ADVERTISEMENT

ADVERTISEMENT

സൈക്കിൾ റാലി

മാന്നാർ: ലോക മലിനീകരണ പ്രതിരോധ ദിനത്തിന്‍റെ ഭാഗമായി സൈക്കിൾ റാലി നടത്തി. ബുധനൂർ ഗവൺമെന്‍റ് സ്കൂൾ ജംഗ്ഷനിൽ ബ്ലോക്ക്‌ പഞ്ചായത്തംഗം കെ. ആർ. മോഹനൻ റാലി ഫ്ലാഗ് ഓഫ് ചെയ്തു.

ADVERTISEMENT

എടത്വ സെന്‍റ് അലോഷ്യസ് കോളജില്‍ വിജ്ഞാനോത്സവം

എടത്വ: വിജ്ഞാനോത്സവം ഒന്നാംവര്‍ഷ ഓണേഴ്‌സ് ബിരുദ പ്രോഗ്രാമുകളുടെ കോളജ് തല ഉദ്ഘാടനം എടത്വ സെന്‍റ് അലോഷ്യസ് കോളജില്‍ നടന്നു. മാനേജര്‍ ഫാ. ഫിലിപ്പ് വൈക്കത്തുകാരന്‍ ഉദ്ഘാടനം നിര്‍വഹിച്ചു. പ്രിന്‍സിപ്പല്‍ പ്രഫ. ഡോ. ജി. ഇന്ദുലാല്‍ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ആന്‍സി ബിജോയ്, പിടിഎ വൈസ് പ്രസിഡന്‍റ് പി.കെ. വേണുഗോപാല്‍, വൈസ് പ്രിന്‍സിപ്പല്‍ ഡോ. സാന്‍റി ജോസഫ്, ബിരുദ പ്രോഗ്രാമുകളുടെ നോഡല്‍ ഓഫീസര്‍ ഡോ. വിനു ടി. വടക്കേല്‍, വിദ്യാര്‍ഥി പ്രതിനിധി അലക്‌സ് എസ്. മാത്യു എന്നിവര്‍ പ്രസംഗിച്ചു. വിദ്യാര്‍ഥികള്‍ക്കും മാതാപിതാക്കള്‍ക്കും വേണ്ടി സൈക്കോളജിസ്റ്റ് ഡോ. ഗംഗ കൈലാസ് ക്ലാസ് നയിച്ചു.

ഡോക്ടേഴ്സ് ദിനത്തിൽ റോഡ് സുരക്ഷാ ക്ലിനിക്

അമ്പലപ്പുഴ: റോഡപടങ്ങൾ കുറയ്ക്കുക എന്ന ലക്ഷ്യത്തോടെ വണ്ടാനം മെഡിക്കൽ കോളജ് ആശുപത്രിയിൽ റോഡ് സുരക്ഷ ക്ലിനിക്കിന് തുടക്കമായി. മോട്ടോർ വാഹന വകുപ്പിന്‍റെ സഹകരണത്തോടെ സംസ്ഥാനത്താദ്യമായി ഡോക്ടേഴ്സ് ദിനത്തിൽ ആരംഭിച്ച ക്ലിനിക് എച്ച്. സലാം എംഎൽഎ ഉദ്ഘാടനം ചെയ്തു. മെഡിക്കൽ സ്ഥാപനങ്ങളുടെ സാമൂഹിക ഉത്തരവാദിത്വം, ക്ലിനിക്കൽ വൈദഗ്ധ്യം, മെഡിക്കൽ വിദ്യാർഥികളുടെ സമൂഹപങ്കാളിത്തം എന്നിവ സമന്വയിപ്പിച്ചാണ് പദ്ധതി നടപ്പാക്കുക. ഇതിന്‍റെ ഭാഗമായി ഡ്രൈവർമാർക്ക് പ്രാഥമിക ആരോഗ്യ പരിശോധനകളും കാഴ്ച, കേൾവി, ന്യൂറോ സംബന്ധമായ പരിശോധനകളും നടത്തും. അപകടമുണ്ടായാൽ ശാസ്ത്രീയമായി ചെയ്യേണ്ട കാര്യങ്ങൾ, ഫസ്റ്റ് എയ്ഡ് ലഭ്യമാക്കൽ എന്നിവയിൽ ഡ്രൈവർമാർ ഉൾപ്പെടെ ഉള്ളവർക്ക് പരിശീലനവും നൽകും. പരിശീലനം സിദ്ധിച്ച 25 മെഡിക്കൽ വിദ്യാർഥികൾ സ്കൂളുകളിലെത്തി റോഡുസുരക്ഷയുടെ ഭാഗമായി കുട്ടികൾക്ക് ബോധവത്കരണ ക്ലാസുകൾ നൽകും. ബുധനാഴ്ചകളിൽ രാവിലെ 9 മുതൽ പകൽ 12 വരെ കമ്യൂണിറ്റി മെഡിസിന്‍റെ കീഴിൽ പ്രവർത്തിക്കുന്ന പ്രിവന്‍റീവ് മെഡിസിനു സമീപമാകും ക്ലിനിക്കിന്‍റെ പ്രവർത്തനം. റോഡ് അപകടങ്ങളിൽ പെടുന്നവർക്കുള്ള ചികിത്സയല്ല, മറിച്ച് അപകടം ഒഴിവാക്കാനുള്ള നടപടികളാണ് ക്ലിനിക്കിൽ ഉണ്ടാവുക. ആശുപത്രി കോൺഫറൻസ് ഹാളിൽ ചേർന്ന പരിപാടിയിൽ പ്രിൻസിപ്പൽ ഡോ. ബി. പത്മകുമാർ അധ്യക്ഷനായി. ആലപ്പുഴ ആർടിഒ എ.കെ. ദിലു, ആർഎംഒ ഡോ. പി.എൽ. ലക്ഷ്മി, അസോസിയറ്റ് പ്രഫ. ഡോ. പി.എസ്. സഞ്ജയ്, ഗവ. നഴ്സിംഗ് കോളജ് പ്രിൻസിപ്പൽ നിഷ ജേക്കബ്, ചീഫ് നഴ്സിംഗ് ഓഫീസർ പി. കെ. ഉഷ., കോളജ് യൂണിയൻ ചെയർപേഴ്സൺ സാൻ മരിയ ബേബി, കമ്യുണിറ്റി മെഡിസിൻ അസോസിയേറ്റ് പ്രഫ. ഡോ. കരോൾ പിൻ ഹെയ്റോ, ഡോ. വിശ്വകല എന്നിവർ പ്രസംഗിച്ചു.

96 കാരനായ റിട്ട. എസ്ഐക്ക് പോലീസിന്‍റെ ബിഗ് സല്യൂട്ട്

മാന്നാർ: 96 കാരനായ റിട്ടയേർഡ് എസ്ഐക്ക് പോലീസിന്‍റെ ബിഗ് സല്യൂട്ട്. മാന്നാർ ഇരമത്തൂർ അമ്പിയിൽ വീട്ടിൽ എ.സി. ശാമുവലിനെയാണ് ചെങ്ങന്നൂർ ഡിവൈഎസ്പി ടി. ബിനുകുമാറിന്‍റെ നേതൃത്വത്തിലുള്ള പോലീസ് സംഘം വീട്ടിലെത്തി പൊന്നാട അണിയിച്ച് ആദരിച്ചത്. മാന്നാർ പോലീസ് ഇൻസ്പെക്ടർ ഡി. രജീഷ് കുമാർ, നൂറനാട് പോലീസ് ഇൻസ്പെക്ടർ എസ്. ശ്രീകുമാർ, ചെങ്ങന്നൂർ പോലീസ് ഇൻസ്പെക്ടർ എ.സി. വിപിൻ, കുറത്തികാട് പോലീസ് ഇൻസ്പെക്ടർ പി.വി. മോഹിത്, മാന്നാർ പോലീസ് സ്റ്റേഷനിലെ ഗ്രേഡ് എസ്ഐ സജി വർഗീസ് എന്നിവർ ഡിവൈഎസ്പിക്ക് ഒപ്പമുണ്ടായിരുന്നു.

റോഡ് പുഴയായി, വ്യാപാര സ്ഥാപനങ്ങൾ പൂട്ടി

മാന്നാർ: മഴ പെയ്താൽ പരുമലയിലെ ഏറ്റവും പ്രധാന റോഡ് പുഴയാകുന്നതിനാൽ യാത്ര ദുഷ്കരമാകുന്നു. മാന്നാർ -ചെങ്ങന്നൂർ റോഡിൽ പരുമല ആശുപത്രിക്കും തിക്കപ്പുഴ ജംഗ്ഷനും മധ്യഭാഗത്തായിട്ടാണ് റോഡിൽ വൻ വെള്ളക്കെട്ട്. അര കിലോമീറ്ററോളം റോഡ് നദിയായി മാറി. നിരവധി വാഹനങ്ങൾ പരുമല ആശുപത്രി, പരുമല പള്ളി എന്നിവിടങ്ങളിലേക്കും മാന്നാർ ടൗണിലേക്കും പോകുന്ന റോഡിൽ ചെറിയ മഴ പെയ്താൽ പോലും വെള്ളക്കെട്ട് രൂപപ്പെടുന്നത് പതിവാണ്. മാവേലി സ്റ്റോർ ഉൾപ്പെടെ നിരവധി വ്യാപാര സ്ഥാപനങ്ങൾ ഈ വെള്ളക്കെ ട്ട് ഭാഗത്തുണ്ട്. അടുത്ത നാളുകളിൽ സ്ഥിരമായി മഴ പെയ്തതോടെ വെള്ളക്കെട്ട് രൂക്ഷമായി. ഇതോടെ ഇവിടത്തെ വ്യാപാര സ്ഥാപനങ്ങളിലേക്ക് ആരും എത്താതായി. ഇതേത്തുടർന്ന് രണ്ട് വ്യാപാര സ്ഥാപനങ്ങൾ പൂട്ടി ഇവിടെനിന്നു മാറി പോയി. വെള്ളക്കെട്ടിനു പരിഹാരം ഉണ്ടായില്ലെങ്കിൽ മറ്റ് വ്യാപാര സ്ഥാപനങ്ങൾ കൂടി പൂട്ടേണ്ടി വരുമെന്ന് വ്യാപാരികൾ പറയുന്നു. ഇവിടത്തെ വെള്ളം ഒഴുകി പോകാൻ സൗകര്യമില്ലാത്തതാണ് കുഴപ്പങ്ങൾക്ക് കാരണം. ഈ ഭാഗം മണ്ണിട്ടുയർത്തി ഓട നിർമിച്ചാൽ ഇവിടത്തെ വെള്ളത്തിനു പരിഹാരം കാണാൻ കഴിയുമെന്ന് വ്യാപാര സമിതി സെക്രട്ടറി ഡൊമിനിക് ജോസഫ് പറഞ്ഞു.

കണ്ടെയ്നറിൽ ഉടക്കി മത്സ്യബന്ധന വല നശിച്ചു

അന്പലപ്പുഴ: കണ്ടെയ്നറിൽ ഉടക്കി മത്സ്യബന്ധന വല നശിച്ചു. അമ്പലപ്പുഴ കോമന പുതുവൽ സന്തോഷിന്‍റെ ഉടമസ്ഥതയിലുള്ള ശബരിമല അയ്യൻ എന്ന വീഞ്ച് വള്ളത്തിന്‍റെ വലയാണ് നശിച്ചത്. രാവിലെ തോട്ടപ്പള്ളി തുറമുഖത്തുനിന്നാണ് 34 തൊഴിലാളികളുമായി മത്സ്യ ബന്ധനത്തിനു പുറപ്പെട്ടത്. ആലപ്പുഴ പടിഞ്ഞാറ് മത്സ്യബന്ധനം നടത്തുന്നതിനിടെയാണ് വല കണ്ടെയ്നറിൽ ഉടക്കി നശിച്ചത്. പിന്നീട് മറ്റു വള്ളക്കാരും കൂടി സഹായിച്ചാണ് വലയെടുത്തത്. ഏകദേശം ഒരു ലക്ഷത്തിലധികം രൂപയുടെ നഷ്ടം കണക്കാക്കുന്നു. വല പിന്നീട് പുറക്കാടെത്തിച്ച് തകരാർ പരിഹരിച്ചു തുടങ്ങി. നിരവധി തൊഴിലാളികൾ ഒരാഴ്ചയിലധികം ജോലി ചെയ്താലേ വല മത്സ്യ ബന്ധനത്തിന് പ്രയോജനകരമാകുന്ന രീതിയിലാക്കാൻ കഴിയൂ. ഒരു മാസം മുൻപുണ്ടായ കപ്പലപകടത്തിനു പിന്നാലെ കടലിൽ നിരവധി കണ്ടെയ്നറുകൾ കിടക്കുന്നത് പരമ്പരാഗത മത്സ്യത്തൊഴിലാളികളുടെ ഉപജീവനത്തിന് ഭീഷണിയായിരിക്കുകയാണ്. ട്രോളിംഗ് നിരോധന കാലയളവായതിനാൽ പ്രതീക്ഷകളോടെയാണ് പരമ്പരാഗത മത്സ്യത്തൊഴിലാളികൾ കടലിൽ പണിക്കുപോകുന്നത്. എന്നാൽ, കണ്ടെയ്നറുകളിൽ ഉടക്കി വല നശിക്കുന്നത് മത്സ്യത്തൊഴിലാളികൾക്ക് വലിയ തിരിച്ചടിയായിരിക്കുകയാണ്. ഒരാഴ്ച മുമ്പ് പുന്നപ്ര സ്വദേശിയുടെ ഉടമസ്ഥതയിലുള്ള വള്ളത്തിലെ വലയും മത്സ്യബന്ധനത്തിനിടെ കണ്ടെയ്നറിൽ ഉടക്കി നശിച്ചിരുന്നു. ഈ അപകടത്തിൽ വലയും മത്സ്യവും നശിച്ചതിനാൽ ലക്ഷങ്ങളുടെ നഷ്ടമാണ് സംഭവിച്ചത്.

മെറിറ്റ് ഈവനിംഗ്

തുറവൂര്‍: പള്ളിത്തോട് സെന്‍റ് സെബാസ്റ്റ്യന്‍സ് ഹൈസ്‌കൂളില്‍ എസ്എസ് എല്‍സി ഫുള്‍ എ പ്ലസ്, യുഎസ്എസ് ജേതാക്കളെ ആദരിക്കുന്നതിനായി മെറിറ്റ് ഈവനിംഗ് 2025 സംഘടിപ്പിച്ചു. കുത്തിയതോട് പോലീസ് സ്റ്റേഷന്‍ എസ്എച്ച്ഒ എം. അജയമോഹന്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. യേശുദാസ് കൊടിവീട്ടില്‍ അധ്യക്ഷത വഹിച്ചു. ചേര്‍ത്തല മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എ.ആര്‍ രാജേഷ് വിദ്യാര്‍ഥികളെ ആദരിച്ചു. റിട്ട. അസി. എക്‌സിക്യൂട്ടീവ് എന്‍ജിനിയര്‍ സുനില്‍ ഡിക്രൂസ് വിജയികള്‍ക്ക് കാഷ് അവാര്‍ഡ് വിതരണം ചെയ്തു. ആലപ്പുഴ ലിയോ തേര്‍ട്ടീന്ത് ഹയര്‍ സെക്കന്‍ഡറി സ്‌കൂള്‍ ഹെഡ്മാസ്റ്റര്‍ മാനുവല്‍ ജോസ് മുഖ്യപ്രഭാഷണം നടത്തി. ഹെഡ്മിസ്ട്രസ് ക്രിസ്ജ നോര്‍ബര്‍ട്ട്, പിടിഎ പ്രസിഡന്‍റ് ബാസ്റ്റിന്‍ ആന്‍റണി, സ്റ്റാഫ് സെക്രട്ടറി സിസിലി ആന്‍റണി എന്നിവര്‍ പ്രസംഗിച്ചു.

റോഡ് കൈയേറി അനധികൃത ബോര്‍ഡുകൾ: പരാതിപ്പെട്ടിട്ട് കാര്യമില്ലെന്ന് ആക്ഷേപം

മാവേലിക്കര: മിച്ചല്‍ ജംഗ്ഷന് തെക്ക് ഭാഗത്ത് റോഡ് കൈയേറി അന്യവാഹനങ്ങള്‍ പാര്‍ക്ക് ചെയ്യരുതെന്ന് ബോര്‍ഡുകള്‍ സ്ഥാപിച്ചതായി പരാതി. വിഷയം അധികൃതരുടെ ശ്രദ്ധയില്‍പ്പെടുത്തിയിട്ടും നടപടി ഉണ്ടായില്ലെന്ന് ആക്ഷേപം. മിച്ചല്‍ ജംഗ്ഷന് തെക്ക് ഭാഗത്ത് സിനിമാ തിയറ്ററിന് എതിര്‍വശമുള്ള ഷോപ്പിംഗ് കോംപ്ലക്‌സിന് മുന്‍പിലായാണ് റോഡ് കൈയേറി ബോര്‍ഡുകള്‍ സ്ഥാപിച്ചിരിക്കുന്നത്. നഗരത്തിന്‍റെ ഹൃദയഭാഗം റോഡരികിൽ വാഹനങ്ങള്‍ പാര്‍ക്ക് ചെയ്യാന്‍ പര്യാപ്തമല്ലാത്തതിനാല്‍ പൊതുജനം ആശ്രയിക്കുന്ന ഇടങ്ങളാണ് കെഎസ്ആര്‍ടിസി മുതല്‍ വള്ളക്കാലില്‍ തിയറ്റര്‍ വരെയുള്ള ഭാഗം. ഇവിടെ വാഹനങ്ങള്‍ക്ക് പാര്‍ക്ക് ചെയ്യാനോ അരികിലേക്ക് ഒതുക്കാനോ പോലുമോ കഴിയാത്ത തരത്തിലും കാല്‍നട യാത്രികര്‍ക്ക് അപകടം ഉണ്ടാക്കത്തക്ക വിധത്തിലുമാണ് ബോര്‍ഡുകള്‍ സ്ഥാപിച്ചിരിക്കുന്നത്. സംഭവം റോഡുമായി ബന്ധപ്പെട്ട വിവിധ വകുപ്പുകളുടെ ശ്രദ്ധയില്‍പ്പെടുത്തിയിട്ടും വിഷയത്തില്‍ നടപടി ഉണ്ടാകുന്നില്ലെന്നാണ് ആക്ഷേപം.

തെരുവുനായ ആക്രമണം: പ്രതിരോധ നടപടികളില്‍ ആശയക്കുഴപ്പം

തിരുവന്‍വണ്ടൂര്‍: പഞ്ചായത്തില്‍ പേ വിഷബാധ സ്ഥിരീകരിച്ച് മൂന്നു ദിവസം പിന്നിട്ടപ്പോഴും പ്രതിരോധ നടപടികളില്‍ ആശയക്കുഴപ്പം. അഞ്ചാം വാര്‍ഡിലെ വയോധികന് തെരുവുനായയുടെ ആക്രമണത്തില്‍ പരിക്കേറ്റതിനെത്തുടര്‍ന്നാണ് പേ വിഷബാധയേറ്റത്. സ്ഥിരീകരണത്തിനുശേഷം പ്രതിരോധ നടപടികളുമായി ഇറങ്ങിയ പഞ്ചായത്തും ആരോഗ്യവകുപ്പും വീടുകളിലെത്തി നായകള്‍ക്കും പൂച്ചകള്‍ക്കും പ്രതിരോധ കുത്തിവയ്പ് നല്‍കി. പഞ്ചായത്തുവക ഉടമസ്ഥര്‍ക്കായി ബോധവത്കരണ ക്ലാസുമുണ്ട്. എന്നാല്‍, പ്രദേശത്ത് അലഞ്ഞുതിരിയുന്ന തെരുവുനായകള്‍ക്കായി ഒരു പ്രതിരോധ കുത്തിവയ്പ് നല്‍കിയിട്ടില്ല. വയോധികനെ ആക്രമിച്ച നായയടക്കം ഇക്കൂട്ടത്തില്‍ കഴിഞ്ഞിട്ടുണ്ടെന്നു നാട്ടുകാര്‍ പറയുന്നു. ക്ഷീര കര്‍ഷകരടക്കമുള്ളവരും ആശങ്കയിലാണ്. വളര്‍ത്തു മൃഗങ്ങള്‍ക്ക് മാത്രമായി വാക്‌സിനേഷന്‍ നല്‍കിയ പഞ്ചായത്ത് തീരുമാനത്തില്‍ നാട്ടുകാരും പ്രതിഷേധത്തിലാണ്. ഇരമല്ലിക്കര മുതല്‍ പ്രാവിന്‍കൂട് ജംഗ്ഷന്‍ വരെ നൂറിനടുത്ത് തെരുവുനായ്ക്കളാണ് വിലസുന്നത്. ഇവ സ്‌കൂള്‍ കുട്ടികള്‍ക്കും വഴിയാത്രക്കാര്‍ക്കും ഇരുചക്രവാഹനയാത്രക്കാര്‍ക്കും ഭീഷണിയാണ്.

ഇനിയും പൂര്‍ത്തിയാകാതെ നഗരഹൃദയത്തിലെ മൂന്നു പാലങ്ങൾ

ആലപ്പുഴ: രണ്ടുമാസംകൊണ്ട് പുനര്‍നിര്‍മിക്കുമെന്ന് ജനങ്ങള്‍ക്ക് ഉറപ്പുനല്‍കി പൊളിച്ചുനീക്കിയ നഗരഹൃദയത്തിലെ മൂന്നു പാലങ്ങളുടെ നിര്‍മാണം ഇനിയും പൂര്‍ത്തിയായില്ല. കൊമ്മാടി പാലത്തിനു സമീപമുള്ള പോപ്പി പാലം, ആറാട്ടുവഴി പാലം, നോര്‍ത്ത് പോലീസ് സ്റ്റേഷനു സമീപമുള്ള വെള്ളാപ്പള്ളി പാലം തുടങ്ങി മൂന്നു പാലങ്ങളുടെ നിര്‍മാണപ്രവര്‍ത്തനങ്ങള്‍ തുടങ്ങിയിട്ട് ഒരുവര്‍ഷം പൂര്‍ത്തിയായെങ്കിലും റോഡ് പൂര്‍വസ്ഥിതിയിലെത്തിയില്ല. സ്‌കൂള്‍ കുട്ടികളാണ് കൂടുതലും ബുദ്ധിമുട്ടുന്നത്. അപ്പുറത്തെ വശത്തെത്താന്‍ ചുറ്റിപ്പോകേണ്ട അവസ്ഥയാണ്. സ്‌കൂള്‍ തുറക്കുംമുന്‍പെങ്കിലും നിര്‍മാണം പൂര്‍ത്തിയാകുമെന്നായിരുന്നു നാട്ടുകാരുടെ പ്രതീക്ഷ. എന്നാല്‍, മൂന്നു പാലങ്ങളും നിര്‍മിച്ചെങ്കിലും അപ്രോച്ച് റോഡ് നിര്‍മാണം നീണ്ടുപോകുകയാണ്. വെള്ളാപ്പള്ളി പാലം പണി തീര്‍ന്നുകിടക്കാന്‍ തുടങ്ങിയിട്ട് മാസങ്ങളായി. അനുബന്ധ പാത നിര്‍മിച്ചില്ലെങ്കിലും നിര്‍മാണം നടക്കുന്ന പാലത്തിലൂടെ ആളുകള്‍ സഞ്ചരിക്കാന്‍ തുടങ്ങി. കുറച്ചു ചെമ്മണ്ണു കൂടിയിട്ട് റോഡ് പാലത്തിന്‍റെ നിരപ്പിലാക്കിയാല്‍ പോപ്പി, ആറാട്ടുവഴി പാലങ്ങളിലൂടെ തത്കാലം ഇരുചക്രവാഹനങ്ങളെങ്കിലും കടന്നുപോകുമെന്നാണു നാട്ടുകാര്‍ പറയുന്നത്. പക്ഷേ, മഴയും ബാക്കിയുള്ള പണികളും കാരണം ഇത് എളുപ്പത്തില്‍ സാധ്യമല്ലെന്ന് അധികൃതര്‍ പറയുന്നു. നാലുമീറ്റര്‍ വീതിയിലാണ് പോപ്പി പാലത്തിന്‍റെ നിര്‍മാണം. ആംബുലന്‍സ് കയറുന്ന വീതിയിലാണ് പാലം നിര്‍മിച്ചിട്ടുള്ളത്. വലിയ വാഹനങ്ങള്‍ക്ക് ഉള്‍പ്പെടെ കടന്നുപോകാവുന്ന തരത്തില്‍ 7.5 മീറ്റര്‍ വീതിയിലാണ് വെള്ളാപ്പള്ളി പുതിയ പാലം. കാല്‍നടയാത്രക്കാര്‍ക്കായി പാലത്തിന് ഇരുവശത്തും ഒരുമീറ്റര്‍ വീതമുള്ള നടപ്പാതയും നിര്‍മിച്ചിട്ടുണ്ട്. 12 സ്പാനോടുകൂടി 13.5 മീറ്ററാണ് പാലത്തിന്‍റെ നീളം. പാലത്തിനടിയിലൂടെ ബോട്ടുകള്‍ക്ക് സഞ്ചരിക്കാവുന്ന തരത്തില്‍ തൂണുകള്‍ ഒഴിവാക്കിയാണ് നിര്‍മാണം നടത്തിയത്. ആറു മീറ്റര്‍ വീതിയിലാണ് ആറാട്ടുവഴി പാലത്തിന്‍റെ നിര്‍മാണം. കൃത്യമായി ചെയ്താല്‍ ഒഴാഴ്ച കൊണ്ട് പൂര്‍ത്തിയാക്കാനുള്ള പ്രവര്‍ത്തികളേ മൂന്നു പാലങ്ങള്‍ക്കുമുള്ളെന്നു നാട്ടുകാര്‍ പറയുന്നു.

പ്രതിഭാസംഗമം നടന്നു

എടത്വ: എടത്വ സെന്‍റ് അലോഷ്യസ് ഹയര്‍ സെക്കന്‍ഡറി സ്‌കൂള്‍ പ്രതിഭാസംഗമം ചങ്ങനാശേരി അതിരൂപത വികാരി ജനറാൾ ഫാ. സ്‌കറിയ കന്യാകോണില്‍ ഉദ്ഘാടനം ചെയ്തു. മാനേജര്‍ ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. പ്രിന്‍സിപ്പല്‍ പി.സി. ജോബി, പ്രധാന അധ്യാപകന്‍ ജിനോ ജോസഫ്, പിടിഎ പ്രസിഡന്‍റ് ബൈജു തങ്കച്ചന്‍, അധ്യാപകരായ ജോര്‍ജ് ഫിലിപ്പ്, മെറിന്‍ ജോസ്, ജുവാന തോമസ്, ഗൗരി മിനീഷ് എന്നിവര്‍ പ്രസംഗിച്ചു. നീറ്റ് ഓള്‍ ഇന്ത്യ പരീക്ഷയില്‍ ഉയര്‍ന്ന റാങ്ക് വാങ്ങിയ പൂര്‍വ വിദ്യാര്‍ഥി സി.ജെ. അഞ്ജലിയെ ആദരിക്കുകയും പരീക്ഷയില്‍ ഉന്നതവിജയം കരസ്ഥമാക്കിയ കുട്ടികള്‍ക്ക് അവാര്‍ഡുകളും വിതരണം ചെയ്തു. അധ്യാപകരായ ജിസി കറുകയില്‍, മായ ചെറിയാന്‍, പ്രസാദ് ജോസ്, ജോജോ തോമസ്, ജോളി അഗസ്റ്റിന്‍, ജിജോ സെബാസ്റ്റ്യന്‍, ഡയാന വര്‍ഗീസ് എന്നിവര്‍ നേതൃത്വം നല്‍കി.

മരം വീണു വീടുകളും സ്കൂളിന്‍റെ മതിലും തകർന്നു

മാവേലിക്കര: ആഞ്ഞടിച്ച ചുഴലിക്കാറ്റില്‍ മാവേലിക്കരയില്‍ രണ്ടു വീടുകള്‍ക്കു മുകളിലേക്ക് മരം വീഴുകയും സ്‌കൂളിന്‍റെ ചുറ്റുമതില്‍ തകരുകയും ചെയ്തു. കൂടാതെ നിരവധി മരങ്ങള്‍ കടപുഴകി. കഴിഞ്ഞ ദിവസം പുലര്‍ച്ചെ രണ്ടോടെയാണ് ചുഴലിക്കാറ്റ് വീശിയടിച്ചത്. കൊയ്പള്ളി കാരാഴ്മ നെടുമാനത്തു പഠിപ്പുരയ്ക്കല്‍ അനില്‍കുമാറിന്‍റെ വീടിനു മുകളിലേക്ക് പ്ലാവ് ഒടിഞ്ഞുവീണ് വീടിന് ഭാഗിക നാശനഷ്ടം ഉണ്ടായി. പടിപ്പുരയ്ക്കല്‍ ഓമനയമ്മയുടെ വീടിനു മുകളിലേക്ക് വലിയ കവുങ്ങ് ഒടിഞ്ഞു വീണ് വീടിന് നാശനഷ്ടം ഉണ്ടായി. തെക്കേക്കര യുപിഎസിന്‍റെ ചുറ്റുമതിലിലേക്ക് മാവ്, കുമില്‍ എന്നീ മരങ്ങള്‍ കടപുഴകി വീണ് ചുറ്റുമതില്‍ പല ഭാഗങ്ങളില്‍ പൂര്‍ണമായി തകര്‍ന്നു. കൂടാതെ മേഖലയില്‍ നിരവധി മരങ്ങള്‍ കടപുഴകി വീണിട്ടുണ്ട്.

വില്‍പ്പനയ്ക്കിടെ പതിനൊന്നര ലിറ്റര്‍ മദ്യവുമായി ഒരാള്‍ പിടിയില്‍

ചേര്‍ത്തല: അനധികൃതമായി മദ്യവില്‍പ്പന നടത്തിയ ആളെ പതിനൊന്നര ലിറ്റര്‍ മദ്യവുമായി എക്‌സൈസ് ചേര്‍ത്തല സര്‍ക്കിള്‍ ഇന്‍സ്‌പെക്ടര്‍ സി.എസ്. സുനില്‍കുമാറിന്‍റെ നേതൃത്വത്തിലുള്ള സംഘം പിടികൂടി. കഞ്ഞിക്കുഴി പഞ്ചായത്ത് രണ്ടാം വാര്‍ഡ് ചെറുവാരണം കൈതവളപ്പില്‍ പ്രകാശനെ(60)യാണ് അറസ്റ്റ് ചെയ്തത്. ഇയാളില്‍നിന്നു 2,500 രൂപയും പിടിച്ചെടുത്തു. ഇന്‍സ്‌പെക്ടര്‍ എന്‍. ബാബു, അസി. ഇന്‍സ്‌പെക്ടര്‍മാരായ പി. വിജയകുമാര്‍, കെ.പി. സജിമോന്‍, പ്രിവന്‍റീവ് ഓഫീസര്‍ എച്ച്. മുസ്തഫ, സിവില്‍ ഓഫീസര്‍ എസ്. ജിനു, അസി. എക്‌സൈസ് ഇന്‍സ്‌പെക്ടര്‍ (ഡ്രൈവര്‍) ഒസ്ബര്‍ട്ട് ജോസ് എന്നിവര്‍ പരിശോധനയില്‍ പങ്കെടുത്തു. കോടതിയില്‍ ഹാജരാക്കിയ പ്രകാശനെ റിമാന്‍ഡ് ചെയ്തു.

പള്ളിക്കൂട്ടുമ്മ-താലൂക്ക് ആശുപത്രി റോഡ് ഉയർത്തണം: ജനാധിപത്യ കേരള കോൺഗ്രസ്

മങ്കൊമ്പ്: പള്ളിക്കൂട്ടുമ്മ -നീലംപേരൂർ റോഡിന്‍റെ ഭാഗമായ പള്ളിക്കൂട്ടുമ്മ-താലൂക്ക് ആശുപത്രി റോഡ് ഗതാഗതയോഗ്യമല്ലാതായ സാഹചര്യത്തിൽ എസി റോഡിനൊപ്പം ഉയർത്തി ഗതാഗതയോഗ്യമാക്കണമെന്ന് ജനാധിപത്യ കേരള കോൺഗ്രസ് ചമ്പക്കുളം മണ്ഡലം സമ്മേളനം ആവശ്യപ്പെട്ടു. പുളിങ്കുന്നിലെ താലൂക്ക് ആശുപത്രിയിലേക്ക് എത്താനുള്ള ഏകമാർഗമായ റോഡ് സ്ഥിരമായി വെള്ളക്കെട്ട് രൂപപ്പെടുന്ന സാഹചര്യത്തിൽ എസി റോഡിന്‍റെ ഉയരത്തിൽ പുനർനിർമിക്കണമെന്ന് യോഗം ഉദ്ഘാടനം ചെയ്ത സംസ്ഥാന സെക്രട്ടേറിയറ്റ് അംഗം ഷിബു മണല ആവശ്യപ്പെട്ടു. കുട്ടനാട്ടിലെ ഇതര റോഡുകൾ മുഴുവൻ ശോച്യാവസ്ഥയിലായതിനാൽ താലൂക്ക് ആശുപത്രിയിൽ എത്താനുള്ള ഏക മാർഗമായ റോഡ് അടിയന്തരമായി നിർമിക്കണമെന്നും അദ്ദേഹം ആവശ്യപ്പെട്ടു. ഇക്കാര്യം ചൂണ്ടിക്കാട്ടി മുഖ്യമന്ത്രിക്ക് നിവേദനം നൽകിയെന്നും അദ്ദേഹം അറിയിച്ചു. മണ്ഡലം പ്രസിഡന്‍റ് അഗസ്റ്റിൻ മുടന്താഞ്ഞിലി അധ്യക്ഷത വഹിച്ചു. നിയോജകമണ്ഡലം പ്രസിഡന്‍റ് ജേക്കബ് സാണ്ടർ, ഫില്ലമ്മ ജോസഫ്, ലിസമ്മ ജോൺസൺ, സജി കല്ലൂത്തറ, ജോസി കണ്ടത്തിപ്പറമ്പിൽ, ലിജോ പാലാത്തറ, ജോയിക്കുട്ടി പെരുമ്പള്ളി, മാത്യു ജോസഫ് തുറവശേരി എന്നിവർ പ്രസംഗിച്ചു. ‌‌

നെഹ്‌റു ട്രോഫി: ടിക്കറ്റുകള്‍ 10 ജില്ലകളിലെ സര്‍ക്കാര്‍ ഓഫീസുകള്‍ വഴി

ആലപ്പുഴ: ഈ വര്‍ഷത്തെ നെഹ്‌റു ട്രോഫി വള്ളംകളി മത്സരത്തിന്‍റെ ടിക്കറ്റുകള്‍ പത്തു ജില്ലകളിലെ സര്‍ക്കാര്‍ ഓഫീസുകള്‍ വഴി വില്‍ക്കാന്‍ പൊതുഭരണ വകുപ്പിന്‍റെ അനുമതിയായി. ആലപ്പുഴ, തിരുവനന്തപുരം, കൊല്ലം, പത്തനംതിട്ട, കോട്ടയം, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട് ജില്ലകളിലെ സര്‍ക്കാര്‍ ഓഫീസുകള്‍ വഴി വള്ളംകളി ടിക്കറ്റ് വില്‍ക്കാനാണ് അനുമതിയായത്. മുന്‍വര്‍ഷങ്ങളിലും സര്‍ക്കാര്‍ ഓഫീസുകള്‍ വഴി വള്ളംകളി ടിക്കറ്റുകള്‍ വിറ്റിരുന്നു. ഓഗസ്റ്റ് 30നാണു പുന്നമടക്കായലില്‍ നെഹ്‌റു ട്രോഫി വള്ളംകളി നടക്കുന്നത്. വള്ളംകളിയുടെ ധനസമാഹരണത്തിന് സര്‍ക്കാര്‍ ഓഫീസുകളിലൂടെ ടിക്കറ്റ് വില്പനയ്ക്ക് അനുമതി നല്‍കണമെന്നു നെഹ്‌റു ട്രോഫി ബോട്ട് റേസ് (എന്‍ടിബിആര്‍) സൊസൈറ്റി സെക്രട്ടറിയായ സബ് കളക്ടര്‍ സമീര്‍ കിഷന്‍ കത്തു നല്‍കിയിരുന്നു. സര്‍ക്കാര്‍ ജീവനക്കാരുടെ പെരുമാറ്റച്ചട്ടം പ്രകാരം, പ്രേരണയോ നിര്‍ബന്ധമോ ഇല്ലാതെ ടിക്കറ്റ് വില്‍ക്കാനാണ് അനുമതി. മുന്‍ വര്‍ഷങ്ങളില്‍ ചില ഓഫിസുകളില്‍ ടിക്കറ്റ് വില്പനയ്ക്കു ടാര്‍ഗറ്റ് നല്‍കിയിരുന്നെന്നും ഓഫീസുകളില്‍ വിവിധ ആവശ്യങ്ങള്‍ക്കായെത്തുന്ന ജനങ്ങളെ ടിക്കറ്റ് എടുക്കാന്‍ നിര്‍ബന്ധിച്ചിരുന്നെന്നും ആരോപണം ഉയര്‍ന്നിരുന്നു. 100 രൂപ മുതല്‍ 25,000 രൂപ വരെയുള്ള നിരക്കുകളിലാണു കഴിഞ്ഞ തവണ ടിക്കറ്റുകള്‍ വിറ്റത്. ഇത്തവണയും ഇതേ നിരക്കുകള്‍ തന്നെയാകാനാണു സാധ്യത. എന്‍ടിബിആര്‍ യോഗം ചേര്‍ന്നാകും ടിക്കറ്റ് നിരക്കുകള്‍ തീരുമാനിക്കുക.

കൈയേറിയ ഭൂമി നഗരസഭ തിരിച്ചുപിടിച്ചു

ആലപ്പുഴ: കിടങ്ങാംപറമ്പ് വാര്‍ഡിലെ (പഴയ സനാതനം വാര്‍ഡ്) കൈയേറ്റങ്ങള്‍ പൊളിച്ചുതുടങ്ങി. ജെസിബി ഉപയോഗിച്ച് നീര്‍ച്ചാല്‍ പുനഃസ്ഥാപിക്കാനുള്ള നടപടിയും ആരംഭിച്ചു. നഗരസഭയിലും കോടതിയിലുമായി നാട്ടുകാരുടെ വര്‍ഷങ്ങളുടെ പോരാട്ടങ്ങള്‍ക്ക് ഒടുവിലാണ് നിയമവിരുദ്ധ കൈയേറ്റത്തിനെതിരേ നടപടി തുടങ്ങുന്നത്. കയര്‍ മെഷീന്‍ ടൂള്‍സ് കമ്പനിയുടെ വടക്കേയറ്റത്ത് പുറമ്പോക്ക് ഭൂമി കൈയേറിയത് പുനഃസ്ഥാപിക്കണമെന്നാവശ്യപ്പെട്ട് നഗരസഭ കൈയേറ്റക്കാര്‍ക്ക് നോട്ടീസ് നല്‍കിയിട്ട് മാസങ്ങളായി. 14 ദിവസത്തിനകം കൈയേറ്റം പൊളിച്ചുനീക്കണമെന്നും അല്ലെങ്കില്‍ നഗരസഭ പൊളിച്ചശേഷം ചെലവായ തുക ഈടാക്കുമെന്നും കൈയേറ്റക്കാരെ അറിയിച്ചിരുന്നു. നോട്ടീസ് കിട്ടി മാസങ്ങള്‍ കഴിഞ്ഞിട്ടും കൈയേറിയ ഭൂമി ഇവര്‍ വിട്ടുനല്‍കിയിട്ടില്ല. കൈയേറ്റം ഒഴിപ്പിച്ച് നീര്‍ച്ചാല്‍ പുനഃസ്ഥാപിക്കണമെന്ന് കളക്ടറും നിര്‍ദേശം നല്‍കിയതാണ്. സെന്‍റിന് 12 മുതല്‍ 14 വരെ ലക്ഷം രൂപ വിലയുള്ള 10 സെന്‍റോളം ഭൂമിയാണ് കൈയേറിയത്. നീര്‍ച്ചാല്‍ കൈയേറ്റംമൂലം വെള്ളക്കെട്ടിലായ സനാതന റെസിഡന്‍റ്സ് അസോസിയേഷനാണ് കൈയേറ്റത്തിനെതിരേ പരാതി നല്‍കിയത്. താലൂക്ക്, നഗരസഭാ അധികൃതര്‍ പരിശോധന നടത്തിയാണ് കൈയേറ്റമാണെന്നു കണ്ടെത്തിയത്. നഗരസഭ കൈയേറ്റം ഒഴിപ്പിക്കില്ലെന്നു മനസിലായതിനാല്‍ ഹൈക്കോടതിയെ പ്രദേശവാസികള്‍ സമീപിച്ചു. മുഖ്യമന്ത്രിക്കടക്കം പരാതി നല്‍കി. നാട്ടുകാരുടെ നിരന്തര ഇടപെടലിനെത്തുടര്‍ന്നാണ് നഗരസഭ കൈയേറ്റമൊഴിപ്പിക്കാന്‍ നടപടി ആരംഭിച്ചത്. ഇതിനായി നിശ്ചിത തുക നഗരസഭ വകയിരുത്തിയിട്ടുണ്ട്. കൈയേറ്റം ഒഴിപ്പിച്ചശേഷം അളന്നു തിട്ടപ്പെടുത്തുമെന്നാണ് ഇവര്‍ നാട്ടുകാര്‍ക്കു നല്‍കിയിരിക്കുന്ന ഉറപ്പ്.

മൊബൈൽ കടയിൽ മോഷണം: പണവും സാധനങ്ങളും നഷ്ടമായി

ഹരിപ്പാട്: മൊബൈൽ കടയിലെ മോഷണത്തിൽ പണവും സാധനങ്ങളും നഷ്ടപ്പെട്ടു. വന്ദികപ്പള്ളി എൻടിപിസി ജംഗ്ഷനിലുള്ള നിയോ മൊബൈൽ എന്ന സ്ഥാപനത്തിലാണ് കഴിഞ്ഞ ദിവസം മോഷണം നടന്നത്. ചിങ്ങോലി ദാറുസലാമിൽ യാസിറിന്‍റെ ഉടമസ്ഥതയിലുള്ളതാണ് കട. ആറ് ഫോണും ബ്ലൂടൂത്ത് സ്പീക്കറും ചാർജറും ഹെഡ്സെറ്റും സിസിടിവി കാമറയും അടക്കം നിരവധി സാധനങ്ങൾ മോഷണം പോയി. മേശയ്ക്കുള്ളിൽ സൂക്ഷിച്ചിരുന്ന 55,000 രൂപയും കവർന്നു. ഇരുമ്പ് ഷീറ്റ് കൊണ്ടും ഇരുമ്പ് നെറ്റ് കൊണ്ടും മറച്ച ചുമരുകൾ ഒരാൾക്കു കടക്കാവുന്ന വിധത്തിൽ മുറിച്ചുമാറ്റിയ ശേഷം കടയ്ക്കുള്ളിൽ കടന്ന മോഷ്ടാക്കൾ കടയുടെ ഇരുമ്പ് വാതിൽ വളച്ച് വിടവുണ്ടാക്കിയാണ് സാധനങ്ങളുമായി പുറത്തുകടന്നത്. മൂന്നോ അതിലധികമോ ആളുകൾ ഉണ്ടാകാമെന്ന് സംശയിക്കുന്നു. കനത്ത മഴയുള്ള സമയത്താണ് മോഷണം നടന്നത്. കടയ്ക്കുള്ളിൽ സ്ഥാപിച്ചിരുന്ന രണ്ടു കാമറകളും മെമ്മറി കാർഡും മോഷ്ടാക്കൾ കൊണ്ടുപോയതിനാൽ ദൃശ്യങ്ങൾ ലഭ്യമല്ല. കരിയിലക്കുളങ്ങര പോലീസ് കേസെടുത്ത് അന്വേഷണം ആരംഭിച്ചു.

ഓഫീസ്-കം-ഷോപ്പിംഗ് കോംപ്ലക്സ് കെട്ടിടം ജീർണാവസ്ഥയിൽ

ചെങ്ങന്നൂർ: പ്രൈവറ്റ് ബസ് സ്റ്റാൻഡ് ഉൾപ്പെടെ പ്രവർത്തിക്കുന്ന ചെങ്ങന്നൂർ നഗരസഭയുടെ ഓഫീസ്-കം-ഷോപ്പിംഗ് കോംപ്ലക്സ് കെട്ടിടം അപകടാവസ്ഥയിൽ. വിദ്യാർഥികളും ജീവനക്കാരും ഉൾപ്പെടെ ദിവസേന നിരവധി പേർ ആശ്രയിക്കുന്ന കെട്ടിടം ഏതു നിമിഷവും തകരാമെന്ന ഭയത്തിലാണ്. കെട്ടിടത്തിന്‍റെ അശാസ്ത്രീയമായ നിർമാണമാണ് നിലവിലെ ബലക്ഷയത്തിന് പ്രധാന കാരണം. നാലു പതിറ്റാണ്ടിലേറെയായി ആദ്യഘട്ട നിർമാണം പൂർത്തിയായിട്ട്. രണ്ടാംഘട്ട നിർമാണം പൂർത്തിയാക്കിയത് 2002 ഏപ്രിലിലാണ്. അന്നു മുതലാണ് നഗരസഭ ഓഫീസ് ഇവിടെ പ്രവർത്തിച്ചുതുടങ്ങിയത്. നിലവിൽ നഗരസഭ ഓഫീസിനു പുറമേ നിരവധി വ്യാപാര സ്ഥാപനങ്ങളും ഈ മൂന്നുനില കെട്ടിടത്തിൽ പ്രവർത്തിക്കുന്നുണ്ട്. കെട്ടിടത്തിനോട് ചേർന്നാണ് ചെങ്ങന്നൂർ പ്രൈവറ്റ് ബസ് സ്റ്റാൻഡും പ്രവർത്തിക്കുന്നത്. വർഷങ്ങൾക്കു മുൻപ് കെട്ടിടത്തിന്‍റെ മൂന്നാം നിലയിലെ ഹാളിന്‍റെ കോൺക്രീറ്റ് തറ അടർന്നു വീഴുകയും വലിയ ഗർത്തം രൂപപ്പെടുകയും ചെയ്തിരുന്നു. ഇതിന് താഴെയാണ് നഗരസഭയുടെ ഓഫീസ് പ്രവർത്തിക്കുന്നത്. അവധി ദിവസമായതുകൊണ്ട് അന്ന് വലിയ ദുരന്തം ഒഴിവായി. പിന്നീട് ഈ ഭാഗം ഇരുമ്പ് വേലികൾ കെട്ടി സുരക്ഷ ഒരുക്കിയിരിക്കുകയാണ്. ഇപ്പോൾ ഒന്നാം നിലയിൽ പ്രവർത്തിക്കുന്ന നഗരസഭ ഓഫീസിന്‍റെ കോൺക്രീറ്റ് സീലിംഗ് അടർന്നുവീണ് കമ്പികൾ തെളിഞ്ഞു തുടങ്ങിയിരിക്കുന്നു. അപകടം ഏതു നിമിഷവും സംഭവിക്കാവുന്ന അവസ്ഥയിൽ ഭീതിയോടെയാണ് ജീവനക്കാർ ഇവിടെ ജോലി ചെയ്യുന്നത്. പുതിയ കെട്ടിടത്തിനായുള്ള നടപടികൾ ഇഴയുകയാണ്. നഗരസഭ ഷോപ്പിംഗ് കോംപ്ലക്സ് അപകടാവസ്ഥയിലാണെന്ന റിപ്പോർട്ടുകളുള്ളതിനാൽ നിലവിലെ കെട്ടിടത്തിന്‍റെ അറ്റകുറ്റപ്പണികൾക്ക് നഗരസഭ എൻജിനിയറിംഗ് വിഭാഗം അനുമതി നൽകുന്നില്ല. കെട്ടിടത്തിന്‍റെ അപകടാവസ്ഥ ചൂണ്ടിക്കാട്ടി നഗരസഭ മന്ത്രിയും സ്ഥലം എംഎൽഎയുമായ സജി ചെറിയാനെ സമീപിച്ചിരുന്നു. നഗരസഭ മുൻപ് പ്രവർത്തിച്ചിരുന്ന സ്ഥലത്ത് പുതിയ കെട്ടിടം നിർമിക്കുന്നതിനായി രണ്ടു വർഷം മുൻപ് സംസ്ഥാന ബജറ്റിൽ രണ്ടു കോടി രൂപ പ്രഖ്യാപിച്ചിരുന്നു. എന്നാൽ, ഇതുവരെ തുടർ നടപടികളൊന്നും ഉണ്ടായിട്ടില്ലെന്ന് നഗരസഭ അധികൃതർ പറയുന്നു. നഗരസഭ മുൻപ് പ്രവർത്തിച്ചിരുന്ന 14 സെന്‍റ് സ്ഥലത്ത് പുതിയ മന്ദിരം നിർമിക്കാൻ നഗരസഭയ്ക്കു പദ്ധതിയുണ്ട്. സർക്കാർ രണ്ടു വർഷം മുൻപ് പ്രഖ്യാപിച്ച തുക പുതിയ കെട്ടിട നിർമാണത്തിന് അപര്യാപ്തമാണ്. വായ്പയെടുത്താൽ മാത്രമേ പുതിയ മന്ദിരം നിർമിക്കാൻ സാധിക്കൂ. അഡ്വ. ശോഭ വർഗീസ് (നഗരസഭാ ചെയർപേഴ്സൺ) വർഷങ്ങൾക്ക് മുൻപ് നിർമാണപ്രവർത്തനങ്ങൾ തുടങ്ങിയെങ്കിലും നിരവധി തവണ അത് മുടങ്ങിയതാണ് കെട്ടിടത്തിന്‍റെ ബലക്ഷയത്തിനു കാരണമായത്. കെട്ടിടത്തിന്‍റെ മുകൾഭാഗങ്ങൾ അടർന്നുവീഴുകയാണ്. ചോർച്ചയും പതിവാണ്. അറ്റകുറ്റപ്പണികൾ കാലാകാലങ്ങളിൽ നടത്തിയിട്ടുണ്ടെങ്കിലും വലിയ തുക ചെലവഴിച്ച് അറ്റകുറ്റപ്പണികൾ നടത്തിയാലും ബലക്ഷയം പരിഹരിക്കാൻ കഴിയാത്ത അവസ്ഥയിലാണ്. ഫണ്ട് കണ്ടെത്തി പുതിയ ഓഫീസ് കെട്ടിടം നിർമിക്കാനുള്ള നടപടിക്രമങ്ങൾ ആരംഭിച്ചിട്ടുണ്ട്. കെ. ഷിബുരാജൻ (വൈസ് ചെയർമാൻ ചെങ്ങന്നൂർ നഗരസഭ)

യാത്രയയപ്പ് നല്‍കി

ചേർത്തല: മുട്ടം ഹോളി ഫാമിലി ഹയർ സെക്കൻഡറി സ്കൂളിന്‍റെ മാനേജരായി നാലുവർഷം സേവനമനുഷ്ഠിച്ച ശേഷം എറണാകുളം-അങ്കമാലി അതിരൂപത വികാരി ജനറാളായി നിയമിതനായി സ്ഥലം മാറിപ്പോകുന്ന റവ. ഡോ. ആന്‍റോ ചേരാംതുരുത്തിക്ക് ചേർത്തല ഹോളി ഫാമിലി ഹയർ സെക്കൻഡറി സ്കൂളിലെ വിദ്യാർഥികളും അധ്യാപകരും പിടിഎയും ചേർന്ന് യാത്രയയപ്പ് നൽകി. സ്കൂൾ ഓഡിറ്റോറിയത്തിൽ ചേർന്ന യോഗത്തിൽ പിടിഎ വൈസ് പ്രസിഡന്‍റ് പാട്രിക് സ്റ്റീഫൻ അധ്യക്ഷത വഹിച്ചു. ചേർത്തല എഇഒ എം. ജയലക്ഷ്മി ഉപഹാരം നൽകി. സാജു തോമസ്, സി.ജെ. വർഗീസ്, വി. ശ്രീഹരി, സിസ്റ്റർ ലിസിയ പുതുശേരി, സിനി തോമസ്, എം.ടി. ജോസഫ്, ക്രിസ്റ്റോ ജൂഡ് ജോഷി, എ. ആദിശേഷ് എന്നിവർ സംസാരിച്ചു. പ്രിൻസിപ്പല്‍ ലിസ കുര്യൻ സ്വാഗതവും പ്രഥമാധ്യാപിക എം. മിനി നന്ദിയും പറഞ്ഞു.

സ്വകാര്യ പണമിടപാട് സ്ഥാപനത്തിലെ ജീവനക്കാർ ഭീഷണിപ്പെടുത്തിയതായി പരാതി ; ഗൃഹനാഥൻ ജീവനൊടുക്കി

ചാരുംമൂട്: സ്വകാര്യ പണമിടപാട് സ്ഥാപനത്തിലെ ജീവനക്കാർ വീട്ടിലെത്തി അപമാനിക്കുകയും ഭീഷണിപ്പെടുത്തുകയും ചെയ്തതിനെ തുടർന്ന് ഗൃഹനാഥൻ ജീവനൊടുക്കിയതായി പരാതി. വള്ളികുന്നം കടുവിനാൽ മലവിളയിൽ ശശി (60) ആണ് വീടിനുള്ളിൽ തൂങ്ങി മരിച്ചത്. കഴിഞ്ഞ ദിവസം വൈകിട്ട് ആറിനായിരുന്നു സംഭവം. വീടുപണിക്കായി സ്വകാര്യ പണമിടപാട് സ്ഥാപനത്തിന്‍റെ മാവേലിക്കര കുറത്തികാട്, താമരക്കുളം എന്നീ ബ്രാഞ്ചുകളിൽനിന്നു ശശിയുടെ ഭാര്യ രാധ ഒന്നര ലക്ഷം രൂപ മൈക്രോ ഫിനാൻസ് വായ്‌പ എടുത്തിരുന്നു. ഇതിന്‍റെ കഴിഞ്ഞ ആഴ്ചയിലെ തവണ അടയ്ക്കാൻ വൈകിയതിനെ തുടർന്ന് സ്ഥാപനത്തിലെ രണ്ടു ജീവനക്കാർ വീട്ടിൽ എത്തി ബഹളം ഉണ്ടാക്കിയെന്നും ഭീഷണി മുഴക്കിയെന്നും ബന്ധുക്കൾ പരാതിയിൽ പറയുന്നു. ഇതിന് പിന്നാലെ ആണ് ഭർത്താവ് ശശി ജീവനൊടുക്കിയതെന്ന് ഭാര്യ രാധ പോലീസിന് മൊഴി നൽകി. ഓച്ചിറയിലെ ഒരു സ്വകാര്യ ആശുപത്രിയിൽ ജോലി ചെയ്യുകയാണ് രാധ. ഫിനാൻസ് ജീവനക്കാർ വീട്ടിലെത്തി പ്രശ്നം ഉണ്ടാക്കിയപ്പോൾ അടയ്ക്കാനുള്ള തുകയുമായി ബസിൽ വീട്ടിലേക്ക് വരികയാണെന്നു പറഞ്ഞിട്ടും അവർ കേട്ടില്ലെന്നും രാധ പോലീസിന് നൽകിയ പരാതിയിൽ പറഞ്ഞു. 720 രൂപ വച്ചാണ് ആഴ്ചയിൽ അടയ്ക്കുന്നത്. ശശി വീട്ടിൽനിന്നു പുറത്തേക്ക് പോയപ്പോൾ ജീവനക്കാർ തടഞ്ഞുനിർത്തിയതായും മരുമകളെ ശശിയുടെ മുന്നിൽ വച്ച് അപമാനിച്ചതായും ബന്ധുക്കൾ പരാതിയിൽ പറയുന്നു. വള്ളികുന്നം പോലീസ് കേസെടുത്ത് അന്വേഷണം ആരംഭിച്ചു. ശശിയുടെ മൃതദേഹം പോസ്റ്റ്‌മോർട്ടത്തിന് ശേഷം കറ്റാനത്തെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംസ്കാരം പിന്നീട്. മക്കൾ ശരൺ,ശരത്ത്. നടപടിയെടുക്കണം: കൊടിക്കുന്നിൽ സുരേഷ് എംപി ചാരുംമൂട്: മൈക്രോ ഫിനാൻസ് സ്ഥാപനങ്ങളുടെ ഭീഷണിക്ക് ഇരയായി വള്ളികുന്നത്ത് ഗൃഹനാഥനായ ശശി ആത്മഹത്യ ചെയ്ത സംഭവത്തിൽ ശക്തമായ നടപടി സ്വീകരിക്കണമെന്ന് കൊടിക്കുന്നിൽ സുരേഷ് എംപി. ശശിയുടെ ആത്മഹത്യക്ക് ഉത്തരവാദികളായ സ്ഥാപനങ്ങളുടെയും ഉദ്യോഗസ്ഥരുടെയും പേരിൽ ആത്മഹത്യാപ്രേരണാക്കുറ്റത്തിൽ കേസെടുത്ത് അടിയന്തരമായി നടപടികൾ സ്വീകരിക്കണമെന്ന് ആലപ്പുഴ ജില്ലാ പോലീസ് മേധാവിയോട് എംപി ആവശ്യപ്പെട്ടു. മൈക്രോ ഫിനാൻസ് സ്ഥാപനങ്ങളുടെ ഇത്തരം പ്രവർത്തനങ്ങൾ നിയന്ത്രിക്കുന്നതിന് കർശന നിയമങ്ങൾ കൊണ്ടുവരാൻ കേന്ദ്ര-സംസ്ഥാന സർക്കാരുകൾ അടിയന്തരമായി ഇടപെടണമെന്നുംഎംപി ആവശ്യപ്പെട്ടു.

വള്ളം മറിഞ്ഞ് മത്സ്യത്തൊഴിലാളിയെ കാണാതായി

തുറവൂർ: കടലിൽ വള്ളം മറിഞ്ഞ് മത്സ്യത്തൊഴിലാളിയെ കാണാതായി. തുറവൂർ പഞ്ചായത്ത് ഒന്നാം വാർഡ് പള്ളിത്തോട് കുരിശിങ്കൽ വീട്ടിൽ കുഞ്ഞുമോന്‍റെ മകൻ അനീഷ് എന്ന ഇമ്മാനുവലി(32)നെയാണ് കാണാതായത്. ഇന്നലെ രാവിലെ 11ന് പള്ളിത്തോട് ചാപ്പക്കടവിനും ചെല്ലാനം ഹാർബറിനും ഇടയിലുള്ള ഭാഗത്തായാണ് വള്ളം മറിഞ്ഞത്. ചെല്ലാനം ഹാർബറിൽനിന്ന് മത്സ്യബന്ധനത്തിനു പോയ ചെല്ലാനം സ്വാദേശി ജോയിയുടെ ഉടമസ്ഥതയിലുള്ള ചെറുവള്ളം ആണ് തിരയിൽപ്പെട്ട് മറിഞ്ഞത്. വള്ളത്തിൽ മൂന്നു പേരാണ് ഉണ്ടായിരുന്നത്. ഇതിൽ ജോയിയും മറ്റൊരാളും നീന്തി രക്ഷപ്പെട്ടു. ഇമ്മാനുവൽ തിരയിൽപ്പെട്ട് കാണാതാവുകയായിരുന്നു. നാട്ടുകാർ അറിയിച്ചതിനെത്തുടർന്ന് കുത്തിയതോട് പോലീസും ഫയർഫോഴ്സും മുങ്ങൽ വിദഗ്ധരും എത്തി തിരച്ചിൽ നടത്തിയെങ്കിലും കണ്ടെത്താനായില്ല. രാത്രി വൈകിയും മത്സ്യത്തൊഴിലാളികളും മറ്റും തിരച്ചിൽ തുടരുകയാണ്. റവന്യു, ഫിഷറീസ്, പഞ്ചായത്ത് ഉദ്യോഗസ്ഥരും സ്ഥലത്തുണ്ട്.

ഡോക്ടർമാരുടെ സുരക്ഷ: സമൂഹം മാറിച്ചിന്തിക്കേണ്ട സമയമെന്ന് ഡോ. ഉമ്മൻ വർഗീസ്

ചെങ്ങന്നൂർ: ആരോഗ്യ പ്രവർത്തകരോടുള്ള സമൂഹത്തിന്‍റെ മനോഭാവത്തിൽ കാതലായ മാറ്റം അനിവാര്യമാണെന്ന് ഇന്ത്യൻ മെഡിക്കൽ അസോസിയേഷൻ ജില്ലാ ചെയർമാനും ചെങ്ങന്നൂർ ഉമ്മൻ ഐ ഹോസ്പിറ്റൽ ഡയറക്ടറുമായ ഡോ. ഉമ്മൻ വർഗീസ്. രോഗികളെ സുഖപ്പെടുത്തുക എന്ന ഏക ലക്ഷ്യത്തോടെ പ്രവർത്തിക്കുന്ന ഡോക്ടർമാരും മറ്റ് ആരോഗ്യ പ്രവർത്തകരും നിർഭാഗ്യകരമായ ചില സാഹചര്യങ്ങളിൽ കുറ്റവാളികളാക്കപ്പെടുകയും ആക്രമിക്കപ്പെടുകയും ചെയ്യുന്ന പ്രവണത വർധിക്കുന്നത് ആശങ്ക ഉയർത്തുന്നുണ്ടെന്നും അദ്ദേഹം പറഞ്ഞു. ഡോക്ടേഴ്‌സ് ദിനത്തോടനുബന്ധിച്ച് നൽകിയ സന്ദേശത്തിലാണ് അദ്ദേഹം ഇക്കാര്യം വ്യക്തമാക്കിയത്. ആരോഗ്യ പ്രവർത്തകർക്ക് സുരക്ഷയൊരുക്കേണ്ടത് സർക്കാരിന്‍റെ മാത്രം ഉത്തരവാദിത്വമല്ല. ഓരോ പൗരനും ഈ വിഷയത്തിൽ തങ്ങളുടെ ചുമതല തിരിച്ചറിയണം. ഡോക്ടേഴ്‌സ് ദിനം, ആരോഗ്യ പ്രവർത്തകരോടുള്ള സമൂഹത്തിന്‍റെ കാഴ്ചപ്പാടിൽ പുതിയ മാറ്റങ്ങൾക്ക് തുടക്കമാകണമെന്നും അവരെ ബഹുമാനിക്കാനും അവരുടെ സുരക്ഷ ഉറപ്പാക്കാനും ഓരോ പൗരനും പ്രതിജ്ഞാബദ്ധരാകണമെന്നും അദ്ദേഹം ആഹ്വാനം ചെയ്തു.

പച്ചയില്‍ എടിഎം തകര്‍ത്ത് മോഷണശ്രമം

എടത്വ: പച്ചയില്‍ എടിഎം തകര്‍ത്ത് മോഷണശ്രമം. ഫെഡറല്‍ ബാങ്ക് പച്ച-ചെക്കിടിക്കാട് ശാഖയിലെ എടിഎം തകര്‍ത്താണ് മോഷണശ്രമം നടന്നത്. ഇന്നലെ പുലര്‍ച്ചെ രണ്ടിനാണ് സംഭവം. കവര്‍ച്ച സമയത്ത് ബാങ്ക് ഹെഡ് ഓഫീസില്‍ ലഭിച്ച സിഗ്‌നലിനെത്തുടര്‍ന്ന് ബാങ്ക് അധികൃതര്‍ പോലീസുമായി ബന്ധപ്പെട്ടു. പോലീസ് സ്ഥലത്തെത്തിയപ്പോൾ മോഷ്ടാവ് ശ്രമം ഉപേക്ഷിച്ച് കടന്നിരുന്നു. പോലീസ് പച്ചയിലെ ബാങ്ക് ജീവനക്കാരെ വിളിച്ചുവരുത്തിയശേഷം സിസിടിവി ദൃശ്യം പരിശോധിച്ചു. റെയിന്‍കോട്ടുകൊണ്ട് ശരീരം പൂര്‍ണമായി മറച്ച വ്യക്തി ഇരുമ്പ് വെട്ടുകത്തി ഉപയോഗിച്ച് എടിഎം തകര്‍ക്കുന്ന ദൃശ്യം സിസിടിവിയില്‍ പതിഞ്ഞിട്ടുണ്ട്. കൃത്യം നടത്തിയ ശേഷം എടത്വ-തകഴി റോഡിനു കുറുകെ തെക്കു ഭാഗത്തേക്കുള്ള ഇടവഴയിലൂടെ നടന്നു പോകുന്നതായി ശ്രദ്ധയില്‍പ്പെട്ടിട്ടുണ്ട്. സംഭവസ്ഥലത്തെത്തിയ ഡിവൈഎസ്പി കെ.എന്‍. രാജേഷ്, ബാങ്ക് മാനേജര്‍ എം. പാര്‍വതിയില്‍നിന്ന് വിവരങ്ങള്‍ അന്വേഷിച്ചറിഞ്ഞു. എടത്വ സിഐ എം. അന്‍വറിന്‍റെ നേതൃത്വത്തില്‍ പോലീസ് സംഘം സംഭവസ്ഥലത്തെത്തി അന്വഷണം ആരംഭിച്ചു. തെളിവുകള്‍ ശേഖരിക്കാന്‍ ഫിംഗര്‍ പ്രിന്‍റ് വിദഗ്ധരേയും ഡോഗ് സ്‌ക്വാഡിനേയും സ്ഥലത്തെത്തിച്ചു. പോലീസ് നായ സച്ചിന്‍ മണം പിടിച്ച് ചെക്കിടിക്കാട് തെക്കേത്തലയ്ക്കല്‍ പാലത്തിന്‍റെ മറുകരയിലുള്ള കുറ്റിക്കാട്ടില്‍ വരെ എത്തിയിരുന്നു. എടത്വ എസ്‌ഐ എന്‍. രാജേഷിനാണ് അന്വഷണ ചുമതല. ഫിംഗര്‍ പ്രിന്‍റ് വിദഗ്ധ പ്രതിഭ, ഫോട്ടോഗ്രാഫര്‍ ബിന്‍സ്, ഡോഗ് സ്‌ക്വാഡില്‍ നിന്ന് ശ്രീകാന്ത്, സീനിയര്‍ സിപിഒമാരായ പ്രതീപ് കുമാര്‍, ശ്രീരാജ്, രാജീവ്, ജസ്റ്റിന്‍ രാജ് എന്നിവര്‍ അന്വഷണത്തിനു നേതൃത്വം നല്‍കി.

തീരദേശത്ത് ഇന്ന് ഹർത്താൽ

തുറവൂർ: വള്ളം മറിഞ്ഞ് മത്സ്യത്തൊഴിലാളിയെ കാണാതായതിനെത്തുടർന്ന് തീരദേശത്ത് ഇന്ന് ഹർത്താൽ. രാവിലെ 6 മുതൽ വൈകിട്ട് 6 വരെയാണ് ഹർത്താൽ. കണ്ണമാലി മുതൽ അർത്തുങ്കൽ വരെയുള്ള ഭാഗങ്ങളിലാണ് തീരദേശ ഹർത്താൽ ആചരിക്കുന്നത്. വെള്ളം മറിഞ്ഞ് കാണാതായ ഇമ്മാനുവലിനെ (32) കൂടാതെ മറ്റു രണ്ടുപേർക്ക് പരിക്കേൽക്കുകയും ചെയ്തിരുന്നു. വള്ളത്തിന്‍റെ ഉടമയായ ചെല്ലാനം സ്വദേശി ജോയിക്ക് ഗുരുതര പരിക്കാണ്. ജോയിയെയും ഒപ്പമുണ്ടായിരുന്ന നോബിയെയും നാട്ടുകാർ തുറവൂർ താലൂക്ക് ആശുപത്രിയിലും തുടർന്ന് എറണാകുളം ജനറൽ ആശുപത്രിയിൽ എത്തിച്ചുവെങ്കിലും ജോയിയുടെ പരിക്ക് ഗുരുതരമായതിനാൽ ഇദ്ദേഹത്തെ കളമശേരി മെഡിക്കൽ കോളജ് ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്.

കപ്പൽ കണ്ടെയ്നറുകൾ കീറാമുട്ടി; വലകള്‍ നശിക്കുന്നു

ചേര്‍ത്തല: കേരള തീരത്ത് അപകടത്തില്‍പ്പെട്ട് കടലില്‍ മുങ്ങി പ്പോയ എംഎസ്‌സി എൽസ-3 കപ്പലിലുണ്ടായിരുന്ന കണ്ടെയ്നറുകൾ കടലിൽ ഒഴുകിനടന്ന് മത്സ്യത്തൊഴിലാളികള്‍ക്ക് വന്‍ നാശനഷ്ടം വരുത്തുന്നതായി പരാതി. വിവിധ ഭാഗങ്ങളില്‍നിന്നും മത്സ്യബന്ധനത്തിനായി പോകുന്നവരുടെ ലക്ഷങ്ങള്‍ വിലയുള്ള വലകളും യാനങ്ങളും കണ്ടെയ്നറുകളുടെ ഇരുമ്പുഭാഗങ്ങളില്‍ തട്ടി നിരന്തരമായി നശിക്കുകയാണ്. കഴിഞ്ഞദിവസം ആലപ്പുഴയ്ക്ക് പടിഞ്ഞാറ് വിവിധയിടങ്ങളിൽ മത്സ്യബന്ധനം നടത്തിയ മത്സ്യബന്ധനവള്ളങ്ങളുടെ വലകൾ കണ്ടെയ്നറുകളിൽ ഉടക്കി ലക്ഷക്കണക്കിന് രൂപയുടെ നാശനഷ്ടം ഉണ്ടായിരുന്നു. വലകൾ നഷ്ടമായി ഫോർട്ട് മട്ടാഞ്ചേരിയിൽനിന്നു കടലിൽ മത്സ്യബന്ധനത്തിനായി പോയ പ്രവാചകൻ, അൽ - റഹ്മാൻ, പ്രത്യാശ, അക്വീലാസ്, ഉന്നതൻ എന്നീ വള്ളങ്ങൾക്കും വൈപ്പിൻ ഗോശ്രീപുരത്തുനിന്നു കടലിലേക്കുപോയ ആദിത്യൻ, അയ്യപ്പജ്യോതി, പരീക്ഷണം, ജലനിധി തുടങ്ങിയ വള്ളങ്ങൾക്കും തിങ്കളാഴ്ച്ച വലകൾ നഷ്ടമായി. ശനിയാഴ്ച ഫോർട്ട് കൊച്ചിയിൽനിന്നുപോയ അറയ്ക്കൽ, പുറപ്പാട് തുടങ്ങിയ വള്ളങ്ങളുടെ വലയും കഴിഞ്ഞ ആഴ്ചയിൽ തോട്ടപ്പള്ളിയിൽനിന്നു പോയ സർവരക്ഷകൻ, ആറാട്ട്, വക്കീൽ, മായാവി, അഖിലാനന്ദന്‍റെ വള്ളം തുടങ്ങി ഏഴു വള്ളങ്ങളുടെ വലകളും നഷ്ടമായി. മത്സ്യബന്ധനം നടത്തുമ്പോൾ വലകൾ കണ്ടെയ്നറുകളിൽ ഉടക്കി കീറുന്നതു പതിവായ സാഹചര്യത്തിൽ ആലപ്പുഴ കടൽമേഖല ഉപേക്ഷിച്ച് മത്സ്യത്തൊഴിലാളികൾ വിവിധ മേഖലയിലേക്ക് വള്ളങ്ങളുമായി പോകേണ്ട സാഹചര്യമാണ്. കനത്ത നിരാശ കപ്പല്‍ അപകടം നടന്ന് ഒരുമാസം പിന്നിട്ടിട്ടും കപ്പലിലെ കണ്ടെയ്നറുകൾ സമയബന്ധിതമായി നീക്കം ചെയ്യണമെന്ന് മത്സ്യത്തൊഴിലാളികൾ നിരന്തരം ആവശ്യപ്പെട്ടിട്ടും നടപടികൾ സ്വീകരിക്കാത്ത സർക്കാരിന്‍റെ നിസംഗതമൂലമാണ് വലകൾ നഷ്ടപ്പെട്ട് മത്സ്യബന്ധനം ഉപേക്ഷിക്കേണ്ട സാഹചര്യമുള്ളത്. തിങ്കളാഴ്ച മാത്രം ഏതാണ്ട് പത്തോളം മത്സ്യബന്ധന യാനങ്ങളുടെ വലകളാണ് കണ്ടെയ്നറുകളിൽ ഉടക്കി നശിച്ചത്. ലക്ഷങ്ങളുടെ വലയും വലയിൽ ഉണ്ടായിരുന്ന ലക്ഷക്കണക്കിന് രൂപ മൂല്യമുള്ള മത്സ്യസമ്പത്തും നശിച്ചതുമൂലം അടുത്ത ഒരാഴ്ച്ചത്തെ സീസൺ പണിക്ക് പോകാൻ പറ്റാത്ത സാഹചര്യം വള്ളം-വല ഉടമകളെയും തൊഴിലാളികളെയും കനത്ത നിരാശയിലാഴ്ത്തിരിക്കുകയാണ്. കപ്പലപകടം വിഴിഞ്ഞം തുറമുഖത്തിന്‍റെ പേരിന് കളങ്കം വരുത്തുമെന്ന കാരണത്താൽ പരാതിപ്പെട്ടാൽ കേസെടുക്കാൻ പോലും തീരദേശ പോലീസ് കൂട്ടാക്കാത്ത സാഹചര്യമാണ്. പാക്കേജ് പ്രഖ്യാപിക്കണം വലകൾ നഷ്ടപ്പെട്ട ഉടമകൾക്കും പണിക്കു പോകാൻ പറ്റാതെ തൊഴിൽദിനങ്ങൾ നഷ്ടമാകുന്ന തൊഴിലാളികൾക്കും അടിയന്തര സഹായമായി കപ്പലപകട സ്കീമിൽ ഉള്‍പ്പെടുത്തി മുൻകൂർ സാമ്പത്തിക പാക്കേജ് പ്രഖ്യാപിക്കാൻ ഫിഷറീസ് വകുപ്പ് തയാറകണമെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷൻ ആലപ്പുഴ ജില്ലാ കമ്മിറ്റി ആവശ്യപ്പെട്ടു. മത്സ്യബന്ധവള്ളുടെ രജിസ്ട്രേഷനും ലൈസൻസ് ഫീസും ഇനത്തിൽ കോടി കണക്കിന് രൂപ ഫീഷറീസ് വകുപ്പിന് ലഭിച്ചിട്ടും അപകടങ്ങളിൽപ്പെടുന്ന മത്സ്യബന്ധയാനങ്ങൾക്ക് അടിയന്തര സഹായം എത്തിക്കുന്നതിൽ സർക്കാർ പരാജയമാണ്. വിഴിഞ്ഞം തുറമുഖത്തെ സംരക്ഷിക്കാൻ വയബലിറ്റി ഫണ്ടടക്കം കോടികൾ ചിലവഴിക്കുന്ന സർക്കാർ കപ്പലപകടം സൃഷ്ടിച്ച ആഘാതത്തിൽ മത്സ്യമേഖലയെ സംരക്ഷിക്കാൻ തയാറാകണമെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷൻ സംസ്ഥാന പ്രസിഡന്‍റ് ജാക്സൺ പൊള്ളയിൽ, ജില്ലാ പ്രസിഡന്‍റ് രാജു ആശ്രയം, സെക്രട്ടറി ആന്‍റണി കുരിശുങ്കൽ എന്നിവർ ആവശ്യപ്പെട്ടു.

അലഞ്ഞുതിരിഞ്ഞ വയോധികനെ ഗാന്ധിഭവൻ സ്നേഹവീട്ടിൽ എത്തിച്ചു

ഹരിപ്പാട്: നാഷണൽ ഹൈവേയിൽ അവശനിലയിൽ കണ്ട വയോധികനെ ഹരിപ്പാട് പോലീസ് ഗാന്ധിഭവൻ സ്നേഹവീട്ടിൽ എത്തിച്ച് സംരക്ഷണം ഒരുക്കി. സംസാരശേഷി ഇല്ലാത്ത ഇതരസംസ്ഥാനക്കാരനായ 70 വയസ് തോന്നിക്കുന്ന വയോധികനെ കരുവാറ്റ പവർ ഹൗസിന് സമീപം കാണുകയും നാട്ടുകാർ പോലീസിനെ വിവരമറിയിക്കുകയുമായിരുന്നു. തുടർന്ന് ഹരിപ്പാട് പോലീസ് ഗാന്ധിഭവന്‍റെ സംരക്ഷണം ആവശ്യപ്പെടുകയായിരുന്നു. പോലീസ് ഉദ്യോഗസ്ഥരായ ബെൽരാജ്, രാകേഷ് എന്നിവർ ചേർന്ന് സ്നേഹവീട്ടിൽ എത്തിച

ആരോഗ്യമന്ത്രി ചരിത്രപരാജയമെന്ന് കൊടിക്കുന്നിൽ സുരേഷ് എംപി

അമ്പലപ്പുഴ: ഇത്രയധികം പരാജയപ്പെട്ട ആരോഗ്യമന്ത്രി കേരളത്തിന്‍റെ ചരിത്രത്തിൽ ഉണ്ടായിട്ടില്ലെന്ന് കൊടിക്കുന്നിൽ സുരേഷ് എംപി. ആരോഗ്യവകുപ്പിന്‍റെ അനാസ്ഥയ്ക്കെതിരേ ആലപ്പുഴ മെഡിക്കൽ കോളജ് ആശുപത്രിയുടെ മുന്നിൽ ജില്ലാ കോൺഗ്രസ് കമ്മിറ്റി സംഘടിപ്പിച്ച പ്രതിഷേധ ധർണ ഉദ്ഘാടനം ചെയ്യുകയായിരുന്നു അദ്ദേഹം. ഓപ്പറേഷനുകൾ നടക്കുന്നില്ല. രോഗികൾക്ക് ആവശ്യമായ മരുന്നുകൾ കിട്ടുന്നില്ല. അത്യാസന്ന നിലയിലായ രോഗികൾക്ക് വേണ്ടത്ര ചികിത്സ കൊടുക്കാൻ സർക്കാരിന് കഴിയുന്നില്ല. ആവശ്യമായ ഡോക്ടർമാരുടെ അഭാവം വലിയ പ്രതിസന്ധിയാണ് സൃഷ്ടിച്ചിരിക്കുന്നത്. ഡോ. ഹാരിസിന്‍റെ വെളിപ്പെടുത്തലുകൾ വന്നപ്പോൾ സിസ്റ്റത്തിന്‍റെ തകരാർ എന്ന് പറഞ്ഞ് ഒഴിയുന്ന നിലപാടാണ് ആരോഗ്യമന്ത്രി സ്വീകരിച്ചത്. മന്ത്രി വീണാ ജോർജിൽനിന്ന് എത്രയും വേഗം ആരോഗ്യവകുപ്പ് മാറ്റണമെന്നും എംപി ആവശ്യപ്പെട്ടു. ഡിസിസി പ്രസിഡന്‍റ് ബി. ബാബുപ്രസാദ് അധ്യക്ഷത വഹിച്ചു.

മെഡിക്കൽ കോളജിൽ കംപ്യൂട്ടർ തകരാറിലായി, ഒപി കൗണ്ടറിലെ രോഗികൾ വലഞ്ഞു

അമ്പലപ്പുഴ: തിരക്കേറിയ സൂപ്പർ സ്പെഷാലിറ്റി ബ്ലോക്കിൽ ഒപി കൗണ്ടറിലെ കംപ്യൂട്ടർ തകരാറിലായി. നൂറുകണക്കിന് രോഗികൾ വലഞ്ഞു. ആലപ്പുഴ മെഡിക്കൽ കോളജ് ആശുപത്രിയിലെ സൂപ്പർ സ്പെഷാലിറ്റി ബ്ലോക്കിലാണ് ഇന്നലെ കംപ്യൂട്ടർ തകരാറിലായത്. ആഴ്ചയിൽ ഒരുദിവസം മാത്രം ഒപി യുള്ള ഗാസ്ട്രോളജി വിഭാഗത്തിൽ ഉൾപ്പെടെ വിവിധ ഒപികളിലായി ചികിത്സതേടി നൂറുകണക്കിന് രോഗികളാണ് രാവിലെ മുതൽ കാത്തുനിന്നത്. ഇതിനിടയിലാണ് ഒപി ടിക്കറ്റ് വിതരണം ചെയ്യുന്ന കംപ്യൂട്ടർ തകരാറിലായത്. പിന്നീട് മണിക്കൂറുകൾ കാത്തുനിന്നശേഷം ഭൂരിഭാഗം രോഗികളും മടങ്ങിപ്പോയി. ഗാസ്ട്രോളജി വിഭാഗത്തിൽ ചികിത്സതേടാൻ ജില്ലയുടെ വിവിധ പ്രദേശങ്ങളിൽനിന്നായി അനേകം രോഗികളാണ് എത്തിയത്. കംപ്യൂട്ടർ തകരാറായെങ്കിലും പകരം സംവിധാനമേർപ്പെടുത്തി ഒപി ടിക്കറ്റ് വിതരണം ചെയ്യാനും അധികൃതർക്ക് കഴിഞ്ഞില്ല.

തണ്ണീർമുക്കം പള്ളിയില്‍ തിരുരക്ത ജപമാല മാസാചരണം

ചേര്‍ത്തല: തണ്ണീർമുക്കം തിരുരക്ത പള്ളിയിൽ 17 വരെ തിരുരക്ത ജപമാല മാസാചരണം നടക്കും. 18ന് തിരുനാൾ കൊടിയേറ്റവും തുടര്‍ന്ന് തിരുരക്ത തിരുനാൾ നവനാൾ ആരംഭിക്കും. 26, 27 തീയതികളിലാണ് പ്രധാന തിരുനാൾ. എല്ലാ വെള്ളിയാഴ്ചകളിലും രാവിലെ 10നും വൈകുന്നേരം അഞ്ചിനും തിരുരക്ത ജപമാലയും ദിവ്യബലിയും പ്രത്യേക തിരുരക്ത തിരുക്കർമങ്ങളും നേർച്ചക്കഞ്ഞി വിതരണവും നടക്കും. തിരുരക്ത ജപമാല മാസാചരണത്തിന്‍റെ ഭാഗമായി 17 വരെ ദിവസങ്ങളിൽ ഇടവകയിലെ കുടുംബങ്ങളെ വിവിധ ഗ്രൂപ്പുകളായി സമർപ്പിച്ച് പ്രത്യേക പ്രാർഥനകളും ഉണ്ടായിരിക്കുമെന്ന് വികാരി ഫാ. സുരേഷ് മല്പാൻ അറിയിച്ചു.

പെരുമ്പളത്തിനൊരു കളിക്കളം; ദ്വീപിന്‍റെ കായിക സ്വപ്നങ്ങള്‍ക്കു കരുത്തുപകര്‍ന്ന് ഒരുകോടി അനുവദിച്ചു

ആലപ്പുഴ: നാടിന് സ്വന്തമായി ഒരു കളിക്കളം വേണമെന്ന പെരുമ്പളം ദ്വീപ് നിവാസികളുടെ സ്വപ്നം യാഥാർഥ്യമാകുന്നു. കായിക, യുവജനകാര്യ വകുപ്പിന്‍റെ ഒരു പഞ്ചായത്തിന് ഒരു കളിക്കളം പദ്ധതിയിൽ ഉൾപ്പെടുത്തിയാണ് കളിക്കളം അനുവദിച്ചത്. ഒരുകോടി രൂപ ചെലവിൽ അത്യാധുനിക സൗകര്യങ്ങളോടെയാണ് കളിക്കളം നിർമിക്കുന്നത്. ഇതിനായി മൊത്തം തുകയുടെ 50 ശതമാനമായ 50 ലക്ഷം രൂപ കായികവകുപ്പ് മുടക്കും. എംഎൽഎ ഫണ്ട്, തദ്ദേശ സ്ഥാപന ഫണ്ട്, സിഎസ്ആർ, പൊതു-സ്വകാര്യ പങ്കാളിത്തം തുടങ്ങിയവയിലൂടെ ബാക്കി തുക കണ്ടെത്തും. രാസലഹരിയുടെ ഉപയോഗവും അക്രമവും യുവാക്കളിലും കൗമാരക്കാർക്കിടയിലും വർധിച്ചുവരുന്ന സാഹചര്യത്തിൽ കായിക മത്സരങ്ങളുടെയും കായിക വിനോദങ്ങളുടെയും നല്ല ലഹരിയിലേക്ക് പുതുതലമുറയെ നയിക്കുന്നതിന് ഇത്തരം പദ്ധതികൾ ഏറെ സഹായകരമാകുമെന്ന് ദലീമ ജോജോ എംഎൽഎ പറഞ്ഞു. പദ്ധതിയുടെ തുടർനടപടികൾ എത്രയും വേഗത്തിലാക്കി സ്വന്തമായി ഒരു കളിക്കളം എന്ന പെരുമ്പളം നിവാസികളുടെ സ്വപ്നം ഉടൻ യാഥാർഥ്യമാക്കാനുള്ള നടപടികൾ കൈക്കൊള്ളുമെന്നും എംഎൽഎ പറഞ്ഞു. കേരളത്തിലെ മുഴുവൻ പഞ്ചായത്തുകളിലും നിലവാരമുള്ള കളിക്കളം ഒരുക്കാൻ ലക്ഷ്യമിട്ടാണ് കായിക, യുവജനകാര്യ വകുപ്പ് പദ്ധതി നടപ്പിലാക്കുന്നത്. 2025-26 സാമ്പത്തിക വർഷത്തിൽ സംസ്ഥാനത്ത് അനുവദിച്ച 36 കളിക്കളങ്ങളിൽ അഞ്ചെണ്ണമാണ് ആലപ്പുഴയ്ക്ക് ലഭിച്ചത്. ഒരെണ്ണം അരൂർ മണ്ഡലത്തിലെ പെരുമ്പളത്തും ബാക്കി നാലെണ്ണം മാവേലിക്കര മണ്ഡലത്തിലെ തെക്കേക്കര, പാലമേൽ, വള്ളികുന്നം, താമരക്കുളം പഞ്ചായത്തുകളിലുമാണ് അനുവദിച്ചത്. പെരുമ്പളം പഞ്ചായത്തിലെ ഏഴാം വാർഡിൽ കളിക്കളം നിർമിക്കാനാണ് ഭരണസമിതി തീരുമാനിച്ചിരിക്കുന്നത്. ഇവിടെ എല്ലാവിധ കായിക ഇനങ്ങൾക്കും പറ്റിയ തരത്തിലുള്ള ഗ്രൗണ്ട്, നടപ്പാത, ഓപ്പൺ ജിം, ശുചിമുറി തുടങ്ങിയ സംവിധാനങ്ങൾ ഒരുക്കുമെന്നും പെരുമ്പളത്തെ ജനങ്ങളുടെ പ്രാദേശിക ഒത്തുചേരലും സാമൂഹിക ഇടപെടലും മെച്ചപ്പെടുത്താൻ സഹായിക്കുന്ന കേന്ദ്രമാക്കി ഇതിനെ മാറ്റുമെന്നും പഞ്ചായത്ത് പ്രസിഡന്‍റ് അഡ്വ. വി.വി. ആശ പറഞ്ഞു.

മൂലം വള്ളംകളി: ട്രാക്കും ഹീറ്റ്‌സും നിശ്ചയിച്ചു

മങ്കൊമ്പ്: ഇത്തവണത്തെ മൂലം ജലോത്സവത്തിലെ മത്സരവള്ളംകളിയിൽ പങ്കെടുക്കുന്ന കളിവള്ളങ്ങളുടെ ട്രാക്കും ഹീറ്റ്‌സും നിശ്ചയിച്ചു. ഇക്കുറി അഞ്ചു ചുണ്ടൻ വള്ളങ്ങൾ, മൂന്നു വീതം എ ഗ്രേഡ്, ബി ഗ്രേഡ് വെപ്പുവള്ളങ്ങളും മത്സരങ്ങളിൽ പങ്കെടുക്കും. കളിവള്ളങ്ങളുടെ ട്രാക്കും ഹീറ്റ്‌സും നിശ്ചയിക്കുന്നതിനുള്ള നറുക്കെടുപ്പ് നെടുമുടി സിഐ നൗഫൽ നിർവഹിച്ചു. ചുണ്ടൻവള്ളങ്ങളുടെ ഒന്നാമത്തെ ഹീറ്റ്‌സിൽ ട്രാക്ക് രണ്ടിൽ നടുഭാഗം, ട്രാക്ക് മൂന്നിൽ ചെറുതന, ഹീറ്റ്‌സ് രണ്ട്-ട്രാക്ക് ഒന്നിൽ ആയാപറമ്പ് പാണ്ടി, ട്രാക്ക് രണ്ടിൽ ചമ്പക്കുളം, ഹീറ്റ്‌സ് മൂന്ന്- ട്രാക്ക് മൂന്നിൽ ആയാപറമ്പ് വലിയദിവാൻജി. ബി ഗ്രേഡ് വെപ്പു വള്ളങ്ങളുടെ മത്സരത്തിൽ ട്രാക്ക് ഒന്നിൽ പി.ജി. കരിപ്പുഴ, ട്രാക്ക് രണ്ടിൽ ചിറമേൽ തോട്ടുകടവൻ, ട്രാക്ക് മൂന്നിൽ പുന്നത്ര പുരയ്ക്കൽ എന്നീ വള്ളങ്ങളും മത്സരിക്കും. എ ഗ്രേഡ് വെപ്പു വള്ളങ്ങളുടെ വിഭാഗത്തിൽ ട്രാക്ക് ഒന്നിൽ നവജ്യോതി, ട്രാക്ക് രണ്ടിൽ അമ്പലക്കടവൻ, ട്രാക്ക് മൂന്നിൽ മണലി എന്നീ വള്ളങ്ങളുമാകും ഏറ്റുമുട്ടുക. ചമ്പക്കുളം ബ്ലോക്കു പഞ്ചായത്ത് പ്രസിഡന്‍റ് ജിൻസി ജോളി യോഗം ഉദ്ഘാടനം ചെയ്തു. നെടുമുടി പഞ്ചായത്ത് പ്രസിഡന്‍റ് മിനി മന്മഥൻ നായർ അധ്യക്ഷത വഹിച്ച യോഗത്തിൽ ചമ്പക്കുളം പഞ്ചായത്ത് പ്രസിഡന്‍റ് ടി.ജി. ജലജാകുമാരി, എം.എസ്. ശ്രീകാന്ത് തുടങ്ങിയവർ പ്രസംഗിച്ചു.

പ്രതിഭാസംഗമം നടത്തി

മങ്കൊമ്പ്: കാവാലം ലിറ്റിൽ ഫ്‌ളവർ ഹൈസ്‌കൂളിലെ പ്രതിഭാസംഗമവും അധ്യാപക രക്ഷാകർതൃ സമ്മേളനവും സ്‌കൂൾ മാനേജർ ഫാ. ജേക്കബ് കാട്ടടി ഉദ്ഘാടനം ചെയ്തു. പിടിഎ പ്രസിഡന്‍റ് എം.സി. ജോയപ്പൻ അധ്യക്ഷത വഹിച്ച യോഗത്തിൽ അതിരമ്പുഴ സെന്‍റ് അലോഷ്യസ് സ്‌കൂൾ ഹെഡ്മിസ്ട്രസ് റോഷ്‌നി ജേക്കബ് എസ്എസ്എൽസി പരീക്ഷയിൽ ഉന്നതവിജയം നേടിയ പ്രതിഭകളെ ആദരിച്ചു. പഞ്ചായത്തംഗം ശ്യാം ശങ്കർ, ഹെഡ്മിസ്ട്രസ് മെർളിക്കുട്ടി ആന്‍റണി, സ്റ്റാഫ് പ്രതിനിധി പ്രശാന്ത് എം. നമ്പൂതിരി, പിടിഎ സെക്രട്ടറി എലിസബത്ത് സി. ജോയ്, വിദ്യാർഥി പ്രതിനിധി ആർച്ച ബി. കൃഷ്ണ, സിസ്റ്റർ കൃപ, അക്ഷയ രതീഷ് തുടങ്ങിയവർ പ്രസംഗിച്ചു. എക്‌സൈസ് ഉദ്യോഗസ്ഥൻ പി.ജെ. അനീഷ് വിദ്യാർഥികൾക്കു ക്ലാസെടുത്തു.

നൈപുണ്യ കോളജിൽ വിദ്യാരംഭം

ചേർത്തല: നൈപുണ്യ കോളജിൽ ബിരുദ വിദ്യാർഥികളെ സ്വീകരിക്കുന്നതിനായി വിദ്യാരംഭം പരിപാടി സംഘടിപ്പിച്ചു. ആലപ്പുഴ ഡെപ്യൂട്ടി കളക്ടർ സി. പ്രേംജി ഉദ്ഘാടനം ചെയ്തു. കോളജ് എക്സിക്യൂട്ടീവ് ഡയറക്ടർ ഫാ. വര്‍ഗീസ് പാലാട്ടി അധ്യക്ഷത വഹിച്ചു. സമ്മേളനത്തിൽ യൂണിവേഴ്സിറ്റി റാങ്ക് ജേതാക്കളെ അനുമോദിച്ചു. അസി. എക്സിക്യൂട്ടീവ് ഡയറക്ടർ ഫാ. ചാക്കോ കിലുക്കൻ, പ്രിൻസിപ്പൽ ഡോ. ബിജി പി. തോമസ്, വൈസ് പ്രിൻസിപ്പൽ പുഷ്പ ജോൺ എന്നിവർ പ്രസംഗിച്ചു.

വള്ളികുന്നം ചിറയിൽ ടൂറിസം പദ്ധതി: നിർമാണം ഉടൻ ആരംഭിക്കും

ചാരുംമൂട്: പ്രകൃതിരമണീയമായ വള്ളികുന്നം ചിറയിലെ ടൂറിസം പദ്ധതിക്കു വീണ്ടും ജീവൻവയ്ക്കുന്നു. നാലു വർഷമായി മുടങ്ങിയ നിർമാണ പ്രവർത്തനങ്ങൾ രണ്ടു മാസത്തിനുള്ളിൽ ആരംഭിക്കാനാണ് ഇപ്പോൾ ലക്ഷ്യമിടുന്നത്. എം.എസ്. അരുൺകുമാർ എംഎൽഎയും ടൂറിസം ഉദ്യോഗസ്ഥരും നിർമാണച്ചുമതലയുള്ള പൊതുമേഖല സ്ഥാപനമായ കേരള ഇലക്‌ട്രിക്കൽ ആൻഡ് അലൈഡ് എൻജിനിയറിംഗ് കമ്പനി ലിമിറ്റഡ് ഉദ്യോഗസ്ഥരുംഇന്നലെ ചിറ സന്ദർശിച്ചു. വിനോദസഞ്ചാരികളെ ആകർഷിക്കുക എന്ന ലക്ഷ്യത്തിലാണ് ഇവിടെ ടൂറിസം പദ്ധതി പ്രഖ്യാപിച്ചിരിക്കുന്നത്. സ്റ്റീൽ ഇൻഡസ്ട്രിയൽസ് കേരള ലിമിറ്റഡാണ് പദ്ധതിയുടെ ഡിപിആർ തയാറാക്കിയിരിക്കുന്നത്. ചിറയുടെ സംരക്ഷണ പ്രവർത്തനങ്ങൾ, പ്രവേശന കവാടം, പാർക്കിംഗ്, വാട്ടർ ടാങ്ക്, ആംഫി തിയറ്റർ, കുട്ടികളുടെ പാർക്ക്, പെഡസ്ട്രിയൽ ബോട്ടിംഗ്, വൈദ്യുതീകരണം, ശൗചാലയ ബ്ലോക്ക് തുടങ്ങിയവയാണ് ആദ്യഘട്ടം ഒരുക്കുന്നത്. പഞ്ചായത്ത് പ്രസിഡന്‍റ് ഡി. രോഹിണി, മുൻ പ്രസിഡന്‍റ് ബിജി പ്രസാദ്, സ്ഥിരം സമിതി അധ്യക്ഷൻ ജെ. രവീന്ദ്രനാഥ്, പഞ്ചായത്തംഗം ബി. കോമളൻ തുടങ്ങിയരും സ്ഥലം സന്ദർശിച്ചു. ചിറയിൽ ടൂറിസം പദ്ധതി നടപ്പാകുന്നതോടെ വള്ളികുന്നം ആഭ്യന്തരടൂറിസം ഭൂപടത്തിൽ ഇടംപിടിക്കും. ഓച്ചിറ-താമരക്കുളം റോഡിൽ പുത്തൻചന്തയിൽനിന്നു കിഴക്കോട്ട് അരക്കിലോമീറ്റർ സഞ്ചരിച്ചാൽ ചിറയിലെത്താം. വള്ളികുന്നം പഞ്ചായത്തിലെ നാലും ഏഴും വാർഡുകളിലായി 18 ഏക്കറിലാണ് ചിറ സ്ഥിതിചെയ്യുന്നത്. ചിറയുടെ രണ്ടുവശങ്ങളിലും വിശാലമായ പുഞ്ചയാണ്. 2012 ൽ നബാർഡിൽനിന്നുള്ള ഒന്നരക്കോടി രൂപ ചെലവഴിച്ചു ചിറ നവീകരിച്ചിരുന്നു. വള്ളികുന്നത്തെ വലുതും പ്രധാനപ്പെട്ടതുമായ ചിറയോടു ചേർന്ന് അനവധി നീർച്ചാലുകളുമുണ്ട്.

കാരുണ്യ പദ്ധതികളുമായി ഹരിപ്പാട് ഗ്രേറ്റർ റോട്ടറി ക്ലബ്

ഹരിപ്പാട്: ഹരിപ്പാട് ഗ്രേറ്റർ റോട്ടറി ക്ലബിന്‍റെ ഭാരവാഹികളുടെ സ്ഥാനാരോഹണവും സുധർമ മുരളീധരൻ വനിതാ രത്ന അവാർഡ് ദാനവും മൂന്നിന് കാർത്തികപ്പള്ളി പോൾ ഹാരീസ് ഹാളിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. റോട്ടറി ഡിസ്ട്രിക്ട് നിയുക്ത ഗവർണർ കൃഷ്ണൻ ജി. നായർ ഉദ്ഘാടനം ചെയ്യും. പുതിയ ഭാരവാഹികളായി ആർ.കെ. പ്രകാശ്(പ്രസിഡന്‍റ് ), സൗമ്യ പ്രമോദ് (സെക്രട്ടറി), സന്തോഷ് വർഗീസ് (ട്രഷറർ) എന്നിവർ ചുമതലയേൽക്കും. ഈ വർഷത്തെ ജീവകാരുണ്യപ്രവർത്തനങ്ങളുടെ ഉദ്ഘാടനവും നടക്കും. പ്രധാന പദ്ധതികളിൽ ഹരിതകർമസേനയ്ക്ക് സൗജന്യ പ്രഭാതഭക്ഷണ വിതരണം, വനിതകൾക്ക് സൗജന്യ കാൻസർ സ്ക്രീനിംഗ്, കിടപ്പുരോഗികൾക്കുള്ള സ്വാന്തന പരിചരണം, ഓപ്പോൾ പദ്ധതിയിലൂടെ നിരാലംബർക്ക് ഭവനനിർമാണം, വിദ്യ എന്ന പേരിൽ വിദ്യാർഥികൾക്കുള്ള പദ്ധതികൾ, നിർമല- ശുദ്ധജല വിതരണം, ആശ -വനിതകൾക്കുള്ള ആരോഗ്യ-തൊഴിൽ പരിശീലന പദ്ധതികൾ, ജനനി- കുട്ടികൾക്കുള്ള കളിപ്പാ വിതരണം, ഭൂമിക- ഫലവൃക്ഷതൈ എന്നിവ ഉൾപ്പെടുന്നു. ഈ പദ്ധതികളുടെ ഉദ്ഘാടനം ഇന്ന് ഒന്നിന് ഡിസ്ട്രിക്ട് ഗവർണർ ഡോ. റ്റീന ആന്‍റണി നിർവഹിക്കും. സുധർമ മുരളീധരൻ വനിതാ രത്ന അവാർഡ് മാവേലിക്കര സ്വദേശിനിയും വ്യവസായ സംരംഭകയുമായ ആർ. ഗീതാലക്ഷ്മിക്ക് സമ്മാനിക്കും. റോട്ടറിയും സുധാ മുരളീ ഫൗണ്ടേഷനും സംയുക്തമായി ഏർപ്പെടുത്തിയ അവാർഡ്, മുൻ റോട്ടറി അംഗം സുധാ മുരളീധരന്‍റെ സ്മരണാർഥമാണ്. വാർത്താസമ്മേളനത്തിൽ പ്രസിഡന്‍റ് ആർ.കെ. പ്രകാശ്‌, സെക്രട്ടറി സൗമ്യ പ്രമോദ്, ട്രഷറർ സന്തോഷ് വർഗീസ്, ക്ലബ്‌ അഡ്മിനിസ്ട്രേറ്റർ മുരുകൻ പാളയത്തിൽ, മെമ്പർഷിപ്പ് കമ്മിറ്റി ചെയർമാൻ മുരളീധരൻ, റോട്ടറി ഫൗണ്ടേഷൻ ചെയർമാൻ പ്രമോദ് ഇട്ടിക്കാട്ടിൽ, ക്ലബ്ബ് ട്രെയിനർ ജേക്കബ് സാമൂവൽ തുടങ്ങിയവർ പങ്കെടുത്തു.

നൂറ്റുവന്‍പാറ ടൂറിസം പദ്ധതിക്ക് ചിറകുമുളയ്ക്കുന്നു

ചെങ്ങന്നൂര്‍: പൗരാണിക ഐതിഹ്യപ്പെരുമയാല്‍ ശ്രധേയമായ പുലിയൂര്‍ പഞ്ചായത്തിലെ നൂറ്റുവന്‍പാറയെ കേന്ദ്രീകരിച്ച് ടൂറിസം പദ്ധതി നടപ്പാക്കാന്‍ സംസ്ഥാന ടൂറിസം വകുപ്പ് രണ്ടു കോടി 20 ലക്ഷം രൂപ അനുവദിച്ചു. മന്ത്രി സജി ചെറിയാന്‍റെ നിര്‍ദേശത്തെത്തുടര്‍ന്നാണ് തീരുമാനം. ചെങ്ങന്നൂരിന്‍റെ പാരമ്പര്യവും സാംസ്‌കാരിക പൈതൃകവും വിളിച്ചോതുന്ന പ്രദേശങ്ങളെ കൂട്ടിയിണക്കി പൈതൃക ടൂറിസം പദ്ധതി നടപ്പാക്കുന്നതിനുള്ള നിരന്തര പരിശ്രമങ്ങളുടെ ഭാഗമായാണ് നൂറ്റുവന്‍പാറ ടൂറിസം പദ്ധതിക്ക് ഇപ്പോള്‍ ഭരണാനുമതി ലഭിച്ചിരിക്കുന്നത്. പദ്ധതിയില്‍ വിഭാവനം ചെയ്യുന്ന പ്രധാന സൗകര്യങ്ങള്‍ പദ്ധതി യാഥാര്‍ഥ്യമാകുന്നതോടെ വിനോദസഞ്ചാരികള്‍ക്ക് നൂറ്റുവന്‍പാറയില്‍ മെച്ചപ്പെട്ട സൗകര്യങ്ങള്‍ ലഭ്യമാകും. വിശ്രമസ്ഥലം, റെയിന്‍ ഷെല്‍ട്ടര്‍, സുരക്ഷാ ഹാന്‍ഡ് റെയിലുകള്‍, കാന്‍റി ലിവര്‍ വ്യൂ പോയിന്‍റ്, സിസിടിവി നിരീക്ഷണം, ആധുനിക ശുചിമുറി സൗകര്യങ്ങള്‍, റോപ്പ് വേ, സുരക്ഷാ ഗാര്‍ഡുകള്‍, മറ്റ് സുരക്ഷാ സംവിധാനങ്ങള്‍ എന്നിവയാണ് ഇതില്‍ ഉള്‍പ്പെടുന്നത്. സന്ദര്‍ശകരുടെ എണ്ണം വര്‍ധിക്കുന്നതിനനുസരിച്ച് കൂടുതല്‍ സൗകര്യങ്ങള്‍ ഏര്‍പ്പെടുത്താനും പദ്ധതി ലക്ഷ്യമിടുന്നുണ്ട്. ചെങ്ങന്നൂരിന് പുതിയ ടൂറിസം സാധ്യതകള്‍ നൂറ്റുവന്‍പാറ ടൂറിസം പദ്ധതി യാഥാര്‍ഥ്യമാകുന്നതോടെ പാണ്ഡവന്‍ പാറ, ആലാ പൂമലച്ചാല്‍, കുതിരവട്ടം ചിറ അക്വാടൂറിസം തുടങ്ങിയ നിലവിലുള്ള പദ്ധതികളുമായി സംയോജിപ്പിച്ച് കൂടുതല്‍ ടൂറിസ്റ്റ് ഡെസ്റ്റിനേഷനുകള്‍ വികസിപ്പിക്കാന്‍ കഴിയും. ഇത് ചെങ്ങന്നൂരിന്‍റെ ടൂറിസം മേഖലയ്ക്ക് വലിയ ഉണര്‍വ് നല്‍കുമെന്ന് മന്ത്രി സജി ചെറിയാന്‍ പറഞ്ഞു. ഈ പദ്ധതി ചെങ്ങന്നൂരിന്‍റെ സാമ്പത്തിക, സാംസ്‌കാരിക രംഗങ്ങളില്‍ പുതിയ അധ്യായം കുറിക്കുമെന്ന പ്രതീക്ഷയിലാണ് പ്രദേശവാസികള്‍.

കല്ലിമേൽ തേനീച്ചവളർത്തൽ കേന്ദ്രം ഹണി മ്യൂസിയമാക്കുന്നു

മാങ്കാംകുഴി: തഴക്കര പഞ്ചായത്തിലെ നൂറേക്കർ ജില്ലാ കൃഷിത്തോട്ടത്തോട് ചേർന്ന് പ്രവർത്തിക്കുന്ന കല്ലിമേൽ തേനീച്ചവളർത്തൽ കേന്ദ്രം ഹണി മ്യൂസിയമാക്കി ഉയർത്തുന്നു. രാജ്യത്തെ ആദ്യ തേനീച്ച സസ്യപാർക്കായി 2018 ലാണ് പ്രവർത്തനം ആരംഭിച്ചത്. ഏഴു വർഷം പിന്നിടുമ്പോൾ തേൻമധുരമുള്ള വിജയകഥയായി കേന്ദ്രം മാറി. ദിവസം 25,000 രൂപവരെയാണ് ഇവിടുത്തെ വിറ്റുവരവ്. അമ്പതിനായിരം കിലോയിലധികം തേനാണ് കർഷകരിൽനിന്നും ശേഖരിച്ച് സംസ്‌കരിച്ച് അമൃത് ഹണിയായി വിൽപ്പന നടത്തിയത്. സർക്കാർ സംവിധാനത്തിലെ ആദ്യത്തെ ആധുനിക തേൻനിർമാണ ശുദ്ധീകരണ വിപണന കേന്ദ്രം കൂടിയാണിത്. മൂന്ന് ഏക്കറിലായാണ് ഹോർട്ടികോർപ്പിന് കീഴിൽ കേന്ദ്രം പ്രവർത്തിക്കുന്നത്. തേനീച്ചകളുടെ പ്രയോജനത്തെക്കുറിച്ച് അവബോധം നൽകുന്നതിന് ഒരുകോടി രൂപ ചെലവിൽ കെട്ടിടം പുനർനിർമിച്ചാണ് പദ്ധതി ആരംഭിച്ചത്. പിന്നീട് വിവിധ ഘട്ടങ്ങളിലായി കേന്ദ്രത്തിന്‍റെ വികസനപ്രവർത്തനങ്ങൾക്ക് രണ്ടുകോടിയിലധികം രൂപ ചെലവഴിച്ചു. പ്രധാനമായും മൂന്നു രീതിയിലാണ് കേന്ദ്രത്തിന്‍റെ പ്രവർത്തനം. തേനീച്ചകളെ വളർത്തി തേൻ ഉത്പാദിപ്പിക്കുക, കർഷകരിൽനിന്ന് തേൻ സംഭരിച്ച് ശാസ്ത്രീയമായി സംസ്‌കരിച്ച് വിപണിയിൽ എത്തിക്കുക, കർഷകർക്ക് പരിശീലനം നൽകുക എന്നിവയാണവ. തേനീച്ച വളർത്തൽ കേന്ദ്രത്തിൽ ഇരുന്നൂറോളം തേനീച്ചക്കൂടുകളാണുള്ളത്. ചെറുതേനീച്ചകളെയും ഇന്ത്യൻ തേനീച്ചകളെയുമാണ് ഇതിൽ പ്രധാനമായും വളർത്തുന്നത്. വർഷം രണ്ടു ടൺ തേൻ ഇവയിൽനിന്നുമാത്രം ഉത്പാദിപ്പിക്കുന്നുണ്ട്. കർഷകർ ഉത്പാദിപ്പിക്കുന്ന തേൻ സർക്കാർ നിശ്ചയിക്കുന്ന തുകയ്ക്ക് നേരിട്ട് സംഭരിക്കുന്നതിലൂടെ കർഷകർക്ക് ന്യായമായ വില ഇവിടെ ഉറപ്പാക്കുന്നുണ്ട്. സംഭരിക്കുന്ന തേൻ ശാസ്ത്രീയമായി സംസ്‌കരിച്ച് തേനിന്‍റെ ഗുണനിലവാരം ഉറപ്പുവരുത്തിയ ശേഷം അമൃത് തേൻ എന്ന ബ്രാൻഡിലാണ് കുറഞ്ഞ വിലയിൽ വിൽക്കുന്നത്. 50 ഗ്രാം മുതലുള്ള അമൃത് ഹണി കാനുകൾ ലഭ്യമാണ്. ഒരു കിലോ തേനിന് 380 രൂപയാണ് വില. അഞ്ചു കിലോ തേൻ 1375 രൂപയ്ക്ക് അമൃത് ഹണി ഔട്ട് ലെറ്റിൽനിന്ന് വാങ്ങാം. ഹണി സോപ് ഉൾപ്പെടെ തേനിൽനിന്നുള്ള മൂല്യവർധിത ഉത്പന്നങ്ങളും ഇവിടെ ലഭ്യമാണ്. ഇരട്ടി മധുരം, നീല അമരി, വിവിധ തരം അരികൾ തുടങ്ങിയവയും ഇവിടെ വിൽപ്പനയ്ക്കുണ്ട്. ഇവിടെ വിജയകരമായി പരിശീലനം പൂർത്തിയാക്കുന്നവർക്ക് തേനീച്ചക്കൂടും അനുബന്ധ ഉപകരണങ്ങളും കേന്ദ്ര, സംസ്ഥാന സർക്കാരുകളുടെ വിവിധ പദ്ധതികൾ വഴി 40 ശതമാനം സബ്സിഡിയിൽ നൽകുന്നുമുണ്ട്. കൂടാതെ ബ്ലോക്ക് അടിസ്ഥാനത്തിൽ 30 കർഷകർക്ക് കൃഷി ഓഫീസറുടെ നിർദേശാനുസരണവും പരിശീലനവും നൽകിവരുന്നു. കൂടാതെ സംസ്ഥാനത്തെ വിവിധ സ്ഥലങ്ങളിൽ തേനീച്ചകളെ ഉത്പാദിപ്പിക്കുന്ന കർഷകരെ തെരഞ്ഞെടുത്ത് അവരിൽനിന്നും തേനീച്ചകളെ സംഭരിക്കുന്ന പ്രവർത്തനങ്ങളും ഇവിടെ നടക്കുന്നുണ്ട്. വിനോദസഞ്ചാരികളെയടക്കം ആകർഷിക്കാൻ കഴിയുന്ന ഹണി മ്യൂസിയമായി കല്ലിമേൽ തേനീച്ച വളർത്തൽ കേന്ദ്രത്തെ മാറ്റുന്നതിനുള്ള പരിശ്രമത്തിലാണ് സർക്കാറെന്ന് എം.എസ്. അരുൺകുമാർ എംഎൽഎ പറഞ്ഞു. സംസ്ഥാനത്തെ 1500ൽ അധികം കർഷകർക്ക് ഇവിടെനിന്ന് പരിശീലനം കൊടുക്കാനായി. പതിനായിരത്തിലധികം കർഷകർക്ക് സബ്‌സിഡിയായി തേനീച്ച കോളനികൾ നിർമിക്കുന്നതിന് സഹായം നൽകി. കർഷകർക്ക് തേനിന്‍റെ ഗുണനിലവാരം പരിശോധിക്കാനായി ലാബ് സ്ഥാപിക്കാനുള്ള അനുമതിയും കേന്ദ്രത്തിന് ലഭിച്ചിട്ടുണ്ടെന്നും രണ്ടു മാസത്തിനുള്ളിൽ ഇതിന്‍റെ നിർമാണപ്രവർത്തനങ്ങൾ ആരംഭിക്കുമെന്നും എംഎൽഎ പറഞ്ഞു. ഹോർട്ടികോർപ്പിന്‍റെ രണ്ടു പതിറ്റാണ്ട് കാലത്തെ പ്രയത്‌നത്തിന്‍റെ ഫലമായി ഇൻഫ്യൂഷൻ സാങ്കേതിക വിദ്യ ഉപയോഗിച്ച് വിവിധ പഴവർഗങ്ങളുടെ രുചിയുള്ള തേനും മാവേലിക്കരയിൽ ഉത്പാദിപ്പിക്കുന്നുണ്ട്. ഇതിനാവശ്യായ ഉപകരണങ്ങളും ഹോർട്ടികോർപ് വികസിപ്പിച്ചിട്ടുണ്ട്.

ജലനിരപ്പിനു നേരിയ കുറവ്; ആശങ്കയിലാക്കി പെരുമഴ

എടത്വ: അപ്പര്‍ കുട്ടനാട്ടില്‍ ജലനിരപ്പിനു നേരിയ കുറവ്. ഇന്നലെ പകല്‍ തെളിഞ്ഞ കാലാവസ്ഥയായിരുന്നെങ്കിലും വൈകിട്ടോടെ വീശിയടിച്ച കാറ്റിലും പെരുമഴയിലും ജനങ്ങള്‍ വീണ്ടും ആശങ്കയിലായിരിക്കുകയാണ്. ശക്തമായ കാറ്റില്‍ നിരവധി മരങ്ങള്‍ കടപുഴകി വീണു. അരമണിക്കൂര്‍ നീണ്ടുനിന്ന പെരുമഴയില്‍ ജലനിരപ്പിനും കാര്യമായ മാറ്റം സംഭവിച്ചിട്ടുണ്ട്. രണ്ടു ദിവസമായി മഴയ്ക്കു നേരിയ ശമനമായെങ്കിലും അപ്പര്‍ കുട്ടനാട്ടില്‍ ജലനിരപ്പ് കാര്യമായി താഴുന്നില്ല. ഒട്ടുമിക്ക പ്രദേശങ്ങളും റോഡുകളും ഇപ്പോഴും മുട്ടോളം വെള്ളത്തിലാണ്. കിഴക്കന്‍ വെള്ളത്തിന്‍റെ വരവ് കുറഞ്ഞതോടെ ജലനിരപ്പ് താഴുമെന്ന് കരുതിയിരിക്കുമ്പോഴാണ് നിനച്ചിരിക്കാതെ പെരുമഴ പെയ്തത്. തലവടി, മുട്ടാര്‍, വീയപുരം, തകഴി, എടത്വ എന്നീ പഞ്ചായത്തില്‍ ജലനിരപ്പ് കുറഞ്ഞു തുടങ്ങിയിരുന്നു. വീടുകളില്‍നിന്ന് വെള്ളം ഇറങ്ങിയെങ്കിലും വീട്ടുപരിസരങ്ങള്‍ വെള്ളക്കെട്ടിലാണ്. അപ്പര്‍ കുട്ടനാട്ടിലെ ഒട്ടുമിക്ക ഗ്രാമീണ റോഡുകളിലും യാത്രക്കാര്‍ക്ക് സഞ്ചരിക്കാന്‍ കഴിയാത്ത നിലയില്‍ വെള്ളം കെട്ടിക്കിടക്കുകയാണ്. ഇതിനോടകം മൂന്നുതവണ വെള്ളം ഉയര്‍ന്ന് ജനജീവിതം സ്തംഭിച്ചിരുന്നു. നിരവധി വീടുകളും തകര്‍ന്നടിയുകയും വിദ്യാര്‍ഥികളുടെ പഠനം മുടങ്ങുകയും ചെയ്തു. അധ്യാപകര്‍ പാഠഭാഗം തീര്‍ക്കാന്‍ പാടുപെടുകയാണ്. ഇന്നലെ കുട്ടനാട് താലൂക്കില്‍ അവധി നല്‍കിയില്ലെങ്കിലും വെള്ളക്കെട്ടിലൂടെ ദുരിതം പേറിയാണ് വിദ്യാര്‍ഥികള്‍ സ്‌കൂളുകളില്‍ എത്തിയത്. സ്‌കൂളുകളില്‍ വിദ്യാര്‍ഥികളുടെ എണ്ണവും കുറവായിരുന്നു.

മെഡിക്കൽ കോളജുകൾ വെന്‍റിലേറ്ററിൽ: കൊടിക്കുന്നിൽ സുരേഷ് എംപി

ചാരുംമൂട്: സംസ്ഥാനത്തെ സർക്കാർ മെഡിക്കൽ കോളജുകൾ വെന്‍റിലേറ്ററിലാണെന്ന് കോൺഗ്രസ് പ്രവർത്തകസമിതി അംഗം കൊടിക്കുന്നിൽ സുരേഷ് എംപി കുറ്റപ്പെടുത്തി. ആരോഗ്യവകുപ്പിന്‍റെ വീഴ്ചയിൽ മുഖ്യമന്ത്രി മൗനം വെടിയണമെന്നും അദ്ദേഹം ആവശ്യപ്പെട്ടു. ആരോഗ്യവകുപ്പ് നയപരമായി തകർന്നു. ആരോഗ്യകേരളം പേരിൽ ഒതുങ്ങി. ചികിത്സ ലഭിക്കാത്തതിനാൽ രോഗികൾ പലവിധ ബുദ്ധിമുട്ടുകൾ അനുഭവിക്കുകയാണ്. ആരോഗ്യവകുപ്പ് മന്ത്രി തന്നെയാണ് ഈ തകർച്ചയുടെ മുഖ്യ ഉത്തരവാദി. എന്ത് അടിസ്ഥാനത്തിലാണ് മന്ത്രി ഇപ്പോഴും പദവിയിൽ തുടരുന്നതെന്ന് സർക്കാർ വ്യക്തമാക്കണമെന്നും കൊടിക്കുന്നിൽ ആവശ്യപ്പെട്ടു. ആലപ്പുഴ, കോഴിക്കോട്, പാലക്കാട്, ഇടുക്കി, തൃശൂർ തുടങ്ങിയ സർക്കാർ മെഡിക്കൽ കോളജുകളിൽ രോഗികൾക്ക് കിടക്കയും ശുചിമുറികളും ചികിത്സയ്ക്കാവശ്യമായ മരുന്നുകളും ലഭ്യമല്ല. ശസ്ത്രക്രിയകൾ മാസങ്ങൾ നീളുന്ന അവസ്ഥയിൽ രോഗികൾ സ്വകാര്യ ആശുപത്രികളിലേക്ക് പോകേണ്ടിവരുന്നത് അവരെ സാമ്പത്തികമായി തകർക്കുകയാണ്. മുൻകാലങ്ങളിൽ ആരോഗ്യരംഗത്ത് കേരളം മാതൃകയായിരുന്നു. ഇന്ന് കേരളത്തിന്‍റെ ആരോഗ്യമന്ത്രി ഈ വകുപ്പിന് അതീവ അപകടം ആണെന്ന് തെളിയിച്ചു കഴിഞ്ഞതായും കൊടിക്കുന്നിൽ പറഞ്ഞു.

എടത്വ ബോട്ട് ജെട്ടിയുടെ മുഖഛായ മാറുന്നു; പുനര്‍നിര്‍മിക്കുന്നതിനായി 50 ലക്ഷം രൂപ

എടത്വ: ഇറിഗേഷന്‍ ഇന്‍ലാന്‍ഡ് നാവിഗേഷന്‍ വകുപ്പ് കുട്ടനാട് പാക്കേജില്‍പ്പെടുത്തി പുനര്‍നിര്‍മിക്കുന്ന എടത്വ ബോട്ട് ജെട്ടിയുടെ നിര്‍മാണോദ്ഘാടനം നടന്നു. ജില്ലാ പഞ്ചായത്ത് വികസന സ്ഥിരസമിതി അധ്യക്ഷ ബിനു ഐസക് രാജു ഉദ്ഘാടനം നിര്‍വഹിച്ചു. ജനങ്ങളുടെ വര്‍ഷങ്ങളായുള്ള ആവശ്യമായിരുന്നു പതിറ്റാണ്ടുകളായി തകര്‍ന്നുകിടന്ന എടത്വ ബോട്ട് ജെട്ടി പുനര്‍നിര്‍മിക്കുക എന്നത്. വെള്ളപ്പൊക്ക സമയത്താണ് കൂടുതല്‍ ദുരിതം അനുഭവിക്കുന്നത്. ബോട്ട് അടുപ്പിച്ചശേഷം കെട്ടാന്‍ പോലും മാര്‍ഗമില്ലായിരുന്നു. മഴയത്തും വെയിലത്തും യാത്രക്കാര്‍ക്ക് നില്‍ക്കുന്നതിനുള്ള കാത്തിരിപ്പു പുരയും ഇല്ല. ചമ്പക്കുളം കഴിഞ്ഞാല്‍ ഏറ്റവും പ്രധാനപ്പെട്ട ജെട്ടിയാണ് എടത്വ. എടത്വ പള്ളിപ്പെരുന്നാള്‍ കാലത്ത് ഒട്ടേറെ ബോട്ടുകള്‍ എത്താറുണ്ട്. നൂറുകണക്കിനു തീര്‍ഥാടകര്‍ കായല്‍ യാത്രയ്ക്കായി ഈ ജെട്ടിയിലാണ് എത്തുന്നത്. നൂതന സാങ്കേതിക വിദ്യയില്‍ എടത്വ മെയിന്‍ ബോട്ട് ജെട്ടിയും ജെട്ടിയോടു ചേര്‍ന്ന് സംരക്ഷണഭിത്തിയും നിര്‍മിക്കാന്‍ മന്ത്രി റോഷി അഗസ്റ്റിന്‍ 47 ലക്ഷം രൂപ അനുവദിക്കുകയും ഇതേത്തുടര്‍ന്ന് നടപടികള്‍ പൂര്‍ത്തീകരിച്ചു പണി ആരംഭിക്കുന്നത്. ടി ഷേപ്പ്ഡ് ജെട്ടിയാണ് നിര്‍മിക്കുന്നത്. ഇതില്‍ മൂന്നു ഡെക്ക് സ്ലാബും ഉണ്ടാകും. കൂടാതെ 69 മീറ്റര്‍ നീളത്തില്‍ സംരക്ഷണഭിത്തിയും കടവും നിര്‍മിക്കും. പ്രധാന ബോട്ട് ജെട്ടിയോടു ചേര്‍ന്ന് കിഴക്ക് ഭാഗത്തുള്ള ജെട്ടിയുടെ അറ്റകുറ്റപ്പണിയും ഇതോടൊപ്പം നടത്തും. റൂഫിംഗ്, ഡക്ക് ടൈല്‍സ് പാകല്‍, ബെഞ്ച് സ്ളാബ് സ്ഥാപിക്കല്‍ എന്നിവക്കായി മൂന്നു ലക്ഷം രൂപ വേറെയും അനുവദിച്ചിട്ടുണ്ട്. 50 ലക്ഷം രൂപയുടെ പണി പൂര്‍ത്തിയാകുമ്പോള്‍ എടത്വ ബോട്ട് ജെട്ടിയുടെ മുഖഛായ മാറുമെന്നു കരുതുന്നു. പഞ്ചായത്ത് പ്രസിഡന്‍റ് ആന്‍സി ബിജോയി അധ്യക്ഷത വഹിച്ചു. ഇറിഗേഷന്‍ വകുപ്പ് മാവേലിക്കര സെക‌്ഷന്‍ അസി. എന്‍ജിനിയര്‍ കെ.വി. വിപിന്‍ പദ്ധതി വിശദീകരിച്ചു. എടത്വ ഫെറോനാ വികാരി ഫാ. ഫിലിപ്പ് വൈക്കത്തുകാരന്‍, പഞ്ചായത്ത് വൈസ് പ്രസിഡന്‍റ് രേഷ്മ ജോണ്‍സണ്‍, പഞ്ചായത്തംഗങ്ങളായ ജി. ജയചന്ദ്രന്‍, പി.സി. ജോസഫ്, ജീമോന്‍ ജോസഫ്, ബെറ്റി ജോസഫ്, ജെയിന്‍ മാത്യു ബിജു, ബാബു മണ്ണാംതുരുത്തില്‍, വിനിത ജോസഫ്, ജലഗതാഗതവകുപ്പ് എടത്വ സ്റ്റേഷന്‍ മാസ്റ്റര്‍ എം. മുജീബ്, ടി.എസ്. സുരേഷ്, ബിനോയി ഉലക്കപ്പാടി, മാത്യു സേവ്യര്‍ കൊച്ചുപറമ്പ്, മധു മംഗലപ്പള്ളി, ബാബു കണ്ണന്തറ, സിബിച്ചന്‍ തെക്കേടം എന്നിവര്‍ പ്രസംഗിച്ചു.

പനിയും ഛർദിയും ബാധിച്ച പത്താം ക്ലാസ് വിദ്യാർഥിയുടെ മരണകാരണം വ്യക്തമല്ല

മാവേലിക്കര: ചെട്ടികുളങ്ങരയിൽ പനിയും ഛർദിയും ബാധിച്ചു പത്താം ക്ലാസ് വിദ്യാർഥി മരിച്ചതിന്‍റെ കാരണം പ്രാഥമിക പോസ്റ്റ്മോർട്ടം റിപ്പോർട്ടിൽ വ്യക്‌തമല്ലെന്ന് അധികൃതർ. ചെട്ടികുളങ്ങര ഈരേഴ തെക്ക് കാങ്കാലിൽ കിഴക്കതിൽ സെൽവരാജ്-ലേഖ ദമ്പതികളുടെ മകൻ ചെട്ടികുളങ്ങര എച്ച്എസ്എസ് വിദ്യാർഥി നവീൻ രാജ് (15) ആണ് കഴിഞ്ഞദിവസം പനിയും ഛർദിയും ബാധിച്ചു മരിച്ചത്. ഇന്നലെ നടന്ന പോസ്റ്റ്മോർട്ടത്തിന്‍റെ പ്രാഥമിക പരിശോധനാ റിപ്പോർട്ടിൽ കാരണം വ്യക്‌തമല്ല എന്നാണ് ആരോഗ്യവകുപ്പ് അധികൃതർ പറയുന്നത്. എന്നാൽ, പനിയെത്തുടർന്നുണ്ടായ ഹൃദയാഘാതമാകാം മരണ കാരണമെന്നു സൂചനയുണ്ട്. ആന്തരിക അവയവങ്ങളുടെ പരിശോധനാ ഫലം ലഭിച്ചാൽ മാത്രമേ മരണകാരണം കൃത്യമാകു. പ്രാഥമിക പരിശോധനയിൽ മരണകാരണം കണ്ടെത്താനായിട്ടില്ലെന്നും അധികൃതർ പറഞ്ഞു. കഴിഞ്ഞദിവസം ഉച്ചയോടെയാണു നവീനെ ആശുപത്രിയിൽ എത്തിച്ചത്. പെട്ടെന്ന് ആരോഗ്യനില വഷളായതിനാൽ അത്യാഹിത വിഭാഗത്തിൽ പ്രവേശിപ്പിച്ചു ചികിത്സ നൽകുന്നതിനിടെയാണ് മരിച്ചത്. പരിശോധനയിൽ കുട്ടിക്ക് എച്ച്‌വൺ എൻവൺ, ഡെങ്കിപ്പനി, എലിപ്പനി എന്നിവയുടെ ലക്ഷണങ്ങൾ ഇല്ലായിരുന്നുവെന്നു സ്‌ഥിരീകരിച്ചു. പോസ്റ്റ്മോർട്ടത്തിനു ശേഷം ചെട്ടികുളങ്ങര എച്ച്എസ്എസിൽ പൊതുദർശനത്തിനു വച്ച മൃതദേഹം വിലാപയാത്രയായി വീട്ടിലെത്തിച്ചു സംസ്കാരം നടത്തി. ആരോഗ്യ വകുപ്പിന്‍റെ നേതൃത്വത്തിൽ ഇന്ന് സ്കൂ‌ളിൽ പനി സംബന്ധിച്ചു ബോധവത്കരണം ക്ലാസ് നടത്തും.

റീൽസ് ചിത്രീകരണം; പള്ളിപ്പുറത്തെ കുടിവെള്ളം മുടങ്ങിയത് മൂന്നു ദിവസം

പൂച്ചാക്കൽ: സോഷ്യൽ മീഡിയ യിൽ വൈറലാകാൻ റീൽസ് ചിത്രീകരിച്ചത് 23 മീറ്ററോളം ഉയരമുള്ള ശുദ്ധജല വിതരണ ടാങ്കിൽ. റീൽസ് കാരണം മൂന്നു ദിവസമായി മുടങ്ങിയിരുന്ന പള്ളിപ്പുറം പഞ്ചായത്തിൽ ശുദ്ധജലവിതരണം ഇന്നലെ ഉച്ചയോടെ പുനഃരാരംഭിച്ചു. ടാങ്കിൽ നിലവിലു ണ്ടായിരുന്ന കുടിവെള്ളം മുഴുവനായി കളഞ്ഞു. പിന്നീട് ടാങ്ക് അണുവിമുക്തമാക്കിയതിനുശേഷം വെള്ളം നിറച്ചു. വെള്ളത്തിന്‍റെ സാമ്പിൾ ശേഖരിച്ച് ജലവിതരണ വിഭാഗത്തിന്‍റെ ആലപ്പുഴയിലെ ക്വാളിറ്റി കൺട്രോൾ വിഭാഗം പരിശോധന നടത്തി മാലിന്യങ്ങൾ ഇല്ലെന്ന് ഉറപ്പുവരുത്തിയതിനു ശേഷമാണ് ശുദ്ധജല വിതരണം ആരംഭിച്ചത്. ചേർത്തല-അരൂക്കുറ്റി റോഡിൽ പള്ളിപ്പുറം മലബാർ സിമെന്‍റ് ഫാക്ടറിക്കു വടക്കുഭാഗത്തെ ജപ്പാൻശുദ്ധജല സംഭണിയിലാണ് കഴിഞ്ഞ 28ന് മൂന്നു യുവാക്കൾ ഇറങ്ങി കുളിച്ചും ടാങ്കിലേക്ക് ചാടിയും വീഡിയോ ചിത്രീകരിച്ചത്. സംഭവത്തിൽ അറസ്റ്റിലായ തൈക്കാട്ടുശേരി മണ്ണാർകാട് യദുകൃഷ്‌ണൻ (25), പുത്തൻനികർത്തിൽ അതുൽകൃഷ്‌ണ(27), പാണാവള്ളി കളരിത്തറ ജയരാജ് (27)എന്നിവരെ റിമാൻഡ് ചെയ്തിരുന്നു. ശുദ്ധജലം മലിനമാക്കൽ പൊതുമുതൽ നശിപ്പിക്കൽ, സർക്കാർ സ്ഥലത്ത് അതിക്രമിച്ചു കടക്കൽ, സംഘം ചേർന്നുള്ള കുറ്റകൃത്യം തുടങ്ങിയ കുറ്റങ്ങളാണ് ഇവർക്കെതിരേ ചുമത്തിയിരിക്കുന്നത്. ജല അഥോറിറ്റി ഉദ്യോഗസ്ഥ രുടെ പരാതിയും മൊഴിയും രേഖപ്പെടുത്തിയതിനുശേഷമാണ് മൂവരുടെയും അറസ്റ്റ് ചേർത്തല പോലീസ് രേഖപ്പെടുത്തിയത്. ശനിയാഴ്ച്ച വൈകിട്ട് ആറോടെയാണ് ഇവർ പിടിയിലായത്. പ്രതികളെ റിമാൻഡ് ചെയ്തു.16 ലക്ഷം ലീറ്റർ സംഭരണശേഷിയുള്ള ജലസംഭരണിയിലാണ് ഇവർ ഇറങ്ങിയത്. നിരപ്പിലെ കോവിണിപ്പടിയിലൂടെ ടവ്വറിനു മുകളിൽ കയറി ജലസംഭണിയിലെ കോവിണിയിലൂടെ ജലത്തിലേക്കിറങ്ങി. ഇറങ്ങിയപ്പോൾ പകുതിയോളം ഭാഗം ജലമുണ്ടായിരുന്നെന്നാണ് വിവരം. 23 മീറ്ററോളം ഉയരമുള്ളതാണ് ജലസംഭരണി. ടവ്വർ പരിസരം ചുറ്റുമതിൽ കെട്ടി സംരക്ഷിച്ചിരുന്നതിൽ അതിക്രമിച്ചു കടക്കുകയായിരുന്നു. വിവരം നാട്ടുകാർ പോലീസിനെ അറിയിക്കുകയുമായിരുന്നു. റീൽസ് ദൃശ്യങ്ങളെടുത്തെന്നും കുളിച്ചെന്നുമെല്ലാം പ്രചാരണമുണ്ടെങ്കിലും പോലീസ് സ്ഥിരീകരിച്ചിട്ടില്ല. സംഭരണിക്കു മുകളിൽ കയറുക എന്ന ലക്ഷ്യമിട്ട് ചെയ്തതാണെന്നാണ് പോലീസ് പറയുന്നത്. സംഭവം മൂലമുണ്ടായ മുഴുവം നഷ്‌ടവും കാരണക്കാരിൽനിന്നും ഈടാക്കണമെന്നും ജലഅഥോറിറ്റി ആവശ്യപ്പെട്ടിട്ടുണ്ട്. ഒന്നരലക്ഷത്തിൽപ്പരം രൂപ നഷ്ടമുണ്ടായതായാണ് പ്രാഥമിക കണക്ക്.

കാവാലം ടെക്‌നിക്കൽ ഹൈസ്‌കൂൾ; സ്ഥലത്തിന്‍റെ രേഖകൾ കൈമാറി

മങ്കൊമ്പ്: നൽപ്പതു വർഷത്തെ കാത്തിരിപ്പിനു വിരാമമിട്ടു കാവാലം ടെക്‌നിക്കൽ ഹൈസ്‌കൂളിന് സ്വന്തമായി സ്ഥലം എന്ന സ്വപ്നം യഥാർഥ്യമായി. സർരക്കാർ ഏറ്റെടുത്ത സ്ഥലത്തിന്‍റെയും കെട്ടിടത്തിന്‍റെയും മഹസറും താക്കോലും കൈമൈറി. ലാൻഡ് അക്യുസിഷൻ തഹസീൽദാർ സൗമ്യ, ടെക്‌നിക്കൽ എഡ്യൂക്കേഷൻ ഡെപ്യൂട്ടി ഡയറക്ടർ ആർ.എസ്. ഷിബു എന്നിവരിൽനിന്നും ടെക്‌നിക്കൽ ഹൈസ്‌കൂൾ സൂപ്രണ്ട് കിരൺ രോഖകൾ ഏറ്റുവാങ്ങി. കഴിഞ്ഞ മുപ്പത്തിയഞ്ചു വർഷമായി ലിസ്യുവിലും പിന്നീട് കുന്നുമ്മയിലും വാടകക്കെട്ടിടത്തിലാണ് സ്‌കൂൾ പ്രവർത്തിച്ചുവന്നിരുന്നത്. സ്‌കൂൾ അധികൃതർ, പഞ്ചായത്ത്, പിടിഎ എന്നിവരുടെ നിരന്തരമായ പരിശ്രമങ്ങൾക്കൊടുവിലാണ് സ്വപ്‌നം യാഥാർഥ്യമാകുന്നത്. ഏറ്റെടുത്ത സ്ഥലത്ത് കെട്ടിടം നിർമിച്ചു സ്‌കൂളിന്‍റെ പ്രവർത്തനം അവിടേക്കു മാറ്റുക എന്നതാണ് അടുത്ത വെല്ലുവിളി. സ്‌കൂളിനായി ഏറ്റെടുത്ത സ്ഥലത്തു നടന്ന ചടങ്ങിൽ പഞ്ചായത്തംഗങ്ങളായ ടിനു കുര്യൻ, സന്ധ്യ രാജപ്പൻ, വൈസ് പ്രസിഡന്‍റ് ഒ.ജി. ഷാജി, സന്ധ്യ രമേശ്, പിടിഎ വൈസ് പ്രസിഡന്‍റ് ജോമോൻ ആന്‍റണി, മുൻ സ്‌കൂൾ സൂപ്രണ്ട് അബൂബക്കർ കുഞ്ഞ്, പി.എൻ. വിജയകുമാർ, സന്തോഷ് കുമാർ, പി.വി. സുനിൽകുമാർ തുടങ്ങിയവർ പ്രസംഗിച്ചു.

ആലപ്പുഴ മെഡിക്കല്‍ കോളജില്‍ സര്‍ജന്‍മാരുടെ ക്ഷാമം

ആലപ്പുഴ: ഗവ. മെഡിക്കല്‍ കോളജില്‍ ശസ്ത്രക്രിയാ ഉപകരണങ്ങള്‍ ഇല്ലാത്തതുകൊണ്ട് ശസ്ത്രക്രിയകള്‍ നിരന്തരം മാറ്റിവയ്ക്കുകയാണെന്ന യൂറോളജി വിഭാഗം മേധാവി ഡോ. ഹാരീസിന്‍റെ വെളിപ്പെടുത്തല്‍ കേട്ടു തലതാഴ്ത്തിരിയിരിക്കുകയാണു കേരളം. ആലപ്പുഴ ഗവ. മെഡിക്കല്‍ കോളജിലെ പ്രശ്‌നം ശസ്ത്രക്രിയ നടത്താനുള്ള ഡോക്ടര്‍മാരില്ല എന്നതാണ്. ജനറല്‍ സര്‍ജറി വിഭാഗത്തില്‍ 18 ഡോക്ടര്‍മാര്‍ വേണ്ടിടത്ത് എട്ടു പേര്‍ മാത്രം. ജനറല്‍ സര്‍ജറി വിഭാഗത്തില്‍ 18 ഡോക്ടര്‍ വേണ്ട സ്ഥാനത്ത് എട്ടു ഡോക്ടര്‍മാര്‍ മാത്രമാണുള്ളത്. അഞ്ചു സര്‍ജറി യൂണിറ്റുകളില്‍ ഒരു യൂണിറ്റിന്‍റെ മേധാവിയെ കഴിഞ്ഞദിവസം സ്ഥലം മാറ്റി. ഡോക്ടര്‍മാര്‍ കുറവായതില്‍ ഒരു യൂണിറ്റ് ഒഴിവാക്കേണ്ടി വരുമെന്ന് കഴിഞ്ഞദിവസം എച്ച്ഡിഎസ് യോഗത്തില്‍ സര്‍ജറി വിഭാഗം അറിയിച്ചു. ദിവസവും ശരാശരി മൂന്നു മേജര്‍ ശസ്ത്രക്രിയകളും പത്തോളം മൈനര്‍ ശസ്ത്രക്രിയകളും നടക്കുന്ന ആശുപത്രിയില്‍ ഡോക്ടര്‍മാരുടെ കുറവ് പ്രതിസന്ധി സൃഷ്ടിക്കുന്നു. ശസ്ത്രക്രിയയുടെ എണ്ണം കുറയ്ക്കാനുള്ള തീരുമാനം എടുക്കാന്‍ ഒരുങ്ങുകയാണ് ഡോക്ടര്‍മാര്‍. കാര്‍ഡിയോളജി വിഭാഗത്തില്‍ ബൈപാസ് ശസ്ത്രക്രിയയ്ക്കാവശ്യമായ ഒരു ഹാര്‍ട്ട് ലങ് യന്ത്രം മാത്രമാണ് നിലവിലുള്ളത്. 2021ല്‍ കേന്ദ്രസര്‍ക്കാര്‍ മറ്റൊരു ഹാര്‍ട്ട് ലങ് യന്ത്രം എത്തിച്ചെങ്കിലും ഇവിടെ സ്ഥലമില്ലെന്നു പറഞ്ഞ് തിരിച്ചയയ്ക്കുകയായിരുന്നു. 2024ല്‍ ഒക്ടോബര്‍, നവംബര്‍, ഡിസംബര്‍ മാസങ്ങളില്‍ ഒരു ശസ്ത്രക്രിയ പോലും നടന്നില്ല. രജിസ്റ്റര്‍ ചെയ്തിരുന്ന നാലു രോഗികളെ പിന്നീടു ശസ്ത്രക്രിയയ്ക്കു സമയം അനുവദിക്കാനായി ഫോണില്‍ വിളിച്ചപ്പോള്‍ അവര്‍ മരിച്ചെന്നു ബന്ധുക്കള്‍ അറിയിച്ചു. ആവശ്യത്തിനു ജീവനക്കാര്‍ ഇല്ലാത്തതിനാല്‍ ആഴ്ചയില്‍ രണ്ടു ബൈപാസ് ശസ്ത്രക്രിയ മാത്രമാണ് ഇവിടെ നടക്കുന്നത്. 10 നഴ്‌സുമാരെയും ഒരു പെര്‍ഫ്യൂഷനിസ്റ്റിനെയും നിയമിച്ചാല്‍ ആഴ്ചയില്‍ നാലും ബൈപാസ് സര്‍ജറി നടത്താം. എണ്‍പതോളം രോഗികളാണു ബൈപാസ് ശസ്ത്രക്രിയയ്ക്കായി കാത്തിരിക്കുന്നത്. ഉദരരോഗ വിഭാഗത്തില്‍ ഒരു സ്ഥിരം ഡോക്ടര്‍ പോലുമില്ല. ആരോഗ്യവകുപ്പില്‍ നിന്ന് വര്‍ക്കിംഗ് അറേഞ്ച്‌മെന്‍റ് അടിസ്ഥാനത്തില്‍ ഒരു അസി. പ്രഫസറെ നിയമിച്ചിരുന്നെങ്കിലും കാലാവധി നീട്ടിക്കൊടുത്തില്ല. തുടര്‍ന്ന് നാലുമാസം ഒപി അടച്ചിടേണ്ടിവന്നു. ഇതിനുശേഷം തിരുവനന്തപുരം മെഡിക്കല്‍ കോളജില്‍ ഒരു ഡോക്ടെ വര്‍ക്കിംഗ് അറേഞ്ച്‌മെന്‍റ് അടിസ്ഥാനത്തില്‍ നിയമിച്ചു. ഈ ഡോക്ടര്‍ ആഴ്ചയില്‍ ഒരു ദിവസമെത്തിയാണ് ഒപിയില്‍ രോഗികളെ നോക്കുന്നത്. ഈ ദിവസം ഇരുനൂറോളം രോഗികള്‍ ഒപിയില്‍ ഉണ്ടാകും. അടുത്തിടെ ഒപിയുള്ള ദിവസം ഈ ഡോക്ടര്‍ക്ക് എത്താനായില്ല. രോഗികള്‍ ബഹളം വച്ചതോടെ മെഡിക്കല്‍ കോളജ് പ്രിന്‍സിപ്പലും സൂപ്രണ്ടും മെഡിസിന്‍ വിഭാഗം മേധാവിയും എത്തിയാണു രോഗികളെ പരിശോധിച്ചത്. ജനറല്‍ മെഡിസിന്‍ ഡോക്ടറായ പ്രിന്‍സിപ്പലും അനസ്തീസിയ വിദഗ്ധനായ സൂപ്രണ്ടും ഉദരരോഗ ചികിത്സാവിഭാഗത്തിലെ രോഗികളെ നോക്കേണ്ടത്ര ദയനീയമാണ് ആലപ്പുഴ മെഡിക്കല്‍ കോളജിലെ ഡോക്ടര്‍ ക്ഷാമം.

മത്സ്യബന്ധന വള്ളം കടലിൽ തകർന്നു; കണ്ടെയ്നറിൽ തട്ടിയെന്ന് സംശയം

അമ്പലപ്പുഴ: മത്സ്യബന്ധന വള്ളം കടലിൽ തകർന്നു. നീർക്കുന്നം തെക്കാലിശേരിൽ വേണുവിന്‍റെ ഉടമസ്ഥതയിലുള്ള ഓണം എന്ന ലയ്‌ലാൻഡ് വള്ളത്തിനാണ് തകരാർ സംഭവിച്ചത്. കഴിഞ്ഞദിവസം രാവിലെ 45 തൊഴിലാളികളുമായി കായംകുളം തുറമുഖത്തുനിന്നാണ് വള്ളം പോയത്. മത്സ്യ ബന്ധനത്തിനിടെ ഉഗ്ര ശബ്ദം കേട്ടതിനുശേഷം വള്ളം ചലിക്കാതെയായി. പിന്നീട് തൊട്ടടുത്തുണ്ടായിരുന്ന മറ്റൊരു വള്ളത്തിന്‍റെ സഹായത്താൽ അപകടത്തിൽപ്പെട്ട വള്ളം കായംകുളം യാർഡിലെത്തിച്ച് പരിശോധിച്ചപ്പോഴാണ് വള്ളത്തിന്‍റെ അടിത്തട്ട് പൂർണമായും തകർന്നത് കണ്ടത്. ഏകദേശം എട്ട് ലക്ഷം രൂപയുടെ നഷ്ടം സംഭവിച്ചതായി വള്ളമുടമ പറഞ്ഞു. കപ്പലപകടത്തിനെത്തുടർന്ന് കടലിന് അടിത്തട്ടിലുള്ള കണ്ടെയ്നറിൽ തട്ടിയതാണ് അപകടകാരണമെന്നു കരുതുന്നു.

അനുഗ്രഹ നിമിഷത്തിന് സാക്ഷിയാകാൻ വിശ്വാസീസാഗരം

മാവേലിക്കര: ദൈവദാസൻ മാർ ഈവാനിയോസ് തിരുമേനിയുടെ ജന്മം കൊണ്ട് അനുഗ്രഹീതമായ മാവേലിക്കരയുടെ മണ്ണിൽ മലങ്കര സുറിയാനി കത്തോലിക്കാ സഭയുടെ മാവേലിക്കര ഭദ്രാസനത്തിന്‍റെ രണ്ടാമത്തെ മെത്രാപ്പോലീത്തയായി ഡോ. മാത്യൂസ് മാർ പോളിക്കോർപ്പസ് അഭിഷിക്തനാവുന്ന സ്ഥാനാരോഹണ ശുശ്രൂഷയിലും പ്രഥമ മെത്രാപ്പോലീത്ത ഡോ. ജോഷ്വാ മാർ ഇഗ്നാത്തിയോസിനു യാത്രയയപ്പ് നൽകാനുമുള്ള അനുഗ്രഹ നിമിഷത്തിൽ വിശ്വാസീ സാഗരം പുന്നമൂട് സെന്‍റ് മേരീസ് കത്തീഡ്രലിലേക്ക് ഒഴുകിയെത്തി. ബിഷപ് ഹൗസ് അങ്കണത്തിൽനിന്നും ഇന്നലെ ഉച്ചകഴിഞ്ഞ് സ്ഥാനാരോഹണ ശുശ്രൂഷയ്ക്കായി മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലിമീസ് കാതോലിക്കാബാവയെയും വിവിധ ഭദ്രാസനത്തിൽനിന്നുള്ള ബിഷപുമാരേയും കത്തീഡ്രലിലേക്ക് സ്വീകരിച്ച് ആനയിച്ചു. അനുമോദന സമ്മേളനം കേന്ദ്ര ന്യൂനപക്ഷകാര്യ സഹമന്ത്രി ജോർജ് കുര്യൻ ഉദ്‌ഘാടനം ചെയ്തു. മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലിമീസ് കാതോലിക്കാ ബാവ അധ്യക്ഷത വഹിച്ചു. മന്ത്രി സജി ചെറിയാൻ, കൊടിക്കുന്നിൽ സുരേഷ് എംപി, എംഎൽഎമാരായ രമേശ് ചെന്നിത്തല, എം.എസ്. അരുൺകുമാർ, യു. പ്രതിഭ, ചാണ്ടി ഉമ്മൻ, മുൻ കേന്ദ്രമന്ത്രി പ്രഫ. പി.ജെ. കുര്യൻ, അബ്ദുൽ സത്താർ മൗലവി അൽഖാസിമി, നഗരസഭാ ചെയർമാൻ നൈനാൻ സി. കുറ്റിശേരി, ഡി സിസി പ്രസിഡന്‍റ് ബി. ബാബുപ്രസാദ്‌, പന്തളം സുധാകരൻ, ഷോൺ ജോർജ്, ജോൺസൺ ഏബ്രഹാം, ജോസഫ് എം. പുതുശേരി, എബി കുര്യാക്കോസ്, കെ.ആർ. മുരളീധരൻ, അഡ്വ. കെ. കെ. അനൂപ്, സജി പായിക്കാട്ടേത്ത് തുടങ്ങിയ രാഷ്ട്രീയ സാമൂഹ്യ രംഗത്തെ പ്രമുഖർ, വൈദികർ, സന്യസ്തർ തുടങ്ങിയവരും പങ്കെടുത്തു.

നൂറ്റുവന്‍പാറ ടൂറിസം പദ്ധതിക്ക് ചിറകുമുളയ്ക്കുന്നു

ചെങ്ങന്നൂര്‍: പൗരാണിക ഐതിഹ്യപ്പെരുമയാല്‍ ശ്രധേയമായ പുലിയൂര്‍ പഞ്ചായത്തിലെ നൂറ്റുവന്‍പാറയെ കേന്ദ്രീകരിച്ച് ടൂറിസം പദ്ധതി നടപ്പാക്കാന്‍ സംസ്ഥാന ടൂറിസം വകുപ്പ് രണ്ടു കോടി 20 ലക്ഷം രൂപ അനുവദിച്ചു. മന്ത്രി സജി ചെറിയാന്‍റെ നിര്‍ദേശത്തെത്തുടര്‍ന്നാണ് തീരുമാനം. ചെങ്ങന്നൂരിന്‍റെ പാരമ്പര്യവും സാംസ്‌കാരിക പൈതൃകവും വിളിച്ചോതുന്ന പ്രദേശങ്ങളെ കൂട്ടിയിണക്കി പൈതൃക ടൂറിസം പദ്ധതി നടപ്പാക്കുന്നതിനുള്ള നിരന്തര പരിശ്രമങ്ങളുടെ ഭാഗമായാണ് നൂറ്റുവന്‍പാറ ടൂറിസം പദ്ധതിക്ക് ഇപ്പോള്‍ ഭരണാനുമതി ലഭിച്ചിരിക്കുന്നത്. പദ്ധതിയില്‍ വിഭാവനം ചെയ്യുന്ന പ്രധാന സൗകര്യങ്ങള്‍ പദ്ധതി യാഥാര്‍ഥ്യമാകുന്നതോടെ വിനോദസഞ്ചാരികള്‍ക്ക് നൂറ്റുവന്‍പാറയില്‍ മെച്ചപ്പെട്ട സൗകര്യങ്ങള്‍ ലഭ്യമാകും. വിശ്രമസ്ഥലം, റെയിന്‍ ഷെല്‍ട്ടര്‍, സുരക്ഷാ ഹാന്‍ഡ് റെയിലുകള്‍, കാന്‍റി ലിവര്‍ വ്യൂ പോയിന്‍റ്, സിസിടിവി നിരീക്ഷണം, ആധുനിക ശുചിമുറി സൗകര്യങ്ങള്‍, റോപ്പ് വേ, സുരക്ഷാ ഗാര്‍ഡുകള്‍, മറ്റ് സുരക്ഷാ സംവിധാനങ്ങള്‍ എന്നിവയാണ് ഇതില്‍ ഉള്‍പ്പെടുന്നത്. സന്ദര്‍ശകരുടെ എണ്ണം വര്‍ധിക്കുന്നതിനനുസരിച്ച് കൂടുതല്‍ സൗകര്യങ്ങള്‍ ഏര്‍പ്പെടുത്താനും പദ്ധതി ലക്ഷ്യമിടുന്നുണ്ട്. ചെങ്ങന്നൂരിന് പുതിയ ടൂറിസം സാധ്യതകള്‍ നൂറ്റുവന്‍പാറ ടൂറിസം പദ്ധതി യാഥാര്‍ഥ്യമാകുന്നതോടെ പാണ്ഡവന്‍ പാറ, ആലാ പൂമലച്ചാല്‍, കുതിരവട്ടം ചിറ അക്വാടൂറിസം തുടങ്ങിയ നിലവിലുള്ള പദ്ധതികളുമായി സംയോജിപ്പിച്ച് കൂടുതല്‍ ടൂറിസ്റ്റ് ഡെസ്റ്റിനേഷനുകള്‍ വികസിപ്പിക്കാന്‍ കഴിയും. ഇത് ചെങ്ങന്നൂരിന്‍റെ ടൂറിസം മേഖലയ്ക്ക് വലിയ ഉണര്‍വ് നല്‍കുമെന്ന് മന്ത്രി സജി ചെറിയാന്‍ പറഞ്ഞു. ഈ പദ്ധതി ചെങ്ങന്നൂരിന്‍റെ സാമ്പത്തിക, സാംസ്‌കാരിക രംഗങ്ങളില്‍ പുതിയ അധ്യായം കുറിക്കുമെന്ന പ്രതീക്ഷയിലാണ് പ്രദേശവാസികള്‍.

അടിയന്തര ശസ്ത്രക്രിയ വേണ്ടത് മെഡി. കോളജുകള്‍ക്ക്: കെ.സി. വേണുഗോപാല്‍

അന്പലപ്പുഴ: അടിയന്തര ശസ്ത്രക്രിയ വേണ്ടത് മെഡിക്കല്‍ കോളജുകള്‍ക്കും സര്‍ക്കാര്‍ ആശുപത്രികള്‍ക്കുമെന്ന് കെ.സി. വേണുഗോപാല്‍ എംപി. ഡോ. ഹാരീസ് ഹസന്‍റെ വെളിപ്പെടുത്തല്‍ ചൂണ്ടിക്കാണിക്കുന്നത് കേരളത്തിലെ പൊതുജന ആരോഗ്യത്തിന്‍റെ ഏറ്റവും ദയനീയാവസ്ഥയാണ്. കേരളത്തിലെ പൊതുജന ആരോഗ്യത്തിന്‍റെ ഏറ്റവും ദയനീയാവസ്ഥയാണ് തിരുവനന്തപുരം മെഡിക്കല്‍ കോളജിലെ യുറോളജി വിഭാഗം മേധാവി ഡോ. ഹാരീസ് ഹസന്‍റെ വെളിപ്പെടുത്തലിലൂടെ ചൂണ്ടിക്കാണിക്കപ്പെട്ടതെന്നും ഗത്യന്തരമില്ലാതെയാണ് ഡോ. ഹാരീസ് ഇത്തരമൊരു സാഹസത്തിനു മുതിര്‍ന്നതെന്നും അദ്ദേഹം കൂട്ടിച്ചേര്‍ത്തു. പുന്നപ്രയില്‍ മാധ്യമങ്ങളുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. ഒരുകാലത്ത് കേരളത്തിലെ ചികിത്സാരംഗത്ത് അന്തിമവാക്ക് മെഡിക്കല്‍ കോളജുകളുടേതായിരുന്നു. ഇന്നതല്ലൊം നഷ്ടമായി. അതിനു കാരണം അവശ്യത്തിന് ഡോക്ടര്‍മാരില്ലാത്തതും ശസ്ത്രക്രിയ ഉപകരണങ്ങളും മരുന്നും ഇല്ലാത്തതുമാണ്. നമ്മുടെ ആരോഗ്യരംഗം മികച്ചതെന്ന് കൊട്ടിഘോഷിക്കുമ്പോഴാണ് നമ്മുടെ മെഡിക്കല്‍ കോളജുകള്‍ പരിതാപകരമായ അവസ്ഥ നേരിടുന്നത്. ഡോക്ടര്‍മാരുടെയും പാരമെഡിക്കല്‍ ജീവനക്കാരുടെയും നഴ്‌സുമാരുടെയും നിരവധി ഒഴിവുകളുണ്ട്. അത് നികത്താന്‍ സര്‍ക്കാര്‍ നടപടിയെടുക്കുന്നില്ല. ഒഴിവുകളിലേക്ക് ഡോക്ടര്‍മാരെ നിയമിച്ചാലും അവര്‍ ചുമതലയേറ്റെടുക്കാത്ത അവസ്ഥയുണ്ട്. അതെന്തുകൊണ്ടാണെന്ന് പഠിക്കാനോ പരിഹാര നടപടിയെടുക്കാനോ സര്‍ക്കാര്‍ തയാറാകുന്നില്ല. സര്‍ക്കാരിന്‍റെ ഇത്തരം സമീപനങ്ങള്‍ സ്വകാര്യ ആശുപത്രികളെ സഹായിക്കാനാണെന്നും കെ.സി. വേണുഗോപാല്‍ പറഞ്ഞു. മെഡിക്കല്‍ കോളജിലെ ഒഴിവുള്ള തസ്തികകള്‍ നികത്താന്‍ സര്‍ക്കാര്‍ തയാറാകുന്നില്ല. സൂപ്പര്‍ സ്‌പെഷാലിറ്റി സൗകര്യം ഇതുവരെ യാഥാര്‍ഥ്യമാക്കിയില്ല. അറ്റകുറ്റപ്പണി നടത്തുന്നതില്‍ പിഡബ്ല്യുഡിയും ആരോഗ്യവകുപ്പും തമ്മില്‍ ശീതസമരമാണ്. സര്‍ജറി വിഭാഗത്തില്‍ 16 അസി. പ്രഫസര്‍മാരുടെ ഒഴിവുണ്ട്. അതില്‍ പതിനൊന്നെണ്ണവും ഒഴിഞ്ഞുകിടക്കുകയാണ്. റോഡിയോളജി ഡിപ്പാര്‍ട്ടുമെന്‍റില്‍ 13 തസ്തകയില്‍ നാലു പേര്‍മാത്രമാണ് ജോലിയിലുള്ളത്. അതീവഗുരുതരമായ തകര്‍ച്ചയിലേക്കു കേരളത്തിന്‍റെ പൊതുജന ആരോഗ്യരംഗത്തെ നയിക്കുകയാണ് പിണറായി സര്‍ക്കാരെന്നും അതിന്‍റെ തെളിവാണ് ഡോ. ഹാരീസ് ഹസന്‍റെ തുറന്നുപറച്ചിലെന്നും കെ.സി. വേണുഗോപാല്‍ പറഞ്ഞു.

പഠിച്ച സ്കൂളിൽ തന്നെ പ്രഥമ അധ്യാപികയായി ചുമതലയേറ്റ് ക്രിസ്ജ

ത.ുറവൂര്‍: പഠിച്ച വിദ്യാലയത്തില്‍ തന്നെ പ്രഥമ അധ്യാപികയായി ചുമതലയേറ്റ് ക്രിസ്ജ നോര്‍ബര്‍ട്ട്. പള്ളിത്തോട് പുന്നയ്ക്കല്‍ നോര്‍ബര്‍ട്ടിന്‍റെയും ലീലാമ്മയുടെയും മൂത്തമകളും ഇപ്പോള്‍ അര്‍ത്തുങ്കല്‍ താമസക്കാരിയുമായ ക്രിസ്ജ നോര്‍ബര്‍ട്ട് ആണ് കഴിഞ്ഞദിവസം പള്ളിത്തോട് സെന്‍റ് സെബാസ്റ്റ്യന്‍ ഹൈസ്‌കൂളിന്‍റെ പ്രഥമാധ്യാപികയായി ചുമതലയേറ്റത്. പത്താം ക്ലാസ് വരെ പഠിച്ച പള്ളിത്തോട് സെന്‍റ് സെബാസ്റ്റ്യന്‍സ് ഹൈസ്‌കൂള്‍ പ്രഥമ അധ്യാപികയായി ചുമതലയേല്‍ക്കുമ്പോള്‍ ഇരട്ടിമധുരമാണ് ക്രിസ്ജാ ടീച്ചറിനു ലഭിക്കുന്നത്. നൂറുകണക്കിന് വിദ്യാര്‍ഥികള്‍ക്ക് അറിവ് പകര്‍ന്നു നല്‍കിയ തന്‍റെ അമ്മ ലീലാമ്മ നോര്‍ബര്‍ട്ട് പഠിപ്പിച്ച അതേ സ്‌കൂളില്‍തന്നെ പ്രഥമാധ്യാപികയായത് ദൈവാനുഗ്രമായാണ് ടീച്ചര്‍ കരുതുന്നത്. താന്‍ ജനിച്ചുവളര്‍ന്ന പള്ളിത്തോടെന്ന തീരദേശ ഗ്രാമത്തില്‍ ആയിരക്കണക്കിന് വിദ്യാര്‍ഥികള്‍ക്ക് അറിവിന്‍റെ വെളിച്ചമേകി തലയെടുപ്പോടെ ഉയര്‍ന്നുനില്‍ക്കുന്ന പള്ളിത്തോട് സെന്‍റ് സെബാസ്റ്റ്യന്‍സ് ഹൈസ്‌കൂളില്‍ ഭാരിച്ച ഉത്തരവാദിത്വത്തോടെയാണ് ചുമതലയേറ്റിരിക്കുന്നത്. മുമ്പ് ആലപ്പുഴ ലിയോ തേർട്ടീന്ത്, അര്‍ത്തുങ്കല്‍ സെന്‍റ് ആഡ്രൂസ് സ്‌കൂളുകളിലും ടീച്ചര്‍ പഠിപ്പിച്ചിട്ടുണ്ട്. പള്ളിത്തോട് സ്‌കൂളിനെ ഉന്നതിയില്‍ എത്തിക്കുക എന്നതാണ് പ്രഥമ ലക്ഷ്യമെന്ന് ടീച്ചര്‍ പറഞ്ഞു. അര്‍ത്തുങ്കല്‍ കുരിശുങ്കല്‍ കുടുംബാംഗമായ അഗസ്റ്റിനാണ് ഭര്‍ത്താവ്. എക്യുന്‍, എവിന്‍ എന്നിവരാണ് മക്കള്‍.

നിരണം തീര്‍ഥാടനം ആറിന്; സ്വാഗതസംഘം ഓഫീസ് തുറന്നു

ചങ്ങനാശേരി: അതിരൂപതാ യുവദീപ്തി-എസ്എംവൈഎമ്മിന്‍റെ ആഭിമുഖ്യത്തില്‍ ജൂലൈ ആറിന് സംഘടിപ്പിക്കുന്ന നിരണം തീര്‍ഥാടനത്തിനുള്ള സ്വാഗതസംഘം ഓഫീസ് പാസ്റ്ററല്‍ സെന്‍ററില്‍ തുറന്നു. അതിരൂപത ഡയറക്ടര്‍ ഫാ. സാവിയോ മാനാട്ട് ഉദ്ഘാടനം ചെയ്തു. അതിരൂപത പ്രസിഡന്‍റ് അരുണ്‍ ടോം അധ്യക്ഷത വഹിച്ചു. അസിസ്റ്റന്‍റ് ഡയറക്ടര്‍ ഫാ. ടോണി പുതുവീട്ടില്‍ക്കളം, ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസ്, ജനറല്‍ സെക്രട്ടറി ക്രിസ്റ്റി കെ. കുഞ്ഞുമോന്‍, ട്രഷറര്‍ സെബാസ്റ്റ്യ ൻ മഞ്ഞുമ്മേല്‍, കണ്‍വീനര്‍മാരായ ക്രിസ്റ്റിന്‍ സേവ്യര്‍, ലൂസി ഫിലിപ്പോസ്, ഡെന്നി, റിയ റ്റോജി എന്നിവര്‍ പ്രസംഗിച്ചു.

കടലിൽ കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി

അമ്പലപ്പുഴ: പുന്നപ്ര പറവൂര്‍ സെന്‍റ് ആന്‍റണീസ് ചാപ്പലിന്‍റെ തീരത്തു നിന്ന് കടലില്‍ കാണാതായ മത്സ്യത്തൊഴിലാളിയുടെ മൃതദേഹം കണ്ടെത്തി. പൊന്തുവള്ളം മറിഞ്ഞ് കാണാതായപുന്നപ്ര വടക്ക് പഞ്ചായത്ത് 12-ാം വാര്‍ഡ് ചാണയില്‍ വീട്ടില്‍ സ്റ്റീഫ(റോക്കി-55)ന്‍റെ മൃതദേഹമാണ് ഇന്നലെ രാവിലെ പത്തോടെ തോട്ടപ്പള്ളി പൊഴി മുഖത്തടിഞ്ഞത്. പുലിമുരുകന്‍ എന്ന വള്ളത്തിലെ തൊഴിലാളികളാണ് മ്യതദേഹം കണ്ടെത്തിയത്. വെള്ളിയാഴ്ച പുലര്‍ച്ചെ പൊന്തു ഇറക്കുന്നതിനിടയില്‍ ശക്തമായ തിരയില്‍പ്പെട്ടാണ് റോക്കിയെ കാണാതായത്. തുടര്‍ന്ന് തീരദേശ പോലീസും, മത്സ്യത്തൊഴിലാളികളും തെരച്ചില്‍ നടത്തിയെങ്കിലും കണ്ടെത്താനായില്ല. മൃതദേഹം വണ്ടാനം മെഡിക്കല്‍ കോളജ് ആശുപത്രി മോര്‍ച്ചറിയിലേക്കു മാറ്റി. ഭാര്യ: മോളി. മക്കള്‍: പ്രിന്‍സി, റോബിന്‍, മരുമകന്‍: ഡിക്‌സണ്‍.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]