോസ്റ്റ് തകര്‍ന്നു

പന്തളം: വൈദ്യുതി പോസ്റ്റില്‍ ടോറസ് ലോറി ഇടിച്ചുണ്ടായ അപകടത്തില്‍ നാട്ടുകാരുടെ സമയോചിതമായ പ്രവര്‍ത്തനം മൂലം വന്‍ ദുരന്തം ഒഴിവായി. ഇന്നലെ പുലര്‍ച്ചെ 3.30 ന് കടയക്കാട് ഭദ്രകാളി ദേവി ക്ഷേത്രത്തിന് സമീപം ടോറസ് ലോറി വൈദ്യുതി പോസ്റ്റില്‍ ഇടിച്ചുണ്ടായ അപകടമാണ് പുലര്‍ച്ചെ കടക്കാട് നിവാസികളെ ഭയാശങ്കയിലാക്കിയത്. പുലര്‍ച്ചെ കോന്നി ഭാഗത്തേക്ക് പോകുകയായിരുന്ന ടോറസ് ലോറി വൈദ്യുതി പോസ്റ്റില്‍ വന്നിടിക്കുകയായിരുന്നു. വന്‍ ശബ്ദത്തോടെ വൈദ്യുതി പോസ്റ്റ് പന്തളം പത്തനംതിട്ട റോഡില്‍ ഭദ്രകാളി ദേവി ക്ഷേത്രത്തിന് സമീപത്തെ വളവില്‍ റോഡിന്‍റെ മധ്യഭാഗത്ത് പതിക്കുകയായിരുന്നു. ലോറി നിര്‍ത്താതെ പോകുകയും ചെയ്തു. വന്‍ ശബ്ദം കേട്ട് ഉണര്‍ന്ന പരിസരവാസികള്‍ പുറത്തിറങ്ങിയെങ്കിലും എല്ലായിടങ്ങളിലും വൈദ്യുതി പ്രവഹിക്കുകയായിരുന്നു. സമീപവാസികള്‍ പന്തളം പോലീസിനെയും വൈദ്യുതി ഓഫീസിലും വിവരമറിയിച്ചു. പോലീസ് എത്തി ഗതാഗതം പൂര്‍ണമായും നിരോധിച്ചു. വൈദ്യുതി പുനസ്ഥാപിക്കുന്നതുവരെ വാഹനഗതാഗതം പൂര്‍ണമായും നിലച്ചു. പത്തനംതിട്ട ഭാഗത്തേക്ക് പോകേണ്ട വാഹനങ്ങള്‍ കുളനട, കുരമ്പാല വഴി പോലീസ് തിരിച്ചുവിട്ടു. ഉച്ചയ്ക്ക് വൈദ്യുതി പുനഃസ്ഥാപിച്ചതിനുശേഷമാണ് വാഹന ഗതാഗതം ആരംഭിച്ചത്. ചെറിയതോതില്‍ മഴ പെയ്യുമ്പോഴായിരുന്നു അപകടം സംഭവിച്ചത്. നാട്ടുകാര്‍ സമയോചിതമായി ഇടപ്പെട്ടതിനാല്‍ വന്‍ അപകടമാണ് ഒഴിവായത്.

കാറ്റും മഴയും: കെടുതികള്‍ തുടരുന്നു ഗ്രാമീണ മേഖല ഇരുട്ടില്‍

പത്തനംതിട്ട: കാറ്റിലും മഴയിലും ജില്ലയില്‍ കെടുതികള്‍ക്ക് ശമനമില്ല. കഴിഞ്ഞദിവസമുണ്ടായ കാറ്റില്‍ ജില്ലയൊട്ടാകെ വന്‍നാശമാണ് വിതച്ചത്. നിരവധി വീടുകള്‍ക്കും കെട്ടിടങ്ങള്‍ക്കും നാശനഷ്ടമുണ്ടായി. വൈദ്യുതി മേഖലയ്ക്കാണ് നഷ്ടം ഏറെയും. രണ്ടുദിവസമായി ഗ്രാമീണ മേഖല ഇരുട്ടിലാണ്. തകരാറിലായ വൈദ്യുതി പുനഃസ്ഥാപിക്കാന്‍ കഴിയാത്തതാണ് പ്രശ്‌നം. ഇന്നലെയും പല സ്ഥലങ്ങളിലും ശക്തമായ കാറ്റ് വീശി. മഴയും ശക്തമായിരുന്നു. നദികളില്‍ ജലനിരപ്പ് ഉയര്‍ന്നു നില്‍ക്കുകയാണ്. സംഭരണികളിലും ജലനിരപ്പ് ഉയര്‍ന്നു കൊണ്ടേയിരിക്കുകയാണ്. തോടുകളും ജലാശയങ്ങളും നിറഞ്ഞു കവിഞ്ഞു. താഴ്ന്ന പ്രദേശങ്ങളില്‍ വെള്ളം കയറിത്തുടങ്ങിയിട്ടുണ്ട്. പടിഞ്ഞാറന്‍ മേഖലയും പ്രളയ ഭീഷണിയിലാണ്. മരങ്ങള്‍ വീണു ഗതാഗതം മുടങ്ങിയ റോഡുകളിലെ തടസങ്ങള്‍ നീക്കി. ഫയര്‍ഫോഴ്‌സും കെഎസ്ഇബിയും വിശ്രമരഹിതമായ ജോലിയിലാണ്. 71 വീടുകള്‍ ഭാഗികമായി തകര്‍ന്നു കനത്ത മഴയിലും കാറ്റിലും ജില്ലയില്‍ ആറ് താലൂക്കിലായി 71 വീടുകള്‍ ഭാഗികമായി തകര്‍ന്നു. റാന്നിയില്‍ ഒരു വീട് പൂര്‍ണമായി തകര്‍ന്നു. റാന്നി 17, കോന്നി 16, മല്ലപ്പള്ളി 12, തിരുവല്ലയില്‍ 10, കോഴഞ്ചേരി, അടൂര്‍ താലൂക്കുകളിലായി എട്ടു വീതവും വീടുകളാണ് തകര്‍ന്നത്. കാറ്റില്‍ മരം വീണ് മല്ലപ്പള്ളി താലൂക്കില്‍ കോട്ടാങ്ങല്‍ സ്വദേശി ബേബി ജോസഫ് (62) വെള്ളിയാഴ്ച മരണമടഞ്ഞിരുന്നു. വീടിനു സമീപമുള്ള ഷെഡിലേക്കാണ് മരം കടപുഴകിയത്. ഷെഡിലുണ്ടായിരുന്ന ബേബി ജോസഫ് തല്‍ക്ഷണം മരിച്ചു. മരങ്ങള്‍ കടപുഴകിയും ശിഖരം ഒടിഞ്ഞുവീണുമാണ് വീടുകള്‍ക്ക് ഏറെയും നാശനഷ്ടമുണ്ടായത്. പല വീടുകളുടെയും മേല്‍ക്കൂര പൂര്‍ണമായി തകര്‍ന്നു. ഭിത്തികള്‍ക്കും കേടുപാടുകളുണ്ടായി. സമീപ പുരയിടങ്ങളിലെ മരങ്ങളാണ് പലര്‍ക്കും നാശമുണ്ടാക്കിയത്. വെള്ളിയാഴ്ച ഉച്ചകഴിഞ്ഞ് ഏതാനും മിനിട്ട് മാത്രം നീണ്ടുനിന്ന കൊടുങ്കാറ്റ് തിരുവല്ല, മല്ലപ്പള്ളി, റാന്നി, അടൂര്‍ താലൂക്കുകളിലാണ് കൂടുതല്‍ നാശം വിതച്ചത്. കോന്നി, കോഴഞ്ചേരി താലൂക്കൂകളിലെ ചില വില്ലേജുകളിലും വന്‍ നാശനഷ്ടങ്ങളുണ്ടായി. ഭീഷണിയായ മരങ്ങള്‍ മുറിച്ചുനീക്കണമെന്ന് എംഎല്‍എ റാന്നി: വീടുകള്‍ക്ക് ഭീഷണിയായി നില്‍ക്കുന്ന മരങ്ങള്‍ മുറിച്ച് നീക്കുന്നതിന് അടിയന്തര നടപടി സ്വീകരിക്കണമെന്ന് പ്രമോദ് നാരായണ്‍ എംഎല്‍എ ജില്ലാ കളക്ടറോടും പഞ്ചായത്ത് ഡെപ്യൂട്ടി ഡയറക്ടറോടും ആവശ്യപ്പെട്ടു. കഴിഞ്ഞദിവസം ഉണ്ടായ ശക്തമായ കാറ്റില്‍ അയല്‍വാസിയുടെ മരം വീണു കോട്ടങ്ങലില്‍ ഒരാള്‍ മരിക്കാനും റാന്നിയുടെ വിവിധ ഭാഗങ്ങളില്‍ നിരവധി വീടുകള്‍ക്ക് നാശനഷ്ടം ഉണ്ടാകാനും ഇടയാക്കിയ സാഹചര്യത്തിലാണ് ഇത്തരത്തില്‍ അപകട ഭീഷണി ഉയര്‍ത്തി നില്‍ക്കുന്ന മരങ്ങള്‍ മുറിച്ചുമാറ്റണമെന്ന് എംഎല്‍എ ആവശ്യപ്പെട്ടത്. അയല്‍വാസിയുടെ മരങ്ങള്‍ വീടുകള്‍ക്ക് അപകട ഭീഷണി ഉണ്ടാക്കുന്നുവെന്ന് കാട്ടി റാന്നി നിയോജക മണ്ഡലത്തിലെ വിവിധ പഞ്ചായത്തുകളില്‍ നിരവധി പരാതികളാണ് വന്നിട്ടുള്ളത്. പലയിടത്തും പഞ്ചായത്ത് ഇടപെട്ടിട്ടും മരങ്ങള്‍ വെട്ടി മാറ്റാന്‍ ഉടമകള്‍ തയാറായിട്ടില്ല. ഈ സാഹചര്യത്തില്‍ ഉടമകള്‍ മരങ്ങള്‍ വെട്ടിമാറ്റാന്‍ തയാറാകുന്നില്ലെങ്കില്‍ പഞ്ചായത്ത് തന്നെ മുന്‍കൈയെടുത്ത് മരങ്ങള്‍ വെട്ടി മാറ്റി അതിന്‍റെ ചെലവ് ഉടമകളില്‍ നിന്ന് ഈടാക്കണമെന്ന് എംഎല്‍എ നിര്‍ദ്ദേശിച്ചു. മരങ്ങള്‍ വീണ് വീട് തകര്‍ന്ന അങ്ങാടി ഐക്കാട്ട് മണ്ണില്‍ മേലേതില്‍ ടി. കെ. വിജയൻ, പുല്ലൂപ്രം പുതുപ്പറമ്പില്‍ രാജന്‍ എന്നിവരുടെ വീടുകള്‍ എംഎല്‍എ സന്ദര്‍ശിച്ചു. പഞ്ചായത്ത് പ്രസിഡന്‍റ് ബിന്ദു വളയനാട് മെംബര്‍മാരായ ബി. സുരേഷ്,രാധാകൃഷ്ണന്‍ എന്നിവരും എംഎല്‍എ യോടൊപ്പം ഉണ്ടായിരുന്നു. കെഎസ്ഇബിക്ക് 41.46 ലക്ഷം രൂപയുടെ നഷ്ടം കഴിഞ്ഞ രണ്ടുദിവസങ്ങളിലായി വീശിയടിച്ച കാറ്റില്‍ കെഎസ്ഇബിക്ക് 41.46 ലക്ഷം രൂപയുടെ നഷ്ടമെന്ന് പ്രാഥമിക വിലയിരുത്തൽ. വൈദ്യുത തൂണുകള്‍ നിലംപൊത്തിയും ലൈനുകള്‍ പൊട്ടിവീണുമാണ് നഷ്ടം. 11 കെവി ലൈനുകളും പോസ്റ്റുകളും തകരാറിലായി. ഒട്ടുമിക്ക സെക്‌ഷനുകളിലും വന്‍നഷ്ടമാണ് കെഎസ്ഇബിക്കുണ്ടായിരിക്കുന്നത്. തകരാറിലായ വൈദ്യുതി വിതരണം ഭാഗികമായി മാത്രമേ പുനഃസ്ഥാപിച്ചിട്ടുള്ളൂ. ജീവനക്കാരെ പൂര്‍ണമായി ഫീല്‍ഡ് ജോലികള്‍ക്കു നിയോഗിച്ചിരിക്കുകയാണ്. രാത്രിയിലും പല ഫീഡറുകളിലും ജോലി നടക്കുന്നുണ്ട്. പോസ്റ്റുകള്‍ മാറ്റിയിടേണ്ട തരത്തിലുള്ള ജോലികള്‍ പൂര്‍ത്തീകരിക്കാന്‍ വൈകും. റാന്നി, മല്ലപ്പള്ളി, അടൂർ, തിരുവല്ല മേഖലകളില്‍ കെഎസ്ഇബിക്ക് വന്‍ നഷ്ടമാണ് ഉണ്ടായത്. കാലവര്‍ഷം ആരംഭിച്ചശേഷം കെഎസ്ഇബിക്കു തുടര്‍ച്ചയായ നഷ്ടമാണ് കാറ്റ് മൂലം ഉണ്ടാകുന്നത്. വൈദ്യുതിലൈനുകളിലേക്ക് മരങ്ങള്‍ കടപുഴകിയും ശിഖരങ്ങള്‍ ഒടിഞ്ഞുവീണുമാണ് നഷ്ടം ഏറെയും. പലയിടങ്ങളിലും വൈദ്യുതലൈനുകള്‍ തന്നെ പുനഃക്രമീകരിക്കേണ്ട സാഹചര്യമുണ്ട്. ട്രാന്‍സ്‌ഫോര്‍മറുകള്‍ക്ക് തകരാറുണ്ടായ സ്ഥലങ്ങളുമുണ്ട്. കൃഷിനാശവും വ്യാപകം കാറ്റു മഴയും കാരണം രണ്ടുദിവസങ്ങളായി കൃഷിനാശവും വ്യാപകമായുണ്ടായി. 473 കര്‍ഷകര്‍ക്ക് 25.82 ഹെക്ടര്‍ സ്ഥലത്ത് 99.17 ലക്ഷം രൂപയുടെ നാശനഷ്ടമുണ്ടായെന്നാണ് പ്രാഥമിക വിലയികരുത്തൽ. റബര്‍,വാഴ, അടയ്ക്ക, കുരുമുളക് എന്നിവയെയാണ് കൂടുതലായി ബാധിച്ചത്. കാറ്റില്‍ ഏത്തവാഴവ്യാപകമായി ഒടിഞ്ഞുവീണു. ഓണക്കാല വിപണി ലക്ഷ്യമിട്ട് കൃഷി ഇറക്കിയ ഏത്തവാഴയാണ് നഷ്ടപ്പെട്ടത്. മരച്ചീനി, വെറ്റില കൃഷികള്‍ക്കും നാശമുണ്ടായിട്ടുണ്ട്. മഴ തുടരുന്ന സാഹചര്യത്തില്‍ പച്ചക്കറി കൃഷിയും വ്യാപകമായി നഷ്ടപ്പെട്ടുകൊണ്ടിരിക്കുകയാണ്. അപകടാവസ്ഥയിലുള്ള മരങ്ങള്‍ മുറിച്ചു മാറ്റണം ശക്തമായ മഴയും കാറ്റും തുടരുന്നതിനാല്‍ സ്വകാര്യ ഭൂമിയിലെ അപകടാവസ്ഥയിലുള്ള മരങ്ങള്‍ ഉടമ സ്വമേധയാ നീക്കം ചെയ്യണമെന്ന് ജില്ലാ കളക്ടര്‍ എസ് പ്രേം കൃഷ്ണന്‍ അറിയിച്ചു. ഉടമ സ്വമേധയാ മരം മുറിച്ച് മാറ്റിയോ ശിഖരങ്ങള്‍ നീക്കം ചെയ്‌തോ അപകടം ഒഴിവാക്കണം. സ്വകാര്യ ഭൂമിയില്‍ അപകടകരമായി നില്‍ക്കുന്ന മരങ്ങള്‍ മുറിച്ച് നീക്കുന്നത് സംബന്ധിച്ച് ലഭിച്ച എല്ലാ അപേക്ഷകളിലും പഞ്ചായത്ത് രാജ് ആക്ട് പ്രകാരം അതത് തദ്ദേശസ്വയംഭരണ സ്ഥാപനങ്ങള്‍ മൂന്ന് ദിവസത്തിനകം നടപടി പൂര്‍ത്തിയാക്കണം. പൊതു സ്ഥലങ്ങളിലെ അപകടകരമായ മരങ്ങള്‍ നീക്കം ചെയ്യാനുള്ള നടപടി ബന്ധപ്പെട്ട വകുപ്പ് സ്വീകരിക്കും. ഇത്തരത്തില്‍ ലഭിച്ച അപേക്ഷയില്‍ നിമാനുസൃത നടപടി സ്വീകരിക്കാത്ത ഉദ്യോഗസ്ഥര്‍ക്കെതിരേ ദുരന്ത നിവാരണ നിയമപ്രകാരം നടപടി സ്വീകരിക്കുമെന്നും കളക്ടര്‍ അറിയിച്ചു. ജില്ലയില്‍ മൂന്ന് ദുരിതാശ്വാസ ക്യാമ്പുകള്‍ ജില്ലയില്‍ ദുരിതാശ്വാസ ക്യാമ്പുകള്‍ മൂന്ന്. തിരുവല്ല താലൂക്കിലാണ് ക്യാമ്പുകള്‍ പ്രവര്‍ത്തിക്കുന്നത്. കുറ്റപ്പുഴ വില്ലേജില്‍ 35-ാം നമ്പര്‍ അങ്കണവാടിയിലെ ക്യാമ്പ് തിരുമൂലപുരം എസ്എന്‍വി സ്‌കൂളിലേക്ക് മാറ്റി. മുത്തൂര്‍ സര്‍ക്കാര്‍ എല്‍പിഎസിലും കവിയൂര്‍ പടിഞ്ഞാറ്റുംശേരി സര്‍ക്കാര്‍ എല്‍പിഎസിലുമാണ് മറ്റ് രണ്ട് ക്യാമ്പുകൾ. 14 കുടുംബങ്ങളിലായി 20 പുരുഷന്‍മാരും 22 സ്ത്രീകളും 11 കുട്ടികളും ഉള്‍പ്പെടെ 53 പേര്‍ ക്യാമ്പിലുണ്ട്. കക്കി ഡാമില്‍ ജലനിരപ്പ് ഉയരുന്നു, ആദ്യ മുന്നറിയിപ്പ് നല്‍കി ശബരിഗിരി ജലവൈദ്യുതി പദ്ധതിയുടെ കക്കി - ആനത്തോട് സംഭരണിയില്‍ ജലനിരപ്പ് ശക്തമായ മഴയേ തുടര്‍ന്ന് ഉയരുന്നു. ജലനിരപ്പ് 70 ശതമാനത്തിലെത്തിയതോടെ ആദ്യ മുന്നറിയിപ്പ് നല്‍കി. മഴ ശക്തമായി തുടരുന്ന സാഹചര്യത്തിലാണ് നീല മുന്നറിയിപ്പ് നല്‍കിയിട്ടുള്ളത്. പമ്പാ നദിയുടെയും കക്കാട്ടാറിന്‍റെ ഇരുകരകളില്‍ താമസിക്കുന്നവരും പൊതുജനങ്ങളും ജാഗ്രത പുലര്‍ത്തണമെന്ന് ജില്ലാ ദുരന്തനിവാരണ അഥോറിറ്റി ചെയർപേഴ്‌സണ്‍ കൂടിയായ ജില്ലാ കളക്ടര്‍ എസ്. പ്രേംകൃഷ്ണന്‍ അറിയിച്ചു. ഡാമിലെ ജലനിരപ്പ് ഓറഞ്ച് മുന്നറിയിപ്പ് നിലയായ 974.36 മീറ്ററില്‍ എത്തിയാല്‍ പൊതുജനങ്ങള്‍ക്കും ജനപ്രതിനിധികള്‍ക്കും അറിയിപ്പ് നല്‍കുമെന്നും ചുവപ്പ് മുന്നറിയിപ്പ് നിലയായ 974.86 മീറ്ററില്‍ എത്തിയാല്‍ താഴ്ന്ന പ്രദേശങ്ങളില്‍ താമസിക്കുന്നവരെ പൂര്‍ണമായും ഒഴിപ്പിച്ച് ദുരിതാശ്വാസ കാമ്പിലേക്ക് മാറ്റേണ്ടിവരുമെന്നും കളക്ടര്‍ അറിയിച്ചു.

ലഹരിവിരുദ്ധ ബോധവത്കരണം നടത്തി

കോഴഞ്ചേരി: കേന്ദ്ര സാമൂഹികനീതി ശക്തീകരണ മന്ത്രാലയം നടപ്പാക്കുന്ന നഷാ മുക്ത് ഭാരത് അഭിയാന്‍ പദ്ധതിയുടെ ജില്ലാതല കാമ്പയിന്‍റെ ഭാഗമായി കോഴഞ്ചേരി മുത്തൂറ്റ് നഴ്സിംഗ് കോളജില്‍ ലഹരിവിരുദ്ധ ബോധവത്കരണം സംഘടിപ്പിച്ചു. സാമൂഹികനീതി വകുപ്പും ജില്ലാ എക്സൈസ് വിമുക്തി മിഷനും സംയുക്തമായി സംഘടിപ്പിച്ച പരിപാടി കോളജ് പ്രിന്‍സിപ്പല്‍ ഡോ. സിസി ജോസഫ് ഉദ്ഘാടനം ചെയ്തു. വൈസ് പ്രിന്‍സിപ്പല്‍ പ്രഫ. സിന്ധു ഏബ്രഹാം അധ്യക്ഷത വഹിച്ചു. അസിസ്റ്റന്‍റ് പ്രഫ. അബി മേരി സ്‌കറിയാ ലഹരിവിരുദ്ധ പ്രതിജ്ഞ ചൊല്ലി. എക്സൈസ് പ്രിവന്‍റീവ് ഓഫീസർ ബിനു വി. വര്‍ഗീസ് ബോധവത്കരണ ക്ലാസെടുത്തു. ജില്ലാ സാമൂഹികനീതി ഓഫീസര്‍ ജെ. ഷംലാ ബീഗം, ലക്ചറര്‍ അനു സാറാ ജോസഫ്, അധ്യാപകര്‍, ജീവനക്കാര്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു. അടൂർ: കേന്ദ്ര സാമൂഹികനീതി ശക്തീകരണ മന്ത്രാലയം നടപ്പാക്കുന്ന നഷാ മുക്ത് ഭാരത് അഭിയാന്‍ പദ്ധതിയുടെ ജില്ലാതല കാമ്പയിന്‍റെ ഭാഗമായി അടൂര്‍ കോളജ് ഓഫ് അപ്ലൈഡ് സയന്‍സില്‍ ലഹരിവിരുദ്ധ ബോധവത്കരണം സംഘടിപ്പിച്ചു. സാമൂഹികനീതി വകുപ്പും ജില്ലാ എക്സൈസ് വിമുക്തി മിഷനും സംയുക്തമായി സംഘടിപ്പിച്ച പരിപാടി അടൂര്‍ നഗരസഭാ ചെയര്‍പേഴ്സൺ കെ. മഹേഷ് കുമാര്‍ ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഡോ. കെ. സന്തോഷ് ബാബു അധ്യക്ഷത വഹിച്ചു. എക്സൈസ് വിമുക്തി മിഷന്‍ ജില്ലാ കോ-ഓര്‍ഡിനേറ്റര്‍ ജോസ് കളീക്കല്‍ ബോധവത്കരണ ക്ലാസ് നയിച്ചു. ജില്ലാ പ്രൊബേഷന്‍ ഓഫീസര്‍ സിജു ബെന്‍, എന്‍എസ്എസ് പ്രോഗ്രാം ഓഫീസര്‍ രഞ്ജു കൃഷ്ണന്‍ തുടങ്ങിയവര്‍ പ്രസംഗിച്ചു.

വല്യയന്തി പള്ളിയില്‍ തിരുനാള്‍

മൈലപ്ര: വല്യയന്തി സെന്‍റ് തോമസ് മലങ്കര കത്തോലിക്കാ പള്ളിയില്‍ 75 ാമത് തിരുനാളിനു കൊടിയേറി. പത്തനംതിട്ട വൈദികജില്ലാ വികാരി ഫാ. ജോണ്‍സണ്‍ പാറയ്ക്കല്‍ കൊടിയേറ്റിനു കാര്‍മികത്വം വഹിച്ചു. വികാരി ഫാ. വര്‍ഗീസ് വിളയില്‍ സന്നിഹിതനായിരുന്നു. 23 മുതല്‍ 25 വരെ വൈകുന്നേരം 5.30ന് വിശുദ്ധ കുര്‍ബാനയും ഇടവക വിശുദ്ധീകരണ ധ്യാനവും ഉണ്ടാകും. ധ്യാനത്തിന് ഫാ. ടോണി കട്ടക്കയം നേതൃത്വം നല്‍കും. 26നു വൈകുന്നേരം 5.30ന് റാസ പ്ലാക്കല്‍ ജംഗ്ഷനില്‍ നിന്നാരംഭിച്ച് പള്ളിയിലേക്ക്. 27ന് എട്ടിന് ആഘോഷമായ തിരുനാള്‍ കുര്‍ബാനയ്ക്ക് ബിഷപ് ഡോ.ജോഷ്വാ മാര്‍ ഇഗ്നാത്തിയോസ് കാര്‍മികത്വം വഹിക്കും. തുടര്‍ന്ന് ഇടവക പ്ലാറ്റിനം ജൂബിലി ഉദ്ഘാടനം, കൊടിയിറക്ക്്, നേര്‍ച്ചവിളമ്പ്.

അർഥ വിഷൻ 2025: റാങ്ക് ജേതാക്കളെ അനുമോദിച്ചു

പത്തനംതിട്ട: കാതോലിക്കേറ്റ് കോള‌ജ് സാമ്പത്തിക ശാസ്ത്ര ബിരുദാനന്തര ബിരുദ ഗവേഷണ വിഭാഗത്തിന്‍റെ ആഭിമുഖ്യത്തിൽ നടന്ന അർഥ വിഷൻ - 2025ൽ എംജി യൂണിവേഴ്സിറ്റി ബിഎ എക്കണോമിക്സിന് ഒന്ന്, ആറ്, ഒന്പത് റാങ്കുകൾ നേടിയ വിദ്യാർഥികളെ ജില്ലാ കളക്ടർ എസ്. പ്രേംകൃഷ്ണൻ ആദരിച്ചു. യുജിസി, നെറ്റ് മത്സര പരീക്ഷാ പരിശീലന ക്ലാസുകളുടെ ഉദ്ഘാടനം ഡോ. ഏബ്രഹാം മാർ സെറാഫിം മെത്രാപ്പോലീത്ത നിർവഹിച്ചു. വകുപ്പ് മേധാവി ഡോ. ഷൈനി ടി. അലക്സാണ്ടർ അധ്യക്ഷത വഹിച്ചു. കാതോലിക്കേറ്റ് കോളജിന്‍റെ ഇ-ഡയറക്ടറി ലോഗോ പ്രകാശനം അലുമ്നി അസോസിയേഷൻ വൈസ് പ്രസിഡന്‍റ് ഡോ. വി.എൻ.എസ്. പിള്ള നിർവഹിച്ചു. കോളജ് പ്രിൻസിപ്പൽ ഡോ. സിന്ധു ജോൺസ്, ബിജോയ് ഡി. ഏബ്രഹാം, സോണി ജേക്കബ്, ബിജി കുഞ്ചാക്കോ, കരുണാകരൻ പരുത്ത്യാനിക്കൽ, ചിന്താമണി ഹരികൃഷ്ണൻ എന്നിവർ പ്രസംഗിച്ചു.

പിന്തള്ളപ്പെടുന്നവരായി ആരുമുണ്ടാകരുത്: ഡോണി തോമസ് വര്‍ഗീസ്

വടശേരിക്കര: സ്‌കൂൾ, കോളജ് പരീക്ഷകളില്‍ മാര്‍ക്ക് കുറഞ്ഞവരെയും പരാജയപ്പെട്ടവരെയും ചേര്‍ത്തുനിര്‍ത്തിയെങ്കില്‍ മാത്രമേ യഥാര്‍ഥ വിജയാഘോഷമാകുകയുള്ളൂവെന്ന് ജില്ലാ ജഡ്ജി ഡോണി തോമസ് വര്‍ഗീസ്. വടശേരിക്കര ഐക്യ ക്രൈസ്തവ സംഘടനയുടെ നേതൃത്വത്തില്‍ നടത്തിയ വിദ്യാഭ്യാസ പ്രോല്‍സാഹന സമ്മേളനവും അവാര്‍ഡുദാന ചടങ്ങും വടശേരിക്കര സെന്‍റ് ആന്‍റണീസ് ദേവാലയത്തില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജീവിത പരീക്ഷകളിൽ വീണുപോയവരെ ചേര്‍ത്തുപിടിച്ച് അവരെയും മുഖ്യധാരയിലെത്തിക്കുമ്പോഴാണ് ആത്മീയജീവിതം പോലും അര്‍ഥപൂര്‍ണമാകുന്നതെന്നും വിജയികളായ കുട്ടികളുടെ എണ്ണം കൂടുമ്പോള്‍തന്നെ ഇരകളായ കുട്ടികളുടെയും കുറ്റകൃത്യങ്ങളിലേര്‍പ്പെടുന്ന കുട്ടികളുടെയും എണ്ണം കൂടിവരുന്നുണ്ടെന്നും അതിസൂക്ഷ്മമായ പഠനത്തിനും അതിഗൗരവമായ പരിഹാരത്തിനും എല്ലാ വിഭാഗങ്ങളില്‍ പെട്ടവരും തയാറാകണമെന്നും ഡോണി തോമസ് വര്‍ഗീസ് പറഞ്ഞു. പ്രസിഡന്‍റ് ഫാ. ജോബ് പതാലില്‍ അധ്യക്ഷത വഹിച്ചു. ഓര്‍ത്തഡോക്‌സ് സഭാ കൗണ്‍സില്‍ അംഗം മനോജ് മാത്യു മുഖ്യപ്രഭാഷണം നടത്തി. ഫാ. സിജോ പന്നലക്കുന്നേല്‍ അനുഗ്രഹ പ്രഭാഷണവും ഫാ. പീറ്റര്‍ കുത്തുകല്ലുങ്കല്‍ ധ്യാന പ്രസംഗവും നടത്തി. സെക്രട്ടറി ബെന്നി പുത്തന്‍പറമ്പിൽ, ട്രഷറാര്‍ സന്തോഷ് കെ. ചാണ്ടി, റവ.ഫിലിപ്പ് ബേബി, ഫാ. എബി വര്‍ഗീസ്, റവ. മാത്യു ജോണ്‍ മുളമൂട്ടില്‍, റവ. സന്തോഷ് മാത്യു, ഫാ. ജോജി ജോര്‍ജ് ഫിലിപ്പ്, റവ. സന്തോഷ് ജോസഫ്, തോമസ് ചാക്കോ, മാത്യൂസ് ഏബ്രഹാം, ഷാജി മാത്യു, സ്വപ്ന സൂസന്‍ ജേക്കബ്, ഡോ. മാത്യു ജോസഫ് എന്നിവര്‍ പ്രസംഗിച്ചു.

കൂട് സ്ഥാപിച്ചിട്ടും പുലി വന്നില്ല; വന്യമൃഗഭീതി ഒഴിയാതെ താന്നിക്കപ്പുഴ

റാന്നി: പുലിയെ പിടികൂടാന്‍ കൂട് സ്ഥാപിക്കുകയും നിരീക്ഷണം ശക്തമാക്കുകയും ചെയ്തുവെങ്കിലും ഭീതി മാറാതെ പ്രദേശവാസികൾ. ഒരാഴ്ച മുമ്പ് പുലിയെ കണ്ടതായി ലഭിച്ച വിവരത്തിന്‍റെ അടിസ്ഥാനത്തില്‍ വെച്ചൂച്ചിറ പെരുന്തേനരുവിക്ക് സമീപം താന്നിക്കപ്പുഴയില്‍ കൂടു സ്ഥാപിക്കുകയും വലിയകാവിലെ ജനവാസ മേഖലയിലും വനത്തിലും വനം വകുപ്പ് നിരീക്ഷണം ശക്തമാക്കുകയും ചെയ്തിരുന്നു. പിന്നീട് പുലിയെ സംബന്ധിച്ചു വിവരങ്ങള്‍ ഒന്നും ഇല്ലെന്നാണ് വനപാലകര്‍ പറയുന്നത്. എന്നാലും നിരീക്ഷണം ശക്തമാക്കാന്‍ നിര്‍ദേശമുണ്ട്. പുലിയെ ടാപ്പിംഗ് തൊഴിലാളി കണ്ടതായി പറയുന്ന വെച്ചൂച്ചിറ താന്നിക്കപ്പുഴയിലെ പൊന്തക്കാടുകള്‍ കേന്ദ്രീകരിച്ച് വനപാലകര്‍ നിരീക്ഷണ കാമറകളും സ്ഥാപിച്ചിരുന്നു. ഇതിലും പുലിയുടെ സാന്നിധ്യം പിന്നീട് ലഭിച്ചിരുന്നില്ല. പുലിഭീതിയില്‍ കഴിയുന്ന താന്നിക്കാപ്പുഴയില്‍ ടാപ്പിംഗ് ജോലികള്‍ അപ്പാടെ നിലച്ച മട്ടാണ്. പുലര്‍ച്ചെയും രാവിലെയുമാണ് തോട്ടങ്ങളില്‍ തൊഴിലാളികള്‍ എത്തി ടാപ്പിംഗ് നടത്തേണ്ടത്. എന്നാല്‍ പുലിഭീതി മൂലം ഈ സമയത്ത് ഇതുവഴി ആരും നടന്നുപോകുന്നില്ല. വാഹനങ്ങളിലല്ലാതെ നടന്നുപോകാന്‍ ആളുകള്‍ക്ക് ഭയമാണ്. കുട്ടികളെ ഒറ്റയ്ക്കു സ്‌കൂളുകളിലേക്ക് അയയ്ക്കുന്നുമില്ല. ഇതിനു സമീപമുണ്ടായിരുന്ന ചില താമസക്കാരും തത്ക്കാലത്തേക്കെങ്കിലും വീടൊഴിഞ്ഞിരിക്കുകയാണ്. താന്നിക്കപ്പുഴ, പെരുന്തേനരുവി, കുരുമ്പന്‍മൂഴി, അഴുത കോളനി, നൂറോക്കാട് എന്‍എസ്എസ് എസ്റ്റേറ്റ് പ്രദേശങ്ങള്‍ എന്നിവിടങ്ങളിലെല്ലാം പുലിഭീതി നിലനില്‍ക്കുകയാണ്. കാട്ടാന, കാട്ടുപോത്ത്, കാട്ടുപന്നി എന്നിവ കൃഷിയിടങ്ങളില്‍ എത്തുകയും ഇവയെക്കുറിച്ചുള്ള ഭയം നിലനില്‍ക്കുകയും ചെയ്യുന്നതിനിടയിലാണ് വില്ലനായി പുലിഭീതി കൂടി ആളുകളിലേക്കെത്തിക്കഴിഞ്ഞിരിക്കുന്നത്. വനാതിര്‍ത്തി പ്രദേശങ്ങളില്‍ ഇപ്പോള്‍ കാര്‍ഷിക വൃത്തിയും ജനജീവിതവും ദുഃസഹമായിരിക്കുകയാണ്. ആനയും കാട്ടുപന്നിയും കാര്‍ഷികവിളകള്‍ അപ്പാടെ നശിപ്പിക്കുകയാണ്. ആനയുടെ ശല്യം രൂക്ഷമായതോടെ വിളകള്‍ അപ്പാടെ നശിപ്പിക്കുകയാണ്. തെങ്ങ്, കമുക് തുടങ്ങിയവയ്ക്കും ഫലവര്‍ഗങ്ങള്‍ക്കും നാശനഷ്ടം വരുത്തുന്നു. കിഴക്കന്‍ മേഖലയിലെ പല പഞ്ചായത്തുകളില്‍നിന്നും അതിര്‍ത്തി പ്രദേശങ്ങളിലെ കര്‍ഷക കുടുംബങ്ങള്‍ വ്യാപകമായി വീടുപേക്ഷിച്ചു പോകുകയാണ്. കര്‍ഷകര്‍ സ്വയം ഒഴഞ്ഞുപോകുന്നതിനു സാഹചര്യമൊരുക്കുകയാണ് വനപാലകരും ചെയ്യുന്നത്. രൂക്ഷമായ വന്യമൃഗശല്യം നേരിടാനും ജനങ്ങളുടെ സൈ്വര ജീവിതം ഉറപ്പാക്കാനും ഒരു പദ്ധതിയുമില്ലെന്ന് കര്‍ഷക സംഘടനകള്‍ ചൂണ്ടിക്കാട്ടുന്നു.

തീര്‍ഥാടകര്‍ തെന്നിവീണു; ശബരിമല നീലിമല പാത അടച്ചു

പത്തനംതിട്ട: പമ്പ - സന്നിധാനം പരമ്പരാഗത പാതയില്‍ നീലിമലയില്‍ നിരവധി തീര്‍ഥാടകര്‍ തെന്നിവീണു പരിക്കേറ്റതോടെ പാത അടച്ചു. ഇതോടെ സ്വാമി അയ്യപ്പന്‍ റോഡിലൂടെയാണ് തീര്‍ഥാടകര്‍ മലകയറുകയും ഇറങ്ങുകയും ചെയ്യുന്നത്. തുടര്‍ച്ചയായി മഴ പെയ്തതോടെയാണ് അപകടം ഉണ്ടായത്. കഴിഞ്ഞ ദിവസം ദര്‍ശനം കഴിഞ്ഞ് നിലിമലയിറങ്ങിയ ഇതര സംസ്ഥാനക്കാരായ 15 തീര്‍ഥാടകര്‍ക്ക് വീണു പരിക്കേറ്റിരുന്നു. കൂടുതല്‍ പേര്‍ക്കും കൈകാലുകള്‍ക്കും തലയ്ക്കുമാണ് പരിക്കേറ്റത്. ഇവര്‍ പമ്പ, പത്തനംതിട്ട ഗവണ്‍മെന്‍റ് ആശുപത്രികളില്‍ പ്രഥമ ശുശ്രൂഷകള്‍ക്കു ശേഷം അവരവരുടെ നാടുകളിലക്ക് പോയി. കര്‍ക്കടക മാസ പൂജയ്ക്ക് നട തുറന്നതു മുതല്‍ തീര്‍ഥാടകരെ നീലിമല പാതയിലൂടെയാണ് കടത്തിവിട്ടത്. എന്നാല്‍ മഴ ശക്തമായതിനു പിന്നാലെ പാതയില്‍ വഴുക്കല്‍ രൂക്ഷമാകുകയും ആളുകള്‍ അപകടത്തില്‍പെടാനും തുടങ്ങി. വിവരം അറിയിച്ചതിനെ തുടര്‍ന്ന് പമ്പ പോലീസ് എത്തിയാണ് നീലിമല പാത അടച്ചത്. മിഥുനമാസ പൂജയ്ക്ക് നടതുറന്നപ്പോളും തീര്‍ഥാടകര്‍ക്ക് തെന്നിവീണു പരിക്കേറ്റിരുന്നു. തെന്നിവീഴുന്നത് ഒഴിവാക്കാന്‍ പാതയില്‍ പാകിയിരിക്കുന്ന കരിങ്കല്ല് പരുക്കന്‍ ആക്കുന്ന പണി അടിയന്തരമായി നടത്തിയ ശേഷമേ പാത തുറന്നു കൊടുക്കുകയുള്ളൂവെന്ന് കഴിഞ്ഞമാസം ദേവസ്വം ബോര്‍ഡ് പറഞ്ഞിരുന്നതാണ്. പണി നടത്താതെ പാത തുറന്നതാണ് വീണ്ടും അപകടത്തിന് ഇടയാക്കിയത്.

കേബിളില്‍ കുരുങ്ങി സ്‌കൂട്ടര്‍ യാത്രികർക്കു പരിക്ക്

മല്ലപ്പള്ളി : കേബിള്‍ വയറില്‍ കുരുങ്ങി ഇരുചക്ര യാത്രികര്‍ക്ക് പരിക്ക്. മല്ലപ്പള്ളി - കോഴഞ്ചേരി റോഡില്‍ കീഴ്‌വായ്പൂര് സമരമുക്കിന് സമീപം ഇന്നലെ വൈകുന്നേരം 4.30നായിരുന്നു അപകടം. വൈദ്യുത പോസ്റ്റില്‍ ചുറ്റി വെച്ചിരുന്ന കേബിളുകള്‍ താഴേക്ക് പതിച്ചാണ് സ്‌കൂട്ടര്‍ യാത്രക്കാരായ അമ്മയ്ക്കും മകള്‍ക്കും പരിക്കേറ്റത്. പത്തനാട് സ്വദേശി പുതിയവീട്ടില്‍ ശ്രീലേഖ (48) മകള്‍ അഖില (24) എന്നിവര്‍ക്കാണ് പരിക്കേറ്റത്. സ്‌കൂട്ടര്‍ ഓടിച്ചിരുന്ന അഖിലയുടെ കഴുത്തിലേക്ക് കേബിളുകള്‍ വീണതിനേ തുടര്‍ന്ന് സ്‌കൂട്ടറിന്റെ നിയന്ത്രണം നഷ്ടപ്പെട്ട് റോഡിലേക്ക് ഇരുവരും വീഴുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. ഉടന്‍തന്നെ മല്ലപ്പള്ളി ജോര്‍ജ് മാത്തന്‍ ആശുപത്രിയില്‍ പ്രാഥമ ശുശ്രൂഷ നല്‍കി. ഇന്ന് കൂടുതല്‍ ചികിത്സ തേടുമെന്ന് ബന്ധുക്കള്‍ അറിയിച്ചു. ശ്രീലേഖ ചെങ്ങന്നൂരിലേ സ്വന്തം വീട്ടിലെത്തിയശേഷം പത്തനാട്ടിലെ വീട്ടിലേക്ക് മടങ്ങുമ്പോഴാണ് അപകടം.

വൈദ്യുതിപോസ്റ്റ് അപകടാവസ്ഥയിൽ; കയര്‍ കെട്ടി സംരക്ഷണം

കോന്നി: ചിറ്റൂര്‍മുക്ക് - കോട്ടപ്പാറ റോഡരികില്‍ അപകടാവസ്ഥയിലായ വൈദ്യുതിപോസ്റ്റ് കഴിഞ്ഞ ഒരുമാസമായി കയറില്‍ താങ്ങിനിര്‍ത്തിയിരിക്കുന്നു. ചിറ്റൂര്‍മുക്ക് അങ്കണവാടിക്കു സമീപമാണ് പോസ്റ്റ് സ്ഥിതി ചെയ്യുന്നത്. നിരവധി വീടുകളും സമീപത്തുണ്ട്. ചുവട്ടിലെ കോണ്‍ക്രീറ്റ് പൊട്ടിമാറി പോസ്റ്റ് ചാഞ്ഞുനില്‍ക്കുകയാണ്. പോസ്റ്റിന്‍റെ അപകടാവസ്ഥ കെഎസ്ഇബിയെ അറിയിച്ചിരുന്നതായി കോന്നി ഗ്രാമപഞ്ചായത്ത് പ്രസിഡന്‍റ് അനി സാബു പറഞ്ഞു. എന്നാല്‍ യാതൊരു നടപടികളും ഉണ്ടായിട്ടില്ല. കഴിഞ്ഞദിവസങ്ങളില്‍ മഴയ്‌ക്കൊപ്പം കാറ്റും ശക്തമായിരുന്നതോടെ പോസ്റ്റ് കൂടുതല്‍ അപകടാവസ്ഥയിലായി. കുട്ടികള്‍ അടക്കം യാത്ര ചെയ്യുന്ന പാതയിലാണ് അപകടാവസ്ഥയില്‍ പോസ്റ്റ് നില്‍ക്കുന്നത്.

ബസു കാറും കൂട്ടിയിടിച്ച് ഒരാള്‍ക്കു പരിക്ക്

ഏനാത്ത്: എംസി റോഡില്‍ കെഎസ്ആര്‍ടിസി ബസിടിച്ച് കാര്‍ യാത്രികനു പരിക്കേറ്റു. കൊല്ലം കടവൂര്‍ സ്വദേശി മഹാദേവനാണ് പരിക്ക്. ശനിയാഴ്ച വൈകുന്നേരമാണ് അപകടമുണ്ടായത്. കൊട്ടാരക്കര പിഡബ്ലുഡി ഗസ്റ്റ്ഹൗസിലെ ഭക്ഷണശാല നടത്തുകയാണ് ഇദ്ദേഹം. ഏനാത്ത് എംജി ജംഗ്ഷനു സമീപംമുണ്ടായ അപകടത്തില്‍ പരിക്കേറ്റു കിടന്ന മഹാദേവനെ ആശുപത്രിയില്‍ എത്തിക്കാന്‍ വാഹനങ്ങള്‍ കൈകാണിച്ചിട്ടും ലഭിക്കാത്തതിനാല്‍ ബസ് ഡ്രൈവര്‍ മണിലാൽ, കൊട്ടാരക്കര സ്വകാര്യ കോളജിലെ അധ്യാപകന്‍ എസ്.സുനീഷ് എന്നിവര്‍ ചേര്‍ന്ന് ഒരു മിനിലോറിയിലാണ് അടൂര്‍ ജനറല്‍ ആശുപത്രിയില്‍ എത്തിച്ചത്.

ബൈക്ക് നിയന്ത്രണം വിട്ട് മറിഞ്ഞ് യുവാവ് മരിച്ചു

അടൂർ: കെപി റോഡിൽ അടൂർ കോട്ടമുകൾ ടിബി ജങ്ഷനിൽ ബൈക്ക് നിയന്ത്രണം വിട്ട് മറിഞ്ഞ് ബൈക്ക് യാത്രികനായ യുവാവ് മരിച്ചു. കൊല്ലം ആയിരനല്ലൂർ മണലിൽ പച്ച അനന്തുവിലാസത്തിൽ രതീഷിന്‍റെയും സുമിയുടെയും മകൻ ആർ.എസ്.അനന്ദു (24) മരിച്ചത്. അടൂർ പന്നിവിഴ കൈമലപ്പാറയിലുള്ള അമ്മയുടെ സഹോദരിയുടെ വീട്ടിലായിരുന്നു താമസം. ഹിറ്റാച്ചി ഓപ്പറേറ്ററായിരുന്നു. പറക്കോട് ഭാഗത്തു നിന്നും കോട്ടമുകൾ ഭാഗത്തേക്ക് അനന്തു വന്ന ബൈക്ക് നിയന്ത്രണം വിട്ട് റോഡിലേക്ക് മറിയുകയായിരുന്നു. തലയ്ക്ക് ഗുരുതര പരിക്കേറ്റു കിടന്ന അനന്തുവിനെ അടൂരിൽ നിന്നും ട്രാഫിക് പോലീസ് എത്തിയാണ് ആംബുലൻസിൽ ആശുപത്രിയിൽ എത്തിച്ചത്.

നിരോധിത പുകയില ഉത്പന്നങ്ങള്‍ പിടികൂടി; ആസാം സ്വദേശി അറസ്റ്റില്‍

പത്തനംതിട്ട: നിരോധിത പുകയില ഉത്പന്നങ്ങളുമായി ആസാം സ്വദേശി അടൂരില്‍ അറസ്റ്റിൽ. ആസാം ബാര്‍പെട്ട ചേട്ടമിരി ബീല്‍ നാഗോണ്‍ ആഷിഖുല്‍ ഇസ്ലാമാണ് (19) അടൂര്‍ കെഎസ്ആര്‍ടിസി സ്റ്റാന്‍ഡില്‍ നിന്നു പിടിയിലായത്. ഇളമണ്ണൂര്‍ പൂതംകര പ്ലൈവുഡ് സ്ഥാപത്തിലെ തൊഴിലാളിയാണ്. പെരുമ്പാവൂരില്‍ നിന്നും കെഎസ്ആര്‍ടിസി ബസില്‍ കടത്തിക്കൊണ്ട് വന്നതാണ് നിരോധിക പുകയില ഉത്പന്നങ്ങളെന്ന് ചോദ്യം ചെയ്യലില്‍ വ്യക്തമായി. എസ്‌ഐ ഡി. സുനില്‍ കുമാറിന്‍റെ നേതൃത്വത്തിലാണ് പിടികൂടിയത്. പട്രോളിംഗ് ഡ്യൂട്ടിക്കിടെ സംശയം തോന്നി തടഞ്ഞു നിര്‍ത്തി പിടികൂടുകയുമായിരുന്നു. ബാഗ് പരിശോധിച്ചു നോക്കിയതില്‍ ശിഖാര്‍ പാന്മസാല എന്നയിനം നിരോധിത പുകയില ഉത്പന്നങ്ങള്‍ കണ്ടെടുത്തു. വില്പനയ്ക്കായി കൈവശം സൂക്ഷിച്ചതാണെന്ന് ചോദ്യം ചെയ്യലില്‍ ബോധ്യപ്പെട്ടതിനേതുടര്‍ന്നാണ് അറസ്റ്റ്. എസ്എച്ച്ഒ ശ്യാം മുരളി, സിപിഒ ബൈജു എന്നിവരും പോലീസ് സംഘത്തില്‍ ഉണ്ടായിരുന്നു.

മത്സ്യവ്യാപാരത്തിലൂടെ ലാഭം വാഗ്ദാനം ചെയ്ത് 1.5 കോടിയും സ്വര്‍ണവും പണവും തട്ടിയെടുത്തു

പത്തനംതിട്ട: മത്സ്യവ്യാപാരത്തിലൂടെ ലാഭമുണ്ടാക്കാമെന്ന് വിശ്വസിപ്പിച്ച് ഒന്നരക്കോടിയിലധികം രൂപയും 166 ഗ്രാം സ്വര്‍ണവും കബളിപ്പിച്ചെടുത്ത കേസില്‍ ഒരാളെ ഇലവുംതിട്ട പോലീസ് പിടികൂടി. കേസിലെ ഒന്നാം പ്രതി മല്ലപ്പള്ളി പെരുമ്പെട്ടി ചാമക്കാലയില്‍ റമീസ് റഹ്‌മാനാണ് (30 )അറസ്റ്റിലായത്. മെഴുവേലി തുമ്പമണ്‍ നോര്‍ത്ത് ഞാവാലിക്കോട് ചക്കാലമണ്ണില്‍ ബിന്നി മാത്യുവിന്‍റെ ഭാര്യ ലീന വര്‍ഗീസിന്‍റെ (54) മൊഴിപ്രകാരം രജിസ്റ്റര്‍ ചെയ്ത കേസിലാണ് ഉടനടി ഒന്നാം പ്രതിയെ കസ്റ്റഡിയിലെടുത്തത്. 2023 ജനുവരി ഒന്നുമുതല്‍ 2025 ജൂണ്‍ വരെയുള്ള കാലയളവിലാണ് തട്ടിപ്പ് നടന്നത്. പോലീസ് ഇന്‍സ്പെക്ടര്‍ ടി. കെ. വിനോദ് കൃഷ്ണന്‍റെ നേതൃത്വത്തിലാണ് അന്വേഷണം നടക്കുന്നത്. കേസില്‍ രണ്ടാം പ്രതി ഇയാളുടെ ഭാര്യ ഷാനിമോളും മൂന്നാം പ്രതി ഇയാളുടെ പിതാവ് അബ്ദുറഹ്‌മാന്‍ കുട്ടിയുമാണ്. പെരുമ്പെട്ടി സ്വദേശി ദിലീപ് ലാലാണ് നാലാം പ്രതിയെന്നു പോലീസ് പറഞ്ഞു. 2023മുതലുള്ള കാലയളവില്‍ പണവും സ്വര്‍ണവും അടക്കം 1,68,59,581 രൂപ തട്ടിയെടുത്ത സംഘം, പണം തിരികെ നല്‍കാതെ വന്നപ്പോള്‍ സാമ്പത്തിക പ്രശ്‌നങ്ങള്‍ മൂലമുണ്ടായ മാനസിക സമ്മര്‍ദ്ദത്താല്‍ സഹിക്കവയ്യാതെ ബിന്നി ജൂണ്‍ 30 ന് രാവിലെ ജീവനൊടുക്കിയിരുന്നു. ബിസിനസിന്‍റെ പേരില്‍ 2023 ജനുവരി ഒന്ന് മുതലുള്ള കാലയളവില്‍ ഇലവുംതിട്ടയിലെ എസ്ബിഐ, കനറ എന്നീ ബാങ്കുകളിലെ ഇദ്ദേഹത്തിന്‍റെ അക്കൗണ്ടുകളില്‍ നിന്നും പത്തനംതിട്ട ഇസാഫ് ബാങ്കിലെ അക്കൗണ്ടിലൂടെയും 1,54,59,581 രൂപ പ്രതികള്‍ കബളിപ്പിച്ച് കൈക്കലാക്കി. കൂടാതെ, 166 ഗ്രാം സ്വര്‍ണവും തട്ടിയെടുത്തു. അന്വേഷണത്തിന്‍റെ ഭാഗമായി ബിന്നിയുടെ ബാങ്ക് ഇടപാടുകള്‍ സംബന്ധിച്ച രേഖകള്‍ പോലീസ് ലഭ്യമാക്കിയിരുന്നു. ഇസാഫ് ബാങ്കിലെ ബിന്നിയുടെ ഇടപാടുകള്‍ പരിശോധിച്ചപ്പോള്‍ 2023 ഫെബ്രുവരി 18 നും 2025 മാര്‍ച്ച് 22 നുമിടയില്‍ ഒന്നാംപ്രതിയുടെ ബാങ്ക് അക്കൗണ്ടിലേക്ക് 52, 18,700 രൂപ കൈമാറ്റപ്പെട്ടതായി കണ്ടെത്തി. എസ് ബിഐ അക്കൗണ്ട് വിവരങ്ങള്‍ പരിശോധിച്ചപ്പോള്‍ 99,72,211 രൂപയും ഇയാളുടെ അക്കൗണ്ടില്‍ എത്തിയതായി വ്യക്തമായി. അതേസമയം രണ്ടും മൂന്നും പ്രതികളുടെ അക്കൗണ്ടുകളിലേക്കായി എസ്ബിഐ, ഇസാഫ് എന്നീ ബാങ്ക് അക്കൗണ്ടുകളില്‍ നിന്നും 30,19,990 രൂപയും കൈമാറ്റം ചെയ്യപ്പെട്ടതായി പോലീസിന്‍റെ അന്വേഷണത്തില്‍ കണ്ടെത്തി. തുടര്‍ന്ന് ഒന്നാംപ്രതി റമീസ് റഹ്‌മാനെ കഴിഞ്ഞ രാത്രി ് കസ്റ്റഡിയിലെടുത്ത് വിശദമായി ചോദ്യം ചെയ്തു. ഇയാളുടെ കുറ്റസമ്മതമൊഴി രേഖപ്പെടുത്തിയ ശേഷം 10ന് അറസ്റ്റ് ചെയ്തു. ബിസിനസ് നഷ്ടവും സാമ്പത്തിക പ്രശ്‌നവും മൂലം മനോവിഷമത്താല്‍ ജൂണ്‍ 30 ന് രാവിലെ വീടിനു പിന്നിലെ സ്റ്റെയര്‍ കേസില്‍ പ്ലാസ്റ്റിക് കയറില്‍ ബിന്നി തൂങ്ങി മരിക്കുകയായിരുന്നു. ഇതിന് ഇലവുംതിട്ട പോലീസ് കേസ് രജിസ്റ്റര്‍ ചെയ്ത് അന്വേഷണം നടത്തിവരികയാണ്. വിശ്വാസവഞ്ചന നടത്തി തട്ടിപ്പ് നടത്തിയ കേസില്‍ മറ്റു പ്രതികള്‍ക്കായുള്ള അന്വേഷണം പോലീസ് ഊര്‍ജിതമാക്കി.

എംസിവൈഎം മാർഗംകളി ശില്പശാല

പത്തനംതിട്ട: മലങ്കര കാത്തലിക് യൂത്ത് മൂവ്മെന്‍റ് (എംസിവൈ.എം) പത്തനംതിട്ട ഭദ്രാസനത്തിന്‍റെ നേതൃത്വത്തിൽ ക്രിസ്തീയ പാരമ്പര്യ കലകളെ കൂടുതൽ പ്രോത്സാഹിപ്പിക്കുന്നതിനും, അവയോടുള്ള ആഭിമുഖ്യം പുതുതലമുറകളിൽ പകർന്നു നൽകുവാനുമായി വാഴമുട്ടം മാർ ബഹനാൻസ് മലങ്കര സുറിയാനി കത്തോലിക്കാ പള്ളിയിൽ മാർഗംകളി ശില്പശാല നടത്തി. ഭദ്രാസന ആനിമേറ്റർ സിസ്റ്റർ ജൊവാൻ എസ്ഐസി എംസിവൈഎം പതാക ഉയർത്തി. സെക്രട്ടറി അബിൻ പി. ബിജു പ്രതിജ്ഞ ചൊല്ലിക്കൊടുത്തു. ഭദ്രാസന ഡയറക്ടർ ഫാ. ജോബ് പതാലിൽ ആമുഖ സന്ദേശം നൽകി. പത്തനംതിട്ട വൈദിക ജില്ലാ വികാരി ഫാ. ജോൺസൺ പാറക്കൽ, വൈദിക ജില്ലാ ഡയറക്ടർ ഫാ. ഷെബിൻ മമ്മൂട്ടിൽ, വാഴമുട്ടം യൂണിറ്റ് ഡയറക്ടർ ഫാ. സനു തെക്കേകാവിനാൽ എന്നിവർ വിശിഷ്ടാതിഥികളായിരുന്നു. ശില്പശാലയ്ക്ക് കോട്ടയം ഹാദൂസായിൽ നിന്ന് മാർഗംകളിയിൽ പരീശീലനം നേടിയവർ നേതൃത്വം നൽകി. ഭദ്രാസനത്തിലെ വിവിധ ഇടവകകളിൽ നിന്നായി 80 ഓളം പേർ ഏകദിന പങ്കെടുത്തു. മാർഗംകളിയിലെ വിവിധ പാദങ്ങളും പൊതു നിർദ്ദേശങ്ങളും വസ്ത്രധാരണത്തിന്‍റെ ക്രമീകരണങ്ങളും പരിശിലീപ്പിച്ചു. ക്രമീകരണങ്ങൾക്ക് വാഴമുട്ടം യൂണിറ്റും, പത്തനംതിട്ട വൈദിക ജില്ലയും നേതൃത്വം നൽകി. ഭദ്രാസന പ്രസിഡന്‍റ് ബിബിൻ ഏബ്രഹാം സ്വാഗതവും ട്രഷറാർ വി.എൽ. വിശാഖ് നന്ദിയും പറഞ്ഞു.

പ്രൈവറ്റ് ബിൽഡിംഗ് കോൺട്രാക്ടർമാർ പഞ്ചദിന സത്യഗ്രഹം നടത്തും

പത്തനംതിട്ട: വിവിധ ആവശ്യങ്ങൾ ഉന്നയിച്ച് പ്രൈവറ്റ് ബിൽഡിംഗ് കോൺട്രാക്ടേഴ്സ് അസോസിയേഷൻ നേതൃത്വത്തിൽ 28 മുതൽ ഓഗസ്റ്റ് ഒന്നുവരെ സെക്രട്ടേറിയറ്റിനു മുന്നിൽ സത്യഗ്രഹസമരം സംഘടിപ്പിക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു . കെട്ടിട നിർമാണ മേഖല അതിരൂക്ഷമായ വിവിധ തൊഴിൽ പ്രശ്‌നങ്ങളെ അഭിമുഖീകരിക്കുകയാണെന്ന് ഭാരവാഹികൾ പറഞ്ഞു. പുതിയ കെട്ടിടങ്ങൾ, ഫ്ളാറ്റുകൾ, വീടുകൾ, തുടങ്ങിയവയുടെ പ്രവൃത്തികൾ ഇപ്പോൾ നടക്കുന്നില്ല. അത്യാവശ്യനിർമാണം മാത്രമാണ് നടക്കുന്നത്. നിർമാണവസ്‌തുക്കളുടെ ഇറക്കുമതി മുഴുവൻ മാഫിയകളുടെ കൈയിലാണെന്ന് അസോസിയേഷൻ കുറ്റപ്പെടുത്തി. ക്വാറികളിൽ പല രീതിയിലാണ് നിർമാണ സാമഗ്രികൾ വില്പന നടത്തുന്നത്. വില ഏകോപിപ്പിക്കാൻ നടപടികളില്ല. അനിയന്ത്രിതമായ വിലക്കയറ്റം തടയാൻ വില നിയന്ത്രണാധികാര സമിതി രൂപീകരിക്കണം. പ്രകൃതി ചൂഷണം ഒഴിവാക്കാൻ ക്വാറി ഉത്പന്നങ്ങളുടെ ഉപയോഗം കുറയ്ക്കുകയും ഇതിനു പരിഹാരമായി മണൽവാരൽ പുനരാരംഭിക്കണമെന്ന് അസോസിയേഷൻ ആവശ്യപ്പെട്ടു. കെ സ്‌മാർട്ട് പദ്ധതിയിലെ അപാകതകൾ പരിഹരിക്കണം. അപേക്ഷിച്ച ഉടനെ പെർമിറ്റ് ലഭിക്കുന്നതിലേക്ക് സോഫ്റ്റ് വെയർ പരിഷ്കരിക്കണമെന്നും സംഘടന ആവശ്യപ്പെട്ടു. പുതിയ നിർമാണ രീതിയിൽ തൊഴിലിടങ്ങളിൽ തൊഴിലാളികൾക്ക് വലിയ തോതിലുള്ള അപകടങ്ങളാണ് സംഭവിക്കുന്നത്. ഇതിനു പരിഹാരമായി സൈറ്റ് ഇൻഷ്വറൻസ് പദ്ധതി നടപ്പിലാക്കണം. കരാറുകർക്ക് ലൈസൻസ് അനുവദിക്കുന്നതിന്‍റെ കാലതാമസം ഒഴിവാക്കുകയും കുടിശികയില്ലാതെ ക്ഷേമനിധി ആനുകൂല്യങ്ങൾ വിതരണം ചെയ്യാൻ തയാറാകണമെന്നും ഭാരവാഹികൾ പറഞ്ഞു. ഇത്തരം ആവശ്യങ്ങളുന്നയിച്ചാണ് പഞ്ചദിന സത്യഗ്രഹം അസോസിയേഷൻ നടത്തുന്നതെന്ന് സംസ്ഥാന സെക്രട്ടറി ടി. വിനോദ് , ജില്ലാ പ്രസിഡന്‍റ് ഡി. മനോഹരൻ, ജില്ലാ സെക്രട്ടറി ആർ. ഷാബു, വൈസ് പ്രസിഡന്‍റ് അനിൽ പി. തോമസ് എന്നിവർ പറഞ്ഞു.

മാലിന്യ മുക്ത നവകേരളം പ്രവര്‍ത്തനം മാതൃകാപരം: മന്ത്രി

പുളിക്കീഴ്: മാലിന്യ മുക്ത നവകേരളം യാഥാർഥ്യമാക്കാനുള്ള സംസ്ഥാനത്തിന്‍റെ പ്രവര്‍ത്തനം മാതൃകാപരമാണെന്ന് മന്ത്രി റോഷി അഗസ്റ്റിൻ. പുളിക്കീഴ് ബ്ലോക്ക് പഞ്ചായത്തില്‍ ബ്ലോക്ക്തല റിസോഴ്സ് റിക്കവറി ഫെസിലിറ്റി സെന്‍റര്‍ നിര്‍മാണോദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. മാലിന്യത്തില്‍ നിന്ന് ഊര്‍ജോത്പാദനം, വളനിര്‍മാണം തുടങ്ങിയവയിലൂടെ മാറ്റം കൊണ്ടു വരാനാകും. ഹരിതകര്‍മ സേനയുടെ പ്രവര്‍ത്തനം ശ്രദ്ധേയമാണ്. വീടും പരിസരവും വൃത്തിയാക്കുന്നതുപോലെ പൊതുഇടവും സൂക്ഷിക്കണമെന്ന ബോധവത്കരണം ഉണ്ടാകണം. ജലജീവന്‍ മിഷന്‍റെ പ്രവര്‍ത്തനത്തിലൂടെ 44 ലക്ഷം ഗ്രാമീണ കുടുംബങ്ങള്‍ക്ക് കുടിവെള്ളം എത്തിച്ചു. ശേഷിക്കുന്നവര്‍ക്കും കുടിവെള്ളം ലഭ്യമാക്കും. പുളിക്കീഴ് കോലറയാറിന്‍റെ തുടര്‍സംരക്ഷണം സംബന്ധിച്ച് പഠനം നടത്താന്‍ വകുപ്പിന് നിര്‍ദ്ദേശം നല്‍കുമെന്നും മന്ത്രി പറഞ്ഞു. മാത്യു ടി. തോമസ് എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് സോമന്‍ താമരച്ചാലില്‍ പദ്ധതി വിശദീകരണം നടത്തി. ബ്ലോക്ക് പഞ്ചായത്ത് പരിധിയിലുള്ള അഞ്ച് ഗ്രാമപഞ്ചായത്തുകളില്‍ നിന്നും ഹരിതകര്‍മ സേന അംഗങ്ങള്‍ ശേഖരിക്കുന്ന അജൈവ മാലിന്യങ്ങളും പ്ലാസ്റ്റിക് പാഴ്വസ്തുക്കളും ബ്ലോക്ക് തലത്തില്‍ തരം തിരിച്ച് ബെയിലിംഗ് നടത്തി ക്ലീന്‍ കേരള കമ്പനിക്ക് നല്‍കുന്നതിനാണ് ബ്ലോക്ക് തലത്തില്‍ ആര്‍ആര്‍എഫ് സ്ഥാപിക്കുന്നത്. പുളിക്കീഴ് ബ്ലോക്ക് പഞ്ചായത്ത് പ്രസിഡന്‍റ് സി. കെ. അനു, ഗ്രാമപഞ്ചായത്ത് പ്രസിഡന്‍റുമാരായ നിഷ അശോകന്‍, റ്റി. പ്രസന്നകുമാരി, അന്നമ്മ ജോര്‍ജ്, അനുരാധ സുരേഷ്, ഏബ്രഹാം തോമസ്, ജില്ലാ പഞ്ചായത്ത് അംഗം മായ അനില്‍കുമാര്‍, ബ്ലോക്ക് പഞ്ചായത്ത് സ്ഥിരം സമിതി അംഗങ്ങളായ മറിയാമ്മ ഏബ്രഹാം, എം.ബി. അനീഷ് തുടങ്ങിയവര്‍ പങ്കെടുത്തു.

കാട്ടാനകളെ തുരത്താൻ നടപടി

റാന്നി: കാട്ടാനശല്യം രൂക്ഷമായ ജനവാസ മേഖലകളിൽ അവയെ തുരത്തി കാട്ടിലേക്ക് ഓടിക്കാൻ നടപടി സ്വീകരിക്കണമെന്ന് പ്രമോദ് നാരായൺ എംഎൽഎ റേഞ്ച് ഓഫീസറോട് ആവശ്യപ്പെട്ടു. കാട്ടാന ഇറങ്ങിയ പ്രദേശങ്ങൾ സന്ദർശിച്ച ശേഷമാണ് എംഎൽഎക്കാര്യം ആവശ്യപ്പെട്ടത്. കാട്ടാന ഇറങ്ങിയ മേഖലകളിൽ ഉദ്യോഗസ്ഥർ അഞ്ച് സംഘങ്ങളായി തിരിഞ്ഞ് നാട്ടുകാരുടെ സഹകരണത്തോടെയാണ് ആനകളെ തുരത്തുന്നതിനുള്ള നടപടികൾ ആരംഭിച്ചിരിക്കുന്നത്. വന മേഖലയോടു ചേർന്ന് കാടുപിടിച്ചു കിടക്കുന്ന സ്വകാര്യ വ്യക്തികളുടെ പുരയിടങ്ങൾ തെളിക്കുന്നതിന് അടിയന്തര നടപടി സ്വീകരിക്കുന്നതിനും എംഎൽഎ നിർദ്ദേശം നൽകി.

വിമാനയാത്രയ്ക്കിടെ ബാഗ് നഷ്ടമായി; 1.25 ലക്ഷം നഷ്ടപരിഹാരം നൽകാൻ വിധി

പത്തനംതിട്ട: വിമാനയാത്രയ്ക്കിടെ ബാഗേജ് നഷ്ടപ്പെട്ടതുമായി ബന്ധപ്പെട്ടു നൽകിയ പരാതിയിൽ വീട്ടമ്മയ്ക്കും കുടുംബത്തിനും എയർ ഇന്ത്യ എക്സ്പ്രസ് കന്പനി 1.25 ലക്ഷം രൂപ നഷ്ടപരിഹാരം നൽകണമെന്ന് ഉപഭോക്തൃ തർക്ക പരിഹാര കമ്മീഷൻ വിധിച്ചു. പന്തളം കുളനട ഉള്ളന്നൂര്‍ സദാനന്ദ വിലാസത്തില്‍ ശ്രീജയും കുടുംബവും മണാലിയിലേക്കുള്ള യാത്രയ്ക്കായി കഴിഞ്ഞ ജനുവരി മൂന്നിന് എയര്‍ ഇന്ത്യ എക്‌സ്പ്രസില്‍ ഡല്‍ഹിയിലേക്ക് യാത്ര ചെയ്തിരുന്നു. ന്യൂഡല്‍ഹിയിലേക്കുള്ള യാത്രയ്ക്കിടെ ലേഓവര്‍ ഉള്ളതിനാല്‍ വിമാനം ഭുവനേശ്വര്‍ വിമാനത്താവളത്തില്‍ ഇറങ്ങുകയും അവിടെനിന്ന് ന്യൂഡല്‍ഹിയിലേക്ക് പോകുകയുമാണുണ്ടായത്. ഭൂവനേശ്വര്‍ വിമാനത്താവളത്തിലെ ബാഗേജ് കണ്‍വെയര്‍ ബെല്‍റ്റില്‍ തങ്ങളുടെ ഒരു ബാഗ് കണ്ടയുടനെ ശ്രീജ എയര്‍ ഇന്ത്യ എക്‌സ്പ്രസ് അധികൃതരെ വിവരം അറിയിച്ചിരുന്നു. ബാഗ് സുരക്ഷിതമായി ന്യൂഡല്‍ഹിയിലെത്തുമെന്ന് ഉറപ്പു ലഭിക്കുകയും ചെയ്തു. എന്നാല്‍ ന്യൂഡല്‍ഹി വിമാനത്താവളത്തില്‍ ചെക്ക് ഔട്ട് ചെയ്തപ്പോള്‍ ഒരു ബാഗ് ലഭിച്ചിരുന്നില്ല. വിവരം എയര്‍ ഇന്ത്യ എക്‌സ്പ്രസ് അധികൃതരോടു പരാതിപ്പെട്ടെങ്കിലും പ്രശ്‌നം പരിഹരിക്കാമെന്ന് അറിയിച്ചതല്ലാതെ നടപടി ഉണ്ടായില്ല. തുടര്‍ന്നും പ്രശ്‌നപരിഹാരം സാധ്യമല്ലാതെ വന്നതോടെ 5000 രൂപ നഷ്ടപരിഹാരം നല്‍കാമെന്ന് ഹര്‍ജിക്കാരെ അറിയിക്കുകയായിരുന്നു. ബാഗില്‍ യാത്രയ്ക്കുള്ള അവശ്യമരുന്നുകളും ശീതകാല വസ്ത്രങ്ങളും യാത്രയില്‍ ഒഴിവാക്കാനാകാത്ത മറ്റു സാമഗ്രികളും ആയിരുന്നതിനാല്‍ യാത്രികര്‍ക്ക് യാത്ര ഉപേക്ഷിച്ചു മടങ്ങേണ്ടിവന്ന സാഹചര്യമാണുണ്ടായത്. വാദികൾ നല്‍കിയ പരാതിയും തെളിവുകളും സസൂക്ഷ്മം വിലയിരുത്തിയ കമ്മീഷന്‍ എതിര്‍കക്ഷികള്‍ക്ക് നോട്ടീസ് അയയ്ക്കുകയും എതിര്‍കക്ഷി ഹാജരാകാതിരുന്നതിനാല്‍ വാദികളുടെ പരാതിയിലെ സത്യാവസ്ഥ ബോധ്യപ്പെട്ട കമ്മീഷന്‍ ഒരു ലക്ഷം രൂപ നഷ്ടപരിഹാരമായും 25000 രൂപ കോടതിച്ചെലവും അനുവദിക്കുകയാണുണ്ടായത്. കമ്മീഷന്‍ പ്രസിഡന്‍റ് ബേബിച്ചന്‍ വെച്ചൂച്ചിറയും അംഗമായ നിഷാദ് തങ്കപ്പനും ചേര്‍ന്നാണ് വിധി പ്രസ്താവിച്ചത്.

വന്യമൃഗശല്യം: സ്ഥലം വിട്ടൊഴിഞ്ഞ കൊക്കാത്തോട് നിവാസികൾ നഷ്ടപരിഹാരം തേടി മനുഷ്യാവകാശ കമ്മീഷനിൽ

പത്തനംതിട്ട: വന്യമൃഗ ശല്യമുള്ള പ്രദേശത്ത് താമസിക്കുന്നവരെ സുരക്ഷിതമായ സ്ഥലത്തേക്ക് മാറ്റി പാർപ്പിക്കുന്ന സ്വയം സന്നദ്ധ സുരക്ഷാ പദ്ധതിയിൽ കൊക്കാത്തോട് വനമേഖലയിലുള്ളവർക്ക് നൽകാനുള്ള നഷ്ടപരിഹാരത്തിന്‍റെ രണ്ടും മൂന്നും ഗഡുക്കൾ ആറാഴ്ചയ്ക്കുള്ളിൽ നൽകണമെന്ന് മനുഷ്യാവകാശ കമ്മീഷൻ ചെയർപേഴ്സൺ ജസ്റ്റീസ് അലക്സാണ്ടർ തോമസ്. പ്രിൻസിപ്പൽ ചീഫ് ഫോറസ്റ്റ് കൺസർവേറ്റർക്കാണ് കമ്മീഷൻ നിർദ്ദേശം നൽകിയത്. കാട്ടുമൃഗങ്ങളുടെ ശല്യം കാരണം സ്വയം സന്നദ്ധ പുനരധിവാസ പദ്ധതി പ്രകാരം അപേക്ഷ നൽകിയവർക്ക് നഷ്ടപരിഹാരം നൽകിയില്ലെന്ന പരാതിയിലാണ് നടപടി. കോന്നി ഡിഎഫ്ഒ സമർപ്പിച്ച റിപ്പോർട്ടിൽ വന്യമൃഗ ശല്യം കാരണം സ്ഥലം വിട്ടൊഴിയുന്നതിലേക്ക് കോന്നി ഡിവിഷനിൽ 157 അപേക്ഷകളും മണ്ണാറപ്പാറ റേഞ്ചിൽ 13 അപേക്ഷകളും ഉൾപ്പെടെ 170 അപേക്ഷകൾ ലഭിച്ചതായി പറഞ്ഞു. പരാതിക്കാർ തങ്ങൾക്ക് നഷ്ടപരിഹാരത്തിന്‍റെ ആദ്യഗഡു ലഭിച്ചിട്ടുണ്ടെന്ന് കമ്മീഷനെ അറിയിച്ചു. രണ്ടും മൂന്നും ഗഡുക്കൾ ലഭിക്കാനുണ്ട്. കോന്നി നെല്ലിക്കാപാറ സ്വദേശി ജോർജ്കുട്ടി സമർപ്പിച്ച പരാതിയിലാണ് നടപടി. റീബിൽഡ് കേരളയിൽ ഉൾപ്പെടുത്തിയാണ് വനംവകുപ്പ് പദ്ധതി പ്രഖ്യാപിച്ചിരുന്നത്. ലഭിച്ച അപേക്ഷകളിൽ സംയുക്ത പരിശോധന നടത്തിയാണ് അംഗീകരിച്ചത്. കൊക്കാത്തോട് മേഖലയിൽ ലഭിച്ച അപേക്ഷകളിൽ 51 അപേക്ഷകളാണ് അംഗീകരിച്ചത്. ആദ്യഗഡു കുറെപ്പേർക്കു നൽകിയെങ്കിലും പിന്നീടുള്ള ഗഡുക്കൾക്ക് പണമില്ലെന്ന അവസ്ഥയാണ്. പതിറ്റാണ്ടുകളായി താമസിക്കുന്ന സ്ഥലത്തു കൃഷി അസാധ്യമാകുകയും വന്യമൃഗങ്ങളുടെ നിരന്തരശല്യം കാരണം ജീവനു ഭീഷണി ഉയരുകയും ചെയ്യുന്ന സാഹചര്യത്തിലാണ് സ്ഥലം വിട്ടൊഴിയാൻ തങ്ങൾ സന്നദ്ധത കാട്ടിയതെന്ന് പ്രദേശവാസികൾ പറഞ്ഞു.

വെല്ലുവിളികളെ നേരിടാൻ സഭാത്മക ചിന്തകളെ പ്രോത്സാഹിപ്പിക്കണം: ഡോ. സാമുവേൽ മാർ ഐറേനിയോസ്

പത്തനംതിട്ട: വിശ്വാസത്തിൽ അടിയുറച്ച് സഭാത്മക ചിന്തകൾ വളർത്തിക്കൊണ്ടുവരണമെന്ന് പത്തനംതിട്ട രൂപതാധ്യക്ഷൻ ഡോ. സാമുവേൽ മാർ ഐറേനിയോസ് മെത്രാപ്പോലീത്ത. മലങ്കര സുറിയാനി കത്തോലിക്കാ സഭ പത്തനംതിട്ട രൂപത മലങ്കര കാത്തലിക് മദേഴ്സ് ഫോറം സഭാ തല സമിതിയുടെ സന്ദർശനം കിഴവള്ളൂർ സെന്‍റ് പീറ്റേഴ്സ് ദേവാലയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആത്മവിശ്വാസത്തോടുകൂടി മുന്നേറുവാൻ കഴിയുന്ന അമ്മമാരാണ് കാലഘട്ടത്തിന്‍റെ ആവശ്യമെന്നും മെത്രാപ്പോലീത്ത പറഞ്ഞു. രൂപത പ്രസിഡന്‍റ് ഷീജ ഏബ്രഹാം അധ്യക്ഷത വഹിച്ചു. സഭാതല ഡയറക്ടർ ഫാ. മാത്യു അറക്കൽ, സഭാതല പ്രസിഡന്‍റ് ജിജി മത്തായി, രൂപതാ ഡയറക്ടർ ഫാ. വർഗീസ് വിളയിൽ, ഫാ. വർഗീസ് തയ്യിൽ, ഫാ. മാത്യു കുന്നുംപുറത്ത്, ഫാ. ജയിംസ് ഒഐസി, ഫാ. ജോയിസ് പുതുപ്പറമ്പിൽ, ഫാ. ജോഷ്വാ കിടങ്ങിൽ, ഫാ. മാത്യു പേഴുംമൂട്ടിൽ, സിസ്റ്റർ അനന്ദ, സിസ്റ്റർ ശാലിനി, സിസ്റ്റർ റോസി, സിസ്റ്റർ പട്രീഷ്യ, ലീലാമ്മ ബാബു, സിന ബിനു, ആനി സന്തോഷ്, ഡയാന സിനു, മേരിക്കുട്ടി ഏബ്രഹാം, സുജ ബാബു, അന്നമ്മ ചാക്കോ, ജയ്സമ്മ ജോസഫ്, മേഴ്സി എന്നിവർ പ്രസംഗിച്ചു.

ബേസിൽ ദയറായിൽ നവതി സ്തോത്രസംഗമം

പത്തനംതിട്ട: തുമ്പമൺ ഭദ്രാസന മുൻ അധ്യക്ഷൻ കുര്യാക്കോസ് മാർ ക്ലീമിസ് വലിയ മെത്രാപ്പോലീത്തായുടെ 90-ാം ജന്മദിനത്തോടനുബന്ധിച്ച് നവതി സ്തോത്ര സംഗമം പത്തനംതിട്ട ബേസിൽ അരമന ചാപ്പലിൽ നടന്നു. ഭദ്രാസനാധിപൻ ഡോ. ഏബ്രഹാം മാർ സെറാഫീം മെത്രാപ്പോലീത്ത ഉദ്ഘാടനം ചെയ്തു. ഭദ്രാസന സെക്രട്ടറി ജോൺസൺ കല്ലിട്ടതിൽ കോർ എപ്പിസ്കോപ്പ അധ്യക്ഷത വഹിച്ചു. സഭാ മുൻ വൈദിക ട്രസ്റ്റി ഫാ.ഡോ. എം. ഒ. ജോൺ , ഭദ്രാസന കൗൺസിൽ അംഗങ്ങളായ ഫാ. ബിജു മാത്യൂസ് മണ്ണാറകുളഞ്ഞി, ഫാ. ബിജു തോമസ് പറന്തൽ, പ്രഫ.ജി . ജോൺ, ഡോ. ജോർജ് വർഗീസ് കൊപ്പാറ, ഐവാൻ വകയാർ, അനി എം. ഏബ്രഹാം, സഭാ മാനേജിംഗ് കമ്മിറ്റി അംഗങ്ങളായ ഫാ. ബിജു മാത്യൂസ് പ്രക്കാനം, അനിൽ പി. വർഗീസ്, നിതിൻ മണക്കാട്ടുമണ്ണിൽ,കെ.വി. ജേക്കബ്, അജു ജോർജ്, കാതോലിക്കേറ്റ് കോളജ് പ്രിൻസിപ്പൽ ഡോ. സിന്ധു ജോൺസ്, ഭദ്രാസന വൈദിക സംഘം സെക്രട്ടറി ഫാ. വർഗീസ് ജോഷ്വാ, പി. മോഹൻ രാജ്, പ്രഫ. കെ.സി. മാണി, ജെസി വർഗീസ് എന്നിവർ പ്രസംഗിച്ചു.

വനിതാ കമ്മീഷന്‍ അദാലത്ത്: 20 പരാതിക്ക് പരിഹാരം

തിരുവല്ല: മാമ്മന്‍ മത്തായി നഗര്‍ ഹാളില്‍ നടന്ന വനിതാ കമ്മീഷന്‍ അദാലത്തില്‍ 20 പരാതികൾ തീര്‍പ്പാക്കി. ആകെ ലഭിച്ചത് 55 പരാതി. അഞ്ചെണ്ണം പോലീസ് റിപ്പോര്‍ട്ടിനും ഒരെണ്ണം ജാഗ്രതാസമിതിക്കും നല്‍കി. ജില്ലാ നിയമസഹായ വേദിയിലേക്ക് മൂന്നു പരാതി കൈമാറി. 26 പരാതി അടുത്ത അദാലത്തിലേക്ക് മാറ്റി. കമ്മീഷന്‍ അംഗം എലിസബത്ത് മാമ്മന്‍ മത്തായി നേതൃത്വം നല്‍കി. അഭിഭാഷകരായ സിനി, ‌ രേഖ, കൗണ്‍സലര്‍മാരായ ശ്രേയ ശ്രീകുമാര്‍, അഞ്ജു തോമസ്, പോലീസ് ഉദ്യോഗസ്ഥരായ ഐ. വി. ആശ, കെ. ജയ എന്നിവര്‍ പങ്കെടുത്തു.

ലയൺസ് ക്ലബ് ഭാരവാഹികളുടെ സ്ഥാനാരോഹണം നാളെ അടൂരിൽ

പത്തനംതിട്ട: കോട്ടയം, ആലപ്പുഴ, പത്തനംതിട്ട ജില്ലകളിലെ 126 ലയൺസ് ക്ലബുകൾ ഉൾപ്പെടുന്ന ലയൺസ് ഡിസ്ട്രിക്‌ട് 318 ബിയുടെ 22- മത് ഡിസ്ട്രിക്ട‌് കാബിനറ്റിന്‍റെ സ്ഥാനാരോഹണവും, സേവന പദ്ധതികളുടെ ഉദ്ഘാടനവും നാളെ വൈകുന്നേരം നാലിന് അടൂർ ഗ്രീൻ വാലി കൺവൻഷൻ സെന്‍ററിൽ നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. ഡിസ്ട്രിക്ട‌് ഗവർണർ വിന്നി ഫിലിപ്പ് അധ്യക്ഷത വഹിക്കും. ഡെപ്യൂട്ടി സ്‌പീക്കർ ചിറ്റയം ഗോപകുമാർ ഉദ്ഘാടനം നിർവഹിക്കും. മലങ്കര ഓർത്തഡോക്സ് സഭ തുന്പമൺ ഭദ്രാസനാധിപൻ ഡോ. ഏബ്രഹാം മാർ സെറാഫിം മെത്രാപ്പോലീത്തയെ ചടങ്ങിൽ ആദരിക്കും. വിവിധങ്ങളായ ക്ഷേമപദ്ധതികൾ ലയൺസ് ക്ലബ് ഏറ്റെടുത്തു നടപ്പാക്കിവരുന്നുണ്ടന്ന് ഭാരവാഹികൾ പറഞ്ഞു. സർക്കാർ സ്‌കൂളുകൾക്കുള്ള വാട്ടർ പ്യൂരിഫയർ വിതരണം, ലഹരിക്കെതിരേയുള്ള ബോധവത്കരണം, സൗജന്യ ഡയാലിസിസ് കിറ്റ് വിതരണം, പരിസ്ഥിതി സംരക്ഷണ പദ്ധതികൾ എന്നിവയുടെ ഉദ്ഘാടനവും നടക്കും. 1500 ഓളം പ്രതിനിധികൾ പങ്കെടുക്കും. ഡിസ്ട്രിക്ട് ഗവർണർ വിന്നി ഫിലിപ്പ്, മാർട്ടിൻ ഫ്രാൻസിസ്, അടൂർ സേതു, മോഹനൻ പിള്ള എന്നിവർ പത്രസമ്മേളനത്തിൽ പങ്കെടുത്തു.

വള്ളസദ്യയുടെ പേരിൽ തർക്കം; ദേവസ്വം കമ്മീഷണർ ഓഫീസിലേക്ക് പള്ളിയോട സേവാസംഘത്തിന്‍റെ മാർച്ച്

ആറന്മുള : ആചാരാനുഷ്ഠാനങ്ങള്‍ക്കുവിരുദ്ധമായി വള്ളസദ്യകള്‍ വാണിജ്യവത്കരിച്ച് പാർഥസാരഥിക്ഷേത്ര മതിലകത്തു നടത്താനുള്ള തിരുവിതാംകൂര്‍ ദേവസ്വംബോര്‍ഡിന്‍റെ തീരുമാനത്തിനെതിരേ 52 പള്ളിയോടകരകളിലെ നാഥന്മാര്‍ ആറന്മുള കിഴക്കേ നടയിലുള്ള തിരുവിതാംകൂര്‍ ദേവസ്വംബോര്‍ഡ് അസിസ്റ്റന്‍റ് കമ്മീഷണർ ഓഫീസിലേക്ക് മാര്‍ച്ച് നടത്തി. മാര്‍ച്ച് പള്ളിയോടസേവാസംഘം പ്രസിഡന്‍റ് കെ.വി. സാംബദേവന്‍ ഉദ്ഘാടനം ചെയ്തു. 250 രൂപ നിരക്കില്‍ വള്ളസദ്യകള്‍ സ്‌പെഷല്‍പാസ് മുഖേന നാളെ മുതല്‍ ക്ഷേത്രമതിലകത്ത് നടത്താന്‍ ദേവസ്വം ബോര്‍ഡ് തീരുമാനിച്ചതിന്‍റെ അടിസ്ഥാനത്തില്‍ ഇന്നലെ രാവിലെ ചേര്‍ന്ന പള്ളിയോട സേവാസംഘത്തിന്‍റെ അടിയന്തര പൊതുയോഗമാണ് ദേവസ്വം കമ്മീഷണർ ഓഫീസിലേക്ക് മാര്‍ച്ച് നടത്താന്‍ തീരുമാനിച്ചത്. ആഴ്ചയില്‍ രണ്ട് സദ്യകള്‍ ക്ഷേത്രമതിലകത്ത് നടത്താന്‍ ദേവസ്വംബോര്‍ഡിന് പള്ളിയോടസേവാസംഘം അനുവാദം നല്കിയിട്ടുണ്ടെന്നുള്ള തിരുവിതാംകൂര്‍ ദേവസ്വംബോര്‍ഡ് പ്രസിഡന്‍റിന്‍റെ പ്രസ്താവന അവാസ്തവവും അടിസ്ഥാനരഹിതവുമാണെന്ന് പള്ളിയോടസേവാസംഘം പ്രസിഡന്‍റ് പറഞ്ഞു. കെഎസ്ആര്‍ടിസിയുടെ ബജറ്റ് ടൂറിസം സെല്‍ ക്ഷേത്രത്തിനു പുറത്ത് പാഞ്ചജന്യം ഓഡിറ്റോറിയത്തില്‍ വള്ളസദ്യ നടത്തുന്നതുപോലെ നടത്താന്‍ ദേവസ്വം ബോര്‍ഡിനു കഴിയുമോയെന്ന് ദേവസ്വം ബോർഡ് പ്രസിഡന്‍റ് ആരാഞ്ഞിരുന്നതായും ചര്‍ച്ച ചെയ്തു തീരുമാനിക്കാമെന്ന് മാത്രമാണ് പറഞ്ഞിട്ടുള്ളതെന്ന് പള്ളിയോടസേവാസംഘം ഭാരവാഹികള്‍ പറഞ്ഞു. പെയ്ഡ് സദ്യകള്‍ നടത്തുന്നതിന് പള്ളിയോടസേവാസംഘത്തിന്‍റെ പൊതുയോഗത്തിന് എതിര്‍പ്പില്ലെങ്കില്‍ ക്ഷേത്രത്തിനു പുറത്ത് നടത്താമെന്ന മിനിറ്റ്‌സാണ് ദേവസ്വംബോര്‍ഡ് ബോധപൂർവം തിരുത്തിയിരിക്കുന്നതെന്നും പള്ളിയോടസേവാസംഘം കുറ്റപ്പെടുത്തി. ഇതുമായി ബന്ധപ്പെട്ട് യാതൊരുവിധ കോടതി ഉത്തരവുകളും സംഘത്തിനോ തങ്ങളുടെ അഭിഭാഷകനോ ലഭിച്ചിട്ടില്ലെന്നും സാംബദേവന്‍ പറഞ്ഞു. അടുത്ത വള്ളസദ്യ കാലയളവില്‍ കെഎസ്ആര്‍ടിസിയുടെ ബജറ്റ് ടൂറിസം സെല്‍ പദ്ധതിയും പള്ളിയോട സേവാസംഘത്തിന്‍റെ ഓണ്‍ലൈന്‍ സദ്യ ബുക്കിംഗും വേണ്ടെന്നും ഇന്നലെ കൂടിയ പൊതുയോഗം തീരുമാനിച്ചു. ഒക്ടോബര്‍ രണ്ടുവരെ ഇത്തരം സദ്യകള്‍ക്ക് സംഘം അനുവാദം നല്കിയതുകൊണ്ടാണ് ഇത്തവണ തുടരേണ്ടി വരുന്നത്. എന്നാല്‍ വള്ളസദ്യയെ കച്ചവടവത്കരിച്ചു സംസ്ഥാനത്തിന്‍റെ വിവിധ ഭാഗങ്ങളില്‍ നിന്നും ടൂർ ഓപ്പറേറ്റര്‍മാര്‍ ഓണ്‍ലൈനിലിലൂടെ സദ്യ ബുക്ക് ചെയ്തതും റദ്ദാക്കിയിട്ടുണ്ട്. ആചാരവും അനുഷ്ഠാനവും പള്ളിയോട കരക്കാരുടെ അഭിമാനവുമാണ് വലുതെന്നും യോഗം അഭിപ്രായപ്പെട്ടു. ക്ഷേത്രമതിലകത്തും പുറത്തും നടത്തുന്ന ഓരോ വള്ളസദ്യയ്ക്കും വാടക, മുതല്‍ക്കൂട്ട് ഇനത്തില്‍ 17500 രൂപയും ഓരോ സദ്യയ്ക്കും സൗജന്യമായി അഞ്ച് വള്ളസദ്യ പാസുകളും പള്ളിയോടസേവാസംഘം, ദേവസ്വംബോര്‍ഡിനു നല്കുന്നുണ്ട്. അതാത് ദിവസം നടക്കുന്ന സദ്യയുടെ 17500 രൂപ നിരക്കിലുള്ള തുക ദേവസ്വംബോര്‍ഡിന്‍റെ പേരിലുള്ള ധനലക്ഷ്മി ബാങ്കില്‍ പള്ളിയോടസേവാസംഘം അടയ്ക്കുന്നുമുണ്ട്. നാളെ ദേവസ്വംബോര്‍ഡ് ബുക്ക് ചെയ്തതായി പറയുന്ന സദ്യ ആചാരാനുഷ്ഠാനത്തോടെയുള്ള വള്ളസദ്യയായി പരിഗണിച്ച് പള്ളിയോടസേവാസംഘം സൗജന്യമായി നല്കാന്‍ തയാറാണ്. എന്നാല്‍ ഇതേനില തുടരുകയാണെങ്കില്‍ കടുത്ത പ്രതിഷേധ സമരത്തിന് പള്ളിയോടസേവാസംഘം തയാറാകുമെന്നും ഭാരവാഹികള്‍ പറഞ്ഞു.

ആർ. ആനന്ദ് ജില്ലാ പോലീസ് മേധാവിയായി ചുമതലയേറ്റു

പത്തനംതിട്ട: ജില്ലാ പോലീസ് മേധാവിയായി ആർ. ആനന്ദ് ചുമതലയേറ്റു. വി. ജി.വിനോദ് കുമാർ ക്രമസമാധാന ചുമതലയുള്ള എഐജിയായി നിയമിക്കപ്പെട്ട ഒഴിവിലാണ് നിയമനം. വി ഐ പി സുരക്ഷാചുമതലയുള്ള ഡെപ്യൂട്ടി കമ്മീഷണർ ആയിരുന്ന ആർ. ആനന്ദ് തമിഴ്നാട് ഡിണ്ടിഗൽ സ്വദേശിയാണ്. കംപ്യൂട്ടർ സയൻസ് ആൻഡ് എൻജിനിയറിംഗ് ബിരുദധാരിയായ ഇദ്ദേഹം 2016 ബാച്ച് കേരള കേഡർ ഐപിഎസ് ഉദ്യോഗസ്ഥനാണ്.

കോന്നി മെഡിക്കല്‍ കോളജിൽ ലേബർ റൂം ഓപ്പറേഷൻ തിയറ്റർ ഉദ്ഘാടനം ഇന്ന്

ജനറൽ ആശുപത്രിയിലെ ഉപകരണങ്ങൾ എത്തിച്ചു പത്തനംതിട്ട: ജനറൽ ആശുപത്രിയിൽ നിന്നുള്ള ഉപകരണങ്ങളെത്തിച്ച് കോന്നി സർക്കാർ മെഡിക്കൽ കോളജിൽ ലേബർ റൂമും ഓപ്പറേഷൻ തിയറ്ററും ഇന്ന് ഉദ്ഘാടനം ചെയ്യും. ജനറൽ ആശുപത്രിയിലെ ബി ആൻഡ് സി ബ്ലോക്കിൽ പ്രവർത്തിച്ചിരുന്ന ശസ്ത്രക്രിയ യൂണിറ്റുകളും ലേബർ റൂം ഉൾപ്പെടെയാണ് താത്കാലികമായി കോന്നി മെഡിക്കൽ കോളജിലേക്ക് മാറ്റിയത്. മെഡിക്കല്‍ കോളജില്‍ 3.5 കോടി രൂപ ചെലവില്‍ നിര്‍മിച്ച ‌ലേബർ റൂം കെട്ടിടത്തിലേക്കാണ് ഉപകരണങ്ങളെത്തിച്ചത്. ലക്ഷ്യ നിലവാരത്തിലാണ് ലേബര്‍ റും, ഓപ്പറേഷന്‍ തിയറ്റര്‍ സംവിധാനങ്ങൾ സജ്ജീകരിച്ചിരിക്കുന്നത്. 27 ലക്ഷം രൂപ ചെലവിൽ നിര്‍മിച്ച 500 ചതുരശ്ര അടി വിസ്തീര്‍ണമുള്ള എച്ച്എല്‍എല്‍ ഫാര്‍മസിയും ഇന്ന് ഉദ്ഘാടനം ചെയ്യും. രാവിലെ 10 ന് മന്ത്രി വീണാ ജോര്‍ജ് ഉദ്ഘാടനം നിര്‍വഹിക്കും. കെ.യു. ജനീഷ്‌കുമാര്‍ എംഎല്‍എ അധ്യക്ഷത വഹിക്കും. കോന്നി മെഡിക്കല്‍ കോളജില്‍ ഗൈനക്കോളജി വിഭാഗം ശക്തിപ്പെടുത്തുന്നതിന്‍റെ ഭാഗമായാണ് ലക്ഷ്യ ലേബര്‍ റൂമും ഓപ്പറേഷന്‍ തിയറ്ററും സജ്ജമാക്കുന്നതെന്ന് മന്ത്രി വീണാ ജോര്‍ജ് പറഞ്ഞു. പത്തനംതിട്ട ജനറൽ ആശുപത്രിയും കോന്നി മെഡിക്കൽ കോളജും ചേർന്ന് ഒറ്റ യൂണിറ്റായിട്ടായിരിക്കും ഇനി പ്രവർത്തിക്കുക. 27,922 ചതുരശ്ര അടി വിസ്തീര്‍ണത്തിലാണ് ലേബര്‍ റൂം. പുതിയ ഒപി വിഭാഗം, അള്‍ട്രാ സൗണ്ട് സ്‌കാനിംഗ് റൂം, ട്രയേജ് ഏരിയ, ഗൈനക് മോഡുലാര്‍ ഓപ്പറേഷന്‍ തിയറ്റര്‍, മൈനര്‍ ഓപ്പറേഷന്‍ തിയേറ്റർ, സെപ്റ്റിക് മോഡുലാര്‍ ഓപ്പറേഷന്‍ തിയേറ്റർ, രണ്ട് എല്‍ഡിആര്‍ സ്യൂട്ടുകള്‍, പ്രസവത്തിനായി എത്തുന്നവരുടെ ആദ്യ, രണ്ടാം, മൂന്നാം ഘട്ട ചികിത്സയ്ക്കുള്ള സൗകര്യങ്ങള്‍, റിക്കവറി റൂമുകള്‍, വാര്‍ഡുകൾ, ഡെമോ റൂം, എച്ച്ഡിയു, ഐസിയു, ഐസൊലേഷന്‍ യൂണിറ്റുകള്‍ എന്നിവയുണ്ട്. ലേബർറൂം സജ്ജമാകുന്നതു വരെ പത്തനംതിട്ട ജനറൽ ആശുപത്രിയിൽ ചികിത്സ തേടിവരുന്ന ഗർഭിണികൾക്ക് കോഴഞ്ചേരിയിലെ ജില്ലാ ആശുപത്രി, അടൂർ ജനറൽ ആശുപത്രി, റാന്നി താലൂക്ക് ആശുപത്രി എന്നിവിടങ്ങളിൽ പ്രസവ ചികിത്സ ലഭിക്കും. ജനറൽ ആശുപത്രിയിലെ ഗൈനക്കോളജി വിഭാഗം ഡോക്ടർമാരെയാണ് മെഡിക്കൽ കോളജിലേക്കും നിയമിച്ചിരിക്കുന്നത്. ജില്ലയില്‍ അഞ്ച് ആശുപത്രികളില്‍ കൂടി ദേശീയ ലക്ഷ്യ നിലവാരത്തിലുള്ള ലേബര്‍ റൂമുകള്‍ സജ്ജമാകുന്നു. അടൂര്‍ ജനറല്‍ ആശുപത്രിക്ക് ലക്ഷ്യ സര്‍ട്ടിഫിക്കേഷന്‍ അടുത്തിടെ ലഭിച്ചു. കോഴഞ്ചേരി ജില്ലാ ആശുപത്രിയിലും ലക്ഷ്യ ലേബര്‍ റൂമുണ്ട്. കോന്നി താലൂക്ക് ആശുപത്രി, തിരുവല്ല താലൂക്ക് ആശുപത്രി, റാന്നി താലൂക്ക് ആശുപത്രി എന്നിവിടങ്ങളില്‍ ലക്ഷ്യ നിലവാരത്തിലുള്ള ലേബര്‍ റൂമുകളുടെ നിര്‍മാണം പുരോഗമിക്കുന്നു. ഗര്‍ഭിണികളായ സ്ത്രീകള്‍ക്കും നവജാത ശിശുക്കള്‍ക്കും മികച്ച പരിചരണം ഉറപ്പാക്കാനായി അത്യാധുനിക സംവിധാനങ്ങളാണ് ലക്ഷ്യ നിലവാരത്തിലൂടെ ഉദ്ദേശിക്കുന്നത്. മെഡിക്കല്‍ കോളജുകൾ, ജില്ലാ ആശുപത്രികൾ, താലൂക്ക് ആശുപത്രികള്‍ എന്നിവയിലാണ് ലക്ഷ്യ പദ്ധതി നടപ്പിലാക്കുന്നത്. സംസ്ഥാനത്ത് ഇതേവരെ 14 ആശുപത്രികള്‍ക്ക് ലക്ഷ്യ സര്‍ട്ടിഫിക്കേഷന്‍ ലഭിച്ചു. കൂടുതല്‍ ആശുപത്രികളെ ദേശീയ നിലവാരത്തിലേക്ക് ഉയര്‍ത്തുകയാണ് ലക്ഷ്യം. ഫാര്‍മസിയില്‍ 24 മണിക്കൂറും സേവനം ലഭിക്കും. മരുന്നുകൾ, സര്‍ജിക്കല്‍ ഉപകരണങ്ങള്‍, ഇൻപ്ലാന്‍റുകള്‍ എന്നിവ 50 ശതമാനം വരെ വിലക്കുറവില്‍ ലഭ്യമാകും. ആശുപത്രിയില്‍ പ്രവേശിപ്പിച്ചിട്ടുള്ള ആരോഗ്യ ഇന്‍ഷ്വറന്‍സ് (കെഎഎസ്പി) ഉള്ള രോഗികള്‍ക്കും, മെഡിസെപ്പ്, ജെഎസ്എസ്‌കെ, ആരോഗ്യ കിരണം സര്‍ക്കാര്‍ സ്‌കീമുകളില്‍ ഉള്‍പ്പെടുന്നവര്‍ക്കും മരുന്ന് സൗജന്യമാണ്. ആന്‍റോ ആന്‍റണി എംപി, ജില്ലാ കളക്ടര്‍ എസ്. പ്രേംകൃഷ്ണൻ, മെഡിക്കല്‍ വിദ്യാഭ്യാസ ഡയറക്ടര്‍ ഡോ. വിശ്വനാഥന്‍, അരുവാപ്പുലം പഞ്ചായത്ത് വൈസ് പ്രസിഡന്‍റ് മണിയമ്മ രാമചന്ദ്രന്‍ നായര്‍ തുടങ്ങിയവര്‍ പങ്കെടുക്കും.

വിദ്യാഭ്യാസ സ്ഥാപനങ്ങൾക്ക് അവധി

പത്തനംതിട്ട: മഴ ശക്തമായി തുടരുന്ന സാഹചര്യത്തിൽ ജില്ലയിലെ അങ്കണവാടികൾ മുതൽ പ്രഫഷണൽ കോളജുകൾ വരെയുള്ള എല്ലാ വിദ്യാഭ്യാസ സ്ഥാപനങ്ങൾക്കും ഇന്ന് ജില്ലാ കളക്ടർ അവധി പ്രഖ്യാപിച്ചു. ട്യൂഷൻ സെന്‍ററുകളടക്കം പ്രവർത്തിക്കരുതെന്ന് കളക്ടർ നിർദേശിച്ചു. എന്നാൽ പൊതുപരീക്ഷകൾ, സർവകലാശാല പരീക്ഷകൾ എന്നിവയ്ക്ക് അവധി ബാധകമല്ല. ദുരിതാശ്വാസ ക്യാമ്പ് തുറന്നു തിരുവല്ല: ശക്തമായ മഴ തുടരുന്ന സാഹചര്യത്തില്‍ തിരുവല്ല കുറ്റപ്പുഴ വില്ലേജില്‍ 35-ാം നമ്പര്‍ അങ്കണവാടിയിൽ ദുരിതാശ്വാസ ക്യാന്പ് തുറന്നു. രണ്ട് കുടുംബങ്ങളിലായി മൂന്ന് പുരുഷന്‍മാരും ആറ് സ്ത്രീകളും മൂന്ന് കുട്ടികളും ക്യാമ്പിലുണ്ട്.

തിരുമൂലപുരത്ത് കൂറ്റൻ മരം വീണ് വൈദ്യതി ബന്ധം നിലച്ചു

തിരുവല്ല: ഇന്നലെ ഉണ്ടായ ശക്തമായ കാറ്റിൽ തേക്ക് മരം വൈദ്യുത പോസ്റ്റിൽ പതിച്ചതോടെ ഒരു പ്രദേശമാകെ വൈദ്യുതി നിലച്ചു. രാത്രി വൈകിയും വൈദ്യുതി വിതരണം പുനഃസ്ഥാപിക്കാനുള്ള ശ്രമത്തിലാണ് കെഎസ്ഇബി ജീവനക്കാർ. നഗരത്തിൽ ദീപാ ജംഗഷന് സമീപത്തെ കല്യാൺ സിൽക്സിന് മുന്നിൽ വർഷങ്ങളായി നിലനിന്ന ബദാം മരം കാറ്റിൽ മറിഞ്ഞ് സമീപത്തെ പാർക്ക് ചെയ്തിരുന്ന കാറിൽ പതിച്ച് കാറിന് കേടുപാടുകൾ സംഭവിച്ചു. ആർക്കും പരിക്കില്ല. ഫയർഫോഴ്സ് എത്തി മരം മുറിച്ച് നീക്കി. കാറിന് കാര്യമായ കേട് പാട് സംഭവിച്ചു. ഏറെ നേരം ഗതാഗത തടസവുമുണ്ടായി. പെരിങ്ങരയിൽ അശ്വതി രാമചന്ദ്രന്‍റെ വീടിന് മുകളിൽ കൂറ്റൻ വാകമരം വീണു. കുറ്റപ്പുഴ ആയുർവേദാശുപത്രിയുടെ ഇൻസിനറേറ്റർ തകർന്നു.

കാറ്റ് കൊടുങ്കാറ്റായി : ജില്ലയൊട്ടാകെ നാശം

പത്തനംതിട്ട: അപ്രതീക്ഷിതമായി ആഞ്ഞുവീശിയ കാറ്റിൽ ജില്ലയൊട്ടാകെ വ്യാപക നാശനഷ്ടം. ഇന്നലെ ഉച്ചകഴിഞ്ഞ് മൂന്നോടെയാണ് കാറ്റ് വീശിയത്. അല്പസമയം മാത്രമേ കാറ്റിന്‍റെ തീവ്രത നീണ്ടുനിന്നുള്ളൂവെങ്കിലും ജില്ലയിലെ എല്ലാ താലൂക്കുകളിലും നാശനഷ്ടങ്ങളുണ്ടായി. മഴയ്ക്കു മുന്നോടിയായ കാറ്റിൽ മരങ്ങൾ വ്യാപകമായി കടപുഴകി. നിരവധി വീടുകൾക്കും കെട്ടിടങ്ങൾക്കും നാശനഷ്ടമുണ്ടായി. വൈദ്യുത പോസ്റ്റുകൾ നിലംപതിച്ചും ലൈനുകൾ പൊട്ടിവീണും കെഎസ്ഇബിക്കും വൻ നഷ്ടമുണ്ടായിട്ടുണ്ട്. വൈദ്യുതി വിതരണം ഒട്ടുമിക്ക പ്രദേശങ്ങളിലും നിലച്ചിരിക്കുകയാണ്. മരങ്ങൾ കടപുഴകിയതു കാരണം പ്രധാന റോഡുകളിലടക്കം ഗതാഗതം തടസപ്പെട്ടു. വാഹനങ്ങൾക്കു മുകളിലേക്കും മരങ്ങൾ വീണു നഷ്ടങ്ങളുണ്ടായിട്ടുണ്ട്. റാന്നിയിൽ അപ്രതീക്ഷിതമായി വീശിയടിച്ച ചുഴലിക്കാറ്റിൽ റാന്നി താലൂക്കിൽ വ്യാപക നാശനഷ്ടം. ഉച്ചകഴിഞ്ഞ് 2.30ന് മഴയ്ക്കു മുന്നോടിയായി എത്തിയ കാറ്റ് ഏറെ നേരത്തേക്ക് നാടിനെ മുൾമുനയിൽ നിർത്തി. റാന്നി ടൗണിന്‍റെ ഹൃദയ ഭാഗത്തേക്ക് വാഹനങ്ങൾ എത്താനുള്ള എല്ലാ പ്രധാന റോഡുകളിലും വൻതോതിൽ മരങ്ങൾ വീണു. ടൗണിന് സമീപം അങ്ങാടി എസ്ബിഐ ബാങ്ക് പടിയിലാണ് ടൗൺ മേഖലയിൽ കാറ്റ് ഏറെ നാശം വിതച്ചത്. ബാങ്ക് കെട്ടിടത്തിനു മുന്പിൽ നിന്നിരുന്ന തേക്കു മരം കടപുഴകി റോഡിനു കുറുകെ വൈദ്യുതി ലൈനുകളിലേക്കും കേബിളുകളിലേക്കും പതിച്ചു. സമീപത്തുണ്ടായിരുന്ന വാഹന ഷോറൂമിൽ കിടന്ന കാറുകൾക്കും എറെ നാശനഷ്ടം സംഭവിച്ചിട്ടുണ്ട്. പ്രദേശത്ത് കടകൾക്കും മറ്റും കനത്ത നാശമാണ് മരത്തിന്‍റെ വീഴ്ച മൂലമുണ്ടായത്. പത്തനംതിട്ടയിൽ നിന്നും റാന്നിയിലേക്കുള്ള പിഎം റോഡിൽ ഉതിമൂട് ഭാഗത്ത് മരം വീണ് റോഡുഗതാഗതത്തെ ബാധിച്ചെങ്കിലും ഫയർ ഫോഴ്സെത്തി മുറിച്ചു നീക്കി. റാന്നി - അത്തിക്കയം റൂട്ടിൽ കരികുളത്തും അഞ്ചു കുഴിയിലും റോഡിനു കുറുകെ മരങ്ങൾ കടപുഴകി. മരങ്ങൾ വീണ് വൈദ്യുത ലൈനുകൾക്കൊപ്പം പോസ്റ്റുകളും റോഡിലേക്ക് ഒടിയുന്ന അവസ്ഥയാണ്. കക്കുടിമൺ - അത്തിക്കയം റോഡിൽ കുറ്റിയിൽ മോഹൻ രാജിന്‍റെ പടിയിൽ മരം വീണ് ലൈനുകളും പോസ്റ്റും തകർന്നു. ചെറുകോൽപ്പുഴ - റാന്നി റോഡിലും ഗതാഗത തടസമുണ്ടായി. റാന്നി - എരുമേലി റൂട്ടിൽ വനമേഖലയിലുൾപ്പെടെ നിരവധി മരങ്ങൾ റോഡിനു കുറുകെ വീണതിനാൽ ഈ റൂട്ടിലും ഗതാഗതം മുടങ്ങി. സ്കൂൾ വിടുന്നതിനു തൊട്ടു മുമ്പായിരുന്നതിനാൽ പതിവായി ബസിനു പോയിരുന്ന മുഴുൻ വിദ്യാർഥികളും മറ്റുയാത്രക്കാരും റാന്നി, ഇട്ടിയപ്പാറ ബസ് സ്റ്റാൻഡുകളിൽ കുടുങ്ങി. മരങ്ങൾ വീണു റോഡ് ഗതാഗതം തടസപ്പെട്ടതോടെ കുട്ടികൾ പലരും ഇന്നലെ കിലോമീറ്ററുകളോളം നടന്നാണ് വീടുകളിലെത്തിയത്. ഫയർഫോഴ്സ് ജീവനക്കാർ ഏറെ പണിപ്പെട്ടാണ് പ്രധാന പാതകളിലെ തടസങ്ങൾ നീക്കിയത്. വിവിധ പഞ്ചായത്തു പ്രദേശങ്ങളിലായി കോടിയിലേറെ രൂപയുടെ നാശനഷ്ടങ്ങളാണ് വൈദ്യുതി വകുപ്പിനുണ്ടായിരിക്കുന്നത്. വൈദ്യുതി പ്രതിസന്ധികൾ പരിഹരിക്കണമെങ്കിൽ ദിവസങ്ങൾ തന്നെ വേണ്ടി വരും. ഇതോടൊപ്പം കാറ്റിൽ മരം വീണ് നിരവധി വീടുകൾ പൂർണമായും ഭാഗികമായും തകർന്നിട്ടുണ്ട്. തിരുവല്ലയിൽ വീശിയടിച്ച കാറ്റിൽ തിരുവല്ലയിലും പരിസരങ്ങളിലും നിരവധി വീടുകൾക്കും കെട്ടിടങ്ങൾക്കും നാശനഷ്ടം. തിരുവല്ല നഗരസഭ , പെരിങ്ങര, നെടുമ്പ്രം പഞ്ചായത്തുകളിലായാണ് വീടുകൾക്ക് നാശമുണ്ടായത്. ശക്തമായ കാറ്റിൽ മരങ്ങൾ കടപുഴകി വീണതിനേ തുടർന്നാണ് നഷ്ടങ്ങളേറെയും. ഉച്ചകഴിഞ്ഞ് വീശിയടിച്ച കാറ്റിൽ ഏക്കർ കണക്കിനു സ്ഥലത്തെ കൃഷികളും നശിച്ചു. വൈദ്യുത ലൈനുകൾ പൊട്ടിവീണും വൻ നഷ്ടമാണ് കെഎസ്ഇബിക്ക് ഉണ്ടായിരിക്കുന്നത്. കൂറ്റൻ ആഞ്ഞിലി, തേക്ക്, പ്ലാവ് തുടങ്ങിയവ കടപുഴകി. മരച്ചീനി, ഏത്തവാഴ തുടങ്ങിയ കാർഷിക വിളകൾക്കും നാശം സംഭവിച്ചു. കാറ്റിൽ മരങ്ങൾ വൈദ്യുത ലൈനുകൾക്ക് മുകളിൽ വീണതിനേതുടർന്ന് വൈദ്യുതി വിതരണം മേഖലയിലാകെ തടസപ്പെട്ടിരിക്കുകയാണ്. രാത്രി വൈകിയും മരങ്ങൾ മുറിച്ച് നീക്കാൻ കെഎസ്ഇബി, അഗ്നി ശമനസേന ശ്രമം തുടരുകയാണ്. നിരവധി വീടുകളുടെ മേൽക്കൂരകൾ കാറ്റിൽ നഷ്ടപ്പെട്ടു. പരസ്യ ബോർഡുകളും ഷീറ്റ് മേൽക്കൂരകളും പറന്നുപോയി. നഗരത്തിലെ ഉപറോഡുകളിലെ ഗതാഗതം തടസപ്പെട്ടിരിക്കുകയാണ്. പടിഞ്ഞാറൻ മേഖലയിലെ പല വഴികളിലും തടസമുണ്ടായി. അടൂരിൽ കനത്ത മഴയും വീശി അടിച്ച കാറ്റിലും മരങ്ങൾ കടപുഴകി വീണ് അടൂർ താലൂക്കിലും വ്യാപക നാശനഷ്ടം. കെഎസ്ആർടിസി ജംഗ്ഷന് സമീപം വലിയ പഞ്ഞിമരം കാറിനും ഇരു ചക്രവാഹനങ്ങൾക്കും മുകളിലേക്ക് വീണു.കോന്നി തേക്കുംകാട്ടിൽ സന്തോഷിന്‍റെ ഉടമസ്ഥതയിലുള്ള കാറിനു മുകളിലേക്കാണ് മരം വീണത്. ജംഗ്ഷനിലെ ടൂവീലർ ഗാരേജിന്‍റെ ഷെഡിനുള്ളിൽ വച്ചിരുന്ന ആറ് ഇരുചക്ര വാഹനങ്ങൾ പൂർണമായും തകർന്നു. മരം വീഴുമ്പോൾ സമീപത്ത് നിന്ന കലഞ്ഞൂർ സ്വദേശി വൈശാഖ് പരിക്കൊന്നും ഏൽക്കാതെ അത്ഭുതകരമായി രക്ഷപെട്ടു. കോട്ടമുകൾ ടിബി ജംഗ്ഷനിൽ ഗ്രീൻ വാലിപാർക്കിന്‍റെ എതിർ വശത്ത് കോണത്ത് മൂല വടക്കേതിൽ വിജയൻ്റെ വീടിന് മുകളിലേക്ക് മരം വീണ് സാരമായ കേടുപാടുകൾ സംഭവിച്ചു. മങ്ങാട് ഗപതി ക്ഷേത്രത്തിന് സമീപം മരം വീണ് ഗതാഗതം തടസപ്പെട്ടു. അഗ്നിശമന സേന എത്തിയാണ് മരങ്ങൾ മുറിച്ച് മാറ്റിയത്. കോട്ടമുകൾ പരുത്തിപ്പാറ റോഡിലും മരം വീണു ഗതാഗത തടസമുണ്ടായി. അടൂർ ഇലക്ട്രിക്കൽ സെക്‌ഷന്‍റെ പരിധിയിൽ നിരവധി സ്ഥലങ്ങളിൽ മരം വീണ് പോസ്റ്റുകൾ ഒടിഞ്ഞു. ഉദയഗിരി ഭാഗം, ചേന്നമ്പള്ളി, കെഎസ്ആർടിസി ജംഗ്ഷനിൽ സൺ ഷൈൻ ഗ്രൗണ്ട്, വെള്ളക്കുളങ്ങര, കൊന്നമങ്കര ഭാഗങ്ങളിൽ വൈദ്യുത പോസ്റ്റുകൾ തകർന്നതോടെ വൈദ്യുതി വിതരണം താറുമാറായിരിക്കുകയാണ്. മല്ലപ്പള്ളിയിൽ മല്ലപ്പള്ളിയിലും സമീപപ്രദേശങ്ങളിലും കാറ്റിലും മഴയിലും വ്യാപക നാശനഷ്ടം. നിരവധി ഇലക്ട്രിക് പോസ്റ്റുകൾ വിവിധ ഇടങ്ങളിലായി ഒടിഞ്ഞുവൈദ്യുതി വിതരണം താറുമാറായി. കടുവാക്കുഴി, ഈട്ടിക്കൽപ്പടി,ചേലക്കപ്പടി,ഇളപ്പ്പുങ്കൽ, പുതുശേരി, പൂവൻപാറ ,പുല്ലുകുത്തി എന്നിവിടങ്ങളിൽ നിരവധി പോസ്റ്റുകൾ ഒടിയുകയും ലൈനിലേക്ക് മരം വീണ് ലൈൻ കമ്പി പൊട്ടിയും വൈദ്യുതി വിതരണം താറുമാറായി. മല്ലപ്പള്ളി സെക്‌ഷന്‍റെ പരിധിയിൽ മൂന്ന് 11 കെവി പോസ്റ്റുകളും, 12 എൽറ്റി പോസ്റ്റുകളും തകർന്നു. 35 സ്ഥലങ്ങളിൽ കമ്പി പൊട്ടിയും,40 ഓളം സ്ഥലത്ത് ലൈനിൽ മരം വീണും 25 ഓളം സ്ഥലത്ത് പോസ്റ്റ്‌ ചരിഞ്ഞും നാശനഷ്ടമുണ്ടായി. മരങ്ങൾ കടപുഴകി വീണ് നിരവധി വീടുകൾക്കും കെട്ടിടങ്ങൾക്കും നാശനഷ്ടമുണ്ടായി. ആനിക്കാട്, കോട്ടാങ്ങൽ, മല്ലപ്പള്ളി, കൊറ്റനാട്, എഴുമറ്റൂർ ഗ്രാമപഞ്ചായത്ത് പ്രദേശങ്ങളിലെല്ലാം വ്യാപകമായ നാശനഷ്ടങ്ങളാണ് ഉണ്ടായത്. കോട്ടാങ്ങൽ മേഖലയിൽ മരങ്ങൾ കടപുഴകി വീണ് ഗതാഗത തടസവും വൈദ്യുതി തകരാറുകളുമുണ്ടായി. കെട്ടിങ്ങൾക്കും വാഹനങ്ങൾക്കും മുകളിലേക്ക് വിവിധയിടങ്ങളിൽ മരങ്ങൾ കടപുഴകി. കോഴഞ്ചേരിയിൽ ഇന്നലെ ഉച്ചകഴിഞ്ഞു വീശിയടിച്ച കാറ്റിലും മഴയിലും വന്‍ നാശനഷ്ടം. കോഴഞ്ചേരി, അയിരൂര്‍, പുല്ലാട് പ്രദേശങ്ങളില്‍ കനത്ത നാശനഷ്ടമാണ് ഉണ്ടായത്. മരങ്ങള്‍ കടപുഴകി വീണതിനാല്‍ വൈദ്യുതി ലൈനുകള്‍ നിശ്ചലാവസ്ഥയിലാണ്. എംകെ റോഡിന്‍റെ പലഭാഗങ്ങളിലും മരങ്ങള്‍ വീണ് ഗതാഗത തടസംഉണ്ടായിരിക്കുകയാണ്. അഗ്നിശമനസേനയും പോലീസും നാട്ടുകാരും സംയുക്തമായാണ് രക്ഷാപ്രവര്‍ത്തനത്തിന് നേതൃത്വം നല്കിയത്. തിരുവോണത്തോണി യാത്രയ്ക്കായി എത്തുന്ന മങ്ങാട്ട് ഭട്ടതിരി ഉത്രാടം നാൾ വിശ്രമിക്കുന്ന അയിരൂർ മഠത്തിന്‍റെ ശ്രീകോവിൽ മരം വീണു തകർന്നു. കോഴഞ്ചേരി തെക്കേമലയിലും പരിസരങ്ങളിലും വ്യാപകമായി മരങ്ങൾ കടപുഴകി. ചെങ്ങന്നൂർ, പന്തളം, ഇലവുംതിട്ട റോഡുകളിൽ പലയിടങ്ങളിലും ഗതാഗതം തടസപ്പെട്ടു. കോന്നിയിൽ കോന്നിയിൽ ശക്തമായ കാറ്റിലും മഴയിലും വ്യാപക നാശനഷ്ടം. കോന്നി മുരിങ്ങമംഗലം ക്ഷേത്രത്തിന് സമീപം സ്വകാര്യ വ്യക്തിയുടെ വീട്ടുമുറ്റത്തെ തേക്ക് പിഴുത് വീണ് കോന്നി വെട്ടൂർ - കുമ്പഴ റോഡിലെ ഗതാഗതം മണിക്കൂറുകളോളം തടസപ്പെട്ടു. സംഭവത്തിൽ മൂന്ന് ഇലക്ട്രിക് പോസ്റ്റുകൾ ഒടിഞ്ഞു. വാഹനങ്ങൾ പയ്യനാമൺ - ആമക്കുന്ന് റോഡ് വഴി തിരിച്ചു വിട്ടാണ് ഗതാഗതം നിയന്ത്രിച്ചത്. കോന്നി രാമകൃഷ്ണ വിലാസം ഉത്തമൻ നായരുടെ വീടിന് മുകളിലേക്ക് തേക്ക് മരം ഒടിഞ്ഞു വീണ് നാശനഷ്ടം ഉണ്ടായി. ഉത്തമൻ നായരും ഭാര്യ സരോജിനിയും അടുത്ത മുറിയിൽ ടിവി കണ്ടുകൊണ്ടിരുന്നതിനാൽ പരിക്കേൽക്കാതെ രക്ഷപ്പെട്ടു. ചിറ്റാറിൽ കനത്ത മഴയിൽ വീടിന്‍റെ സംരക്ഷണ ഭിത്തി തകർന്നു. അട്ടച്ചാക്കൽ ആർ എസ് ഭവൻ രമണന്റെ വീടിന് മുകളിൽ പുളിമരം വീണ് വീടിന് ഭാഗിക നാശനഷ്ടം സംഭവിച്ചു. കോന്നി വില്ലേജിൽ ചൂരപ്ലാമൂട്ടിൽ അച്ചൻകുഞ്ഞിന്‍റെ വീടിന് മുകളിലേക്ക് മരം വീണു. സീതത്തോട് മൂന്ന്കല്ല് തട്ടേകാട്ടിൽ സുരേഷിന്‍റെ വീടിന് മുകളിൽ മരം വീണ് നാശനഷ്ടം നേരിട്ടു. തേക്കുതോട് ഏഴാം തല കരിങ്ങഴ വീട്ടിൽ വിജയന്‍റെ വീടിന് മുകളിൽ മരം വീണ് ഭാഗിക നാശനഷ്ടം ഉണ്ടായി. ഇളകൊള്ളൂർ കാഞ്ഞിരവിളയിൽ ശ്രീകുമാറിന്‍റെ വീടിന് മുകളിലേക്കും മരം വീണ് നാശം നേരിട്ടു. ചുങ്കപ്പാറയിൽ കോട്ടാങ്ങൽ ഗ്രാമ പഞ്ചായത്ത് പ്രദേശങ്ങളായ നിർമല പുരം, മാരംകുളം, ചുങ്കപ്പാറ, തോട്ടത്തുംങ്കുഴി, കോട്ടാങ്ങൽ , വഞ്ചികപ്പാറ, കുളത്തൂർമൂഴി, വായ്പൂര് പ്രദേശങ്ങളിൽ കാറ്റിലും മഴയിലും നിരവധി വീടുകൾക്കും സ്ഥാപനങ്ങൾക്കും കേടുപാടുകൾ സംഭവിച്ചു. ചുങ്കപ്പാറയിൽ കാറ്റിൽ മരങ്ങൾ ഒടിഞ്ഞു വീണ് വീടുകൾ , വ്യാപാരസ്ഥാപനങ്ങൾ എന്നിവയ്ക്ക് നാശനഷ്ടമുണ്ടായി. വൈദ്യുത ലൈനുകളും പോസ്റ്റുകളും തകർന്നതോടെ വൈദ്യുതി വിതരണം താറുമാറായി. ചുങ്കപ്പാറ തുണ്ടു മുറിയിൽ അസീസിന്‍റെ വീട് മരം വീണ് തകർന്നു. കാറ്റിനിടെ മരങ്ങൾ കടപുഴകി വീണ് പ്രധാന റോഡുകളിൽ അടക്കം ഗതാഗതം മുടങ്ങി.

വിശാലതയിൽ കണ്ടെത്തിയ ആത്മീയതയുടെ പച്ചപ്പ് : മാർ ക്ലീമിസ് വലിയ മെത്രാപ്പോലീത്തയ്ക്കു നവതി

ഡോ. ജോർജ് വർഗീസ് കൊപ്പാറ (തുന്പമൺ ഭദ്രാസന കൗൺസിൽ മെംബർ ) മലങ്കര ഓർത്തഡോക്സ് സുറിയാനി സഭയുടെ വലിയ മെത്രാപ്പോലീത്ത കുര്യാക്കോസ് മാർ ക്ലീമിസിന് നവതിയുടെ നിറവ്. 1936 ജൂലൈ 26നു ജനിച്ച അദ്ദേഹത്തിന്‍റെ 90 ാം ജന്മദിനം നാളെയാണ്. കോയിപ്രം കൂർത്തമല നെല്ലിക്കൽ കുടുംബത്തിലാണ് ജനനം. സൃഷ്ടി മുഴുവൻ ദൈവികദാനമെന്നു വിശേഷിപ്പിക്കുന്ന വലിയ ഇടയന്‍റെ പിറന്നാൾ ദിനം താൻ തന്നെ കരുണയുടെ കരങ്ങൾ നീട്ടിക്കൊടുത്തവർക്കൊപ്പമായിരിക്കും. വെച്ചൂച്ചിറയിലെ മാർ ബസേലിയോസ് ഗ്രീഗോറിയോസ് മേഴ്സി ഹോമിലെ താമസക്കാർക്കൊപ്പം നാളെ ഉച്ചമുതൽ ചെലവഴിക്കാനാണ് തീരുമാനം. ജന്മനാടായ കൂർത്തമലയിലെ മാർത്തോമ്മ ഇടവകയുടെ ജൂബിലി പരിപാടികളിൽ പങ്കെടുത്തശേഷം മാരാമൺ സമഷ്ടിയിലും കുറച്ചു സമയം ഉണ്ടാകും. ഇന്ന് പത്തനംതിട്ട ബേസിൽ ദയറായിൽ തുന്പമൺ ഭദ്രാസന കൗൺസിലും ആത്മീയ സംഘടനാ ഭാരവാഹികളും ചേർന്ന് ക്ലീമിസ് വലിയ മെത്രാപ്പോലീത്തയെ ആദരിക്കും. പ്രകൃതിയിലെ ജീവജാലങ്ങളും സസ്യലതാദികളും സമസൃഷ്ടമെന്നു വിശ്വസിക്കുന്ന വലിയ ഇടയനാണ് മാർ ക്ലീമിസ് മെത്രാപ്പോലീത്ത. ഓർത്തഡോക്സ് സഭയുടെ സുൽത്താൻ ബത്തേരി ഭദ്രാസനാധിപനായി ശുശ്രൂഷ ചെയ്ത മെത്രാപ്പോലീത്ത അവിടെനിന്ന് തുന്പമൺ ഭദ്രാസന ചുമതലയേൽക്കാൻ പത്തനംതിട്ടയിലേക്കു വന്നത് ഒരു ലോറി നിറയെ വിവിധയിനം പശുക്കളുമായിട്ടാണ്. ദൈവജനത്തെയെന്നപോലെ പ്രകൃതിയെയും ജീവജാലങ്ങളെയും സ്നേഹിക്കുക എന്ന വലിയ സന്ദേശത്തിന്‍റെ പ്രഘോഷണമായിരുന്നു ആ വരവ്. പത്തനംതിട്ടയിൽ ഉള്ളപ്പോൾ പുലർച്ചെ അഞ്ചിന് എഴുന്നേറ്റ് തൊഴുത്തിലേക്ക് പോകുന്ന മെത്രാനച്ചനെ ഒപ്പമുണ്ടായിരുന്നവർക്ക് മറക്കാനാകുന്നില്ല. ഓരോ പശുവിനെയും പേരു ചൊല്ലി വിളിച്ചു തലോടും. അതിനുശേഷം സ്വന്തമായുള്ള പച്ചക്കറി തോട്ടത്തിലേക്കൊരു യാത്ര. ശുദ്ധമായ പശുവിൻ പാൽ തേടി എത്തുന്നവരോടു രോഗങ്ങൾ അകറ്റാൻ പ്രകൃതിയെ പ്രണയിക്കാൻ ഉപദേശം. ശുദ്ധമായ മനസോടെ ശുദ്ധവായു ആവോളം ശ്വസിച്ചു തുടങ്ങുന്ന ഓരോ ദിവസവും അദ്ദേഹത്തിനു പുതിയ അനുഭവങ്ങളായി മാറി. പിന്നാലെ പ്രിയപ്പെട്ട അരുമകൾക്കായി അദ്ദേഹം പന്പയുടെ തീരത്ത് വിശാലമായ പച്ചപ്പ് കണ്ടെത്തി. അങ്ങനെയാണ് സമഷ്ടി എന്ന പേരിൽ മാരാമണ്ണിൽ പുതിയ ഒരു സ്ഥാപനവും കൃഷിയിടവുമെല്ലാം വരുന്നത്. വിശാലതയിൽ ആത്മീയതയുടെ പച്ചപ്പ് കണ്ടെത്തിയ ശ്രേഷ്ഠാചാര്യന്‍റെ മനസ് വേദനിച്ച സംഭവമാണ് 2018ലെ മഹാപ്രളയം. കോട്ടയത്ത് സഭയുടെ അടിയന്തര മീറ്റിംഗിൽ പങ്കെടുത്ത് തന്‍റെ പ്രിയപ്പെട്ട ഇടമായ സമഷ്ടിയിലേക്ക് വരുന്പോഴേക്കും വെള്ളം കയറിയിരുന്നു. പന്പയുടെ തീരം മുഴുവൻ മുങ്ങി. പക്ഷി മൃഗാദികളെയും സസ്യങ്ങളെയും ഓർത്ത് വേവലാതിപ്പെട്ടു. പരിചിതരായവരെയൊക്കെ വിളിച്ച് സഹായം തേടി. സമഷ്ടിയിലെ കെട്ടിടത്തിനു മുകളിലേക്ക് പശുക്കളെയും ആടിനെയും ഒക്കെ മാറ്റി. പിന്നീട് ഇവയെ സുരക്ഷിത ഇടങ്ങളിലേക്ക് കൊണ്ടുപോയി. പക്ഷേ പച്ചക്കറിയും കാർഷികവിളകളും സംരക്ഷിക്കാൻ കഴിയാതെ വന്നപ്പോൾ അദ്ദേഹത്തിന്‍റെ മനസ് നൊന്തു. 1989 ൽ പത്തനംതിട്ടയിൽ കൂടിയ മലങ്കര സുറിയാനി ക്രിസ്ത്യാനി അസോസിയേഷനിലാണ് ഫാ.പി.എം. കുര്യാക്കോസിനെ മെത്രാപ്പോലീത്ത സ്ഥാനത്തേക്ക് തെരഞ്ഞെടുത്തത്. അതുവരെ പത്തനംതിട്ട കാതോലിക്കേറ്റ് കോളജിലെ ബോട്ടണി അധ്യപകനായിരുന്നു കുര്യാക്കോസ് അച്ചൻ. ദൈവഹിതത്തിൽ പൂർണമായി വിശ്വസിക്കുന്നുവെന്നായിരുന്നു അദ്ദേഹത്തിന്‍റെ പക്ഷം. തനിക്കായി ദൈവംകരുതിയിട്ടുള്ളത് ആർക്കും തട്ടിക്കൊണ്ടുപോകാൻ കഴിയില്ലായെന്നതാണ് ജീവിതം നൽകിയ പാഠമെന്ന് ക്ലീമിസ് തിരുമേനി പറയും. 1991ൽ മാർ ക്ലീമിസ് എന്ന പേരിൽ മെത്രാപ്പോലീത്തയായ അദ്ദേഹം ആദ്യം നിയോഗിക്കപ്പെട്ടത് പുതിയ ഭദ്രാസനമായ സുൽത്താൻ ബത്തേരിയിലേക്കാണ്. ഒന്നുമില്ലായ്മയിൽനിന്ന് ഒരു ഭദ്രാസനം കെട്ടിപ്പടുത്തു. 2009 മാർച്ചിലാണ് ബത്തേരിയിൽ നിന്നു പത്തനംതിട്ടയിലേക്കു മാറ്റപ്പെട്ടത്. പ്രഗത്ഭരായ തന്‍റെ മുൻഗാമികളിൽ ഏറെപ്പേരെയും നേരിട്ടു മനസിലാക്കിയിരുന്ന ക്ലീമിസ് മെത്രാപ്പോലീത്ത അതേവഴിയിൽ ഭദ്രാസനത്തെ നയിച്ചു. കരുണയുടെ പുതിയ പാതകൾ തുറന്ന് നിരവധി സ്ഥാപനങ്ങൾ കുറഞ്ഞ ഒരു കാലയളവുകൊണ്ട് സ്ഥാപിച്ചു. നവതി ആഘോഷിക്കുന്പോൾ മാർ ക്ലീമിസ് വലിയ മെത്രാപ്പോലീത്തയ്ക്ക് അഭിമാനത്തോടെ പറയാനാകുന്നതും ഈ സ്ഥാപനങ്ങളെക്കുറിച്ചാണ്. തുന്പമൺ ഭദ്രാസനത്തിനു കീഴിൽ ഇവയെല്ലാം നല്ലനിലയിൽ പ്രവർത്തിക്കുന്നു. സമ്പാദ്യം മുഴുവൻ അശരണർക്കു നീക്കിവച്ച തിരുമേനി വെച്ചൂച്ചിറയിൽ തന്‍റെ സ്വന്തം സ്ഥലത്ത് ആരോരും ഇല്ലാത്ത വയോധികരെ സംരക്ഷിക്കുന്നതിനുവേണ്ടി വർഷങ്ങൾക്കു മുന്പേ തുടങ്ങിയതാണ് മേഴ്‌സി ഹോം. ഇപ്പോൾ അവിടെ 120 ൽ പരം അന്തേവാസികളുണ്ട്. സിസ്റ്റർ തബീഥയുടെ നേതൃത്വത്തിലാണ് അവരെ സംരക്ഷിച്ചുവരുന്നത്. സമൂഹത്തെ കാർന്നു തിന്നുന്ന കാൻസർ, വൃക്ക, മസ്തിഷ്ക രോഗികൾക്കു മെഡിക്കൽ സഹായവും ചികിത്സയും വീടുകളിൽ എത്തിച്ചു നൽകുന്ന പാലിയേറ്റീവ് മൊബൈൽ യൂണിറ്റ് അദ്ദേഹത്തിന്‍റെ കാഴ്ചപ്പാടിൽ തുടങ്ങിയതാണ്. കോവിഡ് കാലത്ത് ഓക്സിജനുവേണ്ടി ആളുകൾ കാത്തിരുന്നപ്പോൾ പാലിയേറ്റീവ് യൂണിറ്റിന്‍റെ ഡയറക്ടർ ഫാ. ഗബ്രിയേൽ ജോസഫിന്‍റെ നേതൃത്വത്തിൽ നടത്തിയ ഇടപെടലുകൾ മാർ ക്ലീമിസ് മെത്രാപ്പോലീത്തയുടെ ദീർഘവീക്ഷണം മൂലമായിരുന്നു. സമൂഹത്തിന്‍റെയും സഭയുടെയും നന്മ മാത്രം ആഗ്രഹിക്കുന്ന മെത്രാപ്പോലീത്തയ്ക്ക് അധികാരത്തോടും ഭ്രമമുണ്ടായില്ല. മലങ്കര ഓർത്തഡോക്സ് സഭയുടെ കാതോലിക്കയായിരുന്ന ബസേലിയോസ് മാർത്തോമ്മ പൗലോസ് ദ്വിതീയൻ ബാവ കാലം ചെയ്തപ്പോൾ സഭയ്ക്കു നേതൃത്വം നൽകാൻ സീനിയർ മെത്രാപ്പോലീത്തയെന്ന നിലയിൽ കുര്യാക്കോസ് മാർ ക്ലീമിസ് നിയോഗിക്കപ്പെട്ടു. തന്നിൽ സഭ അർപ്പിച്ച വിശ്വാസം കൃത്യമായി നിറവേറ്റി പുതിയ കാതോലിക്ക ബാവയെ തെരഞ്ഞെടുക്കുന്നതിലും അഭിഷിക്തനാക്കുന്നതിലും മുഖ്യപങ്ക് നിർവഹിച്ച് ക്ലീമിസ് തിരുമേനി തന്‍റെ ദൗത്യം പൂർത്തിയാക്കി മടങ്ങുന്നതാണ് കണ്ടത്. പിന്നീട് തുന്പമൺ ഭദ്രാസന ചുമതലയും തന്‍റെ പിൻഗാമിയായി എത്തിയ ഏബ്രഹാം മാർ സെറാഫിം മെത്രാപ്പോലീത്തയെ ഏല്പിച്ച് താൻ ഏറെ ഇഷ്ടപ്പെടുന്ന സമഷ്ടിയിലേക്ക് അദ്ദേഹം മാറി. സഭയുടെ ചരിത്രത്തിൽ ഇതാദ്യമായി വലിയ മെത്രാപ്പോലീത്ത സ്ഥാനം എപ്പിസ്കാപ്പൽ സുന്നഹദോസ് അദ്ദേഹത്തിനു നൽകി. സഭയുടെ പ്രതിസന്ധി ഘട്ടത്തിൽ സമചിത്തതയോടെ സഭാ നൗകയെ ഏകദിശയിലേക്കു നയിക്കാൻ ദൈവം തന്ന അവസരത്തെ തിരുമേനി നന്ദിയോടെയാണ് ഓർക്കുന്നത്. സഭയുടെ ഭിത്തിയെ ബലവത്താക്കാൻ എനിക്കു പിന്നാലെ വരുന്നവനാണ് എന്നേക്കാളും ശ്രേഷ്ഠൻ എന്നു ലോകത്തോട് ഉറക്കെ വിളിച്ചു പറഞ്ഞ തിരുമേനി ലോകത്തുതന്നെ അവശഷിക്കുന്ന അപൂർവ ജെനോസോമിൽപെട്ട ഒന്നാണെന്നു പറയാം. ദൈവം നൽകുന്ന ആയുസ്‌ നന്മ ചെയ്യാനുള്ളതാണെന്ന ബോധ്യമുണ്ടാകണം. തിന്മഒഴിവാക്കണം. വിവേകത്തോടും ദൈവാശ്രയ ബോധത്തോടും കൂടി മറ്റുള്ളവർക്കു നന്മ ചെയ്യുക എന്നതാണ് നവതി ആഘോഷിക്കുന്ന വലിയ മെത്രാപ്പോലീത്തയ്ക്കു വിശ്വാസികൾക്ക് നൽകാനുള്ള സന്ദേശം.

പഞ്ചായത്ത് വോട്ടർപട്ടികയിൽ മരിച്ചവരുടെ നീണ്ട നിര

പത്തനംതിട്ട: തദ്ദേശസ്ഥാപന വോട്ടർപട്ടികയിൽ വ്യാപക ക്രമക്കേടുകളെന്ന് ആരോപണം. വർഷങ്ങൾക്കു മുന്പ് മരണപ്പെട്ടവരും സ്ഥലംമാറ്റപ്പെട്ടവരുമൊക്കെ പട്ടികയിൽ ഇടം തേടിയിട്ടുണ്ട്. ഇത്തരത്തിൽ വോട്ട് വിനിയോഗിക്കാനാകാത്തവരെ ഉൾപ്പെടുത്തി തയാറാക്കിയ പട്ടിക ദുരൂഹമാണെന്ന ആക്ഷേപവുമായി യുഡിഎഫ് രംഗത്തെത്തി. ഇരട്ട വോട്ടുകളും വ്യാപകമായി പട്ടികയിലുണ്ട്. മരിച്ചവരെ ഒഴിവാക്കി പട്ടിക നൽകിയെങ്കിലും പലയിടത്തും ഇത് ഒഴിവാക്കിയിട്ടില്ല. കഴിഞ്ഞദിവസം പ്രസിദ്ധീകരിച്ച പട്ടികയെ സംബന്ധിച്ച ആക്ഷേപങ്ങൾ സ്വീകരിച്ചുവരികയാണ്. അന്തിമപട്ടിക ഓഗസ്റ്റ് 30 ഓടെയാണ് പുറത്തിറക്കുന്നത്.

ബിലീവേഴ്സ് ആശുപത്രിയിൽ ശ്വാസകോശ മാറ്റിവയ്ക്കൽ ശസ്ത്രക്രിയാ സൗകര്യങ്ങൾ

പത്തനംതിട്ട: ശ്വാസകോശ കൈമാറ്റ ശസ്ത്രക്രിയ ഇനി തിരുവല്ല ബിലീവേഴ്‌സ് ചർച്ച് മെഡിക്കൽ കോളജിലും. ഹൈദരാബാദ് യശോദ ആശുപത്രിയുമായി സഹകരിച്ചാണ് ബിലീവേഴ്‌സ് ആശുപത്രിയുടെ പൾമണോളജി വിഭാഗം ഇതു നടപ്പിലാക്കുന്നത്. ശ്വാസകോശ മാറ്റിവയ്ക്കൽ ശസ്ത്രക്രിയയ്ക്കു വേണ്ട സൗകര്യങ്ങൾ നാട്ടിൽ ലഭ്യമാക്കുവാൻ കഴിഞ്ഞാൽ അനവധി രോഗികൾക്ക് ഇതൊരു ആശ്വാസമായി മാറുമെന്ന് ആശുപത്രി അധികൃതർ പത്രസമ്മേളനത്തിൽ പറഞ്ഞു. താരതമ്യേന ശസ്ത്രക്രിയയുടെ ചെലവ് കുറയ്ക്കുകയാണ് ലക്ഷ്യം. സർക്കാർ സബ്സിഡിയും ഇക്കാര്യത്തിലുണ്ടാകണം. ശ്വാസകോശ മാറ്റിവയ്ക്കൽ ശസ്ത്രക്രിയയ്ക്ക് അനുമതിയുള്ള ആശുപത്രികളുണ്ടെങ്കിലും വളരെകുറച്ച് ശസ്ത്രക്രിയകൾ മാത്രമേ നടന്നിട്ടുള്ളൂ. ശ്വാസകോശം മാറ്റിവയ്ക്കണമെങ്കിൽ ധാരാളം മുന്നൊരുക്കങ്ങളും ശസ്ത്രക്രിയയ്ക്ക് ശേഷം പലവിധമായ തുടർപരിചര ണങ്ങളും ആവശ്യമാണ്. കുറഞ്ഞ സമയപരിധിക്കുള്ളിൽ ശ്വാസകോശം എടുക്കുകയും മറ്റൊരാളിലേക്ക് മാറ്റുകയും വേണം. 60 വയസിൽ താഴെയുള്ളവർക്കു മാത്രമേ ശ്വാസകോശം മാറ്റിവയ്ക്കൽ ഫലപ്രദമാകുകയുള്ളൂ. ശ്വാസകോശം നല്കുന്നവർ ചെറുപ്പക്കാരായിരിക്കുകയും വേണം. ശ്വാസകോശ രോഗങ്ങൾ മൂലം നിരവധി ചെറുപ്പക്കാർ ബുദ്ധിമുട്ടനുഭവിക്കുന്ന സാഹചര്യത്തിലാണ് ഇത്തരമൊരു സംരംഭം ബിലീവേഴ്സ് ആശുപത്രിയിൽ തുറക്കാൻ തീരുമാനിച്ചതെന്ന് പൾമണോളജി വിഭാഗം മേധാവി ഡോ. ലൂക്ക് മാത്യു പറഞ്ഞു. ശസ്ത്രക്രിയയുടെ പ്രാരംഭ പ്രവർത്തനങ്ങളുടെ ഉദ്ഘാടനം ഇന്ന് രണ്ടിന് ഹൈദരാബാദ് യശോദ ആശുപത്രി സിഇ ഒ ഡോ. ജി. വിജയകുമാർ നിർവഹിക്കും. ബിലീവേഴ്‌സ് ആശുപത്രി മെഡിക്കൽ സൂപ്രണ്ടും ഓങ്കോളജി വിഭാഗം മേധാവിയുമായ ഡോ. ജോംസി ജോർജ്, സീനിയർ കൺസൾട്ടന്‍റ് ഡോ. അനന്തു ജോസഫ്, മീഡിയ കോ ഓർഡിനേറ്റർ മേഘ രാധാക്യഷ്ണൻ എന്നിവരും പത്രസമ്മേളനത്തിൽ പങ്കെടുത്തു.

വോട്ടിംഗ് മെഷീനുകളുടെ ആദ്യഘട്ട പരിശോധന ഓഗസ്റ്റ് ഒന്നിന്

പത്തനംതിട്ട: തദ്ദേശ തെരഞ്ഞെടുപ്പിന് മുന്നോടിയായുള്ള ഇലക്ട്രോണിക് വോട്ടിംഗ് മെഷീൻ ( ഇവിഎം) കളുടെ ആദ്യഘട്ട പരിശോധന പത്തനംതിട്ട ജില്ലയിൽ ഓഗസ്റ്റ് ഒന്നിന് ആരംഭിക്കും. 20 വരെയാണ് പരിശോധന. സംസ്ഥാനത്ത് ഇന്ന് ആരംഭിക്കുന്ന പരിശോധനയിൽ 14 ജില്ലകളിലായി 51551 കൺട്രോൾ യൂണിറ്റുകളും 139053 ബാലറ്റ് യൂണിറ്റുകളും പരിശോധിക്കും. പൊതുമേഖലാ സ്ഥാപനമായ ഇസിഐഎൽ നിയോഗിക്കുന്ന രണ്ട് എൻജിനിയർമാരുടെ നേതൃത്വത്തിൽ ആയിരിക്കും പരിശോധന.

തദ്ദേശ തെരഞ്ഞെടുപ്പ് അട്ടിമറിക്കാൻ നീക്കമെന്ന് ഡിസിസി

പത്തനംതിട്ട: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പിന് മുന്നോടിയായിട്ടുള്ള വോട്ടർപട്ടിക പ്രഖ്യാപിച്ച തീയതിയിൽ ലഭ്യമാക്കാതെ ഭരണസ്വാധീനം ഉപയോഗിച്ച് സിപിഎം നേതാക്കൾക്ക് ചോർത്തി നല്കി തെരഞ്ഞെടുപ്പ് അട്ടിമറിക്കാൻ നീക്കം ആരംഭിച്ചതായും ജില്ലാ കോൺഗ്രസ് കമ്മിറ്റി നേതൃയോഗം കുറ്റപ്പെടുത്തി. ജില്ലാ പഞ്ചായത്ത് ഡിവിഷനുകൾ തെരഞ്ഞെടുപ്പ് കമ്മീഷൻ നിർദ്ദേശങ്ങൾക്കും മാനദണ്ഡങ്ങൾക്കും വിരുദ്ധമായി സിപിഎം നേതാക്കളുടെ ഇംഗിതത്തിനു വഴങ്ങി പുനഃക്രമീകരിച്ചു. വോട്ടമാരെ വെട്ടി നീക്കിയും വാർഡുകളുടേയും ഡിവിഷനുകളുടേയും സ്വാഭാവിക അതിരുകൾ മാറ്റിമറിച്ചും തെരഞ്ഞെടുപ്പ് അട്ടിമറിക്കാനാണ് ശ്രമിക്കുന്നത്. എൽഡിഎഫ് സർക്കാരിന്‍റെ ജനദ്രോഹ ഭരണം മൂലമുള്ള ഭരണ വിരുദ്ധ വികാരം തദ്ദേശ തെരഞ്ഞെടുപ്പിൽ തിരിച്ചടിയാകുമെന്ന ഭയം മൂലം ഏത് മാർഗം ഉപയോഗിച്ചും ഭരണം നേടുവാൻ നടത്തുന്ന ശ്രമം വിലപ്പോവില്ലെന്ന് യോഗം മുന്നറിയിപ്പ് നല്കി. കെപിസിസി ജനറൽ സെക്രട്ടറി എം. എം. നസീർ യോഗം ഉദ്ഘാടനം ചെയ്തു. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ അധ്യക്ഷത വഹിച്ചു. കെപിസിസി ജനറൽ സെക്രട്ടറി . പഴകുളം മധു, മുൻ എംഎൽഎ മാലേത്ത് സരളാദേവി, കെപിസിസി നിർവാഹക സമിതി അംഗം ജോർജ് മാമ്മൻ കൊണ്ടൂർ, കെപിസിസി സെക്രട്ടറി അനീഷ് വരിക്കണ്ണാമല, ഡിസിസി ഭാരവാഹികളായ റോബിൻ പീറ്റർ, എ. സുരേഷ് കുമാർ, വെട്ടൂർ ജ്യോതി പ്രസാദ്, അനിൽ തോമസ്, സാമുവൽ കിഴക്കുപുറം, ടി. കെ. സാജു, റെജി തോമസ്, കെ. ജാസിംകുട്ടി, കാട്ടൂർ അബ്ദുൾ സലാം, സജി കൊട്ടക്കാട്, ജോൺസൺ വിളവിനാൽ, ഡി. എൻ. തൃദീപ്, സതീഷ് കെ പണിക്കർ, ലാലു ജോൺ, എസ്. വി. പ്രസന്നകുമാർ, ഏഴംകുളം അജു, ഷാം കുരുവിള തുടങ്ങിയവർ പ്രസംഗിച്ചു.

ജില്ലാ പഞ്ചായത്ത് ഡിവിഷൻ: കരട് നിർദേശങ്ങൾക്കെതിരേ വ്യാപക ആക്ഷേപം

കോഴഞ്ചേരി: പത്തനംതിട്ട ജില്ലാ പഞ്ചായത്തിന്‍റെ അതിര്‍ത്തികളില്‍ വരുത്തിയ മാറ്റം ഏറെ അശാസ്ത്രീയമാണെന്ന വിമര്‍ശനം ശക്തമാകുന്നു. കോഴഞ്ചേരി ഗ്രാമപഞ്ചായത്തിനെ മൂന്നായിട്ടാണ് വെട്ടിമുറിച്ചിരിക്കുന്നത്. പഞ്ചായത്തിലെ 2,3,4,6,7 വാര്‍ഡുകള്‍ റാന്നി ജില്ലാ പഞ്ചായത്ത് ഡിവിഷനിലും 10,11,12 വാര്‍ഡുകള്‍ ഇലന്തൂര്‍ ജില്ലാ പഞ്ചായത്ത് ഡിവിഷനിലുമാണ് ഉള്‍പ്പെടുത്തിയിരിക്കുന്നത്. ഇത് അംഗീകരിക്കുകയാണെങ്കില്‍ കോഴഞ്ചേരി പഞ്ചായത്തിലെ വികസന പ്രവര്‍ത്തനങ്ങള്‍ എല്ലാം താറുമാറാകുമെന്നും മൂന്ന് ജില്ലാ പഞ്ചായത്ത് മെംബര്‍മാര്‍ തീരുമാനിച്ചാല്‍ മാത്രമേ ഒരു റോഡുപോലും ടാര്‍ ചെയ്യാന്‍ കഴിയുകയുള്ളൂവെന്ന് ജില്ലാ പഞ്ചായത്ത് മുൻ പ്രസിഡന്‍റ് കെ. കെ. റോയിസണ്‍ പറഞ്ഞു. കോയിപ്രം ജില്ലാ പഞ്ചായത്ത് ഡിവിഷനില്‍ പുളിക്കീഴ് ബ്ലോക്ക് പഞ്ചായത്തിലെ കുറ്റൂര്‍ തൈമറവുംകര ഓതറ എന്നീ പ്രദേശങ്ങള്‍ ചേര്‍ത്തപ്പോള്‍ കോയിപ്രം ബ്ലോക്ക് പഞ്ചായത്ത് ഡിവിഷനിലെ പുല്ലാട്, തട്ടയ്ക്കാട് എന്നിവ കോഴഞ്ചേരി ജില്ലാ പഞ്ചായത്ത് ഡിവിഷനിലാണ് ചേര്‍ത്തിരിക്കുന്നത്. ഇതിനു സമാനമായിട്ടാണ് ബ്ലോക്ക് പഞ്ചായത്തിന്‍റെ വാര്‍ഡ് വിഭജിച്ചിരിക്കുന്നത്. ബ്ലോക്ക് പഞ്ചായത്തിലെ പുല്ലാട് ഡിവിഷനെ കുമ്പനാട് മണ്ഡലത്തിലാണ് ഉള്‍പ്പെടുത്തിയിരിക്കുന്നത്. കോയിപ്രം ജില്ലാ പഞ്ചായത്ത് ഡിവിഷന് പേരുണ്ടെങ്കിലും പഞ്ചായത്തിലെ മുഴുവന്‍ വാര്‍ഡുകളും ഡിവിഷനില്‍ ഉള്‍പ്പെടുത്തിയിട്ടില്ല. കോയിപ്രം ബ്ലോക്ക് ആസ്ഥാനമായ പുല്ലാട് പോലും മറ്റൊരു ഡിവിഷനിലാണ്. പുല്ലാട്, തട്ടയ്ക്കാട് മണ്ഡലങ്ങൾ കോയിപ്രം ജില്ലാ പഞ്ചായത്ത് ഡിവിഷനില്‍ വരേണ്ടതാണെന്ന് മുന്‍ ജില്ലാ പഞ്ചായത്ത് പ്രസിഡന്‍റ് അന്നപൂർണാദേവി പറഞ്ഞു. പുറത്തുവന്ന കരട് അംഗീകരിച്ചാൽ ജില്ലയുടെ വികസനത്തെത്തന്നെ പ്രതികൂലമായി ബാധിക്കുമെന്ന് അവര്‍ പറഞ്ഞു. അതിർത്തി നിർണയത്തിൽ വ്യാപകമായ പിശകുകൾ ഉണ്ടെന്ന് ജില്ലാ പഞ്ചായത്തംഗവും ഡിസിസി വൈസ് പ്രസിഡന്‍റുമായ റോബിൻ പീറ്ററും ചൂണ്ടിക്കാട്ടി. അതിർത്തി നിർണയത്തിനു പിന്നിൽ രാഷ്‌ട്രീയലക്ഷ്യങ്ങളുണ്ടെന്നു സംശയിക്കുന്നതായും അദ്ദേഹം കുറ്റപ്പെടുത്തി. ജില്ലാ പഞ്ചായത്ത് ഡിവിഷനുകളുടെ അതിർത്തികൾ നിർണയിച്ചത് പാർട്ടി ഓഫീസ് കേന്ദ്രീകരിച്ചാണെന്നും കരട് നിർദേശങ്ങൾക്കെതിരേ യുഡിഎഫ് തെരഞ്ഞെടുപ്പ് കമ്മീഷനു പരാതി നൽകുമെന്നും റോബിൻ പീറ്റർ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]