ADVERTISEMENT

ADVERTISEMENT

വളവനാട് ആരോഗ്യകേന്ദ്രം സ്ഥാപിക്കാൻ നടപടിയെടുക്കും: പി.പി. ചിത്തരഞ്ജൻ എംഎൽഎ

മുഹമ്മ: വളവനാട് ബോധി റസിഡന്‍റ്സ് അസോസിയേഷന്‍റെ നേതൃത്വത്തിൽ വിദ്യാഭ്യാസ അവാർഡ് ദാന സമ്മേളനം നടന്നു. പി.പി. ചിത്തരഞ്ജൻ എംഎൽ എ സമ്മേളനം ഉദ്ഘാടനം ചെയ്തു. വളവനാട് മേഖലയിൽ ആരോഗ്യകേന്ദ്രം സ്ഥാപിക്കുന്നതിനും മേഖലയിലെ വെള്ളക്കെട്ട് ഒഴിവാക്കുന്നതിനും നടപടി സ്വീകരിക്കുമെന്നു ചിത്തരഞ്ജൻ പറഞ്ഞു. വിദ്യാഭ്യാസ മേഖലയിൽ ഉന്നതവിജയം നേടിയ വിദ്യാർഥികളെ കാഷ് അവാർഡും ഉപഹാരവും നൽകി എംഎൽഎ ആദരിച്ചു.

കലാ-കായിക മത്സരങ്ങളിലെ വിജയികൾക്കുള്ള കാഷ് അവാർഡുകളും ട്രോഫികളും വളവനാട് ദേവസ്വം പ്രസിഡന്‍റ് ബിൻസ് വിതരണം ചെയ്തു. രക്ഷാധികാരി എൻ. വേണുഗോപാൽ അധ്യക്ഷത വഹിച്ചു. അസോസിയേഷൻ സെക്രട്ടറി എം. മധു, സി.സി. കൈലാസൻ, എൻ. ഓമനക്കുട്ടൻ, ടി. സുനിൽ, പി. സുരേഷ്, കെ.എൻ. സജിമോൻ എന്നിവർ പ്രസംഗിച്ചു.

ADVERTISEMENT

കുട്ടനാട്ടില്‍ തെരുവുനായ ഭീഷണി

ചമ്പക്കുളം: കുട്ടനാട്ടിലെ മിക്ക പഞ്ചായത്തുകളും തെരുവുനായ ഭീഷണിയില്‍. സ്‌കൂള്‍ പരിസരങ്ങളും പൊതുസ്ഥലങ്ങളും തെരുവുനായകള്‍ കൈയടക്കി. തെരുവുനായ ശല്യത്തില്‍നിന്നു നാട്ടുകാരെ സംരക്ഷിക്കേണ്ട ഭരണകൂടം ഇക്കാര്യത്തില്‍ നിശബ്ദത പാലിക്കുന്നു. സ്‌കൂളില്‍ പോകുന്ന മക്കള്‍ നായകടി ഏല്‍ക്കാതെ തിരിച്ച് എത്തണേയെന്ന പ്രാര്‍ഥനയോടെയാണ് മാതാപിതാക്കള്‍ കാത്തിരിക്കുന്നത്. കുട്ടനാട്ടില്‍ പ്രഭാത നടത്തത്തിന് ഇറങ്ങുന്നവരുടെ എണ്ണം കുറഞ്ഞിരിക്കുന്നു. വൈകുന്നേരങ്ങളിലും പകല്‍സമയം പോലും വഴികളിലൂടെ ഒറ്റയ്ക്ക് നടക്കാന്‍ ആളുകള്‍ ഭയപ്പെടുന്നു. ഇരുചക്രവാഹന യാത്രക്കാരും സൈക്കിള്‍ യാത്രക്കാരും ഭയത്തോടെയാണ് യാത്രക്കിറങ്ങുന്നത്. ഏതു സമയത്തും എവിടെനിന്നും നായയുടെ ആക്രമണം പ്രതീക്ഷിക്കേണ്ട സാഹചര്യമാണിന്ന് കുട്ടനാട്ടിലെ പല പഞ്ചായത്തുകളിലും നിലനില്ക്കുന്നത്. പത്രവിതരണം നടത്തുന്നവര്‍ നായകടി ഭയന്ന് നേരം പുലര്‍ന്ന് കഴിഞ്ഞാണ് പലയിടത്തും പത്രം വിതരണം പോലും നടത്തുന്നത്. പുളിങ്കുന്ന് പഞ്ചായത്തിലെ മങ്കൊമ്പിലും നെടുമുടി പഞ്ചായത്തിലെ തെക്കേമുറിയിലും തെരുവുനായ ആക്രമണം ഉണ്ടായിട്ട് ആഴ്ചകള്‍ മാത്രം. മങ്കൊമ്പില്‍ തെരുവുനായ നിരവധി ആളുകളെ ആക്രമിച്ചപ്പോള്‍. നെടുമുടിയില്‍ തെരുവുനായ ആക്രമിച്ച കച്ചവടക്കാരന്‍റെ ധൈര്യപൂര്‍വമായ സമയോചിത ഇടപെടല്‍ പേവിഷബാധയുണ്ടായിരുന്ന നായയുടെ കടിയില്‍നിന്നും നിരവധി ആളുകളെ രക്ഷിച്ചു. നെടുമുടി പഞ്ചായത്തിലെ എട്ടാം വാര്‍ഡില്‍ റെയാന്‍സ് ഏജന്‍സീസ് എന്ന സ്ഥാപനം നടത്തുന്ന ടിറ്റോ ജോസഫിനാണ് തന്‍റെ സ്ഥാപനത്തിന് മുന്നില്‍വച്ച് നായകടിയേറ്റത്. സ്ത്രീകളും കുട്ടികളും അടക്കം നിരവധി ആളുകള്‍ ഈ സമയം സ്ഥാപനത്തിനു മുന്നിലുണ്ടായിരുന്നു. തന്നെ ആക്രമിച്ച നായയെ സാഹസികമായി പിടികൂടി ബന്ധിച്ച് മൃഗാശുപത്രിയില്‍ പരിശോധന നടത്തിയതില്‍ നായക്ക് പേവിഷബാധ സ്ഥിരികരിക്കുകയും ചെയ്തു. തുടര്‍ന്ന് ചികിത്സ നേടിയ ഇയാള്‍ ഇപ്പോഴും ഇതിന്‍റെ ആഘാതത്തില്‍നിന്നു മുക്തനായിട്ടില്ല. കൂട്ടമായി നടക്കുകയും ആക്രമിക്കുകയും ചെയ്യുന്ന തെരുവുനായ്ക്കളില്‍ ചിലതെങ്കിലും വീടുകളില്‍ വളര്‍ത്തിയിരുന്നതും ഇപ്പോള്‍ തുറന്നുവിട്ടിരിക്കുന്നതുമാണെന്ന് കാണാന്‍ കഴിയും. ഈ തെരുവുനായ്ക്കളുടെ കഴുത്തില്‍ ബെല്‍റ്റുകള്‍ ഇപ്പോഴുമുണ്ട്. ബന്ധപ്പെട്ട തദ്ദേശസ്വയംഭരണസ്ഥാപനങ്ങളുടെ അലംഭാവമാണ് ഇപ്രകാരം തെരുവുനായകളുടെ വര്‍ധനവിനു കാരണം. അടിയന്തര നടപടികള്‍ ബന്ധപ്പെട്ട അധികാരികളുടെ ഭാഗത്തുനിന്ന് ഉണ്ടാവണമെന്നാണ് നാട്ടുകാരുടെ ആവശ്യം.

ചേർത്തലയിൽ ബസ് പാലത്തിലേക്ക് ഇടിച്ചുകയറി; 28 പേര്‍ക്കു പരിക്ക്

ചേര്‍ത്തല: ദേശീയപാതയില്‍ നിര്‍മാണം നടക്കുന്ന കോണ്‍ക്രീറ്റ് പാലത്തിലേക്കു കെഎസ്ആര്‍ടിസി ബസ് ഇടിച്ചു കയറി ബസിലുണ്ടായിരുന്ന 28 പേര്‍ക്കു പരിക്ക്. സാരമായി പരിക്കേറ്റ 10 യാത്രക്കാരെ വിദഗ്ധ ചികിത്സയ്ക്കായി ആലപ്പുഴ വണ്ടാനം മെഡിക്കല്‍ കോളജ് ആശുപത്രിയിലേക്കു മാറ്റി. നട്ടെല്ലിനു പരിക്കേല്‍ക്കുകയും കാലൊടിയുകയും ചെയ്ത ബസ് ഡ്രൈവര്‍ കൊല്ലം നീണ്ടൂര്‍ എടത്തറവീട്ടില്‍ ശ്രീരാജ് സുരേന്ദ്രന്‍ (33), കണ്ടക്ടര്‍ തിരുവനന്തപുരം സുജിനാഭവനില്‍ സുജിത് (38), കൊല്ലം മേച്ചേരി പുത്തന്‍വീട്ടില്‍ ഗോപാലകൃഷ്ണന്‍ (57), ബിഹാര്‍ സ്വദേശി മുഹമ്മദ് ബഷീര്‍ (31), കാലടി ചേരാനല്ലൂര്‍ തൈക്കാത്ത് സിജിബാബു (42), തിരുവനന്തപുരം ആര്യാങ്കാവ് പാറവിള പുത്തന്‍വീട്ടില്‍ അജിത്കുമാര്‍ (52), പാലക്കാട് ഹെഡ് ഓഫീസ് പോസ്റ്റല്‍ ക്വാര്‍ട്ടേഴ്‌സില്‍ അനൂപ് (40), ചേര്‍പ്പുളശേരി തറയില്‍വീട്ടില്‍ അരുണ്‍കുമാര്‍ (36), കോയമ്പത്തൂര്‍ സ്വദേശിനികളായ ഉഷ (32), ശൈലജ (45) എന്നിവരാണ് ആലപ്പുഴ മെഡിക്കല്‍ കോളജില്‍ ചികിത്സയിലുള്ളത്.

നിയന്ത്രണം വിട്ടു കോയമ്പത്തൂരില്‍നിന്നു തിരുവനന്തപുരത്തേക്കു പോകുകയായിരുന്ന കെഎസ്ആര്‍ടിസി സൂപ്പര്‍ ഫാസ്റ്റ് സ്വിഫ്റ്റ് ബസ് ആണ് അപകടത്തില്‍പെട്ടത്. ചൊവ്വാഴ്ച പുലര്‍ച്ചെ അഞ്ചോടെ ദേശീയപാതയില്‍ ചേര്‍ത്തല പോലീസ് സ്റ്റേഷനു വടക്ക് ഹൈവേ പാലത്തിനു സമീപമായിരുന്നു അപകടം. പരിക്കേറ്റവരില്‍ സംസ്ഥാനത്തിന്‍റെ വിവിധ ഭാഗങ്ങളിലുളളവരും ഇതരസംസ്ഥാനക്കാരുമുണ്ട്. ചേര്‍ത്തല റെയില്‍വേ സ്റ്റേഷനില്‍ യാത്രക്കാരെ ഇറക്കി തിരുവനന്തപുരത്തേക്കു പോകുകയായിരുന്ന ബസ് ഹൈവേ പാലത്തിനു സമീപം നിയന്ത്രണം വിട്ട് ദേശീപാതയില്‍ അടിപ്പാലം നിര്‍മിക്കുകയായിരുന്ന ഭാഗത്തേക്ക് ഇടിച്ചുകയറുകയായിരുന്നു. അടിപ്പാതയുടെ രണ്ടാംഘട്ട ഭാഗത്ത് കോണ്‍ക്രീറ്റിംഗിനായി കെട്ടിയ കമ്പികളിലേക്കാണ് ബസ് ഇടിച്ചു കയറിയത്.

നിര്‍മാണം നടക്കുന്നതിനാല്‍ ഇവിടെ വാഹനങ്ങള്‍ തിരിച്ചുവിടാന്‍ താത്ക്കാലിക ക്രമീകരണങ്ങളാണ് ഒരുക്കിയിരുന്നത്. ഇതെല്ലാം തകര്‍ത്താണ് ബസ് ഇടിച്ചുകയറിയത്. ഉറങ്ങിപ്പോയെന്ന് സംശയം ക്രമീകരണങ്ങള്‍ കാണാതെ വാഹനം മുന്നോട്ടു പോയതോടെയാണ് അപകടമുണ്ടായത്. ഇടിയുടെ ആഘാതത്തില്‍ ബസിന്‍റെ മുന്‍ഭാഗം തകര്‍ന്നു. ചേര്‍ത്തലയില്‍നിന്ന് അഗ്നിശമനസേനയെത്തി മുന്‍ഭാഗം പൊളിച്ചാണ് ഡ്രൈവറെയും കണ്ടക്ടറെയും മുന്‍വരിയിലിരുന്നവരെയും പുറത്തെത്തിച്ചത്. ബസില്‍ത്തന്നെ തെറിച്ചുവീണും സീറ്റിലും കമ്പികളിലും തലയിടിച്ചുമാണ് മറ്റുള്ളവര്‍ക്കു പരിക്ക്. ഡ്രൈവര്‍ ഉറങ്ങിപ്പോയതാണെന്നു കരുതുന്നു. അതേസമയം, ബസ് അമിത വേഗത്തിലായിരുന്നെന്നും പറയുന്നുണ്ട്. അശ്രദ്ധമായി വാഹനം ഓടിച്ചതിന് ഡ്രൈവര്‍ക്കെതിരേ ചേര്‍ത്തല പോലീസ് കേസെടുത്തിട്ടുണ്ട്. ദേശീയപാത നിര്‍മാണവുമായി ബന്ധപ്പെട്ടു പാലം പണി നടക്കുന്നതിനാല്‍ ഈ ഭാഗത്തു താല്കാലിക പാത ഒരുക്കിയിട്ടുണ്ട്. ദേശീയപാതയിലൂടെ ഇരു ഭാഗങ്ങളില്‍നിന്നു വരുന്ന വാഹനങ്ങള്‍ തൊട്ടടുത്ത് എത്തുമ്പോഴാണ് റോഡിനു താത്കാലികമായി പാത ഒരുക്കിയ വിവരം മനസിലാകുകയുള്ളൂ. ദേശീയപാതയിലൂടെ ഇങ്ങനെ വേഗത്തില്‍ വരുന്ന വാഹനങ്ങള്‍ സ്ഥിരമായി അപകടത്തില്‍ പെടാറുണ്ടെന്നും നാട്ടുകാര്‍ പറയുന്നു.

ഇനി സിബിഎല്‍ പൂരം ; ചാമ്പ്യന്‍സ് ബോട്ട് ലീഗ് അഞ്ചാം സീസണ്‍ 19 മുതല്‍

ആലപ്പുഴ: സംസ്ഥാന വിനോദ സഞ്ചാരവകുപ്പ് സംഘടിപ്പിക്കുന്ന ചാമ്പ്യന്‍സ് ബോട്ട് ലീഗ് (സിബിഎല്‍) അഞ്ചാം സീസണ്‍ 19 മുതല്‍ നടക്കും. കൈനകരിയിലാണ് ഐപിഎല്‍ ക്രിക്കറ്റ് മാതൃകയിലുള്ള ചുണ്ടന്‍വള്ളങ്ങളുടെ ലീഗ് മത്സരമായ ചാമ്പ്യന്‍സ് ബോട്ട് ലീഗ് ആരംഭിക്കുന്നത്. മൂന്നുമാസം നീളുന്ന 12 മത്സരങ്ങളുള്ള സിബിഎല്‍ ഡിസംബര്‍ ആറിന് കൊല്ലത്തെ പ്രസിഡന്‍റ്സ് ട്രോഫിയോടെ സമാപിക്കും. വിജയികള്‍ക്ക് 5.63 കോടി രൂപ സമ്മാനമായി ലഭിക്കും. ചാമ്പ്യന്‍സ് ബോട്ട് ലീഗ് (സിബിഎല്‍) അഞ്ചാം സീസണിന്‍റെ മൈക്രോസൈറ്റും പ്രൊമോഷണല്‍ വീഡിയോയും മന്ത്രി പി.എ. മുഹമ്മദ് റിയാസ് കഴിഞ്ഞദിവസം പുറത്തിറക്കിയിരുന്നു. തെക്കന്‍ കേരളത്തെ കേന്ദ്രീകരിച്ചാണ് സിബിഎല്‍ മത്സരങ്ങളില്‍ ഭൂരിഭാഗവും. മലബാര്‍ മേഖലയിലും മധ്യകേരളത്തിലും മൂന്ന് മത്സരങ്ങള്‍ വീതം നടക്കും. കോട്ടയം താഴത്തങ്ങാടി, എറണാകുളം ജില്ലയിലെ പിറവം, മറൈന്‍ ഡ്രൈവ്, തൃശൂര്‍ കോട്ടപ്പുറം, ആലപ്പുഴ ജില്ലയിലെ പുളിങ്കുന്ന്, കരുവാറ്റ, പാണ്ടനാട്, കായംകുളം, കൊല്ലം ജില്ലയിലെ കല്ലട എന്നിവിടങ്ങള്‍ക്കൊപ്പം വടക്കന്‍ കേരളത്തില്‍ കാസര്‍ഗോഡ് ചെറുവത്തൂര്‍, കണ്ണൂര്‍ ധര്‍മ്മടം, കോഴിക്കോട് ബേപ്പൂര്‍ എന്നിവിടങ്ങളിലും സിബിഎല്‍ മത്സരങ്ങള്‍ നടത്തുന്നുണ്ട്. കാസര്‍കോട്ട് ആദ്യമായാണ് സിബിഎല്‍ മത്സരങ്ങള്‍ നടക്കുന്നത്. ഇത്തവണത്തെ നെഹ്‌റു ട്രോഫി വള്ളംകളിയില്‍ ആദ്യസ്ഥാനങ്ങളിലെത്തിയ പുന്നമട ബോട്ട് ക്ലബ്, നിരണം ബോട്ട് ക്ലബ്, പള്ളാത്തുരുത്തി ബോട്ട് ക്ലബ്, വില്ലേജ് ബോട്ട് ക്ലബ്, ചങ്ങനാശേരി ബോട്ട് ക്ലബ്, കാരിച്ചാല്‍ ചുണ്ടന്‍ ബോട്ട് ക്ലബ്, ഇമ്മാനുവല്‍ ബോട്ട് ക്ലബ്, ടൗണ്‍ ബോട്ട് ക്ലബ്, തെക്കേക്കര ബോട്ട് ക്ലബ് എന്നീ ക്ലബുകളാണ് സിബിഎല്ലില്‍ മത്സരിക്കുക. ഒന്നാം സ്ഥാനം കരസ്ഥമാക്കുന്ന ക്ലബിന് 25 ലക്ഷവും രണ്ടാം സ്ഥാനം നേടുന്നവര്‍ക്ക് 15 ലക്ഷവും മൂന്നാം സ്ഥാനത്തെത്തുന്ന ക്ലബിന് 10 ലക്ഷംരൂപയും സമ്മാനമായി ലഭിക്കും. ഓരോ മത്സരവേദിയിലും വിജയികളാകുന്നവരില്‍ ഒന്നാം സ്ഥാനക്കാര്‍ക്ക് അഞ്ചുലക്ഷം രൂപയും രണ്ടാം സ്ഥാനക്കാര്‍ക്ക് മൂന്നു ലക്ഷവും മൂന്നാം സ്ഥാനക്കാര്‍ക്ക് ഒരു ലക്ഷം രൂപയും ലഭിക്കും. ബോണസായി ഓരോ ടീമിനും നാലു ലക്ഷം രൂപ വീതവും നീക്കിവച്ചിട്ടുണ്ട്. ചെറുവള്ളങ്ങളുടെ വിഭാഗത്തില്‍ ഒന്നാം സ്ഥാനക്കാര്‍ക്ക് മൂന്നു ലക്ഷം രൂപയും രണ്ടും മൂന്നും സ്ഥാനങ്ങളില്‍ എത്തുന്ന ടീമുകള്‍ക്ക് യഥാക്രമം 1.50 ലക്ഷവും 50,000 രൂപയും വീതം ലഭിക്കും. ഈ വിഭാഗത്തില്‍ ബോണസായി ഓരോ ടീമിനും ഒരു ലക്ഷം രൂപ വീതവും നീക്കിവച്ചിട്ടുണ്ട്. ധര്‍മ്മടം (കണ്ണൂര്‍), താഴത്തങ്ങാടി (കോട്ടയം, സെപ്റ്റംബര്‍ 27), ചെറുവത്തൂര്‍ (കാസര്‍ഗോട്, ഒക്ടോബര്‍ 2), പിറവം (ഒക്ടോബര്‍ 4), മറൈന്‍ ഡ്രൈവ് (എറണാകുളം, ഒക്ടോബര്‍ 11), ബേപ്പൂര്‍ (കോഴിക്കോട് ഒക്ടോബര്‍ 19), കോട്ടപ്പുറം (തൃശൂര്‍, ഒക്ടോബര്‍ 25), പുളിങ്കുന്ന് (നവംബര്‍ 1), കരുവാറ്റ (നവംബര്‍ 8), പാണ്ടനാട് (നവംബര്‍ 15), കായംകുളം (നവംബര്‍ 22, ആലപ്പുഴ), കല്ലട (കൊല്ലം, നവംബര്‍ 29) എന്നിവിടങ്ങളിലാണ് മറ്റു മത്സരള്‍. കഴിഞ്ഞ നാല് സീസണിലും പള്ളാത്തുരുത്തി ബോട്ട് ക്ലബ് തുഴഞ്ഞ വള്ളങ്ങളാണ് വിജയികളായത്. അഞ്ചാം സീസണില്‍ തുഴയ്ക്ക് തീപിടിക്കുന്ന മത്സരങ്ങളാണ് വള്ളംകളി പ്രേമികള്‍ പ്രതീക്ഷിക്കുന്നത്. സിബിഎല്ലിനുള്ള അടിസ്ഥാന സൗകര്യങ്ങളും പ്രചാരണവും ടൂറിസം ഡയറക്ടറേറ്റ് ഒരുക്കും. സിബിഎല്ലിന്‍റെ മികച്ച നടത്തിപ്പിന് സിബിഎല്‍ ലിമിറ്റഡ് രൂപീകരിച്ചിരുന്നു.

മാലിന്യസംസ്കരണത്തില്‍ ചേപ്പാടിന്‍റെ കണ്ടെയ്നര്‍ മാതൃക

ആലപ്പുഴ: മാലിന്യസംസ്കരണം കൂടുതല്‍ പ്രകൃതിസൗഹൃദമാക്കി മാതൃകയാവുകയാണ് ചേപ്പാട് പഞ്ചായത്ത്. മാലിന്യം സംഭരിക്കാനുള്ള പഞ്ചായത്തിലെ മെറ്റീരിയൽ കളക്ഷൻ ഫെസിലിറ്റികള്‍ (എംസിഎഫ്) ഒരുക്കാന്‍ കോണ്‍ക്രീറ്റ് കെട്ടിടങ്ങള്‍ തേടിപ്പോകാതെ പഴയ കണ്ടെയ്നറുകള്‍ കണ്ടെത്തിയാണ് ചേപ്പാട് വേറിട്ട മാതൃക സമ്മാനിച്ചത്. പഴയ രണ്ടു കണ്ടെയ്നറുകളാണ് അജൈവ മാലിന്യങ്ങൾ സംഭരിക്കുന്ന എംസിഎഫ് കേന്ദ്രമാക്കി പഞ്ചായത്ത് മാറ്റിയത്. പ്രതിമാസം 800 കിലോ അജൈവ മാലിന്യം ഇതിലൂടെ സംഭരിക്കുന്നുണ്ട്. 2024-25 വാർഷിക പദ്ധതിയിൽ ഉൾപ്പെടുത്തിയാണ് മാലിന്യ പരിപാലനത്തിനായി കണ്ടെയ്നറുകൾ എത്തിച്ചത്. പഞ്ചായത്തിന്‍റെ തനത് ഫണ്ടും കേന്ദ്ര ധനകാര്യ കമ്മീഷൻ ഗ്രാന്‍റും ചേർത്ത് 6,48,528 രൂപ ഇതിനായി ചെലവഴിച്ചു. കണ്ടെയ്നർ ആർക്കിടെക്ചർ സ്ഥാപനമായ ഇന്‍റഗ്രേറ്റഡ് ലിഫ്റ്റേഴ്സിന്‍റെ പക്കൽനിന്നാണ് കണ്ടെയ്നറുകൾ വാങ്ങിയത്. മൂന്നാം വാർഡിൽ പഞ്ചായത്തിനു സമീപവും പതിനൊന്നാം വാർഡിൽ ദേശീയപാതയ്ക്കു സമീപം കോട്ടംകോയിക്കൽ ജംഗ്ഷനിലുമാണ് ഇവ സ്ഥാപിച്ചിട്ടുള്ളത്. 36.31 ക്യൂബിക് മീറ്റർ കപ്പാസിറ്റിയുള്ള കണ്ടെയ്നറിന് 20 അടി ഉയരമുണ്ട്. 14 വാർഡുകളിലെ എംസിഎഫ് പ്രവർത്തനങ്ങളിലൂടെ 28 ഹരിതകർമസേനാംഗ ങ്ങൾക്കാണ് പഞ്ചായത്തില്‍ തൊഴിൽ നൽകുന്നത്. പ്ലാസ്റ്റിക് ഉത്പന്നങ്ങൾ, പ്ലാസ്റ്റിക് കുപ്പികൾ, ചില്ല് മാലിന്യം തുടങ്ങിയവ ഇവർ സംഭരിക്കും. തുടര്‍ന്ന് ഇവ തരംതിരിച്ച് ക്ലീൻ കേരള കമ്പനിക്കും പ്ലാനറ്റ് എർത്ത് എക്കോ സൊല്യൂഷൻസിനും കൈമാറുകയാണ് ചെയ്യുന്നത്.

മുട്ടം ഹോളി ഫാമിലി ഹൈസ്കൂള്‍ സുവര്‍ണജൂബിലിക്കു തുടക്കം

ചേർത്തല: മുട്ടം ഹോളി ഫാമിലി ഹയർ സെക്കൻഡറി സ്കൂളിലെ ഹൈസ്കൂള്‍ വിഭാഗം സുവർണജൂബിലി ആഘോഷങ്ങൾക്കു തുടക്കമായി. മുൻ ഡിജിപി ഹോർമിസ് തരകൻ ഉദ്ഘാടനം ചെയ്തു. സ്കൂൾ മാനേജർ ഫാ. ജോഷി വേഴപ്പറമ്പിൽ അധ്യക്ഷത വഹിച്ചു. എറണാകുളം-അങ്കമാലി അതിരൂപത വികാരി ജനറാൾ റവ. ഡോ. ആന്‍റോ ചേരാംതുരുത്തി അനുഗ്രഹ പ്രഭാഷണം നടത്തി. ഗാനരചയിതാവ് അജീഷ് ദാസൻ ജൂബിലി ലോഗോ മത്സര വിജയികൾക്ക് സമ്മാനദാനം നിർവഹിച്ചു. നഗരസഭാ ചെയർപേഴ്സൺ ഷേർളി ഭാർഗവൻ, വാർഡ് കൗൺസിലർ മിത്ര വിന്ദാഭായ്, പിടിഎ പ്രസിഡന്‍റ് അഡ്വ. ജാക്സൺ മാത്യു, മുൻ പ്രഥമാധ്യാപകൻ ജോയ് സെബാസ്റ്റ്യൻ, പ്രിൻസിപ്പൽ ലിസ കുര്യൻ, ഹെഡ്മിസ്ട്രസ് എം. മിനി, ജൂബിലി ആഘോഷ കമ്മിറ്റി ജനറൽ കൺവീനർ ബിന്ദു ജോസഫ്, ജോയിന്‍റ് ജനറൽ കൺവീനർ സാജു തോമസ്, ഫിനാൻസ് കമ്മിറ്റി കൺവീനർ വി. ശ്രീഹരി, സ്റ്റാഫ് സെക്രട്ടറി എം.ടി. ജോസഫ് എന്നിവർ പ്രസംഗിച്ചു. ഹൈസ്കൂൾ വിഭാഗം സ്ഥാപിതമായതിന്‍റെ അമ്പതാം വാർഷികത്തോടനുബന്ധിച്ച് ഒരുവർഷം നീളുന്ന വിവിധ പരിപാടികളാണ് ഒരുക്കിയിട്ടുള്ളത്.

ഗ്രാനൈറ്റ് തെന്നി മറിഞ്ഞ് അതിഥിതൊഴിലാളികൾക്കു പരിക്ക്

ചെങ്ങന്നൂർ: കുന്നത്തുമലയിൽ നിർമാണത്തിലിരിക്കുന്ന ശബരിമല ഇടത്താവളത്തിന്‍റെ നിർമാണസ്ഥലത്ത് ഗ്രാനൈറ്റ് വീണ് രണ്ട് അതിഥിത്തൊഴിലാളികൾക്ക് ഗുരുതരമായി പരിക്കേറ്റു. വെസ്റ്റ് ബംഗാൾ സ്വദേശികളായ അലി ഹുസൈൻ (23), റഷീദാർ ഹുസൈൻ (31) എന്നിവർക്കാണ് പരിക്കേറ്റത്. ഇരുവരുടെയും കാലിന് പൊട്ടലുണ്ട്. ഇന്നലെ രാവിലെ, ഇടത്താവളത്തിന്‍റെ നിർമാണ സ്ഥലത്തേക്ക് ഗ്രാനൈറ്റ് ഇറക്കുന്നതിനിടെയാണ് അപകടം. ഗ്രാനൈറ്റ് പാളി തെന്നിമാറി തൊഴിലാളികളുടെ കാലുകളിലേക്ക് വീഴുകയായിരുന്നു. ഉടൻതന്നെ സ്ഥലത്തുണ്ടായിരുന്ന മറ്റുള്ളവർ രക്ഷാപ്രവർത്തനം ആരംഭിച്ചു. വിവരമറിഞ്ഞ് സ്ഥലത്തെത്തിയ ചെങ്ങന്നൂർ ഫയർ ഫോഴ്‌സ് സംഘം പരിക്കേറ്റവരെ ചെങ്ങന്നൂർ ജില്ലാ ആശുപത്രിയിൽ പ്രവേശിപ്പിച്ചു.

വൈറോളജി ഇൻസ്റ്റിറ്റ്യൂട്ട് ലബോറട്ടറി; അന്തിമാനുമതി നൽകണമെന്ന് കെ.സി. വേണുഗോപാൽ എംപി

ആലപ്പുഴ: വൈറോളജി ഇന്‍സ്റ്റിറ്റ്യൂട്ടില്‍ പുതുതായി നിര്‍മിച്ച ബയോസേഫ്റ്റി ലെവല്‍-3 ലബോറട്ടറിയുടെ സര്‍ട്ടിഫിക്കേഷന്‍ നടപടികള്‍ക്ക് അന്തിമാനുമതി നല്‍കണമെന്ന് ആവശ്യപ്പെട്ട് കെ.സി. വേണുഗോപാല്‍ എംപി കേന്ദ്ര ആരോഗ്യമന്ത്രി ജെ.പി. നദ്ദയ്ക്ക് കത്തു നല്‍കി. അമീബിക് മസ്തിഷ്‌ക ജ്വരം പടര്‍ന്നുപിടിക്കുന്ന ഗുരുതരമായ സാഹചര്യമാണ് സംസ്ഥാനത്തുള്ളത്. ഇവ ഉള്‍പ്പെടെയുള്ള ജലജന്യരോഗങ്ങളുടെ നിര്‍ണയങ്ങള്‍ക്ക് അത്യാധുനിക സംവിധാനങ്ങളോടെ സജ്ജീകരിച്ചിരിക്കുന്നതാണ് വൈറോളജി ഇന്‍സ്റ്റിറ്റ്യൂട്ട്. ഇതിനുപരിയായി നിപ്പാ വൈറസ്, പക്ഷിപ്പനി, കുരങ്ങ് പനി തുടങ്ങിയ ഗുരുതരരോഗങ്ങളുടെ പരിശോധനയും രോഗനിര്‍ണയവും നടത്താനുള്ള സൗകര്യവും ഇവിടെ ക്രമീകരിച്ചിട്ടുണ്ട്. അതിനാല്‍ അടിയന്തര സാഹചര്യം കണക്കിലെടുത്ത് വൈറോളജി ഇന്‍സ്റ്റിറ്റ്യൂട്ടിന്‍റെ പ്രവര്‍ത്തനം പൂര്‍ണതോതില്‍ പ്രവര്‍ത്തിപ്പിക്കുന്നതിന് നടപടി സ്വീകരിക്കണമെന്നും വേണുഗോപാല്‍ കത്തില്‍ ആവശ്യപ്പെട്ടു.

സ്വാമി വിവേകാനന്ദൻ യുവപ്രതിഭാ പുരസ്കാരം: 23 വരെ അപേക്ഷിക്കാം

ആലപ്പുഴ: സ്വാമി വിവേകാനന്ദന്‍ യുവ പ്രതിഭാ പുരസ്‌കാരത്തിന് നോമിനേഷന്‍ സമര്‍പ്പിക്കുന്നതിനും മികച്ച യുവജന ക്ലബ്ബുകള്‍ക്കുള്ള അവാര്‍ഡിന് അപേക്ഷിക്കുന്നതിനും 23 വരെ സമയം നീട്ടി. യുവപ്രതിഭാ പുരസ്കാരത്തിന് നിശ്ചിതഫോറത്തിൽ നോമിനേഷൻ സമർപ്പിക്കാം. വ്യക്തിഗത പുരസ്കാരത്തിനായി അതത് മേഖകളിലെ 18 നും 40-നും മധ്യേയുള്ള യുവജനങ്ങളെയാണ് നോമിനേറ്റ് ചെയ്യേണ്ടത്. സാമൂഹ്യപ്രവർത്തനം, മാധ്യമപ്രവർത്തനം (പ്രിന്‍റ് മീഡിയ), മാധ്യമ പ്രവർത്തനം (ദ്യശ്യമാധ്യമം), കല, സാഹിത്യം, കായികം (വനിത), കായികം (പുരുഷൻ), സംരംഭകത്വം, കൃഷി എന്നീ മേഖലകളിൽനിന്നു മികച്ച ഓരോ വ്യക്തിക്കുവീതം ആകെ ഒമ്പതു പേർക്കാണ് പുരസ്കാരങ്ങൾ നൽകുന്നത്. പുരസ്കാരത്തിനായി സ്വയം അപേക്ഷ സമർപ്പിക്കാൻ കഴിയില്ല. അതത് മേഖലകളുമായി ബന്ധപ്പെട്ട ഏതൊരാൾക്കും മറ്റൊരാളെ നോമിനേറ്റ് ചെയ്യാവുന്നതാണ്. പുരസ്കാരത്തിന് അർഹരാകുന്നവർക്ക് 50,000 രൂപയും പ്രശസ്തി പത്രവും നൽകും. കൂടാതെ കേരള സംസ്ഥാന യുവജനക്ഷേമ ബോർഡിൽ അഫിലിയേറ്റ് ചെയ്തിട്ടുള്ള യൂത്ത്, യുവ, അവളിടം ക്ലബ്ബുകൾക്കും അവാർഡിനായി അപേക്ഷിക്കാം. ജില്ലാതലത്തിൽ തെരഞ്ഞെടുത്ത മികച്ച ക്ലബ്ബിന് 30,000 രൂപയും പ്രശസ്തി പത്രവും പുരസ്കാരവും നൽകും. ജില്ലാതലത്തിൽ അവാർഡിന് അർഹത നേടിയ ക്ലബ്ബുകളെയാണ് സംസ്ഥാനതലത്തിൽ പരിഗണിക്കുന്നത്. സംസ്ഥാന അവാർഡ് നേടുന്ന ക്ലബ്ബിന് 50,000 രൂപയും പ്രശസ്തി പത്രവും പുരസ്കാരവും നൽകും. മാര്‍ഗനിര്‍ദേശങ്ങളും അപേക്ഷാ ഫോറവും കേരള സംസ്ഥാന യുവജനക്ഷേമ ബോര്‍ഡിന്‍റെ www.ksywb.kerala.gov.in എന്ന വെബ്‌സൈറ്റില്‍ ലഭ്യമാണ്. അപേക്ഷ സമര്‍പ്പിക്കാനുള്ള മേല്‍വിലാസം- ജില്ലാ യൂത്ത് പ്രോഗ്രാം ഓഫീസര്‍, ജില്ലാ യുവജനകേന്ദ്രം, മിനി സിവില്‍ സ്റ്റേഷന്‍, തത്തംപള്ളി പി.ഒ, ആലപ്പുഴ-13 ഫോണ്‍ 9847133866. 0477- 2239736.

അനുയോജ്യ സ്ഥലമായില്ല; നൂറനാട് കേന്ദ്രീയ വിദ്യാലയം നഷ്ടപ്പെടുമോ?

ചാരുംമൂട്: അനുയോജ്യമായ സ്ഥലം കിട്ടാത്തതു മൂലം നൂറനാട് ഐടിബിപി ബറ്റാലിയനോടു ചേർന്നു കേന്ദ്ര സർക്കാർ അനുവദിച്ച കേന്ദ്രീയ വിദ്യാലയം നഷ്ടപ്പെടുമെന്ന് ആശങ്ക. സംസ്ഥാന സർക്കാർ അധികം സ്ഥലം അനുവദിച്ചെങ്കിലും ഇത് അനുയോജ്യമല്ലെന്നു മുമ്പ് കണ്ടെത്തിയിരുന്നു. കേന്ദ്രീയ വിദ്യാലയം സ്ഥാപിക്കാൻ ആകെ അഞ്ചേക്കർ ഭൂമിയാണ് വേണ്ടത്. നിലവിൽ 3.27 ഏക്കർ ഭൂമി ക്യാമ്പ് അനുബന്ധ സൗകര്യങ്ങളായി ലഭ്യമാണ്. കേന്ദ്രീയ വിദ്യാലയം സ്ഥാപിക്കാൻ അധികമായി 1.73 ഏക്കർ ഭൂമികൂടിയാണ് ആവശ്യമുള്ളത്. വെറുതെ കിടന്നിട്ടും നൂറനാട് ലെപ്രസി സാനിട്ടോറിയത്തിൽ ആവശ്യത്തിലധികം ഭൂമി വെറുതെ കിടക്കുന്നുണ്ടെന്നും ഇതു കേന്ദ്രീയ വിദ്യാലയത്തിനു വിട്ടുനൽകണമെന്നും ആവശ്യപ്പെട്ടു കൊടിക്കുന്നിൽ സുരേഷ് എംപി മുഖ്യമന്ത്രിക്കു കത്ത് നൽകിയെങ്കിലും ഫലം കണ്ടില്ല. അഞ്ച് ഏക്കർ ഭൂമിയുടെ കൈവശരേഖ കേന്ദ്ര സർക്കാരിനു നൽകിയാൽ കേന്ദ്രീയ വിദ്യാലയം സ്ഥാപിക്കപ്പെടും. നിലവിൽ ആലപ്പുഴ ജില്ലയിൽ ചെന്നിത്തലയിലും പത്തനംതിട്ട ജില്ലയിലെ അടൂരുമാണ് കേന്ദ്രീയ വിദ്യാലയം ഉള്ളത്. സർക്കാർ പറയുന്ന സ്ഥലം സംസ്ഥാന സർക്കാർ നിലവിൽ അനുവദിച്ചിരിക്കുന്ന അധിക ഭൂമി അനുയോജ്യമല്ലാത്തതിനാൽ സാനിറ്റോറിയം വളപ്പിൽത്തന്നെ അനുയോജ്യമായ മറ്റൊരു സ്ഥലം അനുവദിക്കണമെന്ന് സംസ്ഥാന സർക്കാരിനോട് ആവശ്യപ്പെട്ടു കൊടിക്കുന്നിൽ സുരേഷ് എംപിയുടെ നേതൃത്വത്തിൽ ജനപ്രതിനിധികളെ പങ്കെടുപ്പിച്ചു ജനസഭയും സംഘടിപ്പിച്ചിരുന്നു. സംസ്ഥാന സർക്കാർ ഐടിബിപി ക്യാമ്പിൽനിന്ന് 1.5 കിലോമീറ്റർ അകലെ റവന്യൂ പുറമ്പോക്കിൽ 1.73 ഏക്കർ ഭൂമി നൽകാമെന്നാണ് അറിയിച്ചത്. എന്നാൽ, കേന്ദ്ര പിഡബ്ല്യുഡി മാനദണ്ഡങ്ങൾ പ്രകാരം ഈ സ്ഥലം അനുയോജ്യമല്ലെന്നു സ്ഥലം പരിശോധിച്ച കേന്ദ്ര സംഘം റിപ്പോർട്ട് നൽകിയിരുന്നു. അനുയോജ്യമായ സ്ഥലം ഹരിപ്പാടാണെന്ന് ചെന്നിത്തല സുരേഷ് ഗോപിക്ക് കത്തുനൽകി ഹരിപ്പാട്: എംയിംസിന് അനുയോജ്യമായ സ്ഥലം ഹരിപ്പാടാണെന്ന് രമേശ് ചെന്നിത്തല. ഇതു സംബന്ധിച്ച് അദ്ദേഹം കേന്ദ്രമന്ത്രി സുരേഷ് ഗോപിക്കു കത്തു നൽകി. എയിംസ് തുടങ്ങാൻ അനുയോജ്യമായ സ്ഥലം കേരളത്തിൽ ആലപ്പുഴ ജില്ലയാണെന്നും സ്ഥലം ലഭിക്കുകയാണെങ്കിൽ ആലപ്പുഴ ജില്ലയിൽ എയിംസ് തുടങ്ങുമെന്നുള്ള കേന്ദ്രമന്ത്രി സുരേഷ് ഗോപിയുടെ പ്രസ്താവന ശ്രദ്ധയിൽപ്പെട്ടതിനെത്തുടർന്നാണ് രമേശ് ചെന്നിത്തല കത്ത് നൽകിയത്. ഹരിപ്പാട് മണ്ഡലത്തിൽ കഴിഞ്ഞ യുഡിഎഫ് സർക്കാരിന്‍റെ കാലത്ത്, സിയാൽ മാതൃകയിൽ ഒരു മെഡിക്കൽ കോളജ് സ്ഥാപിക്കാൻ, ഏകദേശം 25 ഏക്കർ സ്ഥലം കരുവാറ്റ പഞ്ചായത്തിൽ, ദേശീയപാതയോടു ചേർന്നു റവന്യൂവകുപ്പ് ഏറ്റെടുത്തിരുന്നു. നയപരമായ കാര്യങ്ങളെത്തുടർന്ന് ഹരിപ്പാട് മെഡിക്കൽ കോളജിന്‍റെ പദ്ധതി ഉപേക്ഷിക്കപ്പെട്ടതിനാൽ ഈ സ്ഥലം വെറുതെ കിടക്കുകയാണ്. ഈ സ്ഥലം എയിംസിന് എന്തുകൊണ്ടും അനുയോജ്യമാണ്. എല്ലാ പിന്തുണയും സഹകരണവും വാഗ്ദാനം ചെയ്യുന്നുവെന്നും രമേശ് ചെന്നിത്തല കേന്ദ്രമന്ത്രി സുരേഷ് ഗോപിക്ക് അയച്ച കത്തിൽ ചൂണ്ടിക്കാട്ടി. എയിംസ് മാവേലിക്കരയിൽ സ്ഥാപിക്കണം: കൊടിക്കുന്നിൽ ചാരുംമൂട്: കേരളത്തിൽ ഒാൾ ഇന്ത്യ മെഡിക്കൽ ഇൻസ്റ്റിറ്റ്യൂട്ട് ആലപ്പുഴയിൽ സ്ഥാപിക്കണമെന്നുള്ള കേന്ദ്ര ടൂറിസം സഹമന്ത്രി സുരേഷ് ഗോപിയുടെ ആവർത്തിച്ചുള്ള പ്രതികരണങ്ങളിൽ ആത്മാർഥതയുണ്ടെങ്കിൽ എയിംസ് ജില്ലയിലെ മാവേലിക്കരയിൽ സ്ഥാപിക്കാൻ കേന്ദ്രസർക്കാർ തയാറാകണമെന്നു കൊടിക്കുന്നിൽ സുരേഷ് എംപി. കേരളത്തിനു പുതുതായി എയിംസ് അനുവദിക്കണമെന്നുള്ളത് നാളുകളായുള്ള ആവശ്യമാണ്. നേരത്തെ കേന്ദ്രസർക്കാർ പുതുതായി 22 എയിംസുകൾക്ക് അംഗീകാരം നൽകിയിരുന്നുവെങ്കിലും അപ്പോഴും കേന്ദ്രം കേരളത്തെ തഴഞ്ഞു. കേരളത്തിലെ എംപിമാർ ഈ വിഷയത്തിൽ തുടർച്ചയായി പ്രധാനമന്ത്രിക്കും കേന്ദ്ര ആരോഗ്യമന്ത്രിക്കും നിവേദനങ്ങൾ നൽകിയിരുന്നെങ്കിലും യാതൊരു പരിഗണനയും ലഭിച്ചില്ലെന്നും കൊടിക്കുന്നിൽ പറഞ്ഞു. നേരത്തെ ഇ എസ് ഐ കോർപറേഷന്‍റെ മെഡിക്കൽ കോളജിനായി നിർദേശിച്ചിരുന്ന തഴക്കര ജില്ലാ കൃഷി ഫാം അന്നത്തെ ജില്ലാ പഞ്ചായത്ത് പ്രസിഡന്‍റായ ഇപ്പോഴത്തെ കായംകുളം എംഎൽഎ യു പ്രതിഭയുടെ നിഷേധാത്മക നിലപാട് മൂലം നഷ്ടപ്പെട്ടതായും എയിംസിന്‍റെ കാര്യത്തിൽ ഇത്തരമൊരു അവസ്ഥ ഉണ്ടാകാതിരിക്കാൻ എല്ലാവരും ഒറ്റക്കെട്ടായി അണിനിരക്കണമെന്നും കൊടിക്കുന്നിൽ പറഞ്ഞു.

കാമുകിയുടെ കൂട്ടുകാരിയെ പീഡിപ്പിച്ച യുവാവിനെ പോലീസ് കസ്റ്റഡിയില്‍ വാങ്ങി

ചേര്‍ത്തല: പ്രായപൂര്‍ത്തിയാകാത്ത വിദ്യാര്‍ഥിനിയെ വസ്ത്രം വാങ്ങിനല്‍കാമെന്ന് പ്രലോഭിപ്പിച്ച് വൈക്കത്തെത്തിച്ചു പീഡിപ്പിച്ച യുവാവിനെ ചേര്‍ത്തല പോലീസ് കസ്റ്റഡിയില്‍ വാങ്ങി തെളിവെടുത്തു. പിറവം മുളക്കുളം നോര്‍ത്ത് പാറേക്കാട്ട് കുഴയില്‍ എല്‍ജോ ജോയി(24)യെയാണ് കസ്റ്റഡിയില്‍ വാങ്ങിയത്. കഴിഞ്ഞയാഴ്ചയാണ് ഇയാളെ ചേര്‍ത്തല പോലീസ് പോക്‌സോ പ്രകാരം അറസ്റ്റ് ചെയ്ത് റിമാന്‍ഡിലാക്കിയത്. എറണാകുളത്ത് ഹോട്ടല്‍ മാനേജ്‌മെന്‍റ് വിദ്യാര്‍ഥിയായ എല്‍ജോജോയ് തന്‍റെ കാമുകിയുടെ കൂട്ടുകാരിയായ പ്ലസ് വണ്‍ വിദ്യാര്‍ഥിനിയെയാണ് തന്ത്രപൂര്‍വം വൈക്കത്ത് പാര്‍ക്കിനോടു ചേര്‍ന്ന കുറ്റിക്കാട്ടിലെത്തിച്ചു പീഡിപ്പിച്ചത്. വിദ്യാര്‍ഥിയുടെ പരാതിയിലായിരുന്നു ഇയാള്‍ക്കെതിരേ കേസെടുത്തത്. കസ്റ്റഡിയില്‍ വാങ്ങിയ പ്രതിയുമായി ചേര്‍ത്തല പോലീസ് വൈക്കത്ത് തെളിവെടുത്തു.

ജൂവലേഴ്സ് ദിനം ജില്ലാതല ഉദ്ഘാടനം ഇന്ന്

ആലപ്പുഴ: ഓൾ കേരള ഗോൾഡ് ആൻഡ് സിൽവർ മർച്ചന്‍റ്സ് അസോസിയേഷൻ ജില്ലാ കമ്മിറ്റിയുടെ നേതൃത്വത്തിൽ പ്രഥമ ജൂവലേഴ്സ് ദിനാചരണ പരിപാടിയുടെ ജില്ലാതല ഉദ്ഘാടനം ഇന്ന് രണ്ടിന് മുല്ലയ്ക്കൽ ഗുരു ജൂവലറിയിൽ വ്യാപാരി വ്യവസായി ഏകോപന സമിതി സംസ്ഥാന സെക്രട്ടറി സബിൽ രാജ് നിർവഹിക്കും. ജുവലേഴ്സ് ദിന സന്ദേശം എകെജി എസ്എംഎ ജില്ലാ സെക്രട്ടറി കെ. നാസർ നൽകും. പ്രസിഡന്‍റ് എം.പി. ഗുരുദയാൽ അധ്യക്ഷത വഹിക്കും.

ചേർത്തലയിൽ ലോറിയും മിനി ഓട്ടോയും കൂട്ടിയിടിച്ച് ഒരാള്‍ക്ക് ഗുരുതര പരിക്ക്

ചേര്‍ത്തല: ദേശീയപാതയില്‍ ലോറിയും മിനി ഓട്ടോയും കൂട്ടിയിടിച്ച് ഒരാള്‍ക്ക് ഗുരുതര പരിക്ക്. ദേശീയപാതയില്‍ ചേര്‍ത്തല സെന്‍റ് മൈക്കിള്‍സ് കോളജിനു സമീപം ഇന്നലെ വൈകുന്നേരം 3.30 നായിരുന്നു അപകടം. ലോറിയും മിനി ഓട്ടോയും തമ്മില്‍ കൂട്ടിയിടിച്ചുണ്ടായ അപകടത്തില്‍ ഓട്ടോ ഡ്രൈവറായ തിരുവിഴ സ്വദേശി താനാട്ട് സുരേഷിന്‍റെ കാലിന് ഗുരുതരമായി പരിക്കേറ്റു. ഇയാളെ എറണാകുളത്തുള്ള സ്വകാര്യ ആശുപത്രയില്‍ പ്രവേ ശിപ്പിച്ചു. മാരാരിക്കുളം പോലീസ് കേസെടുത്തു.

അപ്രോച്ച് റോഡുകള്‍ ഇടിഞ്ഞുതാഴുന്നു

ചമ്പക്കുളം: കുട്ടനാട്ടിലെ ചില പ്രധാന പാലങ്ങളുടെ അപ്രോച്ച് റോഡുകൾ ഇടിഞ്ഞുതാഴുന്നതായി പരാതി. ഇതുമൂലം പാലവും അപ്രോച്ച് റോഡും തമ്മിലുള്ള പൊക്ക വ്യത്യാസം അപകടസാധ്യത കൂട്ടുകയാണ്. രാത്രിയില്‍ യാത്ര ചെയ്യുന്ന സ്ഥലപരിചയമില്ലാത്തവരുടെ വാഹനങ്ങളാണ് പലപ്പോഴും അപകടത്തിലാവുന്നത്. പുളിങ്കുന്ന്- ചമ്പക്കുളം പഞ്ചായത്തുകളെ തമ്മില്‍ ബന്ധിപ്പിക്കുന്ന മങ്കൊമ്പ് സിവില്‍ സ്റ്റേഷന്‍ പാലവും നെടുമുടി- ചമ്പക്കുളം പഞ്ചായത്തുകളെ തമ്മില്‍ ബന്ധിപ്പിക്കുന്ന ചമ്പക്കുളം പള്ളിപ്പാലവുമാണ് ഇതില്‍ പ്രധാനം. മങ്കൊമ്പ് സിവില്‍ സ്റ്റേഷന്‍ പാലം വാഹന ഗതാഗതത്തിനു തുറന്നു കൊടുത്തശേഷം പലതവണ അപ്രോച്ച് റോഡ് ഉയര്‍ത്തിയെങ്കിലും ഇപ്പോഴും ഉയരവ്യത്യാസം വലുതാണ്. പുളിക്കുന്ന്, കാവാലം, നീലംപേരൂര്‍ പഞ്ചായത്തുകളെ കുട്ടനാടിന്‍റെ മറ്റ് പ്രദേശങ്ങളുമായി ബന്ധിപ്പിക്കുന്നതില്‍ പ്രധാനമാണ് ഈ പാലം. കുട്ടനാടിന്‍റെ പ്രകൃതിക്ക് ഇണങ്ങാത്ത അമിതഭാരം കയറ്റിയ ടോറസ് ഉൾപ്പെടെയുള്ള ലോറികൾ പതിവായി സഞ്ചരിക്കുന്നതാണ് റോഡ് ഇടിഞ്ഞുതാഴാൻ പ്രധാന കാരണമെന്നു നാട്ടുകാർ പ‍റയുന്നു. അപകടത്തിനു കാത്തിരിക്കണോ? നിരവധി സ്‌കൂളുകളും ആരാധനാലയങ്ങളും പൊതുസ്ഥാപനങ്ങളും ഹോസ്പിറ്റലുകളും സ്ഥിതി ചെയ്യുന്ന ചമ്പക്കുളത്ത് അപ്രോച്ച് റോഡില്‍ വാഹനങ്ങള്‍ പാലത്തിലേക്കു പെട്ടെന്നു കയറാനാവാതെ നിന്നു പോകുമ്പോള്‍ പിന്നാലെ എത്തുന്ന വാഹനങ്ങള്‍ അപകടത്തില്‍പ്പെടുന്നത് പതിവാണ്. കുറച്ചുനാൾ മുന്പ് കമ്പികയറ്റിവന്ന ലോറിയുടെ മുൻഭാഗം ഉയർന്നതിനെത്തുടർന്നു കമ്പിക്കെട്ട് പിന്നോട്ടു വീണ് അപകടമുണ്ടായി. പിന്നാലെ വന്ന വാഹനം തലനാരിഴയ്ക്കാണ് രക്ഷപ്പെട്ടത്. പടഹാരം പാലവും കഞ്ഞിപ്പാടം പാലവും നിര്‍മിച്ചിരിക്കുന്നതുപോലെ പാലത്തിന്‍റെ കോണ്‍ക്രീറ്റ് സ്പാന്‍ റോഡ് നിരപ്പു വരെ എത്തിക്കുക മാത്രമേ ഇതിനു പരിഹാരമുള്ളെന്ന് ഉദ്യോഗസ്ഥർ നിർദേശിച്ചിരുന്നു. മങ്കൊമ്പ് സിവില്‍ സ്റ്റേഷന്‍ പാലം, ചമ്പക്കുളം പള്ളി പാലം എന്നിവയുടെ ഇരുകരകളിലും ആവശ്യമായ കോണ്‍ക്രീറ്റ് സ്പാനുകള്‍ നിര്‍മിച്ച് അപകടാവസ്ഥ ഒഴിവാക്കണമെന്നാണ് നാട്ടുകാരുടെ ആവശ്യം. സ്പാനുകൾ പരിഹാരം ‌ചമ്പക്കുളം പള്ളിപാലത്തിന്‍റെ അപ്രോച്ച് റോഡ് ആഴത്തിൽ ഇടിഞ്ഞ് അപകടത്തിലായതോടെ കഴിഞ്ഞ മാര്‍ച്ചിൽ നടത്തിയ അറ്റുകുറ്റപ്പണി നടത്തിയിരുന്നു. എന്നിട്ടും റോഡും പാലവും തമ്മിലുള്ള നല്ല ഉയരവ്യത്യാസമുണ്ട്. ചമ്പക്കുളം ബസിലിക്കയുടെ സമീപത്തെ പാലം തുറന്നു നൽകിയ കാലം മുതല്‍ കൃത്യമായ ഇടവേളകളില്‍ അപ്രോച്ച് ഇടിഞ്ഞുതാഴ്ന്നിരുന്നു. ഓരോ തവണയും താത്കാലിക മരാമത്ത് പണികള്‍ ചെയ്താണ് യാത്രാസൗകര്യം ഒരുക്കുന്നത്. പാലത്തിന്‍റെ നിര്‍മാണ കാലം മുതല്‍തന്നെ പാലത്തിന്‍റെ പടിഞ്ഞാറേക്കരയില്‍ ഒരു സ്പാന്‍കൂടി നിര്‍മിക്കണമെന്ന് ആവശ്യം ഉയര്‍ന്നിരുന്നു. എസി റോഡിന്‍റെ പുനരുദ്ധാരണത്തിനു ശേഷം കുട്ടനാട്ടിലെ ചമ്പക്കുളം പള്ളി പാലം ഉള്‍പ്പെടെയുള്ള പാലങ്ങളുടെ സമീപനപാത ഇടിഞ്ഞുതാഴുന്നതു പരിഹരിക്കാൻ കോണ്‍ക്രീറ്റ് സ്പാനുകള്‍ നിര്‍മിക്കുമെന്നു പൊതുമരാമത്ത് ഉദ്യോഗസ്ഥര്‍ അറിയിച്ചിരുന്നു.

മേൽപാലത്തിൽ വാഹനം തകരാറിലായി; ദേശീയപാതയിൽ ഗതാഗതക്കുരുക്ക്

അമ്പലപ്പുഴ: മേൽപാലത്തിൽ വാഹനം തകരാറിലായി. ദേശീയപാതയിൽ മണിക്കൂറുകളോളം ഗതാഗതക്കുരുക്ക്. കാക്കാഴം റെയിൽവേ മേൽപ്പാലത്തിലാണ് ഇന്നലെ രാവിലെ 8ന് വടക്കു ഭാഗത്തേക്കു പോയ ജീപ്പ് തകരാറിലായത്. ഏറെ തിരക്കുള്ള സമയമായതിനാൽ ഗതാഗതക്കുരുക്കായി. തുടർന്ന് അമ്പലപ്പുഴ പോലീസെത്തിയാണ് ഗതാഗതം നിയന്ത്രിച്ചത്. ഇതിനുശേഷം ക്രെയിനെത്തിച്ച് വാഹനം പാലത്തിന്‍റെ മറുകരയിലേക്ക് മാറ്റിയശേഷം 9.30 ഓടെയാണ് ഗതാഗതം സാധാരണ നിലയിലായത്. സ്കൂൾ ബസുകളും കെഎസ്ആർടിസിയുടെ ദീർഘദൂര ബസുകളടക്കം നൂറുകണക്കിന് വാഹനങ്ങളാണ് ഗതാഗതക്കുരുക്കിൽപ്പെട്ടത്.

കാർഷിക സെമിനാറും കർഷക പുരസ്കാരങ്ങളും വിതരണം ചെയ്തു

കലവൂർ: കൃഷിശാസ്ത്രജ്ഞനും പരിസ്ഥിതി സ്നേഹിയുമായിരുന്ന പി.സി. വർഗീസിന്‍റെ 14-ാം അനുസ്മരണ വാർഷികത്തിന്‍റെ ഭാഗമായി കാർഷിക സെമിനാറും കർഷക പുരസ്കാരങ്ങളും വിതരണം ചെയ്തു. കലവൂർ ലിറ്റിൽ ഫ്ലവർ നഗറിൽ നടന്ന സമ്മേളനം ടി.ഡി. മെഡിക്കൽ കോളജ് പ്രിൻസിപ്പൽ ഡോ. ബി.പദ്മകുമാർ ഉദ്ഘാടനം ചെയ്തു. ജനറല്‍ സെക്രട്ടറി രവി പാലത്തിങ്കൽ അധ്യക്ഷത വഹിച്ചു. സമ്മേളനത്തില്‍ സംസ്ഥാന സർക്കാരിന്‍റെ കർഷക ഭാരതി ശ്രവ്യ മാധ്യമ പുരസ്കാര ജേതാവ് മുരളീധരൻ തഴക്കര, മികച്ച കുട്ടിക്കർഷകയ്ക്കുള്ള സംസ്ഥാന അവാർഡ് നേടിയ പാർവതി, മണ്ണഞ്ചേരി പഞ്ചായത്തിലെ മികച്ച കർഷകൻ വി. വിജയൻ, മികച്ച കുട്ടിക്കർഷകൻ അർജുൻ എന്നിവരെ ആദരിച്ചു. മാരാരിക്കുളം മഹാദേവക്ഷേത്ര മൈതാനിയിൽ പി.സി. വർഗീസ് ഫൗണ്ടേഷൻ ഒരുക്കുന്ന പൂന്തോട്ട നിർമാണത്തിന്‍റെ ആദ്യതൈ ഫാ. മാത്യു മുല്ലശേരിയിൽനിന്ന് ക്ഷേത്രം പ്രസിഡന്‍റ് ഗോപാലകൃഷ്ണക്കുറുപ്പ് ഏറ്റുവാങ്ങി. കേരള സാബർമതി സാംസ്കാരിക വേദിയുമായി ചേർന്ന് നടത്തിയ കാർഷിക ക്വിസ്, ചിത്രരചന മത്സരങ്ങളിലെ വിജയികൾക്ക് സമ്മാനങ്ങൾ വിതരണം ചെയ്തു. നഴ്സറി പ്രവർത്തനം എന്ന വിഷയത്തെക്കുറിച്ച് കെ.വി. ദയാൽ ക്ലാസ് എടുത്തു. ഹരികുമാർ വാലേത്ത്, ടി.എസ്. വിശ്വൻ, ഫാ. മാത്യു മുല്ലശേരി, സുനിൽ വർഗീസ്, രാജു പള്ളിപ്പറമ്പിൽ, ജോസഫ് മാരാരിക്കുളം, എം.ഇ. ഉത്തമകുറുപ്പ്, പയസ് നെറ്റോ തുടങ്ങിയവർ പ്രസംഗിച്ചു.

അജൈവ മാലിന്യസംസ്കരണത്തിൽ മാതൃകയായി നിലംപേരൂർ പഞ്ചായത്ത്

ആലപ്പുഴ: അജൈവ മാലിന്യസംസ്കരണത്തിൽ മാതൃകയായി നിലംപേരൂർ പഞ്ചായത്ത്. മെറ്റീരിയൽ കളക്ഷൻ ഫെസിലിറ്റി (എംസിഎഫ്) വഴി പ്രതിമാസം ശരാശരി 1800 കിലോ അജൈവ മാലിന്യമാണ് പഞ്ചായത്തില്‍ സംഭരിക്കുന്നത്. പ്ലാസ്റ്റിക് കുപ്പികൾ, പ്ലാസ്റ്റിക് ഉത്പന്നങ്ങൾ, ഇ മാലിന്യം, കുപ്പിച്ചില്ലുകൾ തുടങ്ങി സമ്പൂർണ മാലിന്യ നിർമാർജനമാണ് പഞ്ചായത്തിന്‍റെ ലക്ഷ്യം. 2000 ചതുരശ്ര അടി വിസ്‌തീർണമുള്ള എംസിഎഫ് കേന്ദ്രമാണ് പഞ്ചായത്തിനുള്ളത്. 2024ൽ ശുചിത്വ മിഷൻ ഫണ്ടും പ്ലാൻ ഫണ്ടും ഉപയോഗിച്ചാണ് രണ്ടാം വാർഡിലെ എംസിഎഫ് കെട്ടിടനവീകരണം ആരംഭിച്ചത്. വൈദ്യുതീകരണം, കൺവെയർ ബെൽറ്റ്, ബെയിലിംഗ് മെഷീൻ, വാട്ടർ ടാങ്ക് സ്ഥാപിക്കൽ തുടങ്ങിയ പ്രവൃത്തികളും ഇതോടൊപ്പം പൂർത്തിയാക്കി. സംഭരിക്കുന്ന മാലിന്യം തരംതിരിച്ചു ക്ലീൻ കേരള കമ്പനിക്കാണ് കൈമാറുന്നത്. 13 വാർഡുകളിലായി എംസിഎഫ് പ്രവർത്തനത്തങ്ങളിലൂടെ 26 ഹരിതകർമസേനാംഗങ്ങൾക്ക് തൊഴിൽ നൽകുന്നു. ഇതുവഴി ശരാശരി 1,40,000 രൂപ പ്രതിമാസ വരുമാനവും ലഭിക്കുന്നു. കൂടാതെ മാലിന്യം സംഭരിക്കുന്നതിന് പൊതുസ്ഥലങ്ങളിൽ 11 ബോട്ടിൽ ബൂത്തുകളും 100 ഡസ്റ്റ് ബിന്നുകളും പഞ്ചായത്ത് നേതൃത്വത്തിൽ സ്ഥാപിച്ചിട്ടുണ്ട്.

ആറുനിലകളിൽ അത്യാധുനിക സൗകര്യങ്ങൾ; തുറവൂർ താലൂക്ക് ആശുപത്രി ഒരുങ്ങുന്നു

ആലപ്പുഴ: ആറുനിലകളില്‍ നിര്‍മിക്കുന്ന തുറവൂർ താലൂക്ക് ആശുപത്രി കെട്ടിടനിർമാണം അന്തിമഘട്ടത്തിൽ. പട്ടണക്കാട് ബ്ലോക്ക് പഞ്ചായത്ത് ഏറ്റെടുത്ത് നല്‍കിയ 62 സെന്‍റിൽ നിർമിക്കുന്ന കെട്ടിടത്തിന്‍റെ നിർമാണപ്രവൃത്തികളുടെ 91 ശതമാനവും പൂർത്തിയായി. കിഫ്ബി ഫണ്ടില്‍നിന്ന് 51.40 കോടി രൂപ വിനിയോഗിച്ചാണ് 6374.81 ചതുരശ്ര മീറ്റർ വിസ്തീർണത്തിൽ പുതിയ കെട്ടിടം ഒരുക്കുന്നത്. ഭവനനിര്‍മാണ ബോര്‍ഡിനാണ് നിർമാണച്ചുമതല. അത്യാധുനിക ചികിത്സാസൗകര്യങ്ങളോടെ നിര്‍മിക്കുന്ന ആശുപത്രിയിൽ ട്രോമകെയര്‍ യൂണിറ്റ്, ഗൈനക്കോളജി വിഭാഗം, സിടി സ്‌കാന്‍, എക്‌സ് റേ വിഭാഗം, മൂന്ന് മേജര്‍ ഓപ്പറേഷന്‍ തിയറ്ററുകള്‍, മൂന്നു നിലകളിലായി 150 ഓളം രോഗികളെ കിടത്തി ചികിൽസിക്കാനുള്ള സംവിധാനം, മൂന്ന് ലിഫ്റ്റുകൾ തുടങ്ങിയവ സജ്ജീകരിക്കുന്നുണ്ട്. കഴിഞ്ഞ ബജറ്റിൽ താലൂക്ക് ആശുപത്രിയില്‍ മോർച്ചറി കെട്ടിടം പണിയുന്നതിനും സ്ഥലം ഏറ്റെടുക്കുന്നതിനുമായി സംസ്ഥാന സർക്കാർ രണ്ട്‌ കോടി രൂപയും അനുവദിച്ചിട്ടുണ്ട്. പെയിന്‍റിംഗ്, അലുമിനിയം പാർട്ടീഷൻ, സാനിറ്ററി ഫിറ്റിംഗ് തുടങ്ങിയ ജോലികളാണ് നിലവില്‍ പുരോഗമിക്കുന്നത്. 2019 സെപ്റ്റംബറിലാണ് നിർമാണപ്രവൃത്തികൾ ആരംഭിച്ചത്. ഈ വർഷം തന്നെ കെട്ടിടനിര്‍മാണം പൂര്‍ത്തിയാക്കി ആശുപത്രി നാടിന് സമർപ്പിക്കാനാണ് ലക്ഷ്യമിടുന്നത്. നിർമാണം പൂർത്തിയാകുന്നതോടെ അത്യാധുനിക ചികിത്സാ സൗകര്യങ്ങളുള്ള ജില്ലയിലെ മികച്ച സര്‍ക്കാര്‍ ആശുപത്രികളിലൊന്നായി തുറവൂര്‍ താലൂക്ക് ആശുപത്രി മാറും. എലിവേറ്റഡ് ഹൈവേ നിർമാണം പൂർത്തിയാകുന്നതോടെ എറണാകുളം ജില്ലക്കാർക്കും തുറവൂർ താലൂക്കാശുപത്രിയുടെ സേവനം പ്രയോജനപ്പെടുത്താനാകും.

റെയിൽവേ സ്റ്റേഷനു മുന്നിൽ ഫ്ളൈ ഓവർ: നഗരസഭയുടെ നേതൃത്വത്തില്‍ ജനകീയ ധര്‍ണ

ചേർത്തല: റെയിൽവേ സ്റ്റേഷനുമുന്നിൽ ഫ്ളൈ ഓവർ സ്ഥാപിക്കണമെന്നാവശ്യപ്പെട്ട് ചേർത്തല നഗരസഭയുടെ നേതൃത്വത്തിൽ ജനകീയ ധര്‍ണ നടത്തി. ജനകീയ സമരത്തില്‍ ഭരണ-പ്രതിപക്ഷ വ്യത്യാസമില്ലാതെ നഗരസഭയിലെ മുഴുവന്‍ കൗണ്‍സിലര്‍മാരും പങ്കെടുത്തു. റെയില്‍വേ സ്റ്റേഷന് മുന്നിലെ ദേശീയപാത നിര്‍മാണം പൂര്‍ത്തിയായാല്‍ സര്‍വീസ് റോഡിലൂടെ മാത്രമാകും യാത്രക്കാര്‍ക്ക് പ്രവേശിക്കാന്‍ കഴിയുക. ദിവസവും പതിനായിരത്തിലധികം യാത്രക്കാർ എത്തിച്ചേരുന്നതും ദേശീയപാതയോട് ചേർന്ന് സ്ഥിതി ചെയ്യുന്നതുമായ ജില്ലയിലെ ഏക സ്റ്റേഷനാണ് ചേർത്തല റെയിൽവേ സ്റ്റേഷൻ. നഗരസഭയുടെ നിർദിഷ്ട മൊബിലിറ്റി ഹബ്ബ് വരുന്നതും റെയിൽവേ സ്റ്റേഷന് എതിർവശത്തായിട്ടാണ്. എന്നാല്‍, റെയില്‍വേ സ്റ്റേഷനു മുന്നില്‍ അടിപ്പാത നിര്‍മിക്കാത്തതിനാല്‍ ദേശീയപാത മുറിച്ചുകടക്കണമെങ്കില്‍ ഇരുവശങ്ങളിലേക്കും ഒരു കിലോമീറ്റര്‍ ദൂരം സഞ്ചരിക്കേണ്ട സ്ഥിതിയാകും. നിര്‍മാണം പൂര്‍ത്തിയാകുമ്പോള്‍ ബസ് നിര്‍ത്താന്‍ പോലും സ്ഥലമില്ലാതെ വരുന്നതിനാല്‍ ബസ് യാത്രക്കാര്‍ക്കും ഏറെ ബുദ്ധിമുട്ട് നേരിടേണ്ടിവരും. ദേശീയപാതയുടെ ഒരു ഭാഗം പൂർണമായും അടച്ചുകെട്ടി നിർമാണം പുരോഗമിച്ചുകൊണ്ടിരിക്കുകയാണ്. ഇതേത്തുടര്‍ന്നാണ് ചേര്‍ത്തല റെയിൽവേ സ്റ്റേഷനു മുന്നിൽ ഫ്ളൈ ഓവർ സ്ഥാപിക്കണമെന്ന ആവശ്യം ഉയര്‍ന്നത്. ഈ ആവശ്യത്തിന് വിവിധ രാഷ്ട്രീയ-സാമൂഹ്യ പ്രവര്‍ത്തകരുടെയും പിന്തുണ ലഭിച്ചതോടെയാണ് ജനകീയ ആവശ്യം ഉന്നയിച്ച് നഗരസഭയും മുന്നിട്ടറിങ്ങിയത്. ഇന്നലെ നടന്ന പ്രതിഷേധസമരം നഗരസഭാ ചെയർപേഴ്സൺ ഷേർളി ഭാർഗവൻ ഉദ്ഘാടനം ചെയ്തു. വൈസ് ചെയർമാൻ ടി.എസ്. അജയകുമാർ അധ്യക്ഷത വഹിച്ചു. യുഡിഎഫ് ജില്ലാ ചെയർമാൻ സി.കെ. ഷാജിമോഹൻ, പി. ഷാജി മോഹൻ, പി. ഉണ്ണികൃഷ്ണൻ, കെ.സി. ആന്‍റണി, സി.ഡി. ശങ്കർ, സി.വി. തോമസ്, ഷീജ സന്തോഷ്, ലിസി ടോമി, സതീഷ്കുമാർ, വേളോർവട്ടം ശശികുമാർ, ഷമ്മി ജോസഫ്, എസ്. ശിവൻപിള്ള, എ.എസ്. സാബു, കെ.പി. പ്രകാശൻ എന്നിവർ പ്രസം ഗിച്ചു.

ചപ്പുചവറുകള്‍ക്കിടയില്‍ പാമ്പ്: പ്രതിഷേധിച്ചു

ആലപ്പുഴ: കിടങ്ങാംപറമ്പ്-കോര്‍ത്തശേരി റോഡ് വക്കില്‍ കൂട്ടിയിട്ടിരിക്കുന്ന ചവര്‍ക്കൂനയ്ക്കിടയില്‍ പാമ്പിനെ കണ്ടെത്തിയതില്‍ തത്തംപള്ളി റസിഡന്‍റ്സ് അസോസിയേഷന്‍ പ്രതിഷേധിച്ചു. റോഡില്‍നിന്ന് തൂത്തുവാരുന്ന ചപ്പുചവറും വീട്ടുകാര്‍ പണം കൊടുത്ത് മുനിസിപ്പാലിറ്റിക്ക് കൈമാറുന്ന പ്ലാസ്റ്റിക്കും റോഡുവക്കില്‍ തന്നെ ഉത്തരവാദിത്തമില്ലാതെ അലക്ഷ്യമായി കൂട്ടിയിടുന്നതും തികച്ചും വൃത്തിഹീനവും അപകടകരവുമാണെന്ന് തത്തംപള്ളി റസിഡന്‍റ്സ് അസോസിയേഷന്‍ കുറ്റപ്പെടുത്തി. കാറ്റിലും മഴയിലും അടുത്തദിവസംതന്നെ വീണ്ടും പരക്കുകയും ചാക്കില്‍ പൊതിഞ്ഞ മാലിന്യങ്ങള്‍ അലഞ്ഞുതിരിയുന്ന നായ്ക്കള്‍ കടിച്ചു പറിച്ചിടുമെന്നും അസോസിയേഷന്‍ ചൂണ്ടിക്കാട്ടി. ശേഖരിക്കുന്ന മാലിന്യം നിര്‍മാര്‍ജനം ചെയ്യണമെന്നുള്ള വര്‍ഷങ്ങളായുള്ള നാട്ടുകാരുടെ ആവശ്യം നടപ്പിലാക്കാത്തത് നാട്ടുകാര്‍ക്ക് കൂടുതല്‍ ബുദ്ധിമുട്ടുകള്‍ക്കു കാരണമാകുന്നതായും ഇത്തരം മാലിന്യക്കൂമ്പാരങ്ങള്‍ക്കിടയില്‍ പാമ്പ്, എലി, കീരി തുടങ്ങിയ ക്ഷുദ്രജീവികളുടെ മേളമാണ്. രാത്രിയില്‍ സ്ട്രീറ്റ് ലൈറ്റും കൂടെ ഇല്ലെങ്കില്‍ അപകടസാധ്യത വര്‍ധിക്കുമെന്നും അസോസിയേഷന്‍ ചൂണ്ടിക്കാട്ടി.

മദ്യലഹരിയില്‍ മക്കൾ ക്രൂരമായി മര്‍ദിച്ച പിതാവ് മരിച്ചു

ചേര്‍ത്തല: മദ്യലഹരിയില്‍ മക്കള്‍ ക്രൂരമായി മര്‍ദിച്ച കേസിലെ പിതാവ് മരിച്ചു. പട്ടണക്കാട് പഞ്ചായത്ത് എട്ടാം വാര്‍ഡ് ചന്ദ്രനിവാസില്‍ ചന്ദ്രശഖരന്‍നായരാ (73)ണ് വൃദ്ധസദനത്തില്‍ ഞായറാഴ്ച രാവിലെ 11ന് മരിച്ചത്. ചന്ദ്രശേഖരന്‍ നായരുടെ ഇരട്ട മക്കളായ അഖില്‍ (31), നിഖില്‍ (31) എന്നിവര്‍ കഴിഞ്ഞ 24ന് വീട്ടില്‍ മദ്യപിച്ച് എത്തി മര്‍ദിക്കുകയായിരുന്നു. കൈകൊണ്ട് ചന്ദ്രശേഖരന്‍ നായരുടെ ശരീരത്ത് അടിക്കുകയും മാപ്പ് പറയണമെന്നാവശ്യപ്പെട്ട് കട്ടിലില്‍നിന്നു വലിച്ചിഴയ്ക്കുകയും തലയില്‍ മര്‍ദിക്കുകയും കഴുത്തിനുപിടിച്ചു തിരിക്കുകയും ചെയ്തു. പ്രാണഭയത്താല്‍ ഒന്നും ശബ്ദിക്കാനാകാത്ത നിലയിലായിരുന്നു ചന്ദ്രശേഖരന്‍. സമീപമുണ്ടായിരുന്ന മാതാവിനും ഒന്നും ചെയ്യാനാവാത്ത അവസ്ഥയിലായിരുന്നു. അഖില്‍ ചന്ദ്രശേഖരന്‍ നായരെ മര്‍ദിക്കുന്നതിനിടയില്‍ നിഖില്‍ മൊബൈല്‍ ഫോണില്‍ ദൃശ്യങ്ങള്‍ പകര്‍ത്തുകയും ഇത് സമൂഹമാധ്യമങ്ങളില്‍ പ്രചരിപ്പിക്കുകയും ചെയ്തു. പിതാവിനെ മര്‍ദിച്ച വിവരം അറിഞ്ഞ് മറ്റു മക്കളായ പ്രവീണും സൂരജും ചേര്‍ന്ന് പിന്നീട് പട്ടണക്കാട് പോലീസില്‍ പരാതി നല്‍കുകയായിരുന്നു. ഇതെത്തുടര്‍ന്ന് പട്ടണക്കാട് പോലീസ് ഇരുവരെയും അറസ്റ്റ് ചെയ്യുകയും സ്ഥിരമായി മക്കളുടെ മര്‍ദനമേല്‍ക്കാറുള്ള ചന്ദ്രശേഖരനെ വീട്ടില്‍ താമസിപ്പിക്കുന്നത് ഉചിതമല്ലെന്ന് കണ്ടെത്തിയതിനെത്തുടര്‍ന്ന് 11-ാം മൈലിന് സമീപമുള്ള വൃദ്ധസദനത്തില്‍ പാര്‍പ്പിക്കുകയും ചെയ്യുകയായിരുന്നു. ചന്ദ്രശേഖരന്‍ നായര്‍ മരിച്ചതിനെത്തുടര്‍ന്ന് അര്‍ത്തുങ്കല്‍ പോലീസ് അസ്വഭാവിക മരണത്തിന് കേസെടുത്തിട്ടുണ്ട്. അതേസമയം മര്‍ദനത്തില്‍ ഉണ്ടായ പരിക്ക് മൂലമല്ല മരണകാരണമെന്ന് പോലീസ് പറയുന്നു.

അക്ഷയകേന്ദ്രങ്ങളുടെ നിലനില്‍പ്പ് പ്രതിസന്ധിയിലെന്ന് സംരംഭകർ

ആലപ്പുഴ: സര്‍വീസ് ചാര്‍ജ് വര്‍ധനയുമായി ബന്ധപ്പെട്ട ഹര്‍ജി ഹൈക്കോടതി തള്ളിയതോടെ അക്ഷയകേന്ദ്രങ്ങളുടെ നിലനില്‍പ്പ് പ്രതിസന്ധിയിലെന്ന് സംരംഭകർ. നിലവില്‍ ഇടാക്കുന്നത് ഏഴ് വര്‍ഷം മുമ്പു നിശ്ചയിച്ച സര്‍വീസ് ചാര്‍ജാണ് ഈടാക്കുന്നതെന്നാണ് ഇവർ പറയുന്നത്. കെട്ടിട വാടക, കറന്‍റ് ചാര്‍ജ്, ഇന്‍റര്‍നെറ്റ് ചാര്‍ജ്, ജീവനക്കാരുടെ ശമ്പളം തുടങ്ങിയ എല്ലാ ചെലവുകളും കൂടുകയാണെന്നും ചാർജ് വർധനയില്ലാതെ മുന്നോട്ടുപോകാനാവില്ലെന്നാണ് ഇവരുടെ വാദം. 15 ലക്ഷം മുടക്കണമെന്ന് 15 ലക്ഷം രൂപയെങ്കിലും നിക്ഷേപിച്ചാലേ ഒരു അക്ഷയകേന്ദ്രം പ്രവര്‍ത്തിക്കാനുള്ള സാങ്കേതിക സംവിധാനങ്ങള്‍ ഒരുക്കാനാവൂയെന്ന് സംരംഭകർ അവകാശപ്പെടുന്നു. ഒരു സെന്‍ററില്‍ കുറഞ്ഞത് അഞ്ച് കംപ്യൂട്ടർ, ഒരു സ്‌കാനര്‍, കളര്‍ പ്രിന്‍റര്‍, ഫോട്ടോസ്റ്റാറ്റ് മെഷീന്‍, സിസിടിവി, തമ്പ് റീഡര്‍, കാമറ, ബാര്‍കോഡ് റീഡര്‍ തുടങ്ങിയ ഉപകരണങ്ങളും ആവശ്യമാണ്. ഇതിനെല്ലാംകൂടി കുറഞ്ഞത് 15 ലക്ഷം രൂപയെങ്കിലും വേണ്ടിവരും. മറ്റു സൗകര്യങ്ങളൊരുക്കാനുള്ള ചെലവ് വേറെ. ഫീസ് ഏകീകരിച്ചു സര്‍ക്കാര്‍ ഫീസുകള്‍ ഏകീകരിച്ചതിനെതിരേയാണ് സംരംഭകരുടെ പ്രധാന പരാതി. എന്നാൽ, അക്ഷയകേന്ദ്രങ്ങളിലെ സേവനങ്ങള്‍ക്ക് ഏകീകൃത നിരക്ക് ഏര്‍പ്പെടുത്തിയ സര്‍ക്കാര്‍ തീരുമാനത്തെ ചോദ്യം ചെയ്ത് ഓള്‍ കേരള അക്ഷയ എന്‍റര്‍പ്രണേഴ്‌സ് കോണ്‍ഫെഡറേഷന്‍ കോടതിയെ സമീപിച്ചെങ്കിലും ഹര്‍ജി കോടതി തള്ളി. ഓഗസ്റ്റ് ആറിനാണ് സര്‍ക്കാര്‍ ഈ തീരുമാനം പ്രഖ്യാപിച്ചത്. സേവനങ്ങളുടെ വ്യാപ്തി, വിഭവങ്ങളുടെ ഉപയോഗം, പ്രവര്‍ത്തനച്ചെലവ് എന്നിവ പരിഗണിക്കാതെയാണ് ഈ ഉത്തരവെന്നായിരുന്നു ഹര്‍ജിക്കാരുടെ വാദം. കേന്ദ്രത്തിന്‍റെ വക നൂറ് ആധാര്‍ എന്‍‌റോൾമെന്‍റ്, ആധാറിലെ തിരുത്തലുകള്‍, പാസ്പോര്‍ട്ട് അപേക്ഷകള്‍ തുടങ്ങിയ സേവനങ്ങളാണ് അക്ഷയ കേന്ദ്രങ്ങളെ സംബന്ധിച്ചു ലാഭകരം. ആധാര്‍ എന്‍‌റോൾമെന്‍റിന് ഗുണഭോക്താക്കളില്‍നിന്നു ഫീസ് ഈടാക്കുന്നില്ല. ഓരോ എന്‍‌റോൾമെന്‍റിനും 100 രൂപ വീതം സെന്‍ററുകള്‍ക്കു കേന്ദ്രസര്‍ക്കാർ നല്‍കും. അതുപോലെ പാസ്പോര്‍ട്ട് അപേക്ഷയുടെ കാര്യത്തില്‍ 100 മുതല്‍ 200 രൂപവരെ ചാര്‍ജ് ഈടാക്കും. മസ്റ്ററിംഗ് ബാധ്യത കൂടുതല്‍ അപേക്ഷകര്‍ എത്തുന്നത് പെന്‍ഷന്‍ മസ്റ്ററിംഗ് ആണ്. അക്ഷയകേന്ദ്രത്തില്‍ നേരിട്ടെത്തി മസ്റ്ററിംഗ് നടത്തുമ്പോള്‍ 30 രൂപയാണ് സര്‍വീസ് ചാര്‍ജ്. വീടുകളില്‍ എത്തി മസ്റ്ററിംഗ് നടത്തുന്നതിനു നിയമപ്രകാരം ഈടാക്കാവുന്നത് 50 രൂപ. വീടുകളിൽ എത്തുന്നതിന് 150 രൂപയെങ്കിലും ആക്കണമെന്നാണ് സെന്‍ററുകളുടെ ആവശ്യം. ഉമ്മന്‍ചാണ്ടി സര്‍ക്കാരിന്‍റെ കാലത്ത് അക്ഷയ സംരംഭകർക്ക് ഓണം അലവന്‍സായി 1000 രൂപ അനുവദിച്ചിരുന്നതൊഴിച്ചാല്‍ സംസ്ഥാന സര്‍ക്കാരില്‍നിന്ന് യാതൊരു ആനുകൂല്യവും അക്ഷയ കേന്ദ്രങ്ങൾക്കു ലഭിക്കുന്നില്ലെന്നാണ് ആക്ഷേപം.

ഹണിട്രാപ്പ് ക്രൂരത: ദുരൂഹതകൾ ബാക്കി

കോഴഞ്ചേരി: ഹണിട്രാപ്പില്‍ കുരുക്കി രണ്ട് യുവാക്കളെ മനുഷ്യത്വരഹിതമായി ഉപദ്രവിച്ച ജയേഷ് - രശ്മി ദന്പതികളുടെ ജീവിതം ദുരൂഹതകൾ നിറഞ്ഞത്. ഇവരുടെ സ്വഭാവ രീതികളും സമീപവാസികൾക്ക് മനസിലാക്കാനായിരുന്നില്ല. റാന്നി, ആലപ്പുഴ സ്വദേശികളെ ക്രൂരമായി ഉപദ്രവിച്ച ദന്പതികൾ റിമാൻഡിലാണെങ്കിലും ഇവരെ സംബന്ധിച്ച വിവരങ്ങൾ തേടി പോലീസ് ഇന്നലെയും വിശദമായ അന്വേഷണം നടത്തി. ക്രൂരമർദനത്തിനിരയായ ആലപ്പുഴ സ്വദേശിയ സംഭവം നടന്ന ആന്താലിമണ്ണിലെത്തിച്ച് തെളിവുമെടുത്തു. കോയിപ്രം, തോട്ടപ്പുഴശേരി ഗ്രാമപഞ്ചായത്തുകളുടെ അതിര്‍ത്തിപ്രദേശമായ കള്ളിപ്പാറ-ആന്താലിമണ്‍ പ്രദേശത്താണ് ഇവര്‍ താമസിച്ചിരുന്നത്. ഇരുപഞ്ചായത്തുകളിലെയും വോട്ടര്‍പട്ടികയില്‍ ഇവരുടെ പേര് ഇല്ലെന്ന് കോയിപ്രം ഗ്രാമപഞ്ചായത്ത് വൈസ് പ്രസിഡന്‍റും നാലാംവാര്‍ഡ് മെംബറുമായ റെനി രാജു കുഴിക്കാലയും തോട്ടപ്പുഴശേരി ഗ്രാമപഞ്ചായത്ത് മുന്‍വൈസ് പ്രസിഡന്‍റ് ഷെറിന്‍ റോയിയും പറയുന്നു. എന്നാല്‍, ജയേഷിന്‍റെ മാതാപിതാക്കള്‍ക്ക് തോട്ടപ്പുഴശേരി ഗ്രാമപഞ്ചായത്തില്‍ വോട്ട് ഉണ്ടായിരുന്നു. ഇരുവരും മരിച്ചുപോയി. മാതാവ് മരിക്കുമ്പോള്‍ കോയിപ്രം ഗ്രാമപഞ്ചായത്തിലെ നാലാം വാര്‍ഡിലെ കുടുംബശ്രീ പ്രവര്‍ത്തകര്‍ മരണാനന്തരപ്രവര്‍ത്തനങ്ങള്‍ക്കു സാമ്പത്തിക സഹായം നല്കിയിരുന്നതായി റെനി രാജു കുഴിക്കാല പറയുന്നു. സാമ്പത്തികമായി പിന്നോക്കം അവസ്ഥയിലായിരുന്നുവെങ്കിലും തദ്ദേശസ്വയംഭരണ സ്ഥാപനങ്ങളിലെയോ മറ്റ് സ്ഥാപനങ്ങളിലെയോ ഒരു സഹായത്തിനായി ഇവര്‍ സമീപിച്ചിരുന്നില്ല. എല്ലാവരുമായും ഒരു നിശ്ചിതഅകലം പാലിച്ചായിരുന്നു ജീവിതം. സമീപവാസികളേറെയും ദിവസക്കൂലിക്കു പണിയെടുക്കുന്നവരായതിനാൽ വൈകുന്നേരം വീടുകളിൽ മടങ്ങിയെത്തി തങ്ങളുടെ സ്വകാര്യ ജീവിതത്തിലേക്കു കടക്കുമെന്നതിനാൽ ഇവരെക്കുറിച്ച് കൂടുതല്‍ കാര്യങ്ങള്‍ അറിവില്ലായിരുന്നു. ന്യൂജെന്‍ ജീവിതം ജയേഷ് ന്യൂജെന്‍ രീതിയിലാണ് ജീവിച്ചിരുന്നതെന്ന് നാട്ടുകാര്‍ പറയുന്നു. ഹിറ്റാച്ചി കമ്പനിയിലെ ജീവനക്കാരനായ ഇയാൾ സിനിമാസ്റ്റൈലില്‍ ഹെഡ്‌ഫോണില്‍ പാട്ടും മറ്റും കേട്ടുകൊണ്ടാണ് നടന്നിരുന്നത്. അയല്‍വാസികളുമായി യാതൊരു സഹകരണവും ഇല്ലായിരുന്നുവെന്നും പരിസരവാസിയായ സുരേഷ് പറഞ്ഞു. ചെറിയ വീടാണെങ്കിലും സിസിടിവി കാമറ ഘടിപ്പിച്ചിരുന്നു. എന്നാൽ, ഇതിപ്പോൾ പ്രവർത്തിക്കുന്നില്ലെന്നാണ് സൂചന. രശ്മി കോഴഞ്ചേരിയിലടക്കം ചില വാണിജ്യ സ്ഥാപനങ്ങളിലും പൊതിച്ചോര്‍ വിതരണസ്ഥാപനങ്ങളിലും താല്ക്കാലിക ജീവനക്കാരിയിരുന്നു. പ്രൈമറി സ്‌കൂളിലെ വിദ്യാര്‍ഥികളായ ഇവരുടെ കുട്ടികളെ രശ്മിയുടെ വീട്ടുകാര്‍ അയിരൂരിലുള്ള കുടുംബവീട്ടിലേക്കു മാറ്റിയിരിക്കുകയാണ്. ആഭിചാരക്രിയകളും അന്ധവിശ്വാസവും ജയേഷിന്‍റെ മാതാവ് കാഷായവസ്ത്രം ധരിച്ച് ക്ഷേത്രങ്ങളിലും മറ്റും തീര്‍ഥാടനം നടത്തി ജീവിക്കുകയായിരുന്നുവെന്നും ഇവരുടെ രീതികള്‍ കണ്ട് ജയേഷ് ആഭിചാരക്രിയകളും മറ്റും നടത്തിയിരുന്നതായ സംശയവും നാട്ടുകാര്‍ക്കുണ്ട്. ഇവര്‍ താമസിക്കുന്ന വീടിന്‍റെ പുറകുവശത്തുള്ള റബര്‍തോട്ടം വഴി ആളുകള്‍ വീട്ടിലെത്തുമായിരുന്നതായും പറയുന്നു. ഇരുവർക്കും മനോവൈകല്യമുണ്ടെന്ന സംശയത്തിലാണ് പോലീസ്. രശ്മിയുമായി ലൈംഗിക ബന്ധത്തിലേര്‍പ്പെടുന്നതായി അഭിനയിപ്പിക്കുകയും അതിന്‍റെ ദൃശ്യങ്ങള്‍ ഫോണില്‍ പകര്‍ത്തുകയും ചെയ്ത ശേഷമാണ് ദമ്പതികള്‍ യുവാക്കളെ മര്‍ദിച്ചതെന്നാണ് വിവരം. യുവാവിന്‍റെ പക്കല്‍നിന്നു പണവും ഐഫോണും അടക്കമുള്ള സാധനങ്ങള്‍ പ്രതികള്‍ തട്ടിയെടുക്കുകയും ചെയ്തു. സമാനമായ രീതിയില്‍ ദമ്പതികളുടെ മര്‍ദനമേറ്റ ആലപ്പുഴ സ്വദേശിയെ കണ്ടെത്തിയാണ് പോലീസ് മൊഴിയെടുത്തത്. ഇയാള്‍ കേസ് നല്കാന്‍പോലും തയാറല്ലായിരുന്നു. 19 കാരനായ യുവാവിനാണ് മര്‍ദമമേറ്റത്. കഴിഞ്ഞ ഒന്നിനാണ് ഇയാള്‍ക്ക് മര്‍ദനമേറ്റത്. മാരാമണ്ണിലേക്ക് വിളിച്ചുവരുത്തി ജയേഷ് ഇയാളുമായി മദ്യപിച്ച ശേഷമാണ് വീട്ടിലെത്തിയത്. റാന്നി സ്വദേശിയുടെ മൊഴിയില്‍ പറയുന്ന തരത്തിലായിരുന്നു ഇയാളോടും മര്‍ദനം. രണ്ട് ഫോണുകളും കൈവശമുണ്ടായിരുന്ന 19,000 രൂപയും നഷ്ടപ്പെട്ടതായി യുവാവ് പറയുന്നു. പരാതിയില്ലാതെ ഒളിവില്‍ കഴിയുന്നതിനിടെയാണ് യുവാവിനെ പോലീസ് കണ്ടെത്തി മൊഴി രേഖപ്പെടുത്തിയത്. മുറിവുകള്‍ക്കു ചികിത്സ ഇയാൾ ചികിത്സ തേടിയിരുന്നു.

അമര്‍ ജവാന്‍ ട്രോഫി വിളംബര ജാഥ

എടത്വ: പച്ച-ചെക്കിടിക്കാട് പിസിബിസിയുടെ നേതൃത്വത്തില്‍ 21 നു നടക്കുന്ന അമര്‍ ജവാന്‍ട്രോഫി ജലോത്സവത്തിന്‍റെ വിളംബരജാഥ നടന്നു. വീരമൃത്യു വരിച്ച ലാന്‍സ് നായിക് ഡി. വേണുഗോപാല്‍ ചേമ്പിലക്കാടിന്‍റെ കരുമാടിയിലെ സ്മൃതിമണ്ഡപത്തില്‍നിന്നാണ് വിളംബരജാഥ ആരംഭിച്ചത്. അമ്പലപ്പുഴ ബ്ലോക്ക് പഞ്ചായത്ത് സ്റ്റാൻ ഡിംഗ് കമ്മിറ്റി ചെയര്‍മാന്‍ ആര്‍. ജയരാജ് ഉദ്ഘാടനം ചെയ്തു. നൂറുകണക്കിനു ഇരുചക്ര വാഹനങ്ങളുടെ അകമ്പടിയോടെ നടന്ന വിളംബരജാഥ റിട്ട. ഹവീല്‍ദാര്‍ തങ്കച്ചന്‍ ജോസഫ് ഫ്ളാഗ് ഓഫ് ചെയ്തു. ഫ്ളാഷ് സാംസ്‌കാരിക സംഘടനാ പ്രസിഡന്‍റ് എസ്. രാഹുല്‍ അധ്യക്ഷത വഹിച്ചു. അജയന്‍ കൊല്ലവന, ഡോണി സഖറിയ, സിനു പന്ത്രണ്ടില്‍ എന്നിവര്‍ പ്രസംഗിച്ചു. പച്ച-ചെക്കിടിക്കാട് ജംഗ്ഷനില്‍ നടന്ന സമാപന സമ്മേളനം വര്‍ഡ് മെംബര്‍ മോന്‍സി ജോര്‍ജ് കരിക്കംപള്ളില്‍ ഉദ്ഘാടനം ചെയ്തു. സംഘാടകസമിതി ചെയര്‍മാന്‍ മാത്യു സഖറിയ കരിക്കംപള്ളില്‍ അധ്യക്ഷത വഹിച്ചു. വി. വിന്‍സന്‍റ്, കെ. രാജേന്ദ്രന്‍, പോളി തോമസ്, എം.വി. സുരേഷ്, ജോസഫ് ആന്‍റണി എന്നിവര്‍ പ്രസംഗിച്ചു. പിസിബിസി എക്സിക്യുട്ടിവ് അംഗങ്ങളെ സോള്‍ജിയേഴ്സ് ഓഫ് പച്ച-ചെക്കിടിക്കാട് ആദരിച്ചു.

കൃഷിക്കു വഴിമുടക്കിയായി പുളിങ്കുന്ന് പുത്തൻതോട് പാലം

മങ്കൊമ്പ്: വീണ്ടുമൊരു പുഞ്ചക്കൃഷിക്കാലം ആരംഭിക്കാനിരിക്കെ കര്‍ഷകര്‍ക്ക് ആശങ്കയായി നിര്‍മാണജോലികള്‍ പാതിവഴിയില്‍ ഉപേക്ഷിച്ച പുളിങ്കുന്ന് പുത്തന്‍തോട് പാലം. നിര്‍മാണം ആരംഭിച്ച് വര്‍ഷങ്ങളായിട്ടും പണിപൂര്‍ത്തിയാകാത്ത പാലം ഇപ്പോള്‍ തോട്ടിലെ നീരൊഴുക്കിനും ഗതാഗതത്തിനും തടസമായിരിക്കുകയാണ്. പുളിങ്കുന്ന്, മങ്കൊമ്പ്, കായല്‍പ്പുറം തുടങ്ങിയ പ്രദേശങ്ങളിലെ നൂറുകണക്കിനു കര്‍ഷകര്‍ക്കാണ് കായല്‍മേഖലയില്‍ കൃഷിഭൂമിയുള്ളത്. നിലമൊരുക്കല്‍ ജോലികള്‍ക്കാവശ്യമായ വസ്തുക്കള്‍, മോട്ടോറുകള്‍, കൃഷിയാവശ്യങ്ങള്‍ക്കുള്ള വിത്ത്, വളം അനുബന്ധ സാധനങ്ങള്‍ ഇവയെല്ലാം കായലിലേക്കു കൊണ്ടുപോകുന്നതിനുള്ള പ്രധാന ഗതാഗതമാര്‍ഗമാണ് ഈ തോട്. 2021ല്‍ പാലത്തിന്‍റെ നിര്‍മാണജോലികള്‍ ആരംഭിക്കുന്നതിന്‍റെ ഭാഗമായി പാലത്തിനിരുവശങ്ങളിലുമായി തോടിനു കുറുകെ താത്കാലിക ബണ്ടുകള്‍ നിര്‍മിച്ചിരുന്നു. ഇതോടെ തോട്ടിലെ നീരൊഴുക്കു പൂര്‍ണമായി നിലയ്ക്കുകയും തോട്ടില്‍ മാലിന്യങ്ങള്‍ നിറയുകയും ചെയ്തിരുന്നു. നാട്ടുകാരും പഞ്ചായത്തധികൃതരും പലവട്ടം ഇറിഗേഷന്‍ വകുപ്പിനെ സമീപിച്ചെങ്കിലും ഫലമുണ്ടായില്ല. നാട്ടുകാരുടെ ദുരിതം ഇരട്ടിച്ചതോടെ പഞ്ചായത്ത് ഹൈക്കോടതിയെ സമീപിച്ചു. കേസ് ഫയലില്‍ സ്വീകരിച്ച കോടതി അന്വേഷണത്തിനായി കമ്മീഷനെ നിയോഗിച്ചു. കമ്മീഷന്‍ നടത്തിയ പരിശോധനകളെത്തുടര്‍ന്ന് ജനങ്ങളുടെ ദുരിതങ്ങള്‍ കണക്കിലെടുത്തു മുട്ടുകള്‍ പൂര്‍ണമായും പൊളിച്ചുനീക്കാന്‍ ഉത്തരവിട്ടിരുന്നു. കോടതി ഉത്തരവിനെത്തുടര്‍ന്ന് ഇറിഗേഷന്‍ വകുപ്പ് മുട്ടുകള്‍ പൂര്‍ണമായും പൊളിച്ചുനീക്കിയിരുന്നു. എന്നാല്‍, പാലത്തിനായി സ്ഥാപിച്ച തൂണുകള്‍ക്കു മുകളിലായി താത്കാലിക പാലം സ്ഥാപിച്ചിരിക്കുന്നതുമൂലം ഇപ്പോള്‍ ഇതുവഴി വള്ളങ്ങളടക്കമുള്ള വാഹനങ്ങള്‍ക്കു ഗതാഗതം അസാധ്യമായിരിക്കുകയാണ്. കായല്‍മേഖലയിലേക്കു പോകുന്നതിനായി കിടങ്ങറ വഴി കാവാലത്തുള്ള തോടിന്‍റെ മറ്റേയറ്റത്തെത്തണമെങ്കില്‍ പത്തു കിലോമീറ്ററും ഒന്നരമണിക്കൂറും അധികം യാത്രചെയ്യേണ്ട ഗതികേടാണ്. അതിരിവിലെ കായലില്‍ ജോലികള്‍ ആരംഭിക്കേണ്ടതിനാല്‍ കര്‍ഷകര്‍ കടുത്ത ആശങ്കയിലാണ്. കായല്‍പ്പുറത്തുനിന്നും മങ്കൊമ്പില്‍നിന്നുമുള്ള മറ്റു ചെറുതോടുകള്‍ക്കു കുറുകെ താത്കാലിക പാലങ്ങള്‍ വന്നതോടെ ഇതുവഴിയുള്ള വാഹന ഗതാഗതവും നിലച്ചിരിക്കുകയാണ്. കര്‍ഷകര്‍ നേരിടാനിരിക്കുന്ന ദുരിതങ്ങള്‍ കണക്കിലെടുത്തു കൃഷിപ്പണികള്‍ ആരംഭിക്കും മുന്‍പുതന്നെ തോട് ഗതാഗതയോഗ്യമാക്കണമെന്നാണ് കര്‍ഷകരുടെ ആവശ്യം.

ഓണാഘോഷം നടത്തി

ഹരിപ്പാട്: എംജി നഗർ റെസിഡന്‍റ്സ് അസോസിയേഷൻ ഓണാഘോഷ പരിപാടികൾ നടത്തി. രക്ഷാധികാരി എം. കൃഷ്ണൻ നായർ ഉദ്ഘാടനം ചെയ്തു. പ്രസിഡന്‍റ് ഡോ. ശശികുമാർപിള്ള അധ്യക്ഷനായി. എഴുത്തുകാരായ ഉണ്ണിക്കൃഷ്ണൻ മുതുകുളം, അശോകൻ വി. കൃഷ്ണൻ എന്നിവരെയും 75 വയസ് പൂർത്തീകരിച്ച അസോസിയേഷൻ അംഗങ്ങളെയും ആദരിച്ചു. ഹരിപ്പാട് ടൗൺ മുസ്‌ലിം ജമാഅത്ത് സെക്രട്ടറി സുഹൈൽ നബിദിനാശംസ യും അസോസിയേഷൻ ജോയിന്‍റ് സെക്രട്ടറി എൻ. വിജയകുമാർ ഓണാശംസയും നേർന്നു. അശോകൻ വി. കൃഷ്ണൻ, ഉണ്ണിക്കൃഷ്ണൻ മുതുകുളം, സെക്രട്ടറി കെ.കെ.ആർ. നായർ, ട്രഷറർ പുരുഷോത്തമൻ പിളള എന്നിവർ പ്രസംഗിച്ചു.

31 കിലോ കഞ്ചാവുമായി ട്രെയിനിലെത്തിയ മൂന്ന് ഇതരസംസ്ഥാനക്കാർ പിടിയില്‍

ചേര്‍ത്തല: ചേര്‍ത്തലയില്‍ എക്സൈസിന്‍റെ വന്‍ കഞ്ചാവ് വേട്ട. മൊത്തക്കച്ചവടത്തിനായി ട്രെയിനിലെത്തിച്ച 31കിലോ കഞ്ചാവ് എക്‌സൈസ് സംഘം പിടികൂടി. രണ്ടിടങ്ങളില്‍നിന്നാണ് ഇത്രയും കഞ്ചാവ് പിടിച്ചെടുത്തത്. സംഭവവുമായി ബന്ധപ്പെട്ട് പ്രായപൂര്‍ത്തിയാകാത്തയാളുള്‍പ്പെടെ മൂന്നു പശ്ചിമബംഗാള്‍ സ്വദേശികള്‍ പിടിയിലായി. ചേര്‍ത്തല കേന്ദ്രീകരിച്ചു വില്‍പ്പനയ്ക്കായി എത്തിച്ചതാണ് കഞ്ചാവെന്ന് എകസൈസ് പറഞ്ഞു. രാവിലെ ചെന്നൈ-എഗ് മോര്‍ ട്രെയിനില്‍ കഞ്ചാവ് കടത്തുന്നു എന്ന രഹസ്യ വിവരത്തിന്‍റെ അടിസ്ഥാനത്തില്‍ ചേര്‍ത്തല എക്‌സൈസ് സിഐ ടി.എസ്. സുനില്‍കുമാറിന്‍റെ നേതൃത്വത്തില്‍ നടത്തിയ പരിശോധനയിലാണ് 26 കിലോ കഞ്ചാവ് പിടിച്ചെടുത്തത്. പശ്ചിമ ബംഗാള്‍ മൂര്‍ഷിദാബാദ് സ്വദേശികളായ അജ്‌റുള്‍ മുല്ല (35), സീമൂള്‍ (18) എന്നിവരാണ് പിടിയിലായത്. ഇവര്‍ 27 പാക്കറ്റുകളിലായാണ് കഞ്ചാവ് സൂക്ഷിച്ചിരുന്നത്. ഇവരോടൊപ്പമുണ്ടായിരുന്ന മൂന്നു പേര്‍ എക്സൈസിനെ കബളിപ്പിച്ച് തന്ത്രപരമായി ഓടി രക്ഷപ്പെട്ടു. ചേര്‍ത്തലയില്‍ മൊത്ത കച്ചവടത്തിനായി കഞ്ചാവ് എത്തിക്കുന്ന സംഘത്തെക്കുറിച്ച് എക്‌സൈസിന് നേരത്തേ വിവരം ലഭിച്ചിരുന്നു. ഇതേത്തുടര്‍ന്ന് സംഘം നിരീക്ഷണത്തിലായിരുന്നു. രഹസ്യ വിവരത്തിന്‍റെ അടിസ്ഥാനത്തില്‍ ഞായറാഴ്ച പുലര്‍ച്ചെ മുതല്‍ എക്‌സൈസ് സംഘം റെയില്‍വേ സ്റ്റേഷന്‍ പരിസരത്ത് ക്യാമ്പ് ചെയ്തിരുന്നു. കഞ്ചാവുമായി സംഘം ഇറങ്ങി വരുമ്പോള്‍ പിടികൂടുകയായിരുന്നു. ചേര്‍ത്തല പോലീസ് ഇന്‍സ്പെക്ടര്‍ ജി. അരുണിന്‍റെ സാന്നിധ്യത്തില്‍ കഞ്ചാവ് പുറത്തെടുത്ത് അളന്ന് തിട്ടപ്പെടുത്തി. കഞ്ചാവ് എവിടെനിന്നാണ് കൊണ്ടുവന്നതെന്നും ആര്‍ക്കാണ് ഇത് എത്തിക്കുന്നതെന്നതടക്കമുളള വിവരങ്ങള്‍ അന്വേഷിക്കുകയാണെന്ന് എക്‌സൈസ് സര്‍ക്കിള്‍ ഇന്‍സ്പക്ടര്‍ ടി.എസ്. സുനില്‍കുമാര്‍ പറഞ്ഞു. സര്‍ക്കിള്‍ ഇന്‍സ്പക്ടര്‍ക്കൊപ്പം എക്‌സൈസ് ഇന്‍സ്‌പെകടര്‍ എന്‍. ബാബു, അസിസ്റ്റന്‍റ് എസ്‌ഐമാരായ ജയകുമാര്‍, വിജയകുമാര്‍, സജി, പ്രിവന്‍റീവ് ഓഫീസര്‍ മുസ്തഫ, സിവില്‍ എക്‌സൈസ് ഓഫീസര്‍മാരായ ജിനു, അശ്വതി, ഡ്രൈവര്‍ ബെന്‍സി എന്നിവരാണ് സംഘത്തിലുണ്ടായിരുന്നത്. ഇതിനിടയില്‍ റെയില്‍വേ സ്റ്റേഷനില്‍നിന്നു കബളിപ്പിച്ചു കടന്നുപോയവരെ കണ്ടെത്താന്‍ പരിശോധനകള്‍ നടത്തുന്നതിനിടെയാണ് മൂന്നംഗ സംഘത്തില്‍ ഒരാളെന്നു സംശയത്തില്‍ പിടികൂടിയ 17 കാരനില്‍നിന്നും അഞ്ചു കിലോ കഞ്ചാവ് പിടിച്ചത്. ചേര്‍ത്തല ഹൈവേ പാലത്തിനു സമീപത്തുനിന്ന് എക്‌സൈസ് റേഞ്ച് ഇന്‍സ്പക്ടര്‍ സുമേഷിന്‍റെ നേതൃത്വത്തിലാണ് ഇയാളെ പിടികൂടിയത്. റെയില്‍വേ സ്റ്റേഷനില്‍നിന്നു കബിളിപ്പിച്ചു കടന്ന സംഘത്തില്‍പ്പെട്ടയാളാണെന്ന നിഗമനത്തിലാണ് എക്‌സൈസ്. പശ്ചിമ ബംഗാള്‍ സ്വദേശിയാണ് ഇയാളും. സംഭവവുമായി ബന്ധപ്പെട്ട് രണ്ടു കേസുകളായാണ് എക്‌സൈസ് രജിസ്റ്റര്‍ ചെയ്തിരിക്കുന്നത്.

സ്‌കൗട്ട് വിദ്യാർഥികൾ ബന്ദിപ്പൂ വിളവെടുപ്പ് നടത്തി

കറ്റാനം: പോപ്പ് പയസ് ഹയർ സെക്കൻഡറി സ്‌കൂളിൽ സ്‌കൗട്ട് യൂണിറ്റിന്‍റെ നേതൃത്വത്തിൽ ബന്ദിപ്പൂ കൃഷിയുടെ വിളവെടുപ്പ് നടത്തി. ബന്ദിപ്പൂ വിറ്റ് കിട്ടുന്ന പണം കരുതൽ പദ്ധതിയിലേക്ക് ഉപയോഗിക്കാനാണ് തീരുമാനം . പ്രിൻസിപ്പൽ ടി. മോഹൻ ഉദ്ഘാടനം ചെയ്തു. സ്കൗട്ട് മാസ്റ്റർ സി.ടി. വർഗീസ്, ലീഡർമാരായ മുകിൽ കൃഷ്ണ, അഭിനവ് മോഹൻ എന്നിവർ നേതൃത്വം നൽകി.

ജന്മാഷ്ടമി: ഗ്രാമങ്ങൾ മഥുരാപുരിയാക്കി കണ്ണന്മാരും ഗോപികമാരും

ചെങ്ങന്നൂര്‍: ജന്മാഷ്ടമിയോടനുബന്ധിച്ച് ഗ്രാമങ്ങള്‍ മഥുരാപുരിയാക്കി കണ്ണന്‍മാരും ഗോപികമാരും നിറഞ്ഞൊഴുകി. നാലു മണിയോടെ കാഴ്ചക്കാരെക്കൊണ്ട് വീഥികള്‍ നിറഞ്ഞു. തിരുവന്‍വണ്ടൂര്‍ മണ്ഡലത്തില്‍ തിരുവന്‍വണ്ടൂര്‍, മഴുക്കീര്‍, ഇരമല്ലിക്കര, നന്നാട്, വനവാതുക്കര, വനവാതുക്കര കിഴക്ക് എന്നിവിടങ്ങളില്‍നിന്നാരംഭിച്ച ശോഭായാത്രകള്‍ തിരുവന്‍വണ്ടൂര്‍ ജംഗ്ഷനില്‍ സംഗമിച്ച് തിരുവന്‍വണ്ടൂര്‍ മഹാവിഷ്ണു ക്ഷേത്രത്തില്‍ സമാപിച്ചു. ചെങ്ങന്നൂര്‍ നഗരത്തില്‍ മേപ്രം, കോടിയാട്ടുകര, ഉമയാറ്റുകര, മുണ്ടന്‍കാവ്, തിട്ടമേല്‍, കിഴക്കേനട, അങ്ങാടിക്കല്‍, അങ്ങാടിക്കല്‍ തെക്ക്, ശാസ്താംകുളങ്ങര, മംഗലം എന്നിവിടങ്ങളില്‍നിന്നുള്ള ശോഭായാത്രകള്‍ വണ്ടിമല ജംഗ്ഷനില്‍ സംഗമിച്ച് മഹാശോഭായാത്ര ചെങ്ങന്നൂര്‍ മഹാദേവ ക്ഷേത്രത്തില്‍ സമാപിച്ചു. മുഴക്കുഴ, മുളക്കുഴ സ്‌കൂളിന്‍റെ വടക്കുഭാഗം, തിരുമുളക്കുഴ, കുഴിപൊയ്ക കനാലിന്‍റെ മുകള്‍ഭാഗം, പറയരുകാല ശോഭായാത്രകള്‍ മുളക്കുഴ കാണിക്കമണ്ഡപം ജംഗ്ഷനില്‍ സംഗമിച്ച് മഹാശോഭായാത്രയായി മുളക്കുഴ ഗന്ധര്‍വമുറ്റം ദേവീക്ഷേത്രത്തില്‍ സമാപിച്ചു. നികരുംപുറം, കോടംതുരുത്ത്, പിരളശേരി എന്നിവിടങ്ങളില്‍നിന്നാരംഭിച്ച ശോഭായാത്രകള്‍ കനാല്‍ ജംഗ്ഷനില്‍ സംഗമിച്ച് മഹാശോഭായാത്രയായി പിരളശേരി ഭദ്രാഭഗവതി ക്ഷേത്രത്തില്‍ സമാപിച്ചു. ആലിന്‍ചുവട്, പൂതംകുന്ന്, പാറപ്പാട്, കാഞ്ഞിരത്തുംമൂട് എന്നീ സ്ഥലങ്ങളില്‍നിന്നുള്ള ശോഭായാത്രകള്‍ വായനശാല ജംഗ്ഷനില്‍ സംഗമിച്ച് പാറപ്പാട് സമാപിച്ചു. കാരയ്ക്കാട് വലിയവീട്ടില്‍ ദേവീക്ഷേത്രം, നെടിയത്ത് ഭഗവതി ക്ഷേത്രം, അരീക്കര ഗുരുമന്ദിരം, മണ്ണാറക്കാട് ഗുരുമന്ദിരം, കൊടക്കാമരം കൊട്ടാരത്തില്‍ ദേവിക്ഷേത്രം, മലനട മഹാദേവക്ഷേത്രം, കായിപ്പശേരി ദേവിക്ഷേത്രം എന്നിവിടങ്ങളില്‍നിന്നുള്ള ശോഭായാത്രകള്‍ കോണത്ത് ദേവീക്ഷേത്രത്തില്‍ എത്തി മഹാശോഭായാത്രയായി കാരയ്ക്കാട് ശ്രീധര്‍മശാസ്താ ക്ഷേത്രത്തില്‍ സമാപിച്ചു. കൊഴുവല്ലൂര്‍, അറന്തക്കാട്, കളരിത്തറ, വാഴപ്പള്ളിമുട്ടം എന്നിവിടങ്ങളില്‍നിന്നുള്ള ശോഭായാത്രകള്‍ അറന്തക്കാട് സംഗമിച്ച് മഹാശോഭായാത്രയായി കൊഴുവല്ലൂര്‍ ദേവിക്ഷേത്രത്തില്‍ സമാപിച്ചു. പുലിയൂരില്‍ പൂവണ്ണാമുറി ദേവിക്ഷേത്രം, ആയൂര്‍വേദ ആശുപത്രി ജംഗ്ഷന്‍, കളിപ്പില്‍ ക്ഷേത്രം, കരിമ്പിന്‍കാവ് ക്ഷേത്രം, കോയിക്കല്‍ ക്ഷേത്രം എന്നീ ശോഭായാത്രകള്‍ പുലിയൂര്‍ ഗണപതി ക്ഷേത്രം ജംഗ്ഷനില്‍ സംഗമിച്ച് പുലിയൂര്‍ മഹാവിഷ്ണുക്ഷേത്രത്തിൽ സമാപിച്ചു. പേരൂര്‍കുളങ്ങര ക്ഷേത്രത്തില്‍നിന്ന് ആരംഭിക്കുന്ന ശോഭായാത്ര പഴയാറ്റില്‍ ക്ഷേത്രംവഴി തൃക്കയില്‍ ക്ഷേത്രത്തില്‍ സമാപിച്ചു. വെണ്മണി മണ്ഡലത്തില്‍ പുന്തല ഏറം, പുന്തലത്താഴം, ശാര്‍ങക്കാവ്, മഹാദേവര്‍നട, കല്യാത്ര, വെണ്‍മണിത്താഴം, കുതിരവട്ടം, ശാര്‍ങമല ബാലഗോകുലങ്ങളുടെ നേതൃത്വത്തില്‍ വൈകിട്ട് നാലിന് ശാര്‍ങക്കാവ് ദേവിക്ഷേത്രത്തില്‍നിന്ന് ആരംഭിച്ച മഹാശോഭായാത്ര കല്യാത്ര ഭുവനേശ്വരി ക്ഷേത്രത്തില്‍ സമാപിച്ചു. ചെറിയനാട് ബാലസുബ്രഹ്‌മണ്യസ്വാമി ക്ഷേത്രം, പെരിങ്ങറ, മണ്ഡപരിയാരം, ഇടവങ്കാട്, അരിയന്നൂര്‍ശേരി, മാമ്പ്ര, ഇടമുറി, വിവേകാനന്ദ എന്നിവിടങ്ങളില്‍നിന്ന് ആരംഭിച്ച ശോഭായാത്രകള്‍ പടനിലം ജംഗ്ഷനില്‍ സംഗമിച്ച് മഹാശോഭായാത്രയായി ബാലസുബ്രഹ്‌മണ്യ സ്വാമി ക്ഷേത്രത്തില്‍ സമാപിച്ചു. ചെറുവല്ലൂര്‍, ആലക്കോട്, ഞാഞ്ഞൂക്കാട്, കടയിക്കാട് ശോഭായാത്രകള്‍ കൊല്ലകടവില്‍ സംഗമിച്ച് ആലക്കോട്, നല്ലൂര്‍ക്കാവ് വഴി ചെറുവല്ലൂര്‍ ദേവിക്ഷേത്ര ദര്‍ശനത്തിനുശേഷം ശ്രീകൃഷ്ണസ്വാമി ക്ഷേത്രത്തില്‍ സമാപിച്ചു. പാണ്ടനാട് മണ്ഡലത്തില്‍ അടിച്ചിക്കാവ്, പ്രയാര്‍, വന്മഴി, മുറിയായിക്കരയില്‍നിന്ന് തുടങ്ങി തൃക്കണ്ണാപുരം കഷേത്രത്തില്‍ സമാപിച്ചു. ആലയില്‍ ആല, ഉമാപതിപുരം, നെടുവരംകോട് എന്നിവിടങ്ങളില്‍നിന്നുള്ള ശോഭയാത്രകള്‍ ആലയില്‍ സംഗമിച്ച് നെടുവരംകോട് മഹാദേവക്ഷേത്രത്തില്‍ സമാപിച്ചു. പെണ്ണുക്കര, പെണ്ണുക്കര വടക്ക്, പെണ്ണുക്കര തെക്ക്, കൊടുകുളഞ്ഞി എന്നീ ശോഭായാത്രകള്‍ പെണ്ണുക്കര കനാല്‍ ജംഗ്ഷനില്‍ സംഗമിച്ച് മഹാശോഭായാത്രയായി നെടുവരംകോട് മഹദേവക്ഷേത്രത്തില്‍ സമാപിച്ചു. വിവിധ ക്ഷേത്രങ്ങളില്‍ ഗോപികാനൃത്തം, ഉറിയടി, സമ്മാനദാനം, പ്രസാദവിതരണം എന്നിവ നടന്നു.

വായനോത്സവം സംഘടിപ്പിച്ചു

ഹരിപ്പാട്: കാർത്തികപ്പള്ളി താലൂക്ക് ലൈബ്രറി കൗൺസിലിന്‍റെ നേതൃത്വത്തിൽ നടന്ന അഖില കേരള വായനോത്സവം സംസ്ഥാന ലൈബ്രറി കൗൺസിൽ അംഗം ടി. തിലകരാജ് ഉദ്ഘാടനം ചെയ്തു. പ്രസിഡന്‍റ് ജി. സന്തോഷ്കുമാർ അധ്യക്ഷനായി. സെക്രട്ടറി സി.എൻ.എൻ. നമ്പി, എൻ. രാമചന്ദ്രൻനായർ, ആർ. വിജയകുമാർ, പി. ഗോപാലൻ, എം.കെ. പ്രദീപ് എന്നിവർ പ്രസംഗിച്ചു. ലൈബ്രറി കൗൺസിൽ മുഖമാസിക ഗ്രന്ഥാലോകം അംഗത്വവിതരണം കരുവാറ്റ യുവധാര ലൈബ്രറി അംഗം എബി ചെറിയാന് നൽകി പ്രസിഡന്‍റ് ജി. സന്തോഷ്കുമാർ നിർവഹിച്ചു. തുടർന്ന് നടന്ന യുപി വിഭാഗത്തിന്‍റെയും വനിതകളുടെയും വായനോത്സവത്തിന്‍റെ ഉദ്ഘാടനം ഹരിപ്പാട് നഗരസഭ സ്ഥിരംസമിതി ചെയർമാൻ എസ്. നാഗദാസ് നിർവഹിച്ചു. വൈസ് പ്രസിഡന്‍റ് കെ.കെ. അനിൽകുമാർ അധ്യക്ഷനായി. സെക്രട്ടറി സി.എൻ.എൻ. നമ്പി സ്വാഗതം പറഞ്ഞു.

ഇതര സംസ്ഥാന തൊഴിലാളി ക്യാമ്പുകള്‍ പരിശോധിക്കണമെന്ന്

അമ്പലപ്പുഴ: വര്‍ധിച്ചുവരുന്ന ലഹരിവസ്തുക്കളുടെ ഉപയോഗം തടയുന്നതിനായി ഇതര സംസ്ഥാന തൊഴിലാളികളുടെ ക്യാമ്പുകള്‍ പരിശോധനയ്ക്കു വിധേയമാക്കണമെന്ന് ഗാന്ധിയന്‍ ദര്‍ശനവേദി. "ലഹരിവസ്തുക്കളുടെ വ്യാപനം എങ്ങനെ തടയാം' എന്ന വിഷയത്തെ സംബന്ധിച്ച് കേരള പ്രദേശ് മദ്യവിരുദ്ധ സമിതിയുടെ ആഭിമുഖ്യത്തില്‍ തോണ്ടന്‍കുളങ്ങര ഗാന്ധിയന്‍ ദര്‍ശനവേദി ഹാളില്‍ നടത്തിയ ബോധവത്കരണ സെമിനാര്‍ ബേബി പാറക്കാടന്‍ ഉദ്ഘാടനം ചെയ്തു. കേരള സര്‍വോദയ മണ്ഡലം ആലപ്പുഴ ജില്ലാ പ്രസിഡന്‍റ് എം.ഇ. ഉത്തമക്കുറിപ്പ് അധ്യക്ഷത വഹിച്ചു. ഹക്കീം മുഹമ്മദ് രാജാ, രാജു പള്ളിപ്പറമ്പില്‍, ജോസഫ് മാരാരിക്കുളം, എം.ഡി. സലിം, എന്‍. സദാശിവന്‍ നായര്‍, ഈ. ഖാലിദ്, ടി.എം. സന്തോഷ്, ആന്‍റണി കരിപ്പാശേരി, ജേക്കബ് എട്ടുപറയില്‍, ബിനു മദനന്‍, ലൈസമ്മ ബേബി എന്നിവര്‍ പ്രസംഗിച്ചു.

ചേന്നങ്കരി പള്ളിയില്‍ വിശുദ്ധ യൗസേപ്പ് പിതാവിന്‍റെ ദര്‍ശനത്തിരുനാള്‍

ചേന്നങ്കരി: വിശുദ്ധ യൗസേപ്പ് പിതാവിന്‍റെ നാമത്തിലുള്ള കുട്ടനാട്ടിലെ പ്രമുഖ ദേവാലയമായ ചേന്നങ്കരി പള്ളിയില്‍ വിശുദ്ധന്‍റെ ദര്‍ശനത്തിരുനാള്‍ 17ന് ആരംഭിച്ച് 22ന് സമാപിക്കും. വിശുദ്ധ ചാവറ കുര്യാക്കോസ് ഏലിയാസച്ചന്‍റെ ജ്ഞാനസ്‌നാന പള്ളി എന്ന പേരിലും പ്രസിദ്ധമാണ് ഈ പള്ളി. 17ന് വൈകുന്നേരം4.30ന് കൊടിയേറ്റ് - വികാരി ഫാ. ജോസഫ് ബംഗ്ലാവുപറമ്പില്‍, തുടര്‍ന്ന് മധ്യസ്ഥപ്രാര്‍ഥന, ഇടവകയില്‍ ശുശ്രൂഷ ചെയ്ത മുന്‍ വികാരിമാരായ ഫാ. സിറിയക് വലിയപറമ്പില്‍, ഫാ.ജോര്‍ജ്പനക്കേഴം, ഫാ. ജയിംസ്അത്തിക്കളം, ഫാ. റോജന്‍ നെല്പുരയ്ക്കല്‍ എന്നിവരുടെ കാര്‍മികത്വത്തില്‍ വിശുദ്ധ കുര്‍ബാന. സന്ദേശം-ഫാ. റോയി കണ്ണന്‍ചിറ സിഎംഐ (ദീപിക കൊച്ചേട്ടന്‍). നഗര പ്രദക്ഷിണം - വിശുദ്ധ യൗസേപ്പ് പിതാവിന്‍റെ തിരുസ്വരൂപത്തിന് ഇടവകയിലെ വിവിധ കൂട്ടായ്മകളില്‍ സ്വീകരണം. 18ന് വൈകുന്നേരം 4.30ന് മധ്യസ്ഥ പ്രാര്‍ഥന, വിശുദ്ധ കുര്‍ബാന, സന്ദേശം - മാര്‍ ജോസഫ്പെരുന്തോട്ടം. ഫാ. തോമസ്പൊക്കാവരയത്ത് സിഎംഐ, ഫാ. ടോണി ചൊങ്കോട്ട് സിഎംഐ എന്നിവർ സഹകാർമികരാകും, തുടര്‍ന്ന് മില്ലേനിയം കുരിശടി പ്രദക്ഷിണം - ഫാ. ജോര്‍ജ് ജോബോ, കുരിശടിയില്‍ സന്ദേശം- ഫാ. ഫിലിപ്പോസ് തുണ്ടുവാലിച്ചിറ സിഎംഐ. 19ന് വൈകുന്നേരം നാലിന് മധ്യസ്ഥ പ്രാര്‍ഥന, വിശുദ്ധ കുര്‍ബാന, സന്ദേശം - ചങ്ങനാശേരി അതിരൂപത മെത്രാപ്പോലിത്ത മാര്‍ തോമസ് തറയില്‍. ഫാ. ജോസഫ് ചെമ്പിലകം, ഫാ. തോമസ് പുതിയാപറമ്പില്‍, ഫാ. നൈജീല്‍ തൊണ്ടിക്കാക്കുഴിയില്‍ എന്നിവർ സഹകാർമികത്വം വഹിക്കും. 5.30ന് ദിവ്യകാരുണ്യപ്രദക്ഷിണം-ഫാ. മോര്‍ളി കൈതപ്പറമ്പില്‍. തുടര്‍ന്ന് ഡിജെ സ്റ്റേജ് ഷോ ആന്‍ഡ് വാട്ടര്‍ ഡ്രംസ്. 20ന് രാവിലെ 6.30ന് കിടപ്പുരോഗികള്‍ക്ക് വിശുദ്ധ കുര്‍ബാന ഭവനങ്ങളില്‍ എത്തിച്ചു നല്കുന്നു. വൈകുന്നേരം നാലിന് മധ്യസ്ഥ പ്രാര്‍ഥന, വിശുദ്ധ കുര്‍ബാന, സന്ദേശം - കര്‍ദിനാള്‍ മാര്‍ ജോര്‍ജ് ആലഞ്ചേരി. ഫാ. റ്റോബിന്‍ അറുവന്‍പറമ്പില്‍ സഹകാർമികത്വം വഹിക്കും. ദേവമാതാ കുരിശടിയിലേയ്ക്ക് പ്രദക്ഷിണം-ഫാ. റോജന്‍ നെല്‍പുരയ്ക്കല്‍, കപ്ലോന്‍ വികാരി വാഴ്ച, പ്രസുദേന്തി വാഴ്ച, ലൈറ്റ് ആന്‍ഡ് സൗണ്ട് ഷോ, കരിമരുന്ന് കലാപ്രകടനം, ചെണ്ട, വയലിന്‍, സാക്‌സോഫോണ്‍ ഫ്യൂഷന്‍, സ്‌നേഹവിരുന്ന്, പള്ളിക്കുള്ളില്‍ രൂപം പ്രതിഷ്ഠിക്കല്‍. പ്രധാന തിരുനാള്‍ ദിനമായ 21ന് രാവിലെ ആറിനു രൂപം മോണ്ടളത്തില്‍ പ്രതിഷ്ഠിക്കും. 6.45ന് സപ്ര, വിശുദ്ധ കുര്‍ബാന. 9.30ന് മധ്യസ്ഥ പ്രാർഥന, ആഘോഷമായ തിരുനാള്‍ കുര്‍ബാന-ഫാ. വിപിന്‍ കുരിശുതറ സിഎംഐ. സഹകാര്‍മികര്‍-ഫാ. അരുണ്‍ കോയിക്കാട്ടുചിറ, ഫാ. ജേക്കബ് തുണ്ടിയില്‍, തിരുനാള്‍ സന്ദേശം-ഫാ. ഫ്രാന്‍സിസ് കര്‍ത്താനം വിസി, തിരുനാള്‍ പ്രദക്ഷിണം ഫാ. തോമസ്ഇരുമ്പുകുത്തി സിഎംഐ, വൈകുന്നേരം6.30ന് രൂപം പള്ളിയില്‍ പ്രതിഷ്ഠിക്കും. 22 തിങ്കള്‍ പൂര്‍വിക സ്മരണദിനം. രാവിലെ 6.30ന് സപ്ര, വിശുദ്ധ കുര്‍ബാന, സന്ദേശം ഇടവകയിലെ വൈദികര്‍, തുടര്‍ന്ന് സെമിത്തേരി സന്ദര്‍ശനവും കൊടിയിറക്കും, നേര്‍ച്ച വസ്തുക്കളുടെ ലേലം, ഇടവക വൈദിക സമര്‍പ്പിത സംഗമം. തിരുനാളിന്‍റെ സുഗമമായ നടത്തിപ്പിനായി വികാരി ഫാ. ജോസഫ് ബംഗ്ലാവുപറമ്പില്‍, കൈക്കാരന്മാരായ ടോമിച്ചന്‍ ചെങ്ങണ്ടയില്‍, ഔസേപ്പ് വര്‍ഗീസ് എടവനക്കളം, സുരേഷ് പി.വി. പരുവപ്പറമ്പില്‍, തിരുനാള്‍ പ്രസുദേന്തി ജോച്ചന്‍ പാലയ്ക്കല്‍, ഡൊമിനിക് എന്നിവരുടെ നേതൃത്വത്തില്‍ വിപുലമായ ഒരുക്കങ്ങള്‍ നടത്തി.

എടത്വ സിഎച്ച്‌സി വികസനത്തിന് പച്ചക്കൊടി; ഉടമസ്ഥാവകാശ പ്രശ്‌നം പരിഹരിച്ചു

എടത്വ: പൊതുജനങ്ങളുടെ വളരെക്കാലത്തെ ആവശ്യങ്ങള്‍ക്കു പരിഹാരമാകുന്നു. എടത്വ സാമൂഹികാരോഗ്യ കേന്ദ്രത്തിന്‍റെ വികസനത്തിന് പച്ചക്കൊടി. ഭൂമിയുടെ ഉടമസ്ഥാവകാശ പ്രശ്‌നം പരിഹരിച്ചു. മാവേലിക്കര ലോക്‌സഭാ മണ്ഡലത്തിലെ ആരോഗ്യ അടിസ്ഥാന സൗകര്യങ്ങളുടെ വളര്‍ച്ചയ്ക്ക് വഴിതെളിക്കുന്ന തരത്തില്‍ എടത്വ സിഎച്ച്‌സിയുടെ ഉടമസ്ഥാവകാശവുമായി ബന്ധപ്പെട്ടിരുന്ന ദീര്‍ഘകാല പ്രശ്‌നം പരിഹരിച്ചതായി കൊടിക്കുന്നില്‍ സുരേഷ് എംപി. എടത്വ സെന്‍റ് ജോര്‍ജ് ഫൊറോനാ പള്ളി വിട്ടുകൊടുത്ത സ്ഥലത്ത് പ്രവര്‍ത്തിച്ചുവരുന്ന കമ്യൂണിറ്റി ഹെല്‍ത്ത് സെന്‍ററിന്‍റെ വികസനത്തിനായി ദേശീയ ആരോഗ്യ ദൗത്യം മുഖേന 5.5 കോടി രൂപയുടെ സമഗ്ര പദ്ധതി തയാറായിട്ടുണ്ട്. ഭൂമിയുടെ ഉടമസ്ഥാവകാശം ഇപ്പോഴും പള്ളിയുടെ ഉടമസ്ഥതയിലായതിനാല്‍ വികസന പ്രവര്‍ത്തനങ്ങള്‍ക്കു നിയമപരമായ തടസം നേരിടുകയായിരുന്നു. ഇതേത്തുടര്‍ന്ന് കഴിഞ്ഞ മൂന്നിനു നടന്ന പ്രതിനിധി യോഗത്തില്‍ ചങ്ങനാശേരി അതിരൂപത ഭൂമിയുടെ ഉടമസ്ഥാവകാശം സംസ്ഥാന സര്‍ക്കാരിലേക്ക് സൗജന്യമായി കൈമാറാന്‍ തീരുമാനിക്കുകയും ആവശ്യമായ പിന്തുണ നല്‍കുമെന്നും അറിയിച്ചു. ചങ്ങനാശേരി അതിരൂപത മെത്രാപ്പോലീത്ത മാര്‍ തോമസ് തറയില്‍, എടത്വ സെന്‍റ് ജോര്‍ജ് ഫൊറോന പള്ളി വികാരി ഫാ. ഫിലിപ്പ് വൈക്കത്തുകാരന്‍ എന്നിവരുടെ സാന്നിധ്യത്തിലാണ് ചര്‍ച്ച നടത്തിയത്. പദ്ധതിയുടെ ഭാഗമായി ഹെല്‍ത്ത് സെന്‍ററിന് ആധുനിക ഔട്ട് പേഷ്യന്‍റ് വിഭാഗം, ലബോറട്ടറി സൗകര്യങ്ങള്‍, മാതൃ-ശിശു ആരോഗ്യ വിഭാഗം, അടിയന്തര ചികിത്സാ വിഭാഗം, പാര്‍ക്കിംഗ് സൗകര്യങ്ങള്‍ എന്നിവ സജ്ജീകരിക്കുന്നതാണ്. ഇതോടെ എടത്വയിലും സമീപ പ്രദേശത്തുമുള്ള ആയിരക്കണക്കിന് ജനങ്ങള്‍ക്ക് പ്രയോജനം ലഭിക്കും. പുതിയ തീരുമാനം എടത്വ മേഖലയിലെ ആരോഗ്യ സൗകര്യങ്ങളുടെ നിലവാരം ഉയര്‍ത്തുന്നതില്‍ വലിയ ചുവടുവയ്പായിരിക്കുമെന്ന് കൊടിക്കുന്നില്‍ സുരേഷ് എംപി പറഞ്ഞു.

പൊതുമരാമത്തിന് അനക്കമില്ല; തൈക്കാട്ടുശേരി റോഡിൽ പ്രതിഷേധക്കുഴിയടയ്ക്കൽ

തുറവൂര്‍: റോഡുകളുടെ അറ്റകുറ്റപ്പണിക്കായി ദേശീയ പാതാ അഥോറിറ്റിയില്‍നിന്ന് കോടികള്‍ അനുവദിച്ചു കിട്ടിയിട്ടും പൊതുമരാമത്തിന് അനക്കമില്ല. ഇതില്‍ പ്രതിഷേധിച്ച് നാട്ടുകാര്‍ പ്രതിഷേധ കുഴിയടയ്ക്കല്‍ നടത്തി. കേരള സ്റ്റേറ്റ് സര്‍വീസ് പെന്‍ഷനേഴ്‌സ് അസോസിയേഷന്‍ ബ്ലോക്ക് പ്രസിഡന്‍റ് പി.ആര്‍. വിജയകുമാറിന്‍റെ നേതൃത്വത്തിലാണ് തുറവൂര്‍ - തൈക്കാട്ടുശേരി റോഡില്‍ മന്നത്ത് ക്ഷേത്രം വളവിലെ കുഴി കോണ്‍ക്രീറ്റ് മിശ്രിതമുപയോഗിച്ച് മൂടിയത്. തുറവൂര്‍ - അരൂര്‍ ഉയരപ്പാത നിര്‍മാണം നടക്കുന്നതിനാലാണ് വാഹനങ്ങള്‍ തുറവൂര്‍ - കുമ്പളങ്ങി , തുറവൂര്‍ - മാക്കേക്കവല റോഡുകള്‍വഴി തിരിച്ചുവിട്ടത്. വാഹനങ്ങളുടെ നിരന്തരമായ ഓട്ടം റോഡുകളെ തകര്‍ത്തു. റോഡുനിര്‍മാണത്തിനായി ഫെബ്രുവരിയില്‍ ദേശീയ പാതാ അഥോറിറ്റി 8.5 കോടി പൊതുമരാമത്തിന്‍റെ അക്കൗണ്ടില്‍ നല്‍കി. തുക പോരെന്ന് കാണിച്ച് പൊതുമരാമത്ത് കത്തയച്ചതിന്‍റെ അടിസ്ഥാനത്തില്‍ ജൂലൈ മാസം അവസാനം 36.2 ലക്ഷം വീണ്ടും നല്‍കി. എന്നാല്‍, ആഴ്ചകള്‍ പിന്നിട്ടിട്ടും റോഡുപണിയാന്‍ അധികൃതര്‍ തയാറായിട്ടില്ല. ഇതിനിടയില്‍ കരാറുകാരന്‍റെ സഹായത്താന്‍ കുമ്പളങ്ങി റോഡില്‍ ചിലയിടങ്ങളില്‍ വലിയ ഗര്‍ത്തങ്ങള്‍ പലതും മൂടി. എന്നാല്‍ തൈക്കാട്ടുശേരി റോഡില്‍ യാതൊന്നും ചെയ്തില്ല. റോഡിലെ കുഴികള്‍ വാഹനയാത്രികര്‍ക്കു ഭീഷണിയായി മാറിയ സാഹചര്യത്തിലാണ് പ്രതിഷേധക്കുഴിയടയ്ക്കല്‍ നടത്തിയത്.

ആലപ്പുഴ മെഡിക്കൽ കോളജിലെ ശ്വാസകോശ വിഭാഗം പുരസ്കാര നിറവിൽ

അമ്പലപ്പുഴ: ആലപ്പുഴ മെഡിക്കല്‍ കോളജിലെ ശ്വാസകോശ വിഭാഗം പുരസ്‌കാര നിറവില്‍. കുമരകത്ത് നടന്ന ശ്വാസകോശ വിദഗ്ധരുടെ ദേശീയ സമ്മേളനമായ "പള്‍മോകോണ്‍ 2025' നോടനുബന്ധിച്ച് ശ്വാസകോശ വിഭാഗം ബിരുദാനന്തര ബിരുദ വിദ്യാര്‍ഥികള്‍ക്കായി നടത്തിയ മത്സരങ്ങളില്‍ ആലപ്പുഴ ഗവണ്‍മെന്‍റ് മെഡിക്കല്‍ കോളജിലെ ശ്വാസകോശ വിഭാഗം ബിരുദാനന്തര ബിരുദ വിദ്യാര്‍ഥികള്‍ മികച്ച നേട്ടം കൈവരിച്ചു. കഴിഞ്ഞ വര്‍ഷത്തെ മികച്ച ഗവേഷണ പഠനത്തിന് രാജ്യാന്തര ശ്വാസകോശ വിദഗ്ധന്‍ ഡോ. ടി. മോഹന്‍കുമാര്‍ ഏര്‍പ്പെടുത്തിയ അവാര്‍ഡ് ക്ഷയരോഗികളില്‍ ചികിത്സയ്ക്കു ശേഷവും കണ്ടുവരുന്ന പ്രശ്‌നങ്ങള്‍ മുന്‍കൂട്ടി തടയാന്‍ കഴിയുന്നതെങ്ങിനെ എന്നതിനെക്കുറിച്ചുള്ള പഠനത്തിന് സീനിയര്‍ റെസിഡന്‍റ് ഡോ. വി.ബി. അഞ്ജലിക്കു ലഭിച്ചു. നെഞ്ചിന്‍റെ എക്‌സ്-റേ പരിശോധനയില്‍ ക്ഷയരോഗ ചികിത്സയ്ക്കുശേഷവും പാടുകള്‍ കണ്ടുവരുന്നത് നിരവധിപ്പേരുടെ വിദേശജോലി സാധ്യതയെ ബാധിക്കുന്ന ഒന്നാണ്. പാടുകള്‍ ഉണ്ടാകാനുള്ള സാധ്യത ഘടകങ്ങള്‍ കണ്ടെത്തി തടയാന്‍ കഴിയുന്നത് ആയിരങ്ങള്‍ക്ക് സഹായകരമായിരിക്കുമെന്ന് ജഡ്ജിംഗ് കമ്മിറ്റി വിലയിരുത്തി. ബിരുദാനന്തര ബിരുദ വിദ്യാര്‍ഥികള്‍ക്കായുള്ള ഗവേഷണ പ്രബന്ധ മത്സരത്തില്‍ രണ്ടാം സ്ഥാനം അവസാന വര്‍ഷ എംഡി വിദ്യാര്‍ഥിനി ഡോ. അലിഡ ഫ്രാന്‍സിസും മൂന്നാം സ്ഥാനം രണ്ടാം വര്‍ഷ എംഡി വിദ്യാര്‍ഥി ഡോ. റജ അഷ്ജാനും നേടി. ക്വിസ് മത്സരത്തില്‍ ആലപ്പുഴയിലെ ശ്വാസകോശ വിഭാഗം ബിരുദാനന്തര ബിരുദ വിദ്യാര്‍ഥികളായ ഡോ. ആന്‍ മരിയ ജോണ്‍സണ്‍, ഡോ. റജ അഷ്ജാന്‍ എന്നിവര്‍ മൂന്നാം സ്ഥാനം കരസ്ഥമാക്കി. വിജയികള്‍ക്കുള്ള സമ്മാനവും സര്‍ട്ടിഫിക്കറ്റുകളും ഇന്ത്യന്‍ മെഡിക്കല്‍ അസോസിയേഷന്‍ സംസ്ഥാന പ്രസിഡന്‍റ് ഡോ. കെ.എ. ശ്രീവിലാസന്‍ എപിസിസിഎം പ്രസിഡന്‍റ് ഡോ. സഞ്ജീവ് നായര്‍ എന്നിവര്‍ സമ്മാനിച്ചു. വിദ്യാര്‍ഥികള്‍ക്കു ലഭിച്ച പുരസ്‌കാരങ്ങള്‍ക്കു പുറമേ മികച്ച പ്രവര്‍ത്തനത്തിനും ഗവേഷണ ശില്പശാല സംഘാടനത്തിനുമുള്ള പ്രസിഡന്‍റിന്‍റെ പ്രത്യേക പുരസ്‌കാരം ശ്വാസകോശ വിഭാഗം പ്രഫ. ഡോ. പി.എസ്. ഷാജഹാന് ലഭിച്ചു. ആലപ്പുഴ മെഡിക്കല്‍ കോളജിന്‍റെ അഭിമാനം ദേശീയതലത്തില്‍ ഉയര്‍ത്തിപ്പിടിച്ച ശ്വാസകോശ വിഭാഗത്തെയും വിദ്യാര്‍ ഥികളെയും പ്രിന്‍സിപ്പല്‍ ഡോ. ബി. പദ്മകുമാര്‍ അഭിനന്ദിച്ചു.

സാഹിത്യസംഗമവും ആദരവും സംഘടിപ്പിച്ചു

ചേര്‍ത്തല: ചേർത്തല സംസ്കാരയുടെ ആഭിമുഖ്യത്തിൽ സംഘടിപ്പിച്ച ഓണാഘോഷവും സാഹിത്യസംഗമവും മന്ത്രി പി. പ്രസാദ് ഉദ്ഘാടനം ചെയ്തു. കേരള സാഹിത്യ അക്കാദമി അവാർഡ് ജേതാവ് ചി‍ഞ്ജു പ്രകാശിനെ ചടങ്ങില്‍ ആദരിച്ചു. പ്രസിഡന്‍റ് വെട്ടയ്ക്കൽ മജീദ് അധ്യക്ഷത വഹിച്ചു. നഗരസഭാ ചെയർപേഴ്സൺ ഷേർളി ഭാർഗവൻ, വൈസ് ചെയർമാൻ ടി.എസ്. അജയകുമാർ, ഗീത തുറവൂർ, ബേബി തോമസ്, കെ.കെ. ജഗദീശൻ, പ്രദീപ് കൊട്ടാരം എന്നിവർ പ്രസംഗിച്ചു. തുടർന്ന് നടന്ന സാഹിത്യസംഗമത്തിൽ തണ്ണീർമുക്കം ഷാജി, കമലാസനൻ വൈഷ്ണവം, തുറവൂർ സുലോചന, രവീന്ദ്രൻ, അജിത അഴീക്കൽ, സാവിത്രി സോമൻ, പി.കെ. സെൽവരാജ്, കെ.ആർ. സോമശേഖരപ്പണിക്കർ, പി.വി. സുരേഷ് ബാബു, മാത്യു മാടവന എന്നിവർ സൃഷ്ടികൾ അവതരിപ്പിച്ചു.

പുതിയ ബസ് സര്‍വീസിന് അനുമതി

ചമ്പക്കുളം: ദേശാസാത്കൃത ബസ് റൂട്ടും വിനോദസഞ്ചാര പ്രാധാന്യവുമുളള പ്രദേശമായ കുട്ടനാട്ടിലെ ഏക കെഎസ്ആര്‍ടിസി ബസ് ഡിപ്പോയാണ് എടത്വാ. ഇവിടെനിന്നു പാലക്കാട് സൂപ്പര്‍ ഫാസ്റ്റും മുവാറ്റുപുഴ ഫാസ്റ്റ് സര്‍വീസും ഉള്‍പ്പെടെ പുതിയ ബസ് സര്‍വീസുകള്‍ ആരംഭിക്കുന്നതിനു ഗതാഗത മന്ത്രി കെ.ബി. ഗണേഷ്‌കുമാര്‍ അനുമതി നല്കിയെന്നും തിരുവനന്തപുരം ചീഫ് ഓഫീസില്‍നിന്ന് റൂട്ട് ഷെഡ്യൂളും ബോര്‍ഡും അനുവദിച്ചെന്നും കേരള കോണ്‍ഗ്രസ് -ബി ആലപ്പുഴ ജില്ലാ പ്രസിഡന്‍റ് ജെയ്സപ്പന്‍ മത്തായി അറിയിച്ചു. കെഎസ്ആര്‍ടിസി സംസ്ഥാനത്ത് ആരംഭിച്ച ഡ്രൈവിംഗ് സ്‌കൂള്‍ ആരംഭത്തില്‍ത്തന്നെ എടത്വയില്‍ പ്രവര്‍ത്തനം തുടങ്ങിയിരുന്നു. എടത്വാ ഡിപ്പോയില്‍ ഡീസല്‍ പമ്പ് തുടങ്ങണമെന്ന ആവശ്യം മന്ത്രിക്ക് സമര്‍പ്പിച്ചിട്ടുണ്ടന്നും ആയതിന് അനുഭാവ പൂര്‍ണമായ നടപടി പ്രതീക്ഷിക്കുന്നതായും മുന്‍ ഗതാഗത മന്ത്രിയായ ആര്‍. ബാലകൃഷ്ണപിള്ളയുടെ കാലത്ത് ആരംഭിച്ച ദീര്‍ഘദൂര ബസ് സര്‍വീസുകള്‍ക്കുശേഷം ആദ്യമായാണ് എടത്വയ്ക്ക് പുതിയ ദീര്‍ഘദൂര ബസുകള്‍ ലഭ്യമാകുന്നതെന്നും കേരള കോണ്‍ഗ്രസ് -ബി കുട്ടനാട് നിയോജക മണ്ഡലം യോഗം ഉദ്ഘാടനം നിര്‍വഹിച്ച് ജെയ്സപ്പന്‍ മത്തായി അറിയിച്ചു. ഭാരവാഹികളായ സുധീഷ്‌കുമാര്‍, ഷാജി മീനത്തേരില്‍, അപ്പച്ചായി വൈപ്പന്‍മഠം, കൊച്ചുകുഞ്ഞ് കമ്മാളില്‍, സുധീഷ്, കെ.വി. ജോര്‍ജ്, സുസമ്മ വര്‍ക്കി എന്നിവര്‍ പ്രസംഗിച്ചു.

ചേര്‍ത്തല റെയില്‍വേ സ്റ്റേഷനു മുന്നില്‍ റോഡ് അടയ്ക്കുന്നതിനെതിരേ നഗരസഭയുടെ പ്രതിഷേധം ഇന്ന്

ചേര്‍ത്തല: ദേശീയപാത വികസനത്തിന്‍റെ ഭാഗമായി ചേര്‍ത്തല റെയില്‍വേ സ്റ്റേഷനു മുന്നില്‍ റോഡ് അടയ്ക്കാനുള്ള നീക്കത്തിനെതിരേ നഗരസഭാ കൗണ്‍സിലര്‍മാര്‍ 15ന് പ്രതിഷേധിക്കും. പാത നിര്‍മാണത്തിന്‍റെ ഭാഗമായി റോഡ് അടച്ചുകെട്ടുന്നതോടെ റെയില്‍വേ സ്റ്റേഷനില്‍ പോകേണ്ട യാത്രക്കാര്‍ ചുറ്റിക്കറങ്ങി സഞ്ചരിക്കേണ്ട സ്ഥിതിയാകും. ഇതിനെതിരേയാണ് കൗണ്‍സിലര്‍മാരുടെയും യാത്രക്കാരുടെയും നേതൃത്വത്തില്‍ സമരം നടത്തുന്നത്. റെയില്‍വേ സ്റ്റേഷനു മുന്നില്‍ ഇന്നു രാവിലെ ഏഴിനു നടക്കുന്ന പ്രതിഷേധ സമരത്തില്‍ ഭരണ-പ്രതിപക്ഷ വ്യത്യാസമില്ലാതെ നഗരസഭയിലെ മുഴുവന്‍ കൗണ്‍സിലര്‍മാരും പങ്കെടുക്കും. ജില്ലയില്‍ ദേശീയപാതയോരത്തുള്ള ഏക റെയില്‍വേ സ്റ്റേഷനാണ് ചേര്‍ത്തലയിലേത്. റെയില്‍വേ സ്റ്റേഷനു മുന്നിലെ ദേശീയപാത നിര്‍മാണം പൂര്‍ത്തിയായാല്‍ സര്‍വീസ് റോഡിലൂടെ മാത്രമാകും യാത്രക്കാര്‍ക്ക് പ്രവേശിക്കാന്‍ കഴിയുക. റെയില്‍വേ സ്റ്റേഷനു മുന്നില്‍ അടിപ്പാത നിര്‍മിക്കാത്തതിനാല്‍ ദേശീയപാത മുറിച്ചുകടക്കണമെങ്കില്‍ ഇരുവശങ്ങളിലേക്കും ഒരു കിലോമീറ്റര്‍ ദൂരം സഞ്ചരിക്കേണ്ട സ്ഥിതിയാകും. നിര്‍മാണം പൂര്‍ത്തിയാകുമ്പോള്‍ ബസ് നിര്‍ത്താന്‍ പോലും സ്ഥലമില്ലാതെ വരുന്നതിനാല്‍ ബസ് യാത്രക്കാര്‍ക്കും ഏറെ ബുദ്ധിമുട്ട് നേരിടേണ്ടിവരും. റെയില്‍വേ സ്റ്റേഷന്‍റെ മുന്‍വശം ഉള്‍പ്പെടെയുള്ള സ്ഥലങ്ങളില്‍ ദേശീയപാത അഥോറിറ്റിയും റെയില്‍വേ അധികൃതരും തമ്മില്‍ സ്ഥലം സംബന്ധിച്ച് തര്‍ക്കമുള്ളതിനാല്‍ റെയില്‍വേ സ്റ്റേഷനു മുന്നില്‍ ബസ്ബേ നിര്‍മിക്കാനും കഴിയാത്ത സ്ഥിതിയാണ്. വഴി അടയുന്നതോടെ റെയില്‍വേ സ്റ്റേഷന് എതിര്‍വശത്തുള്ള വഴിയോര വിശ്രമകേന്ദ്രവും യാത്രക്കാര്‍ക്ക് പ്രയോജനമില്ലാതെ അടഞ്ഞുപോകുമെന്ന സ്ഥിതിയാണ്. ദേശീയപാത നിര്‍മാണം പുരോഗമിക്കുന്നതിനാലാണ് സമരവുമായി നഗരസഭാ കൗണ്‍സിലര്‍മാരും രംഗത്തെത്തുന്നത്.

ഫാ. ആന്‍റണി പോരൂക്കരയുടെ സുവർണ ജൂബിലി ഇന്ന്

ചമ്പക്കുളം: 1975 ഡിസംബർ 23നു ചമ്പക്കുളം കല്ലൂർക്കാട് പള്ളിയിൽ നടന്ന ആദ്യ പൗരോഹിത്യ സ്വീകരണ ശുശ്രൂഷയിലൂടെ വൈദികനായി അഭിഷേകം ചെയ്യപ്പെട്ട ചമ്പക്കുളം കല്ലൂർക്കാട് ഇടവകാംഗം ഫാ. ആന്‍റണി പോരുക്കരയുടെ പൗരോഹിത്യ സ്വീകരണ സുവർണ ജൂബിലി ആഘോഷം ഇന്ന് ദൈവകരുണയുടെ മക്കളോടൊപ്പം കുന്നന്താനത്തെ പ്രത്യാശാഭവനിൽ. 1975 വരെ സാധാരണയായി പൗരോഹിത്യ സ്വീകരണം പൊതുവായി ഒരു കേന്ദ്രത്തിലും നവപൂജാർപ്പണം വൈദികരുടെ സ്വന്തം ഇടവകയിലുമാണ് നടത്തിവന്നിരുന്നത്. എന്നാൽ ചങ്ങനാശേരി അതിരൂപതയ്ക്ക് പുതിയ സഹായ മെത്രാനായി മാർ ജോസഫ് പവ്വത്തിൽ നിയമിതനായതോടുകൂടി പുരോഹിതാർഥികളുടെ ഇടവകയിൽ തന്നെ പട്ടം നല്കുന്ന രീതി നടപ്പിലാക്കി. അങ്ങനെ ആദ്യമായി ചമ്പക്കുളം കല്ലൂർക്കാട് പള്ളിയിൽ പൗരോഹിത്യ സ്വീകരണവും നവപൂജാർപ്പണവും ഒന്നിച്ച് നടത്തപ്പെട്ടത് ഫാ. ആന്‍റണി പോരൂക്കരയുടേതായിരുന്നു. താപസ ചൈതന്യ പൂർണതയിൽ പൗരോഹിത്യശുശ്രൂഷയിൽ അഞ്ച് പതിറ്റാണ്ടുകൾ പൂർത്തിയാക്കുന്ന ആന്‍റണി അച്ചൻ കഴിഞ്ഞ ഒന്നര വർഷമായി കുന്നന്താനത്തെ ദൈവകരുണയുടെ മക്കളുടെ ആത്മീയ ശുശ്രൂഷയിലാണ്. പൗരോഹിത്യ സ്വീകരണം മുതൽ ദരിദ്രരുടെ പക്ഷംചേർന്ന് പ്രവർത്തിച്ചു വന്ന അച്ചന്‍റെ സേവനകാലത്തിൽ നല്ല ഭാഗം ഇപ്പോഴത്തെ തക്കല രൂപതയിൽ ഉൾപ്പെട്ട കന്യാകുമാരി മിഷനിലായിരുന്നു. ജൂബിലി ആഘോഷങ്ങളോടു താത്പര്യം ഉണ്ടായിരുന്നില്ലെങ്കിലും ദൈവപരിപാലനയുടെ മക്കൾ എന്ന സന്യാസിനീ സമൂഹത്തിന്‍റെ നേതൃത്വത്തിൽ നടത്തപ്പെടുന്ന സ്ഥാപനത്തിലെ അന്തേവാസികളുടെ നിർബന്ധം കൊണ്ട് മാത്രമാണ് ജൂബിലി ആഘോഷം വളരെ ലളിതമായിട്ടെങ്കിലും നടത്താൻ തയാറാകുന്നത്. തിങ്കളാഴ്ച രാവിലെ 10.30 ന് കുന്നന്താനം പ്രത്യാശാ ഭവനിൽ നടക്കുന്ന ജൂബിലി വിശുദ്ധ കുർബാനയിൽ അഭിവന്ദ്യ ചങ്ങനാശേരി അതിരൂപതാധ്യക്ഷൻ മാർ തോമസ് തറയിൽ ജൂബിലി സന്ദേശം നല്കും, അതിരൂപതാ മുൻ അധ്യക്ഷൻ മാർ ജോസഫ് പെരുന്തോട്ടം ജൂബിലി സമ്മേളനം ഉദ്ഘാടനം ചെയ്യും. സിഎംഐ സഭാസ്ഥാപക പിതാക്കളിൽ ഒരാളായ പോരൂക്കര തോമ്മാ മല്പാന്‍റെ പിൻമുറക്കാരനായ ഫാ. ആന്‍റണി പോരൂക്കര എവിടെയൊക്കെ വൈദികനായി സേവനം അനുഷ്ഠിച്ചോ അവിടെയെല്ലാം അവഗണിക്കപ്പെട്ടവരുടെ ഉന്നമനത്തിനു വേണ്ടിയുള്ള പരിശ്രമത്തിലായിരുന്നു. ‌2024-ൽ 75 വയസ് പൂർത്തിയാക്കി സ്ഥിര ഇടവക വൈദിക ശുശ്രൂഷയിൽനിന്നും വിരമിച്ച അദ്ദേഹം 150-ൽ അധികം വരുന്ന ഭിന്നശേഷിക്കാരെ സംരക്ഷിക്കുന്ന ദൈവപരിപാലനയുടെ മക്കളുടെ ഈ കേന്ദ്രത്തെ ശുശ്രൂഷയ്ക്കായി തെരഞ്ഞെടുത്തതുതന്നെ തന്‍റെ ശുശ്രൂഷയുടെ ശ്രേഷ്ഠതകൊണ്ടു മാത്രമാണ്. ഏറ്റവും അടുത്ത കുടുംബാംഗങ്ങളോടും മേലധികാരികളോടും പ്രത്യാശാഭവനിലെ അന്തേവാസികളോടുമൊപ്പം ഇന്നു ജൂബിലി ആഘോഷിക്കും.

എയിംസിന് വീണ്ടും പ്രതീക്ഷ; മാവേലിക്കര താലൂക്കില്‍ അനുയോജ്യമായ മൂന്നു സ്ഥലങ്ങള്‍

ചാരുംമൂട്: ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ് എയിംസ് ആലപ്പുഴ ജില്ലയില്‍ സ്ഥാപിക്കുന്നതിനു മുന്‍ഗണന നല്‍കുമെന്ന കേന്ദ്രമന്ത്രി സുരേഷ് ഗോപിയുടെ പ്രഖ്യാപനത്തെത്തുടര്‍ന്ന് വീണ്ടും എയിംസിനായി പ്രതീക്ഷ കൈവന്നു. സംസ്ഥാന സര്‍ക്കാര്‍ സ്ഥലം നല്‍കിയാല്‍ എയിംസ് ജില്ലയില്‍ത്തന്നെ സ്ഥാപിക്കുമെന്നാണ് കേന്ദ്രമന്ത്രി പറഞ്ഞത്. ആലപ്പുഴ, പത്തനംതിട്ട, കൊല്ലം ജില്ലകളുടെ അതിര്‍ത്തിപ്രദേശമായ മാവേലിക്കര താലൂക്കിലെ ചാരുംമൂട് മേഖലയില്‍ സര്‍ക്കാര്‍ ഉടമസ്ഥതയിലുള്ള മൂന്നു സ്ഥലങ്ങള്‍ അനുയോജ്യമായിട്ടുണ്ട്. കൊല്ലം-തേനി ദേശീയപാതയുടെയും കായംകുളം-പുനലൂര്‍ സംസ്ഥാന പാതയുടെയും സംഗമസ്ഥലമായതിനാല്‍ മെച്ചപ്പെട്ട യാത്രാസൗകര്യവുമുണ്ട്. നൂറനാട് ലെപ്രസി സാനിട്ടോറിയം, നൂറനാട് മറ്റപ്പള്ളിയിലെ വെടിവയ്പ് പരിശീലനകേന്ദ്രം, തഴക്കര കോട്ടമുക്കിലെ ജില്ലാ കൃഷിത്തോട്ടം എന്നിവ എയിംസിന് അനുയോജ്യമാണ്. കേന്ദ്രസര്‍ക്കാര്‍ ആവശ്യപ്പെട്ടാല്‍ ഈ സ്ഥലങ്ങള്‍ നിര്‍ദേശിക്കുമെന്ന് കൊടിക്കുന്നില്‍ സുരേഷ് എംപി പറഞ്ഞു. കെ.പി. റോഡിന്‍റെ സമീപത്തുള്ള നൂറനാട് ലെപ്രസി സാനിട്ടോറിയം ആരോഗ്യവകുപ്പിന്‍റെ കീഴിലാണ് പ്രവര്‍ത്തിക്കുന്നത്. നൂറേക്കറിലേറെ വിസ്തൃതിയുള്ള സാനിട്ടോറിയം വളപ്പില്‍ അമ്പത് ഏക്കര്‍ സ്ഥലത്ത് ഇന്‍ഡോ ടിബറ്റന്‍ ബോര്‍ഡര്‍ പോലീസ് ഐടിബിപി യൂണിറ്റ് പ്രവര്‍ത്തിക്കുന്നുണ്ട്. ബാക്കിയുള്ള കുറെ സ്ഥലത്ത് നൂറില്‍പ്പരം കുഷ്ഠരോഗബാധിതര്‍ താമസിക്കുന്നു. പൊതുജനങ്ങള്‍ക്കായുള്ള ഒപി യൂണിറ്റ് ആശുപത്രിയും നഴ്സിംഗ് കോളജും സാനിട്ടോറിയം വളപ്പില്‍ പ്രവര്‍ത്തിക്കുന്നുണ്ട്. ബാക്കിയുള്ള സ്ഥലം എയിംസിനായി പ്രയോജനപ്പെടുത്താന്‍ കഴിയും. നൂറനാട് മറ്റപ്പള്ളിയിലെ പത്തേക്കര്‍ സ്ഥലം ആഭ്യന്തരവകു പ്പിന്‍റെ കീഴിലാണ്. പോലീസുകാര്‍ക്ക് വെടിവയ്പ് പരിശീലനം നല്‍കുന്നതിനായി 1957-ല്‍ വാങ്ങിയതാണ്. പിന്നീട് പരിശീലനം നിലച്ചു. 2014-ല്‍ രമേശ് ചെന്നിത്തല ആഭ്യന്തര മന്ത്രിയായിരുന്നപ്പോള്‍ തണ്ടര്‍ബോള്‍ട്ട് കമാന്‍ഡോ പരിശീലനകേന്ദ്രം തുടങ്ങാന്‍ തീരുമാനിച്ചിരുന്നു. ഇതിനായി തറക്കല്ലുമിട്ടു. ചെറിയൊരു കെട്ടിടം പണിതതല്ലാതെ പിന്നീട് നിര്‍മാണ പ്രവര്‍ത്തനങ്ങളൊന്നും നടന്നില്ല. അലക്സാണ്ടര്‍ ജേക്കബ് ജയില്‍ മേധാവിയായിരുന്നപ്പോള്‍ ജയില്‍ ആശുപത്രി തുടങ്ങാന്‍ പദ്ധതിയിട്ടു. മാലിന്യസംസ്‌കരണകേന്ദ്രം തുടങ്ങാനുള്ള നീക്കം ജനങ്ങളുടെ എതിര്‍പ്പിനെത്തുടര്‍ന്ന് നടന്നില്ല. കാടുപിടിച്ചു കിടക്കുന്ന സ്ഥലം ഇപ്പോള്‍ കാട്ടുപന്നികളുടെ താവളമായി മാറിയിരിക്കുകയാണ്. ആലപ്പുഴ ജില്ലാ പഞ്ചായത്തിന്‍റെ കീഴിലാണ് തഴക്കര കോട്ടമുക്കിലെ നൂറേക്കര്‍ ജില്ലാ കൃഷിത്തോട്ടം. ഇതില്‍ കുറെ സ്ഥലം ഹോര്‍ട്ടികോര്‍പ്പിന് തേനീച്ചവളര്‍ത്തല്‍ കേന്ദ്രത്തിനായി നല്‍കി. ഇവിടെ ഇഎസ്ഐ, മെഡിക്കല്‍ കോളജ് സ്ഥാപിക്കാന്‍ കേന്ദ്ര മന്ത്രിയായിരിക്കുമ്പോള്‍ കൊടിക്കുന്നില്‍ സുരേഷ് എംപി ശ്രമിച്ചിരുന്നു. ജില്ലാ പഞ്ചായത്ത് സ്ഥലം വിട്ടുനല്‍കാന്‍ തയാറാകാത്തതിനെത്തുടര്‍ന്ന് പദ്ധതി നടന്നില്ല. ഇവിടെ പല പദ്ധതികളും പ്രഖ്യാപിച്ചെങ്കിലും അതെല്ലാം പ്രഖ്യാപനത്തില്‍ ഒതുങ്ങി.

തീരസംരക്ഷണ പ്രവൃത്തികള്‍ കെട്ടിടങ്ങള്‍ക്ക് ഭീഷണി

ഹരിപ്പാട്: നദീതീരങ്ങള്‍ സംരക്ഷിച്ച് വെള്ളപ്പൊക്കത്തെ നിയന്ത്രിക്കുന്നതിന്‍റെ ഭാഗമായി വീയപുരം പഞ്ചായത്തിന്‍റെ തുരുത്തേല്‍ക്കടവ് മുതല്‍ തോട്ടപ്പള്ളിവരെയുള്ള ഇരുകരകളും പൈല്‍ ആന്‍ഡ് സ്ലാബ് ഇടുന്ന പ്രവൃത്തി തീരത്തോട് ചേര്‍ന്നുള്ള കെട്ടിടങ്ങള്‍ക്ക് ഭീഷണിയാകുന്നതായി കെട്ടിട ഉടമകള്‍. 9, 7 മീറ്റര്‍ വീതം നീളത്തിലുള്ള രണ്ടുതരം പൈലാണ് സ്ഥാപിക്കുന്നത്. 1.60 മീറ്റര്‍ നീളത്തിലുള്ള സ്ലാബ് മധ്യഭാഗത്തൂകൂടെ അടിത്തട്ടില്‍ സ്ഥാപിക്കുന്ന പ്രവൃത്തിയില്‍ കെട്ടിടങ്ങള്‍ക്ക് കുലുക്കവും അതുപോലെ പൊട്ടലും ഉണ്ടാകുന്നുണ്ട്. അതുപോലെ നിലവില്‍ കരിങ്കല്ലുകൊണ്ട് നിര്‍മിച്ചിട്ടുള്ള പാര്‍ശ്വഭിത്തികള്‍ മാറ്റി പൈല്‍ ആന്‍ഡ് സ്ലാബ് സ്ഥാപിക്കുന്നത് പ്രതിഷേധത്തിനു കാരണമായിട്ടുണ്ട്. പ്രതിഷേധത്തെത്തുടര്‍ന്ന് നിലവിലെ പാര്‍ശ്വഭിത്തിമാറ്റാതെയാണ് ഇപ്പോള്‍ പ്രവൃത്തികള്‍ നടക്കുന്നത്. നിലവിലുള്ള കരിങ്കല്‍ ഭിത്തികള്‍ ആഘാതം കുറക്കാന്‍ കാരണമാകുമെന്ന് നാട്ടുകാര്‍ പറയുന്നു. അനധികൃത മണല്‍വാരല്‍ മൂലം പാലത്തിന്‍റെ സംരക്ഷണഭിത്തി നിലംപൊത്തിയിരുന്നു. ഇവിടെ എന്തുചെയ്യണമെന്ന് അധികൃതര്‍ കൂടിയാലോചന നടത്തിവരികയാണ്. മുറിഞ്ഞപുരയ്ക്കല്‍ പാലത്തിന്‍റെ ഇരുകരകളിലുമുള്ള പാര്‍ശ്വഭിത്തിയാണ് അനധികൃത മണല്‍ വാരല്‍മൂലം നിലംപതിച്ചത്. 20 തൊഴിലാളികള്‍ മൂന്ന് ബാര്‍ജുകളിലായി പൈല്‍ താക്കുന്ന പ്രവൃത്തികളില്‍ ഏര്‍പ്പെടുമ്പോള്‍ 10 പേര്‍ പൈല്‍ ആന്‍ഡ് സ്ലാബ് കോണ്‍ക്രീറ്റ് ചെയ്യുന്ന പ്രവൃത്തിയില്‍ ഏര്‍പ്പെട്ടിരിക്കുന്നു. തുടരെ ഉണ്ടായ വെള്ളപ്പൊക്കം കാരണം പദ്ധതി പ്രദേശത്ത് ധാരാളം എക്കല്‍ അടിഞ്ഞുകൂടാന്‍ കാരണമായിട്ടുണ്ട്. ഇത് പണിക്ക് തടസമാണെന്നും കരാര്‍ പ്രകാരമുള്ള തുകയില്‍ കൂടുതല്‍ ജോലികള്‍ വേണ്ടി വരുമെന്നും കരാര്‍കാര്‍ സൂചിപ്പിക്കുന്നു. തുടരെ ഉണ്ടായ നാലുവെള്ളപ്പൊക്കവും ഓണാവധിയും കഴിഞ്ഞ് ദ്രുതഗതിയിലാണ് ഇപ്പോള്‍ നിര്‍മാണം നടക്കുന്നത്. റീബില്‍ഡ് കേരള പദ്ധതിയില്‍ ഉള്‍പ്പെടുത്തി പമ്പ ആറിന്‍റെയും കൈവഴിയായ മങ്കോട്ട ആറിന്‍റെയും അച്ചന്‍കോവിലാറിന്‍റെയും ഇരുകരകളുടെയും സംരക്ഷണത്തിനായി 70 കോടി രൂപ അടങ്കല്‍ തുകവരുന്നതാണ് തീരസംരക്ഷണ പ്രവൃത്തികള്‍. മേല്‍പാടം വരെ ഇരുകരകളിലുമായി 2574 മീറ്ററും മങ്കോട്ട പമ്പയില്‍ കൈവഴിയുടെ തുടക്കം മുതല്‍ വീയപുരം ഡിപ്പോ പാലം വരെ ഇരുകരകളിലുമായി 897 മീറ്ററും അച്ചന്‍കോവിലാറ്റില്‍ തുരുത്തേല്‍ പാലം മുതല്‍ മുകളിലേക്ക് 295 മീറ്ററും നീളത്തില്‍ പൈല്‍ ആന്‍ഡ് സ്ലാബ് ഉപയോഗിച്ചുള്ള സംരക്ഷണഭിത്തിയുടെ നിര്‍മാണവും അച്ചന്‍കോവിലാറ്റില്‍ ഇരുകരകളിലുമായി 5420 മീറ്റര്‍ നീളത്തില്‍ ബണ്ട് രൂപീകരണവും ഉള്‍പ്പെട്ട പ്രവൃത്തിയാണ് നിലവില്‍ നടക്കുന്നത്.

ദുരിതം... ഈ വഴി!

അമ്പലപ്പുഴ: നടവഴി പോലുമില്ലാതെ കുടുംബങ്ങൾ ദുരിതത്തിൽ. പുറക്കാട് പഞ്ചായത്ത് 16-ാം വാർഡ് പുത്തൻമഠം റോഡുപയോഗിക്കുന്ന കുടുംബങ്ങളാണ് യാത്രാദുരിതത്തിൽ വലയുന്നത്. മണക്കൽ പാടശേഖരത്തിനു സമീപത്തെ നിരവധി കുടുംബങ്ങൾക്ക് പുറം ലോകത്തെത്താനുള്ള ഏക മാർഗമാണിത്. മൂന്നു മീറ്ററോളം വീതിയുള്ള നടവഴി മുഴുവൻ ചെളിനിറഞ്ഞു കിടക്കുകയാണ്. കനത്ത മഴയായാൽ നീന്തിപ്പോകേണ്ട അവസ്ഥയാണ്. കൊച്ചുകുട്ടികൾ ഉൾപ്പെടെ ഇതിലേ നടക്കുന്നവർ വീണു പരിക്കേൽക്കുന്നത് നിത്യസംഭവമാണ്. നാട്ടുകാരുടെ നിരന്തര പരാതിയെത്തുടർന്ന് വഴി ഗതാഗത യോഗ്യമാക്കാൻ ദേശീയ ഗ്രാമീണ തൊഴിലുറപ്പ് പദ്ധതിയിൽ ഉൾപ്പെടുത്തി 4,97,416 രൂപ അനുവദിച്ചു. ഇന്‍റർലോക്ക് നടപ്പാതയ്ക്കായാണ് തുകയനുവദിച്ചത്. നിർമാണച്ചുമതല കരാറുകാരന് കൈമാറി ഒരുവർഷം പിന്നിട്ടിട്ടും റോഡ് യാഥാർഥ്യമായില്ല. ഇപ്പോഴും ചെളിനിറഞ്ഞ വഴിയിലൂടെയാണ് ഇവരുടെ ദുരിത യാത്ര. പഞ്ചായത്ത് ഭരണസമിതിയുടെ കാലാവധി അവസാനിക്കാൻ മാസങ്ങൾ മാത്രം നിൽക്കേ റോഡ് യാഥാർഥ്യമാകുമോ എന്ന ആശങ്കയിലാണ് നാട്ടുകാർ.

പുതുമന പമ്പ് ഹൗസ് നിർമാണം വേഗത്തിലാക്കണമെന്ന്

ചമ്പക്കുളം: കുഴൽക്കിണർ നിർമാണം പൂർത്തിയായിട്ട് മാസങ്ങൾ കഴിഞ്ഞിട്ടും നെടുമുടി പഞ്ചായത്തിലെ പുതുമന പമ്പ് ഹൗസിന്‍റെ അനുബന്ധ പ്രവർത്തനങ്ങളിൽ കാലതാമസം നേരിടുന്നതിൽ പമ്പ് ഹൗസ് സമ്പാദക സമിതിക്ക് പരാതി. നെടുമുടി പഞ്ചായത്തിലെ 8, 9 വാർഡുകളിലെ കുടിവെള്ള വിതരണം സുഗമമാക്കുന്നതിന് തോമസ് കെ. തോമസ് എംഎൽ എ അനുവദിച്ച ഫണ്ട് ഉപയോഗിച്ച് നെടുമുടി പഞ്ചായത്തിലെ എട്ടാം വാർഡിൽ പണി പൂർത്തിയാക്കിയ കുഴൽക്കിണറിന്‍റെ അനുബന്ധ നടപടികൾ വേഗത്തിലാക്കണമെന്നാണ് നാട്ടുകാരുടെ ആവശ്യം. എട്ടാം വാർഡിലെ താമസക്കാരനായ പുതുമന ജോയിച്ചൻ ചമ്പക്കുളം- ചെമ്പകശേരി റോഡിന് സമീപത്തായി പുതിയ പമ്പ് ഹൗസ് സ്ഥാപിക്കുന്നതിന് ഭൂമി വിട്ടു നല്കുകയും കുഴൽക്കിണർ നിർമിക്കുന്നതിനും പമ്പ് ഹൗസ് നിർമിക്കുന്നതിനും അനുയോജ്യമെന്ന് കണ്ടെത്തുകയും ചെയ്ത ഗ്രൗണ്ട് വാട്ടർ ഡിപ്പാർട്ട്മെന്‍റും ജലവിഭവവകുപ്പും നടപടികളുമായി മുന്നോട്ട് പോവുകയും കുഴൽക്കിണർ നിർമിക്കുകയും ചെയ്തു. ഭൂമി നല്കി പത്തുമാസം കഴി ഞ്ഞിട്ടും പമ്പ് ഹൗസ് പ്രവർത്തനക്ഷമമായിട്ടില്ല. കുടിവെള്ള വിതരണത്തിനുള്ള കുഴലുകളും മോട്ടോറും സ്ഥാപിക്കുക, പമ്പ് ഹൗസ് കെട്ടിടം നിർമിക്കുക, വൈദ്യുതി കണക‌്ഷൻ തുടങ്ങിയ ജോലികൾ ഇനിയും ബാക്കി നിൽക്കുന്നു. നെടുമുടി പഞ്ചായത്തിലെ ഒൻപതാം വാർഡിലെ പുല്പത്ര പമ്പ് ഹൗസിൽനിന്നാണ് ഇപ്പോൾ 8, 9 വാർഡുകളിൽ കുടിവെള്ളം ലഭ്യമാകുന്നത്. പുതുമന പമ്പ് ഹൗസിൽനിന്നുള്ള പ്രധാന പൈപ്പ് നിലവിലെ പുല്പത്ര പമ്പ്ഹൗസിൽനിന്നും വരുന്ന പ്രധാന ലൈനുമായി ബന്ധിപ്പിച്ചു വേണം പൈപ്പുകൾ സ്ഥാപിക്കാൻ എന്ന ആവശ്യം ഈ പമ്പ്ഹൗസിന്‍റെ ആലോചനാസമയത്തു തന്നെ ഉയർന്നിരുന്നു. ഒരു പമ്പ് ഹൗസ് തകരാറിലായാലും ശുദ്ധജല വിതരണം സുഗമമാക്കാൻ കഴിയും എന്നതാണ് പമ്പ് സംമ്പാദകസമിതി ഇതുകൊണ്ട് ലക്ഷ്യമാക്കിയത്. 2012ൽ വെറും രണ്ടു മാസം കൊണ്ട് യാഥാർഥ്യമാക്കിയ പുല്പത്ര പമ്പ് ഹൗസിൽ നിന്നും പഞ്ചായത്തിലെ മറ്റ് വാർഡുകളിലേക്കും വെള്ളം വിതരണം ചെയ്തുവരുന്നുണ്ട്. പ്രധാന പൈപ്പുകൾ തമ്മിൽ ബന്ധിപ്പിച്ച് വാൽവ് സ്ഥാപിച്ച് പ്രവർത്തിപ്പിച്ചാൽ അടിയന്തര സാഹചര്യങ്ങളിൽ എട്ട്, ഒൻപത് വാർഡുകളിൽ കൂടാതെ മറ്റ് സ്ഥലങ്ങളിലും വെള്ളം എത്തിക്കാൻ സാധിക്കും. ഇതിന് അനുയോജ്യമായ രീതിയിലായിരിക്കണം ജലവിതരണ കുഴലുകൾ സ്ഥാപിക്കേണ്ടത് എന്ന് പമ്പ് ഹൗസ് സമ്പാദക സമിതി അംഗങ്ങളായ സണ്ണിച്ചൻ തിരുനിലം, അപ്പച്ചൻകുട്ടി ചെമ്പകശേരിൽ, ബിജു ആന്‍റണി തെങ്ങുംപള്ളി, ഷാജി താമരപ്പള്ളിൽ, തോമസ് ആന്‍റണി ആറിൽചിറ, ജോയിച്ചൻ പുതുമന എന്നിവർ ആവശ്യപ്പെട്ടു.

ഭാര്യയുടെ കൈ തല്ലിയൊടിച്ച ഭർത്താവ് റിമാൻഡിൽ

തുറവൂർ: ഭാര്യയുടെ കൈ തല്ലിയൊടിച്ച ഭർത്താവിനെ റിമാൻഡ് ചെയ്തു. കുത്തിയതോട് പഞ്ചായത്ത് ഒന്നാം വാർഡിൽ പള്ളിത്തോട് മേനങ്കാട്ട് റോബിനെയാണ് (43) കുത്തിയതോട് എസ്എച്ച്ഒ എം. അജയമോഹന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. കഴിഞ്ഞ ചൊവ്വാഴ്ച ഭർത്താവിന്‍റെ അച്ഛനുമായി വാക്കുതർക്കമുണ്ടായതിനെത്തുടർന്ന് ഭർത്താവിനെ പിൻതിരിപ്പിക്കാൻ ശ്രമിച്ചതിലുള്ള വൈരാഗ്യത്തിലാണ് ഇയാൾ ഭാര്യയെ ക്രൂരമായി മർദിച്ചത്. തുറവൂർ താലൂക്ക് ആശുപത്രിയിൽ ചികിത്സതേടിയ യുവതിയുടെ എക്സ്റെ പരിശോധിച്ചതിൽ ഇടത് കൈവിരലിന് പൊട്ടൽ കണ്ടെത്തിയതിനെത്തുടർന്ന് യുവതി പോലീസിൽ പരാതി നൽകുകയായിരുന്നു. അറസ്റ്റ് ചെയ്ത പ്രതിയെ ചേർത്തല ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് ഒന്ന് മുമ്പാകെ ഹാജരാക്കി റിമാൻഡ് ചെയ്തു. എസ്ഐ സലി, സിപിഒമാരായ കിഷോർ ചന്ദ്, ഹരിപ്രസാദ്, അമൽ രാജ് എന്നിവരും പ്രതിയെ പിടികൂടുന്ന സംഘത്തിലുണ്ടായിരുന്നു.

എം.കെ. കൃഷ്ണന്‍ അനുസ്മരണം

ചേര്‍ത്തല: പ്രമുഖ സഹകാരിയും സ്വാതന്ത്ര്യസമരസേനാനിയുമായിരുന്ന എം.കെ. കൃഷ്ണന്‍റെ 36-ാമത് അനുസ്മരണം വയലാർ സർവീസ് സഹകരണ ബാങ്കിന്‍റെ ആഭിമുഖ്യത്തിൽ നടത്തി. ബാങ്ക് പ്രസിഡന്‍റ് വി.എന്‍. അജയന്‍ അധ്യക്ഷത വഹിച്ചു. സി.കെ. ഷാജിമോഹൻ ഉദ്ഘാടനം ചെയ്തു. സർവീസ് സഹകരണ ബാങ്ക് അസോസിയേഷൻ ജില്ലാ പ്രസിഡന്‍റ് കെ.ആര്‍. രാജേന്ദ്രപ്രസാദ് മുഖ്യപ്രഭാഷണം നടത്തി. മുട്ടം സർവീസ് സഹകരണ ബാങ്ക് പ്രസിഡന്‍റ് അഡ്വ. കെ.ജെ. സണ്ണി, ബ്ലോക്ക് കോൺഗ്രസ് പ്രസിഡന്‍റ് ടി.എസ്. രഘുവരൻ, യു.ജി. ഉണ്ണി, ബിമൽ ജോസഫ്, പി.വി. പുഷ്പാംഗദൻ, രസ്ന പ്രദീപ്, എന്‍.പി. വിമൽ, പി. വിനോദ്‌, പി. ഷൈനിമോൾ, കെ.എസ്. അഷറഫ് തുടങ്ങിയവർ പ്രസംഗിച്ചു.

ആശുപത്രിയിൽ ഭക്ഷണം നൽകുന്ന യുവാക്കൾക്ക് ആദരവ്

അമ്പലപ്പുഴ: ആശുപത്രിയിൽ രോഗികൾക്കും കൂട്ടിരിപ്പുകാർക്കും ഭക്ഷണം നൽകിവരുന്ന യുവാക്കൾക്ക് ആദരവ്. ആലപ്പുഴ മെഡിക്കൽ കോളജ് ആശുപത്രിയിൽ ഉച്ചഭക്ഷണം വിതരണം ചെയ്യാൻ നേതൃത്വം നൽകുന്ന ഡിവൈഎഫ്ഐ പ്രവർത്തകരെയാണ് പുന്നപ്ര ശാന്തിഭവൻ മാനേജിംഗ് ട്രസ്റ്റി ബ്രദർ മാത്യു ആൽബിൻ ആദരിച്ചത്. ഒൻപതു വർഷമായി ഡിവൈഎഫ്ഐയുടെ ഓരോ മേഖലാ യൂണിറ്റിൽനിന്നായി പ്രതിദിനം 2500 ലധികം പേർക്കാണ് ഉച്ചഭക്ഷണം നൽകുന്നത്. അമ്പലപ്പുഴ വടക്ക് പഞ്ചായത്ത് വൈസ് പ്രസിഡന്‍റ് പി.എം.ദീപ, ചലച്ചിത്ര-സീരിയൽ താരം പുന്നപ്ര മധു തുടങ്ങിയവർ പങ്കെടുത്തു.

അനുമതിയില്ലാതെ പ്രവർത്തിച്ച ഡ്രോൺ പിടികൂടി

അന്പലപ്പുഴ: അനുമതിയില്ലാതെ പാടശേഖരത്ത് പ്രവർത്തിച്ച വിദേശനിർമിത ഡ്രോൺ നാട്ടുകാർ പിടികൂടി. കേസെടുക്കാതെ പോലീസ്. തകഴി കുന്നുമ്മയിൽ പാടത്ത് വിത്ത് വിതയ്ക്കാനായി പ്രവർത്തിപ്പിച്ച ചൈനീസ് നിർമിത ഡ്രോണാണ് പിടിച്ചെടുത്തത്. മതിയായ രജിസ്ട്രേഷനും ലൈസൻസുമില്ലാത്ത ഇത്തരം ഡ്രോൺ 2022ൽ കേന്ദ്രസർക്കാർ നിരോധിച്ചിരുന്നു. ഈ നിരോധനം മറികടന്നാണ് പാടശേഖരത്ത് ഇത് പ്രവർത്തിപ്പിച്ചത്. ഒരുമാസം മുൻപ് ഇവിടെ വളമിടാനായി ഡ്രോൺ എത്തിച്ചപ്പോൾ ചിലർ സ്പെഷൽ ബ്രാഞ്ച് ഡിവൈഎസ്പിക്കു പരാതി നൽകിയിരുന്നു. കഴിഞ്ഞദിവസം പാടത്ത് ഡ്രോൺ പ്രവർത്തിപ്പിക്കുന്നതറിഞ്ഞ് നാട്ടുകാർ വിവരം പോലീസിനെ അറിയിക്കുകയായിരുന്നു. എന്നാൽ, പോലീസ് സ്ഥലത്തെത്തിയെങ്കിലും കേസെടുക്കാതെ വിട്ടയയ്ക്കുകയായിരുന്നു. ഡിഎച്ച്ഐ എന്ന ചൈനീസ് നിർമിത ഡ്രോൺ മങ്കൊമ്പ് സ്വദേശിയുടേതാണ്. യുഐ നമ്പരില്ലാത്ത ഇതിന് 50 കിലോ ഗ്രാം ഭാരം വരെ വഹിക്കാൻ കഴിയും. ഇത് പ്രവർത്തിക്കുമ്പോൾ പാടശേഖരത്തിന്‍റെയും പ്രദേശത്തിന്‍റെയും മാപ്പ് ചൈനീസ് സർവറിൽ അപ് ലോഡാകും. ഇത് കണക്കിലെടുത്താണ് കേന്ദ്രസർക്കാർ ഇതിന് നിരോധനം ഏർപ്പെടുത്തിയത്. വൈഫൈ ഉപയോഗിച്ചാണ് ഇതിന്‍റെ പ്രവർത്തനം നടത്തുക. നിരോധിത ഡ്രോണായിട്ടും കേസെടുക്കാതെ പോലീസ് വിട്ടയച്ചത് രാഷ്ട്രീയ ഇടപെടലാണെന്നും ആരോപണമുയർന്നിട്ടുണ്ട്.

കൈനകരിയിൽ കാറ്റാടിപ്പാടം സ്ഥാപിക്കണം

ചമ്പക്കുളം: ആലപ്പുഴയിലെ തന്നെ ഏറ്റവും അവികസിതവും റോഡ് ഗതാഗതം പിന്നാക്കവുമായ കൈനകരിയിലെ കായൽ പ്രദേശങ്ങളിൽ കാറ്റാടി യന്ത്രങ്ങൾ സ്ഥാപിച്ച് വൈദ്യുതി ഉത്പാദനവും അതിനോടനുബന്ധിച്ച് വിനോദ സഞ്ചാര വികസനവും നടപ്പിലാക്കണമെന്ന ആവശ്യം ശക്തമാകുന്നു. വേമ്പനാട് കായലിനോട് ചേർന്നുള്ള കായൽ നിലങ്ങളിലാണ് കാറ്റിൽനിന്നു വൈദ്യുതി ഉത്പാദിപ്പിക്കാൻ ഏറ്റവും അനുയോജ്യമായ സാഹചര്യം നിലനില്ക്കുന്നത്. ഈ പ്രദേശത്ത് കാറ്റാടിയന്ത്രങ്ങൾ സ്ഥാപിച്ച് വൈദ്യുത ഉത്പാദനം നടത്തുന്നത് സംബന്ധിച്ച്‌ പഠനം നടത്തണമെന്നാണ് ആവശ്യം ഉയരുന്നത്. സെക്കൻഡിൽ നാല് മീറ്ററിലധികം വേഗമുള്ള കാറ്റ് ലഭിക്കുന്ന പ്രദേശങ്ങളിലാണ് സാധാരണയായി കാറ്റാടി യന്ത്രങ്ങൾ സ്ഥാപിക്കുക. അങ്ങനെ കണക്കാക്കിയാൽ കാറ്റാടി യന്ത്രങ്ങൾ സ്ഥാപിക്കാൻ ഏറ്റവും അനുയോജ്യമായ സ്ഥലങ്ങളാണ് കൈനകരിയിലെ കായൽ നിലങ്ങൾ. രാത്രിയും പകലും സ്ഥിരമായി സാമാന്യം ശക്തമായ കാറ്റുവീശുന്ന കായൽ നിലങ്ങളുടെ ചിറകളിൽ നൂറുകണക്കിന് കാറ്റാടികൾ സ്ഥാപിക്കാൻ സാധിക്കും. വൈദ്യുതി ഉത്പാദനത്തോടൊപ്പം കായൽ നിലങ്ങളുടെ പുറംബണ്ടുകൾ നല്ല രീതിയിൽ റോഡുകളായി രൂപപ്പെടുത്തിയാൽ സ്വദേശികളും വിദേശികളുമായ ആയിരക്കണക്കിന് വിനോദസഞ്ചാരികളെ ആകർഷിക്കാനും കഴിയും. കൈനകരിയിലെ കായൽ നിലങ്ങളോട് ചേർന്നും വേമ്പനാട്ട് കായലിലും കാറ്റാടി യന്ത്രങ്ങൾ സ്ഥാപിച്ച് വൈദ്യുതി ഉത്പാദനം പ്രാവർത്തികമാക്കേണ്ട സമയം അതിക്രമിച്ചിരിക്കുന്നു. ഇത് നാട്ടിലെ വിനോദസഞ്ചാര, കാർഷിക മേഖലയ്ക്ക് പുത്തൻ ഉണർവും ഉത്തേജനവുമായിരിക്കും. വൈദ്യുതി മേഖലയിൽ ഒരു കുതിച്ചുചാട്ടത്തിനും ഇതു കാരണമാക്കും. അനിൽ ജോസഫ് ഇടത്തിൽ. (വഞ്ചിവീട് വിനോദസഞ്ചാര മേഖലയിൽ പ്രവർത്തിക്കുന്ന ആൾ.)

വചനം പഠിക്കുന്നവനില്‍ ഈശോ വളരുന്നു: തോമസ് മാര്‍ കൂറിലോസ്

ചങ്ങനാശേരി: ചങ്ങനാശേരി അതിരൂപത ബൈബിള്‍ അപ്പൊസ്തലേറ്റും കുടുംബ കൂട്ടായ്മയും മാക് ടിവിയും സംയുക്തമായി അതിരൂപതയിലെ 250 ഇടവകകളില്‍ സംഘടിപ്പിച്ച നൂറുമേനി വചന മനഃപാഠം പദ്ധതിയിലെ വിജയികളുടെ സംഗമവും ‘എന്‍റെ സ്വന്തം ബൈബിള്‍’ പദ്ധതിയുടെ ഉദ്ഘാടനവും വചനമഹോത്സവമായി. എസ്ബി കോളജിലെ മാര്‍ കാവുകാട്ട് ഹാളില്‍ സംഘടിപ്പിച്ച മഹാസംഗമം തിരുവല്ല ആര്‍ച്ച്ബിഷപ് ഡോ. തോമസ് മാര്‍ കൂറിലോസ് ഉദ്ഘാടനം ചെയ്തു. ജീവിക്കുന്ന ക്രിസ്തുവിന്‍റെ പ്രതീകമാണു വചനമെന്നും വിശുദ്ധ കുര്‍ബാനയിലെന്നപോലെ വചനത്തിലൂടെയും ഈശോ ഹൃദയത്തിലേക്കു കടന്നുവരുന്നതായും ആര്‍ച്ച്ബിഷപ് പറഞ്ഞു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. സുവിശേഷം നന്മയുടെയും മാനവികതയുടെയും സ്‌നേഹസന്ദേശമായതിനാലാണ് സുവിശേഷം പ്രഘോഷിക്കുന്ന ക്രൈസ്തവര്‍ ഏറെ പീഡിപ്പിക്കപ്പെടുകയും വെല്ലുവിളികള്‍ നേരിടുകയും ചെയ്യുന്നതെന്ന് മാര്‍ തറയില്‍ പറഞ്ഞു. നൂറ്റിപ്പത്തൊന്‍പതാം സങ്കീര്‍ത്തനം മനഃപാഠമാക്കിയ രണ്ടാം ക്ലാസ് വിദ്യാര്‍ഥികളായ ലൂക്കാ രാകേഷ്, ഇവാന്‍ വി. ബിജോയ് എന്നിവര്‍ക്ക് പേഴ്സണല്‍ ബൈബിള്‍ നല്‍കി ‘എന്‍റെ സ്വന്തം ബൈബിള്‍’ പദ്ധതിയുടെ ഉദ്ഘാടനം മാര്‍ തോമസ് തറയില്‍ നിര്‍വഹിച്ചു. വികാരി ജനറാള്‍ മോണ്‍. ആന്‍റണി എത്തയ്ക്കാട്ട് മുഖ്യപ്രഭാഷണം നടത്തി. ചലച്ചിത്രനടന്‍ സിജോയ് വര്‍ഗീസ് നൂറുമേനി സീസണ്‍ ഫോറിന്‍റെ ഉദ്ഘാടനവും പഠനപുസ്തക പ്രകാശനവും നിര്‍വഹിച്ചു. പ്രഫ. ജോസഫ് ടിറ്റോ, സിസ്റ്റര്‍ ചെറുപുഷ്പം, ജോസി കടന്തോട്, മറിയം ജോര്‍ജ്, സ്‌കറിയ വടക്കേല്‍ എന്നിവര്‍ പുസ്തകം ഏറ്റുവാങ്ങി. ചലച്ചിത്ര നിര്‍മാതാവും ഗാനരചയിതാവുമായ ലിസി ഫെര്‍ണാണ്ടസ്, അതിരൂപത ബൈബിള്‍ അപ്പൊസ്തലറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, മീഡിയ വില്ലേജ് മീഡിയ കോ-ഓര്‍ഡിനേറ്റര്‍ ഫാ. ജോജിന്‍ ഇലഞ്ഞിക്കല്‍, നൂറുമേനി വചനപഠന പദ്ധതി ചെയര്‍മാന്‍ സണ്ണി തോമസ് ഇടിമണ്ണിക്കല്‍, ബൈബിള്‍ അപ്പൊസ്തലറ്റ് അതിരൂപത പ്രസിഡന്‍റ് ഡോ. റൂബിള്‍ രാജ്, നൂറുമേനി ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം എന്നിവര്‍ പ്രസംഗിച്ചു. ഗ്രാന്‍ഡ് ഫിനാലെ വിജയികള്‍ക്കുള്ള സമ്മാനദാനവും നടന്നു.

കഫെ കുടുംബശ്രീ പ്രീമിയം റസ്റ്ററന്‍റ് ചെങ്ങന്നൂരിൽ

ചെങ്ങന്നൂർ: കുടുംബശ്രീയുടെ നൂതന സംരംഭമായ കഫെ കുടുംബശ്രീ പ്രീമിയം റസ്റ്ററന്‍റ് ചെങ്ങന്നൂരിൽ ആരംഭിക്കുന്നു. എംസി റോഡിൽ തിരുവൻവണ്ടൂർ കല്ലിശേരി ജംഗ്ഷനിൽ പെനിയേൽ ബിൽഡിംഗിലാണ് ഭക്ഷണശാല ആരംഭിക്കുന്നത്. ഇന്നു രാവിലെ 10.30 ന് മന്ത്രി സജി ചെറിയാൻ ഉദ്ഘാടനം ചെയ്യും. സംസ്ഥാനത്ത് കഫെ കുടുംബശ്രീയുടെ 10 ശാഖകൾ ഇതിനോടകം ആരംഭിച്ചിട്ടുണ്ട് . മന്ത്രി സജി ചെറിയാന്‍റെ നിർദേശത്തെത്തുടർന്നാണ് ജില്ലയിലെ ആദ്യ പ്രീമിയം റസ്റ്ററന്‍റ് ശാഖ ചെങ്ങന്നൂരിൽ പ്രവർത്തനം ആരംഭിക്കുന്നത്. രാവിലെ ആറുമുതൽ രാത്രി 11 വരെയാണ് പ്രവർത്തി സമയം. സ്വാദിഷ്ടമായതും മായം കലരാത്തതുമായ ഭക്ഷണമാണ് ഇതിലൂടെ കുടുംബശ്രീ ഉറപ്പു നൽകുന്നത്. കേരളത്തിന്‍റെ തനത് രുചി വൈവിധ്യങ്ങളെ കൂടാതെ ചൈനീസ്, അറബിക്, ഉത്തരേന്ത്യൻ ശൈലിയിലുള്ള ഭക്ഷണങ്ങളും ലഘുപാനീയങ്ങളും ഇവിടെ ലഭ്യമാകും. 3200 ചതുരശ്ര അടി വിസ്തീർണത്തിൽ പൂർണമായി ശീതികരിച്ച ഭക്ഷണശാലയോടനുബന്ധിച്ച് വിശാലമായ പാർക്കിംഗ് സൗകര്യവും അംഗപരിമിതർക്കുൾപ്പെടെ ശുചിമുറികളും ഒരുക്കിയിട്ടുണ്ട്. 78 ലക്ഷം രൂപ ചെലവു വരുന്ന സംരംഭത്തിന് 19.5 ലക്ഷം രൂപ കുടുംബശ്രീ മിഷനാണ് നൽകുന്നത്. ബാക്കി തുക ചെലവഴിക്കുന്നത് കുടുംബശ്രീ മൈക്രോ എന്‍റർപ്രൈസസ് കൾസൾട്ടന്‍റുമാരായ സന്തോഷ്, രഞ്ജു ആർ. കുറുപ്പ് എന്നീ സംരംഭകരാണ്. കഴിഞ്ഞ ജനുവരിയിൽ ചെങ്ങന്നൂരിൽ നടന്ന ദേശീയ സരസ് മേളയിൽ കുടുംബശ്രീ ഫുഡ് കോർട്ടിന് റെക്കോർഡ് വരുമാനമാണ് ലഭിച്ചത്. കുടുംബശ്രീയുടെ നാനോ മാർക്കറ്റ് ഇതോടൊപ്പം സജ്ജീകരിക്കുന്നുണ്ട്. കുടുംബശ്രീയുടെ തനത് ഉത്പന്നങ്ങൾ അവിടെ എത്തിച്ചേരുന്ന ഉപഭോക്താക്കൾക്കു വാങ്ങുന്നതിന് സൗകര്യമൊരുക്കുമെന്ന് കുടുംബശ്രീ ജില്ലാ മിഷൻ കോ-ഓർഡിനേറ്റർ ആർ. രഞ്ജിത്ത് അറിയിച്ചു.

വിനോദയാത്രയ്ക്കിടെ ഹൗസ്‌ബോട്ട് കത്തിനശിച്ചു

മങ്കൊമ്പ്: ഓടിക്കൊണ്ടിരുന്ന ഹൗസ് ബോട്ടിനു തീപിടിച്ചു. യാത്രക്കാർ അപകടമില്ലാതെ രക്ഷപ്പെട്ടു. ഇന്നലെ വൈകുന്നേരം മൂന്നോടെ ചിത്തിര പള്ളിക്കു സമീപം വേമ്പനാട്ടുകായലിലാണ് സംഭവം. ബംഗളൂരു സ്വദേശികളായ ദമ്പതികളുമായി ഉല്ലാസയാത്ര നടത്തിയ ബോട്ടിലാണ് അഗ്നിബാധയുണ്ടായത്. എൻജിൻ ഭാഗത്തു തീപടരുന്നതു കണ്ട ബോട്ടിലെ ജീവനക്കാരുടെ സമയോചിതമായ ഇടപെടലിനെത്തുടർന്നാണ് ദുരന്തം ഒഴിവായത്. തീ പടരുന്നതുകണ്ട ജീവനക്കാർ ബോട്ടു കരയ്ക്കടുപ്പിച്ചു യാത്രക്കാരെ സുരക്ഷിതമായി കരയ്ക്കിറക്കുകയായിരുന്നു. എന്നാൽ, ശക്തമായ കാറ്റുണ്ടായിരുന്നതിനാൽ തീ ആളിപ്പടർന്നു ബോട്ടു പൂർണമായും കത്തിനശിക്കുകയായിരുന്നു. വിവരമറിഞ്ഞു പുളിങ്കുന്ന് പോലീസും ആലപ്പുഴയിൽനിന്നു ഫയർഫോഴ്‌സ് സംഘവുമെത്തി തീയണക്കാൻ ശ്രമം നടത്തിയെങ്കിലും വിജയിച്ചില്ല. ടൂറിസം പോലീസും സ്ഥലത്തെത്തിയിരുന്നു. പിന്നീട് യാത്രക്കാരെ മറ്റൊരു ഹൗസ്‌ബോട്ടിൽ കുമരകത്തെ റിസോർട്ടിലെത്തിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]